Donald Trump

ఓస్లో: అమెరికా అధ్యక్షుడు డొనాల్డ్‌ ట్రంప్‌ నార్వేపై చేసిన అవమానకర వ్యాఖ్యలకు ఆ దేశ పర్యాటక సంస్థ వినూత్నంగా బదులిచ్చింది. ట్రంప్‌ విమర్శలను తమకు అనుకూలమైన ప్రచారంగా మార్చుకుంటూ.. ప్రకృతి అందాల మధ్య నిర్మించిన అద్భుతమైన టాయిలెట్లను ప్రపంచానికి పరిచయం చేసింది. అంతేకాదు.. ట్రంప్‌ రాజకీయ నినాదాన్ని గుర్తుచేసేలా ‘మేక్‌ షిట్‌ హౌసెస్‌ గ్రేట్‌ ఎగైన్‌’ అంటూ వ్యంగ్యాస్త్రం సంధించింది. ప్రస్తుతం ఈ ప్రచారం ఆసక్తికరంగా మారింది.నోబెల్‌ దక్కలేదని నార్వేపై ఆగ్రహంవచ్చే వారం జరగనున్న అమెరికా మధ్యంతర ఎన్నికలకు ముందు మిచిగాన్‌లో జరిగిన ర్యాలీలో ట్రంప్‌ నార్వేపై తీవ్ర వ్యాఖ్యలు చేశారు. తనకు నోబెల్‌ శాంతి బహుమతి రాలేదన్న అసహనాన్ని వ్యక్తం చేస్తూ.. ‘నార్వే పరిస్థితి దారుణంగా ఉంది. అది ఒక చెత్త దేశంగా మారింది’ అన్న అర్థం వచ్చేలా వ్యాఖ్యానించారు. ఆ దేశం నుంచి వలసదారులను స్వాగతించబోనని కూడా పేర్కొన్నారు. ఈ ఏడాది నోబెల్‌ శాంతి బహుమతిని దక్షిణాఫ్రికా న్యాయమూర్తి, హక్కుల పరిరక్షకురాలు నవీ పిళ్లైకి ప్రదానం చేశారు.విమర్శలనే ప్రచారంగా మార్చిన నార్వేట్రంప్‌ వ్యాఖ్యలకు నార్వే పర్యాటక సంస్థ ‘విజిట్‌ నార్వే’ తనదైన శైలిలో స్పందించింది. ‘షిట్‌హౌస్‌ కంట్రీ’ అంటూ చేసిన వ్యాఖ్యను ప్రస్తావిస్తూ.. తమ దేశంలో ప్రపంచంలోనే అత్యంత అద్భుతమైన టాయిలెట్లు ఉన్నాయని పేర్కొంది. ‘ప్రపంచంలోని అత్యంత అందమైన టాయిలెట్లను చూడండి’ అంటూ ప్రత్యేక ప్రచారాన్ని ప్రారంభించింది. ఈ మేరకు ఫేస్‌బుక్‌లో పోస్టు పెట్టి, ప్రకృతి అందాల మధ్య ఉన్న విశ్రాంతి గదుల చిత్రాలను పంచుకుంది. ట్రంప్‌ వ్యాఖ్యలను పర్యాటక ప్రచారానికి ఉపయోగించుకోవడం ఇప్పుడు చర్చనీయాంశమైంది.‘మేక్‌ షిట్‌ హౌసెస్‌ గ్రేట్‌ ఎగైన్‌’ట్రంప్‌ రాజకీయ నినాదం ‘మేక్‌ అమెరికా గ్రేట్‌ ఎగైన్‌’ను గుర్తుచేస్తూ.. ‘మేక్‌ షిట్‌ హౌసెస్‌ గ్రేట్‌ ఎగైన్‌’ అంటూ నార్వే పర్యాటక సంస్థ వ్యంగ్యంగా పేర్కొంది. ఈ టాయిలెట్లు అత్యవసర సమయాల్లోనే కాకుండా.. ప్రత్యేకంగా చూడటానికి కూడా వెళ్లదగినవని చమత్కరించింది. కొండ దిగువన ఫియోర్డ్‌ అందాలను వీక్షించేలా ఉన్న టాయిలెట్లు, నది పక్కన నిర్మించిన విశ్రాంతి గదులు, అద్భుతమైన ప్రకృతి దృశ్యాల మధ్య ఉన్న ఇతర నిర్మాణాల చిత్రాలను ప్రచారంలో ఉపయోగించింది.బంగారు టాయిలెట్‌ ప్రస్తావనతో మరో పంచ్‌నార్వేలోని సెంజా ద్వీపంలో ఉన్న ‘గోల్డెన్‌ లూ’ను కూడా పర్యాటక సంస్థ ప్రస్తావించింది. బంగారు పూతతో కూడిన టాయిలెట్‌ సీటును కొనలేని సాధారణ ప్రజలకు ఇది మరో ఆకర్షణగా ఉంటుందని పేర్కొంది. ఈ సందర్భంగా కళాకారుడు మౌరిజియో కాటెలాన్‌ రూపొందించిన ‘అమెరికా’ అనే 18 క్యారెట్ల స్వచ్ఛమైన బంగారు టాయిలెట్‌ శిల్పాన్ని గుర్తుచేసింది. 2017లో ఆ కళాఖండాన్ని అమెరికా అధ్యక్ష భవనానికి అందించేందుకు ప్రతిపాదించినప్పటికీ.. ట్రంప్‌ దానిని సొంతం చేసుకోలేదు, అక్కడ ఏర్పాటు చేయలేదు. ఆ కళాఖండం 2025 నవంబరులో సోథెబీస్‌ వేలంలో 12.1 మిలియన్‌ డాలర్లకు అమ్ముడైంది.ట్రంప్‌ వ్యాఖ్యలపై నార్వే మంత్రి ఏమన్నారంటే..ట్రంప్‌ వ్యాఖ్యలపై నార్వే విదేశాంగ మంత్రి ఎస్పెన్‌ బార్త్‌ ఐడె స్పందించారు. నోబెల్‌ శాంతి బహుమతి ఎంపికలో తమ ప్రభుత్వానికి ఎలాంటి పాత్ర లేదని స్పష్టం చేశారు. నోబెల్‌ కమిటీ స్వతంత్రంగా పనిచేస్తుందనే విషయం ట్రంప్‌కు బాగా తెలుసని, ఈ విషయాన్ని ఇప్పటికే ఆయనకు గుర్తుచేశామని పేర్కొన్నారు. ట్రంప్‌ వ్యాఖ్యలు తమ దేశంలో పెద్దగా ప్రభావం చూపలేదన్న సంకేతాలను నార్వే ప్రభుత్వం ఇచ్చింది.ఇదీ చదవండి: 10 క్షిపణులు పరీక్షించిన ఉత్తర కొరియా

పశ్చిమాసియా ప్రాంతంలో మరోసారి యుద్ధ మేఘాలు కమ్ముకుంటున్నాయి. నవంబర్‌ 3 తర్వాత సైనిక దాడులకు దిగే అవకాశాలున్నాయన్న సంకేతాలతో పశ్చిమాసియాలో మళ్లీ టెన్షన్‌ మొదలైంది. ఇరాన్‌పై దాడుల విషయంలో అధ్యక్షుడు డొనాల్డ్‌ ట్రంప్‌ ఇంకా తుది నిర్ణయం తీసుకోకపోయినా.. అప్రమత్తంగా ఉండాలంటూ అమెరికా తన మిత్రదేశాలకు హెచ్చరికలు జారీ చేసినట్లు సమాచారం. ఇరాన్‌ ప్రతీకార దాడులకు దిగితే చమురు కేంద్రాలు, కీలక మౌలిక సదుపాయాలకూ ముప్పు తప్పదన్న ఆందోళనలు వ్యక్తమవుతున్నాయి. ట్రంప్‌.. మధ్యంతర ఎన్నికల తర్వాత ఇరాన్‌పై మళ్లీ సైనిక దాడులు చేపట్టే అవకాశాన్ని పరిశీలిస్తున్నట్లు తెలుస్తోంది. ఈ విషయాన్ని ఇద్దరు దౌత్యవేత్తలు వెల్లడించినట్లు అక్కడి మీడియా కథనాలు పేర్కొంటున్నాయి. అయితే, ఇరాన్‌పై కొత్తగా దాడులు చేయాలా వద్దా? అనే విషయంలో ట్రంప్‌ ఇంకా తుది నిర్ణయం తీసుకోలేదని ఆ దౌత్యవేత్తలు స్పష్టం చేశారు. ఎన్నికల తర్వాత సైనిక చర్యకు ఆదేశాలు ఇచ్చే అంశాన్ని ట్రంప్‌ పలుమార్లు ప్రస్తావించిన నేపథ్యంలో తాజా హెచ్చరికలు ప్రాధాన్యం సంతరించుకున్నాయి.అమెరికా హెచ్చరికలతో పశ్చిమాసియాలో మరోసారి ఉద్రిక్తతలు పెరిగే అవకాశాలు కనిపిస్తున్నాయి. అమెరికా, ఇరాన్‌ మధ్య మళ్లీ పూర్తిస్థాయి సైనిక ఘర్షణలు ప్రారంభమవుతాయేమోనన్న ఆందోళన ప్రాంతీయ దేశాల్లో నెలకొంది. ఇరాన్‌పై అమెరికా చేపట్టే కొత్త సైనిక చర్యలు కొన్ని రోజులపాటు కొనసాగవచ్చని ప్రాంతీయ మిత్రదేశాలకు అమెరికా అధికారులు తెలిపినట్లు దౌత్యవేత్తలు వెల్లడించారు. అయితే, ఇరాన్‌తో పాటు దానికి మద్దతుగా ఉన్న సాయుధ బృందాలు ప్రతిదాడులకు దిగితే ఘర్షణలు మరింత కాలం కొనసాగవచ్చని ప్రాంతీయ అధికారులు అంచనా వేస్తున్నారు.ఇరాన్‌ ప్రతీకార చర్యల్లో భాగంగా ఇంధన కేంద్రాలు, ఇతర కీలక మౌలిక సదుపాయాలపై దాడులు జరిగే అవకాశముందని అమెరికా అధికారులు మిత్రదేశాలను అప్రమత్తం చేసినట్లు సమాచారం. అందుకు అనుగుణంగా ముందస్తు రక్షణ చర్యలు చేపట్టాలని సూచించినట్లు తెలుస్తోంది. ఈ వ్యవహారంపై వైట్‌హౌస్‌, ఇతర అమెరికా అధికారులు స్పందించేందుకు నిరాకరించారు. మరోవైపు, ఇరాన్‌పై దాడులకు అమెరికా సైన్యం ఎంత త్వరగా సిద్ధం కాగలదన్నది ఇంకా స్పష్టంగా తెలియలేదు.మరోవైపు, ఉద్రిక్తతలను తగ్గించేందుకు దౌత్యపరమైన ప్రయత్నాలకు ఇరాన్‌ మరో అవకాశం ఇవ్వాలని భావిస్తోంది. ఇరాన్‌ విదేశాంగ మంత్రి అబ్బాస్‌ అరాగ్చీ అక్టోబర్‌ 28న ‘ఎక్స్‌’ వేదికగా స్పందిస్తూ.. దౌత్యం విజయవంతం కావడానికి తమ దేశం ఇప్పటికీ అవకాశం ఇస్తోందని పేర్కొన్నారు. గత నెలలో ఇరాన్‌ ప్రతిపాదించిన కొన్ని అంశాలపై మధ్యవర్తులతో కలిసి సమీక్షిస్తున్నట్లు తెలిపారు. కాల్పుల విరమణకు తిరిగి రావడానికి ఆ ప్రతిపాదనను ప్రాతిపదికగా తీసుకోవాలని ఇరాన్‌ కోరుకుంటోందని వెల్లడించారు. అయితే, ఆ ప్రతిపాదనను ట్రంప్‌ గతంలోనే తిరస్కరించారు.పశ్చిమాసియాలో ఉద్రిక్తతలు తగ్గించాలని యునైటెడ్‌ అరబ్‌ ఎమిరేట్స్‌ (యూఏఈ) విదేశాంగ శాఖ కూడా పిలుపునిచ్చింది. వివేకంతో వ్యవహరించాలని, ఉద్రిక్తతలను అదుపులోకి తెచ్చేందుకు రాజకీయ పరిష్కారాల దిశగా ప్రయత్నించాలని ఇరు పక్షాలకు సూచించింది. పూర్తిస్థాయి సైనిక కార్యకలాపాలు మళ్లీ ప్రారంభం కాకుండా చూడాలని కోరింది.ఫిబ్రవరి చివర్లో ప్రారంభమైన యుద్ధం ఇప్పటికే పలు ప్రాంతాలకు విస్తరించింది. ఇరాన్‌ మద్దతున్న హౌతీ తిరుగుబాటుదారులు సౌదీ అరేబియాలోని చమురు మౌలిక సదుపాయాలు, విమానాశ్రయాలపై దాడులు చేపట్టారు. దీనికి ప్రతిగా సౌదీ నేతృత్వంలోని సంకీర్ణ దళాలు యెమెన్‌లో హౌతీల ఆధీనంలోని ప్రాంతాలపై దాడులు జరిపిన సంగతి తెలిసిందే.ఇదీ చదవండి: ‘అణు కేంద్రం’లో అగ్నిప్రమాదం.. క్షణాల్లో అప్రమత్తం!

ఓహియో: అమెరికా అధ్యక్షుడు డొనాల్డ్ ట్రంప్‌కు ఓహియోలోని చిల్లికోథేలో జరిగిన ర్యాలీలో నిరసనకారుల నుంచి అడ్డంకులు ఎదురయ్యాయి. ఈ సందర్భంగా దివంగత లైంగిక నేరస్థుడు ఎప్‌స్టీన్‌తో తనకున్న సంబంధాలపై ప్రస్తావన రావడంతో ట్రంప్ తీవ్ర అసహనం వ్యక్తం చేశారు. ఎప్‌స్టీన్‌ను తానే గతంలో తన పామ్ బీచ్ క్లబ్‌ నుంచి బయటకు పంపించినట్లు పేర్కొన్నారు. నిరసనకారులను వామపక్ష తీవ్రవాద రాజకీయాలతో ముడిపెట్టే ప్రయత్నం చేశారు.చిల్లికోథేలోని షూమేకర్ సెంటర్‌లో బుధవారం జరిగిన కార్యక్రమం ప్రారంభమైన కొద్దిసేపటికే ఓ నిరసనకారుడిని అక్కడి నుంచి బయటకు పంపించారు. అనంతరం ట్రంప్ ఈ ఘటనపై స్పందిస్తూ.. ఆ వ్యక్తి తీవ్ర వామపక్ష రాజకీయ వ్యూహాలను అనుసరిస్తున్నాడని వ్యాఖ్యానించారు. అతను ఎప్‌స్టీన్‌ పేరును ప్రస్తావించాడని పేర్కొంటూ తన గత చర్యలను సమర్థించుకున్నారు.‘నేను జెఫ్రీ ఎప్‌స్టీన్‌ను మార్‌ ఎ లాగో నుంచి బయటకు గెంటేశాను. నేను చేసిన గొప్ప పని అది’ అని ట్రంప్ అన్నారు. ఎప్‌స్టీన్‌ డెమోక్రాట్ అని పేర్కొంటూ, ఈ వ్యవహారంలో తనకు పూర్తిగా క్లీన్‌చిట్ లభించిందని కూడా వ్యాఖ్యానించారు. నిరసనకారులకు డబ్బులు చెల్లిస్తున్నారని, వారంతా వృత్తిపరమైన నిరసనకారులని ఆరోపించారు.ట్రంప్ ర్యాలీల్లో ఇటీవలి వారాల్లో నిరసనలు పెరుగుతున్నాయి. ముఖ్యంగా చిల్లికోథేలో జరిగిన కార్యక్రమం చిన్న వేదికపై నిర్వహించడంతో నిరసనకారుల అడ్డంకులు స్పష్టంగా కనిపించాయి. సాధారణంగా తన సభల్లో నిరసనకారులపై ట్రంప్ హాస్యంగా స్పందిస్తుంటారు. అయితే ఈసారి ఎప్‌స్టీన్‌ ప్రస్తావన రావడంతో తీవ్ర అసహనం వ్యక్తం చేశారు.ఒబామా ప్రచారం చేయడం మంచిదేమరోవైపు, అమెరికా మధ్యంతర ఎన్నికలకు ముందు మాజీ అధ్యక్షుడు బరాక్ ఒబామా డెమోక్రాట్ల తరఫున ప్రచారం చేయడంపై ట్రంప్ స్పందించారు. ఒబామా ప్రచారం తనకు ఆందోళన కలిగించడం లేదని, అది మంచిదేనని వ్యాఖ్యానించారు. గతంలో హిల్లరీ క్లింటన్, కమలా హారిస్‌లకు ఒబామా మద్దతుగా ప్రచారం చేసినప్పటికీ వారు ఓడిపోయారని ట్రంప్ పేర్కొన్నారు.ఒహియోలోని చిల్లికోథేలో మాట్లాడుతూ.. ఒబామా గతంలో హిల్లరీ క్లింటన్‌కు మద్దతుగా ప్రచారం చేశారని, ఆ తర్వాత కమలా హారిస్‌కు మద్దతు తెలిపారని ట్రంప్ గుర్తుచేశారు. అయితే ఆ ఇద్దరూ ఎన్నికల్లో ఓడిపోయారని వ్యాఖ్యానించారు. మధ్యంతర ఎన్నికలకు ముందు ఒబామా ప్రచారంలో పాల్గొననున్నట్లు తనకు సమాచారం అందిందని, దానిపై తాను సానుకూలంగానే స్పందించానని తెలిపారు.ఇదీ చదవండి: మోదీ సొంత నియోజకవర్గంలో బీజేపీకి షాక్‌!

జెరూసలేం: ఇజ్రాయెల్ ఎన్నికల ఫలితాలపై ఉత్కంఠ కొనసాగుతున్న వేళ ఆ దేశ ప్రధాని బెంజమిన్ నెతన్యాహు కీలక వ్యాఖ్యలు చేశారు. ఎగ్జిట్ పోల్స్‌లో ఏ కూటమికీ స్పష్టమైన మెజారిటీ కనిపించకపోయినప్పటికీ.. తదుపరి ప్రభుత్వాన్ని ఏర్పాటు చేయగలమన్న ధీమాను వ్యక్తం చేశారు. ఇరాన్ ముప్పును శాశ్వతంగా తొలగించేందుకు ఇది చారిత్రక అవకాశమని పేర్కొన్నారు. అమెరికా అధ్యక్షుడు డొనాల్డ్ ట్రంప్‌తో కలిసి ఈ లక్ష్యాన్ని సాధిస్తామని ప్రకటించారు.ఎన్నికల అనంతరం జెరూసలెంలోని లికుడ్ పార్టీ ఎన్నికల ప్రధాన కార్యాలయంలో మద్దతుదారులను ఉద్దేశించి నెతన్యాహు మాట్లాడారు. ఇజ్రాయెల్‌కు బలమైన, జాతీయవాద ప్రభుత్వమే అవసరమని స్పష్టం చేశారు. అరబ్ పార్టీల మద్దతుపై ఆధారపడే ప్రభుత్వాన్ని ఏర్పాటు చేయడం దేశ భద్రతకు ప్రమాదకరమని వ్యాఖ్యానించారు. కొన్ని అరబ్ పార్టీలు హమాస్‌కు మద్దతు ఇస్తున్నాయని, ఇజ్రాయెల్ సైనికులను యుద్ధ నేరగాళ్లుగా అభివర్ణిస్తున్నాయని ఆరోపించారు. అందువల్ల అలాంటి పార్టీలపై ఆధారపడకూడదని పేర్కొన్నారు.మరోవైపు, ఎన్నికల ఎగ్జిట్ పోల్స్ మాత్రం హోరాహోరీ పోటీని సూచిస్తున్నాయి. పోల్స్టర్ డైరెక్ట్ పోల్స్ అంచనాల ప్రకారం.. నెతన్యాహు కూటమికి 55 స్థానాలు, గడి ఐసెన్‌కోట్ నేతృత్వంలోని ప్రతిపక్ష కూటమికి 49 స్థానాలు, అరబ్ పార్టీలకు 16 స్థానాలు లభించే అవకాశముంది. దీంతో ఏ కూటమికీ స్పష్టమైన మెజారిటీ దక్కనట్లుగా కనిపిస్తోంది. అక్టోబర్ 27న జరిగిన ఎన్నికల్లో రాత్రి 10 గంటల సమయానికి 77.7 శాతం పోలింగ్ నమోదైంది. హమాస్ నేతృత్వంలో 2023 అక్టోబర్ 7న గాజాలో యుద్ధం ప్రారంభమైన తర్వాత, ఇరాన్‌తో యుద్ధ పరిణామాల నేపథ్యంలో జరిగిన ఈ ఎన్నికలు ఇజ్రాయెల్ రాజకీయాల్లో కీలకంగా మారాయి. అయితే, ఎగ్జిట్ పోల్స్ అంచనాల మధ్య నెతన్యాహు తదుపరి ప్రభుత్వాన్ని ఎలా ఏర్పాటు చేస్తారన్నది ఆసక్తికరంగా మారింది.ఇదీ చదవండి: Israel: హంగ్‌ దిశగా ‘ఫలితాలు’.. నెతన్యాహుకు షాక్‌!

వాషింగ్టన్‌: అమెరికా అధ్యక్షుడు డొనాల్డ్ ట్రంప్ మరోసారి సంచలన వ్యాఖ్యలు చేశారు. వెనెజువెలా భవిష్యత్తులో అమెరికాలో 51వ రాష్ట్రంగా మారే అవకాశం ఉందని అన్నారు. మంగళవారం టెక్సాస్‌లోని కార్పస్ క్రిస్టీ నగరంలో జరిగిన మధ్యంతర ఎన్నికల ప్రచార సభలో ఆయన ఈ వ్యాఖ్యలు చేశారు. వెనెజువెలా సంపన్న దేశంగా మారుతుందని, ఒకవేళ అది అమెరికాలో 51వ రాష్ట్రంగా చేరితే అధ్యక్షుడికి బదులుగా గవర్నర్ ఎన్నిక జరుగుతుందని వ్యాఖ్యానించారు. ఆ దేశంలో భారీగా చమురు నిల్వలు ఉన్నాయని పేర్కొన్నారు.వెనెజువెలా నుంచి అమెరికాకు వచ్చిన చమురు రవాణాను ట్రంప్ ప్రత్యేకంగా ప్రస్తావించారు. వెనెజువెలా తమకు 10 లక్షల బ్యారెళ్ల చమురును బహుమతిగా పంపిందని మంగళవారం ప్రకటించారు. టెక్సాస్‌లోని సభ సందర్భంగా చమురు నౌకను చూపిస్తూ, అందులో వెనెజువెలా నుంచి వచ్చిన చమురు ఉందని చెప్పారు. అమెరికా సాధించిన చమురు విజయాన్ని చారిత్రాత్మకమైనదిగా అభివర్ణించారు. విజయం సాధించినవారికే దాని ఫలాలు దక్కుతాయంటూ వ్యాఖ్యానించారు.ఈ ఏడాది ప్రారంభంలో వెనెజువెలాలో అమెరికా చేపట్టిన ఆపరేషన్‌ను కూడా ట్రంప్ ప్రస్తావించారు. ఆ చర్యతో అమెరికా చమురు సరఫరా పెరిగిందని పేర్కొన్నారు. ప్రపంచంలోని అతిపెద్ద చమురు వనరులపై అమెరికాకు నియంత్రణ లభించిందని అన్నారు. వెనెజువెలా నుంచి వచ్చిన చమురును టెక్సాస్‌లోనే శుద్ధి చేస్తామని, కార్పస్ క్రిస్టీలోనూ ఈ ప్రక్రియ జరుగుతుందని వెల్లడించారు.అమెరికాలో పెరుగుతున్న ఇంధన ధరల నేపథ్యంలో ట్రంప్ ఈ వ్యాఖ్యలు చేయడం ప్రాధాన్యత సంతరించుకుంది. నవంబరులో జరగనున్న మధ్యంతర ఎన్నికలకు ముందు రిపబ్లికన్ పార్టీ అభ్యర్థులపై ధరల పెరుగుదల ఒత్తిడి పెరుగుతోంది. ఏడాది క్రితంతో పోలిస్తే ఒక గ్యాలన్ సాధారణ పెట్రోల్ ధర 40 శాతం పెరిగిందని, డీజిల్ ధరలు దాదాపు 75 శాతం అధికమయ్యాయని నివేదిక పేర్కొంది. ఈ నేపథ్యంలో వెనెజువెలా చమురు సరఫరాను ప్రస్తావిస్తూ, ఇంధన రంగంలో అమెరికా విజయాలను ఓటర్లకు వివరించేందుకు ట్రంప్ ప్రయత్నించారు. ఇదీ చదవండి: ఎప్‌స్టీన్‌ లైంగిక నేరాల్లో ట్రంప్‌ పాత్ర?.. 50 పేజీల నివేదికతో ప్రకంపనలు

వాషింగ్టన్‌: అమెరికా అధ్యక్షుడు డొనాల్డ్ ట్రంప్‌కు, లైంగిక నేరాల దోషి జెఫ్రీ ఎప్‌స్టీన్‌కు మధ్య సంబంధాల వ్యవహారం మరోసారి తెరపైకి వచ్చింది. ఎప్‌స్టీన్‌ నేరాల్లో ట్రంప్ పాత్ర ఉందంటూ అమెరికా ప్రతినిధుల సభ న్యాయవ్యవహారాల కమిటీలోని డెమోక్రాట్లు 50 పేజీలకు పైగా ఉన్న నివేదికను విడుదల చేశారు. ఈ వ్యవహారంపై అధ్యక్షుడు ట్రంప్‌తో పాటు అటార్నీ జనరల్ టాడ్ బ్లాంచ్‌ పాత్రపైనా స్వతంత్ర ప్రత్యేక న్యాయవాదితో విచారణ జరిపించాలని డిమాండ్ చేశారు. అయితే, నివేదికలోని ఆరోపణలకు సంబంధించి ప్రత్యక్ష ఆధారాలను వెల్లడించని అంశాలు కూడా ఉన్నాయని సమాచారం.యువతులపై దురాగతాల్లో ట్రంప్?1990ల మధ్య నుంచి చివరి వరకు ఎప్‌స్టీన్‌ యువతులపై సాగించిన లైంగిక వేధింపుల్లో ట్రంప్ చురుకైన పాత్ర పోషించారని నివేదిక ఆరోపించింది. గతంలో వెలుగులోకి వచ్చిన ఆరోపణలతో పాటు, తాజాగా ఓ మహిళ చేసిన ఆరోపణను కూడా ప్రస్తావించింది. అయితే, ఈ కొత్త ఆరోపణకు సంబంధించి ఆ మహిళ కమిటీ సిబ్బందితో జరిపిన సంభాషణలు మినహా ప్రత్యక్ష ఆధారాలను నివేదిక చూపలేదని సమాచారం. ఎప్‌స్టీన్‌ నేరాల గురించి తనకు తెలియదని, అతడితో సంబంధం ఉన్న ఏ మహిళపైనా తాను లైంగిక దుర్వ్యవహారానికి పాల్పడలేదని ట్రంప్ గతంలో పలుమార్లు ఖండించారు.ఆధారాలు దాచేస్తున్నారా?ఎప్‌స్టీన్‌ కేసులో ట్రంప్‌కు సంబంధించిన అంశాలను ప్రజలకు తెలియకుండా చేసేందుకు న్యాయశాఖ అధికారులు ప్రయత్నిస్తున్నారని డెమోక్రాట్లు ఆరోపించారు. ఎప్‌స్టీన్‌ కేసులో బాధితుల వాంగ్మూలాలు, ఈ-మెయిళ్లు, డిపాజిషన్‌ పత్రాలు, ట్రంప్ గతంలో చేసిన వ్యాఖ్యలు, ఆయన సంతకాలు, డ్రాయింగ్‌లను నివేదికలో ప్రస్తావించారు. ఎప్‌స్టీన్‌ నేరాల గురించి తనకు ఉన్న అవగాహనపై ట్రంప్ చేసిన వ్యాఖ్యలకు, పత్రాల్లోని సమాచారానికి మధ్య వ్యత్యాసాలున్నాయని పేర్కొన్నారు. బాధితులకు న్యాయం జరగాలంటే పూర్తి కేసు పత్రాలను చట్టప్రకారం కాంగ్రెస్‌కు అందించాలని, రాష్ట్రాలు, విదేశాల్లోని దర్యాప్తు సంస్థలకు అవసరమైన ఆధారాలు అందుబాటులో ఉంచాలని డెమోక్రాట్లు కోరారు.అటార్నీ జనరల్‌పైనా తీవ్ర ఆరోపణలుఅటార్నీ జనరల్ టాడ్ బ్లాంచ్‌ వ్యవహారశైలిపైనా నివేదిక ప్రశ్నలు లేవనెత్తింది. ఎప్‌స్టీన్‌ సహచరి గిస్లేన్‌ మాక్స్‌వెల్‌తో బ్లాంచ్‌ సమావేశం కావడం సాక్షులను ప్రభావితం చేయడం, అధికారిక విచారణకు ఆటంకం కలిగించడం వంటి అంశాలకు దారితీసి ఉండవచ్చని ఆరోపించింది. ఒక నిర్దిష్ట బాధితురాలి గురించి మాట్లాడవద్దని బ్లాంచ్‌ సూచించినట్లు నివేదిక పేర్కొంది. ఆ మహిళ వాంగ్మూలం ట్రంప్‌కు ఇబ్బంది కలిగించే అవకాశం ఉందని డెమోక్రాట్లు అభిప్రాయపడ్డారు. అయితే, ఇవన్నీ నివేదికలో చేసిన ఆరోపణలే తప్ప, నేరం నిరూపణ జరగలేదు.ఆరోపణలను తోసిపుచ్చిన న్యాయశాఖడెమోక్రాట్ల నివేదికను అమెరికా న్యాయశాఖ ప్రతినిధి తీవ్రంగా ఖండించారు. ప్రజలను తప్పుదోవ పట్టించేందుకు చేసిన ప్రయత్నంగా అభివర్ణించారు. ఎప్‌స్టీన్‌ కేసుకు సంబంధించిన దాదాపు 30 లక్షల పత్రాలను ప్రజలకు అందుబాటులో ఉంచామని, కాంగ్రెస్‌ సభ్యులకు ఎలాంటి మార్పులు చేయని పత్రాలను పరిశీలించే అవకాశాన్ని కూడా కల్పించామని తెలిపారు. దశాబ్దాలుగా సాగిన ఎఫ్‌బీఐ దర్యాప్తుల్లో ఈ ఆరోపణలను అప్పట్లోనే పరిశీలించారని పేర్కొన్నారు. ప్రస్తుతం కొనసాగుతున్న దర్యాప్తుల వివరాలపై మాట్లాడలేమని స్పష్టం చేశారు. మరోవైపు, ఎప్‌స్టీన్‌ కేసులో పూర్తి సమాచారాన్ని వెలుగులోకి తీసుకురావాలని, స్వతంత్ర విచారణ జరపాలని డెమోక్రాట్లు తమ డిమాండ్‌ను పునరుద్ఘాటించారు. ఇదీ చదవండి: ‘ట్రంప్‌ నాపై అత్యాచారం చేశారు’.. మాజీ మిస్ స్విట్జర్లాండ్

వాషింగ్టన్‌: అమెరికా అధ్యక్షుడు డొనాల్డ్ ట్రంప్‌పై మాజీ మోడల్, మిస్ స్విట్జర్లాండ్ బియాట్రిస్ క్యూల్ అత్యాచార ఆరోపణలు చేశారు. 1993లో న్యూయార్క్‌లోని ప్లాజా హోటల్‌లో జరిగిన ఓ ఘటనలో ట్రంప్ తనపై అత్యాచారానికి పాల్పడ్డారని ఆమె ఆరోపించినట్లు అమెరికా ప్రతినిధుల సభలోని డెమోక్రటిక్ పార్టీ సభ్యులు విడుదల చేసిన నివేదిక పేర్కొంది. గతంలో ట్రంప్ తనపై లైంగిక వేధింపులకు పాల్పడ్డారని ఆరోపించిన క్యూల్.. తాజాగా అత్యాచారం కూడా జరిగిందని వెల్లడించినట్లు నివేదికలో వివరించారు. ఈ ఆరోపణలను వైట్‌హౌస్ ఖండించింది. డెమోక్రాట్లు రాజకీయ ప్రయోజనాల కోసం నిరాధార ఆరోపణలు చేస్తున్నారని విమర్శించింది.1993లో ఏం జరిగింది?1993 నవంబరులో న్యూయార్క్‌లోని ప్లాజా హోటల్‌లో జరిగిన ఓ అందాల పోటీ కార్యక్రమం సందర్భంగా ట్రంప్‌ను కలిసినట్లు క్యూల్ తెలిపినట్లు నివేదిక పేర్కొంది. అప్పటికి ఆమె వయసు 24 సంవత్సరాలు. తనకు వీసా ఇప్పించడంతోపాటు న్యూయార్క్ యూనివర్సిటీలో ప్రవేశం పొందేలా చూస్తానని ట్రంప్ హామీ ఇచ్చినట్లు ఆమె ఆరోపించారు. అనంతరం హోటల్‌లోనిపై అంతస్తులో తనను కలిసేందుకు రావాలని ట్రంప్ ప్రతినిధి ద్వారా ఆహ్వానం అందినట్లు తెలిపారు. అక్కడ ట్రంప్ తనపై బలవంతంగా అత్యాచారానికి పాల్పడ్డారని ఆమె ఆరోపించినట్లు నివేదిక వెల్లడించింది.ఎప్‌స్టీన్‌తో పరిచయం.. పార్టీలకు ఆహ్వానంట్రంప్ నుంచి దూరమైన తర్వాత జెఫ్రీ ఎప్‌స్టీన్‌ తనను సంప్రదించినట్లు క్యూల్ తెలిపారని నివేదిక పేర్కొంది. తాను ట్రంప్‌కు అత్యంత సన్నిహితుడినని ఎప్స్టీన్ చెప్పినట్లు, మార్‌-ఎ-లాగోలో జరిగే పార్టీకి ఆహ్వానించినట్లు ఆమె ఆరోపించారు. లైంగిక నేరాలకు పాల్పడిన కేసులో దోషిగా తేలిన ఎప్‌స్టీన్‌తో తన స్నేహాన్ని చాలా కాలం క్రితమే తెంచుకున్నట్లు ట్రంప్ గతంలో ప్రకటించారు. ఎప్స్టీన్‌ను మార్‌-ఎ-లాగో క్లబ్ నుంచి బయటకు పంపించానని కూడా ఆయన పలుమార్లు పేర్కొన్నారు.గతంలోనూ లైంగిక వేధింపుల ఆరోపణలు2024 అక్టోబరులోనే ట్రంప్‌పై క్యూల్ లైంగిక వేధింపుల ఆరోపణలు చేశారు. ప్లాజా హోటల్‌లో ట్రంప్ తనను ముద్దు పెట్టుకుని, దుస్తులు పైకి లేపేందుకు ప్రయత్నించారని, శరీరంపై అసభ్యంగా తాకారని అప్పట్లో ఓ వార్తా సంస్థకు ఇచ్చిన ఇంటర్వ్యూలో పేర్కొన్నారు. అయితే, ఆ సమయంలో అత్యాచారం జరిగిందని ఆమె చెప్పలేదు. ఈ ఘటన గురించి సుమారు 20 ఏళ్ల క్రితమే తనకు చెప్పారని క్యూల్ స్నేహితుడు వెల్లడించినట్లు అప్పటి కథనంలో పేర్కొన్నారు. తాజాగా విడుదలైన నివేదికలో ఆమె ఆరోపణలను మరింత వివరంగా ప్రస్తావించారు.వైట్‌హౌస్ ఖండనట్రంప్‌పై వచ్చిన తాజా ఆరోపణలను వైట్‌హౌస్ తీవ్రంగా ఖండించింది. రిపబ్లికన్లకు పెరుగుతున్న ప్రజాదరణ నుంచి అమెరికన్ల దృష్టిని మళ్లించేందుకు డెమోక్రాట్లు నిరాశతో ఇటువంటి ఆరోపణలు చేస్తున్నారని అధ్యక్షుడి ప్రతినిధి వ్యాఖ్యానించినట్లు నివేదిక పేర్కొంది. ఎప్‌స్టీన్‌కు సంబంధించిన అంశాల్లో ట్రంప్‌కు ఎలాంటి సంబంధం లేదని, ఆయనకు క్లీన్‌చిట్ లభించిందని అధ్యక్షుడి ప్రతినిధి గతంలోనూ పేర్కొన్నారు.మరో నలుగురు మహిళల ఆరోపణలుట్రంప్‌పై అత్యాచారం లేదా లైంగిక వేధింపుల ఆరోపణలు చేసిన మరో నలుగురు మహిళల వాంగ్మూలాలను కూడా తాజా నివేదికలో ప్రస్తావించారు. ప్లాజా హోటల్‌లో నిర్వహించిన అందాల పోటీలను యువతులు, బాలికలను లక్ష్యంగా చేసుకునేందుకు ఉపయోగించుకున్నారని నివేదిక ఆరోపించింది. ఎప్‌స్టీన్‌ లేదా ఘిస్లేన్ మాక్స్‌వెల్ ద్వారా కొందరు మహిళలను ట్రంప్ వద్దకు పంపేందుకు ప్రయత్నించారనే ఆరోపణలు కూడా ఉన్నాయని డెమోక్రటిక్ పార్టీ సభ్యుడు జేమీ రాస్కిన్ తెలిపారు.ఇదీ చదవండి: ట్రంప్‌కు మరో తలనొప్పి.. డెమోక్రాట్‌కు రిపబ్లికన్ల మద్దతు!

ప్రపంచ రాజకీయాల్లో అమెరికా అధ్యక్షుడు డొనాల్డ్ ట్రంప్ ప్రభావం పెరుగుతున్న నేపథ్యంలో బ్రెజిల్ ఎన్నికల ఫలితం అంతర్జాతీయంగా ప్రాధాన్యత సంతరించుకుంది. ట్రంప్ విధానాలను తీవ్రంగా విమర్శించే బ్రెజిల్ అధ్యక్షుడు లూయిజ్ ఇనాసియో లూలా డా సిల్వా మరోసారి విజయం సాధించడం లాటిన్ అమెరికా రాజకీయాల్లో కొత్త చర్చకు తెరలేపింది. ఈ ఫలితాన్ని కేవలం ఒక దేశ ఎన్నికల విజయంగా కాకుండా.. వామపక్ష రాజకీయాలు, జాతీయ సార్వభౌమాధికారం, అమెరికా ప్రభావం వంటి అంశాలతో ముడిపెట్టి విశ్లేషిస్తున్నారు.రెండో రౌండ్‌లో సత్తా.. 44 లక్షల ఓట్ల ఆధిక్యం!2026 అక్టోబర్ 25న జరిగిన రెండో విడత ఎన్నికల్లో లూలా తన ప్రత్యర్థి, ఫ్లావియో బోల్సోనారోపై విజయం సాధించారు. ఎన్నికల అధికారుల వివరాల ప్రకారం లూలాకు 51.8 శాతం ఓట్లు రాగా.. బోల్సోనారోకు 48.2 శాతం ఓట్లు లభించాయి. ఇద్దరి మధ్య సుమారు 44 లక్షల ఓట్ల తేడా నమోదైంది. తొలి విడతలో ప్రత్యర్థి కంటే వెనుకబడిన లూలా.. రెండో విడతలో వ్యూహాన్ని మార్చుకుని ఓటర్ల మద్దతు కూడగట్టారు. ద్రవ్యోల్బణం, నిత్యావసర వస్తువుల ధరలు, నేరాలు, ప్రజల భద్రత వంటి అంశాలు ఎన్నికల్లో కీలకంగా మారాయి. బోల్సోనారో నేరాలపై కఠిన చర్యలు, ఆహార ధరల తగ్గింపు వంటి హామీలు ఇవ్వగా.. లూలా సామాజిక సంక్షేమ పథకాలు, ఆర్థిక ప్రోత్సాహకాలపై దృష్టి సారించారు.ట్రంప్ ప్రభావానికి సవాల్‌..అమెరికాతో బ్రెజిల్ సంబంధాలు లూలా విజయానికి సంబంధించిన ప్రధాన అంశాల్లో ఒకటి. ట్రంప్ ప్రభుత్వం అనుసరిస్తున్న విధానాలను, లాటిన్ అమెరికాలో అమెరికా పెత్తనాన్ని లూలా గతంలో విమర్శించారు. మరోవైపు బోల్సోనారోను ట్రంప్‌కు సన్నిహితుడిగా పరిగణిస్తారు. ఈ నేపథ్యంలో లూలా విజయం అమెరికా ఒత్తిడికి వ్యతిరేకంగా స్వతంత్ర నిర్ణయాలు తీసుకోవాలనుకునే రాజకీయ వర్గాలకు ఊరటనిచ్చింది. లాటిన్ అమెరికాలో అతిపెద్ద ఆర్థిక వ్యవస్థగా ఉన్న బ్రెజిల్‌లో అధికారంలో ఉన్న నాయకుడి నిర్ణయాలు వాణిజ్యం, పెట్టుబడులు, ప్రాంతీయ సహకారం, విదేశాంగ విధానంపై ప్రభావం చూపగలవు. అమెరికా విధిస్తున్న సుంకాలు, ఆర్థిక ఒత్తిళ్ల మధ్య లూలా తిరిగి అధికారంలోకి రావడం బ్రెజిల్ తన ప్రయోజనాలకు అనుగుణంగా నిర్ణయాలు తీసుకోవాలనే వైఖరిని కొనసాగించవచ్చనే సంకేతాలను ఇస్తోంది. అయితే ఈ ఎన్నికల ఫలితంతో అమెరికా-బ్రెజిల్ సంబంధాలు పూర్తిగా మారిపోతాయని ఇప్పుడే చెప్పలేం.లాటిన్ అమెరికాలో లెఫ్ట్‌ వింగ్‌ వర్సెస్ రైట్‌ వింగ్‌లాటిన్ అమెరికాలోని పలు దేశాల్లో రైట్‌ వింగ్‌ రాజకీయాలు, ట్రంప్‌తో సైద్ధాంతిక సాన్నిహిత్యం ఉన్న నేతల ప్రభావం గురించి చర్చ జరుగుతున్న సమయంలో లూలా విజయం సాధించారు. దీంతో వామపక్ష నాయకులు కూడా ప్రజల మద్దతు పొందగలరనే విషయం మరోసారి స్పష్టమైంది. మెక్సికో, బ్రెజిల్ వంటి ప్రధాన దేశాల్లో వామపక్ష భావజాలానికి దగ్గరగా ఉన్న నాయకత్వం కొనసాగడం ఈ పరిణామానికి ప్రాధాన్యాన్ని పెంచింది. మెక్సికో అధ్యక్షురాలు క్లాడియా షీన్‌బామ్ లూలాకు అభినందనలు తెలిపారు. ప్రజాస్వామ్యం, బ్రెజిల్ ప్రజల విజయాన్ని ప్రస్తావించారు. క్యూబా అధ్యక్షుడు మిగ్వెల్ డియాజ్-కానెల్ కూడా లూలాకు శుభాకాంక్షలు చెబుతూ శాంతి, సార్వభౌమాధికారం, సామాజిక న్యాయం పట్ల నిబద్ధతను ప్రస్తావించారు. మరోవైపు చిలీ అధ్యక్షుడు జోస్ ఆంటోనియో కాస్ట్, ఈక్వెడార్ అధ్యక్షుడు డానియెల్ నోబోవా కూడా లూలాకు అభినందనలు తెలిపారు. ఆర్థిక సమగ్రత, వ్యవస్థీకృత నేరాల నియంత్రణ, ప్రాంతీయ సహకారం వంటి అంశాలపై వారు దృష్టి సారించారు. దీంతో రాజకీయ విభేదాలున్నప్పటికీ దేశాల మధ్య పరస్పర సహకారం అవసరమనే విషయం వెల్లడైంది.ట్రేడ్ యూనియన్ నేత నుంచి నాలుగోసారి అధ్యక్షునిగా..లూలా రాజకీయ ప్రస్థానం ఎన్నో మలుపులతో సాగింది. 1970వ దశకంలో ట్రేడ్ యూనియన్ నాయకునిగా గుర్తింపు పొందిన ఆయన.. అనంతరం వర్కర్స్ పార్టీ స్థాపనలో కీలక పాత్ర పోషించారు. 2002లో తొలిసారి బ్రెజిల్ అధ్యక్షుడిగా ఎన్నికయ్యారు. 2006లో మరోసారి విజయం సాధించారు. ఆయన తొలి పాలనలో కార్మికుల సంక్షేమం, సామాజిక కార్యక్రమాలకు ప్రాధాన్యం లభించింది. అయితే తర్వాతి కాలంలో అవినీతి ఆరోపణలు, రాజకీయ సంక్షోభాలు బ్రెజిల్‌ను ప్రభావితం చేశాయి. ఒక అవినీతి కేసులో లూలా దోషిగా తేలడంతో 580 రోజులు జైలులో గడిపారు. అనంతరం బ్రెజిల్ సుప్రీంకోర్టు ఆయన శిక్షను రద్దు చేయడంతో రాజకీయాల్లోకి తిరిగి వచ్చే మార్గం సుగమమైంది. 2022లో అప్పటి అధ్యక్షుడు జైర్ బోల్సోనారోపై స్వల్ప ఆధిక్యంతో గెలిచి, 2023లో తిరిగి అధ్యక్ష బాధ్యతలు చేపట్టారు. 2026 ఎన్నికల్లో మరోసారి విజయం సాధించడం ఆయన రాజకీయ జీవితంలో కీలక ఘట్టంగా నిలిచింది. అయితే ఎన్నికల ఫలితాల తర్వాత వివాదాలు కూడా కొనసాగాయి. పోలింగ్ సమయాన్ని రెండు గంటలు పొడిగించడంపై బోల్సోనారో అభ్యంతరం వ్యక్తం చేశారు. ఎన్నికల ఫలితాలను రద్దు చేయాలని డిమాండ్ చేశారులూలా ముందున్న సవాళ్లేంటి?లూలా విజయం లాటిన్ అమెరికాలో ఒకే రాజకీయ సిద్ధాంతం శాశ్వతంగా ఆధిపత్యం చెలాయించదనే సందేశాన్ని ఇచ్చింది. సామాజిక న్యాయం, కార్మికుల హక్కులు, జాతీయ సార్వభౌమాధికారానికి ప్రాధాన్యం ఇచ్చే నాయకుడికి ప్రజలు మరోసారి పట్టం కట్టారు. అయితే ఈ ఫలితాన్ని ట్రంప్ ఓటమిగా లేదా వామపక్షాల సంపూర్ణ విజయంగా మాత్రమే చూడటం సరైనది కాదు. బ్రెజిల్‌లో ద్రవ్యోల్బణం, ప్రజల భద్రత, అవినీతి ఆరోపణలు, రాజకీయ విభజన వంటి సమస్యలు లూలాకు సవాలుగా మారనున్నాయి. పార్లమెంటులో, ప్రాంతీయ రాజకీయాల్లో రైట్‌వింగ్‌ శక్తుల ఉనికి కూడా ఆయన ప్రభుత్వ నిర్ణయాలపై ప్రభావం చూపవచ్చు. ఎన్నికల్లో ఇచ్చిన హామీలను అమలు చేస్తూనే ఆర్థిక ఒత్తిళ్లను ఎదుర్కోవాల్సి ఉంటుంది. మొత్తంగా లూలా విజయం బ్రెజిల్ తన రాజకీయ భవిష్యత్తును స్వయంగా నిర్ణయించుకోవాలనే ఆకాంక్షకు ప్రతీకగా నిలిచింది. అమెరికాతో సంబంధాలను కొనసాగిస్తూనే తన ప్రయోజనాలకు అనుగుణంగా స్వతంత్ర విదేశాంగ, ఆర్థిక విధానాలను అనుసరించగలదా అన్నదే ఇప్పుడు కీలకం.ఇదీ చదవండి: ‘మెటా’పై లూలాకు కోపమెందుకు?.. ఇ‍ప్పుడేం చేయనున్నారు?

బ్రెజిల్‌ అధ్యక్షుడు లూలా డ సిల్వా ఆదివారంనాటి అధ్యక్ష ఎన్నికల్లో సాధించిన విజయంతో నిండా షాక్‌లో మునిగిపోయిన అమెరికా అధ్యక్షుడు డోనాల్డ్‌ ట్రంప్‌... 120 మంది సభ్యులుండే ఇజ్రాయెల్‌ పార్లమెంటు కెనెసెట్‌కు మంగళవారం జరిగే ఎన్నికల్లో తన ఆప్తమిత్రుడు ప్రధాని బెంజిమిన్‌ నెతన్యాహూ పరిస్థితి ఏమవుతుందోనని బెంగటిల్లి ఉంటారు. మూడేళ్ల క్రితమైతే నెతన్యాహూ ఓటమి ఖాయమని అందరూ ఘంటాపథంగా చెప్పేవారు. ఎందుకంటే న్యాయసంస్కరణల పేరుతో సుప్రీంకోర్టు అధికారాలకు కోత పెడుతూ ఆయన ప్రభుత్వం 2023లో చట్టం తెచ్చాక దేశంలో ఉద్యమాలు పెల్లుబికాయి. తనపై ఉన్న అవినీతి కేసుల్ని తప్పించుకోవటానికే ఆ చట్టం తెచ్చారని అన్ని వర్గాలూ విరుచుకుపడ్డాయి. న్యాయమూర్తుల నియామకాన్ని ప్రభుత్వ నియంత్రణలోకి తెచ్చు కోవటంతో పాటు... పార్లమెంటు తెచ్చే ఏ చట్టాన్నయినా రాజ్యాంగ విరుద్ధమని ప్రకటించటానికి దానికుండే అధికారాన్ని కూడా ఆ చట్టం రద్దు చేసింది. సుప్రీంకోర్టు తీర్పును సాధారణ మెజారిటీతో పార్లమెంటు తోసిపుచ్చడానికి కూడా అది వీలుకల్పించింది. రెండేళ్ల క్రితం ఈ చట్టాన్ని సుప్రీంకోర్టు 8–7 మెజారిటీతో కొట్టేసింది. పర్యవసానంగా అవినీతి కేసుల కత్తి నెతన్యాహూపై వేలాడుతోంది. 2023 అక్టోబర్‌లో ఉగ్రవాద సంస్థ హమాస్‌ పలువురు ఇజ్రాయెల్‌ పౌరుల్ని హతమార్చి, అనేకమందిని కిడ్నాప్‌ చేశాక పరిస్థితి మారింది. గాజాపై నెతన్యాహూ సైన్యాన్ని నడిపించి వేలాదిమంది పౌరుల్ని ఊచకోత కోయించారు. గ్రామాలకు గ్రామాలు నేలమట్టం అయ్యాయి. తాను తప్ప ఎవరూ దేశాన్ని రక్షించలేరన్న అభిప్రాయం కలగజేయటానికి ఆయన మూడేళ్లుగా ఆ నరమేథాన్ని సాగిస్తూనే ఉన్నారు. దాదాపు రెండు దశాబ్దాలుగా నెతన్యాహూ దేశ రాజకీయాలను శాసిస్తున్నారు. అన్ని సర్వేలూ అధికార కూటమి లేదా విపక్ష కూటమి పూర్తి స్థాయి మెజారిటీ తెచ్చుకునే అవకాశం లేదని చెబుతున్నాయి. ఈ అనిశ్చితి కూడా నెతన్యాహూకే తోడ్పడుతుంది. ఇజ్రాయెల్‌లో మితవాద పక్షాలదే ఎప్పుడూ పైచేయి. అయితే గత ఎన్నికల్లో నెతన్యాహూ నెలకొల్పినలాంటి అతి మితవాద ప్రభుత్వం గతంలో ఎప్పుడూ లేదు. అందరూ దూరంపెట్టిన అతి తీవ్ర మతవాద పక్షాలను అధికారాన్ని నిలుపుకోవటం కోసం, జైలుశిక్ష తప్పించుకోవటం కోసం ఆయన చేరదీశారు. ఆ పక్షాలకు ఉదారవాద విధానాలు ప్రబల శత్రువులు. దౌత్యంకన్నా యుద్ధమే మేలైనదని వారి దృఢవిశ్వాసం. పాలస్తీనా భూభాగాన్ని మొత్తం స్వాధీనం చేసుకుని విశాల ఇజ్రాయెల్‌ నెలకొల్పటం వారి ధ్యేయం. ఆ సిద్ధాంతాన్ని సాకారం చేసి, దేశంలో తిరుగులేని నేతగా నిలిచిపోవాలని నెతన్యాహూ వాంఛించారు. హమాస్‌ దాడి ఆయనకు ఈ అవకాశాన్నిచ్చింది. అయితే మూడేళ్లుగా నిరాయుధ గాజా పౌరులపై సాగిస్తున్న ఊచకోత కొంతమేర విజయాన్నిచ్చి నట్టు కనబడ్డా, ప్రతిఘటన మాత్రం చల్లారలేదు. దేశం మొత్తం యుద్ధంలో చిక్కుకుంది. పాలస్తీనా పౌరుల వరకూ ఇజ్రాయెల్‌లో ఎవరొచ్చినా ఒకటే. సిద్ధాంతాలు వేరైనట్టు కనబడినా, ఆ పార్టీలన్నీ పాలస్తీనా స్వతంత్ర ప్రతిపత్తికి వ్యతిరేకం. హమాస్‌ దాడి, గాజా ఊచకోత అనంతరం ఇజ్రాయెల్‌ సమాజం మరింత పిడివాదంలోకి జారుకుంది. అందుకే విపక్షాలు గాజాకు భిన్నమైన పరిష్కారం చెప్పడంలేదు. న్యాయసంస్కరణలు రద్దు చేస్తామని మాత్రమే అంటున్నాయి.నెతన్యాహూ కోసం ట్రంప్‌ తన వంతుగా సాయం చేస్తున్నారు. ఈ ఎన్నికల్లో ఓటేయటానికి అమెరికాలో స్థిరపడిన ఇజ్రాయెలీ పౌరులు మందలుగా పోవటం ఆయన చలవే. అటు బ్రెజిల్‌లో లూలా ఓటమికి ప్రయత్నించినట్టే ఇక్కడా చేతనైనంత చేస్తున్నారు. కానీ జైలుశిక్ష అనుభవిస్తున్న బోల్సొనారో కుమారుడు ఫ్లేవియో ఓటమి పాలు కాకతప్పలేదు. ఇప్పుడు నెతన్యాహూ భవితవ్యం ఏమిటన్న ఉత్కంఠ అందరిలో ఉంది. నెతన్యాహూ ఏలుబడిలో ఇజ్రాయెల్‌ తెంపరితనం పెరిగింది. అది మిత్రుల సలహాలను కూడా బేఖాతరు చేస్తుందనీ, తమకు వీసమెత్తు విలువీయదనీ పాశ్చాత్య దేశాల ప్రభుత్వాలు భావిస్తున్నాయి. నెతన్యాహూ చిత్తుగా ఓడిపోవాలని ఆ దేశాల జనం కూడా కోరుకుంటున్నారు. దారీతెన్నూ లేని ఈ నిరంతర యుద్ధం అంతిమంగా దేశ భవిష్యత్తుకు చేటు తెస్తుందని ఇజ్రాయెల్‌ పౌరులు గ్రహిస్తారా లేదా అన్నది ఈ ఎన్నికల ఫలితాలు తేలుస్తాయి.

డెట్రాయిట్‌: అమెరికాలో నవంబర్‌ 3వ తేదీన మధ్యంతర ఎన్నికలు జరగనుండగా రాజకీయ వాతావరణం ఒక్కసారిగా వేడెక్కింది. మాజీ అధ్యక్షుడు బరాక్‌ ఒబామా ప్రతిపక్ష డెమోక్రాట్‌ అభ్యర్థుల తరఫున శనివారం మిషిగన్, ఒహాయోల్లో ప్రచారం చేపట్టారు. అధ్యక్షుడు డొనాల్డ్‌ ట్రంప్‌ విధానాలను ఆయన తీవ్రంగా ఎండగట్టారు. ఇరాన్‌పై అనవసరంగా యుద్ధం కారణంగా దేశంలో ఇంధనంతోపాటు అన్ని వస్తువుల ధరలు ఆకాశాన్నంటాయన్నారు. గత రెండేళ్లుగా సాగుతున్న అవినీతి, అసమర్థతలకు ముగింపు పలికే సమయం వచ్చిందని ఒబామా ప్రజలకు పిలుపునిచ్చారు. అధ్యక్షుడు ట్రంప్, ఆయన కుటుంబం తీవ్రమైన అవినీతి ఆరోపణలున్నాయని ఒబామా చెప్పారు. దేశం ఆర్థికంగా తీవ్ర సంక్షోభం ఎదుర్కొంటున్న సమయంలో ఖర్చులను తగ్గించడానికి బదులుగా వైట్‌హౌస్‌లో కొత్త బాల్‌రూమ్, సౌత్‌ లాన్‌ వద్ద హెలిప్యాడ్‌ వంటివి నిర్మిస్తూ ప్రజా ధనాన్ని దుబారా చేస్తున్నారన్నారు. ఇరాక్‌ మాజీ అధ్యక్షుడు సద్దాం హుస్సేన్‌ ఒక చీజ్‌ కేక్‌ ఫ్యాక్టరీని తెరిచినట్లుగా ఆయన వైట్‌హౌస్‌ను మార్చేశారంటూ దెప్పిపొడిచారు. ట్రంప్, ఆయన అనుచర బృందం క్రూరంగా, అమర్యాదకరంగా వ్యవహరిస్తున్నారని మండిపడ్డారు. ఓహాయోలో రిపబ్లికన్‌ పార్టీ గవర్నర్‌ అభ్యర్థి వివేక్‌ రామస్వామి ప్రచార పోకడలను తప్పుబట్టారు. ప్రత్యర్థిని వ్యక్తిగతంగా విమర్శిస్తూ రామస్వామి అన్ని హద్దులను దాటేశారని, నీచమైన స్థాయికి దిగజారారని విమర్శించారు.

ఒక్క రాత్రి గడిస్తే చాలు.. పశ్చిమాసియా మరోసారి బాంబుల మోతతో దద్దరిల్లుతుందా? చర్చల ముసుగులో యుద్ధానికి రంగం సిద్ధమవుతోందా? ప్రపంచ చమురు రవాణాకు గుండెకాయలాంటి హార్మూజ్‌ జలసంధి మరోసారి రణరంగంగా మారబోతోందా? అమెరికా అధ్యక్షుడు డొనాల్డ్‌ ట్రంప్‌ తాజా వ్యాఖ్యలు అంతర్జాతీయంగా కలకలం రేపుతున్నాయి. ‘రేపే దాడులు చేసే అవకాశం ఉంది.. లేదంటే భారీ ఒప్పందం కుదరవచ్చు’ అంటూ ట్రంప్‌ చేసిన వ్యాఖ్యలు యుద్ధ భయాలను మరింత పెంచాయి. అలాగే, ఇరాన్‌ ఒప్పందానికి సిద్ధంగా ఉందని ఒకవైపు చెబుతూనే.. ఆ దేశాన్ని నమ్మగలమా అంటూనే మరోవైపు సందేహాలు వ్యక్తం చేశారు.ఫ్లోరిడాలో శనివారం ఓటు వేసిన అనంతరం మీడియాతో మాట్లాడిన ట్రంప్‌.. ఇరాన్‌పై మరోసారి దాడులు చేసే అవకాశాన్ని కొట్టిపారేయలేదు. రేపు దాడులు జరగవచ్చా అని విలేకరులు ప్రశ్నించగా.. ఆ విషయాన్ని ముందుగానే చెబుతానని అనుకుంటున్నారా అంటూ ఎదురు ప్రశ్నించారు. రేపే దాడులు చేసే అవకాశం ఉందని, అదే సమయంలో పెద్ద ఒప్పందం కుదిరే అవకాశమూ ఉందని వ్యాఖ్యానించారు. ఇరాన్‌ ఒప్పందం చేసుకోవాలని కోరుకుంటోందని చెప్పిన ట్రంప్‌.. అసలు సమస్య ఆ ఒప్పందానికి ఆ దేశం కట్టుబడి ఉంటుందా లేదా అన్నదేనని పేర్కొన్నారు. దీంతో అమెరికా తదుపరి అడుగు సైనిక చర్య వైపు పడుతుందా, లేక దౌత్యానికి మరో అవకాశం ఇస్తుందా అన్న ఉత్కంఠ నెలకొంది.ఇరాన్‌ సైన్యాన్ని దెబ్బతీశాం.. ఇదే సమయంలో ఇరాన్‌పై తమ ప్రభుత్వం అనుసరిస్తున్న వ్యూహాన్ని ట్రంప్‌ సమర్థించుకున్నారు. అమెరికా నౌకాదళం, సైన్యం అద్భుతంగా పనిచేశాయని చెబుతూ.. ఇరాన్‌ యుద్ధ విమానాలన్నింటినీ ధ్వంసం చేశామని, 259 నౌకలు సముద్ర గర్భంలో ఉన్నాయని వ్యాఖ్యానించారు. ఇరాన్‌ ప్రస్తుతం రికార్డు స్థాయి ద్రవ్యోల్బణాన్ని ఎదుర్కొంటోందని పేర్కొన్నారు. కాగా, ట్రంప్‌ వ్యాఖ్యలు ఇరాన్‌పై అమెరికా ఒత్తిడిని కొనసాగించాలన్న వైఖరిని సూచిస్తున్నాయి. దీంతో, దాడుల అంశాన్ని ప్రస్తావించడం, ఒప్పందంపై సందేహాలు వ్యక్తం చేయడం.. వాషింగ్టన్‌ వైఖరిపై ఉత్కంఠను పెంచుతున్నాయి.హార్మూజ్‌ కథేంటి.. ప్రపంచ చమురు రవాణాకు అత్యంత కీలకమైన హార్మూజ్‌ జలసంధి ఇప్పుడు అమెరికా, ఇరాన్‌ మధ్య ప్రధాన వివాదాంశంగా మారింది. అమెరికా తన నౌకాదళ దిగ్బంధాన్ని ఎత్తివేస్తే.. ఈ జలమార్గాన్ని తిరిగి తెరిచేందుకు ఇరాన్‌ ప్రతిపాదించిందని సౌదీ అరేబియాకు చెందిన ఓ మీడియా సంస్థ కథనం ప్రచురించింది. పాకిస్థాన్‌ మధ్యవర్తుల ద్వారా ఈ ప్రతిపాదన అమెరికాకు చేరినట్లు పేర్కొంది. అయితే, ఈ వార్తలను ఇరాన్‌ తోసిపుచ్చింది. పాకిస్థాన్‌ ద్వారా అమెరికాకు ఎలాంటి ప్రతిపాదన పంపలేదని తస్నీమ్‌ వార్తా సంస్థ వెల్లడించింది. సౌదీ మీడియా కథనం అబద్ధం, కల్పితమని ప్రెస్‌ టీవీ పేర్కొన్నట్లు తెలిపింది. దీంతో ట్రంప్‌ చెబుతున్న ఒప్పందం ఏ ప్రాతిపదికన సాధ్యమవుతుందన్న ప్రశ్న తలెత్తుతోంది. ఒకవైపు ఒప్పందానికి అవకాశం ఉందని అమెరికా అధ్యక్షుడు చెబుతుండగా.. మరోవైపు అలాంటి ప్రతిపాదనే చేయలేదని ఇరాన్‌ స్పష్టం చేస్తోంది. ఈ విభేదాల మధ్య జలసంధి భవిష్యత్తుపై అనిశ్చితి కొనసాగుతోంది.#WATCH | When asked about the possibility of attacking Iran again, US President Donald Trump says, "...There's a possibility I will (attack Iran).There's also a possibility we'll have a nice, big, beautiful agreement. But the problem is will they hold the deal?..." (Source: US Network Pool Via Reuters)— ANI (@ANI) October 24, 2026అమెరికా దౌత్యవేత్తలపై దాడులకు కుట్ర?ఇరాన్‌తో ఉద్రిక్తతలు పెరుగుతున్న వేళ అమెరికా నిఘా వర్గాల హెచ్చరికలు మరింత ఆందోళన కలిగిస్తున్నాయి. అమెరికా దౌత్యవేత్తలు, ప్రభుత్వ అధికారులను లక్ష్యంగా చేసుకునే ప్రయత్నాలను ఇరాన్‌ గణనీయంగా పెంచిందని నిఘా సంస్థలు గుర్తించినట్లు ఆక్సియోస్‌ కథనం వెల్లడించింది. దీంతో అమెరికా భద్రతా అధికారుల్లో ఆందోళన పెరిగినట్లు తెలిపింది. ఈ నేపథ్యంలో మధ్యప్రాచ్యంలోని పలు అమెరికా రాయబార కార్యాలయాల్లో సిబ్బందిని తగ్గించే చర్యలు చేపట్టినట్లు సమాచారం. అయితే, ఈ కుట్రలకు సంబంధించిన పూర్తి వివరాలు, వాటి వెనుక ఉన్న వ్యక్తులు లేదా సంస్థలపై నిర్ధారిత సమాచారం బహిరంగంగా వెల్లడికాలేదు.చర్చల తెర వెనుక యుద్ధ సన్నాహాలా?ట్రంప్‌ వ్యాఖ్యల్లో రెండు కీలక సంకేతాలు కనిపిస్తున్నాయి. ఒకవైపు ఇరాన్‌పై సైనిక ఒత్తిడిని కొనసాగించేందుకు అమెరికా సిద్ధంగా ఉందన్న సంకేతాలిస్తూనే.. మరోవైపు భారీ ఒప్పందానికి అవకాశం ఉందని చెబుతున్నారు. అయితే, హార్మూజ్‌ జలసంధిపై ఇరాన్‌ ప్రతిపాదన చేసిందన్న వార్తలను టెహ్రాన్‌ ఖండించడం, అమెరికా దౌత్యవేత్తలపై ముప్పు పెరుగుతోందన్న నిఘా నివేదికలు పరిస్థితిని మరింత సంక్లిష్టంగా మార్చాయి. ఇప్పుడు ప్రపంచం చూపంతా అమెరికా తదుపరి అడుగుపైనే. ట్రంప్‌ హెచ్చరికలు మాటలకే పరిమితమవుతాయా.. లేక ఇరాన్‌పై మరోసారి సైనిక చర్యకు దిగుతారా? చర్చల ద్వారా జలసంధి వివాదానికి పరిష్కారం లభిస్తుందా? ఒకవేళ యుద్ధం మళ్లీ తీవ్రరూపం దాలిస్తే, దాని ప్రభావం పశ్చిమాసియాకే పరిమితం కాకుండా ప్రపంచ చమురు సరఫరా, ధరలపైనా పడే అవకాశముంది. ప్రస్తుతానికి దాడులపై స్పష్టమైన నిర్ణయం వెలువడలేదు. కానీ అమెరికా, ఇరాన్‌ మధ్య పెరుగుతున్న ఉద్రిక్తతలు అంతర్జాతీయంగా ఆందోళన కలిగిస్తున్నాయి.ఇదీ చదవండి: ఇరాన్‌ సంచలన నిర్ణయం.. ప్రపంచానికి కొత్త ముప్పు!

కుక్క తోక వంకర అన్న సామెత మనకు తెలిసిందే. దాని అర్థం ఎన్ని సార్లు చెప్పినా తన తీరు మార్చుకోరని.. అమెరికా అధ్యక్షుడు ట్రంప్‌ విషయంలో ఈ సామెత సరిగ్గా సరిపోతుంది. భారత్‌-పాక్‌ యుద్ధం విషయంలో ఆయన వ్యాఖ్యలను పలు మార్లు భారత్‌ ఖండించినప్పటికీ ఆయన తీరు మార్చుకోవడం లేదు. తాజాగా మరోసారి ఇండియా-పాక్‌ల మధ్య యుద్ధాన్ని తానే ఆపానంటూ ప్రగల్భాలు పలికారు. అమెరికాలో వచ్చే నెలలో జరగబోయే మధ్యంతర ఎన్నికల ప్రచార ర్యాలీలో భాగంగా ట్రంప్ ప్రసంగించారు. తాను గతంలో చేసిన అంతర్జాతీయ దౌత్య విజయాలు, అధిక పన్నుల బాదుడుని అక్కడి ప్రజలకు గొప్పగా చెప్పుకొచ్చారు. ఈ సందర్భంగా ట్రంప్ మాట్లాడుతూ" రెండు అణ్వాయుధ దేశాలైన భారత్, పాకిస్తాన్ మధ్య గతంలో సైనిక ఘర్షణలు తీవ్రరూపం దాల్చాయి. ఆ సమయంలో నేను రెండు దేశాల నేతలతో మాట్లాడి... 'ఫ్రెండ్స్, మీరు గనుక ఇలాగే కొట్టుకుంటూ ఉంటే, అమెరికాతో వ్యాపారం చేయడం మర్చిపోండి. మీ రెండు దేశాల ఉత్పత్తులపై నేను 250% భారీ టారిఫ్‌లు (సుంకాలు) విధిస్తాను. ఇకపై మీరు మాతో ఎలాంటి బిజినెస్ చేయలేరు. అని గట్టిగా హెచ్చరించాను" అని సభలో చెప్పుకొచ్చారు.దీంతో అమెరికా మార్కెట్‌ను కోల్పోతామనే భయంతో, కోట్లాది డాలర్ల నష్టం వస్తుందనే ఆందోళనతో ఇరు దేశాల నేతలు తీవ్ర కోపానికి, ఆగ్రహానికి గురయ్యారని, కానీ చివరికి నా హెచ్చరికతో కాల్పులు ఆపేయడంతో యుద్ధం ముగిసిందని ట్రంప్ పేర్కొన్నారు. ఈ ఘర్షణల సమయంలో ఇరు దేశాలకు చెందిన 11 సైనిక విమానాలు) కూలిపోయాయని ట్రంప్ తన ప్రసంగంలో పేర్కొన్నారు. అంతే కాకుండా తన హయాంలో కేవలం భారత్-పాక్ మాత్రమే కాకుండా, ప్రపంచవ్యాప్తంగా సుమారు 8 యుద్ధాలకు దారి తీసే పరిస్థితులను కేవలం ఆర్థిక ఒత్తిడి (టారిఫ్‌ల శక్తి) ద్వారానే పరిష్కరించానని ట్రంప్ ఈ ర్యాలీలో గర్వంగా ప్రకటించారు.తాను ఇంతటి దౌత్య విజయాలు సాధించినప్పటికీ, తనకు తగిన గుర్తింపు లభించలేదని ట్రంప్ బహిరంగంగానే అసంతృప్తి వ్యక్తం చేశారు. "నేను 8 యుద్ధాలను చక్కదిద్దాను. మరి నాకు నోబెల్ శాంతి బహుమతి వచ్చిందా? రాలేదు!" అని సభలో ప్రశ్నించారు. గతంలో పాకిస్తాన్ ప్రధాని షెహబాజ్ షరీఫ్ సైతం తనతో మాట్లాడుతూ "మీరు 2.5 కోట్ల నుండి 3 కోట్ల మంది ప్రజల ప్రాణాలను కాపాడారు" అని కొనియాడినట్లు ట్రంప్ ఈ సందర్భంగా పునరుద్ఘాటించారు.ఇదీ చదవండి: గాల్లోనే కూలిన రెండు విమానాలు

వాషింగ్టన్‌: అమెరికాలో మధ్యంతర ఎన్నికల వేళ రాజకీయ సమీకరణలు వేగంగా మారుతున్నాయి. ఇందులో భాగంగానే కెనడా దిగుమతులపై ట్రంప్ యంత్రాంగం విధించిన సుంకాల విధానంలో కీలక మార్పులు చేసింది. మైన్ రాష్ట్ర రిపబ్లికన్ సెనేటర్ సూసన్ కాలిన్స్ పునరేన్నిక పోరులో గట్టి పోటీని ఎదుర్కొంటున్న నేపథ్యంలో అక్కడి రైతులు, స్థానిక వ్యాపారులకు ఊరటనిచ్చేలా ఈ నిర్ణయం వెలువడింది.ఈ పరిణామం అమెరికా రాజకీయాల్లోనూ, వాణిజ్య వర్గాల్లోనూ తీవ్ర చర్చనీయాంశమైంది. కెనడా నుంచి దిగుమతి అయ్యే కొన్ని రకాల వస్తువులపై గత జూలైలో ట్రంప్ ప్రభుత్వం ఏకంగా 50 శాతం మేర భారీ సుంకాలు విధించింది. అయితే, తాజాగా వైట్‌హౌస్ ప్రకటించిన సవరించిన నిబంధనల ప్రకారం.. మైన్ రాష్ట్రంలోని రైతులు, సాగుదారులు ఎక్కువగా ఉపయోగించే శీతలీకరణ పరికరాలు, ప్లైవుడ్, ప్యాకింగ్ యంత్రాలపై సుంకాలను పూర్తిగా ఎత్తివేశారు. మైన్ రాష్ట్రంలోని బ్లూబెర్రీ, బంగాళాదుంప, ఆపిల్, సీవీడ్ ఉత్పత్తిదారులకు ఈ మినహాయింపుల ద్వారా ఉపశమనం కలిగింది.అమెరికన్ మార్కెట్లో సులభంగా లభించని ప్రత్యేక పరికరాలు, ప్యాకింగ్ సామాగ్రి కోసం స్థానిక రైతులు కెనడాపైనే ఆధారపడాల్సి వస్తోందని, ఈ దిగుమతి సుంకాలు వారిపై పెను భారంగా మారుతున్నాయని సెనేటర్ సూసన్ కాలిన్స్ ప్రభుత్వానికి విజ్ఞప్తి చేశారు. ఆమె చేసిన ఈ విన్నపం ఫలితంగానే ప్రభుత్వం దిగివచ్చి ఈ మినహాయింపులు ప్రకటించినట్లు తెలుస్తోంది. అదే సమయంలో కోకో పౌడర్, వినైల్ ఫ్లోరింగ్, షాంపూ, కేనావులు, చెక్కతో చేసిన శవపేటికలు, కార్పెట్లు వంటి ఇతర కెనడియన్ ఎగుమతులపై మాత్రం కొత్త సుంకాలు అమలులోకి రానున్నాయి. ఈ కొత్త నిబంధనలు అక్టోబర్ 30వ తేదీ నుంచి అమల్లోకి వస్తాయని వైట్‌హౌస్ స్పష్టం చేసింది.డోనాల్డ్ ట్రంప్ తిరిగి అధికారంలోకి వచ్చిన నాటికి అమెరికా-కెనడా మధ్య వాణిజ్య ఘర్షణలు కొనసాగుతున్నాయి. కెనడా వైపు నుంచి అమెరికాలోకి ఫెంటానిల్ రవాణా అవుతోందని ఆరోపిస్తూ ట్రంప్ ఈ సుంకాల యుద్ధానికి తెరలేపారు. అంతేకాకుండా కెనడాను అమెరికాలో 51వ రాష్ట్రంగా అభివర్ణించడం, రక్షణ నిబంధనలను ఉపసంహరించుకుంటామంటూ ఆయన చేసిన హెచ్చరికలు కెనడియన్లలో తీవ్ర ఆగ్రహానికి కారణమయ్యాయి.ఇదీ చదవండి: భారత్‌లో అస్థిరతకు కుట్ర?.. ఎవరీ నెవిల్ రాయ్ సింఘమ్?

అమెరికా-ఇరాన్‌ మధ్య మరోసారి ఉద్రిక్తతలు నెలకొన్నాయి. అమెరికా అధ్యక్షుడు డొనాల్డ్‌ ట్రంప్‌ మరోసారి ఇరాన్‌పై దాడులకు సిద్ధమంటూ హెచ్చరించారు. మరో వైపు.. ఇంటర్నెట్‌ కేబుళ్లే టార్గెట్‌గా ఇరాన్‌.. ఈసారి యుద్ధాన్ని మరో స్థాయికి తీసుకెళ్లేలా కనిపిస్తోంది. అమెరికా, ఇజ్రాయెల్‌ దాడులు చేస్తే గల్ఫ్‌ సముద్రగర్భంలో ఉన్న ఇంటర్నెట్‌ కేబుళ్లనే ధ్వంసం చేస్తామంటూ ఇరాన్‌ వార్నింగ్‌ ఇచ్చిన సంగతి తెలిసిందే. అదే జరిగితే యుద్ధ ప్రభావం కేవలం చమురు సరఫరాకే పరిమితం కాకుండా.. ప్రపంచ ఇంటర్నెట్‌ కనెక్టివిటీపై కూడా పడే ప్రమాదం ఉంది.అమెరికా అధ్యక్షుడు డొనాల్డ్‌ ట్రంప్‌ మరోసారి ఇరాన్‌పై సైనిక చర్యకు దిగుతామంటూ హెచ్చరించడంతో పశ్చిమాసియాలో ఉద్రిక్తతలు మళ్లీ పెరుగుతున్నాయి. యుద్ధం ఏడో నెలకు చేరువవుతున్న వేళ.. అమెరికా, ఇజ్రాయెల్‌ మరోసారి దాడులకు దిగితే గల్ఫ్‌ ప్రాంతంలోని సముద్రగర్భ ఇంటర్నెట్‌ కేబుళ్లను లక్ష్యంగా చేసుకుంటామని ఇరాన్‌ హెచ్చరించింది. ఈ మేరకు ప్రణాళికలు సిద్ధం చేసుకున్నట్లు ఇరాన్‌ భద్రతా అధికారులు మీడియాకు వెల్లడించారు.ఫ్లోరిడాలో జరిగిన ఓ ర్యాలీలో ట్రంప్‌ మాట్లాడుతూ.. ‘‘మనం మరో చిన్న ఆపరేషన్‌ ఎపిక్‌ ఫ్యూరీ చేపట్టవచ్చంటూ వ్యాఖ్యానించారు. ఇరాన్‌పై అమెరికా సైన్యం చేపట్టిన యుద్ధానికి ‘ఆపరేషన్‌ ఎపిక్‌ ఫ్యూరీ’ అని పేరు పెట్టిన సంగతి తెలిసిందే. ఫిబ్రవరి 28న ప్రారంభమైన ఈ యుద్ధాన్ని మళ్లీ తీవ్రతరం చేసే అవకాశాలపై ట్రంప్‌ చేసిన వ్యాఖ్యలు అంతర్జాతీయంగా చర్చనీయాంశంగా మారాయి.యుద్ధం కారణంగా అనిశ్చితి, పెరుగుతున్న ఇంధన ధరలు, మరోసారి దాడులు జరిగితే ప్రపంచ ఆర్థిక వ్యవస్థపై పడే ప్రభావాలపై ఆందోళనలు కొనసాగుతున్నాయి. అమెరికా, ఇజ్రాయెల్‌ ఇరాన్‌పై జరిపిన దాడులు, లెబనాన్‌పై ఇజ్రాయెల్‌ దాడుల కారణంగా వేలాది మంది ప్రాణాలు కోల్పోగా.. లక్షలాది మంది నిరాశ్రయులయ్యారు.శుక్రవారం అంతకుముందు వైట్‌హౌస్‌ సౌత్‌ లాన్‌లో మీడియాతో మాట్లాడిన ట్రంప్‌.. యుద్ధాన్ని చాలా త్వరగా ముగించగలమంటూ వ్యాఖ్యానించారు. అయితే, వెంటనే యుద్ధాన్ని ముగించాలా? క్రమంగా దాని తీవ్రత తగ్గేలా వదిలేయాలా? అన్నది ప్రశ్నగా పేర్కొన్నారు. ప్రపంచ ఇంధన సరఫరాకు అత్యంత కీలకమైన హోర్ముజ్‌ జలసంధి గుండా చమురు రవాణా కొనసాగుతోందని.. మనకు కావాల్సినవన్నీ లభిస్తున్నాయని పేర్కొన్నారు.ఈ యుద్ధానికి సంబంధించి ట్రంప్‌.. గతంలో పలుమార్లు గడువులను ప్రకటించారు. వచ్చే నెలలో అమెరికా మధ్యంతర ఎన్నికలు జరగనున్న నేపథ్యంలో.. వాటికి ముందు ఇరాన్‌పై దాడులు చేయబోమని ఈ నెల ప్రారంభంలో ఆయన వెల్లడించారు. అదే సమయంలో యుద్ధాన్ని ముగించేందుకు వాషింగ్టన్‌, టెహ్రాన్‌ మధ్య చర్చలు జరుగుతున్నట్లు వార్తలు వచ్చాయి.అయితే, మధ్యంతర ఎన్నికల అనంతరం ఇరాన్‌పై మళ్లీ దాడులు చేసేందుకు అమెరికా, ఇజ్రాయెల్‌ సైన్యాలు ప్రణాళికలు సిద్ధం చేసుకున్నట్లు అంతర్జాతీయ మీడియా కథనాలు వెల్లడిస్తున్నాయి. అమెరికా అధికారులను ఉటంకిస్తూ.. ఇరాన్‌ ఇంధన మౌలిక సదుపాయాలు, అణు కేంద్రాలు, క్షిపణులు, డ్రోన్ల నిల్వలను లక్ష్యంగా చేసుకునే అవకాశముందని పేర్కొంది.ఇదీ చదవండి: అమెరికా దాడి చేస్తే.. ఇక అణ్వాయుధాలే

క్షిపణులు, డ్రోన్లతో సాగుతున్న పోరులో ఇప్పుడు చమురే అత్యంత కీలకమైన అస్త్రంగా మారుతోంది. ప్రపంచ చమురు రవాణాకు గుండెకాయలాంటి హార్మూజ్‌ జలసంధి కేంద్రంగా ఇరాన్‌ వ్యూహాత్మకంగా పావులు కదుపుతోందన్న ఆరోపణలు అంతర్జాతీయంగా కలకలం రేపుతున్నాయి. అమెరికాలో మధ్యంతర ఎన్నికలు సమీపిస్తున్న వేళ చమురు ధరలు పెరిగితే ఆ సెగ అధ్యక్షుడు డొనాల్డ్‌ ట్రంప్‌ ప్రభుత్వానికీ తగలడం ఖాయం. ఇదే అవకాశాన్ని ఇరాన్‌ తనకు అనుకూలంగా మలుచుకుంటోందన్న విశ్లేషణలు ఇప్పుడు వాషింగ్టన్‌లో ఆందోళన పెంచుతున్నాయి.ప్రపంచ చమురు సరఫరాలో హార్మూజ్‌ జలసంధిది అత్యంత కీలకమైన స్థానం. ఇక్కడ నౌకల రాకపోకలకు ఆటంకాలు ఏర్పడితే అంతర్జాతీయ మార్కెట్లో చమురు ధరలు ఎగబాకే ప్రమాదం ఉంది. ఈ పరిస్థితిని తనకు అనుకూలంగా మార్చుకుంటూ అమెరికాపై ఒత్తిడి పెంచేందుకు ఇరాన్‌ ప్రయత్నిస్తోందనే వార్తలు వినిపిస్తున్నాయి. నౌకలపై దాడులు, రవాణాకు ముప్పు కలిగించే చర్యలతో సరఫరా వ్యవస్థను దెబ్బతీస్తే దాని ప్రభావం ప్రపంచ ఆర్థిక వ్యవస్థతో పాటు అమెరికా రాజకీయాలపైనా పడే అవకాశం ఉంది.ట్రంప్‌పై ఒత్తిడి.. ముఖ్యంగా నవంబర్‌ 3న జరగనున్న అమెరికా మధ్యంతర ఎన్నికల నేపథ్యంలో చమురు ధరల అంశం ప్రాధాన్యం సంతరించుకుంది. ఇంధన ధరలు పెరిగితే సామాన్యుల ఖర్చులు భారమవుతాయి. ద్రవ్యోల్బణం పెరిగితే ప్రభుత్వంపై అసంతృప్తి వ్యక్తమయ్యే అవకాశముంది. ఈ పరిణామాలన్నీ ఎన్నికల వేళ ట్రంప్‌ ప్రభుత్వానికి సవాలుగా మారవచ్చు.అమెరికా ఎదురుదాడికి దిగితే..ఇరాన్‌ చర్యలకు అడ్డుకట్ట వేయడం, హార్మూజ్‌ జలసంధిలో నౌకల రవాణాను సురక్షితంగా కొనసాగించడం అమెరికాకు కీలకంగా మారాయి. ఇందుకోసం సైనిక ఒత్తిడిని పెంచడం, ఆంక్షలను కఠినతరం చేయడం వంటి చర్యలకు వాషింగ్టన్‌ ప్లాన్‌ చేసే అవకాశం ఉంది. అయితే, అమెరికా దూకుడు పెరిగితే ఇరాన్‌ కూడా ప్రతిచర్యలకు దిగే ప్రమాదం ఉంది. అదే జరిగితే పశ్చిమాసియాలో యుద్ధం మరింత విస్తరించడంతో పాటు ప్రపంచ చమురు మార్కెట్లలో అనిశ్చితి పెరిగే అవకాశం ఉంది.మరోవైపు, చమురు సరఫరాను స్థిరీకరించడం, ధరల పెరుగుదలను అడ్డుకోవడం ద్వారా ఇరాన్‌ వ్యూహానికి చెక్‌ పెట్టాలని ట్రంప్‌ ప్రభుత్వం భావించవచ్చు. కానీ సైనిక చర్యలు, ఆర్థిక ఆంక్షలు, దౌత్య ప్రయత్నాల మధ్య సరైన సమతుల్యత సాధించడం అంత సులభం కాదు. ఇరాన్‌పై ఒత్తిడి పెంచే క్రమంలో చమురు ధరలు మరింత పెరిగితే అమెరికాకే ఎదురుదెబ్బ తగిలే పరిస్థితి ఏర్పడుతుందని విశ్లేషకులు చెబుతున్నారు. ఇదిలా ఉండగా.. ఇరాన్‌ అణ్వాయుధ సామర్థ్యాన్ని అడ్డుకోవాలన్న అమెరికా వైఖరి కూడా ఈ సంక్షోభంలో కీలకంగా ఉంది. అణ్వాయుధాలను ఇరాన్‌ సంపాదించకూడదని వాషింగ్టన్‌ స్పష్టం చేస్తోంది. ఇదే సమయంలో ఇరాన్‌లో నిరసనకారులపై అణచివేతకు సంబంధించి 75 వేల మంది మరణించారన్న ఆరోపణలు కూడా చర్చకు వస్తున్నాయి. నిరసనకారులపై చర్యలు, మానవ హక్కుల పరిస్థితి ఇరాన్‌పై అంతర్జాతీయ విమర్శలకు మరో కారణంగా నిలుస్తున్నాయి.ట్రంప్‌కు రాజకీయ పరీక్ష!హార్మూజ్‌ జలసంధిలో ఉద్రిక్తతలు కొనసాగి చమురు ధరలు పెరిగితే దాని ప్రభావం అమెరికా ఆర్థిక వ్యవస్థపై పడవచ్చు. ఎన్నికల వేళ ఇంధన ధరల పెరుగుదల ప్రజల్లో అసంతృప్తిని పెంచితే ట్రంప్‌ ప్రభుత్వానికి రాజకీయంగా ఇబ్బందులు ఎదురయ్యే అవకాశం ఉంది. మరోవైపు, చమురు సరఫరాను స్థిరీకరించి ఇరాన్‌ చర్యలను అదుపులోకి తీసుకురాగలిగితే వాషింగ్టన్‌కు ఊరట లభించవచ్చు. మొత్తంగా, హార్మూజ్‌ జలసంధి ఇప్పుడు కేవలం చమురు రవాణా మార్గం మాత్రమే కాదు.. అంతర్జాతీయ రాజకీయాల్లో వ్యూహాత్మక పోరుకు వేదికగా మారింది. చమురు సెగ ట్రంప్‌ ప్రభుత్వానికి ఎన్నికల వేళ కొత్త చిక్కులు తెచ్చిపెడుతుందా, లేక అమెరికా వ్యూహం ఇరాన్‌ ఆటకు అడ్డుకట్ట వేస్తుందా అన్నది ఆసక్తికరంగా మారింది.ఇదీ చదవండి: భారతీయులే టార్గెట్‌ కాదు.. వీసాలపై రూబియో కీలక వ్యాఖ్యలు

వాషింగ్టన్‌: 2028 అమెరికా అధ్యక్ష ఎన్నికల్లో రిపబ్లికన్ పార్టీ తరఫున తన వారసుడిగా ఉపాధ్యక్షుడు జేడీ వాన్స్‌కు మద్దతు ఇచ్చే అంశంపై అధ్యక్షుడు డొనాల్డ్ ట్రంప్ ప్రస్తుతానికి ఎలాంటి స్పష్టత ఇవ్వలేదు. వాషింగ్టన్‌లోని వైట్‌హౌస్‌లో జరిగిన మీడియా సమావేశంలో ట్రంప్ మాట్లాడుతూ, వాన్స్ ఎంతో సమర్థుడైన నాయకుడని ప్రశంసించినప్పటికీ, 2028 అభ్యర్థిత్వంపై తమ మధ్య ఇంకా ఎలాంటి చర్చలు జరగలేదని స్పష్టం చేశారు. REPORTER : Do you view JD Vance as your successor in 2028? President Trump : “No” https://t.co/5pekTkDnH4— News Algebra (@NewsAlgebraIND) October 21, 2026ప్రస్తుతం తమ దృష్టంతా రాబోయే నవంబర్ 3 మధ్యంతర ఎన్నికలపైనే ఉందని, ఈ సమయంలో ఎవరికైనా మద్దతు ప్రకటించడం చాలా తొందరపాటు అవుతుందని ఆయన పేర్కొన్నారు. అమెరికా రాజ్యాంగ నిబంధనల ప్రకారం రెండు పర్యాయాల పరిమితి ఉండటంతో ట్రంప్ పదవీకాలం 2028తో ముగియనుంది. ఏదైనా విపత్కర పరిస్థితి వస్తే దేశ బాధ్యతలు స్వీకరించడానికి తాను సిద్ధంగా ఉన్నానని గతంలో వాన్స్ వ్యాఖ్యానించినప్పటికీ, తాజా ప్రెస్ మీట్‌లో ట్రంప్ సమాధానాన్ని దాటవేయడంతో 2028 రిపబ్లికన్ అధ్యక్ష అభ్యర్థి ఎవరనే దానిపై రాజకీయ వర్గాల్లో మరింత ఉత్కంఠ నెలకొంది.ఇదీ చదవండి: పాక్‌లోనే దావూద్.. ఐరాస నివేదికపై భారత్ ఆగ్రహం

వాషింగ్టన్‌: నాలుగేళ్లుగా రష్యాలో నిర్బంధంలో ఉన్న ఒక అమెరికన్ పౌరుడి విడుదల అనంతరం, రష్యాపై ఆంక్షలను సడలించడంపై ప్రశ్నించినందుకు సీఎన్‌ఎన్‌, ఏబీసీ న్యూస్ విలేకరులపై అమెరికా అధ్యక్షుడు డొనాల్డ్ ట్రంప్ తీవ్ర ఆగ్రహం వ్యక్తం చేశారు. వైట్‌హౌస్ వెలుపల జర్నలిస్టులతో ట్రంప్ మాట్లాడుతున్న సమయంలో ఈ వాగ్వాదం చోటుచేసుకుంది. ఉక్రెయిన్ తరఫున కిరాయి సైనికుడిగా వ్యవహరించాడనే ఆరోపణలతో రష్యాలో ఖైదు అయిన మిచిగాన్‌కు చెందిన 74 ఏళ్ల స్టీఫెన్ హబ్బర్డ్ విడుదలైన కొద్ది గంటలకే ఈ ఘటన జరిగింది.హబ్బర్డ్ విడుదల గురించి సీఎన్‌ఎన్‌ కరస్పాండెంట్ కైట్లాన్ కాలిన్స్ ప్రశ్నించగా, ఆ అమెరికన్ స్వదేశానికి తిరిగి వస్తున్నాడని ట్రంప్ పేర్కొన్నారు. అయితే రష్యా అధ్యక్షుడు వ్లాదిమిర్ పుతిన్‌పై ఆంక్షలను కొనసాగించి ఉంటే ఈ ఫలితం సాధ్యమయ్యేది కాదని ఆయన వాదించారు. ఆంక్షలను అలాగే ఉంచితే హబ్బర్డ్ మరికొన్ని దశాబ్దాల పాటు జైలులోనే ఉండిపోయేవాడని చెబుతూ, ‘మీరు ఆ ఆంక్షలను కొనసాగించి ఉంటే, ఇక ఆయనను మర్చిపోవాల్సిందే... మరో 25 ఏళ్లపాటు జైలులోనే ఉండిపోయేవాడు’ అని ట్రంప్ అన్నారు.ఆ తర్వాత కాలిన్స్ మరో అనుబంధ ప్రశ్న అడగడంతో ఆగ్రహించిన ట్రంప్.. ఆమెపై వ్యక్తిగత దూషణలకు దిగారు. ‘ఏం మాట్లాడుతున్నావో నీకు తెలీదు. నువ్వొక డమ్మీవి. తక్కువ ఐక్యూ ఉన్నదానివి, పైగా సీఎన్‌ఎన్‌లో పనిచేస్తున్నావు. ఒక ఒప్పందానికి వచ్చినప్పుడు, అత్యంత సున్నితమైన చర్చలు జరుగుతున్నప్పుడు ఎవరూ ఆంక్షలు విధించరు’ అని ఘాటుగా సమాధానమిచ్చారు.అనంతరం ఏబీసీ న్యూస్ మహిళా రిపోర్టర్ కూడా ఇదే అంశాన్ని ప్రస్తావిస్తూ, హబ్బర్డ్ విడుదల కోసం ఆంక్షలను సడలించడం అంటే మాస్కోకు అనుకూలంగా రాయితీలు ఇవ్వడమే కదా అని ప్రశ్నించారు. ఈ ప్రశ్నకు అధ్యక్షుడు మరింత తీవ్రంగా స్పందించారు. ‘హబ్బర్డ్ విడుదల కోసం రష్యాపై ఆంక్షలు ఎత్తివేయడం అంటే రష్యాకు ఏదో ఒకటి అందించినట్లే కాదా?’ అని ఆమె ప్రశ్నించగా, ట్రంప్ ఆమె వైపు కోపంగా చూస్తూ, తన వేలు చూపిస్తూ ‘నువ్వు తెలివితక్కువ దానివి. నువ్వు ఎవరి కోసం పనిచేస్తున్నావు?” అని అడిగారు. ఆమె తాను ఏబీసీ న్యూస్‌లో పనిచేస్తున్నట్లు చెప్పడంతో ‘నువ్వొక తెలివితక్కువ దానివి.. మీ నెట్‌వర్కే అత్యంత చెత్తది’ అంటూ ట్రంప్ తీవ్రంగా మండిపడ్డారు.ఇదీ చదవండి: ముంబై, పూణెలను వణికిస్తున్న లారెన్స్‌ బిష్ణోయ్‌ గ్యాంగ్‌

పారిస్‌: ఫ్రాన్స్‌లో నెలకొన్న అస్థిర పరిస్థితులకు కొందరు దేశాధినేతలు ఉద్దేశపూర్వకంగా ఆజ్యం పోసేలా ప్రవర్తిస్తున్నారంటూ అధ్యక్షుడు ఎమ్మాన్యుయేల్‌ మాక్రాన్‌ సంచలన ఆరోపణలు చేశారు. ముఖ్యంగా, ఈ విషయమై అమెరికా అధ్యక్షుడు డొనాల్డ్‌ ట్రంప్‌ తీరును తీవ్రంగా ఖండించారు. ఆయన ‘మూర్ఖపు’వ్యాఖ్యలు చేశారంటూ మండిపడ్డారు. ‘అట్లాంటిక్‌కు ఆవల ఉన్న విదేశీ నేతలు మా దేశంలోని అస్థిరతను స్వార్థ రాజకీయ ఎజెండాకు అనువుగా మలచుకోజూస్తున్నారు’అంటూ ఆక్షేపించారు. ఫ్రాన్స్‌లో వెల్లువెత్తుతున్న ఆందోళనలకు ముస్లిం వలసదారులే ప్రధాన కారణమని ట్రంప్‌ తీవ్ర వ్యాఖ్యలు చేయడం తెలిసిందే. అంతేగాక, ‘పరిస్థితి పూర్తిగా చేయి దాటకముందే మీ సరిహద్దులను మూసేసుకోండి’అంటూ సలహా కూడా ఇచ్చారు! బుధవారం ఖతర్‌లో విలేకరుల సమావేశంలో మాట్లాడిన మాక్రాన్‌ ట్రంప్‌ వ్యాఖ్యలను తీవ్ర స్థాయిలో తూర్పారబట్టారు. ‘‘ఫ్రా న్స్‌లో, ముఖ్యంగా గత వారాంతంలో రాజధాని నగరం పారిస్‌లో జరిగిన అల్లర్లు, ఆందోళనలు, విధ్వంసకాండ, లూటీలకు సంబంధించి కొన్ని దేశాలు పనిగట్టుకుని మరీ తప్పుడు సమాచారాన్ని వ్యాప్తి చేస్తున్నాయి. ఈ విషయమై పలువురు దేశాధినేతలు చేసిన మూర్ఖపు వ్యాఖ్యలు ఏమాత్రమూ సహించరానివి!’’అంటూ ఆక్షేపించారు. ఈ మాట లు ట్రంప్‌ను ఉద్దేశించినవా అని విలేకరులు ప్రశ్నించగా అవునంటూ విస్పష్టంగా బదులిచ్చారు. ‘‘కొందరు దేశాధినేతలు మరీ చౌకబారుగా ప్రవర్తిస్తున్నారు. (మధ్యంతర) ఎన్నికల్లో లబ్ధి కోసం ఫ్రాన్స్‌ అల్లర్లను ప్రచారాస్త్రంగా మలచుకోజూస్తున్నారు. ఏఐ ఆధారిత తప్పుడు కంటెంట్‌ను బాహాటంగా ఇందుకు వాడుకుంటున్నారు’’అంటూ కడిగి పారేశారు!ఫ్రాన్స్‌లో కర్ఫ్యూ → నిరసనలపై ఇక ఉక్కుపాదమే! → మరిన్ని బలగాల మోహరింపు → స్థానిక సంస్థలకు ఫుల్‌ పవర్స్‌ యూరప్‌ను అల్లాడిస్తున్న ఆందోళనల జ్వాల ఫ్రాన్స్‌లో పతాక స్థాయికి చేరుతోంది. గత శని, ఆదివారాల్లో ఏకంగా 5 లక్షల మందికి పైగా జనం వీధుల్లోకి వచ్చి నిరసనలతో హోరెత్తించడం తెలిసిందే. దాంతో వాటిని అణచివేసేందుకు ప్రభుత్వం ఆదివారం నుంచే కఠిన చర్యలకు దిగుతోంది. వాటిలో భాగంగా భారీ సంఖ్యలో అరెస్టులు, నిర్బంధాలు కొనసాగుతున్నాయి. వీటికి తోడు ఏకంగా కర్ఫ్యూ విధించాలని కూడా బుధవారం కీలక నిర్ణయం తీసుకుంది! ఇందులో భాగంగా రాజధాని నగరం పారిస్‌తో పాటు దేశవ్యాప్తంగా పలు నగరాల్లో అర్ధరాత్రి నుంచి ఉదయం దాకా కర్ఫ్యూ అమల్లో ఉండనుంది. దక్షిణాది నగరమైన నైస్‌లో ప్రత్యేకించి యువతకు వర్తించేలా కర్ఫ్యూ నిబంధనలను అమలు చేయనున్నట్టు మేయర్‌ ప్రకటించారు. పరిస్థితి తీవ్రతను బట్టి కర్ఫ్యూ విధించే విచక్షణాధికారాన్ని స్థానిక సంస్థలకు కట్టబెడుతూ ఇటీవలే ప్రధాని సెబాస్టియన్‌ లెకొర్నూ నిర్ణయం తీసుకోవడం తెలిసిందే. దీనికి తోడు, నిరసనలు ముమ్మరంగా సాగుతున్న ప్రాంతాల్లో బలగాల మోహరింపును కనీవినీ రగని స్థాయిలో భారీగా పెంచుతూ ప్రభుత్వం తాజాగా ఉత్తర్వులు జారీ చేసింది. చట్టాలకు తూట్లు పొడిచే విధ్వంసక శక్తులు చెప్పినట్టల్లా ఆడే ప్రసక్తే లేదని ఈ సందర్భంగా ప్రధాని కుండబద్దలు కొట్టారు.

అమెరికా అధ్యక్షుడు డొనాల్డ్ ట్రంప్ ఇరాన్‌తో యుద్ధంలోకి దిగడంపై ఆయన పెద్ద కుమారుడు డొనాల్డ్ ట్రంప్ జూనియర్ అసంతృప్తిగా ఉన్నట్లు ‘ది అట్లాంటిక్’ కథనం వెల్లడించింది. ఈ యుద్ధంపై తన అభ్యంతరాలను ఆయన తండ్రితో ప్రైవేటు సంభాషణల్లో పలుమార్లు వ్యక్తం చేసినట్లు పేర్కొంది.2024 అధ్యక్ష ఎన్నికల ప్రచార సమయంలోనే అమెరికాను మరో మధ్యప్రాచ్య యుద్ధంలోకి తీసుకెళ్లవద్దని డాన్ జూనియర్ తన తండ్రి ట్రంప్‌ని కోరినట్లు సమాచారం. అప్పట్లో ఇరాన్ ఇజ్రాయెల్‌పై క్షిపణులు, డ్రోన్లతో దాడులు చేసిన సందర్భంలో.. ట్రంప్ నాయకత్వం వల్ల అమెరికా ఇరాన్‌తో పూర్తిస్థాయి యుద్ధంలోకి వెళ్లకుండా ఉందని ఆయన సోషల్ మీడియా వేదికగా వ్యాఖ్యానించారు.అయితే ప్రస్తుతం ఇరాన్‌తో సుదీర్ఘ సైనిక ఘర్షణలో అమెరికా చిక్కుకోవడంతో ట్రంప్ మద్దతుదారుల్లోనూ విభేదాలు పెరుగుతున్నట్లు సదరు కథనం తెలిపింది. విదేశీ యుద్ధాల కంటే దేశీయ సమస్యలకే ప్రాధాన్యం ఇవ్వాలని కొందరు MAGA మద్దతుదారులు భావిస్తున్నారు. దివంగత కన్జర్వేటివ్ నేత చార్లీ కిర్క్ కూడా ఈ యుద్ధాన్ని వ్యతిరేకించినట్లు కథనం పేర్కొంది.అమెరికా ఉపాధ్యక్షుడు జేడీ వాన్స్ సహా పలువురు ఉన్నతాధికారులు కూడా ఈ యుద్ధంపై ప్రైవేటుగా సందేహాలు వ్యక్తం చేసినట్లు నివేదిక వెల్లడించింది. ఇరాన్‌లో వైమానిక దాడుల ద్వారా ప్రభుత్వ మార్పు సాధ్యమేనా అనే అంశంపై సీఐఏ డైరెక్టర్ జాన్ రాట్‌క్లిఫ్, విదేశాంగ మంత్రి మార్కో రూబియో సందేహాలు వ్యక్తం చేసినట్లు తెలిపింది.ఇక మరోవైపు ప్యూ రీసెర్చ్ సెంటర్ సర్వే ప్రకారం.. ఇరాన్ విషయంలో ట్రంప్ వ్యవహరిస్తున్న తీరును అమెరికాలోని 65 శాతం మంది ప్రజలు వ్యతిరేకించగా, 33 శాతం మంది మద్దతు తెలిపారు. అంతేకాదు యుద్ధం ఏడాదికి పైగా కొనసాగవచ్చని దాదాపు సగం మంది అంచనా వేస్తున్నట్లు సర్వే వెల్లడించింది. దీంతో ఈ ఘర్షణపై అమెరికాలో ప్రజా వ్యతిరేకత, రాజకీయ విభేదాలు పెరుగుతున్న సంకేతాలు కనిపిస్తున్నాయి.ఇదీ చదవండి: కారుతో ఢీకొట్టడంతో.. తీవ్ర గాయాలతో రెండు కాళ్లు కోల్పోయిన ఎంపీ!

కీవ్‌: ఉక్రెయిన్‌పై రష్యా యుద్ధంలో కీలక పరిణామం చోటు చేసుకుంది. ఉక్రెయిన్‌లో సైనిక అవసరాల కోసం శాటిలైట్‌ ఇంటర్నెట్‌ సేవల్ని అందిస్తున్న ఎలాన్‌ మస్క్‌ నేతృత్వంలోని స్టార్‌లింక్ ఇంటర్నెట్ వేగాన్ని స్పేస్‌ఎక్స్ సంస్థ తగ్గించినట్లు తెలుస్తోంది. ఇప్పటికే అమల్లోకి వచ్చిన ఈ నిర్ణయంతో ఉక్రెయిన్ డ్రోన్ల కార్యకలాపాలకు తీవ్ర ఆటంకం కలుగుతోందని అమెరికా అధికారులు, సంబంధిత వర్గాలు వెల్లడించాయి.రష్యా చమురు శుద్ధి కర్మాగారాలపై ఉక్రెయిన్ సైన్యం డ్రోన్లతో వరుస దాడులు జరుపుతుండటంటపై అమెరికా అధ్యక్షుడు డొనాల్డ్ ట్రంప్ అసంతృప్తిని వ్యక్తం చేస్తున్నారు. ఉక్రెయిన్ చేస్తున్న ఈ దాడుల వల్ల గ్లోబల్ మార్కెట్‌లో ఇంధన సరఫరా తగ్గి, ధరలు విపరీతంగా పెరిగి అమెరికా ఆర్థిక వ్యవస్థపై భారం పడుతోందని ట్రంప్ భావించారు. అంతేకాకుండా, యుద్ధాన్ని త్వరగా ముగించాలనే తన శాంతి ప్రయత్నాలకు ఉక్రెయిన్ దాడులు ఆటంకం కలిగిస్తున్నాయని ఆయన హెచ్చరించారు.ఉక్రెయిన్‌ దాడులు ట్రంప్‌తో పాటు మస్క్‌ ఆగ్రహానికి గురి చేసింది. ట్రంప్ ప్రభుత్వంలో కీలక సలహాదారుడిగా, డీఓజీఈ బాధ్యతలు నిర్వర్తించిన మస్క్.. ట్రంప్ ఆలోచనలతో పూర్తిగా ఏకీభవించారు. ఉక్రెయిన్ సైన్యం డ్రోన్లను నడిపించడానికి, కమ్యూనికేషన్‌కు అంతా మస్క్‌కు చెందిన స్టార్‌లింక్ నెట్‌వర్క్‌పైనే పూర్తిగా ఆధారపడింది. ట్రంప్ హెచ్చరికలను లెక్కచేయకుండా ఉక్రెయిన్ దాడులు కొనసాగించడంతో, జెలెన్‌స్కీ హద్దుమీరుతున్నారంటూ మస్క్ బహిరంగంగానే మండిపడ్డారు.ఈ నేపథ్యంలోనే, ఉక్రెయిన్‌ను కట్టడి చేసేందుకు ట్రంప్ ఆలోచనకు రూపమిస్తూ.. మస్క్ తన స్టార్‌లింక్ ఇంటర్నెట్ వేగాన్ని పరిమితం చేసినట్లు అంతర్జాతీయ వర్గాలు వెల్లడిస్తున్నాయి.ఉక్రెయిన్ ఆందోళన.. స్టార్‌లింక్ సేవలను పరిమితం చేయడం వల్ల తమ రక్షణ చర్యలు తీవ్రంగా దెబ్బతింటున్నాయని ఉక్రెయిన్ అధ్యక్షుడు వొలొదిమిర్ జెలెన్‌స్కీ ఆందోళన వ్యక్తం చేశారు. మరోవైపు, స్టార్‌లింక్ సేవల విషయంలో నిర్ణయాలు తీసుకునే పూర్తి అధికారం ఆ సంస్థకే ఉందని అమెరికా రక్షణ మంత్రి పేర్కొనడం విశేషం. ఇదీ చదవండి: కారుతో ఢీకొట్టడంతో.. తీవ్ర గాయాలతో రెండు కాళ్లు కోల్పోయిన ఎంపీ!

అమెరికా సుంకాల సెగ.. వాణిజ్య చర్చల్లో ప్రతిష్ఠంభన.. ఇలాంటి పరిణామాల మధ్య భారత్‌-అమెరికా వాణిజ్య సంబంధాలపై కీలక ముందడుగు పడింది. ఇరు దేశాల మధ్య ఏడాదికి పైగా సాగుతున్న చర్చలు ఇప్పుడు తుది దశకు చేరినట్లు అమెరికా అధ్యక్షుడు డొనాల్డ్‌ ట్రంప్‌ వ్యాఖ్యలు సూచిస్తున్నాయి. భారత్‌తో ఒప్పందం చేసుకునేందుకు తాము సిద్ధంగా ఉన్నామని, చర్చలు దాదాపు కొలిక్కి వచ్చాయని ఆయన వెల్లడించారు. అంతేకాదు.. గతంలో అమెరికా చేసుకున్న వాణిజ్య ఒప్పందాల కంటే ఇది పూర్తిగా భిన్నంగా ఉంటుందని వ్యాఖ్యానించడం ఆసక్తిని రేకెత్తిస్తోంది. అగ్రరాజ్యంతో వాణిజ్య సంబంధాల్లో కీలక మలుపు రాబోతోందా? ఇరు దేశాల మధ్య మిగిలిన అడ్డంకులు తొలగిపోనున్నాయా? అన్న చర్చ మొదలైంది.వాషింగ్టన్‌లోని వైట్‌హౌస్‌ ఓవల్‌ కార్యాలయంలో మంగళవారం మీడియాతో మాట్లాడిన ట్రంప్‌.. భారత్‌తో వాణిజ్య ఒప్పందంపై కీలక వ్యాఖ్యలు చేశారు. ‘వాళ్లు ఒప్పందం చేసుకోవాలనుకుంటున్నారు. మేం కూడా ఒప్పందం చేసుకుంటాం. దాదాపు దగ్గరయ్యాం’ అని పేర్కొన్నారు. ఈ ఒప్పందం గతంలో అమెరికా చేసుకున్న వాణిజ్య ఒప్పందాల కంటే చాలా భిన్నంగా ఉంటుందని తెలిపారు. అయితే ఆ భిన్నత్వం ఏయే అంశాల్లో ఉంటుందో మాత్రం వివరించలేదు. అయితే, ప్రస్తుతానికి ట్రంప్‌ వ్యాఖ్యలు ఒప్పందంపై ఆశలు పెంచుతున్నప్పటికీ.. తుది నిబంధనలు, సుంకాల విషయంలో ఇరు దేశాలు ఏ నిర్ణయానికి వచ్చాయన్నది ఇంకా వెల్లడికాలేదు. ఒప్పందం అధికారికంగా ఖరారయ్యే వరకు పూర్తి వివరాలపై స్పష్టత వచ్చే అవకాశం లేదు.రూబియో కూడా అదే మాట!అమెరికా అధ్యక్షుడు ట్రంప్‌ వ్యాఖ్యలకు ముందు నుంచే ఒప్పందంపై పురోగతి కనిపించింది. భారత్‌ పర్యటనలో ఉన్న అమెరికా విదేశాంగ మంత్రి మార్కో రూబియో సైతం వాణిజ్య ఒప్పందం దాదాపు తుది దశకు చేరుకుందని తెలిపారు. ఒప్పందం అమలుకు అవసరమైన ప్రక్రియ పూర్తికాకపోయినా.. ఇరు దేశాలు వీలైనంత దగ్గరకు వచ్చాయని చెప్పారు. పరిష్కరించాల్సిన అంశాలు కొన్నే మిగిలి ఉన్నాయని, వాటిని త్వరలోనే కొలిక్కి తీసుకురావచ్చని ఆశాభావం వ్యక్తం చేశారు. మిగిలిన అంశాలపై ఏకాభిప్రాయం కుదిరితే ఇరు దేశాల నాయకులు ఒప్పందంపై సంతకాలు చేసే అవకాశం ఉందని రూబియో సంకేతాలిచ్చారు. ఆయన వ్యాఖ్యలు, ట్రంప్‌ తాజా ప్రకటనను పరిశీలిస్తే వాణిజ్య చర్చలు కీలక దశలో ఉన్నట్లు స్పష్టమవుతోంది.ఏడాదికి పైగా సాగుతున్న కసరత్తుభారత్‌, అమెరికా మధ్య ద్వైపాక్షిక వాణిజ్య ఒప్పందం (బీటీఏ) కోసం కొంతకాలంగా చర్చలు జరుగుతున్నాయి. ఈ ఏడాది ఫిబ్రవరిలో ఒప్పందం తొలి దశకు సంబంధించిన ప్రాథమిక రూపురేఖలను ఖరారు చేసినట్లు ఇరు దేశాలు ప్రకటించాయి. అయితే ఆ తర్వాత అమెరికా సుంకాల విధానంలో చోటుచేసుకున్న మార్పులతో చర్చలు మరింత సంక్లిష్టంగా మారాయి. ఇరు దేశాల ప్రయోజనాలకు అనుగుణంగా నిబంధనలను ఖరారు చేసేందుకు సంప్రదింపులు కొనసాగాయి.భారత్‌కు ఏం లాభం?అమెరికాతో వాణిజ్య ఒప్పందం ఖరారైతే ఇరు దేశాల వ్యాపార సంబంధాలకు కొత్త అవకాశాలు ఏర్పడే అవకాశం ఉంది. భారత ఎగుమతిదారులకు అమెరికా మార్కెట్‌లో మెరుగైన అవకాశాలు లభించడం, వాణిజ్య అనిశ్చితి తగ్గడం వంటి అంశాలు భారత్‌కు కీలకం. అయితే ఎగుమతులపై సుంకాలు ఎంత మేరకు ఉంటాయి? భారత ఉత్పత్తులకు ఎలాంటి మార్కెట్‌ ప్రవేశ సౌకర్యాలు లభిస్తాయి? అమెరికా ఉత్పత్తుల విషయంలో భారత్‌ ఏ మేరకు రాయితీలు ఇస్తుంది? వంటి అంశాలపై తుది ఒప్పందమే స్పష్టత ఇవ్వనుంది. అమెరికా వైపు నుంచి చూస్తే.. భారత మార్కెట్‌లో తమ ఉత్పత్తులకు మరిన్ని అవకాశాలు కల్పించడం, ద్వైపాక్షిక వాణిజ్యాన్ని విస్తరించడం వంటి లక్ష్యాలు ఈ ఒప్పందంలో కీలకంగా ఉండవచ్చు. అయితే ఏయే రంగాల్లో ఎలాంటి నిర్ణయాలు తీసుకుంటారన్నది అధికారిక వివరాలు వెలువడిన తర్వాతే తెలుస్తుంది.ట్రంప్‌ ఉద్దేశమేంటి?ట్రంప్‌ చేసిన వ్యాఖ్యల్లో ప్రధానంగా ఆసక్తి రేపుతున్న అంశం.. ఈ ఒప్పందం గతంలో అమెరికా చేసుకున్న వాణిజ్య ఒప్పందాల కంటే భిన్నంగా ఉంటుందన్న మాట. అయితే ఆ వ్యాఖ్య వెనుక ఉన్న నిర్దిష్ట ఉద్దేశాన్ని ఆయన వివరించలేదు. సుంకాలు, మార్కెట్‌ ప్రవేశం, వాణిజ్య సమతుల్యత, ఇతర ఆర్థిక నిబంధనల్లో ఎలాంటి మార్పులు ఉంటాయన్నది ప్రస్తుతం స్పష్టంగా లేదు. మొత్తంగా.. భారత్‌తో వాణిజ్య ఒప్పందం దాదాపు ఖరారయ్యే దశకు చేరిందన్న ట్రంప్‌ వ్యాఖ్యలు కీలక పరిణామంగా మారాయి. ఏడాదికి పైగా సాగుతున్న చర్చలు ముగింపు దశకు చేరాయన్న సంకేతాలు కనిపిస్తున్నా.. ఒప్పందంలోని అసలు లెక్కలు, సుంకాలపై నిర్ణయాలు, భారత్‌కు లభించే ప్రయోజనాలు ఏమిటన్నది తుది ప్రకటనతోనే తేలనుంది.ఇదీ చదవండి: పాకిస్తాన్‌ మునీర్‌ దౌత్యం వేళ షాకిచ్చిన ఇరాన్‌

వాషింగ్టన్‌: అమెరికా అధ్యక్షుడు డొనాల్డ్‌ ట్రంప్‌ మరోసారి మీడియాపై తన అసంతృప్తిని వ్యక్తం చేశారు. వైట్‌హౌస్‌లోని మీడియా సమావేశాల గదిలో పనిచేసే జర్నలిస్టులను అక్కడి నుంచి తరలించి, ఆ ప్రదేశంలోని ఇండోర్‌ స్విమ్మింగ్‌ పూల్‌ను పునరుద్ధరించాలని యోచిస్తున్నట్లు సమాచారం. ఈ ప్రతిపాదనపై ట్రంప్‌ తన సన్నిహితులతో పలుమార్లు చర్చించినట్లు తెలుస్తోంది. ప్రభుత్వానికి, వార్తా సంస్థలకు మధ్య విభేదాలు పెరుగుతున్న నేపథ్యంలో ఈ అంశం ప్రాధాన్యత సంతరించుకుంది.ఆగస్టు చివర్లో ఓవల్‌ కార్యాలయంలో జరిగిన సమావేశంలో అప్పటి వైట్‌హౌస్‌ ప్రెస్‌ సెక్రటరీ కరోలిన్‌ లీవిట్‌తో ట్రంప్‌ ఈ విషయాన్ని ప్రస్తావించినట్లు సమాచారం. జేమ్స్‌ ఎస్‌. బ్రాడీ ప్రెస్‌ బ్రీఫింగ్‌ రూమ్‌ నుంచి విలేకరులను తరలించాలని సూచించారు. పలువురు ఉన్నతాధికారుల సమక్షంలో ఈ మార్పు ఆమె పదవీకాలానికి చివరి గుర్తుగా నిలుస్తుందని వ్యాఖ్యానించినట్లు తెలుస్తున్నది. అయితే లీవిట్‌ పదవిలో ఉన్నంతకాలం ఈ ప్రతిపాదన కార్యరూపం దాల్చలేదు. ఆమె ఆగస్టు 27న అధికారికంగా బాధ్యతల నుంచి వైదొలిగారు.1933లో అప్పటి అధ్యక్షుడు ఫ్రాంక్లిన్‌ డి. రూజ్‌వెల్ట్‌ తన పోలియో కారణంగా ప్రభావితమైన కాళ్లకు చికిత్సలో భాగంగా వైట్‌హౌస్‌లో ఇండోర్‌ స్విమ్మింగ్‌ పూల్‌ను ఏర్పాటు చేయించారు. అనంతరం అధ్యక్షుడు రిచర్డ్‌ నిక్సన్‌ ఆ కొలనును కప్పివేసి, విలేకరుల కోసం స్థలాన్ని అందుబాటులోకి తెచ్చారు. ప్రస్తుతం వైట్‌హౌస్‌ గుర్తింపు కార్డులు కలిగిన జర్నలిస్టులు మీడియా సమావేశాల గదికి అనుసంధానంగా ఉన్న ఈ కార్యాలయంలో పనిచేస్తున్నారు. వారిని అక్కడికి ఎదురుగా ఉన్న ఐసెన్‌హోవర్‌ ఎగ్జిక్యూటివ్‌ ఆఫీస్‌ భవనానికి తరలించే అంశాన్ని ట్రంప్‌ వర్గం పరిశీలిస్తున్నట్లు సమాచారం.గత సెప్టెంబరులో ట్రంప్‌ మీడియాపై ఆంక్షలకు సంబంధించిన ప్రకటన చేశారు. తమ ప్రభుత్వంపై కల్పిత కథనాలు, అబద్ధాలను ప్రచారం చేస్తున్నాయంటూ సీఎన్‌ఎన్‌, ఎంఎస్‌ నౌ, పొలిటికో సంస్థలను వైట్‌హౌస్‌లోకి అనుమతించబోమని పేర్కొన్నారు. అనంతరం 70 మందికి పైగా జర్నలిస్టుల గుర్తింపు అనుమతులను ప్రభుత్వం రద్దు చేసింది. ట్రంప్‌ నియమించిన న్యాయమూర్తి తిమోతీ జె. కెల్లీ ఈ నిర్ణయంపై తాత్కాలికంగా అడ్డుకట్ట వేశారు. ఇదీ చదవండి: భయపెట్టడమే పెట్టుబడి.. బెదిరింపులే వ్యాపారం!

వాషింగ్టన్‌: అమెరికా గ్రేట్‌ ఎగేన్‌ నినాదంతో ఆ దేశస్థులను ఉసిగొల్పి రెండోసారి అధికారంలోకి వచ్చిన ట్రంప్‌.. ఈ సారి భారీస్థాయిలో వారితోనే వ్యతిరేఖత ఎదుర్కొవాల్సి వస్తుంది. త్వరలో జరిగే మధ్యంతర ఎన్నికల్లో ఆయనకు ఎదురు గాలి వీచే అవకాశాలున్నట్లు సర్వేలు తేటతెల్లం చేస్తున్నాయి. ద్రవ్యోల్బణం, ఇరాన్ యుద్ధం ఆయన ప్రజాదరణను తీవ్రంగా దెబ్బతీసినట్లు తెలుస్తోంది. అంతే కాకుండా ఆయనను సొంత పార్టీ అభ్యర్థులు నుంచి వ్యతిరేఖత ఎదురవుతున్నట్లు సమాచారం.ప్రజాధారణ కనిష్ట స్థాయికిఅమెరికాలో ట్రంప్ పనితీరుతో సంతోషంగా ఉన్నవారి సంఖ్య ఆ దేశంలో క్రమంగా తగ్గుతోంది. వివిధ సర్వేల ప్రకారం, కేవలం 30 నుండి 36 శాతం మంది మాత్రమే ఆయన పనితీరుతో సంతృప్తిగా ఉన్నట్లు తెలుస్తోంది. ఇటీవల నిర్వహించిన ఎన్‌బిసి న్యూస్ పోల్‌లో 34% మంది ట్రంప్ పనితీరును ఆమోదించగా, వాషింగ్టన్ పోస్ట్-ఏబిసి న్యూస్ పోల్‌లో 33%, ఫాక్స్ న్యూస్ పోల్‌లో 36% మంది ఆమోదించారు. ప్యూ రీసెర్చ్ సెంటర్ సర్వేలో ట్రంప్‌కు అత్యంత తక్కువగా 30% మద్దతు లభించింది. ఇది ఆయన మొదటి పదవీకాలంలో లభించిన మద్దతు కంటే కూడా తక్కువ ఉన్నట్లు సమాచారం.అల్లరి మూకలు పార్లమెంటుపై దాడి చేసిన తర్వాత, ట్రంప్ ఆమోద రేటింగ్ ఆయన మొదటి పదవీకాలంలోనే అత్యంత కనిష్ట స్థాయికి పడిపోయి, జనవరి 2021లో 34 శాతానికి చేరింది .ద్రవ్యోల్బణం దానితో పాటు ట్రంప్ తన 2024 అధ్యక్ష ఎన్నికల ప్రచారంలో ద్రవ్యోల్బణాన్ని, ప్రభుత్వ వ్యయాన్ని తగ్గిస్తానని వాగ్దానం చేశారు. కానీ ఇప్పుడు పెరుగుతున్న ధరలు ఆయన పార్టీకి సమస్యగా మారుతున్నాయి. అమెరికాలో గుడ్లు, పాలు, బ్రెడ్, మాంసం, కూరగాయలు వంటి నిత్యావసర వస్తువుల ధరలు 20 నుంచి 30 శాతం వరకు పెరిగాయి. ఇంటి అద్దెలు గరిష్ట స్థాయికి చేరుకున్నాయి.ఇరాన్ యుద్ధంతో పరిస్థితి తలకిందులు ఇక ట్రంప్ ఇరాన్‌పై చేపట్టిన యుద్ధం ఆయనకు మరో సమస్యగా మారింది. ఈ యుద్ధం గ్యాసోలిన్ డీజిల్ ధరలపై ఒత్తిడిని పెంచింది, దీనివల్ల అమెరికన్ల రోజువారీ ఖర్చులు పెరిగే అవకాశం ఉంది. ఎన్‌బిసి న్యూస్ సర్వేలో, ఇరాన్ యుద్ధం విషయంలో ట్రంప్ వ్యవహరించిన తీరును కేవలం 29% మంది మాత్రమే ఆమోదించారు. ఫాక్స్ న్యూస్ సర్వేలో, ఆయన విదేశాంగ విధానంలో లోపాలు ఉన్నాయని 64% మంది అన్నారు.అయితే, ట్రంప్ తన సొంత రిపబ్లికన్ పార్టీలోనే మద్దతును కొనసాగిస్తున్నారు. ఏపీ పోల్‌లో, 69% మంది రిపబ్లికన్ ఓటర్లు ఆయన విదేశాంగ విధానాన్ని ఆమోదించారు. సొంత పార్టీ అభ్యర్థుల నుంచే వ్యతిరేకతట్రంప్ ప్రజాదరణ తగ్గడం ఆయన సొంత పార్టీపై కూడా ప్రభావం చూపుతోంది. అక్టోబర్‌లో వచ్చిన ఒక రాయిటర్స్ నివేదిక ప్రకారం, పోటీ జరుగుతున్న 62 స్థానాలలో 41 స్థానాలలోని రిపబ్లికన్ అభ్యర్థులు ట్రంప్ యొక్క కొన్ని విధానాలతో విభేదిస్తున్నారు లేదా వాటికి దూరంగా ఉంటున్నారు. ఈ అభ్యర్థులు ట్రంప్ విధానాలన్నింటినీ వ్యతిరేకించడం లేదు. కొన్ని విషయాలలో భిన్నంగా వ్యవహరించడం ద్వారా, పార్టీకి గట్టి మద్దతుదారులు కాని వారి మద్దతును పొందడానికి ప్రయత్నిస్తున్నారు.ఈ అభ్యర్థులు ఎదుర్కొంటున్న సవాలు ఏమిటంటే, ట్రంప్‌కు దగ్గరగా ఉండటం వారి ప్రజాదరణను కోల్పోయేలా చేయవచ్చు, అదే సమయంలో ఆయనకు మరీ దూరంగా ఉండటం ట్రంప్ విధేయులైన మద్దతుదారులకు కోపం తెప్పించవచ్చు.మెజారిటీ కోల్పోతే ట్రంప్‌కు ఏమవుతుంది?కాంగ్రెస్‌లోని ఒకటి లేదా రెండు సభలలో డెమోక్రటిక్ పార్టీకి మెజారిటీ లభిస్తే, ట్రంప్ తన నిర్ణయాలను అమలు చేయడం కష్టతరం కావచ్చు. బడ్జెట్, ప్రభుత్వ వ్యయం, కొత్త చట్టాలకు సంబంధించి కాంగ్రెస్ కీలక నిర్ణయాలు తీసుకుంటుంది. డెమోక్రాట్లకు మెజారిటీ లభిస్తే, అది ట్రంప్ ప్రతిపాదనలను అడ్డుకుని ఆయన పరిపాలనుకు అడ్డంకులు సృష్టించగలదు.

వాషింగ్టన్ డీసీ: అమెరికా అధ్యక్షుడు డొనాల్డ్ ట్రంప్ వాషింగ్టన్ డీసీలోని శతాబ్దాల చరిత్ర కలిగిన ‘ఈస్ట్ పొటోమాక్ గోల్ఫ్ లింక్స్’ను సమూలంగా ఆధునీకరించే ప్రణాళికను ప్రకటించారు. ట్రూత్ సోషల్‌లో కొత్త 18-హోల్ డిజైన్ నమూనాను షేర్‌ చేసి ఆయన, ఈ పనులు నవంబర్‌లో ప్రారంభమవుతాయని వెల్లడించారు. పునర్నిర్మాణం పూర్తయ్యాక ఇది సాధారణ ప్రజలకు అందుబాటులో ఉండటంతో పాటు, యూఎస్ ఓపెన్, పీజీఏ ఛాంపియన్‌షిప్, రైడర్ కప్ వంటి అంతర్జాతీయ స్థాయి టోర్నమెంట్లు నిర్వహించేందుకు వీలుగా తీర్చిదిద్దుతామని ఆయన పేర్కొన్నారు.అయితే ఈ ప్రాజెక్టు ఇప్పటికే న్యాయపరమైన చిక్కులను ఎదుర్కొంటోంది. ముందస్తు సమాచారం ఇవ్వకుండానే గోల్ఫ్ కోర్స్‌లోని వందలాది చెట్లను రాత్రికి రాత్రే నరికివేయడంపై ఫెడరల్ జడ్జి అనా రెయెస్ ట్రంప్ యంత్రాంగంపై ఆగ్రహం వ్యక్తం చేశారు. కోర్టు ఆదేశాలను ఉల్లంఘించారన్న కారణంతో అంతర్గత వ్యవహారాల శాఖ అధికారులను విచారణకు హాజరుకావాలని ఆదేశించగా, ఆ న్యాయమూర్తి తమ ప్రభుత్వంపై పక్షపాతం చూపుతున్నారని ఆరోపిస్తూ కేసు నుంచి తప్పుకోవాలని ట్రంప్ బృందం కోరింది.మరోవైపు ప్రస్తుతం ఉన్న మైదానం శిథిలావస్థకు చేరిందని, తెగులు పట్టిన చెట్లు, దెబ్బతిన్న తీరప్రాంత గోడల స్థానంలో నూతన నిర్మాణం అవసరమని ట్రంప్ సమర్థించుకున్నారు. పొటోమాక్ నదిలోని ఒక ద్వీపంలో ఉన్న ఈస్ట్ పొటోమాక్ గోల్ఫ్ మైదానం చుట్టూ వాకర్లు, సైక్లిస్టులు, చేపలు పట్టేవారు. పిక్నిక్ చేసుకునే సామాన్య పౌరుల కోసం రహదారులు, బాటలు ఉన్నాయి. అయితే, ట్రంప్ ప్రతిపాదించిన సరికొత్త డిజైన్‌లో ఈ బహిరంగ ప్రదేశాలను తొలగించినట్లు కనిపిస్తుండటంతో, సాధారణ ప్రజలకు ఈ ప్రాంత ప్రవేశంపై తీవ్ర ఆంక్షలు ఎదురవుతాయనే ఆందోళనలు వ్యక్తమవుతున్నాయి. ఈ చారిత్రక ప్రజా ఆస్తిని విలాసవంతమైన క్రీడా ప్రాంగణంగా మార్చడంపై స్థానిక పౌరులు, పర్యావరణవేత్తలు అభ్యంతరం వ్యక్తం చేస్తున్నారు.రాజధాని వాషింగ్టన్ రూపురేఖలను మార్చేందుకు ట్రంప్ చేపడుతున్న వివాదాస్పద ప్రాజెక్టులలో ఇది కూడా భాగం. గతంలో వైట్ హౌస్ ఈస్ట్ వింగ్‌ను కూల్చివేసి కొత్త బాల్రూమ్ నిర్మించడం, ట్రయంఫల్ ఆర్చ్ నిర్మాణం, అలాగే కెన్నెడీ సెంటర్‌ను మార్చే ప్రయత్నాలు ఇప్పటికే న్యాయ వివాదాల్లో చిక్కుకున్నాయి. అంతేకాకుండా, 14.7 మిలియన్ డాలర్లతో చేపట్టిన లింకన్ మెమోరియల్ రిఫ్లెక్టింగ్ పూల్ మరమ్మతులు కూడా నాణ్యతా లోపాలు, ఆల్గే సమస్యతో తీవ్ర విమర్శలపాలయ్యాయి. ఈ క్రమంలో గోల్ఫ్ కోర్స్ ప్రాజెక్టు సైతం చెట్ల నరికివేత, ప్రజా హక్కుల విషయంలో మరింత న్యాయ పరిశీలనను ఎదుర్కొంటోంది. ఇదీ చదవండి: ట్రంప్‌కు ‘శాంతి’నిచ్చి.. ప్రతిపక్షంలో మచాడో కలకలం!

కారాకాస్‌: వెనిజువెలా ప్రతిపక్ష కూటమి ఆదివారం నాడు నోబెల్ శాంతి బహుమతి గ్రహీత మరియా కొరీనా మచాడోను తమ నాయకురాలిగా ధ్రువీకరించింది. దీనితో ఆమెను తిరిగి స్వదేశానికి రానివ్వాలని దేశ తాత్కాలిక అధికారులపై ఒత్తిడి పెరగడంలో పాటు దేశంలో కొత్త రాజకీయం మొదలైంది. గత జనవరిలో మాజీ అధ్యక్షుడు నికోలస్ మదురోను అమెరికా సైన్యం నిర్బంధించిన తర్వాత, తాత్కాలిక ప్రభుత్వంతో ప్రతిపక్షంలోని ఒక వర్గం రాజకీయ మార్పుపై చర్చలు జరుపుతున్న తరుణంలో ఈ నిర్ణయం తీసుకుంది.కారకాస్‌లో జరిగిన సమావేశం ముగింపులో సమర్పించిన తుది పత్రం ప్రకారం, ప్రతిపక్షానికి చెందిన ‘యునిటరీ డెమోక్రటిక్ ప్లాట్‌ఫామ్’ (పీయూడీ) సభ్యులు మరియా కొరీనా మచాడో నాయకత్వాన్ని గుర్తించడానికి, సమర్థించడానికి అంగీకరించారు. మచాడో ప్రస్తుతం పనామాలో నివసిస్తున్నారు. ఈ సమావేశంలో, ఈ కూటమి వెనిజులాలో ప్రజాస్వామ్యాన్ని పునరుద్ధరించే లక్ష్యంతో 14 ప్రతిపాదనలను సమర్పించింది. ఇందులో సార్వత్రిక ఎన్నికల నిర్వహణకు సంబంధించిన రోడ్‌మ్యాప్ కూడా ఉంది. అయితే, పోలింగ్ తేదీని మాత్రం ప్రకటించలేదు.రాజకీయ ఖైదీలందరినీ బేషరతుగా విడుదల చేయాలని, రాజకీయ అణచివేతను అంతం చేయాలని, ప్రవాసంలో ఉన్నవారు తిరిగి స్వదేశానికి వచ్చే హక్కును కల్పించాలని కూటమి డిమాండ్ చేసింది. అలాగే రాజకీయ పార్టీలకు పూర్తి స్వేచ్ఛ కల్పించాలని, ఎన్నికల్లో పోటీ చేసే అభ్యర్థులపై ఉన్న ఆంక్షలను తొలగించాలని, రాజకీయ సంస్థలను లక్ష్యంగా చేసుకుని చేపట్టిన పరిపాలనాపరమైన చర్యలను ముగించాలని కోరింది. ఈ ప్రతిపాదనలలో మానవ హక్కుల పరిరక్షణ మరియు స్వేచ్ఛాయుత, పోటీతత్వ ఎన్నికల ద్వారా ప్రజాస్వామ్యానికి శాంతియుత మార్పును నిర్ధారించే చర్యలు ఉన్నాయి.వచ్చే ఏడాది ఎన్నికలు జరగాలని మచాడో పార్టీ ‘వెంటే వెనిజులా’ (Vente Venezuela) ఒత్తిడి చేస్తోంది అధికారులు ఎన్నికల తేదీని ప్రకటించాలని కోరుతోంది.జనవరిలో మదురోను అమెరికా దళాలు పట్టుకుని విచారణ నిమిత్తం న్యూయార్క్‌కు తరలించాయి. ఆయన డిప్యూటీ అయిన డెల్సీ రోడ్రిగ్జ్ అధికారాన్ని చేపట్టి, ప్రస్తుతం వాషింగ్టన్ ఒత్తిడి మధ్య తాత్కాలిక ప్రభుత్వానికి నాయకత్వం వహిస్తున్నారు.తన నోబెల్ పతకాన్ని ట్రంప్‌కు ఇచ్చి..మచాడో అమెరికా అధ్యక్షుడు డొనాల్డ్ ట్రంప్ నుంచి కూడా మద్దతు కోరారు. జనవరి 2026లో వైట్ హౌస్‌లో జరిగిన సమావేశంలో, ఆమె తన నోబెల్ శాంతి బహుమతికి సంబంధించిన అసలైన బంగారు పతకాన్ని ట్రంప్‌కు అందించారు. వెనిజులా నాయకత్వంపై ఆయన ప్రభుత్వం తెచ్చిన ఒత్తిడికి గుర్తింపుగా ఈ సంజ్ఞను ఆమె అభివర్ణించారు. అయితే నోబెల్ పురస్కార గౌరవం అధికారికంగా మచాడో పేరిటే ఉంది.నోబెల్ శాంతి బహుమతిని స్వీకరించేందుకు 2025లో వెనిజులా విడిచిపెట్టినప్పటి నుంచి మచాడో ప్రవాసంలోనే ఉంటున్నారు. ఆమె పార్టీ కథనం ప్రకారం, ఆమె తిరిగి వచ్చేందుకు కనీసం ఏడు సార్లు ప్రయత్నించినప్పటికీ వెనిజులా అధికారులు ఆమెను అడ్డుకున్నారు.కారకాస్‌లో తాత్కాలిక ప్రభుత్వం..ప్రతిపక్షంలోని ఒక వర్గం అమెరికా మద్దతుతో మూడో విడత చర్చలు జరుపుతున్న సమయంలో ప్రతిపక్ష కూటమి ఈ నిర్ణయం తీసుకుంది. ఈ చర్చలలో పాల్గొనేందుకు మచాడోకు ఆహ్వానం అందలేదు. అయినప్పటికీ తాను ఈ ప్రక్రియకు ఆటంకం కలిగించబోనని ఆమె చెప్పారు. ఈ తాజా ఒప్పందం దేశ రాజకీయ మార్పుపై వెనిజులా ప్రతిపక్షంలో ఉన్న విభేదాలను ఎత్తిచూపుతోంది. ఒకవైపు మచాడో వర్గం ఎన్నికల కోసం ఒత్తిడి తెస్తుండగా, మరొక వర్గం తాత్కాలిక అధికారులతో చర్చలను కొనసాగిస్తోంది.ఇదీ చదవండి: ‘టైగర్ ష్రాఫ్‌పై కాల్పులు మా పనే’.. లారెన్స్ బిష్ణోయ్ గ్యాంగ్

కీవ్‌: రష్యాపై అమెరికా అధ్యక్షుడు డొనాల్డ్‌ ట్రంప్‌ ఆంక్షలను నిలిపివేయడాన్ని ఉక్రెయిన్‌ అధినేత జెలెన్‌స్కీ తప్పు పట్టారు. ట్రంప్‌ వైఖరి చాలా దురదృష్టకరమని పేర్కొన్నారు. అమెరికా, రష్యా మధ్య సంబంధాలు మెరుగవుతున్న సంగతి తెలిసిందే. రష్యా ఆర్థిక వ్యవస్థను లక్ష్యంగా చేసుకొని గతంలో విధించిన ఆంక్షలను ట్రంప్‌ నిలిపివేశారు. రష్యా నుంచి చమురు, గ్యాస్‌ కొనే దేశాలపై సుంకాలు విధించే చట్టాన్ని సైతం తాత్కాలికంగా ఆపేశారు. ఈ పరిణామాలను ఉక్రెయిన్‌కు ఆందోళన కలిగిస్తున్నాయి. శీతాకాలం సమీపిస్తున్న తరుణంలో ఉక్రెయిన్‌పై రష్యా దాడులను తీవ్రతరం చేసే అవకాశం ఉన్నట్లు తెలుస్తోంది. యుద్ధాన్ని ముగించేందుకు రష్యాపై నిజంగా తీవ్రమైన ఒత్తిడిని తీసుకురావాల్సిన లిండ్సే గ్రాహం చట్టాన్ని ట్రంప్‌ పూర్తిగా విస్మరించాలని జెలెన్‌స్కీ పేర్కొన్నారు. రష్యాపై కొత్త ఆంక్షలను తిరిగి అమలు చేయవచ్చని ఆశాభావం వ్యక్తం చేశారు. లిండ్సే గ్రాహం చట్టం అమల్లోకి రావాలన్నారు. దీనికి మద్దతుగా అందరూ మాట్లాడాలని శనివారం కోరారు. శుక్రవారం రాత్రి జరిగిన రష్యా దాడుల్లో అంబులెన్స్‌ డ్రైవర్‌తో సహా కనీసం నలుగురు మరణించారని, డజన్ల కొద్దీ గాయపడ్డారని ఉక్రెయిన్‌అధికారులు తెలిపారు. రష్యా సైన్యం ఉక్రెయిన్‌లోని ఇంధన మౌలిక సదుపాయాలపై భారీ దాడి చేసిందని, దేశవ్యాప్తంగా 15కు పైగా ప్రాంతాలను లక్ష్యంగా చేసుకుందని జెలెన్‌స్కీ తెలిపారు. రష్యా దాడుల వల్ల తీవ్ర పరిణామాలు ఏర్పడుతున్నాయని పేర్కొన్నారు.

వాషింగ్టన్: అమెరికా రాజకీయాల్లో ప్రతిష్టాత్మకమైన వైట్‌హౌస్ ప్రెస్ సెక్రటరీ పదవిలో ఊహించని నాటకీయ పరిణామం చోటుచేసుకుంది. నూతన ప్రెస్ సెక్రటరీగా బాధ్యతలు స్వీకరించిన కేటీ జకారియా కేవలం ఐదు రోజులకే తన పదవిని కోల్పోయారు. అమెరికా అధ్యక్షుడు డొనాల్డ్ ట్రంప్‌ యంత్రాంగం ఆమెను అత్యంత వేగంగా బాధ్యతల నుండి తప్పించడం హాట్ టాపిక్‌గా మారింది.శుక్రవారం ఉదయం ఎప్పటిలాగే విధులకు హాజరైన జకారియా.. రూజ్‌వెల్ట్ రూమ్‌లో కమ్యూనికేషన్స్ టీమ్‌తో జరిగిన కీలక సమావేశంలో పాల్గొన్నారు. ఆ తర్వాత మధ్యాహ్నం ఒంటి గంట సమయంలో వెస్ట్ వింగ్‌లోని తన కార్యాలయంలో కూర్చుని ది వాల్ స్ట్రీట్ జర్నల్ ప్రతినిధులకు ప్రత్యేక ఇంటర్వ్యూ ఇస్తున్నారు. తన భవిష్యత్తు ప్రణాళికల గురించి మాట్లాడుతున్నారు. స‌రిగ్గా అదే స‌మ‌యంలో ట్రంప్ సీనియర్ సలహాదారు జేసన్ మిల్లర్ ఆమె ఆఫీస్ తలుపు తట్టారు. ఉపాధ్యక్షుడు జేడీ వాన్స్‌ మనతో ఒకసారి మాట్లాడాలనుకుంటున్నారు. కాస్త పక్కకు వస్తారా అని మిల్లర్ కోరారు. దాంతో ఇంటర్వ్యూను మధ్యలోనే ఆపేసి వెన్స్‌ని కలవడానికి వెళ్లిన జకారియా.. తిరిగి ఆ గదిలోకి రాలేదు. తన ఉద్యోగంలోనూ కొనసాగలేకపోయారు. వాన్స్ భేటీ జ‌రిగిన‌ కొద్ది క్షణాల్లోనే ఆమెపై వేటు పడింది.ట్రంప్ ముందే హెచ్చరించారా?ఈ పరిణామంపై అధ్యక్షుడు డొనాల్డ్ ట్రంప్‌ విలేకరులతో మాట్లాడారు. అదే రోజు ఉదయం తాను జకారియాతో మాట్లాడినట్లు గుర్తుచేసుకున్నారు. నేను ఆమెతో అన్నాను.. కేటీ, ఈ ఉద్యోగం నిజంగా నీకు అవసరమా? నిజాయితీగా చెప్పాలంటే ఈ పదవి నీకు అనవసరం అని చెప్పాను. నేను గనుక ఆమె స్థానంలో ఉంటే ఈ ఉద్యోగం గురించి మరోసారి ఆలోచించుకునేవాడినని అన్నాను అని ట్రంప్ వ్యాఖ్యానించారు. కోల్పోయిన త‌ర్వాత‌ తర్వాత జకారియా ఫోన్ ద్వారా వాల్ స్ట్రీట్ జర్నల్‌తో మాట్లాడారు. నాకు ఉన్న పరిమిత సమయం, సమాచారంతో ప్రెస్ బ్రీఫింగ్‌ను సమర్థవంతంగా నిర్వహించడానికి నా శక్తినంతటినీ ధారపోశాను. ట్రంప్‌కు, అమెరికా ప్రజలకు నా శ్రేష్ఠమైన సేవలు అందించడమే నా లక్ష్యంగా పనిచేశాను అని పేర్కొన్నారు.వేటుకు దారితీసిన కారణాలు ఇవే..కేటీ జకారియా ప్రెస్ సెక్రటరీగా బాధ్యతలు చేపట్టిన మొదటి రోజు నుంచే ఇబ్బందులు ఎదుర్కొన్నారు. ఆమె నిర్వహించిన మొదటి ప్రెస్ బ్రీఫింగ్ ఏమాత్రం ఆకట్టు కోలేకపోయింది. దీనికి తోడు ఆమె విద్యార్హతలు, నేపథ్యంపై తీవ్రమైన విమర్శలు వెల్లువెత్తాయి. తాను సుదీర్ఘకాలంగా న్యాయవాదిగా పని చేస్తున్నట్లు జకారియా చెప్పుకొచ్చారు. అయితే, ఆమె అమెరికాలోని ఏ రాష్ట్రంలోనైనా లేదా గతంలో తాను పనిచేసిన చైనాలోని భారీ లా ఫామ్‌లోనైనా బార్ ఎగ్జామ్ పాసయ్యారా? లేదా? అనే విషయాన్ని స్పష్టం చేయడంలో విఫలమయ్యారు. చివరికి, ఆమె అసలు బార్ ఎగ్జామ్ పాస్ కాలేదని వాల్ స్ట్రీట్ జర్నల్ ఆధారాలతో సహా నిరూపించింది. కొత్త బాధ్యతల్లోకి జకారియా?జకారియా తొలగింపుపై వస్తున్న రకరకాల ఊహాగానాలను వైట్‌హౌస్ కొట్టిపారేసింది. ఆమె ట్రంప్ ప్రభుత్వంలోనే కొనసాగుతారని, అయితే ఆమెకు కేటాయించే కొత్త బాధ్యతలను త్వరలోనే అధికారికంగా ప్రకటిస్తామని వైట్‌హౌస్ వర్గాలు వెల్లడించాయి.ఇదీ చ‌ద‌వండి : కడుపునొప్పి అంటూ నాటకం .. 300 మంది సైనికుల మృతికి కారణమయ్యాడు?

రష్యాపై కొత్తగా విధించాల్సిన కొన్ని ఆంక్షలను సడలిస్తూ అమెరికా అధ్యక్షుడు డొనాల్డ్ ట్రంప్ తీసుకున్న నిర్ణయాన్ని రష్యా అధ్యక్షుడు పుతిన్ ప్రతినిధి కిరిల్ దిమిత్రియేవ్ స్వాగతించారు. ఈ నిర్ణయం చారిత్రాత్మకమని ఆయన అభివర్ణించారు. ఆంక్షలు, ఘర్షణలకు బదులుగా చర్చలు, ఇరు దేశాల మధ్య పరస్పర సహకారం అవసరమని తన Xలో ఖాతాలో పేర్కొన్నారు.రష్యా నుంచి చమురు, గ్యాస్ కొనుగోలు చేసే దేశాలపై భారీ సుంకాలు విధించేందుకు వీలు కల్పించే చట్టం అమలుకు ముందు ట్రంప్ కీలక ఆంక్షల నుంచి మినహాయింపునిస్తూ ఈ ఉత్తర్వుపై సంతకం చేశారు.ఇటీవల పుతిన్‌తో కుదిరిన ఒప్పందం ప్రకారం రష్యా భారీ మొత్తంలో డీజిల్‌ను అంతర్జాతీయ మార్కెట్‌కు సరఫరా చేయనుందని ట్రంప్ వెల్లడించారు. అయితే ఈ ఒప్పందం రష్యాకు ప్రయోజనం చేస్తూ, ఉక్రెయిన్‌పై యుద్ధాన్ని కొనసాగించేందుకు సహకరిస్తుందని అమెరికాలోని పలువురు రాజకీయ నేతలు విమర్శిస్తున్నారు.ఇదిలా ఉండగా మరోవైపు ఉక్రెయిన్ అధ్యక్షుడు జెలెన్‌స్కీ వచ్చే ఏడాది తమ దేశానికి దాదాపు 80 బిలియన్ డాలర్ల అదనపు ఆర్థిక సాయం అందించాలని యూరోపియన్ యూనియన్ నేతలను కోరారు.ఇదీ చదవండి: పిల్లలకూ ఇంటర్నెట్ హక్కు.. వయసు ఆధారిత నిషేధానికి 'సుప్రీం' నో

అమెరికా అధ్యక్షుడు డొనాల్డ్‌ ట్రంప్‌ భారత్‌కు భారీ ఊరటనిచ్చారు. రష్యా నుంచి చమురు కొనుగోలు చేస్తున్న దేశాలపై సుంకాలు విధించే చట్టంలోని కీలక నిబంధనల అమలును ప్రస్తుతానికి నిలిపివేశారు. భారత్‌, చైనా సహా రష్యా ఇంధనాన్ని కొనుగోలు చేస్తున్న దేశాలకు ముప్పుగా మారిన ఈ సుంకాల అమలుకు.. సరిగ్గా ఒక రోజు ముందే ట్రంప్‌ ఈ నిర్ణయం తీసుకోవడం గమనార్హం. రష్యా-ఉక్రెయిన్‌ యుద్ధానికి మాస్కోకు అందుతున్న ఆర్థిక వనరులను తగ్గించాలనే లక్ష్యంతో అమెరికా కాంగ్రెస్‌ ‘లిండ్సే ఓ. గ్రాహమ్‌ శాంక్షనింగ్‌ రష్యా అండ్‌ ఇరాన్‌ యాక్ట్‌–2026’ను ఆమోదించింది. సెప్టెంబర్‌ 18న ఈ చట్టంపై ట్రంప్‌ సంతకం చేశారు. రష్యా నుంచి ముడిచమురు, సహజ వాయువును కొనుగోలు చేసే దేశాలపై అదనపు సుంకాలు విధించేందుకు ఈ చట్టం అధ్యక్షుడికి అధికారం కల్పించింది. రష్యా ఇంధనాన్ని అత్యధికంగా దిగుమతి చేసుకునే ఐదు దేశాల నుంచి అమెరికాలోకి వచ్చే వస్తువులపై 100 శాతంలోపు ఎంతైనా సుంకాలు విధించే అవకాశం ఈ చట్టంలో ఉంది. రష్యా నుంచి చమురు, గ్యాస్‌ కొనుగోళ్లను కొనసాగించే దేశాలపై అదనపు ఆర్థిక చర్యలు తీసుకునేందుకు కూడా వీలు కల్పించింది. సంతకం చేసిన నెలలోపే దీనిపై అధ్యక్షుడు ఓ నిర్ణయం ప్రకటించాల్సి ఉంది. దీంతో రష్యా చమురును పెద్దఎత్తున కొనుగోలు చేస్తున్న భారత్‌, చైనా ఈ ముప్పును ఎదుర్కొనే పరిస్థితి ఏర్పడింది. అయితే అమెరికా జాతీయ ప్రయోజనాల దృష్ట్యా ప్రస్తుతానికి ఈ మినహాయింపు ఇస్తున్నట్లు ట్రంప్‌ ప్రకటించారు. జాతీయ ప్రయోజనాల పేరుతో మినహాయింపుఈ చట్టం కింద కొన్ని సుంకాలు, ఆంక్షల అమలును నిలిపివేస్తూ ట్రంప్‌ అక్టోబర్‌ 16న ఎగ్జిక్యూటివ్‌ ఆర్డర్‌ జారీ చేశారు. ఈ మినహాయింపు అమెరికా జాతీయ ప్రయోజనాలకు అవసరమని కాంగ్రెస్‌కు ధ్రువీకరణ సమర్పించినట్లు ఉత్తర్వుల్లో పేర్కొన్నారు. ఆంక్షలు అమలైతే అంతర్జాతీయ ఇంధన మార్కెట్‌పై ప్రభావం పడటంతో పాటు అమెరికాలో పెట్రోల్‌, డీజిల్‌ ధరలపై మరింత ఒత్తిడి పెరిగే అవకాశం ఉందని విశ్లేషకులు భావిస్తున్నారు. ముఖ్యంగా నవంబర్‌లో జరగనున్న మధ్యంతర ఎన్నికలకు ముందు ఇంధన ధరలు పెరగడం ట్రంప్‌ ప్రభుత్వానికి రాజకీయంగా సవాలుగా మారవచ్చు.భారత్‌ ముందునుంచీ ఇదే చెబుతోందిరష్యా చమురు కొనుగోళ్లపై అమెరికా అదనపు సుంకాలు విధించే ప్రతిపాదన తెరపైకి వచ్చినప్పుడే భారత్‌ తన వైఖరిని స్పష్టం చేసింది. 140 కోట్ల మంది ప్రజల ఇంధన భద్రత తమకు అత్యంత ముఖ్యమని, అంతర్జాతీయ మార్కెట్‌ పరిస్థితులకు అనుగుణంగా వివిధ దేశాల నుంచి ఇంధనాన్ని కొనుగోలు చేస్తామని భారత విదేశాంగ శాఖ తెలిపింది. ఈ అంశంపై అమెరికా అధికారులతో ఉన్నతస్థాయిలో చర్చలు జరిపినట్లు కూడా వెల్లడించింది.ఒకవేళ 100 శాతం అదనపు సుంకాలు అమలైతే అమెరికాకు ఎగుమతి చేసే భారతీయ వస్తువులపై తీవ్ర ప్రభావం పడే అవకాశం ఉండేది. అమెరికా భారత్‌కు ప్రధాన ఎగుమతి మార్కెట్‌ కావడంతో వస్త్రాలు, ఇంజినీరింగ్‌ ఉత్పత్తులు, ఇతర వస్తువుల ఎగుమతులపై అదనపు వ్యయభారం పడే ప్రమాదం ఉండేది. సుంకాల పరిధి, అమలు విధానం ఖరారైతేనే వాస్తవ ప్రభావాన్ని పూర్తిగా అంచనా వేయగలిగేవారు. తాజా నిర్ణయంతో ఆ తక్షణ ముప్పు తప్పింది. అయితే, ఇది శాశ్వత ఉపసంహరణ కాదు. భవిష్యత్తులో అవసరమని భావిస్తే ఆంక్షలను మళ్లీ అమలు చేసే అవకాశం అమెరికా అధ్యక్షుడికి ఉంటుంది. పరిస్థితులను బట్టి తదుపరి చర్యలు తీసుకునే అధికారాన్ని అమెరికా ప్రభుత్వం అట్టిపెట్టుకుంది.పుతిన్‌తో ఇంధన ఒప్పందం.. జెలెన్‌స్కీపై విమర్శలుమరోవైపు, రష్యా అధ్యక్షుడు వ్లాదిమిర్‌ పుతిన్‌తో ట్రంప్‌ సంబంధాలు, ఉక్రెయిన్‌ యుద్ధంపై అమెరికా వైఖరి కూడా చర్చనీయాంశంగా మారాయి. రష్యా నుంచి డీజిల్‌ సరఫరాలపై ఒప్పందం కుదిరినట్లు ట్రంప్‌ ఇటీవల ప్రకటించారు. అంతర్జాతీయ మార్కెట్‌లో ఇంధన సరఫరాలను పెంచడం, ధరల ఒత్తిడిని తగ్గించడం ఈ ప్రయత్నం వెనుక లక్ష్యాలుగా చెబుతున్నారు.ఇదే సమయంలో ఉక్రెయిన్‌ అధ్యక్షుడు వ్లాదిమిర్‌ జెలెన్‌స్కీపై ట్రంప్‌ విమర్శలు గుప్పిస్తున్నారు. రష్యాతో యుద్ధాన్ని ముగించే ఒప్పందాన్ని కుదుర్చుకోవడంలో జెలెన్‌స్కీ విఫలమవుతున్నారని వ్యాఖ్యానిస్తూ, ఉక్రెయిన్‌కు కొత్త నాయకుడు అవసరమని కూడా అన్నారు. రష్యాపై ఆర్థిక ఒత్తిడి పెంచేందుకు ఉద్దేశించిన చట్టంలోని సుంకాలను నిలిపివేయడం, మరోవైపు పుతిన్‌తో ఇంధన ఒప్పందంపై ముందుకు సాగడం వంటి పరిణామాలు అమెరికా విదేశాంగ విధానంపై చర్చకు దారితీశాయి.ఇదీ చదవండి: ట్రంప్‌కే ఎందుకిలా అవుతోంది!

అమెరికా అధ్యక్షుడు డొనాల్డ్‌ ట్రంప్‌ వైట్‌హౌస్‌ ప్రెస్‌ సెక్రటరీగా నియమించిన కేటీ జకారియా పదవిలో వారం రోజులు కూడా పూర్తికాకముందే వైదొలగాల్సి వచ్చింది. ఆమెను పదవి నుంచి తొలగించినట్లు వైట్‌హౌస్‌ అధికారికంగా ప్రకటించింది. దీంతో కీలకమైన మధ్యంతర ఎన్నికలకు రెండు వారాల ముందు ట్రంప్‌ తన ప్రభుత్వ వాదనను ప్రజల్లోకి తీసుకెళ్లే ముఖ్య ప్రతినిధిని కోల్పోవడం గమనార్హం.కేటీ జకారియా(Katie Zacharia) ప్రెస్‌ సెక్రటరీ పదవిలో కొనసాగడంపై ట్రంప్‌ శుక్రవారం కీలక వ్యాఖ్యలు చేశారు. ఈ బాధ్యతల్లో కొనసాగాలా? వద్దా? అనే విషయాన్ని మరోసారి ఆలోచించుకోవాలని ఆమెకు సూచించానని ఆయన తెలిపారు. ‘‘నువ్వు సంతోషంగా ఉండటమే మంచిదని చెప్పా. ఈ పనిలో నువ్వు ఎప్పటికీ సంతోషంగా ఉండగలవో లేదో నాకు తెలియదు. ఇదేమీ సులభమైన పని కాదు’’ అని జకారియాతో అన్నట్లు ట్రంప్‌ పేర్కొన్నారు. మరోసారి ఈ విషయంపై మాట్లాడతానని కూడా చెప్పారు. అయితే, ఆ వెంటనే ఆమెను పదవి నుంచి తొలగించినట్లు వైట్‌హౌస్‌ అధికారులు వెల్లడించారు.బాధ్యతలు చేపట్టిన కొద్ది రోజులకే ఆమె న్యాయవిద్యార్హతలపై ప్రశ్నలు, మీడియా సమావేశంలో పనితీరుపై విమర్శలు వెల్లువెత్తడంతో ఈ పరిణామం చోటుచేసుకుంది.కేటీ జకారియా నేపథ్యం41 ఏళ్ల కేటీ జకారియా కాలిఫోర్నియాలో జన్మించారు. పెప్పర్‌డైన్‌ యూనివర్సిటీలో 2007లో పొలిటికల్‌ సైన్స్‌లో డిగ్రీ, 2011లో న్యాయశాస్త్ర పట్టా పొందారు. జార్జ్‌ డబ్ల్యూ. బుష్‌ అధ్యక్షుడిగా ఉన్న సమయంలో వైట్‌హౌస్‌లో ఇంటర్న్‌గా పనిచేశారు. అనంతరం చైనాలోని బీజింగ్‌లో అంతర్జాతీయ లావాదేవీలకు సంబంధించిన న్యాయ సంస్థలో పనిచేశారు. ఫాక్స్‌ న్యూస్‌, న్యూస్‌మాక్స్‌ వంటి సంస్థల్లో రాజకీయ వ్యాఖ్యాతగా, అమెరికా హోంల్యాండ్‌ సెక్యూరిటీ విభాగంలో అధికార ప్రతినిధిగా పనిచేశారు. ఆమెకు నలుగురు పిల్లలు. న్యాయవిద్య.. బార్‌ పరీక్షపై వివాదంకరోలిన్‌ లీవిట్‌ స్థానంలో కేటీ జకారియాను ప్రెస్‌ సెక్రటరీగా ట్రంప్‌ ఇటీవల నియమించుకున్నారు. ఈ నెల 12న బాధ్యతలు చేపట్టి.. మరుసటి రోజే తొలిసారిగా వైట్‌హౌస్‌లో మీడియా సమావేశం నిర్వహించారు. అయితే, ఆమె గతంలో న్యాయవాదిగా పనిచేశారన్న అంశంపై ప్రశ్నలు మొదలయ్యాయి. తాను అంతర్జాతీయ లావాదేవీల చట్టానికి సంబంధించిన న్యాయవృత్తిలో పనిచేశానని, అందుకు అవసరమైన అర్హతలు ఉన్నాయని జకారియా వెల్లడించారు.కానీ, అమెరికాలోని ఏ రాష్ట్రంలోనూ లేదంటే కొలంబియా జిల్లాలోనూ ఆమె న్యాయవాదిగా నమోదైనట్లు ఆధారాలు లభించలేదని అంతర్జాతీయ మీడియా సంస్థల కథనాలు పేర్కొన్నాయి. పెప్పర్‌డైన్‌ యూనివర్సిటీలో న్యాయవిద్య అభ్యసించిన జకారియా.. గురువారం ఫాక్స్‌ న్యూస్‌కు ఇచ్చిన ఇంటర్వ్యూలో తాను బార్‌ పరీక్షలో ఉత్తీర్ణత సాధించలేదని అంగీకరించారు. అమెరికాలో న్యాయవాదిగా పనిచేయాలంటే సంబంధిత రాష్ట్ర బార్‌లో ప్రవేశం పొందడం తప్పనిసరి. ఈ వ్యవహారం ఆమెపై విమర్శలకు మరింత ఆజ్యం పోసింది.మీడియా కవరేజీపై ట్రంప్‌ అసంతృప్తితన ప్రభుత్వ పనితీరుపై మీడియా కవరేజీ విషయంలో ట్రంప్‌ అసంతృప్తిగా ఉన్నారు. ప్రభుత్వ విజయాలను ప్రజల్లోకి మరింత సమర్థంగా తీసుకెళ్లే ప్రతినిధి కావాలని భావించారు. అందుకే జకారియాను ఎంపిక చేశారు. అయితే, ఆమె నియామకం తర్వాత తొలి రోజుల్లోనే వివాదాలు చుట్టుముట్టడంతో పరిస్థితి మారిపోయింది.ప్రస్తుతం కొత్త ప్రెస్‌ సెక్రటరీ నియామకంపై తొందరపడటం లేదని ట్రంప్‌.. ఫాక్స్‌ న్యూస్‌తో ఫోన్‌లో మాట్లాడుతూ చెప్పారు. జకారియా వైదొలగడం వైట్‌హౌస్‌ చరిత్రలో అత్యంత స్వల్పకాలం ప్రెస్‌ సెక్రటరీగా పనిచేసిన ఉదంతంగా నిలిచే అవకాశం ఉందని వార్తా కథనాలు పేర్కొన్నాయి. ట్రంప్‌ తొలి పాలనలో కేవలం పది రోజుల పాటు కమ్యూనికేషన్స్‌ డైరెక్టర్‌గా పనిచేసిన ఆంథోనీ స్కారముచీ ఈ పరిణామంపై స్పందిస్తూ.. రికార్డులు బద్దలవుతుంటాయని, అయితే ఇతరుల బాధలో తాను ఆనందించనని సోషల్‌ మీడియాలో పేర్కొన్నారు.ఇదీ చదవండి: ట్రంప్‌ కోడలిగా ఛాన్స్‌ మిస్‌.. ఎవరీమె?

వాషింగ్టన్‌: అమెరికాలోని ట్రంప్‌ ప్రభుత్వం వలస నిబంధనలను మరింత కఠినం చేసింది. హెచ్‌–1బీ వీసాదారుల జీవిత భాగస్వాములతో సహా వర్క్‌ పర్మిట్‌ల (ఉద్యోగ అనుమతులు) ఆటోమేటిక్‌ పొడిగింపును మంజూరు చేసే విధానాన్ని తాజాగా రద్దు చేసింది. వర్క్‌ ఆథరై జేషన్‌ డాక్యుమెంట్ల (ఈఏడీ) పొడిగింపు దరఖా స్తులు పెండింగ్‌లో ఉన్న సమయంలో ఈ ఆటోమేటిక్‌ పొడిగింపు లభించేది. ఈ నిర్ణయం భారతీయులతో సహా అనేక మంది విదేశీ నిపుణులపై ప్రభావం చూపే అవకాశం ఉంది. ఇందుకు సంబంధించిన మధ్యంతర ఉత్తర్వును గతేడాది అక్టోబర్‌ 30వ తేదీన విడుదలచేయగా, యూఎస్‌ సిటిజన్‌షిప్‌ అండ్‌ ఇమిగ్రేషన్‌ సర్వీసెస్‌(యూఎస్‌సీఐఎస్‌) బుధవారం తుది నిబంధనను ఖరారు చేసింది. యూఎస్‌సీ ఐఎస్‌లో ప్రాసెసింగ్‌ ఆలస్యాన్ని నివారించడానికి, రెన్యూవల్‌ దరఖాస్తుల సంఖ్యను తగ్గించడానికి అధ్యక్షుడు బైడెన్‌ హయాంలో 2022 మేలో ఈఏడీ పర్మిట్ల కోసం 540 రోజుల ఆటోమేటిక్‌ పొడిగింపును ప్రవేశపెట్టారు.

వాషింగ్టన్‌: ఇరాన్‌లోని ఇంధన మౌలికవనరులు, అణు కేంద్రాలే లక్ష్యంగా అతి భారీ దాడులకు అమెరికా మిలటరీ సన్నాహాలు చేస్తోంది. అమెరికా పొదిలో ఉన్న మదర్‌ ఆఫ్‌ ఆల్‌ బాంబ్స్‌ అని పిలుచుకునే అతిపెద్ద నాన్‌–న్యూక్లియర్‌ బాంబును వేసేందుకు అధ్యక్షుడు డొనాల్డ్‌ ట్రంప్‌ ఇటీవలే అనుమతి కూడా ఇచ్చినట్లు మీడియా కథనాలు వెలువడుతున్నాయి. యుద్ధం ఎటూ తేలకపోవడం, హార్మూజ్‌ను ఇరాన్‌ దిగ్బంధించడం, చమురు ధరలకు భారీగా రెక్కలు రావడం వంటి పరిణామాలు అధ్యక్షుడు ట్రంప్‌నకు కొరుకుడు పడని నేపథ్యంలో ఈ వార్తలు రావడం గమనార్హం. మధ్యంతర ఎన్నికలు నవంబర్‌ 3వ తేదీన ముగిశాక, ఈ బాంబును పిక్‌యాక్స్‌ పర్వతం అడుగున ఇరాన్‌ అత్యంత పకడ్బందీగా ఏర్పాటు చేసుకున్న అణుకేంద్రంపైనా దాడులు చేస్తామని ట్రంప్‌ గురువారం ఓ ఇంటర్వ్యూలో వెల్లడించడం గమనార్హం. దాడులకు అతిపెద్ద బాంబును వాడుతామని చెప్పిన ఆయన..అణుబాంబును ప్రయోగించే అవకాశమే లేదని స్పష్టం చేశారు. అయితే, అమెరికా–ఇరాన్‌ల మధ్య 8 నెలలుగా కొనసాగుతున్న ఉద్రిక్తతలు భారీ బంబు సీబీయూ–43/బీ మాసివ్‌ ఆర్డినెన్స్‌ ఎయిర్‌ బ్లాస్ట్‌ బాంబ్‌(ఎంఓఏబీ)ని ప్రయోగించడం వల్ల మరింత ముదిరే ప్రమాదముందన్న ఆందోళనలు వ్యక్తమవుతున్నాయి. కాగా, ఎంవోఏబీ బరువు సుమారు 9.8 టన్నులు. మొదటిసారిగా దీనిని 2017లో అఫ్గానిస్తాన్‌లోని ఐఎస్‌ సొరంగంపై వేశారు. అయితే, ఇరాన్‌ అణుకేంద్రంపై బీవోఎంబీ ప్రయోగం ఆశించిన ఫలితాలను ఇచ్చే అవకాశాలు లేవని నిపుణులు చెబుతున్నారు.

బ్రస్సెల్స్‌: ప్రస్తుతం ట్రంప్, జెలెన్‌స్కీ మధ్య సంబంధాలు ఏమాత్రం మెరుగ్గా లేవు. ఇటీవల రష్యాతో అమెరికా డీజిల్‌ కొనుగోలు ఒప్పందం చేసుకోవడంతో అగ్రరాజ్యంపై ఉక్రెయిన్‌ అధ్యక్షుడు గుర్రుగా ఉన్నారు. ఈ పరిణామాల నడుమ బ్రస్సెల్స్‌లో జెలెన్‌స్కీని ఓ జర్నలిస్టు అడిగిన ప్రశ్న ఇప్పుడు ఆసక్తికరంగా మారింది.బ్రస్సెల్స్‌లో యూరోపియన్ యూనియన్ నేతలతో సమావేశమైన అనంతరం నిర్వహించిన విలేకరుల సమావేశంలో పాల్గొన్నారు. ఈసందర్భంగా ఓ జర్నలిస్టు ప్రశ్నిస్తూ" అమెరికాలో నెలకొన్న రాజకీయ సమస్యల నుంచి ప్రజల దృష్టిని మళ్లించేందుకు ట్రంప్ తనను లక్ష్యంగా చేసుకుంటున్నారా? అని అడిగారు. దీనికి జెలెన్‌స్కీ చిరునవ్వు నవ్వుతూ మౌనంగా ఉండిపోయారు. అనంతరం “ఇదే నా సమాధానం” అని చెప్పారు." దీంతో అక్కడున్న విలేకరులు నవ్వుకున్నారు.కాగా .. ప్రస్తుతం ఉక్రెయిన్‌పై రష్యా దాడులు కొనసాగుతున్నాయని జెలెన్‌స్కీ పేర్కొన్నారు. ఒక్క రోజులోనే ఉక్రెయిన్‌పై వెయ్యి డ్రోన్లతో దాడులు జరిగాయని పేర్కొంటూ, ఇలాంటి పరిస్థితుల్లో జెలెన్‌స్కీతో మాట్లాడటం కష్టమని అమెరికా వైపు నుంచి వ్యాఖ్యలు రావడంపై ఆయన పరోక్షంగా అసంతృప్తి వ్యక్తం చేశారు. అయితే ట్రంప్ తనను రాజకీయంగా బలిపశువును చేస్తున్నారా? అన్న ప్రశ్నకు మాత్రం నేరుగా సమాధానం ఇవ్వకుండా చిరునవ్వుతో స్పందించడం సమావేశంలో ప్రత్యేక ఆకర్షణగా నిలిచింది.ఎందుకు ఈ వివాదం?వచ్చే నెలలో అమెరికాలో మధ్యంతర ఎన్నికలు జరగనున్న నేపథ్యంలో ట్రంప్ రాజకీయ ఒత్తిడిని ఎదుర్కొంటున్నారని, మరోవైపు ఇరాన్ అంశం, డీజిల్ ధరల పెరుగుదల వంటి సమస్యలు ఆయనకు సవాలుగా మారాయి. ఈ పరిస్థితుల్లో తనపై విమర్శలు చేయడం ద్వారా ట్రంప్ రాజకీయంగా ఎదురవుతున్న ఇబ్బందుల నుంచి దృష్టి మళ్లిస్తున్నారు. అని అంతర్జాతీయ విశ్లేషకులు భావిస్తున్నారు.జెలెన్‌స్కీపై ట్రంప్‌ వివాదస్పద వ్యాఖ్యలురష్యాతో యుద్ధం ముగించేందుకు జెలెన్‌స్కీ ఇష్టం చూపించడం లేదని బహుశా ఉక్రెయిన్‌కు కొత్త అధ్యక్షుడు రావాలేమోనన్నారు. అంతేకాకుండా రష్యా అధ్యక్షుడు పుతిన్‌తో వ్యవహరించడం కంటే జెలెన్‌స్కీతో చర్చలు జరపడమే చాలా కష్టమని వ్యాఖ్యానించారు. ఈ వివాదాల నేపథ్యంలో ఇప్పుడు జర్నలిస్టు వేసిన ప్రశ్న అందరినీ ఆలోచింపజేసింది.ఇదీ చదవండి: సైనికచర్యలు శాంతిని ఇవ్వలేవు

అమెరికాలో సంచలనం రేపిన లైవ్‌ మరణశిక్ష ప్రతిపాదనపై అధ్యక్షుడు డొనాల్డ్‌ ట్రంప్‌ వెనక్కి తగ్గారు. ఫోర్ట్‌ హుడ్‌ నరమేధం కేసులో దోషిగా తేలిన మాజీ ఆర్మీ మేజర్‌ నిడాల్‌ హసన్‌కు విధించిన మరణశిక్షను ప్రపంచమంతా చూసేలా లైవ్‌స్ట్రీమింగ్‌ చేయాలని రక్షణ మంత్రి పీట్‌ హెగ్‌సెత్‌ ప్రతిపాదించారు. అయితే ఈ నిర్ణయంపై సొంత రిపబ్లికన్‌ పార్టీ నేతలు, మత పెద్దలు, ప్రజల నుంచి తీవ్ర వ్యతిరేకత వ్యక్తమైంది. దీంతో లైవ్‌ ప్రసార ప్రతిపాదనను రద్దు చేస్తున్నట్లు ట్రంప్‌ ప్రకటించారు.అమెరికాలో మరణశిక్షను ప్రపంచమంతా ప్రత్యక్షంగా చూసేలా ప్రసారం చేయాలన్న ప్రతిపాదనకు బ్రేక్‌ పడింది. 2009లో ఫోర్ట్‌ హుడ్‌ సైనిక స్థావరంలో 13 మందిని కాల్చి చంపిన మాజీ ఆర్మీ మేజర్‌ నిడాల్‌ మాలిక్‌ హసన్‌కు డిసెంబర్‌ 3న ఫైరింగ్‌ స్క్వాడ్‌ ద్వారా మరణశిక్ష అమలు చేయాలని నిర్ణయించారు. ఈ ప్రక్రియను లైవ్‌స్ట్రీమింగ్‌ చేయాలని రక్షణ మంత్రి పీట్‌ హెగ్‌సెత్‌ ప్రకటించడంతో అమెరికాలో రాజకీయ, నైతిక వివాదం మొదలైంది. సొంత రిపబ్లికన్‌ పార్టీ నేతల నుంచి కూడా వ్యతిరేకత వ్యక్తమవడంతో ట్రంప్‌ తన నిర్ణయాన్ని మార్చుకున్నారు. అయితే హసన్‌కు మరణశిక్ష మాత్రం నిర్ణీత షెడ్యూల్‌ ప్రకారమే అమలవుతుందని స్పష్టం చేశారు.ప్రపంచానికి చూపిస్తే..నేరాలకు పాల్పడేవారికి ఎదురయ్యే పరిణామాలను ప్రపంచం చూడాలని, అలాంటి ప్రసారం ఇతరులకు హెచ్చరికగా నిలుస్తుందని హెగ్‌సెత్‌ వాదించారు. ఉగ్రవాదులుగా భావించే వ్యక్తులపై అమెరికా ఎలాంటి చర్యలు తీసుకుంటుందో అందరికీ తెలియాలన్నది ఈ ప్రతిపాదన వెనుక ఉద్దేశంగా ఆయన పేర్కొన్నారు. అయితే మరణశిక్షను ప్రత్యక్ష ప్రసారం చేయడం ద్వారా నేరాలను అరికట్టగలమా? ఒక వ్యక్తి ప్రాణాలు తీసే ప్రక్రియను ప్రపంచానికి చూపించడం అవసరమా? అనే ప్రశ్నలు తెరపైకి వచ్చాయి.ఈ ప్రతిపాదనపై ఉపాధ్యక్షుడు జేడీ వాన్స్‌ సహా పలువురు రిపబ్లికన్‌ నేతలు అభ్యంతరాలు వ్యక్తం చేశారు. మత పెద్దలు కూడా వ్యతిరేకించారు. అమెరికన్లలో మెజారిటీ ఈ ప్రత్యక్ష ప్రసారాన్ని వ్యతిరేకిస్తున్నట్లు ఒపీనియన్‌ పోల్స్‌ సూచించాయి. దీంతో ఈ ప్రతిపాదనకు రాజకీయంగా, సామాజికంగా మద్దతు తగ్గింది.ట్రంప్‌ ఏమన్నారంటే..లైవ్‌ ప్రసారం వల్ల నేరాలకు భయపడేలా చేయవచ్చని తాను భావించినప్పటికీ, మంచి ఉద్దేశంతో ఆలోచించే చాలామంది మరణశిక్షను కళ్లారా చూడటానికి ఇష్టపడటం లేదని ట్రంప్‌ తన సోషల్‌ మీడియా వేదిక ‘ట్రూత్‌ సోషల్‌’లో పేర్కొన్నారు. అందుకే ఈ కార్యక్రమాన్ని ప్రత్యక్ష ప్రసారం చేయబోమని స్పష్టం చేశారు. అయితే బాధితుల కుటుంబాలకు మాత్రం ఇష్టమైతే మరణశిక్షను ప్రత్యక్షంగా చూసే అవకాశం ఉంటుందని తెలిపారు. బాధిత కుటుంబాలు న్యాయం జరగడాన్ని స్వయంగా చూడటానికి అర్హులని వ్యాఖ్యానించారు. అంటే, ప్రజలందరికీ ప్రసారం చేసే ప్రతిపాదనను రద్దు చేసినప్పటికీ, బాధితుల కుటుంబాల సమక్షంలో శిక్ష అమలు చేసే అవకాశాన్ని కొనసాగిస్తున్నారు.Trump Cancels Livestream of Fort Hood Attacker U.S. President Donald #Trump has cancelled plans to livestream the execution of Fort Hood attacker Nidal Hasan by firing squad following widespread global criticism. #Trump stated that many well-meaning individuals preferred not to watch the event, despite previously defending it as a deterrent.— Daily Euro Times (@dailyeurotimes) October 16, 2026హెగ్‌సెత్‌తో విభేదాలా?ట్రంప్‌ నిర్ణయం రక్షణ మంత్రి హెగ్‌సెత్‌కు ఎదురుదెబ్బగా కనిపిస్తోంది. ఎందుకంటే ఈ ప్రతిపాదనను ముందుకు తెచ్చింది ఆయనే. ట్రంప్‌ కూడా గతంలో లైవ్‌ ప్రసారానికి మద్దతు తెలిపినట్లు వార్తలు వచ్చాయి. ఇప్పుడు మాత్రం వెనక్కి తగ్గారు. అధ్యక్షుడు, రక్షణ మంత్రి మధ్య బహిరంగంగా అభిప్రాయ భేదం కనిపించడం అరుదైన పరిణామంగా విశ్లేషణలు వెలువడ్డాయి.అయితే ఇద్దరి మధ్య విభేదాలు ఉన్నాయన్న ప్రచారాన్ని పెంటగాన్‌ తోసిపుచ్చింది. ట్రంప్‌ నిర్ణయంపై హెగ్‌సెత్‌ మద్దతు తెలిపారని, ఇద్దరూ ఒకే అభిప్రాయంతో ఉన్నారని పెంటగాన్‌ ప్రతినిధి సీన్‌ పార్నెల్‌ వెల్లడించారు. ఈ ప్రకటనతో వివాదాన్ని తగ్గించే ప్రయత్నం చేసినప్పటికీ, లైవ్‌ ప్రసార ప్రతిపాదన వెనక్కి తీసుకోవడం మాత్రం స్పష్టమైన పరిణామంఆనాడు ఏం జరిగిందంటే..నిడాల్‌ హసన్‌ అమెరికా సైన్యంలో మానసిక వైద్యుడిగా పనిచేశారు. 2009 నవంబర్‌ 5న టెక్సాస్‌లోని ఫోర్ట్‌ హుడ్‌ సైనిక స్థావరంలోని వైద్య కేంద్రంలో కాల్పులు జరిపారు. ఈ ఘటనలో 13 మంది మరణించగా, మరో 32 మంది గాయపడ్డారు. కాల్పుల సమయంలో పోలీసులు జరిపిన కాల్పుల్లో హసన్‌ గాయపడి నడుము కింది భాగం పక్షవాతానికి గురైంది. అప్పటి నుంచి వీల్‌చైర్‌కే పరిమితమయ్యారు.ఈ కేసులో 2013లో సైనిక న్యాయస్థానం హసన్‌ను దోషిగా తేల్చింది. ముందస్తు ప్రణాళికతో హత్యలకు పాల్పడినందుకు మరణశిక్ష విధించింది. ఇప్పుడు ఆ శిక్షను ఫైరింగ్‌ స్క్వాడ్‌ ద్వారా అమలు చేయాలని నిర్ణయించారు. డిసెంబర్‌ 3న శిక్ష అమలుకు సంబంధించిన న్యాయపరమైన సవాళ్లు ఎదురయ్యే అవకాశం లేకపోలేదు.మరణశిక్షపై మరోసారి చర్చఅమెరికాలో మరణశిక్ష అమలుపై ఇప్పటికే చర్చ జరుగుతోంది. ఇటీవల టెన్నెసీలో క్రిస్టా పైక్‌కు ప్రాణాంతక ఇంజెక్షన్‌ ద్వారా మరణశిక్ష అమలు చేసే ప్రయత్నం విఫలమైందన్న వార్తలు కూడా ఈ అంశంపై దృష్టిని పెంచాయి. ఇలాంటి పరిస్థితుల్లో మరణశిక్షను లైవ్‌ ప్రసారం చేయాలన్న ప్రతిపాదన మరింత వివాదాస్పదంగా మారింది.మొత్తానికి, హసన్‌కు మరణశిక్ష విధించడం కొత్త పరిణామం కాదు. కానీ ఆ శిక్షను ప్రపంచమంతా చూసేలా ప్రసారం చేయాలన్న ఆలోచనే అమెరికాలో పెద్ద చర్చకు దారితీసింది. రాజకీయ నాయకులు, మత పెద్దలు, ప్రజల నుంచి వచ్చిన వ్యతిరేకత నేపథ్యంలో ట్రంప్‌ ఆ ప్రతిపాదనను వెనక్కి తీసుకున్నారు. లైవ్‌ మరణశిక్షతో కఠిన సందేశం ఇవ్వాలన్న ప్రయత్నం చివరకు వివాదంతో ఆగిపోయింది. ఇదీ చదవండి: ఆలయంపై దాడి కుట్ర భగ్నం.. సంచలన విషయాలు వెలుగులోకి

వాషింగ్టన్: ఇరాన్‌తో యుద్ధాన్ని అమెరికా మళ్లీ ప్రారంభిస్తే.. ఆ దేశంలోని అణు కేంద్రాలు, ఇంధన మౌలిక సదుపాయాలపై భారీ దాడులు చేసే అవకాశాలను అమెరికా సైన్యం పరిశీలిస్తున్నట్లు సమాచారం. ఇందులో ‘మదర్ ఆఫ్ ఆల్ బాంబ్స్’ (MOAB)గా పిలిచే అత్యంత శక్తిమంతమైన బాంబును ఉపయోగించే ప్రణాళిక కూడా ఉన్నట్లు ప్రముఖ అంతర్జాతీయ మీడియా సంస్థ సీఎన్‌ఎన్‌ వెల్లడించింది. ఈ వివరాలను అమెరికా అధికారులను ఉటంకిస్తూ రాయిటర్స్‌ పేర్కొంది. అయితే ఈ నివేదికను రాయిటర్స్‌ స్వతంత్రంగా ధ్రువీకరించలేకపోయింది.ఇరాన్ అణు కేంద్రాలే లక్ష్యంగా?అమెరికా అధ్యక్షుడు డొనాల్డ్ ట్రంప్ ఆదేశిస్తే.. ఇరాన్‌లోని ఇంధన కేంద్రాలు, పిక్‌యాక్స్‌ మౌంటైన్‌ వంటి అణు కేంద్రాలపై దాడులు చేసే అవకాశాలను సైన్యం ఇప్పటికే సిద్ధం చేసినట్లు సమాచారం. అయితే ప్రస్తుతానికి ఈ దాడులు ఎప్పుడు జరుగుతాయనే దానిపై ఇంకా స్పష్టత లేదు. అమెరికా మధ్యంతర ఎన్నికలకు ముందు కానీ.. లేదంటే ఎన్నికల తర్వాత ఈ సైనిక చర్యలను పునఃప్రారంభించే అవకాశాలను పరిశీలిస్తున్నట్లు సదరు కథనం పేర్కొంది.భూగర్భ కేంద్రాలపై ఎంతవరకు ప్రభావం?MOAB బరువు సుమారు 9,800 కిలోలు. ఇది అణ్వాయుధం కాదు కానీ, భారీ పేలుడు సృష్టించగలదు. అయితే గ్రానైట్‌ పొరలతో రక్షణ కల్పించిన భూగర్భ అణు కేంద్రాలను ధ్వంసం చేయడంలో ఈ బాంబు ఎంతవరకు ప్రభావవంతంగా పనిచేస్తుందనే సందేహాలు అమెరికా అధికారుల్లో ఉన్నట్లు తెలుస్తోంది. దీని భారీ పేలుడు పరిధి కారణంగా జరిగే ప్రాణనష్టంపై కూడా ఆందోళనలు వ్యక్తమవుతున్నాయి.యుద్ధం నుంచి బయటపడేందుకు, తమకు విజయం లభించినట్లు చూపించేందుకు ట్రంప్‌ ప్రభుత్వం వివిధ సైనిక ప్రత్యామ్నాయాలను పరిశీలిస్తున్నట్లు సీఎన్‌ఎన్‌ నివేదించింది. అయితే, ఇరాన్‌పై కొత్త దాడులకు సంబంధించి తుది నిర్ణయం తీసుకున్నట్లు ఇప్పటివరకు ఎలాంటి అధికారిక ప్రకటన వెలువడలేదు.ఇదీ చదవండి: భారత్, చైనాపై సుంకాల ముప్పు.. 10 రోజుల్లో ట్రంప్ కీలక నిర్ణయం!

సాక్షి,న్యూఢిల్లీ: రష్యా నుంచి చమురు, గ్యాస్ కొనుగోలు చేసే భారత్, చైనా సహా ఇతర దేశాలపై ఆంక్షలు విధించే అంశంపై అమెరికా అధ్యక్షుడు డొనాల్డ్ ట్రంప్ మరో 10 రోజుల్లో కీలక నిర్ణయం తీసుకునే అవకాశం ఉందని భారత్‌లో అమెరికా రాయబారి సెర్గియో గోర్ వెల్లడించారు. ఈ చర్యల ద్వారా రష్యా-ఉక్రెయిన్ యుద్ధానికి ముగింపు పలకడమే ట్రంప్ లక్ష్యమని తెలిపారు.బ్లూమ్‌బెర్గ్ న్యూ ఎకానమీ ఫోరమ్‌లో మాట్లాడిన గోర్.. రష్యా నుంచి ఇంధనం కొనుగోలు చేసే దేశాలపై జరిమానాలు, ఆంక్షలు విధించే అధికారం ట్రంప్‌కు కల్పించే బిల్లుకు అమెరికా సెనేట్‌లో 86 మంది సభ్యులు మద్దతు తెలిపినట్లు పేర్కొన్నారు. అయితే ఈ చర్యలు ఏ ఒక్క దేశాన్ని లక్ష్యంగా చేసుకుని తీసుకుంటున్నవి కావని ఆయన స్పష్టం చేశారు. భారత్‌కు మినహాయింపు ఇస్తారా?.. లేదా?.. అన్నది ట్రంప్ తీసుకునే నిర్ణయంపై ఆధారపడి ఉంటుందని తెలిపారు.భారత్-అమెరికా వాణిజ్య ఒప్పందంపై ఆశాభావంభారత్, అమెరికా మధ్య వాణిజ్య ఒప్పంద చర్చలు పురోగతిలో ఉన్నాయని సెర్గియో గోర్ వెల్లడించారు. ఇప్పటికే పలు కీలక అంశాలపై అవగాహన కుదిరిందని, మిగిలిన చిన్నచిన్న సమస్యలను పరిష్కరించాల్సి ఉందని చెప్పారు. రక్షణ, ఐటీ, డేటా సెంటర్లు, సెమీకండక్టర్లు, కృత్రిమ మేధ (AI) వంటి రంగాల్లో ఇరు దేశాల మధ్య సహకారాన్ని మరింత పెంచుకోవాలని అమెరికా భావిస్తోందని తెలిపారు. భారత్‌లో అమెరికా కంపెనీల పెట్టుబడులు పెరగడం ద్వారా ఇరు దేశాలకు ప్రయోజనం చేకూరుతుందని గోర్ పేర్కొన్నారు.ఇదీ చదవండి: కోర్టు ఆదేశం.. అమెరికాలో గ్రీన్ కార్డ్ లాటరీకి గ్రీన్ సిగ్నల్

వాషింగ్టన్: అమెరికా డైవర్సిటీ వీసా (DV-2027) లాటరీ రిజిస్ట్రేషన్‌ను తిరిగి ప్రారంభించాలని డొనాల్డ్‌ ట్రంప్ ప్రభుత్వాన్ని ఫెడరల్ కోర్టు ఆదేశించింది. నిర్ణీత సమయంలో రిజిస్ట్రేషన్ ప్రక్రియను ప్రారంభించకపోవడంపై దాఖలైన పిటిషన్‌ను విచారించిన కాలిఫోర్నియా ఫెడరల్ న్యాయమూర్తి జిన్‌సూక్ ఓహ్తా అక్టోబర్ 14న కీలక ఉత్తర్వులు జారీ చేశారు.విదేశాంగ శాఖ 30 రోజుల పాటు ఆన్‌లైన్ దరఖాస్తుల స్వీకరణకు అవకాశం కల్పించాలని, రిజిస్ట్రేషన్ తేదీలు, వెబ్‌సైట్ వివరాలు ప్రకటించాలని ఆదేశించారు. ఎంపికైన అభ్యర్థుల కేసులను కూడా నిబంధనల ప్రకారం పరిశీలించాలని సూచించారు.ఎందుకు ఆలస్యమైంది?DV-2027 దరఖాస్తు ప్రక్రియలో మార్పులు చేస్తున్నట్లు అమెరికా విదేశాంగ శాఖ 2025 నవంబర్‌లో ప్రకటించింది. కానీ ఆ తర్వాత రిజిస్ట్రేషన్ తేదీలను మాత్రం వెల్లడించలేదు. దీంతో ఇమ్మిగ్రేషన్ న్యాయ సంస్థ రెడ్ ఈగిల్ లా కోర్టును ఆశ్రయించింది.ఈ లాటరీ ద్వారా అర్హులైన ఇతర దేశాల పౌరులకు ఏటా గరిష్ఠంగా 55 వేల వలస వీసాలు అందించే అవకాశం ఉంటుంది. కానీ లాటరీలో ఎంపికైనంత మాత్రాన గ్రీన్ కార్డ్ ఖరారైనట్లు కాదు. విద్యార్హత, వృత్తి అనుభవ అర్హతలతో పాటు ఇతర నిబంధనలను కూడా పూర్తి చేయాలి.వీసాల జారీపై ఇంకా సందిగ్ధతDV-2027 వీసా సంవత్సరం 2026 అక్టోబర్ 1 నుంచి 2027 సెప్టెంబర్ 30 వరకు కొనసాగుతుంది. ఆలస్యంగా రిజిస్ట్రేషన్ ప్రారంభం కావడంతో ఎంపిక, ఇంటర్వ్యూలు, వీసా ప్రక్రియకు సమయం తగ్గే అవకాశం ఉంది. అయితే మరోవైపు భద్రతా తనిఖీల సమీక్ష నేపథ్యంలో డైవర్సిటీ వీసాల జారీని నిలిపివేసినట్లు అమెరికా విదేశాంగ శాఖ గతంలో తెలిపింది. కాబట్టి రిజిస్ట్రేషన్‌ను తిరిగి ప్రారంభించాలన్న కోర్టు ఆదేశం వచ్చినప్పటికీ, వీసాల జారీ పునరుద్ధరించినట్లు భావించరాదు. దరఖాస్తుదారులు రిజిస్ట్రేషన్ తేదీలు, మార్గదర్శకాల కోసం అమెరికా విదేశాంగ శాఖ అధికారిక వెబ్‌సైట్‌ను పరిశీలించాలని సూచించారు.ఇదీ చదవండి: అమెరికా కంపెనీలపై రష్యా దాడులు.. కోకాకోలా ప్లాంట్ ధ్వంసం

‘పర్మినెంట్‌ లేబర్‌ సర్టిఫికేషన్‌’ కార్య క్రమం కింద విదేశీ ఉద్యోగులకు జారీ చేసే వీసాలను ట్రంప్‌ ప్రభుత్వం ఇటీవల స్తంభింపజేసింది. ఆ నిర్ణయం ప్రసిద్ధ అమెరికన్‌ టెక్నాలజీ సంస్థలపైనే కాక, అగ్రశ్రేణి భారతీయ ఔట్‌ సోర్సింగ్‌ కంపెనీలపైన కూడా ప్రభావం చూపనుంది. అమెరికన్‌ల స్థానంలో విదేశీయులను తె చ్చుకునేందుకు ఈ ఉపాధి ఆధారిత కార్మిక పథకాలను (ఎంప్లాయ్‌మెంట్‌ బేస్డ్‌ లేబర్‌ ప్రోగ్రామ్స్‌) సాంకేతిక పరిశ్రమ దుర్వినియోగ పరుస్తోందనే కారణంపై అటువంటి నిర్ణయం తీసుకున్నట్లు అమెరికన్‌ ప్రభుత్వం సమర్థించుకుంది. అమెరికా ఇటువంటి స్వీయ సంరక్షణ చర్యలకు దిగడం ఇదే మొదటిసారేమీ కాదు. అమెరికా అధ్యక్ష పదవిని అలంకరిస్తున్న వారు దేశీయ రాజకీయ ప్రయోజనాల నిమిత్తం హెచ్‌–1బి వీసా లను ఒక తాయిలంలా వాడుకుంటూనే ఉన్నారు. విదేశాలలోని వారికి ఉపాధి కల్పిస్తున్న కంపెనీలకు ఇస్తున్న పన్ను విరామాలకు స్వస్తి పలుకుతున్నట్లు 2008లో అప్పటి అధ్యక్షుడు ఒబామా ప్రకటించారు. తర్వాత, జో బైడెన్‌ కూడా అదే పంథా అనుసరించారు. చవుక వనరులే అమెరికా చోదక శక్తితక్కువ వేతనాలకు లభించే సిబ్బంది సదుపాయాన్ని అమె రికన్‌ సాంకేతిక కంపెనీలు ఏనాటి నుంచో వినియోగించుకుంటు న్నాయి. సెమీకండక్టర్ల తయారీకి 1960లలో అవి ఆ వెసులుబా టును ఉపయోగించుకున్నాయి. అప్పట్లో ఆ పరిశ్రమకు పెద్ద సంఖ్య లో సిబ్బంది అవసరమయ్యేవారు. తర్వాత, సాఫ్ట్‌వేర్‌ సర్వీ సులు, ప్రోగ్రామింగ్‌లలోను అవి ఆ ప్రత్యేక ప్రయోజనాన్ని వదులు కోలేదు. ‘ఫెయిర్‌ చైల్డ్‌ సెమీకండక్టర్‌’ సంస్థ అధ్యక్షుడు రాబర్ట్‌ నాయస్, ఉత్పత్తి సదుపాయాలు నెలకొల్పేందుకు 1960 లలో భారత్, దాని చుట్టుపక్కల దేశాలను సందర్శించారు.భారత్‌ అనుమతించకపోవటంతో హాంగ్‌కాంగ్‌లో వాటిని నెలకొల్పు కున్నారు. మరికొద్ది ఏళ్ల తర్వాత ఆయన ‘ఇంటెల్‌’ను స్థాపించారు. ఎలక్ట్రానిక్స్, ఐసీ (ఇంటెగ్రేటెడ్‌ సర్క్యూ ట్స్‌) తయారీకి ఇతర అమెరికన్‌ కంపెనీలు సింగపూర్, మలేసియా, తైవాన్‌లను ఎంచు కున్నాయి. తదనంతర రెండు దశాబ్దాల్లో ఆయా దేశాలు సాంకేతిక వస్తూత్పత్తి కేంద్రాలుగా అవతరించాయి. సెమీకండక్టర్‌ డిజైన్, అమెరికన్‌ క్లయింట్లకు సాఫ్ట్‌వేర్‌ సర్వీసులు, ప్రోగ్రామింగ్‌తో భారత్‌ 1970లు, 1980లలో ఆ స్థాయిని అందుకునే ప్రయత్నం చేసింది. అమెరికన్‌ సాంకేతిక పరిశ్రమతో భారత్‌ ఒడంబడికలు వివిధ పునరావృతులకు లోనయ్యాయి. మార్కెట్‌ అవసరాలకు తగ్గట్లుగా అవి పరిణామం చెందుతూ వచ్చాయి. అమెరికన్‌ సంస్థల స్వల్పకాలిక లేదా మధ్యకాలిక అవసరాల నిమిత్తం భారతీయ సంస్థలు తమ ఇంజనీర్లను అమెరికాకు పంపించడంతో ఇది చిన్నగా మొదలైంది. అమెరికాలో పని పూర్తికాగానే వారు స్వదేశానికి తిరిగి వచ్చేసేవారు. తదుపరి దశలో, అది ‘ఆన్‌సైట్‌’ మోడల్‌గా మారింది. అంటే, భారతీయ కంపెనీలు పంపిన ఉద్యోగులు అమెరికన్‌ కంపెనీల సిబ్బందిలో భాగమవుతారు. దీర్ఘకాలిక ప్రాజెక్టుల్లో పాలుపంచుకుంటారు. భారతీయ సంస్థలు అమెరికన్‌ క్లయింట్ల విశ్వాసాన్ని చూర గొని, కమ్యూనికేషన్‌ మౌలిక సదుపాయాలు మెరుగుపడ్డ తర్వాత, ఆన్‌సైట్‌ పనిలో కొంత భాగం, భారతదేశం నుంచే చక్కబెట్టడం మొదలైంది. ఇది ‘ఆఫ్‌షోర్‌’ మోడల్‌ గా ప్రాచుర్యంలోకి వచ్చింది. భారత్‌ నుండి 10,000 కోట్ల డాలర్లు!అమెరికాలో ఉంటున్న భారతీయులను నియోగించుకుని భారతీయ కంపెనీలపై ఆధార పడే బదులు, తామే భారతదేశంలో కొందరిని ఉద్యోగాల్లోకి తీసుకుని, అక్కడ నుంచే పని చేయించటం బాగుంటుందని అమెరికన్‌ కంపెనీలు గ్రహించాయి. ఇది మరింత తక్కువ ఖర్చుతో కూడిన వ్యవహారంగా పరిణమించింది. మైక్రో సాఫ్ట్‌ 1990ల చివరలో దీనికి శ్రీకారం చుట్టింది. మరికొన్ని సంస్థలు కూడా అదే బాట పట్టాయి. బ్యాంకులు, బీమా సంస్థలు, లాజిస్టిక్స్‌ కంపెనీలు, విమానయాన సంస్థలు, న్యాయ సేవా సంస్థలు, గ్లోబల్‌ కన్సల్టింగ్‌–ఆడిటింగ్‌ దిగ్గజాలు తదితర సంస్థలు అదే తరహాననుసరించాయి. అవి తెర వెనుక చక్కబెట్ట వలసిన పనుల్లో చాలా వాటిని లేదా బిజినెస్‌ ప్రాసెస్‌లను బెంగళూరు, హైదరాబాద్, చెన్నై, నోయిడా వంటి చోట్లకు తరలించాయి. ఔట్‌ సోర్సింగ్‌ వ్యాపారం గత ఇరవై ఏళ్లలో మరింత వైవిద్యీకరణకు లోనైంది. ఇంజనీరింగ్, ఆర్‌–డి, ప్రాడక్ట్‌ అభివృద్ధి వంటివి కూడా ఇందులో చేరాయి. అగ్ర సంస్థలు తమ ముఖ్య కార్య కలాపాల్లో కొన్నింటిని చక్కబెట్టేందుకు భారతదేశంలోనే విభాగా లను నెలకొల్పు కున్నాయి. ఇది పెద్ద మార్పు కింద లెక్క. కేవలం వ్యయాన్ని ఆదా చేసుకునేందుకుకాక, నవీకరణ, పరిశోధన, మేధా హక్కుల (ఐపి) సృష్టికి అవి భారత్‌లో నడుం బిగించాయి. ఈ రోజున, ఫార్చ్యూన్‌ 500 కంపెనీల్లో దాదాపు ప్రతి కంపెనీకి దాని స్వీయ యాజమాన్య గ్లోబల్‌ క్యాపబిలిటీ సెంటర్‌ (జి.సి.సి.)లు బెంగళూరు లేదా హైదరాబాద్‌ లలో ఉన్నాయి. అటువంటి సెంటర్లు 2025 నాటికి 2,100కి పైగా ఉన్నట్లు, అవి 23.6 లక్షల మందికి ఉపాధి కల్పిస్తున్నట్లు లెక్క తేలింది. అవి దాదాపు 10,000 కోట్ల అమె రికన్‌ డాలర్ల రాబడులకు దోహద పడుతున్నాయి. విడదీయరాని సాంకేతిక బంధంమెయిన్‌ ఫ్రేమ్‌ నుంచి మినీ, మైక్రో కంప్యూటర్‌ వరకు, ఇంట ర్నెట్, డాట్‌ కామ్, వై2కె, మొబైల్, సోషల్‌ మీడియా, క్లౌడ్, బిగ్‌ డేటా... ఇలా ప్రతి సాంకేతిక రూపాంతీకరణలోను భారతీయ టెక్నా లజీ కంపెనీలు కీలక పాత్ర వహించాయి. స్వయం ప్రతిపత్తితో వ్యవహరించగల కృత్రిమ మేధ (ఏఐ), వివిధ రంగాల్లో ‘డీప్‌ టెక్‌’ వాడకం మొదలవటంతో ఇపుడు కూడా అవి అదే పనిలో ఉన్నాయి. టెక్నాలజీ ఔట్‌సోర్సింగ్‌ ప్రక్రియ అమెరికా, భారత్‌లు రెండింటిలోను బాగా వేళ్లూనుకుపోయింది. దాన్ని వెనక్కి తిప్పడం అయ్యే పని కాదు. అమెరికా, ఇండియాలు పరస్పర ఆధారితమైనవి. వేగంగా అమలులోకి తెచ్చేందుకు, ప్రపంచవ్యాప్తంగా పనులు చేసేందుకు, స్థాయిని పెంచుకునేందుకు, ఇతర సానుకూలతలకు అగ్రశ్రేణి టెక్‌ కంపెనీలకు భారతీయ ఇంజనీర్లు, ప్రతిభావంతుల అవసరం ఉంది. రాబడులను నిలబెట్టుకునేందుకు, యాక్సెస్‌ ఆపరేటింగ్‌ సిస్టం (విండోస్, యాపిల్, ఐఓఎస్, ఆండ్రాయిడ్‌)లకు, డెవలప్‌మెంట్‌ నిమిత్తం క్లౌడ్‌ మౌలిక వసతులకు అమెరికాతో వ్యాపారం చేయాల్సిన అవసరం భారతీయ కంపెనీలకు ఉంది. ఇది రాకపోకలు రెండింటికీ వీలున్న దారి.ఔట్‌ సోర్సింగ్‌ బిజినెస్‌తో పాటు, అమెరికాలోని సాంకేతిక శక్తి కేంద్రం సిలికాన్‌ వ్యాలీని చాలా వరకు భారత్, చైనా, ఇతర దేశాల నుంచి వెళ్లిన ప్రతిభావంతులే నడిపిస్తున్నారు. అమెరికా, వీసాలను స్తంభింపజేసినప్పటికీ ఆ బండి నడవవలసింది ప్రతిభ, సాంకేతికతల జోడెడ్లతోనే! - దినేశ్‌ సి. శర్మవ్యాసకర్త సైన్స్‌ అంశాల వ్యాఖ్యాత

వాషింగ్టన్‌: అమెరికా అధ్యక్షుడు డొనాల్డ్ ట్రంప్ ప్రముఖ అంతర్జాతీయ మీడియా సంస్థ బీబీసీపై దాఖలు చేసిన 10 బిలియన్ డాలర్ల పరువు నష్టం కేసులో కీలక పరిణామం చోటుచేసుకుంది. అక్టోబర్ 16న జరగాల్సిన ట్రంప్ డిపాజిషన్‌ వాయిదా పడింది. దేశానికి ప్రాముఖ్యమైన అనేక ఇతర పనుల కారణంగా ఆయన కోర్టుకు హాజరుకాలేరని ట్రంప్ తరఫు న్యాయవాదులు తెలిపారు.అయితే ట్రంప్ విచారణను నిరవధికంగా వాయిదా వేయలేరని పేర్కొంటూ బీబీసీ.. కోర్టును ఆశ్రయించింది. డిసెంబర్ నెల మధ్య వరకు ట్రంప్ అందుబాటులో ఉండరని, విచారణను జనవరికి వాయిదా వేయాలని ఆయన న్యాయవాదులు సూచించినట్లు బీబీసీ వెల్లడించింది. విచారణ గడువు ముగియడానికి మరో రెండు నెలల గడువు మాత్రమే ఉన్నందున, ట్రంప్ వాంగ్మూలానికి కచ్చితమైన తేదీని నిర్ణయించాలని న్యాయమూర్తిని కోరింది.అసలు కేసు ఏమిటంటే?2020 అమెరికా అధ్యక్ష ఎన్నికల అనంతరం 2021 జనవరి 6న జరిగిన క్యాపిటల్ హింసకు సంబంధించి ట్రంప్ చేసిన ప్రసంగంలోని దృశ్యాలను బీబీసీ ఓ డాక్యుమెంటరీలో ఎడిట్ చేసి ప్రసారం చేసిందని ట్రంప్ ఆరోపించారు. ఆ ఎడిటింగ్ వల్ల తాను హింసను ప్రేరేపించినట్లు ప్రజల్లో తప్పుడు అభిప్రాయం కలిగిందని పేర్కొంటూ 2025 డిసెంబర్‌లో బీబీసీపై కేసు వేశారు. జరిగిన ఘటనపై బీబీసీ క్షమాపణలు చెప్పింది, ట్రంప్‌కు పరువు నష్టం కలిగించాలనే ఉద్దేశం లేదని కూడా స్పష్టం చేసింది. తొలుత 10 బిలియన్ డాలర్ల నష్టపరిహారం కోరిన ట్రంప్, అనంతరం తన ప్రతిష్ఠకు జరిగిన నష్టానికే పరిమితమయ్యారు. ఈ కేసు వ్యవహారంపై కోర్టులో వచ్చే వారం విచారణ జరగనుంది.ఇదీ చదవండి: లడఖ్‌పై చైనాకు భారత్ గట్టి కౌంటర్‌

ఇరాన్‌ యుద్ధంలో మరో కీలక మలుపు! అమెరికా, ఇజ్రాయెల్‌ దాడులతో సైనికంగా దెబ్బతిన్నా.. హార్ముజ్‌ జలసంధి వద్ద కొత్త వ్యూహాలతో ఇరాన్‌ ఎదురుదాడికి దిగుతోంది. చమురు నౌకలపై దాడులను పెంచడంతో పాటు, తమ ఆంక్షలను ఉల్లంఘించే నౌకలకు ఈ మార్గాన్ని మూసివేయాలని భావిస్తోంది. ప్రపంచ చమురు ధరలు తగ్గకుండా చూడటం, నవంబర్‌ 3న జరిగే అమెరికా మధ్యంతర ఎన్నికల్లో ట్రంప్‌ రిపబ్లికన్ల అవకాశాలను దెబ్బతీయడం కూడా తమ వ్యూహంలో భాగమని ఇరాన్‌ అధికారులు చెబుతున్నారు.మరోవైపు, ఇరాన్‌పై మళ్లీ భారీ సైనిక దాడులు చేయాలా? లేదంటే ఆర్థిక ఆంక్షలు, నౌకాదళ దిగ్బంధనంతో ఒత్తిడి కొనసాగించాలా? అనే విషయంలో అమెరికా అధ్యక్షుడు డొనాల్డ్‌ ట్రంప్‌ సందిగ్ధంలో ఉన్నాడట. ఇటు ఇరాన్‌ అణు కార్యక్రమం తిరిగి ఊపందుకుంటోందన్న ఆందోళనతో ఇజ్రాయెల్‌ ప్రధాని బెంజమిన్‌ నెతన్యాహు కొత్త దాడులకు ఒత్తిడి తెస్తున్నట్లు సమాచారం.హార్ముజ్‌ వద్ద కొత్త ఎత్తుగడలుఫిబ్రవరి 28న అమెరికా, ఇజ్రాయెల్‌ దాడులు ప్రారంభమైనప్పటి నుంచి హార్ముజ్‌ జలసంధిపై పట్టు సాధించేందుకు ఇరాన్‌ ప్రయత్నిస్తోంది. యుద్ధానికి ముందు ప్రపంచ చమురు, ఎల్‌ఎన్‌జీ రవాణాలో దాదాపు ఐదో వంతు ఈ మార్గం నుంచే సాగేది. నౌకల రాకపోకలను పరిమితం చేసి అమెరికాపై ఒత్తిడి పెంచాలని టెహ్రాన్‌ భావిస్తోంది. గత పది రోజులుగా దాడుల వ్యూహాన్ని మార్చినట్లు ఇద్దరు సీనియర్‌ ఇరాన్‌ అధికారులు రాయిటర్స్‌కు వెల్లడించారు.చిన్న పడవలతో నిఘా.. ఆపై దాడులు!అమెరికా దాడుల్లో ఇరాన్‌ రాడార్‌ వ్యవస్థలు దెబ్బతినడంతో ఇరాన్‌ ఇస్లామిక్‌ రెవల్యూషనరీ గార్డ్‌ కార్ప్స్‌ (ఐఆర్‌జీసీ) కొత్త పద్ధతిని అనుసరిస్తున్నట్లు అమెరికా సైనిక అధికారి తెలిపారు. ఆయుధాలు లేని చిన్న పడవల్లో నిఘా సిబ్బందిని పంపి, అమెరికా నౌకాదళంతో పాటు ఇతర లక్ష్యాల కదలికలను గుర్తిస్తున్నట్లు వివరించారు. గత వారం ఇలాంటి ఓ పడవలోని సిబ్బంది సమాచారాన్ని ఐఆర్‌జీసీకి చేరవేస్తున్నట్లు గుర్తించిన అమెరికా బలగాలు వారిని బయటకు పంపించి, పడవను ధ్వంసం చేశాయని తెలిపారు. ఈ ఘటనలో ప్రాణనష్టం జరగలేదన్నారు.గల్ఫ్‌ ఆఫ్‌ ఒమన్‌ వరకూ విస్తరణ?హార్ముజ్‌కే పరిమితం కాకుండా గల్ఫ్‌ ఆఫ్‌ ఒమన్‌, ఖతార్‌, యూఏఈ తీరాలకు సమీపంలోని సముద్ర జలాల్లోనూ కార్యకలాపాలను విస్తరించాలన్నది ఇరాన్‌ వ్యూహంగా కనిపిస్తోంది. గత 48 గంటల్లో ట్యాంకర్లతో సహా వాణిజ్య నౌకలకు సంబంధించి కనీసం ఐదు ఘటనలు నమోదయ్యాయి. వీటిలో డ్రోన్‌ దాడులు కూడా ఉన్నట్లు సమాచారం. తమ ఆంక్షలను ఉల్లంఘించే నౌకలకు హార్ముజ్‌ మార్గాన్ని పూర్తిగా మూసివేస్తామని ఇరాన్‌ అధికారులు హెచ్చరిస్తున్నారు. చమురు ధరలను తగ్గించేందుకు అమెరికా, దాని మిత్రదేశాలు చేసే ప్రయత్నాలను అడ్డుకుంటామని పేర్కొంటున్నారు. హార్ముజ్‌ వద్ద వాణిజ్య నౌకలకు ముప్పు తీవ్రంగానే ఉందని జాయింట్‌ మారిటైమ్‌ ఇన్ఫర్మేషన్‌ సెంటర్‌ కూడా హెచ్చరించింది.దాడులు చేయాలా? ఆగాలా?ఇరాన్‌పై మళ్లీ సైనిక చర్య చేపట్టే అంశంపై ట్రంప్‌, నెతన్యాహు చర్చించినట్లు ఆక్సియోస్‌ కథనం వెల్లడించింది. ఇరాన్‌ అణు కార్యక్రమాన్ని పునరుద్ధరించే ప్రయత్నాల్లో భాగంగా ‘పికాక్స్‌ మౌంటెన్‌’ ప్రాంతాన్ని యురేనియం శుద్ధి కేంద్రంగా ఉపయోగించే అవకాశం ఉందని ఇజ్రాయెల్‌ ఆందోళన వ్యక్తం చేసినట్లు సమాచారం. అమెరికా రక్షణ మంత్రి పీట్‌ హెగ్‌సెత్‌, సెంట్రల్‌ కమాండ్‌ నాయకత్వం సైనిక చర్యకు మద్దతిస్తున్నట్లు కథనం పేర్కొంది. అయితే ట్రంప్‌ సలహాదారుల్లో ఎక్కువమంది ఆర్థిక ఆంక్షలు, ఇతర ఒత్తిడి మార్గాలకే మొగ్గు చూపుతున్నట్లు తెలుస్తోంది.దాడులపై ట్రంప్‌ తుది నిర్ణయం తీసుకోలేదని, నవంబర్‌ 3న జరిగే మధ్యంతర ఎన్నికలకు ముందు ఇరాన్‌పై దాడి చేయబోమని ఆయన ప్రకటించినట్లు వైట్‌హౌస్‌ తెలిపింది. ట్రంప్‌, నెతన్యాహు మళ్లీ యుద్ధం ప్రారంభించే అంశంపై చర్చించారన్న వార్తలను వైట్‌హౌస్‌ అధికారి ఖండించారు. ఇరువురు నేతల మధ్య క్రమం తప్పకుండా సంప్రదింపులు జరుగుతాయని నెతన్యాహు కార్యాలయం పేర్కొంది.ఎన్నికలే అసలు లెక్కా?ఇజ్రాయెల్‌లో అక్టోబర్‌ 27న, అమెరికాలో నవంబర్‌ 3న ఎన్నికలు జరగనున్నాయి. ఇరాన్‌పై మళ్లీ దాడులు చేస్తే నెతన్యాహుకు రాజకీయంగా ప్రయోజనం కలగవచ్చన్న అంచనాలున్నా, ఇరాన్‌ ప్రతిదాడులతో ఎన్నికలు వాయిదా పడే ప్రమాదం ఉందన్న ఆందోళన కూడా ఉంది. అమెరికాలో యుద్ధం కారణంగా చమురు ధరలు పెరిగితే ట్రంప్‌ రిపబ్లికన్లకు ఎన్నికల్లో నష్టం వాటిల్లవచ్చు. అందుకే సైనిక చర్యపై ఆయన ఆచితూచి వ్యవహరిస్తున్నట్లు విశ్లేషణలు చెబుతున్నాయి.అమెరికా ఇరాన్‌ ఓడరేవులపై నౌకాదళ దిగ్బంధనాన్ని కొనసాగిస్తూ ఆర్థిక ఆంక్షలను కఠినతరం చేస్తోంది. హార్ముజ్‌ వద్ద ఇరాన్‌ కొత్త వ్యూహాలు, అమెరికా–ఇజ్రాయెల్‌ సైనిక సన్నద్ధత మధ్య ట్రంప్‌ తీసుకునే నిర్ణయం యుద్ధ భవిష్యత్తుతో పాటు ప్రపంచ చమురు ధరలు, ఎన్నికల రాజకీయాలపైనా ప్రభావం చూపనుంది.ఇదీ చదవండి: 30 ఏళ్ల తర్వాత వీడిన మిస్టరీ!

లండన్‌: బ్రిటన్‌లోని యార్క్‌షైర్ వైల్డ్‌లైఫ్ పార్క్‌లో జరిగిన ఘోర ప్రమాదానికి సంబంధించిన వీడియోను డొనాల్డ్ ట్రంప్ సోషల్ మీడియాలో షేర్‌ చేశారు. పార్క్‌లోని పులుల ఎన్‌క్లోజర్‌లోకి ప్రవేశించిన 23 ఏళ్ల విలియం చాప్‌మన్ అనే యువకుడిపై పులి దాడి చేసి ప్రాణాలు తీసింది. ఈ భయానక 41 సెకన్ల దృశ్యాలను ట్రంప్ తన ట్రూత్ సోషల్ ఖాతాలో షేర్ చేస్తూ ‘ప్రకృతితో ఎప్పుడూ పెట్టుకోవద్దు!’అని వ్యాఖ్యానించారు.ఒక వ్యక్తి ప్రాణాలు కోల్పోయిన సున్నితమైన సంఘటనను, అందులోని తీవ్రమైన హింసను ఏమాత్రం పట్టించుకోకుండా ట్రంప్‌ ఈ వీడియోను పోస్ట్ చేయడంపై నెటిజన్లు తీవ్ర ఆగ్రహం వ్యక్తం చేస్తున్నారు. ట్రంప్ మద్దతుదారులు సైతం ఈ పోస్ట్‌ను తప్పుబడుతున్నారు. ఈ వీడియో వైరల్ కావడంతో పాటు ఏఐ సాయంతో రూపొందించిన ఇలాంటి మరికొన్ని దృశ్యాలు ప్రచారంలోకి రావడంపై విమర్శలు మరింత వెల్లువెత్తాయి. https://t.co/5Rz7TQow2b— Rapid Response 47 (@RapidResponse47) October 13, 2026ఈ పరిణామాలపై మృతుడు విలియం కుటుంబ సభ్యులు తీవ్ర ఆవేదన వ్యక్తం చేశారు. విలియం కొన్నేళ్లుగా తీవ్రమైన మానసిక ఆరోగ్య సమస్యలతో బాధపడుతున్నాడని, వైద్యుల పర్యవేక్షణలో ఔషధాలు తీసుకుంటున్నాడని వారు వెల్లడించారు. పుత్రశోకంలో ఉన్న తమ కుటుంబాన్ని ఇలాంటి భయానక వీడియోల సర్క్యులేషన్ మరింత వేధిస్తోందని వారు వాపోయిన వారు. కాగా ఈ ఘటనకు కారణమైన ‘అల్టాయ్’ అనే పులిని చంపబోమని పార్క్ యాజమాన్యం స్పష్టం చేసింది. ఇది అంతరించిపోతున్న అరుదైన అముర్ జాతికి చెందినదని, ప్రపంచవ్యాప్తంగా అడవుల్లో వీటి సంఖ్య దాదాపు 500 మాత్రమే ఉందని నిర్వాహకులు తెలిపారు. యువకుడు రక్షిత ప్రాంతంలోకి ఎలా ప్రవేశించాడనే అంశంపై స్థానిక డాన్‌కాస్టర్ కౌన్సిల్ అధికారులు సమగ్ర దర్యాప్తు ప్రారంభించారు.ఇదీ చదవండి: ట్రంప్‌కు దిమ్మతిరిగే షాకిచ్చిన కొత్త ప్రెస్ సెక్రటరీ

వాషింగ్టన్‌: అమెరికా అధ్యక్షుడు డొనాల్డ్ ట్రంప్‌ కొత్త ప్రెస్‌ సెక్రటరీ కేటీ జకారియా తొలి మీడియా సమావేశం అనూహ్య పరిణామాలతో ముగిసింది. బాధ్యతలు చేపట్టిన రెండో రోజే వైట్‌హౌస్‌ మీడియా ప్రతినిధులను ఉద్దేశించి మాట్లాడిన ఆమె.. కేవలం 14 నిమిషాల్లోనే సమావేశాన్ని ముగించారు. ముందుగా సిద్ధం చేసుకున్న ప్రసంగం, విలేకరుల ప్రశ్నలకు సమాధానాలు చెప్పడంలో ఇబ్బందులు పడి, చివర్లో ట్రంప్‌ను తన భర్తగా పొరబడటం వంటి పరిణామాలు అక్కడ నవ్వులు పూయించాయి. ఆమె పనితీరుపై విమర్శలు వెల్లువెత్తాయి. ట్రంప్‌ తనను ప్రెస్‌ సెక్రటరీగా నియమించినందుకు ఎంతో గౌరవంగా భావిస్తున్నానని కేటీ జకారియా తెలిపారు. ఆయనతో కలిసి పనిచేయాలని చాలాకాలంగా కోరుకుంటున్నానని అన్నారు. అనంతరం సుమారు ఆరు నిమిషాల పాటు ముందుగా సిద్ధం చేసుకున్న ప్రసంగాన్ని చదివారు. అందులో ట్రంప్‌ను ప్రశంసించడంతోపాటు ఆయన ప్రభుత్వం సాధించిన విజయాలుగా తాను భావిస్తున్న అంశాలను ప్రస్తావించారు.‘తెలుసుకుని తిరిగి సమాధానం చెబుతా’వెనెజువెలాపై జరిగిన యుద్ధాన్ని ‘చారిత్రాత్మకమైన ఒకరోజు యుద్ధం’గా అభివర్ణించారు. అదే సమయంలో ఇరాన్‌తో ఘర్షణ తొమ్మిదో నెలకు చేరువవుతోందన్నారు.తర్వాత ఫాక్స్‌ న్యూస్‌ ప్రతినిధి పీటర్‌ డూసీ ప్రశ్న అడిగారు. ఉక్రెయిన్‌ అధ్యక్షుడు వొలోదిమిర్‌ జెలెన్‌స్కీతో ట్రంప్‌కు తాజాగా తలెత్తిన విభేదాల నేపథ్యంలో.. అమెరికా ఉక్రెయిన్‌తో నిఘా సమాచారాన్ని పంచుకోవడం నిలిపివేసిందా అని ప్రశ్నించారు. దీనిపై కేటీ వెంటనే సమాధానం చెప్పలేకపోయారు. ఆ విషయం గురించి తెలుసుకుని తిరిగి సమాధానం చెబుతానని డూసీకి తెలిపారు. తొలి మీడియా సమావేశంలోనే కీలకమైన ప్రశ్నకు తక్షణ సమాధానం ఇవ్వలేకపోవడం చర్చనీయాంశమైంది.నలుగురు పిల్లలను పెంచుకుంటూ..తర్వాత డైలీ మెయిల్‌ ప్రతినిధి గ్రీస్‌లో అమెరికా రాయబారిగా ఉన్న కింబర్లీ గిల్‌ఫాయిల్‌ గురించి ప్రశ్నించారు. ఏథెన్స్‌లో ఆమె వ్యవహారశైలికి సంబంధించి వచ్చిన వార్తల నేపథ్యంలో.. ట్రంప్‌ ఆమెను రాయబారి పదవి నుంచి తొలగించాలని ఇంకా ఆలోచిస్తున్నారా అని అడిగారు. దీనికి కేటీ జకారియా స్పందిస్తూ.. గిల్‌ఫాయిల్‌ను పదవికి రాజీనామా చేయాలని ట్రంప్‌ కోరినట్లు వెల్లడించారు. గిల్‌ఫాయిల్‌ గతంలో ఫాక్స్‌ న్యూస్‌ వ్యాఖ్యాతగా పనిచేశారు. ట్రంప్‌ పెద్ద కుమారుడైన డొనాల్డ్‌ ట్రంప్‌ జూనియర్‌తో గతంలో ఆమె నిశ్చితార్థం జరిగింది. ఈ అంశంపై కేటీ చేసిన ప్రకటన సమావేశంలో కీలక పరిణామంగా నిలిచింది. కేటీ జకారియా కుటుంబ జీవితం గురించి డైలీ మెయిల్‌ విలేకరి మరో ప్రశ్న అడిగారు. నలుగురు పిల్లలను పెంచుకుంటూ, ఒత్తిడితో కూడుకున్న ప్రెస్‌ సెక్రటరీ బాధ్యతలను ఎలా నిర్వహిస్తారని ప్రశ్నించారు. గతంలో ఈ పదవిలో ఉన్న కరోలిన్‌ లీవిట్‌ ఇద్దరు పిల్లల సంరక్షణతో ఉద్యోగాన్ని సమన్వయం చేసుకోవడంలో ఎదురైన సవాళ్ల కారణంగా రాజీనామా చేసినట్లు వచ్చిన కథనాలను కూడా ప్రస్తావించారు. దీనికి సమాధానం చెప్పే క్రమంలో కేటీ తడబడ్డారు.‘నా అధ్యక్షుడు.. అంటే నా భర్త’ అంటూ..కుటుంబ బాధ్యతల గురించి మాట్లాడుతున్న సమయంలో కేటీ జకారియా ట్రంప్‌ను తన భర్తగా పేర్కొనడం నవ్వులు పూయించింది. ‘నా అధ్యక్షుడు.. క్షమించండి, నా భర్త ఇక్కడ ఉన్నారు’ అని ఆమె అన్నారు. వెంటనే తన పొరపాటును గుర్తించినప్పటికీ, అప్పటికే మీడియా సమావేశంలో నవ్వులు వినిపించాయి. అనంతరం ఆమె తేరుకుని ట్రంప్‌ను ప్రశంసించడం కొనసాగించారు. కుటుంబాలకు అనుకూలంగా వ్యవహరించే అధ్యక్షుడు ట్రంప్‌ అని పేర్కొన్నారు. కుటుంబాలు ఉన్న మహిళలకు ఆయన ఎక్కువ అవకాశాలు కల్పించారని చెప్పారు. తనకు నలుగురు పిల్లలు ఉన్నారని తెలిసినా, ఈ ఉద్యోగం ఎంత కష్టమైనదో తెలిసినా ట్రంప్‌ తనపై నమ్మకం ఉంచారని, ఆ బాధ్యతలను సమర్థంగా నిర్వహించగలననే విశ్వాసం తనకు ఉందని తెలిపారు.14 నిమిషాల్లోనే ముగిసిన సమావేశంఈ పరిణామాల నేపథ్యంలో కేటీ జకారియా తొలి మీడియా సమావేశం కేవలం 14 నిమిషాల్లోనే ముగిసింది. ఆమె పనితీరుపై విమర్శలు వ్యక్తమైనప్పటికీ, వైట్‌హౌస్‌ మాత్రం ఆమెకు మద్దతుగా నిలిచింది. వైట్‌హౌస్‌ కమ్యూనికేషన్స్‌ డైరెక్టర్‌ స్టీఫెన్‌ చ్యూంగ్‌ సామాజిక మాధ్యమం ఎక్స్‌లో స్పందిస్తూ.. కేటీ తొలి సమావేశం అద్భుతమైన ప్రారంభమని ప్రశంసించారు. ఆమె సమావేశాన్ని సమర్థంగా నిర్వహించారని, ఇప్పటివరకు ట్రంప్‌ ప్రభుత్వం చేసిన మంచి పనులను అమెరికా ప్రజలకు సమర్థంగా గుర్తుచేశారని పేర్కొన్నారు. కాగా, ట్రంప్‌ గత శుక్రవారం కేటీ జకారియాను కొత్త ప్రెస్‌ సెక్రటరీగా నియమించారు. ఆమె కరోలిన్‌ లీవిట్‌ స్థానంలో బాధ్యతలు చేపట్టారు. ఇదీ చదవండి: 9/11 రోజున ట్రంప్ ఎక్కడున్నారు? ఆయన వాదనలో వాస్తవమెంత?

అమెరికా అధ్యక్షుడు డొనాల్డ్‌ ట్రంప్‌ ప్రభుత్వంలో మరో వివాదం తెరపైకి వచ్చింది. గ్రీస్‌లో అమెరికా రాయబారిగా పనిచేస్తున్న కింబర్లీ గిల్‌ఫాయిల్‌ను రాజీనామా చేయాలని వైట్‌హౌస్‌ ఆదేశించింది. ట్రంప్‌ ప్రభుత్వంలోని కీలక అధికారులతో పరిచయాలు కల్పిస్తానంటూ ఓ సంపన్న మద్దతుదారుడిని తన క్రెడిట్‌ కార్డు బిల్లు చెల్లించాలని ఆమె కోరినట్లు వచ్చిన ఆరోపణలు ఈ పరిణామానికి దారితీశాయి. ఈ వ్యవహారం ఇప్పుడు అమెరికా దౌత్య వర్గాల్లో చర్చనీయాంశంగా మారింది.గిల్‌ఫాయిల్‌(57) వ్యవహారంపై సెప్టెంబర్‌ చివరి నుంచి వాల్‌స్ట్రీట్‌ జర్నల్‌ వరుస కథనాలు ప్రచురించింది. గ్రీకు ఇంధన సంస్థకు చెందిన లాబీయిస్ట్‌తో ఆమెకు సన్నిహిత సంబంధాలు ఉన్నాయని, ఆ సంస్థ వ్యాపార ప్రయోజనాలను ప్రోత్సహించారని ఆరోపించింది. ప్రైవేటు దౌత్య సమావేశాలకు ఆ లాబీయిస్ట్‌ను అనుమతించారన్న ఆరోపణలూ వెలువడ్డాయి.మరో కథనంలో.. ఓ విందు సందర్భంగా అమెరికా కోరుకుంటే గ్రీకు ప్రభుత్వాన్ని ఇబ్బందులకు గురిచేయగలదని గిల్‌ఫాయిల్‌ వ్యాఖ్యానించిదని వార్త ఇచ్చింది. గ్రీకు వ్యాపారవేత్తలతో విలాసవంతమైన పర్యటనలు, దావోస్‌లో జరిగిన కార్యక్రమానికి ఆహ్వానం పొందేందుకు ఆమె చేసిన ప్రయత్నాలపైనా వార్తలు వచ్చాయి. ఏథెన్స్‌లోని అమెరికా రాయబార కార్యాలయ సిబ్బందితో ఆమె వ్యవహారశైలిపై ఫిర్యాదులు వచ్చినట్లు బ్రిటన్‌ మీడియా వెల్లడించింది.లక్ష డాలర్ల బిల్లుతో వివాదం ముదిరి..ఈ ఆరోపణల్లో అత్యంత తీవ్రమైనది క్రెడిట్‌ కార్డు బిల్లుకు సంబంధించినది. ట్రంప్‌ మద్దతుదారుడైన వ్యాపారవేత్త ఎరిక్‌ డీటర్స్‌ వెల్లడించిన వివరాలను ఉటంకిస్తూ వాల్‌స్ట్రీట్‌ జర్నల్‌ కథనం ప్రచురించింది. గిల్‌ఫాయిల్‌ తన లక్ష డాలర్ల క్రెడిట్‌ కార్డు బిల్లును చెల్లించాలని ఆయనను కోరినట్లు తెలుసస్తోంది. ప్రతిఫలంగా ట్రంప్‌ ప్రభుత్వంలోని ఉన్నతాధికారులను కలిసే అవకాశం కల్పిస్తానని చెప్పినట్లు పేర్కొంది. ఇందుకు సంబంధించిన సందేశాలనూ పత్రిక ప్రస్తావించింది.అయితే గిల్‌ఫాయిల్‌ న్యాయవాదులు ఈ ఆరోపణలను తోసిపుచ్చారు. ఆమె రాయబారిగా నామినేట్‌ కావడానికి ముందే నిర్వహించిన ప్రసంగాలు, ఇతర కార్యక్రమాలకు సంబంధించిన బకాయి పారితోషికమే ఆ మొత్తమని వివరించారు. ప్రైవేటు విమానాల వినియోగంపై వచ్చిన ఆరోపణలను కూడా ఖండించారు. ప్రయాణాలకు ముందు విదేశాంగ శాఖ మార్గదర్శకాలు తీసుకున్నారని, నిబంధనలకు అనుగుణంగానే వ్యవహరించారని తెలిపారు.ట్రంప్‌ కోడలి చాన్స్‌ మిస్‌కింబర్లీ గిల్‌ఫాయిల్‌ వ్యక్తిగత జీవితంలోనూ కీలక పరిణామాలు చోటుచేసుకున్నాయి. గతంలో ఆమె కాలిఫోర్నియాలో ప్రాసిక్యూటర్‌గా పనిచేశారు. అనంతరం ఫాక్స్‌ న్యూస్‌ వ్యాఖ్యాతగా గుర్తింపు పొందారు. ట్రంప్‌ రాజకీయ ప్రచార బృందంలోనూ పనిచేశారు. ట్రంప్‌ పెద్ద కుమారుడు డొనాల్డ్‌ ట్రంప్‌ జూనియర్‌తో 2020 చివర్లో ఆమెకు నిశ్చితార్థం జరిగింది. అయితే ఈ విషయం రెండేళ్ల తర్వాత అధికారికంగా బయటకు వచ్చింది. ఆ తర్వాత ఏమైందో ఏమోగానీ.. 2024 సెప్టెంబర్‌లో ఆ బంధం ముగిసింది. అంత జరిగినా.. అనంతరం ట్రంప్‌ ఆమెను గ్రీస్‌లో అమెరికా రాయబారిగా నియమించారు. 2025 నవంబర్‌లో ఏథెన్స్‌లో బాధ్యతలు చేపట్టిన ఆమె.. అమెరికా ఇంధన ప్రయోజనాల కోసం ఎల్‌ఎన్‌జీ దిగుమతులు, చమురు-గ్యాస్‌ అన్వేషణ ఒప్పందాలను ప్రోత్సహించారు.ట్రంప్‌ అసంతృప్తి.. రాజీనామాకు ఆదేశాలువరుస కథనాలపై సోమవారం విలేకరులు ప్రశ్నించగా.. గిల్‌ఫాయిల్‌ను తొలగించే అంశాన్ని పరిశీలిస్తున్నామని ట్రంప్‌ చెప్పారు. వెలువడుతున్న వార్తలతో తాము సంతోషంగా లేమని వ్యాఖ్యానించారు. మంగళవారం వైట్‌హౌస్‌ ప్రెస్‌ సెక్రటరీ కేటీ జకారియా ఆమెను రాజీనామా చేయాలని కోరినట్లు ధ్రువీకరించారు. గిల్‌ఫాయిల్‌ తమ బృందానికి ఎంతో ఉపయోగపడ్డారని, ఆమెకు శుభాకాంక్షలు తెలుపుతున్నామని పేర్కొన్నారు.మరోవైపు గిల్‌ఫాయిల్‌ ఎక్స్‌లో స్పందిస్తూ.. తనపై వచ్చిన ఆరోపణలు అవాస్తవమని తెలిపారు. తన పేరు, ప్రతిష్ఠ, నిజాయితీని కాపాడుకునేందుకు న్యాయపరంగా పోరాడతానని పేర్కొన్నారు. ట్రంప్‌, విదేశాంగ మంత్రి మార్కో రూబియో పట్ల తన గౌరవం, మద్దతు కొనసాగుతాయని స్పష్టం చేశారు.దర్యాప్తునకు డెమోక్రాట్ల డిమాండ్‌గిల్‌ఫాయిల్‌ వ్యవహారంపై విచారణ జరపాలని డెమోక్రటిక్‌ పార్టీకి చెందిన గ్రెగరీ మీక్స్‌, జీన్‌ షాహీన్‌, రాబర్ట్‌ గార్సియా డిమాండ్‌ చేశారు. ఆమె అధికారిక హోదాను దుర్వినియోగం చేశారన్న ఆరోపణలపై స్పష్టత రావాలని కోరారు. అంతకుముందు గ్రీస్‌ పర్యటనలో రూబియో ఆమెను సమర్థమైన రాయబారిగా అభివర్ణించారు. అయితే ఆరోపణలను ధ్రువీకరించకుండా, అజ్ఞాత వర్గాల సమాచారాన్ని వాస్తవాలుగా పరిగణించకూడదని విలేకరులకు సూచించారు.నాటోలో కీలక మిత్రదేశమైన గ్రీస్‌.. తూర్పు మధ్యధరా ప్రాంతంలో అమెరికా భద్రతా కార్యకలాపాలకు అవసరమైన సైనిక సదుపాయాలను అందిస్తోంది. ఎర్ర సముద్రంలో వాణిజ్య నౌకల రక్షణకు ఉద్దేశించిన యూరోపియన్‌ యూనియన్‌ సముద్ర మిషన్‌లోనూ కీలక పాత్ర పోషిస్తోంది. ఇలాంటి వ్యూహాత్మక దేశంలో అమెరికా రాయబారిపై వివాదం చెలరేగడం దౌత్యపరంగా ప్రాధాన్యం సంతరించుకుంది. గిల్‌ఫాయిల్‌పై వచ్చిన ఆరోపణలపై గ్రీస్‌ ప్రభుత్వం ఇప్పటివరకు అధికారికంగా స్పందించలేదు.కొసమెరుపు.. కింబర్లీకి గతంలో రెండుసార్లు వివాహమైంది. 2001లో గావిన్‌ న్యూసమ్‌ను పెళ్లి చేసుకున్నారు. ఆయన ప్రస్తుతం కాలిఫోర్నియా గవర్నర్‌గా ఉన్నారు. వీరిద్దరూ 2005లో విడాకులకు దరఖాస్తు చేసుకోగా, 2006లో విడాకులు ఖరారయ్యాయి. అదే ఏడాది వ్యాపారవేత్త ఎరిక్‌ విలెన్సీని వివాహం చేసుకున్న కింబర్లీకి ఒక కుమారుడు ఉన్నాడు. ఈ వివాహం కూడా 2009లో ముగిసింది.ఇక డొనాల్డ్‌ ట్రంప్‌ జూనియర్‌ 2005లో వెనెస్సా ట్రంప్‌ను వివాహం చేసుకున్నారు. వీరికి ఐదుగురు పిల్లలు. 2018లో విడిపోయిన ఈ జంటకు అదే ఏడాది విడాకులు ఖరారయ్యాయి. ఆ తర్వాత 2018లో తనకన్నా వయసులో 9 ఏళ్లు పెద్దదైన కింబర్లీతో ప్రేమలో పడ్డాడు. 2020 డిసెంబరు 31న నిశ్చితార్థం చేసుకున్నారు. అయితే ఈ విషయాన్ని 2022లో బహిరంగంగా వెల్లడించారు. 2024లో వీరిద్దరూ విడిపోయారు.ఇదీ చదవండి: ఎన్నికలయ్యాక మీ అంతు చూస్తా.. ట్రంప్‌ సాలిడ్‌ వార్నింగ్‌

ఇటీవల ఫాక్స్ న్యూస్‌లో ప్రసారమైన ఒక ఇంటర్వ్యూలో అమెరికా అధ్యక్షుడు డొనాల్డ్‌ ట్రంప్‌ 9/11 రోజున తాను రెండో విమానం వరల్డ్ ట్రేడ్ సెంటర్‌లోని సౌత్ టవర్‌ను ఢీకొట్టడం చూశానని హోస్ట్ ట్రే గౌడీతో అన్నారు. ఈసారి ఆయన చేసిన కొత్త వాదన ఏమిటంటే.. దాడి సమయంలో కూలిపోతుందేమోననే భావన కలిగించిన ఒక భవనం నుండి ఫైర్‌ఫైటర్స్ తనను ఎత్తుకుని బయటకు తీసుకెళ్లారని చెప్పారు. 2026, సెప్టెంబర్ 8న వైట్ హౌస్‌లో జరిగిన ఒక కార్యక్రమంలో ఈ విషయం ప్రస్తావనకు వచ్చింది. 9/11 దాడుల 25వ వార్షికోత్సవానికి కొద్ది రోజుల ముందు ఎమర్జెన్సీ రెస్పాండర్స్ గౌరవార్థం ఈ కార్యక్రమాన్ని నిర్వహించారు.ఫైర్‌ఫైటర్స్ రక్షించిన తీరు..దాడులు జరిగిన కొద్దిసేపటికే తమ ఉద్యోగుల బృందాన్ని సురక్షిత ప్రాంతానికి తీసుకెళ్లినట్లు ట్రంప్ చెప్పారు. సమీపంలోని ‘వన్ లిబర్టీ ప్లాజా’ భవనం.. దీనిని ఆయన ‘యునైటెడ్ స్టేట్స్ స్టీల్ బిల్డింగ్’ అని పేర్కొన్నారు. దాని నుండి విరిగిపడుతున్న శబ్దాలు రావడం ప్రారంభమైనప్పుడు, ఇద్దరు ఫైర్‌ఫైటర్స్ తనను పట్టుకుని సురక్షితంగా బయటకు తీసుకెళ్లారని ఆయన తెలిపారు.సీఎన్‌ఎన్‌ కథనం ప్రకారం, ట్రంప్ ఈ సంఘటనను వివరిస్తూ ఇలా అన్నారు..‘ నేను న్యూయార్క్‌లో ఒక పెద్ద భవనాన్ని నిర్మిస్తున్నాను, ఘటన జరిగిన వెంటనే నా బృందాన్ని అక్కడికి తీసుకెళ్లాను. యునైటెడ్ స్టేట్స్ స్టీల్ బిల్డింగ్ కదిలిపోతోంది. నిజంగానే శబ్దాలు వస్తున్నాయి. అది కూలిపోతుందని మేము అనుకున్నాం. అది నేటికీ అలాంటి శబ్దాలు చేస్తూనే ఉంది. కానీ అది ఎప్పుడూ కూలిపోలేదు, అది నాకు గుర్తుంది. ఆ ఇద్దరు ఫైర్‌మెన్‌లను నేను ఎప్పటికీ మర్చిపోలేను.’ అనిఅన్నారు.‘ఆ భవనం కూలిపోతుందని..’‘అది మాపై పడిపోతుందని మేము భావించాం, అప్పుడు ఇద్దరు ఫైర్‌మెన్ నన్ను పట్టుకున్నారు. ‘ఇక్కడి నుండి వెళ్లిపోవాలి’ అని వారు చెప్పారు. నిజంగానే వారు నన్ను పైకి ఎత్తుకున్నారు. నన్ను ఎత్తుకుని నాతో పాటు పరుగెత్తడం మొదలుపెట్టారు. నేను ‘మిత్రులారా, నేను స్వయంగా పరుగెత్తగలను’ అని చెప్పాను. కానీ వారు నన్ను మోసుకుంటూ వెళ్లారు. వారు ఆ భవనం కూలిపోతుందని వారు భావించారు. అయినప్పటికీ అది కూలలేదు.’ అని అన్నారు. ట్రంప్ చేసిన ఈ కొత్త వాదనపై ప్రశ్నలు తలెత్తుతున్నాయి. ఎందుకంటే ఆ రోజున ట్రంప్ ‘వన్ లిబర్టీ ప్లాజా’ లోపల ఉన్నారని లేదా ఫైర్‌ఫైటర్స్ ఆయనను అక్కడి నుండి బయటకు తీసుకొచ్చారని ధృవీకరించే బహిరంగ ఆధారాలు గానీ, రికార్డులు గానీ ఏవీ లేవు.‘సహాయక చర్యల్లో పాలుపంచుకున్నా’9/11 గురించి ఆయన చెప్పిన ఉదాహరణ ఇదొక్కటే కాదు..దాడుల అనంతర పరిస్థితులను తాను చూశానని, సహాయక చర్యల్లో పాలుపంచుకున్నానని గతంలో కూడా ఆయన పలుమార్లు పేర్కొన్నారు. అయితే ఆయన ప్రకటనలలో ఎప్పటికప్పుడు చాలా మార్పులు కనిపించాయి. 2026 ఆగస్టులో ‘నేను రెండో విమానం ఢీకొట్టడం చూశాను’ అని ట్రంప్‌ అన్నారు. ఫాక్స్ న్యూస్‌లో ప్రసారమైన ఒక ఇంటర్వ్యూలో, ట్రంప్ హోస్ట్ ట్రే గౌడీకి రెండో విమానం వరల్డ్ ట్రేడ్ సెంటర్‌లోని సౌత్ టవర్‌ను ఢీకొట్టడం చూశానని చెప్పారు. అదే ఇంటర్వ్యూలో, తాను న్యూయార్క్‌లో ఒక పెద్ద భవనాన్ని నిర్మిస్తున్నానని, దాడుల మరుసటి రోజే తన నిర్మాణ కార్మికులతో కలిసి అక్కడికి వెళ్లినట్లు కూడా ట్రంప్ చెప్పారు.‘చాలా మంది దూకడం చూశాను’2016లో బఫెలోలో జరిగిన ఎన్నికల ర్యాలీలోనూ ఆయన ఇలాంటి వాదనే చేశారు. ‘ ఆరోజు జనం భయాందోళనల మధ్య ఉన్నారు. శిథిలాలను తొలగించడంలో సహాయం చేసిన ప్రతి వ్యక్తి.. నేను అక్కడ ఉన్నాను, నేను చూశాను, నేను కూడా కొద్దిగా సహాయం చేశాను. మనందరిపై ఏమి పడబోతోందో ఎవరికీ తెలియదు’ అని చెప్పారన్నారు. 2015లో ట్రంప్ వరల్డ్ ట్రేడ్ సెంటర్ నుండి ప్రజలు కిందకు దూకడం తాను చూశానని విచిత్రమైన వాదన చేశారు. ఆయన అపార్ట్‌మెంట్ దాడులు జరిగిన ప్రదేశానికి నాలుగు మైళ్ల దూరంలో ఉన్నప్పటికీ, ‘చాలా మంది దూకారు, నేను దానిని చూశాను. నా అపార్ట్‌మెంట్ నుండి ఒక దృశ్యం కనిపించేది... నేను కనీసం 10 మంది దూకడం చూశాను’ అని చెప్పారు.‘ఎలాంటి ప్రామాణిక ఆధారాలు లేవు’అదే ఏడాది, జెర్సీ సిటీలో వేలాది మంది ప్రజలు (ప్రత్యేకించి అరబ్ వర్గం వారు) భవనం కూలిపోతున్నప్పుడు వేడుకలు చేసుకోవడం తాను చూశానని కూడా ఆయన పేర్కొన్నారు. ఈ వాదనకు సైతం ఎలాంటి ప్రామాణిక ఆధారాలు ఎన్నడూ లభించలేదు. కాగా 9/11 సహాయక చర్యల సమయంలో న్యూయార్క్ ఫైర్ డిపార్ట్‌మెంట్‌లో బెటాలియన్ చీఫ్‌గా పనిచేసిన రిచర్డ్ ఎల్లెస్ 2019లో ‘పాలిటిఫ్యాక్ట్’తో మాట్లాడుతూ, ట్రంప్ ‘గ్రౌండ్ జీరో’లో ఉన్నారన్న విషయం గానీ లేదా అక్కడికి కార్మికులను తీసుకువచ్చారన్న విషయం గానీ తనకు తెలియదని చెప్పారు. ‘ఖచ్చితంగా దీనికి సంబంధించిన రికార్డు ఉండాలి, ఎందుకంటే అక్కడ పనిచేసిన ప్రతి ఒక్కరూ పోలీసులు, ఫైర్ డిపార్ట్‌మెంట్ పర్యవేక్షణలోనే పనిచేశారు’ అని ఎల్లెస్ స్పష్టం చేశారు.‘అదే నిజమైతే ప్రధాన వార్తగా వచ్చేది’దాడులు జరిగిన కొద్ది రోజుల తర్వాత, సెప్టెంబర్ 13, 2001న ట్రంప్ గ్రౌండ్ జీరో సమీపంలో కనిపించిన మాట వాస్తవమే. ఆ రోజు ఆయన జర్మన్ టీవీ ఛానల్ ఎన్‌24తో మాట్లాడుతూ, తమ 100 మందికి పైగా కార్మికులు అక్కడ ఉన్నారని, మరో 125 మంది వస్తున్నారని చెప్పారు. ఆ సమయంలో సైట్ వైపు వెళ్తున్న పోలీసు అధికారులకు ట్రంప్ హై-ఫైవ్ ఇచ్చినట్లు ‘అసోసియేటెడ్ ప్రెస్’ కూడా వార్త రాసింది. అయితే ట్రంప్ జీవిత చరిత్ర రచయిత టిమోతీ ఓ బ్రియన్ స్పందిస్తూ, ఆ సమయంలో ట్రంప్ ఆర్గనైజేషన్‌లో కేవలం డజను మంది మాత్రమే పనిచేస్తున్నారని, అందువల్ల వందలాది మంది కార్మికులు ట్రంప్ వద్ద అందుబాటులో ఉండటం సాధ్యం కాదన్నారు. ట్రంప్ ఆర్గనైజేషన్ మాజీ నిర్మాణ కార్యనిర్వాహకురాలు బార్బరా రెస్ కూడా ఈ వాదనలను తప్పుబడుతూ, ‘ఒకవేళ ఆయన అక్కడ ఉండి, ఫైర్‌ఫైటర్స్ ఆయనను ఎత్తుకెళ్లినట్లయితే, మరుసటి రోజు ‘ది టైమ్స్’ పత్రికలో అది ప్రధాన వార్త అయ్యేది’ అని పేర్కొన్నారు. 2001 సెప్టెంబర్‌ 11న రెండు విమానాలు న్యూయార్క్‌ నగరంలోని వరల్డ్‌ ట్రేడ్‌ సెంటర్‌లోని ట్విన్‌ టవర్స్‌ను ఢీ కొన్నాయి. ఈ ఘటనను 9/11గా చెబుతుంటారు.ఇదీ చదవండి: మిషిగన్ స్పీకర్‌ రేసులో ప్రవాస భారతీయుడు.. రణ్‌జీవ్ పురి ఎవరు?

యెమెన్‌కు చెందిన హౌతీ తిరుగుబాటుదారులు సౌదీ అరేబియాపై వరుస దాడులకు తెగబడుతున్న సంగతి తెలిసిందే. ఈ క్రమంలో హౌతీలపై అమెరికా అధ్యక్షుడు డోనాల్డ్ ట్రంప్ మరోసారి తీవ్రస్థాయిలో విరుచుకుపడ్డారు. ఇరాన్ ఆదేశాల మేరకే హౌతీలు సౌదీ అరేబియాపై దాడులకు పాల్పడుతున్నారని ఆయన ఆరోపించారు.అమెరికా మధ్యంతర ఎన్నికలకు ముందు చమురు ధరలను భారీగా పెంచి అస్థిరత సృష్టించడమే లక్ష్యంగా ఈ దాడులు జరుగుతున్నాయని మండిపడ్డారు. హౌతీల దాడులను తాను మర్చిపోనని, ఎన్నికల అనంతరం అమెరికా నుంచి తగిన తీవ్ర పరిణామాలు ఉంటాయని 'ట్రూత్ సోషల్' వేదికగా హెచ్చరించారు.“హౌతీలు హద్దులు దాటి ప్రవర్తిస్తున్నారు. ఏడాది కిందట మనం తీవ్రస్థాయిలో బాంబుల వర్షం కురిపించినప్పుడు వారు పాఠం నేర్చుకున్నారనుకున్నాను. వారి విజ్ఞప్తి మేరకే అప్పట్లో దాడులు ఆపాం. చాలా కాలం ప్రశాంతంగా ఉన్న వారు, ఇప్పుడు మళ్లీ బయటకు వచ్చి దాడులకు తెగబడుతున్నారు” అని ట్రంప్ తన పోస్టులో రాసుకొచ్చారు.సౌదీలో భారీ ప్రాణనష్టంఅక్టోబర్ 10న సౌదీ అరేబియా రాజధాని రియాద్‌లోని కింగ్‌ ఖాలిద్‌ అంతర్జాతీయ విమానాశ్రయంపై హౌతీలు బాలిస్టిక్‌ క్షిపణులతో దాడి చేశారు. ఈ భీకర దాడుల్లో హైదరాబాద్‌ వాసి సహా మొత్తం 13 మంది మృతి చెందగా, 300 మందికిపైగా గాయపడ్డారు.సౌదీ ఆర్థిక వ్యవస్థపై ప్రతికూల ప్రభావంహౌతీలు మళ్లీ దాడులు ప్రారంభించడంతో, హార్ముజ్ జలసంధి గుండా జరిగే చమురు, గ్యాస్ రవాణాకు తీవ్ర ఆటంకాలు ఏర్పడుతున్నాయి. ఇది సౌదీ అరేబియా ఆర్థిక వ్యవస్థపై తీవ్ర ఒత్తిడి తెస్తోంది. ఈ పరిణామాల నేపథ్యంలో.. ఈ ఏడాది సౌదీ అరేబియా ఆర్థిక వ్యవస్థ 3.3% క్షీణించవచ్చని అంతర్జాతీయ ద్రవ్య నిధి అంచనా వేసింది.

వాషింగ్టన్‌: అమెరికాలో నవంబర్‌ మూడో తేదీన జరగాల్సిన మధ్యంతర ఎన్నికలకు గాను అధ్యక్షుడు ట్రంప్‌ సారథ్యంలోని అధికార రిపబ్లికన్‌ పార్టీకి స్పేస్‌ ఎక్స్‌ అధిపతి ఎలాన్‌ మస్క్‌ అత్యధికంగా విరాళాలను అందజేసినట్లు వెల్లడైంది. ఆయన ఏకంగా 276 మిలియన్‌ డాలర్లు అంటే, రూ. 2,638 కోట్లు విరాళంగా సమకూర్చారు. డెమోక్రాటిక్‌ పార్టీ నుంచి తీవ్ర పోటీ ఎదుర్కొంటున్న రాష్ట్రాల్లో రిపబ్లికన్‌ పార్టీకి దన్నుగా ఉండేందుకు జూలై నుంచి ఈ మొత్తాన్ని అందజేస్తూ వచ్చారని న్యూయార్క్‌ టైమ్స్‌ తన కథనంలో వెల్లడించింది. 2025–26 సంవత్సరాల్లో వివిధ రాష్ట్రాల్లో జరిగిన ఎన్నికల్లో ప్రచారానికిగాను మస్క్‌ అత్యధికంగా రిపబ్లికన్లకు మొత్తమ్మీద 366 మిలియన్‌ డాలర్లు, అంటే రూ.3,500 కోట్లు ఇచ్చినట్లయిందని పేర్కొ ంది. 2024 ట్రంప్‌ అధ్యక్ష ఎన్నికల్లో ప్రచారానికి గాను 290 మిలియన్‌ డాలర్లు, అంటే రూ.2,772 కోట్లు అందించారని కూడా తెలిపింది.

ఉక్రెయిన్‌ అధ్యక్షుడు జెలెన్‌స్కీ స్థానంలో కొత్త నాయకుడు రావాలని అమెరికా అధ్యక్షుడు డొనాల్డ్‌ ట్రంప్‌ అభిప్రాయపడుతున్న నేపథ్యంలో.. ఆయనకు ప్రత్యామ్నాయంగా ఎవరెవరు పోటీ పడవచ్చనే చర్చ మొదలైంది. మాజీ సైనికాధికారి, ప్రస్తుతం బ్రిటన్‌లో ఉక్రెయిన్‌ రాయబారిగా ఉన్న వలెరీ జలుజ్నీ ఈ జాబితాలో ముందున్నారు. సైనిక గూఢచర్య విభాగం మాజీ అధిపతి కిరిలో బుడనోవ్‌, రక్షణ మంత్రి మైఖైలో ఫెడొరోవ్‌ కూడా కీలక ప్రత్యామ్నాయాలుగా కనిపిస్తున్నారు.జెలెన్‌స్కీ ఐదేళ్ల అధ్యక్ష పదవీకాలం 2024లో ముగిసినప్పటికీ, రాజ్యాంగ నిబంధనలు, మార్షల్‌ లా కారణంగా ఆయన యుద్ధకాలంలో పదవిలో కొనసాగుతున్నారు. రష్యాతో నాలుగున్నరేళ్లుగా యుద్ధం కొనసాగుతున్న నేపథ్యంలో ఎన్నికలు నిర్వహించడంపై ఉక్రెయిన్‌లో భిన్నాభిప్రాయాలున్నాయి. రష్యా అధ్యక్షుడు వ్లాదిమిర్‌ పుతిన్‌ 60 రోజుల కాల్పుల విరమణకు హామీ ఇస్తే ఎన్నికలు నిర్వహించేందుకు సిద్ధమని జెలెన్‌స్కీ ప్రతిపాదించారు.జలుజ్నీకి ప్రజల్లో ఆదరణకీవ్‌కు చెందిన రేటింగ్‌ గ్రూప్‌ అక్టోబర్‌ 8న విడుదల చేసిన సర్వే ప్రకారం.. జలుజ్నీపై 64 శాతం మంది ఉక్రెయిన్‌ ప్రజలు విశ్వాసం వ్యక్తం చేశారు. 25 శాతం మంది ఆయనపై అవిశ్వాసం ప్రకటించారు. 2022లో రష్యా దాడుల సమయంలో కీవ్‌ రక్షణలో, అనంతరం ఎదురుదాడుల్లో ఆయన కీలక పాత్ర పోషించారు. రష్యా అధీనంలో ఉన్న భూభాగంలో 40 శాతాన్ని ఉక్రెయిన్‌ తిరిగి స్వాధీనం చేసుకోవడంలో ఆయన నాయకత్వం వహించారు. అయితే, 2023లో ఎదురుదాడి ఆశించిన ఫలితాలు ఇవ్వకపోవడంతో ఆయనను సైనికాధిపతి పదవి నుంచి తొలగించారు.బుడనోవ్‌, ఫెడొరోవ్‌ కూడా పోటీలోబుడనోవ్‌(40)పై 53 శాతం మంది విశ్వాసం వ్యక్తం చేయగా, 31 శాతం మంది అవిశ్వాసం ప్రకటించారు. గతంలో సైనిక గూఢచర్య విభాగానికి నాయకత్వం వహించిన ఆయన.. రష్యాపై పలు సాహసోపేత కార్యకలాపాలకు నేతృత్వం వహించారు. ఫెడొరోవ్‌ (35) మంత్రిగా పనిచేసి, ప్రభుత్వ సేవలను ఆన్‌లైన్‌లో అందించే వ్యవస్థల అభివృద్ధికి కృషి చేశారు. రక్షణ మంత్రిగా ఆయుధాల కొనుగోళ్లలో పారదర్శకత, డ్రోన్ల వినియోగం పెంపుపై దృష్టి పెట్టారు. ఆయనపై ప్రజల ఆమోదం జూన్‌లో 35 శాతం నుంచి జులైలో 65 శాతానికి పెరిగింది. అయితే, ఎన్నికలు నిర్వహించాలన్న ఆయన వ్యాఖ్యల తర్వాత ఆమోదం 38 శాతానికి తగ్గింది.ఇతర నేతల పరిస్థితి ఏమిటి?ఫెడొరోవ్‌ స్థానంలో జులైలో రక్షణ మంత్రిగా బాధ్యతలు చేపట్టిన యెవెనీ ఖ్మారాపై 29 శాతం మంది విశ్వాసం వ్యక్తం చేశారు. 16 శాతం మంది అవిశ్వాసం ప్రకటించగా, 43 శాతం మందికి ఆయన ఎవరో తెలియదని సర్వే తెలిపింది. విదేశాంగ మంత్రి ఆండ్రి సిబిహా, మాజీ అధ్యక్షుడు పెట్రో పోరోషెంకోపై విశ్వాసం వ్యక్తం చేసినవారు 24 శాతం చొప్పున ఉన్నారు.అయితే, పోరోషెంకోపై 70 శాతం మంది అవిశ్వాసం ప్రకటించారు. జెలెన్‌స్కీపై 53 శాతం మంది విశ్వాసం వ్యక్తం చేయగా, 40 శాతం మంది అవిశ్వాసం ప్రకటించారు. 2019 ఎన్నికల్లో ఆయనకు 73 శాతం ఓట్లు వచ్చాయి. ట్రంప్‌తో విభేదాలు, యుద్ధ నిర్వహణ, అవినీతి ఆరోపణలు, ప్రజాభిప్రాయం రానున్న ఎన్నికల్లో కీలకమయ్యే అవకాశముంది. అయితే, ఎన్నికలు ఎప్పుడు జరుగుతాయన్నది కాల్పుల విరమణ, యుద్ధ పరిస్థితులపై ఆధారపడి ఉంటుంది.

పశ్చిమాసియాలో మరో యుద్ధం ముంచుకొస్తోందా? యెమెన్‌లోని హౌతీ రెబల్స్‌ సౌదీ అరేబియాపై దాడులను తీవ్రతరం చేయడంతో ఈ ప్రశ్న తలెత్తుతోంది. రాజధాని రియాద్‌లోని ప్రధాన విమానాశ్రయాన్ని లక్ష్యంగా చేసుకుని వరుస దాడులు జరగడం, మరోవైపు ఎర్ర సముద్రానికి దక్షిణ ప్రవేశ ద్వారమైన బాబ్ అల్-మండేబ్ సమీపంలో పోరు ఉధృతం కావడం పరిస్థితిని మరింత ప్రమాదకరంగా మార్చాయి. ఈ దాడుల్లో అమెరికా పౌరుడు కూడా మరణించడంతో అధ్యక్షుడు డొనాల్డ్‌ ట్రంప్‌పై స్పందించాలన్న ఒత్తిడి పెరుగుతోంది. అమెరికా నేరుగా రంగంలోకి దిగితే ఈ ఘర్షణ మరింత విస్తరించే ప్రమాదం ఉంది.యెమెన్‌లో ప్రభుత్వ దళాలు, హౌతీ తిరుగుబాటుదారుల మధ్య ఘర్షణలు మళ్లీ తీవ్రరూపం దాల్చుతున్నాయి. సౌదీ మద్దతుతో యెమెన్‌ ప్రభుత్వ దళాలు హౌతీల ఆధీనంలోని ప్రాంతాలపై ఒత్తిడి పెంచుతుండగా.. హౌతీలు సౌదీ భూభాగాన్ని లక్ష్యంగా చేసుకుని దాడులు చేస్తున్నారు. క్షిపణులు, డ్రోన్లతో దాడులకు దిగడం వల్ల ప్రాంతీయ భద్రతపై ఆందోళనలు పెరుగుతున్నాయి. ఇటీవలి దాడుల్లో ప్రాణనష్టం, గాయాల సంఖ్య పెరగడం పరిస్థితి తీవ్రతను సూచిస్తోంది. సౌదీపై దాడులు కొనసాగితే యెమెన్‌లో ఇప్పటికే ఉన్న సంఘర్షణ పొరుగు దేశాలకు విస్తరించే ప్రమాదం ఉందన్న ఆందోళన వ్యక్తమవుతోంది.అమెరికా ఏం చేయబోతోంది?ఇప్పటికే ఈ దాడుల్ని ట్రంప్‌ ఆమోద యోగ్యం కాదని అన్నారు. అయితే అమెరికన్‌ మృతిపై మాత్రం ఆయన ఇంకా స్పందించాల్సి ఉంది. సౌదీ అరేబియా అమెరికాకు కీలక ప్రాంతీయ భాగస్వామి. ఆ దేశంపై దాడులు పెరిగి, అమెరికా పౌరుల ప్రాణాలకు ముప్పు ఏర్పడితే వాషింగ్టన్‌ స్పందన ఎలా ఉంటుందన్నది ఇప్పుడు ప్రధాన ప్రశ్న. హౌతీలపై ప్రత్యక్ష సైనిక చర్యకు దిగాలా? లేదంటే సౌదీ రక్షణ వ్యవస్థలకు సహకారం అందిస్తూ పరిస్థితిని అదుపులో ఉంచాలా? అనే అంశాలపై అమెరికా నిర్ణయం కీలకం కానుంది.అమెరికా నేరుగా దాడులకు దిగితే హౌతీలు ప్రతీకార చర్యలకు పాల్పడే అవకాశముంది. దాంతో సౌదీతోపాటు ఎర్ర సముద్రం, గల్ఫ్‌ ప్రాంతాల్లో భద్రతా పరిస్థితులు మరింత సంక్లిష్టంగా మారొచ్చు. మరోవైపు, సైనిక చర్యకు బదులుగా దౌత్యపరమైన ఒత్తిడి, రక్షణ సహకారం వంటి మార్గాలను ఎంచుకుంటే ఘర్షణ విస్తరణను అడ్డుకునే అవకాశం ఉంటుంది. ట్రంప్‌ ప్రభుత్వం తీసుకునే నిర్ణయం ఈ ప్రాంత భవిష్యత్‌ పరిణామాలపై ప్రభావం చూపనుంది.బాబ్‌ అల్‌-మండేబ్‌ వద్ద కీలక పోరుఎర్ర సముద్రాన్ని గల్ఫ్‌ ఆఫ్‌ అడెన్‌తో కలిపే బాబ్‌ అల్‌-మండేబ్‌ జలసంధి అంతర్జాతీయ వాణిజ్యానికి అత్యంత కీలకం. ఈ మార్గం గుండా నౌకలు సూయజ్‌ కాలువ వైపు ప్రయాణిస్తాయి. ఇక్కడ నౌకాయానానికి అంతరాయం ఏర్పడితే ఆసియా–యూరప్‌ మధ్య సరుకు రవాణా ఆలస్యమవడంతోపాటు రవాణా ఖర్చులు పెరిగే అవకాశం ఉంది. యెమెన్‌ తీర ప్రాంతాల్లో హౌతీల ప్రభావం, సముద్ర మార్గాలపై దాడుల ముప్పు కారణంగా అంతర్జాతీయంగా ఈ ప్రాంతంపై నిఘా పెరిగింది. సౌదీపై దాడులు, బాబ్‌ అల్‌-మండేబ్‌ వద్ద ఉద్రిక్తతలు ఒకేసారి పెరిగితే సమస్య కేవలం రెండు పక్షాల మధ్య ఘర్షణగా మిగలదు. అంతర్జాతీయ వాణిజ్యం, చమురు సరఫరా, సముద్ర భద్రతపైనా ప్రభావం పడవచ్చు.పాకిస్తాన్‌, టర్కీ సాయం ఎంతవరకు?సౌదీ అరేబియా తన భద్రత కోసం ప్రాంతీయ భాగస్వాముల సహకారాన్ని కోరే అవకాశం ఉంది. పాకిస్తాన్‌, టర్కీతో సౌదీకి ఉన్న రక్షణ సంబంధాలు ఈ నేపథ్యంలో ప్రాధాన్యం సంతరించుకుంటాయి. అయితే, రక్షణ ఒప్పందాలు ఉన్నంత మాత్రాన ఈ దేశాలు నేరుగా యుద్ధంలోకి దిగుతాయని చెప్పలేం. ఎలాంటి దాడి జరిగితే ఎలాంటి సహకారం అందించాలి? అది రక్షణకే పరిమితమా? లేక ప్రత్యక్ష సైనిక చర్యకూ విస్తరిస్తుందా? అనేది ఆయా దేశాల నిర్ణయాలు, ఒప్పంద నిబంధనలపై ఆధారపడి ఉంటుంది.సౌదీకి రక్షణ సహకారం పెరిగితే హౌతీల దాడులను అడ్డుకునే సామర్థ్యం మెరుగుపడవచ్చు. అదే సమయంలో, అనేక దేశాలు ప్రత్యక్షంగా జోక్యం చేసుకుంటే ఘర్షణ మరింత విస్తరించే ప్రమాదమూ ఉంది. అందుకే సైనిక సన్నద్ధతతోపాటు దౌత్యపరమైన చర్చలు కూడా కీలకం కానున్నాయి.పెట్టుబడులు, చమురు మార్కెట్లపై ప్రభావంపశ్చిమాసియాలో ఉద్రిక్తతలు పెరిగినప్పుడల్లా చమురు మార్కెట్లు, అంతర్జాతీయ పెట్టుబడిదారులు అప్రమత్తమవుతారు. సౌదీ అరేబియా చమురు ఉత్పత్తిలో కీలక దేశం కావడంతో అక్కడి భద్రతకు ముప్పు ఏర్పడితే ధరల్లో ఒడిదుడుకులు తలెత్తవచ్చు. ఎర్ర సముద్రం, బాబ్‌ అల్‌-మండేబ్‌ మార్గాల్లో నౌకాయానానికి అంతరాయం కలిగితే సరుకు రవాణా ఖర్చులు కూడా పెరిగే అవకాశం ఉంది.సౌదీ చేపడుతున్న భారీ అభివృద్ధి ప్రాజెక్టులు, విదేశీ పెట్టుబడులపై కూడా దీర్ఘకాలిక అస్థిరత ప్రభావం చూపవచ్చు. అయితే, దాడులు జరిగినంత మాత్రాన చమురు సరఫరా లేదంటే పెట్టుబడులకు తక్షణమే భారీ నష్టం వాటిల్లుతుందని భావించలేం. దాడుల తీవ్రత, వాటి కొనసాగింపు, కీలక మౌలిక సదుపాయాలకు జరిగే నష్టం వంటి అంశాలే ప్రభావాన్ని నిర్ణయిస్తాయి.యుద్ధం విస్తరిస్తుందా?ప్రస్తుతం ప్రధానంగా గమనించాల్సిన అంశాలు మూడు. సౌదీపై హౌతీల దాడులు కొనసాగుతాయా? అమెరికా ప్రత్యక్ష సైనిక చర్యకు దిగుతుందా? బాబ్‌ అల్‌-మండేబ్‌ వంటి కీలక సముద్ర మార్గాల్లో భద్రతకు ముప్పు పెరుగుతుందా? వీటికి లభించే సమాధానాలే తదుపరి పరిణామాలను నిర్దేశించనున్నాయి. సౌదీపై దాడులకు ప్రతిగా పెద్ద ఎత్తున సైనిక చర్యలు జరిగితే యెమెన్‌ ఘర్షణ ప్రాంతీయ యుద్ధంగా మారే ప్రమాదం ఉంది. అదే సమయంలో, దౌత్యపరమైన ప్రయత్నాలు, రక్షణ చర్యలు పరిస్థితిని అదుపులోకి తీసుకురావొచ్చు. ఒక్కో దాడి వెనుక వ్యూహం ఏమిటి? దానికి ప్రతిస్పందనగా ఏ దేశం ఎలాంటి నిర్ణయం తీసుకుంటుంది? అన్నదే ఇప్పుడు అంతర్జాతీయంగా ఆసక్తి రేపుతోంది.BIG BREAKING 🇸🇦 Houthis Launched Another Fresh attack on Riyadh, Saudi Arabia; One Indian k*lled, 11 people injured in this attack; Airport operations have been suspended. #Houthis #DroneAttack #RiyadhAirport #SaudiArabia https://t.co/EywQwa2AJt— Kamalraj Singh (@kamalrajsingh_) October 12, 2026ఇదీ చదవండి: హర్ముజ్‌పై ఊహించని ట్విస్ట్‌

అమెరికాతో చర్చలకు ఇరాన్‌ కొత్త మెలిక పెట్టింది. ప్రపంచ చమురు రవాణాకు అత్యంత కీలకమైన హార్ముజ్‌ జలసంధిని తిరిగి తెరవాలంటే తమ ఏడు షరతులను అంగీకరించాల్సిందేనని తేల్చిచెప్పింది. వాషింగ్టన్‌ స్పందన తమకు సంతృప్తికరంగా లేదని, కొన్ని అంశాలపై ఇంకా స్పష్టత రావాల్సి ఉందని ఇరాన్‌ భద్రతా మండలి కార్యదర్శి మొహ్సేన్‌ రెజాయ్‌ ప్రకటించారు. దీంతో ఇరాన్‌-అమెరికా మధ్య దౌత్య ప్రయత్నాలు మరోసారి సందిగ్ధంలో పడ్డాయి.కాగా, అమెరికా నుంచి వచ్చిన ప్రతిపాదనలో కొన్ని షరతులను అంగీకరించినప్పటికీ, మరికొన్నింటిపై స్పష్టత లేదని రెజాయ్‌ వెల్లడించారు. తమ ఏడు షరతులు నెరవేరే వరకు అమెరికాకు హార్ముజ్‌ జలసంధిని తెరిచే ప్రసక్తే లేదని, చర్చలు కూడా ముందుకు సాగవని స్పష్టం చేశారు. ఖతార్‌ మధ్యవర్తిత్వంతో ఇరు దేశాల మధ్య సందేశాల మార్పిడి జరుగుతున్నప్పటికీ, ప్రధానంగా ఏ అంశాన్ని ముందుగా అమలు చేయాలన్న దానిపై విభేదాలు ఉన్నట్లు సమాచారం.అణు చర్చలకు ఇప్పట్లో నో!మరోవైపు.. ప్రస్తుత చర్చల్లో ఇరాన్‌ అణు కార్యక్రమాన్ని చేర్చడాన్ని టెహ్రాన్‌ వ్యతిరేకిస్తోంది. తమ తక్షణ ప్రాధాన్యం హార్ముజ్‌ జలసంధిలో భద్రతను పునరుద్ధరించడమేనని ఇరాన్‌ విదేశాంగ శాఖ అధికార ప్రతినిధి ఇస్మాయిల్‌ బఘాయీ తెలిపారు. అణు కార్యక్రమంపై చర్చలకు బదులుగా ఆంక్షల సడలింపు పొందేందుకు ఐక్యరాజ్యసమితి అణు పర్యవేక్షణ సంస్థ తనిఖీలకు ఇరాన్‌ అంగీకరించిందన్న వార్తలను కూడా ఆయన ఖండించారు.అక్టోబర్‌ 4న ఇరాన్‌ పార్లమెంట్‌ స్పీకర్‌ మహమ్మద్‌ బాఖెర్‌ ఖాలిబాఫ్‌ సైతం ఏడు షరతులు నెరవేరే వరకు అమెరికాకు జలసంధిని తెరిచేది లేదని ప్రకటించారు.త్వరలోనే యుద్ధం ముగిస్తాం: ట్రంప్‌అమెరికా అధ్యక్షుడు డొనాల్డ్‌ ట్రంప్‌ మాత్రం యుద్ధాన్ని త్వరగానే ముగించగలమని వ్యాఖ్యానించారు. ఇరాన్‌ వైఖరిలో కొంత మార్పు కనిపిస్తోందని పేర్కొంటూనే, నవంబర్‌ 3న జరిగే అమెరికా మధ్యంతర ఎన్నికలకు ముందు ఉద్రిక్తతలు పెంచే అవకాశం ఉందని హెచ్చరించారు. ఇరాన్‌తో చర్చలు కొనసాగుతున్నప్పటికీ అమెరికా దిగ్బంధం మాత్రం కొనసాగుతుందని గతంలో స్పష్టం చేశారు. ఇరాన్‌ అణ్వాయుధాన్ని పొందేందుకు అనుమతించబోమని మరోసారి ప్రకటించారు.ఇక, అమెరికా దౌత్య ప్రయత్నాలను పక్కనపెట్టి సైనిక చర్యలకు దిగితే తాము గతంలో కంటే మెరుగైన సన్నద్ధతతో ఉన్నామని ఇరాన్‌ విదేశాంగ మంత్రి అబ్బాస్‌ అరాగ్చీ హెచ్చరించారు. దేశ రక్షణ కోసం అవసరమైన అన్ని చర్యలు తీసుకుంటామని స్పష్టం చేశారు. తమ క్షిపణుల పరిధిని పెంచనున్నట్లు ఇరాన్‌ సైనిక వర్గాలు కూడా ప్రకటించాయి.సౌదీలో ఉద్రిక్తత..ఇదిలా ఉండగా, సౌదీ అరేబియాలోని రియాద్‌ కింగ్‌ ఖాలిద్‌ అంతర్జాతీయ విమానాశ్రయంపై జరిగిన క్షిపణి దాడి ప్రాంతీయ ఉద్రిక్తతలను మరింత పెంచింది. ఈ దాడిలో ఇప్పటి వరకు 13 మంది ప్రాణాలు కోల్పోగా, వందలాది మంది గాయపడినట్లు సౌదీ అధికారులు వెల్లడించారు. రియాద్‌పై దాడికి ఇరాన్‌ మద్దతున్న హౌతీ తిరుగుబాటుదారులే కారణం కాగా.. ఈ దాడిని ట్రంప్‌ తీవ్రంగా ఖండించారు. హౌతీలపై సౌదీ సైనిక చర్యల్లో అమెరికా కూడా పాల్గొనే అవకాశాన్ని పరిశీలిస్తున్నట్లు తెలిపారు. అమెరికా విదేశాంగ మంత్రి మార్కో రూబియో సైతం దాడిని ఖండించారు.దాడి నేపథ్యంలో రియాద్‌ విమానాశ్రయంలో విమాన కార్యకలాపాలకు అంతరాయం ఏర్పడింది. పలు విమానాలను రద్దు చేయగా, మరికొన్నింటిని ఇతర విమానాశ్రయాలకు మళ్లించినట్లు విమాన ట్రాకింగ్‌ సంస్థలు వెల్లడించాయి. మొత్తంగా.. హార్ముజ్‌ జలసంధి తెరవడం, ఇరాన్‌ అణు కార్యక్రమం, అమెరికా ఆంక్షలు, సౌదీపై దాడులు.. ఇలా పలు అంశాలు ఒకదానితో మరొకటి ముడిపడటంతో యుద్ధానికి ముగింపు పలికే దౌత్య ప్రయత్నాలు కఠినంగా మారుతున్నాయి. ఇదీ చదవండి: పెను సంక్షోభం దిశగా ప్రపంచం.. భారత్‌కూ తప్పని సెగ!

వాషింగ్టన్‌: వైరిపక్షాలైన రష్యా, ఉక్రెయిన్‌లు ‘ఇంధన కాల్పుల విరమణ’కు అంగీకరించాయని అమెరికా అధ్యక్షుడు డొనాల్డ్‌ ట్రంప్‌ తెలిపారు. అయితే, పూర్తి వివరాలు వెల్లడించలేదు. ట్రంప్‌ ఆదివారం సోషల్‌ మీడియాలో ఒక పోస్టుచేశారు. ఇంధన కాల్పుల విరమణ(ఎనర్జీ సీజ్‌ఫైర్‌) ఇరు పక్షాలు అంగీకరించాయని, తక్షణమే అమల్లోకి వచ్చిందని పేర్కొన్నారు. ఈ ఒప్పందాన్ని ఉల్లంఘించవద్దని రష్యా, ఉక్రెయిన్‌లకు సూచించారు. ట్రంప్‌ ప్రకటనపై ఉక్రెయిన్‌ అధ్యక్షుడు జెలెన్‌స్కీ స్పందించారు. అమెరికా అధ్యక్షుడు ప్రకటించిన ఇంధన కాల్పుల విరమణ గురించి తాము చర్చించామని అన్నారు. ఈ కాల్పుల విరమణకు ఉక్రెయిన్‌ మద్దతు ఇస్తుందని వెల్లడించారు. దీనికి రష్యా సైతం మద్దతు ఇవ్వడం ముఖ్యం అని స్పష్టంచేశారు. ఉక్రెయిన్‌ ఇంధన వ్యవస్థపై రష్యా దాడులను నిలిపివేస్తే, రష్యా రిఫైనరీలపై దాడులను ఆపడానికి ఉక్రెయిన్‌ సిద్ధంగా ఉందని తేల్చిచెప్పారు. దీనికి అంగీకరించేలా రష్యాపై ఒత్తిడి తేవాలని ట్రంప్‌ను కోరారు. అయితే, ట్రంప్‌ చెబుతున్న ఎనర్జీ సీజ్‌ఫైర్‌పై రష్యా ఇంకా ఎలాంటి ప్రకటన చేయలేదు. మరోవైపు ఉక్రెయిన్‌కు కొత్త అధ్యక్షుడు రావలసిన సమయం ఆసన్నమైందని, యుద్ధాన్ని ముగించడానికి జెలెన్‌స్కీ తగినంతగా కృషి చేయలేదని ట్రంప్‌ శనివారం స్పష్టంచేశారు. అమెరికాలో డీజిల్‌ ధరలు పెరగడానికి జెలెన్‌స్కీ కారణమని ఆరోపించారు. ఇంతలోనే ఉక్రెయిన్, రష్యా మధ్య ఇంధన కాల్పుల విరమణ ఒప్పందం కుదరిందని ట్రంప్‌ ప్రకటించడం ప్రాధాన్యం సంతరించుకుంది.

అమెరికా తీరాన్ని మరోసారి హరికేన్‌ వణికించింది. బలమైన గాలులు.. ఇళ్లపై కూలిన చెట్లు.. దెబ్బతిన్న భవనాలు.. నిలిచిపోయిన విద్యుత్‌ సరఫరా.. తాగునీటి కొరత.. ఇలా హరికేన్‌ ఇసాయాస్‌ ప్రభావంతో ఫ్లోరిడా సహా పలు రాష్ట్రాలు ఇబ్బందులు ఎదుర్కొంటున్నాయి. ఈ తుపాను కారణంగా నలుగురు మరణించగా, లక్షలాది మంది విద్యుత్‌ లేక అంధకారంలో చిక్కుకున్నారు. తుపాను బలహీనపడినా.. వరదలు, టోర్నడోల ముప్పు మాత్రం వెంటాడుతోంది. గతంలో అమెరికాను అతలాకుతలం చేసిన ఇయాన్‌, కత్రినా వంటి హరికేన్లను గుర్తుచేస్తూ తాజా పరిణామాలు ఆందోళన కలిగిస్తున్నాయి.2026 అట్లాంటిక్‌ తుపాను సీజన్‌లో తొలి హరికేన్‌గా నమోదైన ఇసాయాస్‌.. ఫ్లోరిడా తీరాన్ని రెండో కేటగిరీ హరికేన్‌గా తాకింది. తీరాన్ని తాకిన తర్వాత బలహీనపడినప్పటికీ, దాని ప్రభావం విస్తృత ప్రాంతాల్లో కనిపించింది. ఫ్లోరిడా, అలబామా, జార్జియా, మిసిసిపీ రాష్ట్రాల్లో సుమారు 6.7 లక్షల మంది విద్యుత్‌ సరఫరా కోల్పోయినట్లు ప్రాథమిక సమాచారం వెల్లడించింది. మరోవైపు, తుపాను ప్రభావం మొదలైన తొలి గంటల్లో దాదాపు 9 లక్షల మంది వినియోగదారులకు విద్యుత్‌ అంతరాయం ఏర్పడినట్లు అసోసియేటెడ్‌ ప్రెస్‌ నివేదించింది. తుపాను గాలులకు పెన్సకోలాలోని ఓ హోటల్‌ పైకప్పు దెబ్బతింది. పనామా సిటీ బీచ్‌లో ఎత్తైన భవనం దాదాపు కూలిపోయింది. డెస్టిన్‌లో పడవల షెడ్‌ ధ్వంసమైంది. చెట్లు ఇళ్లపై కూలడంతో ప్రాణనష్టం సంభవించింది. పెన్సకోలా విమానాశ్రయం దెబ్బతినడంతో వాణిజ్య విమానాల రాకపోకలను నిలిపివేశారు. అలబామాలో చెట్లు, విద్యుత్‌ లైన్లు రహదారులపై పడటంతో ప్రయాణాలపైనా ఆంక్షలు విధించారు.Hurricane Isaias left at least four dead in the US and cut power to nearly 900,000 customers. With homes destroyed, trees downed, and torrential rains, the storm has put southeastern US states at risk of flash floods. https://t.co/Cpd9mB5V3H— IRNA News Agency ☫ (@IrnaEnglish) October 11, 2026గతంలోనూ ఇసాయాస్‌ బీభత్సం.. ఇసాయాస్‌ అనే పేరు అమెరికాకు కొత్త కాదు. 2020లోనూ ఇదే పేరుతో వచ్చిన హరికేన్‌ అమెరికా తూర్పు తీరాన్ని తీవ్రంగా ప్రభావితం చేసింది. అప్పట్లో అది నార్త్‌ కరోలినా తీరాన్ని గంటకు సుమారు 85 మైళ్ల వేగంతో వీచే గాలులతో తాకింది. ఆ తుపాను కారణంగా అమెరికా వ్యాప్తంగా దాదాపు 30 లక్షల మంది వినియోగదారులు విద్యుత్‌ కోల్పోయారు. 39 టోర్నడోలు ఏర్పడగా, అమెరికా సహా ప్రభావిత ప్రాంతాల్లో పది మృతి చెందారు. నష్టం సుమారు 4.8 బిలియన్‌ డాలర్లుగా అంచనా వేశారు. అయితే, 2020 ఇసాయాస్‌, 2026 ఇసాయాస్‌ వేర్వేరు తుపానులు. అయినప్పటికీ, గత అనుభవాలు తుపాను బలహీనపడిన తర్వాత కూడా విద్యుత్‌ అంతరాయాలు, వరదలు, టోర్నడోలు ఎంతటి నష్టాన్ని కలిగించగలవో గుర్తుచేస్తున్నాయి.🚨 BREAKING: Fort Walton Beach, Florida. Hurricane 💨🌊 Boats are struggling to stay afloat in rough waters at Fort Walton Beach, Florida, as Hurricane Isaias continues its approach toward landfall. Pray for everyone's peace. 🙏❤✝️ https://t.co/ggaqZvMhdL— vanhoa (@vanhoa2272) October 9, 2026ఇయాన్‌.. కత్రినా.. అమెరికా చరిత్రలో అత్యంత భయానక తుపానుల్లో 2022లో వచ్చిన హరికేన్‌ ఇయాన్‌ ఒకటి. అది నాలుగో కేటగిరీ స్థాయిలో ఫ్లోరిడాను తాకి భారీ విధ్వంసం సృష్టించింది. దాని వల్ల జరిగిన నష్టం సుమారు 119.6 బిలియన్‌ డాలర్లుగా అంచనా వేశారు. ఫోర్ట్‌ మైయర్స్‌ బీచ్‌ ప్రాంతంలో సముద్రపు అలల ఉద్ధృతి సుమారు 15 అడుగుల ఎత్తు వరకు చేరింది. ఇక 2005లో వచ్చిన కత్రినా హరికేన్‌ అమెరికా చరిత్రలో అత్యంత వినాశకరమైన తుపానుల్లో ఒకటిగా నిలిచింది. మిసిసిపీ తీరంలో సముద్రపు అలల ఉద్ధృతి సాధారణ అలల స్థాయికి మించి సుమారు 24 అడుగులకు చేరగా, అమెరికాలో నమోదైన అత్యధిక తుపాను అలల ఉద్ధృతి రికార్డుల్లో కత్రినా 25 నుంచి 28 అడుగుల స్థాయితో నిలిచింది.చమురు ఉత్పత్తికి దెబ్బ.. హరికేన్‌ ప్రభావంతో గల్ఫ్‌ ఆఫ్‌ మెక్సికోలో చమురు, సహజ వాయువు ఉత్పత్తి నిలిచిపోయింది. షెల్‌, చెవ్రాన్‌ సంస్థలు తమ ఉత్పత్తి కేంద్రాలకు సిబ్బందిని తిరిగి పంపించే ప్రక్రియను ప్రారంభించినప్పటికీ.. శనివారం నాటికి చమురు ఉత్పత్తిలో సుమారు 69 శాతం, సహజ వాయువు ఉత్పత్తిలో 57 శాతం నిలిచిపోయాయి. ఇంధన సరఫరాలో అంతరాయాన్ని ఎదుర్కొనేందుకు అమెరికా వ్యూహాత్మక చమురు నిల్వల నుంచి గరిష్ఠంగా 40 లక్షల బ్యారెళ్ల ముడిచమురును అత్యవసర మార్పిడి పద్ధతిలో అందించేందుకు ఇంధన శాఖ అనుమతించింది. 🌀🇺🇸Watch: Hurricane #Isaias strikes U.S coast with 200kmph wind gust Severe flooding in Coastal areas🌊 https://t.co/ingQkudOrn— World_Breaking_News03 (@Breaking2003) October 10, 2026ఇదీ చదవండి: పెను సంక్షోభం దిశగా ప్రపంచం.. భారత్‌కూ తప్పని సెగ!

సౌదీ అరేబియా రాజధాని రియాద్‌లో క్షిపణులు గర్జించాయి.. విమానాశ్రయం రక్తసిక్తమైంది.. 12 మంది ప్రాణాలు కోల్పోగా, మరో 309 మంది గాయపడినట్టు సమాచారం. రియాద్‌పై జరిగిన ఈ దాడి ఇప్పుడు మధ్యప్రాచ్యాన్ని మరోసారి యుద్ధం అంచులకు తీసుకెళ్తోంది. ఈ పరిణామంపై అమెరికా అధ్యక్షుడు డొనాల్డ్‌ ట్రంప్‌ తీవ్రంగా స్పందించారు. ‘ఇది ఏమాత్రం ఆమోదయోగ్యం కాదు’ అంటూ హెచ్చరికలు జారీ చేశారు. అంతేకాదు.. హౌతీలపై సౌదీ అరేబియా చేపడుతున్న సైనిక చర్యల్లో అమెరికా కూడా చేరే అవకాశాన్ని తెరపైకి తెచ్చారు. అదే జరిగితే యెమెన్‌లో కొనసాగుతున్న ఘర్షణ మరింత విస్తరించే ప్రమాదం ఉంది. ఇంతకీ ట్రంప్‌ నేరుగా యుద్ధంలోకి దిగుతారా? హౌతీలకు అమెరికా ఎలాంటి సంకేతాలు పంపుతోంది?.రియాద్‌ విమానాశ్రయంపై దాడి నేపథ్యంలో హౌతీలకు వ్యతిరేకంగా సౌదీ అరేబియా చేపడుతున్న సైనిక చర్యల్లో అమెరికా చేరే అవకాశాన్ని ట్రంప్‌ పరిశీలిస్తున్నారు. ఈ అంశంపై విలేకరులు ప్రశ్నించగా.. ‘చేరవచ్చు.. దీన్ని పరిశీలిస్తాం. ఈ దాడి గురించి ఇప్పుడే తెలుసుకున్నాం. నిర్ణయం తీసుకుంటాం.. మేం చాలా వేగంగా కదులుతాం’ అని ఆయన వ్యాఖ్యానించారు. దీంతో అమెరికా ప్రత్యక్ష సైనిక జోక్యంపై చర్చ మొదలైంది. అయితే, అమెరికా ఇప్పటికే యుద్ధంలోకి దిగాలని నిర్ణయించుకున్నట్లు ప్రకటించలేదు. హౌతీలపై చర్యలకు సంబంధించి ఇంకా నిర్ణయం తీసుకోవాల్సి ఉందని ట్రంప్‌ మాటలు స్పష్టం చేస్తున్నాయి. సౌదీ యువరాజు మహమ్మద్‌ బిన్‌ సల్మాన్‌తో మాట్లాడనున్నట్లు కూడా ఆయన వెల్లడించారు.🚨 SHOCKING VISUALS FROM RIYADH, SAUDI ARABIA 🇸🇦 A missile attack by Iran-backed Houthi rebels from Yemen on King Khalid International Airport has left 12 people dead and over 300 injured, including a US citizen. 🇺🇸 Meanwhile, After Pakistan's failure to help its umah brother, US President Donald Trump has hinted at joining Saudi strikes against the Houthis, saying: “We may. We’re going to look at it… We move very quickly.” This isn't distant crossfire anymore, it's a full-scale international inferno. https://t.co/TfSPgNYTKY— Megh Updates 🚨™ (@MeghUpdates) October 11, 2026అమెరికా హెచ్చరిక.. హౌతీలపై ఒత్తిడిఅమెరికా విదేశాంగ మంత్రి మార్కో రూబియో సైతం రియాద్‌ విమానాశ్రయంపై దాడిని తీవ్రంగా ఖండించారు. అమాయక పౌరుల ప్రాణాలను లెక్కచేయని దాడులుగా అభివర్ణించారు. సౌదీ అధికారులతో అమెరికా సంప్రదింపులు కొనసాగిస్తున్నట్లు విదేశాంగ శాఖ తెలిపింది. మరోవైపు.. సౌదీపై దాడులకు తమదే బాధ్యత అంటూ హౌతీ మిలీషియా ‍‍ప్రకటించింది. యెమెన్‌పై సౌదీ జరుపుతున్న దాడులకు ప్రతీకారంగానే ఈ దాడులు చేసినట్టు తాజాగా ఓ ప్రకటనలో పేర్కొంది. కాగా, ఈ ఏడాది ఫిబ్రవరిలో అమెరికా-ఇజ్రాయెల్‌ యుద్ధం ప్రారంభమైన తర్వాత గల్ఫ్‌ దేశాలపై జరిగిన అ‍త్యంత ప్రాణాంతక దాడికి ఇది రికార్డుల్లోకి ఎక్కింది.🚨Última hora: 🇾🇪🇸🇦| Está sucediendo ahora mismo. Incendios masivos en el MAYOR CAMPO PETROLIFERO del mundo, Campo de Al Ghawar al este de Arabia Saudí esta ardiendo. Ansarullah habían advertido a las potencias occidentales y a Arabia Saudí que pagaran su agresión al Yemen. https://t.co/XP1OruZI9g— 🔻🇲🇷 MADIBA.🇪🇭🇵🇸🇩🇿🇨🇺🇲🇽 (@MADIBA1150270) October 10, 2026విమానాశ్రయం మూసివేత.. హౌతీల క్షిపణి దాడి నేపథ్యంలో రియాద్‌లోని కింగ్‌ ఖాలిద్‌ అంతర్జాతీయ విమానాశ్రయంలో కార్యకలాపాలను తాత్కాలికంగా నిలిపివేశారు. వందలాది విమానాల రాకపోకలకు అంతరాయం ఏర్పడింది. విమానాలను ఇతర విమానాశ్రయాలకు మళ్లించాల్సి వచ్చింది. అమెరికా, బ్రిటన్‌, కెనడా సహా పలు దేశాలు తమ పౌరులకు విమానాశ్రయం పరిసరాలకు వెళ్లవద్దని సూచించాయి. ఇదిలా ఉండగా.. సౌదీ తూర్పు ప్రాంతంలోని దమ్మామ్‌ కింగ్‌ ఫహద్‌ అంతర్జాతీయ విమానాశ్రయం సమీపంలోనూ క్షిపణి దాడులు జరిగినట్టు తెలుస్తోంది. దీంతో దేశంలోని కీలక విమానయాన కేంద్రాల భద్రతపై ఆందోళనలు పెరిగాయి.ప్రాంతీయ యుద్ధంగా మారుతుందా?యెమెన్‌లో హౌతీలకు, సౌదీ మద్దతు ఉన్న ప్రభుత్వ దళాలకు మధ్య ఘర్షణలు తీవ్రతరం అవుతున్నాయి. ఎర్ర సముద్రానికి కీలకమైన బాబ్‌ అల్‌-మండేబ్‌ జలసంధి పరిసరాల్లోనూ పోరు ఉధృతమవుతోంది. ఈ మార్గం అంతర్జాతీయ వాణిజ్యానికి, ఇంధన రవాణాకు వ్యూహాత్మకంగా కీలకం. ఈ నేపథ్యంలో రియాద్‌ విమానాశ్రయంపై దాడి పరిస్థితిని మరింత క్లిష్టం చేసింది. ఇప్పటికే సౌదీ నేతృత్వంలోని కూటమి హౌతీ స్థావరాలపై దాడులు చేస్తుండగా.. అమెరికా కూడా సైనికంగా జోక్యం చేసుకుంటే ఘర్షణ మరింత విస్తరించే అవకాశం ఉంది. అయితే, అమెరికా ప్రత్యక్షంగా పాల్గొంటుందా? లేదా సౌదీకి ఇతర రూపాల్లో సహకరిస్తుందా? అన్నది ఇంకా స్పష్టత రావాల్సి ఉంది. ప్రస్తుతం ట్రంప్‌ చేసిన వ్యాఖ్యలు హౌతీలపై సైనిక ఒత్తిడి పెంచే సంకేతాలుగా కనిపిస్తున్నాయి. కానీ మాటల నుంచి సైనిక చర్యల వరకు అమెరికా ఎలాంటి నిర్ణయం తీసుకుంటుందన్నదే ఇప్పుడు కీలకం కానుంది. ఇదీ చదవండి: ఫ్రాన్స్‌లో భారతీయుడికి 20 ఏళ్ల జైలుశిక్షFollowing a deadly Houthi strike on Saudi Arabia’s King Khalid International Airport that also killed an American, U.S. President Donald J. Trump said “We may,” when asked if the U.S. would now join strikes against Houthis. Per the president, he is set to call the Saudi crown prince soon to discuss the matter.— OSINTdefender (@sentdefender) October 11, 2026

వాషింగ్టన్‌: ఈ ఏడాది నోబెల్‌ శాంతి బహుమతి తనకు దక్కకపోవడంపై అమెరికా అధ్యక్షుడు డొనాల్డ్‌ ట్రంప్‌ స్పందించారు. నార్వేపై విమర్శలు గుప్పించారు. అణ్వాయుధ సామర్థ్యమున్న భారత్, పాకిస్థాన్‌ల మధ్య యుద్ధం నిలువరించి ఐదు కోట్ల ప్రాణాలు కాపాడానని ఆచప సైరక్యూస్‌లో శుక్రవారం చెప్పుకున్నారు. ‘‘ద యునైటెడ్‌ స్టేట్స్‌ ఆఫ్‌ అమెరికాకు అధ్యక్షుడి హోదాలో ప్రాతినిథ్యం వహిస్తున్న నాకు నోబెల్‌ శాంతి బహుమతి దక్కి ఉండాల్సింది. ఇవ్వలేదు. ఇది నార్వేపై చెరిపేయలేని మచ్చ,. అంతటి అవమానకరమైన, ఇబ్బందికరమైన నిర్ణయం తీసుకుంది ఆ దేశం’’ అని వ్యాఖ్యానించారు. ‘‘కొంతమంది ప్రజాస్వామ్య వ్యతిరేకులు, నాగరకతకు అసలైన శత్రువులు, తీవ్రవాద భావజాలం ఉన్న వారి కారణంగా నోబెల్‌ శాంతి బహుమతి విశ్వసనీయత శాశ్వతంగా దెబ్బతింది. నార్వే... ఆ బహుమతి నాకివ్వలేదన్న విషయాన్ని మరచిపోము’’ అని అన్నారు. ఈ ఏటి నోబెల్‌ శాంతి బహుమతి దక్షిణాఫ్రికా న్యాయ కోవిదురాలు, భారతీయ సంతతికి చెందిన నవనీతం పిళ్లైకు దక్కిన విషయాన్ని ప్రస్తావిస్తూ.... అమె గురించి ఎవరికీ తెలియదు అంటూనే.... ‘‘ఏదైతేనేం.. శుభాభినందనలు’’ చెప్పారు. తన పదవీకాలంలో ఆపేసిన యుద్ధాల చిట్టా విప్పిన ట్రంప్‌.. ఇంకో రెండింటిని ఆపాల్సి ఉందని, ఇరాన్, రష్యా–ఉక్రెయిన్‌ యుద్ధాలను పరోక్షంగా సూచించారు. ‘‘చరిత్రలోనే అత్యధికంగా యుద్ధాలు ఆపిన నాకు శాంతి బహుమతి ఇవ్వలేదన్న విషయాన్ని మరచిపోము నార్వే... నిజానికి ఒక్కో యుద్ధానికి లెక్కవేసి ఎనిమిది నోబెల్‌ శాంతి బహుమతులు ఇచ్చి ఉండాల్సింది నాకు. కానీ నువ్వు (నార్వే) యునైటెడ్‌ స్టేట్‌ ఆఫ్‌ అమెరికాకు నోబెల్‌ శాంతి బహుమతి ఇవ్వలేదు’’ అని ఆగ్రహం వ్యక్తం చేశారు ఆయన. ‘‘... దీనికి (ఎనిమిది యుద్ధాలు ఆపడం) అదనంగా ఇరాన్‌ అణ్యాయుధాలు దక్కకుండా చేసి మధ్యప్రాచ్యం మొత్తం పేలిపోకుండా కూడా నిరోధించా. మధ్యప్రాచ్యానికి మించి యూరప్‌.. బహుశా అమెరికాతో కలిపి నేను కాపాడినన్ని ప్రాణాలు చరిత్రలో ఇంకెవరూ కాపాడి ఉండరు’’ అని అన్నారు. నోబెల్‌ శాంతి బహుమతులు ఇప్పటివరకూ నలుగురు అమెరికా అధ్యక్షులు థియోడర్‌ రూజ్‌వెల్ట్, వుడ్రో విల్సన్, జిమ్మీ కార్టర్‌లతోపాటు 2009లో బరాక్‌ ఒబామాకు దక్కాయి. డొనాల్డ్‌ ట్రంప్‌ తరచూ ఒబామాకు అవార్డు దక్కడంపై... ‘‘ఏం చేయకుండానే బహుమతి వచ్చింది’’ అంటూ విమర్శిస్తూంటారు.

వాషింగ్టన్‌: అమెరికా అధ్యక్షుడు డొనాల్డ్‌ ట్రంప్‌ మాటలకు, చర్యలకు అర్థాలే వేరు. రష్యా నుంచి చమురు కొనుగోలు చేస్తే భారీగా సుంకాలు విధిస్తామంటూ ప్రపంచ దేశాలను బెదిరిస్తూ చట్టాన్ని తీసుకొచ్చిన ట్రంప్‌ నేడు అదే రష్యా నుంచి చమురు కొనుగోలుకు ఒప్పందం కుదుర్చుకున్నారు. డీజిల్‌ సరఫరా కోసం అమెరికా, రష్యా మధ్య ఈ డీల్‌ కుదిరింది. రష్యా అధ్యక్షుడు పుతిన్‌తో ఫోన్‌ సంభాషణ అనంతరం శుక్రవారం ట్రంప్‌ ఈ ఒప్పందాన్ని స్వయంగా ప్రకటించారు. రష్యా నుంచి డీజిల్‌ కొనుగోలు గురించి ట్రూత్‌ సోషల్‌లో ట్రంప్‌ పోస్టుచేసిన కొద్ది నిమిషాలకే.. రష్యాపై ఆంక్షలను వచ్చే ఏడాది ఏప్రిల్‌ 7 వరకు ఎత్తివేస్తూ అమెరికా ట్రెజరీ శాఖ ప్రకటన చేయడం గమనార్హం. అయితే, ట్రంప్‌ ద్వంద్వ ప్రమాణాలను ఉక్రెయిన్‌ అధ్యక్షుడు జెలెన్‌స్కీ, అమెరికాలో డెమోక్రటిక్‌ నాయకులు, రిపబ్లికన్లలోని ఒక వర్గం నేతలు తప్పుపట్టారు. రష్యా నుంచి చమురు, గ్యాస్‌ను అత్యధికంగా కొనుగోలు చేసే దేశాలపై భారీ సుంకాలను విధించేందుకు సెప్టెంబర్‌ 16న అమెరికా కాంగ్రెస్‌లో ఒక చట్టాన్ని ఆమోదించిన సంగతి తెలిసిందే. నెల రోజుల వ్యవధిలోనే రష్యా నుంచి చమురు కొనుగోలుకు ట్రంప్‌ ఒప్పందం చేసుకోవడం చర్చనీయాంశంగా మారింది. ‘‘నేను రష్యా అధ్యక్షుడు పుతిన్‌తో అత్యంత విజయవంతమైన చర్చను ఇప్పుడే ముగించాను. అమెరికాతోపాటు ప్రపంచ మార్కెట్ల కు తక్షణమే 3,00,000 టన్నులకు పైగా డీజిల్‌ను సరఫరా చేయడానికి రష్యా అంగీకరించింది. నవంబర్‌లో మరో 5,00,000 టన్నుల డీజిల్‌ను, ఆ వెంటనే మరో పది లక్షల టన్నులను సరఫరా చేస్తుంది. డీజిల్‌ రిఫైనరీల సామర్థ్యాన్ని బట్టి అదనంగా 30 లక్షల టన్నుల డీజిల్‌ను సరఫరా చేయడానికి రష్యా అంగీకరించింది’’అని ట్రూత్‌ సోషల్‌లో ట్రంప్‌ పోస్టుచేశారు. హార్మూజ్‌ జలసంధిపై అమెరికాకు ఉన్న నియంత్రణ, రష్యా నుంచి ప్రతిపాదిత డీజిల్‌ సరఫరాలతో ఇంధన ధరలు గణనీయంగా తగ్గుతాయని వెల్లడించారు. యుద్ధాన్ని పొడిగించడానికి అది పెట్టుబడి: జెలెన్‌స్కీ ట్రంప్‌ తాజా నిర్ణయంపై ఉక్రెయిన్‌ అధినేత జెలెన్‌స్కీ తీవ్ర అసంతృప్తి వ్యక్తంచేశారు. రష్యా నుంచి డీజిల్‌ కొనడం సరైన వ్యూహం కాదని పేర్కొన్నారు. పుతిన్‌కు ఇచ్చే బహుమతులు నాగరిక ప్రపంచానికి శాంతిని గానీ, ఇతర ప్రయోజనాన్ని గానీ చేకూర్చలేవని సోషల్‌ మీడియా పోస్ట్‌లో పేర్కొన్నారు. రష్యా పెట్రోలియం ఉత్పత్తులను విక్రయించడానికి అనుమతించడం అనేది... ముగించాల్సిన యుద్ధాన్ని మరింత పొడిగించడానికి పెట్టుబడి పెట్టడమే అవుతుందని విమర్శించారు. అందుకే రష్యా డీజిల్‌పై ఆసక్తి స్వదేశంలో చమురు ధరలు భారీగా పెరగడం వల్లే రష్యా డీజిల్‌పై ట్రంప్‌ ఆసక్తి చూపుతున్నట్లు తెలుస్తోంది. అమెరికాలో శుక్రవారం నాటికి డీజిల్‌ సగటు ధర గ్యాలన్‌కు 6.28 డాలర్లుగా ఉంది. ఇది ఏడాది క్రితం 3.68 డాలర్లుగా ఉండేది. అంటే దాదాపు రెండింతలు పెరిగింది. అమెరికా నుంచి డీజిల్‌ ఎగుమతులపై నిషేధం విధించాలని గత నెలలో ట్రంప్‌ ప్రతిపాదించారు. అయితే, అటువంటి చర్య ప్రపంచవ్యాప్తంగా ఇంధన కొరతకు, తద్వారా ధరల పెరుగుదలకు దారితీయవచ్చని నిపుణులు హెచ్చరించడంతో ట్రంప్‌ వెనక్కి తగ్గారు.

రష్యాతో యుద్ధం ఆపేందుకు ఒప్పందం చేసుకోలేకపోతున్నారా? అయితే ఉక్రెయిన్‌కు కొత్త అధ్యక్షుడు రావాల్సిందే! అంటూ అమెరికా అధ్యక్షుడు డొనాల్డ్‌ ట్రంప్‌ సంచలన వ్యాఖ్యలు చేశారు. రష్యా నుంచి డీజిల్‌ సరఫరాలకు అనుమతిస్తూ అమెరికా తీసుకున్న నిర్ణయాన్ని ఉక్రెయిన్‌ అధ్యక్షుడు వొలోడిమిర్‌ జెలెన్‌స్కీ విమర్శించడంతో ట్రంప్‌ ఈ వ్యాఖ్యలు చేశారు. రష్యా చమురు శుద్ధి కేంద్రాలపై ఉక్రెయిన్‌ దాడులు చేయడం వల్లే ఇంధన ధరలు పెరుగుతున్నాయని ఆయన ఆరోపించారు.రష్యా నుంచి డీజిల్‌ సరఫరాలకు అనుమతించడంపై జెలెన్‌స్కీ అభ్యంతరం వ్యక్తం చేశారు. ఈ నిర్ణయం వల్ల రష్యాకు ఆదాయం పెరుగుతుందని, ఆ డబ్బుతో యుద్ధాన్ని కొనసాగించేందుకు ఆయుధాలు కొనుగోలు చేసే అవకాశం ఉంటుందని ఆందోళన వ్యక్తం చేశారు. ఉక్రెయిన్‌పై దాడులు కొనసాగిస్తున్న రష్యాకు ఆర్థికంగా వెసులుబాటు కల్పించడం సరికాదని ఆయన విమర్శించారు.డీజిల్‌ సరఫరాలకు ట్రంప్‌ గ్రీన్‌సిగ్నల్‌..అమెరికాలో ఇంధన ధరలను తగ్గించేందుకు రష్యా నుంచి డీజిల్‌ సరఫరాలను పెంచాలని ట్రంప్‌ నిర్ణయించారు. తొలుత 3 లక్షల టన్నుల డీజిల్‌ను వెంటనే విడుదల చేయనున్నట్లు ప్రకటించారు. నవంబర్‌లో మరో 5 లక్షల టన్నులు, ఆ తర్వాత మరిన్ని సరఫరాలు అందుబాటులోకి వస్తాయని తెలిపారు. అయితే, ఈ నిర్ణయం రష్యాకు ఆర్థిక ప్రయోజనం చేకూరుస్తుందన్న జెలెన్‌స్కీ విమర్శలు అమెరికా–ఉక్రెయిన్‌ మధ్య విభేదాలను మరింత పెంచాయి.పెరిగిన ఇంధన ధరలు..ఇరాన్‌ యుద్ధం, హార్ముజ్‌ జలసంధి మూసివేతతో ప్రపంచవ్యాప్తంగా ఇంధన సరఫరాలకు అంతరాయం ఏర్పడింది. దీంతో ధరలు భారీగా పెరిగాయి. అమెరికాలో డీజిల్‌ ధర గ్యాలన్‌కు సగటున 6.28 డాలర్లకు చేరింది. ఈ పరిస్థితుల్లో సరఫరాలను పెంచి ధరలను తగ్గించడమే తన లక్ష్యమని ట్రంప్‌ చెబుతున్నారు. అయితే, రష్యాకు ఆదాయం పెరిగితే అది యుద్ధానికి ఉపయోగపడుతుందన్నది జెలెన్‌స్కీ ఆందోళన.రష్యాపై ఒత్తిడి తగ్గించొద్దు: యూరప్‌అమెరికా నిర్ణయంపై యూరోపియన్‌ యూనియన్‌ విదేశాంగ విభాగం అధిపతి కాజా కల్లాస్‌ కూడా అభ్యంతరం వ్యక్తం చేశారు. రష్యాపై ఆంక్షలను సడలించడం వల్ల ఆ దేశానికి యుద్ధం కొనసాగించేందుకు మరిన్ని నిధులు అందుతాయని పేర్కొన్నారు. మరోవైపు, ఉక్రెయిన్‌కు మద్దతు కొనసాగిస్తామని బ్రిటన్‌ ప్రకటించింది. రష్యా ఇంధన రంగంలో కాల్పుల విరమణకు అంగీకరించాలని కోరింది.ఎన్నికలు నిర్వహించాలంటున్న ట్రంప్‌..2022లో రష్యా దాడి ప్రారంభమైనప్పటి నుంచి ఉక్రెయిన్‌లో మార్షల్‌ లా అమల్లో ఉంది. ఈ కారణంగా ఎన్నికలు నిలిపివేశారు. అయితే, ఉక్రెయిన్‌లో ఎన్నికలు నిర్వహించి ప్రజలు కొత్త నాయకుడిని ఎన్నుకునే అవకాశం కల్పించాలని ట్రంప్‌ గతంలోనూ వ్యాఖ్యానించారు. తాజాగా జెలెన్‌స్కీపై చేసిన విమర్శలతో ఈ అంశం మరోసారి అంతర్జాతీయ చర్చకు వచ్చింది. యుద్ధం, ఇంధన సరఫరాలు, నాయకత్వంపై భిన్నాభిప్రాయాల నేపథ్యంలో అమెరికా–ఉక్రెయిన్‌ సంబంధాలు మరింత ఒత్తిడికి గురవుతున్నాయి.ఇదీ చదవండి: పుతిన్‌కు ట్రంప్‌ భారీ ఆఫర్‌.. ఉక్రెయిన్‌కు కొత్త టెన్షన్‌

ఒకప్పుడు రష్యాపై ఆంక్షలు, హెచ్చరికలతో ఒత్తిడి తెచ్చిన అమెరికా అధ్యక్షుడు డొనాల్డ్‌ ట్రంప్‌.. ఇప్పుడు అదే దేశాధినేత వ్లాదిమిర్‌ పుతిన్‌తో ఇంధన ఒప్పందానికి సిద్ధమయ్యారు. అమెరికాలో పెరుగుతున్న డీజిల్‌ ధరలను తగ్గించేందుకు రష్యా నుంచి భారీగా ఇంధనం కొనుగోలు చేయనున్నట్లు ప్రకటించారు. అయితే, ఈ నిర్ణయం ఉక్రెయిన్‌ అధ్యక్షుడు వొలోదిమిర్‌ జెలెన్‌స్కీకి తీవ్ర ఆగ్రహం తెప్పించింది. ఒకవైపు ఉక్రెయిన్‌తో యుద్ధాన్ని ముగించేందుకు చర్చలు జరుపుతూనే.. మరోవైపు రష్యాకు ఆర్థికంగా లబ్ధి చేకూర్చేలా వ్యవహరించడం ఏమిటని ఆయన ప్రశ్నించారు. పుతిన్‌కు ఇలాంటి అవకాశాలు కల్పించడం వల్ల శాంతి సాధ్యం కాదని విమర్శించారు. అమెరికా తన ఇంధన అవసరాల కోసం రష్యాకు మళ్లీ దగ్గరవుతోందన్న చర్చకు ఈ పరిణామం తెరతీసింది.పుతిన్‌కు వరం.. ఉక్రెయిన్‌కు ఆందోళన!అమెరికా, రష్యా మధ్య కుదిరినట్లు ట్రంప్‌ ప్రకటించిన ఒప్పందం ప్రకారం.. తక్షణమే 3 లక్షల మెట్రిక్‌ టన్నులకు పైగా డీజిల్‌ సరఫరా చేయనున్నారు. నవంబర్‌లో మరో 5 లక్షల టన్నులు, ఆ తర్వాత ఇంకో 10 లక్షల టన్నుల డీజిల్‌ అందించనున్నట్లు ట్రంప్‌ వెల్లడించారు. పుతిన్‌తో జరిగిన చర్చలు విజయవంతమయ్యాయని తన ట్రూత్‌ సోషల్‌ ఖాతాలో పేర్కొన్నారు. అమెరికాలో ఇంధన ధరలను తగ్గించడమే ఈ నిర్ణయం వెనుక ప్రధాన ఉద్దేశమని తెలిపారు. అయితే, ఈ ఒప్పందం ద్వారా రష్యాకు అదనపు ఆదాయం సమకూరుతుందని జెలెన్‌స్కీ అభ్యంతరం వ్యక్తం చేశారు. ఆ నిధులు ఉక్రెయిన్‌పై యుద్ధాన్ని కొనసాగించేందుకు ఉపయోగపడతాయని ఆందోళన వ్యక్తం చేశారు. యుద్ధాన్ని ముగించాల్సిన సమయంలో రష్యాకు ఆర్థికంగా చేయూతనివ్వడం సరికాదని విమర్శించారు.‘పుతిన్‌కు బహుమతులిస్తే శాంతి రాదు’ట్రంప్‌ నిర్ణయంపై జెలెన్‌స్కీ ఎక్స్‌ వేదికగా ఘాటుగా స్పందించారు. ‘పుతిన్‌కు బహుమతులు ఇవ్వడం వల్ల శాంతి రాదు. నాగరిక ప్రపంచానికి ఎలాంటి ప్రయోజనమూ ఉండదు’ అని వ్యాఖ్యానించారు. రష్యా ఈ డీజిల్‌ ఆదాయాన్ని మరింత దాడులు, మోసపూరిత చర్యలకు వినియోగించే అవకాశం ఉందని ఆరోపించారు. నిజమైన శాంతి సాధించాలంటే ఇరు పక్షాలు పరస్పరం ఉద్రిక్తతలను తగ్గించుకునే చర్యలు తీసుకోవాలని స్పష్టం చేశారు.రష్యాతో యుద్ధాన్ని ముగించేందుకు ప్రయత్నాల్లో భాగంగా ఉక్రెయిన్‌ ప్రతినిధి బృందం అమెరికాలో చర్చలు జరుపుతున్న సమయంలోనే ఈ ఒప్పందం ప్రకటించడం జెలెన్‌స్కీ అసంతృప్తికి మరో కారణంగా నిలిచింది. తమ బృందాన్ని కేవలం ఒక సాకుగా ఉపయోగించుకుంటున్నారనే భావన కలుగుతోందని ఆయన వ్యాఖ్యానించారు. బలమైన భాగస్వాములు ఇలాంటి నిర్ణయాలు తీసుకోవడం సరైన పద్ధతి కాదని అసహనం వ్యక్తం చేశారు.ఇంధన ధరల కోసం ఆంక్షల సడలింపు?అమెరికాకు ఊరట.. అమెరికాలో డీజిల్‌ ధరలు భారీగా పెరగడంతో వాటిని నియంత్రించేందుకు ట్రంప్‌ ప్రభుత్వం రష్యా సరఫరాలపై దృష్టి పెట్టింది. అమెరికా ఆర్థిక శాఖ శుక్రవారం జారీ చేసిన సాధారణ లైసెన్స్‌ ద్వారా ఏప్రిల్‌ 7 వరకు రష్యా నుంచి డీజిల్‌ దిగుమతులకు అనుమతి కల్పించినట్లు కథనం పేర్కొంది. ఉక్రెయిన్‌పై యుద్ధం నేపథ్యంలో రష్యా ఇంధన సంస్థలపై ఆంక్షలు కొనసాగుతున్నప్పటికీ ఈ నిర్ణయం తీసుకోవడం ప్రాధాన్యం సంతరించుకుంది. కాగా, అమెరికాలో డీజిల్‌ ధరలు గ్యాలన్‌కు 6.28 డాలర్లకు చేరిన నేపథ్యంలో ట్రంప్‌ ఈ చర్యలు చేపట్టారు. రైతులు, పశువుల పోషకులు, ట్రక్కుల డ్రైవర్లపై ఇంధన ధరల భారాన్ని తగ్గించడమే తన ప్రాధాన్యమని తెలిపారు. అయితే, రష్యా నుంచి సరఫరాలు పెరిగినంత మాత్రాన ధరలు గణనీయంగా, దీర్ఘకాలం తగ్గుతాయని చెప్పలేమని చమురు రంగ నిపుణులు అభిప్రాయపడుతున్నారు.అమెరికా ప్రయోజనాలా.. శాంతి ప్రయత్నాలా?అమెరికాలో ఇంధన ధరలను అదుపులోకి తీసుకురావాలన్న ట్రంప్‌ లక్ష్యం ఒకవైపు ఉంటే.. రష్యాకు అదనపు ఆదాయం సమకూరడం వల్ల ఉక్రెయిన్‌ యుద్ధం మరింత కొనసాగుతుందన్న ఆందోళన మరోవైపు ఉంది. ఈ నేపథ్యంలో ట్రంప్‌ నిర్ణయం అమెరికా ఇంధన అవసరాలు, ఉక్రెయిన్‌ శాంతి ప్రయత్నాల మధ్య కొత్త వివాదానికి దారితీసింది. పుతిన్‌తో ఒప్పందం అమెరికా వినియోగదారులకు ఎంతవరకు ఊరటనిస్తుందన్నది ఒక ప్రశ్నగా ఉంటే.. అదే సమయంలో రష్యాపై ఒత్తిడి తగ్గినట్లవుతుందా అన్నది అంతర్జాతీయంగా చర్చనీయాంశమైంది.ఇదీ చదవండి: కెప్టెన్‌ స్మిత్‌ మచ్ఛార్‌కు ఇజ్రాయెలీ అవార్డు!

అమెరికాలో డీజిల్‌ ధరలు ఆకాశాన్నంటుతున్న వేళ అధ్యక్షుడు డొనాల్డ్‌ ట్రంప్‌ కీలక అడుగు వేశారు. రష్యా అధ్యక్షుడు వ్లాదిమిర్‌ పుతిన్‌తో ఒప్పందం కుదుర్చుకుని ఇంధన ధరల తగ్గింపునకు ప్రయత్నిస్తున్నారు. ఈ ఒప్పందంతో ప్రపంచ మార్కెట్లోకి భారీగా డీజిల్‌ అందుబాటులోకి రానుంది.పుతిన్‌ వెంటనే 3 లక్షల టన్నుల డీజిల్‌ను విడుదల చేసేందుకు అంగీకరించారని ట్రంప్‌ తెలిపారు. నవంబర్‌లో మరో 5 లక్షల టన్నులు, ఆ తర్వాత 10 లక్షల టన్నుల డీజిల్‌ను విడుదల చేయనున్నట్లు పేర్కొన్నారు. డీజిల్‌ ధరలు వేగంగా తగ్గుతాయని ట్రూత్‌ సోషల్‌లో పోస్ట్‌ చేశారు.అయితే, అమెరికాలో ఫిబ్రవరిలో ఇరాన్‌తో యుద్ధం ప్రారంభమైనప్పటి నుంచి డీజిల్‌ ధరలు రెండింతలయ్యాయి. ప్రస్తుతం గ్యాలన్‌ డీజిల్‌ సగటు ధర 6.28 డాలర్లుగా ఉంది. సెప్టెంబర్‌ చివర్లో ఇది రికార్డు స్థాయిలో 6.53 డాలర్లకు చేరింది.ట్రంప్‌ ప్రకటన వెలువడిన కొద్దిసేపటికే రష్యా డీజిల్‌ను మార్కెట్లోకి అనుమతిస్తూ అమెరికా ట్రెజరీ శాఖ తాత్కాలిక లైసెన్స్‌ జారీ చేసింది. అలాగే, రష్యా ప్రతినిధి కిరిల్‌ దిమిత్రియేవ్‌ ఈ ఒప్పందాన్ని స్వాగతించారు. ఇరు దేశాల ఇంధన రంగ సహకారం ప్రపంచానికి ప్రయోజనం చేకూరుస్తుందని పేర్కొన్నారు.ఇంధన ధరలను తగ్గించేందుకు ట్రంప్‌ ఇప్పటికే పలు చర్యలు చేపట్టారు. గ్యాసోలిన్‌పై ఫెడరల్‌ పన్నును తాత్కాలికంగా నిలిపివేసే అంశాన్ని పరిశీలిస్తున్నారు. అలాగే, జీ7 దేశాల నిల్వల నుంచి 10 కోట్ల బ్యారెళ్ల చమురు, డీజిల్‌ను విడుదల చేసేలా ఒత్తిడి తెచ్చారు.ఇదీ చదవండి: పనామాలో భారీ భూకంపం.. సునామీ హెచ్చరికలు!

వాషింగ్టన్‌: అంతర్జాతీయ క్రిమినల్‌ కోర్టు (ఐసీసీ)పై అమెరికా అధ్యక్షుడు డొనాల్డ్‌ ట్రంప్‌ ప్రభుత్వం భారీ ఆంక్షలు ప్రకటించింది. అమెరికా సంస్థలు ఐసీసీతో ఆర్థిక లావాదేవీలు జరపకుండా నిషేధం విధించే చర్యలు చేపట్టింది. అమెరికా సార్వభౌమత్వాన్ని కాపాడేందుకే ఈ నిర్ణయం తీసుకున్నట్లు విదేశాంగ మంత్రి మార్కో రూబియో తెలిపారు. అమెరికన్లపై విచారణ జరిపేందుకు ఐసీసీ ప్రయత్నిస్తోందని ఆరోపించారు. అయితే, ఈ చర్యలు అంతర్జాతీయ న్యాయవ్యవస్థకు విఘాతం కలిగిస్తాయని ఐసీసీ పేర్కొంది.అయితే, ఇప్పటికే ఐసీసీకి చెందిన 17 మంది న్యాయమూర్తులు, అధికారులపై ఆంక్షలు విధించిన అమెరికా.. తాజాగా మొత్తం సంస్థనే లక్ష్యంగా చేసుకుంది. అమెరికా కంపెనీలు ఐసీసీకి బ్యాంకింగ్‌, సాఫ్ట్‌వేర్‌ వంటి సేవలు అందించడంపై ఈ చర్యలు ప్రభావం చూపనున్నాయి. కొన్ని ఆంక్షలు అమల్లోకి రావడానికి ఆరు నెలల గడువు ఇచ్చినట్లు వాషింగ్టన్‌ తెలిపింది. ఐసీసీ తన చర్యలను నిలిపివేయాలని, లేదంటే ఆ సంస్థనే అంతం చేస్తామని రూబియో హెచ్చరించారు.2002లో ఏర్పాటైన ఐసీసీ యుద్ధ నేరాలు, మానవత్వానికి వ్యతిరేకమైన నేరాలు, మారణహోమంపై విచారణ జరుపుతుంది. ఇందులో 125 దేశాలు సభ్యులుగా ఉన్నాయి. ఆఫ్ఘనిస్థాన్‌లో అమెరికా సైనికుల చర్యలపై గతంలో చేపట్టిన దర్యాప్తు, ఇజ్రాయెల్‌ ప్రధాని బెంజమిన్‌ నెతన్యాహు సహా పలువురు అధికారులపై అరెస్టు వారెంట్లు జారీ చేయడం ట్రంప్‌ ప్రభుత్వ అసంతృప్తికి కారణమయ్యాయి.అలాగే, అమెరికా నిర్ణయంపై ఐక్యరాజ్యసమితి ప్రధాన కార్యదర్శి ఆంటోనియో గుటెరస్‌ ఆందోళన వ్యక్తం చేశారు. అంతర్జాతీయ నేర న్యాయం కోసం ప్రపంచ దేశాలు చేస్తున్న ప్రయత్నాలకు ఇది పెద్ద దెబ్బ అని పేర్కొన్నారు. బ్రిటన్‌, కెనడా, ఫ్రాన్స్‌, జర్మనీ, ఇటలీ, జపాన్‌, డెన్మార్క్‌, నెదర్లాండ్స్‌ దేశాలు ఐసీసీకి తమ మద్దతును ప్రకటించాయి. ఆంక్షల వల్ల కోర్టు కార్యకలాపాలు దెబ్బతినే అవకాశం ఉందని నెదర్లాండ్స్‌ తెలిపింది.ఐసీసీ మాజీ న్యాయమూర్తి నవీ పిళ్లైకి 2026 నోబెల్‌ శాంతి బహుమతి ప్రకటించిన కొన్ని గంటల్లోనే అమెరికా ఈ ఆంక్షలను వెల్లడించడం గమనార్హం. తమతో సహకరించే వారిని భయపెట్టడమే ఈ చర్యల ఉద్దేశమని ఐసీసీ పేర్కొంది. అయినప్పటికీ తమ కార్యకలాపాలను కొనసాగిస్తామని స్పష్టం చేసింది. తాజా పరిణామాలతో అంతర్జాతీయ నేర న్యాయవ్యవస్థ భవిష్యత్తుపై ఆందోళనలు వ్యక్తమవుతున్నాయి.ఇదీ చదవండి: మతోన్మాది, అవినీతిపరురాలు.. నవీ పిళ్ళైపై నెతన్యాహు ఫైర్‌

2026 నోబెల్ శాంతి బహుమతి నావి పిళ్లైకు దక్కడంపై అమెరికా అధ్యక్షుడు డొనాల్డ్ ట్రంప్ అసంతృప్తి వ్యక్తం చేశారు. ఆమెను ‘అమెరికా, ఇజ్రాయెల్ వ్యతిరేకి’గా అభివర్ణిస్తూ సోషల్ మీడియాలో వచ్చిన విమర్శనాత్మక పోస్టును ట్రంప్ తన ట్రూత్ సోషల్ మీడియా ఖాతాలో రీపోస్ట్ చేశారు.నోబెల్ శాంతి బహుమతి అందుకున్న సందర్భంగా నావి పిళ్లై మాట్లాడుతూ.. చప్పట్లు మరింతగా కొడితే ఈ బహుమతిని ట్రంప్‌తో పంచుకోవచ్చంటూ సరదాగా వ్యాఖ్యానించారు. ట్రంప్‌కు నోబెల్ శాంతి బహుమతిపై ఉన్న తీవ్రమైన ఆసక్తిని ఉద్దేశించే ఆమె ఈ సెటైర్ వేశారు. అయితే దీనిపై ట్రంప్ తీవ్రంగా స్పందించారు. నోబెల్ కమిటీ నిర్ణయం ఆ బహుమతి గౌరవాన్ని తగ్గించిందని ఆ పోస్టులో విమర్శించారు. శాంతి స్థాపనకు తాను చేసిన ప్రయత్నాలను గుర్తించి తనకే ఈ పురస్కారం ఇవ్వాల్సిందని ఆ పోస్ట్‌లో ట్రంప్ పేర్కొన్నారు.85 ఏళ్ల నావి పిళ్లై దక్షిణాఫ్రికాకు చెందిన న్యాయవాది. భారతీయ తమిళ మూలాలున్న ఆమె అంతర్జాతీయ న్యాయస్థానంలో న్యాయమూర్తిగా, ఐక్యరాజ్యసమితి మానవ హక్కుల హైకమిషనర్‌గా కూడా పనిచేశారు. యుద్ధ నేరాలు, మానవత్వానికి వ్యతిరేకమైన నేరాలు, మారణహోమాలకు బాధ్యులపై చట్టపరమైన చర్యలు తీసుకునేలా కృషి చేసినందుకు ఆమెకు ఈ పురస్కారం ప్రకటించినట్లు నోబెల్ కమిటీ తెలిపింది. ఈ బహుమతి కింద ఆమెకు 12 మిలియన్ స్వీడిష్ క్రోనాల విలువైన నగదు అందజేయనున్నారు. డిసెంబర్ 10న నార్వే రాజధాని ఓస్లోలో ఈ పురస్కార ప్రదానోత్సవం జరగనుంది.ఇదీ చదవండి: సీఎం సువేందు రికార్డును బద్దలు కొట్టిన పీఏ తల్లి!

బెర్లిన్‌ : ప్రతిష్టాత్మ నోబెల్ శాంతి బహుమతి ప్రకటన అంతర్జాతీయ రాజకీయాల్లో ఆసక్తికర చర్చకు దారితీసింది. యుద్ధ నేరాలు, మానవాళికి వ్యతిరేకంగా జరిగే అకృత్యాలు, జాతి విద్వేషాలపై సుదీర్ఘకాలంగా పోరాడుతూ అంతర్జాతీయ చట్టాల అమలుకు కృషి చేసిన ప్రముఖ దక్షిణాఫ్రికా న్యాయనిపుణురాలు,భారత సంతతికి నవనీతమ్ పిళ్లై ఈ ఏడాది నోబెల్ శాంతి బహుమతిని గెలుచుకున్నారు.అయితే, ఈ పురస్కారం దక్కడంపై ఆమె స్పందించిన తీరు ఇప్పుడు ప్రపంచ వ్యాప్తంగా చర్చాంశనీయంగా మారింది. జర్మనీలోని నూరెమ్‌ బెర్గ్‌లో ఆమె విజయాన్ని ప్రకటించిన సందర్భంగా అక్కడి ప్రముఖులు హర్షధ్వానాలు తెలుపుతుండగా.. పిళ్లై చేసిన సరదా వ్యాఖ్యలు సభికుల్ని నవ్వులు పూయించాయి.‘మీరు ఇంకొంచెం గట్టిగా చప్పట్లు కొడితే.. బహుశా ఈ నోబెల్ బహుమతిలో కొంత భాగం డొనాల్డ్ ట్రంప్‌తో పంచుకుంటానేమో!’ అంటూ ఆమె చేసిన వ్యాఖ్యలు రాజకీయ వర్గాల్లో తీవ్ర చర్చకు దారి తీశాయి. అమెరికా అధ్యక్షుడు డొనాల్డ్ ట్రంప్‌నకు నోబెల్ శాంతి బహుమతిపై ఉన్న తీవ్రమైన ఆసక్తిని ఉద్దేశించే ఆమె ఈ సెటైర్ వేశారు.నవనీతమ్ పిళ్లై అసాధారణ ప్రయాణం..దక్షిణాఫ్రికా డర్బన్‌లో వర్ణవివక్ష కాలంలో భారతీయ తమిళ సంతతి కుటుంబంలో జన్మించిన పిళ్లై.. అంతర్జాతీయ న్యాయ రంగంలో అసాధారణ శిఖరాలను అధిరోహించారు. దక్షిణాఫ్రికా హైకోర్టులో తొలి మహిళా న్యాయమూర్తిగా, రువాండా అంతర్జాతీయ ట్రిబ్యునల్ న్యాయమూర్తిగా ఆమె సేవలు అందించారు. అంతర్జాతీయ క్రిమినల్ కోర్టు న్యాయమూర్తిగా, ఐక్యరాజ్యసమితి మానవ హక్కుల హైకమిషనర్‌గా బాధ్యతలు నిర్వర్తించారు.అత్యాచారాలు, లైంగిక హింసను జాతి విద్వేషాలు,మానవాళికి వ్యతిరేకంగా జరిగే నేరాలుగా పరిగణించడంలో ఆమె కీలక తీర్పులు ఇచ్చారు. మీడియా ప్రచారాలు హింసను ఎలా ప్రేరేపిస్తాయనే దానిపై ఆమె చేసిన న్యాయ పోరాటాలు ప్రపంచ వ్యాప్తంగా గుర్తింపు పొందాయి.ప్రస్తుతం ఇంటర్నేషనల్ కోర్ట్ ఆఫ్ జస్టిస్‌లో జడ్జిగా కొనసాగుతున్న ఆమె..మయన్మార్‌పై జరుగుతున్న జాతివివక్ష ఆరోపణల కేసులను విచారిస్తున్న కమిషన్‌లోనూ కీలక భూమిక పోషిస్తున్నారు. ప్రపంచంలో అంతర్జాతీయ చట్టాల బలహీనతను, అధికార రాజకీయాల ప్రభావాన్ని ఎత్తిచూపుతూ.. శాంతి స్థాపనలో న్యాయం యొక్క ప్రాముఖ్యతను చాటిచెప్పిన నవనీతమ్ పిళ్లైకి నోబెల్ పురస్కారం దక్కడం పట్ల ప్రపంచ వ్యాప్తంగా ప్రశంసలు వెల్లువెత్తుతున్నాయి.

ఓస్లో: ప్రతిష్టాత్మక నోబెల్‌ శాంతి పురస్కారాన్ని దక్కించుకోవాలనుకున్న అమెరికా అధ్యక్షుడు డొలాల్డ్‌ ట్రంప్‌ ఆశలు అడియాశలయ్యాయి. ట్రంప్ కల కలగా మిగిలింది. ప్రపంచ దేశాల్లో శాంతి కోసం పాటు పడుతున్న తనకు నోబెల్‌ శాంతి బహుమతి ఇవ్వాలంటూ ఓవల్ ఆఫీస్‌లో హుకుం జారీచేసిన ట్రంప్‌కు నోబెల్ కమిటీ కన్నెర్ర చేసింది. ఈ ఏడాది నోబెల్‌ శాంతి బహుమతికి దక్షిణాఫ్రికాకు చెందిన ప్రముఖ న్యాయకోవిదురాలు, భారతీయ తమిళ సంతతికి చెందిన నవనీతమ్‌ నవీ పిళ్లైని ఎంపిక చేసింది. నార్వేజియన్ నోబెల్ కమిటీ ఈ అత్యున్నత పురస్కారాన్ని అధికారికంగా ప్రకటించింది.అంతర్జాతీయ చట్టాలు పటిష్టం కావడంలో, ప్రపంచ శాంతి స్థాపనలో, మానవ హక్కుల పరిరక్షణ కోసం ఆమె దశాబ్దాలుగా అందించిన అమూల్యమైన సేవలను నార్వేజియన్ నోబెల్ కమిటీ గుర్తించి ఈ అత్యున్నత పురస్కారాన్ని కట్టబెట్టింది. నవీ పిళ్లై ఈ ప్రతిష్టాత్మక నోబెల్ పురస్కారాన్ని దక్కించుకోవడం పట్ల ప్రపంచ వ్యాప్తంగా హర్షం వ్యక్తమవుతుండగా.. నవీ పిళ్లైని చూసి భారత్ గర్వపడుతోంది.ట్రంప్ వివాదాస్పద వ్యాఖ్యలు ఇటీవల తనకు నోబెల్‌ శాంతి బహుమతి కావాలనే ఆశను ట్రంప్‌ బహిరంగంగా బయటపెట్టారు. తాను అనేక వివాదాలను, యుద్ధాలను పరిష్కరించానని, చరిత్రలో ఎవరూ చేయని విధంగా శాంతి స్థాపనకు కృషి చేశానని బహిరంగంగానే ప్రకటించుకున్న ఆయన, తనకు ఈసారైనా నోబెల్ శాంతి పురస్కారం ఇవ్వాలని గట్టిగా కోరారు.ఒకవేళ తనకు ఇవ్వకపోతే అది నార్వేజియన్ నోబెల్ కమిటీకి కూడా పెద్ద అవమానమని, కమిటీ తనను విస్మరిస్తే వారి చరిత్రాత్మక తప్పిదమవుతుందని ఇటీవల ఓవల్ ఆఫీస్‌లో మీడియాతో మాట్లాడుతూ ట్రంప్ వివాదాస్పద వ్యాఖ్యలు కూడా చేశారు. అయితే ట్రంప్ అంచనాలు తలకిందులవుతూ నార్వేజియన్ నోబెల్ కమిటీ ప్రకటన వెలువడింది. అందరూ ఊహించినట్లుగానే ట్రంప్‌ ఆశలు అడియాశలయ్యాయి.ఇదీ చదవండి : నవీ పిళ్లైకి నోబెల్‌ శాంతి బహుమతి

అమెరికా అధ్యక్షుడు డొనాల్డ్‌ ట్రంప్‌ మరోసారి తనదైన శైలిలో సంచలన వ్యాఖ్యలు చేశారు. కృత్రిమ మేధస్సు(AI-ఏఐ) అనే పదానికి బదులుగా ‘సూపర్‌ ఇంటెలిజెన్స్‌’ అనాలని సూచించారు. కాదని పాత పదాన్ని ఉపయోగించేవారిని శత్రువులుగా పరిగణిస్తామని హెచ్చరించారు. ఈ మేరకు తన ట్రూత్‌ సోషల్‌ వేదికగా వ్యాఖ్యలు చేశారు. అయితే ఏం చేస్తారన్నది మాత్రం క్లారిటీ ఇవ్వలేదు.ఏఐపై ప్రపంచవ్యాప్తంగా ఆందోళనలు పెరుగుతున్న నేపథ్యంలో ట్రంప్‌ ఈ పేరు మార్పు ప్రయత్నం చేస్తున్నారు. ‘ఆర్టిఫిషియల్‌’ అనే పదం ఈ సాంకేతికతను తక్కువ చేసి చూపిస్తోందని, ప్రస్తుత సాంకేతిక సామర్థ్యాలను ‘సూపర్‌ ఇంటెలిజెన్స్‌’ అనే పదమే బాగా వివరిస్తుందని ఆయన వాదిస్తున్నారు. సెప్టెంబర్‌ 29న ఆయన సంతకం చేసిన కార్యనిర్వాహక ఉత్తర్వుల ప్రకారం.. అమెరికా ప్రభుత్వ విభాగాలు అధికారిక సమాచారంలో ఏఐ(AI), ఆర్టిఫిషియల్‌ ఇంటెలిజెన్స్‌ పదాలకు బదులుగా ఎస్‌ఐ(SI), సూపర్‌ ఇంటెలిజెన్స్‌ పదాలను ఉపయోగించాలి.మస్క్‌ కూడా ఓకే అన్నారు!ట్రంప్‌ ఆలోచనకు ఆయన సన్నిహితుడు, స్పేస్‌ఎక్స్‌ ఏఐ విభాగం అధిపతి ఎలాన్‌ మస్క్‌ కూడా మద్దతు పలికారు. తన సంస్థ పేరును ‘స్పేస్‌ఎక్స్‌ఏఐ’ నుంచి ‘స్పేస్‌ఎక్స్‌ఎస్‌ఐ’గా మార్చుతారా? అని ఓ ఎక్స్‌ వినియోగదారు అడగ్గా.. ‘అవును, ఆ మార్పు చేస్తాం’ అని మస్క్‌ బదులిచ్చారు. అయితే, పేరు మార్పునకు సంబంధించిన పూర్తి వివరాలు ఇంకా వెల్లడికాలేదు.విమర్శలకు సమాధానంగానే.. కృత్రిమ మేధస్సు వినియోగం పెరుగుతున్న కొద్దీ దాని భద్రత, దుర్వినియోగం, నియంత్రణపై చర్చలు తీవ్రంగా సాగుతున్నాయి. ప్రభుత్వ వెబ్‌సైట్లు, కంపెనీల వ్యవస్థలపై ఏఐ ఆధారిత దాడుల ఆందోళనలు కూడా వ్యక్తమవుతున్నాయి. మరోవైపు, ఈ సాంకేతికతపై ప్రజల్లో భయాలు, వ్యతిరేకత పెరుగుతున్నాయి. ఇలాంటి సమయంలో దాని పేరును సానుకూలంగా మార్చడం ద్వారా ప్రజల దృష్టిని దాని అవకాశాలవైపు మళ్లించాలని ట్రంప్‌ భావిస్తున్నట్లు విశ్లేషణలు వెలువడుతున్నాయి. ప్రభుత్వ వెబ్‌సైట్‌లోనూ మార్పులుట్రంప్‌ ఆదేశాల నేపథ్యంలో అమెరికా ప్రభుత్వ ఏఐ వెబ్‌సైట్‌లోనూ ‘SI’ అనే పదాన్ని ప్రముఖంగా ప్రదర్శించారు. అయితే వెబ్‌సైట్‌ చిరునామా మాత్రం ‘AI.gov’గానే ఉంది. మరోవైపు, వైట్‌హౌస్‌లోని కొన్ని వెబ్‌పేజీల్లో ఇప్పటికీ ‘ఆర్టిఫిషియల్‌ ఇంటెలిజెన్స్‌’ అనే పదం కనిపిస్తుండటం గమనార్హం.ఏఐపై నియంత్రణ వద్దు..అమెరికా ఏఐ రంగంలో ముందంజలో ఉందని, చైనాతో పోటీలో వెనుకబడకుండా ఈ సాంకేతికత అభివృద్ధిని వేగవంతం చేయాలని ట్రంప్‌ భావిస్తున్నారు. ఈ రంగంలోని కంపెనీలు స్వీయ నియంత్రణ పాటించగలవని ఆయన గతంలో పేర్కొన్నారు. అయితే ఏఐ భద్రతపై ప్రభుత్వ నియంత్రణలు అవసరమనే డిమాండ్లు కూడా పెరుగుతున్నాయి. పేరును మార్చడం వల్ల సాంకేతికతపై ఉన్న భద్రతా సందేహాలు తొలగిపోతాయా? లేదంటే ఇది కేవలం ప్రచార వ్యూహంగానే మిగిలిపోతుందా? అన్నది చర్చనీయాంశంగా మారింది.ఇదీ చదవండి: మిడ్‌ టర్మ్‌లో ట్రంప్‌కు ఘోర పరాభవం తప్పదా?

అమెరికాలో సంచలనం రేపిన ఓ సైనిక స్థావరంపై కాల్పుల కేసులో ట్రంప్‌ ప్రభుత్వం సంచలన నిర్ణయం తీసుకుంది. 2009లో టెక్సాస్‌లోని ఫోర్ట్‌ హుడ్‌ సైనిక స్థావరంలో 13 మందిని కాల్చి చంపిన మాజీ ఆర్మీ మానసిక వైద్యుడు నిడాల్‌ హసన్‌కు మరణశిక్ష అమలు చేసే ముహూర్తం ఖరారు చేశారు. అంతేకాదు.. అతడిని ఫైరింగ్‌ స్క్వాడ్‌తో కాల్చి చంపే ప్రక్రియను లైవ్‌స్ట్రీమింగ్‌ చేయనున్నట్లు పెంటగాన్‌ ప్రకటించింది. నిడాల్‌ హసన్‌కు డిసెంబర్‌ 3, 2026న గురువారం మధ్యాహ్నం 1 గంటకు అమెరికా సెంట్రల్‌ టైమ్‌ ప్రకారం (భారత కాలమానం ప్రకారం డిసెంబర్‌ 4న అర్ధరాత్రి 12:30 గంటలకు) మరణశిక్ష అమలు చేయనున్నారు. టెక్సాస్‌లోని ఫోర్ట్‌ హుడ్‌ సైనిక స్థావరంలో ఫైరింగ్‌ స్క్వాడ్‌(తుపాకీతో కాల్చి చంపడం) ద్వారా శిక్ష అమలు చేయాలని నిర్ణయించారు. అమెరికాలో మరణశిక్షను ప్రత్యక్ష ప్రసారం చేయడం ఇదే తొలిసారి కానుంది. అయితే.. ఈ నిర్ణయం వెనుక శిక్ష తీవ్రతను ప్రజలకు చాటాలనే ఉద్దేశం ఉందని రక్షణ మంత్రి పీట్‌ హెగ్‌సెత్‌ వ్యాఖ్యలు సూచిస్తున్నాయి. అదే సమయంలో లైవ్‌ టెలికాస్టింగ్‌పై న్యాయపరమైన ప్రశ్నలతోపాటు నైతిక చర్చ కూడా మొదలైంది.రక్షణ మంత్రి హెగ్‌సెత్‌ ఈ నిర్ణయాన్ని సమర్థిస్తూ.. ఇలాంటి చర్యలకు తీవ్రమైన పరిణామాలు ఉంటాయనే విషయాన్ని ప్రజలు అర్థం చేసుకోవాలని చెప్పారు. ఫోర్ట్‌ హుడ్‌లో గురువారం మధ్యాహ్నం ఒంటి గంటకు శిక్ష అమలు చేయాలని నిర్ణయించడం కూడా యాదృచ్ఛికం కాదని ఆయన వ్యాఖ్యానించారు. 2009లో హసన్‌ కాల్పులకు తెగబడిన రోజు, సమయం, అదే స్థావరాన్ని దృష్టిలో ఉంచుకుని ఈ నిర్ణయం తీసుకున్నట్లు తెలిపారు. అసలు నిడాల్‌ హసన్‌ ఎవరు?నిడాల్‌ హసన్‌ (56) గతంలో అమెరికా సైన్యంలో మానసిక వైద్యుడిగా పనిచేశారు. 2009 నవంబర్‌ 5న టెక్సాస్‌లోని ఫోర్ట్‌ హుడ్‌ సైనిక స్థావరంలో ఉన్న వైద్య కేంద్రంలోకి వెళ్లి తుపాకీతో కాల్పులు జరిపారు. ఈ ఘటనలో 13 మంది మరణించగా, మరో 32 మంది గాయపడ్డారు. మృతుల్లో గర్భిణీ సైనికురాలు కూడా ఉన్నారు. కాల్పుల సమయంలో హసన్‌ సెమీ ఆటోమేటిక్‌ హ్యాండ్‌గన్‌ ఉపయోగించినట్లు నివేదికలు వెల్లడించాయి.ఈ దాడి జరిగినప్పుడు హసన్‌ మరికొద్ది వారాల్లో ఆఫ్ఘనిస్తాన్‌కు విధులపై వెళ్లాల్సి ఉంది. అమెరికా ముస్లిం దేశాల్లో చేపట్టిన యుద్ధాలకు ప్రతీకారంగానే దాడి చేసినట్లు ఆయన పేర్కొన్నారని వార్తా కథనాలు తెలిపాయి. అరెస్టు చేసే సమయంలో పోలీసులు కాల్పులు జరపడంతో హసన్‌ పాక్షికంగా పక్షవాతానికి గురయ్యారు. అప్పటి నుంచి వీల్‌చైర్‌కే పరిమితమయ్యారు.2013లోనే మరణశిక్ష విధింపుఈ కేసులో సైనిక న్యాయస్థానం 2013 ఆగస్టులో హసన్‌ను దోషిగా తేల్చింది. ముందస్తు ప్రణాళికతో హత్యలు చేయడం, హత్యాయత్నాలకు పాల్పడటం కలిపి 45 అభియోగాల్లో ఆయన దోషిగా తేలారు. అనంతరం సైనిక జ్యూరీ మరణశిక్ష విధించాలని సిఫార్సు చేసింది. అప్పటి నుంచి ఆయన మరణశిక్ష ఖైదీగా ఉన్నారు.అమెరికా సైనిక చట్టాల ప్రకారం సైనికుడికి మరణశిక్ష అమలు చేయడానికి అధ్యక్షుడి ఆమోదం తప్పనిసరి. రక్షణ మంత్రి హెగ్‌సెత్‌ సిఫార్సు మేరకు అధ్యక్షుడు డొనాల్డ్‌ ట్రంప్‌ ఫైరింగ్‌ స్క్వాడ్‌ ద్వారా శిక్ష అమలుకు ఆమోదం తెలిపినట్లు పెంటగాన్‌ వెల్లడించింది. డిసెంబర్‌ 3న టెక్సాస్‌లోని అదే ఫోర్ట్‌ హుడ్‌ స్థావరంలో మధ్యాహ్నం ఒంటి గంటకు శిక్ష అమలు చేయాలని సైన్యం ప్రకటించింది.అమెరికా చరిత్రలోనే అరుదైన పరిణామంఅమెరికాలో మరణశిక్షలను టెలివిజన్‌లో ప్రసారం చేయాలంటూ గతంలో మీడియా సంస్థలు ప్రయత్నించినప్పటికీ, కోర్టుల ద్వారా అడ్డంకులు ఎదురయ్యాయి. ఇప్పుడు సైనిక స్థావరంలో అమలు చేయబోయే శిక్షను లైవ్‌స్ట్రీమింగ్‌ చేయాలన్న నిర్ణయం చట్టపరమైన, నైతికపరమైన ప్రశ్నలకు దారితీస్తోంది. అమెరికాలో చివరిసారిగా చట్టబద్ధంగా బహిరంగంగా మరణశిక్ష అమలు చేసింది 1936లో. అప్పట్లో వేలాది మంది ప్రేక్షకుల సమక్షంలో ఉరిశిక్ష అమలు చేశారు. అప్పటి నుంచి అమెరికాలో మరణశిక్షలు సాధారణంగా ప్రజలకు కనిపించకుండా, నిర్దిష్ట ప్రదేశాల్లోనే అమలు చేస్తున్నారు.ఫైరింగ్‌ స్క్వాడ్‌ ద్వారా అమెరికా సైన్యం చివరిసారిగా 1945లో మరణశిక్ష అమలు చేసింది. రెండో ప్రపంచ యుద్ధం సమయంలో సైనిక విధుల నుంచి పారిపోయిన ఎడ్డీ స్లోవిక్‌ను ఫ్రాన్స్‌లో కాల్చి చంపారు. అయితే, అమెరికా సైన్యంలో చివరిసారిగా మరణశిక్ష అమలైంది 1961లో. ఆ సందర్భంలో జాన్‌ బెన్నెట్‌కు ఉరిశిక్ష విధించారు. అందువల్ల హసన్‌కు శిక్ష అమలైతే, 1945 తర్వాత అమెరికా సైన్యంలో ఫైరింగ్‌ స్క్వాడ్‌ ద్వారా మరణశిక్ష విధించిన తొలి వ్యక్తిగా ఆయన నిలుస్తారు.న్యాయ నిపుణుల అభ్యంతరాలుఈ నిర్ణయంపై న్యాయ నిపుణులు ప్రశ్నలు లేవనెత్తుతున్నారు. యేల్‌ లా స్కూల్‌లో ఉపన్యాసాలు ఇచ్చే సైనిక న్యాయ నిపుణుడు యూజీన్‌ ఫిడెల్‌.. మరణశిక్షను ప్రత్యక్ష ప్రసారం చేయడం అత్యంత అసాధారణమని వ్యాఖ్యానించారు. ఈ అంశంపై అమెరికా సుప్రీంకోర్టు ఇప్పటివరకు స్పష్టమైన తీర్పు ఇవ్వలేదని తెలిపారు. హసన్‌ తన మరణాన్ని ప్రజలకు ప్రదర్శించడాన్ని అడ్డుకోవాలనుకుంటే ఫెడరల్‌ కోర్టును ఆశ్రయించాల్సి ఉంటుందని పేర్కొన్నారు.సైనిక న్యాయ చరిత్రకారుడు జోనాథన్‌ లూరీ కూడా ఈ నిర్ణయాన్ని ప్రశ్నించారు. మరణశిక్షను బహిరంగంగా చూపించడం వల్ల ఏమి ప్రయోజనం ఉంటుందనే సందేహం వ్యక్తం చేశారు. ప్రభుత్వం శిక్షను ప్రజలకు చూపించడం ద్వారా నేరాలపై భయం కలిగించాలని భావిస్తున్నప్పటికీ, అది అవసరమా అనే చర్చ మొదలైంది.మరణశిక్ష విధానాలపై మళ్లీ చర్చప్రస్తుతం అమెరికాలో కొన్ని రాష్ట్రాలు ఫైరింగ్‌ స్క్వాడ్‌ ద్వారా మరణశిక్ష అమలుకు అనుమతిస్తున్నాయి. డెత్‌ పెనాల్టీ ఇన్ఫర్మేషన్‌ సెంటర్‌ ప్రకారం.. కనీసం ఐదు రాష్ట్రాల్లో ఈ విధానం చట్టబద్ధంగా ఉంది. 2025లో దక్షిణ కరోలినా 15 ఏళ్ల విరామం తర్వాత ఫైరింగ్‌ స్క్వాడ్‌ ద్వారా మరణశిక్ష అమలు చేసిన తొలి రాష్ట్రంగా నిలిచింది. మరోవైపు, ప్రాణాంతక ఇంజెక్షన్ల కోసం అవసరమైన మందులు లభించడంలో ఇబ్బందులు ఎదురవుతున్న నేపథ్యంలో అమెరికా ప్రభుత్వం ఫైరింగ్‌ స్క్వాడ్‌, కరెంట్‌ షాకివ్వడం, విషవాయువుతో ఊపిరాడకుండా చేయడం వంటి పద్ధతులను కూడా చేర్చింది. ఇటీవల టెన్నెసీలో క్రిస్టా పైక్‌ అనే మహిళకు ప్రాణాంతక ఇంజెక్షన్‌ ద్వారా మరణశిక్ష అమలు చేసే ప్రయత్నం విఫలమవడం కూడా ఈ చర్చకు మరింత ప్రాధాన్యం తెచ్చింది. ఇంజెక్షన్‌ ప్రక్రియలో సమస్యలు తలెత్తడంతో ఆమెను ఆస్పత్రికి తరలించారు. ప్రపంచవ్యాప్తంగా చట్టబద్ధమైన మరణశిక్షలను ప్రత్యక్ష ప్రసారం చేయడం అత్యంత అరుదైన విషయం. ఇటీవలి కాలంలో బహిరంగ మరణశిక్షలు అమలు చేసిన దేశాలుగా ఇరాన్‌, తాలిబన్ల పాలనలోని ఆఫ్ఘనిస్తాన్‌ పేర్లు వినిపిస్తున్నాయి. ఇప్పుడు అమెరికా సైన్యం కూడా ఈ దిశగా అడుగువేస్తుండటంతో.. నేరాలకు శిక్ష విధించే విధానం, దాని ద్వారా ప్రజలకు ఏ సందేశం ఇవ్వాలనే అంశాలపై అంతర్జాతీయంగా చర్చ జరిగే అవకాశం ఉంది. మొత్తానికి.. 13 మందిని చంపిన కేసులో నిడాల్‌ హసన్‌కు మరణశిక్ష విధించడం కొత్త విషయం కాదు. కానీ ఆ శిక్షను ఫైరింగ్‌ స్క్వాడ్‌ ద్వారా అమలు చేయడంతోపాటు ప్రజలు ప్రత్యక్షంగా చూడగలిగేలా ప్రసారం చేయాలన్న నిర్ణయమే ఇప్పుడు అమెరికాలో కొత్త వివాదానికి కేంద్రంగా మారింది.ఇదీ చదవండి: ఎన్నారైలే టార్గెట్‌.. ట్రంప్‌ బిగ్‌ స్కెచ్‌

అమెరికాలో ఉన్న విదేశీయులపై ట్రంప్‌ అక్కసు ప్రత్యేకించి చెప్పాల్సిన అవసరం లేదు. ఏదో కారణంతో తరచుగా వారిని వేదిస్తూ తరచుగా ఇబ్బందులకు గురిచేస్తుంటారు. అదే భారతీయులపై ఆ అక్కసు మరింత అధికంగా ఉంటుంది. అయితే త్వరలో అమెరికాలో మధ్యంతర ఎన్నికలు జరగనున్నాయి. దీంతో ట్రంప్‌ అప్రమత్తమైనట్లు తెలుస్తోంది. మధ్యంతర ఎన్నికల్లో తనకు ఓటు వేయరనే భయంతో ఏకంగా ఓ‍ట్ల తొలగింపు చేపడుతున్నట్లు సమాచారం.అమెరికాలో దాదాపుగా 21 లక్షల మంది భారతీయ-అమెరికన్ ఓటర్లు ఉన్నారు. అయితే ట్రంప్‌ భారతీయులపై చేసే తల బిరుసు వ్యాఖ్యలు, తదితర కారణాల రీత్యా వారు తొలుత నుంచి ప్రత్యర్థి అయిన డెమోక్రటిక్ పార్టీకే మద్దతు ఇస్తున్నారు. ఈ నేపథ్యంలోనే మధ్యంతర ఎన్నికలలో భారతీయ- అమెరికన్‌ ఓట్లను పెద్దఎత్తున తొలగింపు చేస్తున్నట్లు సమాచారం. ట్రంప్ రిపబ్లికన్ పార్టీ అధికారంలో ఉన్న 26 రాష్ట్రాల నుంచి దాదాపు లక్ష మందికి పైగా భారత సంతతి ఓటర్ల పేర్లను తొలగించినట్లు తెలుస్తోంది.ఓటర్ల జాబితా ఎందుకు తనిఖీ ?అమెరికాలో, ఓటు వేయడానికి అనర్హులైన వారి పేర్లను తొలగించడానికి ట్రంప్ ప్రభుత్వం ఓటర్ల జాబితాలను తనిఖీ చేస్తోంది. ఇది ఎన్నికల మోసాన్ని నివారించడంతో పాటు, ఓటింగ్ ప్రక్రియను మరింత సురక్షితం చేస్తుందని కారణాలు చెబుతోంది. ట్రంప్ "సేవ్ అమెరికా యాక్ట్" ప్రకారం యూఎస్ కాంగ్రెస్ దిగువ సభ ఆమోదించిన ఈ బిల్లు ప్రకారం, ఓటర్లుగా నమోదు చేసుకునేవారు తమ యూఎస్ పౌరసత్వాన్ని నిరూపించుకోవడానికి జనన ధృవీకరణ పత్రం లేదా పాస్‌పోర్ట్ వంటి పత్రాలను సమర్పించాల్సి ఉంటుంది.ఓటు వేయడానికి గుర్తింపు పత్రాలు సమర్పించే నిబంధనలను కూడా కఠినతరం చేయనున్నారు. ఈ నిబంధనలు పోలింగ్ కేంద్రంలో ఓటు వేయడానికి, అలాగే పోస్టల్ ఓటింగ్‌కు కూడా వర్తిస్తాయి. మరోవైపు, ఈ బిల్లును వ్యతిరేకించేవారు, జనన ధృవీకరణ పత్రాలు లేదా పాస్‌పోర్ట్‌లు లేకపోయినా, కఠినమైన పత్రాల నిబంధనలు అర్హులైన పౌరులను ఓటు వేయకుండా నిరోధించగలవని అంటున్నారు. ఈ చర్యలతో ట్రంప్ ప్రభుత్వం మధ్యంతర ఎన్నికలను ప్రభావితం చేయడానికి ప్రయత్నిస్తోందని డెమోక్రటిక్ పార్టీ నాయకులు ఆరోపిస్తున్నారు.70 శాతం మంది అమెరికన్లు అసంతృప్తికాగా ట్రంప్ సొంత రిపబ్లికన్ పార్టీలోనే ఆయనకు వ్యతిరేకంగా తిరుగుబాటు సంకేతాలు కనిపిస్తున్నాయి. ఆయన ప్రజాదరణ తగ్గుతోంది. మధ్యంతర ఎన్నికలలో ఆయన మద్దతు తమకు నష్టం కలిగిస్తుందని పార్టీ నాయకులు భయపడుతున్నారు.నవంబర్ ఎన్నికలకు ముందు, చాలా మంది రిపబ్లికన్ అభ్యర్థులు ట్రంప్ నుండి తమను తాము దూరం చేసుకుంటున్నారు. కొందరు తమ ప్రచార వెబ్‌సైట్‌ల నుండి ట్రంప్ ,అతని "అమెరికా ఫస్ట్" ఎజెండా గురించిన ప్రస్తావనను పూర్తిగా తొలగించారు. కొంతమంది నాయకులు అతనితో కలిసి వేదిక పంచుకోవడానికి కూడా దూరంగా ఉంటున్నారు.ఏపీ-ఎన్‌ఓఆర్‌సి సర్వే ప్రకారం, కేవలం 30% మంది అమెరికన్లు మాత్రమే ట్రంప్ పనితీరుతో సంతోషంగా ఉన్నారు. ఆర్థిక వ్యవస్థపై ఆయన ఆమోద రేటింగ్ 26%గా ఉంది. ద్రవ్యోల్బణాన్ని ఎదుర్కోవడంలో ఆయన ఆమోద రేటింగ్ కేవలం 17% మాత్రమే. 65% కంటే ఎక్కువ మంది అమెరికన్లు పెరుగుతున్న ధరలకు ట్రంప్ విధానాలనే నిందిస్తున్నారు.2024 అధ్యక్ష ఎన్నికలలో2024లో జరిగిన అధ్యక్ష ఎన్నికల్లో భారతీయ సంతతికి చెందిన ప్రజలలో సుమారు 65% మంది డెమోక్రటిక్ పార్టీ అభ్యర్థి కమలా హారిస్‌కు ఓటు వేశారని సర్వేలు చెబుతున్నాయి. దీంతో ఈ సారి కూడా అలా జరిగితే తనపై ఉన్న వ్యతిరేకత బట్టబయలవుతుందని ట్రంప్ ఓట్లు తొలగింపు చేపడుతున్నట్లు తెలుస్తోంది.మధ్యంతర ఎన్నికలు ఎందుకు?సెనేట్ సభ్యుల పదవీకాలం 6 సంవత్సరాలు. అయితే అందరి పదవీకాలం ఒకేసారి ముగియకుండా, ప్రతి రెండేళ్లకు మూడో వంతు (1/3rd) స్థానాలకు మాత్రమే ఎన్నికలు జరిగేలా రాజ్యాంగంలో ఏర్పాటు చేశారు. అంటే, అమెరికా అధ్యక్షుడికి 4 ఏళ్ల కాలపరిమితి ఉన్నప్పటికీ, దేశ చట్టాలను రూపొందించే పార్లమెంట్ (కాంగ్రెస్) సభ్యుల పదవీకాలాలు మాత్రం రెండేళ్లకే ముగిసిపోతుంటాయి. అందువల్ల అధ్యక్ష ఎన్నికలకు మధ్యలో ఈ ఎన్నికలు జరగడం వల్ల వీటిని "మధ్యంతర ఎన్నికలు" అని పిలుస్తారు.మెజారిటీ నిలుపుకుంటారా? ఈ ఎన్నికలు రాబోయే రెండేళ్లలో యూఎస్ కాంగ్రెస్‌లో ఏ పార్టీ అధికారంలో ఉంటుందో నిర్ణయిస్తాయి. సెనేట్‌లో 100 మంది సభ్యులు ఉంటారు. ఈసారి, 35 స్థానాలకు ఎన్నికలు జరగనున్నాయి. ప్రతినిధుల సభలో 435 స్థానాలకు ఎన్నికలు జరగనున్నాయి. ప్రస్తుతం, రిపబ్లికన్ పార్టీ సెనేట్‌లో 53 స్థానాలను, ప్రతినిధుల సభలో 218 స్థానాలను కలిగి ఉంది.ఈ ఎన్నికల్లో ట్రంప్ రిపబ్లికన్ పార్టీ ఓడిపోతే, కాంగ్రెస్‌లో చట్టాలను ఆమోదింపజేయడం ఆయనకు చాలా కష్టమవుతుంది. ఆయన తనకు నచ్చిన ఏ బిల్లునూ నేరుగా చట్టంగా మార్చలేరు.ఇదీ చదవండి: అస్సాంలో రోడ్డు ప్రమాదం

హెచ్‌-1బీ వీసా విధానాన్ని తప్పుడు దోవలో వినియోగించుకుంటూ అమెరికన్ల ఉద్యోగాలకు ఎసరు పెడుతున్నారంటూ ఐటీ దిగ్గజ కంపెనీలపై అమెరికా ఉపాధ్యక్షుడు జేడీ వాన్స్‌ తీవ్రస్థాయిలో విరుచుకుపడ్డారు. అమెరికన్‌ ఉద్యోగులను తొలగించి.. వారి స్థానంలో తక్కువ వేతనాలకు విదేశీయులతో పనిచేయించుకుంటున్నారని ఆరోపించారు. పైగా విదేశీ ఉద్యోగులను ‘వెట్టి చాకిరీ చేసే బానిసలు’గా ఉపయోగించుకోవడాన్ని సహించబోమని స్పష్టం చేశారు.ఈ క్రమంలో దిగ్గజ కంపెనీ మైక్రోసాఫ్ట్‌నే లక్ష్యంగా చేసుకుని ఆయన విరుచుకుపడ్డారు. గత ఏడాది 6,000 మంది అమెరికన్‌ ఉద్యోగులను తొలగించగా.. అదే సమయంలో 6,300 హెచ్‌-1బీ వీసాలు పొందిందని వాన్స్‌ పేర్కొన్నారు. ఈ వ్యవహారంపై చర్యలు తీసుకుంటూ, విదేశీ ఉద్యోగులకు గ్రీన్‌కార్డుల కోసం దరఖాస్తు చేసే ప్రక్రియలో మైక్రోసాఫ్ట్‌పై ఆంక్షలు విధిస్తున్నట్లు ప్రకటించారు.ఒక్కో ఉద్యోగికి బదులుగా..మైక్రోసాఫ్ట్‌ అమెరికన్‌ ఉద్యోగులను తొలగిస్తూ.. విదేశీ ఉద్యోగుల నియామకాలను కొనసాగించడంపై వాన్స్‌ తీవ్ర అభ్యంతరం వ్యక్తం చేశారు. గత ఏడాది సంస్థ 6,000 మంది అమెరికన్లను ఉద్యోగాల నుంచి తొలగించిందని, అదే సమయంలో 6,300 హెచ్‌-1బీ వీసాలు పొందిందని, దాదాపు 3,000 గ్రీన్‌కార్డుల ప్రక్రియలకు సంబంధించిన ప్రయోజనాలు పొందిందని చెప్పారు.“మైక్రోసాఫ్ట్‌ గొప్ప అమెరికన్‌ సంస్థే. కానీ అమెరికన్లకు ఉద్యోగాలు ఇవ్వాలి. అమెరికన్‌ ఉద్యోగులను తొలగించి వారి స్థానంలో విదేశీ ఉద్యోగులతో వెట్టి చాకిరీ చేయించుకోలేరు” అని వాన్స్‌ వ్యాఖ్యానించారు. లెక్కలు చూస్తే.. తొలగించిన ప్రతి అమెరికన్‌ ఉద్యోగికి బదులుగా 1.5 మంది విదేశీ ఉద్యోగులను తీసుకున్నట్లుగా ఉందని ఆరోపించారు. ఇలాంటి విధానాన్ని అమెరికా ఇంతకాలం అనుమతించడం సిగ్గుచేటని విమర్శించారు.అతితక్కువ వేతనాలతో.. హెచ్‌-1బీ వీసాలపై అమెరికాకు వస్తున్న ఉద్యోగులు, ముఖ్యంగా ఔట్‌సోర్సింగ్‌ సంస్థల ద్వారా నియమితులవుతున్నవారు, తక్కువ వేతనాలకు పనిచేస్తున్నారని వాన్స్‌ ఆరోపించారు. ఉద్యోగం కోల్పోతే దేశం విడిచి వెళ్లాల్సిన పరిస్థితి ఉండటంతో కొందరు విదేశీ ఉద్యోగులు యజమానులపై ఆధారపడాల్సి వస్తోందని పేర్కొన్నారు. ఈ కారణంగానే వారిని ‘ఫారిన్‌ ఇండెంచర్డ్‌ సర్వెంట్స్‌’గా అభివర్ణించారు. హెచ్‌-1బీ విధానం నైపుణ్యం కలిగిన ఉద్యోగులను అమెరికాకు తీసుకురావడానికి ఉద్దేశించిందని, అమెరికన్లను తక్కువ వేతనాలతో విదేశీయులతో భర్తీ చేయడానికి కాదని వాన్స్‌ వాదించారు.మైక్రోసాఫ్ట్‌ వివరణ ఇదీ..అయితే వాన్స్‌ ఆరోపణలపై మైక్రోసాఫ్ట్‌ స్పందించింది. గత ఆర్థిక సంవత్సరంలో హెచ్‌-1బీ వీసాలకు సంబంధించి తాము చేసిన దరఖాస్తుల్లో సుమారు 80 శాతం ఇప్పటికే సంస్థలో పనిచేస్తున్న ఉద్యోగుల వీసాల పొడిగింపు లేదంటే హోదా మార్పుల కోసమేనని తెలిపింది. అవన్నీ కొత్తగా విదేశీ ఉద్యోగులను నియమించుకోవడానికి చేసిన దరఖాస్తులు కావని స్పష్టం చేసింది. అమెరికాలో తమ ఉద్యోగుల్లో అత్యధికులు అమెరికన్లేనని, హెచ్‌-1బీ ఉద్యోగులకు కూడా సమానమైన పనికి ఇతర ఉద్యోగులతో పోల్చదగిన వేతనాలు చెల్లిస్తున్నామని సంస్థ పేర్కొంది. వీసా నిబంధనలను ఉల్లంఘిస్తున్నారన్న ఆరోపణలను ప్రభుత్వం ఎలా నిర్ధారిస్తుందన్నది, ఈ చర్యలపై తదుపరి పరిణామాలు ఎలా ఉంటాయన్నది ఇప్పుడు కీలకంగా మారింది.గ్రీన్‌కార్డు దరఖాస్తులపై నిలిపివేతమైక్రోసాఫ్ట్‌తో పాటు అడోబ్‌, కాగ్నిజెంట్‌, ఇన్ఫోసిస్‌, టాటా కన్సల్టెన్సీ సర్వీసెస్‌ (టీసీఎస్‌), విప్రో, హెచ్‌సీఎల్‌ టెక్నాలజీస్‌, క్యాప్‌జెమినీ సంస్థలను కూడా పర్మినెంట్‌ లేబర్‌ సర్టిఫికేషన్‌ ప్రక్రియ నుంచి నిలిపివేస్తున్నట్లు అమెరికా కార్మిక శాఖ ప్రకటించింది. ఈ సంస్థలకు సంబంధించిన కొత్త దరఖాస్తులను స్వీకరించబోమని, పెండింగ్‌లో ఉన్న దరఖాస్తులను కూడా ప్రాసెస్‌ చేయబోమని అధికారులు తెలిపారు. ఈ చర్య అమెరికాలో పనిచేస్తున్న విదేశీ నిపుణులకు యజమాని ద్వారా గ్రీన్‌కార్డు పొందే ప్రక్రియపై ప్రభావం చూపుతుంది. అమెరికన్‌ ఉద్యోగులకు నష్టం కలగకుండా విదేశీ ఉద్యోగులను నియమిస్తున్నారా అనే అంశాన్ని ఈ ప్రక్రియలో పరిశీలిస్తారు.విదేశీ ఉద్యోగుల నియామకాలపై నిబంధనలను కఠినతరం చేయాలన్న ట్రంప్‌ ప్రభుత్వ వైఖరికి అనుగుణంగానే ఈ చర్యలు తీసుకున్నట్లు అధికారులు చెబుతున్నారు. మరోవైపు, భారతీయ ఐటీ రంగానికి చెందిన సంస్థలపై ఈ నిర్ణయం ప్రభావం చూపే అవకాశం ఉండటంతో, అమెరికాలో పనిచేస్తున్న భారతీయ నిపుణులు తదుపరి పరిణామాలపై దృష్టి సారిస్తున్నారు.ఇటు నాదెళ్లకు ట్రంప్‌ సన్మానం!హెచ్‌-1బీ వీసాలపై జేడీ వాన్స్‌ మైక్రోసాఫ్ట్‌ను విమర్శించిన రోజే.. అమెరికా అధ్యక్షుడు డొనాల్డ్‌ ట్రంప్‌ ఆ సంస్థ సీఈవో సత్య నాదెళ్లను సత్కరించారు. సాంకేతిక రంగంలో విశేష కృషికి గుర్తింపుగా నాదెళ్లకు నేషనల్‌ మెడల్‌ ఆఫ్‌ టెక్నాలజీ అండ్‌ ఇన్నోవేషన్‌ పురస్కారాన్ని అందించారు. మైక్రోసాఫ్ట్‌ అభివృద్ధిలో, క్లౌడ్‌ కంప్యూటింగ్‌ రంగంలో ఆయన పోషించిన పాత్రను ప్రశంసించారు.#WATCH | US President Donald Trump presents the National Medal of Technology and Innovation to Microsoft CEO & Chairman Satya Nadella at the 'A New Golden Age' summit in Washington. (Source: The White House) https://t.co/nUwCYMeXOT— ANI (@ANI) October 8, 2026ఒకవైపు అమెరికన్ల ఉద్యోగాలను విదేశీయులతో భర్తీ చేస్తున్నారంటూ మైక్రోసాఫ్ట్‌పై వాన్స్‌ విమర్శలు.. మరోవైపు అదే సంస్థ సీఈవోకు ట్రంప్‌ నుంచి పురస్కారం! ఇలా ఒకే రోజు చోటుచేసుకున్న ఈ రెండు పరిణామాలు చర్చనీయాంశంగా మారాయి.

సైబీరియా: రష్యాలోని సైబీరియాలో ప్లేగు పరిశోధనా కేంద్రంలో పనిచేసే 28 ఏళ్ల దర్యా షిపిలోవా మృతి చెందడం అంతర్జాతీయంగా అనుమానాలకు దారితీసింది. ఆమె మరణానికి కారణం ఏమిటన్న దానిపై స్పష్టత లేకపోవడంతో అమెరికా, ప్రపంచ ఆరోగ్య సంస్థ (డబ్ల్యూహెచ​వో) రష్యాను మరిన్ని వివరాలు వెల్లడించాలని కోరుతున్నాయి. ఈ నేపథ్యంలో అమెరికా అధ్యక్షుడు డొనాల్డ్ ట్రంప్‌తో ఫోన్‌లో మాట్లాడేందుకు రష్యా అధ్యక్షుడు వ్లాదిమిర్ పుతిన్ సిద్ధంగా ఉన్నట్లు మాస్కో తెలిపింది. అయితే ఇప్పటివరకు కాల్‌కు ఎలాంటి సమయం ఖరారు కాలేదు.‘న్యూమోనియా’తో మృతి.. ప్లేగుపై అనుమానాలుఅక్టోబర్ 2న మరణించిన షిపిలోవా.. ఇర్కుట్స్క్ యాంటీ-ప్లేగ్ ఇన్‌స్టిట్యూట్‌లో పనిచేస్తున్నారు. ఆమె మరణానికి ‘న్యూమోనియా’ కారణమని రష్యా అధికారులు చెబుతున్నారు. అయితే తొలుత వచ్చిన కొన్ని రష్యా మీడియా కథనాల్లో ల్యాబ్‌లో జరిగిన ప్రమాదం కారణంగా ఆమెకు న్యూమోనిక్ ప్లేగు సోకి ఉండొచ్చని పేర్కొన్నారు.200 మందికి పరీక్షలు.. ప్లేగు కేసులేవీ లేవుషిపిలోవాతో సంబంధం ఉన్న సుమారు 200 మందిని పరీక్షించినట్లు రష్యా ఆరోగ్య పర్యవేక్షణ సంస్థ రోస్పోట్రెబ్నాడ్జోర్ తెలిపింది. వారిలో ఎవరికీ ప్లేగు నిర్ధారణ కాలేదని పేర్కొంది. దాదాపు 90 శాతం మందిని పర్యవేక్షణ కోసం విధించిన క్వారంటైన్ నుంచి విడుదల చేసినట్లు తెలిపింది. మొత్తం దాదాపు 5 వేల ప్రయోగశాల పరీక్షలు నిర్వహించామని, ప్రమాదకరమైన వ్యాధికారకాలు ఏవీ గుర్తించలేదని వెల్లడించింది.‘మహమ్మారి ముప్పు లేదు’షిపిలోవా మరణం నేపథ్యంలో ఇర్కుట్స్క్ ప్రాంతంలో తీసుకున్న ముందస్తు జాగ్రత్తలను సడలిస్తున్నట్లు రష్యా అధికారులు తెలిపారు. ఆమెకు పనిచేసే ప్రమాదకర అంటువ్యాధులపై వ్యాక్సిన్లు కూడా ఉన్నాయని పేర్కొన్నారు. అయితే షిపిలోవా మరణానికి అసలు కారణం ఏమిటో స్పష్టంగా చెప్పకపోవడంతో డబ్ల్యూహెచ్‌​వో రష్యా నుంచి మరింత సమాచారం కోరింది. ఆ ప్రాంతంలో మరో వ్యక్తికి కూడా ఇన్ఫెక్షన్ సోకినట్లు వచ్చిన వార్తలను పరిశీలిస్తున్నట్లు తెలిపింది. అయితే రెండో కేసు ఇప్పటివరకు నిర్ధారణ కాలేదు.బయో టెర్రరిజం ముప్పుపైనా ప్రశ్నలుఇర్కుట్స్క్ పరిశోధనా కేంద్రం సాధారణ ప్లేగు పరిశోధనలతో పాటు బయోటెర్రరిజానికి ఉపయోగించే ప్రమాదకర జీవ పదార్థాలకు సంబంధించిన అత్యవసర పరిస్థితులను ఎదుర్కొనే ప్రణాళికలపై కూడా పనిచేస్తున్నట్లు సంస్థ వెబ్‌సైట్‌లో పేర్కొంది. ఈ కారణంగానే ఈ ఘటనపై అంతర్జాతీయ దృష్టి మరింత పెరిగింది. గతంలో రష్యా జీవాయుధ కార్యక్రమాలతో సంబంధం ఉన్నట్లు ఆరోపణలు ఎదుర్కొన్న నేపథ్యంలో ఈ కేంద్రంపై కొత్త అనుమానాలు వ్యక్తమవుతున్నాయి. అయితే షిపిలోవా మరణానికి జీవాయుధాలు లేదా ల్యాబ్ ప్రమాదమే కారణమని నిర్ధారించే ఆధారాలు ఇప్పటివరకు లేవు.పొరుగు దేశాల అప్రమత్తతరష్యా అధికారులు ప్రజలకు ఎలాంటి మహమ్మారి ముప్పు లేదని చెబుతున్నప్పటికీ, పొరుగు దేశాలు మాత్రం అప్రమత్తమయ్యాయి. రష్యా నుంచి అంటువ్యాధులు వ్యాప్తి చెందకుండా కజకిస్థాన్, కిర్గిజిస్థాన్, ఉజ్బెకిస్థాన్ అదనపు ముందస్తు చర్యలు చేపట్టినట్లు అధికారులు తెలిపారు. షిపిలోవా మరణానికి ఖచ్చితమైన కారణంపై రష్యా నుంచి స్పష్టమైన వివరణ వచ్చే వరకు ఈ అంశంపై అంతర్జాతీయంగా ప్రశ్నలు కొనసాగే అవకాశం ఉంది.ఇదీ చదవండి: ‘నానా’ను బలిగొన్న కార్డియాక్‌ అరెస్ట్‌.. ఆ కీలక నిమిషాల్లో ఏం చేయాలంటే..

ఒకవైపు ప్రపంచ వేదికపై యుద్ధాలు.. మరోవైపు శాంతి బహుమతి కోసం పోటీ. గన్‌ మోతలు వినిపిస్తున్న వేళ.. తన దౌత్య విజయాలనే కవచంగా చేసుకుని మరోసారి నోబెల్‌ శాంతి బహుమతి కోసం తన వాదనను తెరపైకి తెచ్చారు అమెరికా అధ్యక్షుడు డొనాల్డ్‌ ట్రంప్‌. ‘నేను ఎనిమిది యుద్ధాలను పరిష్కరించాను.. ఇంతకుముందు ఏ అధ్యక్షుడూ ఇలా చేయలేదు’ అంటూ వైట్‌హౌస్‌ వేదికగా తన రికార్డును మరోసారి గుర్తుచేశారు. అంతేకాదు.. మరో వివాదానికి త్వరలోనే పరిష్కారం చూపే అవకాశం ఉందంటూ ఆసక్తికర వ్యాఖ్యలు చేశారు.ఈ సందర్భంగా డొనాల్డ్‌ ట్రంప్‌.. ‘నేను చేసిన పనులు ఇంతకుముందు ఎవరూ చేయలేదు. గొప్పలు చెప్పుకోవడం కాదు.. వాస్తవాలు చెబుతున్నాను. నేను ఎనిమిది యుద్ధాలను పరిష్కరించాను’ అని అన్నారు. అయితే ఆయన మాటల్లో శాంతి బహుమతిపై ఆశ కూడా దాగి ఉంది. గతంలో పలుమార్లు తనకు నోబెల్‌ రావాల్సిందేనని చెప్పిన ట్రంప్‌.. ఈసారి కూడా తన దౌత్య రికార్డునే ప్రధాన అస్త్రంగా మార్చుకున్నారు. కాగా, ట్రంప్‌ నోబెల్‌ ఆకాంక్షలకు ఏళ్ల చరిత్ర ఉంది. తొలి అధ్యక్ష పదవీకాలం నుంచే ఉత్తర కొరియాతో ఉద్రిక్తతలు తగ్గించేందుకు తాను చేసిన ప్రయత్నాలను ఆయన ప్రస్తావిస్తూ వచ్చారు. 2018లో కొందరు నార్వే రాజకీయ నాయకులు ఆయన పేరును నోబెల్‌ శాంతి బహుమతికి ప్రతిపాదించారు. ఆ తర్వాత కూడా ట్రంప్‌ తనకు ఈ గౌరవం రావాల్సిందేనని పలుమార్లు వ్యాఖ్యానించారు. 2025లో ఏకంగా ‘నాకు నాలుగైదు సార్లు నోబెల్‌ రావాల్సింది’ అంటూ ట్రంప్‌ చేసిన వ్యాఖ్యలు అప్పట్లో చర్చనీయాంశమయ్యాయి.‘8 యుద్ధాలు’.. ట్రంప్‌ చెప్పే జాబితా ఇదే.. తన దౌత్య విజయాలను వివరించేటప్పుడు ట్రంప్‌ పలు అంతర్జాతీయ వివాదాలను ప్రస్తావిస్తున్నారు. భారత్‌-పాకిస్తాన్‌, ఇజ్రాయెల్‌-ఇరాన్‌, కంబోడియా-థాయ్‌లాండ్‌, సెర్బియా-కొసోవో, రువాండా-డెమొక్రటిక్‌ రిపబ్లిక్‌ ఆఫ్‌ కాంగో, ఈజిప్ట్‌-ఇథియోపియా, అర్మేనియా-అజర్‌బైజాన్‌ తదితర అంశాల్లో అమెరికా పాత్రను ఆయన తన విజయాలుగా చెబుతున్నారు. అయితే ఇక్కడే అసలు ట్విస్ట్‌ ఉంది. ట్రంప్‌ చెప్పే ‘ఎనిమిది యుద్ధాలు’ అన్న లెక్కపై ఫ్యాక్ట్‌ చెకర్లు అభ్యంతరాలు వ్యక్తం చేశారు. ఆయన ప్రస్తావిస్తున్న కొన్ని ఘటనలు అధికారికంగా యుద్ధాలే కావని, అలాగే ఒక్కో వివాదంలో అమెరికా పాత్ర కూడా ఒకేలా లేదని వారు చెబుతున్నారు.ఖండించిన భారత్‌.. ఇదిలా ఉండగా.. భారత్‌-పాకిస్తాన్‌ కాల్పుల విరమణ విషయంలో ట్రంప్‌ చేసిన వ్యాఖ్యలకు భారత్‌ గతంలోనే స్పష్టమైన సమాధానం ఇచ్చింది. ఆపరేషన్‌ సిందూర్‌ సమయంలో అమెరికా జోక్యం లేదని భారత విదేశాంగ శాఖ తెలిపింది. సైనిక చర్యలను నిలిపివేయడంపై భారత్‌, పాకిస్తాన్‌ మధ్య నేరుగా అవగాహన కుదిరిందని స్పష్టం చేసింది. అయినా ట్రంప్‌ మాత్రం భారత్‌-పాక్‌ ఉద్రిక్తతల పరిష్కారంలో అమెరికా పాత్ర ఉందన్న తన వాదనను కొనసాగిస్తున్నారు.మిత్రుల నుంచి కూడా మద్దతు.. ట్రంప్‌ నోబెల్‌ ఆశలకు ఆయన ఒక్కరే ప్రచారం చేసుకోవడం లేదు. రిపబ్లికన్‌ ప్రతినిధి క్లాడియా టెన్నీ 2026లో మరోసారి ఆయన పేరును నామినేట్‌ చేశారు. ఇజ్రాయెల్‌, పాకిస్తాన్‌, కంబోడియా నేతలు కూడా ట్రంప్‌ పేరును ప్రతిపాదించినట్లు బహిరంగంగా ప్రకటించారు. అయితే నామినేషన్‌ వచ్చిందంటే నోబెల్‌ కమిటీ ఆ అభ్యర్థిని సమర్థించినట్లు మాత్రం కాదు. 2026 శాంతి బహుమతికి మొత్తం 287 మంది అభ్యర్థులు పరిశీలనలో ఉన్నారు.ట్రంప్‌నకు అడ్డంకి.. ట్రంప్‌ నోబెల్‌ కలకు అసలు పరీక్ష ఎక్కడ ఉందంటే.. ప్రస్తుతం ప్రపంచం చూపు ఇరాన్‌వైపే ఉంది. తాను శాంతి స్థాపకుడినని చెబుతున్న ట్రంప్‌ పాలనలోనే ఇరాన్‌తో తీవ్ర ఘర్షణ కొనసాగుతోంది. దీంతో ఆయన దౌత్య రికార్డుపై ప్రశ్నలు తలెత్తుతున్నాయి. అయినా ట్రంప్‌ మాత్రం వెనక్కి తగ్గడం లేదు. యుద్ధాలు ఆపానంటూ మరోసారి తన రికార్డును ప్రపంచం ముందు పెట్టారు. మరి ఈసారి నోబెల్‌ తలుపు ట్రంప్‌ కోసం తెరుచుకుంటుందా? లేక ఆయన ‘శాంతి పిలుపు’ మరోసారి ప్రకటనలకే పరిమితమవుతుందా? అన్నది ఆసక్తికరంగా మారింది.ఇదీ చదవండి: ఇరాన్‌పై మరో ట్విస్ట్‌.. ట్రంప్‌కు కొత్త టెన్షన్‌

నోబెల్ సీజన్ వచ్చేసింది. ఇప్పటికే వైద్య, భౌతికశాస్త్రాల్లో విజేతల పేర్లు ప్రకటించారు. అంతర్జాతీయ అంతరిక్ష కేంద్రం (ఇంటర్నేషనల్ స్పేస్ స్టేషన్-ఐఎస్ఎస్) ఈ ఏడాది నోబెల్ పీస్ ప్రైజ్ బరిలోకి దిగుతోంది. ఐఎస్ఎస్... ఎల్లలు లేని ప్రపంచం. విశ్వంలో మానవాళి సృష్టించిన ‘త్రిశంకు స్వర్గం’. స్వర్గం అన్నాక వైరం, వైషమ్యాలకు తావుండదు కదా! అంతరిక్ష కేంద్రంలో మిత్రదేశాలే కాదు... శత్రుదేశాల వ్యోమగాములు కూడా నేస్తాలుగా మెలుగుతారు. అందులో గడిపినంత కాలం వారు విశ్వమానవులు. సౌభ్రాతృత్వం, పరస్పర సహకారం వెల్లివిరుస్తాయి. అక్కడ మనస్పర్థలు, వివాదాలు, తగాదాలు, యుద్ధాలకు చోటు లేదు. అక్కడ దేశాలు, జాతీయత భేదాలు ఉండవు. అందరిదీ ఒకటే మతం, ఒకటే దేశం, వసుధైక కుటుంబం.అంతరిక్ష కేంద్రంలో రెండు దశాబ్దాలకు పైగా ఇదే సత్సంప్రదాయం, సంస్కృతి పరిఢవిల్లుతున్నాయి. ఈ సంవత్సరం నోబెల్ శాంతి బహుమతి కోసం 79 సంస్థలు సహా మొత్తం 287 మంది అభ్యర్థుల నుంచి నార్వీజియన్ నోబెల్ కమిటీకి ప్రతిపాదనలు అందాయి. నామినీల్లో సంస్థల పేర్లే నాలుగో వంతుకు పైగా ఉండటం విశేషం. వ్యక్తులు, రాజకీయ నాయకులు, అంతర్జాతీయ సంస్థలే కాకుండా... యుద్ధాలు, ప్రకృతి విపత్తుల వేళ ఆపన్నహస్తం సాచే మానవతా గ్రూపుల పేర్లు కూడా అందులో ఉన్నాయి. కానీ విజేత ఎంపిక విషయంలో చివరి నిమిషంలో అనూహ్యంగా ఐఎస్ఎస్ పేరు తెరపైకి వస్తోంది.పీస్ ప్రైజ్ కోసం ప్రస్తుతం పోటీపడుతున్న వారి పేర్లను నోబెల్ కమిటీ ఇంతవరకు ప్రచురించలేదు. దాంతో నామినీలకు సంబంధించి అధికారికంగా ‘కుదించిన జాబితా’, అందులోని పోటీదారుల పేర్లు బయటకి తెలియరాలేదు. భారత కాలమానం ప్రకారం ఈ నెల 9న (శుక్రవారం) మధ్యాహ్నం 2.30 గంటలకు నార్వేలోని ఓస్లోలో నోబెల్ శాంతి బహుమతి విజేత పేరు ప్రకటిస్తారు. ఈ నేపథ్యంలో పలువురు నిపుణులు తమ వేళ్లను పైకి అంతరిక్ష కేంద్రం వైపు చూపుతున్నారు! ఐఎస్ఎస్ ఏ ఒక్క దేశం సొత్తు కాదు. అది అమెరికా, రష్యా, కెనడా, జపాన్, యూరప్ దేశాల ఉమ్మడి ఆస్తి. పలు దేశాల పరస్పర సహకారానికి చిరునామా. భూమ్మీద ఉద్రిక్తతలు పెచ్చరిల్లే, యుద్ధాలు జరిగే దేశాల ఆస్ట్రోనాట్లు-కాస్మోనాట్లు సైతం అవేమీ పట్టనట్టు భూకక్ష్యలోని అంతరిక్ష కేంద్రంలో సంయమనంతో వ్యవహరిస్తూ పరిశోధనల్లో నిమగ్నమవుతారు.రేసులో ట్రంప్, కార్నీ, కులేబా, ఐసీసీ! నోబెల్ శాంతి బహుమతి రేసులో ఇంకా అమెరికా అధ్యక్షుడు డొనాల్డ్ ట్రంప్, కెనడా ప్రధాన మంత్రి మార్క్ కార్నీ, ఉక్రెయిన్ బాలల హక్కుల ఉద్యమకారుడు మైకోలా కులేబాతోపాటు సేవ్ ద చిల్డ్రన్, ఎమర్జెన్సీ రెస్పాన్స్ రూమ్స్ (సూడాన్), కమిటీ టూ ప్రొటెక్ట్ జర్నలిస్ట్స్, అంతర్జాతీయ న్యాయస్థానం (ఐసీజే), అంతర్జాతీయ నేర న్యాయస్థానం (ఇంటెర్నేషనల్ క్రిమినల్ కోర్టు- ఐసీసీ) పోటీ పడుతున్నాయి. వీటిలో ధర్మ సంస్థాపన-శాంతిస్థాపన దిశగా ఐసీసీ పెద్దగా పొడిచిందేమీ లేకపోయినా కాస్తోకూస్తో వీర-శూరత్వాలు ప్రదర్శించి ప్రపంచం దృష్టిని ఆకర్షించింది. రష్యా అధ్యక్షుడు వ్లాదిమిర్ పుతిన్, ఇజ్రాయెల్ ప్రధాన మంత్రి బెంజమిన్ నెతన్యాహు సహా పలువురు రాజకీయ నేతలపై ఐసీసీ అరెస్టు వారంట్లు జారీ చేసింది. -జమ్ముల శ్రీకాంత్‌.(Courtesy: Associated Press)

ఏడు నెలలుగా కొనసాగుతున్న ఇరాన్‌-అమెరికా యుద్ధానికి ముగింపు పలికేందుకు చర్చలు జరుగుతున్న వేళ.. టెహ్రాన్‌ నాయకత్వంపై అమెరికా చేసిన వ్యాఖ్యలు మరోసారి కలకలం రేపుతున్నాయి. ఇరాన్‌లో అసలు నిర్ణయాలు ఎవరు తీసుకుంటున్నారో స్పష్టంగా తెలియడం లేదని అమెరికా వైస్‌ ప్రెసిడెంట్‌ జేడీ వాన్స్‌ వ్యాఖ్యానించారు. ఆయన వ్యాఖ్యలకు మరుసటి రోజే అధ్యక్షుడు డొనాల్డ్‌ ట్రంప్‌ కూడా స్పందిస్తూ.. ‘ఇరాన్‌ను ఎవరు నడుపుతున్నారో ఎవరికీ తెలియదు’ అని అన్నారు. దీంతో యుద్ధం కంటే ఇప్పుడు ఇరాన్‌ అధికార వ్యవస్థపై అమెరికా వ్యక్తం చేస్తున్న సందేహాలే అంతర్జాతీయంగా చర్చనీయాంశంగా మారాయి.రాయిటర్స్‌కు ఇచ్చిన ప్రత్యేక ఇంటర్వ్యూలో జేడీ వాన్స్‌ మాట్లాడుతూ.. ఇరాన్‌ అధ్యక్షుడు మసౌద్‌ పెజెష్కియాన్‌, విదేశాంగ మంత్రి అబ్బాస్‌ అరాఘ్చీతో అమెరికా చర్చలు జరుపుతోందని తెలిపారు. అయితే, దేశంలో వాస్తవంగా నిర్ణయాలు తీసుకునే అధికారం వీరికి ఎంతవరకు ఉందో స్పష్టంగా తెలియడం లేదని అన్నారు. ఇరాన్‌ రాజకీయ వ్యవస్థలో నిర్ణయాలు ఎవరు?.. ఎలా తీసుకుంటారో పూర్తిగా అర్థం చేసుకోవడం అమెరికాకు సవాలుగా మారిందని వాన్స్‌ వ్యాఖ్యానించారు.వాన్స్‌ వ్యాఖ్యలపై మరుసటి రోజే అమెరికా అధ్యక్షుడు డొనాల్డ్‌ ట్రంప్‌ స్పందించారు. ఇరాన్‌తో చర్చలు, యుద్ధానికి ముగింపు వంటి అంశాలపై అమెరికా ముందుకు వెళ్తున్నప్పటికీ.. ‘అతిపెద్ద సమస్య ఏమిటంటే.. ఇరాన్‌ను ఎవరు నడుపుతున్నారో ఎవరికీ తెలియదు’ అని ట్రంప్‌ వ్యాఖ్యానించారు. ఇరాన్‌ నాయకత్వంపై అమెరికా అధ్యక్షుడు, ఉపాధ్యక్షుడు ఇద్దరూ దాదాపు ఒకే రకమైన సందేహాలను వ్యక్తం చేయడం ఇప్పుడు ప్రాధాన్యం సంతరించుకుంది.ఇరాన్‌ సీరియస్‌.. ఇదిలా ఉండగా.. ఇరాన్‌ సుప్రీం లీడర్‌ మొజ్తబా ఖమేనీ విషయంలోనూ గత కొంతకాలంగా అమెరికా అనుమానాలు వ్యక్తం చేస్తోంది. యుద్ధం సమయంలో ఆయన ప్రజల ముందుకు రాకపోవడం, ఆయన ప్రస్తుత పరిస్థితి, ఆచూకీపై స్పష్టమైన సమాచారం లేకపోవడంతో పలు ఊహాగానాలు వెలువడ్డాయి. అయితే ఇరాన్‌ మాత్రం ఈ వాదనలను ఖండిస్తోంది. మొజ్తబా ఖమేనీనే దేశ సుప్రీం లీడర్‌గా కొనసాగుతున్నారని, ఆయన దేశాన్ని నడిపిస్తున్నారని స్పష్టం చేస్తోంది. ఇరాన్‌ విదేశాంగ శాఖ ప్రతినిధి ఇస్మాయిల్‌ బఘాయీ కూడా అమెరికా వ్యాఖ్యలను తోసిపుచ్చారు. అమెరికా అధికారులకు తమ ఇరానియన్‌ ప్రతినిధులు ఎవరన్నది, దేశ నిర్ణయ వ్యవస్థ ఎలా పనిచేస్తుందన్నది తెలుసని చెప్పారు. అసలు సమస్య ఇరాన్‌లో నాయకత్వం లేదా నిర్ణయ వ్యవస్థలో లేదని.. అమెరికా అధికారుల పరస్పర విరుద్ధ వ్యాఖ్యలు, గందరగోళమైన సందేశాలేనని ఆయన ఆరోపించారు.ఇదిలా ఉంటే.. యుద్ధానికి ముగింపు పలికేందుకు ఇరాన్‌ తన అణు కార్యక్రమంపై కూడా కీలక నిర్ణయం తీసుకోవాల్సి ఉంటుందని వాన్స్‌ స్పష్టం చేశారు. అమెరికా డిమాండ్లను అంగీకరించాలంటే ఇరాన్‌ తన అణు ఇంధన శుద్ధి సామర్థ్యాన్ని గణనీయంగా తగ్గించుకోవాల్సి ఉంటుందని ఆయన అన్నారు. అంటే శాంతి చర్చల్లో కేవలం యుద్ధ విరమణ మాత్రమే కాకుండా.. ఇరాన్‌ అణు కార్యక్రమం కూడా ప్రధాన అంశంగా మారింది. ఇరాన్‌తో జరుగుతున్న చర్చల్లో వాన్స్‌ కీలక పాత్ర పోషిస్తున్నప్పటికీ.. తానే ఈ చర్చలకు నాయకత్వం వహిస్తున్నానని చెప్పేందుకు ఆయన నిరాకరించారు. గతంలో వాన్స్‌ మధ్యవర్తిత్వంతో తాత్కాలిక శాంతి ఒప్పందం కుదిరినప్పటికీ.. అది ఎక్కువ కాలం కొనసాగలేదు. ఇప్పుడు మరోసారి చర్చలు మొదలైన నేపథ్యంలో ఇరాన్‌ నాయకత్వంపై అమెరికా సందేహాలు, అణు శుద్ధి సామర్థ్యంపై అమెరికా డిమాండ్లు కీలకంగా మారాయి. ఇదీ చదవండి: రష్యాలో కొత్త వైరస్‌ కలకలం.. భారత్‌కు ముప్పు ఉందా?

రష్యాలోని సైబీరియాలో ఓ యాంటీ-ప్లేగు పరిశోధనా సంస్థలో పనిచేసే 28 ఏళ్ల యువతి అనుమానాస్పద పరిస్థితుల్లో మృతి చెందడం ప్రపంచవ్యాప్తంగా కలకలం రేపుతోంది. ఆమె ప్లేగుతో చనిపోయిందన్న ప్రచారం మొదలైనప్పటికీ.. రష్యా అధికారులు మాత్రం దీనిని ఖండిస్తున్నారు. అయితే మృతురాలితో సంబంధం ఉన్నవారిని వైద్య పర్యవేక్షణలో ఉంచడం, ల్యాబ్‌ సిబ్బందిని ఐసోలేషన్‌లో పెట్టడం, కొన్ని ఆసుపత్రుల్లో అదనపు ఆంక్షలు విధించడం అనుమానాలకు తెరలేపింది. దీంతో అసలు ఏం జరిగింది? ఆమెకు సోకింది ప్లేగేనా? ల్యాబ్‌లో ఏదైనా ప్రమాదం జరిగిందా? అన్న ప్రశ్నలు తలెత్తుతున్నాయి. ఈ నేపథ్యంలో రష్యా బయో ల్యాబ్‌లో చోటుచేసుకున్న ఈ మరణంపై సీఎన్‌ఎన్‌ సహా అంతర్జాతీయ మీడియా కథనాలు వెలువడటం మరింత ఆసక్తిని రేపుతోంది.అసలు ఏం జరిగిందంటే.. ఇర్కుట్స్క్‌ యాంటీ ప్లేగు రీసెర్చ్‌ ఇన్‌స్టిట్యూట్‌లో పనిచేసే దర్యా షిపిలోవా సెప్టెంబర్‌ 29న ఆసుపత్రిలో చేరినట్లు రష్యా, స్థానిక మీడియా కథనాలు తెలిపాయి. అక్టోబర్‌ 2న ఆమె మరణించింది. రష్యా ఆరోగ్య పర్యవేక్షణ సంస్థ రోస్పోట్రెబ్నాడ్జోర్‌ ప్రకారం.. ఆమెకు ‘తెలియని కారణంతో వచ్చిన న్యూమోనియా’ ఉన్నట్లు గుర్తించారు. అయితే ఆమె మృతదేహంలో ఆమె పనిచేసిన ల్యాబ్‌కు సంబంధం ఉన్న ప్రమాదకర సూక్ష్మజీవులు గుర్తించలేదని అధికారులు తెలిపారు. కాగా, కొన్ని స్థానిక, అంతర్జాతీయ మీడియా కథనాల్లో ఆమె ప్లేగు పరిశోధన సమయంలో అనుకోకుండా వ్యాధికారక పదార్థానికి గురై ఉండొచ్చన్న కథనాలు వెలువడ్డాయి. ముఖ్యంగా ‘ప్లేగు బ్యాక్టీరియా ఉన్న టెస్ట్‌ ట్యూబ్‌ పగిలింది’ అన్న వాదన కూడా ప్రచారంలోకి వచ్చింది.దీంతో, యువతి మృతితో ఆమె పనిచేసిన సంస్థలోని 60 మందికి పైగా సిబ్బందిని ఐసోలేషన్‌లో ఉంచినట్లు వార్తలు వచ్చాయి. ఆమెతో పరిచయం ఉన్న పలువురిని కూడా వైద్య పర్యవేక్షణలోకి తీసుకున్నారు. కొన్ని నివేదికల ప్రకారం దాదాపు 200 మందిని పరిశీలనలో ఉంచారు. ఇదే సమయంలో ఇర్కుట్స్క్‌ ప్రాంతంలోని కొన్ని ఆసుపత్రుల్లోనూ అదనపు ఆంక్షలు అమలు చేయడంతో ప్రజల్లో ఆందోళన పెరిగింది. ముఖ్యంగా కొన్ని ఆసుపత్రుల్లో ‘అత్యంత ప్రమాదకరమైన అంటువ్యాధి ప్లేగు’ అనుమానిత లక్షణాలపై ఉన్నట్టు ఆసుపత్రి పత్రుల్లో పేర్కొన్నట్టు సమాచారం బయటకు వచ్చింది. దీంతో అధికారులు ఏదో విషయాన్ని దాచిపెడుతున్నారన్న అనుమానాలు సోషల్‌ మీడియాలో వెల్లువెత్తాయి. అయితే రష్యా ప్రభుత్వం మాత్రం పరిస్థితి పూర్తిగా అదుపులోనే ఉందని చెబుతోంది.ప్లేగు భయానికి కారణమేంటి?రష్యాలోని ఇర్కుట్స్క్‌ ప్రాంతంలో ఉన్న ఈ సంస్థ సాధారణ ఆసుపత్రి కాదు. ప్లేగు సహా అత్యంత ప్రమాదకరమైన అంటువ్యాధులపై పరిశోధనలు, పర్యవేక్షణ చేసే ప్రత్యేక సంస్థ. అందుకే అక్కడ పనిచేసే ఉద్యోగి అనుమానాస్పద న్యూమోనియాతో మరణించడం సహజంగానే ప్రపంచ ఆరోగ్య సంస్థలు, ఇతర దేశాల దృష్టిని ఆకర్షించింది. అయితే, ఇప్పటివరకు ప్లేగు కేసు అధికారికంగా నిర్ధారణ కాలేదు. రష్యా అధికారులు ప్రపంచ ఆరోగ్య సంస్థ (WHO)కి ఇర్కుట్స్క్‌లో ప్లేగు కేసులు నమోదు కాలేదని తెలిపారు. మృతురాలితో సంబంధం ఉన్న వ్యక్తులను పరీక్షించగా వారిలోనూ ప్రమాదకర వ్యాధికారకాలు గుర్తించలేదని చెప్పారు. ఇక, ఈ ఘటనపై ప్రపంచ ఆరోగ్య సంస్థ రష్యా అధికారులతో నేరుగా సంప్రదింపులు జరిపింది. దీనికి సంబంధించిన పరిస్థితులు, నిర్వహించిన పరీక్షలు, వాటి ఫలితాలపై వివరాలు కోరింది. ప్రస్తుతం అందుబాటులో ఉన్న సమాచారాన్ని బట్టి రష్యా వెలుపల ప్రజారోగ్య ముప్పు చాలా తక్కువగా ఉందని WHO అంచనా వేసింది. రష్యా అధికారులు కూడా ఇర్కుట్స్క్‌లో ప్లేగు కేసు లేదని స్పష్టం చేశారు.ట్రంప్‌ ఏమన్నారు?రష్యా ఘటనపై అమెరికా అధ్యక్షుడు డొనాల్డ్‌ ట్రంప్‌ కూడా స్పందించారు. ఈ అంశంపై రష్యా అధ్యక్షుడు వ్లాదిమిర్‌ పుతిన్‌తో త్వరలో ఫోన్‌లో మాట్లాడనున్నట్లు ఆయన తెలిపారు. ఈ కేసుపై అమెరికా నిఘా వర్గాలు ‘చాలా లోతుగా’ పరిశీలిస్తున్నాయని, మరిన్ని వివరాలను త్వరలో వెల్లడిస్తామని చెప్పారు. అంతకుముందు ట్రంప్‌.. అవసరమైతే రష్యాకు ఈ పరిస్థితిని ఎదుర్కొనేందుకు అమెరికా సాయం చేస్తుందని చెప్పారు. వ్యాధికారక సూక్ష్మజీవులు గతంతో పోలిస్తే మరింత బలంగా మారుతున్నాయని ఆయన వ్యాఖ్యానించారు. అమెరికా విదేశాంగ మంత్రి మార్కో రూబియో కూడా రష్యా ఈ ఘటనపై ప్రపంచానికి మరింత సమాచారం ఇవ్వాల్సిన బాధ్యత ఉందని అన్నారు.భారత్‌కు ముప్పు ఉందా?ప్రస్తుతం భారత్‌ ప్రజలు ఆందోళన చెందాల్సిన అవసరం లేదని చెప్పడానికి అందుబాటులో ఉన్న సమాచారం సరిపోతుంది. దీనికి ప్రధాన కారణం రష్యాలోనే ప్లేగు కేసు ఇంకా అధికారికంగా నిర్ధారణ కాకపోవడం. అంతేకాదు, మృతురాలితో సంబంధం ఉన్నవారిలో ప్రమాదకర వ్యాధికారకాలు గుర్తించలేదని రష్యా అధికారులు WHOకి తెలిపారు. అయితే పరిస్థితి పూర్తిగా స్పష్టమయ్యే వరకు అంతర్జాతీయ ఆరోగ్య సంస్థలు నిఘా కొనసాగించడం సహజమే. ఒకవేళ న్యూమోనిక్‌ ప్లేగు నిర్ధారణైతే.. అది శ్వాసకోశ బిందువుల ద్వారా మనుషుల మధ్య వ్యాపించే అవకాశం ఉన్నందున సన్నిహిత కాంటాక్టులను గుర్తించడం, ఐసోలేషన్‌, పరీక్షలు, త్వరిత చికిత్స కీలకంగా మారతాయి. ప్లేగుకు యాంటీబయాటిక్స్‌తో చికిత్స అందుబాటులో ఉంది. మరోవైపు రష్యాలోని పరిణామాల నేపథ్యంలో మధ్య ఆసియా దేశాలు కూడా అప్రమత్తమయ్యాయి. కజకిస్థాన్‌, కిర్గిజిస్థాన్‌, ఉజ్బెకిస్థాన్‌, తజికిస్థాన్‌ సరిహద్దుల్లో ఆరోగ్య నియంత్రణ చర్యలను పెంచినట్లు నివేదికలు వెల్లడించాయి.రష్యా ఎందుకు ఇలా చేస్తోంది?ఇదే ఇప్పుడు అసలు ప్రశ్నగా మారింది. రష్యా అధికారులు మాత్రం ఎలాంటి ప్లేగు వ్యాప్తి లేదని చెబుతున్నారు. మరోవైపు ల్యాబ్‌ సిబ్బందిని ఐసోలేషన్‌లో పెట్టడం, ఆసుపత్రుల్లో అదనపు ఆంక్షలు విధించడం వంటి చర్యలు చేపట్టడంతో ప్రజల్లో అనుమానాలు పెరిగాయి. అయితే ముందస్తు జాగ్రత్తగా కాంటాక్టులను పర్యవేక్షించడం, ఐసోలేషన్‌లో ఉంచడం వంటి చర్యలు ప్రమాదకర అంటువ్యాధి అనుమానం వచ్చినప్పుడు సాధారణ ప్రజారోగ్య చర్యల్లో భాగం కావచ్చు. ప్రస్తుతం అసలు తేలాల్సిన విషయం ఒక్కటే.. దర్యా షిపిలోవా మృతికి కారణమైన వ్యాధికారకం ఏమిటి? రష్యా దర్యాప్తు, ల్యాబొరేటరీ పరీక్షల తుది ఫలితాలు వెల్లడైతేనే ఈ ఘటన వెనుక ఉన్న వాస్తవం మరింత స్పష్టమవుతుంది. ఇదీ చదవండి: సౌదీకి పాక్‌ బలగం.. హౌతీలను ఓడించే దమ్ముందా?

అమెరికా అధ్యక్షుడు డొనాల్డ్‌ ట్రంప్‌ మరోసారి వివాదాస్పద వ్యాఖ్యలతో వార్తల్లో నిలిచారు. ఫ్రాన్స్‌లో జరుగుతున్న విద్యార్థుల ఆందోళనలకు మతం, వలసలను ముడిపెడుతూ చేసిన వ్యాఖ్యలు తీవ్ర దుమారం రేపాయి. అదే సమయంలో.. పశ్చిమాసియా యుద్ధ నేపథ్యంలో లాస్‌ ఏంజెల్స్‌, శాన్‌డియాగో నగరాలను ఇరాన్‌ ‘‘తుడిచిపెట్టేసుకోవచ్చు’’ అన్నట్లు మాట్లాడిన తీరుపైనా తీవ్ర అభ్యంతరాలు వ్యక్తమవుతున్నాయి. ఫ్రా‍న్స్‌లో స్టూడెంట్స్‌ ఆందోళనలు కొనసాగుతున్నాయి. వీటిపై స్పందించిన అమెరికా అధ్యక్షుడు.. ‘‘ఇది పాఠశాలల సమస్య కాదు.. ఫ్రాన్స్‌ను ఇస్లాం ఆక్రమించుకోవాలని చూస్తోంది’’ అంటూ కామెంట్‌ చేశాడు. దీంతో ఒక్కసారిగా తీవ్ర దుమారం రేగింది. ఫ్రాన్స్‌లో సెప్టెంబర్‌ చివరి నుంచి హైస్కూల్‌ విద్యార్థులు పెద్ద ఎత్తున ఆందోళనలు చేస్తున్నారు. దేశవ్యాప్తంగా వందలాది పాఠశాలల ప్రవేశ ద్వారాలను విద్యార్థులు దిగ్బంధించారు. మెరుగైన విద్యా వసతులు, ఉపాధ్యాయుల కొరతను పరిష్కరించడం, అధిక విద్యార్థులతో కిక్కిరిసిన తరగతులను తగ్గించడం, పాడైపోయిన పాఠశాల భవనాలను బాగుచేయడం వంటి డిమాండ్లు వాటిల్లో ఉన్నాయి. వేడిని తట్టుకోలేని భవనాలు, అధిక పని భారం, సిబ్బంది కొరతపైనా విద్యార్థులు ఆగ్రహం వ్యక్తం చేస్తున్నారు.ఈ ఆందోళన క్రమంగా దేశవ్యాప్తంగా విస్తరించింది. అక్టోబర్‌ 6న ఒక్కరోజే దాదాపు 2.56 లక్షల మంది నిరసనల్లో పాల్గొన్నారని ఫ్రాన్స్‌ అంతర్గత వ్యవహారాల మంత్రిత్వ శాఖ తెలిపింది. యూనియన్లు మాత్రం ఈ సంఖ్య 4.5 లక్షల వరకు ఉంటుందని పేర్కొన్నాయి. విద్యార్థులతో పాటు ఉపాధ్యాయులు, తల్లిదండ్రులు కూడా నిరసనలకు మద్దతుగా రోడ్డెక్కారు. ఘర్షణలతో ఉద్రిక్తతఅయితే కొన్ని ప్రాంతాల్లో నిరసనలు హింసాత్మకంగా మారాయి. పోలీసులు, విద్యార్థుల మధ్య ఘర్షణలు చోటుచేసుకున్నాయి. పోలీసులు టియర్‌ గ్యాస్‌, లాఠీలు, అల్లర్ల నియంత్రణకు ఉపయోగించే ఆయుధాలను ప్రయోగించారు. కొన్ని చోట్ల నిరసనకారులు రాళ్లు విసరడం, వాహనాలు, బస్‌ షెల్టర్లకు నిప్పుపెట్టడం వంటి ఘటనలు జరిగాయి.ఫ్రాన్స్‌ ప్రభుత్వం తెలిపిన వివరాల ప్రకారం.. ఆందోళనలు మొదలైనప్పటి నుంచి 215 మంది విద్యార్థులు, 715 మంది పోలీసులు గాయపడ్డారు. 5,000 మందికిపైగా అరెస్టయ్యారు. వారిలో 87 శాతం మంది మైనర్లే. 24 పాఠశాలలు ధ్వంసం లేదా అగ్నిప్రమాదాలకు గురయ్యాయి. ఇటు పోలీసుల చర్యలపైనా విమర్శలు వస్తున్నాయి. ఓ 15 ఏళ్ల విద్యార్థి పోలీసుల స్టన్‌ గ్రెనేడ్‌ కారణంగా చేతిని కోల్పోయాడు. మరో 14 ఏళ్ల బాలుడి ముఖానికి తీవ్ర గాయాలయ్యాయి. అమ్నెస్టీ ఇంటర్నేషనల్‌ సైతం ఫ్రా‍న్స్‌ పోలీసుల తీరును తీవ్రంగా తప్పుబట్టింది. ఈ నేపథ్యంలో పోలీసుల ప్రవర్తనపై పలు అంతర్గత విచారణలు కూడా ప్రారంభమయ్యాయి. ‘ఇది ఇస్లాం ఆక్రమణ’.. ట్రంప్‌ వ్యాఖ్యఇలాంటి పరిస్థితుల్లో ట్రంప్‌ చేసిన వ్యాఖ్య ఇప్పుడు అసలు వివాదానికి కారణమైంది. ఫ్రాన్స్‌లో జరుగుతున్న ఆందోళనలను ప్రస్తావిస్తూ.. ‘‘ఇది అదుపు తప్పిన భారీ వలసల ఫలితం. ఇది పాఠశాలల గురించి కాదు.. ఒకప్పుడు గొప్ప దేశమైన ఫ్రాన్స్‌ను ఇస్లాం ఆక్రమించుకోవాలని చూస్తోంది’’ అంటూ ట్రంప్‌ తన ‘ట్రూత్‌ సోషల్‌’ ఖాతాలో రాశారు. అయితే ఫ్రాన్స్‌లో విద్యార్థులు చేస్తున్న ప్రధాన డిమాండ్లకు, ట్రంప్‌ చెప్పిన ‘‘ఇస్లాం ఆక్రమణ’’కు ప్రత్యక్ష సంబంధం ఉన్నట్లు నిరసనలపై వచ్చిన తాజా వివరాల్లో ఎలాంటి ఆధారం కనిపించడం లేదు. విద్యార్థులు ప్రధానంగా విద్యా వ్యవస్థలోని సమస్యలపైనే ఆందోళన చేస్తున్నారు. ఇదే విషయాన్ని ట్రంప్‌ వ్యాఖ్యలపై విమర్శలు చేస్తున్నవారు ప్రశ్నిస్తున్నారు.ట్రంప్‌, ఆయన మద్దతుదారులు మాత్రం యూరప్‌లో వలసలు, భద్రత, సామాజిక సమస్యలను అనుసంధానిస్తూ చాలాకాలంగా ప్రచారం చేస్తున్నారు. అమెరికా మధ్యంతర ఎన్నికలు సమీపిస్తున్న సమయంలో ఫ్రాన్స్‌ పరిణామాలను కూడా వలస వ్యతిరేక రాజకీయ ప్రచారానికి ఉపయోగిస్తున్నారనే విమర్శలు వస్తున్నాయి.అమెరికాలోనూ మరో మాట.. ఇదే సమయంలో ఇరాన్‌ యుద్ధంపై ట్రంప్‌ చేసిన మరో వ్యాఖ్య అమెరికాలో కలకలం రేపింది. నెబ్రాస్కాలో సోమవారం జరిగిన ఎన్నికల ప్రచార సభలో ఆయన మాట్లాడుతూ.. యుద్ధం కారణంగా అమెరికాలో ఇంధన ధరలు పెరగడం దేశాన్ని సురక్షితంగా ఉంచేందుకు చెల్లించే ‘‘చిన్న మూల్యం’’ అని అన్నారు. ఆ తర్వాత.. ‘‘వాళ్లు ఒక నగరాన్ని తుడిచిపెట్టేయొచ్చు. లాస్‌ ఏంజెల్స్‌ను తుడిచేయనివ్వండి. శాన్‌డియాగోను తుడిచేయనివ్వండి’’ అన్నట్లుగా వ్యాఖ్యానించారు. ఈ వ్యాఖ్యలకు సభలో కొందరు మద్దతుదారులు చప్పట్లు కొట్టారు. ట్రంప్‌ వ్యాఖ్యలపై కాలిఫోర్నియా గవర్నర్‌ గావిన్‌ న్యూసమ్‌ తీవ్రంగా స్పందించారు. ట్రంప్‌ను ‘‘ప్రమాదకరమైన, మతిభ్రమించిన వ్యక్తి’’ అంటూ విమర్శించారు. లాస్‌ ఏంజెల్స్‌ మేయర్‌ కరెన్‌ బాస్‌.. అధ్యక్షుడి వ్యాఖ్యలు నగర భద్రతకు ముప్పు కలిగించేలా ఉన్నాయని అన్నారు. శాన్‌డియాగో మేయర్‌ టాడ్‌ గ్లోరియా.. తమ నగరం ‘‘యుద్ధంలో త్యాగం చేయాల్సిన వస్తువు కాదు’’ అంటూ మండిపడ్డారు. వైట్‌హౌస్‌ వివరణ ఇదీ..అయితే ట్రంప్‌ వ్యాఖ్యలపై వెల్లువెత్తుతున్న విమర్శలను వైట్‌హౌస్‌ తోసిపుచ్చింది. ట్రంప్‌ ఉద్దేశం అమెరికా నగరాలపై ఇరాన్‌ దాడిని కోరుకోవడం కాదని స్పష్టం చేసింది. ఇరాన్‌ అణ్వాయుధ సామర్థ్యాన్ని సాధించకుండా అడ్డుకోవడం వల్లే లాస్‌ ఏంజెల్స్‌, శాన్‌డియాగో వంటి అమెరికా నగరాలు సురక్షితంగా ఉన్నాయని ఆయన చెప్పాలనుకున్నారని వివరించింది. అయినా అధ్యక్షుడి నోట ‘‘లాస్‌ ఏంజెల్స్‌ను తుడిచేయనివ్వండి.. శాన్‌డియాగోను తుడిచేయనివ్వండి’’ అనే మాటలు రావడం తీవ్ర చర్చకు దారితీసింది. ముఖ్యంగా యుద్ధం, ఇంధన ధరలు, అమెరికా మధ్యంతర ఎన్నికలు కీలకంగా మారిన సమయంలో ట్రంప్‌ చేసిన ఈ వ్యాఖ్యలు రాజకీయంగా కూడా ప్రభావం చూపే అవకాశం ఉందన్న చర్చ మొదలైంది.ఇదీ చదవండి: ఇరాన్‌ దెబ్బకు షాకింగ్‌ డెసిషన్‌ తీసుకున్న ట్రంప్‌

పశ్చిమాసియా ఉద్రిక్తతల్లో అమెరికా అనూహ్య నిర్ణయం తీసుకుంది. బ్రిటన్‌లోని కీలకమైన రాయల్‌ ఎయిర్‌ ఫోర్స్‌ ఫెయిర్‌ఫోర్డ్‌ స్థావరం నుంచి తమ బి-1 బాంబర్లన్నింటినీ వెనక్కి తరలించింది. ఇరాన్‌ ముప్పు ఉందన్న సమాచారంతోనే ఈ నిర్ణయం తీసుకున్నట్లు అమెరికా అధ్యక్షుడు డొనాల్డ్‌ ట్రంప్‌ వెల్లడించారు. అయితే ఈ తరలింపుపై అమెరికా విదేశాంగ మంత్రి మార్కో రుబియో మాత్రం మరో కారణం చెబుతున్నారు. లండన్‌కు సుమారు 145 కిలోమీటర్ల దూరంలో ఉన్న ఫెయిర్‌ఫోర్డ్‌ స్థావరంలో అమెరికా సుమారు 12 బి-1 బాంబర్లను మోహరించింది. ఇరాన్‌పై అమెరికా చేపట్టిన సైనిక చర్యల్లో ఈ స్థావరం కీలకంగా మారింది. అయితే సెప్టెంబర్‌ 27న స్థావరానికి సమీపంలో ఐదుగురు యువకులను ఉగ్రవాద చర్యలకు సన్నాహాలు చేస్తున్నారన్న అనుమానంతో పోలీసులు అరెస్టు చేశారు. వారి వాహనాల్లో పేలుడు పదార్థాలు లభించకపోయినా కొంత పెట్రోల్‌ దొరికినట్లు పోలీసులు తెలిపారు. తొలుత వాళ్లు ఇరాన్‌ ఏజెంట్లు అంటూ ప్రచారం జరిగింది. ఆ తర్వాత వారిని బెయిల్‌పై విడుదల చేశారు. మరో యూకే-ఇరాన్‌ ద్వంద్వ పౌరుడిని కూడా అరెస్టు చేసి బెయిల్‌పై విడుదల చేశారు. ఈ పరిణామాల తర్వాత బాంబర్లను అమెరికాలోని స్వదేశీ స్థావరాలకు తరలించారు. దీనిపై ట్రంప్‌ మాట్లాడుతూ.. తమకు ముప్పు ఉందని సమాచారం వచ్చిందని, అలాంటి పరిస్థితుల్లో బాంబర్లను అక్కడే ఎందుకు ఉంచాలని ప్రశ్నించారు. ముప్పు సృష్టించిన వ్యక్తులు ఎవరన్నది తమకు తెలుసని కూడా చెప్పారు. ఆ ముప్పు ఇరాన్‌తో ముడిపడి ఉందా అని అడిగితే.. అవుననే అర్థం వచ్చేలా సమాధానం ఇవ్వడం కొసమెరుపు.ఉపాధ్యక్షుడు జేడీ వాన్స్‌ కూడా బాంబర్ల తరలింపు ముందుజాగ్రత్త చర్యేనని చెప్పారు. తమ సైనిక సిబ్బంది భద్రత కోసమే ఈ నిర్ణయం తీసుకున్నట్లు పేర్కొన్నారు. బ్రిటన్‌లోని అమెరికా ఆస్తులకు ఇరాన్‌ నుంచి ముప్పు ఉందన్న అంచనాలు కొనసాగుతున్నాయని నాటో వర్గాలు కూడా తెలిపాయి.రుబియో మాత్రం మరోలా.. ఇక్కడే అసలు ట్విస్ట్‌ మొదలైంది. బాంబర్ల తరలింపునకు బ్రిటన్‌లో జరిగిన అనుమానిత కుట్రతో నేరుగా సంబంధం ఉందని చెప్పలేమని విదేశాంగ మంత్రి మార్కో రుబియో స్పష్టం చేశారు. అమెరికా రక్షణ శాఖ అవసరాన్ని బట్టి ప్రపంచవ్యాప్తంగా తన సైనిక వనరులను ఎప్పటికప్పుడు పునర్వ్యవస్థీకరిస్తుంటుందని చెప్పారు. అంటే ఓవైపు ట్రంప్‌ ఇరాన్‌ ముప్పును ప్రస్తావిస్తుండగా.. రుబియో మాత్రం ఈ రెండు పరిణామాలను నేరుగా ముడిపెట్టకపోవడం గమనార్హం.ఫెయిర్‌ఫోర్డ్‌ ఎందుకంత కీలకం?ఫెయిర్‌ఫోర్డ్‌ అమెరికాకు యూరప్‌లో అత్యంత కీలకమైన బాంబర్‌ స్థావరాల్లో ఒకటి. భారీ బాంబర్లను నిర్వహించగల అరుదైన వైమానిక స్థావరాల్లో ఇది కూడా ఒకటి. అమెరికా ఇరాన్‌పై చేపట్టిన చర్యల్లో ఇక్కడి నుంచి బాంబర్లు కార్యకలాపాలు సాగించాయి. అమెరికా నుంచి నేరుగా పశ్చిమాసియాకు వెళ్లడం కంటే ఇక్కడి నుంచి కార్యకలాపాలు నిర్వహిస్తే దూరం, సమయం తగ్గుతాయి. అందుకే ఈ స్థావరం నుంచి బాంబర్లను వెనక్కి తరలించడం వ్యూహాత్మకంగా ప్రాధాన్యం సంతరించుకుంది.అయితే బాంబర్లను అమెరికాకు తరలించినంత మాత్రాన ఇరాన్‌పై దాడి చేసే అమెరికా సామర్థ్యం పూర్తిగా తగ్గిపోయినట్లు కాదంట!. పెంటగాన్‌ ప్రకారం.. అమెరికా బాంబర్‌ బలగాలు ప్రపంచవ్యాప్తంగా అవసరమైన చోట ఖచ్చితమైన దాడులు నిర్వహించేందుకు సిద్ధంగానే ఉన్నాయి. అయితే ఫెయిర్‌ఫోర్డ్‌ నుంచి లభించే వేగవంతమైన ప్రాంతీయ స్పందన సామర్థ్యం మాత్రం తాత్కాలికంగా తగ్గే అవకాశం ఉందని రక్షణ నిపుణులు చెబుతున్నారు.ఇరాన్‌ రియాక్షన్‌ ఏంటంటే.. ఫెయిర్‌ఫోర్డ్‌ ఘటనతో తమకు ఎలాంటి సంబంధం లేదని ఇరాన్‌ స్పష్టం చేసింది. ఈ ఆరోపణలు నిరాధారమని పేర్కొంది. మరోవైపు బ్రిటన్‌ ప్రధాని ఆండీ బర్న్‌హామ్‌ మాత్రం ఈ కుట్ర వెనుక ఇరాన్‌ ప్రమేయం ఉండొచ్చని ఇంతకు ముందు ప్రకటించారు. దీంతో అసలు కుట్రకు ఎవరు తెర వెనుక ఉన్నారన్నది ఇంకా పూర్తిగా తేలలేదు.ఉన్నట్లుండి ఎందుకు వెనక్కి తగ్గారు?ఇక్కడే ఇప్పుడు కీలక ప్రశ్న. అమెరికా అధ్యక్షుడు స్వయంగా ఇరాన్‌ ముప్పును ప్రస్తావించగా.. ఆయన విదేశాంగ మంత్రి మాత్రం నేరుగా సంబంధం లేదంటున్నారు. మరోవైపు ఫెయిర్‌ఫోర్డ్‌ సమీపంలో అరెస్టులు, ఇరాన్‌ నుంచి గతంలో వచ్చిన హెచ్చరికలు, అమెరికా బాంబర్ల ఆకస్మిక తరలింపు.. ఇవన్నీ ఒకేసారి చోటుచేసుకున్నాయి. అయితే ఈ పరిణామాల మధ్య ఖచ్చితమైన సంబంధం ఏమిటన్నది అమెరికా అధికారికంగా పూర్తిగా వెల్లడించలేదు.ఇదీ చదవండి: ఫ్లైదుబాయ్‌ ఫ్లైట్‌ను కూల్చేయాలనుకున్న ఇజ్రాయెల్‌!

2026 నోబెల్ శాంతి బహుమతి రేసు అనూహ్య మలుపు తిరిగింది. సాధారణంగా రాజకీయ నేతలు, మానవతావాద సంస్థలు, అంతర్జాతీయ సంస్థల పేర్లు వినిపించే ఈ పోటీలో ఈసారి అంతరిక్షంలోని అంతర్జాతీయ అంతరిక్ష కేంద్రం (ఐఎస్‌ఎస్‌) కూడా చర్చకు వచ్చింది. అమెరికా అధ్యక్షుడు డొనాల్డ్ ట్రంప్, కెనడా ప్రధాని మార్క్ కార్నీ, ఉక్రెయిన్ అధ్యక్షుడు జెలెన్‌స్కీ, పోప్ లియో తదితరులతో పాటు ఐఎస్‌ఎస్‌ పేరు కూడా నిపుణుల అంచనాల్లో వినిపిస్తోంది. అయితే వీరిలో ఎవరూ అధికారికంగా నామినేట్ అయ్యారనే ధ్రువీకరణ లేదు. నోబెల్ కమిటీ విజేతను అక్టోబర్ 9న ఓస్లోలో ప్రకటించనుంది.287 నామినేషన్లు.. జాబితా మాత్రం రహస్యమే2026 నోబెల్ శాంతి బహుమతికి మొత్తం 287 అర్హత కలిగిన నామినేషన్లు అందాయి. ఇందులో 208 మంది వ్యక్తులు, 79 సంస్థలు ఉన్నాయి. అయితే అధికారిక నామినీల జాబితాను నార్వేజియన్ నోబెల్ కమిటీ బహిర్గతం చేయదు. అందువల్ల నిపుణుల అంచనాలు, ప్రిడిక్షన్ మార్కెట్లు, బహిరంగ చర్చల్లో వినిపిస్తున్న పేర్లను అధికారిక నామినీలుగా పరిగణించలేం. తుది నిర్ణయం పూర్తిగా నోబెల్ కమిటీ చేతుల్లోనే ఉంటుంది.అంతరిక్ష కేంద్రానికి ఎందుకు ప్రాధాన్యం?భౌగోళిక, రాజకీయ విభేదాలు తీవ్రంగా ఉన్న సమయంలో కూడా దేశాలు కలిసి పనిచేయగలవనే సందేశానికి ఐఎస్‌ఎస్‌ ప్రతీకగా నిలుస్తోందని విశ్లేషకులు చెబుతున్నారు. అమెరికా, రష్యా, యూరప్, జపాన్, కెనడాకు చెందిన వ్యోమగాములు, శాస్త్రవేత్తలు ఈ అంతరిక్ష కేంద్రంలో కలిసి పనిచేశారు. రాజకీయంగా పరస్పరం విభేదించే దేశాలు కూడా శాంతియుత ఉమ్మడి ప్రాజెక్టులో సహకరించగలవనే అరుదైన ఉదాహరణగా ఐఎస్‌ఎస్‌ నిలిచింది. 2000 నవంబర్ నుంచి అక్కడ నిరంతరంగా మనుషుల ఉనికి కొనసాగుతోంది. అందుకే ఏదైనా గుర్తింపు లభిస్తే అది ఒక్క శాస్త్రీయ విజయానికి కాకుండా అంతర్జాతీయ సహకారానికి ప్రతీకగా భావించే అవకాశం ఉంది.ట్రంప్ పేరు ఉన్నా.. అవకాశాలపై సందేహాలుఅమెరికా అధ్యక్షుడు డొనాల్డ్ ట్రంప్ కూడా ఈ ఏడాది నోబెల్ శాంతి బహుమతికి పోటీదారుగా చర్చకు వస్తున్నారు. ఈ అవార్డు తనకు రావాలని ట్రంప్ గతంలో పలుమార్లు ఆకాంక్షించారు. పలువురు రాజకీయ నాయకులు కూడా ఆయనను నామినేట్ చేశారు. అయితే ఇటీవలి నిపుణుల అంచనాల్లో ట్రంప్‌కు అవకాశాలు అంతగా లేవనే అభిప్రాయాలు కనిపిస్తున్నాయి. అమెరికా-ఇజ్రాయెల్ నేతృత్వంలోని ఇరాన్‌తో కొనసాగుతున్న ఘర్షణ కూడా ఆయన అవకాశాలపై ప్రభావం చూపే అంశాల్లో ఒకటిగా పేర్కొంటున్నారు. అయితే చివరికి నోబెల్ కమిటీ స్వతంత్రంగా నిర్ణయం తీసుకోనున్నది.కార్నీ, జెలెన్‌స్కీ, పోప్ లియో..కెనడా ప్రధాని మార్క్ కార్నీ పేరు కూడా ఈసారి నిపుణుల చర్చల్లో కనిపిస్తోంది. అమెరికా సుంకాల విధానాలను ఆయన వ్యతిరేకించడం, అంతర్జాతీయ సహకారాన్ని బలపరచాలని కోరడం దీనికి కారణాలుగా చెబుతున్నారు. అయితే ఆయన నోబెల్ షార్ట్‌లిస్ట్‌లో ఉన్నట్లు అధికారిక సమాచారం లేదు. ఉక్రెయిన్ అధ్యక్షుడు జెలెన్‌స్కీ పేరు కూడా పోటీదారుల్లో వినిపిస్తోంది. అమెరికాలో జన్మించిన తొలి పోప్‌గా గుర్తింపు పొందిన పోప్ లియో కూడా చర్చలో ఉన్నారు. పశ్చిమాసియాలోని యుద్ధంపై ఆయన పలుమార్లు మాట్లాడారు. కొన్ని సందర్భాల్లో ఆయన వైఖరి ట్రంప్ అభిప్రాయాలకు భిన్నంగా కూడా ఉంది.మానవతావాద సంస్థలు మొదలు..నోబెల్ శాంతి బహుమతి చర్చల్లో పలు మానవతావాద సంస్థలు, వ్యక్తుల పేర్లు కూడా ఉన్నాయి. సేవ్ ద చిల్డ్రన్, ఉక్రెయిన్ బాలల హక్కుల కార్యకర్త మైకోలా కులేబా, సూడాన్‌కు చెందిన ఎమర్జెన్సీ రెస్పాన్స్ రూమ్స్, కమిటీ టు ప్రొటెక్ట్ జర్నలిస్ట్స్ తదిరుల పేర్లు ప్రస్తావనలో ఉ‍న్నాయి. అంతర్జాతీయ న్యాయం, జవాబుదారీతనం, ఘర్షణలను న్యాయపరమైన మార్గాల్లో పరిష్కరించే ప్రయత్నాలకు ప్రాధాన్యం పెరుగుతున్న నేపథ్యంలో అంతర్జాతీయ న్యాయస్థానం (ఐసీజే), అంతర్జాతీయ క్రిమినల్ కోర్టు (ఐసీసీ) పేర్లు కూడా నిపుణుల అంచనాల్లో కనిపిస్తున్నాయి. ఈ విభిన్న పేర్ల మధ్య 2026 నోబెల్ శాంతి బహుమతి ఎవరిని వరిస్తుందన్న ఉత్కంఠ కొనసాగుతోంది. విజేతను అక్టోబర్ 9న ఓస్లోలో ప్రకటించనున్నారు.ఇదీ చదవండి: ‘క్యాప్సూల్ వార్డ్‌రోబ్‌’ వెంట ‘జెన్‌ జెడ్‌’ పరుగులు!

వాషింగ్టన్‌: బ్రెజిల్, భారత్‌... ప్రపంచానికి రెండు దిక్కుల్లో ఉండే దేశాలు. ఇరుగు పొరుగో లేక ఒకే ప్రాంతంలోని దేశాలైతే పొరపడవచ్చు కానీ... అమెరికా అధ్యక్షుడు ట్రంప్‌ చెరో మూల ఉండే బ్రెజిల్, భారత్‌లను మార్చేశారు. ట్రూత్‌ సోషల్‌లో ఒక పోస్టు చేస్తూ... బ్రెజిల్‌ అధ్యక్ష ఎన్నికను ఇండియా అధ్యక్ష ఎన్నికగా పొరపాటున పేర్కొన్నారు. ‘‘ఇండియా అధ్యక్ష ఎన్నిక తొలి దశలో 12.5 కోట్ల మంది ఓటేశారు. ఓటింగ్‌ ముగిసిన వెంటనే అదే రోజు ఫలితాలు వెలువడ్డాయి,’’అని ట్రంప్‌ ఈ పోస్టులో వ్యాఖ్యానించారు. అంతేకాకుండా... అమెరికాలో ఎన్నికల ఫలితాలు వచ్చేందుకు చాలా ఎక్కువ సమయం పడుతూండటాన్ని ఉద్దేశిస్తూ... ‘‘అమెరికాలో ఓటింగ్‌ ‘‘అవినీతిమయం’’అని, ఫలితాలు వచ్చేందుకు వారాలు పడుతుందని విమర్శించారు. ట్రంప్‌ యథాలాపంగా చేసిన పొరబాటు ఇది. వాస్తవానికి.. ఆదివారం తొలిదశ ఎన్నికలు ముగిసింది బ్రెజిల్‌లో. దాదాపు 12.527 కోట్ల ఓట్లు పోల్‌ అయ్యాయి. సాయంత్రం ఐదు గంటలకు ఓటింగ్‌ ముగియగానే ఫలితాలు రావడమూ మొదలైంది. పైగా.. భారత్‌లో ప్రాతినిధ్య తరహా ఎన్నికలు జరుగుతాయి. రాష్ట్రాల అసెంబ్లీలు, పార్లమెంటు సభ్యులతో ఏర్పడ్డ ఎలక్టోరల్‌ కాలేజీ అధ్యక్షుడిని (రాష్ట్రపతి) ఎన్నుకుంటుంది. ప్రస్తుత రాష్ట్రపతి 2022లో పదవీ బాధ్యతలు స్వీకరించిన విషయం తెలిసిందే. అయితే ట్రంప్‌ అమెరికా ఎన్నికల్లో మార్పులు తీసుకురావాలని చాలాకాలంగా యోచిస్తున్నారు. ముఖ్యంగా పోస్టల్‌ బ్యాలెట్లను నియంత్రించాలన్నది ఆయన లక్ష్యం. ఆగస్టులో ఆయన భారత్‌లోని ఓటర్‌ ఐడీ వ్యవస్థను ప్రస్తావిస్తూ అమెరికాలో ఎన్నికల సంస్కరణలు తీసుకురావాలని అభిలíÙంచారు ‘‘ఇండియా చివరి ఎన్నికల్లో 64.6 కోట్ల మంది ఓటేశారు! మెయిల్‌ ద్వారా ఓటేసిన వాళ్లు ఒక శాతం కంటే తక్కువ. ప్రతి ఓటర్‌కు ఫొటో ఐడీ తప్పనిసరి,’’అని ట్రంప్‌ కలవరించిన సంగతి తెలిసిందే. ఈ పోస్టు పెట్టిన కొన్ని గంటల తరువాత ట్రంప్‌ తాను చేసిన పొరబాటును సరిదిద్దుకున్నారు. బ్రెజిల్‌ అధ్యక్ష ఎన్నికల తొలిదశలో అదే రోజున ఫలితాలు వెలువడ్డాయని చెప్పుకొచ్చారు.

అమెరికా అధ్యక్షుడు డొనాల్డ్‌ ట్రంప్‌ సోషల్‌ మీడియా సందేశాలను ప్రపంచవ్యాప్తంగా కోట్లాది మంది పరిశీలిస్తుంటారు. అయితే తాజాగా ఆయన చేసిన ఓ పోస్ట్‌ ఇప్పుడు చర్చనీయాంశంగా మారింది. అమెరికా ఎన్నికల వ్యవస్థను విమర్శించే క్రమంలో.. భారత్‌ను ప్రస్తావిస్తూ ఆయన చేసిన వ్యాఖ్యలు ఆసక్తితో పాటు ఆశ్చర్యం కలిగిస్తున్నాయి. దీంతో సోషల్‌ మీడియాలో నెటిజన్లు ట్రంప్‌ను ఓ రేంజ్‌లో ట్రోల్‌ చేస్తున్నారు.ట్రంప్‌ తన ట్రూత్‌ సోషల్‌ ఖాతాలో.. 125 మిలియన్ల మంది ఈరోజు భారత్‌ అధ్యక్ష ఎన్నికల తొలి దశలో ఓటేశారు. పోలింగ్‌ ముగిసిన వెంటనే అదే రోజు ఫలితాలు వచ్చాయి అని రాశారు. అయితే ఆ రోజు మన దేశంలో ఎలాంటి ఎన్నికలు జరగలేదు కదా!. పైగా మన దేశంలో అధ్యక్షుడు(రాష్ట్రపతి)ని జనాలు కాదు కదా ఎన్నుకునేది. అయితే ఆయన పేర్కొన్న 125 మిలియన్ల ఓట్ల సంఖ్య కూడా మరో దేశంలో జరిగిన ఎన్నికల గణాంకాలకు దగ్గరగా ఉండటం ఇప్పుడు అసలు ట్విస్ట్‌గా మారింది.ట్రంప్‌ పేర్కొన్న 125 మిలియన్ల సంఖ్య ఎక్కడి నుంచి వచ్చిందన్నదే ఇప్పుడు ఆసక్తికరంగా మారింది. అయితే తాజాగా జరిగిన బ్రెజిల్‌ అధ్యక్ష ఎన్నికల్లో(తొలి దశ) మొత్తం 125,272,513 చెల్లుబాటు అయ్యే ఓట్లు నమోదయ్యాయి. సో.. ఈ సంఖ్య ట్రంప్‌ తన పోస్ట్‌లో పేర్కొన్న 125 మిలియన్లకు అత్యంత దగ్గరగా ఉంది. దీంతో బ్రెజిల్‌ ఎన్నికల గణాంకాలను భారత్‌కు ఆపాదిస్తూ ట్రంప్‌ పోస్ట్‌ చేసినట్లు తెలుస్తోంది. వాస్తవ పరిస్థితికి భిన్నంగా ఉండటంతో సోషల్‌ మీడియాలో ట్రోలింగ్‌ మొదలైంది. ముఖ్యంగా భారత్‌లో రాష్ట్రపతి ఎన్నిక ప్రత్యక్ష ప్రజా ఓటుతో జరగదన్న విషయాన్ని నెటిజన్లు ప్రస్తావిస్తూ ట్రంప్‌ పోస్ట్‌పై సెటైర్లు వేస్తున్నారు.బ్రెజిల్‌లో ఏం జరిగింది?అక్టోబర్‌ 4న బ్రెజిల్‌లో అధ్యక్ష ఎన్నికల తొలి దశ పోలింగ్‌ జరిగింది. ఇందులో ప్రస్తుత అధ్యక్షుడు లూయిజ్‌ ఇనాసియో లులా డా సిల్వా, సెనేటర్‌ ఫ్లావియో బొల్సొనారో(మాజీ అధ్యక్షుడు జైర్‌ బొల్సోనారో కొడుకు) రెండో దశకు చేరుకున్నారు. దాదాపు పూర్తి ఫలితాల ప్రకారం ఫ్లావియో బొల్సొనారోకు 47.03 శాతం, లులాకు 45.16 శాతం ఓట్లు వచ్చాయి. ఎవరికీ 50 శాతానికి పైగా ఓట్లు రాకపోవడంతో అక్టోబర్‌ 25న రెండో దశ పోలింగ్‌ జరగనుంది.భారత అధ్యక్షుడి ఎన్నిక ఎలాగంటే.. భారత్‌లో రాష్ట్రపతిని ప్రజలు నేరుగా ఓటు వేసి ఎన్నుకోరు. ఎన్నికైన ఎంపీలు, రాష్ట్రాలు, ఢిల్లీ, పుదుచ్చేరి శాసనసభల్లోని ఎన్నికైన సభ్యులతో కూడిన ఎలక్టోరల్‌ కాలేజీ రాష్ట్రపతిని ఎన్నుకుంటుంది. ఎంపీలు, ఎమ్మెల్యేలు తమ ఓటు ద్వారా రాష్ట్రపతిని ఎన్నుకుంటారు. ఈ ప్రక్రియలో సింగిల్‌ ట్రాన్స్‌ఫరబుల్‌ ఓటు విధానాన్ని, రహస్య బ్యాలెట్‌ను ఉపయోగిస్తారు.అంటే బ్రెజిల్‌, అమెరికా వంటి దేశాల్లో జరిగే ప్రత్యక్ష ప్రజా ఓటుతో అధ్యక్షుడిని ఎన్నుకునే విధానానికి భారత్‌ రాష్ట్రపతి ఎన్నిక పూర్తిగా భిన్నం. ఈ నేపథ్యంలో ట్రంప్‌ ప్రస్తావించిన ‘‘భారత్‌ అధ్యక్ష ఎన్నికల తొలి దశ’’ అన్న విషయమే వాస్తవ పరిస్థితికి సరిపోలడం లేదు.అమెరికా ఎన్నికలపైనా ట్రంప్‌ విమర్శలుభారత్‌ ఎన్నికలను ప్రస్తావించిన ట్రంప్‌.. ఇదే పోస్టులో అమెరికా ఎన్నికల వ్యవస్థపైనా విమర్శలు చేశారు. డెట్రాయిట్‌, ఫిలడెల్ఫియా, కాలిఫోర్నియా తదితర ప్రాంతాల్లో ఓట్ల లెక్కింపునకు వారాలు పడుతున్నాయని పేర్కొన్నారు. ‘‘వోటింగ్‌ ఇన్‌ అమెరికా ఈజ్‌ కరప్ట్‌’’ అంటూ ఆరోపించారు. గతంలో భారత్‌ ఎన్నికలపై ప్రశంసలుఇదిలా ఉండగా.. ట్రంప్‌ గతంలో మాత్రం భారత్‌ ఎన్నికల విధానాన్ని ప్రస్తావించారు. ఆగస్టులో అమెరికాలో ఓటర్‌ గుర్తింపు నిబంధనలను కఠినతరం చేయాలన్న వాదనకు మద్దతుగా భారత్‌లోని ఓటర్‌ కార్డు వ్యవస్థను ఉదాహరణగా పేర్కొన్నారు. భారత్‌లో భారీ సంఖ్యలో ప్రజలు ఓటు వేసినా పోస్టల్‌ బ్యాలెట్‌ వినియోగం చాలా తక్కువగా ఉందని అప్పట్లో వ్యాఖ్యానించారు.ఇదీ చదవండి: అమెరికాకు ఆ రెండు దేశాల నుంచి బిగ్‌ చాలెంజ్‌!

వాషింగ్టన్‌: కృత్రిమ మేధ రంగంలో అమెరికా ఆధిపత్యాన్ని నిలబెట్టే లక్ష్యంగా సూపర్‌ ఇంటెలిజెన్స్‌ ఫోర్స్‌’ను ఏర్పాటు చేస్తున్నట్లు అధ్యక్షుడు డొనాల్డ్‌ ట్రంప్‌ ‘ప్రకటించారు. జాతీయ నిఘా డైరెక్టర్‌ జే క్లేటన్‌ ఈ ఫోర్స్‌కు సారథ్యం వహిస్తారన్నారు. కృత్రిమ మేధను సూపర్‌ ఇంటెలిజెన్స్‌గా పిలవాలంటూ ట్రంప్‌ కోరుతుండటం తెల్సిందే. సూపర్‌ ఇంటెలిజెన్స్‌ రంగంలో అమెరికాను ప్రపంచంలోనే అగ్రగామిగా నిలపాలన్న అమెరికా ప్రభుత్వ లక్ష్యానికి అనుగుణంగా వినియోగదారులు, సామాజిక సంస్థలు, మత సంఘాలు, కీలక మౌలిక వనరుల కంపెనీలు, ఏఐ సంస్థలను ఈ ఫోర్స్‌ సమన్వయం చేసుకుంటుందని ట్రంప్‌ వివరించారు. ఫెడరల్‌ ట్రేడ్‌ కమిషన్‌ చైర్మన్‌ ఫెర్గుసన్, పెంటగాన్‌ చీఫ్‌ టెక్నాలజీ ఆఫీసర్‌ మైకేల్‌ తదితరులతో కూడిన ఈ ఫోర్స్‌ ఏఐతో తలెత్తే ముప్పు, అవకాశాలపై 120 రోజుల్లోగా అధ్యక్షుడు ట్రంప్, చీఫ్‌ ఆఫ్‌ స్టాఫ్‌ సుసీ వైల్స్‌కు నివేదిక అందజేయనుంది. గత వారం అమెరికాలోని అగ్రగామి టెక్‌ కంపెనీల అధినేతలు వైట్‌హౌస్‌లో ట్రంప్‌తో సమావేశమై తాము అభివృద్ధి చేసే ఏఐ సంబంధిత సాంకేతికతలపై స్వయం పర్యవేక్షణ చేపడతామంటూ అంగీకరించారు. ఈ నేపథ్యంలోనే ట్రంప్‌ సూపర్‌ ఇంటెలిజెన్స్‌ ఫోర్స్‌ వివరాలను ట్రూత్‌ సోషల్‌లో వెల్లడించటం గమనార్హం.

వాషింగ్టన్: ఉక్రెయిన్‌‌పై రష్యా దాదాపు మూడేళ్లుగా సాగిస్తున్న భీకర యుద్ధాన్ని ముగించే దిశగా జరుగుతున్న దౌత్య ప్రయత్నాలలో అనూహ్యమైన మలుపు చోటు చేసుకుంది. రష్యాతో యుద్ధాన్ని ముగించేందుకు అమెరికాలోని డొనాల్డ్ ట్రంప్ ప్రభుత్వం జరుపుతున్న రహస్య చర్చలు.. కేవలం రాజకీయ ఒప్పందాలకే పరిమితం కాకుండా, బిలియన్ డాలర్ల (దాదాపు లక్ష కోట్ల రూపాయల) భారీ చమురు ఒప్పందం వైపు అడుగులు వేస్తున్నట్లు న్యూయార్క్ టైమ్స్ సంచలన కథనాన్ని వెలువరించింది.ఈ ఒప్పందం ద్వారా అమెరికా తరఫున దౌత్య మధ్యవర్తులుగా వ్యవహరిస్తున్న స్టీవ్ విట్కాఫ్, జారెడ్ కుష్నర్‌లతో సన్నిహిత సంబంధాలున్న పశ్చిమాసియా వ్యాపారవేత్తలకు అత్యధిక లబ్ధి చేకూరే అవకాశం ఉందని ఆ నివేదిక పేర్కొంది.లూకోయిల్ ఆస్తులే లక్ష్యంగా..అమెరికా ప్రభుత్వం, రష్యా సంయుక్త ఆమోదంపై పూర్తిగా ఆధారపడి ఉన్న ఈ ఒప్పందంలో.. రష్యాకు చెందిన ప్రముఖ ప్రైవేట్ ఇంధన దిగ్గజం 'లూకోయిల్' సంస్థకు ప్రపంచ వ్యాప్తంగా విస్తరించి ఉన్న చమురు క్షేత్రాలు, అధునాతన రిఫైనరీలు, భారీ గ్యాస్ స్టేషన్ల నెట్‌వర్క్ ప్రధాన భాగంగా ఉన్నాయి. ఉక్రెయిన్ యుద్ధం కారణంగా రష్యాపై విధించిన కఠినమైన ఆంక్షల వల్ల నిలిచిపోయిన ఈ అంతర్జాతీయ ఆస్తులకు మళ్లీ జీవం పోయడమే ఈ డీల్ ప్రధాన ఉద్దేశంగా తెలుస్తోంది.తెరవెనుక చక్రం తిప్పుతున్న దిగ్గజాలుఈ భారీ చమురు ఒప్పందాన్ని కుదిర్చేందుకు తెరవెనుక తీవ్రంగా ప్రయత్నిస్తున్న బృందంలో ప్రముఖ అమెరికన్ బిలియనీర్, పెట్టుబడిదారుడు టాడ్ బోహ్లీతో పాటు.. ట్రంప్ బంధువైన కుష్నర్ లేదా విట్కాఫ్ కుటుంబాలతో వాణిజ్య సంబంధాలున్న రెండు శక్తివంతమైన పశ్చిమాసియా సంస్థలు, అలాగే అమెరికా ప్రభుత్వానికి చెందిన ఒక కీలక విభాగం క్రియాశీలకంగా వ్యవహరిస్తున్నట్లు సమాచారం.పుతిన్ ప్రత్యేక వ్యూహంగత సెప్టెంబర్ 5న క్రెమ్లిన్‌లో రష్యా అధ్యక్షుడు వ్లాదిమిర్ పుతిన్‌తో అమెరికా సంధానకర్తలు స్టీవ్ విట్కాఫ్, జారెడ్ కుష్నర్‌లు భేటీ అయ్యారు. ఈ సమావేశంలోనే పుతిన్ స్వయంగా ఈ భారీ చమురు ఒప్పంద ప్రతిపాదనను తెరపైకి తెచ్చినట్లు తెలుస్తోంది.ఈ రహస్య సమావేశం గురించి పూర్తి అవగాహన ఉన్న విశ్వసనీయ వర్గాలను ఉటంకిస్తూ 'న్యూయార్క్ టైమ్స్' ఈ వివరాలను ప్రచురించింది. అమెరికాతో తాము కేవలం శత్రువులమే కాదని, భవిష్యత్తులోనూ విజయవంతంగా వాణిజ్య, వ్యాపార సంబంధాలు కొనసాగించగలమని రష్యన్ ప్రజలకు, ప్రపంచ దేశాలకు నిరూపించేందుకు ఈ ఒప్పందం ఒక బలమైన వేదిక అవుతుందని పుతిన్ అభిప్రాయపడ్డారు. అందుకే ఈ డీల్‌ను వీలైనంత త్వరగా తుదిరూపునకు తీసుకురావాలని ఆయన ప్రతి పాదించినట్లు ఆ వర్గాలు వెల్లడించాయి.మొత్తానికి, ఉక్రెయిన్ సంక్షోభాన్ని ముగించే ముసుగులో జరుగుతున్న ఈ భారీ ఆర్థిక లావాదేవీలు ఇప్పుడు అంతర్జాతీయ రాజకీయ వర్గాల్లో తీవ్ర చర్చనీయాంశంగా మారాయి.ఇదీ చదవండి : అమెరికా ఘోర తప్పిదం

ఇరాన్‌పై అమెరికా అధ్యక్షుడు డొనాల్డ్‌ ట్రంప్‌ మరోసారి సంచలన వ్యాఖ్యలు చేశారు. ఇరాన్‌పై త్వరలోనే కీలక నిర్ణయం తీసుకుంటానని ప్రకటించిన ట్రంప్‌.. టెహ్రాన్‌ ముందు రెండు మార్గాలే ఉన్నాయని హెచ్చరించారు. అవి.. ‘ఈజీ వే.. లేదా హార్డ్ వే’ అంటూ తీవ్ర వ్యాఖ్యలు చేశారు. ఇరాన్‌ ఇప్పటికే తీవ్రంగా దెబ్బతిందని పేర్కొన్న ఆయన.. అమెరికా తదుపరి చర్య ఏంటనేది త్వరలోనే తేలుస్తానన్నారు. అయితే, తాను తీసుకోబోయే నిర్ణయం సైనిక చర్యా, దౌత్యపరమైన చర్యా అన్నదానిపై మాత్రం స్పష్టత ఇవ్వలేదు.వైట్‌హౌస్‌ నుంచి ఒహియోకు బయలుదేరే ముందు మీడియాతో మాట్లాడిన ట్రంప్‌.. ఇరాన్‌పై తమ తదుపరి వ్యూహాన్ని ఖరారు చేస్తున్నట్లు చెప్పారు. ఇరాన్‌ ఇప్పటికే ధ్వంసమైంది. ఇప్పుడు అది సులభమైన మార్గమా.. కఠినమైన మార్గమా అన్నదే ప్రశ్న అన్న ఆయన వ్యాఖ్యలు పశ్చిమాసియాలో మరోసారి ఉద్రిక్తతలకు దారితీశాయి. ఇరాన్‌ అణ్వాయుధ సామర్థ్యం సాధించే ప్రయత్నాలను దాదాపు విరమించుకుంటోందని కూడా ట్రంప్‌ పేర్కొన్నారు. అలాగే, అమెరికా మిత్రదేశాలకు చెందిన లక్ష్యాలను కూడా పరిగణనలోకి తీసుకుంటున్నట్లు సమాచారం. అదే సమయంలో కొత్త ఘర్షణను నివారించేందుకు ఇరాన్‌ దౌత్య ప్రయత్నాలు కొనసాగిస్తోంది.క్యాంప్‌ డేవిడ్‌లో కీలక భేటీట్రంప్‌ తాజా వ్యాఖ్యలకు ముందు అమెరికా అత్యున్నత జాతీయ భద్రతా అధికారులు క్యాంప్‌ డేవిడ్‌లో రహస్య సమావేశం నిర్వహించారు. ఇరాన్‌తో కొనసాగుతున్న ఉద్రిక్తతలు, దౌత్య చర్చలు, అవసరమైతే తిరిగి భారీ సైనిక చర్య చేపట్టే అవకాశాలపై ఈ భేటీలో చర్చించినట్లు Axios తెలిపింది. యెమెన్‌లో సౌదీ అరేబియా-హౌతీ ఘర్షణలపై అమెరికా విధానంపైనా చర్చ జరిగినట్లు సమాచారం. దౌత్యపరమైన చర్చలు ప్రతిష్ఠంభనలో ఉన్న సమయంలోనే ఈ సమావేశం జరగడం ప్రాధాన్యం సంతరించుకుంది. చర్చల ద్వారా పరిష్కారం లభించకపోతే ఇరాన్‌పై అమెరికా మళ్లీ పెద్దఎత్తున సైనిక చర్యకు దిగే అవకాశాలను ట్రంప్‌ ప్రభుత్వం పరిశీలిస్తున్నట్లు సంకేతాలు వెలువడుతున్నాయి.ఇరాన్‌ కూడా సిద్ధం.. మరోవైపు అమెరికా మళ్లీ భారీ స్థాయిలో దాడులు ప్రారంభిస్తే గతంలో కంటే మరింత విస్తృతంగా, తీవ్రంగా ప్రతిదాడి చేసేందుకు ఇరాన్‌ సిద్ధమవుతున్నట్లు రాయిటర్స్‌ వెల్లడించింది. ఇరాన్‌ సైనిక కమాండర్లు అమెరికాకు సంబంధించిన లక్ష్యాలతో పాటు.. అమెరికా సైనిక చర్యలకు మద్దతు ఇచ్చే దేశాలు, మధ్యప్రాచ్యం వెలుపల ఉన్న కొన్ని ప్రాంతాలను కూడా లక్ష్యాలుగా పరిగణిస్తున్నట్లు సమాచారం. అయితే, ఇరాన్‌ కూడా దౌత్య మార్గాన్ని పూర్తిగా మూసివేయలేదు. కొత్త ఘర్షణను నివారించేందుకు చర్చలు కొనసాగిస్తున్నప్పటికీ.. ఇరాన్‌లోని కొందరు అధికారులు అమెరికాతో ఒప్పందం కుదిరే అవకాశాలు తక్కువగా ఉన్నాయని భావిస్తున్నట్లు సమాచారం.ఇదిలా ఉండగా.. ఇటీవల ఇరాన్‌ ఒక ప్రతిపాదనను ముందుకు తెచ్చింది. అమెరికా తన ఇరాన్‌ పోర్టులపై విధించిన నౌకా దిగ్బంధనాన్ని ఎత్తివేస్తే.. వ్యూహాత్మకంగా అత్యంత కీలకమైన హార్ముజ్‌ జలసంధిని ఏడు రోజుల్లో తిరిగి తెరవడానికి సిద్ధమని టెహ్రాన్‌ సంకేతాలు ఇచ్చింది. ఈ ప్రతిపాదనను ట్రంప్‌ తిరస్కరించారు. అయితే అమెరికా అధికారిక స్పందనపై ఇరాన్‌ తొలుత భిన్నంగా స్పందించినప్పటికీ, ఖతార్‌ మధ్యవర్తిత్వం ద్వారా అమెరికా సమాధానం అందినట్లు తర్వాత వెల్లడించింది. ఈ క్రమంలో రెండు దేశాల మధ్య మధ్యవర్తుల ద్వారా సంప్రదింపులు కొనసాగుతున్నప్పటికీ.. తుది ఒప్పందంపై మాత్రం ఇంకా స్పష్టత రాలేదు.యెమెన్‌ అంశం కూడా కీలకమే..ఇరాన్‌తో ఉద్రిక్తతలకు తోడు యెమెన్‌లో హౌతీలపై సౌదీ అరేబియా సైనిక చర్యకు సిద్ధమవుతోంది. ఎర్ర సముద్రంలో కీలకమైన బాబ్‌ అల్‌ మండేబ్‌ జలమార్గంపై హౌతీల ప్రభావాన్ని తగ్గించడమే లక్ష్యంగా సౌదీ మద్దతు ఉన్న యెమెన్‌ బలగాలు ఆపరేషన్‌కు సిద్ధమవుతున్నట్లు సమాచారం. ఈ చర్యకు అమెరికా నిఘా సహకారం అందిస్తున్నట్లు కూడా రిపోర్టులు పేర్కొంటున్నాయి. దీంతో ఇరాన్‌-అమెరికా వివాదం కేవలం రెండు దేశాల మధ్య సమస్యగా కాకుండా.. హార్ముజ్‌ జలసంధి, యెమెన్‌, హౌతీలు, గల్ఫ్‌ దేశాలు, అంతర్జాతీయ చమురు రవాణాపై ప్రభావం చూపే విస్తృత ప్రాంతీయ సంక్షోభంగా మారే పరిస్థితులు కనిపిస్తున్నాయి.ఇదీ చదవండి: హసీనా అప్పగింతకు భారత్‌ గడువు ఇవ్వలేదు..

పశ్చిమాసియాలో యుద్ధ మంటలు మరింత తీవ్రంగా మారుతున్నాయి. ఇరాన్‌పై అమెరికా–ఇజ్రాయెల్‌ దాడులు, యెమెన్‌లో హౌతీలపై దాడులు, గాజాలో కొనసాగుతున్న ఉద్రిక్తతలతో ఇప్పటికే ప్రపంచ ఇంధన మార్కెట్లు ఉక్కిరి బిక్కిరవుతున్నాయి. ఈ ప్రభావం ఇప్పుడు అమెరికా అధ్యక్షుడు డొనాల్డ్‌ ట్రంప్‌కు కూడా పెద్ద సవాలుగా మారింది. యుద్ధం దెబ్బకు ఇంధన ధరలు రికార్డు స్థాయికి చేరడంతో.. అమెరికాలోనే కాదు, యూరప్‌లోనూ పరిస్థితి ఆందోళనకరంగా మారింది. దీంతో ధరలకు కళ్లెం వేసేందుకు ఓ కీలక నిర్ణయం తీసుకోవాల్సిన పరిస్థితి ఏర్పడింది. అమెరికా అధ్యక్షుడు ట్రంప్‌ యూరప్‌ దేశాలు తమ వద్ద ఉన్న డీజిల్‌ నిల్వలను విడుదల చేయాలని డిమాండ్‌ చేశారు. పరిస్థితి ఇలాగే కొనసాగితే అమెరికా నుంచి డీజిల్‌ ఎగుమతులపై నిషేధం విధించే అవకాశాన్ని కూడా ఆయన ప్రస్తావించారు. అలాంటి నిర్ణయం ప్రపంచ మార్కెట్లో డీజిల్‌ కొరతను మరింత పెంచే ప్రమాదం ఉండటంతో యూరప్‌లో ఆందోళన వ్యక్తమైంది. ఈ నేపథ్యంలో ఫ్రాన్స్‌ అధ్యక్షుడు ఇమ్మాన్యుయేల్‌ మాక్రాన్‌ ట్రంప్‌తో మాట్లాడారు. అనంతరం G7 దేశాల నేతలతో వీడియో కాన్ఫరెన్స్‌ నిర్వహించారు. ట్రంప్‌ కూడా ఈ చర్చల్లో పాల్గొని యూరప్‌ డీజిల్‌ నిల్వలను విడుదల చేయడానికి చర్చలు జరిపినట్లు అమెరికా అధికారులు తెలిపారు.చివరకు G7 ఒక కీలక నిర్ణయం తీసుకుంది. నాలుగు నెలల వ్యవధిలో మొత్తం 100 మిలియన్‌ బ్యారెళ్ల చమురు, డీజిల్‌ తదితర ఇంధన నిల్వలను సమన్వయంతో విడుదల చేయనుంది. ఇందులో తొలి 20 రోజుల్లోనే గణనీయమైన మొత్తంలో డీజిల్‌ను మార్కెట్లోకి తీసుకురానున్నారు. ఈ ప్రక్రియను అంతర్జాతీయ ఇంధన సంస్థ (IEA) ద్వారా సమన్వయం చేయనున్నారు.ట్రంప్‌కు కొత్త టెన్షన్‌ఇక్కడ మరో కీలక అంశం ఉంది. అమెరికాలో డీజిల్‌ ధరలు ఇటీవల రికార్డు స్థాయికి చేరాయి. యుద్ధం కారణంగా ఇంధన సరఫరాలపై ఒత్తిడి పెరగడంతో ధరలు ఎగిశాయి. నవంబర్‌ 3న అమెరికా మధ్యంతర ఎన్నికలు జరగనున్న నేపథ్యంలో పెరిగిన జీవన వ్యయం, ఇంధన ధరలు ట్రంప్‌ ప్రభుత్వానికి రాజకీయంగా కూడా కీలక అంశంగా మారాయి.అందుకే డీజిల్‌ ధరలను అదుపులోకి తీసుకురావడానికి వేగంగా చర్యలు తీసుకోవాల్సిన పరిస్థితి ఏర్పడింది. ట్రంప్‌ స్వయంగా కూడా యూరప్‌ భారీగా డీజిల్‌ నిల్వలను విడుదల చేయడానికి అంగీకరించిందని ప్రకటించారు. అనంతరం అమెరికా డీజిల్‌ ఎగుమతులపై నిషేధం విధించబోమని స్పష్టం చేశారు. G7 దేశాలు కూడా పరస్పరం ఇంధన ఎగుమతులపై ఆంక్షలు విధించబోమని స్పష్టం చేశాయి. అంటే ఒకవైపు నిల్వలను విడుదల చేస్తూనే.. మరోవైపు అంతర్జాతీయ సరఫరా గొలుసుకు మరింత దెబ్బ తగలకుండా చర్యలు తీసుకుంటున్నాయి.అసలు టెన్షన్‌ ఇక్కడే.. అయితే చమురు నిల్వలను విడుదల చేయడం తక్షణ ఉపశమనానికి మాత్రమే. పశ్చిమాసియాలో అసలు సమస్య మాత్రం ఇంకా కొనసాగుతూనే ఉంది. హర్ముజ్‌ జలసంధి, బాబ్ అల్-మండెబ్ సముద్ర మార్గాలపై నెలకొన్న ఉద్రిక్తత ప్రపంచ ఇంధన సరఫరాకు పెద్ద ముప్పుగా మారింది.హర్ముజ్‌ ద్వారా భారీ స్థాయిలో చమురు రవాణా జరుగుతుంది. అక్కడ నౌకల రాకపోకలకు అంతరాయం ఏర్పడితే ప్రపంచ మార్కెట్‌పై నేరుగా ప్రభావం పడుతుంది. G7 కూడా తాజాగా హర్ముజ్‌లో అంతర్జాతీయ నౌకాయాన హక్కులు, స్వేచ్ఛాయుత రాకపోకలను వెంటనే పునరుద్ధరించాలని పిలుపునిచ్చింది.మరోవైపు యెమెన్‌లోని హౌతీల చర్యల కారణంగా బాబ్ అల్-మండెబ్–ఎర్ర సముద్ర మార్గం కూడా ప్రమాదంలో ఉంది. తాజాగా ఒమన్‌ సమీపంలో ఓ క్రూడ్‌ ఆయిల్‌ ట్యాంకర్‌ను క్షిపణి తాకినట్లు యూకే మారిటైమ్‌ ట్రేడ్‌ ఆపరేషన్స్‌ తెలిపింది. సిబ్బంది సురక్షితంగా ఉన్నప్పటికీ.. వాణిజ్య నౌకల భద్రతపై ఆందోళనలు పెరుగుతున్నాయి.హౌతీలపై భారీ దాడులుఇదే సమయంలో యెమెన్‌లో పోరాటం మరింత తీవ్రరూపం దాల్చింది. గత 24 గంటల్లో 474 ఆపరేషన్లు నిర్వహించి 1,540 మంది హౌతీ ఫైటర్లను హతమార్చినట్లు యెమెన్‌ సైన్యం ప్రకటించింది. తైజ్‌ ప్రాంతంలో అత్యధిక నష్టం జరిగినట్లు తెలిపింది. పలువురికి గాయాలైనట్లు సమాచారం. మరోవైపు దక్షిణ సౌదీ అరేబియాను లక్ష్యంగా చేసుకుని వచ్చిన మూడు బాలిస్టిక్‌ క్షిపణులను అడ్డుకున్నట్లు సౌదీ నేతృత్వంలోని సంకీర్ణం తెలిపింది. దీంతో యెమెన్‌–సౌదీ సరిహద్దుల్లోనూ ఉద్రిక్తత కొనసాగుతోంది.గాజాలోనూ దాడులు.. వెస్ట్‌బ్యాంక్‌లో హింసపశ్చిమాసియా సంక్షోభం ఇరాన్‌, యెమెన్‌తోనే ఆగలేదు. గాజా సిటీలోని ఓ నివాస సముదాయంపై ఇజ్రాయెల్‌ వైమానిక దాడిలో చిన్నారి సహా నలుగురు మరణించినట్లు పాలస్తీనా వైద్య వర్గాలు తెలిపాయి. పలువురు గాయపడ్డారు. ఆక్రమిత వెస్ట్‌బ్యాంక్‌లోనూ పాలస్తీనియన్లపై సెటిలర్‌ దాడులు జరిగినట్లు సమాచారం. మరోవైపు హమాస్‌ ఆర్థిక నెట్‌వర్క్‌ను దెబ్బతీసేందుకు అమెరికా, ఫ్రాన్స్‌తో కలిసి చర్యలు కొనసాగిస్తామని అమెరికా విదేశాంగ శాఖ తెలిపింది.ఒక్క యుద్ధం.. ఎన్నో ప్రభావాలుఇలా పశ్చిమాసియాలోని ఒక్కో ఫ్రంట్‌ మరోదానితో ముడిపడి ఉంది. ఇరాన్‌ యుద్ధం చమురు సరఫరాపై ప్రభావం చూపుతోంది.. హౌతీల దాడులు సముద్ర రవాణాపై ఒత్తిడి పెంచుతున్నాయి. హర్ముజ్‌ ఉద్రిక్తత ప్రపంచ చమురు మార్కెట్‌ను కుదిపేస్తోంది.. గాజా, వెస్ట్‌బ్యాంక్‌లో హింస ప్రాంతీయ ఉద్రిక్తతలను మరింత పెంచుతోంది.దీని ప్రభావమే ఇప్పుడు G7 అత్యవసర నిల్వలను రంగంలోకి దించడం. అయితే 100 మిలియన్‌ బ్యారెళ్ల విడుదలతో ధరలపై కొంత ఒత్తిడి తగ్గే అవకాశం ఉన్నా.. పశ్చిమాసియాలో యుద్ధం, సముద్ర మార్గాల భద్రతపై అనిశ్చితి కొనసాగినంతకాలం ఇంధన మార్కెట్‌ టెన్షన్‌ మాత్రం పూర్తిగా తగ్గే పరిస్థితి కనిపించడం లేదు.ఇదీ చదవండి: కీవ్‌లో ఏం జరుగుతోంది? మూడు వంతెనలు నాశనం

వాషింగ్టన్‌: పారిశ్రామిక దేశాల కూటమి జీ7 తమ దేశానికి తక్షణమే 10 కోట్ల బారెళ్ల చమురు, ముఖ్యంగా డీజిల్‌ను సరఫరా చేసేందుకు అంగీకరించినట్లు అమెరికా అధ్యక్షుడు ట్రంప్‌ ప్రకటించారు. మధ్యంతర ఎన్నికలు ముంచుకొస్తున్న వేళ, దేశంలో ఇంధన ధరలు రికార్డు స్థాయిలో పెరుగుతున్న నేపథ్యంలో ట్రంప్‌ సారథ్యంలోని రిపబ్లికన్‌ పార్టీ ప్రభుత్వం తీవ్ర ఒత్తిళ్లను ఎదుర్కొంటోంది. ఇరాన్‌తో యుద్ధం, టారిఫ్‌ల యుద్ధం కారణంగా అమెరికాలో ఆయిల్, ఇతర వస్తువుల ధరలు ఆకాశాన్నంటుతుండటంతో ట్రంప్‌ ప్రజాదరణ దారుణంగా పడిపోయింది. శుక్రవారం ట్రంప్‌ తన సోషల్‌ మీడియా ట్రూత్‌ సోషల్‌లో..‘పెద్ద మొత్తంలో నిల్వ ఉంచుకున్న డీజిల్‌ను విడుదల చేసేందుకు యూరప్‌ అంగీకరించింది. ఈ చమురును వెంటనే విడుదల చేస్తుంది’అని ప్రకటించారు. జీ7 అధ్యక్ష బాధ్యతల్లో ఉన్న ఫ్రాన్స్‌ అధ్యక్షుడు మేక్రాన్‌తో గురువారం రాత్రి ట్రంప్‌ ఫోన్‌లో మాట్లాడారు. తమ దేశంలో పెరుగుతున్న చమురు ధరలను అదుపు చేసేందుకు, పెట్రోలియం ఉత్పత్తుల అవసరం ఏర్పడిందని ఆయనకు తెలిపారు. దీంతో, మేక్రాన్‌ శుక్రవారం ఉదయం జీ7 దేశాల నేతలతో వర్చువల్‌ సమావేశం జరిపి, ట్రంప్‌కు అనుకూలంగా నిర్ణయం తీసుకున్నారని అమెరికాలో ఫ్రాన్స్‌ దౌత్యాధికారి ఒకరు వెల్లడించారు.

జెరూసలెం: ఇజ్రాయెల్‌ వెళుతున్న ఫ్లై దుబాయ్‌ విమానాన్ని కూల్చేసే ప్రయత్నం చేసిన కో–పైలట్‌ వెనుక ఇరాన్‌ ఉన్నట్లు తెలిస్తే ఆ దేశంపై తీవ్రస్థాయి దాడి తప్పదని అమెరికా అధ్యక్షుడు డొనాల్డ్‌ ట్రంప్‌ హెచ్చరించారు. కో–పైలట్‌ కత్తితో కెప్టెన్‌పై దాడి చేయడంతో ఫ్లై దుబాయ్‌ విమానం అదుపుతప్పి వేగంగా కిందకు దిగిన విషయం.. సహ ప్రయాణీకులు సకాలంలో అడ్డుకోవడంతో హైజాక్‌ ముప్పు, 9/11 తరహా దాడిని నివారించడం తెలిసిందే. కో–పైలట్‌కు, ఇరాన్‌కు ఏమైనా సంబంధం ఉందా? అని కొందరు విలేకరులు ప్రశ్నించగా.. దర్యాప్తు సాగుతోందని ట్రంప్‌ సమాధానమిచ్చారు. తనకు అందుతున్న సమాచారం ప్రకారం ఇరాన్‌ ప్రమేయం ఉందన్న ట్రంప్‌ ఆ అనుమానానికి గల కారణాలను మాత్రం వివరించలేదు. దాడి వెనుక ఇరాన్‌ ఉన్నట్లు తేలితే అమెరికా ప్రతీకారం తీర్చుకుంటుందా అని ప్రశ్నించగా.. ‘‘వారిపై తీవ్రమైన దాడి జరుగుతుంది. ఆందోళన చెందకండి’’అని ట్రంప్‌ వ్యాఖ్యానించారు.

ఐక్యరాజ్యసమితి జనరల్‌ అసెంబ్లీలో ప్రసంగించిన ట్రంప్‌కు, శ్వేతసౌధంలో జిన్‌పింగ్‌కు ఆతిథ్యం ఇచ్చిన ట్రంప్‌కు మధ్య వ్యత్యాసాన్ని అంతర్జాతీయ సమాజం గుర్తిస్తున్నది. ఇరాన్‌ను నాశనం చేస్తానని హూంకరించిన ట్రంప్‌ ఎక్కడ? విమానాశ్రయంలో సతీ సమేతంగా జిన్‌పింగ్‌కు స్వాగతం పలికిన ట్రంప్‌ ఎక్కడ? ట్రంప్‌ విలక్షణ మనస్తత్వాన్ని, దౌత్యనీతిని రాజకీయ పరిశీలకులు జాగ్రత్తగా విశ్లేషిస్తున్నారు.ట్రంప్, జిన్‌పింగ్‌ శిఖరాగ్ర సమావేశంలో కీలకమైన ఒప్పందాలు కానీ, నిర్ణయాలు కానీ లేవు. సమావేశంలో జిన్‌పింగ్‌దే పైచేయిగా కన్పడుతున్నది. అమెరికా చైనాను తనతో సమవుజ్జీగా, సమ అగ్రరాజ్యంగా పరిగణిస్తున్నట్లు స్పష్టమైన సంకేతాలు వెలువడ్డాయి. ఇది జిన్‌పింగ్‌కు చెప్పుకోదగిన రాజకీయ విజయం. జిన్‌పింగ్‌ ఈరోజు కోసం ఎన్నో ఏళ్ళుగా వేచి చూస్తు న్నాడు. ఫ్రాన్స్, యూకే, జర్మనీ, ఇటలీ వంటి యూరోపియన్‌ దేశాధినేతలు, ఉక్రెయిన్‌ అధ్యక్షుడు జెలెన్‌స్కీ వంటి నేతలతో ట్రంప్‌ వ్యవహార శైలికి; పుతిన్, జిన్‌పింగ్‌లతో వ్యవహార శైలి హస్తి మశకాంతరము.దూకుడు–పరిణతిట్రంప్‌ మనస్తత్వం విలక్షణమైనది. దూకుడు శైలితో బెదిరింపు ప్రధానంగా అన్ని దేశాలతో వ్యవహరిస్తున్నాడు. అధ్యక్షుని హోదాలో అమెరికా దేశపు పూర్తి బలాన్ని చూపడానికి ఉత్సాహం చూపిస్తాడు. వ్యక్తిగత పొగడ్తలకు ప్రాధాన్యతనిస్తాడు. వ్యాపార, ఆర్థిక లాభా లకు, లావాదేవీలకు పెద్దపీట వేస్తాడు. కొంత చిన్నపిల్లల మనస్తత్వం కూడా ప్రస్ఫుటంగా కన్పడుతుంది. తను చెప్పిన మాట అందరూ వినాలి. తన మాటే వేదమనే మంకుపట్టు. అందరికంటే ముందు తనే అన్ని విషయాలను ప్రపంచానికి తెలియపర్చాలని ఉవ్విళ్లూరుతుంటాడు. ఈ బలహీనతలను వినియోగించుకొని పాకిస్తాన్‌ సైన్యాధ్యక్షుడు ఆసిఫ్‌ మునీర్‌ ట్రంప్‌కు దగ్గరయ్యాడు. తనకు నచ్చకపోతే కనీస దౌత్య మర్యాదలను కూడా ట్రంప్‌ పాటించడు. ఉదాహరణకు ఇటలీ ప్రధాని మెలోని తనతో ఫొటో కోసం వెంపర్లాడిందని పదిమందిలో పదే పదే చెప్పాడు. వైట్‌ హౌస్‌లో సమావేశమైనప్పుడు మీడియా సాక్షిగా జెలెన్‌స్కీని తూల నాడాడు. ఈ అహంకార, దుడుకు వైఖరి ఆధారంగానే ట్రంప్‌నుఅంచనా వేయకూడదు. ట్రంప్‌ తాను అమెరికా అధ్యక్షుడిగా మాట్లాడుతున్నాననే స్పృహ చూపించడు. కానీ రష్యా, చైనా, భారత్‌ లతో చాలావరకు సంయమనాన్ని పాటిస్తున్నాడు. బలవంతులలో వ్యవహరించేటప్పుడు, తన మాదిరి అహంకార స్వభావ వ్యక్తులతో వ్యవహరించేటప్పుడు ట్రంప్‌ పరిణితిని ప్రదర్శిస్తున్నాడు. ఉదాహర ణకు జిన్‌పింగ్, పుతిన్‌లను తన స్నేహితులుగా అభివర్ణిస్తాడు. విచిత్రంగా ఉత్తర కొరియా అధ్యక్షుడు కిమ్‌ను కూడా తన మిత్రుడిగా పరిగణిస్తాడు. ఇటీవల, ఉత్తర కొరియాను లక్ష్యంగా చేసుకొని ప్రతి సంవత్సరం అమెరికా–దక్షిణ కొరియాలు సంయుక్తంగా నిర్వహించే సైనిక విన్యాసాలను పూర్తిగా కుదించి దాదాపుగా అపేశాడు. అణ్వస్త్ర సామర్థ్యం కల్గిన ఉత్తర కొరియా అధ్యక్షుడు కిమ్, ట్రంప్‌లాగా దూకుడు నిర్ణయాలు తీసుకోవటంలో సిద్ధహస్తుడు. బెదిరింపు–ప్రశంసట్రంప్‌ రెండవసారి గెలుపుతో వైట్‌హౌస్‌లోకి భారతదేశపు మిత్రుడు వచ్చాడనుకున్న ఆనందం భారత్‌కు ఎక్కువకాలం నిలవ లేదు. ట్యారిఫ్‌ వార్‌తో మొదలుపెట్టి, రష్యా నుండి చమురు కొను గోలు విషయంలో బెదిరింపులు, హెచ్‌1బీ వీసాలపై కఠిన ఆంక్షలు, ప్రస్తుతం మళ్లీ వంద శాతం సుంకాల వరకు భారత్‌ ఎడల ట్రంప్‌ వైఖరి ఒక మిత్రదేశపు వైఖరి ఎంతమాత్రమూ కాదు. రాజకీయంగా కూడా వ్యక్తిగతంగా ప్రధాని మోదీని ఇరుకున పెట్టే దిశలో పదేపదే తానే ఇండియా–పాకిస్తాన్‌ మధ్య యుద్ధాన్ని (ఆపరేషన్‌సిందూర్‌ను) ఆపానని ప్రకటించాడు.జాగ్రత్తగా పరిశీలిస్తే– ఒకవైపు బెదిరించి, భారత్‌ సహనాన్ని పరీక్షిస్తూనే, మరొకవైపు తాను అమెరికన్‌ ప్రయోజనాలను పరిరక్షి స్తున్నట్లు మోదీ నిబద్ధతతో భారత్‌ ప్రయోజనాలను పరిరక్షిస్తు న్నాడంటాడు. మోదీ తనకు మంచి మిత్రుడనీ, కఠినంగా బేర సారాలు ఆడే వ్యక్తి (టఫ్‌ నెగోషియేటర్‌) అనీ ప్రశంసిస్తాడు. ఓవైపు బెదిరిస్తూనే మరోవైపు ప్రశంసించటం ప్రత్యేక శైలి దౌత్యనీతి. వ్యక్తిగతంగా ట్రంప్‌ వ్యవహార శైలి విషయంలో సమస్యలు, భిన్నాభిప్రాయాలు ఉన్నప్పటికీ ప్రపంచంలో అత్యంత శక్తిమంత మైన దేశానికి ట్రంప్‌ అధ్యక్షుడనే విషయాన్ని అందరూ గుర్తించాలి. మనకిష్టమున్నా లేకున్నా ట్రంప్‌తో వ్యవహారం, దౌత్యం నెరపాల్సిందే. ప్రపంచంలో అతి పెద్ద ఆర్థిక వ్యవస్థ అయిన అమెరికా వాణిజ్యం మనకు లాభదాయకం. అమెరికాలో మనకు వాణిజ్య మిగులు ఉన్నది. 1.6 మిలియన్ల భారతీయులు యూఎస్‌ఏలో పని చేస్తున్నారు. సుమారు 3.7 లక్షల మంది అమెరికాలో చదువుకుంటు న్నారు. సమారు 1.5 మిలియన్ల భారత సంతతి ప్రజలు అమెరికన్‌ పౌరసత్వాన్ని పొంది అక్కడ నివసిస్తున్నారు. పొరుగున పాకిస్తాన్, చైనాలతో సరిహద్దు సమస్యలు, సీమాంతర ఉగ్రవాదం నేపథ్యంలో ప్రపంచ అగ్రరాజ్యమైన అమెరికాతో సత్సంబంధాలు కలిగిఉండటం అభిలషణీయం. మౌనం–ప్రయోజనంఅమెరికాపై ఆధారపడుతూ ట్రంప్‌ను నేరుగా ఎదుర్కోవటం కొరివితో తల గోక్కోవటమే. ఈ విషయంలో మార్క్‌ కార్నీ (కెనడా), నరేంద్ర మోదీ (భారత్‌) మంచి ఉదాహరణలుగా ఉన్నారు. భారత్, కెనడా రెండు దేశాలకు అమెరికాతో సత్సంబంధాలు కీలకం. కానీ రెండు దేశాలు ట్రంప్‌కు సాగిలపడి మోక రిల్లటానికి సిద్ధంగా లేవు. ఇతర దేశాధినేతలతో పోల్చితే కార్నీ, మోదీల పరిస్థితి అడకత్తెరలో పోకచెక్క. ఇరుదేశాధినేతలు చాలా సమయస్ఫూర్తితో, పరిణతితో ట్రంప్‌తో నెగ్గుకొస్తున్నారని చెప్పు కోవాలి. ట్రంప్‌ దుర్భాషలకు వీరు నేరుగా ఎప్పుడూ సమాధానం చెప్పరు. కానీ తమదైన శైలిలో తమ దేశాల ప్రయోజనాలను కాపాడే చర్యలు నిష్కర్షగా తీసుకొంటున్నారు. ట్రంప్, కెనడాను 51వ రాష్ట్రంగా అభివర్ణించాడు. ‘లేక్‌ ఒంటా రియో’ పేరును ‘లేక్‌ అమెరికా’గా మార్చుతూ ఉత్తర్వులు జారీ చేశాడు. ఈ విషయంలో కార్నీ నేరుగా ట్రంప్‌ను నిందించలేదు. ఎప్పటికీ ‘లేక్‌ ఒంటారియో’గానే ఉంటుందని ప్రకటించి ఆగి పోయాడు. కానీ ట్రంప్‌ వేసిన ట్యారిఫ్‌లకు ప్రతిగా కెనడా తన ప్రయోజనాలను రక్షించుకోవటానికి అన్ని చర్యలు తీసుకున్నది. ట్రంప్‌ భారత్‌ ఆర్థిక వ్యవస్థను ‘మృత ఆర్థిక వ్యవస్థ’గా అభి వర్ణించినా, ఆపరేషన్‌ సిందూర్‌ను ఆపేశానని పదే పదే ప్రకటించినా, ఉక్రెయిన్‌ యుద్ధాన్ని భారత్‌ పోషిస్తున్నదని నిందించినా, మోదీ ఏనాడూ వాదనలోనికి దిగలేదు. కానీ భారత్‌ ప్రయోజనాల రక్షణకు, ఆ దేశంతో వాణిజ్య ఒప్పందపు చర్చలలో కఠినంగా వ్యవహరిస్తున్నాము. అయితే, మొన్న విదేశాంగ మంత్రి జైశంకర్‌ ‘నా ప్రధాన ఆందోళనల్లో ఒకదాన్ని నా భాగస్వామి పూర్తిగా అర్థం చేసుకోకపోతే, దాని ప్రభావం సంబం«ధాలపై స్పష్టంగా ఉంటుంది’ అని గట్టిగానే మాట్లాడారు. కానీ దాన్ని ఇంకా మన విధానంగా భావించలేము. స్థూలంగా పరిశీలిస్తే భారత్, కెనడా, రష్యా, చైనాలు ట్రంప్‌ వ్యక్తిగత ప్రకటనలు, దూషణలకు, తిరస్కారాలకు ప్రతిస్పందించకుండా, చేతల విషయంలో తమ తమ దేశాల ప్రయోజనాలను కాపాడుకొంటూ ట్రంప్‌కు నిజమైన దౌత్య నీతిని బోధిస్తున్నాయి.-వ్యాసకర్త అడిషనల్‌ రిజిస్ట్రార్‌ (రిటైర్డ్‌); సివిల్స్, గ్రూప్‌–1 పోటీ పరీక్షల నిపుణులు-గురజాల శ్రీనివాసరావు

దుబాయ్‌ నుంచి టెల్‌ అవీవ్‌ వెళ్తున్న ఫ్లైదుబాయ్‌ విమానంలో జరిగిన ఘటనపై దర్యాప్తు కొనసాగుతున్న వేళ కొత్త విషయాలు వెలుగులోకి వస్తున్నాయి. కాక్‌పిట్‌లో జరిగిన దాడి వెనుక ఉద్దేశం ఏమిటి? విమానాన్ని కూల్చే ప్రయత్నమేనా? లేక మరేదైనా కారణమా? అన్న అంశాలపై అధికారులు ఆరా తీస్తున్నారు. ఈ ఘటనపై ఇజ్రాయెల్‌ ప్రధాని బెంజమిన్‌ నెతన్యాహూ చేసిన వ్యాఖ్యలు ఇప్పుడు చర్చకు దారితీశాయి.ఫాక్స్‌ న్యూస్‌కు ఇచ్చిన ఇంటర్వ్యూలో నెతన్యాహూ.. ఒమన్‌కు చెందిన కో-పైలట్‌ ఇస్లామిక్‌ తీవ్రవాద భావజాలానికి ప్రభావితుడై ఉండొచ్చని తెలిపారు. అతడి వ్యక్తిగత సమాచారంలో కొన్ని అంశాలు బయటపడ్డాయని, దర్యాప్తు కొనసాగుతోందని చెప్పారు. అదుపులోకి తీసుకున్న సమయంలో కో-పైలట్‌ “కిల్‌ మీ.. కిల్‌ మీ” అంటూ అరచినట్లు పేర్కొన్నారు. అతడు ఆత్మహత్యా ధోరణిలో ఉన్నట్లు కనిపించిందని, విమానాన్ని ప్రమాదంలోకి నెట్టే ఉద్దేశం ఉండి ఉండొచ్చని అనుమానం వ్యక్తం చేశారు.ఇటు అమెరికా అధ్యక్షుడు డొనాల్డ్‌ ట్రంప్‌.. ఫ్లైదుబాయ్‌ ఘటనను తీవ్రంగా పరిగణించారు. భారత పైలట్‌ స్మిట్‌ మచ్చార్‌పై దాడి చేసిన ఆ కోపైలట్‌కు ఇరాన్‌తో లింకులు ఉండొచ్చన్న అనుమానాలు వ్యక్తం చేశారు. దర్యాప్తు జరుగుతోందని.. అదే గనుక నిజమని తేలితే ఇరాన్‌పై భీకరదాడులు జరుపుతామని హెచ్చరించారు.కాక్‌పిట్‌లో రక్తపాతం..వీడియో బయటకుఫ్లైదుబాయ్‌ ఎఫ్‌జెడ్‌1073 విమానం దుబాయ్‌ నుంచి టెల్‌ అవీవ్‌కు వెళ్తుండగా ఈ ఘటన జరిగింది. విమానంలో 174 మంది ప్రయాణికులు, ఎనిమిది మంది సిబ్బంది ఉన్నారు. విమాన కాక్‌పిట్‌లో కో-పైలట్‌ భారతీయ కెప్టెన్‌ స్మిట్‌ మచ్చార్‌పై దాడి జరిగింది. ఈ సమయంలో విమానం ఒక్కసారిగా వేల అడుగుల ఎత్తు నుంచి కిందికి దిగడంతో ప్రయాణికుల్లో తీవ్ర భయాందోళనలు నెలకొన్నాయి.బయటకు వచ్చిన వీడియోల్లో విమానం లోపల గందరగోళ పరిస్థితులు కనిపించాయి. ప్రయాణికులు కాక్‌పిట్‌ వైపు పరుగులు తీస్తూ కనిపించారు. “అతడు విమానాన్ని కూల్చేందుకు ప్రయత్నించాడు” అంటూ కొందరు ప్రయాణికులు అరుస్తున్న దృశ్యాలు కూడా బయటకు వచ్చాయి.గాయాలతోనే తలుపు తెరిచి..దాడిలో తీవ్రంగా గాయపడిన కెప్టెన్‌ స్మిట్‌ మచ్చర్‌ రక్తస్రావంతో ఉన్నప్పటికీ కాక్‌పిట్‌ తలుపు తెరిచినట్లు ఆ దృశ్యాలు ఉన్నాయి. దీంతో ప్రయాణికులు లోపలికి వెళ్లి కో-పైలట్‌ను అదుపులోకి తీసుకున్నారు. “అతడు నన్ను చాలా సార్లు కొట్టాడు” అంటూ కెప్టెన్‌ చెప్పిన దృశ్యాలు వీడియోల్లో కనిపించినట్లు సమాచారం.ఈ సమయంలో కొందరు ప్రయాణికులు ధైర్యంగా ముందుకు వచ్చారు. ట్జ్వికా మానెస్‌, అసఫ్‌ రాజువాన్‌, యానివ్‌ హయూన్‌ వంటి ప్రయాణికులు కాక్‌పిట్‌లోకి వెళ్లి దాడి చేసిన వ్యక్తిని అదుపులోకి తీసుకోవడంలో సహకరించారు.ప్లంబర్‌, డెంటిస్ట్‌.. ప్రయాణికులే హీరోలుఈ ఘటనలో ప్రయాణికుల పాత్ర కీలకంగా మారింది. విమానంలో ఉన్న డెంటిస్ట్‌ షోటా ముసాయెవ్‌ గాయపడిన కెప్టెన్‌కు ప్రథమ చికిత్స అందించారు. అలాగే విమానంలో ఉన్న ఆఫ్‌-డ్యూటీ పైలట్లు పరిస్థితిని చక్కదిద్దడంలో సహకరించారు. ప్రయాణికుడు యానివ్‌ హయూన్‌.. విమాన ప్రమాదాలకు సంబంధించిన టీవీ షోలు చూసిన అనుభవం ఆ సమయంలో తనకు ఉపయోగపడిందని చెప్పినట్లు సమాచారం.కోలుకుంటున్న భారత పైలట్‌ఘటన తర్వాత సౌదీ అరేబియాలోని టబూక్‌ ఆస్పత్రిలో చికిత్స పొందిన కెప్టెన్‌ స్మిట్‌ మచ్చర్‌ను అనంతరం యూఏఈకి తరలించారు(ఎయిర్‌లిఫ్ట్‌). యూఏఈలో భారత రాయబారి దీపక్‌ మిట్టల్‌ ఆస్పత్రికి వెళ్లి కెప్టెన్‌, ఆయన కుటుంబ సభ్యులను కలిశారు. స్మిట్‌ ఆరోగ్యం నిలకడగా ఉందని, కుటుంబ సభ్యులతో మాట్లాడుతున్నారని తెలిపారు. “ధైర్యవంతుడైన భారత ముద్దుబిడ్డ” అంటూ స్మిట్‌ను ఆయన ప్రశంసించారు. మానవ ప్రాణాలను కాపాడటంలో ఆయన గొప్ప సేవ చేశారని పేర్కొన్నారు.కో-పైలట్‌ UAE అదుపులోకిఘటన తర్వాత సౌదీ అధికారులు కో-పైలట్‌ను అదుపులోకి తీసుకున్నారు. ప్రాథమిక విచారణ అనంతరం అతడిని యూఏఈ అధికారులకు అప్పగించారు. ఈ ఘటన ఉగ్రవాద సంబంధమా? ముందస్తు ప్రణాళిక ఉందా? కో-పైలట్‌ ఒక్కడే ఈ చర్యకు పాల్పడ్డాడా? అన్న అంశాలపై దర్యాప్తు జరుగుతోంది. ఈ దర్యాప్తులో ఇజ్రాయెల్‌ కూడా భాగం కావొచ్చని సమాచారం. ఘటనపై అనుమానాలు?ఈ ఘటన తర్వాత విమాన భద్రతా వ్యవస్థపై కూడా ప్రశ్నలు తలెత్తుతున్నాయి. ఒమన్‌, ఇజ్రాయెల్‌కు అధికారిక దౌత్య సంబంధాలు లేనప్పటికీ.. ఆ దేశానికి చెందిన వ్యక్తి ఇజ్రాయెల్‌ వెళ్లే విమానంలో విధులు నిర్వహించడం ఎలా సాధ్యమైందన్న చర్చ మొదలైంది. ఏమైనా లోపాలు జరిగాయా? అన్నది దర్యాప్తులో తేలాల్సి ఉంది.మరోవైపు.. అంతర్జాతీయ మీడియా సంస్థలు ఈ ఘటనపై అనుమానాలు వ్యక్తం చేస్తున్నాయి. ప్లంబర్‌ అయిన యానివ్‌ హయూన్‌ ఆ సమయంలో విమానం కంట్రోల్‌ చేశాడన్న కోణాన్ని ఏకిపారేస్తున్నాయి. హయూన్‌ నేరుగా ప్రధాని నెతన్యాహూను కలవడం, ఆ సమయంలో జరిగిందంతా డ్రామాగా అభివర్ణిస్తూ కథనాలు ఇస్తున్నాయి. ఇటు ఒమన్‌కు చెందిన వ్యక్తికి.. ఇజ్రాయెల్‌కు విమానం నడిపే అవకాశం ఎలా దక్కింది? అని మాజీ పైలట్లు ప్రశ్నిస్తున్నారు. ఇంకోవైపు ఎన్నికల్లో లబ్ధి కోసమే నెతన్యాహూ ఈ డ్రామాలు ఆడుతున్నారేమో అని ఇజ్రాయెల్‌ ప్రతిపక్షాలు అనుమానాలు వ్యక్తం చేస్తున్నాయి. ఇదీ చదవండి: ఎలక్షన్‌ దాకా ఆగడం ఎందుకు? బాంబులేస్తే పోలా!

పశ్చిమాసియాను మరోసారి యుద్ధ మేఘాలు కమ్ముకుంటున్నాయా? ఇరాన్‌పై అమెరికా మళ్లీ సైనిక చర్యకు సిద్ధమవుతోందా? తాజా పరిణామాలు ఈ అనుమానాలకు బలం చేకూరుస్తున్నాయి. కొత్త దాడులకు అవకాశం కచ్చితంగా ఉందని ట్రంప్‌ చెప్పడం.. పైగా గల్ఫ్‌ ప్రాంతానికి భారీగా సైనిక బలగాలను తరలించడం ఇప్పుడు చర్చనీయాంశంగా మారింది. బలగాలే గనుక చేరుకుంటే మిడిల్‌ఈస్ట్‌లో అమెరికా సైనిక ఉనికి గతంలో ఎన్నడూలేని స్థాయికి చేరే అవకాశం కనిపిస్తోంది.దాదాపు 9 వేల మంది సైనికులు, మెరైన్లను యుద్ధ నౌకల సమూహంతో కలిసి మిడిల్‌ఈస్ట్‌కు తరలిస్తున్నట్లు అమెరికా అధికారులు వెల్లడించారు. ఈ బలగాల తరలింపు సాధారణ మోహరింపు కాదని, ఇరాన్‌ చుట్టూ పెరుగుతున్న ఉద్రిక్తతల నేపథ్యంలో అమెరికా వ్యూహాత్మకంగా తన సైనిక సామర్థ్యాన్ని పెంచుతోందన్న సంకేతాలు కనిపిస్తున్నాయి. ఇప్పటికే గల్ఫ్‌ ప్రాంతంలో ఉన్న అమెరికా బలగాలకు అదనంగా ఈ కొత్త దళాలు చేరితే.. మధ్యప్రాచ్యంలో అమెరికా నావికాదళ ఉనికి మరింత బలపడనుంది. మొత్తం మీద 20 వేల మందికి పైగా సైనికులు, వందలాది యుద్ధ విమానాలు, అత్యాధునిక ఆయుధ వ్యవస్థలతో అమెరికా సైనిక శక్తి ఈ ప్రాంతంలో అత్యున్నత స్థాయికి చేరే అవకాశం ఉందని అధికారులు అంచనా వేస్తున్నారు.ఇంధన సరఫరాకు కీలకమైన హార్ముజ్‌ జలసంధి, ఇరాన్‌ అణు కార్యక్రమం, ఇటీవలి ప్రాంతీయ దాడుల నేపథ్యంలో ఈ మోహరింపు ప్రాధాన్యం సంతరించుకుంది. ఒకవైపు చర్చలకు తాము సిద్ధమంటూ ఇరాన్‌ సంకేతాలు ఇస్తుండగా.. మరోవైపు అమెరికా సైనిక బలగాలను పెంచడం పశ్చిమాసియాలో తదుపరి పరిణామాలపై ఉత్కంఠను పెంచుతోంది.మూడు విమాన వాహక నౌకలతో సిద్ధంఅమెరికా నౌకాదళానికి చెందిన యూఎస్‌ఎస్‌ థియోడోర్‌ రూజ్‌వెల్ట్‌ క్యారియర్‌ స్ట్రైక్‌ గ్రూప్‌, యూఎస్‌ఎస్‌ మాకిన్‌ ఐలాండ్‌ యాంఫిబియస్‌ రెడీనెస్‌ గ్రూప్‌ పశ్చిమాసియా వైపు కదులుతున్నాయి. వీటిలో వేలాది మంది నావికులు, మెరైన్లు ఉన్నారు. ప్రస్తుత ఏర్పాట్ల ప్రకారం అక్టోబర్‌ చివరి నాటికి ఈ ప్రాంతంలో మూడు ఎయిర్‌క్రాఫ్ట్‌ క్యారియర్లు ఉండే అవకాశం ఉందని అమెరికా అధికారి ఒకరు తెలిపారు. యూఎస్‌ఎస్‌ జార్జ్‌ హెచ్‌డబ్ల్యూ బుష్‌, యూఎస్‌ఎస్‌ జార్జ్‌ వాషింగ్టన్‌ క్యారియర్లు ఇప్పటికే ఆ ప్రాంతంలో ఉన్నాయి. 2003 తర్వాత.. తొలిసారిగా ఒకేసారి మూడు క్యారియర్‌ స్ట్రైక్‌ గ్రూపులు ఆ రీజియన్‌లో ఉండే పరిస్థితి ఏర్పడనుందని అధికారులు చెబుతున్నారు.ఇరాన్‌పై ట్రంప్‌ హెచ్చరికలుఇరాన్‌తో ఉద్రిక్తతల నేపథ్యంలో ట్రంప్‌ కీలక వ్యాఖ్యలు చేశారు. ఇజ్రాయెల్‌కు వెళ్తున్న విమానాన్ని కూల్చేందుకు ప్రయత్నించిన ఘటనలో కో–పైలట్‌కు ఇరాన్‌తో సంబంధాలు ఉన్నట్లు ప్రాథమిక సమాచారం ఉందని ట్రంప్‌ పేర్కొన్నారు. "ఇరాన్‌తో సంబంధం ఉన్నట్లు తేలితే తీవ్ర పరిణామాలు ఉంటాయి" అంటూ ట్రంప్‌ హెచ్చరించారు. ‘‘వారిపై చాలా తీవ్రంగా దాడి జరుగుతుంది’’ అని వ్యాఖ్యానించారు.ఎన్నికల వరకు ఆగుతారా?నవంబర్‌ 3న జరగనున్న అమెరికా ఎన్నికల తర్వాత ఇరాన్‌పై బాంబు దాడులను పెంచే అవకాశం ఉందా అన్న ప్రశ్నకు ట్రంప్‌ ‘‘అది సాధ్యమే’’ అని సమాధానం ఇచ్చారు. ఇరాన్‌ ప్రతిపాదించిన తాజా కాల్పుల విరమణ ప్రతిపాదనను తిరస్కరించినట్లు ట్రంప్‌ తెలిపారు. హార్ముజ్‌ జలసంధిని తెరవాలన్న ప్రతిపాదన ఉన్నప్పటికీ.. మొత్తం ఒప్పందం తనకు ఆమోదయోగ్యంగా లేదని పేర్కొన్నారు. అయితే తాజాగా మధ్యప్రాచ్యంలో భారీగా సైనిక బలగాలను మోహరించడం చూస్తుంటే.. ఎన్నికల వరకు అమెరికా వేచి చూస్తుందా? లేక అంతకుముందే సైనిక చర్యకు దిగుతుందా? అనే చర్చ మొదలైంది.హార్ముజ్‌లో ట్యాంకర్‌పై దాడిఇదిలా ఉండగా, ప్రపంచ ఇంధన సరఫరాకు కీలకమైన హార్ముజ్‌ జలసంధిలో 25 లక్షల బ్యారెళ్ల చమురు తీసుకెళ్తున్న సూపర్‌ ట్యాంకర్‌పై గుర్తుతెలియని ఆయుధంతో దాడి జరిగింది. ఘటనలో నౌకలో మంటలు చెలరేగినట్లు యూకే మారిటైమ్‌ ట్రేడ్‌ ఆపరేషన్స్‌ తెలిపింది. ఈ ఘటనతో గల్ఫ్‌ ప్రాంతంలో భద్రతా ఆందోళనలు మరింత పెరిగాయి.ఇరాన్‌ మరోలా..మరోవైపు ఇరాన్‌ అమెరికాతో చర్చలకు తాము ఎప్పుడూ దూరంగా లేమని అధ్యక్షుడు మసూద్‌ పెజెష్కియాన్‌ తెలిపారు. చర్చల సమయంలోనే తమపై మూడుసార్లు దాడులు జరిగాయని ఆరోపించారు. ఇరాన్‌ రెవల్యూషనరీ గార్డ్‌ (IRGC) సీనియర్‌ సలహాదారు బ్రిగేడియర్‌ జనరల్‌ మొహమ్మద్‌ రెజా నక్దీ మాత్రం అమెరికా ప్రభావం ఈ ప్రాంతంలో తగ్గుతోందని వ్యాఖ్యానించారు. ఇరాక్‌ నుంచి అమెరికా బలగాల ఉపసంహరణ దీనికి ఉదాహరణ అని పేర్కొన్నారు.అమెరికా భారీ సైనిక మోహరింపు, ట్రంప్‌ దూకుడు వ్యాఖ్యలు, హార్ముజ్‌ పరిణామాలు.. మొత్తం మీద మధ్యప్రాచ్యంలో ఉద్రిక్తతలను మరింత పెంచుతున్నాయి. అనూహ్యంగా మధ్యవర్తులు ఎంట్రీ ఇచ్చి ఇరాన్‌–అమెరికా మధ్య మళ్లీ చర్చలను తెరపైకి తెస్తారా? లేదంటే మరోసారి సైనిక ఘర్షణ దిశగా పరిస్థితులు వెళ్తాయా అన్నది ఇప్పుడు ప్రపంచ దేశాల దృష్టిని ఆకర్షిస్తోంది.ఇదీ చదవండి: ఫ్లైదుబాయ్‌ ఘటన.. అంతుచిక్కని ప్రశ్నలివే!

వాషింగ్టన్‌: మధ్యంతర ఎన్నికలు సమీపిస్తున్న వేళ అమెరికాలో అధ్యక్షుడు ట్రంప్‌నకు ఎదురు గాలులు వీస్తున్నాయి. పెట్రోలు, డీజిళ్లతోపాటు నిత్యావసరాల ధరలు కూడా పైపైకి ఎగబాకుతూండటతో ట్రంప్‌ విధానాలపై ప్రజల్లో అసంతృప్తి ఎక్కువవుతోంది. అంతర్జాతీయ వార్తా సంస్థ అసోసియేటెడ్‌ ప్రెస్, షికాగో యూనివర్శిటీ పరిశోధన కేంద్రం ‘నేషనల్‌ ఒపీనియన్‌ రీసెర్చ్‌ సెంటర్లు’సంయుక్తంగా (ఏపీ–ఎన్‌ఓఆర్‌సీ)నిర్వహించిన తాజా సర్వేలోనూ ఈ విషయం స్పష్టమైంది. ధరల పెరుగుదలకు ట్రంప్‌ విధానాలే కారణమని అత్యధికులు భావిస్తున్నారు. దీంతో ఈ అసంతృప్తి ప్రభావం కాస్తా వచ్చే నెలలో జరిగే మధ్యంతర ఎన్నికలపై పడనుందని అధికార రిపబ్లికన్‌ పార్టీ నేతలు ఆందోళన వ్యక్తం చేస్తున్నారు. ఆర్థిక విధానాలపై ట్రంప్‌ అప్రూవల్‌ రేటింగ్‌ గత ఏడాది మార్చితో పోలిస్తే ఏకంగా 14 శాతం వరకూ తగ్గిపోయినట్లు ఈ సర్వే తెలిపింది. కాస్ట్‌ ఆఫ్‌ లివింగ్‌ విషయానికి వస్తే దాదాపు 60 శాతం రిపబ్లికన్లే ట్రంప్‌ తీరుపై మండిపడుతున్నట్లు తెలుస్తోంది. ధరల పెరుగుదల విషయానికి వస్తే ఏపీ–ఎన్‌ఓఆర్‌సీ సర్వే ప్రకారం 65 శాతం అమెరికన్లకు ట్రంప్‌ వైఖరి ఏమాత్రం నచ్చడం లేదు. జీవన వ్యయం విషయంలో ట్రంప్‌ విధానాలు ఓకే అంటున్న వారు.. 17 శాతం మంది ఉండగా.. స్థూలంగా ఆర్థిక విధానాలు ఫర్వాలేదన్న వాళ్లు 26 శాతం మంది మాత్రమే. టారిఫ్‌ల విషయంలో ట్రంప్‌ దూకుడు, ఇరాన్‌తో యుద్ధం కొనసాగుతూండటంపై ప్రజలు అసంతృప్తి వ్యక్తం చేస్తున్నారు. ట్రంప్‌ రెండోసారి అమెరికా అధ్యక్షుడైన తరువాత ఇవి అత్యంత కనిష్టమైన రేటింగ్స్‌ కావడం గమనార్హం. ఈ నేపథ్యంలో వచ్చే నెలలో జరగనున్న మధ్యంతర ఎన్నికలు కీలకం కానున్నాయి. కాంగ్రెస్‌పై రిపబ్లికన్ల పట్టు కొనసాగుతుందా? లేదా అన్నది ఈ ఎన్నికలతో తేలనుంది. మరోవైపు ట్రంప్‌ తన ఎన్నికల ప్రచారాన్ని కూడా దూకుడుగానే మొదలుపెట్టారు. పోలింగ్‌ శాతాన్ని పెంచేందుకు తానే పోటీలో ఉన్నానని అనుకోండని పిలుపునిచ్చారు కూడా. అయితే ఈ ఎత్తుగడ అంత మంచి ఫలితాలిచ్చే అవకాశాలు లేవని, రిపబ్లికన్లలోనే ట్రంప్‌ తీరు, పాలనలపై తీవ్ర అభ్యంతరాలు వ్యక్తమవుతున్నాయని ఈ సర్వే ద్వారా తెలిసింది. ‘‘మా అధ్యక్షుడు దేశానికి సాయం చేస్తాడని అనుకున్నాం. ఇప్పటివరకైతే ఆర్థిక విషయాల్లో కానీ.. ఇతరాల్లో కానీ ఆయన చేసిందేమీ లేదు. మేక్‌ అమెరికా గ్రేట్‌ ఎగెయిన్‌ అన్నాడు కానీ.. ఆ దిశగా జరిగిన ప్రయత్నాలేవీ లేవు’’అని రాబర్ట్‌ గాల్ట్‌ అనే 66 ఏళ్ల పెన్సెల్వేనియా వ్యక్తి చేసిన వ్యాఖ్య పరిస్థితికి అద్దం పడుతోంది. ట్రంప్‌ దృష్టి ఎక్కడో ఉంది... ఇరాన్‌తో యుద్ధం విషయంలో 69 శాతం అమెరికన్లు ట్రంప్‌పై గుర్రుగా ఉంటే దాదాపు 28% మంది మాత్రమే ఒకే అంటున్నారు. వివిధ దేశాలతో వాణిజ్య, టారిఫ్‌లు విధించడంలో ట్రంప్‌ ‘‘మితిమీరి’’వ్యవహరిస్తున్నారని 64% మంది భావిస్తున్నారు. ఈ ఏడాది జనవరిలో 58 శాతం మంది మాత్రమే ఈ రకమైన అభిప్రాయం కలిగి ఉండేవారు. ఆసక్తికరంగా సుమారు 67 శాతం మంది రిపబ్లికన్లు అధిక ధరలకు ట్రంప్‌ చేతుల్లో లేని విషయాలే కారణమని వ్యాఖ్యానిస్తున్నారు. ద్రవ్యోల్బణాన్ని కట్టడి చేయడం చాలా కష్టం అని విస్‌కాన్సిన్‌కు చెందిన ట్రంప్‌ మద్దతుదారు ఫ్రెడ్‌ న్యూమన్‌ (51) అభిప్రాయపడ్డారు. ట్రంప్‌ టారిఫ్‌ విధానాలు, ఇరాన్‌తో యుద్ధం కూడా అవసరమైనవేనని అంటున్నారు. నిత్యావసరాల ధరలు పైపైకి... అమెరికాలో కొన్ని నెలలుగా నిత్యావసరాల ధరలు అంతకంతకూ పెరిగిపోతున్నాయి. నెలవారీ వెచ్చాలు, పెట్రోలు, డీజిళ్ల ధరలపై సగం మంది అమెరికన్లు ఆందోళన చెందుతున్నట్లు తెలుస్తోంది. రెండు నెలల క్రితం ఈ సంఖ్య 39 శాతంగా ఉండేది. అన్ని వస్తువుల ధరలూ పెరిగిపోవడంతో డబ్బులు ఏమాత్రం మిగలడం లేదని, గతంలో పరిస్థితి ఇలా ఉండేది కాదని, కాలిఫోర్నియాకు చెందిన పెడ్రో శాంచెజ్‌ వ్యాఖ్యానించారు. అయోవాలోని ఫెయిర్‌ఫ్యాక్స్‌కు చెందిన బెథనీ లెనికా (41) మాట్లాడుతూ....‘‘ఈ వారం ఒకలా (ధరలు) ఉంటే మరుసటి వారం ఇంకోలా ఉంటున్నాయి. ఖర్చులకు తగ్గట్టు ఆదాయం ఎలాగూ పెరగదు’’అని అన్నారు. రిపబ్లికన్‌ పార్టీ వైపే మొగ్గు చూపే లెనికా ‘‘పరిస్థితులు మారినట్టు కనిపించడం లేదు’’అని వ్యాఖ్యానించడం గమనార్హం.

దుబాయ్‌ నుంచి ఇజ్రాయెల్‌కు వెళ్తున్న ఫ్లైదుబాయ్‌ ప్రయాణికుల విమానంలో చోటుచేసుకున్న దాడి వెనుక ఇరాన్‌ ప్రమేయం ఉండొచ్చని అమెరికా అధ్యక్షుడు డొనాల్డ్‌ ట్రంప్‌ అనుమానం వ్యక్తం చేశారు. ఈ ఘటనపై దర్యాప్తు కొనసాగుతోందని, ప్రాథమికంగా తనకు అందిన సమాచారం ప్రకారం ఇరాన్‌తో సంబంధం ఉండే అవకాశాలున్నాయని గురువారం వైట్‌హౌస్‌లో విలేకరులకు తెలిపారు.ఇరాన్‌ ప్రమేయం ఉంటే తీవ్ర పరిణామాలుఈ ఘటన వెనుక ఇరాన్‌ ఉన్నట్లు దర్యాప్తులో తేలితే అమెరికా ఎలాంటి చర్యలు తీసుకుంటుందన్న ప్రశ్నకు ట్రంప్‌ స్పందిస్తూ.. ఇరాన్‌పై తీవ్రంగా దాడి చేస్తామని హెచ్చరించారు.సెప్టెంబర్‌ 30న దుబాయ్‌ నుంచి టెల్‌ అవీవ్‌కు వెళ్తున్న ఫ్లైదుబాయ్‌ విమానం ఎఫ్‌జెడ్‌1073లో ఈ ఘటన చోటుచేసుకుంది. విమానం ఇజ్రాయెల్‌ వైపు ప్రయాణిస్తున్న సమయంలో కోపైలట్‌ కెప్టెన్‌పై కత్తితో దాడి చేసి, విమానాన్ని అదుపులోకి తీసుకుని కూల్చేందుకు ప్రయత్నించినట్లు ఇజ్రాయెల్‌ అధికారులు తెలిపారు. దాడిలో గాయపడిన భారతీయ కెప్టెన్‌ స్మిత్‌ మచ్చర్‌ ప్రతిఘటించి కాక్‌పిట్‌ తలుపు తెరవడంతో ప్రయాణికులు, సిబ్బంది జోక్యం చేసుకుని నిందితుడిని అదుపులోకి తీసుకున్నారు.విమానం తీవ్రంగా కిందకు దిగడంతో పరిస్థితి ప్రమాదకరంగా మారింది. అనంతరం ప్రత్యామ్నాయ సిబ్బంది విమానాన్ని సౌదీ అరేబియాలోని టబుక్‌ విమానాశ్రయంలో అత్యవసరంగా దించారు. విమానంలో ఉన్న ప్రయాణికులంతా సురక్షితంగా బయటపడగా, గాయపడిన పైలట్లకు చికిత్స అందించారు.దర్యాప్తులో అసలు కారణాలపై ఆరాఈ ఘటనకు సంబంధించి నిందితుడి నేపథ్యం, దాడికి దారితీసిన పరిస్థితులు, ఉగ్రవాద సంస్థలతో సంబంధాలున్నాయా అనే అంశాలపై అధికారులు దర్యాప్తు చేస్తున్నారు. ఇజ్రాయెల్‌ ప్రధాని బెంజమిన్‌ నెతన్యాహు కోపైలట్‌ తీవ్రవాద భావజాల ప్రభావానికి లోనై ఉండొచ్చని వ్యాఖ్యానించినప్పటికీ, దాడి వెనుక అసలు ఉద్దేశం ఇంకా స్పష్టంగా తెలియలేదు.

విమానం గాల్లో ఉంది.. ఒక్కసారిగా కాక్‌పిట్‌లో కలకలం. కో-పైలట్‌ కత్తితో కెప్టెన్‌పై దాడి చేశాడు. తీవ్రంగా గాయపడినప్పటికీ ఆ భారత పైలట్‌ వెనక్కి తగ్గలేదు. కాక్‌పిట్‌ తలుపు తెరిచి బయటకు వచ్చి సంకేతం ఇచ్చాడు. ప్రయాణికులు, ఇతర సిబ్బంది వెంటనే స్పందించడంతో పెను విమాన ప్రమాదం తప్పింది. ఈ ఘటనలో ధైర్యసాహసాలు ప్రదర్శించిన భారత పైలట్‌ స్మిట్‌మచ్చర్‌పై అమెరికా అధ్యక్షుడు డొనాల్డ్‌ ట్రంప్‌, ఇజ్రాయెల్‌ ప్రధాని బెంజమిన్‌ నెతన్యాహు ప్రశంసలు కురిపించారు.ఫ్లైదుబాయ్‌ విమానం FZ1073లో జరిగిన ఘటనపై ఇజ్రాయెల్‌ ప్రధాని బెంజమిన్‌ నెతన్యాహు స్పందించారు. ‘‘భారత పైలట్‌ కెప్టెన్‌ స్మిట్‌ మచ్చర్‌ అసాధారణ ధైర్యానికి నా సెల్యూట్‌’’ అని ఎక్స్‌లో పోస్టు చేశారు. కత్తిపోట్లతో తీవ్రంగా గాయపడినప్పటికీ మచ్చర్‌ ప్రతిఘటించి కాక్‌పిట్‌ తలుపు తెరిచారని తెలిపారు. దీంతో ప్రయాణికులు, సిబ్బంది లోపలికి వెళ్లి దాడి చేసిన వ్యక్తిని అదుపులోకి తీసుకోగలిగారని పేర్కొన్నారు. ఈ చర్య పెను విమాన ప్రమాదాన్ని నివారించిందని, ఆయన త్వరగా కోలుకోవాలని ఆకాంక్షించారు.ఇటు అమెరికా అధ్యక్షుడు డొనాల్డ్‌ ట్రంప్‌ కూడా స్మిట్‌ మచ్చర్‌ను ‘హీరో’గా అభివర్ణించారు. ఇజ్రాయెల్‌ ప్రధాని నెతన్యాహు తనకు చెప్పిన వివరాలను మీడియాతో పంచుకున్న ట్రంప్‌.. తీవ్రంగా గాయపడినప్పటికీ పైలట్‌ చేసిన చర్యను అద్భుతమైనదిగా పేర్కొన్నారు.30 సెకన్లలో 14 వేల అడుగులు కిందకు!భారత కాలమానం ప్రకారం.. బుధవారం ఉదయం దుబాయ్‌-టెల్‌అవీవ్‌ మధ్య ప్రయాణిస్తున్న బోయింగ్‌ 737 MAX 8 విమానం పైలట్‌, కో-పైలట్‌ మధ్య కాక్‌పిట్‌లో ఘర్షణతో ఒక్కసారిగా ఉద్రిక్తంగా మారింది. ఈ క్రమంలో కో-పైలట్‌ కెప్టెన్‌ మచ్చర్‌పై కత్తితో దాడి చేసినట్లు సమాచారం. అనంతరం విమానం ఒక్కసారిగా ఎత్తు కోల్పోయింది. ఫ్లైట్‌ ట్రాకింగ్‌ డేటా ప్రకారం కేవలం 30 సెకన్లలో దాదాపు 14 వేల అడుగుల మేర కిందికి పడిపోయింది.విమానంలోని ప్రయాణికులకు పరిస్థితి అర్థమయ్యేలోపే కాక్‌పిట్‌ నుంచి అరుపులు వినిపించాయి. ఇదే సమయంలో గాయపడిన కెప్టెన్‌ మచ్చర్‌ కాక్‌పిట్‌ తలుపు తెరిచారు. దీంతో ప్రయాణికులు, సిబ్బంది లోపలికి వెళ్లే అవకాశం ఏర్పడింది.‘‘విమానాన్ని కూల్చేందుకు ప్రయత్నించాడు’’ఈ దాడికి సంబంధించి సంచలన ఆరోపణలు వినిపిస్తున్నాయి. కో-పైలట్‌ విమానం వ్యవస్థలను ధ్వంసం చేసేందుకు ప్రయత్నించినట్లు ఆరోపణలు ఉన్నాయి. ప్రయాణికుడు యానివ్‌ తెలిపిన వివరాల ప్రకారం.. మచ్చర్‌ కాక్‌పిట్‌ తలుపు తెరిచి కుప్పకూలిన తర్వాత ప్రయాణికులు లోపలికి వెళ్లి దాడి చేసిన వ్యక్తిని అదుపులోకి తీసుకున్నారు. అనంతరం విమానంలో ఉన్న మరో సెట్‌ పైలట్లు కాక్‌పిట్‌లోకి చేరుకుని విమానాన్ని కంట్రోల్‌ చేయగలిగారు. అటు నుంచి సౌదీ అరేబియాలోని టబుక్‌కు మళ్లించారు. అక్కడ విమానం సురక్షితంగా ల్యాండ్‌ అయింది.ఎవరీ స్మిట్‌మచ్చర్‌?స్మిట్‌ మచ్చర్‌ భారత పౌరుడు. బోయింగ్‌ 737 విమానాలపై ఆయనకు 13 ఏళ్లకు పైగా వాణిజ్య విమానయాన అనుభవం ఉంది. సుమారు 9,750 గంటల ఫ్లయింగ్‌ అనుభవం ఉన్నట్లు ఆయన లింక్డ్‌ఇన్‌ ప్రొఫైల్‌ ఆధారంగా వివరాలు వెల్లడయ్యాయి. 2011లో స్పైస్‌జెట్‌లో చేరిన మచ్చర్‌.. అక్కడ లైన్‌ ట్రైనింగ్‌ కెప్టెన్‌, సీనియర్‌ కమాండర్‌గా పనిచేశారు. 2022 జూన్‌లో స్పైస్‌జెట్‌ను వీడి ఫ్లై దుబాయ్‌లో డైరెక్ట్‌ ఎంట్రీ కెప్టెన్‌గా చేరారు. ఆయన సోదరుడు కూడా ఇటీవల ఫ్లై దుబాయ్‌లో చేరినట్లు సమాచారం.ఆసుపత్రిలో చికిత్స.. పరిస్థితి నిలకడగాకాక్‌పిట్‌ ఘటనలో తీవ్రంగా గాయపడిన మచ్చర్‌ను సౌదీ అరేబియాలోని టబుక్‌ ఆసుపత్రికి తరలించారు. ఆయనకు చికిత్స కొనసాగుతోంది. భారత రాయబార కార్యాలయం, జెడ్డాలోని కాన్సులేట్‌ ఆయన ఆరోగ్య పరిస్థితిని పర్యవేక్షిస్తున్నాయి. ప్రస్తుతం ఆయన పరిస్థితి నిలకడగా ఉన్నట్లు సమాచారం. కుటుంబ సభ్యులతోనూ అధికారులు సంప్రదింపులు జరుపుతున్నారు.‘‘180 మంది ప్రాణాలు కాపాడారు’’ఇజ్రాయెల్‌ అంబాసిడర్‌ రూవెన్‌ అజార్‌ కూడా మచ్చర్‌ను ప్రశంసించారు. అనుభవజ్ఞుడైన, ప్రతిభావంతుడైన భారత పైలట్‌గా అభివర్ణించారు. మచ్చర్‌తో పాటు ప్రయాణికులు, సిబ్బంది చూపిన ధైర్యం 180 మంది ప్రాణాలను కాపాడిందని పేర్కొన్నారు.విమానం టబుక్‌లో సురక్షితంగా దిగిన తర్వాత ప్రయాణికులు సుమారు ఎనిమిది గంటలు సౌదీ అరేబియాలో ఉన్నారు. అనంతరం ప్రత్యామ్నాయ ఫ్లై దుబాయ్‌ విమానంలో ఇజ్రాయెల్‌కు బయలుదేరారు. కత్తిపోట్లతో తీవ్రంగా గాయపడినా.. విమానాన్ని కాపాడేందుకు చివరి వరకు పోరాడిన భారత పైలట్‌ స్మిట్‌మచ్చర్‌ ఇప్పుడు అంతర్జాతీయంగా ప్రశంసలు అందుకుంటున్నారు.ఇదీ చదవండి: యూఏఈలో వాహనదారులకు షాక్‌

సంక్షోభ కాలంలో తటస్థంగా ఉండటం, మర్యాదలు పాటిస్తూ మంచితనం ఒలకబోయటం కుదరదు. అది అవతలిపక్షానికే లబ్ధి చేకూరుస్తుంది. అమెరికా తీరుపై దౌత్య మార్గాల్లో మన దేశం లోగడ అసంతృప్తి తెలిపిందా అన్నది తెలియదుగానీ... తాజాగా విదేశాంగ మంత్రి జైశంకర్‌ నిర్మొహమాటంగా మాట్లాడారు. న్యూయార్క్‌లో సోమవారం జరిగిన ఆసియా సొసైటీ పాలసీ ఇనిస్టిట్యూట్‌(ఏఎస్‌పీఐ) సదస్సులో మన వైఖరేమిటో తెలిపారు. అమెరికా అధ్యక్షుడు డోనాల్డ్‌ ట్రంప్‌ రెండోసారి ఏలుబడిలో కొచ్చాక మనతో తేడాగా ప్రవర్తిస్తున్నారు. భారత్‌వంటి అతి పెద్ద మార్కెట్‌ కావాలి. తన ఉత్పత్తులు నచ్చిన ధరకు విక్రయించుకోవాలి. లాభాలు గడించాలి. అదే సమయంలో పాకిస్తాన్‌తో అంటకాగుతూ, ఆకాశానికెత్తుతారు. దాన్ని బుజ్జగిస్తారు. రోగికి పత్యం రుచించనట్టు మనం చెప్పేది ఆయనకు నచ్చదు. నిజానికి ఇది ట్రంప్‌కు మాత్రమే పరిమితమైన వింత కాదు. ఆయన ముందున్న పాలకులు... వారే పార్టీ వారైనా ఇలాగే ప్రవర్తించారు. కాకపోతే దౌత్య మర్యాదలు పెద్దగా తెలియని, ఖాతరుచేయని మనిషి గనుక ట్రంప్‌ బాహాటంగా ప్రవర్తిస్తున్నారు. అందుకు కారణం లేకపోలేదు. ప్రచ్ఛన్న యుద్ధకాలంలో అప్పటి ప్రధాని ఇందిరాగాంధీ నాయకత్వంలోని భారత్‌... తనతో కాక నాటి సోవియెట్‌ యూనియన్‌తో సన్నిహితంగా మెలగటం అమెరికాకు కంటగింపైంది. అందుకు విరుగుడుగా పాకిస్తాన్‌ను చేరదీసింది. భారత్, పాక్‌మధ్య జరిగిన నాలుగు ప్రధాన యుద్ధాల్లోనూ, ఘర్షణల్లోనూ దాని పరోక్ష హస్తం ఉంది. నిజమైన మిత్రదేశంతో ఎలా మెలగాలో అమెరికాకు ఏనాడూ తెలియదు.ఉగ్రవాదంలో పాకిస్తాన్‌ పాత్రపై స్పష్టమైన సమాచారం ఉన్నా కంటితుడుపు చర్యగా దానికి విడుదల చేయాల్సిన నిధుల్ని ఆపినట్టు నటించటం, కొన్నాళ్లకే ఏదో ఒక సాకుతో విడుదల చేయటం దశాబ్దాలుగా రివాజైంది. ఆయుధ సామగ్రి విషయంలోనూ అంతే. ఉగ్రవాద చేష్టలతో ఆర్థికవ్యవస్థ సర్వనాశనమై దివాళా స్థితిలో పడిన పాకిస్తాన్‌ను ఆర్థికంగా ఆదుకోవాల్సిందే. కానీ అందుకు షరతులుండాలి. ఆ నిధుల్ని ఉగ్రవాదానికి ఊతమందించటానికి మళ్లించకూడదు. ఇందువల్ల మనకొస్తున్న ఇబ్బందులేమిటో అమెరికాకు పట్టదు. అలాగే వాణిజ్య ఒప్పందం పేరిట తాను విధించే షరతులు స్థానిక వ్యాపార, పారిశ్రామిక రంగాలకు చేకూర్చగల నష్టం దానికి లెక్కలేదు. ఈ విషయంలో భారత్‌ అభ్యంతరాలు ఆయన బేఖాతరు చేస్తారు. అంతా తన నిర్దేశానుసారం అమలు కావాల్సిందేనన్నది ట్రంప్‌ పట్టుదల. వాణిజ్య ఒప్పందం ఖరారైపోయిందంటూ పలుమార్లు ఆయన ఏకపక్షంగా ప్రకటించారు. మొన్న ఫిబ్రవరిలో సైతం ఇక సంతకాలే తరవాయి అన్నారు. కానీ భారత్‌నుంచి స్పందన లేకపోవటంతో అదనపు సుంకాలు విధించారు. ఈ బాపతు సుంకాలకు కోర్టులో చుక్కెదురైంది. కానీ అధిక సుంకాల పాటపాడుతూ బెదిరించడం మానుకోలేదు. మరోపక్క ఉగ్రవాదంవల్ల భారత్‌ నష్టపోతున్న వైనం తెలిసినా పాక్‌ను కట్టడి చేయరు. మనపట్ల సహానుభూతి చూపటం ధర్మమనుకోరు.భారత్‌–పాక్‌ల వైరం సంగతలా వుంచి ప్రపంచం ఇంతటి సంక్లిష్ట స్థితికి చేరుకోవటంలో అమెరికా పాత్ర ఎవరికీ తెలియంది కాదు. ఇరాన్‌పై అమెరికా దుందుడుకు చర్యలవల్ల హార్మూజ్‌ జలసంధిలో రవాణా నిలిచిపోయింది. ఉక్రెయిన్‌ను యూరప్‌ దేశాలద్వారా రెచ్చగొట్టి రష్యాను యుద్ధంలోకి నెట్టింది కూడా అమెరికాయే. ఈ రెండు పరిణామాల కారణంగా అంతర్జాతీయ వాణిజ్యం దెబ్బతింది. ముడి చమురు, ఎరువులు, ఆహార ధాన్యాల రవాణా నిలిచిపోయి ప్రపంచ దేశాలన్నీ సంక్షోభంలో పడ్డాయి. చాలా దేశాల ఆర్థికవ్యవస్థలు తీవ్రంగా దెబ్బతిన్నాయి. దీనికి సూపర్‌ ఎల్‌నినో రూపంలో వచ్చిపడిన ప్రకృతి వైపరీత్యాలు తోడవుతున్నాయి. అందుకే రానున్న కాలంలో ప్రపంచ ప్రజలు కనీవినీ ఎరుగని పెను సంక్షోభం ఎదుర్కొనబోతున్నారని జైశంకర్‌ హెచ్చరించారు. ఈ నేపథ్యంలో అమెరికాకు నేరుగా మన అసంతృప్తి తెలియజేయటం, చేస్తున్న తప్పుల్ని దిద్దుకోమని చెప్పటం... ప్రపంచం మునుపట్లా లేదని, ఏకచ్ఛత్రాధిపత్యం రోజులు అంతరించాయని చెప్పడం అత్యవసరం. దీన్ని సకాలంలో నిర్మొహమాటంగా, నిక్కచ్చిగా, తడబాటులేకుండా తెలిపినందుకు ఆయన్ను అభినందించాలి.

న్యూఢిల్లీ: ప్రధానమంత్రి నరేంద్ర మోదీ, అమెరికా అధ్యక్షుడు డొనాల్డ్ ట్రంప్ మధ్య బుధవారం ఫోన్ సంభాషణ జరిగింది. భారత్‌–అమెరికా సమగ్ర ప్రపంచ వ్యూహాత్మక భాగస్వామ్యాన్ని మరింత ముందుకు తీసుకెళ్లేందుకు తమ నిబద్ధతను ఇరువురు నేతలు పునరుద్ఘాటించారు. రెండు దేశాల ప్రజల ప్రయోజనాల కోసం సహకారాన్ని మరింతగా పెంచేందుకు సన్నిహిత సంబంధాలను కొనసాగించాలని అంగీకరించారు.ప్రధానమంత్రి కార్యాలయం విడుదల చేసిన ప్రకటన ప్రకారం.. వాణిజ్యం, రక్షణ, ఇంధనం, కీలక సాంకేతికతలు సహా పరస్పర ప్రయోజనాలకు సంబంధించిన పలు రంగాల్లో ద్వైపాక్షిక సహకారంపై సాధించిన పురోగతిని మోదీ, ట్రంప్ సమీక్షించారు. ప్రాంతీయ, అంతర్జాతీయ పరిణామాలపైనా అభిప్రాయాలు పంచుకున్నారు. ప్రపంచ శాంతి, భద్రతను ప్రోత్సహించేందుకు కొనసాగుతున్న ప్రయత్నాలపై చర్చించారు.మోదీ కీలక కామెంట్స్‌ మోదీ కూడా సామాజిక మాధ్యమం ఎక్స్‌లో ఈ సంభాషణపై స్పందించారు. ‘‘అధ్యక్షుడు ట్రంప్‌తో ఫలప్రదమైన సంభాషణ జరిగింది. వాణిజ్యం, రక్షణ, ఇంధనం, కీలక సాంకేతికతలు సహా ఇతర రంగాల్లో మన ద్వైపాక్షిక సహకారాన్ని సమీక్షించాం. సమగ్ర ప్రపంచ వ్యూహాత్మక భాగస్వామ్యాన్ని ముందుకు తీసుకెళ్లేందుకు సన్నిహిత సంబంధాలను కొనసాగించాలని అంగీకరించాం. ప్రాంతీయ, అంతర్జాతీయ అంశాలతో పాటు ప్రపంచ శాంతి, భద్రతను ముందుకు తీసుకెళ్లేందుకు కొనసాగుతున్న ప్రయత్నాలపైనా అభిప్రాయాలు పంచుకున్నాం’’ అని మోదీ పేర్కొన్నారు.భారత్, అమెరికా పరస్పర ప్రయోజనకరమైన వాణిజ్య ఒప్పందాన్ని ఖరారు చేసేందుకు చర్చలు కొనసాగిస్తున్నాయి. అమెరికా పర్యటనలో విదేశాంగ మంత్రి ఎస్. జైశంకర్ మాట్లాడుతూ.. ఇరు దేశాలు అవగాహనకు మరింత చేరువయ్యాయని తెలిపారు. అయితే అమెరికా సుంకాల నిబంధనల్లో మార్పులు, సెక్షన్ 301 ప్రక్రియ కీలక అంశాలుగా ఉన్నాయని చెప్పారు. 1974 నాటి అమెరికా వాణిజ్య చట్టంలోని సెక్షన్ 301 ప్రకారం.. అన్యాయంగా భావించే వాణిజ్య పద్ధతులపై అమెరికా దర్యాప్తు చేసి, అదనపు సుంకాలు సహా చర్యలు తీసుకోవచ్చు. ఈ దర్యాప్తులను అమెరికా వాణిజ్య ప్రతినిధి కార్యాలయం నిర్వహిస్తుంది.ఇదిలా ఉండగా, ఈ నెల ప్రారంభంలో అమెరికా కాంగ్రెస్ ఆమోదించిన రష్యా, ఇరాన్‌పై ఆంక్షల చట్టంపైనా భారత్ ఆందోళన వ్యక్తం చేసింది. ఈ చట్టం ప్రకారం రష్యాతో పాటు భారత్, చైనా వంటి ప్రధాన ఇంధన కొనుగోలుదారులపై అమెరికా ప్రభుత్వం సుంకాలు విధించే అవకాశం ఉంది. భారత్‌ 140 కోట్ల ప్రజల ఇంధన భద్రతకు భరోసా ఇవ్వడానికి కట్టుబడి ఉందని విదేశాంగ శాఖ తెలిపింది.

టెహ్రాన్: అంతర్జాతీయ రాజకీయాల్లో ఊహించని సరికొత్త డ్రామా తెరపైకి వచ్చింది. అమెరికాలో మధ్యంతర (మిడ్‌టర్మ్) ఎన్నికల వేళ అగ్రరాజ్య అధ్యక్షుడు డొనాల్డ్ ట్రంప్‌నకు ఇరాన్ గట్టిగానే షాకిచ్చింది.ట్రంప్ పాలనా విధానాలను, ఆయన తీసుకుంటున్న అడ్డగోలు నిర్ణయాలను నేరుగా వ్యతిరేకించాలంటూ ఇరాన్‌కు చెందిన అత్యంత శక్తివంతమైన సైనిక దళం ‘ఇస్లామిక్ రివల్యూషనరీ గార్డ్ కార్ప్స్’ (IRGC) అమెరికన్ ఓటర్లకు ఒక బహిరంగ లేఖను సంధించింది. సరిగ్గా ఎన్నికలకు ఐదు వారాల ముందు విడుదలైన ఈ 25 పేజీల సంచలన లేఖ ఇప్పుడు అమెరికా రాజకీయ వర్గాల్లో తీవ్ర ప్రకంపనలు సృష్టిస్తోంది! ట్రంప్ రాజకీయ భవితవ్యాన్ని ప్రశ్నార్థకం చేస్తూ ఇరాన్ వేసిన ఈ మాస్టర్ ప్లాన్ అగ్రరాజ్యంలో పెద్ద మంటలే రేపుతోంది.అమెరికా-ఇజ్రాయెల్ సంయుక్త దళాలు ఇరాన్‌పై యుద్ధం ప్రారంభించి ఏడు నెలలు గడిచిన తరుణంలో ఈ లేఖ వెలువడడం ప్రాధాన్యం సంతరించుకుంది. అమెరికా పౌరులకు, అక్కడి స్వార్థపూరిత రాజకీయ నాయకత్వానికి మధ్య చాలా తేడా ఉందని ఐఆర్‌జీసీ ఈ లేఖలో ఎత్తిచూపింది. ఇరాన్ సామాన్య ప్రజలు, అమెరికన్ పౌరులు ఇద్దరూ కూడా ఖరీదైన యుద్ధాలను ప్రోత్సహించే లీడర్ల బాధితులేనని వాదించింది. ఇజ్రాయెల్‌కు ట్రంప్ ఇస్తున్న గుడ్డి మద్దతును నిలిపివేయాలని, విదేశీ సైనిక జోక్యాలను తక్షణమే వ్యతిరేకించాలని అమెరికన్లను ఈ లేఖ కోరింది.వాషింగ్టన్ తన ఓటమిని అంగీకరించాలిటెహ్రాన్‌లో జరిగిన విలేకరుల సమావేశంలో ఐఆర్‌జీసీ అధికార ప్రతినిధి జనరల్ హోస్సేన్ మొహెబ్బీ ఈ లేఖపై నిప్పులు చెరిగారు. ప్రస్తుత సంఘర్షణకు తెరపడాలంటే వాషింగ్టన్ తన ఓటమిని అంగీకరించి, సైనిక బలగాలను వెనక్కి తీసుకోవడమే ఏకైక మార్గమని తేల్చిచెప్పారు. అమెరికాలో ప్రస్తుతం రాజకీయ వ్యవస్థ అత్యంత బలహీనంగా ఉన్న తరుణాన్ని దృష్టిలో పెట్టుకునే ఈ లేఖను విడుదల చేశామని ఆయన కుండ బద్దలు కొట్టారు. అణు ఆయుధాల ముసగులో ట్రంప్ చేస్తున్న డ్రామాలన్నీ ప్రపంచాన్ని మోసం చేయడానికేనని, తమ యురేనియం శుద్ధి కేవలం శాంతియుత ప్రయోజనాల కోసమేనని స్పష్టం చేశారు.‘డెత్ టు అమెరికా’ అసలు అర్థం అదే!ఇరాన్ రాజకీయ వ్యవస్థలో తరచూ వినిపించే వివాదాస్పద నినాదం ‘డెత్ టు అమెరికా’పై కూడా ఈ లేఖలో క్లారిటీ ఇచ్చారు. ఈ నినాదం అమెరికన్ ప్రజలను ఉద్దేశించి కాదని, వైట్‌హౌస్‌ను కేంద్రంగా చేసుకుని పాలిస్తున్న ‘దయ్యం లాంటి పాలక వర్గాన్ని’ అంతం చేయాలని కోరుతూ చేసే ప్రార్థన మాత్రమేనని వివరించారు. ఇరాన్‌పై అమెరికా-ఇజ్రాయెల్ వేలాది వైమానిక దాడులు చేసినప్పటికీ, తమ మౌలిక సదుపాయాలను దెబ్బతీశారే తప్ప తాము నిర్దేశించుకున్న ఏ ఒక్క లక్ష్యాన్నీ సాధించలేకపోయాయని, చివరికి అమెరికా సైనిక ఆస్తులకే భారీ నష్టం వాటిల్లిందని ఐఆర్‌జీసీ ఘాటుగా హెచ్చరించింది.ఎన్నికల గండం నుంచి గట్టెక్కేందుకు ట్రంప్ తంటాలు..ఈ ఏడాది నవంబర్‌లో జరగనున్న ఈ మధ్యంతర ఎన్నికలు కేవలం కాంగ్రెస్ స్థానాల కోసమే అయినప్పటికీ, ఇవి పూర్తిగా ట్రంప్ పాలనా తీరుపై ప్రజాభిప్రాయాన్ని తెలిపే రెఫరెండ్‌లా మారాయి. ద్రవ్యోల్బణం,పెరుగుతున్న జీవన వ్యయం వల్ల రిపబ్లికన్ పార్టీకి, ట్రంప్ విధానాలకు వ్యతిరేకత తీవ్రస్థాయిలో పెరుగుతోంది. ఈ ఎన్నికల ఉచ్చు నుంచి బయటపడేందుకు ట్రంప్ తంటాలు పడుతూ.. అమెరికన్ ఓటర్లకు ఏకంగా ఐదు వేల డాలర్లు ఇస్తానంటూ వరాల జల్లు కురిపిస్తున్నారు.వియత్నాం యుద్ధ కాలంలో అమెరికన్ సైనికులను తమ ప్రభుత్వానికి వ్యతిరేకంగా రెచ్చగొట్టడానికి ప్రసారాలను ఉపయోగించిన ‘హనోయ్ హన్నా’తరహా వ్యూహాన్నే ఇప్పుడు ఇరాన్ అచ్చం దింపిందని రాజకీయ విశ్లేషకులు మండిపడుతున్నారు. వాషింగ్టన్ పెద్దలను లైట్‌ తీసుకుని, నేరుగా అమెరికన్ ఓటర్లతోనే ఇరాన్ చక్రం తిప్పుతుండటంతో ట్రంప్‌నకు నిద్రపట్టడం లేదు.మరోవైపు ఇరాన్ కరెన్సీ 'రియల్' విలువ చరిత్రలోనే ఎన్నడూ లేనివిధంగా పడిపోయి, ఒక అమెరికన్ డాలర్‌కు ఏకంగా 25 లక్షల రియల్స్‌కు చేరినప్పటికీ... ఇరాన్ మాత్రం తగ్గేదేలే అన్నట్టు ట్రంప్‌ను వేదికపైనే కార్నర్ చేస్తుండటం ప్రపంచవ్యాప్తంగా హాట్ టాపిక్‌గా మారింది!ఇదీ చదవండి : మూడోసారి అమెరికా అధ్యక్షుడిగా డొనాల్డ్‌ ట్రంప్‌?

అమెరికా అధ్యక్షుడు డొనాల్డ్‌ ట్రంప్‌, గూగుల్‌ సీఈవో సుందర్‌ పిచాయ్‌ మధ్య వైట్‌హౌస్‌ వద్ద జరిగిన సరదా సంభాషణ సోషల్‌ మీడియాలో వైరల్‌గా మారింది. టెక్‌ దిగ్గజాలతో భేటీ అనంతరం మీడియాతో మాట్లాడిన ట్రంప్‌.. పిచాయ్‌ను ఉద్దేశించి “ఈయనో మాన్‌స్టర్‌.. కానీ ఎవరికీ తెలియదు” అంటూ వ్యాఖ్యానించారు. దీనికి సుందర్‌ పిచాయ్‌ కూడా ఒక్క నవ్వు నవ్వి బదులిచ్చారు.వైట్‌హౌస్‌ వద్ద మీడియాతో మాట్లాడుతున్న సమయంలో ట్రంప్‌.. పిచాయ్‌ను పిలిచి “సుందర్‌.. ఏమైనా చెబుతావా?” అని అడిగారు. పిచాయ్‌ “ముందుగా థ్యాంక్స్‌...” అని చెప్పబోతుండగానే ట్రంప్‌ ఆయనకు అడ్డుపడ్డారు. “వీళ్లెవరో మీకు అసలు తెలియదు. ప్రపంచంలోనే అత్యంత కీలకమైన వ్యక్తులు వీళ్లు. ఈయన (సుందర్‌ పిచాయ్‌) ఓ మాన్‌స్టర్‌(రాక్షసుడు).. కానీ ఎవరికీ ఈ విషయం తెలియదు” అని ట్రంప్‌ అన్నారు. అంతేకాదు.. ఇలాంటి టెక్‌ దిగ్గజాలకు ప్రతిరోజూ మీడియాతో మాట్లాడాల్సిన అవసరం లేకపోవడం ఎంత మంచి జీవితమో అంటూ వ్యాఖ్యానించారు.“మీకు గుర్తుండాల్సిన పేరు ఒక్కటే.. సుందర్‌” అని పిచాయ్‌ను ఉద్దేశించి ట్రంప్‌ అన్నారు. ట్రంప్‌ వ్యాఖ్యలకు పిచాయ్‌ అలా ఒక నవ్వు నవ్వి సరదాగా స్పందించారు. “నేను మాన్‌స్టర్‌ని అన్నదానికంటే ఇది మంచి ట్యాగ్‌లైన్‌ అవుతుందని ఆశిస్తున్నా” అంటూ అక్కడ నవ్వులు పూయించారు.Trump: This guy (Sundar Pichai) is a monster, and nobody knows him. What a great life! To be a Monster and not have to go through this. All you have to know is — sundarr! Sundar is his name. pic.twitter.com/smlS58lQdW https://t.co/1swuCa4RYT— Nicholas Mugalli (@RealNickMugalli) September 29, 2026ట్రంప్‌ భేటీ సారాంశం ఏంటంటే..వైట్‌హౌస్‌లో ట్రంప్‌.. సుందర్‌ పిచాయ్‌తో పాటు మెటా సీఈవో మార్క్‌ జుకర్‌బర్గ్‌, ఆంత్రోపిక్‌ సీఈవో డారియో అమోడీ, ఎన్విడియా సీఈవో జెన్సెన్‌ హువాంగ్‌, ఓపెన్‌ఏఐ ప్రెసిడెంట్‌ గ్రెగ్‌ బ్రాక్‌మన్‌ తదితర టెక్‌ రంగ ప్రముఖులతో సమావేశమయ్యారు. అధునాతన ఏఐ వ్యవస్థల భద్రత, కంపెనీల అంతర్గత నియంత్రణలు, ప్రమాదాల పర్యవేక్షణ తదితర అంశాలపై చర్చించారు.ఈ సందర్భంగా ‘వైట్‌హౌస్‌ అకార్డ్‌ ఆన్‌ సూపర్‌ ఇంటెలిజెన్స్‌’ పేరుతో స్వచ్ఛంద ఒప్పందాన్ని ప్రకటించారు. ఇందులో ఏఐ మోడళ్లపై అంతర్గత రిస్క్‌ సమీక్షలు, స్వతంత్ర ఆడిట్లు, కంపెనీ బోర్డుల పర్యవేక్షణ వంటి చర్యలు ఉన్నాయి. ఇది ప్రభుత్వ చట్టబద్ధ నియంత్రణ కాకుండా కంపెనీలు స్వచ్ఛందంగా పాటించే భద్రతా ప్రమాణాల ఒప్పందం.అమోడీకి ట్రంప్‌ వార్నింగ్‌?సమావేశంలో ఆంత్రోపిక్‌ సీఈవో డారియో అమోడీ(Dario Amodei)తోనూ ట్రంప్‌ సరదాగా మాట్లాడారు. అమోడీని తన పక్కకు పిలిచిన ట్రంప్‌.. “ఆయన ఓకే అని మాత్రమే చెప్పారు” అంటూ వ్యాఖ్యానించి, వెంటనే “బీ కేర్‌ఫుల్‌” అని హెచ్చరించినట్లు నవ్వుతూ చెప్పారు.అధునాతన ఏఐ వల్ల మానవాళికి ప్రమాదాలు ఉండొచ్చని అమోడీ గతంలో చేసిన వ్యాఖ్యల నేపథ్యంలో ట్రంప్‌ ఈ సరదా వ్యాఖ్య చేసినట్లు తెలుస్తోంది. దీనిపై అమోడీ కూడా నవ్వుతూ.. ఏఐ రేసులో అమెరికా ముందుండాల్సిన అవసరం ఉందని, అదే సమయంలో టెక్నాలజీని సురక్షితంగా అభివృద్ధి చేసేందుకు అందరూ కలిసి పనిచేయాలని చెప్పారు.‘సూపర్‌ ఇంటెలిజెన్స్‌’పై పిచాయ్‌ ఏమన్నారంటే..ఏఐకి సూపర్‌ ఇంటెలిజెన్స్‌గా ట్రంప్‌ నామకరణం చేసిన సంగతి తెలిసిందే. సమావేశం అనంతరం పిచాయ్‌ సోషల్‌ మీడియాలో స్పందిస్తూ.. ట్రంప్‌, ఇతర టెక్‌ నాయకులతో ముఖ్యమైన చర్చ జరిగిందని, వైట్‌హౌస్‌ అకార్డ్‌ ఆన్‌ సూపర్‌ ఇంటెలిజెన్స్‌పై సంతకం చేసినట్లు తెలిపారు. ఏఐ అభివృద్ధిలో తగిన పరీక్షలు, మూల్యాంకనాలు, రెడ్‌ టీమింగ్‌, దుర్వినియోగం నివారణకు భద్రతా చర్యలను కొనసాగిస్తామని చెప్పారు. ఈ రంగంలో ఆవిష్కరణలు కొనసాగిస్తూనే బాధ్యతాయుతమైన అభివృద్ధి, భద్రతా ప్రమాణాల విషయంలో ఇతర సంస్థలతో కలిసి పనిచేస్తామని పిచాయ్‌ పేర్కొన్నారు.ఇదీ చదవండి: ఏఐకి కొత్త పేరు పెట్టిన ట్రంప్‌

అమెరికా అధ్యక్షుడు డొనాల్డ్‌ ట్రంప్‌ సంచలన నిర్ణయం తీసుకున్నారు. ఇకపై అమెరికా ప్రభుత్వ అధికారిక వ్యవహారాల్లో ‘కృత్రిమ మేధ’(అర్టిఫీషియల్‌ ఇంటెలిజెన్సీ) అనే పదానికి బదులుగా ‘సూపర్‌ ఇంటెలిజెన్స్‌’ అనే పదాన్ని ఉపయోగించాలని ఆదేశించారు. ఈ మేరకు సెప్టెంబర్‌ 29న ఎగ్జిక్యూటివ్‌ ఆర్డర్లపై సంతకం చేశారు. ‘కృత్రిమ’ అనే పదం ఈ సాంకేతికత సామర్థ్యాన్ని సరిగ్గా ప్రతిబింబించడం లేదని ట్రంప్‌ అభిప్రాయపడ్డారు.ఈ నిర్ణయానికి ముందు శ్వేతసౌధంలో ప్రపంచంలోని ప్రముఖ సాంకేతిక సంస్థల అధిపతులతో ట్రంప్‌ సమావేశమయ్యారు. మెటా అధినేత మార్క్‌ జుకర్‌బర్గ్‌, ఎన్విడియా అధినేత జెన్సన్‌ హువాంగ్‌, ఆంథ్రోపిక్‌ అధినేత డారియో అమోడెయి, ఓపెన్‌ఏఐ అధ్యక్షుడు గ్రెగ్‌ బ్రాక్‌మన్‌, మైక్రోసాఫ్ట్‌ అధినేత సత్య నాదెళ్ల, గూగుల్‌ అధినేత సుందర్‌ పిచాయ్‌, ఎలాన్‌ మస్క్‌ తదితరులు ఈ భేటీలో పాల్గొన్నారు. అత్యాధునిక సాంకేతికత అభివృద్ధి, భద్రత, భవిష్యత్‌ నియంత్రణలపై ఈ సమావేశంలో చర్చించారు.🇺🇸 Rarely has there been a White House table like this one. Elon on Trump's left, Jensen Huang on his right, with Zuckerberg, Pichai, Bezos and other AI builders around them.Trump's message was simple: "We have a very big lead, and we're gonna keep our lead."He called AI…— Edison (@Edison_TechAI) September 29, 2026కంపెనీలే భద్రత చూసుకోవాలిసమావేశం అనంతరం ట్రంప్‌, టెక్‌ సంస్థల అధినేతలు ఒక స్వచ్ఛంద భద్రతా ఒప్పందాన్ని ప్రకటించారు. దీనిని ట్రంప్‌ ‘నైతికంగా కట్టుబడి ఉండే ఒప్పందం’గా అభివర్ణించారు. దీని ప్రకారం సంస్థలు తమ సాంకేతిక వ్యవస్థలను ఎప్పటికప్పుడు పర్యవేక్షించుకోవాలి. అంతర్గత నియంత్రణలు ఏర్పాటు చేసుకోవడంతోపాటు స్వతంత్ర, బాహ్య సంస్థలతో భద్రతా తనిఖీలు చేయించుకోవాలి. సంస్థల పాలక మండళ్లు కూడా ఈ వ్యవస్థల భద్రతను పర్యవేక్షించాల్సి ఉంటుంది.ఇది చట్టం కాదు.. స్వచ్ఛంద ఒప్పందమేటెక్‌ సంస్థలు అంగీకరించిన ఈ పత్రానికి ప్రస్తుతం చట్టబద్ధమైన అమలు బలం లేదు. అంటే నిబంధనలు పాటించకపోతే వెంటనే శిక్షించే విధానం ఇందులో లేదు. అయితే సైబర్‌ భద్రత, జీవ భద్రత, రసాయన సంబంధిత ప్రమాదాలు వంటి అంశాల్లో ప్రమాదాలను గుర్తించి నియంత్రించేందుకు సంస్థలు చర్యలు తీసుకోవాలని ఒప్పందం సూచిస్తోంది. భవిష్యత్తులో అవసరమైతే వీటిలో కొన్ని అంశాలను చట్టాలుగా మార్చే అవకాశం కూడా ఉందని పేర్కొన్నారు.US President Donald Trump, Meta CEO Mark Zuckerberg, Google CEO Sunder Pichai, Elon Musk and other tech giants brief media after meeting on Super Intelligence pic.twitter.com/dcLpatwSxl— ANI (@ANI) September 29, 2026ప్రభుత్వ నియంత్రణ వద్దు.. కృత్రిమ మేధ రంగంపై కొత్తగా కఠినమైన సమాఖ్య నిబంధనలు తీసుకురావడం కంటే కంపెనీలే తమను తాము పర్యవేక్షించుకోవాలన్న వైఖరిని ట్రంప్‌ స్పష్టం చేశారు. ఇప్పటికే ఉన్న చట్టాలు, ప్రభుత్వ సంస్థల ద్వారా అవసరమైన చర్యలు తీసుకోవచ్చని ఆయన అన్నారు. అమెరికా సాంకేతిక రంగంలో చైనా కంటే ముందంజలో ఉండాలంటే అభివృద్ధిపై అధిక నియంత్రణలు విధించడం సరికాదన్నది ట్రంప్‌ వైఖరి.డేటా కేంద్రాలకు భారీ ప్రోత్సాహంఅత్యాధునిక సాంకేతికత అభివృద్ధికి భారీ కంప్యూటింగ్‌ సామర్థ్యం అవసరం. ఇందుకోసం డేటా కేంద్రాల నిర్మాణాన్ని వేగవంతం చేయాలని ట్రంప్‌ కోరుతున్నారు. అయితే ఈ కేంద్రాలు పెద్ద మొత్తంలో విద్యుత్‌ను వినియోగిస్తాయి. దీంతో విద్యుత్‌ డిమాండ్‌ పెరగడం, స్థానిక మౌలిక వసతులపై ఒత్తిడి రావడం, ప్రజలకు విద్యుత్‌ ఖర్చులు పెరిగే అవకాశం ఉండటంపై ఆందోళనలు వ్యక్తమవుతున్నాయి. డేటా కేంద్రాలు ఏర్పాటు చేసే ప్రాంతాలకు టెక్‌ సంస్థలు ఆర్థిక ప్రయోజనాలు కల్పించాలని ట్రంప్‌ సూచించారు.పది మందితో ప్రత్యేక కమిటీ?సూపర్‌ ఇంటెలిజెన్స్‌ రంగాన్ని పర్యవేక్షించేందుకు దాదాపు పది మందితో ప్రత్యేక కమిటీ ఏర్పాటు చేసే ఆలోచనలో ఉన్నట్లు ట్రంప్‌ తెలిపారు. అయితే ఆ కమిటీలో ఎవరుంటారు? దానికి ఎలాంటి అధికారాలు ఉంటాయి? అన్న దానిపై మాత్రం ఆయన స్పష్టత ఇవ్వలేదు. అమెరికా సాంకేతిక ఆధిపత్యాన్ని కొనసాగించేందుకు ఈ రంగంలో వేగంగా అభివృద్ధి అవసరమని ట్రంప్‌ చెబుతున్నారు.భద్రతపై మాత్రం ఆందోళనలుఅత్యాధునిక సాంకేతిక వ్యవస్థలు కొన్ని సందర్భాల్లో వాటికి నిర్దేశించిన పరిమితులను దాటి పనిచేసే అవకాశం ఉందన్న ఆందోళనలు ఇప్పటికే ఉన్నాయి. సైబర్‌ దాడులు, జీవ భద్రత, రసాయన ప్రమాదాలు వంటి అంశాల్లో ఈ సాంకేతికతను దుర్వినియోగం చేసే అవకాశాలపై నిపుణులు హెచ్చరిస్తున్నారు. దీంతో అమెరికా ఇప్పుడు అభివృద్ధి వేగాన్ని పెంచడంతోపాటు భద్రతా నియంత్రణలను ఎలా బలోపేతం చేయాలి అన్న సవాల్‌ను ఎదుర్కొంటోంది.ఇదీ చదవండి: మొరాకోకు తొలి మహిళా ప్రధాని! ఈ ఫాతిమా ఎవరంటే..

వాషింగ్టన్‌: భారతీయ వ్యాపార దిగ్గజం ఎస్సార్‌ గ్రూప్‌ అమెరికాలో భారీ ఉక్కు ప్లాంటు ఏర్పాటు చేయనుంది. ఇందుకోసం దాదాపు 18 బిలియన్‌ డాలర్ల (సుమారు రూ. 1.72 లక్షల కోట్లు) పెట్టుబడులు పెట్టనుంది. ఎస్సార్‌లో భాగమైన మెసాబీ మెటాలిక్స్‌ ఈ మేరకు ఇన్వెస్ట్‌ చేయనున్నట్లు అమెరికా అధ్యక్షుడు డొనాల్డ్‌ ట్రంప్‌ స్వయంగా ప్రకటించారు. ప్రణాళికల్లో భాగంగా అయోవా రాష్ట్రంలో 15 బిలియన్‌ డాలర్లతో స్టీల్‌ కాంప్లెక్స్‌ను, 3 బిలియన్‌ డాలర్లతో మినెసోటాలో ముడి ఇనుము గని, పెలెట్ల ప్లాంటును ఏర్పాటు చేయనున్నట్లు వివరించారు. ‘అమెరికా చరిత్రలోనే ఇది అతి పెద్ద ఉక్కు ప్లాంటు’గా ఉంటుందన్నారు. ఎస్సార్‌ గ్రూప్‌ వ్యవస్థాపకుడు, వైస్‌ చైర్మన్‌ రవి రూయా, ఆయన కుమారుడు.. మెసాబీ మెటాలిక్స్‌ చైర్మన్‌ రేవంత్‌ రూయాతో కలిసి ట్రంప్‌ ఈ మేరకు ప్రకటించారు. ’అమెరికా ఉక్కు రంగానికి, మా సంస్థకు ఇదొక కీలక మైలురాయి. మేము సమగ్ర ఉక్కు వ్యాపారాన్ని నిర్మిస్తున్నాం. మినెసోటాలోని ముడి ఇనుమును అయోవాలో ప్లాంటుతో అనుసంధానించడం ద్వారా 100 శాతం అమెరికన్‌ ఉక్కును ఉత్పత్తి చేస్తాం’ అని రేవంత్‌ రూయా ఈ సందర్భంగా చెప్పారు. భారత్, అమెరికా మధ్య ఆర్థిక బంధాలు బలోపేతం కావడానికి కూడా ఈ పెట్టుబడులు దోహదపడతాయని రవి రూయా పేర్కొన్నారు. దేశీయంగా పరిశ్రమకు ఊతమిచ్చే లక్ష్యంతో ఉక్కు దిగుమతులపై ట్రంప్‌ 50% టారిఫ్‌లు విధించిన నేపథ్యంలో ఎస్సార్‌ గ్రూప్‌ పెట్టుబడులు ప్రాధాన్యం సంతరించుకున్నాయి. ‘టారిఫ్‌లు కట్టడం ఇష్టం లేక ఇప్పుడు అందరూ ఇక్కడ ప్లాంట్లు నిర్మించేందుకు ఆసక్తి చూపుతున్నారు’ అని ట్రంప్‌ తాజాగా వ్యాఖ్యానించారు.10 మిలియన్‌ టన్నుల సామర్థ్యం.. వైట్‌హౌస్, మినెసోటా కేంద్రంగా పనిచేసే మెసాబి మెటాలిక్స్‌ వర్గాల ప్రకారం ప్రతిపాదిత ప్లాంటు వార్షిక ఉత్పత్తి సామర్థ్యం 10 మిలియన్‌ టన్నులుగా ఉంటుంది. 2030 నాటికి ఉత్పత్తి ప్రారంభమవుతుంది. ఫ్యాక్టరీలో కార్యకలాపాలు ప్రారంభమయ్యాక కనీసం 1,750 మందికి ఉద్యోగాలు లభిస్తాయి. ఈ ప్రాజెక్టు నిర్మాణానికి సంబంధించి 8,000 పైచిలుకు ఉద్యోగాల కల్పన జరుగుతుందని కంపెనీ తెలిపింది. కార్యకలాపాలు ప్రారంభించిన తొలి పదేళ్లలో 95 బిలియన్‌ డాలర్ల మేర ఆర్థిక కార్యకలాపాలకు ఇది దోహదపడుతుందని పేర్కొంది. మినెసొటా గని నుంచి ఏటా 7.5 మిలియన్‌ టన్నుల ముడి ఇనుము ఉత్పత్తి అవుతుందని, పూర్తి స్థాయిలో ఉత్పత్తి ప్రారంభమయ్యాక 350 మందికి ఉద్యోగాల కల్పన జరుగుతుందని వివరించింది. ఇది అమెరికాలో గత 50 ఏళ్లలో నిర్మించిన తొలి గని కానుంది. 1969లో భారత్‌లో ఏర్పాటైన ఎస్సార్‌ గ్రూప్‌నకు మెటల్స్, మైనింగ్, ఎనర్జీ, మౌలిక సదుపాయాలు, టెక్నాలజీ, రిటైల్‌ తదితర రంగాల్లో కార్యకలాపాలు ఉన్నాయి. అంతర్జాతీయంగా 30 బిలియన్‌ డాలర్ల పైగా ఇన్వెస్ట్‌ చేసింది.

అమెరికా–చైనా మధ్య సంబంధాల్లో మరో ఆసక్తికర పరిణామం.. ఓ వైపు తైవాన్‌కు ఆయుధాలు విక్రయిస్తున్న అమెరికా.. మరోవైపు అదే చైనాకు ఆయుధాలు అమ్మే ఆలోచన ఉందా? అన్న ప్రశ్న ఇప్పుడు కొత్త చర్చకు దారితీసింది. అమెరికా అధ్యక్షుడు డొనాల్డ్‌ ట్రంప్‌ చేసిన వ్యాఖ్యలు, చైనాకు ఆయుధాలు విక్రయించడంపై అమెరికా రాయబారి చేసిన ప్రకటనలు పరస్పర విరుద్ధంగా ఉండటంతో గందరగోళం నెలకొంది. అయితే ఈ విషయంలో అమెరికా విదేశాంగ శాఖ మాత్రం స్పష్టత ఇచ్చింది. చైనాకు ఆయుధాలు విక్రయించడాన్ని అమెరికా చట్టం నిషేధిస్తోందని, అలాంటి విక్రయాలకు ఎలాంటి ప్రతిపాదన లేదా ప్రణాళిక లేదని వెల్లడించింది.అసలేం జరిగింది?అమెరికా రాయబారి డేవిడ్‌ పెర్డ్యూ ఫాక్స్‌ న్యూస్‌కు ఇచ్చిన ఇంటర్వ్యూలో కీలక వ్యాఖ్యలు చేశారు. అమెరికా ప్రపంచంలోని ఇతర దేశాలకు ఆయుధాలు విక్రయిస్తున్న విషయాన్ని చైనా అధ్యక్షుడు షీ జిన్‌పింగ్‌తో ట్రంప్‌ ప్రస్తావించారని.. ఒక దశలో ‘మీరు కూడా అమెరికా ఆయుధాలు కొనాలనుకుంటున్నారా?’ అని షీని అడిగినట్లు చెప్పారు. తైవాన్‌కు అమెరికా ఆయుధాల విక్రయాలపై ప్రశ్నకు సమాధానంగా పెర్డ్యూ ఈ వ్యాఖ్యలు చేశారు.ఈ వ్యాఖ్యలపై సోమవారం ట్రంప్‌ను ప్రశ్నించగా.. ‘చైనాకా? మీరు తైవాన్‌ అంటున్నారా?’ అంటూ స్పందించారు. తనకు అలాంటి విషయం గుర్తు లేదని, పెర్డ్యూను అడగాల్సి ఉందన్నారు. అయితే ఆ వెంటనే చైనా.. అమెరికా ఆయుధాలు కొనుగోలు చేయడం బహుశా మంచి ఆలోచనే కావచ్చని వ్యాఖ్యానించారు. ‘అమెరికా పరికరాలు అత్యుత్తమమైనవి కాబట్టి చైనా కొనుగోలు చేయాలనుకోవచ్చు’ అని చెప్పారు. అయితే షీతో అలాంటి ప్రతిపాదనపై చర్చ జరగలేదని స్పష్టం చేశారు.అమెరికా వెంటనే క్లారిటీట్రంప్‌, పెర్డ్యూ వ్యాఖ్యలతో చైనాకు అమెరికా ఆయుధాల విక్రయంపై చర్చ మొదలవడంతో అమెరికా విదేశాంగ శాఖ రంగంలోకి దిగింది. అమెరికా చట్టం చైనాకు ఆయుధాల విక్రయాన్ని నిషేధిస్తోందని.. చైనాకు ఆయుధాలు విక్రయించే ప్రతిపాదన లేదా ప్రణాళిక ఏదీ లేదని స్పష్టం చేసింది. దీంతో ‘కొండను తవ్వి ఎలుకను పట్టిన’ చర్చలా మారుతుందా? అన్న ప్రశ్నలు కూడా వినిపిస్తున్నాయి. ప్రస్తుతానికి అధికారిక అమెరికా వైఖరి మాత్రం చైనాకు ఆయుధాల విక్రయం లేదన్నదే.తైవాన్‌ చుట్టూనే అసలు పంచాయితీఈ మొత్తం వ్యవహారం తైవాన్‌ అంశంతో ముడిపడి ఉంది. తైవాన్‌ను తమ భూభాగంలో భాగంగా భావిస్తున్న చైనా.. దానికి అమెరికా ఆయుధాలు విక్రయించడాన్ని తీవ్రంగా వ్యతిరేకిస్తోంది. మరోవైపు తైవాన్‌ తన రక్షణ సామర్థ్యాన్ని పెంచుకునేందుకు అమెరికా నుంచి ఆయుధాలు కొనుగోలు చేస్తోంది. ఇటీవల ట్రంప్‌-జిన్‌పింగ్‌ భేటీలోనూ తైవాన్‌ అంశం ప్రస్తావనకు వచ్చినట్లు చైనా అధికారిక మీడియా వెల్లడించింది. అమెరికా కూడా తైవాన్‌కు రక్షణ సామర్థ్యాలు కల్పించాల్సిన చట్టపరమైన బాధ్యతలను కలిగి ఉంది. ఈ నేపథ్యంలో చైనాకు అమెరికా ఆయుధాలు విక్రయించే ఆలోచన ఉందన్న మాటలు సహజంగానే ప్రాధాన్యం సంతరించుకున్నాయి. ‘అగ్గికి ఆజ్యం పోసినట్టు’ ట్రంప్‌ వ్యాఖ్యలు ఈ చర్చను మరింత వేడెక్కించాయి.చైనాలో ఏమంటున్నారు?అమెరికా రాయబారి వ్యాఖ్యలపై చైనా నేరుగా స్పందించలేదు. చైనా విదేశాంగ శాఖ ప్రతినిధి గువో జియాకున్‌.. తమ అవసరాలకు అనుగుణంగా దేశ రక్షణ సామర్థ్యాలను బలోపేతం చేసుకుంటున్నామని తెలిపారు. అదే సమయంలో ప్రపంచ శాంతి, స్థిరత్వాన్ని కాపాడేందుకు కట్టుబడి ఉన్నామని చెప్పారు.ఇదిలా ఉండగా.. చైనాకు అమెరికా ఆయుధాల విక్రయం జరిగితే అది దశాబ్దాలుగా కొనసాగుతున్న అమెరికా విధానంలో పెద్ద మార్పుగా పరిగణించాల్సి ఉంటుందని కొందరు విశ్లేషకులు అభిప్రాయపడ్డారు. అయితే ప్రస్తుతం అమెరికా విదేశాంగ శాఖ అలాంటి ప్రతిపాదనేదీ లేదని స్పష్టం చేయడంతో.. ‘చేతులు కాలాక ఆకులు పట్టుకున్నట్టు’ పరిస్థితి రాకుండా అధికారికంగా వ్యవహారం చల్లార్చే ప్రయత్నం చేసినట్లుగా కనిపిస్తోంది. మొత్తంగా ట్రంప్‌ వ్యాఖ్యలు అమెరికా–చైనా–తైవాన్‌ మధ్య ఉన్న సున్నితమైన సమీకరణాలను మరోసారి తెరపైకి తెచ్చాయి.ఇదీ చదవండి: మెట్టు దిగిన ఇరాన్‌.. పశ్చిమాసియాలో కీలక పరిణామాం?

పశ్చిమాసియాలో కొనసాగుతున్న యుద్ధానికి తెరదించే దిశగా కీలక పరిణామం చోటుచేసుకుంది. అమెరికా, ఇరాన్‌ నేరుగా కాకుండా మధ్యవర్తుల ద్వారా మరోసారి చర్చలకు సిద్ధమయ్యాయి. సోమవారం ఇరు దేశాల అధికారులు మధ్యవర్తులతో వేర్వేరుగా సంప్రదింపులు జరిపారు. ఏడు నెలలుగా కొనసాగుతున్న యుద్ధానికి ముగింపు పలికేందుకు తాజా దౌత్య ప్రయత్నాల్లో భాగంగా ఈ చర్చలు జరుగుతున్నాయి.ఇరాన్‌ గత వారం ఐక్యరాజ్యసమితి సాధారణ సభ సందర్భంగా ప్రతిపాదించిన ఏడు రోజుల కాల్పుల విరమణ ప్రణాళికను కొద్దిగా సవరించి తాజా చర్చల్లో ముందుకు తీసుకెళ్లే అవకాశముంది. ఖతార్‌ మధ్యవర్తులు న్యూయార్క్‌లో ఉన్న ఇరాన్‌ విదేశాంగ మంత్రి అబ్బాస్‌ అరాఘ్చీతో, అలాగే అమెరికా వర్గాలతో విడివిడిగా చర్చలు జరుపుతున్నట్లు సమాచారం. యుద్ధంలో అమెరికాదే విజయం: ట్రంప్‌మరోవైపు అమెరికా అధ్యక్షుడు డొనాల్డ్‌ ట్రంప్‌ మాత్రం యుద్ధం త్వరలోనే ముగుస్తుందని, అమెరికా గెలుస్తుందని వ్యాఖ్యానించారు. సోమవారం వైట్‌హౌస్‌లో విలేకరులతో మాట్లాడిన ట్రంప్‌.. యుద్ధాన్ని ముగించేందుకు అమెరికా అధికారులు మధ్యవర్తులతో చర్చలు జరిపినట్లు తెలిపారు. “మేం గెలవబోతున్నాం. నా వరకు ఇది ఎలాగైనా సరే జరుగుతుంది. చాలా త్వరగానే ఇది ముగిసిపోతుంది” అని ట్రంప్‌ పేర్కొన్నారు. యుద్ధంలో అమెరికా విజయం సాధించిన తర్వాత గ్యాస్‌ ధరలు కూడా గణనీయంగా తగ్గుతాయని చెప్పారు.ఇరాన్‌ కీలక ప్రతిపాదన ఇదే..ఇరాన్‌ ప్రతిపాదనలో ప్రధానంగా యుద్ధాన్ని నిలిపివేయడం, లెబనాన్‌లోనూ శత్రుత్వ చర్యలకు ముగింపు పలకడం, ఫ్రీజ్‌ చేసిన తమ బిలియన్ల డాలర్ల ఆస్తులను విడుదల చేయడం, ఇరాన్‌ చమురుపై ఆంక్షలను ఎత్తివేయడం వంటి అంశాలు ఉన్నాయి. అలాగే ఇరాన్‌ పోర్టులపై అమెరికా విధించిన నావికా దిగ్బంధాన్ని తొలగించాలని కోరుతోంది.దీనికి ప్రతిగా ప్రపంచ చమురు రవాణాకు అత్యంత కీలకమైన హర్ముజ్‌ జలసంధిని తిరిగి తెరవడానికి ఇరాన్‌ సిద్ధంగా ఉన్నట్లు తెలిపింది. అంతేకాకుండా ఇరాన్‌ అణు కార్యక్రమంపై అమెరికాతో చర్చలను పునఃప్రారంభించేందుకు ప్రతిపాదించింది. శుద్ధిచేసిన యురేనియం అంశంపైనా చర్చలు జరపాలని అమెరికా కోరుతోంది. ..అయినా చర్చలకు గ్రీన్‌ సిగ్నల్‌ఇరాన్‌ ప్రతిపాదనను అమెరికా అధ్యక్షుడు డొనాల్డ్‌ ట్రంప్‌ శనివారం తిరస్కరించినట్లు ప్రకటించారు. ఆర్థిక ఒత్తిడి కారణంగానే ఇరాన్‌ వేగంగా ఒప్పందం కుదుర్చుకోవాలని చూస్తోందని ఆయన వ్యాఖ్యానించారు. అయితే ఆదివారం ఇదే అంశంపై మాట్లాడుతూ.. ఈ వారంలో అమెరికా ప్రతినిధులు మరోసారి చర్చలు జరిపే అవకాశం ఉందని ట్రంప్‌ తెలిపారు. సోమవారం కూడా మధ్యవర్తులతో అమెరికా అధికారులు మాట్లాడినట్లు వైట్‌హౌస్‌లో ట్రంప్‌ వెల్లడించారు. మరోవైపు, అమెరికా అధికారికంగా తమ ప్రతిపాదనను తిరస్కరించిన సమాచారం తమకు ఇంకా అందలేదని ఇరాన్‌ విదేశాంగ మంత్రి అరాఘ్చీ చెబుతున్నారు. వాషింగ్టన్‌ నుంచి స్పష్టమైన సమాధానం కోసం ఎదురు చూస్తున్నామని ఆయన తెలిపారు. శాంతియుత పరిష్కారం కోరుకుంటే తాము ఇప్పటికే పరిష్కార మార్గాన్ని ప్రతిపాదించామని పేర్కొన్నారు. హర్ముజ్‌పైనే అసలు పట్టుప్రస్తుత చర్చల్లో హర్ముజ్‌ జలసంధి కీలక అంశంగా మారింది. ఈ మార్గం ద్వారా ప్రపంచ ఇంధన రవాణాలో భారీగా చమురు, ఎల్‌ఎన్‌జీ రవాణా జరుగుతుంది. యుద్ధం కారణంగా ఇక్కడ రాకపోకలకు తీవ్ర అంతరాయం ఏర్పడటంతో అంతర్జాతీయ ఇంధన మార్కెట్లపై ప్రభావం పడుతోంది. సోమవారం కూడా దౌత్య ప్రయత్నాలపై ఆశలు, యుద్ధంపై ఆందోళనల మధ్య చమురు ధరలు పెరిగాయి.గతంలో ఏప్రిల్‌, జూన్‌లో మధ్యవర్తుల ప్రయత్నాలతో కాల్పుల విరమణలు కుదిరినా అవి ఎక్కువకాలం కొనసాగలేదు. అయితే ఇప్పుడు ఇరాన్‌ మాత్రం తమ షరతులు నెరవేరిన తర్వాతే హర్ముజ్‌ను పూర్తిగా తెరిచే అంశాన్ని పరిశీలిస్తామని స్పష్టం చేసింది. దీంతో తాజా మధ్యవర్తిత్వ చర్చలు యుద్ధానికి ముగింపు పలుకుతాయా? లేదంటే మరోసారి విఫలమవుతాయా?.. రాబోయే రోజుల్లో ఏం జరగనుందా? అనే ఉత్కంఠ నెలకొంది.ఇదీ చదవండి: ఎల్‌ నినో ఏం చేయబోతోందో తెలుసా?

వాషింగ్టన్‌: మూడు రోజుల అధికారిక పర్యటన కోసం అమెరికా వచ్చిన చైనా అధ్యక్షుడు షీ జిన్‌పింగ్‌కు అధ్యక్షుడు డొనాల్డ్‌ ట్రంప్‌ ఆయుధాలు అమ్మే ప్రయత్నం చేశారా? అవునంటున్నారు డేవిడ్‌ పర్‌డ్యూ. తైవాన్‌కు ఆయుధాలు అందించే విషయంలో జరుగుతున్న జాప్యం కూడా సరైందేనని ట్రంప్‌ వ్యాఖ్యానించినట్లు చైనాలో అమెరికా రాయబారిగా వ్యవహరిస్తున్న పర్‌డ్యూ తెలిపారు. ఫాక్స్‌ న్యూస్‌ కార్యక్రమంలో ఆయన మాట్లాడుతూ ఈ విషయం చెప్పారు. అయితే షీ పర్యటనలో కచ్చితంగా ఏ సందర్భంలో ట్రంప్‌ ఆ ప్రతిపాదన చేసిందీ ఆయన స్పష్టం చేయలేదు. తైవాన్‌ విషయంలో చైనాను మెప్పించేందుకే అమెరికా ఆ దేశానికి ఆయుధాల సరఫరాలో జాప్యం చేస్తోందా? అన్న టీవీ వ్యాఖ్యా త బ్రీమ్‌ ప్రశ్నపై పర్‌డ్యూ స్పందిస్తూ... తైవాన్‌ విషయంలో ట్రంప్‌ మునుపు ఎవరూ లేనంత కృత నిశ్చయంతో ఉన్నారని, ఇప్పటివరకూ చాలా ఆయుధాలు అమ్మారని తెలిపారు. భవిష్యత్తులో ఆ దేశానికి ఆయుధాలు అమ్మే విషయమై ట్రంప్, షీలు చర్చలు జరుపుతారని తెలిపారు. ‘‘అయితే.... తాము ప్రపంచంలో ఇతరులకు కూడా ఆయుధాలు అమ్ముతూనే ఉంటామని ట్రంప్‌ చెబుతూంటారు’’అని గుర్తు చేశారు. ‘‘వాస్తవానికి ఆయన ఒక దశలో ఆయుధాలు ఏమైనా కొంటారా? అని షీ జిన్‌పింగ్‌ను కూడా అడిగారు’’అని అన్నారు. అమెరికా స్వయం ప్రతిపత్తి గల తైవాన్‌ను ఒక దేశంగా గుర్తించదు కానీ.. ఆత్మరక్షణ కోసం ఆయుధాలు అందించవచ్చునని ఆ దేశ చట్టాలే చెబుతున్నాయి. అంతర్జాతీయ స్థాయిలో తైవాన్‌ను సమర్థించే, ఆయుధాలు సరఫరా చేసే అతిపెద్ద దేశం కూడా అమెరికానే. అయితే చైనా ఎప్పుడైనా తైవాన్‌పై దాడికి దిగితే రక్షణ కోసం అమెరికా మిలటరీని కూడా పంపుతుందా? అన్న విషయంలో మాత్రం సందిగ్ధత కొనసాగుతోంది. మరోవైపు తైవాన్‌కు ఆయుధాల సరఫరా నిలిపివేయాలని చైనా కోరుతోంది. ఈ ఏడాది మేలో చైనా పర్యటన సందర్భంగానూ షీ ఈ విషయాన్ని ట్రంప్‌ వద్ద ప్రస్తావించినట్లు తెలుస్తోంది. ఆసక్తికరంగా ఆ సమావేశం తరువాత సుమారు 1,400 కోట్ల డాలర్ల విలువైన ఆయుధాల అమ్మకాన్ని అమెరికా వాయిదా వేయడం గమనార్హం.

అమెరికా, చైనాల దీర్ఘకాలిక ప్రత్యర్థిత్వం ఎట్లున్నా, ప్రస్తుతానికి నదిని ప్రశాంతంగా ఉంచి అందులో పడవ ప్రయాణం ప్రశాంతంగా సాగించాలన్నది ఇరువురి వ్యూహం. రెండు దేశాల అధ్యక్షులు గత మే నెలలో బీజింగ్‌లో సమావేశమై నప్పుడు చూపిన ఈ వైఖరులే గత వారాంతంలో వాషింగ్టన్‌లో కూడా కనిపించాయి. సారాంశంలో అంతకుమించిన కొత్తదన మేమీ లేదు. దాని అర్థం ఈ రెండు శిఖరాగ్ర సమావేశాలు నిష్ఫలమైనవని కాదు. వాటికి అనేక ఫలితాలు వర్తమానంలో ఉండటమే కాదు. భవిష్యత్తులోనూ ఉంటాయి.పోరు నష్టం పొందు లాభంఇటువంటి దృక్పథానికి చొరవ తీసుకుని అమెరికా అధ్యక్షునికి ప్రతిపాదిస్తున్నది చైనా అధ్యక్షుడు కాగా, అందుకు ట్రంప్‌ బీజింగ్‌లో అర్ధాంగీకారం తెలిపి ఇపుడు వాషింగ్టన్‌ చర్చలలో పూర్తిగా సమ్మతించినట్లు కనిపిస్తున్నది. ఆ మేరకు పత్రాలు అయితే ఏమీ రాసుకోలేదు గానీ, ఇరువురి వ్యాఖ్యలను పరిశీలించినపుడు అందులో సందేహ మేమీ తోచటం లేదు. మనం సహకరించుకుంటే ఇద్దరమూ లాభ పడతామని జిన్‌పింగ్‌ గత మే నెలలో వలెనే ఈసారి కూడా సూచించారు. ఘర్షణ పడితే ఉభయులమూ నష్టపోగలమని హెచ్చరించారు. అందుకు ట్రంప్‌ స్పందన గమనించదగ్గది. చారిత్రకంగా అమెరికా, చైనాలు రెండవ ప్రపంచ యుద్ధంలో ప్రత్యర్థులను ఓడించాయనీ, అదే విధమైన పరస్పర సహకారంతో ముందుకు సాగి అభివృద్ధి సాధించగలమనీ అన్నారాయన. రెండు దేశాలు కూడా ఆ విధంగా తమ ప్రజల మేలుకు, ప్రపంచం బాగుకు కృషి చేయ వచ్చునని ఇరువురూ అభిప్రాయపడ్డారు.ఇవి సంబంధాలను స్థూలంగా నిర్దేశించే మౌలిక వైఖరులు. తక్కిన పలు విధాలైన మాటలన్నీ ఈ పరిధిలోకి ఒదిగిపోయేవే. ఉదాహరణకు, మనం అభివృద్ధిలో పోటీదార్లమే గానీ శత్రువులం కాము, మన మధ్య నిర్మాణాత్మకమైన, వ్యూహాత్మకమైన సుస్థిరత అవసరం. లేనట్లయితే విస్ఫోటనాత్మకమైన ఘర్షణ తలెత్తుతుంది వంటివి. అయితే, ఇటువంటి సామరస్యతను చూపుతూనే చైనా అధ్యక్షుడు, ఆయన సీనియర్‌ అధికారులు అమెరికాకు కొన్ని హెచ్చరికలను సూటిగా చేశారు. గతం నుంచి చేస్తూ వచ్చినవే ఇపుడు మరొకసారి చేశారు. వాటిని వారు ‘రెడ్‌ లైన్స్‌’ అంటున్నారు. రెడ్‌ లైన్స్‌వాటిలో అన్నింటికన్న మొదటిది తైవాన్‌. ఆ విషయంలో తేడాలు వస్తే అమెరికాతో ‘ఏ యుద్ధానికైనా సిద్ధ’మని జిన్‌పింగ్‌ గత బీజింగ్‌ సమావేశంలోనే ట్రంప్‌కు స్పష్టం చేయటం తెలిసిందే. అందువల్లనే ట్రంప్‌ స్వదేశానికి తిరిగి వెళుతూ, తాము అమెరికా నుంచి 9,500 మైళ్లు ప్రయాణించి చైనాతో యుద్ధం చేయలేమ న్నారు. తైవాన్‌కు 14 బిలియన్‌ డాలర్ల ఆయుధాల విక్రయాన్ని రద్దు చేయలేదు గానీ నిరవధికంగా నిలిపి వేశారు. తైవాన్‌ స్వాతంత్య్రాన్ని బలపరచబోమని మరొకమారు సూచించారు. అయితే వాషింగ్టన్‌ శిఖరాగ్రంలో చైనా అధ్యక్షుడు కోరింది, స్వాతంత్య్రాన్ని కేవలం బలపరచకపోవటం కాదు వ్యతిరేకించాలని. ఆయుధ విక్రయాలను రద్దు చేయాలని. ఇందుకు ట్రంప్‌ స్పందన తెలియదుగానీ, చైనాతో బేరసారాలకు ఇదొక కార్డుగా ఉపయోగపడుతుందన్నారు.ఇరువురు నేతల మధ్య వాషింగ్టన్‌లో గత మే నెల కన్నాభిన్నంగా చర్చకు వచ్చిన అంశం ఆర్టిఫిషియల్‌ ఇంటెలిజెన్స్‌ (ఏఐ) ఒక్కటే. ఈ విషయమై రెండు దేశాల వైఖరులు పూర్తి భిన్నంగా ఉన్నట్లు ముందునుంచే స్పష్టమైంది. ఇపుడు ఏకాభిప్రాయం రాగలదని ఎవరూ ఆశించలేదు. రాలేదు కూడా. రాగల కాలంలో ఏఐ వల్ల అనూహ్యమైన అభివృద్ధి సాధ్యమవుతుందని, కనుక అందులో పైచేయి సాధించాలి తప్ప ఎటువంటి నియంత్రణలకు అంగీకరించరాదన్నది ట్రంప్‌ ప్రభుత్వ విధానం. నియంత్రణలు లేని ఏఐ వల్ల పొంచి ఉన్న ప్రమాదాలు కూడా అనూహ్యమైనవేనని సాక్షాత్తూ అమెరికన్‌ నిపుణులు, ఏఐ సంస్థలు హెచ్చరిస్తున్నా, ఆధిపత్య అన్వేషణలో మంచి చెడులను ఆలోచించని ఆయన దేనినీ లెక్క చేయటం లేదు. ఏఐ అభివృద్ధిలో చైనాతో ఏర్పడిన గట్టి పోటీ అందుకు తోడవుతున్నది. ఏఐతో అందరం లాభపడాలని, అదే సమ యంలో నష్టాల నివారణకు ఉమ్మడి నియంత్రణలు అవసరమన్న చైనా అధ్యక్షుని ప్రతిపాదనను ట్రంప్‌ ప్రస్తుత చర్చలలో అంగీకరించక పోవటానికి కారణం కూడా అదే. వైట్‌ హౌస్‌ విందుకు హాజరైన టెక్‌ దిగ్గజాలు రాగల రోజులలో తీసుకోగల వైఖరి ఏమిటన్నది ప్రపంచం తగినంత ఆందోళనతోనే ఎదురుచూస్తుందనాలి.జీ–2ఇతర విషయాలకు వస్తే, రెండు దేశాల మధ్య వాణిజ్య యుద్ధ మంటున్న దానికి బీజింగ్‌లో కుదిరిన యుద్ధ విరామం ఈ నవంబర్‌లో ముగియనుండగా దానిని మరో నెలలు జనవరి వరకు పొడి గించుకున్నారు. ఇందులో పెద్ద విశేషం లేదు. అమెరికా తీవ్రమైన వాణిజ్య లోటులో ఉన్నందున దానిని భర్తీ చేసుకునేందుకని చెప్తూ, చైనా సహా అన్ని దేశాలపై యథేచ్ఛగా సుంకాల పెంపు, అందుకు ఎదురు వ్యూహంగా చైనా ప్రభుత్వం తన సుంకాలు పెంచటం, అమెరికా నుంచి కొనుగోళ్లు తగ్గించటం, ముఖ్యంగా అతి కీలకమైన ఖనిజాల ఎగుమతిని నియంత్రించటం వంటి చర్యలు తెలిసినవే. చర్చల ద్వారా ఇందులో చేసుకుంటూ వస్తున్న సర్దుబాట్లను ఇపుడు రెండు నెలలు పొడిగించుకున్నారు. అంతకన్న గత్యంతరం లేదు కూడా. తమ ప్రయోజనాల కోసం ఇతర దేశాలను చతురోపాయాల ద్వారా లొంగదీసుకునే కాలం అమెరికా సహా పాశ్చాత్య కూటమికంతా మెల్లగా గతించిపోతున్నది. చైనా వంటి ‘సమ ఉజ్జీ’ (ఇది పాశ్చాత్యుల పద ప్రయోగమే)తోనైతే వీలు పడేదే కాదు. చివరిగా రెండు ముఖ్య విషయాలు చెప్పుకోవాలి. ఒకటి, ఈ విధమైన ప్రశాంత ప్రయాణం అమెరికా కన్న చైనాకు ఎక్కువ అవ సరం. పాశ్చాత్య దేశాలకు ఆధిపత్య సాధనలు, యుద్ధాలు, నష్టాలు, తిరిగి కోలుకోవటాలు చరిత్ర పొడవునా ఉన్నవే. అదే క్రమంలో వారు వర్తమానంలోనూ యుద్ధాలు సాగిస్తున్నారు. మునుముందు కూడా చేస్తారు. అందుకు చైనా, రష్యాలు మినహాయింపు కాగలవని ఎవరూ శిలాక్షరాలు రాయలేరు. చైనా పరిస్థితి అది కాదు. నల్ల మందు యుద్ధాల (1839) కాలం నుంచి విప్లవం (1949) వరకు వందేళ్లపాటు విదేశీ ఆక్రమణలకు, తీవ్ర నష్టాలకు గురైనందున ఇక మీదట అటువంటి పరిస్థితులు ఎదురు కాకుండా కేవలం అభివృద్ధి పైన దృష్టిని కేంద్రీకరించాలన్నది వారి ఆలోచన. అందుకోసం అమె రికా అనే గాక సాధారణ రూపంలోనే ప్రశాంతమైన నది, ప్రశాంత మైన పడవ ప్రయాణం వారి ప్రణాళిక. ఇది ఒక విషయం కాగా రెండవది, అమెరికా చైనాల శాంతియుత సహజీవన ప్రభావాలు వారిద్దరిపైనే గాక ప్రపంచ వ్యాప్తంగా, ఆసియా, పసిఫిక్‌ సహా అనేక ప్రాంతాలపై గణనీయంగా ఉండనున్నాయి. ఆ విధంగా వారి సంబంధం అధికారికంగా జీ–2గా మారకపోయినా, అనధికారికంగా అదే పాత్ర నిర్వహిస్తుంది.టంకశాల అశోక్‌వ్యాసకర్త సీనియర్‌ సంపాదకుడు

పశ్చిమాసియాలో ఉద్రిక్తతల ముగింపు కోసం దౌత్య ప్రయత్నాలు కొనసాగుతున్నప్పటికీ.. పరిస్థితులు మాత్రం మరోసారి ఉద్రిక్తంగా మారుతున్నాయి. హర్ముజ్‌ జలసంధిని తిరిగి తెరిచేందుకు ఇరాన్‌ ప్రతిపాదించిన ఏడు రోజుల రోడ్‌మ్యాప్‌ను అమెరికా తిరస్కరించడంతో.. అవసరమైతే భయానక యుద్ధాన్ని సైతం ఎదుర్కొనేందుకు తమ దేశం పూర్తిగా సిద్ధంగా ఉందని ఇరాన్‌ అంటోంది. ఈసారి యుద్ధం మొదలైతే అదీ ఎవరూ ఊహించని స్థాయిలో భీకరంగా మారొచ్చు అని ఇరాన్‌ విదేశాంగ మంత్రి అబ్బాస్‌ అరాఘ్చీ స్పష్టం చేశారు. యుద్ధం పునఃప్రారంభమైతే అది ‘డూమ్స్‌డే వార్‌’(Doomsday War)ప్రళయం తరహా) స్థాయికి చేరినా ఎదుర్కొనేందుకు సిద్ధం అని అమెరికాను హెచ్చరించారాయన. అదే సమయంలో దౌత్యానికి తలుపులు మాత్రం మూసివేయలేదని చెప్పారు.హర్ముజ్‌ జలసంధిని తిరిగి తెరవడం, యుద్ధాన్ని ముగించే దిశగా ఇరాన్‌ ఏడు రోజుల ప్రణాళికను ప్రతిపాదించింది. అయితే ఈ ప్రతిపాదనను అమెరికా తిరస్కరించింది. ఇరాన్‌ తమను ఫ్రీజ్‌ చేసిన బిలియన్ల డాలర్ల నిధులను విడుదల చేయాలని, ఆంక్షలను ఎత్తివేయాలని కోరిందని.. అందుకు తాము సిద్ధంగా లేమని ఐక్యరాజ్యసమితిలో అమెరికా రాయబారి మైక్‌ వాల్ట్జ్‌ తెలిపారు. ఇవి కేవలం అమెరికా విధించిన ఆంక్షలు కాదని, ప్రపంచవ్యాప్తంగా అమల్లో ఉన్న ఆంక్షలని ఆయన పేర్కొన్నారు.‘యుద్ధం త్వరలో ముగుస్తుంది’.. ట్రంప్‌మరోవైపు.. ఆరాఘ్ఛి వార్నింగ్‌ వెలువడ్డ కాసేపటికే అమెరికా అధ్యక్షుడు డొనాల్డ్‌ ట్రంప్‌ కీలక ప్రకటన చేశారు. ఈ వారంలో ఇరాన్‌తో మరిన్ని చర్చలు జరిగే అవకాశం ఉందని చెప్పారు. యుద్ధంలో అమెరికా ‘త్వరలోనే విజయం సాధిస్తుంది’ అని ఆయన పేర్కొన్నారు. అయితే ఇరాన్‌ ప్రతిపాదనను తిరస్కరించినప్పటికీ దౌత్య మార్గాలు పూర్తిగా మూసుకుపోలేదని నిపుణులు చెబుతున్నారు.న్యూయార్క్‌లో ఐరాస సర్వసభ్య సమావేశాల సందర్భంగా ఇరాన్‌ ప్రతినిధులతో దౌత్య ప్రయత్నాలు కొనసాగుతున్నాయని సెంటర్‌ ఫర్‌ మిడిల్‌ ఈస్ట్‌ స్ట్రాటజిక్‌ స్టడీస్‌ సీనియర్‌ పరిశోధకుడు అబ్బాస్‌ అస్లానీ తెలిపారు. మధ్యవర్తుల ద్వారా అమెరికా అధికారిక స్పందన కోసం ఇరాన్‌ ఎదురుచూస్తోందని చెప్పారు. ఇరుదేశాలు తమకు ఉన్న ప్రధాన ఒత్తిడి సాధనాలను ముందుగా ఎవరు వదులుకుంటారన్నదే ఇప్పుడు కీలకంగా మారిందని ఆయన విశ్లేషించారు.డ్రోన్‌ స్వాధీనం చేసుకున్నామన్న ఇరాన్‌ ప్రకటనపై..హర్ముజ్‌ జలసంధిలో అమెరికాకు చెందిన అధునాతన అండర్‌వాటర్‌ డ్రోన్‌ను ఇరాన్‌ సైన్యం స్వాధీనం చేసుకుందన్న వార్తలు కూడా ఉద్రిక్తతను పెంచాయి. అయితే ఇరాన్‌ చేసిన ఈ ప్రకటనను అమెరికా సైన్యం ఖండించింది. డ్రోన్‌ తమ ఆధీనంలోకి వెళ్లిందన్న వాదనలో వాస్తవం లేదని స్పష్టం చేసింది. ఇదిలా ఉండగా.. ఇరాన్‌పై అమెరికా దాడులకు ఉపయోగిస్తున్న బ్రిటన్‌లోని ఓ వైమానిక స్థావరం సమీపంలో ఐదుగురిని పోలీసులు అరెస్టు చేశారు. పేలుడు పదార్థాలు, ఉగ్రవాదానికి సంబంధించిన నేరాల అనుమానంతో వారిని అదుపులోకి తీసుకున్నట్లు అధికారులు తెలిపారు. వాళ్లు ఇరాన్‌ పౌరులని తెలుస్తోంది.నస్రల్లా హంతకుల్ని శిక్షించాల్సిందేమరోవైపు హెజ్బొల్లా నేత హసన్‌ నస్రల్లా హత్యకు రెండేళ్లు పూర్తైన సందర్భంగా ఇరాన్‌ మరోసారి ఇజ్రాయెల్‌పై తీవ్ర ఆరోపణలు చేసింది. నస్రల్లా హత్యను ‘క్షమించరాని నేరం’గా అభివర్ణించిన ఇరాన్‌ విదేశాంగ శాఖ.. బాధ్యులను గుర్తించి చట్టపరంగా శిక్షించాలని ప్రపంచ దేశాలను కోరింది. 2024 సెప్టెంబర్‌ 27న బీరుట్‌లోని దక్షిణ శివార్లపై ఇజ్రాయెల్‌ జరిపిన వైమానిక దాడిలో నస్రల్లా మరణించిన విషయం తెలిసిందే.మొత్తంగా హర్ముజ్‌ జలసంధి తెరవడం, ఆంక్షల ఎత్తివేత, అణు కార్యక్రమం వంటి అంశాలపై అమెరికా–ఇరాన్‌ మధ్య ప్రతిష్టంభన కొనసాగుతోంది. ఒకవైపు చర్చలకు అవకాశం ఉందన్న సంకేతాలు కనిపిస్తుండగా.. మరోవైపు యుద్ధం మళ్లీ మొదలైతే పూర్తి స్థాయిలో సిద్ధంగా ఉన్నామని ఇరాన్‌ హెచ్చరించడం పరిస్థితి తీవ్రతను చాటుతోంది.ఇదీ చదవండి: భారత్‌-కెనడా బంధంలో కీలక ‘మలుపు’!

మొదట దాడి.. ఆ తర్వాత ఆస్పత్రికి తరలింపు.. అక్కడ కూడా బాంబుల మోత.. ఇరాన్‌ సుప్రీం లీడర్‌ మోజ్తబా ఖమేనీ చుట్టూ ఇప్పుడు మరో సంచలన కథనం తెరపైకి వచ్చింది. అమెరికా, ఇజ్రాయెల్‌ దాడుల్లో గాయపడిన ఆయనను టెహ్రాన్‌లోని ఆస్పత్రికి తరలించగా.. ఆ తర్వాత నగరంలోని మూడు ఆస్పత్రులపై దాడులు జరిగాయని ఇరాన్‌ అసెంబ్లీ ఆఫ్‌ ఎక్స్‌పర్ట్స్‌ సభ్యుడు మొహ్సెన్‌ హెయ్‌దారీ చెప్పినట్లు ‘న్యూయార్క్‌ పోస్ట్‌’ కథనం వెల్లడించింది. మూడో ఆస్పత్రి శిథిలాల నుంచి మోజ్తబా ఖమేనీని బయటకు తీసి, అనంతరం గుర్తుతెలియని ప్రాంతానికి తరలించినట్లు ఆయన పేర్కొన్నారు.ఇక్కడే అసలు ట్విస్ట్‌ మొదలైంది. శిథిలాల నుంచి బయటపడిన తర్వాత మోజ్తబా ఖమేనీ ఎక్కడ ఉన్నారన్నది స్పష్టంగా తెలియడం లేదని హెయ్‌దారీ చెప్పినట్లు నివేదిక పేర్కొంది. ఆయన బహిరంగంగా కనిపించకపోవడంతో ఆరోగ్య పరిస్థితిపై మళ్లీ అనేక ఊహాగానాలు మొదలయ్యాయి. అయితే, మోజ్తబా ఖమేనీ ఆరోగ్యంపై ఇప్పటికే భిన్న కథనాలు ఉన్నాయి. అమెరికా వర్గాల సమాచారాన్ని ఉటంకిస్తూ కొన్ని నివేదికలు ఆయన తీవ్రంగా గాయపడ్డారని పేర్కొన్నాయి. మరోవైపు ఇరాన్‌ అధ్యక్షుడు మసౌద్‌ పెజెష్కియాన్‌ మాత్రం ఆయన పూర్తిగా ఆరోగ్యంగా ఉన్నారని చెబుతున్నారు. మోజ్తబా ఖమేనీతో తాను సుదీర్ఘంగా సమావేశమై చర్చలు జరిపినట్లు పెజెష్కియాన్‌ వెల్లడించారు.అంటే.. ఒకవైపు ఆస్పత్రి శిథిలాల నుంచి బయటకు తీసినట్లు ఓ ఇరాన్‌ అధికారి చెబుతున్న వాదన.. మరోవైపు ఆయన ఆరోగ్యంగా ఉన్నారని ఇరాన్‌ అధ్యక్షుడి ప్రకటన. దీంతో అసలు మోజ్తబా ఖమేనీ ప్రస్తుత పరిస్థితి ఏమిటన్నది కీలక ప్రశ్నగా మారింది. ఇదిలా ఉండగా.. మోజ్తబా ఖమేనీ సుప్రీం లీడర్‌గా ఎంపికైన విధానంపైనా హెయ్‌దారీ కీలక వివరాలు వెల్లడించినట్లు నివేదిక పేర్కొంది. మార్చి 8న అసెంబ్లీ ఆఫ్‌ ఎక్స్‌పర్ట్స్‌ సమావేశంలో ఆయన పేరును ప్రతిపాదించినట్లు చెప్పారు. ఇదే సమయంలో ఖోమ్‌లోని అసెంబ్లీ సెక్రటేరియట్‌పై దాడి జరిగిందని, ఎనిమిది మంది మరణించారని ఆయన ఆరోపించినట్లు సమాచారం.దాడిలో ఎంపికకు సంబంధించిన పత్రాలు ధ్వంసమైన నేపథ్యంలో సభ్యులు తమ ఓట్లను కాగితాలపై నమోదు చేసి, అనంతరం రహస్య గదిలో సమావేశమైనట్లు ఆయన చెప్పినట్లు నివేదిక పేర్కొంది. మొత్తం 59 మంది సభ్యుల్లో 50 మంది మోజ్తబా ఖమేనీకి మద్దతు పలికినట్లు, ఎనిమిది ఓట్లు అయతుల్లా అలీరెజా అరాఫీకి వచ్చినట్లు, ఒకరు ఓటింగ్‌కు దూరంగా ఉన్నట్లు సమాచారం.ఇదీ చదవండి: మేమంతా చనిపోయే వాళ్లం: నెతన్యాహు సంచలన వ్యాఖ్యలు

అమెరికా అధ్యక్షుడు డొనాల్డ్ ట్రంప్ తమ శాంతి ప్రతిపాదనను తిరస్కరించారన్న వార్తల నేపథ్యంలో ఇరాన్ మరోసారి కీలక ప్రకటన చేసింది. అమెరికా, ఇజ్రాయెల్‌తో నెలకొన్న వివాదానికి దౌత్యమే ఏకైక పరిష్కారమని ఇరాన్ స్పష్టం చేసింది. హార్ముజ్ జలసంధిని తిరిగి తెరవాలంటే తమ షరతులు నెరవేర్చాల్సిందేనని ఇరాన్ విదేశాంగ మంత్రి అబ్బాస్ అరాఘ్చీ తేల్చిచెప్పారు.హార్ముజ్ జలసంధిని తెరవడానికి తమ షరతులు స్పష్టంగా ఉన్నాయని అరాఘ్చీ చెప్పుకొచ్చారు. తమ ప్రతిపాదనపై అమెరికా తిరస్కరణను మధ్యవర్తులు అధికారికంగా తమకు తెలియజేయలేదని చెప్పారు. మధ్యవర్తుల నుంచి తుది సమాచారం కోసం ఎదురుచూస్తున్నామని.. ఆ తర్వాతే తదుపరి నిర్ణయం తీసుకుంటామని వెల్లడించారు. ఈ వారం న్యూయార్క్‌లో జరిగిన ఐక్యరాజ్యసమితి సర్వసభ్య సమావేశం సందర్భంగా ఇరాన్ తన శాంతి ప్రతిపాదనను అమెరికాకు పంపింది. ఖతార్ మధ్యవర్తిత్వంతో ఈ ప్రతిపాదనను వాషింగ్టన్‌కు చేరవేసింది. ఇందులో హార్ముజ్ జలసంధిని ఏడు రోజుల వ్యవధిలో తిరిగి తెరవడం, ప్రాంతీయంగా జరుగుతున్న పోరాటానికి విరామం ఇవ్వడం, ఆ తర్వాత విస్తృత చర్చలు జరపడం వంటి అంశాలు ఉన్నాయి.అయితే ఈ ప్రతిపాదనను తాను తిరస్కరించినట్లు ట్రంప్ శనివారం వెల్లడించారు. ఇరాన్ తీవ్ర ఒత్తిడిలో ఉండటం వల్లే వెంటనే హార్ముజ్‌ను తెరవడానికి ఒప్పందం కోరుతోందని ఆయన వ్యాఖ్యానించారు. మరోవైపు ఇరాన్ తన అణు కార్యక్రమంపై కూడా వెనక్కి తగ్గే ప్రసక్తే లేదన్న సంకేతాలు ఇచ్చింది. అమెరికా ప్రతిపాదనను అంగీకరించినా.. యురేనియం శుద్ధి చేసే హక్కుపై, అధిక శుద్ధి చేసిన యురేనియాన్ని దేశం నుంచి తరలించడంపై తాము రాజీ పడబోమని ఇరాన్ అధికార వర్గాలు తెలిపాయి.ఇరాన్ అధ్యక్షుడు మసౌద్ పెజెష్కియాన్ మాత్రం అణు కార్యక్రమంతో పాటు ఇతర అంశాలపై చర్చలకు సిద్ధంగా ఉన్నామని చెప్పారు. అయితే బెదిరింపులు, ఒత్తిళ్లకు తలొగ్గేది లేదని స్పష్టం చేశారు. తమ దేశం యుద్ధాన్ని కోరుకోవడం లేదని.. ఒత్తిళ్లు, బెదిరింపులు, దాడుల నుంచి తమను తాము రక్షించుకుంటామని తెలిపారు.ప్రపంచ చమురు సరఫరాపై ప్రభావంహార్ముజ్ జలసంధిపై నెలకొన్న ప్రతిష్టంభన ప్రపంచ ఇంధన సరఫరాలపై ఆందోళనలను పెంచుతోంది. ప్రపంచంలోని కీలక సముద్ర మార్గాల్లో ఒకటైన ఈ జలసంధి ద్వారా చమురు రవాణా గణనీయంగా తగ్గినట్లు నివేదికలు పేర్కొంటున్నాయి. దీంతో అంతర్జాతీయ ఇంధన మార్కెట్లపై ప్రభావం పడే అవకాశాలపై ఆందోళనలు వ్యక్తమవుతున్నాయి. ఇరాన్ ఇప్పటికే హార్ముజ్ అంశంపై సౌదీ అరేబియాతోనూ చర్చలు జరిపింది. మరోవైపు అమెరికా-ఇజ్రాయెల్ దాడులకు ఇరాన్, దాని మిత్ర బలగాలు ప్రతిదాడులతో సమాధానం ఇస్తున్నాయి. దీంతో హార్ముజ్ అంశం కేవలం ఇరాన్-అమెరికా మధ్య వివాదంగా కాకుండా.. మొత్తం పశ్చిమాసియా ప్రాంతంపై ప్రభావం చూపే అంశంగా మారింది.ఇదీ చదవండి: భారత్‌కు పాకిస్తాన్‌ సంచలన హెచ్చరిక

వాషింగ్టన్‌: మీడియా సంస్థలతో అమెరికా అధ్యక్షుడి గిల్లికజ్జాలు కొనసాగుతూనే ఉన్నాయి. సీఎన్‌ఎన్, ఎంఎస్‌ నౌ, పొలిటికో ఛానళ్లు వైట్‌హౌస్‌లో ప్రవేశించకుండా విధించిన నిషేధం న్యాయస్థానాల జోక్యంతో తొలగిపోగా.. తాజాగా ట్రంప్‌ సీఎన్‌ఎన్‌ ప్రతినిధులు తన అధికారిక విమానం ‘ఎయిర్‌ ఫోర్స్‌ వన్‌’లోకి ఎక్కకుండా అడ్డుకున్నారు. అమెరికా అధ్యక్షుడి కార్యక్రమాల చిత్రీకరణ ప్రసారానికి సంబంధించి ఆ దేశ టీవీ ఛానళ్లు ఒక ఏర్పాటు చేసుకున్నాయి. దీన్ని వైట్‌హౌస్‌ టీవీ ప్రెస్‌ పూల్‌ అని పిలుస్తూంటారు. సీఎన్‌ఎన్, ఏబీసీ, సీబీఎస్, ఎన్‌బీసీ, ఫాక్స్‌ న్యూస్‌ ఛానళ్లలో ఒకటి అధ్యక్షుడి కార్యక్రమాలను చిత్రీకరిస్తే.. మిగిలిన సంస్థలు ఆ వీడియో ఫీడ్‌ను వాడుకుంటూంటాయి. ఇది వంతులవారీగా జరుగుతూంటుంది. దీని ప్రకారం శనివారం టెన్నసీలోని నాక్స్‌విల్లేలో జరగాల్సిన ట్రంప్‌ కార్యక్రమాలను సీఎన్‌ఎన్‌ చిత్రీకరించాల్సి ఉంది. అయితే ప్రభుత్వ అధికారులు ఎయిర్‌ఫోర్స్‌ వన్‌లో సీఎన్‌ఎన్‌ ప్రతినిధులు లేకుండానే వెళ్లిపోయారు. సీఎన్‌ఎన్‌ స్థానంలో వైట్‌హౌస్‌ ప్రెస్‌ పూల్‌లో భాగం కానీ రియల్‌ అమెరికాస్‌ వాయిస్‌ న్యూస్‌ ట్రంప్‌ కార్యక్రమాలను ప్రసారం చేసింది. ఎయిర్‌ఫోర్స్‌ వన్‌లో సీఎన్‌ఎన్‌ ప్రవేశాన్ని నిషేధించారన్న వార్తను మొట్టమొదట వాషింగ్టన్‌ పోస్టు బట్టబయలు చేసింది.

ఇరాన్‌–అమెరికా యుద్ధానికి తెరపడుతుందన్న ఆశలు మళ్లీ ఆవిరవుతున్నాయా? హర్ముజ్‌ జలసంధిని ఏడు రోజుల్లో తెరిచి.. యుద్ధాన్ని నిలిపివేసేందుకు ఇరాన్‌ ప్రతిపాదించిన ప్లాన్‌ను అమెరికా అధ్యక్షుడు డొనాల్డ్‌ ట్రంప్‌ తిరస్కరించాడనే కథనాలు వెలువడుతున్నాయి. అయితే ఇదే నిజమైతే.. ఇప్పుడు ఇరాన్‌ తదుపరి అడుగు ఏంటి? హర్ముజ్‌ పరిస్థితి ఎలా మారుతుంది? యుద్ధం మళ్లీ తీవ్ర రూపం దాల్చుతుందా?.. ఐక్యరాజ్యసమితి జనరల్‌ అసెంబ్లీ వేదికగా ఇరాన్‌ తన ప్రతిపాదనను అమెరికా ముందుంచింది. ఖతార్‌ మధ్యవర్తిత్వంతో ఈ ప్రతిపాదనను వాషింగ్టన్‌కు పంపినట్లు ఇరాన్‌ విదేశాంగ మంత్రి అబ్బాస్‌ అరాఘ్చీ తెలిపారు. అమెరికా అంగీకరిస్తే ఏడు రోజుల కౌంట్‌డౌన్‌ మొదలై.. హర్ముజ్‌ జలసంధిలో సాధారణ నౌకాయానం పునరుద్ధరించవచ్చని చెప్పారు. అదే సమయంలో ప్రాంతీయంగా అన్ని రంగాల్లో పోరాటాన్ని నిలిపివేసి విస్తృత చర్చలకు వెళ్లొచ్చని ప్రతిపాదించారు.అయితే ఇందుకు ప్రతిగా అమెరికా ఇరాన్‌ పోర్టులపై దిగ్బంధాన్ని ఎత్తివేయాలని, స్తంభింపజేసిన ఇరాన్‌ నిధులను విడుదల చేయాలని, చమురు ఆంక్షలను తొలగించాలని ఇరాన్‌ కోరుతోంది. అణు కార్యక్రమంపై మాత్రం తమ హక్కుల్లో ఎలాంటి రాయితీ ఇవ్వబోమని ఇరాన్‌ వర్గాలు స్పష్టం చేశాయి. ముఖ్యంగా యురేనియం శుద్ధి విషయంలో రాజీ ఉండదని తెలిపాయి.ట్రంప్‌ తిరస్కరిస్తే.. తర్వాత?‘వాల్‌స్ట్రీట్‌ జర్నల్‌’ కథనం ప్రకారం.. ఇరాన్‌ తన డిమాండ్లను అంగీకరిస్తుందన్న నమ్మకం ట్రంప్‌కు లేదని, తిరిగి బాంబుల దాడి చేసే అవకాశం ఉందని ఆయన తన సిబ్బందితో చెప్పినట్లు అమెరికా అధికారులు పేర్కొన్నారు. మరో నివేదిక ప్రకారం.. నవంబర్‌లో జరిగే అమెరికా మధ్యంతర ఎన్నికల తర్వాత బాంబుల దాడులు మళ్లీ ప్రారంభమయ్యే అవకాశాన్ని ట్రంప్‌ అంచనా వేస్తున్నట్లు పేర్కొంది. గతంలోనూ చర్చల ప్రయత్నాలు విఫలమై.. కొంతకాలం కాల్పుల విరమణ తర్వాత మళ్లీ దాడులు జరిగిన నేపథ్యంలో తాజా పరిణామం ప్రాధాన్యం సంతరించుకుంది.హర్ముజ్‌ సంగతేంటి?ఇరాన్‌ ప్రతిపాదనలో కీలక అంశం హర్ముజ్‌ జలసంధి. ప్రపంచంలోని అత్యంత కీలకమైన చమురు రవాణా మార్గాల్లో ఒకటైన ఈ జలసంధి ద్వారా రవాణా తీవ్రంగా దెబ్బతినడంతో ఇప్పటికే ప్రపంచ ఇంధన సరఫరాపై ప్రభావం పడింది. అమెరికా–ఇరాన్‌ మధ్య ఒప్పందం కుదరకపోతే హర్ముజ్‌ పరిస్థితి మరింత కాలం అనిశ్చితంగానే కొనసాగే అవకాశం ఉంది. ఇరాన్‌ మాత్రం అమెరికా తమపై సైనిక ఒత్తిడి తగ్గించి, పోర్టుల దిగ్బంధాన్ని ఎత్తివేస్తే ఏడు రోజుల్లో జలసంధిని తిరిగి తెరవడానికి సిద్ధంగా ఉన్నామని చెబుతోంది. అంటే ఇప్పుడు బంతి అమెరికా కోర్టులోనే ఉందన్నది ఇరాన్‌ వాదన.ఇరాన్‌ ముందున్న దారులేంటి?అమెరికా తన ప్రతిపాదనను అంగీకరించకపోతే ఇరాన్‌ ముందున్న మార్గాలు ప్రధానంగా మూడు. మొదటిది.. దౌత్య మార్గాన్ని కొనసాగిస్తూ ఖతార్‌, ఒమన్‌ వంటి మధ్యవర్తుల ద్వారా చర్చలను ముందుకు తీసుకెళ్లడం. రెండోది.. హర్ముజ్‌ జలసంధిపై తన నియంత్రణను కొనసాగిస్తూ అమెరికాపై ఒత్తిడి పెంచడం. అయితే ఇది ప్రపంచ ఇంధన సరఫరాపై మరింత ప్రభావం చూపే అవకాశం ఉండటంతో ఇరాన్‌కూ ఆర్థిక, దౌత్యపరమైన ఒత్తిళ్లు పెరగొచ్చు. మూడోది.. అమెరికా సైనిక చర్యలకు ప్రతిస్పందిస్తూ ప్రాంతీయంగా తన మిత్ర బలగాల ద్వారా ఒత్తిడి పెంచడం. కానీ ఈ మార్గం యుద్ధం మరింత విస్తరించే ప్రమాదాన్ని పెంచుతుంది. మరోవైపు ఏడు రోజుల ప్రతిపాదనను ముందుకు తెచ్చిన ఇరాన్‌.. హర్ముజ్‌ను తిరిగి తెరవడం, కాల్పుల విరమణ, తదుపరి అణు చర్చలను ఒకే ప్యాకేజీగా మలచాలని చూస్తున్నట్లు కనిపిస్తోంది. అందువల్ల అమెరికా స్పందన ఆధారంగా ఈ మూడు మార్గాల్లో ఏది ముందుకు వస్తుందన్నది ఇప్పుడు కీలకంగా మారింది.మరోవైపు సౌదీపై హౌతీల దాడులుఇదిలా ఉండగా.. ఇరాన్‌ మద్దతుగల యెమెన్‌ హౌతీలు సౌదీ అరేబియాపై దాడులు కొనసాగిస్తున్నారు. రియాద్‌ వైపు వచ్చిన రెండు డ్రోన్లను, ఖమీస్‌ ముషైత్‌ వైపు ప్రయోగించిన బాలిస్టిక్‌ క్షిపణిని అడ్డుకున్నట్లు సౌదీ నేతృత్వంలోని సంకీర్ణం తెలిపింది. ఈ దాడులు కొనసాగుతున్న నేపథ్యంలో సౌదీ అరేబియా భద్రతకు మద్దతుగా పాకిస్థాన్‌, టర్కీ రక్షణాధికారులు రియాద్‌లో సమావేశమై భద్రతా పరిస్థితిపై చర్చించారు.ఇరాన్‌ ప్రతిపాదనకు అమెరికా స్పందన ఎలా ఉండబోతోంది? ట్రంప్‌ వైఖరి నేపథ్యంలో హర్ముజ్‌ జలసంధి తిరిగి తెరుచుకుంటుందా? లేదంటే పశ్చిమాసియాలో పోరాటం మళ్లీ ముదురుతుందా? అన్నదే ఇప్పుడు కీలకంగా మారింది. ఇరాన్‌ ఏడు రోజుల గడువుతో శాంతి ప్రతిపాదనను ముందుకు తెచ్చిన నేపథ్యంలో.. తదుపరి నిర్ణయం అమెరికా చేతుల్లోనే ఉందనే సంకేతాలు కనిపిస్తున్నాయి.ఇదీ చదవండి: ట్రంపరితనంతో మళ్లీ బాంబుల మోతేనా?

అమెరికా-ఇరాన్‌ మధ్య యుద్ధానికి తెరదించేలా ఇరాన్‌ చేసిన కీలక ప్రతిపాదనకు అమెరికా అధ్యక్షుడు డొనాల్డ్‌ ట్రంప్‌ అంగీకరించలేదని ది వాల్‌ స్ట్రీట్‌ జర్నల్‌ నివేదించింది. ఏడు రోజుల్లో హార్ముజ్‌ జలసంధిని తిరిగి తెరవడం, కాల్పుల విరమణకు వెళ్లడం వంటి ప్రతిపాదనను ఇరాన్‌ అమెరికా ముందు ఉంచగా.. ట్రంప్‌ దాన్ని తిరస్కరించినట్లు అమెరికా అధికారులను ఉటంకిస్తూ కథనం వెల్లడించింది.ఇదే సమయంలో నవంబర్‌లో జరిగే అమెరికా మధ్యంతర ఎన్నికల తర్వాత ఇరాన్‌పై అమెరికా మళ్లీ బాంబు దాడులు ప్రారంభించే అవకాశం ఉందని ట్రంప్‌ తన సన్నిహితులకు చెప్పినట్లు సదరు కథనంలో నివేదించింది. అయితే ఇరాన్‌ ప్రతిపాదనపై అమెరికా నుంచి అధికారిక స్పందన ఇంకా వెలువడలేదని పేర్కొంది.ఇరాన్‌ ప్రతిపాదన ఏంటి?ఐక్యరాజ్యసమితి సర్వసభ్య సమావేశం సందర్భంగా ఇరాన్‌ విదేశాంగ మంత్రి అబ్బాస్‌ అరాఘ్చీ ఈ ప్రతిపాదనను వెల్లడించారు. ఖతార్‌ మధ్యవర్తుల ద్వారా అమెరికాకు తమ ప్రతిపాదనను పంపినట్లు తెలిపారు. అమెరికా కొన్ని షరతులను అంగీకరిస్తే ఏడు రోజుల్లో హార్ముజ్‌ జలసంధిని తిరిగి తెరిచి, సాధారణ నౌకా రాకపోకలను పునరుద్ధరిస్తామని చెప్పారు. ఇరాన్‌ షరతుల్లో ప్రధానంగా అమెరికా నౌకాదళ దిగ్బంధాన్ని ఎత్తివేయడం, ఇరాన్‌ చమురు ఎగుమతులపై ఆంక్షలను సడలించడం, మధ్యప్రాచ్యవ్యాప్తంగా కాల్పుల విరమణ పాటించడం ఉన్నాయి. లెబనాన్‌లోనూ శత్రుత్వాన్ని నిలిపివేయాలని ఇరాన్‌ కోరింది. దీనికి ప్రతిగా హార్ముజ్‌ను తెరిచి, అమెరికాతో అణు కార్యక్రమంపై చర్చలను తిరిగి ప్రారంభించేందుకు సిద్ధమని చెప్పుకొచ్చారు.ట్రంప్‌ వైఖరి ఏంటి?ఇరాన్‌ ప్రతిపాదనతో దౌత్యపరమైన చర్చలకు అవకాశం కనిపించినప్పటికీ, ట్రంప్‌ మాత్రం ఒప్పందంపై అనుమానంతో ఉన్నట్లు వాల్‌స్ట్రీట్‌ కథనం పేర్కొంది. ఇరాన్‌ తన డిమాండ్లను పూర్తిగా అమలు చేస్తుందన్న నమ్మకం ట్రంప్‌కు లేదని అమెరికా అధికారులను ఉటంకించింది. మరోవైపు అమెరికా, ఇరాన్‌ మధ్య మధ్యవర్తుల ద్వారా సానుకూల, నిర్మాణాత్మక చర్చలు జరుగుతున్నాయని ఓ అమెరికా అధికారి రాయిటర్స్‌కు తెలిపారు. అందువల్ల ప్రస్తుతం పరిస్థితి ఒకవైపు ఇరాన్‌ ఏడు రోజుల్లో హార్ముజ్‌ను తెరిచే ప్రతిపాదన.. మరోవైపు ట్రంప్‌ దానిపై విముఖతగా కనిపిస్తోంది. ఇరాన్‌ మాత్రం అమెరికా అధికారిక స్పందన కోసం ఎదురుచూస్తోంది.ఇదీ చదవండి: భారత్‌కు పాక్‌ ప్రధాని సంచలన హెచ్చరిక

ఆర్థిక రంగం మొదలు కృత్రిమ మేధ (ఏఐ) వరకూ అన్నిటా పరస్పరం హోరాహోరీ తలపడుతున్న బలమైన ప్రత్యర్థులు అమెరికా, చైనాలు నాలుగు నెలల వ్యవధిలో రెండోసారి కరచాలనం చేసుకున్నాయి. మొన్న మేలో అమెరికా అధ్యక్షుడు డోనాల్డ్‌ట్రంప్‌ చైనాలో పర్యటించగా... మూడు రోజుల దౌత్య పర్యటన కోసం చైనా అధ్యక్షుడు షీ జిన్‌పింగ్‌ బుధవారం వాషింగ్టన్‌ వచ్చారు. ఆయనకు రెండురోజులూ ఘనసత్కారాలే దక్కాయి. కెమెరాల ఎదుట అధినేతలిద్దరూ చిరునవ్వులు చిందించటం కూడా చూడముచ్చట గానే ఉంది.కానీ రెండు దేశాల మధ్యా ఉన్న సమస్యలు గానీ,వాటి కారణంగా ఇప్పటికే పేరుకు పోయిన విభేదాలు గానీ చిన్నవేం కాదు. అవి సంక్లిష్టమైనవి, సామరస్య పరిష్కారానికి ఓపట్టాన లొంగనివి. 60వ దశకంలో నాటి రష్యా అధినేత నికితా కృశ్చేవ్‌ ప్రతిపాదించిన ‘మూడు శాంతుల’ ప్రతిపాదనలో ఒకటైన ‘శాంతియుత సహజీవనం’ సూత్రాన్ని గుర్తుకు తెచ్చేలా సంఘర్షణకన్నా సహకారమే ఇద్దరికీ లాభదాయకమని షీ జిన్‌పింగ్‌ పిలుపునిచ్చారు. అప్పట్లో కృశ్చేవ్‌కు రానట్టే జిన్‌పింగ్‌కు కూడా ట్రంప్‌నుంచి అనుకూల స్పందనేమీ రాలేదు. కానీ ఇరుపక్షాలూమరింత సమతూక వాణిజ్య సంబంధాలు నెలకొల్పుకోవటానికి కలిసి పనిచేస్తున్నాయని ట్రంప్‌ అన్నారు. ఎగుమతులు పెంచటానికీ, ఆర్థికాభివృద్ధి సాధించటానికీ చైనా ప్రభుత్వం అక్కడి తయారీ రంగ పరిశ్రమలకు భారీయెత్తున సబ్సిడీలిస్తోంది. దాంతో చవగ్గా కార్లు, సౌరశక్తి ప్యానెళ్లు, ఖనిజాలు, ఉక్కు, ఇతర రకాల సరుకులు పాశ్చాత్య మార్కెట్లను ముంచెత్తుతున్నాయి. ఈ వ్యూహం అమెరికానూ, పాశ్చాత్య దేశాలనూ తీవ్రంగా దెబ్బ తీస్తోంది. దీన్ని తగ్గించేందుకు తొలి ఏలుబడిలో ట్రంప్‌ చేసిన ప్రయత్నాలు కొంత వరకూ ఫలితాన్నిచ్చాయి. నిరుడు దీన్ని మరింత నియంత్రించేందుకు 25 శాతం అదనపు సుంకాలు విధించారు. వాటి కారణంగా సరుకుల వరద తగ్గిన మాట వాస్తవమే అయినా, దాదాపు 40 పాశ్చాత్య దేశాల మీదుగా ఆ వస్తువులు వెల్లువెత్తటం ట్రంప్‌కు తలనొప్పిగా మారింది. అంతర్జాతీయ నిబంధనలకు అనుగుణంగానే చైనా ఇదంతా చేస్తోంది. ఎవరెంతగా మొత్తుకుంటున్నా విదేశాలతో నిరుడు చైనా వాణిజ్య మిగులు లక్ష కోట్ల డాలర్ల పైమాటే. ఈమధ్యే అమెరికా మాజీ ఆర్థికమంత్రి జానెట్‌ ఎలెన్‌ అంతంతమాత్రంగా ఉన్న అమెరికా పారిశ్రామిక రంగం ‘చైనా షాక్‌’తో మరింత కుంగటం ఖాయమని చేసిన హెచ్చరిక వర్తమాన స్థితికి అద్దం పడుతోంది. చైనా సరుకులపై వ్యామోహంతగ్గించుకోమంటూ జనానికి చేసే హితబోధలేమీ పనిచేయటం లేదు. ‘మాగా’ పేరు చెప్పి ఆవేశంతో ఊగిపోయేవారు సైతం ఈ విషయంలో ట్రంప్‌ మాటల్ని బేఖాతరు చేస్తున్నారు. దాంతో దిక్కుతోచని స్థితిలో చైనాపై గత నెలలో 12.5 శాతం అదనపు సుంకాలు విధించారు. కానీ వాణిజ్య ఒప్పందంపై చర్చలు జరుపుకోవాలన్న అవగాహన కుదిరాక గత నెలలో కొన్ని వస్తువులకు దీన్నుంచి మినహాయింపునిచ్చారు. నవంబర్‌తో ముగియాల్సిన ఆ వెసులుబాటును తాజాగా వచ్చే జనవరి 10 వరకూ పొడిగించారు. అమెరికాతో సంఘర్షణ ముదిరితే జరిగే పర్యవసానాలేమిటో చైనాకు తెలియంది కాదు. అందుకే అది ద్విముఖ వ్యూహం అనుసరిస్తోంది. సుంకాలవల్ల అమెరికాలో కోల్పోయే నష్టాన్ని యూరోప్‌ దేశాల్లో భర్తీచేసుకుంటోంది. అలాగే తమవల్ల నష్టపోయే దేశాల్లో పరిశ్రమలు స్థాపిస్తామని, పెట్టుబడులు పెడతామని ప్రతిపాదిస్తోంది. ఆ దేశాల్లో భారీయెత్తున ఉద్యోగావకాశాలొస్తాయని ఊరిస్తోంది. ఈ వంకనే ప్రపంచాన్ని మభ్యపెట్టి నిలువు దోపిడీచేసిన చరిత్రగల అమెరికా, యూరోప్‌ దేశాలు వీటిని అంత తేలిగ్గాఅంగీకరిస్తాయా? ఈ విషయమై చైనాతో ఈయూ వచ్చేనెలలో చర్చించబోతోంది. కానీ ఫలితం ఉంటుందన్న ఆశ మాత్రం లేదు. అమెరికా–చైనా ఘర్షణలు ముదిరితే బాగుండు నని అవి కోరుకుంటున్నాయి. ఆ మాటెలా వున్నా ట్రంప్, జిన్‌పింగ్‌లిద్దరూ చైనాలోనవంబర్‌లో జరిగే ఆసియా పసిఫిక్‌ ఎకనామిక్‌ ఫోరం, డిసెంబర్‌లో అమెరికాలో జరిగే జీ20 శిఖరాగ్ర సదస్సుల సందర్భంగా కలుసుకోబోతున్నారు. అప్పటికల్లా వాణిజ్య సమస్య ఉపశమించాలని రెండు దేశాలకూ కోరికైతే ఉంది. కానీ పరస్పర విరుద్ధ శక్తుల మధ్య అదంత సులభం కాదని చరిత్ర చెబుతోంది.

ఐక్యరాజ్య సమితి (ఐరాస) సర్వ ప్రతి నిధి సభలో అమెరికా అధ్యక్షుడు డోనాల్డ్‌ ట్రంప్‌ సెప్టెంబర్‌ 22న ఒక సంచలన ప్రకటన చేశారు. ఆ వేదికపై సాగే ప్రసంగాల ప్రమాణాల ప్రకారం చూసినా కూడా అది అసాధారణమైనదే. ఇరాన్‌తో ఫిబ్రవరిలో మొదలైన యుద్ధం గురించి అందరూ అనుకున్నట్లు గానే ఆయన ప్రస్తావించారు. ఒప్పందం కుదుర్చుకుంటే పునర్నిర్మాణానికి తెహ్రాన్‌కు అవకాశం చిక్కుతుంది; లేకపోతే ‘నన్ను ఇరాన్‌ను సర్వనాశనం చేయమంటారా? ప్రజల ప్రాణాలు హరించే, దేశాలను ధ్వంసం చేసే అవకాశం దానికి ఎన్న టికీ ఇవ్వకుండా వేగంగా ఆ పనిని పూర్తి చేసేయమంటారా?’ అని ట్రంప్‌ ప్రశ్నించారు. ‘బతికి బట్ట కట్టనివ్వకుండా దాన్ని నరకంలోని నెట్టేయమంటారా?’ అని కూడా హూంకరించారు. ‘అణ్వస్త్రం’ అనే మాటను ట్రంప్‌ నేరుగా చెప్పకపోయి ఉండవచ్చుకానీ, ఇరాన్‌ను రూపుమాపుతామని ఆయన చేసిన హెచ్చరిక అసాధారణమైంది. ఇరాన్‌ తప్పించి, మరి ఏ ఇతర దేశమూ ఇవెక్కడి అనాగరికపు మాటలని ప్రశ్నించకపోవడం మరింత నిర్ఘాంతపరచేదిగా ఉంది. ఆఫ్రికాకు ఇప్పటికీ స్థానం లేదా?ట్రంప్‌ హెచ్చరిక శూన్యంలోంచి పుట్టుకొచ్చింది కాదు. ఐరాస ప్రధాన కార్యదర్శి ఆంటోనియా గుటెరెస్‌ తన ప్రసంగంలో ఈ చర్చకు తెర లేపారు. దీన్ని ఆయన కడపటి ఉన్నత స్థాయి ప్రసంగంగా చెప్పుకోవచ్చు. ఆయన రెండవ విడత పదవీ కాలం ఈ డిసెంబర్‌ 31తో ముగుస్తోంది. ఆయన వాషింగ్టన్‌ పేరును నేరుగా ప్రస్తా వించలేదుకానీ, ‘మన ప్రపంచంలో అభిప్రాయభేదాలు తీవ్రతర మవుతున్నాయి. బీటలు అగాథంగా పరిణమిస్తున్నాయి’ అని అన్నారు. ప్రపంచం పాలనా వ్యవస్థలు ఇప్పటికీ ‘బలాధిక్య వాస్తవి తకతలను, చాలావరకు గతించిన శకానికి చెందిన ప్రయోజనాలను ప్రతిబింబిస్తున్నాయి’ అని వ్యాఖ్యానించారు. భద్రతా మండలిలో సంస్కరణలు తప్పనిసరిగా తేవాలనీ, అది ఏ ప్రపంచాన్ని శాసించాలనుకుంటోందో, దానికి తగ్గ రూపంలో ఎంతమాత్రం లేదనీ కూడా కుండ బద్దలుకొట్టారు. ఆయన సునిశితమైన రీతిలో లేవ నెత్తిని సంస్థాగత అంశానికి కరతాళ ధ్వనులతో ప్రతిస్పందన లభించింది. ‘ఆఫ్రికాయే ఇందుకు తిరుగులేని ఉదాహరణ. ఐరాస ఏర్పడి నపుడు, ఆఫ్రికాలో చాలాభాగం వలస పాలనలో ఉంది. ఆఫ్రికాకు నేటికీ మండలిలో శాశ్వత ప్రాతినిధ్యం లేదు. ఆఫ్రికాకు శాశ్వత స్థానాలు లేకుండా 21వ శతాబ్దపు భద్రతా మండలి కొనసాగడం అసమంజసం, నిర్హేతుకం’ అని ఆయన అన్నారు. ఐరాసను ‘గొప్ప, గొప్ప సామర్థ్యం’ ఉన్న సంస్థగా ట్రంప్‌ అభివర్ణించారు. ‘గ్లోబలిస్టు బ్యురోక్రాట్ల తీవ్ర వామపక్ష అజెండాను రుద్దే పనిని’ అది మానుకోవాలని అన్నారు. గాజా ప్రణాళిక–శాంతి బోర్డునకు ఆమోదం తెలిపినందుకు భద్రతా మండలికి కృతజ్ఞతలు తెలిపారు. అంతవరకు ఆయన ఐరాస స్థానంలో ఈ బోర్డు ‘పనిచేస్తే చేయవచ్చనే’ ధోరణిని ప్రధర్శించారు.ఫ్రాన్స్‌ సముచిత వైఖరిఫ్రాన్స్‌ అధ్యక్షుడు ఇమాన్యుయేల్‌ మాక్రాన్‌ పదవీకాలం 2027తో ముగుస్తుంది కనుక, ఈ తడవ మాక్రాన్‌ చేసిన ప్రసంగాన్ని ఆయన చివరి ఐరాస సర్వ ప్రతినిధి సభ ప్రసంగంగా భావించాలి. ఆయన హార్మూజ్‌ పైకన్నా గాజాపై ఎక్కువ దృష్టి పెట్టారు. ‘ఏదో శాంతి కుదిర్చినట్లుగా కొందరు డప్పు కొట్టుకుంటున్నారు. కానీ, ఆ శాంతి ఒక్క క్షణం కూడా మానవతావాద సాయం అందేందుకు తలుపులు తెరిచింది లేదు’ అని ట్రంప్‌ పేరును నేరుగా ప్రస్తావించ కుండానే చురకలంటించారు. దేశాలు ‘ఆటవిక న్యాయానికి తిరిగి వెళ్ళాలని కోరుకుంటున్నాయా లేక నాగరిక అంతర్జాతీయ సమాజం దిశగానా?’ అని అడిగారు. ఇజ్రాయెల్‌ భద్రతను ఒక సాకుగా చేసు కుని, పొరుగు దేశాల సార్వభౌమాధికారాన్ని ఉల్లంఘించేందుకు దాన్ని ఒక ‘లైసెన్సు’గా మలచుకోవడం ‘వినాశకర’ తప్పిదమవు తుందని ఆయన అన్నారు. భద్రతా మండలిలో శాశ్వత సభ్యత్వం ఉన్న దేశంగా ఫ్రాన్స్‌ బహుళపక్షీయతకు, మానవతా కారిడార్లకుఎంతో అవసరమైన మద్దతును అలా వ్యక్తపరచిందని చెప్పవచ్చు. శాశ్వత సభ్యత్వం ఉన్న మిగిలిన దేశాల నుంచి స్పందన ఒకే రీతిగాకన్నా అసంపూర్ణంగా ఉందనే భావించాలి. ఇజ్రాయెల్‌– పాలస్తీనా రెండు దేశాలుగా ఉండాలనే పరిష్కారానికి మద్దతును బ్రిటన్‌ ప్రధాని ఆండీ బర్న్‌హామ్‌ పునరుద్ఘాటించారు. చైనా అధ్య క్షుడు షీ జిన్‌పింగ్‌ సెప్టెంబర్‌ 24న శ్వేత సౌధంలో శిఖరాగ్ర సమా వేశం ఉన్న దృష్ట్యా సర్వ ప్రతినిధి సభకు హాజరు కాలేదు. జిన్‌పింగ్‌ బదులు చైనా ఉపాధ్యక్షుడు హ్యాన్‌ జెంగ్‌ హాజరయ్యారు. ఇరాన్‌ లేదా గాజాల పేరును నేరుగా ప్రస్తావించకుండా, నిర్నిరోధ బల ప్రయోగాన్ని చైనా వ్యతిరేకించింది. రష్యా అధ్యక్షుడు వ్లాదిమిర్‌ పుతిన్‌ కూడా ఈ సమావేశాలకు హాజరు కాలేదు. రష్యా విదేశాంగ మంత్రి సెర్గీ లవరోవ్‌ ఆ దేశ ప్రతినిధి బృందానికి నేతృత్వం వహిస్తూ, ఉక్రెయిన్‌పై యుద్ధంలో రష్యా విరామం ఇవ్వదలచు కోలేదని స్పష్టం చేశారు. చర్చలకు సిద్ధమేనంటూ, ఇతర మార్గాల ద్వారా యుద్ధం కొనసాగుతుందని తేల్చేశారు.ఇండియా ఆచితూచి...భద్రతా మండలిలో శాశ్వత సభ్యత్వం ఉన్న ఐదు దేశాలు(పీ5) ఒకే వైఖరితో లేవని తేటతెల్లమైంది. భారతదేశానికి భద్రతా మండ లిలో శాశ్వత సభ్యత్వం లేదు. వీటో చేయగలిగిన అధికారం చలా యించగలిగినదిగా మండలిలో సభ్యత్వం చేజిక్కించుకోవాలని భారత్‌ ఉబలాటపడుతోంది. జిన్‌పింగ్, పుతిన్‌ మాదిరిగానే ప్రధాని నరేంద్ర మోదీ కూడా ఈ సమావేశాలకు హాజరు కాలేదు. విదేశాంగ మంత్రి ఎస్‌. జైశంకర్‌ భారత ప్రతినిధి బృందానికి నేతృత్వం వహించారు. ‘సంస్కరణాయుత బహుళ పక్ష వాదానికి’ జై శంకర్‌ పిలుపునిచ్చారు. బడుగు దేశాలు వాటి ప్రమేయం లేని, అవి ఏ పాపం ఎరుగని సంక్షోభాలను ఎదుర్కొంటున్నాయని ఆయన వాదించారు. పశ్చిమాసియాలో సాగర మార్గాలకు భద్రత కల్పించా లనీ, అంతర్జాతీయ చట్టాలను పాటించాలనీ కోరారు. ఇరాన్‌ను ‘రూపుమాపుతా’మని వచ్చిన హెచ్చరికపై భారత్‌ ఎలాంటి వ్యాఖ్యా చేయలేదు. అమెరికా, రష్యా, ఇరాన్‌లతో సంబంధాలను కాపాడుకుంటోంది. అమెరికావి అనాగరికపు మాటలని అన లేదు. ఐరాస భద్రతా మండలిని సంస్కరించాలని కోరింది. సభ్యత్వం పొందేందుకు భారత్‌కు ఉన్న హక్కును చాటుకుంది. పాలస్తీనా ఓట్లు, ఇంధన భద్రత, శక్తిమంతమైన దేశాల నుంచి దెబ్బ తినకుండా కంచె ఏర్పరుచుకోవడం అనే అంశాలను భారత్‌ ఏనాటి నుంచో మిళితం చేసుకుంటూ వస్తోంది. ఇపుడు అమెరికా నుంచిరెండవ విడత సుంకాల విధింపు బెడద నేపథ్యంలో, ఐరాస 81వ సర్వ ప్రతినిధి సభ సమావేశాల్లోనూ అదే వైఖరిని కొనసాగించింది. విభేదాల బదులు పరస్పరం ఆధారపడటం నేర్చుకోండని గుటెరస్‌ కోరారు. లొంగదీసుకునేందుకు ఒక మార్గంగా విధ్వంసాన్ని ట్రంప్‌ ఎంచుకున్నారు. తుది గడువును ఆయనే విధిస్తు న్నారు. ఓ మోస్తరు శక్తి కలిగిన దేశాలు భద్రతా మండలిలో శాశ్వత సభ్యత్వం కోరుకుంటున్నాయికానీ, నియమ నిబంధనలను పాటించి తీరాలనీ, అంతర్జాతీయ సూత్రాలకు కట్టుబడి ఉండాలనీ ధైర్యంగా చెప్పలేకపోతున్నాయి. హాజరు పట్టీలకు పరిమితమైతే ప్రయోజనం ఏముంది? ఈ సమస్య భారతదేశానిది మాత్రమే కాదు. ఐరాస ఎదుర్కొంటున్న, ఇంకా జవాబు దొరకని ప్రశ్న.-వ్యాసకర్త ‘సొసైటీ ఫర్‌ పాలసీ స్టడీస్‌’ డైరెక్టర్, న్యూఢిల్లీ- సి. ఉదయ్‌ భాస్కర్‌

అమెరికా అధ్యక్షుడు డొనాల్డ్‌ ట్రంప్‌.. చైనా అధ్యక్షుడు జి జిన్‌పింగ్‌కు గురువారం (సెప్టెంబర్‌ 24) వైట్‌హౌస్‌లో ఘన విందు ఇచ్చారు. వైట్‌హౌస్‌ ఈస్ట్‌ రూమ్‌లో జరిగిన ఈ స్టేట్‌ డిన్నర్‌కు జిన్‌పింగ్‌ తన భార్య పెంగ్‌ లియువాన్‌తో కలిసి హాజరయ్యారు. ట్రంప్‌, ప్రథమ మహిళ మెలానియా ట్రంప్‌ ఆతిథ్యమిచ్చిన ఈ కార్యక్రమానికి అమెరికా ప్రభుత్వంలోని కీలక అధికారులు, సుప్రీంకోర్టు న్యాయమూర్తులు, చట్టసభ సభ్యులు, ప్రముఖ వ్యాపారవేత్తలు, టెక్‌ దిగ్గజాలు కలిపి 134 మంది అతిథులు ఆహ్వానితులుగా ఉన్నారు.ఈ విందులో అమెరికా టెక్నాలజీ రంగానికి చెందిన ప్రముఖుల హాజరు ప్రత్యేక ఆకర్షణగా నిలిచింది. టెస్లా, స్పేస్‌ఎక్స్‌ అధినేత ఎలాన్‌ మస్క్‌, యాపిల్‌ బోర్డు చైర్మన్‌ టిమ్‌ కుక్‌, ఎన్విడియా సీఈవో జెన్సన్‌ హువాంగ్‌, ఓపెన్‌ఏఐ సీఈవో సామ్‌ ఆల్ట్‌మన్‌, మెటా సీఈవో మార్క్‌ జుకర్‌బర్గ్‌, అమెజాన్‌ వ్యవస్థాపకుడు జెఫ్‌ బెజోస్‌, ఏఎండీ సీఈవో లిసా సూ తదితరులు పాల్గొన్నారు. మైక్రోసాఫ్ట్‌ సీఈవో సత్య నాదెళ్ల, గూగుల్‌ సీఈవో సుందర్‌ పిచాయ్‌ కూడా ఈ జాబితాలో ఉన్నారు.విందులో భారతీయ మూలాలున్న ఐదుగురువైట్‌హౌస్‌ విడుదల చేసిన అతిథుల జాబితా ప్రకారం.. భారతీయ మూలాలున్న ఐదుగురు ప్రముఖులకు ఈ విందులో చోటు దక్కింది. వారిలో అమెరికా ఉపాధ్యక్షుడు జేడీ వాన్స్‌ సతీమణి, సెకండ్‌ లేడీ ఉషా వాన్స్‌ ఉన్నారు. టెక్నాలజీ రంగం నుంచి మైక్రోసాఫ్ట్‌ ఛైర్మన్‌, సీఈవో సత్య నాదెళ్ల, ఆల్ఫాబెట్‌, గూగుల్‌ సీఈవో సుందర్‌ పిచాయ్, మైక్రాన్‌ టెక్నాలజీ ఛైర్మన్‌, ప్రెసిడెంట్‌, సీఈవో సంజయ్‌ మెహ్రోత్రా హాజరయ్యారు. సంజయ్‌ మెహ్రోత్రా భార్య సంగీతా మెహ్రోత్రా కూడా అతిథుల జాబితాలో ఉన్నారు.అయితే ఈ కార్యక్రమానికి భారత ప్రభుత్వ ప్రతినిధులు ఎవరూ అతిథుల జాబితాలో లేరు. భారతీయ మూలాలున్న ప్రముఖులు మాత్రం అమెరికా రాజకీయ, వ్యాపార, సాంకేతిక రంగాల్లో తమ స్థానానికి అనుగుణంగా ఆహ్వానం అందుకున్నారు.ఒకే వేదికపై టెక్‌, ఫైనాన్స్‌ దిగ్గజాలువిందులో టెక్నాలజీ రంగంతో పాటు అమెరికా ఆర్థిక, పారిశ్రామిక రంగాలకు చెందిన ప్రముఖులు కూడా పాల్గొన్నారు. జేపీ మోర్గాన్‌ చేజ్‌ సీఈవో జేమీ డైమన్‌, బ్లాక్‌రాక్‌ సీఈవో లారీ ఫింక్‌, బ్లాక్‌స్టోన్‌ అధినేత స్టీఫెన్‌ స్క్వార్జ్‌మన్‌, గోల్డ్‌మన్‌ శాక్స్‌ సీఈవో డేవిడ్‌ సోలమన్‌, సిటీగ్రూప్‌ సీఈవో జేన్‌ ఫ్రేజర్‌, మాస్టర్‌కార్డ్‌ సీఈవో మైఖేల్‌ మైబాక్‌ వంటి ప్రముఖులు కూడా హాజరయ్యారు. సుప్రీంకోర్టు చీఫ్‌ జస్టిస్‌ జాన్‌ రాబర్ట్స్‌, న్యాయమూర్తులు అమీ కోనీ బారెట్‌, బ్రెట్‌ కవనాగ్‌ కూడా అతిథుల జాబితాలో ఉన్నారు.ఇదీ చదవండి: ఆస్తులు ఉచితమే.. అప్పులూ ఉచితమే!!

ఢిల్లీలో ప్రధాని మోదీతో కరచాలనం చేసిన చైనా అధ్యక్షుడు జిన్‌పింగ్‌.. ఇప్పుడు వాషింగ్టన్‌లో అమెరికా అధ్యక్షుడు డొనాల్డ్‌ ట్రంప్‌తో కీలక చర్చలు జరిపారు. సెప్టెంబర్‌ 12న న్యూఢిల్లీలో జరిగిన బ్రిక్స్‌ సదస్సు సందర్భంగా మోదీ-జిన్‌పింగ్‌ భేటీ జరగగా.. సెప్టెంబర్‌ 24న వైట్‌హౌస్‌లో ట్రంప్‌-జిన్‌పింగ్‌ సమావేశమయ్యారు. రెండు పర్యటనల మధ్య కేవలం 12 రోజుల వ్యవధి ఉండటం ప్రపంచ దౌత్య వర్గాల దృష్టిని ఆకర్షిస్తోంది. వీరిద్దరి మధ్య చర్చల్లో వాణిజ్యం, తైవాన్‌, AI, టెక్నాలజీ, అరుదైన ఖనిజాలు, ఇరాన్‌ వంటి అంశాలు కీలకంగా మారాయి. అమెరికా-చైనా వాణిజ్య సంధిని మరో రెండు నెలలు పొడిగించేందుకు ఇరు దేశాలు అంగీకరించాయి.మోదీతో భేటీ తర్వాతే ట్రంప్‌తో సమావేశంబ్రిక్స్‌ సదస్సు సందర్భంగా మోదీ, జిన్‌పింగ్‌ ఇరుదేశాల సంబంధాలపై కీలక చర్చలు జరిపారు. సరిహద్దుల్లో శాంతి, ద్వైపాక్షిక సంబంధాల స్థిరీకరణ, వాణిజ్య అసమతుల్యత, సరఫరా చైన్‌, వ్యాపార సంబంధాలను మెరుగుపరచడం వంటి అంశాలపై చర్చ జరిగింది. సరిహద్దు ప్రాంతాల్లో శాంతి, ఇరుదేశాల ఒప్పందాలను పాటించడం ద్వైపాక్షిక సంబంధాల అభివృద్ధికి కీలకమని మోదీ స్పష్టం చేశారు. చైనా కూడా భారత్‌తో సంబంధాలను దీర్ఘకాలిక వ్యూహాత్మక దృష్టితో అభివృద్ధి చేయాలని చెబుతోంది. జిన్‌పింగ్‌-మోదీ భేటీ తర్వాత చైనా ప్రకటనలో ఇరుదేశాలు భాగస్వాములుగా ఉండాలనే అంశాన్ని ప్రస్తావించింది.అసలు టెన్షన్‌ ఇదేఇప్పటివరకు అమెరికా-చైనా పోటీ కారణంగా చైనా నుంచి దూరమయ్యే కంపెనీలకు భారత్‌ ఒక ప్రత్యామ్నాయ తయారీ కేంద్రంగా ఎదిగే అవకాశం వచ్చింది. ‘China+1’ వ్యూహం ద్వారా పెట్టుబడులు, సరఫరా గొలుసులు భారత్‌ వైపు మళ్లే అవకాశం ఏర్పడింది. అమెరికా-చైనా వాణిజ్య ఉద్రిక్తతలు తగ్గి.. చైనా మళ్లీ అమెరికా మార్కెట్‌తో స్థిరమైన సంబంధాలు ఏర్పరచుకుంటే, ఈ అవకాశాల్లో కొంత భాగం తగ్గే అవకాశం ఉందని విశ్లేషణలు చెబుతున్నాయి. తైవాన్‌, AI, టెక్నాలజీ నియంత్రణలు, వాణిజ్య సుంకాలు, ఇరాన్‌ యుద్ధంపై ఇరుదేశాల మధ్య విభేదాలు కొనసాగుతున్నాయి. ముఖ్యంగా రేర్‌ ఎర్త్స్‌ సరఫరాలో చైనాకు ఉన్న ఆధిపత్యం కారణంగా ఈ రంగంలో కుదిరే ఏదైనా అమెరికా-చైనా అవగాహన ప్రపంచ సరఫరా గొలుసులపై ప్రభావం చూపవచ్చు. దాని ప్రభావం భారత్‌ తయారీ, టెక్నాలజీ రంగాలపై కూడా పరోక్షంగా పడే అవకాశం ఉంది.చైనా లెక్కల్లో భారత్‌ ఎందుకు?ఇక్కడే భారత్‌ అంశం ఆసక్తికరంగా మారుతోంది. అమెరికా ఇప్పటికే ఇండో-పసిఫిక్‌లో భారత్‌ను కీలక వ్యూహాత్మక భాగస్వామిగా చూస్తోంది. మరోవైపు భారత్‌ చైనాతో సంబంధాలను పూర్తిగా తెంచుకోకుండా.. సరిహద్దు సమస్యలు, వాణిజ్య అంశాలను పరిష్కరించుకుంటూ సంబంధాలను స్థిరీకరించే ప్రయత్నం చేస్తోంది. అంటే.. అమెరికాతో భారత్‌కు వ్యూహాత్మక భాగస్వామ్యం ఉంది.. చైనాతో భారత్‌కు ఆర్థిక, భౌగోళిక సంబంధాలు ఉన్నాయి. ఈ రెండు సమీకరణాల మధ్య న్యూఢిల్లీ తన స్వతంత్ర విదేశాంగ విధానాన్ని కొనసాగిస్తోంది.రష్యా అంశం కూడా కీలకమే..రష్యా చమురు, ఇరాన్‌ అంశాల్లో భారత్‌, చైనాలపై అమెరికా విధానం కూడా న్యూఢిల్లీకి ముఖ్యమే. అమెరికా-చైనా చర్చల్లో బీజింగ్‌కు రష్యా, ఇరాన్‌ విషయంలో ఏదైనా ప్రత్యేక వెసులుబాటు లభిస్తే.. ప్రాంతీయ శక్తి సమీకరణాలపై దాని ప్రభావం భారత్‌ లెక్కలను కూడా మార్చవచ్చు. అందుకే ఢిల్లీ తర్వాత వాషింగ్టన్‌లో జిన్‌పింగ్‌ భేటీపై భారత్‌ నిశితంగా గమనిస్తోంది. అమెరికా-చైనా సంబంధాలు పూర్తిగా తెగిపోవడం భారత్‌కు ఒక రకమైన అవకాశాలను తెస్తే.. ఇరుదేశాల మధ్య అవగాహన పెరగడం మరో రకమైన అవకాశాలను, సవాళ్లను తీసుకురావచ్చు. ఇదీ చదవండి: హార్ముజ్‌ కోసం ట్రంప్‌-ఇరాన్‌ కీలక భేరం!

అమెరికా–ఇరాన్‌ మధ్య నెలకొన్న యుద్ధ ఉద్రిక్తతలకు తెరదించే దిశగా కీలక పరిణామాలు చోటుచేసుకుంటున్నాయి. న్యూయార్క్‌లో ఐక్యరాజ్యసమితి సర్వసభ్య సమావేశాల నేపథ్యంలో ఇరు దేశాల ప్రతినిధులు దశలవారీ ఒప్పందంపై చర్చిస్తున్నట్లు సమాచారం. ఇందులో భాగంగా అమెరికా ఇరాన్‌పై విధించిన ఆర్థిక దిగ్బంధనాన్ని సడలిస్తే.. ఇరాన్‌ వ్యూహాత్మకమైన హార్ముజ్‌ జలసంధిని తిరిగి తెరిచే ప్రతిపాదన పరిశీలనలో ఉన్నట్లు తెలుస్తోంది.ఇన్నాళ్లూ కత్తులు దూసుకున్న అమెరికా–ఇరాన్‌ ఇప్పుడు ఒకే టేబుల్‌ వద్దకు వచ్చాయి. యుద్ధాన్ని ఆపేందుకు జరుగుతున్న చర్చల్లో కీలక మలుపు చోటుచేసుకుంది. ఇరు దేశాల చేతుల్లో ఉన్న రెండు బలమైన అస్త్రాలే ఇప్పుడు బేరసారాలకు వచ్చాయి. ఒకటి అమెరికా ఆంక్షలు.. మరొకటి ఇరాన్‌ చేతిలో ఉన్న హార్ముజ్‌ జలసంధి!ప్రపంచ చమురు సరఫరాకు అత్యంత కీలకమైన హార్ముజ్‌ జలసంధి ప్రస్తుతం ఇరు దేశాల మధ్య ప్రధాన బేరసారాల అంశంగా మారింది. హార్ముజ్‌ ద్వారా నౌకల రాకపోకలు స్వేచ్ఛగా సాగాలని అమెరికా కోరుతోంది. మరోవైపు తమ ఆర్థిక వ్యవస్థను తీవ్రంగా దెబ్బతీస్తున్న అమెరికా ఆంక్షలు, దిగ్బంధనాన్ని ఎత్తివేయాలని ఇరాన్‌ డిమాండ్‌ చేస్తోంది. స్తంభించిన పరిస్థితిని దశలవారీగా పరిష్కరించడమే సాధ్యమైన మార్గమని ఇరాన్‌కు చెందిన సీనియర్‌ అధికారి పేర్కొన్నట్లు ఓ అంతర్జాతీయ మీడియా సంస్థ వెల్లడించింది.ప్రతిపాదిత ఒప్పందంలో తొలి దశగా ట్రంప్‌ ప్రభుత్వం ఇరాన్‌పై విధించిన ఆర్థిక దిగ్బంధనాన్ని ఎత్తివేయడం, దానికి ప్రతిగా టెహ్రాన్‌ హార్ముజ్‌ మీదుగా నౌకల రాకపోకలను పునరుద్ధరించడం ఉండొచ్చని ఆ కథనం తెలిపింది. అంతేకాకుండా విదేశాల్లో ఫ్రీజ్‌ చేసిన ఇరాన్‌ ఆస్తులను మోక్షం కల్పించే అంశాన్ని కూడా టెహ్రాన్‌ కోరవచ్చని తెలుస్తోంది.ట్రంప్‌ ప్రభుత్వం ఆర్థిక ఒత్తిడిని తగ్గిస్తే.. ఇరాన్‌ ప్రపంచ ఇంధన రవాణాకు కీలకమైన జలమార్గాన్ని తెరవాలన్నది ప్రతిపాదన. అయితే ఇది తుది శాంతి ఒప్పందం కాకపోవచ్చని, గత జూలైలో కుదిరిన అవగాహన విఫలమైన నేపథ్యంలో ఈసారి ఇరు దేశాల రాయితీలు ఎంతకాలం అమల్లో ఉంటాయన్నదే కీలకమనే అభిప్రాయం వ్యక్తమవుతోంది.హార్ముజ్‌ తెరవడానికి ఇరాన్‌ రెడీ.. కానీ!అమెరికా సైనిక ఒత్తిడిని తగ్గించి, ఇరాన్‌ నౌకాశ్రయాలపై దిగ్బంధనాన్ని ఎత్తివేస్తే వారం రోజుల్లోనే హార్ముజ్‌ను తిరిగి తెరవడానికి సిద్ధంగా ఉందట. ఈ ప్రతిపాదనను మధ్యవర్తుల ద్వారా సెప్టెంబర్‌ 16న ట్రంప్‌ ప్రభుత్వానికి చేరవేసినట్లు తెలుస్తోంది. అయితే అసలు చిక్కు ఇక్కడే ఉంది.తమ వద్ద ఉన్న బలమైన బేరసారాల అస్త్రాన్ని ముందుగా వదులుకోవడానికి ట్రంప్‌ ప్రభుత్వం, ఇరాన్‌ రెండూ సిద్ధంగా లేవు. అమెరికా వద్ద ఆర్థిక ఆంక్షలు, దిగ్బంధనం ప్రధాన ఒత్తిడి సాధనాలైతే.. ఇరాన్‌ చేతిలో హార్ముజ్‌ జలసంధి ఉంది. దీంతో ఎవరు ముందుగా మెట్టు దిగాలన్నదే చర్చల్లో కీలకంగా మారింది.ట్రంప్‌ ఒత్తిడి.. ఇరాన్‌ ప్రతిఘటనట్రంప్‌ ప్రభుత్వం మాత్రం టెహ్రాన్‌పై ఒత్తిడి తగ్గించే సంకేతాలు ఇవ్వడం లేదు. ఇరాన్‌ చమురు ఎగుమతులను దెబ్బతీసే ఆంక్షలకు తోడు ఈ నెలలో ఆ దేశ వాణిజ్య విమానయాన సంస్థలు, వాటి సహాయక నెట్‌వర్క్‌లపైనా అమెరికా చర్యలు తీసుకుంది. ఒప్పందానికి రాకపోతే ఇరాన్‌ ఆర్థిక వ్యవస్థ మరింత క్షీణిస్తుందని ట్రంప్‌ హెచ్చరించారు.మరోవైపు ఇరాన్‌ కూడా వెనక్కి తగ్గడం లేదు. అమెరికా తమపై విధించిన ఆర్థిక, సైనిక ఒత్తిడిని ముందుగా తగ్గించాలని టెహ్రాన్‌ కోరుతోంది. ‘‘మా వేళ్లు ట్రిగ్గర్‌పైనే ఉన్నాయి’’ అని పదే పదే చెబుతూ వస్తుండడం.. పరిస్థితి ఎంత సున్నితంగా ఉందో వెల్లడిస్తోంది.ట్రాన్సిట్‌ ఫీజుపై ఇరాన్‌ మెట్టు దిగుతుందా?హార్ముజ్‌ మీదుగా వెళ్లే నౌకల నుంచి ట్రాన్సిట్‌ ఫీజు వసూలు చేయాలన్న తన డిమాండ్‌ను ప్రధాన ఒప్పందం నుంచి పక్కన పెట్టేందుకు ఇరాన్‌ సిద్ధంగా ఉన్నట్లు ప్రాంతీయ వర్గాలు చెబుతున్నాయి. ఆ అంశాన్ని ప్రత్యేక అనుబంధంలో చేర్చే అవకాశం ఉందని సమాచారం. గల్ఫ్‌ దేశాలు మాత్రం ఇలాంటి రుసుముల చెల్లింపును వ్యతిరేకిస్తున్నాయి.అయితే ఫీజు అంశాన్ని పక్కన పెట్టడం అంటే.. హార్ముజ్‌పై తన నియంత్రణను ఇరాన్‌ వదులుకున్నట్లు కాదని సంబంధిత వర్గాలు స్పష్టం చేస్తున్నాయి. దీంతో ప్రధాన డీల్‌లో మాత్రం ముందుగా హార్ముజ్‌ రాకపోకలను పునరుద్ధరించడంపైనే దృష్టి పెట్టే అవకాశం కనిపిస్తోంది.ఎన్నికల తర్వాతే డీల్‌?అమెరికా మధ్యంతర ఎన్నికలు నవంబర్‌ 3న జరగనున్నాయి. ఈ ఎన్నికల తర్వాత అమెరికా–ఇరాన్‌ మధ్య ఒప్పందం కుదిరే అవకాశం ఉందని ట్రంప్‌ ఇప్పటికే చెప్పారు. అయితే న్యూయార్క్‌లో ఇప్పుడు చర్చలు మళ్లీ వేగం పుంజుకోవడంతో.. ఎన్నికలకు ముందే ఏదైనా తాత్కాలిక అవగాహన కుదురుతుందా అన్నది ఆసక్తికరంగా మారింది.ఇరాన్‌ మాత్రం తమ డిమాండ్ల జాబితా చాలా పెద్దదేనని సంకేతాలిస్తోంది. దీంతో ట్రంప్‌ ప్రభుత్వం ఎంత మేరకు ఆర్థిక ఆంక్షలను సడలిస్తుంది? దానికి ప్రతిగా ఇరాన్‌ హార్ముజ్‌పై ఎలాంటి హామీ ఇస్తుంది? అన్నదే కీలకంగా మారింది.గల్ఫ్‌ దేశాలకూ టెన్షన్‌అమెరికా–ఇరాన్‌ చర్చలను గల్ఫ్‌ దేశాలు కూడా నిశితంగా గమనిస్తున్నాయి. హార్ముజ్‌పై ఇరాన్‌కు శాశ్వత నియంత్రణ కల్పించే ఏ ఒప్పందాన్నైనా అవి వ్యతిరేకిస్తున్నాయి. అదే సమయంలో యుద్ధం మరింత విస్తరించకుండా ఉద్రిక్తతలు తగ్గాలని కోరుకుంటున్నాయి. ఎందుకంటే హార్ముజ్‌ కేవలం ఇరాన్‌–అమెరికా మధ్య బేరసారాల అంశం కాదు. ప్రపంచ ఇంధన రవాణాకు ఇది అత్యంత కీలకమైన మార్గం. ఈ జలసంధిలో నౌకల రాకపోకలు సాధారణ స్థితికి వస్తే అంతర్జాతీయ చమురు సరఫరాపై ఒత్తిడి తగ్గే అవకాశం ఉంటుంది. అందుకే ట్రంప్‌–ఇరాన్‌ చర్చల్లో ఏ చిన్న పురోగతినైనా గల్ఫ్‌ దేశాలు, ఇంధన మార్కెట్లు నిశితంగా గమనిస్తున్నాయి.ఇదీ చదవండి: మీకు దణ్ణం పెడతాం.. ఏఐని ఆపండి

వాషింగ్టన్‌: అమెరికా, చైనాలు ప్రత్యర్థుల్లా కాకుండా భాగస్వాములుగా పనిచేయాలని చైనా అధ్యక్షుడు షీ జిన్‌పింగ్‌ పిలుపునిచ్చారు. ఇరుదేశాలు ఈ నవయుగంలో అందుకు తగ్గ మార్గాన్ని కనుక్కోగలవన్న ధీమాను వ్యక్తం చేశారు. అమెరికాలో మూడు రోజులపాటు పర్యటించనున్న జిన్‌పింగ్‌కు అరుదైన గౌరవం దక్కింది. మేరిల్యాండ్‌లోని జాయింట్‌ బేస్‌ ఆండ్రూస్‌లో విమానం దిగిన జిన్‌పింగ్‌ దంపతులను అమెరికా అధ్యక్షుడు డొనాల్డ్‌ ట్రంప్, భార్య మెలానియాలు స్వయంగా స్వాగతం పలికారు. అమెరికా రాక సందర్భంగా విడుదల చేసిన లిఖిత పూర్వక ప్రసంగంలో జిన్‌పింగ్‌ చైనా ప్రజల తరఫున అమెరికన్లకు హృదయపూర్వక శుభాకాంక్షలు తెలిపినట్లు జాతీయ వార్తా సంస్థ షిన్హువా తెలిపింది. ఆ ప్రసంగంలోనే జిన్‌పింగ్‌ ఇరు దేశాల ప్రజల మధ్య స్నేహపూర్వక సంబంధాలు, ప్రయోజనాలు ముడిపడి ఉన్నాయన్నారు. అంతేకాకుండా..చైనా, అమెరికాలు ప్రత్యర్థులుగా కాకుండా.. భాగస్వాములుగా ఉండాలని, చైనా పునరుజ్జీవం, ‘మేకింగ్‌ అమెరికా గ్రేట్‌ ఎగెయిన్‌’(మాగా) అన్న రెండు లక్ష్యాలను కలిసి సాధించగలమని తద్వారా ప్రపంచ శ్రేయస్సును మెరుగుపరచగలమని జిన్‌పింగ్‌ తెలిపారు. సహకారమే పునాదిగా చైనా, అమెరికాలు పనిచేయాలని, పోటీని, భేదాభిప్రాయాలను తగ్గించుకోవాలని, శాంతికి పెద్దపీట వేయాలని షీ తన ప్రసంగంలో పిలుపునిచ్చారు. కాలం మారుతున్నా... ప్రపంచం వృద్ధి చెందుతున్నా చైనా, అమెరికాల మధ్య శాంతియుత సహజీవనం అన్న చారిత్రక తర్కంలో మాత్రం మార్పులేదని ఆయన తెలిపారు. అమెరికాలోని వివిధ వర్గాల ప్రజలతోనూ సంప్రదింపులు జరిపి ఇరుదేశాల మధ్య స్నేహాన్ని బలోపేతం చేస్తానని చెప్పారు. అమెరికా అధ్యక్షుడు డొనాల్డ్‌ ట్రంప్‌తో ద్వైపాక్షిక, ఇతర అంశాలపై లోతైన చర్చలు జరపనున్నామని, వివిధ రంగాల్లో సహకారానికి పెద్దపీట వేస్తామని షీ హామీ ఇచ్చారు. ఈ చర్చలు ఫలప్రదమవుతాయని ఆశిస్తున్నట్లు చెప్పారు. ఇరు దేశాల ప్రజల సంక్షేమానికి, ప్రపంచ శాంతికి సాయపడుతుందని ఆశిస్తున్నట్లు తెలిపారు. షీ జిన్‌పింగ్‌ 2015 తర్వాత అమెరికా రావడం ఇదే తొలిసారి. ఈ సందర్భంగా అమెరికా అధ్యక్షుడు ట్రంప్‌తో జరిగే చర్చల్లో టారిఫ్‌ యుద్ధం, కృత్రిమ మేధస్సు, సైనిక సంబంధాలు, మధ్యప్రాచ్యం, రష్యా–ఉక్రెయిన్ల యుద్ధాలు, అంతరిక్ష ఆయుధపోటీ, తైవాన్‌కు అమెరికా ఆయుధాల వంటి అనేక అంశాలు చర్చకు రావచ్చునని అంచనా. ఈ ఏడాది మేలో ట్రంప్‌ చైనా పర్యటన సందర్భంగా చైనా, అమెరికాల మధ్య వ్యూహాత్మక స్థిరత్వం కోసం నిర్మాణాత్మక సంబంధాలను బలోపేతం చేసుకునే విషయంపై ఏకాభిప్రాయం కుదిరిందని జిన్‌పింగ్‌ తెలిపారు. ద్వైపాక్షిక సంబంధాల అభివృద్ధికి ఈ నిర్ణయం మార్గదర్శకత్వం వహించిందన్నారు. ఘర్షణకు దిగితే నష్టపోతాం: జిన్‌పింగ్‌ అమెరికా పర్యటనలో భాగంగా గురువారం వైట్‌హౌస్‌కు చేరుకున్న చైనా అధినేత షీ జిన్‌పింగ్‌ దంపతులకు అధ్యక్షుడు డొనాల్డ్‌ ట్రంప్‌ దంపతులు లాంఛనంగా స్వాగతం పలికారు. సైనిక బృందం సంగీతం వినిపిస్తుండగా, ట్రంప్, ప్రథమ మహిళ మెలానియా వైట్‌హౌస్‌ సౌత్‌ పోర్టీకో వద్ద జిన్‌పింగ్, పెంగ్‌ లియువాన్‌లకు స్వాగతం పలికారు. అమెరికా అధ్యక్షుడు ఉపయోగించే ‘బీస్ట్‌’వాహనానికి సమానమైన నలుపు రంగు హాంగ్‌కీ (రెడ్‌ ఫ్లాగ్‌) ఎన్‌701 కారులో చైనా అధినేత శ్వేతసౌధానికి విచ్చేశారు. వైట్‌హౌస్‌లో జరిగిన సమావేశం ప్రారంభంలో ట్రంప్‌ కొద్దిసేపు మాట్లాడారు. ‘‘రెండో ప్రపంచ యుద్ధంలో విజయం సాధించడానికి మన ప్రజలు ఎలాగైతే కలిసి పనిచేశారో, అలాగే మన రెండు దేశాలకు మెరుగైన భవిష్యత్తును నిర్మించేందుకు అధ్యక్షుడు జిన్‌పింగ్, నేను కలిసి పనిచేయడం కొనసాగిస్తాం’’అని పేర్కొన్నారు. జిన్‌పింగ్‌ మాట్లాడుతూ.. ‘‘చైనా, అమెరికా వంటి రెండు ప్రధాన దేశాలు సహకారం ద్వారా ప్రయోజనం పొందుతాయి. ఘర్షణకు దిగితే రెండూ నష్టపోతాయి’’అని స్పష్టంచేశారు. మనం పోటీ గురించి ప్రస్తావించడాన్ని మానుకోవాల్సిన అవసరం లేదన్నారు. కానీ, ఆ పోటీ ఆరోగ్యకరమైనదిగా, హద్దులకు లోబడి ఉండాలని సూచించారు. ఇది ఒకరినొకరు అధిగమించేందుకు చేసే పోటీలా ఉండాలి తప్ప ఒకరు గెలిచి మరొకరు ఓడిపోయేలా సాగే కుస్తీ పోరులా ఉండకూడదని జిన్‌పింగ్‌ వ్యాఖ్యానించారు.

చైనా వేగంగా విస్తరిస్తున్న అణ్వాయుధ సామర్థ్యంపై అమెరికా అధ్యక్షుడు డొనాల్డ్ ట్రంప్ ప్రభుత్వం డ్రాగన్‌ దేశంతో రహస్య చర్చలు జరుపుతున్నట్లు అమెరికా అధికారులు వెల్లడించారు. 30 ఏళ్లుగా కొనసాగుతున్న అణు పరీక్షల నిషేధాన్ని బీజింగ్ పాటిస్తోందా? లేదా? అన్నదానిపై అమెరికాకు అనుమానాలు ఉన్న నేపథ్యంలో ఈ చర్చలు జరుగుతున్నాయి.బహుపాక్షిక సమావేశాల సందర్భంగా ఈ చర్చలు జరిగినట్లు అధికారులు తెలిపారు. జెనీవా, న్యూయార్క్, మొరాకోలోని కాసాబ్లాంకాలో జరిగిన సమావేశాల చివర అమెరికా, చైనా ప్రతినిధులు ఈ అంశంపై చర్చించినట్లు వెల్లడించారు. చైనా అత్యంత తక్కువ స్థాయి అణు పరీక్షలను రహస్యంగా నిర్వహించిందన్న ఆరోపణలను పరిష్కరించాలని అమెరికా ఒత్తిడి తెస్తున్నట్లు తెలిపారు.చైనా అణ్వాయుధ నిల్వలు, సామర్థ్యాలు వేగంగా పెరుగుతున్న సమయంలో ఈ చర్చలకు ప్రాధాన్యం ఏర్పడింది. బీజింగ్ అణు పరీక్షలపై అంతర్జాతీయంగా అమల్లో ఉన్న నిషేధాన్ని పాటిస్తోందా అనే ప్రశ్నలను అమెరికా లేవనెత్తుతోంది. ఈ అంశంపై ఇరు దేశాల మధ్య జరుగుతున్న చర్చలు బహిరంగంగా కాకుండా గోప్యంగా కొనసాగుతున్నాయి.ఇంతకుముందు కూడా చైనా 2020లో అత్యంత తక్కువ స్థాయి అణు పరీక్ష నిర్వహించి ఉండొచ్చని ట్రంప్ ప్రభుత్వం ఆరోపించింది. చైనాలోని లోప్ నూర్ ప్రాంతంలో 2020 జూన్ 22న నమోదైన భూకంప తరహా ప్రకంపనలను అమెరికా అధికారులు దీనికి ఆధారంగా ప్రస్తావించారు. అయితే అంతర్జాతీయ పర్యవేక్షణ సంస్థలు ఆ ప్రకంపనలకు అణు పరీక్షే కారణమని నిర్ధారించలేదు. చైనా కూడా రహస్య అణు పరీక్షలు నిర్వహించిందన్న ఆరోపణలను ఖండించింది.ప్రస్తుతం అమెరికా-చైనా మధ్య అణ్వాయుధ నియంత్రణ, వాణిజ్యం, సాంకేతికత, భద్రత వంటి పలు అంశాలపై చర్చలు కొనసాగుతున్న నేపథ్యంలో ఈ రహస్య సంప్రదింపులు కీలకంగా మారాయి. రాబోయే చర్చల్లో చైనా అణు పరీక్షలపై అమెరికా చేసిన ఆరోపణలకు బీజింగ్ ఎలాంటి సమాధానం ఇస్తుందో, అణ్వాయుధ నియంత్రణపై ఇరు దేశాలు ఏదైనా ముందడుగు వేస్తాయో చూడాల్సి ఉంటుంది.

అమెరికా అధ్యక్షుడు డొనాల్డ్‌ ట్రంప్‌కు కోర్టులో గట్టి ఎదురుదెబ్బ తగిలింది. పలు మీడియా సంస్థల జర్నలిస్టులను వైట్‌హౌస్‌లోకి అనుమతించకుండా ఆయన తీసుకున్న నిర్ణయాన్ని ఫెడరల్‌ కోర్టు అడ్డుకుంది. ఆ మీడియా సంస్థలను తక్షణమే అనుమతించాలని కోర్టు ఆదేశించింది. అంతేకాదు.. ట్రంప్‌ విధించిన ఈ నిషేధం రాజ్యాంగ విరుద్ధమయ్యే అవకాశం ఉందని జడ్జి ఈ సందర్బంగా అభిప్రాయపడ్డారు. సెప్టెంబర్‌ 18న ట్రంప్‌ తన సోషల్‌ మీడియా వేదికగా సీఎన్‌ఎన్‌, ఎంఎస్‌ నౌ, పొలిటికోపై ఆగ్రహం వ్యక్తం చేశారు. తనపై ఈ సంస్థలు ‘‘ఫిక్షన్‌, అబద్ధాలు’’ ప్రచారం చేస్తున్నాయని ఆరోపిస్తూ.. వైట్‌హౌస్‌లోకి వాటి జర్నలిస్టులను అనుమతించబోమని ప్రకటించారు. ఆ తర్వాత ఆయా సంస్థలకు చెందిన రిపోర్టర్ల ప్రెస్‌ యాక్సెస్‌ను నిలిపివేశారు. ఈ వివాదం మధ్య వైట్‌హౌస్‌ మరో కీలక నిర్ణయం తీసుకుంది. ప్రధాన టీవీ నెట్‌వర్క్‌లు వైట్‌హౌస్‌ ప్రెసిడెన్షియల్‌ టీవీ పూల్‌ కవరేజ్‌ను నిలిపివేసిన నేపథ్యంలో.. వైట్‌హౌస్‌ స్వయంగా ట్రంప్‌ టీవీ పేరుతో 24 గంటల స్ట్రీమింగ్‌ ఛానల్‌ను ప్రారంభించింది. యూట్యూబ్‌, వైట్‌హౌస్‌ వెబ్‌సైట్‌ ద్వారా ప్రసారమవుతున్న ఈ ఛానల్‌లో ట్రంప్‌ ప్రసంగాలు, గత కార్యక్రమాల వీడియోలు, ఆయన పాలనకు సంబంధించిన ముఖ్యాంశాలను ప్రసారం చేయడం మొదలుపెట్టింది.కోర్టును ఆశ్రయించిన మూడు సంస్థలుట్రంప్‌ నిర్ణయాన్ని సవాలు చేస్తూ ఆ మీడియా సంస్థలు సంయుక్తంగా కోర్టును ఆశ్రయించాయి. తమపై విధించిన నిషేధం అమెరికా రాజ్యాంగంలోని ఫస్ట్‌ అమెండ్‌మెంట్‌ హక్కులను, మీడియా స్వేచ్ఛను ఉల్లంఘిస్తోందని వాదించాయి. ముందస్తు నోటీసు ఇవ్వకుండా, తమ వాదన వినకుండా యాక్సెస్‌ రద్దు చేశారని పేర్కొన్నాయి.‘బ్యాన్‌’పై జడ్జి అభ్యంతరంఈ కేసును విచారించిన యూఎస్‌ డిస్ట్రిక్ట్‌ జడ్జి టిమ్‌ కెల్లీ.. వైట్‌హౌస్‌ అనుసరించిన విధానంపై సందేహాలు వ్యక్తం చేశారు. జర్నలిస్టుల యాక్సెస్‌ను రద్దు చేసే ముందు వారికి తగిన ప్రక్రియ, తమ వాదన వినిపించే అవకాశం ఇవ్వాల్సి ఉంటుందని సూచించారు. తాజాగా ఇచ్చిన ఆదేశంలో మూడు మీడియా సంస్థల జర్నలిస్టులకు వైట్‌హౌస్‌ యాక్సెస్‌ను పునరుద్ధరించాలని ఆదేశిస్తూ.. ట్రంప్‌ బ్యాన్‌ రాజ్యాంగ విరుద్ధమయ్యే అవకాశం ఉందని పేర్కొన్నారు. జాతీయ భద్రత పేరుతో సమర్థించిన ప్రభుత్వంఅయితే ట్రంప్‌ ప్రభుత్వం మాత్రం వైట్‌హౌస్‌ యాక్సెస్‌ అనేది హక్కు కాదని, ఒక ప్రత్యేక సదుపాయమని వాదించింది. ఆయా మీడియా సంస్థల రిపోర్టింగ్‌ జాతీయ భద్రతకు సంబంధించిన అంశాలను ప్రభావితం చేస్తోందని జస్టిస్‌ డిపార్ట్‌మెంట్‌ తరఫు న్యాయవాదులు కోర్టులో పేర్కొన్నారు. ట్రంప్‌ కూడా ఆయా సంస్థల వార్తలపై తీవ్ర అభ్యంతరాలు వ్యక్తం చేశారు. మీడియా–ట్రంప్‌ మధ్య ముదిరిన వివాదంట్రంప్‌ నిర్ణయంతో అమెరికాలో మీడియా స్వేచ్ఛ, అధ్యక్షుడి అధికారాలపై పెద్ద చర్చ మొదలైంది. మూడు సంస్థలపై నిషేధానికి నిరసనగా ఇతర ప్రధాన టీవీ నెట్‌వర్క్‌లు కూడా వైట్‌హౌస్‌ ప్రెస్‌ పూల్‌ కవరేజీని తాత్కాలికంగా నిలిపివేశాయి. దీంతో అధ్యక్షుడి అధికారిక కార్యక్రమాల మీడియా కవరేజీపై ప్రభావం పడింది. అయితే తాజా కోర్టు ఆదేశంతో ట్రంప్‌–మీడియా వివాదం మరో కీలక మలుపు తిరిగింది. ఈ కేసులో తదుపరి న్యాయపరమైన పరిణామాలు వైట్‌హౌస్‌ మీడియా యాక్సెస్‌పై ప్రభావం చూపే అవకాశం ఉంది. అయితే ఫెడరల్‌ కోర్టు తీర్పును ట్రంప్‌ సర్కార్‌ పైకోర్టులో సవాల్‌ చేసే చాన్స్‌ ఉంది.

అమెరికా–చైనా మధ్య ఉద్రిక్తతలు కొనసాగుతున్న వేళ.. చైనా అధ్యక్షుడు జీ జిన్‌పింగ్‌కు అమెరికా అధ్యక్షుడు డొనాల్డ్‌ ట్రంప్‌ అరుదైన స్వాగతం పలికారు. ప్రత్యేక విమానంలో వాషింగ్టన్‌ చేరుకున్న జిన్‌పింగ్‌, ఆయన భార్య పెంగ్‌ లియువాన్‌లను ట్రంప్‌, ఆయన సతీమణి మెలానియా స్వయంగా విమానాశ్రయానికి వెళ్లి ఆహ్వానించారు. దాదాపు ఆరు దశాబ్దాల తర్వాత.. అమెరికా గడ్డపై ఓ విదేశీ నేతకు లభించిన అత్యంత అరుదైన స్వాగతంగా దీని గురించి చర్చ నడుస్తోంది.జాయింట్‌ బేస్‌ ఆండ్రూస్‌ ఎయిర్‌బేస్‌లో జిన్‌పింగ్‌ విమానం దిగగానే రెడ్‌ కార్పెట్‌పైకి వచ్చిన ట్రంప్‌ దంపతులు ఆయనకు కరచాలనం చేసి స్వాగతం పలికారు. 21 మంది సభ్యులతో కూడిన గౌరవ వందనం, సైనిక బ్యాండ్‌, రెండు బి-1 బాంబర్‌ విమానాల విన్యాసంతో ఘనంగా కార్యక్రమం నిర్వహించారు. ట్రంప్‌, జిన్‌పింగ్‌ కొద్దిసేపు మాట్లాడుకుని అనంతరం ఫొటోలకు పోజులిచ్చారు. ఈ మూడు రోజుల పర్యటనలో గురువారం వైట్‌హౌస్‌లో అధికారిక స్వాగత కార్యక్రమం, సైనిక పరేడ్‌, ద్వైపాక్షిక చర్చలు, స్టేట్‌ డిన్నర్‌ జరగనున్నాయి.Chinese President Xi Jinping and his wife, Peng Liyuan, were warmly greeted by U.S. President Donald Trump and his wife, Melania Trump, at the airport in a rare planeside welcome. pic.twitter.com/IoUSosQZ8d— Mulan Chun-Li (@chunlimulan) September 24, 2026ఓ విదేశీ నేతను అమెరికా అధ్యక్షుడు ఈ స్థాయిలో స్వయంగా స్వాగతించడం.. అదీ సుమారు ఆరు దశాబ్దాల తర్వాత కావడంతో చర్చనీయాంశంగా మారింది. ఇంతకు ముందు అమెరికా అధ్యక్షుడు జాన్ ఎఫ్. కెన్నడీ 1962లో పలువురు విదేశీ నేతలను వ్యక్తిగతంగా స్వాగతించారు. ఆ తర్వాత బుష్‌, ఒబామా కాలంలో పోప్‌లను మాత్రం స్వాగతించారు. పోటోకాల్‌ పేరిట అధ్యక్షుడిని మినహాయించి.. విదేశీ నేతలకు అధికార యంత్రాంగం వెల్‌కమ్‌ చెప్పటం అక్కడ ఆనవాయితీగా మారిపోయింది. అయితే జిన్‌పింగ్‌ కోసం ట్రంప్‌ ఇప్పుడు దానిని చెరిపేశారు.ఎందుకింత ప్రత్యేకం?అమెరికా అధ్యక్షులు సాధారణంగా విదేశీ నేతలను విమానాశ్రయానికి వెళ్లి స్వయంగా ఆహ్వానించరు. జాయింట్‌ బేస్‌ ఆండ్రూస్‌లో ఇలాంటి స్థాయి స్వాగతాలు అత్యంత అరుదు. జిన్‌పింగ్‌ పర్యటనకు ముందు ట్రంప్‌ అక్కడికి వెళ్లి స్వయంగా స్వాగతం పలకనున్నట్లు అమెరికా అధికారులు ప్రకటించడంతోనే ఆసక్తి నెలకొంది.ఈ పర్యటనకు మరో ప్రత్యేకత ఉంది. 2015 తర్వాత అమెరికా రాజధానికి చైనా అధ్యక్షుడి తొలి స్టేట్‌ విజిట్‌ ఇది. అయితే 2023లో అప్పటి అధ్యక్షుడు జో బైడెన్‌ ఆహ్వానం మేరకు శాన్‌ఫ్రాన్సిస్కోలో జరిగిన అమెరికా–చైనా శిఖరాగ్ర భేటీ, APEC సదస్సులో పాల్గొనేందుకు వెళ్లారు. ఇప్పుడు మాత్రం అధికారిక స్టేట్‌ విజిట్‌లో భాగంగా వాషింగ్టన్‌ చేరుకున్నారు. గత మేలో ట్రంప్‌ చైనాలో పర్యటించినప్పుడు జిన్‌పింగ్‌ స్వయంగా విమానాశ్రయానికి వెళ్లి ఆయనను కలవలేదు. ఈసారి మాత్రం ట్రంప్‌ స్వయంగా జిన్‌పింగ్‌ను స్వాగతించడం రెండు దేశాల మధ్య దౌత్యపరమైన ప్రాధాన్యతను స్పష్టం చేస్తోంది.వాణిజ్య యుద్ధానికి తాత్కాలిక బ్రేక్‌?జిన్‌పింగ్‌ అమెరికాలో అడుగుపెట్టిన రోజే రెండు దేశాల మధ్య వాణిజ్య అంశంలో కీలక పరిణామం చోటుచేసుకుంది. అమెరికా ట్రెజరీ కార్యదర్శి స్కాట్‌ బెసెంట్‌ ప్రకారం.. అమెరికా, చైనా మధ్య కొనసాగుతున్న వాణిజ్య సంధిని జనవరి 10 వరకు పొడిగించేందుకు ఇరు దేశాలు అంగీకరించాయి. ఈ ఒప్పందం నవంబర్‌లో ముగియాల్సి ఉంది. సుంకాలను తగ్గించడం, కొత్త వాణిజ్య ఆంక్షలు విధించకుండా ఉండటం వంటి అంశాలు ఇందులో ఉన్నాయి. ఇరు దేశాల మధ్య సుంకాలు, అరుదైన ఖనిజాలు, చిప్స్‌, సాంకేతికత వంటి అంశాల్లో విభేదాలు ఇంకా కొలిక్కి రావాల్సి ఉంది.టేబుల్‌పై ట్రేడ్‌.. ఏఐ.. ఇరాన్‌.. తైవాన్‌ట్రంప్‌–జిన్‌పింగ్‌ భేటీలో వాణిజ్యంతో పాటు ఆర్టిఫిషియల్‌ ఇంటెలిజెన్స్‌ కూడా కీలక అంశంగా ఉండనుంది. ఏఐ రంగంలో ఆధిపత్యం కోసం అమెరికా, చైనా తీవ్రంగా పోటీ పడుతున్నాయి. ఈ సాంకేతికతపై ఆందోళనలను చర్చించేందుకు ఇరు దేశాల మధ్య ప్రత్యేక కమ్యూనికేషన్‌ ఛానల్‌ ఏర్పాటు చేసే అంశం కూడా ప్రాథమిక చర్చల్లోకి వచ్చింది.అరుదైన ఖనిజాల సరఫరా కూడా కీలకంగా మారింది. ఎలక్ట్రానిక్స్‌ నుంచి సైనిక పరికరాల వరకు అనేక రంగాలకు అవసరమైన రేర్‌ ఎర్త్‌ మినరల్స్‌ విషయంలో చైనాకు ఉన్న ఆధిపత్యం అమెరికాకు ఆందోళన కలిగిస్తోంది. మరోవైపు కీలక చిప్స్‌, ఇతర సాంకేతిక ఉత్పత్తులపై అమెరికా విధిస్తున్న ఎగుమతి నియంత్రణలను చైనా వ్యతిరేకిస్తోంది.ఇరాన్‌ అంశం కూడా ఈ భేటీలో చర్చకు వచ్చే అవకాశముంది. ఇరాన్‌తో చైనా సంబంధాలు, మధ్యప్రాచ్యంలో కొనసాగుతున్న పరిణామాలు, తైవాన్‌ అంశాలపై రెండు దేశాల మధ్య భిన్నాభిప్రాయాలు ఉన్నాయి. అందువల్ల మూడు రోజుల పర్యటనలో అసలు చర్చలు గురువారం జరిగే ట్రంప్‌–జిన్‌పింగ్‌ సమావేశంపైనే కేంద్రీకృతం కానున్నాయి.భారీ ఏర్పాట్లు.. టెక్‌ దిగ్గజాలతో విందుజిన్‌పింగ్‌ పర్యటనలో భాగంగా గురువారం వైట్‌హౌస్‌లో స్టేట్‌ డిన్నర్‌ నిర్వహించనున్నారు. ఇందులో అమెరికా టెక్‌ రంగానికి చెందిన ప్రముఖులు పాల్గొననున్నారు. ఏఐ, చిప్స్‌, టెక్నాలజీ రంగాల దిగ్గజాల హాజరు ఈ విందుకు మరింత ప్రాధాన్యతను తెచ్చింది.శుక్రవారం జిన్‌పింగ్‌, పెంగ్‌ లియువాన్‌లు ట్రంప్‌ దంపతులతో వైట్‌హౌస్‌లో టీ కార్యక్రమంలో పాల్గొంటారు. అనంతరం అమెరికా చరిత్రకు సంబంధించిన కీలక పత్రాలు భద్రపరిచిన నేషనల్‌ ఆర్కైవ్స్‌ను సందర్శించనున్నారు. ఆ తర్వాత జాయింట్‌ బేస్‌ ఆండ్రూస్‌ నుంచి జిన్‌పింగ్‌ తిరుగు ప్రయాణం కానున్నారు.అమెరికా–చైనా మధ్య వాణిజ్య, సాంకేతిక, భౌగోళిక రాజకీయ విభేదాలు పూర్తిగా సమసిపోలేదు. అయితే చర్చల ద్వారా సంబంధాలను అదుపులో ఉంచి, మరోసారి పెద్ద స్థాయి ఘర్షణకు దారితీయకుండా చూడాలన్న ప్రయత్నం మాత్రం ఈ పర్యటనలో స్పష్టంగా కనిపిస్తోంది.

న్యూయార్క్‌: గాజాలో అమెరికా అధ్యక్షుడు డొనాల్డ్‌ ట్రంప్‌ కాల్పుల విరమణ ప్రణాళిక అమలుకు ఇబ్బందులు ఎదురవుతున్నాయి. దాడులు ఆగడం లేదు. ఇలాంటి తరుణంలో గాజాలో పునర్నిర్మాణం, పరిపాలనను ప్రారంభించేందుకు అమెరికా మద్దతుగల ‘బోర్డ్‌ ఆఫ్‌ పీస్‌’ 6 నెలల కార్యాచరణ కోసం 2.45 బిలియన్‌ డాలర్ల ప్రణాళికను ప్రతి­పాదిస్తోంది. బుధవారం ఐక్యరాజ్యసమితి జనరల్‌ అసెంబ్లీ సమావేశం సందర్భంగా న్యూయార్క్‌లో బోర్డు సమావేశం నిర్వహించారు. గాజాలో అధిగమించాల్సిన భారీ అడ్డంకులు ఇంకా ఉన్నాయని పేర్కొన్నారు. అక్కడ పునర్నిర్మాణ పనులను ప్రారంభించడానికి ‘బోర్డ్‌ ఆఫ్‌ పీస్‌’ గవర్నర్లు 66 ప్రాజెక్టుల బ్లూప్రింట్‌ను ఆవిష్కరించారు. ఇజ్రాయెల్‌–హమాస్‌ యుద్ధాన్ని ముగించడానికి ట్రంప్‌ 20 సూత్రాల ప్రణాళికకు మద్దతుగా రూపొందించిన ప్రతిష్టాత్మక మౌలిక సదుపాయాలు, విద్య, ఆరోగ్య కార్యక్రమాలు ఈ ప్రాజెక్టుల్లో ఉన్నాయి. గాజాలో దెబ్బతిన్న మౌలిక సదు­పాయాలు పూర్తిగా పునర్‌ నిర్మించడానికి సుమారు 35.2 బిలియన్ల అమెరికన్‌ డాలర్లు, అలాగే తదుపరి 10 ఏళ్లలో మరో 71.4 బిలియన్ల అమెరికన్‌ డాలర్లు ఖర్చ­వుతాయని ‘బోర్డ్‌ ఆఫ్‌ పీస్‌’ తెలిపింది.

అమెరికా అధ్యక్షుడు డొనాల్డ్‌ ట్రంప్‌, చైనా అధ్యక్షుడు షీ జిన్‌పింగ్‌ గురువారం వైట్‌హౌస్‌లో భేటీ కానున్న నేపథ్యంలో ఇరాన్‌ అంశం కీలక చర్చగా మారే అవకాశం ఉంది. ఇరాన్‌ క్షిపణి దాడికి ముందు చైనా సంస్థలు టెహ్రాన్‌కు అధిక స్పష్టత కలిగిన ఉపగ్రహ చిత్రాలను అందించాయన్న నివేదిక నేపథ్యంలో ఈ అంశంపై ఇరు దేశాల మధ్య మరోసారి ఉద్రిక్తతలు తలెత్తే అవకాశముంది.జూలై 17న జోర్డాన్‌లోని మువాఫాక్‌ సాల్టీ వైమానిక స్థావరంపై ఇరాన్‌ క్షిపణి దాడి చేసింది. ఆ దాడిలో ముగ్గురు అమెరికా సైనికులు మరణించగా, మరో నలుగురు గాయపడ్డారు. దాడికి ముందు ఇరాన్‌కు అందిన ఉపగ్రహ చిత్రాలకు, ఈ దాడికి సంబంధం ఉందని అమెరికా అధికారులు భావిస్తున్నట్లు వాల్‌స్ట్రీట్‌ జర్నల్‌ పేర్కొంది. అయితే, సంబంధిత చైనా సంస్థల పేర్లను అమెరికా అధికారులు వెల్లడించలేదు. చైనా ప్రభుత్వం కూడా తమ సంస్థలు అమెరికా సైనికులను లక్ష్యంగా చేసుకునే దాడికి చిత్రాలను అందించాయన్న ఆరోపణలను తిరస్కరించింది.చైనా–ఇరాన్‌ సంబంధాలపై అమెరికా గత కొంతకాలంగా ఆందోళన వ్యక్తం చేస్తోంది. ఇరాన్‌కు లక్ష్య నిర్ధారణలో ఉపయోగపడే ఉపగ్రహ చిత్రాలు, నావిగేషన్‌ సేవలు, డ్రోన్లు, క్షిపణులకు సంబంధించిన పరికరాలను చైనా సంస్థలు అందిస్తున్నాయన్న ఆరోపణలు ఉన్నాయి. మేలో ట్రంప్‌ ప్రభుత్వం 3 చైనా సంస్థలపై ఆంక్షలు విధించింది. అవి ఇరాన్‌కు ఉపయోగపడే ఉపగ్రహ చిత్రాలను అందించడం, సేకరించడం లేదా ప్రచురించడంలో పాలుపంచుకున్నాయని అమెరికా ఆరోపించింది.ట్రంప్‌ కూడా ఈ అంశంపై స్పందిస్తూ.. “చైనా మనపై గూఢచర్యం చేస్తుందని వారు అంటున్నారు. వారు చెప్పింది నిజమే. మనం కూడా వారిపై గూఢచర్యం చేస్తున్నాం” అని అన్నారు. షీతో ఈ అంశాన్ని ప్రస్తావిస్తారా అని అడిగినప్పుడు, చైనా అధ్యక్షుడు “సహేతుకంగా వ్యవహరించారు.. మనం కూడా సహేతుకంగా వ్యవహరిస్తున్నాం” అని ట్రంప్‌ పేర్కొన్నారు.ఇరాన్‌తో పాటు వాణిజ్యం, కృత్రిమ మేధ, అరుదైన ఖనిజాలు, తైవాన్‌ అంశాలు కూడా ట్రంప్‌-జిన్‌పింగ్‌ చర్చల్లో ఉంటాయి. సెప్టెంబర్‌ 23 నుంచి 25 వరకు షీ అమెరికాలో పర్యటిస్తున్నారు. నవంబర్‌లో ప్రస్తుత వాణిజ్య సంధి గడువు ముగియనున్న నేపథ్యంలో ఆర్థిక సంబంధాల్లో స్థిరత్వాన్ని కొనసాగించడంపైనా ఇరు దేశాలు దృష్టి పెట్టనున్నాయి. ఇరాన్‌కు సంబంధించిన ఉపగ్రహ చిత్రాల వ్యవహారం ఈ భేటీలో మరో కీలక విభేదంగా మారుతుందా? అనేది ఇప్పుడు చూడాల్సి ఉంది.

ఐక్యరాజ్యసమితి వేదికగా అమెరికా అధ్యక్షుడు డొనాల్డ్‌ ట్రంప్‌ పాకిస్థాన్‌ ప్రధాని షెహబాజ్‌ షరీఫ్‌ను ‘టెర్రిఫిక్‌ మ్యాన్‌’ అంటూ ప్రశంసించడం ఇప్పుడు మరో చర్చకు దారితీసింది. అయితే ఈ ప్రశంసలు పాక్‌కు అనుకూలంగా కనిపిస్తున్న వేళ.. ఉగ్రవాదంపై షరీఫ్‌ చేసిన ఓ వ్యాఖ్య సోషల్‌ మీడియాలో మళ్లీ వైరల్‌గా మారింది. ‘‘మా ఉగ్రవాదులను నియంత్రించకపోయి ఉంటేనా..’’ అని ఆయన వ్యాఖ్యపై నెటిజన్లు భిన్నంగా స్పందిస్తున్నారు.81వ UNGAలో మంగళవారం ప్రసంగించిన ట్రంప్‌.. భారత్‌, పాకిస్థాన్‌ మధ్య 2025లో చోటుచేసుకున్న సైనిక ఉద్రిక్తతను ప్రస్తావించారు. ఆ వివాదాన్ని ఆపేందుకు తాను జోక్యం చేసుకున్నానని మరోసారి పేర్కొన్నారు. ఈ సందర్భంగా పాకిస్థాన్‌ ప్రధాని షెహబాజ్‌ షరీఫ్‌ను ‘టెర్రిఫిక్‌ మ్యాన్‌’గా అభివర్ణించారు. షరీఫ్‌ తనకు కృతజ్ఞతలు తెలిపారని, తాను 3 కోట్ల మంది ప్రాణాలను కాపాడినట్లు చెప్పారని ట్రంప్‌ పేర్కొన్నారు. అయితే భారత్‌ మాత్రం ఈ వివాదంలో మూడో పక్షం మధ్యవర్తిత్వం చేసిందన్న వాదనను గతంలో తిరస్కరించింది.వైరల్‌గా మారిన ఆ వ్యాఖ్య..ట్రంప్‌ ప్రశంసల నేపథ్యంలో షరీఫ్‌ చేసిన ఓ పాత వ్యాఖ్య ఇప్పుడు సోషల్‌ మీడియాలో వైరల్‌గా మారింది. 2025లో జరిగిన 80వ యూఎన్‌జీఏలో ఆయన పాకిస్థాన్‌ రెండు దశాబ్దాలకు పైగా ఉగ్రవాదంపై పోరాడుతోందని చెప్పారు. ఈ పోరులో 90 వేల మందికి పైగా ప్రాణాలు కోల్పోయామని, భారీ ఆర్థిక నష్టం ఎదుర్కొన్నామని పేర్కొన్నారు. అదే ప్రసంగంలో షరీఫ్‌.. పాకిస్థాన్‌ ఉగ్రవాదులను ఎదుర్కొనకపోయి ఉంటే వారు న్యూయార్క్‌, లండన్‌ వీధుల్లో తిరిగేవారని వ్యాఖ్యానించారు. ఉగ్రవాదంపై పాకిస్థాన్‌ చేస్తున్న పోరాటాన్ని ప్రపంచ భద్రతకు తన దేశం చేస్తున్న సేవగా ఆయన అభివర్ణించారు.‘If we haven't controlled our terrorists, they would be roaming on the streets of New York or London"- Pakistan PM Shehbaz Sharif at UNGA pic.twitter.com/2bHJaAKEaG— Rishi Bagree (@rishibagree) September 22, 2026ఒప్పుకున్నట్లేనా?ఈ వ్యాఖ్యల వీడియో ఇప్పుడు సోషల్‌ మీడియాలో వైరల్‌గా మారడంతో.. పాకిస్థాన్‌కు కొత్త చిక్కు ఎదురైంది. షరీఫ్‌ మాటలను పట్టుకుని కొందరు నెటిజన్లు తీవ్రంగా ప్రశ్నిస్తున్నారు. పాకిస్థాన్‌లో ఉగ్రవాద నెట్‌వర్క్‌లు ఉన్నాయన్న విషయాన్ని ఆ దేశ ప్రధానే స్వయంగా అంగీకరించినట్టుగా వారు వ్యాఖ్యానిస్తున్నారు. దీంతో ఉగ్రవాదంపై పాక్‌ వైఖరి, గతంలో ఆ దేశంపై వచ్చిన ఆరోపణలు మరోసారి చర్చకు వస్తున్నాయి.ఇక్కడే మరో కీలక విషయం ఉంది. సోషల్‌ మీడియాలో ప్రస్తుతం వైరల్‌ అవుతున్న ‘న్యూయార్క్‌, లండన్‌’ వ్యాఖ్య ఈ సమావేశాల్లో చేసిన షరీఫ్‌ చేసిన ప్రసంగానిది కాదు. షరీఫ్‌ 2026లో 81వ UNGAకి హాజరయ్యేందుకు సెప్టెంబర్‌ 21న న్యూయార్క్‌ చేరుకున్నారు. ఆయన తాజా UNGA ప్రసంగం సెప్టెంబర్‌ 25న జరగనుంది.ట్రంప్‌ నుంచి వచ్చిన బహిరంగ ప్రశంసల సమయంలోనే ఈ పాత వ్యాఖ్య మళ్లీ తెరపైకి రావడంతో.. పాకిస్థాన్‌ ఉగ్రవాదంపై తన గత వాదనలపై కొత్త చర్చ మొదలైంది. ఒకవైపు అమెరికా అధ్యక్షుడి ప్రశంసలు.. మరోవైపు షరీఫ్‌ పాత ఉగ్రవాద వ్యాఖ్య వైరల్‌ కావడం.. పాక్‌ దౌత్యానికి ఇది ఊహించని చర్చగా మారింది.ఇదీ చదవండి: ఆ టెక్నాలజీ మామూలుది కాదంటున్న ట్రంప్‌

న్యూయార్క్‌: ఇజ్రాయెల్‌ ప్రధాని బెంజమిన్‌ నెతన్యాహు, న్యూయార్క్‌ మేయర్‌ జొహ్రాన్‌ మమ్దానీ మధ్య మాటల యుద్ధం మరింత ముదిరింది. ఐక్యరాజ్యసమితి సాధారణ సభలో ప్రసంగించేందుకు నెతన్యాహు న్యూయార్క్‌ చేరుకోనున్న వేళ.. మమ్దానీపై ఆయన తీవ్రస్థాయిలో విరుచుకుపడ్డారు. మమ్దానీ హమాస్‌కు మద్దతు ఇస్తున్నారని, న్యూయార్క్‌లో యూదులకు వ్యతిరేకంగా అల్లర్లను ప్రోత్సహిస్తున్నారని నెతన్యాహు ఆరోపించారు.మమ్దానీ సోమవారం సీఎన్‌ఎన్‌కు ఇచ్చిన ఇంటర్వ్యూలో నెతన్యాహును ‘వార్‌ క్రిమినల్‌’, పాలస్తీనా ప్రజలపై జరుగుతున్న దారుణాలను ‘జెనోసైడ్‌కు ఆర్కిటెక్ట్‌’గా అభివర్ణించారు. ఈ వ్యాఖ్యలపై స్పందించిన నెతన్యాహు వీడియో సందేశంలో.. ‘నేను ఐక్యరాజ్యసమితికి వస్తున్నాను. మా వీరోచిత సైనికుల గురించి నిజం చెబుతాను. మీ గురించి కూడా నిజం చెబుతాను’ అని అన్నారు. ఇదే సమయంలో మమ్దానీని ఉద్దేశించి నెతన్యాహు మరింత ఘాటుగా స్పందించారు. ‘షేమ్‌ ఆన్‌ యూ, మిస్టర్‌ మమ్దానీ. మా ప్రజలను హతమార్చిన హమాస్‌ ఉగ్రవాదులకు మద్దతు ఇస్తున్నందుకు సిగ్గుపడాలి. న్యూయార్క్‌ యూదులకు వ్యతిరేకంగా అల్లర్లను ప్రేరేపిస్తున్నందుకు సిగ్గుపడాలి’ అని వ్యాఖ్యానించారు.అయితే, ఈ వివాదం కొత్తది కాదు. గతంలో నెతన్యాహును న్యూయార్క్‌లోకి వస్తే అరెస్టు చేస్తానని మమ్దానీ వ్యాఖ్యానించారు. అయితే, అలాంటి అరెస్టు చేసే అధికార పరిధి తనకు వాస్తవంగా ఉందో లేదో స్పష్టత లేదని ఆయన తర్వాత అంగీకరించారు. అంతర్జాతీయ క్రిమినల్‌ కోర్టు (ICC) నెతన్యాహుపై జారీ చేసిన అరెస్టు వారెంట్‌ నేపథ్యంలో మమ్దానీ ఈ వ్యాఖ్యలు చేశారు.ఆరోపణలను తిరస్కరించిన మమ్దానీమమ్దానీపై కొంతమంది రిపబ్లికన్‌ ప్రత్యర్థులు గతంలో యూదు వ్యతిరేకత ఆరోపణలు చేశారు. పాలస్తీనా అనుకూల వైఖరి, గాజాలో ఇజ్రాయెల్‌ సైనిక చర్యలపై ఆయన విమర్శలను ఇందుకు ఉదాహరణగా చూపారు. అయితే మమ్దానీ ఈ ఆరోపణలను తిరస్కరించారు. యూదు వ్యతిరేకతను తాను ఖండించానని, ఇజ్రాయెల్‌ ప్రభుత్వ విధానాలపై విమర్శలను యూదులపై ద్వేషంతో ముడిపెట్టడం సరికాదని ఆయన పేర్కొన్నారు. జూలైలోనూ నెతన్యాహు మమ్దానీపై విమర్శలు చేశారు. న్యూయార్క్‌ మేయర్‌గా అన్ని వర్గాల ప్రజలకు ప్రాతినిధ్యం వహించాల్సిన ఆయన.. ఒక వర్గాన్ని మరో వర్గానికి వ్యతిరేకంగా నిలబెడుతున్నారని ఆరోపించారు.ట్రంప్‌, మమ్దానీ భేటీ..ఇదిలా ఉండగా, అమెరికా అధ్యక్షుడు డొనాల్డ్‌ ట్రంప్‌, న్యూయార్క్‌ మేయర్‌ జొహ్రాన్‌ మమ్దానీ భేటీ అయ్యారు. గ్రేసీ మాన్షన్‌లో జరిగిన ఈ సమావేశంలో న్యూయార్క్‌లో గృహ నిర్మాణం, జీవన వ్యయం, వలసదారుల సమస్యలు, పోలీసింగ్‌ తదితర అంశాలపై చర్చించారు. క్వీన్స్‌లోని సన్నీసైడ్‌ యార్డ్స్‌లో సుమారు 12 వేల అందుబాటు ధరల ఇళ్ల నిర్మాణం, 30 వేల ఉద్యోగాల కల్పనకు సంబంధించిన ప్రతిపాదనపైనా చర్చ జరిగింది. ఈ ప్రాజెక్టుపై ఇరు వర్గాలు తదుపరి చర్చలు జరపాలని నిర్ణయించాయి. గతంలో ట్రంప్‌, మమ్దానీ మధ్య తీవ్ర విమర్శలు జరిగినప్పటికీ.. భేటీ అనంతరం ట్రంప్‌ మాట్లాడుతూ న్యూయార్క్‌కు మమ్దానీ గొప్ప మేయర్‌ కావాలని కోరుకుంటున్నట్లు తెలిపారు. ప్రజలకు ప్రయోజనం చేకూర్చే అంశాల్లో అధ్యక్షుడితో కలిసి పనిచేస్తానని మమ్దానీ చెప్పారు.ఇదీ చదవండి: ఇరాన్‌తో మూడు గంటలు చర్చలు.. గుడ్‌న్యూస్‌ చెప్పిన ట్రంప్‌

అమెరికా–ఇరాన్‌ మధ్య దాదాపు ఏడు నెలలుగా కొనసాగుతున్న యుద్ధానికి తెరపడే దిశగా కీలక పరిణామం చోటుచేసుకుంది. ఐక్యరాజ్యసమితి సాధారణ సభ వేదికగా ఇరు దేశాల ప్రతినిధుల మధ్య సుదీర్ఘ చర్చలు జరిగాయి. అమెరికా ప్రత్యేక రాయబారి స్టీవ్‌ విట్‌కాఫ్‌, ఇరాన్‌ విదేశాంగ మంత్రి అబ్బాస్‌ అరాఘ్చి మధ్య సుమారు మూడు గంటలపాటు సమావేశం జరిగినట్లు ఇరు వర్గాలు ధ్రువీకరించాయి.అమెరికా అధ్యక్షుడు డొనాల్డ్‌ ట్రంప్‌ ఈ సమావేశంలో నేరుగా పాల్గొనలేదు. ఆయన రాయబారులు, ఇరాన్‌ ప్రతినిధులు మధ్యే చర్చలు సాగాయి. ఈ భేటీపై ట్రంప్‌ మాత్రం సానుకూల వ్యాఖ్యలు చేశారు. అమెరికా–ఇరాన్‌ ప్రతినిధుల మధ్య జరిగిన సమావేశం ‘చాలా బాగుంది’ అని ఆయన చెప్పారు. ఇరాన్‌కు ఒప్పందం చేసుకోవడం ప్రయోజనకరమని వ్యాఖ్యానించారు.మరోవైపు విట్‌కాఫ్‌ కూడా చర్చలు సుదీర్ఘంగా జరిగాయని, అవి నిర్మాణాత్మకంగా ఉండాలని ఆశిస్తున్నట్లు తెలిపారు. మధ్యవర్తుల ద్వారా ఇరు వర్గాల మధ్య చర్చలు కొనసాగుతాయని చెప్పారు.హర్ముజ్‌ తెరవాలంటే మూడు షరతులుఈ సమావేశంలో ప్రధానంగా చర్చకు వచ్చిన అంశం హర్ముజ్‌ జలసంధి. ప్రపంచంలోని కీలక చమురు రవాణా మార్గాల్లో ఒకటైన ఈ జలసంధి ద్వారా భారీ స్థాయిలో చమురు, గ్యాస్‌ రవాణా జరుగుతుంది. యుద్ధం కారణంగా ఇక్కడ రవాణా తీవ్రంగా దెబ్బతినడంతో ప్రపంచ ఇంధన మార్కెట్లపై ప్రభావం పడుతోంది. అయితే జలసంధిని తిరిగి తెరవడానికి ఇరాన్‌ అమెరికా ముందు మూడు ప్రధాన షరతులు పెట్టినట్లు ఇరాన్‌ ప్రభుత్వ మీడియా తెలిపింది.మొదటిది.. ఇరాన్‌పై కొనసాగుతున్న అమెరికా నౌకాదళ దిగ్బంధనాన్ని వెంటనే ఎత్తివేయాలి.రెండోది.. అమెరికా వద్ద స్తంభింపజేసిన ఇరాన్‌ ఆస్తులను విడుదల చేయాలి.మూడోది.. ఇరాన్‌ మద్దతు ఉన్న వివిధ ‘రెసిస్టెన్స్‌ ఫ్రంట్ల’పై కొనసాగుతున్న యుద్ధాన్ని ముగించాలి.ఈ షరతులను నెరవేర్చినట్లయితే హర్ముజ్‌ జలసంధిని ఏడు రోజుల్లో తిరిగి తెరవగలమని ఇరాన్‌ గతంలోనే మధ్యవర్తుల ద్వారా అమెరికాకు ప్రతిపాదించినట్లు తెలుస్తోంది.ఆ విషయంలో ట్రంప్‌ ‘నో’మరోవైపు ట్రంప్‌ వైఖరిలో మాత్రం కీలకమైన అంశం మారలేదు. ఇరాన్‌ ఎట్టి పరిస్థితుల్లోనూ అణ్వాయుధాన్ని పొందకూడదని ఆయన స్పష్టం చేశారు. ఐరాస సర్వసభ్య సమావేశంలో ప్రసంగించిన సమయంలో కూడా ఇరాన్‌ విషయంలో తన ముందు రెండు మార్గాలున్నాయని ట్రంప్‌ వ్యాఖ్యానించారు. ఒకటి ఒప్పందం చేసుకుని ఇరాన్‌ భవిష్యత్తును మార్చడం.. మరో మార్గం తీవ్ర సైనిక చర్య అని హెచ్చరించారు.అయితే అదే సమయంలో ఇరాన్‌తో ఒప్పందం కుదిరే అవకాశం ఉందని కూడా ఆయన చెప్పారు. ‘ఎలాగైనా ఒప్పందం కుదుర్చుకుంటాం.. వేగంగా పూర్తి చేస్తాం’ అన్నట్టుగా వ్యాఖ్యానించారు. దీంతో ట్రంప్‌ ఒకవైపు కఠిన హెచ్చరికలు చేస్తూనే.. మరోవైపు చర్చలకు తలుపులు తెరిచి ఉంచిన పరిస్థితి కనిపిస్తోంది.వాళ్లే ముందడుగు వేయాలిఇరాన్‌ వైపు నుంచి కూడా తాజాగా దౌత్యానికి అవకాశం ఉందన్న సంకేతాలు వచ్చాయి. అమెరికా నిజంగా సమస్యను దౌత్యపరంగా పరిష్కరించాలనుకుంటున్నట్లు అధికారికంగా స్పష్టం చేయాలని, ఆ తర్వాత చర్చలకు విధివిధానాలు, షెడ్యూల్‌ ఖరారు చేయాలని ఇరాన్‌ కోరుతోంది.ఇక హర్ముజ్‌ విషయంలోనూ ఇదే వైఖరిని ఇరాన్‌ అవలంబిస్తోంది. అమెరికా సైనిక ఒత్తిడిని తగ్గించి, దిగ్బంధనాన్ని ఎత్తివేస్తే ఏడు రోజుల్లో జలసంధిని తెరవడానికి సిద్ధమని చెబుతోంది. అంటే ముందుగా అమెరికా చర్య తీసుకోవాలి.. ఆ తర్వాతే హర్ముజ్‌ తెరుచుకుంటుందన్నది ఇరాన్‌ ప్రతిపాదన.ఇప్పట్లో డీల్‌ కష్టమేనా?మూడు గంటల చర్చలు జరిగినప్పటికీ అమెరికా–ఇరాన్‌ మధ్య ఎలాంటి తుది ఒప్పందం కుదరలేదు. సమావేశంలో కొన్ని షరతులు, యుద్ధం ముగింపు మార్గాలు, హర్ముజ్‌ పునఃప్రారంభం వంటి అంశాలపై చర్చ జరిగినట్లు సమాచారం. రానున్న రోజుల్లో మరోసారి చర్చలు జరిగే అవకాశం ఉంది.ప్రస్తుతం పరిస్థితి ‘యుద్ధం నుంచి చర్చల వైపు అడుగు’ వేసినంతవరకే ఉంది. అమెరికా తన సైనిక, ఆర్థిక ఒత్తిడిని తగ్గించాలన్నది ఇరాన్‌ డిమాండ్‌ కాగా.. ఇరాన్‌ అణ్వాయుధం దిశగా వెళ్లకుండా హామీ ఇవ్వాలన్నది ట్రంప్‌ ప్రధాన డిమాండ్‌. ఈ రెండు వైఖరుల మధ్యే అసలు పేచీ ఉంది.ప్రపంచం చూపు హర్ముజ్‌పైనే..హర్ముజ్‌ జలసంధి తిరిగి తెరుచుకుంటుందా లేదా అన్నదే ఇప్పుడు అంతర్జాతీయంగా కీలకంగా మారింది. యుద్ధం కారణంగా ఈ మార్గంలో ఇంధన రవాణా దెబ్బతినడంతో చమురు మార్కెట్లలో ఆందోళన పెరిగింది. మరోవైపు సౌదీ అరేబియా ప్రత్యామ్నాయ మార్గాల ద్వారా చమురు ఎగుమతులను కొనసాగించే ప్రయత్నం చేస్తోంది. అమెరికా కూడా హర్ముజ్‌పై ఆధారాన్ని తగ్గించేందుకు గల్ఫ్‌ దేశాలతో ప్రత్యామ్నాయ ఇంధన రవాణా మౌలిక వసతులపై చర్చలు జరుపుతోంది. ఇలాంటి పరిస్థితుల్లో న్యూయార్క్‌లో జరిగిన ఈ మూడు గంటల భేటీకి ప్రాధాన్యత పెరిగింది. తదుపరి చర్చల్లో ఈ రెండు వైఖరుల మధ్య ఎంతవరకు సయోధ్య కుదురుతుందన్నదే అసలు కీలకం కానుంది.ఇదీ చదవండి: నా మాట వినకపోతే మీ గతి అదోగతే!

ఐక్యరాజ్యసమితి: అమెరికా అధ్యక్షుడు డొనాల్డ్‌ ట్రంప్‌ ఐక్యరాజ్యసమితి జనరల్‌ అసెంబ్లీ సాక్షిగా ఇరాన్‌కు తీవ్ర హెచ్చరికలు జారీ చేశారు. తమతో ఒప్పందానికి ఇకనైనా ముందుకు రాకపోతే ఇరాన్‌ను నాశనం చేస్తామని, నరకానికి పంపిస్తామని తేల్చిచెప్పారు. ట్రంప్‌ మంగళవారం ఐరాస జనరల్‌ అసెంబ్లీ సమావేశంలో 37 నిమిషాలపాటు ప్రసంగించారు. ఇరాన్‌పై మరిన్ని సైనిక చర్యలు ఉంటాయని స్పష్టంచేశారు. ఇరాన్‌తో ఏడు నెలలుగా సాగుతున్న యుద్ధాన్ని సమర్ధించారు. ఇరాన్‌ అణ్వాయుధాలు సొంతం చేసుకోకుండా ఈ యుద్ధం నిరోధించిందని, పశ్చిమాసియాలో ఆధిపత్య శక్తిగా ఇరాన్‌ స్థానాన్ని అంతం చేసిందని పేర్కొన్నారు. ఇరాన్‌కు పునర్నిర్మించుకొనే అవకాశం ఇవ్వాలా?. నాశనం చెయ్యాలా అనేది తేల్చుకోవాల్సి ఉందన్నారు. లేదంటే ఇరాన్‌ను నరకంలోకి నెట్టేయాలా? అని ప్రశ్నించారు. ఒకవైపు ఇరాన్‌పై సైనిక చర్యలు తప్పవంటూనే మరోవైపు త్వరలో ఒప్పందం కుదురుతుందని ట్రంప్‌ ఆశాభావం వ్యక్తంచేశారు. నవంబర్‌ 3న జరిగే అమెరికా మధ్యంతర ఎన్నికల తర్వాత వాషింగ్టన్, టెహ్రాన్‌లు ఒక ఒప్పందానికి వస్తాయని ఆశిస్తున్నట్లు చెప్పారు. ఉగ్రవాదానికి ప్రధాన స్పాన్సర్‌ టెహ్రాన్‌ ఇరాన్‌పై ఆర్థిక ఒత్తిడిని కొనసాగించాలని ప్రపంచ దేశాలను ట్రంప్‌ పిలుపునిచ్చారు. ప్రపంచంలోనే ఉగ్రవాదానికి ప్రధాన స్పాన్సర్‌ టెహ్రాన్‌ అని ఆరోపించారు. ఉగ్రవాద మూకలను పెంచి పోషిస్తోందని మండిపడ్డారు. ఇరాన్‌ ఒకప్పుడు పశ్చిమాసియాపై ఆధిపత్యం చెలాయించేందని, ఇప్పుడు ఆ పరిస్థితి లేదని అన్నారు. ఇరాన్‌పై యుద్ధం తన రాజకీయ భవిష్యత్తును ప్రభావితం చేయదని, మధ్యంతర ఎన్నికలలో తాను అభ్యర్ధిని కాదని ట్రంప్‌ వ్యాఖ్యానించారు. తాను ఇప్పటికే ఎన్నికల్లో పోటీ చేశానని, భారీ మెజారిటీతో గెలిచానని, మరో రెండున్నర ఏళ్లపాటు పదవిలో ఉంటానని స్పష్టంచేశారు. ఈ మధ్యంతర ఎన్నికలు అమెరికా కాంగ్రెస్‌పై తమ నియంత్రణను నిర్ణయిస్తాయానని చెప్పారు. మిగిలిన తన పదవీ కాలాన్ని నిర్దేశిస్తాయని వెల్లడించారు. వాణిజ్య నౌకలపై ఇరాన్‌ దాడులను ట్రంప్‌ ఖండించారు. ఈ విషయంలో తీర్మానానికి ఐక్యరాజ్యసమితి భద్రతా మండలి భారీ మెజారిటీతో ఓటు వేసినందుకు ధన్యవాదాలు తెలియజేశారు. ఇరాన్‌పై ఒత్తిడిని కొనసాగించడంలో మనం అంతే ఐక్యంగా ఉండాలని కోరారు. సంఘర్షణ ప్రారంభమైనప్పటి నుంచి అమెరికా నౌకాదళం హార్మూజ్‌ జలసంధి గుండా బిలియన్‌ బ్యారెళ్లకు పైగా చమురును రవాణా చేసిందని పేర్కొన్నారు. ఇకపై సూపర్‌ ఇంటెలిజెన్స్‌ పారిశ్రామిక విప్లవం, ఇంటర్నెట్‌ కంటే కృత్రిమ మేధ పెద్ద మార్పును తీసుకురాగలదని డొనాల్డ్‌ ట్రంప్‌ చెప్పారు. ‘కృత్రిమ మేధ’అనే పదాన్ని ‘సూపర్‌ ఇంటెలిజెన్స్‌’తో భర్తీ చేయాలని అన్నారు. ఇకపై అమెరికా ప్రభుత్వ పత్రాల్లో కృత్రిమ మేధకు బదులుగా సూపర్‌ ఇంటెలిజెన్స్‌ లేదా ‘ఎస్‌ఐ’ని మాత్రమే ఉపయోగించనున్నట్లు తెలిపారు. ‘ఇకపై అమెరికాకు సంబంధించిన అన్ని పత్రాల్లోనూ బహుశా ప్రపంచవ్యాప్తంగా కూడా ఆరి్టఫిíÙయల్‌ అనే పదానికి బదులుగా సూపర్‌ అనే పదాన్ని ఉపయోగిస్తారని భావిస్తున్నట్లు వెల్లడించారు. సూపర్‌ ఇంటెలిజెన్స్‌ అనే కొత్త ప్రపంచానికి స్వాగతం అని వ్యాఖ్యానించారు. ఇది ఎలా సాగుతుందో చూద్దామని, వినడానికి ఇది చాలా బాగుందని చెప్పారు. అధునాతన ఏఐ సాంకేతికత కోసం జరుగుతున్న పోటీని ఒక వ్యూహాత్మక పోటీగా అభివరి్ణంచారు. భారత్, పాక్‌ యుద్ధాన్ని నేనే ఆపేశా.. గత ఏడాది భారత్‌–పాకిస్తాన్‌ యుద్ధాన్ని తానే ఆపేశానని ట్రంప్‌ పునరుద్ఘాటించారు. అమెరికా అధ్యక్షుడిగా పదవీ బాధ్యతలు చేపట్టినప్పటి నుంచి ప్రపంచవ్యాప్తంగా ఎనిమిది యుద్ధాలను పరిష్కరించానని అన్నారు. తద్వారా ఆయా దేశాల నాయకులతో స్నేహ పూర్వక సంబంధాలను ఏర్పరచుకోవడం గొప్ప గౌరవంగా అభివర్ణించారు. వీటిలో అనేక యుద్ధాలు ఎన్నో ఏళ్లుగా, కొన్ని దశాబ్దాలుగా కూడా కొనసాగుతూ వచ్చాయని వెల్లడించారు. వాటిని నిలిపివేసిన ఘనత తనకే దక్కిందన్నారు. రష్యా, ఉక్రెయిన్‌ల మధ్య జరుగుతున్న యుద్ధాన్ని ముగించడానికి, అవసరమైతే, కొత్త చట్టం కింద తనకు లభించిన భారీ సుంకాల అధికారాలను వినియోగిస్తానని ట్రంప్‌ హెచ్చరించారు. ఇరాన్‌ అధ్యక్షుడు, విదేశాంగ మంత్రి గైర్హాజరు ఐరాస సాధారణ సభ వార్షిక సమావేశంలో పాల్గొనడానికి ఇరాన్‌ అధ్యక్షుడు మసూద్‌ పెజెష్కియాన్, విదేశాంగ మంత్రి అబ్బాస్‌ అరాగ్చీ న్యూయార్క్‌కు చేరుకున్నారు. కానీ, ట్రంప్‌ ప్రసంగానికి వారు హాజరు కాలేదు. జనరల్‌ అసెంబ్లీ హాల్‌లో ఉన్న ఇరాన్‌ ప్రతినిధులు ట్రంప్‌ ప్రసంగం ప్రారంభం కాగానే బయటకు వెళ్లిపోయారు. కేవలం ఒక్కరు మాత్రమే హాల్‌లో ఉన్నట్లు తెలిసింది.

వాషింగ్టన్‌: అమెరికా అధ్యక్షుడి అధికారిక నివాసం వైట్‌హౌస్‌ తాజాగా డిజిటల్‌ స్ట్రీమింగ్‌ సర్వీసును ప్రారంభించింది. ‘ట్రంప్‌ టీవీ: ద ఎసన్షియల్‌ స్టేషన్‌’పేరుతో సోమవారం రాత్రి ఏడు గంటలకు ఈ డిజిటల్‌ స్ట్రీమింగ్‌ సేవలు ప్రారంభమయ్యాయి. సీఎన్‌ఎన్, ఎంఎస్‌ నౌ, పొలిటికో వంటి మీడియా సంస్థలకు వైట్‌హౌస్‌లో ప్రవేశాన్ని నిరాకరించిన రెండు రోజుల్లో ట్రంప్‌ ఈ కొత్త స్ట్రీమింగ్‌ సర్వీసును ప్రారంభించడం గమనార్హం. వారు తప్పుడు వార్తలు ప్రచారం చేస్తున్నారని అందుకే నిషేధించామని ట్రంప్‌ తన చర్యను సమర్థి చుకున్నారు కూడా. వైట్‌హౌస్‌ బృందం ఇప్పుడు డిజిటల్‌ స్ట్రీమింగ్‌ సర్వీసుకు తన సోషల్‌ మీడియా అకౌంట్ల ద్వారా ప్రచారం కల్పిస్తోంది. వైట్‌హౌస్‌ వెబ్‌సైట్, యూట్యూబ్‌ ఛానళ్లలో ఈ సర్వీసు లైవ్‌ ఫీడ్‌గా అందుబాటులో ఉంది. ‘‘ట్రంప్‌ ప్రభుత్వపు అతిపెద్ద క్షణాలు అన్నింటినీ ఒకే చోట చూడండి. టాప్‌ వీడియోస్, ప్రధాన వ్యాఖ్యలు, తప్పకుండా చూడాల్సిన హైలైట్స్‌ 24/7 ప్రసారమవుతుంటాయి. రియల్‌టైమ్‌లో అప్‌డేట్‌ అవుతుంటాయి. స్టే ఇన్‌ఫార్మ్‌డ్‌ అండ్‌ స్టే అప్‌ టు డేట్‌’’అంటూ ఈ సర్వీసు ప్రత్యేకతలను వర్ణించారు. ఫేక్‌ న్యూస్, కల్పిత వార్తలు, అబద్ధా్దలు ప్రచారం చేస్తున్నందుకు సీఎన్‌ఎన్, ఎంఎస్‌ నౌ, పొలిటికోను బహిష్కరిస్తున్నట్లు ట్రంప్‌ ప్రకటించడం.. ఈ విషయమై కోర్టులో కేసు వేయనున్నట్లు ఆ మూడు మీడియా సంస్థలు ప్రకటించడం ఇటీవలి పరిణామాలే. మరోవైపు అమెరికా టీవీ ఛానళ్లు ఏబీసీ, సీబీఎస్, సీఎన్‌ఎన్, ఫాక్స్, ఎన్‌బీసీలు అన్నీ ట్రంప్‌ టెలివిజన్‌ కవరేజ్‌ పూల్‌ నుంచి తప్పుకున్నట్లు సోమవారం ప్రకటించాయి. అధ్యక్షుడి కార్యక్రమాలు కొన్నింటిని చిత్రీకరించడం కోసం ఈ పూల్‌ ఏర్పాటైంది.

న్యూయార్క్: ఐక్యరాజ్య సమితి వేదికగా అమెరికా అధ్యక్షుడు డొనాల్డ్ ట్రంప్ మరోసారి సంచలన వ్యాఖ్యలు చేశారు. తన షరతులకు ఇరాన్‌ ఒప్పుకోవాలని, లేదంటే ప్రపంచ పటం నుంచి ఇరాన్‌ను తుడిచేయాలా? అని హెచ్చరించారు.న్యూయార్క్‌లో జరుగుతున్న ఐక్యరాజ్యసమితి 81వ సాధారణ మహాసభల్లో ఇరాన్‌ లక్ష్యంగా నిప్పులు చెరిగారు. ట్రంప్ చేసిన ఈ సంచలన వ్యాఖ్యలు అంతర్జాతీయ రాజకీయాల్లో పెను కలకలం రేపుతున్నాయి. ప్రపంచ దేశాలు తీవ్ర భయాందోళనలోకి గురవుతున్నాయి. ఐరాస వేదికగా ప్రపంచ దేశాల నాయకులను ఉద్దేశించి ప్రసంగించిన ట్రంప్ ఇరాన్ తీరుపై తీవ్ర ఆగ్రహం వ్యక్తం చేశారు. ఇరాన్‌తో ఒప్పందం కుదుర్చుకోవాలా? లేక ఆ దేశాన్ని ప్రపంచ పటం నుంచి శాశ్వతంగా తుడిచిపెట్టేయాలా?’అని హెచ్చరించారు. ఈ సందర్భంగా పశ్చిమాసియాలో (మిడిల్ ఈస్ట్) ఇకపై ఇరాన్ ఆటలు సాగవు. ఆ ప్రాంతాన్ని శాసించే దుర్మార్గపు దాదాగిరికి తాము ఇప్పటికే చరమగీతం పలికాం. మిడిల్ ఈస్ట్‌లో ఇరాన్ సాగిస్తున్న దౌర్జన్యాలు, ఆధిపత్య ధోరణి పూర్తిగా ముగిసిపోయాయని తేల్చిచెప్పారు. ట్రంప్ చేసిన ఈ హెచ్చరికలు రాబోయే రోజుల్లో అంతర్జాతీయంగా ఎలాంటి పరిణామాలకు దారితీస్తాయనే దానిపై సర్వత్రా ఆందోళనలు నెలకొన్నాయి.

పశ్చిమాసియాలో ఇప్పటికే ఇరాన్‌–అమెరికా యుద్ధంతో ఉద్రిక్త పరిస్థితులు నెలకొన్న వేళ.. యెమెన్‌లో హౌతీల దూకుడు ఆ ప్రాంతాన్ని మరో సంక్షోభంలోకి నెడుతోంది. ఇరాన్‌ మద్దతున్న హౌతీలు ఎర్ర సముద్రం తీరంలో వేగంగా ముందుకు సాగుతూ కీలక ప్రాంతాలను తమ ఆధీనంలోకి తెచ్చుకుంటున్నారు. ఇప్పుడు వారి చూపు వ్యూహాత్మక పర్వతాలపై పడింది. మరోవైపు హౌతీలను అడ్డుకునేందుకు అమెరికా సాయం కోరిన యెమెన్‌ ప్రభుత్వం.. ట్రంప్‌ నుంచి మాత్రం ప్రత్యక్ష హామీ పొందలేకపోయింది.హౌతీలపై అమెరికా నేరుగా దాడి చేయబోతోందనే పరిస్థితి చివరి నిమిషంలో మారిపోయింది. పక్కా సమాచారం ప్రకారం.. ఆదివారం హౌతీలపై వైమానిక దాడులు చేయడానికి ట్రంప్‌ ప్రభుత్వం ప్రణాళిక సిద్ధం చేసింది. హౌతీల స్థావరాలపై దాడులు చేసేందుకు విమానాల్లో బాంబులు ఎక్కిస్తున్న సమయంలోనే ట్రంప్‌ వాటిని నిలిపివేయాలని ఆదేశించారు. అంటే.. హౌతీలపై అమెరికా సైనిక చర్యకు సిద్ధమైనా.. ఆఖరి క్షణంలో ఆ ప్లాన్‌ను పక్కన పెట్టినట్లు తెలుస్తోంది. ఈ వ్యవహారంపై ఇటు అమెరికా సెంట్రల్‌ కమాండ్‌ అటు వైట్‌హౌస్‌ రెండూ ఇప్పటికీ స్పందించలేదు.ఇదే సమయంలో సౌదీ మద్దతు ఉన్న యెమెన్‌ ప్రభుత్వం అమెరికా సాయం కోరింది. ఆ దేశ అధ్యక్షుడు రషాద్‌ అల్‌ అలీమి, ట్రంప్‌తో ఫోన్‌లో మాట్లాడారు. అయితే ట్రంప్‌ ఎలాంటి ప్రత్యక్ష సైనిక మద్దతు హామీ ఇవ్వలేదని తెలుస్తోంది.ఇప్పుడు పర్వతాలే టార్గెట్‌హౌతీల తాజా వ్యూహం యెమెన్‌లో పరిస్థితిని మరింత కీలకంగా మార్చేలా కనిపిస్తోంది. ఈ నెలలో ఎర్ర సముద్ర తీర ప్రాంతాల్లో వేగంగా ముందుకు సాగిన హౌతీలు.. ఇప్పుడు తైజ్‌, లహిజ్‌ ప్రావిన్సుల మధ్య ఉన్న కహ్‌బూబ్‌ పర్వతాల వైపు కదులుతున్నారు. ఈ ఎత్తైన ప్రాంతాలను తమ ఆధీనంలోకి తెచ్చుకుంటే ఎర్ర సముద్ర తీరాన్ని దక్షిణ యెమెన్‌లో ప్రభుత్వ ఆధీనంలోని ప్రాంతాల నుంచి వేరు చేసే అవకాశం ఉంటుంది.అల్‌-వజియాహ్‌ పర్వత ప్రాంతం, బాబ్‌ ఎల్‌ మండెబ్‌ జలసంధి సమీపంలోని రాస్‌ అల్‌-అరా ప్రాంతాల్లో పోరు తీవ్రంగా సాగుతున్నట్లు సమాచారం. మరీ ముఖ్యంగా బాబ్‌ ఎల్‌ మండెబ్‌ రీజియన్‌పై పట్టు కోల్పోయాక.. యెమెన్‌ రక్షణాత్మక ధోరణి ప్రదర్శిస్తోందనే విశ్లేషణలు నడుస్తున్నాయి.700 మంది మృతి.. 1.30 లక్షల మంది నిరాశ్రయులుహౌతీల తాజా దాడులతో యెమెన్‌లో మానవతా పరిస్థితి కూడా విషమిస్తోంది. తాజా పోరులో దాదాపు 700 మంది మరణించగా.. వేలాది మంది గాయపడ్డారు. సుమారు 1,30,000 మంది యెమెన్‌లోనే నిరాశ్రయులయ్యారు. మరో 3,000 మందికి పైగా ఎర్ర సముద్రం దాటి పడవల్లో ఆఫ్రికా వైపు వెళ్లినట్లు ఐక్యరాజ్యసమితి గణాంకాలను ఉటంకిస్తూ కథనం పేర్కొంది.హౌతీలను అడ్డుకునేందుకు సౌదీ అరేబియా కూడా రంగంలోకి దిగింది. హౌతీల స్థావరాలపై వందలాది వైమానిక దాడులు చేసింది. అయినప్పటికీ పర్వత ప్రాంతాల్లో హౌతీలను వెనక్కి నెట్టడం సౌదీ బలగాలకు సవాలుగా మారింది.సౌదీ చమురు ఎగుమతులకు కొత్త చిక్కుయెమెన్‌లో జరుగుతున్న పోరుకు మరో కీలక కోణం ఉంది. అది చమురు రవాణా. బాబ్‌ ఎల్‌ మండెబ్‌ ప్రాంతంలో హౌతీల పట్టు బలపడితే.. హర్ముజ్‌ జలసంధి వద్ద ఏర్పడే అంతరాయాలను తప్పించుకునేందుకు సౌదీ ఉపయోగించే ప్రత్యామ్నాయ చమురు మార్గానికి ఇబ్బంది కలగొచ్చు. దీంతో సౌదీ ఇప్పటికే హర్ముజ్‌ మీదుగా మరిన్ని చమురు రవాణాలను పెంచింది.ఆగస్టులో రోజుకు సుమారు 7 లక్షల బ్యారెళ్లుగా ఉన్న సౌదీ చమురు ఎగుమతులు హర్ముజ్‌ మీదుగా ఇటీవలి రోజుల్లో 29 లక్షల బ్యారెళ్లకు చేరినట్లు ఉపగ్రహ డేటా తెలియజేస్తోంది. యుద్ధ పరిస్థితుల్లో హర్ముజ్‌ మార్గంలో రవాణా ఖర్చులు కూడా భారీగా పెరిగినట్లు పేర్కొంది.అమెరికాకు పెరుగుతున్న ఒత్తిడిహౌతీల దూకుడు ట్రంప్‌ ప్రభుత్వాన్ని చిక్కులో పడేస్తోంది. ఒకవైపు సౌదీ అరేబియా తమకు మద్దతుగా అమెరికా సైనిక జోక్యం చేసుకోవాలని కోరుతోంది. మరోవైపు యెమెన్‌లో ప్రత్యక్షంగా మరో యుద్ధంలోకి దిగితే ఈ ఘర్షణ మరింత విస్తరించే అవకాశం ఉంది.గతంలో 2025 ప్రారంభంలో అమెరికా రెండు నెలల పాటు హౌతీలపై దాడులు చేసినప్పటికీ.. కాల్పుల విరమణ ఒప్పందం తర్వాత ట్రంప్‌ వాటిని నిలిపివేశారు. అప్పటి నుంచి యెమెన్‌ ఘర్షణలో అమెరికా ప్రత్యక్షంగా జోక్యం చేసుకోలేదు. ఇప్పుడు మరోసారి హౌతీలపై దాడులకు సిద్ధమై.. విమానాల్లో బాంబులు ఎక్కించే దశకు వెళ్లిన అమెరికా.. ట్రంప్‌ ఆదేశాలతో చివరి నిమిషంలో ఆ చర్యను నిలిపివేసినట్లు వచ్చిన వార్తలు ఆసక్తి రేపుతున్నాయి.అదే సమయంలో హౌతీలు మాత్రం వ్యూహాత్మక ఎత్తైన ప్రాంతాలను లక్ష్యంగా చేసుకుని తమ ఆధిపత్యాన్ని విస్తరించే ప్రయత్నం చేస్తున్నారు. దీంతో ఒకవైపు హౌతీల దూకుడు కొనసాగుతుండగా.. మరోవైపు వారిపై సైనిక చర్యకు సిద్ధమైన ట్రంప్‌ ప్రభుత్వం చివరి నిమిషంలో వెనక్కి తగ్గడం యెమెన్‌ సంక్షోభంలో కీలక పరిణామంగా మారింది.ఇటు హర్ముజ్‌లోనూ ఉద్రిక్తతఇటు హర్ముజ్‌ జలసంధిలోనూ ఉద్రిక్తత కొనసాగుతోంది. బ్రిటన్‌ సముద్ర భద్రత సంస్థ యూకేఎంటీవో (UKMTO) ప్రకారం.. జలసంధిలోకి వెళ్తున్న ఓ నౌకపై ప్రాజెక్టైల్‌ దాడి జరగడంతో సిబ్బందికి స్వల్ప గాయాలయ్యాయి. మరో గ్యాస్‌ ట్యాంకర్‌పై కూడా దాడి జరిగినట్లు సమాచారం.ఇరాన్‌–అమెరికా మధ్య దౌత్య ప్రయత్నాలు కూడా నిలిచిపోయిన పరిస్థితుల్లో యెమెన్‌లో హౌతీల దూకుడు.. మిడిల్‌ ఈస్ట్‌ వార్‌కు మరో కీలక ఫ్రంట్‌ను జోడించింది. హౌతీలపై దాడులకు సిద్ధమైన అమెరికా చివరి నిమిషంలో ఆ ప్రణాళికను ఎందుకు నిలిపివేసిందన్నదే ఇప్పుడు కీలకంగా మారింది. అమెరికా ప్రత్యక్షంగా రంగంలోకి దిగుతుందా? లేదంటే సౌదీ, యెమెన్‌ బలగాలకే మద్దతు పరిమితం చేస్తుందా? అన్నది చూడాలి.ఇదీ చదవండి: అమెరికా వర్సెస్‌ చైనా.. ఇప్పుడు ఓ కొత్త వార్‌

న్యూయార్క్‌: అమెరికా అధ్యక్షుడి అధికారిక నివాసం వైట్‌హౌస్‌లోకి అనుమతి నిరాకరిస్తూ ట్రంప్‌ తీసుకున్న నిర్ణయాన్ని సీఎన్‌ఎన్, ఎంఎస్‌ నౌ, పొలిటికో మీడియా సంస్థలు సోమవారం కోర్టులో సవాల్‌చేశాయి. తమను మాత్రమే ఉద్దేశపూర్వకంగా అడ్డుకోవడం రాజ్యాంగంలోని ఒకటో సవరణ ప్రకారం చెల్లదని ఈ సంస్థలు న్యాయస్థానంలో వాదించాయి. వాషింగ్టన్‌ డీసీలోని ‘యూఎస్‌ డిస్ట్రిక్ట్‌ కోర్ట్‌ ఫర్‌ ది డిస్ట్రిక్ట్‌ ఆఫ్‌ కొలంబియా’లో ఉమ్మడిగా దావా వేశాయి. మొదటి చట్టసవరణ పరిరక్షణ ప్రకారం మీడియా స్వేచ్ఛను ప్రభుత్వాలు అడ్డుకోవడం కుదరదని పేర్కొన్నాయి. ‘‘చట్టం ద్వారా మీడియా సంస్థలకు సంక్రమించిన హక్కులను కాలరాసే అధికారం అధ్యక్షుడు లేదా ఇతర ప్రభుత్వ ఉన్నతాధికారులకు లేదు. ప్రచురితమయ్యే, ప్రసారమయ్యే వార్తలు, కథనాలు అధ్యక్షుడికి నచ్చనంత మాత్రాన ఎలాంటి నోటీస్‌ లేకుండా చట్టపర విధానాన్ని అనుసరించకుండా ఏకపక్షంగా వైట్‌హౌస్‌లోకి రాకుండా నిషేధం విధించడం చట్టప్రకారం కుదరదు’’అని సంస్థలు తమ పిటిషన్‌లో పేర్కొన్నాయి. మీడియా సంస్థలు వేసిన దావాపై శ్వేతసౌధం ఇంకా స్పందించలేదు. కానీ పొద్దుపోయాక ట్రంప్‌ తన సొంత సామాజిక మాధ్యమం ‘ట్రూత్‌ సోషల్‌’లో ఒక పోస్ట్‌పెట్టారు. ‘‘మీడియా స్వేచ్ఛపై శ్వేతసౌధం ఎలాంటి ఆంక్షలు విధంచబోదు. నిజానికి నేను మీడియా స్వేచ్ఛకు ఎంతో విలువ ఇస్తా. తప్పుడు వార్తలు రాసే సంస్థల మీద మాత్రమే ఆంక్షలు విధించా. ఈ తప్పుడు వార్తలనేవి అమెరికాకు క్యాన్సర్‌లా దాపురించాయి. ఈ ఫేక్‌ న్యూస్‌ అవినీతి, స్వీయప్రయోజనాలతో వ్యవస్థీకృతంగా కట్టుతప్పుతున్నాయి. ఇవి జాతీయ భద్రతకు ముప్పగా మారాయి. అందుకే వీటికి తక్షణం అడ్డుకోవాల్సిందే’’అని ట్రంప్‌ ఆ పోస్ట్‌లో పేర్కొన్నారు. తనకు వ్యతిరేకంగా వార్తలు రాసే మీడియా సంస్థలు, ట్రంప్‌కు మధ్య చాలాకాలంగా ఘర్షణపూరిత వాతావరణం నెలకొన్న విషయం తెల్సిందే. ట్రంప్‌ కవరేజీని నిలిపేసిన ప్రధాన టీవీ నెట్‌వర్క్‌లు సోమవారం ట్రంప్‌ వైట్‌హౌస్‌లో కొత్తగా హెలిప్యాడ్‌ను ఆవిష్కరించగా దానికి సంబంధించిన కవరేజీని అమెరికాలోని ప్రధాన టీవీ నెట్‌వర్క్‌లు నిలిపేశాయి. సీఎన్‌ఎన్‌పై నిషేధాన్ని నిరసిస్తూ ట్రంప్‌ కార్యక్రమాల కవరేజీని పక్కనపడేసినట్లు తెలుస్తోంది. ప్రధానమైన ఏబీఎస్, సీబీఎస్, ఫాక్స్‌ న్యూస్‌ చానళ్లలో ఈ కార్యక్రమం ప్రసారం కాలేదు.

పశ్చిమాసియాలో ఉద్రిక్తతలు మరింత ముదురుతున్న వేళ అమెరికా కీలక హెచ్చరిక జారీ చేసింది. ఇరాన్‌కు ఎట్టి పరిస్థితుల్లోనూ ప్రయాణించవద్దని తన పౌరులను ఆదేశించింది. ఇప్పటికే అక్కడ ఉన్నవారు వెంటనే దేశం విడిచి వెళ్లాలని సూచించింది. పరిస్థితులు వేగంగా మారే అవకాశం ఉందని.. విమాన సర్వీసులు రద్దు కావడం, గగనతలం మూసివేయడం, సరిహద్దుల వద్ద ఆంక్షలు విధించడం వంటి పరిణామాలు ఎదురుకావొచ్చని హెచ్చరించింది.అమెరికా వర్చువల్‌ ఎంబసీ ఇన్‌ ఇరాన్‌ తాజాగా విడుదల చేసిన భద్రతా హెచ్చరికలో.. ‘‘ఏ కారణంతోనూ ఇరాన్‌కు వెళ్లొద్దు. అక్కడున్న అమెరికా పౌరులు ఇప్పుడే ఇరాన్‌ నుంచి బయటకు వచ్చేయండి’’ అని స్పష్టం చేసింది. ఇరాన్‌లో భద్రతా పరిస్థితులు సంక్లిష్టంగా మారుతున్నాయని ఆ హెచ్చరికలో పేర్కొంది. విమానాశ్రయాలు, విమానయాన సంస్థలు, సరిహద్దు మార్గాలకు సంబంధించిన పరిణామాలను ఎప్పటికప్పుడు గమనించాలని సూచించింది. ఇతర దేశాలకు వెళ్లాలని భావించే వారు ఆయా దేశాల ప్రవేశ నిబంధనలను ముందుగానే తెలుసుకోవాలని తెలిపింది.అమెరికన్లకు పలు సూచనలుఇరాన్‌లో ఉన్న అమెరికన్లు నిరసనలు, భారీ జనసమూహాలకు దూరంగా ఉండాలని అమెరికా సూచించింది. అమెరికాతో బహిరంగంగా అనుబంధం ఉన్న ప్రాంతాల్లో తక్కువ ప్రొఫైల్‌ పాటించాలని తెలిపింది. వైమానిక దాడులు జరిగితే కిటికీలు, అద్దాల తలుపులకు దూరంగా ఉండాలని.. కూలిన శిథిలాల వైపు వెళ్లొద్దని హెచ్చరించింది.అత్యవసర పరిస్థితుల్లో దౌత్య అధికారులను సంప్రదించేందుకు ‘స్మార్ట్‌ ట్రావెలర్‌ ఎన్‌రోల్‌మెంట్‌ ప్రోగ్రామ్‌ (STEP)’లో నమోదు చేసుకోవాలని సూచించింది. పశ్చిమాసియాలో ప్రయాణించే లేదంటే ఆ ప్రాంతం మీదుగా వెళ్లే అమెరికన్లు అప్రమత్తంగా ఉండాలని.. విమాన సర్వీసులు, గగనతల మార్గాల్లో ఆకస్మిక మార్పులు, రద్దులు జరిగే అవకాశం ఉందని అమెరికా తాజాగా హెచ్చరించింది.హౌతీల దాడులతో మరింత టెన్షన్‌అమెరికా–ఇరాన్‌ మధ్య సైనిక ఉద్రిక్తతలు కొనసాగుతున్న సమయంలో.. ఇరాన్‌ మద్దతున్న హౌతీల కార్యకలాపాలను కూడా అమెరికా ప్రస్తావించింది. సౌదీ అరేబియాపై, ముఖ్యంగా పౌర విమానాశ్రయాలపై హౌతీలు దాడులకు పాల్పడ్డారని తెలిపింది. ప్రస్తుత సైనిక ఘర్షణలు వేగంగా మరింత విస్తరించే అవకాశం ఉందని హెచ్చరించింది.ఇరాన్‌కు మద్దతిచ్చే గ్రూపులు అమెరికా ప్రయోజనాలను లక్ష్యంగా చేసుకునే అవకాశం ఉందని అమెరికా పేర్కొంది. మధ్యప్రాచ్యంతో పాటు ఇతర ప్రాంతాల్లోనూ గతంలో అమెరికా దౌత్య కార్యాలయాలు, సంస్థలు లక్ష్యంగా దాడులు జరిగిన విషయాన్ని గుర్తుచేసింది. అమెరికా వ్యాపార సంస్థలు, సంస్థలు, ఇతర ప్రయోజనాలపైనా ముప్పు ఉండొచ్చని తెలిపింది.సౌదీలోనూ ఆంక్షలుఇరాన్‌తో పాటు సౌదీ అరేబియాలో ఉన్న అమెరికన్లకు కూడా ఇటీవల భద్రతా సూచనలు జారీ అయ్యాయి. హౌతీల దాడుల నేపథ్యంలో తైఫ్‌, యన్బు ప్రాంతాలకు అమెరికా ప్రభుత్వ ఉద్యోగులు అధికారిక లేదా వ్యక్తిగత ప్రయాణాలు చేయాలంటే ప్రత్యేక అనుమతి తీసుకోవాలని సూచించింది. మరోవైపు రియాద్‌ వైపు బాలిస్టిక్‌ క్షిపణి దూసుకురావడంతో సౌదీ అధికారులు అత్యవసర హెచ్చరిక జారీ చేశారు. ఆ క్షిపణిని అడ్డుకున్నట్లు సౌదీ నేతృత్వంలోని సంకీర్ణ దళాలు తెలిపాయి. బిష్‌, తైఫ్‌, ఫరాసాన్‌, యన్బు ప్రాంతాల్లో పౌరులు, మౌలిక వసతులను లక్ష్యంగా చేసుకుని దాడులకు ప్రయత్నాలు జరిగినట్లు పేర్కొన్నాయి. హౌతీల దాడులను ఖతార్‌ ఖండిస్తూ.. సౌదీ అరేబియాకు సంఘీభావం ప్రకటించింది.ఫిబ్రవరి 28న యుద్ధం మొదలైనప్పటి నుంచి ఇరాన్‌ అంతర్జాతీయ రాకపోకలపై తీవ్ర ప్రభావం పడింది. భద్రతా పరిస్థితులు, గగనతల పరిమితులు, విమాన మార్గాల్లో మార్పుల కారణంగా పలు అంతర్జాతీయ సర్వీసులు రద్దు లేదా నిలిపివేతకు గురయ్యాయి. అయితే గల్ఫ్‌ ప్రాంతంలోని అన్ని విమాన మార్గాలు పూర్తిగా మూసుకుపోలేదు. కొన్ని రూట్లలో సర్వీసులు కొనసాగుతున్నప్పటికీ.. విమాన సంస్థలు పరిస్థితిని బట్టి షెడ్యూళ్లను మార్చుతున్నాయి. తాజాగా ఇరాన్‌ నుంచి వచ్చే అంతర్జాతీయ విమానాల్లో దాదాపు మూడో వంతు రద్దైనట్లు సమాచారం. మాహాన్‌ ఎయిర్‌ కూడా ఇస్తాంబుల్‌, అంకారా, మస్కట్‌ వంటి అంతర్జాతీయ మార్గాల్లో సర్వీసులను నిలిపివేసింది. దీంతో ఇరాన్‌కు ప్రయాణం చేయడం, అక్కడి నుంచి బయటకు రావడం గతంతో పోలిస్తే మరింత కష్టంగా మారింది. మరోవైపు అమెరికా–ఇరాన్‌ మధ్య దౌత్య సంబంధాలు తీవ్ర ఉద్రిక్తతలో ఉన్నప్పటికీ.. చర్చలకు సంబంధించిన మార్గాలు పూర్తిగా మూసుకుపోలేదు. సెప్టెంబర్‌ 20న ట్రంప్‌ ఇరాన్‌ అధ్యక్షుడు మసూద్‌ పెజెష్కియాన్‌తో సమావేశానికి తాను సిద్ధంగా ఉన్నట్లు సంకేతాలు ఇవ్వగా.. ఇరాన్‌ విదేశాంగ మంత్రి అబ్బాస్‌ అరాఘ్చీ యూఎన్‌ జనరల్‌ అసెంబ్లీకి వెళ్లే కార్యక్రమంలో భాగంగా దౌత్య ప్రయత్నాలు కొనసాగిస్తున్నారు. చైనా కూడా ఇరాన్‌, అమెరికా సంయమనం పాటించి జూన్‌లో కుదిరిన శాంతి ఒప్పందానికి తిరిగి రావాలని కోరుతోంది. అంటే.. ఒకవైపు సైనిక ఉద్రిక్తతలు, మరోవైపు పరోక్ష దౌత్య ప్రయత్నాలు ఏకకాలంలో కొనసాగుతున్నాయి.ఇదీ చదవండి: మొసలి కన్నీరుపై ఇరాన్‌ ఫైర్‌

పశ్చిమాసియాలో ఉద్రిక్తతలు మరోసారి వేడెక్కాయి. ఒకవైపు అమెరికా–ఇరాన్‌ మధ్య మాటల యుద్ధం తీవ్ర స్థాయికి చేరగా.. మరోవైపు ఇరాన్‌ మద్దతున్న హౌతీలు సౌదీ అరేబియా రాజధాని రియాద్‌పై క్షిపణులు, డ్రోన్లతో దాడికి దిగారు. ఇదే సమయంలో ఇరాన్‌–ఫ్రాన్స్‌ మధ్య దౌత్య వివాదం కూడా ముదురుతోంది. దీంతో ఇప్పటికే నెలలుగా కొనసాగుతున్న ప్రాంతీయ సంక్షోభం కొత్త మలుపు తీసుకుంటోంది.అమెరికా కొత్త దాడికి సిద్ధమవుతోందన్న సమాచారం తమ వద్ద ఉందని ఇరాన్‌ సైన్యం ప్రకటించింది. అమెరికా లేదా దాని మిత్రదేశాలు మరోసారి దాడి చేస్తే.. ఈసారి ప్రతిస్పందన పరిమితం కాదని, అమెరికా స్థావరాలు.. ప్రయోజనాలపై సుదీర్ఘంగా దాడులు కొనసాగిస్తామని ఇరాన్‌ సైనిక కమాండ్‌ హెచ్చరించింది. అమెరికా మిత్రదేశాలను కూడా ఈ ఘర్షణలో భాగస్వాములుగానే పరిగణిస్తామని స్పష్టం చేసింది.మరోవైపు అమెరికా అధ్యక్షుడు డొనాల్డ్‌ ట్రంప్‌ కూడా ఇరాన్‌పై ఒత్తిడి పెంచారు. ఒప్పందానికి ముందుకు రావాలని.. లేదంటే ఇరాన్‌ ఆర్థికంగా మరింత కుదేలవుతుందని, తీవ్ర పరిణామాలు ఎదుర్కోవాల్సి వస్తుందని హెచ్చరించారు. అయితే ఇరాన్‌ అధ్యక్షుడు మసూద్‌ పెజెష్కియాన్‌ ఈ వారంలో ఐక్యరాజ్యసమితి సర్వసభ్య సమావేశానికి న్యూయార్క్‌ వెళ్లనున్న నేపథ్యంలో ఆయనతో భేటీకి తాను సిద్ధంగా ఉన్నానని ట్రంప్‌ చెప్పడం గమనార్హం. రియాద్‌పై హౌతీల మెరుపుదాడిఇదిలా ఉండగానే యెమెన్‌లోని ఇరాన్‌ మద్దతు ఉన్న హౌతీలు సౌదీ రాజధాని రియాద్‌ను లక్ష్యంగా చేసుకున్నారు. సెప్టెంబర్‌ 19న క్షిపణి, డ్రోన్లతో దాడి ప్రయత్నం జరిగినట్లు సౌదీ అరేబియా ధ్రువీకరించింది. రియాద్‌లోని కింగ్‌ ఖాలిద్‌ అంతర్జాతీయ విమానాశ్రయం సమీపంలో భారీ పేలుడుతో దట్టమైన పొగ అలుముకుంది. అయితే సౌదీ నేతృత్వంలోని కూటమి ఆ దాడిని అడ్డుకున్నట్లు తెలిపింది. పెద్దగా నష్టమూ జరగలేదని వెల్లడించింది. హౌతీలు రియాద్‌తో పాటు యాన్‌బు, తాయిఫ్‌, బైష్‌, ఫరాసాన్‌ ప్రాంతాల్లోనూ దాడులకు ప్రయత్నించినట్లు సమాచారం. యాన్‌బు సౌదీ చమురు ఎగుమతులకు కీలక కేంద్రం కావడంతో ఈ దాడులు మరింత ఆందోళనకు కారణమయ్యాయి. ఎందుకంత కీలకం బాబ్-ఎల్-మండేబ్..యెమెన్‌లో హౌతీల దూకుడు ఇటీవలి రోజుల్లో మరింత పెరిగింది. వ్యూహాత్మకమైన మొఖా ప్రాంతంతో పాటు బాబ్‌ ఎల్‌ మందెబ్‌ జలసంధికి సమీప ప్రాంతాలపై వారి పట్టు పెరిగింది. ఈ మార్గం ఎర్ర సముద్రాన్ని గల్ఫ్‌ ఆఫ్‌ ఎడెన్‌తో కలుపుతుంది. ఆసియా–యూరప్‌ మధ్య నౌకాయానానికి ఇది కీలకమైన మార్గం.ఇప్పటికే హర్ముజ్‌ జలసంధిలో ఇరాన్‌ ఆంక్షల కారణంగా ఇంధన రవాణాపై తీవ్ర ఒత్తిడి ఉంది. ఇప్పుడు బాబ్‌ ఎల్‌ వద్ద కూడా భద్రతా సమస్యలు పెరగడంతో ప్రపంచ చమురు సరఫరాపై ఆందోళన మరింత పెరిగింది. హౌతీల దాడుల నేపథ్యంలో సౌదీ చమురు ఎగుమతుల మార్గాల్లో మార్పులు చోటుచేసుకున్నాయి. తాజా పరిణామాల్లో బ్రెంట్‌ క్రూడ్‌ ధర బ్యారెల్‌కు 100 డాలర్లకు పైగానే కొనసాగుతోంది. చైనాకు కూడా టెన్షన్‌.. ఇరాన్‌పై ఒత్తిడిహౌతీల దూకుడుతో సౌదీ మాత్రమే కాకుండా చైనా కూడా ఆందోళన వ్యక్తం చేస్తున్నట్లు ఓ ప్రముఖ మీడియా సంస్థ కథనం ఇచ్చింది. సౌదీ విజ్ఞప్తి నేపథ్యంలో హౌతీలను అదుపులో ఉంచేందుకు ఇరాన్‌పై చైనా ప్రైవేటుగా ఒత్తిడి తెచ్చినట్లు మూడు ఇరాన్‌ వర్గాలను ఉటంకిస్తూ ఆ వార్తను ప్రచురించింది. ఎర్ర సముద్ర మార్గం చైనా వాణిజ్యానికి కూడా కీలకం కావడంతో ఈ పరిణామాలను బీజింగ్‌ నిశితంగా గమనిస్తోంది. ఇటు ఫ్రాన్స్‌తోనూ కొత్త వివాదంఇక ఇరాన్‌–ఫ్రాన్స్‌ సంబంధాల్లోనూ కొత్త చిచ్చు రేగింది. టెహ్రాన్‌లో ఫ్రెంచ్‌ రాయబార కార్యాలయానికి అనుబంధంగా ఉన్న ఫ్రెంచ్‌ భాషా కేంద్రాన్ని ఇరాన్‌ అధికారులు మూసివేశారు. సరైన లైసెన్స్‌ లేకుండా కార్యకలాపాలు నిర్వహించడంతో పాటు జాతీయ భద్రతకు వ్యతిరేకమైన చర్యలకు పాల్పడిందని ఇరాన్‌ ఆరోపించింది. వ్యక్తుల నెట్‌వర్క్‌లను నిర్మించడం, నైపుణ్యం ఉన్న ఇరానియన్లు దేశం విడిచి వెళ్లేందుకు సహకరించడం వంటి ఆరోపణలను కూడా చేసింది. అయితే ఫ్రాన్స్‌ ఈ చర్యను తీవ్రంగా ఖండించింది. తమ సాంస్కృతిక సంస్థలపై మరో దాడిగా అభివర్ణించింది. ఇరాన్‌ రాయబారిని పిలిపించి వివరణ కోరనున్నట్లు ప్రకటించింది. ఈ వివాదం ఇప్పటికే ఇరుదేశాల మధ్య ఉన్న దౌత్య ఉద్రిక్తతలను మరింత పెంచే అవకాశం ఉంది. ‘మొసలి కన్నీరు’ అంటూ ఫైర్‌ఫ్రాన్స్‌ విదేశాంగ మంత్రి జీన్‌-నోయెల్‌ బారో ఇరాన్‌లో మానవ హక్కుల పరిస్థితిపై చేసిన వ్యాఖ్యలపై ఇరాన్‌ విదేశాంగ మంత్రి అబ్బాస్‌ అరాఘ్చీ తీవ్రంగా స్పందించారు. ఫ్రాన్స్‌ గతంలో అల్జీరియాలో చేసిన చర్యలను ప్రస్తావిస్తూ.. ఇరాన్‌పై ఇప్పుడు సానుభూతి చూపడం ‘మొసలి కన్నీరు’ అంటూ బారోను ఉద్దేశించి వ్యాఖ్యానించారు. అమెరికా దాడుల్లో ఇరాన్‌ పాఠశాల విద్యార్థులు చనిపోయిన సమయంలో ఫ్రాన్స్‌ మౌనం వహించిందని కూడా అరాఘ్చీ ఆరోపించారు.ఒకవైపు చర్చలు.. మరోవైపు దాడులుఇలా చూస్తే ప్రస్తుతం ఇరాన్‌ చుట్టూ ఒకేసారి పలు స్థాయిల్లో ఉద్రిక్తతలు కనిపిస్తున్నాయి. అమెరికాతో ప్రత్యక్ష ఘర్షణ మళ్లీ ముదిరే సంకేతాలు, సౌదీపై హౌతీల దాడులు, హర్ముజ్‌–బాబ్‌ ఎల్‌ మండేబ్‌ జలమార్గాలపై ఒత్తిడి, ఫ్రాన్స్‌తో దౌత్య వివాదం.. ఇవన్నీ ఒకదానితో ఒకటి ముడిపడుతున్నాయి.అయితే ఇదే సమయంలో చర్చలకు అవకాశం పూర్తిగా మూసుకుపోలేదు. ట్రంప్‌–ఇరాన్‌ మధ్య కఠిన ప్రకటనలు కొనసాగుతున్నప్పటికీ, ఇరాన్‌ అధ్యక్షుడితో భేటీకి ట్రంప్‌ సిద్ధంగా ఉన్నట్లు చెప్పడం దౌత్య మార్గం ఇంకా తెరిచే ఉందనే సంకేతంగా నిలుస్తోంది. మరోవైపు హౌతీలను నియంత్రించేందుకు చైనా ప్రయత్నాలు కూడా తెరవెనుక దౌత్యం కొనసాగుతున్నట్లు సూచిస్తున్నాయి.ఇదీ చదవండి: ఆ ఏడు కండీషన్స్‌తో ఇరాన్‌ యుద్ధం ముగిసేనా?

వాషింగ్టన్‌: రాజధాని వాషింగ్టన్‌ డీసీలో లింకన్‌ మెమోరియల్, ఆర్లింగ్టన్‌ నేషనల్‌ సెమెట్రీ మధ్య తాను నిర్మించాలనుకుంటున్న భారీ తోరణం ఒక అత్యున్నత శ్రేణి సైనిక స్థావరంగానూ ఉపయోగపడనుందని అమెరికా అధ్యక్షుడు డొనాల్డ్‌ ట్రంప్‌ చెప్పారు. ఇక్కడ మందుగుండు సామగ్రిని నిల్వ చేయడంతోపాటు డ్రోన్లు నిల్వ చేయవచ్చని, స్నైపర్‌లను మొహరించవచ్చని ఆయన వెల్లడించారు. అధ్యక్షుని అధికారిక భవనంతోపాటు వాషింగ్టన్‌ డీసీ నగరాన్ని సుందరీకరించడానికి తాను చేపట్టిన ప్రాజెక్టులు రక్షణ అవసరాలను సైతం తీరుస్తాయని ట్రంప్‌ చాలా రోజులుగా వాదిస్తున్న విషయం తెల్సిందే. వైట్‌హౌస్‌ ప్రాంగణంలో నిర్మిస్తున్న నూతన బాల్‌రూమ్‌ను ‘సైనిక సముదాయం’గా ఆయన అభివర్ణించారు. జాతీయ భద్రతా ప్రయోజనాల కోసం ఇది అవసరమని ఆయన తన నిర్ణయాన్ని సమర్థించుకున్నారు. అమెరికా సైన్యం అభ్యర్థన మేరకు 250 అడుగుల ఎత్తయిన స్మారక తోరణాన్ని సైనిక సముదాయంగా/విజయ తోరణంగా మార్చడానికి తాను అంగీకరించినట్లు ట్రంప్‌ ఆదివారం సోషల్‌ మీడియా పోస్టులో వెల్లడించారు.

వాషింగ్టన్‌: పశ్చిమాసియాలో మరోసారి ఉద్రిక్తత పరిస్థితులు నెలకొన్నాయి. అమెరికా, ఇరాన్, ఇజ్రాయెల్ దేశాల మధ్య ఘర్షణ వాతావరణం తారాస్థాయికి చేరడంతో వైట్‌హౌస్ తీవ్ర అప్రమత్తమైంది. ఈ భద్రతా సంక్షోభం నేపథ్యంలో అమెరికా అధ్యక్షుడు డొనాల్డ్ ట్రంప్ తన వీకెండ్ క్యాంప్ డేవిడ్ పర్యటనను అకస్మాత్తుగా రద్దు చేసుకున్నారు. హుటాహుటిన రాజధాని వాషింగ్టన్‌కు తిరుగుపయనమయ్యారు. ఉద్రిక్తతల తీవ్రత దృష్ట్యా ఇజ్రాయెల్‌ ప్రధాని బెంజిమన్‌ నెతన్యాహు తన టెక్సాస్ పర్యటనతో పాటు, ఎలాన్ మస్క్‌తో జరగాల్సిన కీలక భేటీని కూడా రద్దు చేసుకున్నట్లు తెలుస్తోంది. ఐక్యరాజ్య సమితిలో ప్రసంగం అనంతరం తిరిగి ఇజ్రాయెల్‌ వెళ్లనున్నట్లు అమెరికా మీడియా కథనాలు వెలుగులోకి వచ్చాయి. మరోవైపు, మేరీలాండ్‌లోని క్యాంప్ డేవిడ్ నిర్బంధ గగనతలంలోకి అనుమతి లేకుండా ఒక సాధారణ విమానం ప్రవేశించడం కలకలం రేపింది. వెంటనే రంగంలోకి దిగిన నార్త్ అమెరికన్ ఏరోస్పేస్ డిఫెన్స్ కమాండ్‌కు చెందిన ఎఫ్-16 యుద్ధ విమానాలు, ఫ్లేర్లను వదులుతూ ఆ విమానాన్ని అడ్డగించి, పైలట్‌ను సురక్షిత ప్రాంతానికి తరలించాయి.9 దేశాల్లో అమెరికా హై-అలర్ట్పశ్చిమాసియాలో ఎప్పుడైనా భారీ సైనిక ఘర్షణ చెలరేగే ముప్పు ఉందని నిఘా వర్గాలు హెచ్చరించాయి. దీంతో ఓమాన్, లెబనాన్, జోర్డాన్, ఇరాక్, బహ్రెయిన్, కువైట్, యూఏఈ, ఖతార్, సౌదీ అరేబియాతో సహా మొత్తం తొమ్మిది దేశాల్లోని తమ పౌరులకు అమెరికా రాయబార కార్యాలయాలు అత్యవసర భద్రతా హెచ్చరికలు జారీ చేశాయి. గగనతలాలు అకస్మాత్తుగా మూతపడే అవకాశం ఉన్నందున, విమాన సర్వీసుల రద్దుకు సిద్ధంగా ఉండాలని సూచించాయి.సౌదీపై హూతీల దాడి.. రియాద్‌లో ఎయిర్ అలర్ట్ యెమెన్‌కు చెందిన ఇరాన్ మద్దతుదారులు హూతీ తిరుగుబాటుదారులు సౌదీ అరేబియా రాజధాని రియాద్‌లోని సున్నితమైన ప్రాంతాలపై, ఎర్రసముద్ర తీరంలోని ఇంధన కేంద్రాలపై క్షిపణులు, డ్రోన్లతో విరుచుకుపడ్డారు. రియాద్‌లోని కింగ్ ఖలీద్ అంతర్జాతీయ విమానాశ్రయం సమీపంలో భారీగా పొగలు కమ్ముకోవడంతో విమానాల రాకపోకలకు తీవ్ర అంతరాయం కలిగింది. సౌదీ రక్షణ దళాలు ఒక బాలిస్టిక్ క్షిపణిని గాల్లోనే అడ్డుకుని ధ్వంసం చేసినట్లు ప్రకటించాయి. ఈ తీవ్ర పరిణామాల నేపథ్యంలో సౌదీ సివిల్ డిఫెన్స్ చరిత్రలోనే మొదటిసారిగా రియాద్, అల్-ఖర్జ్ నగరాల్లో వైమానిక దాడుల హెచ్చరికల సైరన్లు మోగించింది.రూ.26 వేల కోట్ల భారీ ఆయుధ ప్యాకేజీపశ్చిమాసియా ఘర్షణల వేళ.. ఇజ్రాయెల్‌కు సుమారు రూ.26 వేల కోట్ల భారీ ఆయుధ ప్యాకేజీని అమెరికా ఆమోదించింది. ఇందులో ఒక్కొక్కటి టన్ను బరువున్న సుమారు 40 వేల అత్యాధునిక బాంబులు ఉన్నాయి. అమెరికా ఆయుధాగారంలో ఉన్న అత్యంత విధ్వంసకరమైన ఆయుధాల్లో 'ఎంకే-84' ఒకటి. ఇందులో భాగంగా ఇజ్రాయెల్‌కు 20 వేల 'ఎంకే-84' బాంబులతో పాటు మరో 20 వేల 'బీఎల్‌యూ-117' బాంబులను పంపేందుకు అమెరికా ఆమోదం తెలిపింది. వీటితో పాటు 20 వేల 'ఐ-2000' పెనెట్రేటర్ వార్‌హెడ్స్‌ను కూడా ఈ ప్యాకేజీలో చేర్చారు. ఈ 'ఎంకే-84' బాంబులు విస్ఫోటనం చెందితే, వాటి లోహపు శకలాలు వేలాది అడుగుల దూరం వరకు ఎగిరిపడి తీవ్ర ప్రాణనష్టాన్ని కలిగిస్తాయి.ఇదీ చదవండి : అమెరికాతో ఇక కురుక్షేత్రమే.. ట్రంప్‌కు ఇరాన్ వార్నింగ్

వాషింగ్టన్‌: రష్యా ఆంక్షల బిల్లుపై అమెరికా అధ్యక్షుడు డొనాల్డ్‌ ట్రంప్‌ సంతకం చేసి చట్టంగా మార్చారు. ఈ పరిణామంతో రష్యా నుంచి చమురు, గ్యాస్‌ కొనుగోలు చేసే దేశాలపై 100 శాతం వరకు సుంకాలు విధించడానికి అధ్యక్షుడికి అధికారం లభించింది. తద్వారా భారత్, చైనాలకు అమెరికా సుంకాల ముప్పు పొంచి ఉన్నట్లే. ‘లిండ్సే ఓ.గ్రాహం శాంక్షనింగ్‌ రష్యా అండ్‌ ఇరాన్‌ యాక్ట్‌ ఆఫ్‌ 2026’ అనే ఈ బిల్లును రిపబ్లికన్ల మద్దతుతో అమెరికా ప్రతినిధుల సభ 262–159 ఓట్ల తేడాతో ఆమోదించిన సంగతి తెలిసిందే. చట్టసభలో బిల్లు ఆమోదం పొందిన రెండు రోజుల తర్వాత ట్రంప్‌ దీనిపై సంతకం చేశారు. → ఉక్రెయిన్‌పై రష్యా చేస్తున్న యుద్ధానికి ఆర్థిక వనరులను తగ్గించడమే ఈ కొత్త చట్టం అసలు లక్ష్యం. → ఇది రష్యా అధికారులు, బ్యాంకులు, ఇంధన సంస్థలు, మాస్కో సైనిక కార్యకలాపాలకు మద్దతు ఇస్తున్న విదేశీ సంస్థలపై గురిపెట్టింది. → రష్యాకు చెందిన చమురు, గ్యాస్‌పై ఆధారపడటాన్ని తగ్గించడానికి, రష్యాతో వ్యాపారం చేసే దేశాలపై సుంకాలు విధించే అధికారాన్ని ఈ చట్టం అధ్యక్షుడికి కల్పిస్తుంది. → హౌస్‌ వేస్‌ అండ్‌ మీన్స్‌ కమిటీ ప్రకారం ఈ చట్టం రష్యన్‌ ఉత్పత్తులపై 500 శాతం వరకు సుంకాలు విధించడానికి వీలు విధిస్తుంది. రష్యా చమురు, గ్యాస్‌ కొనుగోలు నిబంధనల పరిధిలోకి వచ్చే దేశాల ఉత్పత్తులపై 100 శాతం వరకు సుంకాలు విధించవచ్చు. → రష్యా అధ్యక్షుడు పుతిన్‌తోపాటు రష్యా ప్రభుత్వంలోని ఉన్నతాధికారులపైనా ఆంక్షలు విధించడానికి ఆస్కారం ఉంది. → 100% వరకు సుంకాలు విధించడానికి అర్హమైన దేశాలుగా చైనా, భారత్, యూఏఈ, టర్కీ, సింగపూర్, అజర్‌బైజాన్, కజకిస్తాన్, హంగేరీ, కిర్గిజిస్తాన్, స్లోవేకియా పేర్లను స్పష్టంగా పేర్కొనాలని బిల్లులో ఒక సవరణ ద్వారా ప్రతిపాదించారు. ఈ బిల్లు భారత్‌పై 100% సుంకాలు విధించాలని నేరుగా చెప్పలేదు. → అధ్యక్షుడు ట్రంప్‌ తన అధికారాన్ని వినియోగించుకోవాలని నిర్ణయించుకుంటే భారత్‌పై 100 శాతం వరకు సుంకాలు విధించవచ్చు. → బలవంతపు శ్రమతో తయారైన వస్తువుల ఎగుమతులను అడ్డుకోవడంలో విఫలమైనందుకు భారత్‌ నుంచి వచ్చే ఉత్పత్తులపై అమెరికా ప్రస్తుతం 10 శాతం సుంకం వసూలు చేస్తోంది. ఒకవేళ ట్రంప్‌ 100 శాతం సుంకం విధిస్తే అది ఇప్పుడున్న 10 శాతం సుంకానికి అదనం అవుతుంది. → అమెరికా సుంకం రేట్లను ప్రకటించిన తర్వాతే భారతీయ ఎగుమతులపై కొత్త సుంకాల ప్రభావం ఎంతవరకు ఉంటుందో చెప్పగలమని నిపుణులు అంటున్నారు.

వాషింగ్టన్‌: కొత్త హెచ్‌1–బీ వీసా దరఖాస్తులపై ఇంకో ఏడాది లక్ష డాలర్ల ఫీజు వసూలు చేయాలని అమెరికా అధ్యక్షుడు ట్రంప్‌ నిర్ణయించారు. ఈ మేరకు ఆయన శుక్రవారం అధికారిక ఉత్తర్వులు జారీ చేసినట్లు వైట్‌హౌస్‌ ప్రకటించింది. ప్రభుత్వ విభాగాలు మరింత సమన్వయంతో పనిచేయడం ద్వారా హెచ్‌1–బీ వీసాల దరఖాస్తులను నిశితంగా పరిశీలించాలని ట్రంప్‌ మరో ఉత్తర్వు ద్వారా ఆదేశించారు. 2025లో మొదటిసారి లక్ష డాలర్ల ఫీజును ప్రవేశపెట్టాక ఐటీ ఔట్‌సోర్సింగ్‌ కంపెనీల నుంచి వచ్చే హెచ్‌1–బీ వీసా దరఖాస్తులు 92 శాతం వరకూ తగ్గాయని ట్రంప్‌ తాజా ఉత్తర్వుల్లో తెలిపారు. అమెరికా ఆర్థిక, భద్రతపరమైన ప్రయోజనాలను కాపాడేందుకు గత ఏడాది నాటి ఈ ఉత్తర్వులను పొడిగించడం అవసరమైందని స్పష్టం చేశారు. అమెరికన్‌ ఉద్యోగులు, పట్టభద్రుల ఉద్యోగ అవకాశాలకు, కంపెనీలు అత్యధిక నైపుణ్యం అవసరమైన విదేశీయులను మాత్రమే నియమించుకునేలా చేసేందుకు ఈ ఉత్తర్వులు ఉపయోగపడతాయని వివరించారు. హెచ్‌1– బీ వీసాల లబ్ధి అత్యధికంగా పొందుతున్నది భారతీయ టెకీలన్న విషయం తెలిసిందే. 2025లో ట్రంప్‌ హెచ్‌1–బీ వీసా దరఖాస్తులకు లక్ష డాలర్ల ఫీజు వసూలు చేయాలని నిర్ణయించినప్పుడు కొన్ని న్యాయపరమైన చిక్కులు ఎదురయ్యాయి. రెండు ఫెడరల్‌ కోర్టుల్లో కేసులు నమోదయ్యాయి. నాటి ఉత్తర్వుల కాలపరిమితి ఈ నెలతో ముగియనుండగా తాజా ఆదేశాలు వెలువడటం గమనార్హం. అయితే ఈ లక్ష డాలర్ల ఫీజు అనేది అమెరికాలో విద్యార్థి వీసాలపై ఉన్న వారికి, ప్రస్తుతం హెచ్‌1–బీ వీసాపై ఉన్న వారి రెన్యువల్‌కూ వర్తించదు. ఈ వీసాదారుల వేతనాలు, పని నిబంధనలకు సంబంధించి కంపెనీ ఇప్పటికే సమర్పించిన లేబర్‌ కండిషన్‌ అప్లికేషన్ల సమాచారాన్ని 30 రోజుల్లో సమీక్షించాలని, అనంతరం స్పాన్సర్‌ చేసే సంస్థలపై మరిన్ని చర్యలు అవసరమా? లేదా? అన్నది నిర్ణయించాలని ట్రంప్‌ తన ఆదేశాల్లో పేర్కొన్నారు.

అమెరికాలో ఉద్యోగం.. అక్కడే స్థిరపడాలనే కలలు కంటున్న భారతీయ టెకీలకు ట్రంప్‌ సర్కార్‌ మరో కీలక నిర్ణయంతో షాకిచ్చింది. విదేశీ ఉద్యోగులను నియమించుకునే సంస్థలపై విధించిన 1 లక్ష డాలర్ల H-1B వీసా ఫీజును మరో ఏడాది పొడిగించింది. ఇప్పటికే ఈ భారీ ఫీజుతో సతమతమవుతున్న ఐటీ రంగానికి తాజా నిర్ణయం మరింత కీలకంగా మారింది. ఈ ఫీజు కారణంగా పెద్ద ఐటీ ఔట్‌సోర్సింగ్‌ సంస్థల్లో H-1B రిజిస్ట్రేషన్లు 92 శాతం తగ్గినట్లు ట్రంప్‌ తన ప్రకటనలో పేర్కొన్నారు.ఈ సందర్భంగా H-1B కార్యక్రమం అసలు ఉద్దేశాన్ని కొన్ని సంస్థలు దుర్వినియోగం చేస్తున్నాయని ట్రంప్‌ ఆరోపించారు. అమెరికన్ల ఉద్యోగాలను భర్తీ చేసేందుకు విదేశీ ఉద్యోగులను తీసుకొస్తున్నాయని విమర్శించారు. ఈ నేపథ్యంలో అమెరికన్‌ ఉద్యోగులకు అవకాశాలు పెంచడం, అత్యంత నైపుణ్యం కలిగిన విదేశీ ఉద్యోగులను మాత్రమే నియమించుకునేలా చూడటమే లక్ష్యంగా ఫీజును కొనసాగిస్తున్నట్లు వైట్‌హౌస్‌ వెల్లడించింది.భారతీయులపైనే ప్రభావం?అమెరికా H-1B వీసా కార్యక్రమంలో అత్యధికంగా లబ్ధి పొందుతున్న వారిలో భారతీయులే అగ్రస్థానంలో ఉన్నారు. దీంతో ట్రంప్‌ తాజా నిర్ణయం భారతీయ ఐటీ నిపుణులపై ఎలాంటి ప్రభావం చూపుతుందనే చర్చ మొదలైంది. ముఖ్యంగా అమెరికాలో కొత్తగా ఉద్యోగాలు పొందాలనుకునే వారికి ఈ పరిణామం ప్రాధాన్యం సంతరించుకుంది. అయితే, అమెరికాలో ఇప్పటికే విద్యార్థి వీసాలపై ఉన్న విదేశీయులకు మంజూరయ్యే H-1B వీసాలు, ప్రస్తుత వీసాల రెన్యూవల్స్‌కు ఈ లక్ష డాలర్ల ఫీజు వర్తించదని గత ఆదేశంలో స్పష్టం చేశారు.వీసా దరఖాస్తులపై మరింత నిఘాఫీజు పొడిగింపుతోపాటు H-1B దరఖాస్తుల పరిశీలనను కూడా ట్రంప్‌ ప్రభుత్వం కఠినతరం చేసింది. అమెరికన్‌ ఉద్యోగులను తొలగించినా లేదా తొలగించేందుకు ప్రణాళికలు సిద్ధం చేసిన సంస్థలు విదేశీ ఉద్యోగులను నియమించుకునే సమయంలో మరింత నిశితంగా పరిశీలించాలని సంబంధిత శాఖలను ఆదేశించింది. గతంలో సమర్పించిన లేబర్‌ కండిషన్‌ దరఖాస్తులపై 30 రోజుల్లో సమీక్ష ప్రారంభించాలని కార్మిక శాఖకు సూచించింది. అవసరమైతే స్పాన్సర్‌ సంస్థలపై తదుపరి చర్యలు తీసుకునే అంశాన్ని పరిశీలించనున్నారు.కోర్టులో కేసులు.. అయినా వెనక్కి తగ్గని ట్రంప్‌!2025లో విధించిన లక్ష డాలర్ల ఫీజును సవాలు చేస్తూ రెండు ఫెడరల్‌ కోర్టుల్లో కేసులు కొనసాగుతున్నాయి. అయినప్పటికీ, గడువు ముగియనున్న తరుణంలో ట్రంప్‌ ప్రభుత్వం మరో ఏడాది పొడిగింపు ప్రకటించింది. మొత్తంగా.. H-1B వీసాలపై భారీ ఫీజు, కఠిన తనిఖీలు కొనసాగనున్న నేపథ్యంలో అమెరికాలో ఉద్యోగాల కోసం ప్రయత్నిస్తున్న భారతీయులకు కొత్త సవాళ్లు ఎదురయ్యే అవకాశముంది.ఇదీ చదవండి: ఇరాన్‌లో ట్రంప్‌కు బిగ్‌ షాక్‌

గ్రీన్‌లాండ్‌ విషయంలో అమెరికా అధ్యక్షుడు డొనాల్డ్‌ ట్రంప్‌ కీలక ప్రకటన చేశారు. డెన్మార్క్‌, గ్రీన్‌లాండ్‌తో కలిసి అమెరికా ఒక కొత్త భద్రతా ఒప్పందానికి అంగీకరించినట్లు తెలిపారు. ఈ ఒప్పందం ద్వారా గ్రీన్‌లాండ్‌ భద్రతపై అమెరికాకు ‘శాశ్వత నియంత్రణ’’ లభిస్తుందని ట్రంప్‌ ప్రకటించారు. అలాగే దీనిని ఆయన ‘‘ఇన్ఫినిట్‌ లైఫ్‌ అగ్రిమెంట్‌’’గా అభివర్ణించారు.ట్రంప్‌ చేసిన తాజా ప్రకటన.. ప్రపంచంలోనే అతిపెద్ద ద్వీపాన్ని అమెరికా స్వాధీనం చేసుకుంటుందని కాదు. కేవలం భద్రతకు సంబంధించింది మాత్రమే. గ్రీన్‌లాండ్‌ ఇక మీదట కూడా డెన్మార్క్‌ రాజ్యంలోనే కొనసాగుతుందని, ఆ దేశ సార్వభౌమాధికారాన్ని, ప్రాదేశిక సమగ్రతను, అక్కడి ప్రజల స్వయం నిర్ణయ హక్కును ఒప్పందం గుర్తిస్తుందని డెన్మార్క్‌ స్పష్టం చేసింది. అమెరికా, డెన్మార్క్‌, గ్రీన్‌లాండ్‌ ప్రభుత్వాలు వచ్చే వారం ఐక్యరాజ్యసమితి సాధారణ సభ సందర్భంగా న్యూయార్క్‌లో ఈ ఒప్పందంపై సంతకాలు చేయనున్నాయి. అనంతరం అవసరమైన పార్లమెంటరీ ప్రక్రియలు పూర్తయిన తర్వాతే ఇది అమల్లోకి రానుంది. కొత్త ఒప్పందం.. రష్యా, చైనాకు చెక్‌గ్రీన్‌లాండ్‌లో అమెరికా ప్రత్యర్థి దేశాలు సైనిక స్థావరాలు ఏర్పాటు చేయకుండా ఈ ఒప్పందం అడ్డుకట్ట వేస్తుందని ట్రంప్‌ చెప్పారు. ముఖ్యంగా రష్యా, చైనాలు అక్కడ సైనిక స్థావరాలు ఏర్పాటు చేయడం, సైనిక ఉనికిని పెంచడం లేదా సున్నితమైన పెట్టుబడులు పెట్టడం అమెరికా అనుమతి లేకుండా సాధ్యం కాదని ఆయన పేర్కొన్నారు. అమెరికా ఇప్పటికే గ్రీన్‌లాండ్‌లో పిటుఫిక్‌ స్పేస్‌ బేస్‌ను నిర్వహిస్తోంది. క్షిపణి హెచ్చరికలు, క్షిపణి రక్షణ, అంతరిక్ష నిఘా వంటి కార్యకలాపాల్లో ఈ స్థావరం కీలకంగా ఉంది. కొత్త ఒప్పందంతో గ్రీన్‌లాండ్‌లో అమెరికా సైనిక ఉనికిని మరింత పెంచుకునే అవకాశం ఏర్పడినట్లు తాజా వివరాలు సూచిస్తున్నాయి. ట్రంప్‌ వ్యాఖ్యకు అర్థమేంటి?ఈ ఒప్పందానికి గడువు ఉండదనే అర్థంలో ట్రంప్‌ దీనిని ‘‘ఇన్ఫినిట్‌ లైఫ్‌ అగ్రిమెంట్‌’’గా పేర్కొన్నారు. గ్రీన్‌లాండ్‌, అమెరికా భద్రతను కాపాడేందుకు అవసరమైన చర్యలు తీసుకునే అవకాశం అమెరికాకు ఎప్పటికీ ఉంటుందని ఆయన అన్నారు. గ్రీన్‌లాండ్‌లో పెద్ద ఎత్తున అమెరికా సైనిక ఉనికిని అభివృద్ధి చేసే ప్రక్రియను వెంటనే ప్రారంభిస్తామని కూడా ప్రకటించారు. ఎందుకంత కీలకం?ఆర్కిటిక్‌ ప్రాంతంలో ఉన్న గ్రీన్‌లాండ్‌ భౌగోళికంగా అత్యంత కీలకమైన ప్రదేశం. ఉత్తర అమెరికా, యూరప్‌ మధ్య ఉన్న ప్రాంతంలో దాని స్థానం కారణంగా అమెరికా రక్షణ వ్యూహంలో దీనికి ప్రత్యేక ప్రాధాన్యం ఉంది. రష్యా, చైనా ఆర్కిటిక్‌ ప్రాంతంలో తమ ప్రభావాన్ని పెంచుకునే ప్రయత్నాలు చేస్తున్న నేపథ్యంలో గ్రీన్‌లాండ్‌పై అమెరికా దృష్టి మరింత పెరిగింది.ట్రంప్‌ పాత డిమాండ్‌కు భిన్నంగా..గ్రీన్‌లాండ్‌ను అమెరికా సొంతం చేసుకోవాలన్న ఆకాంక్షను ట్రంప్‌ గతంలో పలుమార్లు వ్యక్తం చేశారు. అవసరమైతే బలప్రయోగాన్ని కూడా తోసిపుచ్చని ఆయన వైఖరి డెన్మార్క్‌తో పాటు ఇతర నాటో దేశాల్లో తీవ్ర ఆందోళనకు దారితీసింది. తాజా ఒప్పందం మాత్రం గ్రీన్‌లాండ్‌ను అమెరికాలో కలపడం లేదా దాని సార్వభౌమాధికారాన్ని మార్చడం కాకుండా.. భద్రత, సైనిక ఉనికిపై అమెరికా పాత్రను విస్తరించే దిశగా ఉంది. డెన్మార్క్‌ ప్రధాని మెట్టె ఫ్రెడరిక్సన్‌ ఈ ఒప్పందం.. ఆర్కిటిక్‌, ఉత్తర అట్లాంటిక్‌ ప్రాంతంలో ఉమ్మడి భద్రతను బలోపేతం చేస్తుందని పేర్కొన్నారు. ఇది నాటో, యూరప్‌కు కూడా ప్రయోజనకరమని అన్నారు. గ్రీన్‌లాండ్‌ ప్రభుత్వ అధిపతి జెన్స్‌-ఫ్రెడరిక్‌ నీల్సన్‌ కూడా ఈ ఒప్పందం గ్రీన్‌లాండ్‌, డెన్మార్క్‌, అమెరికా, పాశ్చాత్య కూటమి భద్రతను బలోపేతం చేస్తుందని తెలిపారు. ఇదీ చదవండి: మీడియాను తొక్కిపారేస్తున్న ట్రంప్‌

టెహ్రాన్‌: అమెరికా, ఇజ్రాయెల్‌ దాడుల నేపథ్యంలో ఇరాన్‌ రాజధాని టెహ్రాన్‌లో శుక్రవారం భారీ ర్యాలీ జరిగింది. వేలాది మంది మిలటరీ దుస్తులు ధరించి, ఇరాన్‌ జెండాలు చేతబట్టి ర్యాలీలో పాల్గొన్నారు. అమెరికా దురాక్రమణ ప్రయత్నాలను అడ్డుకుంటామని, అవసరమైతే ప్రాణాలైనా అర్పిస్తామని నినాదాలు చేశారు. ఫిబ్రవరిలో అమెరికా, ఇజ్రాయెల్‌ దాడులు ప్రారంభమైన తర్వాత టెహ్రాన్‌లో జరిగిన అతిపెద్ద ర్యాలీ ఇదేనని పలు కథనాలు పేర్కొంటున్నాయి. సుమారు 3 లక్షల మంది పాల్గొన్నట్టు ఇరాన్‌ ప్రభుత్వ టీవీ అంచనా వేసింది.ఇరాన్‌ ప్రభుత్వం చేపట్టిన ‘జన్ఫాదే–ఇరాన్‌’ (ఇరాన్‌ కోసం ప్రాణాలర్పించేవారు) ప్రచారోద్యమంలో భాగంగా ఈ కార్యక్రమం నిర్వహించినట్లు అధికారులు తెలిపారు. ఇందులో పాల్గొన్న వారికి ఆయుధ శిక్షణ కూడా ఇచ్చినట్లు వెల్లడించారు. ప్రభుత్వ వ్యతిరేక నిరసనలను అణచివేయడంలో కీలకంగా ఉండే ఇరాన్‌ రివల్యూషనరీ గార్డ్‌, బసీజ్‌ మిలీషియాలకు వీరు అదనపు బలంగా ఉంటారని పేర్కొన్నారు. ఈ కార్యక్రమంలో చేరేందుకు ఇప్పటికే 6 లక్షల మంది రిజిస్టర్‌ చేసుకున్నారని రివల్యూషనరీ గార్డ్‌ చీఫ్‌ జనరల్‌ హస్సన్‌ హస్సన్‌జాదెహ్‌ తెలిపారు. త్వరలోనే ఇతర నగరాల్లోనూ ఇలాంటి ర్యాలీలు నిర్వహిస్తామని బసీజ్‌ విభాగం నూతన సారథి హొస్సేన్‌ తాయెబ్‌ ప్రకటించారు.ర్యాలీని ఇరాన్‌ అధ్యక్షుడు మసూద్‌ పెజెష్కియాన్‌, మిలటరీ కమాండర్లు, సీనియర్‌ అధికారులు పరిశీలించారు. కొందరు పాల్గొనేవారు అమెరికా, ఇజ్రాయెల్‌కు వ్యతిరేకంగా నినాదాలు చేస్తూ ఆ దేశాల జెండాలను తొక్కుకుంటూ వెళ్లారు. మరోవైపు ఓ ట్రక్కుపై మహిళా గార్డులు మెషీన్‌ గన్లతో కనిపించడం ర్యాలీలో ప్రత్యేకంగా నిలిచింది.Women present in today's rally of ´Sacrifice for Iran' in Tehran pic.twitter.com/YiiLOO3rov— Farzaneh Ashoorioun | فرزانه عشوریون (@frzaneh_a) September 18, 2026 ఇరాన్‌కు ప్లస్‌.. ఇదిలా ఉండగా.. యుద్ధం కొనసాగుతున్న వేళ జరిగిన ఈ భారీ ర్యాలీని ఇరాన్‌ ప్రభుత్వం దేశ ప్రజాబలాన్ని, ప్రతిఘటన సామర్థ్యాన్ని ప్రదర్శించే కార్యక్రమంగా ముందుకు తీసుకెళ్లింది. అమెరికా ఆంక్షలు, ఆర్థిక ఒత్తిళ్ల మధ్య దేశంలో ఐక్యతను చాటే ప్రయత్నంగానూ దీనిని అంతర్జాతీయ మీడియా విశ్లేషించింది. ఇప్పటికే 6 లక్షల మంది వాలంటీర్లు నమోదు చేసుకున్నట్లు అధికారులు చెబుతుండటం, ఇతర నగరాల్లోనూ ఇలాంటి కార్యక్రమాలను నిర్వహించనున్నట్లు ప్రకటించడం.. యుద్ధ పరిస్థితుల్లో ప్రజలను మరింతగా సమీకరించేందుకు ఇరాన్‌ ప్రయత్నిస్తున్న విషయాన్ని సూచిస్తోంది.ట్రంప్‌కు టెన్షన్‌.. ఇదే ఇప్పుడు కీలక ప్రశ్నగా మారింది. ఇరాన్‌ ప్రజలు అమెరికా దాడులతో ప్రభుత్వానికి వ్యతిరేకంగా తిరుగుతారని అమెరికా అధ్యక్షుడు డొనాల్డ్‌ ట్రంప్‌ ఆశించిన సమయంలో.. యుద్ధం మధ్యలో ఇరాన్‌ ప్రభుత్వం భారీ స్థాయిలో ప్రజలను సమీకరించి ప్రతిఘటనకు సిద్ధమవుతున్నట్లు చూపిస్తోంది. ఈ పరిణామం అమెరికా-ఇజ్రాయెల్‌ వ్యూహాలపై కొత్త ప్రశ్నలను లేవనెత్తుతోంది.ఇదీ చదవండి: ఉత్కంఠకు తెర.. రష్యా ఆంక్షల బిల్లుపై ట్రంప్‌ సంతకం🚨🇮🇷 🇺🇸 Iranians marched under a "we will kill" banner showing Trump in crosshairs as 600,000 sign up for military trainingGen. Hassan Hassanzadeh gave that recruitment figure at Friday's rally in Tehran, where state media counted 300,000 in the streets under the banner "ones… pic.twitter.com/BxKY00yrnz— Mario Nawfal (@MarioNawfal) September 19, 2026

వాషింగ్టన్‌: అమెరికా అధ్యక్షుడు డొనాల్డ్ ట్రంప్ మరో సంచలన నిర్ణయం తీసుకున్నారు. సీఎన్‌ఎన్‌, ఎంఎస్‌ నౌ, పొలిటికో మీడియా సంస్థలను వైట్‌హౌస్‌లోకి అనుమతించబోమని ప్రకటించారు. ఈ మూడు సంస్థలు తన ప్రభుత్వం, అమెరికాపై పదేపదే ‘ఫేక్ న్యూస్’ ప్రసారం చేస్తున్నాయని ట్రంప్ ఆరోపించారు. ఈ నిషేధం తక్షణమే అమల్లోకి వస్తుందని ఆయన తెలిపారు. మరికొన్ని మీడియా సంస్థలపై కూడా ఇదే తరహా చర్యలు తీసుకునే అవకాశం ఉందని హెచ్చరించారు.ట్రంప్ శుక్రవారం తన ‘ట్రూత్‌ సోషల్‌’ ఖాతాలో ఈ నిర్ణయాన్ని ప్రకటించారు. ఆ వార్తా సంస్థలు ‘ఫేక్ న్యూస్’ ప్రచురిస్తున్నందుకే వైట్‌హౌస్ నుంచి నిషేధిస్తున్నట్లు పేర్కొన్నారు. తన పరిపాలన, అమెరికా అధ్యక్షుడు, అమెరికా దేశానికి సంబంధించిన వార్తల్లో ‘కల్పిత కథనాలు, అబద్ధాలు’ రాయడానికి మీడియా సంస్థలను అనుమతించకూడదని ఆయన అన్నారు. అయితే ఏయే కథనాలు లేదా ఏదైనా ప్రత్యేక ఘటన ఈ నిర్ణయానికి కారణమయ్యాయో ట్రంప్ వివరించలేదు.ఈ సందర్భంగా న్యూయార్క్ టైమ్స్, వాషింగ్టన్ పోస్ట్ పేర్లను కూడా ట్రంప్‌ ప్రస్తావించారు. అయితే వీటిపై నిషేధం విధించినట్లు అధికారిక ప్రకటన వెలువడలేదు. ట్రంప్‌కు మీడియా సంస్థలతో విభేదాలు కొత్తేమీ కాదు. ఆయన తొలి అధ్యక్ష పదవీకాలంలో సీఎన్‌ఎన్‌ రిపోర్టర్ జిమ్ అకోస్టా వైట్‌హౌస్ ప్రెస్ పాస్‌ను రద్దు చేయడానికి ప్రయత్నించగా, న్యాయస్థానం ఆ పాస్‌ను పునరుద్ధరించాలని ఆదేశించింది. 2025లో అసోసియేటెడ్ ప్రెస్‌ (ఏపీ)ను కూడా కొన్ని వైట్‌హౌస్ కార్యక్రమాల నుంచి నిషేధించారు. మెక్సికో గల్ఫ్‌ను ‘గల్ఫ్ ఆఫ్ మెక్సికో’గా పేర్కొనడం కొనసాగించడమే అందుకు కారణంగా ట్రంప్ పరిపాలన పేర్కొంది.సీఎన్‌ఎన్‌, పొలిటికో వంటి సంస్థలు తమ జర్నలిస్టులు వైట్‌హౌస్‌లో వార్తలను కవర్ చేసే హక్కును సమర్థించాయి. అమెరికా రాజ్యాంగంలోని ఫస్ట్ అమెండ్‌మెంట్ స్వేచ్ఛా పత్రికా హక్కును రక్షిస్తుందని పేర్కొన్నాయి. మీడియా సంస్థలను వైట్‌హౌస్ నుంచి పూర్తిగా మినహాయించే నిర్ణయం ఎంతవరకు చట్టబద్ధమన్నది దాని పరిధిపై ఆధారపడి ఉంటుందని న్యాయ నిపుణులు చెబుతున్నారు. పరిమిత స్థలాల్లో జరిగే కొన్ని కార్యక్రమాలకు మీడియా ఎంపికపై అధ్యక్షుడికి విస్తృత అధికారం ఉన్నప్పటికీ, సాధారణ వైట్‌హౌస్ ప్రెస్ సౌకర్యాలు లేదా ప్రెస్ పూల్ నుంచి విస్తృతంగా మినహాయించడం రాజ్యాంగపరమైన సవాళ్లను ఎదుర్కొనే అవకాశం ఉందని నిపుణులు అంటున్నారు.ఇదీ చదవండి: ఆ గణపయ్య హుండీ తెరవగానే.. కళ్లు చెదిరే కానుకలు!

ఉత్కంఠకు తెర పడింది. రష్యా నుంచి చమురు, గ్యాస్‌ కొనుగోలు చేస్తున్న దేశాలకు అమెరికా అధ్యక్షుడు డొనాల్డ్‌ ట్రంప్‌ భారీ షాక్‌ ఇచ్చారు. రష్యాపై ఆంక్షలను మరింత కఠినతరం చేసే బిల్లుపై ట్రంప్‌ ఇవాళ సంతకం చేశారు. ఈ బిల్లు చట్టంగా మారడంతో ఆయా దేశాలపై ఏ క్షణమైనా 100 శాతం వరకు టారిఫ్‌లు ట్రంప్‌ విధించే అవకాశం ఉంది. ప్రధానంగా.. భారత్‌, చైనాలకు ఇప్పుడు టెన్షన్‌ పట్టుకుంది. లిండ్సే గ్రాహం యాక్ట్‌ ప్రకారం.. రష్యా నుంచి అత్యధికంగా క్రూడ్‌ ఆయిల్‌ లేదంటే గ్యాస్‌ దిగుమతి చేసుకునే టాప్‌-5 దేశాల నుంచి అమెరికాకు వచ్చే వస్తువులపై 100 శాతం వరకు సుంకాలు విధించే అవకాశం ఉంది. అయితే చట్టంలో ఆ దేశాల పేర్లను ప్రత్యేకంగా పేర్కొనలేదు. ఆయా జాబితాలను ఎలా లెక్కించాలన్న దానిపైనా పూర్తి స్పష్టత లేదు. దీంతో తుది నిర్ణయాధికారం ట్రంప్‌ ప్రభుత్వానికే దక్కింది. అబ్‌ ఆయేగా అస్లీ మజా!ట్రంప్‌ సంతకం చేయడంతో ఇప్పటివరకు కొనసాగిన ఉత్కంఠకు తెరపడింది. కానీ అసలు పరిణామాలు ఇప్పుడే మొదలుకానున్నాయి. భారత్‌, చైనా సహా రష్యా చమురు కొనుగోలు చేస్తున్న ఏ దేశాలు ‘టాప్‌-5’ జాబితాలోకి వస్తాయి? వాటిపై ట్రంప్‌ 100 శాతం వరకు టారిఫ్‌ విధిస్తారా? లేక మినహాయింపు ఇస్తారా? అన్నదే ఇప్పుడు కీలకం. తుది జాబితా, టారిఫ్‌ స్థాయిపై అమెరికా ప్రభుత్వం తీసుకునే నిర్ణయమే ఇప్పుడు అందరి దృష్టినీ ఆకర్షిస్తోంది.ఆగస్టు క్రూడ్‌ దిగుమతుల డేటా ఆధారంగా రష్యా చమురు కొనుగోలులో ముందున్న దేశాలు:భారత్‌చైనాఇటలీటర్కీనెదర్లాండ్స్‌ఎస్‌అండ్‌పీ గ్లోబల్‌ ప్రకారం ఆగస్టులో రష్యా క్రూడ్‌ దిగుమతుల్లో భారత్‌ రోజుకు సుమారు 16 లక్షల బ్యారెళ్లతో మొదటి స్థానంలో ఉండగా, చైనా 11 లక్షల బ్యారెళ్లతో తర్వాతి స్థానంలో ఉంది. ఇటలీ, టర్కీ, నెదర్లాండ్స్‌ తర్వాతి స్థానాల్లో ఉన్నాయి.భారత్‌కు ఎందుకు కీలకం?రష్యా నుంచి చౌకగా లభించే క్రూడ్‌ ఆయిల్‌ భారత రిఫైనరీలకు కీలక వనరుగా మారింది. దేశీయ అవసరాల్లో భారీ భాగం దిగుమతులపైనే ఆధారపడుతోంది. రష్యా చమురు దిగుమతులు భారత మొత్తం క్రూడ్‌ దిగుమతుల్లో దాదాపు సగం వరకు ఉన్నాయని తాజా విశ్లేషణలు పేర్కొంటున్నాయి. దీంతో రష్యా నుంచి కొనుగోళ్లపై అమెరికా చర్యలు తీసుకుంటే భారత రిఫైనింగ్‌ రంగంతో పాటు అమెరికాకు ఎగుమతి చేసే భారతీయ ఉత్పత్తులపైనా ప్రభావం పడే అవకాశం ఉంది. అయితే భారత్‌ సహా ఏ దేశాలపై, ఎప్పుడు, ఎంతమేర సుంకాలు విధించాలన్న విషయంలో ట్రంప్‌దే తుదినిర్ణయం కానుంది. మరోవైపు ఈ విషయంలో అమెరికాతో చర్చలు జరుగుతున్నాయని ఇప్పటికే భారత్‌ స్పష్టం చేసింది. చర్చల్లో మరికొన్ని దేశాలురష్యా చమురు కొనుగోలుదారుల జాబితాతో పాటు రష్యా ఆంక్షలను తప్పించుకునేందుకు సహకరిస్తున్న దేశాలపైనా చట్టం దృష్టి పెట్టింది. ఈ నేపథ్యంలో బ్రెజిల్‌, జపాన్‌, యూరోపియన్‌ యూనియన్‌లోని కొన్ని దేశాలు కూడా అమెరికా చర్యల పరిధిలోకి రావచ్చనే చర్చ జరుగుతోంది. 30 రోజుల్లో నిర్ణయం?కొత్త చట్టం ప్రకారం అర్హత కలిగిన దేశాలపై టారిఫ్‌లు విధించే చర్యలను 30 రోజుల్లో ప్రారంభించే అవకాశం ఉంది. దీంతో నవంబర్‌లో జరగనున్న అమెరికా మధ్యంతర ఎన్నికలకు ముందు ఈ అంశం కీలకంగా మారింది. రష్యా చమురుపై ఆంక్షలు కఠినతరం చేస్తే ప్రపంచ చమురు సరఫరాపై ప్రభావం పడి ధరలు పెరిగే అవకాశం ఉందని విశ్లేషకులు చెబుతున్నారు. అదే సమయంలో అమెరికాలో వినియోగదారులపై ఇంధన ధరల భారం పెరగకుండా ట్రంప్‌ ప్రభుత్వం ఈ అధికారాలను ఎంతవరకు ఉపయోగిస్తుందన్నది ఆసక్తికరంగా మారింది.రష్యాపై మరింత ఒత్తిడిఈ చట్టం కేవలం చమురు కొనుగోలుదారులపైనే కాదు.. రష్యా ఇంధన, రక్షణ రంగాలతో పాటు ఆంక్షలను తప్పించుకునేందుకు ఉపయోగిస్తున్నట్లు ఆరోపణలు ఎదుర్కొంటున్న ‘షాడో ఫ్లీట్‌’ ట్యాంకర్లపైనా చర్యలకు వీలు కల్పిస్తోంది. ఇరాన్‌పై ఉన్న కొన్ని ఆంక్షలను కూడా ఈ చట్టం పొడిగించింది. ఉక్రెయిన్‌పై యుద్ధానికి రష్యాకు లభిస్తున్న ఆర్థిక వనరులను దెబ్బతీయడమే ఈ చర్యల ప్రధాన లక్ష్యంగా అమెరికా పేర్కొంటోంది. మొత్తంగా చూస్తే.. రష్యా నుంచి చమురు కొనుగోలు చేస్తున్న భారత్‌, చైనాలకు ఇది నేరుగా తాకే అంశమే అయినప్పటికీ, 100 శాతం టారిఫ్‌ ఇప్పటికిప్పుడు ఖరారైన నిర్ణయం కాదు. ఏ దేశాలను తుది జాబితాలో చేర్చుతారు? భారత్‌పై ఎంత మేర ప్రభావం ఉంటుంది? అన్నది ట్రంప్‌ ప్రభుత్వం తీసుకునే తదుపరి నిర్ణయాలపై ఆధారపడి ఉంటుంది.ఇదీ చదవండి: భూకంపం కాదు.. భూకంపాలు పుట్టిన కిమ్‌

యెమెన్‌లో హౌతీల దూకుడు పెరుగుతున్న వేళ సౌదీ అరేబియాకు కొత్త తలనొప్పి మొదలైంది. ఒకవైపు హౌతీ దళాలు ఎర్ర సముద్ర తీరంలో కీలక ప్రాంతాలపై పట్టు బిగిస్తూ సౌదీ చమురు రవాణా మార్గాలకు ముప్పుగా మారుతున్నాయి. మరోవైపు.. సౌదీకి ప్రధాన మిత్రదేశమైన అమెరికా మాత్రం హౌతీలతో నేరుగా చర్చలు జరుపుతోంది. ఒమన్‌ రాజధాని మస్కట్‌లో అమెరికా అధికారులు, హౌతీ ప్రతినిధులు రహస్యంగా సమావేశమైనట్లు Reuters వెల్లడించింది. ఈ రహస్య భేటీ ఇప్పుడు గల్ఫ్‌ రాజకీయాల్లో కలకలం రేపుతోంది. అమెరికా-హౌతీల మధ్య నిజంగానే ఏదైనా అవగాహన కుదిరిందా? అదే జరిగితే.. సౌదీకి మిగిలేది ఎవరు? అనే ప్రశ్న ఎదురవుతోంది.ఇరాన్‌ మద్దతు ఉన్న హౌతీలు ఇటీవల యెమెన్‌లోని ఎర్ర సముద్ర తీర ప్రాంతాల్లో వేగంగా ముందుకు సాగారు. వ్యూహాత్మకంగా కీలకమైన బాబ్‌ ఎల్‌-మండేబ్‌ జలసంధికి సమీపంలోని ప్రాంతాల్లో తమ పట్టును పెంచుకున్నారు. ఈ మార్గం సౌదీ చమురు ఎగుమతులతో పాటు అంతర్జాతీయ వాణిజ్యానికి కూడా కీలకమైనది. హౌతీల దాడులు ఏకంగా సౌదీ నగరాలు, ఇంధన మౌలిక వసతుల వరకు విస్తరించాయి. ఇటీవలి ఘర్షణల్లో సౌదీ, హౌతీ బలగాలు పరస్పరం దాడులు కొనసాగిస్తున్నాయి.మస్కట్‌లో అమెరికా-హౌతీల భేటీఈ ఉద్రిక్తతల మధ్య అమెరికా అధికారులు హౌతీ ప్రతినిధులతో ఒమన్‌లో సమావేశమయ్యారు. ఒమన్‌ మధ్యవర్తిత్వంతో జరిగిన ఈ భేటీలో ఎర్ర సముద్రంలో నౌకాయానం కొనసాగడం, అమెరికా-హౌతీల మధ్య గతంలో కుదిరిన కాల్పుల విరమణను కొనసాగించడం వంటి అంశాలపై చర్చ జరిగినట్లు సమాచారం. హౌతీ ప్రతినిధులు అమెరికా, ఇజ్రాయెల్‌కు చెందిన నౌకలను లక్ష్యంగా చేసుకోబోమని హామీ ఇచ్చినట్లు Reuters పేర్కొంది. అదే సమయంలో సౌదీ నౌకలపై దాడులు కొనసాగించే అవకాశం ఉందన్న సమాచారం వెలువడింది.వాన్స్ కీలక ప్రకటన.. ఇదే సమయంలో అమెరికా ఉపాధ్యక్షుడు జేడీ వాన్స్‌ కూడా హౌతీలతో నేరుగా చర్చలు జరుగుతున్నాయని వెల్లడించారు. అయితే ఈ చర్చలు పూర్తిస్థాయి ఒప్పందానికి దారితీశాయా? అన్నది ఇంకా స్పష్టంగా లేదు. అమెరికా ప్రధాన ప్రాధాన్యత ఎర్ర సముద్రంలో స్వేచ్ఛాయుత నౌకాయానాన్ని కొనసాగించడమేనని వాషింగ్టన్‌ స్పష్టం చేసింది.సౌదీ ఒంటరిగా మిగిలిపోతుందా?ఇదిలా ఉండగా.. దాడులు జరుగుతున్నా హౌతీలపై నేరుగా సైనిక చర్యకు అమెరికా ఇప్పటివరకు వెనుకంజ వేస్తుండటం సౌదీకి కీలక సమస్యగా మారింది. సౌదీ క్రౌన్‌ ప్రిన్స్‌ మహ్మద్‌ బిన్‌ సల్మాన్‌ అమెరికా సాయం కోరినప్పటికీ వాషింగ్టన్‌ ప్రత్యక్ష దాడులకు అనుమతి ఇవ్వలేదు. అయితే ఇంటెలిజెన్స్‌ పంచుకోవడం, టార్గెటింగ్‌ విషయంలో సహకారం అందించే అంశం చర్చకు వచ్చినట్లు సమాచారం. ఇదే సమయంలో సౌదీ మద్దతున్న యెమెన్‌ బలగాలు హౌతీలను నిలువరించడంలో ఇబ్బందులు ఎదుర్కొంటున్నాయి. హౌతీల తాజా ముందడుగు సౌదీ భద్రత, చమురు ఎగుమతులు, బాబ్‌ ఎల్‌-మండేబ్‌ మార్గంపై ఒత్తిడిని పెంచింది.ప్రస్తుత హౌతీల దూకుడు, సౌదీ మిత్రబలగాల వైఫల్యం, అమెరికా నేరుగా హౌతీలతో చర్చలు జరపడం.. ఇవన్నీ రియాద్‌కు కొత్త సవాళ్లను విసురుతున్నాయి. అయితే అమెరికా-హౌతీల మధ్య అధికారిక ఒప్పందం కుదిరిందని ఇప్పటివరకు నిర్ధారణ కాలేదు. అయినప్పటికీ ఎర్ర సముద్రంలో అమెరికా నౌకాయాన ప్రయోజనాలకు హామీ లభిస్తే.. సౌదీ ప్రయోజనాలు మాత్రం పక్కకు నెట్టబడే పరిస్థితి ఏర్పడుతుందన్న ఆందోళన నెలకొంది. దీంతో హౌతీలను ఎదుర్కొనే విషయంలో సౌదీ తదుపరి వ్యూహం ఏంటి? అమెరికా మద్దతు ఎంతవరకు ఉంటుందన్నది ఇప్పుడు కీలకంగా మారింది.ఇదీ చదవండి: పాక్‌ తీరు మారలేదు.. భారత్‌ సంచలన వ్యాఖ్యలు

రష్యాపై మరిన్ని ఆంక్షలకు అమెరికా సిద్ధమైంది. రష్యా నుంచి చమురు, సహజవాయువు కొనుగోలు చేస్తున్న దేశాలపై భారీ టారిఫ్‌లు విధించేందుకు అధ్యక్షుడు డొనాల్డ్‌ ట్రంప్‌కు అధికారం ఇచ్చే బిల్లుకు అమెరికా కాంగ్రెస్‌ ఆమోదం తెలిపింది. దీంతో రష్యా చమురు కొనుగోలులో కీలకంగా ఉన్న భారత్‌, చైనాలకు 100 శాతం వరకు టారిఫ్‌ ముప్పు పొంచి ఉంది. అయితే.. ఇదే బిల్లులో అమెరికాకు అనుకూలంగా ఉన్న మరో కీలక నిబంధన ఇప్పుడు ఆసక్తికరంగా మారింది.ట్రంప్‌ సర్కార్‌ ‘లిండ్సే ఓ. గ్రాహమ్‌ శాంక్షనింగ్‌ రష్యా అండ్‌ ఇరాన్‌ యాక్ట్‌–2026’ పేరుతో ఈ బిల్లును తీసుకొచ్చింది. ఉక్రెయిన్‌పై యుద్ధం కొనసాగిస్తున్న రష్యాకు చమురు, గ్యాస్‌ ఎగుమతులే ప్రధాన ఆదాయ వనరుల్లో ఒకటి. ఆ ఆదాయాన్ని తగ్గించడంతో పాటు.. రష్యాతో ఇంధన వ్యాపారం కొనసాగిస్తున్న దేశాలపై ఒత్తిడి పెంచడమే బిల్లు ప్రధాన ఉద్దేశం. రష్యా అధికారులు(అధ్యక్షుడు పుతిన్‌ సహా..), ఆర్థిక సంస్థలు, ఇంధన రంగం, ఆంక్షలను తప్పించుకునేందుకు ఉపయోగిస్తున్న ‘షాడో ఫ్లీట్‌’పై కూడా కఠిన చర్యలకు ఇందులో అవకాశం కల్పించారు. అమెరికా ప్రతినిధుల సభలో బిల్లు 262–159 ఓట్లతో ఆమోదం పొందింది. ఇందులో 203 మంది రిపబ్లికన్లు, 58 మంది డెమొక్రాట్లు, ఒక ఇండిపెండెంట్‌ సభ్యుడు అనుకూలంగా ఓటేశారు. అంతకుముందే సెనేట్‌ కూడా ఈ బిల్లును 86–11 ఓట్లతో ఆమోదించింది. దీంతో ఇప్పుడు బిల్లు ట్రంప్‌ డెస్క్‌కు చేరగా.. ఆయన సంతకంపై సర్వత్రా ఉత్కంఠ నెలకొంది.అసలు ట్విస్ట్‌ ఇదే..రష్యా నుంచి చమురు కొనే దేశాలపై భారీ టారిఫ్‌లకు సిద్ధమైన అమెరికా.. అందులో తనకు అనుకూలంగా ఓ సెక్షన్‌ను జత చేర్చుకుంది. అవసరమైన రష్యా యురేనియం విషయంలో మాత్రం కొంత వెసులుబాటు ఉంచుకుంది. అయితే బిల్లులోని సెక్షన్‌ 111 రష్యా నుంచి యురేనియం దిగుమతులపై ఇప్పటికే ఉన్న అమెరికా ఆంక్షలను అమలు చేయాలని చెబుతోంది. రష్యా ప్రభుత్వ అణు సంస్థ రోసాటమ్‌, దాని అనుబంధ/వారస సంస్థల నుంచి వచ్చే యురేనియం కూడా ఇందులో ప్రస్తావనకు వచ్చింది.కానీ అదే బిల్లులోని సెక్షన్‌ 114 మాత్రం కొన్ని ముఖ్యమైన మినహాయింపులను ఇచ్చింది. అమెరికా–రష్యా మధ్య కుదిరిన పౌర అణు సహకార ఒప్పందాల కింద జరిగే కొన్ని కార్యకలాపాలకు ఈ ఆంక్షలు వర్తించవు. అలాగే అణు రియాక్టర్లలో ఉపయోగించే కొన్ని రకాల లో-ఎన్‌రిచ్డ్‌ యురేనియం (LEU) దిగుమతులకు కూడా మినహాయింపు ఉంది. నిబంధనల ప్రకారం కొన్ని వైద్య ఐసోటోపుల దిగుమతులకు కూడా వెసులుబాటు కల్పించారు. అంటే రష్యాతో అణు రంగంలో ప్రతి లావాదేవీని పూర్తిగా నిలిపివేసేలా ఈ బిల్లు లేనేలేదన్నమాట.అమెరికాకు ఎందుకంత అవసరం?రష్యాపై ఆర్థిక ఆధారపడటాన్ని తగ్గించాలని అమెరికా ప్రయత్నిస్తున్నప్పటికీ.. అణు ఇంధన రంగంలో మాత్రం మాస్కో పాత్ర ఇప్పటికీ పెద్దదే. 2025లో అమెరికా పౌర అణు విద్యుత్‌ సంస్థలు మొత్తం 12.71 మిలియన్‌ సెపరేటివ్‌ వర్క్స్‌ యూనిట్స్‌ (SWU) మేర ఎన్‌రిచ్‌మెంట్‌ సేవలను కొనుగోలు చేశాయి. అందులో రష్యా నుంచి వచ్చినవి 3.284 మిలియన్‌ ఎస్‌డబ్ల్యూయూ.. అంటే సుమారు 26 శాతం. అమెరికా దేశీయ ఎన్‌రిచ్‌మెంట్‌ సేవల వాటా సుమారు 23 శాతంగా ఉంది. ఫ్రాన్స్‌, బ్రిటన్‌, నెదర్లాండ్స్‌ కూడా అమెరికాకు ఎన్‌రిచ్‌మెంట్‌ సేవలు అందిస్తున్నాయి. యురేనియం కొంటే సరిపోదు..అణు ఇంధనం తయారీ ప్రక్రియ ముడి చమురు లాంటిది కాదు. గనుల నుంచి తీసిన యురేనియంను నేరుగా చాలా వాణిజ్య అణు రియాక్టర్లలో ఉపయోగించలేరు. ముందుగా కన్వర్షన్‌, ఎన్‌రిచ్‌మెంట్‌ వంటి పలు దశలు దాటాలి. ఈ ఎన్‌రిచ్‌మెంట్‌ సామర్థ్యంలో రష్యా చాలా కాలంగా ప్రపంచంలో కీలక స్థానంలో ఉంది. అందుకే రష్యాతో విస్తృత ఆర్థిక సంబంధాలను తగ్గించేందుకు అమెరికా ప్రయత్నిస్తున్నా.. అణు విద్యుత్‌ రంగానికి అవసరమైన ఇంధన సరఫరాను ఒక్కసారిగా దెబ్బతీసే నిర్ణయాలు తీసుకోవడం అంత సులభం కాదు.2024లోనే రష్యా యురేనియంపై నిషేధంఈ ఆధారపడటాన్ని తగ్గించే ప్రయత్నంలో భాగంగా.. అమెరికా 2024 మేలో రష్యా యురేనియం ఉత్పత్తుల దిగుమతులపై నిషేధం విధించింది. అయితే దేశీయ సరఫరా వ్యవస్థ పూర్తిస్థాయిలో అందుబాటులోకి వచ్చే వరకు కంపెనీలు మినహాయింపులు కోరుకునే అవకాశం కల్పించింది. ఈ మినహాయింపు వ్యవస్థ 2028 జనవరి 1 వరకు కొనసాగేందుకు అవకాశం ఉంది.అదే సమయంలో అమెరికా దేశీయ అణు ఇంధన సరఫరా గొలుసును బలోపేతం చేసేందుకు 2.72 బిలియన్‌ డాలర్ల నిధులను కేటాయించింది. దీని లక్ష్యం కూడా రష్యాపై ఆధారపడటాన్ని క్రమంగా తగ్గించడమే. అయితే రష్యా చమురు, గ్యాస్‌ కొనుగోలు చేసే దేశాలపై భారీ టారిఫ్‌లకు మార్గం వేస్తూనే.. తన అణు విద్యుత్‌ రంగానికి అవసరమైన కొన్ని రష్యా యురేనియం సరఫరాలకు మాత్రం మినహాయింపులు ఉంచింది. ఇలా.. ఒకే బిల్లులో అమెరికా రెండు రకాల విధానాలను అవలంబిస్తున్నట్లు స్పష్టంగా కనిపిస్తోంది. భారత్‌, చైనా.. టారిఫ్‌లపై సస్పెన్స్‌రష్యా నుంచి ముడి చమురు, సహజవాయువు కొనుగోలు చేసే దేశాలపై 100 శాతం వరకు టారిఫ్‌లు విధించే అధికారం ఈ బిల్లుతో ట్రంప్‌కు దక్కింది. రష్యా ఇంధనాన్ని పెద్ద మొత్తంలో కొనుగోలు చేస్తున్న భారత్‌, చైనాలే ఈ విషయంలో ప్రభావితం కానున్నాయి. అయితే భారత్‌ మాత్రం రష్యా ఆయిల్‌ విషయంలో తగ్గేదే లేదని చెబుతోంది. జాతి ప్రయోజనాల కోసం తాము ఆలోచిస్తామని.. అదే సమయంలో ఈ టారిఫ్‌ ముప్పు గురించి అమెరికాతో చర్చిస్తున్నట్లు తెలిపింది. దీంతో ట్రంప్‌ నిర్ణయం ఏంటన్నది ఉత్కంఠగా మారింది. ఇదీ చదవండి: డయానా ఎపిసోడ్‌లో బిగ్‌ ట్విస్ట్‌

వాషింగ్టన్‌: రష్యాపై ఆంక్షలు విధించే అధికారాన్ని అమెరికా అధ్యక్షుడు ట్రంప్‌కు కట్టబెట్టే బిల్లుకు ఆ దేశ ప్రతినిధుల సభ ఆమోదం తెలిపింది. రష్యా నుంచి చమురు, గ్యాస్‌ కొనుగోళ్లు చేస్తున్న భారత్, చైనాలపై భారీ ఎత్తున టారిఫ్‌లు విధించేందుకు ఈ బిల్లు అవకాశం కల్పిస్తుంది. ‘ద లిండ్సే ఓ గ్రాహం సాంక్షనింగ్‌ రష్యా అండ్‌ ఇరాన్‌ యాక్ట్‌ 2026’పేరున్న ఈ చట్టాన్ని సెనేట్‌ గత నెలలోనే ఆమోదించింది. తాజాగా బుధవారం సాయంత్రం ప్రతినిధుల సభ 262–159 ఓట్లతో ఓకే చెప్పింది. అధ్యక్షుడు ట్రంప్‌ సంతకం పెట్టిన వెంటనే ఈ బిల్లు కాస్తా చట్టం అవుతుంది. ప్రతినిధుల సభలోని 203 మంది రిపబ్లికన్లతోపాటు 56 మంది డెమొక్రాట్లు, ఒక స్వతంత్ర ప్రతినిధి ఈ బిల్లుకు ఆమోదం తెలపడం గమనార్హం. ప్రతిపక్ష డెమొక్రాట్‌ పార్టీ ప్రతినిధులు ట్రంప్‌కు టారిఫ్‌లు విధించే అధికారాలపై తమ అభ్యంతరాన్ని వ్యక్తం చేయడానికి పరిమితమయ్యారు. సౌత్‌ కరొలీనా సెనేటర్, రిపబ్లికన్‌ పార్టీ ప్రతినిధి లిండ్సే గ్రాహం ఏడాది కాలంగా ఈ బిల్లుకు మద్దతు కూడగట్టే ప్రయత్నం చేసి.. ఈ ఏడాది జూలైలో ఆకస్మిక మరణం పాలయ్యారు. దీంతో బిల్లుకు గ్రాహం పేరునే పెట్టారు. బిల్లుపై జరిగిన చర్చలో డెమొక్రాట్‌ ప్రతినిధి రిచర్డ్‌ నీల్‌ మాట్లాడుతూ ‘‘టారిఫ్‌లు విధించే విషయంలో ట్రంప్‌కు ఎక్కువ అధికారాలు ఇవ్వడంపై మాత్రమే తమ అభ్యంతరం’’అని స్పష్టం చేశారు. ఈ బిల్లు ద్వారా రష్యా నేతలపై మాత్రమే కాకుండా ఇంధన రంగం మొత్తమ్మీద ఆంక్షలు విధించే అధికారాన్ని ట్రంప్‌కు కట్టబెట్టనుంది. అధికారికంగా ఇంధన సరఫరా చేసే నౌకలతోపాటు ‘షాడో ఫ్లీట్‌’లకు కూడా ఆంక్షలు వర్తించనున్నాయి. అదే సమయంలో రష్యా సరఫరా చేసే చమురు, గ్యాస్‌లపై భారత్, చైనా వంటి దేశాలు ఆధారపడటాన్ని తగ్గించేందుకు ఆయా దేశాలపై టారిఫ్‌లు వడ్డించేందుకు ఈ బిల్లు ట్రంప్‌కు అధికారం ఇస్తుంది. చైనా అధ్యక్షుడు షీ జిన్‌పింగ్‌ అమెరికా పర్యటన మరికొన్ని రోజులు మాత్రమే ఉండగా ఈ బిల్లు ఆమోదం పొందడం గమనార్హం. సెనేట్‌ ఈ బిల్లును నెలరోజుల క్రితమే 86–11 ఓట్ల తేడాతో ఆమోదించగా ప్రతినిధుల సభలో కొంత ఆలస్యమైంది. నవంబరు మూడున జరిగే మధ్యంతర ఎన్నికలకు ముందు ప్రతినిధుల సభ సమావేశాల చివరిరోజున మాత్రమే ఆమోదం సాధ్యమవడం విశేషం.

అమెరికా అధ్యక్షుడు డొనాల్డ్‌ ట్రంప్‌, ఫెడరల్‌ రిజర్వ్‌ (ఫెడ్‌) చైర్మన్‌ కెవిన్‌ వార్ష్‌ మధ్య సంబంధాలపై మరోసారి చర్చ మొదలైంది. ట్రంప్‌ కోరుకున్న విధంగా వడ్డీ రేట్లను తగ్గించకుండా.. ఫెడ్‌ మూడు సంవత్సరాల తర్వాత తొలిసారి వడ్డీ రేట్లను పెంచింది. దీంతో అధ్యక్షుడు, అమెరికా కేంద్ర బ్యాంకు మధ్య సంబంధం కొత్త మలుపు తిరిగింది.బుధవారం రాత్రి ట్రంప్‌ చేసిన వ్యాఖ్యలు ఈ చర్చకు మరింత ఆజ్యం పోశాయి. వడ్డీ రేట్ల పెంపు నిర్ణయం సరైనది కాదని తాను భావించినప్పటికీ.. వార్ష్‌కు ఓటు వేయడానికి అనుమతించానని ట్రంప్‌ చెప్పినట్లు కథనం పేర్కొంది. ఫెడ్‌ వడ్డీ రేట్ల నిర్ణయ కమిటీలో వార్ష్‌కు తగినంత మద్దతు లేకపోవడంతో.. ఆయన తనతోనే ఓటు వేసినా ప్రయోజనం ఉండదని చెప్పినట్లు ట్రంప్‌ వివరించారు.అయితే ఫెడ్‌ చైర్మన్‌కు వడ్డీ రేట్లు పెంచేందుకు అధ్యక్షుడి అనుమతి అవసరం ఉండదని మాజీ ఫెడరల్‌ రిజర్వ్‌ బ్యాంక్‌ ఆఫ్‌ బోస్టన్‌ అధ్యక్షుడు ఎరిక్‌ రోసెన్‌గ్రెన్‌ వ్యాఖ్యానించారు. ట్రంప్‌ చేసిన వ్యాఖ్యలు అసాధారణమైనవిగా పేర్కొన్న ఆయన.. వార్ష్‌కు అధ్యక్షుడు అనుమతి ఇచ్చినట్లుగా భావించే అవకాశం ఉందని అన్నారు. అయితే ట్రంప్‌ చెప్పిన విషయాలు ఎంతవరకు వాస్తవమో తనకు తెలియదని స్పష్టం చేశారు.‘ఫెడ్‌ నిర్ణయం వార్ష్‌దే..వార్ష్‌ సహచరులతో కలిసి తీసుకున్న నిర్ణయమే ఇది తప్ప.. ఇతరుల ఒత్తిడితో ఆయన రేట్లు పెంచారని చెప్పడానికి ఆధారాలు లేవని ఎవర்கోర్‌ ఐఎస్‌ఐకి చెందిన ఆర్థిక నిపుణుడు కృష్ణ గుహా అన్నారు. కమిటీలో వార్ష్‌ నాయకత్వం స్పష్టంగా కనిపించిందని, సభ్యులంతా ఆయన నిర్ణయానికి మద్దతుగా నిలిచారని పేర్కొన్నారు. గతంలో వార్ష్‌ కొన్ని విషయాల్లో తడబడినప్పటికీ.. తాజా సమావేశంలో మాత్రం ఆయన మరింత స్పష్టంగా, నమ్మకంగా వ్యవహరించారని గుహా అభిప్రాయపడ్డారు.ఫెడ్‌ రాజకీయ ఒత్తిళ్లకు దూరంగా ఉండటం అమెరికా ఆర్థిక వ్యవస్థకు కీలకమని నిపుణులు చెబుతున్నారు. వడ్డీ రేట్లపై నిర్ణయాలు అధ్యక్షుడి రాజకీయ ప్రయోజనాలను దృష్టిలో పెట్టుకుని కాకుండా.. ద్రవ్యోల్బణం, ఉద్యోగాలు, ఆర్థిక వృద్ధి వంటి అంశాలను పరిశీలించి తీసుకోవాల్సి ఉంటుంది. ఫెడ్‌ స్వతంత్రతపై అనుమానాలు పెరిగితే మార్కెట్లలో నమ్మకం దెబ్బతినడంతో పాటు.. భవిష్యత్తులో రుణాలపై వడ్డీ రేట్లు, ఇళ్ల రుణాలు, కార్ల రుణాల ఖర్చులపై ప్రభావం పడే అవకాశం ఉంటుందని విశ్లేషకులు చెబుతున్నారు.‘మా పరిధిలో మేం ఉంటాం’అధ్యక్షుడితో తన సంబంధాలపై అడిగిన ప్రశ్నలకు వార్ష్‌ మాత్రం ఆచితూచి స్పందించారు. ఫెడరల్‌ రిజర్వ్‌ స్వతంత్రతలో భాగంగా తమ పరిధిలో తాము పనిచేస్తామని చెప్పారు. వాణిజ్య, ఆర్థిక విధానాలు చూసే వారు కూడా తమ పరిధిలో ఉండాలని వ్యాఖ్యానించారు. అయితే ట్రంప్‌తో చివరిసారిగా ఎప్పుడు మాట్లాడారనే ప్రశ్నకు మాత్రం సమాధానం ఇవ్వలేదు.వార్ష్‌ స్పందన కొంత అసాధారణంగా అనిపించిందని యాక్సెస్‌/మ్యాక్రో సంస్థకు చెందిన ఆర్థిక నిపుణుడు టిమ్‌ మహెడీ అన్నారు. అధ్యక్షుడితో మాట్లాడలేదని నేరుగా చెప్పడం సరైన సమాధానమని, ముందుగానే ట్రంప్‌తో వార్ష్‌ చర్చించి ఉంటే అది ఆశ్చర్యకరమైన విషయమవుతుందని ఆయన పేర్కొన్నారు.వార్ష్‌ నాయకత్వంపై ప్రభావం?తాజా పరిణామాలు వార్ష్‌ నాయకత్వంపైనా ప్రభావం చూపే అవకాశం ఉందని విశ్లేషకులు చెబుతున్నారు. ఒకవైపు ట్రంప్‌ కోరుకోని వడ్డీ రేట్ల పెంపునకు వార్ష్‌ అధ్యక్షత వహించారు. మరోవైపు సమావేశంలో ఆయన సహచరులందరి మద్దతును పొందారు. మాజీ ఫెడ్‌ చైర్మన్‌ జెరోమ్‌ పావెల్‌ కూడా ఈ నిర్ణయానికి మద్దతు ఇచ్చారు.అయితే భవిష్యత్తులో వార్ష్‌ నేతృత్వంలోని ఫెడ్‌ మళ్లీ వడ్డీ రేట్లు పెంచాల్సి వస్తే.. ఆ నిర్ణయం నిజంగా ఫెడ్‌ స్వతంత్రంగా తీసుకుందా? లేక అధ్యక్షుడి ప్రభావం ఏమైనా ఉందా? అనే ప్రశ్నలు తలెత్తే అవకాశం ఉంది. ప్రస్తుతం ట్రంప్‌ మాత్రం వార్ష్‌పై విమర్శలు చేయకుండా.. ఆయన మంచి వ్యక్తి అంటూ ప్రశంసించారు. అయితే ద్రవ్యోల్బణం, రుణ వ్యయాలు, షేర్‌ మార్కెట్‌, అమెరికా ప్రభుత్వ బాండ్ల వడ్డీ రేట్లు ఎలా మారతాయన్నదే ఇక ముందు వీరిద్దరి సంబంధాలపై ప్రభావం చూపే కీలక అంశాలుగా మారనున్నాయి.

తీసుకునే నిర్ణయాలన్నీ వికటిస్తున్న వైనం కనబడుతూనే ఉన్నా అమెరికా అధ్యక్షుడు డోనాల్డ్‌ ట్రంప్‌కు తత్వం బోధపడలేదు. ఉక్రెయిన్‌పై రష్యా సాగిస్తున్న యుద్ధాన్ని నిలువరించే పేరిట ఆ దేశంపై మరిన్ని ఆంక్షలు విధించటానికీ... దాన్నుంచి ముడి చమురు, గ్యాస్‌ కొనుగోలు చేస్తూ ఆర్థికంగా తోడ్పడుతున్న భారత్, చైనాలపై వంద శాతం సుంకాలు విధించటానికీ అనుమతించే బిల్లును ఆయన ప్రభుత్వం ప్రతినిధుల సభలో ఆమోదింపజేసుకుంది. గత నెల ఇదే బిల్లుకు సెనేట్‌ ఓకే చెప్పింది. తాజా ఆమోదంతో ఈ ఆంక్షల బిల్లుకు అమెరికన్‌ కాంగ్రెస్‌ అంగీకారం తెలిపినట్టయింది. దీనిపై ట్రంప్‌ సంతకం చేశాక చట్టంగా మారుతుంది. ఆ అధికారాన్ని ట్రంప్‌ వినియోగిస్తారా లేదా అన్నది చూడాల్సివుంది. రెండోసారి అధికారంలోకొచ్చాక రష్యాపై ట్రంప్‌ విధించ దల్చుకున్న ఈ ఆంక్షలు అత్యంత కీలకమైనవి. ఈసారి ఆంక్షలన్నీ రష్యా ఇంధన, రక్షణ రంగాలే లక్ష్యంగా రూపొందించారు. తన అభీష్టానికి విరుద్ధంగా ఇరుగు పొరుగు దేశాలు నిర్ణయాలు తీసుకుంటే వాటితో ద్వైపాక్షిక వాణిజ్యంతోసహా వివిధ బంధాలన్నిటినీ తెంచుకోవటం ఏ ప్రభుత్వమైనా చేసే పని. కానీ ‘తన చావు జగత్ప్రళయమ’న్న రీతిలో ఆ పనే అందరూ చేసితీరాలనే డిమాండ్‌ మూర్ఖత్వం. అంతర్జాతీయంగా 80 ఏళ్ల క్రితం కుదిరిన ఒడంబడిక ప్రకారం దురాక్రమణ యుద్ధాలకు పాల్పడే దేశంపై ఎలాంటి చర్యలు అవసరమో ఐక్యరాజ్యసమితి, భద్రతామండలి నిర్ణయిస్తాయి. రష్యా తప్పు చేస్తున్నదని అమెరికా భావిస్తే ఆ వేదికలద్వారా ఒత్తిళ్లు తీసుకురావాలి. అలా చేయలేననుకుంటే తనవరకూ ఇష్టానుసారం చేసుకోవచ్చు. అసలు ట్రంప్‌ అత్యుత్సాహంతో అమలు చేస్తున్న సుంకాల విధానంపై అమెరికాలోనే ఏకాభిప్రాయం లేదు. రష్యాపై కఠిన చర్యల్ని సమర్థిస్తున్న డెమోక్రాట్లు సైతం ట్రంప్‌కు అతిగా అధికారాలు కట్టబెట్టడాన్ని ప్రశ్నిస్తున్నారు. ఇలా ఏకపక్ష అధికారాలు అప్పగిస్తే దేశ ప్రయోజనాలకు విఘాతం కలుగుతుందని హెచ్చరిస్తున్నారు.మన దేశం గతంకన్నా దృఢంగా వ్యవహరించటం హర్షించదగ్గది. ప్రస్తుత విధానాన్ని విడనాడబోమనీ, మార్కెట్‌ చలనాలను నిర్దేశించే ధరవరలు, సరఫరా, డిమాండ్‌ వంటి అంశాలను పరిగణనలోకి తీసుకుని భిన్న మార్గాల్లో చమురు కొనుగోలు చేయడం కొనసాగిస్తామనీ స్పష్టంచేసింది. వంద శాతం సుంకాలపై అమెరికా చర్యకు దిగితే ద్వైపాక్షిక సంబంధాలపై వాటి ప్రభావం పడుతుందని ఇప్పటికే అమెరికాకు తెలియ జేశామని తెలిపింది. అసలు ఈ తీర్మానం చేసే నైతిక హక్కు అమెరికన్‌ కాంగ్రెస్‌కు ఉందా? ఈ ఆంక్షలు ఒక్కరోజు ఆలస్యమైనా ఉక్రెయిన్‌లో మరింతమంది ప్రజలు మృత్యువుకు బలి అవుతారని తీర్మానం చెప్పడం వంచన. ఈ సూత్రం తనకు వర్తించదా? ఇరాన్‌పై ఇజ్రాయెల్‌ సాగించిన దురాగతాలను నిలువరించకపోగా, తానూ అందులో పాలుపంచుకుని దేశాధినేతతోసహా అనేకమంది పౌర, సైనిక ముఖ్యుల్ని హతమార్చటం... ఇప్పటికీ పౌర ప్రాంతాలపై బాంబులేస్తూ పదులకొద్దీ మందిని నిత్యం హతమార్చటాన్ని కాంగ్రెస్‌ ఎలా చూస్తుంది? తీర్మానం చేసేముందు తమ పాలకుడి నిర్వాక మేమిటన్న స్పృహ ఉండొద్దా? తాము అధర్మయుద్ధం కొనసాగిస్తూ ధర్మపన్నాలు వల్లించటం, వేరొకరిని వేలెత్తిచూపటం, అందరూ తననే అనుసరించాలనటం ఏం సబబు?వచ్చేవారం చైనా అధ్యక్షుడు షీ జిన్‌పింగ్‌ అమెరికా సందర్శనకు రాబోతున్నారు. ఇరు దేశాలమధ్యా శిఖరాగ్ర సమావేశం జరగబోతోంది. ఇలాంటి సమయంలో ఆంక్షల తీర్మానం తీసుకురావటం, బెదిరింపులకు దిగటం తెలివిమాలిన చర్యగా అమెరికా గుర్తించకపోవటం ఆశ్చర్యకరం. ఇప్పటికే ఏఐ విషయంలో సమష్టిగా కదలాలన్న అమెరికా ప్రతిపాదనను చైనా తోసిపుచ్చింది. ఆ విషయంలో ఇరు దేశాలమధ్యా భిన్నాభిప్రాయాలున్నాయని బయటపడింది. ఈ నేపథ్యంలో మరో వివాదాన్ని రగల్చటం వల్ల ఒరిగేదేమిటి? తన పెత్తందారీ పోకడలతో విసిగిన ప్రపంచం ఇప్పటికే దూరం జరిగిందని అమెరికా గ్రహించటం లేదు. ఉక్రెయిన్‌పై రష్యా విరుచుకుపడటంలో తెరవెనక తాను నడిపించిన ఎత్తుగడలే కారణమని గుర్తులేదా? అంతర్జాతీయ వేదికల ప్రమేయం లేకుండా ప్రపంచ దేశాలపై ఒత్తిడి తేవటం చట్టవిరుద్ధమని అమెరికా తెలుసుకోవాలి.

రష్యా నుంచి చమురు కొనుగోలు చేస్తున్న దేశాలపై భారీ సుంకాలు విధించేలా అమెరికా కాంగ్రెస్‌ ఆమోదించిన బిల్లుపై భారత్‌ స్పందించింది. తమ వాణిజ్య, ఆర్థిక ప్రయోజనాలను కాపాడుకునేందుకు అవసరమైన చర్యలు తీసుకుంటామని స్పష్టం చేసింది. ఇదే సమయంలో దేశ ఇంధన అవసరాలు, జాతీయ ప్రయోజనాలే తమ చమురు కొనుగోళ్లకు ప్రాతిపదిక అని మరోసారి తేల్చిచెప్పింది.అమెరికా ప్రతినిధుల సభ బుధవారం ‘లిండ్సే ఓ. గ్రాహం శాంక్షనింగ్‌ రష్యా అండ్‌ ఇరాన్‌ యాక్ట్‌ 2026’కు 262–159 ఓట్లతో ఆమోదం తెలిపింది. ఈ బిల్లు ద్వారా రష్యా నుంచి పెద్ద మొత్తంలో చమురు, సహజవాయువు కొనుగోలు చేసే దేశాలపై గరిష్టంగా 100 శాతం వరకు టారిఫ్‌లు విధించే అధికారాన్ని అమెరికా అధ్యక్షుడు డొనాల్డ్‌ ట్రంప్‌కు కల్పించారు. భారత్‌, చైనా వంటి దేశాలు దీని పరిధిలోకి వచ్చే అవకాశం ఉంది. దీంతో ఆయన నిర్ణయంపై ఉత్కంఠ నెలకొంది.భారత్‌ స్పందన.. బిల్లు ఆమోదం నేపథ్యంలో.. భారత విదేశాంగ శాఖ గురువారం స్పందించింది. తన వాణిజ్య, ఆర్థిక ప్రయోజనాలను పరిరక్షించుకునే విషయంలో స్పష్టమైన వైఖరితో ఉన్నట్లు తెలిపింది. రష్యా నుంచి ఇంధనాన్ని కొనుగోలు చేయడంపై భారత్‌ ఇప్పటికే తన విధానాన్ని పలుమార్లు వివరించిందని గుర్తు చేస్తోంది. దేశంలోని 140 కోట్లకుపైగా ప్రజల ఇంధన అవసరాలను తీర్చేందుకు వివిధ దేశాల నుంచి చమురు దిగుమతులు చేసుకుంటున్నామని పేర్కొంది. రష్యా చమురు కొనుగోళ్ల విషయంలో అమెరికా ఒత్తిడి కొనసాగుతున్న నేపథ్యంలో.. భారత్‌ తన ఇంధన భద్రత, జాతీయ ప్రయోజనాలను ప్రధానంగా పరిగణనలోకి తీసుకుంటున్నట్లు స్పష్టం చేస్తోంది. అదే సమయంలో.. అమెరికా ప్రతినిధులతో గత కొన్ని నెలలుగా ఉన్నతస్థాయిలో ఈ అంశంపై చర్చలు జరుగుతున్నాయని విదేశాంగ శాఖ అంటోంది. ఈ బిల్లు వల్ల భారత్‌–అమెరికా ద్వైపాక్షిక సంబంధాలతో పాటు అంతర్జాతీయ ఇంధన మార్కెట్‌పై పడే ప్రభావాలను కూడా భారత ప్రభుత్వం ఇప్పటికే అమెరికా వర్గాలకు స్పష్టంగా వివరించిందని పేర్కొంది. అమెరికా చర్య వల్ల ఎదురయ్యే పరిణామాలను ఎదుర్కొనేందుకు వాణిజ్య, పారిశ్రామిక సంస్థలతో కలిసి పనిచేస్తామని తెలిపింది.ట్రంప్‌ డెస్క్‌ మీద.. అమెరికా ప్రతినిధుల సభలో రష్యా ఆంక్షల బిల్లు ఆమోదం పొందింది. అయితే అంత మాత్రాన భారత్‌పై వెంటనే 100 శాతం టారిఫ్‌ అమల్లోకి వచ్చినట్లు కాదు. ఈ బిల్లు ఇప్పుడు అధ్యక్షుడు ట్రంప్‌ ఆమోదానికి వెళ్లనుంది. సంబంధిత చట్టానికి సంబంధించిన ఫైల్‌.. ట్రంప్‌ డెస్క్‌ వద్దకు వెళ్లినట్లు వైట్‌హౌజ్‌ వర్గాలు ధృవీకరించాయి. అయితే ఏ దేశంపై, ఎంత టారిఫ్‌ విధించాలి అనే అధికారం ఇప్పుడు అధ్యక్షుడి నిర్ణయంపై ఆధారపడి ఉంది. రష్యా ఆంక్షల బిల్లులో.. రష్యా చమురు, గ్యాస్‌ కొనుగోళ్లపై ఆంక్షలతో పాటు రష్యా ‘షాడో ఫ్లీట్‌’, ఆ దేశ నాయకత్వం(పుతిన్‌ సహా అక్కడి పలువురు అగ్రనేతలు), ఆర్థిక సంస్థలు, ఇంధన రంగంపైనా బిల్లు కఠిన చర్యలను ప్రతిపాదిస్తోంది. ఉక్రెయిన్‌ యుద్ధానికి రష్యాకు లభిస్తున్న ఇంధన ఆదాయాన్ని పరిమితం చేయడమే అమెరికా చర్యల ప్రధాన ఉద్దేశంగా పేర్కొంటోంది. ఇక భారత్‌పై ఈ చట్టం ఎలా అమలవుతుంది? టారిఫ్‌ విధిస్తే ఎంత మేరకు ఉంటుంది? రష్యా నుంచి భారత్‌ చమురు కొనుగోళ్లపై దాని ప్రభావం ఏ స్థాయిలో ఉంటుంది? అనే అంశాలు ట్రంప్‌ తదుపరి నిర్ణయంపై ఆధారపడి ఉంటాయి. ప్రస్తుతానికైతే భారత్‌ మాత్రం తన ఇంధన భద్రత, వాణిజ్య ప్రయోజనాల పరిరక్షణకే ప్రాధాన్యం ఇస్తున్నట్లు స్పష్టం చేసింది.అమెరికా రిపబ్లికన్‌ సెనేటర్‌ లిండ్సే గ్రాహం.. 2026 జూలైలో ఉక్రెయిన్‌ పర్యటన ముగించుకుని అమెరికాకు తిరిగొచ్చిన మరుసటి రోజే మరణించారు. రష్యాపై కఠిన ఆంక్షలకు ఉద్దేశించిన ఈ బిల్లును ఆయనే ముందుకు తీసుకెళ్లడంతో.. ఆయన గౌరవార్థం ఈ బిల్లుకు ట్రంప్‌ ‘లిండ్సే ఓ. గ్రాహం’ పేరు పెట్టారు.ఇదీ చదవండి: ట్రంప్‌ రష్యా బిల్లు.. భారత్‌, చైనాపైనే ఎందుకు?

రష్యా–ఉక్రెయిన్‌ యుద్ధం నేపథ్యంలో మాస్కోపై ఆర్థిక ఒత్తిడి పెంచేందుకు అమెరికా కీలక నిర్ణయం తీసుకుంది. రష్యాపై కఠిన ఆంక్షలు విధించే బిల్లుకు అమెరికా ప్రతినిధుల సభ ఆమోదం తెలిపింది. ఈ బిల్లులో రష్యా చమురు, గ్యాస్‌ను కొనుగోలు చేసే దేశాలపై భారీ టారిఫ్‌లు విధించే అధికారం అమెరికా అధ్యక్షుడు డొనాల్డ్‌ ట్రంప్‌కు కల్పించారు. ఇందులో భాగంగా 100 శాతం వరకు టారిఫ్‌లు విధించే అవకాశం ఉండటం భారత్‌, చైనాలకు ఆందోళన కలిగించే అంశంగా మారింది.ప్రతినిధుల సభలో రష్యా ఆంక్షల బిల్లుకు అనుకూలంగా 262 ఓట్లు, వ్యతిరేకంగా 159 ఓట్లు వచ్చాయి. ఇప్పటికే గత నెలలో సెనెట్‌ 86–11 ఓట్లతో ఈ బిల్లును ఆమోదించింది. దీంతో ఇప్పుడు బిల్లు ట్రంప్‌ వద్దకు వెళ్లనుంది. తాను బిల్లుపై సంతకం చేస్తానని ట్రంప్‌ ఇప్పటికే ప్రకటించారు.రష్యాపై మరింత ఒత్తిడి‘లిండ్సే ఓ. గ్రాహం శాంక్షనింగ్‌ రష్యా అండ్‌ ఇరాన్‌ యాక్ట్‌–2026’గా పిలుస్తున్న ఈ చట్టం రష్యా ఇంధన, రక్షణ రంగాలపై కఠిన ఆంక్షలకు మార్గం సుగమం చేయనుంది. రష్యా అధ్యక్షుడు వ్లాదిమిర్‌ పుతిన్‌, ఇతర కీలక అధికారులపైనా ఆంక్షలు విధించే అవకాశం ఉంటుంది. పాశ్చాత్య దేశాల ఆంక్షలను తప్పించుకునేందుకు రష్యా ఉపయోగిస్తోందని ఆరోపణలు ఎదుర్కొంటున్న ‘షాడో ఫ్లీట్‌’ ట్యాంకర్లపైనా చర్యలు తీసుకునే వీలు కల్పిస్తోంది. ఇరాన్‌కు సంబంధించిన అదనపు ఆంక్షలకు కూడా బిల్లులో అవకాశం ఉంది.అంతేకాకుండా రష్యాతో వ్యాపారం కొనసాగించే ఇతర దేశాలపై కూడా చర్యలకు ఈ చట్టం వీలు కల్పిస్తుంది. ముఖ్యంగా రష్యా చమురు, గ్యాస్‌ను కొనుగోలు చేసే దేశాల నుంచి అమెరికాకు వచ్చే దిగుమతులపై 100 శాతం వరకు టారిఫ్‌లు విధించే అధికారాన్ని ట్రంప్‌కు ఇస్తోంది.భారత్‌, చైనాలే ఎందుకు?ఉక్రెయిన్‌పై రష్యా యుద్ధం మొదలైన తర్వాత ప్రపంచ ఇంధన మార్కెట్‌లో భారీ మార్పులు చోటుచేసుకున్నాయి. పాశ్చాత్య దేశాల ఆంక్షల కారణంగా రష్యా చమురు తక్కువ ధరలకు విక్రయించాల్సిన పరిస్థితి ఏర్పడగా.. భారత్‌, చైనా సహా పలు దేశాలు రష్యా నుంచి భారీగా ముడిచమురు కొనుగోలు చేస్తున్నాయి. ఈ నేపథ్యంలో రష్యా నుంచి ఇంధనం కొనుగోలు చేసే ప్రధాన దేశాలపై ద్వితీయ టారిఫ్‌లు విధించే అధికారాన్ని అమెరికా ఉపయోగించవచ్చని బిల్లులో పేర్కొన్నారు. అమెరికా ప్రతినిధుల సభలో జరిగిన చర్చలో భారత్‌, చైనాలను ప్రధాన కొనుగోలుదారులుగా ప్రత్యేకంగా ప్రస్తావించారు.అయితే ఇక్కడ కీలకమైన విషయం ఏమిటంటే.. బిల్లు ఆమోదమైనంత మాత్రాన భారత్‌పై 100 శాతం టారిఫ్‌ తక్షణమే అమల్లోకి రాదు. ఏ క్షణమైనా అలాంటి టారిఫ్‌ విధించే అధికారం మాత్రమే అధ్యక్షుడికి లభిస్తుంది. కాబట్టి దాన్ని ఎప్పుడు, ఏ దేశంపై, ఎంత మేరకు అమలు చేయాలన్నది ట్రంప్‌ నిర్ణయంపై ఆధారపడి ఉంటుంది.అమెరికా మార్కెట్‌పై ప్రభావం?భారత్‌ రష్యా నుంచి భారీగా ముడిచమురు దిగుమతి చేసుకుని, దాన్ని శుద్ధి చేసి దేశీయ అవసరాలకు వినియోగించడంతోపాటు కొన్ని ఉత్పత్తులను ఎగుమతి కూడా చేస్తోంది. ఈ నేపథ్యంలో రష్యా ఇంధన కొనుగోళ్లను కొనసాగిస్తే భారత ఉత్పత్తులపై అమెరికా అదనపు టారిఫ్‌లు విధించే అవకాశం ఉండటం వాణిజ్య రంగంలో కొత్త అనిశ్చితికి దారితీస్తోంది. అయితే ఇప్పటివరకు భారత్‌పై కొత్త 100 శాతం టారిఫ్‌ విధించినట్లు అమెరికా ప్రకటించలేదు.ట్రంప్‌కు అధికారం ఇవ్వడంపై అభ్యంతరాలుబిల్లుకు కాంగ్రెస్‌లో విస్తృత మద్దతు లభించినప్పటికీ.. ట్రంప్‌కు ఇంత విస్తృతమైన టారిఫ్‌ అధికారాలు ఇవ్వడంపై డెమొక్రాట్లు అభ్యంతరం వ్యక్తం చేశారు. హౌస్‌ ఫారిన్‌ అఫైర్స్‌ కమిటీలో డెమొక్రాట్ల తరఫున సీనియర్‌ సభ్యుడైన గ్రెగరీ మీక్స్‌ ఈ బిల్లును తీవ్రంగా విమర్శించారు. రష్యాపై ఆంక్షలకు తాము మద్దతు ఇస్తున్నప్పటికీ.. రష్యాతో వ్యాపారం చేసే దేశాలపై టారిఫ్‌లు విధించే అధికారాన్ని ట్రంప్‌కు విస్తృతంగా ఇవ్వడాన్ని వ్యతిరేకిస్తున్నట్లు డెమొక్రాట్లు తెలిపారు. ఇక సెకండరీ టారిఫ్‌లకు సంబంధించిన నిబంధనలను తొలగించే ప్రయత్నం చేసినా అది విఫలమైంది.ట్రంప్‌ నిర్ణయంపైనే ఉత్కంఠరష్యాపై ఒత్తిడి పెంచి ఉక్రెయిన్‌ యుద్ధానికి ముగింపు పలికేలా పుతిన్‌ను చర్చల వైపు తీసుకురావడమే ఈ చర్యల లక్ష్యమని బిల్లు మద్దతుదారులు చెబుతున్నారు. మరోవైపు ట్రంప్‌ స్వయంగా టారిఫ్‌లు, ఆంక్షలను తన విదేశాంగ విధానంలో కీలక సాధనాలుగా ఉపయోగిస్తున్నారు.ఇప్పుడు ప్రతినిధుల సభ, సెనెట్‌ ఆమోదం పొందిన బిల్లు ట్రంప్‌ సంతకానికి వెళ్లనుంది. బిల్లు చట్టంగా మారిన తర్వాత భారత్‌, చైనా వంటి రష్యా ఇంధన కొనుగోలుదారులపై ట్రంప్‌ ఈ అధికారాన్ని ఎలా ఉపయోగిస్తారన్నదే అసలు ప్రశ్న. దీంతో రష్యా నుంచి చమురు కొనుగోళ్లు, భారత్‌–అమెరికా వాణిజ్య సంబంధాలపై తదుపరి పరిణామాలు ఆసక్తికరంగా మారాయి.ఇదీ చదవండి: అక్కడ రూల్స్‌ పాటించకుంటే ఫైన్‌లు వేసేస్తారు!

అమెరికా అధ్యక్షుడు డొనాల్డ్ ట్రంప్ ప్రభుత్వం ఇజ్రాయెల్‌కు సుమారు 2,000 పౌండ్ల (907 కిలోల) బరువున్న 60 వేల భారీ బాంబులను విక్రయించేందుకు సిద్ధమవుతున్నట్లు అమెరికా మీడియా కథనాలు వెల్లడించాయి. దాదాపు 2.8 బిలియన్ డాలర్ల విలువైన ఈ ఆయుధ ప్యాకేజీకి అమెరికా పన్ను చెల్లింపుదారుల నిధులు కూడా ఉపయోగించనున్నట్లు సమాచారం. అయితే ఈ విక్రయాన్ని అమెరికా ప్రభుత్వం అధికారికంగా ధ్రువీకరించలేదు.ఈ ప్యాకేజీలో 20 వేల ఎంకే-84, 20 వేల బీఎల్‌యూ-117, 20 వేల ఐ-2000 పెనిట్రేటర్ బాంబులు ఉండనున్నట్లు సమాచారం. వీటిలో ఎంకే-84, బీఎల్‌యూ-117లు 2,000 పౌండ్ల సాధారణ బాంబులు కాగా, ఐ-2000ను బంకర్ బస్టర్‌గా పిలుస్తారు. గట్టి నిర్మాణాలను ఛేదించి లోపల పేలేలా దీన్ని రూపొందించారు.ఈ ప్రతిపాదిత విక్రయం నేపథ్యంలో అమెరికా ఆయుధ నిల్వలపై కూడా చర్చ మొదలైంది. ఇరాన్‌తో యుద్ధం కారణంగా అమెరికా ఆయుధ నిల్వలు తగ్గుతున్నాయని, సరఫరా వ్యవస్థలో కొన్ని అవరోధాలు ఏర్పడుతున్నాయని సోమవారం విడుదలైన పెంటగాన్ పర్యవేక్షణ నివేదిక పేర్కొన్నట్లు అల్జజీరా తెలిపింది. 2024లో జో బైడెన్ ప్రభుత్వం ఇజ్రాయెల్‌కు కొన్ని 2,000 పౌండ్ల బాంబుల సరఫరాను నిలిపివేసింది.అనంతరం ట్రంప్ అధ్యక్షుడిగా తిరిగి బాధ్యతలు చేపట్టిన తర్వాత ఆ నిర్ణయాన్ని రద్దు చేశారు. గతంలోనూ ఇజ్రాయెల్‌కు భారీ బాంబుల సరఫరాపై అమెరికాలో రాజకీయ నేతల నుంచి భిన్నమైన స్పందనలు వచ్చాయి. ఇక ఈ కొత్త ఆయుధ ప్యాకేజీ అధికారికంగా ఆమోదం పొందుతుందా, కాంగ్రెస్‌కు ఎప్పుడు అధికారికంగా తెలియజేస్తారు, ఇజ్రాయెల్‌కు ఆయుధాల సరఫరాపై అమెరికా విధానం ఎలా మారుతుంది? అనేది కీలకంగా మారింది.