● ఎస్పీ సతీష్‌కుమార్‌ పుట్టపర్తి టౌన్‌: ప్రజా సమస్యల పరిష్కార వేదిక కార్యక్రమంలో వచ్చిన అర్జీలను క్షేత్రస్థాయిలో పరిశీలించి తక్షణమే పరిష్కారం చూపాలని ఎస్పీ సతీష్‌కుమార్‌ సూచించారు. పోలీస్‌ కార్యాలయంలో సోమవారం ప్రజా సమస్యల పరిష్కార వేదిక నిర్వహించారు. వివిధ సమస్యలపై 60 వినతులు అందాయి. ఎస్పీ సతీష్‌ కుమార్‌ సమస్యలు ఓపికగా విని సంబంధిత పోలీస్‌ అధికారులతో ఫోన్‌ చేసి మాట్లాడారు. ఫిర్యాదుదారులతో మర్యాద పూర్వకంగా మాట్లాడి సమస్యకు పరిష్కారం చూపాలన్నారు. కార్యక్రమంలో సీఐ బొజ్జప్ప, ఎస్‌బీ ఎస్‌ఐ బాలరాజు, లీగల్‌ అడ్వైజర్‌ సాయినాథ్‌రెడ్డి తదితరులు పాల్గొన్నారు. రావులచెరువులో దొంగల బీభత్సం● ఒకే రాత్రి 8 చోట్ల కేబుల్‌ చోరీ ధర్మవరం రూరల్‌: మండల పరిధిలోని రావులచెరువు గ్రామంలో దొంగలు బీభత్సం సృష్టించారు. ఆదివారం రాత్రి 8 చోట్ల వ్యవసాయ మోటర్‌ కేబుల్‌ వైర్లను అపహరించారు. దీంతో బాధిత రైతులు లబోదిబోమంటున్నారు. కరువు పరిస్థితుల నేపథ్యంలో బోరు బావుల ద్వారా వస్తున్న అరకొర నీటితో పంటలను పండించుకుంటున్న రైతులు ఈ ఘటనతో బెంబేలెత్తుతున్నారు. పోలీసులకు ఫిర్యాదు చేయనున్నట్లు బాధిత రైతులు రామలింగారెడ్డి, కులశేఖర్‌రెడ్డి, నరసింహారెడ్డి, నారాయణరెడ్డి, రఘునాథరెడ్డి, సతీష్‌రెడ్డి, ఓబుళరెడ్డి, డి. ఓబుళరెడ్డిలు తెలిపారు. సమగ్రశిక్ష అభియాన్‌ కార్యాలయంలో పాము కలకలంపుట్టపర్తి: బుక్కపట్నం మండల కేంద్రంలో ఉన్న సమగ్ర శిక్ష అభియాన్‌ కార్యాలయంలోకి సోమవారం 8 అడుగుల పాము చొరబడడం కలకలం రేపింది. తరచూ విష పురుగులు కనిపిస్తుండడంతో సిబ్బంది ఆందోళన వ్యక్తం చేస్తున్నారు. కార్యాలయానికి వెళ్లాలంటేనే భయాందోళన చెందుతున్నారు. పునఃప్రతిష్ఠించి.. గంగ ఒడికి చేర్చి!● సోమందేపల్లిలో భక్తిశ్రద్ధలతో వినాయక నిమజ్జనం సోమందేపల్లి (పరిగి): సోమందేపల్లిలోని దుర్గానగర్‌లో రెండు రోజుల క్రితం వినాయక నిమజ్జనోత్సవంలో అపశ్రుతి చోటు చేసుకున్న విషయం తెలిసిందే. నిమజ్జనానికి తరలిస్తున్న గణనాథుడి ప్రతిమ ప్రధాన రహదారి మధ్యలో పడిపోయింది. దీన్ని అపచారంగా భావించిన కాలనీ వాసులు, కమిటీ సభ్యులు తిరిగి సోమవారం వినాయక విగ్రహంతో పాటు గంగమ్మ ప్రతిమను పునఃప్రతిష్ఠ చేశారు. ప్రత్యేక పూజలు నిర్వహించిన అనంతరం సాయంత్రం భక్తిశ్రద్ధలతో శోభాయాత్ర నిర్వహించి నిమజ్జనం చేశారు. 23న జాబ్‌ మేళా అనంతపురం ఎడ్యుకేషన్‌: ఆంధ్రప్రదేశ్‌ రాష్ట్ర నైపుణ్యాభివృద్ధి సంస్థ (ఏపీఎస్‌ఎస్‌డీసీ) సహకారంతో స్థానిక ప్రభుత్వ ఆర్ట్స్‌ కళాశాల ఆధ్వర్యంలో ఈనెల 23న జాబ్‌ మేళా నిర్వహించనున్నారు. అనంతపురం, పరిసర ప్రాంతాలకు చెందిన ఉద్యోగార్థులు, నిరుద్యోగ యువతతో పాటు డిగ్రీ, డిప్లొమా, ఐటీఐ తదితర విద్యార్హతలు కలిగిన అభ్యర్థులకు వివిధ సంస్థల్లో ఉద్యోగ అవకాశాలు కల్పించనున్నారు. పలు ప్రముఖ సంస్థలు మేళాలో పాల్గొని అర్హతలను బట్టి అభ్యర్థులను ఎంపిక చేయనున్నాయి. విద్యార్హత, వయసు, ఉద్యోగ స్వభావం, సంస్థను బట్టి వేతనాలు, ప్రోత్సాహకాలు, ఇతర ప్రయోజనాలు ఉంటాయని ప్రిన్సిపల్‌ పద్మశ్రీ, జేకేసీ కోఆర్డినేటర్‌ జీవన్‌కుమార్‌ తెలిపారు. అర్హత, ఆసక్తి ఉన్న అభ్యర్థులు బయోడేటాతో పాటు విద్యార్హతల ధ్రువపత్రాలు, అవసరమైన ఇతర పత్రాలతో హాజరై అవకాశాన్ని సద్వినియోగం చేసుకోవాలని కోరారు.

ధర్మవరం అర్బన్‌: ‘మీ డ్రైవింగ్‌ లైసెన్సుకు మొబైల్‌ నంబర్‌ లింక్‌ చేసుకోవాలి. అది కూడా సెప్టెంబర్‌ 25వతేదిలోపే. ఆపైన మీ డ్రైవింగ్‌ లైసెన్సు రద్దు అవుతుంది.. లేదా బ్లాక్‌లో పడుతుంది’ అంటూ సోషల్‌ మీడియాలో వార్త చక్కర్లు కొడుతోంది. దీంతో డ్రైవింగ్‌ లైసెన్సు ఉన్నవారంతా నెట్‌ సెంటర్లు, తమ మొబైల్స్‌లలో డ్రైవింగ్‌ లైసెన్సుకు ఫోన్‌ నంబర్‌ లింక్‌ చేసే పనిలో నిమగ్నమయ్యారు. సైబర్‌ నేరగాళ్ల వల...! డ్రైవింగ్‌ లైసెన్సుకు మొబైల్‌ నంబర్‌ లింక్‌ చేసుకోవాలని సోషల్‌ మీడియాలో చక్కర్లు కొడుతుండటంతో సైబర్‌ నేరగాళ్లు వల వేస్తున్నారు. సోషల్‌ మీడియాలో వస్తున్న లింక్‌లను ప్రజలు క్లిక్‌ చేయడంతో సైబర్‌ వలలో చిక్కుకుంటున్నారు. కొన్ని అనధికారిక వెబ్‌సైట్‌లలోకి ప్రజలు వెళ్లడంతో పాటు అక్కడ ఓటీపీని సైతం ఎంటర్‌ చేస్తున్నారు. దీంతో సైబర్‌ నేరగాళ్లు సులభంగా ప్రజల నుంచి డబ్బు కాజేస్తున్నారు. ప్రజలు ఇలాంటి అసత్య వార్తలు నమ్మి సైబర్‌ వలలో పడొద్దని ఆర్‌టీఓ అధికారులు చెబుతున్నారు. అదంతా అవాస్తవం.. సోషల్‌ మీడియాలో డ్రైవింగ్‌ లైసెన్సుకు మొబైల్‌ నంబర్‌ లింక్‌ చేసుకోవాలని వస్తున్న సమాచారం అంతా అవాస్తవమని ధర్మవరం అసిస్టెంట్‌ మోటర్‌ వెహికల్‌ ఇన్‌స్పెక్టర్‌ ఎ.భాగ్యశ్రీ తెలిపారు. ప్రభుత్వం ఎలాంటి డెడ్‌లైన్‌ విధించలేదన్నారు. సోషల్‌ మీడియాలో తప్పుదోవ పట్టించి సైబర్‌ నేరగాళ్లు అమాయక ప్రజల నుంచి డబ్బు కాజేసేందుకు ప్రయత్నిస్తున్నారన్నారు. నిజానిజాలు తెలుసుకోకుండా, సంబంధిత అధికారులతో సంప్రదించకుండా ఒకరిని చూసి మరొకరు విస్తృతంగా సెప్టెంబర్‌ 25 డెడ్‌లైన్‌ అంటూ ప్రచారం చేస్తున్నారని, ఇదంతా నమ్మవద్దని సూచించారు. ప్రభుత్వం గాని, అధికారులు గాని ఎక్కడా డెడ్‌లైన్‌ విధించలేదని స్పష్టం చేశారు. డ్రైవింగ్‌ లైసెన్సుకు మొబైల్‌ నంబర్‌ లింక్‌ ప్రచారం ఉత్తిదే ప్రభుత్వం ఎలాంటి ఆదేశాలూ ఇవ్వలేదని ఆర్‌టీఓ అధికారుల వెల్లడి

సాక్షి ప్రతినిధి, అనంతపురం : కళ్యాణదుర్గం నియోజకవర్గంలో అధికార తెలుగుదేశం పార్టీ నేతలు బరితెగిస్తున్నారు. మట్టి, ఇసుక, లిక్కర్‌లో అందినకాడికి దోచుకుంటున్నారు. తాజాగా ఈ జాబితాలోకి ‘పింఛన్‌’ వచ్చి చేరింది. తాము సిఫార్సులు చేసిన వారికే పింఛన్‌ మంజూరు చేయాలని నియోజకవర్గ నేత అధికారులకు హుకుం జారీ చేశారు. అర్హతలున్నా, అన్ని డాక్యుమెంట్లతో కార్యాలయానికి వచ్చినా ‘పచ్చ’ నేత సిఫార్సు లేకుంటే దరఖాస్తు పక్కన పడేయండని ఆదేశాలు జారీ చేయడం విస్తుగొలుపుతోంది. టీడీపీ నేత అనుమతి తీసుకోకుండా డైరెక్టుగా దరఖాస్తు చేసుకుంటే వాటిని అప్‌లోడ్‌ చేయకుండా అడ్డుకుంటున్నారు. అర్హులకు న్యాయం చేయాల్సిన అధికారులు కూడా ‘వెన్నుపోటు పార్టీ’నేతల ఆదేశాలనే పాటిస్తుండడం తీవ్ర విమర్శలకు తావిస్తోంది. టీడీపీ నేతలు ఓకే అంటేనే కొత్త పింఛన్ల కోసం ఈ నెల 7 నుంచి దరఖాస్తు చేసుకోవాలని ప్రభుత్వం సూచించింది. రెండేళ్ల తర్వాత దరఖాస్తులు స్వీకరించడంతో అర్హులైన వారు దరఖాస్తు చేసుకోవడానికి భారీగా సచివాలయాలకు క్యూ కట్టారు. ఇదే అదనుగా కళ్యాణదుర్గం ప్రజాప్రతినిధి బరితెగించారు. ప్రజాప్రతినిధి మేనల్లుడు కళ్యాణదుర్గంలో ప్రజావేదిక వద్ద నియోజకవర్గంలోని ఎంపీడీఓలు, డిజిటల్‌ అసిస్టెంట్లు, వెల్ఫేర్‌ అసిస్టెంట్లతో ఈ నెల 11వ తేదీ ఉదయం 6 గంటలకే సమావేశం నిర్వహించినట్లు విశ్వసనీయ సమాచారం. సమావేశంలో ఆయన మాట్లాడుతూ ‘స్థానిక టీడీపీ నేతలు ఓకే అంటేనే పింఛన్లు నమోదు చేయండి. లేదంటే వాటిని పక్కన పెట్టేయండి. వైఎస్సార్‌సీపీ సానుభూతి పరులకు అన్ని అర్హతలున్నా స్థానిక టీడీపీ నేతలను కలిసి వచ్చిన తర్వాతే దరఖాస్తులను స్వీకరించండి. అధికార పార్టీ నేతలను కలవకుండా నేరుగా దరఖాస్తు చేసుకుంటే నిర్మొహమాటంగా వాటిని పక్కన పెట్టేయండి. ఏదైనా ఉంటే మేము చూసుకుంటాం’ అని హుకుం జారీ చేశారు. పంచాయతీ నుంచి ఇద్దరి ఎంపిక పంచాయతీ పరిధిలో ఇద్దరు చొప్పున టీడీపీ నేతలను నియోజకవర్గ నేత ఎంపిక చేశారు. వీరందరితో ప్రత్యేకంగా సమావేశం నిర్వహించారు. ‘మీరు సిఫార్సులు చేసిన వారి జాబితా మండల నేతకు ఇవ్వండి. మీరంతా ఓకే అంటేనే పింఛన్‌ మంజూరవుతుంది. ప్రతిపక్షపార్టీ సానుభూతిపరులు, కార్యకర్తలు అన్ని అర్హతలూ ఉండి దరఖాస్తు చేసుకుంటే వారంతా మీ దగ్గరికి వచ్చి బతిమాలితేనే ఓకే చెప్పండ’ని మౌఖిక ఆదేశాలు జారీ చేశారు. దీంతో ప్రతీ పంచాయతీలోనూ వెన్నుపార్టీ నేతలు పింఛన్ల మంజూరు పేరిట వసూళ్లకు పాల్పడుతున్నట్లు దరఖాస్తుదారులు చెబుతున్నారు. ‘పచ్చ’ పార్టీ నేతల ఆదేశాలను అధికారులు తూచా తప్పకుండా పాటిస్తున్నారని వాపోతున్నారు. మరోవైపు టీడీపీ నేతలు తమకు కావాల్సిన వారికి అర్హత లేకపోయినా దరఖాస్తు చేయించినట్లు సొంత పార్టీ కార్యకర్తలే చెప్తుండడం గమనార్హం. 2,657 కళ్యాణదుర్గం 1,389శెట్టూరు1,355బ్రహ్మసముద్రం ఈ చిన్నారి పేరు మోక్షిత. వయసు ఆరేళ్లు. బ్రహ్మసముద్రం మండలం పాలవెంకటాపురం గ్రామం. కుడిచేయి పూర్తిగా సహకరించదు. వైకల్యం 40 శాతం ఉన్నట్లు సదరం సర్టిఫికెట్‌ మంజూరు చేశారు. చంద్రబాబు ప్రభుత్వం నూతన పింఛన్ల కోసం పోర్టల్‌ ప్రారంభించగానే అన్ని పత్రాలతో ఈ నెల 12న దరఖాస్తు చేసుకున్నారు. అయితే వీరి దరఖాస్తును టీడీపీ మండల కన్వీనర్‌ శ్రీరాములు ఆదేశాల మేరకు స్థానిక డిజిటల్‌ అసిస్టెంట్‌ అప్‌లోడే చేయలేదు. దీంతో చిన్నారిని తీసుకుని సోమవారం కలెక్టరేట్‌లో తమ సమస్యను విన్నవించుకున్నారు. 1,844కుందుర్పి2,049కంబదూరుమేం చెప్పిన వారికే ఓకే చేయాలి తెలుసు కదా..? కళ్యాణదుర్గంలో బరితెగించిన అధికార పార్టీ నేతలు ఎంపీడీఓలు, డిజిటల్‌, వెల్ఫేర్‌ అసిస్టెంట్లతో భేటీ టీడీపీ నేతల సిఫార్సులనే అప్రూవ్‌ చేయాలని హుకుం వైఎస్సార్‌సీపీ సానుభూతిపరుల దరఖాస్తుల తిరస్కరణ

సాక్షి, టాస్క్‌ఫోర్స్‌: రాప్తాడులో అరాచకం రాజ్యమేలుతోంది. సామాన్యులపై దౌర్జన్యాలు, దాడులతో రెచ్చిపోతున్న ఎమ్మెల్యే అనుచరులు, బంధువులు చివరకు పేద విద్యార్థులు చదువుకునే సంక్షేమ వసతి గృహాల్లోని సీట్లకూ ఎసరు పెట్టారు. తాము చెప్పిన వారికే ఇవ్వాలంటూ ఆదేశాలివ్వడంతో ప్రిన్సిపాళ్లు కూడా వారి మాట తూచా తప్పకుండా పాటిస్తున్నారు. ఈ నేపథ్యంలో నసనకోట ఎంజేపీ పాఠశాలలో ప్రవేశానికి పరీక్ష రాసి 60 మార్కులు సాధించిన ఓ విద్యార్థిని ప్రవేశం దక్కలేదు. 763వ ర్యాంకు దక్కినా... సీటు లేదంట ఎంజేపీ బీసీ గురుకులాల్లో 5వ తరగతిలో ప్రవేశానికి (2026–27 విద్యా సంవత్సరం) ప్రభుత్వం ప్రవేశ పరీక్ష నిర్వహించగా...గనవి అనే విద్యార్థిని (హాల్‌ టికెట్‌ నంబర్‌ 26050920005) 100 మార్కులకు గానూ 60 మార్కులు సాధించి జిల్లాలో 763 ర్యాంక్‌ దక్కించుకుంది. అయితే తొలి విడత సీట్ల కేటాయిపులో గనవికి సీటు కేటాయించలేదు. దీంతో తల్లిదండ్రులు, కుటుంబ సభ్యులు ఉన్నతాధికారులను ఆశ్రయించి పలుమార్లు వినతిపత్రాలు సమర్పించారు. స్పందించిన బీసీ సంక్షేమ గురుకుల పాఠశాలల సొసైటీ కార్యదర్శి నిబంధనల మేరకు విద్యార్థినికి ప్రవేశం కల్పించాలని పాఠశాల ప్రిన్సిపాల్‌కు లేఖ రాశారు. ఈ లేఖ తీసుకుని రెండురోజుల క్రితం విద్యార్థి గనవి తల్లిదండ్రులతో కలిసి నసనకోట ఎంజేపీ పాఠశాలకు వెళ్లగా... ప్రిన్సిపాల్‌ జమునాభాయి ‘‘ఎమ్మెల్యే పరిటాల సునీత కానీ, ఆమె అనుచరులు ఎవరైనా చెబితేనే ఇక్కడ సీటు ఇస్తాం’’ అని చెప్పారు. దీంతో గనవి తల్లిదండ్రులు అక్కడి నుంచి వెనుదిరిగి వచ్చేశారు. కష్టపడి చదివి ప్రవేశపరీక్ష రాసి ర్యాంకు సాధించినా సీటు ఇవ్వకపోవడం ఏమిటని వారు ప్రశ్నిస్తున్నారు. ఈ ఘటనపై ప్రిన్సిపాల్‌ జమునాభాయిని వివరణ కోరేందుకు ప్రయత్నించగా..ఆమె స్పందించలేదు. బీసీ సంక్షేమ శాఖ మంత్రి సవిత ప్రాతినిథ్యం వహిస్తున్న జిల్లాలోనే ఇలాంటి అడ్డగోలు వ్యవహారాలు చేటుచేసుకోవడం చర్చనీయాంశమైంది. పరిటాల బంధువు హవా.. ఎమ్మెల్యే పరిటాల సునీత సమీప బంధువు ఒకరు పేరూరు డ్యాం (బీసీ బాలుర), నసనకోట (బీసీ బాలికల) పాఠశాలలపై పెత్తనం చేస్తున్నట్లు స్థానికులు చెబుతున్నారు. ప్రవేశాలు, విద్యార్థులకు భోజనం, నీరు తదితర వ్యవహారాన్నీ ఆయనే చూస్తుంటారంటున్నారు. 5వ తరగతి అడ్మిషన్లతోపాటు పాఠశాలల్లో కార్యక్రమాలన్నీ ఆయన ఆధ్వర్యంలోనే జరిగేలా అధికారులకు ఆదేశాలిచ్చారని వాపోతున్నారు. విద్యార్థుల భోజనం, తాగునీరుపై కూడా ఆంక్షలు విధిస్తూ అరాచకం చేస్తున్నారని మండిపడుతున్నారు. విద్యార్థులు రోజూ రెండు లీటర్ల నీరే తాగాలని హుకుం జారీ చేస్తున్నట్లు స్థానికులు తెలుపుతున్నారు. ఎమ్మెల్యే పరిటాల సునీత బంధువు కావడంతో ఆయనపై ఫిర్యాదు చేసేందుకు కూడా ఎవరూ సాహసించడం లేదంటున్నారు. తేల్చిచెప్పిన నసనకోట ఎంజేపీ పాఠశాల ప్రిన్సిపాల్‌ ప్రవేశపరీక్షలో 60 మార్కులు సాధించిన విద్యార్థికి ప్రవేశం కల్పించని వైనం

పుట్టపర్తి అర్బన్‌: తుపాను ప్రభావంతో వరుసగా రెండో రోజూ జిల్లాలోని 18 మండలాల పరిధిలో వర్షం కురిసింది. సోమవారం తెల్లవారుజామున భారీ వర్షం కురిసింది. అత్యధికంగా కొత్తచెరువులో మండలంలో 105.6 మి.మీ వర్షపాతం నమోదైంది. ఇక కొత్తచెరువు మండలంలో 105.6 మి.మీ, గోరంట్ల 68.2, గుడిబండ 34.2, బుక్కపట్నం 25.8, తాడిమర్రి 14.4, పుట్టపర్తి 11.8, ముదిగుబ్బ 6.2, అగళి 6.2, బత్తలపల్లి 4.2, రామగిరి 4.2, సీకేపల్లి 3.6, సోమందేపల్లి 3.2, అమరాపురం 2.8, తలుపుల 2.0, పెనుకొండ 2.0, మడకశిర, హిందూపురం, లేపాక్షి మండలాల్లో 1.8 మి.మీ మేర వర్షపాతం నమోదైనట్లు వాతావరణ శాఖ అధికారులు తెలిపారు. మరో మూడు రోజులూ జిల్లాకు వర్షసూచన ఉన్నట్లు వెల్లడించారు.

ప్రశాంతి నిలయం: రెవెన్యూ భవన్‌లోని పీజీఆర్‌ఎస్‌ హాలులో పోషణ్‌ మాహ్‌ వేడుకలలో భాగంగా మునగాకు బోకేలను కలెక్టర్‌ ఏ.శ్యాంప్రసాద్‌, జాయింట్‌ కలెక్టర్‌ మౌర్యభరద్వాజ్‌ ప్రజలకు అందజేసి అవగాహన కల్పించారు. ఈ సందర్భంగా కలెక్టర్‌ మాట్లాడుతూ నేటి సమాజంలో ప్రజలు క్రమంగా మునగాకును ఆహారంగా తీసుకోవడం మరచిపోతున్నారన్నారు. మునగాకులో క్యాల్షియం, ఐరన్‌, విటమిన్‌–ఏ, విటమిన్‌–సీ, యాంటీ ఆక్సిడెంట్లు పుష్కలంగా లభిస్తాయన్నారు. మునగాకును ప్రతి ఒక్కరూ ఆహారంలో భాగం చేసుకోవాలన్నారు. అంగన్వాడీ కేంద్రాలలో గర్భిణులు, బాలింతలు, చిన్నారులకు మునగాకు, ఇతర ఆకుకూరల వినియోగంపై అవగాహన పెంచాలని ఆదేశించారు. కార్యక్రమంలో ఐసీడీఎస్‌ పీడీ ప్రమీల, సిబ్బంది పాల్గొన్నారు. పోస్టర్ల ఆవిష్కరణ రెవెన్యూ భవన్‌లో సోమవారం కలెక్టర్‌ ఏ.శ్యాం ప్రసాద్‌ ఐసీడీఎస్‌ సిబ్బందితో కలసి అంగన్‌వాడీ ఉత్సవాల పోస్టర్‌లను ఆవిష్కరించారు. కలెక్టర్‌ మాట్లాడుతూ ఈ నెల 25వ తేదీ నుంచి అక్టోబర్‌ 7వ తేదీ వరకు జిల్లాలో ఉత్సవాలు నిర్వహిస్తారన్నారు.

పుట్టపర్తి టౌన్‌: ఆంధ్రప్రదేశ్‌ వర్కింగ్‌ జర్నలిస్ట్‌ ఫెడరేషన్‌ (ఏపీడబ్ల్యూజేఎఫ్‌), ఆంధ్రప్రదేశ్‌ బ్రాడ్‌ కాస్టింగ్‌ జర్నలిస్ట్‌ అసోసియేషన్‌ (ఏపీబీజేఏ) జిల్లా నూతన కమిటీని ఏకగ్రీవంగా ఎన్నుకున్నారు. సోమవారం పుట్టపర్తి పట్టణంలో సమావేశం నిర్వహించారు. ఏపీడబ్ల్యూజే రాష్ట్ర ప్రధాన కార్యదర్శి ఆంజనేయులు, రాయలసీమ ఇన్‌చార్జ్‌ జయరాజ, రాష్ట్ర ఉపాధ్యక్షులు రేపటి రామాంజనేయులు, అనంతపురం జిల్లా కార్యదర్శి శివప్రకాశ్‌ ముఖ్య అతిథులుగా హాజరయ్యారు. ఏపీడబ్యూజేఎఫ్‌ జిల్లా అధ్యక్షుడిగా ఎల్‌.శివరామకృప్ణ, జిల్లా ప్రధాన కార్యదర్శిగా షబ్బీర్‌, ఉపాధ్యక్షులుగా ఎం. మహేష్‌, డి.శ్రీధర్‌రెడ్డి, శివరాజ్‌, ప్రవీణ్‌కుమార్‌, పి.బాబ్జాన్‌, కోశాధికారిగా ఎస్‌.బాబ్జాన్‌, జాయింట్‌ సెక్రటరీలుగా జాకీర్‌హుస్సేన్‌, రామకృష్ణ, రెడ్డి బాషా, హరి, ప్రచార కార్యదర్శిగా జి.రాజశేఖర్‌, కార్యవర్గ సభ్యులుగా ఆంజనేయులు, బాబయ్య, ధర్మారెడ్డి, హనుమంతరెడ్డి, వినోద్‌కుమార్‌, శ్రీనివాసులు, నారాయణస్వామి ఓబుళపతిని ఎన్నుకున్నారు. ● ఏపీబీజేఏ జిల్లా అధ్యక్షుడిగా కె. చలపతి, ప్రధాన కార్యదర్శిగా కె. మురళీ, ఉపాధ్యక్షులుగా విశ్వనాథ్‌, వి. రామకృష్ణ, మురళీధర్‌నాయుడు, రామాంజనేయులు, జాయింట్‌ సెక్రటరీలుగా ఎన్‌. గిరీష్‌బాబు, జగదీష్‌, నరేష్‌, కోశాధికారిగా గణేష్‌, ప్రచార కార్యదర్శిగా చంద్రశేఖర్‌, కార్యవర్గ సభ్యులుగా రాజు, శ్యామ్‌సుందర్‌, రమేష్‌, లక్ష్మీకాంతప్ప, హరికృష్ణ, రామకృష్ణ, పులివెందల నాగరాజును ఎన్నుకున్నారు. నాయకులు మాట్లాడుతూ దేశంలో 12 రాష్ట్రాల్లో జర్నలిస్టులకు పెన్షన్‌ విధానం అమల్లో ఉందని, అదే తరహాలో ఆంధ్రప్రదేశ్‌లో అమలు చేయాలని డిమాండ్‌ చేశారు. అర్హులైన జర్నలిస్టులందరికీ ఇంటి పట్టాలు అందజేయాలని, జర్నలిస్టులకు భద్రతా కమిటీని ఏర్పాటు చేయాలని డిమాండ్‌ చేశారు.

అనంతపురం న్యూ టౌన్‌: రాష్ట్ర ప్రభుత్వ ఆదేశాల మేరకు అనంతపురం జిల్లా పరిషత్‌ ఇకపై రెండుగా మారనుంది. ప్రస్తుత 13 జెడ్పీల స్థానంలో 28 జిల్లాలకు అనుగుణంగా కొత్త జిల్లా పరిషత్తుల ఏర్పాటు, పునర్వ్యవస్థీకరణ చేశారు. ఈ నెల 25 నుంచి శ్రీసత్యసాయి జిల్లా పరిషత్‌ అమలులోకి రానుంది. కొత్త జిల్లా పరిషత్‌ పరిపాలన సౌలభ్యం కోసం సిబ్బంది కేటాయింపులపై రెండు నెలలుగా కసరత్తు కొనసాగుతూనే ఉంది. మరోవైపు కొత్త జెడ్పీ కేంద్రాల ప్రారంభ ప్రక్రియ దగ్గర పడుతోంది. ఈ నేపథ్యంలో గత రాత్రి తాత్కాలిక సిబ్బంది కేటాయింపులపై ప్రస్తుతం ఉన్న జిల్లా పరిషత్తులకు పంచాయతీరాజ్‌ కమిషనరేట్‌ విధివిధానాలను వెల్లడిస్తూ ఆదేశాలు ఇచ్చింది. ఆ మేరకు ప్రస్తుతమున్న జెడ్పీ కేంద్ర కార్యాలయంలో పనిచేసే సిబ్బందిని మాత్రమే విభజన చేయాలని పంచాయతీ రాజ్‌ కమిషనరేట్‌ స్పష్టం చేసింది. దీనివల్ల కొత్త జిల్లా పరిషత్‌ కార్యాలయాల కార్యకలాపాలు సజావుగా నడిచే అవకాశం ఉంది. ఇందులో భాగంగానే సోమవారం సీఈఓ విజయలక్ష్మి పుట్టపర్తిని సందర్శించారు. అక్కడ నూతన జిల్లా పరిషత్‌ కార్యాలయం కోసం భవనాలను పరిశీలించారు. జెడ్పీ కేంద్ర కార్యాలయాన్ని పుట్టపర్తిలో తాత్కాలిక భవనంలో ఏర్పాటు చేయనున్నట్లు ఆమె తెలిపారు. త్వరలో స్థానిక సంస్థల ఎన్నికలు జరుగుతున్న నేపథ్యంలో సిబ్బంది విభజన అనే అంశం ఎంతో ప్రాధాన్యతతో కూడుకున్న అంశం. ప్రెసిడెన్షియల్‌ ఆర్డర్‌ 2025 ప్రకారం పూర్తిస్థాయి జిల్లా పరిషత్తుల విభజన జరగనుంది. ప్రస్తుతమున్న అనంతపురం జిల్లా పరిషత్‌ నుంచి కొత్తగా ఏర్పాటు కానున్న శ్రీసత్యసాయి జిల్లా పరిషత్‌కు సిబ్బంది కేటాయింపులు ఇలా ఉన్నాయి.

ప్రశాంతి నిలయం: తెలుగు సాహిత్యంలో వ్యవహారిక భాషకు పెద్దపీట వేసిన ఆధునిక సాహిత్య వైతాళికుడు గురజాడ అప్పారావు అని కలెక్టర్‌ శ్యాంప్రసాద్‌ కొనియాడారు. మహాకవి, నాటకకర్త, సంఘ సంస్కర్త గురజాడ వెంకట అప్పారావు 164వ జయంతి వేడుకలను సోమవారం రెవెన్యూ భవన్‌లో జిల్లా యంత్రాంగం ఘనంగా నిర్వహించింది. కార్యక్రమంలో కలెక్టర్‌ శ్యాం ప్రసాద్‌, ఎమ్మెల్యే పల్లె సింధూర రెడ్డి, జాయింట్‌ కలెక్టర్‌ మౌర్య భరద్వాజ్‌, డీఆర్‌ఓ కొండయ్యతోపాటు వివిధ శాఖల జిల్లా అధికారులు పాల్గొని గురజాడకు ఘన నివాళులర్పించారు. ఈ సందర్భంగా కలెక్టర్‌ శ్యాంప్రసాద్‌ మాట్లాడుతూ, ఆధునిక తెలుగు సాహిత్యానికి గురజాడ దిశానిర్దేశం చేశారన్నారు. తన సాహిత్యంతో సాంఘిక సంస్కరణలకు బాటలు వేశారన్నారు. నేటి తరం యువతకు, సాహిత్య రంగాలకు ఆయన ఆదర్శమన్నారు. ఈ సందర్భంగా గురజాడ అప్పారావు సాహిత్యాన్ని కవితాగానం చేశారు. వీఆర్‌ఏల సహాయ నిరాకరణ ● డిమాండ్లు నెరవేర్చేవరకూ పోరాటం కొనసాగిస్తామని వెల్లడి పుట్టపర్తి అర్బన్‌: తమ న్యాయమైన డిమాండ్ల సాధన కోసం ఆరు రోజులుగా పోరుబాట పట్టిన గ్రామ సహాయకులు (వీఆర్‌ఏ) సోమవారమూ తమ ఆందోళన కొనసాగించారు. జిల్లా వ్యాప్తంగా తహసీల్దార్‌ కార్యాలయాల వద్ద ప్రత్యేక దీక్షా శిబిరాల్లో కూర్చుని సహాయ నిరాకరణ చేశారు. వీరి ఆందోళనకు ఏఐటీయూసీ నాయకులు మద్దతు తెలిపారు. ఈ సందర్భంగా ఏఐటీయూసీ జిల్లా ప్రధాన కార్యదర్శి ఆంజనేయులు మాట్లాడుతూ... వీఆర్‌ఏల న్యాయమైన డిమాండ్లను ప్రభుత్వం వెంటనే నెరవేర్చాలన్నారు. 40 ఏళ్లుగా ప్రజలకు సేవలందిస్తున్న వీఆర్‌ఏలపై ప్రభుత్వం చిన్న చూపు చూడడం బాధాకరమన్నారు. అనంతరం పలువురు వీఆర్‌ఏలు మాట్లాడుతూ... పేస్కేల్‌ అమలు, కారుణ్య నియామకాలు, ప్రమోషన్లు తదితర డిమాండ్లు నెరవేర్చేవరకూ ఆందోళన కొనసాగిస్తామన్నారు. కార్యక్రమంలో ఏఐటీయూసీ జిల్లా ఉప కార్యదర్శి వెంకటేశు, సీపీఐ ప్రాంతీయ కార్యదర్శి వినోద్‌, వీఆర్‌ఏల సంఘం నాయకులు ఓబులేశు, చంద్ర మోహన్‌, పోతులయ్య, నాగరాజు తదితరులు ఉన్నారు. ఎస్కేయూలో పీజీ ప్రవేశాలుఅనంతపురం: ఎస్కేయూలోని క్యాంపస్‌ కళాశాలలో ఎంబీఏ, ఎమ్మెస్సీ, ఎంబీఏ కోర్సుల్లో లేటరల్‌ ఎంట్రీ ద్వారా అడ్మిషన్లు కల్పిస్తున్నారు. ఆసక్తి గల వారు ఎమ్మెస్సీ కెమిస్ట్రీ, బోటనీ, జువాలజీ, బయోటెక్నాలజీ, ఫిజిక్స్‌, ఎంఏ ఎకనామిక్స్‌, పొలిటికల్‌ సైన్స్‌, ఎంకాం, ఎంబీఏ కోర్సుల్లో అడ్మిషన్లు పొందవచ్చు. సంబంధిత సబ్జెక్టులలో బీఎస్సీ (ఆనర్స్‌), బీఏ (ఆనర్స్‌), బీకాం (ఆనర్స్‌), బీబీఏ కోర్సుపూర్తి చేసిన అభ్యర్థులు అర్హులు. ఆసక్తి గల అభ్యర్థులు తమ ఒరిజినల్‌ సర్టిఫికెట్లను జతపరచాల్సి ఉంటుంది. నిర్ణీత ఫీజు చెల్లించి, ఈ నెల 30వ తేదీలోపు వర్సిటీ అడ్మిషన్‌ కార్యాలయంలో సంప్రదించాలని అధికారులు సూచించారు.

ప్రశాంతి నిలయం: ‘‘జిల్లాలోని నారాయణ, శ్రీచైతన్య విద్యాసంస్థలు అనుమతులేకుండానే తరగతులు నిర్వహిస్తున్నాయి. విద్యార్థుల తల్లిదండ్రులను పీడించి భారీగా ఫీజులు వసూలు చేస్తున్నాయి. నిబంధనలకు విరుద్ధంగా నిర్వహిస్తున్న ఆ కార్పొరేట్‌ స్కూళ్లను కట్టడి చేయండి’’ అని విద్యార్థి సంఘాల నాయకులు జాయింట్‌ కలెక్టర్‌ మౌర్య భరద్వాజ్‌ను కోరారు. సోమవారం రెవెన్యూ భవన్‌లో కలెక్టర్‌ శ్యాంప్రసాద్‌ అధ్యక్షతన నిర్వహించిన ప్రజా సమస్యల పరిష్కార వేదికలో ఈ మేరకు వినతి పత్రం సమర్పించారు. ఈ సందర్భంగా ఏఐఎస్‌ఎఫ్‌ జిల్లా కార్యదర్శి శేషం మహేంద్ర మాట్లాడారు. జిల్లా వ్యాప్తంగా ఉన్న నారాయణ, శ్రీ చైతన్య పాఠశాలలకు ప్రీ ప్రైమరీ తరగతులు నిర్వహించేందుకు అనుమతులు లేవన్నారు. వెంటనే సదరు పాఠశాలలను సీజ్‌ చేయాలన్నారు. సదరు సంస్థలపై ఎన్ని ఫిర్యాదులు వచ్చినా విద్యాశాఖ అధికారులు కనీస చర్యలు తీసుకోవడం లేదన్నారు. ప్రతి అర్జీని పరిష్కరించండి.. ప్రజా సమస్యల పరిష్కార వేదికలో అందే ప్రతి అర్జీని పరిశీలించి పరిష్కరించాలని కలెక్టర్‌ శ్యాంప్రసాద్‌ అధికారులను ఆదేశించారు. ‘పరిష్కార వేదిక’లో వివిధ సమస్యలపై 333 అర్జీలు అందగా...వాటిని ఆయా శాఖలకు పంపారు. కార్యక్రమం అనంతరం కలెక్టర్‌ అధికారులతో సమావేశమయ్యారు. ప్రజలకు మెరుగైన సేవలు అందించాలన్నారు. సంక్షేమ పథకాలు అర్హులకు అందేలా అన్ని శాఖల అధికారులు పని చేయాలని ఆదేశించారు. కార్యక్రమంలో జాయింట్‌ కలెక్టర్‌ మౌర్య భరద్వాజ్‌, డీఆర్‌ఓ కొండయ్య, పుట్టపర్తి ఆర్డీఓ సువర్ణ, వివిధ శాఖల జిల్లా అధికారులు పాల్గొన్నారు. కలెక్టర్‌కు విద్యార్థి సంఘాల నేతల వినతి ప్రజా సమస్యల పరిష్కార వేదికకు 333 అర్జీలు

● అధికారులకు కలెక్టర్‌ ఆదేశం ప్రశాంతి నిలయం: ప్రభుత్వం స్థానిక సంస్థల నిర్వహణకు తగు చర్యలు తీసుకుంటోందని, ఈ క్రమంలో ఎప్పుడు ఎన్నికలు వచ్చినా నిర్వహించేందుకు జిల్లా యంత్రాంగం సిద్ధంగా ఉండాలని కలెక్టర్‌ శ్యాంప్రసాద్‌ అధికారులను ఆదేశించారు. సోమవారం సాయంత్రం ఆయన కలెక్టరేట్‌లోని వీడియో కాన్ఫరెన్స్‌ హాలు నుంచి వివిధ అభివృద్ధి, సంక్షేమ పథకాల అమలుపై సమీక్షించారు. పలువురు జిల్లా స్థాయి అధికారులు నేరుగా సమావేశంలో పాల్గొనగా...మరికొందరు వీడియో కాన్ఫరెన్స్‌ ద్వారా హాజరయ్యారు. ఈ సందర్భంగా కలెక్టర్‌ మాట్లాడుతూ, ప్రభుత్వ ప్రాధాన్యత అంశాల అమలులో అన్ని శాఖల అధికారులు ప్రత్యేక శ్రద్ధ తీసుకోవాలన్నారు. 8వ కలెక్టర్ల సదస్సు నిర్ణయాల అమలుకు ప్రత్యేక చొరవ తీసుకోవాలని ఆదేశించారు. స్వచ్ఛతా హీ సేవ కార్యక్రమాలు పక్కాగా అమలు చేయాలన్నారు. పేదల గృహ నిర్మాణ పనులను ముమ్మరం చేయాలన్నారు. ఆల్బెండజోల్‌ మాత్రల పంపిణీకి విస్తృత చేర్పాట్లు.. జాతీయ నులిపురుగుల నిర్మూలన దినోత్సవం సందర్భంగా జిల్లాలోని 1–19 ఏళ్లలోపు పిల్లలందరికీ అల్బెండజోల్‌ మాత్రల పంపిణీ చేసేందుకు అన్ని ఏర్పాట్లు పూర్తి చేసినట్లు కలెక్టర్‌ శ్యాం ప్రసాద్‌ తెలిపారు. సోమవారం రెవెన్యూ భవన్‌లో జాతీయ నులిపురుగుల నిర్మూలన దినోత్సవ పోస్టర్లను కలెక్టర్‌ వైద్య, ఆరోగ్య శాఖ అధికారులతో కలిసి ఆవిష్కరించారు. ఈ సందర్భంగా కలెక్టర్‌ మాట్లాడుతూ, జిల్లాలోని 5,366 విద్యాసంస్థలకు చెందిన 3.68 లక్షల మంది పిల్లలకు అల్బెండజోల్‌ మాత్రలను అందించేందుకు ఏర్పాట్లు చేశామన్నారు. నులిపురుగులు కడుపులో చేరడం వల్ల రక్తహీనత, ఆకలి మందగించడం, అతిసారం వంటి అనారోగ్య సమస్యలు తలెత్తుతాయన్నారు. అందువల్ల అందరూ పరిసరాలను పరిశుభ్రంగా ఉంచుకోవడంతో పాటు భోజనం చేసే ముందు చేతులు శుభ్రంగా కడుక్కోవాలన్నారు. ఈ మేరకు పిల్లలకు తల్లిదండ్రులు అవగాహన కల్పించాలన్నారు. ఏరువాక జిల్లా కోఆర్డినేటర్‌గా బాలాజీ నాయక్‌ పుట్టపర్తి అర్బన్‌: ఏరువాక కేంద్రం జిల్లా కోఆర్డినేటర్‌గా బాలాజీనాయక్‌ సోమవారం బాధ్యతలు స్వీకరించారు. కళ్యాణదుర్గం కృషి విజ్ఞాన కేంద్రంలో ఏడేళ్ల పాటు విస్తరణ శాస్త్రవేత్తగా సేవలందించిన ఆయన్ను ప్రభుత్వం ఇటీవలే ఏరువాక కేంద్రం జిల్లా కోఆర్డినేటర్‌గా నియమిస్తూ ఉత్తర్వులు జారీ చేసిన విషయం తెలిసిందే. ఇన్నాళ్లూ ఇక్కడ పనిచేసిన డాక్టర్‌ కే. రామసుబ్బయ్య ఉదయగిరి వ్యవసాయ కళాశాల ప్రిన్సిపాల్‌గా బదిలీపై వెళ్లారు. వ్యవసాయ విస్తరణ రంగంలో విశేష అనుభవం కలిగిన బాలాజీ నాయక్‌ జిల్లా కోఆర్డినేటర్‌గా నియమితులు కావడం వల్ల చాలా మేలు జరుగుతుందని వ్యవసాయాధికారులు చెబుతున్నారు. ఈ సందర్భంగా బాలాజీ నాయక్‌ మాట్లాడుతూ, జిల్లాలోని రైతులకు అధునాతన వ్యవసాయ పద్ధతులు, పంటల సాగులో సలహాలు, సూచనలు అందించి రైతుకు మేలు జరిగేలా కృషి చేస్తానన్నారు. విద్యుత్‌ అధికారుల నిర్లక్ష్యం.. రైతుకు పాము కాటురొద్దం: మండల పరిధిలోని నల్లూరు ఎస్సీ కాలనీకి చెందిన రామప్ప కుటుంబం కొంతకాలంగా గ్రామ సమీపాన వ్యవసాయ తోటలో షెడ్డు ఏర్పాటు చేసుకుని నివాసం ఉంటోంది. షెడ్డుకు విద్యుత్‌ సౌకర్యం కోసం ఆరు నెలల క్రితం రామప్ప దరఖాస్తు చేసుకున్నారు. అయితే, విద్యుత్‌ శాఖ అధికారులు సింగిల్‌ ఫేజ్‌ ట్రాన్స్‌ఫార్మర్‌ ఇవ్వలేదు. రేపు, ఎల్లుండి అంటూ కార్యాలయం చుట్టూ తిప్పుకుంటున్నారు. ఈ క్రమంలోనే రెండు రోజుల క్రితం రాత్రి వేళ షెడ్డులోకి పాము చొరబడి రామప్ప కుటుంబ సభ్యుడైన గంగాధర్‌ను కరిచింది. ప్రస్తుతం ఆస్పత్రిలో అతను చికిత్స పొందుతున్నాడు. విద్యుత్‌ అధికారుల నిర్లక్ష్యం కారణంగానే పాముకాటుకు గురికావాల్సి వచ్చిందని బాధిత కుటుంబం వాపోయింది.

రొళ్ల: 16వ ఆర్థిక సంఘం నిధుల స్వాహాకు స్థానిక ఎంపీడీఓ మాస్టర్‌ ప్లాన్‌ వేశారు. ఈ నెల 23న ఎంపీపీ పదవీ కాలం ముగియనున్న నేపథ్యంలో 2026–27 ఆర్థిక సంవత్సరంలో 16వ ఆర్థిక సంఘం ద్వారా మంజూరైన రూ.97,78,080 నిధుల మంజూరు చేయించుకోవడం కోసం ఏకంగా ఎంపీపీ సంతకాన్నే ఫోర్జరీ చేశాడు. ఈ మేరకు ప్రభుత్వానికి నివేదికలు పంపిన సంఘటన మండలంలో చర్చనీయాంశమైంది. పంచాయతీ తీర్మానం లేకుండానే... ప్రభుత్వం రొళ్ల మండలంలోని వివిధ గ్రామాలకు 16వ ఆర్థిక సంఘం నిధులను మంజూరు చేసింది. ఈ నిధులను స్వాహా చేయాలని ప్లాన్‌ చేసిన ఎంపీడీఓ అధికారుల సాయంతో ఈ ఏడాది మే 5న ఎంపీపీ ఎస్‌ఆర్‌ సుమ సంతకాన్ని ఫోర్జరీ చేసి గ్రామ పంచాయతీ తీర్మానం చేసినట్లుగా నిధుల మంజూరుకు ప్రభుత్వానికి ప్రతిపాదనలు పంపారు. ఈ విషయాన్ని ఆలస్యంగా గుర్తించిన ఎంపీపీ సుమ సోమవారం సాయంత్రం స్థానిక ఎంపీడీఓ కార్యాలయానికి చేరుకుని ఎంపీడీఓ శ్రీనివాసరావును ప్రశ్నించారు. దీంతో ఎంపీడీఓ శ్రీనివాసరావు తన తప్పు ఒప్పుకుని క్షమించాలని వేడుకున్నారు. ఈ వ్యవహారంపై ఎంపీపీ ఎస్‌ఆర్‌ సుమ కలెక్టర్‌, ఉమ్మడి అనంతపురం జెడ్పీ సీఈఓకు లిఖితపూర్వకంగా ఫిర్యాదు చేయనున్నట్లు తెలిపారు. ప్రభుత్వ అధికారిక రికార్డులను తారుమారు చేసి, సంతకాన్ని ఫోర్జరీ చేసిన వారిపై కఠిన చర్యలు తీసుకోవాలని ఆమె డిమాండ్‌ చేశారు. ఎంపీపీ వెంట జెడ్పీటీసీ అనంతరాజు, న్యాయవాది రంగనాథ్‌, నాయకులు భోజేగౌడ, నాగరాజు, మంజునాథ్‌, యరగుంటప్ప తదితరులు ఎమ్మెల్యే చెప్పలేదు.. సమావేశం జరపలేదు సాధారణంగా సాధారణ మండల సర్వసభ్య సమావేశం 90 రోజుల్లోపు జరపాల్సి ఉంటుంది. అయితే ప్రస్తుతం స్థానిక మండల ప్రజా పరిషత్‌ కార్యాలయంలో చివరి సారిగా ఈ ఏడాది మే 5న మండల మీట్‌ జరిగింది. నేటికి 141 రోజులు గడుస్తున్నా... మండల సమావేశం నిర్వహించలేదు. ఈ విషయాన్ని పలుమార్లు ఎంపీపీ ఎస్‌ఆర్‌ సుమ ఎంపీడీఓ శ్రీనివాసరావు దృష్టికి తీసుకువెళ్లినా ఆయన స్పందించలేదు. పైగా ‘‘నాకు ఎమ్మెల్యే చెప్పలేదు..అందుకే సమావేశం జరపడం లేదు’’ అని సమాధానమివ్వడం చూసి అక్కడున్న అధికారులే ముక్కున వేలేసుకున్నారు. 16వ ఆర్థిక సంఘం నిధుల స్వాహాకు ఎంపీడీఓ ప్లాన్‌ ఉన్నతాధికారులకు ఫిర్యాదు చేయనున్న ఎంపీపీ సుమ

జిల్లాలో ఎక్కడా కూడా తాగునీటి సమస్య ఉత్పన్నం కాకుండా తగు చర్యలు తీసుకోవాలని కలెక్టర్‌ శ్యాంప్రసాద్‌ అధికారులను ఆదేశించారు. జిల్లాలో ప్రజలు ఎదుర్కొంటున్న తాగునీటి సమస్యలను పరిష్కరించే లక్ష్యంతో సోమవారం ఉదయం ‘డయల్‌ యువర్‌ కలెక్టర్‌’ కార్యక్రమం నిర్వహించారు. వివిధ ప్రాంతాల ప్రజలు ఫోన్‌ ద్వారా తమ సమస్యలు తెలపడంతో...వాటిని నోట్‌ చేసుకున్న కలెక్టర్‌..ఆయా ప్రాంతాల్లోని తాగునీటి సమస్యలను వెంటనే పరిష్కరించాలని సంబంధిత శాఖ అధికారులను ఆదేశించారు. కార్యక్రమంలో మొత్తం 22 ఫిర్యాదులు అందాయని, ఆర్‌డబ్ల్యూఎస్‌, పంచాయతీ రాజ్‌ అధికారులు క్షేత్రస్థాయికి వెళ్లి సమస్యను పరిష్కరించాలని ఆదేశించారు. డయల్‌ యువర్‌ కలెక్టర్‌లో సమస్యలను తెలియజేయలేక పోయిన వారు కలెక్టరేట్‌ కమాండ్‌ కంట్రోల్‌ రూమ్‌లో ఏర్పాటు చేసిన హెల్ప్‌లైన్‌ నంబర్‌ 08555289039కు ఫోన్‌ చేసి తెలియజేయాలని సూచించారు. కార్యక్రమంలో డీఆర్‌ఓ కొండయ్య, ఆర్‌డబ్ల్యూఎస్‌ ఎస్‌ఈ మూరళీధర్‌, డీపీఓ సమత తదితరులు పాల్గొన్నారు.

పుట్టపర్తి అర్బన్‌: గోరంట్ల నుంచి ధర్మవరం వెళ్లే ఆర్టీసీ హైర్‌ బస్సు ప్రయాణికులు ఎక్కేంత వరకూ ఆపలేదని ఓ యువకుడు బస్సు వెనుక అద్దం పగులగొట్టిన సంఘటన పుట్టపర్తి మండలం బత్తలపల్లి గ్రామంలో చోటు చేసుకుంది. సోమవారం గోరంట్లలో బయలుదేరిన బస్సు ఉదయం 9.30 గంటలకు బత్తలపల్లి చేరుకుంది. అప్పటికే ఫుల్లుగా ఉన్న బస్సులోకి కాలేజీ విద్యార్థులు ఎక్కుతున్నారు. విద్యార్థులు, మహిళలు ఎక్కేంత వరకూ బస్సు ఆపలేదని గ్రామానికి చెందిన భాను అనే యువకుడు రాయి తీసుకుని బస్సు వెనుక అద్దం పైకి వేగంగా విసిరాడు. దీంతో అద్దం పగిలి పోయింది. వాదోపవాదాల అనంతరం అందులో ఉన్న ప్రయాణికులు అందరినీ మరో ఆర్టీసీ బస్సులో ఎక్కించి పంపించేశారు. అద్దం పగిలిన బస్సును డ్రైవర్‌ ప్రతాప్‌రెడ్డి నేరుగా ధర్మవరం ఆర్టీసీ డిపోకు తీసుకెళ్లి విషయాన్ని యజమానికి, ఆర్టీసీ డీఎంకు విన్నవించారు. బస్సు యజమాని, ఆర్టీసీ డీఎం తిరిగి బత్తలపల్లికి చేరుకుని పంచాయితీ నిర్వహించి భానుకు ఫైన్‌ విధించినట్లు తెలిసింది. ●ప్రభుత్వం అదనపు బస్సులు వేయక పోవడంతో ప్రతి బస్సూ కిక్కిరిసి పోతున్నాయి. దీంతో బస్సులు సైతం ఎక్కడికక్కడ ఆగిపోతున్నాయని సిబ్బంది వాపోతున్నారు. ఒక బస్సుకు 50 మంది ప్రయాణికులను ఎక్కించాల్సింది 100కు పైగా ఎక్కిస్తున్నామని సిబ్బంది వాపోతున్నారు. ప్రభుత్వం బస్సుల సంఖ్యను పెంచాలని కోరుతున్నారు.

● రోడ్డు ప్రమాదంలో భార్య మృతి, భర్తకు తీవ్ర గాయాలు రొద్దం: వ్యవసాయ పనులు ముగిసేలోపు సాయంత్రమైంది. వర్షం వచ్చే అవకాశం ఉండడంతో ఆ దంపతులు పొలం నుంచి బైకులో వేగంగా బయలుదేరారు. ఈ సమయంలో బైకు అదుపుతప్పింది. దీంతో భార్య అక్కడికక్కడే మృతి చెందగా, భర్తకు తీవ్ర గాయాలయ్యాయి. రొద్దం మండలంలోని సానిపల్లిలో ఈ ఘటన చోటు చేసుకుంది. వివరాలు.. సానిపల్లికి చెందిన కురుబ నాగరాజు భార్య రత్నమ్మ (40)తో కలిసి గ్రామ సమీపాన ఉన్న వ్యవసాయ పొలం పనులకు వెళ్లారు. సోమవారం సాయంత్రం 7 గంటల సమయంలో వర్షం వచ్చే సూచనలు ఉన్నాయని భర్తతో రత్నమ్మ చెప్పింది. దీంతో ఇంటికి ద్విచక్ర వాహనంలో వేగంగా బయలు దేరారు. మార్గమధ్యంలో వాహనం అదుపు తప్పి రోడ్డుపై పడిపోవడంతో రత్నమ్మ 40) తలకు బలమైన గాయాలై అక్కడికక్కడే మృతి చెందింది. తీవ్రంగా గాయపడిన నాగరాజును స్థానికులు పెనుకొండ ఆస్పత్రికి తరలించారు. మెరుగైన వైద్యం కోసం అనంతపురం తరలించారు. మృతురాలికి కుమారుడు, కూతురు ఉన్నారు. ఆధిపత్య పోరులోనే చరణ్‌ హత్య ● హత్య కేసులో 9 మంది అరెస్ట్‌ గుంతకల్లుటౌన్‌: ట్రాన్స్‌జెండర్ల మధ్య నెలకొన్న ఆధిపత్య పోరే జగన్‌ అలియాస్‌ చరణ్‌ హత్యకు ప్రధాన కారణమని వన్‌టౌన్‌ సీఐ మనోహర్‌ తెలిపారు. ఈ హత్య కేసులో 9 మందిని సోమవారం మధ్యాహ్నం స్థానిక రైల్వే డీజిల్‌షెడ్‌ రోడ్‌లోని పార్క్‌ వద్ద అరెస్ట్‌ చేశామన్నారు. నిందితుల నుంచి రెండు వేటకొడవళ్లు, ఒక పిడిబాకు, 6 మోటార్‌ సైకిళ్లు, 4 మొబైల్‌ ఫోన్‌లను స్వాధీనం చేసుకున్నట్లు సీఐ పేర్కొన్నారు. వన్‌టౌన్‌ పీఎస్‌లో ఏర్పాటు చేసిన విలేకర్ల సమావేశంలో వివరాలను సీఐ వెల్లడించారు. హత్యకు దారి తీసిన కారణాలేమంటే.. పాతగుంతకల్లు వాల్మీకి సర్కిల్‌ ఏరియాలో వినాయక చవితి సందర్భంగా ఏర్పాటు చేసిన ఫ్లెక్సీలను అదే ఏరియాకు చెందిన చిత్ర (హిజ్రా) అలియాస్‌ ఉడదాల పృథ్వీ చేత బెంచికొట్టాలకు చెందిన బోయ వీరేష్‌, అతని స్నేహితులు రిబ్బన్‌ కటింగ్‌ చేయించి ఆ వీడియోలను సామాజిక మాధ్యమాల్లో వైరల్‌ చేశారు. తన క్రేజ్‌ను తగ్గించారని మనస్తాపానికి గురైన అపర్ణ (హిజ్రా) అలియాస్‌ రాజశేఖర్‌ చిత్రతో చనువుగా ఉంటున్న వీరేష్‌ను ఎలాగైనా చంపాలని భావించింది. 15వ తేదీ రాత్రి 11:30 గంటల సమయంలో అపర్ణ వర్గానికి చెందిన సాయివికాస్‌, అతని స్నేహితులు వసంత్‌, సాల్మన్‌రాజ్‌, సుందర్‌లు బెంచికొట్టాలలోని వీరేష్‌ ఇంటి వద్దకు బైక్‌లతో వెళ్లి హారన్‌లు మోగించి భారీ శబ్ధాలను చేశారు. దీంతో వీరేష్‌, అతని స్నేహితులు కలిసి సాయివికాస్‌ అతని మిత్రులపై దాడికి పాల్పడ్డారు. విషయం తెలుసుకున్న అపర్ణ వీరేష్‌ను చంపాలని ప్రణాళిక రచించారు. మరుసటి రోజు 16వ తేదీ వేకువజామున తన వర్గీయులైన సాయివికాస్‌, అతని బంధువులతో కలిసి వీరేష్‌ ఇంటిపై దాడికి దిగారు. ఈ ఘర్షణలో తన అన్న వీరేష్‌ను కాపాడేందుకు వచ్చిన తమ్ముడు చరణ్‌ను వేటకొడవలితో మెడపై బలంగా నరికి, ఛాతీపై కత్తితో పొడవడంతో చరణ్‌ అక్కడికక్కడే మృతి చెందాడు. దీనిపై మృతుడి తల్లి లక్ష్మి ఇచ్చిన ఫిర్యాదు మేరకు నిందితులైన ఇందిరానగర్‌కు చెందిన డి.రాజా, రామాంజినేయులు, అల్లీపీరా కాలనీకి చెందిన సాయిచరణ్‌, మధువరణ్‌, మస్తాన్‌పేటకు చెందిన వసంత్‌కుమార్‌, సాల్మన్‌రాజ్‌, బోయ సుందర్‌, రామిరెడ్డికాలనీకి చెందిన షేక్‌నాసిర్‌, దోనిముక్కలరోడ్డుకు చెందిన అపర్ణను పోలీసులు అరెస్ట్‌ చేశారు. సమావేశంలో ఎస్‌ఐ కళ్యాణ్‌, ఏఎస్‌ఐ వెంకటనారాయణ, సిబ్బంది పాల్గొన్నారు.

ధర్మవరం అర్బన్‌: బియ్యం, నిత్యావసర సరుకుల ధరలు అమాంతం పెరగడంతో సామాన్య, మధ్య తరగతి ప్రజలు ఆర్థిక ఇబ్బందులకు గురవుతున్నారు. ప్రజలకు సబ్సిడీపై సన్న బియ్యం అందిస్తామని ఆశ చూపిన చంద్రబాబు ప్రభుత్వం ప్రకటనలు చేసి రాష్ట్ర వ్యాప్తంగా సబ్సిడీ సన్న బియ్యం విక్రయ కేంద్రాలను ఆర్భాటంగా ఎమ్మెల్యేలు, మంత్రులతో ప్రారంభించింది. ఈ కేంద్రాలు మూణ్నాళ్ల ముచ్చటగా మారిపోయాయి. జిల్లాలోని రైతు బజార్‌లు, రైస్‌ మిల్లుల అవుట్‌లెట్‌ స్టోర్లలో సబ్సిడీ బియ్యం విక్రయ కేంద్రాలను ఆగస్టు 3న ఎమ్మెల్యేలు, మంత్రులు ప్రారంభించారు. బియ్యం విక్రయ కేంద్రాల నిర్వహణ బాధ్యతను రైస్‌ మిల్లర్ల అసోసియేషన్‌కు అప్పగించారు. మిల్లర్ల అసోసియేషన్‌ ఈ కార్యక్రమాన్ని వ్యతిరేకించినా పౌర సరఫరాల శాఖ అధికారులు రంగంలోకి దిగి బలవంతంగా ఒప్పించారు. ఆగస్టు 3న సబ్సిడీ విక్రయ కేంద్రాలలో ఏర్పాటు చేసిన బ్యానర్లలో స్టీమ్‌ బియ్యం (బీపీటీ) బహిరంగ మార్కెట్‌లో రూ.62 ఉండగా ప్రత్యేక కౌంటర్ల ధర రూ.52కు, రా బియ్యం (బీపీటీ) బహిరంగ మార్కెట్‌ ధర రూ.58 ఉండగా ప్రత్యేక కౌంటర్ల ధర రూ.50గా నమోదు చేసి ప్రచారం చేశారు. కాని కొన్నిరోజులు మాత్రమే సామాన్యులకు బియ్యం పంపిణీ చేసి కేంద్రాలను మూసివేశారు. ఎల్‌నినో ప్రభావంతో వర్షాలు కురవకపోవడం, వరి పంట పండించేందుకు ప్రభుత్వం సాగునీరు వదలకపోవడంతో బియ్యం ధరలు అమాంతం పెరిగిపోయాయి. మూడు నెలల కాలంలో ఏకంగా నాలుగు సార్లు బియ్యం ధరలు ఎగబాకాయి. దీంతో పేద, మధ్య తరగతి ప్రజలు సన్న బియ్యం కొనలేని పరిస్థితి ఏర్పడింది. మూడు నెలల క్రితం రూ.45 నుంచి రూ.50కు మార్కెట్‌లో లభించిన కిలో బీపీటీ బియ్యం(క్వాలిటీని బట్టి) ప్రస్తుతం రూ.65 నుంచి రూ.72 వరకు పెరిగాయి. జిల్లాలోని పలు సబ్సిడీ కేంద్రాల్లో నాణ్యతలేని బియ్యం అందిస్తుండటంతో ప్రజలు కొనడం మానేశారు. మూతపడిన సన్న బియ్యం విక్రయ కేంద్రాలు పట్టించుకోని పాలకులు బహిరంగ మార్కెట్‌లో బియ్యం ధరలు పెరిగి సామాన్యులకు చుక్కలు మూడు నెలలుగా బహిరంగ మార్కెట్‌లో బియ్యం ధరలు విపరీతంగా పెరిగిపోయాయి. ధరలను అదుపుచేయలేని చంద్రబాబు ప్రభుత్వం సన్న బియ్యాన్ని సామాన్యులకు తక్కువ ధరకే అందుబాటులోకి తెచ్చేందుకంటూ జిల్లాలోని ప్రతి నియోజకవర్గంలో విక్రయ కేంద్రాలను ఏర్పాటు చేసింది. పౌర సరఫరాల శాఖ ఆధ్వర్యంలో ఆగస్టు 3న జిల్లాలోని రైతు బజార్లు, రైస్‌ మిల్లుల అవుట్‌లెట్‌ స్టోర్లలో ఆర్భాటంగా ప్రారంభించిన కేంద్రాలు అప్పుడే మూతపడ్డాయి. నాలుగుసార్లు పెరిగాయ్‌! బలవంతంగా ఒప్పించి..

అనంతపురం అర్బన్‌: రెవెన్యూ ఉద్యోగుల సంఘం రాష్ట్ర కోశాధికారిగా ఆర్‌ఎన్‌ దివాకర్‌రావు ఏకగ్రీవంగా ఎంపికయ్యారు. ప్రస్తుతం ఆయన జిల్లా అధ్యక్షుడిగా కొనసాగుతున్నారు. విజయవాడలో రెవెన్యూ ఉద్యోగుల సంఘం రాష్ట్ర కమిటీ ఎన్నికలు ఆదివారం నిర్వహించారు. ఈ క్రమంలో ఆయనకు రాష్ట్ర కమిటీలో చోటుకల్పించారు. ఈ సందర్భంగా రాష్ట్ర అధ్యక్షుడు బొప్పరాజు వెంకటేశ్వర్లు, ప్రధాన కార్యదర్శి సీహెచ్‌ కృష్ణమూర్తిని, దివాకర్‌రావును జిల్లా సంఘం నాయకులు గజమాలతో సన్మానించారు. ఈ సందర్భంగా దివాకర్‌రావు మాట్లాడుతూ తనకు ఇంతటి బాధ్యత అప్పగించిన రాష్ట్ర అధ్యక్షుడు ప్రధాన కార్యదర్శికి కృతజ్ఞతలు తెలియజేశారు. కార్యక్రమంలో జిల్లా కార్యదర్శి సోమశేఖర్‌, ఉపాధ్యక్షుడు ముక్తియార్‌, కోశాధికారి పునీత్‌బాబు, డివిజన్ల అధ్యక్ష, కార్యదర్శులు నారాయణస్వామి, రాజ్‌కుమార్‌, ఆదినారాయణ, సూర్యనారాయణ, చంద్రమోహన్‌, నాయకులు దినేష్‌, ఉదయ్‌లు పాల్గొన్నారు. ఉత్కంఠ పోరులో వెస్ట్‌ బెంగాల్‌ విజయం అనంతపురం: స్థానిక ఆర్డీటీ క్రీడామైదానంలో ఆంధ్రప్రదేశ్‌ ఫుట్‌బాల్‌ అసోసియేషన్‌ (ఏపీఎఫ్‌ఏ) ఆధ్వర్యంలో డాక్టర్‌ తాలిమెరెన్‌ ఆవో అండర్‌–19 బాలికల నేషనల్‌ ఫుట్‌బాల్‌ చాంపియన్‌షిప్‌ పోటీల్లో భాగంగా ఆదివారం జరిగిన రెండు మ్యాచ్‌లో వెస్ట్‌బెంగాల్‌, ఒడిశా జట్లు గెలుపొందాయి. ఉదయం జరిగిన మ్యాచ్‌లో రాజస్తాన్‌, వెస్ట్‌బెంగాల్‌ జట్లు తలపడ్డాయి. ఉత్కంఠ సాగిన ఈ మ్యాచ్‌లో 1–0 గోల్స్‌ తేడాతో వెస్ట్‌ బెంగాల్‌ జట్టు విజయం సాధించింది. మధ్యాహ్నం 3 గంటలకు జరిగిన రెండో మ్యాచ్‌లో ఒడిశా, మహారాష్ట్ర జట్లు తలపడ్డాయి. మహారాష్ట్ర జట్టు ఒక గోల్‌ చేయగా, ఒడిశా జట్టు నాలుగు గోల్స్‌తో ఘన విజయం సాధించింది. మ్యాచ్‌లు తుది దశకు చేరుకుంటున్న నేపథ్యంలో ఏపీ ఫుట్‌బాల్‌ అసోసియేషన్‌ ప్రతినిధులు అనంత క్రీడాగ్రామానికి చేరుకుంటున్నారు. ఆదివారం జరిగిన మ్యాచ్‌లను ఏపీఎఫ్‌ఏ ప్రతినిధులు జి.అనిల్‌ కుమార్‌, సురేష్‌ మక్కె, సురేష్‌, జి.పవన్‌ కుమార్‌, దాసరి మల్లేష్‌, ఆర్‌ఎన్‌ శ్రీనివాస్‌, ఇర్షాద్‌ అలీ పరిశీలించారు. కలప అక్రమ రవాణా వాహనం సీజ్‌ మడకశిర: పట్టణ సమీపంలో ఆదివారం అక్రమంగా కలపను తరలిస్తున్న వాహనాన్ని ఫారెస్ట్‌ అధికారులు సీజ్‌ చేశారు. రూ.లక్షలు విలువ చేసే కలపను వాహనంలో అక్రమంగా తరలిస్తున్నట్లు గుర్తించి ఫారెస్ట్‌ రేంజ్‌ ఆఫీసర్‌ శ్రీనివాసరెడ్డి ఆధ్వర్యంలో స్థానిక ఫారెస్ట్‌ అధికారులు పట్టుకున్నట్లు సమాచారం. పావగడ ప్రాంతం నుంచి బెంగళూరుకు కలపను తరలిస్తున్నట్లు తెలిసింది. గుడిబండలో భారీ అగ్నిప్రమాదం గుడిబండ: స్థానిక బస్టాండ్‌ ఆవరణలోని శ్రీలక్ష్మీ హాసన్‌ అయ్యంగార్‌ బేకరీలో శనివారం అర్ధరాత్రి భారీ అగ్నిప్రమాదం జరి గింది. విద్యుత్‌ షార్ట్‌సర్క్యూట్‌తో మంటలు చెలరేగి బేకరీ పూర్తిగా కాలిపోయింది. రాత్రివేళలో విద్యుత్‌ షార్ట్‌ సర్క్యూట్‌తో బేకరీలో ఒక్కసారిగా మంటలు చెలరేగి, కాసేపట్లో వ్యాపించాయి. అటుగా వెళుతున్న గణేష్‌ ఉత్సవ నిర్వాహకులు గమనించి పోలీసులు, అగ్నిమాపక సిబ్బందికి సమాచారం అందించారు. అర్థరాత్రి కావడంతో అప్పటికే బేకరీలోని కౌంటర్లు, ఫ్రిజ్‌లు , స్వీట్లు, కూల్‌డ్రింక్స్‌ పూర్తిగా కాలిపోయాయి.ఈ ప్రమాదంలో దాదాపు రూ.8లక్షల వరకు ఆస్తి నష్టం వాటిల్లి ఉంటుందని బేకరీ యజమాని తెలిపాడు. తమను ప్రభుత్వం ఆదుకోవాలని కోరాడు.

తాడిపత్రి రూరల్‌: స్థానిక పులిప్రొద్డుటూరు రహదారిపై వ్యాన్‌ టైరు మారుస్తుండగా.. పాల వ్యాన్‌ రూపంలో మృత్యువు దూసుకొచ్చి డ్రైవర్‌ ఎజ్జాన్‌బాష (46) అక్కడికక్కడే దుర్మరణం చెందాడు. అప్‌గ్రేడ్‌సీఐ నారాయణరెడ్డి వివరాల మేరకు.. వైఎస్సార్‌ కడపజిల్లా ఖాజీపేట మండలం సర్వర్‌ఖాన్‌పేటకు చెందిన ఎజ్జాన్‌బాష మినీవ్యాన్‌ నడుపుకుంటూ కుటుంబాన్ని పోషించుకుంటున్నాడు. అదే గ్రామానికి చెందిన షేక్‌ఖాజా పొగాకు సరుకును బళ్లారికి తరలించేందుకు మినీ వ్యాన్‌ను అద్దెకు మాట్లాడుకున్నాడు. దీంతో శనివారం రాత్రి కర్ణాటక రాష్ట్రం బళ్లారికి బయల్దేరారు. తెల్లవారుజామున పులిపొద్దుటూరు వద్ద రాగానే మినీవ్యాన్‌ టైరు పగిలిపోయింది. దీంతో వాహనాన్ని రోడ్డువైపు ఆపి ఇండికేటర్లు వేసి ఎజ్జాన్‌బాషా టైరు మార్చేందుకు ప్రయత్నం చేస్తున్నాడు. ఇంతలో గుత్తివైపు నుంచి వచ్చిన శ్రీనిధి పాలడెయిరీ గూడ్స్‌ వాహనం వేగంగా వచ్చి మినీ వ్యాన్‌ను ఢీకొనింది. ఈ ప్రమాదంలో ఎజ్జాన్‌బాషాపై గూడ్స్‌ వాహనం వెనుక చక్రాలు ఎక్కడంతో అక్కడిక్కడే మృతి చెందాడు. ప్రమాదంలో పక్కనే ఉన్న పొగాకు రైతు షేక్‌ఖాజాకు తీవ్రగాయాలయ్యాయి. చికిత్స నిమిత్తం అతన్ని తాడిపత్రి ప్రభుత్వాస్పత్రికి తరలించారు. ఎజ్జాన్‌బాష మృతదేహాన్ని పోస్టుమార్టం నిమిత్తం తాడిపత్రి ప్రభుత్వాస్పత్రికి తరలించారు. మృతుడికి భార్య, పిల్లలు ఉన్నారు. మృతుడి సోదరుడు హబీబుల్లా ఫిర్యాదు మేరకు కేసు నమోదు చేసినట్లు సీఐ నారాయణరెడ్డి తెలిపారు. గూడ్స్‌ వాహనం ఢీకొని వ్యాన్‌ డ్రైవర్‌ దుర్మరణం

బత్తలపల్లి: బత్తలపల్లి టోల్‌ఫ్లాజా సమీపంలో అనంతపురం–కదిరి జాతీయ రహదారిపై ఆదివారం త్రుటిలో పెనుప్రమాదం తప్పింది. ధర్మవరం వాసులు పులివెందులలో ఆదివారం బంధువుల ఇంట జరుగుతున్న కేశఖండన కార్యక్రమానికి వెళ్తుండగా కారు టైరు పగిలి అదుపుతప్పి రోడ్డుపక్కనున్న ట్రాన్స్‌ఫార్మర్‌ దిమ్మెను ఢీకొట్టింది. ఈ ప్రమాదంలో ముగ్గురు తీవ్రంగా గాయపడ్డారు. పోలీసులు, ప్రత్యక్షసాక్షులు తెలిపిన మేరకు.. ధర్మవరం పట్టణానికి చెందిన నాగలక్ష్మి ధర్మవరం కోర్టులో పనిచేస్తున్నారు. ఈమె కుమారుడు శ్రీకాంత్‌, కోడలు మౌనిక, అవ్వ బయమ్మలు నలుగురు పులివెందులలో ఆదివారం బంధువుల ఇంట్లో జరిగిన కేశ ఖండన కార్యక్రమానికి కారులో బయల్దేరారు. కారు ధర్మవరం నుంచి బత్తలపల్లి టోల్‌ఫ్లాజా సమీపంలోకి వెళ్లగానే కారు టైర్‌ పగిలి అదుపుతప్పి రోడ్డు పక్కన వ్యవసాయ తోట వద్దనున్న ట్రాన్స్‌ఫార్మర్‌ను ఢీ కొట్టి ఆగిపోయింది. ఈ ప్రమాదంలో మౌనికకు తప్పా మిగిలిన ముగ్గురికి తీవ్ర గాయాలయ్యాయి. క్షతగాత్రులను స్థానికులు ఆర్డీటీ ఆస్పత్రికి చికిత్స నిమిత్తం తరలించారు. అనంతరం మెరుగైన వైద్యం కోసం అనంతపురం తరలించారు. వీరిలో నాగలక్ష్మి, బయమ్మ పరిస్థితి విషమంగా ఉన్నట్లు తెలిపారు. సమాచారం అందుకున్న బత్తలపల్లి ఎస్‌ఐ సోమశేఖర్‌ సిబ్బందితో ఘటనాస్థలానికి చేరుకొని ప్రమాద వివరాలు ఆరాతీశారు. ఇదిలా ఉండగా కారు టైరు పగిలిన సమయంలో వెనుక ఏదైనా వాహనాలు వస్తున్నా, ట్రాన్స్‌ఫార్మర్‌ దిమ్మెను ఢీ కొన్నప్పుడు ఏదైనా ప్రమాదం జరిగి ఉంటే పెను ప్రమాదం సంభవించేదని స్థానికులు తెలిపారు. గాయాలతో బయటపడడంతో త్రుటిలో ప్రమాదం తప్పిందన్నారు. ప్రమాద సమాచారం తెలుసుకున్న ధర్మవరానికి చెందిన పలువురు లాయర్లు, ఇతర సిబ్బంది ప్రమాదంపై, వారి యోగక్షేమాలను అడిగి తెలుసుకున్నారు. ఈ ఘటనకు సంబంధించి ఎలాంటి ఫిర్యాదు అందలేదని పోలీసులు తెలిపారు. కారు టైరు పగిలి ఇద్దరికి తీవ్ర గాయాలు కేశఖండన కార్యక్రమానికి వెళ్తుండగా రోడ్డు ప్రమాదం

యాడికి: మండలంలోని భోగాలకట్ట గ్రామంలో శనివారం రాత్రి కురిసిన భారీ వర్షాలరు మట్టి మిద్దె కూలి అశ్వర్థమ్మ (80) మృతిచెందిన ఘటన చోటుచేసుకుంది. వివరాలు.. గ్రామానికి చెందిన దిద్దే కుంట అశ్వర్థమ్మ, దిద్దేకుంట నారాయణ రెడ్డి దంపతులకు ఇద్దరు కుమారులు, ముగ్గురు కూతుళ్లు. నారాయణరెడ్డితోపాటు ఇద్దరు కుమారులు, ఒక కూతురు మృతి చెందగా.. కోడలు కృష్ణవేణి తన ఇద్దరు కుమారులతో కలిసి గ్రామంలో వేరుగా ఉంటోంది. అయితే వృద్ధురాలు అశ్వర్థమ్మ పాడుబడిన సొంతింటిలోనే తలదాచుకునేది. శనివారం రాత్రి కురిసిన వర్షాలకు ఇంటి మట్టి గోడలు, దూలాలు కుప్పకూలాయి. శిథిలాల కింద నలిగి అశ్వర్థమ్మ అక్కడికక్కడే మృతిచెందింది. ఆదివారం ఉదయం స్థానికులు గమనించి కుటుంబ సభ్యులకు సమాచారం ఇచ్చారు. ఘటనా స్థలానికి చేరుకున్న ఎస్‌ఐ గోపాలుడు, వీఆర్‌ఓ రంగస్వామి తదితరులు మృతి చెందిన అశ్వర్థమ్మను శిథిలాల నుంచి వెలికితీశారు. డీటీ శ్రీనివాసులు మృతురాలి అంత్యక్రియల కోసం రూ.5 వేలు ఆమె కోడలు కృష్ణవేణికి అందించారు. బోగాలకట్టలో విషాదం

రాప్తాడు రూరల్‌: అనంతపురం రూరల్‌ మండలం బళ్లారిరోడ్డు రాచానపల్లి సమీపంలోని ఎస్‌ఆర్‌ జూనియర్‌ కళాశాల హాస్టల్‌లో ఇంటర్‌ ప్రథమ సంవత్సరం చదువుతున్న ఇద్దరు విద్యార్థులు అదృశ్యం కావడం కలకలం రేపుతోంది. నార్పల మండలం జంగంరెడ్డిపల్లికి చెందిన కొవ్వూరి అమృతకుమార్‌రెడ్డి, ధర్మవరానికి చెందిన మనోహర్‌రెడ్డి ఇద్దరూ స్నేహితులు. వీరిద్దరూ శనివారం సాయంత్రం 6.30 గంటల సమయంలో కళాశాల నుంచి బయటకు వెళ్లారు. ఓ మద్యం దుకాణం సమీపంలో కనిపించగా, కళాశాల యాజమాన్యం వారిని చూసింది. దీంతో అక్కడి నుంచి పరారైన విద్యార్థులు రాత్రి 9 గంటలకు హాస్టల్‌కు చేరుకున్నారు. ఈ విషయంపై యాజమాన్యం వారిని మందలించడంతో పాటు, వారి ఎదుటే తల్లిదండ్రులకు ఫోన్‌ చేసి ఆదివారం కళాశాలకు రావాలని సమాచారం ఇచ్చింది. దీంతో మనస్తాపానికి గురైన ఇద్దరు విద్యార్థులు తెల్లవారుజామున మళ్లీ హాస్టల్‌ నుంచి వెళ్లిపోయారు. అమృతకుమార్‌రెడ్డి తండ్రి ఫిర్యాదు మేరకు రూరల్‌ పోలీసులు కేసు నమోదు చేసి దర్యాప్తు చేపట్టారు. సీఐ శ్రీకాంత్‌యాదవ్‌ సిబ్బందితో కలిసి ఆదివారం రాత్రి కళాశాలకు వెళ్లి యాజమాన్యాన్ని, తోటి విద్యార్థులను విచారించారు. ఆచూకీ తెలిసిన వారు 94407 96811 నంబర్‌కు సమాచారం ఇవ్వాలని కోరారు.

పుట్టపర్తి టౌన్‌: రాష్ట్రంలో స్థానిక సంస్థల ఎన్నికల వాతావరణం స్పష్టంగా కనిపిస్తోంది. తొలుత మున్సిపల్‌ ఎన్నికలు నిర్వహిస్తామన్న ప్రచారంతో పట్టణాల్లో రాజకీయ వేడి రాజుకుంటోంది. ఇందులో భాగంగానే పుట్టపర్తి మున్సిపాలిటీలో ఎన్నికలు నిర్వహించడానికి అధికారులు సన్నద్ధమవుతున్నారు. ఏక్షణంలోనైనా ఎన్నికల నోటిఫికేషన్‌ వెలువడే అవకాశం ఉంది. ఈ నేపథ్యంలో రాష్ట్ర ఎన్నికల కమిషన్‌ ఆదేశాల మేరకు అవసరమైన ఏర్పాట్లు పూర్తి చేస్తున్నారు. గతంలో పుట్టపర్తి పురపాలక సంఘంలో 20 వార్డులు ఉండేవి. వాటిని 28కి పెంచుతూ ఉన్నతాధికారులు ఆదేశాలు జారీ చేశారు. ఎటు చూసినా రాజకీయ చర్చ ఆధ్మాత్మిక కేంద్రమైన పుట్టపర్తిలో మున్సిపల్‌ చైర్మన్‌ సీటు ఇప్పుడు హాట్‌ టాపిక్‌గా మారింది. ఎవరికివారు తమ గెలుపు అవకాశాలను బేరీజు వేసుకుంటూ తామే రేసులో బలంగా ఉన్నామని ప్రచారం చేసుకుంటున్నారు. హోటళ్లు, రచ్చబండల వద్ద షాపుల్లో ఏ ఇద్దరు కలిసినా మున్సిపల్‌ ఎన్నికలపైనే చర్చ సాగుతోంది. ప్రపంచ ఆధ్యాత్మిక కేంద్రంగా పుట్టపర్తికి ప్రత్యేక గుర్తింపు ఉంది. శ్రీసత్యసాయి జిల్లా ఏర్పాటు కావడంతో రాజకీయంగా ఈప్రాంతం మరింత ప్రాధాన్యత సంతరించుకుంది. ఆసక్తికరంగా రిజర్వేషన్‌ లెక్కలు నగర పంచాయతీగా ఉన్న పుట్టపర్తి 2011లో మున్సిపాలిటీగా మారింది. మొదటిసారి ఎన్నికలు జరిగినప్పుడు తెలుగుదేశం పార్టీ చైర్మన్‌ పీఠాన్ని దక్కించుకుంది. రెండోసారి ఎన్నికలు జరిగినప్పుడు వైఎస్సార్‌ కాంగ్రెస్‌ పార్టీ చైర్మన్‌ పీఠం దక్కించుకున్నారు. అనంతరం గ్రేడ్‌ –2 మున్సిపాలిటీ కోసం గత ప్రభుత్వంలో అప్పటి ఎమ్మెల్యే దుద్దుకుంట శ్రీధర్‌రెడ్డి ఎంతో కృషి చేసి సాధించారు. ప్రస్తుతం రిజర్వేషన్ల లెక్కలు కూడా ఆసక్తికరంగా మారనున్నాయి. గత ఎన్నికల్లో చైర్మన్‌ సీటు జనరల్‌కు రిజర్వు కావడంతో ఇప్పడు బీసీలకు రిజర్వ్‌ అవుతుందనే ఊహాగానాలు వినిపిస్తున్నాయి. 22న ఓటర్ల జాబితా ప్రకటన ఈనెల 22న వార్డుల వారీగా ఓటర్ల జాబితాను ప్రకటించనున్నారు. ఇప్పటికే ఎన్నికల నిర్వహణకు సంబంధించి ఎన్నికల అధికారులు, ఉప ఎన్నికల అధికారులను 33 మందిని నియమించారు. పట్టణంలో 30 పోలింగ్‌ కేంద్రాలు కూడా ఏర్పాటు చేశారు. ఒక్కొక్క పోలింగ్‌ స్టేషన్‌లో వెయ్యి లోపు ఓటర్లు ఉండే విధంగా అధికారులు ఏర్పాట్లు పూర్తి చేస్తున్నారు. రిజర్వేషన్ల కోసం ఎదురు చూపు మున్సిపల్‌ ఎన్నికలకు సంబంధించి రిజర్వేషన్ల ప్రక్రియను అధికారులు పూర్తి చేయాల్సిఉంది. ప్రధాన పార్టీలు రిజర్వేషన్ల కోసం ఉత్కంఠగా ఎదురు చూస్తున్నాయి. వైఎస్సార్‌పీపీ, తెలుగుదేశం పార్టీ మధ్య గట్టి పోటీ ఉంటుందని రాజకీయ పరిశీలకులు భావిస్తున్నారు. పుట్టపర్తిలో 20 నుంచి 28కి పెరిగిన వార్డుల సంఖ్య 30 పోలింగ్‌ బూత్‌ల ఏర్పాటు రిజర్వేషన్లపై అన్ని పార్టీల్లో ఉత్కంఠ రేపు విడుదల కానున్న ఓటర్ల జాబితా 26,890 మంది ఓటర్లు పట్టణంలో మెత్తం 26,890 మంది ఓటర్లు ఉన్నారు. వీరిలో 13,445 పురుష ఓటర్లు, 13,440 మంది మహిళా ఓటర్లు, ఐదురుగు ఇతరులు ఉన్నారు. ఎన్నికల నిర్వహణపై ఇప్పటికే అధికారులు బూత్‌ స్థాయి అధికారులతో సమావేశాలు నిర్వహించారు. ఓటర్ల విభజన, ఎన్నికల సామగ్రి కూర్పు తదితర అంశాలపై అధికారులు నిమగ్నమయ్యారు.

రామగిరి: మండల కేంద్రంలోని జెడ్పీహెచ్‌ఎస్‌ పాఠశాలలో వారంతా పదో తరగతి చదువుకున్నారు. 27 ఏళ్ల తర్వాత మళ్లీ ఆదివారం అదే స్కూల్‌లో కలుసుకున్నారు. దీంతో వారి ఆనందానికి అవధుల్లేకుండా పోయాయి. జెడ్పీహెచ్‌ఎస్‌ స్కూల్‌లో 1997–98 లో పదో తరగతి బ్యాచ్‌ విద్యార్థులు పూర్వ విద్యార్థుల సమ్మేళనంలో పాల్గొన్నారు. ఈ సందర్భంగా పాత జ్ఞాపకాలను నెమరవేసుకున్నారు. ఒకరి కష్టసుఖాలను మరొకరు అడిగి తెలుసుకున్నారు. అనంతరం విద్యను బోధించిన నాటి ఉపాధ్యాయులను ఘనంగా శాలువాలు, పుష్పగుచ్ఛాలతో సన్మానించారు.

పుట్టపర్తి అర్బన్‌: వరుణుడు కరుణించాడు. శనివారం రాత్రి నుంచి ఆదివారం ఉదయం వరకూ జిల్లా వ్యాప్తంగా 29 మండలాల్లో వర్షం కురిసింది. అత్యధికంగా కొత్తచెరువు మండలంలో 70.6 మి.మీటర్లు, నల్లచెరువు 60.4, తనకల్లు 43.6 , తాడిమర్రి 40.2, పుట్టపర్తి 38.8, ధర్మవరం 38.4, బత్తలపల్లి 32.6 మి.మీటర్ల వర్షపాతం నమోదైంది. అలాగే సోమందేపల్లిలో 28.6 మి.మీ, బుక్కపట్నం 27.8, కనగానపల్లి 25.4, ముదిగుబ్బ 24.6, కదిరి 24.6, లేపాక్షి 24, తలుపుల 23.4, అమడగూరు 23.2, రామగిరి 21.4, గోరంట్ల 20.4, చిలమత్తూరు 16.6, నల్లమాడ 15.4, మడకశిర 15.4 మి.మీటర్ల వర్షం కురిసింది. పెనుకొండలో 14.2 మి.మీ, హిందూపురం 13.8, గాండ్లపెంట 13.6, రొద్దం 13.2, సీకేపల్లి 12.6, ఎన్‌పీకుంట 12.4, పరిగి 9.2, ఓడీచెరువు 8.2, అమరాపురంలో 4.2 మి.మీ వర్షపాతం నమోదైంది. జిల్లా వ్యాప్తంగా మొత్తం 716.8 మి.మీ వర్షపాతం నమోదైనట్లు వాతావరణశాఖ అధికారులు పేర్కొన్నారు. తడిసిన వేరుశనగ ధర్మవరం రూరల్‌: ధర్మవరం డివిజన్‌లో ఆదివారం తెల్లవారు జామున 195.2 మి.మీటర్ల వర్షపాతం నమోదైనట్లు డీవైఎస్‌ఓ ఎస్‌. గోపాల్‌ తెలిపారు. వర్షానికి చిగిచెర్లలో రైతు నల్లప్ప మూడు ఎకరాలలో తొలగించిన వేరుశనగ పంట తడిసిపోవడంతో రైతు కన్నీరు మున్నీరయ్యాడు. 29 మండలాల్లో వర్షం

ప్రశాంతి నిలయం: ప్రశాంతి రైల్వేస్టేషన్‌ సమీపంలోని రెవన్యూ భవన్‌లో సోమవారం ప్రజా సమస్యల పరిష్కార వేదిక కార్యక్రమం నిర్వహించనున్నట్లు కలెక్టర్‌ ఏ.శ్యాంప్రసాద్‌ ఒక ప్రకటనలో తెలిపారు. ఈ కార్యక్రమంలో అన్ని ప్రభుత్వ శాఖల జిల్లా అధికారులు పాల్గొంటారన్నారు. ప్రజలు తమ సమస్యలను అధికారులు దృష్టికి తీసుకువస్తే పరిష్కరిస్తామని పేర్కొన్నారు. ప్రజలందరూ ఈ కార్యక్రమాన్ని సద్వినియోగం చేసుకోవాలని కోరారు. పోలీస్‌ కార్యాలయంలో.. పుట్టపర్తి టౌన్‌: జిల్లా కేంద్రంలో ఉన్న పోలీస్‌ కార్యాలయంలో వీడియో కాన్ఫరెన్స్‌ హాల్లో సోమవారం ప్రజా సమస్యల పరిష్కార వేదిక కార్యక్రమం నిర్వహిస్తున్నట్లు ఎస్పీ సతీష్‌ కుమార్‌ ఒక ప్రకటనలో తెలిపారు. ప్రజలు తమ సమస్యలను నేరుగా అర్జీల ద్వారా తెలుపుకోవాలని సూచించారు. కచ్చితంగా ఆధార్‌కార్డు వెంట తీసుకురావాలని సూచించారు. పంటల సాగుకు పీఎండీఎస్‌ విధానం మేలు మడకశిరరూరల్‌: ఎల్‌నినో పరిస్థితుల్లో తక్కువ వర్షపాతం నమోదవుతున్న నేపథ్యంలో పెల్లైటెజ్డ్‌ పీఎండీఎస్‌ విధానం పంటల సాగుకు అనుకూలంగా ఉంటుందని ఏపీసీఎన్‌ఎఫ్‌ ఆర్‌వైఎస్‌ఎస్‌ ఈవీసీ రిటైర్‌ ఐఏఎస్‌ అధికారి విజయకుమార్‌ తెలిపారు. ఎల్‌నినో ప్రభావంతో ప్రకృతి వ్యవసాయ పద్ధతులతో పంటల సాగు చేస్తున్న తీరును ఆయన ఆదివారం ఆమిదాలగొందిలో పరిశీలించారు. 44 ఎకరాల్లో చేపట్టిన రెయిన్‌ ఫెడ్‌ పెల్లైటెజ్డ్‌ పీఎండీఎస్‌ కాంపాక్ట్‌ బ్లాక్‌ను, ఏ గ్రేడ్‌ మోడల్‌, బుళ్లసముద్రంలో దానిమ్మ, ఏ– గ్రేడ్‌ మోడల్‌, బూదిపల్లిలో 54 ఎకరాల్లో సాగు చేసిన పీఎండీఎస్‌ పద్ధతులతో సాగు చేసిన పంటల పరిస్థితిని క్షేత్రస్థాయిలో పరిశీలించి రైతులతో మాట్లాడారు. ప్రకృతి వ్యవసాయ విధానాలు, రైతుకు కలిగే లాభాలు, తగ్గుతున్న పెట్టుబడి, పీఎండీఎస్‌ విత్తనాలు విత్తే విధానానం, ఏ గ్రేడ్‌, ఏటీఎం, పీఎండీఎస్‌ అమలు, విత్తన గుళీకరణ, జీవ వైవిధ్య పంటల ప్రాధాన్యతతో పాటు తక్కువ వర్షపాత నమోదు పరిస్థితుల్లో పంట వ్యవస్థలను స్థిరంగా కొనసాగే విధానాలపై రైతులకు అవగాహన కల్పించాలని ప్రకృతి వ్యవసాయ సిబ్బందికి సూచించారు. కార్యక్రమంలో జిల్లా కమ్యూనిటీ ఇన్నోవేషన్‌ ఆఫీసర్‌ (సీటీఅండ్‌ఐఓ) లక్ష్మానాయక్‌, ఎస్‌పీఎ డాక్టర్‌ నవీన్‌, మాస్టర్‌ ట్రైనర్‌ రమేష్‌, సిబ్బంది, రైతులు పాల్గొన్నారు. సత్యసాయి సేవా స్ఫూర్తిని ప్రపంచానికి చాటడమే లక్ష్యంప్రశాంతి నిలయం: సత్యసాయి సేవా స్ఫూర్తిని ప్రపంచానికి చాటడమే లక్ష్యంగా మానవ సేవ అనే ఇతివృత్తంతో లఘుచిత్రోత్సవం నిర్వహించామని సత్యసాయి సేవా సంస్థల ఆల్‌ ఇండియా ప్రెసిడెంట్‌ నిమిష్‌ పాండ్య పేర్కొన్నారు. ఆదివారం ప్రశాంతి నిలయంలోని సాయికుల్వంత్‌ సభా మందిరంలో సత్యసాయి లఘు చిత్రోత్సవాన్ని ఘనంగా నిర్వహించారు. సత్యసాయి శతజయంతి వేడుకలను పురస్కరించుకుని లఘు చిత్రోత్సవానికి మూడు విభాగాల్లో 184 మంది రిజిస్ట్రేషన్‌ చేసుకున్నారు. 33 లఘు చిత్రాల్లో 27ను షార్ట్‌ లిస్ట్‌ చేశారు. అందులో 10 చిత్రాలను ఎంపిక చేశారు. న్యాయ నిర్ణేతలుగా అమరన్‌ చిత్రానికి జాతీయ అవార్డు పొందిన దర్శకుడు పెరియసామి, నేషనల్‌ అవార్డు గ్రహీత, నిర్మాత శశికల్‌ నాయర్‌, ఫిల్మ్‌ఫేర్‌ అవార్డు గ్రహీత, రచయిత అమిత్‌ రాయ్‌, నాటక రంగ నటుడు నాసిర్‌ అబ్దుల్లా వ్యవహరించారు. ఈ సందర్భంగా ఉత్తమ చిత్రాలు అవార్డులకు ఎంపికై నా వారికి సత్యసాయి సెంట్రల్‌ ట్రస్ట్‌ మేనేజింగ్‌ ట్రస్టీ ఆర్‌జె.రత్నాకర్‌ రాజు, ట్రస్ట్‌ సభ్యుడు చక్రవర్తి తదితరులు చేతుల మీదుగా బహుమతులను అందజేశారు. కార్యక్రమంలో ప్రముఖ నిర్మాత భరత్‌ బాల, జెట్‌ సింథసిస్‌ సీఈఓ రాజన్‌ నవానీ తదితరులు పాల్గొన్నారు.

ఓడీచెరువు: అధికార దర్పంతో టీడీపీ నేతలు రెచ్చిపోతున్నారు. జిల్లా వ్యాప్తంగా ఎక్కడికక్కడ సహజ సంపదను దోచేస్తున్నారు. ఓడీ చెరువు మండల పరిధిలోని తిప్పేపల్లి చెరువులో యథేచ్ఛగా మట్టిని తరలిస్తుండటంతో రైతులు లబోదిబోమంటున్నారు. పంట భూములు పాడైపోతున్నాయని ఆవేదన వ్యక్తం చేస్తున్నారు. అధికారులకు ఎన్నిసార్లు విన్నవించినా పట్టించుకోవడంలేదంటున్నారు. ఇందులో భాగంగానే ఆదివారం స్థానిక రైతులు మట్టి మాఫియాతో గొడవకు దిగారు. అయితే వారు మాత్రం ఇది మా ప్రభుత్వం.. మా ఇష్టం.. మమ్మల్ని ఆపేదెవరంటూ దౌర్జన్యానికి దిగారు. జేసీబీలు పెట్టి ఎడాపెడా మట్టిని తవ్వేస్తూ ట్రాక్టర్ల ద్వారా తరలిస్తూ రూ.లక్షలు ఆర్జిస్తున్నారని గ్రామస్తులు చెబుతున్నారు. ఎలాంటి అనుమతులు లేకున్నా కేవలం అధికారం అండగా ఉందని మట్టిని అక్రమంగా తరలిస్తున్నారని రైతులు వాపోతున్నారు. కనీసం ఇప్పటికై నా అధికారులు స్పందించి తిప్పేపల్లి చెరువును పరిశీలించి, మట్టి తవ్వకాలపై సమగ్ర విచారణ జరిపి అక్రమార్కులపై చర్యలు తీసుకోవాలని గ్రామస్తులు కోరుతున్నారు. తిప్పేపల్లి చెరువులో యథేచ్ఛగా మట్టి తవ్వకాలు అడ్డుకున్న గ్రామస్తులకు హెచ్చరికలు

కణేకల్లు: ఓవైపు వర్షాభావం.. మరోవైపు కరువు కరాళ నృత్యం...దుర్భర పరిస్థితులు అనుభవిస్తున్న సమయంలో శనివారం రాత్రి కురిసిన భారీ వర్షంతో హనకనహళ్‌ గ్రామం జలదిగ్బంధంలో చిక్కుకుంది. గ్రామానికి నలుదిక్కులా ఉన్న వంకలు ఒక్కసారిగా వరదనీటి ఉధృతికి పొంగిపొర్లాయి. గ్రామాన్ని వరదనీరు చుట్టుముట్టడంతో రాకపోకలు స్తంభించి.. జనం బిక్కుబిక్కుమని గడుపుతున్నారు. మిగిలిన సీజన్లలో ఊరంతా బాగానే ఉంటున్నా ... వర్షాకాలం వచ్చిందంటే ఆ ఊరి జనానికి ఓ వైపు ఆనందం.. మరోవైపు ఆందోళన వెంటాడడం పరిపాటిగా మారింది. కణేకల్లు మండలంలోని హనకనహళ్‌ గ్రామస్తులు వర్షాకాలంలో దయనీయ పరిస్థితిని ఎదుర్కొంటున్నారు. మండల కేంద్రానికి హనకనహళ్‌ సుదూర గ్రామం. కణేకల్లుకు 18 కిలోమీటర్ల దూరంలో గ్రామం ఉంటుంది. అయితే బెళుగుప్ప మండల కేంద్రానికి 5 కిలోమీటర్ల దూరంలో ఉంటుంది. ఈ గ్రామం చుట్టూ వంకలు ఉన్నాయి. హనకనహళ్‌ నుంచి సొల్లాపురానికి వెళ్లే మార్గంలో ఊరికి దగ్గరలో సుమారు 200 మీటర్ల దూరంలో చిన్న వంక ఉంది. ఈ వంకకు మరో 500 మీటర్ల దూరంలో చెరువు వంక ఉంది. హనకనహళ్‌ నుంచి బెళుగుప్ప కు వెళ్లే దారిలో గ్రామ శివారులో పెద్ద వంక ఉంది. హనకనహళ్‌ చుట్టుపక్కల ఉన్న బెలుగుప్ప మండలానికి చెందిన తగ్గుపర్తి, రాంసాగరం, గంగవరం, బెళుగుప్ప తదితర ప్రాంతాల్లో వర్షాలొస్తే మూడు వంకల్లో వరదనీరు ఉధృతంగా ప్రవహిస్తుంది. శనివారం రాత్రి హనకనహళ్‌తోపాటు చుట్టుపక్కల గ్రామాల్లో భారీ వర్షానికి వంగలు, వాగులు పొంగిపొర్లాయి. దీంతో ఈ గ్రామం జలదిగ్బంధంలో చిక్కుకుంది. వాహనాల రాకపోకలు నిలిచిపోయాయి. ఉరవకొండ నుంచి హనకనహళ్‌ మీదుగా కళ్యాణదుర్గానికి వెళ్లే ఆర్టీసీ బస్సు ఉదయం చెరువు వంక దాకా వచ్చి వెనక్కి వెళ్లిపోయింది. వంక ఉధృతి తగ్గే దాకా రాకపోకలు పునరుద్ధరణ ఉండదు. బిక్కుబిక్కుమంటూ గడుపుతున్న రోజులెన్నో.. సొల్లాపురం వెళ్లే మార్గంలో రెండు వంకలు, బెళుగుప్ప మార్గంలో పెద్ద వంకలపై బ్రిడ్జిలు నిర్మించాలంటూ అనేకసార్లు ప్రజాప్రతినిధులు, అధికారులకు కోరినా ఎవ్వరూ కరుణించడం లేదని గ్రామస్తులు ఆవేదన వ్యక్తం చేస్తున్నారు. కాన్పులు, ఇతరత్రా అత్యవసర పరిస్థితుల్లో ఆస్పత్రులకు వెళ్లలేని దయనీయ పరిస్థితి ఉంది. బెళుగుప్ప మార్గంలో ఒకే ఒక వంక ఉందని,ఈ వంకౖపైనెనా బ్రిడ్జి నిర్మిస్తే బెళుగుప్ప వెళ్లొచ్చని, అటు నుంచి జిల్లా కేంద్రమైన అనంతపురం వెళ్లొచ్చని ప్రజలు చెప్తున్నారు. వర్షాకాలం వచ్చిందంటే వంకలు పారితే ఎటూ వెళ్లలేక దేవుడిపై భారం వేసి గడిపిన రోజులెన్నో ఉన్నాయని ప్రజలు నిట్టూరుస్తున్నారు. వంకలు పారితే స్కూళ్లకు సెలవే.. వంకలు పారితే పాఠశాలలు, గ్రామ సచివాలయాలు, ఆరోగ్య ఉపకేంద్రాల్లో పని చేసే ఉద్యోగులు గ్రామంలోకి చేరుకోలేరు. పాఠశాలలకు వెళ్లాల్సిన ఉపాధ్యాయులు అనంతపురం నుంచి హనకనహళ్‌కు అద్దె జీపుల్లో రోజూ వచ్చి వెళ్తుంటారు. ఉదయం విధులకు రావడం.. సాయంత్రం ఇళ్లకు వెళ్లడం పరిపాటి. ఈ గ్రామంలో ప్రాథమిక పాఠశాలతోపాటు హైస్కూల్‌ కూడా ఉంది. వంకలొస్తే స్కూల్‌కు కూడా హాలిడేనే. సచివాలయ, ఆరోగ్య ఉపకేంద్రాల్లో పని చేసే ఉద్యోగుల పరిస్థితి కూడా అంతే. గ్రామాన్ని చుట్టుముట్టిన వరదనీరు భారీ వర్షంతో పొంగిపొర్లుతున్న వంకలు స్తంభించిన రాకపోకలు వానొచ్చిందంటే ఓ వైపు ఆనందం.. మరోవైపు ఆందోళన దయనీయ స్థితిని గడుపుతున్న గ్రామస్తులు

స్వాతంత్య్రం వచ్చి 80 ఏళ్లవుతున్నా మా తలరాతలు మాత్రం మారడం లేదు. మా గ్రామం ఓ చిన్న ద్వీపకల్పంలా ఉంది. వర్షాకాలం వస్తే కంటిమీద కనుకు ఉండదు. రాకపోకలు పూర్తిగా స్తంభించిపోతాయి. అత్యవసర పరిస్థితుల్లో ఎక్కడి వెళ్లాలో అర్థం కాదు. పొరుగు ప్రాంతాలతో సంబంధాలు తెగిపోతాయి. ఇంకెన్నాళ్లీ కష్టాలు పడాలి? మాకు మోక్షం ఎప్పుడు లభిస్త్తుంది.? జిల్లా కలెక్టర్‌ స్పందించి అపరిష్కృతంగా ఉన్న బ్రిడ్జిల సమస్య పరిష్కరించాలి. – గలిబే అనిల్‌కుమార్‌, హనకనహళ్‌ ఒక్క బ్రిడ్జినైనా నిర్మించండి సొల్లాపురం మార్గంలో రెండు వంకలుంటే... బెళుగుప్ప మార్గంలో ఒక వంక మాత్రమే ఉంది. దయనీయ పరిస్థితులను అనుభవిస్తున్న గ్రామాన్ని పాలకులు పట్టించుకోవడంలేదు. కనీసం ఒక వంకౖపైనెనా బ్రిడ్జి కడితే మా ఊరికి మోక్షం లభించినట్లే. ఒక బ్రిడ్జి నిర్మాణానికై నా అధికారులు చర్యలు తీసుకోవాలి. ఈ బ్రిడ్జి నిర్మిస్తే మా గ్రామానికి కుడివైపునున్న బెళుగుప్ప కై నా వెళ్లగలుగుతాం. జలదిగ్బంధం నుంచి బయటపడుతాం. – శివరాజ్‌, హనకనహళ్‌

అనంతపురం సెంట్రల్‌: తెల్లవారుజామున మూడిళ్లలో దొంగతనాలకు పాల్పడిన వ్యక్తిని పోలీసులు సాయంత్రానికల్లా కటాకటాల వెనక్కి పంపించారు. వన్‌టౌన్‌ ఎస్‌ఐ తిరుపాల్‌ తెలిపిన వివరాల మేరకు.. నగరంలోని బోయగేరిలో ఆదివారం తెల్లవారుజామున హరికిరణ్‌ కుటుంబ సభ్యులు ఇంట్లో నిద్రిస్తుండగా దొంగ చొరబడ్డాడు. హఠాత్తుగా నిద్రలేచిన వారిని ఇనుపరాడ్డుతో బెదిరించి హరికిరణ్‌ భార్య మెడలోని బంగారు తాళిబొట్టు గొలుసు, సెల్‌ఫోన్‌ లాక్కున్నాడు. అలాగే ఎదురుగా ఉంటున్న వినేష్‌ ఇంట్లోకి చొరబడి సెల్‌ఫోన్‌, నాగరాజు అనే వ్యక్తికి చెందిన ద్విచక్ర వాహనాన్ని ఎత్తుకెళ్లాడు. బాధితులు ఫిర్యాదు చేసిన వెంటనే రంగంలోకి దిగిన పోలీసులు.. రాప్తాడు మండలం చిన్మయనగర్‌కు చెందిన కటిక సాయిప్రసాద్‌ ఈ దొంగతనాలకు పాల్పడినట్లు నిర్ధారించుకున్నారు. ‘ఎన్‌న్‌టీఆర్‌ మార్గ్‌’లో ఉన్న అతన్ని అరెస్ట్‌ చేశారు. దొంగతనం చేసిన వస్తువులన్నీ రికవరీ చేశారు. రైతు ఆత్మహత్యాయత్నం విడపనకల్లు: మండల కేంద్రానికి చెందిన ఓ రైతు అప్పుల బాధ తాళలేక పురుగుల మందు తాగి ఆత్మహత్యయత్నం చేసిన ఘటన ఆదివారం వెలుగులోకి వచ్చింది. వివరాలు.. విడపనకల్లుకు చెందిన దూదేకుల మహబూబ్‌ బాషా వ్యవసాయం, కుటుంబ పోషణ, పిల్లల పెళ్లిళ్ల కోసం దాదాపు రూ.60 లక్షల వరకు అప్పు చేశాడు. ఏటా పంటలు సాగు చేస్తున్నా పంటలు పండక పెట్టుబడి గిట్టుబాటు కాకపోవడంతో అప్పు తీర్చే మార్గం లేకపోయింది. ఈ ఏడాది కూడా వర్షాభావంతో పంటలు చేతికొచ్చే మార్గం కనిపించలేదు. దీనినికితోడు రుణదాతల నుంచి ఒత్తిళ్లు అధికమయ్యాయి. దీంతో అధికార పార్టీకి చెందిన ఓ నాయకుడు పంచాయితీ చేశాడు. తనకు కొంతకాలం గడువు ఇవ్వాలని కోరాడు. అయినా ఒత్తిళ్లు అధికమై మనస్థాపం చెందిన మహబూబ్‌బాషా శనివారం పురుగుల మందు తాగి ఆత్మహత్యాయత్నం చేశాడు. బంధువులు గమనించి అతన్ని వెంటనే చికిత్స నిమిత్తం కర్ణాటక రాష్ట్రం బళ్లారిలోని ఓ ప్రైవేట్‌ ఆస్పత్రికి తరలించారు. కాగా, దీనిపై పోలీసులను అడగ్గా తమ దృష్టికి రాలేదని సమాధానం ఇచ్చారు.

పెనుకొండ రూరల్‌: వైఎస్సార్‌సీపీ అధినేత, మాజీ ముఖ్యమంత్రి వైఎస్‌ జగన్‌మోహన్‌రెడ్డిని రాజకీయంగా దెబ్బతీసే కుట్రలో భాగంగానే తిరుమల లడ్డూ కల్తీ అంటూ చంద్రబాబు ప్రభుత్వం తప్పుడు ఆరోపణలు చేసిందని వైఎస్సార్‌సీపీ జిల్లా అధ్యక్షురాలు ఉషశ్రీచరణ్‌ విమర్శించారు. తిరుమల లడ్డూలో కల్తీ జరగలేదని ఈడీ తేల్చడంతో వారి కుట్రలు బయట పడ్డాయన్నారు. ఆదివారం మండలంలోని మావటూరు ఆంజనేయస్వామి ఆలయంలో టెంకాయలు కొట్టి మొక్కులు చెల్లించుకున్నారు. అనంతరం ఆమె విలేకరులతో మాట్లాడారు. కేవలం వైఎస్సార్‌పీపీని ఎలాగైనా దెబ్బకొట్టాలనే ఉద్దేశంతోనే పరమ పవిత్రమైన తిరుమల లడ్డ్డూలో పంది కొవ్వు కలిసిందంటూ చంద్రబాబు అండ్‌ కో రాద్దాంతం చేశారన్నారు. లేని వివాదాన్ని తెరపైకి తెచ్చి రాష్ట్రంలోనే కాదు ప్రపంచ వ్యాప్తంగా వేంకటేశ్వరస్వామి భక్తుల మనోభావాలను దెబ్బతీసే ప్రయత్నం చేశారన్నారు. తాజాగా ఈడీ విచారణలో తిరుమల లడ్డూ కల్తీ జరగలేదని తేల్చి చెప్పిందన్నారు. దేశ వ్యాప్తంగా ఉన్న వేంకటేశ్వరస్వామి భక్తులకు, రాష్ట్ర ప్రజలకు కూటమి పార్టీల నేతలు బేషరతుగా క్షమాపణ చెప్పాలని డిమాండ్‌ చేశారు. కలియుగ ప్రత్యక్ష దైవం వేంకటేశ్వరస్వామి ఆగ్రహానికి అధికార పార్టీ నేతలు గురికాకతప్పదని, కర్మ రిటర్న్‌ కచ్చితంగా ఉంటుందన్నారు. మంత్రి సవిత లడ్డూ వివాదంలో వైఎస్‌ జగన్‌ను తీవ్రంగా విమర్శించారన్నారు. ఈడీ క్లీన్‌ చిట్‌ ఇవ్వడంపై కూడా ఆమె స్పందించాలన్నారు. రాజకీయ లబ్ధి కోసం వ్యక్తిత్వ హననానికి పాల్పడం మంత్రికి పారిపాటిగా మారిందన్నారు. గొడ్డలి పార్టీ అని ఎద్దేవా చేసే మంత్రులకు ఈడీ క్లీన్‌ చిట్‌ ఒక చెంప పెట్టు లాంటిదన్నారు. తిరుమల లడ్డూలో కల్తీ జరగలేదని ఈడీ తేల్చడం కూటమికి చెంపపెట్టులాంటిది వైఎస్సార్‌సీపీ జిల్లా అధ్యక్షురాలు ఉషశ్రీచరణ్‌

బొమ్మనహాళ్‌: మండలంలోని నేమకల్లు గ్రామ శివారులోని ఓ పాడుబడ్డ బావిలో ఎలుగు బంటి కనిపించిన ఘటన ఆదివారం కలకలం సృష్టించింది. ప్రమాదవశాత్తు బావిలో పడి ఉంటుందని స్థానికులు అనుమానిస్తున్నారు. గ్రామస్తుల సమాచారంతో అటవీశాఖ డిప్యూటీ రేంజ్‌ ఆఫీసర్‌ దామోదర్‌రెడ్డి, అటవీశాఖ సిబ్బంది ఘటనా స్థలిని పరిశీలించారు. బావి చుట్టూ ఉన్న ముళ్ల కంపను తొలగించడంతో ఎలుగుబండి బయటకు వచ్చి సమీపంలోని కొండల వైపు పరుగులు తీసింది. ఇటీవల గ్రామ సమీపంలోని కంకర క్వారీలో ఎలుగు బంటి ఇరుక్కుపోవడం, తాజాగా పాడుబడ్డ బావిలో మరో భల్లూకం చిక్కుకుపోయిన దృష్ట్యా వన్యప్రాణుల రక్షణకు చర్యలు చేపట్టాలని గ్రామస్తులు కోరుతున్నారు. బావిలో ఎలుగుబంటి

రొద్దం: వ్యవసాయానికి నాణ్యమైన విద్యుత్‌ సరఫరా చేయాలని వైఎస్సార్‌సీపీ జిల్లా అధ్యక్షురాలు ఉషశ్రీచరణ్‌ డిమాండ్‌ చేశారు. అనధికార కోతలను అరికట్టాలని, వ్యవసాయానికి పగటి పూట 9 గంటల నిరంతరాయ విద్యుత్‌ సరఫరా చేయాలని డిమాండ్‌ చేస్తూ రొద్దం విద్యుత్‌ సబ్‌స్టేషన్‌ ఎదుట రైతులతో కలిసి శనివారం ధర్నా నిర్వహించారు. ఈ సందర్భంగా వైఎస్సార్‌సీపీ జిల్లా అధ్యక్షురాలు మాట్లాడుతూ వర్షాభావంతో పంటలు ఎండిపోయి, రైతులు దారుణ పరిస్థితులు అనుభవిస్తున్నా సీఎం చంద్రబాబు పట్టించుకోలేదన్నారు. కరువుతో ప్రజలు అల్లాడుతున్నా కనీసం కలెక్టర్లతో సమీక్ష కూడా చేయలేదని అన్నారు. తమ పార్టీ అధినేత, మాజీ ముఖ్యమంత్రి వైఎస్‌ జగన్‌మోహన్‌రెడ్డి రైతుల కష్టాలపై పోరాటం చేస్తున్నట్లు గుర్తు చేశారు. గతంలో వ్యవసాయం దండగ అని చెప్పిన చంద్రబాబు.. మళ్లీ తిరిగి అధికారంలోకొచ్చిన తర్వాత అదే నిజమని నిరూపిస్తున్నారు. గత జగనన్న ప్రభుత్వంలో పంటల బీమా ప్రభుత్వమే చెల్లించి రైతులను ఆదుకున్నామన్నారు. ఇప్పుడు రైతుల పరస్థితి ఇంత దారుణంగా ఉన్నా పంట బీమా రైతులే కట్టుకోవాలని ఆదేశాల్విడం రైతుల పట్ల చంద్రబాబుకు ఉన్న ప్రేమ ఎలాంటిదో అర్థమవుతోందన్నారు. గత ప్రభుత్వంలో ఇన్‌పుట్‌ సబ్సిడీ ఏ పంటల కాలంలో ఆ పంటకే సకాలంలో చెల్లించిన ఘనత వైఎస్‌ జగన్‌కే దక్కుతుందన్నారు. కూటమి ప్రభుత్వంలో రెండేళ్లు గడుస్తున్నా ఏ ఒక్కరైతుకూ ఇన్‌పుట్‌ సబ్సిడీ చెల్లించిన దాఖలాలు లేవని చెప్పారు. రాయలసీమ ఎత్తుపోతుల పథకాన్ని తెలంగాణ ముఖ్యమంత్రికి తాకట్టు పెట్టారని ఆరోపించారు. జిల్లా మంత్రికి కరువు కనిపించలేదా? రైతులు ఇన్ని కష్టాలు పడుతున్నా జిల్లా ఉన్న మంత్రి సవితకు కరువు కనిపించలేదా? అంటూ ఉషశ్రీచరణ్‌ ఆగ్రహం వ్యక్తం చేశారు. జిల్లాలో వర్ష పాతం అతితక్కుగా ఉన్నా..రైతులు సాగు చేసిన వివిధ పంటలు ఎండుతున్నా కరువు నివారణకు మంత్రి సవిత ఎలాంటి చర్యలు చేపట్టలేదన్నారు. హంద్రీ–నీవా ద్వారా పెన్నా నది నుంచి పేరూరు డ్యాంకు నీరు తరలిస్తే దాని ద్వారా రైతుల వ్యవసాయ బోర్లలో సమృద్ధిగా నీరు వచ్చేదన్నారు. తమ హయాంలో పేరూరు డ్యాంకు నీరు తీసుకురావడంతో వ్యవసాయ బోర్లలో నీరు సమృద్ధిగా వచ్చేదని అన్నారు. హంద్రీ నివా కాలు సిమెంట్‌తో బెడ్డింగ్‌ వేస్తే నీరు ఇంకడానికి వీలు పడదన్నారు. దీంతో బోర్లలో భేగర్భజాలాలు పెరగడానికి వీలు పడదన్నారు. రాయలసీమ ఎత్తుపోతల పథకం ద్వారా సాగు, తాగునీటి ఇచ్చి ఆదుకోవాలని, బకాయిపడిన అన్నదాత సుఖీభ రైతులకు అందజేయాలని, గిట్టుబాటు ధరలు కల్పించాలని, రొద్దం, గోరంట్ల, పెనుకొండ, పరిగి, సోమందేపల్లి మండలాలను కరువు మండలాలుగా ప్రకటించాలని డిమాండ్‌ చేశారు. అనంతరం ట్రాన్స్‌కో ఏఈ శ్రీనివాస్‌మూర్తితో మాట్లాడారు. రైతులకు పగటి వేళలో 9 గంటల విద్యుత్‌ సరఫరా చేయాలని, వ్యవసాయ మోటార్లకు విద్యుత్‌ కనెక్షన్ల కోసం దరఖాస్తు చేసుకున్న రైతులకు సీనియార్టీ ప్రకారం మెటీరియల్‌ అందించాలని వినతిపత్రం అందించారు. కార్యక్రమంలో మండల కన్వీనర్‌ బి.తిమ్మయ్య, నాయకులు ఎన్‌.నారాయణరెడ్డి, వినయ్‌రెడ్డి, జెట్టి శ్రీనివాస్‌రెడ్డి, లక్ష్మీనారాయణరెడ్డి, సినిమా నారాయణ, చిలకల రవి, పంచాయతీ కన్వీనర్‌ ఇస్లాపురం అంజి, ఎస్సీసెల్‌ శివన్న, శంకర, ఎం.తిమ్మయ్య, పలువురు రైతులు, నాయకులు, కార్యకర్తలు, అనుబంధ సంఘాల కమిటీల సభ్యులు పాల్గొన్నారు. వైఎస్సార్‌సీపీ జిల్లా అధ్యక్షురాలు ఉషశ్రీచరణ్‌

● ట్రాక్టర్‌ను ఢీకొన్న సిమెంట్‌ ట్యాంకర్‌ ● బీటెక్‌ విద్యార్థి మృతి ● 8 మందికి గాయాలు తాడిపపత్రి రూరల్‌: వినాయక నిమజ్జనం విషాదం నింపింది. మండలంలోని ఆలూరు సమీపంలో ట్రాక్టర్‌ను సిమెంట్‌ ట్యాంకర్‌ ఢీకొన్న ఘటనలో బీటెక్‌ విద్యార్థి మృతి చెందాడు. మరో 8 మంది గాయపడ్డారు. అప్‌గ్రెడ్‌ సీఐ నారాయణరెడ్డి తెలిపిన మేరకు.. పట్టణంలోని సున్నపు గేరికి చెందిన నాగరాజు, పద్మావతి దంపతుల కుమారుడు జగదీష్‌ (20) స్థానిక సీవీఆర్‌ ఇంజినీరింగ్‌ కళాశాలలో బీటెక్‌ మూడో సంవత్సరం చదువుతున్నాడు. తన స్నేహితులతో కలిసి శుక్రవారం అర్ధరాత్రి ఆలూరు గ్రామ సమీపంలోని నీటికుంటలో వినాయక విగ్రహాన్ని నిమజ్జనం చేసిన అనంతరం ట్రాక్టర్‌లో తిరుగుపయనయ్యాడు. మార్గమధ్యంలో ఆలూరు వద్ద వీరు ప్రయాణిస్తున్న ట్రాక్టర్‌ను సిమెంట్‌ ట్యాంకర్‌ బలంగా ఢీకొంది. ప్రమాద ధాటికి ట్రాక్టర్‌ రెండు ముక్కలైంది. ఇంజిన్‌, ట్రాలీలు రోడ్డు పక్కన బోల్తా పడ్డాయి. ప్రమాదంపై సమాచారం అందుకున్న వెంటనే పోలీసులు సంఘటన స్థలానికి వెళ్లి గాయపడ్డ 9 మందిని 108లో తాడిపత్రి ప్రభుత్వ ఆసుపత్రికి తరలించారు. జగదీష్‌, పవన్‌, విష్ణువర్దన్‌, అశోక్‌ పరిస్థితి ఆందోళనకరంగా ఉండటంతో అనంతపురం ఆస్పత్రికి తరలించగా, చికిత్స పొందుతూ జగదీష్‌ మృతి చెందాడు. కుమారుడి మృతితో నాగరాజు, పద్మావతి దంపతులు గుండెలవిసేలా రోదించారు. వీరికి మరొక కుమారుడు ఉన్నట్లు తెలిసింది. ప్రమాదానికి కారణమైన తమిళనాడుకు చెందిన డ్రైవర్‌ మూర్తిపై కేసు నమోదు చేసి సిమెంట్‌ ట్యాంకర్‌ను స్వాధీనం చేసుకున్నట్లు సీఐ తెలిపారు.

పట్టణంలో ఆదివారం వినాయక నిమజ్జనాన్ని ప్రశాంత వాతావరణంలో నిర్వహించేందుకు పటిష్ట బందోబస్తు ఏర్పాటు చేశామని ఎస్పీ సతీష్‌కుమార్‌ తెలిపారు. శనివారం సాయంత్రం పట్టణంలోని ఏఎంఎస్‌ ఫంక్షన్‌ హాలులో బందోబస్తు సిబ్బందితో సమావేశం నిర్వహించారు. నిమజ్జన ఏర్పాట్లు, పోలీసుల విధులు, శాంతిభద్రతల పరిరక్షణపై దిశానిర్దేశం చేశారు. ఈ సందర్భంగా ఆయన మాట్లాడుతూ శోభాయాత్రలో డీజేలు, అధిక శబ్దం, రెచ్చగొట్టే నినాదాలకు తావులేకుండా చూడాలన్నారు. అత్యవసర సేవలకు అంతరాయం కలగకుండా ప్రత్యేక చర్యలు తీసుకోవాలని చెప్పారు. మద్యం సేవించి వాహనాలు నడిపే వారిపై ప్రత్యేక నిఘా ఉంచాలని, అనుమానాస్పద వ్యక్తుల కదలికలను గమనించాలని ఆదేశించారు. సామాజిక మాధ్యమాల్లో శాంతిభద్రతలకు విఘాతం కలిగించేలా, మత విద్వేషాలను రెచ్చగొట్టేలా పోస్టులు, వీడియోలు, సందేశాలు ప్రచారం చేసే వారిపై నిఘా ఉంచాలన్నారు. వదంతులు వ్యాప్తి చెందకుండా ఎప్పటికప్పుడు పరిస్థితిని పర్యవేక్షించాలని సూచించారు. సమావేశంలో అడిషనల్‌ ఎస్పీ మహేష్‌, సీఐలు అబ్దుల్‌ కరీం, ఆంజనేయులు, జనార్దన్‌, ప్రసాద్‌బాబు తదితరులు పాల్గొన్నారు.

● బినామీ కార్మికులే ఆసరాగా.. ● కాంట్రాక్టర్ల ఖజానాకు సొమ్ము ● అసలైన కార్మికులకు దుమ్ము ● నిబంధనలకు పాతర.. దోపిడీకి జాతర అనంతపురం న్యూటౌన్‌: శ్రీరామరెడ్డి తాగునీటి ప్రాజెక్టును కాంట్రాక్టర్లు ఆదాయ వనరుగా మార్చుకున్నారు. వీరికి కొందరు ఆర్‌డబ్ల్యూఎస్‌ అధికారులు సహకారం అందించడంతో చెలరేగిపోతున్నారు. నిన్నటి చెక్కు జారీ.. రీ కాల్‌ చేయడం, మరొకరి పేరుతో అదే మొత్తాన్ని చెక్కు జారీ చేసిన తతంగమే చక్కటి ఉదాహరణ. ఈ మొత్తం వ్యవహారంలో అధికార పార్టీ ప్రజాప్రతినిధులకు ఆప్తుడైన మడకశిర ఏరియా ప్రస్తుత కాంట్రాక్టర్‌ అడపా వెంకటరావుకు లబ్ధి చేకూర్చడానికి అధికారులు తహతహలాడినట్లు స్పష్టమవుతోంది. ఇలాంటి వెలుగుచూడని అవినీతి బాగోతాలు ఒక్కొక్కటిగా బయటపడుతున్నాయి. పీఎఫ్‌ జమలో చేతివాటం ఉమ్మడి అనంతపురం జిల్లాలో నీలకంఠాపురం శ్రీరామరెడ్డి వాటర్‌ ప్రాజెక్టు కింద రాయదుర్గం, కళ్యాణదుర్గం, మడకశిర, హిందూపురం, పీఏబీఆర్‌ హెడ్‌ వర్క్‌లో సుమారు 600 మంది కార్మికులు రెండు దశాబ్దాలుగా పనిచేస్తున్నారు. కార్మికులకు వేతనంతో పాటు ప్రావిడెంట్‌ ఫండ్‌ (పీఎఫ్‌) చెల్లించాలని చట్టం ఉన్నప్పటికీ 2021 – 22లో అప్పటి కాంట్రాక్టర్‌ లక్ష్మీకళ నాయుడు ఐదు నెలల సొమ్ము జమచేయలేదు. అయినా సదరు కాంట్రాక్టర్‌పై ఆర్‌డబ్ల్యూఎస్‌ ఎస్‌ఈ ఎటువంటి చర్యలూ తీసుకోలేదు. బినామీ కార్మికుల పేరుతో రూ.కోట్ల దోపిడీ లక్ష్మీ కళానాయుడు కాంట్రాక్టర్‌గా ఉన్న సమయంలో బినామీ కార్మికుల పేరుతో దోపిడీకి తెరలేపారు. వాస్తవానికి మడకశిర ప్రాంతంలోని ప్రాజెక్టులో సుమారు 100 మంది దాకా కార్మికులు పనిచేసేవారు. అయితే కాంట్రాక్టరుకు కలిగిన దుర్బుద్ధితో అక్కడ పనిచేసే కార్మికుల సంఖ్య అమాంతం 230కి పైగా చేరింది. రికార్డులలో మాత్రమే అదనంగా వచ్చి చేరిన ఈ 130 మందికి పైగా కార్మికుల పేర్లు ఉంటాయి. వాస్తవానికి క్షేత్రస్థాయిలో వారు కనిపించరు. నిబంధనల మేరకు కార్మికులందరి ఖాతాల్లో వేతనాలు జమవుతాయి. ఇందులో ఖాతాలలో జమ చేసే రూ.13 వేల వేతనంలోంచి బినామీ కార్మికులు రూ.8 వేల చొప్పున కాంట్రాక్టరుకు వెనక్కు తిరిగి ఇచ్చేవారని ఆనాటి కార్మికులు తెలిపారు. ఇలా లక్ష్మీ కళానాయుడు పనిచేసిన మూడేళ్ల కాంట్రాక్ట్‌ కాలంలో బినామీ కార్మికుల వేతనాల రూపంలో కనీసం రూ.8 కోట్ల మేరకు నిధుల దుర్వినియోగమైనట్లు విశ్వసనీయ సమాచారం. నీలకంఠాపురం శ్రీరామరెడ్డి తాగునీటి సరఫరా ప్రాజెక్టులో కాంట్రాక్టర్లు నిబంధనలకు పాతరేశారు. దోపిడీకి జై కొట్టారు. అసలైన కార్మికుల కడుపు కొట్టారు. క్షేత్రస్థాయి పనుల్లో కనిపించని కూలీల పేరుతో రూ.కోట్లు కొల్లగొట్టి ప్రాజెక్టును సొంత జేబు సంస్థగా మార్చుకోవడం చర్చనీయాంశమైంది.

ప్రశాంతి నిలయం: సత్యసాయి మిషన్‌ను మరింత విస్తృతంగా నడపడంలోనూ ఆయన ఆదర్శాలను ముందుకు తీసుకెళ్లడంలో మహిళల పాత్ర కీలకమని పలువురు వక్తలు అన్నారు. ప్రశాంతి నిలయంలో ప్రారంభమైన రెండు రోజుల విద్యావాహిని నెక్ట్స్‌జన్‌ జాతీయ సదస్సు శనివారం ముగిసింది. రెండో రోజు సాయి హీరా ఇంటర్నేషనల్‌ కన్వెన్షన్‌ సెంటర్‌లో బృంద చర్చలు, ఉపన్యాసాలు నిర్వహించారు.సత్యసాయి సేవా సంస్థల నిర్వహణలో మహిళల పాత్ర అన్న అంశంపై చర్చ సాగింది. సాయంత్రం సాయికుల్వంత్‌ సభా మందిరంలో సదస్సులో నిర్ణయించుకున్న అంశాలపై సభ్యులు ప్రతిజ్ఞ చేశారు. అనంతరం సత్యాసాయిని కీర్తిస్తూ సంగీత కచేరీ నిర్వహించారు. గణేశ్‌ లడ్డూ ముస్లిం మహిళ సొంతంధర్మవరం అర్బన్‌: పట్టణంలోని పార్థసారథినగర్‌లో సిద్ధి వినాయక ఉత్సవ కమిటీ సభ్యులు భారీ వినాయకుడిని కొలువుదీర్చారు. శనివారం వినాయక నిమజ్జనం సందర్భంగా నిర్వహించిన వేలంలో 12 కిలోల లడ్డూను ముస్లిం మహిళ షేక్‌ చాందిని రూ.1.45 లక్షలకు దక్కించుకున్నారు. వినాయకుడి వద్ద ఉన్న కలశాన్ని అంజలి అనే మహిళ రూ.15,500, కండువాను గుజ్జల మహేష్‌ రూ.3700కు దక్కించుకున్నారు. వినాయక విగ్రహాన్ని దాత సింగంశెట్టి సాయిపృథ్వీ వినాయక విగ్రహానికి రూ.45 వేలు వెచ్చించారు. 21న డయల్‌ యువర్‌ కలెక్టర్‌ ప్రశాంతి నిలయం: శ్రీ సత్యసాయి జిల్లా ప్రజల తాగునీటి సమస్యలు నేరుగా తెలుసుకొని, సత్వరమే పరిష్కరించేందుకు ఈ నెల 21న డయల్‌ యువర్‌ కలెక్టర్‌ కార్యక్రమం నిర్వహించనున్నట్లు డీఆర్‌ఓ కొండయ్య శనివారం ఓ ప్రకటనలో తెలిపారు. జిల్లాలోని పట్టణాలు, గ్రామాల్లో తాగునీటి సమస్యలుంటే నేరుగా డయల్‌ యువర్‌ కలెక్టర్‌ సెల్‌: 9032020868కు తెలియజేయొచ్చన్నారు. ప్రజల నుంచి వచ్చే ఫిర్యాదులను వెంటనే సంబంధిత అధికారుల దృష్టికి తీసుకుకెళ్లి సత్వరమే పరిష్కరించేందుకు జిల్లా యంత్రాంగం చర్యలు తీసుకుంటుందన్నారు. నమో నారసింహ.. కదిరి టౌన్‌: ఖాద్రీ లక్ష్మీనరసింహస్వామి దర్శనానికి శనివారం భక్తులు పోటెత్తారు. కదిరి పరిసర ప్రాంతాల నుంచే కాక కర్ణాటక, వైఎస్సార్‌ కడప, చిత్తూరు, ఉమ్మడి అనంతపురం జిల్లా నుంచి భక్తులు అధిక సంఖ్యలో తరలివచ్చి లక్ష్మీనారసింహుడిని దర్శించుకున్నారు. భక్తులకు తీర్థప్రసాదాలు, అన్నదానం చేశారు. భక్తులు తలనీలాలు సమర్పించుకుని, మొక్కులు తీర్చున్నారు.

● 5 ఎకరాల్లో మిరప పంట తొలగింపు వజ్రకరూరు: ఆ రైతు ఎన్నో ఆశలతో మిరప పంట సాగు చేశాడు. రూ.లక్షల పెట్టుబడి పెట్టాడు. అయితే విద్యుత్‌ అధికారుల నిర్లక్ష్యం కారణంగా కరెంటు సరఫరాలో తరచూ అంతరాయం ఏర్పడడంతో పంట ఎండుముఖం పట్టింది. దీంతో చేసేదేమి లేక పంటను తొలగించాడు. వివరాలు.. వజ్రకరూరు మండలం పొట్టిపాడు గ్రామానికి చెందిన రైతు రవీంద్రనాథ్‌రెడ్డి తన ఐదు ఎకరాల్లో మిరప పంట సాగుచేశాడు. ఎకరాకు రూ.1.25 లక్షల దాకా పెట్టుబడి పెట్టాడు. 15 రోజులుగా విద్యుత్‌ సరఫరాలో తీవ్ర అంతరాయం ఏర్పడుతుండడం.. 7 గంటల పాటు రావాల్సిన ఉచిత విద్యుత్‌ రెండు గంటలు మాత్రమే రావడంతో పంట వాడుముఖం పట్టింది. విద్యుత్‌ అధికారులను సంప్రదిస్తే మెయిన్‌ లైన్‌ సమస్య ఉందంటూ చేతులెత్తేశారు. ఇదే క్రమంలో నెలకొన్న వర్షాభావంతో పంట ఎండిపోయే దశకు చేరుకుంది. దీంతో చేసేదేమీ లేక శనివారం రైతు రవీంద్రనాథ్‌ రెడ్డి పంటను తొలగించాడు. ప్రభుత్వం తనను ఆదుకోవాలని కోరాడు. యువకుడి బలవన్మరణం అనంతపురం సెంట్రల్‌: యువకుడు బలవన్మరణం పొందిన ఘటన అనంతపురంలోని సాయినగర్‌లో జరిగింది. టూటౌన్‌ సీఐ పుల్లయ్య తెలిపిన మేరకు.. సాయినగర్‌కు చెందిన రామ్మూర్తి కుమారుడు భవాని శంకర్‌ (28) అవివాహితుడు. కుటుంబ కలహాలతో మనస్తాపానికి గురై శంకర్‌ శనివారం ఇంట్లో ఎవరూ లేని సమయంలో ఆత్మహత్యకు పాల్పడ్డాడు. ఈ మేరకు కేసు నమోదు చేసినట్లు టూటౌన్‌ సీఐ పుల్లయ్య తెలిపారు. ట్రాక్టర్‌లో తరలిస్తున్న గడ్డి దగ్ధం కుందుర్పి: ట్రాక్టర్‌లో తరలిస్తున్న గడ్డి దగ్ధమైన ఘటన కుందుర్పిలో జరిగింది. శెట్టూరు మండలం లక్ష్మంపల్లికి చెందిన రామకృష్ణ శనివారం కణేకల్లు నుంచి ట్రాక్టర్‌లో మొక్కజొన్న గడ్డి తరలిస్తుండగా కుందుర్పిలో ప్రమాదవశాత్తు విద్యుత్‌ వైర్లు తగిలాయి. ఈ క్రమంలోనే మంటలు చెలరేగడంతో గడ్డి కాలిపోయింది. స్థానికులు స్పందించి మంటలను ఆర్పడంతో పెను ప్రమాదం తప్పింది.

సోమందేపల్లి (పరిగి): శుభకార్యంలో పాల్గొనడంతో పాటు బంధుమిత్రులతో హాయిగా గడిపి వద్దామని బయలుదేరిన కుటుంబ సభ్యుల ఇళ్లలో విషాదం నిండింది. కారులో వెళ్తుండగా కుక్క అడ్డురావడంతో జరిగిన రోడ్డు ప్రమాదంలో సౌమ్య (46) అనే మహిళ దుర్మరణం చెందిన ఘటన కర్ణాటక రాష్ట్రం బెంగళూరు సమీపంలోని దేవినహళ్లి వద్ద శనివారం జరిగింది. సోమందేపల్లి మండల కేంద్రానికి చెందిన చంద్రశేఖరరెడ్డి కట్టెల మిల్లు యజమాని. ఇతనికి భార్య సౌమ్యతో పాటు కుమార్తె భూమిక, కుమారుడు సంజయ్‌ శ్రీనివాస్‌ ఉన్నారు. ఆదివారం బెంగళూరులో తమ సమీప బంధువుల గృహ ప్రవేశ కార్యక్రమంలో పాల్గొనేందుకు శనివారం ఉదయం చంద్రశేఖరరెడ్డి, సౌమ్య దంపతులతో పాటూ ఆయన కుమారుడు సంజయ్‌ శ్రీనివాస్‌, పిన్ని శ్యామలమ్మ, వదిన విమలమ్మతో కలిసి కారులో బయలుదేరి వెళ్లారు. దేవినహళ్లి వద్ద వెళ్తుండగా రోడ్డుకు అడ్డంగా కుక్క అడ్డురావడంతో దాన్ని తప్పించబోయి సడెన్‌గా బ్రేకు వేశాడు. దీంతో ఆగి ఉన్న కారును వెనకవైపు నుంచి వేగంగా వచ్చిన మరో కారు ఢీకొంది. దీంతో సౌమ్య ప్రయాణిస్తున్న కారు డోరు తెరుచుకుంది. వెంటనే కింద పడిపోయిన సౌమ్య పైనుంచి కారు దూసుకెళ్లింది. ఈ క్రమంలో సౌమ్య దుర్మరణం చెందగా కారులో ప్రయాణిస్తున్న వారికి గాయాలయ్యాయి. సోమందేపల్లిలో విషాదఛాయలు.. బెంగళూరుకు వెళ్లి తిరిగొస్తారని భావించిన కుటుంబ సభ్యులకు, బంధువులకు సౌమ్య విగతజీవిగా తిరిగి రావడంతో సోమందేపల్లిలో విషాదఛాయలు అలుముకున్నాయి. సౌమ్య భౌతిక కాయాన్ని శనివారం సాయంత్రం స్వగృహానికి తీసుకొచ్చారు. మృతదేహం వద్ద కుటుంబీకులు, బంధువులు గ్రామస్తులు కన్నీరుమున్నీరుగా విలపించారు. చూసేందుకు వచ్చిన వారి కళ్లు చెమర్చాయి. శుభకార్యానికి కారులో వెళ్తుండగా ప్రమాదం

ధర్మవరం: నేతన్న సేవలో, నేతన్న పింఛన్లలో చేనేత కార్మికులకు అన్యాయం చేశారని సీపీఐ నియోజకవర్గ కార్యదర్శి ముసుగు మధు ధ్వజమెత్తారు. పట్టణంలోని మార్కెట్‌యార్డులోనున్న చేనేత హ్యాండ్‌లూమ్‌ కార్యాలయం వద్ద శనివారం సీపీఐ నాయకులు, చేనేత కార్మిక సంఘం నాయకులు నిరసన వ్యక్తం చేశారు. ఈ సందర్భంగా సీపీఐ నియోజకవర్గ కార్యదర్శి ముసుగు మధు, చేనేత కార్మిక సంఘం జిల్లా ప్రధాన కార్యదర్శి వెంకటనారాయణలు మాట్లాడుతూ చేనేత కార్మికులకు ఉపశమనం అందించే విధంగా నేతన్న సేవలో పథకాన్ని ఆగస్టు 7న ప్రారంభించారన్నారు. కానీ అర్హుల ఖాతాలో డబ్బులు పడకపోవడంతో చేనేత కార్మికులు నిరాశకు గురయ్యారని తెలిపారు. అర్హులకు ఖాతాల్లో జమ చేస్తామని అధికారులు, ప్రజాప్రతినిధులు తేదీలు చెబుతున్నారే గానీ ఇంత వరకూ డబ్బులు వేయలేదన్నారు. ప్రస్తుతం చేనేత పింఛన్లలో మరోసారి అవినీతి అక్రమాలకు అధికారులు తెరలేపారన్నారు. ఇప్పటికై నా జిల్లాస్థాయి అధికారులు స్పందించి వెంటనే చర్యలు తీసుకుని నిజమైన చేనేత కార్మికులకు న్యాయం చేయాలని కోరారు. ఈ నిరసనలో సీపీఐ పట్టణ కార్యదర్శి రవికుమార్‌, ఎర్రంశెట్టి రమణ తదితరులు పాల్గొన్నారు. ‘స్థానిక’ ఎన్నికల పోలింగ్‌ కేంద్రాలు 1,320 అనంతపురం న్యూ టౌన్‌: ఎంపీటీసీ, జెడ్పీటీసీ స్థానాలకు త్వరలో జరగనున్న ఎన్నికలకు సంబంధించిన పోలింగ్‌ బూత్‌ల వివరాలను జిల్లా పరిషత్‌ అధికారులు విడుదల చేశారు. ఈ మేరకు శనివారం కలెక్టర్‌ ఆమోదం లభించిన జాబితాను మీడియాకు వెల్లడించారు. జిల్లాలోని 32 మండలాలలో మొత్తం 397 మండల ప్రాదేశిక సభ్యులను ఎన్నుకోనున్నారు. ఇందుకు గాను జిల్లావ్యాప్తంగా 1,320 పోలింగ్‌ స్టేషన్లను తుదివిడతగా గుర్తించినట్లు జిల్లా పరిషత్‌ అధికారులు వివరించారు.

మడకశిర రూరల్‌/మడకశిర: రబీ సీజన్‌లో నీటి వసతి ఉన్న రైతులను చియా సాగు చేసేలా ప్రోత్సహించాలని కలెక్టర్‌ శ్యాంప్రసాద్‌ అధికారులను ఆదేశించారు. శనివారం జిల్లా కలెక్టర్‌ కదిరేపల్లి వద్ద రైతు నరసింహప్ప ప్రకృతి వ్యవసాయ పద్ధతులు అనుసరించి సాగు చేసిన రాగి పంటను పరిశీలించారు. అనంతరం రైతుతో రాగి పంట సాగు విధానం, దిగుబడి, ఖర్చు, ప్రకృతి వ్యవ సాయ విధానం తదితర వాటిని అడిగి తెలుసుకున్నారు. కార్యక్రమంలో వ్యవసాయ, పట్టు పరిశ్రమశాఖ సహాయ సంచాలకులు కృష్ణమీనన్‌, హనుమంతనాయక్‌, తహసీల్దార్‌ ముకుంద, ఏఓ తిమ్మప్ప, ప్రకృతి వ్యవసాయం మాస్టర్‌ ట్రైనర్‌ రమేష్‌, రైతులు తదితరులు పాల్గొన్నారు. ప్రతి ఒక్కరూ పచ్చదనాన్ని కాపాడండి.. ప్రతి ఒక్కరూ పచ్చదనాన్ని కాపాడాలని కలెక్టర్‌ శ్యాంప్రసాద్‌ సూచించారు. శనివారం పట్టణంలోని వైఎస్సార్‌ సర్కిల్‌లో మున్సిపల్‌ శాఖ ఆధ్వర్యంలో స్వచ్ఛతా హీ సేవా కార్యక్రమం జరిగింది. కార్యక్రమంలో కలెక్టర్‌ పాల్గొని చెత్తా చెదారాన్ని తొలగించి మొక్కలు నాటారు. అనంతరం మున్సిపల్‌ కార్మికులకు ప్లాస్టిక్‌ రహిత బ్యాగులను పంపిణీ చేశారు. కార్యక్రమంలో మాజీ ఎమ్మెల్సీ గుండుమల తిప్పేస్వామి, మున్సిపల్‌ కమిషనర్‌ మురళీధర్‌, తహసీల్దార్‌ ముకుంద, మున్సిపల్‌ సిబ్బంది, మున్సిపల్‌ కార్మికులు, ప్రజలు తదితరులు పాల్గొన్నారు. అమరాపురం/గుడిబండ: అమరాపురం మండలంలోని బసవనపల్లిలో రైతు వక్క శంకరప్ప రెండు ఎకరాల్లో చేపట్టిన పెల్లైటెజ్డ్‌ పీఎం డీఎస్‌ విధానాన్ని కలెక్టర్‌ శ్యాంప్రసాద్‌ పరిశీలించారు. పరిస్థితి ప్రకృతి వ్యవసాయ పద్ధతులు, రైతులకు అందుతున్న సాంకేతిక సాయంపై అడిగి తెలుసుకున్నారు. ఎంటీ రమేష్‌ పెల్లైటెజ్డ్‌ పీఎం డీఎస్‌ విధానం, దానితీరు కలెక్టర్‌ క్షేత్రస్థాయిలో వివరించారు. గుడిబండ మండలంలోని జంబులబండ గ్రామం సమీపంలో ఉన్న పట్టుపరిశ్రమ ఫారాలను జిల్లా కలెక్టర్‌ క్షేత్ర స్థాయిలో సందర్శించారు. మడకశిర డివిజన్‌ సిరికల్చర్‌ సిబ్బంది చేపట్టిన క్షేత్రస్థాయి అభివద్ధి పనులపై పట్టు పరిశ్రమ సిబ్బందిని అభినందించారు. పట్టు పరిశ్రమ సంచాలకులు హనుమంతరాయప్ప, ఏడీఏ కృష్ణమీనన్‌, ఏఓ మంజునాథ్‌ తదితరులు పాల్గొన్నారు. కలెక్టర్‌ శ్యాంప్రసాద్‌

●ధర్మవరం 4వ వార్డులో 580కి పైగా చేనేత కుటుంబాలు ఉన్నాయి. చేనేతలను ఆదుకునేందుకు చందబ్రాబు ప్రభుత్వం అట్టహాసంగా అమలు చేసిన ‘నేతన్న సేవలో’ పథకం నిధులు మాత్రం కేవలం ఒక్కరికి మాత్రమే అందాయి. దీంతో మిగిలిన వారంతా రెండో విడతలో దరఖాస్తు చేసుకుని సాయం కోసం ఎదురుచూస్తున్నారు. బత్తలపల్లి మండలం అప్రాశ్చెర్వు గ్రామంలో పది మగ్గాలున్నా...ఒక్కరంటే ఒక్కరికీ ‘నేతన్న సేవలో’ పథకం సాయం అందలేదు. ఇదే గ్రామంలో 70 మంది దాకా అనర్హులకు నేతన్న సేవలో పథకం కింద ఒక్కొక్కరికి రూ.25 వేలు చొప్పున సాయం బ్యాంకు ఖాతాల్లో జమైంది. ధర్మవరం: చేనేత కార్మికుల సంక్షేమాన్ని చంద్రబాబు సర్కార్‌ విస్మరించింది. వైఎస్‌ జగన్‌ హయాంలో అమలు చేసిన ‘నేతన్న నేస్తం’ పథకాన్ని రద్దు చేసిన చంద్రబాబు సర్కార్‌ రెండేళ్లు చోద్యం చూసింది. దీంతో చేనేతల నుంచి తీవ్ర వ్యతిరేకత వ్యక్తం కావడంతో ఈ ఏడాది చేనేత దినోత్సవం రోజున ‘నేతన్న సేవలో’ అంటూ హడావుడి చేసింది. అయితే అందులోనూ అర్హులైన నేతన్నలకు వెన్నుపోటు పొడిచింది. గత రెండేళ్లతో పాటు ఈ ఏడాది ఆర్థిక సాయంతో కలిపి రూ.75 వేలు ఇస్తారని ఆశగా ఎదురు చూడగా... పథకం ఈ ఏడాది నుంచే అమలు చేస్తున్నామని చెప్పడంతో చేనేతలు తీవ్ర నిరాశకు లోనయ్యారు. అందులోనూ అనర్హులకు పెద్దపీట వేయడంపై సర్వత్రా విమర్శలు వెల్లువెత్తుతున్నాయి. దరఖాస్తులు బుట్టదాఖలు.. జిల్లా వ్యాప్తంగా 12,500 మంది నేతన్నలుంటే.. ఒక్క ధర్మవరం పట్టణంలోనే 10,500 మంది చేనేతలకు నేతన్న సేవలో పథకం కింద ఒక్కో కుటుంబానికి రూ.25,000 చొప్పున మొత్తం రూ.31.25 కోట్లు సాయం అందించేందుకు సర్కారు చర్యలు చేపట్టింది. దీన్ని ఇదే అదునుగా చేసుకొని అధికార పార్టీ కార్యకర్తలు, నాయకులు పెద్ద ఎత్తున అనర్హుల పేరిట దరఖాస్తు చేశారు. అర్హులైన చేనేతల దరఖాస్తులను బుట్టదాఖలు చేశారు. దీంతో పథకం కింద నిధులు విడుదల కాగానే మొదట అనర్హులకే సాయం అందింది. ఆర్భాటపు ప్రకటనలతో మభ్యపెడుతున్న మంత్రులు.. నేతన్న సేవలో పథకం కింద అర్హులైన చేనేతలు వేలాది మందికి సాయం జమ కాలేదు. దీంతో వారు కడుపు మండి రోడ్లపైకి వచ్చి పెద్ద ఎత్తున నిరసనలు చేపట్టారు. దీంతో ప్రభుత్వం మంత్రులు సవిత, సత్యకుమార్‌ యాదవ్‌లు అర్హుల నుంచి మళ్లీ దరఖాస్తులు తీసుకోవాలని చేనేత, జౌళీ శాఖ అధికారులను ఆదేశించారు. వారంలోపు సాయం జమ చేయాలని ఆదేశించారు. అప్పటి నుంచి నెలన్నరరోజులవుతున్నా ఇదిగో ఇస్తాం.. అదిగో ఇస్తామంటూ మభ్యపెడుతూ కాలం గడుపుతున్నారు. అధికార పార్టీ నేతలు, అధికారులు కుమ్మక్కు.. ‘నేతన్నసేవలో’ పథకంలో కూటమి పార్టీల నాయకులు, చేనేత జౌళీ శాఖ అధికారులు, సచివాలయ సిబ్బంది కుమ్మకై ్క పెద్ద ఎత్తున అవినీతికి పాల్పడినట్లు తెలుస్తోంది. అనర్హులకు సాయం జమ చేసి వారి నుంచి సగం మొత్తం అంటే రూ.12,500 తీసుకుని అర్హులైన చేనేతలకు మొండి చేయి చూపారు. రూ.లక్షలు కొల్లగొట్టినట్లు సమాచారం. ...నేతన్న సేవలో పథకం అమలు తీరుకు ఇవి మచ్చుకు కొన్ని ఉదాహరణలే.. ఇలాంటివి జిల్లా వ్యాప్తంగా ఉన్నట్లు తెలుస్తోంది. జగన్‌ హయాంలో అమలు చేసిన ‘నేతన్న నేస్తం’ను రద్దు చేసిన చంద్రబాబు సర్కార్‌.. రెండేళ్లుగా చేనేత కార్మికుల సంక్షేమాన్ని విస్మరించింది. తాజాగా ‘నేతన్న సేవలో’లో అంటూ పథకం ప్రారంభించినా పచ్చనేతల సిఫార్సులతో అనర్హులకు కట్టబెట్టి అర్హులకు అన్యాయం చేసింది. ‘నేతన్న సేవలో’ అర్హులకు అన్యాయం వేలాది మంది చేనేతలకు నేటికీ అందని సాయం కార్యాలయాల చుట్టూ తిరిగి విసిగి వేసారి పోతున్న నేతన్నలు రెండో విడతలో దరఖాస్తు చేసినా అందని ఆర్థిక సాయం

గుడిబండ: గ్రామాల్లో తాగునీటి సమస్యలు తలెత్తనీయొద్దని కలెక్టర్‌ శ్యాంప్రసాద్‌ పేర్కొన్నారు. శనివారం మండల పరిధిలోని కేకాతి గ్రామ సమీపంలోని శ్రీరామరెడ్డి తాగునీటి పథకం వాటర్‌ ట్యాంకులను ఆయన పరిశీలించారు. ఈ సందర్భంగా ఆయన మాట్లాడుతూ జిల్లా పరిధిలోని వందలాది గ్రామాలకు తాగునీరు అందించే అత్యంత కీలకమైన ప్రాజెక్టుల్లో నీలకంఠాపురం శ్రీరామరెడ్డి పథకం ఒకటన్నారు. ఈ పథకం ద్వారా గ్రామ ప్రజలకు తాగునీరు సక్రమంగా అందించాలని అధికారులకు సూచించారు. రోజూ గ్రామాల్లో వాటర్‌ ట్యాంకులను పూర్తి స్థాయిలో నిండేలా చూడాలన్నారు. ప్రజలకు నిరంతరాయంగా సురక్షిత జలాలు అందేలా అధికారులు చర్యలు తీసుకోవాలన్నారు. కార్యక్రమంలో ఎంపీడీఓ కేశవరెడ్డి, ఆర్‌డబ్ల్యూఎస్‌ అధికారులు పాల్గొన్నారు. సక్రమంగా విధులు నిర్వర్తించకపోతే ఇంటికే అమరాపురం: అధికారులు విధి నిర్వహణలో అలసత్వం వహిస్తే ఇంటికి వెళ్లాల్సి వస్తుందని కలెక్టర్‌ ఎ.శ్యాంప్రసాద్‌ హెచ్చరించారు. శనివారం మండల పరిధిలోని హలుకూరు సమీపంలో ఉన్న శ్రీరామరెడ్డి మంచినీటి పథకం ట్యాంకును ఆయన పరిశీలించారు. ఈ సందర్భంగా కలెక్టర్‌ మాట్లాడుతూ ప్రజల కనీస అవసరాల కోసం మంచినీటిని అందించే బాధ్యత సంబంధిత అధికారులపై ఉందన్నారు. రికార్డులో నమోదు సక్రమంగా చేయలేదని, సంబంధిత అధికారుల పర్యవేక్షణ కూడా కొరవడిందంటూ ఆగ్రహం వ్యక్తం చేశారు. తాగునీటి సమస్య మరోసారి తీవ్రంగా ఉన్నట్లు తన దృష్టికి వస్తే చర్యలు తప్పవని హెచ్చరించారు. కార్యక్రమంలో ఆర్‌డబ్ల్యూఎస్‌ డీఈ మనూనాయక్‌, ఎంపీడీఓ రామరావు తదితరులు పాల్గొన్నారు. కలెక్టర్‌ శ్యాంప్రసాద్‌

పుట్టపర్తి: వ్యక్తి మృతి వివాదాస్పదమైంది. పీహెచ్‌సీలో వేసిన ఇంజక్షన్‌ వికటించడం వల్లే మృతి చెందాడంటూ బంధువులు ఆరోపించడం సర్వత్రా చర్చనీయాంశంగా మారింది. వివరాలు.. నల్లమాడ మండలం వంకరకుంట గ్రామానికి చెందిన రాము(42) భార్య నారాయణమ్మతో కలిసి వినాయక చవితికి పుట్టపర్తి మండలం ఎనుములపల్లిలోని బంధువుల ఇంటికి వారం క్రితం వచ్చాడు. శుక్రవారం రాత్రి వినాయక నిమజ్జన కార్యక్రమంలో ఉత్సాహంగా పాల్గొన్నాడు. శనివారం ఉదయం ఒళ్లు నొప్పులు ఉన్నాయంటూ ఇంట్లో ఉన్న మాత్రలు మింగాడు. గంట తర్వాత ఒళ్లంతా దద్దుర్లు రావడంతో కుటుంబీకులు అతడిని ఎనుములపల్లి ప్రాధమిక ఆరోగ్య కేంద్రానికి తీసుకెళ్లారు. రామును పరిశీలించిన డాక్టర్‌ గాయత్రి అతడికి ఇంజక్షన్‌ వేసి కొద్దిసేపు అక్కడే ఉండాలని చెప్పారు. ఈ క్రమంలోనే రాముకు ఫిట్స్‌ రావడంతో డాక్టర్‌ మరో ఇంజక్షన్‌ వేశారు. వెంటనే 108కు సమాచారం ఇచ్చి రామును కొత్తచెరువు సీహెచ్‌సీకి పంపారు. పరీక్షించిన డాక్టర్‌ అప్పటికే అతను మృతి చెందినట్లు నిర్ధారించారు. ఈ క్రమంలోనే అక్కడికి చేరుకున్న బంధువులు పీహెచ్‌సీలో వేసిన ఇంజక్షన్‌ వికటించడం వల్లే రాము మృతి చెందాడని ఆరోపించడం చర్చనీయాంశమైంది. కరెంటు షాక్‌తో కూలీ మృతి యల్లనూరు: కరెంటు షాక్‌తో కూలీ మృతి చెందిన ఘటన మండలంలోని తిమ్మంపల్లి వద్ద జరిగింది. ఎస్‌ఐ రామాంజనేయరెడ్డి తెలిపిన మేరకు.. శనివారం తిమ్మంపల్లి సమీపంలోని ఓ వ్యవసాయ తోటలో మోటారును బయటకు తీసే పనులకు బుక్కాపురం గ్రామానికి చెందిన మునీంద్ర (50) వెళ్లాడు. జీపు సాయంతో మోటారును బయటకు తీస్తున్న సమయంలో మునేంద్ర గమనించకుండా పైపులు పైకి ఎత్తడంతో విద్యుత్‌ తీగలు తగిలి అక్కడికక్కడే మృతి చెందాడు. మునీంద్రకు భార్య లక్ష్మిదేవి, పిల్లలు ఉన్నారు. మృతుడి భార్య ఫిర్యాదు మేరకు ఎస్‌ఐ రామాంజనేయరెడ్డి కేసు నమోదు చేశారు. గడ్డి మందు తాగి యువతి ఆత్మహత్య బుక్కరాయసముద్రం: గడ్డి మందు తాగి యువతి ఆత్మహత్యకు పాల్పడిన ఘటన మండల పరిధిలోని కొత్తపల్లిలో జరిగింది. పొలీసులు తెలిపిన మేరకు.. కొత్తపల్లికి చెందిన రాజు, జానకి దంపతుల కుమార్తె అశ్వని (19) తన తల్లితో కలిసి నిత్యం కూలి పనులకు వెళ్తుండేది. శనివారం మధ్యాహ్నం ఇంట్లో ఉన్న గడ్డి మందు తీసుకుని గ్రామం బయటకు వెళ్లిన ఆమె.. అక్కడ గడ్డి మందు తాగి అపస్మారక స్థితిలో పడిపోయింది. స్థానికులు గుర్తించి కుటుంబీకులకు సమాచారం ఇచ్చారు. వారు వెళ్లి పరిశీలించగా, అప్పటికే అశ్వని మృతి చెందింది. అశ్వని ఆత్మహత్యకు దారి తీసిన కారణాలపై పోలీసులు ఆరా తీస్తున్నారు. ఉరివేసుకుని మహిళ .. తాడిపత్రిటౌన్‌: తాడిపత్రి పట్టణంలోని ఇందిరా నగర్‌లో నివాసం ఉంటున్న సునీత (40) ఉరివేసుకుని ఆత్మహత్య చేసుకుంది. పోలీసులు తెలిపిన వివరాల మేరకు.. సునీత, విజయ్‌ దంపతులకు ముగ్గురు ఆడపిల్లలు సంతానం. పెద్దమ్మాయి ఇడుపుల పాయ ట్రిపుల్‌ఐటీలో ఇంజినీరింగ్‌ చదువుతోంది. విజయ్‌ కారు డ్రైవర్‌గా పనిచేస్తూ కుటుంబాన్ని పోషించుకుంటున్నాడు. కొంతకాలంగా సునీత అనారోగ్యంతో బాధపడుతోంది. ఎన్ని ఆసుపత్రులు తిరిగినా నయం కాకపోవడంతో మనోవేదనకు గురైన ఆమె శుక్రవారం రాత్రి ఇంట్లో ఎవరూ లేని సమయంలో చీరతో ఉరి వేసుకుని ఆత్మహత్యకు పాల్పడింది. పోలీసులు కేసు నమోదు చేసి దర్యాప్తు చేస్తున్నారు. ● సునీతకు చికిత్సల నేపథ్యంలో కుటుంబంలో ఆర్థిక సమస్యలు తలెత్తాయని, దీంతో అప్పుడప్పుడు భార్యాభర్తలు గొడవ పడేవారని స్థానికులు చెబుతున్నారు. అనారోగ్యంతో పాటు కాపురంలో కలహాలతో మనస్తాపానికి గురైన ఆమె ఆత్మహత్యకు పాల్పడి ఉంటుందని పేర్కొన్నారు. ఆంధ్ర జట్టుకు భంగపాటు అనంతపురం: ఆంధ్రప్రదేశ్‌ ఫుట్‌బాల్‌ అసోసియేషన్‌ (ఏపీఎఫ్‌ఏ) ఆధ్వర్యంలో ఆర్డీటీ క్రీడా మైదానం వేదికగా సాగుతున్న డాక్టర్‌ తాలిమెరెన్‌ ఆవో అండర్‌–19 బాలికల జాతీయ ఫుట్‌బాల్‌ చాంపియన్‌ షిప్‌ పోటీల్లో ఆంధ్ర జట్టు వరుసగా రెండో ఓటమిని చవిచూసింది. శనివారం ఉదయం కర్ణాటక, ఏపీ జట్ల మధ్య మ్యాచ్‌ జరిగింది. కర్ణాటక జట్టు క్రీడాకారులు ఆట ప్రారంభం నుంచి దూకుడు ప్రదర్శిస్తూ వచ్చారు. కర్ణాటక జట్టు 7 గోల్స్‌ సాధించగా, ఏపీ జట్టు ఒక్క గోల్‌తో సరిపెట్టుకోవాల్సి వచ్చింది.

హిందూపురం టౌన్‌: వినాయక చవితి ఉత్సవాల్లో భాగంగా హిందూపురం పట్టణంలో గణేశ్‌ నిమజ్జనాన్ని నేడు (ఆదివారం) నిర్వహించనున్నారు. ఇప్పటికే ఇందుకు సంబంధించి అధికారులు అన్ని ఏర్పాట్లను పూర్తి చేశారు. ఆఖరి ఘట్టాన్ని ప్రశాంతంగా పూర్తి చేసేందుకు పెద్ద సంఖ్యలో పోలీసు బందోబస్తును కూడా ఏర్పాటు చేశారు. కోనేరు సిద్ధం.. గణపయ్యల నిమజ్జనానికి గుడ్డం కోనేరులో అధికారులు ఏర్పాట్లు పూర్తి చేశారు. దాదాపు 26 అడుగుల లోతుతో కోనేరును సిద్ధం చేశారు. భారీ విగ్రహాలను వాహనాలపై నుంచి కిందకు దించడానికి మున్సిపల్‌ శాఖ ఆధ్వర్యంలో రెండు క్రేన్‌లను ఉంచారు. గణపతి విగ్రహాలను క్రేన్‌ ద్వారా నేరుగా కోనేరులో నిమజ్జనం చేయడానికి అనుకులంగా ఏర్పాట్లు చేస్తున్నారు. మొత్తం నిమజ్జనం చేయడానికి కోనేరు వద్ద మూడు స్పాట్స్‌ ఏర్పాటు చేశారు. ఇప్పటికే కోనేరులో పూర్తిస్థాయిలో నీరు నింపారు. అలాగే చుట్టూ బారికేడ్లు కట్టారు. ఎంజీఎం స్కూల్‌ వైపు నుంచి కోనేరు పక్కకు రావడానికి దారి పక్కన కూడా బారికేడ్లు నిర్మించారు. కోనేరు చుట్టూ విద్యుత్‌ లైట్లను అమర్చారు. ప్రజలు నిమజ్జనాన్ని వీక్షించడానికి ఏర్పాట్లను చేశారు. కోనేరు వద్ద గంగా హారతి, సాంస్కృతిక కార్యక్రమాలను చేపట్టనున్నట్లు మున్సిపల్‌ కమిషనర్‌ మల్లికార్జున తెలిపారు. ఇది ప్రత్యేకంగా ఆకట్టుకోనుంది. విద్యుత్‌ సరఫరాలో అంతరాయం.. పట్టణంలో వినాయక నిమజ్జనం నేపథ్యంలో ఆదివారం భారీ వినాయక విగ్రహాల ఊరేగింపు తరలివెళ్లే చోట్ల ఏరియాల వారీగా విద్యుత్‌ సరఫరా నిలిపివేస్తారు. తర్వాత మైన్‌ రోడ్డులో కూడా కొంత ఇబ్బంది ఉండవచ్చని, అయితే విగ్రహాలు తరలిన వెంటనే ఆయా ప్రాంతాల్లో విద్యుత్‌ సరఫరా పునరుద్ధరిస్తామని ట్రాన్స్‌కో ఈఈ చంద్రానాయక్‌ తెలిపారు. భారీ వాహనాలకు అనుమతి లేదు.. నిమజ్జనం సందర్భంగా ఆదివారం ఉదయం 6 గంటల నుంచే పట్టణంలోకి ఎలాంటి పెద్ద వాహనాలను అనుమతించడం లేదు. అనంతపురం, కొడికొండ చెక్‌పోస్టు వైపు నుంచి వచ్చే ప్రై వేటు, ఆర్టీసీ బస్సులను చోళసముద్రం హైవే వద్ద నుంచి కొట్నూరు బైపాస్‌ రోడ్డులోకి ప్రవేశించి, ఆర్టీసీ బస్టాండ్‌కు చేరుకోవాలన్నారు. తిరిగి అలాగే వెళ్లాలి. అలాగే బెంగళూరు నుంచి వచ్చే బస్సులు కూడా గౌరిబిదనూరు ఓల్డ్‌ ఆర్టీఓ దగ్గర డైవర్షన్‌ తీసుకుని వాటంకొత్తపల్లి మార్గంలో నగరిగెర, లేపాక్షి, చోళసముద్రం, కొట్నూరు బైపాస్‌ నుంచి ఆర్టీసీ బస్టాండ్‌కు చేరుకోవాలి. దీంతో పాటు మధుగిరి, మడకశిర నుంచి వచ్చే వాహనాలను సేవామందిరం వరకు అనుమతి ఇచ్చారు. ‘పురం’లో నేడు గంగ ఒడికి చేరనున్న వినాయకుడు ఏర్పాట్లు పూర్తి చేసిన అధికారులు పోలీసు బందోబస్తు ఇలా.. ఏఎస్పీ – 1 డీఎస్పీలు – 8 మంది సీఐలు – 33 మంది ఎస్‌ఐలు – 47 మంది పోలీసు సిబ్బంది – 900 మంది మున్సిపాలిటీ పర్యవేక్షణ ఇలా.. ఇంజనీరింగ్‌ సిబ్బంది,(స్ట్రీట్‌ లైటింగ్‌, కోనేరు వద్ద) – 50 మంది శానిటేషన్‌ సిబ్బంది(ప్రధాన రహదారుల్లో) – 250 మంది కోనేరును ఎప్పటికప్పుడు శుభ్రం చేయడానికి (తెప్పల ద్వారా) – నలుగురు శానిటేషన్‌ వర్కర్స్‌ – 8 మంది శానీటరీ ఇన్‌స్పెక్టర్‌ – 1 విద్యుత్‌ పర్యవేక్షణ ఇలా.. ఏడీలు –ముగ్గురు ఏఈలు – 12 మంది జేఈఈలు – 10మంది లైన్‌ఇన్‌స్పెక్టర్లు, లైన్‌మెన్లు, మొబైల్‌ టీమ్‌, ఇతర సిబ్బంది – 120 మంది ట్రాన్స్‌కో కంట్రోల్‌ రూం – 9440813209

శ్రీరామరెడ్డి తాగునీటి ప్రాజెక్టును దోచుకుతింటున్న పెద్దల కబంధహస్తాల నుంచి కాపాడాలని మేం డిమాండ్‌ చేస్తున్నాం. కార్మికులకు సకాలంలో జీతాలు, ప్రావిడెంట్‌ ఫండ్లు చెల్లించి ఆదుకోవాలనేది మా ఆకాంక్ష. వేతనాలు ఇవ్వకుండా వేధిస్తూ.. ప్రభుత్వ నిధులను భోంచేస్తూ ప్రాజెక్టును నిర్వీర్యం చేసే పనులకు స్వస్తి పలకకపోతే భవిష్యత్తులో తీవ్ర ప్రతిఘటన ఎదుర్కోవాల్సి వస్తుందని హెచ్చరిస్తున్నాం. – పెన్నోబిలేసు, రాష్ట్ర ఉపాధ్యక్షులు, వైఎస్సార్‌సీపీ ఎస్సీ సెల్‌

ధర్మవరం అర్బన్‌/బత్తలపల్లి: ధర్మవరం, బత్తలపల్లిలో శనివారం ప్రశాంతంగా వినాయక నిమజ్జన వేడుకలు జరిగాయి. ఐదు రోజులపాటు కొలువైన భారీ వినాయకులను శుక్రవారం ప్రత్యేక పూజల మధ్య విగ్రహాలకు కదిలించారు. అనంతరం శనివారం నిమజ్జనానికి తరలించారు. ధర్మవరం పట్టణం నుంచి భారీగా వినాయకుని విగ్రహాలను ఊరేగింపుగా తీసుకొచ్చి చిత్రావతి నదిలో నిమజ్జనం చేశారు. ధర్మవరం చెరువుతోపాటు సంగమేశ్వరం వంక, రేగాటిపల్లి చెరువుల్లో వినాయక విగ్రహాలను ప్రజలు నిమజ్జనం చేశారు. ధర్మవరం చెరువులో వినాయకుల నిమజ్జనానికి క్రేన్‌లను ఉపయోగించారు. ధర్మవరం చెరువులోకి ఎవరూ దిగకుండా పోలీసులు బందోబస్తు ఏర్పాటు చేశారు. బత్తలపల్లి మండలంలోని సంఘమేశ్వర క్షేత్రం సమీపంలోని చిత్రావతి నదిలో వినాయకుని నిమజ్జన వేడుకలు ప్రశాంతంగా ముగిశాయి. ఐదు రోజులపాటు కొలువైన భారీ వినాయకులను పట్టణ పురవీధుల్లో ఊరేగిస్తూ చెరువులోకి తరలించారు. క్రేన్‌ల సాయంతో చెరువులో నిమజ్జనం చేశారు. యువకులు, మహిళలు రంగులు చల్లుకుంటూ కేరింతలు కొడుతూ డాన్స్‌లు చేస్తూ నిమజ్జనానికి తరలించారు. డీఎస్పీ జగన్నాథ్‌రాజు, టూ టౌన్‌ సీఐ జయనాయక్‌, ధర్మవరం రూరల్‌ సీఐ ప్రభాకర్‌గౌడు, తహసీల్దార్‌ ఈశ్వర్‌ ప్రసాద్‌, ఎస్‌ఐ సోమశేఖర్‌ పర్యవేక్షించారు.

కదిరి అర్బన్‌: ఎగువపల్లి సమీపంలో హంద్రీ–నీవా కాలువ పంప్‌హౌస్‌ వద్ద శుక్రవారం గుర్తు తెలియని శవం లభ్యమైనట్లు కదిరి రూరల్‌ అప్‌గ్రేడ్‌ పోలీస్టేషన్‌ సీఐ నిరంజన్‌రెడ్డి తెలిపారు. శవం పురుషుడిదని వయసు సుమారు 35 నుంచి 40 ఏళ్ల మధ్య వయసు ఉంటుందన్నారు. పూర్తిగా కుళ్లిపోయి ఉండడంతో గుర్తు పట్టడం కష్టంగా మారిందన్నారు. ఎవరైనా చుట్టు పక్కల గ్రామాల వారు తమ కుటుంబ సభ్యులు తప్పిపోయినట్లు ఉంటే తమకు సమాచారం ఇవ్వాలని తెలిపారు. విషద్రావకం తాగి వృద్ధురాలు ఆత్మహత్య బత్తలపల్లి: కాలికి అయిన గాయం శస్త్రచికిత్స చేయించుకున్నా నయం కాకపోవడంతో నొప్పిని భరించలేక ఓ వృద్ధురాలు విషద్రావకం తాగి ఆత్మహత్య చేసుకున్న ఘటన బత్తలపల్లిలో శుక్రవారం చోటు చేసుకుంది. పోలీసులు తెలిపిన మేరకు.. బత్తలపల్లిలోని పాతూరుకు చెందిన తలచూరి కేశమ్మ(75) సంతానం లేదు. తన అన్న కుమారుడైన చంద్రశేఖర్‌ ఇంట్లోనే ఉంటోంది. ఆమె కాలికు గాయం కావడంతో గతంలో ఆపరేషన్‌ చేయించారు. గాయం నయంకాకపోగా, నొప్పి ఎక్కువైంది. ఈ విషయమై తన మేనల్లుడు చంద్రశేఖర్‌, అతని భార్య రమాదేవికి చెప్పింది. వారిద్దరూ వృద్ధురాలికి నచ్చజెప్తూ ఉండేవారు. అయితే గురువారం సాయంత్రం ఇంటివద్ద ఎవరూలేని సమయంలో విషద్రావకం తాగింది. ఇంతలో బయటికెళ్లిన భార్యాభర్తలిద్దరూ ఇంటికి వచ్చి విషయాన్ని గమనించారు. వృద్ధురాలిని ఆరా తీయగా.. తాను విషద్రావకం తాగినట్లు చెప్పడంతో వెంటనే ఆర్డీటీ ఆస్పత్రికి తరలించారు. అక్కడ చికిత్స పొందుతూ మృతి చెందింది. చంద్రశేఖర్‌ ఫిర్యాదు మేరకు కేసు నమోదు చేసుకున్నట్లు బత్తలపల్లి పోలీసులు తెలిపారు. విద్యుదాఘాతంతో మహిళా రైతుకు తీవ్ర గాయాలు గుత్తి రూరల్‌: మండలంలోని టి.కొత్తపల్లిలో శుక్రవారం విద్యుదాఘాతంతో నాగలక్ష్మి అనే మహిళా రైతుకు తీవ్ర గాయాలయ్యాయి. పోలీసులు తెలిపిన మేరకు.. గ్రామానికి చెందిన ఆదిశేషులు, నాగలక్ష్మి దంపతులు వ్యవసాయం చేస్తూ జీవనం సాగిస్తున్నారు. నాగలక్ష్మి గ్రామ శివారులోని పంటకు నీరు పెట్టేందుకు వెళ్లింది. వ్యవసాయ బోరు స్విచ్‌ ఆన్‌ చేస్తున్న క్రమంలో స్టార్టర్‌ బాక్సు వద్ద తెగి ఉన్న తీగ తగిలి ఆమె షాక్‌కు గురైంది. ఈ ప్రమాదంలో సొమ్మసిల్లి పడి అపస్మారక స్థితికి చేరుకుంది. స్థానికులు, కుటుంబ సభ్యులు వెంటనే ఆమెను చికిత్స నిమిత్తం గుత్తి ప్రభుత్వాస్పత్రికి తరలించారు. వైద్యుల సూచన మేరకు మెరుగైన చికిత్సలకు అనంతపురానికి తరలించారు. పోలీసులు కేసు దర్యాప్తు చేస్తున్నారు.

హిందూపురం టౌన్‌: పట్టణంలో ఆదివారం నిర్వహించనున్న వినాయక నిమజ్జన శోభాయాత్రకు పకడ్భందీగా భద్రతా ఏర్పాట్లు చేస్తున్నామని ఏఎస్పీ మహేష్‌ అన్నారు. దాదాపు 1000 మంది పోలీసు సిబ్బంది, అధికారులు బందోబస్తులో పాల్గొంటారన్నారు. వినాయక నిమజ్జన ఏర్పాట్లపై శుక్రవారం ఏఎస్పీ కార్యాలయం వద్ద సీఐలు ప్రసాద్‌, జనార్దన్‌, అబ్దుల్‌ కరీంల కలిసి ఏఎస్పీ విలేకరులతో మాట్లాడారు. పట్టణంలో సుమారు 150 వినాయక విగ్రహాలతో శోభాయాత్ర ఉంటుందన్నారు. నిక్కంపల్లి, వాల్మీకి సర్కిల్‌, చిన్న మార్కెట్‌, ఎంఎఫ్‌ రోడ్‌, మెయిన్‌బజార్‌, గాంధీ సర్కిల్‌, ఎన్టీఆర్‌ సర్కిల్‌, రైల్వే రోడ్డు, అంబేడ్కర్‌ సర్కిల్‌, గురునాథ్‌ సర్కిల్‌ మీదుగా శోభాయాత్ర సాగి గుడ్డం కోనేరులో విగ్రహాల నిమజ్జనం ఉంటుందన్నారు. 13 అడుగుల వెడల్పు ఉన్న విగ్రహాలను పేట వెంకటరమణస్వామి ఆలయ మార్గంలోకి రానివ్వబోమన్నారు. ఆయా విగ్రహాలన్నీ ఇప్పటికే పోలీసులు చెప్పిన మార్గం గుండా వెళ్లాలన్నారు. నిమజ్జనం రోజు రాత్రి 11 గంటలపైన డీజేలను బంద్‌ చేయాలన్నారు. భక్తుల రద్దీని దృష్టిలో ఉంచుకుని అవాంఛనీయ ఘటనలకు తావులేకుండా ముందస్తు ప్రణాళికతో భద్రతా చర్యలు చేపట్టామన్నారు. శోభాయాత్ర మార్గాల్లో పోలీసులను మోహరించడంతోపాటు రద్దీ ప్రాంతాల్లో ప్రత్యేక నిఘా ఏర్పాటు చేస్తున్నామన్నారు. శోభాయాత్ర సమయంలో ట్రాఫిక్‌కు అంతరాయం కలగకుండా ప్రత్యామ్నాయ మార్గాలను సిద్ధం చేశామన్నారు. ప్రధాన రహదారుల మీదుగా వచ్చే బస్సులు, లారీలు, కార్లు తదితర వాహనాలను పట్టణంలోకి రాకుండా దారి మళ్లిస్తామన్నారు. ముఖ్యంగా బెంగళూరు–అనంతపురం జాతీయ రహదారిపై భారీ వాహనాల రాకపోకలను నియంత్రిస్తామన్నారు. బెంగళూరు నుంచి అనంతపురం వైపు వెళ్లే భారీ వాహనాలపై ఉదయం నుంచే ట్రాఫిక్‌ ఆంక్షలు అమలు చేస్తామన్నారు. శోభాయాత్రలో మద్యం సేవించి వాహనాలు నడిపితే డ్రైవర్‌ను అదుపులోకి తీసుకోవడంతోపాటు వాహనాన్ని సీజ్‌ చేస్తామని హెచ్చరించారు. కోనేరు వద్ద రెండు క్రేన్లను మున్సిపల్‌ అధికారులు ఏర్పాటు చేశారని, నిమజ్జన కార్యక్రమాన్ని నిర్ణీత సమయాల్లోనే పూర్తి చేసి పోలీసులకు నిర్వాహకులు, భక్తులు సహకరించాలన్నారు. భారీ వాహనాలకు హిందూపురంలో ఆంక్షలు మద్యం సేవించి వాహనం నడిపితే సీజ్‌ చేస్తాం ఏఎస్పీ మహేష్‌ హెచ్చరిక

పుట్టపర్తి అర్బన్‌: పోటీ ప్రపంచంలో ప్రభుత్వ పాఠశాలల్లోని విద్యార్థులు రాణించాలంటే ఆధునిక సాంకేతిక పరిజ్ఞానాన్ని అందిపుచ్చుకుని డిజిటల్‌ విద్యను మరింత చేరువ చేయాలని కేంద్ర ప్రభుత్వ పాఠశాల విద్య, అక్షరాస్యత శాఖ కార్యదర్శి టీకే అనిల్‌ కుమార్‌ ఆదేశించారు. శుక్రవారం ఆయన కలెక్టర్‌ శ్యాం ప్రసాద్‌, జిల్లా విద్యాశాఖ అధికారులతో కలిసి మండలంలోని జగరాజుపల్లి వద్ద ఉన్న కేజీబీవీ, మోడల్‌ స్కూళ్లను సందర్శించి పాఠశాల స్థితిగతులు, విద్యా ప్రమాణాలను పరిశీలించారు. విద్యాశాఖ అమలు చేస్తున్న కార్యక్రమాలు, డిజిటల్‌ బోధన, మౌలిక వసతుల కల్పనను పరిశీలించారు. పీఎంశ్రీ కింద పాఠశాలకు అందించిన ఆధునిక వసతులు, అభివృద్ధి పనులు, గ్యాలరీ ప్రదర్శనను పరిశీలించారు. డిజిటల్‌ బోధన కోసం ఏర్పాటు చేసిన క్లికర్‌ ఆధారిత మూల్యాంకనం ద్వారా విద్యార్థులతో సంభాషించారు. పాఠశాలల్లో ఏర్పాటు చేసిన వృత్తి విద్య, స్కిల్‌ ల్యాబ్‌, క్రీడా ప్రాంగణం, జల సంరక్షణలో భాగంగా వర్షపు నీటి నిల్వలు, కిచెన్‌ గార్డెన్‌, పీఏఎల్‌ ల్యాబ్‌లను పరిశీలించారు. తరగతిలో విద్యార్థులతో పాటు కూర్చొని విద్యా బోధనను పర్యవేక్షించారు. మధ్యాహ్న భోజనశాల, కోడిగుడ్లు, ఆహార పదార్థాల నాణ్యత, సెల్ఫ్‌ డిఫెన్స్‌ విద్య, యోగా, విద్యార్థులు ప్రదర్శించిన సాంస్కృతిక కార్యక్రమాలు ఆకట్టుకున్నాయి. కార్యక్రమంలో సమగ్ర శిక్ష రాష్ట్ర ప్రాజెక్టు డైరెక్టర్‌ రవీంద్రనాథ్‌రెడ్డి, అడిషనల్‌ పీడీ దేవానందరెడ్డి, ఆర్‌జేడీ శ్యామ్యుల్‌, డీఈఓ కిష్టప్ప, ప్రిన్సిపాళ్లు, ఉపాధ్యాయులు, స్కౌట్స్‌అండ్‌ గైడ్స్‌ విద్యార్థులు, సిబ్బంది పాల్గొన్నారు.

● పరువు తీస్తున్నాడని తండ్రిపై మచ్చుకత్తితో దాడి ధర్మవరం రూరల్‌: ఊరూరా బెల్ట్‌షాపులు ఏర్పాటు చేసి మద్యం ఏరులై పారిస్తున్న చంద్రబాబు సర్కార్‌...ప్రజలను వ్యసనపరులను చేసి కుటుంబాల్లో చిచ్చుపెడుతోంది. మద్యం సేవించి వస్తూ తల్లిని కొడుతుండటంతో పాటు ఊళ్లో వారితో తరచూ గొడవ పడుతూ పరువు తీస్తున్నాడని ఓ కుమారుడు తండ్రినే మచ్చుకొడవలితో నరికాడు. ఈ ఘటన శుక్రవారం ధర్మవరం మండలం నేలకోట తండాలో చోటు చేసుకుంది. స్థానికులు, పోలీసులు తెలిపిన వివరాల మేరకు... నేలకోట తండాకు చెందిన వడిత్యా కృష్ణానాయక్‌ తరచూ మద్యం సేవించి గ్రామస్తులతో గొడవపడేవాడు. ఇది మంచి పద్ధతి కాదని భార్య ఆదిబాయి నచ్చజెప్పేది. తనకే నీతులు చెప్పుతావా? అంటూ ఆమైపెనే దాడి చేసేవాడు. వంట మనిషిగా చేస్తూ ఇతర ప్రాంతంలో ఉన్న కుమారుడు రఘునాయక్‌కు ఈ విషయం తెలిసింది. శుక్రవారం ఇంటికి వచ్చిన కుమారుడు రఘునాయక్‌ తండ్రితో గొడవపడ్డాడు. మాటామాటా పెరగడంతో కోపోద్రిక్తుడైన రఘునాయక్‌.. ఇంట్లో ఉన్న మచ్చుకత్తితో తండ్రిపై దాడి చేసి తలపై నరికాడు. తీవ్రంగా గాయపడిన కృష్ణానాయక్‌ను స్థానికులు చికిత్స నిమిత్తం ధర్మవరం ప్రభుత్వాసుపత్రికి తరలించారు. అక్కడ నుంచి మెరుగైన చికిత్స కోసం అనంతపురం తరలించారు. దాడికి పాల్పడిన రఘునాయక్‌ను పోలీసులు అదుపులోకి తీసుకొని విచారిస్తున్నట్లు సమాచారం. కాగా, కుమారుడిపై తండ్రి పోలీసులకు ఇప్పటి వరకు ఫిర్యాదు చేయలేదని తెలిసింది. హెచ్చెల్సీలో వ్యక్తి గల్లంతు కణేకల్లు: మండలంలోని యర్రగుంట శివారులో హెచ్చెల్సీలో ఈత కొడుతూ గురుస్వామి (42) నీటి ప్రవాహానికి కొట్టుకుపోయి గల్లంతయ్యాడు. పోలీసులు తెలిపిన మేరకు.. యర్రగుంటలో బుధవారం వినాయక నిమజ్జనం జరిగింది. గురుస్వామి నిమజ్జనం వేడుకలో పాల్గొన్నాడు. అయితే నిమజ్జనంలో పాల్గొన్నవారంతా వెళ్లిపోయారు. ఈతలో ఆరితేరిన గురుస్వామి కాలువలో స్నానానికి దిగాడు. కొదిసేపు ఈత కొట్టాడు. ఈక్రమంలో కాలువలో నీటి ప్రవాహం ఎక్కువగా ఉండటంతో గల్లంతయ్యాడు. రెండ్రోజులైనా గురుస్వామి ఇంటికి రాకపోవడంతో కుటుంబ సభ్యులు తెలిసిన వారందరినీ విచారించారు. చివరికి ఆయన గల్లంతయ్యాడని పోలీసులకు ఫిర్యాదు చేశారు. కుటుంబ సభ్యుల ఫిర్యాదు మేరకు కేసు నమోదు చేసి విచారిస్తున్నారు. మరోవైపు గురుస్వామి మృతదేహం కోసం కాలువ వెంబగడి గాలించినా ఆచూకీ లభించలేదు.

● మాజీ ఎమ్మెల్యే తోపుదుర్తి ప్రకాష్‌రెడ్డి ఆత్మకూరు: చంద్రబాబు ప్రభుత్వం అధికారంలోకొచ్చినప్పటి నుంచి సస్యశ్యామలంగా ఉన్న రాప్తాడు నియోజకవర్గంలో రెడ్‌బుక్‌ రాజ్యాంగం అమలవుతోంది.. ఎమ్మెల్యే పరిటాల సునీత పల్లెల్లో కక్షలకు ఆజ్యం పోస్తోందని మాజీ ఎమ్మెల్యే తోపుదుర్తి ప్రకాష్‌రెడ్డి విమర్శించారు. శుక్రవారం ఘర్షణలో గాయపడి అనంతపురం ప్రభుత్వాస్పత్రిలో చికిత్స పొందుతున్న అనూష, హరికుమార్‌, మహేంద్ర, శివానందను మాజీ ఎమ్మెల్యే ప్రకాష్‌రెడ్డి పరిమర్శించారు. అనంతరం ఆయన విలేకరులతో మాట్లాడారు. గొరిదిండ్లలో అనూష అనే మహిళపై టీడీపీ కార్యకర్త అక్కులప్ప కత్తితో దాడి చేశాడన్నారు. అక్కులప్ప అనుచరులు మరో ముగ్గురిపై విచక్షణరహితంగా కత్తులు, గొడ్డలితో దాడి చేశారని, కనగానపల్లి అక్కులప్ప అనే వ్యక్తి అనూషను అత్యాచారం చేయబోయాడని తెలిపారు. మధు, సతీష్‌, సోమశేఖర్‌, రామాంజనేయులు అనూషకు మద్దతు ఇచ్చిన వారిపై కత్తులు, గొడ్డలితో దాడి చేశారన్నారు. అయితే అక్కులప్పను మాత్రమే పోలీసులు అరెస్ట్‌ చేశారని, మిగిలిన నలుగురిని ఎందుకు అరెస్ట్‌ చేయలేదని ప్రశ్నించారు. పోలీసులు ఏకపక్షంగా వ్యవహరిస్తున్నారని విమర్శించారు. మహిళను అత్యాచారం, చంపబోతే ఇంత నిర్లక్ష్యంగా వ్యవహరిస్తారా? అని మండిపడ్డారు. మదిగుబ్బ తండాలో ఓ మహిళను హత్య చేస్తే పోలీసులు కేసు తీసుకోకుండా ఆత్మహత్యగా చిత్రీకరించారన్నారు. నిందితులు నెల రోజులుగా గ్రామంలో తిరుగుతున్నా పోలీసులు పట్టించుకోకపోవడం దారుణమన్నారు. సనప గ్రామంలో పోతులయ్య అనే వ్యక్తి ఇంట్లో రూ.18 లక్షల విలువైన నగలు దొంగతనం జరిగితే టీడీపీ నేతలే దొంగతనం చేశారని ఫిర్యాదు చేసినా పోలీసులు పట్టించుకోలేదన్నారు. దొంగలకు, రేపిస్ట్‌లకు, హత్యలు చేసేవారికి పరిటాల సునీత మద్దతు పలుకుతూ గ్రామాల్లో కక్షలు రేపుతున్నారన్నారు. దాడులు చేసిన వారు అధికార పార్టీ నేతలు అయితే వారిని పోలీస్‌ స్టేషన్‌లో కూర్చోబెట్టి టీ, కాఫీలు ఇస్తున్నారన్నారు. అదే గ్రామానికి చెందిన మాజీ జెడ్పీటీసీ కుళ్లాయప్ప ప్రమేయం ఉందని బాధిత కుటుంబ సభ్యులు చెప్తున్నారని, అనంతపురం రూరల్‌ మండలం కొడిమిలో అంజనాదేవి అనే మహిళపై అత్యాచారయత్నం చేస్తే మహేంద్రరెడ్డి, మహేశ్వరరెడ్డితో పాటు మరొకరు ఆమెను వివస్త్రను చేసి, రాళ్లు, కట్టెలతో దాడి చేశారన్నారు. పోలీసులు మాత్రం దాడులకు పాల్పడిన వారి దగ్గర నుంచి ఫిర్యాదులు తీసుకొని బాధితులపై కేసులు నమోదు చేస్తున్నారని మండిపడ్డారు. ఈ కార్యక్రమంలో వైఎస్సార్‌సీపీ నాయకులు పాపంపల్లి వాసుదేవరెడ్డి ,ముత్యాలరెడ్డి, గొరిదిండ్ల నరసింహ, సునీల్‌దత్తారెడ్డి, సుధీర్‌రెడ్డి, హనుమంతు నాయక్‌ తదితరులు పాల్గొన్నారు.

ప్రశాంతి నిలయం: మానవాళి శ్రేయస్సే లక్ష్యంగా సత్యసాయి అందించిన ఆధ్యాత్మిక, మానవతా విలువలతో కూడిన జ్ఞానం భవిష్యత్‌ తరాలకు బదిలీ చేసే చక్కటి వ్యవస్థను రూపొందించే లక్ష్యంతో యువత ముందుకు సాగాలని సత్యసాయి సెంట్రల్‌ ట్రస్ట్‌ మేనేజింగ్‌ ట్రస్టీ ఆర్‌జే రత్నాకర్‌రాజు పిలుపునిచ్చారు. విలువలతో కూడిన విద్యను గ్రామస్థాయి వరకూ చేర్చే లక్ష్యంతో ప్రారంభించిన సత్యసాయి విద్యా వాహిని ప్రాజెక్ట్‌ను మరింత విస్తృతం చేసేందుకు ‘నెక్ట్స్‌ జెన్‌’ పేరుతో జాతీయ స్థాయి సదస్సు శుక్రవారం ప్రారంభించారు. రెండు రోజుల పాటు జరిగే ఈ సదస్సును సాయికుల్వంత్‌ సభా మందిరంలో సత్యసాయి సెంట్రల్‌ ట్రస్ట్‌ మేనేజింగ్‌ ట్రస్టీ ఆర్‌జే రత్నాకర్‌ రాజు, ట్రస్ట్‌ సభ్యులు, విద్యావాహిని నిర్వాహకులతో కలిసి జ్యోతిప్రజ్వలను చేసి ప్రారంభించారు. దేశంలోని వివిధ ప్రాంతాలకు చెందిన విద్యావాహిని ప్రాజెక్ట్‌కు చెందిన 500 మంది యువత సదస్సులో పాల్గొన్నారు. రత్నాకర్‌రాజు మాట్లాడుతూ సత్యసాయి ఆధ్యాతిక బోధనలు, మానవతా విలువలను విస్తృతం చేయాలన్నారు. విద్యా వాహిని ద్వారా ఆధునిక సాంకేతిక పరిజ్ఞానంతో కూడిన విజ్ఞానంతో పాటు విలువలను జోడించి బోధన చేస్తున్నామన్నారు. కేంద్ర విద్యాశాఖ కార్యదర్శి అనిల్‌ కుమార్‌ మాట్లాడుతూ, సత్యసాయి సంస్థల ఆధ్వర్యంలో నడుస్తున్న విద్యా వాహని పథకం ఎంతో గొప్పదని, వికసిత్‌ భారత్‌ 2047లో భాగంగా ‘విద్యావాహిని’కి కేంద్ర ప్రభుత్వం నుంచి అన్ని విధాలుగా సహాయ సహకారాలు అందజేస్తామన్నారు. విద్యావాహిని ద్వారా ఏడు రాష్ట్రాల పరిధిలో 38 వేల మంది పాఠశాల విద్యార్థులకు విలువలతో కూడిన సాంకేతిక విద్యను అందిస్తుండడం గర్వకారణమన్నారు. ఈ సందర్భంగా ప్రముఖ సంగీత విద్వాంసుడు రాజగోపాల్‌ బృందం సంగీత కచేరీ నిర్వహించారు. అనంతరం సత్యసాయి విద్యావాహిని, సత్యసాయి ఇన్‌స్టిట్యూట్‌ ఆఫ్‌ హయ్యర్‌ లర్నింగ్‌ మధ్య నిర్వహణకు సంబంధించి అవగాహన ఒప్పందం చేసుకున్నారు. పలువురు ప్రముఖులు యువత లక్ష్యాలు, సత్యసాయి బోధనలు అన్న అంశంపై ప్రసంగించారు. సాయంత్రం సాయి హీరా ఇంటర్నేషనల్‌ కన్వెన్షన్‌ సెంటర్‌లో సదస్సు కార్యక్రమాలు ప్రారంభమయ్యాయి. మానవతా విలువలు భవిష్యత్‌ తరాలకు అందించడమే లక్ష్యం సత్యసాయి సెంట్రల్‌ ట్రస్ట్‌ మేనేజింగ్‌ ట్రస్టీ ఆర్‌జే రత్నాకర్‌ రాజు ప్రశాంతి నిలయంలో ప్రారంభమైన ‘నెక్ట్స్‌ జెన్‌’ వర్క్‌షాప్‌

నల్లచెరువు: ఇంటి ముంగిట వృద్ధురాలు ఒంటరిగా కూర్చున్న విషయాన్ని గమనించిన గుర్తు తెలియని దుండగులు.. ఆమైపె పైపులకు వాడే గమ్‌ను చల్లి చెవులకు ఉన్న బంగారు కమ్మలను బలవంతంగా లాక్కెళ్లిన ఘటన మండల కేంద్రంలో శుక్రవారం చోటు చేసుకుంది. స్థానికులు తెలిపిన మేరకు.. నల్లగుట్టవీధిలో వెంకటలక్ష్మమ్మ భర్త శివారెడ్డి చనిపోవడంతో ఒంటరిగా నివసిస్తోంది. అయితే శుక్రవారం సాయంత్రం వెంటలక్ష్మమ్మ తన ఇంటి ముందు ఒంటరిగా కూర్చున్న విషయం గుర్తు తెలియని వ్యక్తులు గమనించారు. ఇదే అదునుగా చూసి పైపులకు అతికించడానికి వాడే గమ్‌ను వృద్ధురాలు ముఖంపై చల్లి.. ఆమె చెవుల్లోని బంగారు కమ్మలను బలవంతంగా లాక్కుని పరారయ్యారు. దుండగుల దాడిలో వృద్ధురాలి రెండు చెవులకు తీవ్ర గాయాలయ్యాయి. స్థానికులు వెంకటలక్ష్మమ్మను చికిత్స నిమిత్తం కదిరి ప్రభుత్వ ఆసుపత్రికి తరలించారు.

చిలమత్తూరు: బాల కార్మిక వ్యవస్థను ప్రోత్సహిస్తే చర్యలు తప్పవని కార్మికశాఖ సహాయ కమిషనర్‌ సూర్యనారాయణ, ఎస్‌ఐ శ్రీధర్‌ హెచ్చరించారు. బాల కార్మిక నిరోధక టాస్క్‌ఫోర్స్‌ బృందం శుక్రవారం దుకాణాలు, హోటళ్లు, డాబాలు, గ్రానైట్‌ పరిశ్రమల్లో తనిఖీ నిర్వహించింది. అధికారులు మాట్లాడుతూ చదువుకునే వయస్సులో వారిని పనులకు పంపించి, వారి జీవితాలను నాశనం చేస్తే చర్యలు ఉంటాయని హెచ్చరించారు. కార్యక్రమంలో హిందూపురం లేబర్‌ అధికారి రమణారెడ్డి, ధర్మవరం సహాయ కార్మిక అధికారి నరేష్‌కుమార్‌, ఐసీడీఎస్‌ అధికారులు పాల్గొన్నారు. విద్యుత్‌దాఘాతంతో ఆవులు మృతి పుట్టపర్తి అర్బన్‌: మండలంలోని వీరజిన్నయ్యపల్లిలో ఓ రైతు కుటుంబానికి చెందిన రెండు పాడి ఆవులు విద్యుదాఘాతంతో శుక్రవారం మృతిచెందాయి. పాడి రైతు ఇడుగుట్టు లక్ష్మీనారాయణ తెలిపిన మేరకు.. ఇంటి సమీపంలో ఓ విద్యుత్‌ స్తంభానికి వీధిలైట్లకు అమర్చిన విద్యుత్‌ ట్రాన్స్‌ఫార్మర్‌ ఉంది. దాని సమీపంలోనే రోజూలాగే పాడి ఆవులను పొలానికి అమర్చిన కంచెకు కట్టి వేశారు. రాత్రి పొద్దుపోయాక గ్రామంలో వర్షం కురిసింది. దీంతో ఇనుప కంచెకు విద్యుత్‌ ప్రసరించి, కట్టేసిన ఆవులు విద్యుత్‌షాక్‌కు గురై అక్కడికక్కడే మృతిచెందాయి. సుమారు రూ. లక్ష నష్టపోయినట్లు బాధితుడు ఆవేదన చెందాడు. ప్రభుత్వం ఆదుకోవాలని రైతు దంపతులు కోరారు. తాగునీటి సమస్య తీర్చండి గుడిబండ: మండలంలోని మద్దనకుంటలో తాగునీటి సమస్య తీర్చాలని గ్రామస్తులు ఖాళీ బిందెలతో గుడిబండ, మోరబాగల్‌ రహదారిపై బైఠాయించి శుక్రవారం నిరసన తెలిపారు. మహిళలు మాట్లాడుతూ కొన్ని రోజులుగా గ్రామంలో నీటి సమస్య తీవ్రంగా ఉందని, సంబంధిత శాఖ అధికారులకు పలుమార్లు విన్నపించినా పట్టించుకోలేదని ఆవేదన వ్యక్తం చేశారు. బోరు బావులకు విద్యుత్‌ సమస్యతో తాగునీటికి తీవ్ర ఎదుర్కొంటున్నామన్నారు. ఉన్నత అధికారులు గ్రామంలో తాగునీటి సమస్య తీర్చాలని గ్రామ ప్రజలు కోరారు. జూదరుల అరెస్ట్‌ మడకశిరరూరల్‌: మండలంలోని అగ్రంపల్లి సమీపంలో జూద కేంద్రంపై పోలీసులు శుక్రవారం దాడి చేశారు. ఇద్దరిని అరెస్టు చేసినట్లు ఎస్‌ఐ కృష్ణారెడ్డి తెలిపారు. వారి నుంచి రూ.80 వేల నగదు, రెండు సెల్‌ఫోన్లు, ద్విచక్ర వాహనాన్ని స్వాధీనం చేసుకున్నట్లు తెలిపారు. వివాహిత ఆత్మహత్య గార్లదిన్నె: బూదేడుకు చెందిన ఓ వివాహిత ఆస్పత్రిలో చికిత్స పొందుతూ శుక్రవారం మృతిచెందింది. శుక్రవారం పోలీసులు తెలిపిన మేరకు.. గ్రామానికి చెందిన అనూష (30) గత బుధవారం ఇంటి వద్ద విషద్రావకం తాగి ఆత్మహత్యాయత్నం చేసింది. అపస్మారక స్థితిలో ఉండగా ఆమెను కుటుంబ సభ్యులు చికిత్స నిమిత్తం అనంతపురం ఆస్పత్రికి తరలించారు. అక్కడి నుంచి అనంతపురంలోని ఓ ప్రైవేట్‌ ఆస్పత్రికి, అక్కడి నుంచి మెరుగైన చికిత్స కోసం బెంగళూరుకు తీసుకెళ్తుండగా మార్గంమధ్యలో మృతిచెందింది. మృతు రాలికి కొడుకు,కుమార్తె ఉన్నారు. కాగా, ఆత్మహత్యకు గల కారణాలు పోలీసుల విచారణలో తెలియాల్సి ఉంది. వీవర్స్‌ కాలనీలో వివాహిత మృతి కదిరి టౌన్‌: మున్సిపల్‌ పరిధిలోని వీవర్స్‌కాలనీకి చెందిన వివాహిత గౌతమి (27) శుక్రవారం రాత్రి మృతి చెందింది. వివరాలు.. బెంగళూరు నుంచి గౌతమి దంపతులు వినాయక చవితికి పుట్టినిళ్లు అయిన కదిరి వీవర్స్‌కాలనీకి వారం క్రితం వచ్చారు. అయితే శుక్రవారం రాత్రి గౌతమి వినాయకుడి వద్ద ప్రసాదం అందరికీ పంచిపెట్టి ఇంటికి వెళ్లింది. గౌతమి కళ్లు తిరిగినట్లు ఉందని చెప్పడంతో ఆమె భర్త సతీష్‌నాయుడు, బంధువులు కదిరి ప్రభుత్వ ఆస్పత్రికి తీసుకెళ్లారు. వెంటనే వైద్యం అందిస్తుండగా మృతి చెందినట్లు అవుట్‌ పోస్టు పోలీసులు శుక్రవారం తెలిపారు. మృతురాలికి కొడుకు, కూతురు ఉన్నారు. గౌతమి మృతితో బంధువులు కన్నీరుమున్నీరయ్యారు.

అనంతపురం సిటీ: ఉమ్మడి జిల్లా పరిధిలోని డీసీహెచ్‌ఎస్‌ పరిధిలో ఉన్న ఆస్పత్రుల్లో రోగులు, వైద్య సిబ్బందికి ఆహారం (డైట్‌) సరఫరా చేసేందుకు అనుభవం, ఆసక్తి ఉన్న వారి నుంచి టెండర్లు స్వీకరించనున్నారు. ఈ మేరకు డీసీహెచ్‌ఎస్‌ డాక్టర్‌ వెంకట్రావు శుక్రవారం ఓ ప్రకటన విడుదల చేశారు. హిందూపురంలోని 200 పడకలు ఉన్న జిల్లా ఆస్పత్రితో పాటు తాడిపత్రి, గుంతకల్లు, మడకశిర, కదిరి, ధర్మవరం, రాయదుర్గంలోని వంద పడకల ప్రాంతీయ వైద్యశాలలు, అనంతపురంలోని సీడీ ఆస్పత్రి, ఉరవకొండ, కళ్యాణదుర్గం, గుత్తి, పెనుకొండ ప్రాంతాల్లోని 50 పడకల సామాజిక ఆరోగ్య కేంద్రాలు, కొనకొండ్ల, శింగనమల, కణేకల్లు, పామిడి, సీకే పల్లి, తనకల్లు, కొత్తచెరువు, గోరంట్ల, నల్లమాడ, రొళ్లలోని 30 పడకల సీహెచ్‌సీలకు టెండర్లు ఆహ్వానిస్తున్నారు. ఆసక్తి ఉన్న వారు జిల్లా ఆస్పత్రికి రూ.2 వేలు, ప్రాంతీయ వైద్య శాలలకు రూ.1,500, సీడీ ఆస్పత్రి, సీహెచ్‌సీలకు రూ.వెయ్యి చొప్పున డీడీ (డిస్ట్రిక్ట్‌ కో ఆర్డినేటర్‌ ఆఫ్‌ హాస్పిటల్‌ సర్వీసెస్‌, అనంతపురం) తీసి ఈ నెల 21 నుంచి 26వ తేదీలోపు కార్యాలయం పనివేళల్లో అందజేయాలి. పూర్తి వివరాలకు 80085 53730, 82475 78680 నంబర్లలో సంప్రదించవచ్చు. జీనియస్‌ బుక్‌ రికార్డులో ఉమర్‌ఫారూక్‌కు చోటు హిందూపురం టౌన్‌: పట్టణానికి చెందిన సాహితీవేత్త, రక్తదాత ఉమర్‌ఫారూక్‌ఖాన్‌కు ‘జీనియస్‌ బుక్‌ ఆఫ్‌ రికార్డ్స్‌’లో చోటు దక్కింది. ఈ మేరకు శుక్రవారం జీనియస్‌ బుక్‌ ఆఫ్‌ రికార్డ్స్‌ నుంచి ‘ది హ్యూమానిటేరియన్‌ లీడర్‌ ఇన్‌ బ్లడ్‌ డొనేషన్‌ సర్వీస్‌ ఫర్‌ 25 కన్సెక్యూటివ్‌ ఇయర్స్‌’ అనే రికార్డు టైటిల్‌తో సర్టిఫికెట్‌ అందించారు. ఆంధ్రప్రదేశ్‌, తెలంగాణ, కర్ణాటక రాష్ట్రాల్లో థలసీమియా చిన్నారులు, ప్రసవాలు, శస్త్రచికిత్సలు, రక్తహీనతతో బాధపడుతున్న మహిళలు, ఇతర అత్యవసర పరిస్థితుల్లో రక్తం అవసరమైన వారికి దాతలను సమన్వయం చేసి ఉమర్‌ ఫారూఖ్‌ ఖాన్‌ సేవలందించారు. ఇప్పటివరకు 26 వేల రక్తదాన కేసులకు దాతల ద్వారా సహకారం అందించినట్లు రికార్డు ధ్రువపత్రంలో పేర్కొన్నారు. అంతేకాకుండా ఆయన స్వయంగా 66 సార్లు రక్తదానం చేసినట్లు పేర్కొన్నారు. ఈ సందర్బంగా ఆయనను పలువురు అభినందించారు.

ధర్మవరం అర్బన్‌: నిమజ్జనం ఊరేగింపు.. చిన్నా పెద్దా అందరూ వసంతాలు చల్లుకుంటూ ఆడుతూ పాడుతూ జనమంతా ఆనందంగా ఉన్నారు.. నిమజ్జనం పూర్తి కానేలేదు.. అంతలోనే అపరిశ్రుతి చోటు చేసుకుంది. ట్రాక్టర్‌ రూపంలో మృత్యువు కబళించింది.. క్షణాల్లోనే సంబరమంతా ఆవిరైంది. ఆటోను ఢీకొన్న ప్రమాదంలో ఓ బాలిక ప్రాణాలు కోల్పోగా.. ఏడుగురికి తీవ్ర గాయాలయ్యాయి. ఈ విషాద ఘటన ధర్మవరం పట్టణంలో శుక్రవారం సాయంత్రం చోటు చేసుకుంది. వివరాలు.. ధర్మవరంలోని శారదానగర్‌కు చెందిన ప్రజలు ఆటోలో వినాయకుడిని నిమజ్జనానికి తీసుకెళ్తున్నారు. కదిరి గేటు సమీపంలోని బ్రహ్మంగారి ఆలయం వద్దకు చేరుకోగా... వినాయకుడి విగ్రహాన్ని నిమజ్జనానికి తరలిస్తున్న ఓ ట్రాక్టర్‌ వెనుక నుంచి వేగంగా వచ్చింది. మద్యం మత్తులో ఉన్న ట్రాక్టర్‌ డ్రైవర్‌ పోతలయ్య రోడ్డు పక్కన ద్విచక్ర వాహనంపై కూర్చున్న నిరీష, నిషితలను ట్రాక్టర్‌తో ఢీకొట్టాడు. వారు కింద పడటంతో నిరీషకు కాలు విరిగింది. స్కూటీ కింద పడిపోయింది. వేగంగా ట్రాక్టర్‌ను పక్కకు తిప్పడంతో అదుపుతప్పి ఎదురుగా ఉన్న ఆటోపైకి ఎక్కింది. ఈ ప్రమాదంలో ఆటోలో వెనుక కూర్చున్న వర్షిత (9) అక్కడికక్కడే మృతిచెందింది. మరో ఏడుగురికి తీవ్ర గాయాలయ్యాయి. స్థానికులు వెంటనే క్షతగాత్రులను స్థానిక ప్రభుత్వ ఆసుపత్రికి తరలించారు. మృతి చెందిన వర్షిత అక్క బిందుప్రియకు కాలు విరిగింది. మాధవి, బిందుశ్రీలకు తీవ్ర గాయాలయ్యాయి. నితీష్‌, శ్రావ్య, తాజుద్దిన్‌, షర్వీన్‌లకు స్వల్ప గాయాలయ్యాయి. కళ్లముందే కుమార్తె మృతి చెందడంతో తల్లిదండ్రులు గంగాదేవి, అశోక్‌లు బోరున విలపించారు. చిన్న కూతురు మృతి చెందడం, పెద్ద కూతురుకు కాలు విరగడంతో ఆ తల్లిదండ్రుల రోదన అందరినీ కలచివేసింది. మృతిచెందిన వర్షిత శాంతినగర్‌లోని మున్సిపల్‌ ప్రాథమిక పాఠశాలలో నాల్గో తరగతి చదువుతోంది. చిన్నారి మృతదేహాన్ని పోస్టుమార్టం నిమిత్తం ధర్మవరం మార్చురీకి తరలించారు. ప్రమాదానికి కారణమైన ట్రాక్టర్‌ డ్రైవర్‌ పోతలయ్య పరారీలో ఉన్నాడు. ధర్మవరం వన్‌ టౌన్‌ ఇన్‌చార్జ్‌ సీఐ జయనాయక్‌ ఆస్పత్రికి చేరుకొని క్షతగాత్రుల వివరాలు తెలుసుకున్నారు. అనంతరం కేసు నమోదు చేసుకుని ప్రమాదానికి కారణమైన డ్రైవర్‌ కోసం గాలిస్తున్నారు. వినాయక నిమజ్జన ఊరేగింపులో అపశ్రుతి మద్యం మత్తులో ట్రాక్టర్‌ వేగంగా నడిపిన డ్రైవర్‌ ఆటోను ఢీకొనడంతో బాలిక మృతి.. ఏడుగురికి తీవ్ర గాయాలు

ఎన్‌పీకుంట: గోవిందరాజులపల్లిలో వినాయక లడ్డూ రికార్డు ధర పలికింది. శుక్రవారం నిమజ్జనం సందర్భంగా స్వామి వారి లడ్డూను వేలం వేశారు. గ్రామానికి చెందిన రంగారెడ్డి రెడ్డి మనోహర్‌రెడ్డి రూ.2.90 లక్షలకు లడ్డూను దక్కించుకున్నాడు. జాతీయస్థాయి సాఫ్ట్‌బాల్‌ పోటీలకు మైథిలి తాడిమర్రి: మండలంలోని దాడితోట జిల్లా పరిషత్‌ ఉన్నత పాఠశాల విద్యార్థిని వి.మైథిలి జాతీయ స్థాయి సాఫ్ట్‌బాల్‌ చాంపియన్‌ షిప్‌ పోటీలకు ఎంపికై ంది. ప్రస్తుతం పదో తరగతి చదువుతున్న మైథిలి సాఫ్ట్‌బాల్‌లో రాణిస్తోంది. ఈ క్రమంలోనే గత నెలలో అనంతపురంలోని ఆర్డీటీ స్టేడియంలో జరిగిన జిల్లాస్థాయి సాఫ్ట్‌బాల్‌ పోటీల్లో అత్యుత్తమ ఆటతీరు ప్రదర్శించి రాష్ట్రస్థాయి పోటీలకు ఎంపికై ంది. ఈనెల 11, 12 తేదీల్లో విజయనగరం జిల్లా బొబ్బిలిలో జరిగిన రాష్ట్రస్థాయి పోటీల్లో సత్తాచాటి సెలక్టర్లను ఆకట్టుకుంది. దీంతో వారు 39వ సబ్‌ జూనియర్‌ జాతీయ స్థాయి పోటీలకు మైథిలిని ఎంపిక చేశారు. ఈనెల 26న మహారాష్ట్రలోని శంభాజీనగర్‌లో జరగబోయే జాతీయ స్థాయి పోటీల్లో మైథిలి రాష్ట్రం జట్టు తరఫున ఆడనున్నట్లు పాఠశాల వ్యాయామ ఉపాధ్యాయిని జయలక్ష్మి, హెచ్‌ఎం ఉమామహేశ్వర్‌ తెలిపారు. మహిళలకు టైలరింగ్‌లో ఉచిత శిక్షణ పుట్టపర్తి టౌన్‌: కెనరాబ్యాంక్‌ గ్రామీణ స్వయం ఉపాధి శిక్షణ సంస్థ వారి ఆధ్వర్యంలో టైలరింగ్‌పై మహిళలకు నెలరోజుల పాటు ఉచిత శిక్షణ ఇస్తున్నట్లు సంస్థ డైరెక్టర్‌ శాంతిప్రియ తెలిపారు. ఈమేరకు శుక్రవారం ఒక ప్రకటన విడుదల చేశారు. 18 నుంచి 50 ఏళ్లలోపు వయస్సు కలిగిన గ్రామీణ ప్రాంతాల్లోని మహిళలు అర్హులన్నారు. ఈనెల 19 తేదీ నుంచి నెలరోజుల పాటు శిక్షణ ఉంటుందని, శిక్షణ కాలంలో భోజన సదుపాయం కూడా కల్పిస్తున్నట్లు తెలిపారు. ఆసక్తి గల అభ్యర్థులు ఆధార్‌, రేషన్‌కార్డు, బ్యాంక్‌ పాస్‌బుక్‌, విద్యార్హత ధ్రువీకరణ పత్రాల జిరాక్స్‌లతో పాటు నాలుగు పాస్‌పోర్ట్‌ సైజు ఫొటోలు తీసుకుని బ్రాహ్మణపల్లిపల్లి వద్ద ఉన్న కెనరా బ్యాంక్‌ గ్రామీణ స్వయం ఉపాధి శిక్షణ సంస్థ కార్యాలయంలో సంప్రదించాలన్నారు. పూర్తి వివరాలకు 8977718982, 9391486269 నంబర్లలో సంప్రదించాలని సూచించారు. 16 మండలాల్లో వర్షం పుట్టపర్తి అర్బన్‌: ఇన్నాళ్లూ ముఖం చాటేసిన వరుణుడు చాలా రోజుల తర్వాత జిల్లా వాసులను పలకరించాడు. గురువారం రాత్రి ఒక్కసారిగా వాతావరణంలో మార్పులు చోటుచేసుకోగా చిరుజల్లులు ప్రారంభమయ్యాయి. ఈ క్రమంలో శుక్రవారం ఉదయం వరకూ జిల్లాలోని 16 మండలాల పరిధిలో మోస్తరు వర్షం కురిసినట్లు వాతావరణ శాఖ అధికారులు తెలిపారు. అత్యధికంగా పుట్టపర్తిలో 39.2 మి.మీ వర్షపాతం నమోదైంది. ఇక హిందూపురం మండలంలో 36.2 మి.మీ, బుక్కపట్నం 35.6, కొత్తచెరువు 33.6, గోరంట్ల 16.2, అగళి 15.4, అమడగూరు 12.4, పరిగి 11.6, సీకేపల్లి 10.2, తనకల్లు 6.4, పెనుకొండ 6.2, చిలమత్తూరు 6.2, నల్లమాడ 4.6, నల్లచెరువు 2.2, లేపాక్షి 2.0, తాడిమర్రి 1.2 మి.మీ మేర వర్షపాతం నమోదైనట్లు వాతావరణ శాఖ అధికారులు వెల్లడించారు. ఉమ్మడి జిల్లాకు వర్ష సూచన అనంతపురం అగ్రికల్చర్‌: ఉమ్మడి అనంతపురం జిల్లాలో రాగల నాలుగు రోజులూ వర్షం పడే సూచనలు ఉన్నట్లు రేకులకుంట వ్యవసాయ పరిశోధన స్థానం ప్రధాన శాస్త్రవేత్త డాక్టర్‌ జి.నారాయణస్వామి, రీసెర్చ్‌ అసోసియేట్‌ కె.పావని శుక్రవారం ఒక ప్రకటనలో తెలిపారు. అనంతపురం జిల్లాలో 19న 6.3 మి.మీ, 20న 8.8 మి.మీ, 21న 10 మి.మీ, 22న 10.1 మి.మీ, 23న 6 మి.మీ మేర సగటు వర్షపాతం నమోదు కావచ్చని పేర్కొన్నారు. అలాగే శ్రీసత్యసాయి జిల్లాలో 19న 6.4 మి.మీ, 20న 16 మి.మీ, 21న 8 మి.మీ, 22న 10 మి.మీ, 23న 8.8 మి.మీ మేర వర్షం పడే సూచన ఉందన్నారు.

చిలమత్తూరు: వాణిప్య పన్నుల శాఖ అధికారుల నిర్లక్ష్యం.. వ్యాపారుల స్వార్థం వెరసి ప్రభుత్వ ఆదాయానికి భారీగా గండి పడుతోంది. జీఎస్టీ చెల్లించకుండా వస్తువులు విక్రయిస్తూ వ్యాపారులు సొమ్ము చేసుకుంటున్నారు. అరికట్టాల్సిన అధికారులు మామూళ్ల మత్తులో జోగుతున్నారు. హిందూపురంలో నకిలీ సిగరెట్లు, పాన్‌మసాలా, నాణ్యత లేని వస్తువులు, రైతులు వినియోగించే పైపులు, డ్రిప్‌ ఇరిగేషన్‌ పరికరాలు బిల్లులు లేకుండానే విక్రయించేస్తున్నారు. ఇతర రాష్ట్రాల నుంచి హిందూపురంతో పాటు నియోజకవర్గంలోని పరిసర ప్రాంతాలకు ఈ వస్తువులు యథేచ్ఛగా సరఫరా అవుతున్నాయి. ఒక వైపు ప్రభుత్వం డిజిటల్‌ చెల్లింపులు, వంద శాతం ఆన్‌లైన్‌ జీఎస్టీ బిల్లింగ్‌ అంటూ ప్రచారం చేస్తున్నా ఈ ప్రాంతంలో అలాంటివి కనిపించడం లేదు. కోట్లాది రూపాయల వ్యాపారం జీఎస్టీ లేకుండానే సాగుతోంది. చిన్న, మధ్య తరహా వ్యాపారుల ముసుగులో కొందరు బడా వ్యాపారులు జీఎస్టీ ఎగవేస్తున్నారు. నిబంధనల ప్రకారం వ్యాపార లావాదేవీలు జీఎస్టీ పోర్టల్‌ పరిధిలోనే జరగాలి. లోపాలు ఉంటే నోటీసులు ఇవ్వాలి. కానీ ఆ దిశగా మాత్రం పనిచేయడం లేదు. అక్రమాలకు అడ్డుకట్ట వేయడంలో వాణిజ్య పన్నుల శాఖ అధికారులు పూర్తిగా విఫలమయ్యారు. గుడారంలో బేరాలు? చిలమత్తూరు మండలం 44 వ నంబరు జాతీయ రహదారి కొడికొండ చెక్‌పోస్ట్‌లో ఎకై ్సజ్‌శాఖ ఏర్పాటు చేసుకున్న చెక్‌పాయింట్‌ వద్ద తరచూ వాణిజ్య పన్నుల శాఖ అధికారులు వాహనాలను తనిఖీ చేస్తుంటారు. అందులో భాగంగానే ఇటీవల తనిఖీల్లో భాగంగా బాగేపల్లి వైపు నుంచి వచ్చిన ఓ వాహనాన్ని, అందులోని వస్తువులను తనిఖీ చేయగా.. జీఎస్టీ బిల్లులు లేవని తేలింది. దీంతో కేసు పెడతామని బెదిరించి.. చివరకు అక్కడే ఉన్న గుడారంలోకి వెళ్లి రూ.5 వేలు తీసుకొని వారిని వదిలేశారు. సీటీఓ కారులోనే కూర్చొని రసీదులు తనిఖీ చేస్తుండగా... మరో అధికారి గుడారంలో వాహనదారులతో రహస్య మంతనాలు జరిపి నగదు తీసుకోవడం సీటీఓ అధికారుల అవినీతికి అద్దం పడుతోంది. హిందూపురం వాణిజ్య పన్నుల శాఖలో పనిచేస్తే ఓ అధికారి ఈ అవినీతి అక్రమాలకు కేరాఫ్‌గా నిలిచారనే ఆరోపణలు వినపడుతున్నాయి. వాణిజ్య పన్నుల అధికారుల సహకారం బిల్లులు లేకుండానే వస్తువుల దిగుమతి యథేచ్ఛగా అమ్మకాలు సాగిస్తున్న వైనం ప్రభుత్వ ఆదాయానికి భారీగా గండి

పుట్టపర్తి అర్బన్‌: 50 ఏళ్లకే పింఛన్‌ ఇస్తామని అధికారంలోకి వచ్చిన చంద్రబాబు..రెండేళ్లుగా ఆ విషయమే మరచిపోయారు. తీరా స్థానిక ఎన్నికలు సమీపిస్తున్న తరుణంలో ఓట్లు రాబట్టేందుకు పింఛన్‌ రాగం అందుకున్నారు. వారం గడువు విధించి దరఖాస్తు చేసుకోవాలని ఆదేశాలు జారీ చేశారు. దీంతో అర్హులంతా ఆశగా సచివాలయాల వద్దకు వెళ్లగా...అక్కడ తిష్టవేసిన కూటమి పార్టీల నేతలు ఎన్టీఆర్‌ భరోసా పింఛన్‌ కోసం బేరాలు పెట్టారు. అర్హత అక్కర లేదని, తాము అడిగినంత ఇస్తే పింఛన్‌ మంజూరు చేయిస్తామంటూ భారీగా వసూళ్లు చేశారు. సదరం సర్టిఫికెట్‌ పేరుతో దోపిడీ.. పింఛన్లకు దరఖాస్తు చేసుకోవాలని ప్రభుత్వం ప్రకటించగానే కూటమి నాయకులు రంగంలోకి దిగారు. పట్టణాలతో పాటు గ్రామాల్లో దివ్యాంగులు, వృద్ధులు, వితంతువులు, ఒంటరి మహిళలను టార్గెట్‌ చేసుకొని భారీగా డబ్బు వసూలు చేయడానికి శ్రీకారం చుట్టారు. పింఛన్‌ దరఖాస్తు చేసుకునే దివ్యాంగులకు సదరం సర్టిఫికెట్‌ అవసరం కానుండగా.. వారి నుంచి ఒక్కో సదరం సర్టిఫికెట్‌ కోసం రూ.30 వేల నుంచి రూ. 40 వేల వరకూ వసూలు చేస్తున్నారు. ముఖ్యంగా పెనుకొండ ఆస్పత్రి నుంచి సర్టిఫికెట్లు తీసుకునేందుకు టీడీపీ నాయకులు ఓ హోటల్‌లో మకాం వేసి రూ.లక్షల్లో వసూళ్లు చేశారు. సచివాలయ సిబ్బందిపై పెత్తనం.. అన్ని అర్హతలున్న వారి దరఖాస్తులు ఆన్‌లైన్‌లో అప్‌లోడ్‌ చేద్దామనుకున్న సచివాలయ సిబ్బందిపై కూడా ‘తెలుగు తమ్ముళ్లు’ పెత్తనం చేశారు. సచివాలయాల్లోనే తిష్టవేసి తాము చెప్పిన వారి దరఖాస్తులే తీసుకోవాలంటూ హుకూం జారీ చేశారు. మరికొందరు నేతలు వేళాపాలా లేకుండా, మహిళలని కూడా చూడకుండా ఫోన్లు చేస్తూ సచివాలయ సిబ్బందిని వేధించారు. పోనీ వారు చెప్పిన వారి దరఖాస్తులే ఆన్‌లైన్‌ చేద్దామంటే యాప్‌ పనిచేయక డిజిటల్‌ అసిస్టెంట్లు తీవ్ర ఇబ్బందులు పడ్డారు. మాట మార్చిన చంద్రబాబు.. బీసీ, ఎస్సీ, ఎస్టీ, మైనార్టీలకు 50 ఏళ్లకే సామాజిక పింఛన్‌ ఇస్తామని ఎన్నికల్లో హామీ ఇచ్చిన చంద్రబాబు ఇప్పుడు మాట మార్చారు. రెండేళ్లుగా సామాజిక పింఛన్ల ఊసే ఎత్తని ఆయన..తాజాగా దరఖాస్తు చేసుకోవాలని చెప్పినా...60 ఏళ్లు దాటిన వారి నుంచి మాత్రమే దరఖాస్తులు స్వీకరించడంతో ఆయా వర్గాల వారు చంద్రబాబుపై ఆగ్రహంతో ఊగి పోతున్నారు. భారీగా దరఖాస్తులు.. వితంతువులు, వికలాంగులు, వృద్ధులు, డప్పు కళాకారులు, కల్లుగీత కార్మికులు తదితరులు కొత్తగా పింఛన్లకు దరఖాస్తు చేసుకున్నారు. జిల్లాలోని 32 మండలాల నుంచి శుక్రవారం సాయంత్రం వరకూ 54,521 మంది దరఖాస్తు చేసుకున్నట్లు జీఎస్‌డబ్ల్యూఎస్‌ అధికారి శ్రీలక్ష్మి పేర్కొన్నారు. జగన్‌ హయాంలో అర్హతే ప్రామాణికం.. గత వైఎస్సార్‌సీపీ ప్రభుత్వంలో అప్పటి ముఖ్యమంత్రి వైఎస్‌ జగన్‌ మోహన్‌రెడ్డి అర్హతే ప్రామాణికంగా సంక్షేమ పథకాలు అందజేశారు. ఈ క్రమంలోనే కుల, మత, రాజకీయాలకు అతీతంగా అర్హులందరికీ పింఛన్‌ మంజూరు చేశారు. ఐదేళ్ల కాలంలో జిల్లాలో 42 వేలకుపైగా పింఛన్‌లను పెంచి అందజేశారు. ప్రతి నెలా ఒకటో తేదీన వలంటీర్లు లబ్ధిదారులు నిద్ర లేవక ముందే తలుపుతట్టి మరీ పింఛన్‌ మొత్తాన్ని అందజేశారు. పింఛన్‌ లబ్ధిదారుల్లో ఎవరైనా అనారోగ్యంతో లేదా ప్రమాదంలో గాయపడి ఆస్పత్రుల్లో చికిత్స పొందుతున్నా...వలంటీర్లు వారి వద్దకే వెళ్లి పింఛన్‌ మొత్తం అందించి వారికి భరోసా కల్పించారు. ఇక కొందరు పింఛన్‌దారులు వివిధ సమస్యలతో ఇతర రాష్ట్రాల్లో ఉన్నా... అక్కడికే వెళ్లి పింఛన్‌ మొత్తాన్ని అందజేశారు. ప్రతి ఆరు నెలలకూ ఓ సారి అర్హులు ఎవరున్నా అర్హతే ప్రమాణికంగా పింఛన్లు మంజూరు చేసి ఆదుకున్నారు. దీంతో వృద్ధులు, దివ్యాంగులు వైఎస్‌ జగన్‌ను, ఆయన అమలు చేసిన సంక్షేమ పథకాలను మరవ లేకున్నారు. పింఛన్‌ అంటే అంత తేలిక కాదు.. కొంచెం ఖర్చవుతుంది..!

కదిరి టౌన్‌: వినాయక నిమజ్జనం ఆదివారం ప్రశాంతంగా, భక్తిశ్రద్ధలతో సాగాలని ఎస్పీ సతీష్‌కుమార్‌ పిలుపునిచ్చారు. శుక్రవారం కదిరిలోని దత్త ఫంక్షన్‌ హాలులో పోలీస్‌శాఖ ఆధ్వర్యంలో వినాయక ఉత్సవ కమిటీ సభ్యులతో ప్రత్యేక సమావేశం నిర్వహించారు. ఈ సందర్భంగా నిమజ్జన ఏర్పాట్లు, శాంతిభద్రతలు, ట్రాఫిక్‌ నియంత్రణ, సమయపాలన, సౌండ్‌ సిస్టమ్‌ వినియోగం, ప్రజల సహకారం తదితర అంశాలపై ఎస్పీ పలు సూచనలు చేశారు. కదిరిలో పండుగల సందర్భంగా హిందూ ముస్లింలు పరస్పరం సహకరించుకుంటూ శాంతియుత వాతావరణాన్ని కొనసాగించడం అభినందనీయమన్నారు. ఆదివారం సాయంత్రం 5.30 గంటలలోపు అన్ని విగ్రహాలూ నిమజ్జన ప్రాంతానికి చేరుకునేలా ఉత్సవ కమిటీ సభ్యులు చర్యలు తీసుకోవాలన్నారు. నిమజ్జన ప్రాంతంలో నాలుగు క్రేన్లు ప్రవేశ, నిష్క్రమణ మార్గాలు, లైటింగ్‌ తదితర సౌకర్యాలు ఏర్పాటు చేసినట్లు ఎస్పీ తెలిపారు. ప్రతి ఒక్కరూ భద్రతా నిబంధనలు తప్పనిసరిగా పాటించాలన్నారు. అవాంఛనీయ సంఘటనలు జరగకుండా ప్రశాంతంగా జరిగేందుకు ప్రజలు సహకరించాలన్నారు. చిన్న పిల్లలను నిమజ్జన ప్రాంతంలోకి తీసుకురావద్దని సూచించారు. మదనపల్లి రహదారి వద్ద నిమజ్జనం చేసే దేవరచెరువు వద్ద ఏర్పాట్లను పరిశీలించారు. ఈ సందర్భంగా ఖాద్రీ ఆలయ సమీపంలోని మసీదును, పలు వినాయక మండపాలను ఎస్పీ సందర్శించారు. కార్యక్రమంలో డీఎస్పీ శివనారాయణస్వామి, సీఐలు బి.వెంకటేశ్వర్లు, నిరంజన్‌రెడ్డి, ఆంజనేయులు, ఎస్‌ఐలు బాబ్జాన్‌, ధనుంజయ్‌రెడ్డి, పోలీసు సిబ్బంది తదితరులు పాల్గొన్నారు. దేవరచెరువు వద్ద నిమజ్జనానికి ఏర్పాట్లు వినాయక ఉత్సవ కమిటీ సభ్యుల సమావేశంలో ఎస్పీ సతీష్‌కుమార్‌

బొమ్మనహాళ్‌: మండలంలోని నేమకల్లు శివారులోని క్వారీల్లో అనుమతి లేకుండా తెల్లరాయి తవ్వకాలు జరుగుతున్నాయన్న ఫిర్యాదుపై మైన్స్‌ అండ్‌ జియాలజీ అధికారులు రెండో రోజు శుక్రవారం కూడా తనిఖీలు నిర్వహించారు. కర్నూలు రీజినల్‌ మైన్స్‌అండ్‌ జియాలజీ విజిలెన్స్‌ అధికారి రాజశేఖర్‌ ఆధ్వర్యంలో అనంతపురం జిల్లా మైనింగ్‌ అధికారుల బృందం సభ్యులు క్వారీలను పరిశీలించారు. కర్నూలు రీజినల్‌ మైన్స్‌అండ్‌ జియాలజీ ఏజీ రాజశేఖర్‌ మాట్లాడుతూ అనుమతి లేకుండా తెల్లరాయి తవ్వకాలు చేస్తున్నారన్న ఫిర్యాదులు కేంద్ర మైన్స్‌ అండ్‌ జియాలజీ కార్యాలయాలనికి అందడంతో ఉన్నతాధికారుల ఆదేశాల మేరకు నేమకల్లు కొండల్లోని క్వారీల్లో రెండురోజుల పాటు తనిఖీలు నిర్వహించామన్నారు. పీహెచ్‌ భారతి 4.398 హెక్టార్లు, శివరాజు 4.958 హెక్టార్లు, మోహన్‌దాస్‌ 2.620 హెక్టార్లు, గురుప్రసాద్‌ 2.082 హెక్టార్లకు ప్రభుత్వం లీజు మంజూరు చేసిందన్నారు. అయితే అనుమతులు లేకపోయినా కేటీ లాలుస్వామి 2.646 హెక్టార్లు, తిమ్మనగౌడ్‌ 3.632 హెక్టార్లు, అలైఖ్య 4.684 హెక్టార్లలో తవ్వకాలు సాగిస్తున్నారన్నారు. లీజు అనుమతుల కోసం వీరు రెండేళ్ల క్రితం దర ఖాస్తులు చేసుకున్నారని, అయితే వాటిని 8 నెలల క్రితమే రద్దు చేసినట్లు తెలిపారు. కేటీ లాలుస్వామి, తిమ్మనగౌడ్‌ క్వారీల అనుమతి కోసం దరఖాస్తు చేసుకున్న ప్రదేశాల్లోనే అక్రమంగా తెల్లరాయిని తవ్వుతున్నట్లు నిర్ధారణ అయ్యిందన్నారు. నిబంధనలకు విరుద్ధంగా ఉన్న వాహనాలు, యంత్రాలను గురువారమే సీజ్‌ చేసిన్నట్లు చెప్పారు. అన్ని క్వారీల్లో సర్వేలు చేశామని, నివేదికను ఉన్నతాధికారులకు పంపుతామని ఏజీ తెలిపారు. తనిఖీల్లో రాయల్టీ ఇన్‌స్పెక్టర్‌ పురుషోత్తం, టెక్నికల్‌ అసిస్టెంట్‌ దిలీప్‌కుమార్‌, అనంతపురం రాయల్టీ ఇన్‌స్పెక్టర్‌ సుప్రజ, సర్వేయర్‌ నిర్మల్‌ పాల్గొన్నారు.

నిబంధనలు ఉల్లంఘించిన వారిపై చర్యలుబత్తలపల్లి: మండలంలోని ఈదుల ముష్టూరులో వినాయక నిమజ్జనం అనంతరం కొందరు ప్రజా శాంతికి భంగం కలిగించే విధంగా వ్యవహరించినట్లు పోలీసులకు సమాచారం అందడంతో 11 మందిని గుర్తించి చర్యలు తీసుకున్నారు. గురువారం పోలీసులు విలేకర్లతో మాట్లాడారు. వినాయక నిమజ్జనం ఊరేగింపు సమయంలో ముఖాలకు రంగులు పూసుకునే విషయంలో ఏర్పడిన మనస్పర్థల కారణంగా రెండు వర్గాలుగా విడిపోయి గొడవకు పాల్పడినట్లు పేర్కొన్నారు. ఒక వర్గంలో ఆరుగురు, మరో వర్గంలో ఐదుగురిని గుర్తించి వారి వివరాలను నమోదు చేసి, భవిష్యత్తులో ఇలాంటి సంఘటనలు పునరావృతం కాకుండా చట్ట ప్రకారం చర్యలు తీసుకుంటామన్నారు. బత్తలపల్లిలో 19 మందిపైన: వినాయక నిమజ్జనం సందర్భంగా డీజే సౌండ్‌తో ప్రజలకు ఇబ్బంది కలిగించి, పోలీసుల విధులకు ఆటంకం కలిగించిన 19 మందిపై చర్యలు తీసుకున్నట్లు పోలీసులు తెలిపారు. శనీశ్వరుడి ఆదాయం రూ.1.37 కోట్లు పావగడ: స్థానిక స్వర్ణ శనీశ్వరాలయ హుండీలు, టికెట్ల ఆదాయం రూ 1.37 కోట్లు లభించింది. ఇందులో హుండీల ద్వారా రూ.70 లక్షలు, దర్శనం టికెట్ల ద్వారా రూ.67 లక్షలు లభించినట్లు ఆలయ పదాధికారులు గురువారం తెలిపారు. గత నాలుగు శ్రావణ శనివారోత్సవాలను పురస్కరించుకుని భక్తులు శనీశ్వరస్వామికి సమర్పించిన కానుకల లెక్కింపు ప్రక్రియ రెండు రోజులు గా సాగింది. అన్నపూర్ణ దాసోహ భవనంలో ఏర్పాటు చేసిన లెక్కింపు ప్రక్రియ లో ఎస్‌ఎస్‌కే ట్రస్ట్‌ పదాధికారులు, ఆలయ సిబ్బంది, బ్యాంకు ఉద్యోగుల సిబ్బంది పాల్గొన్నారు. అమడగూరు: మండలంలోని పూలకుంట్లపల్లిలో విద్యుదాఘాతంతో మృతి చెందిన మస్తాన్‌ కుటుంబానికి న్యాయం చేయాలంటూ ఎమ్మార్పీఎస్‌ ఆధ్వర్యంలో గురువారం మండల కేంద్రంలోని అంబేడ్కర్‌సర్కిల్‌లో బాధిత కుటుంబ సభ్యులు గ్రామస్తులతో కలిసి ధర్నా చేశారు. ఎంఆర్‌పీఎస్‌ జిల్లా అధ్యక్షుడు పలక ఆంజనేయులు, జిల్లా దళిత సంఘాల అధ్యక్షుడు మూలి యల్లంరాజు, ఎస్సీ, ఎస్టీ విజిలెన్స్‌ మానిటరింగ్‌ కమిటీ సభ్యుడు కత్తి ఆనంద్‌, ఎమ్మార్పీఎస్‌ మండలాధ్యక్షుడు గంగులప్ప మాట్లాడారు. మస్తాన్‌ మృతిపై ఎన్నో అనుమానాలు ఉన్నాయని, పోలీసులు సమగ్ర విచారణ జరిపి కుటుంబానికి న్యాయం చేయాలన్నారు. మస్తాన్‌ మృతికి బాధ్యులపై కఠిన చర్యలు తీసుకోవాలని డిమాండ్‌ చేశారు. మస్తాన్‌ కుటుంబానికి న్యాయం చేసేంతవరకూ ధర్నా చేస్తామన్నారు. ఐదు గంటల పాటు ధర్నా కొనసాగడంతో ట్రాఫిక్‌కు అంతరాయం ఏర్పడింది. విద్యుదాఘాతంతో చనిపోయిన మస్తాన్‌ కుటుంబ సభ్యులకు రూ.25 లక్షలు ఎక్స్‌గ్రేషియా చెల్లించాలని, అలాగే ఆ కుటుంబంలో ఒకరికి ఉద్యోగం ఇవ్వాలన్నారు. 10 ఎకరాలు ప్రభుత్వ భూమి మంజూరు చేయాలని, మండల కేంద్రంలో 5 సెంట్లు ఇంటి స్థలం కేటాయించాలన్నారు.చివరికి నల్లమాడ సీఐ శ్రీనివాసులు ధర్నా దగ్గరకు వచ్చి ఆందోళనకారులకు సర్దిచెప్పారు. అయినా వారు వినకపోవడంతో చివరికి తహసీల్దార్‌ మారుతీ ప్రకాశ్‌ , సీఐ శ్రీనివాసులు మరోసారి ఆందోళనకారులతో చర్చించారు. మస్తాన్‌ కుటుంబానికి న్యాయం చేయడంతో పాటు మస్తాన్‌ మృతి కారకులకు శిక్ష పడేలా చూస్తామని హామీ ఇవ్వడంతో వారు శాంతించారు. వర్షం కోసం జలధి ఉత్సవం అగళి: మండల పరిధిలోని మధూడిలో గురువారం వర్షాలు కురవాలంటూ రైతులు, ప్రజలు గ్రామదేవతలకు ప్రత్యేక పూజలు, జలది ఉత్సవం నిర్వహించారు. వీరభద్రస్వామి, రంగనాథస్వామి, కోల్లపూర్ధమ్మదేవి ఉత్సవమూర్తులను ట్రాక్టర్లో ఊరేగింపుగా కర్ణాటక రాష్ట్రం సిద్దరబెట్ట గ్రామంలోని కొండపైకి తీసుకెళ్లి శిలింగం వద్ద ఉన్న జలాలతో అభిషేకాలు నిర్వహించారు. అక్కడి నుంచి జలాలను (నీళ్లు) తీసుకొచ్చారు. మధూడి గ్రామంలో ఉత్సవ మూర్తులను ఊరేగింపుగా చెరువుల వద్దకు తీసుకెళ్లి ప్రత్యేక పూజలు చేశారు. అనంతరం భక్తులకు అన్నదానం చేశారు. కార్మికుల హక్కుల పరిరక్షణే ధ్యేయం ● సీఐటీయూ రాష్ట్ర ప్రధాన కార్యదర్శి ఏవీ నాగేశ్వర్‌రావు పుట్టపర్తి టౌన్‌: ఎన్నో ఏళ్లుగా పోరాడి సాధించుకొన్న హక్కులను కేంద్ర, రాష్ట్ర ప్రభుత్వాలు నిర్వీర్యం చేస్తున్నాయి. కార్మికుల హక్కుల పరిరక్షణకు డిసెంబర్‌ 1న చలో డిల్లీ కార్యక్రమం చేపడుతున్నట్లు సీఐటీయూ రాష్ట్ర ప్రధాన కార్యదర్శి ఏవీ నాగేశ్వర్‌రావు పేర్కొన్నారు. గురువారం ప్రశాంతి గ్రామంలో కార్మిక కర్షక భవన్‌లో కార్మిక కర్షక పరిష్కార మార్గల భవిష్యత్‌ కార్యాచరణపై సీఐటీయూ జిల్లా అఽధ్యక్షుడు జెడ్‌.పి శ్రీనివాసులు అధ్యక్షతన జిల్లా సదస్సు నిర్వహించారు. ఈ సందర్భంగా వారు మాట్లాడుతూ పోరాడి సాధించుకున్న 28 కార్మిక చట్టాలను మోదీ సర్కార్‌ నిర్వీర్యం చేసేందుకు నాలుగు లేబర్‌ కోడ్ల అమలు చేస్తోందన్నారు. ఏటా 2 కోట్ల ఉద్యోగాలు ఇస్తామన్న హామీ ఏమైందో మోదీ చెప్పాలన్నారు. లేబర్‌ కోడ్లు రద్దు చేయాలని, కనీస వేతనం రూ.42 వేలు అమలు చేయాలని, నిత్యావసర వస్తువుల ధరలు తగ్గించాలని డిమాండ్‌ చేశారు. కార్మికుల సమస్యల పరిష్కారానికై డిసెంబర్‌ 1 నుంచి మూడు రోజులు పాటు నిర్వహించే చలో డిల్లీ కార్యక్రమాన్ని విజయవంతం చేయాలని పిలుపునిచ్చారు.అనుమానాస్పదస్థితిలో వ్యక్తి మృతి లేపాక్షి: మండలంలోని కల్లూరు పొలాల్లో అనుమానాస్పదస్థితిలో వ్యక్తి మృతి చెందాడు. వివరాలు .. బుధవారం ఉదయం కల్లూరుకు చెందిన మద్దిలేటప్ప (45) ఇంటి వద్ద ఉన్న ద్విచక్ర వాహనాన్ని తీసుకుని పొలంలో నీరు కట్టేందుకు వెళతానని వెళ్లారు. అయితే ఉదయం నుంచి రాత్రి 9 గంటల వరకు ఇంటికి రాలేదు. అనుమానం వచ్చి మృతుని బంధువులు, స్థానిక ప్రజలు పొలాల్లో గాలించారు. ఈ గాలింపులో ద్విచక్ర వాహనాన్ని గుర్తించారు. అయితే గురువారం రవి పొలంలోని సీమసప్పులో ఉన్న మృతున్ని గుర్తించారు. ఈ విషయాన్ని పోలీసులకు సమాచారం ఇవ్వడంతో వారు ఘటనా స్థలాన్ని పరిశీలించారు. మృతుడి తలకు బలమైన గాయాలయ్యాయని పోలీసులు గుర్తించారు. మృతుని భార్య అనితమ్మ ఫిర్యాదు మేరకు కేసు నమోదు చేసుకుని దర్యాప్తు చేస్తున్నారు. మృతుడు గ్రామంలోనే పంక్చర్‌ షాపు నిర్వహిస్తూ జీవనం సాగించేవాడు. మృతునికి భార్యతో పాటు ఇద్దరు కుమారులు ఉన్నారు. అయితే మృతుడు ఎలా చనిపోయాడన్న వివరాలు పోలీసుల విచారణలో తేలాల్సి ఉంది. బాధిత కుటుంబ సభ్యులు, గ్రామస్తుల ధర్నా

కదిరి టౌన్‌: కదిరి ఏరియా ఆస్పత్రి భవన నిర్మాణం అటకెక్కింది. ఎమ్మెల్యే కందికుంట ఎన్నోసార్లు ఆస్పత్రి భవనాన్ని పూర్తి చేస్తామని హామీ ఇచ్చినా నీటి మీద రాతగానే మారింది. దీంతో ప్రజలు తీవ్ర ఇబ్బందులు పడుతున్నారు. గత ప్రభుత్వంలో మంజూరు.. ప్రజలకు మెరుగైన వైద్య సేవలు అందించాలనే ఉద్దేశంతో గత వైఎస్సార్‌సీపీ ప్రభుత్వంలో కదిరి ప్రభుత్వ ఏరియా ఆస్పత్రికి కొత్త భవనాన్ని మంజూరు చేశారు. ఇందులో భాగంగానే రూ.18 కోట్లను కేటాయించారు. గత ప్రభుత్వంలోనే దాదాపు 70 శాతం నిర్మాణాలను కూడా పూర్తి చేశారు. అయితే చంద్రబాబు ప్రభుత్వం ఏర్పడిన తర్వాత ఆస్పత్రి భవన నిర్మాణాన్ని పట్టించుకోకపోవడంతో రోగులు తీవ్ర ఇబ్బందులు పడుతున్నారు. కోట్లాది రూపాయలతో నిర్మిస్తున్న భవనం పూర్తికాకపోవడంతో ప్రజల డబ్బు వినియోగంపై కూడా ప్రశ్నలు తలెత్తున్నాయి. పేరుకు 100 పడకల ఆస్పత్రి.. కదిరి ప్రభుత్వ ఏరియా ఆస్పత్రి 100 పడకల ఆస్పత్రి అయినప్పటికీ అవసరమైన స్థాయిలో వైద్యులు, సిబ్బంది, పరికరాలు, మౌలిక వసతులు అందుబాటులో లేవని ప్రజలు విమర్శిస్తున్నారు. నిత్యం ఎంతోమంది రోగులు ఆస్పత్రికి వైద్యం కోసం వస్తుంటారు. వారికి సరైన వైద్యం అందక ఇబ్బందులు తప్పడం లేదని చెబుతున్నారు. అత్యవసర కేసులు వస్తే వెంటనే అనంతపురం, బత్తలపల్లి ఆస్పత్రికి రెఫర్‌ చేస్తున్నారంటున్నారు. అధికారులు ప్రజాప్రతినిధులు స్పందించి రోగులకు మెరుగైన వైద్య సేవలు అందేలా చూడాలని ప్రజలు కోరుతున్నారు. ఈ విషయంపై ప్రభుత్వాస్పత్రి సూపరింటెండెంట్‌ డాక్టర్‌ హుస్సేన్‌ను ‘సాక్షి’ వివరణ కోరగా రోగులకు మెరుగైన వైద్య సేవలు అందిస్తున్నామని పేర్కొన్నారు. నాణ్యమైన వైద్య సేవలందించాలి గత వైఎస్సార్‌సీపీ ప్రభుత్వంలో కదిరి ఏరియా ఆస్పత్రి నిర్మాణానికి రూ.18 కోట్లు మంజూరు 70 శాతం పనులనూ పూర్తిచేసిన వైనం నిర్మాణాన్ని పట్టించుకోని చంద్రబాబు ప్రభుత్వం హామీలిచ్చి చోద్యం చూస్తున్న ఎమ్మెల్యే కందికుంట ! గతంలో కదిరిలో జరిగిన ఆస్పత్రి అభివృద్ధి కమిటీ సమావేశంలో ఎమ్మెల్యే కందికుంట వెంకటప్రసాద్‌ ఆస్పత్రి భవనాన్ని త్వరలోనే పూర్తి చేసి వైద్య సేవలు అందుబాటులోకి తీసుకొస్తామని హామీ ఇచ్చారు. గతంలోనూ ఇదే హామీని ఎన్నోసార్లు ఇచ్చారు. అయితే నేటికీ ఆస్పత్రి నిర్మాణ పనులు మాత్రం పూర్తిచేయకపోవడంతో ప్రజలు తీవ్ర అసంతృప్తి వ్యక్తం చేస్తున్నారు. ఒప్పందం ప్రకారం ఆస్పత్రి భవనం ఎప్పుడో పూర్తికావాల్సి ఉందని, కేవలం అధికారులు, ప్రజాప్రతినిధుల నిర్లక్ష్యం కారణంగానే పూర్తికావడం లేదని ఆగ్రహం వ్యక్తం చేస్తున్నారు. అటకెక్కిన ఎమ్మెల్యే హామీ.. ఆస్పత్రి నిర్మాణాన్ని పూర్తి చేయాలి కదిరి ప్రభుత్వ ఏరియా ఆస్పత్రికి రోజూ 500, 600 మంది రోగులు వస్తుంటారు. ఆస్పత్రి సిబ్బంది వారికి సరైన వైద్య సేవలు అందించడంలో విఫలమవుతున్నారు. దాదాపు 12 మండలాల నుంచి రోగులు ఆస్పత్రికి వస్తుంటే కనీసం మౌలిక వసతులు కూడా కల్పించలేని దుస్థితి నెలకొంది. వెంటనే వైద్య సిబ్బంది, ప్రజాప్రతినిధులు స్పందించి ఆస్పత్రికి వచ్చే రోగులకు నాణ్యమైన వైద్య సేవలు అందించాలి. – జీఎల్‌.నరసింహులు సీపీఎం నాయకుడు కదిరి ప్రభుత్వ ఆస్పత్రికి వచ్చే ప్రతి యాక్సిడెంట్‌, అత్యవసర కేసులన్నీ అనంతపురం, బత్తలపల్లి ఆస్పత్రులకు రెఫర్‌ చేస్తున్నారు. వచ్చిన వారికి సరైన వైద్య సేవలు అందించకపోతే ఇక్కడ ఆస్పత్రి ఎందుకు ఉన్నట్లు. ఇప్పటికై నా ప్రభుత్వ వైద్యులు, సిబ్బంది రోగులకు నాణ్యమైన వైద్యసేవలందించాలి. అలాగే నిర్మాణంలో ఉన్న ఏరియా ఆస్పత్రి భవనాన్ని వెంటనే పూర్తిచేయాలి. – రాజేంద్ర, విద్యార్థి సంఘం నాయకుడు

పుట్టపర్తి అర్బన్‌: జిల్లాలోని పలు పాఠశాలల్లో మౌలిక వసతులు, సౌకర్యాలు, బోధన తీరును పరిశీలించేందుకు కేంద్ర పాఠశాల విద్య, లిటరసీ కార్యదర్శి, సమగ్ర శిక్ష రాష్ట్ర ప్రాజెక్టు డైరెక్టర్‌ సభ్యులుగా ఉన్న కేంద్రం బృందం శుక్రవారం జిల్లాలో పర్యటించనుంది. పుట్టపర్తి మండలం జగరాజుపల్లిలోని కేజీబీవీ, మోడల్‌ స్కూళ్లను కేంద్ర బృందం పరిశీలించనున్న నేపథ్యంలో గురువారం కలెక్టర్‌ శ్యాం ప్రసాద్‌ విద్యాశాఖ అధికారులతో కలిసి ఆయా పాఠశాలలను సందర్శించారు. పాఠశాలల్లో మౌలిక సదుపాయాలు, ఏర్పాట్లను పరిశీలించారు. ఆయా స్కూళ్ల నిర్వాహకులకు పలు సూచనలు చేశారు. ఎలాంటి లోటుపాట్లు లేకుండా అన్ని ఏర్పాట్లు పూర్తి చేయాలన్నారు. కలెక్టర్‌ వెంట కేజీబీవీ కార్యదర్శి దేవానందరెడ్డి, సమగ్ర శిక్ష అడిషనల్‌ ఎస్పీడి రవీంద్రనాథ్‌రెడ్డి, పాఠశాల విద్య ఆర్‌జేడీ శామ్యుల్‌, డీఈఓ కిష్టప్ప తదితరులు ఉన్నారు. సమస్యలు చెప్పండి పరిష్కరిస్తాం ● జిల్లా న్యాయ సేవాధికార సంస్థ కార్యదర్శి రాజశేఖర్‌ హిందూపురం టౌన్‌: ఉపకారాగారంలోని సమస్యలను తమ దృష్టికి తీసుకొస్తే పరిష్కారానికి చర్యలు తీసుకుంటామని జిల్లా న్యాయ సేవాధికార సంస్థ కార్యదర్శి రాజశేఖర్‌ పేర్కొన్నారు. గురువారం స్థానిక ఉపకారాగారాన్ని ఆయన తనిఖీ చేశారు. ఈ సందర్భంగా ఖైదీలతో వివరాలను అడిగి తెలుసుకున్నారు. న్యాయవాదులను కుటుంబ సభ్యులు తరచూ కలుస్తున్నారా, బెయిల్‌ మంజూరైందా తదితర విషయాలపై ఆరా తీశారు. అనంతరం ఆయన మాట్లాడారు. న్యాయవాదులను ఏర్పాటు చేసుకోలేని రిమాండ్‌ ఖైదీలు దరఖాస్తు చేసుకుంటే ఉచిత న్యాయ సహాయం అందిస్తామని తెలిపారు. భోజన తయారీలో నాణ్యత పాటించాలన్నారు. ఉపకారాగారంలో ఏమైనా సమస్యలుంటే స్థానికంగా ఏర్పాటు చేసిన ఫిర్యాదుల పెట్టెలో కాగితంపై రాసి వేయాలన్నారు. ఉపకారాగార అధికారులు, సిబ్బంది రిమాండ్‌ ఖైదీల పట్ల వివక్ష ప్రదర్శిస్తుంటే తమ దృష్టికి తీసుకొస్తే పరిష్కారానికి కృషి చేస్తామన్నారు. అనంతరం రికార్డులను పరిశీలించారు. కార్యక్రమంలో ఉపకారాగార అధికారి హనుమప్ప, న్యాయవాది ఆశ, లోక్‌ అదాలత్‌ సిబ్బంది రాజా, నాయక్‌, పారా లీగల్‌ వాలంటీర్లు పాల్గొన్నారు. డ్యాన్స్‌ చేస్తూ కుప్పకూలిన యువకుడు ● ఆస్పత్రిలో చికిత్స పొందుతూ మృతి గుత్తి: వినాయక చవితి వేడుకల్లో అపశ్రుతి చోటుచేసుకుంది. పట్టణంలోని ఎస్‌బీఐ కాలనీలో నివాసముండే అశోక్‌కుమార్‌ (26) బుధవారం రాత్రి వినాయక నిమజ్జనం సంబరాల్లో పాల్గొన్నాడు. డ్యాన్స్‌ చేస్తూ కుప్పకూలి కింద పడిపోయాడు. స్థానికులు, కుటుంబ సభ్యులు అతడిని కర్నూలు ఆస్పత్రికి రెఫర్‌ చేశారు. చికిత్స పొందుతూ గురువారం తెల్లవారుజామున మృతి చెందాడు. మృతుడు అశోక్‌ కుమార్‌ ఔట్‌ సోర్సింగ్‌ ఉద్యోగిగా పని చేసేవాడు. మృతుడికి భార్య ప్రశాంతి ఉన్నారు. ఇద్దరు మహిళలపై దాడి బత్తలపల్లి: భూ వివాదం నేపథ్యంలో ఇంట్లోకి ప్రవేశించి దాడికి పాల్పడిన ఘటనపై గురువారం కేసు నమోదు చేసినట్లు బత్తలపల్లి పోలీసులు తెలిపారు. పోలీసుల వివరాలమేరకు... మండలంలోని సంగాల రెవెన్యూ గ్రామ పరిధిలోని సర్వే నంబర్‌ 35లో ఉన్న 2.12 ఎకరాల భూమి విషయంలో తంబాపురం గ్రామానికి చెందిన ఎస్‌.శివమ్మకు ఆమె బంధువుల మధ్య కొంతకాలంగా వివాదం కొనసాగుతోంది. గురువారం భూమి విషయంలో ఉన్న మనస్పర్థల కారణంగా శివమ్మ ఇంట్లోకి బంధువులు వెళ్లి రాళ్లు విసిరి, ఆమెతో పాటు ఆమె సోదరి పుష్పావతిపై దాడి చేసి గాయపర్చారు. శివమ్మ ఫిర్యాదు మేరకు కేసు నమోదు చేసుకొని దర్యాప్తు చేస్తున్నట్లు పోలీసులు తెలిపారు.

బత్తలపల్లి: మండల కేంద్రమైన బత్తలపల్లిలో వినాయక చవితి పండుగ సందర్భంగా పోలీసుల పక్షపాత వైఖరి బట్టబయలైంది. వినాయక నిమజ్జనోత్సవంలో బుధవారం రాత్రి అక్కడక్కడా చెదురుముదురు సంఘటనలు జరిగాయి. డీజేల వినియోగం, నిబంధనలు అమలు, పోలీసుల సమన్వయ లోపంపై స్థానికులు నుంచి తీవ్ర అభ్యంతరాలు వ్యక్తమవుతున్నాయి. వినాయక నిమజ్జనం సందర్భంగా ఊరేగింపులో డీజేల వినియోగంపై కఠిన ఆంక్షలు విధించామని ఉత్సవ కమిటీలకు పోలీస్‌ స్టేషన్‌లో సమావేశం ఏర్పాటు చేసి వివరించారు. కానీ మండల కేంద్రంలో జరిగిన కొన్ని ఊరేగింపుల్లో మాత్రం డీజేలు, భారీ సౌండ్‌ సిస్టమ్స్‌లతో హోరెత్తించారు. మరికొన్ని కమిటీల ఊరేగింపులపై ఆంక్షలు విధించడాన్ని ప్రజలు తప్పుబడుతున్నారు. అసలు ఏ ప్రాతిపదికన కొందరికి అనుమతులు ఇచ్చారని, నిబంధనలు అందరికీ ఒకేలా ఎందుకు అమలు చేయడం లేదని పలువురు ప్రశ్నిస్తున్నారు. నిమజ్జన ఊరేగింపు సమయంలో కొన్ని రాజకీయ పరమైన పాటలను భారీ శబ్ధాలతో వినిపించడంతో ప్రధాన కూడలి వద్ద కొద్దిసేపు ఉద్రిక్త వాతావరణం నెలకొంది. ఇతర విగ్రహాల వెంట ఉన్న యువకుల మధ్య ఈ పాటలు కవ్వింపు చర్యలకు దారి తీశాయి. అలాగే స్థానికంగా రెండు కాలనీలకు చెందిన వారు కవ్వింపు చర్యలకు పాల్పడ్డారు. ఈ తరుణంలో పోలీసులు అక్కడికి చేరుకోగానే పోలీసులు డౌన్‌.. డౌన్‌ అంటూ నినాదాలు చేశారు. సాయంత్రం ప్రారంభమైన నిమజ్జన కార్యక్రమం ఎన్నడూ లేనంతగా అర్థరాత్రి వరకు కొనసాగింది. సాయంత్రం 4.30 నుంచి రాత్రి 11.30 వరకు విద్యుత్‌ సరఫరా నిలిపివేయడంతో ప్రజలందరూ తీవ్ర ఇబ్బందులు పడ్డారు. పోలీసుల తీరుపై సర్వత్రా విమర్శలు

ప్రశాంతి నిలయం: దేవశిల్పిగా, వాస్తుశిల్పి, శిల్పశాస్త్రానికి ప్రేరణగా ప్రసిద్ధి చెందిన భగవాన్‌ విశ్వకర్మ జయంతి వేడుకలను గురువారం కలెక్టరేట్‌లో ఘనంగా నిర్వహించారు. ఈ సందర్భంగా కలెక్టర్‌ శ్యాం ప్రసాద్‌ విశ్వకర్మ చిత్రపటానికి పూలమాలలు వేసి నివాళులర్పించారు. అనంతరం ఆయన మాట్లాడుతూ, విశ్వకర్మ విశ్వానికే మొదటి ఆర్కిటెక్ట్‌ అన్నారు. శిల్పకళ, ఇంజినీరింగ్‌, నిర్మాణ రంగాలకు విశ్వకర్మ ప్రేరణగా నిలిచారన్నారు. దేవతల మందిరాలు, యజ్ఞవేదికలు, మండపాలు, వివిధ నిర్మాణాలు చేపట్టి భావితరాలకు ఆదర్శంగా నిలిచారన్నారు. నేటి ఆర్కిటెక్ట్‌లు, చేతివృత్తుల వారందరికీ ఆయన ఆదర్శమూర్తి అన్నారు. పీఎం విశ్వకర్మ పథకానికి సంబంధించి అర్హులైన వారు సరైన విధానంలో దరఖాస్తు చేసుకోవాలని సూచించారు. లోపాలుంటే సరిచేసి పథకం వర్తింపజేసేందుకు జిల్లా యంత్రాంగం సిద్ధంగా ఉందన్నారు. అర్హులందరూ ‘పీఎం విశ్వకర్మ’ పథకానికి దరఖాస్తు చేసుకుని లబ్ధి పొందాలని సూచించారు. కార్యక్రమంలో పుట్టపర్తి ఆర్డీఓ సువర్ణ, బీసీ సంక్షేమ శాఖ అధికారి రాజేంద్ర కుమార్‌రెడ్డి, స్కిల్‌ డెవలప్‌మెంట్‌ ఆఫీసర్‌ హరికృష్ణ, స్వచ్ఛాంధ్ర కార్పొరేషన్‌ డైరెక్టర్‌ పర్వీన్‌ భాను తదితరులు పాల్గొన్నారు. ఎం.కొండాపురం పంచాయతీకి ఐఎస్‌ఓ గుర్తింపు అనంతపురం ఎడ్యుకేషన్‌: కళ్యాణదుర్గం మండలం ఎం.కొండాపురం గ్రామ పంచాయతీకి నీటి సమృద్ధి అంశం కింద ఐఎస్‌ఓ గుర్తింపు లభించింది. సమర్థవంతమైన నీటి నిర్వహణతో పాటు ప్రజలకు నీటి సదుపాయాలు కల్పించేందుకు పంచాయతీ చేపట్టిన చర్యలకు గుర్తింపు లభించినట్లు జిల్లా పంచాయతీ అధికారి టి.నాగరాజ నాయుడు తెలిపారు. పంచాయతీరాజ్‌ కమిషనర్‌ కార్యాలయంలో గురువారం జరిగిన కార్యక్రమంలో కమిషనర్‌ చేతుల మీదుగా డిప్యూటీ ఎంపీడీఓ రంగనాయకులు, పంచాయతీ కార్యదర్శి లోకేష్‌ ఐఎస్‌ఓ ధ్రువపత్రాన్ని అందుకున్నారు. జిల్లాలో మోస్తరు వర్షం అగళి: జిల్లా వ్యాప్తంగా గురువారం మోస్తరు వర్షం కురిసింది. సీజన్‌ ఆరంభంలో పలకరించిన వరుణుడు ఆ తర్వాత ముఖం చాటేశాడు. దీంతో వేసవిని తలపించే ఎండలతో జనం అల్లాడిపోతున్నారు. వరుణదేవా కరుణించవా...అంటూ ఊరూవాడా వేడుకుంటున్నారు. ఈ క్రమంలో గురువారం సాయంత్రం నుంచి వాతావరణంలో ఒక్కసారిగా మార్పులు చోటుచేసుకోగా జిల్లాలోని పలు ప్రాంతాల్లో మోస్తరు వర్షం కురిసింది. మడకశిర, అగళి, హిందూపురం, పెనుకొండ, సోమందేపల్లి తదితర మండలాల్లో చెప్పుకోదగ్గ వర్షం కురిసింది. అగళి మండల పరిధిలోని కురుసాంగనపల్లి గ్రామానికి చెందిన జూలేగౌడ్‌ పొలంలో సాయంత్రం కొబ్బరిచెట్టుపై పిడుగు పడటంతో కాలిపోయింది.

పుట్టపర్తి: చత్తీస్‌గఢ్‌లో వీరమరణం పొందిన జవాన్‌ సుబ్బిరెడ్డి భౌతికకాయానికి పోలీస్‌ లాంఛనాలతో గురువారం అంత్యక్రియలు పూర్తిచేశారు. వివరాలు.. చత్తీస్‌గఢ్‌ రాష్ట్రం రాయపూర్‌లో సుబ్బిరెడ్డి పనిచేస్తున్నారు. విధి నిర్వహణలో ప్రమాదవశాత్తూ గాయపడటంతో ఆయన్ను ఆస్పత్రికి తరలించారు. అయితే ఆస్పత్రిలో చికిత్స పొందుతూ ఆయన మృతి చెందారు. దీంతో బీఎస్‌ఎఫ్‌ జవాన్లు సుబ్బిరెడ్డి భౌతికకాయాన్ని వారి స్వగ్రామం కొత్తచెరువు మండలం లింగారెడ్డిపల్లికి తీసుకొచ్చారు. అనంతరం పోలీసు లాంఛనాలతో అంత్యక్రియలను పూర్తి చేశారు. అంతకు ముందు కొత్తచెరువు నుంచి లింగారెడ్డిపల్లి వరకూ పెద్ద ఎత్తున అభిమానులు, బంధువులు, మాజీ సైనికోద్యోగులు ర్యాలీగా వచ్చి అంత్యక్రియల్లో పాల్గొన్నారు. నేడు బాలుర క్రికెట్‌ సెలక్షన్లు హిందూపురం టౌన్‌: పట్టణంలోని ఎంజీఎం క్రీడామైదానంలో శుక్రవారం బాలుర అండర్‌ 15, అండర్‌ 18 క్రికెట్‌ సెలక్షన్లు నిర్వహిస్తున్నట్లు ఆర్‌డీటీ స్పోర్ట్స్‌ డైరెక్టర్‌ సాయికృష్ణ గురువారం తెలిపారు. హిందూపురం నియోజకవర్గంలోని చుట్టుపక్కల ప్రాంతాల్లోని బాలురు క్రికెట్‌ పట్ల ఆసక్తి ఉన్న వారు పాల్గొనవచ్చన్నారు. వ్యక్తిపై పోక్సో కేసు బుక్కరాయసముద్రం: మండల పరిధిలోని పసులూరులో బాలికపై ఓ వ్యక్తి లైంగిక వేఽధింపులకు పాల్పడ్డాడు. ఈ మేరకు బాలిక తల్లిదండ్రులు స్థానిక పోలీస్‌స్టేషన్‌లో ఫిర్యాదు చేశారు. వారి వివరాలమేరకు.. వెంకటాపురానికి చెందిన రాజు పసులూరు గ్రామంలో ఓ బాలికతో పరిచయం పెంచుకున్నాడు. రాజుకు ఇది వరకే పెళ్లి అయింది. అయితే నాలుగు రోజుల క్రితం బాలికను రాజు ఇంటి నుంచి తీసుకెళ్లాడు. తల్లిదండ్రుల ఫిర్యాదుతో గురువారం ఇరువురిని స్టేషన్‌కు తీసుకొచ్చి రాజును అదుపులోకి తీసుకున్నారు. బాలికను తల్లిదండ్రులకు అప్పగించారు. రాజుపై పోక్సో కేసు నమోదు చేసినట్లు పోలీసులు తెలిపారు.

ధర్మవరం: రైలులో ప్రయాణిస్తున్న దంపతులకు మత్తు మందు ఇచ్చిన ఓ మహిళ 50 గ్రాముల బంగారు మంగళసూత్రాన్ని అపహరించింది. గురువారం స్థానిక ఆర్‌పీఎఫ్‌ స్టేషన్‌లో సీఐ నాగేశ్వరరావు ఈ కేసుకు సంబంధించిన వివరాలు తెలిపారు. కర్నూలు జిల్లా మంత్రాలయానికి చెందిన కుమ్మర గోవిందు నౌకాదళంలో పనిచేస్తున్నారు. వారం రోజుల క్రితం ఆయన, భార్య సంధ్యతో కలిసి షిరిడీకి వెళ్లారు. సాయిబాబా దర్శనం అనంతరం అక్కడి పర్యాటక ప్రాంతాలను సందర్శించి ఈనెల 15వ తేదీ (మంగళవారం) కోపర్గావ్‌ రైల్వేస్టేషన్‌ చేరుకుని తెల్లవారుజామున కర్ణాటక ఎక్స్‌ప్రెస్‌(రైలు నంబర్‌ 12628)లో తిరుగు పయనమయ్యారు. రిజర్వేషన్‌ దొరక్కపోవడంతో గోవిందు ఓ బోగీలో ఎక్కాడు. భార్య సంధ్యను రద్దీ తక్కువగా ఉన్న లేడీస్‌ కోచ్‌లో ఎక్కించాడు. ఓ స్టేషన్‌లో రైలు ఆగినప్పుడు భోజనం చేసేందుకు భార్య ఉన్న లేడీస్‌ కోచ్‌లోకి గోవిందు వెళ్లాడు. భోజనం చేసిన అనంతరం పక్కనే కూర్చున్న ఓ మహిళ వారికి చిక్కీతో చేసిన ప్రసాదాన్ని ఇచ్చింది. దీంతో వారు కళ్లకద్దుకుని తిన్న అనంతరం నిద్రలోకి జారుకున్నారు. మేల్కొని చూసేసరికి ధర్మవరం రైల్వేస్టేషన్‌ వచ్చింది. దీంతో వారు తమకు ఎవరో మత్తుమందు ఇచ్చారని స్థానిక రైల్వే పోలీసులకు తెలిపారు. ఆర్‌పీఎఫ్‌ సిబ్బంది వారిని స్థానిక ప్రభుత్వ ఆస్పత్రికి తరలించి చికిత్స చేయించారు. బుధవారం రాత్రి వారికి మత్తు దిగాక రైల్వే స్టేషన్‌కు చేరుకున్నారు. తన భార్య మెడలోని 50 గ్రాముల బంగారు మంగళసూత్రం కనిపించడంలేదని, తమకు మత్తు మందు ఇచ్చిన మహిళే చోరీ చేసిందని గోవిందు ఫిర్యాదు చేశారు. ఈ మేరకు కేసు నమోదు చేశామని సీఐ నాగేశ్వరరావు తెలిపారు. అనంతరం రైళ్లలో చోరీలు చేసే మహిళల ఫొటోలను తెప్పించి గోవిందు భార్యకు చూపించగా ఆమె...తమకు మత్తుమందు ఇచ్చిన మహిళను గుర్తించింది. అంతకుముందు ఆస్పత్రిలో చికిత్స పొందుతున్న గోవిందు దంపతులను ఆర్‌ పీఎఫ్‌ అధికారులు పరామర్శించారు.

టీడీపీలో వర్గపోరు తార స్థాయికి చేరింది. ఇప్పటికే సీనియర్లకు పార్టీలో ప్రాధాన్యం తగ్గగా... కొత్త నాయకులు తెరపైకి వచ్చారు. అధ్యక్షులూ మారారు. మంత్రివర్గంలో చోటు దక్కించుకున్న వారు పెత్తనం చెలాయిస్తున్నారు. దీంతో సీనియర్లంతా ఇంటికే పరిమితమయ్యారు. కానీ స్థానిక ఎన్నికల వేళ సీనియర్లంతా జూనియర్లతో అమీతుమీకి సిద్ధమవుతున్నారు. తమ మాట చెల్లకపోతే సత్తా ఏమిటో చూపుతామంటున్నారు. సాక్షి, పుట్టపర్తి తెలుగుదేశం పార్టీలో ఎవరికి పదవులు రావాలన్నా.. నామినేటెడ్‌లో స్థానం దక్కాలన్నా.. టికెట్‌ పొందాలన్నా సీనియర్లు కీలక పాత్ర పోషించేవారు. సీనియర్ల సిఫారసుల మేరకే పదవుల పంపకాలు నడిచేవి. అయితే కూటమి ప్రభుత్వం ఏర్పడిన తర్వాత మిత్రపక్షాల సంగతి పక్కన పెడితే.. టీడీపీలోనే గ్రూపు తగాదాలు పార్టీ ప్రతిష్టను బాగా దెబ్బ తీస్తున్నాయి. సీనియర్లందరూ చంద్రబాబు వర్గంలో.. జూనియర్లంతా చినబాబు (లోకేశ్‌) వర్గంలో ఉన్నట్లు సమాచారం. దీంతో ఎవరికి వారుగా అధిష్టానం వద్ద లాబీయింగ్‌ చేస్తున్నారు. కానీ ఎక్కువసార్లు చినబాబు వర్గానికే న్యాయం జరుగుతోందని సీనియర్లు ఆవేదన వ్యక్తం చేస్తున్నారు. గతంలో పదవులు అనుభవించారనే కారణంతో సీనియర్లకు ప్రాధాన్యం తగ్గించి చినబాబు నేతృత్వంలో జూనియర్లు పెత్తనం చెలాయిస్తున్నారు. దీంతో స్థానిక సంస్థల ఎన్నికల్లో కూడా జూనియర్లు చెప్పిన వారికే టికెట్లు వచ్చే అవకాశం ఉందని తెలుస్తోంది. ఫలితంగా సీనియర్ల వెంట నడిచేందుకు చాలామంది ఆసక్తి చూపడం లేదు. దశాబ్దాల కాలంగా పార్టీ జెండా మోసినా.. కీలక సమయంలో తమ సీనియారిటీని పట్టించుకోవడం లేదంటూ వాపోతున్నారు. జిల్లా వ్యాప్తంగా ఏడు అసెంబ్లీ నియోజకవర్గాల్లోనూ గ్రూపు తగాదాలు టీడీపీ అధిష్టానాన్ని వెంటాడుతున్నాయి. టీడీపీలోని గ్రూపు తగాదాలతో రానున్న స్థానిక సంస్థల ఎన్నికల్లో జనసేనకు అదృష్టం వరించే అవకాశాలు ఎక్కువగా ఉన్నాయి. చెల్లని సీనియర్ల సిఫారసులు.. జిల్లాలోని ఆరు (మడకశిర, హిందూపురం, పెనుకొండ, ధర్మవరం, కదిరి, పుట్టపర్తి) మున్సిపల్‌ చైర్మన్‌ స్థానాలతో పాటు జిల్లా పరిషత్‌ చైర్మన్‌ కోసం ప్రత్యక్ష ఎన్నిక జరగనుంది. అదేవిధంగా పుట్టపర్తి అర్బన్‌ డెవలప్‌మెంట్‌ అథారిటీ (పుడా) చైర్మన్‌ పదవికి అభ్యర్థిని పార్టీ నేతలు నామినేట్‌ చేయనున్నారు. ఈ క్రమంలో టీడీపీ నుంచి అధిష్టానానికి మూడు జాబితాలు పంపించినట్లు తెలిసింది. సీనియర్ల సిఫారసులు.. జూనియర్లు ఎంపిక చేసిన జాబితాతో పాటు ప్రజాప్రతినిధుల నుంచి మరో జాబితా అధిష్టానం వద్దకు చేరినట్లు సమాచారం. చైర్మన్‌ పీఠం తమకే ఇవ్వాలని.. లేనిపక్షంలో కూటమి ధర్మంలో భాగంగా జనసేనకు ఇచ్చినా సహకరిస్తామని చెప్పినట్లు తెలిసింది. ఇరు వర్గాల ఆధిపత్యపోరులో జనసేన నాయకులకు అడక్కుండానే అదృష్టం వరించే అవకాశం ఉంది. పార్టీ ఆవిర్భావం నుంచి ఉన్నప్పటికీ తమకు ప్రాధాన్యం ఎందుకు ఉండదని సీనియర్లు ఎవరికి వారుగా జాబితాలు సిద్ధం చేస్తున్నారు. జెడ్పీ, ‘పుడా’ చైర్మన్‌ స్థానాలకు పోటాపోటీ.. కొత్తగా జిల్లా పరిషత్‌ ఏర్పాటు కానుండగా...‘పుడా’ పరిధి కూడా విస్తరించింది. దీంతో ఈ రెండు పీఠాలపై పోటీ పెరిగింది. టీడీపీలోని సీనియర్లు, జూనియర్లు ఎవరికి వారుగా అధిష్టానం వద్ద లాబీయింగ్‌ చేస్తున్నారు. కొందరు చంద్రబాబు చుట్టూ తిరుగుతుండగా... జూనియర్లంతా లోకేష్‌తో మంతనాలు సాగిస్తున్నట్లు తెలుస్తోంది. అయితే టీడీపీ అధిష్టానం మాత్రం ప్రతి నియోజకవర్గం నుంచి ఒకరిద్దరి పేర్లను పరిశీలనలోకి తీసుకున్నట్లు తెలిసింది. కుల సమీకరణాల్లో భాగంగా పలువురి పేర్లను అధిష్టానం దృష్టికి తీసుకెళ్లారు. టీడీపీలో వర్గ విభేదాల కారణంగా తమకు అవకాశం దక్కుతుందనే ఉద్దేశంతో జనసేనలోనూ ఆశావహుల సంఖ్య పెరిగినట్లు తెలిసింది. దీంతో జెడ్పీ, పుడా చైర్మన్‌ల కోసం భారీ పోటీ నెలకొంది. తారస్థాయికి విభేదాలు.. మడకశిరలో మాజీ ఎమ్మెల్సీ గుండుమల, మాజీ ఎమ్మెల్యే ఈరన్న, ఎమ్మెల్యే ఎంఎస్‌ రాజు మధ్య ఆధిపత్య పోరు కొనసాగుతోంది. పెనుకొండలో మంత్రి సవిత, ఎంపీ పార్థసారథి మధ్య ముందు నుంచి విభేదాలు ఉన్న సంగతి తెలిసిందే. పుట్టపర్తిలో మాజీ మంత్రి పల్లె రఘునాథరెడ్డితో బీసీ వర్గానికి చెందిన నాయకులు చాలామంది విభేదిస్తున్నారు. హిందూపురంలో బాలయ్య అనుచరుల మధ్య పొసగడం లేదు. కదిరిలో ఎమ్మెల్యే కుందికుంటతో కూటమి నేతలు విభేదిస్తున్నారు. ధర్మవరంలో మూడు పార్టీల నాయకులు ఎవరికి వారుగా వ్యవహరిస్తున్నారు. ఈ క్రమంలో స్థానిక సమరం తర్వాత పచ్చపార్టీ నేతలు తలోదారి చూసుకోనున్నట్లు తెలుస్తోంది. ‘బాబు’ బ్యాచ్‌కు చినబాబు అనుచరుల సెగ ‘స్థానిక’ ఎన్నికల నేపథ్యంలో మొదలైన యుద్ధం తమకు సీటివ్వకపోతే జనసేనకు ఇవ్వాలని సూచన జెడ్పీ, ‘పుడా’ స్థానాల కోసం నేతల పోటాపోటీ జిల్లా నుంచి మూడు జాబితాలు సిద్ధమైనట్లు సమాచారం

పుట్టపర్తి అర్బన్‌: గ్రామీణ మహిళలు డ్వాక్రా రుణాలను తీసుకొని ఆదాయ వనరులను పెంపొందించుకోవాలని డీఆర్‌డీఏ పీడీ నరసయ్య పేర్కొన్నారు. గురువారం స్థానిక వెలుగు కార్యాలయంలో ఉమ్మడి అనంతపురం, ఉమ్మడి కర్నూలు జిల్లాలకు చెందిన ఐఎఫ్‌సీ సీఆర్పీలకు మూడు రోజుల శిక్షణలో భాగంగా మొదటి రోజు కార్యక్రమాన్ని ప్రారంభించి మాట్లాడారు. పీడీ మాట్లాడుతూ గ్రామీణ ప్రాంతాల్లోని స్వయం సహాయక సంఘాల సభ్యులు ఆర్థికాభివృద్ధి, జీవనోపాదుల మెరుగుదల, వ్యాపారాభివృద్ధికి , ఆర్థిక స్వావలంబనకు ఐఎఫ్‌సీలు (ఇంటరనల్‌ ఫైనాన్సియల్‌ కన్సల్టెంట్స్‌) పాత్ర కీలకమన్నారు. ఐఎఫ్‌సీ క్లస్టర్‌ వ్యూహం ద్వారా సభ్యులకు మెరుగైన ఆర్థిక సేవలు, వ్యాపారావకాశాలు అందేలా కృషి చేస్తాయన్నారు. కార్యక్రమంలో డీపీఎం రామమోహన్‌, వాసన్‌ ఎన్‌జీఓ ఊతప్ప, ఏపీఎంలు రమణప్ప, ఓబులేషు, నాలుగు జిల్లాల ఐఎఫ్‌సీ సీఆర్పీలు పాల్గొన్నారు.

మడకశిర రూరల్‌/అమరాపురం: తీవ్ర వర్షాభావం...పాలకుల ముందుచూపులేని తనం రైతులకు శాపంగా మారింది. గత ఏడాది భారీ వర్షాలు కురిసినా కనీసం చెరువులు కూడా నింపకపోవడంతో ఈసారి భూగర్భజలమట్టం భారీగా పడిపోయింది. దీంతో బోర్లన్నీ ఒట్టిపోయాయి. మరోవైపు కళ్లముందే హంద్రీ–నీవా కాలువలో పారుతున్న నీరు కుప్పానికి వెళ్లిపోతోంది. దీంతో ఖరీఫ్‌ కల్లోలంగా మారింది. పంటలన్నీ కళ్లముందే ఎండిపోతుండగా..దిక్కుతోచని రైతులు కనీసం పశువులకు మేతకై నా పనికొస్తుందని బిడ్డలా కాపాడిన పంటను తొలగిస్తున్నారు. జిల్లాలో ఎక్కడ చూసినా ఇప్పుడు ఇవే దృశ్యాలు కనిపిస్తున్నాయి. గురువారం మడకశిర మండలం సింగేపల్లి వద్ద ఎండిపోతున్న వేరుశనగ పంటను రైతులు ట్రాక్టర్‌తో తొలగిస్తూ కనిపించారు. అలాగే అమరాపురం మండలం హలుకూరు గ్రామ రైతు గంగాధర నాలుగు ఎకరాల్లో సాగు చేసిన వేరుశనగ పంట ఎండిపోతుండటంతో పశువులకు గ్రాసమైనా దక్కుతుందని భావించి పంటను తొలగించాడు.

మడకశిర: పట్టణంలోని ప్రభుత్వ ఒకేషనల్‌ కళాశాల ప్రిన్సిపాల్‌ పోస్టు చాలా రోజులుగా ఖాళీగా ఉంది. దీంతో కళాశాల నిర్వహణ, సిబ్బంది వేతనాలకు సంబంధించి తీవ్ర ఇబ్బందులు ఎదురవుతున్నాయి. దీంతో అదే కళాశాలలో పనిచేస్తున్న వారికి ఇన్‌చార్జ్‌గా ఇద్దామని ప్రభుత్వం భావిస్తున్నా ‘మాకొద్దు..బాబోయ్‌’ అంటూ అధ్యాపకులు తప్పుకుంటున్నారు. 2008 నుంచి ప్రిన్సిపాల్‌ పోస్టు పెండింగ్‌.. 2008లో మడకశిరకు ప్రభుత్వ ఒకేషనల్‌ జూనియర్‌ కళాశాల మంజూరైంది. అయితే ప్రిన్సిపాల్‌ పోస్టు మాత్రం మంజూరు కాలేదు. దీంతో ఉన్నతాధికారులు స్థానిక ప్రభుత్వ జూనియర్‌ కళాశాలలో ఇంగ్లిష్‌ లెక్చరర్‌గా పనిచేస్తున్న మహేష్‌ను ఒకేషనల్‌ జూనియర్‌ కళాశాల ఇన్‌చార్జ్‌ ప్రిన్సిపాల్‌గా నియమించారు. అప్పటి నుంచే ఆయనే ఇన్‌చార్జ్‌ ప్రిన్సిపాల్‌గా కొనసాగారు. అయితే ఇటీవల ఆయనకు పదోన్నతి రాగా, ఇన్‌చార్జ్‌ ప్రిన్సిపాల్‌ బాధ్యతల నుంచి తప్పుకుని డిగ్రీ కళాశాల లెక్చరర్‌గా ఉద్యోగంలో చేరారు. ఇన్‌చార్జ్‌ బాధ్యతలకు విముఖత.. మహేష్‌ ఇన్‌చార్జ్‌ ప్రిన్సిపాల్‌ బాధ్యతల నుంచి తప్పుకోవడంతో ప్రభుత్వం ఒకేషనల్‌ జూనియర్‌ కళాశాలలోనే ఇంగ్లిష్‌ అధ్యాపకురాలిగా పని చేస్తున్న శిరోమణిని ఇన్‌చార్జ్‌ ప్రిన్సిపాల్‌గా నియమిస్తూ ఉత్తర్వులు జారీ చేసింది. అయితే తనకు ఆరోగ్య సమస్యలున్నాయని, అందువల్ల ఇన్‌చార్జ్‌ ప్రిన్సిపాల్‌గా బాధ్యతలు తాను నిర్వర్తించలేనంటూ ఆమె ఇటీవలే ఉన్నతాధికారులకు లేఖ రాశారు. దీంతో ఇన్‌చార్జ్‌ ప్రిన్సిపాల్‌ సమస్య మళ్లీ మొదటికి వచ్చింది. అందని వేతనాలు.. 2008 నుంచి ఒకేషనల్‌ జూనియర్‌ కళాశాలకు రెగ్యులర్‌ ప్రిన్సిపాల్‌ పోస్టు మంజూరు కాకపోవడంతో ఇన్‌చార్జ్‌ ప్రిన్సిపాలే కళాశాల నిర్వహణలో కీలకపాత్ర పోషించారు. ప్రధానంగా అధ్యాపకులు, సిబ్బందికి వేతనాలు చెల్లించడానికి డ్రాయింగ్‌ అధికారిగా కూడా ఇన్‌చార్జ్‌ ప్రిన్సిపాలే వ్యవహరించారు. ఈ నేపథ్యంలో మూడు నెలల నుంచి కళాశాలకు ఇన్‌చార్జ్‌ ప్రిన్సిపాల్‌ లేక పోవడంతో అధ్యాపకులు, సిబ్బందికి వేతనాలు అందడం లేదు. టీచింగ్‌, నాన్‌ టీచింగ్‌ సిబ్బందికి నెలల పాటు వేతనాలు అందక నానా తంటాలు పడుతున్నారు. అయినా ఇన్‌చార్జ్‌ ప్రిన్సిపాల్‌గా బాధ్యతలు స్వీకరించడానికి అధ్యాపకులెవరూ ముందుకు రాకపోవడం గమనార్హం. ఇప్పటికై నా ప్రభుత్వం ప్రిన్సిపాల్‌ పోస్టు మంజూరు చేయాలని, లేదంటే మరో కళాశాల అధ్యాపకులెవరినైనా ఇన్‌చార్జ్‌ ప్రిన్సిపాల్‌గా నియమించాలని సిబ్బంది కోరుతున్నారు. ఒకేషనల్‌ కళాశాల ఇన్‌చార్జ్‌ ప్రిన్సిపాల్‌ బాధ్యతల స్వీకరణకు విముఖత ఇటీవలే ఇన్‌చార్జ్‌ ప్రిన్సిపాల్‌గా శిరోమణి నియామకం అనారోగ్య కారణంతో బాధ్యతలు స్వీకరించలేనంటూ లేఖ ప్రిన్సిపాల్‌ లేకపోవడంతో మూడు నెలలుగా అందని వేతనాలు

పుట్టపర్తి టౌన్‌: బస్సులో మహిళా ప్రయాణికులు పోగొట్టుకున్న బ్యాగ్‌ను గుర్తించి తిరిగి వారికి అందజేసి ఆీర్టీసీ ఉద్యోగులు నిజాయితీ చాటుకున్నారు. బుధవారం మండలంలోని కర్ణాటకనాగేపల్లికి చెందిన వరలక్ష్మి పుట్టపర్తి ఆర్టీసీ బస్టాండ్‌లో తన బ్యాగ్‌ మరచిపోయింది. అందులో 5 గ్రాముల బంగారం (రెండు చిన్నకమ్మలు, బంగారు తాళిబొట్టు) ఉన్నాయి. గుర్తించిన స్వీపర్లు బుకింగ్‌ ఏజెంట్‌ ఖాదర్‌బాషా, అనౌన్సర్‌ సాయితేజ దృష్టికి తీసుకెళ్లారు. అనంతరం బ్యాగును డిపో మేనేజర్‌ ఇనతుల్లాకు అందజేసి తమ నిజాయితీ చాటుకున్నారు. వరలక్ష్మి కుటుంబ సభ్యులకు బ్యాగ్‌ను తిరిగి అందజేయడంతో వారు ఆనందం వ్యక్తం చేశారు. అంజినప్పకు ఆంధ్ర కళానిధి బిరుదు బత్తలపల్లి: తేనె తెలుగు కల్చరల్‌ చారిటబుల్‌ ట్రస్ట్‌ వ్యవస్థాపకుడు, కళాభిషేకం నిర్వాహకుడు యస్‌.అంజినప్పను ఆంధ్ర కళానిధి బిరుదుతో సత్కరించారు. సోమవారం పొట్టి శ్రీరాములు నెల్లూరు జిల్లా కావలిలో రంగస్థల రాష్ట్రస్థాయి ప్రముఖ సీనియర్‌ నటుడు సుబ్బరాజు అధ్యక్షతన కళాభిషేకం కార్యక్రమం నిర్వహించారు. ఈ సందర్భంగా అంజినప్పను ఆంధ్ర కళానిధి బిరుదుతో సత్కరించారు. కార్యక్రమంలో యువ కళాకారుడు, ట్రస్ట్‌ సమన్వయకర్త, టీచర్‌ ఆదినారాయణ, సీనియర్‌ నటులు బీసీహెచ్‌ వెంకయ్య, ప్రముఖ హరిశ్చంద్ర పాత్రధారి మినగల్లు సుధాకర్‌, సిహెచ్‌ మధుసూధన్‌, ఎస్‌.రమణయ్య, డి.శ్రీనివాసులు, వెంకారెడ్డి, బుజ్జయ్య, కళాకారులు పాల్గొన్నారు. రోడ్డు ప్రమాదంలో యువకుడి దుర్మరణం రొద్దం: మండల పరిధిలోని పెను కొండ–పావగడ ప్రధాన రహదారిపై బుధవారం జరిగిన రోడ్డు ప్రమాదంలో ఓ యువకుడు దుర్మరణం చెందాడు. స్థానికుల వివరాల మేరకు.. మండల కేంద్రంలోని పాత ఎస్సీ కాలనీకి చెందిన హనుమతప్ప కుమారుడు నరేష్‌ (28) ద్విచక్ర వాహనంలో కర్ణాటక కోడిమోడుగు నుంచి రొద్దంకు వస్తుండగా, మార్గమధ్యంలోని పెనుకొండ–పావగడ ప్రధాన రహదారిపై ఈద్గా వద్ద బైకు అదుపుతప్పింది. ఈ క్రమంలోనే బండ రాయిపై నరేష్‌ పడిపోవడంతో తలకు బలమైన గాయాలై అక్కడికక్కడే మృతి చెందాడు. ఇదే ఘటనలో రాజేంద్ర అనే యువకుడికి స్వల్ప గాయాలయ్యాయి. పోలీసులు ఘటనా స్థలాన్ని పరిశీలించి కేసు నమోదు చేశారు. మృతుడికి భార్య ఉన్నట్లు తెలిసింది. కారు ఢీకొని వ్యక్తి..ముదిగుబ్బ: మండల పరిధిలోని రాళ్లనంతపురం వద్ద బుధవారం రాత్రి జరిగిన రోడ్డు ప్రమాదంలో కుల్లాయప్ప నాయక్‌ (55) అనే వ్యక్తి మృతి చెందాడు. ముదిగుబ్బ పోలీసులు తెలిపిన మేరకు.. రాళ్లనంతపురం తండాకు చెందిన కుల్లాయప్ప నాయక్‌ రోడ్డు దాటుతుండగా కదిరి వైపు నుంచి వేగంగా వస్తున్న కారు ఢీకొంది. తీవ్ర గాయాలైన ఆయన అక్కడికక్కడే మృతి చెందాడు. సమాచారం అందుకున్న ముదిగుబ్బ పోలీసులు సంఘటనా స్థలానికి వెళ్లి పరిశీలించారు. ప్రమాదానికి కారణమైన కారును స్టేషన్‌కు తరలించారు. మృతునికి భార్య లక్ష్మమ్మ, ఒక కుమారుడు, ఇద్దరు కుమార్తెలు ఉన్నారు. పోలీసులు కేసు నమోదు చేసుకుని దర్యాప్తు చేస్తున్నారు. విద్యుత్‌ షాక్‌తో వ్యక్తి మృతి అమడగూరు: మండల పరిధిలోని పూలకుంట్లపల్లికి చెందిన మస్తాన్‌ (45) విద్యుత్‌ షాక్‌కు గురై మృతి చెందాడు. పోలీసులు తెలిపిన మేరకు.. మస్తాన్‌ మంగళవారం రాత్రి పూలకుంట్లపల్లి సమీపంలో వ్యవసాయ పొలంలో జూదం ఆడుతుండుగా, గుర్తు తెలియని వ్యక్తులు టార్చ్‌లైట్‌ వేశారు. పోలీసులు వస్తున్నారని భయపడిన మస్తాన్‌ పరుగులు తీశాడు. ఈ క్రమంలోనే పొలంలో ఏర్పాటు చేసిన విద్యుత్‌ వైర్లు తగలడంతో షాక్‌కు గురై అక్కడికక్కడే మృతి చెందాడు. మృతుడి భార్య జ్యోతి ఫిర్యాదు మేరకు కేసు నమోదు చేసి దర్యాప్తు చేస్తున్నట్లు పోలీసులు తెలిపారు. మృతుడుకి కుమార్తె, ఇద్దరు కుమారులు ఉన్నారు.

పావగడ: సూడో నక్సలైట్‌ కనికలబండ ఉప్పర వెంకటేశ్‌ (46)ను పట్టుకునేందుకు పావగడ, మధుగిరి పోలీసులు నిర్వహించిన కూంబింగ్‌ విజయవంతమైంది. మంగళవారం రాత్రి కడమలకుంట గ్రామ సరిహద్దులోని సోలార్‌ పార్క్‌ వద్ద మద్యం మత్తులో నిందితుడు ఉప్పర వెంకటేశ్‌ దొరికి పోయాడు. ఇటీవల రైతు నాగభూషప్ప ఇంటి గోడకు వెంకటేశ్‌ అతికించిన బెదిరింపు లేఖలో రూ.5 లక్షలు ఇవ్వాలంటూ ఈ నెల 16ను డెడ్‌ లైన్‌గా విధించిన విషయం తెలిసిందే. అయితే అదే రోజు అతను అరెస్ట్‌ కావడం గమనార్హం. కొంత కాలంగా కనికలబండ గ్రామంలో దౌర్జన్యాలు, బెదిరింపులకు పాల్పడుతూ గ్రామస్తులకు ఇతను కంటి మీద కునుకు లేకుండా చేశాడు. గత నెల 29న గ్రామానికి చెందిన రైతు కరియణ్ణ పంప్‌ సెట్‌కు నాటు బాంబు బిగించి హత్యకు కుట్ర పన్నాడు. అదృష్టవశాత్తు కరియణ్ణ ప్రాణాలతో బయట పడ్డాడు. ఇటీవల గంగసాగర రైతు నాగభూషప్పకు పీపుల్స్‌ వార్‌ దేవన్న దళం పేరిట రూ. 5 లక్షలు డిమాండ్‌ చేస్తూ బెదిరింపు లేఖ రాసి గ్రామంలో గోడకు అతికించాడు. ఈ క్రమంలోనే అతడిని పట్టుకునేందుకు పోలీసు ఉన్నతాధికారుల ఆధ్వర్యంలో ప్రత్యేక పోలీసు సిబ్బంది కూంబింగ్‌ నిర్వహించారు. మంగళవారం రాత్రి కడమలకుంట గ్రామ శివార్లలో మద్యం సేవిస్తున్న ఉప్పర వెంకటేశ్‌ను అరెస్ట్‌ చేశారు. ● నిందితుడు ఉప్పర వెంకటేశ్‌ పట్టణంలోని బాపూజీ పాఠశాలలో పదో తరగతి వరకు చదివాడు. అనంతరం సూడో నక్సల్‌గా మారి డబ్బు కోసం బెదిరింపులకు పాల్పడ్డాడు. పట్టణ సమీప రామగిరి మండలంలో గతంలో జరిగిన ఓ హత్య కేసులో ప్రధాన నిందితుడిగా ఉన్నట్లు స్థానిక పోలీసులు తెలిపారు. కూంబింగ్‌లో అడిషనల్‌ ఎస్పీ గోపాలయ్య, డీవైఎస్పీ మంజునాథ్‌, సీఐలు సురేశ్‌, కొట్రేశ్‌, ఎస్‌ఐ సునీల్‌, సిబ్బంది పాల్గొన్నారు.

అనంతపురం సిటీ: జిల్లా సర్వజనాస్పత్రికి శ్రీసత్యసాయి జిల్లా పెనుకొండ మండలం ఎర్రమంచి వద్ద ఉన్న మోబిస్‌ ఇండియా మోడ్యూల్‌ ప్రైవేట్‌ లిమిటెడ్‌ కంపెనీ చేయూతనందించింది. కార్పొరేట్‌ సామాజిక బాధ్యతలో భాగంగా అత్యంత ఖరీదైన స్కాన్‌మొబైల్‌ డీఆర్‌ లైట్‌ ఎక్స్‌రే పరికరాన్ని వితరణ చేసింది. ఈ యంత్రం పనితీరును మోబిస్‌ కంపెనీ మేనేజింగ్‌ డైరెక్టర్‌ యాంగ్‌యోంగ్‌–డ్యూక్‌, హెచ్‌ఆర్‌జీఏ విభాగాధిపతి పి.ఎన్‌.శ్రీనివాస్‌, కంపెనీ సీఎస్‌ఆర్‌ ఇన్‌చార్జ్‌, ప్రముఖ న్యాయవాది సింధూజ పరిశీలించి, బుధవారం జీజీహెచ్‌ రేడియాలజీ విభాగానికి అందజేశారు. ఈ సందర్భంగా జీజీహెచ్‌ సూపరింటెండెంట్‌ డాక్టర్‌ మల్లీశ్వరి మాట్లాడుతూ మోబిస్‌ కంపెనీ అందించిన స్కాన్‌మొబల్‌ డీఆర్‌ లైట్‌ ఎక్స్‌రే పరికరం హై ఫ్రీక్వెన్సీతో మంచి పనితీరును కనబరుస్తుందన్నారు. గ్రామ కదలలేని స్థితిలో మంచంపై ఉన్న రోగులకు ఇది ఎంతో ఉపయుక్తంగా ఉంటుందన్నారు. క్యాజువాలిటీ ఎమర్జెన్సీ, ఏఎంసీయూ విభాగాల్లో ఈ యంత్రం సేవలను వినియోగించనున్నట్లు పేర్కొన్నారు. కార్యక్రమంలో జీజీహెచ్‌ పరిపాలన అధికారి, డిప్యూటీ కలెక్టర్‌ వి.మల్లికార్జునరెడ్డి, జీఎంసీ ప్రిన్సిపాల్‌ డాక్టర్‌ విజయశ్రీ, సీఎస్‌ఆర్‌ఎంఓ డాక్టర్‌ హేమలత తదితరులు పాల్గొన్నారు.

పెనుకొండ రూరల్‌: వినాయక నిమజ్జనంలో అపశ్రుతి చోటు చేసుకుంది. ఎస్‌ఐ వెంకటేశ్వర్లు తెలిపిన మేరకు.. పెనుకొండ పట్టణంలోని నారాయణమ్మ కాలనీకి చెందిన కార్పెంటర్‌ రామాంజినేయులు (45) బుధవారం సాయంత్రం స్థానికంగా జరిగిన వినాయక నిమజ్జనోత్సవంలో పాల్గొన్నాడు. చెరువులో విగ్రహాన్ని నిమజ్జనం చేసిన అనంతరం ట్రాక్టర్‌లో తిరిగి ఇంటికి బయలుదేరాడు. మార్గమధ్యంలోని మిట్ట ఆంజనేయ స్వామి దేవాలయం వద్ద ట్రాక్టర్‌ అదుపు తప్పడంతో రామాంజినేయులు కిందిపడ్డాడు. ఈ క్రమంలోనే అతని తలపై ట్రాక్టర్‌ చక్రం ఎక్కడంతో తీవ్ర గాయాలయ్యాయి. అప్రమత్తమైన పోలీసులు క్షతగాత్రున్ని హుటాహుటిన పెనుకొండ ప్రభుత్వ ఆసుపత్రికి తరలించగా, అప్పటికే మృతి చెందినట్లు వైద్యులు నిర్ధారించారు. పోస్టుమార్టం నిమిత్తం మృతదేహాన్ని మార్చురీకి తరలించారు. కేసు నమోదు చేసి దర్యాప్తు చేస్తున్నట్లు పోలీసులు తెలిపారు. మృతునికి భార్య అరుణ, కుమార్తె మమత, కుమారుడు రవి ఉన్నట్లు తెలిసింది. రామాంజినేయులు (ఫైల్‌) ట్రాక్టర్‌ అదుపుతప్పి వ్యక్తి మృత్యువాత

గుంతకల్లు: ట్రాన్స్‌జెండర్ల మధ్య ఆధిపత్య పోరులో భాగంగా ఇరువర్గాల మధ్య జరిగిన ఘర్షణలో ఒకరు దారుణహత్యకు గురయ్యారు. మరో ఇద్దరు తీవ్రంగా గాయపడ్డారు. ఈ సంఘటన బుధవారం తెల్లవారుజూమున గుంతకల్లులో చోటు చేసుకుంది. స్థానికులు, పోలీసులు తెలిపిన మేరకు వివరాలు ఇలా ఉన్నాయి. స్థానిక మస్తాన్‌పేట్‌లోని రెడ్‌ ట్యాంక్‌ వద్ద మూడు రోజుల క్రితం వినాయక చవితి వేడుకల్లో భాగంగా ఫ్లెక్సీలు ఏర్పాటు చేశారు. ఫ్లెక్సీ ప్రారంభోత్సవానికి అపర్ణ అనే ట్రాన్స్‌ జెండర్‌ను ముఖ్యఅతిథిగా ఆహ్వానించారు. చిత్ర అనే మరో ట్రాన్స్‌జెండర్‌ సన్నిహితుడిగా ఉన్న బోయ వీరేష్‌ ఇది జీర్ణించుకోలేక ఫ్లెక్సీలను చించేశాడు. ఆ సమయంలో చిన్నపాటి గొడవ జరి గింది. వాస్తవానికి చిత్ర, అపర్ణ మధ్య కొన్నినెలలుగా ఆధిపత్య పోరు నడుస్తోంది. ఈ నేపథ్యంలోనే వారం రోజుల క్రితం అపర్ణ వర్గం ర్యాలీ కూడా నిర్వహించింది. ఇదిలా ఉండగా.. అపర్ణ వర్గానికి చెందిన వికాష్‌ తన స్నేహితుడితో కలిసి మంగళవారం రాత్రి 11.30 గంటల సమయంలో బెంచికొట్టాల సమీపంలోని బోయ వీరేష్‌ ఇంటి మీదుగా ద్విచక్రవాహనంలో వెళ్తుండగా.. వారిని వీరేష్‌ అడ్డుకున్నాడు. వాదనకు దిగి గొడవ పెట్టుకున్నాడు. వికాష్‌పై వీరేష్‌తో పాటు పలువురు దాడి కూడా చేశారు. అక్కడి నుంచి వెళ్లిపోయిన వికాష్‌ తన స్నేహితులు, బంధువులతో కలసి బుధవారం తెల్లవారుజూమున మూడు గంటల సమయంలో వీరేష్‌ ఇంటిపై దాడికి దిగారు. ఈ విషయం తెలుసుకున్న వీరేష్‌ తమ్ముడు చరణ్‌ అలియాస్‌ జగన్‌ ప్రతిదాడికి యత్నించాడు. ఈ క్రమంలో వికాష్‌ సమీప బంధువులు చరణ్‌ను కొడవలితో నరికారు. మెడపై, తలపై నరకడంతో అక్కడికక్కడే మృతి చెందాడు. అలాగే వీరేష్‌ తలపై దాడి చేయడంతో బలమైన గాయమైంది. వీరితో పాటు వికాష్‌ కూడా తీవ్రంగా గాయపడ్డాడు. వీరేష్‌ను మెరుగైన వైద్యం కోసం బళ్లారికి తరలించగా, వికాష్‌ను కర్నూలుకు తీసుకెళ్లారు. ఈ ఘటనపై వన్‌టౌన్‌ సీఐ మనోహర్‌ కేసు నమోదు చేసుకుని దర్యాప్తు చేస్తున్నారు. ● హత్యకు గురైన చరణ్‌ రాడ్‌ బెండింగ్‌ కూలీగా పని చేసేవాడు. భార్య ఐశ్వర్యతో పాటు కుమారుడు, కుమార్తె ఉన్నారు. ఇతను గతంలో వన్‌టౌన్‌ స్టేషన్‌ పరిధిలో ఓ హత్య కేసులో నిందితుడిగా ఉండి జైలుకు కూడా వెళ్లి వచ్చాడు. హత్యకు గురైన చరణ్‌ అలియాస్‌ జగన్‌ (ఫైల్‌) చరణ్‌ మృతదేహం వద్ద రోదిస్తున్న భార్య, బంధువులు ట్రాన్స్‌జెండర్ల మధ్య వర్గపోరు ఇరువర్గాల ఘర్షణ.. వ్యక్తి దారుణ హత్య మరో ఇద్దరికి తీవ్రగాయాలు

ధర్మవరం అర్బన్‌: యువత క్రీడలపై ఆసక్తి పెంచుకుని జాతీయ, అంతర్జాతీయ స్థాయిలో రాణించాలని రాష్ట్ర వైద్య ఆరోగ్యశాఖ మంత్రి సత్యకుమార్‌ సూచించారు. పట్టణంలోని ఆర్డీటీ క్రీడా మైదానంలో మాజీ ప్రధాని అటల్‌ బిహారీ వాజ్‌పేయి స్మారకార్థం, ప్రధాని నరేంద్రమోదీ పుట్టినరోజును పురస్కరించుకుని ఆగస్టు 20 నుంచి నిర్వహిస్తున్న క్రికెట్‌ టోర్నమెంట్‌ సీజన్‌–3 ముగిసింది. బుధవారం ఫైనల్‌ మ్యాచ్‌లో డ్రాగన్‌ లెవన్‌, పెనుకొండ జట్లు తలపడ్డాయి. తొలుత బ్యాటింగ్‌ చేసిన డ్రాగన్‌ లెవన్‌ జట్టు నిర్ణీత 15 ఓవర్లలో 2 వికెట్ల నష్టానికి 239 పరుగులు చేసింది. అనంతరం బరిలోకి దిగిన పెనుకొండ జట్టు 15 ఓవర్లలో 8 వికెట్ల నష్టానికి 174 పరుగులు చేసింది. దీంతో డ్రాగన్‌ లెవన్‌ జట్టు 65 పరుగుల తేడాతో ఘన విజయం సాధించింది. విజేత డ్రాగన్‌ లెవన్‌ జట్టుకు మంత్రి సత్యకుమార్‌ రూ.లక్ష నగదు బహుమతితోపాటు ట్రోఫీ అందించారు. రన్నరప్‌గా నిలిచిన పెనుకొండ జట్టుకు రూ.50 వేల నగదు బహుమతి, ట్రోఫీ అందించారు. అనంతరం మంత్రి మాట్లాడుతూ క్రీడలు యువతలో క్రమశిక్షణ, పట్టుదల, సమయస్ఫూర్తి, నాయకత్వ లక్షణాలను పెంపొందిస్తాయన్నారు. కార్యక్రమంలో జనసేన రాష్ట్ర నాయకుడు చిలకం మధుసూదన్‌రెడ్డి, బీజేపీ జిల్లా అధ్యక్షుడు జీఎం శేఖర్‌, జిల్లా ఇన్‌చార్జ్‌ నీలకంఠ తదితరులు పాల్గొన్నారు. మంత్రి సత్యకుమార్‌

రొళ్ల: వర్షాలు కురిసి సమృద్ధిగా పంటలు పండాలని ఆకాంక్షిస్తూ యువకులు వరుణుడి ప్రతిమను ఊరేగించారు. బుధవారం మధ్యాహ్నం మండల పరిధిలోని దొమ్మరహట్టి గ్రామానికి చెందిన యువకులు మట్టితో వరుణుడి ప్రతిమను తయారు చేసుకుని పూలతో అలంకరణ చేసి విశేష పూజలు నిర్వహించారు. అనంతరం ఇంటింటా తిరిగి నిత్యావసర సరుకులను సేకరించారు. ప్రజలు వరుణుని ప్రతిమకు అడుగడుగునా పూజలు చేశారు. వరుణుడి ప్రతిమను మూడు రోజుల పాటు ఊరేగించిన తర్వాత హులికుంట చెరువులో నిమజ్జం చేస్తామన్నారు. నిమజ్జనం రోజున అన్నదానం ఉంటుందని, ఇలా చేయడం వల్ల వర్షాలు కురుస్తాయని నమ్మకమని తెలిపారు. కార్యక్రమంలో వైఎస్సార్‌సీపీ మండల ప్రధాన కార్యదర్శి మంజునాథ్‌, మాజీ వైస్‌ సర్పంచ్‌ రవికుమార్‌ తదితరులు పాల్గొన్నారు. మడకశిర మండలం సింగేపల్లిలో.. మడకశిరరూరల్‌: వర్షాలు కురిపించి ఎండుతున్న పంటలను కాపాడాలని వరుణుని ప్రతిమను బుధవారం మహిళలు సింగేపల్లిలో ఊరేగింపు నిర్వహించారు. ఇంటింటా ప్రతిమకు నీరు పోసి పూజలు చేశారు. బియ్యం, కంది పప్పు తదితర వంట సామగ్రిని అందించారు. సేకరించిన ధాన్యంతో శనివారం సమారాధన నిర్వహిస్తామని మహిళలు తెలిపారు. డీజేకు అనుమతించాలంటూ ఆందోళన రొద్దం: డీజేకు అనుమతించాలంటూ గ్రామస్తులు ఆందోళన చేసిన ఘటన మండల పరిధిలోని పి.రొప్పాలలో జరిగింది. స్థానిక దళిత వాడలో బుధవారం సాయంత్రం పోలీసులు డీజే వాహనాన్ని అడ్డుకున్నారు. దీంతో ఆగ్రహించిన స్థానికులు మడకశిర–పెనుకొండ ప్రధాన రహదారిపై బైఠాయించి ఆందోళనకు దిగారు. గ్రామంలో కొందరికి అనుమతించి తమకు ఎందుకు అడ్డుకున్నారని ప్రశ్నించారు. పోలీసులు మాట్లాడుతూ డీజేకు అనుమతులు ఇవ్వడానికి తమకు అధికారం లేదన్నారు. పెద్ద శబ్దం లేకుండా వినాయక నిమజ్జనం జరుపుకోవాలని సర్దిచెప్పడంతో కార్యక్రమం యథావిధిగా సాగింది. వివాహిత అనుమానాస్పద మృతి డి.హీరేహాళ్‌(బొమ్మనహాళ్‌): మండలంలోని మురడి గ్రామంలో సంధ్య (22) అనే వివాహిత బుధవారం రాత్రి అనుమానాస్పద స్థితిలో మృతి చెందినట్లు ఎస్‌ఐ గురుప్రసాద్‌రెడ్డి తెలిపారు. ఎస్‌ఐ తెలిపిన మేరకు.. శెట్టూరు మండలం మంగంపల్లికి చెందిన సంధ్యకు మురడి గ్రామానికి చెందిన తిప్పేస్వామితో నాలుగు నెలల క్రితం వివాహమైంది. బుధవారం రాత్రి సంధ్య ఫ్యాన్‌కు ఉరేసుకున్నట్లు కుటుంబ సభ్యులు గుర్తించారు. వెంటనే భర్త తిప్పేస్వామి, అత్తామామలు, బంధువులు, స్థానికుల సహకారంతో ఆమెను రాయదుర్గం ప్రభుత్వ ఆస్పత్రికి తరలించారు. వైద్యులు పరీక్షించి అప్పటికే మృతి చెందినట్లు నిర్ధారించారు. సమాచారం అందుకున్న ఎస్‌ఐ గురుప్రసాద్‌రెడ్డి సంఘటనా స్థలానికి చేరుకుని విచారణ చేపట్టారు.

ఆత్మకూరు/ కనగానపల్లి: ఉమ్మడి జిల్లాలోని ఉరవ కొండ, రాప్తాడు, కళ్యాణదుర్గం, పెనుకొండ, పుట్టపర్తి, కదిరి నియోజకవర్గాల మీదుగా హంద్రీ–నీవా కాలువ వెళ్తుంది. అయితే కాలువకు కాంక్రీట్‌తో లైనింగ్‌ చేయడం వల్ల సమీప ప్రాంతాల్లో భూగర్భజలాలు పెరిగే అవకాశం లేకుండా పోయింది. ఎవరైనా కాలువలోకి మోటర్లు వేసి నీటిని పొలాలకు తీసుకుందామని ప్రయత్నిస్తే కేసులు పెడుతున్నారని రైతులు వాపోతున్నారు. ఫ్యాక్టరీలకు నీరు వదిలే ప్రభుత్వం.. పంటల సాగు ఇవ్వకపోతే ఎలా అంటూ ప్రశ్నిస్తున్నారు. ఇలా అయితే ఉపాధి కోసం వలస పోక తప్పదని రైతులు ఆవేదన వ్యక్తం చేస్తున్నారు. రైతు కంటతడి బోర్లల్లో నీళ్లున్నాయన్న ఆశతో చాలామంది రైతులు వరి నార్లు వేసుకుని, నాట్లుకూడా వేశారు. అయితే హంద్రీ– నీవా, పీఏబీఆర్‌ కుడి కాలువ ద్వారా చెరువులకు నీరు ఇవ్వకపోవడంతో పరిస్థితి తారుమారైంది. ఓ వైపు ఎల్‌–నినో ప్రభావంతో తీవ్ర వర్షాభావ పరిస్థితులు నెలకొన్నాయి. మరోవైపు చెరువులకు నీరు చేరడం లేదు. క్రమేణా భూగర్భజలాలు అడుగంటడంతో బోర్లలోంచి నీరు రావడం లేదు. దీంతో పైరు ఎండిపోతుండటంతో కాపాడుకోలేని నిస్సహాయ స్థితిలో రైతు కంటతడి పెడుతున్నాడు. నీరు లేక వ్యవసాయ భూములన్ని బీళ్లుగా మారుతున్నాయి. ఒక్క రాప్తాడు నియోజకవర్గంలోనే లక్ష ఎకరాల వరకు నీరందకుండా పోతోంది. తాగునీటికీ కష్టాలే హంద్రీ–నీవా కాలువతో పాటు పీఏబీఆర్‌ నుంచి కుడి కాలువ గుండా కూడా చెరువులు, కుంటలకు నీరు వదలటం లేదు. దీంతో గ్రామాల్లో ప్రజలకు తాగునీటి కష్టాలు మొదలయ్యాయి. హంద్రీ–నీవా ద్వారా సాగునీటికి కాకుండా తాగునీటికి వదులుతామని చెప్పిన అధికారులు కనీసం ఈ ప్రాంతంలోని చెరువులు, నీటికుంటలకు కూడా నీరు ఇవ్వడం లేదు. దీంతో బోరుబావుల్లో నీరు రాక ప్రజలు తాగునీటి కష్టాలు పడుతున్నారు. కనగానపల్లి మండలం యలకుంట్ల వద్ద చుట్టుపక్కల గ్రామాల ప్రజలు రెండు రోజుల క్రితం తాగునీటి కోసం హంద్రీ–నీవా కాలువ వద్ద తూమును ఎత్తి నీటిని సమీపంలోని వంకలోకి వదిలారు. దీనిని గుర్తించిన అధికారులు వెంటనే అక్కడికి వెళ్లి నీటిని బయటకు వెళ్లకుండా అడ్డుకట్ట వేశారు. హంద్రీ–నీవా కాలువలో పారుతున్న కృష్ణా జలాలు కాలువకు కాంక్రీట్‌ లైనింగ్‌తో పెరగని భూగర్భ జలాలు చెరువులు, కుంటలకు వదలని నీరు.. బీళ్లుగా మారుతున్న పొలాలు

గుడిబండ: మడకశిర నియోజకవర్గంలో తాగునీటి సమస్య తీవ్ర రూపం దాల్చింది. పాలకులు పట్టించుకోక...అధికారులు స్పందించక గ్రామీణులు గుక్కెడు నీటి కోసం ఖాళీ బిందెలతో రోడ్లెక్కాల్సిన పరిస్థితులు నెలకొన్నాయి. తాజాగా గుడిబండ మండల పరిధిలోని పి గొల్లహట్టి మహిళలు ఖాళీ బిందెలతో రోడ్డుపై బైఠాయించారు. 25 రోజులుగా నీరు బంద్‌ పి గొళ్లహట్టిలో 25 రోజులుగా తాగునీటి సమస్య నెలకొంది. అధికారులకు చెప్పినా పట్టించుకోలేదు. ఎమ్మెల్యేౖకైనా తమ గోడు వెళ్లబోసుకుందామనుకుంటే స్థానికేతరుడైన ఆయన ఎక్కడుంటాడో ఎవరికీ తెలియదు. దీంతో మహిళలు బుధవారం రోడ్డెక్కారు. అధికారులు, ప్రజాప్రతినిధుల తీరును నిరసిస్తూ ఖాళీ బిందెలతో గుడిబండ – మడకశిర రహదారిపై బైఠాయించారు. చంద్రబాబు ప్రభుత్వానికి వ్యతిరేకంగా నినాదాలు చేశారు. తమ గ్రామానికి తాగునీరు అందించేంత వరకూ కదిలేది లేదని రోడ్డుపైనే బైఠాయించారు. ఆర్టీసీ బస్సులు, ఇతర వాహనాలను 2 గంటల పాటు అడ్డుకున్నారు. ఎస్‌ఐ రమేష్‌బాబు సంఘటనా స్థలానికి చేరుకుని పరిస్థితిని మండల అధికారులకు వివరించారు. ట్యాంకర్ల ద్వారా తాగునీరు సరఫరా చేస్తామని అధికారులు చెప్పారని మహిళలకు తెలిపి వారితో ఆందోళన విరమింపజేశారు. అనంతరం మహిళలు స్థానిక మండల పరిషత్‌ కార్యాలయానికి చేరుకుని ఖాళీ బిందెలతో నిరసన కార్యక్రమాన్ని కొనసాగించారు. తమ గ్రామంలోని తాగునీటి సమస్య వెంటనే పరిష్కరించాలని ఎంపీడీఓ కేశవరెడ్డికి వినతి పత్రం అందించారు. స్పందించిన ఆయన ..వారం రోజుల్లో కొత్తగా బోరు వేయించి తాగునీటి సమస్యకు శాశ్వత పరిష్కారం చూపుతామని, అంతవరకూ ట్యాంకర్ల ద్వారా అందిస్తామని హామీ ఇవ్వడంతో మహిళలు ఆందోళన విరమించారు. 25 రోజులుగా పి గొల్లహట్టిలో దాహం కేకలు పట్టించుకోని అధికారులు, ప్రజాప్రతినిధులు రోడ్డుపై బైఠాయించి నిరసన తెలిపిన మహిళలు చంద్రబాబు ప్రభుత్వానికి వ్యతిరేకంగా నినాదాలు

● వార్డుల సంఖ్య పెంచుతూ సర్కార్‌ గెజిట్‌ విడుదల పుట్టపర్తి టౌన్‌: ‘పుర’పోరుకు ప్రభుత్వం సన్నద్ధమైంది. ఈ క్రమంలో జిల్లాలోని మున్సిపాలిటీల్లో వార్డులు పెంచుతూ ఉత్తర్వులు జారీ చేసింది. పాలన సౌలభ్యం కోసం జనాభా అధారంగా వార్డుల సంఖ్య పెంచాలని ఇటీవల రాష్ట్ర ప్రభుత్వం ఉత్తర్వులు జారీ చేసింది. ఈ నేపథ్యంలో స్థానిక మున్సిపల్‌ అధికారులు వార్డుల సంఖ్య పెంచుతూ ప్రభుత్వానికి ప్రతిపాదనలు పంపారు. అభ్యంతరాలన్నీ పరిష్కరించాక జిల్లాలోని వివిధ మున్సిపాలిటీల్లో వార్డుల సంఖ్యను పెంచుతూ ప్రభుత్వం గెజిట్‌ విడుదల చేసింది. ఈ క్రమంలో ఇప్పటికే హిందూపురం మున్సిపాలిటీలో 38 వార్డులుండగా.. 52, మడకశిరలో 20 వార్డులుండగా..23, పెనుకొండలో 20 వార్డులుండగా..23కు పెంచారు. తాజాగా పుట్టపర్తి మున్సిపాలిటీలో 20 వార్డులు ఉండగా...వాటిని 28కు పెంచారు. అలాగే కదిరి మున్సిపాలిటీలో గతంలో 36 వార్డులుండగా.. 44 వార్డులకు పెంచుతూ ప్రభుత్వం గెజిట్‌ నోటిఫికేషన్‌ విడుదల చేసింది. ప్రస్తుతం వార్డుల వారీగా ఓటర్ల విభజన ప్రక్రియలో అధికారులు నిమగ్నమయ్యారు. త్వరలోనే ఓటరు జాబితా విడుదల చేయనున్నారు. ప్రభుత్వ తాజా చర్యలతో ఏక్షణంలోనైనా ఎన్నికల నోటిఫికేషన్‌ వెలువడే అవకాశం ఉన్నట్లు తెలుస్తోంది. నేటి నుంచి ‘స్వచ్ఛతా హీ సేవ’ ప్రశాంతి నిలయం: జిల్లా వ్యాప్తంగా ఈనెల 17 నుంచి నెల రోజుల పాటు నిర్వహించనున్న ‘స్వచ్ఛతా హీ సేవ’ ప్రచార కార్యక్రమాల్లో అందరూ భాగస్వాములై విజయవంతం చేయాలని కలెక్టర్‌ శ్యాం ప్రసాద్‌ పిలుపునిచ్చారు. ఈ మేరకు బుధవారం ఆయన ఒక ప్రకటన విడుదల చేశారు. ప్రభుత్వ కార్యాలయాలు, మార్కెట్లు, బస్టాండ్లు, పర్యాటక ప్రాంతాల్లో శుభ్రతా చర్యలు చేపట్టాలన్నారు. అలాగే పారిశుధ్య కార్మికులకు ఆరోగ్య పరీక్షలు, సన్మాన కార్యక్రమాలు, ఇంటింటికీ వెళ్లి చెత్త సేకరణపై అవగాహన కల్పించడం తదితర కార్యక్రమాలను నిర్వహించాలన్నారు. ఈ కార్యక్రమాల్లో జిల్లా ప్రజలు, ప్రజాప్రతినిధులు, యువత, స్వచ్ఛంద సంస్థల ప్రతినిధులు, మెప్మా, డ్వాక్రా మహిళలు పెద్ద ఎత్తున పాల్గొనాలని పిలుపునిచ్చారు. భక్తిని చాటుదాం.. ఆదర్శంగా నిలుద్దాం ● ఉత్సవ కమిటీ నిర్వాహకులకు ఎస్పీ సతీష్‌కుమార్‌ పిలుపు హిందూపురం టౌన్‌: ‘‘గణేష్‌ నిమజ్జనం సందర్భంగా సంప్రదాయ కళాకారులు, కళారూపాలను ప్రోత్సహిద్దాం...డీజేలను పక్కనపెట్టి భక్తితో గణేశుడిని గంగఒడి చేర్చి ఆదర్శంగా నిలుద్దాం’’ అని ఎస్పీ సతీష్‌కుమార్‌ పిలుపునిచ్చారు. బుధవారం స్థానిక సాయితేజ ఫంక్షన్‌ హాలులో గణేష్‌ ఉత్సవాల నిర్వహణ, నిమజ్జన ఏర్పాట్లపై పోలీసుల ఆధ్వర్యంలో వివిధ శాఖల అధికారులు, గణేష్‌ ఉత్సవ సమితుల ప్రతినిధులతో ఏఎస్పీ మహేష్‌ అధ్యక్షతన సమన్వయ సమావేశం నిర్వహించారు. ముఖ్య అతిథిగా విచ్చేసిన ఎస్పీ సతీష్‌ కుమార్‌ మాట్లాడారు. నిమజ్జన వేడుకల్లో ఈసారి డీజేలకు అధిక ప్రాధాన్యత ఇవ్వకుండా సంప్రదాయ కళాకారులు, కళారూపాలను ప్రోత్సహించాలని సూచించారు. ‘‘పండుగ భక్తిని చాటాలి.. డీజే శబ్ధాన్ని కాదు’’ అనే సందేశంతో యువత సంప్రదాయాలను గౌరవిస్తూ ఉత్సవాలను నిర్వహించాలని పిలుపునిచ్చారు. అలాగే హిందూపురంలో పలు రహదారులు ఇరుకుగా ఉన్నందున భారీ విగ్రహాల నిమజ్జన ఊరేగింపులకు ప్రత్యామ్నాయ మార్గాలను ఎంచుకోవాలని సూచించారు. ఈ నెల 20న నిమజ్జనం రోజున ప్రతి విగ్రహం సాయంత్రం 5 గంటల్లోపు ప్రధాన రహదారికి చేరుకునేలా ఏర్పాట్లు చేసుకోవాలన్నారు. అలాగే పోలీసులు సూచించిన రూట్‌ మ్యాప్‌ను అనుసరించాలని, వీలైనంత త్వరగా నిమజ్జనాన్ని పూర్తి చేయాలన్నారు. అనంతరం కమాండ్‌ కంట్రోల్‌ రూమ్‌, సీసీ, డ్రోన్‌ కెమెరాల పనితీరును పరిశీలించారు. నిమజ్జనం సందర్భంగా తీసుకోవాల్సిన జాగ్రత్తలపై అధికారులకు సూచనలు చేశారు. కార్యక్రమంలో ఆర్టీఓ కరుణ సాగర్‌ రెడ్డి, మున్సిపల్‌ కమిషనర్‌ మల్లికార్జున, సీఐలు ఆంజనేయులు, అబ్దుల్‌ కరీం, జనార్దన్‌, ప్రసాద్‌బాబు, ఇస్మాయిల్‌, ఉక్సవ కమిటీల నిర్వాహకులు పాల్గొన్నారు.

పుట్టపర్తి శోభాయాత్రలో చిందులు వేస్తున్న యువకులు‘గణేష్‌ మహరాజ్‌కి జై’ అంటూ యువకులు సందడి చేశారు. రంగులు చల్లుకుంటూ ఉత్సాహంతో ఆడిపాడారు. ‘‘జైజై గణేశా.. జై కొడతా గణేశా’’ అంటూ నృత్యాలతో హోరెత్తించారు. బుధవారం జిల్లా వ్యాప్తంగా గణేష్‌ నిమజ్జనం అట్టహాసంగా సాగింది. డప్పు దరువుతో పిల్లా పెద్ద చిందులు వేస్తూ గౌరీ పుత్రున్ని గంగ ఒడికి చేర్చారు. పలుచోట్ల అన్నదానం చేశారు. లడ్డూ వేలం పాటలు ఆసక్తిగా సాగాయి. మరోవైపు ప్రశాంతి నిలయంలోని సత్యసాయి విద్యా, వైద్య, ట్రస్ట్‌ కార్యాలయాల్లో ఏర్పాటు చేసిన వినాయక విగ్రహాలను బుధవారం సత్యసాయి మహాసమాధి చెంత ఉంచి పూజలు నిర్వహించారు. అనంతరం ఊరేగింపుగా తీసుకువెళ్లి సాహెబ్‌ చెరువు, బుక్కపట్నం చెరువుల్లో నిమజ్జనం చేశారు. – పుట్టపర్తి టౌన్‌/ప్రశాంతి నిలయం:

పుట్టపర్తి: చత్తీస్‌గఢ్‌లో విధులు నిర్వహిస్తూ కొండ ప్రాంతంలో కాలు జారిపడి తీవ్రంగా గాయపడిన జవాన్‌ సుబ్బిరెడ్డి (50) వారం రోజుల పాటు ఆస్పత్రిలో మృత్యువుతో పోరాడి ఓడారు. ఆయన మరణవార్త స్థానికంగా విషాదం నింపింది. వివరాలిలా ఉన్నాయి. కొత్తచెరువు మండలం లింగారెడ్డిపల్లికి చెందిన శెట్టిపి చిన్నవెంకటప్ప కుమారుడు శెట్టిపి సుబ్బిరెడ్డి(50) బీఎస్‌ఎఫ్‌లో 31 ఏళ్లుగా పనిచేస్తున్నారు. ఈ నెల 9వ తేదీన చత్తీస్‌గఢ్‌లో కొండ ప్రాంతంలో విధులు నిర్వర్తిస్తూ కాలు జారి పడ్డారు. తోటి జవాన్లు ఆయన్ను 14 కిలోమీటర్లు భుజాలపై మోసుకుని హెలిప్యాడ్‌కు చేర్చి.. అక్కడి నుంచి రాయపూర్‌ ఆస్పత్రికి తరలించారు. అక్కడ చికిత్స పొందుతున్న సుబ్బిరెడ్డి వారం రోజుల పాటు మృత్యువుతో పోరాడి బుధవారం తెల్లవారుజామున కన్నుమూశారు. ఇంటర్నల్‌ బ్లీడింగ్‌ జరిగి రక్తం ఊపిరితిత్తుల్లోకి చేరడంతో ప్రాణాలు కోల్పోయినట్లు వైద్యులు నిర్ధారించారు. విషయం తెలుసుకున్న కుటుంబ సభ్యులు రాయపూర్‌కు బయలుదేరి వెళ్లారు. ఆయనకు భార్య లీలావతి, కుమారుడు వంశీధర్‌రెడ్డి, కుమార్తె రోహిణి ఉన్నారు. జవాన్‌ సుబ్బిరెడ్డి (ఫైల్‌)

అనంతపురం ఎడ్యుకేషన్‌: తీవ్ర కరువుతో అల్లాడుతున్న ఉమ్మడి అనంతపురం జిల్లాలో పంటలను కాపాడేందుకు చెరువులకు తక్షణమే నీటిని విడుదల చేయాలని రాప్తాడు మాజీ ఎమ్మెల్యే తోపుదుర్తి ప్రకాష్‌రెడ్డి ప్రభుత్వాన్ని డిమాండ్‌ చేశారు. బుధవారం వైఎస్సార్‌సీపీ జిల్లా కార్యాలయంలో నిర్వహించిన విలేకరుల సమావేశంలో ఆయన మాట్లాడారు. శ్రీశైలం డ్యాం నుంచి నీటి విడుదల ప్రారంభమై 50 రోజులు గడుస్తున్నా జిల్లాలోని చెరువులకు నీరు విడుదల చేసే ప్రక్రియ ప్రారంభం కాలేదన్నారు. శ్రీశైలం డ్యాంలో నీటిమట్టం 180 టీఎంసీల నుంచి 112 టీఎంసీలకు పడిపోయిందని తెలిపారు. అయినప్పటికీ 835 అడుగుల వరకు నీటిని డ్రా చేసుకునే అవకాశం ఉందన్నారు. ప్రస్తుతం రోజుకు సుమారు 2 టీఎంసీల నీటిని విడుదల చేస్తున్నారని, పవర్‌ జనరేషన్‌ జరగని పరిస్థితుల్లో హంద్రీ–నీవాకు 3.5 టీఎంసీల నీటిని తీసుకునే అవకాశం ఉంటుందని వివరించారు. శ్రీశైలం డ్యాంలో 854–840 అడుగుల మధ్య సుమారు 26 టీఎంసీల నీరు అందుబాటులో ఉంటుందన్నారు. ఈ సమయంలో వెలిగొండ, హంద్రీ–నీవా, ముచ్చుమర్రి, కల్వకుర్తి లిఫ్ట్‌ ఇరిగేషన్‌ పథకాలకు నీటి విడుదల కొనసాగితే హంద్రీ–నీవాకు మరో 9 టీఎంసీల వరకు నీటిని తీసుకునే అవకాశం ఉందన్నారు. 840–830 అడుగుల మధ్య కూడా హంద్రీ–నీవా, కల్వకుర్తి, ముచ్చుమర్రి ద్వారా నీటిని తీసుకునే అవకాశం ఉందని, దీంతో మరో 4.5 టీఎంసీల వరకు హంద్రీ–నీవాకు నీరు పొందవచ్చన్నారు. ఈ లెక్కన ఇప్పటికీ శ్రీశైలం నుంచి హంద్రీ–నీవా ద్వారా దాదాపు 17 టీఎంసీల నీటిని తీసుకునే వెసులుబాటు ఉందని తెలిపారు. ట్రయల్‌ రన్‌కే నీరు ఎందుకు? వెలిగొండ ప్రాజెక్టు నిర్మాణం పూర్తికాలేదని, ప్రధాన సొరంగం నిర్మాణం పూర్తయినా కాలువల వ్యవస్థ ఇంకా పూర్తి కావాల్సి ఉందని ప్రకాష్‌రెడ్డి అన్నారు. ప్రస్తుతం ట్రయల్‌ రన్‌లో భాగంగా నీటిని విడుదల చేస్తున్న పరిస్థితుల్లో, ఆ నీటిని తగ్గించి హంద్రీ–నీవా, ముచ్చుమర్రి ద్వారా రాయలసీమ జిల్లాలకు మళ్లించాలని కోరారు. ఎండిపోతున్న పంటలు ఉమ్మడి అనంతపురం జిల్లాలోని తొమ్మిది నియోజకవర్గాల్లో హంద్రీ–నీవా నీటిపై ఆధారపడిన చెరువులు ఉన్నాయని తోపుదుర్తి ప్రకాష్‌రెడ్డి తెలిపారు. నీరు లేక చీనీ, అరటి, మిరప, టమాట తదితర పంటలు ఎండిపోతున్నాయని, భూగర్భజలాలు అడుగంటడంతో రైతులు పంటలను వదిలేసుకుంటున్నారని ఆవేదన వ్యక్తం చేశారు. తుంగభద్ర డ్యాం నుంచి పీఏబీఆర్‌కు నీటిని విడుదల చేసి, అక్కడి నుంచి పీఏబీఆర్‌ కుడికాలువ కింద ఉన్న 49 చెరువులకు నీటిని అందించాలని ప్రకాష్‌రెడ్డి కోరారు. హంద్రీ–నీవా కింద ఉన్న అన్ని చెరువులను వెంటనే నింపడంతో పాటు హంద్రీ–నీవా నుంచి పేరూరు డ్యాంకు నీటిని విడుదల చేయాలని డిమాండ్‌ చేశారు. ఈ డిమాండ్ల సాధన కోసం గురువారం హంద్రీ–నీవా సీఈ కార్యాలయం ఎదుట జలదీక్ష చేపడుతున్నట్లు తెలిపారు. రైతులు, రైతు సంఘాల నాయకులు, ప్రతిపక్ష రాజకీయ పార్టీల నాయకులు పాల్గొంటారని చెప్పారు. తొమ్మిది నియోజకవర్గాల నుంచి వైఎస్సార్‌సీపీ నాయకులు, కార్యకర్తలు తరలివస్తారని వెల్లడించారు. సమావేశంలో జెడ్పీటీసీ సభ్యుడు చంద్రకుమార్‌, వైస్‌ ఎంపీపీలు చియ్యేడు కృష్ణారెడ్డి, బోయ రామాంజనేయులు, వైఎస్సార్‌సీపీ నాయకులు రంగంపేట గోపాల్‌రెడ్డి బండి పవన్‌, గోవిందరెడ్డి తదితరులు పాల్గొన్నారు. రాప్తాడు మాజీ ఎమ్మెల్యే తోపుదుర్తి ప్రకాష్‌రెడ్డి డిమాండ్‌ నేడు హంద్రీ–నీవా సీఈ కార్యాలయం ఎదుట జలదీక్ష

కదిరి అర్బన్‌: స్థానిక ఎమ్మెల్యే కందికుంట వెంకటప్రసాద్‌ డ్రైవర్‌ గిరినాయుడు వీరంగం సృష్టించాడు. మంగళవారం రాత్రి పోలీస్‌స్టేషన్‌ సమీపంలోనే భార్య హారికతో పాటు మామ ఆదినారాయణ, అత్త సునీతమ్మతో పాటు మరికొందరిపై దాడి చేశాడు. మామ ఆదినారాయణ తలపై కొట్టడంతో అతను తీవ్రంగా గాయపడ్డాడు. దీంతో కుటుంబీకులు ఆయన్ను కదిరి ప్రభుత్వాసుపత్రికి తరలించి చికిత్స చేయిస్తున్నారు. ఈ ఘటనపై గిరినాయుడు భార్య హరిత కదిరి రూరల్‌ అప్‌గ్రేడ్‌ పోలీస్టేషన్‌లో ఫిర్యాదు చేశారు. కొంతకాలంగా గిరినాయుడు తనను వేధిస్తున్నాడని, అతని వేధింపులు తాళలేక తాను పుట్టింటికి వెళ్లానని తెలిపారు. అయినప్పటికీ నిత్యం తనకు ఫోన్‌ చేసి వేధింపులకు గురిచేస్తున్నాడని, తనకు ఎమ్మెల్యే కందికుంట వెంకటప్రసాద్‌ అండ ఉందని, తనను ఎవరూ ఏమీ చేయలేరని భయాందోళనకు గురిచేస్తున్నాడని ఫిర్యాదులో పేర్కొన్నారు. గిరినాయుడు బారి నుంచి తనను, తన కుటుంబాన్ని రక్షించాలని కోరారు. హరిత ఫిర్యాదు మేరకు ఎమ్మెల్యే కందికుంట డ్రైవర్‌ గిరినాయుడుపై గృహహింస చట్టం కింద కేసు నమోదు చేసినట్లు రూరల్‌ అప్‌గ్రేడ్‌ పోలీస్టేషన్‌ సీఐ నిరంజన్‌రెడ్డి తెలిపారు. భార్య, అత్తామామలపై దాడి కేసు నమోదు చేసిన కదిరి రూరల్‌ పోలీసులు

ప్రశాంతి నిలయం: ప్రశాంతి నిలయంలో వినాయక చవితి వేడుకలు భక్తిశ్రద్ధలతో నిర్వహించారు. సోమవారం ఉదయం సత్యసాయి మహా సమాధి చెంత వేదపఠనంతో వేడుకలు ప్రారంభించారు. సత్యసాయి మహాసమాధిని, సాయికుల్వంత్‌ సభా మందిరాన్ని ప్రత్యేకంగా అలంకరించారు. సత్యసాయి విద్యార్థులు గణనాథుడిని కీర్తిస్తూ భక్తిగీతాలు ఆలపించారు. సత్యసాయి సెంట్రల్‌ ట్రస్ట్‌ కార్యాలయంలో సెంట్రల్‌ ట్రస్ట్‌ మేనేజింగ్‌ ట్రస్టీ ఆర్‌జె.రత్నాకర్‌రాజు వినాయకుడికి ప్రత్యేక పూజలు నిర్వహించారు. సత్యసాయి విద్య, వైద్య, ట్రస్ట్‌ కార్యాలయాల్లో విభిన్న రూపాల్లో వినాయక విగ్రహాలను ఏర్పాటు చేసి పూజలు చేశారు. పిదప భక్తులు సత్యసాయి మహా సమాధిని దర్శించుకున్నారు.

కదిరి అర్బన్‌: ఖాద్రీ లక్ష్మీ నరసింహస్వామి జన్మ నక్షత్రమైన స్వాతి నక్షత్రం రోజున మంగళవారం మండల పరిధిలోని కదిరి కొండ చుట్టూ భక్తులు గిరి ప్రదక్షిణ చేశారు. గోవింద నామస్మరణతో పరిసరాలు మర్మోగాయి. భక్తులకు నరేంద్రబాబు, హరికృప దంపతులు అల్పాహారం అందజేశారు. నృసింహ సేవా సమితి సభ్యులు మజ్జిగ ప్యాకెట్లు పంపిణీ చేశారు. వ్యక్తి ఆత్మహత్యకదిరి అర్బన్‌: మండల పరిధిలోని కుమ్మరవాండ్లపల్లి గ్రామంలో మంగళవారం తెల్లవారుజామున నవీన్‌కుమార్‌ (31) అనే వ్యక్తి ఫ్యానుకు ఉరి వేసుకుని ఆత్మహత్య చేసుకున్నాడు. కుటుంబ కలహాలే ఆత్మహత్యకు కారణమై ఉంటాయని స్థానికులు చెబుతున్నారు. మృతదేహాన్ని పోస్టుమార్టం నిమిత్తం కదిరి ఏరియా ఆసుపత్రికి తరలించారు. మృతునికి భార్య, కుమార్తె ఉన్నారు. రూరల్‌ మండల పోలీసులు కేసు నమోదు చేసుకుని దర్యాప్తు చేస్తున్నారు. గొర్రెల కాపరి .. ముదిగుబ్బ: మండల పరిధిలోని ముక్తాపురం గ్రామ పొలాల్లో కొత్తచెరువు మండలం తలమర్ల గ్రామానికి చెందిన కురుబ సూర్యనారాయణ (30) అనే గొర్రెల కాపరి మంగళవారం మామిడి చెట్టుకు ఉరి వేసుకొని ఆత్మహత్య చేసుకున్నాడు. పోలీసులు తెలిపిన వివరాల మేరకు మృతుడు ధర్మవరం మండలం రావులచెరువు గ్రామంలో పెళ్లి చేసుకుని అక్కడే నివాసం ఉంటున్నాడు. గొర్రెలు కాయడానికి అక్కడే ఒకరి వద్ద పనికి కుదిరాడు. ఏమైందో తెలియదు కానీ, ముక్తాపురం గ్రామానికి చేరుకుని పొలాల్లో బలవన్మరణానికి పాల్పడ్డాడు. ఆత్మహత్యకు గల కారణాలు పోలీసుల విచారణలో తెలియాల్సి ఉంది. ప్రశాంతిగ్రామంలో చోరీపుట్టపర్తి టౌన్‌: పుట్టపర్తి మున్సిపాలిటీ పరిధి ప్రశాంతి గ్రామంలోని ఓ ఇంట్లో సోమవారం రాత్రి చోరీ జరిగింది. ఫైర్‌ స్టేషన్‌ సమీపంలో నివాసముంటున్న మనోహర్‌ ఇంటికి తాళం వేసుకుని కుటుంబ సభ్యులతో కలసి స్వగ్రామం అమగొండపాలెం వెళ్లారు. ఇదే అదునుగా భావించిన దుండగులు సోమవారం అర్ధరాత్రి ఇంటి తలుపులు ధ్వంసం చేసి లోపలికి ప్రవేశించి బీరువాలో ఉన్న మూడు తులాల బంగారం, రూ.50 వేలు అపహరించారు. ఈ విషయంపై బాధితుడు మనోహర్‌ మంగళవారం పుట్టపర్తి రూరల్‌ పోలీసుస్టేషన్‌లో ఫిర్యాదు చేశాడు. ఎస్‌ఐ క్రాంతి కేసు నమోదు చేసుకుని ఘటనాస్థలాన్ని పరిశీలించారు. క్లూస్‌ టీమ్‌ సాయంతో ఆధారాలను సేకరించారు. రెండింతల ఆనందంపుట్టపర్తి అర్బన్‌: పుట్టపర్తి మండలం పెడపల్లికి చెందిన పాడి రైతు రాజారెడ్డి ఇంట ఒక పాడి ఆవుకు రెండు దూడలు జన్మించాయి. నాలుగేళ్లుగా పెంచుకుంటున్న పాడి ఆవుకు వినాయక చవితి పర్వదినాన మంగళవారం తెల్లవారుజామున ఒకే ఈతలో ఒక పెయ్య, ఒక కుర్ర దూడ జన్మించాయని రైతు ఆనందం వ్యక్తం చేశాడు. రెండేళ్ల క్రితం మరో ఆవుకు ఇలాగే రెండు దూడలు జన్మించినట్లు తెలిపాడు. మద్యం మత్తులో డ్రైవింగ్‌.. వ్యక్తికి 7 రోజుల జైలు గాండ్లపెంట: మద్యం మత్తులో డ్రైవింగ్‌ చేసిన ఓ వ్యక్తికి 7 రోజుల జైలు శిక్ష పడింది. స్థానిక ఎస్‌ఐ సుమతి, పోలీసులు మంగళవారం వాహనాలు తనిఖీ చేస్తుండగా కదిరి మండలానికి చెందిన ఆదెప్ప మద్యం సేవించి ఆటో నడుపుతూ పట్టుబడ్డాడు. కేసు నమోదు చేసిన అనంతరం ఆదెప్పను న్యాయస్థానంలో హాజరు పరుచగా న్యాయమూర్తి 7 రోజుల జైలు శిక్ష విధించినట్లు ఎస్‌ఐ తెలిపారు. ఇద్దరికి రూ.19 వేల జరిమానా తనకల్లు: మద్యం సేవించి వాహనాలను నడుపుతున్న ఇద్దరు వ్యక్తులకు కోర్టు రూ. 19 వేలు జరిమానా విధించినట్లు ఎస్‌ఐ దిలీప్‌కుమార్‌ మంగళవారం తెలిపారు. వివరాలు... రెండు రోజుల క్రితం ఎస్‌ఐ ఆధ్వర్యంలో పోలీసులు డ్రంక్‌ అండ్‌ డ్రైవ్‌లో భాగంగా స్థానిక జాతీయ రహదారిపై వాహనాల తనిఖీ చేపట్టారు. అదే సమయంలో ఎన్‌పీ కుంట మండలం మూలపల్లికి చెందిన కమలాకర్‌, తనకల్లు మండలం బాలసముద్రానికి చెందిన సురేష్‌ మద్యం సేవించి ద్విచక్ర వాహనాలను నడుపుతున్నట్లు గుర్తించి కేసు నమోదు చేశారు. కదిరి కోర్టులో నిందితులను హాజరుపరచగా విచారణ అనంతరం కమలాకర్‌, సురేష్‌కు రూ.19 వేలు జరిమానాను న్యాయమూర్తి విధించారు.

ధర్మవరం అర్బన్‌/రొద్దం/పెనుకొండ రూరల్‌/కనగానపల్లి: గణేష్‌ నిమజ్జనంలో ఎలాంటి ఘటనలు జరగకుండా పోలీసులు ముందస్తు ఏర్పాట్లు చేసుకోవాలని ఎస్పీ సతీష్‌కుమార్‌ ఆదేశించారు. మంగళవారం ఆయన ధర్మవరం, రొద్దం, పెనుకొండ, కనగానపల్లి మండలాల్లో పర్యటించారు. ఇందులో భాగంగానే పలు వినాయక మండపాలను పరిశీలించారు. నిర్వాహకులతో కలిసి పూజలు చేశారు. ఈ సందర్భంగా ఎస్పీ మాట్లాడుతూ వినాయక మండపాల వద్ద డీజేలు, లౌడ్‌ స్పీకర్లు పెట్టి ప్రజలకు ఇబ్బందులు కలిగించకుండా ఉత్సవాలు ప్రశాంతంగా జరుపుకోవాలన్నారు. మండపాల వద్ద రాజకీయ నాయకుల పాటలు, సమావేశాలు పెట్టి వర్గ విబేధాలు రెచ్చగొడితే చర్యలు తీసుకోవాలని సూచించారు. వినాయక నిమజ్జనం రోజు బారికేడ్లు, లైటింగ్‌, ట్రాఫిక్‌ నియంత్రణ, బందోబస్తు, భద్రతా ఏర్పాట్లను ముందుగానే పూర్తిస్థాయిలో సిద్ధం చేయాలని పోలీసు సిబ్బందిని ఆదేశించారు. నిమజ్జనం రోజున శోభాయాత్ర సందర్భంగా ప్రజలకు, వాహనదారులకు ఇబ్బందులు కలగకుండా ముందస్తు ప్రణాళికతో విధులు నిర్వహించాలని సూచించారు. నిమజ్జన కార్యక్రమాలపై నిరంతర నిఘా ఉండేలా సీసీ కెమెరాలు, డ్రోన్‌ టెక్నాలజీ వంటి సాంకేతిక పరిజ్ఞానాన్ని సమర్థవంతంగా వినియోగించుకోవాలన్నారు. ప్రజలు పోలీసు అధికారులకు సహకరించి వినాయక నిమజ్జనాన్ని ప్రశాంతంగా జరిగేలా చూడాలన్నారు. ఎస్పీ సతీష్‌కుమార్‌

అనంతపురం న్యూ టౌన్‌: భారతరత్న సర్‌ మోక్షగుండం విశ్వేశ్వరయ్య ఇంజినీర్లకు స్ఫూర్తి ప్రదాత అని పంచాయతీ రాజ్‌ ఇంజినీర్‌ ఇన్‌ చీఫ్‌ (ఈఎన్‌సీ) బాలు నాయక్‌ అన్నారు. నగరంలోని పంచాయతీరాజ్‌ సూపరింటెండెంట్‌ ఇంజినీర్‌ కార్యాలయంలో మంగళవారం మోక్షగుండం విశ్వేశ్వరయ్య 165వ జయంతిని పురస్కరించుకుని 59వ ఇంజినీర్ల దినోత్సవం ఘనంగా నిర్వహించారు. పంచాయతీరాజ్‌ ఎస్‌ఈ వై. చిన్న సుబ్బరాయుడు అధ్యక్షతన జరిగిన ఈ కార్యక్రమానికి బాలు నాయక్‌ ముఖ్య అతిథిగా హాజరయ్యారు. ఈ సందర్భంగా ఆయన మాట్లాడుతూ నిబద్ధత, నిజాయతీలే మోక్షగుండం విశ్వేశ్వరయ్యను భారతరత్నను చేశాయన్నారు. పీఆర్‌ సూపరింటెండెంట్‌ ఇంజినీర్‌ చిన్న సుబ్బరాయుడు మాట్లాడుతూ మోక్షగుండం విశ్వేశ్వరయ్య భారతీయుల హృదయాల్లో చిరస్మరణీయుడన్నారు. ఇంజినీర్లు రాజకీయ నేతల వలలో చిక్కుకోకూడదని పలువురు రిటైర్డ్‌ ఇంజినీర్లు అభిలషించారు. అంతకుముందు పీఆర్‌ ఆవరణలో ఏర్పాటు చేసిన మోక్షగుండం విశ్వేశ్వరయ్య విగ్రహాన్ని ఆవిష్కరించారు. విధి నిర్వహణలో అత్యుత్తమ ప్రతిభ కనబరిచిన పలువురు ఇంజినీర్లను సన్మానించారు. డివిజనల్‌ ఇంజినీర్లు కే.లక్ష్మీనారాయణ (సబ్‌ డివిజన్‌–1, అనంతపురం), రమణ (పెనుకొండ), వెంకటేష్‌ (మడకశిర), నాగేంద్ర కుమార్‌ (కళ్యాణదుర్గం), అసిస్టెంట్‌ ఇంజినీర్లు ఓబులేసు, అబ్దుల్‌ ఖాదర్‌, ఇంజినీరింగ్‌ అసిస్టెంట్‌ చరణ్‌ అవార్డులు అందుకున్న వారిలో ఉన్నారు. కార్యక్రమంలో మురళీమోహన్‌, రాజన్న, భాస్కర్‌ తదితరులు పాల్గొన్నారు. ఈఎన్‌సీ బాలు నాయక్‌

అనంతపురం సెంట్రల్‌: దేవాలయాల్లో దొంగతనాలకు పాల్పడుతున్న అంతర్రాష్ట్ర దొంగల ముఠాను కళ్యాణదుర్గం రూరల్‌ పోలీసులు అరెస్ట్‌ చేశారు. వారి నుంచి రూ. 40 లక్షల విలువైన 21 కిలోల వెండి ఆభరణాలు, కరిగించిన వెండి, ఒక ద్విచక్రవాహనం స్వాధీనం చేసుకున్నారు. మంగళవారం అనంతపురంలోని జిల్లా పోలీసు కాన్ఫరెన్స్‌ హాలులో ఏర్పాటు చేసిన సమావేశంలో వివరాలను ఎస్పీ జగదీష్‌ వెల్లడించారు. వ్యసనాలకు బానిసలై.. అనంతపురం రూరల్‌ మండలం నందమూరి నగర్‌కు చెందిన కురపాటి సాయికుమార్‌, అక్కంపల్లికి చెందిన కనుమక్కుల చాంద్‌బాషా, శ్రీ సత్యసాయి జిల్లా పరిగి మండలం కొడిగినెహళ్లికి చెందిన గుండప్పగారి సూదం ముఠాగా ఏర్పడ్డారు. సర్వీసింగ్‌ సెంటర్లో వర్కర్‌, కూలీ పనులు చేసుకునే వీరు వ్యసనాలకు బానిసలయ్యారు. జల్సాలను తీర్చుకునేందుకు దేవాలయాలను టార్గెట్‌గా చేసుకున్నారు. కాపలాలేని దేవాలయాలను ఎంచుకొని ఎవరూ లేని సమయంలో దొంగతనాలకు పాల్పడేవారు. సీసీ కెమెరాలు ఉన్నా.. వాటిలో రికార్డు కాకుండా స్ప్రే ద్వారా లెన్స్‌ను బ్లర్‌ చేయడం, కొన్ని చోట్ల డీవీఆర్‌లను ఎత్తుకెళ్లారు. కంబదూరు మండలం రాంపురం మారెమ్మ ఆలయంలో సీసీ కెమెరాలు ధ్వంసం చేసి చోరీకి పాల్పడ్డారు. ఘటనపై కేసు నమోదు చేసి దర్యాప్తు చేపట్టగా నిందితుల వివరాలు వెల్లడయ్యాయి. అనంతరం వారిని అరెస్టు చేసి విచారించగా... కంబదూరుతో పాటు బ్రహ్మసముద్రం, శెట్టూరు, పామిడి, బుక్కరాయసముద్రం, రామగిరి మండలం నసనకోట ముత్యాలమ్మ ఆలయం, రొద్దం, కర్ణాటకలోని తుమకూరు, కొరటగెరె, క్యాససంద్ర తదితర చోట్ల దేవాలయాల్లో దొంగతనాలకు పాల్పడినట్లు ఒప్పుకున్నారు. దొంగలను పట్టుకోవడంలో ప్రతిభ కనబరిచిన కళ్యాణదుర్గం డీఎస్పీ రవిబాబు, రూరల్‌ సీఐ నీలకంఠ, ఎస్‌ఐ లోకేష్‌, ఏఎస్‌ఐ గంగాధర, సిబ్బందిని ఎస్పీ జగదీష్‌ ప్రత్యేకంగా అభినందించారు.

బత్తలపల్లి: కరువు కోరల్లో చిక్కుకున్న రైతులను ప్రభుత్వం ఆదుకోవాలని ఏపీ రైతు సంఘం జిల్లా అధ్యక్షుడు జంగాలపల్లి పెద్దన్న పేర్కొన్నారు. ఏపీ రైతు సంఘం ఆధ్వర్యంలో బుధవారం కరువు బృందం బత్తలపల్లి మండలం గుమ్మల్లకుంట గ్రామంలో పర్యటించింది. ఐదు ఎకరాల్లో 300 చీనీచెట్లు నీరు లేక ఎండిపోయిన వైనాన్ని పరిశీలించి, బాధిత రైతు లక్ష్మీదేవిని నాయకులు పరామర్శించారు. ఈ సందర్భంగా ఆయన మాట్లాడుతూ మండలంలోని చాలా గ్రామాల్లో పండ్లతోటలు ఎండుతున్న దుర్భర పరిస్థితులు ఏర్పడుతున్నాయన్నారు. వరిమడుగు నాగిరెడ్డి, లక్ష్మీదేవి దంపతులు సాగు చేసిన చీనీ చెట్లు ఎండిపోయాయన్నారు. రెండు ఎకరాలలో ఏడు బోరు బావులు ఉన్నా ఎల్‌నినో ప్రభావం వల్ల వర్షాలు రాక ఎండిపోయాయన్నారు. దీంతో ఆ కుటుంబం అప్పుల ఊబిలో కూరుకుపోయిందన్నారు. మూడు ఎకరాలలో పశువుల గడ్డి కూడా ఎండిపోయిందన్నారు. నాగిరెడ్డి, లక్ష్మీదేవి దంపతులకు రూ.30 లక్షల వరకు నష్టం వచ్చిందని, ప్రభుత్వంపరిహారం చెల్లించాలని డిమాండ్‌ చేశారు. జిల్లాను వెంటనే కరువు ప్రాంతంగా ప్రకటించి సహాయక చర్యలు చేపట్టాలన్నారు. కార్యక్రమంలో ఏపీ చేనేత కార్మిక సంఘం ధర్మవరం పట్టణ కార్యదర్శి గుంపు హరి, లక్ష్మన్న, రైతులు లక్ష్మీదేవి, నాగిరెడ్డి, హనుమంతరెడ్డి తదితరులు పాల్గొన్నారు.

రొళ్ల: రెండేళ్లుగా బీసీ కాలనీలో నెలకొన్న తీవ్రమైన తాగునీటి సమస్యను పరిష్కరించడంలో నియోజకవర్గస్థాయి ముఖ్య నాయకులు, ప్రత్యేక అధికారులు పూర్తిగా విఫలం అయ్యారని మహిళలు ఆగ్రహం వ్యక్తం చేశారు. మంగళవారం మండలంలోని హెచ్‌టీ హళ్లిలో మహిళలు ప్రధాన రోడ్డు పై ఆందోళన చేపట్టారు. బీసీ కాలనీలో 75 కుటుంబాలకు పైగా నివాసం ఉంటున్నా తాగునీటికి నానా అవస్థలు పడాల్సిన దుస్థితి నెలకొందన్నారు. రోడ్డుపై ముళ్ల కంప వేసి వాహన రాకపోకలను అడ్డుకొని నిరసన తెలిపారు. స్పందించిన అధికారులు నాలుగు రోజుల్లో నీటి సమస్యను పరిష్కరిస్తామని హామీ ఇవ్వడంతో ఆందోళన విరమించారు.

గుంతకల్లు: విధి నిర్వహణలో ప్రతిభ కనబరిచిన పలువురు ఉద్యోగులకు మంగళవారం డీఆర్‌ఎం చంద్రశేఖర్‌ గుప్తా మ్యాన్‌ ఆఫ్‌ మంత్‌ అవార్డులను అందజేశారు. మంగళవారం డీఆర్‌ఎం కార్యాలయంలోని తుంగభద్ర ఛాంబర్‌లో డివిజన్‌ వ్యాప్తంగా ఎంపికై న 13 మంది అవార్డులు అందుకున్నారు. ఈ సందర్భంగా డీఆర్‌ఎం సీఎస్‌ గుప్తా మాట్లాడుతూ ప్రతి ఉద్యోగి నిబంధనల ప్రకారం నడుచుకుంటూ పని చేస్తే ప్రమాదాలను నివారించవచ్చన్నారు. దీంతో పాటు రైల్వే అభివృద్ధి బాటలో నడుస్తుందన్నారు. అవార్డులు అందుకున్న వారిలో తాడిపత్రికి చెందిన సంతోష్‌సింగ్‌, గుంతకల్లుకు చెందిన జ్ఞానేశ్వర్‌రావు, ఎం.సుధాకర్‌, ఎం.రాము, శివప్రసాద్‌, సాకేబండ రఫీ, ఫకృధ్దీన్‌ (కొండాపురం), టీ.వేమరెడ్డి (గుత్తి), ఎండీ సాహెబ్‌ (తిమ్మనచర్ల), సరనేష్‌మీనా (జక్కలచెరువు), ప్రిన్‌కుమార్‌ సింగ్‌ (గంగయ్యపాళెం), రాజేష్‌కుమార్‌ (తిమ్మనచర్ల) ఉన్నారు. కార్యక్రమంలో ఏడీఆర్‌ఎం శివప్రసాద్‌ తదితరులు పాల్గొన్నారు.

సాక్షి ప్రతినిధి, అనంతపురం: జిల్లాలో సూరీడు సుర్రుమనిపిస్తున్నాడు. ఉష్ణోగ్రతలు వేసవిని తలపిస్తున్నాయి. ఉదయం ఏడు గంటల నుంచే ఎండలు ఠారెత్తిస్తున్నాయి. బయటికి రావాలంటే జంకాల్సిన పరిస్థితి నెలకొంది. వేడి, ఉక్కపోతతో ప్రజలు అల్లాడిపోతున్నారు. సాధారణంగా సెప్టెంబర్‌లో 34 డిగ్రీల సెల్సియస్‌ ఉష్ణోగ్రత నమోదవుతూ ఉంటుంది. కానీ, సూపర్‌ ఎల్‌–నినో ప్రభావంతో గరిష్ట ఉష్ణోగ్రతలు నమోదవుతున్నాయి. అనంతపురం నగరంలో 40 డిగ్రీల సెల్సియస్‌ ఉష్ణోగ్రత నమోదైంది. తాడిపత్రి, శింగనమల, ధర్మవరం, కళ్యాణదుర్గం, పుట్టపర్తి, కదిరి, ఉరవకొండ నియోజకవర్గాల్లో 38 డిగ్రీల వరకు గరిష్ట ఉష్ణోగ్రతలు నమోదవుతున్నాయి. 15 మీటర్లకు పడిపోయిన భూగర్భ జలాలు ఈ ఏడాది ఖరీఫ్‌ సీజన్‌ రైతులను ముంచేసింది. జూన్‌ నుంచి ఇప్పటివరకు ఒక్క పదునుపాటి వర్షం కూడా పడలేదంటే పరిస్థితి ఎంద దారుణంగా ఉందో అర్థం చేసుకోవచ్చు. గతేడాది సెప్టెంబర్‌లో జిల్లా సరాసరి భూగర్భ జలమట్టం 10.54 మీటర్లు కాగా, ఈ ఏడాది అది 15.19 మీటర్ల దిగువకు చేరింది. అంటే దాదాపు 5 మీటర్ల దిగువకు భూగర్భ జలాలు ఇంకిపోయాయి. యాడికి మండలం జిల్లాలోనే టాప్‌లో నిలుస్తోంది. ఇక్కడ 66.32 మీటర్ల లోతుకు భూగర్భ జలం పడిపోయిందంటే ఎల్‌–నినో ప్రభావం ఏ స్థాయిలో ఉందో అర్థం చేసుకోవచ్చు. పంటలు కాపాడుకునేందుకు అప్పులు చేసి బోర్లు వేస్తున్నా ఫెయిలవుతున్నాయి. 700 అడుగులకు పైగా లోతులో బోర్లు వేస్తున్నా నీరు పడడం లేదని రైతులు చెబుతున్నారు. జలాశయాల్లోనూ నీటిమట్టం తగ్గుముఖం అనంతపురం జిల్లాకు ప్రధానంగా శ్రీశైలం, తుంగభద్ర జలాశయాల నుంచి తాగు– సాగు నీరు అందుతోంది. రాష్ట్రంలో ఈ ఏడాది వర్షాలు పడలేదు. ఎగువప్రాంతాల్లో కురిసిన అరకొర వర్షాల వల్ల రెండు జలాశయాల్లోకి కొద్దోగొప్పో నీరు వచ్చి చేరింది. హంద్రీ–నీవా కెనాల్‌కు ప్రస్తుతం 2,500 క్యూసెక్కులు మాత్రమే విడుదల చేస్తున్నారు. శ్రీశైలం పూర్తిస్థాయి నీటి నిల్వ 215 టీఎంసీలు కాగా ప్రస్తుతం 115 టీఎంసీల నీరు మాత్రమే ఉంది. తుంగభద్రలో పూర్తిస్థాయి నిల్వ 105 టీఎంసీలు కాగా ప్రస్తుతం 85 టీఎంసీలు మాత్రమే ఉన్నాయి. గత దశాబ్ద కాలంలో తుంగభద్రలో సాధారణ నీటి నిల్వ 90 టీఎంసీలుగా ఉంది. కానీ, ఈ ఏడాది సెప్టెంబర్‌నాటికి 85 టీఎంసీలు మాత్రమే ఉన్నాయి. బ్రహ్మసముద్రం మండలం పాలవెంకటాపురంలో పండుగ పూట ఇలా...ఉసూరుమనిపించిన రుతుపవనాలు ఈ ఏడాది జూన్‌ రెండో వారంలోనే నైరుతి రుతుపవనాలు రాయలసీమను తాకాయి. మబ్బులు ఊరించి ఉసూరుమనిపించాయి. నైరుతి రుతుపవనాల వల్లే దాదాపు 70 నుంచి 80 శాతం వర్షం కురుస్తుంది. ఎల్‌–నినో దెబ్బకు 50 శాతం కూడా వర్షపాతం నమోదవలేవు. ఫలితంగా జిల్లా వ్యాప్తంగా తీవ్ర వర్షాభావ పరిస్థితులు నెలకొన్నాయి. వంకలు, వాగులు, చెరువులు, నదులు, డ్యాంలలో చుక్కనీరు కనిపించడం లేదు. ఇప్పటికే గుత్తి, కళ్యాణదుర్గం, రాయదుర్గం, గుంతకల్లు, ఉరవకొండ ప్రాంతాలలో తాగు నీటి సమస్య మొదలైంది. మరోవైపు పంటలు వాడుముఖం పట్టి నిలువునా ఎండిపోతున్నాయి. పుట్లూరు, యల్లనూరు, గుత్తి, శింగనమల ప్రాంతాల్లో ఎండుతున్న చీనీ చెట్లను కాపాడుకునే మార్గం కనిపించక రైతులు కొట్టేస్తున్నారు. వేసవిని మించి నమోదవుతున్న ఉష్ణోగ్రతలు తీవ్ర ఉక్కపోతతో అల్లాడుతున్న ప్రజలు మరోవైపు అడుగంటుతున్న భూగర్భ జలాలు ఎల్‌–నినో ప్రభావంతో సాగు, తాగునీటికి తీవ్ర ఇబ్బందులు

బుక్కరాయసముద్రం/తాడిమర్రి:అల్లారు ముద్దుగా పెంచుకున్నారు. వారి జీవితం ఆనందంగా సాగిపోవాలని ఆకాంక్షించారు. అలాంటి ‘ఆశల దీపాలు’ ఒక్కసారిగా ఆరిపోయాయని తెలుసుకున్న ఆ హృదయాలు ‘తల్లి’డిల్లిపోయాయి. హుటాహుటిన ఘటనాస్థలికి చేరుకున్నాయి. ఎప్పుడూ నవ్వుతూ, నవ్విస్తూ ఉండే బిడ్డలు కళ్ల ముందే విగతజీవులుగా పడి ఉండడం చూసి తట్టుకోలేకపోయాయి. గుండెలవిసేలా రోదించాయి. వారి ఆర్తనాదాలు పలువురిని కంటతడి పెట్టించాయి. బుక్కరాయసముద్రం మండలం రోటరీపురం వద్ద అనంతపురం–తాడిపత్రి రహదారిపై మంగళవారం తెల్లవారుజామున జరిగిన ఘోర రోడ్డు ప్రమాదం రెండు కుటుంబాల్లో విషాదం నింపింది. కన్నవాళ్లకు తీరని శోకం మిగిల్చింది. ఇద్దరూ నర్సులే గుత్తి మండలానికి చెందిన రామాంజనేయులు, సాలమ్మల కుమార్తె హరిత (20) అనంతపురంలోని ఓ నర్సింగ్‌ కళాశాలలో మూడో సంవత్సరం చదువుకుంటూ త్రిపుర ప్రైవేటు ఆస్పత్రిలో నర్సుగా పని చేస్తోంది. ఇదే ఆస్పత్రిలో తాడిమర్రి మండలం నిడిగల్లు గ్రామానికి చెందిన నారాయణస్వామి, విజయ దంపతుల కుమార్తె నవనీత (20) కూడా నర్సుగా పని చేస్తోంది. వీరివురూ ప్రైవేటు హాస్టల్లో ఉంటున్నారు. త్రిపుర ఆసుపత్రిలోనే ల్యాబ్‌లో పనిచేసే వినయ్‌ కుమార్‌, ఆస్పత్రిలోని ఇన్సూరెన్స్‌ విభాగంలో పనిచేసే శ్రీధర్‌ రెడ్డిలు హరిత, నవనీతతో స్నేహం పేరుతో పరిచయం పెంచుకుని ప్రేమ పేరుతో దగ్గరయ్యారు. సోమవారం రాత్రి టాటా సఫారీ వాహనంలో శింగనమలకు వచ్చిన నలుగురూ తిరిగి మంగళవారం తెల్లవారుజామున అనంతపురానికి బయలు దేరారు. కారు నడుపుతున్న శ్రీధర్‌ రెడ్డి మార్గమధ్యంలోని రోటరీపురం గ్రామ సమీపంలోని ఫ్లైఓవర్‌పై స్పీడ్‌ బ్రేకర్లను గమనించకుండా అతివేగంగా వెళ్లడంతో అదుపు తప్పిన కారు రోడ్డు పక్కల చెట్లను ఢీకొన్న అనంతరం ఓ హోటల్‌లోకి దూసుకెళ్లి బోల్తా పడింది. ప్రమాదంలో తీవ్ర గాయాలైన హరిత అక్కడికక్కడే మృతి చెందింది. విషయం తెలుసుకున్న బీకేఎస్‌ సీఐ సుబ్బరాయుడు, పోలీసు సిబ్బంది ఘటనాస్థలికి చేరుకుని గాయపడిన నవనీత, శ్రీధర్‌ రెడ్డి, వినయ్‌ కుమార్‌ను 108 వాహనంలో అనంతపురం ప్రభుత్వాసుపత్రికి తరలించారు. చికిత్స పొందుతూ నవనీత మృతి చెందింది. మా బిడ్డలను చంపేశారు.. ప్రమాద వార్త తెలుసుకున్న హరిత, నవనీత తల్లులు విజయ, సాలమ్మతో పాటు వారి బంధువులు హుటాహుటిన అనంతపురం ప్రభుత్వాసుపత్రికి చేరుకున్నారు. విగతజీవులుగా పడి ఉన్న కుమార్తెల మృతదేహాల వద్ద గుండెల విసేలా రోదించారు. తమ బిడ్డలకు శ్రీధర్‌ రెడ్డి, వినయ్‌కుమార్‌లు మాయ మాటలు చెప్పి హాస్టల్‌ నుంచి బయటకు తీసుకెళ్లి చంపేశారని ఆరోపించారు. పోలీసులు సమగ్ర విచారణ జరిపించి తమకు న్యాయం చేయాలని కోరారు. ఘటనపై బీకేఎస్‌ సీఐ సుబ్బరాయుడు కేసు నమోదు చేసి దర్యాప్తు చేస్తున్నారు. భీతావహంగా మారిన ఘటనాస్థలి, చిత్రంలో హరిత మృతదేహం ఆసుపత్రిలో రోదిస్తున్న యువతుల తల్లులు నిడిగల్లులో విషాదం నవనీత మృతితో తాడిమర్రి మండలంలోని నిడిగల్లులో విషాదఛాయలు అలముకున్నాయి. ఉద్యోగం చేస్తూ కుటుంబానికి చేదోడువాదోడుగా ఉంటున్న కుమార్తె మృతితో తల్లిదండ్రులు శోకసంద్రంలో మునిగి పోయారు. వైఎస్సార్‌ సీపీ నాయకులు మదమంచి మల్లికార్జున నాయుడు, గుజ్జల హనుమంతులు బాధిత కుటుంబాన్ని పరామర్శించి సంతాపం వ్యక్తం చేశారు. రోడ్డు ప్రమాదంలో ఇద్దరు నర్సుల దుర్మరణం అల్లారు ముద్దుగా పెంచుకున్న బిడ్డల మృతితో హతాశయులైన కన్నవారు మృతదేహాల వద్ద కన్నీరు మున్నీరైన తల్లులు

ప్రశాంతి నిలయం: సమాజంలోని ప్రతి ఒక్కరికీ పర్యావరణ పరిరక్షణపై అవగాహన అవసరమని కలెక్టర్‌ ఏ.శ్యాంప్రసాద్‌ తెలియజేశారు. సోమవారం కలెక్టర్‌ బంగ్లాలో వినాయక చవితి వేడుకలను భక్తిశ్రద్దలతో నిర్వహించారు. కలెక్టర్‌తో పాటు జాయింట్‌ కలెక్టర్‌ ఎం.మౌర్యభరద్వాజ్‌ కుటుంబ సభ్యులతో కలసి శాస్త్రోక్తంగా వినాయక చవితి పూజల్లో పాల్గొన్నారు. మట్టితో తయారు చేసిన వినాయక విగ్రహాలకు పూజలు చేశారు. వినాయకుడి ఆశీస్సులతో ప్రజలందరూ సుఖశాంతులతో సుభిక్షింగా జీవించాలని కలెక్టర్‌ ఆకాంక్షించారు. ఎస్‌ఎంసీ ఎన్నికలకు నోటిఫికేషన్‌ విడుదల పుట్టపర్తి: పాఠశాల యాజమాన్య కమిటీ (ఎస్‌ఎంసీ) పునర్‌ వ్యవస్థీకరణ ఎన్నికల షెడ్యూల్‌ను ప్రభుత్వం విడుదల చేసినట్లు డీఈఓ కిష్టప్ప ఒక ప్రకటనలో పేర్కొన్నారు. అన్ని పాఠశాలల్లో సెప్టెంబర్‌ 29న ఎన్నికలు నిర్వహించి కమిటీ చైర్మన్‌, వైస్‌ చైర్మన్‌ను ఎన్నుకోవాలన్నారు. కేంద్ర ప్రభుత్వం జారీ చేసిన ఎస్‌ఎంసీ మార్గదర్శకాలు–2026కు అనుగుణంగా ఎన్నికల ప్రక్రియ జరుగుతుందన్నారు. షెడ్యూల్‌ వివరాలు 15న ఎస్‌ఎంసీ సభ్యులు, చైర్మన్‌, వైస్‌ చైర్మన్‌ ఎన్నికల నిర్వహణకు నోటిఫికేషన్‌ విడుదల, 18న పాఠశాల నోటీస్‌ బోర్డులో ఓటర్ల జాబితా ప్రదర్శన, 25న జాబితాపై అభ్యంతరాల స్వీకరణ, పరిష్కారం, అనంతరం తుది ఓటరు జాబితా ఖరారు, ప్రదర్శన ఉంటుంది. 29న ఎన్నికల నిర్వహణ, అదేరోజు మధ్యాహ్నం 1.30 గంటలకు చైర్మన్‌, వైస్‌ చైర్మన్‌ ఎన్నిక నిర్వహిస్తారు. ముగిసిన స్టేట్‌ లెవల్‌ బేస్‌బాల్‌ పోటీలు పుట్టపర్తి టౌన్‌: జిల్లా కేంద్రమైన పుట్టపర్తిలో నిర్వహించిన 8వ సీనియర్‌ స్టేట్‌ లెవల్‌ ఇంటర్‌ డిస్ట్రిక్ట్‌ బేస్‌ బాల్‌ చాంపియన్‌ షిప్‌ (పురుషులు, మహిళలు) పోటీలు ఘనంగా ముగిశాయి. ఈ కార్యక్రమానికి జాయింట్‌ కలెక్టర్‌ మౌర్య భరద్వాజ్‌ ముఖ్య అతిథిగా హాజరై విజేతలకు బహుమతులు అందజేశారు. ఈ పోటీలు సెప్టెంబర్‌ 12 నుంచి 15వ తేదీ వరకూ జరిగాయి. రాష్ట్రంలో వివిధ జిల్లాల నుంచి 44 జట్లు పాల్గొన్నాయి. పురుషుల విభాగంలో నంద్యాల జిల్లా ప్రథమ స్థానాన్ని దక్కించుకుంది. శ్రీకాకుళం జిల్లా ద్వితీయ, విజయనగరం జిల్లా తృతీయ స్థానాల్లో నిలిచాయి. మహిళా విభాగంలో శ్రీకాకుళం జిల్లా, ద్వితీయస్థానం నెల్లూరు జిల్లా, తృతీయస్థానం పల్నాడు జిల్లాలు విజేతలుగా నిలిచాయి. గెలుపొందిన జట్లకు జాయింట్‌ కలెక్టర్‌ మౌర్యభరద్వాజ్‌ ట్రోఫీలను అందజేశారు. ఉమ్మడి ‘స్థానిక’ పోలింగ్‌ కేంద్రాలు 2,741అనంతపురం న్యూ టౌన్‌: త్వరలో జరగనున్న స్థానిక సంస్థల ఎన్నికల ఏర్పాట్లు ఉమ్మడి అనంతపురం జిల్లాలో ముమ్మరంగా సాగుతున్నాయి. ఇందులో భాగంగా మంగళవారం జిల్లా పరిషత్‌ ప్రాదేశిక స్థానాల్లో ఓటర్లు తమ ఓట్లను వేసేందుకు పోలింగ్‌ స్టేషన్ల ముసాయిదా జాబితాను జెడ్పీ సీఈఓ విజయలక్ష్మి వెల్లడించారు. అనంతపురం, శ్రీసత్యసాయి జిల్లాల పోలింగ్‌ కేంద్రాల జాబితాను ప్రజల సమాచార నిమిత్తం జిల్లా పరిషత్‌ కార్యాలయ నోటీసు బోర్డులో ఉంచారు. ఉమ్మడి అనంతపురం జిల్లాలో మొత్తం 63 జిల్లా పరిషత్‌ ప్రాదేశిక నియోజక వర్గాల పరిధిలో 2,741 పోలింగ్‌ కేంద్రాలను గుర్తించినట్లు వివరించారు. అనంతపురం జిల్లాలోని 31 మండలాలకు గాను 1,507 పోలింగ్‌ కేంద్రాలు ఏర్పాటు కానున్నాయి. అదేవిధంగా శ్రీసత్యసాయి జిల్లాలోని 32 జిల్లాపరిషత్‌ ప్రాదేశిక నియోజక వర్గాల్లో 1,234 పోలింగ్‌ కేంద్రాలను అధికారులు గుర్తించారు. ఈ మొత్తం 2,741 పోలింగ్‌ స్టేషన్ల ద్వారా ఉమ్మడి జిల్లా వ్యాప్తంగా 25,18,110 మంది ఓటర్లు 63 మంది జిల్లా ప్రాదేశిక సభ్యులను ఎన్నుకోవాల్సి ఉంటుంది. పోలింగ్‌ స్టేషన్ల ముసాయిదా జాబితాలను విడుదల చేసే కార్యక్రమంలో జిల్లా పరిషత్‌ పరిపాలన అధికారులు మల్లికార్జున, నందకిషోర్‌, భాస్కర్‌రెడ్డి, లెక్కల శ్రీనివాసులు, ఫణిశేఖర్‌రెడ్డి, ముత్యాలరెడ్డి తదితరులు పాల్గొన్నారు.

హిందూపురం టౌన్‌: కదిరి నుంచి హిందూపురం వస్తున్న ఏపీఎస్‌ఆర్టీసీ బస్సులో వెనుక టైర్‌ నుంచి ఒక్కసారిగా పొగలు రావడంతో ప్రయాణికులు తీవ్ర భయాందోళన చెందారు. ఈ ఘటన పట్టణంలోని మేళాపురం సర్కిల్‌ వద్ద మంగళవారం చోటుచేసుకుంది. కదిరి నుంచి హిందూపురం వస్తున్న ఏపీఎస్‌ఆర్టీసీ బస్సు స్థానిక మేళాపురం సర్కిల్‌ వద్ద ప్రయాణికులను దింపడానికి నిలిపింది. ఆ సమయంలో బస్సు వెనుక చక్రం వద్ద నుంచి ఒక్కసారిగా పొగలు రావడంతో ప్రయాణికులు భయాందోళనకు గురయ్యారు. వెంటనే బస్సు దిగిపోయారు. సమాచారం తెలుసుకున్న ఆర్టీసీ డిపో అధికారులు అక్కడికి చేరుకుని పరిశీలించారు. బ్రేక్‌ లైనర్లు ఒకదానిపై ఒకటి రాపిడికి గురికావడంతో వేడి పెరిగి పొగలు వచ్చినట్లు తెలిపారు. అనంతరం బస్సును డిపో వద్దకు తరలించి పరిశీలించారు. ఎలాంటి ప్రమాదం జరగకపోవడంతో ప్రయాణికులు ఊపిరి పీల్చుకున్నారు. ‘ప్రత్యామ్నాయ’ విత్తనాలు సిద్ధం పుట్టపర్తి అర్బన్‌: ప్రత్యామ్నాయ పంటల విత్తనాలను సబ్సిడీపై అందజేయడానికి సిద్ధం చేసినట్లు జిల్లా వ్యవసాయాధికారి క్రిష్ణయ్య ఓ ప్రకటనలో పేర్కొన్నారు. 80 శాతం రాయితీతో ఉలవ, పెసర, అలసంద, జొన్నలను అందజేయనున్నట్లు తెలిపారు. పొలాలను ఖాళీగా ఉంచకుండా పంటలను సాగు చేయాలన్నారు. అన్ని మండల కేంద్రాల్లో ఇప్పటికే ఉలవలను సిద్ధంగా ఉంచామన్నారు. ఇప్పటి వరకూ సాగు చేసిన పంటలు, రైతుల వివరాలు ‘ఈ– పంట’లో 95 శాతం నమోదయ్యాయన్నారు. రైతులు ఏ పంటకు బీమా చెల్లించారో అదే పంటకు బీమా వర్తిస్తుందన్నారు. జిల్లాలో సాధారణ సాగు విస్తీర్ణం 1,97,518 హెక్టార్లు ఉండగా ప్రస్తుతానికి 1,16,099 హెక్టార్లలో వివిధ రకాల పంటలు సాగు చేశారన్నారు. వేరుశనగ 46,470 హెక్టార్లు, కంది 35,949, మొక్కజొన్న 15,296, ఆముదం 6,633, వరి 5,981 హెక్టార్లలో సాగు చేశారన్నారు. 81,419 హెక్టార్లలో పంటలు సాగు చేయాల్సి ఉందన్నారు. ప్రతి ఎకరాలో పంట సాగు చేసేలా వ్యవసాయ శాఖ ప్రత్యామ్నాయ ప్రణాళికను సిద్ధం చేసినట్లు వెల్లడించారు.

ధర్మవరం: ‘‘ చంద్రబాబు నేతృత్వంలోని కూటమి ప్రభుత్వం అభివృద్ధిని పక్కన పెట్టింది...సంక్షేమానికి నీళ్లొదిలింది. రెడ్‌బుక్‌ రాజ్యాంగంతో రాక్షస పాలన సాగిస్తోంది.. అవినీతి, అక్రమాలే పరమావధిగా సాగుతున్న ఈ ప్రభుత్వ పతనానికి స్థానిక సంస్థల ఎన్నికల్లో నాంది పలుకుదాం’’ అని మాజీ ఎమ్మెల్యే, వైఎస్సార్‌ సీపీ ధర్మవరం నియోజకవర్గ సమన్వయకర్త కేతిరెడ్డి వెంకటరామిరెడ్డి పార్టీ శ్రేణులకు పిలుపునిచ్చారు. శనివారం స్థానిక వైఎస్సార్‌సీపీ కార్యాలయంలో నియోజకవర్గ విస్తృత స్థాయి సమావేశాన్ని నిర్వహించారు. కేతిరెడ్డి వెంకటరామిరెడ్డి అధ్యక్షతన జరిగిన సమావేశంలో నియోజకవర్గ పరిశీలకుడు నార్పల సత్యనారాయణరెడ్డితో పాటు నియోజకవర్గ స్థాయి కమిటీలు, అనుబంధ విభాగాల నాయకులు, కార్యకర్తలు హాజరయ్యారు. ఈ సందర్భంగా మాజీ ఎమ్మెల్యే కేతిరెడ్డి మాట్లాడుతూ... పార్టీ అధినేత వైఎస్‌ జగన్‌మోహన్‌రెడ్డి నాయకులు, కార్యకర్తలకు పూర్తి స్వేచ్స్‌చ్చారని, స్థానిక సంస్థల్లో పోటీ చేసే అభ్యర్థిని నాయకులు, కార్యకర్తలే ఎంపిక చేసుకుని రమ్మని చెప్పారన్నారు. అందరం కలిసి అభ్యర్థులను ఎంపిక చేయడంతో పాటు త్వరలో జర గబోయే స్థానిక సంస్థల ఎన్నికల్లో పట్టణంలోని 48 వార్డుల్లో వైఎస్సార్‌సీపీ అభ్యర్థులు విజయ ఢంకా మోగించేలా సమష్టిగా పనిచేద్దామని పిలుపునిచ్చారు. నియోజకవర్గంలోని 110 క్లస్టర్లలో నాయకులు నూతన కమిటీ సభ్యులతో సమావేశాలు నిర్వహించి ఎన్నికలకు సన్నద్ధం చేయాలన్నారు. కూటమి ప్రభుత్వం పాలనపై ప్రజల్లో తీవ్ర అసంతృప్తి ఉందన్నారు. సంక్షేమం లేదు...అభివృద్ధి లేదన్నారు. ఉన్నదల్లా కేవలం అవినీతి, కూటమి నాయకులు దోచుకోవడం దాచుకోవడం మాత్రమేనన్నారు. ఈ అవినీతి కార్యకలాపాలన్నీ ప్రజల్లోకి బలంగా తీసుకుపోవాల్సిన బాధ్యత వైఎస్సార్‌సీపీ శ్రేణులపై ఉందన్నారు. కూటమి ప్రభుత్వం ఇటీవల రెడ్‌బుక్‌ పేరుతో వైఎస్సార్‌సీపీ శ్రేణుల మీద అక్రమ కేసులు, బైండోవర్‌లు, వేధింపులతో రాక్షస ఆనందం పొందుతోందని, జగనన్న 2.0లో రెట్టింపు ప్రతి చర్యను వారు చవిచూస్తారని కేతిరెడ్డి తెలిపారు. కూటమి నాయకులు భవిష్యత్‌ను సిరాతో రాయాలనుకుంటే తాను సిరాతోనే బదులిస్తానని, రక్తంతో రాయాలనుకుంటే రక్తంతోనే బదులిస్తానన్నారు. వైఎస్సార్‌ సీపీ కార్యకర్తలకు ఏ చిన్న సమస్య వచ్చిన... కేతిరెడ్డి ముందుంటాడన్న విషయాన్ని కూటమి నాయకులు గుర్తుంచుకోవాలన్నారు. త్వరలోనే నియోజకవర్గంలో ఉన్న అన్ని మండాలల్లో సమావేశం పెట్టుకుని కార్యకర్తల సమస్యలు తెలుసుకుని స్థానిక సంస్థల్లో గెలుపే పరమావధిగా దిశా నిర్దేశం చేస్తానన్నారు. సమష్టి కృషితోనే విజయం సాధ్యం వైఎస్సార్‌సీపీ నియోజకవర్గ పరిశీలకుడు నార్పల సత్యనారాయణరెడ్డి మాట్లాడుతూ, వైఎస్సార్‌సీపీ అనుబంధ విభాగాలు, నూతన కమిటీల ఏర్పాటులో 14వేల పైచిలుకు బలమైన నాయకులను అందించి రాష్ట్రంలోనే ధర్మవరం మొదటి స్థానంలో ఉందన్నారు. అందరూ కలిసి సమష్టిగా కృషి చేస్తే వైఎస్సార్‌సీపీ అభ్యర్థుల గెలుపు నల్లేరుమీద నడకేనన్నారు. గత ప్రభుత్వంలో వైఎస్‌ జగన్‌మోహన్‌రెడ్డి చేసిన సంక్షేమం, అభివృద్ధి, నియోజకవర్గంలో కేతిరెడ్డి చేసిన అనేక అభివృద్ధి కార్యక్రమాలను ప్రజల్లోకి విస్తృతంగా తీసుకుపోవాలన్నారు. పార్టీలో కార్యకర్తలే మూల స్తంభాలని, రానున్న కాలంలో కార్యకర్తలకే ప్రథమ ప్రాధాన్యం ఉంటుందన్నారు. సమావేశంలో నియోజకవర్గంలోని వైఎస్సార్‌సీపీ నాయకులు, కార్యకర్తలు, రాష్ట్ర, జిల్లా స్థాయి నేతలతో పాటు పార్టీ అనుబంధ కమిటీల సభ్యులు పాల్గొన్నారు. స్థానిక సంస్థల ఎన్నికల్లో మన సత్తా చాటుదాం నాయకులు, కార్యకర్తలు గెలుపే లక్ష్యంగా పని చేయాలి మాజీ ఎమ్మెల్యే కేతిరెడ్డి, పరిశీలకుడు సత్యనారాయణరెడ్డి పిలుపు ధర్మవరంలో నియోజకవర్గస్థాయి సమావేశం భారీగా తరలివచ్చిన వైఎస్సార్‌సీపీ శ్రేణులు కార్యకర్తలకు అండగా ఉంటాం..

లేపాక్షి: స్థానిక పాతూరు ఆంజనేయస్వామి దేవాలయం సమీపంలో శనివారం ఉదయం జరిగిన రోడ్డు ప్రమాదంలో యువకుడు దుర్మరణం చెందాడు. వివరాలు ఇలా ఉన్నాయి.చిలమత్తూరు మండలంలోని కొర్లకుంట గ్రామానికి చెందిన పెద్ద తిప్పన్న, అశ్వత్థమ్మ దంపతుల రెండో కుమారుడు శేషాద్రి (23) హిందూపురం పట్టణానికి హమాలీ పని నిమిత్తం ద్విచక్ర వాహనంలో వెళుతుండగా, హిందూపురం నుంచి చిలమత్తూరు వైపు వెళ్తున్న ఓ ట్రాన్స్‌పోర్టు లారీ ఢీకొంది. దీంతో తీవ్ర గాయాలైన యువకుడు అక్కడికక్కడే మృతి చెందాడు. స్థానికుల సమాచారంతో ఎస్‌ఐ నరేంద్ర వెంటనే అక్కడికి చేరుకున్నారు. మృతదేహాన్ని హిందూపురం ప్రభుత్వ ఆసుపత్రికి తరలించారు. విద్యుదాఘాతంతో పెయింటర్‌ మృతి హిందూపురం టౌన్‌: పెయింటర్‌ విద్యుదాఘాతానికి గురై మృతి చెందిన ఘటన పట్టణంలో చోటు చేసుకుంది. వివరాల మేరకు.. పట్టణంలోని ప్రభుత్వ పాలిటెక్నిక్‌ కళాశాల సమీపంలో ఇస్కాన్‌ ఆలయ నిర్మాణ పనులు జరుగుతుండగా, అందులో కొట్నూరుకు చెందిన నాగార్జున(35) అనే పెయింటర్‌ పనులు చేస్తున్నాడు. శనివారం పెయింటింగ్‌ పనులు చేస్తుండగా విద్యుదాఘాతానికి గురయ్యాడు. కూప్పకూలిన అతడిని అక్కడున్న వారు హిందూపురం జిల్లా ప్రభుత్వాస్పత్రికి తరలించారు. పరీక్షించిన వైద్యులు మరణించినట్లు నిర్ధారించారు. మృతుడికి భార్య, ఇద్దరు కుమార్తెలు ఉన్నారు. ఇస్కాన్‌ ఆలయ నిర్మాణ పనులు జరుగుతున్న ప్రాంతంలో నిర్వాహకుల నిర్లక్ష్యం కారణంగానే ప్రమాదం చోటుచేసుకుందని మృతుడి కుటుంబ సభ్యులు ఆరోపించారు. మృతుడి భార్య వన్‌టౌన్‌ పోలీసులకు ఫిర్యాదు చేయగా, కేసు నమోదు చేసుకుని దర్యాప్తు చేస్తున్నారు. నాగార్జున కుటుంబానికి రూ.20 లక్షల ఎక్స్‌గ్రేషియా ఇవ్వాలని కేవీపీఎస్‌ నాయకులు, పెయింటర్‌లు డిమాండ్‌ చేశారు. అనుమానాస్పద స్థితిలో వ్యక్తి .. హిందూపురం టౌన్‌: పట్టణంలోని కంసలపేటలో భార్యాభర్తల మధ్య వివాదం విషాదాన్ని మిగిల్చింది. మృతుడి సోదరి భాగ్యలక్ష్మీ తెలిపిన మేరకు.. కంసలపేటకు చెందిన శోభ, దొడ్డబళ్లాపురానికి చెందిన రవికుమార్‌(40)లు 17 ఏళ్ల క్రితం ప్రేమించి వివాహం చేసుకున్నారు. కొంత కాలంగా వీరి మధ్య గొడవలు చోటు చేసుకుంటున్నాయి. శుక్రవారం కూడా ఇద్దరూ ఘర్షణ పడ్డారు. ఈ నేపథ్యంలో ఇంటి నుంచి వెళ్లిన రవికుమార్‌కు ప్రమాదం జరిగిందని, మీరు రావాలంటూ తమకు ఫోన్‌ చేశారని భాగ్యలక్ష్మీ చెప్పారు. తాము వచ్చి చూడగా రవికుమార్‌ తీవ్ర గాయాలతో మృతి చెందాడన్నారు. మృతదేహాన్ని దొడ్డబళ్లాపురం తీసుకెళ్లగా, తమకు అనుమానం రావడంతో తిరిగి హిందూపురానికి తీసుకువచ్చి, పోలీసులకు సమాచారం ఇచ్చామన్నారు. రవికుమార్‌ను భార్య శోభనే కొట్టి హత్య చేసిందని టూటౌన్‌ పోలీసులకు ఫిర్యాదు చేసినట్లు ఆమె తెలిపింది. సీఐ అబ్దుల్‌ కరీం కేసు దర్యాప్తు చేస్తున్నట్లు చెప్పారు. ట్రాక్టర్‌ బోల్తా.. వ్యక్తి మృత్యువాతపావగడ: తాలూకాలోని తిరుమణి పీఎస్‌ పరిధిలోని తిమ్మాపురం గ్రామం వద్ద ఇసుక లోడుతో వెళ్తున్న ట్రాక్టర్‌ బోల్తా పడి రామగిరి మండలం తిమ్మాపురం గ్రామానికి చెందిన డ్రైవర్‌ చాకలి హరీశ్‌ (32) మృతి చెందాడు. ఈ ఘటన శుక్రవారం తెల్లవారుజామున చోటు చేసుకుంది. పోస్టుమార్టం అనంతరం మృతదేహాన్ని బంధువులకు అప్పగించినట్లు ఎస్‌ఐ విజయ్‌ కుమార్‌ తెలిపారు. మృతుడికి భార్య, ఇద్దరు పిల్లలు ఉన్నారు.

సాక్షి, పుట్టపర్తి: పరిటాల కుటుంబం దౌర్జన్యాలు, దుర్మార్గాలకు అంతేలేకుండా పోతోంది. నమ్మి ఓట్లేసిన జనాన్ని నట్టేట ముంచేందుకు సిద్ధమైంది. పరిటాల కుటుంబ సభ్యులు, బంధువులు, అనుచరుల దుర్మార్గాలతో సామాన్యులు అల్లాడిపోతున్నారు. తాజాగా సొంతమండలం రామగిరిలోని రైతుల పట్టా భూములపై పరిటాల కుటుంబం పెత్తనం చేస్తోంది. ‘‘ఎవడి భూమైతే మాకేంటి...మా ఇష్టం వచ్చినట్లు చేస్తాం’’ అంటూ దౌర్జన్యంగా వ్యవహరిస్తోంది. అంతా మేమే చేసుకుంటామని హామీ.. రాప్తాడు నియోజకవర్గం రామగిరి మండలం దుబ్బార్లపల్లి, ముత్యాలంపల్లి, మక్కినవారిపల్లి, చిన్నకొండాపురం, పెద్ద కొండాపురం, నసనకోట, రెడ్డివారిపల్లి గ్రామాలతోపాటు కర్ణాటక సరిహద్దు గ్రామాల్లో సోలార్‌, విండ్‌ పవర్‌ గ్రిడ్‌ టవర్లు నిర్మించేందుకు జేఎస్‌డబ్ల్యూ, అమరరాజ కంపెనీలు సిద్ధమయ్యాయి. ఇందుకోసం స్థానికంగా ఉన్న నాయకులను కలిసి టవర్ల నిర్మాణాలకు భూసేకరణ చేపట్టాలని ఆయా కంపెనీలు భావించాయి. ఈ క్రమంలో పరిటాల కుటుంబీకులను కలవగా...తాము అడిగినంత ఇస్తే అంతా తామే చూసుకుంటామని చెప్పినట్లు తెలుస్తోంది. ఇందుకు సదరు కంపెనీలు అంగీకరించడంతో రామగిరి మండలంలో సోలార్‌ విద్యుత్‌ టవర్ల నిర్మాణ పనులు ఊపందుకున్నాయి. పరిటాల తిప్పన్న ఆధ్వర్యంలో పనులు.. రాప్తాడు ఎమ్మెల్యే పరిటాల సునీత సమీప బంధువు పరిటాల తిప్పన్న టవర్ల నిర్మాణ పనులు కాంట్రాక్ట్‌ దక్కించుకున్నారు. ఒక్కో టవర్‌ నిర్మాణానికి కాంట్రాక్టర్‌ రూ.కోటికిపైగా అంచనాలు వేయగా, ఈ ప్రాంతంలోనే వంద టవర్లకుపైగా నిర్మించనున్నట్లు తెలుస్తోంది. అదేవిధంగా ఒక టవర్‌ కేబుల్‌వైర్‌తోపాటు నిర్మాణానికి మూడు ఎకరాల భూమి కావాల్సి ఉండగా, రామగిరి మండలంలో అధికారులు నామమాత్రంగా సర్వేలు చేసి కాంట్రాక్ట్‌ పనులు అప్పగించారని బాధిత రైతులు వాపోతున్నారు. కర్ణాటక రైతులకు భారీగా పరిహారం.. రామగిరికి సమీపంలోనే కర్ణాటక సరిహద్దు ఉంటుంది. రామగిరి మండలంలో టవర్లు నిర్మిస్తున్న కంపెనీలే అక్కడా రైతుల భూముల్లో సోలార్‌ టవర్లు నిర్మిస్తున్నాయి. కర్ణాటక రైతులకు ఒక్కో టవర్‌ నిర్మాణానికి భూమి తీసుకున్నందుకు రూ.40 లక్షలు ఇస్తున్నాయి. అలాగే విద్యుత్‌ తీగలు పొలంలో ఎంత మేర వెళ్తే అంత మేర మీటర్‌కు రూ.30 వేల చొప్పున సపరేట్‌గా డబ్బులు ఇస్తున్నారు. కానీ రామగిరి మండలంలో ఇలాంటి ఒప్పందాలేమీలేవు. తమకు జరుగుతున్న అన్యాయంపై ఎవరిని కలవాలో, ఎవరికి తెలపాలో కూడా తెలియడం లేదని బాధిత రైతులు వాపోతున్నారు. ప్రస్తుతం రామగిరి మండలంలోని రైతుకు సమాచారం ఇవ్వకుండానే వారి భూముల్లో యంత్రాల సాయంతో పెద్దపెద్ద గుంతలు తవ్వి కరెంట్‌ స్తంభాలు వేసేందుకు సిద్ధపడుతున్నారు. తమకు న్యాయం జరగకపోతే అందరం కలిసి కలెక్టరేట్‌ ఎదుట ధర్నాకు దిగుతామని ఆయా గ్రామాల రైతులు చెబుతున్నారు. అరకొర ఇచ్చేందుకు ప్లాన్‌.. ఇప్పటికే సోలార్‌ టవర్ల నిర్మాణాలు చేపట్టిన పరిటాల కుటుంబం... విషయం పెద్దదైతే రైతులకు అరకొర ఇవ్వాలని నిర్ణయించినట్లు తెలుస్తోంది. ఈ క్రమంలోనే ‘‘ఇక్కడేం పండుతుంది.. ఎకరం రూ.3 లక్షలు కూడా పలకదు.. టవర్‌ కోసం మహా అయితే 20 సెంట్లు తీసుకుంటారు. మీరడిగితే రూ.2 లక్షలకు మించి ఇవ్వరు. మా ద్వారా వెళితే..రూ.5 లక్షల వరకూ ఇప్పిస్తాం..అందరినీ తీసుకురా’’ అంటూ ఆయా గ్రామాల్లోని బాధిత రైతులకు తమ అనుచరుల ద్వారా చెప్పిస్తున్నారు. రామగిరి మండలంలో సోలార్‌ విద్యుత్‌ టవర్ల నిర్మాణం రైతులకు తెలియకుండానే భూముల్లో నిర్మాణ పనులు ప్రశ్నించిన రైతులపై పరిటాల బంధువుల దౌర్జన్యం ఎవరికి చెప్పుకోవాలో దిక్కుతోచని స్థితిలో రైతులు రూ.వందలకోట్ల ప్రాజెక్ట్‌కు అన్నీ తామై వ్యవహరిస్తున్న ‘పరిటాల’ నోరెత్తితే తంతారయ్యా కర్ణాటకలో ఒక్కో టవర్‌ నిర్మాణానికి రూ.40 లక్షలు ఇస్తున్నారు. ఇక్కడేమో మాకు కనీసం సమాచారం ఇవ్వలేదు. మా పొలంలో టవర్‌ నిర్మించడంతో పాటు లైను లాగుతున్నారు. దీంతో పంటలు పెట్టుకోలేం. ఆ భూములను ఎవరూ కొనరు. ఏం చేయాలయ్యా. మేమూ టీడీపీ వాళ్లమే. మా ప్రభుత్వంలోనే మాకు ఇంత అన్యాయం జరుగుతోంది. ఏమైనా అడిగితే పరిటాల బంధువులు తంతారయ్యా. ఏం చేస్తాం..మా ఖర్మ ఇలా ఉంది. – పేరు చెప్పేందుకు భయపడుతున్న దుబ్బార్లపల్లికి చెందిన రైతు ఆవేదన ఇది గ్రామసభల ఊసేలేదు.. కంపెనీల ఏర్పాటు, అభివృద్ధి పనులు, ఇతరత్రా పనులకైనా రైతుల భూములు సేకరించాలంటే ముందుగా గ్రామ సభ ఏర్పాటు చేయాల్సి ఉంటుంది. ఆ ప్రాంతంలో ఎలాంటి పనులు చేపడతున్నారో రైతులకు వివరించాల్సి ఉంటుంది. అనంతరం రైతులు, అధికారుల సమక్షంలోనే పరిహారం గురించి చర్చించాల్సి ఉంటుంది. రైతులంతా ఒప్పుకుంటేనే అగ్రిమెంట్‌ చేసుకుని వారి పొలాల్లో పనులు చేపట్టాలి. కానీ రామగిరి మండలంలోని రైతులకు అలాంటి అవకాశమే లేకుండా పోయింది. సోలార్‌ విద్యుత్‌ టవర్ల నిర్మాణం చేపట్టిన కంపెనీలతో ‘పరిటాల’ కుటుంబమే పెద్దమొత్తంలో డబ్బులు తీసుకున్నట్లు విమర్శలున్నాయి. దీంతో వారు గ్రామసభల ఏర్పాటు ఇతరత్రా వ్యవహారాల జోలికి వెళ్లలేదు. అటు కంపెనీ నుంచి భారీగా డిమాండ్‌ చేస్తున్న పరిటాల కుటుంబీకులు రైతులకు మాత్రం సమాచారం లేకుండానే పనులు ప్రారంభించడం గమనార్హం. దుబ్బార్లపల్లిలో నాలుగు టవర్లు ఏర్పాటవుతుండగా..భూనిర్వాసితులంతా టీడీపీ నాయకులే. కానీ మట్టినమూనాల కోసం గుంతలు తీస్తున్నామని చెప్పి...ఇప్పుడు ఏకంగా టవర్ల ఏర్పాటు కోసం గుంతలు తవ్వుకున్నారు. చిన్నకొండాపురం, పెద్ద కొండాపురం, రెడ్డివారిపల్లిలో తమకు ఇష్టంలేదని రైతులు అభ్యంతరం తెలుపుతున్నా పట్టించుకునే వారే లేరు. రామగిరి మండలం దుబ్బార్లపల్లిలోని ఓ రైతు పొలంలో సోలార్‌ విద్యుత్‌ టవర్‌ నిర్మాణం కోసం జరుగుతున్న పనులివి. రైతుకు తెలియకుండానే పొలంలో భారీగా గుంతలు తవ్వుతున్నారు. గ్రామ సభ నిర్వహించకుండా...పరిహారం తేల్చకుండానే పనులు ప్రారంభించడంతో రైతులు లబోదిబోమంటున్నారు. రామగిరి మండలంలోని దుబ్బార్లపల్లి, ముత్యాలంపల్లి, మక్కినవారిపల్లి, చిన్నకొండాపురం, పెద్ద కొండాపురం, రెడ్డివారిపల్లి గ్రామాల్లోని రైతుల పొలాల్లో దాదాపు వంద సోలార్‌ విద్యుత్‌ టవర్ల నిర్మాణానికి ఆయా కంపెనీలు సిద్ధం కాగా, వ్యవహారమంతా పరిటాల కుటుంబీకుల కనుసన్నల్లో సాగుతోంది. దీంతో నోరు మెదపలేని రైతులు కన్నీరుమున్నీరవుతున్నారు.

● అందరూ మట్టి వినాయక ప్రతిమలే ప్రతిష్ఠించాలి ● కలెక్టర్‌ శ్యాం ప్రసాద్‌ పిలుపు ప్రశాంతి నిలయం: జిల్లా ప్రజలందరూ పర్యావరణ పరిరక్షణ కోసం పాటుపడాలని, సహజ రంగులలో చేసిన మట్టి ప్రతిమలతో పర్యావరణ అనుకూల వినాయక చవితి జరుపుకోవాలని కలెక్టర్‌ శ్యాం ప్రసాద్‌ పిలుపునిచ్చారు. శనివారం సాయంత్రం కలెక్టరేట్‌ ఆవరణలో ఆంధ్రప్రదేశ్‌ కాలుష్య నియంత్రణ మండలి ఆధ్వర్యంలో పర్యావరణ అనుకూల వినాయక చవితి ఉత్సవాలపై అవగాహన కార్యక్రమం నిర్వహించారు. ఈ కార్యక్రమంలో పాల్గొన్న కలెక్టర్‌ శ్యాం ప్రసాద్‌ మట్టి వినాయక ప్రతిమలను ప్రజలకు బహూకరించారు. ఈ సందర్భంగా మాట్లాడుతూ, వినాయక చవితి విశిష్టతను కాపాడేందుకు అందరూ కృషి చేయాలన్నారు. చెరువులు, జలవనరులకు నష్టం కలిగించే ప్లాస్టర్‌ ఆఫ్‌ ప్యారిస్‌ విగ్రహాల వాడకాన్ని నిషేధించాలన్నారు. కార్యక్రమంలో ఏపీ కాలుష్య నియంత్రణ మండలి, పర్యావరణ ఇంజినీర్‌ శశికళ, డీఆర్‌డీఏ పీడీ నరసయ్య తదితరులు పాల్గొన్నారు. ‘పోషణ్‌ మాహ్‌’ విజయవంతం చేయండి జిల్లా వ్యాప్తంగా జరుగుతున్న ‘పోషణ్‌ మాహ్‌–2026’ వేడుకల్లో ప్రతి ఒక్కరూ భాగస్వాములై విజయవంతం చేయాలని కలెక్టర్‌ శ్యాం ప్రసాద్‌ శనివారం ఓ ప్రకటనలో పిలుపునిచ్చారు. సెప్టెంబర్‌ 9 నుంచి అక్టోబర్‌ 8వ తేదీ వరకు ఐసీడీఎస్‌ ఆధ్వర్యంలో వేడుకలు నిర్వహిస్తున్నట్లు తెలిపారు. ఆరోగ్యకరమైన ఎదుగుదలకు ప్రోటీన్లతో కూడిన ఆహారం ఎంతో అవసరమన్నారు. ప్రతి ఒక్కరూ తగినంత ప్రోటీన్‌ను ఆహారంలో తీసుకోవాలని సూచించారు. వినియోగదారుల హక్కుల పరిరక్షణే ధ్యేయం పుట్టపర్తి టౌన్‌: వస్తువుల కొనుగోలు నుంచి ఆన్‌లైన్‌ సేవల వరకు వినియోగదారులకు సంపూర్ణ అవగాహన కల్పిస్తూ వారి హక్కుల పరిరక్షణే ధ్యేయంగా ప్రభుత్వం పనిచేస్తోందని జాయింట్‌ కలెక్టర్‌ మౌర్య భరద్వాజ్‌ అన్నారు. స్థానిక సాయిఆరామంలో ఆంధ్రప్రదేశ్‌ వినియోగదారుల సంఘాల సమాఖ్య (క్యాప్‌కో), జాతీయ వినియోగదారుల సమన్వయ మండలి (సీసీసీ) ఆధ్వర్యంలో చైర్మన్‌ సురేష్‌ కుమార్‌ అధ్యక్షతన 16వ జాతీయ వినియోగదారుల అవగాహన సదస్సు నిర్వహించారు. ఈ సందర్భంగా పది రాష్ట్రాల నుంచి విచ్చేసిన జాతీయ వినియోగదారుల సమన్వయ మండలి ప్రతినిధులు జాతీయ స్థాయిలో వినియోగదారుల ఉద్యమాలను బలోపేతం చేయడంపై చర్చించారు. అనంతరం జేసీ మౌర్య భరద్వాజ్‌ మాట్లాడుతూ... జిల్లాలో వినియోగదారులకు మెరుగైన సేవలు అందేలా చర్యలు తీసుకుంటామని, వినియోగదారుల హక్కులు, బాధ్యతలపై కార్యక్రమాలు నిర్వహిస్తామన్నారు. సమావేశంలో సీసీసీ చైర్మన్‌ అభిషేక్‌ శ్రీవాత్సవ్‌, బ్యూరోఆఫ్‌ ఇండియన్‌ స్టాండర్స్‌ డైరెక్టర్‌ ప్రేమసంజనీ పట్నాలా, ప్రొఫెసర్‌ అనిల్‌ జవహరి, క్యాప్‌కో చైర్మన్‌ నాగేశ్వరరావు, వ్యవస్థాపకులు కృష్ణారెడ్డి, హైకోర్టు అడ్వకేట్‌ సునీల్‌ పాల్గొన్నారు. 9,913 కేసులు పరిష్కారం అనంతపురం: ఉమ్మడి జిల్లా వ్యాప్తంగా శనివారం నిర్వహించిన జాతీయ లోక్‌ అదాలత్‌లో మొత్తం 9,913 కేసులు పరిష్కారం అయ్యాయి. ఈ కేసుల్లో ఏకంగా రికార్డు స్థాయిలో రూ.10.49 కోట్ల పరిహారం మంజూరు చేశారు. జిల్లా న్యాయ సేవాధికార సంస్థ చైర్మన్‌, ఉమ్మడి జిల్లా ప్రధాన న్యాయమూర్తి భీమారావు అధ్యక్షతన జరిగిన జాతీయ లోక్‌ అదాలత్‌లో అత్యధిక స్థాయిలో పరిహారం కల్పించి సరికొత్త రికార్డు సృష్టించారు. ఈ సందర్భంగా ఆయన మాట్లాడుతూ ‘రాజీమార్గమే రాజమార్గం‘ అని స్పష్టం చేశారు. అనంతరం జిల్లా న్యాయ సేవాధికార సంస్థ కార్యదర్శి ఎన్‌.రాజశేఖర్‌ మాట్లాడారు.

పావగడ: ఓ వృద్ధురాలు సజీవ దహనమైన ఘటన తాలూకాలోని కేటీ హళ్లి గ్రామంలో జరిగింది. కేటీ హళ్లిలో వృద్ధురాలు సణ్ణ లక్ష్మమ్మ (67) గుడిసెలో నివాసముంటోంది. గురువారం అర్ధరాత్రి అగ్రి ప్రమాదం చోటుచేసుకుని గుడిసె దగ్ధమైంది. ఇంట్లో నిద్రిస్తున్న సణ్ణ లక్ష్మమ్మ మంటల్లో చిక్కుకుపోయి సజీవ దహనమైంది. ఘటనా స్థలానికి చేరుకున్న అగ్ని మాపక దళం మంటలను ఆర్పి గుడిసెలో పరిశీలించగా వృద్ధురాలి శరీరం పూర్తిగా కాలి పోయి గుర్తు పట్టలేని విధంగా మారిపోయింది. సంఘటనపై అరసికెరె పోలీసులు కేసు నమోదు చేసుకుని దర్యాప్తు ప్రారంభించారు. విద్యుత్‌ శాఖ జేఈ అదృశ్యం కొలిమిగుండ్ల: మండల కేంద్రంలోని విద్యుత్‌ శాఖ కార్యాలయంలో పని చేసే జేఈ (సబ్‌ ఇంజినీర్‌) చింత లక్ష్మణస్వామి అదృశ్యమైనట్లు సీఐ రమేష్‌బాబు శనివారం తెలిపారు. ఆయన స్వస్థలం శ్రీసత్యసాయి జిల్లా ధర్మవరం కాగా 14 ఏళ్ల నుంచి జేఈగా విధులు నిర్వహిస్తూ కుటుంబ సభ్యులతో కలిసి కొలిమిగుండ్లలోనే నివాసం ఉంటున్నారు. ఈ నెల 8వ తేదీ రాత్రి కారు తీసుకుని ప్రమోషన్‌ ఉందని సంబంధిత పత్రాలు తిరుపతిలో సమర్పించాలని ఇంటి నుంచి వెళ్లిపోయాడు. మరుసటి రోజు నుంచి అతని ఫోన్‌ స్విచాఫ్‌ వస్తుంది. కుటుంబ సభ్యులు పలు సార్లు ఫోన్‌ చేసినా స్పందన లేదు. బంధువులు, తెలిసిన వాళ్లకు ఫోన్‌లు చేసి ఆరా తీశారు. ఆచూకీ లభించక పోవడంతో చివరకు లక్ష్మణస్వామి భార్య లీలావతి పోలీస్‌ స్టేషన్‌లో ఫిర్యాదు చేయడంతో మిస్సింగ్‌ కేసు నమోదు చేసినట్లు సీఐ పేర్కొన్నారు. బేకరీ నిర్వాహకుడిపై కత్తితో దాడి ఎన్‌పీకుంట: మండల కేంద్రంలో సాయిబాబా బేకరీ నిర్వాహకుడు లోకేశ్వరరెడ్డిపై అతని సడ్డుకుడు రామాంజులురెడ్డి కత్తితో దాడి చేసి తీవ్రంగా గాయపరిచిన ఘటన శనివారం రాత్రి చోటుచేసుకుంది. బాధితుడు తెలిపిన మేరకు.. అన్నమయ్య జిల్లా గాలివీడు మండలం వడిశలంకపల్లికి చెందిన లోకేశ్వరరెడ్డి సడ్డుకుడు రామాంజులురెడ్డి గతంలో ఆర్మీలో విధులు నిర్వర్తించి పదవీ విరమణ పొందాడు. కొంత కాలంగా భార్య సుజాతపై అనుమానంతో వేధింపులకు గురిచేస్తుండటంతో లోకేశ్వరరెడ్డి పలుమార్లు అతనికి నచ్చజెప్పినా ప్రవర్తనలో మార్పు రాలేదు. వేధింపులు భరించలేక అతని భార్య ‘నేను ఇక్కడ ఉండలేను, నన్ను, నా పిల్లలను తీసుకువెళ్లండి’ అని లోకేశ్వరరెడ్డి భార్య హరితకు ఫోన్‌ చేసి చెప్పింది. దీంతో ఆరు నెలల కిత్రం ఆమెను హైదరాబాద్‌లో తమకు తెలిసిన వారి ఇంట్లో పెట్టాడు. భార్య తన నుంచి వెళ్లిపోవడానికి లోకేశ్వరరెడ్డి కారణమని రామాంజులురెడ్డి అప్పటి నుంచి రోజూ గొడవకు దిగేవాడు. ఈ క్రమంలో శనివారం ఉదయం ఎన్‌పీ కుంటలోని బేకరీ వద్దకు వచ్చి గొడవ పడ్డాడు. ‘నేను ఆర్మీ ఉద్యోగి, నిన్ను పొడిచినా నన్ను ఎవరూ ఏమీ చేయలేరు’ అంటూ బెదిరించి వెళ్లాడు. మళ్లీ రాత్రి 8.30 గంటల సమయంలో బేకరీ వద్దకు వచ్చి వెంట తెచ్చుకున్న కత్తితో ఒక్కసారిగా లోకేశ్వరరెడ్డిపై దాడి చేశాడు. గమనించిన స్థానికులు వెంటనే అతడిని స్థానిక ప్రాథమిక ఆరోగ్య కేంద్రానికి తరలించారు. ఎస్‌ఐ క్రిష్ణమూర్తి పీహెచ్‌సీలో చికిత్స పొందుతున్న లోకేశ్వరరెడ్డితో వివరాలను అడిగి తెలుసుకున్నారు. ఫిర్యాదు మేరకు కేసు నమోదు చేసుకుని దర్యాప్తు చేపట్టారు. నిందితుడు రామాంజులురెడ్డిని పట్టుకుని పోలీస్‌స్టేషన్‌కు తరలించారు. మద్యం షాపుల రెన్యూవల్‌కు దరఖాస్తులు పుట్టపర్తి టౌన్‌: జిల్లా వ్యాప్తంగా ఓపెన్‌, రిజర్వ్‌ కేటగిరీ కింద ప్రభుత్వం మంజూరు చేసిన 78 మద్యం షాపుల నిర్వాహకులు ఈ నెల 21లోపు రెన్యూవల్‌కు దరఖాస్తు చేసుకోవాలని జిల్లా ప్రొహిబిషన్‌, ఎకై ్సజ్‌ అధికారి నరశింహులు తెలిపారు. ఈ మేరకు శనివారం ఒక ప్రకటన విడుదల చేశారు. ఆన్‌లైన్‌, హైబ్రిడ్‌ పద్ధతుల్లో దరఖాస్తు చేసుకోవచ్చునన్నారు. 2025–26 సంవత్సరం ఫీజులో 38 శాతం ఒకే సారి చెల్లించాలన్నారు. 50 వేల లోపు జనాభా ఉన్న మద్యం షాపులకు రూ. 6,05,000.. 50 వేల కంటే ఎక్కువ జనాభా ఉన్న మద్యం షాపులకు రూ.71,50,000.. 5 లక్షల జనాభా కంటే ఎక్కువ ఉన్న మద్యం షాపులకు రూ.93,50,000 ఒకే విడతలో లేదా నాలుగు విడతల్లో గానీ చెల్లించాలన్నారు. రెన్యూవల్‌కు వచ్చే లైసెన్స్‌దారుడు ప్రాసెసింగ్‌ ఫీజు రూ.5,000 డీడీ రూపంలో తీసుకురావాలన్నారు. మరిన్ని వివరాలకు పుట్టపర్తి పట్టణ సమీపంలో ఉజ్వలా ఫౌండేషన్‌ ఆవరణంలో ఉన్న జిల్లా ప్రొహిబిషన్‌, ఎకై ్సజ్‌ కార్యాలయంలో సంప్రదించాలని సూచించారు.

● శ్రీరామరెడ్డి కార్మికుల ఆకలికేకలు అనంతపురం న్యూ టౌన్‌: ‘ఆర్‌డబ్ల్యూఎస్‌ అధికారు లు, శ్రీరామరెడ్డి తాగునీటి ప్రాజెక్టు కాంట్రాక్టర్లు మీకు జీవితాలు ఇవ్వకపోతే.. మా సొంత నిధుల నుంచి మీ కు వేతనాలు చెల్లించి ఆదుకుంటాం.. తక్షణమే సమ్మె విరమించి విధుల్లో చేరండి.. ప్రజల దాహం తీర్చండి..’ అంటూ కార్మికులకు టీడీపీ ఎమ్మెల్యేలు ఇచ్చిన హామీ ‘నీటి మూటలు’గా నిలిచిపోయింది. సమ్మె విరమించిన తర్వాత జీతాల గురించి ప్రశ్నించిన సుమారు 30 మందిని విధుల నుంచి తొలగించారు. అవస్థలు వర్ణనాతీతం నీలకంఠాపురం శ్రీరామరెడ్డి వాటర్‌ సప్లై స్కీం ద్వారా ఉమ్మడి అనంతపురం జిల్లాలోని పీఏబీఆర్‌, కళ్యాణదుర్గం, రాయదుర్గం, బెళుగుప్ప, పరిగి, హిందూపురం, మడకశిర డివిజన్‌లో 900 పైగా గ్రామాలకు తాగునీరు అందిస్తున్నారు. కరోనా సందర్భంలో కూడా తాగునీరు నిరంతరంగా అందించిన ఘనత కార్మికులదే.. ఈ స్కీం లో పనిచేస్తున్న కార్మికులకు మాత్రం సకాలంలో అందని వేతనాలు, నెలల తరబడి జమ కాని ప్రావిడెంట్‌ ఫండ్‌ నిధుల సమస్యలతో సతమతమవుతున్నారు. ఈ స్కీంలో పనిచేస్తున్న కార్మికులకు కుటుంబ పోషణ భారమైంది. లైన్‌పై పని చేసే లైన్‌మెన్లు, ఫిట్టర్లు, పంప్‌ ఆపరేటర్లు, హెల్పర్లు తదితర కార్మికులకు బండిపై వెళ్లేందుకు పెట్రోలుకు కూడా డబ్బులేక అప్పులు చేస్తున్నారు. పిల్లల చదువులు, కుటుంబ పోషణకు పడరానిపాట్లు పడుతున్నారు. పె(గ)ద్దలదే రాజ్యం ఉమ్మడి అనంతపురం జిల్లాలలో 18 ఏళ్ల క్రితం నెలకొల్పిన నీలకంఠాపురం శ్రీరామరెడ్డి వాటర్‌ సప్లై స్కీం పరిశుభ్రమైన తాగునీరు 10 లక్షల మంది ప్రజలకు అందించాలన్న లక్ష్యంతో ఏర్పడింది. ఈ స్కీమును కాలక్రమేణా రాజకీయ పె(గ)ద్దల ప్రమేయంతో భాగాలుగా విడగొట్టారు. కార్మికులు జీతాలు అడిగితే కొత్త అగ్రిమెంటు జరగలేదు. అందువల్ల తాము జీతాలు ఇవ్వలేక పోతున్నామంటూ చెబుతున్నారు. ఆర్‌డబ్ల్యూఎస్‌ అధికారులు మాత్రం ప్రభుత్వం నుంచి నిధులు రానందున కార్మికులకు బకాయిలు ఇవ్వలేమని చెబుతున్నారు. అందువల్ల నీలకంఠాపురం శ్రీరామరెడ్డి తాగునీటి పథకంలో పనిచేస్తున్న కార్మికులు తమ డిమాండ్ల సాధనకై సమ్మెలోకి వెళ్తున్నందున తాగునీటి సరఫరా నిలిపి వేస్తున్నట్లు సమ్మె నోటీసులివ్వడం.. వారిని అటు కాంట్రాక్టర్లు.. ఇటు ఆర్‌డబ్ల్యూఎస్‌ అధికారులు నయానో భయానో దారిలోకి తెచ్చుకొని ‘నీటి మూట’ లాంటి హామీలు ఇవ్వడం.. కార్మికులను తిరిగి ప్రాజెక్టులో పనిచేసేలా దారికి తెచ్చుకోవడం పరిపాటి అయిపోయింది. పండగ పూటా పస్తులే శ్రీరామరెడ్డి తాగునీటి సరఫరా పథకంలో పనిచేసే కార్మికులు వినాయక చవితి పండుగ పూట కూడా జీతాలందక పస్తులతోనే సహ జీవనం చేయాల్సిన దుర్భర పరిస్థితులు నెలకొన్నాయి. మడకశిర, కళ్యాణదుర్గం, రాయదుర్గం ప్రాంతాలలో ప్రశ్నించిన పాపానికి జీవనోపాధి కోల్పోయి రోడ్డున పడిన కార్మికుల పరిస్థితి దయనీయంగా మారింది. మడకశిర ప్రాంతంలో ప్రాజెక్టునే నమ్ముకుని బతుకుతున్న సుబ్బరాజు అనే కార్మికుడు గత జూలై నెలలో తినేందుకు పిడికెడు అన్నం లేక గుడిబండ మండలంలో ఓవర్‌హెడ్‌ ట్యాంక్‌ ఎక్కి కిందకు దూకి ప్రాణాలు తీసుకునేందుకు సిద్ధమయ్యాడు. అతని బాధను సెల్‌ఫోన్‌ ద్వారా విన్న ఆర్‌డబ్ల్యూఎస్‌ ఎస్‌ఈ శ్రీనివాసులు ‘తక్షణమే మీ కుటుంబాన్ని ఆదుకుంటాం. ఆత్మహత్యకు పాల్పడవద్దు’ అంటూ ఇచ్చిన హామీ సైతం నెరవేరలేదు.

హిందూపురం టౌన్‌: పట్టణంలోని జిల్లా ప్రభుత్వ ఆస్పత్రిలో ఆవరణలోని ఎంసీహెచ్‌ భవనంపై నూతనంగా నిర్మించిన క్రిటికల్‌ కేర్‌ బ్లాక్‌ను శనివారం ప్రారంభించారు. విజయవాడ నుంచి కేంద్ర వైద్య ఆరోగ్యశాఖ మంత్రి జగదీష్‌ ప్రసాద్‌ నడ్డా, ముఖ్యమంత్రి చంద్రబాబు నాయుడు, వైద్య, ఆరోగ్య శాఖమంత్రి సత్యప్రసాద్‌ వర్చువల్‌గా ప్రారంభించారు. ఈ సందర్భంగా ఆస్పత్రిలో ఏర్పాటు చేసిన పూజా కార్యక్రమంలో ఎంపీ బీకే పార్థసారథి, జాయింట్‌ కలెక్టర్‌ మౌర్య భరద్వాజ్‌, పెనుకొండ ఆర్డీఓ ఆనంద్‌, డీఎంహెచ్‌ఓ డాక్టర్‌ ఫైరోజాబేగం, డీసీహెచ్‌ఎస్‌ డాక్టర్‌ శ్రీకాంతి, ప్రభుత్వాసుపత్రి సూపరింటెండెంట్‌ డాక్టర్‌ ఆఫ్తాబ్‌ పాల్గొన్నారు. ఈ క్రిటికల్‌ కేర్‌ యూనిట్‌ ద్వారా అత్యవసర వైద్య సేవలు స్థానికంగా అందుబాటులోకి వస్తాయన్నారు. దీనివల్ల ప్రాణాపాయ స్థితిలో ఉన్న రోగులకు, గుండె సంబంధిత, శ్వాసకోస సమస్యలకు రోడ్డు ప్రమాద బాధితులకు తక్షణమే అత్యుత్తమ వైద్యసేవలు అందించే వీలుంటుందన్నారు. పరికరాలు, సిబ్బంది ఎక్కడ..? ఎంతో ఆర్భాటంగా కూటమి ప్రభుత్వం ప్రారంభించిన క్రిటికల్‌ కేర్‌ యూనిట్‌కు కావాల్సిన పరికరాలు, డాక్టర్లు, సిబ్బంది మాత్రం నియమించలేదు. కేవలం భవనాన్ని మాత్రమే ప్రారంభించడం పట్ల విమర్శలు వ్యక్తమవుతున్నాయి. వైఎస్సార్‌సీపీ ప్రభుత్వ హయాంలో 2024 ఫిబ్రవరి 25న శంకుస్థాపన చేసిన క్రిటికల్‌కేర్‌ యూనిట్‌ భవనాన్ని మాత్రం ఇప్పటికి పూర్తి చేశారని, పరికరాలు, సిబ్బందిని నియమించి పూర్తి స్థాయిలో క్రిటికల్‌ కేర్‌ యూనిట్‌ను ఇంకెప్పుడు అందుబాటులోకి తీసుకువస్తారని స్థానికులు ప్రశ్నిస్తున్నారు. వర్చువల్‌గా ప్రారంభించిన కేంద్రమంత్రి

సాక్షి, పుట్టపర్తి పుట్టపర్తికి తాగునీటి అందించేందుకు చేపట్టిన ‘నాన్‌ అమృత్‌ స్కీం’కు సంబంధించిన భారీ పైపులను కాంట్రాక్టర్లు పుట్టపర్తి శివారున ఉంచారు. చంద్రబాబు ప్రభుత్వం అధికారంలోకి రాగానే ఎమ్మెల్యే సింధూరారెడ్డి హడావుడిగా పనులు ప్రారంభించారు.. ఆ తర్వాత వాటి గురించి మరచిపోయారు. దీంతో రూ.కోట్లు విలువ చేసే పైపులపై ‘తెలుగు తమ్ముళ్ల’ కన్ను పడింది. రాత్రికి రాత్రే భారీ యంత్రాల సాయంతో మాయం చేసినట్లు తెలిసింది. అయితే మరుసటి రోజే సదరు కాంట్రాక్టర్‌ పుట్టపర్తి రూరల్‌ పోలీసులకు సమాచారం ఇచ్చారు. అందులో కొందరి పేర్లు కూడా పేర్కొన్నట్లు సమాచారం. అయితే ఎవరి పేర్లు ఉన్నాయనే విషయంపై పోలీసులు గోప్యంగా ఉంచారు. యజమాని ఫిర్యాదు చేస్తే విచారణ చేసి కేసు నమోదు చేస్తామని చెబుతున్నారు. ఇప్పటి వరకు కేసు లేకపోవడంపై భారీ చర్చ నడుస్తోంది. ‘తెలుగు తమ్ముళ్లే’ దొంగలు.. పుట్టపర్తి పట్టణానికి చెందిన ఇద్దరు.. బుక్కపట్నం మండలానికి చెందిన మరో తెలుగు తమ్ముడి కనుసన్నల్లోనే పైపుల చోరీ జరిగినట్లు సమాచారం. అంతేకాకుండా అంతటి భారీ పైపులు ఎత్తుకెళ్లాలంటే క్రెయిన్‌ తప్పనిసరి. అంతేకాకుండా ఓ పెద్ద గూడ్స్‌ వాహనం అవసరం. ముగ్గురు తెలుగు తమ్ముళ్ల తోడుగా ఇద్దరు డ్రైవర్లు.. పైపులు కొనే వ్యక్తి.. కలిపి మొత్తంగా పది మంది పైపుల చోరీలో కీలక పాత్ర పోషించినట్లు తెలుస్తోంది. ముఖ్య పాత్రదారులంతా టీడీపీ కార్యకర్తలు కావడంతోనే.. సమస్య బయటికి రాకుండా కప్పిపెట్టినట్లు తెలుస్తోంది. దొంగలెవరన్న విషయం ఊరంతా కోడై కూస్తున్నా...ఈ విషయం పోలీసులకూ తెలిసినా.. పట్టించుకోలేని పరిస్థితి. ‘ఫలానా వ్యక్తి దొంగ’ అని జనమే బహిరంగంగా చర్చించుకుంటున్నా.. ఏమీ చేయలేని స్థితిలో పోలీస్‌ వ్యవస్థ ఉంది. బైండోవర్లు.. ఉల్లంఘనలు.. ట్రాఫిక్‌ ఆంక్షలతో పాటు టీడీపీ నాయకులు చెప్పినట్లు వింటూ అక్రమ కేసులు బనాయించడానికేనా పోలీసులు అంటూ సామాజిక మాధ్యమాల్లో చర్చ నడుస్తోంది. సీసీ కెమెరాలు చూసినా... పుట్టపర్తి శివారు నుంచి ఎటు వైపు వెళ్లినా.. కిలోమీటరు దూరంలో సీసీటీవీ కెమెరాలు ఉన్నాయి. భారీ పైపులతో వెళ్లే వాహనాన్ని పసిగట్టడం గంటల వ్యవధిలో పూర్తయ్యే పని. అయితే సీసీటీవీ ఫుటేజీల గురించి నేటికీ పోలీసులు పట్టించుకోలేదు. మాజీ మంత్రి ‘పల్లె’ జోక్యంతో పోలీసులు కేసును పట్టిచుకోలేదని పట్టణ ప్రజలు భావిస్తున్నారు. అంతిమంగా కోటి విలువైన పైపులను దర్జాగా దొంగలించి వాటిని అమ్ముకుని తలా కొంచెం వాటాలు పంచుకున్నట్లు తెలుస్తోంది. ఇందులో పోలీసులకూ వాటా ఉందని అందుకే పైపుల చోరీపై కేసు కూడా కట్టకుండా తాత్సారం చేస్తున్నారని జనం చర్చించుకుంటున్నారు. భారీ చోరీ.. రూ.కోట్లు విలువ చేసే తాగునీటి పైపులు మాయం. ఊరంతా తెలిసింది. పోలీసులకూ ఫిర్యాదు వెళ్లింది. కానీ రెండు వారాలు గడుస్తున్నా కేసు నమోదు లేదు. యజమాని నుంచి ఫిర్యాదు అందలేదని పోలీసులు చెబుతుండగా.. దొంగలు ‘తెలుగు తమ్ముళ్లు’ కావడంతో కేసు నీరుగారుతోందన్న చర్చ నడుస్తోంది. మాజీ మంత్రి ‘పల్లె’ జోక్యం చేసుకోవడంతో దొంగలను పట్టుకోవడంలో పోలీసులు తాత్సారం చేస్తున్నట్లు తెలిసింది. దొంగ ‘తమ్ముళ్లకు’ ‘పల్లె’ దన్ను! ఊరంతా తెలిసిన దొంగలు ఖాకీలకు తెలియదంట రెండు వారాలైనా కేసు కూడా నమోదు చేయని వైనం గట్టిగా అడిగితే ఫిర్యాదే రాలేదంటున్న పోలీసులు ‘పల్లె’ దుప్పటి పంచాయితీతో అందరూ మౌనం రూ.కోటి విలువ చేసే తాగునీటి పైపుల చోరీ కథ కంచికి

అగళి: మండల కేంద్రంలోని జాతీయ రహదారి 544 రోడ్డు కూడలి వద్ద శనివారం జరిగిన రోడ్డు ప్రమాదంలో ఓ వ్యక్తి దుర్మరణం చెందాడు. స్థానికులు, పోలీసులు తెలిపిన మేరకు.. గుడిబండ మండలం సింగేపల్లికి చెందిన రంగప్ప (45) కుమార్తె మౌనిక అగళి కస్తూరిబా గాంధీ పాఠశాలలో ఇంటర్‌ రెండో సంవత్సరం చదువుతోంది. పండుగ నేపథ్యంలో పాఠశాలకు మూడు రోజులు సెలవులు రావడంతో కుమార్తెను స్వగ్రామానికి తీసుకెళ్లేందుకు రంగప్ప బైకుపై వచ్చాడు. పాఠశాల నుంచి తండ్రి, కుమార్తె ఇద్దరూ తిరిగి వెళ్తుండగా, మార్గమధ్యంలో మాదుడి రోడ్డు వద్ద రొళ్ల నుంచి కంకర లోడుతో వెళ్తున్న టిప్పర్‌ లారీ బైకును ఢీకొంది. కింద పడిన రంగప్పపై టిప్పర్‌ టైర్లు ఎక్కడంతో తీవ్ర గాయాలై ఘటనాస్థలిలోనే ప్రాణాలు వదిలాడు. మౌనిక ఎగిరి పక్కకు పడిపోవడంతో స్వల్ప గాయాలతో బయటపడింది. స్థానికులు ఆమెను పీహెచ్‌సీకి తీసుకెళ్లి చికిత్సలందించారు. సమాచారం అందుకున్న అగళి పోలీసులు ఘటనా స్థలికి చేరుకుని పరిశీలించారు. ఈ మేరకు కేసు నమోదు చేసుకుని దర్యాప్తు ప్రారంభించారు. టిప్పర్‌ కింద నలిగిన ప్రాణం

పుట్టపర్తి టౌన్‌: జిల్లా అంతటా వినాయక చవితి సందడి కనిపిస్తోంది. జై బోలో గణేష్‌ మహరాజ్‌ కీ నినాదాలు వినిపిస్తున్నాయి. మంటపాల ఏర్పాటు, అలంకరణ తదితరాలకు సన్నాహాలు ఊపందుకున్నాయి. కమిటీల ఆధ్వర్యంలో పెద్ద ఎత్తున ఏర్పాట్లు జరుగుతున్నాయి. జిల్లాలో పలు చోట్ల రకరకాల ఆకృతుల్లో ఆకర్శణీయమైన విగ్రహాలను సిద్ధం చేశారు. రూ.1,000 నుంచి రూ.50 వేల విలువైన విగ్రహాలను కమిటీ సభ్యులు కొనుగోలు చేశారు. మట్టి గణపతితో మేలు.. ఉత్సవాలకు మట్టి వినాయకుని ప్రతిమలనే వాడాలని పర్యావరణ ప్రేమికులు కోరుతున్నారు. మట్టితో తయారు చేసిన విగ్రహాన్ని సహజ పద్ధతిలో నిమజ్జనం చేస్తే తిరిగి మట్టిలో కలిసిపోయే అవకాశం ఉంటుందని, తద్వారా పర్యావరణహిత సంప్రదాయాన్ని కొనసాగించాలని విజ్ఞప్తి చేస్తున్నారు. ప్లాస్టర్‌ ఆఫ్‌ పారిస్‌తో తయారు చేసే విగ్రహాలు నీటిలో కరగవని, నిమజ్జనం అనంతరం అవశేషాలు పేరుకుపోయి జల వనరుల సహజ స్వభావాన్ని దెబ్బ తీస్తాయంటున్నారు. నిబంధనలు తప్పనిసరి.. వినాయక విగ్రహాల ఏర్పాటుకు పోలీస్‌ శాఖ నుంచి అనుమతులు తప్పనిసరిగా పొందాలి. ఇందుకోసం పోలీసుస్టేషన్లకు రావాల్సిన అవసరం లేదని, ‘గణేష్‌ ఉత్సవ్‌’ వెబ్‌సైట్‌లో దరఖాస్తు చేసుకోవచ్చని చెబుతున్నారు. ప్రతిష్టించే విగ్రహం ఎత్తు, ప్రదేశం, నిమజ్జనం తేదీ తదితర వివరాలు పొందుపరచాల్సి ఉంటుంది. అన్ని శాఖల అధికారులు పరిశీలించిన తరువాత అనుమతులు మంజూరు చేస్తారు. మంటపాలకు ప్రత్యేకంగా క్యూఆర్‌ కోడ్‌ జారీ చేయనున్నారు. ● మంటపాలు ఏర్పాటు చేసే సమయంలో ప్రజలకు ఎటువంటి ఇబ్బందులు కలగకుండా జాగ్రత్తలు పాటించాలి. లౌడ్‌ స్పీకర్లు ఉదయం 8 నుంచి రాత్రి 10 గంటల వరకు పరిమితి శబ్దంతోనే ఉపయోగించాలి. మంటపాల వద్ద అగ్ని ప్రమాదాలకు ఆస్కారం లేకుండా ఏర్పాట్లు చేసుకోవాలి. క్యూ లైన్లు, పార్కింగ్‌ ప్రాంతాల్లో సీసీ కెమెరాలు ఏర్పాటు చేసుకోవడంతోపాటు 24 గంటలూ వలంటీర్లను అందుబాటులో ఉంచాలి. విగ్రహాల ఊరేగింపు సమయంలో ఇతరులను రెచ్చకొట్టేలా వ్యవహరించకూడదు. జిల్లా అంతటా వినాయక చవితి సందడి వాడవాడలా సిద్ధమవుతున్న మంటపాలు అనుమతులు తప్పనిసరి అంటున్న పోలీస్‌ శాఖ మట్టి గణపతులనే పూజిద్దామంటున్న పర్యావరణ ప్రేమికులు శాంతిభద్రతలకు విఘాతం కలిగిస్తే చర్యలు పండుగను ప్రశాంతమైన వాతావరణంలో జరుపుకోవాలి. మంటపాలకు అనుమతులు తీసుకోవాలి. అనుమతులు పొందిన తర్వాతనే విగ్రహాలు ఏర్పాటు చేసుకోవాలి. ఉత్సవాల ముసుగులో ఘర్షణలు, మత కలహాలు, అల్లర్లకు పాల్పడితే కఠిన చర్యలు తప్పవు. రాత్రి 10 గంటల వరకు మాత్రమే మైకులకు అనుమతి ఉంటుంది. మంటపాల సమీపంలో జూదం ఆడటం, మద్యం తాగడం, అశ్లీల నృత్యాలు వంటి కార్యకలాపాలకు పాల్పడితే కేసులు నమోదు చేస్తాం. బాణాసంచా కాల్చడానికి వీల్లేదు. ప్రతి మంటపం వద్ద క్యూఆర్‌ కోడ్‌ ప్రదర్శించాలి. ఎక్కడైనా అనుమానిత వ్యక్తులు కనిపిస్తే 112 నంబర్‌కు ఫోన్‌ చేసి పోలీసులకు సమాచారం ఇవ్వాలి. – సతీష్‌కుమార్‌, ఎస్పీ

ప్రశాంతి నిలయం: లోక కల్యాణార్థం అవతరించిన యుగావతారి సత్యసాయి అన్న సందేశాన్నిస్తూ భక్తులు నిర్వహించిన బుర్రకథా కాలక్షేపం ఆకట్టుకుంది. పర్తియాత్రలో భాగంగా తెలంగాణ రాష్ట్రానికి చెందిన సంగారెడ్డి జిల్లా సత్యసాయి భక్తులు పుట్టపర్తి ప్రశాంతి నిలయానికి చేరుకున్నారు. శనివారం ఉదయం వందలాది మంది భక్తులు సామూహికంగా సత్యసాయి చాలీసా పఠించారు. సాయంత్రం యుగావతార్‌ పేరుతో సత్యసాయి యువత బుర్రకథా కాలక్షేపం నిర్వహించారు. సత్యసాయి పుట్టుక, సేవా కార్యక్రమాలు, ఆధ్యాత్మిక బోధనలను వివరిస్తూ చక్కటి సందేశంతో సాగిన బుర్రకథతో భక్తులు మైమరచిపోయారు.

ముదిగుబ్బ: మండల కేంద్రంలోని శివ పంచాయతన దేవాలయంలో శనివారం అఖిల గాండ్ల సంక్షేమ సంఘం ఆధ్వర్యంలో ఎంబీబీఎస్‌ సీట్లు సాధించిన విద్యార్థులు, ఉత్తమ ఉపాధ్యాయ అవార్డు గ్రహీతను ఘనంగా సన్మానించారు. ఈ సందర్భంగా మేడాపురం గ్రామానికి చెందిన తుంపెర సందీప్‌ కుమార్‌, బీకే అశ్విత, బసంపల్లికి చెందిన వినీత్‌కుమార్‌, కూటాగుళ్లకు చెందిన హర్షవర్ధన్‌, పాముదుర్తికి చెందిన మహతిని సత్కరించారు. గోరంట్ల మండలం ఎగువ గంగంపల్లి పాఠశాలలో ఉపాధ్యాయుడిగా పనిచేస్తున్న రామచంద్రప్పను సన్మానించారు. కార్యక్రమానికి ముఖ్య అతిథులుగా అఖిల గాండ్ల సంక్షేమం సంఘం జిల్లా అధ్యక్షుడు సీవీ కృష్ణమూర్తి, ప్రధాన కార్యదర్శి గార్లదిన్నె మల్లికార్జున, కోశాధికారి పుట్టపర్తి నరసింహులు, జిల్లా ఉపాధ్యక్షుడు ముత్యాలు శ్రీనివాసులు హాజరయ్యారు.

పుట్టపర్తి: ‘‘అబద్ధాలతో వాళ్లు రెండేళ్లు గడిపేశారు. సంక్షేమ పథకాలు అందక జనం అల్లాడిపోతున్నారు. ఎన్నికల సమయంలో ఇచ్చిన ఒక్క హామీ కూడా పూర్తిగా అమలు చేయకుండా అన్ని వర్గాలనూ మోసం చేశారు. చివరకు సాగునీరులేక పంటలన్నీ ఎండిపోయి రైతులు అల్లాడిపోతున్నా...పట్టించుకునేవారే లేరు..ఈ అరాచక పాలనకు అంతం పలికి మళ్లీ జగనన్న రాజ్యం తెచ్చుకునేందుకు త్వరలో జరిగే స్థానిక సంస్థల ఎన్నికల్లో నాయకులు, కార్యకర్తలు సమష్టిగా సైనికుల్లా పని చేసి విజయఢంకా మోగించాలి’’ అంటూ పుట్టపర్తి మాజీ ఎమ్మెల్యే దుద్దుకుంట శ్రీధర్‌రెడ్డి, వైఎస్సార్‌ సీపీ హిందూపురం పార్లమెంట్‌ పరిశీలకుడు రమేష్‌రెడ్డి పిలుపునిచ్చారు. శుక్రవారం పుట్టపర్తిలోని వైఎస్సార్‌ సీపీ కార్యాలయంలో పార్టీ నియోజకవర్గ విస్తృత స్థాయి సమావేశం జరిగింది. పార్టీ రాష్ట్ర, జిల్లా స్థాయి నాయకులతో పాటు వివిధ అనుబంధ, విభాగాల అధ్యక్షులు, కార్యదర్శులు, మండల కన్వీనర్లు, ఎంపీపీలు, జెడ్పీటీసీలు, ఎంపీటీసీలు, మాజీ సర్పంచులు పెద్ద సంఖ్యలో నాయకులు, కార్యకర్తలు పాల్గొన్నారు. ఈ సందర్భంగా దుద్దుకుంట శ్రీధర్‌రెడ్డి మాట్లాడుతూ...గత వైఎస్సార్‌ సీపీ హయాంలో సీఎం జగన్‌మోహన్‌రెడ్డి అన్ని వర్గాల సంక్షేమం కోసం పాటుపడ్డారన్నారు. చంద్రబాబు ప్రభుత్వం అధికారంలోకి వచ్చిన మరుసటి రోజు నుంచి ప్రజలపై భారం మోపిందన్నారు. అలాగే ఎన్నికల వేళ ఇచ్చిన హామీలు అమలు చేయాలని కోరిన వైఎస్సార్‌సీపీ ముఖ్య నేతలు, మద్దతుదారులపై అక్రమ కేసులు, ఆస్తులు ధ్వంసం చేస్తూ రెడ్‌బుక్‌ రాజ్యాంగాన్ని అమలు చేస్తోందని దుద్దుకుంట శ్రీధర్‌రెడ్డి ధ్వజమెత్తారు. వైఎస్సార్‌సీపీ హయాంలోనే అభివృద్ధి.. వైఎస్సార్‌సీపీ ప్రభుత్వ హయాంలో పుట్టపర్తిని జిల్లా చేయటంతో పాటు వేలాది మందికి జగనన్న ఇళ్లు కట్టించామని, రెండు జాతీయ రహదారులు, ఒక గ్రీన్‌ఫీల్డు హైవే పనులు చేపట్టామన్నారు. వీటి వల్లే పరిశ్రమలు వస్తున్నాయన్నారు. దీంతో పాటు రూ.864 కోట్లతో నియోజకవర్గంలో 193 చెరువులు నింపే పనులకు శ్రీకారం చుట్టామన్నారు. వీటిని పూర్తి చేయటంలో ఎమ్మెల్యే పల్లె సింధూరరెడ్డి విఫలమయ్యారన్నారు. జూదరులను ప్రోత్సహించి ఆధ్యాత్మిక కేంద్రమైన పుట్టపర్తి ప్రతిష్టను మంట కలిపారని ఆవేదన వ్యక్తం చేశారు. పల్లె రఘునాథరెడ్డి ప్రోత్సాహంతో తెలుగు తమ్ముళ్లు ఇసుక అక్రమ రవాణా చేస్తూ నదుల రూపురేఖలు మార్చేశారన్నారు. చివరకు తాగునీటి పైపులు అమ్ముకొని దోపీడీ చేశారని ఆరోపించారు. 50 ఏళ్లకే పింఛన్‌ ఏమైంది బాబూ తమ ప్రభుత్వం అధికారంలోకి వస్తే ఎస్సీ, ఎస్టీ, బీసీ, మైనార్టీ వర్గాల్లోని వారికి 50 ఏళ్లకే పింఛన్‌ అందిస్తామని చంద్రబాబు హామీ ఇచ్చారని, ఆ కథ ఇప్పుడు కంచికి చేరిందని శ్రీధర్‌రెడ్డి అన్నారు. 60 ఏళ్ల వయస్సు ఉన్న వారికి సైతం నేటికీ పింఛన్‌ ఇవ్వలేదని విమర్శించారు. అలాగే పింఛన్లలోనూ భారీగా కోత పెట్టారన్నారు. ఇతర సంక్షేమ పథకాలు కూడా అర్హులకు రద్దు చేసి కేవలం తమ పార్టీ వారికే అందిస్తూ వేధిస్తున్నారని మండిపడ్డారు. మోసాల మాంత్రికుడు చంద్రబాబు చంద్రబాబు మోసాల మాంత్రికుడని వైఎస్సార్‌ సీపీ హిందూపురం పార్లమెంట్‌ పరిశీలకుడు రమేశ్‌రెడ్డి అన్నారు. అధికారం కోసం ఆయన ఎంతకై నా దిగజారుతారన్నారు. నమ్మిన వారిని దారుణంగా మోసం చేయటం చంద్రబాబుకు అలవాటన్నారు. అందుకే నమ్మి ఓటేసిన వారిని నట్టేట ముంచారన్నారు. అధికారంలోకి వచ్చి రెండేళ్లు దాటినా ఒక్క హామీ పూర్తిగా నెరవేర్చలేదన్నారు. చంద్రబాబు అసమర్థ పాలనను ప్రజల్లోకి తీసుకువెళ్లి స్థానిక సంస్థల్లో గట్టి బుద్ధి చెప్పాలని పిలుపునిచ్చారు. విజయమే లక్ష్యంగా పార్టీ శ్రేణులు సైనికుల్లా పనిచేయాలి మాజీ ఎమ్మెల్యే శ్రీధర్‌రెడ్డి, పార్లమెంట్‌ పరిశీలకుడు రమేశ్‌రెడ్డి పిలుపు పుట్టపర్తి నియోజక వర్గ విస్తృత స్థాయి సమావేశం భారీగా హాజరైన పార్టీ నాయకులు, కార్యకర్తలు

ప్రశాంతి నిలయం: తీవ్ర వర్షాభావ పరిస్థితులను పరిగణనలోకి తీసుకుని జిల్లాను కరువు ప్రాంతంగా ప్రకటించాలని సీపీఐ జిల్లా కార్యదర్శి వేమయ్య యాదవ్‌, ఆంధ్రప్రదేశ్‌ రైతు సంఘం రాష్ట్ర వర్కింగ్‌ ప్రెసిడెంట్‌ కాటమయ్య డిమాండ్‌ చేశారు. శుక్రవారం కలెక్టరేట్‌ ఎదుట ఆంధ్రప్రదేశ్‌ రైతు సంఘం ఆధ్వర్యంలో రైతులు, ప్రజా సంఘాల నాయకులు ధర్నా నిర్వహించారు. ఈ సందర్భంగా వారు మాట్లాడుతూ రాష్ట్రంలో చాలా తక్కువ వర్షపాతం నమోదైందన్నారు. వ్యవసాయ రంగం తీవ్ర సంక్షోభాన్ని ఎదుర్కొంటోందని తెలిపారు. 98 లక్షల ఎకరాల్లో పంటలు సాగులోకి రావాల్సి ఉండగా 34 లక్షల ఎకరాల్లో పంటలే సాగవలేదన్నారు. కంది, టమాట, పత్తి పంటలు ఎండిపోతున్నాయని, వేరుశనగ సాగు భారీగా తగ్గిపోయిందని పేర్కొన్నారు. రాష్ట్ర ప్రభుత్వం వెంటనే కరువు మండలాలు ప్రకటించాలని, ఆహార పంటలకు ఎకరాకు రూ.25 వేల చొప్పున ఇన్‌పుట్‌ సబ్సిడీ, పంట బీమా పరిహారం అందించాలని డిమాండ్‌ చేశారు. 2026 నాటికి ఉన్న అన్ని పంట రుణాలు మాఫీ చేయాలన్నారు. పంటలు కాపాడేందుకు నీటి రవాణా ఖర్చులు ప్రభుత్వమే భరించాలన్నారు. ఉపాధి హామీ పనులు విరివిగా కల్పించాలని, రోజుకు రూ.700 వేతనం ఇవ్వాలని డిమాండ్‌ చేశారు. అనంతరం డీఆర్‌ఓకు వినతి పత్రం అందజేశారు. కార్యక్రమంలో వ్యవసాయ కార్మిక సంఘం జిల్లా కార్యదర్శి కదిరప్ప, సీపీఐ నియోజకవర్గ కార్యదర్శి వినోద్‌, అధ్యక్షుడు బాలస్వామి, కుళ్లాయప్ప, ఈఎస్‌ వెంకటేష్‌, లింగన్న తదితరులు పాల్గొన్నారు.

బొమ్మనహాళ్‌: పరిహారం పెంచాకనే నిర్మాణాలు చేపట్టాలంటూ పవర్‌ గ్రిడ్‌ టవర్ల పనులను రైతులు అడ్డుకున్నారు. మండలంలోని ఎల్‌బీ నగర్‌ సమీపంలో విద్యుత్‌ పవర్‌ గ్రిడ్‌ టవర్ల నిర్మాణం శుక్రవారం ఉద్రిక్తతకు దారి తీసింది. కళ్యాణదుర్గం డీఎస్పీ రవిబాబు ఆధ్వర్యంలో రాయదుర్గం, కళ్యాణదుర్గం రూరల్‌ సీఐలు వెంకటరమణ, గంగాధర, బొమ్మనహాళ్‌, కణేకల్లు, డి.హీరేహాళ్‌ ఎస్‌ఐలు నబీరసూల్‌, నాగమధు, గురుప్రసాద్‌రెడ్డితో పాటు భారీగా పోలీసులు మోహరించారు. పోలీసు బందోబస్తు నడుమ టవర్ల నిర్మాణానికి కంపెనీ ప్రతినిధులు రావడంతో ఉద్రిక్త పరిస్థితులు నెలకొన్నాయి. తగిన పరిహారం చెల్లించకుండా బలవంతంగా తమ వ్యవసాయ భూముల్లో పనులు చేపడుతున్నారంటూ బాధిత రైతులు ఆగ్రహం వ్యక్తం చేశారు. కర్ణాటక, మహారాష్ట్రల్లో ఎకరానికి రూ.12 లక్షలు ఇస్తుండగా, ఇక్కడ రూ.4 లక్షలు ఇస్తామనడం ఏమిటని ప్రశ్నించారు. న్యాయమైన పరిహారం చెల్లించిన తర్వాతే పనులు చేపట్టాలని డిమాండ్‌ చేశారు. ఈ విషయంపై ఇప్పటికే కోర్టును ఆశ్రయించామని, అయినప్పటికీ టవర్‌ ఏర్పాటుకు అధికారులు, కంపెనీ ప్రతినిధులు చర్యలు చేపట్టడంపై తీవ్ర అభ్యంతరం వ్యక్తం చేశారు. పవర్‌ గ్రిడ్‌ పనులను అడ్డుకున్న రైతులు లక్ష్మీ, సుబ్బమ్మ, అమర్‌తో పాటు మరికొంతమందిని పోలీసులు అరెస్టు చేసి బలవంతంగా పోలీస్‌స్టేషన్‌కు తరలించారు. అనంతరం పొలంలో మొక్కజొన్న పంటను తొలగించి పనులు చేపట్టడం గమనార్హం.

అనంతపురం: ఆంధ్రప్రదేశ్‌ ఫుట్‌బాల్‌ అసోసియేషన్‌ ఆధ్వర్యంలో డాక్టర తాలిమెరెన్‌ ఆవో అండర్‌–19 బాలికల జాతీయ ఫుట్‌బాల్‌ చాంపియన్‌షిప్‌ (టైర్‌–1) పోటీలు అనంతపురంలోని ఆర్డీటీ స్టేడియంలో హోరాహోరీగా సాగుతున్నాయి. రెండో రోజు శుక్రవారం ఢిల్లీ – గుజరాత్‌, జార్ఖండ్‌ – బిహార్‌ జట్ల మధ్య మ్యాచ్‌లు జరిగాయి. ఉదయం జరిగిన మ్యాచ్‌లో ఢిల్లీ, గుజరాత్‌ జట్లు తలపడ్డాయి. 40వ నిమిషంలో వేదిక (జెర్సీ నం. 24) తొలి గోల్‌ చేసి ఢిల్లీకి ఆధిక్యాన్ని ఇచ్చింది. ప్రత్యర్థి గుజరాత్‌ ఆటగాళ్లను ఎక్కడికక్కడ ఢిల్లీ క్రీడాకారులు సమర్థవంతంగా అడ్డుకుంటూ తమ ఆధిపత్యాన్ని చూపుతూ వచ్చారు. ఈ క్రమంలోనే స్టోపేజ్‌ టైమ్‌ (వివిధ కారణాల వల్ల నిలిచిపోయిన సమయాన్ని భర్తీ చేయడానికి అదనంగా కేటాయించే సమయం) ఢిల్లీ జట్టుకు కలిసొచ్చింది. ఢిల్లీ క్రీడాకారిణి సునైనా (జర్సీ నం. 99) అద్భుత ప్రదర్శనతో రెండు గోల్స్‌ సాధించి ఢిల్లీకి 3–0తో విజయాన్ని ఖాయం చేసింది. ● మధ్యాహ్నం జరిగిన మ్యాచ్‌లో జార్ఖండ్‌, బిహార్‌ జట్లు తలపడ్డాయి. ఆట ప్రారంభం నుంచే బిహార్‌పై జార్ఖండ్‌ జట్టు ఆధిపత్యం కొనసాగుతూ వచ్చింది. మైదానం నలుమూలలా జార్ఖండ్‌ క్రీడాకారులు మెరుపు వేగంతో కదులుతూ బిహార్‌ జట్టు క్రీడాకారులను ఎక్కడికక్కడ కట్టడి చేస్తూ వచ్చారు. ఈ క్రమంలోనే ఆట ప్రారంభమైన తొలి రెండో నిమిషంలోనే 15వ నంబర్‌ జెర్సీ ధరించిన జార్ఖండ్‌ క్రీడాకారిణి అద్భుత గోల్‌ను సాధించి జట్టు క్రీడాకారుల్లో ఉత్సాహాన్ని నింపింది. అనంతరం 49వ నిమిషంలోనూ మరో గోల్‌ సాధించింది. ఆట 22వ నిమిషంలో కొనసాగుతుండగా 8వ నంబర్‌ జెర్సీ ధరించిన క్రీడాకారిణి ఓ గోల్‌, 18వ నంబర్‌ జెర్సీ ధరించిన మరో క్రీడాకారిణి ఇంకో గోల్‌ చేశారు. దీంతో జట్టు 4–0 గోల్స్‌ ఆధిక్యంలో ఉండగా స్టోపేజ్‌ టైమ్‌ కలిసి వచ్చింది. దీంతో 8వ నంబర్‌ జెర్సీ ధరించిన క్రీడాకారిణి మరో గోల్‌ సాధించడంతో 5–0 గోల్స్‌ తేడాతో జార్ఖండ్‌ జట్టు విజయ కేతనం ఎగుర వేసింది. బిహార్‌ క్రీడాకారిణికి ఎల్లో కార్డ్‌ జార్ఖండ్‌ క్రీడాకారుల దూకుడుతో సహనం కోల్పోయిన బిహార్‌ క్రీడాకారిణి నిబంధనలకు విరుద్ధంగా వ్యవహరించడంతో రెఫరీ ఎల్లో కార్డు చూపారు. ఆట 83వ నిమిషంలో కొనసాగుతుండగా బిహార్‌కు చెందిన 9వ నంబర్‌ జెర్సీ ధరించిన క్రీడాకారిణి తన ప్రత్యర్థిని ప్రమాదకర రీతిలో కిందపడేసింది. దీంతో బిహార్‌ క్రీడాకారిణిని హెచ్చరిస్తూ రెఫరీ ఎల్లో కార్డు చూపారు. మ్యాచ్‌లను ఏపీ ఫుట్‌బాల్‌ అసోసియేషన్‌ కార్యదర్శి డానియల్‌ ప్రదీప్‌, జిల్లా అసోసియేషన్‌ అధ్యక్షుడు దాదా ఖలందర్‌ పర్యవేక్షించారు.

హిందూపురం టౌన్‌: రైళ్ల ద్వారా గంజాయి, ఇతర మాదకద్రవ్యాల అక్రమ రవాణాకు అడ్డుకట్ట వేసేందుకు ప్రత్యేక నిఘా, తనిఖీలు కొనసాగిస్తున్నామని హిందూపురం అడిషనల్‌ ఎస్పీ కేవీ మహేష్‌ తెలిపారు. శుక్రవారం హిందూపురం, పెనుకొండ రైల్వే స్టేషన్లలో మాదకద్రవ్యాల రవాణా, వినియోగాన్ని అరికట్టే చర్యల్లో భాగంగా ఏఎస్పీ ఆధ్వర్యంలో ఆకస్మిక తనిఖీలు నిర్వహించారు. ముఖ్యంగా హిందూపురం రైల్వే స్టేషన్‌లో భువనేశ్వర్‌–ప్రశాంతి ఎక్స్‌ప్రెస్‌లో గంజాయి అక్రమ రవాణా జరుగుతోందన్న సమాచారంతో పోలీసులు ప్రత్యేక తనిఖీలు చేపట్టారు. 50 మంది పోలీసు సిబ్బంది, డాగ్‌ స్క్వాడ్‌తో రైలులోని వివిధ బోగీల్లో క్షుణ్ణంగా సోదాలు నిర్వహించారు. అరగంట పాటు కొనసాగిన తనిఖీల్లో అనుమానాస్పద వ్యక్తుల కదలికలు, ప్రయాణికుల సామగ్రిని పరిశీలించారు. ఈ సందర్భంగా ఒడిశాకు చెందిన ఓ వ్యక్తి వద్ద గంజాయి ఉన్నట్లు గుర్తించిన పోలీసులు అతడిని అదుపులోకి తీసుకున్నారు. అతడి వద్ద నుంచి ఏడు చిన్న ప్యాకెట్లలో 100 గ్రాముల గంజాయిని గుర్తించి స్వాధీనం చేసుకున్నారు. అలాగే గంజాయి తరలింపునకు ఉపయోగించిన సూట్‌కేసును కూడా స్వాధీనం చేసుకున్నట్లు ఏఎస్పీ కేవీ మహేష్‌ తెలిపారు. తదుపరి చట్టపరమైన చర్యల నిమిత్తం నిందితుడిని జీఆర్‌పీ పోలీసులకు అప్పగించారు. రైళ్లలో మాదకద్రవ్యాల అక్రమ రవాణాకు పాల్పడే వ్యక్తులపై ప్రత్యేక నిఘా కొనసాగుతుందని ఏఎస్పీ తెలిపారు. రైల్వే స్టేషన్లు, రైళ్లలో అనుమానాస్పద వ్యక్తుల కదలికలను నిశితంగా పరిశీలించడంతో పాటు డాగ్‌ స్క్వాడ్‌ సహాయంతో తరచూ ఆకస్మిక తనిఖీలు నిర్వహిస్తామన్నారు. మాదకద్రవ్యాల అక్రమ రవాణా, వినియోగానికి పాల్పడే వారిపై ఎట్టి పరిస్థితుల్లోనూ ఉపేక్ష ఉండదని స్పష్టం చేశారు. మాదకద్రవ్యాల రహిత సమాజం కోసం ఇటువంటి ప్రత్యేక తనిఖీలు, ఆపరేషన్లు నిరంతరం కొనసాగుతాయని తెలిపారు. ఈ తనిఖీల్లో సీఐలు అబ్దుల్‌ కరీం, ఈగల్‌ ఎస్‌ఐ శ్రీధర్‌, ఎస్‌ఐ రాజేష్‌తో పాటు ఆర్పీఎఫ్‌, ఏఆర్‌, ఈగల్‌ బృందం, డాగ్‌ స్క్వాడ్‌, సబ్‌డివిజన్‌ పోలీసు సిబ్బంది పాల్గొన్నారు.

పామిడి/అనంతపురం: అంతర్జాతీయ రెజ్లింగ్‌ సెలెక్షన్‌ ట్రయల్స్‌కు స్థానిక ఏపీ మోడల్‌ స్కూల్‌ విద్యార్థిని కొప్పల అనూష ఎంపికై నట్లు ప్రిన్సిపాల్‌ అరుణ తెలిపారు. ఈ నెల 20 నుంచి రెండు రోజుల పాటు చత్తీస్‌ఘడ్‌లోని రాయపూర్‌లో జరగనున్న ట్రయల్స్‌లో అనూష పాల్గొంటుందన్నారు. అండర్‌–17 కేటగిరీలో 40 కిలోల విభాగంలో కొప్పల అనూష పాల్గొని తన ప్రతిభను చాటుకోనున్నారు. ఈ పోటీల్లోనూ రాణించి దక్షిణ అమెరికాలోని రియో డి జనీరోలో జరిగే అంతర్జాతీయ పోటీలకు ఎంపిక కావాలని ఆకాంక్షించారు. విద్యార్థిని ప్రయాణ ఖర్చుల నిమిత్తం అధ్యాపకులు చందారూపాన రూ.11,500 వసూలు చేసి అందజేశారు. ● అనూష ప్రయాణ ఖర్చులను తాను భరిస్తానంటూ అనంతపురం ఎమ్మెల్యే దగ్గుపాటి ప్రసాద్‌ భరోసానిచ్చారు. దీంతో శుక్రవారం ఎమ్మెల్యేను అనూష కలిసి కృతజ్ఞతలు తెలిపింది. అనూష వెంట డీఎస్‌డీఓ మంజుల, కోచ్‌ ఎన్‌.రాఘవేంద్ర ఉన్నారు.

చిలమత్తూరు: మండల పరిధిలోని దిగువపల్లి తండా సమీపంలో టీడీపీ నాయకులు యథేచ్ఛగా మట్టి అక్రమ రవాణా సాగిస్తున్నారు. రైతుల పొలాలకంటూ కప్పిపుచ్చుకుంటుండటం తీవ్ర విమర్శలకు తావిస్తోంది. ఇరిగేషన్‌ అధికారుల వద్ద తీసుకున్న అనుమతుల కంటే ఎక్కువగా మట్టిని తోడేస్తున్నారు. దీంతో చెరువుల్లో భారీ గుంతలు ఏర్పడ్డాయి. ఇరిగేషన్‌, రెవెన్యూ అధికారులు చర్యలు చేపట్టాలని ప్రజలు డిమాండ్‌ చేస్తున్నారు. మహిళను వేధిస్తున్న వ్యక్తిపై కేసుపరిగి: మండలంలోని కాలువపల్లి వద్ద ఉన్న ఓ గార్మెంట్స్‌ పరిశ్రమలో పని చేస్తున్న మహిళా కార్మికురాలిపై అదే పరిశ్రమలో సూపర్‌వైజర్‌గా పని చేస్తున్న వ్యక్తి వేధింపులకు గురిచేశాడరు ఆరోపణతో శుక్రవారం పరిగి పోలీస్‌స్టేషన్‌లో కేసు నమోదైంది. ఎస్‌ఐ రవికుమార్‌ తెలిపిన వివరాలు ఇలా ఉన్నాయి. ఇండియన్‌ టెక్స్‌పోర్టు డిజైన్స్‌ గార్మంట్స్‌ పరిశ్రమలో కర్ణాటక రాష్ట్రం గుట్టకొడిగెనహళ్లికి చెందిన మంజునాథ్‌ సూపర్‌వైజర్‌గా పని చేస్తున్నాడు. తన డిపార్టుమెంట్‌లోనే పనిచేస్తున్న పరిగి మండలం పెద్దిరెడ్డిపల్లికి చెందిన ఓ మహిళను కొంత కాలంగా శారీరకంగా, మానసికంగా వేధింపులకు గురి చేస్తున్నాడు. శుక్రవారం బాధితురాలు పరిగి పోలీస్‌స్టేషన్‌లో ఫిర్యాదు చేయడంతో మంజునాథ్‌పై కేసు నమోదు చేసినట్లు ఎస్‌ఐ తెలిపారు. 20 క్వింటాళ్ల రేషన్‌ బియ్యం పట్టివేత బత్తలపల్లి: అక్రమంగా తరలిస్తున్న 20 క్వింటాళ్ల రేషన్‌ బియ్యాన్ని విజిలెన్స్‌ అండ్‌ ఎన్‌ఫోర్స్‌మెంట్‌, రెవెన్యూ అధికారులు శుక్రవారం పట్టుకున్నారు. అధికారులు తెలిపిన సమాచారం మేరకు... మండలంలోని సంగాల గ్రామానికి చెందిన గుజ్జల రామకృష్ణ కొందరు డీలర్లతో పాటు తెల్లరేషన్‌ కార్డుదారుల ద్వారా సేకరించిన బియ్యాన్ని పుట్టపర్తి మండలం బుగ్గపల్లి గ్రామానికి చెందిన సోమశేఖర్‌ అలియాస్‌ సోముకు విక్రయిస్తున్నాడు. అందులో భాగంగా కార్డుదారుల నుంచి సేకరించిన రేషన్‌ బియ్యాన్ని శుక్రవారం (ఏపీ 26 టీబీ5846) అశోక్‌ లేలాండ్‌ వాహనంలో తరలిస్తున్నాడు. సమాచారం అందుకున్న విజిలెన్స్‌ అండ్‌ ఎన్‌ఫోర్స్‌మెంట్‌, రెవెన్యూ అధికారులు చిత్రావతి బ్రిడ్జి వద్ద వాహనాన్ని నిలిపి తనిఖీ చేశారు. అందులో 20 క్వింటాళ్ల (46 బ్యాగులు) రేషన్‌ బియ్యం ఉండటంతో వాహనాన్ని సీజ్‌ చేసి బత్తలపల్లి పోలీసులకు అప్పగించారు. బియ్యాన్ని స్వాధీనం చేసుకుని ధర్మవరం గోదాముకు తరలించారు. అలాగే రేషన్‌ బియ్యం తరలిస్తున్న గుజ్జల రామకృష్ణను అదుపులోకి తీసుకున్నారు. దాడుల్లో విజిలెన్స్‌ అండ్‌ ఎన్‌ఫోర్స్‌మెంట్‌ సీఐ సద్గురుడు, సిబ్బంది, సీఎస్‌డీటీ ప్రసన్నకుమార్‌, వీఆర్‌ఓ రాణా ప్రతాప్‌ తదితరులు పాల్గొన్నారు. న్యాయం కోసం రాస్తారోకో ఉరవకొండ: పట్టణ శివారులోని టీవీ టవర్‌ సమీపంలో ఈ నెల 10న జరిగిన రోడ్డు ప్రమాదంలో ముగ్గురు దుర్మరణం చెందిన విషయం తెలిసిందే. ఈ క్రమంలో తమకు న్యాయం చేయాలంటూ బాధిత కుటుంబ సభ్యులు, బంధువులు శుక్రవారం ఉరవకొండ ఆసుపత్రి ఎదుట ప్రధాన రహదారిపై రాస్తారోకో చేపట్టారు. బాధిత కుటుంబ సభ్యులు మాట్లాడుతూ కూలీనాలీ చేసుకుని జీవించే తమ కుటుంబాలకు పోషించే దిక్కు లేకుండా పోయిందన్నారు. ఐచర్‌ వాహనాన్ని అదుపులోకి తీసుకున్న నేపథ్యంలో సంబంధిత యజమాని నుంచి తమకు పరిహారం ఇప్పించాలని డిమాండ్‌ చేశారు. ట్రాఫిక్‌కు అంతరాయం ఏర్పడటంతో ఉరవకొండ సీఐ మహనంది, ఎస్‌ఐ జనార్థన్‌నాయుడు అక్కడికి చేరుకున్నారు. కచ్చితంగా న్యాయం జరిగేలా చూస్తామని హామీ ఇవ్వడంతో కుటుంబ సభ్యులు శాంతించి మృతదేహాలను స్వగ్రామం వజ్రకరూరుకు తరలించారు. విద్యుత్‌షాక్‌తో వ్యక్తి మృతి తాడిపత్రి రూరల్‌: మండలంలోని బ్రహ్మణపల్లి వద్ద వ్యవసాయ పొలంలో విద్యుత్‌ షాక్‌కు గురై బాషా (45) అనే వ్యక్తి మృతి చెందాడని అప్‌గ్రెడ్‌ సీఐ నారాయణరెడ్డి తెలిపారు. గ్రామంలో సురేష్‌రెడ్డికి చెందిన మోటార్‌ పనిచేయకపోవడంతో స్టార్టర్‌ను రిపేరీ చేస్తున్న సమయంలో బాషా విద్యుత్‌షాక్‌కు గురయ్యాడన్నారు. వెంటనే చికిత్స నిమిత్తం తాడిపత్రి ప్రభుత్వ ఆసుపత్రికి తరలించగా, వైద్యులు పరీక్షించి మృతి చెందినట్లు నిర్ధారించారన్నారు. మృతుడికి భార్య, ఇద్దరు పిల్లలు ఉన్నట్లు తెలిసింది. ఈ ఫిర్యాదు మేరకు కేసు నమోదు చేసినట్లు సీఐ తెలిపారు.

అనంతపురం న్యూ టౌన్‌: ఉమ్మడి అనంతపురం జిల్లాలో స్థానిక సంస్థల ఎన్నికలకు సంబంధించి 25.18 లక్షల మంది ఓటర్లు ఉన్నట్లు జిల్లా పరిషత్‌ ముఖ్య కార్య నిర్వహణ అధికారి పి.విజయలక్ష్మి వెల్లడించారు. నగరంలోని జిల్లా పరిషత్‌ కార్యాలయంలో శుక్రవారం జెడ్పీటీసీల వారీగా గ్రామ పంచాయతీ ఓటర్ల ఫొటోలతో కూడిన జాబితాలను విడుదల చేశారు. ఈ సందర్భంగా ఆమె మీడియాతో మాట్లాడుతూ ఉమ్మడి జిల్లాలో మొత్తం 847 మండల ప్రాదేశిక (ఎంపీటీసీ) స్థానాలకు ఎన్నికలు నిర్వహించనున్నట్లు తెలిపారు. గతంలో కంటే ఆరు ఎంపీటీసీ స్థానాలు పెరిగాయి. 2021లో జరిగిన ఎన్నికల్లో 841 స్థానాలకు ఎంపీటీసీ సభ్యులను ఎన్నుకున్నారు. అప్పట్లో పామిడి మండలాన్ని నగర పంచాయతీగా గుర్తించడంతో కొన్ని ఎంపీటీసీ స్థానాలు తగ్గాయి. ప్రస్తుతం ఈ మండలం నుంచి ఆరు స్థానాలను కలిపి అనంతపురం జిల్లాలో 450 ఎంపీటీసీ స్థానాలకు పెరిగాయి. ఇదే సమయంలో శ్రీసత్యసాయి జిల్లాలో ఎంపీటీసీ స్థానాల విషయంలో ఎలాంటి మార్పూ లేదు. ప్రస్తుతం అక్కడ 397 మండల ప్రాదేశిక స్థానాలకు ఎన్నికలు నిర్వహించనున్నారు. మహిళా ఓటర్లే ‘కీలకం’ ఉమ్మడి అనంతపురం జిల్లాలో మొత్తం 25,18,110 మంది ఓటర్లు ఉన్నారు. వీరిలో 12,40,009 పురుషులు కాగా 12,77,947 మంది మహిళా ఓటర్లు ఉన్నారు. ఉమ్మడి జిల్లా మొత్తంగా 154 మంది ట్రాన్స్‌జెండర్‌ ఓటర్లు ఉన్నారు. అనంతపురం జిల్లాలో 6,73,335 మంది పురుష ఓటర్లు కాగా 6,78,835 మంది మహిళా ఓటర్లు ఉన్నారు. అనంతపురం జిల్లాలో 5,602 మంది మహిళా ఓటర్లు అధికంగా ఉన్నారు. కాగా శ్రీ సత్య సాయి జిల్లాలో మొత్తం 12,77,976 మంది కాగా.. వీరిలో 5,66,776 మంది పురుషులు కాగా 5,99,112 మంది మహిళా ఓటర్లు ఉన్నారు. అంటే శ్రీ సత్యసాయి జిల్లాలో 32,336 మంది మహిళా ఓటర్లు అధికంగా ఉన్నారు. రానున్న స్థానిక సంస్థల ఎన్నికల్లో ప్రధానంగా శ్రీ సత్యసాయి జిల్లాలో మహిళలు కీలకంగా మారనున్నారు. ఇక జిల్లా పరిషత్‌ ప్రాదేశిక స్థానాల విషయంలో ఉమ్మడి జిల్లాలో మొత్తం 63 ఉండగా అనంతపురం జిల్లాలో 31 స్థానాలు, శ్రీసత్యసాయి జిల్లాలో 32 జిల్లా ప్రాదేశిక స్థానాలు ఉన్నట్లు సీఈఓ విజయలక్ష్మి వివరించారు. ఉమ్మడి జిల్లాలో మహిళా ఓటర్లే కీలకం

కదిరి అర్బన్‌: ‘తాంబూలాలిచ్చాం తన్నుకు చావండి’ అన్న చందంగా మారింది సామాజిక భద్రతా పెన్షన్‌ దరఖాస్తుల స్వీకరణ ప్రక్రియ. అసలే గడువు తక్కువ. అందులోను పండుగల సెలవులు, ఇవి చాలదన్నట్లు దరఖాస్తులు స్వీకరించేందుకు సవాలక్ష నిబంధనలు. కదిరి మండలం కుమ్మరవాండ్లపల్లికి చెందిన హసీనా భర్త మరణించి మూడేళ్లు అవుతోంది. హసీనాకు ముగ్గురు సంతానం. కుటుంబానికి రేషన్‌కార్డు ఉంది. భర్త డెత్‌ సర్టిఫికెట్‌, ఆదాయ ధ్రువీవకరణ పత్రం కూడా తీసుకున్నారు. చంద్రబాబు ప్రభుత్వం పెన్షన్‌ దరఖాస్తులు స్వీకరిస్తుండడంతో ఇటీవల హసీనా కుమ్మరవాండ్లపల్లి సచివాలయానికి వెళ్తే అక్కడ హౌస్‌హోల్డ్‌ మ్యాపింగ్‌లో ఆమె కదిరి మున్సిపాలిటీలోని రాజేంద్రప్రసాద్‌ వీధిలో కాపురం ఉన్నట్లు చూపిస్తోంది. అదే హౌస్‌హోల్డ్‌ మ్యాపింగ్‌లో హసీనా కుమార్తె ఆసియాకు వితంతు పెన్షన్‌ వస్తోంది. ఈ క్రమంలో ఒకే ఇంట్లో ఇద్దరు పెన్షన్‌కు అర్హులు కారని అధికారులు చెబుతుండడం గమనార్హం. రేషన్‌కార్డులు వేరుగా ఉన్నప్పటికీ కేవలం హౌస్‌హోల్డ్‌ మ్యాపింగ్‌లో అందరూ కలిసి ఉన్నట్లు చూపిస్తుండడంతో ఆన్‌లైన్‌లో దరఖాస్తు తీసుకోవడం లేదు. ప్రస్తుతం హౌస్‌హోల్డ్‌ మ్యాపింగ్‌లో హసీనా కుటుంబాన్ని వేరు చేసే ఆప్షన్‌ లేకపోవడంతో పెన్షన్‌కు దరఖాస్తు చేసుకునేందుకు అవకాశం లేకుండా పోయింది. ఇప్పటికై నా అధికారులు స్పందించి అర్హులు నష్టపోకుండా నిబంధనలు సడలించాలని పలువురు కోరుతున్నారు. వివాహిత ఆత్మహత్య శింగనమల: మండలంలోనివె వెస్ట్‌ నరసాపురం గ్రామంలో ఓ వివాహిత శుక్రవారం ఉరి వేసుకుని ఆత్మహత్య చేసుకుంది. ఎస్‌ఐ ప్రసాద్‌ తెలిపిన మేరకు.. గ్రామానికి చెందిన మల్లేశ్వరి(26)కి నార్పల మండలం బొందలవాడకు చెందిన నాగేంద్రతో ఒకటిన్నర సంవత్సరం క్రితం వివాహం జరిగింది. నెలరోజులకే భర్తతో ఉండడం ఇష్టం లేక మల్లేశ్వరి స్వగ్రామం వచ్చేసి తల్లిదండ్రుల వద్ద ఉంటోంది. ఈ క్రమంలోనే తీవ్ర మనస్తాపం చెందిన ఆమె శుక్రవారం ఇంట్లో ఎవరూ లేని సమయంలో ఉరి వేసుకుని ఆత్మహత్య చేసుకుంది. పోలీసులు ఘటనాస్థలిని పరిశీలించారు. కేసు నమోదు చేసిన అనంతరం మృతదేహాన్ని పోస్టుమార్టు నిమిత్తం అనంతపురం ప్రభుత్వాసుపత్రికి తరలించారు. కాశీపురంలో వృద్ధురాలు.. రాయదుర్గం రూరల్‌: అనారోగ్యం బారిన పడిన హరిజన లక్ష్మక్క (78) అనే వృద్ధురాలు ఉరి వేసుకుని మృతి చెందిన సంఘటన మండలంలోని కాశీపురం గ్రామంలో శుక్రవారం చోటుచేసుకుంది. బంధువులు, పోలీసులు తెలిపిన మేరకు లేట్‌ హరిజన గంగన్న భార్య లక్ష్మక్క ఒక్కగానొక్క కుమారుడితో ఉంటోంది. గురువారం రోజు వ్యవసాయ కూలి పనులకు కూడా వెళ్లి వచ్చింది. అయితే రాత్రి అనారోగ్యానికి గురైన ఆమె బాధను భరించలేక, కుమారుడు, కోడలికి చెప్పుకోలేక, శుక్రవారం ఎస్సీ కాలనీ సమీపంలో ఉన్న వేప చెట్టుకు ఉరివేసుకుని ఆత్మహత్య చేసుకుంది. గమనించిన కుటుంబ సభ్యులు పోలీసులకు సమాచారం ఇచ్చారు. చెట్టుపై నుంచి పడి వ్యక్తి మృతి గుత్తి రూరల్‌: మండలంలోని బేతాపల్లి గ్రామంలో శుక్రవారం టెంకాయ చెట్టుపై నుంచి పడి పృథ్విరాజు (35) అనే వ్యక్తి మృతి చెందాడు. పోలీసులు, కుటుంబ సభ్యులు తెలిపిన వివరాలిలా ఉన్నాయి. గ్రామానికి చెందిన పృథ్విరాజు వ్యవసాయ కూలీ పనులు చేసుకుంటూ జీవనం సాగించేవాడు. అమావాస్య కావడంతో గ్రామ శివారులోని తన తోట వద్ద ఉన్న చెట్టుపై టెంకాయలు తెచ్చేందుకు వెళ్లాడు. చెట్టు ఎక్కి టెంకాయలు, పట్టలు కోస్తుండగా ప్రమాదవశాత్తూ అదుపు తప్పి చెట్టుపై నుంచి కిందకు పడ్డాడు. ఎంతసేపయినా ఇంటికి రాకపోయేసరికి కుటుంబ సభ్యులు తోట వద్దకు వెళ్లారు. తీవ్ర గాయాలతో చెట్టు పక్కన అపస్మారక స్థితిలో పడి ఉన్న పృథ్విరాజును గమనించిన కుటుంబసభ్యులు, స్థానికులు వెంటనే గ్రామంలోని పీహెచ్‌సీకి తరలించారు. మెరుగైన చికిత్సలకు గుత్తి ప్రభుత్వ ఆసుపత్రికి తరలించారు. పరీక్షించిన వైద్యులు పృథ్విరాజు అప్పటికే మృతి చెందినట్టు నిర్ధారించారు. ఇంటి పెద్ద దిక్కు మృతితో భార్య, కుటుంబ సభ్యులు కన్నీరు మున్నీరుగా విలపించారు. మృతుడికి భార్య మౌనిక, కుమారుడు, కుమార్తె ఉన్నారు. పోలీసులు కేసు నమోదు చేసి దర్యాప్తు చేస్తున్నారు.

అనంతపురం: జాతీయ లోక్‌ అదాలత్‌ను శనివారం నిర్వహించనున్నట్లు ఉమ్మడి జిల్లా ప్రధాన న్యాయమూర్తి భీమారావు తెలిపారు. రాజీ పడదగిన కేసులను పరిష్కరించుకోవడానికి జాతీయ లోక్‌ అదాలత్‌ను కక్షిదారులు సద్వినియోగం చేసుకోవాలని పిలుపునిచ్చారు. జిల్లాలోని అన్ని కోర్టులు, పోలీస్‌ స్టేషన్ల పరిధిలోని రాజీ పడదగిన కేసులను గుర్తించి, అత్యధిక సంఖ్యలో కేసులను పరిష్కరించేందుకు కృషి చేయాలని అధికారులను ఆదేశించారు. 12న జాతీయ వినియోగదారుల సదస్సు పుట్టపర్తి టౌన్‌: వినియోగదారుల సమస్యలను చట్టపరంగా ఎదుర్కొనే మార్గాలపై భవిష్యత్‌ కార్యాచరణపై చర్చించేందుకు పుట్టపర్తిలో ఈనెల 12 నుంచి మూడు రోజుల పాటు 16వ జాతీయ వినియోగదారుల సదస్సు నిర్వహిస్తున్నట్లు జాతీయ వినియోగదారుల సమన్వయ మండలి అధ్యక్షుడు అభిషేక్‌ శ్రీవాస్తవ్‌, ఆంధ్రప్రదేశ్‌ వినియోగదారుల సంఘాల సమాఖ్య అధ్యక్షుడు సురేష్‌ కుమార్‌ తెలిపారు. శుక్రవారం వారు స్థానిక సాయి ఆరామంలో విలేకరులతో మాట్లాడారు. సదస్సులో పౌరసరఫరాలు, వినియోగదారుల కమిషనర్‌ కన్నబాబు, సత్యసాయి సెంట్రల్‌ ట్రస్ట్‌ మేనేజింగ్‌ ట్రస్టీ ఆర్‌జే రత్నాకర్‌, జాయింట్‌ కలెక్టర్‌ మౌర్య భరద్వాజ్‌తోపాటు సుమారు 18 రాష్ట్రాలకు చెందిన వినియోగదారుల సంఘాల ప్రతినిధులు, అన్ని జిల్లాలో వినియోగదారులు సంఘాల నాయకులు, కార్యకర్తలు హాజరవుతారన్నారు. వినియోగదారుల హక్కుల పరిరక్షించడంతో పాటు మరింత సమర్థవంతమైన కార్యాచరణ రూపొందించి జాతీయ స్థాయిలో వినియోగదారుల సంఘాలు బలోపేతం చేయడమే లక్ష్యంగా ముందుకు సాగుతున్నామన్నారు. ప్రస్తుతం దేశ వ్యాప్తంగా ఆన్‌లైన్‌ మోసాలు, నకిలీ, కల్తీ ఉత్పత్తులు, తప్పుదారి పట్టించే ప్రకటనలు, నాసిరకం వస్తువులు, సేవల్లో లోపాలు, డిజిటల్‌ లావాదేవీలతో వినియోగదారులు తీవ్రంగా నష్టపోతున్నారని, వీటిపై వినియోగదారులకు అవగాహన కల్పించడంతోపాటు బాధితులకు చట్టపరమైన పరిష్కారం అందేలా వినియోగదారుల సంఘాలు మరింత చురుకై న పాత్ర పోషిస్తున్నట్లు వెల్లడించారు. జాతీయ సదస్సులో వినియోగదారుల పరిరక్షణ చట్టం అమలు, ఆహార భద్రత, నాణ్యత ప్రమాణాలు, డిజిటల్‌ వినియోగదారుల హక్కులు, వినియోగదారులు ఫిర్యాదులు పరిష్కారం వినియోగదారుల సంఘాల బలోపేతం వంటి అంశాలపై చర్చిస్తామన్నారు. ‘ఆశా’ ఉద్యోగాలకు దరఖాస్తుల ఆహ్వానం పుట్టపర్తి అర్బన్‌: జిల్లాలో ఖాళీగా ఉన్న ఆశా కార్యకర్తల ఉద్యోగాల భర్తీకి దరఖాస్తులు ఆహ్వానిస్తున్నట్లు డీఎంహెచ్‌ఓ డాక్టర్‌ ఫైరోజా బేగం శుక్రవారం ఒక ప్రకటనలో తెలిపారు. గ్రామీణ ప్రాంతాల్లో 19, పట్టణ ప్రాంతాల్లో 3 కలిపి మొత్తంగా 22 పోస్టులు ఖాళీ ఉన్నాయన్నారు. అర్హులైన మహిళా అభ్యర్థులు ఈనెల 15 నుంచి 19వ తేదీలోపు దరఖాస్తు చేసుకోవాలన్నారు. ప్రాథమిక ఆరోగ్య కేంద్రాలు, పట్టణ ఆరోగ్య కేంద్రాలు, స్వర్ణ గ్రామ సచివాలయాల్లో దరఖాస్తులు అందజేయాలన్నారు. దరఖాస్తులు పరిశీలించి ఈనెల 25న తుది జాబితాను విడుదల చేయనున్నట్లు వెల్లడించారు. పదో తరగతి ఉత్తీర్ణులై, 25– 45 ఏళ్ల మధ్య వయస్సు కలిగిన వివాహితులైన మహిళలు అర్హులన్నారు. వితంతువులు, విడాకులు పొందిన, భర్త నుంచి విడిపోయిన, నిరాశ్రయులైన మహిళలకు ప్రాధాన్యత ఉంటుందన్నారు. ‘కేజీబీవీ’ తుది మెరిట్‌ జాబితా విడుదల అనంతపురం ఎడ్యుకేషన్‌: జిల్లాలోని కస్తూరిబా గాంధీ బాలిక విద్యాలయాల్లో (కేజీబీవీ) ఖాళీగా ఉన్న బోధన సిబ్బంది పోస్టుల భర్తీకి సంబంధించి తుది మెరిట్‌ జాబితాను శుక్రవారం విడుదల చేశారు. ప్రొవిజనల్‌ మెరిట్‌ జాబితా నుంచి రోస్టర్‌ ప్రకారం 1:10 నిష్పత్తిలో అభ్యర్థులను ధ్రువపత్రాల పరిశీలనకు ఎంపిక చేశారు. ఆగస్టు 18, 19 తేదీల్లో ధ్రువపత్రాల పరిశీలనకు హాజరైన అభ్యర్థుల తుది మెరిట్‌ జాబితాను http:// samagrashikshaatp. blogspotలో అందుబాటులో ఉంచినట్లు ఏపీసీ శైలజ తెలిపారు. జాబితాపై ఏవైనా అభ్యంతరాలు, ఫిర్యాదులుంటే తగిన ఆధారాలతో ఈ నెల 16వ తేదీ సాయంత్రం 5 గంటల్లోపు సమగ్ర శిక్ష కార్యాలయంలో నేరుగా సమర్పించాలని, గడువు అనంతరం అందే అభ్యంతరాలు, ఫిర్యాదులను పరిగణనలోకి తీసుకోబోమని ఏపీసీ శైలజ స్పష్టం చేశారు.

అనంతపురం ఎడ్యుకేషన్‌: రాయలసీమకు సాగునీరు అందించేందుకు శ్రీశైలం ప్రాజెక్టు నుంచి తగినంత నీటిని విడుదల చేయాలంటూ వక్తలు గళమెత్తారు. అఖిల భారత రైతు–కూలీ సంఘం (ఏఐకేఎంఎస్‌) 9వ రాష్ట్ర మహాసభలు శుక్రవారం అనంతపురం నగరంలోని డాక్టర్‌ అంబేడ్కర్‌ విజ్ఞాన భవన్‌లో ప్రారంభమయ్యాయి. తొలుత అంబేడ్కర్‌ భవన్‌ నుంచి మున్సిపల్‌ కార్యాలయం వరకు భారీ ర్యాలీ నిర్వహించారు. అరుణోదయ కళాకారుల నృత్య ప్రదర్శనతో సాగిన ర్యాలీలో సంఘం రాష్ట్ర అధ్యక్షుడు ఇండ్ల ప్రభాకర్‌, ప్రధాన కార్యదర్శి చిట్టిపాటి వెంకటేశ్వర్లు, రాష్ట్ర కార్యవర్గ సభ్యులు, ఆహ్వాన సంఘం అధ్యక్షుడు రామ్‌కుమార్‌, జిల్లా నాయకులు, కార్యకర్తలు పాల్గొన్నారు. రాష్ట్ర అధ్యక్షుడు ఇండ్ల ప్రభాకర్‌ ఎర్రజెండాను ఎగురవేశారు. అనంతరం ప్రారంభ సభను ఇండ్ల ప్రభాకర్‌, ఎం.దుర్గాప్రసాద్‌, ఎస్‌.వి.వి.సత్యనారాయణ అధ్యక్షవర్గంగా నిర్వహించారు. రామ్‌కుమార్‌ మాట్లాడుతూ రాయలసీమకు సాగునీరు అందించేందుకు శ్రీశైలం ప్రాజెక్టు నుంచి నీటిని విడుదల చేయాలని, గోదావరి, కృష్ణా నదుల నుంచి రాయలసీమకు నీటి కేటాయింపులు పెంచాలని డిమాండ్‌ చేశారు. రాష్ట్ర మహాసభల్లో రైతాంగ సమస్యలతో పాటు రాయలసీమ సాగునీటి సమస్యపై లోతుగా చర్చించి కార్యాచరణ రూపొందించాలని కోరారు. సంయుక్త కిసాన్‌ మోర్చా ఆంధ్రప్రదేశ్‌ కన్వీనర్‌, మాజీ వ్యవసాయశాఖ మంత్రి వడ్డే శోభనాద్రీశ్వరరావు ప్రారంభోపన్యాసం చేశారు. రాయలసీమలో హంద్రీ–నీవా, గాలేరు–నగరి ప్రాజెక్టుల ద్వారా ఆశించిన స్థాయిలో సాగునీరు అందడం లేదని అన్నారు. వేల కోట్ల రూపాయలు ఖర్చు చేసినా ప్రాజెక్టుల పూర్తి ప్రయోజనం రైతులకు దక్కడం లేదని పేర్కొన్నారు. రాయలసీమ సాగునీటి సాధన సమితి అధ్యక్షుడు బి.దశరథరామిరెడ్డి మాట్లాడుతూ ప్రాంతంలో సాగునీటితో పాటు తాగునీటి సమస్య కూడా తీవ్రంగా ఉందన్నారు. మహాసభలో ఏఐకేఎంఎస్‌ జాతీయ అధ్యక్షుడు వేములపల్లి వెంకట్రామయ్య, తెలంగాణ రాష్ట్ర ప్రధాన కార్యదర్శి గౌని ఐలయ్య ప్రసంగించారు. ఏఐకేఎంఎస్‌ రాష్ట్ర మహాసభల్లో వక్తల గళం

సాక్షి, పుట్టపర్తి పుట్టపర్తి అర్బన్‌ డెవలప్‌మెంట్‌ అథారిటీ (పుడా).. ఇన్నాళ్లూ కేవలం పుట్టపర్తి నియోజకవర్గానికి మాత్రమే పరిమితమైన ఈ సంస్థ పరిధిలోకి జిల్లాలోని 32 మండలాలనూ చేర్చారు. దీంతో పుడా చైర్మన్‌ పీఠం కోసం పోటీ బాగా పెరిగింది. పైగా రిజర్వేషన్‌ ఉండదు... కుల సమీకరణాలతో పని లేదు... నాయకుడి వద్ద లాబీయింగ్‌ చేసుకుంటే చాలు జిల్లా స్థాయి పదవి సంపాదించవచ్చు. దీంతో పుడా చైర్మన్‌ పీఠం కోసం నెల రోజుల నుంచి భారీ డిమాండ్‌ పెరిగింది. జిల్లాలోని ఎమ్మెల్యేలు, మంత్రుల వద్ద ఆశావహులు ఎవరికి వారుగా లాబీయింగ్‌ మొదలుపెట్టారు. మాజీ మంత్రుల కుటుంబ సభ్యులు సైతం ‘పుడా’ చైర్మన్‌ పదవి రేసులోకి వచ్చినట్లు తెలిసింది. పరిధి పెరగడంతోనే పోటాపోటీ.. ‘పుడా’ వైఎస్సార్‌సీపీ ప్రభుత్వ హయాంలో పుట్టపర్తి నియోజకవర్గంలోని ఆరు మండలాల వరకు విస్తరించింది. అయితే గత ఆగస్టులో పుడా పరిధిలోకి జిల్లాలోని 32 మండలాలనూ చేర్చారు. అహుడా (అనంతపురం – హిందూపురం అర్బన్‌ డెవలప్‌మెంట్‌ అథారిటీ) అనంతపురం జిల్లాకు మాత్రమే పరిమితం చేశారు. దీంతో పుడా చైర్మన్‌ స్థానం కోసం జిల్లాలోని అన్ని నియోజకవర్గాల నుంచి ఆశావహులు తెరపైకి వచ్చారు. అధిష్టానం వద్ద లాబీయింగ్‌లో ఎవరు పైచేయి సాధిస్తారనేది చర్చనీయంగా మారింది. హిందూపురం, పెనుకొండ, పుట్టపర్తి, ధర్మవరం నుంచి మూడు పార్టీల్లోనూ ఆశావహుల పేర్లు వినిపిస్తున్నాయి. ఖాళీగా.. రెండేళ్లుగా.. చంద్రబాబు ప్రభుత్వం ఏర్పడిన తర్వాత ‘పుడా’ చైర్మన్‌ పదవి ఎవరికీ ఇవ్వలేదు. కుల సమీకరణాల్లో భాగంగా ఎవరికి ఇవ్వాలనే దానిపై పుట్టపర్తి నియోజకవర్గ టీడీపీ ఇన్‌చార్జి పల్లె రఘునాథరెడ్డి తేల్చలేకపోయారు. చంద్రబాబు ప్రభుత్వం కొలువుదీరి రెండేళ్లు పూర్తయినా నేటికీ ఎవరికీ ఇవ్వకుండా నాన్చుడు ధోరణితో వచ్చారు. ఒకానొక సమయంలో ప్రొటోకాల్‌ కోసం ‘పుడా’ చైర్మన్‌ పదవి తానే తీసుకుంటానని అనుచరులతో పల్లె ప్రస్తావించినట్లు ప్రచారం జరిగింది. ప్రస్తుతం పుడా పరిధి పెరగడంతో జిల్లాలోని మిగతా ప్రాంతాల వారికి కూడా అవకాశం ఉన్నందున నియోజకవర్గంలోని నాయకుల ఆశలపై నీళ్లు జల్లినట్లయింది. రేసులో మాజీ మంత్రి నిమ్మల.. గత సార్వత్రిక ఎన్నికల్లో టికెట్‌ కోల్పోయిన మాజీ మంత్రి నిమ్మల కిష్టప్ప ‘పుడా’ చైర్మన్‌ పదవి ఆశిస్తున్నట్లు తెలిసింది. తనకు ఇవ్వకపోయినా.. కుమారుడికి ఇవ్వాలని అధిష్టానం వద్ద పట్టుబట్టినట్లు సమాచారం. అయితే స్థానిక మంత్రి సవిత, ఎంపీ పార్థసారథి నుంచి నిమ్మల కిష్టప్పకు సహకారం లేదన్న విషయం తెల్సిందే. మరోవైపు పుట్టపర్తి నుంచి సామకోటి ఆదినారాయణ కూడా ‘పుడా’ పీఠం కోసం ప్రయత్నాలు చేస్తుండగా... ఆయన్ను మంత్రి తిరస్కరించినట్లు సమాచారం. జనసేన నేతల పోరాటం.. ఉమ్మడి అనంతపురం జిల్లాలో బీజేపీకి ఒక ఎమ్మెల్యే సీటు ఇచ్చారు. మంత్రి పదవి కూడా కట్టబెట్టారు. జనసేనకు అహుడా చైర్మన్‌ ఇచ్చారు. అదే తరహాలో ‘పుడా’ చైర్మన్‌ పదవిని కూడా జనసేనకు ఇవ్వాలని ఆ పార్టీ నాయకులు డిమాండ్‌ చేస్తున్నారు. ఈ నేపథ్యంలోనే జనసేన నుంచి పుట్టపర్తి నేత అబ్దుల్‌ అబు.. చైర్మన్‌ స్థానం కోసం లాబీయింగ్‌ చేస్తున్నట్లు సమాచారం. జిల్లాలోని 32 మండలాలనూ ‘పుడా’ పరిధిలోకి తెస్తూ సర్కార్‌ నిర్ణయం చైర్మన్‌ పదవి కోసం పెరిగిన పోటీ... రేసులో అన్ని నియోజకవర్గాల నేతలు మంత్రులు, ఎమ్మెల్యేలు, నారా లోకేష్‌తో మంతనాలు పొత్తులో భాగంగా తమకే ఇవ్వాలని జనసేన నేతల డిమాండ్‌ టీడీపీ తరఫున మాజీ మంత్రి నిమ్మల కుటుంబం ఆశలు కుల సమీకరణల్లో భాగంగా ఎవరికి వారుగా లాబీయింగ్‌

పావగడ: కొన్నేళ్లుగా కనుమరుగైన నక్సల్స్‌ కార్యకలాపాలు పావగడలో మళ్లీ పురుడుపోసుకుంటున్నాయి. పావగడ తాలూకాలోని కనికలబండ గ్రామంలో ఓ ఇంటి గోడకు అతికించిన నక్సల్‌ బెదిరింపు లేఖను కలకలం రేపింది. ఈ లేఖను స్థానిక పోలీసులు మూడురోజుల క్రితం స్వాధీనం చేసుకున్నారు. దీంతో పావగడలో మళ్లీ విప్లవ ఉద్యమం ప్రాణం పోసుకుంటోందని స్థానికులు అనుమానాలు వ్యక్తం చేస్తున్నారు. దీనిపై స్థానిక పోలీసులు దర్యాప్తు ప్రారంభించారు. రూ.5 లక్షలు పార్టీఫండ్‌ ఇవ్వాలి.. నక్సల్స్‌ అతికించినట్లుగా పేర్కొంటున్న లేఖ ముత్తవకుంట్ల భూషప్పకు కామ్రేడ్‌ దేవన్న రాసినట్లుగా ఉంది. తాము స్వచ్ఛా సమాజం కోసం తరాలుగా పోరాటాలు చేస్తున్నామని, పేదలపై దోపిడీ, దౌర్జన్యం ఎక్కడ జరుగుతుందో అక్కడ తమ ఉద్యమం పుడుతుందని పేర్కొన్నారు. కనికలబండ గ్రామంలో రాజకీయ గూండాల మధ్య నలిగి పోతున్న ఉప్పర వెంకటేశులు విషయం తమకు తెలిసిందని, అందువల్ల ఆ గూండా శక్తులను అణచి వేయడానికి తమ జనశక్తి పార్టీ తాలూకాలో తిరుగుబాటు చేస్తోందని పేర్కొన్నారు. అందుకుగాను పార్టీకి సహకరించి రూ.5 లక్షలు పార్టీ ఫండుగా ఇవ్వాలని, నకరాలు చేసినా, పోలీసులకు సమాచారం ఇచ్చినా ఉక్కపాదంతో అణచి వేస్తామని హెచ్చరించారు. సెప్టెంబర్‌ 16వ తేదీ (బుధవారం) లోపు డబ్బులు కనికలబండ కురువ చంద్రప్ప కుమారుడు లాయర్‌ సుబ్రహ్మణ్యంకు అందించాలని, లాయర్‌కు ఎలాంటి ప్రాబ్లమ్‌ రాకుండా చూసుకోవాలని లేఖలో పేర్కొన్నారు. ఈలేఖ స్థానికంగా కలకలం రేపగా, రాష్ట్రస్థాయిలో చర్చ జరుగుతోంది. మరోవైపు పోలీసు ఉన్నతాధికారులు కూడా దీనిపై దృష్టిసారించి దర్యాప్తు చేపట్టారు.

రాప్తాడు రూరల్‌: అనధికారిక కోతలతో వ్యవసాయానికి విద్యుత్‌ సక్రమంగా అందడం లేదని, బోర్లు పనిచేయక పంటలు నిలువునా ఎండిపోతున్నాయని రాప్తాడు మాజీ ఎమ్మెల్యే తోపుదుర్తి ప్రకాష్‌రెడ్డి వాపోయారు. సోమవారం అనంతపురం రూరల్‌, ఆత్మకూరు, రాప్తాడు మండలాలకు చెందిన పలువురు రైతులతో కలిసి ప్రజా సమస్యల పరిష్కార వేదికలో కలెక్టర్‌ ఆనంద్‌ను కలిసి వినతిపత్రం అందజేశారు. ఈ సందర్భంగా తోపుదుర్తి ప్రకాష్‌రెడ్డి మాట్లాడుతూ కరెంటు సమస్యలపై రైతులు సబ్‌స్టేషన్లకు వెళ్లి ధర్నాలు చేసే పరిస్థితి ఏర్పడిందన్నారు. నాడు వైఎస్సార్‌ వ్యవసాయానికి 7 గంటల ఉచిత కరెంటు ఇస్తే.. వైఎస్‌ జగన్‌ 9 గంటలకు పెంచారని గుర్తు చేశారు. ఇప్పుడు వ్యవసాయానికి నిర్దేశించిన సమయంలో విద్యుత్‌ కోతలు విధిస్తున్నారన్నారు. ఇప్పటికే వర్షాలు లేకపోవడంతో రైతులు తీవ్ర ఇబ్బందులు పడుతున్నారని, ఉన్న భూగర్భ జలాలతో పంటలను కాపాడుకుందామంటే కరెంటు కోతలు వేధిస్తున్నాయని ఆందోళన వ్యక్తం చేశారు. రోజుకు 2–3 గంటలు కూడా విద్యుత్‌ సరఫరా కావడం లేదని, 300 ఓల్టేజీ ఉండాల్సిన చోట 150–200 మాత్రమే ఉంటోందని తెలిపారు. తక్కువ ఓల్టేజీతో బోర్లు, మోటార్లు కాలిపోతున్నాయన్నారు. ఎల్‌–నినో ప్రభావం ఉంటుందని ముందే పేరూరు డ్యాంకు నీళ్లు నింపాలని కోరినా ఎమ్మెల్యే పరిటాల సునీత, అధికారులు పట్టించుకోలేదన్నారు. హంద్రీ–నీవా కాలువకు కాంక్రీట్‌ లైనింగ్‌ వేయొద్దని విజ్ఞప్తి చేసినా పట్టించుకోకుండా రైతులకు తీరని అన్యాయం చేశారన్నారు. పీఏబీఆర్‌ కుడికాలువకు నీళ్లిచ్చే పరిస్థితి కూడా కనిపించడం లేదన్నారు. గతేడాది 7 నెలల పాటు హంద్రీ–నీవా ద్వారా చిత్తూరు జిల్లాకు 5.5 టీఎంసీల నీరు ఇస్తే.. కేవలం 2.5 టీఎంసీలు మాత్రమే చెరువులకు చేరాయని, మిగిలిన 3 టీఎంసీలు లాసెస్‌ అయ్యాయని తెలిపారు. ఆ నీటిని ఇక్కడికి ఇస్తే పీఏబీఆర్‌ కుడికాలువ కింద ఉన్న చెరువులన్నీ నిండేవన్నారు. ఇప్పటికై నా అఖిలపక్ష సమావేశం ఏర్పాటు చేసి తాగు–సాగునీరు, విద్యుత్‌ సమస్యలపై దీర్ఘకాళిక ప్రణాళిక రూపొందించాలని కలెక్టర్‌ను తోపుదుర్తి ప్రకాష్‌రెడ్డి కోరారు. కలెక్టర్‌కు సమస్య విన్నవించిన మాజీ ఎమ్మెల్యే తోపుదుర్తి ప్రకాష్‌రెడ్డి

ధర్మవరం: ‘‘ఎన్నికలకు ముందు కూటమి నాయకుల మాయమాటలను నమ్మి ఓట్లు వేశాం...తీరా అధికారంలోకి వచ్చాక మమ్మల్ని నమ్మించి నట్టేట ముంచారు. గత ప్రభుత్వం అందించిన నేతన్న నేస్తం పథకానికి రెండేళ్లు మంగళం పాడారు. తీరా ఈ ఏడాది నేతన్న సేవలో అంటూ పథకాన్ని ప్రారంభించినా కూటమి పార్టీల నేతలే పంచుకుతిని అర్హులకు మొండి చేయి చూపారు’’ అంటూ పలువురు చేనేత కార్మికులు మాజీ ఎమ్మెల్యే కేతిరెడ్డి వెంకటరామిరెడ్డి ఎదుట కన్నీటి పర్యంతమయ్యారు. ‘గుడ్‌మార్నింగ్‌ ధర్మవరం’ కార్యక్రమంలో భాగంగా మాజీ ఎమ్మెల్యే కేతిరెడ్డి వెంకటరామిరెడ్డి సోమవారం పట్టణంలోని 8వ వార్డులో పర్యటించారు. చేనేతల ఇళ్ల వద్దకు వెళ్లి సమస్యలు అడిగి తెలుసుకున్నారు. ఈ సందర్భంగా పలువురు చేనేత కార్మికులు మాట్లాడుతూ... గత వైఎస్సార్‌ కాంగ్రెస్‌ పార్టీ ప్రభుత్వంలో నేతన్న నేస్తం పథకం కింద ఏటా రూ.24 వేలు ఠంఛన్‌గా సాయం అందేదన్నారు. ప్రభుత్వం మారినప్పటి నుంచి రెండేళ్లపాటు పథకం నిలిపివేశారన్నారు. మరోవైపు ముడిపట్టు ధరలు పెరిగి అప్పుల బాధలతో అల్లాడిపోయామన్నారు. తీరా ఈ ఏడాది నెల కిందట ‘నేతన్నసేవలో’ అంటూ పథకం అమలు చేసినా...అర్హులకు అందలేదన్నారు. ఆటోవాళ్లు, బేల్దార్లు, కూలీలకు పథకం వర్తింపజేసి వారి నుంచి సగం మొత్తం తీసుకున్నారన్నారు. చేనేత మగ్గాలున్న తమ దరఖాస్తులను చెత్తబుట్టలో పడేశారన్నారు. ఎలాగైనా తమకు న్యాయం చేయాలని కన్నీటి పర్యంతమయ్యారు. మూడేళ్ల సాయం అందించే వరకూ పోరాడతాం ‘నేతన్న సేవ’లో పథకాన్ని కూటమి పార్టీల నాయకులు, కార్యకర్తలు ఆదాయ వనరుగా మార్చుకుని సగం సగం పంచుకుని తినడంపై కేతిరెడ్డి తీవ్ర ఆగ్రహం వ్యక్తం చేశారు. ఎన్నికలకు ముందు హామీ ఇచ్చిన విధంగా రెండేళ్ల పాటు పథకం నిలిపివేసిన బకాయిలతోపాటు ఈ ఏడాదితో కలిపి ఏడాదికి రూ.25 వేల చొప్పున మొత్తం ఒక్కో కుటుంబానికి రూ.75 వేలు ఇవ్వాల్సిందేనన్నారు. ఇప్పటికే దశల వారీగా వైఎస్సార్‌సీపీ తరఫున పోరాటం చేశామన్నారు. కూటమి నాయకులు, కార్యకర్తలకే పథకం వర్తింపజేసి అర్హులకు అన్యాయం చేశారన్నారు. ధర్మవరం నియోజకవర్గంలోనే ఇప్పటికే 10,500 మందికి ‘నేతన్నసేవ’లో సాయం అందించామని ప్రభుత్వం చెబుతోందని, ఆ నిధులు అర్హులకు మాత్రం అందలేదన్నారు. ఇప్పుడు మళ్లీ 10 వేలకుపైగా దరఖాస్తులు వచ్చాయని, అవి కూడా అనర్హులకు కట్టబెట్టేందుకే సన్నాహాలు చేస్తున్నారన్నారు. అర్హుల జాబితా ఇప్పటికే తాము సేకరించామని, వారికి న్యాయం జరిగే వరకు పోరాటం ఉధృతం చేస్తామన్నారు. చేనేతలు అధైర్య పడవద్దని కేతిరెడ్డి భరోసానిచ్చారు. కార్యక్రమంలో వైఎస్సార్‌సీపీ నాయకులు, కార్యకర్తలు, చేనేత నాయకులు, కార్మికులు తదితరులు పాల్గొన్నారు. ‘నేతన్న సేవ’ పేరుతో పంచుకుతిన్నారు అర్హులకు అన్యాయం చేశారు కేతిరెడ్డి ఎదుట చేనేతల ఆవేదన అధైర్య పడవద్దు... అండగా ఉంటానని కేతిరెడ్డి భరోసా

శింగనమల: ఉల్లికల్లు పెన్నానది నుంచి ఇసుక అక్రమ తరలింపు నిరాటంకంగా సాగుతోంది. పోలీసులు, మైనింగ్‌, రెవెన్యూ అధికారులు దాడులు చేసినా రాజకీయ నాయకుల అండదండలతో వెనక్కు తగ్గడం లేదు. అధికార పార్టీకి చెందిన కొంతమంది నాయకులు అక్రమార్జనే ధ్యేయంగా ఇసుక రవాణా చేస్తున్నారు. పెన్నానదిలో జేసీబీ పెట్టి ట్రాక్టర్లతో ఒక చోటకు డంప్‌ చేసుకుని, అక్కడి నుంచి రాత్రిపూట టిప్పర్లతో తరలిస్తున్నారు. చంద్రబాబు ప్రభుత్వం వచ్చిన రెండున్నరేళ్లలో దాదాపు రూ.3 కోట్లు విలువ చేసే ఇసుకను అమ్ముకున్నట్లు ప్రజలు చర్చించుకుంటున్నారు. సీజ్‌ చేసిన ఇసుకనూ వదల్లేదు ఉల్లికల్లు పెన్నానది నుంచి ఇసుకను అక్రమంగా తరలిస్తున్నారని పత్రికల్లో వచ్చిన కథనాలకు స్పందించిన రెవెన్యూ, మైనింగ్‌ అధికారులు, పోలీసులు సంయుక్తంగా గత నెల 18న దాడులు చేసి, ఇసుక డంప్‌లను గుర్తించారు. దాదాపు 300 టన్నుల ఇసుక ఉందని లెక్క కట్టారు. కొద్దిరోజుల తర్వాత అక్రమార్కులు మళ్లీ ఇసుక తవ్వకాలు చేపట్టారు. ఈసారి అక్రమ ఇసుక తవ్వకంతో పాటు అధికారులు సీజ్‌ చేసిన ఇసుకనూ రాత్రికి రాత్రే తరలించారు. సీజ్‌ చేసిన ఇసుక ఆనవాళ్లు లేకుండా చేశారు. ఇష్టారాజ్యంగా ఇసుకను తోడేస్తే భూగర్భజలాలు తగ్గిపోతాయని రైతులు ఆందోళన చెందుతున్నారు.

నల్లచెరువు: రాష్ట్ర షెడ్యూల్‌ తెగల (ఎస్టీ) కమిషన్‌ చైర్మన్‌ సొల్ల బోజిరెడ్డి మంగళవారం మండలంలో పర్యటించనున్నట్లు తహసీల్దార్‌ రవి నాయక్‌ తెలిపారు. ఈ మేరకు సోమవారం ఆయన ఒక ప్రకటన విడుదల చేశారు. తన పర్యటనలో భాగంగా ఎస్టీ కమిషన్‌ చైర్మన్‌ మండలంలోని బాలేపల్లి తండా గ్రామాన్ని సందర్శించనున్నట్లు పేర్కొన్నారు. గ్రామాల్లోని గిరిజనులకు అందుతున్న ప్రభుత్వ పథకాలు, వారి సమస్యలు, ప్రభుత్వ పథకాల అమలులో పడుతున్న ఇబ్బందులను స్వయంగా అడిగి తెలుసుకోనున్నట్లు వెల్లడించారు. చిన్నారుల వేలిముద్రలు నవీకరించండి ● కలెక్టర్‌ శ్యాం ప్రసాద్‌ ప్రశాంతి నిలయం: పిల్లల ఆధార్‌ను అప్‌డేట్‌ చేయడంతో పాటు వేలిముద్రలను నవీకరించాలని, ఈ ప్రక్రియను మూడు నెలల్లోపు పూర్తి చేయాలని కలెక్టర్‌ ఏ.శ్యాం ప్రసాద్‌ అధికారులను ఆదేశించారు. సోమవారం కలెక్టరేట్‌లోని మినీ కాన్ఫరెన్స్‌ హాలులో జిల్లా స్థాయి ఆధార్‌ మానిటరింగ్‌ కమిటీ సమావేశం జరిగింది. ఈ సందర్భంగా కలెక్టర్‌ మాట్లాడుతూ, జిల్లాలో 0 – 5 ఏళ్లలోపు వయస్సు ఉన్న పిల్లలకు సంబంధించిన 25,291 ఆధార్‌ అప్‌డేషన్లు పెండింగ్‌ ఉన్నాయని, వాటిని వీలైనంత త్వరగా పూర్తి చేయాలన్నారు. ఇందుకోసం వైద్య, ఆరోగ్య శాఖ, అంగన్‌ వాడీ కేంద్రాల సిబ్బంది సహకారం తీసుకోవాలన్నారు. పెండింగ్‌లో ఉన్న ఆధార్‌ అప్‌డేషన్ల కోసం పాఠశాలలు, జూనియర్‌ కళాశాలల్లో ప్రత్యేక శిబిరాలు ఏర్పాటు చేసే ప్రక్రియను వేగవంతం చేయాలని డీఈఓ, ఆర్‌ఐఓలను కలెక్టర్‌ ఆదేశించారు. ప్రతి నెలా రెండు ప్రత్యేక ఆధార్‌ శిబిరాలు నిర్వహించాలన్నారు. ఆధార్‌ సేవా కేంద్రాల్లో యూఐడీఏ నిబంధనల కంటే అధికంగా రుసుము వసూలు చేస్తే కఠిన చర్యలు తప్పవని హెచ్చరించారు. ఆధార్‌కు సంబంధించిన సమాచారం కోసం జిల్లా ఆధార్‌ నోడల్‌ అధికారి కృపానంద రెడ్డిని 9154409500 నంబరులో సంప్రదించాలని సూచించారు. కార్యక్రమంలో ‘స్వర్ణ గ్రామ–స్వర్ణ వార్డు’ సచివాలయాల జిల్లా అధికారి శ్రీలక్ష్మి, ఆర్‌ఐఓ కేశవ ప్రసాద్‌, యూఐడీఏఐ అసిస్టెంట్‌ మేనేజర్‌ దామోదర్‌, హెల్త్‌ ఆఫీసర్లు, సీఎస్సీ జిల్లా మేనేజర్‌ పాండు తదితరులు పాల్గొన్నారు. అర్జీలన్నీ సకాలంలో పరిష్కరించాలి ● జాయింట్‌ కలెక్టర్‌ మౌర్య భరద్వాజ్‌ ప్రశాంతి నిలయం: ‘ప్రజా సమస్యల పరిష్కార వేదిక’లో అందే అర్జీలన్నీ సకాలంలో పరిష్కరించాలని జాయింట్‌ కలెక్టర్‌ మౌర్య భరద్వాజ్‌ అధికారులను ఆదేశించారు. సోమవారం పుట్టపర్తి రైల్వేస్టేషన్‌ సమీపంలోని రెవెన్యూ భవన్‌లో నిర్వహించిన ‘ప్రజా సమస్యల పరిష్కార వేదిక’ కార్యక్రమంలో ఆయన పాల్గొని ప్రజల నుంచి అర్జీలు స్వీకరించారు. జిల్లా నలుమూలల నుంచి వచ్చిన ప్రజల వివిధ సమస్యలపై 323 అర్జీలు అందించగా...వాటిని ఆయా శాఖలకు పంపారు. అర్జీల పరిష్కారంపై అధికారులు ప్రత్యేక శ్రద్ధ చూపాలన్నారు. కార్యక్రమం అనంతరం జేసీ అధికారులతో సమావేశమయ్యారు. ఈ సందర్భంగా జాయింట్‌ కలెక్టర్‌ మాట్లాడుతూ, అర్జీలన్నీ నిర్ణీత గడువులోపు పరిష్కరించాలన్నారు. అర్జీలు పునరావృతం కాకుండా చూసుకోవాల్సిన బాధ్యత అధికారులదేనన్నారు. ప్రభుత్వం అందిస్తున్న సంక్షేమ పథకాలు అర్హులైన ప్రతి ఒక్కరికీ అందించే లక్ష్యంతో పని చేయాలని ఆధికారులను ఆదేశించారు. కార్యక్రమంలో డీఆర్‌ఓ కొండయ్య, ఎస్‌డీసీ విజయకుమారి, పుట్టపర్తి ఆర్డీఓ సువర్ణ, వివిధ శాఖల జిల్లా అధికారులు పాల్గొన్నారు. రిషికేశ్‌లో తనకల్లు వాసి మృతి తనకల్లు: గంగాస్నానం చేసేందుకు భార్యతో కలిసి రిషికేశ్‌ వెళ్లిన ఓ వ్యక్తి గుండెపోటుతో మృతి చెందాడు. వివరాల్లోకి వెళితే...తనకల్లుకు చెందిన సురేంద్రబాబు (62) స్థానిక మూడురోడ్ల కూడలిలో కొన్నేళ్లుగా కిరాణ దుకాణం నిర్వహిస్తున్నాడు. ఐదు రోజుల క్రితం భార్య సుధావాణితో కలిసి గంగా స్నానం చేయడానికి రిషికేశ్‌కు వెళ్లాడు. సోమవారం రిషికేశ్‌లో ఉన్న సురేంద్రబాబుకు గుండెపోటు రావడంతో కుప్పకూలిపోయాడు. వెంటనే స్థానికులు సమీపంలోని ఆస్పత్రికి తీసుకువెళ్లగా... అప్పటికే అతను మృతి చెందినట్లు వైద్యులు నిర్ధారించారు. మృతునికి ఒక కుమారుడు, ఒక కుమార్తె ఉన్నారు.

మడకశిర: ఎల్‌–నినో ప్రభావంతో తీవ్ర వర్షాభావ పరిస్థితులు నెలకొన్నాయని, తాగునీటి సమస్యతో పాటు పశుగ్రాసం కొరత తీవ్ర రూపం దాల్చిందని వైఎస్సార్‌ సీపీ నియోజకవర్గ సమన్వయకర్త ఈరలక్కప్ప అన్నారు. గ్రాసం కొరతతో రైతులు తమ పశువులను కబేళాలకు తరలిస్తున్నారని ఆవేదన వ్యక్తం చేశారు. ప్రభుత్వం వెంటనే పశుగ్రాసం, దాణా సరఫరా చేసి మూగ జీవాలు కబేళాలకు తరలిపోకుండా చూడాలని కోరారు. సోమవారం ఆయన వైఎస్సార్‌సీపీ నాయకులతో కలిసి ఆర్డీఓ కార్యాలయం ఎదుట నిరసన తెలిపారు. అనంతరం మూగజీవాలను ఆదుకోవాలని కోరుతూ ఆర్డీఓ నాగప్రసన్నలక్ష్మికి వినతి పత్రం సమర్పించారు. ఈ సందర్భంగా ఈరలక్కప్ప మాట్లాడుతూ... ఈ ఏడాది మడకశిర నియోజకవర్గంలో తీవ్ర వర్షాభావ పరిస్థితులు ఏర్పడ్డాయన్నారు. గ్రాసం కొరత తీవ్రరూపం దాల్చడంతో మూగజీవాల పరిస్థితి కడు దయనీయంగా మారిందని ఆవేదన వ్యక్తం చేశారు. అయినా చంద్రబాబు ప్రభుత్వంలో ఏమాత్రం చలనం లేదన్నారు. స్థానిక ప్రజాప్రతినిధులు కూడా పట్టించుకోవడం లేదని ఆరోపించారు. మూగ జీవాలకు తాగునీటి కొరత కూడా అధికంగా ఉందన్నారు. కరువు పరిస్థితులు తీవ్రంగా ఉన్నా... చంద్రబాబు ప్రభుత్వం ఇంతవరకు కరువు మండలాలను కూడా ప్రకటించలేదన్నారు. కరువు నివారణ చర్యలు చేపట్టడంలో ప్రభుత్వం పూర్తిగా విఫలమైందని ధ్వజమెత్తారు. వెంటనే మొద్దు నిద్ర వీడి కరువు నివారణ చర్యలు చేపట్టాలని కోరారు. లేకపోతే పశుసంపద కనుమరుగైపోవడం ఖాయమన్నారు. రైతులు ఉపాధి కోసం వలస వెళ్లాల్సిన పరిస్థితి ఏర్పడుతుందని తెలిపారు. స్థానిక ప్రజా ప్రతినిధులు ఈవిషయంలో బాధ్యతాయుతంగా వ్యవహరించాలని హితవు పలికారు. కార్యక్రమంలో వైఎస్సార్‌ సీపీ మండల కన్వీనర్‌ శ్రీరాములు, పట్టణ కన్వీనర్‌ ఓంకుమార్‌, ఎస్సీ సెల్‌ జిల్లా అధ్యక్షుడు నరసింహమూర్తి, పంచాయతీరాజ్‌ విభాగం రాష్ట్ర కార్యదర్శి నాగభూషణ్‌రెడ్డి, రైతు విభాగం రాష్ట్ర కార్యదర్శి రామిరెడ్డి, ఎస్సీ సెల్‌ రాష్ట్ర కార్యదర్శి తిప్పేస్వామి, నియోజకవర్గ బూత్‌ కమిటీ అధ్యక్షుడు మల్లికార్జున, పబ్లిసిటీ వింగ్‌ నియోజకవర్గ అధ్యక్షుడు సికిందర్‌, పట్టణ ఉపాధ్యక్షుడు గోపి, పట్టణ బూత్‌ కమిటీ అధ్యక్షుడు రవీంద్రారెడ్డి, పట్టణ పబ్లిసిటీ వింగ్‌ అధ్యక్షుడు రఘునందన్‌, పంచాయతీరాజ్‌ విభాగం జిల్లా ఉపాధ్యక్షుడు చిరంజీవి, యువజన విభాగం పట్టణ అధ్యక్షుడు బాబు, స్థానిక నాయకులు శీన, సురంగల నాగరాజు తదితరులు పాల్గొన్నారు. ఆర్డీఓకు వైఎస్సార్‌సీపీ సమన్వయకర్త ఈరలక్కప్ప వినతి గ్రాసం కొరతతో మూగజీవాలు కబేళాలకు తరలుతున్నాయని ఆవేదన

ధర్మవరం అర్బన్‌: ‘‘వైద్యశాఖలో దీర్ఘకాలికంగా పనిచేస్తున్న అర్హులైన కాంట్రాక్ట్‌ ఉద్యోగులను వెంటనే పర్మినెంట్‌ చేయాలి. అంతవరకూ కాంట్రాక్ట్‌ ఉద్యోగులందరికీ వంద శాతం గ్రాస్‌ వేతనం చెల్లించాలి. విధి నిర్వహణలో మృతి చెందిన కాంట్రాక్ట్‌ ఉద్యోగి కుటుంబానికి రూ.50 లక్షలు ఎక్స్‌గ్రేషియాతోపాటు కుటుంబంలో అర్హులైన వారికి ఉద్యోగం ఇవ్వాలి’’ అని ఉద్యోగులు డిమాండ్‌ చేశారు. తమ న్యాయమైన డిమాండ్ల సాధన కోసం ఉద్యమబాట పట్టిన కాంట్రాక్ట్‌ మెడికల్‌, పారా మెడికల్‌ ఉద్యోగులు సోమవారం వినూత్నంగా నిరసన తెలిపారు. ఆంధ్రప్రదేశ్‌ మెడికల్‌ అండ్‌ హెల్త్‌ కాంట్రాక్ట్‌ ఎంప్లాయీస్‌ జాయింట్‌ యాక్షన్‌ కమిటీ ఆధ్వర్యంలో స్థానిక ప్రభుత్వ ఆస్పత్రి ఆవరణలో నల్లబ్యాడ్జీలు ధరించిన ఉద్యోగులు మోకాళ్లపై కూర్చుని వినూత్నంగా నిరసన వ్యక్తం చేశారు. ఈ సందర్భంగా ఉద్యోగులు మాట్లాడుతూ, కాంట్రాక్ట్‌ ఉద్యోగులకు ఈపీఎఫ్‌ అమలు చేయాలని, అనారోగ్యానికి గురైన ఉద్యోగులకు పూర్తి జీతంతో కూడిన వైద్య సెలవులు మంజూరు చేయాలని కోరారు. అలాగే కాంట్రాక్ట్‌ ఉద్యోగి, వారి కుటుంబ సభ్యులకు హెల్త్‌కార్డు సౌకర్యం కల్పించాలని డిమాండ్‌ చేశారు. తమ న్యాయమైన డిమాండ్ల సాధనకు నిరంతరం పోరాడతామని స్పష్టం చేశారు. నిరసనలో కాంట్రాక్ట్‌ మెడికల్‌, పారా మెడికల్‌ ఉద్యోగులు వెంకట రామంజనేయులు, పద్మ, మహబూబ్‌జాన్‌, అరుణ, కమలమ్మ, లూథియా, మాధవీలత, లక్ష్మీనరసమ్మ, సంధ్య, జయమ్మ, అమిద, అశ్విని, లలిత తదితరులు పాల్గొన్నారు.

● ఉచితం మాటున ఊడ్చేస్తున్నారు ● నదులు కొల్లగొడుతున్న ‘పచ్చ’ నేతలు ● పట్టించుకోని అధికార యంత్రాంగం అనంతపురం టౌన్‌: చంద్రబాబు ప్రభుత్వం వచ్చాక అధికార తెలుగుదేశం పార్టీ నేతలకు ఇసుక ఆదాయ వనరుగా మారింది. నదీ పరివాహక ప్రాంతాలలో అనుమతులు లేకుండానే జేసీబీలు, హిటాచీలను పెట్టి ఇసుకను తవ్వేస్తున్నారు. ప్రజాప్రతినిధుల ఒత్తిళ్లకు తలొగ్గి.. అధికారులు పట్టించుకోకపోవడంతో ఇసుక దందా యథేచ్ఛగా సాగిపోతోంది. శింగనమల నియోజకవర్గంలో ఇసుక లభ్యమయ్యే ప్రాంతాలు ఎక్కువగా ఉన్నాయి. గార్లదిన్నె మండలంలోని పెన్నానది, శింగనమల కూతలేరు నదితోపాటు పెన్నా పరివాహక ప్రాంతం పెద్ద ఎత్తున ఉంది. యల్లనూరు మండలంలో చిత్రావతి నది ఉండడంతో ఇసుక లభ్యత అధికంగా ఉంది. దీంతో టీడీపీ నాయకుల కన్ను వీటిపై పడింది. రాత్రింబవళ్లు ఇసుకను తోడేస్తున్నారు. రీచ్‌లు లేకున్నా.. ఇసుక రవాణా కళ్యాణదుర్గం నియోజకవర్గంలో ఇసుక రీచ్‌లు లేవు. అయినా ఇసుకకు కొరత లేదు. ఎవరికై నా ఇసుక కావాలంటే టీడీపీ నాయకులు ఇంటి వద్దకే డెలివరీ చేస్తున్నారు. బహ్మసముద్రం మండలంలోని వేదావతి, కంబదూరు మండలంలోని పెన్నానది నుంచి ఇసుకను తవ్వేసి కళ్యాణదుర్గం మండల కేంద్రంతోపాటు కర్ణాటక ప్రాంతంలో విక్రయించి సొమ్ము చేసుకుంటున్నారు. ఇది చాలదన్నట్లు స్థానిక ప్రజాప్రతినిధి ఆర్‌ఎంసీ ప్లాంటు ఏర్పాటు చేశారు. ప్లాంటుకు పెద్ద ఎత్తున ఇసుకను తరలించేస్తున్నా రెవెన్యూ, ఇరిగేషన్‌ అధికారులు నిద్ర మత్తు వీడడం లేదు. ఇసుకాసురులు ముదిగుబ్బ సమీపంలోని చిత్రావతి నదిని చిత్రవధ చేస్తున్నారు. పగలు, రాత్రి తేడా లేకుండా పీసీరేవు సమీపంలోని చిత్రావతి నుంచి ఇసుకను తవ్వి అక్రమంగా రవాణా చేస్తూ రూ.కోట్లు కూడబెడుతున్నారు. వీరి ధన దాహానికి చిత్రావతి నది రూపురేఖలు మారిపోగా, పీసీరేపు గ్రామ రహదారి దెబ్బతినింది. అధికారులుకు ఫిర్యాదు చేసినా స్పందన లేకపోవడంతో ఈనెల 5వ తేదీన గ్రామస్తులే రోడ్డుకు అడ్డంగా సిమెంట్‌ పైపులు వేసి ఇసుక వాహనాలను అడ్డుకున్నారు.

బత్తలపల్లి: ‘‘తీవ్ర వర్షాభావంతో రైతులంతా సాగునీటి కష్టాలు ఎదుర్కొంటున్నారు. రైతులను ఆదుకోవాల్సిన చంద్రబాబు ప్రభుత్వం... దుర్మార్గంగా వ్యవహరిస్తోంది. హంద్రీ–నీవా కాలువకు సిమెంట్‌తో లైనింగ్‌ వేసి నీటిని కుప్పానికి తరలించింది. ఇంతకంటే దుర్మార్గమైన పాలకులు ఎక్కడైనా ఉంటారా... జిల్లా రైతులకు ఇంత అన్యాయం జరుగుతున్నా...జిల్లాకు చెందిన ఎమ్మెల్యేలు, మంత్రులు ఎందుకు నోరుమెదపడం లేదు’’ అంటూ మాజీ ఎమ్మెల్యే కేతిరెడ్డి వెంకటరామిరెడ్డి తీవ్ర ఆగ్రహం వ్యక్తం చేశారు. రైతులు స్వల్పకాలిక పంటలు సాగు చేసుకోవాలని సూచిస్తున్న ప్రభుత్వం.. ప్రత్యామ్నాయ ఏర్పాట్లు చేయడంలోనూ విఫలమైందన్నారు. గురువారం సాయంత్రం ఆయన మండలంలోని గుమ్మల్లకుంట గ్రామంలో వరిమడుగు నాగిరెడ్డి చీనీతోటను పరిశీలించారు. పదేళ్లుగా కాపాడుకుంటూ వస్తున్న చీనీచెట్లు నీరులేక ఎండిపోయాయని రైతు కేతిరెడ్డి ఎదుట వాపోయారు. ఈ సందర్భంగా కేతిరెడ్డి మాట్లాడుతూ.య.. కూటమి నేతలు రైతుల బాగోగులను పట్టించుకోవడంలేదన్నారు. వైఎస్సార్‌సీపీ ప్రభుత్వంలో ఐదేళ్లూ చెరువులకు నీరు విడుదల చేశామని, కూటమి ప్రభుత్వంలో చెరువులకు నీరు విడుదల చేయకపోగా... చెరువులో ఉన్న సంపద కోసం పాకులాడుతూ ఉన్న నీటిని బయటికి పంపేశారన్నారు. ధర్మవరం నియోజకవర్గంలోని ప్రధాన చెరువులు గొట్లూరు, అప్పరాచెరువు, రేగాటిపల్లి చెరువులకు హంద్రీనీవా, పీఏబీఆర్‌ డ్యాముల నుంచి నీరు విడుదల చేసి చెరువులు నింపితే కనీసం తాగునీరైన ప్రజలకు అందుబాటులో ఉంటుందన్నారు. చెరువులకు నీరు విడుదల చేయకపోవడంతో... పండ్లతోటలు, ఇతర పంటలు ఎండిపోతున్నాయని, వాటిని చూసి రైతులు కన్నీటి పర్యంతమవుతున్నారన్నారు. అమరావతిలో అద్ధాలకు ఖర్చు చేసే నిధులతో రాష్ట్రంలోని రైతులందరికీ పంటల బీమా ప్రీమియం చెల్లించవచ్చన్నారు. మంత్రి సత్యకుమార్‌ కేవలం నెలకు రెండు సార్లు నియోజకవర్గంలో పర్యటించి వెళ్లడం తప్ప, ఆయన ప్రజలకు ఎలాంటి మంచి పనులు చేయడంలేదన్నారు. కూటమి నేతలు ఇప్పటికై నా రైతుల ఇక్కట్లను, ఆవేదనను అర్థం చేసుకొని చెరువులకు నీరు విడుదల చేయాలన్నారు. ఎండిపోయిన చీనీ చెట్లను తొలగిస్తూ రైతు నాగిరెడ్డి బోరున విలపించడం తనను కలిచి వేసిందన్నారు. ఇదే పరిస్థితి ఉమ్మడి జిల్లా అంతటా ఉందన్నారు. రైతులకు సాగు నీరు ఇవ్వలేకపోయినా, కనీసం తాగడానికై నా నీరు ఇవ్వాలని కేతిరెడ్డి డిమాండ్‌ చేశారు. కార్యక్రమంలో వైస్‌ ఎంపీపీ గజ్జెల వెంగళరెడ్డి, రైతు విభాగం రాష్ట్ర కార్యదర్శి కమతం ఈశ్వరయ్య, యువజన విభాగం రాష్ట్ర కార్యదర్శి చల్లా మహేష్‌ నాయుడు, జిల్లా ప్రధాన కార్యదర్శి కోటి సురేష్‌, నియోజకవర్గ నాయకులు షరాబ్‌ యోగానంద ఆచారి, బండి వీరనారప్ప, బోయ సాంబ, మాజీ సర్పంచులు గొల్లపల్లి నరసింహరెడ్డి, సానే జయచంద్రారెడ్డి, చల్లా కరుణాకర్‌నాయుడు, గోపాల్‌, అక్కిం దామోదర్‌, మాదిరెడ్డి చెన్నారెడ్డి, మండల కన్వీనర్‌ జయరామిరెడ్డి, మాజీ కన్వీనర్‌ బగ్గిరి బయపరెడ్డి, మండల ఉపాధ్యక్షులు బ్యాల్ల పెద్దయ్య, రాంభూపాల్‌రెడ్డి, జాంపుల చంద్రమోహన్‌, ఈడిగ కాశప్ప, పోతుల శంకరరెడ్డి, శివారెడ్డి, సీతారాంరెడ్డి, రాజవీరారెడ్డి, ఉపేంద్రరెడ్డి, దివాకరరెడ్డి, సండ్రా రామకృష్ణ, నరేంద్రరెడ్డి, షాషు, నడిమింటి షేక్షావలితో పాటు పలువురు నాయకులు పాల్గొన్నారు. వర్షాల్లేక రైతులు అల్లాడుతుంటే..హంద్రీ–నీవా నీటిని కుప్పానికి తరలించడం దుర్మార్గం మండిపడిన మాజీ ఎమ్మెల్యే కేతిరెడ్డి వెంకటరామిరెడ్డి గుమ్మల్లకుంటలో ఎండిన చీనీ తోట పరిశీలన

అనంతపురం అగ్రికల్చర్‌/యల్లనూరు: ఫ్రూట్‌బౌల్‌ ఆఫ్‌ ఏపీగా ఖ్యాతినొంది, ఉద్యానహబ్‌గా రూపాంతరం చెందుతున్న కీలక తరుణంలో జిల్లాలో పండ్లతోటలు ముప్పుబారిన పడుతున్నాయి. నెలల తరబడి వర్షాలు లేక బోరుబావులు ఎండుముఖం పట్టాయి. కొత్తగా బోర్లు తవ్విస్తున్నా 10 శాతం కూడా ఫలితం కనిపించడం లేదు. దీంతో రైతులు దిక్కులు చూస్తున్న పరిస్థితి నెలకొంది. 2.96 లక్షల ఎకరాల్లో తోటలు.. జిల్లాలో 2.96 లక్షల ఎకరాల భారీ విస్తీర్ణంలో ఉద్యాన తోటలు విస్తరించాయి. అత్యధికంగా చీనీ తోటలు 90 వేల ఎకరాలు, మామిడి 35 వేలు, అరటి 35 వేలు, టమాట 40 వేలు, దానిమ్మ 12 వేల ఎకరాలు.. ఇలా 31 మండలాల పరిధిలోనూ తోటలు విస్తరించాయి. ఏటా 30 లక్షల మెట్రిక్‌ టన్నుల ఉద్యాన ఉత్పత్తులు, రూ.15 వేల కోట్లకు పైగా టర్నోవర్‌ జరుగుతున్నట్లు ఉద్యానశాఖ లెక్కలు చెబుతున్నాయి. చంద్రబాబు సర్కారు రైతులకు నీటి భద్రత కల్పించడంలో విఫలం కావడంతో కష్టాలు తప్పడం లేదు. రెండేళ్లుగా రైతులకు పరిహారం ఇవ్వలేదు. ఇన్‌పుట్‌ సబ్సిడీ కూడా ఇచ్చిన దాఖలాలు లేవు. తోటలు ఎండుతున్నా అటువైపు చూసే పరిస్థితి కనిపించడం లేదు. తోటలను కాపాడుకునేందుకు ట్యాంకర్లతో నీటి తడులు ఇస్తున్నా ఏ మూలకూ చాలడం లేదని రైతులు వాపోతున్నారు. ఆదుకున్న జగన్‌.. వైఎస్‌ జగన్‌మోహన్‌రెడ్డి ప్రభుత్వంలో అన్నదాతలను ఆదుకున్నారు. జిల్లాలో యల్లనూరు మండలంలోని కోమటికుంట్ల, గరుగుచింతలపల్లికి చెందిన చీనీ రైతులకే రూ. 1.70 కోట్ల పరిహారం అందించారంటే పరిస్థితి అర్థం చేసుకోవచ్చు. అప్పట్లో ఒక్కో రైతుకు రూ.4 లక్షల వరకు ఖాతాల్లో జమ చేయగా, ప్రస్తుత సర్కారు ఇప్పటికీ పైసా ఇవ్వకపోవడం గమనార్హం. వర్షాలు లేక, బోర్లలో నీళ్లు రాక ఎండుతున్న ఉద్యాన తోటలు పంటలను కాపాడుకునేందుకు రైతుల అష్టకష్టాలు నీటి భద్రత కల్పించడంలో చంద్రబాబు సర్కారు విఫలం ఉన్న మూడు బోర్లలో నీళ్లు తగ్గిపోయాయి. కొత్తగా బోరు వేసినా అర ఇంచు కూడా పడలేదు. ట్యాంకర్లతో తడి ఇద్దామంటే భారీగా ఖర్చు చేయాల్సిన పరిస్థితి. దీంతో ఏమి చేయాలో దిక్కుతోచక 5 ఎకరాల్లో 8 ఏళ్ల కిందట సాగు చేసిన 600 చీనీ చెట్లను ఇదిగో ఇలా పుట్లూరుకు చెందిన రైతు వై.వీరశేఖర్‌రెడ్డి జేసీబీ ద్వారా తొలగించేశాడు. గతంలో మూడు పంటలు తీసుకున్నానని, ప్రస్తుతం బోర్లలో నీళ్లు తగ్గిపోవడంతో ఈ దుస్థితి తలెత్తిందని వీరశేఖర్‌రెడ్డి ఆవేదన వ్యక్తం చేశాడు. ఇప్పటికే రూ.7 లక్షల నుంచి రూ.10 లక్షల వరకు నష్టం వచ్చిందని చెప్పాడు. ఇంకా రెండు ఎకరాల్లో మూడేళ్ల చెట్లు ఉన్నాయని, ఇదే పరిస్థితి కొనసాగితే రెండు మూడు నెలల్లో వాటిని కూడా తొలగించాల్సి ఉంటుందంటూ నిట్టూర్చాడు.

అగళి: మండల పరిధిలోని నరసంబూది గ్రామంలో గురువారం జిల్లా గ్రామ పంచాయతీ అధికారి సమత పర్యటించారు. జాతీయ మహిళా ఫ్రెండ్లీ ప్రోగ్రామ్‌కు నరసంబూది పంచాయతీ ఎంపిక కావడంతో పాఠశాల, అంగన్వాడీ కేంద్రం, గ్రామంలోని మౌలిక వసతులను పరిశీలించారు. అనంతరం జాతీయ మహిళా ఫ్రెండ్లీ ప్రోగ్రామ్‌, గ్రామసభ తదితర వాటిపై అధికారులతో చర్చించారు. గ్రామంలో మౌలిక వసతుల కల్పన, రోడ్లు డ్రైనేజీలు, తాగునీరు, విద్య, వైద్యం, ఉపాధి అవకాశాలు, పేదరిక నిర్మూలన, మహిళలు, బలహీన వర్గా అభ్యున్నతి తదితర వాటిపై చేపట్టబోయే కార్యాచరణపై మాట్లాడారు. ఉమెన్‌ ఫ్రెండ్లీ పంచాయతీ కార్యక్రమం కింద అభివృద్ధి పనులకు కేంద్రం ప్రత్యేకంగా నిధులు అందించే అవకాశం ఉందన్నారు. కార్యక్రమంలో డీడీఓ పెనుగొండ తేజోష్ణ , డీఎల్‌పీఓ శివనారాయణరెడ్డి, ఎంపీడీఓ నరేష్‌, గంగధర్‌, ఇన్‌చార్జ్‌ సీడీపీఓ రాధ, ఐసీడీఎస్‌ సూపర్‌వైజర్‌ లీలావతి, డెప్యూటీ ఎంపీడీఓలు రెడ్డి ప్రకాష్‌, పద్మ, మండల వ్యవసాయ అధికారి నాగరాజు తదితరులు పాల్గొన్నారు.

అనంతపురం: జిల్లాలో ఈ నెల 12న జాతీయ లోక్‌ అదాలత్‌ నిర్వహించనున్నట్లు జిల్లా ప్రధాన న్యాయమూర్తి జస్టిస్‌ ఈ.భీమారావు తెలిపారు. ఈ మేరకు గురువారం ఓ ప్రకటన విడుదల చేశారు. జిల్లాలోని అన్ని స్టేషన్ల పరిధిలో ఉన్న రాజీ పడదగ్గ కేసులను నిర్ధారించి వాటి పరిష్కారానికి చొరవ తీసుకోవాలని సంబంధిత అధికారులకు సూచించారు. జిల్లాలో సంఖ్యాపరంగా ఎక్కువ కేసులు పరిష్కారం అయ్యేటట్లు కృషి చేయాలన్నారు. ఈ అవకాశాన్ని కక్షిదారులు సద్వినియోగం చేసుకోవాలని పిలుపునిచ్చారు. ఆర్థిక సమస్యలతో యువకుడి ఆత్మహత్య కనగానపల్లి (చెన్నేకొత్తపల్లి): కుటుంబ ఆర్థిక సమస్యలతో ఓ యువకుడు ఒంటిపై పెట్రోల్‌ పోసుకొని నిప్పంటించుకొని ఆత్మహత్యకు పాల్పడిన సంఘటన చెన్నేకొత్తపల్లి మండలం గొల్లవాళ్లపల్లిలో చోటుచేసుకుంది. స్థానికుల వివరాల మేరకు గొల్లవాళ్లపల్లికి చెందిన గొల్ల ప్రసాద్‌ (36) ధర్మవరంలో సిమెంట్‌ ఇటుకల ఫ్యాక్టరీ పెట్టుకొని జీవిస్తున్నాడు. అయితే కుటుంబ ఆర్థిక సమస్యలతో మద్యానికి బానిసైన అతను గురువారం ఇంటి దగ్గర ఒంటిపై పెట్రోల్‌ పోసుకొని నిప్పంటించుకున్నాడు. కుటుంబ సభ్యులు గమనించి వెంటనే మంటలు ఆర్పేందుకు ప్రయత్నించారు. కాని అతని శరీరం అప్పటికే చాలా కాలిపోయింది. తీవ్ర గాయాలు కావటంతో వెంటనే బెంగుళూరు తరలిస్తుండగా మార్గమధ్యలోనే చనిపోయాడు. మృతునికి భార్య, ఇద్దరు కుమారులు ఉన్నారు. రోడ్డు ప్రమాదంలో యువకుడి మృతి గుడిబండ: మండల పరిధిలోని మందలపల్లికి చెందిన భీమరాజు కుమారుడు జగదీష్‌ (25) రోడ్డు ప్రమాదంలో మృతి చెందాడు. స్థానికుల వివరాల మేరకు.. మృతుడు జగదీష్‌ వ్యవసాయ కూలీ పనులు చేసుకుంటూ జీవనం సాగించేవాడు. బుధవారం అర్ధరాత్రి పని నిమిత్తం 544 ఈ జాతీయ రహదారిపై హిందూపురానికి బయలుదేరాడు. అయితే మడకశిర మండలం బుళ్లసముద్రం గ్రామ సమీపంలో గుర్తు తెలియని వాహనం ఢీ కొట్టడంతో అక్కడిక్కడే మృతి చెందాడు. అటుగా వెళుతున్న ప్రయాణికులు గమనించి హుటాహుటిన మడకశిర ప్రభుత్వాస్పత్రికి తరలించారు. అప్పటికే జగదీష్‌ మృతి చెందినట్లు వైద్యులు నిర్ధారించారు. మృతుడి తల్లి ఆదిలక్ష్మీ ఫిర్యాదు మేరకు కేసు నమోదు చేసి దర్యాప్తు చేస్తున్నట్లు పోలీసులు తెలిపారు. ప్రమాదానికి కారణమైన గుర్తు తెలియని వాహనం కోసం గాలిస్తున్నట్లు పేర్కొన్నారు.

హిందూపురం టౌన్‌: రాష్ట్ర ప్రభుత్వం ప్రస్తుత మద్యం షాపుల లైసెన్సులను మరో సంవత్సరం పాటు రెన్యూవల్‌ చేసుకోవడానికి అవకాశం కల్పించిందని, అందువల్ల మద్యం షాపుల లైసెన్సుదారులు తమ షాపులను రెన్యూవల్‌ చేసుకోవాలని అనంతపురం జిల్లా ఎకై ్సజ్‌శాఖ డిప్యూటీ కమిషనర్‌ ఎస్‌కేడీవీ ప్రసాద్‌ తెలిపారు. ఈ మేరకు గురువారం పట్టణంలోని ఎకై ్సజ్‌ కార్యాలయంలో స్థానిక సీఐ లక్ష్మీదుర్గయ్యతో కలిసి పట్టణంలో మద్యం షాపు లైసెన్సుదారులతో ఆయన సమావేశం నిర్వహించారు. మద్యం షాపుల రెన్యూవల్‌కు సంబంధించి విధి విధానాలను ఆయన వివరించారు. ఒకవేళ మద్యం షాపులను రెన్యూవల్‌ చేసుకోకపోతే ప్రభుత్వ నిబంధనలు, ఆదేశాల మేరకు ఆ షాపును ప్రభుత్వం ఏర్పాటు చేస్తుందని స్పష్టం చేశారు. సమావేశంలో మద్యం షాపుల లైసెన్సుదారులు, సిబ్బంది పాల్గొన్నారు.

ఉరవకొండ/వజ్రకరూరు: కోర్టులో వాయిదా ముగించుకుని తిరిగి స్వగ్రామం వెళ్తున్న ముగ్గురిని మృత్యువు కబళించింది. కొన్ని నిమిషాల్లో ఇంటికి చేరుకోవాల్సిన వారు విగత జీవులుగా మారడం విషాదం నింపింది. వివరాలు.. వజ్రకరూరు గ్రామానికి చెందిన కణేకల్లు జైనుల్లా (45), మహబూబ్‌బాషా (32), భగవాన్‌ మహ్మద్‌రఫీ (30)లు గురువారం ఉదయం టీవీఎస్‌ ఎక్స్‌ఎల్‌ వాహనంలో ఉరవకొండ కోర్టుకు కేసు వాయిదా నిమిత్తం వచ్చి సాయంత్రం తిరుగు ప్రయాణయ్యారు. ఉరవకొండ దాటగానే టీవీ టవర్‌ సమీపంలో ఓ గుర్తు తెలియని వాహనం వీరిని బలంగా ఢీకొంది. వాహనానికి ఇరుక్కున్న ముగ్గురినీ అర కిలోమీటరు వరకు ఈడ్చుకెళ్లడంతో తీవ్ర గాయాలైన వారు అక్కడిక్కడే ప్రాణాలొదిలారు. దద్దరిల్లిన ఉరవకొండ ఆస్పత్రి.. మృతదేహాలను ఉరవకొండలోని ప్రభుత్వ ఆసుపత్రికి తరలించారు. విషయం తెలుసుకున్న మృతుల కుటుంబ సభ్యులు, బంధువులు పెద్ద ఎత్తున ఆస్పత్రికి తరలివచ్చారు. వారి రోదనలతో ఆసుపత్రి ప్రాంగణం దద్దరిల్లింది. ఒకేసారి ముగ్గురి మరణంతో వారి స్వగ్రామం వజ్రకరూరులో విషాద ఛాయలు అలుముకున్నాయి. ఒక్కగానొక్క కొడుకు.. రోడ్డు ప్రమాదంలో మృతి చెందిన మహ్మద్‌రఫీ తండ్రి మస్తాన్‌ కొన్నేళ్ల క్రితమే మృతి చెందాడు. అప్పటి నుంచి తల్లి శర్మాస్‌బీ కూలి పనులకు వెళ్తూ ఇద్దరు కుమార్తెలు, కుమారుడు మహ్మద్‌రఫీని పోషించుకుంటోంది. అందరినీ కంటికి రెప్పలా కాపాడుకుంటోంది. తనకు ఆధారమైన కుమారుడు రోడ్డు ప్రమాదంలో మృతి చెందడంతో శర్మాస్‌బీ, కుటుంబీకులు కన్నీరుమున్నీరుగా విలపించారు. ‘ఒక్కగానొక్క కుమారుడిని తీసుకుని పోయి ఇంటికి మగ దిక్కు లేకుండా చేశావా యా అల్లాహ్‌’ అంటూ శర్మాస్‌బీ రోదించిన తీరు అందరినీ కంటతడి పెట్టించింది. పెద్ద దిక్కు కోల్పోయిన కుటుంబం కణేకల్లు జైనుల్లాకు భార్య వహిదా, ఇద్దరు కుమార్తెలు, ఒక కుమారుడు ఉన్నారు. చిన్న హోటల్‌ పెట్టుకుని జైనుల్లా కుటుంబాన్ని పోషించుకుంటున్నాడు. అలాంటి ఇంటి పెద్ద చనిపోవడంతో కుటుంబం దిక్కులేకుండా పోయింది. ‘యా అల్లాహ్‌ ఇక నాకు, పిల్లలకు దిక్కెవరు?’ అంటూ వహిదా విలపించడం కలచివేసింది. మహబూబ్‌ బాషా భార్య 7 నెలల గర్భిణి.. ఉరవకొండ ఆర్టీసీ డిపోలో అప్రెంటిస్‌ విధానంలో మెకానిక్‌గా విధులు నిర్వర్తిస్తున్న మహబూబ్‌బాషాకు గుంతకల్లుకు చెందిన ఆశుతో వివాహమైంది. ఇతనికి ఏడాది వయసున్న కుమార్తె ఉంది. ప్రస్తుతం ఆశు ఏడు నెలల గర్భిణి కావడం గమనార్హం. ఇటీవల ఆమె డెలివరీ కోసం పుట్టింటికి వెళ్లింది. ఈ క్రమంలోనే మహబూబ్‌బాషా మృతి చెందడంతో ఆ కుటుంబంలో విషాదం నెలకొంది. ‘యా ఖుదా నా కుమారుడిపై ఇంత చిన్నచూపు చూశావా తండ్రీ’ అంటూ మహబూబ్‌బాషా తల్లి రమీజా రోదిస్తుండడం చూసిన పలువురి గుండె బరువెక్కింది. బైకును ఢీకొన్న గుర్తు తెలియని వాహనం ముగ్గురు వ్యక్తుల దుర్మరణం

ధర్మవరం అర్బన్‌: ప్రభుత్వ పాలిటెక్నిక్‌ కళాశాలకు నేషనల్‌ బోర్డ్‌ ఆఫ్‌ అక్రిడిటేషన్‌ గుర్తింపు పొడిగించారని ఆ కళాశాల ప్రిన్సిపాల్‌ సురేష్‌బాబు తెలిపారు. స్థానిక ప్రభుత్వ పాలిటెక్నిక్‌ కళాశాలలో గురువారం ఏర్పాటు చేసిన సమావేశంలో ప్రిన్సిపాల్‌ మాట్లాడుతూ కళాశాలకు ఈ ఏడాది జూన్‌ వరకు ఎన్‌బీఏ గుర్తింపు ఉండేదన్నారు. ఎన్‌బీఏ గుర్తింపు కోసం దరఖాస్తు చేసుకోవడంతో జూన్‌ 28న ఢిల్లీ నుంచి ఉన్నతాధికారులు పాలిటెక్నిక్‌ కళాశాలను పరిశీలించారన్నారు. తాజాగా కళాశాలకు 2029 డిసెంబర్‌ 31 వరకూ ఎన్‌బీఏ గుర్తింపు పొడిగించారని పేర్కొన్నారు. నేషనల్‌ బోర్డ్‌ ఆఫ్‌ అక్రిడిటేషన్‌ గుర్తింపుతో విద్యార్థులకు అంతర్జాతీయస్థాయిలో గుర్తింపు లభిస్తుందన్నారు. నాణ్యమైన విద్యను అందించే కళాశాలలకు ఎన్‌బీఏ గుర్తింపు ఇస్తారని తెలియజేశారు. 16 నుంచి డీఎడ్‌ సెమిస్టర్‌ పరీక్షలుపుట్టపర్తి: డీఎడ్‌ రెండో సెమిస్టర్‌ పరీక్షలు ఈనెల 16 నుంచి జరుగుతాయని డైట్‌ కళాశాల డైరెక్టర్‌ డాక్టర్‌ శ్రీనివాసులరెడ్డి గురువారం ఒక ప్రకటనలో తెలిపారు. ఈ నెల 19వ తేదీ వరకూ రోజూ ఉదయం 9 గంటల నుంచి 11.30 గంటల వరకు పరీక్ష ఉంటుందన్నారు. విద్యార్థులు www. bse. ap. gov. in వెబ్‌సైట్‌ నుంచి హాల్‌ టికెట్లు డౌన్‌లోడ్‌ చేసుకోవాలని సూచించారు. గంజాయి ముఠా అరెస్ట్‌ ● 1.5 కిలోల గంజాయి స్వాధీనం ఆత్మకూరు: గంజాయి విక్రయిస్తున్న ముఠాను పోలీసులు గురువారం ఆత్మకూరు మండలం పంపనూరు సమీపంలోని హంద్రీ నీవా కెనాల్‌ వద్ద అదుపులోకి తీసుకున్నారు. స్థానిక పోలీసుస్టేషన్‌లో ఏర్పాటు చేసిన విలేకరుల సమావేశంలో అనంతపురం రూరల్‌ ఇన్‌చార్జ్‌ డీఎస్సీ చంద్రశేఖర్‌, ఇటుకులపల్లి సీఐ హేమంత్‌కుమార్‌ వివరాలు తెలియజేశారు. వాహనాల తనిఖీలో భాగంగా గురువారం కళ్యాణదుర్గం నుంచి రెండు ద్విచక్ర వాహనాల్లో నలుగురు వ్యక్తులు రాగా అనుమానంతో వారిని తనిఖీ చేశామన్నారు. వారి దగ్గర 1.5 కిలోల గంజాయి, రెండు ద్విచక్ర వాహనాలను, మూడు సెల్‌ఫోన్‌లను స్వాదీనం చేసుకున్నట్లు పేర్కొన్నారు. గంజాయి విక్రయిస్తున్న కాకిమాని రాజు, (బళ్లారి టౌన్‌), నల్లబోతుల సుంకన్న (అనంతపురం), ఎడవాల మహేష్‌ (అనంతపురం)తో పాటు బాలుడిని అదుపులోకి తీసుకొని కేసు నమోదు చేసి రిమాండ్‌కు పంపినట్లు తెలియజేశారు. మహేష్‌పై ఇప్పటికే రెండు మర్డర్‌ కేసులు కూడా ఉన్నాయన్నారు. నలుగురిలో ఇద్దరిని కిట్ల ద్వారా పరీక్షించగా ఇద్దరికి పాజిటివ్‌ వచ్చిందన్నారు. కార్యక్రమంలో ఆత్మకూరు, ఇటుకలపల్లి ఎస్‌ఐలు లక్ష్మణరావు, విజయ్‌కుమార్‌, ఏఎస్‌ఐ దస్తగిరి, గౌస్‌, కానిస్టేబుళ్లు హరి, విజయ్‌, చౌడప్ప, అశోక్‌, హర్ష తదితరులు పాల్గొన్నారు. విద్యార్థుల ఘర్షణ పెద్దవడుగూరు: గుత్తి పరిధిలోని గేట్స్‌ ఇంజనీరింగ్‌ కళాశాలలో గురువారం విద్యార్థుల మధ్య ఘర్షణ చోటు చేసుకుంది. ఈ ఘర్షణలో గుత్తి అనంతపురం గ్రామానికి చెందిన విజయ్‌కుమార్‌ అనే విద్యార్థికి తీవ్రగాయాలు అయ్యాయి. విషయాన్ని విద్యార్థులు యాజమాన్యం దృష్టికి తీసుకెళ్లగా వారు నిర్లక్ష్యంగా వ్యవహరించడంతో బాధితుడు పోలీసులను ఆశ్రయించాడు. విజయ్‌కుమార్‌ ఇచ్చిన ఫిర్యాదు మేరకు పోలీసులు కళాశాలకు చేరుకొని జరిగిన సంఘటనపై విచారణ చేపట్టారు. యాజమాన్యంతో చర్చించి దాడులకు పాల్పడిన వారిపై చర్యలు తీసుకుంటామని ఎస్‌ఐ రాఘవేంద్రప్ప తెలిపారు. లాటరీ పేరుతో రూ.15 లక్షల టోకరా! బొమ్మనహాళ్‌: లాటరీలో భారీ మొత్తం గెలుచుకున్నారంటూ నమ్మించి ఓ వ్యక్తి నుంచి సైబర్‌ నేరగాళ్లు ఏకంగా రూ.15 లక్షలు కాజేసిన ఘటన మండలంలోని కొలగానహాళ్లి గ్రామంలో ఆలస్యంగా వెలుగులోకి వచ్చింది. బాధితుడు తెలిపిన మేరకు.. రెండు రోజుల క్రితం కొలగానహాళ్లికి చెందిన నాగరాజుకు గుర్తు తెలియని వ్యక్తులు ఫోన్‌ చేశారు. ‘మీకు కేంద్ర ప్రభుత్వం నుంచి లాటరీ వచ్చింది.. ఎలక్ట్రికల్‌ స్కూటర్‌తో పాటు పెద్ద మొత్తంలో నగదు గెలుచుకోవచ్చు’ అంటూ మాయమాటలు చెప్పారు. దీంతో నాగరాజు ఆనందంతో ఉబ్బితబ్బియ్యాడు. ‘మీ మొబైల్‌కు ఓటీపీ వచ్చింది, చెప్పండి’ అని సైబర్‌ నేరగాళ్లు కోరగా, వారు చెప్పినట్లే చేశాడు. కొంతసేపటికే అకౌంట్‌లో ఉన్న రూ.15 లక్షలు డ్రా అయినట్లు మెసేజ్‌ రావడంతో ఘొల్లుమన్నాడు. ఈ విషయంపై స్థానిక పోలీస్‌స్టేషన్‌లో ఫిర్యాదు చేయనున్నట్లు బాధితుడు తెలిపాడు.

గోరంట్ల: మ్యుటేషన్‌ దరఖాస్తులన్నీ గడువులోపు పరిష్కరించాలని జాయింట్‌ కలెక్టర్‌ మౌర్య భరద్వాజ్‌ అధికారులను ఆదేశించారు. గురువారం ఆయన గోరంట్ల తహసీల్దార్‌ కార్యాలయాన్ని తనిఖీ చేశారు. ఈ సందర్భంగా కార్యాలయంలోని పలు విభాగాలను పరిశీలించారు. అనంతరం రెవెన్యూ సిబ్బంది, అధికారులతో సమీక్షించారు. గ్రామాల్లో జరుగుతున్న సమగ్ర భూసర్వే పురోగతిపై ఆరా తీశారు. సర్వే ప్రక్రియలో సరిహద్దు వివాదాలకు తావులేకుండా పక్కా ఆధారాలతో రికార్డులను సిద్ధం చేయాలని వీఆర్‌ఓలు, సర్వేయర్లను ఆదేశించారు. అర్జీదారుల సమస్యలను సానుభూతితో పరిష్కరించాలన్నారు. రికార్డులు పక్కాగా ఉండాలని, లేని పక్షంలో చర్యలు తీసుకుంటామన్నారు. విధుల్లో నిర్లక్ష్యం వహించే సిబ్బందిపై కఠిన చర్యలు తప్పవని హెచ్చరించారు. జేసీ వెంట తహసీల్దార్‌ మధుసూదన్‌ నాయక్‌, డిప్యూటీ తహసీల్దార్లు, ఆర్‌ఐలు సర్వేయర్లు, కార్యాలయ సిబ్బంది ఉన్నారు. అధికారులకు జేసీ మౌర్య భరద్వాజ్‌ ఆదేశం

ప్రశాంతి నిలయం: వివిధ ప్రాంతాల నుంచి ప్రశాంతి నిలయానికి విచ్చేసే భక్తుల సౌకర్యార్థం సత్యసాయి సెంట్రల్‌ ట్రస్ట్‌ ‘ప్రశాంతి పాత్‌ ఫైండర్‌’ యాప్‌ను అందుబాటులోకి తెచ్చింది. గురువారం యాప్‌ను సత్యసాయి సెంట్రల్‌ ట్రస్ట్‌ మేనేజింగ్‌ ట్రస్టీ ఆర్‌జె.రత్నాకర్‌ రాజు ఆవిష్కరించారు. భక్తులు ప్రశాంతి నిలయంలో తాము చేరుకోవాల్సిన ప్రదేశానికి యాప్‌ ద్వారా సులువుగా చేరుకోవచ్చన్నారు. యాప్‌ను స్కాన్‌ చేయడం ద్వారా ప్రశాంతి నిలయంలోని 12 లొకేషన్లను చేరుకోవడానికి వెళ్లే రూట్‌మ్యాప్‌ అందుబాటులోకి వస్తుందన్నారు.

పెనుకొండ రూరల్‌: అక్రమంగా తరలిస్తున్న 45 క్వింటాళ్ల రేషన్‌ బియ్యాన్ని పౌరసరఫరాల శాఖ అధికారులు స్వాధీనం చేసుకున్నారు. రేషన్‌ బియ్యం అక్రమ రవాణాపై వచ్చిన సమాచారం మేరకు గురువారం రాత్రి విజిలెన్స్‌, రెవెన్యూ అధికారులు పెనుకొండ సమీపంలోని 44వ జాతీయ రహదారిపై తనిఖీలు చేపట్టారు. ఈ సమయంలో గుట్టూరు వైపు నుంచి బెంగళూరుకు వెళ్తున్న బొలెరో వాహనాన్ని తనిఖీ చేయగా...45 క్వింటాళ్ల రేషన్‌ బియ్యం కనిపించాయి. దీంతో రేషన్‌ బియ్యాన్ని తరలిస్తున్న సోమందేపల్లికి చెందిన మోహన్‌కుమార్‌, నరేష్‌, బాషాపై కేసు నమోదు చేశారు. అనంతరం రేషన్‌ బియ్యాన్ని స్వాధీనం చేసుకుని పౌరసరఫరాల శాఖ గోడౌన్‌కు తరలించినట్లు ఇన్‌చార్జ్‌ సీఎస్‌డీటీ శ్రీధర్‌ తెలిపారు.

సాక్షి, పుట్టపర్తి : రాష్ట్రంలో చంద్రబాబు ప్రభుత్వం ఏర్పడిన తర్వాత కూటమి పార్టీల నేతలు అక్రమార్జనకు అలవాటు పడ్డారు. సహజవనరులు కొల్లగొట్టి కొందరు రూ.కోట్లు సంపాదించగా... మరికొందరు పేదల బియ్యాన్ని అక్రమంగా రవాణా చేస్తూ జేబులు నింపుకుంటున్నారు. ఎవరైనా అడ్డుచెబితే ముఖ్యనేతలతో ఫోన్లు చేయించి బెదిరిస్తున్నారు. ఈ క్రమంలోనే కూటమి పార్టీల నేతలు రేషన్‌ బియ్యం దందాలో ఆరితేరారు. పొరుగున ఉన్న కర్ణాటకలో మన బియ్యానికి బాగా డిమాండ్‌ ఉండటంతో ఇక్కడ కార్డుదారుల నుంచి కొనుగోలు చేసి కర్ణాటకలో విక్రయిస్తున్నారు. మరికొందరు కర్ణాటకలోని రైస్‌మిల్లుల్లో రేషన్‌ బియ్యాన్ని పాలిష్‌ చేయించి సంచులు మార్చి జిల్లాలోని పేదలకే వాటిని అధిక ధరలకు విక్రయిస్తున్నారు. మంత్రుల ఇలాకాలోనే.. మంత్రులు సవిత, సత్యకుమార్‌ ప్రాతినిధ్యం వహిస్తున్న పెనుకొండ, ధర్మవరం నియోజకవర్గాల్లోనే రేషన్‌ బియ్యం దందా జోరుగా సాగుతున్నట్లు తెలుస్తోంది. కొందరు నేతలు సిండికేటుగా మారారు. రేషన్‌ బియ్యం దందాలోకి ఎవరినీ రానీయకుండా కట్టడి చేస్తూ అంతా వారి కనుసన్నల్లోనే నడిచేలా చూస్తున్నారు. ఈ క్రమంలోనే సోమందేపల్లికి చెందిన ఓ వ్యక్తి.. ధర్మవరం చుట్టుపక్కల ప్రాంతాల్లో రేషన్‌ బియ్యం కొనుగోలు చేసి రాత్రి వేళల్లో ఎన్‌ఎస్‌ గేటు, పెనుకొండ, కొడికొండ మీదుగా కర్ణాటకకు తరలిస్తున్నట్లు తెలిసింది. జిల్లాలోని ఓ మంత్రి అండదండలు ఉండటంతో పోలీసులు కూడా సదరు వ్యక్తి వాహనాలను నిలువరించలేని పరిస్థితి నెలకొంది. ఆ ఒక్కడి ఆధ్వర్యంలో రోజూ లారీ రేషన్‌ బియ్యం జిల్లా దాటిపోతున్నట్లు తెలిసింది. ఇక ఎవరైనా రేషన్‌ బియ్యం రవాణా చేసినా సదరు వ్యక్తికి కమీషన్‌ ఇవ్వాల్సిందే. లేకపోతే అధికారులకు సమాచారం ఇచ్చి వాహనాలను పట్టిస్తారని తెలుస్తోంది. దర్జాగా హద్దు దాటిపోతూ.. దందా రాయుళ్లు నియోజకవర్గానికి ఒకరిని ఏజెంటుగా నియమించుకుని గ్రామాల్లోని పేదల నుంచి రేషన్‌ బియ్యాన్ని సేకరిస్తున్నారు. డిమాండ్‌ను బట్టి కిలో రూ.17 నుంచి రూ.20 వరకూ కొనుగోలు చేస్తున్నారు. అలా సేకరించిన బియ్యాన్ని ఆటోలో తరలించి ఒక చోట నిల్వ చేస్తున్నారు. అనంతరం పెనుకొండ, సోమందేపల్లి, రామగిరి మీదుగా కర్ణాటక తరలిస్తున్నారు. జిల్లాలో 32 మండలాలు ఉండగా.. 16 మండలాలకు కర్ణాటక సరిహద్దు ఉండటంతో రేషన్‌ బియ్యాన్ని సులువుగా సరిహద్దు దాటిస్తున్నారు. ఎక్కువగా ధర్మవరం, నల్లమాడ, కొత్తచెరువు ప్రాంతాల నుంచి పెనుకొండ, సోమందేపల్లి మీదుగా కర్ణాటక తరలిస్తున్నట్లు సమాచారం. ప్రజలే సమాచారం ఇస్తుండగా... అక్కడక్కడా పోలీసులు రేషన్‌ బియ్యం స్వాధీనం చేసుకుంటున్న ఘటనలు వెలుగు చూస్తున్నాయి. రూ.కోట్లలో లావాదేవీలు రేషన్‌ బియ్యం దందాలో ప్రతి నెలా రూ.3 కోట్ల వరకు చేతులు మారుతున్నట్లు సమాచారం. ఇందులో ఎవరి వాటా వారికి వెళ్లినా.. ఒక్కో వ్యక్తికి సగటున రూ.5 లక్షలు మిగులుతున్నట్లు తెలుస్తోంది. పాలిష్‌ చేసి మళ్లీ పేదలకే విక్రయం కొందరు తక్కువ ధరకు పేదల నుంచి రేషన్‌ బియ్యం కొని వాటిని కర్ణాటకకు తీసుకువెళ్లి అక్కడ మిల్లుల్లో పాలిషింగ్‌ చేసి తిరిగి మార్కెట్‌లోకి తీసుకువస్తున్నారు. కూటమి నేతలే అక్రమ వ్యాపారులుగా అవతారమెత్తి.. బియ్యం దందాను నడిపిస్తుండటంతో అధికారులు పట్టీపట్టనట్లు వ్యవహరిస్తున్నారు. మరికొందరు మాత్రం రేషన్‌ బియ్యాన్ని నేరుగా కర్ణాటకలో అధిక ధరలకు విక్రయించి భారీగా లాభాలు ఆర్జిస్తున్నట్లు తెలుస్తోంది. పౌర సరఫరాల శాఖ అధికారులు పట్టించుకోకపోవడంతో రేషన్‌ షాపుల నుంచి నేరుగా నల్లబజారుకు చౌక బియ్యం తరలిపోతున్నట్లు తెలిసింది. జిల్లాలో జోరుగా రేషన్‌ బియ్యం వ్యాపారం గుట్టు చప్పుడు కాకుండా రాత్రివేళ కర్ణాటకకు రవాణా ఆటోలు, ఐచర్‌ వాహనాల్లో అక్రమంగా తరలింపు రేషన్‌ బియ్యం మాఫియాగా కొందరు కూటమి నేతలు తక్కువ ధరలకు కొనుగోలు చేసి అధిక ధరకు విక్రయం దర్జాగా సరిహద్దు దాటిపోతున్నా పట్టించుకోని అధికారులు2025 డిసెంబరు 28 : ధర్మవరం నుంచి 1,300 కిలోల రేషన్‌ బియ్యాన్ని బెంగళూరు తీసుకెళ్తున్నట్లు సమాచారంతో ధర్మవరం వన్‌టౌన్‌ పోలీసులు ఎర్రగుంట్ల సర్కిల్‌లో పట్టుకున్నారు. ఆటోను సీజ్‌ చేసి.. డ్రైవర్‌పై కేసు నమోదు చేశారు. కిలో రూ.18 వెచ్చించి కొనుగోలు చేసినట్లు తెలిసింది. 2025 జూలై 23 : చెన్నేకొత్తపల్లి మండలం ఎర్రంపల్లి బస్టాప్‌ వద్ద ఆటోల్లో తెచ్చిన రేషన్‌ బియ్యం.. లారీల్లోకి మార్చే దృశ్యాలను ఓ వ్యక్తి వీడియో తీసి పోలీసులకు పంపించారు. అయినా పోలీసులు స్పందించలేదు. పైగా ఆ తర్వాత వీడియో పంపిన వ్యక్తికి రేషన్‌ బియ్యం వ్యాపారి ఫోన్‌ చేసి బెదిరించాడు. 2026 మే 7 : హిందూపురం మండలం మణేసముద్రం పరిసరాల్లో రేషన్‌ బియ్యంతో వెళ్తున్న ఐచర్‌ వాహనాన్ని హిందూపురం రూరల్‌ పోలీసులు పట్టుకున్నారు. వాహనంలోని 16 టన్నుల రేషన్‌ బియ్యం స్వాధీనం చేసుకున్నారు. ఇద్దరిపై కేసు నమోదు చేశారు. 2026 జూన్‌ 4 : కర్ణాటకకు రేషన్‌ బియ్యం తరలిస్తున్న పుట్టపర్తికి చెందిన ఓ వ్యాపారిని మామిళ్లపల్లి వద్ద స్థానికులు అడ్డుకున్నారు. వాహనాలను వీడియో తీయగా.. వ్యాపారి వీడియో తీసిన స్థానికుడి మొబైల్‌ లాక్కుని.. కారులో పరారయ్యాడు. అనంతరం ఘటనా స్థలానికి వచ్చిన పోలీసులు రేషన్‌ బియ్యం స్వాధీనం చేసుకున్నారు.

ప్రకృతికి ఎదురొడ్డి పంటలు సాగుచేసిన రైతుల పరిస్థితి అగమ్యగోచరంగా మారింది. ఎల్‌–నినో కారణంగా తీవ్ర వర్షాభావం నెలకొన్నా...కొందరు రైతులు బోర్ల కింద వేరుశనగ సాగు చేశారు. అందులో ధర్మవరం మండల పరిధిలోని ఏలుకుంట్ల గ్రామానికి చెందిన బోసల మురళీ కూడా ఒకరు. మూడు ఎకరాల్లో రూ.1.50 లక్షలు ఖర్చుచేసి వేరుశనగ సాగుచేశాడు. అయితే పంట కాయదశకు చేరుకునే సమయంలో బోరు బావిలో నీరు అడుగంటిపోయింది. కళ్లముందే పంట ఎండుతుండగా..ఏం చేయాలో తెలియని మురళి కనీసం పశువుల మేతకై నా పనికి వస్తుందని గురువారం ఇలా పంటను ట్రాక్టర్‌తో దున్నేశాడు. కనీసం ఒక్క పదునైన వర్షం వచ్చినా పంట దక్కేదని ఆవేదన వ్యక్తం చేశాడు. ఇలాంటి కష్టం ఎవరికీ రాకూడదని, ఆరుగాలం కుటుంబమంతా శ్రమిస్తే అప్పులే మిగిలాయని రైతు ఆవేదన వ్యక్తం చేశాడు. – ధర్మవరం రూరల్‌: ఎండిన వేరుశనగ పంటను ట్రాక్టర్‌తో తొలగించుకుంటున్న రైతు బోసల మురళి

ఏ ప్రభుత్వమైనా ప్రజలకు మంచి చేయాలని భావిస్తుంది. కానీ చంద్రబాబు ప్రభుత్వం దోపిడీనే పరమాధిగా భావిస్తోంది. చివరకు డబ్బు కోసం రైతులకు తీరని అన్యాయం చేస్తూ హంద్రీ–నీవా కాలువకు కాంక్రీట్‌ లైనింగ్‌ పనులు చేపట్టింది. రైతుల తరఫున పోరాడిన మాలాంటి వారందరిపై అక్రమ కేసులు పెట్టింది. గ్రామాల్లో వలసలు మొదలయ్యాయి. మళ్లీ రాజన్న రాజ్యం కావాలంటే స్థానిక సంస్థల్లో మనం విజయఢంకా మోగించాలి. – తోపుదుర్తి ప్రకాష్‌రెడ్డి, మాజీ ఎమ్మెల్యే, రాప్తాడు నియోజకవర్గ సమన్వయకర్త

పుట్టపర్తి టౌన్‌: ‘మాజీ మంత్రి పల్లె రఘునాథరెడ్డి అండదండలతో నల్లమాడలో రెడ్‌బుక్‌ రాజ్యాంగం అమలవుతోంది. వైఎస్సార్‌సీపీ నాయకులపై అక్రమ కేసులు నమోదు చేసి జైలుకు పంపారు’ అని వైఎస్సార్‌సీపీ మైనార్టీ విభాగం నేత ఎన్‌హెచ్‌ బాషా ఆవేదన వ్యక్తం చేశారు. బుధవారం నల్లమాడలో ఆయన విలేకరులతో మాట్లాడారు. నల్లమాడలో తమ తాత, ముత్తాలకు సంబంధించి సర్వేనంబర్‌ 136–1లో 8.47 ఎకరాల భూమి ఉందన్నారు. అందులో అన్నదమ్ములు 8 ఎకరాల భూమిని పంచుకోగా 47 సెంట్లు భూమి మిగులు భూమిగా ఉందని చెప్పారు. దానికి సంబంధించి మోదీనమ్మ, ఆలామ్‌మోలీ, ఎన్‌ బాషా పేరుమీద రికార్డులు కూడా ఉన్నాయన్నారు. అయితే చంద్రబాబు ప్రభుత్వం అధికారంలోకి రాగానే తెలుగుదేశం పార్టీకి చెందిన సలాముల్లాఖాన్‌, రఫీఖాన్‌ కన్ను ఆ భూమిపై పడిందన్నారు. తాము కూడా వంశ వృక్షంలో ఉన్నామని, తమకు భూమి రావాలని మాపై గొడవకు దిగారన్నారు. తాము అంగీకరించకపోవడంతో మాజీ మంత్రి పల్లె రఘునాథరెడ్డి అండతో రెవెన్యూ, పోలీసులును ఆశ్రయించారన్నారు. అధికార పార్టీకి తలొగ్గిన అధికారులు ఇద్దరిని పిలిచి పంచాయితీ పెట్టి అందులో ఆరు సెంట్ల భూమి సలాంముల్లా, రఫీఖాన్‌కు ఇవ్వాలని, అధికారులకు మూడు సెంట్ల భూమి ఇవ్వాలని పంచాయితీ చేశారన్నారు. తాము ససేమీరా అనడంతో వైఎస్సార్‌సీపీ సానుభూతి పరులవి ఫేక్‌ వంశవృక్షమని మోదీనమ్మ, ఆలామ్‌మోలీ ,ఎన్‌హెచ్‌ బాషాపై అక్రమ కేసులు బనాయించి కదిరి కోర్టుకు తరలించారన్నారు. మహిళ అని కూడా చూడకుండా అర్ధరాత్రి సమయంలో అనంతపురం కోర్టుకు తరలించారని ఆవేదన వ్యక్తం చేశారు. సొంత పూచీ కత్తుతో తనను విడిచిపెట్టారని ఎన్‌హెచ్‌ బాషా తెలిపారు. నల్లమాడలో వైఎస్సార్‌సీపీకి పనిచేశామని, పదవులు కూడా తీసుకున్నామని ఏనాడూ ఎవరి భూములు లాక్కోలేదన్నారు. చంద్రబాబు ప్రభుత్వం అధికారంలోకి వచ్చిన తరువాత భూములు లాక్కొని అక్రమ కేసులు నమోదు చేస్తున్నారన్నారు. మాట విని అధికారులకు మూడు సెంట్ల భూమి ఇచ్చివుంటే ఇదంతా జరిగివుండేది కాదన్నారు. ప్రాణాలు పోయినా సెంటు భూమి కూడా ఇచ్చేదిలేదని స్పష్టం చేశారు. వైఎస్సార్‌సీపీ సానుభూతిపరులపై అక్రమ కేసులు వైఎస్సార్‌సీపీ మైనార్టీ విభాగం నేత బాషా

స్థానిక సంస్థల ఎన్నికలు సమీపిస్తుండగా... అధికార పార్టీ కుట్రలు, కుతంత్రాలకు తెరతీస్తోంది. అక్రమ కేసులతో భయపెట్టాలని చూస్తోంది. కానీ వారికి తెలియదేమో ప్రాణం పోయినా వైఎస్సార్‌ సీపీ క్యాడర్‌ వెనక్కి తగ్గే రకం కాదు. మన సత్తా ఏమిటో స్థానిక సంస్థల ఎన్నికల్లో చంద్రబాబు ప్రభుత్వానికి చూపుదాం. ప్రతి కార్యకర్త విజయమే లక్ష్యంగా శ్రమించాలి. ప్రతి స్థానంలోనూ వైఎస్సార్‌ సీపీ జెండా రెపరెపలాడించాలి. – ఈరలక్కప్ప, మడకశిర నియోజకవర్గ సమన్వయకర్త

హిందూపురం టౌన్‌: పోలీసులపై దాడులకు పాల్పడిన దొంగల ముఠాను అరెస్ట్‌ చేసి కటకటాల వెనక్కు నెట్టారు. గతంలో పందులను దొంగిలించేందుకు బొలెరో వాహనంలో వచ్చిన ముఠా సభ్యులు పోలీసులను సైతం లెక్కచేయకుండా రెండు సార్లు దాడులకు పాల్పడి పరారయ్యారు. దీన్ని ప్రతిష్టాత్మకంగా తీసుకున్న జిల్లా పోలీసు ఉన్నతాధికారులు ప్రత్యేక దృష్టి సారించి 11 మంది ముఠా సభ్యులను పట్టుకున్నారు. ఈ మేరకు బుధవారం స్థానిక వన్‌టౌన్‌ పోలీస్‌స్టేషన్‌లో హిందూపురం ఏఎస్పీ మహేష్‌తో కలిసి ఎస్పీ సతీష్‌కుమార్‌ విలేకరులకు వివరాలు వెల్లడించారు. కేసు పూర్వాపరాలు ఇలా.. గత నెల 6న రాత్రి హిందూపురం పట్టణంలో పోలీసులు గస్తీ నిర్వహిస్తుండగా, చిన్నమార్కెట్‌ సమీపంలో ఓ బొలెరో వాహనం ఆపకుండా వేగంగా వెళ్లింది. వెంబడించిన పోలీసులపై ముఠా సభ్యులు దాడి చేయడానికి ప్రయత్నించారు. సీఐని వాహనంతో గుద్దేందుకు ప్రయత్నించారు. సీఐ చాకచక్యంగా తప్పించుకున్నారు. అదే నెలలో 27న అర్ధరాత్రి సమయంలో హిందూపురం రూరల్‌ సీఐ జనార్దన్‌ స్థానిక అంబేడ్కర్‌ సర్కిల్‌లో గస్తీలో ఉండగా, అదే సమయంలో ఓ బొలెరో రావడంతో అనుమానం వచ్చి పోలీసులు ఆపడానికి ప్రయత్నించారు. వారు ఆపకుండా వెళ్లడంతో సీఐ జనార్దన్‌ ఇతర పోలీసులను అలర్ట్‌ చేశారు. పోలీసులపైనే రాళ్లు, బాటిళ్లతో దాడులకు యత్నించారు. దీంతో రూరల్‌ సీఐ జనార్దన్‌ దుండగుల వాహనంపై మూడు రౌండ్లు కాల్పులు జరిపారు. అయినా దుండగులు తప్పించుకుపోయారు. దీనిపై హిందూపురం వన్‌టౌన్‌ పోలీస్‌స్టేషన్‌లో కేసులు కూడా నమోదయ్యాయి. ముఠా అరెస్ట్‌... హిందూపురం పట్టణ శివారులో హైవేపై దారిదోపిడీకి సిద్ధమవుతున్న దొంగల ముఠాను పోలీసులు అరెస్ట్‌ చేశారు. బుధవారం ఉదయం పట్టణంలోని సింగిరెడ్డిపల్లి శివారులో శిరా–కొడిగెనహళ్లి ఎన్‌హెచ్‌–544ఈ రహదారి వద్ద కొందరు వ్యక్తులు అనుమానాస్పదంగా మారణాయుధాలతో సంచరిస్తున్నట్లు పోలీసులకు సమాచారం వచ్చింది. దీంతో వన్‌టౌన్‌ సీఐ ప్రసాద్‌బాబు, టూటౌన్‌ సీఐ అబ్దుల్‌ కరీం, హిందూపురం రూరల్‌ సీఐ జనార్దన్‌, యూపీఎస్‌ సీఐ ఆంజనేయులు, వన్‌టౌన్‌ ఎస్‌ఐ రాజేష్‌, సిబ్బంది సంఘటనా స్థలానికి చేరుకుని ముఠాలోని 11 మంది నిందితులను అదుపులోకి తీసుకున్నారు. విచారణలో నిందితులు హైవేపై రవాణా అవుతున్న పందుల లోడును దారి కాచి పందులను దొంగిలించేందుకు సిద్ధమైనట్లు వెల్లడైంది. వారి వద్ద నుంచి రూ.8.50 లక్షల నగదు, రెండు బొలెరో పికప్‌ వాహనాలు, ఆరు పిడిబాకులు, దాడి చేయడానికి ఉంచుకున్న రాళ్లు, 20 ఖాళీ కూల్‌డ్రింక్‌ సీసాలు స్వాధీనం చేసుకున్నారు. వీరిలో పోలీసులపై దాడికి పాల్పడిన ఇద్దరు పరారీలో ఉన్నట్లు తెలిసింది. విచారణలో గత నెల 27న హిందూపురం పట్టణంలో 10 పందులను దొంగలించినట్లు అంగీకరించినట్లు ఎస్పీ తెలిపారు. అరెస్టు అయిన వారిలా.. పోలీసులు అరెస్ట్‌ చేసిన వారిలో అనంతపురానికి చెందిన ఎరికల చంద్రశేఖర్‌, సాకే రాజేష్‌, ఎరికల రమేష్‌, వెంకటేష్‌, బెస్త రాకేష్‌, సాకే మహేష్‌, ఎరికల గంగన్న, నడిమిండ్లు లక్ష్మణ్‌, ఎరికల సునీల్‌, జె.రోహిత్‌, హిందూపురానికి చెందిన వెంకటేష్‌ ఉన్నారు. వీరు పందులను దొంగలించి కర్ణాటక, అనంతపురం ప్రాంతాల్లో విక్రయించేవారు. వారి వద్ద నుంచి చోరీ చేసిన పందులను కొన్న అనంతపురం, కర్ణాటకకు చెందిన వారిని కూడా పోలీసులు గుర్తించారు. దీనిపై మరింత విచారణ జరుపుతున్నట్లు ఎస్పీ పేర్కొన్నారు. నిందితులపై కేసులు ప్రస్తుతం అరెస్టు అయిన ముఠా సభ్యులపై హిందూపురం వన్‌టౌన్‌, ఉరవకొండ, తాడిపత్రి టౌన్‌, తాడిపత్రి రూరల్‌, గుంతకల్లు రూరల్‌, కసాపురం, యల్లనూరు, కళ్యాణదుర్గం అర్బన్‌, డోన్‌ రూరల్‌, అమరాపురం, నల్లమాడ, బుక్కరాయసముద్రం తదితర పోలీస్‌స్టేషన్ల పరిధిలో దొంగతనాలు, పోలీసులపై దాడులు, హింసాత్మక నేరాలకు సంబంధించిన పలు కేసులు నమోదైనట్లు ఎస్పీ వెల్లడించారు. ఈ కేసులో ప్రతిభ కనబరిచిన సీఐలు ప్రసాద్‌ బాబు, ఆంజనేయులు, జనార్ధన్‌, కరీం, ఎస్‌ఐ రాజేష్‌, ఉమ్మడి అనంతపురం జిల్లా క్రైమ్‌ పోలీసు సిబ్బందిని ఎస్పీ అభినందించి, ప్రశంసాపత్రాలు, నగదు రివార్డులను అందించారు. 11 మంది అరెస్ట్‌, పరారీలో ఇద్దరు రూ.8.50 లక్షల నగదు, రెండు బొలెరోలు, మారణాయుధాలు స్వాధీనం వివరాలు వెల్లడించిన ఎస్పీ సతీష్‌కుమార్‌ దోపిడీ ముఠాకు పోలీస్‌ ట్రీట్‌మెంట్‌ బేడీలు వేసి నడిపించుకుంటూ తీసుకెళ్లిన వైనం దారి దోపిడీ, పందుల దొంగతనాలకు పాల్పడుతూ పోలీసులపైనే దాడులకు పాల్పడుతున్న 11 మంది దోపిడీ ముఠా సభ్యులకు పట్టణ ఖాకీలు పోలీస్‌ ట్రీట్‌మెంట్‌ ఇచ్చారు. బుధవారం సాయంత్రం ముఠా సభ్యులను అరెస్టు చేశారు. అనంతరం సీఐలు ప్రసాద్‌బాబు, అబ్దుల్‌ కరీం, జనార్దన్‌ ఆంజనేయులు సమక్షంలో పోలీసు సిబ్బంది స్థానిక గురునాథ్‌ సర్కిల్‌ నుంచి తెలుగుతల్లి సర్కిల్‌ వరకు నిందితుల చేతులకు బేడీలు వేసి ఊరేగించారు. ప్రజల్లో భయభ్రాంతులు కలిగించేలా, అడ్డొచ్చిన వారిని అంతమొందించేలా దాడులకు తెగబడుతున్న దోపీడి ముఠాపై కఠిన చర్యలు తీసుకుంటామని పోలీసులు హెచ్చరించారు. ప్రజల్లో ఉన్న భయాందోళనలు తొలగించడానికి నిందితులను ఊరేగించామని పేర్కొన్నారు.

చిలమత్తూరు: సహకార కేంద్ర బ్యాంకు అక్రమాలకు కేరాఫ్‌ అడ్రెస్‌గా మారింది. అడిగేవారు లేకపోవడంతో బ్యాంకు అధికారులు ఇష్టారీతిన వ్యవహరిస్తూ బ్యాంకుకే తీరని నష్టం కలిగిస్తున్నారు. భూములను తాకట్టుపెట్టుకుని రుణాలు ఇస్తున్న బ్యాంకు సిబ్బంది రుణదాతలు రుణం మొత్తం చెల్లించినా... బ్యాంకులో చెల్లించకుండా సెక్రటరీలు మింగేసిన ఘటనలు అనేకం వెలుగులోకి వచ్చాయి. తాజాగా మరో స్కాం రాష్ట్రంలో సంచలనంగా మారింది. హిందూపురం ఏడీసీసీ బ్యాంకులో భారీ స్కాం బయటపడింది. బ్యాంకుల్లో పనిచేసే గోల్డ్‌ అప్రైజర్‌ ద్వారా నకిలీ బంగారం తనఖా పెట్టించి సుమారు రూ.8 కోట్లు రుణాలు పొందడం సంచలనంగా మారింది. ఈ ఘటనతో హిందూపురం ఒక్కసారిగా ఉలిక్కిపడింది. బ్యాంకు సిబ్బంది పాత్రపై అనుమానాలు జిల్లా సహకార సంఘం బ్యాంకులో జరిగిన భారీ గోల్డ్‌ స్కాంలో ఇక్కడే పాతుకుపోయిన అధికారుల పాత్ర ఉన్నట్టు స్పష్టమవుతోంది. ఈ ఘటన తో బ్యాంకులో పనిచేసే సిబ్బంది అక్రమాలు ఒక్కొక్కటిగా బయటపడుతున్నాయి. ఇప్పటికే ఈ స్కాంలో సూత్రధారులుగా అనుమానిస్తున్న బ్యాంకు మేనేజరు జయరాం చౌదరి, అసిస్టెంట్‌ మేనేజరు కంబగిరి, సహాయకురాలు అర్చనాభాయిలను ఉన్నతాధికారులు సస్పెండ్‌ చేశారు. గుట్టుగా విచారణ ఏడీసీసీబీ అధికారులు హిందూపురంలోనే తిష్ట వేసి అవినీతి అంశంపై విచారణ వేగవంతం చేశారు. ఆర్‌అండ్‌బీ గెస్ట్‌హౌస్‌లో ఉంటూ నకిలీ బంగారం తాకట్టు అంశానికి సంబంధించి గుట్టుగా విచారణ జరుపుతున్నారు. నకిలీ బంగారం తాకట్టుపై ఇప్పటికే మీడియాలో కథనాలు వస్తున్నప్పటికీ అధికారికంగా ఎలాంటి ప్రకటన చేయకపోవడం గమనార్హం. సహకార బ్యాంకుల్లో ఇంత పెద్ద స్కాం బయట పడటం రాష్ట్ర చరిత్రలో ఇదే తొలిసారని అధికార వర్గాలు పేర్కొంటున్నాయి. గోల్డ్‌స్కాం కేరాఫ్‌గా మారిన హిందూపురం ఏడీసీసీబీ నకిలీ బంగారంతో బ్యాంకుకు భారీ టోకరా మేనేజర్‌, అసిస్టెంట్‌ మేనేజర్‌ సహా ముగ్గురు సస్పెండ్‌ సమగ్ర విచారణ చేపట్టిన బ్యాంకు ఉన్నతాధికారులు ఎస్పీకి ఫిర్యాదు ? నకిలీ ఖాతాలు.. నకిలీ బంగారం ఏడీసీసీ బ్యాంకులో సాధారణ తనిఖీలు నామమాత్రంగా సాగుతుండటంతో అక్రమార్కుల పంట పండింది. కేవలం రైతులు మాత్రమే రుణాలు తీసుకొనే ఈ బ్యాంకుల్లో నకిలీ రైతులను సృష్టించి, అదే విధంగా పదుల సంఖ్యలో బ్యాంకు ఖాతాలు తెరచి వాటి ద్వారా నకిలీ బంగారాన్ని తాకట్టు పెట్టి వాటిని తనిఖీ చేసే అప్రైజర్‌తో బ్యాంకు అధికారులు కుమ్మకై ్క ఈ భారీ స్కాంకు పాల్పడినట్టుగా తెలుస్తోంది. తవ్వే కొద్దీ అక్రమాల చిట్టా బయటకు వస్తుండటం సంచలనంగా మారింది. ఈ విషయం అధికారికంగా బయటకు చెప్పనప్పటికీ బ్యాంకు ఉన్నతాధికారులు ఈ స్కాంపై ఐదు రోజులుగా విచారణ చేస్తూనే ఉండటంతో మరిన్ని అక్రమాలు వెలుగులోకి వచ్చే అవకాశం ఉన్నట్టుగా తెలుస్తోంది. గోల్డ్‌ స్కాం వ్యవహారంలో బ్యాంకులో పనిచేసే సిబ్బంది పాత్ర ఉండటంతో విచారణ అధికారులకు వారు ఏమాత్రం సహకరించనట్టుగా తెలుస్తోంది. ఇప్పటికే భారీగా రుణాలు ఇచ్చినట్టు గుర్తించిన అధికారులు, ఈ వ్యవహారం పై పోలీసులు విచారణ చేస్తేనే నిజానిజాలు బయటకు వచ్చే అవకాశం ఉండటంతో బుధవారం ఎస్పీ సతీష్‌కుమార్‌కు రాతపూర్వకంగా ఫిర్యాదు చేసినట్టుగా తెలిసింది.

కదిరి అర్బన్‌: రాష్ట్రంలో చంద్రబాబు ప్రభుత్వం కొలువుదీరగానే అధికారం అండలో టీడీపీ నేతలు దోపిడీలకు తెగబడ్డారు. భూదందాలు, ప్రైవేటు పంచాయితీలతో భారీగా ఆర్జిస్తున్నారు. మరికొందరు ‘తమ్ముళ్లు’ సహజవనరులను కొల్లగొట్టి రూ.కోట్లు సంపాదిస్తున్నారు. తాజాగా కదిరిలోని పచ్చ నేతలు చెరువులను చెరబట్టారు. సారవంతమైన మట్టిని తవ్వుకుని తరలిస్తున్నారు. చెలరేగుతున్న మట్టిమాఫియా.. కదిరిలో మట్టిమాఫియాగా మారిన తెలుగు తమ్ముళ్లు... దేవరచెరువు, విఠలరాయుని చెరువు, సున్నపుగుట్టతండా సమీపంలోని గుట్టలు...ఇలా ఎక్కడ బడితే అక్కడ మట్టిని తవ్వేస్తున్నారు. దేవరచెరువు కట్టపై ఒకవైపు ఎమ్మెల్యే కందికుంట వెంకటప్రసాద్‌ సుందరీకరణ అంటూ హడావుడి చేస్తుండగా...అదే చెరువు నుంచి రాత్రివేళల్లో ‘తమ్ముళ్లు’ మట్టిని అక్రమంగా తవ్వేసి సొమ్ము చేసుకుంటున్నారు. ఒక్కో టిప్పర్‌ మట్టి రూ.4 వేల చొప్పున విక్రయిస్తూ భారీగా ఆర్జిస్తున్నారు. రోజూ వందలాది టిప్పర్లు మట్టి తరలిస్తున్నారు. ఇప్పటికై నా సంబంధిత అధికారులు మట్టిమాఫియాపై కఠిన చర్యలు తీసుకోవాలని స్థానికులు కోరుతున్నారు. ఇంత విచ్చలవిడిగా మట్టిమాఫియా రెచ్చిపోతోందంటే ఇదంతా ఎమ్మెల్యేకు తెలియకుండా జరుగుతుందా...అన్న అనుమానాలు వ్యక్తమవుతున్నారు. ఎమ్మెల్యే అండదండలు ఉండడంతోనే అధికారులు కూడా చూసీచూడనట్లు వ్యవహరిస్తున్నారనే ఆరోపణలు బలంగా వినిపిస్తున్నారు. కళ్లముందే టిప్పర్లు పోతున్నా.. రాత్రి 12 గంటల సమయంలో కదిరి జీవిమాను కూడలిలో పోలీసుల ముందే ఒకదానివెనుక ఒకటి మట్టి టిప్పర్లు తరలిపోతున్నా.. ఎవరూ పట్టించుకోవడం లేదు. అధికారులకు చిత్తశుద్ధి ఉంటే పట్టణంలో అన్ని కూడళ్లలో సీసీ కెమెరాలు ఉన్నాయి. వాటిని పరిశీలించి అయినా మట్టి అక్రమ తరలింపుపై కేసులు నమోదు చేయవచ్చు. – అరుణ్‌కుమార్‌, భారత విప్లవ కమ్యూనిస్టు పార్టీ నాయకుడు, కదిరి మట్టి మాఫియాగా మారిన తెలుగు తమ్ముళ్లు రోజూ రాత్రి వేళల్లో చెరువు నుంచి మట్టి తరలింపు మరోవైపు సుందరీకరణ పేరుతో ఎమ్మెల్యే ఆర్భాటం

పెనుకొండ రూరల్‌: ‘విజయమే లక్ష్యం కావాలి. ఎవరెన్ని కేసులు పెట్టినా...ఎవరెంత భయపెట్టినా వెనక్కు తగ్గేది లేదు..స్థానిక సంస్థల ఎన్నికల్లో నిలుద్దాం...గెలిచి చూపిద్దాం’ అంటూ వైఎస్సార్‌సీపీ రీజనల్‌ కోఆర్డినేటర్‌, ఎంపీ పెద్దిరెడ్డి మిథున్‌రెడ్డి వైఎస్సార్‌సీపీ నాయకులు, కార్యకర్తలకు దిశానిర్దేశం చేశారు. స్థానిక సంస్థల ఎన్నికల నేపథ్యంలో బుధవారం పట్టణంలోని ఎన్‌ కన్వెన్షన్‌ హాలులో వైఎస్సార్‌ సీపీ జిల్లా విస్తృత స్థాయి సమావేశం ఏర్పాటు చేశారు. పార్టీ జిల్లా అధ్యక్షురాలు ఉషశ్రీచరణ్‌ అధ్యక్షతన నిర్వహించిన సమావేశంలో జిల్లాలోని వివిధ నియోజకవర్గాల నుంచి పెద్ద సంఖ్యలో వైఎస్సార్‌ సీపీ నాయకులు, కార్యకర్తలు, అనుబంధ సంఘాల ప్రతినిధులు తరలివచ్చారు. ముందుగా దివంగత నేత డాక్టర్‌ రాజశేఖరరెడ్డి విగ్రహానికి నాయకులు పూల మాలలు వేసి ఘనంగా నివాళులర్పించారు. అనంతరం స్థానిక సంస్థల ఎన్నికల్లో అనుసరించాల్సిన వ్యూహాలు, విజయానికి దోహదపడే అంశాలను వైఎస్సార్‌ సీపీ శ్రేణులకు నేతలు వివరించారు. విజయఢంకా మోగిద్దాం.. నాయకులు, కార్యకర్తలు అన్న తేడా మరచి అందరం సమష్టిగా పనిచేసి స్థానిక సంస్థల ఎన్నికల్లో జిల్లాలోని అన్ని స్థానాల్లో విజయఢంకా మోగిద్దామని పార్టీ రీజనల్‌ కోఆర్డినేటర్‌, ఎంపీ పెద్దిరెడ్డి వెంకట మిథున్‌ రెడ్డి పిలుపునిచ్చారు. నాయకులు క్షేత్రస్థాయిలో కేడర్‌కు భరోసా ఇవ్వాలన్నారు. ప్రభుత్వ వైఫల్యాలను ప్రజలకు వివరించాలన్నారు. అభ్యర్థుల ఎంపిక ప్రక్రియలో స్పష్టత ఉండాలన్నారు. పార్టీ కోసం చేసిన సేవలు, వ్యక్తిత్వాన్ని పరిగణనలోకి తీసుకోవాలన్నారు. అధికార పార్టీ నేతలు బనాయించే అక్రమ కేసులను పార్టీ సమర్థవంతంగా ఎదుర్కొంటుందన్నారు. ప్రతి కార్యకర్తకూ పార్టీ అండగా నిలబడుతుందన్నారు. సమావేశంలో పార్టీ పార్లమెంట్‌ పరిశీలకుడు రమేష్‌ రెడ్డి, పెనుకొండ నియోజకవర్గ ఎన్నికల పరిశీలకురాలు మధుమతి, మాజీ మంత్రి నర్సేగౌడ్‌, మాజీ ఎమ్మెల్యేలు వైటీ ప్రభాకర్‌ రెడ్డి, తిప్పేస్వామి, అత్తార్‌ చాంద్‌ బాషా, పార్టీ రాష్ట్ర ఆర్గనైజింగ్‌ సెక్రటరీ వజ్ర భాస్కర్‌ రెడ్డి, వైఎస్సార్‌ సీపీ వాల్మీకి విభాగం రాష్ట్ర అధ్యక్షుడు పొగాకు రామచంద్ర, వక్కలిగ సాధికారిత విభాగం అధ్యక్షుడు రంగేగౌడ్‌, అనుబంధ విభాగాల నాయకులు, కన్వీనర్లు పాల్గొన్నారు. పోస్టర్ల ఆవిష్కరణ చంద్రబాబు రెండేళ్ల పాలనపై పార్టీ రూపొందించిన వెన్నుపోటు పార్టీ...వెన్నుపోటు పాలన’ పోస్టర్లను పార్టీ నేతలు ఆవిష్కరించారు. అనంతరం మిథున్‌రెడ్డి పార్టీ ముఖ్యనేతలకు పార్టీ ఐడీ కార్డులు అందజేశారు. స్థానిక సంస్థల ఎన్నికల్లో విజయ ఢంకా మోగిద్దాం పార్టీ శ్రేణులకు ఎంపీ మిథున్‌ రెడ్డి దిశానిర్దేశం అరాచకపాలనకు చరమగీతం పాడుదామని పిలుపు ప్రతి కార్యకర్తకు పార్టీ అండగా ఉంటుందని వెల్లడి పెనుకొండలో వైఎస్సార్‌ీసీపీ జిల్లా విస్తృత స్థాయి సమావేశం

పుట్టపర్తి: ఓపెన్‌ స్కూల్‌లో అడ్మిషన్లకు ఈ నెల 15వ తేదీలోపు రిజిస్ట్రేషన్‌ చేసుకోవాలని ఓపెన్‌ స్కూల్‌ జిల్లా కోఆర్డినేటర్‌ లాజరు పేర్కొన్నారు. బుధవారం ఆయన మడకశిర, పెద్దమంతూరు, రాళ్లపల్లి, మావటూరు తదితర స్కూళ్లు, కళాశాలల్లో ఓపెన్‌ స్కూల్‌ అడ్మిషన్లపై అవగాహన కల్పించి పోస్టర్లు ప్రదర్శించారు. చదువు మానేసిన వారు తిరిగి కొనసాగించేందుకు ఓపెన్‌ స్కూల్‌ అద్భుతమైన అవకాశమన్నారు. ఆసక్తి కలిగిన వారు ఈనెల 15వ తేదీలోపు రిజిస్ట్రేషన్‌ చేసుకొని ఫీజు చెల్లించాలని సూచించారు. జాతీయ స్థాయి పోటీలకు విద్యార్థి ఎంపిక సోమందేపల్లి(పరిగి): ఇన్‌స్పైర్‌ మనాక్‌ అవార్డు కోసం నిర్వహించే జాతీయ స్థాయి పోటీలకు సోమందేపల్లి మండలంలోని జూలకుంట జిల్లా పరిషత్‌ ఉన్నత పాఠశాల విద్యార్థి ఎస్‌. విష్ణువర్దన్‌రెడ్డి ఎంపికయ్యాడు. ఈమేరకు గైడ్‌ టీచర్‌ నరసింహమూర్తి వివరాలను తెలిపారు. విద్యార్థుల్లో దాగి ఉన్న ఇన్నోవేటివ్‌ ఐడియాలను ప్రోత్సహించడానికి ఇన్‌స్పైర్‌ మనాక్‌ అవార్డులు అందిస్తారన్నారు. ఇందులో తమ పాఠశాలకు చెందిన విష్ణువర్దన్‌రెడ్డి విత్తనాలు తడవకుండా ఎండబెట్టే ప్రాజెక్టుతో ఇటీవల జరిగిన జిల్లా, రాష్ట్ర స్థాయిల పోటీల్లో పాల్గొన్నారన్నారు. ఈ ప్రాజెక్టు అత్యుత్తమమైనదిగా భావించిన నిర్వాహకులు జాతీయ స్థాయి పోటీలకు ఎంపిక చేసినట్లు వెల్లడించారు. విష్ణువర్దన్‌రెడ్డి జాతీయ స్థాయి పోటీలకు ఎంపిక కావడంపై ప్రధానోపాధ్యాయుడు, ఉపాధ్యాయులు, తల్లిదండ్రులు, గ్రామస్తులు అభినందించి, హర్షం వ్యక్తం చేశారు. జాతీయ స్థాయిలో రాణించి అవార్డు తీసుకురావాలని ఆకాంక్షించారు. నీటి కోసం మహిళల నిరసన తలుపుల: పదిరోజులుగా తాగునీటి సమస్యతో తీవ్ర ఇబ్బందులు పడుతున్నా..అధికారులు పట్టించుకోకపోవడంతో తలుపుల సంగం బజార్‌కు చెందిన మహిళలు ఆందోళనకు దిగారు. తాగునీటి సమస్య పరిష్కరించాలని బుధవారం ఎంపీడీఓ కార్యాలయం ముందు నిరసనకు దిగారు. ఈ సందర్భంగా పలువురు మహిళలు మాట్లాడుతూ...తాము పది రోజులుగా తాగునీటి సమస్యతో ఇబ్బంది పడుతున్నా...అధికారులు నిమ్మకునీరెత్తినట్లు వ్యవహరిస్తున్నారని మండిపడ్డారు. తాగునీటి సమస్యపై స్పష్టమైన హామీ ఇచ్చేవరకు కదిలేది లేదని కార్యాలయం ముందు రోడ్డుపై బైఠాయించారు. దీంతో రాకపోకలకు అంతరాయం కలిగింది. విషయం తెలుసుకున్న పోలీసులు అక్కడికి వచ్చి మహిళలకు సర్దిచెప్పారు. అనంతరం పంచాయతీ కార్యదర్శి రవణప్పనాయుడుని పిలిపించారు. ఆయన వచ్చి తాగునీటి సమస్య పరిష్కారమయ్యే వరకూ తాత్కాలికంగా ట్యాంకర్లతో నీరు సరఫరా చేస్తామని చెప్పడంతో మహిళలు శాంతించారు. రూ.6 కోట్లతో పరార్‌ ● చీటీలతో పాటు భారీగా అప్పులు ● రాత్రికి రాత్రే ఉడాయించిన డ్వామా ఉద్యోగి కదిరి టౌన్‌: డ్వామా టెక్నికల్‌ అసిస్టెంట్‌ వీరారెడ్డి చీటీలు, డైలీ కలెక్షన్‌ పేరుతో దాదాపు రూ.6 కోట్ల దాకా మోసం చేసి పరారయ్యాడు. బాధితుల వివరాల మేరకు.. కదిరికి చెందిన వీబీజీ రామ్‌జీ టెక్నికల్‌ అసిస్టెంట్‌ వీరారెడ్డి పదేళ్లుగా డబ్బులు వడ్డీకి ఇవ్వడంతో పాటు చిట్టీలు నిర్వహించేవాడు. నమ్మకంగా డబ్బులు వెనక్కు ఇస్తుండటంతో డ్వామా కార్యాలయంలోని టెక్నికల్‌ ఇంజనీర్లు, టెక్నికల్‌ అసిస్టెంట్లతోనే దాదాపు రూ.30 లక్షలు, జ్ఞానేశ్వర్‌రెడ్డితో రూ.40 లక్షలు, ఎస్‌పీఎస్‌ మెడికల్‌ స్టోర్‌ నిర్వాహకుడితో రూ.18 లక్షలు, కమలాకర్‌ మూర్తితో రూ. 5 లక్షలు, రామాంజనేయనాయక్‌ రూ.5 లక్షలు, అలాగే ఇతరులతో పెద్ద మొత్తంలో డబ్బు వసూలు చేశాడు. మొత్తంగా రూ.6 కోట్ల దాకా వసూలు చేశాడు. చీటీలు ఎత్తిన వారికి డబ్బులు ఇవ్వకపోవడం, ఫోన్‌ స్విచ్ఛాఫ్‌ రావడంతో అనుమానం వచ్చి అతని ఇంటి వద్దకు బాధితులు వెళ్లారు. ఇంటికి తాళం వేసి ఉండటంతో కొందరు పోలీసులకు ఫిర్యాదు చేశారు. విచారించి కేసు నమోదు చేస్తామని సీఐ తెలిపారు.