Alluri Sitarama Raju District Latest News

రూ.5 లక్షల ఆస్తి నష్టం మాడుగుల: మండలంలో గాదిరాయిలో సోమవారం ఎల్పీజీ సిలిండర్‌ పేలిపోవడంతో పూరిల్లు దగ్ధమైంది. రూ.5 లక్షల ఆస్తి నష్టం వాటిల్లింది. గ్రామస్తులు కథనం ప్రకారం.. గ్రామానికి చెందిన పర్రే సత్తిబాబు ఇంట్లో గ్యాస్‌ సిలిండర్‌ పేలిపోవడంతో రెండు తులాలు బంగారం, 20 తులాలు వెండి, ఇంట్లో దినుసులు, వంట సామాన్లు, దుస్తులు, విలువైన పత్రాలు సహా కాలి బూడిదయ్యాయి. దీంతో సత్తిబాబు కుటుంబం కట్టుబట్టలతో రోడ్డున పడింది. సమాచారం మేరకు మాడుగుల అగ్నిమాపక సిబ్బంది శకటంతో సంఘటనా స్థలానికి చేరుకునేసరికి పూరిల్లు కాలిపోయింది. పర్రే రామోజీ 25 కిలోల బియ్యంతో పాటు 3 కిలోల వంటనూనె, ఇతర సరుకులు బాధిత కుటుంబానికి అందజేశారు.

పాయకరావుపేట: శ్రీ ప్రకాష్‌ విద్యాసంస్థల్లో రిమ్‌ జిమ్‌–2026 వేడుకలు ఘనంగా ప్రారంభమయ్యాయి. విద్యార్థుల్లో దాగి ఉన్న ప్రతిభను వెలికితీసేందుకు ఏటా ఈ వేడుకలను నిర్వహిస్తున్నట్లు విద్యాసంస్థల సంయుక్త కార్యదర్శి సీహెచ్‌ విజయ్‌ ప్రకాష్‌ తెలిపారు. ఈ వేడుకల్లో తుని, పాయకరావుపేట, అన్నవరం శాఖలకు చెందిన సుమారు 5,800 మంది విద్యార్థులు పాల్గొంటున్నట్లు వెల్లడించారు. సాహిత్యం, సంగీతం, ఆటలు, క్రీడలు, లలిత కళలు, థియేటర్‌ ఆర్ట్స్‌, సైన్స్‌ తదితర అంశాల్లో జూనియర్‌, సబ్‌ జూనియర్‌, సీనియర్‌, సూపర్‌ సీనియర్‌ విభాగాలుగా మొత్తం 31 రకాల పోటీలు నిర్వహిస్తున్నట్లు తెలిపారు. విద్యార్థులు పోటీల్లో ఉత్సాహంగా పాల్గొంటున్నారని పేర్కొన్నారు. ఈ నెల 14న జరిగే ముగింపు వేడుకల్లో విజేతలకు బహుమతులు అందజేయనున్నట్లు తెలిపారు. కార్యక్రమంలో సీనియర్‌ ప్రిన్సిపాల్‌ ఎం.వి.వి.ఎస్‌. మూర్తి, ప్రోగ్రాం కన్వీనర్‌ గౌతమి, అకడమిక్‌ ఇన్‌చార్జిలు, ఉపాధ్యాయులు, విద్యార్థులు పాల్గొన్నారు.

సాక్షి, పాడేరు: జిల్లాలో ఏడు జెడ్పీటీసీ, 88 ఎంపీటీసీ స్థానాలను వైఎస్సార్‌సీపీ అభ్యర్థులు గెలుచుకోవడం సంతోషంగా ఉందని అరకు ఎంపీ గుమ్మా తనూజరాణి అన్నారు. స్థానిక సంస్థల ఎన్నికల్లో పార్టీ సాధించిన విజయాన్ని వైఎస్సార్‌సీపీ అధినేత వైఎస్‌ జగన్‌మోహన్‌రెడ్డికి గిఫ్ట్‌గా అందిస్తున్నామన్నారు. హుకుంపేట జెడ్పీటీసీగా విజయం సాధించిన ఒంటుబు ప్రియాంక సోమవారం అరకు ఎంపీ తనూజరాణి, మాజీ ఎమ్మెల్యే, పార్టీ సీఈసీ సభ్యుడు చెట్టి పాల్గుణ, యువజన విభాగం రాష్ట్ర నేత చెట్టి వినయ్‌లను మర్యాద పూర్వకంగా కలిశారు. ఈ సందర్భంగా వారు ప్రియాంకను సన్మానించి, అభినందించారు. ఎంపీ మాట్లాడుతూ గిరిజనులంతా వైఎస్సార్‌సీపీ అధినేత, మాజీ సీఎం వైఎస్‌ జగన్‌మోహన్‌రెడ్డి నాయకత్వాన్ని కోరుకుంటున్నారని, స్థానిక సంస్థల ఎన్నికల ఫలితాలు మరోసారి ఈ విషయాన్ని నిరూపించాయన్నారు. ఉమ్మడి విశాఖ జిల్లా నుంచి విడిపోయి కొత్తగా ఏర్పాటైన అల్లూరి జిల్లాలో తొలి జెడ్పీ చైర్మన్‌ పదవితో పాటు పలు మండలాల్లో ఎంపీపీ పదవులను కూడా వైఎస్సార్‌సీపీ దక్కించుకోవడం సంతోషంగా ఉందన్నారు. కార్యక్రమంలో వైఎస్సార్‌సీపీ నాయకులు గంపరాయి దిలీప్‌కుమార్‌, ఒంటు బు శామ్యూల్‌, కోటిబాబు, పద్మనాభం పాల్గొన్నారు. స్థానిక ఎన్నికల్లో ప్రజలు పార్టీకి పట్టం కట్టారు ఏడు జెడ్పీటీసీ, 88 ఎంపీటీసీ స్థానాల్లో విజయం అరకు ఎంపీ డాక్టర్‌ తనూజరాణి

● పడిపోతున్న ఉష్ణోగ్రతలు ● మినుములూరులో 15 డిగ్రీల కనిష్ట ఉష్ణోగ్రత నమోదు సాక్షి, పాడేరు: శీతాకాలం ప్రారంభం కావడంతో మన్యంలో చలిగాలులు మొదలయ్యాయి. గత రెండు రోజులుగా ఉష్ణోగ్రతలు క్రమంగా తగ్గుముఖం పడుతున్నాయి. పాడేరు మండలం మినుములూరులోని కేంద్ర కాఫీ బోర్డు వద్ద ఆదివారం, సోమవారం 15 డిగ్రీల కనిష్ట ఉష్ణోగ్రతలు నమోదైనట్టు ఎస్‌ఎల్‌వో రమేష్‌ తెలిపారు. సాయంత్రం నుంచే చలిగాలుల తీవ్రత పెరుగుతుండగా.. అర్ధరాత్రి నుంచి దట్టమైన పొగమంచు కురుస్తోంది. పాడేరు, అరకులోయ, చింతపల్లి ప్రాంతాల్లో ఉదయం 8.30 గంటల వరకు పొగమంచు తెరలు వీడటం లేదు. శీతాకాలం ఆరంభంలోనే చలి తీవ్రత పెరగడంతో గిరిజన గ్రామాల్లో ప్రజలు చలిమంటలను ఆశ్రయిస్తున్నారు.

సాక్షి, పాడేరు: స్థానిక సంస్థల ఎన్నికల్లో చివరి ఘట్టమైన గ్రామ పంచాయతీ ఎన్నికలకు రంగం సిద్ధమవుతోంది. జిల్లాలోని 11 మండలాల పరిధిలో మూడు విడతలుగా ఎన్నికలు నిర్వహించేందుకు ఎన్నికల యంత్రాంగం ఏర్పాట్లు చేస్తోంది. నవంబర్‌ 26, 29, డిసెంబర్‌ 2 తేదీల్లో పోలింగ్‌ నిర్వహించేందుకు అధికారులు నిర్ణయించారు. దీంతో మన్యంలో మరోసారి పంచాయతీ ఎన్నికల సందడి నెలకొననుంది. ఎన్నికల కోడ్‌ కూడా జిల్లాలో అమల్లో ఉంది. 244 పంచాయతీల్లో ఎన్నికలు జిల్లాలోని 244 గ్రామ పంచాయతీల్లో సర్పంచ్‌, 2,446 వార్డు సభ్యుల స్థానాలకు మూడు విడతల్లో ఎన్నికలు జరగనున్నాయి. ఇందుకోసం మండలాల వారీగా పోలింగ్‌ కేంద్రాలను సిద్ధం చేస్తున్నారు. అరకు, పాడేరు నియోజకవర్గాల పరిధిలోని మండలాల వారీగా పంచాయతీలు, వార్డులు, పోలింగ్‌ కేంద్రాల వివరాలు ఇలా ఉన్నాయి.మండలం పంచాయతీలు వార్డులు పోలింగ్‌ అరకు నియోజకవర్గం అరకులోయ 14 164 164 అనంతగిరి 24 232 232 డుంబ్రిగుడ 18 188 188 పెదబయలు 23 232 232 హుకుంపేట 33 282 282 ముంచంగిపుట్టు 23 228 228 పాడేరు నియోజకవర్గం పాడేరు 26 246 246 చింతపల్లి 17 204 204 జి.మాడుగుల 17 188 188 కొయ్యూరు 33 294 294 జి.కె.వీధి 16 188 188 మొత్తం 244 2446 2446 జిల్లాలో 244 పంచాయతీల్లో ఎన్నికలకు ఏర్పాట్లు మూడు విడతల్లో సర్పంచ్‌, వార్డు సభ్యుల ఎన్నికలు నవంబర్‌ 26, 29, డిసెంబర్‌ 2 తేదీల్లో పోలింగ్‌

సాక్షి, పాడేరు: జిల్లాలో జెడ్పీటీసీ ఎన్నికల్లో విజ యం సాధించిన అభ్యర్థులకు ఇన్‌చార్జి రిటర్నింగ్‌ అధికారి, ఐటీడీఏ పీవో ఆదిత్యవర్మ ఎన్నిక ధ్రువపత్రాలను అందజేశారు. జిల్లాలో అనంతగిరి, హుకుంపేట, డుంబ్రిగుడ, పెదబయలు, చింతపల్లి, జి.కె.వీధి, పాడేరు కలిపి ఏడు జెడ్పీటీసీ స్థానాల్లో వైఎస్సార్‌సీపీ అభ్యర్థులు విజయం సాధించారు. ముంచంగిపుట్టు జెడ్పీటీసీ స్థానాన్ని సీపీఎం అభ్యర్థి కై వసం చేసుకోగా, మరో మూడు స్థానాల్లో టీడీపీ అభ్యర్థులు గెలుపొందారు. విజేతలకు ఎన్నిక ధ్రువపత్రా లు అందజేసి అధికారులు శుభాకాంక్షలు తెలిపారు.

గొలుగొండ: ప్రముఖ శైవక్షేత్రమైన దారమఠం శివాలయంలో మంగళవారం వేకువజాము నుంచి కార్తీక మాస పూజా కార్యక్రమాలు ప్రారంభం కానున్నాయి. ఇక్కడ దట్టమైన అటవీ ప్రాంతం నడుమ వెలసిన దేవాలయం వందల ఏళ్ల నుంచి అలరారుతోంది. నెల రోజుల పాటు భక్తులు వేలాదిగా తరలిరానున్న దృష్ట్యా ప్రత్యేక ఏర్పాట్లు చేశారు. గొలుగొండ నుంచి ఐదు కిలోమీటర్లు దూరంలో శివాలయం ఉంది. కార్తీక మాసంతో పాటు మహాశివరాత్రి మూడు రోజులు వేలాది మంది భక్తులు తరలి వస్తుంటారు. ఆధ్యాత్మికంగా పర్యాటకంగా ఈ ప్రాంతం ఎంతో ప్రసిద్ధి పొందింది. దారమఠం శివాయం మహా పర్వతం దారకొండ దిగువున ఉంది. ఇక్కడ దట్టమైన అరణ్యంలో పెద్ద పెద్ద రాళ్ల మధ్య నుంచి జలపాతాలు పొంగి ప్రవహిస్తుంటాయి. ఇటీవల కురిసిన వర్షాలతో జలపాతాలు పరవళ్లు తొక్కుతున్నాయి. కార్తీక మాసం కావడంతో అటు భక్తులు, ఇటు పర్యాటకులు అధికంగా రానుండటంతో నెల రోజుల పాటు కళకళలాడనుంది.

మునగపాక: కొడుకులు లేకపోవడంతో భర్తకు తల కొరివి పెట్టి భార్య రుణం తీర్చుకున్న సంఘటన మండల కేంద్రమైన మునగపాకలో సోమవారం చోటు చేసుకుంది. వివరాలు ఇలా ఉన్నాయి. మునగపాకకు చెందిన ఆడారి రవి స్థానికంగా సిమెంట్‌ వ్యాపారం చేస్తూ జీవనం సాగించేవారు. కొద్ది రోజులుగా అనారోగ్యంతో బాధపడుతూ ఇంటికే పరిమితమయ్యారు. ఆదివారం రాత్రి రవి మృతి చెందారు. రవికి భార్య లక్ష్మితో పాటు ముగ్గురు కుమార్తెలు ఉన్నారు. కుమారులు లేకపోవడంతో భార్య లక్ష్మి ముందుకొచ్చి భర్త రవి మృతదేహానికి తల కొరివి పెట్టి చితికి నిప్పంటించి రుణం తీర్చుకుంది. ఈ సంఘటన స్థానికులను కలచివేసింది.రవి అంత్యక్రియలకు గ్రామస్తులు భారీగా హాజరయ్యారు.

కొయ్యూరు: జావెలిన్‌ త్రో అండర్‌–17 విభా గంలో ఆశ్రమ పాఠశాల విద్యార్థి కుర్తాడి లింగమూర్తి బంగారు పతకం సాధించాడు. హైదరాబాద్‌లో నిర్వహించిన స్కూల్‌ గేమ్స్‌ ఫెడరేషన్‌ పోటీల్లో ప్రతిభ కనబరిచి స్వర్ణ పతకాన్ని కై వసం చేసుకున్నాడు. ఈ విజయంతో ఈ నెల 12 నుంచి 16 వరకు మధ్యప్రదేశ్‌లో జరిగే 74వ జాతీయ స్కూల్‌ గేమ్స్‌ ఫెడరేషన్‌ పోటీల్లో పాల్గొనేందుకు అర్హత సాధించాడు. ఈ సంద ర్భంగా సోమవారం కొయ్యూరు ఆశ్రమ బాలుర పాఠశాల–1 హెచ్‌ఎం శ్రీనివాస్‌, పీడీ శివప్రసాద్‌, వార్డెన్‌ అంబటి నూకరాజు, ఇతర ఉపాధ్యాయులు.. లింగమూర్తిని అభినందించారు. జాతీయ స్థాయి పోటీల్లోనూ ప్రతిభ కనబరిచి స్వర్ణ పతకం సాధించాలని ఆకాంక్షించారు.

దేవరాపల్లి: మండలంలోని రైవాడలో ఇటీవల పెట్రోలు పోసి నిప్పంటించిన ఘటనలో చల్లా ఈశ్వరరావు(బుజ్జి) భార్య చల్లా నాగమణి ఆదివారం రాత్రి చికిత్స పొందుతూ మృతి చెందింది. ఈ నెల 2న కేజీహెచ్‌లో చికిత్స పొందుతూ తల్లి వరహాలమ్మ(60) మృతిచెందిన విషయం విదితమే. ఎస్‌ఐ వి. సత్యనారాయణ వివరాల ప్రకారం.. ఈ నెల 1న రైవాడలో కుటుంబ కలహాల నేపథ్యంలో ఈశ్వరరావు క్షణికావేశంలో ఇంటిలో కట్టెల పొయ్యిపై వంట చేస్తున్న భార్య నాగమణి, తల్లి వరహాలమ్మతో పాటు తనపైన పెట్రోలు పోసుకొని, మిగిలిన పెట్రోలును పొయ్యిలో వేయడంతో ఒక్కసారిగా మంటలు చెలరేగాయి. ముగ్గురు మంటల్లో చిక్కుకున్నారు. ఈ ఘటనలో తీవ్రంగా గాయపడిన ఈశ్వరరావు అలియాస్‌ బుజ్జి(45), భార్య నాగమణి (38), తల్లి వరహాలమ్మ(60)లను అదే రోజు కేజీహెచ్‌కు తరలించిన సంగతి తెలిసిందే. అక్కడ చికిత్స పొందుతున్న భార్య నాగమణి మృతి చెందింది. ఆమె తల్లి బార పార్వతి ఫిర్యాదు మేరకు నిందితుడు ఈశ్వరరావుపై హత్యాయత్నం కేసు నమోదు చేశామని ఎస్‌ఐ తెలిపారు. కేసు నమోదు చేసి, మృతదేహానికి పోస్టుమార్టం అనంతరం కుటుంబ సభ్యులకు అప్పగించామన్నారు. ఇద్దరు బిడ్డలకు తల్లి ప్రేమను దూరం చేసిన క్షణికావేశం.... క్షణికావేశంలో తీసుకున్న తప్పుడు నిర్ణయం ఓ కుటుంబాన్ని ఛిన్నాభిన్నం చేసింది. వారం రోజలు వ్యవధిలో ఒకే ఇంట్లోని అత్త, కోడలు మృతి చెందడంతో తీవ్ర విషాదం మిగిల్చింది. వెరసి అభంశుభం తెలియని ఇద్దరు బిడ్డలను తల్లి ప్రేమకు దూరం చేసింది. ఈ ఘటనలో మృతుల సంఖ్య రెండుకు చేరగా, ప్రస్తుతం కేజీహెచ్‌లో చికిత్స పొందుతున్న చల్లా ఈశ్వరరావు (బుజ్జి) పరిస్థితి కూడా విషమంగా ఉంది. స్వగ్రామం రైవాడలో తీవ్ర విషాద ఛాయలు అలుముకున్నాయి. కేజీహెచ్‌లో భర్త ఈశ్వరరావు పరిస్థితి విషమం

చోడవరం: పవిత్ర కార్తీక మాసం పూజలు సోమవారం అన్ని శివాలయాల్లో భక్తిశ్రద్ధలతో ప్రారంభమయ్యాయి. నెలరోజుల పాటు జరిగే ఈ పవిత్ర పూజల్లో మహిళా భక్తులు పెద్దసంఖ్య ఆలయాలకు వచ్చారు. అతిప్రాచీన దేవాలయమైన చోడవరం శ్రీ స్వయంభూ గౌరీశ్వరస్వామి ఆలయం ఉదయం నుంచీ భక్తులతో రద్దీగా మారింది. మూడు నదులు కలిసి ముద్దుర్తి సంగమేశ్వరస్వామి ఆలయంలో ప్రత్యేక పూజలు చేయగా పవిత్ర పుణ్యస్నానాలు ఆచరించారు. గోవాడ, గవరవరం, జుత్తాడ శివాలయాల్లో స్వామివారికి ప్రత్యేక పూజలు చేశారు. సోమవారం సాయంత్రం అన్ని శివాలయాల్లోనూ ఆకాశ దీపోత్సవం జరిగింది. భక్తులు స్వామివారిని దర్శించుకోవడంతో శివన్మామస్మరణతో క్షైవ క్షేత్రాలన్నీ మారుమ్రోగాయి. ఈ సందర్భంగా చోడవరం శ్రీ స్వయంభూ గౌరీశ్వరస్వామి ఆలయంలో ఆకాశదీపోత్సవం కన్నుల పండువగా జరిగింది.ఆలయ ప్రధాన అర్చకుడు కొడమంచిలి చలపతి ఆధ్వర్యంలో వేదపండితులు మంత్రోచ్ఛరణ మధ్య స్వామివారికి ప్రత్యేక పూజలు చేసి, ఆలయ ధ్వజస్తంభం వద్ద ఆకాశదీపానికి ప్రత్యేక పూజలు చేశారు. ఈ కార్యక్రమంలో ఎమ్మెల్యే కె.ఎస్‌.ఎన్‌.ఎస్‌ రాజు పాల్గొన్నారు. దేవదాయ శాఖ ఎగ్జిక్యూటివ్‌ ఆఫీసర్‌ కిరణ్మయి, జెడ్పీటీసీ కనిశెట్టి మత్స్యరాజు, ఆలయ అభివృద్ధి కమిటీ చైర్మన్‌ గూనూరు సురేష్‌, ఎంపీటీసీ గూనూరు మల్లునాయుడు, మాజీ ఎంపీపీ గూనూరు పెదబాబు పాల్గొన్నారు. అనకాపల్లి: స్థానిక గవరపాలెం నూకాంబిక అమ్మవారి దేవాలయంలో కార్తీకమాసం పురస్కరించుకుని అమ్మవారి ఆలయంలో ఆకాశదీపంతోపాటు అఖండ దీపాన్ని సోమవారం రాత్రి ఆలయ సహాయ కమిషనర్‌ బుద్ద లక్ష్మీనగేష్‌, ఉద్యోగులు ప్రారంభించారు. ఈ సందర్భంగా ఆయన మాట్లాడుతూ నెల రోజుల పాటు అమ్మవారి ఆలయంలో ప్రత్యేక పూజలు నిర్వహించడం జరుగుతుందన్నారు.

యలమంచిలి రూరల్‌: జిల్లాలో ప్రసిద్ధి చెందిన యలమంచిలి పంచరాత్రి ఉత్సవాలు ఆదివారం ప్రారంభమయ్యాయి. ప్రతి ఏటా దీపావళి నుంచి నాగులచవితి వరకు పట్టణంలో తులసీనగర్‌ భూలోకమాంబ అమ్మవారు, పాతవీధి సుబ్రహ్మణ్యేశ్వర స్వామి ఉత్సవ కమిటీలు ఈ ఉత్సవాలను అత్యంత వైభవంగా నిర్వహించడం ఆనవాయితీగా వస్తోంది. భూలోకమాంబ అమ్మవారి సన్నిధిలో తొలిపూజ ఆడారి శ్రీధర్‌(చిన్నా) దంపతులు చేశారు. అనంతరం భక్తులను అమ్మవారి దర్శనానికి అనుమతించారు. అయిదురోజులు అమ్మవారిని వివిధ రూపాల్లో అలంకరించనున్నట్టు అర్చకుడు తెలిపారు. సుబ్రహ్మణ్యేశ్వర స్వామి ఆలయంలో ప్రత్యేక పూజల అనంతరం స్వామివారిని భక్తులు దర్శించుకున్నారు. ఎమ్మెల్యే సుందరపు విజయ్‌కుమార్‌,మాజీ ఎమ్మెల్సీ పప్పల చలపతిరావు, మున్సిపల్‌ చైర్‌పర్సన్‌ పిళ్లా రమాకుమారి సహా పలువురు ప్రముఖులు అమ్మవారు, సుబ్రహ్మణ్యసామిని దర్శించుకున్నారు. ఉత్సవ కమిటీల ప్రతినిధులు అతిధులకు స్వాగతం పలికి, శేషవస్త్రం, తీర్థ ప్రసాదాలు ఇచ్చారు. ఉత్సవాల సందర్భంగా యలమంచిలి పట్టణంలో ప్రధాన రహదారి, దిమిలిరోడ్డు కూడలి,అంతర్గత రహదారులన్నీ విద్యుద్దీపాలతో అలంకరించారు.కార్యక్రమంలో మళ్ల కొండబాబు, కర్రి జానకీరాం,ఆడారి పూరీ జగన్నాథం, ఆడారి ఆదిమూర్తి పాల్గొన్నారు.

సాక్షి, విశాఖపట్నం: పారిశ్రామిక ప్రగతి ముసుగులో విశాఖ సాగరతీరం సాక్షిగా మరో భూ దందాకు రంగం సిద్ధమవుతోందన్న ఆరోపణలు వెల్లువెత్తుతున్నాయి. ఈ నెల 12, 13 తేదీల్లో జరగనున్న సీఐఐ భాగస్వామ్య సదస్సు ద్వారా రాష్ట్రానికి పెట్టుబడులు తీసుకురావడం కంటే అధికార కూటమి నేతల ప్రయోజనాలకే పెద్దపీట వేస్తున్నారనే విమర్శలు వ్యక్తమవుతున్నాయి. గతంలో కాగితాలకే పరిమితమైన ఎంవోయూల తరహాలోనే మరోసారి భారీ ఒప్పందాల ప్రచారానికి తెరతీస్తున్నారనే ఆరోపణలు వినిపిస్తున్నాయి. పరిశ్రమల స్థాపన పేరుతో ప్రభుత్వ ఖాళీ స్థలాలను తమ అనుచరులకు కట్టబెట్టేందుకు నియోజకవర్గాల వారీగా జాబితాలు సిద్ధం చేస్తున్నారనే విమర్శలు వస్తున్నాయి. అంకెల గారడీకి రంగం సిద్ధం! సదస్సులో భారీ సంఖ్యలో ఎంవోయూలు కుదిరినట్లు చూపించుకునేందుకు కసరత్తు జరుగుతోందని సమాచారం. ఇందుకోసం క్షేత్రస్థాయి వాస్తవాలతో సంబంధం లేకుండా బ్రిక్స్‌, టైల్స్‌ తదితర వ్యాపారాల వారీగా జాబితాలు రూపొందిస్తున్నట్లు తెలుస్తోంది. సాధారణ వ్యాపారాలు నిర్వహించే వారిని సైతం పారిశ్రామికవేత్తలుగా చూపిస్తూ ఒప్పందాలు కుదుర్చుకునేందుకు ప్రయత్నాలు సాగుతున్నాయనే ఆరోపణలు వినిపిస్తున్నాయి. గతంలోనూ తమ అనుచరులతోనే ఎంవోయూలు చేయించుకుని, ఆ తర్వాత పరిశ్రమల స్థాపనలో ఆశించిన పురోగతి సాధించలేకపోయారనే విమర్శలు టీడీపీ ప్రభుత్వంపై ఉన్నాయి. అయినా మళ్లీ అదే తరహా విధానాన్ని అనుసరిస్తున్నారనే ఆరోపణలు వ్యక్తమవుతున్నాయి. కూటమి నేతలకు భూ నజరానా? ఈ సదస్సు ద్వారా పెట్టుబడుల ఆకర్షణ కంటే అధికార పార్టీకి చెందిన నేతలు, అనుచరులకు ప్రభుత్వ భూములు కట్టబెట్టేందుకే ప్రాధాన్యమిస్తున్నారనే విమర్శలు వస్తున్నాయి. పారిశ్రామికవేత్తల ముసుగులో ప్రభుత్వ రాయితీలు, భూములు పొందేందుకు పావులు కదుపుతున్నారనే ఆరోపణలు వినిపిస్తున్నాయి. ఉమ్మడి విశాఖ జిల్లా పరిధిలో 200 ఎకరాలకు పైగా ప్రభుత్వ భూములను పరిశ్రమల పేరుతో కేటాయించేందుకు ప్రయత్నాలు జరుగుతున్నట్లు ప్రచారం సాగుతోంది. దీంతో ఏపీఐఐసీ, పర్యాటక శాఖల పరిధిలోని ఖాళీ స్థలాలపై కూటమి నేతలు కన్నేశారనే విమర్శలు వ్యక్తమవుతున్నాయి. చిన్న తరహా హోటళ్లు, రెస్టారెంట్లు నిర్వహించే వారిని సైతం పారిశ్రామికవేత్తలుగా చూపించి భూములు పొందేందుకు ప్రయత్నిస్తున్నారనే ఆరోపణలు వెల్లువెత్తుతున్నాయి. పారిశ్రామిక విధానంపై ప్రశ్నలు పారిశ్రామిక అనుభవం లేని వారికి సైతం కోట్లాది రూపాయల విలువైన భూములు కేటాయించేలా ప్రయత్నాలు జరుగుతున్నాయనే ఆరోపణలు వినిపిస్తున్నాయి. సాధారణ పారిశ్రామికవేత్తలకు అందని రాయితీలు, అనుమతులు అధికార పార్టీ నేతల సిఫార్సులతో సులభంగా లభిస్తున్నాయనే విమర్శలు వస్తున్నాయి. పరిశ్రమల శాఖను కొందరు నేతలు తమ ప్రయోజనాలకు వేదికగా మార్చుకుంటున్నారనే ఆరోపణలు వ్యక్తమవుతున్నాయి. గతంలో 2016, 2018, 2025 సంవత్సరాల్లో నిర్వహించిన సదస్సుల్లో కుదిరిన ఒప్పందాల్లో ఎన్ని కార్యరూపం దాల్చాయన్నది ఇప్పుడు చర్చనీయాంశంగా మారింది. గత అనుభవాల నుంచి పాఠాలు నేర్చుకోకుండా మరోసారి ప్రచార ఆర్భాటాలకే ప్రాధాన్యమిస్తే పెట్టుబడుల లక్ష్యం నీరుగారడమే కాకుండా ప్రభుత్వ భూముల కేటాయింపులపైనా అనుమానాలు తలెత్తుతాయని నగరవాసులు అభిప్రాయపడుతున్నారు.

కొయ్యూరు: మారుమూల యూ.చీడిపాలెం పంచాయతీ పరిధిలోని తీగలమెట్ట గ్రామానికి చెందిన రెండు నెలల ఏడు రోజుల శిశువు తారాబు గాయత్రి మృతిపై జిల్లా మలేరియా అధికారి(డీఎంవో) తులసి సోమవారం విచారణ చేపట్టారు. వైద్యుడు హేమంత్‌తో కలిసి మండల కేంద్రానికి సుమారు 100 కిలోమీటర్ల దూరంలో ఉన్న గ్రామానికి వెళ్లి శిశువు తల్లి కాసులమ్మతో పాటు స్థానిక గిరిజనులను వివరాలు అడిగి తెలుసుకున్నారు. గాయత్రి ఈ ఏడాది ఆగస్టు 19న జన్మించింది. ఈ నెల 2న శిశువుకు దగ్గు, జలుబు లక్షణాలు కనిపించాయి. దీంతో 3న నర్సీపట్నం ఏరియా ఆస్పత్రికి తరలించారు. పరీక్షించిన వైద్యులు శిశువుకు శ్వాస తీసుకోవడంలో ఇబ్బంది ఉందని గుర్తించి కేజీహెచ్‌కు తీసుకెళ్లాలని సూచించారు. అయితే తల్లి కాసులమ్మ తెలిసిన వారి సాయంతో నర్సీపట్నంలోని ఓ ప్రైవేటు ఆస్పత్రికి తీసుకెళ్లారు. అక్కడి వైద్యులు కూడా శ్వాస తీసుకోవడంలో ఇబ్బంది ఉన్నట్లు నిర్ధారించారు. దీంతో 4న కేజీహెచ్‌కు తరలించారు. అక్కడ పరీక్షించిన వైద్యులు శిశువు పరిస్థితి విషమంగా ఉందని తెలిపారు. చికిత్స పొందుతూ ఆదివారం రాత్రి శిశువు మృతి చెందింది. ఆస్పత్రికి తీసుకెళ్లడంలో జాప్యమే కారణం శిశువు మృతి సమాచారంతో డీఎంవో తులసి సోమవారం తీగలమెట్ట గ్రామానికి వెళ్లి విచారణ జరిపారు. గత నెలలో బాలింతకు వైద్య పరీక్షలు నిర్వహించగా జ్వరం లేనట్లు రికార్డుల్లో నమోదైందని పరిశీలించారు. గ్రామంలోని గిరిజనులను కూడా విచారించారు. శిశువును ఆస్పత్రికి తరలించడంలో జరిగిన జాప్యం మృతికి కారణమైందని విచారణలో నిర్ధారించినట్లు తెలిపారు. ఇటీవల రెండు తుపాన్ల ప్రభావంతో వర్షాలు కురవడం, వాతావరణంలో మార్పుల కారణంగా జ్వరాలు వచ్చే అవకాశం ఉందని డీఎంవో పేర్కొన్నారు. గిరిజనులు అనారోగ్య లక్షణాలు కనిపించిన వెంటనే సమీప ఆస్పత్రులకు వెళ్లి రక్త పరీక్షలు చేయించుకోవాలని సూచించారు. మారుమూల తీగలమెట్ట గ్రామానికి వెళ్లిన డీఎంవో ఊపిరి తీసుకోవడంలో ఇబ్బందితో కేజీహెచ్‌లో చికిత్స వైద్యం అందించడంలో జాప్యమే కారణమని నిర్ధారణ

నర్సీపట్నం: మున్సిపాలిటీ పరిధి పెదబొడ్డేపల్లి గురుకుల పాఠశాల సమీపంలో ఈ నెల 8వ తేదీ తెల్లవారు జామున ఘోర రోడ్డు ప్రమాదం సంభవించింది. ఈ ప్రమాదంలో ఇద్దరు యువకులు అక్కడిక్కక్కడే దుర్మరణం పాలయ్యారు. ఎదురుగా వస్తున్న కారును టిప్పర్‌ ఢీ కొట్టింది. ఈ ఘటనలో కారులో ప్రయాణిస్తున్న ఇద్దరు యవకులు మృతి చెందారు. ఈ ప్రమాదం ధాటికి కారు పూర్తిగా నుజ్జునుజ్జుయింది. విషయం తెలుసుకున్న డీఎస్పీ శ్రీనివాసరావు, సీఐ ఎస్‌.కె.గపూర్‌ ఘటనా స్థలానికి చేరుకుని టిప్పర్‌ ముందు భాగంలో ఇరుకున్న కారును క్రెయిన్‌తో బయటకు తీయించారు. కారులో ఇరుకున్న మృతదేహాలను పోస్ట్‌మార్టం నిమిత్తం ప్రభుత్వ ఆసుపత్రికి తరలించారు. టౌన్‌ సీఐ తెలిపిన వివరాలు ప్రకారం మున్సిపాలిటీ 40వ వార్డు అయ్యన్న కాలనీకి చెందిన ఎం.వి.దుర్గాప్రసాద్‌(23), పి.వంశీ ఇద్దరూ కారులో విశాఖపట్నం వెళ్లారు. పని ముగించుకుని తిరిగి వస్తుండగా ఈ ప్రమాదం జరిగింది. ఎదురుగా వస్తున్న టిప్పర్‌ కారును బలంగా ఢీ కొట్టింది. దీంతో కారులో ఉన్న దుర్గాప్రసాద్‌, వంశీ మృతి చెందారు. దీంతో అయ్యన్న కాలనీలో విషాదఛాయలు అలుముకున్నాయి. చేతికి అందించిన కుమారులు అకాల మరణం పొందడంతో తల్లిదండ్రులు కన్నీరుమున్నీరుగా విలపిస్తున్నారు. ఘనంగా వీరి అంత్యక్రియులు నిర్వహించారు. తల్లిదండ్రుల ఫిర్యా దు మేరకు కేసు నమోదు చేసి దర్యాప్తు చేస్తున్నారు.

సాక్షి, విశాఖపట్నం: దివ్వెల పండుగ దీపావళి సంబరాలు నగరంలో అంబరాన్నంటాయి. అదే స్థాయిలో కాలుష్యమూ విజృంభించి నగరవాసులను ఉక్కిరిబిక్కిరి చేసింది. గురువారం రాత్రి నగరవాసులు పోటీపడి బాణసంచా కాల్చడంతో స్వచ్ఛమైన సాగర గాలి ఒక్కసారిగా విషపూరితంగా మారింది. లక్ష్మీదేవి పూజ ల అనంతరం మొదలైన టపాసుల మోతతో నగర వాతావరణం దట్టమైన పొగ మేఘాలతో నిండిపోయింది. నగర చరిత్రలోనే ఎన్నడూ లేనివిధంగా వా యు నాణ్యత సూచీ (ఏక్యూఐ) అత్యంత ప్రమాదకర స్థాయికి చేరుకుంది. సాగరతీర నగరాన్ని విషపూరిత పొగ కమ్మేసి ప్రజలను ఊపిరాడకుండా చేసింది. 8 గంటలకే 247కు చేరిన కాలుష్యం దీపావళి రాత్రి 7.01 గంటలకు వాయు నాణ్యత సూచీ 191 ఏక్యూఐగా నమోదైంది. సమయం గడిచేకొద్దీ టపాసుల మోత పెరగడంతో రాత్రి 7.31 గంటలకు 210కి చేరింది. 8.01 గంటల సమయానికి బాణసంచా పేలుళ్లు మరింత పెరగడంతో వాయు నాణ్యత సూచీ 247కు చేరుకుంది. దీంతో నగరమంతటా పొగ దట్టంగా అలముకుంది. 9.31 గంటలకు కాలుష్య ప్రళయం రాత్రి 8.30 గంటల నుంచి బాణసంచా కాల్చడం తారస్థాయికి చేరింది. దీంతో వాయు నాణ్యత ఒక్కసారిగా పడిపోయింది. రాత్రి 8.31 గంటలకు ఏక్యూఐ 423కి, 9.01 గంటలకు 444కి చేరుకుంది. టపాసుల మోత మరింత పెరగడంతో రాత్రి 9.31 గంటలకు విశాఖపట్నం వాయు నాణ్యత సూచీ ఏకంగా 521 ఏక్యూఐకి చేరింది. నగర చరిత్రలోనే అత్యంత ప్రమాదకర స్థాయిలో కాలుష్యం నమోదైంది. అర్ధరాత్రి దాటినా తగ్గని తీవ్రత రాత్రి 10 గంటల తర్వాత బాణసంచా కాల్చడంపై ఉన్న ఆంక్షలను సైతం పట్టించుకోకుండా పలుచోట్ల టపాసులు కాల్చడం కొనసాగించారు. దీంతో రాత్రి 11.01 గంటలకు కూడా కాలుష్య సూచీ 409 ఏక్యూఐగా నమోదై ప్రమాదకర స్థాయిలోనే కొనసాగింది. రాత్రి 11.31 గంటల ప్రాంతంలో టపాసుల మోత కొంత తగ్గడంతో సూచీ 367కి పడిపోయింది. అయినప్పటికీ సాధారణ స్థాయితో పోలిస్తే కాలుష్య తీవ్రత ఎన్నో రెట్లు అధికంగానే ఉంది. కాలనీల్లో భారీగా పెరిగిన విష కణాలు నగరంలోని ప్రధాన నివాస ప్రాంతాల్లో సూక్ష్మ ధూళి కణాలైన పీఎం10, పీఎం2.5 స్థాయులు విపరీతంగా పెరిగాయి. పోలీస్‌ బ్యారెక్స్‌ ప్రాంతంలో పీఎం10 కణాల స్థాయి సాధారణంగా ఉండే 124 మైక్రోగ్రాముల పర్‌ క్యూబిక్‌ మీటర్‌ నుంచి ఏకంగా 274కు ఎగబాకింది. ఊపిరితిత్తుల్లోకి నేరుగా చేరే పీఎం2.5 కణాల స్థాయి 131 మైక్రోగ్రాముల పర్‌ క్యూబిక్‌ మీటర్‌కు పెరిగింది. ఎంవీపీ రైతుబజార్‌ ప్రాంతంలో పీఎం10 స్థాయి 266కు చేరింది. ఆటోనగర్‌లో 241, జీవీఎంసీ ప్రధాన కార్యాలయం పరిసరాల్లో 249గా నమోదైంది. ఈ గణాంకాలు నగరంలోని వివిధ ప్రాంతాల్లో కాలుష్య తీవ్రత ఏ స్థాయిలో పెరిగిందో స్పష్టం చేస్తున్నాయి. 20 మందికి గాయాలు దట్టమైన పొగ, కాలుష్యం కారణంగా వృద్ధులు, ఆస్తమా బాధితులు, చిన్నపిల్లలు తీవ్ర ఇబ్బందులు ఎదుర్కొన్నారు. శ్వాస తీసుకోవడంలో అవస్థలు పడ్డారు. మరోవైపు టపాసుల ప్రమాదాల్లో నగరంలో 20 మందికి పైగా గాయపడ్డారు. ప్రాంతీయ కంటి ఆస్పత్రిలో ఐదుగురు చికిత్స పొందగా, కేజీహెచ్‌లో మరో ఐదుగురికి వైద్యం అందించారు. నగరంలోని వివిధ ఆస్పత్రుల్లో మరో 10 మంది గాయాలతో చికిత్స పొంది డిశ్చార్జ్‌ అయ్యారు. ఇక పండుగ ముగిసిన మరుసటి రోజు ఉదయానికి జీవీఎంసీ పారిశుధ్య సిబ్బంది నగర వీధుల నుంచి సాధారణ రోజుల్లో సేకరించే చెత్తకు అదనంగా 700 టన్నులకు పైగా టపాసుల వ్యర్థాలను తొలగించారు. దీపావళి సంబరాల వెనుక దాగిన కాలుష్య భారం ఎంత తీవ్రంగా ఉందో ఈ పరిస్థితులు స్పష్టం చేస్తున్నాయి. భారీగా పెరిగిన కాలుష్యం గోపాలపట్నం: దీపావళి సందర్భంగా విశాఖ నగరంలో శబ్ధ, వాయు కాలుష్యం భారీగా పెరిగింది. ఈ మేరకు కాలుష్య నియంత్రణ మండలి (పీసీబీ) అధికారులు విడుదల చేసిన గణాంకాలు ఆందోళన కలిగిస్తున్నాయి. కురుపాం మార్కెట్‌లో అత్యధికంగా 96.5 డెసిబుల్స్‌, జూపార్క్‌ ప్రాంతంలో 95.4, సుజాతానగర్‌లో 89.8, ఎంవీపీ రైతుబజారులో 87.4 డెసిబుల్స్‌ శబ్ధ తీవ్రత నమోదైంది. వాయు కాలుష్యమూ అధికమే వాయు కాలుష్యం కూడా గణనీయంగా పెరిగినట్లు పీసీబీ వెల్లడించింది. 11 ప్రాంతాల్లో గాలి నాణ్యతను పరిశీలించగా జీవీఎంసీ కార్యాలయం వద్ద అత్యధికంగా 367 మైక్రోగ్రాములు/క్యూబిక్‌ మీటర్‌, పోలీస్‌ బ్యారక్స్‌ వద్ద 331, జ్ఞానాపురంలో 313 నమోదైనట్లు తెలిపింది.

బుచ్చెయ్యపేట: మండలంలోని మల్లాం సెగ్మెంట్‌లో టీడీపీ కంచుకోటకు ఎట్టకేలకు బీటలు పడ్డాయి. ఈ సారి స్థానిక ఎన్నికల్లో వైఎస్సార్‌సీపీ అభ్యర్థి పల్లా వెంకటలక్ష్మి ఘన విజయం సాధించారు. ఇక్కడ 25 ఏళ్లుగా జరుగుతున్న ఎన్నికల్లో టీడీపీ అభ్యర్థి విజయం సాధించగా, ఈ ధపా ఎన్నికల్లో మల్లాం సెగ్మెంట్‌ పరిధి ఆర్‌. భీమవరం, ఆర్‌. శివరాంపురం, చిన భీమవరం, ఎంబీపాలెం, చిన మల్లాం, పెద మల్లాం, గంగాదేవిపేట, అప్పంపాలెం గ్రామాల వైఎస్సార్‌సీపీ నాయకుల సమష్టి కృషితో టీడీపీ ఓటమి పాలైంది. ప్రత్యర్థిపై 199 ఓట్లు ఆధిక్యంతో తొలిసారి మల్లాం సెగ్మెంట్‌లో వైఎస్సార్‌సీపీ పాగా వేసింది.

● ఏ పార్టీకీ దక్కని స్పష్టమైన మెజార్టీ ● వైఎస్సార్‌సీపీకి 7, టీడీపీకి 5 స్థానాలు ● కీలకంగా మారిన ముగ్గురు స్వతంత్ర ఎంపీటీసీలుజి.మాడుగుల: మండల పరిషత్‌ అధ్యక్ష(ఎంపీపీ) పీఠంపై ఉత్కంఠ నెలకొంది. మండలంలోని 15 ఎంపీటీసీ స్థానాలకు జరిగిన ఎన్నికల్లో ఏ రాజకీయ పార్టీకీ స్పష్టమైన మెజార్టీ లభించలేదు. వైఎస్సార్‌సీపీ 7 స్థానాలు, టీడీపీ 5 స్థానాలు, స్వతంత్ర అభ్యర్థులు 3 స్థానాల్లో విజయం సాధించారు. దీంతో ఎంపీపీ పీఠాన్ని దక్కించుకునేందుకు రాజకీయ పార్టీలు స్వతంత్ర ఎంపీటీసీల మద్దతుపై దృష్టి సారించాయి. ఎంపీపీ పీఠాన్ని కై వసం చేసుకోవాలంటే కనీసం 8 మంది ఎంపీటీసీల మద్దతు అవసరం. వైఎస్సార్‌సీపీకి ప్రస్తుతం ఏడుగురు సభ్యుల బలం ఉండటంతో ఒక్క స్వతంత్ర సభ్యుడి మద్దతు లభిస్తే ఎంపీపీ పీఠం దక్కించుకునే అవకాశం ఉంది. టీడీపీకి మాత్రం ముగ్గురు స్వతంత్ర సభ్యుల మద్దతు అవసరం. దీంతో స్వతంత్ర ఎంపీటీసీలు ఎవరికి మద్దతు ఇస్తారన్నది ఆసక్తికరంగా మారింది. ఎంపీటీసీ ఎన్నికల ప్రక్రియ పూర్తయినప్పటికీ ఎంపీపీ ఎన్నికకు సంబంధించి అధికారులు ఇంకా ప్రకటన విడుదల చేయలేదు. దీంతో ఆశావహుల్లో ఉత్కంఠ కొనసాగుతోంది. ఎంపీటీసీలకు ఎమ్మెల్యే అభినందనలు ఇటీవల జరిగిన ఎంపీటీసీ ఎన్నికల్లో విజయం సాధించిన వైఎస్సార్‌సీపీ అభ్యర్థులను పాడేరు ఎమ్మెల్యే, ఆ పార్టీ జిల్లా అధ్యక్షుడు మత్స్యరాస విశ్వేశ్వరరాజు అభినందించారు. మండలంలోని 15 స్థానాలకు ఏడు స్థానాల్లో వైఎస్సార్‌సీపీ అభ్యర్థులు విజయం సాధించడంపై హర్షం వ్యక్తం చేశారు. కె.కోడాపల్లి ఎంపీటీసీ తలారి వెంకటరమణ, గడుతూరు ఎంపీటీసీ బోనంగి చిన్న మత్స్యకొండబాబు, సింగర్భ ఎంపీటీసీ పాంగి రామకృష్ణ, బొయితిలి ఎంపీటీసీ గావెలి సుభాషిణి, పాలమామిడి ఎంపీటీసీ గెమ్మెలి కామలమ్మ, భీరం ఎంపీటీసీ నుర్మాని రాజమ్మ, పెదలువ్వాసింగి ఎంపీటీసీ వంతాల సుమిత్రలను ఆయన అభినందించారు.

ముంచంగిపుట్టులో భారీగా తిరస్కరణకు గురైన బ్యాలెట్‌ పత్రాలు జెడ్పీటీసీకి 2,110.. ఎంపీటీసీలకు 1,814 చెల్లని ఓట్లు జెడ్పీటీసీకి 251, ఎంపీటీసీలకు 478 ఖాళీ బ్యాలెట్‌ పత్రాలుచెల్లని ఓట్లు.. కొంపముంచాయ!ముంచంగిపుట్టు: ఓటు వేయడంలో అవగాహన లేకపోవడం అభ్యర్థుల గెలుపోటములపై ప్రభావం చూపిందా..? చెల్లని ఓట్లు, ఖాళీ బ్యాలెట్‌ పత్రాలే కొన్నిచోట్ల ఫలితాలను తారుమారు చేశాయా..? ప్రస్తుతం మండలంలో ఇదే చర్చ జరుగుతోంది. ఈ నెల 5న నిర్వహించిన జెడ్పీటీసీ, ఎంపీటీసీ ఎన్నిక ల్లో భారీ సంఖ్యలో ఓట్లు చెల్లకుండా పోవడం, మరికొన్ని బ్యాలెట్‌ పత్రాలపై ఎలాంటి గుర్తుకు ఓటు వేయకపోవడం రాజకీయ వర్గాల్లో చర్చనీయాంశంగా మారింది. ముంచంగిపుట్టు మండలంలో మొత్తం 38,935 మంది ఓటర్లు ఉండగా, జెడ్పీటీసీ, ఎంపీటీసీ ఎన్నికల్లో 24,612 ఓట్లు పోలయ్యాయి. వీటిలో జెడ్పీటీసీ ఎన్నికలకు సంబంధించి 2,110 ఓట్లు చెల్లనివిగా నమోదయ్యాయి. ఎంపీటీసీ ఎన్నికల్లో 1,814 ఓట్లు తిరస్కరణకు గురయ్యాయి. వీటికి అదనంగా జెడ్పీటీసీ ఎన్నికల్లో 251, ఎంపీటీసీ ఎన్నికల్లో 478 బ్యాలెట్‌ పత్రాలపై ఓటర్లు ఏ గుర్తుకూ ఓటు వేయకుండా ఖాళీగా బ్యాలెట్‌ బాక్సుల్లో వేశారు. స్వల్ప మెజార్టీలతో గెలుపు ● బాబుశాల సెగ్మెంట్‌లో అత్యధికంగా 355 చెల్లని ఓట్లు నమోదవగా, 57 ఖాళీ బ్యాలెట్‌ పత్రాలు ఉన్నాయి. ఇక్కడ టీడీపీ అభ్యర్థి 149 ఓట్ల మెజార్టీతో విజయం సాధించారు. ● మాకవరం సెగ్మెంట్‌లో 151 ఓట్లు చెల్లనివిగా, 33 బ్యాలెట్‌ పత్రాలు ఖాళీగా నమోదయ్యాయి. ఇక్కడ స్వతంత్ర అభ్యర్థి కేవలం నాలుగు ఓట్ల స్వల్ప ఆధిక్యంతో గెలుపొందారు. ● దారెల సెగ్మెంట్‌లో తొలుత వైఎస్సార్‌సీపీ అభ్యర్థి రెండు ఓట్ల మెజార్టీతో విజయం సాధించినట్లు ప్రకటించారు. అయితే టీడీపీ అభ్యర్థి రీకౌంటింగ్‌ కోరడంతో అధికారులు మరోసారి ఓట్లను లెక్కించారు. అనంతరం ఐదు ఓట్ల మెజార్టీతో టీడీపీ అభ్యర్థి గెలిచినట్లు ప్రకటించారు. ఈ సెగ్మెంట్‌లో 93 చెల్లని ఓట్లు, 66 ఖాళీ బ్యాలెట్‌ పత్రాలు నమోదయ్యాయి. ఓటు వినియోగంపై అవగాహన అవసరం గిరిజన ప్రాంతాల్లో చాలామంది నిరక్షరాస్యులు ఉండటం, బ్యాలెట్‌ పత్రంపై ఓటు ఎలా వేయాలనే అంశంపై తగిన అవగాహన లేకపోవడం చెల్లని ఓట్లు పెరగడానికి కారణమై ఉండొచ్చని విశ్లేషకులు అభిప్రాయపడుతున్నారు. రానున్న పంచాయతీ ఎన్నికల్లో అభ్యర్థులు ప్రచారంతోపాటు ఓటు వేసే విధానంపైనా ఓటర్లకు అవగాహన కల్పించాల్సిన అవసరం ఉందని సూచిస్తున్నారు. లేకుంటే చెల్లని ఓట్లు, ఖాళీ బ్యాలెట్‌ పత్రాలు ఎన్నికల ఫలితాలపై ప్రభావం చూపే అవకాశం ఉందని పేర్కొంటున్నారు.దారెల సెగ్మెంట్‌లో రీకౌంటింగ్‌ నిర్వహిస్తున్న అధికారులు (ఫైల్‌)

అల్లూరి సీతారామరాజు జిల్లా● మన్యం ఓటరు విలక్షణ తీర్పు ● కూటమి ప్రలోభాలకు చెక్‌ ● ఆరు జెడ్పీటీసీలు కై వసం ● జగన్‌ నాయకత్వానికి మద్దతు ఆదివారం శ్రీ 8 శ్రీ నవంబర్‌ శ్రీ 2026కూటమి నేతల ప్రలోభాలు.. రూ.కోట్లలో పంపిణీ.. ఏవీ గిరిజన ఓటర్ల తీర్పును మార్చలేకపోయాయి. స్థానిక సంస్థల ఎన్నికల్లో మరోసారి వైఎస్సార్‌సీపీ వైపే మన్యం ఓటర్లు మొగ్గుచూపారు. జగన్‌మోహన్‌రెడ్డి నాయకత్వంపై తమకున్న అభిమా నాన్ని ఓట్ల రూపంలో చాటారు. 11 జెడ్పీటీసీ స్థానాలకు గాను ఆరు స్థానాలను కై వసం చేసుకుని జిల్లాపరిషత్‌ చైర్మన్‌ పీఠంపై ఆశలు సజీవంగా నిలుపుకున్నారు. మిగతా చోట్ల కొన్నింటిలో వైఎస్సార్‌సీపీ అభ్యర్థులు ముందజలో ఉన్నారు. సాక్షి, పాడేరు: వైఎస్సార్‌సీపీ అధినేత వైఎస్‌ జగన్‌మోహన్‌రెడ్డి నాయకత్వానికి గిరిజన ఓటర్లు మరోసారి మద్దతు పలికారు. ప్రతిష్టాత్మకంగా జరిగిన స్థానిక సంస్థల ఎన్నికల్లో జిల్లా వ్యాప్తంగా వైఎస్సార్‌సీపీ ప్రభావం స్పష్టంగా కనిపించింది. అధికారంలో ఉన్న కూటమి పార్టీల ప్రలోభాలకు మెజారిటీ గిరిజన ఓటర్లు లొంగకుండా తమ తీర్పును వెల్లడించారు. కూటమి పార్టీలు కోట్లాది రూపాయలు ఖర్చు చేసినా ఓటర్లు వాటిని పట్టించుకోలేదు. చివరకు ఫ్యాన్‌ గుర్తుపైనే ఓటు వేసి వైఎస్సార్‌సీపీ అభ్యర్థులను గెలిపించారు. ఈ విజయాలను జగన్‌మోహన్‌రెడ్డికి కానుకగా అందించారు. వైఎస్సార్‌సీపీ ఆవిర్భావం నుంచి జరిగిన పలు ఎన్నికల్లో జిల్లా ఓటర్లు ఆ పార్టీ అభ్యర్థులకు మద్దతుగా నిలుస్తున్నారు. 2014, 2019, 2024 సార్వత్రిక ఎన్నికల్లో అరకు ఎంపీ, అరకులోయ, పాడేరు ఎమ్మెల్యే స్థానాల్లో వైఎస్సార్‌సీపీ అభ్యర్థులనే గెలిపించారు. అలాగే 2021లో జరిగిన స్థానిక సంస్థల ఎన్నికల్లో అనంతగిరి జెడ్పీటీసీ, జి.మాడుగుల ఎంపీపీ పదవులు మినహా మిగిలిన పది మండలాల్లో వైఎస్సార్‌సీపీ అభ్యర్థులే విజయం సాధించారు. ఉమ్మడి విశాఖ జిల్లా పరిషత్‌ చైర్మన్‌ పదవిని సైతం ముంచంగిపుట్టు జెడ్పీటీసీ సుభద్రకు దక్కేలా జగన్‌ అవకాశం కల్పించారు. ఐదేళ్లపాటు వైఎస్సార్‌సీపీకి చెందిన జెడ్పీటీసీలు, ఎంపీపీలు, ఎంపీటీసీలు, సర్పంచ్‌లు గిరిజన ప్రాంత అభివృద్ధికి కృషి చేశారు. ప్రస్తుతం జరిగిన స్థానిక సంస్థల ఎన్నికల్లోనూ వైఎస్సార్‌సీపీ అభ్యర్థులకు మద్దతు పలకడం ద్వారా అల్లూరి సీతారామరాజు జిల్లా ఓటర్లు మరోసారి జగన్‌మోహన్‌రెడ్డి నాయకత్వంపై తమ విశ్వాసాన్ని చాటుకున్నారు. ఈ ఎన్నికల్లో జిల్లాలోని 11 జెడ్పీటీసీ స్థానాలకు గాను ఇప్పటికే ఆరు స్థానాలను వైఎస్సార్‌సీపీ కైవసం చేసుకుంది. దీంతో జిల్లా పరిషత్‌ చైర్మన్‌ పీఠాన్ని అధిష్టించేందుకు ఆ పార్టీ కి మార్గం సుగమమైంది. గూడెంకొత్తవీధి, చింతపల్లి, పాడేరు, పెదబయలు, డుంబ్రిగుడ, అనంతగిరి జెడ్పీటీసీ స్థానాల్లో వైఎస్సార్‌సీపీ అభ్యర్థులు విజయం సాధించారు. మిగతా స్థానాల్లో కూడా లెక్కింపు కొనసాగుతున్నందున మరికొన్ని కైవసం చేసుకునే అవకాశాలు కనిపిస్తున్నాయి.

నక్కపల్లి: టీడీపీ కంచుకోటలో ఈ దఫా పరిషత్‌ ఎన్నికల్లో వైఎస్సార్‌సీపీ పాగా వేసింది. మూడు దశాబ్దాల తర్వాత మత్స్యకార గ్రామాల్లో టీడీపీకి ఎదురుదెబ్బ తగిలింది. మండలంలో గత సార్వత్రిక ఎన్నికల్లో హోంమంత్రి వంగలపూడి అనితకు 1500 ఓట్ల మెజార్టీ ఇచ్చిన రాజయ్యపేటలో ఈ దఫా ఎంపీటీసీ స్థానాన్ని వైఎస్సార్‌సీపీ కై వసం చేసుకుంది. ఇక్కడ ఎంపీటీసీ అభ్యర్థిగా పిక్కి కాశీ తన ప్రత్యర్థి పిక్కి రమణ(కూటమి)పై 664 ఓట్ల మెజార్టీతో విజయం సాధించారు. పెదతీనార్ల మత్స్యకార గ్రామంలో వైఎస్సార్‌సీపీ అభ్యర్థి మైలపల్లి సరోనా తన సమీప ప్రత్యర్థి మైలపల్లి రమాదేవిపై 85 ఓట్ల మెజార్టీతో గెలుపొందారు. మరో మత్స్యకార గ్రామం బంగారయ్యపేట సెగ్మెంట్‌లో వైఎస్సార్‌సీపీ అభ్యర్థి కొవిరి రమణ తన సమీప టీడీపీ అభ్యర్థి ఏవీఎస్‌ రాజుపై 161 ఓట్ల మెజార్టీతో విజయం సాధించారు. ఈ సెగ్మెంట్లన్నీ గతంలో టీడీపీకి కంచుకోటగా ఉన్నాయి. మత్స్యకారులంతా 40 ఏళ్లనుంచి టీడీపీకే ఓటేస్తూ వస్తున్నారు. ప్రధానంగా రాజయ్యపేటలో 6,500 పైచిలుకు ఓటర్లు ఉన్నారు. స్థానిక ఎన్నికలు, సార్వత్రిక ఎన్నికల్లో ఈ గ్రా మం నుంచి టీడీపీకి 80 శాతం ఓట్లు లభిస్తాయి. ప్రతి ఎన్నికల్లోనూ టీడీపీకి 2 నుంచి 3 వేల ఆధిక్యత లభించేది. అటువంటిది ఈ ఎన్నికల్లో రాజయ్యపేటలో ఫ్యాన్‌ గాలి బలంగా వీచింది. మత్స్యకారులంతా వైఎస్సార్‌సీపీనే ఆదరించారు. ఎక్కువ ఓట్లు కలిగిన రాజయ్యపేట, పెదతీనార్ల, బంగారయ్యపేట గ్రామాల్లో వైఎస్సార్‌సీపీని ఆదరించడం చర్చనీయాంశమైంది. రాజయ్యపేటలో వైఎస్సార్‌సీపీ అభ్యర్థికి మండలంలోనే అత్యధికంగా 664 ఓట్ల మెజార్టీ రావడాన్ని అధికార పార్టీకి పెద్ద దెబ్బ అని పలువురు అంటున్నారు. అక్రమ మద్యం విక్రేత అరెస్టు అనకాపల్లి టౌన్‌ : మండలంలోని కొత్తూరు గ్రామంలో అక్రమంగా మద్యం విక్రయిస్తున్న మోసూరి ప్రకాశరావు నుంచి 24 మద్యం సీసాలను స్వాధీనం చేసుకొని, అరెస్ట్‌ చేసినట్టు ఎకై ్సజ్‌ సీఐ లక్ష్మీనాయుడు తెలిపారు. ఎకై ్సజ్‌ చట్టం ప్రకారం అక్రమంగా మద్యం విక్రయాలు చేపడితే కఠిన చర్యలు తీసుకుంటామన్నారు. ఈ దాడుల్లో ఎస్‌ఐ కె.ఎస్‌.గణేష్‌, సిబ్బంది ఎం.వి.ఎస్‌. రమేష్‌, పూర్ణచంద్రరావు పాల్గొన్నారు. వైఎస్సార్‌సీపీ ఎంపీటీసీలకు అభినందన

చింతపల్లి: మండలంలో జరిగిన ఎంపీటీసీ ఎన్నికల్లో వైఎస్సార్‌సీపీ ఆధిక్యం ప్రదర్శించింది. మొత్తం 20 ఎంపీటీసీ సెగ్మెంట్లకు గాను 10 స్థానాలను వైఎస్సార్‌సీపీ కై వసం చేసుకోగా, టీడీపీ 4, జనసేన 3, స్వతంత్ర అభ్యర్థులు 3 స్థానాల్లో విజయం సాధించారు. మండలంలో మొత్తం 64,374 మంది ఓటర్లకు గాను 34,155 మంది ఓటు హక్కును వినియోగించుకున్నారు. శనివారం జరిగిన ఓట్ల లెక్కింపులో గెలుపొందిన అభ్యర్థుల వివరాలు ఇలా ఉన్నాయి. ● వైఎస్సార్‌సీపీ తరఫున బలపం నుంచి లెరడా లక్ష్మీపార్వతి సమీప జనసేన అభ్యర్థిపై 152 ఓట్ల మెజారిటీతో విజయం సాధించారు. తమ్మెంగులులో సాగిన శాంతి 121 ఓట్లు, అన్నవరంలో సుండ్రు శిరీషకుమారి 267 ఓట్ల ఆధిక్యంతో గెలుపొందారు. కొత్తపాలెం–1లో కిల్లో భీమరాజు 246, కొత్తపాలెం–2లో మఠం గణేష్‌ 275, లోతుగెడ్డలో సాగిన నాగవెంకటలక్ష్మి 654, చింతపల్లి–2లో దాసరి దారలక్ష్మిపద్మ 48, కొమ్మంగిలో లోచలి రాంబాబు 124, గొందిపాకులలో పొటుకూరి దేవి 513, మర్రి కళావతి 144 ఓట్ల మెజారిటీతో విజయం సాధించారు. ● కుడుముసారి, లంబసింగి, కిటుములు, ఎర్రబొమ్మలులో టీడీపీ అభ్యర్థులు గెలుపొందారు. చింతపల్లి–1, చింతపల్లి–2, బెన్నవరంలో జనసేన అభ్యర్థులు విజయం సాధించారు. చౌడుపల్లి, తాజంగి, పెదబరడ పంచాయతీల్లో స్వతంత్ర అభ్యర్థులు గెలుపొందారు. జెడ్పీటీసీగా కోరాబు అనూషదేవి చింతపల్లి జెడ్పీటీసీ స్థానాన్ని వైఎస్సార్‌సీపీ అభ్యర్థి కోరాబు అనూషదేవి కై వసం చేసుకున్నారు. ఆమెకు 14,799 ఓట్లు పోలవగా, సమీప టీడీపీ అభ్యర్థి సాగిన అన్నపూర్ణదేవికి 11,375 ఓట్లు వచ్చాయి. దీంతో 3,424 ఓట్ల మెజారిటీతో అనూషదేవి ఘన విజయం సాధించారు.జెడ్పీటీసీ, 10 ఎంపీటీసీ స్థానాలు వైఎస్సార్‌సీపీ కై వసం

చింతపల్లి: స్థానిక గురుకుల జూనియర్‌ కళాశాలలో శనివారం నిర్వహించిన ఎన్నికల ఓట్ల లెక్కింపు ప్రక్రియను ఐటీడీఏ పీవో ఆదిత్యవర్మ, ఏఎస్పీ మహేంద్ర సిన్హా పరిశీలించారు. కౌంటింగ్‌ తీరును పరిశీలించి, అధికారులను వివరాలు అడిగి తెలుసుకున్నారు. ఎటువంటి ఇబ్బందులు తలెత్తకుండా కౌంటింగ్‌ ప్రక్రియను సజావుగా నిర్వహించాలని ఎన్నికల అధికారులను ఆదేశించారు. కౌంటింగ్‌ కేంద్రంలో పోలీసులు అప్రమత్తంగా వ్యవహరించాలని ఏఎస్పీ సూచించారు. అవాంఛనీయ సంఘటనలకు తావులేకుండా ముందస్తు చర్యలు చేపట్టాలని పోలీసు అధికారులను ఆదేశించారు. రిటర్నింగ్‌ అధికారి రమణారావు, ఎంపీడీవో సీతయ్య, డిప్యూటీ ఎంపీడీవోలు సీతామహాలక్ష్మి, సీఐ సింహాచలం, ఎస్‌ఐ వీరబాబు పాల్గొన్నారు.

మునగపాక : మునగపాకలో జరిగిన స్థానిక సంస్థల ఎన్నికల ఫలితాలు రసకందాయంలో పడ్డాయి. ప్రతిష్టాత్మకమైన ఎంపీపీ పీఠం ఎవరిని వరిస్తుందోనన్న చర్చనీయాంశమైంది. వివరాలు పరిశీలిస్తే మండలంలోని 16 ఎంపీటీసీ స్థానాలకు ఈ నెల 5వ తేదీన ఎన్నికలు జరిగిన విషయం తెలిసిందే.కౌంటింగ్‌ శనివారం నిర్వహించారు. ఈ ఫలితాలు అందరినీ ఆశ్చర్యానికి గురి చేశాయి. వైఎస్సార్‌సీపీకి 8 స్థానాలు రాగా కూటమికి మరో 8 స్థానాలు దక్కాయి. అయితే ఎంపీపీ పీఠం దక్కాలంటే కనీసం 9 ఎంపీటీసీ స్థానాలు గెలుపొందాల్సి ఉంది. ఇరు పార్టీలకు చెరి సగం ఓట్లు రావడంతో అందరి దృష్టి మునగపాక మండలంపై పడింది. ఎంపీపీ పీఠం దక్కాలంటే ఏదో పార్టీకి చెందిన వ్యక్తి అవతల పార్టీలోకి వెళ్లాలి. అటువంటి పరిస్థితులు వైఎస్సార్‌సీపీలో కనిపించడం లేదు. మండలంలో వైఎస్సార్‌సీపీకి బలమైన క్యాడర్‌తో పాటు నమ్మకమైన పెద్దలు ఉండడంతో వైఎస్సార్‌సీపీ నుంచి అధికార పార్టీలోకి వెళ్లే పరిస్థితులు లేవనే చెప్పాలి. అలాగే కూటమి నాయకత్వంపై మొదటి నుంచి పెద్దగా క్యాడర్‌లో విశ్వాసం కూడా లేదు. ఇటువంటి పరిస్థితుల్లో ఎంపీపీ పీఠం ఎవరికి దక్కుతుందన్న ఉత్కంఠ అందరిలోనూ నెలకొంది. ఇదిలా ఉండగా వైఎస్సార్‌సీపీ నుంచి ఎవరూ కూడా చేజారకుండా ఉండేలా వైఎస్సార్‌సీపీ పెద్దలు తగు చర్యలు చేపడుతున్నారు. మున్ముందు మునగపాక ఎంపీపీ పీఠానికి సంబంధించి ఏం జరుగుతుందో వేచి చూడాల్సిందే. నాడు...నేడు ఒకటే ఫలితం మండలంలో స్థానిక సంస్థల ఎన్నికల ఫలితాలు 2014లో జరిగిన ఫలితాలు పునరావృతమయ్యాయి. మొత్తం 16 ఎంపీటీసీ స్థానాలకు గాను గత 2014లో జరిగిన ఎంపీటీసీ ఎన్నికల్లో వైఎస్సార్‌సీపీకి 8 స్థానాలు, అలాగే అప్పటి టీడీపీకి మరో 8 స్థానాలు వచ్చాయి. అప్పటి ఎమ్మెల్యే పంచకర్ల రమేష్‌బాబు, వైఎస్సార్‌సీపీ నేత బొడ్డేడ ప్రసాద్‌లు ఒక ఒడంబడికకు వచ్చారు. ముందు రెండున్నరేళ్ల పాటు టీడీపీకి మొదటిసారిగా ఎంపీపీ అవకాశం కల్పించారు. తరువాత రెండున్నరేళ్ల కాలం వైఎస్సార్‌సీపీకి ఎంపీపీ అవకాశం కల్పించారు. నేడు అటువంటి ఫలితమే మరోసారి పునరావృతం కావడం విశేషం. 2026లో జరిగిన స్థానిక సంస్థల ఎన్నికల్లో భాగంగా మొత్తం 16 ఎంపీటీసీ స్థానాలకు గాను వైఎస్సార్‌సీపీకి 8 స్థానాలు రాగా కూటమి ప్రభుత్వానికి 8 స్థానాలు వచ్చాయి. ఈ పర్యాయం ఎంపీపీ పీఠం ఎవరిని వరిస్తుందో మరి?

● వైఎస్సార్‌సీపీ శరభన్నపాలెంఎంపీటీసీ అభ్యర్థి కూడా రాజేశ్వరి కొయ్యూరు: ఒక్క ఓటు.. అభ్యర్థి గెలుపోటములను నిర్ణయించింది. మండలంలోని శరభన్నపాలెం ఎంపీటీసీ స్థానంలో వైఎస్సార్‌సీపీ అభ్యర్థి కూడ రాజేశ్వరి ఒక్క ఓటు మెజారిటీతో విజయం సాధించడం సంచలనం సృష్టించింది. తొలుత ఈ సెగ్మెంట్‌లో వైఎస్సార్‌సీపీ అభ్యర్థి ఓడిపోయినట్లు ప్రచారం జరిగింది. అయితే, కౌంటింగ్‌ పూర్తయ్యాక రెండు ఓట్ల మెజారిటీతో రాజేశ్వరి విజయం సాధించినట్లు ప్రకటించారు. దీనిపై టీడీపీ నాయకులు అభ్యంతరం వ్యక్తం చేసి పట్టుబట్టడంతో అధికారులు రీకౌంటింగ్‌ నిర్వహించారు. అయినప్పటికీ వైఎస్సార్‌సీపీ అభ్యర్థి రాజేశ్వరి ఒక్క ఓటు మెజారిటీతో సమీప ప్రత్యర్థి గాం రమాదేవిపై గెలుపొందారు. రాజేశ్వరికి 872 ఓట్లు రాగా, రమాదేవికి 871 ఓట్లు పోలయ్యాయి. దీంతో ఒక్క ఓటు ఆధిక్యంతో రాజేశ్వరి విజయం ఖరారైంది.

పెదబయలు: స్థానిక సంస్థల ఎన్నికల్లో వైఎస్సార్‌సీపీ అభ్యర్థులు విజయకేతనం ఎగురవేశారు. జెడ్పీటీసీ స్థానాన్ని భారీ మెజారిటీతో కై వసం చేసుకోవడంతో పాటు, 15 ఎంపీటీసీ స్థానాలకు గాను పది స్థానాల్లో విజయం సాధించారు. జెడ్పీటీసీ వైఎస్సార్‌సీపీ అభ్యర్థి వంతాల శాంతికి 13,097 ఓట్లు పోలవగా, సమీప ప్రత్యర్థి టీడీపీ అభ్యర్థి వెచ్చంగి సుశీలకు 8,999 ఓట్లు వచ్చాయి. దీంతో వంతాల శాంతి 4,098 ఓట్ల మెజారిటీతో ఘన విజయం సాధించారు. మండలంలో గత ఎన్నికల్లోనూ వైఎస్సార్‌సీపీ జెడ్పీటీసీ అభ్యర్థులే విజయం సాధించారు. తాజాగా జరిగిన ఎన్నికల్లో 2021లో వచ్చిన మెజారిటీ కంటే అధికంగా 4,098 ఓట్ల ఆధిక్యంతో గెలుపొందడంతో పార్టీ శ్రేణుల్లో ఉత్సాహం నెలకొంది. అలాగే 15 ఎంపీటీసీ స్థానాలకు గాను వైఎస్సార్‌సీపీ పది స్థానాలను కై వసం చేసుకుంది. టీడీపీ మూడు, బీజేపీ ఒకటి, జనసేన ఒక స్థానంలో విజయం సాధించాయి. పార్టీ అభ్యర్థుల విజయంతో మండల వ్యా ప్తంగా కార్యకర్తలు సంబరాలు చేసుకున్నారు. గెలుపొందిన అభ్యర్థులు వైఎస్సార్‌ పార్కులోని వైఎస్సార్‌ విగ్రహానికి పూలమాలలు వేసి నివాళులర్పించారు. ఈ సందర్భంగా పార్టీ నాయకులు మాట్లాడుతూ.. 2029 ఎన్నికల్లో వైఎస్‌ జగన్‌మోహన్‌రెడ్డిని తిరిగి ముఖ్యమంత్రిని చేసేందుకు శక్తివంచన లేకుండా పనిచేస్తామని తెలిపారు. పార్టీ కోసం కష్టపడి పనిచేసిన కార్యకర్తలకు పేరుపేరునా కృతజ్ఞతలు తెలిపారు. ఇదే ఉత్సాహంతో రానున్న 23 గ్రామ పంచాయతీ ఎన్నికల్లోనూ పార్టీ అభ్యర్థులను గెలిపించుకుంటామని ధీమా వ్యక్తం చేశారు. మండల ప్రజలకు ఎల్లప్పుడూ అందుబాటులో ఉంటూ సేవలందిస్తామని పేర్కొన్నారు. ఈ కార్యక్రమంలో పది మంది ఎంపీటీసీ అభ్యర్థులు, మాజీ జెడ్పీటీసీ కూడ బొంజుబాబు, వంతాల అప్పారావు, గంపరాయి సూరయ్య, పార్టీ నేతలు, కార్యకర్తలు తదితరులు పాల్గొన్నారు.జెడ్పీటీసీతో పాటు పది స్థానాల్లో వైఎస్సార్‌సీపీ అభ్యర్థులు విజయం

అనకాపల్లి టౌన్‌ : చీకటిని ప్రాదద్రోలి వెలుగులు నింపే దీపావళి పండుగను ఆదివారం జరుపుకొనేందుకు ప్రజలు సిద్ధమయ్యారు. ఇంటికి రకరకాల విద్యుత్‌ అలంకరణలు, ప్రమిదల వెలుగులు, టపాసులు పేల్చడానికి సిద్దమైన ప్రతి ఒక్కరూ అప్రమత్తంగా ఉండాల్సిన అవసరం ఎంతైనా ఉంది. ప్రతి ఇంటిలో లక్ష్మిదేవికి పూజ చేసి, చెరకు గెడ, ఆముదం కర్రలతో కూడిన దివ్వెలను వెలిగించిన అనంతరం టపాసులు కాల్చుతారు. అయితే తమ తమ స్ధాయిలో టపాసులు కొనుక్కొని ఇంటికి తెచ్చి, ఆంనందోత్సాహాల మద్య, సరదా కోసం కాల్చే టపాసుల విషయంలో ప్రతి ఒక్కరూ జాగ్రత్తగా ఉండాలని పలువురు సూచిస్తున్నారు. ఈ దీపావళి పండగ అంటే ముఖ్యంగా చిన్నారులకు ఎంతో ఇష్టమైన పండగ. అలాగే పెద్దలు కూడా ఆనందంగా టపాసులు కాల్చుతుంటారు. రంగురంగుల బాణసంచా కాల్చేందుకు పిల్లలు ఆసక్తి చూపుతుంటారు. అయితే పెద్దల పర్యవేక్షణ లేకుండా పిల్లలకు టపాసులు ఇవ్వకూడదని పలువురు సూచిస్తున్నారు. అప్రమత్తత లేకపోతే జరిగే ప్రమాదాలపై ముందుగానే వారికి అవగాహన కల్పించాలని అగ్నిమాపక శాఖ అధికారులు సూచిస్తున్నారు. ●బాణాసంచా కాల్చేటప్పుడు బహిరంగ ప్రదేశాలను ఎంచుకోవాలి. ●ఇళ్ల సమీపంలో, వాహనాల పక్కన, విద్యుత్‌ తీగల కిద టపాసులు కాల్చరాదు. ●టపాసులు కాల్చేటప్పుడు చేతితో పట్టుకోకుండా నేలపై ఉంచి పొడవైన అగరబత్తితో వెలిగించాలి. ●మందుగుండు సామాన్లు కాల్చే సమయంలో కాటన్‌ దుస్తులు ధరించాలి. ●మందుగుండు వెలిగించే ప్రాంతంలో ఒక బకెట్‌ ఇసుక, నీరు అందుబాటులో ఉంచుకోవాలి. ●ఒకసారి వెలిగించిన టపాసు కాలకపోతే తిరిగి వెలిగించే ప్రయత్నం చేయరాదు. ●ఇళ్లలో దీపాలు వెలిగించేటప్పుడు కర్టెన్లు, కాగితాలు, ఇతర మండే వస్తువులను దూరంగా ఉంచాలి. ●విద్యుత్‌ దీపాలు అలంకరణలో నాణ్యమైన వైర్లు, ప్లగ్‌లు ఉపయోగించాలి. ●బాణాసంచా కాల్చేటప్పుడు కాళ్లకు చెప్పులు, బూట్లు తప్పని సరిగా ధరించాలి ●బాణాసంచా కాల్చిన తర్వాత చేతులను శుభ్రంగా కడుక్కోవాలి. ●కళ్లకు, చేతులకు గాయాలైనప్పుడు సొంత వైద్యం చేసుకోకుండా వెంటనే సమీపంలో ఆసుపత్రికి వెళ్లి డాక్టర్‌ సలహాపై వైద్యం పొందాలి.

సాక్షి, పాడేరు: జిల్లాలో 11 జెడ్పీటీసీ, 172 ఎంపీటీసీ స్థానాలకు జరిగిన ఎన్నికల ఓట్ల లెక్కింపు ఉత్కంఠభరితంగా సాగింది. ఉదయం ప్రారంభమైన కౌంటింగ్‌ ప్రక్రియ రాత్రి వరకు కొనసాగడంతో అభ్యర్థులు, రాజకీయ పార్టీల శ్రేణుల్లో ఉత్కంఠ నెలకొంది. పాడేరుతో పాటు మిగిలిన 10 మండలాల్లోని కౌంటింగ్‌ కేంద్రాల వద్ద పటిష్ట పోలీసు బందోబస్తు ఏర్పాటు చేయడంతో పాటు సీసీ కెమెరాలతో నిరంతర నిఘా ఉంచారు. పాడేరు డిగ్రీ కళాశాలలో ఏర్పాటు చేసిన కౌంటింగ్‌ కేంద్రాన్ని కలెక్టర్‌ టి.నిశాంతి సందర్శించి లెక్కింపు ప్రక్రియను పరిశీలించారు. ● అన్ని కేంద్రాల్లో తొలుత జెడ్పీటీసీ, ఎంపీటీసీ స్థానాలకు సంబంధించిన పోస్టల్‌ బ్యాలెట్లను లెక్కించారు. పోస్టల్‌ ఓట్లలో వైఎస్సార్‌సీపీ అభ్యర్థులకు అధికంగా ఓట్లు పోలయ్యాయి. అనంతరం అభ్యర్థులు, ఏజెంట్ల సమక్షంలో బ్యాలెట్‌ బాక్సుల సీళ్లు తొలగించి ఓట్ల లెక్కింపు చేపట్టారు. జడ్పీటీసీ, ఎంపీటీసీ ఓట్లను వేర్వేరుగా కట్టలుగా విభజించి లెక్కించారు. పలు కేంద్రాల్లో లెక్కింపు నెమ్మదిగా సాగడంతో ఫలితాల వెల్లడిలో జాప్యం జరిగింది. ● జిల్లాలోని 11 జడ్పీటీసీ, 172 ఎంపీటీసీ స్థానాలకు జరిగిన ఓట్ల లెక్కింపు ప్రక్రియ రాత్రికి పూర్తవడంతో ఫలితాలు వెలువడ్డాయి. తొలుత ప్రకటించిన అనంతగిరి జెడ్పీటీసీ స్థానంలో వైఎస్సార్‌సీపీ అభ్యర్థి దూరు జయవర్ధిని విజయం సాధించారు. అనంతరం గూడెంకొత్తవీధిలో కంకిపాటి గిరిప్రసాద్‌, చింతపల్లిలో కోరాబు అనూషదేవి, పెదబయలులో వంతాల శాంతి, పాడేరులో సీదరి రాంబాబు, డుంబ్రిగుడలో హరి గెలుపొందారు. వీరంతా వైఎస్సార్‌సీపీ అభ్యర్థులే కావడంతో పార్టీ శ్రేణులు విజయోత్సవాలు జరుపుకున్నాయి. ● జిల్లా పరిషత్‌ చైర్మన్‌ పీఠాన్ని దక్కించుకోవడానికి అవసరమైన ఆరు జడ్పీటీసీ స్థానాలను వైఎస్సార్‌సీపీ కై వసం చేసుకోవడంతో ఆ పార్టీ శ్రేణుల్లో హర్షాతిరేకాలు వ్యక్తమయ్యాయి. ఇదే సమయంలో పెదబయలు, డుంబ్రిగుడ, పాడేరు, జి.కే.వీధి, చింతపల్లి, అనంతగిరి, హుకుంపేట మండలాల్లో అధిక ఎంపీటీసీ స్థానాలను వైఎస్సార్‌సీపీ గెలుచుకోవడంతో ఆయా మండలాల్లో ఎంపీపీ పీఠాలు కూడా ఆ పార్టీకే దక్కే అవకాశాలు కనిపిస్తున్నాయి. హోరాహోరీ పోరు అత్యధిక జెడ్పీటీసీ స్థానాలు కై వసం వైఎస్సార్‌సీపీ శ్రేణుల్లో ఆనందం విజేతలను అభినందించిన పార్టీ జిల్లా అధ్యక్షుడు, ఎమ్మెల్యే విశ్వేశ్వరరాజు

ముంచంగిపుట్టు: మండలంలోని 14 ఎంపీటీసీ స్థానాలకు జరిగిన ఎన్నికల్లో వైఎస్సార్‌సీపీ ఎనిమిది స్థానాలను కై వసం చేసుకుంది. కూటమి అభ్యర్థులు కనీస పోటీ కూడా ఇవ్వలేక మూడు స్థానాలకే పరిమితమయ్యాయి. మిగిలిన స్థానాల్లో సీపీఎం, స్వతంత్ర అభ్యర్థులు విజయం సాధించారు. వైఎస్సార్‌సీపీ తరఫున జర్జుల సెగ్మెంట్‌లో పాంగి పద్మారావు, సుజనకోటలో మజ్జి సుబ్బలక్ష్మి, పెదగూడలో తమర్భ నాగరత్నం, దారెలలో అరిసెల సీతమ్మ, కుమడలో తాల్లోయ్‌ భాస్కరరావు, బరడలో జనం ప్రమీల, జోలాపుట్టులో సీసా లక్ష్మి, రంగబయలులో సిరగం భాగ్యవతి విజయం సాధించారు. లక్ష్మీపురం సెగ్మెంట్‌లో సీపీఎం అభ్యర్థి కొర్ర మల్లేశ్వరరావు గెలుపొందారు. బంగారుమెట్ట, కిలగాడ సెగ్మెంట్లలో జనసేన అభ్యర్థులు కోడా చంద్రుబాబు, వంతాల కొండమ్మ విజయం సాధించారు. బాబుశాలలో టీడీపీ అభ్యర్థి కిల్లో గణే ష్‌పడాల్‌ గెలుపొందారు. కించాయిపుట్టు, మాకవరం సెగ్మెంట్లలో స్వతంత్ర అభ్యర్థులు రొబ్బ అరుణ, మట్టం రషుపతిపడాల్‌ విజయం సాధించారు. జెడ్పీటీసీ బరిలో మొదటి స్థానంలో సీపీఎం అభ్యర్థి కొర్రా త్రినాథ్‌, ద్వితీయస్థానంలో వైఎస్సార్‌సీపీ అభ్యర్థి జల్లిపల్లి సుభద్ర నిలవగా జనసేన అభ్యర్థి శ్రవణ్‌కుమార్‌ మూడు స్థానంలో నిలిచారు. జెడ్పీటీసీ బరిలో మూడు స్థానానికి దిగజారిన జనసేన అభ్యర్థి శ్రవణ్‌కుమార్‌

సింహాచలం: శ్రీవరాహ లక్ష్మీనృసింహస్వామికి శనివారం ఆర్జిత సేవలు వైభవంగా జరిగాయి. ఉదయం 7 గంటలకు సహస్ర నామార్చన పూజ చేశారు. స్వామివారి ఉత్సవమూర్తులు గోవిందరాజస్వామి, శ్రీదేవి, భూదేవిలను ఆలయ కల్యాణ మండపంలో వేదికపై అధిష్టింపజేసి, 1001 నామాలతో సహస్ర నామార్చన నిర్వహించారు. ఉభయదాతలకు శేషవస్త్రాలు, ప్రసాదం అందజేశారు. శ్రీవరాహ లక్ష్మీనృసింహస్వామికి శనివారం ఉదయం 9.30 గంటల నుంచి నిత్యకల్యాణం శాస్త్రోక్తంగా జరిగింది. ఆలయ కల్యాణ మండపంలో స్వామివారి ఉత్సవమూర్తులు గోవిందరాజస్వామి, శ్రీదేవి, భూదేవిలను అధిష్టింపజేశారు. అనంతరం విష్వక్సేన పూజ, పుణ్యాహవచనం, కంకణధారణ, యజ్ఞోపవీతం, జీలకర్రబెల్లం, మాంగల్యధారణ, తలంబ్రాలు, తదితర ఘట్టాలతో కల్యాణం శాస్త్రోక్తంగా సాగింది. ఉభయదాతలకు కల్యాణ అక్షింతలు, ప్రసాదం, శేషవస్త్రం అందజేశారు.

● స్వతంత్ర అభ్యర్థిగా అరుణ విజయం ముంచంగిపుట్టు: మండలంలోని కించాయిపుట్టు ఎంపీటీసీ సెగ్మెంట్‌లో స్వతంత్ర అభ్యర్థిగా బరిలో నిలిచిన గ్రామ వలంటీర్‌ రొబ్బ అరుణ విజయం సాధించారు. గత వైఎస్సార్‌సీపీ ప్రభుత్వ హయాంలో వలంటీర్‌గా ఆమె అందించిన సేవలు, ప్రభుత్వ సంక్షేమ పథకాలను ప్రజలకు చేరవేయడంలో చూపిన చొరవకు పంచాయతీ ప్రజలు మద్దతుగా నిలిచారు. సీపీఎం అభ్యర్థి సీసా విజయలక్ష్మిపై వంద ఓట్ల మెజారిటీతో అరుణ గెలుపొందారు. దీంతో కించాయిపుట్టు పంచాయతీలో వలంటీర్లు, ప్రజలు హర్షం వ్యక్తం చేశారు.

14 స్థానాల్లో వైఎస్సార్‌సీపీ అభ్యర్థుల హవాగూడెంకొత్తవీధి: మండలంలో వైస్సార్‌సీపీ విజయదుందుభి మోగించింది. 18 ఎంపీటీసీ స్థానాల్లో 14 చోట్ల గెలుపొందింది. కూటమి నాలుగు స్థానాలకు పరిమితమైంది. వైఎస్సార్‌సీపీకి చెందిన జెడ్పీటీసీ అభ్యర్థి కంకిపాటి గిరిప్రసాద్‌ టీడీపీ అభ్యర్థి రొబ్బ పుష్పపై విజయం సాధించారు. పాడేరు మాజీ ఎమ్మె ల్యే కొట్టగుళ్లి భాగ్యలక్ష్మి విజేతలను అభినందించారు. ఈ సందర్భంగా ఆమె మాట్లాడుతూ గిరిజనులు వైఎస్సార్‌ సీపీకి పట్టం కట్టడం ఆనందంగా ఉందన్నారు. సీలేరు: సీలేరులో కూటమి అభ్యర్థి నాగమణిపై వైఎస్సార్‌సీపీ అభ్యర్థి ఎం. ప్రియ వంద ఓట్ల మెజారిటీతో గెలుపొందారు. దుప్పులవాడ సెగ్మెంట్‌ వైఎస్సార్‌సీపీ అభ్యర్థి వెలుగూరి సత్యనారాయణ కాంగ్రెస్‌ అభ్యర్థి సొన్నుపై 86 ఓట్ల మెజారిటీ విజయం సాధించారు. ధారకొండ టీడీపీ అభ్యర్థిపై వైఎస్సార్‌సీపీ అభ్యర్థి బాకూరి రాజేశ్వరి 120 ఓట్ల మెజారిటీతో గెలుపొందారు. గుమ్మరేవుల సెగ్మెంట్‌లో టీడీపీ అభ్యర్థిపై వైఎస్సార్‌సీపీ అభ్యర్థి కొర్రా అప్పారావు 56 ఓట్ల మెజారిటీతో గెలుపొందారు. గాలికొండ సెగ్మెంట్‌లో టీడీపీ అభ్యర్థిపై వైఎస్సార్‌సీపీ అభ్యర్థి గొంతులొంగి జ్యోతి రాణి 158 ఓట్ల మెజారిటీతో విజయం సాధించారు.

● జిల్లా వ్యాప్తంగా 11 కేంద్రాలు ● 298 టేబుళ్ల ఏర్పాట్లు ● 1200 మంది సిబ్బందితో నిర్వహణ సాక్షి, పాడేరు: స్థానిక సంస్థల ఎన్నికల సమరం ముగియడంతో అభ్యర్థుల భవితవ్యం తేలే సమయం ఆసన్నమైంది. శనివారం జరగనున్న ఓట్ల లెక్కింపునకు జిల్లా ఎన్నికల అధికారులు అన్ని ఏర్పాట్లు పూర్తి చేశారు. జిల్లాలోని 11 జడ్పీటీసీ, 172 ఎంపీటీసీ స్థానాలకు జరిగిన ఎన్నికల్లో విజయం ఎవరిని వరిస్తుందోనన్న ఉత్కంఠ అభ్యర్థులు, రాజకీయ పార్టీలతో పాటు ఓటర్లలోనూ నెలకొంది. స్ట్రాంగ్‌ రూమ్‌లలో భద్రపరిచిన బ్యాలెట్‌ బాక్సులు తెరుచుకోనుండటంతో అందరి దృష్టి కౌంటింగ్‌ కేంద్రాలపై పడింది. ● జిల్లా వ్యాప్తంగా 11 మండలాల్లో 11 కౌంటింగ్‌ కేంద్రాలను ఏర్పాటు చేశారు. జడ్పీటీసీ ఓట్ల లెక్కింపునకు 148, ఎంపీటీసీ ఓట్ల లెక్కింపునకు మరో 148 టేబుళ్లను సిద్ధం చేశారు. ప్రతి టేబుల్‌ వద్ద ఒక కౌంటింగ్‌ సూపర్‌వైజర్‌, ఇద్దరు కౌంటింగ్‌ అసిస్టెంట్లు విధులు నిర్వహించనున్నారు. మొత్తం 1,200 మంది సిబ్బందిని కౌంటింగ్‌ విధులకు నియమించారు. తొలుత పోస్టల్‌ బ్యాలెట్లు.. కౌంటింగ్‌ ప్రక్రియలో తొలుత పోస్టల్‌ బ్యాలెట్‌ ఓట్లను లెక్కిస్తారు. అనంతరం ఎంపీటీసీ, జెడ్పీటీసీ ఓట్ల లెక్కింపు చేపడతారు. ఎంపీటీసీ స్థానాల ఫలితాలను సంబంధిత రిటర్నింగ్‌ అధికారులు ప్రకటిస్తారు. జడ్పీటీసీ స్థానాలకు సంబంధించిన ఫలితాలను ఇన్‌చార్జి జాయింట్‌ కలెక్టర్‌, రిటర్నింగ్‌ అధికారి ప్రకటిస్తారని కలెక్టర్‌ నిశాంతి తెలిపారు. మీడియా కేంద్రాల ఏర్పాటు అన్ని కౌంటింగ్‌ కేంద్రాల వద్ద పోలీసు బందోబస్తు ఏర్పాటు చేశారు. మీడియా ప్రతినిధుల కోసం ప్రత్యేక కేంద్రాలను సిద్ధం చేశారు. కలెక్టరేట్‌లోని ఎంసీఎంసీ ద్వారా ఎన్నికల ఫలితాలను ప్రత్యక్షంగా ప్రదర్శించేందుకు చేపట్టిన ఏర్పాట్లను కలెక్టర్‌ పరిశీలించారు.

ఇబ్బందికరంగా ఆదేశాలు గత నెల 29వ తేదీ నుంచి మున్సిపల్‌ ఎన్నికల విధు లు, ఆ తర్వాత జెడ్పీటీసీ, ఎంపీటీసీ ఎన్నికల పోలింగ్‌ విధుల్లో నిరంతరంగా పాల్గొంటున్నాం. సుదూర ప్రాంతాల్లో విధులు నిర్వహించి గురువారం అర్ధరాత్రి ఒంటి గంటకు ముంచంగిపుట్టు చేరుకున్నాం. మళ్లీ శుక్రవారం ఉదయం కౌంటింగ్‌ శిక్షణకు హాజరై, కొయ్యూరు, గూడెంకొత్తవీధి మండలాల్లో కౌంటింగ్‌ విధులు నిర్వహించాలని ఆదేశించడం ఇబ్బందికరంగా ఉంది. ఇప్పటికే 100 నుంచి 180 కిలోమీటర్లు ప్రయాణించి విధులు నిర్వహించి వచ్చిన సిబ్బందిని తిరిగి అదే ప్రాంతాలకు పంపడం వల్ల తీవ్ర ప్రయాణ భారం పడుతోంది. – ముక్కి రామకృష్ణ, ఉపాధ్యక్షులు, గిరిజన ఉద్యోగుల సంఘం, ముంచంగిపుట్టు తీవ్ర అవస్థలు పడుతున్నాం ఎన్నికల విధులకు సంబంధించిన ఆదేశాలను ముందుగానే తెలియజేస్తే సిబ్బంది ప్రయాణాలకు తగిన ఏర్పాట్లు చేసుకునే అవకాశం ఉంటుంది. అప్పటికప్పుడు విధులకు హాజరుకావాలని చెప్పడంతో తీవ్ర అవస్థలు పడుతున్నాం. కొయ్యూరు మండలంలో ఎన్నికల విధులకు వెళ్లి గత రెండు రోజులుగా సరైన నిద్ర, స్నానం లేకుండా ఇబ్బందులు ఎదుర్కొంటున్నాం. దీనివల్ల మానసిక ఒత్తిడికి గురవుతున్నాం. ఎన్నికల విధులకు తప్పనిసరిగా హాజరవుతాం. అయితే ముందుగానే విధుల వివరాలు తెలియజేయడంతో పాటు, వీలైన మేర సమీప మండలాల్లో బాధ్యతలు కేటాయిస్తే ప్రయాణ ఇబ్బందులు తగ్గుతాయి. అధికారులు దీనిని పరిగణనలోకి తీసుకోవాలి. – రెయ్యల రామకృష్ణ, ప్రధాన కార్యదర్శి, మండల గిరిజన ఉద్యోగుల సంఘం, ముంచంగిపుట్టు●ఆర్వో శ్రీనివాసరావుకు సమస్య వివరిస్తున్న ఎన్నికల డ్యూటీ ఉపాధ్యాయులుఆవేదన వెలిబుచ్చుతున్న ఉపాధ్యాయులుముంచంగిపుట్టు: ఎన్నికల విధులంటేనే ఉపాధ్యాయులకు కత్తిమీద సాములా మారింది. మున్సిపల్‌ ఎన్నికల విధులు ముగియగానే జెడ్పీటీసీ, ఎంపీటీసీ ఎన్నికల బాధ్యతలు.. అవి పూర్తిచేసుకుని అర్ధరాత్రి ఇళ్లకు చేరుకునేలోపే మళ్లీ కౌంటింగ్‌ విధులంటూ ఆదేశాలు జారీ అయ్యాయి. కనీస విశ్రాంతి, నిద్రకు కూడా నోచుకోకుండా వందల కిలోమీటర్లు ప్రయాణిస్తూ విధులు నిర్వహించాల్సి రావడంతో ఉపాధ్యాయులు తీవ్ర అసహనం వ్యక్తం చేశారు. ఈ క్రమంలో ముంచంగిపుట్టు మండల కేంద్రంలో శుక్రవారం ఎన్నికల రిటర్నింగ్‌ అధికారి శ్రీనివాసరావుకు ఉపాధ్యాయుల నుంచి ప్రశ్నల వర్షం ఎదురైంది. ● గత నెల 29వ తేదీ నుంచి మున్సిపల్‌ ఎన్నికల నిర్వహణలో పాల్గొన్న ఉపాధ్యాయులు, ఆ వెంటనే జెడ్పీటీసీ, ఎంపీటీసీ ఎన్నికల విధుల్లో నిమగ్నమయ్యారు. ఈ బాధ్యతలన్నీ ముగించుకుని గురువారం అర్ధరాత్రి ఒంటి గంటకు ముంచంగిపుట్టు మండల కేంద్రానికి చేరుకున్నారు. అయితే శుక్రవారం ఉదయం మళ్లీ కౌంటింగ్‌ శిక్షణకు రావాలని, అనంతరం కొయ్యూరు, చింతపల్లి, గూడెంకొత్తవీధి, అనంతగిరి మండలాల్లో కౌంటింగ్‌ విధులకు హాజరుకావాలని ఆర్‌వో శ్రీనివాసరావు ఆదేశాలు జారీ చేశారు. దీంతో 70 మందికి పైగా ఉపాధ్యాయులు తీవ్ర అసహనం వ్యక్తం చేశారు. ● వంద నుంచి 180 కిలోమీటర్ల దూరం ప్రయాణించి ఎన్నికల విధులు నిర్వహించిన తమను, మళ్లీ అదే దూరంలోని మండలాలకు కౌంటింగ్‌ కోసం పంపడం ఎంతవరకు సమంజసమని ప్రశ్నించారు. మధ్యాహ్నం 12 గంటల వరకు ముంచంగిపుట్టులో శిక్షణ తీసుకుని, తిరిగి 3 గంటలకు కొయ్యూరులో కౌంటింగ్‌ విధులకు ఎలా హాజరుకావాలని నిలదీశారు. కొయ్యూరు, జి.కె.వీధి, చింతపల్లి మండలాల్లో పోలింగ్‌ విధులు నిర్వహించిన సిబ్బందికి ఆయా ప్రాంతాల్లోనే కౌంటింగ్‌ శిక్షణ ఇచ్చి విధులు కేటాయిస్తే ప్రయాణ భారం తగ్గుతుందని సూచించారు. ● కేవలం శిక్షణ కోసమే ముంచంగిపుట్టుకు వచ్చి, తిరిగి ఆయా మండలాలకు వెళ్లడం ఇబ్బందికరమని ఆవేదన వ్యక్తం చేశారు. సరైన నిద్ర లేకుండా, రెండు మూడు రోజులుగా స్నానాలు చేసుకునే అవకాశం కూడా లేక తీవ్ర ఇబ్బందులు పడుతున్నామని ఆర్‌వో దృష్టికి తీసుకెళ్లారు. ఎన్నికల కమిషన్‌ ఆదేశాలను తప్పనిసరిగా పాటించాలని, ఈ విషయంలో నిర్ణయం తమదేనని ఆర్‌వో బదులివ్వడంతో ఉపాధ్యాయులు, అధికారుల మధ్య వాగ్వాదం చోటుచేసుకుంది. ● చివరకు ఉపాధ్యాయుల విజ్ఞప్తితో స్పందించిన ఆర్‌వో ఉన్నతాధికారులతో మాట్లాడి రవాణా సదుపాయం కల్పించారు. కొయ్యూరు, అనంతగిరి వైపు వెళ్లేందుకు రెండు మార్గాల్లో రెండు బస్సులను ఏర్పాటు చేసి, కౌంటింగ్‌ విధులకు హాజరుకావాల్సిన సిబ్బందికి ఆదేశాలు అందజేశారు. ఎన్నికల విధులతో ఉపాధ్యాయులు ఉక్కిరిబిక్కిరి! పోలింగ్‌ నుంచి కౌంటింగ్‌ వరకు పరుగులే! అర్ధరాత్రి వరకు విధులు మళ్లీ కౌంటింగ్‌ శిక్షణకు పిలుపు ఉపాధ్యాయుల సహనానికి పరీక్ష!

విశాఖ విద్య: ఆంధ్ర యూనివర్సిటీ గోల్డెన్‌ జూబ్లీ మైదానంలో దీపావళి టపాసుల విక్రయాలకు అనుమతి ఇవ్వడంపై ఆరోపణలు వెల్లువెత్తుతున్నాయి. విద్యార్థుల క్రీడా కార్యకలాపాలకు ఉపయోగించాల్సిన మైదానాన్ని టపాసుల విక్రయాలకు కేటాయించడం వెనుక పెద్ద వ్యాపార ప్రయోజనాలు ఉన్నాయనే విమర్శలు వినిపిస్తున్నాయి. కూటమి నేతల ఒత్తిడితోనే ఏయూ యంత్రాంగం మైదానాన్ని కేటాయించిందనే ఆరోపణలు వస్తున్నాయి. అద్దె కంటే ఆదాయమే ఎక్కువ? ఏయూ మైదానాన్ని టపాసుల విక్రయాలకు అద్దెకు ఇచ్చేందుకు సుమారు రూ.18 లక్షలకు ఒప్పందం కుదిరినట్లు సమాచారం. కూటమి నేతల అనుబంధ వ్యక్తికే కాంట్రాక్టు దక్కిందనే ఆరోపణలు ఉన్నాయి. అనంతరం స్థానిక కార్పొరేటర్‌ జోక్యం పెరిగిందని, ఆయన సిఫారసుతోనే స్టాళ్ల కేటాయింపులు జరిగాయని పలువురు వ్యాపారులు చెబుతున్నారు. మొత్తం 70 వరకు స్టాళ్ల ఏర్పాటుకు అనుమతి ఇచ్చినట్లు సమాచారం. ఒక్కో స్టాల్‌కు సుమారు రూ.1.20 లక్షల వరకు వసూలు చేసినట్లు ఆరోపణలు ఉన్నాయి. దీంతో వర్సిటీకి చెల్లించిన అద్దెతో పోలిస్తే కాంట్రాక్టర్‌కు రూ. 84 లక్షల భారీ ఆదాయం వచ్చే అవకాశం ఉందనే విమర్శలు వ్యక్తమవుతున్నాయి. మరోవైపు విక్రయాల అనంతరం మైదానాన్ని యథాస్థితికి తీసుకురావడానికి అయ్యే ఖర్చు కూడా వర్సిటీపై పడే అవకాశం ఉందని అంటున్నారు. భద్రతపై ఆందోళన ఏయూ సిల్వర్‌ జూబ్లీ మైదానంలో టపాసుల విక్రయాలకు అనుమతి ఇవ్వడంపై విద్యార్థి సంఘాలు ఆందోళన వ్యక్తం చేస్తున్నాయి. మైదానం చుట్టూ పలు వసతిగృహాలు ఉన్నందున అగ్నిప్రమాదాలు జరిగితే విద్యార్థుల భద్రతకు ముప్పు వాటిల్లే అవకాశం ఉందని ఏయూ పరిరక్షణ సమితి కన్వీనర్‌ డా. మీనన్‌ పేర్కొన్నారు. గతంలో ఏయూ ఇంజినీరింగ్‌ కాలేజీ మైదానాన్ని అద్దెకు ఇచ్చిన తర్వాత పునరుద్ధరణకు భారీగా ఖర్చు చేయాల్సి వచ్చిందని గుర్తుచేశారు. గోల్డెన్‌ జూబ్లీ మైదానంలో టపాసుల విక్రయాలకు అనుమతులు ఇవ్వడం సరికాదని ఎస్‌ఎఫ్‌ఐ అభ్యంతరం వ్యక్తం చేసింది. విద్యార్థుల భద్రతకు ప్రాధాన్యం ఇవ్వాలని, భద్రతా ప్రమాణాలు పాటిస్తున్నారా లేదా అనే అంశంపై కలెక్టర్‌, ఏయూ వీసీ దృష్టి సారించాలని డిమాండ్‌ చేసింది.

కంచరపాలెం: జ్ఞానాపురం రక్షణగిరిలో 33 అడుగుల దివ్య రక్షకుడు క్రీస్తు స్వరూప మహా ప్రతిష్ట మహోత్సవ కార్యక్రమాన్ని ఈ నెల 8వ తేదీ ఆదివారం సాయంత్రం 6 గంటలకు విశాఖ ఆర్చిబిషప్‌ రెవరెండ్‌ ఫాదర్‌ డాక్టర్‌ ఉడుముల బాల ప్రారంభించనున్నట్లు వార్డు కార్పొరేటర్‌ కోడిగుడ్ల పూర్ణిమ, వైఎస్సార్‌సీపీ వార్డు అధ్యక్షుడు కోడిగుడ్ల శ్రీధర్‌ తెలిపారు.ఈ సందర్భంగా వారు మాట్లాడుతూ రాష్ట్రంలోనే అత్యంత ఎత్తయిన క్రీస్తు స్వరూపంగా ఇది నిలవనుందని తెలిపారు. సుమారు 33 అడుగుల ఎత్తైన క్రీస్తు స్వరూపం బేస్‌మెంట్‌తో కలిపి 55 అడుగుల ఎత్తులో ఉంటుందని పేర్కొన్నారు.విశాఖలో జీసెస్‌ స్వరూపం ఒక పర్యాటక ప్రాంతంగా అభివృద్ధి చెందాలనే ఉద్దేశంతో దీనిని నిర్మించినట్లు పూర్ణిమ, శ్రీధర్‌ తెలిపారు. సుమారు 150 ఏళ్ల చరిత్ర కలిగిన జ్ఞానాపురం రక్షణగిరిలో నిర్మించిన ఈ క్రీస్తు స్వరూపానికి దాతలుగా నిలవడం తమకు ఆనందంగా ఉందన్నారు. విశాఖ ప్రజలపై క్రీస్తు దీవెనలు ఉండాలని ఆకాంక్షించారు.

బీచ్‌రోడ్డు: ప్రాణాపాయ స్థితిలో ఉన్న పసిపాప వైద్యం కోసం విశాఖ ట్రాఫిక్‌ పోలీసులు మానవత్వం చాటుకున్నారు. టూ టౌన్‌ ట్రాఫిక్‌ పోలీస్‌ స్టేషన్‌లో విధులు నిర్వహిస్తున్న మహిళా కానిస్టేబుల్‌ సుసన్న బిడ్డ అర్ధాంతరంగా జన్మించి మెడికవర్‌ ఆస్పత్రిలో చికిత్స పొందుతోంది. చిన్నారి వైద్య ఖర్చులకు సుమారు రూ.18 లక్షల వరకు అవసరం కావడంతో ఆ కుటుంబం ఆర్థిక ఇబ్బందుల్లో పడింది. ఈ నేపథ్యంలో తోటి ఉద్యోగికి అండగా నిలవాలని ట్రాఫిక్‌ విభాగం సిబ్బంది నిర్ణయించారు. ట్రాఫిక్‌ విభాగంలో పనిచేస్తున్న సిబ్బంది నుంచి సేకరించిన రూ.3.5 లక్షలను శుక్రవారం ట్రాఫిక్‌ ఏసీపీ చేతుల మీదుగా తల్లి సుసన్నకు అందజేశారు. ఖాకీ వెనుక మానవత్వం ఉందని నిరూపిస్తూ, కష్టకాలంలో తోటి కానిస్టేబుల్‌ కుటుంబానికి అండగా నిలిచారు. త్వరలోనే పూర్తి మొత్తం సమకూరి చిన్నారి ఆరోగ్యంగా ఇంటికి చేరాలని ట్రాఫిక్‌ పోలీసులు ఆకాంక్షించారు.

మహారాణిపేట: విశాఖ వేదికగా ఈ నెల 12, 13 తేదీల్లో నిర్వహించనున్న సీఐఐ పార్ట్‌నర్‌షిప్‌ సమ్మిట్‌ను విజయవంతం చేసేందుకు అన్ని శాఖల అధికారులు సమన్వయంతో పనిచేయాలని రాష్ట్ర ప్రభుత్వ ప్రత్యేక ప్రధాన కార్యదర్శి ఎస్‌.ఎస్‌.రావత్‌ ఆదేశించారు. సదస్సుకు హాజరయ్యే దేశ, విదేశీ ప్రతినిధులకు ఎలాంటి ఇబ్బందులు కలగకుండా పకడ్బందీ ఏర్పాట్లు చేయాలని సూచించారు. శుక్రవారం కలెక్టరేట్‌ సమావేశ మందిరంలో జిల్లా కలెక్టర్‌ ఎం.అభిషిక్త్‌ కిశోర్‌తో కలిసి రాష్ట్ర, జిల్లా స్థాయి అధికారులతో సన్నాహక ఏర్పాట్లపై సమీక్ష నిర్వహించారు. సదస్సుకు వచ్చే విదేశీ ప్రతినిధులకు నగరంలోని పర్యాటక ప్రాంతాలు, స్థానిక విశేషాలను పరిచయం చేసేలా ప్రత్యేక టూరిస్ట్‌ సర్క్యూట్‌లు రూపొందించాలన్నారు. అతిథుల భద్రతకు పటిష్ట చర్యలు తీసుకోవాలని సూచించారు. విమానాశ్రయంలో ప్రత్యేక రిసెప్షన్‌ డెస్క్‌, స్వాగత బృందాన్ని ఏర్పాటు చేయాలని, తెలుగు సంస్కృతి, సంప్రదాయాలు ప్రతిబింబించేలా అతిథులకు ఘన స్వాగతం పలకాలని చెప్పారు. జిల్లా కలెక్టర్‌ ఎం.అభిషిక్త్‌ కిశోర్‌ మాట్లాడుతూ ఈ నెల 9 నుంచి కంట్రోల్‌ రూమ్‌ సేవలు అందుబాటులోకి వస్తాయన్నారు. ఈ సమీక్షలో సీపీ శంఖబ్రత బాగ్చి, అనకాపల్లి కలెక్టర్‌ విజయకృష్ణన్‌, జీవీఎంసీ కమిషనర్‌ కేతన్‌ గార్గ్‌, ఏపీఈడీబీ సీఈవో సాన్మోహన్‌, ఏపీఐఐసీ చైర్మన్‌, ఎండీ దినేష్‌ కుమార్‌, సెర్ప్‌ సీఈవో కరుణ, జీసీసీ ఎండీ శోభిక, జేసీ విద్యాధరి, అధికారులు గీతాంజలి శర్మ, గెడ్డం శేఖర్‌బాబు, డీసీపీ మణికంఠ తదితరులు పాల్గొన్నారు. ఏర్పాట్ల పరిశీలన డాబాగార్డెన్స్‌: ఈ నెల 12, 13 తేదీల్లో విశాఖలో నిర్వహించనున్న సీఐఐ భాగస్వామ్య సదస్సు ఏర్పాట్లను రాష్ట్ర ప్రభుత్వ ప్రత్యేక ప్రధాన కార్యదర్శి ఎస్‌.ఎస్‌.రావత్‌ శుక్రవారం క్షేత్రస్థాయిలో పరిశీలించారు. జీవీఎంసీ కమిషనర్‌ కేతన్‌ గార్గ్‌, రాష్ట్ర, జిల్లా స్థాయి ఉన్నతాధికారులతో కలిసి ఏయూ ఇంజినీరింగ్‌ కళాశాల మైదానంలో జరుగుతున్న పనులను సమీక్షించారు. ప్రాంగణంలో చేపడుతున్న అభివృద్ధి, సుందరీకరణ పనుల వివరాలను జీవీఎంసీ కమిషనర్‌ కేతన్‌ గార్గ్‌ ఆయనకు వివరించారు. అన్ని పనులను నాణ్యతా ప్రమాణాలతో నిర్దేశిత గడువులోగా పూర్తి చేయాలని, సంబంధిత శాఖల అధికారులు సమన్వయంతో పనిచేయాలని ఆదేశించారు.

● జాతీయ స్థాయి పోటీలకునుర్మతి ఆశ్రమ విద్యార్థిని జి.మాడుగుల: మండలంలోని నుర్మతి ప్రభుత్వ గిరిజన సంక్షేమ ఆశ్రమ బాలికల పాఠశాల విద్యార్థిని కె.కళ్యాణి ఎస్‌జీఎఫ్‌ ఐ రాష్ట్రస్థాయి క్రీడా పోటీల్లో జావెలిన్‌ త్రో విభాగంలో ప్రథమ స్థానం సాధించింది. కర్నూలులో నిర్వహించిన పోటీల్లో ప్రతిభ కనబరిచి జాతీయస్థాయి పోటీలకు అర్హత సాధించింది. ఈ నెల చివరి వారంలో ఢిల్లీలో జరగనున్న జాతీయస్థాయి పోటీల్లో పాల్గొననుంది. ఈ సందర్భంగా పాఠశాల ప్రధానోపాధ్యాయుడు ఎల్‌.నాగేశ్వరరావు, పీడీ గిడ్డి మురళి విద్యార్థినిని అభినందించారు. జాతీయస్థాయిలోనూ రాణించి పాఠశాలకు, జిల్లాకు మంచి పేరు తీసుకురావాలని ఆకాంక్షించారు.

సబ్బవరం: మండలంలో పిచ్చికుక్క స్వైరవిహరం చేస్తూ ప్రజలను భయాందోళనకు గురిచేస్తోంది. శుక్రవారం నాటికి 19 మందిని గాయపరిచింది. పలు గ్రామాల్లో సంచరిస్తున్న ఈ కుక్కను పట్టుకునేందుకు ఎవరూ సాహసించలేకపోవడంతో స్థానికులు ఆందోళన చెందుతున్నారు. తాజాగా అసకపల్లి సమీపంలోని గణపతినగర్‌కు చెందిన ఏడేళ్ల బాలికపై దాడి చేసి, గాయపరిచింది. దీంతో బాలిక తల్లిదండ్రులు, బంధువులు ఆమెను సబ్బవరం పీహెచ్‌సీకి తరలించారు. ప్రధాన వైద్యాధికారి డాక్టర్‌ ఎస్‌ఎన్‌ చక్రవర్తి బాలికకు యాంటీ రేబిస్‌ బ్యాక్సిన్‌ వేసి, చికిత్స అందించారు. మండల ప్రజలను అప్రమత్తం చేశారు. కుక్కకాటు బాధితులు గాయాన్ని ప్రవహించే నీటితో సబ్బు పెట్టి కనీసం 15 నిమషాల పాటు శుభ్రంగా కడగాలన్నారు. ఏమాత్రం ఆలస్యం చేయకుండా సమీపంలోని ప్రభుత్వ ఆసుపత్రికి వెళ్లి యాంటీ రేబిస్‌ వ్యాక్సిన్‌ తీసుకోవాలని సూచించారు. వైద్యుల సలహా మేరకు చికిత్స పొందాలన్నారు. కుక్క కాటును నిర్లక్ష్యం చేయవద్దని, చిన్నారులు ఒంటరిగా బయటకు వెళ్లకుండా జాగ్రత్తలు తీసుకోవాలని సూచించారు. కుక్క కాటుకు గురైన గణపతినగర్‌కు చెందిన చిన్నారి, కాలు పై భాగంలో కుక్క కాటు గాయం

మధురవాడ: హైటెన్షన్‌ విద్యుత్‌ లైన్‌ ఓ టైలర్‌ ప్రాణాన్ని బలిగొంది. కుటుంబానికి పెద్ద దిక్కుగా ఉన్న వ్యక్తి మృతి చెందడంతో ఆ కుటుంబం దిక్కుతోచని స్థితిలో పడింది. ఈ విషాద ఘటన మధురవాడ కళానగర్‌లో చోటుచేసుకుంది.స్థానికులు, పీఎం పాలెం పోలీసులు తెలిపిన వివరాల ప్రకారం.. కళానగర్‌కు చెందిన ఉరుకూటి భాస్కరరావు (44) గత 30 ఏళ్లుగా టైలర్‌గా పనిచేస్తూ అందరికీ సుపరిచితుడిగా ఉన్నాడు. కొన్నేళ్లుగా మధురవాడ మెయిన్‌ రోడ్డులో జీవీఎంసీ కార్యాలయం ఎదురుగా ఉన్న కొల్లి కాంప్లెక్స్‌లో టైలరింగ్‌ షాపు నిర్వహిస్తూ కుటుంబాన్ని పోషిస్తున్నాడు.గురువారం రాత్రి 8.30 గంటల సమయంలో ఇంటికి సామాన్లు ఇచ్చి తిరిగి దుకాణానికి వెళ్లాడు. రాత్రి 11 గంటల సమయంలో భార్య సునీత ఫోన్‌ చేయగా, పని ముగించుకుని వస్తానని చెప్పాడు. అనంతరం దుకాణం మూసివేసి, షాపుపై ఉన్న ఫ్లెక్సీని మార్చేందుకు మేడపైకి వెళ్లాడు.ఇనుప రాడ్లతో ఉన్న ఫ్లెక్సీని తొలగించే క్రమంలో పైన ఉన్న హైటెన్షన్‌ విద్యుత్‌ తీగలకు తగలడంతో భాస్కరరావు అక్కడికక్కడే మృతి చెందాడు. రాత్రి ఇంటికి రాకపోవడంతో కుటుంబ సభ్యులు తెలిసిన వారిని, బంధువులను సంప్రదించారు. అతనితో కలిసి పనిచేసే శంకర్‌కు ఫోన్‌ చేయగా.. ఉదయం దుకాణం వద్దకు వచ్చి ఫోన్‌ చేయడంతో మేడపై రింగ్‌ వినిపించింది.అనుమానంతో పైకి వెళ్లి చూడగా ఫ్లెక్సీ కింద భాస్కరరావు మృతదేహం కనిపించింది. కుటుంబ సభ్యుల సమాచారంతో పీఎం పాలెం పోలీసులు ఘటనా స్థలానికి చేరుకుని పరిశీలించారు. మృతదేహాన్ని పోస్టుమార్టం నిమిత్తం కేజీహెచ్‌కు తరలించి దర్యాప్తు చేస్తున్నారు. కుటుంబ పెద్దను కోల్పోయి.. భాస్కరరావు మృతితో ఎంతో అన్యోన్యంగా జీవిస్తున్న కుటుంబం ఆర్థికంగా ఇబ్బందుల్లో పడింది. మృతుడికి భార్య సునీతతో పాటు ముగ్గురు కుమార్తెలు ఉన్నారు. కుటుంబ పెద్దను కోల్పోవడంతో వారి పరిస్థితి ఆగమ్యగోచరంగా మారింది. ఈ ఘటన స్థానికులను కలచివేసింది.

తాటిచెట్లపాలెం : దొండపర్తిలోని పద్మపూజిత వీల్స్‌ మార్ట్‌ కార్యాలయంలో దసరా సందర్భంగా లక్కీ డ్రా కార్యక్రమాన్ని నిర్వహించారు. ఈ సందర్భంగా సంస్థ అధినేత ఆర్‌ఎస్‌వీపీ బసవరాజు మాట్లాడుతూ గత 24 సంవత్సరాలుగా పద్మపూజిత వీల్స్‌ మార్ట్‌ ఆంధ్రప్రదేశ్‌, తెలంగాణ రాష్ట్రాల్లో పలు బ్రాంచ్‌ల ద్వారా వినియోగదారులకు సేవలందిస్తోందని తెలిపారు. దసరా సందర్భంగా సుమారు 20 ఏళ్లుగా ప్రతి సంవత్సరం వినియోగదారులకు లక్కీ డ్రా నిర్వహించి బహుమతులు అందజేస్తున్నట్లు చెప్పారు. ఈ ఏడాది సుమారు రూ.75 లక్షల విలువైన బహుమతులను లక్కీ డ్రా ద్వారా అందిస్తున్నట్లు తెలిపారు. ఆంధ్రప్రదేశ్‌లోని వివిధ బ్రాంచ్‌లకు చెందిన సుమారు 100 మంది వినియోగదారులకు 50 రైస్‌ కుక్కర్లు, 25 స్మార్ట్‌ఫోన్లు, 25 రిఫ్రిజిరేటర్లను అందజేస్తున్నట్లు పేర్కొన్నారు.సంస్థ అభివృద్ధిలో తెలుగు రాష్ట్రాల ప్రజలు చూపిన ఆదరణ, సిబ్బంది చేసిన కృషి మరువలేనిదన్నారు. పద్మపూజిత చారిటబుల్‌ సంస్థ ద్వారా లాభాల్లో కొంత భాగంతో పలు సేవా కార్యక్రమాలు నిర్వహిస్తున్నట్లు తెలిపారు. రానున్న రోజుల్లో మరిన్ని బ్రాంచ్‌ల ద్వారా ప్రజలకు మరింత చేరువవుతామని చెప్పారు.కార్యక్రమంలో సంస్థ ప్రతినిధులు సాయిబాబు, మహేష్‌, రమేష్‌, ఫన్నీ, రహీం, కిరణ్‌ తదితరులు పాల్గొన్నారు.

చింతపల్లి: కాఫీ తోటలో పండ్లు సేకరిస్తున్న గిరిజన రైతుపై అడవిపంది ఒక్కసారిగా దాడి చేసింది. ఊహించని ఈ ఘటనతో రైతు తీవ్రంగా గాయపడ్డాడు. చేయి, నడుము, కాళ్లకు తీవ్ర గాయాలు కావడంతో తోటి రైతులు వెంటనే ఆసుపత్రికి తరలించారు. ఈ ఘటన శుక్రవారం గూడెంకొత్తవీధి మండలం దామనాపల్లి గ్రామంలో చోటుచేసుకుంది. దామనాపల్లి పంచాయతీ కేంద్రానికి చెందిన సాకెరి నాగేశ్వరరావు రోజూ మాదిరిగానే శుక్రవారం ఉదయం కాఫీ తోటలో పండ్లు సేకరించేందుకు వెళ్లాడు. ఈ క్రమంలో తోటలో ఉన్న అడవిపంది ఒక్కసారిగా అతడిపై దాడి చేసింది. దీంతో నాగేశ్వరరావు చేయి, నడుము భాగంతో పాటు కాళ్లకు తీవ్ర గాయాలయ్యాయి. సమీపంలో ఉన్న తోటి గిరిజన రైతులు గమనించి వెంటనే చింతపల్లి ఏరియా ఆసుపత్రికి తరలించారు. అక్కడ వైద్యాధికారి తేజ్‌ నారాయణ ప్రాథమిక వైద్యసేవలు అందించి, మెరుగైన చికిత్స కోసం నర్సీపట్నం ఏరియా ఆసుపత్రికి తరలించారు.

విద్యార్థులతో ప్రిన్సిపాల్‌ డాక్టర్‌ మెహన్‌రావు, శాప్‌ కోచ్‌ అబ్బు నర్సీపట్నం: ఉత్తరాఖండ్‌ హరిద్వార్‌లో జరిగిన 7వ జాతీయ గ్రాప్లింగ్‌ రెజ్లింగ్‌ చాంపియన్‌షిప్‌ పోటీల్లో ఐదుగురు విద్యార్థులు పతకాలు సాధించారని శాప్‌ కోచ్‌ కె.అబ్బు తెలిపారు. ఈ పోటీల్లో అవంతి ఇంజనీరింగ్‌ కళాశాల నుంచి ఏడుగురు విద్యార్థులు పాల్గొన్నారు. వీరిలో ఎడ్ల హాసిని, కృష్ణచైతన్య, మోహన్‌ స్వర్ణాలు, జాహ్నవి, సాయి కిరణ్‌ రజత పతకాలు సాధించారు. వీరందరిని ప్రిన్సిపాల్‌ డాక్టర్‌.మెహన్‌రావు అభినందించారు. చదువుతో పాటు క్రీడల్లోనూ విద్యార్థులకు ప్రోత్సహస్తున్నామన్నారు. కార్యక్రమంలో పీడీ ప్రియాంక పాల్గొన్నారు.

● కలెక్టర్‌ నిశాంతి సాక్షి, పాడేరు: జిల్లాలో 11 జెడ్పీటీసీ, 172 ఎంపీటీసీ స్థానాలకు ఎన్నికలు ప్రశాంతంగా నిర్వహించామని కలెక్టర్‌ టి.నిశాంతి తెలిపారు. శుక్రవారం కలెక్టరేట్‌లో నిర్వహించిన విలేకరుల సమావేశంలో ఆమె మాట్లాడుతూ.. జిల్లాలో 4,98,465 మంది ఓటర్లకు గాను 3,09,133 మంది ఓటు హక్కు వినియోగించుకున్నారని, 62.01 శాతం పోలింగ్‌ నమోదైందన్నారు. అత్యధికంగా డుంబ్రిగుడలో 73.63 శాతం, అత్యల్పంగా చింతపల్లిలో 52.25 శాతం పోలింగ్‌ నమోదైందన్నారు. జిల్లాలో 3,086 పోస్టల్‌ బ్యాలెట్లు పోలయ్యాయని, వీటిలో 2,205 మంది పురుషులు, 881 మంది మహిళలు ఉన్నారని తెలిపారు. ఎన్నికల నిర్వహణకు సహకరించిన అధికారులు, సిబ్బంది, వివిధ శాఖలతో పాటు ఓటర్లకు కృతజ్ఞతలు తెలిపారు. ఈ నెల 7న 11 మండలాల్లో జరిగే ఓట్ల లెక్కింపునకు అన్ని ఏర్పాట్లు పూర్తి చేశామన్నారు. సమావేశంలో సబ్‌కలెక్టర్‌ నాగ వెంకట సాహిత్‌, డీఆర్‌డీఏ పీడీ జయకృష్ణ పాల్గొన్నారు.

అనకాపల్లి: దీపావళి పండగ నేపథ్యంలో ఎలాంటి అవాంఛనీయ సంఘటనలు, అగ్నిప్రమాదాలు జరగకుండా బాణసంచా తయారీ కేంద్రాలు, నిల్వ గోదాములు, తాత్కాలిక విక్రయ దుకాణాల వద్ద భద్రతా ప్రమాణాల అమలుపై విస్తృత తనిఖీలు చేపడుతున్నట్లు ఎస్పీ తుహిన్‌ సిన్హా శుక్రవారం ఓ ప్రకటనలో తెలిపారు. బాణసంచా నిల్వలు, విక్రయాలు చేపట్టే వ్యాపారులు సంబంధిత శాఖల నుంచి ముందస్తుగా తాత్కాలిక లైసెన్సులు పొందాలని సూచించారు. అధీకృత హోల్‌సేల్‌ వ్యాపారుల వద్ద నుంచే బాణసంచా కొనుగోలు చేయాలన్నారు. నివాస ప్రాంతాలు, విద్యాసంస్థలు, ఆస్పత్రులకు దూరంగా పట్టణ, గ్రామీణ శివార్లలోని ఖాళీ బహిరంగ ప్రదేశాల్లో మాత్రమే తాత్కాలిక దుకాణాలు ఏర్పాటు చేయాలని పేర్కొన్నారు. ప్రమాద తీవ్రత తగ్గించేందుకు రెండు దుకాణాల మధ్య కనీసం 15 మీటర్ల దూరం ఉండాలన్నారు. ప్రతి దుకాణం వద్ద తగినంత నీరు, పొడి ఇసుక బస్తాలు, నిబంధనలకు అనుగుణమైన అగ్నిమాపక పరికరాలు అందుబాటులో ఉంచుకోవాలని సూచించారు. ప్రజా రవాణా వాహనాలు, ప్రయాణికులు ప్రయాణించే వాహనాల్లో బాణసంచా రవాణా చేయడం చట్టరీత్యా నేరమని హెచ్చరించారు. బాణసంచా నిల్వ గోదాముల్లో షార్ట్‌సర్క్యూట్‌ ప్రమాదాలు జరగకుండా సురక్షితమైన విద్యుత్‌ వైరింగ్‌ ఏర్పాటు చేయాలని, ఫైర్‌ అలారమ్‌లు తప్పనిసరిగా అందుబాటులో ఉంచాలని తెలిపారు. అత్యవసర సమయాల్లో సులభంగా బయటకు వెళ్లేందుకు రాకపోకలకు వేర్వేరు ద్వారాలు ఏర్పాటు చేసుకోవాలని ఎస్పీ సూచించారు. నిబంధనలు ఉల్లంఘించి అగ్నిప్రమాద నివారణ చర్యలు పాటించని వ్యాపారులపై కఠిన చర్యలు తీసుకుంటామని హెచ్చరించారు.

సాక్షి, పాడేరు: ఒకే ఎన్నిక.. ఒకే పోలింగ్‌.. కానీ అధికారికంగా వెలువడిన లెక్కలు మాత్రం మూడు రకాలు! జిల్లాలో స్థానిక సంస్థల ఎన్నికల పోలింగ్‌ శాతంపై గంటల వ్యవధిలో వచ్చిన మార్పులు అభ్యర్థులను అయోమయానికి గురిచేస్తున్నాయి. తొలుత 59.98 శాతంగా ప్రకటించిన అధికారులు.. ఆ తర్వాత 61.71 శాతంగా సవరించారు. శుక్రవారం మధ్యాహ్నం కలెక్టర్‌ నిశాంతి ఏకంగా 62.01 శాతం పోలింగ్‌ నమోదైనట్లు వెల్లడించారు. దీంతో అసలు పోలింగ్‌ శాతం ఎంత? ఏ గణాంకాన్ని ప్రామాణికంగా తీసుకోవాలి? అన్న ప్రశ్నలు పోటీలో ఉన్న అభ్యర్థులను వెంటాడుతున్నాయి. 617 కేంద్రాల్లో.. జిల్లాలో 11 జెడ్పీటీసీ, 172 ఎంపీటీసీ స్థానాలకు గురువారం ఎన్నికలు జరిగాయి. మొత్తం 617 పోలింగ్‌ కేంద్రాలకు గాను 44 సమస్యాత్మక కేంద్రాల్లో మధ్యాహ్నం 3 గంటలకే పోలింగ్‌ ముగిసింది. మిగిలిన కేంద్రాల్లో నిర్ణీత సమయం సాయంత్రం 5 గంటలకు అధికారులు పోలింగ్‌ ప్రక్రియను ముగించారు. అయితే హుకుంపేట మండలం భీమవరం పోలింగ్‌ కేంద్రంలో మాత్రం సాయంత్రం 6.25 గంటల వరకు ఓటింగ్‌ కొనసాగింది. ● పోలింగ్‌ ముగిసిన అనంతరం గురువారం రాత్రి 8 గంటల సమయంలో అధికారులు తొలుత 59.98 శాతం పోలింగ్‌ నమోదైనట్లు ప్రకటించారు. డుంబ్రిగుడలో అత్యధికంగా, గూడెంకొత్తవీధిలో అత్యల్పంగా ఓటింగ్‌ జరిగినట్లు వెల్లడించారు. దీంతో రాజకీయ పార్టీలు, అభ్యర్థులు ఈ గణాంకాలనే తుది లెక్కలుగా భావించారు. అయితే రాత్రి 10 గంటలు దాటిన తర్వాత ఫైనల్‌ రిపోర్టు పేరుతో 61.71 శాతం పోలింగ్‌ నమోదైనట్లు మరో ప్రకటన వెలువడింది. గంటల వ్యవధిలోనే పోలింగ్‌ శాతం పెరగడం చర్చనీయాంశమైంది. ● అయితే రాత్రి వేళలో ఏ పోలింగ్‌ కేంద్రంలోనూ ఓటింగ్‌ జరగలేదని ఎన్నికల అధికారి, డీఆర్‌డీఏ పీడీ జయకృష్ణ ‘సాక్షి’కి తెలిపారు. మరి పోలింగ్‌ శాతం ఎలా పెరిగింది? మొదట ప్రకటించిన గణాంకాల్లో ఏమైనా ఓట్లు లెక్కలోకి రాలేదా? అన్న సందేహాలు వ్యక్తమవుతున్నాయి. ఈ క్రమంలో శుక్రవారం మధ్యాహ్నం కలెక్టర్‌ నిశాంతి మీడియా సమావేశంలో 62.01 శాతం పోలింగ్‌ నమోదైనట్లు ప్రకటించడంతో గందరగోళం మరింత పెరిగింది. కలెక్టర్‌ ప్రకటించిన లెక్కలివీ.. జిల్లాలోని 617 పోలింగ్‌ కేంద్రాల పరిధిలో మొత్తం 4,98,465 మంది ఓటర్లకు గాను 3,09,133 మంది ఓటు హక్కు వినియోగించుకున్నారని కలెక్టర్‌ తెలిపారు. వీరిలో పురుషులు 1,54,382 మంది, మహిళలు 1,54,748 మంది, ఇతరులు ముగ్గురు ఉన్నారని వెల్లడించారు. మండలాల వారీగా డుంబ్రిగుడలో 73.63 శాతంతో అత్యధికంగా, చింతపల్లిలో 52.25 శాతంతో అత్యల్పంగా పోలింగ్‌ నమోదైనట్లు పేర్కొన్నారు. అనంతగిరి 65.34, అరకులోయ 68.34, జి.మాడుగుల 58.36, జి.కే.వీధి 53.28, హుకుంపేట 68.32, కొయ్యూరు 61.50, ముంచంగిపుట్టు 63.76, పాడేరు 65.29, పెదబయలు 60.48 శాతం పోలింగ్‌ జరిగినట్లు వివరించారు. రాత్రి 8 గంటల నివేదికలో 59.98 శాతం జిల్లాలో 4,98,465 మంది ఓటర్లకు గాను 2,99,001 మంది ఓటు వేసినట్లు గురువారం రాత్రి 8 గంటలకు ఎన్నికల అధికారులు ప్రకటించారు. దీంతో 59.98 శాతం పోలింగ్‌ నమోదైనట్లు వెల్లడించారు. మండలాల వారీగా డుంబ్రిగుడలో 70.83 శాతంతో అత్యధికంగా, జి.కే.వీధిలో 34.77 శాతంతో అత్యల్పంగా నమోదైనట్లు పేర్కొన్నారు. అనంతగిరి 65.38, అరకులోయ 68.45, చింతపల్లి 54.24, జి.మాడుగుల 58.79, హుకుంపేట 68.09, కొయ్యూరు 60.27, ముంచంగిపుట్టు 63.47, పాడేరు 64.95, పెదబయలు 60.48 శాతం పోలింగ్‌ జరిగినట్లు ఆ నివేదికలో వివరించారు. తుది రిపోర్టులో 61.71 శాతం : గురువారం రాత్రి 10 గంటలు దాటిన తర్వాత ఎన్నికల విభాగం అధికారులు ఫైనల్‌ రిపోర్టు పేరుతో మరో గణాంకాన్ని విడుదల చేశారు. జిల్లాలో 4,98,465 మంది ఓటర్లకు గాను 3,07,589 మంది ఓటు వేసినట్లు, మొత్తం 61.71 శాతం పోలింగ్‌ నమోదైనట్లు ప్రకటించారు. ఈ నివేదికలో డుంబ్రిగుడలో 70.83 శాతంతో అత్యధికంగా, చింతపల్లిలో 52.25 శాతంతో అత్యల్పంగా పోలింగ్‌ జరిగినట్లు పేర్కొన్నారు. అనంతగిరి 65.38, అరకులోయ 68.45, జి.కే.వీధి 53.53, జి.మాడుగుల 58.79, హుకుంపేట 68.09, కొయ్యూరు 60.25, ముంచంగిపుట్టు 63.64, పాడేరు 64.9, పెదబయలు 60.48 శాతం పోలింగ్‌ నమోదైనట్లు వెల్లడించారు. గంటల వ్యవధిలో మారిన గణాంకాలు తొలుత 59.98 నుంచి 61.71.. అక్కడి నుంచి 62.01 శాతానికిపెరుగుదల ఓట్ల లెక్కల్లో తేడాలపై అభ్యర్థుల్లో ఉత్కంఠ ఒకే ఎన్నిక.. మూడు రకాల పోలింగ్‌ శాతాలు! వ్యత్యాసానికి కారణాలేంటి? మూడు ప్రకటనల్లోనూ పోలింగ్‌ శాతం, ఓట్ల సంఖ్య, కొన్ని మండలాల గణాంకాల్లో తేడాలు కనిపిస్తుండటంతో అభ్యర్థుల్లో ఉత్కంఠ నెలకొంది. ముఖ్యంగా తొలి నివేదిక, ఫైనల్‌ రిపోర్టు, కలెక్టర్‌ ప్రకటించిన గణాంకాల మధ్య వ్యత్యాసానికి కారణాలేమిటో అధికారులు స్పష్టత ఇవ్వాల్సిన అవసరం ఉంది. తుది ఫలితాలపై ప్రభావం చూపే అవకాశం ఉన్న ఈ లెక్కలపై సందేహాలు తొలగాలంటే సమగ్ర వివరణ అవసరమని అభ్యర్థులు కోరుతున్నారు.

చింతపల్లి ఏడీఆర్‌ ఆదిలక్ష్మిచింతపల్లి: జిల్లాలో మరో ఐదు రోజుల పాటు వర్షం పలకరించనుంది. ఇప్పటికే తుఫాన్ల ప్రభావంతో భారీ వర్షాలను చవిచూసిన గిరిజన ప్రాంతంలో రానున్న రోజుల్లో తేలికపాటి జల్లులు కురిసే అవకాశం ఉందని చింతపల్లి ప్రాంతీయ వ్యవసాయ పరిశోధనా స్థానం శాస్త్రవేత్తలు వెల్లడించారు. ఈ నెల 7 నుంచి 11వ తేదీ వరకు జిల్లాలోని చింతపల్లి, పాడేరు, అరకు డివిజన్ల పరిధిలో మోస్తరు వర్షాలు కురిసే అవకాశాలున్నాయని అసోసియేట్‌ డైరెక్టర్‌ ఆఫ్‌ రీసెర్చ్‌, వాతావరణ విభాగం నోడల్‌ అధికారి డాక్టర్‌ డి. ఆదిలక్ష్మి శుక్రవారం తెలిపారు. ఐదు రోజుల వాతావరణ అంచనాలు ఈ ఐదు రోజుల వ్యవధిలో 0 నుంచి 5 మిల్లీమీటర్ల వరకు తేలికపాటి వర్షపాతం నమోదయ్యే అవకాశం ఉందన్నారు. గరిష్ఠ ఉష్ణోగ్రతలు 24.8 నుంచి 25 డిగ్రీల మధ్య, కనిష్ఠ ఉష్ణోగ్రతలు 19 నుంచి 19.3 డిగ్రీల మధ్య ఉండవచ్చని పేర్కొన్నారు. ఉదయం వేళల్లో గాలిలో సాపేక్ష ఆర్ద్రత 78 నుంచి 90 శాతం, మధ్యాహ్నం వేళల్లో 85 నుంచి 90 శాతం వరకు ఉండే అవకాశం ఉందన్నారు. గాలులు గంటకు 4 నుంచి 5 కిలోమీటర్ల వేగంతో వీచే సూచనలు ఉన్నాయని వివరించారు. ఆకాశం ఆక్టా 2–3 మేర మేఘావృతమై ఉండవచ్చన్నారు. రైతులు వాతావరణ పరిస్థితులకు అనుగుణంగా పంటల విషయంలో తగిన జాగ్రత్తలు పాటించాలని డాక్టర్‌ ఆదిలక్ష్మి సూచించారు.

డాబాగార్డెన్స్‌: జగదాంబ జంక్షన్‌లో నగర సుందరీకరణలో భాగంగా నిర్మించిన ఐకానిక్‌ క్లాక్‌టవర్‌ గడియారం పక్షం రోజులుగా పనిచేయడం లేదు. బ్రిటిష్‌ కాలం నాటి వింటేజ్‌ యూరోపియన్‌ శైలిలో నిర్మించిన ఈ టవర్‌ రాత్రివేళ విద్యుత్‌ కాంతులతో ఆకట్టుకుంటోంది. పర్యాటకులకు ఫొటోషూట్‌ స్పాట్‌గా నిలిచిన క్లాక్‌టవర్‌లో గడియారం తప్పు సమయాలను చూపుతోంది. తూర్పు వైపు 2.35 గంటలు, పడమర వైపు 6.40 గంటలు చూపిస్తుండటంతో సందర్శకులు అసంతృప్తి వ్యక్తం చేస్తున్నారు. అధికారులు స్పందించి వెంటనే మరమ్మతులు చేపట్టాలని కోరుతున్నారు.

కొయ్యూరు: ఎలక్ట్రానిక్‌ వ్యర్థాలతో పర్యావరణానికి తీరని నష్టం వాటిల్లుతుందని మర్రిపాలెం మహిళా డిగ్రీ కళాశాల ప్రిన్సిపాల్‌ డాక్టర్‌ కె.సుధ అన్నారు. శుక్రవారం కళాశాలలో బ్రిక్స్‌ సుస్థిర వారోత్సవాల్లో భాగంగా ఈ–వ్యర్థాలపై అవగాహన కార్యక్రమం నిర్వహించారు. ఈ సందర్భంగా ఆమె మాట్లాడుతూ ఎలక్ట్రానిక్‌ పరికరాలను అవసరమైనంత వరకు మాత్రమే వినియోగించాలని, వ్యర్థాలను తగ్గించి పర్యావరణాన్ని కాపాడాలని సూచించారు. వైస్‌ ప్రిన్సిపాల్‌ డాక్టర్‌ వెంకటలక్ష్మి వ్యర్థాల పునర్వినియోగ పద్ధతులను వివరించారు. ఫిజిక్స్‌ అధ్యాపకుడు సీహెచ్‌ రాజుబాబు మాట్లాడుతూ పాత మొబైల్‌ ఫోన్లు, టీవీ లు, రిమోట్లు, కంప్యూటర్లు, ల్యాప్‌టాప్‌ బ్యాటరీలను ఎక్కడపడితే అక్కడ పడేయడం వల్ల గాలి, నీరు, నేల కలుషితమవుతున్నాయని తెలిపారు. బ్రిక్స్‌ ప్రోగ్రాం అధికారి బోండ్ల శేఖర్‌ ఆధ్వర్యంలో ఈ కార్యక్రమం నిర్వహించారు.

అల్లిపురం: పక్కాగా రెక్కీ నిర్వహించారు.. పథకం ప్రకారం తీవ్ర తుపాను రోజున రంగంలోకి దిగారు.. ఎలక్ట్రిక్‌ కట్టర్లతో తాళాలు కట్‌ చేసి షోరూమ్‌లోకి చొరబడ్డారు. ఐఫోన్లు, ఇతర బ్రాండెడ్‌ ఫోన్లు, ఎలక్ట్రానిక్‌ వస్తువులు దోచుకెళ్లారు. అయితే సీసీ కెమెరాల నిఘా నుంచి తప్పించుకోలేక చివరకు పోలీసులకు చిక్కారు. డాబాగార్డెన్స్‌లోని బీసీపీ మాల్‌లో ఉన్న సెల్‌ పాయింట్‌ ఇండియా లిమిటెడ్‌ షోరూమ్‌లో జరిగిన భారీ చోరీ కేసును టూటౌన్‌ క్రైమ్‌ పోలీసులు ఛేదించారు. ఇద్దరు నిందితులను అరెస్ట్‌ చేయడంతో పాటు, నేరంలో పాల్గొన్న బాలుడిని అదుపులోకి తీసుకున్నారు. శుక్రవారం సాయంత్రం టూటౌన్‌ క్రైమ్‌ పోలీస్‌ స్టేషన్‌ ఆవరణలో ఏర్పాటు చేసిన మీడియా సమావేశంలో నగర క్రైమ్‌ ఏడీసీపీ ఎన్‌.రమ్య, క్రైమ్‌ ఏసీపీ ఎ.వెంకటరావు, ఈస్ట్‌ సబ్‌ డివిజన్‌ క్రైమ్‌ సీఐ సీహెచ్‌ రాజులనాయుడు కేసు వివరాలు వెల్లడించారు. స్నేహితులు.. సినిమా స్టైల్‌లో చోరీ! ముగ్గురూ స్నేహితులు. వీరిలో చుక్క రవితేజ అలియాస్‌ పండు(20) ప్రధాన నిందితుడు. పాత నేరచరిత్ర ఉన్న ఇతడే మిగిలిన ఇద్దరినీ చోరీకి ప్రేరేపించాడు. అర్నబ్‌ తుపాను సమయంలో మంగళవారం అర్ధరాత్రి చోరీకి పక్కా స్కెచ్‌ వేసుకున్నారు. అందుకు మూడు రోజుల ముందే షోరూమ్‌ పరిసరాలను పరిశీలించి రెక్కీ నిర్వహించారు. షోరూమ్‌లోకి ఎలా ప్రవేశించాలి.. ఏ మార్గంలో బయటకు వెళ్లాలనే విషయాలపై ముందుగానే ప్రణాళిక సిద్ధం చేసుకున్నారు. కట్టర్లతో తాళాలు కట్‌ చేసి.. అర్నబ్‌ తుపాను రోజున భారీ వర్షం పడుతున్న సమయంలో పథకం ప్రకారం ఎలక్ట్రికల్‌ కట్టర్లతో సెల్లార్‌ గేట్‌, మెట్ల వద్ద ఉన్న గేట్‌ తాళాలు కట్‌ చేశారు. అనంతరం షోరూమ్‌ వెనుక వైపు ఉన్న గ్లాస్‌ డోర్‌ తాళాలను సైతం తొలగించి లోపలికి ప్రవేశించారు. అక్కడున్న ఖరీదైన ఐఫోన్లు, ఇతర బ్రాండ్ల మొబైల్‌ ఫోన్లు, ఎలక్ట్రానిక్‌ వస్తువులను మూటకట్టుకుని అక్కడి నుంచి పరారయ్యారు. 35 ఫోన్లు.. ఇతర వస్తువులు స్వాధీనం నిందితుల నుంచి 25 ఐఫోన్లు, ఒక నథింగ్‌, రెండు రియల్‌మీ, రెండు శాంసంగ్‌, ఐదు వివో ఫోన్లు.. మొత్తం 35 మొబైల్‌ ఫోన్లతో పాటు ఆపిల్‌ వాచీలు, ఇయర్‌బడ్స్‌, ఇతర ఎలక్ట్రానిక్‌ వస్తువులను కూడా పోలీసులు స్వాధీనం చేసుకున్నారు. ఇద్దరు నిందితులను రిమాండ్‌కు తరలించగా, బాలుడిని జువైనెల్‌ హోమ్‌కు పంపించారు. ప్రధాన నిందితుడిపై పలు కేసులు ప్రధాన నిందితుడు చుక్క రవితేజపై గతంలో ఎంవీపీ, ఆరిలోవ, భీమిలి పోలీస్‌ స్టేషన్ల పరిధిలో పలు కేసులు నమోదయ్యాయి. హత్య కేసుతో పాటు చోరీ కేసుల్లోనూ ఇతడికి ప్రమేయం ఉన్నట్లు పోలీసులు వెల్లడించారు. ఈ ఏడాదిలోనే మూడు కేసుల్లో నిందితుడిగా ఉన్నాడని, భీమిలి పోలీస్‌ స్టేషన్‌లో సస్పెక్ట్‌ షీట్‌ తెరిచినట్లు తెలిపారు. సమావేశంలో టూటౌన్‌ క్రైమ్‌ పోలీస్‌ స్టేషన్‌ ఎస్‌ఐ సీహెచ్‌ చిరంజీవిరావు, ఇతర సిబ్బంది పాల్గొన్నారు. సీసీ కెమెరాలతో చిక్కిన దొంగలు చోరీపై కేసు నమోదు చేసిన పోలీసులు సీసీ కెమెరాల ఫుటేజీని పరిశీలించి దర్యాప్తు చేపట్టారు. భీమిలి గొల్లతిమ్మాపురానికి చెందిన చుక్క రవితేజ అలియాస్‌ పండు (20), ఇసుకతోట రామాలయం వీధికి చెందిన కాపరపు దుర్గాప్రసాద్‌ (19)ను నిందితులుగా గుర్తించి అరెస్ట్‌ చేశారు. వీరితో పాటు నేరంలో పాల్గొన్న బాలుడిని అదుపులోకి తీసుకున్నారు.

● బూత్‌ల వద్ద హడావుడి ● ఫిర్యాదు చేసినా పట్టించుకోని అధికారులు ● ఓటర్ల జాబితాల్లో గందరగోళం ● అభ్యర్థికే దక్కని ఓటు హక్కు సాక్షి, పాడేరు: స్థానిక సంస్థల ఎన్నికల పోలింగ్‌ గురువారం జిల్లాలోని 11 మండలాల్లో అధికార యంత్రాంగం, పోలీసుల పర్యవేక్షణలో జరిగింది. అయితే మరోవైపు పోలింగ్‌ కేంద్రాల ఆవరణలో కూటమి అభ్యర్థులు, నేతలు, కార్యకర్తల హడావుడి అధికంగా కనిపించినా.. వారిని నియంత్రించాల్సిన అధికారులు మాత్రం పట్టించుకోలేదనే విమర్శలు వ్యక్తమయ్యాయి. ● ఉదయం 7 గంటల నుంచే ఓటర్లు మెల్లమెల్లగా పోలింగ్‌ కేంద్రాలకు చేరుకున్నారు. మధ్యాహ్నం వరకు పోలింగ్‌ ప్రక్రియ మందకొడిగానే సాగింది. జిల్లాలోని 11 జెడ్పీటీసీ, 172 ఎంపీటీసీ స్థానాలకు జరిగిన ఎన్నికల కోసం మొత్తం 617 పోలింగ్‌ కేంద్రాలను ఏర్పాటు చేశారు. వీటిలో 44 సమస్యాత్మక కేంద్రాల్లో మధ్యాహ్నం 3 గంటల వరకే పోలింగ్‌ నిర్వహించారు. దీంతో ఆయా కేంద్రాల్లో పోలింగ్‌ శాతం 50కి మించలేదని తెలుస్తోంది. మిగిలిన పోలింగ్‌ కేంద్రాల్లో సాయంత్రం 5 గంటల వరకు ఓటింగ్‌ కొనసాగింది. అన్ని మండలాల్లోనూ రాజకీయ పార్టీల పోలింగ్‌ ఏజెంట్ల సమక్షంలో ఎన్నికల అధికారులు పోలింగ్‌ ప్రక్రియను ప్రారంభించారు. మారిన బూత్‌లు.. ఓటర్లకు తిప్పలు పాడేరుతో పాటు పలు ప్రాంతాల్లో ఓటర్ల జాబితాలు తారుమారు కావడంతో ఓటర్లు తీవ్ర ఇబ్బందులు ఎదుర్కొన్నారు. ఎంపీటీసీ సెగ్మెంట్లు సైతం మారిపోవడంతో పోటీలో ఉన్న అభ్యర్థులతో పాటు ఓటర్లు ఆందోళనకు గురయ్యారు. పాడేరు ఎంపీటీసీ స్థానం–1 నుంచి బీజేపీ అభ్యర్థిగా బరిలో ఉన్న కురుసా లక్ష్మయ్యకు ఆ సెగ్మెంట్‌లో ఓటు లేకపోవడం గమనార్హం. రెండో సెగ్మెంట్‌లో ఓటు ఉండటంతో తాను పోటీ చేస్తున్న స్థానంలో తన ఓటు తానే వేసుకోలేని పరిస్థితి ఏర్పడిందని ఆయన ఆవేదన వ్యక్తం చేశారు. ఉమ్మడి కుటుంబంలోని సభ్యుల ఓట్లు సైతం వేర్వేరు సెగ్మెంట్లకు మారడంతో గందరగోళం నెలకొంది. పాడేరు పట్టణంలో భార్యాభర్తలు వేర్వేరు పోలింగ్‌ కేంద్రాల్లో ఓటు వేయాల్సి రావడం చర్చనీయాంశమైంది. కూటమి నేతలదే హవా జిల్లాలోని పలు పోలింగ్‌ కేంద్రాల వద్ద కూటమి నేతల హడావుడి కనిపించింది. పోలింగ్‌ ప్రక్రియ ప్రారంభమైనప్పటి నుంచి కూటమి అభ్యర్థులు, నేతలు, కార్యకర్తలు కేంద్రాల ఆవరణలో సంచరిస్తూ ఓటర్లను ప్రలోభాలకు గురిచేశారనే ఆరోపణలు వినిపించాయి. పాడేరు జూనియర్‌ కళాశాలలోని పోలింగ్‌ కేంద్రాల్లో కూటమి నేతలు, సంబంధిత ఎంపీటీసీ అభ్యర్థులు అక్కడి ఓటర్లను ప్రలోభాలకు గురిచేస్తున్నారని వైఎస్సార్‌సీపీ నాలుగో సెగ్మెంట్‌ ఎంపీటీసీ అభ్యర్థి కూడా సురేష్‌కుమార్‌ పోలీసుల దృష్టికి తీసుకువెళ్లి అభ్యంతరం వ్యక్తం చేశారు. ఆర్టీసీ రీజినల్‌ చైర్మన్‌, అరకు టీడీపీ ఇన్‌చార్జి దొన్నుదొర నియోజకవర్గంలోని పలు పోలింగ్‌ కేంద్రాల వద్దకు వాహనంతో సహా నేరుగా వెళ్లారు. పోలింగ్‌ ప్రక్రియను పరిశీలించిన అధికారులు ఆయనను అడ్డుకోకపోవడం విమర్శలకు తావిచ్చింది. అలాగే జనసేన నేత, రాష్ట్ర కళలు, జానపద విభాగం చైర్మన్‌ గంగులయ్య గూడెంకొత్తవీధి మండలం జర్రెల పోలింగ్‌ కేంద్రంలోకి ప్రవేశించడంపై ఓటర్లు అభ్యంతరం వ్యక్తం చేశారు. టీడీపీ నాయకులు, కార్యకర్తలు సైతం పలు పోలింగ్‌ కేంద్రాల్లో సంచరించినా పోలీసులు చూసీచూడనట్లు వ్యవహరించారనే విమర్శలు వెల్లువెత్తాయి. పోలింగ్‌ కేంద్రాల పరిశీలన గూడెంకొత్తవీధి: గూడెం పంచాయతీలోని 1, 2, 3 సెగ్మెంట్ల పోలింగ్‌ కేంద్రాలను చింతపల్లి ఏఎస్పీ నిరంజన్‌ మహేంద్ర సిన్హ పరిశీలించారు. పోలింగ్‌ సరళిపై ఆర్‌వో నాయక్‌ను అడిగి వివరాలు తెలుసుకున్నారు. మారుమూల ప్రాంతాల్లో ఎన్నికల నిర్వహణ, భద్రతా ఏర్పాట్లపై పోలీసు సిబ్బందితో సమీక్షించారు. ప్రశాంతంగా ఎన్నికలు జరిగేలా పటిష్ట భద్రత కల్పించినట్లు తెలిపారు. ఈ కార్యక్రమంలో తహశీల్దార్‌ అన్నాజీరావు పాల్గొన్నారు.

కాలం చెల్లిన వాహనంతో ఎన్నికల విధులు నిర్వహిస్తున్న పోలీస్‌ జీపు అనకాపల్లి టౌన్‌: ప్రజలకు రక్షణ కల్పించాల్సిన పోలీస్‌ వాహనాలే ప్రమాదాలకు ఆహ్వనం పలుకుతున్నాయి. ఎక్కడైనా ప్రమాదం, దొంగతనాలు జరిగితే తక్షణమే హాజరు కావల్సిన పోలీసులు తుప్పుపట్టిన జీపులో విధులు నిర్వహిస్తుండంపై స్థానికులు అసహనం వ్యక్తం చేస్తున్నారు. కాలం చెల్లినట్లుగా కనిపిస్తున్న ఓ పోలీస్‌ జీపు ఎన్నికల విధుల్లో కనిపించడం ఆశ్చర్యానికి గురిచేసింది. పోలీస్‌ విధుల్లో నిత్యం గస్తీ నిర్వహించాల్సిన ఈ జీపు పరిస్థితి చూస్తే వాహన నిర్వహణపై అనేక ప్రశ్నలు తల్తెత్తుతున్నాయి. జీపు పూర్తిగా తుప్పుపట్టి ఉంది. అలాగే నెంబర్‌ ప్లేట్‌ సరిగ్గా కనిపించడం లేదు. రాత్రి సమయాల్లో గస్తీ నిర్వహించే సమయంలో ఇటుంటి వాహనాలతో ఇతర వాహనాదారులకు కూడా ప్రమాదాలు జరిగే అవకాశం ఉంది. రోడ్లపై తరిగే ప్రతి వాహనానికి ఫిట్‌నెస్‌, ఇన్సూరెన్స్‌, పొల్యూషన్‌ సర్టిఫికెట్‌ సిగ్నల్‌ లైట్లు తప్పనిసరిగా ఉండాలని రవాణా శాఖ నిబంధనలు చెపుతున్నాయి. నిబంధనలు ఉల్లఘించే సామాన్యులకు విధించే జరిమానాలు పోలీస్‌ వాహనాలకు విధిస్తున్నారా లేదా అని ప్రజలు చర్చించుకుంటున్నారు. తక్షణమే పోలీస్‌ శాఖకు ప్రతిష్టకు సంబంఽధించిన అశంగా భావించి సంబంధిత ఉన్నతాధికారలు ఈ వాహనంపై దృష్టి సారించాలని ప్రజలు కోరుతున్నారు.

ఓటువేసేందుకు వచ్చిన పెళ్లికుమార్తె చంద్రిక నక్కపల్లి : పెళ్లిపీటల మీద నుంచి పోలింగ్‌ కేంద్రానికి వచ్చి తన ఓటు హక్కు వినియోగించుకున్న సంఘటన మండలంలో గురువారం జరిగింది. గొడిచర్ల కొత్తూరు గ్రామానికి చెందిన మంతిన చంద్రికకు గురువారం ఉదయం కశింకోటలో వివాహం జరిగింది. తన గ్రామంలో జరుగుతున్న ఎంపీటీసీ ఎన్నికల్లో ఓటు హక్కు వినియోగించుకోవాలనే ఉద్దేశ్యంతో ఆమె పెళ్లి తంతు పూర్తయిన వెంటనే గొడిచర్లలో పోలింగ్‌ కేంద్రానికి వచ్చి తన ఓటుహక్కును వినియోగించుకుంది.

బ్యాలెట్‌ పేపర్‌పై సిరా గుర్తుతో వైరల్‌ అవుతున్న ఫొటోలు తుమ్మపాల : జెడ్పీటీసీ, ఎంపీటీసీ పోలింగ్‌కు సంబంధించి పోలింగ్‌ కేంద్రాల్లోకి ఓటర్లు ఎలాంటి ఎలక్ట్రానిక్‌ పరికరాలను తీసుకెళ్లకూడదనే నిబంధనలు ఉన్నప్పటికీ, అనకాపల్లి మండలంలో జరిగిన పోలింగ్‌లో కొందరు మొబైల్‌ఫోన్లతో పోలింగ్‌ కేంద్రాల్లోకి వెళ్లినట్టు ఆరోపణలు వ్యక్తమవుతున్నాయి. తాము ఓటు వేసిన దృశ్యాలతో పాటు, ఓటు హక్కు వినియోగించుకున్నట్టు వేలిపై వేసిన సిరా గుర్తును చూపిస్తూ తీసిన ఫొటోలు సామాజిక మాధ్యమాల్లో చక్కర్లు కొడుతుండడం చర్చనీయాంశంగా మారింది. ముఖ్యంగా అధికార పార్టీకి చెందిన కొందరు వ్యక్తులు పోలింగ్‌ కేంద్రాల్లోకి మొబైల్‌ ఫోన్లు తీసుకెళ్లి ఓటు వేసిన దృశ్యాలను చిత్రీకరించడంతో, పోలింగ్‌ కేంద్రాల్లో మొబైల్‌ ఫోన్ల వినియోగంపై ప్రశ్నలు ఉత్పన్నమవుతున్నాయి. పోలింగ్‌ కేంద్రాల వద్ద పోలీసులు, ఎన్నికల సిబ్బంది పటిష్టమైన నిఘా ఏర్పాటు చేసినప్పటికీ, వారి కళ్లు గప్పి మొబైల్‌ ఫోన్లు లోపలికి ఎలా వెళ్లాయన్న అనుమానాలను ఓటర్లు వ్యక్తం చేస్తున్నారు.

ముంచంగిపుట్టు: మండలంలో జెడ్పీటీసీ, ఎంపీటీసీ ఎన్నికల పోలింగ్‌ ముగిసింది. గురువారం ఉదయం నుంచే ఓటర్లు పోలింగ్‌ కేంద్రాల వద్ద బారులు తీరారు. అయితే మావోయిస్టు ప్రభావిత ప్రాంతాలైన బూసిపుట్టు, బుంగాపుట్టు, రంగబయలు పంచాయతీలకు చెందిన గిరిజనులు తీవ్ర ఇబ్బందులు ఎదుర్కొంటూ పోలింగ్‌ కేంద్రాలకు చేరుకుని ఓటు హక్కును వినియోగించుకున్నారు. సుదూర ప్రాంతాల్లో పోలింగ్‌ కేంద్రాలు ఏర్పాటు చేయడంతో కొందరు ఓటు వేసేందుకు రాలేకపోయారు. దీనికితోడు రంగబయలు, బూసిపుట్టు, బాబుశాల, బుంగాపుట్టు, వనుగుమ్మ, కుమడ పంచాయతీల్లోని సమస్యాత్మక ప్రాంతాల పోలింగ్‌ కేంద్రాల్లో ఎన్నికల సంఘం ఆదేశాల మేరకు మధ్యాహ్నం 3 గంటలకే పోలింగ్‌ ముగించారు. అత్యంత సమస్యాత్మక కేంద్రాల వద్ద భారీగా పోలీసు బలగాలను మోహరించి గట్టి నిఘా ఏర్పాటు చేశారు. సుజనకోట పంచాయతీలోని 12 గ్రామాల గిరిజనులు, పెదగూడ పంచాయతీ పరిధిలోని దొరగూడ, వనుగుమ్మ పంచాయతీలోని ఒలైబీరు గ్రామాల ఓటర్లు మత్స్యగెడ్డను నాటు పడవలపై దాటి వచ్చి తమ ఓటు హక్కును వినియోగించుకున్నారు. తమ గ్రామాలకు సమీపంలోనే పోలింగ్‌ కేంద్రాలు ఏర్పాటు చేయాలని ఆయా ప్రాంతాల ఓటర్లు కోరుతున్నారు. మరోవైపు పలు పోలింగ్‌ కేంద్రాల్లో కనీస సౌకర్యాలు లేక ఓటర్లు తీవ్ర ఇబ్బందులు పడ్డారు. టెంట్లు లేక ఎండలోనే గంటల తరబడి నిరీక్షించి ఓటు వేయాల్సి వచ్చింది. తాగునీరు, మరుగుదొడ్లు వంటి సదుపాయాలు లేక అవస్థలు ఎదుర్కొన్నారు. మావోయిస్టు ప్రభావిత ప్రాంతాలనుంచి ఇబ్బందులు పడుతూ వచ్చిన గిరిజన ఓటర్లు నాటు పడవలపై మత్స్యగెడ్డ దాటి పోలింగ్‌ కేంద్రాలకు చేరిక సమస్యాత్మక కేంద్రాల్లో మధ్యాహ్నం 3 గంటలకే పోలింగ్‌ ముగింపు కనీస సౌకర్యాలు లేక ఓటర్ల అవస్థలు

సింహాచలం: ఏకాదశిని పురస్కరించుకుని శ్రీ వరాహ లక్ష్మీనృసింహస్వామికి గురువారం ఆర్జిత సేవలు వైభవంగా జరిగాయి. ఉదయం 7 గంటలకు స్వర్ణ తులసీదళార్చన ఘనంగా నిర్వహించారు. స్వామివారి ఉత్సవమూర్తులు గోవిందరాజస్వామి, శ్రీదేవి, భూదేవిలను ఆలయ కల్యాణమండపంలో వేదికపై వేంజేపచేశారు. 108 స్వర్ణ తులసీదళాలతో అష్టోత్తర శతనామావళి పూజ జరిపారు. ఉభయదాతలకు శేషవస్త్రాలు, ప్రసాదం అందించారు. శాస్త్రోక్తంగా నిత్యకల్యాణం శ్రీ వరాహ లక్ష్మీనృసింహస్వామికి ఉదయం 9.30 నుంచి నిత్యకల్యాణం శాస్త్రోక్తంగా జరిగింది. ఆలయ కల్యాణమండపంలో స్వామివారి ఉత్సవమూర్తులు గోవిందరాజస్వామి, శ్రీదేవి, భూదేవిలను వేంజేపచేశారు. విష్వక్సేనపూజ, పుణ్యాహవాచనం, కంకణధారణ, యజ్ఞోపవీతం, జీలకర్రబెల్లం, మాంగళ్యధారణ, తలంబ్రాలు తదితర ఘట్టాలతో కల్యాణం శాస్త్రోక్తంగా నిర్వహించారు. ఉభయ దాతలకు కల్యాణ అక్షింతలు, ప్రసాదం, శేషవస్త్రం అందజేశారు. వైభవంగా గరుడ సేవ : శ్రీ వరాహ లక్ష్మీనృసింహస్వామికి గరుడ సేవ వైభవంగా జరిగింది. ఆలయ బేడామండపంలో స్వామివారి ఉత్సవమూర్తి గోవిందరాజస్వామిని వెండి గరుడ వాహనంపై వేంజేపచేశారు. అష్టోత్తర శతనామావళి పూజ నిర్వహించారు. విశేష హారతులు అందజేశారు. భక్తులను గరుడ వాహనం చుట్టూ ప్రదక్షిణ చేయించారు.

డుంబ్రిగుడ: మండలంలోని చంపపట్టి, శిలంగొంది, జాంకరవలస తదితర ఐదు గ్రామాల గిరిజనులు వంతెన నిర్మాణంపై ప్రభుత్వ నిర్లక్ష్యాన్ని నిరసిస్తూ గురువారం ఆందోళనకు దిగారు. వంతెన నిర్మాణానికి కూటమి ప్రభుత్వం స్పష్టమైన హామీ ఇవ్వకపోతే ఎన్నికలను బహిష్కరిస్తామని హెచ్చరిస్తూ ధర్నా నిర్వహించారు. అయితే సాయంత్రం 4 గంటల తర్వాత పోలింగ్‌ కేంద్రాలకు చేరుకుని తమ ఓటు హక్కును వినియోగించుకున్నారు. ● 2014లో హుద్‌హుద్‌ తుపాను ప్రభావంతో చంపపట్టి వద్ద ఉన్న వంతెన కొట్టుకుపోయింది. అప్పటి నుంచి ఈ ఐదు గ్రామాల గిరిజనులు రాకపోకలకు తీవ్ర ఇబ్బందులు ఎదుర్కొంటున్నారు. గత వైఎస్సార్‌ కాంగ్రెస్‌ ప్రభుత్వ హయాంలో వంతెన నిర్మాణానికి నిధులు మంజూరైనప్పటికీ.. 2024లో కూటమి ప్రభుత్వం అధికారంలోకి వచ్చిన తర్వాత ఆ నిధులు వెనక్కి వెళ్లిపోయాయని గ్రామస్తులు ఆరోపిస్తున్నారు. దీంతో సుమారు 12 ఏళ్లుగా వంతెన నిర్మాణం ప్రశ్నార్థకంగానే మిగిలిపోయింది. తమ రాకపోకల కష్టాలను గుర్తించి కూటమి ప్రభుత్వం స్పందించాలని, వెంటనే వంతెన నిర్మాణం చేపట్టి ఐదు గ్రామాల ప్రజలకు ఇబ్బందులు తొలగించాలని గిరిజనులు కోరుతున్నారు. ఐదు గ్రామాల గిరిజనుల ధర్నా స్పష్టమైన ఇవ్వకుంటే ఎన్నికలు బహిష్కరిస్తామని హెచ్చరిక ఎట్టకేలకు సాయంత్రంఓటు హక్కు వినియోగం

తెనుగుపూడి గురుకుల విద్యాలయానికి బ్యాలెట్‌ బాక్స్‌లతో చేరుకుంటున్న పోలింగ్‌ సిబ్బంది దేవరాపల్లి: ఎంపీటీసీ, జెడ్పీటీసీ పోలింగ్‌ ప్రక్రియ పూర్తికావడంతో బ్యాలెట్‌ బాక్స్‌లను బస్సుల్లో తెనుగుపూడిలోని డాక్టరు బీఆర్‌. అంబేడ్కర్‌ బాలుర గురుకుల విద్యాలయంలో ఏర్పాటు చేసిన స్ట్రాంగ్‌రూమ్‌కు గురువారం రాత్రి పటిష్ట బందోబస్తు నడుమ తరలించారు. దేవరాపల్లి, కె.కోటపాడు మండలాలకు ఇక్కడ స్ట్రాంగ్‌ రూమ్‌లను ఏర్పాటు చేసి, కౌంటింగ్‌ను సైతం చేపట్టేందుకు ఏర్పాటు చేశారు. ఈ నేపథ్యంలో దేవరాపల్లి మండలంలో 58 పోలింగ్‌ కేంద్రాలు, కె.కోటపాడు మండలంలో 63 పోలింగ్‌ కేంద్రాల్లో బ్యాలెట్‌ బాక్స్‌లను పోలింగ్‌ సిబ్బంది నుంచి అధికారులు స్వీకరించారు. ఎన్నికల రిటర్నింగ్‌ అధికారి ఎస్‌.మంజులవాణి, ఎంపీడీవో ఎస్‌.కె.వి. వరప్రసాద్‌, తహసీల్దార్‌ పి.లక్ష్మీదేవి ఈ ప్రక్రియను పర్యవేక్షించారు. ఆర్‌వోలు, ఇతర అధికార్లు, పోలీస్‌ బందోబస్తు నడుమ బ్యాలెట్‌ బాక్స్‌లను స్ట్రాంగ్‌ రూమ్‌ల్లో భద్రపరిచారు.

జెడ్పీటీసీ అభ్యర్థి అంకంరెడ్డి సౌమ్యతో కలిసి పోలింగ్‌ సరళిని పరిశీలిస్తున్న మాజీ ఎమ్మెల్యే గణేష్‌ నాతవరం: కూటమి నేతలు ఎన్ని జిమ్మిక్కులు చేసిన ప్రజల్లో వైఎస్సార్‌సీపీకి ఆదరణ తగ్గలేదని నర్సీపట్నం మాజీ ఎమ్యెల్యే పెట్ల ఉమా శంకర్‌ గణేష్‌ తెలిపారు. మండలంలో ఎం. బెన్నవరం, మర్రిపాలెం, నాతవరం, పెదగొలుగొండపేట, గునుపూడి, పి.కె.గూడెం, పి.జగ్గంపేట, శృంగవరం, వెదురుపల్లి, చమ్మచింత, తాండవ గ్రామాల్లో ఆయన గురువారం జెడ్పీటీసీ అభ్యర్థి అంకంరెడ్డి సౌమ్యతో కలిసి పోలింగ్‌ సరళిని స్వయంగా పరిశీలించారు. పార్టీ అభ్యర్థుల్లో మనోధైర్యాన్ని నింపారు. ప్రజలకు అండగా ఉంటూ అధిక శాతం ఓటింగ్‌ నమోదుకు ప్రోత్సహించాలని సూచించారు. కూటమి నేతలు ప్రలోభాలు పెట్టి తప్పుదోవ పట్టించేందుకు కుట్ర చేశారన్నారు. వారిని ప్రజలు నమ్మే స్థితిలో లేరన్నారు. నియోజకవర్గంలో కూటమి నేతలకు దిమ్మతిరిగే విధంగా తమ అభ్యర్థులు పోటీ ఇచ్చారన్నారు. మెజార్టీ స్థానాల్లో విజయం సాధిస్తారని ధీమా వ్యక్తం చేశారు. ఈ కార్యక్రమంలో పార్టీ జిల్లా కమిటీ సభ్యుడు కరక అప్పలరాజు, తదితరులు పాల్గొన్నారు.

● అత్యధికంగా డుంబ్రిగుడ మండలంలో 70.83 శాతం ● అత్యల్పంగా గూడెంకొత్తవీధిమండలంలో 34.77 శాతం సాక్షి, పాడేరు: జిల్లాలోని 11 మండలాల్లో సాయంత్రం 5 గంటల వరకు 59.98 శాతం పోలింగ్‌ నమోదైంది. మొత్తం 4,98,465 మంది ఓటర్లకు గాను 2,99,001 మంది ఓటు హక్కును వినియోగించుకున్నారు. అత్యధికంగా డుంబ్రిగుడ మండలంలో 70.83 శాతం, అరకువ్యాలీ మండలంలో 68.45 శాతం, హుకుంపేట మండలంలో 68.09 శాతం పోలింగ్‌ నమోదైంది. అత్యల్పంగా గూడెంకొత్తవీధి మండలంలో 34.77 శాతం పోలింగ్‌ నమోదైంది. మహిళా ఓటర్లు ఓటు హక్కు వినియోగించుకునేందుకు ఆసక్తి చూపారు. జిల్లా సమాచారం ● మొత్తం ఓటర్లు: 4,98,465. పోలైన మొత్తం ఓట్లు: 2,99,001. వీరిలో పురుషులు: 1,48,780, మహిళలు: 1,49,460, ఇతరులు: 1, పోలింగ్‌ శాతం: 59.98. మండలాల వారీగా వివరాలు ● అనంతగిరి: మొత్తం ఓటర్లు 38,286 – పోలైన ఓట్లు 25,030 – పురుషులు 12,649 – మహిళలు 12,381. ● అరకువ్యాలీ: మొత్తం ఓటర్లు 42,725 – పోలైన ఓట్లు 29,246 – పురుషులు 14,406 – మహిళలు 14,840. ● చింతపల్లి: మొత్తం ఓటర్లు 65,374 – పోలైన ఓట్లు 35,460 – పురుషులు 17,908 – మహిళలు 17,552. ● డుంబ్రిగుడ: మొత్తం ఓటర్లు 38,743 – పోలైన ఓట్లు 27,443 – పురుషులు 13,630 – మహిళలు 13,813. ● గూడెంకొత్తవీధి: మొత్తం ఓటర్లు 52,412 – పోలైన ఓట్లు 18,223 – పురుషులు 9,207 – మహిళలు 9,016. ● జి.మాడుగుల: మొత్తం ఓటర్లు 44,674 – పోలైన ఓట్లు 26,263 – పురుషులు 13,385 – మహిళలు 12,878. ● హుకుంపేట: మొత్తం ఓటర్లు 45,787 – పోలైన ఓట్లు 31,177 – పురుషులు 15,435 – మహిళలు 15,742. ● కొయ్యూరు : మొత్తం ఓటర్లు 43,711 – పోలైన ఓట్లు 26,344 – పురుషులు 12,750 – మహిళలు 13,594. ● ముంచంగిపుట్టు: మొత్తం ఓటర్లు 38,895 – పోలైన ఓట్లు 24,685 – పురుషులు 12,401 – మహిళలు 12,284. ● పాడేరు : మొత్తం ఓటర్లు 44,536 – పోలైన ఓట్లు 28,929 – పురుషులు 13,661 – మహిళలు 14,508. ● పెదబయలు: మొత్తం ఓటర్లు 43,322 – పోలైన ఓట్లు 26,201 – పురుషులు 13,348 – మహిళలు 12,852.

నర్సీపట్నం:ప్లాస్టిక్‌ వాడకం మానవ మనుగడకు ప్రమాదమని ఆర్టీసీ డిపో మేనేజర్‌ పాలుమూరి ఆచారి తెలిపారు. గురువారం నిర్వహించిన ప్లాస్టిక్‌కు నో చెబుదాం కార్యక్రమంలో ఆయన మాట్లాడారు. ఆర్టీసీ అధికారులు, సిబ్బంది ప్లాస్టిక్‌ వాడకానికి స్వస్తి పలకాలన్నారు. పర్యావరణ పరిరక్షణకు ప్లాస్టిక్‌ అత్యంత ప్రమాదకరమన్నారు. ఒక్కసారి వాడి పారేసే ప్లాస్టిక్‌ వల్ల భూగర్భ జలాలు కలుషితమవడంతోపాటు అడుగంటి పోతాయన్నారు. ప్లాస్టిక్‌ వస్తువుల్లో వేడి ఆహార పదార్థాలు కరిగి మానవ శరీరంలో ప్రవేశించి క్యాన్సర్‌ రావడానికి అవకాశాలు ఉన్నాయన్నారు. ప్రతి ఒక్కరూ ప్లాస్టిక్‌ రహిత సమాజం కోసం కృషి చేయాలన్నారు. కార్యక్రమంలో అసిస్టెంట్‌ మేనేజర్‌ డి.టి.త్రిమూర్తులు, డిప్యూటీ సూపరింటెండెంట్లు ఎంఎన్‌.రావు, పి.వి.రమణ, కండక్టర్లు, డ్రైవర్లు, గ్యారేజ్‌ సిబ్బంది పాల్గొన్నారు.

సదస్సులో ప్రసంగిస్తున్న వక్తలు ఏయూ క్యాంపస్‌: మెట్రో నగరాలకే పరిమితం కాకుండా టైర్‌–2, టైర్‌–3 నగరాల్లోనూ పరిశ్రమలను విస్తరించాల్సిన అవసరం ఉందని ఎన్‌ ల్యాబ్స్‌ ఏఐ ప్రైవేట్‌ లిమిటెడ్‌ సీఈవో కల్పన పెనుమత్స సూచించారు. బీచ్‌రోడ్డులోని నోవాటెల్‌ హోటల్‌లో నిర్వహించిన ‘ఈస్ట్‌ వేవ్‌–2026, జీసీసీ అండ్‌ ఏఐ కాన్‌క్లేవ్‌’లో ఆమె మాట్లాడారు. స్వయం సమృద్ధితోనే పారిశ్రామిక రంగ భవిష్యత్తు మెరుగుపడుతుందన్నారు. ఇంటర్నెట్‌, డిజిటల్‌ కనెక్టివిటీ అందుబాటులోకి వచ్చిన నేపథ్యంలో ఎక్కడి నుంచైనా పనిచేసే అవకాశాలు పెరిగాయని, పరిశ్రమలను కేవలం మెట్రో నగరాలకే పరిమితం చేయాల్సిన అవసరం లేదన్నారు. చిన్న నగరాలు, పట్టణాల్లోనూ పరిశ్రమలు ఏర్పాటయ్యేలా ప్రభుత్వం ప్రోత్సాహకాలు అందించాలని సూచించారు. స్టార్టప్‌లు దీర్ఘకాలం కొనసాగేందుకు అవసరమైన ప్రోత్సాహం కల్పించాలన్నారు.

పెద ఈశ్వరరావు పాడి మోస్తున్న ఎంపీ గొల్లబాబూరావు, శ్రీపతిరాజులు ఎస్‌.రాయవరం : రాజకీయాల్లో పెద ఈశ్వరరావు లాంటి అనుభవజ్ఞుణ్ని కోల్పోవడం చాలా బాధకరమని రాజ్యసభ ఎంపీ గొల్ల బాబూరావు అన్నారు. వైఎస్సార్‌ కాంగ్రెస్‌ పార్టీలో ఎనలేని సేవలందించి అందరి మనన్నలు అందుకున్నారన్నారు. ఎంపీటీసీ , జెడ్పీటీసీ ఎన్నికల్లో కీల పాత్ర పోషించి జెడ్పీటీసీ అభ్యర్థిని పోటీలో దించి పోలింగ్‌కు ఒక్క రోజు ముందు తుదిశ్వాసను విడిచారన్నారు. దార్లపూడిలో పోలిశెట్టి పెద ఈశ్వరరావు అంత్యక్రియల్లో పాల్గొని, పాడె మోసి తన అభిమానాన్ని చాటుకున్నారు. మరోవైపు సీనియర్‌ నాయకులు శ్రీపతిరాజు కూడా ఈశ్వరరావు పాడె మోశారు. పాయకరావుపేట సమన్వయకర్త కంబాల జోగులు, మండల పార్టీ అధ్యక్షుడు మధువర్మ తదితరులు పెద ఈశ్వరరావు పార్థివ దేహాన్ని సందర్శించి నివాళులు అర్పించారు.

బుచ్చెయ్యపేట: మండలంలోని బంగారుమెట్టలో చూడి ఆవు ప్రమాదవశాత్తు చెరువులో పడి మృతి చెందింది. గ్రామానికి చెందిన పర్రే పెద వెంకినాయుడుకు గురువారం సాయంత్రం తన ఆవును మేతకు తోలుకెళ్లాడు. ఈ క్రమంలో గట్టుపై నుంచి జారి చెరువులో పడి పోయింది. ఆవు మెడ విరిగిపోయి నీటిలో మునిగి చనిపోయింది. స్థానికులు తాళ్లు సహాయంతో చెరువులో నుంచి బయటకు తీశారు. ఐదు నెలల చూడి ఆవు చనిపోవడంతో రూ. 60 వేలు నష్టం జరిగిందని బాధిత రైతు వాపోతున్నాడు. ప్రభుత్వం పరిహారం అందించాలని పలువురు కోరారు. నాయకులు యెనుముల వాసు, హణికంఠ, సాయం వెంకటేష్‌ తదితరులు పరామర్శించారు.

రావికమతం: మండలంలోని మేడివాడ పంట కాలువలో గురువారం ఉపాధి కూలీ కాలు జారి పడి మృతి చెందింది. స్థానికులు, మేట్‌ కథనం మేరకు.. మేడివాడకు చెందిన ఉపాధి కూలీ గొర్లి చిలుకమ్మ గ్రామ శివారు దిడ్డిలో ఉపాధి పనికి వెళ్లింది. పని ముగించుకొని ఇంటికి తిరిగి వస్తుండగా, పంట కాలువలో ప్రమాదవశాత్తు జారి పడింది. ఆ సమయంలో ఎవ్వరూ లేకపోవడంతో మరణించింది. ఈ విషయాన్ని మేట్‌ శ్రీలక్ష్మి ఏపీవో చిన్నారావు దృష్టికి తీసుకెళ్లారు. ఉన్నతాధికారుల దృష్టికి తీసుకెళ్తామని ఏపీవో తెలిపారు. చిలుకమ్మ భర్త గతంలో చనిపోగా, కుమారుడు మహేష్‌తో కలిసి ఉంటోంది. మృతురాలు కుమారుడు ఫిర్యాదు మేరకు కేసు దర్యాప్తు చేస్తున్నట్లు రావికమతం ఎస్‌ఐ రఘువర్మ తెలిపారు.

గూడెంకొత్తవీది: జెర్రెల ఎంపీటీసీ సెగ్మెంట్‌లోని పోలింగ్‌ కేంద్రంలోకి అనుమతి లేకుండా జనసేన నాయకుడు వంపూరి గంగులయ్య, పార్టీ సమన్వయకర్త గొర్లె వీరవెంకట్‌ వెళ్లడం వివాదానికి దారితీసింది. వారిని గమనించిన వైఎస్సార్‌సీపీ నాయకులు పోలీసులకు ఫిర్యాదు చేస్తూ అభ్యంతరం వ్యక్తం చేశారు. అనుమతి లేకుండా పోలింగ్‌ కేంద్రంలోకి ఎలా అనుమతించారంటూ ఎస్‌ఐ సురేష్‌ను ప్రశ్నించారు. ఆందోళన చేస్తామని హెచ్చరించడంతో ఎస్‌ఐ వెంటనే వారిని బయటకు పంపించారు. మరోవైపు గూడెం పోలింగ్‌ కేంద్రంలో టీడీపీ మండల కార్యదర్శి పసుపులేటి నాగమణి అనుమతి లేకుండా సెల్‌ఫోన్‌ తీసుకెళ్లి ఫొటోలు తీస్తున్నా అధికారులు పట్టించుకోవడం లేదంటూ పలువురు విమర్శించారు.

ముంచంగిపుట్టు: స్థానిక సీహెచ్‌సీని గురువారం నేషనల్‌ హెల్త్‌ మిషన్‌ చీఫ్‌ ఎగ్జిక్యూటివ్‌ ఆఫీసర్‌ డాక్టర్‌ ప్రకాశ్‌రావు, రాష్ట్ర టీకాల కార్యక్రమ అధికారి డాక్టర్‌ దేవితో పాటు రాష్ట్ర రివ్యూ మిషన్‌ బృందం సభ్యులు తనిఖీ చేశారు. ఆసుపత్రిలోని వివిధ వార్డులను పరిశీలించి, రోగులతో మాట్లాడి వారికి అందుతున్న వైద్య సేవలపై ఆరా తీశారు. గర్భిణుల ప్రసవాలు, ల్యాబ్‌ పరీక్షలు, నమోదవుతున్న వ్యాధులు, మందుల నిల్వల వివరాలను వైద్యులను అడిగి తెలుసుకున్నారు. ఎస్‌ఎన్‌సీయూను సందర్శించి బాలింతలు, నవజాత శిశువుల సంరక్షణకు తీసుకుంటున్న చర్యలు, అందిస్తున్న వైద్య సేవలను పరిశీలించారు. ఆసుపత్రి రికార్డులను తనిఖీ చేశారు. ఆసుపత్రిలోనే ప్రసవాలు జరిగేలా చూడాలని, చిన్నారులకు నిర్ణీత సమయంలో టీకాలు వేయించాలని, వార్డులను నిత్యం పరిశుభ్రంగా ఉంచాలని వైద్యులకు సూచించారు. ఈ కార్యక్రమంలో డీఎంఅండ్‌హెచ్‌వో డాక్టర్‌ రియాజ్‌బేగ్‌, ఏడీఎంఅండ్‌హెచ్‌వో డాక్టర్‌ బాల మురళీకృష్ణ, ఆర్‌బీఎస్‌కే ప్రోగ్రామ్‌ అధికారి డాక్టర్‌ టి.ఎన్‌.ప్రతాప్‌, సూపరింటెండెంట్‌ ధరణి, వైద్యులు ఆదిత్య, ప్రదీప్‌ పాల్గొన్నారు. సీహెచ్‌సీలో రాష్ట్ర బృందం తనిఖీ

మల్కాపురం: యారాడ గ్రామానికి వెళ్లాలంటే ఆ ఒక్క మార్గమే ఆధారం. అలాంటి ప్రధాన మార్గానికే రాత్రివేళ కార్లు అడ్డుగా నిలుస్తుండటంతో గ్రామస్తులు తీవ్ర ఇబ్బందులు ఎదుర్కొంటున్నారు. డాల్ఫిన్‌ హిల్స్‌ నేవల్‌ క్వార్టర్స్‌ వద్ద కొందరు తమ కార్లను రహదారికి అడ్డంగా నిలుపుతుండటంతో ఆర్టీసీ బస్సు గ్రామంలోకి వెళ్లలేని పరిస్థితి నెలకొంటోంది. దీంతో బస్సులో ప్రయాణించే గ్రామస్తులు రెండు కిలోమీటర్ల దూరం కాలినడకన వెళ్లాల్సి వస్తోంది. యారాడ గ్రామానికి చేరుకోవాలంటే రెండు ఎత్తైన కొండలను దాటుకుని వెళ్లాలి. గ్రామానికి నిత్యం వచ్చే 16 నంబరు ఆర్టీసీ బస్సు ద్వారా ఉద్యోగులు, విద్యార్థులు, మహిళలు రాకపోకలు సాగిస్తుంటారు. అయితే గ్రామానికి సమీపంలోని డాల్ఫిన్‌ హిల్స్‌ ప్రాంతంలో ఉన్న నేవల్‌ క్వార్టర్స్‌ వద్ద నుంచే బస్సు రాకపోకలు సాగించాల్సి ఉంటుంది. ఈ నేపథ్యంలో క్వార్టర్స్‌లో నివసించే కొందరు నేవీ ఉద్యోగులు రాత్రివేళ తమ కార్లను బస్సు వెళ్లే మార్గానికి అడ్డంగా నిలుపుతున్నారు. దీంతో బస్సు గ్రామంలోకి వెళ్లలేకపోతోంది. కార్లు అడ్డం.. రెండు కి.మీ. నడక బుధవారం రాత్రి కూడా ఇదే పరిస్థితి ఎదురైంది. గ్రామానికి వెళ్లాల్సిన బస్సు మార్గంలో కార్లు అడ్డంగా ఉండటంతో అక్కడే నిలిచిపోయింది. దీంతో బస్సులోని ప్రయాణికులు రెండు కిలోమీటర్ల దూరం కొండ దిగువకు నడుచుకుంటూ వచ్చారు. బస్సులో రావాల్సిన వారు కాలినడకన రావడంతో అక్కడున్న గ్రామస్తులు కారణం అడిగారు. కార్లు అడ్డంగా ఉండటంతో నడుచుకుంటూ రావాల్సి వచ్చిందని ప్రయాణికులు వివరించారు. దీంతో ఆగ్రహించిన గ్రామస్తులు డాల్ఫిన్‌ హిల్స్‌ వద్దకు వెళ్లి నేవీ సిబ్బందితో వాదించారు. అనంతరం మార్గానికి అడ్డంగా ఉన్న కార్లను తొలగించారు. అయితే ఇది ఒక్కరోజు సమస్య కాదని, ప్రతిరోజూ రాత్రివేళ ఇదే ఇబ్బంది ఎదురవుతోందని గ్రామస్తులు ఆవేదన వ్యక్తం చేస్తున్నారు. బస్సు రాకపోకలకు ఆటంకం కలగకుండా అధికారులు శాశ్వత పరిష్కారం చూపాలని కోరుతున్నారు.

తగరపువలస: కలుషిత గాలి.. విషతుల్యమైన నీరు.. భరించలేని దుర్వాసన.. ఇళ్లలో ఉండలేని దుస్థితి.. చివరకు అధికారుల నిర్లక్ష్యానికి నిరసనగా ఓటు హక్కునే వదులుకున్నారు ఆ గ్రామస్తులు. ఆరు నెలలుగా కాలుష్య సమస్యతో అల్లాడుతున్నా.. కూటమి ప్రభుత్వం పట్టించుకోకపోవడంతో ఎన్నికలను బహిష్కరించి తమ ఆగ్రహాన్ని చాటారు. భీమిలి మండలం తాళ్లవలస పంచాయతీ పరిధిలోని రాయినపేట గ్రామస్తులు గురువారం జరిగిన ప్రాదేశిక ఎన్నికలకు దూరంగా ఉన్నారు. జాతీయ రహదారిని ఆనుకుని ఉన్న ఎంపీఈపీ పాఠశాలలో ఏర్పాటు చేసిన పోలింగ్‌ కేంద్రంలో గ్రామానికి చెందిన 131 మంది ఓటు వేయాల్సి ఉండగా.. ఒక్కరూ పోలింగ్‌ కేంద్రానికి వెళ్లలేదు. పోలీసులు, రెవెన్యూ అధికారులు వచ్చి నచ్చజెప్పినా తమ నిర్ణయాన్ని మార్చుకోలేదు. ఆరు నెలలుగా నరకయాతన తాళ్లవలస పంచాయతీలోని చిన్నిపేట, యాతపేట, గొల్లల తాళ్లవలసతో పాటు ఆనందపురం మండలం పెద్దిపాలెంలోని పలు కార్పొరేట్‌ విద్యాసంస్థలు శుద్ధి చేయని వ్యర్థాలను సమీపంలోని చెరువులోకి నేరుగా వదులుతున్నాయని గ్రామస్తులు ఆరోపిస్తున్నారు. దీంతో ఈ ఏడాది మే నెల నుంచి రాయినపేట, పెద్దిపాలెం గ్రామాల్లో తీవ్రమైన దుర్వాసన వ్యాపిస్తోంది. చెరువులో నీరు అడుగంటడంతో వ్యర్థాలు రాయినపేట వరకు చేరుతున్నాయి. సమీపంలోని రక్షిత మంచినీటి పథకం బోరులోకి కూడా కలుషిత నీరు చేరడంతో తాగునీరు సైతం విషతుల్యంగా మారుతోందని గ్రామస్తులు ఆవేదన వ్యక్తం చేస్తున్నారు. గాలి పీల్చినా.. నీరు తాగినా ఇబ్బందులే దుర్వాసన భరించలేక ఇళ్లలో ఉండలేని పరిస్థితి నెలకొందని గ్రామస్తులు చెబుతున్నారు. కలుషిత గాలి, నీటి కారణంగా చర్మ అలర్జీలు వస్తున్నాయని ఆందోళన వ్యక్తం చేస్తున్నారు. చెరువులో చేపలు మృత్యువాత పడుతున్నాయని తెలిపారు. రక్షిత మంచినీటి పథకం, జల్‌ జీవన్‌ మిషన్‌ బోర్ల ద్వారా సరఫరా అవుతున్న నీటిలో దుర్వాసనతో పాటు పురుగులు, చిన్న కప్పలు వస్తున్నా అధికారులు పట్టించుకోవడం లేదని మండిపడుతున్నారు. ఇటీవల కురిసిన వర్షాలకు చెరువును ఆనుకుని ఉన్న బంగారమ్మ ఆలయం మునిగిపోయిందని, గత మూడు రోజులుగా శుద్ధమైన తాగునీరు కూడా అందడం లేదని వాపోతున్నారు. అధికారుల చుట్టూ తిరిగినా.. కాలుష్య సమస్యపై గత ఆరు నెలలుగా కలెక్టర్‌, జాయింట్‌ కలెక్టర్‌, భీమిలి ఎమ్మెల్యే గంటా శ్రీనివాసరావు, పొల్యూషన్‌ కంట్రోల్‌ బోర్డు చైర్మన్‌ పంచకర్ల సందీప్‌తో పాటు గ్రామీణ నీటి సరఫరా విభాగం అధికారులకు పలుమార్లు ఫిర్యాదు చేసినా పరిష్కారం లభించలేదని గ్రామస్తులు మండిపడుతున్నారు. రెండు పంచాయతీల ప్రజలు కలెక్టరేట్‌లో నిర్వహించిన ప్రజా సమస్యల పరిష్కార వేదికలోనూ తమ గోడు వెళ్లబోసుకున్నా సమస్య మాత్రం పరిష్కారం కాలేదని వాపోతున్నారు. పంచాయతీ ఎన్నికలూ బహిష్కరిస్తాం అధికారులు, ప్రజాప్రతినిధులు హామీలకే పరిమితమవుతున్నారని గ్రామస్తులు ఆగ్రహం వ్యక్తం చేస్తున్నారు. ఎన్నికల సమయంలో మాత్రమే తమ గ్రామానికి వస్తున్నారని, మిగిలిన రోజుల్లో సమస్యలను పట్టించుకోవడం లేదని విమర్శిస్తున్నారు. ఇప్పటికై నా ప్రభుత్వం స్పందించి సమస్యను పరిష్కరించకపోతే రానున్న గ్రామ పంచాయతీ ఎన్నికలను కూడా బహిష్కరిస్తామని హెచ్చరించారు. గాలి, నీరు కలుషితమయ్యాయి చెరువులోకి చేరుతున్న వ్యర్థాలతో రాయినపేటలో గాలి, నీరు తీవ్రంగా కలుషితమయ్యాయి. దుర్వాసనతో గాలి పీల్చుకోవడం కూడా కష్టంగా ఉంది. ఇళ్లలోని బోర్ల నీరు తాగడానికి పనికిరావడం లేదు. అధికారులు సమస్యను పరిష్కరించకపోవడంతో గ్రామాన్ని విడిచి వెళ్లాల్సిన దుస్థితి ఏర్పడింది. ప్రభుత్వం స్పందించాలనే ఎన్నికలను బహిష్కరించాం. – రాయిన రమేష్‌ఎన్నికలప్పుడే గుర్తుకొస్తాం ఆనందపురం, భీమిలి మండలాల మధ్య ఉన్న చిన్న గ్రామం కావడంతో ఎన్నికల సమయంలో తప్ప మిగిలిన రోజుల్లో అధికారులు, ప్రజాప్రతినిధులకు మేం గుర్తుకు రావడం లేదు. ఆరు నెలల క్రితం సమస్యను వివరించినప్పుడు మూడు నెలల్లో పరిష్కరిస్తామని హామీ ఇచ్చారు. ఆ తర్వాత పట్టించుకోలేదు. – నిమ్మకాయల ఆదినారాయణ

డాబాగార్డెన్స్‌: హార్బర్‌ పోలీస్‌ స్టేషన్‌ పరిధి అనకాపల్లి గేట్‌ విద్యుత్‌ స్తంభం వీపీఏ/ఎంఎన్‌/87 సమీపాన ఫ్లైఓవర్‌ కింద గుర్తు తెలియని ఒక వ్యక్తి మృతదేహాన్ని హార్బర్‌ పోలీసులు గుర్తించారు. ఫ్లైఓవర్‌ నిర్మాణ పనులు చేపడుతున్న అరవింగ్‌ టెక్నో ఇన్‌ఫ్రా సంస్థలో సెక్షన్‌ మేనేజర్‌గా పనిచేస్తున్న ఫిర్యాదుదారుడు అలవరపు విజయ్‌బాబు ఆ మృతదేహాన్ని గుర్తించి సమాచారం అందించాడని హార్బర్‌ పీఎస్‌ ఇన్వెస్టిగేషన్‌ ఆఫీసర్‌ మోహనరావు తెలిపారు. మృతుడి వయసు సుమారు 30 నుంచి 35 ఏళ్ల మధ్య ఉంటుందని, అనకాపల్లి గేట్‌ పరిసర ప్రాంతాల్లో తిరుగుతూ కనిపించే వాడని, మానసిక స్థితి సరిగ్గా లేకుండా ఉండేవాడని, అనారోగ్యం, ఆకలి, వర్షపు వాతావరణానికి గురై మరణించి ఉండవచ్చని ఫిర్యాదు చేసినట్టు చెప్పారు. మృతుడి వివరాలు తెలిసిన వారు హార్బర్‌ పీఎస్‌ సీఐ కె.మల్లేశ్వరరావును 94407 96013, ఇన్వెస్టిగేషన్‌ ఆఫీసర్‌ మోహనరావును 83310 41665 నంబర్లలో సంప్రదించాలని కోరారు.

చింతపల్లి: చింతపల్లి డివిజన్‌ పరిధిలో స్థానిక సంస్థల ఎన్నికలు ప్రశాంత వాతావరణంలో జరిగేలా అన్ని ఏర్పాట్లు చేసినట్లు స్థానిక ఏఎస్పీ నిరంజన్‌ మహేందర్‌ సిన్హా తెలిపారు. బుధవారం స్థానిక మండల పరిషత్‌ కార్యాలయంలో పోలింగ్‌ కేంద్రాలకు సిబ్బంది, ఎన్నికల సామగ్రి పంపిణీ కార్యక్రమాన్ని ఆయన పరిశీలించారు. ఈ సందర్భంగా పంచాయతీల వారీగా చేపడుతున్న ఏర్పాట్ల వివరాలను ఎన్నికల రిటర్నింగ్‌ అధికారి రమణారావు, ఎంపీడీవో లాలం సీతయ్యను అడిగి తెలుసుకున్నారు. అనంతరం ఆయన విలేకరులతో మాట్లాడుతూ.. డివిజన్‌ పరిధిలోని చింతపల్లి, గూడెంకొత్తవీధి, కొయ్యూరు మండలాల్లో అన్ని పోలింగ్‌ కేంద్రాల వద్ద ప్రశాంతంగా ఎన్నికలు నిర్వహించేందుకు చర్యలు చేపట్టినట్లు చెప్పారు. సమస్యాత్మక, అత్యంత సమస్యాత్మక పోలింగ్‌ కేంద్రాలను గుర్తించి అదనపు పోలీసు బలగాలను మోహరించినట్లు వెల్లడించారు. కార్యక్రమంలో సీఐ సింహాచలం, ఎస్‌ఐ వీరబాబు తదితరులు పాల్గొన్నారు. సమస్యాత్మక కేంద్రాల వద్ద పటిష్ట భద్రత : పాడేరు డీఎస్పీ రాజసింహారెడ్డి ముంచంగిపుట్టు: సమస్యాత్మక పోలింగ్‌ కేంద్రాల వద్ద పటిష్ట భద్రత ఏర్పాటు చేసినట్లు పాడేరు డీఎస్పీ రాజాసింహారెడ్డి తెలిపారు. బుధవారం స్థానిక మండల పరిషత్‌ కార్యాలయం వద్ద ఏర్పాటు చేసిన ఎన్నికల సామగ్రి పంపిణీ కేంద్రాన్ని ఆయన పరిశీలించారు. ఓట్ల లెక్కింపు కేంద్రం, స్ట్రాంగ్‌ రూమ్‌లను తనిఖీ చేసి భద్రతా ఏర్పాట్లను సమీక్షించారు. పలు పోలింగ్‌ కేంద్రాలను సందర్శించి అక్కడి సదుపాయాలు, ఏర్పాట్లను పరిశీలించారు.అనంతరం పోలీస్‌స్టేషన్‌ను సందర్శించి ఎస్‌ఐ నాని, సిబ్బందితో మాట్లాడారు. ఎన్నికల సమయంలో ఎలాంటి అవాంఛనీయ ఘటనలు జరగకుండా ముందస్తు చర్యలు తీసుకోవాలని, ఓటర్లు స్వేచ్ఛగా, ప్రశాంత వాతావరణంలో ఓటు హక్కు వినియోగించుకునేలా చూడాలని సూచించారు. ఎన్నికల విధుల్లో నిరంతరం అప్రమత్తంగా ఉంటూ ఇతర శాఖల అధికారులతో సమన్వయం చేసుకోవాలని ఆదేశించారు. కార్యక్రమంలో డీసీఆర్‌బీ సీఐ సంజీవరావు, ఎంపీడీవో ధర్మారావు, తహసీల్దార్‌ త్రినాథనాయుడు పాల్గొన్నారు.ఏఎస్పీ నిరంజన్‌ మహేందర్‌ సిన్హా

కొప్పిశెట్టి వెంకటేష్‌కొప్పిశెట్టి హేమలతవీసం దేవివీసం నారాయణరావునక్కపల్లి : నక్కపల్లి మండల పరిషత్‌ అధ్యక్ష పదవికి తీవ్ర పోటీ నెలకొంది. ఈ పదవి జనరల్‌ మహిళకు కేటాయించడంతో మండల స్థాయిలో నాయకత్వం వహిస్తున్న రెండు ప్రధాన రాజకీయ కుటుంబాల మధ్య తీవ్రపోటీ జరుగుతోంది. నక్కపల్లి ఎంపీపీ పదవికి వైఎస్సార్‌సీపీ నుంచి పార్టీ రాష్ట్ర కార్యదర్శి వీసం రామకృష్ణ మరదలు, నక్కపల్లి తాజా ఎంపీటీసీ సభ్యురాలు, తాజా మాజీ వైస్‌ ఎంపీపీ వీసం నానాజీ భార్య వీసం దేవి పోటీపడుతున్నారు. టీడీపీ నుంచి నియోజకవర్గ ఇన్‌చార్జ్‌ కొప్పిశెట్టి వెంకటేష్‌ సతీమణి కొప్పిశెట్టి హేమలత రేసులో ఉన్నారు. వీరిద్దరూ మండల కేంద్రం నక్కపల్లికి చెందిన వారు. రిజర్వేషన్ల వల్ల వీరికి స్వగ్రామాల్లో పోటీ చేసే అవకాశం లభించలేదు. దీంతో వైఎస్సార్‌సీపీ తరఫున వీసం దేవి రేబాక సెగ్మెంట్‌ నుంచి, టీడీపీ తరఫున కొప్పిశెట్టి హేమలత దేవవరం సెగ్మెంట్‌ నుంచి పోటీచేస్తున్నారు. వీరితో పాటు వీరి భర్తలు కూడా ఎంపీటీసీలుగా పోటీ చేస్తున్నారు. వైఎస్సార్‌సీపీ నుంచి వీసం నానాజీ పెద బోదిగల్లం ఎంపీటీసీ సెగ్మెంట్‌ నుంచి, అలాగే టీడీపీ తరఫున కొప్పిశెట్టి వెంకటేష్‌ కూడా ఇదే పెద బోదిగల్లం సెగ్మెంట్‌నుంచి బరిలో ఉన్నారు. ఇద్దరు హేమా హేమీ నాయకులు ఒకే సెగ్మెంట్‌ నుంచి పోటీ చేయడంతో బోదిగల్లంలో ఎన్నికల పోరు రసవత్తరంగా ఉంది. ఎంపీపీ పదవి మహిళలకు కేటాయించడంతో వీరిద్దరూ సూపర్‌ ఎంపీపీలుగా చెలామణి అయ్యేందుకే వారి భార్యలతోపాటు వీరు కూడా పాలకమండలిలో స్థానం కోసం పోటీ చేస్తున్నట్టు ప్రచారం జరుగుతోంది. ఇప్పటి వరకు నక్కపల్లి మండలంలో వీసం, కొప్పిశెట్టి కుటుంబాలే ఇరు పార్టీల్లోను కీలక భూమిక పోషిస్తూ వస్తున్నాయి. వైరి వర్గాలైన ఈ రెండు కుటుంబాలు ఇప్పుడు ఎంపీపీ పదవిని కై వసం చేసుకునేందుకు తమ శక్తియుక్తులు ఒడ్డుతున్నాయి. గతంలో జరిగిన ఎన్నికల్లో మండల పరిషత్‌ పాలకవర్గాన్ని వైఎస్సార్‌సీపీ కై వసం చేసుకుంది. ఎస్సీ మహిళకు కేటాయించడంతో నక్కపల్లి 2 సెగ్మెంట్‌ నుంచి వీసం రామకృష్ణ కుటుంబం బలపరచిన ఏనుగుపల్లి రత్నం ఎంపీపీ పదవిని చేపట్టారు. ఈ దఫా జనరల్‌ మహిళకు కేటాయించారు. మండల పరిషత్‌ ఏర్పాటైన తర్వాత జనరల్‌ మహిళకు కేటాయించడం ఇదే తొలిసారి కావడంతో ఈ పదవిని ఎలాగైనా కై వసం చేసుకునేందుకు వైఎస్సార్‌సీపీ, టీడీపీలు పావులు కదుపుతున్నాయి. టీడీపీ తరఫున హోంమంత్రి వంగలపూడి అనిత, జిల్లా గ్రంథాలయ సంస్థ మాజీ చైర్మన్‌ తోటనగేష్‌, నియోజకవర్గ ఇన్‌చార్జ్‌ కె.వెంకటేష్‌లు ప్రచారం చేస్తుండగా వైఎస్సార్‌సీపీ తరఫున రాష్ట్ర కార్యదర్శి వీసం రామకృష్ణ, జిల్లా ప్రధాన కార్యదర్శి శీరం నర్సింహమూర్తి, సీనియర్‌ నాయకులు మణిరాజు, పాపారావు, జి. నర్సింహమూర్తి, సూరాకాసుల గోవిందు తదితరులు ప్రచారం చేస్తున్నారు.

పాడేరు రూరల్‌: నూతన రెవెన్యూ అధికారి (డీఆర్వో)గా వెంకటేశ్వరరావు బుధవారం బాధ్యతలు స్వీకరించారు. తొలుత ఆయన కలెక్టర్‌ టి.నిశాంతిని మర్యాదపూర్వకంగా కలిశారు. గతంలో రాజోలు తహసీల్దార్‌గా, మార్కాపురం, వెలిగొండ ప్రాజెక్టు పరిధిలోని కంభం యూనిట్‌లో ఎస్‌డీసీగా విధులు నిర్వహించినట్లు ఆయన తెలిపారు. అనంతరం కలెక్టరేట్‌ కార్యాలయ సిబ్బంది నూతన డీఆర్వోకు శుభాకాంక్షలు తెలిపి స్వాగతం పలికారు. ఈ సందర్భంగా ఆయన మాట్లాడుతూ.. అందరి సహాయ సహకారాలతో ప్రజలకు అందుబాటులో ఉంటూ, సహచర ఉద్యోగుల పట్ల సమన్యాయంతో వ్యవహరిస్తూ సమిష్టిగా పనిచేస్తానన్నారు. ఈ కార్యక్రమంలో కార్యాలయ సిబ్బంది తదితరులు పాల్గొన్నారు.

గోపాలపట్నం: యువతులను అల్లరి పెట్టబోయిన ఆకతాయిలు చివరికి వీడియో ఆధారంగా పోలీసులకు చిక్కారు. ఈ నెల 2వ తేదీ రాత్రి ఎన్‌ఏడీ జంక్షన్‌ శాంతినగర్‌కు చెందిన ఇద్దరు యువతులు స్కూటీపై సీఎంఆర్‌ షాపింగ్‌ మాల్‌ నుంచి తిరిగి వస్తుండగా భాష్యం స్కూల్‌ సమీపంలో గ్లామర్‌ బైక్‌పై వస్తున్న బుచ్చిరాజుపాలెం కరాసాకు చెందిన గణేష్‌, సంతోష్‌, గౌతమ్‌ వారిని అసభ్యంగా దూషిస్తూ, అసభ్యకరంగా ప్రవర్తించారు. ప్రమాదకరంగా బైక్‌ నడుపుతూ భయభ్రాంతులకు గురిచేశారు. ఈ ఘటనకు సంబంధించిన వీడియోను ఆ యువతులు సోషల్‌ మీడియాలో పోస్ట్‌ చేయడంతో వైరల్‌గా మారింది. దీనిపై స్పందించిన సీపీ శంఖబ్రత బాగ్చి ఆదేశాలతో ఎయిర్‌పోర్టు పోలీసులు సుమోటోగా కేసు నమోదు చేశారు. సీఐ శంకరనారాయణ పర్యవేక్షణలో బాధితులను గుర్తించి, వారి ఫిర్యాదు మేరకు దర్యాప్తు చేపట్టారు. బుధవారం గణేష్‌, సంతోష్‌లను అదుపులోకి తీసుకోగా, గౌతమ్‌ కోసం గాలిస్తున్నారు. ట్రిపుల్‌ రైడింగ్‌పై మోటారు వాహనాల చట్టం ప్రకారం కూడా చర్యలు తీసుకోనున్నారు.

వర్షంలోనూ పోలింగ్‌ సిబ్బంది తరలింపు సాక్షి, పాడేరు: జిల్లాలో గురువారం జరిగే స్థానిక సంస్థల ఎన్నికల పోలింగ్‌కు అన్ని ఏర్పాట్లు పూర్తయ్యాయి. కలెక్టర్‌ నిశాంతి, ఎస్పీ అమిత్‌బర్ధర్‌, జిల్లా ఎన్నికల పరిశీలకుడు రోణంకి కూర్మనాథ్‌ పర్యవేక్షణలో బుధవారం ఉదయం నుంచే అన్ని మండలాల్లో ఎన్నికల సామగ్రి, సిబ్బంది తరలింపు ప్రక్రియ ప్రారంభమైంది. ఉదయం నుంచి వర్షం కురుస్తున్నప్పటికీ ఎన్నికల అధికారులు, సిబ్బంది మండల కేంద్రాల్లోని రిసెప్షన్‌ కేంద్రాలకు చేరుకున్నారు. తమకు కేటాయించిన పోలింగ్‌ కేంద్రాలకు సంబంధించిన సామగ్రి, బ్యాలెట్‌ బాక్సులను స్వీకరించారు. మధ్యాహ్న భోజనం అనంతరం ఆర్టీసీ బస్సులు, ఇతర వాహనాల్లో పోలింగ్‌ కేంద్రాలకు బయలుదేరారు. పాడేరు డిగ్రీ కళాశాల రిసెప్షన్‌ కేంద్రంలో సామగ్రి పంపిణీ ప్రక్రియను కలెక్టర్‌ నిశాంతి, ఎస్పీ అమిత్‌బర్దర్‌, ఎన్నికల రిటర్నింగ్‌ అధికారి భానుమూర్తిరాజు పర్యవేక్షించారు. అరకు, అనంతగిరి, డుంబ్రిగుడ, పెదబయలు, ముంచంగిపుట్టు, హుకుంపేట, జి.మాడుగుల, చింతపల్లి, కొయ్యూ రు, గూడెంకొత్తవీధి మండలాల్లోనూ సిబ్బంది పోలింగ్‌ కేంద్రాలకు చేరుకున్నారు. ● జిల్లాలో 11 జెడ్పీటీసీ, 172 ఎంపీటీసీ స్థానాలకు సంబంధించి 617 పోలింగ్‌ కేంద్రాల్లో గురువారం పోలింగ్‌ జరగనుంది. మొత్తం 4,98,467 మంది ఓటర్లు తమ ఓటు హక్కును వినియోగించుకోనున్నారు. వీటిలో 44 మారుమూల, సమస్యాత్మక కేంద్రాల్లో ఉదయం 7 నుంచి మధ్యాహ్నం 3 గంటల వరకు, మిగిలిన కేంద్రాల్లో ఉదయం 7 నుంచి సాయంత్రం 5 గంటల వరకు పోలింగ్‌ నిర్వహించనున్నారు. ● ప్రశాంత ఎన్నికల నిర్వహణకు అన్ని పోలింగ్‌ కేంద్రాల వద్ద పోలీసు బందోబస్తు ఏర్పాటు చేసినట్లు కలెక్టర్‌, ఎస్పీ తెలిపారు. వెబ్‌కాస్టింగ్‌తోపాటు అవసరమైన కేంద్రాల్లో వీడియోగ్రఫీ చేపట్టనున్నారు. సున్నితమైన కేంద్రాల్లో 78 మంది మైక్రో అబ్జర్వర్లను నియమించారు. సిబ్బంది, సామగ్రి తరలింపునకు 103 ఆర్టీసీ బస్సులు, 276 జీపులు, వ్యాన్లను ఏర్పాటు చేశారు. మొత్తం 3,702 మంది ఎన్నికల సిబ్బంది, 78 మంది జోనల్‌ అధికారులు, 117 మంది రూట్‌ అధికారులను నియమించారు. సెగ్మెంట్ల వారీగా ఓటర్ల సమాచారం అనంతగిరి మండలంలో 14 సెగ్మెంట్ల పరిధిలో 38,286 మంది ఓటర్లు, అరకులోయ మండలంలో 16 పరిధిలో 42,725 మంది, చింతపల్లి మండలంలో 20 పరిధిలో 65,374 మంది ఓటర్లు ఉన్నారు. డుంబ్రిగుడ మండలంలో 14 పరిధిలో 38,743 మంది, జి.మాడుగుల మండలంలో 16 పరిధిలో 44,674 మంది, గూడెంకొత్తవీధి మండలం 18 పరిధిలో 52,412 మంది ఓటర్లు ఉన్నారు. హుకుంపేట మండలంలో 15 సెగ్మెంట్ల పరిధిలో 45,787 మంది, కొయ్యూరు మండలంలో 14 పరిధిలో 43,711 మంది, ముంచంగిపుట్టులో 14 పరిధిలో 38,895, పాడేరు మండలం 17 పరిధిలో 44,536 మంది, పెదబయలు మండలం 15 సెగ్మెంట్ల పరిధిలో 43,322 మంది ఓటర్లు ఉన్నారు. 11 జెడ్పీటీసీ స్థానాలకు బరిలో 70మంది జిల్లాలోని 11 జెడ్పీటీసీ స్థానాలకు 70మంది అభ్యర్థులు బరిలో ఉన్నారు. వైఎస్సార్‌సీపీ అభ్యర్థులు 11మంది, టీడీపీ 6, బీజేపీ, ఆమ్‌ఆద్మీ4, బీఎస్పీ 1, సీపీఎం 4,కాంగ్రెస్‌ 8, జనసేన నుంచి ముగ్గురు పోటీలో ఉన్నారు. జిల్లాలోని 172 ఎంపీటీసీ స్థానాలకు 648 మంది అభ్యర్థులు బరిలో ఉన్నట్టు అధికారులు తెలిపారు.కాలువల ఉధృతి.. ఓటుకు ఆటంకం?మన్యంలో వర్షాల ఎఫెక్ట్‌! 617 కేంద్రాల్లో పోలింగ్‌ 4.98 లక్షల మంది ఓటర్లు 44 కేంద్రాల్లో 3 గంటలకే ముగింపు 3,702 మంది ఎన్నికల సిబ్బంది 103 ఆర్టీసీ బస్సులు.. 276 వాహనాలు 78 మంది మైక్రో అబ్జర్వర్లు కొయ్యూరు: ఓవైపు భారీ వర్షాలు.. మరోవైపు ఉధృతంగా ప్రవహిస్తున్న కాలువలు.. వెరసి మండలంలోని యూ.చీడిపాలెం సెగ్మెంట్‌లో పోలింగ్‌పై ప్రభావం పడే పరిస్థితి నెలకొంది. ఈ సెగ్మెంట్‌ పరిధిలోని ఎం.భీమవరం, యూ.చీడిపాలెం పంచాయతీల్లో 48 గ్రామాలు ఉండగా.. వాటిలో 20కి పైగా గ్రామాల ప్రజలు పోలింగ్‌ కేంద్రాలకు చేరుకోవాలంటే రెండు, మూడు కాలువలు దాటాల్సి ఉంది. వర్షాలతో కాలువలు ఉద్ధృతంగా ప్రవహిస్తుండటంతో ఓటర్లు కేంద్రాలకు చేరుకోవడం కష్టంగా మారింది. ఎం.భీమవరం పంచాయతీలోని మందపల్లి గ్రామం పోలింగ్‌ కేంద్రానికి సుమారు 30 కిలోమీటర్ల దూరంలో ఉంది. అక్కడి నుంచి రావాలంటే రెండు పెద్ద కాలువలు దాటాల్సి ఉంటుంది. మర్రిపాకలు, గంగవరం, నీలవరం, తీగలమెట్ట, బిల్లుపాలెం, రేవులకోట, పుట్టకోట, పీఎల్‌ కొత్తూరు తదితర గ్రామాల ప్రజలకూ ఇదే పరిస్థితి. కాలువల ఉద్ధృతి తగ్గితేనే వీరు ఓటు వేసేందుకు వచ్చే అవకాశం ఉంది. వర్షాలు తగ్గితేనే.. దీనిపై ఆర్‌ఓ నరసింహారావును సంప్రదించగా.. వర్షాలు తగ్గుతాయని భావిస్తున్నామని తెలిపారు. కాలువల ప్రవాహం తగ్గితే మారుమూల గ్రామాల నుంచి ఎక్కువ మంది ఓటు వేసేందుకు వచ్చే అవకాశం ఉందన్నారు. యూ.చీడిపాలెం సెగ్మెంట్‌లో పోలింగ్‌ సరళిని ఎప్పటికప్పుడు పరిశీలిస్తామని చెప్పారు.

సీలేరు: ఏజెన్సీలోని ఆంధ్ర–ఒడిశా–పోలవరం జిల్లా సరిహద్దు అటవీ ప్రాంతాల్లో ఎన్నికల నిర్వహణకు అధికారులు పటిష్ట ఏర్పాట్లు చేశారు. గూడెంకొత్తవీధి మండలంలోని సీలేరు, దుప్పులవాడ, దారకొండ, అత్యంత మారుమూల గుమ్మిరేవుల ప్రాంతాలకు బుధవారం సాయంత్రం ప్రత్యేక బస్సుల్లో పోలింగ్‌ సిబ్బంది చేరుకున్నారు. ఆయా ప్రాంతాల్లో ఎన్నికల ఏర్పాట్లు పూర్తి చేశారు. స్థానిక పోలీస్‌స్టేషన్‌ పరిధిలోని పోలింగ్‌ కేంద్రాల వద్ద ఎలాంటి అవాంఛనీయ ఘటనలు జరగకుండా ఎస్‌ఐ యాసీన్‌ ఆధ్వర్యంలో సీఆర్‌పీఎఫ్‌, పోలీసు బలగాలతో భద్రత కల్పిస్తున్నారు. ఏఎస్పీ ఆదేశాలతో సీఐ సుధాకర్‌ పర్యవేక్షణలో బందోబస్తు చేపట్టారు. 144 సెక్షన్‌ అమల్లో ఉండటంతో పోలింగ్‌ కేంద్రాల వద్ద గుంపులుగా సంచరించవద్దని హెచ్చరించారు. మారుమూల ప్రాంతాలపై ప్రత్యేక దృష్టి.. గూడెంకొత్తవీధి మండలంలోని 16 పంచాయతీల్లో ఎన్నికల నిర్వహణకు వర్షాలు, రహదారి ఇబ్బందులు సవాలుగా మారాయి. సీలేరు మినహా మిగిలిన పోలింగ్‌ కేంద్రాల్లో మధ్యాహ్నం 3 గంటలకే పోలింగ్‌ ముగియనుంది. పోలింగ్‌ అనంతరం సిబ్బంది, బ్యాలెట్‌ బాక్సులు సురక్షితంగా మండల కేంద్రానికి చేరేలా పోలీసు యంత్రాంగం ప్రత్యేక చర్యలు చేపట్టింది.మధ్యాహ్నం 3 గంటల వరకే పోలింగ్‌

బ్యాలెట్‌ బాక్సుల్లో సాక్షి, విశాఖపట్నం: పారదర్శకతకు పాతరేస్తూ, ప్రజల తీర్పును బ్యాలెట్‌ బాక్సుల్లోనే మాయం చేసిన వ్యవహారం.. మహా విశాఖ నగరపాలక సంస్థ(జీవీఎంసీ) ఎన్నికల చరిత్రలో చీకటి అధ్యాయంగా మిగిలిపోతోంది. జీవీఎంసీ ఎన్నికల్లో పోలింగ్‌ ముగిశాక మొత్తం 10,35,154 ఓట్లు పోలైనట్లు అధికారికంగా ప్రకటించారు. మేయర్‌ ఎన్నికల కౌంటింగ్‌ పూర్తయ్యే సరికి ఆ సంఖ్య 10,22,227కి పడిపోయింది. అంటే ఏకంగా 12,927 ఓట్లు గల్లంతయ్యాయి. ఇవన్నీ ఎటుపోయాయన్నది ఇప్పుడు చర్చనీయాంశంగా మారింది. ఈ లెక్కల గారడీ వెనుక ఏదో అదృశ్య శక్తి హస్తం ఉందన్న అనుమానాలు వ్యక్తమవుతున్నాయి. స్ట్రాంగ్‌ రూమ్‌లలో ‘చీకటి’వ్యవహారం.! బ్యాలెట్‌ బాక్సుల తరలింపులో కనీస నిబంధనలు పాటించలేదన్న ఆరోపణలు బలంగా వినిపిస్తున్నాయి. పోలింగ్‌ కేంద్రాల వద్ద సీల్‌ వేయాల్సిన బాక్సులను, ఎలాంటి భద్రతా చర్యలు లేకుండానే స్ట్రాంగ్‌ రూమ్‌లకు తరలించడం అనుమానాలకు బలం చేకూరుస్తోంది. దీనికి తోడు, సీల్‌ వేయని బాక్సులను స్ట్రాంగ్‌ రూమ్‌లలో పెట్టిన కాసేపటికే దాదాపు గంట పాటు విద్యుత్‌ సరఫరా నిలిచిపోయింది. ఈ వ్యవహారం మరో చీకటి కోణాన్ని ఆవిష్కరిస్తోంది. అధికారుల మౌనంలో ఆంతర్యమేంటో? కరెంట్‌ పోయిన ఆ గంట వ్యవధిలోనే అసలు కుట్ర జరిగిందని విపక్షాలు ఆరోపిస్తున్నాయి. సీల్‌ వేయని బాక్సులను మాయం చేసి, వాటి స్థానంలో ముందుగానే రిగ్గింగ్‌ చేసి సిద్ధంగా ఉంచిన వేరే బాక్సులను పెట్టారనేది ప్రధాన ఆరోపణ. సరిగ్గా ఇదే విషయంపై పోలింగ్‌ రోజు అర్ధరాత్రి వైఎస్సార్‌సీపీ శ్రేణులు, వామపక్ష నాయకులు తీవ్ర స్థాయిలో ఆందోళన వ్యక్తం చేసినప్పటికీ, సంబంధిత అధికారులు ఏమాత్రం పట్టించుకోకపోవడం ఎన్నికల పారదర్శకతనే ప్రశ్నార్థకంగా మార్చాయి. ఓటమి భయంతో కూటమి మాయాజాలం రాష్ట్ర వ్యాప్తంగా ఉన్న రాజకీయ వాతావరణం, ఎన్నికల సరళిని గమనిస్తే.. జీవీఎంసీ మేయర్‌ పీఠాన్ని దక్కించుకోలేమేమో? అన్న భయంతోనే కూటమి నేతలు ఈ అక్రమాలకు పాల్పడి ఉంటారనే విమర్శలు వినిపిస్తున్నాయి. ప్రజా తీర్పు తమకు వ్యతిరేకంగా ఉందనే ముందస్తు అంచనాతోనే, అధికారుల సమక్షంలో ఈ తరహా బ్యాలెట్‌ మాయాజాలానికి తెరతీశారన్నది విపక్షాల ప్రధాన వాదన. అందుకే.. మేయర్‌ ఓట్ల లెక్కింపు ప్రక్రియ మంగళవారం రాత్రి 9.30 గంటలకు ముగిసిపోయినా.. అర్ధరాత్రి 2 గంటల వరకూ తుదిఫలితాలు వెల్లడించలేదు. పది వార్డుల ఓట్లకు మేయర్‌ ఓట్లకు పొంతన కుదరకపోవడంతో.. అధికారులు, కూటమి నేతలు కంగారు పడ్డారు. 2024 సార్వత్రిక ఎన్నికల మాదిరిగా.. ఇది కూడా వివాదాస్పదమవుతుందన్న భయంతో.. తర్జనభర్జన పడ్డారు. చిక్కుముడి ఎప్పటికీ వీడకపోవడంతో.. మొత్తం 10,22,227 ఓట్లు మాత్రమే పోలయ్యాయంటూ డిక్లేర్‌ చేసేశారు. మిగిలిన 12,927 ఏమయ్యాయనే దానిపై ఎన్నికల అధికారుల నుంచి ఎలాంటి స్పష్టతా లేకపోవడం గమనార్హం. వీధినపడ్డ ‘పింక్‌’బ్యాలెట్లు ఈ మొత్తం వ్యవహారంలో అత్యంత వివాదాస్పదమైన అంశం మేయర్‌ ఎన్నికకు సంబంధించిన పింక్‌ కలర్‌ బ్యాలెట్‌ పేపర్లు పోలింగ్‌ కేంద్రాల బయట దర్శనమివ్వడం. పోలింగ్‌ జరుగుతున్న సమయంలోనే ఆ బ్యాలెట్లు బయటకు రావడం, వాటిని టీడీపీ నేతలు చేత్తో పట్టుకుని హల్‌చల్‌ చేస్తున్న వీడియోలు వెలుగులోకి రావడం వెనుక భారీ కుట్రే జరిగిందన్నది స్పష్టమవుతోంది. రిగ్గింగ్‌ చేసిన తర్వాత మిగిలిన బ్యాలెట్‌ పేపర్లను ఇలా వీధిలోకి తీసుకొచ్చినట్లు అనుమానాలు వ్యక్తమవుతున్నాయి. పారదర్శకంగా జరగాల్సిన ఎన్నికల ప్రక్రియలో ఇన్ని లొసుగులు బయటపడటం, వీడియో ఆధారాలు చక్కర్లు కొడుతున్నా అధికారులు స్పందించకపోవడం వ్యవస్థల వైఫల్యాన్ని సూచిస్తోంది. ఈ ఆరోపణలపై సమగ్ర, నిష్పాక్షిక విచారణ జరిపితే తప్ప, ఎన్నికల ప్రక్రియపై ప్రజలకు నమ్మకం కలిగే పరిస్థితి నెలకొనదని రాజకీయ నిపుణులు, ప్రజాస్వామ్యవాదులు పేర్కొంటున్నారు. సాగర నగరంలో ప్రజాస్వామ్యం నిలువునా దగా పడింది! పదీ.. వంద కాదు.. ఏకంగా సుమారు 13 వేల ఓట్లు కనుమరుగైపోయాయి. వీధిన పడ్డ పింక్‌ బ్యాలెట్లు.. సీలు పడని బ్యాలెట్‌ బాక్సులు.. స్ట్రాంగ్‌ రూమ్‌లో కరెంట్‌ కోతలు.. ప్రజా తీర్పును తుంగలో తొక్కి, ఓటమి భయంతో కూటమి నేతలు ఆడిన బ్యాలెట్‌ అంకెల గారడీ.. జీవీఎంసీ ఎన్నికల ఫలితాల్ని అపహాస్యం చేశాయి. పోలింగ్‌ రోజున ప్రకటించిన ఓటింగ్‌ శాతానికి.. కౌంటింగ్‌ తర్వాత తేలిన ఓట్లకు మధ్య భారీ వ్యత్యాసం పలు అనుమానాలకు తావిస్తోంది.

విశాఖ స్పోర్ట్స్‌: ఇండియన్‌ గోల్ఫ్‌ ప్రీమియర్‌ లీగ్‌ రెండో రౌండ్‌లోనూ గగన్‌జీత్‌ బుల్లార్‌ ఆధిక్యాన్ని కొనసాగించారు. తొలి రోజు ముందంజలో ఉన్న దీపక్‌, రవికుమార్‌ వెనుకబడగా.. సచిన్‌ బైసోయా, తుషార్‌ పన్ను మెరుగైన ప్రదర్శనతో దూసుకొచ్చారు. విశాఖ ఈస్ట్‌ పాయింట్‌ గోల్ఫ్‌ కోర్స్‌ (ఈపీజీసీ)లో జరుగుతున్న గ్రీన్‌ ఫ్యూయల్స్‌ మారిటైమ్‌ ఇన్విటేషన్‌–2026 టోర్నీలో బుధవారం రెండో రోజు పోటీలు జరిగాయి. ఐదుసార్లు విజేతగా నిలిచిన గగన్‌జీత్‌ బోగీలు చేయకుండా ఆరు బర్డీలు సాధించి ఆధిక్యాన్ని నిలబెట్టుకున్నారు. సచిన్‌ బైసోయా నాలుగు బర్డీలతో రెండో స్థానానికి చేరుకోగా, తుషార్‌ పన్ను నాలుగు బర్డీలతో మూడో స్థానంలో నిలిచారు. దీపక్‌ ఒక డబుల్‌ బోగీతో నాలుగో స్థానానికి, రవికుమార్‌ ఒక డబుల్‌ బోగీ, ఒక బోగీతో ఐదో స్థానానికి పడిపోయారు. వైజాగ్‌ డాల్ఫిన్స్‌ జట్టుతో బరిలోకి.. ఈపీజీసీలో నిర్వహించిన కార్యక్రమంలో టోర్నీ నిర్వాహక కమిటీ ప్రతినిధి శ్రీ సుధాకర్‌ మాట్లాడుతూ.. ఏపీలో ఫ్రాంచైజీ జట్టును తీసుకోవాలనే ఆసక్తితో వైజాగ్‌ డాల్ఫిన్స్‌ జీసీ పేరుతో జట్టును ఎంపిక చేసుకుని టోర్నీలో పాల్గొంటున్నామని తెలిపారు. క్లబ్‌లో క్లినిక్‌లు, జూనియర్‌ కార్యక్రమాలతో గోల్ఫ్‌పై అవగాహన పెంచుతామన్నారు. స్పీడ్‌ గోల్ఫ్‌ ద్వారా యువతలో క్రీడపై ఆసక్తి పెంచేందుకు కృషి చేస్తున్నామని పేర్కొన్నారు.

తాటిచెట్లపాలెం: రైల్వేశాఖ పరిధిలో జరుగుతున్న అభివృద్ధి పనులను నాణ్యతగా చేపట్టాలని సౌత్‌ కోస్ట్‌ రైల్వే జనరల్‌ మేనేజర్‌(జీఎం) సందీప్‌ మాధుర్‌ అధికారులకు, సిబ్బందికి సూచించారు. విశాఖపట్నం–కంటకాపల్లి సెక్షన్‌ల మధ్య బుధవారం పర్యటించారు. ఆయా ప్రాంతాల్లో జరుగుతున్న భద్రత, అభివృద్ధి పనులను పరిశీలించారు. అమృత్‌ భారత్‌ స్టేషన్‌ పథకం కింద ఆధునికీకరిస్తున్న విజయనగరం స్టేషన్‌ స్థితిగతులను, ప్రయాణికులకు అందుతున్న సౌకర్యాలను పరిశీలించారు. విజయనగరం, కంటకాపల్లి బొబ్బిలి స్టేషన్‌లలో పర్యటించి స్టేషన్‌ యార్డ్‌, సైడింగ్‌ పనులను, గొట్లాం–నెల్లిమర్ల బైపాస్‌ రైల్వే లైన్‌ పనులను సమీక్షించారు. కంటకాపల్లి స్టేషన్లో అల్ట్రాటెక్‌ సిమెంట్‌ ప్రతినిధుల బృందంతో ప్రాజెక్ట్‌ పురోగతి, ఇతర విషయాలపై చర్చించారు. బొబ్బిలిలో నూతనంగా నిర్మించిన మహిళా సిబ్బంది రెస్ట్‌ రూంను జీఎం ప్రారంభించారు. ఈ పర్యటనలో ఆయనతో పాటు విశాఖపట్నం డివిజన్‌ డీఆర్‌ఎం లలిత్‌బోహ్ర, ప్రిన్సిపల్‌ చీఫ్‌ ఇంజినీర్‌ బీఎస్‌కే రాజ్‌కుమార్‌, ప్రిన్సిపల్‌ చీఫ్‌ సిగ్నల్‌ అండ్‌ టెలికం ఇంజినీర్‌ ఒ.బి.సురేష్‌కుమార్‌, ప్రిన్సిపల్‌ చీఫ్‌ ఆపరేషన్స్‌ మేనేజర్‌ వినీత్‌కుమార్‌, చీఫ్‌ అడ్మినిస్ట్రేటివ్‌ ఆఫీసర్‌ అంకుష్‌గుప్తా, విశాఖపట్నం డివిజన్‌ సీనియర్‌ అధికారుల పాల్గొన్నారు. సౌత్‌కోస్ట్‌ రైల్వే జీఎం సందీప్‌ మాధుర్‌

● మరోసారి ఫ్యాన్‌ గాలి ● ఎమ్మెల్సీ కుంభా రవిబాబు ● అరకులో వైఎస్సార్‌సీపీ ప్రచార ర్యాలీ అరకులోయ టౌన్‌ (డుంబ్రిగుడ): 2014, 2021 ఎన్నికల్లో జెడ్పీటీసీ స్థానాలను కై వసం చేసుకున్న వైఎస్సార్‌ కాంగ్రెస్‌ పార్టీ మరోసారి జెడ్పీటీసీతో పాటు 14 ఎంపీటీసీ స్థానాల్లో విజయం సాధించేందుకు సిద్ధంగా ఉందని ఎమ్మెల్సీ డాక్టర్‌ కుంభ రవిబాబు అన్నారు. ఆంధ్రా ఊటీ అరకులోయలో ఫ్యాన్‌ గాలి మరోసారి వీచే సమయం దగ్గరలో ఉందని పేర్కొన్నారు. అరకులోయ టౌన్‌షిప్‌లోని స్థానిక ఎమ్మెల్యే రేగం మత్స్యలింగం క్యాంపు కార్యాలయం నుంచి మంగళవారం భారీ ర్యాలీ నిర్వహించారు. జెడ్పీటీసీ అభ్యర్థి కమ్మిడి అశోక్‌, ఎంపీటీసీ అభ్యర్థులతో పాటు వైఎస్సార్‌సీపీ మద్దతుదారులు, కార్యకర్తలు, అభిమానులు పెద్ద సంఖ్యలో పాల్గొన్నారు. ప్రచార రథంపై ఏర్పాటు చేసిన పాటలతో గిరిజన మహిళలు, యువత ఉత్సాహంగా నృత్యాలు చేశారు. పార్టీ జెండాలు చేతబట్టి, సంప్రదాయ ధింసా నృత్యాలతో సందడి చేశారు. వీధివీధినా వైఎస్సార్‌సీపీ జెండాలు కనిపించాయి. ఈ నెల 5న జరిగే ఎన్నికల్లో జెడ్పీటీసీ అభ్యర్థి కమ్మిడి అశోక్‌తో పాటు ఎంపీటీసీ అభ్యర్థులకు ఫ్యాన్‌ గుర్తుపై ఓటు వేసి మెజారిటీతో గెలిపించాలని ఎమ్మెల్సీ రవిబాబు ఓటర్లను కోరారు. ఈ కార్యక్రమంలో మాజీ జెడ్పీటీసీ శెట్టి రోషిణి, మండల పార్టీ అధ్యక్షుడు స్వాభి రామూర్తి, ఉపాధ్యక్షుడు పి. విజయ్‌కుమార్‌, రాష్ట్ర ఎస్టీ సెల్‌ కార్యదర్శి పి. చిన్నారావు, జిల్లా ఎస్టీ సెల్‌ కార్యదర్శి శెట్టి అప్పాలు, ఎంపీటీసీ అభ్యర్థులు పి.బి. రంభ, పి. శాంతి, కె. శిరీష, కె. బాలరాజు, పురుషోత్తం, సుక్రయ్య, జి. ప్రసాద్‌, కె. బంగార్రాజు, పి. బుల్లమ్మ, జి. నిర్మల, మోహన్‌రావు, బుటికి, స్వామి, కోగేశ్‌, రాజ్‌కుమార్‌, ఇతర నాయకులు పాల్గొన్నారు.

● స్ట్రాంగ్‌ రూమ్‌, కౌంటింగ్‌ కేంద్రాల తనిఖీ ● పటిష్ట భద్రత, సీసీ కెమెరాల నిఘాకు ఆదేశాలు అరకులోయ (సాక్షి, పాడేరు): స్థానిక సంస్థల ఎన్నికలకు సంబంధించి అరకులోయ మండలంలో చేపట్టిన ఏర్పాట్లను కలెక్టర్‌ టి.నిశాంతి మంగళవారం పరిశీలించారు. స్ట్రాంగ్‌ రూమ్‌ను తనిఖీ చేసిన ఆమె ఎన్నికల సామగ్రి, బ్యాలెట్‌ బాక్సులను క్షుణ్ణంగా పరిశీలించారు. స్ట్రాంగ్‌ రూమ్‌తో పాటు ఓట్ల లెక్కింపు కేంద్రాల్లో భద్రతా ఏర్పాట్లు, సీసీ కెమెరాల నిఘా, ఎన్నికల సామగ్రి భద్రపరిచే విధానంపై అధికారులతో సమీక్షించారు. ఓట్ల లెక్కింపు కేంద్రంలో కల్పించాల్సిన మౌలిక సదుపాయాలపై తగిన ఆదేశాలు జారీ చేశారు. ఎన్నికల సంఘ మార్గదర్శకాలు, నిబంధనలను తప్పనిసరిగా పాటిస్తూ స్ట్రాంగ్‌ రూమ్‌, కౌంటింగ్‌ కేంద్రాల వద్ద పటిష్ట భద్రతా ఏర్పాట్లు చేయాలని అధికారులను ఆదేశించారు. పోలింగ్‌తో పాటు ఓట్ల లెక్కింపు ప్రక్రియను సజావుగా, పారదర్శకంగా నిర్వహించేందుకు అవసరమైన ముందస్తు చర్యలు చేపట్టాలని కలెక్టర్‌ సూచించారు.

విశాఖలోనగరంపై సైబర్‌ నేరగాళ్ల పంజా ఏడేళ్లలో రూ.347.82 కోట్లు కొల్లగొట్టిన మోసగాళ్లు 25,438 ఫిర్యాదులు.. వృద్ధులు, పెన్షనర్లే లక్ష్యంగా దోపిడీలు డిజిటల్‌ అరెస్టుల పేరుతో రూ.1.94 కోట్లు స్వాహా ద్వారకానగర్‌: ఒకప్పుడు దొంగలు ఇళ్లలోకి చొరబడి దోచుకునేవారు. ఇప్పుడు చేతిలో ఫోన్‌ ఉంటే చాలు. కాలు కదపకుండానే కూర్చున్న చోటు నుంచే ఖాతాలను కొల్లగొడుతున్నారు. తలుపులు బద్దలు కొట్టాల్సిన పనిలేదు. కత్తులు చూపించాల్సిన అవసరం లేదు. ఒక లింక్‌ క్లిక్‌తో జీవితకాల సంపాదనను స్వాహా చేస్తున్నారు. బ్యాంకు అధికారులమంటూ ఓటీపీల వేట.. పోలీసులమంటూ డిజిటల్‌ అరెస్టు బెదిరింపులు.. పెట్టుబడులపై భారీ లాభాలంటూ ఆశల వల.. ఇలా సైబర్‌ నేరగాళ్లు విశాఖ నగరాన్ని లక్ష్యంగా చేసుకుని కొత్తకొత్త పద్ధతుల్లో దోపిడీలకు తెగబడుతున్నారు. ముఖ్యంగా వృద్ధులు, విశ్రాంత ఉద్యోగులు, పెన్షనర్లను బుట్టలో వేసుకుని రూ.కోట్లు కొల్లగొడుతున్నారు. స్మార్ట్‌ సిటీగా పేరొందిన విశాఖలో సైబర్‌ నేరాల తీవ్రత ఎంతలా పెరిగిందంటే.. గత ఏడేళ్లలో బాధితులు పోగొట్టుకున్న సొమ్ము అక్షరాలా రూ.347.82 కోట్లు. 25,438 ఫిర్యాదులు.. 2,524 కేసులు.. 9,781 మంది బాధితులు.. ఈ గణాంకాలు డిజిటల్‌ దోపిడీ ఏ స్థాయిలో సాగుతోందో కళ్లకు కడుతున్నాయి. ఫోన్‌ చేతిలో ఉంటే చాలు.. ఖాతా ఖాళీ సైబర్‌ నేరగాళ్లు అమాయకుల బలహీనతలనే పెట్టుబడిగా చేసుకుంటున్నారు. బ్యాంకులు, ప్రభుత్వ సంస్థల పేర్లను పోలిన నకిలీ వెబ్‌సైట్లు సృష్టించి లింకులు పంపుతున్నారు. స్పెల్లింగ్‌లో చిన్న మార్పులు చేసి అసలైన వెబ్‌సైట్లుగా నమ్మిస్తున్నారు. మరోవైపు ఫోన్‌కు ఓటీపీ వచ్చిందని, వెరిఫికేషన్‌ కోసం చెప్పాలని కోరుతున్నారు. నమ్మి ఓటీపీ చెప్పగానే ఖాతాల్లోని నగదును ఇతర ఖాతాలకు మళ్లించేస్తున్నారు. వాట్సాప్‌, ఫేస్‌బుక్‌, ఎక్స్‌ వంటి సామాజిక మాధ్యమాల ద్వారా కూడా వల విసురుతున్నారు. క్రిప్టో కరెన్సీ, స్టాక్‌ మార్కెట్‌ ట్రేడింగ్‌లో తక్కువ పెట్టుబడితో భారీ లాభాలు వస్తాయంటూ ఉద్యోగులు, వ్యాపారులను మోసగిస్తున్నారు. వృద్ధులే టార్గెట్‌.. కష్టార్జితమే వేట సాంకేతిక పరిజ్ఞానంపై సరైన అవగాహన లేని వృద్ధులు, విశ్రాంత ఉద్యోగులు సైబర్‌ ముఠాలకు సులువైన లక్ష్యాలుగా మారుతున్నారు. తొందరగా నమ్మే స్వభావం, ఒంటరితనం, ఆన్‌లైన్‌ లావాదేవీలపై అవగాహన లేకపోవడాన్ని ఆసరాగా చేసుకుంటున్నారు. పోలీసులమంటూ వీడియో కాల్స్‌ చేసి బెదిరించడం.. కేసుల్లో ఇరుక్కున్నారని భయపెట్టడం.. విచారణ పేరుతో బ్యాంకు ఖాతాల్లోని సొమ్మును బదిలీ చేయించుకోవడం వంటి మోసాలకు పాల్పడుతున్నారు. భయంతో బాధితులు ఎవరికీ చెప్పుకోలేకపోవడంతో నేరగాళ్ల దోపిడీకి అడ్డూ అదుపు లేకుండా పోతోంది. డిజిటల్‌ అరెస్టు.. రూ.1.94 కోట్ల దోపిడీ! విశాఖలో డిజిటల్‌ అరెస్టు మోసం ఎంతటి తీవ్రతకు చేరిందో అక్కయ్యపాలెం పరిధి లలితనగర్‌ ఘటన చూస్తే అర్థమవుతుంది. అక్కడి విశ్రాంత ఉద్యోగి కారి గోపాల రామానుజం (65)కు పోలీసులమంటూ వాట్సాప్‌ వీడియో కాల్‌ చేశారు. పోలీసు దుస్తుల్లో కనిపిస్తూ బెదిరింపులకు దిగారు. కేసుల పేరుతో భయభ్రాంతులకు గురిచేసి ఏకంగా 13 విడతల్లో రూ.1.94 కోట్లను తమ ఖాతాలకు బదిలీ చేయించుకున్నారు. బాధితుడి ఫిర్యాదుతో సైబర్‌ క్రైమ్‌ పోలీసులు కేసు నమోదు చేసి దర్యాప్తు చేస్తున్నారు. ఏడేళ్లలో రూ.347.82 కోట్ల గల్లంతు! విశాఖలో సైబర్‌ నేరాల పెరుగుదలకు నమోదైన గణాంకాలే సాక్ష్యం. 2019 నుంచి 2026 వరకు నేషనల్‌ సైబర్‌ క్రైమ్‌ రిపోర్టింగ్‌ పోర్టల్‌లో 25,438 ఫిర్యాదులు నమోదయ్యాయి. వీటిలో 2,524 కేసులు నమోదు కాగా, 9,781 మంది బాధితులుగా మారారు. మొత్తం రూ.347,82,04,615 మేర ఆర్థిక నష్టం వాటిల్లినట్లు తెలుస్తోంది. 2019లో కేవలం 104గా ఉన్న ఫిర్యాదులు 2025 నాటికి 7,531కు చేరడం సైబర్‌ నేరాల విస్తృతిని తెలియజేస్తోంది. ప్రతి ఏటా కోట్లలో.. ఏడాది దోపిడీ 2022 రూ.13.33 కోట్లు 2023 రూ.29.46 కోట్లు 2024 రూ.104.53 కోట్లు 2025 రూ.121.29 కోట్లు 2026(ఇప్పటి వరకు) రూ.63.64 కోట్లు మోసపోతే వెంటనే ఫిర్యాదు చేయాలి సైబర్‌ నేరగాళ్లు ముఖ్యంగా వృద్ధులు, అమాయకులను లక్ష్యంగా చేసుకుంటున్నారు. అనుమానాస్పద ఫోన్‌ కాల్స్‌, వాట్సాప్‌ కాల్స్‌ వస్తే అప్రమత్తంగా ఉండాలి. మోసానికి గురైతే ఏమాత్రం ఆలస్యం చేయకుండా వెంటనే 1930 హెల్ప్‌లైన్‌కు ఫిర్యాదు చేయాలి. ఎంత త్వరగా ఫిర్యాదు చేస్తే నగదును నిలిపివేసే అవకాశం అంత ఎక్కువగా ఉంటుంది. – భవాని ప్రసాద్‌, ఇన్‌స్పెక్టర్‌, సైబర్‌ క్రైమ్‌ అప్రమత్తతే అసలైన రక్షణ సైబర్‌ నేరాల పట్ల ప్రతి ఒక్కరూ అప్రమత్తంగా ఉండాలి. బ్యాంకులు, ప్రభుత్వ సంస్థలు ఎప్పుడూ ఓటీపీలు, పాస్‌వర్డ్‌లు అడగవు. అపరిచితులు పంపే లింకులను తెరవకూడదు. వ్యక్తిగత వివరాలను సామాజిక మాధ్యమాల్లో పంచుకోవద్దు. గుర్తుతెలియని వ్యక్తుల నుంచి వచ్చే వీడియో కాల్స్‌ పట్ల జాగ్రత్తగా ఉండాలి. – డాక్టర్‌ శంఖబ్రత బాగ్చి, నగర పోలీస్‌ కమిషనర్‌

● ఎస్‌ఐ సురేష్‌ సొంత నిధులతోమరమ్మతులు గూడెంకొత్తవీధి: పూర్తిగా శిథిలావస్థకు చేరిన గూడెం బస్‌షెల్టర్‌కు ఎస్‌ఐ సురేష్‌ చొరవతో కొత్త రూపు వచ్చింది. సొంత నిధులతో ఆయన బస్‌షెల్టర్‌కు మరమ్మతులు చేయించారు. గతంలో నిర్మించిన ఈ బస్‌షెల్టర్‌ కాలక్రమేణా పూర్తిగా పాడైపోయింది. నాయకులు, అధికారులు నిత్యం అటుగా వెళ్తున్నా దాని మరమ్మతులపై ఎవరూ దృష్టి సారించలేదు. బస్‌షెల్టర్‌ దుస్థితిని గమనించిన ఎస్‌ఐ సురేష్‌ దానిని బాగు చేయించాలని సంకల్పించారు. కొద్ది రోజుల్లోనే మరమ్మతులు పూర్తి చేయించడంతో పాటు రంగులు వేయించారు. దీంతో బస్‌షెల్టర్‌ కొత్తగా నిర్మించినట్లుగా కనిపిస్తోంది. షెల్టర్‌ ముందు ద్విచక్ర వాహనాలు వెళ్లకుండా ఇనుప రాడ్లను కూడా ఏర్పాటు చేయించారు. ఎస్‌ఐ సురేష్‌ చేసిన ఈ పనిపై స్థానికులు, ప్రజలు ప్రశంసలు వ్యక్తం చేస్తున్నారు.

సాక్షి, పాడేరు: ఈ నెల 5వ తేదీ గురువారం జరిగే స్థానిక సంస్థల ఎన్నికలను ప్రశాంతంగా నిర్వహించేందుకు అన్ని ఏర్పాట్లు పూర్తి చేశామని కలెక్టర్‌ టి.నిశాంతి తెలిపారు. జిల్లా ఎన్నికల పరిశీలకుడు రోణంకి కూర్మనాథ్‌, జిల్లా ఎన్నికల వ్యయ పరిశీలకుడు ధీరజ్‌ హన్స్‌తో కలిసి మంగళవారం కలెక్టరేట్‌లో విలేకరుల సమావేశం నిర్వహించి ఎన్నికల ఏర్పాట్ల వివరాలను వెల్లడించారు. 11 జెడ్పీటీసీ, 172 ఎంపీటీసీ.. ఈ సందర్భంగా కలెక్టర్‌ మాట్లాడుతూ జిల్లాలో 11 జెడ్పీటీసీ, 172 ఎంపీటీసీ స్థానాలకు ఎన్నికలు జరగనున్నాయని తెలిపారు. జిల్లా వ్యాప్తంగా 617 పోలింగ్‌ కేంద్రాలను ఏర్పాటు చేశామని, 4,98,467 మంది ఓటర్లు తమ ఓటు హక్కును వినియోగించుకోనున్నారని పేర్కొన్నారు. వీటిలో 149 సెన్సిటివ్‌, 91 హైపర్‌ సెన్సిటివ్‌ కేంద్రాలుగా పోలీసులు గుర్తించారన్నారు. ఇంటర్నెట్‌ సదుపాయం ఉన్న చోట వెబ్‌కాస్టింగ్‌, అవసరమైన పోలింగ్‌ కేంద్రాల్లో వీడియోగ్రఫీ ఏర్పాటు చేస్తామని, సెన్సిటివ్‌ కేంద్రాల్లో 78 మంది మైక్రో అబ్జర్వర్లు విధులు నిర్వహిస్తారని వివరించారు. నేడు పోలింగ్‌ సామగ్రి పంపిణీ.. ఈ నెల 4వ తేదీ ఉదయం నుంచి మండల కేంద్రాల్లో పోలింగ్‌ సామగ్రి పంపిణీ చేపడతామన్నారు. ఎన్నికల సిబ్బంది, సామగ్రి తరలింపునకు 103 ఆర్టీసీ బస్సులు, 276 జీపులు, వ్యాన్లు ఏర్పాటు చేశామని, అవసరమైన చోట పోలీసు ఎస్కార్ట్‌ ఉంటుందని తెలిపారు. ప్రతి పోలింగ్‌ కేంద్రంలో ప్రిసైడింగ్‌ అధికారితో పాటు మరో ఐదుగురు సిబ్బంది విధుల్లో ఉంటారని, మొత్తం 3,702 మంది ఎన్నికల విధులు నిర్వహిస్తారని చెప్పారు. అదనంగా 20 శాతం రిజర్వు సిబ్బందిని అందుబాటులో ఉంచామన్నారు. 78 మంది జోనల్‌ అధికారులు, 117 మంది రూట్‌ అధికారులను నియమించినట్లు వెల్లడించారు. గుర్తింపు కార్డు తప్పనిసరి.. ఎన్నికల కమిషన్‌ అనుమతితో 44 మారుమూల, సమస్యాత్మక పోలింగ్‌ కేంద్రాల్లో ఉదయం 7 గంటల నుంచి మధ్యాహ్నం 3 గంటల వరకే పోలింగ్‌ నిర్వహిస్తామని, మిగిలిన కేంద్రాల్లో సాయంత్రం 5 గంటల వరకు కొనసాగుతుందని తెలిపారు. పోలింగ్‌కు 48 గంటల ముందే ఎన్నికల ప్రచారం నిలిపివేయాలని సూచించారు. ఓటర్లు ఓటు వేసే సమయంలో ఎన్నికల కమిషన్‌ సూచించిన 20 రకాల గుర్తింపు కార్డుల్లో ఏదో ఒకటి చూపించాలన్నారు. పర్యవేక్షణకు ప్రత్యేక యాప్‌.. ఎన్నికల పర్యవేక్షణకు కమిషన్‌ ప్రత్యేక మొబైల్‌ యాప్‌ను రూపొందించిందని, ప్రతి రెండు గంటలకు పోలింగ్‌ శాతాన్ని తెలుసుకునేందుకు ప్రతి మండలానికి కమ్యూనికేషన్‌ ప్లాన్‌ సిద్ధం చేశామని చెప్పారు. నెట్‌వర్క్‌ సదుపాయం లేని 66 పోలింగ్‌ కేంద్రాలకు కమ్యూనికేటర్లను ఏర్పాటు చేశామన్నారు. పోలింగ్‌ అనంతరం బ్యాలెట్‌ బాక్సులకు సీల్‌ వేసి, సాయుధ పోలీసు భద్రత నడుమ స్ట్రాంగ్‌ రూమ్‌లకు తరలిస్తామని తెలిపారు. అక్కడ 24 గంటల పోలీసు భద్రతతో పాటు సీసీ కెమెరాల నిఘా ఉంటుందని, మండల కేంద్రాల్లో ఓట్ల లెక్కింపు ప్రక్రియను పకడ్బందీగా నిర్వహిస్తామని కలెక్టర్‌ స్పష్టం చేశారు. జిల్లాలో 617 పోలింగ్‌ కేంద్రాలు 4,98,467 మంది ఓటర్లు.. 3,702 మంది సిబ్బంది 44 మారుమూల కేంద్రాల్లో మధ్యాహ్నం 3 గంటలకే పోలింగ్‌ ముగింపు కలెక్టర్‌ నిశాంతి

జెడ్పీ చైర్‌పర్సన్‌గా మన్యం రూపురేఖలు మార్చిన జల్లిపల్లి సుభద్రఉమ్మడి విశాఖ జిల్లా మాజీ జెడ్పీ చైర్‌పర్సన్‌గా పనిచేసిన జల్లిపల్లి సుభద్ర మరోసారి ప్రజాక్షేత్రంలోకి వచ్చారు. ముంచంగిపుట్టు జెడ్పీటీసీ స్థానానికి వైఎస్సార్‌సీపీ అభ్యర్థిగా బరిలో నిలిచిన ఆమెకు గతంలో మండలంలో చేపట్టిన అభివృద్ధి పనులే ప్రధాన ప్రచారాస్త్రాలుగా మారాయి. రూ.30 కోట్లతో వివిధ అభివృద్ధి పనులు చేపట్టడం నుంచి మారుమూల గిరిజన గ్రామాలకు తాగునీరు, రహదారులు, విద్యుత్‌ సౌకర్యాలు కల్పించడం వరకు తన హయాంలో జరిగిన పనులు ఇప్పుడు మరోసారి చర్చనీయాంశమవుతున్నాయి. మంగళవారం సాయంత్రంతో ఎన్నికల ప్రచారానికి తెరపడిన నేపథ్యంలో.. గతంలో ఆమె చేపట్టిన అభివృద్ధి పనులు, నెరవేర్చిన హామీలు, అసంపూర్తిగా మిగిలిన పనులపై ప్రత్యేక కథనం. ముంచంగిపుట్టు: ఉమ్మడి విశాఖ మాజీ జెడ్పీ చైర్‌పర్సన్‌ జల్లిపల్లి సుభద్ర మరోసారి ముంచంగిపుట్టు జెడ్పీటీసీ బరిలో నిలిచారు. గతంలో జెడ్పీటీసీగా గెలుపొంది ఉమ్మడి విశాఖ జెడ్పీ చైర్‌పర్సన్‌గా పనిచేసిన అనుభవంతో మండలంలో పలు అభివృద్ధి పనులకు శ్రీకారం చుట్టారు. ఆమె హయాంలో ముంచంగిపుట్టు మండలానికి సుమారు రూ.30 కోట్ల నిధులతో వివిధ అభివృద్ధి పనులు చేపట్టినట్లు గణాంకాలు వెల్లడిస్తున్నాయి. ముఖ్యంగా మారుమూల గిరిజన గ్రామాల్లో తాగునీరు, రహదారులు, డ్రైనేజీ సౌకర్యాల కల్పనకు ప్రాధాన్యమిచ్చారు. మరోవైపు విద్య, వైద్యం, రవాణా రంగాల్లోనూ పలు సమస్యల పరిష్కారానికి చొరవ చూపారు. గ్రామీణ మౌలిక వసతులకు ప్రాధాన్యం మండలంలోని 23 పంచాయతీల పరిధిలో ఉన్న 376 గిరిజన గ్రామాల్లో మౌలిక వసతుల కల్పన ప్రధాన సవాలుగా ఉంది. ఈ నేపథ్యంలో సుభద్ర తన పదవీకాలంలో 78 గ్రామాల్లో తాగునీటి బోర్లు, 54 గ్రామాల్లో సీసీ రోడ్లు, 26 గ్రామాల్లో డ్రైనేజీల నిర్మాణాలు చేపట్టినట్లు వివరాలు తెలియజేస్తున్నాయి. పలు గ్రామాల్లో సామాజిక భవనాలు, వంటషెడ్ల నిర్మాణాలతో పాటు తారురోడ్ల పనులు కూడా చేపట్టారు. ● మండల కేంద్రంలో అంబేడ్కర్‌ పార్కు సుందరీకరణ, అధ్వానంగా ఉన్న చెరువు అభివృద్ధి, నాలుగు రోడ్ల కూడలిలో ప్రయాణికుల కోసం బస్‌ షెల్టర్‌ నిర్మాణం వంటి పనులు చేపట్టారు. గిరిజన ఉద్యోగుల సంఘం భవనాన్ని పూర్తి చేయడంతో పాటు శాఖా గ్రంథాలయానికి భవన సౌకర్యం కల్పించారు. మండల ప్రజా పరిషత్‌ నూతన భవనానికి శంకుస్థాపన చేయగా, జెడ్పీ అతిథిగృహ నిర్మాణ పనులకు శ్రీకారం చుట్టారు. విద్య, వైద్య రంగాలపై దృష్టి స్థానిక ప్రభుత్వ జూనియర్‌ కళాశాలలో పదేళ్లకు పైగా విద్యార్థినులు ఎదుర్కొంటున్న వసతి సమస్య పరిష్కారానికి చొరవ తీసుకున్నారు. గిరిజన ప్రాంతాల నుంచి విశాఖ కేజీహెచ్‌కు వచ్చే రోగులను పరామర్శించడం, మెరుగైన వైద్య సేవలు అందేలా చూడటంతో పాటు అత్యవసర సమయాల్లో రోగుల తరలింపునకు వాహనాలు ఏర్పాటు చేసిన సందర్భాలున్నాయి. రంగబయలు పంచాయతీ గొబ్బరపడకు చెందిన నిరుపేద గిరిజన కుటుంబాలకు చెందిన 30 కుటుంబాలకు ఇళ్ల నిర్మాణం కోసం సొంత నిధులతో రేకులు అందించడం, బంగారుమెట్ట పంచాయతీలో విద్యుత్‌ సౌకర్యం లేని గ్రామానికి విద్యుత్‌ వెలుగులు తీసుకొచ్చేందుకు కృషి చేయడం కూడా ఆమె హయాంలో చేపట్టిన పనుల్లో ఉన్నాయి. రవాణా, పర్యాటక అభివృద్ధికి ప్రాధాన్యం విశాఖపట్నం, మధురవాడ నుంచి దొడిపుట్టు వరకు ఆర్టీసీ బస్సు సర్వీసు అందుబాటులోకి తీసుకొచ్చేందుకు ఆమె కృషి చేశారు. గిరిజన ప్రాంతాల్లో రవాణా సౌకర్యాల కొరతను గుర్తించి మరిన్ని గ్రామాలకు బస్సు సర్వీసులు విస్తరించాల్సిన అవసరాన్ని గుర్తించారు. ● ముంచంగిపుట్టు జెడ్పీటీసీగా మరోసారి అవకాశం లభిస్తే మండల కేంద్రంలోని సామాజిక ఆరోగ్య కేంద్రాన్ని 100 పడకల ఆస్పత్రిగా ఆధునికీకరించడం, పూర్తిస్థాయిలో వైద్యులు, సిబ్బందిని నియమించడం తన ప్రాధాన్యతలుగా ఆమె ముందుంచుతున్నారు. సామూహిక మరుగుదొడ్ల నిర్మాణం, గిరిజన మత్స్యకారులకు వలలు, బోట్లు అందించడం, ఆశ్రమ పాఠశాలల్లో హెల్త్‌ వర్కర్ల నియామకానికి కృషి చేయాలని లక్ష్యంగా పెట్టుకున్నారు. ● జీవో నంబర్‌ 3 అమలు, 1/70 చట్టం పరిరక్షణ, గిరిజనులకు ఉద్యోగ అవకాశాల కల్పన కోసం పోరాడాలని భావిస్తున్నారు. సుజనకోట మత్స్యగెడ్డ, జడిగూడ, జోలాపుట్టు, బురదగుంట ప్రాంతాలను పర్యాటకంగా అభివృద్ధి చేయడం, అవసరమైన వసతులు కల్పించడం, మారుమూల గ్రామాలకు తాగునీరు, రహదారులు, డ్రైనేజీ సౌకర్యాలు విస్తరించడం ఆమె ముందున్న లక్ష్యాలు. కుమడ, డుడుమ, జోలాపుట్టు, పెదబయలు మార్గాల్లో బస్‌ షెల్టర్ల నిర్మాణం, తారురోడ్లు ఉన్న గిరిజన గ్రామాలకు ఆర్టీసీ బస్సు సర్వీసుల విస్తరణపైనా దృష్టి సారించనున్నారు. ముంచంగిపుట్టు జెడ్పీటీసీ స్థానం నుంచి మరోసారి పోటీ రూ.30 కోట్లతో అభివృద్ధి పనులు 78 గ్రామాలకు తాగునీటి బోర్లు 54 గ్రామాలకు సీసీ రోడ్ల సౌకర్యం విద్య, వైద్యం, రవాణాపై ప్రత్యేక దృష్టి గిరిజన గ్రామాల్లో మౌలిక వసతుల కల్పన

ముంచంగిపుట్టు: మండలంలో మంగళవారం ఉదయం నుంచి ఏకధాటిగా వర్షం కురుస్తోంది. దీంతో మండల కేంద్రంలోని రహదారులన్నీ జలమయమయ్యాయి. గిరిజన గ్రామాల్లో పలుచోట్ల వరి పంట పొలాలు నీట మునిగాయి. మట్టి దిబ్బలు కొట్టుకొచ్చి పొలాల్లో పేరుకుపోవడంతో గిరిజన రైతులు తీవ్ర ఆవేదన వ్యక్తం చేశారు. రంగబయలు, బూసిపుట్టు పంచాయతీలకు వెళ్లే రహదారులు బురదమయంగా మారాయి. దీంతో వాహనాలు బురదలో కూరుకుపోవడంతో ప్రయాణికులు, వాహనదారులు తీవ్ర ఇబ్బందులు ఎదుర్కొన్నారు. ముసురు వాతావరణం కారణంగా పలు గ్రామాల గిరిజనులు ఇళ్లకే పరిమితమయ్యారు.

వేకువజాము నుంచే గ్రామాల్లో అభ్యర్థుల పర్యటన సాక్షి, పాడేరు: ఈ నెల 5న జరగనున్న జెడ్పీటీసీ, ఎంపీటీసీ ఎన్నికలకు సంబంధించి చివరి రోజు మంగళవారం వైఎస్సార్‌సీపీ ఎన్నికల ప్రచారం హోరెత్తింది. జిల్లాలోని 11 జెడ్పీటీసీ, 172 ఎంపీటీసీ స్థానాల్లో ఆ పార్టీ అభ్యర్థులంతా వేకువజాము నుంచే తమ పరిధిలోని గ్రామాలను సందర్శించి ఇంటింటా ప్రచారం నిర్వహించారు. వైఎస్సార్‌సీపీ అధినేత వై.ఎస్‌.జగన్‌మోహన్‌రెడ్డి నాయకత్వం, ‘రెండు ఓట్లు ఫ్యాన్‌ గుర్తుకే’ అన్న నినాదాలతో మన్యమంతా మార్మోగింది. మండల కేంద్రాలు, వారపు సంతలు, గ్రామాల్లో పార్టీ శ్రేణులు పెద్ద ఎత్తున ర్యాలీలు చేపట్టి ప్రచారాన్ని హోరెత్తించాయి. జగనన్న నాయకత్వంలోనే గిరిజనాభివృద్ధి : అరకు ఎంపీ గుమ్మా తనూజరాణి వైఎస్సార్‌సీపీ అధినేత, మాజీ ముఖ్యమంత్రి వై.ఎస్‌.జగన్‌మోహన్‌రెడ్డి నాయకత్వంలోనే గిరిజనుల అభివృద్ధి సాధ్యమని అరకు ఎంపీ డాక్టర్‌ గుమ్మా తనూజరాణి అన్నారు. హుకుంపేట మండలంలోని దుర్గం, ఓల్డా, రాప ప్రాంతాల్లో వైఎస్సార్‌సీపీ జెడ్పీటీసీ అభ్యర్థి ఒంటుబు ప్రియాంక, ఎంపీటీసీ అభ్యర్థులతో కలిసి మంగళవారం ఎన్నికల ప్రచారం నిర్వహించారు. ఇంటింటికీ వెళ్లి ఓటర్లను కలుసుకుని బ్యాలెట్‌ నమూనా కరపత్రాలను పంపిణీ చేశారు. బైక్‌ ర్యాలీలు నిర్వహిస్తూ ప్రచారాన్ని ఉధృతం చేశారు. ఈ సందర్భంగా ఎంపీ మాట్లాడుతూ జిల్లాలోని 11 జెడ్పీటీసీ, 172 ఎంపీటీసీ స్థానాల్లో సమర్థులైన అభ్యర్థులను వైఎస్సార్‌సీపీ బరిలో నిలిపిందన్నారు. అన్ని వర్గాల ఓటర్లు రెండు ఓట్లు ఫ్యాన్‌ గుర్తుపై వేసి తమ అభ్యర్థులను అధిక మెజారిటీతో గెలిపించాలని కోరారు. వైఎస్సార్‌సీపీ పాలనలో గిరిజనులకు ఎంతో మేలు జరిగిందని, గతంలో ఆ పార్టీ ప్రజాప్రతినిధుల హయాంలో గిరిజన గ్రామాలు అభివృద్ధి చెందాయని పేర్కొన్నారు. మరోసారి జెడ్పీ చైర్మన్‌ పదవితో పాటు జెడ్పీటీసీ, ఎంపీపీ స్థానాల్లో వైఎస్సార్‌సీపీ అభ్యర్థులు విజయం సాధిస్తే గిరిజన గ్రామాల సమగ్ర అభివృద్ధికి అవకాశం ఉంటుందన్నారు. కూటమి పార్టీల ప్రలోభాలకు, మాయమాటలకు ఓటర్లు మోసపోవద్దని, వైఎస్సార్‌సీపీ అభ్యర్థులను మరోసారి గెలిపించాలని పిలుపునిచ్చారు. ఈ కార్యక్రమంలో వైఎస్సార్‌సీపీ యువజన విభాగం నేత చెట్టి వినయ్‌, పార్టీ నాయకులు, కార్యకర్తలు పాల్గొన్నారు. వర్షంలోనూ జోరుగా ప్రచారం కొయ్యూరు: వర్షం కురుస్తున్నా లెక్కచేయకుండా కొయ్యూరు జెడ్పీటీసీ వైఎస్సార్‌సీపీ అభ్యర్థి, మాజీ ఎంపీ గొడ్డేటి మాధవి ఎన్నికల ప్రచారాన్ని ముమ్మరం చేశారు. ప్రచారానికి చివరి రోజైన మంగళవారం మండలంలోని కొమ్మిక, శరభన్నపాలెం, రావణాపల్లి మూడు సెగ్మెంట్లలో విస్తృతంగా పర్యటించారు. ప్రతి ఇంటికీ వెళ్లి ఫ్యాన్‌ గుర్తుకు ఓటు వేసి తనతో పాటు 14 మంది ఎంపీటీసీ అభ్యర్థులను గెలిపించాలని ఓటర్లను అభ్యర్థించారు. కూటమి పాలనలో నిత్యావసర వస్తువుల ధరలు పెరిగి సామాన్య ప్రజలు ఎదుర్కొంటున్న ఇబ్బందులను గుర్తించాలని కోరారు. ఈ నెల 5న జరిగే పోలింగ్‌లో ఫ్యాన్‌ గుర్తుకు ఓటు వేసి వైఎస్సార్‌సీపీ అభ్యర్థులను గెలిపించాలని విజ్ఞప్తి చేశారు. ఈ ప్రచారంలో రావణాపల్లి సెగ్మెంట్‌ అభ్యర్థి రాజులమ్మ, కొమ్మిక అభ్యర్థి లోవరాజు, శరభన్నపాలెం అభ్యర్థి రాజేశ్వరి పాల్గొన్నారు. ప్రచారంలో జోరు గత ఆరు రోజులుగా సాగిన ఎన్నికల ప్రచారంలో వైఎస్సార్‌సీపీ శ్రేణులు ఉత్సాహంగా పాల్గొన్నాయి. ఈ నెల 1న కాకరపాడు నుంచి కొయ్యూరు వరకు నిర్వహించిన భారీ బైక్‌ ర్యాలీ ప్రత్యేక ఆకర్షణగా నిలిచింది. రాష్ట్ర వైఎస్సార్‌సీపీ అధికార ప్రతినిధి శ్యామల కూటమి ప్రభుత్వంపై సంధించిన విమర్శనాస్త్రాలు పార్టీ శ్రేణుల్లో ఉత్సాహాన్ని నింపాయి. వైఎస్సార్‌సీపీతోనే అభివృద్ధి సాధ్యం : ముంచంగిపుట్టు జెడ్పీటీసీ అభ్యర్థి సుభద్ర ముంచంగిపుట్టు: గ్రామాల ప్రగతి వైఎస్సార్‌సీపీతోనే సాధ్యమవుతుందని మాజీ జెడ్పీ చైర్‌పర్సన్‌, ఆ పార్టీ జెడ్పీటీసీ అభ్యర్థి జల్లిపల్లి సుభద్ర అన్నారు. మంగళవారం మండలంలోని సుజనకోట పంచాయతీలో ఎంపీటీసీ అభ్యర్థి మజ్జి సుబ్బలక్ష్మితో కలిసి ఎన్నికల ప్రచారం నిర్వహించారు. ఫ్యాన్‌ గుర్తుపై ఓటు వేయాలని ఓటర్లను కోరారు. గ్రామస్తులతో కలిసి మత్స్యగెడ్డ ఒడ్డున ఉన్న గంగమ్మతల్లి ఆలయాన్ని సందర్శించి ప్రత్యేక పూజలు చేశారు. అనంతరం కించాయిపుట్టు పంచాయతీలోని పలు గ్రామాల్లో ఎంపీటీసీ అభ్యర్థి చికలమ్మతో కలిసి ప్రచారం నిర్వహించారు. ప్రజలకు మేలు చేసే వైఎస్సార్‌సీపీ అభ్యర్థులను గెలిపించాలని కోరుతూ కరపత్రాలు పంపిణీ చేశారు. బంగారుమెట్ట పంచాయతీ పరిధిలోని సరియాపల్లిలో ఎంపీటీసీ అభ్యర్థి జగన్నాథంతో కలిసి ఇంటింటికీ వెళ్లి ఫ్యాన్‌ గుర్తుపై ఓటు వేయాలని విజ్ఞప్తి చేశారు. ఈ సందర్భంగా సుభద్ర మాట్లాడుతూ పార్టీలకతీతంగా పేదలందరికీ సంక్షేమ పాలన అందాలంటే వైఎస్సార్‌సీపీని ఆదరించాలని కోరారు. మోసపూరిత హామీలతో ప్రజలను మభ్యపెట్టిన చంద్రబాబు ప్రభుత్వానికి స్థానిక సంస్థల ఎన్నికల్లో తగిన బుద్ధి చెప్పాలని అన్నారు. రోజురోజుకూ నిత్యావసర వస్తువుల ధరలు పెరుగుతుండటంతో సామాన్యుల జీవ నం భారంగా మారిందని పేర్కొన్నారు. ఈ నెల 5న జరిగే మండల, జిల్లా పరిషత్‌ ఎన్నికల్లో ఓటర్లు తమ రెండు ఓట్లను ఫ్యాన్‌ గుర్తుపై వేసి భారీ మెజారిటీతో గెలిపించాలని కోరారు. 14 ఎంపీటీసీ స్థానాలతో పాటు జెడ్పీటీసీ స్థానాన్ని గెలుచుకునేందుకు ప్రజలంతా సిద్ధంగా ఉన్నారని ఆశాభావం వ్యక్తం చేశారు. ఈ కార్యక్రమంలో వైఎస్సార్‌సీపీ మండల నాయకులు, కార్యకర్తలు అధిక సంఖ్యలో పాల్గొన్నారు.

గొలుగొండ: అలవిమాలిన హామీలిచ్చి ప్రజలకు మోసం చేయడమే కాకుండా నర్సీపట్నం నియోజకవర్గాన్ని స్పీకరు అయ్యన్నపాత్రుడు అభివృద్ధి చేశామని చెప్పడం విడ్డూరంగా ఉందని మాజీ ఎమ్మెల్యే పెట్ల ఉమాశంకర్‌ గణేష్‌ విమర్శించారు. మంగళవారం గొలుగొండలో ఆయన మాట్లాడుతూ సూపర్‌ సిక్స్‌ పథకాలు అమలు చేస్తామని 2024 కూటమి గెలిచిందని, అప్పటి నుంచి ఇప్పటి వరకు అమలు చేయకపోవడం వల్ల నర్సీపట్నం నియోజకవర్గ ప్రజలకు రూ. 990 కోట్లు ఉందన్నారు. పథకాల పేరుతో చంద్రబాబు సర్కార్‌ ప్రజలను అనేక ఇబ్బందులకు గురి చేస్తుందని ధ్వజమెత్తారు. నర్సీపట్నం ప్రాంతాన్ని రూ. 276 కోట్లతో అభివృద్ధి చేశామని ఇటీవల టీడీపీ నాయకులు డబ్బా కొట్టుకోవడం సిగ్గుచేటన్నారు. 2024 ఎన్నికలకు ముందే వైఎస్సార్‌సీపీ ప్రభుత్వంలో రూ.185 కోట్లు మంజూరు చేయించగా, రూ.109 కోట్లతో సగం అభివృద్ధి పనులు పూర్తి చేశామన్నారు. తమ ప్రభుత్వంలో మంజూరైన నిధులనూ కూటమి సర్కార్‌ ఖాతాలో వేసుకోవడం ప్రజలకు తెలుసునన్నారు. అక్రమంగా సంపాదించుకోవడం కోసం రూ.200 కోట్లతో ఎంపీ సీటు కొనుగోలు చేసుకున్నారని దుయ్యబట్టారు. స్పీకర్‌ అయ్యన్నపాత్రుడు నర్సీపట్నం ప్రజలకు బాకీ ఉన్న రూ. 990 కోట్లు తీసుకువచ్చి అప్పుడు ప్రగల్బాలు పలకాలన్నారు. గతంలో మంత్రి హోదాలో అయ్యన్న గొలుగొండ మండల ప్రజలకు అవసరమైన ఆరిల్లోవ రోడ్డు అనుమతులు తీసుకురాలేక పోయారని ఎద్దేవా చేశారు. ఎమ్మెల్యే హోదాలో తాను ఆరిల్లోవ రోడ్డు వేసి ప్రజల కష్టాలు తీర్చానన్నారు. వెన్నుపోటు పార్టీ అంటేనే తెలుగుదేశం పార్టీ అన్నారు. అప్పట్లో ఎన్టీఆర్‌ను ఇప్పుడు ప్రజలను వెన్నుపోటు పొడిచారని ఆరోపించారు. గొలుగొండ, నాతవరం, మాకవరపాలెం మండలాల్లో పోటీ చేసిన వైఎస్సార్‌సీపీ జెడ్పీటీసీ, ఎంపీటీసీ అభ్యర్థులను గెలిపించాలని కోరారు. కార్యక్రమంలో పార్టీ అధ్యక్షుడు కొరుప్రోలు పాణిశాంతారామ్‌, మాజీ జెడ్పీటీటీ సుర్ల గిరిబాబు, మాజీ ఎంపీపీ గజ్జలపు మణికుమారి, పార్టీ జిల్లా మహిళా విభాగం అధ్యక్షురాలు లోచల సుజాత, జెడ్పీటీసీ, ఎంపీటీసీ అభ్యర్థులు మాదాల ప్రవీణ్‌కుమార్‌, కసిపల్లి బుజ్జి, నాయకులు సత్యనారాయణ, నాయుడు తదితరులు పాల్గొన్నారు.

బుచ్చెయ్యపేట: మండలంలో పోలేపల్లి తాజా మాజీ ఎంపీటీసీ సభ్యుడు సీతా సన్యాసినాయుడు టీడీపీని వీడి వైఎస్సార్‌సీపీలో చేరారు. వైఎస్సార్‌సీపీ రీజనల్‌ కో ఆర్డినేటర్‌, మాజీ మంత్రి గుడివాడ అమర్‌నాథ్‌ సమక్షంలో మంగళవారం గ్రామానికి చెందిన 30 మంది పార్టీ తీర్థం పుచ్చుకున్నారు. సీతా వరలక్ష్మి, కస్పా కాలువ నీటి సంఘం మాజీ డైరెక్టర్‌ సీతా గౌరీనాయుడు కుమారుడు సీతా శ్రీను, ముత్తా శ్రీను, సీతా పెంటయ్య, పిట్ల మాణిక్యం తదితరులు తమ కుటుంబ సభ్యులతో కలిసి పార్టీలో చేరారు. వీరందరికి అమర్‌నాథ్‌ పార్టీ కండువాలు వేసి సాదరంగా ఆహ్వానించారు. మాజీ సీఎం వైఎస్‌ జగన్‌మోహన్‌రెడ్డి, మాజీ మంత్రి అమర్‌నాథ్‌ల నాయకత్వంలో వైఎస్సార్‌సీపీ అభ్యర్థుల విజయానికి కృషి చేస్తామని వారంతా తెలిపారు. ఎంపీపీ అభ్యర్థి దొండా రాంబాబు, వైఎస్సార్‌సీపీ మండలాధ్యక్షుడు జోగా కొండబాబు తదితరులు పాల్గొన్నారు.

బుచ్చెయ్యపేట: ఎన్నికల హామీలను నెరవేర్చని కూటమి ప్రభుత్వానికి స్థానిక ఎన్నికల్లో గుణపాఠం చెప్పాలని వైఎస్సార్‌సీపీ రీజనల్‌ కో ఆర్డినేటర్‌, మాజీ మంత్రి గుడివాడ అమర్‌నాథ్‌ పిలుపు నిచ్చారు. మంగళవారం ఆయన ఎంపీపీ దొండా రాంబాబు, జెడ్పీటీసీ అభ్యర్థి తరపున జోగా కొండబాబుతో పాటు రాజాం ఎంపీటీసీ అభ్యర్థి యన్నెంశెట్టి హైమావతి, పలు గ్రామాల ఎంపీటీసీ అభ్యర్థులకు మదతుగా ఎన్నికల ప్రచారం నిర్వహించారు. ఈ సందర్భంగా మాట్లాడుతూ 50 ఏళ్లు దాటిన బీసీ, ఎస్సీ, ఎస్టీలకు పింఛన్‌ ఇస్తామని, 18 ఏళ్లు దాటిన వారికి నెలకు రూ. 1,500, నిరుద్యోగ భృతి నెలకు రూ. 3 వేలు ఎవరికై నా ఇచ్చారా అని ప్రశ్నించారు. కూటమి ప్రభుత్వం వచ్చి రెండున్నరేళ్లలో కొత్తగా ఒక్క పింఛన్‌, ఇల్లు గాని ఇచ్చారా అని ప్రశ్నించారు. సంపద సృష్టిస్తానని, ధరలు తగ్గిస్తామని గొప్పలు చెప్పిన సీఎం చంద్రబాబునాయుడు, కూటమి నేతలు ఇక్కడ మైనింగ్‌ను కొల్లగొట్టడమే కాక నిత్యావసర వస్తువుల ధరలు విపరీతంగా పెంచి ప్రజల నడ్డి విరుస్తున్నారని ధ్వజమెత్తారు. ఫ్యాన్‌ గుర్తుపై ఓటేసి అన్ని గ్రామాల్లో జెడ్పీటీసీ, ఎంపీపీ, ఎంపీటీసీ అభ్యర్థులకు గెలిపించాలని కోరారు. మన జగనన్న ప్రభుత్వం వస్తే అన్ని పథకాలు మీ ఇళ్లకే వస్తాయన్నారు.

మరిపెడ రూరల్‌ : కొబ్బరి బొండాల మాటున పశువుల అక్రమ రవాణాకు పాల్పడుతున్న ముఠా గుట్టు రట్టు అయ్యింది. మరిపెడ పోలీసులు తనిఖీల్లో బయటపడింది. నంబర్‌ ప్లేట్‌ లేని టాటా ట్రాలీలో కొబ్బరి బొండాల కింద ఎనిమిది పశువులను కాళ్లు, మెడలకు తాళ్లతో కట్టేసి కదలలేని స్థితిలో తరలిస్తుండగా పోలీసులు పట్టుకున్నారు. ఈ ఘటనలో ముగ్గురు నిందితులపై కేసు నమోదు చేసి, వాహనాన్ని సీజ్‌ చేశారు. ఈ అమానుష ఘటన సోమవారం మహబూబాబాద్‌ జిల్లా మరిపెడ మండల కేంద్రంలోని చోటు చేసుకుంది. ఎస్‌ఐ గండ్రాతి సతీశ్‌ కథనం ప్రకారం.. మరిపెడ పోలీస్‌స్టేషన్‌ కానిస్టేబుళ్లు నరేష్‌, జి.శ్రీను రాత్రి పెట్రోలింగ్‌ నిర్వహిస్తుండగా అనుమానాస్పదంగా కనిపించిన టాటా ట్రాలీని ఆపి తనిఖీ చేశారు. కొబ్బరి బొండాల మాటను పరిశీలించగా ఆరు ఆవులు, రెండు కోడెగిత్తలు కలిపి మొత్తం ఎనిమిది పశువులు కనిపించాయి. వాటిని కాళ్లు, మెడలకు తాళ్లతో బంధించి అనుమానుషంగా తరలిస్తున్నట్టు గుర్తించారు. ఆంధ్రప్రదేశ్‌లోని అనకాపల్లి ప్రాంతానికి చెందిన గొర్ల శివ, యలమచిలీ శివ, బంగారి లచ్చన్న అదే ప్రాంతంలోని ఈ పశువులను కొబ్బరి బొండాల మాటున హైదరాబాద్‌లోని కబేళాలకు తరలిస్తున్నారు. బందీగా ఉన్న అక్రమ రవాణాదారుల చెర నుంచి ఎనిమిది పశువుల నుంచి విడిపించిన పోలీసులు పశువైద్యాధికారులతో మూగజీవాలకు చికిత్స అందించారు. పశువుల అక్రమ రవాణాకు ఉపయోగించిన టాటా ట్రాలీని సీజ్‌ చేసి ముగ్గురు నిందితులపై పశువుల అక్రమ రవాణా, జంతువుల పట్ల కూరత్వానికి సంబంధించిన చట్టాల కింద కేసులు నమోదు చేసి దర్యాప్తు చేస్తున్నట్టు ఎస్‌ఐ తెలిపారు.

సాక్షి, విశాఖపట్నం : జీవీఎంసీ ఎన్నికల్లో వైఎస్సార్‌సీపీ నుంచి 13 మంది కార్పొరేటర్ల అభ్యర్థులు విజయం సాధించారు. 6వ వార్డు నుంచి పి.హనుమంతురావు, 7వ వార్డు నుంచి పోతుల జాహ్నవి, 19వ వార్డు నుంచి మొల్లి లక్ష్మి, 42వ వార్డు నుంచి కోడిగుడ్ల పూర్ణిమ, 59వ వార్డు నుంచి అల్లు వెంకట సత్యశ్రీ, 65వ వార్డు నుంచి షేక్‌ జహీరున్నీషా, 76వ వార్డు నుంచి సోమాదుల సురేష్‌, 84వ వార్డు నుంచి గుడివాడ వెంకట సాయి అనూష, 92వ వార్డు నుంచి గొందేశి శ్రీదేవి, 94వ వార్డు నుంచి ధర్మాల రాధిక, 99వ వార్డు నుంచి కోమటి శ్రీనివాసరావు, 104వ వార్డు నుంచి మద్ది శ్రీనివాస్‌, 119వ వార్డు నుంచి దాసరి అన్నపూర్ణ విజయం సాధించారు. వీరందరికీ ఎన్నికల రిటర్నింగ్‌ అధికారి డిక్లరేషన్‌ ఫారాలు అందజేశారు.

మన్యంలో భారీ వర్షంసాక్షి, పాడేరు: మురసు తుపాన్‌ ప్రభావంతో మన్యంలో సోమవారం భారీ వర్షం కురిసింది. తెల్లవారుజాము నుంచే ప్రారంభమైన వర్షం జిల్లా కేంద్రం పాడేరుతో పాటు పలు మండలాల్లో జనజీవనాన్ని అస్తవ్యస్తం చేసింది. ఉదయం 8 నుంచి 10 గంటల వరకు పలుచోట్ల కుండపోత వర్షం కురిసింది. దీంతో రహదారులపై వర్షపు నీరు ప్రవహించి రాకపోకలకు అంతరాయం ఏర్పడింది. ఇప్పటికే అర్నబ్‌ తుపాను కారణంగా పంటలు తీవ్రంగా దెబ్బతినడంతో గిరిజన రైతులు ఆందోళన చెందుతున్నారు. ఆ నష్టం నుంచి కోలుకోకముందే మురసు తుపాను ప్రభావంతో మళ్లీ భారీ వర్షాలు కురుస్తుండటంతో కలవరపడుతున్నారు. మరోవైపు కొండవాగులు, గెడ్డల్లో వరద ఉధృతి పెరిగింది. ఏజెన్సీలోని ప్రధాన మత్స్యగెడ్డ ఉధృతంగా ప్రవహిస్తోంది. గంపరాయి బ్రిడ్జి వద్ద వరద ప్రవాహం పెరగడంతో పరిసర ప్రాంతాల ప్రజలు అప్రమత్తంగా ఉండాల్సిన పరిస్థితి నెలకొంది. జోలాపుట్‌ రిజర్వాయర్‌కు కూడా ఇన్‌ఫ్లో పెరుగుతోంది.

పెదబయలు: పైకి పొత్తు.. క్షేత్రస్థాయిలో ఎవరికి వారే అన్నట్లుగా పెదబయలు మండలంలో కూటమి పార్టీల పరిస్థితి తయారైంది. స్థానిక సంస్థల ఎన్నికల్లో జెడ్పీటీసీ, ఎంపీటీసీ స్థానాల సీట్ల పంపకాలతో మొదలైన విభేదాలు ఇంకా సమసిపోలేదు. నామినేషన్ల ఉపసంహరణ గడువు ముగిసినా మూడు పార్టీల మధ్య సర్దుబాటు కొలిక్కి రాకపోవడంతో టీడీపీ, జనసేన, బీజేపీ అభ్యర్థులు వేర్వేరుగా బరిలో నిలిచారు. గ్రామస్థాయిలో ఎవరికి వారే ప్రచారం నిర్వహిస్తున్నారు. ర్యాలీలో బీజేపీకి దూరం సోమవారం పెదబయలు వారపు సంతలో నిర్వహించిన కూటమి ర్యాలీ ఈ విభేదాలను బహిర్గతం చేసింది. టీడీపీ, జనసేన నాయకులు తమ పార్టీల జెండాలతో ర్యాలీలో పాల్గొనగా.. ఏడు ఎంపీటీసీ స్థానాల్లో పోటీ చేస్తున్న బీజేపీ అభ్యర్థులు, మండల పార్టీ నాయకులు మాత్రం పూర్తిగా దూరంగా ఉన్నారు. ఎవరి ఓట్లు ఎవరికి? పెదబయలు మండలంలో టీడీపీ జెడ్పీటీసీతో పాటు 11 ఎంపీటీసీ స్థానాల్లో, బీజేపీ ఏడు ఎంపీటీసీ స్థానాల్లో, జనసేన ఐదు ఎంపీటీసీ స్థానాల్లో పోటీ చేస్తున్నాయి. దీంతో ఎంపీటీసీ ఎన్నికల్లో తమ అభ్యర్థులకు ఓటు వేయాలని కోరుతూనే జెడ్పీటీసీ ఓటును మాత్రం ఓటర్ల ఇష్టానికే వదిలేస్తున్న పరిస్థితి కనిపిస్తోంది. ముఖ్యంగా బీజేపీ పోటీ చేస్తున్న ఏడు ఎంపీటీసీ స్థానాల్లో ఆ పార్టీ అభ్యర్థులకు లభించే ఓట్లు జెడ్పీటీసీ ఎన్నికల్లో టీడీపీ అభ్యర్థికి బదిలీ అవుతాయా? అన్నది అనుమానమేనన్న చర్చ నడుస్తోంది. బీజేపీ పోటీ చేస్తున్న ఏడు ఎంపీటీసీ స్థానాల పరిధిలోని జెడ్పీటీసీ ఓట్లు ఎటువైపు మొగ్గుతాయన్నది చర్చనీయాంశంగా మారింది.

పాడేరు: ఈ నెల 5న జరిగే స్థానిక సంస్థల ఎన్నికల్లో వైఎస్సార్‌సీపీ సత్తా చాటుతుందని, జిల్లాలో ఎంపీపీ స్థానాలతో పాటు జెడ్పీ పీఠాన్ని కై వసం చేసుకుంటామని వైఎస్సార్‌సీపీ జిల్లా అధ్యక్షుడు, పాడేరు ఎమ్మెల్యే మత్స్యరాస విశ్వేశ్వరరాజు ధీమా వ్యక్తం చేశారు. సోమవారం పాడేరులోని తన నివాసంలో అరకు ఎంపీ డాక్టర్‌ గుమ్మా తనూజరాణి, అరకు ఎమ్మెల్యే రేగం మత్స్యలింగం, ఎమ్మెల్సీ కుంభా రవిబాబుతో కలిసి ఆయన విలేకరులతో మాట్లాడారు. వైఎస్సార్‌సీపీ తరఫున బీ–ఫారాలు పొందిన వారే పార్టీ అధికారిక అభ్యర్థులని స్పష్టం చేశారు. టికెట్లు దక్కని కొందరు పార్టీ నిర్ణయానికి వ్యతిరేకంగా నామినేషన్లు వేసి పోటీలో కొనసాగుతున్నారని తెలిపారు. పార్టీకి నష్టం కలిగించేలా వ్యవహరించే వారిపై క్రమశిక్షణ చర్యలు తప్పవని హెచ్చరించారు. పార్టీ అభ్యర్థుల విజయానికి ప్రతి కార్యకర్త సమష్టిగా కృషి చేయాలని పిలుపునిచ్చారు. పార్టీ బలోపేతానికి, అభ్యర్థుల గెలుపునకు కృషి చేసిన ప్రతి ఒక్కరికీ పార్టీ అధికారంలోకి వచ్చిన వెంటనే సముచిత స్థానం కల్పిస్తామని హామీ ఇచ్చారు. రానున్నది వైఎస్సార్‌సీపీ కాలమేనని, కార్యకర్తలు ఆత్మవిశ్వాసంతో పనిచేయాలని సూచించారు. ఈ సమావేశంలో మాజీ మంత్రి పసుపులేటి బాలరాజు, వైఎస్సార్‌సీపీ అరకు పార్లమెంట్‌ నియోజకవర్గ పరిశీలకుడు చింతలపూడి వెంకటరామయ్య, మాజీ ఎమ్మెల్యేలు కొట్టగుళ్లి భాగ్యలక్ష్మి, చెట్టి ఫాల్గుణ, శోభా హైమవతి, పాడేరు నియోజకవర్గ పరిశీలకుడు ఏడువాక సత్యారావు తదితరులు పాల్గొన్నారు.

ఐటీడీఏ పీవో ఆదిత్యవర్మ కొయ్యూరు: పోలింగ్‌ కేంద్రాల వద్ద ఓటర్లకు ఇబ్బందులు లేకుండా అన్ని రకాల వసతులు కల్పిస్తామని ఐటీడీఏ పీవో ఆదిత్యవర్మ స్పష్టం చేశారు. ఆయన సోమవారం రావణాపల్లి, ఎం.మాకవరం పోలింగ్‌ కేంద్రాలను పరిశీలించారు. ఈ మేరకు ఆయన వసతుల కల్పనకు ఎలాంటి చర్యలు తీసుకుంటున్నదీ అధికారులను అడిగి తెలుసుకున్నారు. తాగునీరు, విద్యుత్‌, వృద్ధులు ఓటు వేసేందుకు వీలుగా ర్యాంప్‌లను ఏర్పాటు చేయాలని ఆర్‌వో నరసింహారావు, తహసీల్దారు ప్రసాదరావును పీవో ఆదేశించారు. అనంతరం ఆయన మాట్లాడుతూ పోలింగ్‌ ప్రశాంతంగా నిర్వహించేందుకు వీలుగా చర్యలు తీసుకుంటున్నామన్నారు. ప్రజలు నిర్భయంగా వచ్చి ఓటు వేయవచ్చన్నారు. అనంతరం అయ్యప్ప మాలధారణలో ఉన్న పీవో.. సింగవరం షిర్డీసాయిబాబా ఆలయంలో పూజలు నిర్వహించి అక్కడే భిక్ష చేశారు.

సాక్షి, పాడేరు: గత 80 ఏళ్లుగా ఆంధ్రప్రదేశ్‌ భూభాగంలో నివాసం ఉంటున్న తమను ఒడిశా అధికారులు వేధిస్తున్నారని పెదబయలు మండలం ఇంజరి పంచాయతీ పరిధిలోని జమదంగి ఆదివాసీలు ఆందోళన వ్యక్తం చేశారు. ఒడిశా కలెక్టర్‌, ఎస్పీ తమ గ్రామానికి వచ్చి ఒడిశాలో కలవాలని, ఆంధ్రప్రదేశ్‌లో ఓట్లు వేయకూడదని హెచ్చరిస్తూ భయాందోళనలకు గురిచేస్తున్నారని ఆరోపించారు. ఈ నేపథ్యంలో సోమవారం జమదంగి గ్రామానికి చెందిన గిరిజనులంతా పాడేరు కలెక్టరేట్‌కు చేరుకుని అధికారులకు తమ సమస్యలను వివరించారు. దశాబ్దాలుగా ఏపీ పరిధిలోనే నివాసం ఉంటున్న తమపై ఒడిశా అధికారులు ఒత్తిడి తీసుకురావడం సరికాదన్నారు. తమకు ఒడిశా అధికారుల నుంచి రక్షణ కల్పించాలని, గతంలో మాదిరిగానే ఏపీలోని ఇంజరి పంచాయతీ పరిధిలో కొనసాగించాలని అధికారులను కోరారు.

పాడేరు: ఈ నెల 5న నిర్వహించనున్న జెడ్పీటీసీ, ఎంపీటీసీ ఎన్నికలను ప్రశాంత వాతావరణంలో నిర్వహించేందుకు అన్ని ఏర్పాట్లు చేపట్టినట్లు కలెక్టర్‌ నిశాంతి తెలిపారు. సోమవారం సాయంత్రం పాడేరు ప్రభుత్వ జూనియర్‌ కళాశాల మైదానం నుంచి జిల్లా ఎస్పీ అమిత్‌బర్దర్‌, పోలీసు అధికారులు, సిబ్బందితో కలిసి ఫ్లాగ్‌మార్చ్‌ నిర్వహించారు. ఈ సందర్భంగా కలెక్టర్‌ మాట్లాడుతూ ఎన్నికల్లో శాంతిభద్రతలకు విఘాతం కలగకుండా ముందస్తు భద్రతా చర్యలు చేపట్టినట్లు తెలిపారు. ఓటర్లు ఎలాంటి భయాందోళనలకు గురికాకుండా స్వేచ్ఛగా తమ ఓటు హక్కును వినియోగించుకునేలా భరోసా కల్పించేందుకే ఫ్లాగ్‌మార్చ్‌ నిర్వహించినట్లు చెప్పారు. ఎన్నికలను నిష్పక్షపాతంగా, శాంతియుత వాతావరణంలో నిర్వహించేందుకు జిల్లా యంత్రాంగం, పోలీసు శాఖ సమన్వయంతో పనిచేస్తున్నాయన్నారు. రాజకీయ పార్టీల అభ్యర్థులు ఎన్నికల ప్రవర్తనా నియమావళిని తప్పనిసరిగా పాటించాలని సూచించారు. ఈ కార్యక్రమంలో జిల్లా అదనపు ఎస్పీ వై.శృతి, పాడేరు డీఎస్పీ రాజసింహారెడ్డి, పోలీసు అధికారులు, సిబ్బంది పాల్గొన్నారు.

సాక్షి, పాడేరు: ఎన్నికల కోడ్‌ అమలులో ఉన్నప్పటికీ ప్రభుత్వ ప్రచార చిత్రాల్లో సీఎం, మంత్రుల ఫొటోలు కొనసాగుతున్న విషయంపై ‘సాక్షి’లో సోమవారం ప్రచురితమైన కథనానికి జిల్లా ఎన్నికల యంత్రాంగం స్పందించింది. సంబంధిత అధికారులు హుటాహుటిన చర్యలు చేపట్టారు. ఎయిడ్స్‌ కంట్రోల్‌ సొసైటీ ప్రచార వాహనంపై ఉన్న పోస్టర్‌లో సీఎం చంద్రబాబు, వైద్య ఆరోగ్యశాఖ మంత్రి ఫొటోలతో పాటు, చింతపల్లి వ్యవసాయ మార్కెట్‌ కమిటీ కార్యాలయం వద్ద ప్రభుత్వ పథకాల ప్రచార పోస్టర్‌లో ఉన్న సీఎం, వ్యవసాయశాఖ మంత్రి ఫొటోలపై స్టిక్కర్లు అంటించారు. ఈ మేరకు జిల్లా ఎన్నికల అధికారులకు వివరణ లేఖలు కూడా పంపించారు.

కొయ్యూరు: చింతాలమ్మ ఘాట్‌రోడ్డులో సోమవారం ఓ అడవిదున్న హల్‌చల్‌ చేసింది. రహదారిపై సంచరిస్తున్న అడవిదున్నను చూసి అటుగా వెళ్తున్న వాహనదారులు ఒక్కసారిగా భయాందోళనకు గురయ్యారు. బస్సులు, ఇతర వాహనాల్లో ప్రయాణిస్తున్న వారు దానిని చూసి అప్రమత్తమయ్యారు. సాధారణ గేదెలతో పోలిస్తే అడవిదున్న నుదుటిపై, కాళ్ల కింది భాగంలో తెల్లటి గుర్తులు ఉండటంతో దానిని సులభంగా గుర్తించారు. కొద్దిసేపు రోడ్డుపై సంచరించిన అడవిదున్న అనంతరం తిరిగి అడవిలోకి వెళ్లిపోవడంతో వాహనదారులు ఊపిరి పీల్చుకున్నారు.

సాక్షి, పాడేరు: స్థానిక సంస్థల ఎన్నికల వేళ వైఎస్సార్‌సీపీకి వలసలు పెరుగుతున్నాయి. అరకులోయ, కొయ్యూరు మండలాల్లో టీడీపీకి చెందిన కుటుంబాలతో పాటు స్వతంత్ర అభ్యర్థి సైతం వైఎస్సార్‌సీపీలో చేరారు. ఆయా ప్రాంతాల్లో పార్టీ నేతల సమక్షంలో కండువాలు కప్పుకుని వైఎస్సార్‌సీపీకి మద్దతు ప్రకటించారు. కోడిపుంజువలసలో 10 కుటుంబాలు అరకులోయ మండలం సిరగం పంచాయతీ కోడిపుంజువలసకు చెందిన టీడీపీ నేత కొర్రా భీమన్నతో పాటు 10 కుటుంబాల గిరిజనులు సోమవారం వైఎస్సార్‌సీపీలో చేరారు. వైఎస్సార్‌సీపీ అధినేత వైఎస్‌ జగన్‌మోహన్‌రెడ్డి నాయకత్వాన్ని బలపరుస్తూ ఎస్టీ సెల్‌ రాష్ట్ర ప్రధాన కార్యదర్శి పాంగి చిన్నారావు సమక్షంలో పార్టీలో చేరారు. వారందరికీ చిన్నారావు కండువాలు వేసి సాదరంగా ఆహ్వానించారు. ఈ నెల 5న జరిగే స్థానిక ఎన్నికల్లో అరకు జెడ్పీటీసీ అభ్యర్థి కమ్మిడి అశోక్‌, ఎంపీటీసీ అభ్యర్థుల విజయానికి కృషి చేస్తామని వారు ప్రకటించారు. ఈ కార్యక్రమంలో ఎంపీటీసీ అభ్యర్థి నాందెల శుక్రయ్య, మాజీ సర్పంచ్‌లు గుడివాడ ప్రకాశరావు, కె.జీనబందు, కిల్లో జగన్‌కుమార్‌ తదితరులు పాల్గొన్నారు. డౌనూరులో 45 కుటుంబాలు కొయ్యూరు: మండలంలోని డౌనూరు పంచాయతీ జోడుమామిడి, నిమ్మలపాలెం, తులబాలగెడ్డ గ్రామాలకు చెందిన 45 కుటుంబాలు వైఎస్సార్‌సీపీలో చేరాయి. అరకు జెడ్పీటీసీ అభ్యర్థి గొడ్డేటి మాధవి సమక్షంలో వారు పార్టీలో చేరారు.పార్టీ బలోపేతానికి ప్రతి ఒక్కరూ కృషి చేయాలని, పార్టీ బలపరిచిన అభ్యర్థుల విజయానికి పనిచేయాలని మాధవి కోరారు. స్వతంత్ర అభ్యర్థి చేరిక చింతలపూడి ఎంపీటీసీ సెగ్మెంట్‌ నుంచి స్వతంత్ర అభ్యర్థిగా పోటీ చేస్తున్న లీలావతి సోమవారం జెడ్పీటీసీ అభ్యర్థి గొడ్డేటి మాధవి ఆధ్వర్యంలో వైఎస్సార్‌సీపీలో చేరారు. ఆమెకు మాధవి పార్టీ కండువా వేసి సాదరంగా ఆహ్వానించారు. వైఎస్‌ జగన్‌మోహన్‌రెడ్డి ముఖ్యమంత్రిగా ఉన్న సమయంలో అమలు చేసిన సంక్షేమ పథకాలు, పార్టీ సిద్ధాంతాలు నచ్చి వైఎస్సార్‌సీపీలో చేరినట్లు లీలావతి తెలిపారు. పార్టీ బలోపేతానికి కృషి చేస్తానన్నారు. శరభన్నపాలెంలో ప్రచార హోరు మాధవి పెదమాకవరం, శరభన్నపాలెం సెగ్మెంట్లలో ఎన్నికల ప్రచారం నిర్వహించారు. ఈ సందర్భంగా భారీ బైక్‌ ర్యాలీ చేపట్టారు. రాష్ట్ర అధికార ప్రతినిధి నాగ మల్లేశ్వరి పాల్గొని, స్థానిక ఎన్నికల్లో టీడీపీ పాల్పడుతున్న హింసాకాండను ప్రజలకు వివరించారు. టీడీపీకి ఎందుకు ఓటు వేయకూడదో తెలియజేశారు. కొమ్మికలోనూ వైఎస్సార్‌సీపీ నేతలు భారీ బైక్‌ ర్యాలీ నిర్వహించారు.

ముంచంగిపుట్టు: స్థానిక సంస్థల ఎన్నికల నేపథ్యంలో ఆంధ్ర–ఒడిశా సరిహద్దు ప్రాంతమైన ముంచంగిపుట్టు మండల కేంద్రంలోని చెక్‌పోస్ట్‌ వద్ద సోమవారం పోలీసులు, రెవెన్యూ అధికారులు విస్తృత తనిఖీలు చేపట్టారు. రెండు రాష్ట్రాల మధ్య రాకపోకలు సాగించే వాహనాలపై ప్రత్యేక నిఘా ఏర్పాటు చేశారు. ప్రయాణికుల బ్యాగులు, లగేజీలను క్షుణ్ణంగా పరిశీలించిన అనంతరం అనుమతిస్తున్నారు. ఎన్నికల నియమావళికి అనుగుణంగా తనిఖీలు నిర్వహిస్తూ అపరిచితులు, అనుమానితుల వివరాలను సేకరిస్తున్నారు. ఎన్నికలు ప్రశాంతంగా జరిగేలా అధికారులు నిరంతరం అప్రమత్తంగా వ్యవహరిస్తున్నారు.

బియ్యం కోసం గిరిజనుల బేజారు ఎండీయూ వాహనాల రద్దుతో కష్టాలు 3 నుంచి 15 కిలోమీటర్ల దూరంలో రేషన్‌ డిపోలు కిలోమీటర్ల దూరం నడిచి వెళ్లి.. బియ్యం మోత కొన్ని డిపోలు తెరుచుకోక లబ్ధిదారుల ఎదురుచూపులుపాడేరు పాతబస్టాండ్‌ వద్ద తెరుచుకోని ప్రధాన డీఆర్‌ డిపోసాక్షి, పాడేరు: గిరిజనులకు రేషన్‌ బియ్యం అందుకోవడం కష్టంగా మారింది. గతంలో ఇంటి వద్దకే వచ్చి నిత్యావసర సరుకులు పంపిణీ చేసిన ఎండీయూ వాహనాల వ్యవస్థ రద్దు కావడంతో మళ్లీ పాత కష్టాలు మొదలయ్యాయి. ప్రతి నెల రేషన్‌ కోసం గ్రామాల నుంచి డిపోలకు కిలోమీటర్ల దూరం నడిచి వెళ్లడం.. గంటల తరబడి క్యూలైన్లలో నిరీక్షించడం.. బియ్యం తీసుకున్న అనంతరం వాటిని తిరిగి గ్రామాలకు మోసుకురావడం గిరిజనులకు భారంగా మారింది. జిల్లా కేంద్రం పాడేరుతో పాటు మారుమూల ప్రాంతాల్లోనూ ఇదే పరిస్థితి నెలకొంది. మరోవైపు నెల ప్రారంభమై రెండు రోజులవుతున్నా పలు డీఆర్‌ డిపోలు తెరుచుకోకపోవడంతో కార్డుదారులు ఇబ్బందులు పడుతున్నారు. తెరుచుకున్న కొన్ని డిపోల వద్ద రద్దీతో గంటల తరబడి వేచి ఉండాల్సి వస్తోంది. ముఖ్యంగా డిపోలకు దూరంగా ఉన్న గ్రామాల ప్రజల అవస్థలు వర్ణనాతీతంగా ఉన్నాయి. ఒక్కో డిపో పరిధిలో 15 గ్రామాలు

సాక్షి, పాడేరు: స్థానిక సంస్థల ఎన్నికల పోలింగ్‌కు సమయం దగ్గరపడుతుండటంతో గిరిజన గ్రామాల్లో ఓటరు స్లిప్‌ల సందడి నెలకొంది. ఈ నెల 5న జరిగే ఎన్నికల్లో ఓటు హక్కు వినియోగించుకునేందుకు ఓటర్లు సిద్ధమవుతున్నారు. ఎన్నికల కమిషన్‌, జిల్లా ఎన్నికల అధికారి, కలెక్టర్‌ నిశాంతి ఆదేశాల మేరకు జిల్లా వ్యాప్తంగా ఓటరు స్లిప్‌ల పంపిణీ చేపట్టారు. వీఆర్‌వోలు, బీఎల్‌వోలతో పాటు ఇతర సిబ్బంది గ్రామాలను సందర్శించి ఓటరు జాబితా ప్రకారం స్లిప్‌లను అందజేస్తున్నారు. జిల్లాలోని 11 మండలాల పరిధిలో 11 జెడ్పీటీసీ, 172 ఎంపీటీసీ స్థానాలకు ఎన్నికలు జరగనున్నాయి. మొత్తం 4,98,467 మంది ఓటర్లు తమ ఓటు హక్కును వినియోగించుకోనున్నారు. ఓటర్లందరికీ స్లిప్‌లు అందేలా ఎన్నికల యంత్రాంగం చర్యలు చేపట్టింది. దీంతో గ్రామాల్లో ఎన్నికల సందడి కనిపిస్తోంది.

పెదబయలు: ఎన్నికల కోడ్‌ అమలులో ఉన్నప్పటికీ నిబంధనల ఉల్లంఘన జరుగుతున్నా అధికారులు పట్టించుకోవడం లేదనే విమర్శలు వ్యక్తమవుతున్నాయి. సోమవారం పెదబయలు వారపు సంతలో టీడీపీ, జనసేన కూటమి నిర్వహించిన ఎన్నికల ప్రచార ర్యాలీలో ప్రభుత్వ విధుల్లో ఉన్నట్లు తెలిపే ‘ఆన్‌ గవర్నమెంట్‌ డ్యూటీ’స్టిక్కర్‌ కలిగిన ఇనోవా వాహనం పాల్గొనడం చర్చనీయాంశంగా మారింది. ఏపీ 31 టీఎన్‌ 2859 నంబరు కలిగిన టయోటా ఇనోవాకు టీడీపీ జెండా కట్టి ప్రచార ర్యాలీలో తిప్పారు. వాహనం వెనుక భాగంలో ప్రభుత్వ విధుల్లో ఉన్నట్లు తెలిపే స్టిక్కర్‌ స్పష్టంగా కనిపిస్తున్నప్పటికీ ఎన్నికల ప్రచారానికి ఎలా వినియోగించారనే ప్రశ్నలు తలెత్తుతున్నాయి. ప్రభుత్వ లేదా అద్దె వాహనాలను ఎన్నికల ప్రచారానికి వినియోగించడంపై నిబంధనలు ఆంక్షలు విధిస్తున్నాయి. ఈ నేపథ్యంలో సంబంధిత వాహనంపై ఎన్నికల అధికారులు విచారణ జరిపి చర్యలు తీసుకోవాలని స్థానికులు కోరుతున్నారు.

గత వైఎస్సార్‌సీపీ ప్రభుత్వ హయాంలో ఎండీయూ వాహనాల ద్వారా గ్రామాల్లో ఇంటింటికీ బియ్యం, ఇతర నిత్యావసర సరుకులు పంపిణీ చేసేవారు. దీంతో గిరిజనులు ఎక్కడికీ వెళ్లాల్సిన అవసరం లేకుండానే ఇంటి వద్ద సరుకులు పొందేవారు. వృద్ధులు, మహిళలు, మారుమూల గ్రామాల ప్రజలకు ఈ విధానం ఎంతో ఉపయుక్తంగా ఉండేది. అయితే కూటమి ప్రభుత్వం అధికారంలోకి వచ్చిన తరువాత ఎండీయూ వాహనాల పంపిణీ వ్యవస్థను రద్దు చేసి తిరిగి డీఆర్‌ డిపోల ద్వారా సరుకులు అందించే విధానాన్ని అమలు చేస్తోంది. దీంతో గిరిజనులు మళ్లీ రేషన్‌ కోసం డిపోల చుట్టూ తిరగాల్సిన పరిస్థితి ఏర్పడింది. గంటల తరబడి నిరీక్షించి, బియ్యం మూటలను తలపై మోసుకుంటూ ఇళ్లకు చేరుతున్నారు. డిపోలకు దూరంగా ఉన్న గ్రామాల ప్రజలకు ఈ కష్టాలు మరింత ఎక్కువయ్యాయి.

ఎండీయూ వాహనాల ద్వారా ఇంటింటికీ బియ్యం పంపిణీ చేసే విధానాన్ని రద్దు చేయడంతో గిరిజనులు తీవ్ర ఇబ్బందులు పడుతున్నారు. ప్రతి నెల రేషన్‌ కోసం డిపోల వద్దకు వెళ్లాల్సి వస్తోంది. కొన్ని చోట్ల డిపోలు సకాలంలో తెరవకపోవడంతో మొదటి వారంలోనే బియ్యం పొందడం కష్టంగా మారింది. ప్రభుత్వం ఎండీయూ వాహనాలతో పంపిణీని పునరుద్ధరించాలి. లేనిపక్షంలో మారుమూల గ్రామాల ప్రజల ఇబ్బందులను దృష్టిలో ఉంచుకు ని కొత్తగా డీఆర్‌ డిపోలను ఏర్పాటు చేయాలి. –రంధి చిన్నయ్య, గిరిజన ప్రజా సంఘం నేత, గుత్తులపుట్టు

యలమంచిలి రూరల్‌ : యలమంచిలి మున్సిపల్‌ ఎన్నికల ఓట్ల లెక్కింపు సందర్భంగా లెక్కింపు కేంద్రం గురప్ప కల్యాణ మండపం వద్ద పటిష్ట బందోబస్తు ఏర్పాటు చేసినట్టు పరవాడ డీఎస్పీ బి.మోహన్‌రావు సోమవారం రాత్రి తెలిపారు. లెక్కింపు కేంద్రం పరిసరాల్లో మంగళవారం ఉదయం 6 గంటల నుంచి 163 బీఎన్‌ఎస్‌ఎస్‌(144 సెక్షన్‌), 30 పోలీస్‌ యాక్ట్స్‌’ అమలులో ఉంటుందని తెలిపారు. ప్రజలు గుంపులు,గుంపులుగా తిరగడానికి అనుమతి లేదని పేర్కొన్నారు. అనవసరంగా బయట తిరగవద్దన్నారు. ముఖ్యంగా ఎన్నికల్లో గెలుపొందిన నాయకులు విజయోత్సవ ర్యాలీలు, బాణసంచా కాల్చడానికి అనుమతి లేదన్నారు. ఓట్ల లెక్కింపు పూర్తయ్యేవరకు పట్టణంలోని అంతర్గత రహదారులను ప్రజలు వినియోగించుకోవాలని సూచించారు. శాంతి భధ్రతలకు విఘాతం కలిగించే వారిపై చట్ట ప్రకారం చర్యలు తీసుకుంటామని స్పష్టం చేశారు.

బుచ్చెయ్యపేట : కూటమి ప్రభుత్వం చెబుతున్న మోసపూరిత హామీలను నమ్మి ప్రజలు మోసపోవద్దని మాజీ మంత్రులు కురసాల కన్నబాబు, గుడివాడ అమర్‌నాథ్‌లు కోరారు. స్థానిక ఎన్నికల్లో భాగంగా సోమవారం సాయంత్రం వడ్డాది వచ్చారు. ఎంపీపీ అభ్యర్థి దొండా రాంబాబు, జెడ్పీటీసీ అభ్యర్థి జోగా వరలక్ష్మితో పాటు మండలంలో ఉన్న 19 ఎంపీటీసీ స్థానాల్లో పోటీ చేస్తున్న వైఎస్సార్‌సీపీ అభ్యర్ధులను గెలిపించాలని ప్రజలను కోరారు. జగన్‌ అంటే ప్రజలకు నమ్మకం అని.. ఇచ్చిన మాట నిలబెట్టకోవడంలో జగన్‌ ముందుంటారన్నారు. గత ఎన్నికల్లో గెలిచి ఇచ్చిన హామీలన్ని నెరవేర్చడమే కాక ఇవ్వని హామీలను అమలు చేసి ప్రజల గుండెల్లో గూడు కట్టుకున్నారన్నారు. చంద్రబాబు ఎన్నికల ముందు సూపర్‌ సిక్స్‌ హామీలిచ్చి అధికారంలోకి వచ్చి రెండున్నరేళ్‌లైనా ఇచ్చిన సూపర్‌ సిక్స్‌ హామీలను నెరవేర్చకుండా అన్ని రంగాల ప్రజల్ని మోసం చేశారన్నారు. అందుకే ప్రజలకు జగన్‌ అంటే నమ్మకం, చంద్రబాబు అంటే అమ్మకం అని తెలిసిపోయిందన్నారు. ఎన్నికల్లో సంపద సృస్టిస్తానని, ధరలు తగ్గిస్తామన్న చంద్రబాబు ఇప్పుడు సంపదలు తరలిపోగా అన్ని రకాల వస్తువుల ధరలు పెంచి ప్రజల నడ్డి విరుస్తున్నారన్నారు. కొత్తగా ఒక్క పింఛన్‌ గాని,ఇల్లు గాని మంజూరు చేశారా అని ప్రశ్నించారు. జగనన్న ఇచ్చిన పింఛన్లు, ఇళ్లు తప్ప కొత్తగా చేసింది ఏమీ లేదన్నారు. ప్రభుత్వంపై ఉన్న కోపాన్ని స్ధానిక ఎన్నికల్లో ప్రజలు చూపడానికి సిద్ధంగా ఉన్నారన్నారు. కూటమి నేతలకు స్ధానిక ఎన్నికల్లో ఓటు అడిగే హక్కు లేదన్నారు. వడ్డాది–1 పోటీ అభ్యర్ధి నాలం మంగ ఎన్నికల ప్రచారంలో భాగంగా మాజీ మంత్రులు కన్నబాబు, అమర్‌నాఽథ్‌తో కలసి ప్రచారం నిర్వహిస్తూ బజ్జీ కొట్టు వద్ద బజ్జీలు వేసి ఓటర్లను ఆకట్టుకున్నారు. మండల పార్టీ అధ్యక్షుడు జోగా కొండబాబు, ఎంపీటీసీ పోటీ అభ్యర్థి దొండా నారాయణమూర్తి, నాయకులు కోవెల జనర్ధనరావు, అడపా శ్రీను, గుమ్మిడి ప్రసాద్‌, సయ్యపురెడ్డి కొండబాబు, కోరుకొండ రమణ, బి. వరలక్ష్మి, శంకర్రావు, మనోహర్‌, కేబుల్‌ ప్రసాద్‌, కిషోర్‌ తదితరులు పాల్గొన్నారు.

నర్సీపట్నం: స్థానిక సంస్థల ఎన్నికల్లో టీడీపీకి ఓటు వేసి మరోసారి మోసపోవద్దని మాజీ ఎమ్మెల్యే పెట్ల ఉమాశంకర్‌ గణేష్‌ కోరారు. మండలంలోని లక్ష్మీపురంలో వైఎస్సార్‌సీపీ ఎంపీపీ అభ్యర్థి శానాపతి దుర్గ, పార్టీ మండలాధ్యక్షుడు శానపతి వెంకటరత్నంలతో కలిసి ఆయన ఇంటింటికీ వెళ్లి ఫ్యాన్‌ గుర్తుపై ఓటు వేసి జెడ్పీటీసీ అభ్యర్థి బోళెం వెంకటేష్‌, ఎంపీటీసీ అభ్యర్థి దుర్గను అత్యధిక మెజార్టీతో గెలిపించాలని విజ్ఞప్తి చేశారు. గ్రామాలు అభివృద్ధి చెందాలన్నా, ప్రజా సమస్యలు పరిష్కారం కావాలన్నా వైఎస్సార్‌సీపీ అభ్యర్థులను గెలిపించాలని ఓటర్లను అభ్యర్థించారు.

సాక్షి,విశాఖపట్నం : జీవీఎంసీ ఎన్నికల పోలింగ్‌ సరళిపై అధికార యంత్రాంగం రెండుమార్లు విడుదల చేసిన ఈ అంకెల గారడీ.. ప్రజాస్వామ్యాన్ని అపహాస్యం చేసేలా సాగిన చీకటి కుట్రలను బట్టబయలు చేస్తోంది. ఓటమి భయంతో వణికిపోయిన కూటమి నేతలు.. వ్యవస్థలను గుప్పెట్లో పెట్టుకుని రాత్రికి రాత్రే అడ్డగోలు రిగ్గింగ్‌కు తెరతీశారన్న అనుమానాలు రేకెత్తుతున్నాయి. ఆదివారం రాత్రి 10 గంటలకు తాత్కాలిక అంచనాగా 51.47 శాతంగా నమోదైందంటూ సాక్షాత్తూ.. జిల్లా ఎన్నికల అధికారి, కలెక్టర్‌ అభిషిక్త్‌ కిశోర్‌ ప్రకటించారు. కానీ.. సోమవారం ఉదయానికి అమాంతం 56.32 శాతానికి చేరడం.. అధికార పార్టీ నేతలు, అధికారులు కలిసి ఆడిన కుట్రల కుతంత్రమేంటో ప్రపంచానికి అర్థమయ్యేలా చేసింది. పక్కా ప్రణాళికతో వేలాది ఓట్లు అదనంగా పోల్‌ అవుతున్నా, బ్యాలెట్‌ పేపర్లు పబ్లిక్‌గా బయటకు వస్తున్నా ఎన్నికల అధికారులు చూసీచూడనట్లు వ్యవహరించడం, పోలీసులే దగ్గరుండి కూటమి నేతలకు సహకరించారని వైఎస్సార్‌సీపీ శ్రేణులు మండిపడుతున్నాయి. ఎన్నికల ముందే వైఎస్సార్‌సీపీ నేతలు వ్యక్తం చేసిన అనుమానాలను నిజం చేస్తూ, అధికార బలంతో కూటమి నేతలు సాగించిన ఈ కుతంత్రాలు విశాఖ రాజకీయాల్లో పెను దుమారం రేపుతున్నాయి. ఆదివారం రాత్రి 10 గంటల సమయానికి అధికారులు విడుదల చేసిన వార్డుల వారీ నివేదిక ప్రకారం జీవీఎంసీ పరిధిలో మొత్తం 9,45,918 ఓట్లు పోలవగా, 51.47 శాతం పోలింగ్‌ నమోదైనట్లు ప్రకటించారు. కానీ సోమవారం ఉదయం విడుదల చేసిన ఫైనల్‌ జోన్ల వారీ నివేదికలో ఈ శాతం అమాంతం 56.32 శాతానికి అంటే.. 10,35,154 ఓట్లు పోలయ్యాయని వెల్లడించారు. తొలుత ప్రకటించింది తాత్కాలిక నివేదిక అయినా.. తుది జాబితాలో మరో వెయ్యో.. రెండు వేల ఓట్లో జమ కావాలి. అంతేగానీ రాత్రికి రాత్రే పోలైన ఓట్లు భారీగా పెరిగిపోవడం అనుమానాలకు తావిస్తోంది. రాత్రికి రాత్రే రిగ్గింగ్‌ జరిగిందా.? అధికారిక గణాంకాలను పరిశీలిస్తే రాత్రికి రాత్రే కొన్ని జోన్లలో అసాధారణ స్థాయిలో ఓట్లు పెరిగాయి. ప్రధానంగా జీవీఎంసీ గాజువాక జోన్‌లో అత్యధికంగా 20,296 ఓట్లు పెరిగాయి. అదేవిధంగా పశ్చిమ జోన్‌లో 17,242 ఓట్లు, నార్త్‌ జోన్‌లో 15,955 ఓట్లు, ఈస్ట్‌ జోన్‌లో 10,840 ఓట్లు అదనంగా నమోదయ్యాయి. అదేవిధంగా.. పెందుర్తిలో 9,246 ఓట్లు, మధురవాడలో 6,371 ఓట్లు, అగనంపూడిలో 6,017 ఓట్లు పెరగడం ఈ రిగ్గింగ్‌ ఆరోపణలకు బలం చేకూరుస్తోంది. ఈ అనూహ్య ఓట్ల పెరుగుదల వెనుక కూటమి నేతల రిగ్గింగ్‌ ఉందనే ఆరోపణలు బలంగా వినిపిస్తున్నాయి. ఎన్నికల సరళిపై మొదటి నుంచి తాము వ్యక్తం చేసిన అనుమానాలే నిజమయ్యాయని వైఎస్సార్‌సీపీ నేతలతో పాటు వామపక్షాలూ వ్యాఖ్యానిస్తున్నాయి. పలుచోట్ల రిగ్గింగ్‌ను అడ్డుకునేందుకు వైఎస్సార్‌సీపీ శ్రేణులు తీవ్రంగా యత్నించినప్పటికీ, పోలీసుల, ఎన్నికల అధికారుల సహకారంతో కూటమి నేతలు రెచ్చిపోయారని వారు ఆరోపిస్తున్నారు. పోలింగ్‌ కేంద్రాల నుంచి బ్యాలెట్‌ పేపర్లు బయటకు వచ్చినా ఎన్నికల అధికారులు కనీసం పట్టించుకోలేదనే విమర్శలు వెల్లువెత్తుతున్నాయి. ప్రజాస్వామ్యబద్ధంగా జరగాల్సిన ఎన్నికలను కూటమి నేతలు అపహాస్యం చేశారని విపక్షాలు తీవ్ర స్థాయిలో ధ్వజమెత్తుతున్నాయి. జీవీఎంసీ పరిధిలోని 120 వార్డుల్లో మొత్తం 18,37,901 మంది ఓటర్లకు గాను.. 9,45,918 మంది తమ ఓటు హక్కు వినియోగించుకున్నారు మొత్తం టెంటెటివ్‌గా 51.47 శాతం పోలింగ్‌ నమోదైంది.’ – ఆదివారం రాత్రి 9.45 గంటలకు జిల్లా కలెక్టర్‌, ఎన్నికలఅధికారి అభిషిక్త్‌ కిశోర్‌ జీవీఎంసీ పరిధిలోని 10 జోన్లలోని 120 వార్డుల్లో మొత్తం 18,37,901 మంది ఓటర్లకు గాను.. 10,35,154 మంది తమ ఓటు హక్కు వినియోగించుకున్నారు మొత్తం 56.32 శాతం పోలింగ్‌ నమోదైంది. – సోమవారం ఉదయం 9.30 గంటలకు జీవీఎంసీ కమిషనర్‌ కేతన్‌ గార్గ్‌ విడుదల చేసిన వివరాలు.

మృతి చెందిన పాడి ఆవు బుచ్చెయ్యపేట: మేజర్‌ పంచాయతీ వడ్డాదిలో సెఫ్టిక్‌ ట్యాంకు గోతిలో పడి పాడి ఆవు మృతి చెందింది. గ్రామానికి చెందిన శనగల శ్రీనుకు చెందిన పాడి ఆవు సోమవారం పచ్చగడ్డి మేస్తుండగా, సెఫ్టిక్‌ ట్యాంక్‌ కోసం తవ్విన గోతిలో ప్రమాదవశాత్తు పడిపోయింది. స్థానిక యువకులు తాళ్లు సహాయంతో గోతిలో నుంచి మృతి చెందిన ఆవును బయటకు తీశారు. రూ. 50 వేలు విలువ చేసే పాడి ఆవు మృతితో బాధిత రైతు ఆవేదన వ్యక్తం చేశాడు. ఇదే ప్రాంతంలో 20 మంది వరకు సెఫ్టిక్‌ ట్యాంక్‌ గోతులు తవ్వి వరలు వేసి రక్షణ మూతలు పెట్టకుండా వదిలేశారు. జీవాలు గోతుల్లో పడి మృతి చెందుతున్న పంచాయతీ అధికారులు పట్టించుకోవడం లేదని గ్రామస్తులు ఆగ్రహాం వ్యక్తం చేస్తున్నారు. దీనిపై కలెక్టర్‌కు ఫిర్యాదు చేస్తామని స్థానిక యువకులు తెలిపారు.

వేముల వేంకటేశ్వరరావును పార్టీలోకి సాదరంగా ఆహ్వానించిన చిక్కాల రామారావు టీడీపీని వీడి వైఎస్సార్‌సీపీలో చేరిన వారికి పార్టీ కండువా వేస్తున్న అనురాధ నక్కపల్లి : మండలంలో చినదొడ్డిగల్లుకు చెందిన జనసేన నాయకుడు, మాజీ సైనికోద్యోగి పంపన బోయిన శ్రీను సోమవారం వైఎస్సార్‌సీపీలో చేరారు. శ్రీనుకు పార్టీ రాష్ట్ర కార్యదర్సి వీసం రామకృష్ణ, మాజీ వైస్‌ ఎంపీపీ వెలగా ఈశ్వరరావు కండువా కప్పి పార్టీలోకి ఆహ్వానించారు. శ్రీను స్థానిక ఎన్నికల్లో జనసేన నుంచి ఎంపీటీసీగా పోటీ చేయాలని భావించారు. నామినేషన్‌ కూడా దాఖలు చేశారు. అయితే పార్టీ బీఫారం ఇవ్వలేదు. దీంతో బలమైన సామాజిక వర్గానికి చెందిన శ్రీను జనసేనకు రాజీనామా చేశారు. సోమవారం వైఎస్సార్‌సీపీలో చేరారు. ఈ సందర్భంగా శ్రీను మాట్లాడుతూ జనసేన పార్టీ నాయకులు, కార్యకర్తలు జెండాలు మోయడానికే తప్ప పదవులు అనుభవించే అదృష్టానికి నోచుకోలేదన్నారు. కార్యకర్తలన్నా, ప్రజా సంక్షేమమన్నా, చిత్తశుద్ధితో పనిచేసే వైఎస్సార్‌సీపీలో చేరాలని భావించి తన అనుచరులు 50 మందితో కలిసి వైఎస్సార్‌సీపీలో చేరడం జరిగిందన్నారు. చినదొడ్డిగల్లు నుంచి పోటీ చేస్తున్న ఇద్దరు ఎంపీటీసీలను భారీ మెజార్టీతో గెలిపించుకుంటామని జనసేనకు డిపాజిట్‌ దక్కకుండా చేయడమే ధ్యేయంగా పనిచేస్తానన్నారు. కార్యక్రమంలో మాజీ ఎంపీటీసీ తోట సత్తిబాబు, లక్ష్మణరావు, జిల్లా యూత్‌ విభాగం కార్యదర్శి వెలగా రమేష్‌, పలువురు వైఎస్సార్‌సీపీ నాయకులు పాల్గొన్నారు. పాయకరావుపేట : మండలంలో గల అరట్లకోట గ్రామానికి చెందిన బీజేపీ నాయకుడు వేముల వేంకటేశ్వరరావు వైఎస్సార్‌సీపీలో చేరారు. వైఎస్సార్‌సీపీ రాష్ట్ర కార్యదర్శి చిక్కాల రామారావు పార్టీ కండువా వేసివేముల వేంకటేశ్వరరావును సాదరంగా ఆహ్వానించారు. వేముల వేంకటేశ్వరరావు బీజేపీలో పార్టీ మండల అధ్యక్షుడుగాను, పలు పదవులను చేశారు. వైఎస్సార్‌సీపీలో రాష్ట్రం అభివృద్ధి చెందుతుందని, వైఎస్సార్‌సీపీ సిద్ధాంతాలకు తాను ఆకర్షితుడనై పార్టీలో చేరడం జరిగిందని వేముల వేంకటేశ్వరరావు అన్నారు. టీడీపీ నుంచి వైఎస్సార్‌సీపీలో చేరిన 20 కుటుంబాలు చీడికాడ: మండలంలోని కోనాం శివారు గుడివాడ గిరిజన గ్రామంలో టీడీపీని వీడి 20 కుటుంబాల వారు వైఎస్సార్‌సీపీలో చేరారు. వీరికి పార్టీ కండువాలు కప్పి వైఎస్సార్‌సీపీ రాష్ట్ర మహిళా విభాగం జోన్‌–1 వర్కింగ్‌ ప్రెసిడెంట్‌ ఈర్లె అనురాధ సాదరంగా ఆహ్వానించారు. మండలంలోని కోనాం శివారు గ్రామాల్లో సోమవారం ఆమె ఎన్నికల ప్రచారం చేశారు. ఈ సందర్భంగా గిరిజన గ్రామం గుడివాడకు చెందిన టీడీపీ నేత సలుగు దేముడు, మరో 20 కుటుంబాల వారు అనురాధ సమక్షంలో వైఎస్సార్‌సీపీలో చేరారు. కార్యక్రమంలో మాజీ జెడ్పీటీసీ సలుగు పెద సత్యనారాయణ, నాయకుడు సలుగు భీమునాయుడు తదితరులు పాల్గొన్నారు. గుల్లేపల్లిలో టీడీపీని వీడి వైస్సార్‌సీపీలో చేరిక కె.కోటపాడు: కూటమి వైఫల్యాలను పార్టీ కార్యకర్తలు ప్రజల్లోకి విస్తృతంగా తీసుకెళ్లాలని వైఎస్సార్‌సీపీ రాష్ట్ర మహిళా విభాగం జోన్‌–1 వర్కింగ్‌ ప్రెసిడెంట్‌ ఈర్లె అనురాధ తెలిపారు. మండలంలోని గుల్లేపల్లిలో టీడీపీని వీడి కడుపుకుట్ల మహలక్ష్మినాయుడు, వియ్యపు నాగమణిల, తదితరులు వైఎస్సార్‌సీపీలో చేరారు. వీరికి ఈర్లె అనురాధ పార్టీ కండువాను వేసి వైఎస్సార్‌సీపీలోకి సాదరంగా ఆహ్వనించారు. ఈ సందర్భంగా ఆమె మాట్లాడుతూ అధికారంలోకి వచ్చి 30 నెలలు కావస్తున్నా మహిళలకు ఆడబిడ్డ నిధి ద్వారా నగదు ఇవ్వలేదన్నారు. ఏదయినా చెప్పారంటే.. చేసే మనస్తత్వం ఒక్క వైఎస్‌ జగన్‌మోహన్‌రెడ్డికే ఉందన్నారు. చెప్పింది చేయలేని మనస్తత్వం చంద్రబాబుది అని విమర్శించారు. వైఎస్సార్‌సీపీ గుల్లేపల్లి ఎంపీటీసీ అభ్యర్థి బండారు మంగమ్మను జెడ్పీటీసీ అభ్యర్థి రెడ్డి జగన్‌మోహన్‌లను ఫ్యాన్‌ గుర్తుకు ఓటు వేసి గెలిపించాలని అభ్యర్థించారు. కార్యక్రమంలో మాజీ సర్పంచ్‌ బండారు దేముళ్లు, బండారు శ్రీరామ్మూర్తి, గేదెల ప్రసాద్‌, కశిరెడ్డి రాంబాబు, కర్రి రమేష్‌ తదితరులు పాల్గొన్నారు. ఎస్‌.రాయవరం : టీడీపీ అప్రజాసామిక పరిపాలన, అబద్దపు హామీలతో విసుగుచెంది మండల కేంద్రం సీనియర్‌ కార్యకర్త ఎస్‌.రాయవరం ఇంద్ర న్యూకాలనీ గుదిబండి రాము వైఎస్సార్‌సీపీలో చేరారు. గ్రామశాఖ అధ్యక్షుడు కర్రి కోటేశ్వరరావు పార్టీ కండువా వేసి ఆహ్వానించారు. ఎంపీటీసీ ఎన్నిక ప్రచారం సోమవారం రాత్రి పార్టీలో చేరినట్టు చెప్పారు. ఈ కార్యక్రమంలో వైఎస్సార్‌సీపీ నాయకులు లక్కోజు ఆదిమూర్తి, గట్టెం పర్వతాలు, దుబాజి జోగారావు, ఎస్సీ సెల్‌ అద్యక్షులు బంగారి లక్ష్మణరావు, కొమ్ము జగదీష్‌,కర్రి గాంధీ, నవీన్‌, లక్ష్మీనారాయణ,పోతురాజు,ఈతకొట్టు నాగు,కశింకోట సత్యవతి,రామ్‌దాస్‌,స్వామి తదితరులు ఉన్నారు.

● విశ్వం ఫౌండర్‌ యూనివర్స్‌ డుంబ్రిగుడ: ఓటు హక్కుపై ప్రజల్లో చైతన్యం కల్పించేందుకు మండల కేంద్రం డుంబ్రిగుడలో విశ్వం ఫౌండేషన్‌ వ్యవస్థాపకుడు యూనివర్స్‌ ఆదివారం వినూత్న ప్రచారం నిర్వహించారు. జాతీయ రహదారి వద్ద బ్యానర్‌ ప్రదర్శిస్తూ, మైక్‌ ద్వారా ఓటుకు నోటు తీసుకోవద్దని, డబ్బు ఆశ చూపి ఓట్లు కొనుగోలు చేయవద్దని ప్రచారం చేశారు. ఎలాంటి ప్రలోభాలకు లోనుకాకుండా ఓటు హక్కును స్వేచ్ఛగా వినియోగించుకోవాలని ప్రజలకు పిలుపునిచ్చారు. ప్రజాస్వామ్య వ్యవస్థలో ఓటు హక్కుకు ఎంతో ప్రాధాన్యం ఉందని పేర్కొన్నారు. ఈ కార్యక్రమంలో శెట్టి గాసి పాల్గొన్నారు.

కొయ్యూరు: బూదరాళ్ల పంచాయతీ పరిధిలోని గరిమండ గ్రామంలో ఆదివారం మంప ఎస్‌ఐ శ్రీనివాస్‌ ఆధ్వర్యంలో కార్డన్‌ అండ్‌ సెర్చ్‌ నిర్వహించారు. ఈ సందర్భంగా గ్రామంలోని ప్రతి ఇంటినీ తనిఖీ చేయడంతో పాటు అనుమానిత ప్రాంతాలను పరిశీలించారు. అనంతరం ఎస్‌ఐ మాట్లాడుతూ.. గ్రామానికి కొత్త వ్యక్తులు లేదా అనుమానితులు ఎవరైనా వచ్చినట్లయితే వెంటనే పోలీసులకు సమాచారం అందించాలని కోరారు. స్థానిక సంస్థల ఎన్నికలను ప్రశాంతంగా నిర్వహించేందుకు ప్రజలంతా సహకరించాలని విజ్ఞప్తి చేశారు. ఎన్నికల సమయంలో వివాదాలు సృష్టించేందుకు ఎవరైనా ప్రయత్నిస్తే చర్యలు తప్పవని హెచ్చరించారు.

● రేంజర్‌ కోటేశ్వరరావు డుంబ్రిగుడ: నడకతో ఆరోగ్యం, నవ్వుతో ఆనందం కలుగుతాయని రేంజర్‌ కె. కోటేశ్వరరావు అన్నారు. ఈ నినాదంతో బ్రిక్స్‌ సుస్థిర వారోత్సవాల్లో భాగంగా ఆదివారం అరకులోని పైనరీలో మొక్కలు నాటే కార్యక్రమం నిర్వహించారు. అనంతరం యోగా, నడక, వ్యాయామాలతో పాటు నవ్వుల కార్యక్రమంలో పాల్గొని ఆనందాన్ని పంచుకున్నారు. గత వారం తుపాను ప్రభావంతో మూతపడిన అరకులోని పైనరీ ఆదివారం తిరిగి తెరుచుకుంది. ఈ కార్యక్రమంలో పైనరీ మేనేజర్‌ చంద్రశేఖర్‌, వీఎస్‌ఎస్‌ సభ్యులు భారతి తదితరులు పాల్గొన్నారు.

సీలేరు: ఆంధ్రా–ఒడిశా సరిహద్దు జలవిద్యుత్‌ కేంద్రాలకు నీటిని సరఫరా చేసే బలిమెల జలాశయం ప్రమాద స్థాయికి చేరువైంది. ఇటీవల కురిసిన భారీ వర్షాలకు జోలాపుట్టు రిజర్వాయర్‌ నుంచి నీటిని విడుదల చేయడంతో బలిమెలలో నీటిమట్టం పెరిగింది. ఆదివారం మధ్యాహ్నానికి పూర్తిస్థాయి నీటిమట్టం 1516 అడుగులకు ఐదు అడుగుల దూరంలో చేరడంతో అధికారులు రెండు గేట్లు ఎత్తి సీలేరు (గుంటవాడ) రిజర్వాయర్‌లోకి 6 వేల క్యూసెక్కుల నీటిని విడుదల చేస్తున్నారు. ప్రస్తుతం సీలేరు రిజర్వాయర్‌లో 1338 అడుగుల నీటిమట్టం ఉంది. పూర్తిస్థాయి మట్టం 1360 అడుగులు. వరద ప్రవాహం కొనసాగితే నీటిమట్టం మరింత పెరిగే అవకాశం ఉండటంతో అధికారులు అప్రమత్తమయ్యారు. డొంకరాయి ప్రధాన డ్యాం నీటిమట్టం 1030.60 అడుగులకు చేరడంతో అధికారులు రెండు గేట్లు ఎత్తి 10 వేల క్యూసెక్కుల నీటిని శబరి నదిలోకి విడుదల చేస్తున్నారు. డ్యాం పూర్తిస్థాయి నీటిమట్టం 1037 అడుగులు. ఉపనదుల నుంచి వరద ప్రవాహం, జలవిద్యుత్‌ కేంద్రం నుంచి విడుదలవుతున్న నీటితో ఇన్‌ఫ్లో పెరుగుతుండటంతో ఈ చర్యలు చేపట్టారు. బలిమెల నుంచి నీటి విడుదల కొనసాగుతున్న నేపథ్యంలో సీలేరు, డొంకరాయి రిజర్వాయర్ల వద్ద అప్రమత్తంగా వ్యవహరిస్తున్నట్లు జెన్‌కో చీఫ్‌ ఇంజినీర్‌ కేవీ రాజారావు తెలిపారు.

పాలనలోనూ కీలక పాత్ర ముంచంగిపుట్టు: మండలంలోని 23 పంచాయతీల పరిధిలో ఉన్న 14 ఎంపీటీసీ స్థానాల్లో మొత్తం 38,895 మంది ఓటర్లు ఉన్నారు. వీరిలో మహిళా ఓటర్లే అధికంగా ఉండటం విశేషం. పురుష ఓటర్లు 18,990 మంది ఉండగా, మహిళా ఓటర్లు 19,903 మంది ఉన్నారు. మొత్తం 14 ఎంపీటీసీ స్థానాల్లో ఏడు స్థానాలను మహిళలకు కేటాయించారు. సుజనకోట, దారెల, కిలగాడ, లక్ష్మీపురం, జోలాపుట్టు, పెదగూడ, బరడ సెగ్మెంట్లలో ఎస్టీ మహిళలకు ఎంపీటీసీ స్థానాలు రిజర్వ్‌ చేశారు. గత కొన్నేళ్లుగా మండలంలో జెడ్పీటీసీ, ఎంపీపీ పదవులు మహిళలకే కేటాయిస్తూ వస్తున్నారు. దీనికి తోడు ఎంపీటీసీ స్థానాల్లోనూ సగం మహిళలకు రిజర్వ్‌ కావడంతో మండల పరిషత్‌ పాలనలో మహిళల ప్రాతినిధ్యం కీలకం కానుంది. స్థానిక పాలనలో మహిళలే దిశానిర్దేశం చేయనున్నారు.

సీలేరు: జెడ్పీటీసీ, ఎంపీటీసీ ఎన్నికల నేపథ్యంలో పాడేరు ఎమ్మెల్యే మత్స్యరాస విశ్వేశ్వరరాజు వైఎస్సార్‌సీపీ అభ్యర్థులతో కలిసి ఆదివారం సీలేరు, దుప్పులవాడ, దారకొండ, గుమ్మరేవుల పంచాయతీల్లో విస్తృతంగా ప్రచారం నిర్వహించారు. వారపు సంతలో పార్టీ జెండాలతో ర్యాలీ చేపట్టి ఓటర్లను కలిశారు. ఫ్యాన్‌ గుర్తుపై రెండు ఓట్లు వేసి పార్టీ అభ్యర్థులను గెలిపించాలని కోరారు. ఈ సందర్భంగా ఎమ్మెల్యే మాట్లాడుతూ.. పేదల సంక్షేమం కోసం పనిచేసిన వైఎస్సార్‌సీపీ ప్రతి కార్యకర్తకు అండగా ఉంటుందని భరోసా ఇచ్చారు. జెడ్పీటీసీ, ఎంపీటీసీ ఎన్నికల్లో పార్టీ అభ్యర్థులను గెలిపించి వైఎస్‌ జగన్‌మోహన్‌రెడ్డికి బహుమతిగా ఇవ్వాలని కోరారు. సీలేరు పంప్డ్‌ స్టోరేజ్‌ ప్రాజెక్టులో స్థానిక నిరుద్యోగులకు ఉద్యోగావకాశాలు కల్పించేలా చర్యలు తీసుకుంటామని హామీ ఇచ్చారు. ఈ ప్రచారంలో జెడ్పీటీసీ అభ్యర్థి కంకిపాటి గిరిప్రసాద్‌, సీలేరు ఎంపీటీసీ అభ్యర్థి ఎం.ప్రియా, గుమ్మరేవుల అభ్యర్థి కుర్ర అప్పారావు, దారకొండ అభ్యర్థి రాజేశ్వరి, దుప్పులవాడ అభ్యర్థి వెలుగోరి సత్యనారాయణతో పాటు మాజీ ఎంపీపీ కుమారి, కుందేరి రామకృష్ణ, వైఎస్సార్‌సీపీ నాయకులు వెంకటరావు, బుజ్జి, గణేష్‌, మాజీ ఎంపీటీసీ సాంబమూర్తి, మాజీ సర్పంచులు దుర్జో, రాజు, మండల బీసీ సెల్‌ అధ్యక్షుడు బుజ్జి, మాజీ ఉపసర్పంచ్‌ కారే శ్రీనివాస్‌, వల్లి ప్రసాద్‌ తదితరులు పాల్గొన్నారు. పాడేరు ఎమ్మెల్యే, వైఎస్సార్‌సీపీ జిల్లా అధ్యక్షుడు మత్స్యరాస విశ్వేశ్వరరాజు

● జిల్లా సాధారణ ఎన్నికల పరిశీలకుడు రోణంకి కూర్మనాథ్‌ ● పోస్టల్‌ బ్యాలెట్‌ ఓటింగ్‌ ప్రక్రియ పరిశీలన పాడేరు: ఎంపీటీసీ, జెడ్పీటీసీ ఎన్నికలకు సంబంధించి పోస్టల్‌ బ్యాలెట్‌ ఓటింగ్‌ ప్రక్రియను జిల్లా సాధారణ ఎన్నికల పరిశీలకుడు రోణంకి కూర్మనాథ్‌ ఆదివారం పరిశీలించారు. పాడేరు ప్రభుత్వ ఉన్నత పాఠశాలతో పాటు జి.మాడుగుల, చింతపల్లి, గూడెంకొత్తవీధి, కొయ్యూరు మండలాల్లో ఏర్పాటు చేసిన పోస్టల్‌ బ్యాలెట్‌ ఓటింగ్‌ కేంద్రాలను ఆయన సందర్శించారు. ఈ సందర్భంగా ఓటింగ్‌ కేంద్రాల్లో చేసిన ఏర్పాట్లు, ఓటర్లకు కల్పించిన సౌకర్యాలు, పోలింగ్‌ సిబ్బంది విధుల నిర్వహణ, బ్యాలెట్‌ పత్రాల వినియోగం, ఓటింగ్‌కు సంబంధించిన రికార్డుల నిర్వహణ తదితర అంశాలను పరిశీలించారు. పోస్టల్‌ బ్యాలెట్‌ వినియోగించుకునే అర్హులైన ఓటర్లకు ఎలాంటి ఇబ్బందులు కలగకుండా తగిన ఏర్పాట్లు చేయాలని అధికారులను ఆదేశించారు. ఎన్నికల నిబంధనలు, మార్గదర్శకాలను కచ్చితంగా పాటిస్తూ పోస్టల్‌ బ్యాలెట్‌ ఓటింగ్‌ ప్రక్రియను ప్రశాంత వాతావరణంలో స్వేచ్ఛగా, నిష్పక్షపాతంగా, పారదర్శకంగా నిర్వహించాలని సూచించారు. ఎలాంటి పొరపాట్లకు తావులేకుండా అప్రమత్తంగా వ్యవహరించాలన్నారు. ఆయన వెంట ఎన్నికల పరిశీలకుల లైజనింగ్‌ అధికారి పట్టాసి చలపతిరావు, ఎన్నికల రిటర్నింగ్‌ అధికారులు భానుమూర్తిరాజు, విద్యాసాగర్‌, వెంకటరమణ, బాబునాయక్‌, ఎంపీడీఓలు తేజ్‌రతన్‌, సీతయ్య తదితరులు ఉన్నారు.

ముంచంగిపుట్టు: గత వైఎస్సార్‌సీపీ పాలనలో గ్రామాల్లో చేపట్టిన సంక్షేమ, అభివృద్ధి కార్యక్రమాలను పరిశీలించి, ఆలోచించి ఓటు వేయాలని మాజీ జెడ్పీ చైర్‌పర్సన్‌, జెడ్పీటీసీ అభ్యర్థి జల్లిపల్లి సుభద్ర అన్నారు. మండలంలోని జర్రెల, జోలాపుట్టు పంచాయతీల పరిధిలోని గ్రామాల్లో ఆదివారం ఆమెతో పాటు ఎంపీటీసీ అభ్యర్థులు కమల, లక్ష్మి ఇంటింటికీ వెళ్లి ఎన్నికల ప్రచారం నిర్వహించారు. ఫ్యాన్‌ గుర్తుపై ఓటు వేసి, భారీ మెజారిటీతో గెలిపించాలని ఓటర్లను అభ్యర్థించారు. కొన్ని గ్రామాల్లో మహిళలు పనులు చేసుకుంటుండగా వారికి సహకరిస్తూ ప్రచారం సాగించారు. ఈ సందర్భంగా జల్లిపల్లి సుభద్ర మాట్లాడుతూ.. గత వైఎస్సార్‌సీపీ ప్రభుత్వ హయాంలో ప్రతి గ్రామంలో అనేక అభివృద్ధి పనులు చేపట్టామని, రహదారులు, తాగునీటి సదుపాయాలు మెరుగుపడటంతో పాటు ప్రభుత్వ పాఠశాలలకు కొత్త రూపురేఖలు వచ్చాయని పేర్కొన్నారు. ఇంటివద్దకే రేషన్‌, పింఛన్లను వాలంటీర్ల ద్వారా అందించేవారని గుర్తుచేశారు. ప్రస్తుతం ప్రజలు సంక్షేమ పథకాలకు దూరమవుతున్నారని, ప్రజలకు న్యాయం చేసే వైఎస్సార్‌సీపీ అభ్యర్థులను గెలిపించాలని కోరారు. ఈ కార్యక్రమంలో జేసీఎస్‌ జిల్లా కోఆర్డినేటర్‌ జగబంధు, వైఎస్సార్‌సీపీ మండల నాయకులు, కార్యకర్తలు అధిక సంఖ్యలో పాల్గొన్నారు.మాజీ జెడ్పీ చైర్‌ పర్సన్‌, వైఎస్సార్‌సీపీ జెడ్పీటీసీ అభ్యర్థి జల్లిపల్లి సుభద్ర

ముంచంగిపుట్టు: స్థానిక కార్యాలయంలో ఏర్పాటు చేసిన పోస్టల్‌ బ్యాలెట్‌ ఫెసిలిటేషన్‌ సెంటర్‌లో ఉద్యోగులు తమ ఓటు హక్కును వినియోగించుకున్నారు. మండల ఎన్నికల రిటర్నింగ్‌ అధికారి శ్రీనివాసరావు పర్యవేక్షణలో మొత్తం 111 మంది ఉద్యోగులు జెడ్పీటీసీ, ఎంపీటీసీ ఎన్నికలకు పోస్టల్‌ బ్యాలెట్‌ ద్వారా ఓటు వేశారు. స్థానిక ఎస్‌ఐ నాని ఆధ్వర్యంలో సీఆర్‌పీఎఫ్‌, ఏపీఎస్‌పీ పోలీసులు మండల పరిషత్‌ కార్యాలయం చుట్టూ పటిష్ట భద్రత ఏర్పాటు చేశారు. ఈ కార్యక్రమంలో మండల అసిస్టెంట్‌ ఆర్‌వోలు ధర్మారావు, త్రినాథనాయుడు పాల్గొన్నారు. జి.మాడుగుల: మండలంలో జెడ్పీటీసీ, ఎంపీటీసీ ఎన్నికల విధుల్లో పాల్గొనే ఉద్యోగులు ఆదివారం పోస్టల్‌ బ్యాలెట్‌ ద్వారా తమ ఓటు హక్కును వినియోగించుకున్నారు. స్థానిక మండల పరిషత్‌ కార్యాలయంలో ఏర్పాటు చేసిన ప్రత్యేక కేంద్రంలో ఉద్యోగులకు ఓటు వేసే అవకాశం కల్పించారు. మొత్తం 64 పోస్టల్‌ బ్యాలెట్లు పోలైనట్లు ఎన్నికల అధికారులు తెలిపారు. చింతపల్లి: మండలంలో ఎన్నికల విధుల్లో ఉన్న ఉద్యోగుల నుంచి పోస్టల్‌ బ్యాలెట్‌ కోసం 175 దరఖాస్తులు స్వీకరించినట్లు రిటర్నింగ్‌ అధికారి రమణారావు తెలిపారు. ఆదివారం వివిధ శాఖలకు చెందిన ఉద్యోగులు పోస్టల్‌ బ్యాలెట్‌ కోసం దరఖాస్తులు అందజేశారు. శనివారం 15 మంది, ఆదివారం 160 మంది ఉపాధ్యాయులు, ఉద్యోగులు దరఖాస్తులు సమర్పించినట్లు ఆయన పేర్కొన్నారు. ఈ కార్యక్రమంలో ఎంపీడీవో లాలం సీతయ్య, ఎంఈవో ప్రసాద్‌ తదితరులు పాల్గొన్నారు. 143 మంది పోస్టల్‌ బ్యాలెట్‌ వినియోగం కొయ్యూరు: మండలంలో 143 మంది ఉద్యోగులు పోస్టల్‌ బ్యాలెట్‌ ద్వారా తమ ఓటు హక్కును వినియోగించుకున్నారు. ఆదివారం మండల పరిషత్‌ కార్యాలయంలో ఆర్‌వో వై.వి. నరసింహారావు ఆధ్వర్యంలో పోస్టల్‌ బ్యాలెట్‌ ప్రక్రియ నిర్వహించారు. ఈ సందర్భంగా ఏటీడబ్ల్యూఓ క్రాంతికుమార్‌ ఉద్యోగులకు పోస్టల్‌ బ్యాలెట్‌ విధానంపై అవగాహన కల్పించారు. అనంతరం ఓటు వేసిన బ్యాలెట్‌ పత్రాలను కవర్లలో ఉంచి బాక్సుల్లో వేయించారు. మొత్తం 143 మంది ఉద్యోగులు పోస్టల్‌ బ్యాలెట్‌ సదుపాయాన్ని వినియోగించుకున్నట్లు అధికారులు తెలిపారు.

పెదబయలు: మండలంలోని గోమంగి ఎంపీటీసీ సెగ్మెంట్‌ పరిధిలోని గుల్లేలు పంచాయతీ జంగంపుట్టు గ్రామానికి చెందిన బీఎస్‌పీ సీనియర్‌ నాయకులు కొరవంగి ఎండునాయుడు, కొరవంగి రాజారావు వైఎస్సార్‌సీపీలో చేరినట్లు గోమంగి సెగ్మెంట్‌ ఎంపీటీసీ అభ్యర్థి సాగేని చంద్రకళ, పార్టీ సీనియర్‌ నాయకుడు సాగేని నాగరాజు తెలిపారు. ఆదివారం బీఎస్‌పీ నాయకులతో పాటు గ్రామానికి చెందిన 40 కుటుంబాల నుంచి 90 మంది వైఎస్సార్‌సీపీలో చేరారు. వారికి పార్టీ కండువాలు వేసి నాయకులు ఆహ్వానించారు. ఈ సందర్భంగా వారు మాట్లాడుతూ.. వైఎస్‌ జగన్‌మోహన్‌రెడ్డి ముఖ్యమంత్రిగా ఉన్న సమయంలో ఎన్నో సంక్షేమ పథకాలను ప్రవేశపెట్టారని పేర్కొన్నారు. 2029లో మళ్లీ జగన్‌ను ముఖ్యమంత్రిని చేసేందుకు తమ వంతు సహకారం అందిస్తామని కొత్తగా పార్టీలో చేరిన వారు తెలిపారన్నారు. స్థానిక సంస్థల ఎన్నికల్లో వైఎస్సార్‌సీపీ అభ్యర్థుల గెలుపునకు కృషి చేస్తామని పేర్కొన్నారు. ఈ కార్యక్రమంలో జంగంపుట్టు గ్రామానికి చెందిన రాంబాబు, శ్రీనుబాబు, మాజీ జెడ్పీటీసీ కొంటా సూర్యనారాయణ, సీనియర్‌ నాయకులు కూడ కళ్యాణం, గుల్లేలు పంచాయతీ పార్టీ అధ్యక్షుడు గంపరాయి సుబ్బారావు, బూడిదే బాలరాజు, పార్టీ నాయకులు కొంటా నవీణ, సత్తిబాబు, మత్స్యకొండబాబు, కొమ్మ బాలరాజు, సాగేని పండన్న, కొంటా తిరుపతిరావు, పూజారి రాంబాబు, కుంబిడి వెంకటరమణ, జర్సింగి సుబ్బారావు తదితరులు పాల్గొన్నారు.

సాక్షి, పాడేరు: ఈ నెల 5 స్థానిక సంస్థల ఎన్నికలు జరగనున్న నేపథ్యంలో జిల్లాలో ఎన్నికల కోడ్‌ అమలుపై అధికారుల నిర్లక్ష్యం కనిపిస్తోందనే విమర్శలు వ్యక్తమవుతున్నాయి. జిల్లాలో ఎయిడ్స్‌ కంట్రోల్‌ సొసైటీకి చెందిన ఐసీటీసీ వాహనంపై సీఎం చంద్రబాబు ఫొటోతో కూడిన ప్రచార స్టిక్కర్లను కారు చుట్టూ అతికించారు. ఈ వాహనం జిల్లా వ్యాప్తంగా తిరుగుతున్నప్పటికీ వాటిని తొలగించలేదు. అలాగే చింతపల్లి వ్యవసాయ మార్కెట్‌ కమిటీ కార్యాలయం వద్ద సీఎం, వ్యవసాయశాఖ మంత్రి ఫొటోలతో కూడిన ప్రచార పోస్టర్లు సైతం కనిపిస్తున్నాయి ఎన్నికల కోడ్‌ అమల్లో ఉన్నప్పటికీ వీటిని అధికారులు ఎందుకు తొలగించడం లేదని పలువురు ప్రశ్నిస్తున్నారు. ఈ ప్రచార చిత్రాలకు ఎన్నికల కోడ్‌ వర్తించదా అని జిల్లా ఎన్నికల విభాగాన్ని నిలదీస్తున్నారు.

● వైఎస్సార్‌సీపీ రాష్ట్ర అధికారప్రతినిధి శ్యామల ● జెడ్పీటీసీ అభ్యర్థి మాధవి తరఫున ప్రచారం ఉత్సాహంగా బైక్‌ ర్యాలీ మాట్లాడుతున్న పార్టీ అధికార ప్రతినిధి శ్యామల, పక్కన మాధవికొయ్యూరు: ఎల్‌నినో.. ఎల్లో (పసుపు) నినోగా మారి రాష్ట్రాన్ని నాశనం చేస్తోందని వైఎస్సార్‌సీపీ రాష్ట్ర అధికార ప్రతినిధి శ్యామల ఎద్దేవా చేశారు. ఎల్లో నినో ప్రభావంతో రాష్ట్రంలో తీవ్ర కరువు పరిస్థితులు నెలకొన్నాయని విమర్శించారు. ఆదివారం కాకరపాడు నుంచి కొయ్యూరు వరకు జెడ్పీటీసీ అభ్యర్థి గొడ్డేటి మాధవి నిర్వహించిన బైక్‌ ర్యాలీలో ఆమె పాల్గొన్నారు. వందలాది మంది పార్టీ కార్యకర్తలు బైక్‌లతో ర్యాలీగా తరలివచ్చారు. గుడ్లపల్లి జంక్షన్‌ వద్ద కార్యకర్తలను ఉద్దేశించి శ్యామల మాట్లాడుతూ.. చంద్రబాబు ఏమి చేశారని ప్రజలు ఓటు వేయాలో ఆలోచించాలని అన్నారు. మోసపూరిత హామీలతో అధికారంలోకి వచ్చిన చంద్రబాబు ఇప్పటికీ ప్రజలను మోసం చేస్తూనే ఉన్నారని విమర్శించారు. గత వైఎస్‌ జగన్‌ పాలనకు, ప్రస్తుత చంద్రబాబు కూటమి పాలనకు మధ్య తేడాను పరిశీలిస్తే నిత్యావసర వస్తువుల ధరలు రెట్టింపయ్యాయని ఆరోపించారు. పేదవాడికి నోటికాడి ముద్ద అందడం కూడా గగనంగా మారిందన్నారు. వేల కోట్ల రూపాయల విలువైన భూములను 99 పైసలకే కట్టబెట్టడంలో చంద్రబాబు గొప్ప వ్యక్తిగా మారారని విమర్శించారు. నిరుద్యోగ భృతి, మహిళలకు నెలకు రూ.1,500 ఇస్తామన్న హామీలను ఇప్పటికీ అమలు చేయలేదన్నారు. జగన్‌ అన్నకు సోదరిగా ఉన్న మాధవితో పాటు 14 ఎంపీటీసీ సెగ్మెంట్ల నుంచి పోటీ చేస్తున్న అభ్యర్థులను ఫ్యాన్‌ గుర్తుపై ఓటు వేసి గెలిపించాలని ఆమె కోరారు. ఈ కార్యక్రమంలో వైఎస్సార్‌సీపీ నాయకులు, కార్యకర్తలు అధిక సంఖ్యలో పాల్గొన్నారు.

దేవరాపల్లి: మా ఇంట్లో ఓట్లు అమ్మబడవు.. నా ఓటు కొనే శ్రీమంతుడు లేడు.. ఓట్లు అమ్ముకునే దరిద్రంలో నేను లేను.. డాక్టరు బీఆర్‌ అంబేడ్కర్‌ మనకు ఇచ్చిన అత్యంత శక్తిమంతమైన ఆయు ధం ఓటు హక్కు మాత్రమే...అంటూ యువకుడు తన ఇంటికి బ్యానర్‌ కట్టి అందరి దృష్టిని ఆకర్షిస్తున్నాడు. దేవరాపల్లిలో కర్రి సన్యాశినాయుడు తన ఇంటికి దీన్ని ఏర్పాటు చేసి అందరినీ ఆలోచింపజేస్తున్నాడు. ఎన్నికలు వస్తే చాలు ఓటర్లను ప్రలోభాలకు పెట్టేందుకు రాజకీయ పార్టీలు నానా ప్రయత్నాలు చేస్తాయి. ఈ నిరుపేద యువకుడి మాదిరిగా అందరూ ఆలోచించి ప్రజాస్వామ్య దేశంలో ప్రలోభాలకు లొంగకుండా వజ్రాయుధం లాంటి ఓటు హక్కుతో మంచి చేసే నాయకుడిని ఎన్నుకోవాలని పలువురు అభిప్రాయం వ్యక్తం చేస్తున్నారు. ఆలోచింపచేస్తున్న దేవరాపల్లిలో యువకుడు వినూత్న ప్రచారం

జగదాంబ: ప్రజాస్వామ్య దేశంలో ఇలాంటి ఎన్నికలు ఎప్పడూ చూడలేదని గ్రేటర్‌ విశాఖ మున్సిపల్‌ వైఎస్సార్‌సీపీ మేయర్‌ అభ్యర్థి వరుదు కల్యాణి అన్నారు. నగరంలో ఆదివారం ఎన్నికల సరళి, జరుగుతున్న తీరును తెలుసుకునేందుకు వార్డుల్లో పర్యటించారు. జీవీఎంసీ 37వ వార్డుకు వచ్చిన సందర్భంలో అక్కడ ఎన్నికల అధికారిణి ప్రవర్తించిన తీరుపై ఆమె మండిపడ్డారు. మేయర్‌ అభ్యర్థిగా పోలింగ్‌ బూత్‌లోకి వెళ్లకుండా అడ్డుకున్న తీరుపై కల్యాణి మీడియా సమావేశంలో మాట్లాడారు. ఓ ఎన్నికల అధికారిణి జనసేన కార్యకర్తగా వ్యవహరించారన్నారు. పోలింగ్‌ కేంద్రం వద్ద నిబంధనలు ఉల్లంఘించిన జనసేన కార్యకర్తల విషయంలో ఎలాంటి అభ్యంతరం తెలపలేదన్నారు. ఓటరు స్లిప్పులు ఇస్తూ.. వారు జనసేన పార్టీకి ఓటు వేయాలని ఓటర్లకు చెబుతున్నా అధికారిణి ఎలాంటి అభ్యంతరం తెలపలేదన్నారు. ఆమైపె ఎన్నికల కమిషన్‌కు ఫిర్యాదు చేస్తామన్నారు. వైఎస్సార్‌సీపీ గెలుపు ఖాయమని తెలిసి కూటమి ప్రభుత్వం ఇలాంటి అధికారులతో కుట్రలు చేయిస్తోందన్నారు. ఎన్నికల్లో కచ్చితంగా మేయర్‌ అభ్యర్థిగా గెలుపు తమదేనని కల్యాణి అన్నారు. దక్షణ నియోజకవర్గం సమన్వయకర్త వాసుపల్లి మాట్లాడుతూ.. పోలీసులు పక్షపాతధోరణి చూపుతున్నారన్నారు. మేయర్‌ అభ్యర్థి పోలింగ్‌ కేంద్రం వద్దకు వెళ్తే అడ్డుకోవడ ఏంటని ఆయన ప్రశ్నించారు. నిబంధనలు అందరికీ ఒకేలా ఉండాలన్నారు. పార్టీ అధికార ప్రతినిధి కొండారాజీవ్‌ మాట్లాడుతూ ఎన్నికల అధికారిణి, పోలీసుల తీరుపై ఎన్నికల ఽఅధికారులకు ఫిర్యాదు చేస్తామన్నారు.

అచ్యుతాపురం రూరల్‌: స్థానిక సంస్థల ఎన్నికల వేళ అచ్యుతాపురం మండలంలో జనసేన పార్టీకి చెందిన నాయకులు, కార్యకర్తలు వైఎస్‌ఆర్సీపీలో చేరారు. ఈ సందర్భంగా ఆదివారం పార్టీ యలమంచిలి నియోజకవర్గ సమన్వయకర్త కరణం ధర్మశ్రీ, జిల్లా అధ్యక్షుడు బొడ్డేడ ప్రసాద్‌ ఆధ్వర్యంలో వైఎస్‌ఆర్‌సీపీ కండువా కప్పుకుని పార్టీలో చేరారు. ఉప్పవరం గ్రామానికి చెందిన మాజీ మార్కెట్‌ కమిటీ డైరెక్టర్‌, జనసేన నాయకుడు చందక శివ, చందక తిరుమల రావు తమ అనుచరులు సుమారు 20 మందితో కలిసి వైఎస్‌ఆర్సీపీ తీర్థం పుచ్చుకున్నారు. ఈ కార్యక్రమంలో రవీంద్రరాజు, ఎంపీటీసీ అభ్యర్థి చందక శ్రీనువాసరావు, బుధిరెడ్డి భాస్కర్‌, బోజా నూకేష్‌, నాయకులు, కార్యకర్తలు పాల్గొన్నారు.

సాక్షి, అనకాపల్లి: రాష్ట్ర వ్యాప్తంగా స్థానిక సంస్థల ఎన్నికల్లో చోటు చేసుకుంటున్న సంఘటనల తీరులాగే అనకాపల్లి మండలంలో నిర్వహించనున్న సర్పంచ్‌ ఎన్నికలపై పచ్చ ముద్ర కనిసిస్తుంది.జిల్లా ఎన్నికల అధికారిగా వ్యవహరిస్తున జిల్లా కలెక్టర్‌ ఆదేశాలతో అనకాపల్లి మండలంలోని 13 పంచాయితీల రిజర్వేషన్లు మార్చడం ఇప్పుడు జిల్లా రాజకీయ పార్టీ వర్గాలను కుదిపేస్తోంది. ఈ వ్యవహారంలో అధికారులు తాము చేసిన తప్పిదాన్ని సరిచేసుకున్నామని చెబుతున్నప్పటికీ రాజకీయ పార్టీలో అగ్గి రాజేస్తుంది. ముఖ్యంగా అధికారంలో ఉన్న కూటమిలో టీడీపీ నేతలే ఈ వ్యవహారంపై మండిపడుతూ కోర్టుని ఆశ్రయించే పనిలో పడుతున్నారు. ఇది ఎంత వరకూ దారి తీస్తుందో లేక టీ కప్పులో తుఫాన్‌లా చల్లబడుతుందో వేచి చూడాలి. గెజిట్‌ నంబర్‌ 89పై వివాదం..? అనకాపల్లి జిల్లా కలెక్టర్‌ సంతకంతో అక్టోబర్‌ 31న గెజిట్‌ నంబర్‌ 89ను విడుదల అయ్యింది.ఇది అక్టోబర్‌ 15వ తేదీన విడుదల గెజిట్‌ నంబర్‌ 86కు అమెండ్‌మెంట్‌గా పరిగణిస్తూ జిల్లా పౌర సంబంధాల శాఖ శనివారం విడుదల చేసింది.ఇందులో ఏం తప్పుంది..? స్వయంగా అనకాపల్లి జిల్లా కలెక్టర్‌ విజయ్‌ కృష్ణన్‌ ఎన్నికల విధుల్లో భాగంగా గెజిట్‌ విడుదల చేయడం మామూలు ప్రక్రియ అనే అందరూ భావించాలి కూడా.అయితే ఇక్కడ చాల ట్విస్ట్‌లు ఉన్నాయి.అవేంటో చూద్దాం.26న విడుదల అయిన గెజట్‌ నంబర్‌ 89ను 31వ తేదీ వరకూ బయటకు ఎందుకు విడుదల చేయలేదు.అనకాపల్లి మండల అభివృద్ధి కార్యాలయంలో రూపొందించిన అనకాపల్లి మండలంలోని 26 పంచాయితీలకు సంబంధించిన రిజర్వేసన్లలో 13 పంచాయితీ రిజర్వేషన్లను మారుస్తూ ఈ గెజిట్‌ విడుదల కావడమే చర్చనీయాంశం అయ్యింది. మారిన తలరాతలు..! స్థానిక ఎన్నికల దగ్గర నుంచి సార్వత్రిక ఎన్నికల వరకూ పోటీ చేసే ఔత్సాహిక అభ్యర్థులు వారి పోటీ చేసే స్థానిక సంస్థలు,నియోజక వర్గాల రిజర్వేషన్‌ ప్రకటనపై ఉత్కంఠగా ఎదురు చూస్తారు.ఒక సామాజిక వర్గంలో బలమైన నేత పోటీ చేయాలనుకుంటే అనుకోకుండా అక్కడ వచ్చిన రిజర్వేషన్‌ బట్టి పోటీలో నుంచి విరమించుకోవాల్సి వస్తుంది.మళ్లీ ఐదేళ్ల వరకూ వేచి చూడాల్సిందే.అదే విధంగా అనకాపల్లి మండలంలోని 26 పంచాయితీలకు అక్టోబర్‌ 15న విడుదల చేసిన గెజిట్‌లో ప్రకటించిన రిజర్వేషన్ల బట్టి అభ్యర్థులు సన్నద్ధం అవుతారు.అభ్యర్థుల బలబలాలు,రిజర్వేషన్లు,ఆర్థిక,అంగ బలం బట్టి పోటీలో నిలిచేందుకు నిర్ణయించుకుంటారు.అలాగే అనకాపల్లి మండలంలోని 26 పంచాయితీలకు 26 మంది వారికి వర్తించిన రిజర్వేషన్‌ ప్రకారం పోటీకి సిద్ధం అవుతున్నారు.సరిగ్గా పక్షం రోజులు గడిచే సరికి మీ పంచాయితీ రిజర్వేషన్‌ మారిందని గెజిట్‌ విడుదల చేస్తే షాక్‌ అవ్వారా మరి.దీంతో మాకు అన్యాయం జరిగిందని పోటీకి రెడీ అయిన అభ్యర్థులు కోర్టుని ఆశ్రయించేందుకు సిద్ధం అవుతున్నారు. అభియోగం ఏంటంటే...? తొలుత ప్రకటించిన రిజర్వేషన్ల ప్రకారం ఒక పంచాయితీ సర్పంచ్‌గా పోటీ చేయాలనుకున్న సహకారం సంస్థ ఛైర్మన్‌ బంధువులకు అవకాశం లేకుండా పోయింది.ఎలాగైనా తమ గ్రామానికి కేటాయించిన రిజర్వేషన్‌ మార్చాలంటే పలుకుబడి ప్రయోగించాలి.అతి సత్ఫలితాన్ని ఇవ్వడంతో ఒక పంచాయితీ రిజర్వేషన్‌ మార్చితే అనుమానం వస్తుంది కాబట్టి 50 పంచాయితీల రిజర్వేషన్‌ అటూ ఇటూ మార్చితే సరిపోతుంది కదా అనేది అభియోగం.ఇదే కాకుండా 26వ తేదీతో సంతకం పెట్టిన గెజిట్‌ను 31వ తేదీ వరకూ ఎందుకు బయటకు రానివ్వలేదు.ఆ సమయంలో పరిషత్‌ ఎన్నికలకు నామినేషన్లు పడుతున్నందున రిజర్వేషన్‌లు మారాయని తెలిస్తే రాజకీయ పార్టీలు సమర్పించే నామినేషన్ల మీద ప్రభావం పడుతుందని ఆపారా ..? అనేది ఒక కోణం. అధికారుల వాదన ఇది..! అక్టోబర్‌ 15కు ముందు ఇక్కడి ఎంపీడీవో ఆశాజ్యోతి సెలవులో ఉన్నారట.ఈ కారణంగా ఏఓగా ఉన్న అధికారే రెండు బాధ్యతలు మోస్తూ రిజర్వేషన్‌ల జాబితా రూపొందించారట.గెజిట్‌ విడుదల అయిన తర్వాత ఒక వ్యక్తి ద్వారా జిల్లా కలెక్టర్‌కు ఫిర్యాదు రావడంతో అధికారి ఆదేశాల మేరకు కొత్త రిజర్వేషన్లు మార్చి గెజిట్‌ను విడుదల చేశారట.కేవలం మొదట రూపొందించిన రిజర్వేషన్లలో జనాభా నిష్పత్తి,మండల యూనిట్‌,గ్రామ యూనిట్‌,2011 జనాభా లెక్కల ప్రకారం రిజర్వేషన్లు ప్రతిపాదికన అంటూ రిజర్వేషన్లు మార్చారని ఇక్కడి అఽధికారులు సెలవిచ్చారు.కేవలం సిబ్బంది మొదటి జాబితాలో చేసిన సాంకేతిక తప్పిదాల వల్లే రెండవ సారి రిజర్వేషన్లు మార్చాల్సిన అవసరం వచ్చిందని వివరణ వచ్చింది. టీడీపీలో కల్లోలం.. ఈ పరిణామం నియోజక వర్గ టీడీపీలో కల్లోలాన్ని సృష్టిస్తోంది.టీడీపీలోని సహకార సంస్థ ఛైర్మన్‌కు ఆ పార్టీలోని కీలక నేతల సహకారంతో ఇదంతా జరిగిందని ఆరోపణలు వస్తున్నాయి. ఈ కారణంగా తాము పోటీ చేసేందుక సన్నద్ధం అవుతున్న తరుణంలో రిజర్వేషన్లు మార్చడం వల్ల పోటీ చేయలేని పరిస్థితి వచ్చిందని మెజారిటీ టీడీపీ నేతలు వాపోతున్నారు.కోర్టుని ఆశ్రయిస్తామని టీడీపీ నేతలు చెబుతున్నారు.ఇదిలా ఉండగా స్థానికంగా ఉన్న జనసేన ప్రజాప్రతినిధి సహకారంతో పోటీ ఒక పంచాయితీలో పోటీ చేయాలని ఇద్దరు యువనేతలు పోటీ పడుతుండగా రిజర్వేషన్‌ మారడంతో ఆ ప్రజాప్రతినిధికి ఝలక్‌ ఇచ్చినట్లయ్యింది.ఇక్కడ ప్రజా ప్రతినిధి కంటే సహకార సంస్థ ఛైర్మన్‌ మాటే నెగ్గిందనే ప్రచారం మండల వర్గాలో జోరుగా సాగుతోంది.అయితే ఈ విషయంలో అధికారుల వివరణ చాలా సింపుల్‌గా ఉంది.తొలుత తయారు చే సిన జాబితాలో ఉన్న తప్పుల్ని సవరించి రెండో జాబితా రూపొందించామని,అన్ని రకాల జనాభా లెక్కలు,రిజర్వేషన్ల శాతం ఆన్‌లైన్‌లో ఉంటుందని చెప్పడం కొసమెరుపు. స్థానిక ఎన్నికలను బహిష్కరిస్తాం ఆర్‌.వి పాలెం గ్రామస్తులు సాక్షి,అనకాపల్లి: అనకాపల్లి మండలం రొంగలివానిపాలెం గ్రామస్తులు సంచలన నిర్ణయం తీసుకున్నారు. ముందుగా ప్రకటించిన రిజర్వేషన్లను మార్చటంపై అసంతృప్తి వ్యక్తం చేస్తూ ఈ నెల 5వ తేదీన నిర్వహించనున్న ఎంపీటీసీ, జెడ్పీటీసీ ఎన్నికలతో పాటు సర్పంచ్‌ ఎన్నికల్ని బహిష్కరిస్తున్నట్లు ప్రకటించారు. ఈ మేరకు ఆదివారం రాత్రి సమావేశమై తీర్మానం చేసుకున్నారు. గ్రామంలో వలస వచ్చిన షెడ్యూల్‌ కులాల్లో ఆరుగురు మాత్రమే ప్రస్తుతం ఇక్కడ ఉన్నారని, గెజిట్‌లో రిజర్వేషన్లను బీసీ(మహిళ) నుంచి ఎస్సీ(మహిళ)కు కేటాయించడం అన్యాయమని వాపోయారు. మొదటి ప్రకటించిన రిజర్వేషన్‌ అమలు చేయాలని, లేకుంటే స్థానిక ఎన్నికల్ని బహిష్కరిస్తామని స్పష్టం చేశారు.

మహారాణిపేట: ప్రసూతి, సీ్త్ర వైద్య రంగాల్లో ఆధునిక సాంకేతిక పరిజ్ఞానం, నూతన చికిత్సా విధానాలపై నిపుణులు సవివరంగా చర్చించారు. విశాఖ ప్రసూతి, సీ్త్ర వైద్య నిపుణుల సంఘం (ఓజీఎస్‌వీ) ఆధ్వర్యంలో జరుగుతున్న 60వ వార్షిక సదస్సు, వజ్రోత్సవ వేడుకల్లో భాగంగా ఆదివారం రెండో రోజు శాసీ్త్రయ కార్యక్రమాలు నిర్వహించారు. ఈ సందర్భంగా ‘ప్రసూతి సమయంలో రక్తంలో ఇన్ఫెక్షన్‌ (ఆబ్‌స్టెట్రిక్స్‌ సెప్సిస్‌)’ అంశంపై డాక్టర్‌ విద్యాతోభి, డాక్టర్‌ అచ్యుత్‌ మీనన్‌ స్మారక ప్రసంగం చేశారు. ‘గురువు వారసత్వం.. ప్రసూతి, సీ్త్ర వైద్య రంగంలో గతం నుంచి భవిష్యత్తుకు వారధి’ అనే అంశంపై డాక్టర్‌ టి. రాధ, డాక్టర్‌ జి.ఆర్‌.కె. రాజు స్మారక ప్రసంగం అందించారు. సీ్త్ర వైద్య చికిత్సల్లో రోబోటిక్‌ సాంకేతికత వినియోగంపై డాక్టర్‌ మంజుల అనగాని కీలకోపన్యాసం చేశారు. ఆంధ్రా మెడికల్‌ కాలేజీ ప్రిన్సిపల్‌, ఓజీఎస్‌వీ అధ్యక్షురాలు డాక్టర్‌ సంధ్యాదేవి, కేజీహెచ్‌ సూపరింటెండెంట్‌ డాక్టర్‌ ఐ.వాణి, కార్యదర్శి డాక్టర్‌ జి.సునందారాణి నాయకత్వంలో సదస్సు జరిగింది. కార్యవర్గ సభ్యులు డాక్టర్‌ జి.వనజ, డాక్టర్‌ డి. రేఖ, డాక్టర్‌ వై. సృజన్‌ సహకరించారు.

మునగపాక: స్థానిక సంస్థల ఎన్నికల్లో అధికార కూటమికి షాక్‌ తగిలింది. జనసేనకు చెందిన పలువురు నేతలు ఆదివారం వైఎస్సార్‌సీపీలో చేరారు. స్థానిక పార్టీ కార్యాలయంలో మండల పరిషత్‌ ఉపాధ్యక్షులు, నరేంద్రపురానికి చెందిన జనసేన నేత బోజా లక్ష్మీ శ్రీనివాసరావు తన అనుచరులతో కలిసి వైఎస్సార్‌సీపీలో చేరారు. వైఎస్సార్‌సీపీ నేతలు కరణం ధర్మశ్రీ,బొడ్డేడ ప్రసాద్‌,కోలా గురువులు వారిని పార్టీలోకి ఆహ్వనించారు. ఈ సందర్బంగా వారు మాట్లాడుతూ మాజీ సీఎం వైఎస్‌ జగన్‌మోహన్‌రెడ్డి హయాంలో జరిగిన సంక్షేమ కార్యక్రమాలకు ఎంతోమంది ఆకర్షితులై వైఎస్సార్‌సీపీలో చేరుతున్నారన్నారు. అర్హులైన ప్రతి ఒక్కరికీ సంక్షేమ పథకాలు అందించిన ఘనత జగన్‌మోహన్‌రెడ్డికే దక్కుతుందన్నారు. కూటమి నేతలు ఎన్నికల ముందు ఇచ్చిన హామీలను విస్మరించారన్నారు. త్వరలో జరగనున్న స్థానిక సంస్థల ఎన్నికల్లో పార్టీ అభ్యర్థుల విజయానికి పాటుపడాలన్నారు. ప్రతి ఒక్కరూ ఫ్యాన్‌ గుర్తుపై ఓటు వేసి అభ్యర్థులను అఖండ మెజార్టీతో గెలిపించాలన్నారు. కార్యక్రమంలో పార్టీ మండల కన్వీనర్‌ ఆడారి అచ్చియ్యనాయుడు, మాజీ వైస్‌ ఎంపీపీ మళ్ల కాశీ సురేష్‌, పార్టీ నేతలు ఎ.వి. సత్యనారాయణ, జాజుల వెంకటరావు, దొడ్డి వరహా, బొడ్డేడ బుజ్జి, శంకరరావు, పొలమరశెట్టి సురేష్‌, ఎ.వి.సత్యనారాయణ, అల్లవరపు రమణ బాబు,, దొడ్డి సూరప్పారావు పాల్గొన్నారు. జనసేన కోర్‌ కమిటీ సభ్యుడు వాసు రాజీనామా మునగపాక: మండలంలోని నాగులాపల్లికి చెందిన జనసేన నేత కర్రి వాసు తన పదవికి ఆదివారం రాజీనామా చేశారు. వాసు జనసేన నియోజకవర్గ కోర్‌ కమిటీ సభ్యునిగా చురుగ్గా పనిచేసేవారు. అయితే పార్టీలో కష్టపడి పనిచేసినా తగిన గుర్తింపు లేకపోవడం అలాగే నేర ప్రవృతి ఉన్న వ్యక్తులను ప్రోత్సహించడం వంటి అంశాలు తనకు నచ్చలేదన్నారు. అలాగే స్థానిక ఎమ్మెల్యే విజయకుమార్‌ కూడా కార్యకర్తలకు ఎటువంటి ప్రాధాన్యం ఇవ్వడం లేదన్నారు. పార్టీ అధ్యక్షుడు పవన్‌కళ్యాణ్‌ సిద్ధాంతాలు నచ్చి తాను మంత్రి మనోహర్‌ ఆధ్వర్యంలో జనసేనలో చేరాల్సి వచ్చిందని, అయితే క్షేత్రస్థాయిలో సిద్ధాంతాలకు విరుద్ధంగా పార్టీ నేతలు వ్యవహరించడం తనకు నచ్చక పార్టీకి రాజీనామా చేస్తున్నట్టు ఆయన ఆదివారం విలేకరులకు తెలిపారు.

యలమంచిలి రూరల్‌: యలమంచిలి మున్సిపల్‌ ఎన్నికల పోలింగ్‌ ప్రశాంతంగా ముగిసింది. పట్టణంలో 32 వార్డులకు ఆదివారం పటిష్ట బందోబస్తు మధ్య పోలింగ్‌ నిర్వహించారు.ఉదయం 7 గంటలకే పోలింగ్‌ ప్రారంభమైనప్పటికీ..10 గంటల తర్వాతే ఓటర్ల రాక ఊపందుకుంది. నిర్దేశిత సమయం 5 గంటల వరకు 76.08 శాతం పోలింగ్‌ నమోదైనట్టు ముందు ప్రకటించిన అధికారులు..తరువాత 76.33 శాతంగా ప్రకటించారు. దివ్యాంగులు,వృద్ధులు,యువతీ, యువకులు,మహిళలు పెద్ద సంఖ్యలో కేంద్రాలకు చేరుకుని తమ ఓటు హక్కు వినియోగించుకున్నారు. మాజీ ఎమ్మెల్యే కన్నబాబురాజు పట్టణంలోని రైల్వేస్టేషన్‌రోడ్డు పాఠశాలలో ఓటేశారు.వైఎస్సార్‌సీపీ మున్సిపల్‌ ఛైర్‌పర్సన్‌ అభ్యర్థి బొద్దపు తులసి,ఆమె భర్త బొద్దపు ఎర్రయ్యదొరలు పెదపల్లి స్కూలులో ఓటు హక్కు వినియోగించుకున్నారు.బీజేపీ మున్సిపల్‌ చైర్‌పర్సన్‌ అభ్యర్థి పిల్లా రమాకుమారి యలమంచిలి తులసీనగర్‌ కేంద్రంలో ఓటు వేశారు. గత మున్సిపల్‌ ఎన్నికల కంటే ఈ సారి పోలింగ్‌ శాతం స్వల్పంగా తగ్గింది. బీఎల్‌వోలు ఓటరు స్లిప్పులను పూర్తిస్థాయిలో పంపిణీ చేయకపోవడంతో కొందరు ఓటర్లకు తమ ఓటు ఏ బూత్‌లో ఉందో తెలియక ఓటు వేయకుండానే వెనుదురగడం కనిపించింది. పట్టణంలోని తులసీనగర్‌ జెడ్పీ బాలికోన్నత పాఠశాలలో పోలింగ్‌ కేంద్రాలను జిల్లా కలెక్టర్‌ విజయక్రిష్ణన్‌,పెదపల్లి,పట్టణంలో పోలింగ్‌ కేంద్రాలను ఎస్పీ తుహీన్‌ సిన్హా పరిశీలించారు. యలమంచిలి మున్సిపాలిటీకి సంబంధించిన బ్యాలెట్‌ బాక్సులను స్థానిక గురప్ప కల్యాణ మండపంలోని కౌంటింగ్‌ కేంద్రం స్ట్రాంగ్‌రూమ్‌లో భద్రపరిచారు. వీటి భద్రతకు మూడంచెల పోలీసు బందోబస్తు ఏర్పాటు చేశారు. మొదటి అంచెలో రాష్ట్ర స్పెషల్‌ రిజర్వ్‌ పోలీసు బలగాలు, రెండో అంచెలో ఏఆర్‌ పోలీసులు, మూడో అంచెలో సివిల్‌ పోలీసులు విధులు నిర్వహిస్తున్నారు. ఈ నెల 3వ తేదీ మంగళవారం ఉదయం 8 గంటలకు ఓట్ల లెక్కింపు ప్రారంభం కానుంది. ఇందుకోసం అధికారులు ఏర్పాట్లు చేశారు. నర్సీపట్నంలో 72.60 శాతం.. నర్సీపట్నం, మాకవరపాలెం, నాతవరం, గొలుగొండ: పురపాలక ఎన్నికలు ప్రశాంతంగా ముగిశాయి. చెదురు, మదురు సంఘటనలు మినహా ఎలాంటి అవాంఛనీయ ఘటనలు చోటు చేసుకోలేదు. అన్ని పోలింగ్‌ కేంద్రాల్లో ఉదయం 7 గంటలకే పోలింగ్‌ ప్రారంభమైంది. పోలింగ్‌ సమయం కంటే ముందే ఓటర్లు ఓటు వేసేందుకు పోలింగ్‌ కేంద్రాల వద్ద క్యూ కట్టారు. ఉదయం నుంచి మధ్యాహ్నం 2 గంటల వరకు పోలింగ్‌ జోరుగా సాగింది. అక్కడి నుంచి 5 గంటల వరకు పోలింగ్‌ మందకొడిగా సాగింది. నర్సీపట్నం మున్సిపాలిటీలో 40 వార్డులకు ఆదివారం ఎన్నికలు జరిగాయి. 76 పోలింగ్‌ కేంద్రాలను ఏర్పాటు చేశారు. 31 సమస్మాత్మక, ఏడు అత్యంత సమస్యాత్మక కేంద్రాలు సీఆర్‌పీఎఫ్‌ బలగాలతో గట్టి బందోబస్తు ఏర్పాటు చేయడంతో పాటు వెబ్‌కాస్టింగ్‌, వీడియోగ్రఫీతో పోలింగ్‌ కేంద్రాల వద్ద ప్రశాంత వాతావరణం కల్పించారు. ఓటర్లు ఓటు వేసేందుకు పోలింగ్‌ కేంద్రాల వద్ద బారులు తీరారు. మొత్తం 49099 మంది ఓటర్లు ఉండగా 35674 మంది తమ ఓటుహక్కును వినియోగించుకున్నారు. 72.60 శాతం మంది ఓటు హక్కును వినియోగించుకున్నారు. రిటర్నింగ్‌ అధికారి ఆర్డీవో వి.వి.రమణ పోలింగ్‌ కేంద్రాలను సందర్శించి పోలింగ్‌ సరళిపై ఎప్పటికప్పుడు ఆరా తీసారు. ఓటు వేసేందుకు వచ్చే దివ్యాంగులు, వృద్ధులు, వికలాంగులు కోసం వీల్‌చైర్లు ఏర్పాటు చేయించారు. డీఎస్పీ పి.శ్రీనివాసరావు, సీఐ గపూర్‌ మున్సిపాలిటీలోని పోలింగ్‌ కేంద్రాలను సందర్శించారు. పోలింగ్‌ ముగిశాక కట్టుదిట్టమైన భద్రత మధ్య బ్యాలెట్‌ బాక్స్‌లను డాన్‌ బాస్కో కళాశాలకు స్ట్రాంగ్‌రూమ్‌కు తరలించారు.

● జిల్లాలో రూ.50.46 కోట్ల నష్టం అంచనా ● దెబ్బతిన్న రోడ్లు, వంతెనలు.. ధ్వంసమైన కల్వర్టులు ● 587 హెక్టార్లలో ఖరీఫ్‌, ఉద్యాన పంటలకు నష్టం సాక్షి, పాడేరు: అర్నబ్‌ తుపాను గిరిజన ప్రాంతాలను అతలాకుతలం చేసింది. భారీ వర్షాలు, వరదలతో రహదారులు, వంతెనలు, కల్వర్టులు దెబ్బతినగా.. వందలాది హెక్టార్లలో పంటలు నీటిపాలయ్యాయి. సుమారు వంద ఇళ్లు నేలకూలాయి. జిల్లా వ్యాప్తంగా అన్ని శాఖల పరిధిలో జరిగిన నష్టాన్ని అధికారులు క్షేత్రస్థాయిలో సమగ్రంగా అంచనా వేసి ప్రభుత్వానికి నివేదిక సమర్పించారు. కలెక్టర్‌ టి.నిశాంతి ద్వారా అందించిన ఈ నివేదిక ప్రకారం జిల్లాలో మొత్తం రూ.50.46 కోట్ల నష్టం వాటిల్లినట్టు అంచనా వేశారు. రోడ్లు, మౌలిక సదుపాయాలకు దెబ్బ తుపాను ప్రభావంతో రోడ్లు, భవనాల శాఖ పరిధిలో భారీ నష్టం సంభవించింది. భారీ వర్షాలు, వరదలకు పలు ప్రాంతాల్లో రహదారులు కోతకు గురయ్యాయి. కల్వర్టులు దెబ్బతినడంతో పాటు కొండచరియలు విరిగిపడి రాకపోకలకు అంతరాయం ఏర్పడింది. పంచాయతీరాజ్‌ శాఖ పరిధిలోనూ రహదారులు, ఇతర మౌలిక సదుపాయాలు దెబ్బతిన్నాయి. రహదారుల పునరుద్ధరణకు అధికారులు తాత్కాలిక, శాశ్వత మరమ్మతుల అంచనాలు రూపొందించారు. పలు ప్రాంతాల్లో చెక్‌డ్యామ్‌లు సైతం తీవ్రంగా దెబ్బతిన్నాయి. దెబ్బతిన్న పంటలు తుపాను ప్రభావంతో ఖరీఫ్‌ పంటలకు తీవ్ర నష్టం వాటిల్లడంతో గిరిజన రైతులు ఆవేదన చెందుతున్నారు. సుమారు 280 హెక్టార్లలో వరి, ఇతర చిరుధాన్యాల పంటలు, 307 హెక్టార్లలో ఉద్యాన పంటలు దెబ్బతిన్నాయి. వరి, మొక్కజొన్న, రాగులు, సామలు, మినుములు, రాజ్‌మా పంటలతో పాటు అరటి, టమాటా, అల్లం, పసుపు, మిరియాలు, బంతి, కూరగాయల తోటలకు నష్టం వాటిల్లింది. మరోవైపు సుమారు వంద గృహాలు నేలకూలాయి. విద్యుత్‌ స్తంభాలు పడిపోవడంతో అధికారులు వెంటనే కొత్త స్తంభాలను ఏర్పాటు చేసి సరఫరాను పునరుద్ధరించారు.

సాక్షి, పాడేరు: వైఎస్సార్‌సీపీ అధినేత, మాజీ ముఖ్యమంత్రి వైఎస్‌ జగన్‌మోహన్‌రెడ్డి గిరిజనుల పక్షాన నిలిచిన నాయకుడని అరకు ఎంపీ డాక్టర్‌ గుమ్మా తనూజరాణి అన్నారు. బాకై ్సట్‌ తవ్వకాలకు సంబంధించిన జీవో నంబర్‌ 97ను రద్దు చేయడం చారిత్రాత్మక నిర్ణయమని పేర్కొన్నారు. హుకుంపేట జెడ్పీటీసీ అభ్యర్థి ఒంటుబు ప్రియాంకతో పాటు అన్ని ఎంపీటీసీ సెగ్మెంట్ల అభ్యర్థుల విజయాన్ని కాంక్షిస్తూ శనివారం హుకుంపేట వారపు సంతలో నిర్వహించిన ఎన్నికల ప్రచారంలో ఆమె పాల్గొన్నారు. కొంతిలి జంక్షన్‌ నుంచి ప్రచార ర్యాలీని ప్రారంభించారు. ఈ సందర్భంగా ఎంపీ మాట్లాడుతూ అప్పట్లో ముఖ్యమంత్రిగా ఉన్న చంద్రబాబు బాకై ్సట్‌ తవ్వకాలకు సంబంధించి జీవో 97 తీసుకువచ్చారని, దీనికి వ్యతిరేకంగా ప్రతిపక్ష నేతగా ఉన్న జగన్‌మోహన్‌రెడ్డి గిరిజనుల పక్షాన ఉద్యమాలు చేపట్టారని గుర్తుచేశారు. వైఎస్సార్‌సీపీ 2019లో అధికారంలోకి వచ్చిన తర్వాత ఆ జీవోను రద్దు చేసి గిరిజనుల ఖనిజ సంపద పరిరక్షణకు చర్యలు తీసుకుందని పేర్కొన్నారు. వైఎస్సార్‌సీపీ పాలనలో రూ.500 కోట్లతో పాడేరులో మెడికల్‌ కళాశాల మంజూరు చేయడం ద్వారా గిరిజన ప్రాంతంలో వైద్య విద్య, ఉన్నత వైద్య సేవలకు అవకాశం కల్పించామని చెప్పారు. హుకుంపేటలో హోరెత్తిన ర్యాలీ : వైఎస్సార్‌సీపీ ప్రచార ర్యాలీతో హుకుంపేట మండల కేంద్రం, వారపు సంత సందడిగా మారాయి. మండలంలోని వివిధ ప్రాంతాల నుంచి పార్టీ నాయకులు, కార్యకర్తలు, అభిమానులు, మహిళలు పెద్ద సంఖ్యలో తరలివచ్చారు. కొంతిలి జంక్షన్‌ నుంచి ప్రధాన రహదారి మీదుగా వారపు సంత, మోదకొండమ్మ గుడి సెంటర్‌ మీదుగా తిరిగి కొంతిలి జంక్షన్‌ వరకు ర్యాలీ నిర్వహించారు. ఓపెన్‌టాప్‌ వాహనంపై అరకు ఎంపీ తనూజరాణి, మాజీ మంత్రి పసుపులేటి బాలరాజు, ఎస్టీ సెల్‌ రాష్ట్ర అధ్యక్షురాలు, మాజీ ఎమ్మెల్యే కొట్టగుళ్లి భాగ్యలక్ష్మి, మాజీ ఎమ్మెల్యే, సీఈసీ సభ్యుడు చెట్టి పాల్గుణ, జెడ్పీటీసీ అభ్యర్థి ఒంటుబు ప్రియాంక, ఎంపీటీసీ అభ్యర్థులు పాల్గొని ఓటర్లకు అభివాదం చేశారు. ర్యాలీలో పార్టీ పాటలకు నాయకులు, కార్యకర్తలు నృత్యాలు చేస్తూ, జై జగన్‌ నినాదాలు చేశారు. మాజీ ఎమ్మెల్యే చెట్టి పాల్గుణ, యువజన విభాగం రాష్ట్ర నేత చెట్టి వినయ్‌ కూడా నృత్యాలతో సందడి చేశారు. వారపు సంతలో ఓటర్లను కలుసుకుని పార్టీ అభ్యర్థులకు మద్దతు ఇవ్వాలని కోరారు. పార్టీ మండల అధ్యక్షుడు పాంగి అనిల్‌, మాజీ జెడ్పీటీసీలు, ఎంపీటీసీలు, సర్పంచ్‌లు, పార్టీ నాయకులు పాల్గొన్నారు. కూటమి ప్రభుత్వానికి స్థానిక ఎన్నికల్లో బుద్ధి చెప్పాలి ముంచంగిపుట్టు: స్థానిక సంస్థల ఎన్నికల్లో ఓటు ద్వారా కూటమి ప్రభుత్వానికి ప్రజలు బుద్ధి చెప్పాలని అరకు ఎంపీ గుమ్మ తనూజరాణి పిలుపునిచ్చారు. వైఎస్సార్‌సీపీ జెడ్పీటీసీ అభ్యర్థి జల్లిపల్లి సుభద్రతో పాటు 14 ఎంపీటీసీ సెగ్మెంట్ల అభ్యర్థుల విజయాన్ని కాంక్షిస్తూ శనివారం మండల కేంద్రంలోని వారపు సంతలో భారీ ప్రచార ర్యాలీ నిర్వహించారు. దారపల్లి నుంచి ప్రారంభమైన ర్యాలీ పార్టీ జెండాలు, నినాదాలతో ఉత్సాహంగా సాగింది. నాలుగు రోడ్ల కూడలిలో నిర్వహించిన సభలో ఎంపీ మాట్లాడుతూ గత వైఎస్సార్‌సీపీ ప్రభుత్వ హయాంలో గ్రామాల్లో రహదారులు, తాగునీరు, సీసీ రోడ్లు, పాఠశాలల్లో మౌలిక సదుపాయాల కల్పనకు చర్యలు తీసుకున్నామని చెప్పారు. జెడ్పీటీసీ అభ్యర్థి జల్లిపల్లి సుభద్ర మాట్లాడుతూ గతంలో మండలంలో రూ.30 కోట్లతో గిరిజన గ్రామాల్లో అభివృద్ధి పనులు చేపట్టామని, రహదారులు, సీసీ రోడ్లు, బోర్లు ఏర్పాటు చేశామని తెలిపారు. ఫ్యాన్‌ గుర్తుపై ఓటు వేసి తనతో పాటు ఎంపీటీసీ అభ్యర్థులను గెలిపించాలని విజ్ఞప్తి చేశారు. అనంతరం ఎంపీ తనూజరాణి, మాజీ ఎమ్మెల్యే భాగ్యలక్ష్మి, జెడ్పీటీసీ అభ్యర్థి సుభద్ర, ఎంపీటీసీ అభ్యర్థులు, పార్టీ నాయకులు, కార్యకర్తలు థింసా నృత్యాలు చేశారు. ఈ కార్యక్రమంలో పార్టీ మండల అధ్యక్షుడు పాంగి పద్మారావు, జేసీఎస్‌ జిల్లా కోఆర్డినేటర్‌ అరబీరు జగబందు, 23 పంచాయతీలకు చెందిన మాజీ సర్పంచులు, మాజీ ఎంపీటీసీలు, కార్యకర్తలు పాల్గొన్నారు.

మునగపాక: మండలంలోని నాగులాపల్లి టీచర్స్‌ కాలనీలో చోరీ జరిగింది. బంగారు, వెండి ఆభరణాలు అపహరణకు గురయ్యాయి. ఇందుకు సంబంధించి ఎస్‌ఐ ప్రసాదరావు తెలిపిన వివరాలు... నాగులాపల్లి టీచర్స్‌ కాలనీలో కుందురు వెంకటేశ్వరరావు అద్దెకు నివాసం ఉంటున్నారు. తన కోడలు గర్భవతి కావడంతో హైదరాబాద్‌కు ఈ నెల 23న వెళ్లారు. తిరిగి శనివారం ఉదయం 9.30 గంటలకు ఇంటికి వచ్చి చూసేసరికి ఇంటి వెనుక ఉన్న తలుపులు తీసి ఉన్నాయి. ఇంటి లోపలికి వెళ్లి చూడగా బీరువాలోని అర తులం బంగారం, 16 తులాల వెండి పట్టీలు, కుంకుమ భరిణె చోరీకి గురైనట్టు గుర్తించారు. విషయం తెలుసుకున్న మునగపాక పోలీసులు సంఘటనా స్థలానికి చేరుకుని వివరాలు సేకరించారు. క్లూస్‌ టీమ్‌ ఆధారాలు సేకరించింది. కేసు నమోదు చేసి దర్యాప్తు చేస్తున్నట్టు ఎస్‌ఐ ప్రసాదరావు తెలిపారు.

కొయ్యూరు: వైఎస్సార్‌సీపీ జెడ్పీటీసీ అభ్యర్థి గొడ్డేటి మాధవి శనివారం రావణాపల్లి సెగ్మెంట్‌ లో విస్తృతంగా ఎన్నికల ప్రచారం నిర్వహించా రు. అంతాడ, బంగారంపేట, రాజుపేట, రావణాపల్లి, వైఎన్‌ పాకల గ్రామాల్లో సెగ్మెంట్‌ ఎంపీటీసీ అభ్యర్థి రాజులమ్మతో కలిసి ఇంటింటికీ తిరుగుతూ ఓటర్లను కలిశారు. ఈ సందర్భంగా వైఎస్సార్‌సీపీ అభ్యర్థులకు మద్దతు తెలిపి గెలిపించాలని కోరారు. ప్రచారానికి వెళ్లిన ప్రతి గ్రామంలోనూ ప్రజలు వారికి స్వాగతం పలికారు. కార్యకర్తలు పెద్ద సంఖ్యలో పాల్గొన్నారు. ఓటర్లకు బ్యాలెట్‌ నమూనాలను పంపిణీ చేస్తూ ఓటు వేసే విధానంపై అవగాహన కల్పించారు. ఫ్యాన్‌ గుర్తుపై ఓటు వేసి పార్టీ అభ్యర్థులందరినీ గెలిపించాలని మాధవి కోరారు. స్థానిక సమస్యల పరిష్కారానికి కృషి చేస్తామని హామీ ఇచ్చారు. ఈ కార్యక్రమంలో మాజీ ఎంపీపీ బడుగు రమేష్‌బాబు, వైస్‌ ఎంపీపీ అంబటి నూకాలు, పార్టీ మండల మాజీ అధ్యక్షుడు జల్లి బాబులు, యువనేత గొడ్డేటి మహేశ్‌, మాజీ సర్పంచ్‌లు చంద్రరావు, పెంటమ్మ తదితరులు పాల్గొన్నారు.

నర్సీపట్నం: మున్సిపాలిటీలో రూ.267 కోట్లతో అభివృద్ధి చేశామని టీడీపీ నాయకులు చేస్తున్న ప్రచారంలో ఎంత మాత్రం వాస్తవం లేదని మాజీ ఎమ్మెల్యే పెట్ల ఉమాశంకర్‌ గణేష్‌ పేర్కొన్నారు. శనివారం ఆయన విలేకరులతో మాట్లాడుతూ ఈ నిధుల్లో రూ.185 కోట్లతో నిర్మించే రక్షిత మంచినీటి పథకం ఉందని ఆరోపించారు. 2014 టీడీపీ హయాంలో పట్టించుకోని అప్పటి మంత్రి, ప్రస్తుత స్పీకర్‌ అయ్యన్నపాత్రుడు 2019 సార్వత్రిక ఎన్నికల్లో లబ్ధి పొందేందుకు ఈ పథకాన్ని తెరమీదకు తెచ్చారన్నారు. వాస్తవంగా గత వైఎస్సార్‌సీపీ ప్రభుత్వంలో రక్షిత మంచినీటి ప్రాజెక్టు నిర్మాణానికి రూ.166 కోట్లు మంజూరు చేశామన్నారు. అప్పట్లో తాను ఎమ్మెల్యేగా ఉన్నప్పుడు 80 కిలోమీటర్ల మేర చిన్న పైపులైను, 4 కిలోమీటర్ల మేర పెద్ద పైపులైను వేశామన్నారు. తమ ప్రభుత్వంలో మంజూరు చేసిన పథకాన్ని కూడా వారి ఖాతాలో వేసుకుని పురపాలిక ఎన్నికల్లో లబ్ధి పొందేందుకు ప్రచారం చేసుకుంటున్నారని దుయ్యబట్టారు. రక్షిత మంచినీటి పథకం ఎవరు తీసుకువచ్చారో పట్టణ ప్రజలకు తెలుసునన్నారు.

పట్టుకున్న మద్యం బాటిళ్లతో ఎస్‌ఐ మనోజ్‌కుమార్‌ బుచ్చెయ్యపేట : బుచ్చెయ్యపేటలో అక్రమంగా నిల్వ చేసిన మద్యం బాటిళ్లను స్వాధీనం చేసుకున్నట్టు ఎస్‌ఐ పి.మనోజ్‌కుమార్‌ తెలిపారు. స్థానికుల ఫిర్యాదు మేరకు సీతా అప్పలనాయుడు ఇంటి వద్ద మద్యం నిల్వ చేసినట్టు సమాచారం అందడంతో శనివారం రాత్రి తమ సిబ్బందితో దాడి చేశామన్నారు. 48 మద్యం బాటిళ్లతో పాటు నిల్వ చేసిన వ్యక్తిని అదుపులోకి తీసుకుని కేసు నమోదు చేశామన్నారు. ఎవరైనా బెల్టు షాపులు నిర్వహించినా, అక్రమంగా మద్యం నిల్వ చేసినా కేసులు నమోదు చేసి చర్యలు తీసుకుంటామని హెచ్చరించారు.

గొలుగొండ : అల్లూరి జిల్లా ఏజెన్సీ నుంచి మైదానం ప్రాంతం అయిన కృష్ణదేవిపేట పోలీస్‌స్టేషన్‌ పరిధిలో కారులో 8 కిలోల గంజాయి తరలిస్తున్న ఇద్దరు వ్యక్తులను అరెస్టు చేసి కోర్టుకు తరలించడం జరిగిందని ఎస్‌ఐ రుషికేశ్వరరావు తెలిపారు. ఏజెన్సీ నుంచి కారులో గంజాయి తరలిస్తున్న సమయంలో శనివారం ఉదయం అల్లూరి పార్కు వద్ద వాహన తనిఖీలు నిర్వహించే సమయంలో ఒంగోలు ప్రాంతానికి చెందని షోయిక్‌, బోజి అనే ఇద్దరు వ్యక్తులు కారులో గంజాయి తరలిస్తుండగా పట్టుకున్నామన్నారు. ఇద్దరిని కోర్టుకు తరలించి కారు, రెండు సెల్‌ఫోన్లు స్వాధీనం చేసుకోవడం జరిగిందన్నారు. కార్యక్రమంలో కృష్ణదేవిపేట పోలీసులు పాల్గొన్నారన్నారు.

సాక్షి, పాడేరు: స్థానిక సంస్థల ఎన్నికల్లో పోటీ చేస్తున్న జెడ్పీటీసీ, ఎంపీటీసీ అభ్యర్థులతో పాటు అన్ని రాజకీయ పార్టీల నేతలు ఎన్నికల నియమావళిని కచ్చితంగా పాటించాలని కలెక్టర్‌ టి.నిశాంతి ఆదేశించారు. ఎన్నికలను స్వేచ్ఛాయుత, ప్రశాంత వాతావరణంలో నిర్వహించేందుకు అందరూ సహకరించాలని కోరారు. శనివారం కలెక్టరేట్‌లో జిల్లా ఎన్నికల పరిశీలకుడు కూర్మనాథ్‌, జిల్లా ఎస్పీ అమిత్‌బర్ధర్‌, ఎన్నికల విభాగం అధికారులు, రాజకీయ పార్టీల ప్రతినిధులతో ఆమె సమావేశం నిర్వహించారు. ఈ సందర్భంగా కలెక్టర్‌ మాట్లాడుతూ కుల, మత విద్వేషాలను రెచ్చగొట్టే ప్రచారాలు చేయరాదని, అభ్యర్థుల వ్యక్తిగత జీవితాలపై నిరాధార ఆరోపణలు చేయకూడదని స్పష్టం చేశారు. దేవాలయాలు, మసీదులు, చర్చిలు వంటి ప్రార్థనా మందిరాలను ఎన్నికల ప్రచారానికి వినియోగించరాదన్నారు. లౌడ్‌స్పీకర్ల వినియోగం, ఎన్నికల సభలు, ర్యాలీల నిర్వహణకు ముందస్తు అనుమతులు తప్పనిసరిగా తీసుకోవాలని సూచించారు. ఓటర్లను ప్రలోభపెట్టేందుకు నగదు, బహుమతులు, ఇతర ఆర్థిక ప్రయోజనాలు పంపిణీ చేయడం నిషేధమన్నారు. ఓటర్లను భయపెట్టడం, బలవంతంగా ఓట్లు వేయించడం, దొంగ ఓట్లకు పాల్పడటం వంటి చర్యలను సహించేది లేదని హెచ్చరించారు. పోలింగ్‌కు 48 గంటల ముందు నుంచి నిశ్శబ్ద కాలం పాటించాలని, ఆ సమయంలో బహిరంగ సభలు, ర్యాలీలు నిర్వహించరాదన్నారు. ఎన్నికల సంఘం ఆదేశాల మేరకు మద్యం విక్రయాలు, పంపిణీపై విధించిన నిషేధాన్ని తప్పనిసరిగా అమలు చేయాలన్నారు. జిల్లాలోని 44 సమస్యాత్మక, మారుమూల పోలింగ్‌ కేంద్రాల్లో మధ్యాహ్నం 3 గంటల వరకే పోలింగ్‌ నిర్వహించనున్నట్టు కలెక్టర్‌ తెలిపారు. ఈ సమావేశంలో సబ్‌కలెక్టర్‌ నాగ వెంకట సాహిత్‌, ఏఎస్పీ శృతి, వివిధ రాజకీయ పార్టీల ప్రతినిధులు పాల్గొన్నారు. ప్రచారంలో హద్దులు దాటొద్దు ఎన్నికల నియమావళిని కచ్చితంగా పాటించాలి రాజకీయ పార్టీలు, అభ్యర్థులకు కలెక్టర్‌ నిశాంతి ఆదేశం

చీడికాడ/నాతవరం/దేవరాపల్లి: అర్నాబ్‌ తుపాను ప్రభావంతో కురిసిన భారీ వర్షాలకు జిల్లాలోని కోనాం, తాండవ, రైవాడ జలాశయాల్లో నీటిమట్టాలు గణనీయంగా పెరిగాయి. కోనాం జలాశయంలోకి ప్రస్తుతం 650 క్యూసెక్కుల ఇన్‌ఫ్లో కొనసాగుతుండగా, నీటిమట్టం 100.55 మీటర్లకు చేరింది. గరిష్ట ప్రమాద స్థాయి 101.25 మీటర్లు కావడంతో అదనపు నీటిని ప్రధాన గేట్ల ద్వారా దిగువ బొడ్డేరులోకి విడుదల చేస్తున్నారు. తాండవ రిజర్వాయరులో నీటిమట్టం 371.2 అడుగులకు చేరింది. ప్రస్తుతం రోజుకు 1,500 క్యూసెక్కుల ఇన్‌ఫ్లో వస్తోందని ప్రాజెక్టు డీఈ అనురాధ తెలిపారు. గరిష్ట నీటిమట్టం 380 అడుగులు కాగా, ఖరీఫ్‌ సాగుకు సరిపడా నీటి నిల్వలు ఉన్నాయని ఆమె పేర్కొన్నారు. మరోవైపు రైవాడ జలాశయంలో నీటిమట్టం 113.05 మీటర్లకు చేరింది. ప్రస్తుతం 2 వేల క్యూసెక్కుల ఇన్‌ఫ్లో కొనసాగుతోంది. గరిష్ట నీటిమట్టం 114 మీటర్లు కాగా, ప్రమాద స్థాయి 113.50 మీటర్లుగా అధికారులు తెలిపారు. నీటిమట్టం మరింత పెరిగితే స్పిల్‌వే గేట్ల ద్వారా శారదా నదిలోకి వరద నీటిని విడుదల చేయనున్నారు.

● సస్పెండైన నేతల ఆవేదన ఎటపాక: పార్టీ కోసం కష్టపడిన కార్యకర్తలకు టీడీపీలో విలువ లేదని టీడీపీ అరకు పార్లమెంట్‌ కార్యాలయ మాజీ కార్యదర్శి మువ్వా శ్రీనివాస్‌ ఆవేదన వ్యక్తం చేశారు. స్థానిక సంస్థల ఎన్నికల్లో పార్టీ ఆదేశాలు పాటించలేదనే కారణంతో ఆయన్ని, మాజీ వైస్‌ ఎంపీపీ దొంతు మంగేశ్వరరావును శుక్రవారం టీడీపీ నుంచి సస్పెండ్‌ చేశారు. ఈ నేపథ్యంలో ఎటపాకలో శనివారం వారు విలేకరుల సమావేశంలో మాట్లాడారు. 30 ఏళ్లుగా పార్టీ కోసం పనిచేస్తే తమ కష్టాన్ని అనుభవించి ఇప్పుడు సస్పెండ్‌ చేసి టీడీపీ తమను మోసం చేసిందని వారు కంటతడి పెట్టారు. గిరిజన బిడ్డలంటే చులకనగా చూస్తున్నారని విమర్శించారు.

● గెలుపే లక్ష్యంగా శ్రేణులు శ్రమించాలి ● పార్టీ జిల్లా అధ్యక్షుడు, ఎమ్మెల్యే విశ్వేశ్వరరాజు పిలుపుచింతపల్లి: జిల్లాలోని అన్ని మండలాల్లో వైఎస్సార్‌సీపీ బలపరిచిన అభ్యర్థుల విజయమే లక్ష్యంగా పార్టీ శ్రేణులు సమష్టిగా కృషి చేయాలని పాడేరు ఎమ్మెల్యే, పార్టీ జిల్లా అధ్యక్షుడు మత్స్యరాస విశ్వేశ్వరరాజు పిలుపునిచ్చారు. శనివారం చింతపల్లి మండలం అన్నవరం పంచాయతీ పరిధిలోని చినసోమవరం, బర్రెంబంద, సోమవరం తదితర గ్రామాల్లో ఆయన పర్యటించి పార్టీ అభ్యర్థులకు మద్దతుగా ప్రచారం నిర్వహించారు. ఓటర్లను కలిసి వైఎస్సార్‌సీపీ బలపరిచిన అభ్యర్థులను గెలిపించాలని కోరారు. ఈ సందర్భంగా విశ్వేశ్వరరాజు మాట్లాడుతూ కూటమి ప్రభుత్వ ప్రజావ్యతిరేక విధానాలను ప్రజలకు వివరించాలని పార్టీ శ్రేణులకు సూచించారు. గత వైఎస్సార్‌సీపీ ప్రభుత్వ హయాంలో చేపట్టిన అభివృద్ధి, సంక్షేమ కార్యక్రమాలను గ్రామగ్రామాన ప్రచారం చేయాలన్నారు. ఈ కార్యక్రమంలో అన్నవరం ఎంపీటీసీ అభ్యర్థి సుండ్రు శిరీష, మాజీ సర్పంచ్‌ సుండ్రు చిన్నబ్బాయి, పార్టీ నాయకులు పాల్గొన్నారు.

మేయర్‌ పీఠానికి 15 మంది పోటీ ● 120 వార్డుల్లో 573 మంది అభ్యర్థులు 18.37 లక్షల మంది ఓటర్లు ● 1,990 పోలింగ్‌ కేంద్రాలు సిద్ధం సమయం ఉదయం 7 నుంచి సాయంత్రం 5 గంటల వరకు.. సాక్షి, విశాఖపట్నం: జీవీఎంసీ ఎన్నికల పోలింగ్‌కు సర్వం సిద్ధమైంది. ఆదివారం ఉదయం 7 నుంచి సాయంత్రం 5 గంటల వరకు పోలింగ్‌ జరగనుంది. మేయర్‌ పీఠం కోసం 15 మంది అభ్యర్థులు, 120 వార్డుల్లో కార్పొరేటర్‌ స్థానాల కోసం 573 మంది అభ్యర్థులు పోటీ పడుతున్నారు. మొత్తం 18,37,901 మంది ఓటర్లు తమ ఓటు హక్కును వినియోగించుకోనున్నారు. ఈ నెల 3న ఓట్ల లెక్కింపు చేపట్టనున్నారు. మేయర్‌ పీఠానికి 15 మంది పోరు గ్రేటర్‌ మేయర్‌ పీఠాన్ని దక్కించుకునేందుకు 15 మంది అభ్యర్థులు బరిలో నిలిచారు. వైఎస్సార్‌సీపీ తరఫున వరుదు కల్యాణి, కాంగ్రెస్‌ నుంచి దేవర నాగసునందాదేవి, టీడీపీ నుంచి ముక్కా శ్రావణి, బీఎస్పీ నుంచి కరణం కీర్తన గ్రేస్‌, భారత చైతన్య యువజన పార్టీ నుంచి నమ్మి భవాని పోటీ చేస్తున్నారు. మిగిలిన అభ్యర్థులు స్వతంత్రులుగా బరిలో ఉన్నారు. రెండు బ్యాలెట్‌ పత్రాలు.. రెండు ఓట్లు ఈ ఎన్నికల్లో మేయర్‌ను ప్రజలు నేరుగా ఎన్నుకునే విధానం అమల్లో ఉండటంతో ప్రతి ఓటరు రెండు బ్యాలెట్‌ పత్రాలపై ఓటు వేయాల్సి ఉంటుంది. మేయర్‌ అభ్యర్థికి గులాబీ రంగు, వార్డు కార్పొరేటర్‌ అభ్యర్థికి తెలుపు రంగు బ్యాలెట్‌ పత్రాలను కేటాయించారు. భారీ బందోబస్తు.. 14,334 మంది సిబ్బంది ఎన్నికలను ప్రశాంతంగా నిర్వహించేందుకు 4,500 మందికి పైగా పోలీసు సిబ్బందితో బందోబస్తు ఏర్పాటు చేశారు. పోలింగ్‌ ప్రక్రియ నిర్వహణకు 14,334 మంది సిబ్బందిని నియమించారు. వీరితోపాటు 82 మంది రిటర్నింగ్‌, అసిస్టెంట్‌ రిటర్నింగ్‌ అధికారులు, 56 మంది మాస్టర్‌ ట్రైనర్లు, 95 మంది నోడల్‌, సహాయ అధికారులు, 201 మంది రూట్‌ అధికారులు, 61 మంది సెక్టార్‌ అధికారులు, 10 మంది జోనల్‌ స్పెషల్‌ ఆఫీసర్లను నియమించారు. ఎన్నికల పర్యవేక్షణకు 379 మంది మైక్రో అబ్జర్వర్లు, 21 ఎన్నికల ఖర్చుల పరిశీలక బృందాలు, 11 ఎంసీసీ బృందాలు, 11 ఫ్లయింగ్‌ స్క్వాడ్‌ బృందాలు, 20 స్టాటిక్‌ సర్వైలెన్స్‌ బృందాలు, రెండు వీడియో వ్యూయింగ్‌ బృందాలను ఏర్పాటు చేశారు. ఎన్నికల సామగ్రి పంపిణీ పూర్తి పోలింగ్‌కు అవసరమైన ఎన్నికల సామగ్రిని శనివారం ఉదయం జీవీఎంసీ పరిధిలోని 10 జోన్లలో ఏర్పాటు చేసిన పంపిణీ కేంద్రాల ద్వారా సిబ్బందికి అందజేశారు. ప్రతి కేంద్రంలో రిజిస్ట్రేషన్‌ కేంద్రం, పీఓ/ఏపీఓ కౌంటర్‌, పబ్లిక్‌ అడ్రస్‌ సిస్టమ్‌, పోలీసు కౌంటర్‌, ఆహార పంపిణీ కౌంటర్‌ తదితర ఏర్పాట్లు చేశారు. మీ ఓటు ఎక్కడుందంటే.. ఓటర్లు తమ ఓటు వివరాలు, వార్డు, పోలింగ్‌ కేంద్రం నంబరు, చిరునామా తెలుసుకునేందుకు జీవీఎంసీ అధికారిక వెబ్‌సైట్‌ (www.gvmc.gov.in) (http://www.gvmc. gov. in)ను సందర్శించవచ్చు. జోన్లు వార్డులు ఓటర్లు పోలింగ్‌ కేంద్రాలు భీమిలి 1–5 66,446 78 మధురవాడ 6–11, 120 1,49,452 162 తూర్పు 12–29 2,96,124 309 దక్షిణ 30–45 2,17,817 249 ఉత్తర 46–65 2,91,692 302 పశ్చిమ 66–82 2,22,029 245 గాజువాక 83–101 2,98,228 329 అగనంపూడి 102–106 69,796 75 అనకాపల్లి 107–112 76,950 89 పెందుర్తి 113–119 1,49,367 152

కె.కోటపాడు: 14 ఏళ్ల వయస్సు బాలికలకు హెచ్‌పీవీ వ్యాక్సినేషన్‌ ప్రక్రియను వైద్య సిబ్బంది త్వరితగతిన పూర్తి చేయాలని జిల్లా ఇమ్యునైజేషన్‌ అధికారి చంద్రశేఖర్‌ దేవ్‌ తెలిపారు. చౌడువాడ పీహెచ్‌సీని శుక్రవారం ఆయన పరిశీలించారు. ఈ సందర్భంగా ఇటీవల అర్నబ్‌ తుఫాన్‌ ప్రభావంతో పీహెచ్‌సీలో దెబ్బతిన్న 50 అడుగుల ప్రహరీని ఆయన పరిశీలించారు. దీని మరమ్మతులకు నిధుల కోసం జిల్లా ఉన్నతాధికారులకు నివేదించనున్నట్టు తెలిపారు. విద్యుత్‌ అంతరాయంతో ఇక్కడ రిఫ్రిజరేటర్లలో నిల్వ ఉంచిన వ్యాక్సిన్లు పాడయ్యాయా లేదా అని వైద్య సిబ్బందిని అడిగి తెలుసుకున్నారు. ఆయన వెంట వైద్యాధికారులు మాలంనాయుడు, బి.రామ్‌ చైతన్య పాల్గొన్నారు. జిల్లా ఇమ్యునైజేషన్‌ అధికారి చంద్రశేఖర్‌ దేవ్‌

మునగపాక: ఎన్నికలు సమీపిస్తున్న వేళ టీడీపీ, జనసేన, బీజేపీల నుంచి వైఎస్సార్‌సీపీలోకి వలసలు కొనసాగుతున్నాయి. మండలంలోని అరబుపాలెంలో జనసేన పార్టీ నాయకుడు బొడ్డేడ వెంకటస్వామినాయుడు(వెంకన్న) ఆ పార్టీ రాజీనామా చేసి వైఎస్సార్‌సీపీలో చేరారు. శుక్రవారం రాత్రి జరిగిన కార్యక్రమంలో వైఎస్సార్‌సీపీ జిల్లా అధ్యక్షుడు బొడ్డేడ ప్రసాద్‌ ఆయనకు పార్టీ కండువా కప్పి సాదరంగా ఆహ్వానించారు. ఈ సందర్భంగా ప్రసాద్‌ మాట్లాడుతూ రానున్న ఎన్నికల్లో వైఎస్సార్‌సీపీ విజయమే లక్ష్యంగా ప్రతి ఒక్కరూ కృషి చేయాలని పిలుపునిచ్చారు. మాజీ సీఎం వైఎస్‌ జగన్‌మోహన్‌రెడ్డి హయాంలో జరిగిన అభివృద్ధిని గుర్తించి ఫ్యాన్‌ గుర్తుపై ఓటు వేయాలని కోరారు. వైఎస్సార్‌సీపీ జెడ్పీటీసీ అభ్యర్థి ఆడారి కమలప్రియ, ఎంపీటీసీ అభ్యర్థి నరాలశెట్టి భారతిని అత్యధిక మెజార్టీతో గెలిపించాలని విజ్ఞప్తి చేశారు. ఈ కార్యక్రమంలో మాజీ సర్పంచులు బొడ్డేడ శ్రీనివాసరావు, దొడ్డి చిన్న, బొద్దపు శ్రీరామమూర్తి, మాజీ ఎంపీటీసీ బొడ్డేడ బుజ్జి, పార్టీ సీనియర్‌ నాయకులు నరాలశెట్టి సూర్యనారాయణ, ద్వారం జానకీరామ్‌, శ్రీపతి రామకృష్ణ, ఆడారి గణేష్‌ తదితరులు పాల్గొన్నారు. బీజేపీ మండల ఉపాధ్యక్షుడు చేరిక మునగపాక మండల ఉపాధ్యక్షుడు, మునగపాక గ్రామ శాఖ అధ్యక్షుడు బీరా శ్రీనివాస్‌ శుక్రవారం వైఎస్సార్‌సీపీలో చేరారు. గత 15 సంవత్సరాలుగా బీజేపీకి సేవ చేసిన తగిన గుర్తింపు లేకపోవడంతో ప్రజా సమస్యలపై నిరంతరం పోరాడుతున్న వైఎస్సార్‌సీపీలో చేరేందుకు ఆయన ముందుకువచ్చారు. ఆయనకు వైఎస్సార్‌సీపీ జిల్లా అధ్యక్షుడు బొడ్డేడ ప్రసాద్‌ పార్టీ కండువా కప్పి ఆహ్వానించారు. ఈ కార్యక్రమంలో పార్టీ నేతలు కర్రి కోటి, పెంటకోట రాము, దాడి మురళి, కాండ్రేగుల రాము, విల్లూరి మోహన్‌, దాడి వీర పాల్గొన్నారు. టీడీపీ నుంచి 20 కుటుంబాలు చేరిక చీడికాడ: మండలంలోని జైతవరం పంచాయతీలో టీడీపీ నుంచి 20 కుటుంబాల వారు వైఎస్సార్‌సీపీ చేరారు. వారికి పార్టీ మండల అధ్యక్షుడు గొల్లవిల్లి రాజుబాబు వైఎస్సార్‌సీపీ కండువా కప్పి ఆహ్వానించారు. పార్టీలో చేరిన వారిలో రెడ్డి వాసు, రెడ్డి గౌతమి, రెడ్డి నారాయణమూర్తి, రెడ్డి హర్షావర్ధన్‌, బొబ్బిలి వరహామూర్తి, తంగేటి బుబ్జి, మొల్లి దేముడునాయుడు, సింగంపల్లి పైడినాయుడు, రెడ్డి రాజారావు, తదితర కుటుంబాలు ఉన్నాయి. గ్రామానికి చెందిన వైఎస్సార్‌సీపీ జిల్లా యూత్‌ ప్రధాన కార్యదర్శి ఈర్లె చైతన్య ఆధ్వర్యంలో ఈ చేరికలు జరిగాయి.

నర్సీపట్నం: స్థానిక కోర్టు సముదాయంలో నూతనంగా ఏర్పాటు చేసిన పోస్టాఫీసును జిల్లా అదనపు న్యాయమూర్తి వి.నరేష్‌ శుక్రవారం ప్రారంభించారు. ఈ సందర్భంగా ఆయన మాట్లాడుతూ త్వరలో బ్యాంకింగ్‌ సేవలను కూడా అందుబాటులోకి తీసుకురావటానికి తనవంతు కృషి చేస్తానన్నారు. వీటి స్థాపన వల్ల న్యాయవాదులు, కక్షిదారులే కాకుండా చుట్టుపక్కల ప్రాంత వాసులకు ఎంతో ఉపయోగకరంగా ఉంటుందన్నారు. కార్యక్రమంలో సీనియర్‌ సివిల్‌ జడ్జి పి.షియాజ్‌ ఖాన్‌, జూనియర్‌ సివిల్‌ జడ్జి ఎం.రోహిత్‌, బార్‌ అసోసియేషన్‌ అధ్యక్షుడు మెట్టా ప్రభాకర్‌, ఉపాధ్యక్షుడు కోసూరి అప్పలనాయుడు, సీనియర్‌ న్యాయవాది గొలుసు శంకరరావు పాల్గొన్నారు.

మాడుగుల రూరల్‌: అర్నబ్‌ తుఫాన్‌ ప్రభా వం వల్ల కురిసిన వర్షాలకు బుచ్చెయ్యపేట మండలం విజయరామరాజుపేట వద్ద బొడ్డేరు నదిపై కాజ్‌వే కొట్టుకుపోవడంతో మాడుగుల, పాడేరు వెళ్లే ఆర్టీసీ బస్సు సర్వీసులను కె.జె.పురం మీదుగా మళ్లించారు. పాడేరు డిపో నుంచి విశాఖపట్నం వెళ్లే ఆర్టీసీ బస్సు సర్వీసులు కె.జె.పురం మీదుగా నడుపుతున్నారు. ఇదే రహదారిలో కె.జె.పురం తాచేరు నదిపై వంతెన బలహీనంగా ఉంది. తాచేరు నది సమీపంలో కల్వర్టు శిథిలావస్థకు చేరింది. ఇప్పుడు వీటిపై ఆర్టీసీ బస్సులు నడపడంతో ప్రయాణికులు భయాందోళనకు గురవుతున్నారు.

కోటవురట్ల: కనిపించకుండా పోయిన ఆటోడ్రైవర్‌ హత్యకు గురైనట్లు పోలీసుల దర్యాప్తులో వెల్లడైంది. వివాహేతర సంబంధం నేపథ్యంలో పథకం ప్రకారం మద్యంలో నిద్రమాత్రలు కలిపి తాగించి, కర్రతో కొట్టి హతమార్చినట్లు పోలీసులు గుర్తించారు. అనంతరం మృతదేహాన్ని గోనెసంచిలో చుట్టి ఏలేరు కాలువలో పడేసినట్లు దర్యాప్తులో తేలింది. ఈ ఘటనకు సంబంధించిన వివరాలను డీఎస్పీ శ్రీనివాసరావు శుక్రవారం స్థానిక పోలీస్‌స్టేషన్‌లో వెల్లడించారు. చినబొడ్డేపల్లి శివారు ఆర్‌.కొత్తూరుకు చెందిన ఆటోడ్రైవర్‌ ఒబ్బలరెడ్డి రమేష్‌ (24) ఈ నెల 15 నుంచి కనిపించడం లేదు. దీంతో అతని తల్లి ఒబ్బలరెడ్డి మంగ ఈ నెల 20న పోలీసులకు ఫిర్యాదు చేశారు. మిస్సింగ్‌ కేసు నమోదు చేసి దర్యాప్తు చేపట్టిన పోలీసులకు విస్తుపోయే విషయాలు తెలిశాయి. అదే గ్రామానికి చెందిన రెడ్డి సత్తిబాబు 2021లో కోటనందూరు మండలం జగన్నాథపురానికి చెందిన రాజేశ్వరిని వివాహం చేసుకున్నాడు. ఆమెతో రమేష్‌ వివాహేతర సంబంధం కొనసాగిస్తున్నట్లు పోలీసులు తెలిపారు. ఈ విషయం తెలిసి సత్తిబాబుతో పాటు గ్రామ పెద్దలు పలుమార్లు హెచ్చరించినా రమేష్‌ వైఖరిలో మార్పు రాలేదన్నారు. పథకం ప్రకారం హత్య : ఈ నేపథ్యంలో ఈ నెల 9న సత్తిబాబు, రాజేశ్వరి మధ్య గొడవ జరగడంతో ఆమె జగన్నాథపురంలోని పుట్టింటికి వెళ్లిపోయింది. భార్యను అనుసరించి అక్కడకు వెళ్లిన సత్తిబాబు.. రమేష్‌ ఆమెను కలవడాన్ని గమనించి అతనిపై దాడి చేశాడు. అక్కడి నుంచి రమేష్‌ తప్పించుకోవడంతో అతనిపై పగ పెంచుకున్న సత్తిబాబు హత్యకు పథకం రచించాడు. ఇందుకోసం రమేష్‌ స్నేహితుడు జి.లోవరాజు సహకారం తీసుకున్నాడు. ఈ నెల 15న లోవరాజు మద్యంలో నిద్రమాత్రలు కలిపి రమేష్‌తో తాగించి జగన్నాథపురానికి తీసుకెళ్లి సత్తిబాబుకు అప్పగించాడు. మద్యం, నిద్రమాత్రల మత్తులో ఉన్న రమేష్‌ను సత్తిబాబు కర్రతో కొట్టి హత్య చేసినట్లు డీఎస్పీ వివరించారు. హత్య అనంతరం మృతదేహాన్ని మాయం చేసేందుకు సత్తిబాబు తన అన్న, సాఫ్ట్‌వేర్‌ ఉద్యోగి నాగేశ్వరరావు సహాయం కోరాడు. అప్పటికే ఆర్‌.కొత్తూరుకు వచ్చిన నాగేశ్వరరావు తమ్ముడి ఫోన్‌తో జగన్నాథపురానికి చేరుకున్నాడు. ఇద్దరూ కలిసి రమేష్‌ మృతదేహాన్ని గోనెసంచిలో చుట్టి ద్విచక్ర వాహనంపై నర్సీపట్నం మండలం వేములపూడికి తరలించారు. అక్కడ ఏలేరు కాలువలో పడేసినట్లు పోలీసుల విచారణలో వెల్లడైంది. మృతదేహం కోసం గాలింపు : నిందితులు వెల్లడించిన వివరాల ఆధారంగా ఎస్పీ ఆదేశాలతో నక్కపల్లి సీఐ రామకృష్ణ పర్యవేక్షణలో ఎస్‌ఐ విజయ్‌కుమార్‌ ఏలేరు కాలువలో గాలింపు చర్యలు చేపట్టారు. అయితే ఇప్పటి వరకు మృతదేహం లభించలేదు. కాలువ పరిధిలోని పోలీస్‌స్టేషన్ల సిబ్బందితోనూ గాలింపు చేపట్టాలని ఎస్పీ ఆదేశించినట్లు డీఎస్పీ తెలిపారు. ఈ కేసులో సత్తిబాబు, నాగేశ్వరరావులను అదుపులోకి తీసుకున్నామని, హత్యకు సహకరించిన జి.లోవరాజును ఏ–3గా చేర్చి కేసు నమోదు చేశామని వెల్లడించారు. ఘటన కోటనందూరు పోలీస్‌స్టేషన్‌ పరిధిలో జరగడంతో కేసు ఫైల్‌ను అక్కడకు బదిలీ చేయనున్నట్లు తెలిపారు. వివాహేతర సంబంధం నేపథ్యంలో ఆటోడ్రైవర్‌ దారుణ హత్య మద్యంలో నిద్రమాత్రలు కలిపి.. కర్రతో కొట్టి హతం మృతదేహాన్ని గోనెసంచిలో చుట్టి ఏలేరు కాలువలో పడేసిన నిందితులు అదుపులో ఇద్దరు నిందితులు.. మరొకరిపై కేసు హత్య కేసు వివరాలు వెల్లడించిన డీఎస్పీ శ్రీనివాసరావు