Mancherial

మంచిర్యాలటౌన్‌: మారుతున్న జీవనశైలి, తీసుకుంటున్న ఆహారంతో జిల్లాలో బీపీ, షుగర్‌ వ్యాధిన పడిన వారి సంఖ్య పెరుగుతోంది. వైద్య ఆరోగ్య శాఖ ఆధ్వర్యంలో ప్రభుత్వం నిర్వహిస్తున్న నాన్‌ కమ్యూనికేబుల్‌ డీసీజెస్‌ (ఎన్‌సీడీ) సర్వేలో బీపీ, షుగర్‌ బారిన పడినవారు బయటపడుతున్నారు. జిల్లాలో 30 ఏళ్లకు పైబడిన వారే వ్యాధుల బారిన పడుతున్నట్లు సర్వేలో బయటపడుతోంది. వ్యా యామం చేసేందుకు తగిన సమయం లేకపోవడం, ఉరుకుల పరుగుల జీవితంలో చాలా మంది సమయానికి సరైన ఆహారం తీసుకోక పోవడం, మానసిక ఒత్తిడికి గురికావడం, సరైన నిద్ర, తగిన విశ్రాంతి లేకపోవడంతో వ్యాధులు ప్రబలేందుకు కారణం అవుతున్నట్లు తెలుస్తోంది. ఒకప్పుడు 50 ఏళ్లు దాటిన వారిలో మాత్రమే కనిపించే బీపీ, షుగర్‌ ప్రస్తుతం యువతలోనూ కనిపించడం ఆందోళన కలిగిస్తోంది. 30 ఏళ్లు దాటిన వారిలో ఎక్కువగా కనిపించడం, చిన్న వయస్సులోనే మహిళలు, పురుషులు అనే తేడా లేకుండా వ్యాధుల బారిన పడుతున్నట్లు సర్వేలో గుర్తిస్తున్నారు. బీపీ, షుగర్‌ బారిన పడకుండా ఉండేందుకు ముందస్తు జాగ్రత్తలు తీసుకోకపోవడంతో ఆయా వ్యాధుల బారిన పడుతున్న వారి సంఖ్య రోజురోజుకూ పెరుగుతోంది. ఒకసారి ఈ వ్యాధులు దరిచేరితే, వాటిని అదుపులో ఉంచేందుకు జీవితాంతం మందులు వాడడంతో పాటు, సరైన వ్యాయామం, ఆహార నియమాలను తప్పనిసరిగా పాటించాలని వైద్యులు సూచిస్తున్నారు. సర్వేలో వ్యాధుల గుర్తింపు వైద్య ఆరోగ్య శాఖ ఆధ్వర్యంలో జిల్లా వ్యాప్తంగా నిర్వహిస్తున్న ఎన్‌సీడీ సర్వేలో మధుమేహం, రక్తపోటు వంటి దీర్ఘకాలిక వ్యాధుల బారిన ఎంతమంది పడుతున్నారో తెలుసుకుంటున్నారు. జాతీయ ఆరోగ్య మిషన్‌ పథకంలో భాగంగా అన్ని ప్రభుత్వ ప్రాథమిక ఆరోగ్య కేంద్రాలు, కమ్యూనిటీ హెల్త్‌ సెంటర్లు, పట్టణ ఆరోగ్య కేంద్రాలు, జిల్లా ఆస్పత్రులు.. ఇలా అన్నింటిలోనూ బీపీ, షుగర్‌ పరీక్షలు చేస్తున్నారు. 2011 జనాభా లెక్కల ప్రకారం జిల్లాలో 8,09,000 మంది జనాభా ఉండగా, 30 ఏళ్లు పైబడిన వారు 4,20,680 మంది ఉన్నట్లుగా గుర్తించారు. ఇప్పటి వరకు 2,86,149 మందికి వైద్య పరీక్షలు నిర్వహించగా, మధుమేహం ఉన్నవారు 29,058 మంది, రక్తపోటు (బీపీ) ఉన్నవారు 73,664 మంది ఉన్నట్లు గుర్తించి, వారికి వైద్యంతో పాటు అవసరమైన మందులు అందిస్తున్నారు. వారి వివరాలను వెబ్‌పోర్టల్‌లో నమోదు చేసి ఎన్‌సీడీ కార్డు ఇస్తున్నారు. ఎన్‌సీడీ కార్డులో పేషెంట్‌ పేరు, అందిస్తున్న చికిత్స, మందుల వివరాలు పొందుపర్చి, ప్రతీనెల ఆశా వర్కర్లు, ఏఎన్‌ఎంల ద్వారా వారికి మందులు అందిస్తున్నారు. వీటితో పాటు ఓరల్‌ క్యాన్సర్‌ కేసులు 25, బ్రెస్ట్‌ క్యాన్సర్‌ కేసులు 46, సర్వైకల్‌ క్యాన్సర్‌ కేసులు 12 ఉన్నట్లు నిర్ధారించారు.

పాతమంచిర్యాల: రాష్ట్ర ప్రభుత్వం ఫీజు రీయింబర్స్‌మెంట్‌ బకాయిలు వెంటనే విడుదల చేయాలని ఎస్సీ, ఎస్టీ, బీసీ, మైనార్టీ జేఏసీ అధ్యక్షుడు మంచర్ల సదానందం డిమాండ్‌ చేశారు. ఆదివారం ఏర్పాటు చేసిన సమావేశంలో ఆయన మాట్లాడుతూ ఫీజు రీయింబర్స్‌మెంట్‌ విడుదల చేయకపోవడంతో విద్యార్థుల చదువులకు ఇబ్బంది కలుగుతోందన్నారు. విద్యార్థుల భవిష్యత్‌ను దృష్టిలో ఉంచుకుని ప్రభుత్వం చర్యలు తీసుకోవాలన్నారు. ఈ నెల 30న హైదరాబాద్‌లోని ఇందిరా పార్కు వద్ద నిర్వహించనున్న మహాధర్నా కార్యక్రమాన్ని విద్యార్థులు, విద్యార్థి సంఘాల నాయకులు విజయవంతం చేయాలన్నారు. సమావేశంలో ఎదునూరి రమేశ్‌, రామస్వామి, గొడిశెల సురేందర్‌, మేడి రాజు, సారయ్య, తదితరులు పాల్గొన్నారు.

బెల్లంపల్లి: రాష్ట్ర ప్రభుత్వం సింగరేణి సంస్థకు ఉన్న బకాయిలు వెంటనే చెల్లించాలని మాజీ ఎమ్మెల్యే, బీజేపీ రాష్ట్ర కార్యవర్గ సభ్యురాలు అమురాజుల శ్రీదేవి డిమాండ్‌ చేశారు. ఆదివా రం విలేకరుల సమావేశంలో ఆమె మాట్లాడుతూ సింగరేణి సంస్థకు రాష్ట్ర ప్రభుత్వం నుంచి రూ.55 వేల కోట్ల బకాయిలు రావాల్సి ఉందన్నారు. బకాయిలు చెల్లించాలని, కార్మికుల సమస్యలు పరిష్కరించాలని డిమాండ్‌ చేస్తూ ఈ నెల 30న సీసీసీ కార్నల్‌లో ధర్నా నిర్వహించనున్నట్లు తెలిపారు. బీజేపీ రాష్ట్ర అధ్యక్షుడు రాంచందర్‌రావు, మల్కాజిగిరి ఎంపీ ఈటల రాజేందర్‌, శాసనసభ పక్ష నేత ఏలేటి మహేశ్వర్‌రెడ్డి హాజరు కానున్నట్లు తెలిపారు. సమావేశంలో బీజేపీ పట్టణ అధ్యక్షురాలు దార కళ్యాణి, ప్రధాన కార్యదర్శి ఎర్రోజు శ్రీనివాస్‌, నాయకులు మద్దెర్ల శీనివాస్‌, దూది ప్రకాష్‌, నల్లుల సంగీత, గాండ్ల మహేష్‌, పుల్లూరి రాము, తదితరులు పాల్గొన్నారు.

జన్నారం మండలం పొనకల్‌కు చెందిన సాయికృష్ణ భార్య, తమ్ముడు జ్వరం బారిన పడ్డారు. ఆస్పత్రిలో పరీక్షలు చేయించుకోగా డెంగీ పాజిటివ్‌ అని రిపోర్టు వచ్చింది. భయంతో మంచిర్యాల ఆసుపత్రికి వెళ్లి నాలుగు రోజులుగా చికిత్స చేయించుకున్నాక తగ్గినట్లు తెలిపారు.జన్నారం మండలం మురిమడుగుకు చెందిన శ్రీనివాస్‌కు పదిహేను రోజుల క్రితం తీవ్రమైన జ్వరం రావడంతో జన్నారంలోని ఓ ప్రైవేట్‌ ఆస్పత్రిలో పరీక్షలు చేయించుకోగా డెంగీ పాజిటివ్‌ వచ్చినట్లు వైద్యులు ధ్రువీకరించారు. రక్త కణాలు 40 వేలకు పడిపోయాయని చెప్పడంతో వెంటనే మంచిర్యాలలోని ఓ ప్రైవేట్‌ ఆస్పత్రిలో నాలుగు రోజులు చికిత్స చేయించుకున్నాడు. ఆ తర్వాత అతని భార్య, కుమారుడు కూడా జ్వరం బారిన పడ్డారు.జన్నారం: మండలంలో డెంగీ జ్వరాలు భయాందోళన కలిగిస్తున్నాయి. పలు గ్రామాల్లో పారిశుద్ధ్యం లోపించడం, మురుగునీరు నిల్వ ఉండడం, దోమల బెడద తీవ్రం కావడంతో వందలాది మంది జ్వరాల బారిన పడుతున్నారు. రెండు నెలల కాలంలో మండలంలో వివిధ గ్రామాలకు చెందిన 50కి పైగా ప్రజలు డెంగీ బారిన పడినట్లు తెలుస్తోంది. అపరిశుభ్రత..దోమల వ్యాప్తి గ్రామాల్లోని వీధులు, డ్రెయినేజీల్లో మురుగునీరు నిలిచి దుర్వాసన వెదజల్లుతున్నా పంచాయతీ అధికారులు పట్టించుకోవడం లేదనే ఆరోపణలు వస్తున్నాయి. మురుగు కుంటలు, నిలిచిపోయిన వాననీరు దోమలకు ఆవాసాలుగా మారి డెంగీ, టైఫాయిడ్‌ వంటి జ్వరాలు ప్రబలడానికి ప్రధాన కారణమవుతున్నాయి. జన్నారం ప్రభుత్వ ఆరోగ్య కేంద్రంతో పాటు స్థానిక ప్రైవేట్‌ ఆస్పత్రులు జ్వర బాధితులతో కిటకిటలాడుతున్నాయి. పల్లెల్లో ఇంటికి ఒకరిద్దరు జ్వరంతో బాధపడుతున్నట్లు తెలుస్తోంది. పీహెచ్‌సీల్లో తగినన్ని మందులు, వైద్య సదుపాయాలు లేకపోవడంతో ప్రైవేట్‌ ఆస్పత్రులకు వెళ్లి వేలాది రూపాయలు ఖర్చు చేయాల్సి వస్తోందని ఆవేదన వ్యక్తం చేస్తున్నారు. సంబంధిత అధికారులు వెంటనే స్పందించి గ్రామాలు, తండాల్లో ప్రత్యేక వైద్య శిబిరాలు ఏర్పాటు చేయాలని, దోమల నివారణకు ఫాగింగ్‌, బ్లీచింగ్‌ పౌడర్‌ పిచికారీ చేయాలని మండల ప్రజలు కోరుతున్నారు.

శ్రీరాంపూర్‌: సింగరేణిలో పనిచేస్తున్న కాంట్రాక్ట్‌ కార్మికులు నిర్లక్ష్యానికి గురవుతున్నారు. కంపెనీ ఉత్పత్తి లక్ష్యసాధన, సంక్షేమ కార్యక్రమాల్లో సేవలందిస్తున్న కాంట్రాక్ట్‌ కార్మికులకు సీఎంపీఎఫ్‌ అమలు, సేవల్లో తీవ్ర జాప్యం జరుగుతోంది. కంపెనీ వ్యాప్తంగా సివిల్‌ నిర్మాణాలు, సివిక్‌, పారిశుద్ధ్యం, సెక్యూరిటీ, హౌజ్‌కీపింగ్‌, రోడ్‌ స్వీపింగ్‌, సీహెచ్‌పీలో సేల్‌పికింగ్‌, బెల్ట్‌ క్లీనింగ్‌, నర్సరీ, హాస్పిటల్స్‌, భూగర్భంతో పాటు ఉపరితలాల్లోని అనేక డిపార్టుమెంటుల్లో 28 వేల మంది కాంట్రాక్ట్‌ కార్మికులు పనులు చేస్తున్నారు. నిబంధనల ప్రకారం కంపెనీలో పనిచేసే ప్రతీ కార్మికునికి కోల్‌ మైన్స్‌ ప్రావిడెంట్‌ ఫండ్‌ (సీఎంపీఎఫ్‌) తప్పనిసరిగా అమలు చేయాలి. కానీ వీరిలో కేవలం 12 వేల మందికి మాత్రమే సీఎంపీఎఫ్‌ అమలవుతోంది. టెండర్‌ షెడ్యూల్‌లో కార్మికులకు సీఎంపీఎఫ్‌ అమలు చేయాలనే నిబంధన పెట్ట కపోవడంతో ఈ సమస్య ఉత్పన్నం అవుతోంది. నాలుగేళ్లుగా లెక్కల్లేవ్‌.. ప్రతీనెల కాంట్రాక్ట్‌ కార్మికుని నెల బేసిక్‌ వేతనం నుంచి 12 శాతం రికవరీ చేసి అంతే మొత్తం కంపెనీ కాంట్రాక్టర్‌ నుంచి సీఎంపీఎఫ్‌ ఖాతాలో జమ చేస్తుంది. ఇలా జమ అయిన డబ్బులకు ఆశాఖ వడ్డీ కలిపి ఖాతాలో జమ చేస్తుంది. ఇప్పటి వరకు కంపెనీ వ్యాప్తంగా సుమారు 12 వేల మంది కాంట్రాక్ట్‌ కార్మికులకు సీఎంపీఎఫ్‌ అమలవుతోంది. కానీ వారికి ఖాతాలో ఎంత మొత్తం జమ అయ్యిందో ఆ శాఖ అధికారులు లెక్కలు చెప్పడం లేదు. గతంలో ఏడాది ముగిసాక జమ వివరాలను చీటీల రూపంలో అందించే వారు. ఇప్పుడు ఆ శాఖలో ఉన్న ఖాతాలను ఆన్‌లైన్‌ చేస్తున్నామని అధికారులు చెబుతున్నా ఇప్పటికీ ఎక్కువ మొత్తం ఖాతాలు ఆన్‌లైన్‌ కాలేదని కార్మికులు వాపోతున్నారు. 2021–22 ఆర్థిక సంవత్సరం నుంచి సీఎంపీఎఫ్‌ జమ లెక్కలు చెప్పాలని డిమాండ్‌ చేస్తున్నారు.జమ లెక్కలు చెప్పాలిప్రతీ కాంట్రాక్ట్‌ కార్మికుడికి సీఎంపీఎఫ్‌ అమలు చేయాలని ఆఫీసుల చుట్టూ తిరుగుతున్నాం. రికవరీ అయిన వారికి ఖాతాలో ఎన్ని డబ్బులు ఉన్నాయో చెప్పడంలేదు. ప్రతీ కాంట్రాక్ట్‌ కార్మికునికి సీఎంపీఎఫ్‌ అమలు చేసి జమ లెక్కలు చెప్పాలి. – డీ.బ్రహ్మానందం, వర్కింగ్‌ ప్రెసిడెంట్‌, ఎస్సీసీడబ్ల్యూసీఎంపీఎఫ్‌ అమలు చేయాలి12 సంవత్సరాలుగా నర్సరీలో పని చేస్తు న్నా. ఇప్పటి వరకు సీఎంపీఎఫ్‌ కడుతలేరు. కాంట్రాక్టర్లను అడిగితే అధికారులను అడుగాలంటున్నారు. వారిని అడిగితే ఇదిగో అయిపోతుందంటూ దాటవేస్తున్నారు. ఇప్పటికై నా సీఎంపీఎఫ్‌ అమలు చేయాలి. – పీ.లక్ష్మి, నర్సరీ కార్మికురాలు

దండేపల్లి/పాతమంచిర్యాల/నెన్నెల: రాష్ట్ర ప్రభుత్వం దాదాపు నాలుగేళ్ల తర్వాత పింఛన్ల కోసం ఇటీవల దరఖాస్తులు స్వీకరించింది. దరఖాస్తుల గడువు ముగియడంతో వెంటనే వాటి విచారణ ప్రారంభించింది. ఈ నెల 25 వరకు పరిశీలన పూర్తి చేయాలని లక్ష్యంగా నిర్దేశించింది. సమయం చాలక పరిశీలన పూర్తికాక పోవడంతో ఈ నెలాఖరు వరకు గడువు పొడగించారు. జిల్లాలోని 16 మండలాలు, 5 మున్సిపాలిటీలు, ఒక కార్పొరేషన్‌తో సహా, వివిధ కేటగిరీలలో మొత్తం 13,744 దరఖాస్తులు వచ్చాయి. వీటి పరిశీలనకు జిల్లా వ్యాప్తంగా 143 మంది అధికారులను నియమించారు. ఐదు విభాగాల్లో పరిశీలన జిల్లా వ్యాప్తంగా 13,744 మంది పింఛన్‌ కోసం దరఖాస్తు చేసుకున్నారు. వీటిలో అత్యధికంగా వితంతు, దివ్యాంగ పింఛన్ల కోసం దరఖాస్తులు వచ్చా యి. వీటిని అధికారులు ఐదు కేటగిరీల్లో పరిశీలిస్తున్నారు. ప్రభుత్వం ప్రత్యేకంగా రూపొందించిన 360 డిగ్రీల మొబైల్‌ యాప్‌లో మొత్తం 12 ప్రశ్నలను నమోదు చేయడంతో పాటు, దరఖాస్తులు పరిశీలించనున్నారు. 7.5 ఎకరాల కంటే ఎక్కువగా మెట్ట, మూడెకరాల కంటే ఎక్కువగా నీటి ఆధారిత పంటల సాగుభూములు ఉండరాదని, పట్టణ ప్రాంతాల్లో రూ.2 లక్షలు, గ్రామీణ ప్రాంతాల్లో రూ.1.50 లక్షల ఆదాయం ఉండాలి. ఒంటరి మహిళల విషయంలో సంబంధిత పత్రాలను, కల్లుగీత, చేనేత కార్మికులకు గుర్తింపు కార్డు పరిశీలనలోకి తీసుకుంటారు. మొబైల్‌ యాప్‌ ద్వారా చేయూత దరఖాస్తుదారుడి వివరాలు పక్కాగా పరిశీలిస్తోంది. ఆధార్‌ అనుసంధానం కావడంతో అర్హులా? కాదా? అనే నిర్ధారణ జరుగుతోంది. మధ్యవర్తులను నమ్మి ఎవరూ పైరవీలు చేయరాదని అధికారులు సూచిస్తున్నారు. అర్హులకు అన్యాయం జరగకుండా చూడాలన్న నేపథ్యంలో ప్రతీ దరఖాస్తును, దానికి జతచేసిన పత్రాలను క్షుణ్ణంగా పరిశీలించి, అదనంగా అవసరమైన పత్రాలను వారి వద్ద నుంచి తీసుకొని విచారణ పూర్తి చేస్తున్నారు. విచారణ అధికారులదే బాధ్యత పింఛన్‌కు అర్హులను ఎంపిక చేశాక ఇందులో ఎవరైనా అనర్హులని తేలితే క్షేత్రస్థాయి పరిశీలన అధికారులనే బాధ్యులను చేయనున్నారు. లబ్ధిదారులకు పింఛన్‌ రూపంలో చెల్లించిన మొత్తాన్ని అధికారి నుంచి రికవరీ చేయనున్నట్లు ప్రభుత్వం జారీ చేసిన ఉత్తర్వుల్లో పేర్కొనడం గమనార్హం. దీంతో పరిశీలన అధికారులు అర్హుల ఎంపికను పకడ్బందీగా నిర్వహించేందుకే ప్రాధాన్యం ఇస్తున్నారు. అర్హతకు సంబంధించిన ధ్రువపత్రాలను జాగ్రత్తగా పరిశీలిస్తున్నారు.జిల్లాలో పింఛన్‌ దరఖాస్తుల వివరాలువితంతు 7,859 ఒంటరి మహిళ 1,790 దివ్యాంగులు 3,337 నేత కార్మికులు 294 కల్లు గీత కార్మికులు 464

కాసిపేట: మండలంలోని దేవాపూర్‌ పోలీసుస్టేషన్‌ పరిధిలో అక్రమంగా గుడుంబా తరలిస్తున్న ఇద్దరిని అరెస్టు చేసినట్లు ఎస్సై గంగారాం తెలిపారు. ఆయన కథనం ప్రకారం.. మండలంలోని లంబాడితండా(డి) గ్రామానికి చెందిన అజ్మీర రాజేష్‌, బానోత్‌ రాజేష్‌ బైక్‌పై 20 లీటర్ల గుడుంబాను విక్రయించేందుకు వెళ్తున్నారు. ఆదివారం దేవాపూర్‌ అంగడిబజార్‌ ఏరియాలో పట్టుకున్నట్లు ఎస్సై తెలిపారు. ఇద్దరిని అరెస్టు చేసి వారి నుంచి గుడుంబా స్వాధీనం చేసుకున్నామన్నారు. ఈ మేరకు కేసు దర్యాప్తు చేస్తున్నట్లు తెలిపారు.

నార్నూర్‌: తల్లిని కోల్పోయిన చిన్నారికి అండగా నిలిచారు గోండ్వాన పంచాయతీ రాయి సెంటర్‌ పెద్దలు, అభిమాన్యు వాట్సాప్‌ గ్రూప్‌ సభ్యులు. గాదిగూడ మండలం హిరాపూర్‌కు చెందిన ఆత్రం కవిత జంగు రిమ్స్‌లో మూర్ఛ వ్యాధితో చికిత్స పొందుతూ పాపకు జన్మనిచ్చి మృతిచెందింది. కుటుంబం ఆర్థిక ఇబ్బందుల్లో ఉండటాన్ని గుర్తించిన అభిమాన్యు గ్రూప్‌ సభ్యులు ఆపన్నహస్త అందించాలని పిలుపునిచ్చారు. దాతలు రూ.82,200 విరాళాలు సేకరించారు. జూగ్నక్‌ భీంరావ్‌ సర్మేడి (గాదిగూడ), మందాడి దౌలత్‌రావు సర్మేడి (ఝరి) తదితరుల చేతుల మీదుగా ఆదివారం కుటుంబ సభ్యులకు అందజేశారు. పాపకు ‘రక్షణ’గా నామకరణం చేశారు. ఈ మొత్తంలో రూ.45 వేలతో పాప పేరిట ఫిక్స్‌డ్‌ డిపాజిట్‌, రూ.27 వేలతో ఆవు, లేగదూడ, రూ.5 వేలతో వైద్య అవసరాల కోసం జమ, రూ.5,200 నగదు అందజేశారు. ఆపదలో ఉన్న కుటుంబానికి అండగా నిలిచిన దాతలు, సహకరించిన ఎంఎన్‌ఆర్‌ టీమ్‌కు అభిమాన్యు గ్రూప్‌ సభ్యులు కృతజ్ఞతలు తెలిపారు. ఆదివాసీ ఉద్యోగుల సంఘం నాయకులు, సామాజిక కార్యకర్త మెస్రం శేఖర్‌బాబు, పీఆర్‌టీయూ ఉపాధ్యాయ సంఘం గాదిగూడ మండల అధ్యక్షుడు మెస్రం లింగు, ఆదివాసీ విద్యార్థి సంఘం జిల్లా అధ్యక్షుడు పెందూర్‌ సంతోష్‌, మాజీ సర్పంచ్‌ మాడవి జాకు, జైభారత్‌ మండల నాయకులు గంగారాం తదితరులు ఉన్నారు. ఆవు, లేగదూడ అందజేస్తున్న ఆదివాసీ పెద్దలు, అభిమాన్యూ గ్రూప్‌ సభ్యులుఆర్థికసాయం అందిస్తున్న అభిమాన్యు వాట్సాప్‌ గ్రూప్‌ సభ్యులు, ఆదివాసీ పెద్దలు

మందమర్రిరూరల్‌: సింగరేణిలో కొందరు ఉద్యోగుల హాజరు అంతంత మాత్రంగా ఉంది. నెలకు కనీసం 15, ఏడాదిలో కనీసం 101 మస్టర్లు చేయకుండా గైర్హాజరవుతున్నారు. దీంతో బొగ్గు ఉత్పత్తిపై ప్రభావం చూపుతుంది. వీరిలో నాన్‌ ప్రొడక్షన్‌ వర్క్‌ సైడ్‌ అంటే జనరల్‌ అసిస్టెంట్లు, ట్రైనీ ఉద్యోగులే ఎక్కువ. మందమర్రి ఏరియాలో కేకే–5, కేకే–ఓసీ, కాసిపేట, కాసిపేట–2, శాంతిఖని గనులతోపాటు వర్క్‌షాపు, సివిల్‌, ఎస్‌అండ్‌ పీసీ, జీఎం ఆఫీస్‌, జీవీటీసీ తదతర విభాగాల్లో మొత్తం 4,500 మంది ఉద్యోగులు ఉన్నారు. వీరిలో సుమారు 1350 పైచిలుకు మంది అంటే 30 శాతం వరకు విధులకు హాజరవడం లేదు. కేకే–5 గనిలో సుమారు 200, శాంతిఖనిలో 130, కాసిపేట గనిలో 351, కాసిపేట–2 గనిలో 276, కేకే–ఓసీలో 84 మంది ఉద్యోగులతోపాటు ఇతర విభాగాల్లో సంవత్సరంలో కనీసం 101 మస్టర్‌లైనా చేయకుండా సుమారు 250 పైచిలుకు మంది గైర్హాజరు అవుతున్నారు. అయితే గనుల, డిపార్ట్‌మెంట్ల సంక్షేమాధికారులు, గుర్తింపు కార్మిక సంఘం ప్రతినిధులు వారి కుటుంబ సభ్యుల సమక్షంలో సమావేశం నిర్వహించి కౌన్సెలింగ్‌ ఇస్తున్నారు. మూడు నెలల వరకు అవకాశంఒక ఉద్యోగి ఏడాదిలో 101 మస్టర్ల కంటే తక్కువగా ఉంటే గుర్తించి ముందుగాఅధికారులు నోటీసులు జారీ చేస్తారు. వారి పేర్లు గనిపై నోటీసు బోర్డుపై అంటించడం, రెస్పాండ్‌ కానివారికి న్యూస్‌ పేపర్‌ ప్రకటన ద్వారా సమాచారం తెలియజేస్తారు. అనంతరం వారికి కుటుంబ సభ్యుల సమక్షంలో గుర్తింపు సంఘం నాయకుల ఆధ్వర్యంలో కౌన్సెలింగ్‌ ఇస్తారు. ప్రతీనెల కనీసం 20 మస్టర్లు చేయాలని మూడు నెలల వరకు అవకాశం ఉంది. సద్వినియోగం చేసుకోకపోతే తాత్కాలికంగా ఇంక్రిమెంట్‌ కట్‌ చేయడం లాంటి చర్యలంటాయి. మూడు నుంచి ఐదేళ్ల వరకు గైర్హాజరు ఉద్యోగుల్లో మార్పు రాకపోతే క్రమశిక్షణలో భాగంగా చర్యలు తీసుకుంటారు. పద్ధతి మార్చుకోవాలి గైర్హాజరు ఉద్యోగులు పద్ధతి మార్చుకుని విధులకు హాజరుకావాలి. లేకపోతే ప్రతీనెల వేతనం, లాభాల్లో వాటా, బోనస్‌, జీతం, లీవ్‌, తదితర వెసలుబాటు కోల్పోయే అవకాశం ఉంది. గతంలో గైర్హాజరు పేరిట ఉద్యోగం కోల్పోయిన పరిస్థితి దయనీయంగా ఉంది. కుటుంబ బాధ్యతలు గుర్తుంచుకుని విధులకు హాజరుకావాలి. – నీలజాల రాధాకృష్ణ, ఏరియా జీఎం మందమర్రి

ఆదిలాబాద్‌(బేల): తమ వయస్సుకు తగిన ఎత్తు, బరువు లేకుండా చిన్నారులు పోషకాహార లోపంతో కొట్టుమిట్టాడుతున్నారు. ఇటీవల విడుదలైన జాతీయ కుటుంబ ఆరోగ్య సర్వే–6 (ఎన్‌ఎఫ్‌ హెచ్‌ఎస్‌–6) నివేదికలో 2023–24 సంవత్సరానికి సంబంధించిన వివరాలను కేంద్రప్రభుత్వం వెల్లడించింది. 2019–21తో పోలిస్తే పలు అంశాల్లో స్వల్ప మెరుగుదల కనిపించినప్పటికీ, చిన్నారుల్లో పోషకాహార లోపం సమస్య మాత్రం పూర్తిగా తొలగిపోలేదని గణాంకాలు స్పష్టం చేస్తున్నాయి. ఐదేళ్లలోపు పిల్లల్లో వయసుకు తగ్గ ఎత్తు, బరువు లేకపోవడం, తీవ్రంగా బరువు తగ్గడం వంటి సమస్యలు ఇంకా కొనసాగుతుండటం ఆందోళన కల్గిస్తోంది. భావి భారతానికి పునాదిగా నిలవాల్సిన చిన్నారుల ఆరోగ్య పరిస్థితి ఇలా ఉండటం భవిష్యత్తుపై ప్రశ్నలు రేకెత్తిస్తోంది. తల్లిపాలపై పెరిగిన అవగాహనఉమ్మడి జిల్లాలో తల్లిపాల ప్రాధాన్యంపై అవగాహ న పెరుగుతోంది. పుట్టిన వెంటనే శిశువుకు తల్లిపాలు అందించే విషయంలో గత సర్వేతో పోలిస్తే తాజా గణాంకాల్లో మెరుగుదల నమోదైంది. మూ డేళ్లలోపు పిల్లలకు పుట్టిన గంటలోపే తల్లిపాలు అందించిన వారి శాతం ఆదిలాబాద్‌లో 20.4 నుంచి 6 4.2కి,నిర్మల్‌లో 20.9నుంచి 56.4కి, ఆసిఫాబాద్‌లో 42.6 నుంచి 53.8కి, మంచిర్యాలలో 24.2 నుంచి 45.3కి పెరిగింది. ముఖ్యంగా ఆదిలాబాద్‌లో 43.8 శాతం పాయింట్ల పెరుగుదల నమోదవగా, నిర్మల్‌లో35.5, మంచిర్యాలలో 21.1, ఆసిఫాబాద్‌లో 11. 2 శాతం పాయింట్ల చొప్పున వృద్ధి కనిపించింది. ఆహారలోపంతో.. ఎదుగుదల ముప్పుఉమ్మడి జిల్లాలో 6–23 నెలల తల్లిపాలు తాగే పిల్ల లకు తగిన అనుబంధ ఆహారం అందుతున్న పరిస్థితిలో జిల్లాల మధ్య వ్యత్యాసం కనిపిస్తోంది. 2019 –21తో పోలిస్తే 2023–24లో ఆదిలాబాద్‌, నిర్మల్‌, కుమురం భీం ఆసిఫాబాద్‌ జిల్లాల్లో పరిస్థితి మెరుగుపడగా, మంచిర్యాలలో మాత్రం తగ్గుదల నమోదైంది. ఆదిలాబాద్‌లో 9.7 శాతం నుంచి 18 శాతా నికి, నిర్మల్‌లో 10.2 నుంచి 22.7 శాతానికి, ఆసిఫా బాద్‌లో 8.1 నుంచి 13.2 శాతానికి పెరిగింది. మంచిర్యాలలో మాత్రం 4.3 శాతం నుంచి 2.2 శాతాని కి పడిపోయింది. ఆరు నెలల తర్వాత తల్లిపాలతో పాటు తగిన అనుబంధ ఆహారం అందకపోతే పిల్ల లకు అవసరమైన శక్తి, ప్రోటీన్‌, సూక్ష్మపోషకాలు అందక బరువు పెరుగుదల మందగించడం, ఎదుగుదల లోపం వంటి సమస్యల ప్రమాదం పెరుగుతుంది. రెండు జిల్లాల్లో వెనుకబాటు

దండేపల్లి: రైతులకు 11 అంకెలతో కూడిన విశిష్ట గుర్తింపు కార్డును జారీ చేసే ప్రక్రియను ‘రైతు రిజిస్ట్రేషన్‌’ (ఫార్మర్‌ ఐడీ) పేరిట వ్యవసాయ శాఖ చేపట్టి ఏడాది దాటింది. ప్రాధాన్యం గల ఈ ప్రక్రి య ఇప్పటి వరకు జిల్లాలో 77 శాతం మాత్రమే పూర్తయింది. రాష్ట్ర వ్యవసాయ శాఖ దీనిపై ప్రత్యేక దృష్టి సారించింది. ఈ నెల 22 నుంచి 30 వరకు గ్రామాల్లో ప్రత్యేక సదస్సులు నిర్వహించి రైతులను ఈదిశగా చైతన్యపరుస్తూ నమోదును పెంచాలని నిర్ణయించింది. ఆయా వ్యవసాయ క్లస్టర్లలో వ్యవసాయ విస్తరణాధికారులు రైతు రిజిస్ట్రీ ప్రక్రియ వేగవంతం చేయాల్సి ఉంటుంది. మండల వ్యవసాయాధికారులు ప్రక్రియను పర్యవేక్షించనున్నారు. కార్డు ప్రాధాన్యంపై అవగాహన ఈ కార్డుతో కలిగే ప్రయోజనాలపై రైతులకు అవగాహన కల్పించాల్సి ఉంటుంది. కనీస మద్దతు ధరలకు పంటల విక్రయం, యాప్‌ ద్వారా ఎరువుల కొనుగోళ్లు, బ్యాంకుల ద్వారా పంట రుణాలు పొందడానికి, కేంద్ర, రాష్ట్ర ప్రభుత్వ పథకాలు, సేవలు ఇతర ప్రయోజనాలు పొందేందుకు, రైతు సేవలు, రాయితీలు, ఇతర వ్యవసాయ సంబంధిత సేవలకు ఈ విశిష్ట గుర్తింపు కార్డు ఉపయోగపడుతుందని వివరించాల్సి ఉంటుంది. పారదర్శకత రైతుల వివరాలు కచ్చితంగా నమోదైతే పారదర్శకత పెరుగుతుంది. ఒకే ఐడీతో లబ్ధి నేరుగా బ్యాంక్‌ ఖాతాలోకి వస్తుంది. భవిష్యత్‌ పథకాల ప్రయోజనాలు సులభం, స్పష్టమైన గుర్తింపుతో మోసాలు తగ్గుతాయి. నమోదు పూర్తయ్యాక ‘యూనిక్‌ ఐడీ’ని అందజేస్తారు. నమోదుకు అవసరమైనవి ఆధార్‌ కార్డు నంబర్‌, భూమిపాస్‌ బుక్‌ వివరాలు ఆధార్‌తో లింక్‌ అయి ఉన్న ఫోన్‌నంబర్‌తో రైతు వేదికల్లో ఏఈవోల వద్ద ఉచితంగా చేయించుకోవచ్చు. లేదంటే మీసేవ కేంద్రాల్లో చేయించుకోవచ్చు.

ఈ ఫొటోలోని వ్యక్తిపేరు నాగవత్‌ రాజు నాయక్‌. చెన్నూర్‌ మండలం లంబాడిపల్లికి చెంది న ఈయన వయసు 65 ఏళ్లు. ఇప్పటి వరకు పది ఎన్నికల్లో ఓటుహక్కు వినియోగించుకున్నాడు. ఇటీవల చేపట్టిన సర్‌ ప్రక్రియలో భాగంగా 2002 ఓటరు జాబితాలో రాజు నాయక్‌ పేరు కనిపించలేదు. దీంతో అతనికి సర్‌ నోటీసులు జారీ అయ్యాయి. దీంతో తన ఓటు ఉంటుందో పోతుందో అని రాజు నాయక్‌ ఆందోళన వ్యక్తం చేస్తున్నాడు. చెన్నూర్‌: ఓటరు జాబితా ప్రత్యేక సవరణ ప్రక్రియ(సర్‌) చెన్నూర్‌ మండలం లంబాడిపల్లి గ్రామ ఓటర్లను కలవరపెడుతోంది. ఆ పంచాయతీలోని వందలాది మందికి నోటీసులు జారీయ్యాయి. వారంతా ఆధారాలతో పత్రాలు సమర్పించినా సర్‌ ప్రక్రియలో పేర్లు నమోదు కాలేదు. రానున్న ఎన్నికల్లో ఓటు హక్కు ఉంటుందా లేదా అని గ్రామస్తులు ఆవేదన వ్యక్తం చేస్తున్నారు. అందరికీ నోటీసులు..లంబాడిపల్లి గ్రామ పంచాయతీలో మొత్తం 425 మంది ఓటర్లు ఉండగా, 15 మంది మృతి చెందా రు. ప్రస్తుతం 410 మంది ఉన్నారు. సర్‌ ప్రక్రియలో అందరికీ నోటీసులు రావడంతో సంబంధిత ధ్రువీ కరణ పత్రాలను బీఎల్‌వోలకు అందజేశారు. అయినా రెండు దఫాలు మళ్లీ నోటీసులు జారీయ్యాయి. 2002 ఓటరు జాబితాలో పేర్లు లేవని తెలిపినందున ఆందోళన మరింత పెరిగింది. హక్కు ప్రశ్నార్థకంలంబాడిపల్లిలో సుమారు వందేళ్లుగా తాతలు, తండ్రులు జీవనం సాగించారని ప్రజలు తెలిపారు. పంచాయతీగా ఏర్పడి పది సంవత్సరాలు అవుతోంది. ప్రతి ఎన్నికల్లో ఓటు హక్కు విని యోగించుకున్నామని, గత గ్రామ పంచాయతీ ఎ న్నికల్లో కూడా ఓటు వేసిన పేర్లు జాబితాలో లేకపోవడం దారుణమని గ్రామస్తులు అంటున్నారు. జి ల్లా అధికారులు స్పందించి పాత రికార్డులు పరిశీ లించి ఓటు హక్కు కల్పించాలని ప్రజలు కోరుతున్నారు.

● రామగుండం సీపీ అంబర్‌ కిషోర్‌ ఝామంచిర్యాలక్రైం: తెలంగాణ ఉద్యమంలో కొండా లక్ష్మణ్‌ బాపూజీ కీలకపాత్ర పోషించారని, తన ఇళ్లు, ఆస్తులు సైతం తాకట్టు పెట్టిన మహనీయుడని రామగుండం సీపీ అంబర్‌ కిషోర్‌ ఝా కొనియాడారు. కమిషనరేట్‌ ఆవరణలో ఆదివారం కొండా లక్ష్మణ్‌ జయంతి వేడుకలను ఘనంగా నిర్వహించారు. అనంతరం బాపూజీ చిత్రపటానికి పూలమాలలు వేసి నివాళులర్పించారు. ఈ సందర్భంగా సీపీ మాట్లాడుతూ బాపూజీ కుమురంభీం జిల్లా వాంకిడిలో 1915 సెప్టెంబర్‌ 27న జన్మించారని, స్వాతంత్రోద్యమంలో నిజాం నిరంకుశ పాలనకు వ్యతిరేకంగా ఽజరిగిన పోరాటంలో అలుపెరుగని కృషి చేశారన్నారు. 1969లో జరిగిన తొలిదశ తెలంగాణ ఉద్యమంలో ఆయన కీలక పాత్ర పోషించారన్నారు. ఈ కార్యక్రమంలో అడిషనల్‌ డీసీపీ శ్రీనివాస్‌, ఎస్‌బీ ఏసీపీ నాగేంద్రగౌడ్‌, ఆర్‌ఐ మల్లేశం, తదితరులు పాల్గొన్నారు.

వేమనపల్లి: ఆస్తి కోసం తమ్ముడిని అన్న హత్య చేసినట్లు చెన్నూర్‌ రూర ల్‌ సీఐ కృష్ణ తెలిపారు. ఆయన తెలిపిన వివరా ల ప్రకారం.. మండలంలోని నీల్వాయికి చెందిన కుడుకల శ్రీనివాస్‌(40)ను అతని అన్న రాజేష్‌ ఆస్తికోసం హత్యకు పథక రచన చేశాడు. ఈనెల 20న శ్రీనివాస్‌ను చెన్నూరుకు రప్పించాడు. రాజేష్‌ చెన్నూరు మండలం చాకపల్లికి చెందిన సమీప బంధువు గోదారి సమ్మయ్య మరో కొందరికి సుపారీ ఇచ్చాడు. చెన్నూరులో మద్యం తాగించి సోమనపల్లి, శివారం అటవీ ప్రాంతానికి తీసుకెళ్లారు. అక్కడే హత్య చేసి మృతదేహంపై పెట్రోల్‌ పోసి నిప్పంటించినట్లు ప్రాథమిక విచారణలో తెలిసింది. ఆరోజు భారీ వర్షం కురవడంతో మృతదేహం 80 శాతం కాలి ఎముకల గూడు మిగిలింది. మద్యం షాపు వద్ద సీసీ ఫుటేజీ ఆధారంగా పోలీసులు ఈ కేసులో పురోగతి సాధించారు. హత్య జరిగిన రోజు నిందితుల వద్ద కాల్‌డేటా, రికార్డింగ్‌ పక్కా ఆధారాలు సేకరించారు. అన్న పరారీలో ఉండగా గాలిస్తున్నారు. ఆరుగురిని అదుపులో తీసుకుని విచారణ చేపడుతున్నారు. కాగా, వారం క్రితం అదృశ్యమైన శ్రీనివాస్‌ విగతజీవిగా మారడంతో కుటుంబీకులు విలపించారు. పోస్టుమార్టం నిమిత్తం ప్రభుత్వాస్పత్రికి తరలించారు.

ఆదిలాబాద్‌టౌన్‌: ఎన్నికల ప్రధాన కమిషనర్‌ జ్ఞానేష్‌కుమార్‌ను వెంటనే తొలగించాలని హైకోర్టు రిటైర్డ్‌ జడ్జి చంద్రకుమార్‌ డిమాండ్‌ చేశారు. జిల్లాకేంద్రంలోని ప్రింట్‌ మీడియా ప్రెస్‌క్లబ్‌లో ఆదివారం ఆయన విలేకరులతో మాట్లాడారు. బీజేపీ ప్రభుత్వం కేంద్రంలో అధికారంలోకి వచ్చిన తర్వాత ఓట్ల తొలగింపు వ్యవహారాన్ని మార్చేసిందని పేర్కొన్నారు. 17 కోట్లకు పైగా ఓట్లను కమిషనర్‌ తొలగించారని ఆరోపించారు. సుప్రీంకోర్టు జడ్జి, ప్రధాని, రాష్ట్రపతి, ప్రతిపక్ష నేత కమిషనర్‌ను ఎన్నుకునే విధానం ఉండేదని, మోదీ పీఎం అయ్యాక అనుకూలంగా ఉన్నవారిని నియమించుకున్నారని ఆరోపించారు. కమిషన్‌లో ఉన్న ఇద్దరు సభ్యులు 14 సార్లు కమిషనర్‌ ఏకపక్ష నిర్ణయాలు తీసుకుంటున్నారని మంత్రివర్గ కమిటీకి లేఖ రాసినట్లు పేర్కొన్నారు. ఎన్నికల ముందు కేంద్ర హోంశాఖమంత్రి జిల్లా కేంద్రానికి వచ్చినప్పుడు ఆదిలా బాద్‌ ఎంపీ, ఎమ్మెల్యేలను గెలిపిస్తే సీసీఐని పునః ప్రారంభిస్తారని హామీ ఇచ్చారని గుర్తుచేశారు. వెంటనే సీసీఐని పునఃప్రారంభించాలని లేకపోతే ఎంపీ, ఎమ్మెల్యేలు రాజీనామా చేయాలని పేర్కొన్నా రు. సమావేశంలో పెన్షనర్స్‌ సంఘం అధ్యక్షుడు శశికాంత్‌, దయాకర్‌రెడ్డి, గంగాధర్‌, లోకారి పోశెట్టి, కొండ రమేశ్‌, ఈశ్వర్‌ పాల్గొన్నారు.

ఆదిలాబాద్‌టౌన్‌: రిమ్స్‌ ఎస్‌ఎన్‌సీయూలో జరిగిన అగ్నిప్రమాద ఘటనలో శిశువులను కాపాడిన క్రమంలో అస్వస్థతకు గురైన స్టాఫ్‌ నర్స్‌ ప్రమీల ఆరోగ్య పరిస్థితి విషమించింది. పట్టణంలోని ఓ ప్రైవేట్‌ ఆస్పత్రిలో చికిత్స పొందుతున్న ఆమెను ఆదివారం రాత్రి హైదరాబాద్‌లోని నిమ్స్‌కు తరలించారు. ఊపిరితిత్తుల్లో నీరు నిల్వ కావడం, కెమికల్స్‌తో లీవర్‌పై ప్రభావం చూపిందని వైద్యులు పే ర్కొన్నారు. జిల్లా కేంద్రంలోని ఆస్పత్రిలో చి కిత్స పొందుతున్న ఆమెను ఎమ్మెల్యే పాయల్‌ శంకర్‌, రిమ్స్‌ డైరెక్టర్‌ జైసింగ్‌ రాథోడ్‌, దళిత శక్తి ప్రోగ్రాం కన్వీనర్‌ అగ్గిమల్ల గణేశ్‌తోపాటు పలువురు పరామర్శించారు.

ఆదిలాబాద్‌టౌన్‌: కరీంనగర్‌ జిల్లా కేంద్రంలో అక్టోబర్‌లో తెలంగాణ రాష్ట్రస్థాయి జానపద సాంస్కృతి క జాతర నిర్వహించనున్నట్లు సంకల్ప స్వచ్ఛంద సేవా సంస్థ వ్యవస్థాపక అధ్యక్షుడు, రాష్ట్రస్థాయి సిల్వర్‌–గోల్డ్‌ అవార్డు గ్రహీత వలస సుభాష్‌ చంద్రబోస్‌ తెలిపారు. తెలంగాణ భాషా సాంస్కృతిక శా ఖ సహకారంతో ఈ కార్యక్రమాన్ని నిర్వహిస్తున్నట్లు పేర్కొన్నారు. జిల్లా కేంద్రంలో ఆదివారం ఆయన విలేకరులతో మాట్లాడారు. తెలంగాణ సంస్కృతి, సంప్రదాయాలు భావితరాలకు అందించడంతోపా టు వాటిని పరిరక్షించేందుకు జానపద సాంస్కృతిక జాతర నిర్వహిస్తున్నట్లు తెలిపారు. జానపద, భజన, బతుకమ్మ ఆట పాటలు, డప్పు నృత్యాలు, గ్రూప్‌ సాంగ్స్‌, ఒగ్గుకథ, ఒగ్గుడోలు, మహిళా కోలా టం, బోనాలు, బుర్రకథ, సింధు యక్షగానం తదిత ర తెలంగాణ కళారూపాల ప్రదర్శనకు కళాకారులు ఈనెల 28 వరకు దరఖాస్తులు చేసుకోవాలని సూచించారు. ఆసక్తి ఉన్నవారు 94409 88001 నంబర్‌లో సంప్రదించాలని సూచించారు.

కాసిపేట: భర్త మరో మహిళతో డ్యాన్స్‌ వేయడాన్ని తట్టుకోలేక ఈనెల 24న మండలంలోని దే వాపూర్‌ పోలీసుస్టేషన్‌ పరిధిలో దొడ్డిగూడకు చెందిన రాయిసిడాం సంధ్య(23) ఆత్మహత్యకు పాల్పడిన విషయం తెలిసిందే. ఈ ఘటనపై పోలీసులు కేసు నమోదు చేశారు. భర్త మరోమహిళతో సంబంధం పెట్టుకుని సోదరి సంధ్యను వేధించడంతో ఆత్మహత్యకు పాల్పడిందని గణేశ్‌ ఫిర్యాదు చేశారు. గతంలో ఓ పెళ్లి లో స దరు మహిళతో చనువుగా ఉండి డ్యాన్స్‌ చే యడం, బావ సిడాం జంగును కొట్టి మందలించినట్లు తెలిపారు. పద్ధతి మార్చుకోకుండా వేధింపులకు పాల్పడుతుండటం, గణేశ్‌ నిమజ్జనం ఊరేగింపులో మహిళతో డ్యాన్స్‌ చేస్తూ ముద్దులు పెడుతూ, పులిహోర తినిపించడంతో తట్టుకోలేక సంధ్య ఆత్మహత్యకు పాల్పడినట్లు తెలిపారు. బాధలో ఏం తోచలేదని పక్కన ఉన్నవారు చెప్పినట్లు ఫిర్యాదుకు అంగీకరించామని, ఈ విషయమై విచారణ జరిపి చర్యలు తీసుకోవాలని కోరారు.

ఆదిలాబాద్‌టౌన్‌: ఉదారి కుటుంబం చేస్తున్న సాహిత్య సేవ చాలా గొప్పదని పలువురు కవులు పేర్కొన్నారు. జిల్లాకేంద్రంలోని జెడ్పీ సమావేశ మందిరంలో ఆదివారం ఉదారి నాగదాసు స్మారక కవిత పురస్కారాన్ని మునిమడుగుల రాజారావుకు అందజేశారు. పలువురు కవులు హాజరై మాట్లాడారు. తత్వ కవులు కష్టాలకు భయపడి శ్రమకు, కుటుంబాలకు దూరంగా ఉండలేరని పేర్కొన్నారు. ఉదారి నాగదాసు కుటుంబం కవిత పురస్కారం అందించడం కవులను గౌరవించడమేనని అన్నారు. రాజారావుకు ప్రశంసపత్రంతోపాటు రూ.5వేల నగదు అందజేశారు. కవులు సామల వీరన్న, బాలసాని నారాయణ గౌ డ్‌, మన్నె ఏలియా, డైట్‌ కళాశాల వైస్‌ ప్రి న్సిపాల్‌ కిరణ్‌ కుమార్‌, ఉదారి నారాయణ, తొడసం చందు, చిందం ఆశన్న పాల్గొన్నారు.

మంచిర్యాలఅగ్రికల్చర్‌: ప్రకృతి వనరులు, పర్యావరణ సమతుల్యత, చారిత్రక, ఆధ్యాత్మిక, సాహస పర్యాటకానికి జిల్లాలో అపార అవకాశాలు ఉన్నాయని జిల్లా కలెక్టర్‌ కుమార్‌ దీపక్‌ అన్నారు. శనివారం కలెక్టరేట్‌లో ప్రపంచ పర్యాటక దినోత్సవాన్ని పర్యాటక శాఖ ఆధ్వర్యంలో ఏర్పాటు చేశారు. జిల్లా అటవీ అధికారి రాహుల్‌ కిషన్‌ జాదవ్‌, జిల్లా అదనపు కలెక్టర్‌ చంద్రయ్య, బెల్లంపల్లి సబ్‌ కలెక్టర్‌ మనోజ్‌, డీఆర్వో మోతిరామ్‌, జిల్లా పర్యాటక నోడల్‌ అధికారి, ట్రైనీ డిప్యూటీ కలెక్టర్‌ విలాయ్‌ అలీతో కలిసి టూరిజం శాఖ లోగో, మ్యాగజైన్‌ ఆవిష్కరించారు. కలెక్టర్‌ మాట్లాడుతూ జిల్లాలో పర్యాటక ప్రదేశాలను విస్తృతంగా ప్రచారం చేసి పర్యాటకుల సంఖ్య పెంచేందుకు చర్యలు తీసుకోవాలన్నారు. పర్యాటక శాఖ ఆధ్వర్యంలో పాఠశాల, ఇంటర్మీడియెట్‌ స్థాయిలో పర్యాటకంపై నిర్వహించిన వ్యాసరచన, క్విజ్‌, చిత్రలేఖన పోటీల విజేతలుగా నిలిచిన విద్యార్థులకు ప్రశంసాపత్రాలు అందజేశారు. వృద్ధుల సంక్షేమానికి చర్యలు మంచిర్యాలఅగ్రికల్చర్‌: వయోవృద్ధుల సంక్షేమం, సాధికారతకు ప్రభుత్వం ప్రత్యేక కార్యక్రమాలు నిర్వహిస్తోందని కలెక్టర్‌ కుమార్‌ దీపక్‌ అన్నారు. శనివారం కలెక్టర్‌ చాంబర్‌లో అంతర్జాతీయ వయోవృద్ధుల దినోత్సవం–2026 పురస్కరించుకుని వయోవృద్ధుల సంక్షేమం, సాధికారత వారోత్సవాల వాల్‌పోస్టర్లను ఆవిష్కరించారు. కలెక్టర్‌ మాట్లాడుతూ 28న సైబర్‌ భద్రత, డిజిటల్‌ అక్షరాస్యత, వయోవృద్ధులపై వేధింపుల నుంచి రక్షణ, 29న తరతరాల మధ్య అనుబంధం, పరస్పర అభ్యాస కార్యక్రమాలు, 30న తల్లిదండ్రులు, వయోవృద్ధులకు వేధింపులు తదితర సమస్యలు ఎదురైనప్పుడు అధికారులను సంప్రదించడంపై అవగాహన కార్యక్రమాలు నిర్వహిస్తామని తెలిపారు. సహాయం కోసం హైల్ప్‌లైన్‌ నంబర్లు 14567, 100ను సంప్రందించాలని తెలిపారు.

మంచిర్యాలక్రైం: కోర్టు సిబ్బంది, లైజన్‌ అధికారులు, కోర్టు కానిస్టేబుళ్లు, ఐటీ విభాగం అందరూ ఒకే బృందంగా సమన్వయంతో పని చేయాలని జిల్లా జడ్జి ఏ.వీరయ్య, రామగుండం సీపీ అంబర్‌కిషోర్‌ ఝా అన్నారు. శనివారం స్థానిక కోర్టు ప్రాంగణంలో క్రిమినల్‌ జస్టిస్‌, కోర్టు ఇన్ఫర్మేషన్‌సిస్టంపై సమీక్షించారు. ఈ ఎఫ్‌ఐఆర్‌, ఈ చార్జిషీట్‌, ఈ సమన్స్‌, సీసీటీఎన్‌ఎస్‌లో సమాచార నవీకరణ, కేసుల పురోగతి, చార్జీషీటు దాఖలు, పోలీసుశాఖ, న్యాయస్థానాల మధ్య సమన్వయం తదితర అంశాలపై చర్చించారు. డీసీపీ భాస్కర్‌, న్యా యమూర్తులు ఏ.నిర్మల, డి.రామ్మోహన్‌రెడ్డి, కే.నిరోష, కృష్ణతేజ, ఏసీపీలు పాల్గొన్నారు.

చదువెందుకు అన్నరు.. ఉద్యోగాలు సాధించారు..! బెల్లంపల్లి: నేను ఇంటర్మీడియట్‌ వరకు చదివిన. పరుగుపందెంలో నెగ్గి బాయిపని ఉద్యోగం సాధించిన. నలుగురు కూతుళ్లు. వ్యవసాయం జీవనాధరమైన నాకు ఉన్నతంగా చదివే అవకాశం కలుగలేదు. ఆడబిడ్డలను ఉన్నతంగా చదివించాలని బలంగా నిర్ణయించుకున్న. ఆడబిడ్డలకు చదువెందుకు అన్నరు. ఎవరెన్ని చెప్పినా, ఆటంకాలు వచ్చినా లెక్క చేయలేదు. సింగరేణిలో తట్టమోసుడు అంటే నరకం చూసినట్లే. నాగపోకుండా డ్యూటీలు చేసిన. మేము ఆశించినట్లుగానే పెద్దమ్మాయి జ్యోతి ఎంఎస్‌, ఓబీజీ, డీజీవో చదివింది. రామగుండం ప్రభుత్వ ఆస్పత్రి గైనకాలజీ విభాగంలో అసోసియేట్‌ ప్రొఫెసర్‌గా ఉద్యోగం చేస్తోంది. రెండో బిడ్డ స్వాతి బీఎస్సీ, స్టాటిస్టిక్స్‌, ఎంసీఏ చదివి ఫారెస్ట్‌ బీట్‌ ఆఫీర్‌గా కుమురంభీం ఆసిఫాబాద్‌ జిల్లా కాగజ్‌నగర్‌ రేంజ్‌లో పని చేస్తోంది. మూడో బిడ్డ కృష్ణవేణి జీఎన్‌ఎం చేసి మంచిర్యాల ప్రభుత్వ ఆస్పత్రిలో నర్సింగ్‌ ఆఫీసర్‌గా చేస్తోంది. చిన్న బిడ్డ సుజాత బీఎస్సీ, బీఈడీ చదివి ఎస్సై ఉద్యోగానికి సిద్ధమవుతోంది. – సింగరేణి రిటైర్డు కార్మికుడు చిలుముల పోశం, గౌరమ్మ, బెల్లంపల్లిఆడపిల్ల పుట్టిందనగానే అయ్యో అనేవారు..! వారసుడి కోసం ఎదురు చూసేవారు..! ఇదంతా గతం. తరం మారుతున్న కొద్దీ తల్లిదండ్రుల్లో మార్పు వచ్చింది. ఆడపిల్లలూ తక్కువేం కాదని తల్లిదండ్రులు వారికి స్వేచ్ఛనిస్తున్నారు. విద్య, వైద్యం, ఇంజనీరింగ్‌, పోలీసు ఇలా ఏ రంగాన్ని ఎంచుకున్నా సరే ప్రోత్సహిస్తున్నారు. కూతుళ్లూ తల్లిదండ్రుల కలలను నిజం చేస్తూ ఆయా రంగాల్లో రాణిస్తున్నారు. కుటుంబ బాధ్యతలు పంచుకుంటూ తల్లిదండ్రులకు కూతురమ్మలు అవుతున్నారు. నేడు కూతుళ్ల దినోత్సవం సందర్భంగా ప్రత్యేక కథనం.

సాక్షి ప్రతినిధి, మంచిర్యాల: కేంద్ర బొగ్గు, గనుల శాఖ మరోసారి బొగ్గు బ్లాక్‌లను వేలం వేస్తున్న త రుణంలో జిల్లా పరిధిలో ఉన్న శ్రావణపల్లి గని సింగరేణికి దక్కుతుందా? లేదా? అని అందరూ ఆసక్తిగా ఎదురుచూస్తున్నారు. ఇటీవలే సింగరేణి కంపెనీ కి మణుగూరు పీకేఓసీ–2, తాడిచర్ల బ్లాక్‌లు నామి నేషన్‌ ప్రాతిపదికన దక్కాయి. తెలంగాణ పరిధిలో మిగిలిన ఉన్న బ్లాక్‌లను సైతం నామినేషన్‌ పద్ధతిన సింగరేణికి కేటాయించాలని రాష్ట్ర ప్రభుత్వం పలుమార్లు విజ్ఞప్తి చేసింది. గతంలోనూ సీఎం రేవంత్‌రెడ్డి ఇక్కడి బ్లాక్‌ను సింగరేణికి కేటాయించాలంటూ కేంద్రాన్ని కోరారు. అయితే నామినేషన్‌ పద్ధతిలో కాకుండా ప్రస్తుతం ఉన్న మార్గదర్శకాల ప్రకారం సింగరేణి కంపెనీ సైతం ప్రైవేటు వ్యక్తులతో పోటీపడి వేలంలో దక్కించుకోవాల్సిన పరిస్థితి ఏర్పడింది. దేశవ్యాప్తంగా 16వ విడత వేలం ఈ నెల 17ప్రారంభం కాగా, నెలాఖరులో బిడ్‌ల ప్రక్రియ పూర్తి కానుంది. ఈ క్రమంలో వేలంలో కొత్తగూడెం జిల్లా టేకులపల్లి మండలం కోయగూడెం బ్లాక్‌ 3, జిల్లాలోని నెన్నెల మండలం శ్రావణపల్లి ప్రతిపాదిత ఓపెన్‌ కాస్ట్‌(ఓసీపీ) కోసం సింగరేణి బిడ్‌లు దాఖలు చేసేందుకు సన్నద్ధమైంది. దీంతో కొత్త గనుల కోసం కంపెనీ దక్కించుకునేందుకు తీవ్ర ప్రయత్నాలు చేస్తోంది. ప్రైవేటు సంస్థల పోటీతో బ్లాక్‌ను దక్కించుకోవాల్సి ఉంది. బ్లాక్‌ వస్తే ఊరట బొగ్గు గనుల జిల్లాగా పేరుగాంచినప్పటికీ కాలక్రమేణ ఆ వైభవం కనుమరుగవుతోంది. బెల్లంపల్లి, మందమర్రి, శ్రీరాంపూర్‌ ఏరియాల్లో కంపెనీ మనుగడ ప్రశ్నార్థకంగా మారుతోంది. ఇప్పటికే బెల్లంపల్లి ఏరియాలో రెండు గనులు, మందమర్రి ఏరియాలో ఆరు, శ్రీరాంపూర్‌ ఏరియాలో పది గనులు కొనసాగుతున్నాయి. వచ్చే ఐదేళ్లలోనే చాలా వరకు గనుల నిల్వలు పూర్తి కానున్నాయి. మరోవైపు భూగర్భ గనుల నుంచి బొగ్గు వెలికితీత భారంగా మారడంతో సంస్థ వ్యయాన్ని తగ్గించుకుంటోంది. ఇప్పటికే శాంతిఖని గనిని ప్రైవేటుకు నిర్వహణ, అభివృద్ధి పేరుతో అప్పగించేందకు సైతం సిద్ధపడింది. గత కొంతకాలంగా కంపెనీకి కొత్త గనులకు అనుమతులు రావడం లేదు. దీంతో స్థానికులకు ఉపాధి కరువవుతోంది. బొగ్గు, బొగ్గు ఆధారిత పరిశ్రమలు మూత పడుతున్నాయి. వేలాది మందిపై ప్రత్యక్ష, పరోక్షంగా ప్రభావం చూపుతోంది. ఈ క్రమంలో కొత్త గని అందుబాటులోకి వస్తే స్థానికంగా ఉద్యోగ, ఉపాధి అవకాశాలు మెరుగుపడే అవకాశాలు ఉన్నాయి.వ్యతిరేకించిన స్థానికులునెన్నెల మండలం శ్రావణపల్లి ఓసీపీ ప్రతిపాదన సమయంలో సర్వేను స్థానికులు వ్యతిరేకించారు. ఇళ్లు, సాగు భూములు కోల్పోవడంపై జెండావెంకటాపూర్‌, నార్వాయిపేట, జోగాపూర్‌, మామిడిపల్లి, సారంగపల్లి ప్రభావితం కానున్నాయి. ఈ క్రమంలో సర్వే సమయంలోనే అధికారులను గ్రామస్తులు అడ్డుకున్నారు. ఈ క్రమంలో కొత్త గని వేలం దక్కితే ఈ గ్రామాల భూ సేకరణలో సమస్యలు తీర్చి ముందుకెళ్లాల్సి ఉంది.

చెన్నూర్‌: చెన్నూర్‌లో ఆర్‌ఎంపీగా పని చేస్తున్న. రెండో సంతానంగా అమ్మాయి పుట్టింది. చిన్న సంపాదన, ఆడబిడ్డ అంటే మాటలు కాదని బంధువులు, చుట్టుపక్కల వాళ్లు అనే మాటలకు ఇబ్బంది పడ్డాం. వారి మాటలు పట్టించుకోకుండా కూతురు తిప్పర్తి సుష్మను బాగా చదివించాను. పట్టుదలతో చదివి డేటా సైన్స్‌ ఇంజనీరింగ్‌ పూర్తి చేసింది. ఇన్ఫినిటమ్‌ మీడియా నెట్‌వర్క్‌ యూట్యూబ్‌లో పని చేస్తోంది. అమృతం వైబ్స్‌, నా పేరు మీనాక్షి, కపుల్‌ గోల్స్‌లో మెయిన్‌ రోల్‌ చేసింది. రెండు తెలుగు సినిమాల్లో చేస్తోంది. నటనను చూసి నిత్యం ఫోన్లు వస్తుంటాయి. అమ్మాయి గొప్పతనం చెబుతుంటే ఆనందం కలుగుతుంది. ఆనాడు భారం అన్నవాళ్లు నేడు నోరెళ్లబెడుతున్నారు. మా అమ్మాయే మమ్మల్ని ఈ సమాజానికి పరిచయం చేసింది. – తిప్పర్తి గోపాల్‌, శ్రీకళ, చెన్నూర్‌

మంచిర్యాలక్రైం: మహిళా చైతన్యం, ఆత్మగౌరవానికి తెలంగాణ వీరవనిత, తెలంగాణ రైతాంగ సాయుధ పోరాట యోధురాలు చాకలి ఐలమ్మ ఒక ప్రతీక అని రామగుండం పోలీసు కమిషనర్‌ అంబర్‌ కిషోర్‌ ఝా అన్నారు. శనివారం రామగుండం పోలీస్‌ కమిషనరేట్‌ కార్యాలయంలో చాకలి ఐలమ్మ జయంతి వేడుకల సందర్భంగా ఆమె చిత్రపటానికి పూలమాల వేసి ఘనంగా నివాళులర్పించారు. సీపీ మాట్లాడుతూ పెత్తందార్ల దురాగతాలు, నాటి నిరంకుశ రజాకార్లు, దేశ్‌ముఖ్‌లకు వ్యతిరేకంగా చాకలి ఐలమ్మ మొక్కవోని ధైర్యంతో పోరాడిన తీరు అందరికీ ఆదర్శనీయమని అన్నారు. ఈ కార్యక్రమంలో అదనపు డీసీపీ(అడ్మిన్‌) కె.శ్రీనివాస్‌, స్పెషల్‌ బ్రాంచ్‌ ఏసీపీ నాగేంద్రగౌడ్‌, ఏఓ శ్రీనివాస్‌, ఆర్‌ఐలు శేఖర్‌, సీసీ సందీప్‌ పాల్గొన్నారు.

రూ.25 లక్షల పరిహారం ఇవ్వాలిబెల్లంపల్లి: తెలంగాణ ఉ ద్యమ జానపద కళాకా రుడు రెడ్డి పోశం (49) అకాల మరణం చెందా డు. బెల్లంపల్లి మండలం ఆకెనపల్లి గ్రామాని కి చెందిన పోశం తీవ్ర అనారోగ్యంతో బాధ ప డుతూ శుక్రవారం రాత్రి తుదిశ్వాస విడిచాడు. పోశం మృతి చెంది నట్లు తెలుసుకుని తెలంగాణ రాష్ట్ర జానపద కళా కారుల సంఘం తీవ్ర సంతాపం తెలిపింది. సంఘం రాష్ట్ర కార్యదర్శి హనుమాండ్ల మధుకర్‌ ఇతర కళాకారులు, పలువురు నాయకులు శనివారం పోశం మృతదేహంపై పూలమాలలు వేసి నివాళులర్పించారు. మృతుడి కుటుంబ సభ్యులను పరామర్శించి ప్రగాఢ సానుభూతి తెలిపారు. ఈ సందర్భంగా నాయకులు, కళాకా రులు మాట్లాడు తూ.. తెలంగాణ మ లిదశ ఉద్యమంలో తన ఆట, పాటలతో పోశం ప్రజలను చైతన్యపరిచాడని పేర్కొన్నారు. అనారోగ్యంతో బాధపడుతున్న పోశంకు తెలంగాణ జానపద కళాకారుల సంఘం రాష్ట్ర అధ్యక్షుడు వంగ శ్రీనివాస్‌గౌడ్‌ ఇటీవల రూ.10వేల ఆర్థికసాయం అందించినట్లు గుర్తుచేశారు. పోశం అకాల మరణం జానపద కళారంగానికి, తెలంగాణ ఉద్యమ కళాకారులకు తీరని లోటని కొనియాడారు. కళాకారులు జంజర్ల దినేశ్‌కుమార్‌, అడెపు సమ్మయ్య, కుమార్‌ తదితరులు పాల్గొన్నారు.

గోదావరిఖని: పెద్దపల్లి జిల్లా గోదావరిఖని సమీపంలోని గోదావరి వంతెన సమీపంలో అంబులెన్స్‌, ద్విచక్రవాహనం ఢీకొన్నాయి. శనివారం వేకువజామున జరిగిన రోడ్డు ప్రమాదంలో గాయపడిన పవన్‌ అనే వ్యక్తిని మంచిర్యాల నుంచి వరంగల్‌లోని ఎంజీఎంకు అంబులెన్స్‌లో తీసుకెళ్తున్నారు. గోదావరి వంతెన సమీపంలోకి రాగానే ఇద్దరు వ్యక్తులు ద్విచక్రవాహనంపై ఎదురుగా అతివేగంగా వచ్చి అంబులెన్స్‌ను ఢీకొట్టారు. దీంతో అంబులెన్స్‌ అదుపుతప్పి బోల్తాపడింది. ఘటనలో అంబులెన్సు డ్రైవర్‌ సతీశ్‌, అంబులెన్స్‌లోని పవన్‌, సుధీర్‌, పవన్‌ తల్లి రమక్క, అక్క కవిత గాయపడ్డారు. సమాచారం అందుకున్న వన్‌టౌన్‌ సీఐ ఇంద్రసేనరెడ్డి వెంటనే ఘటనా స్థలానికి చేరుకుని మరో అంబులెన్స్‌ రప్పించి గాయపడిన వారిని ఆస్పత్రికి తరలించారు. ద్విచక్రవాహనంపై ప్రయాణిస్తున్న మహిమొద్దీన్‌, ఎండీ పర్వేజ్‌ కూడా గాయపడ్డారు. అంబులెన్స్‌ ఓనర్‌ ఫిర్యాదు మేరకు ఎస్‌ఐ రాజశేఖర్‌ కేసు నమోదు చేసుకున్నారు. గాయపడ్డవారందరూ మంచిర్యాల జిల్లావాసులే.

కెరమెరి: మండలంలోని కొత్తగూడ గ్రామానికి చెందిన దుర్వ శ్రీనివాస్‌ (40) పెద్దవాగులో కొట్టుకుపోయి మృతి చెందాడు. కుటుంబ సభ్యులు తెలిపి న వివరాల ప్రకారం.. శ్రీనివాస్‌ మండంలోని జోడేఘాట్‌ ఆశ్రమోన్నత పాఠశాలలో సీఆర్టీ వ్యాయామ ఉపాధ్యాయునిగా విధులు నిర్వహిస్తున్నాడు. ఈ నెల 24న ఇంటి నుంచి బయటికి వెళ్లాడు. తిరుగు ప్రయాణంలో భారీ వర్షం కురవడంతో పెద్దవాగు ఉప్పొంగి ప్రవహించింది. రాత్రి కావడంతో తన వాహనాన్ని కెరమెరిలోని వాగుకు సమీపంలోగల షెడ్డులో ఉంచాడు. నీటి ప్రవాహం తెలియక వాగు దాటుతూ అందులో కొట్టుకుపోయినట్లు సమాచారం. రాత్రి 9గంటల వరకు ఫోన్‌లో మాట్లాడిన శ్రీనివాస్‌ ఆ తర్వాత అందుబాటులోకి రాకపోవడంతో కుటుంబీకులు ఆందోళనకు గురయ్యారు. ఆచూకీ దొరకకపోవడంతో పెద్దవాగులో కొట్టుకుపోయి ఉంటాడని అనుమానించారు. స్థానికులు పెద్దవాగులో గాలింపు చేపట్టగా నిసాని గ్రామ సమీపంలో మృతదేహం లభ్యమైంది. దీంతో కుటుంబీకులు కన్నీరుమున్నీరుగా విలపించారు. శ్రీనివాస్‌కు భార్య భూదేవి, ముగ్గురు కొడుకులు, కూతురు ఉన్నారు. శ్రీనివాస్‌ మరణంతో కొత్తగూడలో విషాదం అలుముకుంది. కాగా, 2011లో శ్రీనివాస్‌ తండ్రి మెంగు కూడా పెద్దవాగులో కొట్టుకుపోయి మృతి చెందడం గమనార్హం.

జన్నారం: విదేశీ విద్య పై అధ్యయనం చేసేందుకు వియత్నాం దేశ పర్యటనకు మండలంలోని అక్కపెల్లిగూడ పాఠశాలకు చెందిన ఉ పాధ్యాయురాలు అంకం కరుణ ఎంపికయ్యారు. గతంలో ఇదే పా ఠశాలకు చెందిన హెచ్‌ఎం జాజల శ్రీనివాస్‌ ఫిన్‌ల్యాండ్‌ దేశ పర్యటనకు వెళ్లి అక్కడి విద్యావిధానంపై అధ్యయనం చేసి వచ్చారు. వియత్నాం పర్యటనకు రాష్ట్రం నుంచి 32మంది ఎంపిక కాగా, మంచిర్యాల జిల్లా నుంచి కరుణ ఎంపిక కావడం ఆనందంగా ఉందని ఆ పాఠశాల ప్రధానోపాధ్యాయుడు శ్రీనివాస్‌ పేర్కొన్నారు. ఈ సందర్భంగా మండల విద్యాధికారి బానవత్‌ రాజేందర్‌, కాంప్లెక్స్‌ హెచ్‌ఎం విజయ్‌కుమార్‌, పీఆర్టీయూ అధ్యక్షుడు కట్ట రాజమౌళి, ప్రధాన కార్యదర్శి అనుముల రాజన్న, చైర్మన్‌ రమాదేవి, ఉపాధ్యాయులు కరుణను అభినందించారు.

బెల్లంపల్లి: పట్టణంలో అనుమతి లేకుండా రెండో అంతస్తు నిర్మాణం చేపట్టిన ఓ భవన యాజమానురాలికి శనివారం మున్సిపల్‌ అధికారులు భారీ జరి మానా విధించారు. మున్సిపల్‌ కమిషనర్‌ రమేష్‌ తెలిపిన వివరాల ప్రకారం.. కాంట్రాక్టర్‌ బస్తీకి చెందిన దొంగల భాగ్యలక్ష్మి అనుమతించిన నిర్మాణ విస్తీర్ణానికి అదనంగా రెండో అంతస్తు నిర్మాణం చేపట్టినట్లు అధికారులు గుర్తించి షోకాజ్‌ నోటీసులు జారీ చేశారు. నిర్మాణ విలువను రూ.23,16,600గా లెక్కించి 25శాతం జరిమానా రూ.5,79,150 విధించారు. అనుమతి పొందిన తర్వాత మాత్రమే ఇంటి నిర్మాణ పనులు చేపట్టాలని సూచించారు.

మంచిర్యాలక్రైం: జిల్లా కేంద్రంలోని తిలక్‌నగర్‌కు చెందిన చిలుక శైలజ (32), ఆమె కూతురు విహాన్సిక (6) అదృశ్యమైనట్లు స్థానిక ఎస్సై రమేశ్‌ తెలిపారు. ఆయన తెలిపిన వివరాల ప్రకారం.. తిలక్‌నగర్‌కు చెందిన దంపతులు చిలుక నాగరాజు–శైలజ మధ్య తరచూ గొడవలు జరుగుతుండేవి. ఈ నెల 24న నాగరాజుతో శైలజ గొడవపడి ఇంట్లోంచి కూతురుతో వెళ్లిపోయింది. శనివారం వరకు తిరిగి రాకపోవడంతో ఎంత వెతికినా ఆచూకీ దొరకలేదు. శైలజ తల్లి కట్ల లక్ష్మి ఫిర్యాదు మేరకు కేసు నమోదు చేసి దర్యాప్తు చేస్తున్నట్లు ఎస్సై తెలిపారు. శైలజ ఇంట్లోంచి వెళ్లినరోజు పింక్‌ టాప్‌, ఆకు పచ్చ ప్యాంట్‌ ధరించి ఉందని పేర్కొన్నారు. ఆచూకీ తెలిసినవారు స్థానిక పోలీస్‌స్టేషన్‌లో సమాచారం ఇవ్వాలని సూచించారు.

మంచిర్యాలఅర్బన్‌: తెలంగాణ ఆర్టీసీలో గుర్తింపు యూనియన్‌ ఎన్నికల వేడి రాజుకుంటోంది. పోటీ చేసే యూనియన్లకు ఎన్నికల గుర్తులు కేటాయిస్తూ జాయింట్‌ కమిషన్‌ ఆఫ్‌ లేబర్‌ ఉత్తర్వులు జారీ చేసింది. తెలంగాణ మజ్దూర్‌ యూనియన్‌ ఎన్నికల్లో పోటీకి అనుమతి లభించడంతో న్యాయపరమైన చిక్కులు తొలగి ఎన్నికలకు మార్గం సుగమమైంది. అక్టోబర్‌ 9న పోలింగ్‌, 17న ఓట్ల లెక్కింపు నిర్వహిస్తారు. రహస్య బ్యాలెట్‌ విధానంలో జరిగే ఈ ఎన్నికలు ఆర్టీసీ ఉద్యోగులు, కార్మికుల భవిష్యత్‌ హక్కులతోపాటు యూనియన్ల ప్రాతినిధ్యం దృష్ట్యా కీలకం కానున్నాయి. 12 యూనియన్లు బరిలో నిలవడం, గుర్తుల కేటాయింపుతో ఎన్నికల ప్రచారం మొదలైంది. గుర్తులు ఇలా.. ఆర్టీసీ సామాజిక తెలంగాణ మజ్దూర్‌ యూనియన్‌ కు బతుకమ్మ గుర్తు, తెలంగాణ మజ్దూర్‌ యూని యన్‌కు నిచ్చెన, బహుజన వర్కర్‌ యూనియన్‌కు కత్తెర, ఈయూకు బస్సు, కార్మిక పరిషత్‌కు బస్సు టైర్‌, కార్మిక సంఘ్‌కు పులి, బహుజన కార్మిక యూ నియన్‌కు ధర్మచక్రం, తెలంగాణ ఆర్టీసీ వర్కర్‌ యూనియన్‌కు విల్లు, బాణం, స్టాఫ్‌ అండ్‌ వర్కర్స్‌ ఫెడరేషన్‌కు నక్షత్రం, నేషనల్‌ మజ్దూర్‌ యూనియ న్‌కు చేతిలో దివిటీ, మషాల్‌, స్టాఫ్‌ వర్కర్‌ యూని యన్‌కు తరాజు, తెలంగాణ జాతీయ మజ్దూర్‌ యూనియన్‌కు గద గుర్తు కేటాయించారు. మంచిర్యాల డిపోలో అత్యధిక ఓటర్లుఆదిలాబాద్‌ రీజియన్‌ పరిధిలో ఆర్టీసీ యూనియన్‌ ఎన్నికలకు సంబంధించిన ఓటరు జాబితా విడుదల చేసింది. రీజియన్‌ వ్యాప్తంగా 1773 మంది అర్హులైన ఉద్యోగులు ఓటర్లుగా ఉన్నారు. ఇందులో రెగ్యులర్‌ ఉద్యోగులు 1703 కాగా 70 మంది కాంట్రాక్టు, కన్సాలిడేటెడ్‌ వేజేస్‌ ఉద్యోగులు ఉన్నారు. అత్యధిక ఓటర్లు కలిగిన డిపో మంచిర్యాల కాగా ఉట్నూర్‌ డిపోలో అత్యల్ప ఓటర్లు ఉన్నారు.

వేలాల గ్రామాన్ని, శ్రీమల్ల న్నస్వామి, గట్టు మల్లన్నస్వామి ఆలయాలను మరింతగా అభివృద్ధి చేస్తాం. ఇ ప్పటికే గోదావరి పుష్కరాల కు రూ.14.50కోట్ల నిధులు మంజూరు చేశాం. త్వ రలో టెండర్లు పూర్తికాగానే పనులు ప్రారంభిస్తాం. భక్తుల సౌకర్యాలకు అనుగుణంగా ప్రతిపాదనలు రాగా నిధులు మంజూరు చేయించాం. – గడ్డం వివేక్‌ వెంకటస్వామి, రాష్ట్ర మంత్రి మంత్రి సహకారంతో నిధులు రాష్ట్ర కార్మికశాఖ మంత్రి గడ్డం వివేక్‌ వెంకటస్వామి సహకారంతో గోదావరి పుష్కరాలకు రూ.14.50 కోట్ల నిధులు మంజూరయ్యాయి. దీంతో గ్రామం, ఆలయాలు అభివృద్ధి చెందనుండగా పుష్కరాలకు వచ్చే భక్తులకు అన్నిరకాల సౌకర్యాలు మెరుగుపడనున్నాయి. ఈ ప్రాంత ప్రజలు మంత్రికి రుణపడి ఉంటారు. – డేగ స్వప్న–నగేశ్‌, వేలాల సర్పంచ్‌

శ్రీరాంపూర్‌: వీరత్వానికి చాకలి ఐలమ్మ స్పూర్తి అని శ్రీరాంపూర్‌ జీఎం ఎం.శ్రీనివాస్‌ తెలిపారు. శనివారం శ్రీరాంపూర్‌ జీఎం కార్యాలయంలో వీరనారి చాకలి ఐలమ్మ జయంతి వేడుకలను ఘనంగా నిర్వహించారు. ఈ సందర్భంగా ఆమె చిత్రపటానికి పూలమాలలు వేసి నివాళులర్పించారు. జీఎం మాట్లాడుతూ సీ్త్రగా, వెనుకబడిన తరగతుల్లో జన్మించిన కూడా పురుషాధిక్యత ఉన్న ఆ రోజుల్లో పెత్తందార్ల వ్యవస్థకు వ్యతిరేకంగా పోరాడిన వీరవనిత అని కొనియాడారు. ఈ కార్యక్రమంలో గుర్తింపు సంఘం బ్రాంచ్‌ కార్యదర్శి షేక్‌ బాజీసైదా, అధికారుల సంఘం ప్రతినిధి పద్మ, ఏజీఎం(ఫైనాన్స్‌) శ్రీధర్‌, డీజీఎంలు అనిల్‌ కుమార్‌, రాజన్న, సర్వే అధికారి నర్సింగరావు, పర్చేస్‌ అధికారి చంద్రశేఖర్‌, లా ఆఫీసర్‌ మల్లేష్‌, ఐటి అధికారి శ్రీనివాస్‌ డీవైపీఎం క్రాంతి తదితరులు పాల్గొన్నారు. అడవిపందిని హతమార్చిన కేసులో విచారణ భీమిని: కన్నెపల్లి మండలం టేకులపల్లి గ్రామ శివారులో అడవిపందిని హతమార్చిన ఘటనపై అటవీ అధికారులు శనివారం విచారణ చేపట్టారు. టేకులపల్లి శివారులో కొందరు వ్యక్తులు అడవిపందిని వేటాడి మాంసం పంచుకున్నట్లు తమకు అందిన సమాచారం మేరకు పలువురు అనుమానితులను అదుపులోకి తీసుకుని విచారణ చేపడుతున్నట్లు బెల్లంపల్లి డిప్యూటీ రేంజ్‌ అధికారి గౌరిశంకర్‌ తెలిపారు. వన్యప్రాణి సంరక్షణ చట్టం ప్రకారం కేసు నమోదు చేసి దర్యాప్తు జరుపుతున్నట్లు ఆయన పేర్కొన్నారు.

జైపూర్‌: మండలంలోని వేలాల మల్లన్నస్వామి ఆలయం, గోదావరి పుష్కరాల అభివృద్ధి పనుల ను శనివారం ఆర్‌డబ్ల్యూఎస్‌, దేవాదాయశాఖ అ ధికారులు వేర్వేరుగా పరిశీలించారు. ఈ సందర్భంగా ఆర్‌డబ్ల్యూఎస్‌ ఎస్‌ఈ రవీందర్‌, ఈఈ వెంకటేశ్‌, డీఈ కిరణ్‌, ఏఈ రాజ్‌మల్లయ్య స్థాని క సర్పంచ్‌ డేగ స్వప్ననగేశ్‌తో కలిసి గోదావరి ఒడ్డున పుష్కరఘాట్‌ పనులను పరిశీలించి పలు సూచనలు చేశారు. పుష్కరాల సందర్భంగా వేలాలకు వచ్చే భక్తులకు ఎలాంటి ఇబ్బందులు తలెత్తకుండా అన్ని వసతులు కల్పించడానికి ప్రణాళికలు సిద్ధం చేసినట్లు చెప్పారు. దేవాదా యశాఖ ఏఈ ప్రతాప్‌, ఇన్‌చార్జి ఈవో వేణుగో పాల్‌తో కలిసి వేలాల మల్లన్నస్వామి ఆలయం వద్ద, గోదావరి ఒడ్డున పుష్కరఘాట్‌ వద్ద భక్తుల సౌకర్యార్థం చేపట్టనున్న పనులు, సుందరీకరణ పనులు పరిశీలించారు. రెండుశాఖల అధికారులు వేర్వేరుగా పనులు చేపట్టే ప్రాంతాలను గుర్తించారు. వారితో స్థానిక ఉపసర్పంచ్‌ రాజలింగు, పంచాయతీ కార్యదర్శి రాకేశ్‌, పంచాయతీ పాలకవర్గ సభ్యులున్నారు.

జన్నారం: చెరువును కబ్జా కోరల్లో నుంచి కాపాడాలని డిమాండ్‌ చేస్తూ శనివారం రైతులు రోడ్డెక్కారు. మండలంలోని రేండ్లగూడలోగల అల్లం కుంట చెరు వును గ్రామానికి చెందిన కొందరు కబ్జా చేశారని ఆరోపిస్తూ, చెరువు కబ్జా కాకుండా చూడాలని డి మాండ్‌ చేస్తూ ఆరు రోజులుగా చేపట్టిన రిలే నిరా హార దీక్షలో భాగంగా వంటావార్పు నిర్వహించి రై తులు రాస్తారోకోకు దిగారు. గంటపాటు రాస్తారో కో చేయగా ఇరువైపులా వాహనాలు నిలిచి రాకపోకలకు అంతరాయమేర్పడింది. ఎస్సై ఉదయ్‌కిరణ్‌, ఇరిగేషన్‌ డీఈ వెంకటేశం రేండ్లగూడకు చేరుకుని రైతులకు నచ్చజెప్పారు. దీంతో రైతులు రాస్తారోకో విరమించారు. ఈ సందర్భంగా రైతులు సముద్రా ల శంకర్‌, దాసరి తిరుపతి మాట్లాడుతూ.. రేండ్లగూడ గ్రామానికి చెందిన పలువురు భూస్వాములు చెరువు భూమిని కబ్జా చేసి, అక్రమంగా పట్టా చే యించుకున్నారని ఆరోపించారు. అధికారులు అలసత్వంతోనే కబ్జా విషయంలో చర్యలు తీసుకోవడం లేదని విమర్శించారు. కబ్జా నుంచి చెరువు భూమిని కాపాడి, అక్రమ పట్టాలు రద్దు చేసే వరకు ఆందోళనలు కొనసాగిస్తామని హెచ్చరించారు. గ్రామానికి చెందిన రైతులు రవి, సురేశ్‌ తదితరులున్నారు.

జైపూర్‌: ఉత్తర తెలంగాణలో మరో కొమురవెల్లి మల్లన్నగా వెలుగొందుతున్న వేలాల మల్లన్నస్వామి ఆలయ అభివృద్ధికి అడుగులు పడుతున్నాయి. దశాబ్దాలుగా అభివృద్ధికి ఆమడ దూరంగా ఉన్న వేలాల గ్రామానికి గోదావరి పుష్కరాలతో నిధుల వరద కురవనుంది. గోదావరి పుష్కరాల నేపథ్యంలో వేలాల ప్రాంతానికి మహర్దశ పట్టనుంది. పుష్కరాల అభివృద్ధి పనుల్లో భాగంగా వేలాల పుష్కరఘాట్‌తో పాటు ప్రసిద్ధిగాంచిన మల్లికార్జున స్వామి (కింద) ఆలయం, గట్టు మల్లన్న స్వామి (గుట్టపై న) ఆలయాల అభివృద్ధికి భారీగా నిధులు కేటా యించేందుకు ప్రతిపాదనలు సిద్ధమయ్యాయి. మొ త్తంగా రూ.20కోట్లకు పైగా విలువైన అభివృద్ధి ప నులు చేపట్టేందుకు అధికారులు ప్రతిపాదనలు త యారు చేశారు. ఇప్పటికే రూ.14.50కోట్ల నిధులు మంజూరయ్యాయి. దీంతో వేలాల ప్రాంతం ఆధ్యాత్మిక, పర్యాటక కేంద్రంగా మరింత అభివృద్ధి చెందే అవకాశం ఏర్పడింది. భక్తులకు సరిపడా వసతులుపన్నెండేళ్లకోసారి నిర్వహించే గోదావరి పుష్కరాలు 2027లో నిర్వహించనుండగా పెద్ద ఎత్తున భక్తులు తరలిరానున్నారు. తెలంగాణ ప్రభుత్వం పుష్కరా లను ఘనంగా నిర్వహించేందుకు ఇప్పటికే ప్రణా ళికలు సిద్ధం చేస్తోంది. ఈ మేరకు అధికారులు వేలాల మల్లన్న స్వామి, గట్టు మల్లన్న స్వామి ఆలయాల అభివృద్ధికి ప్రత్యేక ప్రణాళిక రూపొందించా రు. ఆలయ పరిసరాలను సుందరీకరించడం, భక్తులకు సౌకర్యాలు కల్పించడం, అవసరమైన మౌలిక వసతులు మెరుగుపర్చడం ద్వారా ఆలయాలకు కొత్త కళ తీసుకురానున్నారు. పుష్కరాల సమయంలో అధికసంఖ్యలో భక్తులు తరలివచ్చే అవకాశం ఉండడంతో అందుకు అనుగుణంగా ఏర్పాట్లు చేయనున్నారు. ఆధ్యాత్మిక, పర్యాటక కేంద్రంగా..గోదావరి తీరంలోని వేలాలకు ఇప్పటికే ప్రత్యేక ఆధ్యాత్మిక ప్రాధాన్యం ఉంది. ఏటా మహాశివరాత్రికి ఇక్కడ నిర్వహించే జాతరకు లక్షల్లో భక్తులు తరలివస్తారు. ప్రతీనెల నిర్వహించే గిరిప్రదక్షిణలో భక్తులు అధికసంఖ్యలో పాల్గొంటున్నారు. ప్రభుత్వం పుష్కరాలకు వచ్చే భక్తులకు వసతుల కల్పనతోపాటు మల్లన్నస్వామి, గట్టు మల్లన్నస్వామి ఆలయాల అభివృద్ధి పనులు పూర్తి చేస్తే భక్తుల సంఖ్య మరింత పెరిగే అవకాశముంది. దీంతో ఈ ప్రాంతంఆఽధ్యాత్మికంగా, పర్యాటకంగా అభివృద్ధి చెంది వ్యాపార, ఉపాధి అవకాశాలు కూడా మెరుగుపడనున్నాయి.

పుష్కరాలకు వచ్చే భక్తులు, పర్యాటకులకు ఇబ్బందులు లేకుండా మౌలిక వసతుల కల్ప నకు ప్రాధాన్యం ఇవ్వనున్నారు. ఇందులో భాగంగా గ్రామంలో రూ.5.10కోట్లతో అంతర్గత సిమెంట్‌ రోడ్లు, రూ.4.25కోట్లతో పుష్కరఘాట్‌, రూ.2.80కోట్లతో ఆర్వో ప్లాంట్లు, వాటర్‌ ట్యాంక్‌లు, టాయిలెట్స్‌ ఇతర వసతులు, రూ.2కోట్లతో విద్యుత్‌, శానిటేషన్‌ పనులు, రూ.2,30కోట్లతో గుట్ట కింద, పైన ఆలయాల అభివృద్ధి, భక్తుల సౌకర్యార్థం వసతి కల్పన తదితర పనులు చేపట్టనున్నారు. ఇవే కాకుండా.. ఆలయం వద్ద, గోదావరి తీరం పుష్కరఘాట్‌ వద్ద సుమారు మూడెకరాల భూమి కొనుగోలు చేసి భక్తులకు పర్మినెంట్‌గా వసతి కల్పనతో పాటు అన్నిరకా ల సౌకర్యాలు కల్పించడానికి సుమారు రూ.2.30 కోట్ల అంచనాలు తయారు చేశారు.

మంచిర్యాల జిల్లా: వినాయక నిమజ్జనోత్సవంలో భర్త మరో మహిళతో కలిసి నృత్యం చేయడాన్ని తట్టుకోలేక భార్య ఆత్మహత్యకు పాల్పడింది. ఈ సంఘటన మంచిర్యాల జిల్లా కాసిపేట మండలం దేవాపూర్‌ పోలీసుస్టేషన్‌ పరిధి దొడ్డిగూడలో చోటుచేసుకుంది. దేవాపూర్‌ ఎస్సై గంగారాం, కుటుంబ సభ్యుల కథనం ప్రకారం.. దొడ్డిగూడ పక్కనే ఉన్న సోనాపూర్‌లో ఈ నెల 23న రాత్రి వినాయక నిమజ్జనోత్సవం జరిగింది. దొడ్డిగూడకు చెందిన రాయిసిడాం సంధ్య (23) భర్త జంగు మద్యంమత్తులో మరో యువతితో కలిసి నృత్యం చేశాడు. ఇది చూసిన సంధ్య తట్టుకోలేక పోయింది. 24న ఉదయం జంగు సోనాపూర్‌లోని వినాయక మండపం తీసేయడానికి వెళ్లాడు. ఇంట్లో ఒంటరిగా ఉన్న సంధ్య క్షణికావేశంలో పురుగుల మందు తాగింది. మంచిర్యాల ప్రభుత్వ ఆస్పత్రికి తరలించగా, పరిస్థితి విషమంగా ఉండటంతో ప్రైవేటు ఆస్పత్రిలో చేరి్పంచారు. చికిత్స పొందుతూ సంధ్య శుక్రవారం ఉదయం చనిపోయింది. మృతురాలి సోదరుడి ఫిర్యాదు మేరకు కేసు నమోదు చేసినట్లు ఎస్సై తెలిపారు.

జాతీయ పోషణమాసం అన్ని అంగన్‌వాడీ కేంద్రాల్లో నిర్వహించేలా చర్యలు తీసుకుంటున్నాం. చిన్నారుల్లో బరువు తక్కువగా ఉండడం, ఎత్తుకు తగిన బరువు లేక, వయస్సుకు తగినట్లు ఎదుగుదల లేని వారిని గుర్తించి నెల రోజులపాటు ప్రత్యేక కార్యక్రమాలు చేపట్టి వారిలో ఆరోగ్యకరమైన ఎదుగుదల జరిగేలా చేస్తున్నాం. పోషకాహార లోపంతో ఉన్నవారిని గుర్తించి అవసరమైన పౌష్టికాహారం అందించడం, చిన్నారులకు వైద్య పరీక్షలను నిర్వహించి, తల్లిదండ్రులకు అవగాహన కల్పిస్తాం. – రౌఫ్‌ఖాన్‌, జిల్లా సంక్షేమశాఖ అధికారి, మంచిర్యాల

మంచిర్యాలఅర్బన్‌: జిల్లా కేంద్రం మంచిర్యాలలో శుక్రవారం మహిళలు, యువతీ, యువకుల నృత్యాలు, డప్పు చప్పుళ్ల మధ్య వినాయకుడి శోభాయాత్ర వైభవంగా నిర్వహించారు. వాడవాడలా వెలిసిన వినాయకుడిని నగర వీధుల్లో శోభాయాత్ర నిర్వహించి రాయపట్నం, మంచిర్యాల గోదావరి నదిలో ఉత్సవ విగ్రహాలను నిమజ్జనం చేశారు. స్థానిక లక్ష్మీనారాయణ మందిర్‌, విశ్వనాథ ఆలయ కాలక్షేప మండపంలో ఆర్యవైశ్యసంఘం ఆధ్వర్యంలో ఏర్పాటు చేసిన వినాయకుడి వద్ద ఎమ్మెల్యే ప్రేమ్‌సాగర్‌రావు ప్రత్యేక పూజలు నిర్వహించారు. ఐబీ చౌరస్తాలో విశ్వహిందు సమితి వేదిక వద్ద వినాయకుల శోభాయాత్రకు జెండా ఊపి ప్రారంభించారు. సరస్వతీ శిశుమందిర్‌ విద్యార్థుల సాంస్కృతిక ప్రదర్శనలు ఆకట్టుకున్నాయి. వినాయకులు టీటీడీ కల్యాణ మండపం చౌరస్తా మీదుగా ఐబీ చౌరస్తా వేదిక వద్దకు చేరుకున్నాయి. బాణాసంచా కాలుస్తూ మంగళవాయిద్యాల మధ్య చిన్న విగ్రహాలను మంచిర్యాల గోదావరి నదికి తరలించారు. భారీ విగ్రహాలను రాయపట్నం గోదావరి నది వైపు నిమజ్జనానికి తరలించారు. మాజీ ఎమ్మెల్యే దివాకర్‌రావు పాత మంచిర్యాలలో పలు వినాయకులను దర్శించకుని ప్రత్యేక పూజలు నిర్వహించారు. వేర్వేరుగా జరిగిన పూజా కార్యక్రమంలో డీసీపీ భాస్కర్‌, మంచిర్యాల నగర మేయర్‌ ధర్ని మధుకర్‌, మంచిర్యాల మార్కెట్‌ కమిటీ చైర్మన్‌ రామగిరి భానేష్‌, చాంబర్‌ ఆప్‌ కామర్స్‌ అధ్యక్షుడు గుండ సుధాకర్‌, నగర పార్టీ అధ్యక్షుడు నరేష్‌, ఐఎన్‌టీయూసీ జిల్లా అధ్యక్షుడు పూదరి తిరుపతి, మాజీ మున్సిపల్‌ వైస్‌ ఛైర్మన్‌ మహేష్‌, హిందు ఉత్సవ సమితి సభ్యులు పాల్గొన్నారు. ట్రాఫిక్‌ అంతరాయం కలుగకుండా డీసీపీ భాస్కర్‌ పర్యవేక్షణలో పోలీసులు బందోబస్తు నిర్వహించారు. కాగా, మార్కెట్‌రోడ్‌లోని వినాయక భక్తజన గణేష్‌ మండలి ఆధ్వర్యంలో నిర్వహించిన నవరాత్రోత్సవాల్లో పూజలందుకున్న లడ్డును వేలం వేశారు. తిరుపాల్‌రెడ్డి బ్రదర్స్‌ రూ.1,17,300, కలశంను ముత్తవరం శ్రీనివాస్‌ దక్కించుకున్నారు. జైపూర్‌: పెద్దపల్లి–మంచిర్యాల జిల్లాల సరిహద్దు గోదావరి బ్రిడ్జిపైన మూడో రోజున గణపతి నిమజ్జనం వైభవంగా సాగింది. జిల్లాలోని ఆయా ప్రాంతాల నుంచి గణనాథులను ఇందారం గోదావరి బ్రిడ్జిపై నుంచి నిమజ్జనం చేశారు. జైపూర్‌ ఏసీపీ వెంకటేశ్వర్‌ ఆధ్వర్యంలో సీఐ నవీన్‌కుమార్‌, ఎస్సై భూమేశ్‌ నేతృత్వంలో పోలీసులు బందోబస్తు నిర్వహించారు. ప్రధానంగా మంచిర్యాల నుంచి ఇందారం గోదావరికి నిమజ్జనం కోసం తరలించగా అర్ధరాత్రి నుంచి తెల్లవారి వరకు సందడి వాతావరణం నెలకొంది. నిమజ్జనాన్ని కలెక్టర్‌ కుమార్‌ దీపక్‌ శుక్రవారం రాత్రి పరిశీలించారు.

శ్రీరాంపూర్‌: సింగరేణిలో గుర్తింపు సంఘం ఎన్ని కల కాలపరిమితి ముగిసినందున వెంటనే ఎన్నికలు నిర్వహించాలని టీబీజీకేఎస్‌ రాష్ట్ర అధ్యక్షుడు మిరియాల రాజిరెడ్డి డిమాండ్‌ చేశారు. శుక్రవారం ఆర్కే 5 గనిపై నిర్వహించిన గేట్‌ మీటింగ్‌లో ఆయ న కార్మికులను ఉద్దేశించి మాట్లాడారు. ఎన్నికలు నిర్వహించే వరకు అన్ని కార్మిక సంఘాలకు సమాన హోదా కల్పించి కార్మికుల సమస్యలపై చర్చలకు పిలువాలని డిమాండ్‌ చేశారు. సింగరేణిలో ప్రైవేటీకరణకు ఆధ్యులు ఏఐటీయూసీ నేతలే అని ఆరో పించారు. నాడు కోయగూడెం ఓపెన్‌ కాస్ట్‌లో ప్రైవే ట్‌ సర్ఫేస్‌ మైనర్‌ను ప్రవేశపెట్టింది వారు కాదా? అని ప్రశ్నించారు. ఇటీవల ఆర్‌ఎల్‌సీ వద్ద ఏఐటీయూసీ నేతలు 24 డిమాండ్లపై ఒప్పందం చేసుకున్నట్లు పేర్కొంటున్నారని, 12(3) ఒప్పందం ప్రకా రం వారు చేసుకున్న ఒప్పంద పత్రాలను కార్మికుల ముందు పెట్టాలని డిమాండ్‌ చేశారు. ఆర్కే 5 గని లో సీనియర్‌ కార్మిక నాయకుడు రామిడి మహేందర్‌రెడ్డితోపాటు పలువురు టీబీజీకేఎస్‌లో చేరారు. కార్యక్రమంలో యూనియన్‌ కేంద్ర ప్రధాన కార్యదర్శి కేతిరెడ్డి సురేందర్‌రెడ్డి, బ్రాంచ్‌ ఉపాధ్యక్షుడు బండి రమేశ్‌, డిప్యూటీ ప్రధాన కార్యదర్శి పెట్ట్టం లక్ష్మణ్‌, నాయకులు పానుగంటి సత్తయ్య, పొగాకు రమేశ్‌, అన్వేశ్‌రెడ్డి, పాశం శ్రీనివాస్‌రెడ్డి, ఎండీ లా ల, బీఆర్‌ఎస్‌ పట్టణ అధ్యక్ష, కార్యదర్శులు సుబ్బ య్య, మేరుగు పవన్‌కుమార్‌ పాల్గొన్నారు.

కాసిపేట: వైద్య సిబ్బంది సీజనల్‌ వ్యాధుల దృష్ట్యా మెరుగైన వైద్య సేవలు అందించాలని జిల్లా కలెక్టర్‌ కుమార్‌ దీపక్‌ సూచించారు. శుక్రవారం మండల కేంద్రంలోని రైతువేదికలో ఎస్‌ఐఆర్‌–2026 హియరింగ్‌ ప్రక్రియ నిర్వహణ తీరును పరిశీలించి అధికారులకు సూచనలు చేశారు. తహసీల్దార్‌ కార్యాలయాన్ని సందర్శించి రీ సర్వే, భూభారతి, రెవెన్యూ సదస్సుల దరఖాస్తు పరిష్కారం అంశాలపై సమీక్షించారు. ప్రాథమిక ఆరోగ్య కేంద్రాన్ని సందర్శించి వార్డులు, మందుల నిల్వలు, రిజిష్టర్లు, పరిసరాలను పరిశీలించారు. పరిసరాల్లో పారిశద్ధ్య నిర్వహణ పకడ్బందీగా చేపట్టాలని, అవసరమైన మందులు అందుబాటులో ఉంచుకోవాలని సూచించారు. ఈ కార్యక్రమంలో తహసీల్దార్‌ సునిల్‌కుమార్‌, మండల వైద్యాధికారి శ్రీదివ్య, నయబ్‌ తహసీల్దార్‌ అంజయ్య పాల్గొన్నారు.

జన్నారం: కవ్వాల్‌ టైగర్‌ రిజర్వు జన్నారం డివిజన్‌ను శుక్రవారం ఇండియన్‌ ఇన్‌స్టిట్యూట్‌ ఆఫ్‌ ఫారెస్ట్‌ మేనేజ్‌మెంట్‌ (ఐఐఎఫ్‌ఎం) మధ్యప్రదేశ్‌ రాష్ట్రంలోని భోపాల్‌ విద్యార్థులు సందర్శించారు. వీరిలో పశ్చిమబెంగాల్‌, మధ్యప్రదేశ్‌, కేరళ, ఉత్తరాఖండ్‌, ఆంధ్రప్రదేశ్‌, తెలంగాణ రాష్ట్రాల విద్యార్థులు ఉన్నారు. కవ్వాల్‌ టైగర్‌ రిజర్వు కోర్‌ ఏరియాలో అమలు చేస్తున్న అటవీ, వన్యప్రాణుల నివాస ప్రాంతాలు, నీటి కుంటల నిర్వహణ, అటవీ, వన్యప్రాణుల సంరక్షణ, రక్షణ చర్యలపై అటవీ శాఖ అధికారుల అవగాహన కల్పించారు. జన్నారం డివిజన్‌లో ఎకో టూరిజం కార్యకలాపాలపై వివరించారు. బైసన్‌కుంట, వన్యప్రాణుల నివాస ప్రాంతాల పరిరక్షణ, వన్యప్రాణుల నీటి వనరుల నిర్వహణ చర్యలను విద్యార్థులు పరిశీలించారు. ఈ కార్యక్రమంలో జన్నారం ఎఫ్‌డీవో ఎం.రామ్‌మోహన్‌, అటవీ రేంజ్‌ అధికారి బాబా ఖాదర్‌వలి, ఫారెస్ట్‌ సెక్షన్‌ అధికారి ఎం.శంకర్‌, ఫారెస్టు బీట్‌ అధికారులు బి.రవినాయక్‌, జె.సంతోష్‌, సిబ్బంది పాల్గొన్నారు. వలస కార్మికుల సంక్షేమానికి ముందడుగునిర్మల్‌ఖిల్లా: తెలంగాణతోపాటు భారతీయ వలస కార్మికుల హక్కులు, రక్షణ, సంక్షేమం కోసం తెలంగాణ గల్ఫ్‌ సమితి–ఖతార్‌, ప్రవాసీమిత్ర కార్మిక సంఘం–తెలంగాణ సంయుక్తంగా పనిచేయాలని నిర్ణయించాయి. ఈ మేరకు శుక్రవారం డిజిటల్‌ వర్చువల్‌ వేదికగా రెండు సంస్థల మధ్య అవగాహన ఒప్పందం కుదిరింది. బిల్డింగ్‌ అండ్‌ వుడ్‌ వర్కర్స్‌ ఇంటర్నేషనల్‌కు అనుబంధంగా పనిచేస్తున్న ఈ రెండు కార్మిక సంఘాలు సురక్షిత, క్రమబద్ధమైన, చట్టబద్ధమైన వలసలను ప్రోత్సహించడంతోపాటు వలస కార్మికుల సమస్యలను క్షేత్రస్థాయి నుంచి అంతర్జాతీయ స్థాయి వరకు తీసుకెళ్లేందుకు సమన్వయంతో పనిచేయనున్నాయి. ఈ డిజిటల్‌ అవగాహన ఒప్పందంపై ప్రవాసీ మిత్ర కార్మిక సంఘం తెలంగాణ రాష్ట్ర అధ్యక్షుడు స్వదేశ్‌ పరికిపండ్ల, తెలంగాణ గల్ఫ్‌ సమితి–ఖతార్‌ అధ్యక్షుడు మధు మైదం సంతకాలు చేశారు. ఈ మేరకు ప్రవాసీమిత్ర లేబర్‌ యూనియన్‌ రాష్ట్ర అధ్యక్షుడు నిర్మల్‌ జిల్లాకు చెందిన స్వదేశ్‌ వివరాలు వెల్లడించారు. ఉమ్మడి ఆదిలాబాద్‌ జిల్లాతోపాటు ఉత్తర తెలంగాణ జిల్లాల నుంచి విరివిగా విదేశీ ఉపాధి కోసం వెళ్తున్న కార్మికులకు వీసా, ఉద్యోగ ఒప్పందం, వేతనాలు, నియామక ప్రక్రియ, పని పరిస్థితులు, కార్మికుల హక్కులు, చట్టపరమైన అంశాలపై అవగాహన కల్పించేందుకు కార్యక్రమాలు నిర్వహించనున్నట్లు తెలిపారు. స్వదేశానికి తిరిగి వచ్చిన కార్మికులకు పునరావాసం, పునఃసమీకరణ, నైపుణ్యాభివృద్ధి, ఉపాధి అవకాశాలు తదితర అంశాలపై సమాచారం, మార్గదర్శకత్వం అందించే కార్యక్రమాలూ చేపట్టనున్నట్లు పేర్కొన్నారు. వలస కార్మికులు సమస్యలు సేకరించి కేంద్ర, రాష్ట్ర ప్రభుత్వాల దృష్టికి తీసుకెళ్లనున్నట్లు తెలిపారు. .

మంచిర్యాలటౌన్‌: ఉద్యోగుల ప్రధాన సమస్యల పరిష్కారానికి రాష్ట్ర ప్రభుత్వం సానుకూలంగా స్పందించి కీలక హామీలు ఇవ్వడంపై టీజీఈజేఏసీ నాయకులు హర్షం వ్యక్తం చేశారు. శుక్రవారం జిల్లా కేంద్రంలో ఏర్పాటు చేసిన సమావేశంలో వారు మాట్లాడారు. దసరాకు రెండు డీఏలు, సంక్రాంతికి మరో డీఏ విడుదలతోపాటు ఈ నెలాఖరులోపు పీఆర్సీ నివేదిక తెప్పించి, మెరుగైన ఫిట్‌మెంట్‌తో అమలుకు ప్రభుత్వం హామీ ఇచ్చిందని తెలిపారు. ఉద్యోగుల దీర్ఘకాలిక డిమాండ్‌ సీపీఎస్‌ రద్దుపై కమిటీ ఏర్పాటు చేస్తామని, ఉద్యోగుల ఇతర సమస్యల పరిష్కారానికి సానుకూలంగా స్పందించిందని తెలిపారు. భవిష్యత్‌లో టీజీజేఏసీ తీసుకునే నిర్ణయాలకు అనుగుణంగా ఉద్యోగులందరూ సమష్టిగా, ఐక్యంగా ముందుకు సాగి న్యాయమైన సమస్యల పరిష్కారానికి కృషి చేస్తామని తెలిపారు. టీజీజేఏసీ జిల్లా చైర్మన్‌ గడియారం శ్రీహరి, కార్యదర్శి వనజారెడ్డి, సభ్యులు పాల్గొన్నారు.నేడు, రేపు జయంతి ఉత్సవాలుమంచిర్యాలటౌన్‌: నస్పూరులోని కలెక్టరేట్‌లో ఈ నెల 26న ఉదయం 10:30 గంటలకు వీరనారి చాకలి ఐలమ్మ జయంతి, 27న ఆచార్య కొండా లక్ష్మణ్‌ బాపూజీ జయంతి ఉత్సవాలను నిర్వహించనున్నట్లు జిల్లా వెనుకబడిన తరగతుల అభివృద్ధి అధికారి నీరటి రాజేశ్వరి ఒక ప్రకటనలో తెలిపారు. ఉత్సవాల్లో జిల్లా అధికారులు, ప్రజలు పాల్గొనాలని కోరారు.

శ్రీరాంపూర్‌: సింగరేణిలో నెలకొన్న ఆర్థిక సంక్షోభంపై నిరసనగా బీజేపీ ఆధ్వర్యంలో ఈ నెల 30న సీసీసీ కార్నర్‌లో ‘సింగరేణి బకాయి.. బీజేపీ లడాయి’ పేరిట ధర్నా నిర్వహించనున్నట్లు ఆ పార్టీ రాష్ట్ర ఉపాధ్యక్షుడు వెరబెల్లి రఘునాథ్‌రావు తెలిపారు. శుక్రవారం నస్పూర్‌ కాలనీలోని ప్రెస్‌క్లబ్‌లో ఆయన విలేకరులతో మాట్లాడారు. ఈ కార్యక్రమానికి పార్టీ రాష్ట్ర అధ్యక్షుడు రాంచందర్‌రావు, ఎంపీ ఈటల రాజేందర్‌, బీజేపీ శాసనసభాపక్ష నేత ఏలేటి మహేశ్వర్‌రెడ్డి తదితరులు హాజరవుతారని తెలిపారు. సింగరేణికి రాష్ట్ర ప్రభుత్వం నుంచి రావాల్సిన రూ.55వేల కోట్ల బకాయిలు చెల్లించాలని డిమాండ్‌ చేశారు. బకాయిలు పేరుకుపోవడంతో ఉద్యోగుల జీతాలను యజమాన్యం ఓడీగా తెచ్చి ఇచ్చే పరిస్థితి నెలకొందని అన్నారు. కాంగ్రెస్‌ ప్రభుత్వ విధానాలతో సింగరేణి నష్టాల ఊబిలో కూరుకుపోయే ప్రమాదం ఏర్పడిందన్నారు. ఈ కార్యక్రమంలో పార్టీ జిల్లా ప్రధాన కార్యదర్శి వెంకటేశ్వర్‌రావు, ఉపాధ్యక్షులు పీ.కమలాకర్‌రావు, బేర సత్యనారాయణ, బీఎంఎస్‌ ఏరియా ఉపాధ్యక్షుడు నాతాడి శ్రీధర్‌రెడ్డి, పట్టణ అధ్యక్షుడు కుర్రె చక్రి, నాయకులు పొన్నవేన సదానందం, ఆర్‌ శ్రీనివాస్‌, చిరంజీవి, గొల్ల మహేందర్‌, బొద్దున రమేశ్‌, రేణుక, శీరిష పాల్గొన్నారు.

ఒకప్పుడు కూతురు భారం అనుకునేవారు..! తరం మారుతున్న కొద్దీ కుమారుల కంటే కూతురేం తక్కువ కాదని తల్లిదండ్రులు ఘంటాపథంగా చెబుతున్నారు. కూతుళ్లు ఏ రంగం ఎంచు కున్నా సరే విజయపథంలో దూసుకెళ్తూ తల్లిదండ్రులకు పేరు తెస్తున్న వారెందరో ఉన్నారు. ఏ చిన్న అవకాశం దొరికినా ఇదీ మా కూతురు గొప్పదనం అంటూ ఉదాహరణలెన్నో చెబుతారు. ఆ గొప్పదనం మరింత మందితో పంచుకునేలా సాక్షి దినపత్రిక అవకాశం కల్పిస్తోంది. కూతురు గొప్పదనం గురించి నాలుగు వాక్యాలు నేటి సాయంత్రం 4గంటల వరకు మా వాట్సప్‌ నంబర్‌కు పంపించండి. ఈ నెల 27న కూతుళ్ల దినోత్సవం సందర్భంగా ‘సాక్షి’లో ప్రచురిస్తాం. మీ కూతురుతో దిగిన సెల్ఫీ ఫొటో పంపించడం మర్చిపోవద్దు. పేర్లు, ఊరు, మండలం వివరాలు ఉండాలి.90100 57302

మంచిర్యాలరూరల్‌(హాజీపూర్‌): నగర పరిధిలోని ముల్కల్ల జిల్లా పరిషత్‌ ఉన్నత పాఠశాలలో శుక్రవారం ఎస్‌జీఎఫ్‌ ఆధ్వర్యంలో జిల్లా స్థాయి టేబుల్‌ టెన్నీస్‌ క్రీడాకారుల ఎంపిక పోటీలు నిర్వహించారు. అండర్‌–14, 17 విభాగాల్లో బాల, బాలికల ఎంపిక పోటీలను కార్పొరేటర్‌ బియ్యాల త్రివేణీ, ఎంఈఓ, ప్రధానోపాధ్యాయుడు రాజేశం, ఎస్‌జీఎఫ్‌ కార్యదర్శి యాకుబ్‌ ప్రారంభించారు. ఎస్‌జీఎఫ్‌ కుమురంభీం ఆసిఫాబాద్‌ జిల్లా కార్యదర్శి రామ్మోహన్‌రావు, నిర్వాహక కార్యదర్శి సంతోశ్‌, పీడీలు, జిల్లా నలుమూలల నుంచి క్రీడాకారులు హాజరయ్యారు. జోనల్‌ స్థాయికి ఎంపికై న క్రీడాకారులు అండర్‌–17 బాలుర విభాగంలో జయరాజ్‌, సాయితేజ(జెడ్పీ పాఠశాల–ముల్కల్ల), రిత్విక్‌(ఎంజేపీ–లక్సెట్టిపేట), నివాన్‌, సుప్రతిక్‌ వర్మ(ఆల్ఫోర్స్‌ పాఠశాల) ఎంపికయ్యారు. బాలికల విభాగంలో డి.అకుల్య, పి.సత్యచతుర్వేది(కార్మల్‌ పాఠశాల), కే.అశ్విత(జడ్పీ పాఠశాల–ముల్కల్ల), కే.లక్ష్మీ సహస్ర(జెడ్పీ పాఠశాల–బెల్లంపల్లి) ఎంపికయ్యారు. అండర్‌–14 బాలుర విభాగంలో రౌనిత్‌రెడ్డి(డీఏవీ–దేవాపూర్‌), అభిరామ్‌(జెడ్పీ పాఠశాల–ముల్కల్ల), జి.సహస్‌, శ్రీహితార్థ్‌(ఆల్ఫోర్స్‌ పాఠశాల) ఎంపికయ్యారు. బాలికల విభాగంలో సహానశ్రీ, ఆరోహీ(ఆల్ఫోర్స్‌ పాఠశాల), సీహెచ్‌.లాస్య(జెడ్పీ పాఠశాల–ముల్కల్ల), నిషాఅరుజున్‌(జెడ్పీ పాఠశాల–బెల్లంపల్లి) ఎంపికయ్యారు.

మంచిర్యాలఅగ్రికల్చర్‌: వరి ధాన్యం కొనుగోలు కేంద్రాల్లో సన్న రకాల వడ్ల గుర్తింపునకు ప్రభుత్వం వలంటీర్లను నియమించాలని నిర్ణయించింది. సన్న రకాలకు కనీస మద్దతు ధర రూ.2,461, అదనంగా రూ.500 బోనస్‌ చెల్లిస్తోంది. వానాకాలం సాగుకు ముందుగా ప్రభుత్వం సూచించిన సన్న రకం ధాన్యానికి మాత్రమే బోనస్‌ చెల్లిస్తామని ప్రకటించింది. కొనుగోలు కేంద్రాల్లో ధాన్యం రకం గుర్తింపు కోసం ప్రత్యేక వలంటీర్లను నియమించాలని వ్యవసాయ ఉత్పత్తుల శాఖ కమిషనర్‌ సురేంద్రమోహన్‌ ఇటీవల జిల్లా అధికారులతో నిర్వహించిన సమావేశంలో ఆదేశించారు. వ్యవసాయ పట్టభద్రులు, డిప్లొమా అర్హతలు ఉన్న అభ్యర్థులను ఎంపిక చేసి ప్రత్యేక శిక్షణ ఇస్తారు. ప్రతీ కొనుగోలు కేంద్రానికి ఒకరు చొప్పున నియమించి నెలవారీగా గౌరవ భృతి చెల్లించి వారి సేవలను వినియోగించుకుంటారు. జిల్లాలో 3.20లక్షల ఎకరాల్లో వివిధ రకాల పంటలు సాగు కాగా 1.44లక్షల ఎకరాల్లో వరి సాగు విస్తీర్ణం ఉంది. ఇందులో 90శాతం సన్నరకం వరి పంట ఉంది. 3.70లక్షల మెట్రిక్‌ టన్నుల ధాన్యం దిగుబడి వస్తుందని అధికారులు అంచనా వేస్తున్నా రు. రైతుల అవసరాలు, కంపెనీ విత్తనాలు పోను కొనుగోలు కేంద్రాలకు 1.70లక్షల మెట్రిక్‌ టన్నుల ధాన్యం వస్తుందని భావిస్తున్నారు. నవంబర్‌ మొద టి వారంలో ధాన్యం సేకరణ ప్రారంభమవుతుంది. 287కొనుగోలు కేంద్రాల్లో ఏర్పాట్లు, గన్ని బ్యాగులు, తూకం యంత్రాలు, టార్పాలిన్లు, ఇతర మౌలి క సదుపాయాలు కల్పించాలని ఐకేపీ, పీఏసీఎస్‌, డీసీఎంఎస్‌, మెప్మా ఏజెన్సీల నిర్వాహకులకు అవగాహన కల్పించారు. కొనుగోలు కేంద్రాల్లోని సిబ్బంది, వలంటీర్లకు సూచనలు, శిక్షణ ఇస్తారు. ఏడు రకాలకే బోనస్‌ జిల్లాలో సాధారణంగా వానాకాలంలో సన్న రకం, యాసంగిలో దొడ్డు రకాలు సాగు చేస్తుంటారు. సన్నాలకు మార్కెట్లో డిమాండ్‌ ఉండడంతో కొన్నేళ్లుగా ప్రభుత్వం సాగును ప్రోత్సహిస్తూ బోనస్‌ అందిస్తోంది. బోనస్‌ దుర్వినియోగం కాకుండా ఈ సీజన్‌ నుంచి వలంటీర్ల విధానాన్ని అమల్లోకి తెస్తోంది. సన్న రకం సాగు చేస్తున్న రైతులు విత్తనాల కొనుగోలు నుంచే టీ అగ్రి సీడ్స్‌ పోర్టల్‌లో నమోదు చేశారు. సొంత విత్తనాలు కొనుగోలు చేసిన వారు, పరిశోధన కేంద్రం నుంచి అందిన విత్తనాలు పొందిన రైతులు సంబంధిత ఏఈవోల ధ్రువీకరణ పత్రం అందించాల్సి ఉంటుంది. నాణ్యత, దిగుబడి, మార్కెట్‌లో డిమాండ్‌ను పరిగణనలోకి తీసుకుని ఏడు ప్రత్యేక రకాల సన్న వడ్లపై తెలంగాణ వ్యవసాయ విశ్వవిద్యాలయం ప్రభుత్వానికి నివేదిక ఇచ్చింది. దీంతో ఆ ఏడు రకాలకే క్వింటాల్‌కు రూ.500 బోనస్‌ ఇచ్చేందుకు ప్రభుత్వం నిర్ణయించింది. ఇందులో బీపీటీ–5204(సాంబ మ సూరి), ఆర్‌ఎన్‌ఆర్‌ 15048(తెలంగాణ సోన), జై శ్రీరాం, కేఎన్‌ఎం–1638(కూనారం సన్నాలు), డ బ్ల్యూజీఎల్‌–44(సిద్ది), కేఎన్‌ఎం–7715 ఉన్నా యి. నాణ్యత గింజ పొడువు 6 మిల్లీమీటర్ల కంటే తక్కువగా ఉండాలి. పొడవు, వెడల్పు నిష్పత్తి 2ః5 కంటే ఎక్కువగా ఉండాలి. గింజ వెడల్పు 2 మిల్లీమీటర్లు మించి ఉండకూడదు. ఆయా ఏడు రకాల వడ్లనే కనీస మద్దతు ధరతోపాటు అదనంగా బోనస్‌ చెల్లించి కొనుగోలు చేస్తారు. ఏఈవోల వద్ద క్రాప్‌ బుకింగ్‌ పోర్టల్‌లో పంట వివరాలు నమోదు చేసుకుని ఉండాలి. సన్నరకం వడ్లు, నాణ్యత, ప్రమాణాల గుర్తింపులో వలంటీర్లు కీలకం కానున్నారు.

మంచిర్యాలఅగ్రికల్చర్‌: జిల్లాలో కొన్ని రోజులుగా ఎండ, ఉక్కపోతతో వేసవిని తలపించగా.. మూడు రోజులుగా కురుస్తున్న వాన ప్రజలకు ఉపశమనం కలిగించింది. బంగాళాఖాతంలో ఏర్పడిన వాయుగుండం ప్రభావంతో బుధవారం నుంచి వర్షం కురుస్తోంది. బుధ, గురువారాల్లో 34.6, శుక్రవారం 11.9మిల్లీమీటర్ల వర్షం కురిసింది. ఓ మోస్తారు నుంచి భారీ వర్షం కురుస్తుండడంతో పంటలకు ప్రాణం పోసినట్లయింది. పత్తి గూడ, వరి పొట్ట దశలో ఉంది. ప్రస్తుతం వరిలో కలుపు, ఎరువులు వేస్తున్నారు. పంట పొలాల్లో నీరు నిల్వడంతో మరో 15రోజుల వరకు నీటితడులకు ఢోకా లేదని రైతులు హర్షం వ్యక్తం చేస్తున్నారు. మరో రెండు రోజులు.. మరో రెండు రోజులపాటు వర్షం కురిసే అవకాశం ఉందని వాతావరణ శాఖ ప్రకటించింది. ప్రస్తుత వర్షాలు ఊరటనిస్తున్నా ఇలాగే మరో రెండ్రోజులు కొనసాగితే పత్తి పంటలో పూత, గూడ రాలిపోతుంది. చేన్లు జౌకపట్టి పత్తి చెట్లు రంగు మారుతాయని రైతులు తెలిపారు. శుక్రవారం జన్నారం మండలంలో 47.9 మిల్లీమీటర్లు, దండేపల్లిలో 44.2, లక్షెట్టిపేటలో 22.6, హాజీపూర్‌లో 20.4 మిల్లీమీటర్ల వర్షం కురువగా.. నస్పూర్‌, నెన్నెల, కన్నెపల్లి, చెన్నూర్‌, భీమారం, భీమిని, కాసిపేట, తాండూర్‌, బెల్లంపల్లి, మందమర్రి, జైపూర్‌, కోటపల్లి, మంచిర్యాల, వేమనపల్లి మండలాల్లో 1మిల్లీమీటరు నుంచి 13.3మిల్లీమీటర్ల వర్షపాతం నమోదైంది. జిల్లా సాధారణ వర్షపాతం ఇప్పటివరకు 920.8మిల్లీమీటర్లు కాగా 947మిల్లీమీటర్లు కురిసింది. సగటున 3శాతం అధికంగా నమోదైంది.

బెల్లంపల్లి: మున్సిపాలిటీ పరిధిలో చేపట్టిన అభివృద్ధి పనులు త్వరగా పూర్తి చేయాలని జిల్లా కలెక్టర్‌ కుమార్‌ దీపక్‌ అధికారులను ఆదేశించారు. శుక్రవారం మున్సిపల్‌ కమిషనర్‌ తన్నీరు రమేష్‌తో కలిసి అభివృద్ధి పనులు పరిశీలించారు. కలెక్టర్‌ మాట్లాడుతూ అంతర్గత రహదారులు, మురుగు కాలువలు, ఇతర అభివృద్ద్ధి పనులు నిర్ధేశించిన గడువులోగా పూర్తి చేయించడానికి చర్యలు తీసుకోవాలని అన్నారు. పారిశుద్ధ్య నిర్వహణపై ప్రత్యేక దృష్టి సారించి రోజువారీగా తడి, పొడి చెత్త సేకరించి డంపింగ్‌యార్డ్‌కు తరలించాలని తెలిపారు. బెల్లంపల్లి సబ్‌ కలెక్టర్‌ కార్యాలయంలో సబ్‌ కలెక్టర్‌ మనోజ్‌తో కలిసి నియోజకవర్గంలోని తహసీల్దార్లతో సమావేశం నిర్వహించారు. ఓటరు జాబితా ప్రత్యేక సమగ్ర సవరణలో మ్యాపింగ్‌ కాని, అనామలిస్‌ జాబితాలో ఉన్న ఓటర్లకు నోటీసులు జారీ చేసి విచారణ వేగవంతం చేయాలన్నారు. భూ సమస్యల పరిష్కారంలో భాగంగా చేపట్టిన రీ సర్వేలో గ్రామ నక్షాలు, వివిధ రకాల భూముల గుర్తింపు వేగవంతం చేయాలని ఆదేశించారు. సాదాబైనామా, భూభారతి, రెవెన్యూ సదస్సుల్లో వచ్చిన దరఖాస్తులను రికార్డులతో సరిచూసి క్షేత్రస్థాయిలో పరిశీలించాలని అన్నారు. 22ఏ ప్రక్రియను పకడ్బందీగా అమలు చేయాలని తెలిపారు.

మంచిర్యాలరూరల్‌(హాజీపూర్‌): ఎల్లంపల్లి ప్రాజెక్ట్‌ పూర్తిస్థాయి నీటిమట్టానికి చేరుకుని జలకళను సంతరించుకుంది. శుక్రవారం ప్రాజెక్ట్‌ నీటి మట్టం వివరాలు ఇలా ఉన్నాయి. 148 మీటర్ల క్రస్ట్‌ లెవెల్‌కు 148 మీటర్లు చేరగా.. 20.175 టీఎంసీలకు గాను 20.100 టీఎంసీల నీటి మట్టంతో నిండుకుండను తలపిస్తోంది. ఇన్‌ఫ్లో కింద ఎగువ ప్రాంతాల నుంచి 13వేల క్యూసెక్కుల వరదనీరు ప్రాజెక్ట్‌లోకి వచ్చి చేరుతుండగా.. అవుట్‌ ఫ్లో కింద హైదరాబాద్‌కు 277, ఎన్టీపీసీకి 121, నంది పంప్‌హౌస్‌కు 12,600 క్యూసెక్కుల నీటిని తరలిస్తున్నారు. ‘కడెం’కు స్వల్ప ఇన్‌ఫ్లో కడెం: కడెం ప్రాజెక్ట్‌కు శుక్రవారం 1,242 క్యూసెక్కుల స్వల్ప ఇన్‌ఫ్లో వస్తున్నట్లు ప్రాజెక్ట్‌ అధికారులు తెలిపారు. ప్రస్తుతం ప్రాజెక్ట్‌ పూర్తిస్థాయి నీటిమట్టం 700 అడుగులు ఉన్నట్లు పేర్కొన్నారు.

మంచిర్యాలరూరల్‌(హాజీపూర్‌): మంచిర్యాల ప్రభుత్వ డిగ్రీ కళాశాల మైదానంలో ఈ నెల 19న నిర్వహించిన జిల్లా స్థాయి జూనియర్‌ అథ్లెటిక్స్‌ చాంపియన్‌షిప్‌ పోటీల్లో నగర పరిధిలోని తెలంగాణ సాంఘిక సంక్షేమ గురుకుల పాఠశాల, కళాశాల విద్యార్థులు ప్రణయ్‌కుమార్‌, ఉల్లాస్‌, అరుణ్‌ణకుమార్‌ రాష్ట్ర స్థాయి జూనియర్స్‌ అథ్లెటిక్స్‌ చాంపియన్‌షిప్‌ పోటీలకు ఎంపికయ్యారు. ఈ నెల 26, 27న హన్మకొండలోని స్టేడియంలో జరిగే పోటీల్లో పాల్గొంటారు. విద్యార్థులను ప్రధానోపాధ్యాయుడు కుమ్మరి మోహన్‌, జూనియర్‌ వైస్‌ ప్రిన్సిపాల్‌ కస్తూరి రమేశ్‌, వ్యాయామ ఉపాధ్యాయులు పున్నం, జాతీయ కోచ్‌ కుమ్మరి శ్రీకాంత్‌, పీఈటీ మాస్టర్‌ ముత్యం, రాము అభినందించారు. ఫుట్‌బాల్‌ జిల్లా జట్టు.. రామకృష్ణాపూర్‌/బెల్లంపల్లి: మందమర్రి మండలం బొక్కలగుట్టలోని హెవెన్‌ ఆఫ్‌ హోప్‌ స్కూల్‌లో శుక్రవారం అండర్‌–19 బాలుర ఫుట్‌బాల్‌ ఎంపిక పోటీలు నిర్వహించారు. స్కూల్‌ గేమ్స్‌ ఫెడరేషన్‌ ఆధ్వర్యంలో ఉమ్మడి ఆదిలాబాద్‌ జిల్లా జట్టు ఎంపిక పోటీలు జరుగగా ప్రతిభ కనబర్చిన క్రీడాకారులను జిల్లా జట్టుకు ఎంపిక చేశారు. ఎంపికై న క్రీడాకారులు త్వరలో భువనగిరిలో జరిగే రాష్ట్రస్థాయి పోటీల్లో పాల్గొంటారని ఎస్‌జీఎఫ్‌ సెక్రెటరీ బాబురావు తెలిపారు. కార్యక్రమంలో పాఠశాల కరస్పాండెంట్‌ కారోలీన్‌ విగ్‌, ఔట్‌రీచ్‌ మ్యాప్‌ డైరెక్టర్‌ పాల్‌విగ్‌, పీడీ సుదీప్‌, పీఈటీలు శేఖర్‌, సురేందర్‌, రాజేందర్‌ పాల్గొన్నారు. జిల్లా జట్టుకు ఎంపికై న వారిలో బెల్లంపల్లిలోని తెలంగాణ ప్రభుత్వ సాంఘిక సంక్షేమ కాసిపేట బాలుర గురుకుల పాఠఽశాల/కళాశాల విద్యార్థులు ఎం.విఘ్నేశ్వర్‌, జి.కార్తీక్‌ ఉన్నారు. వీరిని ప్రిన్సిపాల్‌ సంతోష్‌కుమార్‌, పీడీ కే.హరీష్‌, పీఈటీ ఏ.రాజేందర్‌ అభినందించి సన్మానించారు.

● ఒక్కొక్కరికి నాలుగైదు బాధ్యతలు ● పెరుగుతున్న పరిధితో నేరాలపై ప్రభావంరామకృష్ణాపూర్‌: విస్తీర్ణం పెరుగుతోంది.. కొత్త కాలనీలు వెలుస్తున్నాయి. జనాభా క్రమంగా పెరుగుతోంది. కానీ రామకృష్ణాపూర్‌ పోలీస్‌స్టేషన్‌లో సిబ్బంది సంఖ్య మాత్రం అందుకు తగ్గట్టుగా పెరగడం లేదు. దాదాపు 45 వేల జనాభా ఉండగా.. స్టేషన్‌లో 30 మంది మాత్రమే విధులు నిర్వర్తిస్తున్నారు. వీరిలో ఎస్సై, అదనపు ఎస్సై, ముగ్గురు ఏఎస్సైలు, ఐదుగురు హెడ్‌ కానిస్టేబుళ్లు, 20 మంది కానిస్టేబుళ్లు ఉన్నారు. విస్తారమైన పరిధికి ఈ సంఖ్య సరిపోకపోవడంతో పోలీసులపై పని ఒత్తిడి తీవ్రంగా పెరుగుతోంది. ఉన్న వారిలోనే కోర్టు డ్యూటీలు, రైటర్‌ విధులు, బ్లూకోట్‌, స్పెషల్‌ డ్యూటీలు, గన్‌మెన్‌ తదితర బాధ్యతలకు సిబ్బందిని కేటాయించాల్సి ఉంటోంది. దీంతో సాధారణ పెట్రోలింగ్‌, శాంతిభద్రతలు, నేరాల నియంత్రణ, ఫిర్యాదుల విచారణ, అత్యవసర సంఘటనలకు స్పందించడం వంటి విధులకు అందుబాటులో ఉండే సిబ్బంది సంఖ్య తగ్గుతోంది. ఒక్కొక్కరికి నాలుగైదు విధులు సిబ్బంది కొరత కారణంగా ఒకే కానిస్టేబుల్‌ పలు రకాల విధులు నిర్వహించాల్సి వస్తోంది. కోర్టుకు వెళ్లడం, వారెంట్లు, సమన్లు అమలు చేయడం, స్టేషన్‌ విధులు, పెట్రోలింగ్‌, బందో బస్తు, అత్యవసర డ్యూటీలు, ఇలా ఒకే వ్యకి ్తపై పలు బాధ్యతలు పడుతున్నాయి. ఎవరైనా సెలవులో ఉన్నా బందోబస్తుకు వెళ్లినా లేదా ఇ తర ప్రత్యేక విధులకు కేటాయించినా మిగిలిన సిబ్బందిపైనే అదనపు భారం పడుతోంది. పోలీస్‌స్టేషన్‌ పరిధి కూడా క్రమంగా విస్తరిస్తోంది. గద్దెరాగిడి, తిమ్మాపూర్‌ తదితర ప్రాంతాల్లో కొత్త ఇళ్లు, కొత్త కాలనీలు వేగంగా ఏర్పడుతన్నాయి. జానాభా పెరుగుతున్నా కొద్దీ పోలీసులపై బాధ్యతలు కూడా పెరుగుతున్నాయి. గంజాయి, చోరీలపై నిఘా పెంచాలని డిమాండ్‌ ఇటీవలి కాలంలో గంజాయి చలామణి, విని యోగం, దొంగతనాలపై స్థానికంగా ఆందోళనలు వ్యక్తమవుతున్నాయి. అరికట్టేందుకు అనుమానితుల కదలికలపై నిఘా, సమస్యాత్మక ప్రాంతాల్లో పెట్రోలింగ్‌, సమాచార వ్యవస్థను బలోపేతం చేయాల్సిన అవసరం ఉంది. ప్రత్యేకంగా క్రైమ్‌ వాచ్‌ నిర్వహించే సిబ్బంది అందుబాటులో ఉండాలని ప్రజలు కోరుతున్నారు. ఆదివారం బ్యాంక్‌లకు నో హాలిడేపాతమంచిర్యాల: బ్యాంకు ఉద్యోగుల సమస్యల పరిష్కారం కోసం ఈ నెల 28, 29, 30న దేశ వ్యాప్తంగా బ్యాంకు ఉద్యోగులు సమ్మె చేస్తున్న కారణంగా మూడు రోజులపాటు బ్యాంకులు మూతపడనున్నాయి. 4వ శనివారం, ఆదివారం బ్యాంకులకు సెలువులు కావడంతో వరుసగా ఐదు రోజులు బ్యాంకులు పని చేయవు. కాగా ఈ నెల 27న ఆదివారం రోజు వినియోగదారుల లావాదేవీల సౌకర్యం కోసం బ్యాంకులు తెరిచి ఉంచాలని ప్రభుత్వం నిర్ణయించిందని, ఉద్యోగులు విధులకు హాజరు కావాలని ఆదేశాలు వచ్చాయని ఎస్‌బీఐఎస్‌యూహెచ్‌సీ రీజినల్‌ సెక్రెటరీ కే.శ్రీనివాస్‌ తెలిపారు. ఆదివారం బ్యాంకు ఉద్యోగులు విధులు నిర్వర్తిస్తారని, మరుసటి రోజు సోమ, మంగళ, బుధవారాల్లో సమ్మెలో పాల్గొంటారని తెలిపారు

లింగాపూర్‌: ఆదిలాబాద్‌ రిమ్స్‌ ఆస్పత్రిలో జరిగిన అఆగ్ని ప్రమాదంలో కంచన్‌పల్లి గ్రామపంచాయతీ పరిధి మూలగూడ గ్రామానికి చెందిన చిన్నారి మృతి చెందగా బాధిత దుర్గాబాయి–మారుతి దంపతులను ఐటీడీఏ పీవో మంద మకరందు శుక్రవారం పరామర్శించారు. రాష్ట్ర ప్రభుత్వం తరఫున మంజూరైన రూ.5లక్షల చెక్కు అందించారు. ప్రభుత్వం అండగా ఉంటుందని భరోసా కల్పించారు. ఆపద సమయంలో బాధిత కుటుంబానికి అవసరమైన స హాయ సహకారాలు అందించేందుకు ప్రభుత్వం చ ర్యలు తీసుకుంటుందని తెలిపారు. ఏవో సంజ య్‌కుమార్‌, ఏపీవో పీవీటీవీ ఆత్రం భాస్కర్‌, హౌ సింగ్‌ ఏఈ శశికాంత్‌, సర్పంచ్‌ ఆత్రం శేషునారాయణ, కనక పార్వతీబాయి, అధికారులు పాల్గొన్నారు.

మంచిర్యాలటౌన్‌: గ్యాస్‌ సిలిండర్‌ కావాలంటే ఇక ఆధార్‌ బయోమెట్రిక్‌ ధ్రువీకరణ తప్పనిసరి. కానీ జిల్లాలో 16,764 మంది గ్యాస్‌ వినియోగదారులు ఆధార్‌ బయోమెట్రిక్‌ చేసుకోకపోవడంతో సబ్సిడీ సిలిండర్లకు దూరం కానున్నారు. కేంద్రం ఆధార్‌ ఆధారిత బయోమెట్రిక్‌ అథెంటికేషన్‌(బీఏఏ) పూర్తి చేయని కుటుంబాలకు వచ్చే నెల ఒకటో తేదీ నుంచి 14.2 కిలోల గృహ వినియోగ సిలిండర్‌ను సబ్సిడీతో అందించే విధానానికి బ్రేక్‌ వేయాలని నిర్ణయించింది. బీఏఏ పూర్తయ్యే వరకు సబ్సిడీ రీఫిల్‌ బుక్‌ చేసుకునే అవకాశం ఉండదు. సబ్సిడీ నిలిపివేయనుండగా.. కనెక్షన్‌ను రద్దు, గ్యాస్‌ పూర్తిగా నిలిపి వేయడం గానీ చేయరు. బీఏఏ పూర్తి చేసిన తర్వాతనే 14.2 కిలోల సబ్సిడీ రీఫిల్‌ సౌకర్యం పునరుద్ధరిస్తారు. జిల్లాలో గ్యాస్‌ వినియోగదారులు 2,42,102 మంది ఉండగా.. 2,25,338 మంది ఆధార్‌ బయోమెట్రిక్‌ చేసుకున్నారు. ఇంకా చేసుకోవాల్సిన వారు 16,764 మంది ఉన్నారు. తప్పనిసరి గ్యాస్‌ కనెక్షన్‌ ఉన్న వారు వారి ఆధార్‌ వివరాలను వేలిముద్ర, ముఖ గుర్తింపు వంటి బయోమెట్రిక్‌ ద్వారా ధ్రువీకరించుకోవాలి. ప్రధానమంత్రి ఉజ్వల యోజన(పీఎంయూవై), నాన్‌ పీఎంయూవై వినియోగదారులు ఎవరైనా బయోమెట్రిక్‌ను ధ్రువీకరించుకోవాలి. నిజమైన వినియోగదారుడిదేనని ఆధార్‌తో నిర్ధారించే పక్రియ కోసం ఈ ఏడాది జూన్‌ 30వరకు గడువు నిర్ణయించగా, ఆ తర్వాత పలుమార్లు పొడిగిస్తూ ఈ నెల 14వరకు అవకాశం కల్పించారు. గడువు ముగిసినా బీఏఏ చేసుకునే అవకాశాన్ని వినియోగదారులు వినియోగించుకోవచ్చు. పెండింగ్‌లో ఉన్న వినియోగదారులు బీఏఏ పూర్తి చేసుకునేందుకు నిర్ధిష్ట గడువు లేకుండానే అక్టోబర్‌ ఒకటో తేదీ నుంచి బీఏఏ చేసుకోని వారికి సబ్సిడీ నిలిపివేయనున్నారు. దీనివల్ల సబ్సిడీ సిలిండర్‌ నియంత్రిత ధరకు బుక్‌ చేసుకునే అవకాశం ఉండదు. గ్యాస్‌ అవసరం ఉన్నవారు ఆయిల్‌ కంపెనీల లభ్యతను బట్టి 5, 10 కేజీల సిలిండర్లను మార్కెట్‌ ధరకు తీసుకునేందుకు అవకాశం ఉండగా, వీటికి సబ్సిడీ వర్తించదు. మొబైల్‌ యాప్‌ ద్వారా చేసుకోవచ్చు గ్యాస్‌ కనెక్షన్‌ వినియోగదారులు వారి ఆధార్‌ బయోమెట్రిక్‌ అథెంటికేషన్‌ను నేరుగా గ్యాస్‌ ఏజెన్సీల వద్దకు వెళ్లి చేసుకోవడంతోపాటు గ్యాస్‌ సిలిండర్‌ డెలివరీ సమయంలోనే డెలివరీ సిబ్బంది, ఆయిల్‌ కంపెనీల మొబైల్‌ యాప్‌ల ద్వారా చేసుకునేందుకు అవకాశం కల్పించారు. ఇండేన్‌, భారత్‌, హెచ్‌పీ గ్యాస్‌ సంస్థలు డిజిటల్‌ మార్గాలను అందుబాటులో ఉంచాయి.

మంచిర్యాలటౌన్‌: చిన్నారులు, గర్భిణులు, బాలింతలు, కిశోర బాలికల్లో పౌష్టికాహార లోపాన్ని అధిగమించేందుకు ప్రభుత్వం ఏటా పోషణ మాసోత్సవం నిర్వహిస్తోంది. ఈ నెల 9 నుంచి అక్టోబర్‌ 8వరకు మహిళా శిశు, దివ్యాంగుల, వృద్ధుల సంక్షేమ శాఖ ఆధ్వర్యంలో నిర్వహిస్తున్న పోషణ మాసోత్సవం మొక్కుబడిగా సాగుతోంది. గర్భిణుల ఆరోగ్య రక్షణ, రక్తహీనత నివారణ, పిల్లల పెరుగుదల పర్యవేక్షణ, పరిశుభ్రత వంటి పలు అంశాలపై అవగాహన కల్పించే కార్యక్రమాలు నెలంతా అన్ని అంగన్‌వాడీ కేంద్రాల పరిధిలో నిర్వహించాలి. కానీ ఏదో ఒక రోజు నిర్వహిస్తూ మమ అనిపిస్తున్నారు. గర్భిణులు, బాలింతలు, కిశోర బాలికలకు పోషకాహారంపై సరైన అవగాహన లేక, పేదరికం కారణంగా ఎంతోమంది పౌష్టికాహార లోపంతో అనారోగ్యం బారిన పడుతున్నారు. అంగన్‌వాడీ టీచర్లకు బీఎల్‌వోలుగా అదనపు విధులు కేటాయించారు. ప్రత్యేక ఓటరు సమగ్ర సవరణ(సర్‌) కార్యక్రమంలోనే బిజీగా ఉండడంతో అంగన్‌వాడీ కేంద్రాలకు రెండు నెలలకు పైగా రావడం లేదు. దీంతో చిన్నారులు, గర్భిణులు, బాలింతలకు పౌష్టికాహారం ఇవ్వలేని పరిస్థితులు ఉండగా.. పోషణ మాసోత్సవాలు నిర్వహించలేని పరిస్థితి ఎదురవుతోంది. చిన్నారుల్లో పోషకాహార లోపాలు జిల్లాలోని 975 అంగన్‌వాడీ కేంద్రాల్లో 35,537మంది చిన్నారులు, గర్భిణులు 3,649మంది, బాలింతలు 2,961 మంది ఉన్నారు. చిన్నారుల్లో తీవ్ర పోషకాహార లోపం ఉన్నవారు 1,175 మంది కాగా అతి తీవ్ర పోషకాహార లోపం ఉన్నవారు 276 మంది ఉన్నారని గత నెలలో గుర్తించారు. మాసోత్సవంలో భాగంగా గ్రామీణ, పట్టణ ప్రాంత ప్రజల భాగస్వామ్యంతోనే అవగాహన కల్పించి, పిల్లల ఎత్తు, బరువు కొలతలు సేకరించడం, గర్భిణుల బరువు, భుజం కొలతలను తీసుకోవడం, పోషకాహారంపై అవగాహన కల్పించి, రోగ నిరోధక శక్తిని పెంచడం వంటివి చేపడుతున్నారు. చిన్నారుల్లో పోషకాహార లోపాలను గుర్తించి, తక్కువ బరువు ఉన్న పిల్లలకు వైద్య పరీక్షలు, మందులు, బాలామృతం, బాలామృతం ప్లస్‌ పంపిణీ చేసి తల్లిదండ్రులకు కౌన్సెలింగ్‌ ఇవ్వాలి. చిన్నారుల్లో గ్రోత్‌ మానిటరింగ్‌ వివరాలుప్రాజెక్టు చిన్నారులు తీవ్ర పోషకాహార అతి తీవ్ర లోపం పోషకాహార లోపం బెల్లంపల్లి 9,578 369 85 చెన్నూర్‌ 8,078 244 72 లక్సెట్టిపేట్‌ 6,104 221 54 మంచిర్యాల 11,777 341 65 మొత్తం 35,537 1,175 276

జన్నారం: డీజే వాహనం సీజ్‌ చేసి యజమానిపై కేసు నమోదు చేసినట్లు ఎస్సై ఉదయ్‌కిరణ్‌ తెలిపారు. మండలంలోని మురిమడుగులో బుధవారం రాత్రి గణేశ్‌ నిమజ్జనోత్సవాల్లో అత్యధిక శబ్దంతో ప్రజల ప్రశాంతతకు భంగం వాటిల్లేలా ప్రదర్శిస్తున్న డీజే, వాహనాన్ని సీజ్‌ చేసి యజమాని శ్రీరామ్‌నగర్‌ కాలనీ చెందిన ముల్కల్ల సంజీవ్‌పై కేసు నమోదు చేసినట్లు ఆయన పేర్కొన్నారు. కేయూ పరిధిలో నేటి పరీక్షలు వాయిదాకేయూక్యాంపస్‌: కాకతీయ యూనివర్సిటీ పరిధిలోని ఉమ్మడి వరంగల్‌, ఖమ్మం, ఆదిలాబాద్‌ జిల్లాల్లో శుక్రవారం నిర్వహించనున్న దూరవిద్య డిగ్రీ, పీజీ, రెగ్యులర్‌ లా తదితర పరీక్షలు వాయిదా వేస్తున్నట్లు పరీక్షల నియంత్రణాధికారి కే.రాజేందర్‌ తెలిపారు. భారీ వర్షాల హెచ్చరికల నేపథ్యంలో గురువారం కూడా అన్ని పరీక్షలు వాయిదా వేశామని పేర్కొన్నారు. మిగిలిన పరీక్షలు టైంటేబుల్‌ ప్రకారం యధావిధిగా జరుగుతాయని, ఈ నెల 24, 25 తేదీల్లో జరగాల్సిన పరీక్షలను మళ్లీ ఎప్పుడు నిర్వహించేది తర్వాత ప్రకటిస్తామని ఆయన పేర్కొన్నారు. విద్యార్థులకు అరుదైన గుర్తింపుమంచిర్యాలఅర్బన్‌: వరంగల్‌ కాకతీయ యూనివర్సిటీలో జాతీయ సేవా పథకం స్వర్ణోత్సవ వేడుకల్లో గురువారం నిర్వహించిన సాంస్కృతిక కార్యక్రమాల్లో స్థానిక వివేకావర్థిని డిగ్రీ, పీజీ కళాశాల విద్యార్థులకు అరుదైన గుర్తింపు దక్కింది. రాష్ట్రస్థాయి యువజనోత్సవాల్లో పాల్గొన్న వలంటీర్స్‌కు అవకాశం కల్పించారు. ఉమ్మడి ఆదిలాబాద్‌ జిల్లా నుంచి వివేకావర్థిని వలంటీర్స్‌ పాల్గొని బోనాల పండుగ పాటలకు నృత్యం చేసి అలరించారు. ఎన్‌ఎస్‌ఎస్‌ జిల్లా కన్వీనర్‌, కళాశాల కరస్పాండెంట్‌ ఉదారి చంద్రమోహన్‌ గౌడ్‌ రాష్ట్ర ఎన్‌ఎస్‌ఎస్‌ అవార్డును అందజేశారు. ఈ కార్యక్రమంలో యూనివర్సిటీ రిజిస్ట్రార్‌ ప్రొఫెసర్‌ రామచంద్రం, మాజీ కోఆర్డినేటర్‌ జ్యోతి, కోఆర్డినేటర్‌ ఈసం సత్యనారాయణ, కళాశాల ప్రిన్సిపాల్‌ ఆర్‌.శ్రీనివాస్‌, ప్రోగ్రాం అధికారి షరీనా, తదితరులు పాల్గొన్నారు.

చెన్నూర్‌: 2027లో గోదావరి పుష్కరాలను కుంభమేళా తరహాలో నిర్వహించాలని రాష్ట్ర ప్రభుత్వం నిర్ణయించింది. వివిధ రాష్ట్రాల నుంచి పుష్కర స్నానం ఆచరించేందుకు విచ్చేస్తున్న భక్తులకు ఎలాంటి ఇబ్బందులు కలుగకుండా ఏర్పాట్లు చేపట్టాలనే ఉద్దేశంతో ముందుకెళ్తోంది. ఇటీవలే నిధులు కూడా మంజూరు చేసింది. చెన్నూర్‌లో రాష్ట్ర కార్మిక శాఖ మంత్రి గడ్డం వివేక్‌ వెంకటస్వామి రూ.8 కోట్ల నిధులతో పుష్కర ఘాట్లు, గోదావరిమాత విగ్రహం, భక్తులకు షెడ్ల నిర్మాణాలకు భూమిపూజ చేశారు. త్వరలో నిర్మాణ పనులు ప్రారంభం కానున్నాయి. టెండర్లు పూర్తి కాగానే రోడ్డు నిర్మాణ పనులతో పాటు ఇతర పనులు ప్రారంభించే అవకాశం ఉంది. చెన్నూర్‌ పట్టణంతో పాటు మండలంలోని పలు ఆలయాల అభివృద్ధికి మరో రూ.10 కోట్ల నిధులు మంజూరు కానున్నాయి. మరో పది నెలల్లో గోదావరి పుష్కరాలు ప్రారంభం కానున్నాయి. ఎలాంటి ఆటంకాలు లే కుండా పనులు సజావుగా సాగితే సకాలంలో పూ ర్తయ్యే అవకాశం ఉంటుంది. చెన్నూర్‌ గోదావరి నుంచి ఇసుక రవాణా చెన్నూర్‌ గోదావరి నుంచి ఇసుక తరలించేందుకు మైనింగ్‌ శాఖ గతంలో సింగరేణికి 30 ఏళ్లపాటు అ నుమతించింది. సంస్థకు ఇసుక తప్పనిసరి కావడంతో సుదీర్ఘకాలం అనుమతి పొందింది. పదేళ్లుగా రో జుకు 40 నుంచి 50 వరకు లారీల్లో ఇసుక తరలిస్తున్నారు. పుష్కర పనులు ప్రారంభమైతే ఇసుక రవా ణా దారి మళ్లీస్తారా? లేదా ఇదే దారి గుండా కొనసాగిస్తారా? అని పట్టణ ప్రజలు చర్చించుకుంటున్నారు. పదేళ్లుగా అధికలోడుతో ఇసుక రవాణాతో గోదావరి రోడ్డు అధ్వానంగా మారిందని పట్టణ ప్రజలు ఆవేదన వ్యక్తం చేస్తున్నారు. పుష్కరాలు పూర్తయ్యే వరకు ఇసుక రవాణా ను దారి మళ్లించాల్సిన అవసరం ఉందని పట్టణ ప్రజలు అంటున్నారు. ఈ విషయంపై జిల్లా అధికా రులు, ప్రజా ప్రతినిధులు దృష్టి సారించాలని కోరుతున్నారు.

ఆసిఫాబాద్‌అర్బన్‌: బంగారు ఆభరణాల కోసం వృద్ధురాలిని హత్య చేసిన ప్రధాన నిందితుడితో పాటు ఆభరణాలను విక్రయించేందుకు సహకరించిన మరో ఇద్దరిని అదుపులోకి తీసుకున్నట్లు ఎస్పీ నితిక పంత్‌ తెలిపారు. గురువారం విలేకరుల సమావేశంలో వివరాలు వెల్లడించారు. ఆగస్టు 30న ఆసిఫాబాద్‌ మండలంలోని బూరుగూడకు చెందిన మేకర్తి మల్లక్క (80) ఇంట్లోకి ప్రవేశించిన ధనుంజయ్‌ బండరాయితో తలపై కొట్టి హత్య చేశాడు. అనంతరం ఆమె ఒంటిపై ఉన్న బంగారు ఆభరణాలు తీసుకుని పరారయ్యాడు. ఈ నెల 21న వృద్ధురాలి ఇంట్లో నుంచి దుర్వాసన రావడంతో స్థానికులు వెళ్లి చూడగా మల్లక్క మృతి చెంది కనిపించింది. కుటుంబ సభ్యుల ఫిర్యాదు మేరకు పోలీసులు కేసు నమోదు చేసి దర్యాపు చేపట్టారు. ధనుంజయ్‌ దొంగలించిన బంగారాన్ని అమ్మేందుకు ప్రవీణ్‌ సహాయంతో మహేష్‌కు రూ.32వేలకు విక్రయించాడు. అందులో నుంచి ప్రవీణ్‌ రూ.3 వేలు కమీషన్‌ తీసుకున్నాడు. వచ్చిన డబ్బులతో దుబారా ఖర్చు పెడుతుండడంతో అనుమానం వచ్చిన పోలీసులు అతన్ని విచారించగా హత్య చేసినట్లుగా ఒప్పుకొన్నాడు. దీంతో ధనుంజయ్‌తో పాటు ప్రవీణ్‌, మహేష్‌పై కేసు నమోదు చేసి రిమాండ్‌కు తరలించినట్లు ఎస్పీ వెల్లడించారు.

జన్నారం: గత విద్యా సంవత్సరం ఎస్సెస్సీ ఫలితాల్లో 600 మార్కులకు గాను 582 మార్కులతో జిల్లా మొదటి ర్యాంకు సాధించిన మండలంలోని కిష్టాపూర్‌ ఉన్నత పాఠశాల పూర్వ విద్యార్థిని, రేండ్లగూడ గ్రామానికి చెందిన లసెట్టి శ్వేతకు రాష్ట్ర గవర్నర్‌ శివప్రతాప్‌ శుక్లా రూ.2 లక్షలతోపాటు ప్రశంసాపత్రం అందజేశారు. శ్రీరామ్‌ లైఫ్‌ ఇన్సూరెన్స్‌ కంపెనీ చేపట్టిన ‘చదువుకో తెలంగాణ‘ కార్యక్రమంలో భాగంగా శ్వేతను ఎంపిక చేసింది. గురువారం హైదరాబాద్‌లో జరిగిన కార్యక్రమంలో నగదు పురస్కారం, ప్రశంసాపత్రం అందజేశారు. విద్యార్థినిని జిల్లా విద్యాశాఖ అధికారి పి.చంద్రయ్య, మండల విద్యాధికారి బి.రాజేందర్‌, గ్రామ సర్పంచ్‌ వాసాల నరేష్‌, పాఠశాల ప్రధానోపాధ్యాయుడు గుండా రాజన్న, ఉపాధ్యాయుడు దాముక కమలాకర్‌ అభినందించారు.

దండేపల్లి: కుండపోత వర్షం.. గణపతి నిమజ్జనోత్సవంలో ఒక్కసారిగా చీకట్లు కమ్ముకున్నాయి. 33 కేవీ విద్యుత్‌ లైన్‌ బ్రేక్‌డౌన్‌ కావడంతో బుధవారం రాత్రి 8 గంటల సమయంలో దండేపల్లి మండలంలో విద్యుత్‌ సరఫరా నిలిచిపోయింది. లక్సెట్టిపేట ఏడీఈ బి.తిరుపతి తక్షణమే స్పందించారు. వర్షం, సమయాన్ని లెక్కచేయకుండా దండేపల్లి ఏఈ బాపు, జన్నారం సబ్‌ ఇంజనీర్లు, సిబ్బందిని అప్రమత్తం చేశారు. టార్చిలైట్ల వెలుగులోనే 33 కేవీలైన్‌ వెంట కిలోమీటర్ల మేర నడిచారు. అర్ధరాత్రి వేళ తనిఖీలు చేస్తూ బ్రేక్‌డౌన్‌కు కారణమైన లోపాన్ని గుర్తించారు. అర్ధరాత్రి 12 గంటల వరకు వర్షంలో తడుస్తూ శ్రమించి, సమస్యను సరిచేసి విద్యుత్‌ సరఫరా పునరుద్ధరించారు.

లక్సెట్టిపేట: మండల కేంద్రంలోని బస్టాండ్‌ వద్ద ఈ నెల 23న ఒకరిపై దాడికి పాల్పడిన ఏడుగురిని రిమాండ్‌కు తరలించినట్లు ఎస్సై గోపతి సురేష్‌ తెలిపారు. దండేపల్లి మండలం వెల్గనూర్‌కు చెందిన బండ సురేష్‌ రేషన్‌ బియ్యం, కలప అక్రమాలకు పాల్పడుతుండేవాడన్నారు. సంబంధిత అధికారులు పట్టుకున్నప్పుడు అదే గ్రామానికి చెందిన పర్సవేని అనిల్‌ సమాచారం ఇస్తున్నాడనే అనుమానం పెంచుకున్నాడు. ఈ క్రమంలో ఈ నెల 23న అనిల్‌, అతని స్నేహితులు వినయ్‌, విష్ణువర్దన్‌ పట్టణంలో పూజ వస్తువులు కొనుగోలు చేస్తున్నారనే సమాచారంతో సురేష్‌ అతని స్నేహితులు చందనగిరి నవీన్‌, చందనగిరి నరేష్‌, పెట్టెం సాయికుమార్‌, బండె అజయ్‌కుమార్‌, కుండారపు అభిలాష్‌, గంగుల కుమారస్వామితో కలిసి దాడికి పాల్పడ్డారు. పోలీసులకు ఫిర్యాదు చేయడంతో కే సు నమోదు చేశారు. ఏడుగురిని అదుపులోకి తీసుకుని వారి వద్ద నుంచి స్విప్ట్‌ డిజైర్‌ కారు, రెండు బైకులు రెండు ఇనుప రాడ్లు, రెండు కర్రలు, ఏడు సెల్‌ఫోన్‌లు స్వాధీనం చేసుకుని గురువారం రిమాండ్‌కు తరలించినట్లు పేర్కొన్నారు.

మంచిర్యాలఅర్బన్‌: ఉమ్మడి ఆదిలాబాద్‌ జిల్లాలో ఏక్‌పేడ్‌ మాకే నామ్‌ కార్యక్రమం అమలు మందకొడిగా సాగుతోంది. ఎల్‌నినో ప్రభావం, పర్యావరణ పరిరక్షణకు మొక్కలు విస్తృతంగా నాటేందుకు విద్యార్థులను భాగస్వాములను చేయాలని ప్రభుత్వం సంకల్పించింది. విద్యార్థి దశనుంచే పర్యావరణ పరిరక్షణపై ఆసక్తి పెంచేందుకు ప్రభుత్వం ఏక్‌పేడ్‌ మాకేనామ్‌ (అమ్మ పేరుతో మొక్క) కార్యక్రమానికి శ్రీకారం చుట్టింది. తెలంగాణ సమగ్ర శిక్షా విభాగం పరిధిలో మిషన్‌ లైప్‌–ఏకో క్లబ్స్‌ ద్వారా 3.0 పేరిట మొక్కలు నాటే కార్యక్రమం చేపట్టింది. సెప్టెంబర్‌ 23 వరకు పురోగతి సాధించకపోవడంతో మరో రెండు రోజులు గడువు పొడగించారు. ఉమ్మడి ఆదిలాబాద్‌ జిల్లాలో 4.32 లక్షల మొక్కలు నాటాలని లక్ష్యంగా నిర్దేశించగా 26,464 మొక్కలు మాత్రమే నాటారు. అధికారుల పర్యవేక్షణ లోపం, అవగాహన లోపంతో హరిత వేగం మందగించినట్లు తెలుస్తోంది. రాష్ట్రంలోనే ఆదిలాబాద్‌ జిల్లా చివరి స్థానం(33)లో నిలవడం నిరాశజనకంగా మారింది. పొడగించిన సమయం శుక్రవారంతో ముగియనుండటంతో నిర్దేశిత లక్ష్యం సాధించేందుకు అధికారులు నిమగ్నమయ్యారు. అమ్మపేరిట మొక్క నాటడం.. ప్రపంచ పర్యావరణ దినోత్సవం సందర్భంగా ప్రధాన మంత్రి నరేంద్రమోదీ 2024 జూన్‌ 25న తల్లి పేరు మీద మొక్కను నాటే కార్యక్రమానికి శ్రీకారం చుట్టారు. పర్యావరణ సమతుల్యతను కాపాడుతూ భూమిపై ఆకుపచ్చదనాన్ని పెంచటం, ప్రతి ఒక్కరూ తమ తల్లి పేరు మీద మొక్కను నాటడం కార్యక్రమ ఉద్దేశం. ఇందులో భాగంగా తెలంగాణ సమగ్ర శిక్షా విభాగం మిషన్‌లైప్‌–ఏకో క్లబ్స్‌ ద్వారా ఏక్‌పేడ్‌ మాకే నామ్‌ 3.0 పేరిట మొక్కలు నాటే కార్యక్రమానికి శ్రీకారం చుట్టింది. పాఠశాల ప్రధానోపాధ్యాయులు ఎంఈవో, సీఆర్‌పీలు, ఏకోక్లబ్‌ ఇన్‌చార్జీ ఉపాధ్యాయులు, ఐసీటీ ఇన్‌స్ట్రక్టర్లు, ఇతర సిబ్బందికి బాధ్యతలు కేటాయించారు. నాటిన మొక్కల వివరాలు జియోట్యాగ్‌ చేసిన ఫొ టోలను పోర్టల్‌లో అప్‌లోడ్‌ చేయాల్సి ఉన్నా పర్యవేక్షణ, ప్రచార లోపంతో వెనక‘బడి’ పోయింది. 14వ స్థానంలో మంచిర్యాల ఉమ్మడి ఆదిలాబాద్‌ జిల్లాలో రాష్ట్రంలోనే ఆదిలాబాద్‌ చివరి స్థానం (0.7శాాతం), మంచిర్యాల 14వ స్థానంలో ముందు వరుసలో నిలిచింది. ఆదిలాబాద్‌ జిల్లాలో 1,31,716 లక్ష్యం కాగా కేవలం 917 మొక్కలు మాత్రమే నాటారు. నిర్మల్‌లో 95.541 లక్ష్యానికి గానూ కేవలం 2,327 మొక్కలు నాటి (2.4శాతం) 32వ ర్యాంకు సాధించింది. కుమురంభీం ఆసిఫాబాద్‌లో 1,08,857 లక్ష్యం కాగా కేవలం 7,071 మొక్కలు నాటి (29 వర్యాంకు) 6.5శాతం ప్రగతితో అట్టడుగు స్థానాల్లో నిలిచింది. మంచిర్యాలలో 95,649 లక్ష్యానికి గానూ 16,149 మొక్కలు నాటి 14వస్థానంలో నిలిచింది. ఉమ్మడి జిల్లాలోనే మంచిర్యాల ముందు వరుసలో నిలవగా టాప్‌–10 జాబితాలోకి చేరుకునే అవకాశం ఉంటుందని అధికారులు ఆశాభావం వ్యక్తం చేశారు.

వాంకిడి: అనారోగ్య సమస్యలతో బాధపడుతున్న ఓ వృద్ధురాలు బావిలో దూకి ఆ త్మహత్య చేసుకున్న సంఘటన మండలంలో చోటు చేసుకుంది. ఎస్సై మహేందర్‌ తెలిపిన వివరాల ప్రకారం.. ఖమాన గ్రా మానికి చెందిన బండె మల్లక్క (75) కొంతకాలంగా బీపీ, షుగర్‌తో బాధపడుతోంది. ఇటీవల ఆమె కాలుకు గాయంకాగా షుగర్‌ కారణంగా ఎంతకు మానడం లేదు. ఆస్పత్రిలో చూపించగా కాలు తొలగించాల్సి వస్తుందని వైద్యులు సూచించారు. దీంతో ఆందోళనకు గురైన వృద్ధురాలు గురువారం తెల్లవారు జామున సవారీల బంగ్లా వద్ద ఉన్న బావిలో దూకి ఆత్మహత్య చేసుకుంది. మృతురాలి మనవరాలు ఇచ్చిన ఫిర్యా దు మేరకు కేసు నమోదు చేసినట్లు ఎస్సై తెలిపారు.

మందమర్రిరూరల్‌: కార్మికుల హక్కుల సాధనే ఏఐటీయూసీ లక్ష్యమని యూనియన్‌ అధ్యక్షుడు వాసిరెడ్డి సీతారామయ్య పేర్కొన్నారు. గురువారం ఏరియాలోని కేకే–5 గనిపై ఏర్పాటు చేసిన సమావేశంలో ఆయన మాట్లాడారు. సింగరేణి కార్మికుల 32 సమస్యల పరిష్కారానికి గత నెలలో యాజమాన్యానికి సమ్మె నోటీస్‌ జారీ చేసినట్లు తెలిపారు. ఆర్‌ఎల్‌సీ సమక్షంలో జరిగిన చర్చల్లో 23 సమస్యల పరిష్కారానికి యాజమాన్యం అంగీకరించిందన్నారు. ఇది కార్మిక విజయంగా ఆయన పేర్కొన్నారు. గత ప్రభుత్వ హయాంలో ఉన్న గుర్తింపు కార్మిక సంఘం కార్మిక హక్కులను పట్టించుకోలేదని ఆరోపించారు. అలాంటి సంఘం నాయకులు అవగాహన లేకుండా ఏఐటీయూసీపై ఆరోపణలు చేస్తున్నారని, వారికి కార్మిక వర్గం తగిన రీతిలో బుద్ది చెబుతుందన్నారు. సమావేశంలో ఆ యూనియన్‌ బ్రాంచ్‌ కార్యదర్శి సత్యనారాయణ, నాయకులు సుదర్శన్‌, శ్రీనివాస్‌, సంపత్‌, రాజేశం, సీవీ రమణ, తదితరులు పాల్గొన్నారు.

మంచిర్యాలక్రైం: గిరిజనుల అభివృద్ధితోనే అటవీ సంరక్షణ సాధ్యమని మంచిర్యాల కలెక్టర్‌ కుమార్‌ దీపక్‌ అన్నారు. గిరిజనుల సమస్యలు, పరిష్కారం, పోడు సమస్యపై అధికారులు ఎదుర్కొంటున్న ఇబ్బందులపై ఈ నెల 23న ఉమ్మడి ఆదిలాబాద్‌ జిల్లా కవ్వాల్‌ టైగర్‌ రిజర్వ్‌ ఫారెస్ట్‌ ఏరియాలో 20 ఎన్‌జీవోస్‌, వివిధ సంస్థల అధికారులు, అటవీ శాఖ అధికారులతో కలిసి క్షేత్రస్థాయిలో పరిశీలన చేశారు. అనంతరం గురువారం జిల్లా కేంద్రంలోని ధరణి కాన్ఫరెన్స్‌ హాల్‌లో ఉమ్మడి జిల్లా అటవీశాఖ అధికారులు, ఐటీడీఏ పీవో మంద మకరందు, ఎఫ్‌డీపీటీ శాంతారామ్‌తో కలిసి సమీక్ష నిర్వహించారు. కలెక్టర్‌ మాట్లాడుతూ అటవీ శాఖ, ఐటీడీఏ అధికారులు సమన్వయంతో కమిటీ ఏర్పాటు చేసి గిరిజనుల సమస్యలు పరిష్కరిస్తున్నట్లు తెలిపారు. పీఓ మాట్లాడుతూ అటవీ సంరక్షణలో గిరిజనుల భాగస్వామ్యం, ప్రభుత్వ పథకాల అమలుపై వివరించారు. ఎన్‌జీఓస్‌ నాయకులు మాట్లాడుతూ గిరిజనుల సమస్యల పరిష్కారంలో ప్రభుత్వం విఫ లమవుతున్న తీరు, అటవీ అధికారుల నిర్లక్ష్యం తది తర అంశాలను క్షుణ్ణంగా వివరించారు. డీఎఫ్‌ఓలు రాహుల్‌ కిషన్‌ జాదవ్‌, బాలామణి, సుషాంత్‌ సుఖ్‌దేవ్‌ బొడాడే, తదితరులు పాల్గొన్నారు.

గోదావరిఖని: సింగరేణి రెస్క్యూపోటీల్లో ఓవరాల్‌ చాంపియన్‌గా ఆర్జీ–2,3, ఏపీఏ జట్టు నిలిచింది. గురువారంతో సింగరేణి మైన్స్‌రెస్క్యూ పోటీలు ముగిసాయి. పోటీల్లో ఓవరాల్‌ ఫస్ట్‌ ఉమెన్‌ జట్టుగా స్మార్ట్‌ ఏ జట్టు నిలవగా మెటల్‌ టీంలో ఓవరాల్‌ ఫస్ట్‌గా యూరేనియం కార్పొరేషన్‌ జట్టు, ఓవరాల్‌ రెండో స్థానంలో ఆర్జీ–1, ఓవరాల్‌ మూడో స్థానంలో శ్రీరాంపూర్‌ జట్లు నిలిచాయి. బెస్ట్‌ ఉమెన్‌ కెప్టెన్‌గా మౌనిక, బెస్ట్‌ మెటల్‌ కెప్టెన్‌గా భాస్కర్‌, ఫస్ట్‌ బెస్ట్‌ కెప్టెన్‌గా జి.ప్రమోద్‌కుమార్‌ ఎంపికయ్యారు. రెండో ఫస్ట్‌ కెప్టెన్‌గా సాంబ నిలిచారు. వీటితో బెస్ట్‌ స్టాట్యుటరీ, థియరీ, ఫస్ట్‌ఎయిడ్‌, రెస్యూ అండ్‌ రికవరీ, బెస్ట్‌ మెంబర్లను ప్రకటించారు. విజేతలకు డిప్యూటీ డైరెక్టర్‌ మైన్స్‌ సేఫ్టీ టీఆర్‌ కన్నన్‌, సింగరేణి డైరెక్టర్‌ వెంకటేశ్వర్లు బహుమతులు అందజేశారు. పోటీల ముగింపు సందర్భంగా నిర్వహించిన చిన్నారుల నృత్యాలు ఆకట్టుకున్నాయి. మంథని జేఎన్‌టీయూ కళాశాల విద్యార్థులు పాల్గొన్నారు.

ఆసిఫాబాద్‌క్రైమ్‌: చైన్నె– న్యూఢిల్లీ ప్రధాన రైల్వే మార్గంలోని కాగజ్‌నగర్‌– బల్లార్షా మధ్యలోని రైల్వే స్టేషన్ల కేంద్రంగా అక్రమ వ్యాపారాలు ఊపందుకున్నాయి. రైల్వే శాఖ నిబంధనలకు విరుద్ధంగా కొందరు నిషేధిత వస్తువులు విక్రయిస్తూ సొమ్ము చేసుకుంటున్నారు. తెలంగాణ– మహారాష్ట్ర సరిహద్దుకు ఆనుకుని అటు వైపు బల్లార్షా జంక్షన్‌ రైల్వే స్టేషన్‌ (మహారాష్ట్ర) ఉండగా, ఇటు వైపు కాగజ్‌నగర్‌ రైల్వే స్టేషన్‌ (తెలంగాణ) ఉంది. ఈ రూట్‌లో నడిచే దాదాపు అన్ని రైళ్లకు ఈ రెండు స్టేషన్లలో హాల్ట్‌ ఉంటుంది. బల్లార్షా నుంచి వెళ్లే ఎక్కువ శాతం రైళ్లు నేరుగా కాగజ్‌నగర్‌ రైల్వే స్టేషన్‌లో ఆగుతుండగా, కాగజ్‌నగర్‌ రైల్వే స్టేషన్‌ నుంచి బయలుదేరే ప్రతీ రైలు నేరుగా బల్లార్షా జంక్షన్‌ వద్ద ఆగుతోంది. బల్లార్షాకు చెందిన కొందరు ఒక టీంగా ఏర్పడి ప్రతీ ప్యాసింజర్‌లో అనుమతి లేని తినుబండారాలు, నిషేధిత పొగాకు ఉత్పత్తులను విక్రయిస్తున్నారు. ఇందుకు సొంతంగా తమ మనుషులను నియమించుకుని అక్రమ వ్యాపారాలు సాగిస్తున్నారు. చోరీలకు ఆస్కారంబల్లార్షా కేంద్రంగా సాగుతున్న ఈ అక్రమ వ్యాపారం కారణంగా రైళ్లలో చోరీలు సైతం పెరిగే అవకాశం ఉంది. కాగజ్‌నగర్‌, బెల్లంపల్లి, మంచిర్యాల, రామగుండం వంటి ముఖ్య స్టేషన్ల పరిధిలో చోరీ కేసులు అధికంగా నమోదవుతున్నాయి. అనుమతి లేని వస్తువులు, తిను బండారాలు అమ్ముతున్న వెండర్ల(విక్రయదారులు) వద్ద గుర్తింపు కార్డులు లేకపోవడం, ఒక ట్రావెల్‌ బ్యాగ్‌ భుజాన వేసుకుని విక్రయాలు జరుపుతున్న వారి గుర్తింపు సైతం ఎవరికీ తెలియదు. ఇదే ముసుగులో కొందరు చోరీలకు సైతం పాల్పడుతున్నట్లు ఫిర్యాదులు ఉన్నాయి. రైల్వే శాఖ ఉన్నతాధికారులు ఇప్పటికై నా జోక్యం చేసుకుని.. తనిఖీలు నిర్వహించాలని, అక్రమ వ్యాపారాలపై చర్యలు తీసుకోవాలని ప్రయాణికులు కోరుతున్నారు.జోరుగా అమ్మకాలుకాగజ్‌నగర్‌కు చెందిన ఓ వ్యక్తి బల్లార్షాకు చెందిన టీంతో సంబంధాలు పెట్టుకుని అక్రమ వ్యాపారాల్లో పాలుపంచుకుంటున్నట్లు తెలు స్తోంది. ప్రతీ రైలులో గుట్కా, ఖైనీ, సిగరేట్‌, బీడీలు వంటి నిషేధిత ఉత్పతులతో పాటు రైల్వే శాఖ అనుమతి లేని నాణ్యత లోపించిన తిను బండారాలను సైతం విక్రయిస్తున్నారు. దాదాపు అన్ని ట్రైన్లలో వ్యసనపరులకు సులభంగా నిషేధిత పొగాకు ఉత్పత్తులు అందుబాటులో ఉంచుతున్నారు. కాజీపేట్‌ నుంచి బల్లార్షా వైపు వయా కాగజ్‌నగర్‌ మీదుగా వెళ్లే ఎక్కువశాతం ఎక్స్‌ప్రెస్‌, సూపర్‌ ఫాస్ట్‌ ఎక్స్‌ప్రెస్‌ రైళ్లలోని జనరల్‌ బోగీలు ప్రయాణికులతో కిక్కిరిసి ఉంటాయి. ముఖ్యంగా ఉత్తరాది రాష్ట్రాలకు వెళ్లే రైళ్లల్లోని జనరల్‌ బోగీల్లో అసలు కాలు పెట్టే స్థలం కూడా ఉండదు. ఇలాంటి చోట వ్యసనపరులు గుట్కా ఉమ్మివేయడం, బీడీ, సిగరేట్‌లు తాగుతుండటంతో ప్రయాణికుల ఇబ్బంది పడటంతోపాటు బోగీలు అపరిశుభ్రంగా మారుతున్నాయి.

జైపూర్‌: ఇందారం ఐకే ఓపెన్‌కాస్టును గురువారం సింగరేణి డైరెక్టర్‌ (పీపీ) కె.వెంకటేశ్వర్లు సందర్శించారు. ఈ సందర్భంగా శ్రీరాంపూర్‌ జీఎం మునిగంటి శ్రీనివాస్‌తో కలిసి గని అధికారులతో ఉత్పత్తి, ఉత్పాదకతపై సమీక్షించారు. అనంతరం గనిలోని పనులను పరిశీలించారు. వర్షాలు, కాంట్రాక్టు సమస్యలతో వెనుకబడిన ఉత్పత్తిని ప్రణాళికాబద్ధంగా సాధించాలని ఆదేశించారు. ఈ ఆర్థిక సంవత్సరం లక్ష్యం 15 లక్షల టన్నుల ఉత్పత్తిని అధిగమించాలన్నారు. ఈ కార్యక్రమంలో ప్రాజెక్టు అధికారి ఏవీ.రెడ్డి, ఇంజనీర్‌ రామకృష్ణ, ఇతర అధికారులు పాల్గొన్నారు.

జైపూర్‌/జ్యోతినగర్‌: మంచిర్యాల జిల్లా ఇందారం అటవీశాఖ చెక్‌పోస్ట్‌ సమీపంలో రాజీవ్‌ రహదారిపై గురువారం రాత్రి జరిగిన రోడ్డు ప్రమాదంలో పెద్దపల్లి జిల్లా గోదావరిఖనిలోని ఎన్టీపీసీ కృష్ణానగర్‌కు చెందిన అనురాధ త్రివేది (62) మృతి చెందినట్లు ఎస్సై భూమేశ్‌ తెలిపారు. ఎన్టీపీసీకి చెందిన అనురాధ ఆమె భర్త రామ్‌ప్రసాద్‌తో కలిసి ద్విచక్ర వాహనంపై గోదావరిఖని నుంచి మంచిర్యాల వైపు వెళ్తుండగా లారీ ఢీకొనడంతో ప్రమాదం జరిగినట్లు సమాచారం. తీవ్ర గాయాలపాలైన అనురాధ త్రివేది ప్రమాద స్థలంలోనే మృతి చెందింది. ఆమె భర్త వేణుగోపాల్‌ త్రివేది ఎన్టీపీసీ కృష్ణానగర్‌లో నివాసం ఉంటూ లయన్స్‌ క్లబ్‌లో ప్రముఖుడిగా కొనసాగుతున్నారు. కేసు నమోదు చేసుకుని దర్యాప్తు జరుపుతున్నట్లు ఎస్సై తెలిపారు.

జైపూర్‌: సీఎం రేవంత్‌రెడ్డి అసమర్థతతో రాష్ట్రంలో రైతులు, ప్రజలు, పరిశ్రమలకు కరెంటు కష్టాలు దాపురించాయని, కేసీఆర్‌ సీఎంగా ఉన్నప్పుడు ఉన్న కరెంటు కాంగ్రెస్‌ ప్రభుత్వం రాగానే మాయమైందని బీఆర్‌ఎస్‌ పార్టీ జిల్లా అధ్యక్షుడు, మాజీ విప్‌ బాల్క సుమన్‌, మాజీ మంత్రి జోగు రామన్న, ఎమ్మెల్యేలు కోవ లక్ష్మి, అనిల్‌ జాదవ్‌ విమర్శించా రు. బీఆర్‌ఎస్‌ పార్టీ పిలుపు మేరకు కరెంటు సమస్యలపై క్షేత్రస్థాయి పరిశీలనలో భాగంగా గురువారం ఆ పార్టీ నాయకుల బృందం జైపూర్‌లోని సింగరేణి థర్మల్‌ పవర్‌ప్లాంటు(ఎస్టీపీపీ)లో పర్యటించింది. పార్టీ శ్రేణులు భారీగా ప్లాంటు ప్రధాన గేటు వద్దకు చేరుకోగా పోలీసులు అడ్డుకున్నారు. ఎస్టీపీపీ అధికారుల సూచనల మేరకు బాల్క సుమ న్‌, జోగు రామన్న, ఎమ్మెల్యేలు కోవ లక్ష్మి, అనిల్‌జాదవ్‌, మాజీ ఎమ్మెల్యేలు దుర్గం చిన్నయ్య, కోనే రు కోనప్ప, నాయకులు జాన్సన్‌ నాయక్‌, కౌశికహరిలను ప్లాంటులోకి అనుమతించారు. బస్సులో అడ్మిన్‌ భవన్‌లో విద్యుత్‌ ఉత్పత్తి, బొగ్గు నిల్వలపై ఎస్టీపీపీ ఈడీ చిరంజీవితో మాట్లాడారు. యూనిట్‌–1లో 330 మెగావాట్ల విద్యుత్‌ ఉత్పత్తి చేస్తుండగా యూనిట్‌–2 షట్‌డౌన్‌లో ఉన్నట్లు తెలిపారు. బొగ్గు నిల్వలు, విద్యుత్‌ ఉత్పత్తి సామర్థ్యాల పరిశీలనకు అనుమతించాలని నాయకులు కోరగా.. అధికారులు నిరాకరించారు. అనంతరం ఎస్టీపీపీ ప్రధాన గేటు వద్ద బీఆర్‌ఎస్‌ నాయకులు విలేకరులతో మాట్లాడారు. రైతాంగానికి కనీసం రోజుకు మూడు గంటలు కరెంటు ఇవ్వడం లేదని విమర్శించారు. సింగరేణి సంస్థకు జెన్‌కో రూ.53వేల కోట్లు బకా యిలు చెల్లించాల్సి ఉండగా బొగ్గు రవాణా నిలిపి వేయడంతో ఉత్పత్తి తగ్గి కరెంటు కొరత నెలకొందని తెలిపారు. రైతులకు పంట పెట్టుబడి సాయం, సమయానికి ఎరువులు, విత్తనాలు అందించకుండా ప్రభుత్వం రైతులు ఉసురుపోసుకుంటోందని విమర్శించారు. ఎస్టీపీపీలో 1200మెగావాట్ల విద్యుత్‌ ఉత్పత్తి చేయాల్సి ఉండగా 330మెగావాట్లు మాత్రమే ఉత్పత్తి చేస్తున్నారని తెలిపారు. సింగరేణి స్వంత ప్లాంటుకు సైతం బొగ్గు రవాణా జరగడం లేదని ఆరోపించారు. మాజీ విప్‌ బాల్క సుమన్‌ మాట్లాడుతూ రాష్ట్ర మంత్రి వివేక్‌వెంకటస్వామిపై తీవ్ర స్థాయిలో ధ్వజమెత్తారు. ఒక్క మూడు గంటలు కరెంట్‌ లేకుండా ఉంటారా అని ప్రశ్నించారు. పదవులు రాగానే ప్రజలను మర్చిపోతారని విమర్శించారు. చెన్నూర్‌ నియోజకవర్గం, ఉమ్మడి ఆదిలాబాద్‌ జిల్లాలో ఏ గ్రామానికై నా పోలీసులు, కాంగ్రెస్‌ కార్యకర్తలు లేకుండా వెళ్లే దమ్ముందా అని ప్రశ్నించారు. ఏ గ్రామంలోనైనా 24గంటల కరెంట్‌ కాంగ్రెస్‌ ప్రభుత్వం ఇస్తుందని ఏ ఒక్క రైతు చెప్పినా తాను ఈ ప్రాంతంలోనే ఉండనని, రాజకీయ సన్యాసం తీసుకుంటానని సవాల్‌ విసిరారు. పోలీసుల భారీ బందోబస్తు జైపూర్‌లో ఓ వైపు రాష్ట్ర కార్మిక శాఖ మంత్రి గడ్డం వివేక్‌ అభివృద్ధి కార్యక్రమాల పర్యటన ఉండగా.. మరోవైపు బీఆర్‌ఎస్‌ పర్యటనతో ఉద్రిక్త వాతావరణం ఏర్పడింది. డీసీపీ భాస్కర్‌, ఏసీపీ వెంకటేశ్వర్‌, సీఐలు నవీన్‌కుమార్‌, రమేశ్‌, ఎస్సైలు భారీ బందోబస్తు ఏర్పాటు చేశారు.

ఒకప్పుడు కూతురు భారం అనుకునేవారు..! తరం మారుతున్న కొద్దీ కుమారుల కంటే కూతురేం తక్కువ కాదని తల్లిదండ్రులు ఘంటాపథంగా చెబుతున్నారు. కూతుళ్లు ఏ రంగం ఎంచు కున్నా సరే విజయపథంలో దూసుకెళ్తూ తల్లిదండ్రులకు పేరు తెస్తున్న వారెందరో ఉన్నారు. ఏ చిన్న అవకాశం దొరికినా ఇదీ మా కూతురు గొప్పదనం అంటూ ఉదాహరణలెన్నో చెబుతారు. ఆ గొప్పదనం మరింత మందితో పంచుకునేలా సాక్షి దినపత్రిక అవకాశం కల్పిస్తోంది. కూతురు గొప్పదనం గురించి నాలుగు వాక్యాలు శనివారం సాయంత్రం 4గంటల వరకు మా వాట్సప్‌ నంబర్‌కు పంపించండి. ఈ నెల 27న కూతుళ్ల దినోత్సవం సందర్భంగా ‘సాక్షి’లో ప్రచురిస్తాం. మీ కూతురుతో దిగిన సెల్ఫీ ఫొటో పంపించడం మర్చిపోవద్దు. పేర్లు, ఊరు, మండలం వివరాలు ఉండాలి.90100 57302

మంచిర్యాలరూరల్‌(హాజీపూర్‌): హాజీపూర్‌ మండలంలోని ర్యాలీ గ్రామ పంచాయతీ పరిధి కొలాంగూడ గిరిజన తండాలో ప్రారంభించిన హెల్త్‌సెంటర్‌లో గిరిజనులకు వైద్యసేవలు అందుబాటులో ఉంటాయని జిల్లా వైద్యారోగ్యశాఖ అదికారి నరేందర్‌రాథోడ్‌ అన్నారు. గురువారం ఆయన ఐటీడీఏ ఆధ్వర్యంలో ప్రధానమంత్రి జనజాతి ఆదివాసీ న్యాయ మహా అభియాన్‌ పథకం కింద నిర్మించిన మల్టీపర్పస్‌ భవన సముదాయంలో హెల్త్‌సెంటర్‌ను ప్రారంభించారు. హాజీపూర్‌ పీహెచ్‌సీ నిర్వహించిన వైద్య శిబిరంలో గిరిజనులకు వైద్య పరీక్షలు చేసి మందులు అందజేశారు. గఢ్‌పూర్‌ గ్రామ పంచాయతీలోని ఆయుష్మాన్‌ ఆరోగ్యమందిర్‌ నుంచి సందర్శించి వైద్య సిబ్బందికి సూచనలు చేశారు. హాజీపూర్‌ పీహెచ్‌సీ వైద్యాధికారి లహరి, జిల్లా ప్రోగ్రాం అధికారి డాక్టర్‌ సుధాకర్‌నాయక్‌, పీఎం జన్మన్‌ వైద్యాధికారి డాక్టర్‌ ఆదిత్యబాబు, హెల్త్‌ ఎడ్యుకేటర్‌ అల్లాడి శ్రీనివాస్‌, కమ్యూనిటీ హెల్త్‌ అధికారి గుండేటి నాందేవ్‌ పాల్గొన్నారు.

● ప్రజలను మోసం చేస్తున్న బీఆర్‌ఎస్‌ ● రాష్ట్ర కార్మిక శాఖ మంత్రి వివేక్‌వెంకటస్వామి జైపూర్‌: చెన్నూర్‌ నియోజకవర్గంలో విద్యాభివృద్ధికి పెట్టపీట వేస్తూ వసతిగృహాలు, తరగతి గదులు, కళాశాల భవనాలు నిర్మిస్తున్నట్లు రాష్ట్ర కార్మిక శాఖ మంత్రి గడ్డం వివేక్‌వెంకటస్వామి తెలిపారు. మండల కేంద్రంలో రూ.1.81కోట్లతో ఎస్సీ సంక్షేమ వసతిగృహ భవనానికి గురువారం జిల్లా కలెక్టర్‌ కుమార్‌ దీపక్‌తో కలిసి భూమి పూజ చేశారు. ఈ సందర్భంగా మంత్రి మాట్లాడుతూ సోమనపల్లిలో రూ.200కోట్లతో 2,500మంది విద్యార్థులకు యంగ్‌ ఇండియా ఇంటిగ్రేటెడ్‌ రెసిడెన్షియల్‌ పాఠశాల నిర్మించనున్నట్లు తెలిపారు. చెన్నూర్‌లో నిర్మించిన 100పడకల ఆస్పత్రి ప్రజలకు చాలా ఉపయోగకరంగా మారుతుందన్నారు. బీఆర్‌ఎస్‌ పార్టీ నాయకులు డైవర్షన్‌ పాలిటిక్స్‌ చేస్తూ ప్రజలను మోసం చేయడానికి ప్రయత్నం చేస్తున్నారని విమర్శించా రు. ఈ కార్యక్రమంలో మంచిర్యాల డీసీపీ భాస్కర్‌, జైపూర్‌ ఏసీపీ వెంకటేశ్వర్‌, సర్పంచ్‌ కూన భాస్కర్‌, డీసీసీ ఉపాధ్యక్షుడు రిక్కుల శ్రీనివాస్‌రెడ్డి, మండల అధ్యక్షుడు చల్ల విశ్వంభర్‌రెడ్డి పాల్గొన్నారు. మందమర్రిలో 50 పడకల ఆసుపత్రి మందమర్రిరూరల్‌: మందమర్రి పట్టణంలో 50 పడకల ఆసుపత్రి, నిరుపేదలకు ఇందిరమ్మ ఇళ్లు ఏర్పాటు శుభవార్త త్వరలోనే చెబుతానని మంత్రి వివేక్‌వెంకటస్వామి అన్నారు. ఆసుపత్రి, ఇందిరమ్మ ఇళ్ల ఏర్పాటు కోసం సీఎండీతో చర్చించగా అంగీకరించినట్లు తెలిపారు. సింగరేణికి కేటాయించిన భూమిలో 25 ఎకరాలు ప్రభుత్వానికి ఇస్తే ఇందిరమ్మ ఇళ్ల నిర్మాణానికి అవకాశం ఉంటుందని తెలిపారు. గురువారం మార్కెట్‌లోని వినాయకుడి వద్ద లడ్డు వేలం పాట, పట్టణంలోని మండపాల్లో సన్మాన కార్యక్రమానికి ఏరియా జీఎం రాధాకృష్ణతో కలిసి హాజరయ్యారు. లడ్డును వెంకటేశం అనే వ్యక్తి రూ.లక్షా 116కు వేలంలో దక్కించుకున్నాడు. జాతీయస్థాయి సాఫ్ట్‌బాల్‌ పోటీలకు ఎంపిక బెల్లంపల్లి: బెల్లంపల్లి ప్రభుత్వ సాంఘిక సంక్షేమ బాలుర గురుకుల సీవోఈ పాఠశాల విద్యార్థి జాతీ య స్థాయి సాఫ్ట్‌బాల్‌ పోటీలకు ఎంపికయ్యాడు. తొమ్మిదో తరగతి విద్యార్థి గజ్జల సుశాంత్‌ బెల్లంపల్లిలోని తిలక్‌స్టేడియంలో ఈ నెల 11, 12న నిర్వహించిన 11వ రాష్ట్రస్థాయి సబ్‌ జూనియర్‌ సాఫ్ట్‌బాల్‌ పోటీల్లో సత్తాచాటాడు. మహారాష్ట్ర రాష్ట్రంలోని ఔరంగాబాద్‌లో ఈ నెల 25 నుంచి 27 వరకు జరిగే పోటీల్లో పాల్గొంటాడు. గురువారం ఏర్పాటు చేసిన కార్యక్రమంలో అసోసియేషన్‌ జిల్లా అధ్యక్ష, కార్యదర్శులు పోశన్న, కిరణ్‌, ప్రిన్సిపాల్‌ ఆకిడి విజయ్‌సాగర్‌ విద్యార్థిని అభినందించారు.

బెల్లంపల్లి: అసెంబ్లీ నియోజకవర్గ కేంద్రం.. 34 వార్డులు.. 56 వేలకు పైగా జనాభా కలిగి ఉన్న బెల్లంపల్లి మున్సిపాలిటీలో ద్విచక్ర వాహనాలకు కనీసం పార్కింగ్‌ స్థలం కూడా లేక వాహన దారులు తీవ్ర ఇబ్బందులు పడుతున్నారు. మున్సిపాలిటీ ఏర్పడి 39 ఏళ్లు కావస్తున్నా నేటికీ పార్కింగ్‌ సమస్య పరిష్కారానికి నోచుకోవడం లేదు. ఏళ్లు గడుస్తున్నా, ఎంతోమంది అధికారులు, ప్రజా ప్రతి నిధులు మారుతున్నా సమస్య మాత్రం పరిష్కారం కాకుండా అలాగే ఉండిపోతోంది. రోడ్డే పార్కింగ్‌ స్థలం.. చుట్టుపక్కల మండలాల నుంచి బెల్లంపల్లికి ప్రతీరోజు వేలాదిమంది రాకపోకలు సాగిస్తారు. తాండూర్‌, కాసిపేట, భీమిని, కన్నెపల్లి, నెన్నెల, వేమనపల్లి, కుమురం భీం ఆసిఫాబాద్‌ జిల్లా దహెగాం, తిర్యాణి, రెబ్బెన, బెల్లంపల్లి గ్రామీణ ప్రాంతాల నుంచి వందలాది మంది రోజువారీ పనులు, షాపింగ్‌, ఆసుపత్రులు, మార్కెట్‌ కోసం, ప్రభుత్వ కార్యాలయాల్లో పనుల కోసం బెల్లంపల్లికి రాకపోకలు సాగిస్తుంటారు. వీరితో పాటు బెల్లంపల్లి పుర ప్రజలకు బజారు ఏరియా ప్రాంతం ఎంతో ముఖ్యమైనది. గ్రామీణ ప్రాంతాలు, పుర ప్రజల వాహనాలతో బజారు ఏరియా, బీఆర్‌ అంబేడ్కర్‌ (కాంటా) చౌరస్తా, పాత బస్టాండ్‌ ఏరియా ఎప్పుడూ రద్దీగా ఉంటుంది. ద్విచక్ర వాహనాలకు ప్రత్యేకంగా పార్కింగ్‌ స్థలాలు లేకపోవడంతో రోడ్డు మీదనే బైక్‌లను పార్కింగ్‌ చేయడం ఏళ్ల తరబడి నుంచి ఆనవాయితీగా వస్తోంది. రోడ్డుమీద, ఫుట్‌పాత్‌పై బైక్‌లు పార్కింగ్‌ చేయడంతో ట్రాఫిక్‌ సమస్యలు ఏర్పడుతున్నాయి. రోడ్డు మీదకొచ్చిన వ్యాపారం ... కాంటా చౌరస్తా కల్వర్టు వద్ద నుంచి పాతబస్టాండ్‌ చౌరస్తా వరకు రోడ్డుకు ఇరువైపులా షాపులు ఉన్నాయి. నిబంధనల ప్రకారం షాపులన్నీ మురుగునీటి కాలువ అవతలి వైపు ఉండాల్సి ఉండగా షాపుల నిర్వాహకులు కాలువ దాటి రోడ్డు వరకు షాపులను విస్తరించారు. మరికొందరు షాపుల ముందున్న ఖాళీ స్థలాన్ని ఫుట్‌పాత్‌ వ్యాపారులకు అద్దెకు ఇచ్చి ఎంచక్కా సొమ్ము చేసుకుంటున్నారు. పోలీసుల చలాన్లు.. రోడ్డు మీద, ఫుట్‌పాత్‌పై పార్కింగ్‌ చేసిన ద్విచక్ర వాహనాలకు పోలీసులు చలాన్లు విధిస్తున్నారు. పార్కింగ్‌ చేసిన బైక్‌ ఫోటో తీసి వాహనదారుడికి ఆన్‌లైన్‌లో సమాచారం పంపించడం సర్వసాధారణంగా మారింది. బజారు ఏరియాలో పార్కింగ్‌ స్థలం ఏర్పాటు చేస్తే మేమెందుకు రోడ్డుమీద, ఫుట్‌పాత్‌పై బైక్‌ పార్కింగ్‌ చేస్తామని వాహనదారులు అంటున్నారు. పార్కింగ్‌ స్థలాల ఏర్పాటు విషయంలో మౌనం వహిస్తున్న అధికారులు ఫైన్‌ విధించడానికి ఎగబడి బైక్‌ల ఫొటోలు తీయించడం ఎంతవరకు సమంజసమని ప్రశ్నిస్తున్నారు.పరిష్కారం ఏమిటి? మున్సిపాలిటీలో పార్కింగ్‌ సమస్య తీర్చడానికి పాలకవర్గం, మున్సిపల్‌ అధికారులు ప్రత్యేక శ్రద్ధ చూపాలి. బజారు ఏరియాలో అన్ని వాణిజ్య సముదాయాల వద్ద తప్పనిసరిగా పార్కింగ్‌ స్థలం ఉండేలా చర్యలు తీసుకోవాలి. కాంటా చౌరస్తా, పాత బస్టాండ్‌ ఏరియాలో రోడ్డు మీదకు విస్తరించిన షాపులను తొలగించి ఆస్థానంలో పార్కింగ్‌ స్థలం ఏర్పాటు చేయాలి. ఈ విషయమై మున్సిపల్‌ కమిషనర్‌ తన్నీరు రమేశ్‌ను ‘సాక్షి’ ఫోన్‌లో సంప్రదించగా స్పందించలేదు.

మంచిర్యాలఅగ్రికల్చర్‌: వానాకాలం వరి ధాన్యం సేకరణకు ప్రభుత్వం ఏర్పాట్లు చేస్తోంది. ఈ సీజన్‌లో ధాన్యం మిల్లర్లకు ఇవ్వరాదని నిర్ణయించింది. ధాన్యం నిల్వకు ప్రభుత్వ, ప్రైవేటు గోదాములు, ఇతర ఫంక్షన్‌హాళ్లు ఎంపిక చేయాలని అధికారులకు ఆదేశాలు అందాయి. దీంతో జిల్లా అదనపు కలెక్టర్‌ రాములు అధికారులతో సమీక్షించి గోదాములు, ఇతర స్థలాలు గుర్తించాలని తహసీల్దార్లను ఆదేశించారు. జిల్లాలో 1.40లక్షల మెట్రిక్‌ టన్నుల నుంచి 1.70లక్షల మెట్రిక్‌ టన్నుల ధాన్యం కొనుగోలు కేంద్రాలకు వస్తుందని అంచనా వేస్తున్నారు. ఇప్పటివరకు 40వేల మెట్రిక్‌ టన్నుల వరకు నిల్వ చేసేందుకు గోదాములు అందుబాటులో ఉన్నట్లు గుర్తించారు. ధాన్యం సేకరణకు అనుగుణంగా నిల్వ చేసేందుకు అనువైన ప్రభుత్వ, ప్రైవేటు గోదాములు, ఫంక్షన్‌హాళ్లు, ఇతరత్రా స్థలాలు గుర్తించే పనిలో పౌరసరఫరాల శాఖ అధికారులు ఉన్నారు. నిల్వలకు స్థలాలను ఎంపిక చేసి యాప్‌లో నమోదు చేయనున్నారు. రబీలో మార్క్‌ఫెడ్‌ రైతుల నుంచి మొక్కజొన్న కొనుగోలు చేసి గోదాముల్లో నిల్వ చేసింది. నెల రోజుల్లోనే వాటిని తీసేసి ఆ గోదాముల్లో ధాన్యం నిల్వకు ఏర్పాట్లు చేయనున్నారు. సొమ్ము చేసుకుంటున్న మిల్లర్లు గత కొన్నేళ్లుగా ఖరీఫ్‌, రబీ సీజన్లలో రైతులు పండించిన ధాన్యాన్ని ప్రభుత్వం మద్దతు ధరకు కొనుగోలు చేసి మిల్లర్లకు అప్పగిస్తోంది. పౌరసరఫరాల సంస్థ రూ.వేల కోట్లు అప్పులు చేసి ఏటా వడ్డీ చెల్లిస్తోంది. సేకరించిన లక్షల టన్నుల ధాన్యాన్ని కస్టమ్‌ మిల్లింగ్‌(సీఎంఆర్‌) కింద రైస్‌మిల్లర్లకు నయాపైసా పెట్టుబడి లేకుండా అప్పగిస్తోంది. మరాడించి బియ్యాన్ని సంస్థకు సకాలంలో అప్పగించకుండా మిల్లర్లు దర్జాగా వ్యాపారం చేస్తూ రూ.కోట్లు ఆర్జిస్తున్నారు. అధికారుల పర్యవేక్షణ లోపించి, గడువు మీద గడువు ఇస్తూ వెళ్లడంతో వ్యాపారులు ఇష్టారాజ్యంగా వ్యవహరిస్తూ ధాన్యం పక్కదారి పట్టించారు. జిల్లాలో 67 రా రైస్‌, బాయి ల్డ్‌ రైస్‌మిల్లులు ఉండగా.. ధాన్యం కేటాయించి తిరిగి ఇవ్వని 23 మిల్లులపై కేసులు నమోదు చేశా రు. మరికొన్నింటిని డిఫాల్ట్‌ జాబితాలో చేర్చారు. గత కొన్ని సీజన్లకు సంబంధించిన ధాన్యం రూ.కో ట్లు బకాయిలు పెండింగ్‌ ఉన్నాయి. పలుమార్లు గడువు పొడిగించినా, బ్లాక్‌లిస్టులో పెట్టినా, నోటీసులు జారీ చేస్తున్నా, జరిమానా విధిస్తున్నా మిల్ల ర్లు మారడం లేదు. ఏవేవో కారణాలు చూపిస్తూ రెండు మూడు సీజన్లు దాటినా ధాన్యానికి సంబంధించిన బియ్యం వెనక్కి ఇవ్వడం లేదు. కొందరు మిల్లర్లు నేరుగా విక్రయించుకోగా, మరికొందరు మరాడించి బియ్యాన్ని ఇతర రాష్ట్రాలకు తరలించి సొమ్ము చేసుకున్నారనే ఆరోపణలున్నాయి. ఇలా ఒక్కో రైస్‌మిల్లు నుంచి వేలాది క్వింటాళ్ల ధాన్యం మాయం చేస్తూ ఆ లోటును భర్తీ చేసేందుకు రేషన్‌ బియ్యాన్ని కొనుగోలు చేసి రీసైక్లింగ్‌ చేసి సీఎంఆర్‌ కింద ఇస్తున్నట్లు తెలుస్తోంది. మిల్లర్లు బియ్యాన్ని ఎఫ్‌సీఐ, పౌరసరఫరాల శాఖకు అప్పగించే వ్యవహారంలో అనేక అక్రమాలు చోటు చేసుకుంటున్నాయి. మిల్లర్లు పెద్దయెత్తున ధాన్యం పక్కదారి పట్టించి ఆర్జిస్తున్నారని, ప్రభుత్వానికి వాయిదాల పద్ధతిలో కొంత చెల్లిస్తున్నారనే ఆరపణలున్నాయి. ఇటీవల మిల్లుల్లో విజిలెన్స్‌, ఎన్‌ఫోర్స్‌మెంట్‌ అధికారుల తనిఖీలతో లోపాలు బహిర్గతం అయ్యా యి. ఈసారి ధాన్యాన్ని మిల్లర్లకు ఇవ్వొద్దని ఎక్కడికక్కడే నిల్వ చేయాలని ప్రభుత్వం నిర్ణయించింది. జిల్లాలో ఈ వానాకాలం 1.40లక్షల ఎకరాల్లో వరి సాగైంది. 3.50 లక్షల మెట్రిక్‌ టన్నుల ధాన్యం దిగుబడి వస్తుందని, రైతుల అవసరాలు, విత్తన కంపెనీలకు పోను 1.70 లక్షల మెట్రిక్‌ టన్నులు కొనుగోలు కేంద్రాలకు వస్తుందని అధికారులు అంచనా వేస్తున్నారు. పీఏసీఎస్‌, ఐకేపీ, డీసీఎంఎస్‌, మెప్మా ఏజెన్సీల ఆధ్వర్యంలో 287 కొనుగోలు కేంద్రాలు ఏర్పాటు, ధాన్యం నిల్వకు ప్రణాళిక సిద్ధం చేస్తున్నారు. గతంలో కొనుగోలు కేంద్రాల నుంచి మిల్లులకు ధాన్యం తరలించగా మిల్లర్ల అక్రమాల నేపథ్యంలో కేటాయింపునకు ప్రభుత్వం నిరాకరించింది. జిల్లాలోని చెన్నూర్‌, భీమారం, బెల్లంపల్లి, మందమర్రి, మంచిర్యాల పరిధిలో ప్రభుత్వ, ప్రైవేటు గోదాముల్లో నిల్వకు ఏర్పాట్లు చేస్తున్నారు. ఎస్‌డబ్ల్యూసీ(స్టేట్‌ వేర్‌ హౌసింగ్‌ కార్పొరేషన్‌), పీఏసీఎస్‌ సహా ప్రభుత్వ రంగంలోని 30వేల నుంచి 40వేల మెట్రిక్‌ టన్నుల నిల్వ సామర్థ్యం కలిగిన పలు గోదాములను గుర్తించారు. ఇంకా లక్ష మెట్రిక్‌ టన్నుల వరకు ధాన్యం నిల్వకు ఫంక్షన్‌హాళ్లు, అవసరం మేరకు క్యాప్‌ గోదాములు ఏర్పాటు చేయాలని భావిస్తున్నారు. ఖా ళీ స్థలంలో ధాన్యం బస్తాలు ఎత్తుగా పేర్చి వర్షానికి తడవకుండా, గాలి తగలకుండా ప్లాస్టిక్‌ టార్పాలిన్‌తో కప్పేస్తారు. ఈ స్థలాల ఎంపికను మండలాల వారీగా తహసీల్దార్లకు అప్పగించారు. ఎస్‌డబ్ల్యూసీ అధికారులు నిల్వల భద్రతను పర్యవేక్షిస్తారు.

మంచిర్యాలటౌన్‌: మంచిర్యాల ప్రభుత్వ జనరల్‌ ఆసుపత్రిలో వైద్యులు, సిబ్బంది భయం భయంగా విధులు నిర్వర్తించాల్సి వస్తోంది. శిథిలావస్థకు చేరిన భవనంలోనే ఎక్స్‌రే గదిని ఏర్పాటు చేశారు. గురువారం గది లోపల, బయట సీలింగ్‌ కోసం వేసిన పీవోపీ ఊడి కింద పడేందుకు సిద్ధమవగా వైద్యులు గుర్తించి తొలగింపజేశారు. ఎక్స్‌రే మిషన్‌ ఒక్కటే ఉండడం, ప్రతీరోజు 30మందికి పైగా ఎక్స్‌రే కోసం వస్తుంటారు. ఒక్క మిషన్‌ వల్ల రోజంతా సమయం వృథా అవుతోంది. సిబ్బంది పీవోపీని తొలగించే క్రమంలో గంటల తరబడి ఆపడంతో ఇబ్బందులకు గురయ్యారు. పీవోపీ తొలగిస్తున్న సిబ్బంది

కోటపల్లి: మండలంలోని రాంపూర్‌ గ్రామానికి చెందిన అడపా శంకరయ్య భూ సమస్య 38 ఏళ్ల తర్వాత పరిష్కారమైంది. 1988లో రాంపూర్‌ శివారులోని సర్వే నంబర్‌ 339లో మూడెకరాల పట్టా భూమిని సాదాబైనామా ద్వారా కొనుగోలు చేసి సాగు చేస్తున్నాడు. పట్టా కోసం కార్యాలయాల చుట్టూ తిరిగాడు. సాదాబైనామా దరఖాస్తుల క్రమబద్ధీకరణలో భాగంగా తహసీల్దార్‌ రాఘవేంద్రరావు గ్రామంలో విచారణ, క్షేత్రస్థాయిలో పరిశీలన చేశారు. ఆర్డీవో శ్రీనివాస్‌రావుకు సిఫారసు చేయగా, పరిశీలన అనంతరం ఆయన 13–బీ జారీ చేశారు. దీంతో భూమికి పట్టా జారీ కావడంతో శంకరయ్య ఆనందం వ్యక్తం చేశాడు.

సాక్షి ప్రతినిధి, మంచిర్యాల: అధికార కాంగ్రెస్‌ ప్రజాప్రతినిధుల మధ్య వర్గపోరు ముదురుతోంది. రాష్ట్ర మంత్రి వివేక్‌ వెంకటస్వామి, ఎంపీ గడ్డం వంశీకృష్ణ ఓ వైపు.. మంచిర్యాల ఎమ్మెల్యే ప్రేమ్‌సాగర్‌రావు మరోవైపు అన్నట్లుగా రాజకీయాలు సాగుతున్నాయి. ఈ నెల 21న ప్రేమ్‌సాగర్‌రావు పుట్టినరోజు సందర్భంగా పెద్దపల్లి పార్లమెంటు నియోజకవర్గ పరిధిలోని మంత్రులు దుద్దిళ్ల శ్రీధర్‌బాబు, అడ్లూరి లక్ష్మణ్‌కుమార్‌, ప్రభుత్వ విప్‌ చింతకుంట విజయరమణారావుతో కలిసి బహిరంగంగానే ఐక్యతను వెల్లడించారు. గతంలో అంతర్గతంగా ఉన్న మనస్పర్థలు తాజాగా బయటపడుతున్నాయి. దీంతో అధికార పార్టీలో ప్రజాప్రతినిధుల మధ్య విభేదాలు తేటతెల్లం అయిపోయాయి. వచ్చే ఎన్నికల నాటికి మరింత పెరిగే అవకాశాలున్నాయి. గూడెం పర్యటనతో మొదలు.. గత జూలైలో దండేపల్లి మండలం గూడెంలో ఎంపీ వంశీకృష్ణ పర్యటన సందర్భంగా స్థానిక నాయకులు వ్యతిరేకిస్తూ నిరసన తెలిపారు. దీనిపై వంశీకృష్ణ స్పందిస్తూ తాను ఎవరికీ భయపడనని, కాకా అభిమానులపై దాడులు చేస్తే ఊరుకోబోమంటూ హెచ్చరించారు. ఈ ఘటనపై కాంగ్రెస్‌ నాయకులపైనే పోలీస్‌స్టేషన్‌లో ఫిర్యాదు చేశారు. ప్రేమ్‌సాగర్‌రావు అనుచరుడిగా ఉన్న మంతెన జగన్‌మోహన్‌రావు కాకా గడ్డం వెంకటస్వామి విగ్రహం ఆవిష్కరించి ఒక్కసారిగా దుమారం రేపారు. మంచిర్యాల నియోజకవర్గం నుంచి మంత్రి వివేక్‌ వర్గంలోకి ఒక్కొక్కర్ని తమవైపు తిప్పుకొంటున్నారు. జిల్లా కేంద్రానికి చెందిన ఎనిమిది మంది నగరపాలక సంస్థ కార్పొరేటర్లు, లక్సెట్టిపేటకు చెందిన ఇద్దరు మున్సిపల్‌ కౌన్సిలర్లు ఎమ్మెల్యే వర్గాన్ని వీడి మంత్రి వైపు చేరారు. జగన్‌మోహన్‌రావు ఇంటికి మంత్రి వివేక్‌ వెళ్లారు. ఇటీవల జిల్లా కేంద్రంలో ఎంపీ ల్యాడ్స్‌ నిధులతో పనుల ప్రారంభోత్సవం సందర్భంగా మంతెన జగన్‌మోహన్‌రావు అనుచరులతో భారీ రోడ్‌షోతో హంగామా చేశారు. ఈ సందర్భంగా ఏర్పాటు చేసిన ఫ్లెక్సీలను మరుసటి రోజే తొలగించారంటూ ఫిర్యాదు చేశారు. దీంతో తన ఇలా ఖాలో మంత్రి, ఎంపీ చేస్తున్న రాజకీయాలు ఎమ్మె ల్యే ప్రేమ్‌సాగర్‌రావుకు ఆగ్రహం తెప్పిస్తున్నాయి. ఎటు దారి తీస్తాయో? మంత్రి, ఎంపీకి వ్యతిరేకంగా సాగుతున్న ఈ పర్యావసనాలు ఎటువైపు దారి తీస్తాయోనని కేడర్‌లో చర్చ నడుస్తోంది. మంచిర్యాలలో పట్టు సాధించేందుకు ఎంపీ ప్రయత్నాలు చేస్తుండగా, మంత్రి మద్దతు ఇస్తున్నారు. దీంతో స్థానిక ఎమ్మెల్యే తీవ్రంగా పరిగణిస్తున్నారు. తన నియోజకవర్గంలో వ్యతి రేకిగా మారిన మంతెన జగన్‌మోహనరావుతో కలిసి కార్యక్రమాలు చేయడం ఎమ్మెల్యేకు మరింత ఆగ్రహం తెప్పిస్తోంది. కేడర్‌లోనూ రెండు వర్గాలు ఏర్పడడంతో ఈ పరిణామాలు ఎటువైపు దారితీస్తాయోనని పార్టీలో చర్చసాగుతోంది.వివేక్‌కు వ్యతిరేకంగా మంత్రులు, ఎమ్మెల్యేలుపార్లమెంట్‌ ఎన్నికల నుంచే గడ్డం వంశీకృష్ణకు టికెట్‌ ఇవ్వడాన్ని స్థానిక ఎమ్మెల్యేలు వ్యతిరేకించారు. అయితే, అధిష్టానం వంశీకే టికెట్‌ ఖరారు చేయడంతో తప్పనిపరిస్థితుల్లో కాంగ్రెస్‌ గెలుపు కోసం పని చేశారు. అంతకుముందు మంత్రి వివేక్‌కు చెన్నూరు టికెట్‌, ఆ తర్వాత మంత్రి పదవి ఇచ్చే విషయంలోనూ ఎమ్మెల్యే ప్రేమ్‌సాగర్‌రావు అవకాశాలకు గండి కొట్టారనే వాదనలు ఉన్నాయి. రెండు రోజుల క్రితం ఎమ్మెల్యే ప్రేమ్‌సాగర్‌ తన పుట్టినరోజు సందర్భంగా తామంతా కలిసికట్టుగా పని చేసి ఎంపీగా గెలిపిస్తే, తమను మానసిక క్షోభకు గురి చేస్తున్నారని ఆరోపించారు. తాము మద్దతు ఇవ్వకపోతే డిపాజిట్‌ దక్కకపోయేదంటూ వ్యాఖ్యానించారు. జిల్లా కేంద్రంలో గంజాయి బ్యాచ్‌ను లేకుండా చేస్తామంటూ పరోక్షంగా హెచ్చరికలు జారీ చేశారు. దళితులు ఎవరివైపు ఉన్నారో తేల్చుకుందాం అంటూ సవాల్‌ విసిరారు దళితులను మోసం చేసిన వారే వారి గురించి మాట్లాడుతున్నారంటూ ఘాటు విమర్శలు చేశారు.

మంచిర్యాలఅర్బన్‌: జిల్లాలో ఆదాయ, వ్యయ ఆడిట్‌ నివేదికలు, వార్షిక ట్యూషన్‌ ఫీజుల వివరాల నమోదులో ప్రైవేటు పాఠశాలల యాజమాన్యాలు దాగుడు మూతలు ఆడుతున్నాయి. ఆన్‌లైన్‌ పోర్టల్‌లో పారదర్శకంగా అప్‌లోడ్‌ చేయాలని విద్యాశాఖ ఆదేశాలు జారీ చేసినా మెజారిటీ యాజమాన్యాలు లెక్కచేయడం లేదు. ఇంతకాలం ఫీజులు, ఆడిట్‌పై ఎవరూ పట్టించుకోకపోవడంతో యాజమాన్యాలు యథేచ్ఛగా నిబంధనలు ఉల్లంఘించాయి. పరిస్థితి తీవ్రతను గుర్తించిన జిల్లా విద్యాశాఖ అధికారి ఫీజుల వివరాలు కచ్చితంగా వెల్లడించాలని ఆదేశించడంతో జిల్లాలో 2026–27 విద్యాసంవత్సరానికి గాను 237 ప్రైవేటు పాఠశాలల్లో 145 పాఠశాలలు ఫీజు వివరాలు నమో దు చేశారు. ఇంకా 92 స్కూళ్లు నమోదు చేయాల్సి ఉంది. వార్షిక ఆదాయ, వ్యయాల సమర్పణలో 2023–24, 25, 26 సంవత్సరాలకు సంబంధించి 80 వరకు పాఠశాలలు ఆన్‌లైన్‌ నివేదికలు సమర్పించినట్లు తెలుస్తోంది. నమోదులో సాంకేతిక లొసుగులు చూపుతూ నిబంధనలు ఉల్లంఘిస్తున్నాయి. నివేదికలు ఇవ్వకపోవడంపై అనుమానాలు వ్యక్తమవుతున్నాయి. అంతులేని జాప్యం జిల్లాలో ప్రైవేటు ఎయిడెడ్‌ రహిత పాఠశాలల యాజమాన్యాలు వార్షిక పరిపాలన నివేదికలతోపాటు ఆడిట్‌ చేసిన లెక్కల పత్రాలు, ఫీజుల వివరాలు సకాలంలో సమర్పించాలని డీఈవో ఆదేశించారు. 2023–24, 2024–25, 2025–26లో ఆడిట్‌ లెక్కలను చార్టర్డ్‌ అకౌంటెంట్‌(సీఏ)తో ఆడిట్‌ చేసి నివేదికను జూలై 30 నాటికి సమర్పించాలని ఉత్తర్వుల్లో పేర్కొన్నారు. 2026–27 విద్యాసంవత్సరంలో తరగతుల వారీగా నిర్ణయించిన ఫీజుల వివరాలను పాఠశాల నోటీసుబోర్డుపై ప్రదర్శించాల్సి ఉంటుంది. ఫీజులు, ఆడిట్‌, ఆదాయ లెక్కలు ఐఎస్‌ఎంఎస్‌(ఇంటిగ్రేటెడ్‌ స్కూల్‌ మేనేజ్‌మెంటు సిస్టమ్‌) పోర్టల్‌లో అప్‌లోడ్‌ చేయడంతోపాటు ఈమెయిల్‌ ఐడీకి పంపించాలి. నిబంధనలు పాటించని పాఠశాలలకు షోకాజ్‌ నోటీసులు జారీ చేసి చట్టపరమైన చర్యలు తీసుకుంటామని హెచ్చరించారు. దీంతో ఫీజుల వివరాలపై వేగం పెంచినా ఆదాయ, వ్యయాలకు సాంకేతిక లోపాలు ఎత్తి చూపుతున్నారు. నమోదులో వేగవంతంమూడేళ్లుగా పెండింగ్‌లో ఉన్న ప్రైవేట్‌ పాఠశాలల ఆదాయ, వ్యయాల వివరాల నమోదుపై ప్రత్యేక దృష్టి సారించాం. యాజమాన్యం, ఎంఈవోలతో సమావేశం ఏర్పాటు చేసి పోర్టల్‌ నమోదు చేయాలని ఆదేశించాం. ఫీజుల వివరాల నమోదు ప్రక్రియ వేగవంతం చేశాం. ఇప్పటికే సగానికి పైగా పాఠశాలలు ఫీజుల వివరాలు నమోదయ్యాయి. ఎప్పటికప్పుడు సాంకేతిక లోపాలను పరిష్కరిస్తున్నాం. – జిల్లా అదనపు కలెక్టర్‌, డీఈవో చంద్రయ్యగోప్యత వెనుక కారణాలెన్నో..?లాగిన్‌ సమస్యల పేరిట ఆడిట్‌ వివరాలు గోప్యంగా ఉంచడం చర్చనీయాంశంగా మారింది. ట్యూషన్‌ ఫీజులు, డొనేషన్లు, ఇతర రుసుముల పేరిట తల్లిదండ్రుల నుంచి భారీగా వసూలు చేస్తున్న మొత్తాలను అధికారికంగా చూపించలేక యాజమాన్యాలు ఆడిట్‌ నివేదికలను తొక్కి పెడుతున్నాయనే ఆరోపణలున్నాయి. అర్హత కలిగిన టీచర్లకు పెద్దమొత్తంలో జీతాలు ఇస్తున్నట్లు రికార్డుల్లో చూపిస్తూ తక్కువ చెల్లిస్తున్నారనే విమర్శలున్నాయి. కొన్ని పాఠశాలల్లో ఆడిట్‌ పూర్తికాకపోవడం, రికార్డుల నమోదులో జాప్యం జరగడం వల్ల సమర్పణ ఆలస్యమవుతున్నట్లు తెలుస్తోంది.

దండేపల్లి: ప్రత్యేక సమగ్ర ఓటరు సవరణ పారదర్శకంగా, వేగవంతగా పూర్తి చేయాలని కలెక్టర్‌ కుమార్‌ దీపక్‌ సూచించారు. దండేపల్లి గ్రామ పంచాయతీ ఆవరణలో బుధవారం నిర్వహించిన సర్‌ హియరింగ్‌ను పరిశీలించారు. నోటీసులు అందుకున్న వారు తగిన ధ్రువీకరణ పత్రాలు ఇస్తున్నారా లేదా అని ఆరా తీశారు. నోటీసులు అందుకున్న వారికి సమాచారం అందించి, ఆధార పత్రాలు స్వీకరించి సవరణ పూర్తి చేయాలని చెప్పారు. కుల ధ్రువీకరణ పత్రాలకు ఇబ్బందులు తలెత్తుతున్నాయని కొందరు కలెక్టర్‌ దృష్టికి తీసుకెళ్లగా.. అలాంటిదేమీ ఉండదని అన్నారు. అంతకుముందు గూడెం గోదావరి నది వద్ద గణేష్‌ నిమజ్జన ఏర్పాట్లు పరిశీలించారు. దండేపల్లి కేజీబీవీని సందర్శించి వసతులపై ఆరా తీశారు. దండేపల్లి ప్రాథమిక ఆరోగ్య కేంద్రాన్ని తనిఖీ చేశారు. ద్వారక జెడ్పీ ఉన్నత పాఠశాలను తనిఖీ చేసి 9వ తరగతి విద్యార్థులకు పాఠాలు బోధించారు. ప్రశ్నలు వేసి ప్రతిభ సామర్థ్యాలను పరిశీలించారు. ద్వారకలో ఎస్టీ హాస్టల్‌ భవన నిర్మాణాన్ని పరిశీలించారు. తహసీల్దార్‌ రోహిత్‌కుమార్‌దేశ్‌పాండే, ఎంపీడీవో ప్రసాద్‌, ఆర్‌ఐ భూమన్న, పంచాయతీ కార్యదర్శి నాగరాజు, రాజహరీష్‌ పాల్గొన్నారు.

మంచిర్యాలఅగ్రికల్చర్‌: రైతులకు ఇబ్బంది లేకుండా ధాన్యం సేకరించాలని రాష్ట్ర వ్యవసాయ ఉత్పత్తుల శాఖ కమిషనర్‌ సురేంద్రమోహన్‌ అన్నారు. బుధవారం హైదరాబాద్‌ నుంచి వ్యవసాయ శాఖ సంచాలకులు గోపి, ఉన్నతాధికారులతో కలిసి వీడియో కాన్ఫరెనన్స్‌ ద్వారా జిల్లా అదనపు కలెక్టర్‌, జిల్లా వ్యవసాయ, ఇతర శాఖల అధికారులతో డిజిటల్‌ క్రాప్‌ సర్వే, ఫార్మర్‌ రిజిస్ట్రీ, సన్న రకాల వరి ధాన్యం కొనుగోలు, బోనస్‌ చెల్లింపు, ధాన్యం కొనుగోళ్ల ఏర్పాట్లపై సమీక్ష నిర్వహించారు. వ్యవసాయ ఉత్పత్తుల శాఖ కమిషనర్‌ మాట్లాడుతూ ప్రతీ కొనుగోలు కేంద్రంలో ఒకరికి సన్నరకం వరి ధాన్యాలపై అవగాహన, శిక్షణ ఇప్పించి వాలంటీర్‌గా నియమించాలని, గౌరవ భృతి చెల్లించాలని అన్నారు. తూకం యంత్రాలు, గన్నీ సంచులు, టార్పాలిన్లు, ఇతర మౌలిక సదుపాయాలు సిద్ధంగా ఉంచాలని తెలిపారు. ఈ సమావేశంలో జిల్లా అదనపు కలెక్టర్‌ వి.రాములు, జిల్లా వ్యవసాయ అధికారి సురేఖ, జిల్లా గ్రామీణ అభివృద్ధి అధికారి కిషన్‌, జిల్లా పౌరసరఫరాల శాఖ అధికారి బ్రహ్మారావు, జిల్లా మేనేజర్‌ శ్రీకళ, తదితరులు పాల్గొన్నారు.

మంచిర్యాలఅర్బన్‌/మంచిర్యాలరూరల్‌(హాజీపూర్‌): నవరాత్రులు పూజలందుకున్న గణనాథుడి శోభాయాత్ర బుధవారం వైభవంగా సాగింది. డప్పు వాయిద్యాల మధ్య వీడ్కోలు సంబరం అంబరాన్నంటింది. ఇందారం గోదావరి నది వద్ద, రాయపట్నం సమీపంలో గోదావరిలో వినాయకులను నిమజ్జనం చేశారు. మంచిర్యాల డిపో వద్ద ఆర్టీసీ కార్మికుల ఆధ్వర్యంలో వినాయకుడి శోభాయాత్ర, నిమజ్జన వేడుకలు బుధవారం రాత్రి నిర్వహించారు. గణేశ్‌ నిమజ్జనాన్ని పురస్కరించుకుని ఎల్లంపల్లి ప్రాజెక్టు దిగువ ప్రాంతాల్లోని గోదావరి నదిలోకి మూడు గేట్లు ఎత్తి ఐదు వేల క్యూసెక్కుల నీటిని వదిలారు. ప్రాజెక్టు పూర్తి స్థాయి నీటిమట్టం 20.175టీఎంసీలకు గాను 18.585 టీఎంసీల నీరు నిల్వ ఉంది. ఇన్‌ఫ్లో 3వేల క్యూసెక్కుల నీరు వస్తోంది. హైదరాబాద్‌కు 238, ఎన్టీపీసీకీకి 131 క్యూసెక్కుల నీరు తరలిస్తున్నారు. గోదావరి పరీవాహక ప్రాంతల ప్రజలు అప్రమత్తంగా ఉండాలని ఎల్లంపల్లి ప్రాజెక్ట్‌ ఎగ్జిక్యూటీవ్‌ ఇంజనీర్‌ పి.రవీంద్రచారీ సూచించారు.

మంచిర్యాలఅర్బన్‌: ప్రభుత్వ పాఠశాలల్లోని విద్యార్థుల్లో ఆత్మవిశ్వాసాన్ని పెంచేలా, కార్పొరేట్‌ స్కూళ్లకు దీటుగా ఉండేలా యూనిఫామ్‌, షూస్‌ పంపిణీ చేసిన ప్రభుత్వం టై, బెల్ట్‌లు, ఐడీ కార్డులు పంపిణీ చేయనుంది. ఇందులో భాగంగా టైలు, బెల్టులు సామగ్రి బుధవారం మంచిర్యాల ఎమ్మార్సీకి చేరింది. ప్రభుత్వ, పాఠశాలల, కళాశాలలు, హాస్టళ్ల విద్యార్థుల కోసం తెలంగాణ లెదర్‌ ఇండస్ట్రీస్‌ ప్రమోషన్‌ కార్పొరేషన్‌(టీఎస్‌ఎల్‌ఐపీసీ) ద్వారా బెల్టులు, టైలు చేరాయి. బెల్టులు 6,766, టైలు 1,760, ఐడీ కార్డు హోల్డర్లు 4446 ఎమ్మార్సీలకు చేరగా త్వరలోనే విద్యార్థులకు పంపిణీ చేయనున్నారు. ప్రభుత్వ పాఠశాలలు, ప్రభుత్వ జూనియర్‌ కళాశాలలు, కేజీబీవీలు, సాంఘిక, వెనకబడిన తరగతులతోపాటు గిరిజన సంక్షేమ హాస్టళ్లకు అందజేయనున్నారు.

సాక్షి ప్రతినిధి, మంచిర్యాల: గత యాసంగి సేకరించిన(2025–26రబీ) ధాన్యాన్ని వేలం వేయనున్నా రు. ఈ మేరకు పౌరసరఫరాల శాఖ ఇటీవల నోటిఫికేషన్‌ జారీ చేసింది. మంచిర్యాల, నిర్మల్‌ జిల్లాల పరిధిలో ఉన్న దొడ్డు రకం ధాన్యాన్ని లాట్‌ల కింద చేర్చి టెండర్‌ పిలిచింది. ఈ నెల 28న టెండర్‌ ఓపెన్‌ చేయనున్నారు. రెండు జిల్లాల పరిధిలో ఉన్న రైస్‌ మిల్లులతోపాటు గోదాంల్లో నిల్వ చేసిన వడ్లను సైతం వేలంలో చేర్చారు. రెండు జిల్లాలో మొత్తం ధాన్యాన్ని మూడు లాట్లుగా నిర్మల్‌, మంచిర్యాలతోపాటు మరో లాట్‌లో సిరిసిల్ల పరిధిలోని వడ్లకు కూడా టెండరు పిలిచారు. మంచిర్యాల జిల్లాలో 26, నిర్మల్‌ జిల్లాలో 30మిల్లులను మొత్తం గోదాంల్లో ఉన్న వడ్లను కలిపి మూడు లాట్లుగా విభజించారు. ఒక లాట్‌లో సిరిసిల్ల జిల్లా ధాన్యం చేర్చారు. ఒక్కో లాట్‌కు 50వేల మెట్రిక్‌ టన్నుల చొప్పున మొత్తం 150మెట్రిక్‌ టన్నులకు వేలం వేయనున్నారు. పౌరసరఫరాల శాఖ కనీస ధర క్వింటాల్‌కు రూ.2,389 చొప్పున ధర రిజర్వు చేశారు. టెండర్‌లో పాల్గొనే బిడ్డర్లు ఇంతకంటే తక్కువ టెండర్‌ కోట్‌ చేయరాదు. అర్హత కలిగిన వారంతా వేలంలో పాల్గొని ధాన్యాన్ని దక్కించుకోవచ్చు. ఈ మేరకు టెండరు నిర్వహణ మూడు ఏజెన్సీలకు అప్పగించారు. అయితే ధర విషయంలో బిడ్డర్లు ముందుకు వస్తారా? లేదా? అనేది తేలనుంది. కొనసాగుతున్న తనిఖీలు మరోవైపు సీఎంఆర్‌ ఇస్తున్న మిల్లుల్లో పీవీ(ఫిజికల్‌ వెరిఫికేషన్‌) జరుగుతోంది. ప్రతీ బుధవారం ఈ మేరకు ధాన్యం నిల్వలపై పరిశీలనలు జరుగుతున్నాయి. గతంలో వలే కాకుండా పకడ్బందీగా పరిశీలనలు చేస్తున్నారు. రెవెన్యూ అధికారులతోపాటు సివిల్‌ సప్లయి అధికారులు పాల్గొంటున్నారు. దీంతో మిల్లర్లు తమ బియ్యం బాకీలను అప్పగించడంతోపాటు పౌరసరఫరాల శాఖకు బాకీ ఉన్న మొత్తాన్ని చెల్లిస్తున్నారు.

కాసిపేట: పేలుళ్లతో ఇళ్లు కూలుతున్నాయని, న్యాయం చేయాలని మండలంలోని సోమగూడెం(కె), బెల్లంపల్లి మండలం సోమగూడెం(బి) గ్రామపంచాయతీల ప్రజలు బెల్లంపల్లి సబ్‌కలెక్టర్‌ మనోజ్‌ను వేడుకున్నారు. బుధవారం ఆయన సోమగూడెం, ట్యాంక్‌బస్తీ గ్రామాల్లో మందమర్రి జీఏం రాధాకృష్ణతో కలిసి పర్యటించారు. ఓపెన్‌కాస్టు బ్లాస్టింగ్‌లతో పగులు తేలుతున్న ఇళ్లను పరిశీలించారు. ఓసీ వల్ల కలిగే నష్టాలను స్థానికులు సబ్‌ కలెక్టర్‌ దృష్టికి తీసుకువెళ్లారు. ఆర్‌అండ్‌ఆర్‌ ప్యాకేజీ కల్పించి శాశ్వత పరిష్కారం చూపాలని కోరారు. పూర్తిస్థాయిలో విచారణ జరిపి నివేదికను ఉన్నతాధికారులకు అందజేస్తామని తెలిపారు. జీఏం రాధాకృష్ణ మాట్లాడుతూ ఓసీ ప్రాంతంలోని గ్రామాల అభివృద్ధికి సింగరేణి తరఫున సహకారం అందిస్తున్నామని, పేలుళ్ల విషయంలో నిబంధనలు పాటిస్తున్నామని తెలిపారు. ఈ కార్యక్రమంలో ఓసీ పీవో రాంబాబు, సోమగూడెం(కె) సర్పంచ్‌ కున్సోత్‌ చైతన్య, సోమగూడెం(బి) సర్పంచ్‌ పొన్నాల మౌనిక, మాజీ సర్పంచ్‌ సఫాట్‌ శంకర్‌, ఉపసర్పంచ్‌లు మల్యాల స్రవంతి, బూరుగుపల్లి రమేష్‌, సీపీఐ(ఏఎం) జిల్లా కన్వీనర్‌ సంకె రవి, మాజీ ఉపసర్పంచ్‌లు కనుకుల రాకేష్‌, కుక్క రాంచందర్‌, నాయకులు తోడేటి ప్రశాంత్‌, తేండ్రా శ్యాం, వెంకటలక్ష్మి, శ్రీనివాస్‌, వెంకటస్వామి, మధు, రమేష్‌ పాల్గొన్నారు.

కెరమెరి: రెండో బిడ్డ కోసం ఆ తల్లి ఎన్నో ఏళ్లుగా ఎదురుచూసింది. మొదటి బిడ్డ పుట్టిన 16 ఏళ్ల తర్వాత మళ్లీ కడుపు పండడంతో తల్లిదండ్రుల ఆనందా నికి అవధులు లేవు. పురిటి నొ ప్పులు ప్రారంభం కాగానే త మ ఇంటికి మరో బిడ్డ వస్తున్నాడనే ఆనందంతో నొప్పులు భరిస్తూ ఆ తల్లి ఆసుపత్రికి బయలుదేరింది. కానీ పండంటి మగబిడ్డకు జన్మనిచ్చిన మాతృమూర్తి తన పేగుబంధాన్ని చూడకుండానే తిరిగిరాని లోకానికి చేరుకుంది. అమ్మ ఒడిలో సేదతీరాల్సిన పసిబిడ్డ.. పుట్టిన రోజే అమ్మను కోల్పోయిన హృదయవిషాదకర ఘటన కెరమెరి మండలంలోని చిన్న సాకడలో చోటుచేసుకుంది. వివరాల్లోకి వెళ్తే.. మండలంలోని చిన్నసాకడ గ్రామానికి చెందిన కుర్సెంగ తానుబాయి(40) మంగళవారం పురిటి నొప్పులతో బాధపడుతుండగా కుటుంబ సభ్యులు కెరమెరి పీహెచ్‌సీకి తరలించారు. అక్కడి నుంచి మెరుగైన వైద్యం కోసం ఉ ట్నూర్‌.. అక్కడి నుంచి ఆదిలాబాద్‌లోని రిమ్స్‌కు తరలించారు. మంగళవారం సాయంత్రం 6 గంటలకు తానుబాయి మగశిశువుకు జన్మనిచ్చిన అ నంతరం స్పృహ కోల్పోయింది. వైద్యులు రాత్రంతా చికిత్స అందించినప్పటికీ పరిస్థితి మెరుగుపడలేదు. బుధవారం ఉదయం ఆమె మృతి చెందింది. కుటుంబంలో తీవ్ర విషాదం.. ఇంటి ఇల్లాలు మృతితో కుటుంబంలో తీవ్ర విషాదం అలుముకుంది. భార్యను కోల్పోయిన భర్త ఏత్మారావు, తల్లిని కోల్పోయిన పెద్ద కుమారుడు, తల్లి ప్రేమను రుచి చూడని అప్పుడే పుట్టిన బిడ్డను చూసి గ్రామస్తులంతా కన్నీరుమున్నీరవుతున్నారు. తానుబాయికి ఇప్పటికే 16 ఏళ్ల కుమారుడు ఉన్నాడు. ఇది రెండో కాన్పు. ఆమె రక్తహీనతతో బాధపడుతున్నట్లు కుటుంబ సభ్యులు పేర్కొంటున్నారు. ఆమె శరీరంలో హిమోగ్లోబిన్‌ స్థాయి కేవలం ఆరు గ్రాములే ఉండగా, రిమ్స్‌లో వైద్యం అందించడంతో 8 గ్రామాలకు చేరింది. కాగా రెండు రక్తనాళాలు బ్లాక్‌ కావడమే ఆమె మృతికి కారణంగా తెలుస్తోంది. కొద్ది రోజుల క్రితం మృతురాలికి ఐరన్‌ ఇంజెక్షన్‌ ఎక్కించేందుకు ప్రయత్నించగా అనారోగ్యానికి గురైంది. ఎప్పటికప్పుడు వైద్యసలహాలు అందించడంతో పాటు పరీక్షలు చేయించినట్లు ఏఎన్‌ఎం శోభ, ఎంఎల్‌హెచ్‌పీ శ్యాంరావు తెలిపారు. తానుబాయి పురిటి నొప్పులతో కెరమెరి పీహెచ్‌సీకి వచ్చినప్పటి నుంచి ఆమె వెంటే ఉండి ఆరోగ్య పరిస్థితిని ఎప్పటికప్పుడు పరిశీలించినట్లు పేర్కొన్నారు.రక్తహీనతతో..

మందమర్రిరూరల్‌: మందమర్రి ఏరియాలోని కేకే–ఓసీని సింగరేణి డైరెక్టర్‌(పీఅండ్‌పీ) వెంకటేశ్వర్లు, సీపీ అండ్‌ సీ మనోహర్‌ బుధవారం ఏరియా జీఎం రాధాకృష్ణతో కలసి సందర్శించారు. పనులు పరిశీలించి బొగ్గు ఉత్పత్తి, నాణ్యతా ప్రమాణాలు, రవాణాపై అధికారులను అడిగి తెలుసుకున్నారు. అనంతరం వారు మాట్లాడుతూ ఉద్యోగులు రక్షణ సూత్రాలు పాటిస్తూ సంస్థ నిర్ధేశించిన బొగ్గు ఉత్పత్తి లక్ష్యాన్ని సాధించాలని సూచించారు. ప్రాజెక్ట్‌ ఆఫీసర్‌ రాంబాబు, సేఫ్టీ ఆఫీసర్‌ పైడయ్య, ఏరియా సెక్యూరిటీ ఆఫీసర్‌ వెంకటేశ్వర్‌రెడ్డి, అధికారులు పాల్గొన్నారు. పర్యావరణాన్ని పరిరక్షించాలి శ్రీరాంపూర్‌: పర్యావరణాన్ని పరిరక్షించాలని శ్రీరాంపూర్‌ జీఎం ఎం.శ్రీనివాస్‌ తెలిపారు. బుధవారం శ్రీరాంపూర్‌ ఓపెన్‌ కాస్ట్‌ ప్రాజెక్ట్‌ ఆఫీసర్‌ కార్యాలయం ముందు గల ఖాళీ స్థలంలో మొక్కలు నాటారు. ఈ సందర్భంగా ఆయ న మాట్లాడుతూ హెక్టార్‌ ప్రాంతంలో 5 రకాల 500 మామిడి మొక్కలను నాటుతున్నట్టు తెలిపారు. ఈ కార్యక్రమంలో ఓపెన్‌ కాస్ట్‌ ప్రాజెక్టు అధికారి సీహెచ్‌.వెంకటేశ్వర్లు, ఇందారం ఓపెన్‌ కాస్ట్‌ ప్రాజెక్టు అధికారి ఏవీ రెడ్డి, గుర్తింపు సంఘం ఏఐటీయూసీ బ్రాంచ్‌ సెక్రెటరీ బాజీ సైదా, అధికారుల సంఘం బ్రాంచ్‌ అధ్యక్షుడు లక్కాకుల మహేష్‌ పాల్గొన్నారు.

ఆదిలాబాద్‌: తమ డిమాండ్ల పరిష్కారం కోసం బ్యాంకు ఉద్యోగులు సమ్మెకు పిలుపునివ్వడంతో బ్యాంకు ఖాతాదారులకు సేవల్లో అంతరాయం ఏర్పడే అవకాశం ఉంది. ఈ నెల 28 నుంచి 30వరకు సమ్మె చేపట్టనున్నట్లు యూఎఫ్‌బీయూ ప్రకటించింది. ఇప్పటికే బ్యాంకు యూనియన్‌ సభ్యులు స్ట్రైక్‌ బ్యాడ్జీలు ధరించి విధులకు హాజరవుతున్నారు. వరుస సెలవులు, సమ్మె కారణంగా బ్యాంకింగ్‌ సేవలకు అంతరాయం కలుగనుంది. ఈ నేపథ్యంలో ఖాతాదారులకు బ్యాంకులు సంక్షిప్త సందేశాలు పంపిస్తున్నాయి. బ్యాంకుల సూచనలివీ..జిల్లా రూరల్‌ సెమి అర్బన్‌ అర్బన్‌ మొత్తం ఆదిలాబాద్‌ 54 17 38 109 ఆసిఫాబాద్‌ 42 15 01 58 మంచిర్యాల 51 77 04 132 నిర్మల్‌ 59 37 04 100 మొత్తం 206 146 47 399 ఉమ్మడి జిల్లాలోని బ్యాంకుల వివరాలు (ఎస్‌ఎల్‌బీసీ ఆధారంగా)

రామకృష్ణాపూర్‌: చిన్నతనంలో అమెరికా నుంచి మంచిర్యాల జిల్లా రామకృష్ణాపూర్‌కు వచ్చినప్పుడు తాతయ్య చెప్పిన కథలు వింటూ, ఆయనతో కలిసి పల్లెల్లో, వ్యవసాయ పొలాల్లో తిరిగిన ఓ బాలుడు... కాలక్రమేణా అదే తాతయ్య అల్జీమర్స్‌ వ్యాధితో బాధపడటాన్ని గమనించాడు. ఆ అనుభవం అతనిలో ఓ ఆలోచనకు బీజం వేసింది. అల్జీమర్స్‌ను ముందుగానే గుర్తించగలిగితే? వ్యాధి తీవ్రత పెరగకముందే అవసరమైన జాగ్రత్తలు తీసుకునే అవకాశం ఉంటే? అనే ప్రశ్నలకు సమాధానం వెతుకుతూ పరిశోధన ప్రారంభించాడు. మూడేళ్ల తర్వాత అంతర్జాతీయ స్థాయిలో గుర్తింపు పొందాడు. అమెరికాలోని వాషింగ్టన్‌ స్టేట్‌ బెల్లెవ్యూ ప్రాంతానికి చెందిన హైస్కూల్‌ విద్యార్థి శ్రీహిత్‌ చెన్నారెడ్డి(16) 2026 గ్లోరియా బారన్‌ ప్రైజ్‌ ఫర్‌ యంగ్‌ హీరోస్‌కు ఎంపికయ్యాడు. ప్రజలు, సమాజం, పర్యావరణంపై సానుకూల ప్రభావం చూపుతున్న యువ నాయకులను ఈ అవార్డు గుర్తిస్తుంది. ఈ ఏడాది 25 మందిని ఎంపిక చేయగా, వారిలో 15 మంది టాప్‌ విజేతలకు ఒక్కొక్కరికి 10 వేల అమెరికన్‌ డాలర్ల నగదు పురస్కారం అందుతుంది. తక్కువ ఖర్చుతో బహుభాషా ఏఐ.. శ్రీహిత్‌ రూపొందించిన " MConAI' తక్కువ ఖర్చుతో అల్జీమర్స్‌ వ్యాధిని ముందస్తుగా గుర్తించే బహుభాషా ఏఐ వ్యవస్థ. వ్యక్తులు మాట్లాడిన మాటలను టెక్స్‌ట్‌గా మార్చి, అందులోని సూక్ష్మమైన కాగ్నిటివ్‌–లింగ్విస్టిక్‌ బయోమార్కర్లను విశ్లేషిస్తుంది. దీని ఆధారంగా వ్యక్తి మానసికంగా ఆరోగ్యంగా ఉన్నారా, స్వల్పస్థాయి కాగ్నిటివ్‌ సమస్యలున్నాయా లేదా అల్జీమర్స్‌ అభివృద్ధి చెందుతున్న సంకేతాలున్నాయా అనేది గుర్తిస్తుంది. అన్ని భాషల్లో మాట్లాడే వ్యక్తులకు ఉపయోగపడేలా దీన్ని రూపొందించారు. పరిశోధనలో ఇంగ్లిష్‌లో 87 శాతం, ఇతర భాషల్లో 83 శాతం ఖచ్చితత్వం సాధించినట్లు బారన్‌ ప్రైజ్‌ ప్రకటించింది. ఇంగ్లీష్‌కు మాత్రమే పరిమితమైన అనేక ఏఐ ఆధారిత డిమెన్షియా స్క్రీనింగ్‌ సాధనాలతో పోలిస్తే బహుభాషా విధానంలో MConAI ప్రత్యేకంగా నిలిచిందని అవార్డు సంస్థ పేర్కొంది. ఎంఆర్‌ఐ స్థాయి ఫలితాలతో పోలిక శ్రీహిత్‌ పరిశోధనలో వచ్చిన ఫలితాలు ఎంఆర్‌ఐ స్కాన్ల వంటి ఖరీదైన క్లినికల్‌ డిటెక్షన్‌ పద్ధతుల ఖచ్చితత్వంతో పోల్చదగినవిగా ఉన్నట్లు బారన్‌ ప్రైజ్‌ ఓ ప్రకటనలో పేర్కొంది. తక్కువ ఖర్చుతో, పెద్ద సంఖ్యలో ప్రజ లకు అందుబాటులో ఉండే విధంగా ఈ విఽ దానాన్ని మరింత అభివృద్ధి చేయగలిగితే వనరులు పరిమితంగా ఉన్న ప్రాంతాల్లోనూ అల్జీమర్స్‌ స్క్రీనింగ్‌ అందుబాటులోకి వచ్చే అవకాశం ఉందని వివరించారు. అంతర్జాతీయ వేదికలపై ప్రదర్శన శ్రీహిత్‌ తన పరిశోధనను ప్రతిష్టాత్మక అల్జీమర్స్‌ అసోసియేషన్‌ ఇంటర్నేషనల్‌ న్యూరో సైన్స్‌ నెక్స్‌ట్‌ 2026 కాన్ఫరెన్స్‌లో ప్రదర్శించారు. టోక్యోలో జరిగిన ఏసీఎం ఆర్టిఫిషియల్‌ ఇంటెలిజెన్స్‌ అండ్‌ క్లౌడ్‌ కంప్యూటింగ్‌ కాన్ఫరెన్స్‌లోనూ ప్రాజెక్టును వివరించారు. ఆయన పరిశోధన ఏసీఎం డిజిటల్‌ లైబ్రరీ, ఐఈఈఈ ఎక్స్‌ప్లోర్‌లో ప్రచురితమైంది. ప్రస్తుతం స్టోనీ బ్రూక్‌ యూనివర్శిటీ డిపార్ట్‌మెంట్‌ ఆఫ్‌ బయోమెడికల్‌ ఇన్ఫార్మేటిక్స్‌, ఇన్‌స్టిట్యూట్‌ ఫర్‌ సిస్టమ్స్‌ బయాలజీతో కలిసి ఆరోగ్య సేవలను మరింత అందుబాటులోకి తీసుకురావడంపై ఏఐ పరిశోధనను కొనసాగిస్తున్నట్లు బారన్‌ ప్రైజ్‌ తెలిపింది. రామకృష్ణాపూర్‌తో ప్రత్యేక అనుబంధం శ్రీహిత్‌ కుటుంబానికి రామకృష్ణాపూర్‌తో మూడు తరాల అనుబంధం ఉంది. ఆయన తల్లి ప్రసన్న ఇక్కడే విద్యాభ్యాసం చేశారు. తాతయ్య సింగరేణిలో ఏ1 కాంట్రాక్టర్‌గా పనిచేశాడు.తాత అనారోగ్యమే పరిశోధనకు స్ఫూర్తి.. అల్జీమర్స్‌తో బాధపడుతున్న పరిస్థితిని ప్రత్యక్షంగా గమనించిన తర్వాతే ఈ పరిశోధన ప్రారంభించా. ఈ సమయంలో ప్రపంచ వ్యాప్తంగా 50 మిలియన్లకు పైగా ప్రజలు అల్జీమర్స్‌ బారిన పడుతున్న విషయం తెలిసింది. ఈ సమస్యకు సాంకేతిక పరిష్కారం అందించాలనే పట్టుదల మరింత పెరిగింది. పరిశోధన కొనసాగించే కొద్దీ నా పట్టుదల, ప్రత్యేకమైన ఆలోచన విధానం ఒక్కో అంశాన్ని మరో అంశంతో అనుసంధానించేందుకు సహాయపడ్డాయి. చివరకు నా ప్రాజెక్టు విజయవంతమైంది. – శ్రీహిత్‌

చెన్నూర్‌: పట్టణంలోని అభినవపోతన బిరుదాంకితులు వానమామలై వరదార్యులు విగ్రహాన్ని బీజేపీ 18వ వార్డు కౌన్సిలర్‌ ఏతం శివకృష్ణ తొలగించారు. నిబంధనలకు విరుద్ధంగా విగ్రహం తొలగించడంపై కవులు, రచయితలు ఆగ్రహం వ్యక్తం చేస్తున్నారు. వానమామలై వరదాచార్యులు ఎమ్మెల్సీగా పని చేశారు. ఆయనను మాజీ ప్రధాని పీవీ నర్సింహరావు ఘనంగా సన్మానించి కాలికి గండపెండేరాన్ని బహూకరించారు. సంఘటన స్థలాన్ని సీఐ బన్సీలాల్‌, కౌన్సిలర్లు అంబటి శంకర్‌, మార్కెట్‌ కమిటీ చైర్మన్‌ మహేశ్‌ ప్రసాద్‌, కోఆప్షన్‌ సభ్యులు సాధనబోయిన కృష్ణ, మాజీ జెడ్పీటీసీ బెల్లంకొండ కరుణసాగర్‌రావు, సాహీర్‌, కాంగ్రెస్‌ నాయకులు పెద్దింటి శ్రీనివాస్‌, రాజేశ్‌, సంతోశ్‌, బ్రహ్మయ్య, లింగంపల్లి మహేశ్‌, తనులు రవికుమార్‌, చింతల శ్రీనివాస్‌, పాతర్ల నాగరాజు, హిమవంతరెడ్డి పరిశీలించారు. వరదచార్యుల విగ్రహాన్ని పక్కనే ఉన్న మర్రి చెట్టు వద్ద దసరా పండుగ తర్వాత ఏర్పాటు చేస్తానని విగ్రహ కమిటీ, వారి కుటుంబ సభ్యులు, కుల సంఘాల నాయకులకు చెప్పానని కౌన్సిలర్‌ ఏతం శివకృష్ణ తెలిపారు. ఆ తర్వాతే విగ్రహాన్ని జగన్నాథాలయ రథం గదిలో భద్రపర్చానని తెలిపారు. కాగా, మున్సిపల్‌ అధికా రుల అనుమతి లేకుండా విగ్రహాన్ని తొలగించడాన్ని సంఘ విద్రోహ చర్యగా పరిగణించి కేసు నమోదు చేయాలని కాంగ్రెస్‌ నాయకుడు సుద్దపల్లి సుశీల్‌కుమార్‌ డిమాండ్‌ చేశారు. మా టీచర్‌ మాకే కావాలని ఆందోళన తాండూర్‌: మండలంలోని నర్సాపూర్‌ గ్రామంలో విద్యార్థులు, తల్లిదండ్రులు బుధవారం ఆందోళన చేపట్టారు. ప్రాథమిక పాఠశాల ఉపాధ్యాయురాలిని డి ప్యూటేషన్‌పై వేరే చోటికి పంపించడంతో ఆగ్రహం వ్యక్తం చేస్తూ నిరసన వ్య క్తం చేశారు. విద్యార్థులు తరగతులు బహిష్కరించగా, తల్లిదండ్రులు పాఠశాల ఎదుట ఆందోళన చేశారు. పాఠశాలలో 23 మంది విద్యార్థులు ఉండగా ము గ్గురు ఉపాధ్యాయులు పని చేస్తున్నారు. వీరిలో ఉపాధ్యాయురాలు జ్యోతిని డిప్యూటేషన్‌పై బెల్లంపల్లికి పంపించారు. దీంతో బోధన అరకొరగా సాగుతోందని తల్లిదండ్రులు ఆరోపించారు. ఉపాధ్యాయురాలిని ఇక్కడే కేటాయించి మెరుగైన బోధన అందేలా చూడాలని కోరారు. ఆందోళనలో విద్యా కమిటీ చైర్మన్‌ కుర్సింగ భగవంత్‌రావు, స్థానికులు కుర్సింగ గణపతి, ధర్మరావు, కడెం వెంకటేష్‌, పేంద్రం మారుతి, రమేష్‌ తదితరులు పాల్గొన్నారు.

మంచిర్యాలటౌన్‌: సంపూర్ణ ఆరోగ్యం ఆయుర్వేదంతోనే లభిస్తుందని జిల్లా అదనపు కలెక్టర్‌ పి.చంద్రయ్య అన్నారు. 11వ ఆయుర్వేద దినోత్సవాన్ని పురస్కరించుకుని బుధవారం ఆయుష్‌ శాఖ ఆధ్వర్యంలో జిల్లా కేంద్రంలోని ప్రభుత్వ జనరల్‌ ఆసుపత్రిలో నిర్వహించిన మెగా ఆయుర్వేద వైద్య శిబిరానికి డీఎంహెచ్‌వో డాక్టర్‌ నరేందర్‌ రాథోడ్‌తో కలిసి హాజరయ్యారు. ఈ కార్యక్రమంలో ప్రభుత్వ జనరల్‌ ఆసుపత్రి ఆర్‌ఎంఓ డాక్టర్‌ శ్రీధర్‌, జిల్లా ఆయుర్వేద వైద్యాధికారి నీరజ, జిల్లా ప్రోగ్రాం అధికారి రవీందర్‌ రాథోడ్‌, ఆయుష్‌ వైద్యులు, వైద్య సిబ్బంది, ఆశా కార్యకర్తలు పాల్గొన్నారు.

నెన్నెల: మండల కేంద్రంలో బుధవారం కురిసిన వర్షానికి పత్తి చేనులో పిడుగుపడి తోట శ్రీనుకు చెందిన పత్తి పంట కొంతమేరకు దెబ్బతింది. పంట చేతికి వచ్చే దశలో పిడుగుపడడంతో పత్తి మొక్కలు తీవ్రంగా దెబ్బతి న్నాయి. ఇప్పటికే సాగు పెట్టుబడులు పెరిగి ఇబ్బందులు పడుతున్న సమయంలో ప్రకృతి వైపరీత్యం రూపంలో పిడుగుపాటు తమను మరింత నష్టాల్లోకి నెట్టిందని రైతు వాపోయాడు. దెబ్బతిన్న పత్తి పంటను అధికారులు పరిశీలించి నష్టాన్ని అంచనా వేసి ప్రభుత్వం ద్వారా పరిహారం అందించాలని బాధిత రైతు కోరుతున్నాడు. బొలేరో ఢీకొని ఒకరు మృతిభీమిని: కన్నెపల్లి మండలంలోని సాలీగాం గ్రామ శివారులో బుధవారం బొలేరో వాహ నం స్కూటీని ఢీకొన్న ఘటనలో యువకుడు మృతి చెందాడు. పోలీ సులు, స్థానికులు తెలిపి న వివరాల ప్రకారం కుమురం భీం జిల్లా పెంచికల్‌పేట్‌కు చెందిన సత్యనారాయణ – లక్ష్మిలకు ఇద్దరు కుమారులు సాగర్‌, శ్రవణ్‌లు ఉన్నారు. వీరిలో శ్రవణ్‌కు వివాహం కాగా మూడేళ్ల బాబు ఉన్నాడు. శ్రవణ్‌ కుటుంబంతో ఉపాధి నిమిత్తం మంచిర్యాలలో ఉంటున్నాడు. బుధవారం వినా యకుని నిమజ్జనం ఉండటంలో స్వగ్రామం పెంచికల్‌పేట్‌కు స్కూటీపై బ యలుదేరాడు. దహెగాం నుంచి ఎదురుగా వ స్తున్న బొలేరో వాహనం స్కూటీని బలంగా ఢీ కొట్టడంతో తలకు తీవ్రగాయాలై అక్కడికక్కడే మృతి చెందాడు. మృతుడి కుటుంబీకుల ఫిర్యా దు మేరకు కేసు నమోదు చేసుకొని దర్యాప్తు చేస్తున్నట్లు కన్నెపల్లి ఎస్సై విక్రమ్‌ తెలిపారు. ఉరేసుకొని వృద్ధురాలు ఆత్మహత్యజైపూర్‌: మండల కేంద్రానికి చెందిన కట్కూరి లక్ష్మి(60) అనారోగ్యంతో బాధపడుతూ మంగళవారం రాత్రి ఇంట్లో ఉ రేసుకొని ఆత్మహత్యకు పాల్పడింది. స్థాని కులు తెలిపిన వివరాల ప్రకారం.. లింగయ్య –లక్ష్మి దంపతులు కూలీ పని చేస్తూ జీవనం సా గిస్తుండగా ఇద్దరు కొడుకులు హైదరా బా ద్‌లో నివాసం ఉంటున్నారు. లింగయ్య 30ఏళ్ల క్రితం ప్రమాదంలో రెండు కాళ్లు కో ల్పోయాడు. భార్య లక్ష్మి అతడి ఆలనపాలన చూ సుకుంటుంది. ఆమె కూడా అనారోగ్యానికి గురి కాగా మానసిక వేధనకు గురై ఆత్మహ త్య చేసుకుంది. కొడుకులు శ్రీనివాస్‌, మల్లేశ్‌ల ఫిర్యాదు మేరకు కేసు నమోదు చేసుకున్నట్లు ఎస్సై భూమేశ్‌ తెలిపారు.

మంచిర్యాలటౌన్‌: జిల్లా కేంద్రంలోని ప్రభుత్వ జనరల్‌ ఆస్పత్రి(జీజీహెచ్‌) భవనం శిథిలావస్థకు చేరింది. గోడలు పగుళ్లు రాగా వర్షపు నీటితో తడి ఏర్పడుతోంది. గోడను ఆనుకుని ఉన్న విద్యుత్‌ వైర్లు వర్షపు నీటితో తడిస్తే ప్రమాదకరంగా మారుతుంది. విద్యుత్‌ కనెక్షన్లు అస్తవ్యస్తంగా ఉన్నాయి. ప్రభుత్వ జనరల్‌ ఆస్పత్రి, మాతాశిశు ఆరోగ్య కేంద్రంలో నలుగురు ఎలక్ట్రీషియన్లు పని చేస్తుండగా విద్యుత్‌ సమస్యలో లోపాలను ఎప్పటికప్పుడు సరి చేస్తున్నారు. రెండు ఆస్పత్రులకు సంబంధించిన విద్యుత్‌ కనెక్షన్ల ఏర్పాటు మ్యాప్‌లు లేవు. ఆయా భవనాల విద్యుత్‌ కనెక్షన్లు ఇచ్చిన విధానంపై ప్రస్తుత ఎలక్ట్రీషియన్లకు అవగాహన లేక మరమ్మతు సమయంలో కొంత ఇబ్బంది ఏర్పడుతోంది. ఏసీల మరమ్మతులు, నిర్వహణకు టెక్నీషియన్‌ను నియమించారు. విద్యుత్‌ వ్యస్థ సక్రమంగా లేకపోవడం, గోడలు శిథిలావస్థకు చేరడం వల్ల విద్యుత్‌ కనెక్షన్లు అస్తవ్యస్తంగా మారి ఏ ప్రమాదం ముంచుకొస్తుందోనని రోగులు ఆందోళన చెందుతున్నారు. గోడలు నీటితో తడవడం వల్ల షార్ట్‌ సర్క్యూట్‌ జరిగే ప్రమాదం ఉంది. ప్రైవేట్‌ ఎలక్ట్రీషియన్‌తోనే పనులు చెన్నూర్‌: చెన్నూర్‌ ఏరియా ఆసుపత్రి భవనం రెండేళ్ల క్రితం ప్రారంభించడంతో విద్యుత్‌ సరఫరా సక్రమంగా సాగుతోంది. ఏసీలు, ఇతర పరికరాల మరమ్మతు కోసం శాశ్వత ఎలక్ట్రీషియన్‌ లేకపోవడంతో ప్రైవేట్‌ ఎలక్ట్రీషియన్‌ను సంప్రదించాల్సిన పరిస్థితి నెలకొంది. ఏసీలను మూడు నెలలకు ఒకసారి చెక్‌ చేయిస్తున్నామని ఏరియా ఆస్పత్రి సూపరింటెండెంట్‌ సత్యనారాయణ తెలిపారు. బెల్లంపల్లిలో ఫైర్‌ సేఫ్టీ ఏర్పాట్లు భేష్‌బెల్లంపల్లి: బెల్లంపల్లి ప్రభుత్వ ఏరియా ఆసుపత్రి లో ఫైర్‌ సేఫ్టీ ఏర్పాట్లు బేషుగ్గా ఉన్నాయి. షార్ట్‌సర్క్యూట్‌, ఇతర విద్యుత్‌ సమస్యలు ఉత్పన్నం కా కుండా పటిష్టమైన చర్యలు తీసుకున్నారు. మూడు నెలలకోసారి బెల్లంపల్లి అగ్నిమాపక సిబ్బంది పర్యవేక్షిస్తున్నారు. నాలుగు ఏసీలను షెడ్యూల్‌ ప్రకారం పరీక్షించాక ఆన్‌ చేస్తుండడం గమనార్హం.

తల్లిడిల్లిన గుండెలు నెలలు నిండక ముందే లోకం చేరిన ఆ పసికందులపై విధి కన్నెర్రజేసింది. ఆసుపత్రిలో అర్ధరాత్రి అగ్ని ప్రమాదరూపంలో వారిని కబలించింది. పుట్టి వారం గడవకముందే ఊపిరిరాడకుండా చేసి తిరిగిరాని లోకాలకు చేర్చింది. పేరు పెట్టకముందే పేగుబంధాన్ని తెంచేసింది. పురిటి నొప్పులు కూడా వీడని ఆ తల్లులకు గుండె కోత.. బాధిత కుటంబాలకు తీరని శోకం మిగిల్చింది. ఆదిలాబాద్‌ రిమ్స్‌లో చోటుచేసుకున్న ఈ ఘటన రాష్ట్ర వ్యాప్తంగా కలకలం రేపింది. ఆదిలాబాద్‌టౌన్‌/కై లాస్‌నగర్‌: నవమాసాలు పూర్తి కాకుండా పుట్టిన కొందరు, చిన్నపాటి రుగ్మతలతో జన్మించిన మరికొందరిని రిమ్స్‌ ఎస్‌ఎన్‌సీయూ వార్మర్‌లో ఉంచారు. వీరి పాలిట ఏసీ మృత్యుపాశంగా మారింది. అప్పటివరకు తమ చిన్నారులను చూసి మురిసిపోయిన వారంతా అర్ధరాత్రి అకస్మాత్తుగా జరిగిన షార్ట్‌ సర్క్యూట్‌తో హతాశులయ్యారు. దట్టమైన పొగతో ముగ్గురు పసికందుల ప్రాణాలు గాలిలో కలిసిపోయాయి. ఘటన జరిగిన వెంటనే కలెక్టర్‌, ఎస్పీ హుటాహుటిన అక్కడికి చేరుకున్నారు. ప్రమాదానికి గురైన చిన్నారులను జిల్లా కేంద్రంలోని ప్రైవేట్‌ ఆసుపత్రులకు తరలించారు. పెనుప్రమాదం తప్పినట్లయింది. ముగ్గురు చిన్నారుల మృత్యువాత ఈ ఘటనలో ముగ్గురు చిన్నారులు మృత్యువాత పడ్డారు. ఇచ్చోడ మండల కేంద్రంలోని సుభాష్‌నగర్‌కు చెందిన సలీంఖాన్‌(ఫీర్‌ఖాన్‌), సబాఖానంలకు శుక్రవారం పాప జన్మించింది. ఏడు నెలలకే పుట్టిన పాపను ఎస్‌ఎన్‌సీయూ వార్డులో ఉంచారు. ఊపిరాడక చిన్నారి మృతి చెందింది. ఇంద్రవెల్లి మండలంలోని గిన్నెరకు చెందిన షేకుబాయి–కు మ్ర దినేశ్‌ దంపతులకు రెండో సంతానంగా ఆడబిడ్డ జన్మించింది. ఎనిమిది నెలలకే బిడ్డ పుట్టడంతో ఎస్‌ఎన్‌సీయూ వార్డులో ఉంచారు. చికిత్స నిమిత్తం ప్రైవేట్‌ ఆస్పత్రికి తీసుకెళ్లినా ఫలితం లేకుండా పో యింది. తెల్లవారుజామున 4.35 గంటలకు చిన్నారి మృతి చెందింది. అలాగే, ఉట్నూర్‌ మండల కేంద్రానికి చెందిన సబా సమ్రిన్‌–తౌఫిక్‌ దంపతులకు రెండో సంతానంగా ఆడబిడ్డ జన్మించింది. బరువు 1,100 గ్రాములు ఉండగా ఎస్‌ఎన్‌సీయూలో ఉంచారు. పొగతో ఊపిరాడక చిన్నారి అస్వస్థతకు గు రైంది. మొదట జిల్లాకేంద్రంలోని ప్రైవేట్‌ ఆస్పత్రికి తరలించగా, మెరుగైన వైద్యం కోసం నిర్మల్‌, అక్క డి నుంచి నిజామాబాద్‌కు తరలించారు. అక్కడికి చేరుకునే సమయంలోనే చిన్నారి మృతిచెందింది. ప్రైవేట్‌ ఆస్పత్రులకు తరలింపు అస్వస్థతకు గురైన చిన్నారులను వెంటనే జిల్లా కేంద్రంలోని ప్రైవేట్‌ చిల్డ్రన్స్‌ ఆస్పత్రులకు తరలించా రు. పట్టణంలోని ఇషా, కేర్‌, సురక్షా, లక్ష్మినర్సింహ ఆస్పత్రులకు తరలించి చికిత్స అందిస్తున్నారు. కలెక్టర్‌, ఎస్పీ మంగళవారం వేకువజామున 4 గంటల వరకు అక్కడే ఉండి సహాయక చర్యలు ముమ్మరం చేశారు. ప్రతీ చిన్నారికి సంబంధించి ప్రత్యేక చొరవ చూపారు. రిమ్స్‌ డైరెక్టర్‌ జైసింగ్‌ రాథోడ్‌ ప్రమాదం జరిగినప్పటి నుంచి చిన్నారులను తరలించే వరకు దగ్గరుండి పరిస్థితిని సమీక్షించారు. తెల్లవారుజామున ఆయా ఆస్పత్రులకు వెళ్లి పసికందుల ఆరోగ్య పరిస్థితిని స్వయంగా పరిశీలించారు. మెరుగైన వైద్యం అందించాలని వైద్యులకు సూచించారు. మరో ఇద్దరు శిశువుల పరిస్థితి విషమం ప్రమాదంలో గాయపడ్డ శిశువుల్లో మరో ఇద్దరి పరిస్థితి విషమంగా ఉంది. ఆదిలాబాద్‌ పట్టణంలోని విఘ్నేశ్వర ఆసుపత్రిలో చికిత్స పొందుతున్న శిశువు ఆరోగ్య పరిస్థితి ఆందోళనకరంగా ఉన్నట్లు వైద్యులు చెబుతున్నారు. ఈ పాప 900 గ్రాముల బరువు ఉందని పేర్కొన్నారు. ఈ శిశువు మహారాష్ట్రలోని పాఠన్‌కు చెందినదిగా చెబుతున్నారు. అలాగే రిమ్స్‌లో చికిత్స పొందుతున్న చిన్నారి పరిస్థితి కూడా విషమంగానే ఉన్నట్లుగా పేర్కొంటున్నారు. మరో 22 మంది చిన్నారుల ఆరోగ్య పరిస్థితి ప్రస్తుతం నిలకడగా ఉందని అధికారులు చెబుతున్నారు. వీరంతా జిల్లా కేంద్రంలోని వివిధ ప్రైవేట్‌ ఆసుపత్రుల్లో, రిమ్స్‌లో చికిత్స పొందుతున్నారు. షార్ట్‌సర్క్యుట్‌లో దెబ్బతిన్న వైద్య పరికరాలుషార్ట్‌సర్క్యూట్‌లో దెబ్బతిన్న వైద్య పరికరాలుఅసలేం జరిగిందంటే .. ఘటనపై విచారణకు ఆదేశించిన సీఎం ఆదిలాబాద్‌ రిమ్స్‌ ఆసుపత్రిలోని ఎస్‌ఎన్‌సీయూ వార్డులో 27 మంది చిన్నారులు చికిత్స పొందుతున్నారు. సోమవారం అర్ధరాత్రి 11.40గంటల సమయంలో ఈ సంఘటన జరిగింది. ఆ విభా గంలోని రిసెప్షన్‌ వద్ద ఉన్న ఏసీలో షార్ట్‌సర్క్యూట్‌తో ఒక్కసారిగా పేలుడు సంభవించింది. అందులోని గ్యాస్‌ లీకై దట్టమైన పొగ అలుముకుంది. అక్కడున్న వైద్యులు, సిబ్బంది భయంతో పరుగు తీశారు. ఒక్కసారిగా అక్కడ ఏం జరుగుతుందో తెలియని అయోమయం. తల్లిదండ్రులు, కుటుంబీకులు కొంతమంది సిబ్బంది లోపలకు వెళ్లి చిన్నారులను ఒక్కొక్కరిని బయటకు తీసుకువచ్చారు. తల్లిదండ్రుల రోదనలు, చిన్నారుల ఏడుపులతో వార్డు దద్దరిల్లింది. మిగతా వార్డులో చికిత్స పొందుతున్న రోగుల సహాయకులు, వై ద్య సిబ్బంది అక్కడికి చేరుకున్నారు. చిన్నారుల ను కాపాడే ప్రయత్నం చేశారు. దట్టమైన పొగ కా రణంగా పసికందుల శరీరమంతా మసిబారిపోయింది. చిన్నారులను బయటకు తీసుకువచ్చే సమయంలో కొందరు ఊపరాడక ఉక్కిరిబిక్కిరి అయ్యారు. ఓ వైద్యుడు, కొంతమంది సిబ్బంది తమ ప్రాణాలకు తెగించి నవజాత శిశువులను కాపాడారు. అయినప్పటికి ఓ శిశువు పొగతో ఊ పిరాడక తనువు చాలించింది. ప్రమాదతీవ్రత పె రగవద్దనే ఉద్దేశంతో ఆ వార్డులో విద్యుత్‌ సరఫ రాను నిలిపివేశారు. దీంతో ఇంక్యుబేటర్లు పనిచేయడం ఆగిపోయాయి. వెంటిలేటర్లపై ఉన్న నలు గురు చిన్నారులు తీవ్ర అస్వస్థతకు గురయ్యారు. కాగా, అదే సమయంలో వార్డుల సందర్శనకు వచ్చిన డైరెక్టర్‌ హుటాహుటిన అక్కడకు చేరుకున్నారు. తాను కూడా పొగలోనూ లోపలకు వెళ్లి చిన్నారులను బయటకు తీసుకువచ్చారు. వెంటనే విషయాన్ని కలెక్టర్‌ రాజర్షి షా, ఎస్పీ అఖిల్‌ మహాజన్‌ దృష్టికి తీసుకెళ్లారు. వారు కూడా 15 నిమిషాల్లోనే అక్కడికి చేరుకున్నారు.

మంచిర్యాలక్రైం: ఆనందో త్సహాల మధ్య జరగాల్సి న వేడుకల్లో చిన్న చిన్న త ప్పిదాలతో పెద్ద ప్రమాదా లు చోటు చేసుకునే అవకా శం ఉంటుంది. శోభాయా త్ర, నిమజ్జనం ప్రశాంతంగా సాగేలా పోలీసు శాఖ చర్యలు చేపట్టింది. సీసీ కెమెరాలతో పర్యవేక్షణ, సమస్యాత్మక ప్రాంతాల్లో డ్రోన్‌ కెమెరాతో నిఘాకు ప్రత్యేక బృందం ఏర్పాటు చేసింది. జిల్లాలో 2,379 విగ్రహాలు ఏర్పాటు చేయగా ఈ నెల 23, 24, 25వ తేదీల్లో నిమజ్జనం చేయనున్నారు. జిల్లాలో వినా యక నిమజ్జనం సందర్భంగా పోలీసు బందోబస్తు పై మంచిర్యాల డీసీపీ ఎగ్గడి భాస్కర్‌ వివరించారు.

తాండూర్‌: భూముల రీ సర్వే ప్రక్రియ పకడ్బందీగా చేపట్టాలని కలెక్టర్‌ కుమార్‌ దీపక్‌ సూచించారు. మంగళవారం తహసీల్దార్‌ జ్యో త్స్నతో కలిసి మండలంలోని ద్వారకాపూర్‌ గ్రామంలో భూముల రీ సర్వేను పరిశీలించా రు. గ్రామ నక్షలు, రైతుల భూ రికార్డులను స రిచూసుకుంటూ క్షేత్ర స్థాయిలో పరిశీలన చేప ట్టి రికార్డులు తయారు చేయాలన్నారు. భవి ష్యత్‌లో భూవివాదాలకు ఈ సర్వేతో చెక్‌ ప డనుందన్నారు. అనంతరం ఇందిరమ్మ ఇళ్ల ని ర్మాణాల పురోగతి, ఆసరా పింఛన్ల దరఖాస్తు ల పరిశీలన వివరాలను అధికారులను అడిగి తెలుసుకున్నారు. కేజీబీవీలో అదనపు గదులు, భోజనశాల నిర్మాణ పనులు పరిశీలించి త్వరగా పూర్తి చేయాలని సూచించారు. తాండూర్‌ ప్రాథమిక ఆరోగ్యకేంద్రాన్ని సందర్శించి గర్భిణులతో మాట్లాడి పౌష్టికాహారం తీసుకోవాలని తెలిపారు. తహసీల్దార్‌ కార్యాలయాన్ని సందర్శించి సర్‌ ప్రక్రియను నిర్ణీత గ డువులోపు పూర్తి చేయాలన్నారు. ఎంపీడీవో శ్రీనివాస్‌, పీహెచ్‌సీ వైద్యురాలు ఝాన్సీరా ణి, కేజీబీవీ ఎస్వో కవిత పాల్గొన్నారు.

మంచిర్యాలఅగ్రికల్చర్‌: జిల్లాలో ధాన్యం నిల్వకు అందుబాటులో ఉన్న గోదాములను గుర్తించి వివరాలు యాప్‌లో నమోదు చేయాలని అదనపు కలెక్టర్‌ వి.రాములు సూచించా రు. మంగళవారం తన చాంబర్‌లో జిల్లా పౌ రసరఫరాల శాఖ అధికారి బ్రహ్మారావు, మేనేజర్‌ శ్రీకళతో కలిసి ఎస్‌డబ్ల్యూసీ గోదాముల మేనేజర్లు, సంబంధిత అధికారులతో సమావేశం నిర్వహించి మాట్లాడారు. ధాన్యం సేకరణకు ముందస్తు ఏర్పాట్లలో భాగంగా అవసరమైన నిల్వ స్థలాలను గుర్తించి అందుబాటులో ఉంచాలని సూచించారు. అనంతరం జి ల్లా రైస్‌మిల్లర్స్‌ అసోసియేషన్‌ ప్రతినిధులతో సమీక్ష నిర్వహించారు. ఈ సందర్భంగా మా ట్లాడుతూ.. సామర్థ్యానికి అనుగుణంగా రైస్‌ మిల్లులకు కేటాయించిన సీఎంఆర్‌ డెలివరీల ను వేగవంతం చేసి, నిర్దేశిత లక్ష్యాలను సకా లంలో పూర్తి చేయాలని సూచించారు. వానా కాలం సీజన్‌కు సంబంధించి ప్రాథమిక వ్యవసాయ సహకార ప్రతినిధులు, మెప్మా, డీసీ ఎంస్‌ ప్రతినిధులతో ధాన్యం సేకరణపై సమీ క్ష నిర్వహించారు. ధాన్యం సేకరణ కేంద్రాలు ఏర్పాటు చేసేందుకు అవసరమైన పరి కరా లు, మౌలిక సదుపాయాలను నెలాఖరులోపు సిద్ధం చేసుకోవాలని సూచించారు. సేకరణ కేంద్రాల ఏర్పాటుకు తక్కువ ఎత్తులో ఉన్న ప్రాంతాలను (లో–లైయింగ్‌ ఏరియాలు) ఎంపిక చేయరాదని, సేకరణ కేంద్రాల్లో రైతులకు ఎలాంటి ఇబ్బంది కలగకుండా ముంద స్తు ఏర్పాట్లు పూర్తి చేయాలని ఆదేశించారు.

7విద్యార్థుల ఆరోగ్యంపై ప్రత్యేక శ్రద్ధ విద్యార్థుల ఆరోగ్యంపై ప్రత్యేక శ్రద్ధ పెట్టాలని డీఎంహెచ్‌వో రాథోడ్‌ నరేందర్‌ సూచించారు. జైపూర్‌ కేజీబీవీని ఆకస్మికంగా తనిఖీ చేసి ఎస్వోకు పలు సూచనలు చేశారు. నిమజ్జనానికి సర్వం సిద్ధం జిల్లా వ్యాప్తంగా నేడు గణపతి నిమజ్జనోత్సవాన్ని అంగరంగ వైభవంగా నిర్వహించనున్నారు. ఇందుకు సంబంధించి అధికారులు ఇప్పటికే ఏర్పాట్లు పూర్తి చేశారు. 8లోu సాధారణ ఉష్ణోగ్రతలు నమోదవుతాయి. ఆకాశం మేఘావృతమవుతుంది. జిల్లాలో మోస్తరు నుంచి భారీ వర్షం కురుస్తుంది.

భీమిని: మండలంలోని పెద్దపేట గ్రామపంచాయ తీ పరిపాలన అధికారి(జీపీఓ) దుర్గాప్రసాద్‌ మంగళవారం అవినీతి నిరోధక శాఖ(ఏసీబీ) అధికారులకు చిక్కాడు. రూ.80 వేలు లంచం తీసుకుంటుండగా రెడ్‌హ్యాండెడ్‌గా పట్టుకున్నారు. ఆదిలాబాద్‌ రేంజ్‌ ఏసీబీ డీఎస్పీ మధు తెలిపిన వివరాల ప్రకా రం.. పెద్దపేట గ్రామానికి చెందిన మహ్మద్‌ ఫకీర్‌కు గ్రామ శివారులోని సర్వే నంబరు 10లో 29 గుంటల భూమి కోసం సాదాబైనామా పత్రాల ద్వారా పట్టా పాస్‌బుక్కు జారీకి జీపీఓ దుర్గాప్రసాద్‌ రూ.1.30 లక్షలు డిమాండ్‌ చేశాడు. మొదటిగా విడతగా రూ.80 వేలు, పని పూర్తయ్యాక రూ.50 వేలు ఇవ్వాలని బేరం కుదుర్చుకున్నాడు. దీంతో ఫిర్యాదుదారుడు ఏసీబీ అధికారులను ఆశ్రయించాడు. మంగళవారం జీపీఓ దుర్గాప్రసాద్‌, తహసీల్దార్‌ కా ర్యాలయానికి ఎదురుగా ఉన్న కిరాణ కొట్టు యజ మాని పోతురాజుల రాజేందర్‌ కలిసి మోటారుసైకిల్‌పై వ్యవసాయ పొలాల వద్దకు వచ్చారు. రాజేందర్‌కు డబ్బులు ఇవ్వాలని జీపీవో చెప్పాడు. రాజేందర్‌ డబ్బులు తీసుకుని వెళ్తుండగా ఏసీబీ అధికారులు ఇద్దరిని అదుపులోకి తీసుకున్నారు. కరీంనగర్‌లోని ఏసీబీ ప్రత్యేక న్యాయస్థానంలో హాజరుపర్చనున్నట్లు తెలిపారు. ప్రభుత్వ అధికారులు లంచం అడిగితే 1064, 9440446106కు ఫిర్యాదు చేయాలని సూచించారు. ఫిర్యాదుదారుల వివరాలు గోప్యంగా ఉంచుతామని అధికారులు తెలిపారు.

ఈ ఘటనపై ముఖ్యమంత్రి రేవంత్‌రెడ్డి వెంటనే స్పందించారు. ప్రమాదంలో చిన్నారులు మృతిచెందడంపై తీవ్ర దిగ్భ్రాంతి వ్యక్తం చేశారు. క్షేత్రస్థాయిలో పరిస్థితుల పరిశీలనకు రాష్ట్ర వైద్యారోగ్య శాఖ మంత్రి దామోదర రాజనర్సింహను జిల్లాకు పంపించారు. సీఎం ఆదేశాల మేరకు మంత్రి ప్రత్యేక హె లిక్యాప్టర్‌లో రిమ్స్‌కు చేరుకున్నారు. వైద్యారోగ్య శాఖ ప్రిన్సిపల్‌ సెక్రటరీ క్రిస్టీనా జడ్‌.చోంగ్తూ, ఆదిలాబాద్‌ ఎమ్మెల్యే పాయల్‌ శంకర్‌ మంత్రితో కలిసి వచ్చారు. రిమ్స్‌లోని ఎస్‌ఎన్‌సీయూతో పాటు పలు వార్డులను పరిశీలించారు. దాదాపు గంటకు పైగా పలువురు రోగులతో మాట్లాడి సంఘటన తీరు, వైద్య సేవలపై ఆరా తీశారు. అనంతరం డైరెక్టర్‌ చాంబర్‌లో ఆస్పత్రి సేవల్లోని లోపాలు, అవసరమైన వసతులు, ప్రమాదానికి దారితీసిన పరిస్థితులపై సమీ క్ష నిర్వహించారు. అనంతరం విలేకరులతో మాట్లాడుతూ.. అగ్నిప్రమాద ఘటనపై స మగ్ర విచారణ చేపడుతున్నట్లు పేర్కొన్నా రు. ఎలక్ట్రికల్‌, ఫైర్‌, సివిల్‌స్ట్రక్చర్‌ ఆడిట్‌లను నిర్వహించాలని కలెక్టర్‌ను మంత్రి ఆదేశించారు. వారం రోజుల్లో అందే నివేదిక ఆధారంగా తగు చర్యలు చేపడతామని స్పష్టం చేశారు. ప్రత్యేకంగా 150 పడకలతో కూడిన మాతా శిశు సంరక్షణ కేంద్రాన్ని ఏర్పాటు చేసేలా చర్యలు చేపడతామన్నారు. వంద రోజుల్లో రిమ్స్‌ రూపురేఖలు మార్చుతామని పేర్కొన్నారు. ఇలాంటి ఘటనలు రాష్ట్ర వ్యాప్తంగా పునరావృతం కాకుండా చర్యలు చేపడతామని తెలిపారు. తలసేమియా, సికిల్‌సెల్‌, ఎనిమియా, హెమోఫీలియా వంటి వ్యాధిగ్రస్తులకు చికి త్స అందించేలా రిమ్స్‌లో ప్రత్యేకంగా హెమటాలజీ సేవలను అందుబాటులోకి తె స్తామని పేర్కొన్నారు. మంత్రి వెంట డీఎంఈ పి.వాణి, కలెక్టర్‌ రాజర్షి షా, ఎస్పీ అఖిల్‌ మహాజన్‌, ఐటీడీఏ పీవో మంద మకరందు, డీఎంహెచ్‌వో సాధన, మార్కెట్‌, లైబ్రరీ, మున్సిపల్‌ చైర్మన్లు శ్రీకాంత్‌ రెడ్డి, నర్సయ్య, అనూష, కాంగ్రెస్‌ ఆదిలాబాద్‌ నియోజకవర్గ ఇన్‌చార్జి కంది శ్రీనివాసరెడ్డి, అధికారు లు, వైద్యులు, నాయకులున్నారు.

మంచిర్యాలరూరల్‌(హాజీపూర్‌): విపత్తుల వే ళ ప్రాణ, ఆస్తి నష్టాల నివారణలో యువత పాత్ర కీలకమని, యువ ఆపదమిత్ర ద్వారా శిక్షణ పూర్తి చేసుకున్న యువత సేవా దృక్పథంతో సమాజంలో రాణించాలని కరీంనగర్‌ అదనపు కలెక్టర్‌ డి.శ్రీనివాసరెడ్డి సూ చించారు. మంగళవారం గుడిపేట 13వ ప్ర త్యేక పోలీస్‌ బెటాలియన్‌లో ఎస్‌డీఆర్‌ఎఫ్‌ ఆ ధ్వర్యంలో యువ ఆపదమిత్ర కార్యక్రమంలో భాగంగా కరీంగనర్‌ శాతవాహన యూనివర్సిటీ డిగ్రీ కళాశాల విద్యార్థులకు వారం రో జులుగా వరదలు, అగ్నిప్రమాదాలు, విపత్తు ల సమయాల్లో రెస్క్యూ ఆపరేషన్‌, క్షతగాత్రులను కాపాడడం, సీపీఆర్‌, ప్రథమ చికిత్స తదితర అంశాలపై ఇస్తున్న శిక్షణ ముగిసింది. ముఖ్య అతిథిగా అదనపు కలెక్టర్‌ శ్రీనివాసరెడ్డి హాజరై విద్యార్థులకు ప్రశంసాపత్రాలు అందజేశారు. కార్యక్రమంలో కమాండెంట్‌ వెంకటేశ్వర్లు, అసిస్టెంట్‌ కమాండెంట్‌ ఆంజనేయరెడ్డి, యూనిట్‌ మెడికల్‌ అధికారి డాక్టర్‌ సంతోష్‌సింగ్‌, అడ్మినిస్ట్రేటీవ్‌ అధికారి గౌస్‌మొహీయుద్దీన్‌, ఎస్‌డీఆర్‌ఎఫ్‌ ఆర్‌ఐ ఎం.అశోక్‌, బెటాలియన్‌ అధికారులు, ఎస్‌డీఆర్‌ఎఫ్‌ శిక్షణ సిబ్బంది పాల్గొన్నారు.

మంచిర్యాలక్రైం: ‘గణేశ్‌ నిమజ్జన శోభాయాత్రకు పోలీస్‌ అధికారులు రూట్‌ మ్యాప్‌ సిద్ధం చేశారు.. నిర్దేశించిన రూట్‌ మ్యాప్‌ ద్వారానే శోభాయాత్ర నిర్వహించాలి’ అని స్థానిక ఎమ్మెల్యే ప్రేమ్‌సాగర్‌రావు సూచించారు. జిల్లా కేంద్రంలోని ఎం.కన్వెన్షన్‌ హాల్‌లో పోలీసులు, హిందూ ఉత్సవ కమిటీ సభ్యులు, వివిధ మతాల పెద్దలతో శాంతి కమిటీ సమవేశం నిర్వహించి మాట్లాడారు. మతాలకు అతీతంగా అన్ని వర్గాలు వారు సమన్వయంతో వినాయకుని శోభాయాత్ర ప్రశాంతంగా సంబరంగా జరుపుకోవాలని సూచించారు. అవాంఛనీయ ఘటనలకు తావు లేకుండా నిమజ్జన శోభాయాత్ర జరుపుకోవాలని తెలిపారు. ట్రాఫిక్‌ సమస్య తలెత్తకుండా పోలీస్‌ అధికారులు చేపట్టిన చర్యలకు వారి ఆదేశాలను గౌరవించి సహకరించాలని కోరారు. పోలీస్‌, ఫైర్‌, ఎన్‌డీఆర్‌ఎఫ్‌ సిబ్బంది, గజ ఈతగాళ్లను అందుబాటులో ఉంచాలని అధికారులకు సూచించారు. స్థానిక ఏసీపీ ప్రకాశ్‌, సీఐ ప్రమోద్‌రావు, మేయర్‌ మధుకర్‌, డిప్యూటీ మేయర్‌ రమ్య, సంబంధిత శాఖల అధికారులు, మండపాల నిర్వాహకులు, పీస్‌ కమటీ పెద్దలు పాల్గొన్నారు.

నెన్నెల: మండల కేంద్రానికి చెందిన ఫారెస్ట్‌ బీట్‌ ఆఫీసర్‌ గట్టు చి న్నయ్యకు ఉచిత ఆపరేషన్‌కు మార్గం సుగమమైంది. ఈ నెల 20న ‘కార్డు ఉన్నా అందని వైద్యం’ శీర్షికన ‘సాక్షి’లో ప్రచురితమైన కథనానికి అధికారులు స్పందించారు. జిల్లా కో ఆర్డినేటర్‌ డాక్టర్‌ చుంచు రాధిక ఆదేశాల మేరకు అధికార యంత్రాంగం స్పందించింది. చిన్నయ్య వివరాలను సేకరించి హైదరాబాద్‌లోని ప్రధాన కార్యాలయంలో ఈహెచ్‌ఎస్‌ కార్డు సమస్యను పరిష్కరించి వివరాలను ఆస్పత్రికి పంపించారు. దీంతో అపోలో ఆస్పత్రిలో ఉచితంగా ఆపరేషన్‌కు ఏ ర్పాట్లు చేశారు. తనకు అండగా నిలిచిన జిల్లా ఆరోగ్యశ్రీ సిబ్బందికి ఎన్‌ఈహెచ్‌ఎస్‌ సీఈవో తో పాటు సమస్యను వెలుగులోకి తెచ్చి ఆపరేషన్‌ జరిగేలా చేసిన ‘సాక్షి’ దినపత్రికకు చిన్న య్య ప్రత్యేకంగా కృతజ్ఞతలు తెలిపారు.

● తెలంగాణ విద్యార్థికి ప్రతిష్టాత్మక బారన్‌ అవార్డు ● అమెరికాలోని టాప్‌–15 మంది విద్యార్థుల్లో శ్రీహిత్‌ చిన్నారెడ్డిరామకృష్ణాపూర్‌: కృత్రిమ మేథ (ఏఐ) పరిశోధనలో తెలంగాణకు చెందిన 16 ఏళ్ల విద్యార్థి శ్రీహిత్‌ చిన్నారెడ్డి విశేష ప్రతిభ కనబర్చి అమెరికాలో ప్రతిష్టాత్మకంగా భావించే బారన్‌ అవార్డుకు ఎంపికయ్యాడు. అల్జీమర్స్‌ వ్యాధి ప్రభావా లను తగ్గించేందుకు ఇటీవల ఏఐ ఆధారిత ప్రాజెక్టును రూపొందించినందుకు ఈ గుర్తింపు లభించినట్లు కుటుంబసభ్యులు తెలిపారు. అవార్డుకు ఎంపికై న టాప్‌ 15 మంది విద్యార్థుల్లో హైదరాబాద్‌కు చెందిన శ్రీహిత్‌ ఉండడం గర్వకారణమని కుటుంబసభ్యులు పేర్కొన్నారు. అవార్డుకు ఎంపికై న వారికి ఒక్కొక్కరికి 10 వేల అమెరికన్‌ డాలర్ల నగదు పురస్కారం అందజేయనున్నట్లు తెలిపారు. శ్రీహిత్‌ ప్రస్తుతం తల్లిదండ్రులతో కలిసి అమెరికాలోని బెల్ల వ్యూ సియాటెల్‌ ప్రాంతంలో ఉంటూ విద్యాభ్యాసం చేస్తున్నాడు. అతని తండ్రి వెంకటేశ్వర్లు సాఫ్ట్‌వేర్‌ రంగంలో పనిచేస్తున్నారు. రామకృష్ణాపూర్‌తో ప్రత్యేక అనుబంధం.. శ్రీహిత్‌ కుటుంబానికి రామకృష్ణాపూర్‌తో ప్రత్యేక అనుబంధం ఉంది. అతని తల్లి ప్రసన్న పట్టణంలోని శ్రీ సరస్వతి శిశుమందిర్‌ పాఠశాలలో విద్యాభ్యాసం చేశారు. కుటుంబంలోని పలువురు గతంలో ఆర్‌కేపీలో నివాసం ఉండగా ప్రస్తుతం వివిధ ప్రాంతాల్లో స్థిరపడ్డారు.

సాక్షి ప్రతినిధి, మంచిర్యాల: పేకాట దందా రోజు రూ.లక్షల్లో సాగుతోంది. గంటల్లో జేబులు గుల్ల చేసుకునే జూదరులే లక్ష్యంగా దందా నడుస్తోంది. ఇక్కడి పోలీసులకు చిక్కకుండా ఉమ్మడి జిల్లా మహారాష్ట్ర సరిహద్దు ప్రాంతాల్లో అనేక అనధికార క్లబ్బులు నడుస్తున్నాయి. రాజురా, పొడ్సా, సోన్లూరి, పఠాన్‌భోరి, రనవెల్లి, గట్‌చందూర్‌ పరిసర ప్రాంతాల్లో అనధికార పేకాట క్లబ్‌లు ఉన్నాయి. సోషల్‌ క్లబ్‌ల పేరిట చట్ట విరుద్ధంగా పేకాట క్లబ్‌లు నిర్వహిస్తున్నారు. ఈ వ్యసనంతో అనేక మంది రోజు రూ.లక్షల్లో పోగొట్టుకుంటున్నారు. జిల్లాలో పేకాట ఆడితే పోలీసులకు దొరికిపోతామని మహారాష్ట్రకు వెళ్లి మరీ సరదా తీర్చుకుంటున్నారు. ఇందుకు నిర్వాహకులు ఫంటర్ల(పేకాట ఆడేవారు)కు రవాణా, భోజనం, మద్యం, ఏసీ గదుల్లో పేకాటకు టేబుళ్లు వేసి మరీ డబ్బుల దందా చేస్తున్నారు. సెలవు దినాల్లో పెద్ద ఎత్తున కార్లలో వెళ్తూ జేబులు గుల్ల చేసుకుని వస్తున్నారు. దీంతో అనేకమంది కుటుంబాలు ఆర్థికంగా చితికిపోతున్నాయి. రెండు రోజుల క్రితం వీరూర్‌ పరిధి సోన్లూర్‌లో సోషల్‌ విన్నర్‌ క్లబ్‌లో స్థానిక పోలీసులు దాడులు చేసి 40మందిపై కేసులు నమోదు చేశారు. రూ.6.76లక్షల నగదు స్వాధీనం చేసుకున్నారు. వీరందరూ మంచిర్యాల, ఆసిఫాబాద్‌, గోదావరిఖని, ఉమ్మడి కరీంనగర్‌ తదితర ప్రాంతాలకు చెందిన వారే ఉన్నారు. రూ.కోట్లలో పేకాట పేకాట క్లబ్బుల కోసం రూ.కోట్లలోనే ఖర్చు చేస్తున్నారు. రమ్మీ, తీన్‌పత్తా, కట్‌పత్తా ఆటల్లో గంటల్లోనే రూ.లక్షలు పోగొట్టుకుంటారు. ప్రతీ ఆటలో నిర్వాహకులకు కనీసం పది శాతం కమీషన్‌ ఉంటుంది. ఒక్కో టేబుల్‌కు రెండు మూడు గంటల్లోనే రూ.10నుంచి రూ.20వేలు సంపాదించుకునే అవకాశం ఉంటుంది. అలా ఒక్కో క్లబ్బులో 20నుంచి 30టేబుళ్లు వేస్తూ రాత్రింబవళ్లు నడిపిస్తున్నారు. ఆదివారం, ఇతర సెలవు దినాల్లో టేబుళ్లు ఒక్కటి కూడా ఖాళీగా ఉండవంటే పరిస్థితి అర్థం చేసుకోవచ్చు. తెచ్చుకున్న డబ్బులు అయిపోయాక కూడా తెలిసిన వారి నుంచి అప్పులు తీసుకుని మరీ ఆడుతున్నారు. సరిహద్దు దాటితే ఓకే.. మహారాష్ట్రలో షరతులతో కూడిన అనుమతిచ్చిన క్లబ్బుల్లో రమ్మీ ఆడుకోవచ్చు. అయితే క్లబ్బుల్లోని సభ్యులకు మాత్రమే. అది కూడా ఎలాంటి ధన, ఇతర వస్తువుల రూపంలో బెట్టింగ్‌ లేకుండా ఆడుకోవచ్చు. దీనిని ఆసరా చేసుకుని స్పోర్ట్స్‌, ఇండోర్‌ గేమ్స్‌, సోషల్‌ క్లబుల పేరుతో అక్కడి వారి పేరుతో జిల్లా వాసులే అంతా నడిపిస్తున్నారు. తెలంగాణ సరిహద్దు దాటితే ఇక్కడి పోలీసులకు అధికారం ఉండదు. దీంతో ఆ రాష్ట్రంలో క్లబుల మాటున పెద్ద ఎత్తున పేకాట దందా సాగిస్తున్నారు. గతంలో ఆసిఫాబాద్‌ జిల్లా పోలీసులు సరిహద్దు గ్రామాలైన గోయగాం, సిర్పూర్‌(టీ) వైపు పెన్‌గంగా వద్ద చెకింగ్‌లతో కొంత మేర తగ్గింది. ప్రస్తుతం ఎలాంటి చెకింగ్‌లు లేకపోవడంతో విచ్చలవిడిగా జూదం సాగుతోంది. అక్కడి ప్రభుత్వం ఈ క్లబ్‌లపై పకడ్బందీ నిఘా పెడితే తప్ప జూదం నిలిచే అవకాశాలు లేవు.ఆడేది.. ఆడించేది జిల్లా వాసులే..పేకాట వ్యసనంగా మారిన అనేక మంది నిర్వాహకులుగా మారి క్లబ్‌లు నిర్వహిస్తున్నారు. గోదావరిఖని ఏన్టీపీసీకి చెందిన ఓ వ్యక్తి అనేక సార్లు కేసుల పాలైనప్పటికీ ఈ దందా వదలడం లేదు. వీరే కాకుండా మంచిర్యాల జిల్లా కేంద్రానికి చెందిన ఓ వడ్డీ వ్యాపారి, స్థానిక సంస్థల ప్రజాప్రతినిధులు, ఉద్యోగులు ఈ వ్యసనానికి బానిసలయ్యారు. మళ్లీ వీరే రూ.లక్షలు పెట్టి క్లబ్‌లు నిర్వహిస్తున్నారు. జిల్లా కేంద్రానికి చెందిన కొందరు దేగ్లూర్‌లో క్లబ్‌ నడిపేందుకు ఒక్కొక్కరు రూ.లక్షల కొద్దీ డబ్బులు కుమ్మరించారు. అంతకుముందు పోడ్స, రాజురా పరిసర ప్రాంతాల్లోని క్లబ్‌ల్లో జిల్లాకు చెందిన వారే వాటాదారులుగా ఉన్నారు.

మంచిర్యాలటౌన్‌: కాంగ్రెస్‌ పార్టీ కోసం కష్టపడ్డ వారికి మంచి జరుగుతుందని, మంచిర్యాల ఎమ్మె ల్యే కొక్కిరాల ప్రేమ్‌సాగర్‌రావు(పీఎస్సార్‌) పార్టీ అధికారంలో లేకున్నా, పార్టీ కోసం ఎంతగానో కష్టపడ్డారని రాష్ట్ర ఐటీ శాఖ మంత్రి దుద్దిళ్ల శ్రీధర్‌బాబు అన్నారు. అందరిలోనూ ఎమ్మెల్యేకు మంచి స్థానం లభించాలనే కోరిక ఉందని, అది నెరవేరుతుందనే ఆశాభావం వ్యక్తం చేశారు. మంచిర్యాల ఎమ్మెల్యే కే.ప్రేమ్‌సాగర్‌రావు జన్మదిన వేడుకలను సోమవారం జిల్లా కేంద్రంలోని ఓ ఫంక్షన్‌ హాలులో ఘనంగా నిర్వహించారు. భారీ ఎత్తున మోటారుసైకిళ్లు, కార్ల ర్యాలీతో సభాస్థలికి చేరుకున్నారు. గజమాల వేసి ఎమ్మెల్యేను సత్కరించారు. అనంతరం మంత్రులు శ్రీధర్‌బాబు, అడ్లూరి లక్ష్మణ్‌కుమార్‌, ప్రభుత్వ విప్‌ విజయరమణరావుతో కలిసి కేక్‌ కట్‌ చేశారు. మంత్రి శ్రీధర్‌బాబు మాట్లాడుతూ మంచిర్యాలను రాష్ట్రంలోనే అభివృద్ధి దిశగా తీసుకెళ్తున్నారని అన్నారు. ప్రజల కోసం చేస్తున్న శ్రమ అంతా ఇంతా కాదని, కాంగ్రెస్‌ పార్టీ బలోపేతం కోసం ఎంతగానో కృషి చేశారని అన్నారు. దమ్ముంటే మీటింగ్‌ నిర్వహించండి.. కాంగ్రెస్‌ పార్టీ కోసం ఎక్కడైనా దళితులు ఎంత మందితోనైనా తాను మీటింగ్‌ను ఒక్క రూపాయి తీ సుకోకుండా నిర్వహిస్తానని, దమ్ముంటే మీరు తనకంటే ఎక్కువమంది దళితులతో మీటింగ్‌ నిర్వహించి చూపాలని ఎమ్మెల్యే కే.ప్రేమ్‌సాగర్‌రావు పరోక్షంగా మంత్రి వివేక్‌కు సవాల్‌ విసిరారు. తాను మీటింగ్‌ నిర్వహించలేకుంటే రాజీనామా చేస్తానని అన్నారు. ప్రతిపక్షంలో ఉన్నప్పుడు కాంగ్రెస్‌ పార్టీ కోసం కష్టపడ్డానని, పార్లమెంట్‌ ఎన్నికల్లో తామంతా మద్దతుగా నిలిస్తే, తాను అనారోగ్యంతో ఉన్న సమయంలో తనను కొందరు మానసిక క్షోభకు గురి చేస్తున్నారని అన్నారు. మంచిర్యాలలో గంజా యి బ్యాచ్‌లకు తావులేదని, తమ కార్యకర్తల చీమలదండు కదిలిందని, గంజాయి బ్యాచ్‌ల సంగతి చూసుకుంటారని అన్నారు. గంజాయి బ్యాచ్‌లను విడిచేది లేదని, ఇక్కడ పార్టీ మాత్రమే ముఖ్యమని అన్నారు. దళితులను అణగదొక్కిన వారు దళితుల తరుఫున మాట్లాడుతున్నారని, దళితులకు సమన్యాయం చేసింది తానేనని అన్నారు. కొందరు అధికారులు కూడా తమ కార్యకర్తలను ఇబ్బందులకు గురి చేయాలని చూస్తున్నారని తెలిపారు. భారీ ర్యాలీ శ్రీరాంపూర్‌: ఎమ్మెల్యే కొక్కిరాల ప్రేంసాగర్‌రావు జన్మదినాన్ని పురస్కరించుకొని శ్రీరాంపూర్‌ జీఎం కార్యాలయం నుంచి భారీ మోటార్‌ సైకిల్‌ ర్యాలీ నిర్వహించారు. జీఎం కార్యాలయం వద్ద మంత్రులు దుదిళ్ల శ్రీధర్‌బాబు, అడ్లూరి లక్ష్మణ్‌, ప్రభుత్వ విప్‌, పెద్దపల్లి ఎమ్మెల్యే విజయరమణారావులకు ప్రేంసాగర్‌రావు స్వాగతం పలికారు. అక్కడి నుంచి సీసీసీ కార్నర్‌ వరకు ర్యాలీ నిర్వహించారు. మంచిర్యాల అభివృద్ధికి కృషి మంత్రి శ్రీధర్‌బాబు మాట్లాడుతూ ప్రేంసాగర్‌రావు మంచిర్యాలలో అనేక అభివృద్ధి పనులు చేపట్టారన్నారు. ఆసుపత్రి నిర్మాణం, మెడికల్‌ కాలేజీ, స్కూల్స్‌ వంటి అనేక అభివృద్ధి పనులు చేస్తున్నారని అన్నారు. అనంతరం టాప్‌లెస్‌ జీపులో మంచిర్యాల వరకు ర్యాలీగా చేరుకున్నారు. పెద్దయెత్తున కార్మికులు, పార్టీ శ్రేణులు ఈ ర్యాలీలో పాల్గొన్నారు. ఈ కార్యక్రమంలో తుడా మాజీ చైర్మన్‌ కోమటిరెడ్డి నరేందర్‌రెడ్డి, మాజీ ఎమ్మెల్యే ఆరెపల్లి మోహన్‌, మంచిర్యాల నగర మేయర్‌ ధర్ని మధూకర్‌, డిప్యూటీ మేయర్‌ చల్లా రమ్య, కాంగ్రెస్‌ పార్టీ కార్పొరేషన్‌ అధ్యక్షుడు తూముల నరేశ్‌, పీసీసీ నాయకులు చిట్ల సత్యనారాయణ, ఏఎంసీ చైర్మన్‌ బానేశ్‌, కార్పొరేటర్లు రాచకొండ గోపాల్‌రావు, ఖాలిద్‌, బండారి సుధాకర్‌, రవీందర్‌ పాల్గొన్నారు.

మంచిర్యాలఅర్బన్‌: ప్రభుత్వ జూనియర్‌ కళాశాలల్లో విద్యార్థుల సంక్షేమం కోసం అల్పాహారం ప్రవేశపెట్టిన ప్రభుత్వం మధ్యాహ్న భోజన పథకాన్నీ అమలు చేస్తోంది. విదార్థులకు ఆకలి బాధలు లేకుండా, పౌష్టికాహార లోపం తగ్గించడమే ధ్యేయంగా ప్రవేశపెట్టింది. రోజూ రుచికర, శుభ్రమైన భోజనం వడ్డిస్తున్నారు. హరేకృష్ణ మూవ్‌మెంట్‌ చారిటబుల్‌ ఫౌండేషన్‌ పర్యవేక్షణలో మొదటి దఫాలో మంచిర్యాల నియోజకవర్గం దండేపల్లి, లక్సెట్టిపేట, మంచిర్యాల కళాశాలల్లో అల్పాహారం అందజేస్తుండగా.. వారం రోజుల క్రితం నుంచి మధ్యాహ్న భోజనం వడ్డిస్తున్నారు. విడతల వారీగా.. జిల్లాలోని పది ప్రభుత్వ జూనియర్‌ కళాశాలల్లో 4,664 మంది విద్యార్థులు ఉన్నారు. మొదటి విడతలో మూడు కళాశాలల్లో అమలు చేస్తుండగా రెండో విడత చెన్నూర్‌ నియోజకవర్గంలోని జైపూర్‌, చెన్నూ ర్‌ కళాశాలల్లో మంగళవారం నుంచి మధ్యాహ్న భోజనం అమల్లోకి రానుంది. అల్పాహారంలో సాంబార్‌ ఇడ్లీ, ఉప్మా, పూరి, బోండాలు అందిస్తున్నారు. మధ్యాహ్న భోజనంలో కర్రీ, పప్పు, రైస్‌ అందిస్తున్నారు. పరీక్షల సమయాల్లో అధ్యాపకులు, స్వచ్ఛంద సంస్థలు మధ్యాహ్న భోజనం అందించగా.. ప్రస్తుతం ప్రభుత్వమే అమలు చేస్తోంది.

మంచిర్యాలఅగ్రికల్చర్‌: జిల్లాలో రోడ్డు ప్రమాదాల నివారణకు అధికారులు పటిష్టమైన చర్యలు చేపట్టాలని జిల్లా కలెక్టర్‌ కుమార్‌ దీపక్‌ అన్నారు. సోమవారం కలెక్టరేట్‌లో డీసీపీ ఏ.భాస్కర్‌, జిల్లా అదనపు కలెక్టర్‌ పి.చంద్రయ్య, జిల్లా అటవీ అధికారి రాహుల్‌ కిషన్‌ జాదవ్‌, బెల్లంపల్లి సబ్‌ కలెక్టర్‌ మనోజ్‌తో కలిసి రహదారి భద్రత సమావేశానికి హాజరయ్యారు. కలెక్టర్‌ మాట్లాడుతూ మున్సిపల్‌ పరిధిలో స్పీడ్‌ బ్రేకర్లు, ఇతర రోడ్డు భద్రత సూచికలు ఏర్పాటు చేయాలన్నారు. రోడ్లపై చెత్త, ఆటంకాలను తొలగించాలని, అనధికార వాహన నిలుపుదల, నిబంధనల ఉల్లంఘనపై కఠిన చర్యలు తీసుకోవాలని తెలిపారు. డీసీపీ భాస్కర్‌ మాట్లాడుతూ జిల్లాలో ఈ ఏడాది ఇప్పటివరకు 429 ప్రమాదాలు జరిగాయని, 95 మంది మృతిచెందారని అన్నారు. మాదకద్రవ్యాల నియంత్రణపై సమీక్ష మాదకద్రవ్యాల నియంత్రణపై సమీక్షలో కలెక్టర్‌ కుమార్‌ దీపక్‌ మాట్లాడుతూ జిల్లాలో ఈ ఏడాది 63 కేసులు నమోదు చేశామని, ఇందులో 133 మందిని అరెస్టు చేసి 35 మందిని డ్రగ్‌ డి–అడిక్షన్‌ కేంద్రాలకు తరలించి కౌన్సెలింగ్‌ ఇచ్చామని తెలిపారు. విద్యాసంస్థలకు 100 మీటర్ల పరిధిలో బెల్ట్‌షాపులు, పొగాకు ఉత్పత్తుల విక్రయం నిషేధించామని, ఆ దిశగా అధికారులు చర్యలు తీసుకోవాలని సూచించారు. ఈ సమావేశంలో ట్రైనీ డిప్యూటీ కలెక్టర్‌ విలాయత్‌ అలీ పాల్గొన్నారు.

మంచిర్యాలక్రైం: బాధితుల సమస్యల సత్వర పరిష్కారం కోసమే ప్రజా ఫిర్యాదుల విభాగం చేపడుతున్నట్లు రామగుండం పోలీస్‌ కమిషనర్‌ అంబర్‌ కిషోర్‌ ఝా తెలిపారు. కమిషనరేట్‌ ఆవరణలో సోమవారం నిర్వహించిన ప్రజావాణిలో మంచిర్యాల, పెద్దపల్లి జిల్లాల నుంచి వచ్చిన బాధితుల నుంచి ఫిర్యాదులు స్వీకరించారు. పోలీస్‌స్టేషన్ల ఎస్‌హెచ్‌వోలతో మాట్లాడి చట్ట పరిధిలో సమస్యలు పరిష్కరించాలని ఆదేశించారు. అదనపు డీసీపీ శ్రీనివాస్‌, సిబ్బంది పాల్గొన్నారు. వినాయక నిమజ్జనంపై సమీక్ష మంచిర్యాల, పెద్దపల్లి జిల్లాల్లో వినాయక నిమజ్జన శోభాయాత్ర ఏర్పాట్లపై వివిధ శాఖల అధికారులతో సీపీ అంబర్‌ కిషోర్‌ ఝా సమీక్షించారు. శాంతియుతంగా నిమజ్జనం, శోభాయాత్ర జరిగే విధంగా కృషి చేయాలని అన్నారు. రక్షణ సిబ్బంది, గజ ఈతగాళ్లు, రెస్క్యూ బృందాలు ఉంచాలని తెలిపా రు. ఈ కార్యక్రమంలో అదనపు డీసీపీ శ్రీనివాస్‌, ఆర్‌జీ 1 జీఎం లలిత్‌కుమార్‌, ఎస్‌బీ ఏసీపీ నాగేంద్రగౌడ్‌, గోదావరిఖని ఏసీపీ రమేష్‌, జైపూర్‌ ఏసీపీ వెంకటేశ్వర్లు, సీఐలు, ఎస్సైలు పాల్గొన్నారు.

జన్నారం: అడవులు అభివృద్ధి జరిగితే ఈ ప్రాంత ప్రజలకు ఉపాధి అవకాశాలు మెరుగవుతాయని జన్నారం ఎఫ్‌డీవో రామ్మోహన్‌ అన్నారు. సొమవారం సాయంత్రం ఎఫ్‌డీవో కార్యాలయంలో ఆయన విలేకరులతో మాట్లాడారు. టైగర్‌జోన్‌ వల్ల అడవులు, వివిధ రకాల వన్యప్రాణులను సంరక్షించవచ్చని తెలిపారు. జీవ వైవిధ్యం పెరుగుతుందని, తడోబా, అందేరీ, తిప్పేశ్వర్‌ వలే ఇక్కడ కూడా పర్యాటక రంగం అభివృద్ధి చెందుతుందని తెలిపారు. టైగర్‌ రిజర్వ్‌ కోర్‌ ప్రాంతం చుట్టూ ఏర్పాటు చేసిన ఎకో సెన్సిటివ్‌ జోన్‌ ప్రజలను ఇబ్బందులు పెట్టే నిర్ణయం కాదని, వన్యప్రాణులు, పర్యావరణ హాని కారక కార్యకలాపాల నియంత్రించవచ్చని అన్నారు. స్థానిక ప్రజల జీవనో పాధి, అవసరాల దృష్ట్యా ఎకో సెన్సిటివ్‌ జోన్‌ పరిధిని ఒక కిలోమీటర్‌కు తగ్గిస్తూ ప్రభుత్వానికి ప్రతిపాదనలు పంపించామని తెలిపారు.

మంచిర్యాలఅర్బన్‌: జిల్లా కేంద్రంలోని ఓ పంక్షన్‌హాల్‌లో సాహితీ సంరక్షణ సమితి ఆధ్వర్యంలో సుబ్బాయమ్మ రచించిన ప్రసంగ చంద్రిక పుస్తకాన్ని ఆదివారం ఆవిష్కరించారు. ఈ సందర్భంగా కవులు మాట్లాడుతూ.. గతంలో ఏడు పుస్తకాలు రచించిన సుబ్బాయమ్మ నూత న గ్రంథంలో 13 ముఖ్యమైన అంశాలతో ఆషా ఢ, శ్రావణ మాసాల విశిష్టత, పండుగల ప్రాశస్త్యాన్ని సమగ్రంగా వివరించారని పేర్కొన్నా రు. ఈ సందర్భంగా సుబ్బాయమ్మను సన్మానించారు. శతావధాని, చెన్నూర్‌ ప్రభుత్వ డిగ్రీ కళాశాల ప్రిన్సిపాల్‌ వెంకటరమణ పట్వర్థన్‌ అధ్యక్షతన జరిగిన కార్యక్రమంలో ఆదిలాబాద్‌ ఆకాశవాణి విశ్రాంత సంచాలకుడు సుమనస్పతీరెడ్డి, ప్రస్తుత సంచాలకుడు రామేశ్వర్‌, ఆకాశవాణి ఆదిలాబాద్‌ కేంద్రం వ్యాఖ్యాత కట్ట లెని న్‌, సాహితీ సంరక్షణ సమితి అధ్యక్షుడు వామ న్‌రావు, ప్రధాన కార్యదర్శి అల్లాడి శ్రీనివాస్‌, మహిళా కార్యదర్శి శ్రీలక్ష్మి, పుస్తక సమీక్షకులు నోముల చంద్రశేఖర్‌, జ్యోత్స్న, వెంకటకిషన్‌, లక్ష్మణ్‌, బ్రహ్మయ్యచార్య తదితరులున్నారు.

బెల్లంపల్లి: బెల్లంపల్లి తిలక్‌ స్టేడియంలో ఆదివారం తిలక్‌ వాకర్స్‌ అసోసియేషన్‌ ఆధ్వర్యంలో మాస్టర్‌ అథ్లెటిక్‌ పోటీలు నిర్వహించారు. బెల్లంపల్లి రూరల్‌ సీఐ హనోక్‌, రిటైర్డ్‌ అడిషనల్‌ ఎస్పీ రవికుమార్‌, వన్‌టౌన్‌ ఎస్సై రామకృష్ణ జెండా ఊపి పోటీలను ప్రారంభించారు. స్పీడ్‌ వాక్‌, రన్నింగ్‌, షాట్‌పుట్‌, టగ్‌ అఫ్‌ వార్‌ తదితర పోటీలు నిర్వహించి విజేతలకు బహుమతులు అందజేశారు. సీనియర్‌ క్రీడాకారులు యాదండ్ల నర్సయ్య, తోట పోచన్న, మాదాసి గోపాల్‌, గో వర్ధన్‌ను సన్మానించారు. కార్యక్రమంలో పీడీలు రాజ్‌ మహ్మ ద్‌, బండి రవి, చాంద్‌పాషా, వాకర్స్‌ అసోసియేషన్‌ అధ్యక్షుడు రంగ రామన్న, ప్రధాన కార్యదర్శి కంటేవాడ నగేశ్‌, కోశాధికారి కజ్జం రమేశ్‌ తదితరులు పాల్గొన్నారు.

రామకృష్ణాపూర్‌: క్యాతనపల్లి మున్సిపాలిటీ వి వాదాలకు కేరాఫ్‌ అడ్రస్‌గా మారింది. తాజాగా ఓ వ్యవసాయ భూమిలో షెడ్డు నిర్మాణానికి సంబంధించిన వ్యవహారం ఇందుకు మరింత ఆ జ్యం పోస్తోంది. ఆరోవార్డులోని 34వ సర్వే నంబర్‌లో తన రెండెకరాల వ్యవసాయ భూమిలో వాచ్‌మెన్‌ కోసం షెడ్‌ నిర్మిస్తుండగా మున్సిపల్‌ సిబ్బంది అడ్డుకున్నారని తూటి సతీశ్‌కుమార్‌ ఆరోపించారు. కమిషనర్‌ను కలిసి సమస్య వివరిస్తే.. ‘బిల్డర్స్‌ అసోసియేషన్‌ వారిని కలవండి’ అని సూచించినట్లు చెబుతున్నారు. ఈ క్రమంలో సిబ్బంది తనను సెల్‌ఫోన్‌ బయటపెట్టి లోపలికి రావాలని ఉచిత సలహా ఇచ్చారని ఆరోపించారు. కమిషనర్‌ సూచన మేరకు అసోసియేషన్‌ కు సంబంధించిన ఓ కౌన్సిలర్‌ను కలవగా రూ.లక్ష డిమాండ్‌ చేశారని, ఇందులో రూ.50వేలు ఫోన్‌ పే ద్వారా చెల్లించానని ఆరోపిస్తున్నా రు. ఇందుకు ఆధారాలున్నట్లు చెబుతున్నారు. సిబ్బందిలోనూ అసంతృప్తి? మున్సిపాలిటీలో పనిచేస్తున్న అధికారులు, సి బ్బందితో కమిషనర్‌ వ్యవహారంపై పలువురు సి బ్బంది అసంతృప్తి వ్యక్తంజేస్తున్నట్లు తెలిసింది. పనులు అప్పగించే విధానంలో ఇష్టారీతిన వ్యవహరించటం, సమయపాలనకు సంబంధం లే కుండా పనులు చేయించుకోవటం, భోజన విరా మ సమయాల్లోనూ ఇబ్బందులకు గురిచేస్తున్నారనే ఆరోపణలు అతడిపై ఉన్నట్లు తెలుస్తోంది. మంత్రికి తలనొప్పిగా అధికారుల తీరు? క్యాతనపల్లి మున్సిపల్‌ అధికారుల వ్యవహారశైలిపై వరుసగా ఆరోపణలు, విమర్శలు రావటం రాష్ట్ర కార్మిక శాఖ మంత్రి గడ్డం వివేక్‌ వెంకటస్వామికి తలనొప్పిగా మారింది. గతంలో చెన్నూర్‌ మున్సిపల్‌ కమిషనర్‌గా పనిచేసిన మురళీకృష్ణపై అక్కడ ఆరోపణలు వచ్చిన నేపథ్యంలో ఆయనను బదిలీ చేయగా తిరిగి క్యాతనపల్లికి రావటం.. ఇక్కడా అదే తరహా ఆరోపణలు రావడం చర్చనీయాంశమైంది. పీస్‌ కమిటీ సమావేశంలోనే విమర్శలు మరోవైపు గణేశ్‌ నవరాత్రోత్సవాల సందర్భంగా పారిశుద్ధ్య పనుల్లో కొన్ని వార్డులకే ప్రాధాన్యం ఇస్తూ మరికొన్ని వార్డులను పట్టించుకోవటం లేదని ఇటీవల జరిగిన పీస్‌ కమిటీ సమావేశంలోనూ కమిషనర్‌ తీరుపై బహిరంగ విమర్శలు వచ్చాయి. సతీశ్‌కుమార్‌ కమిషనర్‌పై చేసిన ఆరోపణలు సోషల్‌మీడియాలో తీవ్ర చర్చకు దారితీసిన నేపథ్యంలో జిల్లా ఉన్నతాధికారులు ఎలా స్పందిస్తారో వేచి చూడాలి. ఈ వ్యవహారంలో మరి ఉన్నతాధికారులు, మంత్రి ఎలా స్పందిస్తారో వేచిచూడాలి. బద్నామ్‌ చేయాలనే..నాపై చేస్తున్న ఆరోపణల్లో వాస్తవం లేదు. సెల్‌ఫోన్‌ బయటపెట్టి కార్యాలయంలోకి రావాలని నేను ఎన్నడూ ఎవరితోనూ చెప్పలేదు. బిల్డర్స్‌ అసోసియేషన్‌ వాళ్ల దగ్గరకు వెళ్లాలని కూడా అనలేదు. ఏదో రకంగా నన్ను బద్నామ్‌ చేయాలని ప్రయత్నిస్తున్నారు. – మురళీకృష్ణ, మున్సిపల్‌ కమిషనర్‌

మంచిర్యాలఅర్బన్‌: స్కూల్‌ గేమ్‌ ఫెడరేషన్‌ ఆధ్వర్యంలో ఆదివారం జిల్లా కేంద్రంలోని ట్రినిటి హై స్కూల్‌లో నిర్వహించిన అండర్‌–17 బాలబాలికల జిల్లాస్థాయి క్రికెట్‌ ఎంపిక పోటీలు ఉత్సాహంగా సాగాయి. జిల్లా నలుమూలల నుంచి 180మంది క్రీ డాకారులు పాల్గొన్నారు. మంచిర్యాల నగరపాలక సంస్థ డిప్యూటీ మేయర్‌ సల్ల రమ్య క్రీడాకారులను పరిచయం చేసుకుని పోటీలు ప్రారంభించారు. కా ర్యక్రమంలో కార్పొరేటర్‌ స్వరూప, ఎస్‌జీఎఫ్‌ జిల్లా సెక్రటరీ ఎండీ యాకుబ్‌, సీనియర్‌ పీడీ గోపాల్‌, నిర్వాహక కార్యదర్శులు రవి, రవీందర్‌, సౌమిత్‌, పీఈటీలు శ్రీనివాస్‌రెడ్డి, సంతోష్‌, శ్రీనివాస్‌, విజయ్‌, జ్యోతి తదితరులు పాల్గొన్నారు. రాష్ట్రస్థాయి పోటీలకు ఎంపిక బెల్లంపల్లి: బెల్లంపల్లిలోని ప్రభుత్వ మైనార్టీ బాలిక ల గురుకుల పాఠశాల, కళాశాల విద్యార్థులు రాష్ట్రస్థాయి పోటీలకు ఎంపికయ్యారు. ఈనెల 19వ తేదీ న మంచిర్యాల జిల్లా కేంద్రంలో జిల్లాస్థాయి క్రీడా పోటీలు నిర్వహించగా తొమ్మిదో తరగతి విద్యార్థిని సాయిప్రీతి లాంగ్‌జంప్‌లో ప్రథమ, ఇంటర్‌ సెకండియర్‌ విద్యార్థిని అసిఫాఉన్నీసా షాట్‌పుట్‌లో ప్రథ మ బహుమతులు సాధించారు. వీరు రాష్ట్రస్థాయి పోటీలకు ఎంపికయ్యారు. వీరిని ప్రిన్సిపాల్‌ షగు ఫ్తా ఫిర్దౌస్‌, అధ్యాపకులు, ఉపాధ్యాయులు, సిబ్బంది అభినందించారు. విద్యార్థినులు రాష్ట్రస్థాయి పో టీల్లోనూ విజయం సాధించాలని ఆకాంక్షించారు.

మంచిర్యాలటౌన్‌: సేవా భారతి ఆధ్వర్యంలో ఆదివారం జిల్లా కేంద్రంలోని ఐబీ చౌరస్తాలో 5కే, 10కే రన్‌ను సేవాభారతి సభ్యుడు, బీజేపీ రాష్ట్ర ఉపాధ్యక్షుడు రఘునాథ్‌ వెరబెల్లి, జిల్లా అధ్యక్షుడు నగునూరి వెంకటేశ్వర్‌ ప్రారంభించారు. 1,200 మందికి పైగా యువతీయువకులు, మహిళలు, వాకర్స్‌, రన్నర్స్‌, వైద్యులు, ఉద్యోగులు ఉత్సాహంగా పాల్గొన్నారు. ఈ సందర్భంగా రఘునాథ్‌ మాట్లాడారు. ఫిట్‌ ఇండియాలో భాగంగా ‘ఫిట్‌ మంచిర్యాల’ నినాదంతో ప్రతి ఒక్కరూ ఆరోగ్యంగా ఉండడానికి నిత్యం ఫిట్‌నెస్‌ సాధన చేయాలనే ఉద్దేశంతో రన్‌ నిర్వహించినట్లు తెలిపారు. ఈ సందర్భంగా విజేతలకు బహుమతులు అందజేశారు. కార్యక్రమంలో ఏకలవ్య ఆశ్రమ అధ్యక్షుడు ఓడ్నాల లక్ష్మీనారాయణ, బీజేపీ మున్సిపల్‌ ఫ్లోర్‌ లీడర్‌ గాజుల ముఖేశ్‌గౌడ్‌, కార్పొరేటర్‌ కస్తూరి నాగరాజు, మాజీ కౌన్సిలర్‌ బొట్ల సత్యం, రాజ్‌కుమార్‌, శ్రీశైలం, రమేశ్‌, చక్రవర్తి, సతీశ్‌రావు, బాపు, అశోక్‌వర్ధన్‌, ప్రేమ్‌సింగ్‌, స్వప్నారాణి, ప్రవీణ్‌, శ్రీనివాస్‌ తదితరులు పాల్గొన్నారు.

చెన్నూర్‌: ప్రజా పోరాటాలతో నిజాం సర్కార్‌ కూలి తె లంగాణకు విముక్తి కలిగిందని సీపీఎం రాష్ట్ర కమిటీ సభ్యుడు పైళ్ల ఆశయ్య పే ర్కొన్నారు. చెన్నూర్‌లో ఆ దివారం నిర్వహించిన సీపీఎం సర్వసభ్య సమావేశానికి శ్యామల ఉమారాణి అధ్యక్షత వహించగా, ఆశయ్య హాజరై మాట్లాడారు. కార్యక్రమంలో జిల్లా కార్యదర్శి బోడెంకి చందు, కార్యవర్గ సభ్యులు ఎర్ర పున్నం, కోటపల్లి మండల కార్యదర్శి రవి, చెన్నూర్‌ మండల కమిటీ సభ్యులు కరీమా, సమ్మక్క తదితరులు పాల్గొన్నారు. ఈ సందర్భంగా చెన్నూర్‌ మండల కమిటీ కార్యదర్శిగా పుట్ట కృష్ణమాచారిని ఎన్నుకున్నారు.

బెల్లంపల్లి: కోల్‌బెల్ట్‌ ప్రాంత ప్రజలకు ప్రభుత్వం తీపి కబురు అందించింది. బొగ్గు గని కార్మికులు, కార్మికేతరుల దశాబ్దాల నిరీక్షణకు తెరదించుతూ ఇంటి స్థలాల క్రమబద్ధీకరణకు గ్రీన్‌ సిగ్నల్‌ ఇచ్చింది. జీవో 76 ప్రకారం 45రోజుల్లో ఇళ్ల పట్టాల సమస్యకు పరిష్కారం చూపుతామని రాష్ట్ర రెవెన్యూశాఖ మంత్రి పొంగులేటి శ్రీనివాసరెడ్డి ప్రకటించారు. ఇందుకు సంబంధించి రెవెన్యూశాఖ కార్యదర్శి లోకేశ్‌కుమార్‌ శనివారం ఉత్తర్వులు జారీ చేశారు. ఈ ప్రక్రియతో కోల్‌బెల్ట్‌ప్రాంత ప్రజల్లో ఆశలు చిగురించాయి. జిల్లాలో దాదాపు ఏడువేల ఇళ్ల దరఖాస్తులు ఈపాటికే పెండింగ్‌లో ఉన్నట్లు తెలుస్తోంది. ఇంకా వేలాదిమంది ఇళ్లు కట్టుకుని పట్టాల కోసం నిరీక్షిస్తున్నారు. బెల్లంపల్లి, మందమర్రి, శ్రీరాంపూర్‌, రామకృష్ణాపూర్‌ ప్రాంతాల్లో డీడీలు కట్టి ఏళ్లుగా పడిగాపులు కాస్తున్నారు. కాగా, ప్రభుత్వ నిర్ణయంతో సింగరేణి కంపెనీకి చెందిన లీజు భూముల్లో దశాబ్దాల క్రితం ఇళ్లు కట్టుకుని నివాసముంటున్న కార్మికులు, పేదలు, రిటైర్డ్‌ కార్మికులకు ప్రయోజనం కలగనుంది. అపరిష్కృతంగా ఉన్న ఇళ్ల పట్టాల పెండింగ్‌ దరఖాస్తులకు మోక్షం కలగనుండగా ఇటీవలి కాలంలో స్థిర నివాసాలు కట్టుకున్న ఇళ్లకూ పట్టాలు ఇవ్వాలనే డిమాండ్‌ వస్తోంది. వైఎస్సార్‌ తెచ్చిన జీవో ఆధారంగానే.. దివంగత ఉమ్మడి ఆంధ్రప్రదేశ్‌ ముఖ్యమంత్రి వైఎస్‌.రాజశేఖరరెడ్డి హయాంలో ఇళ్ల పట్టాల జారీకి ప్రత్యేకంగా జీవో 76 జారీ అయింది. దాని ఆధారంగా స్థిర నివాసాలు ఏ ర్పాటు చేసుకున్న ప్రజల కు ఇళ్ల పట్టాలు అందజేశారు. అయితే, రాష్ట్రాన్ని పదేళ్లు ఏలిన బీఆర్‌ఎస్‌ ప్రభుత్వం ఇళ్ల పట్టాలు పంపిణీ చేయడానికి సిద్ధపడినప్పటీకీ పూర్తిస్థాయిలో అమలు కాలేదు. ఎన్నికల నోటిఫికేషన్‌ జారీకి కొద్దిరోజుల ముందుగా ఇళ్ల పట్టాలు కొందరికి అందజేసినా ఇంకా అనేక మందికి పంపిణీ జరగలేదు. అప్పటికే ఎన్ని కల నోటిఫికేషన్‌ జారీ కావడం ఇతర ప్రతికూల పరిస్థితులు తోడు కావడంతో ఇళ్ల పట్టాల పంపిణీ అసంపూర్తిగా ఉండిపోయింది. ప్రస్తుత కాంగ్రెస్‌ ప్రభుత్వం కూడా వైఎస్సార్‌ తెచ్చిన జీవో 76ను అనుసరించి ఇళ్ల క్రమబద్ధీకరణ చేస్తామని క్లారిటీ ఇచ్చింది. అయితే, కోల్‌బెల్ట్‌ ప్రాంతంలోని భూము ల స్వభావం, ప్రభుత్వ, సింగరేణి హక్కులు, ప్రస్తు త నివాస పరిస్థితులు, హైకోర్టు ఆదేశాలు తదితర అంశాలను పరిగణనలోని తీసుకోనున్నారు.తుది నిర్ణయం త్రిసభ్య కమిటీదే..కార్మికులు, కార్మికేతరులకూ..సింగరేణి కార్మికులే కాకుండా కంపెనీ ఖాళీ స్థలాల్లో స్థిర నివాసాలు ఏర్పాటు చేసుకుని దశాబ్దాల నుంచి నివాసముంటున్న కార్మికేతరులకు ఇళ్ల పట్టాలు దక్కనున్నాయి. ముఖ్యంగా పేద, మధ్యతరగతి ప్రజలు, రిటైర్డ్‌ కార్మికులకు ప్రయోజనం కలగనుంది. ఇప్పటివరకు ఇళ్లపట్టాలు లేక కార్మికులు, కార్మికేతరులు అనేక ఇబ్బందులు పడుతున్నారు. ఇంటిపై యాజమాన్యపు హక్కు లేక బ్యాంక్‌ రుణాలు పొందడానికి, ఇళ్ల మరమ్మతులకు ఇక్కట్లు ఎదురవుతున్నాయి. రాష్ట్ర ప్రభుత్వ సానుకూల ప్రకటనతో ఇళ్లకు శాశ్వత పరిష్కారం లభించనుంది.ఇళ్ల పట్టాల సమస్య పరిష్కారానికి రాష్ట్ర ప్రభుత్వం త్రిసభ్య కమిటీ ఏర్పాటు చేయనుంది. ఇందులో కలెక్టర్‌ చైర్మన్‌గా, సింగరేణి కాలరీస్‌ కంపెనీ ప్రతినిధి, జిల్లా రిజిస్ట్రార్‌ సభ్యులుగా వ్యవహరిస్తారు. ఇళ్ల పట్టాల జారీకి విధి విధానాలను అనుసరించి ఈ కమిటీ తుది నిర్ణయం తీసుకోనుంది.45 రోజుల డెడ్‌లైన్‌ విధింపు సింగరేణి విస్తరించి ఉన్న ఖమ్మం, భద్రాద్రి కొత్తగూడెం, భూపాలపల్లి, కుమురంభీం ఆసిఫాబాద్‌, మంచిర్యాల, పెద్దపల్లి జిల్లాల పరిధిలో పెండింగ్‌లో ఉన్న ఇళ్ల పట్టాల దరఖాస్తులు, కొత్తగా నిర్మించిన ఇళ్లకు ఏర్పడిన పట్టాల అవరోధాలకు పరిష్కారం చూపనున్నారు. ఆ దరఖాస్తుల పరిశీలన పూర్తి చేయడానికి ప్రభుత్వం డెడ్‌లైన్‌ విధించింది. 45రోజుల వ్యవధిలో పరిష్కరిస్తామని ప్రకటించింది. మంచిర్యాల జిల్లా పరిధిలో శ్రీరాంపూర్‌, రామకృష్ణాపూర్‌, మందమర్రి, బెల్లంపల్లి ప్రాంతాల ప్రజల ఇళ్ల పట్టాలకు మార్గం సుగమం కానుంది. పట్టా జారీ చేసిన వెంటనే 22–ఏ నిషేధిత జాబితా నుంచి తొలగించి రిజిస్ట్రేషన్‌కు అవకాశం కల్పించనున్నట్లు తెలుస్తోంది.

మంచిర్యాలటౌన్‌: జిల్లాలోని వివిధ ప్రాంతాల నుంచి జిల్లా కేంద్రానికి వచ్చి చిరువ్యాపారాలు సాగిస్తున్న పలువురు వీధి వ్యాపారులు ఇబ్బందులు పడుతున్నారు. రోడ్లపైనే కూర్చుని విక్రయిస్తున్నారు. మున్సిపాలిటీ తరఫున వీధి విక్రయదారుల షెడ్లు నిర్మించినా, వాటిని సద్వినియోగం చేసుకోవడం లేదు. ఐదేళ్ల్ల క్రితం రూ.22లక్షల మున్సిపల్‌ నిధులతో ఐబీ చౌరస్తాలో, పాతమంచిర్యాల వాటర్‌ ట్యాంక్‌ ప్రహరీ వద్ద, ప్రభుత్వ ఐటీఐ ప్రహరీని ఆనుకుని వీధి విక్రయదారుల షెడ్లు నిర్మించారు. రూ.7.50 లక్షలతో ఐబీ చౌరస్తాలోని ఐబీ ప్రహరీని ఆనుకుని 25 దుకాణాలు, ప్రభుత్వ ఐటీఐ ప్రహరీని ఆనుకుని 15 షాపులు, పాతమంచిర్యాలలోని నీటి ట్యాంక్‌ ప్రహరీ వద్ద 15 షాపులు వచ్చేలా రూ.22 లక్షలతో నిర్మాణాలు చేపట్టారు. వీటి నిర్మాణం పూర్తయి ఐదేళ్లయినా ఇప్పటికీ నిరుపయోగంగానే ఉంచడంతో అవి ఎందుకు పనికిరాకుండా పోతున్నాయి. తప్పని ట్రాఫిక్‌ ఇబ్బందులు జిల్లాలోని పలు ప్రాంతాల నుంచి నిత్యం పండ్లు, కూరగా యలు, పూలు, మక్క కంకులు, వివిధ రకాల సరుకులు, వస్తువులు, తోపుడు బండ్లు, గంపల్లో పెట్టుకుని వీధి వ్యా పారులు ఎండ, వాన తేడా లేకుండా రోడ్లపైనే నిత్యం అ మ్మకాలు జరుపుతున్నారు. ఓవైపు ఎండ, వానకు ఇబ్బందులు పడుతుంటే, ట్రాఫిక్‌ ఇబ్బందులు కలగకుండా వారిని ఒకచోట నుంచి మరో చోటకు పోలీసులు తరలించడంతో ఇబ్బందుల మధ్య వ్యాపారాలు కొనసాగిస్తున్నారు. వర్షం పడితే పక్కనే తలదాచుకుంటూ తగ్గిన తర్వాత మళ్లీ రోడ్లపైకి వచ్చి అమ్ముకుని వెళ్తున్నారు. నగరపాలక సంస్థ ఆధ్వర్యంలో వీధి వ్యాపారుల కోసం నిర్మించిన షెడ్లు ఎవరికీ కే టాయించక పోవడం, ఆ దిశగా కనీస ప్రయత్నాలు కూడా చేయకపోవడంతో రాత్రి సమయాల్లో అవి మందుబాబుల కు అడ్డాలుగా మారుతున్నాయి. వీధి వ్యాపారులందరికీ షె డ్లు ఇవ్వడం సాధ్యం కాకపోయినా, కొన్ని ప్రాంతాల్లోని వా రికి ఇవి అందించి, వారు రోడ్లపై ఇబ్బందులు పడకుండా చూసే అవకాశముంది. ఈ షెడ్లను అవసరమైన వారికి అందించి, రోడ్లపైన క్రయవిక్రయాలు జరగకుండా చూడాల్సిన బాధ్యత ము న్సిపల్‌ అధికారులదే. కానీ, రోడ్లపైనే విక్రయాలు జరుగుతున్నా పట్టించుకోవడం లేదు. వీధి వ్యాపారులు షెడ్లలోకి వెళ్తే మాత్రం జిల్లా కేంద్రంలో ట్రాఫిక్‌ సమస్య తీరేందుకు అవకాశముంది. ముఖ్యమైన కూడలిగా ఉన్న ఐబీ చౌరస్తాలో నిత్యం ట్రాఫిక్‌ సమస్య ఉంటుంది. ఇక్కడ షెడ్లున్నా, వీధి వ్యాపారులు రోడ్లపైనే కూర్చుని అమ్మకాలు చేస్తున్నారు. పట్టణ ప్రగతి, సుందరీకరణలో భాగంగా నిర్మించిన షెడ్ల కోసం ఖర్చు చేసిన నిధులు వృథా అవుతుండగా, షెడ్లు వినియోగంలో లేకపోవడంతో అవి శిథిలావస్థకు చేరి, మందుబాబులకు అడ్డాగా మారే అవకాశముంది.వ్యాపారులు ఆసక్తి చూపించకనే..వీధి వ్యాపారులు రోడ్లపై విక్రయాలు జరపకుండా ఉండేందుకు మూడుచోట్ల షెడ్లు నిర్మించగా, వీధి వ్యాపారులు వీటిలోకి రావడానికి ఆసక్తి చూపించడం లేదు. దీంతో అవి నిరుపయోగమయ్యాయి. షెడ్లను వినియోగంలోకి తీసుకువచ్చేందుకు చర్యలు తీసుకుంటాం. – అన్వేశ్‌, మంచిర్యాల నగర కమిషనర్‌

జిల్లాలో స్కానింగ్‌ కేంద్రాలు నిబంధనలు పాటిస్తున్నాయా లేదా అనే అంశాలతోపాటు లింగ నిర్ధారణ పరీక్షలు చేస్తున్నాయా అని తెలుసుకునేందుకు, స్కానింగ్‌ కేంద్రాల పరిశీలనకు జిల్లా వైద్య, ఆరోగ్య శాఖ ఆధ్వర్యంలో ప్రోగ్రాం ఆఫీసర్‌తోపాటు ఐదుగురు పారామెడికల్‌ అధికారులతో కమిటీ వేసి ఐదు బృందాలు ఏర్పాటు చేశారు. జిల్లాలోని ప్రభుత్వ ఆస్పత్రుల్లో 4, ప్రైవేటు ఆస్పత్రుల్లో 51 స్కానింగ్‌ కేంద్రాలు ఉన్నాయి. కమిటీ సభ్యులు ఆయా కేంద్రాల్లో రిజిష్టర్ల నిర్వహణ, లింగనిర్ధారణ వంటివి పరిశీలిస్తున్నా కొన్ని నిబంధనలను యథేచ్ఛగా ఉల్లంఘిస్తున్నాయి. గతంలో మహారాష్ట్రకు వెళ్లి లింగనిర్ధారణ పరీక్షలు చేయించుకుని అబార్షన్లు చేసుకున్నారు. ప్రస్తుతం జిల్లాలోనే లింగనిర్ధారణ పరీక్షలు, అబార్షన్లు చేస్తున్నట్లు బయటకు రావడం ఆందోళన కలిగిస్తోంది.

బెల్లంపల్లి: బెల్లంపల్లి మున్సిపాలిటీ పరిధిలో ని ప్రభుత్వ పాఠశాలల్లో శనివారం నో బ్యాగ్‌ డే సందర్భంగా విదార్థులు ఉత్సాహంగా గడిపారు. బ్యాగు లేకుండానే హాజరైన విద్యార్థులు తరగతి గదుల్లో హాజరు తర్వాత పేరెంట్స్‌, టీచర్‌ మీటింగ్‌ నిర్వహించారు. విద్యార్థుల అభిరుచులకు అనుగుణంగా బెల్లంపల్లి బజారు ఏరియా ఉన్నత పాఠశాలలో ఏకపాత్రాభినయం, వ్యాసరచన, ఉపన్యాస పోటీలు, అంత్యాక్షరి నిర్వహించారు. కొందరు తబలా, కీబోర్డు వాయించి, పాటలు పాడి అలరించారు. జానపద, దేశభక్తి గీతాలపై నృత్యాలు చేశారు. దైనందిన చర్యకు భిన్నంగా విద్యార్థులు ఉల్లాసంగా, ఉత్సాహంగా నో బ్యాగ్‌ డేలో పాల్గొన్నారు. ఒకట్రెండు పాఠశాలల్లో నో బ్యాగ్‌ డే నిర్వహించలేదు.

బెల్లంపల్లి: పాలిటెక్నిక్‌ కళాశాలలను యంగ్‌ ఇండియా స్కిల్‌ యూనివర్సిటీ(వైఐఎస్‌యూ)లో విలీనం చేయొద్దని డిమాండ్‌ చేస్తూ బెల్లంపల్లి ప్రభుత్వ పాలిటెక్నిక్‌ కళాశాల విద్యార్థులు శనివారం నిరసన వ్యక్తం చేశారు. పాలిటెక్నిక్‌ విద్యార్థుల రారష్ట్‌ర జేఏసీ పిలుపు మేరకు తరగతులు బహిష్కరించి కళాశాల ప్రాంగణంలో వంటావార్పు చేశారు. భోజనం, కూరగాయలు వండి అక్కడనే భోంచేసి నిరసన వ్యక్తం చేశారు. ఈ సందర్భంగా విద్యార్థులు మాట్లాడుతూ సాంకేతిక విద్య అభ్యసిస్తే సత్వరంగా ఉద్యోగాలు వస్తాయనే ఆశతో పాలిటెక్నిక్‌ కళాశాలల్లో చేరితే ప్రభుత్వం యంగ్‌ ఇండియా స్కిల్‌ యూనివర్సిటీలో విలీనం చేసి తమ భవిష్యత్‌ను అగాథంలోకి నెట్టడానికి యత్నాలు చేస్తోందని విమర్శించారు. ప్రభుత్వం దిగి వచ్చేవరకు ఆందోళనలు నిర్వహిస్తామని ప్రకటించారు.

నెన్నెల: ఓటరు జాబితా ప్రత్యేక సవరణ(ఎస్‌ఐఆర్‌) ప్రక్రియను వేగవంతం చేయాలని జిల్లా అదనపు కలెక్టర్‌, డీఈవో చంద్రయ్య అధికారులకు సూచించారు. శనివారం మండలంలోని కుశ్నపల్లి, ఆవుడం గ్రామాల్లో సర్‌ ప్రక్రియను పరిశీలించారు. ఇంటింటికీ వెళ్లి ఓటర్లకు నోటీసులు అందజేయాలని బీఎల్‌ఓలకు సూచించారు. నోటీసులు అందుకున్న ఓటర్లు సరైన ఆధారాలతో ధ్రువపత్రాలు అధికారులకు సమర్పించాలని కోరారు. కుశ్నపల్లి, ఆవుడం పాఠశాలలను సందర్శించి పేరెంట్స్‌ మీటింగ్‌లో పాల్గొన్న తల్లిదండ్రులు, విద్యార్థులతో మాట్లాడారు. మెనూ ప్రకారం భోజనం, నాణ్యతపై విద్యార్థులను అడిగి తెలుసుకున్నారు. విద్యార్థులకు ప్రశ్నలు వేసి సమాధానాలు రాబట్టారు. కుశ్నపల్లిలో టస్సర్‌ మగ్గాలను పరిశీలించి చేనేత కార్మికులతో మాట్లాడారు. సమస్యలు తెలుసుకున్నారు. తహసీల్దార్‌ శ్రీనివాస్‌, ఎంఈఓ చంద్రశేఖర్‌రెడ్డి, ఆర్‌ఐ సులోచన, జీపీఓ లక్ష్మణ్‌ పాల్గొన్నారు.

మంచిర్యాలటౌన్‌: రక్తదానానికి ప్రతి ఒక్కరూ స్వచ్ఛందంగా ముందుకు రావాలని జిల్లా వైద్య, ఆరోగ్య శాఖ అధికారి డాక్టర్‌ నరేందర్‌ రాథోడ్‌ అన్నారు. జాతీయ స్వచ్ఛంద రక్తదాన శిబిరం కార్యక్రమంలో భాగంగా శనివారం జిల్లా కేంద్రంలోని ప్రభుత్వ జనరల్‌ ఆసుపత్రి నుంచి రక్తదాన అవగాహన ర్యాలీని ఆయన ప్రారంభించారు. అనంతరం మాట్లాడుతూ అక్టోబర్‌ 2వరకు రక్తదాన శిబిరాలు, అవగాహన కార్యక్రమాలు జిల్లావ్యాప్తంగా చేపట్టనున్నట్లు తెలిపారు. గాంధీ జయంతి సందర్భంగా అక్టోబర్‌ 1న రక్తదాన శిబిరాలను ప్రజలు విజయవంతం చేయాలని కోరారు. ఈ కార్యక్రమంలో జిల్లా మాస్‌ మీడియా అధికారి బుక్క వెంకటేశ్వర్‌, రషీద్‌, అల్లాడి శ్రీనివాస్‌, నాందేవ్‌, పుట్ట సత్తయ్య, వెంకటేశ్వర్లు, డాక్టర్లు రమ్య, అమన్‌, రెడ్‌క్రాస్‌ సొసైటీ జిల్లా కార్యదర్శి చందూరి మహేందర్‌, తలసేమియా సికిల్‌సెల్‌ వెల్ఫేర్‌ అసోసియేషన్‌ అధ్యక్షుడు శ్రీనివాస్‌, నర్సింగ్‌ సిబ్బంది, నర్సింగ్‌ విద్యార్థులు పాల్గొన్నారు.

బెల్లంపల్లి: వినాయకుల నిమజ్జనం రోజున ట్రాఫిక్‌ సమస్యలు తలెత్తకుండా ముందస్తు ప్రణాళికతో పటిష్టమైన చర్యలు చేపట్టాలని రామగుండం పోలీసులు కమిషనర్‌ అంబర్‌కిషోర్‌ ఝా అధికారులను ఆదేశించారు. భక్తులకు ఇబ్బందులు కలుగకుండా జాగ్రత్తలు తీసుకోవాలని సూచించారు. శనివారం రాత్రి ఆయన పట్టణంలోని పలు గణేష్‌ మండపాలను సందర్శించి ప్రత్యేక పూజలు చేశారు. నిర్వాహకులతో మాట్లాడి నిమజ్జన ఏర్పాట్లపై తెలుసుకున్నారు. బెల్లంపల్లి మున్సిపల్‌ చైర్‌ పర్సన్‌ దావ స్వాతి, బెల్లంపల్లి రూరల్‌ సీఐ హనోక్‌, పోలీసు అధికారులు పాల్గొన్నారు.

మంచిర్యాలఅగ్రికల్చర్‌: జిల్లాలో అధికంగా సాగు అవుతున్న పత్తి, మామిడి పంటలు విదేశాలకు ఎగుమతి కానున్నాయి. ఇటీవల కేంద్ర ప్రభుత్వం రాష్ట్రంలో 31 జిల్లాలను సమ్మిళిత ఎగుమతి వృద్ధి కార్యాచరణ కార్యక్రమం కింద ఎంపిక చేసింది. ప్రతీ జిల్లా నుంచి ప్రత్యేక ఉత్పత్తులను ఎంపిక చేసి బ్రాండ్‌ గుర్తింపు ఇవ్వగా.. జిల్లా నుంచి పత్తి, మామిడి ఎగుమతిని ప్రోత్సహించేందుకు ఎంపిక చేశారు. అంతర్జాతీయ మార్కెట్లతో అనుసంధానం ద్వారా సరైన మద్దతు ధర లభించే అవకాశం ఉంది. ప్రస్తుతం పంటలకు గిట్టుబాటు ధర లభించక, స్థానిక మార్కెట్‌ సౌకర్యాలు లేక దళారులపై ఆధారపడే రైతులు ఇకపై అంతర్జాతీయ మార్కెట్‌లో నేరుగా పోటీ పడే అవకాశం లభిస్తుంది. ఎగుమతులకు అవసరమైన చర్యల వేగవంతానికి జిల్లా కలెక్టర్‌ అధ్యక్షతన ప్రత్యేక ప్రోత్సాహక కమిటీ ఈపీసీ(ఎక్స్‌పోర్ట్‌ ప్రమోషన్‌ కమిటీ) ఏర్పాటు చేయనున్నారు. కమిటీ ఆధ్వర్యంలో రైతులకు ప్రోత్సాహం, నాణ్యమైన దిగుబడి సాధనకు సాంకేతిక పరిజ్ఞానం, అవగాహన సదస్సులు నిర్వహిస్తారు. సేకరణ, నాణ్యత గ్రేడింగ్‌, ప్యాకేజింగ్‌, నిల్వ, రవాణా వరకు ఎగుమతి ప్రక్రియను సమన్వయం చేస్తారు. ఎగుమతుల్లో ఎదురయ్యే సమస్యల పరిష్కారంలో కమిటీ కీలకంగా వ్యవహరిస్తుంది. తెల్లబంగారానికి డిమాండ్‌ జిల్లాలో పత్తి సాగు విస్తీర్ణం అధికంగా ఉంటుంది. ఈ ఏడాది 1.72లక్షల ఎకరాల్లో సాగైంది. 12 నుంచి 13లక్షల క్వింటాళ్ల వరకు దిగుబడి రానుంది. ఏటా ప్రభుత్వ రంగ సంస్థలు కొర్రీలతో కొనుగోలుకు నిరాకరిస్తుండడంతో రైతులు దళారులను ఆశ్రయిస్తున్నారు. దీంతో మద్దతు ధర లభించక నష్టపోతున్నారు. పత్తికి విదేశీ మార్కెట్లలో మంచి డిమాండ్‌ ఉంది. స్థానిక వ్యాపారులు, దళారులపై ఆధారపడడం తగ్గి మంచి ధర పొందే అవకాశం లభిస్తుంది.మరింత విలువ..జిల్లాలో 15,477.32 ఎకరాల్లో మామిడి తోటలున్నాయి. ఏటా 45వేల నుంచి 50వేల మెట్రిక్‌ టన్నుల దిగుబడి వస్తుంది. సరైన మార్కెటింగ్‌ సౌకర్యం, కోల్డ్‌స్టోరేజీ లేక రైతులు ఇబ్బందులు పడుతున్నారు. దళారులను ఆశ్రయించాల్సి వస్తుంది. పక్కనే ఉన్న మహారాష్ట్రకు తరలించి విక్రయిస్తున్నారు. ఓసారి ధరలు అనుకూలిస్తే మరోసారి పెట్టుబడీ రాక నష్టపోతున్నారు. ఎగుమతుల్లో నాణ్యత, గ్రేడింగ్‌, ప్యాకింగ్‌ కీలకం కానున్నాయి. అంతర్జాతీయ ప్రమాణాలతో ఎగుమతి చేస్తే మెరుగైన ధర లభిస్తుంది. ఎగుమతులు పెరిగితే జిల్లాలో ప్రాసెసింగ్‌, గ్రేడింగ్‌, ప్యాకేజింగ్‌, కోల్డ్‌స్టోరేజీ ఏర్పాటై యువతకు ఉపాధి అవకాశాలు లభిస్తాయి.రసాయనాలు లేకుండా సాగు చేయాలిజిల్లాలో మామిడి దిగుబడి కోసం రైతులు పూత దశ నుంచి రసాయనిక మందులు పిచికారీ చేస్తున్నారు. మోతాదుకు మించి వాడడం వల్ల అంతర్జాతీయ మార్కెట్లో ఎగుమతికి అవకాశం ఉండదు. సేంద్రియ విధానాలతో సాగు చేసే ఉత్పత్తులే విక్రయాలకు అవకాశం ఉంటుంది. రానున్న రోజుల్లో రెతులకు అధికారులు అవగాహన కల్పించనున్నారు.

జిల్లాలోని స్కానింగ్‌ కేంద్రాల వివరాలు వైద్య, ఆరోగ్య శాఖలో నమోదైనవి 55ప్రభుత్వ ఆసుపత్రుల్లో నిర్వహిస్తున్నవి 4ప్రైవేటు ఆసుపత్రుల్లో నిర్వహిస్తున్నవి 51మంచిర్యాలటౌన్‌: ‘‘లింగ నిర్ధారణ పరీక్ష చేయడం, చేయించుకోవడం, ప్రోత్సహించడం చట్టరీత్యా నేరం. క్రిమినల్‌ కేసులూ నమోదు చేస్తారు. పుట్టబోయేది ఆడా, మగ అని తెలియజేయకూడదు. అలా చేస్తే జైలు శిక్ష విధిస్తారు..’’ కానీ ఈ నిబంధనలు ఎవరూ పట్టించుకోవడం లేదు. జిల్లా కేంద్రం మంచిర్యాలలోని కొన్ని స్కానింగ్‌ కేంద్రాల్లో డబ్బులు తీసుకుని పుట్టబోయే బిడ్డ ఆడ, మగ అని చెప్పేస్తున్నారు. ఇటీవల బస్టాండ్‌ సమీపంలోని ఓ స్కానింగ్‌ కేంద్రంలో రూ.15వేలు తీసుకుని ఓ గర్భిణికి స్కానింగ్‌ చేసి ఆడశిశువు అని చెప్పగా.. ఇప్పటికే ఇద్దరు ఆడపిల్లలు ఉన్నారని, జన్మభూమినగర్‌లోని ఓ ప్రైవేటు ఆస్పత్రిలో అబార్షన్‌ చే యించారు. సదరు మహిళ పలు కారణాలతో ఆత్మహత్యాయత్నం చేయడంతో లింగనిర్ధారణ బాగో తం బయటకు పొక్కింది. ‘భ్రూణహత్యలు ఆపేద్దాం.. ఆడపిల్ల లను రక్షించుకుందాం..’ అనే నినా దంతో ప్రజల్లో అధికారులు అవగాహన కల్పిస్తుండగా.. స్కానింగ్‌ కేంద్రాల నిర్వాహకులతో జిల్లా వైద్యాధికారి సమీక్షిస్తూ పీసీపీఎస్‌డీటీ చట్టం అమలుపై హెచ్చరిస్తున్నా కొందరు అవేమీ పట్టనట్లుగా వ్యవహరిస్తున్నారు. లింగ నిర్ధారణ, పలు ప్రైవేటు ఆస్పత్రుల్లో అబార్షన్లు జరుగుతుండడం జిల్లాలో ఆ డపిల్లల సంఖ్య తగ్గేందుకు కారణమవుతున్నాయి.

బెల్లంపల్లి: గణేష్‌ నిమజ్జనం ప్రశాంతంగా నిర్వహించడానికి పటిష్టమైన ఏర్పాట్లు చేసుకోవాలని డీసీపీ ఎగ్గడి భాస్కర్‌ అన్నారు. శనివారం సబ్‌కలెక్టర్‌ మనోజ్‌, మున్సిపల్‌ చైర్‌పర్సన్‌ దావ స్వాతి, ఇతర శాఖల అధికారులతో కలిసి బెల్లంపల్లి పోచమ్మ చెరువు వద్ద నిమజ్జన ఏర్పాట్లు, విగ్రహాలు వచ్చే, బయటకు వెళ్లే మార్గాలను పరిశీలించి పలు సూచనలు చేశారు. ఈ సందర్భంగా డీసీపీ మాట్లాడుతూ శోభాయాత్ర మార్గంలో రోడ్లపై గుంతలను పూడ్చి వేయాలని తెలిపారు. నిమజ్జన ప్రాంతంలో వెలుతురు ఉండేలా విద్యుత్‌ దీపాలు ఏర్పాటు చేయాలని సూచించారు. మత్స్యశాఖ ఆధ్వర్యంలో ఈతగాళ్లను అందుబాటులో ఉంచుతున్నట్లు తెలిపారు. బెల్లంపల్లి రూరల్‌ సీఐ సీహెచ్‌.హనోక్‌, బెల్లంపల్లి టౌన్‌ ఎస్‌హెచ్‌ఓ కే.శ్రీనివాసరావు, తహసీల్దార్‌ కృష్ణ, మున్సిపల్‌ అధికారులు పాల్గొన్నారు. పోలీసుస్టేషన్‌ తనిఖీ బెల్లంపల్లి వన్‌టౌన్‌ పోలీస్‌స్టేషన్‌ను డీసీపీ భాస్కర్‌ తనిఖీ చేశారు. కేసుల నమోదు, నిర్వహణ, పెండింగ్‌ కేసుల రికార్డులు పరిశీలించారు. స్టేషన్‌కు వచ్చే వచ్చే ఫిర్యాదుదారులతో మర్యాదపూర్వకంగా వ్యవహరించాలని సూచించారు. నేరాల నియంత్రణ, రోడ్డు భద్రతపై దృష్టి సారించాలని సూచించారు.

మంచిర్యాలఅర్బన్‌: విద్యార్థులపై పుస్తకాల బరువు తగ్గించి పరిజ్ఞానం, సృజనాత్మకత పెంపొంచడానికి ప్రవేశపెట్టిన పాఠశాలల్లో నో బ్యాగ్‌ డే అమలు శని వారం మొక్కుబడి మారింది. జిల్లాలో ప్రాథమిక పాఠశాలలు 483, ప్రాథమికోన్నత 97, ఉన్నత పా ఠశాలలు 132 ఉండగా.. 45,634 మంది విద్యార్థులు ఉన్నారు. కొన్ని పాఠశాలలను ‘సాక్షి’ సందర్శించగా రోజూ మాదిరిగానే పాఠ్యపుస్తకాల బ్యాగులతో హాజరయ్యారు. ప్రాథమిక పాఠశాలల్లో నెలవా రీ కనీస అభ్యాస సామర్థ్యాల సాధనలో భాగంగా ఎఫ్‌ఎల్‌ఎన్‌ పరీక్షలు నిర్వహించడంతో పుస్తకాలు తెచ్చుకున్నట్లు ఉపాధ్యాయులు తెలిపారు. ఉన్నత పాఠశాలల్లో ఎఫ్‌ఏ–2 పరీక్షలు పూర్తవడంతో సమీక్ష కోసం పుస్తకాలు తెచ్చుకున్నట్లు తెలుస్తోంది. పీటీఎం సమావేశాల వల్ల బిజీబిజీగా గడపడం వల్ల నో బ్యాగ్‌ నామమాత్రంగా మారింది. ప్రత్యేకంగా కార్యాచరణ రాష్ట్ర విద్యాపరిశోధన, శిక్షణ మండలి ప్రత్యేకంగా రూపొందించిన మాడ్యుల్‌ను ఉపాధ్యాయులు అమలు చేసేలా విద్యాశాఖ కార్యాచరణ సిద్ధం చేసింది. ప్రతీ నెల మూడో శనివారం ఒకటిన ఉంచి పదో తరగతి విద్యార్థుల వరకు పుస్తక రహిత అంశాల బోధన ఉంటుంది. విద్యార్థులు బ్యాగు లేకుండా హాజరైతే వృత్తివిద్య అనుభవ పూర్వకంగా అభ్యసనాలు చేయిస్తారు. చారిత్రక, సాంస్కృతిక ప్రాముఖ్యత ఉన్న ప్రదేశాలకు తీసుకెళ్లి చూపించాల్సి ఉంటుంది. కళలు, పర్యావరణం, చేతిపనులు, సృజనాత్మక కార్యకలాపాలు, పాఠ్యపుస్తకాలు మించిన వాస్తవ అనుభవాల అంశాలకు ప్రాధాన్యత లభిస్తుంది. శనివారం మాత్రం జిల్లాలోని పదుల సంఖ్యలో పాఠశాలల్లో మాత్రమే పాటలు, క్విజ్‌ పోటీలు, గ్రామీణ ప్రాంతాల సందర్శన చేసినట్లు తెలుస్తోంది.

మంచిర్యాలఅర్బన్‌: మంచిర్యాల బస్‌స్టేషన్‌ ఆధునీకరణ రూ.20కోట్లతో చేపట్టనున్నట్లు ఎమ్మెల్యే కే.ప్రేమ్‌సాగర్‌రావు తెలిపారు. శనివారం ఆర్టీసీ అధికారులతో కలిసి బస్టాండ్‌ను పరిశీలించారు. ప్రయాణికుల మౌలిక వసతులు, సౌకర్యాలపై చర్చించారు. బస్టాండ్‌ విస్తరణ, ప్లాట్‌ఫాం నిర్మాణంపై పరిశీలించారు. ప్రస్తుత ప్లాట్‌ఫారాలు ఎన్ని ఉన్నాయి.. కొత్తగా ఏర్పాటు చేయాల్సిన వాటిపై అడిగి తెలుసుకున్నారు. ప్రయాణికులకు ఇబ్బందులు లేకుండా సులువుగా బస్సులు తిరిగేలా నిర్మాణాలు చేపట్టాలని సూచించారు. అంతకుముందు ఆర్టీసీ అధికారులు డిపో పరిసరాలను పరిశీలించి మొక్కలు నాటారు. ఈ కార్యక్రమంలో కరీంనగర్‌ జోన్‌ ఈడీ సోలోమాన్‌, ఈడీ, ఐటీ, పీఅండ్‌ఎం హైదరాబాద్‌ రాజశేఖర్‌, ఆర్‌ఎం విజయభాను, ఆదిలాబాద్‌ డిప్యూటీ ఆర్‌ఎంవో మల్లేశయ్య, అసిస్టెంట్‌ డిపో మేనేజర్‌ శ్రీలత, మేయర్‌ ధర్ని మధుకర్‌, డిప్యూటీ మేయర్‌ సల్ల రమ్య, కార్పొరేషన్‌ కమిషనర్‌ అన్వేష్‌, మార్కెట్‌ కమిటీ చైర్మన్‌ రామగిరి భానేష్‌, కాంగ్రెస్‌ పార్టీ అధ్యక్షుడు నరేష్‌, కార్పొరేటర్లు పాల్గొన్నారు. రద్దీకి అనుగుణంగా బస్సులు ప్రయాణికుల రద్దీకి అనుగుణంగా బస్సులు రాకపోకలు సాగిస్తున్నాయని కరీంనగర్‌ జోన్‌ ఈడీ సోలోమాన్‌ అన్నారు. శనివారం ఈడీ, ఐటీ, పీఅండ్‌ఎం హైదరాబాద్‌ జోన్‌ రాజశేఖర్‌, ఆర్‌ఎం విజయభాను, డిప్యూటీఆర్‌ఎం మల్లేశయ్యతో కలిసి విలేకరులతో మాట్లాడారు. మంచిర్యాల నుంచి కాళేశ్వరానికి వెళ్లే మహిళా ప్రయాణికులకు మహారాష్ట్ర సరిహద్దులో నిబంధనల మేరకు ఉచితంతోపాటు నగదు టికెట్‌ వర్తిస్తుందని తెలిపారు. రాబోయే పుష్కరాల్లో భక్తులకు ఆటంకం లేకుండా బస్సులు నడిపిస్తామని తెలిపారు.

జిల్లాలోని అన్ని స్కానింగ్‌ కేంద్రాలను తనిఖీ చేసేందుకు పీసీపీఎన్‌డీటీ కమిటీతో ఐదు బృందాలను ఏర్పాటు చేశాం. స్కానింగ్‌ నిబంధనలు సక్రమంగా పాటిస్తున్నాయో లేదో పరిశీలించి, వెంటనే వాటిపై చట్టప్రకారంగా చర్యలు తీసుకుంటాం. అన్ని స్కానింగ్‌ కేంద్రాల నిర్వహణ పరిశీలించడంతోపాటు లింగనిర్ధారణ చేసినట్లుగా ఏ స్కానింగ్‌ కేంద్రం వ్యవహరించినా చట్టం ఉల్లంఘించిన వారిపై చట్టప్రకారం చర్యలు తీసుకుంటాం. – డాక్టర్‌ నరేందర్‌రాథోడ్‌, జిల్లా వైద్య, ఆరోగ్య శాఖ అధికారి, మంచిర్యాల

ఉట్నూర్‌రూరల్‌: ఉమ్మడి ఆదిలాబాద్‌ జిల్లాలోని నిరుద్యోగుల జీవితాల్లో ‘ఆర్‌సెటి’ వెలుగులు నింపుతోంది. గ్రామీణ యువత, మహిళలు తమకాళ్లపై తాము నిలబడి ఆర్థిక స్వావలంబన సాధించేందుకు ఉట్నూర్‌ కేబీ ప్రాంగణంలోని ఎస్‌బీఐ–గ్రామీణ స్వయం ఉపాధి శిక్షణ (ఆర్‌సెటి) సంస్థ ఉచితంగా ఉపాధి శిక్షణ కార్యక్రమాలు నిర్వహిస్తోంది. 18 నుంచి 45 సంవత్సరాల వయస్సు కలిగిన నిరుద్యోగ యువతులు, మహిళలకు మగ్గం వర్క్‌, టైలరింగ్‌ (కుట్టు మిషన్‌) పలు రకాల ఉపాధి కోర్సుల్లో ఉచిత భోజన, వసతితో పాటు కోర్సు మెటీరియల్‌ను కూడా అందిస్తున్నారు. శిక్షణ పూర్తి చేసుకున్న అభ్యర్థులకు ప్రభుత్వ గుర్తింపు పొందిన ఆర్‌సెటి ధ్రువపత్రాలు అందజేస్తున్నారు. 2007 జూన్‌ 30న సంస్థ ప్రారంభం నుండి ఇప్పటి వరకు 381 బ్యాచ్‌ల్లో 11,059 మందికి శిక్షణ అందించారు. అందులో 9,409 మంది స్వయం ఉపాధిలో స్థిరపడ్డారు. వీరిలో 4,010 మంది స్వయంగా, 4,357 మంది బ్యాంకు రుణాల సహాయంతో వ్యాపారాలు, యూనిట్లు ప్రారంభించి ఆర్థికంగా నిలదొక్కుకున్నట్లు సంస్థ నిర్వాహకులు పేర్కొంటున్నారు. సద్వినియోగం చేసుకోవాలి ‘గ్రామీణ యువత, మహిళల్లో స్వయం ఉపాధి సాధన కోసం ఉట్నూర్‌ ఎస్‌బీఐ ఆర్‌సెటీ సంస్థ నిరంతరం కృషి చేస్తోంది. ని రుద్యోగులను వ్యాపారవేత్తలు గా తీర్చిదిద్దడమే మా సంస్థ ము ఖ్య ఉద్దేశం. అర్హులైన అభ్యర్థులు ఈ అవకాశాలను సద్వినియోగం చేసుకోవాలి. – నరసింహారావు, డైరెక్టర్‌, ఎస్‌బీఐ ఆర్‌సెటీ, ఉట్నూర్‌ బాధ్యతగా భావిస్తున్నాం.. గ్రామీణ ప్రాంత మహిళలకు టైలరింగ్‌, మగ్గం వర్క్‌లో నాణ్యమైన శిక్షణ అందిస్తున్నాం. వారిలో నైపుణ్యాలను పెంపొందించడం ద్వారా స్వయం ఉపాధి పొందేలా చేయడం మా బాధ్యతగా భావిస్తున్నాం. – బి.మౌనిక, మగ్గం వర్క్‌ ఇన్‌స్ట్రక్టర్‌ ఆర్థిక ప్రాధాన్యత పెరిగేలా.. ‘ఆధునిక పద్ధతులు, మోడల్స్‌ నేర్పిస్తూ మహిళలకు స్వయం ఉపాధిపై పూర్తిస్థాయి అవగాహన కల్పిస్తున్నాం. శిక్షణ అనంతరం వారు సొంతంగా కుట్టు శిక్షణ కేంద్రాన్ని లేదా షాప్‌ను ప్రారంభించవచ్చు. – జి.స్వరూప, టైలరింగ్‌ ఇన్‌స్ట్రక్టర్‌, వరంగల్‌ కుట్టు శిక్షణ నేర్చుకుంటున్న మహిళలు, యువతులు

నెన్నెల: ఉద్యోగం చేస్తూ కుటుంబాన్ని పోషిస్తున్న ఓ ప్రభుత్వ ఉద్యోగి పెద్దపేగు క్యాన్సర్‌ బారిన పడి వైద్యం కోసం ఆర్థిక ఇబ్బందులు ఎదుర్కొంటున్నాడు. మంచిర్యాల జిల్లా నెన్నెల మండల కేంద్రానికి చెందిన చిన్నయ్య ఆదిలాబాద్‌ డివిజన్‌లోని బేల రేంజ్‌ అటవీశాఖలో ల్యాండ్‌ అండ్‌ సర్వేలో స్పెషల్‌ డ్యూటీలో పనిచేస్తున్నాడు. కొంతకాలంగా పెద్దపేగు క్యాన్సర్‌తో బాధపడుతూ హైదరాబాద్‌లోని అపోలో ఆస్పత్రిలో చికిత్స పొందుతున్నాడు. ఇప్పటి వరకు అప్పులు చేసి సుమారు రూ.15 లక్షల వరకు వైద్య ఖర్చులు భరించాడు. ప్రస్తుతం వైద్యులు అత్యవసరంగా ఆపరేషన్‌ చేయాల్సి ఉందని సూచించారు. చేతిలో డబ్బులు లేక చికిత్సను కొనసాగించలేని పరిస్థితి ఏర్పడిందని ఆవేదన వ్యక్తం చేస్తున్నాడు. ఈహెచ్‌ఎస్‌ కార్డు ఉన్నా ప్రయోజనం సున్నాప్రభుత్వ ఉద్యోగులకు అందుబాటులో ఉండే ఈహెచ్‌ఎస్‌ వైద్య సదుపాయం తనకు ఉన్నప్పటికీ కార్డు పనిచేయడం లేదని చిన్నయ్య వాపోతున్నాడు. ఆన్‌లైన్‌లో తన వివరాలు కనిపించకపోవడంతో వైద్యసేవలు పొందలేకపోతున్నానని ఆవేదన వ్యక్తం చేస్తున్నాడు. సంబంధిత అధికారులు స్పందించి ఈ సమస్యను పరిష్కరించి అత్యవసర వైద్యం అందేలా చర్యలు తీసుకోవాలని కోరుతున్నాడు. తన పరిస్థితిని రాష్ట్రస్థాయి అధికారులు, మంత్రుల దృష్టికి తీసుకెళ్లి ప్రభుత్వపరంగా వైద్య సదుపాయం అందించాలని వేడుకుంటున్నాడు. తనకు అత్యవసరంగా ఆపరేషన్‌ అవసరం ఉందని ఆర్థిక ఇబ్బందుల కారణంగా వైద్యం ఆగిపోకుండా ప్రభుత్వం మానవతాదృక్పథంతో స్పందించాలని కోరుతున్నాడు. ఈహెచ్‌ఎస్‌ ఉన్నతాధికారులు, అటవీ శాఖ అధికారులు, రాష్ట్ర ప్రభుత్వం వెంటనే స్పందించి వైద్య సహాయం అందించాలని బాధిత కుటుంబ సభ్యులు సైతం వేడుకుంటున్నారు. వరాల కోసం 9182391985 నంబర్‌ను సంప్రదించాలని కోరుతున్నారు.

భీమిని: మండలంలోని చిన్నతిమ్మపూర్‌ గ్రామ పంచాయతీ పరిధిలోని తంగేళ్ళపల్లి గ్రామానికి వెళ్లాలంటే తప్పనిసరిగా వాగు దాటాల్సిందే. మండలా ల విభజనలో కొమురంభీం జిల్లా దహేగాం మండలంలోని చిన్నతిమ్మపూర్‌ గ్రామ పంచాయతీ భీ మిని మండలంలో విలీనమైంది. దీంతో ప్రస్తుతం గ్రామస్తులకు దహేగాం మండలం నుంచి వైద్యసే వలు అందుతున్నాయి. శనివారం వైద్య సిబ్బంది గ్రామానికి వెళ్లి వైద్య సేవలు అందించారు. తిరుగు ప్రయాణంలో దహేగాంకు వెంకటాపూర్‌, మాడవెల్లి, సాలీగాం మీదుగా వాహనంలో పలువురు వైద్య సిబ్బంది వెళ్ళారు. కాగా చిన్నతిమ్మపూర్‌కు చెందిన ఆశ కార్యకర్త వెంకుబాయి తంగేళ్ళపల్లి నుంచి చిన్నతిమ్మపూర్‌కు వెళ్ళేందుకు ఎర్రవాగు ప్రమాదకరంగా ప్రవహిస్తుండడంతో స్థానికులు దగ్గరుండి దా టించారు. వర్షాకాలంలో అనేక ఇబ్బందులు పడుతున్నామని, ఇప్పటికై నా అధికారులు, ప్రజాప్రతినిధులు స్పందించి తంగేళ్ళపల్లి, చిన్నతిమ్మపూర్‌ మ ధ్యలో ఎర్రవాగుపై వంతెన నిర్మించి తమకష్టాలు తీర్చలాని ఆయా గ్రామాల ప్రజలు కోరుతున్నారు.

జైపూర్‌: క్రీడలతో విద్యార్థుల్లో దాగి ఉన్న ప్రతిభ వెలుగులోకి వస్తుందని ఏసీపీ వెంకటేశ్వర్‌ అన్నారు. మంచిర్యాల ఎస్జీఎఫ్‌ ఆధ్వర్యంలో కోటపల్లిలోని తెలంగాణ సాంఘిక సంక్షేమ గురుకులంలో శని వారం అండర్‌–17 బాలుర జిల్లాస్థాయి వాలీబాల్‌ ఎంపిక పోటీలు నిర్వహించారు. ఏసీపీ వెంకటేశ్వర్‌, సీఐ నవీన్‌కుమార్‌ పోటీలను ప్రారంభించగా జిల్లాలోని వివిధ ప్రాంతాల నుంచి సుమారు 200 మంది క్రీడాకారులు పాల్గొన్నారు. అనంతరం ఏర్పాటు చేసిన సమావేశంలో వారు మాట్లాడుతూ విద్యార్థులు చదువుతో పాటు క్రీడల్లోనూ రాణించాలని, క్రీడలు శారీరక దృఢత్వంతో పాటు క్రమశిక్షణ, పట్టుదలను పెంపొందిస్తాయన్నారు. ఎంపిక పోటీల్లో ప్రతిభ కనబర్చిన క్రీడాకారులు ఉన్నత స్థాయిలో రాణించాలని ఆకాంక్షించారు. ఈ కార్యక్రమంలో గురుకులం ప్రిన్సిపాల్‌ శ్రీధర్‌, ఎంపీడీవో శ్రీపతిబాపు, తహసీల్దార్‌ వనజారెడ్డి, సర్పంచ్‌ కూన భాస్కర్‌, ఎస్జీఎఫ్‌ కార్యదర్శి ఎండీ.యాకూబ్‌, పీఈటీలు, పీఈడీలు పాల్గొన్నారు.

కాసిపేట: బాలికలు భవిష్యత్‌లో గర్భాశయ ముఖద్వారా క్యాన్సర్‌ బారిన పడకుండా హెచ్‌పీవీ టీకాలు వేయడంలో సంబంధిత శాఖ సిబ్బంది నిర్లక్ష్యంగా వ్యవహరిస్తున్నారు. జిల్లా వారీగా లక్ష్యం కేటాయించి మండలాల్లోని ప్రాథమిక ఆరోగ్య కేంద్రాలకు టీకాలు సరఫరా చేశారు. 14నుంచి 15ఏళ్లలోపు బాలికలకు టీకాలు వేయాల్సి ఉండగా.. అవగాహన లేక తల్లిదండ్రులు ఆసక్తి చూపడం లేదు. అధికారులు సైతం అవగాహన కల్పించడంలో విఫలం కావడంతో లక్ష్యాన్ని చేరలేకపోతున్నారు. 17రకాల గర్భాశయ ముఖద్వారా క్యాన్సర్‌లలో నాలుగు ప్రధానమైన వేరియంట్లు గుర్తించి 6, 11, 16, 18కోడ్‌లతో తయారు చేసిన హెచ్‌పీవీ టీకాను రాష్ట్రంలో వేస్తున్నారు. ప్రైవేటు ఆస్పత్రుల్లో వయస్సుతో సంబంధం లేకుండా మూడు డోస్‌లకు సుమారు రూ.15వేల వరకు ఖర్చవుతోంది. ప్రభుత్వం ఉచితంగా టీకాలు వేయిస్తుండగా అవగాహన లోపించి వినియోగించుకోవడం లేదు. 14ఏళ్లు నిండి 15వ సంవత్సరం దాటక ముందు పుట్టిన తేదీ ద్వారా ఆన్‌లైన్‌లో నమోదు చేసి టీకాలు వేస్తుండగా ఈ ఏడాది మార్చి నాటికి జిల్లాలో 4,632మంది లక్ష్యంగా నిర్ధారించారు. రోజువారీగా పుట్టిన తేదీలతో అర్హుల సంఖ్య పెరగడం, తగ్గడం జరుగుతోంది. మార్చి నాటి లక్ష్యం ప్రకారం జిల్లాలో 2,507మందికి టీకాలు వేశారు. చాలా మండలాల్లో 25శాతం కూడా వేయలేదని తెలుస్తోంది. ఉన్నత పాఠశాలల్లో పిల్లల తల్లిదండ్రులకు ఉపాధ్యాయులు, మహిళా సంఘాల ద్వారా అవగాహన కల్పిస్తే లక్ష్యం చేరే అవకాశాలున్నాయి. అవగాహన కల్పిస్తున్నాం గ్రామాల్లో బాలికల తల్లిదండ్రులకు ఆశ, ఏఎన్‌ఏం, అంగన్‌వాడీల ద్వారా అవగహన కల్పిస్తున్నారు. వాక్సిన్‌ లక్ష్యం అంటూ ఏమీ లేదు. పుట్టిన తేదీ ఆధారంగా 14ఏళ్లు దాటి 15ముగిసేలోపు బాలికలను ఆన్‌లైన్‌లో నమోదు చేసి వేస్తున్నాం. రోజువారీగా అర్హులు పెరుగుతారు, తగ్గుతారు. తల్లిదండ్రులు వాక్సిన్‌పై అపోహలు వీడి బాలికలకు వేయించాలి. – సుధాకర్‌ నాయక్‌, డీఐఈవో, మంచిర్యాల

కాసిపేట: జిల్లాలో గతేడాది మండల విద్యావనరుల కేంద్రాల్లో (ఎంఆర్‌సీ) ఖాళీగా ఉన్న మెసెంజర్‌ పోస్టులకు నోటిఫికేషన్‌ వేసి 2025 ఆగస్టు 21న నియామకాలు చేపట్టారు. అందులో మంచిర్యాలలో తిరుపతి, కాసిపేటలో అంజనేయులు, వేమనపల్లి విద్యావనరుల కేంద్రంలో అశోక్‌ను నియమించారు. కిందిస్థాయి ఉద్యోగి అందులో కేవలం రూ.11వేలకు మండల విద్యావనరుల కేంద్రంలో ఫైల్స్‌ అందించడం మొదలు యూనిఫాంలు, పాఠ్య పుస్తకాలు, నోట్‌ బుక్కులు పాఠశాలలకు పంపిణీ చేయడం వాటి బాధ్యతలతో పాటు చివరకు కార్యాలయం శుభ్రంగా ఉంచడం లాంటి విధులు నిర్వహిస్తుంటారు. ముగ్గురూ గత విద్యాసంవత్సరం పూర్తి చేశారు. తిరిగి ఈ విద్యాసంవత్సరంలో ఐదు నెలలుగా విధులు నిర్వహిస్తున్నారు. ఏడాదిగా వీరిని పట్టించుకునేవారు లేరు. ఇప్పటికై నా అధికారులు స్పందించి తమ వేతనాలు అందించాలని కోరుతున్నారు. ఏడాదిగా వేతనాలు లేవు ఉద్యోగంలో చేరి ఏడాదవుతోంది. నేటికీ ఒక్క రూపాయి కూడా వేతనం ఇవ్వలేదు. అధికారులు పట్టించుకోకుండా ఇబ్బందులకు గురి చేస్తున్నారు. వీలైనంత త్వరగా వేతనాలు చెల్లించి ఆదుకోవాలి. – రత్నం తిరుపతి, మెసెంజర్‌, మంచిర్యాల

నేను డిగ్రీ పూర్తి చేశా. ఆర్‌సెటీలో మగ్గం వర్క్‌లో శిక్షణ తీసుకున్నా. సొంతంగా వ్యా పారం ప్రారంభించి ఆర్థికంగా నిలదొక్కుకునేందుకు ఈ శిక్షణ ఎంతగానో ఉపయోగపడుతోంది. ఈ శిక్షణ నాలో ఆత్మవిశ్వాసాన్ని నింపింది. – సోయం స్వప్న, గౌట సాంగ్వీ, బోథ్‌, ఆదిలాబాద్‌ ఉపాధి మార్గం ఎంచుకోవచ్చు నేను పదో తరగతి వరకు చదువుకున్నా. నాలాంటి యువతులు టైలరింగ్‌ నేర్చుకుని తమ గ్రామాల్లోనే స్వయం ఉపాధి మార్గాన్ని ఎంచుకోవచ్చు. మ హిళలు, యువతులు ఈ అవకాశాన్ని సద్వినియోగం చేసుకోవాలి. – ఆత్రం సౌమ్య, మాణిక్యాపూర్‌, తిర్యాణి, కుమురంభీం ధైర్యం వచ్చింది నేను పదో తరగతి వరకు చదువుకున్నా. ఆర్‌సెటీలో టైలరింగ్‌లో శిక్షణ పొందా. నాలాంటి గ్రామీణ యువతులకు ఆర్‌సెటీ ఉచితంగా అందిస్తున్న శిక్షణ ఎంతగానో మేలు చేస్తోంది. నా కాళ్లపై నేను నిలబడతాననే ధైర్యం వచ్చింది. – సిడాం సంధ్య, లోహ, దహెగాం, కుమురంభీం

ఖిలావరంగల్‌: క్రీడల్లో రాణిస్తే ఉజ్వల భవిష్యత్‌ ఉంటుందని కేయూ రిజిస్ట్రార్‌ ప్రొఫెసర్‌ జి.రామచంద్రం అన్నారు. వరంగల్‌ బొల్లికుంటలోని వాగ్దేవి ఇంజనీరింగ్‌ కళాశాల క్రీడామైదానంలో వాగ్దేవి కళాశాల ఆఫ్‌ ఫిజికల్‌ ఎడ్యుకేషన్‌ ఆధ్వర్యంలో నిర్వహిస్తున్న కేయూ యూనివర్సిటీ అండ్‌ కాలేజ్‌ 2026–27 క్రీడోత్సవాలు శనివారం ప్రారంభమయ్యాయి. రిజిస్ట్రార్‌ రామచంద్రం క్రీడోత్సవాలను ప్రారంభించి మాట్లాడారు. వరంగల్‌, ఖమ్మం, ఆదిలాబాద్‌ తదితర ఉమ్మడి జిల్లాల నుంచి సు మారు 780 మందితో మహిళా క్రీడోత్సవాలు ప్రా రంభించినట్లు తెలిపారు. ఈ నెల 19 నుంచి 21 వరకు కబడ్డీ, సాఫ్ట్‌బాల్‌, బాస్కెట్‌బాల్‌, బాల్‌ బ్యాడ్మింటన్‌, క్రాస్‌ కంట్రీ తదితర క్రీడా పోటీలు కొనసాగనున్నట్లు వివరించారు. కార్యక్రమంలో స్పోర్ట్స్‌ బోర్డ్‌ సెక్రటరీ ప్రొఫెసర్‌ టి.శాస్త్రి, వాగ్దేవి కళాశాల డైరెక్టర్‌ వాణిదేవి, హెచ్‌.సుదర్శన్‌రెడ్డి, ప్రిన్సిపాల్‌ ప్రొఫెసర్‌ సునీల్‌రెడ్డి, ఆర్గనైజింగ్‌ సెక్రటరీ రవీందర్‌, ఫిజికల్‌ డైరెక్టర్లు, కోచ్‌లు పాల్గొన్నారు.

జన్నారం: మండల కేంద్రంలో ఇళ్లముందు ఉంచిన ఆటోలలో బ్యాటరీలు చోరీ చేసిన నిందితుడిని అరెస్ట్‌ చేసినట్లు ఎస్సై ఉదయ్‌కిరణ్‌ తెలిపారు. శనివారం విలేకరుల సమావేశంలో వివరాలు వెల్లడించారు. ఈ నెల 16న పొనకల్‌ గ్రామంలోని వినాయకనగర్‌ తహసీల్దార్‌ కార్యాలయం రోడ్డులో అద్దెకు ఉంటున్న ఎల్కపల్లి నరేశ్‌కు చెందిన ఆటో, సంబరాజుల రాజశేఖర్‌కు చెందిన ఆటో బ్యాటరీలు చోరీకి గురయ్యాయి. నరేశ్‌ ఫిర్యాదు మేరకు దర్యాప్తులో భాగంగా ధర్మారానికి చెందిన గడ్డి చంద్రశేఖర్‌, పొనకల్‌ వినాయకనగర్‌కు చెందిన ఎరుకల అరుణ్‌ చోరీకి పాల్పడినట్లు గుర్తించారు. చోరీ చేసిన రెండు బ్యాటరీలను విక్రయిస్తుండగా చంద్రశేఖర్‌ను శనివారం అరెస్టు చేసి లక్సెట్టిపేట కోర్టుకు తరలించామని, మరో నిందితుడు అరుణ్‌ పరారీలో ఉన్నట్లు ఎస్సై తెలిపారు.

శ్రీరాంపూర్‌: సింగరేణిలో గుర్తింపు సంఘం కాలపరిమితి ముగిసినందున వెంటనే ఎన్నికలు నిర్వహించాలని టీబీజీకేఎస్‌ అధ్యక్షుడు మిరియాల రాజిరెడ్డి డిమాండ్‌ చేశారు. శనివారం ఎస్సార్పీ 1గనిపై ఏర్పాటు చేసిన గేట్‌ మీటింగ్‌లో ఆయన మాట్లాడారు. ఎన్నికలు నిర్వహించేంత వరకు రిజిస్టర్‌ కార్మిక సంఘాలన్నింటికీ యాజమాన్యం సమాన హోదా కల్పించాలని, కార్మికుల సమస్యల పరిష్కారానికి చర్చలకు ఆహ్వానించాలని డిమాండ్‌ చేశారు. గత ఎన్నికల్లో గెలిచిన ఏఐటీయూసీ, ఐఎన్టీయూసీ సంఘాలు కార్మికులకు ఇచ్చిన హామీలు నెరవేర్చకుండా మోసం చేశాయన్నారు. సింగరేణి లాభాల ను ప్రకటించి కార్మికులకు వాటా చెల్లించాలని డిమాండ్‌ చేశారు. ఈ సందర్భంగా పలువురు టీబీజీకేఎస్‌లో చేరారు. ఈ కార్యక్రమంలో యూనియన్‌ కేంద్ర ప్రధాన కార్యదర్శి కేతిరెడ్డి సురేందర్‌ రెడ్డి, బ్రాంచ్‌ ఉపాధ్యక్షుడు బండి రమేశ్‌, కేంద్ర కమిటీ నాయకులు పెట్టం లక్ష్మణ్‌, పానుగంటి సత్తయ్య, బ్రాంచ్‌ నాయకులు వెంగళకుమారస్వామి, బుస్స రమేశ్‌, తొంగల రమేశ్‌, రవీందర్‌రెడ్డి, తిరుపతిరావు, నీలం సదయ్య, మైన్స్‌ కమిటీ నాయకులు కురుమ వికాస్‌, మేడం తిరుపతి, శ్రీకాంత్‌, తదితరులు పాల్గొన్నారు.

కాజీపేట: కేంద్ర ప్రభుత్వం సుమారు పదేళ్ల క్రితం రద్దు చేసిన రూ.1.38 కోట్ల విలువ చేసే పాత కరెన్సీ నోట్లను రవాణా చేస్తున్న ముఠాను అదుపులోకి తీసుకుని కోర్టులో హాజరు పరిచినట్లు కాజీపేట ఏసీపీ పింగిళి ప్రశాంత్‌ రెడ్డి తెలిపారు. హనుమకొండ జిల్లా కాజీపేట పోలీస్‌స్టేషన్‌ ఆవరణలో శుక్రవారం రాత్రి ఏర్పాటు చేసిన విలేకరుల సమావేశంలో వివరాలు వెల్లడించారు. కాజీపేట చౌరస్తాలో వాహనాల తనిఖీ చేస్తుండగా ఓ వాహనంలోని వ్యక్తుల కదలికలు అనుమానాస్పదంగా ఉండడంతో సోదా చేశారు. దీంతో 2016లో ప్రభుత్వం రద్దు చేసిన రూ.500, రూ.వెయ్యి నోట్ల కట్టలు బయటపడ్డాయి. దీంతో వాహనంలో ప్రయాణిస్తున్న కర్ణాటక రాష్ట్రానికి చెందిన ముల్లా అబ్బాస్‌, మంచిర్యాల జిల్లా హాజీపూర్‌కు చెందిన బాసవేని మల్లేష్‌, కరీంనగర్‌ జిల్లా జమ్మికుంటకు చెందిన తంగళ్ల కృష్ణమోహన్‌, సిద్దిపేటకు చెందిన కుక్కల సంపత్‌, హనుమకొండకు చెందిన రైనాకుల శ్రీధర్‌, పల్లపు రాజు, వరంగల్‌ కరీమాబాద్‌కు చెందిన మహంకాళి శ్యాంసుందర్‌, నెక్కొండ మండలం చంద్రుగొండకు చెందిన మాంకాల గణేశ్‌లను అరెస్ట్‌ చేశారు. వీరిని విచారించగా తమిళనాడు రాష్ట్రానికి చెందిన ఓ వ్యక్తి నోట్ల సరఫరాకు సహకరించినట్లు గుర్తించారు. ఆ వ్యక్తి ప్రస్తుతం పరారీలో ఉండగా, నిందితులను కోర్టులో హాజరుపరిచినట్లు ఏసీపీ తెలిపారు. సమావేశంలో సీఐ శ్యాంసుదర్‌, ఎస్సైలు మౌనిక, శివ, తాళ్లపల్లి యాదగిరి, శ్రీనివాస్‌, సిబ్బంది సునీత, అశోక్‌కుమార్‌, శ్రీధర్‌, క్రాంతికుమార్‌, కుమారస్వామి, విష్ణు, వినయ్‌ పాల్గొన్నారు.

నిర్మల్‌ఖిల్లా: ఉపాధి కోసం ఖతార్‌ దేశానికి వెళ్లిన నిర్మల్‌ జిల్లాకు చెందిన ఇద్దరు యువకులు అక్కడి పోలీసుల అదుపులో ఉన్నట్లు సమాచారం రావడంతో వారి కుటుంబ సభ్యుల్లో ఆందోళన నెలకొంది. తమ కుటుంబసభ్యులను ఎలాగైనా స్వదేశానికి రప్పించేలా కృషి చేయాలని బాధిత కుటుంబ సభ్యులు ప్రభుత్వాన్ని కోరుతున్నారు. నిర్మల్‌ జిల్లా నర్సాపూర్‌–జి మండలం రాంపూర్‌ గ్రామానికి చెందిన కుంచెపు గణేశ్‌ (24), సోన్‌ మండలం మాదాపూర్‌కు చెందిన సంపత్‌ (25) సుమారు రెండున్నర సంవత్సరాల క్రితం ఉపాధి కోసం ఖతార్‌కు వెళ్లినట్లు కుటుంబ సభ్యులు తెలిపారు. వీరు ఆక్వా క్లిన్‌ ఫెసిలిటీస్‌ సర్వీసెస్‌ కంపెనీలో పనిచేస్తున్నట్లు పేర్కొన్నారు. నిషేధిత ప్రదేశంలో ఫోన్‌ వినియోగించారని.. ఉద్యోగ విధుల్లో భాగంగా ఉన్న సమయంలో గత ఆగస్టులో నిషేధిత పని ప్రదేశంలో సెల్‌ఫోన్‌ వినియోగించారనే కారణంతో ఖతార్‌ పోలీసులు ఇద్దరినీ అదుపులోకి తీసుకున్నట్లు సమాచారం అందిందని కుటుంబ సభ్యులు తెలిపారు. ఈ విషయాన్ని పొన్కల్‌కు చెందిన సందీప్‌ ఎన్‌ఆర్‌ఐ అడ్వైజరీ కమిటీ రాష్ట్ర సభ్యులకు ఫోన్‌ ద్వారా సమాచారమందించినట్లు పేర్కొన్నారు. ఈ నేపథ్యంలో గల్ఫ్‌ బాధిత యువకులు గణేశ్‌, సంపత్‌ కుటుంబ సభ్యులు జిల్లా కాంగ్రెస్‌ పార్టీ ఇన్‌చార్జి కూచాడి శ్రీహరిరావును శుక్రవారం కలిసి తమ ఆవేదన వివరించారు. తమ పిల్లలను భారతదేశానికి తీసుకురావడానికి ప్రభుత్వం తరఫున అవసరమైన చర్యలు చేపట్టాలని, న్యాయ సహాయం అందించాలని విజ్ఞప్తి చేశారు. శ్రీహరిరావు స్పందిస్తూ, సమస్యను రాష్ట్రస్థాయిలో సంబంధిత ఎన్‌ఆర్‌ఐ విభాగం దృష్టికి తీసుకెళ్లేందుకు చర్యలు ప్రారంభించినట్లు తెలిపారు. రాష్ట్ర ఎన్‌ఆర్‌ఐ కమిటీ వైస్‌చైర్మన్‌ మంద భీమ్‌రెడ్డితో ఫోన్‌లో మాట్లాడి ఇద్దరు యువకుల వివరాలను అందించినట్లు పేర్కొన్నారు. ప్రభుత్వ సహాయం కోసం ఎదురుచూపులు.. విదేశాల్లో ఉపాధి కోసం వెళ్లిన తమ పిల్లలు అనుకోని పరిస్థితుల్లో నిర్బంధానికి గురికావడంతో కుటుంబ సభ్యులు తీవ్ర ఆందోళన వ్యక్తం చేస్తున్నారు. ఖతార్‌లోని భారత రాయబార కార్యాలయం, రాష్ట్ర ఎన్‌ఆర్‌ఐ విభాగం, సంబంధిత ప్రభుత్వ అధికారులు ఈ వ్యవహారంపై స్పందించి వాస్తవ పరిస్థితులను తెలుసుకోవడంతో పాటు అవసరమైన కాన్సులేట్‌, న్యాయ సహాయం అందించాలని వారు కోరుతున్నారు. యువకులపై ఉన్న ఆరోపణలు, కేసు వివరాలు, తదుపరి న్యాయ ప్రక్రియపై అధికారిక సమాచారం వెలువడితేనే పూర్తి పరిస్థితి స్పష్టమయ్యే అవకాశం ఉందని రాష్ట్ర ఎన్‌ఆర్‌ఐ కమిటీ సభ్యులు స్వదేశ్‌ పేర్కొనగా, కుటుంబ సభ్యులు మాత్రం తమ పిల్లలను సురక్షితంగా స్వదేశానికి తీసుకురావడానికి ప్రభుత్వం తక్షణ చర్యలు చేపట్టాలని వేడుకుంటున్నారు.

బెల్లంపల్లి: విద్యార్థులు క్రీడల్లో ప్రతిభ చాటాలని డీఐఈవో అంజయ్య అన్నారు. శుక్రవారం బెల్లంపల్లిలోని ప్రభుత్వ సాంఘిక సంక్షేమ కాసిపేట బా లుర గురుకుల పాఠశాలలో ఉమ్మడి ఆదిలాబాద్‌ జి ల్లా అండర్‌ –19 ఎస్‌జీఎఫ్‌ జోనల్‌ స్థాయి వాలీ బాల్‌ క్రీడాకారుల ఎంపిక పోటీలను ఆయన ప్రా రంభించారు. ఆయన మాట్లాడుతూ చదువుతో పా టు విద్యార్థులు క్రీడల్లో చురుకుగా పాల్గొనాలన్నా రు. బెల్లంపల్లి రూరల్‌ సీఐ సీ.హెచ్‌ హనోక్‌ మాట్లాడుతూ ఆటలో గెలుపు ఓటములను సమానంగా తీసుకోవాలన్నారు. ఎస్‌జీఎఫ్‌ సెక్రటరీ బాపురావు మాట్లాడుతూ ఉమ్మడి జిల్లా నుంచి 100 మందికి పైగా క్రీడాకారులు ఎంపిక పోటీలకు హా జరయ్యారని, 12 మంది క్రీడాకారులను రాష్ట్రస్థాయి పోటీలకు ఎంపిక చేశామన్నారు. కళాశాల ప్రిన్సిపాల్‌ సంతోష్‌ కుమార్‌, పీడీ హరీష్‌, పీఈటీ రాజేందర్‌, పీడీలు, పీఈటీలు, విద్యార్థులు పాల్గొన్నారు.

మందమర్రిరూరల్‌: మందమర్రి ఏరియాలోని రామకృష్ణాపూర్‌లో సివిక్‌ టెండర్‌ పనులను వెంటనే ప్రారంభించాలని సింగరేణి కాలరీస్‌ కాంట్రాక్ట్‌ వర్కర్స్‌ యూనియన్‌ (ఐఎఫ్‌టీయూ) రాష్ట్ర వర్కింగ్‌ ప్రెసిడెంట్‌ బ్రహ్మనందం డిమాండ్‌ చేశారు. శుక్రవారం ఏరియాలోని సివిల్‌ కార్యాలయంలో డీవైజీఎం షేక్‌ మదీనా పాషాను కలిసి వినతిపత్రం అందజేశారు. అనంతరం బ్రహ్మనందం మాట్లాడుతూ బీజోన్‌ ఏరియాలో సివిల్‌ టెండర్‌ కాలపరిమితి ముగియడంతో టెండర్‌ వర్కర్స్‌తో పనులు చేయిస్తున్నారని తెలిపారు. వెంటనే యాజమాన్యం చొరవ తీసుకొని డీజీఎం సివిల్‌ టెండర్‌ను ప్రారంభించి పనులు చేయించేలా చూడాలని కోరారు. అలాగే మందమర్రి ఏరియాలోని సులభ్‌ కాంప్లెక్స్‌ కార్మికులకు చెల్లించాల్సిన బకాయి వేతనాలు చెల్లించాలని కోరారు. మల్లేశ్‌, శేఖర్‌, శ్రీనివాస్‌, నరేశ్‌, సంపత్‌, అప్పారావు, తదితరులు ఉన్నారు.

కాసిపేట: మందమర్రి ఏరియా కల్యాణిఖని ఓపెన్‌కాస్ట్‌లో శుక్రవారం మండలంలోని సోమగూడం(కె) గ్రామస్తులు ఆందోళన చేపట్టారు. భారీగా గ్రామస్తులు ఓసీ వద్దకు చేరుకొని పనులను అడ్డుకొని అధికారులతో వాదనకు దిగారు. గ్రామాలకు సమీపంలో ఓసీ ఏర్పాటు చేయడంతో పేలుళ్లతో ఇళ్లు పగుళ్లు తేలి కూలుతున్నాయని ఆగ్రహం వ్యక్తం చేశారు. ఓసీ నుంచి వెలువడుతున్న దుమ్ము, ధూళితో జీవనం దుర్భరంగా మారిందని ఆవేదన వ్యక్తం చేశారు. సమస్యలు పరిష్కరించి పేలుళ్ల తీవ్రత తగ్గించాలని లేకుంటే గ్రామాన్ని పూర్తి స్థాయి ముంపు గ్రామంగా ప్రకటించి అన్ని సౌకర్యాలు కల్పించాలని కోరారు. విషయం తెలుసుకున్న సింగరేణి అధికారులు, పోలీసులు వారికి నచ్చజెప్పారు. సమస్యల పరిష్కారానికి ఓసీ ప్రాజెక్టు ఆఫీసర్‌ రాంబాబు హామీ ఇవ్వడంతో ఆందోళన విరమించారు. కార్యక్రమంలో మాజీ సర్పంచ్‌, ఏఐబీఎస్‌ఎస్‌ జిల్లా అధ్యక్షుడు సపాటు శంకర్‌, ఉపసర్పంచ్‌ స్రవంతి, వార్డు సభ్యులు ప్రశాంత్‌, తిరుపతి, భుక్య పద్మ, సురేశ్‌, రమేశ్‌, మహిళలు, గ్రామస్తులు పాల్గొన్నారు.

శ్రీరాంపూర్‌: కంపెనీ ఆస్తుల పరిరక్షణకు ఎస్టేట్స్‌ విభాగం చేస్తోందని జీఎం, ఎస్టేట్స్‌(కార్పొరేట్‌) జీఎస్‌ గోపాలరాజు తెలిపారు. జీఎంగా బాధ్యతలు చేపట్టిన తర్వాత మొదటిసారిగా ఆయన శ్రీరాంపూర్‌లో పర్యటించారు. ఈ సందర్భంగా జీఎం కార్యాలయంలో జీఎం ఎం.శ్రీనివాస్‌ ఆయన్ను శాలువతో సత్కరించారు. ఈ సందర్భంగా జీఎం మాట్లాడుతూ కంపెనీ భూములను పరిరక్షించడానికి ఎల్లవేళలా కృషి చేస్తున్నారన్నారు. ఎస్టేట్‌ విభాగాన్ని మరింత పటిష్టం చేయడానికి గోపాలరాజు చేస్తున్న కృషి చేస్తున్నారని కొనియాడారు. ఏరియా ఎ్‌స్‌ఓటు జీఎం కృష్ణప్రసాద్‌, ఏజీఎం(ఫైనాన్స్‌) శ్రీధర్‌, డీజీఎంలు అనిల్‌కుమార్‌, రాజన్న, హరినారాయణ, ఎస్టేట్స్‌ మేనేజర్‌ వరలక్ష్మి తదితరులు పాల్గొన్నారు.

ఉట్నూర్‌రూరల్‌: షెడ్యూల్డ్‌ ప్రాంతాల్లో గిరిజనుల హక్కుల పరిరక్షణకు, ప్రత్యేక అవకాశాల పునరుద్ధరణకు ప్రభుత్వం వెంటనే చర్యలు తీసుకోవాలని ఖానాపూర్‌ ఎమ్మెల్యే, నిర్మల్‌ జిల్లా డీసీసీ అధ్యక్షుడు వెడ్మ బొజ్జు శాసనసభలో డిమాండ్‌ చేశారు. శుక్రవారం అసెంబ్లీ సమావేశాల్లో ఆయన మాట్లాడుతూ... జీవో నెం. 3తో పాటు సుమారు 29 రకాల జీవోల రద్దు వల్ల ఏజెన్సీ ప్రాంతాల్లోని గిరిజన యువత విద్య, ఉద్యోగ అవకాశాలపై తీవ్ర ప్రభావం పడుతోందని ఆందోళన వ్యక్తం చేశారు. పొరుగున ఉన్న ఆంధ్రప్రదేశ్‌ తరహాలోనే తెలంగాణలోనూ షెడ్యూల్డ్‌ ప్రాంత ఆదివాసీ యువతకు పోలీస్‌ రిక్రూట్‌మెంట్‌లో 75 శాతం ఉద్యోగాలు కల్పించాలని ముఖ్యమంత్రిని కోరారు. అలాగే ఏజెన్సీ ప్రాంతాల్లో దీర్ఘకాలంగా వేధిస్తున్న ఫారెస్ట్‌, రెవెన్యూ వివాదాలకు శాశ్వత పరిష్కారం చూపాలని కోరారు. విద్యుత్‌ స్తంభాల మార్పిడి, పారిశు ద్ధ్యం, సులభతరంగా రెవెన్యూ సర్టిఫికెట్ల జారీ వంటి సమస్యలను పరిష్కరించి గిరిజనులకు అన్ని రకాల మౌలిక వసతులు కల్పించాలని సభ ద్వారా ప్రభుత్వానికి విజ్ఞప్తి చేశారు.

ఆదిలాబాద్‌రూరల్‌: ఆర్‌ఓఎఫ్‌ఆర్‌ పంట పొలాల్లో అక్రమంగా సాగు చేస్తున్న గంజాయి మొక్కలను స్వాధీనం చేసుకున్నట్లు ఎస్పీ అఖిల్‌ మహాజన్‌ తెలిపారు. మండలంలోని అల్లికోరి గ్రామపంచాయతీ పరిధిలో గల పొట్టంలొద్ది శివారు ప్రాంతంలోని వ్యవసాయ పొలంలో సాగు చేస్తున్న మొక్కలను గురువారం స్వాధీనం చేసుకున్నారు. శుక్రవారం ఆదిలాబాద్‌రూరల్‌ పోలీస్‌స్టేషన్‌ ఆవరణలో వివరాలు వెల్లడించారు. పొటంలొద్ది శివారులో గల వ్యవసాయ పొలాల్లో సాగు చేస్తున్నట్లు స మాచారం రావడంతో పోలీసులు దాడి చేశారు. రెండు వేర్వేరు ఘటనల్లో 385 మొక్కలు స్వాధీనం చే సుకున్నట్లు ఎస్పీ తెలిపారు. వాటి విలువ రూ. 38.50 లక్షలు ఉంటుందన్నారు. ఆ మొక్కలు గ్రా మానికి చెందిన మెస్రం గంగారాం పటేల్‌, మెస్రం నాగులకు చెందినవిగా గుర్తించినట్లు పేర్కొన్నారు. వారు పరారీలో ఉన్నారని, నిందితులను పట్టుకోవడానికి ప్రత్యేక పోలీసు బృందాలను ఏర్పాటు చేసినట్లు తెలిపారు. వీరిపై గతంలోనూ కేసులు నమోదయ్యాయని వెల్లడించారు. ఆదిలాబాద్‌ డీఎస్పీ ఎల్‌.జీవన్‌రెడ్డి, రూరల్‌ సీఐ రహీం పాషా, ఎస్సై వి.విష్ణువర్ధన్‌, పోలీసు సిబ్బంది పాల్గొన్నారు.