Election News

లక్నో: 2027 ఉత్తరప్రదేశ్ అసెంబ్లీ ఎన్నికల్లో కలిసి పోటీ చేయాలని అసదుద్దీన్ ఒవైసీ నేతృత్వంలోని ఆల్ ఇండియా మజ్లిస్-ఎ-ఇత్తెహాదుల్ ముస్లిమీన్ (ఏఐఎంఐఎం), చంద్రశేఖర్ ఆజాద్ నేతృత్వంలోని ఆజాద్ సమాజ్ పార్టీ (కాన్షీరామ్) నిర్ణయించినట్లు సమాచారం. ఈ రెండు పార్టీల మధ్య పొత్తు ఖరారైనట్లు రాజకీయ వర్గాలు వెల్లడించాయి. నవంబర్ 12న లక్నోలో నిర్వహించనున్న మీడియా సమావేశంలో ఒవైసీ, చంద్రశేఖర్ ఆజాద్ అధికారికంగా ఈ కూటమిని ప్రకటించే అవకాశం ఉందని తెలుస్తోంది.కూటమిలోకి మరిన్ని పార్టీలు?ప్రతిపాదిత కూటమిని మరింత విస్తరించేందుకు ఇతర రాజకీయ నేతలు, చిన్న పార్టీలతోనూ చర్చలు జరుగుతున్నట్లు సమాచారం. నవంబర్ 12న ప్రకటన వెలువడితే యూపీలోని 403 అసెంబ్లీ స్థానాల ఎన్నికల బరిలో మరో రాజకీయ కూటమి రంగంలోకి దిగినట్లవుతుంది.ఒకే వేదికపై ఒవైసీ, ఆజాద్ఈ కూటమి ద్వారా ఏఐఎంఐఎం అధ్యక్షుడు అసదుద్దీన్ ఒవైసీ, భీమ్ ఆర్మీ చీఫ్ చంద్రశేఖర్ ఆజాద్ ఒకే వేదికపైకి రానున్నారు. ఆజాద్ సమాజ్ పార్టీ (కాన్షీరామ్) అధ్యక్షుడిగా ఉన్న చంద్రశేఖర్ ఆజాద్ ప్రస్తుతం నాగినా లోక్‌సభ నియోజకవర్గానికి ప్రాతినిధ్యం వహిస్తున్నారు. అయితే ఈ రెండు పార్టీల నుంచి ఇప్పటివరకు అధికారిక ప్రకటన వెలువడలేదు. రాజకీయ వర్గాల సమాచారం ప్రకారం.. ఇప్పటికే పొత్తుపై అవగాహన కుదిరింది.బీజేపీని అడ్డుకోవడమే లక్ష్యమా?ఉత్తరప్రదేశ్‌లో ఏఐఎంఐఎం తన రాజకీయ కార్యకలాపాలను ముమ్మరం చేసింది. ఒవైసీ ఇప్పటికే రాష్ట్రంలోని పలు ప్రాంతాల్లో బహిరంగ సభల్లో పాల్గొన్నారు. ఎన్నికలకు ముందే ప్రతిపక్ష పార్టీలతో పొత్తు పెట్టుకోవాలని ప్రయత్నిస్తున్నారు. బీజేపీ తిరిగి అధికారంలోకి రాకుండా అడ్డుకోవాలనుకునే పార్టీలతో కలిసి పనిచేయడానికి సిద్ధంగా ఉన్నట్లు గతంలో ఒవైసీ ప్రకటించారు.ఇప్పటికే అభ్యర్థుల ప్రకటన2027 ఎన్నికల కోసం ఏఐఎంఐఎం ఇప్పటికే మూడు నియోజకవర్గాల్లో అభ్యర్థులను ప్రకటించింది. రాష్ట్రంలో గణనీయమైన సంఖ్యలో స్థానాల్లో పోటీ చేయాలని పార్టీ నాయకత్వం భావిస్తోంది. ఈ నేపథ్యంలో చంద్రశేఖర్ ఆజాద్ పార్టీతో కుదిరినట్లు చెబుతున్న అవగాహన ఒప్పందం ఏఐఎంఐఎం ఎన్నికల వ్యూహంలో కీలకంగా మారే అవకాశం ఉంది.రాజకీయ వర్గాల దృష్టిలక్నోలో జరగనున్న మీడియా సమావేశంలో కూటమిపై స్పష్టత వచ్చే అవకాశం ఉంది. అంతేకాకుండా మరిన్ని పార్టీలు ఇందులో చేరతాయా? సీట్ల పంపకంపై ఎలాంటి నిర్ణయం తీసుకుంటారు? అనే అంశాలపై ఆసక్తి నెలకొంది.ఇదీ చదవండి: ‘రామాయణం’ చూసొచ్చి.. జటాయు సెంటర్‌కు పరుగులు!

న్యూఢిల్లీ: 2027 నూతన సంవత్సరం ఆరంభంలోనే దేశంలో ఎన్నికల సందడి మొదలయ్యే అవకాశాలు కనిపిస్తున్నాయి. 2027 జనవరి మొదటి వారంలోనే ఐదు రాష్ట్రాల అసెంబ్లీ ఎన్నికలు నిర్వహించే అవకాశం ఉందనే చర్చ రాజకీయ వర్గాల్లో ఆసక్తి రేపుతోంది. ఉత్తరప్రదేశ్, పంజాబ్, ఉత్తరాఖండ్, గోవా, మణిపూర్ రాష్ట్రాల్లో ఎన్నికలు జరగవచ్చనే అంచనాలు వెలువడుతున్నాయి. అయితే దీనిపై కేంద్ర ఎన్నికల సంఘం ఇప్పటివరకు ఎలాంటి అధికారిక ప్రకటన చేయలేదు.ఎన్నికలను ముందుగానే నిర్వహించాల్సిన పరిస్థితులు కనిపిస్తున్నాయని విశ్లేషణలు చెబుతున్నాయి. సీబీఎస్ఈ బోర్డు పరీక్షలు 2027 ఫిబ్రవరి 16 నుంచి ఏప్రిల్ 9 వరకు జరగనున్నాయి. ఈ సమయంలో ఎన్నికలు నిర్వహించడం ఇబ్బందికరంగా మారే అవకాశముంది. మరోవైపు మణిపూర్, గోవా, పంజాబ్ రాష్ట్రాల అసెంబ్లీల గడువు మార్చిలోనే ముగియనుంది. ఉత్తరాఖండ్ అసెంబ్లీ గడువు మార్చి 28తో ముగుస్తుంది. ఉత్తరప్రదేశ్ అసెంబ్లీ గడువు మే 22 వరకు ఉంది.చలి కాలంలో ఎన్నికల సవాలు!జనవరి మొదటి వారంలో ఎన్నికలు నిర్వహించాలంటే పలు సవాళ్లను ఎదుర్కోవాల్సి ఉంటుంది. ఉత్తర భారతంలో ఆ సమయంలో తీవ్రమైన చలి, దట్టమైన పొగమంచు ఉంటుంది. దీంతో ఓటర్లు ఉదయాన్నే పోలింగ్ కేంద్రాలకు చేరుకోవడం, రాజకీయ పార్టీలు ప్రచారం నిర్వహించడం కష్టంగా మారవచ్చు. దీనికితోడు ఫిబ్రవరి 5 నుంచి 27 వరకు యూపీ బోర్డు పరీక్షలు కూడా ఉన్నాయి. ఈ పరిస్థితులన్నింటినీ పరిగణనలోకి తీసుకుంటే ఎన్నికల షెడ్యూల్ ఎప్పుడు విడుదలవుతుందనే అంశంపై ఆసక్తి నెలకొంది. అయితే జనవరి తొలి వారంలోనే ఎన్నికలు జరుగుతాయన్నది ప్రస్తుతానికి ప్రచారం అవుతున్న ఒక అంచనా. ఇదీ చదవండి: గాడిదల సంతలో అమ్మకానికి బాలీవుడ్ స్టార్స్‌

జరూసలేం: ఇజ్రాయెల్‌లో ఎన్నికల ఫలితాలు రాజకీయ అనిశ్చితిని సృష్టించాయి. యూనివర్సిటీ ఆఫ్ ఎక్సెటర్‌కు చెందిన పాలస్తీనా అధ్యయనాల కేంద్రం డైరెక్టర్ ఇలాన్ పప్పే ప్రస్తుత పరిస్థితులపై విశ్లేషించారు. ప్రతిపక్ష నేత గాడి ఐసెన్‌కాట్‌కు ప్రభుత్వం ఏర్పాటు చేసే బాధ్యత అప్పగించినప్పటికీ, పాలస్తీనా పార్టీల మద్దతు తీసుకునే విషయంలో ఆయన కూటమిలో ఏకాభిప్రాయం లేదని పప్పే పేర్కొన్నారు. హరేది వర్గానికి సైనిక సేవ నుంచి మినహాయింపు ఇవ్వడం, ఐక్య ప్రభుత్వ ఏర్పాటు వంటి ప్రత్యామ్నాయాలున్నాయని వివరించారు.ఏ కూటమికీ మెజారిటీ రాకపోతే ఆరు నెలల్లో మరోసారి ఎన్నికలు జరిగే అవకాశముందని అ‍న్నారు. అప్పటివరకు నెతన్యాహు ప్రభుత్వం కొనసాగుతుందని తెలిపారు. తదుపరి ప్రభుత్వం కూడా గాజా, వెస్ట్‌బ్యాంక్ విషయంలో ప్రస్తుత విధానాలనే కొనసాగించే ప్రమాదముందని పప్పే అభిప్రాయపడ్డారు. ఇజ్రాయెల్ సమాజంలో రాజకీయ విభేదాలు మరింత పెరగడంతో పాటు అంతర్జాతీయంగా ఆ దేశంపై విమర్శలు పెరిగే అవకాశముందని పేర్కొన్నారు.పాలస్తీనా ప్రజలకు రాజకీయ వ్యవస్థలో సముచిత స్థానం కల్పించకపోతే పరిస్థితులు మరింత సంక్లిష్టమవుతాయని విశ్లేషించారు. కాగా అక్టోబర్ 27న జరిగిన ఎన్నికల్లో ప్రధాని బెంజమిన్ నెతన్యాహు నేతృత్వంలోని కూటమికి 120 మంది సభ్యులున్న పార్లమెంట్‌లో 53 స్థానాలే దక్కాయి. ఆయన వ్యతిరేక కూటమికి 67 స్థానాలు వచ్చాయి. అయితే ప్రభుత్వ ఏర్పాటుకు 61 మంది సభ్యుల మద్దతు అవసరం.ఇదీ చదవండి: ‘ఇక నిర్వీర్యమే..’ ఇరాన్‌కు ట్రంప్‌ వార్నింగ్‌!

రైల్వే కోడూరు: రైల్వే కోడూరులో పెట్రోల్‌ బాంబులతో టీడీపీ గూండాలు చెలరేగిపోతున్నారు. పోలీసుల సమక్షంలోనే వారు తమ ప్రతాపం చూపిస్తున్నారు. పెనగలూరు మండలంల నల్లపురెడ్డి పల్లిలో టీడీపీ గూండాలు రెచ్చిపోతున్నారు. ఈ దాడుల్లో వైఎస్‌ఆర్సీపీ కార్యకర్తకు గాయాలయ్యాయి. చంద్రబాబు నియోజకవర్గం కుప్పంలో టీడీపీ గూండాలు బీభత్సం సృష్టిస్తున్నారు. పోలింగ్‌ బూత్‌లకు కబ్జా చేసి, దౌర్జన్యాలకు దిగుతున్నారు.

పులివెందుల: వైఎస్ఆర్ జిల్లా పులివెందులలో జరుగుతున్న ఎన్నికల్లో టీడీపీ నేతల గూండాగిరి కొనసాగుతోంది. వీరికి పోలీసులు కొమ్ముకాస్తున్నారు. లింగాల మండలం పార్న పల్లి వద్ద ఎంపీ అవినాష్ రెడ్డిని పోలీసులు అడ్డుకున్నారు. అలాగే వైఎస్‌ఆర్సీపీ ఏజెంట్లను టీడీపీ గుండాలు అడ్డుకుంటున్నారు. దీనికితోడు ఏజెంట్ల పత్రాలను చించేస్తున్నా, పోలీసులు చోద్యం చూస్తున్నారు. టీడీపీ నేతలు బయటి వ్యక్తులను భారీగా మోహరించినప్పటికీ పోలీసులు పట్టించుకోవడం లేదు. కడప జిల్లా పెద్దముడియం మండలం జై. కొట్టాలపల్లిలో ఎంపీపీ స్కూల్‌లో పోలింగ్ కేంద్రం చుట్టూ టీడీపీ నేతలు మోహరించారు. ఓటు హక్కు వినియోగించుకునేందుకు వచ్చిన ఓటర్లు వెనక్కి పంపుతున్నారు. అలాగే వైఎస్‌ఆర్సీపీ ఏజెంట్స్ బయటకు పంపివేసిస్తూ, పచ్చ మూకలు వారిపై దాడికి యత్నిస్తున్నాయ. తమ ఓటు హక్కు వినియోగించుకోకుండా అడ్డుకోవడంపై ఓటర్లు ఆగ్రహం వ్యక్తం చేస్తున్నారు. బయట ఊరి నుంచి వచ్చిన టిడిపి గుండాలు ఓటర్లను అడ్డుకుంటున పరిస్థితి ఏర్పడింది. ఇంత జరుగుతున్నా పోలీసులు తమకేమీ పట్టనట్లు చోద్యం చూస్తున్నారు. అధికారాన్ని అడ్డంపెట్టుకొని పోలీసులు సమక్షంలో కూటమి నేతలు ఓట్లు వేసుకుంటున్నారు. పల్నాడు జిల్లా గురజాల మండలంలో పల్లెగుంట, గంగవరం, పులిపాడు, దైద ,తేలుకుట్ల, గొట్టిముక్కల,సమాధానం పేట కొత్త అంబాపురం, గోగులపాడు,బోదవాడ, గ్రామాలలో వైఎస్ఆర్సీపీ ఏజెంట్లను పోలీసులు, తెలుగుదేశం నేతలు బయటకు పంపించేస్తున్నారు. గ్రామాల్లోని వైఎస్ఆర్సీపీ కీలక నేతలను అదుపులోనికి తీసుకుని పోలీస్ స్టేషన్లో అక్రమంగా గురజాల సీఐ మురళి నిర్బంధిస్తున్నారు.

జార్జియా: అమెరికా మధ్యంతర ఎన్నికల్లో డెమోక్రటిక్ పార్టీకి కీలక విజయం లభించింది. జార్జియా రాష్ట్రం నుంచి డెమోక్రటిక్ సెనేటర్ జాన్ ఒస్సాఫ్ (39) మరోసారి ఎన్నికయ్యారు. రిపబ్లికన్ అభ్యర్థి మైక్ కాలిన్స్‌పై విజయం సాధించి రెండోసారి సెనేట్‌లో అడుగుపెట్టనున్నారు. 2026 మధ్యంతర ఎన్నికల ప్రచారం ప్రారంభమైనప్పటి నుంచి ఒస్సాఫ్ రిపబ్లికన్లకు ప్రధాన లక్ష్యంగా నిలిచారు. 2024 అధ్యక్ష ఎన్నికల్లో డొనాల్డ్ ట్రంప్‌కు మద్దతు లభించిన జార్జియాలో డెమోక్రటిక్ పార్టీ తరఫున తిరిగి ఎన్నికల బరిలో నిలిచిన ఏకైక సెనేటర్ ఆయనే. అయినప్పటికీ ట్రంప్ విధానాలను తీవ్రంగా విమర్శిస్తూ ప్రచారం నిర్వహించారు.ఈ ఎన్నికల్లో ఒస్సాఫ్‌కు భారీగా విరాళాలు అందాయి. ఆయన ప్రచారానికి ఏకంగా 100 మిలియన్ డాలర్లకు పైగా నిధులు సమకూరాయి. ట్రంప్ పాలన, రాజకీయ అవినీతి, ఆర్థిక విధానాలపై విమర్శలు చేస్తూ ఓటర్లను ఆకట్టుకున్నారు. దీంతో 2028 అధ్యక్ష ఎన్నికల్లో ఆయన పోటీ చేసే అవకాశాలపై కూడా చర్చ మొదలైంది. మరోవైపు రిపబ్లికన్ అభ్యర్థి మైక్ కాలిన్స్‌కు ట్రంప్ మద్దతు ప్రకటించారు. అయితే ఆయన ప్రచారం ఆశించిన స్థాయిలో సాగలేదు. నిధుల సమీకరణలో ఇబ్బందులు ఎదుర్కోవడంతోపాటు జాత్యహంకార ఆరోపణలు, గతంలో సోషల్ మీడియాలో చేసిన వ్యాఖ్యలు, ప్రతినిధుల సభలో పెండింగ్‌లో ఉన్న నైతిక విచారణ కూడా ఆయనకు ప్రతికూలంగా మారాయి.కాలిన్స్‌పై ఒస్సాఫ్ తీవ్ర విమర్శలు చేశారు. ట్రంప్ ఏం చెబితే కాలిన్స్ అదే చేస్తారని, సొంతంగా ఆలోచించే సామర్థ్యం లేదని ఆరోపించారు. దీనికి ప్రతిగా ఒస్సాఫ్ విధానాలు అతివాదంగా ఉన్నాయని, ఆయన ఓటింగ్ విధానంపై ప్రజలకు సమాధానం చెప్పాలని కాలిన్స్ విమర్శించారు. 2020లో తొలిసారి ఒస్సాఫ్ సెనేటర్‌గా ఎన్నికయ్యారు. అదే సమయంలో డెమోక్రటిక్ నేత రాఫెల్ వార్నాక్ కూడా విజయం సాధించారు. జార్జియా నుంచి తొలి యూదు సెనేటర్‌గా ఒస్సాఫ్, తొలి నల్లజాతి సెనేటర్‌గా వార్నాక్ చరిత్ర సృష్టించారు. తాజా విజయంతో ఒస్సాఫ్ మరోసారి తన రాజకీయ బలాన్ని నిరూపించుకున్నారు. అమెరికా అధ్యక్షుడు ట్రంప్ విధానాలను వ్యతిరేకిస్తున్న డెమోక్రాట్లకు ఈ విజయం కీలకంగా మారింది.ఇదీ చదవండి: ‘మధ్యంతరం’లో ట్రంప్‌కు షాక్‌.. డెమోక్రాట్ల జోరు!

జరూసలేం: ఇజ్రాయెల్‌లో ఎన్నికల అనంతరం ప్రభుత్వ ఏర్పాటుపై ఉత్కంఠ కొనసాగుతోంది. ప్రధానమంత్రి బెంజమిన్ నెతన్యాహును అధికారానికి దూరం చేసేందుకు ప్రతిపక్ష కూటమి ప్రయత్నాలు ముమ్మరం చేసింది. ఈ క్రమంలో యషార్ పార్టీ నేత గడి ఐసెన్‌కాట్ కీలక ప్రకటన చేశారు. కొత్తగా ఎన్నికైన పార్లమెంటు (కెన్నెసెట్)లో ప్రతిపక్షానికి ఉన్న మెజారిటీని వెంటనే వినియోగించుకుంటామని వెల్లడించారు. అక్టోబర్ 7 నాటి ప్రభుత్వానికి వ్యతిరేకంగా ఇజ్రాయెల్ ప్రజలు స్పష్టమైన తీర్పు ఇచ్చారని పేర్కొన్నారు.ఇటీవల జరిగిన ఎన్నికల్లో నెతన్యాహు వ్యతిరేక పార్టీలకు మొత్తం 67 స్థానాలు లభించాయి. అయితే, నెతన్యాహును వ్యతిరేకించే జియోనిస్ట్ పార్టీలకు 48 సీట్లు మాత్రమే వచ్చాయి. మరోవైపు రెండు ప్రధాన అరబ్ పార్టీలు రామ్, జాయింట్ లిస్ట్‌కు కలిపి 19 స్థానాలు దక్కాయి. ఈ రెండు పార్టీల మద్దతు ఐసెన్‌కాట్ నేతృత్వంలోని ప్రతిపక్ష కూటమికి కీలకంగా మారింది. నెతన్యాహు నేతృత్వంలోని ప్రస్తుత కూటమికి 53 స్థానాలే రావడంతో ప్రభుత్వ ఏర్పాటుకు అవసరమైన మెజారిటీ లభించలేదు. మొత్తం 120 స్థానాలున్న కెన్నెసెట్‌లో ప్రభుత్వ ఏర్పాటుకు కనీసం 61 మంది సభ్యుల మద్దతు అవసరం.ప్రభుత్వ మార్పుతోపాటు పలు కీలక సంస్కరణలు చేపడతామని ఐసెన్‌కాట్ ప్రకటించారు. 2023 అక్టోబర్ 7న హమాస్ జరిపిన దాడిని ముందుగా గుర్తించడంలో, అడ్డుకోవడంలో విఫలమైన అంశాలపై స్వతంత్ర ప్రభుత్వ విచారణ కమిషన్ ఏర్పాటు చేస్తామని చెప్పారు. ఇజ్రాయెల్ పౌరులందరికీ సైనిక సేవ తప్పనిసరి చేస్తామని, ప్రస్తుత ప్రభుత్వం తీసుకొచ్చిన వివాదాస్పద న్యాయవ్యవస్థ సంస్కరణ చట్టాలను రద్దు చేస్తామని హామీ ఇచ్చారు. దేశంలో మార్పు కావాలని ఇజ్రాయెల్ ప్రజలు 5 లక్షలకు పైగా ఓట్ల తేడాతో తీర్పునిచ్చారని ఆయన వ్యాఖ్యానించారు.మరోవైపు, నెతన్యాహు ప్రభుత్వాన్ని గద్దె దించేందుకు రామ్, జాయింట్ లిస్ట్ పార్టీలు బయటి నుంచి ప్రతిపక్షానికి మద్దతు ఇచ్చేందుకు సిద్ధంగా ఉన్నట్లు సంకేతాలిచ్చాయి. అయితే, ప్రభుత్వంలో నేరుగా భాగస్వాములు కావాలనే ఉద్దేశం లేదని జాయింట్ లిస్ట్ నేత అహ్మద్ తిబీ స్పష్టం చేసినట్లు టైమ్స్ ఆఫ్ ఇజ్రాయెల్ పేర్కొంది. మరో అరబ్ రాజకీయ నాయకుడు జాఫర్ ఫరా వెల్లడించిన వివరాల ప్రకారం.. ఈ రెండు పార్టీలు ఇజ్రాయెల్ అధ్యక్షుడు ఐజాక్ హెర్జోగ్‌ను కలిసి తమ మద్దతు విషయాన్ని తెలియజేయనున్నాయి. తదుపరి ప్రధానమంత్రిగా మాజీ ఇజ్రాయెల్ సైన్యాధిపతి గడి ఐసెన్‌కాట్ పేరును ప్రతిపాదించనున్నట్లు సమాచారం. ఈ పరిణామాలతో నెతన్యాహు రాజకీయ భవిష్యత్తుపై ఉత్కంఠ నెలకొంది. ఇదీ చదవండి: హాలోవీన్ వేళ యూరప్‌లో జెన్‌జీ నిరసనల సెగ

ఇజ్రాయెల్ పార్లమెంటు ఎన్నికల్లో విదేశీ శక్తుల జోక్యం జరిగిందన్న అనుమానాలపై సమగ్ర దర్యాప్తు చేపట్టాలని కేంద్ర ఎన్నికల కమిటీ అధ్యక్షుడు, సుప్రీంకోర్టు న్యాయమూర్తి నోమ్ సోల్‌బర్గ్ దేశ భద్రతా సంస్థ షిన్ బెట్‌ను ఆదేశించారు. ఖతార్ నుంచి భారీగా నిధులు వచ్చి, అరబ్ ఓటర్ల ఓటింగ్‌పై ప్రభావం చూపేందుకు ప్రయత్నాలు జరిగి ఉండవచ్చని హిబ్రూ మీడియా కథనాలు వెల్లడించాయి. అయితే ఈ ఆరోపణలు ఇంకా నిర్ధారణ కాలేదని అధికారులు స్పష్టం చేశారు.సోల్‌బర్గ్ బుధవారం షిన్ బెట్ చీఫ్ డేవిడ్ జినీకి రాసిన లేఖలో.. ఇజ్రాయెల్ ప్రయోజనాలకు వ్యతిరేకంగా వ్యవహరించే విదేశీ శక్తులు నిధుల ద్వారా ఎన్నికలను అనుచితంగా ప్రభావితం చేస్తున్నాయన్న తీవ్రమైన అనుమానాలు తన దృష్టికి వచ్చినట్లు పేర్కొన్నారు. ఈ అనుమానాల వాస్తవికతను తాను ధ్రువీకరించలేనప్పటికీ, విదేశీ సంస్థల ప్రమేయం ఉందన్న ఆరోపణల నేపథ్యంలో పూర్తిస్థాయి దర్యాప్తు అవసరమని తెలిపారు. వారంలోగా దర్యాప్తు వివరాలను సమర్పించాలని కోరారు.ఈ వ్యవహారంపై గత 2 వారాల్లోనే విశ్వసనీయ నిఘా సమాచారంతో దర్యాప్తు ప్రారంభించినట్లు ఓ భద్రతా అధికారి కన్ వార్తా సంస్థకు తెలిపారు. సమస్యాత్మక అంశాలు ఉన్నట్లు గుర్తించామని, పూర్తి సమాచారాన్ని వెలికితీసేందుకు విచారణ కొనసాగిస్తున్నామని చెప్పారు.ఖతార్ అరబ్ సంస్థలకు భారీగా నిధులు అందించి, ఓటర్లను పోలింగ్‌కు రప్పించడం లేదా వారి ఓటింగ్‌పై ప్రభావం చూపేందుకు ప్రయత్నించి ఉండవచ్చని కొన్ని హిబ్రూ మీడియా సంస్థలు భద్రతా వర్గాలను ఉటంకిస్తూ తెలిపాయి. ఈ నిధుల బదిలీకి ఉపయోగించిన మార్గాలు గతంలో ఉగ్రవాద కార్యకలాపాలకు డబ్బు చేరవేసేందుకు ఉపయోగించిన పద్ధతులను పోలి ఉన్నాయని ఛానల్ 12 పేర్కొంది.ఎన్నికల్లో అక్రమాలు జరిగాయా?ఇజ్రాయెల్ ఎన్నికల్లో విస్తృత స్థాయిలో ఓటింగ్ అక్రమాలు జరిగినట్లు వచ్చిన ఆరోపణలను కేంద్ర ఎన్నికల కమిటీ తాత్కాలిక డైరెక్టర్ జనరల్ డీన్ లివ్నే ఖండించారు. ఎన్నికలు చట్టబద్ధంగా జరిగాయని, తమకు తెలిసినంతవరకు వ్యవస్థాగత అక్రమాలకు ఆధారాలు లేవని తెలిపారు. సోల్‌బర్గ్ కోరిన దర్యాప్తు రహస్య నిఘా సమాచారానికి సంబంధించినదని, దాన్ని ఇంకా ధ్రువీకరించాల్సి ఉందని వివరించారు.మరోవైపు, అరబ్ పార్టీల వల్ల ఎన్నికల చోరీ జరిగిదంటూ ప్రధానమంత్రి బెంజమిన్ నెతన్యాహు నేతృత్వంలోని లికుడ్ పార్టీ ఆరోపించింది. ఖతార్ పేరు ప్రస్తావించకుండా, విదేశీ శక్తులు ఇజ్రాయెల్ పార్లమెంటును తమ అధీనంలోకి తెచ్చుకునేందుకు ప్రయత్నించాయని పేర్కొంది. అరబ్ పార్టీలతో ఏ జియోనిస్ట్ పార్టీ కూడా పొత్తు పెట్టుకోకూడదని వాదించింది.అరబ్ ఓటర్లలో అధిక పోలింగ్ నమోదవడంతో రామ్, జాయింట్ లిస్ట్ పార్టీలు కలిపి రికార్డు స్థాయిలో 19 స్థానాలు గెలుచుకునే అవకాశం ఏర్పడింది. 120 స్థానాలున్న పార్లమెంటులో నెతన్యాహు కూటమికి 53, జియోనిస్ట్ ప్రతిపక్షానికి 48 స్థానాలు వస్తాయని తుది దశకు చేరిన లెక్కలు సూచించాయి. దీంతో ప్రభుత్వ ఏర్పాటులో అరబ్ పార్టీలు కీలక పాత్ర పోషించే పరిస్థితి నెలకొంది.ఇదీ చదవండి: సైకిల్‌ను తుక్కు తుక్కుగా ఓడించాలి: ఆర్కే రోజాఅయితే విదేశీ జోక్యం ఆరోపణలను రాజకీయ ప్రయోజనాల కోసం ఉపయోగించి కొత్త పార్లమెంటు ప్రమాణ స్వీకారాన్ని ఆలస్యం చేయకూడదని ప్రతిపక్ష నేత గాడి ఐసెన్‌కోట్ హెచ్చరించారు. ఎన్నికల సమగ్రతను కాపాడేందుకు ప్రతి ఫిర్యాదుపైనా దర్యాప్తు జరగాలని, అదే సమయంలో రాజకీయ జోక్యానికి అవకాశం ఇవ్వకూడదని పేర్కొన్నారు. కొత్త పార్లమెంటు నవంబర్ 10న ప్రమాణ స్వీకారం చేయాల్సి ఉంది. షిన్ బెట్ దర్యాప్తులో వెలువడే వివరాలు ఎన్నికల ఫలితాలపై రాజకీయ వివాదాన్ని మరింత పెంచుతాయా, ప్రభుత్వ ఏర్పాటుపై ప్రభావం చూపుతాయా అన్నది కీలకంగా మారింది.

జెరూసలేం: ఇజ్రాయెల్ ఎన్నికల్లో ప్రధానమంత్రి బెంజమిన్ నెతన్యాహు నేతృత్వంలోని కూటమి అతిపెద్ద రాజకీయ శక్తిగా నిలిచినప్పటికీ.. ప్రభుత్వ ఏర్పాటుకు అవసరమైన మెజారిటీకి దూరంగా నిలిచింది. బుధవారం ఓట్ల లెక్కింపు కొనసాగుతున్న సమయంలో వెలువడిన తాజా ఫలితాల ప్రకారం.. నెతన్యాహు కూటమికి 53 స్థానాలు లభించే అవకాశం ఉండగా, గడి ఐసెన్‌కాట్ నేతృత్వంలోని ప్రతిపక్ష కూటమికి 48 స్థానాలు దక్కనున్నాయి. అరబ్ పార్టీలకు 19 స్థానాలు వచ్చే అవకాశం కనిపిస్తోంది. ఇజ్రాయెల్ పార్లమెంటు అయిన నెస్సెట్‌లో మొత్తం 120 స్థానాలు ఉండగా.. ప్రభుత్వ ఏర్పాటుకు కనీసం 61 స్థానాలు అవసరం. దీంతో ఏ కూటమికీ స్పష్టమైన మెజారిటీ లభించకపోవడంతో తదుపరి ప్రభుత్వం ఏర్పాటుపై ఉత్కంఠ నెలకొంది.అరబ్ పార్టీలపై నెతన్యాహు పార్టీ ఆరోపణలుఇజ్రాయెల్ ఎన్నికలను అరబ్ పార్టీలు దొంగిలించాయని నెతన్యాహు నేతృత్వంలోని లికుడ్ పార్టీ ఆరోపించింది. ఉగ్రవాదానికి, యూదు రాజ్య నిర్మూలనకు మద్దతు ఇచ్చే అరబ్ పార్టీలు ఎన్నికల ప్రక్రియను ప్రభావితం చేశాయని బుధవారం విడుదల చేసిన ప్రకటనలో పేర్కొంది. ఓటర్లను పోలింగ్ కేంద్రాలకు రాకుండా బెదిరింపులు, హింస, తప్పుడు ప్రచారం, అవినీతి, నిషేధిత సాఫ్ట్‌వేర్ వినియోగం వంటి చర్యలకు పాల్పడ్డాయని ఆరోపించింది. అయితే ఇవి లికుడ్ పార్టీ చేసిన ఆరోపణలు మాత్రమే. మరోవైపు, నెతన్యాహు తన మద్దతుదారులను ఉద్దేశించి మాట్లాడుతూ.. బలమైన మితవాద ప్రభుత్వాన్ని ఏర్పాటు చేయాలని పిలుపునిచ్చారు. యూదు, జియోనిస్ట్ మెజారిటీ ఐక్యంగా ఉండాలని పేర్కొన్నారు. అరబ్ పార్టీల మద్దతుతో ప్రభుత్వం ఏర్పాటు చేయడాన్ని ఆయన తీవ్రంగా వ్యతిరేకించారు.మెజారిటీ కోసం కూటముల కసరత్తుఇజ్రాయెల్‌లో ఓటర్లు నేరుగా ప్రధానమంత్రిని ఎన్నుకోరు. రాజకీయ పార్టీలకు ఓట్లు వేస్తారు. ఏ ఒక్క పార్టీకి సాధారణంగా పూర్తి మెజారిటీ రాకపోవడంతో.. ప్రభుత్వాన్ని ఏర్పాటు చేయడానికి పార్టీలు కలిసి కూటమిగా ఏర్పడాల్సి ఉంటుంది. తాజా ఫలితాల ప్రకారం నెతన్యాహు కూటమి, ఐసెన్‌కాట్ నేతృత్వంలోని ప్రతిపక్ష కూటమి రెండూ మెజారిటీకి అవసరమైన 61 స్థానాలను సాధించలేకపోయాయి. ప్రతిపక్ష కూటమి, అరబ్ పార్టీల స్థానాలను కలిపితే 67 స్థానాలు వచ్చే అవకాశం ఉంది. అయితే అరబ్ పార్టీలతో కలిసి పనిచేయడానికి ప్రతిపక్షంలోని కొన్ని పార్టీలు విముఖత చూపుతున్నాయి. దీంతో ఈ సంఖ్యాబలం ప్రభుత్వ ఏర్పాటుకు ఎంతవరకు ఉపయోగపడుతుందనేది స్పష్టంగా తెలియడం లేదు. మరోవైపు, అరబ్ పార్టీల నేత మన్సూర్ అబ్బాస్ మాట్లాడుతూ.. నెతన్యాహుకు అనుకూలంగా, వ్యతిరేకంగా ఉన్న రెండు వర్గాల ప్రతినిధులు తమతో సంప్రదింపులు జరుపుతున్నారని వెల్లడించారు.రికార్డు స్థాయిలో పోలింగ్ఈ ఎన్నికల్లో గత పావు శతాబ్దానికి పైగా కాలంలో ఎన్నడూ లేనంత అధిక పోలింగ్ నమోదైనట్లు నివేదికలు వెల్లడించాయి. 2022 ఎన్నికలతో పోలిస్తే ఇజ్రాయెల్ సైనిక సిబ్బందిలో కూడా ఓటింగ్ శాతం పెరిగింది. సైనిక సిబ్బంది పోలింగ్ 79.9 శాతానికి చేరినట్లు ఇజ్రాయెల్ సైన్యం తెలిపింది. ఇది గత ఎన్నికలతో పోలిస్తే 6.2 శాతం పాయింట్లు ఎక్కువ. అక్టోబర్ 7, 2023న హమాస్ దాడి తర్వాత ఇజ్రాయెల్‌లో జరిగిన తొలి ఎన్నికలు కావడంతో వీటికి ప్రత్యేక ప్రాధాన్యం ఏర్పడింది. ఈ దాడి అనంతరం గాజాలో యుద్ధం ప్రారంభమై.. ఆ ప్రాంతంలో తీవ్ర విధ్వంసం చోటుచేసుకుంది. ఇదీ చదవండి: ‘ఎప్‌స్టీన్‌ను నేనే గెంటేశా’.. ట్రంప్ ఆగ్రహం

ఇజ్రాయెల్‌ ఎన్నికల కౌంటింగ్‌ కొనసాగుతోంది. అరబ్‌ పార్టీలు కింగ్‌ మేకర్‌గా నిలిచే అవకాశం ఉంది. ఇజ్రాయెల్ ఎన్నికల బరిలో రెండు అరబ్ పార్టీల కూటములు ఉన్నాయి. హదాష్, బాలాద్, తాల్ పార్టీలతో కూడిన జాయింట్ అరబ్ లిస్ట్‌కు ఇప్పటివరకు లెక్కించిన ఓట్లలో 9.11 శాతం, ఇస్లామిస్ట్ పార్టీ రామ్‌కు 4.74 శాతం ఓట్లు వచ్చాయి.ఇతర పార్టీలు వీటితో కలిసి సంకీర్ణ ప్రభుత్వం ఏర్పాటు చేసేందుకు అంగీకరిస్తాయా? అనేది స్పష్టంగా లేదు. అరబ్ ఇజ్రాయెలీల సమాన హక్కులు, పాలస్తీనా భూభాగాల్లో ఇజ్రాయెల్ సైనిక ఆక్రమణకు ముగింపు, రెండు దేశాల పరిష్కారానికి జాయింట్ అరబ్ లిస్ట్ మద్దతు ఇస్తోంది. నెతన్యాహు ప్రభుత్వాన్ని భర్తీ చేయగల ప్రతిపక్షానికి మద్దతుగా నిలిచి, అరబ్ ఇజ్రాయెలీలను వేధిస్తున్న ముఠాల నేరాల నియంత్రణ వంటి అంశాలపై హామీలు పొందాలని భావిస్తోంది. రామ్ పార్టీ నాయకుడు మన్సూర్ అబ్బాస్ అరబ్ ఇజ్రాయెలీల సమస్యల పరిష్కారానికి ప్రాధాన్యం ఇస్తున్నారు. ఈ ఎన్నికల్లో తన పార్టీ జాబితాలో రెండో స్థానాన్ని యూదు మాజీ పోలీసు అధికారి, మధ్యేవాద ఎంపీ యోవ్ సెగాలోవిట్జ్‌కు ఇచ్చి ఆశ్చర్యపరిచారు.నెతన్యాహుకు పిడుగులాంటి వార్త నెతన్యాహు ప్రభుత్వాన్ని గద్దె దించేందుకు మార్గం సుగమం చేసేందుకు తమ కూటమి సిద్ధంగా ఉందని జాయింట్ అరబ్ లిస్ట్ నాయకుడు యూసుఫ్ జబరీన్ తెలిపారు. ఇజ్రాయెల్ కేంద్ర ఎన్నికల కమిటీ లెక్కల ప్రకారం, ఈ కూటమికి ఇప్పటివరకు 9.11 శాతం ఓట్లు వచ్చాయి. ప్రభుత్వ ఏర్పాటులో ఈ కూటమి కీలక పాత్ర పోషించే అవకాశముంది. రక్తపాతానికి, ఆధిపత్య ధోరణులకు, జాతి వివక్షకు, వెలివేత రాజకీయాలకు తాము పూర్తి భిన్నమైన ప్రత్యామ్నాయాన్ని అందిస్తున్నామని జబరీన్ ఎక్స్‌లో పేర్కొన్నారు. యూదులు, అరబ్బుల మధ్య నిజమైన, సమాన భాగస్వామ్యంతోనే మార్పు సాధ్యమని చెప్పారు. మరోవైపు, అరబ్ ఇజ్రాయెలీలను ఇజ్రాయెల్ యూదు గుర్తింపునకు ముప్పుగా నెతన్యాహు ప్రభుత్వం పలుమార్లు అభివర్ణించింది. ప్రత్యర్థులు అరబ్ పార్టీలతో కలిసి ప్రమాదకర ప్రభుత్వాన్ని ఏర్పాటు చేసేందుకు ప్రయత్నిస్తున్నారని ఇటీవల నెతన్యాహు ఆరోపించారు. ప్రతిపక్ష కూటమి అరబ్ పార్టీలతో కలిసి ప్రభుత్వం ఏర్పాటు చేయాలని యాయిర్ గోలన్ కోరగా, ఐసెన్‌కాట్ గతంలో ఈ ప్రతిపాదనను తోసిపుచ్చారు. అయితే, ఎన్నికలకు ముందు కొత్త ప్రభుత్వ కూటమికి మద్దతు ఇచ్చే ఏర్పాటుపై జాయింట్ అరబ్ లిస్ట్ చర్చించింది.ఇదీ చదవండి: డీఏ, డీఆర్ పెంపు.. కేంద్ర క‍్యాబినెట్ కీలక నిర్ణయాలు

జెరూసలేం: ఇజ్రాయెల్‌ పార్లమెంట్‌ ఎన్నికల ఫలితాలు ఉత్కంఠ రేపుతున్నాయి. ఓట్ల లెక్కింపు కొనసాగుతున్న కొద్దీ రాజకీయ సమీకరణాలు మారుతున్నాయి. ఇప్పటివరకు జరిగిన కౌంటింగ్‌లో నెతన్యాహు కూటమికి 53 స్థానాలు దక్కాయి. ఇక అరబ్ పార్టీలకు ‍ప్రాధాన్యం పెరిగిపోయింది.Israel election results Updates85.6% ఓట్ల లెక్కింపు పూర్తిఇజ్రాయెల్ కేంద్ర ఎన్నికల కమిటీ 85.6 శాతం ఓట్ల లెక్కింపు పూర్తయ్యాక తాజా వివరాలను వెల్లడించింది.- నెతన్యాహు కూటమి: 53 స్థానాలు- ఐసెన్‌కాట్ కూటమి: 48 స్థానాలు- అరబ్ పార్టీలు: 19 స్థానాలుజాయింట్ అరబ్ లిస్ట్‌కు 9.11 శాతం ఓట్లుఇస్లామిస్ట్ పార్టీ రామ్‌కు 4.74 శాతం ఓట్లుఇజ్రాయెల్ ఎన్నికల బరిలో రెండు అరబ్ పార్టీల కూటములు ఉన్నాయి. హదాష్, బాలాద్, తాల్ పార్టీలతో కూడిన జాయింట్ అరబ్ లిస్ట్‌కు ఇప్పటివరకు లెక్కించిన ఓట్లలో 9.11 శాతం, ఇస్లామిస్ట్ పార్టీ రామ్‌కు 4.74 శాతం ఓట్లు వచ్చాయి.ఇతర పార్టీలు వీటితో కలిసి సంకీర్ణ ప్రభుత్వం ఏర్పాటు చేసేందుకు అంగీకరిస్తాయా అనేది స్పష్టంగా లేదు. అరబ్ ఇజ్రాయెలీల సమాన హక్కులు, పాలస్తీనా భూభాగాల్లో ఇజ్రాయెల్ సైనిక ఆక్రమణకు ముగింపు, రెండు దేశాల పరిష్కారానికి జాయింట్ అరబ్ లిస్ట్ మద్దతు ఇస్తోంది.నెతన్యాహు ప్రభుత్వాన్ని భర్తీ చేయగల ప్రతిపక్షానికి మద్దతుగా నిలిచి, అరబ్ ఇజ్రాయెలీలను వేధిస్తున్న ముఠాల నేరాల నియంత్రణ వంటి అంశాలపై హామీలు పొందాలని భావిస్తోంది. రామ్ పార్టీ నాయకుడు మన్సూర్ అబ్బాస్ అరబ్ ఇజ్రాయెలీల సమస్యల పరిష్కారానికి ప్రాధాన్యం ఇస్తున్నారు. ఈ ఎన్నికల్లో తన పార్టీ జాబితాలో రెండో స్థానాన్ని యూదు మాజీ పోలీసు అధికారి, మధ్యేవాద ఎంపీ యోవ్ సెగాలోవిట్జ్‌కు ఇచ్చి ఆశ్చర్యపరిచారు.77% ఓట్ల లెక్కింపు పూర్తి77 శాతం ఓట్ల లెక్కింపు పూర్తయ్యాక కేంద్ర ఎన్నికల కమిటీ ఫలితాలను అప్‌డేట్‌ చేసింది.- నెతన్యాహు కూటమికి 54 స్థానాలు- ఐసెన్‌కాట్ కూటమికి 49 స్థానాలు- అరబ్ పార్టీలకు 17 స్థానాలుఅరబ్ పార్టీలకు పెరిగిన ప్రాధాన్యం?70 శాతం ఓట్ల లెక్కింపు పూర్తయ్యే సమయానికి అరబ్ పార్టీలకు ఇప్పటివరకు 17 స్థానాలు వచ్చాయి. అయితే, ఇంకా 30 శాతం ఓట్ల లెక్కింపు మిగిలి ఉంది.ప్రభుత్వం ఏర్పాటు చేయడానికి అవసరమైన మెజారిటీ స్థానాలు ప్రధాన క్యాంపుల్లో దేనికీ లభించలేదు. దీంతో అరబ్ పార్టీలు అత్యంత కీలకంగా మారనున్నాయి.ఐసెన్‌కాట్ ప్రభుత్వం ఏర్పాటు చేయాలంటే అరబ్ పార్టీల మద్దతుపై ఆధారపడాల్సి ఉంటుంది. అవి ఆయన ప్రభుత్వంలో చేరకపోయినా, కనీసం ఆయనకు వ్యతిరేకంగా ఓటు వేయకుండా ఉండాలి. దీనినే ‘సేఫ్టీ నెట్ సన్నివేశం’గా పిలుస్తారు.అయితే, ప్రస్తుతం కొనసాగుతున్న ఓట్ల లెక్కింపులో ఐసెన్‌కాట్ స్థానాలు తగ్గుతూ, నెతన్యాహు స్థానాలు పెరుగుతుండటంతో ఈ తరహా మద్దతు లభించే అవకాశాలు క్రమంగా తగ్గుతున్నాయి.ఇటు ఓట్ల లెక్కింపు.. అటు దాడులుఇజ్రాయెల్‌లో ఓట్ల లెక్కింపు జరుగుతున్న వేళ.. గాజాలో ఇజ్రాయెల్ జరిపిన దాడిలో ఇద్దరు గాయపడినట్లు అక్కడి మా ప్రతినిధులు తెలిపారు.దక్షిణ గాజాలోని ఖాన్ యూనిస్‌లో ఈ తాజా దాడి జరిగినట్లు అత్యవసర సేవల సిబ్బందిని ఉటంకిస్తూ వారు వెల్లడించారు.2023 అక్టోబర్ నుంచి గాజాపై ఇజ్రాయెల్ సాగిస్తున్న మారణకాండలో 74,000 మందికి పైగా పాలస్తీనీయులు ప్రాణాలు కోల్పోగా, దాదాపు 175,000 మంది గాయపడ్డారు.2025 అక్టోబర్‌లో అమెరికా మధ్యవర్తిత్వంతో కుదిరిన ‘కాల్పుల విరమణ’ అమల్లోకి వచ్చినప్పటి నుంచి 1,500 మందికి పైగా ప్రాణాలు కోల్పోయారు. నెతన్యాహు కూటమికి 55 స్థానాలు? ఇప్పటివరకు సగానికి పైగా ఓట్లు లెక్కించగా, ప్రధానమంత్రి బెంజమిన్‌ నెతన్యాహు నేతృత్వంలోని కూటమికి 55 స్థానాలు లభించే అవకాశాలు కనిపిస్తున్నాయి. గాడి ఐజెన్‌కాట్‌ నేతృత్వంలోని మార్పు కూటమి 49 స్థానాలతో వెనుకబడింది. అరబ్‌ పార్టీలకు 16 స్థానాలు దక్కే సూచనలు కనిపిస్తున్నాయి. అయితే, తుది ఫలితాలు వెల్లడయ్యే వరకు ఏ కూటమికీ స్పష్టమైన మెజారిటీ వస్తుందనేది చెప్పలేని పరిస్థితి నెలకొంది.నెతన్యాహుకు ట్రంప్‌ మద్దతు.. కొత్త షరతులు?అమెరికా అధ్యక్షుడు డొనాల్డ్‌ ట్రంప్‌ ఇజ్రాయెల్‌ ఎన్నికల ఫలితాలను నిశితంగా పరిశీలిస్తున్నారు. నెతన్యాహు తదుపరి ప్రభుత్వంలో ఇట్‌మార్‌ బెన్‌ గ్విర్‌, బహుశా బెజలెల్‌ స్మోట్రిచ్‌లకు చోటు కల్పించకూడదని ట్రంప్‌ వర్గాలు భావిస్తున్నట్లు సమాచారం. మరోవైపు, ఇజ్రాయెల్‌తో సంబంధాలను సాధారణీకరించేందుకు సౌదీ అరేబియా సహా కొన్ని అరబ్‌ దేశాలు నెతన్యాహు ప్రధానిగా కొనసాగడంపై అభ్యంతరాలు వ్యక్తం చేస్తున్నట్లు తెలుస్తున్నది. ఈ నేపథ్యంలో ఇజ్రాయెల్‌లో ఐక్య ప్రభుత్వ ఏర్పాటుకు ట్రంప్‌ ప్రయత్నించవచ్చనే అంచనాలు వ్యక్తమవుతున్నాయి. అవసరమైతే అధికార భాగస్వామ్యం, పదవీకాలాన్ని పంచుకునే ఒప్పందం ద్వారా రాజకీయ ప్రతిష్ఠంభనకు ముగింపు పలికే ప్రయత్నాలు జరగవచ్చని విశ్లేషణలు వినిపిస్తున్నాయి.అరబ్‌ పార్టీలకు పెరుగుతున్న మద్దతుఓట్ల లెక్కింపులో అరబ్‌ పార్టీలకు లభిస్తున్న మద్దతు కూడా చర్చనీయాంశంగా మారింది. ముఖ్యంగా జెరూసలేం నగరంలో అరబ్‌ పార్టీలకు గత ఎన్నికలతో పోలిస్తే గణనీయంగా ఎక్కువ ఓట్లు నమోదయ్యాయి. అక్కడ 80 శాతానికి పైగా పోలింగ్‌ కేంద్రాల లెక్కింపు పూర్తయ్యే సమయానికి, ఉమ్మడి జాబితాకు 11,477 ఓట్లు వచ్చినట్లు సమాచారం. గత ఎన్నికల్లో ఈ జాబితాకు వచ్చిన ఓట్లతో పోలిస్తే ఇది సుమారు 4.5 రెట్లు అధికం. మరోవైపు, సైన్యంలో పనిచేస్తున్న వారిలో 79.9 శాతం మంది తమ ఓటు హక్కును వినియోగించుకున్నారు. గత ఎన్నికలతో పోలిస్తే ఇది 6.2 శాతం ఎక్కువ. అయితే, కొన్ని ప్రధాన నగరాల్లోని పోలింగ్‌ కేంద్రాల ఫలితాలు ఇంకా పూర్తిగా నమోదు కాకపోవడంతో తుది రాజకీయ చిత్రం మారే అవకాశం ఉంది.మరో మలుపు తిప్పనున్న డబుల్‌ బ్యాలెట్‌ కవర్లుఇజ్రాయెల్‌ ఎన్నికల తుది ఫలితాలపై డబుల్‌ బ్యాలెట్‌ కవర్ల లెక్కింపు ప్రభావం చూపే అవకాశముంది. సైనికులు, ఇతర ప్రాంతాల్లో ఉన్న ఓటర్లు, నిరాశ్రయులైన ప్రజలు వేసిన ఓట్లు ఇందులో ఉంటాయి. ఎన్నికల సంఘం అంచనా ప్రకారం ఐదు లక్షలకు పైగా కవర్లు ఉండవచ్చు. వీటి లెక్కింపు అర్ధరాత్రి ప్రారంభమై మరుసటి రోజు సాయంత్రం వరకు కొనసాగవచ్చని అధికారులు తెలిపారు. ఈ ఓట్లు దాదాపు 15 స్థానాల సమీకరణాలను ప్రభావితం చేసే అవకాశం ఉందని అంచనాలు ఉన్నాయి. మరోవైపు, నెతన్యాహు నేతృత్వంలోని లికుడ్‌ పార్టీ అతిపెద్ద పార్టీగా కొనసాగుతుండగా, ఐజెన్‌కాట్‌ కూటమి మెజారిటీ సాధించేందుకు అవసరమైన మద్దతు కూడగట్టాల్సి ఉంది. తుది లెక్కింపు పూర్తయ్యే వరకు ఇజ్రాయెల్‌లో తదుపరి ప్రభుత్వం ఎవరిదనే ఉత్కంఠ కొనసాగనుంది. ఇదీ చదవండి: ట్రంప్‌తో కలిసి రంగంలోకి దిగుతా: నెతన్యాహు

వాషింగ్టన్‌: అమెరికాలో నవంబర్ 3న జరగనున్న మధ్యంతర ఎన్నికల నేపథ్యంలో ఒహియో గవర్నర్ ఎన్నికలు తీవ్ర ఉత్కంఠ రేపుతున్నాయి. రిపబ్లికన్ పార్టీ అభ్యర్థి వివేక్ రామస్వామి, డెమోక్రటిక్ పార్టీ అభ్యర్థి అమీ ఆక్టన్ మధ్య హోరాహోరీ పోటీ నెలకొంది. ప్రస్తుత గవర్నర్ మైక్ డివైన్ ఈ ఎన్నికల్లో పోటీ చేయడం లేదు. దీంతో ఆయన స్థానాన్ని ఎవరు భర్తీ చేస్తారనే అంశంపై ఆసక్తి పెరిగింది. ఈ పోరు అమెరికా అధ్యక్షుడు డొనాల్డ్ ట్రంప్ రాజకీయ ప్రభావానికి, రిపబ్లికన్ పార్టీ ఆధిపత్యానికి, డెమోక్రాట్ల పునరాగమన అవకాశాలకు పరీక్షగా మారింది.ఒహియో గవర్నర్ ఎన్నికల ప్రచారానికి సంబంధించిన ప్రకటనల ఖర్చులు, ఖర్చు చేస్తామన్న హామీలు అక్టోబర్ చివరి నాటికి సుమారు 248.2 మిలియన్ డాలర్లకు చేరినట్లు నివేదికలు వెల్లడించాయి. ఇది రాష్ట్ర చరిత్రలోనే అత్యంత ఖరీదైన గవర్నర్ ఎన్నికగా నిలిచే అవకాశముంది. ఇందులో వివేక్ రామస్వామికి అనుకూలంగా సుమారు 204.2 మిలియన్ డాలర్లు, అమీ ఆక్టన్‌కు మద్దతుగా దాదాపు 44 మిలియన్ డాలర్ల ప్రకటనల వ్యయం నమోదైనట్లు ఎన్బీసీ4, అడ్ఇంపాక్ట్ పొలిటిక్స్ గణాంకాలు చెబుతున్నాయి. అక్టోబర్‌లో విడుదలైన కొన్ని సర్వేల్లో ఆక్టన్ స్వల్ప ఆధిక్యంలో ఉండగా, మరికొన్ని సర్వేలు రామస్వామికి అనుకూలంగా ఉన్నాయి.2024 రిపబ్లికన్ అధ్యక్ష అభ్యర్థిత్వ పోటీ సమయంలో వివేక్ రామస్వామి జాతీయ స్థాయిలో గుర్తింపు పొందారు. వ్యాపారవేత్తగా ఆయనకున్న అనుభవం, సంప్రదాయవాద విధానాలు, ట్రంప్‌తో సన్నిహిత సంబంధాలు రిపబ్లికన్ వర్గాల్లో ఆయనకు మద్దతును పెంచాయి. ప్రభుత్వ సంస్కరణలు, నియంత్రణల తగ్గింపు, సంప్రదాయవాద విధానాల అమలు వంటి అంశాలను ఆయన ప్రచారంలో ప్రస్తావిస్తున్నారు. వైద్యురాలైన అమీ ఆక్టన్ గతంలో ఒహియో ఆరోగ్య శాఖ డైరెక్టర్‌గా పనిచేశారు. కరోనా మహమ్మారి సమయంలో రాష్ట్ర ప్రజారోగ్య విధానాల రూపకల్పనలో కీలక పాత్ర పోషించి గుర్తింపు పొందారు.ఇదీ చదవండి: ట్రంప్‌తో కలిసి రంగంలోకి దిగుతా: నెతన్యాహు

బ్రెజిల్‌: అధ్యక్ష ఎన్నికల్లో తిరిగి విజయం సాధించిన బ్రెజిల్‌ అధ్యక్షుడు లూయిజ్ ఇనాసియో లూలా డా సిల్వా.. సోషల్ మీడియా సంస్థలపై నియంత్రణ అవసరమని మరోసారి స్పష్టం చేశారు. ఎన్నికల ప్రచారంలో మెటా సంస్థ తనకు అన్యాయం చేసిందని ఆరోపిస్తూ, డిజిటల్ వేదికల పనితీరుపై ఆందోళన వ్యక్తం చేశారు. రాజకీయ ప్రచారంలో సామాజిక మాధ్యమాల ప్రభావం, ఎన్నికల్లో వాటి పాత్రపై ఈ పరిణామం మరోసారి చర్చకు దారితీసింది.అక్టోబర్‌ 25న ఆదివారం తిరిగి ఎన్నికైన అనంతరం లూలా మాట్లాడుతూ.. తమ ప్రభుత్వానికి లోబడి సోషల్ మీడియా సంస్థలు పనిచేయాల్సి ఉంటుందని పేర్కొన్నారు. ఫేస్‌బుక్‌, ఇన్‌స్టాగ్రామ్‌, వాట్సాప్‌ల మాతృసంస్థ అయిన మెటాతో ఎన్నికల సమయంలో ఆయన ప్రచార బృందానికి వివాదం తలెత్తింది. మెటా అల్గారిథమ్‌లు తన ప్రత్యర్థి ఫ్లావియో బొల్సొనారోకు అనుకూలంగా వ్యవహరించాయని, తనకు మద్దతుగా ఉన్న పోస్టుల వ్యాప్తిని పరిమితం చేశాయని లూలా ప్రచార బృందం ఆరోపించింది.ఎన్నికల్లో జోక్యం చేసుకున్నట్లు వచ్చిన ఆరోపణలను మెటా ఖండించింది. ఏ అభ్యర్థికీ రాజకీయ సిద్ధాంతాల ఆధారంగా అనుకూలంగా వ్యవహరించబోమని స్పష్టం చేసింది. ప్రచార సమయంలో ఎదురైన సమస్యలు సాంకేతిక లోపాల వల్లే తలెత్తాయని వివరించింది. సెప్టెంబరులో లూలా ప్రచార ప్రకటనల ఖాతాను పొరపాటున గంటకు పైగా నిలిపివేసినట్లు అంగీకరించింది. ప్రభుత్వ సామాజిక సంక్షేమ పథకాన్ని అనుకరించే ప్రయత్నంపై అనుమానంతో నిర్వహించిన పరిశీలనలో ఈ పొరపాటు జరిగిందని, అనంతరం దాన్ని సరిచేశామని తెలిపింది.బ్రెజిల్‌ అధ్యక్ష ఎన్నికల చివరి వారాల్లో ఈ వివాదం మరింత ముదిరింది. సోషల్ మీడియా పోస్టులు కనిపించే స్థాయి, వాటి వ్యాప్తి, చెల్లింపు ప్రకటనల పంపిణీపై లూలా ప్రచార బృందం అభ్యంతరాలు వ్యక్తం చేసింది. మెటా కృత్రిమ మేధ (ఏఐ) సాధనాల ద్వారా రూపొందించిన రాజకీయ సమాచారాన్ని నిర్వహించే తీరుపైనా ఆందోళన తెలిపింది. అయితే, ఈ పరిణామాలు ఉద్దేశపూర్వక రాజకీయ జోక్యానికి నిదర్శనమన్న ఆరోపణలను మెటా తోసిపుచ్చింది.ఈ వివాదంపై బ్రెజిల్‌ సుపీరియర్‌ ఎలక్టోరల్‌ కోర్టు మెటాను వివరణ కోరింది. అభ్యర్థుల ప్రచార సమాచారాన్ని సమానంగా చూడలేదన్న ఆరోపణలపై ప్రశ్నలు లేవనెత్తింది. అనంతరం రెండు ప్రచార బృందాల పట్ల సమానంగా వ్యవహరించేలా చర్యలు తీసుకున్నామని మెటా వెల్లడించింది. ఎన్నికల్లో ఓటర్లను చేరుకోవడానికి రాజకీయ పార్టీలు సామాజిక మాధ్యమాలపై ఎక్కువగా ఆధారపడుతున్న నేపథ్యంలో, వాటి నియంత్రణపై చర్చ ప్రాధాన్యం సంతరించుకుంది. పోస్టుల వ్యాప్తి, ప్రకటనల ప్రదర్శన ఫలితాలపై ప్రభావం చూపే అవకాశం ఉండటంతో పారదర్శకతపై ప్రశ్నలు తలెత్తుతున్నాయి. ఎన్నికల అనంతరం కూడా ఈ అంశాన్ని కొనసాగిస్తానన్న లూలా వైఖరి.. బ్రెజిల్‌లో టెక్నాలజీ సంస్థలపై ఎలాంటి నియంత్రణలు అమలవుతాయన్న ఆసక్తిని పెంచుతోంది.ఇదీ చదవండి: లూలా విజయంతో భారత్‌కు ఒరిగేదేంటి?

న్యూఢిల్లీ: జామియా మిలియా ఇస్లామియా విశ్వవిద్యాలయంలో విద్యార్థి సంఘం ఎన్నికల నిర్వహణపై ప్రతిష్ఠంభన కొనసాగుతోంది. ఎన్నికలు నిర్వహిస్తామని యాజమాన్యం తాజాగా ఉత్తర్వులు జారీ చేసినప్పటికీ, స్పష్టమైన హామీలు లేవంటూ ఆందోళన చేస్తున్న విద్యార్థులు ఆరోపిస్తున్నారు. ఎన్నికల తేదీని ప్రకటించాలని, తమ డిమాండ్లపై లిఖితపూర్వక హామీలు ఇవ్వాలని వారు పట్టుబడుతున్నారు.విద్యార్థి సంఘాన్ని పునరుద్ధరించాలని కోరుతూ జామియా విద్యార్థులు కొద్ది రోజులుగా ఆందోళన చేస్తున్నారు. ఈ నేపథ్యంలో సోమవారం తెల్లవారుజామున 4.30 గంటల సమయంలో విశ్వవిద్యాలయ రిజిస్ట్రార్ ప్రొఫెసర్ ఎండీ మెహతాబ్ ఆలం రిజ్వీ క్యాంపస్‌కు చేరుకుని నిరసనకారులతో చర్చలు జరిపారు. అనంతరం అక్టోబర్ 26 తేదీతో జారీ చేసిన అధికారిక ఉత్తర్వులను విద్యార్థులకు అందజేసి, ఆందోళన విరమించాలని కోరినట్లు జమ్మూ కశ్మీర్ స్టూడెంట్స్ అసోసియేషన్ (జేకేఎస్ఏ) వెల్లడించింది.విద్యార్థి సంఘం రాజ్యాంగానికి ఆమోదం లభించిన 15 రోజుల తర్వాత జామియా మిలియా ఇస్లామియా విద్యార్థి సంఘం ఎన్నికలు నిర్వహిస్తామని విశ్వవిద్యాలయ యాజమాన్యం ఉత్తర్వుల్లో పేర్కొంది. అయితే, రాజ్యాంగానికి ఎప్పటిలోగా ఆమోదం తెలుపుతారనే విషయంపై స్పష్టత లేదని విద్యార్థులు అభ్యంతరం వ్యక్తం చేస్తున్నారు. ఎన్నికల నిర్వహణకు నిర్దిష్ట గడువు ప్రకటించకుండా కేవలం హామీలు ఇవ్వడం తమ డిమాండ్ల పరిష్కారం కాదని వారు స్పష్టం చేశారు.ఆందోళన సందర్భంగా విద్యార్థులపై జారీ చేసిన సస్పెన్షన్ ఉత్తర్వులు, వివరణ కోరుతూ ఇచ్చిన షోకాజ్ నోటీసులను ఉపసంహరించుకుంటున్నట్లు యాజమాన్యం ప్రకటించింది. అలాగే, నిరసనల సమయంలో విశ్వవిద్యాలయ భద్రతా సిబ్బంది వ్యవహరించిన తీరుపై విచారణ జరిపేందుకు కమిటీని ఏర్పాటు చేయనున్నట్లు తెలిపింది. ఈ నిర్ణయాలతో కొన్ని సమస్యలకు పరిష్కారం లభించినప్పటికీ, తమ ప్రధాన డిమాండ్లపై స్పష్టత వచ్చే వరకు పోరాటాన్ని విరమించబోమని విద్యార్థులు చెబుతున్నారు.ఇదీ చదవండి: Delhi: పార్లమెంట్‌ సమీపంలో అగ్నిప్రమాదం

ఇజ్రాయెల్‌ ఎన్నికల వేళ ఆసక్తికర పరిణామం చోటుచేసుకుంటోంది. దేశానికి దూరంగా విదేశాల్లో నివసిస్తున్న వేలాది మంది ఇజ్రాయెల్‌ పౌరులు ఓటు హక్కును వినియోగించుకునేందుకు స్వదేశానికి పయనమవుతున్నారు. సెలవుల కోసం కాదు.. పర్యటనల కోసం అంతకన్నా కాదు.. తమ దేశాన్ని ఎవరు పాలించాలనే నిర్ణయంలో భాగస్వాములు కావడానికి వేల కిలోమీటర్లు ప్రయాణిస్తున్నారు. అమెరికా కేంద్రంగా పనిచేసే ఓ సంస్థ అంచనా ప్రకారం, ఈసారి దాదాపు 67 వేల మంది ఇజ్రాయెలీలు ఎన్నికల కోసం స్వదేశానికి చేరుకునే అవకాశం ఉంది. దీంతో ఈ ఓట్లు ఎవరికి అనుకూలంగా మారతాయన్న చర్చ రాజకీయ వర్గాల్లో ఆసక్తి రేపుతోంది. మరోవైపు.. ఎన్నికల వేళ ఇజ్రాయెల్‌లో భారీ సంఖ్యలో ప్రజలు రోడ్ల మీదకు వచ్చి నెతన్యాహుకు వ్యతిరేకంగా నినాదాలు చేస్తున్న వీడియోలు బయటకు వచ్చాయి. ఈ నేపథ్యంలో ఇజ్రాయెల్‌లో నెతన్యాహుకు వ్యతిరేక పవనాలు వీస్తున్నాయనే అంచనాలు కనిపిస్తున్నాయి.కాగా, ఇజ్రాయెల్‌ రాజకీయాల్లో కీలక నేతగా ఉన్న ప్రధాని బెంజమిన్‌ నెతన్యాహుకు ఈ విదేశీ ఓటర్లు కొత్త రాజకీయ సవాలుగా మారతారా? అన్న ప్రశ్న ఇప్పుడు ప్రాధాన్యం సంతరించుకుంది. విదేశాల్లో నివసించే ఇజ్రాయెలీలు రాజకీయ మార్పును కోరుకునే అవకాశాలు ఎక్కువగా ఉన్నాయని కొందరు విశ్లేషకులు భావిస్తున్నారు. ఎన్నికల్లో పోటీ నువ్వా-నేనా అన్నట్లు సాగితే, ఈ ఓట్లు ఫలితాలపై ప్రభావం చూపవచ్చని అంచనా వేస్తున్నారు. అయితే, విదేశీ ఓటర్లంతా నెతన్యాహుకు వ్యతిరేకంగా ఉన్నారని చెప్పడానికి ఆధారాలు లేవు.ఎందుకీ ప్రత్యేక ప్రయాణాలు?విదేశాల్లో నివసించే సాధారణ ఇజ్రాయెల్‌ పౌరులకు పోస్టల్‌ లేదా ఆన్‌లైన్‌ ఓటింగ్‌ సదుపాయం లేకపోవడంతో, ఓటు వేయాలంటే స్వయంగా దేశానికి రావాల్సిన పరిస్థితి ఏర్పడింది. ఈ క్రమంలో అమెరికా నుంచి పెద్ద సంఖ్యలో ఓటర్లు వస్తుండగా, యూరప్‌, కెనడా, ఆస్ట్రేలియా, ఆసియా ప్రాంతాల నుంచి కూడా పలువురు బయలుదేరుతున్నారు. వీరిలో చాలామంది తమ ప్రయాణ ఖర్చులను తామే భరిస్తున్నారు.రెండు స్థానాలపై ప్రభావం చూపుతాయా?ఇజ్రాయెల్‌లో 73 లక్షలకు పైగా ఓటర్లు ఉండగా, ఎన్నికల్లో ప్రధాన పార్టీల మధ్య గట్టి పోటీ ఉంటుందని సర్వేలు సూచిస్తున్నాయి. విదేశాల నుంచి వచ్చే ఓట్ల ప్రభావం దాదాపు రెండు స్థానాల వరకు ఉండవచ్చన్న అంచనాలు కూడా వినిపిస్తున్నాయి. ఇదే సమయంలో, విదేశీ ఓటర్లను స్వదేశానికి తీసుకొచ్చే ప్రచారాన్ని అడ్డుకునేందుకు నెతన్యాహు నేతృత్వంలోని లికుడ్‌ పార్టీ ప్రయత్నించిందనే ఆరోపణలు కూడా ఉన్నాయి.⚠️__Just two days before the rally, thousands of Israelis held a massive demonstration in #TelAviv, calling for a commission of inquiry to investigate #Netanyahu's failures during the October 7, 2023 massacre. https://t.co/xqmp9yqJuz— Regional insight (@Regional_Asia) October 24, 2026నెతన్యాహుకు ఇబ్బందేనా?విదేశీ ఓటర్లు పెద్ద సంఖ్యలో స్వదేశానికి రావడం ఎన్నికల సమీకరణాల్లో ప్రాధాన్యం పొందవచ్చు. అయితే, ఆ ఓట్లు ఏ పార్టీకి పడతాయి, ఎంతమంది నిజంగా ఓటు వేస్తారు, మొత్తం ఫలితాలపై ఎంత ప్రభావం చూపుతారు అన్నది ఇంకా స్పష్టంగా లేదు. అందువల్ల నెతన్యాహుకు ఓటమి ముప్పు పొంచి ఉందని ఇప్పుడే తేల్చేయడం సరికాదు. కానీ పోటీ గట్టిగా ఉన్న ఎన్నికల్లో ప్రతి ఓటూ కీలకమే. విదేశాల నుంచి వస్తున్న ఈ ఓటర్ల తీర్పు ఇజ్రాయెల్‌ రాజకీయాల్లో ఎలాంటి మలుపు తిప్పుతుందన్నది ఆసక్తికరంగా మారింది. ఇజ్రాయెల్‌ ఎన్నికల్లో ప్రస్తుత ప్రధాని బెంజమిన్‌ నెతన్యాహు నేతృత్వంలోని కూటమికి, ఆయనను అధికారం నుంచి తప్పించాలని చూస్తున్న ప్రతిపక్ష కూటమికి మధ్య గట్టి పోటీ కనిపిస్తోంది. అయితే, తాజా సర్వేలలో ప్రతిపక్షానికి కొన్ని స్థానాల ఆధిక్యం కనిపించినప్పటికీ, ప్రభుత్వాన్ని ఏర్పాటు చేయడానికి అవసరమైన 61 స్థానాల మెజారిటీ(మొత్తం స్థానాలు 120) ఏ కూటమికీ స్పష్టంగా కనిపించడం లేదు.ట్రంప్‌ కీలక వ్యాఖ్యలు.. మరోవైపు.. ఇజ్రాయెల్‌ ఎన్నికల వేళ అమెరికా అధ్యక్షుడు డొనాల్డ్‌ ట్రంప్‌ ప్రధాని బెంజమిన్‌ నెతన్యాహుకు మద్దతుగా కీలక వ్యాఖ్యలు చేశారు. నెతన్యాహు మరోసారి అధికారంలోకి రావాలని ఆకాంక్షిస్తూ, ఆయనకు తన మద్దతు ఉంటుందని ట్రంప్‌ స్పష్టం చేశారు. నెతన్యాహు కాకుండా మరో నేత అధికారంలోకి వస్తే ఇరాన్‌ విషయంలో అమెరికాపై మరింత బాధ్యత పడవచ్చన్న అభిప్రాయాన్ని కూడా ఆయన వ్యక్తం చేసినట్లు నివేదికలు వెల్లడించాయి. దీంతో ఇజ్రాయెల్‌ ఎన్నికల ప్రచారంలో ట్రంప్‌ వ్యాఖ్యలు ప్రాధాన్యం సంతరించుకున్నాయి. అయితే, ట్రంప్‌ మద్దతు నెతన్యాహు కూటమి ఎన్నికల ఫలితాలపై ఎంతవరకు ప్రభావం చూపుతుందన్నది స్పష్టంగా తెలియాల్సి ఉంది.ఇజ్రాయెల్‌ ఎన్నికల షెడ్యూల్‌..అక్టోబర్ 27, మంగళవారం: పోలింగ్‌ జరుగుతుంది. ఇజ్రాయెల్‌ స్థానిక కాలమానం ప్రకారం రాత్రి 10 గంటలకు పోలింగ్‌ ముగిసిన వెంటనే ఎగ్జిట్‌ పోల్స్‌ వెలువడతాయి.అక్టోబర్ 28, బుధవారం తెల్లవారుజాము: ఓట్ల లెక్కింపు ప్రారంభ దశలోనే తొలి ఫలితాల సరళి స్పష్టమయ్యే అవకాశం ఉంది. అక్టోబర్ 29, గురువారం మధ్యాహ్నం: అన్ని ఓట్ల లెక్కింపు పూర్తయితే తుది ఫలితాలు వెల్లడయ్యే అవకాశం ఉందని ఎన్నికల కమిటీ అంచనా వేసింది.నవంబర్ 4: అధికారిక ఫలితాల ప్రకటనకు గడువు. ఇదీ చదవండి: ఫ్రాన్స్‌లో ఏం జరుగుతోంది?.. జనం ఎందుకు తిరగబడుతున్నారు?

బ్రెజిలియా: బ్రెజిల్ అధ్యక్ష ఎన్నికల్లో 80 ఏళ్ల వామపక్ష నేత లుయిజ్ ఇనాసియో లులా డా సిల్వా సంచలన విజయం సాధించారు. తొలి విడత ఎన్నికల్లో రెండో స్థానంలో నిలిచినప్పటికీ, చివరికి మాజీ అధ్యక్షుడు జైర్ బోల్సోనారో పెద్ద కుమారుడు, సెనేటర్ ఫ్లావియో బోల్సోనారోను ఓడించి, నాలుగోసారి అధ్యక్ష పీఠాన్ని అధిష్టించారు. లాటిన్ అమెరికాలో పెరుగుతున్న మితవాద గాలిని ఎదుర్కొంటూ ఒపీనియన్ పోల్స్‌ను తలకిందులు చేసి ఈ విజయం సాధించడం విశేషం.ఈ ఎన్నికల విజయం ద్వారా లూలా తన రాజకీయ ప్రస్థానంలో మరోసారి ఘనమైన విజయం దక్కిచుకున్నారు. 2003 నుంచి 2011 వరకు అధ్యక్షుడిగా పనిచేసిన ఆయన, 2022లో జైర్ బోల్సోనారోను ఓడించి మళ్లీ అధికారంలోకి వచ్చారు. ద్రవ్యోల్బణం, అవినీతి ఆరోపణలు, ప్రభుత్వ పనితీరుపై విమర్శలు ఎదుర్కొన్నప్పటికీ, ప్రజలు అనిశ్చితి వైపు కాకుండా సుపరిచితమైన దారినే ఎంచుకోవడంతో లూలా విజయం సాధించగలిగారు. ఈ గెలుపు అమెరికా అధ్యక్షుడు డొనాల్డ్ ట్రంప్ వర్గానికి ఎదురుదెబ్బగా నిలిచింది.అయితే నాలుగోసారి అధికారంలోకి వస్తున్న లూలాకు భవిష్యత్తులో తీవ్రమైన రాజకీయ, ఆర్థిక సవాళ్లు ఎదురుకానున్నాయి. బ్రెజిల్ చరిత్రలోనే అత్యంత సంప్రదాయవాద కాంగ్రెస్ ఎన్నిక కావడంతో, పార్లమెంటులో రైట్‌పార్టీల కూటమి బలముంది. ఇది ఆయన ప్రభుత్వ విధానాలకు ఆటంకం కలిగించవచ్చని, అభిశంసన ముప్పు ఉండే అవకాశం ఉందని నిపుణులు హెచ్చరిస్తున్నారు. వీటితో పాటు దేశంలో పెరుగుతున్న ప్రభుత్వ రుణం (జీడీపీలో 82 శాతానికి పైగా), గరిష్ట వడ్డీ రేట్లు, గృహ రుణాల భారం వంటి తీవ్రమైన ఆర్థిక సవాళ్లను ఆయన ఎదుర్కోవాల్సి ఉంది. సంక్షేమ పథకాలను అమలు చేస్తూనే, ప్రజా ఆర్థిక వ్యవస్థను గాడిలో పెట్టడం, సంప్రదాయవాద పార్లమెంటుతో నెగ్గుకురావడం లూలాకు కత్తి మీద సాములా మారనుంది.