Visakhapatnam District News

పెదగంట్యాడ: విశాఖ నగరంలోని గోకుల్‌ పార్కు వద్ద గల బీచ్‌లో ఈ నెల 7న గల్లంతైన పదో తరగతి విద్యార్థిని కరణం వెంకటి మృతదేహం పాత గంగవరం తీరంలో ఆదివారం అర్ధరాత్రి లభ్యమైంది. న్యూపోర్టు పోలీసులు తెలిపిన వివరాలు.. పరవాడ మండలం, దేశపాత్రునిపాలేనికి చెందిన కరణం అమ్మాజీ తన ఇద్దరు కుమార్తెలు కరణం పూలలక్ష్మి, వెంకటి(15)తో కలసి నివాసం ఉంటోంది. పెద్ద కుమార్తె గాజువాకలోని ఓ దుస్తుల దుకాణంలో పని చేస్తుండగా, చిన్న కుమార్తె పదో తరగతి చదువుతోంది. ఈ నెల 6న ఇద్దరూ కలసి ఆర్కేబీచ్‌కు వెళ్లారు. ఆరోజు రాత్రి వారు ఇంటికి రాలేదు. మరుసటి రోజు మధ్యాహ్నం సమయంలో పూలలక్ష్మి తన తల్లి అమ్మాజీకి ఫోన్‌ చేసిన చెల్లి వెంకటి సముద్రంలో గల్లంతైందని సమాచారం ఇచ్చింది. మహారాణి పేట పోలీసులకూ ఫిర్యాదు చేసింది. స్పందించిన పోలీసులు గల్లంతైన వెంకటి కోసం గాలింపు చర్యలు చేపట్టారు. చివరికి ఆదివారం అర్ధరాత్రి దాటాక పాత గంగవరం తీరానికి మృతదేహం కొట్టుకువచ్చింది. సమాచారం అందుకున్న న్యూపోర్టు పోలీసులు సంఘటన స్థలానికి చేరుకుని మృతదేహాన్ని పోస్టుమార్టం నిమిత్తం కేజీహెచ్‌కు తరలించారు.

సాక్షి, విశాఖపట్నం: దివ్వెల పండుగ దీపావళి సంబరాలు నగరంలో అంబరాన్నంటాయి. అదే స్థాయిలో కాలుష్యమూ విజృంభించి నగరవాసులను ఉక్కిరిబిక్కిరి చేసింది. గురువారం రాత్రి నగరవాసులు పోటీపడి బాణసంచా కాల్చడంతో స్వచ్ఛమైన సాగర గాలి ఒక్కసారిగా విషపూరితంగా మారింది. లక్ష్మీదేవి పూజల అనంతరం మొదలైన టపాసుల మోతతో నగర వాతావరణం దట్టమైన పొగ మేఘాలతో నిండిపోయింది. నగర చరిత్రలోనే ఎన్నడూ లేనివిధంగా వాయు నాణ్యత సూచీ (ఏక్యూఐ) అత్యంత ప్రమాదకర స్థాయికి చేరుకుంది. సాగరతీర నగరాన్ని విషపూరిత పొగ కమ్మేసి ప్రజలను ఊపిరాడకుండా చేసింది. 8 గంటలకే 247కు చేరిన కాలుష్యం దీపావళి రాత్రి 7.01 గంటలకు వాయు నాణ్యత సూచీ 191 ఏక్యూఐగా నమోదైంది. సమయం గడిచేకొద్దీ టపాసుల మోత పెరగడంతో రాత్రి 7.31 గంటలకు 210కి చేరింది. 8.01 గంటల సమయానికి బాణసంచా పేలుళ్లు మరింత పెరగడంతో వాయు నాణ్యత సూచీ 247కు చేరుకుంది. దీంతో నగరమంతటా పొగ దట్టంగా అలముకుంది. 9.31 గంటలకు కాలుష్య ప్రళయం రాత్రి 8.30 గంటల నుంచి బాణసంచా కాల్చడం తారస్థాయికి చేరింది. దీంతో వాయు నాణ్యత ఒక్కసారిగా పడిపోయింది. రాత్రి 8.31 గంటలకు ఏక్యూఐ 423కి, 9.01 గంటలకు 444కి చేరుకుంది. టపాసుల మోత మరింత పెరగడంతో రాత్రి 9.31 గంటలకు విశాఖపట్నం వాయు నాణ్యత సూచీ ఏకంగా 521 ఏక్యూఐకి చేరింది. నగర చరిత్రలోనే అత్యంత ప్రమాదకర స్థాయిలో కాలుష్యం నమోదైంది. అర్ధరాత్రి దాటినా తగ్గని తీవ్రత రాత్రి 10 గంటల తర్వాత బాణసంచా కాల్చడంపై ఉన్న ఆంక్షలను సైతం పట్టించుకోకుండా పలుచోట్ల టపాసులు కాల్చడం కొనసాగించారు. దీంతో రాత్రి 11.01 గంటలకు కూడా కాలుష్య సూచీ 409 ఏక్యూఐగా నమోదై ప్రమాదకర స్థాయిలోనే కొనసాగింది. రాత్రి 11.31 గంటల ప్రాంతంలో టపాసుల మోత కొంత తగ్గడంతో సూచీ 367కి పడిపోయింది. అయినప్పటికీ సాధారణ స్థాయితో పోలిస్తే కాలుష్య తీవ్రత ఎన్నో రెట్లు అధికంగానే ఉంది. కాలనీల్లో భారీగా పెరిగిన విష కణాలు నగరంలోని ప్రధాన నివాస ప్రాంతాల్లో సూక్ష్మ ధూళి కణాలైన పీఎం10, పీఎం2.5 స్థాయులు విపరీతంగా పెరిగాయి. పోలీస్‌ బ్యారెక్స్‌ ప్రాంతంలో పీఎం10 కణాల స్థాయి సాధారణంగా ఉండే 124 మైక్రోగ్రాముల పర్‌ క్యూబిక్‌ మీటర్‌ నుంచి ఏకంగా 274కు ఎగబాకింది. ఊపిరితిత్తుల్లోకి నేరుగా చేరే పీఎం2.5 కణాల స్థాయి 131 మైక్రోగ్రాముల పర్‌ క్యూబిక్‌ మీటర్‌కు పెరిగింది. ఎంవీపీ రైతుబజార్‌ ప్రాంతంలో పీఎం10 స్థాయి 266కు చేరింది. ఆటోనగర్‌లో 241, జీవీఎంసీ ప్రధాన కార్యాలయం పరిసరాల్లో 249గా నమోదైంది. ఈ గణాంకాలు నగరంలోని వివిధ ప్రాంతాల్లో కాలుష్య తీవ్రత ఏ స్థాయిలో పెరిగిందో స్పష్టం చేస్తున్నాయి.20 మందికి గాయాలు దట్టమైన పొగ, కాలుష్యం కారణంగా వృద్ధులు, ఆస్తమా బాధితులు, చిన్నపిల్లలు తీవ్ర ఇబ్బందులు ఎదుర్కొన్నారు. శ్వాస తీసుకోవడంలో అవస్థలు పడ్డారు. మరోవైపు టపాసుల ప్రమాదాల్లో నగరంలో 20 మందికి పైగా గాయపడ్డారు. ప్రాంతీయ కంటి ఆస్పత్రిలో ఐదుగురు చికిత్స పొందగా, కేజీహెచ్‌లో మరో ఐదుగురికి వైద్యం అందించారు. నగరంలోని వివిధ ఆస్పత్రుల్లో మరో 10 మంది గాయాలతో చికిత్స పొంది డిశ్చార్జ్‌ అయ్యారు. ఇక పండుగ ముగిసిన మరుసటి రోజు ఉదయానికి జీవీఎంసీ పారిశుధ్య సిబ్బంది నగర వీధుల నుంచి సాధారణ రోజుల్లో సేకరించే చెత్తకు అదనంగా 700 టన్నులకు పైగా టపాసుల వ్యర్థాలను తొలగించారు. దీపావళి సంబరాల వెనుక దాగిన కాలుష్య భారం ఎంత తీవ్రంగా ఉందో ఈ పరిస్థితులు స్పష్టం చేస్తున్నాయి. భారీగా పెరిగిన కాలుష్యం గోపాలపట్నం: దీపావళి సందర్భంగా విశాఖ నగరంలో శబ్ధ, వాయు కాలుష్యం భారీగా పెరిగింది. ఈ మేరకు కాలుష్య నియంత్రణ మండలి (పీసీబీ) అధికారులు విడుదల చేసిన గణాంకాలు ఆందోళన కలిగిస్తున్నాయి. కురుపాం మార్కెట్‌లో అత్యధికంగా 96.5 డెసిబుల్స్‌, జూపార్క్‌ ప్రాంతంలో 95.4, సుజాతానగర్‌లో 89.8, ఎంవీపీ రైతుబజారులో 87.4 డెసిబుల్స్‌ శబ్ధ తీవ్రత నమోదైంది. వాయు కాలుష్యమూ అధికమే వాయు కాలుష్యం కూడా గణనీయంగా పెరిగినట్లు పీసీబీ వెల్లడించింది. 11 ప్రాంతాల్లో గాలి నాణ్యతను పరిశీలించగా జీవీఎంసీ కార్యాలయం వద్ద అత్యధికంగా 367 మైక్రోగ్రాములు/క్యూబిక్‌ మీటర్‌, పోలీస్‌ బ్యారక్స్‌ వద్ద 331, జ్ఞానాపురంలో 313 నమోదైనట్లు తెలిపింది. రాత్రి 9:31 గంటలకు 521 ఏక్యూఐతో నగర చరిత్రలోనే గరిష్ట కాలుష్యం టపాసుల మోతతో విషపూరిత పొగలో చిక్కుకున్న సాగర నగరం అర్ధరాత్రి దాటినా తగ్గని కాలుష్య తీవ్రత.. శ్వాసకోశ రోగులకు ఇక్కట్లు టపాసుల ప్రమాదాల్లో 20 మందికి పైగా గాయాలు నగర వీధుల్లో 700 టన్నులకు పైగా అదనపు వ్యర్థాలు

బీచ్‌ రోడ్డు: పిల్లలకు వినోదం, విజ్ఞానం అందించాలనే లక్ష్యంతో రూ.16 కోట్ల వ్యయంతో సిరిపురంలో వీఎంఆర్డీఏ నిర్మించిన ‘చిల్డ్రన్స్‌ ఎరీనా’దారి తప్పింది. పెళ్లి విందులు, సినిమా ఫంక్షన్లు, మతపరమైన కార్యక్రమాలు, ఇతర వేడుకలకు నిలయమై.. చిన్నారులకు దూరమైంది. ఏ ఉద్దేశంతో ఈ ఆడిటోరియాన్ని నిర్మించారో, ఆ లక్ష్యం నీరుగారిపోయింది. ఈ ఏడాది కూడా బాలల ఉత్సవాలు నిర్వహించలేమని అధికారులు చేతులెత్తేశారు. ఈ చిల్డ్రన్స్‌ ఎరీనా ప్రారంభించి 8 ఏళ్లు అవుతున్నా.. ఇప్పటివరకు ఒక్కసారి కూడా అధికారికంగా బాలల ఉత్సవాలను నిర్వహించకపోవడం గమనార్హం. రూ.16 కోట్లతో ఆధునికీకరణ చిన్నారులు, విద్యార్థుల్లో దేశభక్తిని పెంపొందించే సినిమాలు, సమాజంపై బాధ్యతను పెంచే చిత్రాల ప్రదర్శనతో పాటు విజ్ఞానం అందించే సైన్స్‌ ఎగ్జిబిషన్లను ఏర్పాటు చేయడానికి వీఎంఆర్డీఏ దీన్ని నిర్మించింది. దీనిని ఆధునికీకరించేందుకు 2012లో పనులు ప్రారంభించగా, 2018 నాటికి రూ.16 కోట్లతో పనులు పూర్తి చేసి ఎరీనాను ఘనంగా ప్రారంభించారు. 600 సీట్లతో 4కే టెక్నాలజీతో థియేటర్‌తో పాటు, కింద ఫ్లోర్‌లో ఎగ్జిబిషన్‌ హాల్‌ను నిర్మించారు. 8 ఏళ్లుగా చిత్ర ప్రదర్శనలేవీ? దేశంలోనే రెండో చిల్డ్రన్స్‌ ఎరీనాగా పేరుగాంచిన ఈ ఆడిటోరియంలో గత 8 ఏళ్లలో కనీసం ఏడు చిత్రాలు కూడా ప్రదర్శించిన దాఖలాలు లేవు. 2018లో చిల్డ్రన్స్‌ ఫిల్మ్‌ ఫెస్టివల్‌ ఏర్పాటు చేసినా... సాంకేతిక కారణాల వల్ల అది విజయవంతం కాలేదు. ఆ తర్వాత ఒక్క పిల్లల చిత్రోత్సవం కూడా నిర్వహించలేదు. ఈ ఏడాది నవంబర్‌ 14న బాలల దినోత్సవాన్ని పురస్కరించుకుని బాలల ఉత్సవాలు నిర్వహించాలని బాలల పరిరక్షణ సంఘాలు కోరుతున్నాయి. ఈ మేరకు వీఎంఆర్డీఏ అధికారులకు వినతిపత్రాలు కూడా అందజేశారు. విజ్ఞాన ప్రదర్శనల ఊసే లేదు సైన్స్‌ ఎగ్జిబిషన్ల ద్వారా చిన్నారులకు విజ్ఞానం అందించాల్సిన చిల్డ్రన్స్‌ ఎరీనాలో ఆధునికీకరణ తర్వాత ఒక్క సైన్స్‌ ప్రదర్శన కూడా జరిగిన దాఖలాల్లేవు. మొదట్లో ప్రైవేట్‌ సంస్థలు అప్పుడప్పుడు విద్యార్థులకు పోటీలు నిర్వహించడం మినహా, వీఎంఆర్డీఏ తరఫున ఎటువంటి సైన్స్‌ ఎగ్జిబిషన్లు ఏర్పాటు చేయలేదు. ఎరీనా ఆధునికీకరణ అనంతరం రెండేళ్ల పాటు వీఎంఆర్‌డీఏ వేసవి శిక్షణ తరగతులు నిర్వహించి, ఆ తర్వాత వాటికీ స్వస్తి పలికింది. గడిచిన ఐదేళ్లలో సమ్మర్‌ క్యాంపుల జోలికే పోలేదు. దీంతో చిన్నారులు ప్రైవేటు సంస్థలు ఏర్పాటు చేసే వేసవి శిక్షణ తరగతుల్లో చేరేందుకు రూ.వేలల్లో ఖర్చు చేయాల్సి వస్తోంది. పెద్దల కార్యక్రమాలకే ప్రాధాన్యం చిల్డ్రన్స్‌ ఎరీనాలో చిన్నారుల కోసం కాకుండా, వీఎంఆర్డీఏ పెద్దల కార్యక్రమాలకే అధిక ప్రాధాన్యమిచ్చింది. గడిచిన ఎనిమిదేళ్లలో సినిమా ఫంక్షన్లు, రాజకీయ సమావేశాలు, మతపరమైన కార్యక్రమాలు, విందులు వంటి వాటికే ఎరీనాను కేటాయించారు. వినోదం కాకపోయినా, కనీసం విజ్ఞానం అందించే సైన్స్‌ ఎగ్జిబిషన్లు వంటివైనా పిల్లల కోసం ఏర్పాటు చేయాలని తల్లిదండ్రులు కోరుతున్నారు. అధికారుల దృష్టికి తీసుకువెళ్తాం వీఎంఆర్డీఏ చిల్డ్రన్స్‌ ఎరీనాలో చిన్నారుల కోసం చిత్రాల ప్రదర్శన, సైన్స్‌ ఎగ్జిబిషన్ల ఏర్పాటుపై తల్లిదండ్రుల నుంచి అనేక వినతులు వచ్చాయి. గతంలో అనేకసార్లు అధికారులకు నివేదించాం. ఎనిమిదేళ్లలో ఒక్కసారి కూడా బాలల ఉత్సవాలు నిర్వహించకపోవడం దారుణం. చిన్నారులకు వినోదం, విజ్ఞానం అందించడం ప్రభుత్వ బాధ్యత. చిన్నారుల కోసం కేటాయించిన ఆడిటోరియంలో పెద్దల కార్యక్రమాలు నిర్వహించడం సరైన పద్ధతి కాదు. – గొండు సీతారాం, కన్వీనర్‌, చైల్డ్‌ రైట్స్‌ అవేర్‌నెస్‌ ఫోరమ్‌

కంకిపాడు: ఆటోలో మాయమైన బంగారు వస్తువులను ఎట్టకేలకు బాధితురాలికి అప్పగించారు. కంకిపాడు ఎస్‌ఐ కేవై దాసు తెలిపిన వివరాల ప్రకారం విశాఖపట్నంకు చెందిన అద్దంకి భాగ్యలక్ష్మి ఈనెల 6వ తేదీ 12 గంటల సమయంలో విజయవాడ రైల్వేస్టేషన్‌లో దిగి అక్కడి నుంచి దుర్గమ్మ దర్శనానికి వెళ్లారు. అక్కడి నుంచి ఈడుపుగల్లులోని అత్తగారింటికి వెళ్లి తిరిగి సొంత ఊరుకి బయలుదేరేందుకు గోసాల సెంటరులో ఆటో ఎక్కారు. తన వెంట ఉన్న బ్యాగులో ఒక తులం బంగారు గాజులు, ఒక తులం బంగారు మాల, రెండు మురుగులు భద్రపరుచుకున్నారు. విజయవాడ రైల్వేస్టేషన్‌ వద్ద ఆటో దిగే సమయంలో బంగారు ఆభరణాలు ఉన్న బ్యాగును ఆటోలో మర్చిపోయారు. ఆభరణాలు కనిపించకపోవడంతో బాధితురాలు పోలీసులను ఆశ్రయించారు. ఘటనపై కేసు నమోదు చేసిన పోలీసులు ప్రత్యేకంగా విచారణ చేశారు. ఆటోలోనే బంగారు ఆభరణాలను మర్చిపోయినట్లు గుర్తించి వాటిని స్వాధీనం చేసుకున్నారు. అనంతరం బాధితురాలు భాగ్యలక్ష్మికి అప్పగించారు.

గోపాలపట్నం: దీపావళి పండగ వేళ ఆ కుటుంబంలో తీవ్ర విషాదం చోటుచేసుకుంది. అర్ధరాత్రి దాటిన తర్వాత టపాసులు కాల్చవద్దని తల్లిదండ్రులు మందలించడంతో మనస్తాపం చెందిన యువకుడు ఆత్మహత్యకు పాల్పడి ఆ కుటుంబాన్ని తీరని శోకంలో ముంచాడు. ఎయిర్‌పోర్టు పోలీసులు తెలిపిన వివరాల ప్రకారం... సాకేతపురానికి చెందిన సోమాదుల బుజ్జి, రాజేశ్వరి దంపతులకు ఇద్దరు కుమారులు. పెద్ద కుమారుడు సాయి రూపేష్‌(19) ప్రభుత్వ ఐటీఐలో రెండో సంవత్సరం చదువుతున్నాడు. వ్యసనాలకు బానిసయ్యాడు. ఆదివారం దీపావళి పండగ సందర్భంగా కుటుంబ సభ్యులు, స్నేహితులతో కలిసి రూపేష్‌ ఉత్సాహంగా టపాసులు కాల్చాడు. అందరితో కలిసి భోజనం చేసి, అర్ధరాత్రి దాటిన తర్వాత ఒంటరిగా బయట బాంబులు కాలుస్తుండటంతో... ‘రాత్రి చాలా టైం అయింది, ఇక పడుకో’మని తల్లిదండ్రులు, కుటుంబ సభ్యులు మందలించారు. ఆ మందలింపును తట్టుకోలేకపోయాడు. బయటకు వెళ్లి వస్తానని.. చెప్పి ఇంటి నుంచి వెళ్లిన రూపేష్‌ ఎంతకీ తిరిగి రాలేదు. ఆందోళన చెందిన కుటుంబ సభ్యులు చుట్టుపక్కల వెతికారు. చివరకు ఇంటి సమీపంలోని దుర్గాదేవి మండపంలో చీరతో ఉరివేసుకుని విగతజీవిగా వేలాడుతూ రూపేష్‌ కనిపించాడు. కంటిముందు తిరుగాడే కొడుకు ఆ స్థితిలో కనిపించడంతో ఆ తల్లిదండ్రుల రోదనలు కంటతడి పెట్టించాయి. సమాచారం అందుకున్న ఎయిర్‌పోర్టు పోలీసులు ఘటనా స్థలానికి చేరుకుని, మృతదేహాన్ని పోస్టుమార్టం నిమిత్తం కేజీహెచ్‌కు తరలించారు. తల్లి రాజేశ్వరి ఇచ్చిన ఫిర్యాదు మేరకు సీఐ శంకరనారాయణ పర్యవేక్షణలో పోలీసులు కేసు నమోదు చేసి దర్యాప్తు చేపట్టారు. పండగ రోజు చిన్న విషయానికే నిండు నూరేళ్ల జీవితాన్ని అర్ధంతరంగా ముగించుకోవడంతో సాకేతపురంలో విషాదఛాయలు అలుముకున్నాయి.

విశాఖ విద్య: హక్కుల సాధన కోసం ఏళ్ల తరబడి సాగించిన పోరాటానికి ఎట్టకేలకు ఫలితం దక్కింది. దశాబ్దాలుగా ఉద్యోగ, ఆరోగ్య, సామాజిక భద్రతకు నోచుకోకుండా, చాలీచాలని వేతనాలతో జీవితాలను వెళ్లదీస్తున్న ఆంధ్రా యూనివర్సిటీ కాంట్రాక్ట్‌ అసిస్టెంట్‌ ప్రొఫెసర్ల జీవితాల్లో కొత్త ఆశలు చిగురించాయి. విశ్వవిద్యాలయంలో పనిచేస్తున్న కాంట్రాక్ట్‌ అసిస్టెంట్‌ ప్రొఫెసర్లకు ఎంప్లాయీస్‌ ప్రావిడెంట్‌ ఫండ్‌(ఈపీఎఫ్‌) సదుపాయాన్ని వర్తింపజేస్తూ యాజమాన్యం ఉత్తర్వులు జారీ చేసింది. సుమారు పాతికేళ్లుగా అపరిష్కృతంగా ఉన్న ఈ సమస్యకు పరిష్కారం లభించడంతో అధ్యాపకులు హర్షం వ్యక్తం చేస్తున్నారు. భద్రత లేని జీవితాలు.. దాదాపు 25 ఏళ్లుగా విశ్వవిద్యాలయంలో బోధన అందిస్తూ భావి భారత పౌరులను తీర్చిదిద్దుతున్న కాంట్రాక్ట్‌ అసిస్టెంట్‌ ప్రొఫెసర్లకు ఇన్నాళ్లూ కనీస సామాజిక భద్రత కరువైంది. పదవీ విరమణ అనంతరం వారి భవిష్యత్తు ప్రశ్నార్థకంగా మారింది. ఈ నేపథ్యంలో ప్రతి ఉద్యోగికీ ఈపీఎఫ్‌ హక్కుగా దక్కాలన్న లక్ష్యంతో కాంట్రాక్ట్‌ అసిస్టెంట్‌ ప్రొఫెసర్ల అసోసియేషన్‌ అధ్యక్షుడు డాక్టర్‌ బోరుగడ్డ సుబ్బయ్య నేతృత్వంలో అధ్యాపకులు సంఘటితమయ్యారు. చట్టబద్ధమైన హక్కుల సాధన కోసం ప్రజాస్వామ్యబద్ధంగా పోరాటం సాగించారు. రెండేళ్లుగా పోరాటాలు రెండేళ్లుగా ఆంధ్రా యూనివర్సిటీ టీచర్స్‌ అసోసియేషన్‌(కాంట్రాక్ట్‌) ఆధ్వర్యంలో సభ్యులను సమీకరించి, తమ సమస్యను యాజమాన్యం దృష్టికి తీసుకెళ్లారు. ఈ ఏడాది ఫిబ్రవరిలో వైస్‌ ఛాన్సలర్‌ ప్రొఫెసర్‌ జి.పి.రాజశేఖర్‌, రెక్టార్‌ ప్రొఫెసర్‌ పులిపాటి కింగ్‌, రిజిస్ట్రార్‌ ప్రొఫెసర్‌ కె.రాంబాబులను కలిసి వినతిపత్రం సమర్పించారు. వివిధ దశల్లో శాంతియుత నిరసనలు చేపట్టి తమ డిమాండ్‌ను బలంగా వినిపించారు. ఎట్టకేలకు వారి ప్రయత్నాలు ఫలించి ఈపీఎఫ్‌ అమలుకు మార్గం సుగమమైంది. కేంద్ర కార్మిక చట్టాల చొరవతోనే.. సామాజిక భద్రత కోడ్‌–2020 అమల్లోకి వచ్చిన నేపథ్యంలో ఈపీఎఫ్‌వో చొరవ మా హక్కుల సాధనకు దోహదపడింది. ఈ చట్టపరమైన వెసులుబాటుతో ఏయూ యాజమాన్యం, ఈపీఎఫ్‌ కార్యాలయం సమన్వయంతో ఒప్పంద అధ్యాపకులందరికీ ఈపీఎఫ్‌ వర్తింపజేయాలని నిర్ణయం తీసుకోవడం హర్షణీయం. అక్టోబర్‌ నుంచి ఒప్పంద ఉద్యోగుల వాటాను వారి పీఎఫ్‌ ఖాతాల్లో జమ చేసేందుకు ఏర్పాట్లు చేస్తున్నారు. 2024 ఏప్రిల్‌ నుంచి ఈ ప్రయోజనాన్ని అమలు చేయాలని నిర్ణయించారు. – డాక్టర్‌ బోరుగడ్డ సుబ్బయ్య, అధ్యక్షుడు, ఏయూ కాంట్రాక్ట్‌ టీచర్స్‌ అసోసియేషన్‌ ఏయూ కాంట్రాక్ట్‌ అధ్యాపకుల పోరాటానికి విజయం

మూడు దుకాణాల్లో తనిఖీలు.. రూ.1.25 లక్షల జరిమానా ద్వారకా నగర్‌: బియ్యం విక్రయాల్లో నిబంధనలను ఉల్లంఘిస్తున్న వ్యాపారులపై విజిలెన్స్‌ అండ్‌ ఎన్‌ఫోర్స్‌మెంట్‌ అధికారులు చర్యలు చేపట్టారు. నగరంలోని బియ్యం రిటైల్‌, హోల్‌సేల్‌ దుకాణాల్లో లీగల్‌ మెట్రాలజీ, పౌరసరఫరాల శాఖ అధికారులతో కలిసి సోమవారం విస్తృత తనిఖీలు నిర్వహించారు. మూడు వ్యాపార సంస్థల్లో పలు ఉల్లంఘనలను గుర్తించి ఆరు కేసులు నమోదు చేశారు. వీటిలో ఐదు కేసులకు సంబంధించి రూ.1.25 లక్షల జరిమానా విధించారు. రీజినల్‌ విజిలెన్స్‌ అండ్‌ ఎన్‌ఫోర్స్‌మెంట్‌ అధికారి ఆదేశాల మేరకు సోమవారం ఉదయం నుంచి తనిఖీలు చేపట్టారు. తొలుత శ్రీ మణికంఠ రైస్‌ ట్రేడర్స్‌లో 10 కిలోల సుందర రత్న ప్రీమియం సోనా రైస్‌ బస్తాలను పరిశీలించారు. ఈ సందర్భంగా 17 బస్తాలపై ఎంఆర్‌పీ, ప్యాకింగ్‌ తేదీలు మార్చినట్లు గుర్తించారు. ప్రదీప్‌ ట్రేడర్స్‌ అండ్‌ జనరల్‌ స్టోర్స్‌లో తనిఖీలు నిర్వహించగా, 26 కిలోల సార్టెక్స్‌ 999 గోల్డ్‌ బాయిల్డ్‌ రైస్‌ ఐదు బస్తాలపై తయారీదారు పేరు, చిరునామా ముద్రించకుండా విక్రయిస్తున్నట్లు గుర్తించారు. వెంకట లక్ష్మి ఎంటర్‌ప్రైజెస్‌లో తనిఖీల సందర్భంగా ప్యాకేజింగ్‌ నిబంధనలకు విరుద్ధంగా విక్రయిస్తున్న భారీ మొత్తంలో బియ్యం బస్తాలను గుర్తించారు. సార్టిక్స్‌ 999 గోల్డ్‌ బాయిల్డ్‌ రైస్‌ 17 బస్తాలు, గోకుల్‌ సటాకే ప్రీమియం రైస్‌ 8 బస్తాలు, కిసాన్‌ బ్రాండ్‌ జై శ్రీరామ్‌ లచ్చకరి రైస్‌ 450 బస్తాలపై ప్యాకర్‌ పేరు, చిరునామా ముద్రించకుండా ఉన్నట్లు గమనించారు. ప్యాకేజ్డ్‌ వస్తువుల నిబంధనలను ఉల్లంఘించినందుకు లీగల్‌ మెట్రాలజీ చట్టం ప్రకారం మొత్తం ఆరు కేసులు నమోదు చేసి, జరిమానా విధించినట్లు అధికారులు తెలిపారు.

మహారాణిపేట: విశాఖ వేదికగా ఈ నెల 12, 13 తేదీల్లో నిర్వహించనున్న 31వ సీఐఐ పార్టనర్‌షిప్‌ సమ్మిట్‌–2026కు సంబంధించిన అన్ని వేదికలను ప్రారంభానికి 48 గంటల ముందే సిద్ధం చేయాలని రాష్ట్ర పరిశ్రమలు, వాణిజ్య శాఖల ప్రత్యేక ప్రధాన కార్యదర్శి ఎన్‌.యువరాజ్‌ అధికారులను ఆదేశించారు. మంగళవారం నాటికి నిర్మాణాలు, మౌలిక సదుపాయాలు పూర్తి చేసి పోలీస్‌ శాఖ తనిఖీలకు అప్పగించాలని స్పష్టం చేశారు. ఫైర్‌ సేఫ్టీ, విద్యుత్‌ సరఫరా, ఆడియో వ్యవస్థలతో పాటు అన్ని ఏర్పాట్లను తనిఖీ చేసి ధ్రువీకరణ పత్రాలు జారీ చేయాలని సూచించారు. సమ్మిట్‌ ఏర్పాట్లపై యువరాజ్‌ సమీక్ష నిర్వహించారు. ఈ నెల 11నే ముఖ్యమంత్రి చంద్రబాబు నాయుడు, ఇతర ప్రతినిధులు, ఉన్నతాధికారులు నగరానికి చేరుకోనున్న నేపథ్యంలో వసతి, రవాణా, భద్రత, ప్రోటోకాల్‌ ఏర్పాట్లలో ఎలాంటి లోపాలు ఉండకూడదన్నారు. ప్రారంభోత్సవానికి కేంద్ర హోంమంత్రి అమిత్‌ షా, కేంద్ర వాణిజ్య, పరిశ్రమల శాఖ మంత్రి పీయూష్‌ గోయల్‌, ముగింపు కార్యక్రమానికి ఉపరాష్ట్రపతి సీపీ రాధాకృష్ణన్‌ హాజరుకానున్నట్లు తెలిపారు. ఇతర దేశాల మంత్రులు, రాయబారులు, కేంద్ర, రాష్ట్ర ఉన్నతాధికారులు కూడా పాల్గొంటారని చెప్పారు. అతిథుల కోసం గుర్తించిన హోటళ్లు, వాహనాలు, లైజన్‌, ప్రోటోకాల్‌ అధికారులు పరస్పరం సమన్వయం చేసుకోవాలని సూచించారు. ఈ నెల 14న అతిథుల సందర్శన కోసం గుర్తించిన పర్యాటక ప్రాంతాలు, బీచ్‌లను విద్యుత్‌ దీపాలు, పూలు, మొక్కలతో సుందరీకరించాలని, పరిసరాలను పరిశుభ్రంగా ఉంచాలని జీవీఎంసీ కమిషనర్‌ను ఆదేశించారు. అన్ని వేదికల వద్ద సమాచార శాఖ రూపొందించిన బ్యాక్‌డ్రాప్‌లనే వినియోగించాలని స్పష్టం చేశారు. అంతా సమష్టిగా పనిచేయాలి సమ్మిట్‌కు ప్రజాప్రతినిధులు, అధికారులు సమష్టిగా పనిచేయాలని జిల్లా ఇన్‌చార్జి మంత్రి డోలా శ్రీ బాలవీరాంజనేయస్వామి సూచించారు. సోమవారం నిర్వహించిన వర్చువల్‌ సమీక్షలో ఆయన మాట్లాడుతూ సుమారు 59 దేశాల నుంచి ప్రతినిధులు, 15 మంది విదేశీ మంత్రులు, 1,250 మందికిపైగా దేశీయ, అంతర్జాతీయ పారిశ్రామికవేత్తలు, సీఈవోలు హాజరుకానున్నట్లు తెలిపారు. ‘నావిగేటింగ్‌ ది న్యూ వరల్డ్‌ ఆర్డర్‌: ట్రేడ్‌, టెక్నాలజీ, ట్రస్ట్‌’ ఇతివృత్తంతో జరిగే సదస్సులో వాణిజ్యం, గ్రీన్‌ ఎనర్జీ, క్వాంటం కంప్యూటింగ్‌, టెక్నాలజీ ఇన్నోవేషన్‌, ఏరోస్పేస్‌ మాన్యుఫ్యాక్చరింగ్‌ తదితర కీలక రంగాలపై చర్చలు జరగనున్నాయి. రాష్ట్ర పారిశ్రామిక, పెట్టుబడి అవకాశాలను చాటిచెప్పేందుకు ఏపీ పెవిలియన్‌, ఎంఎస్‌ఎంఈ ఎగ్జిబిషన్‌ ఏర్పాటు చేస్తున్నారు. అతిథుల కోసం 26 హోటళ్లలో 580 గదులను గుర్తించామని కలెక్టర్‌ ఎం.అభిషిక్త్‌ కిషోర్‌ తెలిపారు. ఎవరికి ఏ హోటల్‌ కేటాయించారనే వివరాలను లైజన్‌ అధికారులకు ఇప్పటికే అందజేశామన్నారు. ప్రధాన, ఇతర వేదికల్లో సీటింగ్‌, డీమార్కింగ్‌ ఏర్పాట్లు చేస్తున్నామని, భోజన సదుపాయాలను కూడా వేర్వేరుగా కల్పిస్తున్నామని వివరించారు. సమీక్షల్లో ఎంపీ శ్రీ భరత్‌, ప్రభుత్వ విప్‌, ఎమ్మెల్సీ వేపాడ చిరంజీవిరావు, ఎమ్మెల్యేలు పల్లా శ్రీనివాసరావు, వంశీకృష్ణ శ్రీనివాస్‌, విష్ణుకుమార్‌ రాజు, సీపీ శంఖబ్రత్‌ బాగ్చి, జీవీఎంసీ కమిషనర్‌ కేతన్‌ గార్గ్‌, జేసీ విద్యాధరి, ఏపీఐఐసీ ఎండీ దినేష్‌కుమార్‌, వివిధ శాఖల అధికారులు పాల్గొన్నారు.

సాక్షి, విశాఖపట్నం: పారిశ్రామిక ప్రగతి ముసుగులో విశాఖ సాగరతీరం సాక్షిగా మరో భూ దందాకు రంగం సిద్ధమవుతోందన్న ఆరోపణలు వెల్లువెత్తుతున్నాయి. ఈ నెల 12, 13 తేదీల్లో జరగనున్న సీఐఐ భాగస్వామ్య సదస్సు ద్వారా రాష్ట్రానికి పెట్టుబడులు తీసుకురావడం కంటే అధికార కూటమి నేతల ప్రయోజనాలకే పెద్దపీట వేస్తున్నారనే విమర్శలు వ్యక్తమవుతున్నాయి. గతంలో కాగితాలకే పరిమితమైన ఎంవోయూల తరహాలోనే మరోసారి భారీ ఒప్పందాల ప్రచారానికి తెరతీస్తున్నారనే ఆరోపణలు వినిపిస్తున్నాయి. పరిశ్రమల స్థాపన పేరుతో ప్రభుత్వ ఖాళీ స్థలాలను తమ అనుచరులకు కట్టబెట్టేందుకు నియోజకవర్గాల వారీగా జాబితాలు సిద్ధం చేస్తున్నారనే విమర్శలు వస్తున్నాయి. అంకెల గారడీకి రంగం సిద్ధం! సదస్సులో భారీ సంఖ్యలో ఎంవోయూలు కుదిరినట్లు చూపించుకునేందుకు కసరత్తు జరుగుతోందని సమాచారం. ఇందుకోసం క్షేత్రస్థాయి వాస్తవాలతో సంబంధం లేకుండా బ్రిక్స్‌, టైల్స్‌ తదితర వ్యాపారాల వారీగా జాబితాలు రూపొందిస్తున్నట్లు తెలుస్తోంది. సాధారణ వ్యాపారాలు నిర్వహించే వారిని సైతం పారిశ్రామికవేత్తలుగా చూపిస్తూ ఒప్పందాలు కుదుర్చుకునేందుకు ప్రయత్నాలు సాగుతున్నాయనే ఆరోపణలు వినిపిస్తున్నాయి. గతంలోనూ తమ అనుచరులతోనే ఎంవోయూలు చేయించుకుని, ఆ తర్వాత పరిశ్రమల స్థాపనలో ఆశించిన పురోగతి సాధించలేకపోయారనే విమర్శలు టీడీపీ ప్రభుత్వంపై ఉన్నాయి. అయినా మళ్లీ అదే తరహా విధానాన్ని అనుసరిస్తున్నారనే ఆరోపణలు వ్యక్తమవుతున్నాయి. కూటమి నేతలకు భూ నజరానా? ఈ సదస్సు ద్వారా పెట్టుబడుల ఆకర్షణ కంటే అధికార పార్టీకి చెందిన నేతలు, అనుచరులకు ప్రభుత్వ భూములు కట్టబెట్టేందుకే ప్రాధాన్యమిస్తున్నారనే విమర్శలు వస్తున్నాయి. పారిశ్రామికవేత్తల ముసుగులో ప్రభుత్వ రాయితీలు, భూములు పొందేందుకు పావులు కదుపుతున్నారనే ఆరోపణలు వినిపిస్తున్నా యి. ఉమ్మడి విశాఖ జిల్లా పరిధిలో 200 ఎకరాలకు పైగా ప్రభుత్వ భూములను పరిశ్రమల పేరుతో కేటాయించేందుకు ప్రయత్నాలు జరుగుతున్నట్లు ప్రచారం సాగుతోంది. దీంతో ఏపీఐఐసీ, పర్యాటక శాఖల పరిధిలోని ఖాళీ స్థలాలపై కూటమి నేతలు కన్నేశారనే విమర్శలు వ్యక్తమవుతున్నాయి. చిన్న తరహా హోటళ్లు, రెస్టారెంట్లు నిర్వహించే వారిని సైతం పారిశ్రామికవేత్తలుగా చూపించి భూములు పొందేందుకు ప్రయత్నిస్తున్నారనే ఆరోపణలు వెల్లువెత్తుతున్నాయి. పారిశ్రామిక విధానంపై ప్రశ్నలు పారిశ్రామిక అనుభవం లేని వారికి సైతం కోట్లాది రూపాయల విలువైన భూములు కేటాయించేలా ప్రయత్నాలు జరుగుతున్నాయనే ఆరోపణలు వినిపిస్తున్నాయి. సాధారణ పారిశ్రామికవేత్తలకు అందని రాయితీలు, అనుమతులు అధికార పార్టీ నేతల సిఫార్సులతో సులభంగా లభిస్తున్నాయనే విమర్శలు వస్తున్నాయి. పరిశ్రమల శాఖను కొందరు నేతలు తమ ప్రయోజనాలకు వేదికగా మార్చుకుంటున్నారనే ఆరో పణలు వ్యక్తమవుతున్నాయి. గతంలో 2016, 2018, 2025 సంవత్సరాల్లో నిర్వహించిన సదస్సుల్లో కుదిరి న ఒప్పందాల్లో ఎన్ని కార్యరూపం దాల్చాయన్నది ఇప్పుడు చర్చనీయాంశంగా మారింది. గత అనుభవాల నుంచి పాఠాలు నేర్చుకోకుండా మరోసారి ప్రచార ఆర్భాటాలకే ప్రాధాన్యమిస్తే పెట్టుబడుల లక్ష్యం నీరుగారడమే కాకుండా ప్రభుత్వ భూముల కేటాయింపులపైనా అనుమానాలు తలెత్తుతాయని నగరవాసులు అభిప్రాయపడుతున్నారు.

భీమునిపట్నం: బైక్‌ అదుపుతప్పి ప్రమాదవశాత్తు మురుగు కాలువలో పడి ఓ వ్యక్తి మృతి చెందాడు. ఈ సంఘటనకు సంబంధించి పోలీసులు తెలిపిన వివరాలు. మండలంలోని అన్నవరం గ్రామానికి చెందిన మైలిపల్లి రామస్వామి(31)కి భార్య, ఇద్దరు పిల్లలు ఉన్నారు. విశాఖలోని ఓ ప్రైవేటు సంస్థలో పనిచేస్తున్నాడు. భీమిలి ఎగువపేట వద్ద తన బంధువు ఇంటికి శనివారం వచ్చి తన బైక్‌పై తగరపువలస వెళ్తుండగా, జమ్మిచెరువు పార్కు దాటిన తరువాత వాహనం అదుపుతప్పి, కల్వర్ట్‌ కింద ఉన్న మురుగు కాలువలో పడిపోయాడు. ఈ ప్రమాదంలో తీవ్రగాయాలయ్యాయి. అతని వెనుక వస్తున్న మేనమామ రామారావుకు ప్రమాదం గురించి తెలిసి వెంటనే రామస్వామిని ప్రభుత్వ ఆస్పత్రికి తరలించగా అప్పటికే అతను మృతి చెందాడు. పోలీసులు కేసు నమోదు చేసి దర్యాప్తు చేస్తున్నారు.

సింహాచలం: సింహగిరిపై నరకాసుర వధ ఉత్సవాన్ని ఆదివారం రాత్రి వైభవంగా నిర్వహించారు. శ్రీ వరాహ లక్ష్మీనృసింహ స్వామి ఉత్సవమూర్తులైన గోవిందరాజస్వామి, శ్రీదేవి, భూదేవిలను ఒక పల్లకీలో, నరకాసురుడి విగ్రహాన్ని మరో పల్లకీలో కొలువుదీర్చి.. ఇరు పల్లకీలను మాడ వీధుల్లో ఎదురెదురుగా నిలిపి యుద్ధ ఘట్టాలను ప్రదర్శించారు. అనంతరం నరకాసుర వధ ఘట్టాన్ని నిర్వహించి, పెద్ద ఎత్తున బాణసంచా కాల్చారు. అర్చకులు నరకాసుర వధ ఘట్టాలను భక్తులకు వివరించారు. ప్రధానార్చకులు కరి సీతారామాచార్యులు, అర్చకుడు పవన్‌కుమార్‌, వేద పండితులు ఉత్సవాన్ని నిర్వహించారు. సింహగిరి గిరిజనులు పెద్ద సంఖ్యలో పాల్గొన్నారు.

విశాఖ లీగల్‌: అర్హత కలిగిన ప్రతి ఒక్కరికీ ఉచిత న్యాయ సహాయం అందించడమే న్యాయ సేవా ప్రాధికార సంస్థ లక్ష్యమని విశాఖ జిల్లా ప్రధాన న్యాయమూర్తి జి.శ్రీనివాస్‌ స్పష్టం చేశారు. సోమవారం జిల్లా కోర్టు ప్రాంగణంలోని న్యాయ సేవా సదన్‌లో నిర్వహించిన న్యాయ సేవా దినోత్సవాన్ని ఆయన ప్రారంభించారు. ఈ సందర్భంగా ఆయన మాట్లాడుతూ రాజ్యాంగంలోని ఆర్టికల్‌ 39(ఎ) ప్రకారం అర్హులైన ప్రతి ఒక్కరికీ ఉచిత న్యాయ సహాయం పొందే హక్కు ఉందన్నారు. పేదలు, మహిళలు, దివ్యాంగులు, వెనుకబడిన వర్గాలు, షెడ్యూల్డ్‌ కులాలు, తెగలు, ఆర్థికంగా వెనుకబడిన వారందరికీ ఈ సదుపాయం అందుబాటులో ఉంటుందని వివరించారు. జిల్లా న్యాయ సేవాధికార సంస్థ కార్యదర్శి ఆర్‌.సన్యాసినాయుడు మాట్లాడుతూ అర్హులైన వారికి నిరంతరం న్యాయ సహాయం అందించేందుకు సంస్థ సిద్ధంగా ఉందన్నారు. న్యాయ సహాయ క్లినిక్‌లు, ప్రత్యేక శిబిరాల ద్వారా సేవలందిస్తున్నామని, పారా లీగల్‌ వలంటీర్లకు శిక్షణ ఇవ్వడంతోపాటు న్యాయవాదుల సేవలను అందుబాటులో ఉంచుతున్నామని తెలిపారు. కార్యక్రమంలో బార్‌ అసోసియేషన్‌ అధ్యక్షుడు నమ్మి సన్యాసిరావు, రాష్ట్ర బార్‌ కౌన్సిల్‌ సభ్యుడు ఎస్‌. కృష్ణమోహన్‌, ఉపాధ్యక్షుడు బీవీఆర్‌ మూర్తి, జాతీయ న్యాయ సేవా శిక్షకుడు రఘుపాత్రుని శ్రీనివాసరావు, సీనియర్‌ న్యాయవాదులు, న్యాయమూర్తులు, కోర్టు సిబ్బంది, కక్షిదారులు, వివిధ సేవా సంస్థల ప్రతినిధులు పాల్గొన్నారు.

జగదాంబ: దీపావళి పండగ సందడి పూర్ణామార్కెట్‌ను కమ్మేసింది. ఆదివారం పండగ కావడంతో శనివారమే మార్కెట్‌కు జనం పోటెత్తారు. పూజా సామగ్రి మొదలుకొని పూలు, పండ్లు, టపాసులు, చెరుకులు, పత్రులు.. ఇలా పండగకు అవసరమైన ప్రతి వస్తువు కోసం వినియోగదారులు మార్కెట్‌కు తరలివచ్చారు. దీంతో పూర్ణామార్కెట్‌ జనసంద్రమైంది. ఒకవైపు కొనుగోళ్ల సందడి నెలకొంటే.. మరోవైపు పెరిగిన ధరలు సామాన్యులకు షాక్‌ ఇచ్చాయి. దీపావళి సందర్భంగా మార్కెట్‌లో తాత్కాలిక దుకాణాలు పెద్ద సంఖ్యలో వెలిశాయి. ప్రమిదలు, పూజా సామగ్రి, పూలు, చెరుకులు, పత్రులు, అరటిడొప్పలు, పండ్ల దుకాణాలతో మార్కెట్‌ కళకళలాడింది. అయితే పండగ డిమాండ్‌కు అనుగుణంగా ధరలూ చుక్కలంటాయి. ముఖ్యంగా పూల ధరలు కొనుగోలుదారులకు భారంగా మారాయి. 50 గ్రాముల పూలు రూ.150కు పైగా పలికాయి. నిన్నమొన్నటి వరకు కిలో రూ.200 ఉన్న యాపిల్‌ ధర ప్రస్తుతం రూ.350కు చేరింది. దానిమ్మ ధరలు కూడా అందనంత ఎత్తుకు చేరాయి. చిన్న సైజు కిలో రూ.350, పెద్ద సైజు రూ.500కు విక్రయించారు. నల్ల ద్రాక్ష కిలో రూ.80 నుంచి రూ.100, అరటిపండ్లు రూ.100, బత్తాయిలు రూ.120 చొప్పున అమ్మారు. వీటితోపాటు అరటిడొప్పలు, తమలపాకులు, చెరుకులు, ఆముదం చెట్టుకొమ్మలు, పత్రులు, మట్టి ప్రమిదల ధరలూ పెరిగాయి. అగరబత్తులు, కొబ్బరికాయల ధరలు సైతం ఒక్కసారిగా పైకెగిశాయి.

మండలం గెలిచింది మెజారిటీ ఆనందపురం జనసేన 1557 పెందుర్తి టీడీపీ 4139 భీమిలి టీడీపీ 3110 పద్మనాభం టీడీపీ 1415 జెడ్పీటీసీ సభ్యులు ఎంపీటీసీలు.. మండలం వైఎస్సార్‌సీపీ టీడీపీ జనసేన బీజేపీ ఆనందపురం(17) 7 6 4 0 భీమునిపట్నం(12) 2 9 1 0 పద్మనాభం(15) 4 11 0 0 పెందుర్తి(9) 3 3 3 0 మొత్తం(53) 16 29 8 0 సాక్షి, విశాఖపట్నం: స్థానిక సంస్థల పరిషత్‌ ఎన్నికల్లో కూటమి పార్టీలు అధికార దుర్వినియోగానికి పాల్పడి అడ్డగోలుగా విజయం సాధించాయి. అధికార బలాన్ని అడ్డుపెట్టుకుని ఓటర్లను భయభ్రాంతులకు గురిచేయడం, విచ్చలవిడిగా డబ్బు, మద్యం ప్రలోభాలకు తెరలేపడం, కొన్ని చోట్ల రిగ్గింగ్‌లకు పాల్పడటం ద్వారా జెడ్పీటీసీ, ఎంపీటీసీ స్థానాలను చేజిక్కించుకున్నాయి. ప్రలోభాలు, బెదిరింపులతో ఎన్నికల ప్రక్రియను ప్రహసనంగా మార్చినప్పటికీ.. అధికారపక్ష అరాచకాలను వైఎస్సార్‌సీపీ అంతే ధీటుగా ఎదుర్కొని చివరి వరకూ హోరాహోరీ పోటీ ఇచ్చింది. జెడ్పీటీసీల్లో నెగ్గుకొచ్చిన కూటమి జిల్లాలోని నాలుగు జెడ్పీటీసీ స్థానాల ఓట్ల లెక్కింపు ఉత్కంఠభరితంగా సాగింది. తొలి మూడు రౌండ్లు ముగిసే సమయానికి ఇరు పక్షాల మధ్య ఓట్ల వ్యత్యాసం స్వల్పంగానే ఉంది. ము ఖ్యంగా ఆనందపురం, పెందుర్తి జెడ్పీటీసీ స్థానాల్లో రౌండ్‌ రౌండ్‌కూ ఆధిక్యం మారుతూ పోటీ నువ్వానేనా అన్నట్లు సాగింది. చివరి రౌండ్‌లో కూటమి అభ్యర్థులు స్వల్ప మెజారిటీతో విజ యం సాధించారు. పద్మనాభం, భీమిలి స్థానాల్లో మాత్రం చివ రి రెండు రౌండ్లలో కూటమి అభ్యర్థులు ఆధిక్యం సాధించారు. ఎంపీటీసీల్లో హోరాహోరీ సమరం మొత్తం 53 ఎంపీటీసీ స్థానాలకుగాను 52 స్థానాలకు ఎన్నికలు జరిగాయి. వీటిలో వైఎస్సార్‌సీపీ 16 స్థానాల్లో విజయం సాధించింది. టీడీపీ 29, జనసేన 7 స్థానాలను గెలుచుకున్నాయి. పెందుర్తి మండలం పెదగాడి ఎంపీటీసీ స్థానం జనసేనకు ఏకగ్రీవం అయింది. దీంతో జనసేన 8 స్థానాలు గెలుచుకున్నట్లయింది. పలు స్థానాల్లో స్వల్ప ఓట్ల తేడాతో వైఎస్సార్‌సీపీ అభ్యర్థులు ఓటమి పాలయ్యారు. కొన్ని చోట్ల చెల్లని ఓట్లపై అభ్యంతరాలు కూడా వ్యక్తమయ్యాయి. ఆనందపురం మండలంలో వైఎస్సార్‌సీపీ అత్యధికంగా 8 ఎంపీటీసీ స్థానాలను కైవసం చేసుకుని సత్తా చాటింది. గంభీరం ఎంపీటీసీ స్థానంలో తొలుత 36 ఓట్ల మెజారిటీతో వైఎస్సార్‌సీపీ గెలిచినట్లు తేలినా.. నాలుగుసార్లు రీకౌంటింగ్‌ నిర్వహించిన అనంతరం నాలుగు ఓట్ల ఆధిక్యంతో కూటమి అభ్యర్థి గెలిచినట్లు ప్రకటించారని వైఎస్సార్‌సీపీ నేతలు ఆరోపించారు. ఫలితాన్ని వెంటనే ప్రకటించకుండా రాత్రి 9 గంటల వరకు జాప్యం చేశారని పేర్కొన్నారు. వైఎస్సార్‌సీపీ గెలిచిన ఎంపీటీసీ స్థానాలు ఆనందపురం మండలంలో ఆనందపురం–1, ఆనందపురం–2, గొట్టిపల్లి, కుసులవాడ, గిడిజాల, మామిడిలోవ, శొంఠ్యాం స్థానాల్లో వైఎస్సార్‌సీపీ విజయం సాధించింది. పద్మనాభం మండలంలో పాండ్రంగి–2, అనంతవరం, గంధవరం, రెడ్డిపల్లి స్థానాలను కై వసం చేసుకుంది. పెందుర్తి మండలంలో సరిపల్లి, గుర్రంపాలెం, రాజయ్యపేట, భీమిలి మండలంలో చిప్పాడ, మజ్జిపేట స్థానాల్లో గెలుపొందింది. వైఎస్సార్‌సీపీ 16 చోట్ల విజయం

తాటిచెట్లపాలెం: దీపావళి, ఛత్‌పూజ తదితర పండగల నేపథ్యంలో ప్రయాణికుల రద్దీని దృష్టిలో ఉంచుకుని విశాఖ–పాట్నా మధ్య ప్రత్యేక రైళ్లను నడపనున్నట్లు విశాఖపట్నం డివిజన్‌ అధికారులు తెలిపారు. విశాఖ–పాట్నా (08588) ఆన్‌ డిమాండ్‌ స్పెషల్‌ ఎక్స్‌ప్రెస్‌ ఈ నెల 15, 22 తేదీల్లో (ఆదివారాలు) రాత్రి 7.25 గంటలకు విశాఖపట్నంలో బయలుదేరి మరుసటి రోజు రాత్రి 8 గంటలకు పాట్నా చేరుకుంటుంది. తిరుగు ప్రయాణంలో పాట్నా–విశాఖ(08587) స్పెషల్‌ ఎక్స్‌ప్రెస్‌ ఈ నెల 16, 23 తేదీల్లో (సోమవారాలు) రాత్రి 9.50 గంటలకు పాట్నాలో బయలుదేరి మరుసటి రోజు అర్ధరాత్రి 12.30 గంటలకు విశాఖపట్నం చేరుకుంటుంది. ఈ రైళ్లలో రెండు సెకండ్‌ ఏసీ, ఆరు థర్డ్‌ ఏసీ, ఆరు స్లీపర్‌, ఆరు జనరల్‌ సెకండ్‌ క్లాస్‌, రెండు సెకండ్‌ క్లాస్‌ కం లగేజీ కోచ్‌లు ఉంటాయని అధికారులు వెల్లడించారు.

మహారాణిపేట: విశాఖలో ఈ నెల 12, 13 తేదీల్లో నిర్వహించనున్న సీఐఐ భాగస్వామ్య సదస్సుకు పకడ్బందీ ఏర్పాట్లు చేయాలని కలెక్టర్‌ ఎం.అభిషిక్త్‌ కిశోర్‌ అధికారులను ఆదేశించారు. శనివారం కలెక్టరేట్‌లో వివిధ శాఖల అధికారులతో సమీక్ష నిర్వహించారు. సదస్సుకు 3 వేల నుంచి 5 వేల మంది వరకు హాజరయ్యే అవకాశం ఉన్నందున రవాణా, వాహనాలు, పాసులు, ప్రోటోకాల్‌, ఇతర సౌకర్యాలపై ప్రత్యేక దృష్టి సారించాలన్నారు. ఏయూ ఇంజినీరింగ్‌ కళాశాల మైదానంలో కార్యక్రమాలు, మౌలిక సదుపాయాలు, భోజన ఏర్పాట్లను జీవీఎంసీ కమిషనర్‌ కేతన్‌ గార్గ్‌ పర్యవేక్షించాలని సూచించారు. ముఖ్యమంత్రి పర్యటన ఏర్పాట్లను భీమిలి ఆర్డీవో, కేంద్ర మంత్రుల ప్రోటోకాల్‌ బాధ్యతలను హౌసింగ్‌ పీడీ, ఫ్యాక్టరీస్‌ ఇన్‌స్పెక్టర్‌ సమన్వయం చేయాలన్నారు. ప్లీనరీ హాల్‌ నిర్వహణను వీఎంఆర్డీఏ అదనపు కమిషనర్‌ కీర్తి, పీసీబీ ఈఈ ముకుందరావు, రూరల్‌ తహసీల్దార్‌ చేపట్టాలని ఆదేశించారు. వెల్‌కమ్‌ డిన్నర్‌, క్యాటరింగ్‌, సీటింగ్‌ ఏర్పాట్లలో ముందస్తు ప్రణాళిక అవసరమన్నారు. చివరి నిమిషంలో సమస్యలు తలెత్తకుండా ప్రత్యామ్నాయ ఏర్పాట్లు చేసుకోవాలని, అతిథుల పట్ల మర్యాదగా వ్యవహరించాలని సూచించారు. అన్ని శాఖలు సమన్వయంతో పనిచేసి సదస్సును విజయవంతం చేయాలన్నారు. సమావేశంలో జీవీఎంసీ కమిషనర్‌ కేతన్‌ గార్గ్‌, జాయింట్‌ కలెక్టర్‌ గొబ్బిళ్ల విద్యాధరి, డీసీపీ మణికంఠ, డీఆర్వో విశ్వేశ్వరనాయుడు, ఆర్డీవోలు దిలీప్‌ చక్రవర్తి, సంగీత్‌ మాధుర్‌ తదితరులు పాల్గొన్నారు.

అక్కిరెడ్డిపాలెం: రోడ్డు ప్రమాదం ఓ కుటుంబంలో తీరని విషాదాన్ని నింపింది. ద్విచక్ర వాహనంపై భర్తతో కలిసి ప్రయాణిస్తున్న భార్య కళ్ల ముందే లారీ రూపంలో మృత్యువు దూసుకొచ్చింది. వెనుక నుంచి వచ్చిన లారీ బలంగా ఢీకొనడంతో భర్త సీరపు ఈశ్వరరావు (46) అక్కడికక్కడే ప్రాణాలు కోల్పోయాడు. ఈ ఘటన షీలానగర్‌ జాతీయ రహదారిపై శనివారం ఉదయం చోటుచేసుకుంది. గాజువాక ట్రాఫిక్‌ పోలీసులు తెలిపిన వివరాల ప్రకారం.. గోపాలపట్నంలోని వెంకటాపురం ఎల్జీ పాలిమర్స్‌ ప్రాంతానికి చెందిన ఈశ్వరరావు ప్రైవేట్‌గా రాడ్‌ బెండింగ్‌ పనులు చేసుకుంటూ భార్య గాయత్రిదేవి, ఇద్దరు పిల్లలతో జీవనం సాగిస్తున్నాడు. శనివారం ఉదయం వ్యక్తిగత పనుల నిమిత్తం భార్యను ద్విచక్ర వాహనంపై ఎక్కించుకుని పాత గాజువాకకు వెళ్లాడు. పనులు ముగించుకుని గాజువాక నుంచి ఎన్‌ఏడీ వైపు ఇంటికి తిరిగి వెళ్తుండగా ఉదయం 8.50 గంటల సమయంలో షీలానగర్‌ బస్‌స్టాప్‌ వద్దకు చేరుకున్నారు. అదే సమయంలో వెనుక నుంచి వేగంగా వచ్చిన లారీ వారి బైక్‌ను బలంగా ఢీకొట్టింది. దీంతో భార్యాభర్తలిద్దరూ రోడ్డుపై పడిపోగా.. లారీ ఈశ్వరరావు శరీరంపై నుంచి వెళ్లడంతో తీవ్రంగా గాయపడి అక్కడికక్కడే మృతిచెందాడు. కళ్ల ముందే భర్త ప్రాణాలు కోల్పోవడంతో గాయత్రిదేవి కన్నీరుమున్నీరైంది. ఆమెకు కూడా తీవ్ర గాయాలు కావడంతో స్థానికులు వెంటనే కేజీహెచ్‌కు తరలించారు. ఘటనా స్థలానికి చేరుకున్న పోలీసులు మృతదేహాన్ని పోస్టుమార్టం నిమిత్తం కేజీహెచ్‌కు తరలించి, లారీ డ్రైవర్‌పై కేసు నమోదు చేసి దర్యాప్తు చేస్తున్నారు. రోడ్డు దాటుతుండగా బస్సు ఢీ.. యాచకుడి మృతి షీలానగర్‌ నుంచి ఎన్‌ఏడీ కొత్త రోడ్డుకు వెళ్లే జాతీయ రహదారిపై ఎయిర్‌పోర్టు కంటైనర్‌ యార్డు వద్ద రోడ్డు దాటుతున్న భిక్షాటన చేసుకునే వ్యక్తిని ఆర్టీసీ బస్సు బలంగా ఢీకొట్టింది. దీంతో అతడు అక్కడికక్కడే ప్రాణాలు కోల్పోయాడు. మృతుడు నిత్యం ఈ ప్రాంతంలోనే తిరుగుతుంటాడని స్థానికులు తెలిపారు. సమాచారం అందుకున్న పోలీసులు ఘటనా స్థలానికి చేరుకుని మృతదేహాన్ని కేజీహెచ్‌కు తరలించారు. మృతుడి పూర్తి వివరాలు తెలియాల్సి ఉంది.

కౌంటింగ్‌పై కలెక్టర్‌ పర్యవేక్షణ మహారాణిపేట: జిల్లాలో పరిషత్‌ ఎన్నికల ఓట్ల లెక్కింపు ప్రక్రియను కలెక్టర్‌ ఎం.అభిషిక్త్‌ కిశోర్‌ పర్యవేక్షించారు. భీమిలి సెడార్‌ పాఠశాలలో పద్మనాభం, భీమునిపట్నం మండలాల కౌంటింగ్‌ కేంద్రాలను సందర్శించి ఏర్పాట్లు, లెక్కింపు సరళిని పరిశీలించారు. జిల్లా పరిషత్‌ కార్యాలయంలోని కమాండ్‌ కంట్రోల్‌ రూమ్‌ నుంచి జిల్లా వ్యాప్తంగా కౌంటింగ్‌ పురోగతిని సమీక్షించారు. ఎన్నికల నిబంధనలను పాటిస్తూ పారదర్శకంగా, ఎలాంటి పొరపాట్లకు తావులేకుండా లెక్కింపు పూర్తి చేయాలని అధికారులను ఆదేశించారు. విదేశీయుల రాకపోకల వివరాల నమోదు తప్పనిసరి ద్వారకానగర్‌: హోటళ్లు, లాడ్జీలు, గెస్ట్‌హౌస్‌లు, హోమ్‌స్టేలు, అద్దె ఇళ్లలో బస చేసే విదేశీయుల వివరాలను తప్పనిసరిగా ఆన్‌లైన్‌లో నమోదు చేయాలని నగర పోలీస్‌ శాఖ ఆదేశించింది. ఇమ్మిగ్రేషన్‌ అండ్‌ ఫారినర్స్‌ చట్టం–2025 ప్రకారం విదేశీయులు, ఓసీఐ కార్డుదారుల రాక, నిష్క్రమణ వివరాలను నిర్దేశిత పోర్టల్‌లో నమోదు చేయాలని నగర పోలీస్‌ కమిషనర్‌, విదేశీయుల నమోదు అధికారి డాక్టర్‌ శంఖబ్రత బాగ్చి తెలిపారు. విదేశీయులు వసతి గృహానికి చేరుకున్న 24 గంటల్లోపు రాక వివరాలు, వెళ్లిపోయిన 24 గంటల్లోపు నిష్క్రమణ వివరాలు నమోదు చేయాలన్నారు. ఇందుకోసం గతంలో ఫారం–సీగా పిలిచే ఫారం–3ను ఆన్‌లైన్‌లో సమర్పించాలని సూచించారు. సంబంధిత రికార్డులను ఎలక్ట్రానిక్‌ రూపంలో భద్రపరిచి, తనిఖీల సమయంలో అధికారులకు అందుబాటులో ఉంచాలన్నారు. నిబంధనలు ఉల్లంఘిస్తే చట్టంలోని సెక్షన్‌ 23(బి) ప్రకారం గరిష్టంగా మూడేళ్ల జైలు శిక్ష లేదా రూ.3 లక్షల జరిమానా లేదా రెండూ విధించే అవకాశం ఉందని హెచ్చరించారు. సంబంధిత సంస్థల యాజమాన్యాలు వెంటనే నమోదు ప్రక్రియ పూర్తి చేసి నిబంధనలు పాటించాలని కోరారు.

అల్లిపురం: నగరంలో చేపడుతున్న అభివృద్ధి పనులను వేగవంతం చేసి, నాణ్యతా ప్రమాణాలతో నిర్ణీత గడువులో పూర్తి చేయాలని జీవీఎంసీ కమిషనర్‌ కేతన్‌ గార్గ్‌ అధికారులను ఆదేశించారు. శనివారం సౌత్‌ జోన్‌ పరిధిలో పర్యటించిన ఆయన వెలంపేటలో 177 గృహాల నిర్మాణ పనులు, ముడసర్లోవలో వర్కింగ్‌ ఉమెన్స్‌ హాస్టల్‌ పనులను పరిశీలించారు. పనుల్లో జాప్యంపై అసహనం వ్యక్తం చేసి, వేగం పెంచాలని సూచించారు. అలాగే సీఐఐ సదస్సు నేపథ్యంలో ఆర్‌.కె. బీచ్‌ రోడ్డులో చేపడుతున్న సుందరీకరణ పనులను సమీక్షించి, ఈనెల 12, 13 తేదీల్లోగా అన్ని పనులు పూర్తి చేయాలని ఆదేశించారు. మహిళల వసతి గృహాలను త్వరితగతిన అందుబాటులోకి తీసుకురావాలని స్పష్టం చేశారు.

మరో ముగ్గురికి తీవ్ర గాయాలు భీమునిపట్నం: భీమిలి బీచ్‌ రోడ్డులోని ఐఎన్‌ఎస్‌ కళింగ సమీపంలో శనివారం ఉదయం జరిగిన రోడ్డు ప్రమాదంలో బీటెక్‌ విద్యార్థి మృతి చెందాడు. విశాఖ నుంచి భీమిలి వైపు నలుగురు విద్యార్థులు కారులో వేగంగా వెళ్తుండగా అదుపుతప్పి రోడ్డుపక్కన ఉన్న లోతైన ప్రాంతంలో బోల్తాపడింది. ఈ ప్రమాదంలో గీతం కళాశాలలో బీటెక్‌ ప్రథమ సంవత్సరం చదువుతున్న భవేశ్‌ (19) తీవ్రంగా గాయపడి అక్కడికక్కడే మృతి చెందాడు. కారులో ఉన్న అతని స్నేహితులు శ్యాంసుందర్‌, శ్రీమంత్‌ యాదవ్‌, వెంకట్‌కు గాయాలయ్యాయి. వెంటనే వారిని భీమిలి ప్రభుత్వ ఆసుపత్రికి తరలించారు. అక్కడ ప్రాథమిక చికిత్స అనంతరం మెరుగైన వైద్యం కోసం కేజీహెచ్‌కు పంపించారు.

ఆరిలోవ: ఇందిరా గాంధీ జూ పార్కులో వన్యప్రాణులకు మెరుగైన వైద్య సేవలు అందించడంలో ప్రత్యేక దృష్టి సారించాలని జూ అధికారులకు రాష్ట్ర అటవీ శాఖ అదనపు ముఖ్య కార్యదర్శి రాహుల్‌ పాండే సూచించారు. జూ పార్కును శనివారం ఆయన సందర్శించారు. అధికారులతో కలిసి వన్యప్రాణుల ఎన్‌క్లోజర్లు, వెటర్నరీ ఆస్పత్రి, ఇటీవల జరిగిన పలు అభివృద్ధి పనులను పరిశీలించారు. ఇటీవల ఏయే రకాల వన్యప్రాణులను ఏయే జూ పార్కుల నుంచి తీసుకొచ్చారు, వాటికి బదులుగా విశాఖ జూ నుంచి ఏయే జంతువులు, పక్షులను తరలించారు, ప్రస్తుతం ఎన్ని వన్యప్రాణులున్నాయి, జూలో సిబ్బంది పనితీరు తదితర విషయాల గురించి జూ క్యూరేటర్‌ జి.మంగమ్మను అడిగి తెలుసుకున్నారు. వెటర్నరీ ఆస్పత్రిలో అందుబాటులో ఉన్న మందులు, మూగజీవాలకు అందుతున్న వైద్య సేవలపై ఆరా తీశారు. జూలోని వివిధ విభాగాల్లో భద్రత కోసం కంచెలు ఏర్పాటు చేయాలని క్యూరేటర్‌కు సూచించారు. గోడలపై మెరుగుదల కోసం తెలుపు, ఎరుపు, ఆకుపచ్చ రంగులు వేసి ఆకర్షణీయంగా తీర్చిదిద్దాలన్నారు. జూ అసిస్టెంట్‌ క్యూరేటర్లు, జూ వైద్యులు, సిబ్బంది పాల్గొన్నారు. సింహాన్ని దత్తత తీసుకున్న బాలుడు నగరానికి చెందిన విఖ్యాత్‌ సిద్ధాన్‌ అనే బాలుడు తన పుట్టిన రోజు సందర్భంగా జూలో మగ సింహాన్ని మూడు నెలలకు దత్తత తీసుకున్నాడు. తన తల్లిదండ్రులతో కలిసి శనివారం జూ పార్కుకు వెళ్లి సింహానికి మూడు నెలల ఆహారం కోసం రూ.54,000 విరాళం అందించాడు. ఈ సందర్భంగా బాలుడిని రాహుల్‌ పాండే అభినందించి.. దత్తత ధ్రువీకరణ పత్రాన్ని అందజేశారు. కుమారుడిని ప్రోత్సహించిన తల్లిదండ్రులకు ఆయన కృతజ్ఞతలు తెలిపారు.

బీచ్‌రోడ్డు(విశాఖ): నగరంలోని డీఎన్‌సీఎస్‌ జీవ వైవిధ్య ఉద్యానవనంలో అరుదైన దృశ్యం ఆవిష్కృతమైంది. దాదాపు పన్నెండేళ్ల నిరీక్షణకు తెరదించుతూ అరుదైన కొవ్వొత్తి చెట్టు తొలిసారిగా కాపు కాసింది. చెట్టు నిండా కొవ్వొత్తుల ఆకారంలో వేలాడుతున్న పసుపు రంగు పండ్లు చూపరులను ఆకట్టుకుంటున్నాయి.సాయంత్రం వేళల్లో ఈ పండ్లు సహజంగా వెలిగే దీపాల్లా కనిపిస్తూ ఉద్యానవనానికి ప్రత్యేక ఆకర్షణగా నిలుస్తున్నాయి. అరుదైన ఈ వృక్షాన్ని చూసేందుకు వృక్ష ప్రేమికులు, విద్యార్థులు, నగరవాసులు తరలివస్తున్నారు. చెట్టు మొదలు నుంచే పూలు, పండ్లు ఈ చెట్టు అసలు పేరు కొవ్వొత్తి చెట్టు (పార్మెంటీరా సెరిఫెరా). బిగ్నోనియేసి కుటుంబానికి చెందిన ఈ అలంకార వృక్షం స్వస్థలం పనామా దేశం. ఏడాది పొడవునా పచ్చగా ఉండే ఈ చెట్టు ఆకులు మూడు కలసి ఒకే కాడకు ఏర్పడతాయి.ఈ చెట్టు ప్రత్యేకత ఏమిటంటే.. సాధారణంగా కొమ్మల చివర వచ్చే పూలు, పండ్లు దీనికి మాత్రం చెట్టు మొదలు నుంచే ఏర్పడతాయి. ఆకుపచ్చ, తెలుపు రంగుల మేళవింపుతో గంట ఆకారంలో పూలు పూస్తాయి. అనంతరం పొడవైన స్తంభాల్లాంటి పండ్లు ఏర్పడి, వాటిపై ఉండే మైనపు పూతతో పసుపు రంగులో కొవ్వొత్తుల్లా మెరుస్తాయి. ఈ పండ్లను తినవచ్చని, ఆకులు, వేర్లలో ఔషధ గుణాలు ఉన్నట్లు వృక్ష శాస్త్ర నిపుణులు చెబుతున్నారు. ఎన్నో ఏళ్ల తర్వాత ఒక్కసారి కనిపించిన ఈ ప్రకృతి అద్భుతం ప్రస్తుతం డీఎన్‌సీఎస్‌ ఉద్యానవనానికి ప్రత్యేక ఆకర్షణగా మారింది.

బీచ్‌రోడ్డు: పర్యాటక ప్రియులకు ఐఆర్‌సీటీసీ శుభవార్త అందించింది. విశాఖ నుంచి దేశంలోని ప్రముఖ పర్యాటక ప్రాంతాలను సందర్శించేలా ఇండియన్‌ రైల్వే క్యాటరింగ్‌ అండ్‌ టూరిజం కార్పొరేషన్‌ (ఐఆర్‌సీటీసీ) రెండు ప్రత్యేక విమాన టూర్‌ ప్యాకేజీలను ప్రకటించింది. కర్ణాటక తీర ప్రాంతాలతో పాటు ఈశాన్య భారతంలోని ప్రకృతి అందాలకు నెలవైన మేఘాలయ, అస్సాం రాష్ట్రాలను సందర్శించేలా ఈ ప్యాకేజీలను రూపొందించింది. వీటి బుకింగ్‌లను కూడా ప్రారంభించినట్లు అధికారులు తెలిపారు. నగరంలోని ఓ హోటల్‌లో శుక్రవారం నిర్వహించిన విలేకరుల సమావేశంలో ఐఆర్‌సీటీసీ చీఫ్‌ సూపర్‌వైజర్‌ రామచంద్ర కుమార్‌ పర్యాటక ప్యాకేజీల వివరాలను వెల్లడించారు. మొదటి ప్యాకేజీగా ‘కోస్టల్‌ కారిడార్‌ ఆఫ్‌ కర్ణాటక’ పేరుతో ఐదు రాత్రులు, ఆరు రోజుల పర్యటనను ఏర్పాటు చేశారు. నవంబర్‌ 25 నుంచి 30వ తేదీ వరకు జరిగే ఈ టూర్‌లో ఉడిపి, గోకర్ణ, మురుడేశ్వర్‌, శృంగేరి, ధర్మస్థల, కుక్కే సుబ్రహ్మణ్య, మంగళూరు ప్రాంతాలను సందర్శించవచ్చు. ఈ ప్యాకేజీకి సింగిల్‌ ఆక్యుపెన్సీకి రూ.57,450, డబుల్‌ ఆక్యుపెన్సీకి రూ.46,100, ట్రిపుల్‌ ఆక్యుపెన్సీకి రూ.44,600 చొప్పున ధరలను నిర్ణయించారు. రెండో ప్యాకేజీగా ‘క్లౌడ్స్‌ ఆఫ్‌ మేఘాలయ అండ్‌ అస్సాం’ పేరుతో ఏడు రాత్రులు, ఎనిమిది రోజుల పర్యటనను ప్రకటించారు. డిసెంబర్‌ 2 నుంచి 9వ తేదీ వరకు జరిగే ఈ టూర్‌లో షిల్లాంగ్‌, చిరపుంజి, కాజిరంగా, గౌహతి తదితర ప్రముఖ పర్యాటక ప్రాంతాలను సందర్శించవచ్చు.ఈ ప్యాకేజీకి సింగిల్‌ ఆక్యుపెన్సీకి రూ.75,850, డబుల్‌ ఆక్యుపెన్సీకి రూ.62,150, ట్రిపుల్‌ ఆక్యుపెన్సీకి రూ.58,550 చొప్పున ఛార్జీలను నిర్ణయించారు.బుకింగ్‌లు, పూర్తి వివరాల కోసం విశాఖపట్నం రైల్వే స్టేషన్‌ ప్రధాన ప్రవేశ ద్వారం గేట్‌ నంబర్‌–1 వద్ద ఉన్న ఐఆర్‌సీటీసీ కార్యాలయాన్ని సంప్రదించాలని అధికారులు సూచించారు. మరిన్ని వివరాలు, ఆన్‌లైన్‌ బుకింగ్‌ల కోసం www.irctctourism.com వెబ్‌సైట్‌ను సందర్శించాలని తెలిపారు. విశాఖ నుంచి ఐఆర్‌సీటీసీ టూర్‌ ప్యాకేజీలు

తాటిచెట్లపాలెం : దొండపర్తిలోని పద్మపూజిత వీల్స్‌ మార్ట్‌ కార్యాలయంలో దసరా సందర్భంగా లక్కీ డ్రా కార్యక్రమాన్ని నిర్వహించారు. ఈ సందర్భంగా సంస్థ అధినేత ఆర్‌ఎస్‌వీపీ బసవరాజు మాట్లాడుతూ గత 24 సంవత్సరాలుగా పద్మపూజిత వీల్స్‌ మార్ట్‌ ఆంధ్రప్రదేశ్‌, తెలంగాణ రాష్ట్రాల్లో పలు బ్రాంచ్‌ల ద్వారా వినియోగదారులకు సేవలందిస్తోందని తెలిపారు. దసరా సందర్భంగా సుమారు 20 ఏళ్లుగా ప్రతి సంవత్సరం వినియోగదారులకు లక్కీ డ్రా నిర్వహించి బహుమతులు అందజేస్తున్నట్లు చెప్పారు. ఈ ఏడాది సుమారు రూ.75 లక్షల విలువైన బహుమతులను లక్కీ డ్రా ద్వారా అందిస్తున్నట్లు తెలిపారు. ఆంధ్రప్రదేశ్‌లోని వివిధ బ్రాంచ్‌లకు చెందిన సుమారు 100 మంది వినియోగదారులకు 50 రైస్‌ కుక్కర్లు, 25 స్మార్ట్‌ఫోన్లు, 25 రిఫ్రిజిరేటర్లను అందజేస్తున్నట్లు పేర్కొన్నారు.సంస్థ అభివృద్ధిలో తెలుగు రాష్ట్రాల ప్రజలు చూపిన ఆదరణ, సిబ్బంది చేసిన కృషి మరువలేనిదన్నారు. పద్మపూజిత చారిటబుల్‌ సంస్థ ద్వారా లాభాల్లో కొంత భాగంతో పలు సేవా కార్యక్రమాలు నిర్వహిస్తున్నట్లు తెలిపారు. రానున్న రోజుల్లో మరిన్ని బ్రాంచ్‌ల ద్వారా ప్రజలకు మరింత చేరువవుతామని చెప్పారు.కార్యక్రమంలో సంస్థ ప్రతినిధులు సాయిబాబు, మహేష్‌, రమేష్‌, ఫన్నీ, రహీం, కిరణ్‌ తదితరులు పాల్గొన్నారు.

తాటిచెట్లపాలెం: దీపావళి పండుగ సీజన్‌ కావడంతో ప్రయాణికులు తెలిసో, తెలియకో మందుగుండు, మండే స్వభావం కలిగిన పదార్థాలను రైళ్లలో తమ వెంట తీసుకెళ్తున్నారని, ఇది ప్రమాదకరమని, నేరమని సౌత్‌ కోస్ట్‌ రైల్వే అధికారులు తెలిపారు. పండుగ వేళల్లో దేశంలోని వివిధ ప్రాంతాల్లో స్థిరపడిన ప్రజలు కుటుంబాలతో కలిసి స్వగ్రామాలు, సొంత ప్రాంతాలకు ప్రయాణాలు చేస్తుంటారని, వారి ప్రయాణాలు సురక్షితంగా సాగేందుకు ఈ నిబంధనలు అమలు చేస్తున్నట్లు పేర్కొన్నారు. ఈ సీజన్‌లో రైళ్లు రద్దీగా ఉండే నేపథ్యంలో టపాసులు, మందుగుండు సామగ్రి, గ్యాస్‌ సిలిండర్లు, యాసిడ్‌, పెట్రోల్‌, కిరోసిన్‌ వంటి ప్రమాదకర వస్తువులను రైళ్లలో తీసుకెళ్లడం నిషేధమని తెలిపారు. నిబంధనలు ఉల్లంఘిస్తే మూడేళ్ల జైలు శిక్ష లేదా రూ.వెయ్యి వరకు జరిమానా లేదా రెండూ విధించే అవకాశం ఉందని వెల్లడించారు. ఎవరైనా ఇలాంటి వస్తువులను తీసుకెళ్తున్నట్లు గుర్తిస్తే సమీపంలోని రైల్వే అధికారులు, సిబ్బందికి లేదా 139 నంబర్‌కు సమాచారం అందించాలని కోరారు.ప్రయాణికులకు సురక్షితమైన, సౌకర్యవంతమైన ప్రయాణాన్ని అందించేందుకు సౌత్‌ కోస్ట్‌ రైల్వే జోన్‌ పరిధిలో ప్రత్యేక డ్రైవ్‌లు, నిరంతర తనిఖీలు, ఆకస్మిక తనిఖీలు నిర్వహిస్తున్నట్లు అధికారులు తెలిపారు.

సాయంత్రం 6 గంటల వరకే అప్పన్న దర్శనాలు సింహాచలం : నరక చతుర్దశిని పురస్కరించుకుని ఆదివారం రాత్రి సింహగిరిపై నరకాసుర వధ ఉత్సవం నిర్వహించనున్నారు. రాత్రి 7 గంటల నుంచి నరకాసురుడి విగ్రహాన్ని ఒక పల్లకిలో, శ్రీ వరాహ లక్ష్మీనృసింహస్వామి ఉత్సవమూర్తులు గోవిందరాజస్వామి, శ్రీదేవి, భూదేవిలను మరో పల్లకిలో వేంచేపు చేస్తారు.అనంతరం సింహగిరి మాడవీధిలో ఇరు పల్లకులను ఎదురెదురుగా ఉంచి నరకాసుర వధ ఘట్టాన్ని నిర్వహిస్తారు. యుద్ధ సన్నివేశాలు, నరకాసుర వధ ఘట్ట విన్నపం, పూజా కార్యక్రమాలు నిర్వహించిన అనంతరం పెద్ద ఎత్తున బాణసంచా కాల్చనున్నారు.కాగా, ఆదివారం సాయంత్రం 6 గంటల వరకు మాత్రమే భక్తులకు స్వామివారి దర్శనాలు లభిస్తాయని దేవస్థానం ఈవో జల్లేపల్లి వెంకటరావు తెలిపారు.

ఆరిలోవ: కై లాసగిరిపై డ్రోన్‌ వ్యతిరేక చర్యలపై ఏపీ కోస్టల్‌ సెక్యూరిటీ పోలీసులు, నావికాదళంతో కలిసి శుక్రవారం శిక్షణ కార్యక్రమాన్ని నిర్వహించారు. ఏపీ కోస్టల్‌ సెక్యూరిటీ పోలీసులు డీఐజీ గోపినాథ్‌ జెట్టి ఈ కార్యక్రమాన్ని పర్యవేక్షించారు.ఈ శిక్షణలో వివిధ సంస్థల మధ్య సమన్వయం, కార్యాచరణ సన్నద్ధత, డ్రోన్ల వల్ల ఎదురయ్యే భద్రతా సవాళ్లను ఎదుర్కొనే విధానాలు, సామర్థ్యాల బలోపేతం తదితర అంశాలపై అవగాహన కల్పించారు.కార్యక్రమంలో ఎస్పీ శ్రావణి, అడిషనల్‌ ఎస్పీ కె.వి. రమణ, డీఎస్పీ కిరణ్‌కుమార్‌, ఇన్‌స్పెక్టర్‌ అశోక్‌, ఎస్‌ఐ రమేష్‌ తదితరులు పాల్గొన్నారు.

డాబాగార్డెన్స్‌: జగదాంబ జంక్షన్‌లో నగర సుందరీకరణలో భాగంగా నిర్మించిన ఐకానిక్‌ క్లాక్‌టవర్‌ గడియారం పక్షం రోజులుగా పనిచేయడం లేదు. బ్రిటిష్‌ కాలం నాటి వింటేజ్‌ యూరోపియన్‌ శైలిలో నిర్మించిన ఈ టవర్‌ రాత్రివేళ విద్యుత్‌ కాంతులతో ఆకట్టుకుంటోంది. పర్యాటకులకు ఫొటోషూట్‌ స్పాట్‌గా నిలిచిన క్లాక్‌టవర్‌లో గడియారం తప్పు సమయాలను చూపుతోంది. తూర్పు వైపు 2.35 గంటలు, పడమర వైపు 6.40 గంటలు చూపిస్తుండటంతో సందర్శకులు అసంతృప్తి వ్యక్తం చేస్తున్నారు. అధికారులు స్పందించి వెంటనే మరమ్మతులు చేపట్టాలని కోరుతున్నారు. పడమర వైపున 6.40 సమయం చూపుతున్న దృశ్యంసాయంత్రం 4 గంట లకు తూర్పు వైపున 2.35 చూపుతున్న గడియారం

విశాఖ విద్య: ఆంధ్ర యూనివర్సిటీ గోల్డెన్‌ జూబ్లీ మైదానంలో దీపావళి టపాసుల విక్రయాలకు అనుమతి ఇవ్వడంపై ఆరోపణలు వెల్లువెత్తుతున్నాయి. విద్యార్థుల క్రీడా కార్యకలాపాలకు ఉపయోగించాల్సిన మైదానాన్ని టపాసుల విక్రయాలకు కేటాయించడం వెనుక పెద్ద వ్యాపార ప్రయోజనాలు ఉన్నాయనే విమర్శలు వినిపిస్తున్నాయి. కూటమి నేతల ఒత్తిడితోనే ఏయూ యంత్రాంగం మైదానాన్ని కేటాయించిందనే ఆరోపణలు వస్తున్నాయి. అద్దె కంటే ఆదాయమే ఎక్కువ? ఏయూ మైదానాన్ని టపాసుల విక్రయాలకు అద్దెకు ఇచ్చేందుకు సుమారు రూ.18 లక్షలకు ఒప్పందం కుదిరినట్లు సమాచారం. కూటమి నేతల అనుబంధ వ్యక్తికే కాంట్రాక్టు దక్కిందనే ఆరోపణలు ఉన్నాయి. అనంతరం స్థానిక కార్పొరేటర్‌ జోక్యం పెరిగిందని, ఆయన సిఫారసుతోనే స్టాళ్ల కేటాయింపులు జరిగాయని పలువురు వ్యాపారులు చెబుతున్నారు. మొత్తం 70 వరకు స్టాళ్ల ఏర్పాటుకు అనుమతి ఇచ్చినట్లు సమాచారం. ఒక్కో స్టాల్‌కు సుమారు రూ.1.20 లక్షల వరకు వసూలు చేసినట్లు ఆరోపణలు ఉన్నాయి. దీంతో వర్సిటీకి చెల్లించిన అద్దెతో పోలిస్తే కాంట్రాక్టర్‌కు రూ. 84 లక్షల భారీ ఆదాయం వచ్చే అవకాశం ఉందనే విమర్శలు వ్యక్తమవుతున్నాయి. మరోవైపు విక్రయాల అనంతరం మైదానాన్ని యథాస్థితికి తీసుకురావడానికి అయ్యే ఖర్చు కూడా వర్సిటీపై పడే అవకాశం ఉందని అంటున్నారు. భద్రతపై ఆందోళన ఏయూ సిల్వర్‌ జూబ్లీ మైదానంలో టపాసుల విక్రయాలకు అనుమతి ఇవ్వడంపై విద్యార్థి సంఘాలు ఆందోళన వ్యక్తం చేస్తున్నాయి. మైదానం చుట్టూ పలు వసతిగృహాలు ఉన్నందున అగ్నిప్రమాదాలు జరిగితే విద్యార్థుల భద్రతకు ముప్పు వాటిల్లే అవకాశం ఉందని ఏయూ పరిరక్షణ సమితి కన్వీనర్‌ డా. మీనన్‌ పేర్కొన్నారు. గతంలో ఏయూ ఇంజినీరింగ్‌ కాలేజీ మైదానాన్ని అద్దెకు ఇచ్చిన తర్వాత పునరుద్ధరణకు భారీగా ఖర్చు చేయాల్సి వచ్చిందని గుర్తుచేశారు. గోల్డెన్‌ జూబ్లీ మైదానంలో టపాసుల విక్రయాలకు అనుమతులు ఇవ్వడం సరికాదని ఎస్‌ఎఫ్‌ఐ అభ్యంతరం వ్యక్తం చేసింది. విద్యార్థుల భద్రతకు ప్రాధాన్యం ఇవ్వాలని, భద్రతా ప్రమాణాలు పాటిస్తున్నారా లేదా అనే అంశంపై కలెక్టర్‌, ఏయూ వీసీ దృష్టి సారించాలని డిమాండ్‌ చేసింది.

మల్కాపురం : స్వీట్స్‌ కొనడానికి ఆ షాపులో అడుగుపెడితే ముందుగా కనిపించేవి కాకరపువ్వొత్తులు, సిసింద్రీలు, భూచక్రాలు, సీమ టపాకాయలు..ఒక్క క్షణం బాణసంచా కేంద్రంలోకి వచ్చామేమో అనిపిస్తుంది. కానీ ఇది టపాసుల దుకాణం కాదు సుమా, పక్కా స్వీట్‌ స్టాల్‌. దీపావళి సందర్భంగా కోవాతో రకరకాల బాణసంచా నమూనాలను తీర్చిదిద్ది, వాటినే స్టాల్‌లో కొలువుదీర్చారు. ప్రతి పండుగకో ప్రత్యేకత 80వ వార్డు శ్రీహరిపురం ప్రధాన మార్గం పక్కనే ఉన్న శ్రీనివాస్‌ స్వీట్‌ స్టాల్‌ను దున్న ప్రతాప్‌ గత కొన్నేళ్లుగా నిర్వహిస్తున్నారు. పారిశ్రామిక ప్రాంతంలోని మిగిలిన స్వీట్‌ షాపులకు భిన్నంగా, ఈయన ప్రతి ఏటా ఏదో ఒక వినూత్న ప్రయోగం చేస్తుంటారు. సంక్రాంతి వస్తే తెలుగువారు ఇష్టపడే సంప్రదాయ వంటకాలు, దసరా వస్తే ఆ వేడుకకు తగ్గ మిఠాయిలు.. ఇలా సందర్భాన్ని బట్టి స్వీట్లు తయారుచేయడం ఆయన ప్రత్యేకత. ఈ దీపావళికి స్వీట్‌ కోవాతో రకరకాల బాణసంచా ఆకారాలను రూపొందించారు. ఇవి చూసిన కొనుగోలుదారులు వాటిపై మోజు పడి, బాణసంచా ఆకృతుల్లో ఉన్న కోవా స్వీట్లను ఏరికోరి కొంటున్నారు. ‘తినడానికి ముందు చూడటానికే ముచ్చటగా ఉన్నాయి’ అంటున్నారు వినియోగదారులు. సిబ్బందీ సంప్రదాయ వేషంలో.. ఆకర్షణ స్వీట్లతోనే ఆగలేదు. ఇక్కడి సిబ్బంది రోజూ సంప్రదాయ వస్త్రాలు ధరించి, కొనుగోలుదారులకు సాదరంగా స్వాగతం పలుకుతున్నారు. దీపావళి రోజుల్లో ప్రతి సాయంత్రం షాపు వద్ద సిబ్బందితో కలిసి నిజమైన బాణసంచా కాల్చి, పండుగ వాతావరణాన్ని రెట్టింపు చేస్తున్నారు. మొత్తానికి, మిఠాయిని టపాసులా, టపాసును మిఠాయిలా మార్చిన ఈ ప్రయోగంతో శ్రీనివాస్‌ స్వీట్‌ స్టాల్‌ ఈ దీపావళికి శ్రీహరిపురంలో అందరి నోళ్లలో నానుతోంది. ఇక్కడ పేలేది టపాసులు కాదు, నోట్లో కరిగే కోవా రుచులే. ఇవన్నీ స్వీట్లే శ్రీహరిపురంలో కోవా టపాసుల సందడి చిచ్చుబుడ్డి.. భూచక్రాల స్వీట్స్‌1000 వాలా స్వీట్‌

మహారాణిపేట: పరిషత్‌ ఎన్నికల ఓట్ల లెక్కింపు ప్రక్రియను పారదర్శకంగా, ప్రశాంత వాతావరణంలో నిర్వహించాలని కలెక్టర్‌ ఎం. అభిషిక్త్‌ కిశోర్‌ అధికారులను ఆదేశించారు. శుక్రవారం నిర్వహించిన టెలికాన్ఫరెన్స్‌లో కౌంటింగ్‌ ఏర్పాట్లపై సమీక్షించారు. అభ్యర్థులు, ఏజెంట్ల సమక్షంలో ఉదయం 7 గంటలకు స్ట్రాంగ్‌ రూమ్‌లు తెరిచి, 8 గంటలకు లెక్కింపు ప్రారంభించాలని సూచించారు. అనధికార వ్యక్తులను అనుమతించవద్దని, సమస్యలు తలెత్తకుండా పోలీసులతో సమన్వయం చేసుకోవాలని ఆదేశించారు. ఫలితాల సమాచారాన్ని ఎప్పటికప్పుడు మీడియాకు అందించాలని తెలిపారు. కార్యక్రమంలో జాయింట్‌ కలెక్టర్‌ గొబ్బిళ్ల విద్యాధరి, ఆర్డీవోలు దిలీప్‌ చక్రవర్తి, సంగీత్‌ మాధుర్‌, రిటర్నింగ్‌ అధికారులు పాల్గొన్నారు.

మహారాణిపేట: జిల్లాలో గ్రామ పంచాయతీ ఎన్నికల నిర్వహణకు షెడ్యూల్‌ విడుదలైంది. రాష్ట్రవ్యాప్తంగా మూడు విడతల్లో ఎన్నికలు నిర్వహించనుండగా.. మూడో విడతలో విశాఖ జిల్లాను కేటాయించారు. దీంతో గ్రామీణ ప్రాంతాల్లో ఎన్నికల సందడి మొదలైంది. ఈ ఏడాది ఏప్రిల్‌ 2తో సర్పంచ్‌ల పదవీకాలం ముగియడంతో ప్రస్తుతం పంచాయతీల్లో ప్రత్యేక అధికారుల పాలన కొనసాగుతోంది. డిసెంబర్‌ 2న పోలింగ్‌ మూడో విడత ఎన్నికల్లో భాగంగా నవంబర్‌ 19న నోటిఫికేషన్‌ విడుదల చేయనున్నారు. డిసెంబర్‌ 2న జిల్లాలోని పంచాయతీలకు ఎన్నికలు నిర్వహిస్తారు. జిల్లాలోని నాలుగు మండలాల పరిధిలో 79 పంచాయతీలు ఉండగా.. మొత్తం 1,62,407 మంది ఓటర్లు తమ ఓటు హక్కు వినియోగించుకోనున్నారు. వీరిలో 82,737 మంది మహిళలు, 79,630 మంది పురుషులు ఉన్నారు. పోలింగ్‌ కోసం 802 కేంద్రాలు ఏర్పాటు చేశారు. 79 సర్పంచ్‌ స్థానాలకు ఎన్నికలు భీమిలి మండలంలో 16 సర్పంచ్‌లు, 166 వార్డు సభ్యులు, పద్మనాభం మండలంలో 22 సర్పంచ్‌లు, 226 వార్డు సభ్యులు, ఆనందపురం మండలంలో 26 సర్పంచ్‌లు, 260 వార్డు సభ్యులు, పెందుర్తి మండలంలో 15 సర్పంచ్‌లు, 150 వార్డు సభ్యుల స్థానాలకు ఎన్నికలు జరగనున్నాయి. మధ్యాహ్నం నుంచే ఓట్ల లెక్కింపు ఉదయం 6.30 గంటల నుంచి మధ్యాహ్నం 1 గంట వరకు పోలింగ్‌ నిర్వహిస్తారు. పోలింగ్‌ ముగిసిన వెంటనే మధ్యాహ్నం 1 గంట నుంచి ఓట్ల లెక్కింపు ప్రారంభించనున్నారు. ఎన్నికల షెడ్యూల్‌ విడుదలతో గ్రామాల్లో రాజకీయ సందడి ఊపందుకోనుంది.

మహారాణిపేట: విశాఖ వేదికగా ఈ నెల 12, 13 తేదీల్లో నిర్వహించనున్న సీఐఐ పార్ట్‌నర్‌షిప్‌ సమ్మిట్‌ను విజయవంతం చేసేందుకు అన్ని శాఖల అధికారులు సమన్వయంతో పనిచేయాలని రాష్ట్ర ప్రభుత్వ ప్రత్యేక ప్రధాన కార్యదర్శి ఎస్‌.ఎస్‌.రావత్‌ ఆదేశించారు. సదస్సుకు హాజరయ్యే దేశ, విదేశీ ప్రతినిధులకు ఎలాంటి ఇబ్బందులు కలగకుండా పకడ్బందీ ఏర్పాట్లు చేయాలని సూచించారు. శుక్రవారం కలెక్టరేట్‌ సమావేశ మందిరంలో జిల్లా కలెక్టర్‌ ఎం.అభిషిక్త్‌ కిశోర్‌తో కలిసి రాష్ట్ర, జిల్లా స్థాయి అధికారులతో సన్నాహక ఏర్పాట్లపై సమీక్ష నిర్వహించారు. సదస్సుకు వచ్చే విదేశీ ప్రతినిధులకు నగరంలోని పర్యాటక ప్రాంతాలు, స్థానిక విశేషాలను పరిచయం చేసేలా ప్రత్యేక టూరిస్ట్‌ సర్క్యూట్‌లు రూపొందించాలన్నారు. అతిథుల భద్రతకు పటిష్ట చర్యలు తీసుకోవాలని సూచించారు. విమానాశ్రయంలో ప్రత్యేక రిసెప్షన్‌ డెస్క్‌, స్వాగత బృందాన్ని ఏర్పాటు చేయాలని, తెలుగు సంస్కృతి, సంప్రదాయాలు ప్రతిబింబించేలా అతిథులకు ఘన స్వాగతం పలకాలని చెప్పారు. జిల్లా కలెక్టర్‌ ఎం.అభిషిక్త్‌ కిశోర్‌ మాట్లాడుతూ ఈ నెల 9 నుంచి కంట్రోల్‌ రూమ్‌ సేవలు అందుబాటులోకి వస్తాయన్నారు. ఈ సమీక్షలో సీపీ శంఖబ్రత బాగ్చి, అనకాపల్లి కలెక్టర్‌ విజయకృష్ణన్‌, జీవీఎంసీ కమిషనర్‌ కేతన్‌ గార్గ్‌, ఏపీఈడీబీ సీఈవో సాన్మోహన్‌, ఏపీఐఐసీ చైర్మన్‌, ఎండీ దినేష్‌ కుమార్‌, సెర్ప్‌ సీఈవో కరుణ, జీసీసీ ఎండీ శోభిక, జేసీ విద్యాధరి, అధికారులు గీతాంజలి శర్మ, గెడ్డం శేఖర్‌బాబు, డీసీపీ మణికంఠ తదితరులు పాల్గొన్నారు. ఏర్పాట్ల పరిశీలన డాబాగార్డెన్స్‌: ఈ నెల 12, 13 తేదీల్లో విశాఖలో నిర్వహించనున్న సీఐఐ భాగస్వామ్య సదస్సు ఏర్పాట్లను రాష్ట్ర ప్రభుత్వ ప్రత్యేక ప్రధాన కార్యదర్శి ఎస్‌.ఎస్‌.రావత్‌ శుక్రవారం క్షేత్రస్థాయిలో పరిశీలించారు. జీవీఎంసీ కమిషనర్‌ కేతన్‌ గార్గ్‌, రాష్ట్ర, జిల్లా స్థాయి ఉన్నతాధికారులతో కలిసి ఏయూ ఇంజినీరింగ్‌ కళాశాల మైదానంలో జరుగుతున్న పనులను సమీక్షించారు. ప్రాంగణంలో చేపడుతున్న అభివృద్ధి, సుందరీకరణ పనుల వివరాలను జీవీఎంసీ కమిషనర్‌ కేతన్‌ గార్గ్‌ ఆయనకు వివరించారు. అన్ని పనులను నాణ్యతా ప్రమాణాలతో నిర్దేశిత గడువులోగా పూర్తి చేయాలని, సంబంధిత శాఖల అధికారులు సమన్వయంతో పనిచేయాలని ఆదేశించారు.

మహారాణిపేట: శ్రీ చైతన్య విద్యాసంస్థల చైర్‌పర్సన్‌ డాక్టర్‌ బి.ఝాన్సీ లక్ష్మీబాయి 79వ జన్మదినం సందర్భంగా రాష్ట్రవ్యాప్తంగా శ్రీ చైతన్య కాలేజీలు, పాఠశాలల్లో మెగా రక్తదాన శిబిరాలు నిర్వహించారు. ఇందులో భాగంగా ద్వారకానగర్‌లోని శ్రీ చైతన్య కాలేజీలో ఏర్పాటు చేసిన రక్తదాన శిబిరంలో శ్రీ చైతన్య కాలేజీల ఎగ్జిక్యూటివ్‌ ఏజీఎం కె.వి.రమణ, శ్రీ చైతన్య స్కూల్స్‌ ఎగ్జిక్యూటివ్‌ ఏజీఎం ఎం.వి.సురేష్‌ పాల్గొని రక్తదానం చేసిన సిబ్బందిని అభినందించారు. ఈ సందర్భంగా కె.వి.రమణ మాట్లాడుతూ సరైన సమయంలో రక్తం అందక ప్రాణాలు కోల్పోతున్న ఎంతోమందికి ప్రాణదానం చేసేందుకు సిబ్బంది రక్తదాన శిబిరాలు నిర్వహించడం అభినందనీయమన్నారు. ప్రతి ఒక్కరూ జీవితంలో కనీసం ఒక్కసారైనా రక్తదానం చేయాలని ఎం.వి.సురేష్‌ పిలుపునిచ్చారు. ఈ కార్యక్రమంలో శ్రీ చైతన్య విద్యాసంస్థల డీన్లు, ఏజీఎంలు, ఆర్‌ఐలు, ప్రిన్సిపాళ్లు, ఇతర సిబ్బంది పాల్గొన్నారు. ఉత్తరాంధ్ర జిల్లాల్లో ఏటీఆర్‌ బ్లడ్‌ బ్యాంకుల సహకారంతో మొత్తం 360 మంది రక్తదానం చేశారు.

పరిషత్‌ తీర్పు భీమిలి సెడార్‌ స్కూల్‌లో సాక్షి, విశాఖపట్నం: జిల్లాలో పరిషత్‌ ఎన్నికల ఓట్ల లెక్కింపునకు సర్వం సిద్ధమైంది. పెందుర్తి, పద్మనాభం, ఆనందపురం, భీమిలి మండలాల్లో నిర్వహించిన జెడ్పీటీసీ, ఎంపీటీసీ ఎన్నికల ఫలితాలపై నెలకొన్న ఉత్కంఠకు శనివారంతో తెరపడనుంది. ఉదయం 8 గంటల నుంచే లెక్కింపు ప్రక్రియ ప్రారంభం కానుండగా, అధికారులు మూడు ప్రధాన కేంద్రాల్లో అన్ని ఏర్పాట్లను పూర్తి చేశారు. నాలుగు మండలాల్లో మొత్తం 78 కౌంటింగ్‌ టేబుళ్లను ఏర్పాటు చేశారు. ఆనందపురం మండలంలో ఎంపీడీవో కార్యాలయ నూతన సమావేశ మందిరంలో 20 టేబుళ్లు, భీమిలిలోని సెడార్‌ పాఠశాల గ్రౌండ్‌ ఫ్లోర్‌ హాల్‌లో 20 టేబుళ్లు, అదే పాఠశాల మొదటి అంతస్తు హాల్‌లో పద్మనాభం ఓట్ల లెక్కింపు కోసం 20 టేబుళ్లు, పెందుర్తి ప్రభుత్వ జూనియర్‌ కళాశాల డైనింగ్‌ హాల్‌లో 18 టేబుళ్లను ఏర్పాటు చేశారు. మొత్తం 53 ఎంపీటీసీ, 4 జెడ్పీటీసీ సెగ్మెంట్లకు సంబంధించిన ఓట్ల లెక్కింపు చేపట్టి ఫలితాలను వెల్లడించనున్నారు. పెందుర్తి మండలంలోని పెదగాడి ఎంపీటీసీ సెగ్మెంట్‌ ఏకగ్రీవమైన నేపథ్యంలో మిగిలిన సెగ్మెంట్లకు సంబంధించిన ఓట్ల లెక్కింపు నిర్వహించనున్నారు. కౌంటింగ్‌ ప్రక్రియను పారదర్శకంగా, ప్రశాంత వాతావరణంలో నిర్వహించేందుకు అవసరమైన ఏర్పాట్లు చేయాలని ఇప్పటికే కలెక్టర్‌ ఎం. అభిషిక్త్‌ కిశోర్‌ ఆదేశాలు జారీ చేశారు. ఆ మేరకు అధికారులు అన్ని ఏర్పాట్లను పూర్తి చేయడంతో పాటు, లెక్కింపు ప్రక్రియ నిర్వహణపై సిబ్బందికి ఆయా కౌంటింగ్‌ కేంద్రాల పరిధిలో శిక్షణలు కూడా అందజేశారు. 82.51 శాతం పోలింగ్‌.. 1.34 లక్షల ఓట్లు విశాఖ రూరల్‌ పరిధిలోని ఈ నాలుగు మండలాల్లో మొత్తం 4 జెడ్పీటీసీ, 52 ఎంపీటీసీ స్థానాలకు పోలింగ్‌ జరిగింది. 203 పోలింగ్‌ కేంద్రాల పరిధిలో రికార్డు స్థాయిలో 82.51 శాతం మంది (మొత్తం 1,34,000 మంది) ఓటర్లు తమ హక్కును వినియోగించుకున్నారు. బరిలో నిలిచిన 13 మంది జెడ్పీటీసీ, 117 మంది ఎంపీటీసీ అభ్యర్థుల భవితవ్యం నేటి లెక్కింపుతో తేలనుంది. పెందుర్తి మండలంలోని పెదగాడి ఎంపీటీసీ సెగ్మెంట్‌ ఇప్పటికే ఏకగ్రీవమైనందున, మిగిలిన 53 ఎంపీటీసీ, 4 జెడ్పీటీసీ సెగ్మెంట్ల ఫలితాలను వెల్లడించనున్నారు. తొలి ఫలితం ఎక్కడంటే.. కౌంటింగ్‌ ప్రక్రియలో భాగంగా అధికారులు మొదట ఎంపీటీసీ ఫలితాలను, ఆ తర్వాత జెడ్పీటీసీ ఫలితాలను ప్రకటిస్తారు. ఎంపీటీసీ విభాగంలో గంధవరం, సింగనబంధ సెగ్మెంట్లలోనే తొలి ఫలితం వెలువడే అవకాశం ఉంది. అలాగే జెడ్పీటీసీ స్థానాల్లో పద్మనాభం సెగ్మెంట్‌ తొలి ఫలితం రానుంది. 3 కేంద్రాలు.. 78 టేబుళ్లు.. 355 మంది సిబ్బంది నాలుగు మండలాల ఓట్ల లెక్కింపు కోసం అధికారులు మొత్తం 3 చోట్ల 78 టేబుళ్లను అందుబాటులోకి తెచ్చారు. లెక్కింపు ప్రక్రియను వేగవంతం చేసేందుకు 355 మంది కౌంటింగ్‌ సిబ్బందిని రంగంలోకి దించుతున్నారు. ఎక్కడికక్కడే కౌంటింగ్‌ కేంద్రాలు ● ఆనందపురం మండల ఓట్ల లెక్కింపు ప్రక్రియ స్థానిక ఎంపీడీవో కార్యాలయ నూతన సమావేశ మందిరంలో జరుగుతుంది. ● పెందుర్తి మండల ఓట్ల లెక్కింపు ప్రక్రియ స్థానిక ప్రభుత్వ జూనియర్‌ కళాశాల డైనింగ్‌ హాలులో ఉంటుంది. ● పద్మనాభం, భీమునిపట్నం మండల ఓట్ల లెక్కింపు భీమిలిలోని సెడార్‌ పాఠశాల గ్రౌండ్‌ ఫ్లోర్‌ – మొదటి అంతస్తు హాల్‌లో నిర్వహిస్తారు. జిల్లాలో మూడు చోట్ల ఓట్ల లెక్కింపు కేంద్రాలు ఉదయం 8 గంటల నుంచే కౌంటింగ్‌ ప్రారంభం తొలుత ఎంపీటీసీ, తరువాత జెడ్పీటీసీ ఫలితాలు గంధవరం, సింగనబంధ ఎంపీటీసీ సెగ్మెంట్లలోనే తొలి ఫలితం జెడ్పీటీసీల్లో తొలి ఫలితం పద్మనాభం సెగ్మెంట్‌ 78 కౌంటింగ్‌ టేబుళ్ల ఏర్పాటు 52 ఎంపీటీసీ, 4 జెడ్పీటీసీ సెగ్మెంట్ల ఫలితాల వెల్లడి జిల్లాలో 4 జెడ్పీటీసీ, 52 ఎంపీటీసీ స్థానాలకు జరిగిన పోలింగ్‌ ఎన్నికల నిర్వహణకు అరకొర నిధులుమహారాణిపేట: పరిషత్‌ ఎన్నికల నిర్వహణకు అరకొర బడ్జెట్‌ విడుదల కావడంతో అధికార యంత్రాంగం ఇబ్బందులు ఎదుర్కొంటోంది. జిల్లాలోని నాలుగు మండలాల్లో జెడ్పీటీసీ, 53 ఎంపీటీసీ స్థానాలకు గురువారం ఎన్నికలు నిర్వహించగా, శనివారం ఓట్ల లెక్కింపు జరగనుంది. జిల్లాలో పరిషత్‌ ఎన్నికల ప్రక్రియకు మొత్తం రూ.1.50 కోట్ల వరకు వ్యయం అవుతుందని అధికారులు అంచనా వేశారు. అయితే ప్రభుత్వం రూ.80 లక్షలు మాత్రమే విడుదల చేసినట్లు సమాచారం. ఇప్పటికే ఈ నిధులు ఎన్నికల నిర్వహణలో పాల్గొన్న సిబ్బంది ఖర్చులు, ఇతర అవసరాలకు పూర్తిగా ఖర్చయిపోయినట్లు తెలుస్తోంది. ప్రస్తుతం చేతిలో నిధులు లేక శనివారం జరిగే ఓట్ల లెక్కింపు నిర్వహణపై అధికారులు ఆందోళన చెందుతున్నారు. మూడు కేంద్రాల్లో లెక్కింపు చేపట్టనుండగా, అక్కడికి వచ్చే సిబ్బందికి భోజనాలు, ఇతర ఏర్పాట్లు చేయాల్సి ఉంది. అలాగే లెక్కింపులో పాల్గొనే సిబ్బందికి టీఏ, డీఏలు చెల్లించాల్సి ఉండటంతో అధికారులు ప్రత్యామ్నాయ మార్గాలపై దృష్టి సారించినట్లు సమాచారం.

రూ.3.5 లక్షల అందజేత బీచ్‌రోడ్డు: ప్రాణాపాయ స్థితిలో ఉన్న పసిపాప వైద్యం కోసం విశాఖ ట్రాఫిక్‌ పోలీసులు మానవత్వం చాటుకున్నారు. టూ టౌన్‌ ట్రాఫిక్‌ పోలీస్‌ స్టేషన్‌లో విధులు నిర్వహిస్తున్న మహిళా కానిస్టేబుల్‌ సుసన్న బిడ్డ నెలలు నిండక ముందే జన్మించి మెడికవర్‌ ఆస్పత్రిలో చికిత్స పొందుతోంది. చిన్నారి వైద్య ఖర్చులకు సుమారు రూ.18 లక్షల వరకు అవసరం కావడంతో ఆ కుటుంబం ఆర్థిక ఇబ్బందుల్లో పడింది. ఈ నేపథ్యంలో తోటి ఉద్యోగికి అండగా నిలవాలని ట్రాఫిక్‌ విభాగం సిబ్బంది నిర్ణయించారు. ట్రాఫిక్‌ విభాగంలో పనిచేస్తున్న సిబ్బంది నుంచి సేకరించిన రూ.3.5 లక్షలను శుక్రవారం ట్రాఫిక్‌ ఏసీపీ చేతుల మీదుగా తల్లి సుసన్నకు అందజేశారు. ఖాకీ వెనుక మానవత్వం ఉందని నిరూపిస్తూ, కష్టకాలంలో తోటి కానిస్టేబుల్‌ కుటుంబానికి అండగా నిలిచారు. త్వరలోనే పూర్తి మొత్తం సమకూరి చిన్నారి ఆరోగ్యంగా ఇంటికి చేరాలని ట్రాఫిక్‌ పోలీసులు ఆకాంక్షించారు.

సింథియా : భారత స్కౌట్స్‌ అండ్‌ గైడ్స్‌ ఏర్పడి 75 ఏళ్లు పూర్తయిన సందర్భంగా విజయవాడ రాజ్‌భవన్‌లో శనివారం నిర్వహించే సత్కారానికి శ్రీహరిపురానికి చెందిన సీనియర్‌ స్కౌట్‌ ఎస్‌.వి.రమణ (75) ఎంపికయ్యారు. హిందూస్థాన్‌ షిప్‌యార్డ్‌ ఉద్యోగిగా పనిచేస్తూ స్కౌట్స్‌ అండ్‌ గైడ్స్‌ విభాగంలో సేవలందించిన ఆయన.. ప్రపంచ తెలుగు మహాసభలు, గోదావరి పుష్కరాలు, లాతూర్‌ భూకంప సహాయక చర్యలు, పర్యావరణ కార్యక్రమాల్లో పాల్గొన్నారు. రోవర్‌ స్కౌట్స్‌కు శిక్షణ అందించి రాష్ట్రపతి అవార్డు సాధనలో కీలక పాత్ర పోషించారు. రమణ ఎంపికపై షిప్‌యార్డ్‌ ఉద్యోగులు హర్షం వ్యక్తం చేశారు.

మధురవాడ: హైటెన్షన్‌ విద్యుత్‌ లైన్‌ ఓ టైలర్‌ ప్రాణాన్ని బలిగొంది. కుటుంబానికి పెద్ద దిక్కుగా ఉన్న వ్యక్తి మృతి చెందడంతో ఆ కుటుంబం దిక్కుతోచని స్థితిలో పడింది. ఈ విషాద ఘటన మధురవాడ కళానగర్‌లో చోటుచేసుకుంది.స్థానికులు, పీఎం పాలెం పోలీసులు తెలిపిన వివరాల ప్రకారం.. కళానగర్‌కు చెందిన ఉరుకూటి భాస్కరరావు (44) గత 30 ఏళ్లుగా టైలర్‌గా పనిచేస్తూ అందరికీ సుపరిచితుడిగా ఉన్నాడు. కొన్నేళ్లుగా మధురవాడ మెయిన్‌ రోడ్డులో జీవీఎంసీ కార్యాలయం ఎదురుగా ఉన్న కొల్లి కాంప్లెక్స్‌లో టైలరింగ్‌ షాపు నిర్వహిస్తూ కుటుంబాన్ని పోషిస్తున్నాడు.గురువారం రాత్రి 8.30 గంటల సమయంలో ఇంటికి సామాన్లు ఇచ్చి తిరిగి దుకాణానికి వెళ్లాడు. రాత్రి 11 గంటల సమయంలో భార్య సునీత ఫోన్‌ చేయగా, పని ముగించుకుని వస్తానని చెప్పాడు. అనంతరం దుకాణం మూసివేసి, షాపుపై ఉన్న ఫ్లెక్సీని మార్చేందుకు మేడపైకి వెళ్లాడు.ఇనుప రాడ్లతో ఉన్న ఫ్లెక్సీని తొలగించే క్రమంలో పైన ఉన్న హైటెన్షన్‌ విద్యుత్‌ తీగలకు తగలడంతో భాస్కరరావు అక్కడికక్కడే మృతి చెందాడు. రాత్రి ఇంటికి రాకపోవడంతో కుటుంబ సభ్యులు తెలిసిన వారిని, బంధువులను సంప్రదించారు. అతనితో కలిసి పనిచేసే శంకర్‌కు ఫోన్‌ చేయగా.. ఉదయం దుకాణం వద్దకు వచ్చి ఫోన్‌ చేయడంతో మేడపై రింగ్‌ వినిపించింది.అనుమానంతో పైకి వెళ్లి చూడగా ఫ్లెక్సీ కింద భాస్కరరావు మృతదేహం కనిపించింది. కుటుంబ సభ్యుల సమాచారంతో పీఎం పాలెం పోలీసులు ఘటనా స్థలానికి చేరుకుని పరిశీలించారు. మృతదేహాన్ని పోస్టుమార్టం నిమిత్తం కేజీహెచ్‌కు తరలించి దర్యాప్తు చేస్తున్నారు. కుటుంబ పెద్దను కోల్పోయి.. భాస్కరరావు మృతితో ఎంతో అన్యోన్యంగా జీవిస్తున్న కుటుంబం ఆర్థికంగా ఇబ్బందుల్లో పడింది. మృతుడికి భార్య సునీతతో పాటు ముగ్గురు కుమార్తెలు ఉన్నారు. కుటుంబ పెద్దను కోల్పోవడంతో వారి పరిస్థితి ఆగమ్యగోచరంగా మారింది. ఈ ఘటన స్థానికులను కలచివేసింది.

విశాఖ విద్య: ఆంధ్ర విశ్వవిద్యాలయంలో విద్యార్థులు ఎదుర్కొంటున్న సమస్యల పరిష్కారంలో యాజమాన్యం తీవ్ర నిర్లక్ష్యంగా వ్యవహరిస్తోందని ఎస్‌ఎఫ్‌ఐ నాయకులు ఆగ్రహం వ్యక్తం చేశారు. సమస్యలను పరిష్కరించాలని కోరుతున్న విద్యార్థులకు సమాధానం చెప్పాల్సిన అధికారులు నోటీసులు జారీ చేస్తూ భయభ్రాంతులకు గురిచేయాలని చూడటం సిగ్గుచేటని మండిపడ్డారు. శుక్రవారం ఏయూ వీసీ కార్యాలయం ఎదుట నిర్వహించిన మీడియా సమావేశంలో ఎస్‌ఎఫ్‌ఐ విశాఖ జిల్లా అధ్యక్షుడు సాయితేజ మాట్లాడుతూ విద్యార్థుల నుంచి వివిధ రకాల ఫీజులు వసూలు చేస్తున్న యాజమాన్యం కనీస మౌలిక సదుపాయాలు కల్పించడంలో విఫలమవుతోందని విమర్శించారు. జిల్లా కార్యదర్శి జి.అజయ్‌ మాట్లాడుతూ వర్సిటీలో అనేక విభాగాల్లో ఖాళీగా ఉన్న అధ్యాపక పోస్టులను భర్తీ చేయకుండా విద్యార్థుల భవిష్యత్తుతో యాజమాన్యం చెలగాటమాడుతున్నారని ఆగ్రహం వ్యక్తం చేశారు. వీసీ, అధికారులు విద్యార్థి సంఘాలతో తక్షణమే చర్చలు జరిపి, ప్రతి సమస్య పరిష్కారానికి కాలపరిమితితో కూడిన కార్యాచరణ ప్రకటించాలని డిమాండ్‌ చేశారు. విద్యార్థి నాయకులకు జారీ చేసిన నోటీసులు ఉపసంహరించుకునే వరకు ఎస్‌ఎఫ్‌ఐ ఆధ్వర్యంలో పోరాటాన్ని మరింత ఉధృతం చేస్తామని హెచ్చరించారు. ఈ కార్యక్రమంలో ఏయూ విభాగం ఎస్‌ఎఫ్‌ఐ కార్యదర్శి కుసుమాంజలి, యూనివర్సిటీ ఉపాధ్యక్షులు ప్రగతి, సంజయ్‌, విశాల్‌, దోహిత్‌, నిఖిల్‌, సాగర్‌తో పాటు పలువురు విద్యార్థులు పాల్గొన్నారు.

అల్లిపురం: పక్కాగా రెక్కీ నిర్వహించారు.. పథకం ప్రకారం తీవ్ర తుపాను రోజున రంగంలోకి దిగారు.. ఎలక్ట్రిక్‌ కట్టర్లతో తాళాలు కట్‌ చేసి షోరూమ్‌లోకి చొరబడ్డారు. ఐఫోన్లు, ఇతర బ్రాండెడ్‌ ఫోన్లు, ఎలక్ట్రానిక్‌ వస్తువులు దోచుకెళ్లారు. అయితే సీసీ కెమెరాల నిఘా నుంచి తప్పించుకోలేక చివరకు పోలీసులకు చిక్కారు. డాబాగార్డెన్స్‌లోని బీసీపీ మాల్‌లో ఉన్న సెల్‌ పాయింట్‌ ఇండియా లిమిటెడ్‌ షోరూమ్‌లో జరిగిన భారీ చోరీ కేసును టూటౌన్‌ క్రైమ్‌ పోలీసులు ఛేదించారు. ఇద్దరు నిందితులను అరెస్ట్‌ చేయడంతో పాటు, నేరంలో పాల్గొన్న బాలుడిని అదుపులోకి తీసుకున్నారు. శుక్రవారం సాయంత్రం టూటౌన్‌ క్రైమ్‌ పోలీస్‌ స్టేషన్‌ ఆవరణలో ఏర్పాటు చేసిన మీడియా సమావేశంలో నగర క్రైమ్‌ ఏడీసీపీ ఎన్‌.రమ్య, క్రైమ్‌ ఏసీపీ ఎ.వెంకటరావు, ఈస్ట్‌ సబ్‌ డివిజన్‌ క్రైమ్‌ సీఐ సీహెచ్‌ రాజులనాయుడు కేసు వివరాలు వెల్లడించారు. స్నేహితులు.. సినిమా స్టైల్‌లో చోరీ! ముగ్గురూ స్నేహితులు. వీరిలో చుక్క రవితేజ అలియాస్‌ పండు(20) ప్రధాన నిందితుడు. పాత నేరచరిత్ర ఉన్న ఇతడే మిగిలిన ఇద్దరినీ చోరీకి ప్రేరేపించాడు. అర్నబ్‌ తుపాను సమయంలో మంగళవారం అర్ధరాత్రి చోరీకి పక్కా స్కెచ్‌ వేసుకున్నారు. అందుకు మూడు రోజుల ముందే షోరూమ్‌ పరిసరాలను పరిశీలించి రెక్కీ నిర్వహించారు. షోరూమ్‌లోకి ఎలా ప్రవేశించాలి.. ఏ మార్గంలో బయటకు వెళ్లాలనే విషయాలపై ముందుగానే ప్రణాళిక సిద్ధం చేసుకున్నారు. కట్టర్లతో తాళాలు కట్‌ చేసి.. అర్నబ్‌ తుపాను రోజున భారీ వర్షం పడుతున్న సమయంలో పథకం ప్రకారం ఎలక్ట్రికల్‌ కట్టర్లతో సెల్లార్‌ గేట్‌, మెట్ల వద్ద ఉన్న గేట్‌ తాళాలు కట్‌ చేశారు. అనంతరం షోరూమ్‌ వెనుక వైపు ఉన్న గ్లాస్‌ డోర్‌ తాళాలను సైతం తొలగించి లోపలికి ప్రవేశించారు. అక్కడున్న ఖరీదైన ఐఫోన్లు, ఇతర బ్రాండ్ల మొబైల్‌ ఫోన్లు, ఎలక్ట్రానిక్‌ వస్తువులను మూటకట్టుకుని అక్కడి నుంచి పరారయ్యారు. 35 ఫోన్లు.. ఇతర వస్తువులు స్వాధీనం నిందితుల నుంచి 25 ఐఫోన్లు, ఒక నథింగ్‌, రెండు రియల్‌మీ, రెండు శాంసంగ్‌, ఐదు వివో ఫోన్లు.. మొత్తం 35 మొబైల్‌ ఫోన్లతో పాటు ఆపిల్‌ వాచీలు, ఇయర్‌బడ్స్‌, ఇతర ఎలక్ట్రానిక్‌ వస్తువులను కూడా పోలీసులు స్వాధీనం చేసుకున్నారు. ఇద్దరు నిందితులను రిమాండ్‌కు తరలించగా, బాలుడిని జువైనెల్‌ హోమ్‌కు పంపించారు. ప్రధాన నిందితుడిపై పలు కేసులు ప్రధాన నిందితుడు చుక్క రవితేజపై గతంలో ఎంవీపీ, ఆరిలోవ, భీమిలి పోలీస్‌ స్టేషన్ల పరిధిలో పలు కేసులు నమోదయ్యాయి. హత్య కేసుతో పాటు చోరీ కేసుల్లోనూ ఇతడికి ప్రమేయం ఉన్నట్లు పోలీసులు వెల్లడించారు. ఈ ఏడాదిలోనే మూడు కేసుల్లో నిందితుడిగా ఉన్నాడని, భీమిలి పోలీస్‌ స్టేషన్‌లో సస్పెక్ట్‌ షీట్‌ తెరిచినట్లు తెలిపారు. సమావేశంలో టూటౌన్‌ క్రైమ్‌ పోలీస్‌ స్టేషన్‌ ఎస్‌ఐ సీహెచ్‌ చిరంజీవిరావు, ఇతర సిబ్బంది పాల్గొన్నారు. సీసీ కెమెరాలతో చిక్కిన దొంగలు చోరీపై కేసు నమోదు చేసిన పోలీసులు సీసీ కెమెరాల ఫుటేజీని పరిశీలించి దర్యాప్తు చేపట్టారు. భీమిలి గొల్లతిమ్మాపురానికి చెందిన చుక్క రవితేజ అలియాస్‌ పండు (20), ఇసుకతోట రామాలయం వీధికి చెందిన కాపరపు దుర్గాప్రసాద్‌ (19)ను నిందితులుగా గుర్తించి అరెస్ట్‌ చేశారు. వీరితో పాటు నేరంలో పాల్గొన్న బాలుడిని అదుపులోకి తీసుకున్నారు.

అగనంపూడి: విశాఖ నుంచి కేరళలోని కొల్లాం వరకు నేరుగా ఎక్స్‌ప్రెస్‌ రైళ్లను నడపాలని దువ్వాడ రైల్వే యూజర్స్‌ అసోసియేషన్‌ ప్రతినిధి కె.ఈశ్వర్‌ రైల్వే అధికారులను కోరారు. ఈ మేరకు ఆయన అధికారులకు ఈ–మెయిల్‌ ద్వారా విజ్ఞప్తి చేశారు. ఉత్తరాంధ్ర జిల్లాల నుంచి ఏటా వేలాది మంది అయ్యప్ప భక్తులు శబరిమల యాత్రకు వెళ్తుంటారని తెలిపారు. విశాఖ నుంచి కొల్లాంకు నేరుగా రైళ్లు లేకపోవడంతో ఇతర ప్రాంతాలకు వెళ్లి రైళ్లు మారాల్సి వస్తోందని పేర్కొన్నారు. ప్రత్యేక వాహనాల్లో ప్రయాణించాల్సి రావడంతో భక్తులు ఇబ్బందులు ఎదుర్కొంటున్నారని వివరించారు. మాలధారణ సమయంలో నియమనిష్టలు పాటిస్తూ యాత్ర సాగించేందుకు నేరుగా రైలు సౌకర్యం ఎంతో అవసరమని తెలిపారు. రైల్వే బోర్డు, ఉన్నతాధికారులు స్పందించి విశాఖ–కొల్లాం మధ్య ఎక్స్‌ప్రెస్‌ రైళ్లను నడిపేలా చర్యలు తీసుకోవాలని విజ్ఞప్తి చేశారు.

ద్వారకానగర్‌: విదేశాల్లో ఉద్యోగాల పేరుతో నిరుద్యోగ యువతను ఆకర్షించి, వారిని సైబర్‌ నేరాల వైపు మళ్లించిన గాజువాకకు చెందిన ప్రధాన ఏజెంట్‌ చుక్క రాజేష్‌ వినయ్‌కుమార్‌పై నగర పోలీసులు పీడీ యాక్ట్‌ ప్రయోగించారు. పునరావృతంగా సైబర్‌ నేరాలకు యువతను ప్రోత్సహిస్తూ ప్రజల ఆర్థిక భద్రతకు ముప్పుగా పరిణమిస్తున్నాడన్న కారణంతో నగర పోలీస్‌ కమిషనర్‌ డాక్టర్‌ శంఖబ్రత బాగ్చి నిర్బంధ ఉత్తర్వులు జారీ చేశారు. దీంతో నిందితుడిని విశాఖ కేంద్ర కారాగారానికి తరలించారు.పోలీసుల వివరాల ప్రకారం.. గాజువాకకు చెందిన చుక్క రాజేష్‌ వినయ్‌కుమార్‌ ఓ ఇన్‌స్టిట్యూట్‌ నిర్వహిస్తూ, కంప్యూటర్‌ ఆపరేటర్‌, డేటా ఎంట్రీ ఉద్యోగాల పేరుతో నిరుద్యోగ యువతను కంబోడియాలోని సైబర్‌ స్కామ్‌ కంపెనీలకు పంపిస్తున్నాడు. వివిధ జిల్లాలకు చెందిన యువత నుంచి ఒక్కొక్కరి వద్ద రూ.2 లక్షల వరకు వసూలు చేసి విదేశాలకు పంపించినట్లు తెలిపారు.కంబోడియా వెళ్లిన యువతను అక్కడి ఏజెంట్లు సైబర్‌ మోసాలకు పాల్పడే కంపెనీలకు అప్పగించి, భారత్‌కు వ్యతిరేకంగా స్కామ్‌లు చేయాలని ఒత్తిడి చేస్తున్నట్లు బాధితుల ఫిర్యాదుల ద్వారా వెల్లడైందని పోలీసులు తెలిపారు. ఈ మేరకు కేసు నమోదు చేసి దర్యాప్తు చేపట్టి రాజేష్‌ వినయ్‌కుమార్‌ను అరెస్టు చేసినట్లు పేర్కొన్నారు.విచారణలో నిందితుడు తాను నిర్వహిస్తున్న ఇన్‌స్టిట్యూట్‌ ద్వారా విదేశీ ఉద్యోగాల పేరుతో యువతను పంపిస్తున్నట్లు అంగీకరించినట్లు పోలీసులు తెలిపారు. అభ్యర్థుల నుంచి నగదు లేదా ఫోన్‌పే ద్వారా డబ్బులు తీసుకుని విమాన టికెట్లు, కరెన్సీ మార్పిడి, ఈ–వీసా ప్రక్రియలను పూర్తి చేసి కంబోడియాలోని ఏజెంట్ల వద్దకు పంపిస్తున్నట్లు వెల్లడించారు. అక్కడి ఏజెంట్లు యువతను సైబర్‌ స్కామ్‌ కంపెనీలకు అప్పగిస్తున్నట్లు తెలిపారు. యువత అప్రమత్తంగా ఉండాలి మయన్మార్‌, కంబోడియా, వియత్నాం, లావోస్‌ వంటి ఆగ్నేయాసియా దేశాల్లో ఉద్యోగాల పేరుతో జరుగుతున్న మోసాల పట్ల యువత అప్రమత్తంగా ఉండాలని సైబర్‌ క్రైమ్‌ పోలీసులు సూచించారు. ఇలాంటి మోసపూరిత ఉద్యోగాల కోసం వెళ్లి చట్టవిరుద్ధ కార్యకలాపాల్లో పాల్గొంటే చర్యలు తప్పవని హెచ్చరించారు.

మహారాణిపేట: జిల్లాలోని భీమిలి, పద్మనాభం, ఆనందపురం, పెందుర్తి మండలాల పరిధిలో గురువారం నిర్వహించిన జెడ్పీటీసీ, ఎంపీటీసీ ఎన్నికల ప్రక్రియను కలెక్టర్‌ అభిషిక్త్‌ కిశోర్‌ క్షేత్రస్థాయిలో పరిశీలించారు. ఎన్నికల నిర్వహణ తీరును ఎప్పటికప్పుడు సమీక్షిస్తూ సంబంధిత అధికారులకు తగిన సూచనలు, ఆదేశాలు జారీ చేశారు. ఎన్నికల ప్రక్రియలో ఎలాంటి అవాంఛనీయ ఘటనలకు తావులేకుండా ప్రశాంత వాతావరణంలో, పూర్తి పారదర్శకతతో పోలింగ్‌ నిర్వహించాలని అధికారులను ఆదేశించారు. పోలింగ్‌ కేంద్రాల్లో అవసరమైన ఏర్పాట్లను నిరంతరం పర్యవేక్షించాలని, ఓటర్లు ఎలాంటి ఇబ్బందులు లేకుండా తమ ఓటు హక్కును వినియోగించుకునేలా చర్యలు తీసుకోవాలని సూచించారు.

డాబాగార్డెన్స్‌: దేశ ప్రగతిలో జర్నలిస్టుల సేవలు నిరుపమానమని ప్రముఖ సంఘ సేవకులు మట్టపల్లి హనుమంతరావు, డాక్టర్‌ సీఎంఏ జహీర్‌ అహ్మద్‌ కొనియాడారు. ప్రజా సమస్యలను వెలుగులోకి తీసుకురావడంతో పాటు ప్రభుత్వానికి, ప్రజలకు మధ్య వారధిగా ఉంటూ సమాజాభివృద్ధిలో జర్నలిస్టులు కీలక పాత్ర పోషిస్తున్నారని పేర్కొన్నారు. ఆంధ్రప్రదేశ్‌ వర్కింగ్‌ జర్నలిస్టుల ఫెడరేషన్‌ 20వ ఆవిర్భావ దినోత్సవ వేడుకలను గురువారం పాతనగరంలోని స్వామి వివేకానంద అనాథ వృద్ధాశ్రమంలో నిర్వహించారు. ఈ సందర్భంగా ఆశ్రమంలోని అనాథలకు, వృద్ధులకు అన్నదానం, వస్త్రదానం చేయడంతో పాటు నిత్యావసర సరుకులు అందజేశారు. జాతీయ జర్నలిస్టుల సంఘం కార్యదర్శి, ఏపీ వర్కింగ్‌ జర్నలిస్టుల ఫెడరేషన్‌ రాష్ట్ర నాయకుడు గంట్ల శ్రీనుబాబు, విశాఖ జిల్లా అధ్యక్షుడు పి.నారాయణ మాట్లాడుతూ భవిష్యత్‌లో జర్నలిస్టులకు ఇళ్ల స్థలాలు, పెన్షన్‌తో పాటు ఇతర సంక్షేమ సదుపాయాలు కల్పించేందుకు మరింత అంకితభావంతో కృషి చేస్తామని తెలిపారు. కార్యక్రమంలో ఫెడరేషన్‌ నాయకులు ధవలేశ్వరపు రవికుమార్‌, కృష్ణమూర్తినాయుడు, నగేష్‌, రవిశంకర్‌, ఇరోతి ఈశ్వరరావు, కింతాడ మదన్‌, జగన్మోహన్‌, కేవీ శర్మ, బొబ్బర ప్రసాద్‌, జగన్‌, గణేష్‌రెడ్డి, ప్రసాద్‌, రాజశేఖర్‌ తదితరులు పాల్గొన్నారు.

అల్లిపురం: ఏపీఎస్‌ఆర్టీసీ ఆధ్వర్యంలో నవంబర్‌ 7వ తేదీ వరకు నిర్వహిస్తున్న బ్రిక్స్‌ సస్టైనబుల్‌ లైఫ్‌ స్టైల్‌ వీక్‌ (బీఎస్‌ఎల్‌డబ్ల్యూ–2026)లో భాగంగా జిల్లాలోని ఏడు డిపోల్లో వివిధ కార్యక్రమాలు చేపట్టారు. యోగా, మొక్కలు నాటడం, ఆరోగ్యకరమైన ఆహారపు అలవాట్లపై అవగాహన కార్యక్రమాలు నిర్వహించారు. ఈ సందర్భంగా ఆర్టీసీ రీజినల్‌ మేనేజర్‌ బి. అప్పలనాయుడు ద్వారకా బస్‌ స్టేషన్‌, సింహాచలం, మద్దిలపాలెం బస్‌ స్టేషన్లను తనిఖీ చేశారు. సింగిల్‌ యూజ్‌ ప్లాస్టిక్‌ వినియోగాన్ని తగ్గించి, క్లాత్‌ సంచులను వినియోగించాలని స్టాల్‌ నిర్వాహకులు, సిబ్బందికి సూచించారు.ఉద్యోగులు ఆరోగ్యకరమైన జీవనశైలిని అలవర్చుకోవడంతో పాటు పర్యావరణ పరిరక్షణలో భాగస్వాములు కావాలని పిలుపునిచ్చారు.

డాబాగార్డెన్స్‌: నగర రహదారులు, బీచ్‌ పరిసరాలను పరిశుభ్రంగా ఉంచాలని, తుపాను కారణంగా పేరుకుపోయిన వ్యర్థాలను తక్షణమే తొలగించాలని జీవీఎంసీ కమిషనర్‌ కేతన్‌గార్గ్‌ అధికారులను ఆదేశించారు. గురువారం తూర్పు జోన్‌ పరిధిలోని సిరిపురం జంక్షన్‌, బాలాజీనగర్‌, బీచ్‌రోడ్డులో పార్క్‌ హోటల్‌ జంక్షన్‌ నుంచి ఆర్కే బీచ్‌ వరకు ఆయన తూర్పు జోన్‌ జోనల్‌ కమిషనర్‌ కె.శివప్రసాద్‌, సహాయక వైద్యాధికారి బి.ప్రసాదరావుతో కలిసి పర్యటించారు. సిరిపురం జంక్షన్‌, బాలాజీనగర్‌ ప్రాంతాల్లో తుపాను వ్యర్థాలు పూర్తిస్థాయిలో తొలగించకపోవడం, అలాగే బీచ్‌ పరిసరాల్లో వ్యర్థాలు పేరుకుపోవడంపై అసంతృప్తి వ్యక్తం చేశారు. రాత్రి వేళల్లోనూ పారిశుధ్య పనులు పకడ్బందీగా చేపట్టాలని శానిటరీ సూపర్‌వైజర్లు, ఇన్‌స్పెక్టర్లు, కార్యదర్శులను ఆదేశించారు. త్వరలో విశాఖలో సీఐఐ సమ్మిట్‌ జరగనున్న నేపథ్యంలో జాతీయ, అంతర్జాతీయ ప్రతినిధులు నగరాన్ని సందర్శించనున్నారని పేర్కొన్నారు. ఈ నేపథ్యంలో నగర ప్రతిష్టకు తగినట్లుగా రహదారులు, బీచ్‌రోడ్డు, తీర ప్రాంతాలను పరిశుభ్రంగా, సుందరంగా తీర్చిదిద్దాలని అధికారులకు సూచించారు.

మల్కాపురం: యారాడ గ్రామానికి వెళ్లాలంటే ఆ ఒక్క మార్గమే ఆధారం. అలాంటి ప్రధాన మార్గానికే రాత్రివేళ కార్లు అడ్డుగా నిలుస్తుండటంతో గ్రామస్తులు తీవ్ర ఇబ్బందులు ఎదుర్కొంటున్నారు. డాల్ఫిన్‌ హిల్స్‌ నేవల్‌ క్వార్టర్స్‌ వద్ద కొందరు తమ కార్లను రహదారికి అడ్డంగా నిలుపుతుండటంతో ఆర్టీసీ బస్సు గ్రామంలోకి వెళ్లలేని పరిస్థితి నెలకొంటోంది. దీంతో బస్సులో ప్రయాణించే గ్రామస్తులు రెండు కిలోమీటర్ల దూరం కాలినడకన వెళ్లాల్సి వస్తోంది. యారాడ గ్రామానికి చేరుకోవాలంటే రెండు ఎత్తైన కొండలను దాటుకుని వెళ్లాలి. గ్రామానికి నిత్యం వచ్చే 16 నంబరు ఆర్టీసీ బస్సు ద్వారా ఉద్యోగులు, విద్యార్థులు, మహిళలు రాకపోకలు సాగిస్తుంటారు. అయితే గ్రామానికి సమీపంలోని డాల్ఫిన్‌ హిల్స్‌ ప్రాంతంలో ఉన్న నేవల్‌ క్వార్టర్స్‌ వద్ద నుంచే బస్సు రాకపోకలు సాగించాల్సి ఉంటుంది. ఈ నేపథ్యంలో క్వార్టర్స్‌లో నివసించే కొందరు నేవీ ఉద్యోగులు రాత్రివేళ తమ కార్లను బస్సు వెళ్లే మార్గానికి అడ్డంగా నిలుపుతున్నారు. దీంతో బస్సు గ్రామంలోకి వెళ్లలేకపోతోంది. కార్లు అడ్డం.. రెండు కి.మీ. నడక బుధవారం రాత్రి కూడా ఇదే పరిస్థితి ఎదురైంది. గ్రామానికి వెళ్లాల్సిన బస్సు మార్గంలో కార్లు అడ్డంగా ఉండటంతో అక్కడే నిలిచిపోయింది. దీంతో బస్సులోని ప్రయాణికులు రెండు కిలోమీటర్ల దూరం కొండ దిగువకు నడుచుకుంటూ వచ్చారు. బస్సులో రావాల్సిన వారు కాలినడకన రావడంతో అక్కడున్న గ్రామస్తులు కారణం అడిగారు. కార్లు అడ్డంగా ఉండటంతో నడుచుకుంటూ రావాల్సి వచ్చిందని ప్రయాణికులు వివరించారు. దీంతో ఆగ్రహించిన గ్రామస్తులు డాల్ఫిన్‌ హిల్స్‌ వద్దకు వెళ్లి నేవీ సిబ్బందితో వాదించారు. అనంతరం మార్గానికి అడ్డంగా ఉన్న కార్లను తొలగించారు. అయితే ఇది ఒక్కరోజు సమస్య కాదని, ప్రతిరోజూ రాత్రివేళ ఇదే ఇబ్బంది ఎదురవుతోందని గ్రామస్తులు ఆవేదన వ్యక్తం చేస్తున్నారు. బస్సు రాకపోకలకు ఆటంకం కలగకుండా అధికారులు శాశ్వత పరిష్కారం చూపాలని కోరుతున్నారు.

సింథియా/మల్కాపురం: గుర్తుతెలియని కీటకం కుట్టడంతో అస్వస్థతకు గురై అపస్మారక స్థితిలోకి వెళ్లిన వ్యక్తి చికిత్స పొందుతూ గురువారం మృతి చెందాడు. పోలీసులు తెలిపిన వివరాల ప్రకారం.. 76వ వార్డు జై ఆంధ్ర కాలనీకి చెందిన రేకపల్లి బాబూరావు (52) బుధవారం మధ్యాహ్నం ఇంటి వద్ద ఉండగా గుర్తుతెలియని కీటకం కుట్టింది. దీంతో ఆయన అపస్మారక స్థితికి చేరుకోవడంతో బంధువులు సమీపంలోని ప్రైవేట్‌ ఆస్పత్రికి తరలించారు. అక్కడ పరిస్థితి విషమించడంతో మెరుగైన వైద్యం కోసం కేజీహెచ్‌కు తీసుకెళ్లారు. అక్కడ చికిత్స పొందుతూ గురువారం మధ్యాహ్నం మృతి చెందాడు. బంధువుల ఫిర్యాదు మేరకు పోలీసులు కేసు నమోదు చేసి దర్యాప్తు చేస్తున్నారు. పోస్టుమార్టం నివేదిక ఆధారంగా మృతికి గల కారణాలు వెల్లడవుతాయని తెలిపారు. కాగా, బాబూరావును విషసర్పం కరిచి ఉంటుందని స్థానికులు అనుమానిస్తున్నారు. ఇదే ప్రాంతంలో రెండు రోజుల క్రితం ఓ మహిళను కూడా పాము కాటేసిన ఘటన చోటుచేసుకోవడంతో ఈ అనుమానాలు వ్యక్తమవుతున్నాయి. అయితే పోస్టుమార్టం నివేదిక వస్తేనే మృతికి అసలు కారణం స్పష్టమవుతుంది.

పెందుర్తి: తీవ్ర ఆర్థిక ఇబ్బందులతో ఓ ఆటో డ్రైవర్‌ ఆత్మహత్యకు పాల్పడిన ఘటన పెందుర్తి పాతూరులో గురువారం చోటుచేసుకుంది.పాతూరు రామాలయం సమీపంలో నివాసం ఉంటున్న మామిడి వెంకటేశ్‌ (35) ఆటో నడుపుతూ జీవనం సాగిస్తున్నాడు. కొంతకాలంగా ఆర్థిక ఇబ్బందులతో సతమతమవుతున్న వెంకటేశ్‌ తీవ్ర మనస్తాపానికి గురయ్యాడు. ఈ క్రమంలో గురువారం ఉదయం ఇంట్లోని ఫ్యాన్‌కు ఉరివేసుకుని ఆత్మహత్యకు పాల్పడ్డాడు.సమాచారం అందుకున్న పెందుర్తి పోలీసులు ఘటనా స్థలానికి చేరుకుని మృతదేహాన్ని పోస్టుమార్టం నిమిత్తం కేజీహెచ్‌కు తరలించారు. మృతుడికి భార్య వనిత, ఇద్దరు కుమార్తెలు ఉన్నారు. ఘటనపై పోలీసులు కేసు నమోదు చేసి దర్యాప్తు చేస్తున్నారు.

తగరపువలస: కలుషిత గాలి.. విషతుల్యమైన నీరు.. భరించలేని దుర్వాసన.. ఇళ్లలో ఉండలేని దుస్థితి.. చివరకు అధికారుల నిర్లక్ష్యానికి నిరసనగా ఓటు హక్కునే వదులుకున్నారు ఆ గ్రామస్తులు. ఆరు నెలలుగా కాలుష్య సమస్యతో అల్లాడుతున్నా.. కూటమి ప్రభుత్వం పట్టించుకోకపోవడంతో ఎన్నికలను బహిష్కరించి తమ ఆగ్రహాన్ని చాటారు. భీమిలి మండలం తాళ్లవలస పంచాయతీ పరిధిలోని రాయినపేట గ్రామస్తులు గురువారం జరిగిన ప్రాదేశిక ఎన్నికలకు దూరంగా ఉన్నారు. జాతీయ రహదారిని ఆనుకుని ఉన్న ఎంపీఈపీ పాఠశాలలో ఏర్పాటు చేసిన పోలింగ్‌ కేంద్రంలో గ్రామానికి చెందిన 131 మంది ఓటు వేయాల్సి ఉండగా.. ఒక్కరూ పోలింగ్‌ కేంద్రానికి వెళ్లలేదు. పోలీసులు, రెవెన్యూ అధికారులు వచ్చి నచ్చజెప్పినా తమ నిర్ణయాన్ని మార్చుకోలేదు. ఆరు నెలలుగా నరకయాతన తాళ్లవలస పంచాయతీలోని చిన్నిపేట, యాతపేట, గొల్లల తాళ్లవలసతో పాటు ఆనందపురం మండలం పెద్దిపాలెంలోని పలు కార్పొరేట్‌ విద్యాసంస్థలు శుద్ధి చేయని వ్యర్థాలను సమీపంలోని చెరువులోకి నేరుగా వదులుతున్నాయని గ్రామస్తులు ఆరోపిస్తున్నారు. దీంతో ఈ ఏడాది మే నెల నుంచి రాయినపేట, పెద్దిపాలెం గ్రామాల్లో తీవ్రమైన దుర్వాసన వ్యాపిస్తోంది. చెరువులో నీరు అడుగంటడంతో వ్యర్థాలు రాయినపేట వరకు చేరుతున్నాయి. సమీపంలోని రక్షిత మంచినీటి పథకం బోరులోకి కూడా కలుషిత నీరు చేరడంతో తాగునీరు సైతం విషతుల్యంగా మారుతోందని గ్రామస్తులు ఆవేదన వ్యక్తం చేస్తున్నారు. గాలి పీల్చినా.. నీరు తాగినా ఇబ్బందులే దుర్వాసన భరించలేక ఇళ్లలో ఉండలేని పరిస్థితి నెలకొందని గ్రామస్తులు చెబుతున్నారు. కలుషిత గాలి, నీటి కారణంగా చర్మ అలర్జీలు వస్తున్నాయని ఆందోళన వ్యక్తం చేస్తున్నారు. చెరువులో చేపలు మృత్యువాత పడుతున్నాయని తెలిపారు. రక్షిత మంచినీటి పథకం, జల్‌ జీవన్‌ మిషన్‌ బోర్ల ద్వారా సరఫరా అవుతున్న నీటిలో దుర్వాసనతో పాటు పురుగులు, చిన్న కప్పలు వస్తున్నా అధికారులు పట్టించుకోవడం లేదని మండిపడుతున్నారు. ఇటీవల కురిసిన వర్షాలకు చెరువును ఆనుకుని ఉన్న బంగారమ్మ ఆలయం మునిగిపోయిందని, గత మూడు రోజులుగా శుద్ధమైన తాగునీరు కూడా అందడం లేదని వాపోతున్నారు. అధికారుల చుట్టూ తిరిగినా.. కాలుష్య సమస్యపై గత ఆరు నెలలుగా కలెక్టర్‌, జాయింట్‌ కలెక్టర్‌, భీమిలి ఎమ్మెల్యే గంటా శ్రీనివాసరావు, పొల్యూషన్‌ కంట్రోల్‌ బోర్డు చైర్మన్‌ పంచకర్ల సందీప్‌తో పాటు గ్రామీణ నీటి సరఫరా విభాగం అధికారులకు పలుమార్లు ఫిర్యాదు చేసినా పరిష్కారం లభించలేదని గ్రామస్తులు మండిపడుతున్నారు. రెండు పంచాయతీల ప్రజలు కలెక్టరేట్‌లో నిర్వహించిన ప్రజా సమస్యల పరిష్కార వేదికలోనూ తమ గోడు వెళ్లబోసుకున్నా సమస్య మాత్రం పరిష్కారం కాలేదని వాపోతున్నారు. పంచాయతీ ఎన్నికలూ బహిష్కరిస్తాం అధికారులు, ప్రజాప్రతినిధులు హామీలకే పరిమితమవుతున్నారని గ్రామస్తులు ఆగ్రహం వ్యక్తం చేస్తున్నారు. ఎన్నికల సమయంలో మాత్రమే తమ గ్రామానికి వస్తున్నారని, మిగిలిన రోజుల్లో సమస్యలను పట్టించుకోవడం లేదని విమర్శిస్తున్నారు. ఇప్పటికై నా ప్రభుత్వం స్పందించి సమస్యను పరిష్కరించకపోతే రానున్న గ్రామ పంచాయతీ ఎన్నికలను కూడా బహిష్కరిస్తామని హెచ్చరించారు. గాలి, నీరు కలుషితమయ్యాయి చెరువులోకి చేరుతున్న వ్యర్థాలతో రాయినపేటలో గాలి, నీరు తీవ్రంగా కలుషితమయ్యాయి. దుర్వాసనతో గాలి పీల్చుకోవడం కూడా కష్టంగా ఉంది. ఇళ్లలోని బోర్ల నీరు తాగడానికి పనికిరావడం లేదు. అధికారులు సమస్యను పరిష్కరించకపోవడంతో గ్రామాన్ని విడిచి వెళ్లాల్సిన దుస్థితి ఏర్పడింది. ప్రభుత్వం స్పందించాలనే ఎన్నికలను బహిష్కరించాం. – రాయిన రమేష్‌ఎన్నికలప్పుడే గుర్తుకొస్తాం ఆనందపురం, భీమిలి మండలాల మధ్య ఉన్న చిన్న గ్రామం కావడంతో ఎన్నికల సమయంలో తప్ప మిగిలిన రోజుల్లో అధికారులు, ప్రజాప్రతినిధులకు మేం గుర్తుకు రావడం లేదు. ఆరు నెలల క్రితం సమస్యను వివరించినప్పుడు మూడు నెలల్లో పరిష్కరిస్తామని హామీ ఇచ్చారు. ఆ తర్వాత పట్టించుకోలేదు. – నిమ్మకాయల ఆదినారాయణ

మద్దిలపాలెం: సామాజిక సేవా కార్యక్రమాల్లో ఎల్లప్పుడూ ముందుండే సిఎంఆర్‌ సంస్థ మరోసారి తన మానవతా దృక్పథాన్ని చాటుకుంది. దీపావళి పర్వదినాన్ని పురస్కరించుకుని ఫిజికల్లీ హ్యాండిక్యాప్డ్‌ వెల్ఫేర్‌ అసోసియేషన్‌కు సీఎంఆర్‌ సంస్థ తరఫున మావూరి వెంకటరమణ రూ.50 వేల ఆర్థిక సహాయాన్ని అందించారు.2007 సంవత్సరం నుంచి ప్రతి ఏటా దీపావళి సందర్భంగా ఈ సంస్థకు సిఎంఆర్‌ తన వంతు సహకారాన్ని అందిస్తోంది. అసోసియేషన్‌ సభ్యులు స్వయంగా తయారు చేసే దీపావళి ప్రమిదల కొనుగోలుకు రూ.25 వేలు, వారి జీవనోపాధికి తోడ్పాటుగా మరో రూ.25 వేలు చొప్పున మొత్తం రూ.50 వేల విరాళాన్ని అందించడం ఆనవాయితీగా కొనసాగుతోంది.ఈ ఏడాది అందించిన ఆర్థిక సహాయాన్ని సీఎంఆర్‌ సంస్థ ప్రతినిధుల తరఫున శ్రీమతి మావూరి వెంకట పద్మావతి స్వయంగా అసోసియేషన్‌ ప్రతినిధులకు అందజేశారు.దాదాపు రెండు దశాబ్దాలుగా ప్రతి దీపావళికి ఈ సేవా కార్యక్రమాన్ని కొనసాగిస్తూ దివ్యాంగుల స్వావలంబనకు, జీవనోపాధికి సిఎంఆర్‌ సంస్థ అందిస్తున్న సహకారం అభినందనీయమని పలువురు పేర్కొన్నారు. పండుగ వెలుగులు ప్రతి ఒక్కరి జీవితాల్లో నిండాలనే ఆశయంతో కొనసాగిస్తున్న ఈ సేవా కార్యక్రమం సమాజానికి స్ఫూర్తిదాయకంగా నిలుస్తోంది.

ఆనందపురంలో మోడల్‌ పోలింగ్‌ స్టేషన్‌లో ఓటు వేసేందుకు క్యూలో ఉన్న ప్రజలుసాక్షి, విశాఖపట్నం: కూటమి ప్రభుత్వ ఆంక్షలు, పోలీసుల ఏకపక్ష వైఖరి మధ్య విశాఖ రూరల్‌ పరిధిలో జెడ్పీటీసీ, ఎంపీటీసీ ఎన్నికల పోలింగ్‌ గురువారం ముగిసింది. ఇటీవల జరిగిన మున్సిపల్‌, జీవీఎంసీ ఎన్నికల తరహాలోనే పోలింగ్‌ కేంద్రాల వద్ద పోలీసుల వ్యవహారశైలిపై విమర్శలు వ్యక్తమయ్యాయి. కూటమి ప్రజాప్రతినిధులకు అనుకూలంగా వ్యవహరిస్తూ, పక్షపాత వైఖరి ప్రదర్శించారనే ఆరోపణలు వినిపించాయి. అధికారులు వెల్లడించిన ప్రాథమిక సమాచారం ప్రకారం విశాఖ రూరల్‌ పరిధిలోని భీమిలి, పద్మనాభం, ఆనందపురం, పెందుర్తి మండలాల్లో సాయంత్రం పోలింగ్‌ ముగిసే సమయానికి సగటున 82.51 శాతం ఓటింగ్‌ నమోదైంది. 2021లో జరిగిన ప్రాదేశిక ఎన్నికల్లో ఈ నాలుగు మండలాల్లో సగటున 87.5 శాతం పోలింగ్‌ నమోదవగా, ఈసారి 6.3 శాతం తగ్గడం గమనార్హం. మొత్తం నాలుగు జెడ్పీటీసీ, 52 ఎంపీటీసీ స్థానాల పరిధిలోని 203 పోలింగ్‌ కేంద్రాల్లో 1,34,000 మంది ఓటర్లు తమ ఓటు హక్కును వినియోగించుకున్నారు. బరిలో ఉన్న 13 మంది జెడ్పీటీసీ, 117 మంది ఎంపీటీసీ అభ్యర్థుల భవితవ్యాన్ని బ్యాలెట్‌ బాక్సుల్లో నిక్షిప్తం చేశారు. జీవీఎంసీ ఎన్నికల్లో మాదిరిగానే ఈ ఎన్నికల్లోనూ పోలింగ్‌ శాతం తగ్గడం చర్చనీయాంశంగా మారింది. మహిళా ఓటర్లదే ఆధిక్యం ప్రతి ఎన్నికల్లోనూ ఉత్సాహంగా పాల్గొనే మహిళా ఓటర్లు ఈసారి కూడా తమ భాగస్వామ్యాన్ని చాటుకున్నారు. పురుషుల కంటే అధిక సంఖ్యలో ఉదయం నుంచే పోలింగ్‌ కేంద్రాల వద్ద క్యూలైన్లలో కనిపించారు. ప్రతి రెండు గంటలకోసారి నమోదైన పోలింగ్‌ సరళిని పరిశీలించినా మహిళా ఓటర్ల భాగస్వామ్యమే అధికంగా ఉన్నట్లు అధికారులు తెలిపారు. ఉదయం 7 నుంచి 9 గంటల వరకు 14.83 శాతం పోలింగ్‌ నమోదైంది. ఉదయం 11 గంటలకు 20.57 శాతం, మధ్యాహ్నం 1 గంటకు 56.33 శాతం, మధ్యాహ్నం 3 గంటలకు 71.23 శాతం ఓటింగ్‌ నమోదైంది. సాయంత్రం 5 గంటలకు పోలింగ్‌ ముగిసే సమయానికి మొత్తం 82.51 శాతం పోలింగ్‌ నమోదైంది. బ్యాలెట్‌ బాక్సులు స్ట్రాంగ్‌ రూంలకు తరలింపు జిల్లాలో జెడ్పీటీసీ, ఎంపీటీసీ ఎన్నికల పోలింగ్‌ అనంతరం బ్యాలెట్‌ బాక్సులను ఆయా మండల కేంద్రాల్లో ఏర్పాటు చేసిన స్ట్రాంగ్‌ రూంలకు తరలించారు.ఆనందపురం మండలానికి సంబంధించిన బ్యాలెట్‌ బాక్సులను మండల కేంద్రంలోని ఎంపీడీఓ కార్యాలయంలో ఏర్పాటు చేసిన స్ట్రాంగ్‌ రూంలో భద్రపరిచారు. భీమిలి, పద్మనాభం మండలాలకు సంబంధించిన బ్యాలెట్‌ బాక్సులను సీడర్‌ స్కూల్‌లలో ఏర్పాటు చేసిన స్ట్రాంగ్‌ రూంలకు తరలించారు. పెందుర్తి మండలానికి చెందిన బ్యాలెట్‌ బాక్సులను పెందుర్తి ప్రభుత్వ జూనియర్‌ కళాశాలలో ఏర్పాటు చేసిన స్ట్రాంగ్‌ రూంలో భద్రపరిచారు. గత ఎన్నికలకు..ప్రస్తుత ఎన్నికలకు మధ్య వ్యత్యాసం మండలం 2021 2026 ఎన్నికల్లో ఎన్నికల్లో (శాతం) (శాతం) ఆనందపురం 88.8 84.76 పద్మనాభం 86.5 81.89 భీమునిపట్నం 84.2 80.97 పెందుర్తి 90.69 81.40పోలింగ్‌ కేంద్రాల వద్ద పోలీసుల్లో మారని తీరు ప్రాదేశిక ఎన్నికల పోలింగ్‌ 82.51 శాతం గతంతో పోలిస్తే తగ్గిన పోలింగ్‌ శాతం 203 పోలింగ్‌ కేంద్రాల పరిధిలో ఓటు వేసిన 1,34,000 మంది ఓటర్లు జిల్లాలో 4 జెడ్పీటీసీ స్థానాలకు పోటీలో 13 మంది అభ్యర్థులు 53 ఎంపీటీసీ స్థానాలకు 117 మంది అభ్యర్థులుపోలింగ్‌ ఎలా సాగిందంటే.. సమయం పోలింగ్‌ ఓటు మహిళలు పురుషులు శాతం వేసినవారు ఉదయం 9 గం.కు 14.83 24,083 10,759 13,324 ఉదయం 11 గం.కు 20.57 33,415 17,910 15,505 మధ్యాహ్నం 1గం.కు 56.33 91,486 48,942 42,544 మధ్యాహ్నం 3గం.కు 71.23 1,15,683 61,396 54,287 5 గంటల వరకు 82.51 1,34,000 69,076 64,924

మహారాణిపేట: ఆశీలమెట్టలోని శ్రీ సంపత్‌ వినాయగర్‌ ఆలయ హుండీలను గురువారం తెరిచి లెక్కించారు. దేవదాయ శాఖ జిల్లా సహాయ కమిషనర్‌ అన్నపూర్ణ, ఆలయ వ్యవస్థాపక ధర్మకర్త రాజేశ్వరన్‌ చోళన్‌ సమక్షంలో శివ జ్యోతి వెల్ఫేర్‌ అసోసియేషన్‌ సేవా సభ్యులు, ఆలయ సిబ్బంది హుండీ ఆదాయాన్ని లెక్కించారు. 24 రోజులకు గాను హుండీ లెక్కింపు ద్వారా రూ.16,82,715 , 10 గ్రాముల వెండి, 42 అమెరికన్‌ డాలర్లు ఆదాయంగా లభించినట్లు ఆలయ ఈవో ప్రసాదరావు తెలిపారు. ఈ మొత్తాన్ని బ్యాంక్‌ ఆఫ్‌ ఇండియా, సూర్యబాగ్‌ శాఖ అధికారులకు అప్పగించినట్లు చెప్పారు. కార్యక్రమంలో ఆలయ సిబ్బంది గోవిందరెడ్డి తదితరులు పాల్గొన్నారు.

సాక్షి, విశాఖపట్నం: జీవీఎంసీ మేయర్‌ ఎన్నికల్లో తన గెలుపు కోసం, వైఎస్సార్‌సీపీ విజయానికి శ్రమించిన ప్రతి ఒక్కరికీ పార్టీ మేయర్‌ అభ్యర్థి, ఎమ్మెల్సీ వరుదు కల్యాణి ఒక ప్రకటనలో ధన్యవాదాలు తెలిపారు. అధికార, డబ్బు, మూడు పార్టీల కూటమి బలాన్ని తట్టుకొని వైఎస్సార్‌సీపీ నాయకులు, కార్యకర్తలు వీరోచితంగా పోరాడారని, వారి త్యాగాలకు ఎప్పటికీ రుణపడి ఉంటానని పేర్కొన్నారు. తనను మేయర్‌ అభ్యర్థిగా ప్రకటించిన నాటి నుంచి కౌంటింగ్‌ వరకు పార్టీ పెద్దలు, నియోజకవర్గ సమన్వయకర్తలు, కార్యకర్తలు అత్యంత ప్రతిష్టాత్మకంగా భావించి అహర్నిశలూ శ్రమించారని కొనియాడారు. ఎన్నికల ప్రచారంలో ప్రజలు, ఉద్యోగులు, రిటైర్డ్‌ ఉద్యోగులు, కాంట్రాక్ట్‌ కార్మికులు, మద్దతుదారులు చూపిన ఆదరణ, ప్రేమ తనకు ఎంతో స్ఫూర్తినిచ్చాయన్నారు. ఎన్నికల్లో విజయం సాధించలేకపోయినా, విశాఖ ప్రజల మనసుల్లో ప్రత్యేక స్థానాన్ని సంపాదించుకున్నామని గర్వంగా చెబుతున్నానన్నారు. తమపై నమ్మకంతో ఓటేసిన సుమారు 3.40 లక్షల మంది ప్రజలకు కృతజ్ఞతలు తెలిపారు. 2029లో వైఎస్సార్‌సీపీ జెండా ఎగరేయడమే లక్ష్యం ఎమ్మెల్సీగా, మహిళా విభాగం అధ్యక్షురాలిగా నిరంతరం ప్రజాక్షేత్రంలోనే ఉంటానని, గెలుపోటములతో సంబంధం లేకుండా ఎప్పుడూ ప్రజల్లోనే ఉంటూ ప్రజా సమస్యలపై పోరాడతానని స్పష్టం చేశారు. ఎమ్మెల్సీగా, వైఎస్సార్‌సీపీ మహిళా విభాగం అధ్యక్షురాలిగా ప్రజల హక్కుల కోసం, ముఖ్యంగా మహిళలపై జరిగే అఘాయిత్యాలు, అరాచకాలపై ప్రభుత్వాన్ని ఎప్పటికప్పుడు నిలదీస్తానని వెల్లడించారు. 2029 ఎన్నికల్లో విశాఖపట్నంలో వైఎస్సార్‌సీపీ జెండా ఎగరేయడమే లక్ష్యంగా ఈ క్షణం నుంచే అందరం కలిసికట్టుగా పనిచేయాలని పిలుపునిచ్చారు. నూతన మేయర్‌కు అభినందనలు మేయర్‌గా విజయం సాధించిన కూటమి అభ్యర్థి ముక్కా శ్రావణికి అభినందనలు తెలిపారు. ప్రజలు ఉంచిన నమ్మకాన్ని వమ్ము చేయకుండా ఇచ్చిన హామీలన్నీ నెరవేర్చాలన్నారు. ముఖ్యంగా విశాఖ ప్రజల కష్టార్జితమైన రూ.1,700 కోట్ల జీవీఎంసీ నిధులను డైవర్ట్‌ చేశారని, నూతన పాలకవర్గం తమ అధికారాన్ని ఉపయోగించి ఆ నిధులను తిరిగి జీవీఎంసీకి రప్పించి నగరంలో మౌలిక వసతులు కల్పించాలని సూచించారు.

విశాఖ విద్య: విద్యార్థి దశలో చదువుతోపాటు క్రీడలూ ముఖ్యమేనని పదేపదే ప్రభుత్వాలు చెప్తుంటాయి. ఆచరణలో మాత్రం కానరాదు. ఇందుకు ఆంధ్రా యూనివర్సిటీ(ఏయూ) తీరే నిదర్శనం. విద్యార్థుల్ని క్రీడల పట్ల ప్రోత్సహిస్తూ వారి సర్వతోముఖాభివృద్ధికి తోడ్పడాల్సిన ఏయూ ఇప్పుడు వారి ఆశల్ని అడియాసలు చేస్తోంది. ఇంటర్‌ వర్సిటీ క్రీడా పోటీలున్న సమయంలో ఏయూ మైదానాలను బాణసంచా దుకాణాల కోసం కేటాయించడంపై సర్వత్రా తీవ్ర ఆగ్రహం వ్యక్తమవుతోంది. చదువుకంటే.. వ్యాపారమే మిన్న! ప్రస్తుతం ఇంటర్‌ యూనివర్సిటీ కాలేజీల క్రీడాపోటీల షెడ్యూల్‌ ఖరారైంది. ఈ సమయంలో క్రీడాకారులకు ప్రాక్టీస్‌ చేయడానికి కాదు కదా, చివరికి పోటీలు నిర్వహించడానికి కూడా ఏ ఒక్క మైదానాన్ని అందుబాటులో ఉంచలేని దుస్థితిలో ఏయూ యంత్రాంగం ఉంది. ఇంజనీరింగ్‌ కాలేజీ గ్రౌండ్స్‌ను ఎన్నికల నిర్వహణకు అప్పగించేశారు. అది లేకున్నా.. గోల్డెన్‌ జూబ్లీ గ్రౌండ్‌ ఉంది కదా.. సరిపెట్టుకుందామనుకుంటే.. దాన్ని కూడా దీపావళి బణసంచా స్టాళ్లకు కేటాయించారు. వాస్తవంగా ఈ నెల 6న ఆర్చరీ పోటీలు ఇక్కడే జరగాలి. రాత్రికి రాత్రే దీన్ని బాణసంచా స్టాళ్లకు కేటాయించడంపై విద్యార్థులు, క్రీడాకారులు ఆగ్రహం వ్యక్తం చేస్తున్నారు. క్రీడాపోటీల షెడ్యూల్‌ ముందే ఖరారై ఉన్నా, ఏయూ పెద్దలకు వ్యాపారుల ‘డబ్బుల మోత’వినిపించిందే తప్ప, విద్యార్థుల ‘పతకాల మోత’పట్టింపులేదని విద్యార్థి సంఘాలు నిప్పులు చెరుగుతున్నాయి. ఫిజికల్‌ ఎడ్యుకేషన్‌ శాఖ పాత్రేంటి? పోటీల షెడ్యూల్‌, వేదికలను ముందుగానే సిద్ధం చేసే ఏయూ ఫిజికల్‌ ఎడ్యుకేషన్‌ విభాగం ఇక్కడ ఏం చేస్తోందో.. తెలియని పరిస్థితి. మైదానాలు వేరే వాళ్లకు ధారాదత్తం చేస్తుంటే అడ్డుకోవాల్సిన ఆ విభాగం చేష్టలుడిగి చూస్తోందన్న ఆక్షేపణలున్నాయి. దీనిపై ఏయూ ఉన్నతాధికారులకు సమాచారం ఇచ్చారా? అయినా ఏయూ యంత్రాంగం పట్టించుకోలేదా? అన్న ప్రశ్నలు తలెత్తుతున్నాయి. ‘యూనివర్సిటీ ఫస్ట్‌’అనే నినాదం పోయి, ‘ప్రైవేట్‌ ప్రయోజనాలే ఫస్ట్‌’అన్నట్లుగా ఏయూ మైదానాలను ఇలాంటి వ్యవహారాలకు కేటాయించడంపై ఆరోపణలు వెల్లువెత్తుతున్నాయి. చివరికి ఇలాంటి వ్యాపార కార్యకలాపాలు ముగిశాక మైదానాల నిర్వహణ కూడా చేయకుండానే చేతులు దులిపేసుకుంటుండటంతో ఏయూ ఖజానాకు చిల్లు పడుతోందని విద్యార్థులు ఆవేదన వ్యక్తం చేస్తున్నారు. ఏయూ అవసరాల మాటేంటి? విశ్వవిద్యాలయాన్ని విద్యార్థుల అవసరాల కోసం కాకుండా, పదేపదే ప్రైవేట్‌ వ్యాపారాల కోసం కేటాయించడం అత్యంత సబబు కాదు. విద్యార్థుల గేమ్స్‌ ఉన్న సమయంలో దీపావళి స్టాల్స్‌కు ఎలా కేటాయిస్తారు? యాజమాన్యానికి విద్యార్థులపై ఏమాత్రం బాధ్యత ఉందో.. దీంతో తెలుస్తోంది. సభలు, సమావేశాల పేరుతో ఏయూ గ్రౌండ్స్‌ నాశనం చేయడం, చివరకు ఏయూ సొమ్ముతోనే వాటిని బాగుచేయడం వల్ల యూనివర్సిటీకి వచ్చే లాభం ఏంటో.. వర్సిటీ యంత్రాంగమే చెప్పాలి. – డా.మీనన్‌, కన్వీనర్‌, ఏయూ పరిరక్షణ సమితి ఆదేశాలిచ్చింది ఎవరు? ఈ బాణసంచా దుకాణాల నిర్వహణకు ఏయూ మైదానం కేటాయింపు వెనుక అసలు సూత్రధారులు ఎవరనే దానిపై ఇప్పుడు జోరుగా చర్చ సాగుతోంది. కలెక్టర్‌ ఆదేశాల మేరకే ఇవ్వాల్సి వచ్చిందనే సాకులు చెబుతున్న అధికారులు... ఒకవేళ నిజంగా కలెక్టరే ఆదేశిస్తే, క్రీడాపోటీలను ఆయన కూడా లైట్‌ తీసుకున్నట్లేనా? లేక ఏయూ పెద్దల ముందస్తు వంటకమే ఇది కాస్తా కలెక్టర్‌ భుజాల మీదకు నెడుతున్నారా? అన్న ప్రశ్నలు తలెత్తుతున్నాయి.

గోపాలపట్నం: యువతులను అల్లరి పెట్టబోయిన ఆకతాయిలు చివరికి వీడియో ఆధారంగా పోలీసులకు చిక్కారు. ఈ నెల 2వ తేదీ రాత్రి ఎన్‌ఏడీ జంక్షన్‌ శాంతినగర్‌కు చెందిన ఇద్దరు యువతులు స్కూటీపై సీఎంఆర్‌ షాపింగ్‌ మాల్‌ నుంచి తిరిగి వస్తుండగా భాష్యం స్కూల్‌ సమీపంలో గ్లామర్‌ బైక్‌పై వస్తున్న బుచ్చిరాజుపాలెం కరాసాకు చెందిన గణేష్‌, సంతోష్‌, గౌతమ్‌ వారిని అసభ్యంగా దూషిస్తూ, అసభ్యకరంగా ప్రవర్తించారు. ప్రమాదకరంగా బైక్‌ నడుపుతూ భయభ్రాంతులకు గురిచేశారు. ఈ ఘటనకు సంబంధించిన వీడియోను ఆ యువతులు సోషల్‌ మీడియాలో పోస్ట్‌ చేయడంతో వైరల్‌గా మారింది. దీనిపై స్పందించిన సీపీ శంఖబ్రత బాగ్చి ఆదేశాలతో ఎయిర్‌పోర్టు పోలీసులు సుమోటోగా కేసు నమోదు చేశారు. సీఐ శంకరనారాయణ పర్యవేక్షణలో బాధితులను గుర్తించి, వారి ఫిర్యాదు మేరకు దర్యాప్తు చేపట్టారు. బుధవారం గణేష్‌, సంతోష్‌లను అదుపులోకి తీసుకోగా, గౌతమ్‌ కోసం గాలిస్తున్నారు. ట్రిపుల్‌ రైడింగ్‌పై మోటారు వాహనాల చట్టం ప్రకారం కూడా చర్యలు తీసుకోనున్నారు.

డాబాగార్డెన్స్‌: జీవీఎంసీ ప్రధాన పట్టణ ప్రణాళికా అధికారి(సీసీపీ)గా జీవీజీఎస్‌వీ ప్రసాద్‌ జీవీఎంసీ ప్రధాన కార్యాలయంలోని తన చాంబర్లో బుధవారం బాధ్యతలు స్వీకరించారు. ప్రసాద్‌ గతంలో ఆంధ్రప్రదేశ్‌ టౌన్‌ అండ్‌ కంట్రీ ప్లానింగ్‌ డైరెక్టరేట్‌లో డైరెక్టర్‌గా విధులు నిర్వహిస్తూ, అమరావతిలోని ఏపీ రియల్‌ ఎస్టేట్‌ రెగ్యులేటరీ అథారటీ(ఏపీరెరా)లో డిప్యూటేషన్‌పై పనిచేశారు. మున్సిపల్‌ పరిపాలన, పట్టణాభివృద్ధి శాఖ ఉత్తర్వుల మేరకు జీవీఎంసీ సీసీపీగా బాధ్యతలు చేపట్టారు. ఇదా కూటమి ధర్మం డాబాగార్డెన్స్‌: కూటమి ధర్మానికి టీడీపీ తూట్లు పొడిచిందని 39వ వార్డు బీజేపీ కార్పొరేటర్‌ అభ్యర్థి దామోదర్‌ యాదవ్‌ మండిపడ్డారు. ఈ మేరకు ఆయన మీడియాతో బుధవారం మాట్లాడుతూ టీడీపీ దక్షిణ ఇన్‌చార్జి వల్లే తాను ఓడిపోయానని ఆవేదన వ్యక్తంచేశారు. కూటమిలో ఉంటూ పొత్తు ధర్మం పాటించలేని ఇన్‌చార్జిని తక్షణమే పార్టీ నుంచి సస్పెండ్‌ చేయాలని డిమాండ్‌ చేశారు. లేదంటే టీడీపీ కార్యాలయం ముందు ధర్నా చేస్తానని హెచ్చరించారు. రెబల్‌ అభ్యర్థులను కూటమిలోకి తీసుకుంటే ఊరుకోబోనన్నారు. బీజేపీ అభ్యర్థులకు ఎన్నికల్లో టీడీపీ నాయకులు చుక్కలు చూపించారని మండిపడ్డారు. పథకాలపై సమీక్షిస్తున్న వైద్య ఆరోగ్య శాఖకు చెందిన కమిటీ అధికారులు మహారాణిపేట: హెల్త్‌ ఇండికేటర్లపై వైద్య ఆరోగ్య శాఖకు చెందిన కమిటీ బుధవారం సమీక్ష నిర్వహించారు. కమిటీ రాష్ట్ర చీఫ్‌ అడ్మినిస్ట్రేటివ్‌ అధికారి డాక్టర్‌ డి.ప్రకాష్‌రావు, స్టేట్‌ ఇమ్యునైజేషన్‌ అధికారి డాక్టర్‌ ఎల్‌బీఎస్‌హెచ్‌ దేవి తదితరులు జిల్లాలో అమలవుతున్న పలు పథకాలపై సమీక్షించారు. జాతీయ హెల్త్‌ మిషన్‌ నిధులు ఏ విధంగా వినియోగిస్తున్నారన్న దానిపై ఆరా తీశారు. అనంతరం భానోజీనగర్‌, గాజువాక తదితర పీహెచ్‌సీల్లో పర్యటించి.. పథకాల అమలు తీరుతెన్నులను ప్రజలను అడిగి తెలుసుకున్నారు. ఈ సందర్భంగా డీఎంహెచ్‌వో డాక్టర్‌ పి.జగదీశ్వరరావు, డాక్టర్‌ డి.ప్రకాష్‌రావు, డా.ఎల్‌.బి.ఎస్‌.హెచ్‌.దేవి, అధికారులు ఎ.వాసుబాబులను సన్మానించారు. వివిధ విభాగాల అధికారులు డాక్టర్‌ బి.ఉమావతి, శశిభూషణ్‌, బి.రమేష్‌ పాల్గొన్నారు.

తాటిచెట్లపాలెం: రైల్వేశాఖ పరిధిలో జరుగుతున్న అభివృద్ధి పనులను నాణ్యతగా చేపట్టాలని సౌత్‌ కోస్ట్‌ రైల్వే జనరల్‌ మేనేజర్‌(జీఎం) సందీప్‌ మాధుర్‌ అధికారులకు, సిబ్బందికి సూచించారు. విశాఖపట్నం–కంటకాపల్లి సెక్షన్‌ల మధ్య బుధవారం పర్యటించారు. ఆయా ప్రాంతాల్లో జరుగుతున్న భద్రత, అభివృద్ధి పనులను పరిశీలించారు. అమృత్‌ భారత్‌ స్టేషన్‌ పథకం కింద ఆధునికీకరిస్తున్న విజయనగరం స్టేషన్‌ స్థితిగతులను, ప్రయాణికులకు అందుతున్న సౌకర్యాలను పరిశీలించారు. విజయనగరం, కంటకాపల్లి బొబ్బిలి స్టేషన్‌లలో పర్యటించి స్టేషన్‌ యార్డ్‌, సైడింగ్‌ పనులను, గొట్లాం–నెల్లిమర్ల బైపాస్‌ రైల్వే లైన్‌ పనులను సమీక్షించారు. కంటకాపల్లి స్టేషన్లో అల్ట్రాటెక్‌ సిమెంట్‌ ప్రతినిధుల బృందంతో ప్రాజెక్ట్‌ పురోగతి, ఇతర విషయాలపై చర్చించారు. బొబ్బిలిలో నూతనంగా నిర్మించిన మహిళా సిబ్బంది రెస్ట్‌ రూంను జీఎం ప్రారంభించారు. ఈ పర్యటనలో ఆయనతో పాటు విశాఖపట్నం డివిజన్‌ డీఆర్‌ఎం లలిత్‌బోహ్ర, ప్రిన్సిపల్‌ చీఫ్‌ ఇంజినీర్‌ బీఎస్‌కే రాజ్‌కుమార్‌, ప్రిన్సిపల్‌ చీఫ్‌ సిగ్నల్‌ అండ్‌ టెలికం ఇంజినీర్‌ ఒ.బి.సురేష్‌కుమార్‌, ప్రిన్సిపల్‌ చీఫ్‌ ఆపరేషన్స్‌ మేనేజర్‌ వినీత్‌కుమార్‌, చీఫ్‌ అడ్మినిస్ట్రేటివ్‌ ఆఫీసర్‌ అంకుష్‌గుప్తా, విశాఖపట్నం డివిజన్‌ సీనియర్‌ అధికారుల పాల్గొన్నారు. సౌత్‌కోస్ట్‌ రైల్వే జీఎం సందీప్‌ మాధుర్‌

సాక్షి, విశాఖపట్నం: జిల్లాలోని నాలుగు మండలాల పరిధిలో జెడ్పీటీసీ, ఎంపీటీసీ ఎన్నికల నిర్వహణకు జిల్లా యంత్రాంగం సర్వం సిద్ధం చేసింది. గురువారం(5న) జరగనున్న పరిషత్‌ పోరుకు సంబంధించి పోలింగ్‌, భద్రత, ఎన్నికల సామగ్రి పంపిణీ తదితర ప్రక్రియలన్నీ పూర్తయ్యాయి. నాలుగు(భీమిలి, ఆనందపురం, పద్మనాభం, పెందుర్తి) మండలాల పరిధిలో 4 జెడ్పీటీసీ, 53 ఎంపీటీసీ స్థానాలున్నాయి. పెందుర్తి మండల పరిధిలోని పెదగాడి ఎంపీటీసీ స్థానం ఇప్పటికే ఏకగ్రీవం కావడంతో, మిగిలిన 52 ఎంపీటీసీ స్థానాలకు నేడు పోలింగ్‌ జరగనుంది. 4 జెడ్పీటీసీ స్థానాల కోసం 13 మంది, 52 ఎంపీటీసీ స్థానాల కోసం 117 మంది బరిలో నిలిచారు. మొత్తం 1,62,407(పురుషులు 79,630, మహిళలు 82,777) మంది ఓటర్లు తమ ఓటు హక్కు వినియోగించుకోనున్నారు. జిల్లా వ్యాప్తంగా 115 ప్రాంతాల్లోని 203 పోలింగ్‌ కేంద్రాల్లో ఉదయం 7 నుంచి సాయంత్రం 5 వరకు ఓటింగ్‌ జరగనుంది. పోలింగ్‌ సామగ్రి పంపిణీ ఎన్నికల విధుల నిర్వహణకు జిల్లా వ్యాప్తంగా మొత్తం 1,484 మంది సిబ్బందిని నియమించారు. బుధవారం ఆయా మండల కేంద్రాల్లో ఏర్పాటు చేసిన పంపిణీ కేంద్రాల ద్వారా వీరికి ఎన్నికల సామగ్రి అందజేశారు. పెందుర్తిలోని ప్రభుత్వ జూనియర్‌ కళాశాల, ఆనందపురం ఎంపీడీవో కార్యాలయ ప్రాంగణం, భీమిలిలోని సిద్ధార్థ పాఠశాల నుంచి పోలింగ్‌ సిబ్బంది తమకు కేటాయించిన సామగ్రితో పోలింగ్‌ స్టేషన్లకు తరలివెళ్లారు. 16 జోన్లు.. 25 రూట్లు పరిషత్‌ ఎన్నికలను సజావుగా నిర్వహించేందుకు జిల్లాను 16 జోన్లుగా విభజించారు. పోలింగ్‌ సామగ్రి, సిబ్బంది సురక్షిత తరలింపు కోసం 25 ప్రత్యేక రూట్లను గుర్తించారు. 4 మోడల్‌ కోడ్‌ ఆఫ్‌ కండక్ట్‌ టీమ్‌లు, 4 ఫ్లయింగ్‌ స్క్వాడ్‌లు, 4 స్టాటిక్‌ సర్వైలెన్స్‌ బృందాలు, 2 వీడియో వీక్షణ బృందాలు, 5 ఎన్నికల వ్యయ పరిశీలన బృందాలు, 5 సింగిల్‌ విండో క్లియరెన్స్‌ బృందాలు నిరంతరం పర్యవేక్షిస్తున్నాయి. మండల స్థాయిలోనే కాకుండా జిల్లా స్థాయిలో ప్రత్యేక కంట్రోల్‌ రూమ్‌లు అందుబాటులోకి తెచ్చారు. ఉన్నతాధికారుల క్షేత్రస్థాయి పరిశీలన పరిషత్‌ ఎన్నికల నిర్వహణకు సంబంధించి సామగ్రి పంపిణీ కేంద్రాలు, స్ట్రాంగ్‌ రూమ్‌లు, ఓట్ల లెక్కింపు హాళ్లను ఉన్నతాధికారులు క్షేత్రస్థాయిలో పరిశీలించారు. పెందుర్తిలో జిల్లా కలెక్టర్‌ ఎం.అభిషిక్త్‌ కిశోర్‌, ఆనందపురంలో జేసీ గొబ్బిళ్ల విద్యాధరి, భీమిలిలో జనరల్‌ అబ్జర్వర్‌(జీసీసీ ఎండీ) శోభిక తనిఖీలు నిర్వహించారు. ఈ సందర్భంగా ఎన్నికల సామగ్రి పంపిణీ, సిబ్బంది రవాణా, కౌంటింగ్‌ టేబుళ్లు, భద్రత, మౌలిక సదుపాయాలను సమీక్షించారు. స్ట్రాంగ్‌ రూమ్‌ల భద్రతపై ప్రత్యేక శ్రద్ధ వహించాలని ఆదేశించారు. కౌంటింగ్‌ సమయంలో అభ్యర్థులు, వారి ఏజెంట్లకు నిబంధనల మేరకు వసతులు కల్పించాలని తెలిపారు. పోలింగ్‌ నుంచి ఓట్ల లెక్కింపు వరకు అన్ని దశలను సమన్వయంతో, నిష్పక్షపాతంగా నిర్వహించాలని కలెక్టర్‌ స్పష్టం చేశారు. కార్యక్రమంలో విశాఖ ఆర్డీవో దిలీప్‌ చక్రవర్తి, జిల్లా పరిషత్‌ సీఈవో నారాయణమూర్తి, స్పెషల్‌ ఆఫీసర్‌ ఉషారాణి, ఏసీపీ, స్థానిక తహసీల్దార్‌ తదితరులు పాల్గొన్నారు. జిల్లాలో 4 జెడ్పీటీసీ, 52 ఎంపీటీసీ స్థానాలకు ఎన్నికలు జెడ్పీటీసీల బరిలో 13 మంది, ఎంపీటీసీల బరిలో 117 మంది 1,62,407 మంది ఓటర్లు, 203 పోలింగ్‌ కేంద్రాలు నిరంతర పర్యవేక్షణకు వెబ్‌కాస్టింగ్‌ పోలింగ్‌ ప్రక్రియను నిరంతరం పర్యవేక్షించేందుకు ఏర్పాట్లు చేశారు. 203 పోలింగ్‌ కేంద్రాల్లో 115 కేంద్రాల నుంచి జిల్లా కంట్రోల్‌ రూమ్‌కు నేరుగా లైవ్‌ టెలికాస్ట్‌(వెబ్‌కాస్టింగ్‌) సౌకర్యం కల్పించారు. 93 సెన్సిటివ్‌ కేంద్రాల్లో 101 సీసీ సర్వైలెన్స్‌ ఏర్పాటు చేశారు. స్ట్రాంగ్‌ రూమ్‌లు లెక్కింపు కేంద్రాలు భీమిలి, పద్మనాభం మండలాలకు సంబంధించి భీమిలిలోని ‘సీడార్‌’ (పాత ఏఎంజీ స్కూల్‌) ప్రాంగణం ఆనందపురం మండలానికి ఎంపీడీవో కార్యాలయ ప్రాంగణం పెందుర్తి మండలానికి పెందుర్తి ప్రభుత్వ జూనియర్‌ కళాశాల ప్రాంగణం

బ్యాలెట్‌ బాక్సుల్లో సాక్షి, విశాఖపట్నం: పారదర్శకతకు పాతరేస్తూ, ప్రజల తీర్పును బ్యాలెట్‌ బాక్సుల్లోనే మాయం చేసిన వ్యవహారం.. మహా విశాఖ నగరపాలక సంస్థ(జీవీఎంసీ) ఎన్నికల చరిత్రలో చీకటి అధ్యాయంగా మిగిలిపోతోంది. జీవీఎంసీ ఎన్నికల్లో పోలింగ్‌ ముగిశాక మొత్తం 10,35,154 ఓట్లు పోలైనట్లు అధికారికంగా ప్రకటించారు. మేయర్‌ ఎన్నికల కౌంటింగ్‌ పూర్తయ్యే సరికి ఆ సంఖ్య 10,22,227కి పడిపోయింది. అంటే ఏకంగా 12,927 ఓట్లు గల్లంతయ్యాయి. ఇవన్నీ ఎటుపోయాయన్నది ఇప్పుడు చర్చనీయాంశంగా మారింది. ఈ లెక్కల గారడీ వెనుక ఏదో అదృశ్య శక్తి హస్తం ఉందన్న అనుమానాలు వ్యక్తమవుతున్నాయి. స్ట్రాంగ్‌ రూమ్‌లలో ‘చీకటి’ వ్యవహారం.! బ్యాలెట్‌ బాక్సుల తరలింపులో కనీస నిబంధనలు పాటించలేదన్న ఆరోపణలు బలంగా వినిపిస్తున్నాయి. పోలింగ్‌ కేంద్రాల వద్ద సీల్‌ వేయాల్సిన బాక్సులను, ఎలాంటి భద్రతా చర్యలు లేకుండానే స్ట్రాంగ్‌ రూమ్‌లకు తరలించడం అనుమానాలకు బలం చేకూరుస్తోంది. దీనికి తోడు, సీల్‌ వేయని బాక్సులను స్ట్రాంగ్‌ రూమ్‌లలో పెట్టిన కాసేపటికే దాదాపు గంట పాటు విద్యుత్‌ సరఫరా నిలిచిపోయింది. ఈ వ్యవహారం మరో చీకటి కోణాన్ని ఆవిష్కరిస్తోంది. అధికారుల మౌనంలో ఆంతర్యమేంటో? కరెంట్‌ పోయిన ఆ గంట వ్యవధిలోనే అసలు కుట్ర జరిగిందని విపక్షాలు ఆరోపిస్తున్నాయి. సీల్‌ వేయని బాక్సులను మాయం చేసి, వాటి స్థానంలో ముందుగానే రిగ్గింగ్‌ చేసి సిద్ధంగా ఉంచిన వేరే బాక్సులను పెట్టారనేది ప్రధాన ఆరోపణ. సరిగ్గా ఇదే విషయంపై పోలింగ్‌ రోజు అర్ధరాత్రి వైఎస్సార్‌సీపీ శ్రేణులు, వామపక్ష నాయకులు తీవ్ర స్థాయిలో ఆందోళన వ్యక్తం చేసినప్పటికీ, సంబంధిత అధికారులు ఏమాత్రం పట్టించుకోకపోవడం ఎన్నికల పారదర్శకతనే ప్రశ్నార్థకంగా మార్చాయి. ఓటమి భయంతో కూటమి మాయాజాలం రాష్ట్ర వ్యాప్తంగా ఉన్న రాజకీయ వాతావరణం, ఎన్నికల సరళిని గమనిస్తే.. జీవీఎంసీ మేయర్‌ పీఠాన్ని దక్కించుకోలేమేమో? అన్న భయంతోనే కూటమి నేతలు ఈ అక్రమాలకు పాల్పడి ఉంటారనే విమర్శలు వినిపిస్తున్నాయి. ప్రజా తీర్పు తమకు వ్యతిరేకంగా ఉందనే ముందస్తు అంచనాతోనే, అధికారుల సమక్షంలో ఈ తరహా బ్యాలెట్‌ మాయాజాలానికి తెరతీశారన్నది విపక్షాల ప్రధాన వాదన. అందుకే.. మేయర్‌ ఓట్ల లెక్కింపు ప్రక్రియ మంగళవారం రాత్రి 9.30 గంటలకు ముగిసిపోయినా.. అర్ధరాత్రి 2 గంటల వరకూ తుదిఫలితాలు వెల్లడించలేదు. పది వార్డుల ఓట్లకు మేయర్‌ ఓట్లకు పొంతన కుదరకపోవడంతో.. అధికారులు, కూటమి నేతలు కంగారు పడ్డారు. 2024 సార్వత్రిక ఎన్నికల మాదిరిగా.. ఇది కూడా వివాదాస్పదమవుతుందన్న భయంతో.. తర్జనభర్జన పడ్డారు. చిక్కుముడి ఎప్పటికీ వీడకపోవడంతో.. మొత్తం 10,22,227 ఓట్లు మాత్రమే పోలయ్యాయంటూ డిక్లేర్‌ చేసేశారు. మిగిలిన 12,927 ఏమయ్యాయనే దానిపై ఎన్నికల అధికారుల నుంచి ఎలాంటి స్పష్టతా లేకపోవడం గమనార్హం. వీధినపడ్డ ‘పింక్‌’ బ్యాలెట్లు ఈ మొత్తం వ్యవహారంలో అత్యంత వివాదాస్పదమైన అంశం మేయర్‌ ఎన్నికకు సంబంధించిన పింక్‌ కలర్‌ బ్యాలెట్‌ పేపర్లు పోలింగ్‌ కేంద్రాల బయట దర్శనమివ్వడం. పోలింగ్‌ జరుగుతున్న సమయంలోనే ఆ బ్యాలెట్లు బయటకు రావడం, వాటిని టీడీపీ నేతలు చేత్తో పట్టుకుని హల్‌చల్‌ చేస్తున్న వీడియోలు వెలుగులోకి రావడం వెనుక భారీ కుట్రే జరిగిందన్నది స్పష్టమవుతోంది. రిగ్గింగ్‌ చేసిన తర్వాత మిగిలిన బ్యాలెట్‌ పేపర్లను ఇలా వీధిలోకి తీసుకొచ్చినట్లు అనుమానాలు వ్యక్తమవుతున్నాయి. పారదర్శకంగా జరగాల్సిన ఎన్నికల ప్రక్రియలో ఇన్ని లొసుగులు బయటపడటం, వీడియో ఆధారాలు చక్కర్లు కొడుతున్నా అధికారులు స్పందించకపోవడం వ్యవస్థల వైఫల్యాన్ని సూచిస్తోంది. ఈ ఆరోపణలపై సమగ్ర, నిష్పాక్షిక విచారణ జరిపితే తప్ప, ఎన్నికల ప్రక్రియపై ప్రజలకు నమ్మకం కలిగే పరిస్థితి నెలకొనదని రాజకీయ నిపుణులు, ప్రజాస్వామ్యవాదులు పేర్కొంటున్నారు. మేయర్‌ గెలుపు డిక్లరేషన్‌లో తగ్గిన మొత్తం ఓట్లుసాగర నగరంలో ప్రజాస్వామ్యం నిలువునా దగా పడింది! పదీ.. వంద కాదు.. ఏకంగా సుమారు 13 వేల ఓట్లు కనుమరుగైపోయాయి. వీధిన పడ్డ పింక్‌ బ్యాలెట్లు.. సీలు పడని బ్యాలెట్‌ బాక్సులు.. స్ట్రాంగ్‌ రూమ్‌లో కరెంట్‌ కోతలు.. ప్రజా తీర్పును తుంగలో తొక్కి, ఓటమి భయంతో కూటమి నేతలు ఆడిన బ్యాలెట్‌ అంకెల గారడీ.. జీవీఎంసీ ఎన్నికల ఫలితాల్ని అపహాస్యం చేశాయి. పోలింగ్‌ రోజున ప్రకటించిన ఓటింగ్‌ శాతానికి.. కౌంటింగ్‌ తర్వాత తేలిన ఓట్లకు మధ్య భారీ వ్యత్యాసం పలు అనుమానాలకు తావిస్తోంది.

విశాఖ స్పోర్ట్స్‌: ఇండియన్‌ గోల్ఫ్‌ ప్రీమియర్‌ లీగ్‌ రెండో రౌండ్‌లోనూ గగన్‌జీత్‌ బుల్లార్‌ ఆధిక్యాన్ని కొనసాగించారు. తొలి రోజు ముందంజలో ఉన్న దీపక్‌, రవికుమార్‌ వెనుకబడగా.. సచిన్‌ బైసోయా, తుషార్‌ పన్ను మెరుగైన ప్రదర్శనతో దూసుకొచ్చారు. విశాఖ ఈస్ట్‌ పాయింట్‌ గోల్ఫ్‌ కోర్స్‌ (ఈపీజీసీ)లో జరుగుతున్న గ్రీన్‌ ఫ్యూయల్స్‌ మారిటైమ్‌ ఇన్విటేషన్‌–2026 టోర్నీలో బుధవారం రెండో రోజు పోటీలు జరిగాయి. ఐదుసార్లు విజేతగా నిలిచిన గగన్‌జీత్‌ బోగీలు చేయకుండా ఆరు బర్డీలు సాధించి ఆధిక్యాన్ని నిలబెట్టుకున్నారు. సచిన్‌ బైసోయా నాలుగు బర్డీలతో రెండో స్థానానికి చేరుకోగా, తుషార్‌ పన్ను నాలుగు బర్డీలతో మూడో స్థానంలో నిలిచారు. దీపక్‌ ఒక డబుల్‌ బోగీతో నాలుగో స్థానానికి, రవికుమార్‌ ఒక డబుల్‌ బోగీ, ఒక బోగీతో ఐదో స్థానానికి పడిపోయారు. వైజాగ్‌ డాల్ఫిన్స్‌ జట్టుతో బరిలోకి.. : టోర్నీ నిర్వాహక కమిటీ ప్రతినిధి శ్రీ సుధాకర్‌ మాట్లాడుతూ ఏపీలో ఫ్రాంచైజీ జట్టును తీసుకోవాలనే ఆసక్తితో వైజాగ్‌ డాల్ఫిన్స్‌ జీసీ పేరుతో జట్టును ఎంపిక చేసుకుని టోర్నీలో పాల్గొంటున్నామని తెలిపారు. క్లబ్‌లో క్లినిక్‌లు, జూనియర్‌ కార్యక్రమాలతో గోల్ఫ్‌పై అవగాహన పెంచుతామన్నారు. కార్యక్రమంలో సీఈవో ఉత్తమ్‌సింగ్‌, ఈపీజీసీ కార్యదర్శి ఎస్‌వీఆర్‌ రాజు, ఉపాధ్యక్షుడు వర్మ పాల్గొన్నారు.

డాబాగార్డెన్స్‌: హార్బర్‌ పోలీస్‌ స్టేషన్‌ పరిధి అనకాపల్లి గేట్‌ విద్యుత్‌ స్తంభం వీపీఏ/ఎంఎన్‌/87 సమీపాన ఫ్లైఓవర్‌ కింద గుర్తు తెలియని ఒక వ్యక్తి మృతదేహాన్ని హార్బర్‌ పోలీసులు గుర్తించారు. మృతుడి వయసు సుమారు 30 నుంచి 35 ఏళ్ల మధ్య ఉంటుందని, అనకాపల్లి గేట్‌ పరిసర ప్రాంతాల్లో తిరుగుతూ కనిపించే వాడని, మానసిక స్థితి సరిగ్గా లేకుండా ఉండేవాడని, అనారోగ్యంతో మరణించి ఉండవచ్చని ఫిర్యాదు చేసినట్టు చెప్పారు. మృతుడి వివరాలు తెలిసిన వారు హార్బర్‌ సీఐ కె.మల్లేశ్వరరావును 9440796013కు సంప్రదించాలని కోరారు. నేడు, రేపు ఆర్టీఐ కమిషనర్‌ పర్యటన

కేంద్రాల వద్ద డ్రోన్లు, సీసీ కెమెరాలతో నిఘా ద్వారకా నగర్‌: విశాఖ రూరల్‌ పరిధిలోని నాలుగు మండలాల్లో జరగనున్న ఎంపీటీసీ, జెడ్పీటీసీ ఎన్నికలను ప్రశాంతంగా, స్వేచ్ఛాయుత వాతావరణంలో నిర్వహించేందుకు నగర పోలీసు శాఖ పటిష్ట భద్రతా ఏర్పాట్లు చేపట్టింది. ఎన్నికల విధుల కోసం 953 మందికి పైగా పోలీసు సిబ్బందిని నియమించారు. బుధవారం పోలింగ్‌ కేంద్రాలు, స్ట్రాంగ్‌ రూములను పరిశీలించిన పోలీస్‌ కమిషనర్‌ డాక్టర్‌ శంఖబ్రత బాగ్చి భద్రతా ఏర్పాట్లను సమీక్షించారు. బందోబస్తులో భాగంగా 25 రూట్‌ మొబైల్స్‌, 15 స్ట్రైకింగ్‌ ఫోర్స్‌లు, నాలుగు స్పెషల్‌ స్ట్రైకింగ్‌ ఫోర్స్‌లు, 10 మొబైల్‌ పార్టీలు, నాలుగు ఫ్లయింగ్‌ స్క్వాడ్లు, నాలుగు చెక్‌పోస్టులు, రెండు పికెట్లు ఏర్పాటు చేశారు. సమస్యాత్మక ప్రాంతాల్లో డ్రోన్లు, సీసీ కెమెరాలతో నిఘా ఏర్పాటు చేయనున్నారు. పోలింగ్‌ సామగ్రి పంపిణీ నుంచి బ్యాలెట్‌ బాక్సులు స్ట్రాంగ్‌ రూంలకు చేరే వరకు నిరంతర భద్రత కల్పించాలని సీపీ ఆదేశించారు. ఓటర్లను ప్రలోభపెట్టినా, బెదిరించినా, ఎన్నికల నిబంధనలు ఉల్లంఘించినా కఠిన చర్యలు తీసుకుంటామని హెచ్చరించారు. ఓటర్లు నిర్భయంగా తమ ఓటు హక్కును వినియోగించుకోవాలని, ఎన్నికల ప్రశాంత నిర్వహణకు అందరూ సహకరించాలని కోరారు.

ప్రజాస్వామ్యంపై అధికారాన్ని అడ్డుపెట్టుకుని కూటమి నేతల అరాచకాలు రాత్రికి రాత్రే పెరిగిన పోలింగ్‌.. సీల్‌ లేని బ్యాలెట్‌ బాక్సులు రీకౌంటింగ్‌లతోనూ ఫలితాల తారుమారు జీవీఎంసీ మేయర్‌గా ముక్కా శ్రావణి సాక్షి, విశాఖపట్నం: కూటమి నేతల దౌర్జన్యాలు.. అధికారాన్ని అడ్డుపెట్టుకుని సాగించిన రాజకీయ కుట్రలు.. ఎన్నికల నిబంధనలకు తూట్లు.. వెరసి జీవీఎంసీ ఎన్నికల ప్రక్రియపై అనేక అనుమానాలు వ్యక్తమయ్యాయి. రాత్రికి రాత్రే పెరిగిన పోలింగ్‌ శాతం.. సీల్‌ వేయకుండానే స్ట్రాంగ్‌ రూమ్‌లకు చేరిన బ్యాలెట్‌ బాక్సులు.. ఎన్నికల నిర్వహణలో అధికారుల తీరుపై సందేహాలు రేకెత్తించాయి. నిబంధనలను పక్కనపెట్టి కూటమి నేతలు చెప్పిందే అమలుచేశారన్న ఆరోపణలు వెల్లువెత్తాయి. ఫలితంగా ఎన్నికల ఫలితాలు తారుమారయ్యాయని వైఎస్సార్‌సీపీ నేతలు ఆరోపిస్తున్నారు. కొన్ని స్థానాల్లో వైఎస్సార్‌సీపీ అభ్యర్థులు విజయం సాధించినప్పటికీ.. రీకౌంటింగ్‌ పేరుతో ఫలితాలను మార్చి కూటమి అభ్యర్థులనే విజేతలుగా ప్రకటించారన్న విమర్శలు వినిపించాయి. నోటిఫికేషన్‌ వెలువడినప్పటి నుంచి కౌంటింగ్‌ పూర్తయ్యే వరకు ప్రతి దశలోనూ అక్రమాలు చోటుచేసుకున్నాయని వైఎస్సార్‌సీపీ నేతలు ఆరోపిస్తున్నారు. ఈ పరిణామాల మధ్య జీవీఎంసీపై కూటమి ఆధిపత్యం సాధించినట్లు ప్రకటించగా.. అధికారులు ఫలితాలను ధ్రువీకరించారు. జీవీఎంసీ మేయర్‌గా కూటమి అభ్యర్థి ముక్కా శ్రావణి సుమారు 2.01 లక్షల ఓట్ల మెజారిటీతో వైఎస్సార్‌సీపీ అభ్యర్థి వరుదు కల్యాణిపై విజయం సాధించారు. కార్పొరేటర్‌ స్థానాల్లో కూటమి ఆధిపత్యం జీవీఎంసీ ఎన్నికల్లో మేయర్‌ పదవితోపాటు అత్యధిక కార్పొరేటర్‌ స్థానాలను కూటమి అభ్యర్థులు కై వసం చేసుకున్నారు. మొత్తం 120 కార్పొరేటర్‌ స్థానాలకు ఎన్నికలు జరగ్గా.. టీడీపీకి 64 స్థానాలు, జనసేనకు 26 స్థానాలు, వైఎస్సార్‌సీపీకి 13 స్థానాలు, బీజేపీకి 8 స్థానాలు, సీపీఎంకి ఒక స్థానం, స్వతంత్రులకు 8 స్థానాలు దక్కాయి. మేయర్‌ పదవికి మొత్తం 15 మంది పోటీపడగా కూటమి అభ్యర్థి ముక్కా శ్రావణి విజయం సాధించారు. ఓట్లు.. బ్యాలెట్‌ బాక్సుల హైజాక్‌ ఈ విజయం ప్రజల మద్దతుతోనే సాధించిందా? లేక ఎన్నికల ప్రక్రియలో చోటుచేసుకున్న అక్రమాల ప్రభావం ఉందా? అన్న అనుమానాలు వ్యక్తమవుతున్నాయి. కూటమి నేతల కుట్రలు, బ్యాలెట్‌ బాక్సుల నిర్వహణలో జరిగిన అవకతవకలే ఫలితాలను ప్రభావితం చేశాయని వైఎస్సార్‌సీపీ నేతలు ఆరోపిస్తున్నారు. పోలింగ్‌ ప్రారంభమైన కొద్దిసేపటికే వైఎస్సార్‌సీపీకి అనుకూలంగా ఓటింగ్‌ జరుగుతోందన్న సంకేతాలు రావడంతో కూటమి నేతలు అధికారాన్ని అడ్డుపెట్టుకుని పోలింగ్‌ కేంద్రాల వద్ద అలజడులు సృష్టించారని ఆరోపణలు వచ్చాయి. తూర్పు, పశ్చిమ, దక్షిణ, ఉత్తర నియోజకవర్గాల్లోని పలు వార్డుల్లో రిగ్గింగ్‌కు పాల్పడ్డారని, ఓటర్లను బెదిరింపులకు గురిచేశారని వైఎస్సార్‌సీపీ నేతలు విమర్శించారు. ఆ పార్టీ సానుభూతిపరులు కనిపిస్తే చాలు.. వారితో వాగ్వాదానికి దిగి, పోలింగ్‌కు ఆటంకం కలిగించారని ఆరోపించారు. కొన్ని ప్రాంతాల్లో పోలింగ్‌ కేంద్రాలను తమ ఆధీనంలోకి తీసుకుని అక్రమాలకు పాల్పడ్డారని పేర్కొన్నారు. తూర్పు నియోజకవర్గంలో వందలాది బ్యాలెట్‌ పత్రాలతో టీడీపీ నేతలు పోలింగ్‌ కేంద్రాల బయట తిరిగారన్న ఆరోపణలు ఎన్నికల నిర్వహణ తీరుపై సందేహాలు రేకెత్తించాయి. దక్షిణ నియోజకవర్గంలో రిగ్గింగ్‌ జరుగుతోందంటూ కలెక్టర్‌కు ఫిర్యాదులు అందినా చర్యలు తీసుకోలేదని వైఎస్సార్‌సీపీ నేతలు ఆరోపించారు. రిగ్గింగ్‌ను అడ్డుకునేందుకు వెళ్లిన తమ పార్టీ నేతలను పోలీసులు నిలువరించారని, అధికార పార్టీ నేతల పట్ల మాత్రం ఉదాసీనంగా వ్యవహరించారని విమర్శించారు. సీల్‌ వేయకుండానే స్ట్రాంగ్‌ రూమ్‌లకు బాక్సులు! ఎన్నికల నిర్వహణలో అధికారుల వ్యవహారశైలిపైనా అనేక అనుమానాలు వ్యక్తమయ్యాయి. అధికారిక గణాంకాల ప్రకారమే పోలింగ్‌ శాతంలో భారీ వ్యత్యాసం కనిపించడం చర్చనీయాంశంగా మారింది. పోలింగ్‌ జరిగిన రోజు రాత్రి 10 గంటలకు మొత్తం 9,45,915 ఓట్లు పోలయ్యాయని, 51.47 శాతం పోలింగ్‌ నమోదైందని ఎన్నికల అధికారులు ప్రకటించారు. అయితే మరుసటి రోజు ఉదయం వెల్లడించిన గణాంకాల్లో ఏకంగా 56.32 శాతం పోలింగ్‌ నమోదైనట్లు, 10,35,154 ఓట్లు పోలైనట్లు పేర్కొన్నారు. ఒక్క రాత్రిలోనే 89,239 ఓట్లు అదనంగా నమోదైనట్లు గణాంకాలు వెల్లడించడంపై వైఎస్సార్‌సీపీ నేతలు తీవ్ర అభ్యంతరం వ్యక్తం చేశారు. ఈ వ్యత్యాసానికి అధికారులు వివరణ ఇవ్వాలని డిమాండ్‌ చేశారు. మరోవైపు పోలింగ్‌ ముగిసిన వెంటనే బ్యాలెట్‌ బాక్సులకు పోలింగ్‌ కేంద్రాల వద్దే ఏజెంట్ల సమక్షంలో సీల్‌ వేసి స్ట్రాంగ్‌ రూమ్‌లకు తరలించాల్సి ఉండగా.. కొన్ని బాక్సులకు సీల్‌ వేయకుండానే తరలించారని వైఎస్సార్‌సీపీ నేతలు ఆరోపించారు. స్ట్రాంగ్‌ రూమ్‌ల్లో బాక్సులను భద్రపరిచిన వెంటనే సుమారు గంటపాటు విద్యుత్‌ సరఫరా నిలిపివేయడం మరిన్ని అనుమానాలకు తావిచ్చింది. ఈ విషయం తెలుసుకున్న వైఎస్సార్‌సీపీ నేతలు అక్కడికి చేరుకుని అధికారులను నిలదీశారు. బ్యాలెట్‌ బాక్సుల భద్రత, సీల్‌ వేయకుండా తరలించిన అంశాలపై సమగ్ర విచారణ జరిపించాలని డిమాండ్‌ చేశారు. టీడీపీ 64 – 1, 2, 3, 4, 8, 9, 10, 13, 14, 15, 16, 17, 18, 20, 21, 22, 23, 24, 25, 27, 28, 29, 30, 35, 38, 44, 45, 47, 48, 49, 50, 51, 52, 55, 56, 60, 61, 63, 64, 66, 67, 68, 69, 70, 71, 72, 74, 77, 78, 82, 83, 87, 89, 90, 91, 96, 97, 100, 101, 107, 108, 116, 117, 120 జనసేన 26– 5, 11, 12, 26, 31, 32, 33, 34, 37, 40, 43, 46, 62, 75, 79, 80, 93, 95, 102, 103, 109, 110, 112, 113, 114, 115 వైఎస్సార్‌సీపీ 13 – 6, 7, 19, 42, 59, 65, 76, 84, 92, 94, 99, 104, 119 బీజేపీ – 8 – 53, 54, 57, 58, 81, 85, 88, 111 సీపీఎం – 1 – 105 స్వతంత్రులు– 8– 36, 39, 41, 73, 86, 98, 106, 118 మేయర్‌ ఓట్ల లెక్కల్లో తేడాలు? కూటమి విజయం వెనుక ఎలాంటి కుట్రలు జరిగాయన్నది స్పష్టమవుతోంది. రాత్రి 10 గంటలకల్లా మేయర్‌ ఓట్ల లెక్కింపు పూర్తయింది. 10.30కి డిక్లరేషన్‌ ఫారం ఇస్తామంటూ కలెక్టర్‌ ప్రకటించారు. అయితే.. మొత్తం ఓట్లు కూడే సమయంలో కూటమి నేతల రిగ్గింగ్‌ బాగోతం బట్టబయలైంది. మూడు రౌండ్లలో మేయర్‌ ఓట్ల లెక్కింపు జరిగింది. దాదాపు 10 వార్డుల్లో పోలైన ఓట్లకు.. కౌంటింగ్‌ సమయంలో ఓట్లకు పొంతన కుదరలేదు. దీంతో అధికారులు కంగుతిన్నారు. ఈ అడ్డగోలు వ్యవహారాన్ని కప్పిపుచ్చుకునేందుకు తుది ఫలితాలు వెల్లడించడంలో తీవ్ర జాప్యం చేశారు. రాత్రి 9.30 గంటలకే కౌంటింగ్‌ ముగిసినా అర్ధరాత్రి ఒంటిగంట దాటినా తుది ఫలితం ఇవ్వకపోవడం అనేక అనుమానాలకు తావిస్తోంది. అధికారులు, కూటమి నేతలు కలిపి.. పోలైన ఓట్లు, వచ్చిన ఓట్లు లెక్క సరిపోయేలా సుదీర్ఘ కసరత్తులు చేశారు. అర్ధరాత్రి 2 గంటలకు గానీ, ఉదయం గానీ డిక్లరేషన్‌ ఫారం ఇస్తామంటూ మీడియాతో అధికారులు చెప్పడం చూస్తుంటే.. ఓట్ల రిగ్గింగ్‌ వ్యవహారం ఎలా జరిగిందో సుస్పష్టమవుతోంది.

సాక్షి, విశాఖపట్నం : జీవీఎంసీ ఎన్నికల్లో వైఎస్సార్‌సీపీ నుంచి 13 మంది కార్పొరేటర్ల అభ్యర్థులు విజయం సాధించారు. 6వ వార్డు నుంచి పి.హనుమంతురావు, 7వ వార్డు నుంచి పోతుల జాహ్నవి, 19వ వార్డు నుంచి మొల్లి లక్ష్మి, 42వ వార్డు నుంచి కోడిగుడ్ల పూర్ణిమ, 59వ వార్డు నుంచి అల్లు వెంకట సత్యశ్రీ, 65వ వార్డు నుంచి షేక్‌ జహీరున్నీషా, 76వ వార్డు నుంచి సోమాదుల సురేష్‌, 84వ వార్డు నుంచి గుడివాడ వెంకట సాయి అనూష, 92వ వార్డు నుంచి గొందేశి శ్రీదేవి, 94వ వార్డు నుంచి ధర్మాల రాధిక, 99వ వార్డు నుంచి కోమటి శ్రీనివాసరావు, 104వ వార్డు నుంచి మద్ది శ్రీనివాస్‌, 119వ వార్డు నుంచి దాసరి అన్నపూర్ణ విజయం సాధించారు. వీరందరికీ ఎన్నికల రిటర్నింగ్‌ అధికారి డిక్లరేషన్‌ ఫారాలు అందజేశారు.

బీచ్‌రోడ్డు: విశాఖలో ప్రముఖ హోటళ్లలో వరుసగా కుళ్లిన చికెన్‌, పాడైన ఆహారం బయటప డుతున్నా.. అసలు ఈ దందా ఇంత విచ్చలవిడిగా సాగడానికి కారణం ఏమిటనే ప్రశ్న తలెత్తుతోంది. దీనికి సమాధానంగా ఫుడ్‌ సేఫ్టీ విభాగంలో ఏళ్ల తరబడి డిప్యూటేషన్‌పై కొనసాగుతున్న అధికారుల వ్యవహారం ఇప్పుడు చర్చనీయాంశమైంది. సిబ్బంది కొరత పేరుతో అధికారులు మారకపోవడం, హోటళ్లపై క్రమం తప్పకుండా తనిఖీలు లేకపోవడం వల్లే కల్తీ ఆహార దందా పెచ్చరిల్లిందన్న విమర్శలు వినిపిస్తున్నాయి. ఇటీవల సాక్షి కథనాల తర్వాత అధికారులు వరుస దాడులు నిర్వహించారు. రైల్వేస్టేషన్‌ రోడ్డులోని కామత్‌ హోటల్‌లో 60 కిలోల కుళ్లిన చికెన్‌, సిరిపురంలోని పిస్తా హౌస్‌లో నిల్వ చికెన్‌, జగదాంబలోని ఆల్ఫా హోటల్‌లో డ్రైనేజీ పక్కనే వంట, ఈస్టర్న్‌ స్టార్‌లో నల్లబడిన వంటనూనె, ఎంవీపీ సెక్టార్‌–8లోని వాయుపుత్ర టిఫిన్స్‌ అండ్‌ మీల్స్‌లో 28 కిలోల పాడైన ఆహారం స్వాధీనం చేసుకున్నారు. కేసులు నమోదైనా.. ఏడాది పొడవునా ఇలాంటి తనిఖీలు ఎందుకు జరగడం లేదన్న ప్రశ్న మాత్రం తీరడం లేదు. 10 వేలకుపైగా హోటళ్లకు ఇద్దరే అధికారులు జీవీఎంసీ పరిధిలో 10 వేలకుపైగా హోటళ్లు, రెస్టారెంట్లు, బేకరీలు, స్వీట్‌ షాపులు, ఫాస్ట్‌ఫుడ్‌ కేంద్రాలు ఉన్నాయి. వీటి పర్యవేక్షణకు కనీసం 12 మంది ఫుడ్‌ సేఫ్టీ అధికారులు అవసరం. ప్రస్తుతం ఇద్దరే పనిచేస్తుండగా, వారిలో ఒకరు దాదాపు 20 ఏళ్లుగా అదే కార్యాలయంలో డిప్యూటేషన్‌పై కొనసాగుతున్నారు. మరో అధికారి కూడా చాలా కాలంగా విశాఖలోనే విధులు నిర్వహిస్తున్నారని సమాచారం. సత్సంబంధాలే కల్తీకి అండా? ఏళ్ల తరబడి ఒకేచోట కొనసాగడం వల్ల హోటల్‌ యాజమాన్యాలతో సన్నిహిత సంబంధాలు ఏర్పడ్డాయన్న ఆరోపణలు ఉన్నాయి. నెలవారీ మామూళ్ల వ్యవహారం సాగుతోందనే విమర్శలు వినిపిస్తున్నాయి. అందుకే పలుమార్లు నిబంధనలు ఉల్లంఘించిన హోటళ్లపై కూడా కేవలం జరిమానాలతో సరిపెడుతున్నారన్న అనుమానాలు వ్యక్తమవుతున్నాయి. తనిఖీలు తక్కువ.. గోప్యత ఎక్కువ గత ఏడాదిలో జరిగిన తనిఖీలు 50 కూడా దాటలేదు. తనిఖీలు చేసినా హోటళ్ల పేర్లు బయటకు రానివ్వకుండా వ్యవహరిస్తున్నారనే విమర్శలు ఉన్నాయి. ప్రజారోగ్యానికి ముప్పు కలిగిస్తున్న సంస్థల వివరాలను కూడా గోప్యంగా ఉంచడం ఏమిటని ప్రజలు ప్రశ్నిస్తున్నారు. లైసెన్సు రద్దు చేయడం లేదు ఎందుకు? కల్తీ ఆహారం విక్రయిస్తే చట్టం ప్రకారం లైసెన్సు రద్దు, క్రిమినల్‌ కేసులు, జైలుశిక్ష వరకు నిబంధనలు ఉన్నాయి. కానీ విశాఖలో ఇప్పటివరకు ఒక్క హోటల్‌ లైసెన్సు కూడా రద్దు కాలేదు. నోటీసులు, స్వల్ప జరిమానాలతోనే వ్యవహారం ముగుస్తోందన్న విమర్శలు ఉన్నాయి. అవగాహన కార్యక్రమాలు శూన్యం ఫుడ్‌ సేఫ్టీ నిబంధనల ప్రకారం హోటల్‌ యజమానులు, వంట సిబ్బంది, స్ట్రీట్‌ఫుడ్‌ విక్రేతలు, విద్యార్థులకు క్రమం తప్పకుండా అవగాహన కార్యక్రమాలు నిర్వహించాలి. ప్రతి హోటల్‌లో ఫిర్యాదు టోల్‌ఫ్రీ నంబర్‌ను ప్రదర్శించాలి. అయితే విశాఖలో ఇలాంటి కార్యక్రమాలు దాదాపు కనిపించడం లేదని తెలుస్తోంది. ఫిర్యాదు ఎలా చేయాలి కల్తీ ఆహారంపై ఫిర్యాదు చేసేందుకు ప్రభుత్వం ప్రకటించిన టోల్‌ఫ్రీ నంబర్‌ 1800–425–2977కు ఫోన్‌ చేస్తే స్పందన ఉండడం లేదని ప్రజలు వాపోతున్నారు. అధికారులు అందుబాటులో లేకపోవడంతో ఫిర్యాదులు చేయడమే కష్టమవుతోందని ఆగ్రహం వ్యక్తం చేస్తున్నారు. ఏళ్లుగా డిప్యూటేషన్‌లో ఉన్న అధికారులను వెంటనే బదిలీ చేయాలని, జీవీఎంసీకి కనీసం 12 మంది ఫుడ్‌ సేఫ్టీ అధికారులను నియమించాలని ప్రజాసంఘాలు డిమాండ్‌ చేస్తున్నాయి. ప్రతి వార్డులో నెలకు ఒకసారి తనిఖీలు నిర్వహించి నివేదికలను ఆన్‌లైన్‌లో ఉంచాలని, కల్తీ ఆహారం విక్రయించే హోటళ్ల లైసెన్సులు రద్దు చేసి క్రిమినల్‌ కేసులు నమోదు చేయాలని కోరుతున్నాయి. అలాగే ప్రతి జోన్‌కు ప్రత్యేక ఫుడ్‌ సేఫ్టీ ఇన్‌స్పెక్టర్‌, వాట్సాప్‌ ఫిర్యాదు నంబర్‌, 24 గంటల్లో స్పందించే వ్యవస్థను ఏర్పాటు చేయాలని సూచిస్తున్నాయి.

పెందుర్తి: ‘నేను టీడీపీలో 36 ఏళ్లుగా కష్టపడి పనిచేశాను. నిత్యం పార్టీ బలోపేతానికి ప్రయత్నం చేశాను. ఈ ఎన్నికల్లో 106వ వార్డు నుంచి కూటమి తరఫున నాకు టీడీపీ టికెట్‌ కేటాయించి బీఫారం కూడా ఇచ్చారు. కానీ జనసేన నుంచి మరో అభ్యర్థిని పెట్టారు. ఆ అభ్యర్థిని పోటీ నుంచి తప్పుకోవాలని ఇటు ఎమ్మెల్యే పంచకర్ల రమేష్‌బాబు గానీ, అటు టీడీపీ ఇన్‌చార్జి గండి బాబ్జీ గానీ చెప్పలేదు. టీడీపీ అధ్యక్షుడు పల్లా శ్రీనివాసరావు దృష్టికి సమస్య తీసుకువెళ్లినా ఫలితం లేకపోయింది. టికెట్‌ ఇచ్చి నన్ను ఓడించిన గండి బాబ్జీకి, పంచకర్లకు కృతజ్ఞతలు’.. అంటూ 106వ వార్డు టీడీపీ(కూటమి) అభ్యర్థి రౌతు శ్రీనివాసరావు ఆ పార్టీకి మంగళవారం రాజీనామా చేశారు. కూటమి రెబల్‌(జనసేన) అభ్యర్థి రామునాయుడు చేతిలో ఓడిపోయిన అనంతరం రౌతు ఈ నిర్ణయం తీసుకున్నారు. ఈ సందర్భంగా శ్రీనివాసరావు మీడియాతో మాట్లాడుతూ తనకు టికెట్‌ ఇచ్చిన తరువాత పంచకర్ల, గండి బాబ్జీ ఒక్క రోజు కూడా ప్రచారానికి రాలేదన్నారు. కనీసం కార్యాలయం ప్రారంభానికి పిలిచినా మొహం చాటేశారని చెప్పారు. టికెట్‌ ఇవ్వడం ఎందుకు? వెన్నుపోటు పొడవడం ఎందుకు? అని ప్రశ్నించారు. ఇదేనా కూటమి ధర్మం అంటూ ఆవేదన వ్యక్తం చేశారు. జనసేన నాయకుడిని ప్రోత్సహించే ఉద్దేశం ఉంటే తనకు కూటమి నుంచి టికెట్‌ ఎందుకు కేటాయించారని ధ్వజమెత్తారు. ఇలాంటి వెన్నుపోటు పార్టీలో కొనసాగలేనంటూ అనకాపల్లి జిల్లా టీడీపీ అధ్యక్షుడు బత్తుల తాతయ్యబాబుకు రాజీనామా లేఖ పంపారు.

ఆరిలోవ: ఇండియన్‌ ఆర్థోపెడిక్‌ అసోసియేషన్‌ వార్షిక జాతీయ సదస్సు (ఐఓఏసీఓఎన్‌)లో అపోలో ఆర్థోపెడిక్‌ వైద్య నిపుణుడు డాక్టర్‌ అబ్దుల్‌ డి. ఖాన్‌ పరిశోధన పత్రాలు సమర్పించనున్నారు.తాను రూపొందించిన ఏడు పరిశోధన పత్రాలను సదస్సులో సమర్పించి వాటిపై వివరించేందుకు ఆహ్వానం అందినట్లు డాక్టర్‌ ఖాన్‌ మంగళవారం తెలిపారు. ఈ సదస్సు డిసెంబర్‌లో అహ్మదాబాద్‌లో జరగనుంది.ఒకే జాతీయ సదస్సులో ఏడు పరిశోధన పత్రాలు సమర్పించడం అరుదైన విషయమని ఆయన పేర్కొన్నారు. మోకాలు, భుజం కీళ్లకు సంబంధించిన ఆధునిక ఆర్ర్‌థోస్కోపిక్‌ విధానాలపై రెండేళ్ల ఫాలోఅప్‌ ఫలితాలను ఈ పరిశోధనలు వివరిస్తున్నాయని తెలిపారు.

తాటిచెట్లపాలెం: మురసు తుపాను నేపథ్యంలో తీసుకోవాల్సిన ముందస్తు జాగ్రత్తలపై సౌత్‌ కోస్ట్‌ రైల్వే జనరల్‌ మేనేజర్‌ సందీప్‌ మాధుర్‌ మంగళవారం ప్రత్యేక సమావేశం నిర్వహించారు. తన కార్యాలయంలో జరిగిన ఈ సమావేశంలో నాలుగు డివిజన్ల డివిజనల్‌ రైల్వే మేనేజర్లు, ఆయా విభాగాల ప్రిన్సిపల్‌ హెడ్స్‌ పాల్గొన్నారు. ఈ సందర్భంగా జీఎం మాట్లాడుతూ జోన్‌ పరిధిలో తుపాను పరిస్థితులను ఎప్పటికప్పుడు పర్యవేక్షించేందుకు సిబ్బంది నిరంతరం పనిచేస్తున్నారని తెలిపారు. రైల్వే ట్రాక్‌లు, ఓవర్‌ హెడ్‌ ఎక్విప్‌మెంట్‌లు, వంతెనల వద్ద ప్రత్యేక నిఘా ఉంచాలని అధికారులను ఆదేశించారు. రైళ్ల రాకపోకలకు అంతరాయం లేకుండా చర్యలు చేపట్టాలని, ప్రయాణికుల భద్రతకు అత్యంత ప్రాధాన్యత ఇవ్వాలని సూచించారు. ఫీల్డ్‌ సూపర్‌వైజర్లు తరచూ తనిఖీలు నిర్వహించాలని ఆదేశించారు. మురసు తుపాను దృష్ట్యా జోన్‌ పరిధిలోని 19 ప్రధాన రైల్వే స్టేషన్లలో హెల్ప్‌ డెస్క్‌లను ఏర్పాటు చేశారు. జోనల్‌ ప్రధాన కార్యాలయం, డివిజనల్‌ కార్యాలయాల్లో 24/7 అధికారులు అందుబాటులో ఉండి పరిస్థితిని సమీక్షించాలని తెలిపారు. రాష్ట్ర ప్రభుత్వ, వాతావరణ శాఖ అధికారులతో సమన్వయం చేసుకోవాలని, ఫస్ట్‌ ఎయిడ్‌ కిట్లు, అంబులెన్స్‌లను సిద్ధంగా ఉంచాలని జీఎం ఆదేశించారు.

మహారాణిపేట: గతంలో ఎన్నికల ముందు ఇంటింటికీ నిత్యావసరాల పంపిణీ అంటూ పెద్ద పెద్ద మాటలు చెప్పిన తెలుగుదేశం అధినేత, అధికారంలోకి వచ్చాక ఆ మాటలను పూర్తిగా గాలికి వదిలేశారు. గత 28 నెలల కాలంలో కందిపప్పును కేవలం రెండుసార్లే ఇచ్చి చేతులు దులుపుకున్నారు. ఇక రాగుల సరఫరా అయితే ’మూన్నాళ్ల ముచ్చట’గానే మిగిలిపోయింది. కొన్ని మాసాలుగా రాగుల ఊసే లేదు. వంటనూనె సరేసరి. పప్పుల పత్తా లేదు. ఇప్పుడు నవంబర్‌ నెల కోటాలో పంచదారను కూడా పూర్తిగా ఎత్తివేసి పేదోడి నోట సున్నం కొడుతున్నారు. బహిరంగ మార్కెట్‌ బాటలో సరకులు గతంలో రేషన్‌ షాపుల్లో అరకిలో పంచదార రూ.17కే లభించేది. కానీ నవంబర్‌ కోటా కేటాయింపులు రాకపోవడంతో ఆ కాస్త పంచదార కూడా లేకుండా పోయింది. ప్రస్తుతం బహిరంగ మార్కెట్‌లో నాణ్యతను బట్టి కిలో పంచదార రూ.70 నుంచి రూ.75 వరకు పలుకుతోంది. మార్కెట్లో ధరలు భగ్గుమంటున్న వేళ, పేదలకు అండగా ఉండాల్సిన ప్రభుత్వమే రేషన్‌ పంచదారను ఎత్తివేయడం ప్రభుత్వ తీరుకు అద్దం పడుతోంది. ప్రతి వస్తువునూ బహిరంగ మార్కెట్లో భారీ ధరలు చెల్లించి కొనుగోలు చేయాల్సిన పరిస్థితలో ప్రజలు సతమతమవుతున్నారు. వైఎస్సార్‌సీపీ ప్రభుత్వ హయాంలో.. గత వైఎస్సార్‌సీపీ ప్రభుత్వ హయాంలో రేషన్‌ దుకాణాల ద్వారా క్రమం తప్పకుండా కందిపప్పు పంపిణీ జరిగేది. లబ్ధిదారుడికి కిలో కందిపప్పును కేవలం రూ.70కే అందించేవారు. మార్కెట్‌లో ధరలు ఎగబాకుతున్నా, పీడీఎస్‌ ద్వారా తక్కువ ధరకే పప్పు దొరకడంతో సామాన్యులకు ఎంతో ఊరట లభించేది. కానీ నేడు ఆ పరిస్థితి పూర్తిగా కనుమరుగైంది. బహిరంగ మార్కెట్లో రూ.180 నుంచి రూ.200 మధ్య ధరకు కందిపప్పు కొనుగోలు చేయాల్సి వస్తోందని ప్రజలు ఆవేదన వ్యక్తం చేస్తున్నారు. అధికారులున్నా.. ఫలితం సున్నా! విశాఖ అర్బన్‌ డీఎస్‌వో పరిధిలో మధురవాడ, ఆనందపురం, భీమిలి, పద్మనాభం, పెందుర్తి తదితర ప్రాంతాలు ఉన్నాయి. జిల్లాలో 5,17,619 తెల్ల రేషన్‌ కార్డులు, 625 చౌకధరల దుకాణాలు ఉన్నాయి. ఇంత పెద్ద యంత్రాంగం.. ఒక జిల్లా సప్లై ఆఫీసర్‌(డీఎస్‌వో), ముగ్గురు ఏఎస్‌వోలు, 21 మంది చెకింగ్‌ ఇన్‌స్పెక్టర్లు, నలుగురు డిప్యూటీ తహసీల్దార్లు ఉన్నప్పటికీ.. ప్రజలకు మాత్రం అవసరమైన సరకులు అందడం లేదు. కాగితాలపై అధికార బలగం ఎంత ఉన్నా, రేషన్‌ షాపుల్లో ’ఖాలీ సంచుల రాజ్యాంగం’ నడుస్తోంది. నమ్మించి గద్దెనెక్కిన తర్వాత ఇచ్చిన మాట తప్పడం కూటమి సర్కార్‌కు పరిపాటిగా మారిందని విశాఖ ప్రజలు మండిపడుతున్నారు. ఎన్నికల వేళ కుప్పలు తెప్పలుగా హామీలు గుప్పించి, అధికారంలోకి వచ్చాక వాటిని బంగాళాఖాతంలో కలిపేయడంలో కూటమి ప్రభుత్వానికి తిరుగులేదని పదేపదే నిరూపితమవుతోంది. పేద ప్రజలకు ప్రజా పంపిణీ వ్యవస్థ(పీడీఎస్‌) ద్వారా అందిస్తున్న సరకుల్లో నానాటికీ కోత విధిస్తుండటమే దీనికి నిదర్శనం. చంద్రబాబు ప్రభుత్వం వచ్చి రెండున్నరేళ్లవుతున్నా.. రేషన్‌ దుకాణాల ద్వారా పూర్తిస్థాయి నిత్యావసర సరకులు అందని దుస్థితి. కేవలం అరకొర బియ్యంతోనే కాలం వెళ్లదీస్తున్న ఈ ప్రభుత్వం.. పేదోడి పప్పన్నం కలలపై ఎడాపెడా కత్తెర వేస్తోంది.

ప్రారంభమైన గోల్ఫ్‌ టోర్నీవిశాఖస్పోర్ట్స్‌: గ్రీన్‌ ఫ్యూయల్‌ మారిటైమ్‌ ఆహ్వాన గోల్ఫ్‌ టోర్నీ విశాఖ ఈస్ట్‌పాయింట్‌ గోల్ఫ్‌ క్లబ్‌లో మంగళవారం ప్రారంభమైంది. మూడు రోజుల పాటు జరిగే ఈ టోర్నీ తొలి రౌండ్‌లో గగన్‌జీత్‌ భుల్లర్‌ మూడు అండర్‌–69 స్కోర్‌తో ఆకట్టుకునే ఆరంభం చేశారు. తొలి రౌండ్‌లో దీపక్‌, కనవ్‌, రవికుమార్‌లు కూడా మూడు అండర్‌–69 స్కోర్‌లు నమోదు చేసి గగన్‌జీత్‌తో కలిసి అగ్రస్థానాన్ని పంచుకున్నారు. ఏఎం గ్రీన్‌ ఐజీపీఎల్‌లో ఐదుసార్లు విజేతగా నిలిచిన గగన్‌జీత్‌తో పాటు తొలి టైటిల్‌ కోసం ఎదురుచూస్తున్న ముగ్గురు ఆటగాళ్లు తొలిరోజు ఆధిక్యంలో నిలిచారు. విశాఖ కోర్సులో గత అనుభవాన్ని దీపక్‌ సద్వినియోగం చేసుకోగా.. రవికుమార్‌, కనవ్‌ చౌహాన్‌లు కూడా తమ ఆటతీరుతో ఆకట్టుకున్నారు. నాలుగో హోల్‌ నుంచి ఆట ప్రారంభించిన గగన్‌జీత్‌ వరుసగా ఐదు పార్‌లతో నిలకడగా ఆడి, తొమ్మిదో హోల్‌లో తొలి బర్డీ సాధించారు. 15వ హోల్‌ నుంచి వరుసగా మూడు బర్డీలతో జోరు పెంచి 69 స్కోర్‌తో రౌండ్‌ను ముగించారు. ఈస్ట్‌పాయింట్‌ కోర్సులో రెండుసార్లు రన్నరప్‌గా నిలిచిన దీపక్‌ బోగీ లేకుండా 69 స్కోర్‌ సాధించారు. 14వ హోల్‌ నుంచి ప్రారంభించిన ఆయన మూడు బర్డీలు నమోదు చేసి తప్పిదాలు లేకుండా తొలి రౌండ్‌ను పూర్తి చేశారు. ఈ సీజన్‌లో ఏఎం గ్రీన్‌ ఐజీపీఎల్‌లో ప్రొఫెషనల్‌గా మారిన రవికుమార్‌ కూడా 69 స్కోర్‌తో ఆకట్టుకున్నారు. ఆరో హోల్‌ నుంచి ప్రారంభించి బర్డీలతో ఆధిక్యాన్ని ప్రదర్శించారు. ఆల్‌ ఇండియా జూనియర్‌ చాంపియన్‌ కనవ్‌ చౌహాన్‌ సైతం మూడు అండర్‌–69 స్కోర్‌ నమోదు చేశారు. 11 సార్లు ఏసియన్‌ టూర్‌ విజేతగా నిలిచిన గగన్‌జీత్‌ భుల్లర్‌ విశాఖలో తొలిసారి బరిలోకి దిగి తన అనుభవంతో తొలి రౌండ్‌లో ఆధిక్యం సాధించారు.

విశాఖలోఏడేళ్లలో రూ.347.82 కోట్లు కొల్లగొట్టిన మోసగాళ్లు 25,438 ఫిర్యాదులు.. వృద్ధులు, పెన్షనర్లే లక్ష్యంగా దోపిడీలు డిజిటల్‌ అరెస్టుల పేరుతో రూ.1.94 కోట్లు స్వాహా ద్వారకానగర్‌: ఒకప్పుడు దొంగలు ఇళ్లలోకి చొరబడి దోచుకునేవారు. ఇప్పుడు చేతిలో ఫోన్‌ ఉంటే చాలు. కాలు కదపకుండానే కూర్చున్న చోటు నుంచే ఖాతాలను కొల్లగొడుతున్నారు. తలుపులు బద్దలు కొట్టాల్సిన పనిలేదు. కత్తులు చూపించాల్సిన అవసరం లేదు. ఒక లింక్‌ క్లిక్‌తో జీవితకాల సంపాదనను స్వాహా చేస్తున్నారు. బ్యాంకు అధికారులమంటూ ఓటీపీల వేట.. పోలీసులమంటూ డిజిటల్‌ అరెస్టు బెదిరింపులు.. పెట్టుబడులపై భారీ లాభాలంటూ ఆశల వల.. ఇలా సైబర్‌ నేరగాళ్లు విశాఖ నగరాన్ని లక్ష్యంగా చేసుకుని కొత్తకొత్త పద్ధతుల్లో దోపిడీలకు తెగబడుతున్నారు. ముఖ్యంగా వృద్ధులు, విశ్రాంత ఉద్యోగులు, పెన్షనర్లను బుట్టలో వేసుకుని రూ.కోట్లు కొల్లగొడుతున్నారు. స్మార్ట్‌ సిటీగా పేరొందిన విశాఖలో సైబర్‌ నేరాల తీవ్రత ఎంతలా పెరిగిందంటే.. గత ఏడేళ్లలో బాధితులు పోగొట్టుకున్న సొమ్ము అక్షరాలా రూ.347.82 కోట్లు. 25,438 ఫిర్యాదులు.. 2,524 కేసులు.. 9,781 మంది బాధితులు.. ఈ గణాంకాలు డిజిటల్‌ దోపిడీ ఏ స్థాయిలో సాగుతోందో కళ్లకు కడుతున్నాయి. ఫోన్‌ చేతిలో ఉంటే చాలు.. ఖాతా ఖాళీ సైబర్‌ నేరగాళ్లు అమాయకుల బలహీనతలనే పెట్టుబడిగా చేసుకుంటున్నారు. బ్యాంకులు, ప్రభుత్వ సంస్థల పేర్లను పోలిన నకిలీ వెబ్‌సైట్లు సృష్టించి లింకులు పంపుతున్నారు. స్పెల్లింగ్‌లో చిన్న మార్పులు చేసి అసలైన వెబ్‌సైట్లుగా నమ్మిస్తున్నారు. మరోవైపు ఫోన్‌కు ఓటీపీ వచ్చిందని, వెరిఫికేషన్‌ కోసం చెప్పాలని కోరుతున్నారు. నమ్మి ఓటీపీ చెప్పగానే ఖాతాల్లోని నగదును ఇతర ఖాతాలకు మళ్లించేస్తున్నారు. వాట్సాప్‌, ఫేస్‌బుక్‌, ఎక్స్‌ వంటి సామాజిక మాధ్యమాల ద్వారా కూడా వల విసురుతున్నారు. క్రిప్టో కరెన్సీ, స్టాక్‌ మార్కెట్‌ ట్రేడింగ్‌లో తక్కువ పెట్టుబడితో భారీ లాభాలు వస్తాయంటూ ఉద్యోగులు, వ్యాపారులను మోసగిస్తున్నారు. వృద్ధులే టార్గెట్‌.. కష్టార్జితమే వేట సాంకేతిక పరిజ్ఞానంపై సరైన అవగాహన లేని వృద్ధులు, విశ్రాంత ఉద్యోగులు సైబర్‌ ముఠాలకు సులువైన లక్ష్యాలుగా మారుతున్నారు. తొందరగా నమ్మే స్వభావం, ఒంటరితనం, ఆన్‌లైన్‌ లావాదేవీలపై అవగాహన లేకపోవడాన్ని ఆసరాగా చేసుకుంటున్నారు. పోలీసులమంటూ వీడియో కాల్స్‌ చేసి బెదిరించడం.. కేసుల్లో ఇరుక్కున్నారని భయపెట్టడం.. విచారణ పేరుతో బ్యాంకు ఖాతాల్లోని సొమ్మును బదిలీ చేయించుకోవడం వంటి మోసాలకు పాల్పడుతున్నారు. భయంతో బాధితులు ఎవరికీ చెప్పుకోలేకపోవడంతో నేరగాళ్ల దోపిడీకి అడ్డూ అదుపు లేకుండా పోతోంది. డిజిటల్‌ అరెస్టు.. రూ.1.94 కోట్ల దోపిడీ! విశాఖలో డిజిటల్‌ అరెస్టు మోసం ఎంతటి తీవ్రతకు చేరిందో అక్కయ్యపాలెం పరిధి లలితనగర్‌ ఘటన చూస్తే అర్థమవుతుంది. అక్కడి విశ్రాంత ఉద్యోగి కారి గోపాల రామానుజం (65)కు పోలీసులమంటూ వాట్సాప్‌ వీడియో కాల్‌ చేశారు. పోలీసు దుస్తుల్లో కనిపిస్తూ బెదిరింపులకు దిగారు. కేసుల పేరుతో భయభ్రాంతులకు గురిచేసి ఏకంగా 13 విడతల్లో రూ.1.94 కోట్లను తమ ఖాతాలకు బదిలీ చేయించుకున్నారు. బాధితుడి ఫిర్యాదుతో సైబర్‌ క్రైమ్‌ పోలీసులు కేసు నమోదు చేసి దర్యాప్తు చేస్తున్నారు. ఏడేళ్లలో రూ.347.82 కోట్ల గల్లంతు! విశాఖలో సైబర్‌ నేరాల పెరుగుదలకు నమోదైన గణాంకాలే సాక్ష్యం. 2019 నుంచి 2026 వరకు నేషనల్‌ సైబర్‌ క్రైమ్‌ రిపోర్టింగ్‌ పోర్టల్‌లో 25,438 ఫిర్యాదులు నమోదయ్యాయి. వీటిలో 2,524 కేసులు నమోదు కాగా, 9,781 మంది బాధితులుగా మారారు. మొత్తం రూ.347,82,04,615 మేర ఆర్థిక నష్టం వాటిల్లినట్లు తెలుస్తోంది. 2019లో కేవలం 104గా ఉన్న ఫిర్యాదులు 2025 నాటికి 7,531కు చేరడం సైబర్‌ నేరాల విస్తృతిని తెలియజేస్తోంది. ప్రతి ఏటా కోట్లలో.. ఏడాది దోపిడీ 2022 రూ.13.33 కోట్లు 2023 రూ.29.46 కోట్లు 2024 రూ.104.53 కోట్లు 2025 రూ.121.29 కోట్లు 2026(ఇప్పటి వరకు) రూ.63.64 కోట్లు మోసపోతే వెంటనే ఫిర్యాదు చేయాలి సైబర్‌ నేరగాళ్లు ముఖ్యంగా వృద్ధులు, అమాయకులను లక్ష్యంగా చేసుకుంటున్నారు. అనుమానాస్పద ఫోన్‌ కాల్స్‌, వాట్సాప్‌ కాల్స్‌ వస్తే అప్రమత్తంగా ఉండాలి. మోసానికి గురైతే ఏమాత్రం ఆలస్యం చేయకుండా వెంటనే 1930 హెల్ప్‌లైన్‌కు ఫిర్యాదు చేయాలి. ఎంత త్వరగా ఫిర్యాదు చేస్తే నగదును నిలిపివేసే అవకాశం అంత ఎక్కువగా ఉంటుంది. – భవాని ప్రసాద్‌, ఇన్‌స్పెక్టర్‌, సైబర్‌ క్రైమ్‌ అప్రమత్తతే అసలైన రక్షణ సైబర్‌ నేరాల పట్ల ప్రతి ఒక్కరూ అప్రమత్తంగా ఉండాలి. బ్యాంకులు, ప్రభుత్వ సంస్థలు ఎప్పుడూ ఓటీపీలు, పాస్‌వర్డ్‌లు అడగవు. అపరిచితులు పంపే లింకులను తెరవకూడదు. వ్యక్తిగత వివరాలను సామాజిక మాధ్యమాల్లో పంచుకోవద్దు. గుర్తుతెలియని వ్యక్తుల నుంచి వచ్చే వీడియో కాల్స్‌ పట్ల జాగ్రత్తగా ఉండాలి. – డాక్టర్‌ శంఖబ్రత బాగ్చి, నగర పోలీస్‌ కమిషనర్‌

సింథియా: భారత్‌–అమెరికా సంయుక్త త్రివిధ దళాల మానవతా సహాయం, విపత్తు నిర్వహణ విన్యాసాలు ‘టైగర్‌ ట్రయంఫ్‌–2026’ ఐదో ఎడిషన్‌ ప్రారంభోత్సవాన్ని విశాఖలోని మారిటైమ్‌ వార్‌ఫేర్‌ సెంటర్‌లో మంగళవారం ఘనంగా నిర్వహించారు. భారీ స్థాయిలో మానవతా సహాయం, విపత్తు నిర్వహణ కార్యకలాపాలు చేపట్టే సమయంలో ఇరుదేశాల సాయుధ దళాల మధ్య సమన్వయం, ఉమ్మడి ప్రణాళికలు, పరస్పర సహకార సామర్థ్యాలను మరింత మెరుగుపరచడం ఈ విన్యాసాల ప్రధాన ఉద్దేశం. ప్రారంభోత్సవానికి భారత నౌకాదళ తూర్పు నౌకాదళ దళాధిపతి రియర్‌ అడ్మిరల్‌ విశాల్‌ బిష్టోయ్‌, అమెరికా పసిఫిక్‌ నౌకాదళ వైస్‌ కమాండర్‌ రియర్‌ అడ్మిరల్‌ జోక్విన్‌ జె.మార్టినెజ్‌ డి పినిల్లోస్‌ అధ్యక్షత వహించారు. భారత్‌–అమెరికా మధ్య సముద్ర రంగంలో పెరుగుతున్న వ్యూహాత్మక ప్రయోజనాల సమన్వయంతో పాటు బలపడుతున్న రక్షణ భాగస్వామ్యానికి ఈ విన్యాసాలు నిదర్శనంగా నిలుస్తున్నాయి. భారత్‌ తరఫున పాల్గొంటున్న దళాలు భారత నౌకాదళానికి చెందిన సముద్ర కార్యకలాపాల నిపుణులు, భారత సైన్యంలోని భూదళాలు, భారత వైమానిక దళంలోని వివిధ విభాగాల ప్రతినిధులతో పాటు మూడు సాయుధ దళాలకు చెందిన ప్రత్యేక దళాల సిబ్బంది ఈ విన్యాసాల్లో పాల్గొంటున్నారు. తొలిసారిగా జాతీయ విపత్తు ప్రతిస్పందన దళం (ఎన్‌డీఆర్‌ఎఫ్‌) బృందం కూడా భాగస్వామ్యమవుతోంది. అమెరికా తరఫున పాల్గొంటున్న దళాలు అమెరికా తరఫున వైమానిక దళం, సైన్యం, మైరెన్‌ కార్ప్స్‌, నేవీకి చెందిన వివిధ విభాగాల నిపుణులు పాల్గొంటున్నారు. వీరితో పాటు అంతరిక్షం, సైబర్‌ కార్యకలాపాలు, వైద్య సేవలు, పేలుడు పదార్థాల నిర్వీర్యం వంటి కీలక విభాగాలకు చెందిన నిపుణులు కూడా ఈ విన్యాసాల్లో భాగస్వాములవుతున్నారు.

అల్లిపురం: స్థానిక సంస్థల ఎన్నికల్లో ప్రజాస్వామ్య విలువలు దెబ్బతిన్నాయని మాజీ అదనపు ప్రభుత్వ న్యాయవాది బలగ సత్యారావు ఆరోపించారు. పోలింగ్‌ కేంద్రాలు అధికార పార్టీ ఆధిపత్య ప్రదర్శనకు వేదికలుగా మారాయని విమర్శించారు. కూటమి పార్టీ ఏజెంట్లను మాత్రమే అనుమతించి, ఇతర పార్టీల ఏజెంట్లను అడ్డుకోవడం సరికాదన్నారు. ఓటర్లపై దాడులు, రిగ్గింగ్‌ ఆరోపణలపై సమగ్ర విచారణ జరపాలని డిమాండ్‌ చేశారు.పోలీసులు, ఎన్నికల కమిషన్‌ నిష్పక్షపాతంగా వ్యవహరించాల్సిన అవసరం ఉందన్నారు. అంబేద్కర్‌ కల్పించిన ఓటు హక్కు ను బలప్రయోగంతో అణచివేయడం రాజ్యాంగ స్ఫూర్తికి విరుద్ధమని పేర్కొన్నారు. ఎన్నికల అక్రమాలపై విచారణ జరిపి బాధ్యులపై చర్యలు తీసుకోవాలని కోరారు.

మహారాణిపేట: సముద్ర మత్స్యకారుల ప్రాణరక్షణ, జీవనోపాధి భద్రతకు కేంద్ర ప్రభుత్వం తక్షణ చర్యలు తీసుకోవాలని వైఎస్సార్‌సీపీ నాయకుడు, ఈస్ట్‌ కోస్ట్‌ మెకనైజ్డ్‌ ఫిషింగ్‌ బోట్‌ ఓనర్స్‌ అసోసియేషన్‌ ఆఫ్‌ ఇండియా జాతీయ అధ్యక్షుడు వాసుపల్లి జానకిరామ్‌ కోరారు. ఈ మేరకు కేంద్ర మత్స్యశాఖ మంత్రికి పలు డిమాండ్లతో కూడిన వినతిపత్రాన్ని సమర్పించారు. ఆంధ్రప్రదేశ్‌లో సుమారు 1.65 లక్షల మైరెన్‌ ఫిషింగ్‌ కుటుంబాలు, 555 మత్స్యకార గ్రామాలు, 349 ఫిష్‌ ల్యాండింగ్‌ కేంద్రాలు ఉన్నాయని వివరించారు. సముద్రంలో బోట్లు మునిగిపోవడం, ఇంజన్లు పనిచేయకపోవడం, అగ్ని ప్రమాదాలు, తుపాన్ల సమయంలో మత్స్యకారులు ప్రాణాపాయ పరిస్థితులను ఎదుర్కొంటున్నారని పేర్కొన్నారు. ఈ నేపథ్యంలో విశాఖపట్నం మేజర్‌ ఫిషింగ్‌ హార్బర్‌తో పాటు నిజాంపట్నం, మచిలీపట్నం, జువ్వలదిన్నె మైనర్‌ హార్బర్లలో మైరెన్‌ అంబులెన్సులు, హైస్పీడ్‌ రెస్క్యూ బోట్లు, అత్యవసర వైద్య పరికరాలు, ఆక్సిజన్‌, జీపీఎస్‌, శాటిలైట్‌ కమ్యూనికేషన్‌ వ్యవస్థలు ఏర్పాటు చేయాలని కోరారు. తుపాన్లు, వేట నిషేధిత సమయాల్లో మత్స్యకారులకు నేరుగా డీబీటీ ద్వారా ఆర్థిక సాయం అందించే ప్రత్యేక పరిహార ప్యాకేజీ ప్రకటించాలని విజ్ఞప్తి చేశారు. బోట్లు మునిగిపోవడం, తుపాను, అగ్ని ప్రమాదాలు, ఇంజన్లు, యంత్ర పరికరాల నష్టాలకు బీమా రక్షణ కల్పించాలన్నారు. డీజిల్‌ సబ్సిడీ పెంచి మత్స్యకారులకు ఉపశమనం కల్పించాలని కోరారు. ఈ నాలుగు ప్రధాన డిమాండ్లపై కేంద్ర మంత్రి వ్యక్తిగతంగా స్పందించి, అధికారులకు ఆదేశాలు జారీ చేయాలన్నారు.

పెందుర్తి: దొంగ ఓటు వేసినట్లు ఆరోపణలు ఎదుర్కొంటున్న ఎమ్మెల్యే పంచకర్ల రమేష్‌బాబుపై ఎన్నికల కమిషన్‌ వెంటనే కేసు నమోదు చేసి చర్యలు తీసుకోవాలని మాజీ ఎమ్మెల్యే, వైఎస్సార్‌సీపీ నియోజకవర్గ సమన్వయకర్త అన్నంరెడ్డి అదీప్‌రాజ్‌ డిమాండ్‌ చేశారు.రాంపురంలోని పార్టీ కార్యాలయంలో సోమవారం నిర్వహించిన విలేకరుల సమావేశంలో ఆయన మాట్లాడుతూ.. ప్రజాప్రతినిధి దొంగ ఓటు వేస్తే అధికారులు ఎందుకు చర్యలు తీసుకోవడం లేదని ప్రశ్నించారు. ఇదే తప్పు సామాన్యుడు లేదా వైఎస్సార్‌సీపీ కార్యకర్త చేసి ఉంటే ఇదే విధంగా వ్యవహరించేవారా అని నిలదీశారు.ఎమ్మెల్యేకు సహకరించిన పోలింగ్‌ అధికారులు, ఇతర సిబ్బందిపైనా చర్యలు తీసుకోవాలని కోరారు. రానున్న పరిషత్‌ ఎన్నికల్లోనూ వైఎస్సార్‌సీపీ విజయం సాధిస్తుందనే విశ్వాసాన్ని వ్యక్తం చేశారు.

సాక్షి,విశాఖపట్నం : జీవీఎంసీ ఎన్నికల పోలింగ్‌ సరళిపై అధికార యంత్రాంగం రెండుమార్లు విడుదల చేసిన ఈ అంకెల గారడీ.. ప్రజాస్వామ్యాన్ని అపహాస్యం చేసేలా సాగిన చీకటి కుట్రలను బట్టబయలు చేస్తోంది. ఓటమి భయంతో వణికిపోయిన కూటమి నేతలు.. వ్యవస్థలను గుప్పెట్లో పెట్టుకుని రాత్రికి రాత్రే అడ్డగోలు రిగ్గింగ్‌కు తెరతీశారన్న అనుమానాలు రేకెత్తుతున్నాయి. ఆదివారం రాత్రి 10 గంటలకు తాత్కాలిక అంచనాగా 51.47 శాతంగా నమోదైందంటూ సాక్షాత్తూ.. జిల్లా ఎన్నికల అధికారి, కలెక్టర్‌ అభిషిక్త్‌ కిశోర్‌ ప్రకటించారు. కానీ.. సోమవారం ఉదయానికి అమాంతం 56.32 శాతానికి చేరడం.. అధికార పార్టీ నేతలు, అధికారులు కలిసి ఆడిన కుట్రల కుతంత్రమేంటో ప్రపంచానికి అర్థమయ్యేలా చేసింది. పక్కా ప్రణాళికతో వేలాది ఓట్లు అదనంగా పోల్‌ అవుతున్నా, బ్యాలెట్‌ పేపర్లు పబ్లిక్‌గా బయటకు వస్తున్నా ఎన్నికల అధికారులు చూసీచూడనట్లు వ్యవహరించడం, పోలీసులే దగ్గరుండి కూటమి నేతలకు సహకరించారని వైఎస్సార్‌సీపీ శ్రేణులు మండిపడుతున్నాయి. ఎన్నికల ముందే వైఎస్సార్‌సీపీ నేతలు వ్యక్తం చేసిన అనుమానాలను నిజం చేస్తూ, అధికార బలంతో కూటమి నేతలు సాగించిన ఈ కుతంత్రాలు విశాఖ రాజకీయాల్లో పెను దుమారం రేపుతున్నాయి. ఆదివారం రాత్రి 10 గంటల సమయానికి అధికారులు విడుదల చేసిన వార్డుల వారీ నివేదిక ప్రకారం జీవీఎంసీ పరిధిలో మొత్తం 9,45,918 ఓట్లు పోలవగా, 51.47 శాతం పోలింగ్‌ నమోదైనట్లు ప్రకటించారు. కానీ సోమవారం ఉదయం విడుదల చేసిన ఫైనల్‌ జోన్ల వారీ నివేదికలో ఈ శాతం అమాంతం 56.32 శాతానికి అంటే.. 10,35,154 ఓట్లు పోలయ్యాయని వెల్లడించారు. తొలుత ప్రకటించింది తాత్కాలిక నివేదిక అయినా.. తుది జాబితాలో మరో వెయ్యో.. రెండు వేల ఓట్లో జమ కావాలి. అంతేగానీ రాత్రికి రాత్రే పోలైన ఓట్లు భారీగా పెరిగిపోవడం అనుమానాలకు తావిస్తోంది. రాత్రికి రాత్రే రిగ్గింగ్‌ జరిగిందా.? అధికారిక గణాంకాలను పరిశీలిస్తే రాత్రికి రాత్రే కొన్ని జోన్లలో అసాధారణ స్థాయిలో ఓట్లు పెరిగాయి. ప్రధానంగా జీవీఎంసీ గాజువాక జోన్‌లో అత్యధికంగా 20,296 ఓట్లు పెరిగాయి. అదేవిధంగా పశ్చిమ జోన్‌లో 17,242 ఓట్లు, నార్త్‌ జోన్‌లో 15,955 ఓట్లు, ఈస్ట్‌ జోన్‌లో 10,840 ఓట్లు అదనంగా నమోదయ్యాయి. అదేవిధంగా.. పెందుర్తిలో 9,246 ఓట్లు, మధురవాడలో 6,371 ఓట్లు, అగనంపూడిలో 6,017 ఓట్లు పెరగడం ఈ రిగ్గింగ్‌ ఆరోపణలకు బలం చేకూరుస్తోంది. ఈ అనూహ్య ఓట్ల పెరుగుదల వెనుక కూటమి నేతల రిగ్గింగ్‌ ఉందనే ఆరోపణలు బలంగా వినిపిస్తున్నాయి. ఎన్నికల సరళిపై మొదటి నుంచి తాము వ్యక్తం చేసిన అనుమానాలే నిజమయ్యాయని వైఎస్సార్‌సీపీ నేతలతో పాటు వామపక్షాలూ వ్యాఖ్యానిస్తున్నాయి. పలుచోట్ల రిగ్గింగ్‌ను అడ్డుకునేందుకు వైఎస్సార్‌సీపీ శ్రేణులు తీవ్రంగా యత్నించినప్పటికీ, పోలీసుల, ఎన్నికల అధికారుల సహకారంతో కూటమి నేతలు రెచ్చిపోయారని వారు ఆరోపిస్తున్నారు. పోలింగ్‌ కేంద్రాల నుంచి బ్యాలెట్‌ పేపర్లు బయటకు వచ్చినా ఎన్నికల అధికారులు కనీసం పట్టించుకోలేదనే విమర్శలు వెల్లువెత్తుతున్నాయి. జీవీఎంసీ పరిధిలోని 120 వార్డుల్లో మొత్తం 18,37,901 మంది ఓటర్లకు గాను.. 9,45,918 మంది తమ ఓటు హక్కు వినియోగించుకున్నారు మొత్తం 51.47 శాతం పోలింగ్‌ నమోదైంది.’ – ఆదివారం రాత్రి 9.45 గంటలకు జిల్లా కలెక్టర్‌, ఎన్నికలఅధికారి అభిషిక్త్‌ కిశోర్‌ జీవీఎంసీ పరిధిలోని 10 జోన్లలోని 120 వార్డుల్లో మొత్తం 18,37,901 మంది ఓటర్లకు గాను.. 10,35,154 మంది తమ ఓటు హక్కు వినియోగించుకున్నారు మొత్తం 56.32 శాతం పోలింగ్‌ నమోదైంది. – సోమవారం ఉదయం 9.30 గంటలకు జీవీఎంసీ కమిషనర్‌ కేతన్‌ గార్గ్‌ విడుదల చేసిన వివరాలు.

విశాఖ స్పోర్ట్స్‌: జాతీయ పాఠశాలల టీమ్‌ చెస్‌ చాంపియన్‌షిప్‌లో తమిళనాడు జట్లు ఆధిపత్యం కొనసాగిస్తున్నాయి. విశాఖలో జరుగుతున్న పోటీల్లో సోమవారం ఆరో రౌండ్‌ ముగిసే సమయానికి అండర్‌–18 విభాగంలో వేలమ్మల్‌ నెక్సస్‌–2, వేలమ్మల్‌ ఎంహెచ్‌ఎస్‌ జట్లు చెరో 11 పాయింట్లతో తొలి రెండు స్థానాల్లో నిలిచాయి. కల్వి పబ్లిక్‌ స్కూల్‌ 8 పాయింట్లతో మూడో స్థానంలో ఉంది.అండర్‌–12 విభాగంలో వేలమ్మల్‌ నెక్సస్‌–2 జట్టు ఆరు రౌండ్లలోనూ విజయం సాధించి 12 పాయింట్లతో అగ్రస్థానంలో కొనసాగుతోంది. కన్నూర్‌ విద్యానికేతన్‌, వేలమ్మల్‌ నెక్సస్‌–1 జట్లు చెరో 9 పాయింట్లతో తర్వాతి స్థానాల్లో ఉన్నాయి. ఏపీకి చెందిన అక్షర, భాష్యం పాఠశాల జట్లు కూడా పోటీలో కొనసాగుతున్నాయి.

ఆనందపురం: మండలంలోని శొంఠ్యాం పంచాయతీ గుమ్మడివానిపాలెం రోడ్డులో ఆదివారం అర్ధరాత్రి గోవుల అక్రమ రవాణా ఘటన చోటుచేసుకుంది.స్థానికులు తెలిపిన వివరాల ప్రకారం.. గుమ్మడివానిపాలెం వద్ద ఆగి ఉన్న ఓ వ్యాన్‌ నుంచి మూగజీవాల అరుపులు వినిపించడంతో అనుమానం వచ్చిన యువకులు వాహనాన్ని పరిశీలించారు. వ్యాన్‌లో గోవుల కాళ్లను తాళ్లతో కట్టి, ఒకదానిపై ఒకటి కిక్కిరిసేలా తరలిస్తున్నట్లు గుర్తించి వాహనాన్ని అడ్డుకున్నారు.డ్రైవర్‌, క్లీనర్‌ను రవాణా పత్రాలు చూపాలని కోరగా వారి వద్ద ఎలాంటి పత్రాలు లేకపోవడంతో పాటు సరైన సమాధానం కూడా ఇవ్వలేకపోయారని తెలిపారు. దీంతో సమరస సేవ ఫౌండేషన్‌ జిల్లా కన్వీనర్‌ కోరుకొండ రామలక్ష్మికి సమాచారం అందించారు.ఆమె పోలీసులకు సమాచారం ఇచ్చేందుకు డయల్‌–100, 112 నంబర్లకు పలుమార్లు ఫోన్‌ చేసినప్పటికీ లైన్లు బిజీగా ఉండటంతో ఇబ్బందులు ఎదురయ్యాయని పేర్కొన్నారు. ఈలోగా అక్రమ రవాణాదారులు మరో వ్యాన్‌ను అక్కడికి రప్పించి, గోవులను దానిలోకి మార్చి పెందుర్తి మార్గం గుండా పరారైనట్లు స్థానికులు తెలిపారు.ఈ ఘటనపై విచారణ జరిపి గోవుల అక్రమ రవాణాకు పాల్పడిన వారిపై కఠిన చర్యలు తీసుకోవాలని స్థానికులు డిమాండ్‌ చేశారు.

మహారాణిపేట: జిల్లాలో ఎంపీటీసీ, జెడ్పీటీసీ ఎన్నికల ప్రచారానికి మంగళవారంతో తెరపడనుంది. ఈ నెల 5న జిల్లాలో ఎంపీటీసీ, జెడ్పీటీసీ స్థానాలకు ఎన్నికలు జరగనున్నాయి. ఎన్నికలకు 48 గంటల ముందు ప్రచారం నిలిపివేయాల్సి ఉంటుంది. కలెక్టర్‌, ఎన్నికల అధికారి ఎం. అభిషిక్త్‌ కిశోర్‌ ఆధ్వర్యంలో రిటర్నింగ్‌ అధికారి, జిల్లా జాయింట్‌ కలెక్టర్‌ జి. విద్యాధరి పర్యవేక్షణలో జిల్లా పరిషత్‌ ముఖ్య కార్యనిర్వహణాధికారి పి. నారాయణమూర్తి ఎన్నికల ఏర్పాట్లను పర్యవేక్షిస్తున్నారు. నాలుగు మండలాల్లో ఎన్నికలు: జిల్లాలోని భీమిలి, ఆనందపురం, పద్మనాభం, పెందుర్తి మండలాల్లో నాలుగు జెడ్పీటీసీ, 53 ఎంపీటీసీ స్థానాలకు ఎన్నికలు నిర్వహించనున్నారు. మొత్తం 203 పోలింగ్‌ కేంద్రాలను ఏర్పాటు చేశారు. జిల్లాలో 1,62,407 మంది ఓటర్లు ఉండగా.. వారిలో 79,630 మంది పురుషులు, 82,777 మంది మహిళలు ఉన్నారు. పంపిణీ, లెక్కింపు కేంద్రాలు సిద్ధం ఎన్నికల సామగ్రి పంపిణీ, స్ట్రాంగ్‌ రూములు, ఓట్ల లెక్కింపు కేంద్రాలను ఖరారు చేశారు. భద్రతా ఏర్పాట్లతో పాటు సీసీ కెమెరాల నిఘా ఏర్పాటు చేస్తున్నారు. 203 పోలింగ్‌ కేంద్రాల్లో 102 చోట్ల లైవ్‌ టెలికాస్టింగ్‌, 101 కేంద్రాల్లో సీసీ కెమెరాలను ఏర్పాటు చేశారు. భీమిలి, పద్మనాభం మండలాలకు సీడార్‌ (పాత ఏఎంజీ స్కూలు, భీమిలి)లో ఎన్నికల సామగ్రి పంపిణీ, స్ట్రాంగ్‌ రూమ్‌, ఓట్ల లెక్కింపు కేంద్రాలను ఏర్పాటు చేశారు. ఆనందపురంలో ఎంపీడీవో కార్యాలయం, పెందుర్తిలో ప్రభుత్వ జూనియర్‌ కళాశాలలో ఈ ఏర్పాట్లు చేసినట్లు జిల్లా పరిషత్‌ సీఈవో పి. నారాయణమూర్తి తెలిపారు. 16 జోన్ల ఏర్పాటు : ఎన్నికల నిర్వహణ కోసం 16 జోన్లను ఏర్పాటు చేశారు. 203 పోలింగ్‌ కేంద్రాలను 106 ప్రాంతాల్లో ఏర్పాటు చేస్తున్నారు. ఎన్నికల విధుల కోసం 1,484 మంది సిబ్బందిని నియమించగా, పోలింగ్‌ సామగ్రి తరలింపునకు 25 రూట్లను గుర్తించారు. పర్యవేక్షణకు ప్రత్యేక బృందాలు ఎన్నికల ప్రవర్తనా నియమావళి అమలును పర్యవేక్షించేందుకు నాలుగు మోడల్‌ కోడ్‌ ఆఫ్‌ కండక్ట్‌ బృందాలు, నాలుగు ఫ్లయింగ్‌ స్క్వాడ్లు, నాలుగు స్టాటిక్‌ సర్వైలెన్స్‌ బృందాలు, రెండు వీడియో వీక్షణ బృందాలు, ఐదు ఎన్నికల వ్యయ పరిశీలన బృందాలు, ఐదు సింగిల్‌ విండో క్లియరెన్స్‌ బృందాలను ఏర్పాటు చేశారు. మండల, జిల్లా స్థాయిలో కంట్రోల్‌ రూమ్‌లు ఏర్పాటు చేశారు. పోలింగ్‌ రోజు ఓటింగ్‌ సరళికి సంబంధించిన వివరాలను నిర్ణీత సమయాల్లో కంట్రోల్‌ రూమ్‌లకు అందించాలని ఆదేశించారు. బ్యాలెట్‌ పత్రాలకు రంగుల కేటాయింపు జెడ్పీటీసీ బ్యాలెట్‌ పత్రానికి తెలుపు రంగు, ఎంపీటీసీ బ్యాలెట్‌ పత్రానికి గులాబీ రంగు కేటాయించారు. ప్రతి ఓటరు రెండు ఓట్లు వేయాల్సి ఉంటుంది. విశాఖ జిల్లా పరిషత్‌ చైర్మన్‌ పదవిని బీసీ జనరల్‌కు కేటాయించారు. ఆనందపురం జెడ్పీటీసీ జనరల్‌, భీమిలి జెడ్పీటీసీ జనరల్‌ (మహిళ), పద్మనాభం బీసీ (మహిళ), పెందుర్తి బీసీ జనరల్‌కు కేటాయించారు. ఎంపీపీ స్థానాల్లో ఆనందపురం బీసీ జనరల్‌, భీమిలి బీసీ జనరల్‌, పద్మనాభం జనరల్‌ మహిళ, పెందుర్తి జనరల్‌గా రిజర్వేషన్లు ఖరారు చేశారు. మద్యం దుకాణాలు మూసివేత జెడ్పీటీసీ, ఎంపీటీసీ ఎన్నికల నేపథ్యంలో గ్రామీణ ప్రాంతాల్లోని మద్యం దుకాణాలను మంగళవారం సాయంత్రం 5 గంటల నుంచి మూసివేయాలని ఎకై ్సజ్‌ అధికారులు ఆదేశించారు. 4న రోజంతా, 5న పోలింగ్‌ పూర్తయ్యే వరకు దుకాణాలు మూసివేయనున్నారు. 6న సాధారణంగా మద్యం దుకాణాలు తెరిచే అవకాశం ఉండగా, 7న జెడ్పీటీసీ, ఎంపీటీసీ ఎన్నికల ఫలితాలు ప్రకటించే వరకు గ్రామీణ ప్రాంతాల్లోని మద్యం దుకాణాలు మూసివేయాలని అధికారులు తెలిపారు.

కలెక్టర్‌కు మహిళ ఫిర్యాదు మహారాణిపేట: లంచం ఇవ్వలేదనే కారణంతో రెవెన్యూ సిబ్బంది తనపై భౌతిక దాడికి పాల్పడి, కాంపౌండ్‌ వాల్‌ను ధ్వంసం చేశారని ఆరోపిస్తూ గాజువాక మండలం భానోజీతోటకు చెందిన జాలుమూరు శ్రీలక్ష్మి సోమవారం జిల్లా కలెక్టర్‌కు ఫిర్యాదు చేశారు. భానోజీతోట సర్వే నంబర్‌ 86లో భూ ఆక్రమణదారులతో రెవెన్యూ సిబ్బంది కుమ్మకై ్క ప్రభుత్వ భూముల ఆక్రమణలకు సహకరిస్తున్నారని ఆమె ఆరోపించారు. గత 15 ఏళ్లుగా భానోజీతోటలో భూమి క్రమబద్ధీకరణ పట్టాపై నివాసం ఉంటున్నానని తెలిపారు. సర్వే నంబర్‌ 86లో జరుగుతున్న ఆక్రమణలపై తన భర్త ఉన్నతాధికారులకు ఫిర్యాదు చేశారని పేర్కొన్నారు. దీంతో కక్ష పెంచుకున్న గాజువాక మండల రెవెన్యూ ఇన్‌స్పెక్టర్‌ మధుల, వీఆర్వో వనజ లంచం డిమాండ్‌ చేశారని ఆరోపించారు. లంచం ఇవ్వకపోవడంతో అక్టోబర్‌ 30న తన ఇంటికి వచ్చి జుట్టు పట్టుకుని దాడి చేశారని, కాంపౌండ్‌ వాల్‌ను కూల్చివేశారని ఫిర్యాదులో పేర్కొన్నారు. ఈ ఘటనపై న్యూపోర్టు పోలీస్‌ స్టేషన్‌లో ఫిర్యాదు చేసినట్లు వెల్లడించారు. దాడికి పాల్పడిన రెవెన్యూ అధికారులపై చర్యలు తీసుకోవాలని విజ్ఞప్తి చేశారు.

ఎంవీపీ కాలనీ: ఎంవీపీ కాలనీలోని సాయి స్వర్ణ హుండై షోరూంలో సోమవారం న్యూ బేయాన్‌ కారును ఘనంగా ఆవిష్కరించారు. ఈ కార్యక్రమానికి సాయి స్వర్ణ హుండై మేనేజింగ్‌ డైరెక్టర్‌ సుమన్‌, సినీ రచయిత సత్యానంద్‌, సాయి కృష్ణ ట్రావెల్స్‌ అధినేత రామచంద్రరావు, సాయి స్వర్ణ హుండై సీఈవో అబ్బాస్‌ ఖాన్‌ ముఖ్య అతిథులుగా హాజరై నూతన మోడల్‌ కారును ఆవిష్కరించారు. ఈ కారు ఎక్స్‌–షోరూం ధర రూ.9.99 లక్షల నుంచి ప్రారంభమవుతుందని నిర్వాహకులు తెలిపారు. అధునాతన ఫీచర్లు, ఆకర్షణీయమైన డిజైన్‌తో రూపొందించిన ఈ కారు వినియోగదారులకు మెరుగైన డ్రైవింగ్‌ అనుభూతిని అందిస్తుందని పేర్కొన్నారు. కార్యక్రమంలో రవిరాజా ట్రావెల్స్‌ అధినేత రవి తదితరులు పాల్గొన్నారు.

యువకుడి మృతి అక్కిరెడ్డిపాలెం: నాతయ్యపాలెంలోని క్రిష్టా మహంతి చెరువులోకి కారు దూసుకెళ్లడంతో అందులో యువకుడు మృతి చెందాడు. గాజువాక ట్రాఫిక్‌ పోలీసులు తెలిపిన వివరాల ప్రకారం.. మర్రిపాలెం అంబేడ్కర్‌ కాలనీకి చెందిన కిళ్లి వరుణ్‌కుమార్‌ (26) సోమవారం తెల్లవారుజామున కారులో నాతయ్యపాలెం నుంచి షీలానగర్‌ వైపు వెళ్తున్నాడు. ఈ క్రమంలో క్రిష్టా మహంతి చెరువు వద్ద ఉన్న భారీ మలుపును గమనించకపోవడంతో కారు అదుపుతప్పి చెరువులోకి దూసుకెళ్లి బోల్తా పడింది. చెరువులో నీరు ఎక్కువగా ఉండటంతో కారు పూర్తిగా నీటిలో మునిగిపోయింది. ఈ ఘటనను గమనించిన స్థానికులు వెంటనే స్పందించి కారులో ఉన్న వరుణ్‌కుమార్‌ను బయటకు తీశారు. అనంతరం సమీపంలోని కిమ్స్‌ ఆస్పత్రికి తరలించగా, అప్పటికే మృతి చెందినట్లు వైద్యులు నిర్ధారించారు. పోలీసులు సంఘటనా స్థలానికి చేరుకుని మృతదేహాన్ని పోస్టుమార్టం నిమిత్తం కేజీహెచ్‌కు తరలించారు.

డాబాగార్డెన్స్‌: విశాఖ పోర్టు గోల్డెన్‌ జూబ్లీ హాస్పటల్‌ను ప్రైవేటీకరించే ప్రయత్నాలను వెంటనే నిలిపివేయాలని పోర్టు అఖిలపక్ష కార్మిక సంఘాలు డిమాండ్‌ చేశాయి. సర్వీసులో ఉన్న అధికారులు, కార్మికులు, ఉద్యోగులు, సీహెచ్‌డీ కార్మికులు, క్యాజువల్‌ కార్మికులు, పూల్‌ కలాసీలు, రిటైర్డ్‌ అధికారులు, ఉద్యోగులు, కార్మికులు, సీఐఎస్‌ఎఫ్‌ సిబ్బంది, వారి కుటుంబాలకు వైద్య సేవలు అందిస్తున్న ఆస్పత్రిని ప్రైవేట్‌ వ్యక్తుల చేతుల్లో పెట్టడం సరికాదని పేర్కొన్నారు.జగదాంబ సిటూ కార్యాలయంలో సోమవారం జరిగిన సమావేశంలో కార్మిక సంఘాల నాయకులు మాట్లాడుతూ.. గతంలో పీపీపీ విధానంలో హాస్పటల్‌ను అప్పగించే ప్రయత్నాలను వ్యతిరేకిస్తూ 532 రోజుల పాటు నిరసనలు చేపట్టినట్లు తెలిపారు. అనంతరం పీపీపీ విధానాన్ని ఉపసంహరించి ఓ అండ్‌ వీ విధానంలో నిర్వహించాలనే ప్రతిపాదన రావడంతో ఆందోళనలు విరమించామని చెప్పారు. ప్రస్తుతం మళ్లీ ప్రైవేటీకరణకు చర్యలు చేపట్టడాన్ని వ్యతిరేకిస్తున్నామని, దీనిపై హైకోర్టులో న్యాయపోరాటం కొనసాగుతున్నప్పటికీ ఈ నెల 6న టెండర్లు తెరవడానికి పోర్టు యాజమాన్యం చర్యలు తీసుకోవడాన్ని ఖండిస్తున్నామని తెలిపారు. హాస్పటల్‌ అభివృద్ధి పేరుతో 1.21 ఎకరాల ఆస్పత్రి, చుట్టుపక్కల ఉన్న 4.7 ఎకరాల స్థలం కలిపి మొత్తం 5.91 ఎకరాల విలువైన భూమిని ప్రైవేట్‌ సంస్థలకు అప్పగించే ప్రయత్నం జరుగుతోందని ఆరోపించారు.టెండర్ల ప్రక్రియను వెంటనే నిలిపివేయాలని, డిమాండ్ల సాధన కోసం ఈ నెల 5న మధ్యాహ్నం 12 గంటలకు పోర్టు ఏఓబీ వద్ద అఖిలపక్ష కార్మిక సంఘాల ఆధ్వర్యంలో ధర్నా నిర్వహించనున్నట్లు తెలిపారు.సమావేశంలో ఏఐటీయూసీ నుంచి యు.పోతన్న, హెచ్‌ఎంఎస్‌ సీనియర్‌ నాయకుడు మంగయ్యనాయుడు, సిటూ గౌరవ అధ్యక్షుడు వీఎస్‌ పద్మనాభరాజు, సీఎఫ్‌టీయూఐ నుంచి సత్యనారాయణ, ఎన్‌పీటీ యూనియన్‌ జనరల్‌ సెక్రటరీ చందు, బీఎంఎస్‌ నుంచి గోపి, వీడీఎల్‌బీ యూనియన్‌ నుంచి ఎం. వి.రాఘవరావు తదితరులు పాల్గొన్నారు. పోర్టు అఖిలపక్ష కార్మిక సంఘాలు

సాక్షి, విశాఖపట్నం: జీవీఎంసీ ఎన్నికల సమరంలో తుది ఘట్టం ఆసన్నమైంది. నగర మేయర్‌ పీఠాన్ని ఏ పార్టీ దక్కించుకోబోతుందో తేల్చేందుకు సర్వం సిద్ధమైంది. సార్వత్రిక ఎన్నికలను తలపించిన ఈ సమరంలో ఓటర్లు వేసిన తీర్పు మంగళవారం వెల్లడికానుంది. కౌంటింగ్‌ నిర్వహణ కోసం ఏయూ నార్త్‌ క్యాంపస్‌లో 8 బ్లాకులు, సౌత్‌ క్యాంపస్‌లో 2 బ్లాకుల్లో మొత్తం 113 కౌంటింగ్‌ హాళ్లను ఏర్పాటు చేశారు. లెక్కింపు వేగవంతంగా, పారదర్శకంగా పూర్తి చేసేందుకు అధికారులు 1507 కౌంటింగ్‌ టేబుళ్లను అందుబాటులోకి తెచ్చారు. రౌండ్లవారీగా ఫలితాలు త్వరగా వెలువడేలా దాదాపు 5 వేల మంది సిబ్బందిని ఈ లెక్కింపు ప్రక్రియలో పాల్గోనున్నారు. రెండు రౌండ్లలో కౌంటింగ్‌ పూర్తి చేసేలా.. గరిష్టంగా రెండు రౌండ్లలో ఓట్ల లెక్కింపు పూర్తి చేసేలా ప్రణాళిక సిద్ధం చేశారు. అధికారులందరూ ఉదయం 5 గంటలకే కౌంటింగ్‌ కేంద్రాలకు చేరుకోవాలని, ఉదయం 6 గంటలకు అభ్యర్థులు, ఎన్నికల ఏజెంట్ల సమక్షంలో స్ట్రాంగ్‌ రూములను తెరవాలని జిల్లా ఎన్నికల అధికారి ఆదేశించారు. బ్యాలెట్‌ పత్రాలను కౌంటింగ్‌ హాళ్లకు తరలించి ఉదయం 8 గంటలకు పోస్టల్‌ బ్యాలెట్లతో సహా ఓట్ల లెక్కింపు ప్రారంభించనున్నారు. మొత్తం ప్రక్రియను కేవలం రెండు రౌండ్లలోనే పూర్తి చేసేలా అధికారులు పక్కా ప్రణాళికలు రూపొందించారు. దీంతో మధ్యాహ్నానికే జీవీఎంసీ ఫలితాలపై ఒక స్పష్టమైన అవగాహన వచ్చే అవకాశం ఉంది. ప్రధాన పార్టీల అభ్యర్థులు, స్థానిక నాయకులు లెక్కింపు కేంద్రాల వద్ద ఉత్కంఠగా ఎదురుచూస్తున్నారు. ఫలితాల ప్రకటన అనంతరం ఎలాంటి ఘర్షణలు, గొడవలు జరగకుండా కౌంటింగ్‌ కేంద్రాల వద్ద భారీ పోలీసు బందోబస్తును ఏర్పాటు చేశారు. మరి విశాఖ మేయర్‌ పీఠాన్ని ఎవరు అధిరోహిస్తారో చూడాలి. తొలి ఫలితం 76వ వార్డుదే.. జీవీఎంసీ ఎన్నికల కౌంటింగ్‌లో రెండు రౌండ్లలోనే 120 వార్డుల ఫలితాలు వెలువడనున్నాయి. అన్ని వార్డులకు సంబంధించి 1,507 కౌంటింగ్‌ టేబుళ్ల వద్ద ఒకేసారి లెక్కింపు ప్రక్రియ ప్రారంభం కానుంది. వీటిలో తక్కువ ఓట్లు పోలైన 76వ వార్డుదే తొలి ఫలితం కానుంది. ఆ తర్వాత 105వ వార్డు, 29వ వార్డు, 54వ వార్డు, 74వ వార్డుల ఫలితాలు వెలువడనున్నాయి. 5వ వార్డు, 107వ వార్డు, 109వ వార్డుల ఫలితాలు చివరిగా ప్రకటించే అవకాశం ఉంది. సెల్‌ఫోన్ల నిషేధం జీవీఎంసీ ఎన్నికల ఓట్ల లెక్కింపు సందర్భంగా కౌంటింగ్‌ కేంద్రాల్లోకి సెల్‌ఫోన్లను ఎట్టి పరిస్థితుల్లోనూ అనుమతించరాదని స్పష్టం చేశారు. కేవలం కౌంటింగ్‌ హాల్‌ సూపర్వైజర్లు, ట్యాబులేషన్‌ ఇన్‌చార్జిలకు మాత్రమే నిబంధనల మేరకు సెల్‌ఫోన్ల వినియోగానికి అనుమతి ఉంటుందని తెలిపారు. మిగిలిన వారు ఫోన్లు భద్రపరుచుకునేందుకు వీలుగా అక్కడక్కడా డిపాజిట్‌ కౌంటర్లు ఏర్పాటు చేయాలని సూచించారు. కౌంటింగ్‌ ప్రక్రియకు సంబంధించిన తాజా సమాచారాన్ని ఎప్పటికప్పుడు మీడియాకు అందించాలని అధికారులను ఆదేశించారు. ఎన్నికల్లో విజయం సాధించిన అభ్యర్థులు కౌంటింగ్‌ జరిగే ప్రాంతంలో ఎలాంటి హడావుడి చేయరాదని, గుంపులుగా చేరడం, శాంతిభద్రతలకు విఘాతం కలిగించే చర్యలకు పాల్పడకూడదని కలెక్టర్‌ స్పష్టం చేశారు. నేడే జీవీఎంసీ ఎన్నికల ఫలితాలు పకడ్బందీగా జీవీఎంసీ ఎన్నికల ఓట్ల లెక్కింపు కలెక్టర్‌ అభిషిక్త్‌ కిశోర్‌ ఓట్ల లెక్కింపు ప్రక్రియను అత్యంత పారదర్శకంగా, పకడ్బందీగా నిర్వహించాలని జిల్లా కలెక్టర్‌, ఎన్నికల అధికారి ఎం. అభిషిక్త్‌ కిశోర్‌ అధికారులను ఆదేశించారు. ఏయూలో నిర్వహించనున్న కౌంటింగ్‌ ప్రక్రియ ఏర్పాట్లపై సోమవారం సాయంత్రం సీపీ శంఖబ్రత బాగ్చి, జీవీఎంసీ కమిషనర్‌ కేతన్‌ గార్గ్‌, సంబంధిత అధికారులతో ఇంజినీరింగ్‌ అడ్మినిస్ట్రేషన్‌ బ్లాక్‌ వద్ద సమీక్ష నిర్వహించి దిశానిర్దేశం చేశారు. స్ట్రాంగ్‌ రూములు తెరిచినప్పటి నుంచి కౌంటింగ్‌ పూర్తయి ఫలితాలు ప్రకటించే వరకు జోనల్‌ కమిషనర్లు, రిటర్నింగ్‌ అధికారులు, డిప్యూటీ కలెక్టర్లు, నోడల్‌ అధికారులు, కౌంటింగ్‌ సూపర్వైజర్లు నిరంతరం సమన్వయంతో వ్యవహరించాలని సూచించారు. ప్రతి బ్లాక్‌కు ప్రత్యేక ప్రవేశ, నిష్క్రమణ మార్గాలను ఏర్పాటు చేసి, వాటిపై సిబ్బంది, రాజకీయ పార్టీల ప్రతినిధులు, ఏజెంట్లకు ముందుగానే స్పష్టమైన సమాచారం అందించాలన్నారు. ప్రతి బ్లాక్‌ వద్ద వెయిటింగ్‌ కేంద్రాలు ఏర్పాటు చేయాలని, వాహనాలను కౌంటింగ్‌ కేంద్రానికి 500 మీటర్ల దూరంలోనే పార్కింగ్‌ చేసి నడుచుకుంటూ రావాలని సూచించారు. కౌంటింగ్‌ సిబ్బంది ఎన్నికల నిబంధనలపై పూర్తి అవగాహన కలిగి ఉండటంతో పాటు, ఏజెంట్లకు కూడా అవసరమైన సూచనలు అందించాలన్నారు. ప్రతి రౌండ్‌లో లెక్కించిన ఓట్లను క్షుణ్ణంగా పరిశీలించి, పీవో డైరీలోని వివరాలు, ట్యాబులేషన్‌ రికార్డులతో సరిపోల్చుకోవాలని ఆదేశించారు. ఏవైనా సందేహాలు లేదా అనూహ్య పరిస్థితులు ఎదురైతే సంబంధిత జోనల్‌ కమిషనర్లు, రిటర్నింగ్‌ అధికారులు, నోడల్‌ అధికారుల దృష్టికి తీసుకెళ్లి పరిష్కరించుకోవాలన్నారు. నిర్ణీత సమయపాలనతో లెక్కింపు ప్రక్రియను పూర్తి చేయాలని సూచించారు. ఆయా వార్డుల ఓట్ల లెక్కింపు పూర్తయిన వెంటనే సంబంధిత వార్డు సభ్యుల ఎన్నిక ఫలితాలను ప్రకటించాలని, మేయర్‌ పదవికి సంబంధించిన తుది ఫలితాన్ని మాత్రం అన్ని వార్డుల లెక్కింపు పూర్తయిన అనంతరం ప్రకటించాలని కలెక్టర్‌ ఆదేశించారు.

మహారాణిపేట: జెడ్పీటీసీ, ఎంపీటీసీ ఎన్నికలకు సంబంధించి అన్ని ఏర్పాట్లు పూర్తి చేసి, ఎన్నికల సంఘం నిబంధనలు కచ్చితంగా పాటించాలని కలెక్టర్‌, ఎన్నికల అధికారి అభిషిక్త్‌ కిషోర్‌ అధికారులను ఆదేశించారు. సోమవారం కలెక్టరేట్‌లో జేసీ జి. విద్యాధరితో కలిసి ఆర్డీఓలు, రిటర్నింగ్‌ అధికారులు, ఎంపీడీఓలు, నోడల్‌ అధికారులతో సమీక్ష నిర్వహించారు.ఈ నెల 5న ఉదయం 7 నుంచి సాయంత్రం 5 గంటల వరకు పోలింగ్‌ జరుగుతుందని, ప్రతి కేంద్రంలో కనీస సదుపాయాలు, క్రిటికల్‌ కేంద్రాల్లో వెబ్‌కాస్టింగ్‌, భద్రతా ఏర్పాట్లు చేయాలని సూచించారు. మండల, జిల్లా స్థాయిలో కంట్రోల్‌ రూములు ఏర్పాటు చేసి పోలింగ్‌ సరళిని పర్యవేక్షించాలని, ఎన్నికల సామగ్రి, సిబ్బంది శిక్షణ, రవాణా, స్ట్రాంగ్‌ రూమ్‌ల వద్ద భద్రతా ఏర్పాట్లు పూర్తి చేయాలని ఆదేశించారు. ఎలాంటి నిర్లక్ష్యానికి తావులేకుండా బాధ్యతాయుతంగా విధులు నిర్వహించాలని స్పష్టం చేశారు. సమావేశంలో డీఆర్‌వో ఎం. విశ్వేశ్వర నాయుడు, ఆర్డీఓలు దిలీప్‌ చక్రవర్తి, సంగీత్‌ మాధుర్‌, ఎన్నికల అధికారులు, నోడల్‌ అధికారులు పాల్గొన్నారు.

డాబాగార్డెన్స్‌: శబరిమల, పంచారామ క్షేత్రాల భక్తులతో పాటు పర్యాటకుల సౌకర్యార్థం ఏపీఎస్‌ఆర్టీసీ ప్రత్యేక బస్సు సర్వీసులను అందుబాటులోకి తీసుకొస్తున్నట్లు జిల్లా ప్రజా రవాణా అధికారి బి.అప్పలనాయుడు తెలిపారు. ఈ మేరకు ప్రత్యేక సర్వీసులకు సంబంధించిన పోస్టర్‌ను కార్యాలయంలో సంబంధిత అధికారులతో కలిసి ఆయన ఆవిష్కరించారు. శబరిమల వెళ్లే భక్తుల కోసం ఈ నెల 16 నుంచి వచ్చే నెల 27వ తేదీ వరకు ‘శబరిగిరి మహోత్సవం’ పేరుతో 5, 6, 7 రోజుల యాత్రా సర్వీసులను ప్రారంభించినట్లు వెల్లడించారు. యాత్రకు వెళ్లాలనుకునే భక్తులు 7382914219, 8309265666, 9959225602 నంబర్లలో సంప్రదించాలని సూచించారు. ముందస్తు టికెట్ల కోసం www.apsrtconline.in వెబ్‌సైట్‌లో బుక్‌ చేసుకోవచ్చన్నారు. పంచారామ క్షేత్ర దర్శిని.. కార్తీకమాసాన్ని పురస్కరించుకుని ఐదు ప్రముఖ శైవక్షేత్రాల దర్శనానికి ‘పంచారామ క్షేత్ర దర్శిని’ పేరుతో ప్రత్యేక బస్సులు నడపనున్నట్లు చెప్పారు. కార్తీకమాసంలో ప్రతి ఆదివారం సాయంత్రం 5 గంటలకు ద్వారకా బస్‌స్టేషన్‌ నుంచి బస్సులు బయలుదేరుతాయి. మరుసటి రోజు సోమవారం అమరావతిలోని అమరేశ్వరుడు, భీమవరంలోని భీమేశ్వరుడు, పాలకొల్లులోని క్షీర రామలింగేశ్వరుడు, ద్రాక్షారామంలోని భీమలింగేశ్వరుడు, సామర్లకోటలోని కుమార రామలింగేశ్వరుడిని దర్శించుకునేలా యాత్రను రూపొందించారు. ఈ సర్వీసులకు కూడా ముందస్తు రిజర్వేషన్లు చేసుకోవచ్చన్నారు. లంబసింగి, దారమఠానికి ప్రత్యేక సర్వీసులు.. కార్తీకమాసంలో పర్యాటకులు, పిక్నిక్‌లకు వెళ్లేవారి కోసం ప్రతి శని, ఆదివారాల్లో ప్రత్యేక బస్సులు నడపనున్నట్లు అప్పలనాయుడు వెల్లడించారు. ఈ రోజుల్లో తెల్లవారుజామున 3 గంటలకు ద్వారకా బస్‌స్టేషన్‌ నుంచి లంబసింగికి, ఉదయం 7 గంటలకు దారమఠానికి బస్సులు బయలుదేరుతాయని తెలిపారు. ఆయా సర్వీసుల వివరాలు, టికెట్ల రిజర్వేషన్‌ కోసం 7382914219, 8309265666, 9959225602 నంబర్లలో సంప్రదించాలని కోరారు. ఈ కార్యక్రమంలో డిప్యూటీ చీఫ్‌ మెకానికల్‌ ఇంజినీర్‌ గంగాధరరావు, డిప్యూటీ చీఫ్‌ ట్రాఫిక్‌ మేనేజర్‌ కె.పద్మావతి, అసిస్టెంట్‌ ట్రాఫిక్‌ మేనేజర్‌ కె.గంగాధరరావు, విశాఖ డిపో మేనేజర్‌ మణిమాధురి, ఉజ్వలారాణి, పీవీవీఎన్‌ రావు తదితరులు పాల్గొన్నారు.

సాక్షి, విశాఖపట్నం: జీవీఎంసీ ఎన్నికల ఓట్ల లెక్కింపు ప్రక్రియలో పార్టీ కార్పొరేటర్‌ అభ్యర్థులు, కౌంటింగ్‌ ఏజెంట్లు అత్యంత అప్రమత్తంగా వ్యవహరించాలని వైఎస్సార్‌ సీపీ జిల్లా అధ్యక్షుడు కేకే రాజు, మేయర్‌ అభ్యర్థి వరుదు కల్యాణి సూచించారు. సోమవారం మద్దిలపాలెంలోని పార్టీ కార్యాలయంలో కార్పొరేటర్‌ అభ్యర్థులు, పోలింగ్‌ బూత్‌ ఏజెంట్లు, కౌంటింగ్‌ ఏజెంట్లతో సమావేశం నిర్వహించారు. ఈ సందర్భంగా ఓట్ల లెక్కింపు సమయంలో తీసుకోవాల్సిన జాగ్రత్తలు, ఎన్నికల నిబంధనలపై సూచనలు చేశారు.ప్రతి ఓటును నిశితంగా పరిశీలించాలని, ఏవైనా పొరపాట్లు జరిగితే వెంటనే ఎన్నికల అధికారుల దృష్టికి తీసుకెళ్లాలని తెలిపారు. కౌంటింగ్‌ ఏజెంట్లు గుర్తింపు కార్డులు, అనుమతి పత్రాలతో నిర్ణీత సమయానికి ముందే కేంద్రాలకు చేరుకోవాలని సూచించారు. బ్యాలెట్‌ బాక్సుల సీల్స్‌ను లెక్కింపు ప్రారంభానికి ముందే పరిశీలించాలని, అనుమానాలు ఉంటే రిటర్నింగ్‌ అధికారికి ఫిర్యాదు చేయాలని చెప్పారు. ప్రతి రౌండ్‌లో నమోదైన ఓట్ల వివరాలను సరిపోల్చుకోవాలని, చెల్లుబాటు అయ్యే ఓట్లపై అభ్యంతరాలు, ఓట్ల లెక్కింపులో తేడాలు ఉంటే వెంటనే తెలియజేయాలని సూచించారు. అవసరమైతే రీకౌంటింగ్‌ కోసం లిఖితపూర్వకంగా దరఖాస్తు చేసుకోవచ్చని తెలిపారు. కౌంటింగ్‌ కేంద్రాల్లో ఎన్నికల నిబంధనలు పాటిస్తూ సంయమనంతో వ్యవహరించాలని, అధికారిక ఫలితాలు వెలువడే వరకు ఎలాంటి తొందరపాటు ప్రకటనలు చేయవద్దని సూచించారు.ఈ సమావేశంలో మాజీ ఎమ్మెల్యేలు వాసుపల్లి గణేష్‌కుమార్‌, తైనాల విజయ్‌కుమార్‌, నియోజకవర్గ సమన్వయకర్తలు తిప్పల దేవన్‌రెడ్డి, మొల్లి అప్పారావు, రాష్ట్ర డిప్యూటీ ప్రధాన కార్యదర్శి హర్షవర్ధన్‌రెడ్డి, నియోజకవర్గ పరిశీలకులు బాణాల శ్రీనివాసరావు, పేడాడ రమణికుమారి, పీలా వెంకటలక్ష్మి, పీలా ఉమారాణి, మువ్వల సురేష్‌, పాల్‌ విక్టర్‌ తదితరులు పాల్గొన్నారు.

సాక్షి, విశాఖపట్నం : గ్రేటర్‌ ఎన్నికల్లో ఓటర్ల తీర్పు, అభ్యర్థుల భవితవ్యం దాగిన బ్యాలెట్‌ బాక్సులను స్ట్రాంగ్‌ రూమ్‌కు తరలించారు. పోలింగ్‌ పూర్తయిన తర్వాత.. ఆయా కేంద్రాల్లోని ఏజెంట్లు, అధికారుల సమక్షంలో బ్యాలెట్‌ బాక్సులకు సీల్‌ వేసి స్ట్రాంగ్‌ రూమ్‌లు ఏర్పాటు చేసిన ఏయూ క్యాంపస్‌కు వాహనాల్లో తరలించారు. మొత్తం 120 వార్డుల ఎన్నికల లెక్కింపు ప్రక్రియ ఇక్కడే జరగనుంది. నగర పోలీస్‌ విభాగం వారు స్ట్రాంగ్‌ రూములకు రెండు తాళాలు వేయడంతో పాటు మూడంచెల భద్రతా వ్యవస్థను ఏర్పాటు చేశారు. స్ట్రాంగ్‌ రూమ్‌ల నుంచి కౌంటింగ్‌ కేంద్రాలకు బ్యాలెట్‌ బాక్సులు తరలించే సమయంలోనూ భద్రత కట్టుదిట్టం చేశారు. కౌంటింగ్‌ ప్రక్రియ 5 రౌండ్లలో పూర్తిచేసేలా అవసరమైన టేబుళ్లు, సిబ్బంది, ఇతర సౌకర్యాలపై ఇప్పటికే అధికారులు కసరత్తు పూర్తిచేశారు. ● స్ట్రాంగ్‌ రూమ్‌లకు వేసిన రెండు తాళాలకు సంబంధించిన తాళంచెవి ఒకటి స్ట్రాంగ్‌ రూమ్‌ ఇన్‌చార్జ్‌ వద్ద, మరొకటి మేజిస్టీరియల్‌ అధికారాల వద్ద ఉంచారు. ● 24 గంటల పాటు సాయుధ పోలీసు బలగాలు పహారా కాయడంతో పాటు సీసీ కెమెరాల నిరంతర పర్యవేక్షణ ఉంచారు. ● మూడంచెల భద్రతా వ్యవస్థలో మొదటి అంచెలో ఏఆర్‌ విభాగానికి చెందిన 51 మంది సాయుధ గార్డులతో భద్రత కల్పించారు. రెండో అంచెలో సివిల్‌ పోలీసులు, మూడో అంచెలో ట్రాఫిక్‌ పోలీసులను నియమించారు. సుమారు 2 వేల మంది పోలీసు సిబ్బందితో ఇక్కడ పటిష్ట బందోబస్తు ఏర్పాటు చేశారు. ● స్ట్రాంగ్‌ రూమ్‌ ఉన్న ప్రాంగణం మొత్తాన్ని భద్రతా వలయంగా మార్చారు. ఆ ప్రాంగణంలోకి ఉన్నతాధికారులతో సహా ఎవరి వాహనాలను అనుమతించకుండా పోలీసు అధికారులు చర్యలు తీసుకుంటున్నారు. ● ఎన్నికల రిటర్నింగ్‌ అధికారులు, స్థానిక పోలీస్‌ ఉన్నతాధికారులతో కలిసి రోజూ స్ట్రాంగ్‌ రూమ్స్‌ను పరిశీలించి ప్రధాన ఎన్నికల అధికారికి నివేదిక అందించనున్నారు. ● స్ట్రాంగ్‌ రూమ్స్‌కి వెళ్లే ప్రతి ఒక్కరి వివరాలు కచ్చితంగా లాగ్‌ బుక్‌లో నమోదు చేయాలనే నిబంధనలను కచ్చితంగా అమలు చేయాలని సాయుధ బలగాలను ఆదేశించారు. ఈ ప్రక్రియ మొత్తం వీడియోలో రికార్డయ్యేలా ఏర్పాటు చేశారు. ప్రతి సీసీ కెమెరాలో నిక్షిప్తమైన దృశ్యాలను జీవీఎంసీ, నగర పోలీస్‌ కార్యాలయంలో ఉన్న కమాండ్‌ కంట్రోల్‌ సెంటర్‌ ద్వారా పర్యవేక్షించనున్నారు. ● కౌంటింగ్‌ మొదలయ్యే వరకు భద్రతను పర్యవేక్షించే పూర్తి బాధ్యతను ఓ సీనియర్‌ అధికారికి అప్పగించారు. ఈ భద్రతా ఏర్పాట్లపై ఏడీసీపీ, ఏసీపీలు నిత్యం ఆకస్మిక తనిఖీలు నిర్వహించనున్నారు. ● ఈ నెల 3న జరగనున్న మహా ఎన్నికల కౌంటింగ్‌ ప్రక్రియ సజావుగా సాగేలా జీవీఎంసీ అధికారులు, నగర పోలీసు యంత్రాంగం కట్టుదిట్టమైన ఏర్పాట్లు చేశారు. ● నగర పోలీస్‌ కమిషనర్‌ శంఖబ్రత బాగ్చి ఆదివారం రాత్రి స్ట్రాంగ్‌ రూమ్‌ కేంద్రాల్ని పర్యవేక్షించారు. మూడంచెల భద్రతా ఏర్పాట్లను క్షేత్రస్థాయిలో పరిశీలించారు. 2 రౌండ్లలో కౌంటింగ్‌ పూర్తి ఏయూలో ఏర్పాటు చేసిన 113 కౌంటింగ్‌ హాళ్లలో మంగళవారం ఉదయం 8 గంటలకు ఓట్ల లెక్కింపు ప్రారంభమవుతుందని కలెక్టర్‌ ఎం.అభిషిక్త్‌ కిశోర్‌ పేర్కొన్నారు. ఇందుకోసం 1,507 కౌంటింగ్‌ టేబుళ్లు, సుమారు 5,000 మంది సిబ్బందిని నియమించినట్లు వెల్లడించారు. గరిష్టంగా రెండు రౌండ్లలో కౌంటింగ్‌ పూర్తి చేసేలా ప్రణాళిక రూపొందించామన్నారు. ప్రతి కౌంటింగ్‌ హాల్‌లో ఒకవైపు మేయర్‌ పదవికి సంబంధించిన బ్యాలెట్‌ పత్రాలు, మరోవైపు వార్డు సభ్యుల బ్యాలెట్‌ పత్రాల లెక్కింపు చేపడతామన్నారు. ఉదయం 7 గంటలకు అభ్యర్థులు, వారి ఏజెంట్ల సమక్షంలో స్ట్రాంగ్‌ రూములు తెరిచి, కౌంటింగ్‌ ప్రక్రియ ప్రారంభిస్తామని వివరించారు.

తాటిచెట్లపాలెం: జీవీఎంసీ ఎన్నికల్లో వైఎస్సార్‌సీపీకి ప్రజలు పట్టం కట్టబోతున్నారని ఆ పార్టీ మేయర్‌ అభ్యర్థి వరుదు కల్యాణి ధీమా వ్యక్తం చేశారు. ఆదివారం పోలింగ్‌ అనంతరం నగర ఓటర్లకు కృతజ్ఞతలు తెలిపారు. కొన్ని పోలింగ్‌ కేంద్రాల్లో తమ ఏజెంట్లకు ఆటంకాలు ఎదురయ్యాయని, పార్టీ జిల్లా అధ్యక్షుడు కేకే రాజుతో కలిసి అధికారుల దృష్టికి తీసుకెళ్లామన్నారు. కూటమి పాలనపై ప్రజలు విసిగిపోయారని, ప్రచార సమయంలో తమకు మంచి స్పందన లభించిందని పేర్కొన్నారు. ఫలితాల్లో తాను మేయర్‌గా, మెజార్టీ స్థానాల్లో వైఎస్సార్‌సీపీ అభ్యర్థులు విజయం సాధిస్తారని ఆశాభావం వ్యక్తం చేశారు. జగన్‌మోహన్‌రెడ్డి సహకారంతో విశాఖను అభివృద్ధి చేస్తామని తెలిపారు.

తాటిచెట్లపాలెం: నార్త్‌ జోన్‌ 54వ వార్డులో ఓ యువకుడికి వింత అనుభవం ఎదురైంది. తాటిచెట్లపాలెం హైవే, అన్నా కాంటీన్‌ సమీపంలోని 54/7 పోలింగ్‌ బూత్‌లో ఆదివారం సాయంత్రం 4 గంటల సమయంలో బొక్క మారుతి దుర్గాప్రసాద్‌ ఓటు వేసేందుకు వచ్చాడు. అయితే అతని ఓటును ఇప్పటికే మరొకరు వినియోగించుకున్నట్లు అధికారులు చెప్పడంతో అవాక్కయ్యాడు. దీనిపై అధికారులను ప్రశ్నించగా చివరకు అతనికి చాలెంజ్‌ ఓటు అవకాశం కల్పించారు. ఇదే బూత్‌లో ఓటర్ల ఆధారాలను పూర్తిస్థాయిలో పరిశీలించకుండానే కొందరిని అనుమతించారని పలువురు ఓటర్లు తెలిపారు. ఇదే కేంద్రానికి సాయంత్రం 5.02 గంటలకు వచ్చిన మరో ఓటరును అధికారులు లోపలికి అనుమతించలేదు. కనీసం 10 నిమిషాల సమయం ఇవ్వాలని కోరినా అధికారులు పట్టించుకోలేదని సదరు ఓటరు వాపోయారు.

పోలింగ్‌ ఎలా సాగిందంటే... సమయం పోలింగ్‌ శాతం ఓటేసినవారు ఉదయం 9 గం.కు 3.34 61,309 ఉదయం 11 గం.కు 13.34 2,45,251 మధ్యాహ్నం 1గం.కు 26.50 4,86,972 మధ్యాహ్నం 3గం.కు 39.74 7,30,431 పోలింగ్‌ ముగిసే సమయానికి 51.47 9,45,915 సాక్షి, విశాఖపట్నం: మహా నగర ఓటరు తీరు మారలేదు. తన వీధి, తన వార్డు, తన నగర అభివృద్ధిని ప్రభావితం చేసే జీవీఎంసీ ఎన్నికల్లోనూ నిర్లిప్తత వీడలేదు. ఆదివారం జరిగిన జీవీఎంసీ ఎన్నికల్లో ప్రాథమికంగా వెల్లడించిన తాత్కాలిక తుది నివేదిక ప్రకారం 51.47 శాతం పోలింగ్‌ మాత్రమే నమోదైంది. జీవీఎంసీ పరిధిలో మొత్తం 18,37,901 మంది ఓటర్లు ఉండగా, వారిలో 9,45,915 మంది మాత్రమే ఓటు హక్కు వినియోగించుకున్నారు. 120 వార్డుల్లోని 1,990 పోలింగ్‌ కేంద్రాల్లో ఎన్నికలు నిర్వహించినప్పటికీ, నగరవాసులు గత ఎన్నికల తీరునే పునరావృతం చేశారు. 2021 ఎన్నికల్లో 59.41 శాతం పోలింగ్‌ నమోదు కాగా, ఈసారి ఏకంగా 7.94 శాతం తగ్గడం ఆందోళన కలిగిస్తోంది. మెట్రో నగరాలతో పోటీ పడుతున్న విశాఖలో ప్రజాస్వామ్య ప్రక్రియలో ప్రజల భాగస్వామ్యం మాత్రం ఆశించిన స్థాయిలో పెరగడం లేదు. వరుసగా ఆరోసారి కూడా పోలింగ్‌ శాతం 60 దాటకపోవడం నగర ఓటర్ల నిర్లిప్తతకు అద్దం పడుతోంది. 1987లో 56.83 శాతం, 1995లో 49.02 శాతం, 2000లో 49.63 శాతం, 2007లో 52.48 శాతం, 2021లో 59.41 శాతం పోలింగ్‌ నమోదైంది. ఈసారి గత ఎన్నికలతో పోలిస్తే ఓటింగ్‌ శాతం మరింత తగ్గడం గమనార్హం. ముఖ్యంగా ఉన్నత వర్గాలు, ఉద్యోగులు, వ్యాపారులు ఓటు వేసేందుకు పెద్దగా ఆసక్తి చూపలేదనే అభిప్రాయం వ్యక్తమైంది. శివారు ప్రాంతాలతో పోలిస్తే నగరం నడిబొడ్డున ఉన్న ప్రాంతాల్లో పోలింగ్‌ తక్కువగా నమోదైంది. సెలవు దినంగా భావించి పలువురు ఇళ్లకే పరిమితం కాగా, ఓటు వేయాలని రాజకీయ పార్టీల ఏజెంట్లు, కార్యకర్తలు అపార్ట్‌మెంట్లు, ఇళ్లకు వెళ్లి విజ్ఞప్తి చేసినా ఆశించిన స్పందన కనిపించలేదు.

సాక్షి, విశాఖపట్నం : జీవీఎంసీ ఎన్నికల్లో ఓటింగ్‌ సరళిపై కూటమి నేతల్లో ఆందోళన మొదలైంది. ఉదయం 9 గంటలకే తమ అంచనాలు తలకిందులవుతున్నాయని భావించి అలజడులకు ప్రయత్నించారు. ఎమ్మెల్యేల ఆదేశాలతో టీడీపీ, జనసేన నేతలు రంగంలోకి దిగి నిబంధనలు అతిక్రమిస్తూ హల్‌చల్‌ చేశారు. కొన్ని చోట్ల రిగ్గింగ్‌కు పాల్పడగా, మరికొన్ని చోట్ల ఓటర్లను ఇబ్బందులకు గురిచేశారు. వైఎస్సార్‌సీపీ నేతలతో వాగ్వాదాలకు దిగుతూ పోలింగ్‌ కేంద్రాల వద్ద ఉద్రిక్త పరిస్థితులు సృష్టించారు. జీవీఎంసీ పోలింగ్‌ ఉదయం 7 గంటలకు ప్రారంభం కాగా ఓటర్లు పెద్ద సంఖ్యలో తరలివచ్చారు. 9 గంటల సమయానికి ఓటింగ్‌ సరళిపై ఆందోళనకు గురైన కూటమి శ్రేణులు వివిధ వార్డుల్లో ఇబ్బందులు సృష్టిస్తూ ప్రశాంత వాతావరణానికి భంగం కలిగించేందుకు ప్రయత్నించారు. ● తూర్పు నియోజకవర్గంలోని ఏయూ హైస్కూల్‌ కేంద్రంలో ఓటు హక్కు వినియోగించుకున్న వైఎస్సార్‌సీపీ మేయర్‌ అభ్యర్థి వరుదు కల్యాణి మీడియాతో మాట్లాడుతుండగా టీడీపీ నేతలు అడ్డుకున్నారు. వైఎస్సార్‌సీపీ నేతలతో వాగ్వాదానికి దిగి తోపులాటకు పాల్పడ్డారు. ● దక్షిణ నియోజకవర్గంలోని 37వ వార్డులో జనసేన నేతలు రిగ్గింగ్‌కు పాల్పడుతున్నారంటూ అడ్డుకునేందుకు వెళ్లిన వైఎస్సార్‌సీపీ నేతలతో వాగ్వాదానికి దిగారు. పోలీసుల సమక్షంలో హడావుడి సృష్టించారు. దీనిపై మేయర్‌ అభ్యర్థి వరుదు కల్యాణి కలెక్టర్‌కు ఫిర్యాదు చేశారు. ● మద్దిలపాలెం కృష్ణా కాలేజీలో టీడీపీ నేతలు రిగ్గింగ్‌కు పాల్పడుతున్నారని, బ్యాలెట్‌ పేపర్లు బయటకు తీసుకొస్తున్నారని సమాచారం అందడంతో వైఎస్సార్‌సీపీ సమన్వయకర్త మొల్లి అప్పారావు అక్కడికి వెళ్లేందుకు ప్రయత్నించారు. అయితే పోలీసులు లోపలికి వెళ్లనీయకుండా అడ్డుకోవడంతో వాగ్వాదం చోటుచేసుకుంది. టీడీపీ నేతలు బ్యాలెట్‌ పేపర్లను బయటకు తీసుకొచ్చి బహిరంగంగా ప్రదర్శించినా పోలీసులు పట్టించుకోలేదు. ● తూర్పు నియోజకవర్గంలోని 26/6 పోలింగ్‌ బూత్‌లో పోలింగ్‌ అయిపోయిన తర్వాత.. ముగ్గురు కూటమి నేతలు బూత్‌లోకి వెళ్లి తలుపులు మూసేశారు. ఈ విషయంపై వైఎస్సార్‌సీపీ నేతలు వాగ్వాదానికి దిగారు. దాదాపు 30 నిమిషాల పాటు పోలింగ్‌ బూత్‌లో ఉన్నారని తెలిసినా పోలీసులు పట్టించుకోలేదని స్థానికులు ఆరోపిస్తున్నారు. ● 28వ వార్డు భానోజీనగర్‌లో ఓటర్లను ప్రలోభపెట్టేందుకు ప్రయత్నించిన టీడీపీ నేతలను తూర్పు నియోజకవర్గ వైఎస్సార్‌సీపీ ఎస్సీ సెల్‌ అధ్యక్షుడు భవానీ శంకర్‌పై రాళ్లతో దాడి జరిగింది. టీడీపీ నేత, ఏయూ ఉద్యోగి అబ్బాస్‌ రాళ్లతో దాడికి పాల్పడ్డాడు. తీవ్రంగా గాయపడిన భవానీ కేజీహెచ్‌లో చికిత్స పొందుతుండగా.. పార్టీ జిల్లా అధ్యక్షుడు కేకే రాజు పరామర్శించారు. ● 12వ వార్డులో జనసేన నేతలు రిగ్గింగ్‌కు యత్నించగా వైఎస్సార్‌సీపీ శ్రేణులు అడ్డుకున్నాయి. దీంతో ఇరువర్గాల మధ్య తీవ్ర వాగ్వాదం చోటుచేసుకుంది. సమాచారం అందుకున్న పోలీసులు, భద్రతా సిబ్బంది అక్కడికి చేరుకుని ఇరువర్గాలను చెదరగొట్టారు. ● తాటిచెట్లపాలెంలో వైఎస్సార్‌సీపీ మేయర్‌, కార్పొరేటర్‌ అభ్యర్థులను పోలింగ్‌ కేంద్రంలోకి వెళ్లకుండా కూటమి నేతలు పోలీసుల సాయంతో అడ్డుకునేందుకు ప్రయత్నించారు. దీంతో ఇరువర్గాల మధ్య వాగ్వాదం చోటుచేసుకోగా ఓటర్లు భయాందోళనకు గురయ్యారు. ● 65వ వార్డు ధర్మానగర్‌లో టీడీపీ నేతలు రిగ్గింగ్‌కు పాల్పడటంతో పాటు ఓటర్లను ప్రలోభపెడుతున్నారని అడ్డుకున్న వైఎస్సార్‌సీపీ శ్రేణులపై దాడికి పాల్పడ్డారు. దుర్భాషలాడుతూ రెచ్చిపోయారు. ● 78వ వార్డు ఏడుగుళ్ల జంక్షన్‌ వద్ద ఓటర్లను ప్రలోభపెడుతున్న కూటమి శ్రేణులను అడ్డుకోవడంతో ఇరువర్గాల మధ్య తోపులాట చోటుచేసుకుంది. పోలీసులు రంగంలోకి దిగి పరిస్థితిని అదుపులోకి తెచ్చారు. ● 22వ వార్డు అల్వార్‌దాస్‌ పబ్లిక్‌ స్కూల్‌ బూత్‌లో ఓటర్లను మభ్యపెడుతున్న టీడీపీ నేతలను తొలగించాలని పోలీసులకు ఫిర్యాదు చేయడంతో వైఎస్సార్‌సీపీ శ్రేణులతో వాగ్వాదం చోటుచేసుకుంది.ఇలా పలు వార్డుల్లో కూటమి నేతల వ్యవహారశైలితో ఉద్రిక్త పరిస్థితులు నెలకొన్నాయి. ఓటమి భయంతోనే రిగ్గింగ్‌, ప్రలోభాలకు పాల్పడి ప్రజాస్వామ్య ప్రక్రియను అపహాస్యం చేశారనే విమర్శలు వ్యక్తమయ్యాయి. ● ఉత్తర నియోజకవర్గంలోని 46, 47వ వార్డుల్లో పోలింగ్‌ స్టేషన్లలో టీడీపీ, జనసేన శ్రేణులు అరాచకం సృష్టించాయి. పోలింగ్‌ సమయం ముగిసిపోయిందని పోలీసులు గేట్లు వేసినా.. జనసేన, టీడీపీ మూకలు పోలింగ్‌ కేంద్రాల గేట్లు బద్దలు కొట్టి లోపలికి చొరబడి.. రిగ్గింగ్‌ చేయడానికి తీవ్రంగా ప్రయత్నించారు.

తాటిచెట్లపాలెం: సుప్రీంకోర్టు ఆదేశాలున్నా పోలింగ్‌ బూత్‌ల వద్ద సీసీ కెమెరాల ఏర్పాటులో అధికారులు నిర్లక్ష్యంగా వ్యవహరించారని వైఎస్సార్‌సీపీ జిల్లా అధ్యక్షుడు కేకే రాజు ఆరోపించారు. 65వ వార్డు పరిధి ధర్మనగర్‌లో ఆదివారం బూత్‌లను పరిశీలించిన ఆయన మాట్లాడుతూ.. శనివారమే జీవీఎంసీ కమిషనర్‌, కలెక్టర్‌కు లిఖితపూర్వకంగా ఫిర్యాదు చేసినా కేవలం 30 శాతం బూత్‌ల వద్దే కెమెరాలు ఏర్పాటు చేశారన్నారు. అధికారులు అధికార దుర్వినియోగానికి పాల్పడ్డారని ఆరోపించారు. చంద్రబాబు ప్రభుత్వం విశాఖ, ఉత్తరాంధ్ర అభివృద్ధిపై వివక్ష చూపుతూ వెన్నుపోటు పొడుస్తోందని విమర్శించారు.

సాక్షి, విశాఖపట్నం: జీవీఎంసీ ఎన్నికల పోలింగ్‌ సందర్భంగా పోలీసులు నిబంధనల పేరిట విధించిన ఆంక్షలు తీవ్ర దుమారం రేపుతున్నాయి. పోలింగ్‌ కేంద్రాల వద్ద గంటకో విచిత్రమైన నిబంధనను అమలు చేస్తూ, అడుగడుగునా ఆంక్షలు విధించడంతో ప్రజాస్వామ్య ప్రక్రియ నవ్వులపాలవుతోంది. సమస్యాత్మక ప్రాంతాల్లో ఎన్నికలను పారదర్శకంగా నిర్వహించాల్సిన యంత్రాంగం.. అధికార కూటమి నేతల అక్రమాలను కప్పిపుచ్చేందుకే ప్రాధాన్యం ఇస్తోంది. పోలింగ్‌ సరళిని, అధికార పార్టీ నేతల అక్రమాలను మీడియా ప్రపంచానికి చూపించకుండా చేసేందుకే పోలీసులు ఈ తరహా ఆంక్షలు విధించారు. పలు కేంద్రాల వద్ద కూటమి నేతలు ఓటర్లను ప్రభావితం చేయడం, స్థానికేతరులను తరలించడం వంటి అక్రమాలకు పాల్పడుతున్నా పోలీసులు కంటితుడుపు చర్యలతో సరిపెట్టారు. అయితే వీటిని కవరేజ్‌ చేసేందుకు ప్రయత్నించే రిపోర్టర్లపై మాత్రం ఆంక్షల ఉక్కుపాదం మోపారు. నిబంధనలకు తూట్లు.. అడుగడుగునా అడ్డంకులు కూటమి పార్టీలు చేస్తున్న అక్రమాలకు, రిగ్గింగ్‌కు పోలీసులు అండగా నిలిచారు. కూటమి నేతలు సాగిస్తున్న అక్రమాలకు రక్షణ కల్పించారు. నిబంధనలకు విరుద్ధంగా అధికారులు, పోలీసులు అధికార దుర్వినియోగానికి పాల్పడ్డారు. విశాఖ దక్షిణ నియోజకవర్గంలోని 37వ వార్డులో బహిరంగంగా రిగ్గింగ్‌ జరుగుతున్నా అక్కడ రిటర్నింగ్‌ అధికారి ఉన్నప్పటికీ పట్టించుకోకుండా కూటమికి అనుకూలంగా వ్యవహరించారు. దీనిపై ప్రశ్నించేందుకు వైఎస్సార్‌సీపీ మేయర్‌ అభ్యర్థి వరుదు కల్యాణి అక్కడికి వెళ్లగా పోలీసులు లోపలికి వెళ్లకుండా అడ్డుకున్నారు. విశాఖ ఉత్తర నియోజకవర్గంలోని పోలింగ్‌ బూత్‌లో కూటమి పార్టీలకు అనుకూలంగా అధికారులు వ్యవహరిస్తున్నారని తెలిసి అక్కడికి వెళ్లేందుకు ప్రయత్నించగా అడుగడుగునా అడ్డంకులు సృష్టించారు. అంతేకాకుండా వైఎస్సార్‌సీపీ ఏజెంట్లను బయటకు పంపించి, సాయంత్రం 5 గంటల తర్వాత లోపలికి రానివ్వకుండా పోలీసులు ఓవరాక్షన్‌ చేశారు. అదేవిధంగా 48వ వార్డులో రిగ్గింగ్‌ జరుగుతోందనే సమాచారం రావడంతో మేయర్‌ అభ్యర్థి వరుదు కల్యాణి, మాజీ ఎమ్మెల్యే వాసుపల్లి గణేష్‌కుమార్‌ అక్కడికి వెళ్లేందుకు ప్రయత్నించగా అడ్డుకున్నారు. తాటిచెట్లపాలెం వాటర్‌ ట్యాంక్‌ వద్ద కూడా మేయర్‌ అభ్యర్థి వరుదు కల్యాణి, కార్పొరేటర్‌ అభ్యర్థిని వెళ్లనీయకుండా పోలీసులు అడ్డుకున్నారు. ఏయూ హైస్కూల్‌ వద్ద సమయం ముగిసిందనే కారణంతో ఓటు వేసేందుకు వచ్చిన ఓటర్లను కొన్ని చోట్ల పోలీసులు అనుమతించలేదు. మరికొన్ని చోట్ల సమయం దాటిపోయినా కూటమికి అనుకూలమైన ఓటర్లకు ఓటు వేసేందుకు నిబంధనలను సడలించారు. మీడియాపై ఆంక్షలు పోలింగ్‌ సరళిని, అధికార పార్టీ నేతల అక్రమాలను మీడియా ప్రపంచానికి చూపించకుండా చేసేందుకే పోలీసులు ఈ తరహా ఆంక్షలు విధిస్తుంచారన్న ఆరోపణలున్నాయి. పలు కేంద్రాల వద్ద కూటమి నేతలు ఓటర్లను ప్రభావితం చేయడం, స్థానికేతరులను తరలించడం వంటి అంశాలు జరుగుతున్నా పోలీసులు కంటితుడుపు చర్యలకే పరిమితమయ్యారు. వీటిని కవరేజ్‌ చేసేందుకు ప్రయత్నించే రిపోర్టర్లపై మాత్రం ఉక్కుపాదం మోపారు. అధికార పార్టీకి అనుకూలంగా ఉన్న వ్యాపారులు, నేతలకు పోలింగ్‌ కేంద్రాల వద్ద స్వేచ్ఛా విహారం కల్పిస్తూ.. వార్తలు సేకరించే విలేకరులను మాత్రం 100 మీటర్ల అవతలే నిలిపివేశారు. ఎలక్షన్‌ కమిషన్‌ జారీ చేసిన చెల్లుబాటు అయ్యే గుర్తింపు కార్డులు ఉన్నప్పటికీ జర్నలిస్టులను పోలింగ్‌ కేంద్రాల పరిసరాల్లోకి వెళ్లకుండా అడ్డుకున్నారు. కెమెరాలను నిలిపివేయడం, వార్తలు సేకరించే రిపోర్టర్లను బెదిరించడం పరిపాటిగా మారింది.గంటకో ఆంక్ష మారుస్తూ మీడియాపై నిర్బంధం విధించడంపై పాత్రికేయ సంఘాలు, పౌర సమాజంలో తీవ్ర ఆగ్రహం వ్యక్తమవుతోంది.

జగదాంబ: ఎన్నికల విధుల్లో నిష్పక్షపాతంగా వ్యవహరించాల్సిన ప్రిసైడింగ్‌ అధికారిణి.. జనసేన కార్యకర్తలా వ్యవహరించారన్న ఆరోపణలు జీవీఎంసీ 37వ వార్డులో తీవ్ర కలకలం రేపాయి. ఇందిరా మున్సిపల్‌ క్రికెట్‌ స్టేడియంలోని 36/5 పోలింగ్‌ కేంద్రంలో పీఓగా విధులు నిర్వహిస్తున్న అధికారిణి ఓటర్లకు స్లిప్పులు అందిస్తూ.. జనసేనకు ఓటు వేయాలని సూచించినట్లు ఆరోపణలు వెల్లువెత్తాయి. అంతటితో ఆగకుండా పోలింగ్‌ సరళిని పరిశీలించేందుకు వచ్చిన వైఎస్సార్‌సీపీ వార్డు అధ్యక్షురాలు అలుపన లక్ష్మీభవానిని లోపలికి అనుమతించకుండా అడ్డుకోవడం వివాదానికి దారితీసింది. ఎన్నికల విధుల్లో అధికారుల తీరుపై వైఎస్సార్‌సీపీ శ్రేణులు తీవ్ర అభ్యంతరం వ్యక్తం చేశాయి. మేయర్‌ అభ్యర్థికీ అడ్డంకులు ఎన్నికల సరళిని పరిశీలించేందుకు వైఎస్సార్‌సీపీ మేయర్‌ అభ్యర్థి వరుదు కల్యాణి, దక్షిణ నియోజకవర్గ సమన్వయకర్త వాసుపల్లి గణేష్‌కుమార్‌, పార్టీ అధికార ప్రతినిధి కొండా రాజీవ్‌, 37వ వార్డు అభ్యర్థి అలుపన లక్ష్మీభవాని పోలింగ్‌ కేంద్రానికి వెళ్లారు. ఎన్నికల నిబంధనల ప్రకారం ఇతర నాయకులు బయటే ఉండగా.. మేయర్‌, వార్డు అభ్యర్థులు మాత్రమే లోపలికి వెళ్లేందుకు ప్రయత్నించారు. అయితే ప్రిసైడింగ్‌ అధికారిణి వారిని అడ్డుకున్నారు. మేయర్‌ అభ్యర్థికి లోపలికి వెళ్లేందుకు అనుమతి ఉందని చెప్పినా పట్టించుకోలేదు. దీంతో వరుదు కల్యాణి ఎన్నికల అధికారికి ఫోన్‌ చేసి విషయం వివరించడంతో చివరకు ఆమెను లోపలికి అనుమతించారు. జనసేన నేతల మూకుమ్మడి వాగ్వాదం మేయర్‌ అభ్యర్థి పోలింగ్‌ కేంద్రంలోకి వెళ్లడాన్ని గమనించిన జనసేన నాయకులు, కార్యకర్తలు ఒక్కసారిగా అక్కడికి చేరుకుని వాగ్వాదానికి దిగారు. మేయర్‌ అభ్యర్థికి లోపలికి వెళ్లే అవకాశం ఉందని వివరించినా వినిపించుకోకుండా సుమారు గంట పాటు వివాదం కొనసాగించారు. ఈ క్రమంలో పోలీసులు సైతం జనసేన నాయకుల పట్ల ఒకలా, వైఎస్సార్‌సీపీ నాయకుల పట్ల మరోలా వ్యవహరించారు. జనసేన నాయకులను అక్కడే ఉండనిచ్చి.. వైఎస్సార్‌సీపీ నాయకులు, కార్యకర్తలను మాత్రమే బయటకు పంపించేందుకు ప్రయత్నించారు. పోలీసుల తీరుపై ఆగ్రహం వైఎస్సార్‌సీపీ నాయకులను మాత్రమే బయటకు పంపడంపై మాజీ ఎమ్మెల్యే వాసుపల్లి గణేష్‌కుమార్‌ పోలీసులను నిలదీశారు. జనసేన నాయకులను ఎందుకు పంపించడం లేదని ప్రశ్నించారు. దీంతో పోలీసులు, జనసేన నాయకులు కలిసి వైఎస్సార్‌సీపీ నేతలు, కార్యకర్తలతో వాగ్వాదానికి దిగారు. ఎన్నికల కేంద్రం వద్ద అధికారుల తీరు, పోలీసుల వ్యవహారశైలి చూస్తుంటే కూటమి నేతలకు అనుకూలంగా వ్యవహరిస్తున్నారన్న అనుమానాలు కలుగుతున్నాయని ఓటర్లు ఆగ్రహం వ్యక్తం చేశారు. ఎన్నికల విధుల్లో నిష్పక్షపాతంగా ఉండాల్సిన అధికారులు, పోలీసులు ఇలా వ్యవహరించడంపై విమర్శలు వెల్లువెత్తాయి.

విశాఖ స్పోర్ట్స్‌: నేషనల్‌ స్కూల్స్‌ టీమ్‌ చాంపియన్‌షిప్స్‌లో అండర్‌–12, అండర్‌–18 విభాగాల్లో వేలమ్మల్‌ నెక్సస్‌ జట్లు ఆధిక్యంలో కొనసాగుతున్నాయి. విశాఖ వేదికగా ఆదివారం ప్రారంభమైన ఈ టోర్నీలో అండర్‌–12లో 27 జట్లు, అండర్‌–18లో 23 జట్లు పాల్గొంటున్నాయి.తొలిరోజు స్విస్‌ లీగ్‌ పద్ధతిలో మూడు రౌండ్లు నిర్వహించగా, రెండు విభాగాల్లోనూ వేలమ్మల్‌ నెక్సస్‌ జట్లు పరాజయం లేకుండా నాలుగో రౌండ్‌కు చేరాయి. అండర్‌–12లో 1847 సగటు రేటింగ్‌తో, అండర్‌–18లో ఫిడే మాస్టర్‌ మహిష్‌ (2131 రేటింగ్‌) నాయకత్వంలో జట్లు ముందంజలో ఉన్నాయి. అండర్‌–12లో లిశాంత్‌, పూజశ్రీ, సర్వేస్‌, ఆధ్య, అండర్‌–18లో కిషోర్‌, హకీష్‌, గోకుల్‌, కెవిన్‌ విజయాలు సాధించి జట్లకు సహకరించారు. ఈ పోటీలను ఆంధ్ర చెస్‌ సంఘం, ఆల్‌ విశాఖ చెస్‌ సంఘం ఆధ్వర్యంలో నిర్వహిస్తున్నారు. టోర్నీని ఆదివారం ఒడిశా గవర్నర్‌ కంభంపాటి హరిబాబు ప్రారంభించారు. యువ క్రీడాకారులు కష్టపడి సాధన చేసి భవిష్యత్తులో గ్రాండ్‌మాస్టర్లుగా ఎదగాలని ఆయన ఆకాంక్షించారు.

మాజీ మంత్రి గుడివాడ అమర్‌నాథ్‌ అక్కిరెడ్డిపాలెం: మింది హైస్కూల్‌ పోలింగ్‌ కేంద్రంలో మాజీ మంత్రి గుడివాడ అమర్‌నాథ్‌ కుటుంబ సభ్యులతో కలిసి ఓటు హక్కు వినియోగించుకున్నారు. ఓటు హక్కు ప్రతి పౌరుడి చేతిలో ఉన్న ఆయుధమని ఆయన అన్నారు. రాష్ట్రంలో ఎన్నికలు జరుగుతున్న తీరు బాధాకరంగా ఉందన్నారు. ఓటు వేసేందుకు వచ్చే వారిని కూటమి అడ్డుకోవడం దారుణమని, వైఎస్సార్‌సీపీ వెనకడుగు వేయకుండా పోరాటం చేస్తుందని పేర్కొన్నారు. కూటమి ప్రభుత్వం అభద్రతాభావంతో వ్యవహరిస్తోందని, ఓటర్లను భయపెట్టే ప్రయత్నాలు చేస్తోందని ఆరోపించారు. ప్రజలు తీసుకునే ప్రతి నిర్ణయానికి వైఎస్సార్‌సీపీ అండగా నిలిచి పోరాడుతుందని తెలిపారు.

జగదాంబ: ప్రజాస్వామ్య దేశంలో ఇలాంటి ఎన్నికలు ఎప్పడూ చూడలేదని గ్రేటర్‌ విశాఖ మున్సిపల్‌ వైఎస్సార్‌సీపీ మేయర్‌ అభ్యర్థి వరుదు కల్యాణి అన్నారు. నగరంలో ఆదివారం ఎన్నికల సరళి, జరుగుతున్న తీరును తెలుసుకునేందుకు వార్డుల్లో పర్యటించారు. జీవీఎంసీ 37వ వార్డుకు వచ్చిన సందర్భంలో అక్కడ ఎన్నికల అధికారిణి ప్రవర్తించిన తీరుపై ఆమె మండిపడ్డారు. మేయర్‌ అభ్యర్థిగా పోలింగ్‌ బూత్‌లోకి వెళ్లకుండా అడ్డుకున్న తీరుపై కల్యాణి మీడియా సమావేశంలో మాట్లాడారు. ఓ ఎన్నికల అధికారిణి జనసేన కార్యకర్తగా వ్యవహరించారన్నారు. పోలింగ్‌ కేంద్రం వద్ద నిబంధనలు ఉల్లంఘించిన జనసేన కార్యకర్తల విషయంలో ఎలాంటి అభ్యంతరం తెలపలేదన్నారు. ఓటరు స్లిప్పులు ఇస్తూ.. వారు జనసేన పార్టీకి ఓటు వేయాలని ఓటర్లకు చెబుతున్నా అధికారిణి ఎలాంటి అభ్యంతరం తెలపలేదన్నారు. ఆమైపె ఎన్నికల కమిషన్‌కు ఫిర్యాదు చేస్తామన్నారు. వైఎస్సార్‌సీపీ గెలుపు ఖాయమని తెలిసి కూటమి ప్రభుత్వం ఇలాంటి అధికారులతో కుట్రలు చేయిస్తోందన్నారు. ఎన్నికల్లో కచ్చితంగా మేయర్‌ అభ్యర్థిగా గెలుపు తమదేనని కల్యాణి అన్నారు. దక్షణ నియోజకవర్గం సమన్వయకర్త వాసుపల్లి మాట్లాడుతూ.. పోలీసులు పక్షపాతధోరణి చూపుతున్నారన్నారు. మేయర్‌ అభ్యర్థి పోలింగ్‌ కేంద్రం వద్దకు వెళ్తే అడ్డుకోవడ ఏంటని ఆయన ప్రశ్నించారు. నిబంధనలు అందరికీ ఒకేలా ఉండాలన్నారు. పార్టీ అధికార ప్రతినిధి కొండారాజీవ్‌ మాట్లాడుతూ ఎన్నికల అధికారిణి, పోలీసుల తీరుపై ఎన్నికల ఽఅధికారులకు ఫిర్యాదు చేస్తామన్నారు. కార్యక్రమంలో పార్టీ నాయకులు బొల్లవరపు జాన్‌వెస్లీ తదితరులు పాల్గొన్నారు.

విశాఖ స్పోర్ట్స్‌: సబ్‌ జూనియర్‌ అండర్‌–13 బ్యాడ్మింటన్‌ ర్యాంకింగ్‌ టోర్నీలో విశాఖ చిన్నారులు సత్తాచాటారు. బాలికలు, బాలుర డబుల్స్‌ విభాగాల్లో ఫైనల్‌కు చేరిన ప్రవ్య–ప్రియాంక, మోజేష్‌–మోక్షజ్ఞ జోడీలు రన్నరప్‌గా నిలిచాయి. ముంబైలో ఆదివారంతో ముగిసిన ఈ టోర్నీలో ఆంధ్రప్రదేశ్‌కు ప్రాతినిధ్యం వహించిన ఈ రెండు జోడీలు టైటిల్‌ పోరులో చివరి వరకు పోరాడి తృటిలో విజయాన్ని చేజార్చుకున్నాయి. బాలికల డబుల్స్‌ ఫైనల్లో పి.ప్రవ్య, సీహెచ్‌ ప్రియాంక జోడీ అమైర్‌ దుమట్కర్‌–సైన శర్మ జోడీతో తలపడింది. హోరాహోరీగా సాగిన పోరులో 12–15, 15–9, 15–17 స్కోరుతో 1–2 తేడాతో ఓటమి పాలైంది. తొలి గేమ్‌ కోల్పోయినప్పటికీ రెండో గేమ్‌లో అద్భుతంగా పుంజుకుని ప్రత్యర్థికి దీటుగా నిలిచింది. అయితే నిర్ణయాత్మక మూడో గేమ్‌లో స్వల్ప తేడాతో ఓటమి చవిచూసింది. బాలుర డబుల్స్‌ ఫైనల్లో విశాఖకు చెందిన కె.మోజేష్‌–కె. మోక్షజ్ఞ జోడీ లోకేష్‌ గుర్జర్‌–రక్షిత్‌ సింగ్‌ జోడీతో తలపడింది. ఉత్కంఠభరితంగా సాగిన ఈ పోరులో 14–16, 12–15 స్కోరుతో వరుస గేముల్లో ఓటమి చెందింది. తొలి గేమ్‌లో విజయానికి చేరువైనప్పటికీ చివరి దశలో పాయింట్లు కోల్పోయి 14–16తో గేమ్‌ను చేజార్చుకుంది. దీంతో రెండు విభాగాల్లోనూ విశాఖ జోడీలు రన్నరప్‌ ట్రోఫీలతో సరిపెట్టుకున్నాయి.

పెందుర్తి: జనసేన పార్టీ అనకాపల్లి జిల్లా అధ్యక్షుడు, పెందుర్తి ఎమ్మెల్యే పంచకర్ల రమేష్‌బాబు తన ఓటు హక్కును తప్పుడు రీతిలో వినియోగించి, అభాసుపాలయ్యారు. జీవీఎంసీ ఎన్నికల్లో ప్రజాస్వామ్యాన్ని అపహాస్యం చేస్తూ.. తనకు ఓటు లేని చోట ఓటేసి అధికారులను, సిబ్బంది ఉద్యోగాలను ఇరుకున పెట్టారు. కూటమి పొత్తు ధర్మానికి వెన్నుపోటు పొడుస్తూ.. టీడీపీ అభ్యర్థి బరిలో ఉన్న వార్డులో కాకుండా.. జనసేన అభ్యర్థి పోటీలో ఉన్న చోట ఓటు వేశారు. మరోవైపు లేని చోట ఎమ్మెల్యే తన అధికార దర్పంతో ఓటు వేయడంతో దాన్ని కప్పి పుచ్చేందుకు అధికారులు మల్లగుల్లాలు పడుతున్నారు. పోలింగ్‌ సాయంత్రం 5 గంటలకే ముగిసినా రాత్రి 11 అయినా బ్యాలెట్‌ బాక్సులు స్ట్రాంగ్‌రూమ్‌కు తరలించలేదు. నిబంధనలు మీరి అదనపు ఓటు పడడంతో ఆ ఓటును లెక్కింపు రోజు పరిగణలోకి తీసుకుంటారా లేదా అన్నదే మిలియన్‌ డాలర్ల ప్రశ్న. అసలేం జరిగింది? పెందుర్తి జనసేన ఎమ్మెల్యే పంచకర్ల రమేష్‌బాబు సుజాతనగర్‌లో నివాసం ఏర్పాటు చేసుకున్నారు. ఈ క్రమంలో ఆయన ఇల్లు జీవీఎంసీ 117వ వార్డు పరిధిలోకి వచ్చింది. అదే వార్డు ఓటరు జాబితాలో ఎమ్మెల్యే, ఆయన సతీమణి ఓట్లు నమోదయ్యాయి. అయితే ఆదివారం ఎన్నికల సందర్భంగా ఓటు వేసేందుకు వచ్చిన పంచకర్ల నేరుగా 115వ వార్డులోని 8వ నంబర్‌ బూత్‌లోకి వెళ్లి ఓటేసేశారు. ఆయన ఓటేసేందుకు వెళ్లేటపుడు పీవో నాయుడు కనీస నిబంధనలు పాటించలేదు. ఎమ్మెల్యే వెళ్లగానే నేరుగా బ్యాలెట్లు ఇవ్వడంతో క్షణాల్లో పంచకర్ల ఓటు హక్కు వినియోగం జరిగిపోయింది. వెన్నుపోటేనా! ఎమ్మెల్యే పంచకర్ల ఓటు హక్కు ఉన్న 117వ వార్డు నుంచి టీడీపీ అభ్యర్థి అవగడ్డ అప్పలనాయుడు(టీడీపీ ఇన్‌చార్జి గండి బాబ్జీ సన్నిహితుడు) పోటీలో ఉన్నారు. ఆయన నిబంధనలు మీరి వినియోగించుకున్న 115వ వార్డు నుంచి జనసేన అభ్యర్థిగా ఎమ్మెల్యేకు అత్యంత సన్నిహితుడు శానాపతి సోమశేఖర్‌ బరిలో ఉన్నారు. టీడీపీ అభ్యర్థికి ఓటు వేసేందుకు ఇష్టపడని పంచకర్ల ఉద్దేశపూర్వకంగానే తనకు ఓటు లేని చోట.. జనసేన అభ్యర్థి పోటీలో ఉన్న వార్డులో ఓటు వినియోగించుకున్నారని కూటమి నాయకుల నుంచే విమర్శలు వినిపిస్తున్నాయి. అధికారులకు ముచ్చెమటలు ఎమ్మెల్యే పంచకర్ల ఉద్దేశ్యపూర్వక తప్పిదంతో పీవో సహా సదరు బూత్‌లోని ఎన్నికల సిబ్బంది అంతా ఇరుకున పడ్డారు. బూత్‌ నెంబర్‌ 115/8లోని ఓటరు జాబితా ప్రకారం అసలు ఎమ్మెల్యేకు ఓటు హక్కు లేదు. ఈ క్రమంలో ఎమ్మెల్యే ఓటుకు వచ్చారన్న అలవిమాలిన భక్తితో నేరుగా బ్యాలెట్‌లను అధికారులు ఇవ్వడం.. ఇదే అదను అని తన పార్టీకి చెందిన అభ్యర్థి బరిలో ఉన్న వార్డులో పంచకర్ల ఓటేయడం చకచకా జరిగిపోయాయి. అయితే పంచకర్ల మాయాజాలం కాసేపటికే బయటకు రావడంతో పీవో సహా ఇతర సిబ్బంది తలలు పట్టుకున్నారు. పోలింగ్‌ ముగిసి ఆరేడు గంటలైనా బ్యాలెట్‌ బాక్స్‌లను తరలించలేదు. మరోవైపు జరిగిన ఘటనపై స్పందించేందుకు అధికారులు మీడియాకు ముఖం చాటేశారు. మొత్తానికి ప్రజాస్వామ్యాన్ని నిలబెట్టాల్సిన ఓ ప్రజాప్రతినిధి తన ఓటునే అపహాస్యం చేసిన తీరుపై సర్వాత్రా విమర్శలు వెల్లువెత్తుతున్నాయి.

మహారాణిపేట: ప్రసూతి, సీ్త్ర వైద్య రంగాల్లో ఆధునిక సాంకేతిక పరిజ్ఞానం, నూతన చికిత్సా విధానాలపై నిపుణులు సవివరంగా చర్చించారు. విశాఖ ప్రసూతి, సీ్త్ర వైద్య నిపుణుల సంఘం (ఓజీఎస్‌వీ) ఆధ్వర్యంలో జరుగుతున్న 60వ వార్షిక సదస్సు, వజ్రోత్సవ వేడుకల్లో భాగంగా ఆదివారం రెండో రోజు శాసీ్త్రయ కార్యక్రమాలు నిర్వహించారు. ఈ సందర్భంగా ‘ప్రసూతి సమయంలో రక్తంలో ఇన్ఫెక్షన్‌ (ఆబ్‌స్టెట్రిక్స్‌ సెప్సిస్‌)’ అంశంపై డాక్టర్‌ విద్యాతోభి, డాక్టర్‌ అచ్యుత్‌ మీనన్‌ స్మారక ప్రసంగం చేశారు. ‘గురువు వారసత్వం.. ప్రసూతి, సీ్త్ర వైద్య రంగంలో గతం నుంచి భవిష్యత్తుకు వారధి’ అనే అంశంపై డాక్టర్‌ టి. రాధ, డాక్టర్‌ జి.ఆర్‌.కె. రాజు స్మారక ప్రసంగం అందించారు. సీ్త్ర వైద్య చికిత్సల్లో రోబోటిక్‌ సాంకేతికత వినియోగంపై డాక్టర్‌ మంజుల అనగాని కీలకోపన్యాసం చేశారు. ఆంధ్రా మెడికల్‌ కాలేజీ ప్రిన్సిపల్‌, ఓజీఎస్‌వీ అధ్యక్షురాలు డాక్టర్‌ సంధ్యాదేవి, కేజీహెచ్‌ సూపరింటెండెంట్‌ డాక్టర్‌ ఐ.వాణి, కార్యదర్శి డాక్టర్‌ జి.సునందారాణి నాయకత్వంలో సదస్సు జరిగింది. కార్యవర్గ సభ్యులు డాక్టర్‌ జి.వనజ, డాక్టర్‌ డి. రేఖ, డాక్టర్‌ వై. సృజన్‌ తదితరులు సహకరించారు.

ఆనందపురం: మండలంలోని వెల్లంకి పంచాయతీ బొడ్డపాలెం గ్రామం వైఎస్సార్‌ కాలనీలో విషాద ఘటన చోటుచేసుకుంది. తల్లి మందలించడంతో మనస్తాపానికి గురైన ఓ బాలుడు (14) ఆత్మహత్య చేసుకున్నాడు. పోలీసుల వివరాల ప్రకారం.. కాలనీకి చెందిన గొలగాని గౌరీకి ఒక కుమార్తె, ఇద్దరు కుమారులు ఉన్నారు. పెద్ద కుమారుడు తేజ వెల్లంకి జెడ్పీ ఉన్నత పాఠశాలలో తొమ్మిదో తరగతి చదువుతున్నాడు. కొంతకాలంగా చదువుపై ఆసక్తి చూపకపోవడంతో కూలి పనులు చేసుకునే తల్లిదండ్రులు చదువుకోవాలని పలుమార్లు మందలించారు. ఈ క్రమంలో శనివారం ఉదయం ఆడుకోవడానికి వెళ్లిన తేజ రాత్రి ఇంటికి తిరిగొచ్చాడు. దీంతో తల్లి ‘ఎప్పుడూ ఆటలేనా.. కాస్త చదువుకోవచ్చు కదా’ అని మందలించడంతో బాలుడు మనస్తాపానికి గురయ్యాడు. మేడ మీద అందరూ ఉన్న సమయంలో కింద ఉన్న గది ప్రధాన ద్వారానికి గడియ పెట్టి లోపలకి వెళ్లి సీలింగ్‌ హుక్‌కి చున్నీతో ఉరి వేసుకున్నాడు. కొద్దిసేపటి తర్వాత తల్లి గమనించి, చుట్టుపక్కల వారి సహాయంతో వెంటనే ఆస్పత్రికి తరలించింది. అయితే అప్పటికే బాలుడు మృతి చెందినట్లు భీమిలి సీహెచ్‌సీ వైద్యులు నిర్ధారించారు. తండ్రి ఫిర్యాదు మేరకు పోలీసులు కేసు నమోదు చేసి దర్యాప్తు చేస్తున్నారు.

ద్వారకానగర్‌: ఎన్నికలు ప్రశాంతంగా, పారదర్శకంగా నిర్వహించాల్సిన బాధ్యత పోలీసులపై ఉంది. అయితే ఆదివారం జరిగిన జీవీఎంసీ ఎన్నికల పోలింగ్‌ సందర్భంగా పోలీసుల వ్యవహారశైలి అనేక అనుమానాలకు, తీవ్ర విమర్శలకు తావిచ్చింది. ఎన్నికల నిబంధనలను ఉల్లంఘిస్తూ పోలింగ్‌ కేంద్రాల వద్ద కూటమి నేతలు హడావుడి సృష్టించినా పోలీసులు ప్రేక్షక పాత్రకే పరిమితమయ్యారనే ఆరోపణలు వెల్లువెత్తుతున్నాయి. అధికార పక్ష నేతల విషయంలో ఒక రకంగా, ప్రతిపక్ష నేతల విషయంలో మరో రకంగా వ్యవహరించిన పోలీసుల తీరుపై ప్రజాస్వామ్యవాదులు తీవ్ర అసంతృప్తి వ్యక్తం చేస్తున్నారు. పలు పోలింగ్‌ కేంద్రాల్లో నిబంధనలకు విరుద్ధంగా కూటమి నాయకులు హల్‌ చల్‌ చేసినా, పోలీసులు చోద్యం చూడటం వారి వైఫల్యానికి అద్దం పడుతోంది. పోలీసుల వ్యవహారశైలిపై ఆగ్రహం అక్కయ్యపాలెం, మధురవాడ, భీమిలి తదితర ప్రాంతాల్లో కూటమి నేతలు అధికార దుర్వినియోగానికి పాల్పడ్డారు. ఎన్నికల అధికారులను, పోలీసులను బెదిరించి తమ అభ్యర్థులకే ఓట్లు పడేలా చక్రం తిప్పారన్న విపక్షాల ఆరోపణలు కలకలం రేపుతున్నాయి. భీమిలిలో పోలీసులే స్వపక్ష నేతలకు కొమ్ముకాశారని ప్రతిపక్ష, స్వతంత్ర అభ్యర్థులు తీవ్ర ఆగ్రహం వ్యక్తం చేశారు. మధురవాడ వాంబే కాలనీలో పోలింగ్‌ ముగిసే సమయానికి కూటమి నేతలు సృష్టించిన ఉద్రిక్తతలపై పోలీసులు ఎలాంటి చర్యలూ తీసుకోకపోవడం అనుమానాలకు తావిస్తోంది. ఇక అక్కయ్యపాలెం బూత్‌ వద్ద తన ఓటును ఎవరో ముందే వేసేశారంటూ ఓ బాధితుడు కన్నీరుమున్నీరై నిరసన తెలపడం ఎన్నికల సిబ్బంది వైఫల్యానికి నిదర్శనం. నిబంధనలు కాలరాసినా.. కూటమి నేతలు నిబంధనలను కాలరాస్తూ ఓటర్లను ప్రలోభపెట్టినా, బహిరంగంగా ప్రచారం చేసినా పోలీసులు చూసీచూడనట్లు వ్యవహరించారు. విపక్షాల పట్ల కఠినంగా, అధికార పక్షం పట్ల మెతక వైఖరితో వ్యవహరించారనే విమర్శలు బహిరంగంగానే వినిపిస్తున్నాయి. సీపీ ఆదేశాలను బేఖాతరు చేస్తూ క్షేత్రస్థాయిలో పోలీసులు వ్యవహరించిన తీరుపై సర్వత్రా విమర్శలు వ్యక్తమవుతున్నాయి. పోలింగ్‌ బూత్ల వద్ద కూటమి నేతలు, అభ్యర్థుల భర్తల ఓవర్‌యాక్షన్‌తో ఘర్షణ వాతావరణం, తోపులాటలు చోటు చేసుకున్నా పోలీసులు కనీసం నియంత్రించలేని అసమర్థ స్థితిలో కూరుకుపోయారు. గతంలో ఎన్నడూ లేనివిధంగా పోలీసులు ఇంతటి ఉదాసీన వైఖరి ప్రదర్శించడం ప్రజాస్వామ్య వ్యవస్థకే ముప్పని విపక్ష నేతలు, ప్రజాస్వామ్యవాదులు మండిపడుతున్నారు.

అల్లిపురం: జీవీఎంసీ ఎన్నికల్లో వైఎస్సార్‌ సీపీ అభ్యర్థుల విజయం కోసం కృషి చేసిన లీగల్‌ సెల్‌ నాయకులు, కార్యకర్తలు, కుటుంబ సభ్యులకు జిల్లా లీగల్‌ సెల్‌ అధ్యక్షుడు బాజీ నాయుడు కృతజ్ఞతలు తెలిపారు. ఎన్నికల ప్రక్రియలో పార్టీ అభ్యర్థులకు సహకరించిన రాష్ట్ర కమిటీ నాయకులు, లీగల్‌ సెల్‌ సభ్యుల సేవలను ఆయన అభినందించారు. నవంబర్‌ 3న జరిగే ఓట్ల లెక్కింపు ప్రక్రియలోనూ కమిటీ సభ్యులు అందుబాటులో ఉండి, ఫలితాలు వెలువడే వరకు సమన్వయంతో బాధ్యతలు నిర్వహించాలని కోరారు. విశాఖ మేయర్‌ అభ్యర్థి వరుదు కల్యాణి విజయం సాధిస్తారన్న ఆశాభావాన్ని వ్యక్తం చేసిన బాజీ నాయుడు, ఆమెకు మెజార్టీ లభిస్తుందని తెలిపారు. కార్యక్రమంలో లీగల్‌ సెల్‌ రాష్ట్ర ప్రధాన కార్యదర్శి కరణం కృష్ణ, రాష్ట్ర అధికార ప్రతినిధి పాకా సత్యనారాయణ, రాష్ట్ర కార్యదర్శి ఊదా శ్రీనివాస్‌, ఈస్ట్‌ నియోజకవర్గ జిల్లా ప్రధాన కార్యదర్శి మొల్లి రామారావు, జిల్లా కార్యదర్శి తులసీదాస్‌ తదితరులు పాల్గొన్నారు.

మేయర్‌ పీఠానికి 15 మంది ● 120 వార్డుల్లో 573 మంది అభ్యర్థులు పోటీ 18.37 లక్షల మంది ఓటర్లు ● 1,990 పోలింగ్‌ కేంద్రాలు సిద్ధం సమయం ఉదయం 7 నుంచి సాయంత్రం 5 గంటల వరకు.. సాక్షి, విశాఖపట్నం: జీవీఎంసీ ఎన్నికల పోలింగ్‌కు సర్వం సిద్ధమైంది. ఆదివారం ఉదయం 7 నుంచి సాయంత్రం 5 గంటల వరకు పోలింగ్‌ జరగనుంది. మేయర్‌ పీఠం కోసం 15 మంది అభ్యర్థులు, 120 వార్డుల్లో కార్పొరేటర్‌ స్థానాల కోసం 573 మంది అభ్యర్థులు పోటీ పడుతున్నారు. మొత్తం 18,37,901 మంది ఓటర్లు తమ ఓటు హక్కును వినియోగించుకోనున్నారు. ఈ నెల 3న ఓట్ల లెక్కింపు చేపట్టనున్నారు. మేయర్‌ పీఠానికి 15 మంది పోరు గ్రేటర్‌ మేయర్‌ పీఠాన్ని దక్కించుకునేందుకు 15 మంది అభ్యర్థులు బరిలో నిలిచారు. వైఎస్సార్‌సీపీ తరఫున వరుదు కల్యాణి, కాంగ్రెస్‌ నుంచి దేవర నాగసునందాదేవి, టీడీపీ నుంచి ముక్కా శ్రావణి, బీఎస్పీ నుంచి కరణం కీర్తన గ్రేస్‌, భారత చైతన్య యువజన పార్టీ నుంచి నమ్మి భవాని పోటీ చేస్తున్నారు. మిగిలిన అభ్యర్థులు స్వతంత్రులుగా బరిలో ఉన్నారు. రెండు బ్యాలెట్‌ పత్రాలు.. రెండు ఓట్లు ఈ ఎన్నికల్లో మేయర్‌ను ప్రజలు నేరుగా ఎన్నుకునే విధానం అమల్లో ఉండటంతో ప్రతి ఓటరు రెండు బ్యాలెట్‌ పత్రాలపై ఓటు వేయాల్సి ఉంటుంది. మేయర్‌ అభ్యర్థికి గులాబీ రంగు, వార్డు కార్పొరేటర్‌ అభ్యర్థికి తెలుపు రంగు బ్యాలెట్‌ పత్రాలను కేటాయించారు. భారీ బందోబస్తు.. 14,334 మంది సిబ్బంది ఎన్నికలను ప్రశాంతంగా నిర్వహించేందుకు 4,500 మందికి పైగా పోలీసు సిబ్బందితో బందోబస్తు ఏర్పాటు చేశారు. పోలింగ్‌ ప్రక్రియ నిర్వహణకు 14,334 మంది సిబ్బందిని నియమించారు. వీరితోపాటు 82 మంది రిటర్నింగ్‌, అసిస్టెంట్‌ రిటర్నింగ్‌ అధికారులు, 56 మంది మాస్టర్‌ ట్రైనర్లు, 95 మంది నోడల్‌, సహాయ అధికారులు, 201 మంది రూట్‌ అధికారులు, 61 మంది సెక్టార్‌ అధికారులు, 10 మంది జోనల్‌ స్పెషల్‌ ఆఫీసర్లను నియమించారు. ఎన్నికల పర్యవేక్షణకు 379 మంది మైక్రో అబ్జర్వర్లు, 21 ఎన్నికల ఖర్చుల పరిశీలక బృందాలు, 11 ఎంసీసీ బృందాలు, 11 ఫ్లయింగ్‌ స్క్వాడ్‌ బృందాలు, 20 స్టాటిక్‌ సర్వైలెన్స్‌ బృందాలు, రెండు వీడియో వ్యూయింగ్‌ బృందాలను ఏర్పాటు చేశారు. ఎన్నికల సామగ్రి పంపిణీ పూర్తి పోలింగ్‌కు అవసరమైన ఎన్నికల సామగ్రిని శనివారం ఉదయం జీవీఎంసీ పరిధిలోని 10 జోన్లలో ఏర్పాటు చేసిన పంపిణీ కేంద్రాల ద్వారా సిబ్బందికి అందజేశారు. ప్రతి కేంద్రంలో రిజిస్ట్రేషన్‌ కేంద్రం, పీఓ/ఏపీఓ కౌంటర్‌, పబ్లిక్‌ అడ్రస్‌ సిస్టమ్‌, పోలీసు కౌంటర్‌, ఆహార పంపిణీ కౌంటర్‌ తదితర ఏర్పాట్లు చేశారు. మీ ఓటు ఎక్కడుందంటే.. ఓటర్లు తమ ఓటు వివరాలు, వార్డు, పోలింగ్‌ కేంద్రం నంబరు, చిరునామా తెలుసుకునేందుకు జీవీఎంసీ అధికారిక వెబ్‌సైట్‌ (www.gvmc. gov.in) (http://www.gvmc. gov. in)ను సందర్శించవచ్చు. జోన్లు వార్డులు ఓటర్లు పోలింగ్‌ కేంద్రాలు భీమిలి 1–5 66,446 78 మధురవాడ 6–11, 120 1,49,452 162 తూర్పు 12–29 2,96,124 309 దక్షిణ 30–45 2,17,817 249 ఉత్తర 46–65 2,91,692 302 పశ్చిమ 66–82 2,22,029 245 గాజువాక 83–101 2,98,228 329 అగనంపూడి 102–106 69,796 75 అనకాపల్లి 107–112 76,950 89 పెందుర్తి 113–119 1,49,367 152120 వార్డులు.. 573 మంది అభ్యర్థులు

డాబాగార్డెన్స్‌: ప్రతి ఓటరూ తమ ఓటు హక్కును తప్పనిసరిగా వినియోగించుకోవాలని కలెక్టర్‌ అభిషిక్త్‌ కిశోర్‌, జీవీఎంసీ కమిషనర్‌, అదనపు ఎన్నికల అధికారి కేతన్‌గార్గ్‌ పిలుపునిచ్చారు. ఎలాంటి ప్రలోభాలు, ఒత్తిళ్లకు లొంగకుండా స్వేచ్ఛగా, నిర్భయంగా ఓటేయాలని సూచించారు. జీవీఎంసీ ఎన్నికల నిర్వహణపై సమీక్షించిన ఆయన, శనివారం పది జోన్లలోని ఎన్నికల సామగ్రి పంపిణీ కేంద్రాలను పరిశీలించారు. పోలింగ్‌ సజావుగా, పారదర్శకంగా జరిగేలా అధికారులు, సిబ్బంది సమయపాలన పాటిస్తూ బాధ్యతతో విధులు నిర్వహించాలని ఆదేశించారు. పోలింగ్‌ సమయంలో సమస్యలు తలెత్తకుండా ముందస్తు జాగ్రత్తలు తీసుకోవాలని సూచించారు. రెండు బ్యాలెట్లపై అవగాహన : మేయర్‌ ఎన్నికకు పింక్‌ రంగు బ్యాలెట్‌ పేపరు, వార్డు కార్పొరేటర్‌ ఎన్నికకు తెలుపు రంగు బ్యాలెట్‌ పేపరు వినియోగించనున్నట్లు కమిషనర్‌ తెలిపారు. పోలింగ్‌ కేంద్రాల్లో ప్రిసైడింగ్‌ అధికారులు బ్యాలెట్‌ పేపర్లను మడతపెట్టి బ్యాలెట్‌ బాక్సుల్లో వేసే విధానాన్ని వివరిస్తారని చెప్పారు. ఎన్నికలకు సంబంధించి సమస్యలు, ఫిర్యాదులు ఉంటే టోల్‌ఫ్రీ నంబరు 1800 4250 0009కు ఫోన్‌ చేయాలని కేతన్‌గార్గ్‌ సూచించారు.

సాక్షి, విశాఖపట్నం: నగర భవిష్యత్తును నిర్ణయించే ఓటు హక్కు వినియోగంలో విశాఖ ఓటర్లు ఎందుకు వెనుకబడుతున్నారు? ఎన్నికలొచ్చినప్పుడు చర్చలు.. సోషల్‌ మీడియాలో రాజకీయాలపై విశ్లేషణలు.. నగర సమస్యలపై ఆగ్రహావేశాలు.. కానీ ఓటు వేసే సమయానికి మాత్రం నిర్లక్ష్యం! గ్రేటర్‌ విశాఖ మున్సిపల్‌ కార్పొరేషన్‌ ఎన్నికల చరిత్రను పరిశీలిస్తే కనిపిస్తున్న విరుద్ధ చిత్రమిది. ఆరు ఎన్నికల్లో ఒక్కసారి మాత్రమే 70 శాతం పోలింగ్‌ నమోదైంది. ఐదు ఎన్నికల్లో ఓటింగ్‌ శాతం 60 దాటలేదు. నగర పాలనపై అసంతృప్తి వ్యక్తం చేసేవారిలోనూ ఓటు హక్కు వినియోగంపై నిర్లిప్తత కనిపిస్తుండటం ఆందోళన కలిగిస్తోంది. ఈసారైనా ఓటర్లు మౌనం వీడి పోలింగ్‌ కేంద్రాల బాట పడతారా? నగర భవిష్యత్తును నిర్ణయించే బాధ్యతను భుజానికెత్తుకుంటారా? ఆరు ఎన్నికలు.. మారని ఓటింగ్‌ తీరు గ్రేటర్‌ విశాఖలో ఓటింగ్‌ శాతం పెరగకపోవడం ఒక్క ఎన్నికతో మొదలైన సమస్య కాదు. దశాబ్దాలుగా ఇదే ధోరణి కొనసాగుతోంది. 1981లో జరిగిన ఎన్నికల్లో 70.10 శాతం పోలింగ్‌ నమోదైంది. అదే అత్యధికం. ఆ తర్వాత జరిగిన ఎన్నికల్లో మాత్రం ఓటర్ల భాగస్వామ్యం ఆశించిన స్థాయికి చేరలేదు. 1987లో 56.83 శాతం, 1995లో 49.02 శాతం, 2000లో 49.63 శాతం, 2007లో 52.48 శాతం పోలింగ్‌ నమోదైంది. 2021లో కొంత మెరుగుదల కనిపించినా.. ఓటింగ్‌ శాతం 59.41కే పరిమితమైంది. అంటే, ఆరు ఎన్నికల్లో ఐదుసార్లు 60 శాతం మార్కును కూడా విశాఖ దాటలేకపోయింది. ఏడు లక్షల మంది ఓటుకు దూరం 2021 ఎన్నికల గణాంకాలు నగర ఓటర్ల నిర్లక్ష్యానికి అద్దం పడుతున్నాయి. అప్పట్లో జీవీఎంసీ పరిధిలో 17,26,158 మంది ఓటర్లు ఉండగా.. వారిలో 10,25,442 మంది మాత్రమే ఓటు హక్కు వినియోగించుకున్నారు. మిగిలిన 7,00,716 మంది ఓటు వేయలేదు. అంటే మొత్తం ఓటర్లలో సుమారు 40.59 శాతం మంది పోలింగ్‌కు దూరంగా ఉన్నారు. మేయర్‌ పీఠాన్ని ఎవరు దక్కించుకుంటారన్న రాజకీయ పోటీ ఒకవైపు ఉంటే.. ప్రజాస్వామ్య ప్రక్రియలో ఎంతమంది భాగస్వాములవుతారన్న ప్రశ్న మరోవైపు నిలుస్తోంది. ఓటు వేయకపోవడానికి సవాలక్ష సాకులు ‘నా ఒక్క ఓటుతో ఏమవుతుంది?’.. ‘ఒక్కరోజు సెలవు దొరికింది.. ఇంట్లోనే ఉంటా!’.. ‘పోలింగ్‌ కేంద్రంలో గంటల తరబడి వేచి ఉండాలా?’.. ‘ఓటరు జాబితాలో పేరు ఉందో లేదో తెలియదు!’.. ఎన్నికల సమయంలో వినిపించే సమాధానాలివి. ఓటు హక్కు వినియోగించుకోకపోవడానికి ఒక్కొక్కరు ఒక్కో కారణం చెబుతున్నారు. కానీ ప్రతి ఓటూ విలువైనదే. పోటీ హోరాహోరీగా ఉన్నప్పుడు కొద్దిపాటి ఓట్ల తేడా కూడా ఫలితాన్ని మార్చగలదు. తమ సమస్యలపై పాలకులను ప్రశ్నించాలన్నా, నగర పాలనలో మార్పు కోరాలన్నా పౌరుల చేతిలో ఉన్న అత్యంత కీలకమైన ప్రజాస్వామ్య ఆయుధం ఓటు. ప్రశ్నించేవారు.. ఓటేయడంలోనూ ముందుండాలి రోడ్లు బాగోలేవని.. తాగునీరు రావడం లేదని.. డ్రైనేజీ సమస్యలు పరిష్కారం కావడం లేదని.. పారిశుధ్యం అధ్వానంగా ఉందని నగరవాసులు నిత్యం ఆవేదన వ్యక్తం చేస్తుంటారు. పాలకుల పనితీరుపై అసంతృప్తి ఉన్నా.. తమ అభిప్రాయాన్ని ఓటు రూపంలో వ్యక్తం చేయకపోతే ప్రజాస్వామ్య ప్రక్రియలో భాగస్వామ్యం అసంపూర్తిగానే మిగులుతుంది. ఎన్నికల్లో ఓటు వేయడం అంటే ఒక పార్టీకి మద్దతివ్వడమే కాదు.. తమ ప్రాంతానికి ఎలాంటి పాలన కావాలో నిర్ణయించుకోవడం. పోటీ చేసే అభ్యర్థుల పనితీరు, విశ్వసనీయత, నగర సమస్యలపై వారి వైఖరిని బేరీజు వేసుకుని ఓటు వేయడం ప్రతి పౌరుడి బాధ్యత. ఈసారైనా గడప దాటుదాం! గత ఎన్నికల గణాంకాలు ఒక హెచ్చరిక. నగర అభివృద్ధిపై ఆసక్తి చూపే పౌరులు ఓటు హక్కు వినియోగంలోనూ అదే చైతన్యం ప్రదర్శించాల్సిన అవసరాన్ని గుర్తుచేస్తున్నాయి. ఓటరు జాబితాలో తమ పేరు ఉందో లేదో ముందుగానే చూసుకోవడం.. పోలింగ్‌ కేంద్రం వివరాలు తెలుసుకోవడం.. ఎన్నికల రోజున ఓటు వేసేందుకు సమయం కేటాయించడం వంటి చిన్నచిన్న చర్యలతోనే పెద్ద మార్పుకు పునాది పడుతుంది. ఓటు వేయడం సెలవు దినంలో చేసే అదనపు పని కాదు.. పౌరుడిగా నిర్వర్తించాల్సిన కనీస బాధ్యత. నగర భవిష్యత్తును నిర్ణయించే అవకాశం వచ్చినప్పుడు నిర్లక్ష్యానికి తావివ్వకుండా ప్రతి ఒక్కరూ పోలింగ్‌ కేంద్రానికి వెళ్లాలి.

సాక్షి, విశాఖపట్నం: ఓటరు మహాశయా.. మీకెవరైనా ఓటరు స్లిప్పుతో పాటు డబ్బులిచ్చారా? నోట్లు కొత్తగా ఉన్నాయని మురిసిపోతున్నారా? అయితే జాగ్రత్త.. అందులో నకిలీ నోట్లున్నాయేమో.. ఒక్కసారి చెక్‌ చేసుకోండి సుమా! అభివృద్ధిని విస్మరించి.. విశాఖ నగరాన్ని విధ్వంసం చేస్తున్న కూటమి నేతలు.. ఎలాగైనా జీవీఎంసీ ఎన్నికల్లో గెలవాలని అడ్డదారులు తొక్కుతున్నారనే ఆరోపణలున్నాయి. సార్వత్రిక ఎన్నికల్లో హామీలతో మోసం చేసిన కూటమి ప్రభుత్వం.. గ్రేటర్‌ ఎన్నికల్లో డబ్బులతో ఓటర్లను ప్రలోభపెట్టేందుకు చూస్తోందనే విమర్శలు వినిపిస్తున్నాయి. ఇప్పుడు పంపిణీ చేసే డబ్బుల్లోనూ మోసం జరిగిందనే అనుమానాలు కలకలం రేపుతున్నాయి. ఓటుకు.. దొంగ ‘నోట్లా?’ ఎన్నికలొచ్చాయంటే ఓటర్లకు పండగే! కానీ, ఆ పండగనూ ‘దొంగ’ క్యాష్‌ చేసుకుంటున్నారా? ఓటుకు నోటు ఇవ్వడం పాత ట్రెండ్‌.. ఇచ్చిన నోట్లలోనే నకిలీలు కలపడం కొత్త ట్రెండ్‌ అనే అనుమానాలు వ్యక్తమవుతున్నాయి. రెండు రోజుల క్రితం నగరంలో పట్టుబడ్డ నకిలీ కరెన్సీ ముఠా వ్యవహారం ఓటర్లలో గుబులు రేపుతోంది. కూటమి నేతలు ఇచ్చిన నోట్లలో ఏవి అసలో.. ఏవి నకిలీవోనని జనం ఆందోళన చెందుతున్నారు. జగదాంబ జంక్షన్‌ సమీపంలోని వీ–స్టార్‌ హోటల్‌లో పోలీసులు మెరుపు దాడి చేసి.. 105వ నంబర్‌ గదిలో ఉన్న నలుగురిని అదుపులోకి తీసుకున్నారు. లగేజీ బ్యాగులు తెరిచి చూడగా కట్టలకొద్దీ రూ.500 నోట్ల కలర్‌ జిరాక్స్‌ కాపీలు బయటపడ్డాయి. మొత్తం 200 కట్టల్లో.. ఒక్కో కట్టలో 66 కాపీల చొప్పున 13,200 కాపీలను గుర్తించినట్లు సమాచారం. వీటి ముఖ విలువ రూ.66 లక్షలు. దీంతో ఓటర్లకు పంపిణీ చేసిన డబ్బులపైనా అనుమానాలు మొదలయ్యాయి. కూటమి నేతల హస్తం ఉందా? ఎన్నికల వేళ ఈ ముఠా పట్టుబడటం రాజకీయంగా చర్చనీయాంశమైంది. ఈ వ్యవహారం వెనుక కూటమి నేతల హస్తం ఉందనే ఆరోపణలు వినిపిస్తున్నాయి. కొన్ని చోట్ల ఒక్కో ఓటుకు రూ.3 వేల చొప్పున పంపిణీ చేశారనే ప్రచారం సాగుతోంది. ఆ డబ్బుల్లో అసలు నోట్లతోపాటు నకిలీలను కలిపారనే అనుమానాలూ వ్యక్తమవుతున్నాయి. 7వ వార్డులో ఓ నాయకుడు తొలుత రూ.1,500 ఇచ్చి.. తర్వాత మరో రూ.700 ఇచ్చారనే ప్రచారం జరుగుతోంది. ఎందుకిలా అని అడిగితే.. తన వార్డు నంబర్‌ ఏడని, అదే తన సెంటిమెంట్‌ నంబర్‌ కావడంతో మరో రూ.700 ఇస్తున్నానని చెప్పినట్లు సమాచారం. ఇలా పలు చోట్ల జరిగిందనే చర్చ సాగుతోంది. నకిలీ నోట్ల వ్యవహారం బయటపడటంతో ఓటర్లు గందరగోళానికి గురవుతున్నారు. డబ్బులు తీసుకుని మురిసిపోయిన జనం.. అవి నకిలీవేమోనని ఆందోళన చెందుతున్నారు. ప్రజాస్వామ్యాన్ని డబ్బుతో కొనాలనుకోవడమే తప్పు.. అందులోనూ నకిలీ నోట్లతో మోసం చేశారనే అనుమానాలు మరింత కలకలం రేపుతున్నాయి.

ద్వారకా నగర్‌: స్థానిక ఎన్నికలలో కూటమి తరఫున రౌడీలు వకాల్తా పుచ్చుకుని రాజకీయ ముసుగులో చేస్తున్న అరాచకాలపై స్పందించని పోలీసుల తీరుపై సర్వత్రా విమర్శలు వెల్లువెత్తుతున్నాయి. అదే సమయంలో ప్రతిపక్ష పార్టీలపై నిబంధనల పేరుతో విరుచుకుపడుతున్న తీరుపైనా అభ్యంతరాలు వ్యక్తమవుతున్నాయి. నగరంలోని పలు వార్డుల్లో బెదిరింపులు, ప్రలోభాలకు రౌడీ గ్యాంగులు పాల్పడుతున్నా పోలీసులు చోద్యం చూస్తున్నారనే విమర్శలు వినిపిస్తున్నాయి. ఎన్నికల అవసరాల కోసం కొందరు నేతలు రౌడీ గ్యాంగులను చేరదీసి, వారికి ఆశ్రయం కల్పించారనే ఆరోపణలు ఉన్నాయి. రోజువారీ జీతభత్యాలతో పాటు మందు, విందు సౌకర్యాలు కూడా కల్పిస్తుండటంతో రౌడీషీటర్లు రాజకీయ పార్టీల శిబిరాలను వీడడం లేదు. కూటమి నాయకుల కనుసన్నల్లోనే అక్రమంగా పంపిణీ చేసే డబ్బు, మద్యం ఈ రౌడీ గ్యాంగుల ద్వారానే ఆయా వార్డుల్లో ప్రజలకు చేరుతున్నాయనే ఆరోపణలు ఉన్నాయి. పోలీసుల చర్యలు శూన్యం విశాఖ గ్రేటర్‌ కార్పొరేషన్‌ ఎన్నికల నేపథ్యంలో శాంతిభద్రతలకు ఎలాంటి విఘాతం కలగకుండా, అవాంఛనీయ సంఘటనలు చోటుచేసుకోకుండా విశాఖ పోలీసులు ముందస్తు చర్యలు చేపట్టినప్పటికీ, ఫలితం మాత్రం శూన్యమంటూ పలువురు ఎద్దేవా చేస్తున్నారు. కూటమి అభ్యర్థులకు అనుకూలంగా వ్యవహరిస్తూ, ప్రతిపక్ష పార్టీల అభ్యర్థులకు నిబంధనల పేరుతో ఇబ్బందులు కలిగిస్తున్నారనే ఆరోపణలు ప్రస్తుతం చర్చనీయాంశంగా మారాయి. దీనికి తోడు రౌడీషీటర్ల హడావుడి కూడా పెరిగిందనే విమర్శలు వినిపిస్తున్నాయి. ఓటర్లకు బెదిరింపులు.. తాము పనిచేస్తున్న పార్టీ నేతలకే ఓట్లు వేయాలని రౌడీలు ప్రజలను దమాయించి బెదిరింపులకు పాల్పడుతున్నారనే ఆరోపణలు ఉన్నాయి. ఇవన్నీ పోలీసులు, ప్రభుత్వ ఎన్నికల యంత్రాంగం దృష్టికి రాకుండా చాపకింద నీరులా సాగుతున్నాయని పలువురు పేర్కొంటున్నారు. ఈ క్రమంలో రాజకీయ నాయకుల నుంచి అందినకాడికి వేలల్లో, లక్షల్లో డబ్బులు వసూలు చేస్తున్నారనే ఆరోపణలు కూడా ఉన్నాయి. కొందరు రౌడీషీటర్ల విషయంలో పోలీసులు చూసీచూడనట్లు వ్యవహరిస్తున్నారనే ఆరోపణలు ఉన్నాయి. రాజకీయ నేతల అండదండలు ఉన్న వారిపై చర్యలు తీసుకోవడంలో పోలీసులు వెనుకడుగు వేస్తున్నారనే విమర్శలు వినిపిస్తున్నాయి. రౌడీషీటర్ల కదలికలపై నిరంతర నిఘా, చట్టపరమైన చర్యలు కొనసాగాల్సిన అవసరం ఉంది. అయితే రాజకీయ నేతలతో సన్నిహితంగా తిరుగుతున్న వారిపై పోలీసులు ఎలాంటి చర్యలు తీసుకుంటున్నారన్నది ప్రస్తుతం చర్చనీయాంశంగా మారింది. రంగంలో 847 మంది రౌడీ షీటర్లు నగరంలో రౌడీషీటర్ల కదలికలు కలవరపెడుతున్నాయి. విశాఖ పోలీస్‌ కమిషనరేట్‌ పరిధిలో మొత్తం 933 మంది రౌడీషీటర్లు ఉండగా, వారిలో 86 మంది ప్రస్తుతం జైళ్లలో ఉన్నారు. మిగిలిన 847 మంది నగరంలోనే ఉన్నట్లు గణాంకాలు వెల్లడిస్తున్నాయి. స్థానిక సంస్థల ఎన్నికల నేపథ్యంలో వీరి కదలికలు ఇప్పుడు చర్చనీయాంశంగా మారాయి. శాంతిభద్రతలకు విఘాతం కలగకుండా పోలీసులు బైండోవర్‌ చర్యలు చేపడుతున్నప్పటికీ, కొందరు రాజకీయ నేతల అండదండలతో ఎన్నికల వ్యవహారాల్లో చురుగ్గా పాల్గొంటున్నారనే ఆరోపణలు వినిపిస్తున్నాయి. నేరచరిత్ర ఉన్న వ్యక్తులు ఎన్నికల వేళ రాజకీయ శక్తులుగా మారితే ప్రజాస్వామ్యానికి, ప్రజల భద్రతకు ముప్పు తప్పదనే ఆందోళన వ్యక్తమవుతోంది.

వైఎస్సార్‌సీపీ జిల్లా అధ్యక్షుడు కేకే రాజు మహారాణిపేట: జీవీఎంసీ ఎన్నికల పోలింగ్‌ ప్రక్రియను పారదర్శకంగా, నిష్పక్షపాతంగా నిర్వహించేందుకు అన్ని పోలింగ్‌ కేంద్రాల్లో సీసీ కెమెరాలు, వీడియోగ్రఫీ ఏర్పాట్లు పూర్తి చేయాలని వైఎస్సార్‌సీపీ జిల్లా అధ్యక్షుడు కేకే రాజు జిల్లా కలెక్టర్‌, జీవీఎంసీ కమిషనర్‌లను కోరారు.ఈ మేరకు అధికారులకు వినతిపత్రం సమర్పించిన ఆయన, సుప్రీంకోర్టు ఈ నెల 27న జారీ చేసిన ఆదేశాల ప్రకారం నామినేషన్‌ కేంద్రాలు, రిటర్నింగ్‌ అధికారుల కార్యాలయాలు, పోలింగ్‌ కేంద్రాలు, స్ట్రాంగ్‌ రూములు, కౌంటింగ్‌ కేంద్రాల్లో వీడియోగ్రఫీ, సీసీటీవీ కెమెరాలు తప్పనిసరిగా ఏర్పాటు చేయాల్సి ఉందన్నారు. ఎన్నికల పిటిషన్ల గడువు ముగిసే వరకు లేదా తుది పరిష్కారం జరిగే వరకు దృశ్యాలను భద్రపరచాలని ఆదేశాలు ఉన్నాయని తెలిపారు.జీవీఎంసీ పరిధిలోని కొన్ని పోలింగ్‌ కేంద్రాల్లో ఇప్పటికీ సీసీ కెమెరాలు, వీడియోగ్రఫీ ఏర్పాట్లు పూర్తికాలేదని సమాచారం అందుతోం దన్నారు. పోలింగ్‌ ప్రారంభానికి ముందే ప్రతి కేంద్రంలో కెమెరాలు ఏర్పాటు చేసి, ప్రవేశ ద్వారాలు, బ్యాలెట్‌ బాక్సుల ప్రాంతాలను పర్యవేక్షణలో ఉంచాలని కోరారు. సమస్యాత్మక, అత్యంత సమస్యాత్మక కేంద్రాల్లో లైవ్‌ వెబ్‌కాస్టింగ్‌ ఏర్పాటు చేయాలని, పోలింగ్‌ అనంతరం బ్యాలెట్‌ బాక్సుల సీలింగ్‌, తరలింపు ప్రక్రియను రికార్డు చేయాలని సూచించారు. నవంబర్‌ 3న జరిగే ఓట్ల లెక్కింపు లోనూ కౌంటింగ్‌ ప్రక్రియ మొత్తం సీసీ కెమెరాల పర్యవేక్షణలో నిర్వహించాలని కోరారు.ఎన్నికల పారదర్శకత, ఓటర్ల స్వేచ్ఛను కాపాడేందుకు అధికారులు ఈ అంశాన్ని అత్యవసరంగా పరిగణించాలని కేకే రాజు విజ్ఞప్తి చేశారు.

ఆరిలోవ: బ్రెయిన్‌ డెడ్‌ అయిన ఓ వ్యక్తి అవయవదానం ద్వారా పలువురికి ప్రాణదానం చేశాడు. అవయవాలు దానం చేసిన కుటుంబ సభ్యులకు జీవన్‌ధాన్‌ బృందం కృతజ్ఞతలు తెలిపింది.అనకాపల్లి జిల్లా కె.కోటపాడు మండలం పాతవలస గ్రామానికి చెందిన కోట్యాడ సూరిబాబు (40) ప్రమాదవశాత్తు కిందపడి తీవ్రంగా గాయపడ్డాడు. కుటుంబ సభ్యులు అతన్ని విశాఖలోని ఆరిలోవ హెల్త్‌సిటీ అపోలో ఆస్పత్రిలో చేర్పించారు. చికిత్స పొందుతూ శుక్రవారం సాయంత్రం బ్రెయిన్‌ డెడ్‌ అయినట్లు వైద్యులు నిర్ధారించారు.విషయం తెలుసుకున్న జీవన్‌ధాన్‌ బృందం అవయవదానంపై కుటుంబ సభ్యులకు అవగాహన కల్పించగా, వారు అంగీకరించారు. దీంతో అపోలో వైద్య బృందం శనివారం సూరిబాబు నుంచి రెండు కిడ్నీలు, ఊపిరితిత్తులు, కాలేయం, కార్నియాలను సేకరించింది.కిడ్నీలను నగరంలోని కిమ్స్‌ ఆస్పత్రికి, ఊపిరితిత్తులను చైన్నెలోని ఓ ఆస్పత్రికి, కాలేయాన్ని హెల్త్‌సిటీలోని అపోలో ఆస్పత్రికి, కార్నియాలను విశాఖలోని ఎల్వీ ప్రసాద్‌ కంటి ఆస్పత్రికి తరలించినట్లు జీవన్‌ధాన్‌ కోఆర్డినేటర్‌ డాక్టర్‌ వి. మన్మథరావు తెలిపారు. ఈ సందర్భంగా సూరిబాబు కుటుంబ సభ్యులకు కృతజ్ఞతలు తెలిపి ధ్రువపత్రం అందజేశారు.

మహారాణిపేట: కేజీహెచ్‌ ఆవరణలో మెటర్నల్‌ చైల్డ్‌ హెల్త్‌ (ఎంసీహెచ్‌) బ్లాక్‌ నిర్మించాలని కేజీహెచ్‌ సూపరింటెండెంట్‌ డాక్టర్‌ ఐ. వాణి, ఆంధ్రా మెడికల్‌ కాలేజీ ప్రిన్సిపల్‌ డాక్టర్‌ కేవీఎస్‌ఎం సంధ్యాదేవి కోరారు.శనివారం ఆంధ్రా మెడికల్‌ కాలేజీలో జరిగిన కార్యక్రమంలో పాల్గొనేందుకు రాష్ట్ర వైద్య విద్య, ఆరోగ్య శాఖ ప్రత్యేక ప్రధాన కార్యదర్శి జి. వీరపాండ్యన్‌ కేజీహెచ్‌కు వచ్చారు. ఈ సందర్భంగా మెడికల్‌ కాలేజీలోని పలు విభాగాల అధిపతులతో సమావేశమయ్యారు.ఉత్తరాంధ్రలో అతిపెద్ద ఆస్పత్రిగా ఉన్న కేజీహెచ్‌లో గర్భిణులు, శిశువుల కోసం ప్రత్యేకంగా ఎంసీహెచ్‌ బ్లాక్‌ అవసరమని గైనకాలజీ విభాగం ప్రొఫెసర్లు ఆయన దృష్టికి తీసుకెళ్లారు. అనంతరం ఎంసీహెచ్‌ బ్లాక్‌ నిర్మాణానికి ప్రతిపాదించిన స్థలాన్ని వీరపాండ్యన్‌ పరిశీలించారు.కార్యక్రమంలో ఆంధ్రా మెడికల్‌ కాలేజీ వైస్‌ ప్రిన్సిపల్‌ డాక్టర్‌ ఏ. కృష్ణవేణి, డాక్టర్‌ వి. రాజ్‌కమల్‌, కేజీహెచ్‌ డిప్యూటీ సూపరింటెండెంట్‌ డాక్టర్‌ ఎం.చంద్రశేఖర నా యుడు, డాక్టర్‌ ఏ. గోపాలరావు, డీసీఎస్‌ఆర్‌ఎంవో డాక్టర్‌ ఆర్‌వీఎస్‌ కుమార్‌, కేజీహెచ్‌ అడ్మినిస్ట్రేటర్‌ డిప్యూటీ కలెక్టర్‌ బి.వి. రమణ, ఇతర అధికారులు, ఇంజినీరింగ్‌ సిబ్బంది పాల్గొన్నారు.

సీతంపేట: తెలుగు సాహిత్యానికి బలివాడ కాంతారావు చేసిన సేవలు, ఆయన రచనలు ఎప్పటికీ మరువలేనివని సాహిత్య అకాడమీ తెలుగు సలహా మండలి సంచాలకురాలు సి. మృణాళిని అన్నారు. విశాఖలో శనివారం బలివాడ కాంతారావు శతజయంతి సదస్సు ఘనంగా జరిగింది.ద్వారకానగర్‌ పౌర గ్రంథాలయంలో సాహిత్య అకాడమీ, రైటర్స్‌ అకాడమీ సంయుక్త ఆధ్వర్యంలో జరిగిన ఈ సదస్సులో మృణాళిని మాట్లాడుతూ తెలుగు సాహిత్యంలో బలివాడ కాంతారావుకు రావాల్సిన గుర్తింపు లభించలేదని అన్నారు. ఆయన రచనల్లో అన్ని నవరసాలు కనిపిస్తాయని, వివిధ ప్రాంతాల అనుభవాలను రచనల్లో ప్రతిబింబించిన వైవిధ్యభరిత రచయిత అని కొనియాడారు.ప్రముఖ రచయిత ద్విభాష్యం రాజేశ్వరరావు మాట్లాడుతూ కాంతారావు కథలు, నవలలు భారతీయ భాషల్లోకి అనువాదమయ్యాయని, పలు పత్రికల్లో సీరియల్స్‌గా ప్రచురితమయ్యాయని తెలిపారు. కేంద్ర సాహిత్య అకాడమీ అవార్డుతో పాటు అనేక పురస్కారాలు అందుకున్నారని గుర్తు చేశారు. కాంతారావు కుమార్తె సుజాత పట్నాయక్‌ మాట్లాడుతూ తన తండ్రి అనేక కథలు, నవలలు రాశారని, కుటుంబంలో సాధారణ తండ్రిలా మెలిగేవారని తెలిపారు. పునర్ముద్రణకు నోచుకోని ఆయన రచనలను రాజేశ్వరరావు ప్రోత్సాహంతో విశాలాంధ్ర ప్రచురించిందని పేర్కొన్నారు. ఈ సభలో రచయిత మేడ మస్తాన్‌రెడ్డి, కేంద్ర సాహిత్య అకాడమీ తెలుగు సలహా మండలి సభ్యుడు చింతకింది శ్రీనివాసరావు, రచయితలు అశోక్‌ బలివాడ, నండూరి రాజగోపాల్‌, ఎన్‌.కె. బాబు, వాడ్రేవు వీరలక్ష్మీదేవి, జి. యోహాన్‌బాబు తదితరులు పాల్గొన్నారు.

కంచరపాలెం: నార్త్‌ జోన్‌ ఎన్నికల కేంద్రం కంచరపాలెం పాలిటెక్నిక్‌ కళాశాలలో శనివారం సాయంత్రం ఎన్నికల విధులకు హాజరైన అల్లూరి జిల్లా గిరిజన మహిళా సిబ్బంది నిరసన వ్యక్తం చేశారు. పాడేరు, అరకు, కొయ్యూరు, పెదబయలు, నర్సీపట్నం ప్రాంతాల నుంచి వచ్చిన తమకు ఎన్నికల విధులు కేటాయించారని, శుక్రవారం సాయంత్రం హడావుడిగా బయలుదేరి వచ్చినా శనివారం మధ్యాహ్నం వరకు రిజర్వులో ఉంచి సాయంత్రం ఎలాంటి ఏర్పాట్లు లేకుండా వదిలేశారని ఆవేదన వ్యక్తం చేశారు. తమ స్వగ్రామాలకు వెళ్లేందుకు ఏర్పాట్లు చేయాలని కోరినా స్పందించే వారు లేకపోవడంతో ఎన్నికల కేంద్రం వద్ద నిరసన తెలిపారు. ఎన్నికల కమిషన్‌ తీరుపై ఆగ్రహం వ్యక్తం చేశారు. వారంతా ‘సాక్షి’ని సంప్రదించగా..నార్త్‌ జోన్‌ ఆర్‌వో బాబూరావు దృష్టికి తీసుకువెళ్లడం జరిగింది. దీంతో ఆయన స్పందించి ప్రత్యేక ఎన్నికల అధికారి జ్ఞానవేణి, జోనల్‌ కమిషనర్‌ రాముకు సమాచారం అందించారు. దీంతో అధికారులు చర్యలు చేపట్టారు. గిరిజన మహిళా సిబ్బందికి రాత్రి భోజనం ఏర్పాటు చేయడంతో పాటు, వారి స్వగ్రామాలకు వెళ్లేందుకు బస్సు సౌకర్యం కల్పించారు.

విశాఖను సాక్షి, విశాఖపట్నం: జీవీఎంసీ ఎన్నికల్లో వైఎస్సార్‌సీపీని గెలిపిస్తే విశాఖను ‘ఫ్యూచర్‌ ఆఫ్‌ ఏపీ’గా తీర్చిదిద్దుతామని ఆ పార్టీ మేయర్‌ అభ్యర్థి, ఎమ్మెల్సీ వరుదు కల్యాణి హామీ ఇచ్చారు. నగరంలోని ప్రముఖులు, విద్యావేత్తలతో చర్చించి వారి సలహా సూచనలతో విశాఖను కేవలం ‘నేచర్‌ సిటీ’గానే కాకుండా, అభివృద్ధి చెందిన ‘ఫ్యూచర్‌ సిటీ’గా మారుస్తామన్నారు. శుక్రవారం విశాఖలోని ఓ ప్రైవేట్‌ హోటల్‌లో వైఎస్సార్‌సీపీ రీజనల్‌ కోఆర్డినేటర్‌ కురసాల కన్నబాబు, మాజీ మంత్రి గుడివాడ అమర్‌నాథ్‌, విశాఖ జిల్లా అధ్యక్షుడు కేకే రాజుతో కలిసి ఆమె ఎన్నికల మేనిఫెస్టోను విడుదల చేశారు. ఈ సందర్భంగా ఆమె మాట్లాడుతూ జీవీఎంసీ ఎన్నికలకు టీడీపీ విడుదల చేసిన మేనిఫెస్టోను చూసి ప్రజలు నవ్వుకుంటున్నారన్నారు. విశాఖ అంటే పాతకాలపు మున్సిపాలిటీ కాదని, దానికో అంతర్జాతీయ విలువ ఉందని చెప్పారు. విశాఖ బ్రాండ్‌కు మరిన్ని కొత్త విలువలను జోడించాల్సి ఉండగా.. కూటమి ప్రభుత్వం వచ్చినప్పటి నుంచి నగరంపై పగబట్టినట్లు వ్యవహరిస్తోందని మండిపడ్డారు. తాము అధికారంలోకి వస్తే అద్భుతమైన సముద్రతీరం, పచ్చని కొండలు కలిగిన ఈ నగరానికి మరింత వన్నె తెచ్చి.. ప్రపంచ స్థాయి మెట్రోపాలిటన్‌ నగరంగా తీర్చిదిద్దుతామని స్పష్టం చేశారు. టీడీపీ గతంలో ఇచ్చిన హామీలను గెలిచిన తర్వాత చెత్తబుట్టలో వేసిందని ప్రజలు ఆగ్రహం వ్యక్తం చేస్తున్నారని, ఇప్పుడు ఇచ్చే జీవీఎంసీ మేనిఫెస్టోను కూడా గెలిచాక అలాగే చెత్తబుట్టలో వేస్తారని ఎద్దేవా చేశారు. టీడీపీ దోపిడీ పాలన నుంచి విశాఖను కాపాడుకోవాలని పిలుపునిచ్చారు.

పద్మనాభం: మద్యం తాగేందుకు డబ్బులు ఇవ్వలేదనే కక్షతో ఓ వ్యక్తి వృద్ధుడిని కర్రతో తలపై కొట్టి హత్య చేసిన ఘటన పద్మనాభం మండలం రెడ్డిపల్లిలో చోటుచేసుకుంది. ఈ కేసులో నిందితుడిని పోలీసులు శుక్రవారం అరెస్టు చేసి రిమాండ్‌కు తరలించారు. సీఐ ఎం.చంద్రమౌళి తెలిపిన వివరాల ప్రకారం.. శేరిఖండం గ్రామానికి చెందిన సంగం అప్పలరాజు రెడ్డిపల్లిలోని పల్లంటి చిన్నారావుకు చెందిన సామిల్లులో వాచ్‌మెన్‌గా పనిచేస్తున్నాడు. రెడ్డిపల్లి గ్రామానికి చెందిన రాము సామిల్లు సమీపంలో ఒంటరిగా ఉంటున్నాడు. మద్యానికి బానిసైన రాము తరచూ సామిల్లు వద్దకు వెళ్లి అప్పలరాజు, యజమాని చిన్నారావులను డబ్బులు ఇవ్వాలని వేధించేవాడు. అయితే అప్పలరాజు డబ్బులు ఇచ్చేందుకు నిరాకరించడంతో పాటు సామిల్లు వద్దకు రావొద్దని రామును గట్టిగా హెచ్చరించాడు. దీంతో అప్పలరాజుపై రాము కక్ష పెంచుకున్నాడు. తలపై కర్రతో.. : ఈ క్రమంలో గురువారం రాత్రి సామిల్లు వద్దకు వెళ్లిన రాము.. మంచంపై ఉన్న అప్పలరాజు తలపై కర్రతో బలంగా కొట్టాడు. దీంతో అప్పలరాజు అక్కడికక్కడే మృతి చెందాడు. అనంతరం నిందితుడు అక్కడి నుంచి పరారయ్యాడు. సామిల్లులో పనిచేసే గుమస్తా శుక్రవారం ఉదయం అక్కడికి వెళ్లగా.. అప్పలరాజు మంచంపై రక్తపు మడుగులో విగతజీవిగా కనిపించాడు. వెంటనే పోలీసులకు సమాచారం అందించారు. ఫిర్యాదు మేరకు కేసు నమోదు చేసిన పోలీసులు సీసీ కెమెరాల ఫుటేజీల ఆధారంగా నిందితుడు రామును శుక్రవారం రేవిడిలో గుర్తించి అరెస్ట్‌ చేశారు. అనంతరం రిమాండ్‌కు తరలించారు.

సాక్షి, విశాఖపట్నం: క్షేత్రస్థాయిలో మైకుల ప్రచార హోరు ముగిసినా, అసలైన సమరం సోషల్‌ మీడియా వేదికగా డిజిటల్‌ స్క్రీన్‌లపై ఇప్పుడు పీక్స్‌కు చేరింది. జీవీఎంసీ ఎన్నికల సమరం.. క్‌లైమాక్స్‌కు చేరుకున్న వేళ.. ప్రచారంలోనే కాదు.. ‘స్మార్ట్‌’స్క్రీన్ల మీదా వైఎస్సార్‌సీపీ అభ్యర్థి వరుదు కల్యాణి సెన్సేషన్‌ క్రియేట్‌ చేస్తున్నారు. అటు ప్రజలతో మమేకమవ్వడంలోనూ.. ఇటు అన్ని వర్గాల నెటిజన్లను ఆకట్టుకోవడంలోనూ టీడీపీ అభ్యర్థి ముక్కా శ్రావణి కంటే చాలా ముందంజలో ఉన్నారు. ‘ట్రెండ్‌’సెట్‌ చేస్తున్నారు జీవీఎంసీ మేయర్‌ ఎన్నికల బరిలో నిలిచిన వైఎస్సార్‌సీపీ అభ్యర్థి వరుదు కల్యాణి ప్రచార శైలి నెటిజన్లను విపరీతంగా ఆకట్టుకుంటోంది. క్లిక్‌మనిపిస్తే చాలు ఆమె ప్రచార దశ్యాలు, ప్రజలతో మమేకమవుతున్న రీల్స్‌.. మొబైల్‌ ఫోన్లలో ప్రత్యక్షమవుతున్నాయి. కేవలం ఒక వైపు ప్రచారానికే పరిమితం కాకుండా, ఓటర్లు అడిగే ప్రశ్నలకు సమాధానమిస్తూ, అందరితో కలుపుగోలుగా దూసుకుపోతూ డిజిటల్‌ వేదికలపై నయా ట్రెండ్‌ సెట్‌ చేస్తున్నారు. మేనిఫెస్టో హల్‌చల్‌ ఎన్నికల వ్యూహంలో అత్యంత కీలకమైన మేనిఫెస్టో అస్త్రాన్ని సోషల్‌ మీడియా ద్వారా ప్రతి ఇంటికీ, ప్రతి వర్గానికి చేర్చడంలో వరుదు కల్యాణి టీమ్‌ పూర్తి సక్సెస్‌ అయింది. ఆమెకున్న స్పష్టమైన వాక్చాతుర్యం, స్థానిక సమస్యలపై ఉన్న పట్టు డిజిటల్‌ ప్రచారానికి భారీ మైలేజ్‌ తెచ్చిపెట్టాయి. ఇన్‌స్ట్రాగాం, ఫేస్‌బుక్‌, ఎక్స్‌(ట్విటర్‌) వేదికలపై ఆమె షేర్‌ చేస్తున్న పోస్టులు, వీడియోలకు వస్తున్న రెస్పాన్స్‌ చూస్తుంటే ఓటర్ల నాడి ఎటువైపు ఉందో స్పష్టంగా అర్థమవుతోంది. అన్నింటా ‘కల్యాణి’దే పైచేయి! టీడీపీ అభ్యర్థి ముక్కా శ్రావణితో పోల్చి చూస్తే సోషల్‌ మీడియా ఫాలోయింగ్‌లో వరుదు కల్యాణిదే స్పష్టమైన పైచేయి. ఇన్‌స్ట్రాగాంలో 64 వేలకు పైగా, ఫేస్‌బుక్‌లో 78 వేల మందికి పైగా ఫాలోవర్లతో కల్యాణి సుడిగాలి వేగంతో దూసుకుపోతుండగా, శ్రావణి ఫేస్‌బుక్‌లో 5,700, ఇన్‌స్ట్రాగాంలో 6,232 మంది ఫాలోవర్లకే పరిమితమై గట్టి పోటీ ఇవ్వలేకపోతున్నారు. సాంప్రదాయ ప్రచారానికే పరిమితమైన ప్రత్యర్థి క్యాంప్‌తో పోలిస్తే, సరికొత్త ట్రెండ్‌కు తగ్గట్టుగా డిజిటల్‌ వార్‌లో పూర్తి ఆధిపత్యం ప్రదర్శిస్తూ మేయర్‌ రేసులో వరుదు కల్యాణి అత్యంత వేగంగా ప్రజల మద్దతుని కూడగట్టుకోవడం విశేషం.

అల్లిపురం: జీవీఎంసీ ఎన్నికల వేళ విశాఖ నగరంలో నకిలీ నోట్ల కలర్‌ జెరాక్స్‌ కాపీలు కలకలం రేపాయి. ఎన్నికల నేపథ్యంలో పోలీసులు నిర్వహించిన తనిఖీల్లో జగదాంబ జంక్షన్‌ సమీపంలోని వీ–స్టార్‌ హోటల్‌లో రూ.66 లక్షల విలువైన రూ.500 నోట్ల జెరాక్స్‌ కాపీలు పట్టుబడ్డాయి. వీటితో పాటు డమ్మీ తుపాకీని కూడా స్వాధీనం చేసుకున్నారు. ఈ కేసులో నలుగురిని పోలీసులు అదుపులోకి తీసుకోగా.. మరో ముగ్గురు పరారీలో ఉన్నారు. శుక్రవారం రాత్రి మహారాణిపేట పోలీస్‌ స్టేషన్‌లో ఈస్ట్‌ సర్కిల్‌ ఏసీపీ లక్ష్మణమూర్తి, సీఐ గోవిందరావు వివరాలు వెల్లడించారు. హోటళ్లలో తనిఖీలతో వెలుగులోకి.. : నగరంలోని హోటళ్లు, లాడ్జీల్లో పోలీసుల తనిఖీల్లో భాగంగా.. శుక్రవారం వీ–స్టార్‌ హోటల్‌లోని 105వ గదిలో నలుగురి బ్యాగులను పరిశీలించగా.. ఒక బ్యాగులో రూ.500 నోట్ల జెరాక్స్‌ కాపీలతో కూడిన 200 కట్టలు లభించాయి. ఒక్కో కట్టలో 66 చొప్పున మొత్తం 13,200 నోట్ల కాపీలు ఉన్నాయి. వీటి విలువ రూ.66 లక్షలుగా పోలీసులు గుర్తించారు. మరో బ్యాగులో డమ్మీ తుపాకీ లభించింది. నలుగురు అదుపులోకి.. మరో ముగ్గురు పరారీ పోలీసుల అదుపులో ఉన్నవారిని అల్లూరి సీతారామరాజు జిల్లా అరకు మండలం డోమలజోరు గ్రామానికి చెందిన పాంగి కొండబాబు, పార్వతీపురం మన్యం జిల్లా సాలూరు మండలం మామిడిపల్లి గ్రామానికి చెందిన బేవర సాయి, సాలూరు పెద్దవీధికి చెందిన ఇజ్జవరపు దుర్గాప్రసాద్‌, ఎస్‌.పెద్దవలస గ్రామానికి చెందిన వెలగడ దినేష్‌గా గుర్తించారు. ఈ వ్యవహారంలో మరో ముగ్గురు పరారీలో ఉన్నట్లు పోలీసులు తెలిపారు. ఇన్‌స్ట్రాగామ్‌ పరిచయాలతో మోసం : ఏడుగురు నిందితులు మూడు నెలల క్రితం ఇన్‌స్ట్రాగామ్‌ ద్వారా పరిచయమై ఈ దందా ప్రారంభించినట్లు పోలీసుల విచారణలో తేలింది. పరారీలో ఉన్న చందు కలర్‌ జెరాక్స్‌ నోట్లు తయారు చేయించడం, వాటితో మార్పిడికి ఆసక్తి చూపేవారిని గుర్తించడం చేసేవాడని పోలీసులు తెలిపారు. మిగిలిన వారు పరిసరాలను గమనిస్తూ, నోట్ల మార్పిడికి సహకరించేవారని, ఇందుకు వారికి డబ్బులు ఇచ్చేవారని వెల్లడించారు. విజయనగరం, విశాఖలోనూ దందా : విజయనగరం, విశాఖ ప్రాంతాల్లోనూ గతంలో ఇలాంటి లావాదేవీలు జరిగినట్లు పోలీసులు గుర్తించారు. నకిలీ నోట్ల కాపీలు ఎక్కడ తయారవుతున్నాయి? వాటిని ఎవరు సరఫరా చేస్తున్నారు? ఈ వ్యవహారంలో ఇంకా ఎవరెవరు ఉన్నారనే కోణాల్లో దర్యాప్తు చేస్తున్నారు. పరారీలో ఉన్న ముగ్గురి కోసం ప్రత్యేక బృందాలతో గాలిస్తున్నారు.

బీచ్‌రోడ్డు: హ్యుందాయ్‌ మోటార్‌ ఇండియా సరికొత్త ఐయూవీ హ్యుందాయ్‌ బేయాన్‌ను విశాఖలో లక్ష్మీ హ్యుందాయ్‌ ఆధ్వర్యంలో ఘనంగా లాంచ్‌ చేసింది. ‘ఇంటెలిజెన్స్‌ దట్‌ మూవ్స్‌’ ఫిలాసఫీతో రూపొందించిన ఈ వాహనం దేశవ్యాప్తంగా విడుదలైన సందర్భంగా కార్యక్రమం నిర్వహించారు. ఈ సందర్భంగా లక్ష్మీ హ్యుందాయ్‌ సేల్స్‌ హెడ్‌ సోమనాథ్‌ లాల్‌ మాట్లాడుతూ.. బేయాన్‌ ఎక్స్‌షోరూమ్‌ ధర రూ.9.99 లక్షల నుంచి ప్రారంభమవుతుందని తెలిపారు. హెచ్‌ఎక్స్‌–2 నుంచి హెచ్‌ఎక్స్‌–10 వరకు ఏడు వేరియంట్లలో అందుబాటులో ఉందన్నారు. రూ.11 వేలతో బుకింగ్స్‌ ప్రారంభమవుతాయని చెప్పారు. పది ప్రాంతీయ భాషల్లో వాయిస్‌ కమాండ్స్‌, జెనరేటివ్‌ ఏఐ వాయిస్‌ అసిస్టెంట్‌, కనెక్టెడ్‌ కార్‌ టెక్నాలజీ, లెవల్‌–2 ఏడీఏఎస్‌, ఆరు ఎయిర్‌బ్యాగులు, 360 డిగ్రీల కెమెరా వంటి అధునాతన భద్రతా ఫీచర్లు ఇందులో ఉన్నాయని వివరించారు. కార్యక్రమంలో లక్ష్మీ హ్యుందాయ్‌ ఆపరేషన్స్‌ హెడ్‌ శ్రీనివాసన్‌, సిబ్బంది, ఫైనాన్స్‌, ఇన్సూరెన్స్‌ ప్రతినిధులు పాల్గొన్నారు. బుకింగ్‌, టెస్ట్‌ డ్రైవ్‌ కోసం 7997999456 నంబరును సంప్రదించాలని తెలిపారు.

మహారాణిపేట: వైఎస్సార్‌సీపీ బ్రాహ్మణులకు ఎల్లప్పుడూ అధిక ప్రాధాన్యత ఇస్తుందని ఆ పార్టీ జీవీఎంసీ మేయర్‌ అభ్యర్థి వరుదు కల్యాణి అన్నారు. బీచ్‌ రోడ్డులోని ఓ హోటల్‌లో శుక్రవారం జరిగిన కార్యక్రమంలో ఆమె మాట్లాడారు. గత సాధారణ ఎన్నికల్లో బ్రాహ్మణులను గుర్తించిన వైఎస్సార్‌సీపీ ఎంతో మందికి టికెట్లు ఇచ్చిన విషయాన్ని గుర్తు చేశారు. బ్రాహ్మణులకు పార్టీ అధినేత వైఎస్‌ జగన్‌ కూడ ఎంతో ప్రాధాన్యత ఇస్తున్నారని పేర్కొన్నారు. సభకు అధ్యక్షత వహించిన వైఎస్సార్‌సీపీ ఎస్‌ఈసీ సభ్యుడు పీవీ నారాయణ మాట్లాడుతూ జీవీఎంసీలో అధికారం చేపట్టిన తర్వాత పలు నామినేటెడ్‌ పోస్టుల భర్తీలో బ్రాహ్మణులకు అధిక ప్రాధాన్యత ఇవ్వాలన్నారు. విశాఖ బ్రాహ్మణ్‌ వెల్ఫేర్‌ సొసైటీ అధ్యక్షుడు కావూరు చరణ్‌కుమార్‌ మాట్లాడుతూ బ్రాహ్మణులను గుర్తించి పదవులు ఇవ్వాలని కోరారు. అనంతరం మేయర్‌ అభ్యర్థి వరుదు కల్యాణిని సన్మానించారు. కార్యక్రమంలో వైఎస్సార్‌సీపీ నాయకుడు ద్రోణంరాజు శ్రీవత్సవ్‌, వివిధ బ్రాహ్మణ సంఘాల నాయకులు జి.ప్రభాకరశాస్త్రి, నండూరి సుబ్రహ్మణ్యం, కోదూరి సుశీల, కె.రామభద్రుడు, శివ గణేష్‌ శర్మ, తెన్నేటి సునీల్‌ శర్మ, అయిలూరి నీలకంఠ శాస్త్రి తదితరులు పాల్గొన్నారు. జీవీఎంసీ మేయర్‌ అభ్యర్థి వరుదు కల్యాణి

సాక్షి, విశాఖపట్నం: జీవీఎంసీ ఎన్నికల ప్రచారం చివరి రోజూ ఉప్పొంగిన ప్రజాభిమానంతో వైఎస్సార్‌ సీపీ హోరెత్తింది. యువత, మహిళల నుంచి వృద్ధుల వరకు ప్రచారంలో ఉత్సాహాన్ని ప్రదర్శించారు. ఏ ప్రాంతానికి వెళ్లినా ప్రజలు ఎదురొచ్చి కుంకుమ దిద్ది సాధరంగా ఆహ్వానించారు. వైఎస్సార్‌సీపీ మేయర్‌ అభ్యర్థి వరుదు కల్యాణి ఎన్నికల ప్రచారానికి పౌరుల నుంచి విశేష స్పందన లభించింది. విశాఖ తూర్పు సమన్వయకర్త మొల్లి అప్పారావు ఆధ్వర్యంలో శుక్రవారం 24, 27, 28 వార్డుల్లో ప్రచారం నిర్వహించారు. అలాగే, విశాఖ దక్షిణ సమన్వయకర్త, మాజీ ఎమ్మెల్యే వాసుపల్లి గణేష్‌కుమార్‌ ఆధ్వర్యంలో 31, 32, 33, 34, 35, 39, 36, 37, 38, 41, 43, 42 వార్డుల్లో ప్రచారం సాగింది. అనంతరం మధ్యాహ్నం 2 గంటలకు హోటల్‌ ఓషన్‌ విస్తా బేలో బ్రాహ్మణ ఆత్మీయ సమావేశం నిర్వహించారు. ఈ ప్రచారంలో స్థానిక కార్పొరేటర్‌ అభ్యర్థులు, పార్టీ నాయకులు, కార్యకర్తలు పాల్గొన్నారు. 54వ వార్డులో కన్నబాబు, అమర్‌నాథ్‌, కేకే రాజు ఉత్తర నియోజకవర్గ పరిధిలోని 54వ వార్డు వైఎస్సార్‌ నగర్‌, సత్యసాయినగర్‌, నరసింహనగర్‌, సీతమ్మధార, బిలాల్‌ కాలనీలలో నిర్వహించిన ఎన్నికల ప్రచారంలో రీజనల్‌ కో–ఆర్డినేటర్లు కురసాల కన్నబాబు, గుడివాడ అమర్‌నాథ్‌, విశాఖ జిల్లా అధ్యక్షుడు కేకే రాజు, మాజీ ఎమ్మెల్యే చింతలపూడి వెంకట్రామయ్య పాల్గొన్నారు. ఈ సందర్భంగా వైఎస్సార్‌సీపీ మేయర్‌ అభ్యర్థి వరుదు కల్యాణిని, 54వ వార్డు కార్పొరేటర్‌ అభ్యర్థి బాణాల శ్రీనివాసరావును గెలిపించాలని ప్రజలను విజ్ఞప్తి చేశారు. అభ్యర్థులకు మద్దతుగా పార్టీ శ్రేణులు భారీ బైక్‌ ర్యాలీ నిర్వహించాయి. అదేవిధంగా 59, 53, 56, 55 వార్డులలో కేకే రాజు ప్రచారంలో పాల్గొని, మేయర్‌ అభ్యర్థి వరుదు కళ్యాణితో పాటు కార్పొరేటర్‌ అభ్యర్థులను ఫ్యాన్‌ గుర్తుపై ఓట్లేసి గెలిపించాలని కోరారు.

మహా విశాఖ నగరాన్ని నడిపించే ప్రథమ పౌరురాలు ఎలా ఉండాలి? స్వతంత్రంగా నిర్ణయాలు తీసుకునే ధీరత్వంతో ఉండాలా.. లేక ఇతరుల చేతుల్లో కీలుబొమ్మగా మిగిలిపోవాలా? జీవీఎంసీ ఎన్నికల మేనిఫెస్టో ఆవిష్కరణ వేదికలపై దృశ్యాలే ఈ ప్రశ్నకు స్పష్టమైన సమాధానం ఇస్తున్నాయి. టీడీపీ, వైఎస్సార్‌సీపీ మేయర్‌ అభ్యర్థుల తీరుతెన్నులను ప్రతిబింబిస్తున్న రెండు ఫోటోలు ఇప్పుడు విశాఖ రాజకీయాల్లో హాట్‌ టాపిక్‌గా మారాయి. టీడీపీ మేయర్‌ అభ్యర్థి ముక్కా శ్రావణి పరిస్థితి చూస్తే రేపు ఆమె గెలిచినా పెత్తనమంతా పక్కన ఉన్న ఎంపీలు, ఎమ్మెల్యేలదేనని తేటతెల్లమవుతోంది. వేదికపై అగ్రనేతల ఆధిపత్యం మధ్య ఆమె ఒక సాధారణ కార్యకర్తలా మూలన నిలబడాల్సి వచ్చింది. రేపు అధికారంలోకి వస్తే ఆమెకు ఎలాంటి స్వేచ్ఛ ఉంటుందో ఊహించడం పెద్ద కష్టమేమీ కాదనే విమర్శలు వ్యక్తమవుతున్నాయి. దీనికి పూర్తి భిన్నంగా వైఎస్సార్‌సీపీ మేయర్‌ అభ్యర్థి వరుదు కల్యాణి తన నాయకత్వ పటిమను చాటుకున్నారు. వేదికపై ఉద్ధండులైన మాజీ మంత్రులు ఉన్నప్పటికీ... ఏమాత్రం బెరుకు లేకుండా ప్రధాన స్థానంలో కూర్చొని సగర్వంగా సమావేశాన్ని నడిపించారు. నాయకురాలికి ఉండాల్సిన దర్పాన్ని, ఆత్మవిశ్వాసాన్ని కళ్లకు కట్టారు. ఒకవైపు ఆధిపత్యంతో ఉక్కిరిబిక్కిరి చేసే సంస్కృతి.. మరోవైపు స్వేచ్ఛ, ఆత్మవిశ్వాసంతో నడిపించే నాయకత్వం. ఈ రెండు చిత్రాలు రేపటి విశాఖ భవిష్యత్తుకు ప్రత్యక్ష నిదర్శనాలు. నగర ప్రగతిని నడిపించే అసలైన నాయకురాలు ఎవరో విశాఖ ఓటర్లే తేల్చుకోవాల్సిన సమయం ఆసన్నమైంది. – సాక్షి, విశాఖపట్నం

డాబాగార్డెన్స్‌: జీవీఎంసీ ఎన్నికల బరిలో నిలిచిన వైఎస్సార్‌సీపీ అభ్యర్థులకు బీసీ కుల సంఘాలు, కులవృత్తిదారులు మద్దతుగా నిలిచారు. నగరంలోని ఓ ఫంక్షన్‌ హాల్లో ఆంధ్రప్రదేశ్‌ బహుజన బీసీ సంక్షేమ సంఘం ఆధ్వర్యంలో శుక్రవారం నిర్వహించిన ఆత్మీయ సదస్సులో కార్పొరేషన్‌ ఎన్నికల్లో వైఎస్సార్‌ సీపీ అభ్యర్థులకు సంపూర్ణ మద్దతు ప్రకటించారు. ఈ సందర్భంగా వారు మాట్లాడుతూ ఆదివారం జరిగే కార్పొరేషన్‌ ఎన్నికల్లో వైఎస్సార్‌ సీపీ కార్పొరేటర్‌ అభ్యర్థులతో పాటు మేయర్‌గా బరిలో నిలిచిన వరుదు కల్యాణికి మద్దతు పలుకుతూ తీర్మానం చేశారు. మహానేత డాక్టర్‌ వైఎస్‌ రాజశేఖర్‌రెడ్డి, మాజీ ముఖ్యమంత్రి వైఎస్‌ జగన్‌మోహన్‌రెడ్డి గతంలో బీసీల అభివృద్ధి, సంక్షేమానికి చేపట్టిన కార్యక్రమాలు గుర్తు చేశారు. ఆంధ్రప్రదేశ్‌ బహుజన బీసీ సంక్షేమ సంఘం అధ్యక్షుడు పిన్నింటి ఆదిమూర్తియాదవ్‌, వెంపటాపు నూకరాజు, కోడూరి సత్యనారాయణ, పిల్లా సుజాత పాల్గొన్నారు.

బీచ్‌రోడ్డు : కర్నూలు జిల్లా ఆత్మకూరు సాక్షి రూరల్‌ విలేకరి సుబ్బారెడ్డిపై జరిగిన దాడిని ఖండిస్తూ విశాఖలో జర్నలిస్టులు పెద్ద ఎత్తున నిరసన ప్రదర్శన నిర్వహించారు. జీవీఎంసీ కార్యాలయం ఎదురుగా ఉన్న గాంధీ విగ్రహం వద్ద నల్ల బ్యాడ్జీలు ధరించి, క్యాండిల్స్‌, ప్లకార్డులు పట్టుకొని నినాదాలు చేశారు. ఈ సందర్భంగా సాక్షి బ్యూరో చీఫ్‌ కే. రాఘవేంద్ర రెడ్డి మాట్లాడుతూ ఇటీవల కాలంలో జర్నలిస్టులపై దాడులు విపరీతంగా పెరిగిపోతున్నాయని ఆందోళన వ్యక్తం చేశారు. కొద్దిరోజులుగా విశాఖలో కూడా విధి నిర్వహణలో ఉన్న విలేకరులపై తప్పుడు కేసులు పెట్టి తీవ్రంగా వేధిస్తున్నారని ఆవేదన వ్యక్తం చేశారు. పత్రికా స్వేచ్ఛపై దాడి చేయడం అంటే ప్రజాస్వామ్య వ్యవస్థపై దాడి చేసినట్లేనని అన్నారు. ఆంధ్రప్రదేశ్‌ వర్కింగ్‌ జర్నలిస్ట్‌ యూనియన్‌ జిల్లా సహాయ కార్యదర్శి కేటీ రామునాయుడు, ఆంధ్రప్రదేశ్‌ వర్కింగ్‌ జర్నలిస్ట్‌ ఫెడరేషన్‌ నాయకులు బసనబోయిన ఆనందరావు మాట్లాడుతూ కూటమి ప్రభుత్వం జర్నలిస్టులకు రక్షణ కల్పించడంలో పూర్తిగా విఫలమైందని మండిపడ్డారు. ఈ నిరసన కార్యక్రమంలో నగరంలోని ప్రింట్‌, ఎలక్ట్రానిక్‌ మీడియా జర్నలిస్టులు పాల్గొన్నారు. దాడిపై ఖండన విశాఖ విద్య: సాక్షి ఆత్మకూరు రూరల్‌ రిపోర్టర్‌ సుబ్బారెడ్డిపై జరిగిన దాడిని వైఎస్సార్‌ సీపీ ఆర్‌టీఐ విభాగం రాష్ట్ర వర్కింగ్‌ ప్రెసిడెంట్‌ జీలకర్ర నాగేంద్ర ,ఏయూ నిరుద్యోగ సంఘం నేత డా. సురేష్‌ మీనన్‌ ,విదసం కన్వీనర్‌ డా. బూసి వెంకటరావు ఖండించారు. ఏపీయూడబ్ల్యూజే.. మహారాణిపేట: సాక్షి రిపోర్టర్‌పై దాడికి పాల్పడిన వారిని వెంటనే అరెస్ట్‌ చేయాలని ఆంధ్రప్రదేశ్‌ యూనియన్‌ ఆఫ్‌ వర్కింగ్‌ జర్నలిస్టుల జిల్లా కమిటీ అధ్యక్షుడు కె. రాము, ప్రధాన కార్యదర్శి కె.చంద్రమోహన్‌, కోశాధికారి పరుశురాం,ఏపీ ఎలక్ట్రానిక్‌ మీడియా జర్నలిస్ట్‌ అసోసియేషన్‌ రాష్ట్ర ప్రధానకార్యదర్శి ఆర్‌. రామచంద్రరావు డిమాండ్‌చేశారు.

డాబాగార్డెన్స్‌: జీవీఎంసీ ఎన్నికల ప్రచారానికి శుక్రవారం సాయంత్రంతో తెరపడింది. మైకుల హోరు.. బహిరంగ సభలు.. రోడ్‌షోలు.. ఇంటింటి ప్రచారంతో హోరెత్తిన నగరం ఇక పోలింగ్‌కు సిద్ధమైంది. సవరించిన ఎన్నికల షెడ్యూల్‌ ప్రకారం నవంబర్‌ 1న పోలింగ్‌, 3న ఓట్ల లెక్కింపు జరగనుంది. శుక్రవారం సాయంత్రం ప్రచార గడువు ముగియడంతో సైలెంట్‌ పీరియడ్‌ ప్రారంభమైంది. మేయర్‌ పీఠం కోసం 15 మంది పోరు గ్రేటర్‌ మేయర్‌ పీఠాన్ని దక్కించుకునేందుకు 15 మంది అభ్యర్థులు బరిలో నిలిచారు. వైఎస్సార్‌సీపీ నుంచి వరుదు కల్యాణి, కాంగ్రెస్‌ నుంచి దేవర నాగసునందాదేవి, టీడీపీ నుంచి ముక్కా శ్రావణి, బీఎస్పీ నుంచి కరణం కీర్తన గ్రేస్‌, భారత చైతన్య యువజన పార్టీ నుంచి నమ్మి భవాని పోటీలో ఉన్నారు. మిగిలిన అభ్యర్థులు స్వతంత్రులుగా బరిలో నిలిచారు. 120 వార్డులు.. 573 మంది అభ్యర్థులు జీవీఎంసీ పరిధిలోని 120 వార్డులకు 573 మంది కార్పొరేటర్‌ అభ్యర్థులు పోటీ చేస్తున్నారు. పార్టీలు, స్వతంత్ర అభ్యర్థుల మధ్య పోటీతో ఎన్నికల బరిలో ఆసక్తికర పరిస్థితులు నెలకొన్నాయి. పార్టీల వారీగా అభ్యర్థుల వివరాలు.. వైఎస్సార్‌సీపీ – 119, టీడీపీ – 77, జనసేన – 32, బీజేపీ – 11, కాంగ్రెస్‌, సీపీఐ, సీపీఎం, ఆప్‌, బీఎస్పీ, ఇతర పార్టీలు – 88, స్వతంత్రులు – 246 18.37 లక్షల మంది ఓటర్లు గ్రేటర్‌ ఎన్నికల్లో 18,37,901 మంది ఓటర్లు తమ ఓటు హక్కును వినియోగించుకోనున్నారు. వీరి కోసం 1,990 పోలింగ్‌ కేంద్రాలు, 4,378 బ్యాలెట్‌ బాక్సులు సిద్ధం చేశారు. ఎన్నికల విధుల నిర్వహణకు 14,334 మంది పోలింగ్‌ సిబ్బందితో పాటు 82 మంది ఆర్వోలు, ఏఆర్వోలు, 56 మంది మాస్టర్‌ ట్రైనర్లు, 95 మంది నోడల్‌ అధికారులు, సహాయక అధికారులు, 201 మంది రూట్‌ అధికారులు, 61 మంది సెక్టార్‌ అధికారులు, 10 మంది జోనల్‌ స్పెషల్‌ అధికారులు, ఇతర అధికారులను నియమించారు. రేపు ఉదయం 7 గంటల నుంచి పోలింగ్‌ నవంబర్‌ 1న ఉదయం 7 నుంచి సాయంత్రం 5 గంటల వరకు పోలింగ్‌ జరగనుంది. 3వ తేదీన ఉదయం 8 గంటలకు ఓట్ల లెక్కింపు ప్రారంభం కానుంది. ఎన్నికల నిర్వహణకు అవసరమైన ఏర్పాట్లను అధికారులు పూర్తి చేశారు. వార్డులు పోటీలో ఉన్న పోలింగ్‌ అభ్యర్థులు కేంద్రాలు భీమిలి: 1–5 19 78 మధురవాడ: 6–11, 120 27 162 తూర్పు: 12–29 70 309 దక్షిణ: 30–45 77 249 ఉత్తర: 46–65 86 302 పశ్చిమ: 66–82 72 245 గాజువాక: 83–101 139 329 అగనంపూడి: 102–106 28 75 అనకాపల్లి: 107–112 20 89 పెందుర్తి: 113–119 35 152

డాబాగార్డెన్స్‌: గ్రేటర్‌ విశాఖ మున్సిపల్‌ కార్పొరేషన్‌ మేయర్‌ ఎన్నికల బరిలో 15 మంది అభ్యర్థులు నిలిచారు. నామినేషన్ల పరిశీలన అనంతరం ఈ నెల 21న నిర్వహించిన ఉపసంహరణలో ఆరుగురు అభ్యర్థులు తమ నామినేషన్లను ఉపసంహరించుకున్నారు. దీంతో తుది బరిలో 15 మంది అభ్యర్థులు మిగిలారు. వైఎస్సార్‌సీపీ నుంచి వరుదు కల్యాణి, ఇండియన్‌ నేషనల్‌ కాంగ్రెస్‌ పార్టీ నుంచి దేవర నాగసునందాదేవి, టీడీపీ నుంచి ముక్కా శ్రావణి, బహుజన సమాజ్‌ పార్టీ నుంచి కరణం కీర్తన గ్రేస్‌, భారత చైతన్య యువజన పార్టీ నుంచి నమ్మి భవాని మేయర్‌ అభ్యర్థులుగా పోటీలో ఉన్నారు. మిగిలిన అభ్యర్థులు స్వతంత్రులుగా బరిలో నిలిచారు.కాంగ్రెస్‌ పార్టీ నుంచి నామినేషన్‌ దాఖలు చేసిన ప్రియాంక దండి పార్టీ నుంచి బీ–ఫాం అందకపోవడంతో ఆమెను స్వతంత్ర అభ్యర్థిగా పరిగణించారు. రాష్ట్ర ఎన్నికల కమిషన్‌ ఆదేశాల మేరకు అభ్యర్థుల జాబితాను విడుదల చేయకుండా నిలిపివేయగా.. అధికారికంగా ఆదివారం జాబితాను ప్రకటించారు. గుర్తులు ఇలా.. ● వైఎస్సార్‌ కాంగ్రెస్‌ పార్టీపై పోటీ చేస్తున్న వరుదు కల్యాణికి..ఫ్యాన్‌ గుర్తు ● బహుజన్‌ సమాజ్‌ పార్టీ నుంచి పోటీ చేస్తున్న కరణం కీర్తనగ్రేస్‌కు ఏనుగు ● భారత జాతీయ కాంగ్రెస్‌ నుంచి పోటీ చేస్తున్న దేవర నాగ సునందాదేవికి హస్తం ● తెలుగుదేశం పార్టీ నుంచి పోటీ చేస్తున్న ముక్కా శ్రావణికి సైకిల్‌ ● భారత చైతన్య యువజన పార్టీ నుంచి పోటీ చేస్తున్న నమ్మి భవానికి బ్యాటరీలైట్‌ స్వతంత్ర అభ్యర్థులు.. ● ఫ్యాన్సీ నమ్మ అత్తిలికి..సీసా ● గొంప వెంకట పద్మావతికి సాసర్‌ ● శైలజ తలుపులకి స్కూల్‌ బ్యాగ్‌ ● ప్రియాంక దండికి ఎయిర్‌ కండీషనర్‌ ● పకృతి దేవికి ఉంగరం ● బోర సంతోషికి కాలిఫ్లవర్‌ ● లిఖిత లండాకి కొవ్వొత్తులు ● వాండ్రాసి శాంతికుమారికి పల్లకి ● వియ్యపు ఉమాకు ఫ్లూట్‌ ● షేక్‌ దౌలతున్నీసా బీరువా.. నామినేషన్లు ఉపసంహరించుకున్న వారు.. ఇండియన్‌ నేషనల్‌ కాంగ్రెస్‌ నుంచి వెంకటలక్ష్మీ జెర్రిపోతుల, ఉస్నారా పర్వీన్‌, తెలుగుదేశం పార్టీ నుంచి సేనాపతి వసంత, వైఎస్సార్‌ సీపీ నుంచి పేడాడ రమణకుమారి, వెంకట విజయకుమారి తిప్పల, స్వతంత్రులు పులిచింతల రాజేశ్వరి నామినేషన్లు ఉపసంహరించుకున్నారు. 120 స్థానాలకు 570 మందిడాబాగార్డెన్స్‌: గ్రేటర్‌ విశాఖ మున్సిపల్‌ కార్పొరేషన్‌ (జీవీఎంసీ) కార్పొరేటర్‌ ఎన్నికల బరిలో 570 మంది అభ్యర్థులు నిలిచారు. 120 వార్డులకు మొత్తం 1,623 మంది నామినేషన్లు దాఖలు చేయగా.. పరిశీలన అనంతరం ఈ నెల 21న నిర్వహించిన ఉపసంహరణలో 1,053 మంది తమ నామినేషన్లను ఉపసంహరించుకున్నారు. దీంతో తుది బరిలో 570 మంది అభ్యర్థులు మిగిలారు. జోన్‌ల వారీగా చూస్తే తూర్పు జోన్‌ నుంచి 70 మంది, దక్షిణ జోన్‌ నుంచి 77 మంది, ఉత్తర జోన్‌ నుంచి 81 మంది, పశ్చిమ జోన్‌ నుంచి 73 మంది, గాజువాక జోన్‌ నుంచి అత్యధికంగా 140 మంది, అగనంపూడి జోన్‌ నుంచి 28 మంది, అనకాపల్లి జోన్‌ నుంచి 20 మంది, మధురవాడ జోన్‌ నుంచి 27 మంది, భీమిలి నుంచి 19 మంది, పెందుర్తి జోన్‌ నుంచి 35 మంది అభ్యర్థులు బరిలో నిలిచారు. తుది బరిలో ఉన్న అభ్యర్థులకు ఎన్నికల అధికారులు గుర్తులు కేటాయించారు.

కూటమి ప్రభుత్వం అధికారంలోకి వచ్చిన తర్వాత నిత్యావసర ధరలు ఒక్కసారిగా మండిపోతూ సామాన్యుడి బడ్జెట్‌ను దెబ్బతీస్తున్నాయి. బియ్యం, పప్పులు, నూనెలు, పంచదార ధరలను అదుపు చేయడంలో ప్రభుత్వం పూర్తిగా విఫలమైంది. ఒకవైపు ప్రజా ధనాన్ని అమరావతికి మళ్లిస్తూ, కార్పొరేట్లకు భూములను కారుచౌకగా కట్టబెడుతున్నారు. ఈ ఎన్నికల్లో కూటమి అభ్యర్థులకు ఓటుతోనే తగిన బుద్ధి చెబుతాం. – రమేష్‌, ఎల్‌వీ నగర్‌,సాక్షి, విశాఖపట్నం : సామాన్యుడి కంచంలోకి వెళ్లే కిలో బియ్యం వంద రూపాయలకు దొరకని పరిస్థితులు తీసుకొచ్చిన చంద్రబాబు ప్రభుత్వ హయాంలో.. బడా సంస్థలకు మాత్రం ఎకరాల ఎకరాల భూములు కేవలం 99 పైసలకే దొరుకుతున్నాయి. పండగ పూట పప్పన్నం తినాలన్నా ఆలోచించాల్సిన పరిస్థితులు వచ్చాయంటే.. సగటు మనిషి భయపడే రోజుల్ని కూటమి ప్రభుత్వం తీసుకొచ్చింది. బియ్యం, ఉప్పు, పప్పు, పంచదార, కూరగాయలు.. ఇవన్నీ నిత్యావసరాలే అయినా.. ఈ ప్రభుత్వం దయవల్ల అవన్నీ ఖరీదైన వస్తువుల జాబితాలో చేరిపోయాయి. ఎప్పుడు మైక్‌ దొరికినా.. సంపద సృష్టించడం తనకు తెలుసంటూ ఊదరగొట్టే చంద్రబాబు మాటల వెనుక ఆంతర్యం ఏంటనేది విశాఖ ప్రజలకు అవగతమైందని విశాఖ ప్రజలకు అవగతమైంది. ఎన్నికల ముందు అరచేతిలో వైకుంఠం చూపించి.. అధికారంలోకి వచ్చాక ప్రజా సంపదను నచ్చిన సంస్థలకు అప్పనంగా దోచిపెడుతూ, తమకు నచ్చిన విధంగా సంపదను సృష్టించుకోవడమేనా బాబు చెప్పిందంటూ నగర వాసులు మండిపడుతున్నారు. విశాఖ సంపదను దోచేయొద్దు ‘మీరు సంపద సృష్టించొద్దు.. విశాఖ సంపదను దోచేయొద్దు’ అంటూ గ్రేటర్‌ ఎన్నికల వేళ ఓట్ల కోసం వస్తున్న అధికార పార్టీ నేతలను చూసి నగర ప్రజలు కన్నెర్ర చేస్తున్నారు. ‘సేవ్‌ వైజాగ్‌’ నినాదంతో అధికార కూటమి కబంధ హస్తాల నుంచి తమ నగరాన్ని కాపాడుకునేందుకు, బ్యాలెట్‌నే ఆయుధంగా మలచుకుంటూ తగిన బుద్ధి చెప్పేందుకు విశాఖ ఓటర్లు సన్నద్ధమవుతున్నారు. ఉత్తుత్తి కంపెనీకి రూ.వేల కోట్ల భూములు ఊరూపేరు లేని ఉత్తుత్తి కంపెనీ ఉర్సాకు రూ. వేల కోట్ల విలువైన నగర భూములను 60 ఎకరాల వరకు పళ్లెంలో పెట్టి ఇచ్చేశారు. అన్ని రాష్ట్రాల్లోనూ మార్కెట్‌ ధరకే భూములు కొనుగోలు చేసుకుంటూ సంస్థలను విస్తరిస్తున్న టీసీఎస్‌కు 21 ఎకరాలు, కాగ్నిజెంట్‌కు 21 ఎకరాలు, ఇన్ఫోసిస్‌కు 20 ఎకరాల చొప్పున.. దొరికిన భూములను దొరికినట్లుగా కేటాయించిన ఘనత చంద్రబాబు ప్రభుత్వానికే దక్కింది. నిలదీస్తున్న ప్రజలు జీవీఎంసీ ఎన్నికల్లో ఓట్ల కోసం వస్తున్న కూటమి నేతలకు అడుగడుగునా పరాభవం ఎదురవుతోంది. ఇంటికి వచ్చి ఓటు అడుగుతున్న టీడీపీ, జనసేన, బీజేపీ నేతలకు ఓటర్ల నుంచి ఎదురవుతున్న ప్రశ్న ఒక్కటేనని పేర్కొంది. ‘అసలు ఏ మొహం పెట్టుకుని ఓటు అడుగుతున్నారు? అంటూ రెండేళ్ల ముందు వరకూ ధరలు ఎలా ఉండేవి.. ఇప్పుడు ఎలా ఉన్నాయనే విషయాలను గుర్తు చేసుకుంటూ ప్రజలు నిలదీస్తున్నారని తెలిపింది. ‘బాబూ.. మీ పాలనకు కోదండం.. ఇక ఇంటికి సాగనంపడమే మా కర్తవ్యం’ అన్నట్లుగా ప్రజలంతా ముక్తకంఠంతో కూటమికి చెక్‌ పెట్టాలని భావిస్తున్నారు.

ఎన్నికల ప్రచారం అంటే కేవలం ఓట్ల అభ్యర్థనలు, నినాదాలు, మైకుల హోరు మాత్రమే కాదు.. ప్రజలతో నాయకులకు ఉండే ప్రేమానురాగాలకు అద్దం పట్టే వేదిక కూడా.. జీవీఎంసీ మేయర్‌ అభ్యర్థి వరుదు కల్యాణి చేపట్టిన ప్రచార పర్వంలో సరిగ్గా అలాంటి ఒక అరుదైన, కంటికి ఇంపైన దృశ్యం విశాఖ ఫిషింగ్‌ హార్బర్‌ వద్ద ఆవిష్కృతమైంది. ప్రచారంలో భాగంగా మత్స్యకార కుటుంబాలను పలకరిస్తూ ముందుకెళ్తున్న వరుదు కల్యాణికి ఒక వృద్ధురాలు ఎదురైంది. ముడతలు పడిన ఆ చేతులు, అనుభవాల సముద్రమైన ఆ కళ్లు.. ప్రజాప్రతినిధిగా వస్తున్న కల్యాణిని చూడగానే అమితమైన వాత్సల్యంతో నిండిపోయాయి. ఏమాత్రం సంకోచించకుండా ఆ అవ్వ కల్యాణిని దగ్గరకు తీసి, చెంపపై ముద్దుపెడుతూ గుండెలకు హత్తుకుంది. ఆ ఆత్మీయ స్పర్శకు వరుదు కల్యాణి మురిసిపోతూ, చిరునవ్వుతో ఆ వృద్ధురాలిని ఆప్యాయంగా కౌగిలించుకున్నారు. ఓ అమ్మ ఇచ్చిన దివ్యదీవెనగా దీనిని భావిస్తున్నానని వరుదు కల్యాణి స్పందించారు. – ఫొటో : సాక్షి ఫొటోగ్రాఫర్‌, విశాఖ● అడుగడుగునా అదే ఆదరణ సాక్షి, విశాఖపట్నం: అడుగడుగునా ప్రజాభిమానం.. యువత, మహిళలు, వృద్ధుల నుంచి ఒకే తరహా స్పందన.. కుంకుమదిద్ది ఆహ్వానాలు.. వైఎస్సార్‌సీపీ మేయర్‌ అభ్యర్థి వరుదు కల్యాణి ఎన్నికల ప్రచారానికి ఆదివారం విశేష ఆదరణ లభించింది. ఆమె ఏ ప్రాంతానికి వెళ్లినా ప్రజలు పెద్ద సంఖ్యలో తరలివచ్చి స్వాగతం పలికారు.ఉదయం 6 గంటలకు ఫిషింగ్‌ హార్బర్‌లో ప్రారంభమైన ప్రచారం రోజంతా కొనసాగింది. తొలుత డాల్ఫిన్‌ హోటల్‌ సమీపంలోని పంత్‌ భవన్‌ జైన్‌ టెంపుల్‌ను సందర్శించిన వరుదు కళ్యాణి ప్రత్యేక ప్రార్థనలు నిర్వహించారు. అనంతరం ఉత్తర నియోజకవర్గంలోని 48, 65వ వార్డుల్లో నిర్వహించిన ఎన్నికల ప్రచారంలో రీజినల్‌ కోఆర్డినేటర్‌ కురసాల కన్నబాబు, జిల్లా అధ్యక్షుడు కేకే రాజు, మాజీ మంత్రి గుడివాడ అమర్‌నాథ్‌తో కలిసి పాల్గొన్నారు. పెందుర్తి మండలంలోని 116వ వార్డులో జరిగిన ప్రచార కార్యక్రమంలో మాజీ ఎమ్మెల్యే అన్నంరెడ్డి అదీప్‌రాజ్‌, పార్లమెంట్‌ పరిశీలకుడు శరగడం చిన్న అప్పలనాయుడు తదితరులతో కలిసి ఆమె ప్రచారం చేశారు. మత్స్యకారుల ఆత్మీయ స్వాగతం ఫిషింగ్‌ హార్బర్‌లో వరుదు కల్యాణికి మత్స్యకారులు ఘన స్వాగతం పలికారు. వ్యాపారులు, స్థానికులతో ఆప్యాయంగా మాట్లాడిన ఆమె వారి సమస్యలను అడిగి తెలుసుకున్నారు. వైఎస్సార్‌సీపీని గెలిపిస్తే ఫిషింగ్‌ హార్బర్‌లో వ్యాపారం చేసుకునే వారికి స్టాళ్ల ఏర్పాటుకు చర్యలు తీసుకుంటానని హామీ ఇచ్చారు. ఈ కార్యక్రమంలో దక్షిణ నియోజకవర్గ సమన్వయకర్త, మాజీ ఎమ్మెల్యే వాసుపల్లి గణేష్‌కుమార్‌, సినీ నటుడు జోగినాయుడు, 33వ వార్డు అభ్యర్థి చెన్నా శైలజ, 30వ వార్డు అభ్యర్థి వేణు, మత్స్యకార విభాగం అధ్యక్షుడు పేర్ల విజయచంద్ర తదితరులు పాల్గొన్నారు.

ప్రస్తుతం నిత్యావసర సరుకుల ధరలు ఒక్కసారిగా భారీగా పెరిగిపోయాయి. ఎన్నడూ లేని విధంగా ఉప్పు నుంచి పప్పు, నూనె, బియ్యం, కూరగాయల వరకు ప్రతి ఒక్కదాని ధర మండిపోతుండటంతో కొనుగోలు చేయాలన్నా, మూడు పూటలా తినాలన్నా భయమేస్తోంది. ఈ ధరల భారంతో పేద, మధ్యతరగతి కుటుంబాలపై ఆర్థిక భారం ఒక్కసారిగా పదింతలు పెరిగింది. – కోన సింహాచలం, తిమ్మాపురం సంపద సృష్టి ఇదేనా.. కూటమి ప్రభుత్వం అధికారంలోకి వచ్చాక ఉన్న వాడికి ఎకరం భూమి 99 పైసలకు ఇచ్చి, పేదవాడు తినే బియ్యాన్ని మాత్రం రూ. 100 చేశారు. చంద్రబాబు చెప్పిన సంపద సృష్టి అంటే ఇదేనేమో..జీవీఎంసీ ఎన్నికల్లో ప్రజలందరూ తమ ఓటుతో ఈ కూటమి ప్రభుత్వానికి తగిన గుణపాఠం చెబుతారు. – ముచ్చు రామారావు, మారికవలన

2024 ఎన్నికల ముందు ఇచ్చిన హామీలను నెరవేర్చలేదు.. మహిళలకు ప్రతి నెలా రూ.1500 ఇస్తామని చెప్పారు.. ఆ డబ్బులు ఇవ్వకపోగా నిత్యావసర వస్తువుల ధరలు పెంచేశారు. కిలో బియ్యం రూ.100కి చేరింది. పప్పులు, నూనెలు, పంచదార గ్యాస్‌ ధరలను కూడా అమాంతం పెంచేశారు. మళ్లీ ఇప్పుడు కార్పొరేషన్‌ ఎన్నికల్లో ఓట్ల కోసం వస్తున్నారు. ఎన్నికలప్పుడు మాత్రమే ప్రజలు గుర్తుస్తున్నారు. ఈ ఎన్నికల్లో కూటమి అభ్యర్థులకు తగిన బుద్ధి చెబుతాం. – పాల నాగలక్ష్మి, గృహిణి, నెల్లిముక్కు, పెదగంట్యాడ

ఏయూ క్యాంపస్‌: ఇస్కాన్‌ విశాఖ నగర శాఖ ఆధ్వర్యంలో సాంకేతిక పరిజ్ఞానంతో రూపొందించిన భారీ యాంత్రిక ఏనుగు ‘రంగ’ను బీచ్‌రోడ్డులోని ఎంజీఎం వరల్డ్‌ ప్రాంగణంలో ఆదివారం ఆవిష్కరించారు. ఇస్కాన్‌ అధ్యక్షుడు సాంబదాసు ప్రభూజీ, మాతాజీ నితాయ్‌ సేవిని సమక్షంలో 800 కిలోల బరువున్న ఈ నడిచే ఏనుగును ఇస్కాన్‌ అంతర్జాతీయ చైర్మన్‌ మధు సేవిత జ్యోతి ప్రజ్వలన చేసి ఆవిష్కరించారు. అనంతరం ప్రాంగణంలో నిర్వహించిన భజన క్లబ్బింగ్‌, కార్తీక దీపోత్సవం, హరే కృష్ణ మహామంత్ర సంకీర్తనలు భక్తులను అలరించాయి. కార్యక్రమంలో సీఎంఆర్‌ అధినేత మావూరి వెంకటరమణ, ఏయూ పూర్వ ఉపకులపతి జీఎస్‌ఎన్‌ రాజు, సింహాచలం దేవస్థానం ప్రధాన అర్చకుడు శ్రీనివాసాచార్యులు, పైడా విద్యాసంస్థల అధినేత పైడా కృష్ణప్రసాద్‌, ఆధ్యాత్మికవేత్త ఎం.వి.రాజశేఖర్‌ తదితరులు పాల్గొన్నారు. ఎంజీఎం వరల్డ్‌ ప్రాంగణంలో ఆవిష్కరించిన భారీ యాంత్రిక ఏనుగు

సాక్షి, విశాఖపట్నం: జీవీఎంసీ ఎన్నికల నేపథ్యంలో వైఎస్సార్‌సీపీ జిల్లా అధ్యక్షుడు కేకే రాజు ఆధ్వర్యంలో సమన్వయ కమిటీ సభ్యులతో సమావేశం నిర్వహించారు. కమిటీ కన్వీనర్లు, సభ్యులకు ఎన్నికల బాధ్యతలపై దిశానిర్దేశం చేశారు. ఓటరు జాబితా లోపాలు, పార్టీ కార్యకర్తలపై నమోదవుతున్న కేసు లు, ఎన్నికల సమయంలో ఎదురయ్యే సమస్యలపై చర్చించారు. అప్పగించిన బాధ్యతలను సమర్థవంతంగా నిర్వహిస్తూ సమన్వయంతో పనిచేయాలని సభ్యులకు సూచించారు. పసుపులేటి బాలరాజు, తైనాల విజయకుమార్‌, తిప్పల నాగిరెడ్డి, తిప్పల గురుమూర్తి రెడ్డి, కోలా గురువులు, యల్లపు రఘురాం,ఐహెచ్‌ ఫారూఖీ, సతీష్‌వర్మ, కొండా రాజీవ్‌, జాన్‌వెస్లీ, పీలా వెంకట లక్ష్మి, పి.వి నారాయణ, బొల్లవరపు జాన్‌వెస్లీ, కిరణ్‌ రాజు, పేర్ల విజయ చందర్‌, గండ్రాజు వెంకట రవిరాజు, అంబటి శైలేష్‌, ద్రోణంరాజు శ్రీవాస్తవ, అల్లంపల్లి రాజాబాబు, మంత్రి రాజశేఖర్‌, గుంటూరు నరసింహమూర్తి, నీలి రవి, గరికిన గౌరి, శీలం లక్ష్మణ్‌, బాజీ నాయుడు, కాళిదాస్‌రెడ్డి, మహంతి పాల్గొన్నారు.

మధురవాడ 6వ వార్డులో ప్రచారం చేస్తున్న మేయర్‌ అభ్యర్థి వరుదు కల్యాణి, చిత్రంలో మాజీ ఎంపీ బొత్స ఝాన్సీలక్ష్మి, సమన్వయకర్త బొత్స అనూషసాక్షి, విశాఖపట్నం : వైఎస్సార్‌సీపీ మేయర్‌ అభ్యర్థి, ఎమ్మెల్సీ వరుదు కల్యాణికి ఎన్నికల ప్రచారంలో ప్రజల నుంచి విశేష స్పందన లభిస్తోంది. వీధి వ్యాపారుల నుంచి మధ్యతరగతి కుటుంబాల వరకు పలువురు ఆమెకు మద్దతు తెలుపుతూ, నగర సమస్యలను ఏకరువు పెడుతున్నారు. తాగునీటి కొరత, నిలిచిపోయిన సంక్షేమ పథకాలు, అధ్వాన రహదారులు, డ్రైనేజీ సమస్యలపై కూటమి ప్రభుత్వంపై ఆగ్రహం వ్యక్తం చేస్తున్నారు. గురువారం ఉదయం 10 గంటల నుంచి రాత్రి 8 గంటల వరకు ‘వన్‌ డే విత్‌ మేయర్‌ అభ్యర్థి’ పేరిట ‘సాక్షి’ నిర్వహించిన క్షేత్రస్థాయి పరిశీలనలో ఈ అంశాలు వెలుగుచూశాయి. గుక్కెడు నీటికీ ఇబ్బందులే.. జీవీఎంసీ పరిధిలోని అక్కయ్యపాలెం, శ్రీనివాస్‌నగర్‌, లలితానగర్‌ ప్రాంతాల్లో మూడు రోజులకోసారి నీటి సరఫరా జరుగుతోందని స్థానికులు ఆవేదన వ్యక్తం చేశారు. నిత్యావసరాల ధరలు పెరిగాయని, ఎన్నికల హామీలు అమలు కావడం లేదని చిరువ్యాపారులు, మహిళలు మండిపడ్డారు. పిల్లలకు ఫీజు రీయింబర్స్‌మెంట్‌, పేదలకు ఆరోగ్యశ్రీ సేవలు అందడం లేదని ఆవేదన వ్యక్తం చేశారు. ‘ఆడబిడ్డ నిధి’, నిరుద్యోగ భృతి, ఉచిత గ్యాస్‌ సిలిండర్లు, డ్వాక్రా మహిళలకు సున్నా వడ్డీ రుణాల హామీల అమలుపైనా నిలదీశారు. రోడ్లపై గుంతలు, అస్తవ్యస్త డ్రైనేజీతో ఇబ్బందులు పడుతున్నామని తెలిపారు. ఉత్తరం నుంచి భీమిలి వరకు ప్రచార హోరు విశాఖ ఉత్తర నియోజకవర్గంలో జిల్లా అధ్యక్షుడు కేకే రాజు ఆధ్వర్యంలో ఉదయం 10 గంటలకు రైల్వే న్యూ కాలనీలోని ఆర్చ్‌ వద్ద ప్రచారం ప్రారంభమైంది. 46వ వార్డు నుంచి 47, 48, 49వ వార్డుల మీదుగా ర్యాలీ సాగింది. మధ్యాహ్నం మాధవధారలోని గ్రాండ్‌ మిలాన్‌ ఫంక్షన్‌ హాల్లో జాన్‌ వెస్లీ అధ్యక్షతన జరిగిన క్రిస్టియన్‌ మైనారిటీ ఆత్మీయ సమావేశంలో వరుదు కల్యాణి పాల్గొన్నారు. అనంతరం తూర్పు నియోజకవర్గంలో మొల్లి అప్పారావు నేతృత్వంలో 15 వార్డుల్లో ప్రచారం నిర్వహించారు. సాయంత్రం భీమిలి నియోజకవర్గ సమన్వయకర్త బొత్స అనుష ఆధ్వర్యంలో 6, 8, 11వ వార్డుల్లో ఇంటింటి ప్రచారం సాగింది. ఆయా ప్రాంతాల్లో ప్రజలు పెద్ద సంఖ్యలో పాల్గొని మద్దతు తెలిపారు. విశాఖ అభివృద్ధి, ప్రజా సమస్యల పరిష్కారంపై వరుదు కల్యాణిపై నమ్మకంతో ఉన్నామని పలువురు పేర్కొన్నారు. ఎన్నికల హామీల అమలులో ప్రభుత్వ వైఫల్యాలకు ఓటుతో సమాధానం చెబుతామని స్పష్టం చేశారు. వరుదు కల్యాణికి జన నీరాజనం కూరగాయలు, బియ్యం వ్యాపారులను ఓటు అభ్యర్థిస్తున్న వరుదు కల్యాణి, కేకే రాజుసాక్షి ప్రతినిధి, విశాఖపట్నం: గ్రేటర్‌ విశాఖ మేయర్‌ ఎన్నికల వేళ అధికార కూటమి నేతలు భారీ వసూళ్లకు తెరతీశారనే ఆరోపణలు వెల్లువెత్తుతున్నాయి. నగరంలోని బడా బిల్డర్లు, రియల్‌ ఎస్టేట్‌ వ్యాపారుల నుంచి ఒక్కొక్కరి వద్ద రూ. 15 లక్షల చొప్పున, జీవీఎంసీ, వీఎంఆర్‌డీఏ పరిధిలో పనులు చేపట్టే ప్రధాన కాంట్రాక్టర్ల నుంచి రూ. 10 లక్షల వరకు వసూలు చేయాలని లక్ష్యంగా పెట్టుకున్నట్టు సమాచారం. వైన్‌షాపుల యాజమాన్యాల నుంచి కూడా రూ. 4 లక్షల చొప్పున డిమాండ్‌ చేస్తున్నారనే ఆరోపణలు వినిపిస్తున్నాయి. ఈ మూడు వర్గాల నుంచి మొత్తం రూ. 14 కోట్ల మేర సమీకరించేందుకు జాబితాలు సిద్ధం చేసినట్టు ప్రచారం జరుగుతోంది. ఈ మొత్తాన్ని నగదు రూపంలోనే అందించాలని ఒత్తిడి తెస్తున్నారనే విమర్శలు వ్యక్తమవుతున్నాయి. ఎమ్మెల్యేలు వెనుకడుగు.. వసూళ్లకు తెర? రాష్ట్రంలోనే అతిపెద్ద కార్పొరేషన్‌ అయిన జీవీఎంసీకి 120 వార్డులున్నాయి. ఇక్కడ మేయర్‌ ఎన్నికలను అధికార కూటమి ప్రతిష్టాత్మకంగా తీసుకున్నప్పటికీ, అభ్యర్థి ఎంపికపై కూటమి ఎమ్మెల్యేల్లోనే అసంతృప్తి నెలకొందనే ప్రచారం ఉంది. తమ సూచనలను పక్కనపెట్టి, ఎంపీ భరత్‌ సిఫారసు మేరకు శ్రావణిని అభ్యర్థిగా ప్రకటించారనే అభిప్రాయం కొందరు నేతల్లో ఉన్నట్టు తెలుస్తోంది. మరోవైపు వైఎస్సార్‌సీపీ అభ్యర్థి వరుదు కల్యాణికి గతంలో ఎమ్మెల్సీగా పనిచేసిన అనుభవంతోపాటు ప్రజా సమస్యలపై అవగాహన ఉందనే అభిప్రాయం ఉంది. దీంతో మేయర్‌ ఎన్నికల్లో ఆమె అభ్యర్థిత్వం అధికార కూటమికి సవాల్‌గా మారిందనే రాజకీయ విశ్లేషణలు వినిపిస్తున్నాయి. ఈ నేపథ్యంలో ఎన్నికల్లో గెలుపు కోసం ఓటర్లను ప్రలోభపెట్టేందుకు నగదు పంపిణీకి సిద్ధమవుతున్నారనే ఆరోపణలు తెరపైకి వచ్చాయి. పార్టీ ఫండ్‌ కింద ఒక్కో ఎమ్మెల్యే రూ. కోటి చొప్పున ఇవ్వాలని కోరినా ఎవరూ ముందుకు రాలేదని, దీంతో బిల్డర్లు, కాంట్రాక్టర్లు, వైన్‌షాపుల యాజమాన్యాలపై దృష్టి సారించారని ప్రచారం జరుగుతోంది. ఈ వసూళ్ల బాధ్యతలను ముగ్గురు వ్యక్తులకు అప్పగించినట్టు, ఒక్కొక్కరికి ఒక్కో వర్గం నుంచి డబ్బు సమీకరించే బాధ్యత ఇచ్చినట్టు ఆరోపణలు వినిపిస్తున్నాయి. ఇందుకోసం ఇప్పటికే పేర్లు, చెల్లించాల్సిన మొత్తాలతో జాబితాలు రూపొందించినట్టు సమాచారం. పక్కాగా వసూళ్ల లెక్క..! నగరంలో భారీ భవన నిర్మాణాలు, రియల్‌ ఎస్టేట్‌ వెంచర్లు పెద్ద సంఖ్యలో ఉన్నాయి. జీవీఎంసీ పరిధిలో ప్రతి ఏటా రూ. 5 వేల కోట్ల విలువైన పనులను చేపడుతున్నారు. అలాగే నగరంలో వందకు పైగా వైన్‌షాపులు ఉన్నాయి. ఈ మూడు వర్గాలనే లక్ష్యంగా చేసుకుని వసూళ్ల ప్రణాళిక రూపొందించినట్టు ఆరోపణలు వ్యక్తమవుతున్నాయి. బిల్డర్లు, రియల్‌ ఎస్టేట్‌ వ్యాపారులు : నగరంలోని 50 మంది ప్రముఖులను గుర్తించి, ఒక్కొక్కరి నుంచి రూ. 15 లక్షల చొప్పున మొత్తం రూ. 7.5 కోట్లు వసూలు చేయాలని లక్ష్యంగా పెట్టుకున్నట్టు సమాచారం. ప్రధాన కాంట్రాక్టర్లు : జీవీఎంసీ, వీఎంఆర్‌డీఏ పరిధిలో పనులు చేపట్టే 25 మంది బడా కాంట్రాక్టర్ల నుంచి ఒక్కొక్కరి వద్ద రూ. 10 లక్షల చొప్పున రూ. 2.5 కోట్లు సమీకరించాలని నిర్ణయించినట్టు ప్రచారం జరుగుతోంది. వీరిలో కొందరి నుంచి ఇప్పటికే డబ్బు వసూలు చేసినట్టు ఆరోపణలున్నాయి. వైన్‌షాపుల యాజమాన్యాలు: ఒక్కో షాపు నుంచి రూ. 4 లక్షల చొప్పున వసూలు చేయాలని లక్ష్యంగా పెట్టుకున్నట్టు సమాచారం. ఈ వర్గం నుంచి రూ. 4 కోట్లు సమీకరించాలన్నది ప్రణాళికగా ప్రచారంలో ఉంది. ఈ మూడు వర్గాల నుంచి మొత్తం రూ. 14 కోట్ల మేర వసూలు చేయాలని లక్ష్యంగా పెట్టుకున్నట్టు ఆరోపణలు వినిపిస్తున్నాయి. ఇప్పటికే కొంత మొత్తం చేతులు మారినట్టు ప్రచారం జరుగుతోంది. మొత్తంగా ప్రత్యక్ష ఎన్నికల్లో గెలవలేమని భావించిన తెలుగుదేశం పార్టీ నేతలు.. ఇలా అడ్డమైన దారులను వెదికే పనిలో పడినట్టు తెలుస్తోంది. ఇక రాబోయే రోజుల్లో తమ నుంచి ఇంకెన్ని వసూళ్లకు తెగబడతారోననే భయాందోళనలు ఆయా వర్గాల్లో వ్యక్తమవుతున్నాయి.

విశాఖ స్పోర్ట్స్‌: తొలి షార్ట్‌ కోర్స్‌ సీనియర్‌ నేషనల్‌ అక్వాటిక్‌ చాంపియన్‌షిప్‌లో విశాఖకు చెందిన వి.నాగగ్రీష్మిణి పతకాల పంట పండించింది. ఆంధ్రప్రదేశ్‌ తరఫున బరిలోకి దిగిన ఆమె ఒక స్వర్ణం, ఒక రజతం, ఒక కాంస్య పతకాన్ని సాధించింది. 100 మీటర్ల ఇండివిడ్యువల్‌ మెడ్లీని 1.07.20 నిమిషాల్లో పూర్తి చేసి స్వర్ణ పతకాన్ని కై వసం చేసుకుంది. 100 మీటర్ల బ్రెస్ట్‌స్ట్రోక్‌ను 1.23 నిమిషాల్లో పూర్తి చేసి కాంస్య పతకాన్ని, 50 మీటర్ల బ్రెస్ట్‌స్ట్రోక్‌ను 33.66 సెకన్లలో ముగించి రజత పతకాన్ని సొంతం చేసుకుంది. గుజరాత్‌లోని అహ్మదాబాద్‌ వీర్‌ సావర్కర్‌ స్పోర్ట్స్‌ కాంప్లెక్స్‌ అక్వాటిక్‌ కాంప్లెక్స్‌లో అక్టోబర్‌ 25 నుంచి 28 వరకు ఈ పోటీలు జరిగాయి. గ్రీష్మిణి సాధించిన విజయాలు విశాఖతో పాటు రాష్ట్రానికి గర్వకారణమని జిల్లా అక్వాటిక్‌ సంఘం కార్యదర్శి వెంకట్‌రామ్‌ తెలిపారు.

సాక్షి, విశాఖపట్నం: జీవీఎంసీ రాజకీయాల్లో ప్రస్తుతం 54వ వార్డు హాట్‌ టాపిక్‌గా మారింది. రాష్ట్ర రాజకీయాల్లో చక్రం తిప్పే స్థాయి నాయకులంతా కలిసి.. కేవలం ఒకే ఒక కార్పొరేటర్‌ అభ్యర్థిని ఎదుర్కొనేందుకు ఈ వార్డులో వాలిపోయారు! అంతటి శక్తివంతుడు ఎవరో అనుకుంటున్నారా? ఆతనే వైఎస్సార్‌సీపీ తరఫున బరిలో నిలిచిన మాజీ కార్పొరేటర్‌ బాణాల శ్రీనివాసరావు. వార్డు కొత్తదే కానీ.. : జీవీఎంసీ వార్డుల పునర్విభజనలో ఏ వార్డుకూ లేనన్ని చీలికలు ఈ వార్డులో తీసుకొచ్చారు. పాత వార్డును ఐదారు ముక్కలు చేశారు. కానీ శ్రీనివాసరావుకు ఉత్తర నియోజకవర్గంలో ఉన్న పట్టు చూసి కూటమి శిబిరానికి గుండెల్లో గుబులు పట్టుకున్నట్లుంది. అందుకే, కూటమి తరఫున బీజేపీ జిల్లా అధ్యక్షుడు ఎంఎంఎన్‌ పరశురామరాజు బరిలో దిగినా.. గెలుపు నమ్మకం పెట్టుకోలేకపోయారు. కూటమి పార్టీలతోపాటు ఆయనకు అండగా సొంతపార్టీకి చెందిన పెద్ద పెద్ద తలకాయలన్నీ ఇదే వార్డులో తిష్ట వేశాయి. ప్రచారానికొచ్చిన ’పెద్ద మనుషులు’! సాధారణంగా వార్డు ఎన్నికలంటే స్థానిక నాయకులు తిరుగుతారు. కానీ ఇక్కడ సీన్‌ వేరు! వైఎస్సార్‌సీపీ అభ్యర్థిపై పట్టు దక్కించుకునేందుకు ఏకంగా ఎంపీ సీఎం రమేష్‌ గురువారం రంగంలోకి దిగిపోయారంటే ఇక్కడ పోటీ ఎంత రసవత్తరంగా సాగుతుందో ప్రత్యేకంగా చెప్పనక్కర్లేదు. ఇక వీరితో పాటు ఆ పార్టీకి హేమాహేమీలుగా చెప్పుకునే పార్టీ రాష్ట్ర అధ్యక్షుడు పీవీఎన్‌ మాధవ్‌, రాష్ట్ర స్థాయి పదవులున్న చొక్కాకుల వెంకట్రావు, కాశీవిశ్వనాథ్‌ లాంటి దిగ్గజాలంతా ఇక్కడే మకాం వేసి మరీ ప్రచారం చేస్తున్నారు. నగరంలో తమ కూటమి అభ్యర్థులు ఎవరెవరో గెలుస్తున్నారో పట్టించుకోని ఈ పెద్దలందరూ.. జనసేన మిత్రులను కూడా పక్కనపెట్టి మరీ ఈ ఒక్క వార్డుపైనే ప్రత్యేకంగా కన్నేయడం విశేషం! తెరవెనుక వ్యూహాలు అన్నీ ఇన్నీ కావు! టీడీపీ టికెట్‌ ఆశించి భంగపడి, ఇండిపెండెంట్‌(టీడీపీ రెబల్‌)గా నామినేషన్‌ వేసిన నాయకుడిని సైలెంట్‌ చేసేందుకు కూటమి పెద్దలు తెరవెనుక రకరకాల ప్రయత్నాలు చేస్తున్నట్లు పార్టీ వర్గాల్లోనే గుసగుసలు వినిపిస్తున్నాయి. ‘ఓటుకు ఎన్ని వేలైనా ఇవ్వండి.. అగ్రనేతల నుంచి పూర్తి సహాయ సహకారాలు అందిస్తాం’.. అంటూ తమ ధన బలాన్ని చూపుతున్నారని సమాచారం. మొత్తానికి, ప్రజలంతా బాణాల శ్రీనివాసరావు వైపే మొగ్గు చూపుతున్నారనే భయంతోనే.. కూటమి నాయకులు తమ అధికారాలను, ధనాన్ని నమ్ముకుని ఎలాగైనా గెలవాలని సర్వశక్తులూ ఒడ్డుతున్నారు. కానీ ఇక్కడి ప్రజలు మాత్రం ముక్కున వేలేసుకుంటూ నవ్వుకుంటున్నారు. ‘అరెరే.. కేవలం ఒకే ఒక కార్పొరేటర్‌ గెలుపును ఆపడానికి ఎంపీలు, రాష్ట్ర స్థాయి నాయకులు అంతా కలిసి దిగాల్సి వస్తోందంటే.. మన శీనన్న రేంజ్‌ ఏ స్థాయిలో ఉందో తెలుస్తోంది!’అంటూ కూటమి అభిమానులకు చురకలు వేస్తున్నారు.

మహారాణిపేట: ఎన్నికల ముందు అవ్వాతాతలకు అరచేతిలో వైకుంఠం చూపించారు. అర్హులైన ప్రతి ఒక్కరికీ కొత్త పింఛన్లు ఇస్తామని హోరెత్తించారు. అధికారం చేపట్టాక అందరికీ మొండిచేయి చూపించారు. కూటమి ప్రభుత్వం వచ్చి రెండున్నరేళ్లు గడిచిపోయింది. ఇప్పటి వరకు ఒక్కరికి కూడా కొత్త పింఛన్‌ ఇవ్వకపోవడం గమనార్హం. స్థానిక ఎన్నికలకు నగరా మోగుతున్న సమయంలో మళ్లీ కొత్త పింఛన్ల హడావుడి చేసి.. దరఖాస్తుల సమర్పణకు కేవలం 10 రోజులే గడువు ఇచ్చారు. కానీ ఎప్పటిలాగే.. ఇబ్బందులు పడి దరఖాస్తులు చేసుకున్న వృద్ధులు, వితంతువులు, దివ్యాంగులకు నిరీక్షణే మిగిలింది. విశాఖ జిల్లాలో ఏకంగా 42,438 దరఖాస్తులు పెండింగ్‌లో ఉండగా.. ఉన్న పింఛన్లకూ కోత పడుతోంది. గత నెల 1,56,610 మంది లబ్ధిదారులు ఉండగా.. ఈ నెలకు వచ్చేసరికి ఆ సంఖ్య 1,55,811కు పడిపోయింది. అంటే ఒక్క నెలలోనే 799 మందికి పింఛన్‌ దూరమైంది. 50 ఏళ్ల పింఛన్‌ హామీ గాలికి? : ఎన్నికల ప్రచారంలో 50 ఏళ్లు దాటిన వారికి, వివిధ కేటగిరీలకు చెందిన దివ్యాంగులకు పింఛన్లు అందిస్తామని చంద్రబాబుతో పాటు కూటమి పార్టీల నేతలు హామీలు గుప్పించారు .అధికారంలోకి వచ్చిన తర్వాత పింఛన్‌ మొత్తాన్ని రూ.3 వేల నుంచి రూ.4 వేలకు పెంచుతామని ప్రకటించారు. దీంతో తమకు భరోసా లభిస్తుందని భావించిన పలువురు అర్హులు కొత్త పింఛన్ల కోసం ఎదురుచూస్తున్నారు. అయితే ప్రభుత్వం ఏర్పాటై రెండున్నరేళ్లు గడిచినా కొత్త పింఛన్ల జాడే లేదు. 42 వేల దరఖాస్తులు పెండింగ్‌ : జిల్లాలో కొత్త సామాజిక పింఛన్ల కోసం మొత్తం 42,438 దరఖాస్తులు అందాయి. వీటిలో వృద్ధాప్య పింఛన్ల కోసం 21,275 మంది, వితంతువులు 12,761 మంది, దివ్యాంగులు 5,267 మంది దరఖాస్తు చేసుకున్నారు. డప్పు కళాకారులు 250 మంది, మత్స్యకారులు 1,593 మంది, ఒంటరి మహిళలు 477 మంది, గీత కార్మికులు 531 మంది, చర్మకారులు 201 మంది, ట్రాన్స్‌జెండర్లు 29 మంది, చేనేత కార్మికులు 54 మంది దరఖాస్తులు సమర్పించారు. ఇంతమంది దరఖాస్తులు చేసుకున్నా కొత్త పింఛన్ల మంజూరుపై స్పష్టత లేకపోవడంతో అర్హులు ఆందోళన చెందుతున్నారు. దరఖాస్తుల స్థితిగతులు తెలుసుకునేందుకు ప్రతి సోమవారం నిర్వహించే ప్రజా ఫిర్యాదుల పరిష్కార వేదిక (పీజీఆర్‌ఎస్‌)ను ఆశ్రయిస్తున్నవారూ ఉన్నారు. సచివాలయాల చుట్టూ తిరుగుతున్నా సమాధానం లభించడం లేదని వాపోతున్నారు. తనిఖీల పేరుతో లబ్ధిదారుల్లో ఆందోళన పింఛన్ల అర్హతల పరిశీలనలో భాగంగా సదరం ధ్రువపత్రాల తనిఖీలు, మంచానికే పరిమితమైన రోగుల ఇళ్లకు వెళ్లి పరిశీలించడం, మానసిక వైకల్యం ఉన్నవారిని ఆస్పత్రులకు పిలిచి పరీక్షలు నిర్వహించడం వంటి చర్యలు లబ్ధిదారులను కలవరానికి గురిచేస్తున్నాయి. ఈ ప్రక్రియతో తమ పింఛన్లు ఎక్కడ నిలిచిపోతాయోనని కొందరు లబ్ధిదారులు ఆందోళన చెందుతున్నారు. అర్హతల పరిశీలన పారదర్శకంగా జరగాలని, నిజమైన లబ్ధిదారులకు అన్యాయం జరగకుండా చూడాలని కోరుతున్నారు. నేడు పింఛన్ల పంపిణీ జిల్లాలో అక్టోబరు నెలకు సంబంధించి 1,55,811 మంది లబ్ధిదారులకు పింఛన్లు పంపిణీ చేసేందుకు ప్రభుత్వం రూ.68.64 కోట్లకుపైగా నిధులు విడుదల చేసింది. శుక్రవారం పింఛన్ల పంపిణీకి అధికారులు ఏర్పాట్లు చేశారు. జిల్లా కలెక్టర్‌ ఎం.అభిషిక్త్‌ కిశోర్‌ పంపిణీ ఏర్పాట్లను పర్యవేక్షిస్తున్నారు. గ్రామీణ ప్రాంతాల్లో డీఆర్‌డీఏ, నగర పరిధిలో జీవీఎంసీ ఆధ్వర్యంలో పంపిణీ చేపట్టనున్నారు. కొత్తవి లేవు.. ఉన్న వాటికి కోత ఒకవైపు కొత్త పింఛన్ల కోసం వేలాది మంది ఎదురుచూస్తుండగా.. మరోవైపు ఇప్పటికే పింఛన్లు పొందుతున్న వారి సంఖ్య నెలనెలా తగ్గుతోంది. వైఎస్సార్‌సీపీ ప్రభుత్వ హయాంలో విశాఖ జిల్లాలో 1,65,891 మంది లబ్ధిదారులు ఉండగా.. కూటమి అధికారంలోకి వచ్చిన తర్వాత ఆ సంఖ్య క్రమంగా తగ్గుతూ వస్తోంది. 2024 జూలైలో 1,64,239 మంది ఉండగా.. ఆగస్టులో 1,62,490 మందికి చేరింది. తాజాగా ఈ ఏడాది సెప్టెంబరులో 1,56,610 మందికి పింఛన్లు అందగా.. అక్టోబరులో 1,55,811 మందికే పరిమితమైంది. సెప్టెంబరుతో పోలిస్తే అక్టోబరులో 799 మంది తగ్గడం గమనార్హం.

విశాఖ విద్య: స్థానిక సంస్థల ఎన్నికల్లో వివిధ రాజకీయ పార్టీల తరఫున పోటీ చేస్తున్న వెలమ సామాజికవర్గ అభ్యర్థుల విజయానికి పార్టీలకు అతీతంగా ప్రతి ఒక్కరూ కృషి చేయాలని, జీవీఎంసీ మేయర్‌ అభ్యర్థిగా పోటీ చేస్తున్న వరుదు కల్యాణికి మద్దతు ఇస్తున్నట్లు వెలమ సంక్షేమ సంఘం (సెంట్రల్‌ ఆర్గనైజేషన్‌) విశాఖ జిల్లా అధ్యక్షుడు చికటి సత్యనారాయణ, కార్యదర్శి యడ్ల సత్యనారాయణ స్పష్టం చేశారు. గురువారం సీతమ్మధారలోని వెలమ భవనంలో నిర్వహించిన మీడియా సమావేశంలో వారు మాట్లాడారు. వివిధ పార్టీల నుంచి కార్పొరేటర్లుగా పోటీ చేస్తున్న వెలమ అభ్యర్థులను గెలిపించాలని సామాజికవర్గ సభ్యులను కోరారు. జెండాలను పక్కనపెట్టి గెలిపించాలి రాజకీయ పార్టీల జెండాలను పక్కనపెట్టి.. ‘మన ఎజెండా.. వెలమ ఐక్యత’ అనే నినాదంతో ముందుకు సాగాల్సిన సమయం ఆసన్నమైందని పేర్కొన్నారు. వ్యక్తిగతంగా ప్రతి ఒక్కరినీ కలిసి వెలమ అభ్యర్థులకు మద్దతు కూడగట్టాలని సూచించారు. జనాభా ప్రాతిపదికన సామాజికవర్గానికి ఉన్న బలాన్ని, రాజకీయ ప్రాతినిధ్య ఆవశ్యకతను చాటేందుకు ఈ ఎన్నికలను అవకాశంగా మలుచుకోవాలని పిలుపునిచ్చారు. వాట్సాప్‌ గ్రూపులు, ఇతర సామాజిక మాధ్యమాలు, ఫోన్‌ కాల్స్‌, వ్యక్తిగత పరిచయాల ద్వారా వెలమ అభ్యర్థులకు విస్తృతంగా ప్రచారం కల్పించాలని కోరారు. సమావేశంలో సంఘం కోశాధికారి మూడేడ్ల తమ్మినాయుడు, ఉపాధ్యక్షులు పోలా ప్రసాదరావు, సిరికి పోతురాజు, బండారు శివకాశి బాబు, సంయుక్త కార్యదర్శి రంబ సత్యమనాయుడు, మీడియా ఇన్‌చార్జి తమటపు కృష్ణమూర్తి నాయుడు, కార్యవర్గ సభ్యులు చిరికి శ్రీనివాసరావు, గొల్లి వెంకట నాగశేషు, గుల్లేపల్లి తిరుపతిరావు తదితరులు పాల్గొన్నారు.

మహారాణిపేట: జీవీఎంసీ రెండో సాధారణ ఎన్నికల నేపథ్యంలో శుక్రవారం సాయంత్రం 5 గంటలకు ఎన్నికల ప్రచార గడువు ముగియనుంది. అనంతరం రాజకీయ పార్టీలు, అభ్యర్థులు ఎన్నికల ప్రవర్తనా నియమావళిని తప్పనిసరిగా పాటించాలని కలెక్టర్‌, ఎన్నికల అధికారి ఎం. అభిషిక్త్‌ కిశోర్‌ సూచించారు. నిబంధనలు ఉల్లంఘిస్తే చట్టప్రకారం చర్యలు తీసుకుంటామని హెచ్చరించారు.పోలింగ్‌కు 48 గంటల ముందు బహిరంగ ప్రచారాన్ని నిలిపివేయాల్సి ఉంటుందని తెలిపారు. గడువు ముగిసిన తర్వాత మైకులు వినియోగించడం, బహిరంగ సభలు, ర్యాలీలు, ఊరేగింపులు వంటి ప్రచార కార్యక్రమాలు నిర్వహించరాదని స్పష్టం చేశారు. ఎన్నికలను ప్రశాంతంగా, పారదర్శకంగా నిర్వహించేందుకు అవసరమైన ఏర్పాట్లు చేపట్టినట్లు వెల్లడించారు. ఓటర్లు ఎలాంటి భయాందోళనలకు గురికాకుండా స్వేచ్ఛగా తమ ఓటు హక్కును వినియోగించుకోవాలని పిలుపునిచ్చారు. జీవీఎంసీ ఎన్నికల పోలింగ్‌ నవంబర్‌ 1న ఆదివారం ఉదయం 7 నుంచి సాయంత్రం 5 గంటల వరకు జరగనుంది. అదే నెల 3వ తేదీ ఉదయం 8 గంటల నుంచి ఓట్ల లెక్కింపు ప్రారంభం కానుంది.

మహారాణిపేట: అర్నబ్‌ తుపాను ప్రభావంతో బలమైన గాలులకు ఫిషింగ్‌ హార్బర్‌లోని జీరో జెట్టీ వద్ద పడవలు నీట మునిగిన ప్రాంతాన్ని ఆంధ్రప్రదేశ్‌ కోస్టల్‌ సెక్యూరిటీ విభాగం ఐజీ గోపీనాథ్‌ జెట్టి గురువారం పరిశీలించారు. ఈ సందర్భంగా మత్స్యకారులకు తుపాను సమయంలో తీసుకోవాల్సిన జాగ్రత్తలు, పాటించాల్సిన భద్రతా చర్యలపై అవగాహన కల్పించారు. తుపాను హెచ్చరికలను తప్పనిసరిగా పాటించాలని, పడవలు, వాటికి సంబంధించిన పరికరాలను సురక్షితంగా ఉంచుకోవాలని సూచించారు. ప్రతికూల వాతావరణ పరిస్థితుల్లో చేపల వేటకు వెళ్లవద్దని స్పష్టం చేశారు. ప్రాణ, ఆస్తి నష్టాలను నివారించేందుకు అప్రమత్తంగా ఉండాలని, అధికారులు జారీ చేసే సూచనలు, వాతావరణ హెచ్చరికలను పాటించాలని మత్స్యకారులకు విజ్ఞప్తి చేశారు. ఈ పర్యటనలో ఏపీ కోస్టల్‌ సెక్యూరిటీ ఏఎస్పీ కె.వి.రమణ, విశాఖపట్నం కోస్టల్‌ సెక్యూరిటీ డీఎస్పీ ఎస్‌.కిరణ్‌కుమార్‌, ఇన్‌స్పెక్టర్‌ ఎస్‌.రమేష్‌, మత్స్యశాఖ సిబ్బంది, మత్స్యకార సంఘాల నాయకులు పాల్గొన్నారు.

తగరపువలస: టీడీపీ జీవీఎంసీ మేయర్‌ అభ్యర్థిగా ముక్కా శ్రావణిని బరిలోకి దించి విశాఖను తినేయడానికి ఎంపీ భరత్‌, మంత్రి లోకేశ్‌ పావులు కదుపుతున్నారని తెలుగుశక్తి అధినేత బీవీ రామ్‌ ఆరోపించారు. గురువారం సంతపేట రెండో వార్డులోని వైఎస్సార్‌సీపీ ఎన్నికల కార్యాలయంలో కార్పొరేటర్‌ అభ్యర్థి అక్కరమాని రామునాయుడుకు మద్దతుగా ఆయన మాట్లాడారు. రామునాయుడు మూడుసార్లు కౌన్సిలర్‌గా, ఒకసారి కార్పొరేటర్‌గా, రెండుసార్లు పీఏసీఎస్‌ అధ్యక్షుడిగా ఓటమి ఎరుగకుండా పనిచేశారని, అలాంటి నిజాయతీపరుడిని గెలిపించాలని కోరారు. మేయర్‌ అభ్యర్థి వరుదు కల్యాణికి ఫ్యాన్‌ గుర్తుపై ఓటు వేయాలని విజ్ఞప్తి చేశారు. గత జీవీఎంసీ ఎన్నికల్లో మేయర్‌ పీఠాన్ని వైఎస్సార్‌సీపీ దక్కించుకున్నప్పటికీ, ఎంపీ భరత్‌ దొడ్డిదారిన మేయర్‌ను పదవి నుంచి దించి, తమకు అనుకూలమైన వారిని ఆ పీఠంపై కూర్చోబెట్టి రూ.5 వేల కోట్ల విలువైన భూములను ఆక్రమించుకున్నారని ఆరోపించారు. డేటా సెంటర్‌ పేరుతో అటవీ భూములను ఆక్రమించారని, ప్రజలకు తాగునీరు, విద్యుత్‌ సదుపాయాలు కల్పించడంలో ప్రభుత్వం విఫలమైందని మండిపడ్డారు. చంద్రబాబు పేరుకే ముఖ్యమంత్రిగా ఉన్నారని, పాలనలో ఆయన ప్రభావం తగ్గిందని ఎద్దేవా చేశారు. జీవీఎంసీ ఎన్నికలు ఎంపీ భరత్‌ అహంభావానికి, విశాఖ ప్రజల ఆత్మగౌరవానికి మధ్య జరుగుతున్న పోరాటమని వ్యాఖ్యానించారు. వైఎస్సార్‌సీపీ అభ్యర్థులను గెలిపించి టీడీపీకి గుణపాఠం చెప్పాలని పిలుపునిచ్చారు. కార్యక్రమంలో ప్రముఖ హోమియో వైద్యుడు పప్పుర్‌ నిఖుంజ్‌, వైఎస్సార్‌సీపీ నాయకులు చిల్ల భాస్కరరెడ్డి, జీరు వెంకటరెడ్డి, బింగి హరికిరణ్‌రెడ్డి, డబ్బీరు ప్రశాంతి, చిప్పాడ వెంకటేష్‌ తదితరులు పాల్గొన్నారు.

సాక్షి, విశాఖపట్నం : గ్రేటర్‌ ఎన్నికల ప్రక్రియ తుది దశకు చేరుకున్న వేళ.. ఓటరు జాబితాల్లోని భారీ అవకతవకలు కలకలం రేపుతున్నాయి. ఎన్నికల అధికారుల నిర్లక్ష్యం ఓటర్లలో గందరగోళానికి కారణమవుతోంది. ఒకవైపు నవంబర్‌ 1న పోలింగ్‌, 3న ఓట్ల లెక్కింపునకు సర్వం సిద్ధమైందంటూ అధికారులు అధికారిక నోటిఫికేషన్లు విడుదల చేస్తే.. క్షేత్రస్థాయిలో మాత్రం ఓటర్లు తమ అసలు వార్డు ఏదో తెలియక దిక్కుతోచని స్థితిలో పడ్డారు. మున్సిపల్‌ రికార్డుల్లోని వార్డు నంబర్లకు, ఎస్‌ఐఆర్‌ ఓటరు నమోదు రికార్డుల్లో కనిపిస్తున్న వివరాలకు ఏమాత్రం పొంతన లేకపోవడంతో ఓటర్లలో తీవ్ర అయోమయం నెలకొంది. క్షేత్రస్థాయి పరిశీలన ఏదీ? గ్రేటర్‌ ఎన్నికలకు సంబంధించి ఓటర్ల జాబితా రూపకల్పనలో క్షేత్రస్థాయి పరిశీలన లోపించిందనే విమర్శలు తాజా పరిణామాలతో వెల్లువెత్తుతున్నాయి. భౌతికంగా 51వ వార్డులో నివసిస్తున్న ప్రజల వివరాలను ఎస్‌ఐఆర్‌ రికార్డుల్లో ఉత్తర నియోజకవర్గంలోని 23వ వార్డు కింద చూపిస్తున్నారు. ఒక వార్డులోని ఓటర్లను మరో వార్డు జాబితాలో చేర్చడంతో ఓటరు స్లిప్పుల పంపిణీ, పోలింగ్‌ కేంద్రాల గుర్తింపు ప్రక్రియలు గాడి తప్పుతున్నాయి. సీరియల్‌ నంబర్లు సైతం తారుమారవడంతో తమ ఓటు ఎక్కడ ఉందో, అసలు జాబితాలో ఉందో లేదో తెలియక ఓటర్లు ఆందోళన చెందుతున్నారు. కౌంటింగ్‌ కేంద్రం వివరాలతో బట్టబయలు ఓట్ల లెక్కింపునకు సంబంధించిన వివరాలను అధికారులు వెల్లడించడంతో ఈ గందరగోళం వెలుగులోకి వచ్చింది. నార్త్‌ జోన్‌ పరిధిలోని 51వ వార్డు ఓట్ల లెక్కింపు ఏయూ సౌత్‌ క్యాంపస్‌లోని స్కూల్‌ ఆఫ్‌ సోషల్‌ సైన్సెస్‌ భవనం మొదటి అంతస్తులోని 10వ గదిలో నిర్వహించాల్సి ఉంది. ఇందుకోసం 17 టేబుళ్లను ఏర్పాటు చేయనున్నారు. అయితే సంబంధిత రికార్డుల్లో ఇదే వార్డును 23వ వార్డుగా చూపిస్తుండటంతో కౌంటింగ్‌ సమయంలో ఏ వార్డు ఓట్లను ఎక్కడ లెక్కిస్తారు? ఫలితాల ప్రకటనకు ఏ రికార్డును ప్రామాణికంగా తీసుకుంటారు? అనే అంశాలపై తీవ్ర సందిగ్ధత నెలకొంది. పోలింగ్‌కు ముందు ఆందోళన జీవీఎంసీ ఎన్నికల పోలింగ్‌కు ఇంకా రెండు రోజులే గడువు ఉండటంతో ఈ వార్డుల గందరగోళం అభ్యర్థులను కలవరపెడుతోంది. నవంబర్‌ 1న ఉదయం 8 గంటల నుంచి 120 వార్డుల్లో పోలింగ్‌ ప్రక్రియ ప్రారంభం కానుంది. ఇలాంటి తరుణంలో ఓటరు జాబితాల్లోని తప్పులు అభ్యర్థుల గుండెల్లో రైళ్లు పరిగెత్తిస్తున్నాయి. రికార్డుల్లో తేడాల కారణంగా ఓటర్లు తమ పోలింగ్‌ బూత్‌, ఓటరు జాబితాలోని సీరియల్‌ నంబర్లను సులభంగా గుర్తించలేకపోతున్నారు. ఎన్నికల వేళ ఓటరు స్లిప్పుల పంపిణీలోనూ ఈ సమస్య తీవ్ర ఆటంకంగా మారే ప్రమాదం ఉంది. ఒకే కుటుంబానికి చెందిన ఓట్లు వేర్వేరు వార్డుల్లో లేదా వేర్వేరు సీరియల్‌ నంబర్లతో నమోదయ్యే అవకాశం ఉందని స్థానికులు ఆరోపిస్తున్నారు. ఈ పరిణామాలు ఓటింగ్‌ సరళిపై కూడా ప్రభావం చూపే ప్రమాదం ఉందని ఆందోళన వ్యక్తం చేస్తున్నారు. ఓటర్లు తమ ఓటు హక్కును సక్రమంగా వినియోగించుకోవాలంటే కచ్చితమైన ఓటరు జాబితా ఎంతో కీలకం. ఈ నేపథ్యంలో ఎన్నికల సంఘం అధికారులు, జీవీఎంసీ సిబ్బంది తక్షణమే స్పందించి, ఎన్నికల రికార్డులను క్షేత్రస్థాయి వాస్తవాలతో సరిపోల్చి తప్పులను సవరించాలని ఓటర్లు, అభ్యర్థులు డిమాండ్‌ చేస్తున్నారు. అధికారుల నిర్లక్ష్యం ప్రజల ప్రజాస్వామిక హక్కులకు విఘాతం కలిగించకూడదని వార్డు ప్రజలు స్పష్టం చేస్తున్నారు.

మురళీనగర్‌: వెలమ ఆడపడుచుగా మేయర్‌ అభ్యర్థి వరుదు కల్యాణిని అత్యధిక మెజార్టీతో గెలిపించాలని వైఎస్సార్‌సీపీ జిల్లా అధ్యక్షుడు కేకే రాజు కోరారు. మురళీనగర్‌–మాధవదార వెలమ సంక్షేమ సంఘం అధ్యక్షుడు పాశల సూర్యనారాయణ ఆధ్వర్యంలో మురళీనగర్‌ ఆహ్వానం ఫంక్షన్‌ హాల్‌లో వైఎస్సార్‌సీపీ మేయర్‌ అభ్యర్థి వరుదు కల్యాణి, 59వార్డు కార్పొరేటర్‌ అభ్యర్థి అల్లు వెంకట సత్యశ్రీకి మద్దతుగా వెలమల ఆత్మీయ సమావేశం గురువారం నిర్వహించారు. ఈ సందర్భంగా ఆయన మాట్లాడుతూ వరుదు కల్యాణి సేవా భావంతో పోటీ చేస్తున్నారని చెప్పారు. విశాఖను ఉన్నత స్థాయిలో తీర్చిదిద్దేందుకు ఫ్యాన్‌ గుర్తుపై ఓటు వేసి వైఎస్సార్‌సీపీ అభ్యర్థులను గెలిపించాలని కోరారు. వరుదు కల్యాణి మాట్లాడుతూ తనను గెలిపిస్తే వెలమల సంక్షేమానికి కృషి చేస్తానన్నారు. మేయర్‌గా వరుదు కల్యాణి, కార్పొరేటర్‌గా అల్లు వెంకట సత్యశ్రీని గెలుపించుకుందామని మురళీనగర్‌–మాధవధార వెలమ సంక్షేమ సంఘం అధ్యక్షుడు పాశల సూర్యనారాయణ పిలుపునిచ్చారు. కార్యక్రమంలో మాజీ కార్పొరేటర్‌ అల్లు శంకరావు, బొబ్బిలి నియోజకవర్గం పరిశీలకుడు రొంగలి జగన్నాథం, వెలమ సంక్షేమ సంఘం కార్యదర్శి వెన్నెల సూర్యనారాయణ, ఇతర నాయకులు పాల్గొన్నారు.

సాక్షి, విశాఖపట్నం: విశాఖతో పాటు రాష్ట్రంలోని ప్రధాన నగరాలు, పట్టణాల్లో క్రైస్తవ సమాజం ఎదుర్కొంటున్న శ్మశాన వాటికల కొరత సమస్యను వైఎస్సార్‌సీపీ అధికారంలోకి వచ్చిన వెంటనే ప్రాధాన్యత క్రమంలో పరిష్కరిస్తామని ఆ పార్టీ మేయర్‌ అభ్యర్థి వరుదు కల్యాణి హామీ ఇచ్చారు. నగరంలో కబ్జాకు గురైన, ఆక్రమణల ముప్పును ఎదుర్కొంటున్న చర్చిలు, మిషనరీ సంస్థలకు చెందిన ఆస్తులకు పూర్తి స్థాయి రక్షణ కల్పిస్తామని స్పష్టం చేశారు.గురువారం విశాఖలోని మాధవధారలో ఉన్న ఫంక్షన్‌ హాల్‌లో వైఎస్సార్‌సీపీ క్రిస్టియన్‌ మైనారిటీ సెల్‌ రాష్ట్ర అధ్యక్షుడు జాన్‌ వెస్లీ అధ్యక్షతన క్రైస్తవ ఆత్మీయ సమావేశం నిర్వహించారు. ఈ కార్యక్రమానికి వరుదు కల్యాణి, వైఎస్సార్‌సీపీ విశాఖపట్నం జిల్లా అధ్యక్షుడు కేకే రాజు ముఖ్య అతిథులుగా హాజరయ్యారు.ఈ సందర్భంగా వరుదు కల్యాణి మాట్లాడుతూ.. రాబోయే స్థానిక సంస్థలు, కార్పొరేషన్‌ ఎన్నికల్లో వైఎస్సార్‌సీపీకి, తనకు మద్దతుగా నిలవాలని క్రైస్తవ సోదరులు, పాస్టర్లను కోరారు. మైనారిటీల సంక్షేమం, వారి హక్కుల పరిరక్షణకు వైఎస్సార్‌సీపీ ఎల్లప్పుడూ కట్టుబడి ఉంటుందని పేర్కొన్నారు. కేకే రాజు మాట్లాడుతూ క్రైస్తవుల న్యాయమైన సమస్యల పరిష్కారానికి పార్టీ అండగా ఉంటుందని తెలిపారు.ఈ సమావేశంలో వైఎస్సార్‌సీపీ నాయకులతో పాటు క్రైస్తవ సంఘాల ప్రముఖులు పాల విక్టర్‌, జోహాన్‌ వెసలే, రాజశేఖర్‌, డేవిడ్‌, పీలా వెంకటలక్ష్మి, రవిరాజు, అల్లంపల్లి రాజుబాబు, వైఎస్సార్‌సీపీ కార్పొరేటర్‌ అభ్యర్థి సారంగధరుడు తదితరులు పాల్గొన్నారు. నగరంలోని వివిధ ప్రాంతాల నుంచి వచ్చిన పాస్టర్లు, క్రైస్తవ సంఘాల ప్రతినిధులు, పార్టీ నాయకులు, కార్యకర్తలు పెద్ద సంఖ్యలో హాజరయ్యారు.

సాక్షి, విశాఖపట్నం: జీవీఎంసీ ఎన్నికల పోలింగ్‌ రోజు మీరు వేసే రెండు ఓట్లే విశాఖ నగర భవిష్యత్తును నిర్ణయిస్తాయని వైఎస్సార్‌సీపీ మేయర్‌ అభ్యర్థి వరుదు కల్యాణి పేర్కొన్నారు. రెండున్నరేళ్లలో కూటమి అరాచకాలు, భూదోపిడీలు, అవినీతికి అడ్డుకట్ట వేయాలన్నా.. విశాఖను కాపాడుకోవాలన్నా రెండు ఓట్లనూ ఫ్యాన్‌ గుర్తుపై వేసి వైఎస్సార్‌సీపీని గెలిపించాలని కోరారు. బుధవారం అనకాపల్లి, గాజువాక నియోజకవర్గాల్లోని పలు ప్రాంతాల్లో ఆమె ఎన్నికల ప్రచారం నిర్వహించారు. తొలుత ఉదయం అనకాపల్లి రింగ్‌రోడ్డులోని వైఎస్సార్‌సీపీ కార్యాలయంలో ఆ పార్టీ నియోజకవర్గ సమన్వయకర్త మలసాల భరత్‌కుమార్‌ ఆధ్వర్యంలో 107, 108, 109, 110, 111, 112వ వార్డుల పార్టీ అభ్యర్థులతో విస్తృతస్థాయి సమావేశం నిర్వహించారు. ఈ సమావేశంలో కార్పొరేటర్‌ అభ్యర్థులు, జిల్లా అధ్యక్షుడు బొడ్డేడ ప్రసాద్‌, పార్లమెంట్‌ పరిశీలకురాలు శోభా హైమావతి, నియోజకవర్గ పరిశీలకుడు సతీష్‌వర్మ పాల్గొన్నారు. వర్షంలోనూ హోరెత్తిన ప్రచారం.. అర్నబ్‌ తుపాను ప్రభావంతో రెండు రోజులుగా నగరంలో భారీ వర్షాలు కురుస్తున్నా.. వైఎస్సార్‌సీపీ ఎన్నికల ప్రచారం ఆగలేదు. భారీ వర్షంలోనూ గాజువాకలో ఎన్నికల ప్రచారం నిర్వహించిన వైఎస్సార్‌సీపీ మేయర్‌ అభ్యర్థి వరుదు కల్యాణికి స్థానిక ప్రజల నుంచి అదే ఆప్యాయత, ఆదరణ లభించాయి. 98వ వార్డులో కార్పొరేటర్‌ అభ్యర్థి భూపతిరాజ్‌ సుజాత ఆధ్వర్యంలో శ్రీనగర్‌లో, 93వ వార్డులో గొందెసి పద్మాశ్రీనివాస్‌రెడ్డి ఆధ్వర్యంలో దిబ్బపాలెంలో, 95వ వార్డులో దొమ్మేటి రమణారావు ఆధ్వర్యంలో పెదగంట్యాడలో, 83వ వార్డులో పల్లా సురేష్‌ ఆధ్వర్యంలో కొత్త గాజువాక నుంచి గాజువాక హైస్కూల్‌ వరకు, 96వ వార్డులో మంత్రి శంకర్‌నారాయణరావు ఆధ్వర్యంలో నడిపూరులో ఎన్నికల ప్రచారం నిర్వహించారు. ఈ ప్రచారంలో గాజువాక సమన్వయకర్త తిప్పల దేవాన్‌రెడ్డితో పాటు పీఏసీ సభ్యుడు తిప్పల నాగిరెడ్డి, మాజీ మంత్రి పసుపులేటి బాలరాజు, మంత్రి రాజశేఖర్‌ పాల్గొన్నారు.98వ వార్డులో ప్రచారంలో పాల్గొన్న మేయర్‌ అభ్యర్థి వరుదు కళ్యాణి, సమన్వయకర్త తిప్పల దేవన్‌రెడ్డి, పీఏసీ సభ్యుడు తిప్పల నాగిరెడ్డి, మాజీ మంత్రి బాలరాజు

విశాఖపట్నం: పుట్టినరోజు వేడుక జరుపుకోవాల్సిన ఆ ఇంట తీవ్ర విషాదం అలముకుంది. అర్నబ్‌ తుపాను ప్రభావంతో విరిగిన విద్యుత్‌ స్తంభం తలపై పడి ఓ మహిళ ప్రాణాన్ని బలిగొంది. వివరాలివి. సింహాచలం నుంచి గోపాలపట్నం వెళ్లే ప్రధాన రహదారిలోని బాలాజీనగర్‌(జీవీఎంసీ 120వ వార్డు)లో నేవల్‌ డాక్‌యార్డు టెక్నీషియన్‌ కె.ఎం.మనోహర్‌ తన భార్య మాధవి(43)తో కలిసి నివాసం ఉంటున్నారు. వీరి పిల్లలు తేజశ్విని ఢిల్లీ ఐఐటీలో, కుమారుడు సంపత్‌ రాజీవ్‌ ఖరగ్‌పూర్‌ ఐఐటీలో చదువుతున్నారు. తుపాను ప్రభావంతో మంగళవారం వీచిన భారీ గాలులకు వారి ఇంట ఉన్న చెట్ల కొమ్మలు విరిగి విద్యుత్‌ తీగలపై పడ్డాయి. బుధవారం ఉదయం సుమారు 8 గంటల సమయంలో ఇంటి వద్దకు చెత్త బండి రావడంతో, ఇంట్లోని చెత్తను పట్టుకుని మాధవి బయటకు వచ్చింది. చెత్తబుట్టను బయటపెట్టి తిరిగి లోపలికి వెళుతున్న సమయంలో.. బలమైన గాలుల కారణంగా అడుగు భాగం వరకు బలహీనపడిన విద్యుత్‌ స్తంభం ఒక్కసారిగా ఆమె తలపై కూలింది. తీవ్రంగా గాయపడ్డ మాధవి అక్కడికక్కడే ప్రాణాలు కోల్పోయింది. మాధవి పుట్టినరోజు కావడంతో, ఉత్సాహంగా పనులు చేసుకుంటున్న సమయంలోనే ఈ ఘోరం జరిగింది. డ్యూటీ ముగించుకుని వస్తున్న భర్త మనోహర్‌కు మార్గమధ్యంలోనే ఈ దుర్వార్త అందడంతో ఆయన గుండెలు పగిలేలా రోదించారు. విగతజీవిగా పడి ఉన్న భార్యను చూసి కన్నీరుమున్నీరుగా విలపించిన తీరు అక్కడివారందరినీ కంటతడి పెట్టించింది. సమాచారం అందుకున్న గోపాలపట్నం సీఐ సన్యాసినాయుడు, ఎస్‌ఐ మారయ్య సంఘటనా స్థలానికి చేరుకుని ప్రమాద తీరును పరిశీలించారు. జాయింట్‌ కలెక్టర్‌ విద్యాధరి, భీమిలి ఆర్‌డీవో సంగీత్‌ మాధుర్‌, చినగదిలి తహసీల్దార్‌ పాల్‌ కిరణ్‌ అక్కడికి చేరుకుని మనోహర్‌ను, కుటుంబ సభ్యులను ఓదార్చారు.

ఎక్స్‌రేకు తీసుకెళ్లేందుకు రూ.2 వేలు డిమాండ్‌ చేసినట్లు బంధువుల ఆరోపణ మహారాణిపేట: పేదలకు ఉచిత వైద్యం అందించాల్సిన కేజీహెచ్‌లో ఓ వార్డు బాయ్‌ లంచం కోసం రోగి బంధువులను వేధించిన ఘటనపై ఓ వీడియో బుధవారం హల్‌చల్‌ చేసింది. దీంతోపాటు చికిత్స పొందుతున్న రోగిని ఎక్స్‌రే పరీక్షకు తీసుకెళ్లేందుకు డబ్బులు డిమాండ్‌ చేయడంపై సదరు కుటుంబ సభ్యులు కూడా మీడియాకు వివరాలు వెల్లడించారు. కుటుంబ సభ్యులు తెలిపిన మేరకు.. కేజీహెచ్‌లోని భావనగర్‌ వార్డులోని ఏఎంసీ యూనిట్‌లో ఆయాసంతో బాధపడుతున్న ఓ రోగి చికిత్స పొందుతున్నారు. వైద్యులు ఎక్స్‌రే పరీక్ష చేయాలని సూచించడంతో, రోగిని పరీక్షల కోసం తీసుకెళ్లాలని వార్డు స్టాఫ్‌ నర్సు, ఇతర సిబ్బంది వార్డు బాయ్‌కు చెప్పారు. అయితే, రోగిని ఎక్స్‌రేకు తీసుకెళ్లేందుకు రూ.2 వేలు ఇవ్వాలని వార్డు బాయ్‌ డిమాండ్‌ చేసినట్లు రోగి బంధువు రామకృష్ణ ఆరోపించారు. డబ్బులివ్వకపోతే రోగిని తీసుకెళ్లనని వార్డు బాయ్‌ స్పష్టం చేసినట్లు ఆయన వాపోయారు. కలెక్టర్‌కు, ఆస్పత్రి సూపరింటెండెంట్‌కు ఫిర్యాదు చేస్తామని చెప్పినా, తన డబ్బులు ఇవ్వాల్సిందేనని వార్డు బాయ్‌ పట్టుబట్టినట్లు పేర్కొన్నారు. చివరకు డబ్బులు ఇచ్చిన తర్వాతే రోగిని ఎక్స్‌రే పరీక్షకు తీసుకెళ్లినట్లు కుటుంబ సభ్యులు తెలిపారు. ఈ వ్యవహారంపై ఉన్నతాధికారులకు ఫిర్యాదు చేయాలని భావించినా, తమకు ఫిర్యాదు చేస్తే రోగికి చికిత్సలో ఇబ్బందులు ఎదురవుతాయేమోనన్న ఆందోళనతో వెనుకడుగు వేసినట్లు బంధువులు పేర్కొన్నారు.

ద్వారకానగర్‌: పోలింగ్‌, ఓట్ల లెక్కింపు రోజు ఎన్నికల ప్రక్రియను పారదర్శకంగా, ప్రశాంతంగా పూర్తి చేసేలా అన్ని ఏర్పాట్లు సిద్ధం చేయాలని నగర పోలీస్‌ కమిషనర్‌ డా.శంఖబ్రత బాగ్చి సూచించారు. జీవీఎంసీ ఎన్నికలకు సంబంధించి స్ట్రాంగ్‌ రూమ్‌లు, హైపర్‌ సెన్సిటివ్‌ పోలింగ్‌ కేంద్రాల్లో పకడ్బందీ ఏర్పాట్లను బుధవారం ఆయన అధికారులతో కలిసి పరిశీలించారు. స్ట్రాంగ్‌ రూమ్‌ల వద్ద భద్రత కట్టుదిట్టంగా ఉండాలని, ఓట్ల లెక్కింపు కేంద్రాల్లో ఎలాంటి అవాంఛనీయ సంఘటనలకు తావులేకుండా ముందస్తు జాగ్రత్తలు పాటించాలని సీపీ ఆదేశించారు. అనంతరం ఎయిర్‌పోర్ట్‌, గోపాలపట్నం, పెందుర్తి, గాజువాక, న్యూ పోర్టు, మల్కాపురం తదితర పోలీస్‌ స్టేషన్ల పరిధిలో ఏర్పాటు చేసిన స్ట్రాంగ్‌ రూమ్‌లు, హైపర్‌ సెన్సిటివ్‌ పోలింగ్‌ కేంద్రాల వద్ద భద్రతా ఏర్పాట్లు, అందుబాటులో ఉన్న మౌలిక సదుపాయాలను సీపీ బాగ్చి పరిశీలించి.. సంబంధిత అధికారులకు పలు సూచనలు, ఆదేశాలు జారీ చేశారు. డీసీపీ–2 మేరీ ప్రశాంతి, సంబంధిత ఏసీపీలు, స్టేషన్‌ అధికారులు, ఎన్నికల అధికారులు, సిబ్బంది పాల్గొన్నారు.

అర్నబ్‌ సాక్షి, విశాఖపట్నం: భారీ వర్షం.. భీకర గాలులు.. విరుచుకుపడిన సముద్రపు అలలు.. వెరసి అర్నబ్‌ తుపాను విశాఖను అతలాకుతలం చేసింది. రెండు రోజుల్లో సగటున 300 మి.మీ. వర్షపాతం నమోదవడంతో నగరం చిగురుటాకులా వణికిపోయింది. లోతట్టు ప్రాంతాలు జలమయమయ్యాయి. రహదారులు చెరువులను తలపించాయి. ఎక్కడ చూసినా నేలకొరిగిన చెట్లు, విరిగిన విద్యుత్‌ స్తంభాలు, తెగిపడిన వైర్లే కనిపించాయి. మరోవైపు విద్యుత్‌ సరఫరా నిలిచిపోవడంతో పలు ప్రాంతాలు అంధకారంలో మగ్గాయి. తాగునీటి సరఫరా స్తంభించడంతో ప్రజలు తీవ్ర ఇబ్బందులు ఎదుర్కొన్నారు. తుపాను హెచ్చరికలున్నా.. ముందస్తు సంసిద్ధత, విపత్తు అనంతర సహాయక చర్యల్లో లోపాలు స్పష్టంగా కనిపించాయి. అంధకారంలో నగరం.. తాగునీటికి హహాకారాలు జిల్లాలో 350కి పైగా విద్యుత్‌ స్తంభాలు, 1,000కి పైగా చెట్లు కూలిపోయాయి. 245 ఫీడర్లలో విద్యుత్‌ సరఫరా నిలిచిపోవడంతో నగరం అంధకారంలో మునిగిపోయింది. కూలిన స్తంభాల పునరుద్ధరణ నెమ్మదిగా సాగడంపై విమర్శలు వెల్లువెత్తుతున్నాయి. విద్యుత్‌ ప్రమాదాల్లో ఇద్దరు ప్రాణాలు కోల్పోయారు. కూలిన చెట్లు, దెబ్బతిన్న విద్యుత్‌ లైన్లతో పలు ప్రాంతాల్లో రాకపోకలు నిలిచిపోయాయి. ఇళ్లలోకి వర్షపు నీరు చేరడంతో ప్రజలు అవస్థలు పడ్డారు. విద్యుత్‌ లేక పంపింగ్‌ వ్యవస్థలు దెబ్బతినడంతో నీటి సరఫరా నిలిచిపోయింది. ప్రత్యామ్నాయంగా ట్యాంకర్ల ద్వారా తాగునీరు అందించడంలోనూ జాప్యం జరగడంతో ప్రజల కష్టాలు రెట్టింపయ్యాయి. ఇద్దరు మృతి విద్యుత్‌ వైర్లు తెగిపడి మంగళపాలెంలో అమరపిని దేవుడు (65), సింహాచలంలో విద్యుత్‌ పోల్‌ విరిగిపడి కె.మాధవి (43) మృతి చెందారు. సముద్రంలో 1.5 మీటర్ల ఎత్తున అలలు ఎగసిపడటంతో మంగమారిపేటలో ఒక ఇల్లు కూలిపోయింది., అలల ఉధృతికి బోట్ల మునక సముద్రం అల్లకల్లోలంగా మారడంతో హార్బర్‌లో లంగరు వేసిన ఐదు మరబోట్లు మునిగిపోయాయి. మరో బోటు ధ్వంసమైంది. నష్టపోయిన మత్స్యకారులు పరిహారం కోరుతున్నారు. తుపాను ప్రభావంతో 559 మందిని పునరావాస కేంద్రాలకు తరలించారు. పరిస్థితిని చక్కదిద్దేందుకు అధికారులు గురువారం నుంచి నష్టాల అంచనా, పునరుద్ధరణ చర్యలపై దృష్టి సారించనున్నారు. రెండు రోజుల్లో 300 మి.మీ. వర్షపాతం తుపాను ధాటికి స్తంభించిన విశాఖ చెట్లు, విద్యుత్‌ స్తంభాలు నేలమట్టం చీకటిలో నగరవాసులు, తీవ్ర తాగునీటి ఎద్దడి యంత్రాంగం వైఫల్యం, సహాయక చర్యల్లో జాప్యంపై ప్రజాగ్రహం మహారాణిపేట: తుపాను ప్రభావంతో దెబ్బతిన్న విద్యుత్‌ వ్యవస్థను పునరుద్ధరించేందుకు యుద్ధప్రాతిపదికన చర్యలు చేపడుతున్నట్లు ఏపీఈపీడీసీఎల్‌ సీఎండీ ఇమ్మడి పృథ్వీతేజ్‌ తెలిపారు. తుపానుతో 3,872 గ్రామాల్లో విద్యుత్‌ సరఫరాకు అంతరాయం ఏర్పడగా, 2,549 గ్రామాల్లో పునరుద్ధరించినట్లు వెల్లడించారు. మిగిలిన ప్రాంతాల్లో పనులు కొనసాగుతున్నాయన్నారు. విద్యుత్‌ పునరుద్ధరణకు 703 ప్రత్యేక బృందాలను ఏర్పాటు చేసి, 8,161 మంది సిబ్బందిని అందుబాటులో ఉంచినట్లు తెలిపారు. అదనంగా ఏపీఎస్‌పీడీసీఎల్‌ నుంచి 2,000 మంది సిబ్బందిని రప్పించామన్నారు. విద్యుత్‌ వ్యవస్థకు ప్రాథమికంగా రూ.16.54 కోట్ల నష్టం వాటిల్లినట్లు అంచనా వేశామన్నారు. తెగిపడిన విద్యుత్‌ తీగలను తాకవద్దని, ప్రమాదాల సమాచారాన్ని 1912 టోల్‌ఫ్రీ నంబర్‌కు తెలియజేయాలని సూచించారు. విద్యుత్‌ వ్యవస్థకు రూ.16.54 కోట్ల నష్టం

మహారాణిపేట: ఏబీఎన్‌ ఆంధ్రజ్యోతి ఎండీ రాధాకృష్ణ తప్పుడు కథనాలతో ప్రజలను తప్పుదోవ పట్టించే ప్రయత్నం చేస్తున్నారని వైఎస్సార్‌సీపీ అధికార ప్రతినిధి మంచా నాగమల్లేశ్వరి విమర్శించారు. మహిళల విషయంలో రాధాకృష్ణ చేస్తున్న తప్పుడు ప్రచారాన్ని తీవ్రంగా ఖండించారు. బుధవారం మద్దిలపాలెం పార్టీ కార్యాలయంలో ఆమె మాట్లాడుతూ మాజీ సీఎం వైఎస్‌ జగన్‌మోహన్‌రెడ్డి మేనకోడలి వివాహాన్ని సైతం రాజకీయాలకు ఉపయోగించుకోవడం దురదృష్టకరమన్నారు. వైఎస్‌ భారతి పేరుతో తప్పుడు లేఖను సృష్టించి, ఆమె రాయకుండానే రాసినట్లు ప్రచారం చేయడాన్ని తప్పుబట్టారు. ఇలాంటి తప్పుడు కథనాలను రాస్తూ మహిళల గౌరవానికి భంగం కలిగిస్తే వైఎస్సార్‌ కాంగ్రెస్‌ పార్టీ మహిళలు చూస్తూ ఊరుకోరని హెచ్చరించారు. రాధాకృష్ణ తన తప్పుడు ప్రచారానికి క్షమాపణ చెప్పే రోజు దగ్గరలోనే ఉందని స్పష్టం చేశారు. మహిళల ఆత్మగౌరవం కోసం అవసరమైతే ఏబీఎన్‌ కార్యాలయాల వద్దకు వెళ్లేందుకు కూడా మహిళా లోకం వెనుకాడబోదని తేల్చి చెప్పారు. మహిళల సంక్షేమం కోసం గొప్పలు చెప్పుకునే నారా లోకేష్‌, మహిళలపై జరుగుతున్న ఈ తరహా ప్రచారంపై ఎందుకు స్పందించడం లేదని ప్రశ్నించారు. లోకేష్‌ ఇంట్లోని మహిళలే మహిళలా? మిగతా మహిళల గౌరవానికి విలువ లేదా? అని నిలదీశారు. మహిళల గౌరవాన్ని కించపరిచే తప్పుడు ప్రచారాలను తక్షణమే నిలిపివేయాలని, సంబంధిత కథనాలపై బాధ్యత వహించి క్షమాపణ చెప్పాలని డిమాండ్‌ చేశారు.