న్యూఢిల్లీ: ప్రైవేట్‌ రంగ బ్యాంకింగ్‌ దిగ్గజం ఐసీఐసీఐ బ్యాంక్‌ కొన్నాళ్ల క్రితం హెచ్‌డీఎఫ్‌సీ లిమిటెడ్‌ను కొనుగోలుపై ఆసక్తి చూపింది. అందుకోసం ఆఫర్‌ కూడా ఇచ్చింది. కానీ హెచ్‌డీఎఫ్‌సీ లిమిటెడ్‌ ఆ ప్రతిపాదనను తిరస్కరించింది. ఐసీఐసీఐ బ్యాంక్‌ మాజీ ఎండీ చందా కొచర్‌తో నిర్వహించిన చర్చాగోష్టి సందర్భంగా హెచ్‌డీఎఫ్‌సీ లిమిటెడ్‌ మాజీ చైర్మన్, సీనియర్‌ బ్యాంకర్‌ దీపక్‌ పరేఖ్‌ ఈ విషయాలు వెల్లడించారు. ‘ఐసీఐసీఐతోనే హెచ్‌డీఎఫ్‌సీ ప్రారంభమైంది. అలాంటప్పుడు సొంతింటికి తిరిగి రావచ్చు కదా, అని ఒకసారి మీరు ఆఫర్‌ ఇచ్చిన సంగతి నాకు గుర్తుంది. కానీ దాన్ని నేను తిరస్కరించాను. అది సముచితం కాదని చెప్పాను‘ అని పరేఖ్‌ గుర్తు చేసుకున్నారు. ఆ తర్వాత నియంత్రణ నిబంధనల ఒత్తిడి కారణంగా హెచ్‌డీఎఫ్‌సీ బ్యాంకులో సంస్థను విలీనం చేశామని, ఈ విషయంలో రిజర్వ్‌ బ్యాంక్‌ తమకు కొంత తోడ్పాటు అందించిందని ఆయన చెప్పారు. విలీనమనేది సంస్థకు మేలు చేసేది కాగా, భారీ స్థాయి బ్యాంకులు ఉండటమనేది దేశానికే మంచి చేస్తుందని పరేఖ్‌ పేర్కొన్నారు. భవిష్యత్తులోనూ భారతీయ బ్యాంకులు ఇతర సంస్థల కొనుగోళ్ల ద్వారా మరింత బలోపేతం కావడంపై దృష్టి పెట్టాలని ఆయన సూచించారు. 44 ఏళ్ల చరిత్ర గల హెచ్‌డీఎఫ్‌సీ లిమిటెడ్‌ సంస్థ రివర్స్‌ మెర్జర్‌ ద్వారా అనుబంధ సంస్థ హెచ్‌డీఎఫ్‌సీ బ్యాంకులో విలీనమైన సంగతి తెలిసిందే. ఈ రివర్స్‌ మెర్జర్‌కి ముందు దాన్ని కొనుగోలు చేసేందుకు ఐసీఐసీఐ బ్యాంకు ప్రతిపాదన చేసింది. హెచ్‌డీఎఫ్‌సీ లిమిటెడ్‌ ఏర్పాటుకు ఐసీఐసీఐ బ్యాంక్‌ మాతృ సంస్థ ఐసీఐసీఐ లిమిటెడ్‌ ఆర్థికంగా తోడ్పాటు అందించింది.

ముంబై: సెంట్రల్ బ్యూరో ఆఫ్ ఇన్వెస్టిగేషన్ (సీబీఐ)పై బాంబే హైకోర్టు మెట్టికాయలు వేసింది. ఐసీఐసీఐ బ్యాంక్ మాజీ సీఈఓ చందా కొచ్చర్, ఆమె భర్త దీపక్ కొచ్చర్‌ అరెస్ట్ అంశంలో సీబీఐ అధికార దుర్వినియోగానికి పాల్పడుతుందనే కీలక వ్యాఖ్యలు చేసింది.   జస్టిస్ అనుజా ప్రభుదేశాయ్, జస్టిస్ ఎన్. ఆర్.బోర్కర్ డివిజన్ బెంచ్ 2024 ఫిబ్రవరి 6న కొచ్చర్ దంపతుల అరెస్టును చట్టవిరుద్ధమని పేర్కొంది. జనవరి 2023లో మరొక బెంచ్ వారికి బెయిల్ మంజూరు చేస్తూ మధ్యంతర ఉత్తర్వును ధృవీకరించింది. కోర్టు జారీ చేసిన సంబంధిత ఉత్తర్వుల్లో.. కొచ్చర్ దంపతులను అరెస్టు చేసిన సీబీఐ అధికారులు అందుకు తగ్గ ఆదారాల్ని చూపించలేకపోయారని, కాబట్టే సీబీఐ అధికారులు అధికార దుర్వినియోగానికి పాల్పడుతున్నారని భావిస్తున్నట్లు అనూజా ప్రభుదేశాయ్, ఎన్ఆర్ బోర్కర్ల ధర్మాసనం తెలిపినట్లు వెలుగులోకి వచ్చిన కోర్టు ఉత్తర్వులు ఉన్నట్లు తెలుస్తోంది.   అధికార దుర్వినియోగం తగదు ‘చట్టాన్ని పరిగణనలోకి తీసుకోకుండా ఇటువంటి సాధారణ అరెస్టులు అధికార దుర్వినియోగానికి సమానం’ అని కోర్టు పేర్కొంది. కానీ కొచ్చర్ దంపతులు విచారణకు సహకరించనందున అరెస్ట్ చేశామని సీబీఐ కోర్టుకు విన్నవించుకుంది. అయితే, విచారణ సమయంలో మౌనంగా ఉండే హక్కు నిందితులకు ఉందని.. సీబీఐ వాదనను అంగీకరించేందుకు కోర్టు నిరాకరించింది. కాగా, భారత రాజ్యాంగంలోని ఆర్టికల్ 20(3) ప్రకారం ఏ వ్యక్తినీ తనకు తాను వ్యతిరేకంగా సాక్ష్యం చెప్పమని నిర్భంధం చేయకూడదు. విచారణ చేస్తున్న సమయంలో అలా చేస్తున్నట్ల మౌనంగా ఉండే హక్కును కల్పిస్తుందని బాంబే హైకోర్టు స్పష్టం చేసింది.

ఐసీఐసీఐ బ్యాంక్‌ - వీడియో కాన్‌ లోన్‌ కుంభకోణం కేసులో ఐసీఐసీఐ బ్యాంక్‌ మాజీ సీఈఓ చందా కొచ్చర్‌ దంపతులకు భారీ ఊరట లభించింది. చందా కొచ్చర్‌ దంపతులకు ఇచ్చిన మధ్యంతర బెయిల్‌ సబబేనని స్పష్టం చేసింది.  రుణాల కేసులో సెంట్రల్ బ్యూరో ఆఫ్ ఇన్వెస్టిగేషన్ (సీబీఐ) తమని అక్రమంగా అరెస్ట్‌ చేసిందని, తమకు మధ్యంతర బెయిల్‌ మంజూరు చేయాలని కోరుతూ చందా కొచ్చర్‌, ఆమె భర్త దీపక్‌ కొచ్చార్‌లు కోర్టు మెట్లెక్కారు. విచారణ చేపట్టిన డివిజన్‌ బెంచ్‌ మధ్యంతర బెయిల్‌ను జారీ చేసింది.   తాజాగా, మధ్యంతర బెయిల్‌పై బాంబే హైకోర్టులో విచారణ జరిగింది. ఈ సందర్భంగా బాంబే హైకోర్టు న్యాయమూర్తులు అనూజా ప్రభుదేశాయ్,ఎన్‌ఆర్ బోర్కర్‌లతో కూడిన ధర్మాసనం.. ‘చందా కొచ్చర్‌ దంపతులకు ఇచ్చిన మధ్యంతర బెయిల్ ఆర్డర్‌ను ధృవీకరించాం’ అని తెలిపారు. అంతేకాదు, ఐసీఐసీఐ బ్యాంక్ మాజీ ఎండీ, సీఈఓ చందా కొచ్చర్, ఆమె భర్త దీపక్ కొచ్చర్‌లను సీబీఐ అరెస్ట్‌ చేయడం అక్రమమని బాంబే హైకోర్టు పేర్కొంది. 2023 జనవరి 9న కొచ్చర్ దంపతులకు ఇచ్చిన మధ్యంతర బెయిల్ సబబేనని స్పష్టం చేసింది. ఐసీఐసీఐ బ్యాంక్ క్రెడిట్ విధానాలను ఉల్లంఘించి వీడియోకాన్ సంస్థకు రుణాలు ఇచ్చారన్న కేసులో కొచ్చర్ దంపతులు అభియోగాలు ఎదుర్కొంటున్నారు. నేరం అంగీకరించకపోవడమంటే విచారణకు సహకరించడం లేదని అర్థం కాదని హైకోర్టు స్పష్టం చేసింది. కొచ్చర్ దంపతులకు బాంబే హైకోర్టు ఇచ్చిన మధ్యంతర బెయిల్‌ను సీబీఐ సుప్రీంకోర్టులో సవాల్ చేసింది. అయితే దీనిపై హైకోర్టులోనే తేల్చుకోవాలని సుప్రీంకోర్టు సీబీఐని ఆదేశించింది.   2022లో అరెస్ట్‌  వీడియోకాన్-ఐసీఐసీఐ బ్యాంకు రుణం కేసుకు సంబంధించి చందా కొచ్చర్‌ దంపతులను 2022 డిసెంబర్ 23న సీబీఐ అరెస్ట్ చేసింది. ఈ కేసులో కొచ్చర్‌తో పాటు వీడియోకాన్ గ్రూప్ వ్యవస్థాపకుడు వేణుగోపాల్ ధూత్‌ను కూడా సీబీఐ అదుపులోకి తీసుకుంది.  చందా కొచ్చర్‌ దంపతులతో పాటు  బ్యాంకింగ్ రెగ్యులేషన్ యాక్ట్, రిజర్వ్ బ్యాంక్ ఆఫ్ ఇండియా మార్గదర్శకాలు, బ్యాంక్ క్రెడిట్ పాలసీలను ఉల్లంఘించి ధూత్ ప్రమోట్ చేసిన వీడియోకాన్ గ్రూప్ కంపెనీలకు ఐసీఐసీఐ బ్యాంక్ రూ.3,250 కోట్ల క్రెడిట్ మంజూరు చేసిందని సీబీఐ ఆరోపించింది. నేరపూరిత కుట్రకు సంబంధించిన ఐపీసీ సెక్షన్ల కింద 2019లో నమోదైన ఎఫ్‌ఐఆర్‌లో వీడియోకాన్ ఇండస్ట్రీస్ లిమిటెడ్ తోపాటు ఈ కేసులో ప్రధాన నిందితులుగా ఐసీఐసీ బ్యాంక్‌ మాజీ సీఈఓ చందా కొచ్చర్, ఆయన భర్త దీపక్ కొచ్చర్‌లను సీబీఐ నిందితులుగా చేర్చింది.

దేశ బ్యాంకింగ్‌ రంగంలో ప్రత్యేక గుర్తింపుతో అగ్రస్థానానికి ఎదిగి సంచలనం సృష్టించిన ఐసీఐసీఐ బ్యాంక్‌ మాజీ సీఈవో, ఎండీ చందా కొచ్చర్ కుంభకోణంలో ఇరుక్కుని కేసులను ఎదుర్కొంటూ తన పదవీ విరమణ ప్రయోజనాలు ఇప్పించాలని కోర్టుల చుట్టూ తిరుగుతోంది.  ప్రైవేట్ రంగ దిగ్గజం ఐసీఐసీఐ బ్యాంక్‌ మాజీ సీఈవో, ఎండీ చందా కొచ్చర్ సుప్రీం కోర్టులోనూ తీవ్ర నిరాశే ఎదురైంది. బ్యాంకు నుంచి తన పదవీ విరమణ ప్రయోజనాలకు సంబంధించి చందా కొచ్చర్ దాఖలు చేసిన అప్పీల్‌ను స్వీకరించడానికి సుప్రీంకోర్టు డిసెంబర్‌ 8న నిరాకరించింది.  ఐసీఐసీఐ బ్యాంక్‌ నుంచి రిటైర్‌మెంట్‌ బెనిఫిట్స్‌ కోసం చందా కొచ్చర్‌ గతంలో బాంబే హైకోర్టులో మధ్యంతర పిటిషన్‌ వేయగా డివిజన్‌ ​​బెంచ్‌ తిరస్కరించింది. తాజాగా ఆ డివిజన్‌ బెంచ్‌ నిర్ణయాన్నే  సుప్రీంకోర్టు కూడా సమర్థించింది. కొచ్చర్ తరఫున సీనియర్ న్యాయవాది హరీష్ సాల్వే వాదనలు వినిపించారు. బాంబే హైకోర్టు తీర్పు అన్యాయమని, బ్యాంకు మొదట్లో కొచ్చర్‌కు రిటైర్‌మెంట్ ప్రయోజనాలను అందించేందుకు అంగీకరించి తర్వాత వెనక్కితీసుకుందని ఆయన గుర్తు చేశారు. అయితే ఈ పిటిషన్‌ను విచారణకు స్వీకరించేందుకు సుప్రీం కోర్టు నిరాకరించింది. ఈ ఏడాది మే నెలలో ఐసీఐసీఐ బ్యాంక్ నుంచి పదవీ విరమణ ప్రయోజనాలను కోరుతూ ఆమె చేసిన మధ్యంతర దరఖాస్తును తిరస్కరించిన బాంబే హైకోర్టు డివిజన్ బెంచ్ సింగిల్ జడ్జి ఉత్తర్వును అత్యున్నత న్యాయస్థానం సమర్థించింది.  ఐసీఐసీఐ బ్యాంక్ సీఈవో పదవి నుంచి చందా కొచ్చర్‌ తొలగింపును సమర్థించిన బాంబే హైకోర్టు దీనిపై ఆమె వేసిన పదవీ విరమణ ప్రయోజనాల కోసం​ ఆమె వేసిన మధ్యంతర పిటిషన్‌ను గతేడాది నవంబర్‌లో కొట్టేసింది. 2018లో ఆమె దక్కించుకున్న 6.90 లక్షల షేర్లతో ఆమెకు ఎటువంటి సంబంధం లేదని స్పష్టం చేసింది. 2018 మేలో తనపై విచారణ ప్రారంభం కాగానే చందా కొచ్చర్‌ సెలవుపై వెళ్లిపోయారు. ఆ తరువాత ముందస్తు రిటైర్‌మెంట్‌కు దరఖాస్తు చేసుకున్నారు. దీన్ని ఆమోదించిన ఐసీఐసీఐ బ్యాంక్‌ టెర్మినేషన్ ఫర్ కాజ్'గా పరిగణించి ఆర్బీఐ నుంచి అనుమతి కూడా కోరినట్లు తెలిపింది. కాగా 2019 జనవరిలో దాఖలు చేసిన చార్జిషీట్‌లో చందా కొచ్ఛర్ ఆధ్వర్యంలోని ఐసీఐసీఐ బ్యాంక్ క్రెడిట్ విధానాలను ఉల్లంఘించి వీడియోకాన్‌కు రుణాలు మంజూరు చేసిందని సీబీఐ పేర్కొంది. ఈ రుణాలు తరువాత నిరర్థక ఆస్తులుగా మారాయని, ఫలితంగా బ్యాంకుకు తప్పుడు నష్టం, రుణగ్రహీతకు, నిందితులకు తప్పుడు లాభం కలిగిందని సీబీఐ అభియోగం మోపిన సంగతి తెలిసిందే.

ఐసీఐసీఐ బ్యాంక్ మాజీ సీఈవో చందా కొచ్చర్, ఆమె భర్త దీపక్ కొచ్చర్‌లకు సుప్రీం కోర్ట్‌ నోటీసులు జారీ చేసింది. రుణ మోసం కేసులో బాంబే హైకోర్టు మంజూరు చేసిన మధ్యంతర బెయిల్‌ను సవాలు చేస్తూ సీబీఐ వేసిన పిటిషన్‌పై విచారించిన సుప్రీంకోర్టు దీనిపై చందా కొచ్చర్‌ దంపతుల స్పందన కోరింది. న్యాయమూర్తులు అనిరుద్ధ బోస్, బేల ఎం త్రివేదిలతో కూడిన ధర్మాసనం సీబీఐ పిటిషన్‌పై చందా కొచ్చర్‌ దంపతులకు నోటీసులు జారీ చేసి మూడు వారాల్లోగా స్పందనను తెలియజేయాలని కోరింది. సెక్షన్ 409 వర్తిస్తే.. సీబీఐ తరఫున హాజరైన అదనపు సొలిసిటర్ జనరల్ ఎస్‌వీ రాజు మాట్లాడుతూ, ఐపీసీలోని సెక్షన్ 409 (ప్రభుత్వ సేవకుడి నేరపూరిత నమ్మక ద్రోహం)ను పరిగణనలోకి తీసుకోకుండా, నేరానికి గరిష్టంగా ఏడేళ్ల జైలు శిక్ష పడుతుందని హైకోర్టు తప్పుగా భావించిందని తెలిపారు. ఈ సెక్షన్‌ ప్రకారం ముద్దాయిలకు పది సంవత్సరాల నుంచి జీవత ఖైదు శిక్ష పడే ఆస్కారం ఉందన్నారు. ప్రైవేట్ బ్యాంకు అయినప్పుడు ఐపీసీ సెక్షన్ 409 ఎలా వర్తిస్తుందని అదనపు సొలిసిటర్‌ జనరల్‌ను ధర్మాసనం ప్రశ్నించింది. బ్యాంకు ప్రైవేట్‌ కావచ్చు కానీ అందులో ప్రజాధనం ఉంటుందని అదనపు సొలిసిటర్‌ జనరల్‌ సమాధానమిచ్చారు. దీనిపై చందా కొచ్చర్‌ దంపతులకు నోటీసులు జారీ చేసి మూడు వారాల్లో సమాధానం చెప్పాలని ధర్మాసనం ఆదేశించింది. వీడియోకాన్-ఐసీఐసీఐ బ్యాంకు రుణాల మోసం కేసుకు సంబంధించి 2022 డిసెంబర్ 23న చందా కొచ్చర్‌ దంపతులను సీబీఐ అరెస్టు చేసింది. అయితే విచక్షణను ఉపయోగించకుండా యాంత్రికంగా చందా కొచ్చర్‌ దంపతులను సీబీఐ అరెస్ట్‌ చేసిందని ఆక్షేపిస్తూ బాంబే హైకోర్ట్‌ జనవరి 9న వారికి మధ్యంతర బెయిల్ మంజూరు చేసింది.

ఐసీఐసీఐ బ్యాంకులో ఆ సంస్థ మాజీ సీఈవో చందాకొచ్చర్‌ ముడుపుల వ్యవహారం మరోసారి తెరపైకి వచ్చింది. తనని ఐసీఐసీఐ బ్యాంకు సీఈవో పదవి నుంచి అక్రమంగా తొలగించారంటూ బాంబే హైకోర్టు ఇచ్చిన తీర్పును సవాలు చేస్తూ తాజాగా సుప్రీం కోర్టును ఆశ్రయించారు. రెండు వారాల తర్వాత ఆమె వ్యాజ్యాన్ని అత్యున్నత న్యాయస్థానం విచారించనుంది. లక్షల కోట్ల ఆస్తులు. వేల సంఖ్యలో ఉద్యోగులు. పురుషాధిక్య వ్యాపార రంగం. ప్రభుత్వ రంగ సంస్థలతో పోటీ. అయితేనేం అంకెలతో గారడీ చేసే ఐసీఐసీఐ బ్యాంక్‌ సీఈవోగా.. బ్యాంకర్లకు మెగస్టార్‌లా..తోటి ఉద్యోగులకు దేవుడిలా కనిపించిన చందాకొచ్చర్‌ ఇప్పుడు కోర్టుల చుట్టూ తిరుగుతున్నారు.  2018లో  అప్పట్లో చందాకొచ్చర్‌ క్విడ్‌ ప్రోకో’ వ్యవహారం వెలుగులోకి రావడంతో అక్టోబర్‌ 4, 2018లో ఐసీఐసీఐ బ్యాంక్‌ చందాకొచ్చర్‌తో స్వచ్ఛంద రాజీనామా చేయించింది. 4 నెలల తర్వాత బాంబే హైకోర్టు సైతం బ్యాంక్‌ యాజమాన్యం తీసుకున్న నిర్ణయం సరైందేనని, చందా కొచ్చర్‌ సీఈవో పదవిలో కొనసాగేందుకు అనర్హులుగా తీర్పిచ్చింది. బాంబే హైకోర్టు తీర్పును సవాలు చేస్తూ చందా కొచ్చర్‌ సుప్రీం కోర్టు తలుపు తట్టారు.   పలు నివేదికల ప్రకారం..  అదే సమయంలో, తనకు రావాల్సిన రిటైర్మెంట్‌ బెన్ఫిట్స్‌, ఎంప్లాయి స్టాక్‌ ఆప్షన్‌ (ఈఎస్‌ఓపీఎస్‌) అందిచాలని కోరింది. టెర్మినేషన్‌ రద్దు చేయాలని సుప్రీం కోర్టుకు విజ్ఞప్తి చేశారు. అయితే, చందా కొచ్చర్‌ ఆమె భర్త దీపక్‌ కొచ్చర్‌, అతని కంపెనీకి లాభం చేకూర్చిన వీడియోకాన్ గ్రూప్‌కు క్విడ్ ప్రోకో లోన్‌లు రూ. 3,250 కోట్లు ఇచ్చారంటూ ఆరోపణలు వచ్చాయి. దీంతో ఐసీఐసీఐ బ్యాంక్‌ డైరెక్టర్లు మాజీ సీఈవోకి ఎంప్లాయి స్టాక్‌ ఆప్షన్‌ (ఈఎస్‌ఓపీఎస్‌) తోపాటు వేతనాన్ని నిలిపివేసింది. ఇప్పుడు అదే అంశాన్ని చందా కొచ్చర్‌ సుప్రీం కోర్టుకు చేసిన అప్పీల్‌లో వివరించారు.  ఐసీఐసీఐ బ్యాంక్‌ విఫలం ఐసీఐసీఐ బ్యాంక్‌ తన పదవీ విరమణ తర్వాత సంస్థ అందించే ప్రయోజనాలను అడ్డుకునేందుకు చేస్తున్న ప్రయత్నాల్ని నిరోధించాలని సుప్రీంకు విన్నవించారు. తన వద్ద ఉన్న 6,90,000 షేర్ల అమ్మకాలు, కొనుగోళ్లపై అనుమతించాలని అన్నారు. స్టాక్స్‌ డీల్‌ చేసే వీలు లేదని తెలిపేలా ఐసీఐసీఐ యాజమాన్యం వద్ద ఎలాంటి చట్టపరమైన ఆధారాలు లేవని హైకోర్టులో నిరూపించుకోవడంలో విఫలమైందని గుర్తు చేశారు.  వేధింపులకు గురవుతున్నారు ఒకప్పుడు ఫోర్బ్స్ మ్యాగజైన్ రూపొందించిన ప్రపంచంలోని 100 మంది అత్యంత శక్తివంతమైన మహిళల జాబితాలో చోటును దక్కించుకున్నారని, అత్యున్నత పౌర పురస్కారం పద్మభూషణ్ అవార్డును పొందిన తాను ఈ కేసుల కారణంగా  62 ఏళ్ల వయస్సులో తీవ్రమైన మనోవేదకు గురవుతున్నట్లు అప్పీల్‌లో ఆవేదన వ్యక్తం చేశారు. అరెస్ట్‌.. బెయిల్‌పై విడుదల చందా కొచ్చర్‌ సీఈవోగా ఉన్నప్పుడు ఐసీఐసీఐ బ్యాంకు నుంచి వీడియోకాన్‌ కంపెనీ రూ.3,200 కోట్లకుపైగా లోన్‌ తీసుకుంది. ఈ లోన్‌ మంజూరు సమయంలో చందా కొచ్చర్‌, ఆమె భర్త దీపక్‌ కొచ్చర్‌ అక్రమాలకు పాల్పడినట్లు ఆరోపణలున్నాయి. దీంతో వీరిద్దరినీ ఈనెల 23న సీబీఐ అరెస్టు చేసిన విషయం తెలిసిందే. ఈ కేసులో వేణుగోపాల్‌ ధూత్‌, దీపక్‌ కొచ్చర్‌కు చెందిన న్యూపవర్‌ రెన్యూవబుల్స్‌ (ఎన్‌ఆర్‌ఎల్‌), సుప్రీమ్‌ ఎనర్జీ, వీడియోకాన్‌ ఇంటర్నేషనల్‌ ఎలక్ట్రానిక్స్‌ లిమిటెడ్‌, వీడియోకాన్‌ ఇండస్ట్రీస్‌ లిమిటెడ్‌తో పాటు చందా కొచ్చర్‌లను సీబీఐ ఎఫ్‌ఐఆర్‌లో నిందితులుగా పేర్కొంది. దీపక్‌ కొచ్చర్‌ దంపతులతో పాటు వేణుగోపాల్‌ ధూత్‌లు డిసెంబర్ 2022లో అరెస్టయ్యారు, అయితే ప్రస్తుతం బెయిల్‌పై బయట ఉన్నారు. కాగా, ఇండియన్‌ బ్యాంకింగ్‌ ట్రెండ్‌ను మార్చేసి.. ఆ రంగాన్ని పరుగులు పెట్టించారు. ఎవరి అంచనాలకు అందకుండా దూసుకెళ్లారు. కానీ ఇప్పుడు కరువైన పలకరింపులు.. కోర్టులు,కేసులు, అరెస్ట్‌లతో ఆమె జీవితం భారం కావడంతో చందా కొచ్చర్‌ అభిమానులు విచారం వ్యక్తం చేస్తున్నారు.  చదవండి👉 చందా కొచ్చర్‌ అక్రమ సామ్రాజ్య పునాదులు కదిలాయి

ఐసీఐసీఐ బ్యాంక్‌ మాజీ సీఈవో చందా కొచ్చర్‌ వీడియోకాన్‌ ముడుపుల వ్యవహారంలో బాంబే హైకోర్ట్‌లో విచారణ జరిగింది. ఈ విచారణ సందర్భంగా చందా కొచ్చర్‌పై తాము దాఖలు చేసిన ఛార్జ్‌షీట్‌ను పరిగణలోకి తీసుకోవాలని కోర్ట్‌ను కోరింది.  కొచ్చర్‌ రూ.64 కోట్ల బ్యాంక్‌ నిధుల్ని వ్యక్తిగత అవసరాల కోసం వినియోగించుకున్నారని కోర్ట్‌కు సీబీఐ తెలిపింది. చట్టవిరుద్ధంగా బ్యాంక్‌ సొమ్మును దుర్వినియోగం చేశారనే ఆధారాలున్నాయని పేర్కొంది. అంతేకాదు, తమ విచారణలో రూ.64 కోట్లను కొచ్చర్‌ ఆమె భర్త దీపక్‌ కొచ్చర్‌కు చెందిన న్యూ పవర్‌ రెన్యూవబుల్‌తో పాటు వీడియోకాన్‌ కంపెనీలోకి మళ్లించినట్లు ఆధారాలున్నాయని తెలిపింది.  ఈ సందర్భంగా సీబీఐ తరపున ప్రత్యేక పబ్లిక్ ప్రాసిక్యూటర్ ఎ లిమోసిన్.. చందా కొచ్చర్ కొంతమంది వ్యక్తులతో కుమ్మక్కై రుణాలకు అనర్హమైన వీడియోకాన్‌ కంపెనీకి లోన్స్‌ ఇచ్చేలా తన పదవిని దుర్వినియోగం చేసినట్లు కోర్ట్‌ ఎదుట వాదించారు. దీంతో పాటు, 2016లో కొచ్చార్‌ ముంబైలోని చర్చ్‌గేట్‌ ప్రాంతంలో ఉన్న సీసీఐ చాంబర్స్‌లోని రూ.5.3 ​కోట్ల విలువైన ఫ్లాట్‌కు కేవలం రూ.11లక్షలే చెల్లించారని అన్నారు. 2021 నవంబర్‌ నెలలో అదే బిల్డింగ్‌లో ఓ ఫ్లోర్‌కు చందా కొచ్చర్ కుమారుడు అర్జున్‌ కొచ్చర్‌ రూ.19.11 కోట్లు వెచ్చించి కొనుగోలు చేసినట్లు సీబీఐ కోర్టుకు వివరించింది.  11,000 పేజీల ఛార్జ్‌ షీట్‌  ఐసీఐసీఐ బ్యాంక్‌ నుంచి రూ.3,250 కోట్ల రుణాన్ని వీడియోకాన్‌ గ్రూపు పొందిన తర్వాత.. అందులో కోట్లాది రూపాయలను దీపక్‌ కొచ్చర్‌ నిర్వహించే న్యూపవర్‌లో, వీడియోకాన్‌ ప్రమోటర్‌ వేణుగోపాల్‌ ధూత్‌ పెట్టుబడులుగా పెట్టినట్లు సీబీఐ ఆరోపిస్తోంది. కేసులో భాగంగా ఈ ఏడాది ఏప్రిల్‌లో చందా కొచ్చర్‌, దీపక్‌ కొచ్చర్‌, వేణుగోపాల్‌ ధూత్‌లపై సీబీఐ 11,000 చార్జిషీట్‌ దాఖలు చేసింది. జులై 3కి వాయిదా తాజాగా,ఆ చార్జిషీట్‌పై విచారణ జరిగింది. విచారణలో కొచ్చర్‌పై తాము దాఖలు చేసిన ఛార్జిషీట్‌ను పరిగణలోకి తీసుకోవాలని సీబీఐ కోర్ట్‌ను కోరింది. ఇరువురి వాదనలు విన్న బాంబే హైకోర్ట్‌ కేసు తదుపరి విచారణను జూలై 3కి వాయిదా వేసింది. సీబీఐ ప్రత్యేక న్యాయమూర్తి ఎస్పీ నాయక్ నింబాల్కర్ ఎదుట లిమోసిన్ తన వాదనలు కొనసాగించనున్నారు. 2017లోనే  తెరపైకి క్విడ్‌ ప్రో కో వివాదం.. వీడియోకాన్‌ గ్రూప్‌నకు రుణాల మంజూరుకు చందా కొచ్చర్‌ తోడ్పడినందుకు గాను ప్రతిగా ఆమె భర్త దీపక్‌ కొచర్‌కు చెందిన న్యూపవర్‌లో తన సుప్రీం ఎనర్జీ సంస్థ ద్వారా ధూత్‌ రూ.64 కోట్లు ఇన్వెస్ట్‌ చేసినట్లు ఆరోపణలున్నాయి. 2017 డిసెంబర్‌లో సీబీఐ ఈ వివాదంపై ప్రాథమిక విచారణ ప్రారంభించింది. బ్యాంక్‌ నియమ, నిబంధనలకు విరుద్ధంగా ఈ రుణాలు మంజూరైనట్లు ఆరోపణలు ఉన్నాయని సీబీఐ వర్గాలు పేర్కొన్నాయి. ఇలా వీడియోకాన్‌ గ్రూప్‌నకు ఇచ్చిన రుణాల్లో అధిక భాగం లోన్‌లు మొండిబాకీలుగా మారడంతో బ్యాంక్‌కు దాదాపు రూ.1,730 కోట్ల మేర నష్టం వాటిల్లినట్లు సీబీఐ వర్గాలు వివరించాయి.  చివరిగా :: సీబీఐ నివేదికల ప్రకారం..ఆగస్ట్‌ 6, 2009లో వీడియోకాన్‌ ఎలక్ట్రానిక్స్‌ ఇంటర్నేషనల్‌ లిమిటెడ్‌కు ఐసీఐసీఐ బ్యాంక్‌ సీఈవోగా ఉన్న చందా కొచ్చార్‌ లోన‍్లు ఇచ్చారని, అదే ఏడాది సెప్టెంబర్‌ 7 ఆ రుణాల్ని వీడియోకాన్‌కు చెల్లించినట్లు తేలింది. చదవండి👉 ‘అప్పుడు మెగాస్టార్‌.. ఇప్పుడు ఆర్థిక నేరాలతో అరెస్ట్‌’

ఐసీఐసీఐ బ్యాంక్‌ మాజీ సీఈవో చందా కొచ్చర్‌, ఆమె భర్త చందా కొచ్చర్‌ అరెస్ట్‌ అక్రమమంటూ బాంబే హైకోర్ట్‌ తీర్పు వెలువరించింది. దీంతో మంగళవారం చందా, దీపక్‌ కొచ్చర్‌లు జైలు నుంచి విడుదలయ్యారు. నిబంధనలకు విరుద్ధంగా వీడియో కాన్‌ గ్రూప్‌కు రూ.3వేల కోట్ల రుణం మంజూరు చేశారంటూ గతేడాది డిసెంబర్‌ 23న సీబీఐ అధికారులు కొచ్చర్‌ దంపతుల్ని అరెస్ట్‌ చేశారు. జనవరి 25న కొచ్చర్‌ల కుమారుడు వివాహం జరగాల్సి ఉండగా.... అంతకంటే ముందే వారిద్దరి అరెస్ట్‌ సరైంది కాదంటూ కోర్టు తీర్పు ఇవ్వడంతో భారీ ఊరట లభించినట్లైంది.  కోర్టు తీర్పులో ఏముందంటే? కేసు నమోదు చేసిన నాలుగేళ్ల తర్వాత ఆ జంటను అరెస్టు చేయడానికి గల కారణాన్ని అరెస్ట్ మెమోలలో పేర్కొనలేదని కోర్టు నిన్న తెలిపింది. "అరెస్ట్ మెమోలలో పేర్కొన్న పిటిషనర్లను అరెస్టు చేయడానికి కారణం తప్పనిసరి నిబంధనలను స్పష్టంగా ఉల్లంఘించడమే" అని పేర్కొంది. నిందితులు చేసిన తప్పు ఒప్పుకోకపోతే.. వాళ్లు విచారణకు సహకరించలేమని చెప్పలేమని తెలిపింది.  అవినీతి నిరోధక చట్టం కింద తమ అరెస్టు చట్టవిరుద్ధమని, దర్యాప్తు ప్రారంభించేందుకు చట్టంలోని సెక్షన్ 17ఎ కింద అనుమతి తప్పనిసరి అని, ఈ దర్యాప్తును ప్రారంభించడానికి ఏజెన్సీకి అలాంటి అనుమతి లేదని కొచ్చర్‌ దంపతులు గతంలో కోర్టు ముందు వాదించారు. కాగా, ఇప్పటి ఐసీఐసీఐ రుణం కేసులో వీడియోకాన్‌ గ్రూప్‌ చైర్మన్‌ వేణుగోపాల్‌ ధూత్‌ను కూడా సీబీఐ అరెస్ట్‌ చేసిన విషయం తెలిసిందే.  చదవండి👉 పద్మభూషణ్ నుంచి.. కటకటాల్లోకి, ‘ఎంత పనిచేశావయ్యా అరవింద్‌’

ఐసీఐసీఐ బ్యాంక్‌ లోన్‌ కుంభకోణంలో వీడియోకాన్‌ గ్రూప్‌ అధినేత వేణుగోపాల్‌ ధూత్‌ను సీబీఐ అధికారులు అరెస్ట్‌ చేసిన విషయం తెలిసిందే. అరెస్ట్‌ అనంతరం ఎన్‌ఫోర్స్‌మెంట్‌ అధికారులు లోన్‌ కేసులో ప్రధాన నిందితులైన చందా కొచ్చర్‌, దీపక్‌ కొచ్చర్‌తో పాటు వేణుగోపాల్‌ ధూత్‌ స్టేట్మెంట్‌ను రికార్డ్‌ చేస్తున్నారు. ఈ సందర్భంగా అధికారులు నిందితుల మధ్య జరిగిన లావాదేవీలను పరిశీలించగా అందులో కొన్ని సంచలన విషయాలు వెలుగులోకి వచ్చాయి.  కొచ్చర్‌ దంపతులకు లంచాలు ఎలా ఇచ్చారంటే? ఐసీఐసీఐ బ్యాంక్‌ సీఈవోగా చందా కొచ్చర్‌ ఆర్‌బీఐ బ్యాంక్‌లకు విధించిన బ్యాంకింగ్‌ రెగ్యూలేషన్‌ యాక్ట్‌, క్రెడిట్‌ పాలసీ (రుణ) నిబంధనలకు విరుద్ధంగా వీడియోకాన్‌ గ్రూప్‌ ప్రమోటర్‌ వేణుగోపాల్‌ ధూత్‌కు రూ.3250 కోట్లలోన్‌ మంజూరు చేశారు. అందుకు గాను ధూత్‌.. కొచ్చర్‌ కుటుంబానికి లంచాలు ఇచ్చినట్లు అధికారుల దర్యాప్తులో తేలినట్లు తెలుస్తోంది.   వడ్డీతో పాటు షేర్‌ కూడా  రుణం మంజూరు తర్వాత భార్య భర్తలైన చందాకొచ్చర్‌, దీపక్‌ కొచ‍్చర్‌కు వేణుగోపాల్‌ ధూత్‌ల మధ్య సన్నిహిత సంబంధాలు ఏర్పడ్డాయి. రుణం విషయంలో అనుకూలంగా వ్యవహరించారనే కారణంగా ధూత్‌ తన వీడియోకాన్‌ గ్రూప్‌లో ఆ సమయంలో ఐసీఐసీఐ బ్యాంక్‌ సీఈవోగా చందాకొచ్చర్‌కు షేర్‌ ఇవ్వడంతో పాటు సంస్థ నుంచి వచ్చిన లాభాల్లో అధిక మొత్తంలో వడ్డీ ఇచ్చారు. పైగా తన ఖరీదైనా ప్లాటులో నివాసం ఉండేలా కొచ్చర్‌ దంపతులు ఇచ్చారు.  అప్పు తీర్చేందుకు అప్పుగా రూ.300 కోట‍్ల రుణం  సీఈవో పదవితో పాటు ఐసీఐసీఐ బ్యాంక్‌ శాంక్షనింగ్ కమిటీ చైర్‌ పర్సన్‌గా ఉన్న చందా కొచ్చర్‌ అధికార దుర్వినియోగానికి పాల్పడ్డారు. ఆ పదవిలో(శాంక్షనింగ్  కమిటీ చైర్ పర్సన్‌ గా) ఉన్న ఆమె బ్యాంక్‌ యాజమాన్యానికి సమాచారం ఇవ్వకుండా వీడియోకాన్ ఇంటర్నేషనల్ ఎలక్ట్రానిక్స్ లిమిటెడ్ (వీఐఎల్)కు రూ.300కోట్ల రుణం మంజూరు చేసింది. ఆ రుణాన్ని వీడియోకాన్‌ గతంలో అదే బ్యాంక్‌ నుంచి తీసుకున్న రుణాన్ని చెల్లించేందుకు.. కొత్తగా వందల కోట్లను రుణాన్ని ఇచ్చింది. ఆ తర్వాత శాక్షనింగ్‌ కమిటీ పదవి నుంచి తప్పుకుంది.   రూ.64కోట్లు ముడుపులు అందుకు ప్రతిఫలంగా వీడియోకాన్‌ అధినేత వేణుగోపాల్‌ ధూత్‌..చందా కొచ్చర్‌ భర్త దీపక్‌ కొచ్చర్‌కు చెందిన న్యూ పవర్‌ రెన్యూవబుల్స్‌ ప్రైవేట్‌ లిమిటెడ్‌ (nrpl) సంస్థ నిర్వహణ ఖర్చుల నిమిత్తం రూ.64 కోట్లు ముడుపులుగా ఇచ‍్చినట్లు సీబీఐ తన ఇన్వెస్టిగేషన్‌లో గుర్తించింది.  ఆ రూ.64 కోట్లతో దీపక్‌ కొచ్చర్‌ 33.15 మెగా వాట‍్ల కెపాసిటీతో  విండ్‌ ఫార్మ్‌ ప్రాజెక్ట్‌ కావాల్సిన భారీ ఎత్తున చిన్న చిన్న విండ్‌ టర్బైన్లను కొనుగోలు చేశారు.  రూ.5.25 కోట్ల ప్లాట్‌ ఖరీదు రూ.11 లక్షలే  చందా కొచ్చర్, ఆమె కుటుంబం వేణుగోపాల్‌ ధూత్‌ నుంచి అన్నీ రకాల లబ్ధి పొందినట్లు దర్యాప్తు అధికారులు విచారణలో స్పష‍్టమైంది. పైన పేర్కొన్నుట్లుగా రూ.64 కోట్లతో పాటు ముంబైలోని సీసీఐ ఛాంబర్స్‌లో ఉన్న రూ.5.25 కోట్ల ఖరీదైన ఫ్లాటును 1996 నుంచి 2016 వరకు ఫ్రీగా వినియోగించుకున్నారు. ఆ తర్వాత అదే ప్రాపర్టీని రూ.11లక్షలకు కొనుగోలు చేసిన వీడియోకాన్‌ గ్రూప్‌ తెలిపింది. ఈ లావాదేవీలు 2016 లో జరిగాయి. కానీ ఈ ప్లాట్‌ కొనుగోలు మాత్రం సంవత్సరాల ముందు నుంచి ఒప్పందం జరిగినట్లు సమాచారం.

ఐసీఐసీఐ రుణం కేసులో వీడియోకాన్ గ్రూప్ చైర్మన్ వేణుగోపాల్ ధూత్‌ను సీబీఐ అధికారులు అరెస్ట్‌ చేశారు. సీఈవోగా బాధ్యతలు నిర్వర్తించే సమయంలో వీడియోకాన్ గ్రూప్‌కు ఇచ్చిన రూ. 3వేల కోట్లుకు పైగా రుణంలో అవకతవకలు జరిగాయని ఆరోపించిన కేసులో ఐసీఐసీఐ బ్యాంక్ మాజీ సీఈవో చందా కొచ్చర్, ఆమె భర్త దీపక్ కొచ్చర్‌లను సీబీఐ అరెస్ట్‌ చేసింది. వారిద్దరిని అరెస్ట్‌ చేసిన రెండు రోజుల తర్వాత ఇవాళ (సోమవారం) వేణుగోపాల్‌ ధూత్‌ను అదుపులోకి తీసుకున్నారు.  నేరపూరిత కుట్ర ఈ సందర్భంగా నేరపూరిత కుట్రకు పాల్పడ్డారని ఆరోపిస్తూ సీబీఐ ఐపీసీ సెక్షన్ల కింద ఎఫ్‌ఐఆర్‌ నమోదు చేసింది. దీపక్ కొచ్చర్, సుప్రీం ఎనర్జీ, వీడియోకాన్ ఇంటర్నేషనల్ ఎలక్ట్రానిక్స్ లిమిటెడ్, వీడియోకాన్ ఇండస్ట్రీస్ లిమిటెడ్ నిర్వహిస్తున్న నూపవర్ రెన్యూవబుల్స్ (ఎన్‌ఆర్‌ఎల్) కంపెనీలతో పాటు కొచ‍్చర్‌ దంపతులతో పాటు, వేణుగోపాల్‌ ధూత్‌ను నిందితులుగా పేర్కొంది.   రూ.40వేల కోట్లు రుణంలో ఇదొక భాగం కేసులో అభియోగాల ప్రకారం.. 2010 - 2012 మధ్యకాలంలో వీడియోకాన్ గ్రూప్‌కు బ్యాంకు రుణం మంజూరు చేసిన నెలల తర్వాత, క్విడ్ ప్రోకోలో భాగంగా వేణుగోపాల్ ధూత్ న్యూపవర్ రెన్యూవబుల్స్‌లో రూ. 64 కోట్లు పెట్టుబడి పెట్టాడు. అంతేకాదు చందా కొచ్చర్‌ తన పదవిని దుర్వినియోగం చేసి వీడియోకాన్‌కు రూ.300 కోట్లు మంజూరు చేసినందుకు ధూత్ నుండి తన భర్త దీపక్‌ కొచ్చర్‌కు లబ్ధి చేకూరేలా వ్యవహరించినట్లు సీబీఐ పేర్కొంది. కాగా, స్టేట్ బ్యాంక్ ఆఫ్ ఇండియా నేతృత్వంలోని 20 బ్యాంకుల కన్సార్టియం నుండి వీడియోకాన్ పొందిన రూ. 40వేల కోట్ల రుణంలో ఇది భాగం . పదవి నుంచి వైదొలగి కన్స్యూమర్ ఎలక్ట్రానిక్స్,ఆయిల్ అండ్ గ్యాస్ ఎక్స్‌ప్లోరేషన్ కంపెనీ వీడియోకాన్ గ్రూప్‌కు అనుకూలంగా ఉన్నారనే ఆరోపణలపై ఐసీఐసీఐ బ్యాంక్ సీఈవో, మేనేజింగ్ డైరెక్టర్‌గా చందా కొచర్‌ 2018 అక్టోబర్‌లో కీలక బాధ్యతల నుంచి వైదొలిగారు.  నేను ఎలాంటి తప్పు చేయలేదు బ్యాంకింగ్ రెగ్యులేషన్ యాక్ట్, ఆర్‌బీఐ మార్గదర్శకాలు,బ్యాంక్ క్రెడిట్ పాలసీని ఉల్లంఘించి వీడియోకాన్ గ్రూప్ కంపెనీలకు ఐసీఐసీ బ్యాంక్‌ రూ. 3,250 కోట్ల మేరకు రుణాలు మంజూరు  చేసినట్లు సీబీఐ ఆరోపించింది. చందా కొచ్చర్‌ మాత్రం రుణాల విషయంలో తాను ఎలాంటి తప్పు చేయలేదని కొట్టిపారేశారు. చదవండి👉 పద్మభూషణ్ నుంచి.. కటకటాల్లోకి, ‘ఎంత పనిచేశావయ్యా అరవింద్‌’

వేగంగా డబ్బు సంపాదించడం పెద్ద కష్టం కాకపోవచ్చు. కానీ కథ అడ్డం తిరిగినప్పుడు కళ్లముందున్న డబ్బు కూడా చేతికొచ్చేలోగా ఆవిరైపోవచ్చు. అప్పుడు చేసిన పాపాలకు ముసుగేసే టైం దొరక్కపోవచ్చు. కష్టపడకుండా వచ్చిన సొమ్మును కాపాడుకోవడం కూడా కష్టమేనని నిరూపించిన సంఘటన చందాకొచ్చర్‌ స్కాం. కాస్త తెలివితేటలతో బ్యాంకింగ్‌ వ్యవస్థను అడ్డంగా వాడుకోవచ్చని బయటపెట్టిన ఈ కుంభకోణమే చందా కొచ్చర్‌ స్కాం.  ఏదైనా సాధించడం ఎంత కష్టమో. దాన్ని నిలబెట్టుకోవడం అంతకంటే కష్టం. పవర్‌ఫుల్‌ బ్యాంకర్‌గా పేరు తెచ్చుకున్న చందా కొచ్చర్‌ పొజీషన్‌ కూడా అదే. లక్షల కోట్ల ఆస్తులు. వేల సంఖ్యలో ఉద్యోగులు. పురుషాధిక్య వ్యాపార రంగం. ప్రభుత్వ రంగ సంస్థలతో పోటీ. అయితేనేం అంకెలతో గారెడీ చేసే ఐసీఐసీఐ బ్యాంక్‌ సీఈవోగా.. బ్యాంకర్లకు మెగస్టార్‌లా..తోటి ఉద్యోగులకు దేవుడిలా కనిపించారు. ఇండియన్‌ బ్యాంకింగ్‌ ట్రెండ్‌ను మార్చేసి.. ఆ రంగాన్ని పరుగులు పెట్టించారు. ఎవరి అంచనాలకు అందకుండా దూసుకెళ్లారు. కానీ కొంతమందిని కొంతకాలమే మోసం చేయొచ్చు. కానీ ఎక్కువ మందిని ఎక్కువ కాలం మోసం చేయలేరు. సీఈవోగా ఐసీఐసీఐ బ్యాంక్‌ను ఏలిన కొచ్చర్‌ కూడా అలాగే దొరికి పోయారు. బ్యాంకింగ్‌ రంగంలో నడిచిన కరప్షన్‌ ఏపీసోడ్‌ మొత్తం బయటపడింది. చందా కొచ్చర్‌ అక్రమసామ్రాజ్యం పునాదులతో కదిలాయి.  సీబీఐ అరెస్ట్‌ ఒకప్పుడు మ్యాగజైన్ కవర్‌ పేజీల మీద మెరిసిన స్టార్ చందా కొచ్చర్‌తో పాటు ఆమె భర్త దీపక్ కొచ్చర్‌ను సెంట్రల్ బ్యూరో ఆఫ్ ఇన్వెస్టిగేషన్ (సిబిఐ) అరెస్టు చేసింది. వేణుగోపాల్ ధూత్‌కి చెందిన వీడియోకాన్ గ్రూపునకు ఇచ్చిన రూ. 3,000 కోట్లకు పైగా రుణాల విషయంలో అవకతవకలు జరిగాయంటూ అరెస్టు చేశారు. ఇంతకీ ఈ ముడుపుల వ్యవహారం ఎలా వెలుగులోకి వచ్చింది? ఎస్సార్‌ గ్రూప్‌, వీడియోకాన్‌ గ్రూప్‌లో లాంచాల భాగోతం ఎలా వెలుగులోకి వచ్చింది.    ఇచ్చుకో.. పుచ్చుకో 2010లో ఐసీఐసీఐ బ్యాంక్‌ ఎస్సాఆర్‌ స్టీల్‌కి 530 మిలియన్‌ డాలర్లు అప్పిచ్చింది. ఎస్సార్‌ ఆయిల్‌కి 350 మిలియన్‌ డాలర్ల అప్పును పువ్వులో పెట్టి ఇచ్చింది. ఎస్సార్‌ గ్రూప్‌లోని రెండు కంపెనీలకు అప్పులిచ్చిన తర్వాత లంచాల భాగోతం మొదలైంది. అంటే 2010 నుంచి 2012 మధ్య కాలంలో చందా కొచ్చర్‌ భర్త దీపా కొచ్చర్‌ కంపెనీలో పెట్టుబడులను అంటే లంచాల ద్వారా పంపించారు.  ‘ఎంత పనిచేశావయ్యా అరవింద్‌’ రవి రూయా అల్లుడు నిషాంత్‌ కనోడియాకు చెందిన ఫస్ట్‌ హ్యాండ్‌ హోల్డింగ్స్‌ నాలుగు విడతులుగా న్యూ పవర్‌లో రూ.325 కోట్ల షేర్లను కొనుగోలు చేశారు. శశిరూయా అల్లుడు అనిరుధ్‌ భువాల్కాకు చెందిన ఏ1 మోటార్స్‌ అనే సంస్థ ఏంఎండబ్ల్యూ అనే మరో సంస్థతో న్యూపవర్‌ టెక్నాలజీస్‌ను కొనుగోలు చేసిందని అరవింద్‌ గుప్తా అనే ఇన్వెస్టర్‌, సామాజిక కార్యకర్త అనుమానం వ్యక్తం చేశారు. అయితే ఈ విలువ ఎంతన్నది బయటకు రాలేదు. అంటే ఐసీఐసీఐ బ్యాంక్‌ నుంచి రెండు కంపెనీలకు అప్పులందాయి. అడిగినంత అప్పు ఇచ్చినందుకు ప్రతిఫలంగా న్యూపవర్‌కు వెళ్లింది.  చదవండి👉ఇదేందయ్యా..ఇది నేను చూడలా.. ‘ఓలా’ ఎలక్ట్రిక్‌ స‍్కూటర్‌ వైరల్‌! తీగలాగితే డొంక కదలింది అప్పులిచ్చిన చందా కొచ్చర్‌, లంచం తీసుకున్న దీపా కొచ్చర్‌ భార్యభర్తలు. అప్పులు తీసుకున్న రుయా సోదరులకు పెట్టుబడులు పెట్టిన అనిరుధ్‌, నిషాంత్‌ అల్లుళ్లు. ఈ వ్యవహారమే క్విడ్‌ ప్రోకో అని రిజిష్టార్‌ ఆఫీస్‌ కంపెనీస్‌ నుంచి సేకరించిన సమాచారం తన దగ్గరుందని విజిల్‌ బ్లోయర్‌  అరవింద్‌ గుప్తా సంచలన ఆరోపణలు చేశారు. ఆ ఆరోపణలు కొనసాగుతుండగా చందా కొచ్చర్‌ వీడియోకాన్‌కు రూ.3 వేల కోట్లకు పైగా ఇచ్చిన రుణం ఇచ్చినందుకు గాను తీసుకున్న ముడుపుల వ్యవహారం వెలుగులోకి వచ్చింది. దీంతో చందా కొచ్చర్‌ చీకటి సామ్రాజ్యం ప్రపంచానికి తెలిసింది. తీగలాగితే డొంక కదిలిందిన్నట్లుగా వీడియో కాన్‌ గ్రూప్‌ల వద్ద నుంచి తీసుకున్న ముడుపులు దెబ్బకు గతంలో ఎస్సాఆర్‌ గ్రూప్‌ వ్యవహారం బయటకొచ్చింది.        కొచ్చర్‌ భాగోతంపై ప్రధానికి లేఖ వీడియోకాన్ గ్రూప్‌లో పెట్టుబడిదారు అరవింద్ గుప్తా. ఆ అరవింద్‌ గుప్తా 2016లో ఐసీఐసీఐ బ్యాంక్‌, వీడియోకాన్‌ గ్రూప్‌ల మధ్య జరిగిన లావాదేవీలపై అనేక అనుమానాలు వ్యక్తం చేశారు. కొచ్చర్‌ భాగోతాలపై అదే ఏడాది మార్చిలో ప్రధాన మంత్రి కార్యాలయానికి లేఖ రాశారు. ఆ లేఖతో రంగంలో దిగిన ఆర్‌బీఐ దర్యాప్తు చేసింది.  చందా కొచర్ - దీపక్ కొచ్చర్ అరెస్ట్‌:   అక్టోబరు 2016: చందా కొచ్చర్‌పై ఆరోపణలు వెల్లు వెత్తిన తర్వాత  ఐసీఐసీఐ బ్యాంక్‌లో రుణ అక్రమాలు హైలెట్‌ అయ్యాయి. రంగంలోకి దిగిన ఆర్‌బీఐ దర్యాప్తు చేసింది కానీ.. కొచ్చర్‌ ముడుపుల వ్యవహారాన్ని ఎటూ తేల్చ లేకపోయింది.   మార్చి 2018: 31లోన్ తీసుకున్న బ్యాంక్‌ అకౌంట్‌లలో  సమస్యలను గుర్తించడంలో జాప్యం జరుగుతోందని ఆరోపిస్తూ బ్యాంక్,  ఆర్‌బీఐకు విజిల్‌ బ్లోయర్ అరవింద్‌ గుప్తా ఫిర్యాదు చేచేశారు. ఇది జరిగిన కొన్ని వారాల తర్వాత, సీబీఐ అంతర్గత విచారణను దాఖలు చేసి దీపక్ కొచ్చర్‌ను ప్రశ్నించడం ప్రారంభించింది.    ఏప్రిల్ 2018: ఐసీఐసీఐ బ్యాంక్ బోర్డు చందా కొచ్చర్‌కు అండగా నిలిచింది. ఆమెపై వచ్చిన ఆరోపణల్ని ఖండించింది. కొన్ని వారాల తర్వాత, సీరియస్ ఫ్రాడ్ ఇన్వెస్టిగేషన్ ఆఫీస్ (SFO) ఐసీఐసీఐ బ్యాంక్ మంజూరు చేసిన వీడియోకాన్ రుణంపై దర్యాప్తు చేయడానికి కార్పొరేట్ వ్యవహారాల మంత్రిత్వ శాఖ అనుమతిని కోరింది.  మే - జూన్ 2018: చందా కొచ్చర్‌పై విజిల్‌బ్లోయర్ తాజా ఆరోపణలతో  ఐసీఐసీఐ బ్యాంక్ తప్పులు చేసిందనే అనుమానాలు వ్యక్తమయ్యాయి. దీంతో సుప్రీంకోర్టు మాజీ న్యాయమూర్తి జస్టిస్ బీఎన్ శ్రీకృష్ణ విచారణ ప్రారంభించడంతో మే నెలలో కొచ్చర్ సెలవుపై వెళ్లారు.  జూలై 2018: షోకాజ్ నోటీసుకు తన ప్రత్యుత్తరాన్ని సమర్పించాల్సిందిగా సెక్యూరిటీస్ అండ్ ఎక్స్ఛేంజ్ బోర్డ్ ఆఫ్ ఇండియా (సెబీ) కొచ్చర్‌ని కోరింది.  అక్టోబర్ 2018: ఐసీఐసీఐ బ్యాంక్ మేనేజింగ్ డైరెక్టర్ (ఎండీ), సీఈవో బాధ్యతలకు చందా కొచ్చర్‌ రాజీనామా సమర్పించారు.  జనవరి 2019: 2012లో వీడియోకాన్ గ్రూప్‌కు మంజూరైన రుణాల్లో అవకతవకలు జరిగాయన్న ఆరోపణలపై దీపక్ కొచ్చర్, చందా కొచ్చర్, వేణుగోపాల్ ధూత్‌లపై సీబీఐ ఎఫ్ఐఆర్ దాఖలు చేసింది. ఆ వెంటనే, చందా కొచ్చర్ బ్యాంక్ కోడ్‌ను ఉల్లంఘించినట్లు ఐసీఐసీఐ బ్యాంక్ స్వతంత్ర దర్యాప్తులో తేలింది. ఫిబ్రవరి 2019: చందా కొచ్చర్‌పై సీబీఐ లుక్‌అవుట్ నోటీసు జారీ చేసింది.  జనవరి 2020: ఎన్‌ఫోర్స్‌మెంట్ డైరెక్టరేట్ (ఈడీ) చందా కొచ్చర్, ఆమె కుటుంబ సభ్యుల ఆస్తులను తాత్కాలికంగా అటాచ్ చేసింది. వీటి విలువ రూ.78 కోట్ల పైమాటే.  సెప్టెంబర్ 2020: మనీలాండరింగ్ కేసులో దీపక్ కొచ్చర్‌ను ఈడీ అరెస్టు చేసింది.  నవంబర్ 2020: చందా కొచ్చర్‌పై ఈడీ ఛార్జిషీట్ దాఖలు చేసింది.  మార్చి 2021: దీపక్ కొచ్చర్ రూ. 3 లక్షల వ్యక్తిగత బాండ్‌పై విడుదలయ్యారు  మే 2022: సీబీఐ  చందా కొచ్చర్‌పై ఎఫ్‌ఐఆర్ దాఖలు చేసింది.  డిసెంబర్ 23, 2022: చందా కొచ్చర్, ఆమె భర్త దీపక్ కొచ్చర్‌లను సిబిఐ అరెస్టు చేసింది. డిసెంబరు 26, 2022 వరకు వారిని 3 రోజుల పాటు సీబీఐ కస్టడీకి తీసుకుంది.  పద్మభూషణ్ నుంచి.. కటకటాల్లోకి 1984లో ఐసీఐసీఐ బ్యాంక్‌లో మేనేజ్‌మెంట్ ట్రైనీగా చేరిన చందా కొచ్చర్.. అతి తక్కువ సమయంలో దేశ బ్యాంకింగ్‌ రంగంలో స్టార్‌గా ఎదిగారు. అనతి కాలంలో ట్రైనీ నుంచి బ్యాంక్‌ సీఈవోగా ఆమె ఎదిగిన తీరు అమోఘం..అనర్వచనీయం. 2009 మేలో ఐసీఐసీఐ బ్యాంక్‌ సీఈఓగా, ఎండీగా చందా కొచ్చర్‌ నియమితులయ్యారు. ఆ బాధ్యతలు చేపట్టిన తర్వాతే ఐసీఐసీఐ బ్యాంక్‌ అద్భుతమైన విజయాన్ని సాధించింది. ప్రభుత్వ బ్యాంకులకు గట్టి పోటీ ఇచ్చింది.  బ్యాంకింగ్‌ రంగంలో ఆమె చేసిన కృషికి గాను భారత ప్రభుత్వం 2011లో పద్మ భూషణ్ ప్రదానం చేసింది. ఫోర్బ్స్ మ్యాగజైన్ రూపొందించిన ప్రపంచంలోని 100 మంది అత్యంత శక్తివంతమైన మహిళల జాబితాలో ఆమెకు కూడా చోటు దక్కింది. ఐసీఐసీఐ బ్యాంక్‌లో మూడు దశాబ్దాలకుపైగా కాలంలో ఎన్నోసార్లు అత్యంత ప్రభావశీల మహిళగా చందా కొచ్చర్‌ గుర్తింపును పొందారు. కానీ, ఎంతో అద్భుతంగా సాగుతున్న తన బ్యాంకింగ్ కెరీర్ మెరుపుల నుంచి మరకల వరకు ఇలా కటకటాల వెనక్కి వెళ్తామని బహుశా ఆమె కూడా ఊహించి ఉండరు. చదవండి👉 ‘బండ్లు ఓడలు ..ఓడలు బండ్లు అవ్వడం అంటే ఇదేనేమో’!

ఐసీఐసీఐ మాజీ సీఈవో, ఎండీ చందాకొచర్, ఆమె భర్త దీపక్ కొచ్చర్‌కు ముంబైలోని ప్రత్యేక కోర్టు 3 రోజుల పాటు సీబీఐ కస్టడీని విధించింది. వీడియోకాన్‌ రుణాల అవకతవకల కేసులో ఆరోపణలు ఎదుర్కొంటున్న వీరిద్దరూ 26 తేదీ వరకూ సీబీఐ తన కస్టడీ​లో ఉంచుకోనుంది. ఈ కేసులో వీరివురిని స్వల్పకాలిక విచారణ తర్వాత శనివారం అరెస్టు చేశారు. విచారణలో వారిద్దరూ సహకరించలేదని, అందుకే అరెస్టు చేశామని కేంద్ర దర్యాప్తు సంస్థ కోర్టుకు తెలిపింది. కాగా 2012లో చందా కొచర్‌ సీఈవోగా ఉన్నప్పుడు వీడియోకాన్‌కు రూ. 3,250 కోట్లు రుణాలు మంజూరు చేసినట్లు, ప్రతిగా ఆ కంపెనీ చీఫ్‌ వేణుగోపాల్‌ ధూత్‌.. దీపక్‌ కొచర్‌కి చెందిన కంపెనీలో పెట్టుబడులు పెట్టినట్లు ఆరోపణలు ఉన్నాయి. దీంతో చందా కొచర్, దీపక్‌ కొచర్, ధూత్‌లతో పాటు న్యూపవర్‌ రెన్యువబుల్స్‌ తదితర సంస్థలను సీబీఐ ఎఫ్‌ఐఆర్‌లో చేర్చింది.

న్యూఢిల్లీ:  వీడియోకాన్‌ గ్రూప్‌నకు రుణాల్లో అవకతవకలు, మోసం ఆరోపణలపై ఐసీఐసీఐ బ్యాంక్‌ మాజీ సీఈవో, ఎండీ చందా కొచర్, ఆమె భర్త దీపక్‌ కొచర్‌ను సీబీఐ అరెస్ట్‌ చేసింది. ఈ కేసుకు సంబంధించి వారిని ముందుగా సీబీఐ హెడ్‌క్వార్టర్స్‌లో ప్రశ్నించారు. అయితే, వారు విచారణకు సహకరించకపోవడంతో అరెస్టు చేసినట్లు అధికారులు తెలిపారు. చందా కొచర్, దీపక్‌ కొచర్‌లను శనివారం సీబీఐ ప్రత్యేక కోర్టులో హాజరుపర్చనున్నారు. తొలి చార్జి షీటును కూడా సీబీఐ సత్వరం దాఖలు చేసే అవకాశం ఉందని సంబంధిత వర్గాలు తెలిపాయి. 2012లో చందా కొచర్‌ సీఈవోగా ఉన్నప్పుడు వీడియోకాన్‌కు రూ. 3,250 కోట్లు రుణాలు మంజూరు చేసినట్లు, ప్రతిగా ఆ కంపెనీ చీఫ్‌ వేణుగోపాల్‌ ధూత్‌.. దీపక్‌ కొచర్‌కి చెందిన కంపెనీలో ఇన్వెస్ట్‌ చేసినట్లు ఆరోపణలు ఉన్నాయి. దీనితో చందా కొచర్, దీపక్‌ కొచర్, ధూత్‌లతో పాటు న్యూపవర్‌ రెన్యువబుల్స్‌ తదితర సంస్థలను సీబీఐ ఎఫ్‌ఐఆర్‌లో చేర్చింది. చదవండి: బీభత్సమైన ఆఫర్‌: జస్ట్‌ కామెంట్ చేస్తే చాలు.. ఉచితంగా రూ.30 వేల స్మార్ట్‌ఫోన్‌!

బాంబే హైకోర్టులో ఐసీఐసీఐ బ్యాంకు మాజీ సీఈవో చందా కొచ్చర్‌కు ఎదురు దెబ్బ తగిలింది. పదవీ విరమణ తర్వాత కొచ్చర్‌ వేసిన పిటిషన్‌ను బాంబే హైకోర్టు నిరాకరించింది.  అంతేకాదు 2018లో ఆమె సంపాదించిన 6.90 లక్షల షేర్ల విషయంలో జోక్యం చేసుకోవద్దని జస్టిస్ ఆర్‌ఐ గహ్లా సింగిల్ బెంచ్ కొచ్చర్‌ను కోరినట్లు పీటీఐ నివేదించింది.దీంతో పాటు గతంలో ఆమె ఏదైనా షేర్లకు సంబంధించి ట్రాన్సాక్షన్‌, ఇతర వ్యాపార లావాదేవీలు నిర్వహించి ఉంటే, ఆరు వారాల్లోగా అఫిడవిట్‌ సమర్పించాలని గహ్లా అన్నారు.  ఈ సందర్భంగా  జస్టిస్ చాగ్లా మాట్లాడుతూ కొచ్చర్‌ రాజీనామా సమయంలో వెల్లడించని వాస్తవాలు ఇతర అంశాలపై పూర్తి అవగాహన బ్యాంకుకు లేదన్నారు. ప్రస్తుతం ఈ కేసుకు సంబంధించిన వాస్తవాలు విచారణ నివేదిక అందిన తర్వాత మాత్రమే వెల్లడయ్యాయని అన్నారు.  కాగా, ఐసీఐసీఐ స్కాంలో ‍ చందా కొచర్‌  వీడియోకాన్‌ గ్రూప్‌నకు రూ.3,250 కోట్ల రుణం మంజూరులో  క్విడ్‌ప్రోకో  ఆరోపణలు ఎదుర్కొంటున్న సంగతి తెలిసిందే. వీడియోకాన్ ఇంటర్నేషనల్ ఎలక్ట్రానిక్స్ లిమిటెడ్‌కు చందా కొచర్‌ నేతృత్వంలోని బ్యాంక్ ప్యానెల్ మంజూరు చేసిన రూ .300 కోట్ల రుణ మొత్తంలో రూ .64 కోట్లు వీడియోకాన్ ఇండస్ట్రీస్ నుపవర్ రెన్యూవబుల్స్ ప్రైవేట్ లిమిటెడ్ (ఎన్‌ఆర్‌పిఎల్)కు బదిలీ అయినట్టు ఈడీ ఆరోపించింది. ఈ కేసులో ఆమె భర్త దీపక్ కొచర్‌పై మనీలాండరింగ్ కింద కేసులు నమోదయ్యాయి. 2019లో సీబీఐ కేసు నమోదు చేయగా 2020లో ఎన్‌ఫోర్స్‌మెంట్‌ డైరెక్టరేట్‌ (ఈడీ) కూడా కేసు నమోదు చేసింది.  ఈనేపథ్యంలో 2020 సెప్టెంబర్‌లో చందా కొచర్‌ దంపతులను ఈడీ అరెస్ట్‌ చేసిన సంగతి తెలిసిందే. 

సాక్షి, న్యూఢిల్లీ: ఐసీఐసీఐ-వీడియోకాన్‌ రుణాల కుంభకోణం కేసులో కీలక పరిణామం చోటుసుకుంది. ఈ కేసులో కీలక నిందితురాలు, ఐసీఐసీఐ మాజీ సీఎండీ చందాకొచర్‌కు తాజాగా మరో ఎదురుదెబ్బ తగిలింది. చందా కొచర్ భర్త, వ్యాపారవేత్త దీపక్ కొచర్‌ను ఎన్‌ఫోర్స్‌మెంట్ డైరెక్టరేట్ (ఇడి) సోమవారం అరెస్టు చేసింది, ఐసీఐసీఐ బ్యాంక్-వీడియోకాన్ కేసుకు సంబంధించి ఆయన్ను అరెస్ట్ చేసినట్లు ఈడీ అధికారులు తెలిపారు.  రేపు (మంగళవారం) సెషన్స్ కోర్టులో హాజరుపరుస్తామన్నారు. మోసం, నేరపూరిత కుట్ర, అవినీతి నిరోధక చట్టం కింద చందా కొచర్, ఆమె భర్త దీపక్ కొచర్ తోపాటు వీడియోకాన్ గ్రూప్ ప్రమోటర్ వేణుగోపాల్ ధూత్, అతని  కంపెనీలపై జనవరి 22, 2019 న సీబీఐ ఎఫ్ఐఆర్ నమోదు చేసిన సంగతి తెలిసిందే. ఆ తరువాత, జనవరి 31న, ఐసీఐసీఐ బ్యాంక్ కార్పొరేట్ గ్రూపు 1,875 కోట్ల రుణాలు మంజూరు చేయడంలో అవకతవకలకు సంబంధించి ఈడీ మనీలాండరింగ్ కేసును నమోదు చేసింది.   మనీలాండరింగ్ కేసులో గత ఏడాది మార్చిలో ఎన్‌ఫోర్స్‌మెంట్ డైరెక్టరేట్ స్వాధీనం చేసుకున్నఆస్తులను విడుదల చేయాలని కోరుతూ దీపక్ కొచర్‌కు చెందిన పసిఫిక్ క్యాపిటల్ సర్వీస్ ప్రైవేట్ లిమిటెడ్ ఇటీవల ఢిల్లీ హైకోర్టును ఆశ్రయించింది. ఆస్తుల సీజ్ ఒక సంవత్సరం మాత్రమే ఉంటుందని, ఈడీ ఎలాంటి చార్జ్ షీట్ దాఖలు చేయని కారణంగా సంస్థ ఆస్తులను విడుదల చేయాలని కోరింది. అయితే దీనిపై అభ్యంతరం వ్యక్తం చేసిన ఈడీ ఇలాంటి పిటిషన్ ఇప్పటికే బొంబాయి హైకోర్టులో పెండింగ్‌లో ఉందని వాదించింది. గత ఏడాది మార్చిలో, పసిఫిక్ క్యాపిటల్ సర్వీసెస్ ప్రైవేట్ లిమిటెడ్ కార్యాలయంలో ఈడీ దాడుల సందర్భంగా  డైరీ, హార్డ్ డిస్క్తోపాటు 10.5 లక్షలరూపాయలను స్వాధీనం చేసుకుంది. కాగా ఐసీఐసీఐ బ్యాంక్-వీడియోకాన్ స్కాం బ్యాంకింగ్ రంగంలో ప్రకంపనలు రేపింది.  3,250 కోట్ల రూపాయల కుంభకోణంలో క్విడ్ ప్రో కో కింద అవినీతికి పాల్పడ్డారన్న ఆరోపణల నేపథ్యంలో  చందా కొచర్ తన పదవిని కోల్పోయారు.

ముంబై : ఐసీఐసీఐ బ్యాంక్‌ మాజీ సీఈఓ చందా కొచర్‌  తనను సీఈవోగా తొలగించడాన్ని సవాల్‌  చేస్తూ బాంబే హైకోర్టును ఆశ్రయించారు. తనను ఉద్యోగం నుంచి తొలగించడంతో పాటు 2009 నుంచి 2019 వరకు పొందిన బోనస్‌లను తిరిగి ఇచ్చేయాలన్న ఐసీఐసీఐ బ్యాంక్‌  బోర్డు నిర్ణయంపై  ఆమె కోర్టులో పిటిషన్‌ దాఖలు చేశారు. దీనిపై జస్టిస్‌ రంజిత్‌, జస్టిస్‌ కార్నిక్‌తో కూడిన దర్మాసనం వాదనలు విననుంది. మరోవైపు హేతుబద్దమైన ఆధారాలు, ఆర్‌బీఐ అనుమతి లేకుండా తనను తొలగించడంపైనే ఆమె పిటిషన్‌లోని ముఖ్య అంశమని ఆర్థిక నిపుణులు చెబుతున్నారు. చందాకొచర్‌ తరుపున విక్రమ్‌ నన్‌కాని, సుజయ్‌ కంతవాలా వాదనలు వినిపిస్తుండగా ఐసీసీఐ బ్యాంక్‌ తరపున డారియస్‌ కమ్‌బాటా వినిపించనున్నారు. కాగా ఐసీఐసీఐ బ్యాంకు సీఈవోగా ఉన్న చందాకొచర్‌పై వీడియోకాన్‌ రుణాలకు సంబంధించిన క్రిడ్‌ప్రోకోకు పాల్పడ్డారన్న ఆరోపణలు దుమారం రేపాయి. దీనిపై  కేసు నమోదు చేసిన ఈడీ, సీబీఐ  చందా కొచర్‌, భర్త దీపక్‌ కొచర్‌తో  పాటు ఇతర బంధువులను కూడా చార్జ్‌ షీటు చేర్చింది.  అయితే ప్రారంభంలో చందా కొచర్‌ను వెనకేసుకొచ్చిన  బోర్డు, ఆరోపణలపై విచారణకు నియమించిన మాజీ న్యాయమూర్తి బీఎన్‌ కృష్ణ ఆధ్వర్యంలోని స్వతంత్ర దర్యాప్తు కమిటీ నివేదిక అనంతరం ఆమెపై వేటు వేసిన సంగతి తెలిసిందే.

ముంబై : ఐసీఐసీఐ బ్యాంక్‌ - వీడియోకాన్‌ మనీల్యాండరింగ్‌ కేసులో విచారణను ఎన్‌ఫోర్స్‌మెంట్‌ డైరెక్టరేట్‌ (ఈడీ) విస్తృతం చేయనుంది. ఈ కేసులో ఐసీఐసీఐ బ్యాంక్‌ మాజీ సీఈవో చందా కొచ్చర్‌తో పాటు బ్యాంకు ఉన్నతాధికారులను మరోసారి ప్రశ్నించనున్నట్టు ఈడీ వర్గాలు వెల్లడించాయి. ఈ కేసులో చందా కొచ్చర్‌ ఆమె భర్త దీపక్‌ కొచ్చర్‌లను గతనెలలో ప్రశ్నించిన ఈడీ వారి స్టేట్‌మెంట్‌లను నమోదు చేసింది. చందా కొచ్చర్‌ ఇచ్చిన సమాధానాలను ఇతర అధికారులను ప్రశ్నించి వారి సమాధానాలతో సరిపోల్చేందుకు ఈడీ ప్రయత్నిస్తోంది. ఐసీఐసీఐ బ్యాంక్‌తో వీడియోకాన్‌ డీల్‌ గురించి పూర్తి సమాచారం రాబట్టేందుకు ఈడీ కసరత్తు ముమ్మరం చేసింది. కాగా, ఆరోగ్యపరమైన ఇబ్బందులు, కొన్ని వ్యక్తిగత కారణాలతో తనకు కొంత సమయం కావాలని కోరిన చందా కొచ్చర్‌ త్వరలోనే ఈడీ ఎదుట హాజరుకానున్నారు. కాగా,ఈ కేసుకు సంబంధించి మనీల్యాండరింగ్‌ చట్టం కింద చందా కొచ్చర్‌ ఆమె మరిది రాజీవ్‌ కొచ్చర్‌ల ఆస్తులను అటాచ్‌ చేసేందుకు ఈడీ యోచిస్తోంది.  ఐసీఐసీఐ బ్యాంక్‌ వీడియోకాన్‌కు రుణాలు జారీ చేసే క్రమంలో పెద్దమొత్తంలో బ్యాంక్‌ చీఫ్‌ చందా కొచ్చర్‌ భర్త దీపక్‌ కొచ్చర్‌కు ముడుపులు ముట్టాయని, అనుచిత లబ్ధిపొందారనే అభియోగాలు నమోదైన సంగతి తెలిసిందే.

సాక్షి, న్యూఢిల్లీ: వీడియోకాన్‌ గ్రూప్‌నకు రుణాల కుంభకోణం కేసులో ఐసీఐసీఐ బ్యాంక్ మాజీ సీఈవో చందా కొచర్, ఆమె భర్త దీపక్ కొచర్‌  మంగళవారం కూడా ఎన్‌ఫోర్స్‌మెంట్ డైరెక్టరేట్ (ఈడీ) విచారణకు హాజరయ్యారు.  సోమవారం దాదాపు ఎనిమిది గంటలపాటు వీరిని  ఈడీ  ప్రశ్నించింది . వాస్తవానికి ఈ నెల ప్రారంభంలోనే వారు  రావాల్సి ఉన్నా కొంత గడువు కోరడంతో ఈడీ అనుమతించింది.   బ్యాంకు రుణాలమంజూరులో మోసం, నగదు బదిలీ కేసుకు సంబంధించి దీపక్ కొచర్ సోదరుడు రాజీవ్ కొచర్‌ను కొద్ది రోజుల క్రితమే ఈడీ విచారణ చేసింది. సీబీఐ కూడా గతంలో ఆయన్ని ప్రశ్నించింది. వీడియోకాన్‌ గ్రూప్ రుణాలను ఐసీఐసీఐ బ్యాంక్ పునర్‌వ్యవస్థీకరించడంలో ఆయన పాత్ర గురించి విచారణ చేసింది. వీడియోకాన్ గ్రూప్‌నకు ఐసీఐసీఐ బ్యాంక్‌ దాదాపు రూ.1,875 కోట్ల మేర రుణాలివ్వడంలో అవకతవకలు చోటుచేసుకున్నాయన్న ఆరోపణలపై చందా కొచర్‌, దీపక్‌ కొచర్‌, వీడియోకాన్ గ్రూప్ అధినేత వేణుగోపాల్ ధూత్ తదితరులపై మనీలాండరింగ్ నిరోధక చట్టం కింద ఈడీ ఏడాది క్రితం క్రిమినల్ కేసు దాఖలు చేసింది. సీబీఐ ఎఫ్‌ఐఆర్‌ ఆధారంగా ఈడీ ఈ నిర్ణయం తీసుకుంది. చందా కొచర్ సహకారంతో ఐసీఐసీఐ నుంచి రుణాలు తీసుకున్న ధూత్‌.. ప్రతిగా ఆమె భర్త దీపక్‌కు చెందిన న్యూపవర్‌ రెన్యూవబుల్స్‌లో ఇన్వెస్ట్ చేశారని ఆరోపణలు ఉన్నాయి.   

న్యూఢిల్లీ: వీడియోకాన్‌ గ్రూప్‌నకు రుణాల కుంభకోణం కేసులో ఐసీఐసీఐ బ్యాంక్‌ మాజీ సీఈవో చందా కొచర్, ఆమె భర్త దీపక్‌ కొచర్‌ సోమవారం ఎన్‌ఫోర్స్‌మెంట్‌ డైరెక్టరేట్‌ (ఈడీ) విచారణకు హాజరయ్యారు. వాస్తవానికి ఈ నెల ప్రారంభంలోనే వారు  రావాల్సి ఉన్నా కొంత గడువు కోరడంతో ఈడీ అనుమతించింది. ఈ కేసుకు సంబంధించి దీపక్‌ కొచర్‌ సోదరుడు రాజీవ్‌ కొచర్‌ను కొద్ది రోజుల క్రితమే ఈడీ విచారణ చేసింది. సీబీఐ కూడా గతంలో ఆయన్ని ప్రశ్నించింది. వీడియోకాన్‌ గ్రూప్‌ రుణాలను ఐసీఐసీఐ బ్యాంక్‌ పునర్‌వ్యవస్థీకరించడంలో ఆయన పాత్ర గురించి విచారణ చేసింది. వీడియోకాన్‌ గ్రూప్‌నకు ఐసీఐసీఐ బ్యాంక్‌ దాదాపు రూ.1,875 కోట్ల మేర రుణాలివ్వడంలో అవకతవకలు చోటుచేసుకున్నాయన్న ఆరోపణలపై చందా కొచర్, దీపక్‌ కొచర్, వీడియోకాన్‌ గ్రూప్‌ అధినేత వేణుగోపాల్‌ ధూత్‌ తదితరులపై మనీలాండరింగ్‌ నిరోధక చట్టం కింద ఈడీ ఏడాది క్రితం క్రిమినల్‌ కేసు దాఖలు చేసింది. సీబీఐ ఎఫ్‌ఐఆర్‌ ఆధారంగా ఈడీ ఈ నిర్ణయం తీసుకుంది. చందా కొచర్‌ సహకారంతో ఐసీఐసీఐ నుంచి రుణాలు తీసుకున్న ధూత్‌.. ప్రతిగా ఆమె భర్త దీపక్‌కు చెందిన న్యూపవర్‌ రెన్యూవబుల్స్‌లో ఇన్వెస్ట్‌ చేశారని ఆరోపణలు ఉన్నాయి.  చందా కొచర్, దీపక్‌ కొచర్‌ల మంగళవారం మళ్లీ ప్రశ్నించే అవకాశం ఉన్నట్లు ఈడీ వర్గాలు తెలిపాయి.    

ముంబై: అక్రమ ధనార్జన కేసులో సోమవారం వరుసగా నాల్గవరోజూ ఎన్‌ఫోర్స్‌మెంట్‌ డైరెక్టరేట్‌ (ఈడీ) అధికారులు ఐసీఐసీఐ బ్యాంక్‌ చీఫ్‌ చందాకొచర్‌ను ప్రశ్నించారు.  చందా కొచర్, ఆమె భర్త దీపక్‌ కొచర్, వీడియోకాన్‌ ఇండస్ట్రీస్‌ ప్రమోటర్‌ వేణుగోపాల్‌ ధూత్‌ నివాసాలపై ఎన్‌ఫోర్స్‌మెంట్‌ డైరెక్టరేట్‌ (ఈడీ) నాలుగురోజులుగా దాడులు నిర్వహిస్తున్న సంగతి తెలిసిందే. వీడియోకాన్‌కు చెందిన కొన్ని కార్యాలయాల్లో కూడా సోదాలు జరిగినట్లు ఉన్నత స్థాయి వర్గాలు తెలిపాయి. ముంబై, ఔరంగాబాద్‌లోని ఐదు ప్రాంతాల్లో ఈ సోదాలు జరిగినట్లు సమాచారం. వీడియోకాన్‌ గ్రూప్‌నకు ఐసీఐసీఐ బ్యాంక్‌ రూ.1,875 కోట్ల రుణ మంజూరు విషయంలో తీవ్ర అవకతవకలు, అవినీతి చోటుచేసుకుందన్న ఆరోపణలపై విచారణ జరుపుతున్న ఈడీ, ఈ అంశంలో తదుపరి విచారణను తీవ్రతరం చేసింది.  మార్చి 1 నుంచీ...  మార్చి 1న చందా కొచర్, ఆమె భర్త దీపక్‌ కొచర్‌లను సౌత్‌ ముంబైలోని వారి నివాసంలో ఈడీ అధికారులు మొదటిసారి ప్రశ్నించారు. సోమవా రం ఇక్కడి ఈడీ కార్యాలయంలో ఆమెను అధికారులు తాజాగా ప్రశ్నించారు. కాగా ఆదివారం ఈడీ అధికారులు మాటిక్స్‌ గ్రూప్‌ చైర్మన్, ఎస్సార్‌ గ్రూప్‌ సహ వ్యవస్థాపకులు రవి రుయా మేనల్లుడు నిషాంత్‌ కనోడియాను కూడా ప్రశ్నించారు. మారిషస్‌ కేంద్రంగా కార్యకలాపాలు నిర్వహిస్తున్న ఆయన ఫస్ట్‌లాండ్‌ హోల్డింగ్స్‌ దీపక్‌ కొచర్‌ నిర్వహిస్తున్న నూపవర్‌ రెన్యువబుల్స్‌ ప్రైవేట్‌ లిమిటెడ్‌లో పెట్టుబడులు పెట్టారు. ఈ కేసులో వీడియోకాన్‌ గ్రూప్‌ ప్రమోటర్‌ వేణుగోపాల్‌ దూత్‌పై మార్చి 2న ఈడీ అధికారులు అర్ధరాత్రి వరకూ ప్రశ్నల వర్షం కురిపించినట్లు సమాచారం.  

ముంబై : అవినీతి ఆరోపణలు ఎదుర్కొంటున్న ఐసీఐసీఐ బ్యాంక్‌ మాజీ సీఈవో చందా కొచర్‌ శనివారం ఎన్‌ఫోర్స్‌మెంట్‌ డైరెక్టరేట్‌ విచారణకు హాజరయ్యారు. కాగా ఈడీ విచారణకు చందాకొచ్చర్‌ భర్త దీపక్‌ కొచ్చర్‌, వీడియోకాన్‌ మేనేజింగ్‌ డైరక్టర్‌ వేణుగోపాల్‌ ధూత్‌ కూడా హాజరయ్యారు. ప్రయివేట్‌ కంపెనీలకు మంజూరు చేసిన రుణాల విషయంలో చందా కొచర్‌పై ఐసీఐసీఐను మోసగించడం, క్రిమినల్‌ కుట్ర ఆరోపణలు ఉన్నాయి. ఈ నేపథ్యంలో వీడియోకాన్‌ గ్రూప్‌కు ఐసీఐసీఐ బ్యాంకు రూ. 1,875 కోట్ల రుణాలిచ్చిన కేసులో  దర్యాప్తు వేగవంతం చేసిన ఈడీ... చందా కొచర్‌తో పాటు వీడియోకాన్‌ ప్రమోటర్‌ వేణుగోపాల్‌ ధూత్‌ నివాసాల్లో నిన్న ఏకకాలంలో సోదాలు నిర్వహించిన విషయం తెలిసిందే. మరోవైపు ఈడీ విచారణ అనంతరం చందా కొచ్చర్‌ ఇవాళ మధ్యాహ్నం ఇంటికి వెళ్లిపోయినా... ఆమె భర్త దీపక్‌ కొచ్చర్‌, వేణుగోపాల్‌ ధూత్‌ మాత్రం ఇంకా ఈడీ కార్యాలయంలోనే ఉన్నారు.

న్యూఢిల్లీ: వీడియోకాన్‌ గ్రూప్‌నకు ఐసీఐసీఐ బ్యాంకు రూ. 1,875 కోట్ల రుణాలిచ్చిన కేసులో ఎన్‌ఫోర్స్‌మెంట్‌ డైరెక్టరేట్‌ (ఈడీ) దర్యాప్తు వేగవంతం చేసింది. అవినీతి ఆరోపణలు ఎదుర్కొంటున్న ఐసీఐసీఐ బ్యాంక్‌ మాజీ సీఈవో చందా కొచర్‌తో పాటు వీడియోకాన్‌ ప్రమోటర్‌ వేణుగోపాల్‌ ధూత్‌ నివాసాల్లో శుక్రవారం ఏకకాలంలో సోదాలు నిర్వహించింది. దక్షిణ ముంబైలోని కొచర్‌ నివాసంలో, ఔరంగాబాద్‌లోని ధూత్‌ నివాసంలో ఈడీ తనిఖీలు నిర్వహించింది. సీబీఐ ఎఫ్‌ఐఆర్‌ ఆధారంగా మనీల్యాండరింగ్‌ కేసు నమోదు చేసిన ఈడీ.. కొచర్‌ నివాసంలో సోదాలు చేయడం ఇదే తొలిసారి. సీబీఐ ఇప్పటికే ముంబైలోని నాలుగు ప్రాంతాల్లో తనిఖీలు నిర్వహించింది.   ప్రైవేట్‌ కంపెనీలకు మంజూరు చేసిన రుణాల విషయంలో చందా కొచర్‌పై ఐసీఐసీఐను మోసగించడం, క్రిమినల్‌ కుట్ర ఆరోపణలు ఉన్నాయి. కన్సార్షియంలో భాగంగా వీడియోకాన్‌ గ్రూప్‌నకు ఐసీఐసీఐ ఇచ్చిన రుణాల్లో అవకతవకలేమైనా జరిగాయా అన్న కోణంలో జరిగిన ప్రాథమిక విచారణ (పీఈ) అనంతరం చందా కొచర్, ఆమె భర్త దీపక్‌ కొచర్, వీడియోకాన్‌ గ్రూప్‌ అధికార్లపై ఎఫ్‌ఐఆర్‌ నమోదైంది. దీనిపై ఐసీఐసీఐ బ్యాంక్‌ ఏర్పాటు చేసిన జస్టిస్‌ బీఎన్‌ శ్రీకృష్ణ కమిటీ కూడా వీడియోకాన్‌ గ్రూప్‌నకు రుణాల మంజూరీలో చందా కొచర్‌ బ్యాంక్‌ నిబంధనలను ఉల్లంఘించారని తేల్చింది. వీడియోకాన్‌ గ్రూప్‌నకు ఐసీఐసీఐ బ్యాంక్‌ రుణాల మంజూరీలో చందా కొచర్‌ పాత్ర కూడా ఉండటం, ఆ తర్వాత ఆమె భర్త దీపక్‌కి చెందిన న్యూపవర్‌ రెన్యూవబుల్స్‌లో ధూత్‌ పెట్టుబడులు పెట్టినట్లు వెల్లడవటంతో ఈ వివాదం వెలుగులోకి వచ్చింది. వీడియోకాన్‌ గ్రూప్‌కి ఇచ్చిన రుణాలు మొండిబాకీలుగా మారాయి.   

న్యూఢిల్లీ : ఐసీఐసీఐ బ్యాంకు మాజీ సీఈవో చందా కొచర్‌ ఇంట్లో ఎన్‌ఫోర్స్‌మెంట్‌ డైరెక్టరేట్‌ సోదాలు నిర్వహించింది. వీడియోకాన్‌కు మంజూరు చేసిన రుణాల వివాదంలో ఆమె అవినీతి ఆరోపణలు ఎదుర్కొంటున్న సంగతి తెలిసిందే. ఇందులో భాగంగా ఇప్పటికే చందా కొచర్‌తో పాటు ఆమె భర్త దీపక్‌ కొచర్, వీడియోకాన్‌ గ్రూప్‌ ఎండీ వేణుగోపాల్‌ ధూత్‌లపై సీబీఐ లుక్‌ అవుట్‌ నోటీసులు జారీ చేసింది. ఈ నేపథ్యంలో శుక్రవారం ఉదయం ఈడీ.. చందా కొచర్‌తో పాటు వేణుగోపాల్‌ ధూత్‌ ఇంటిపై కూడా రైడ్‌ చేసింది. కాగా వీడియోకాన్‌ గ్రూప్‌నకు ఐసీఐసీఐ బ్యాంక్‌ రూ. 1,875 కోట్ల మేర ఆరు రుణాలు మంజూరు చేయడంలో.. అప్పటి సీఈఓ చందా కొచర్‌ కీలక పాత్ర పోషించారని, ఈ క్రమంలో నిబంధనలు ఉల్లంఘించారని ఆరోపణలు ఉన్నాయి. దీనికి ప్రతిఫలంగా వీడియోకాన్‌ గ్రూప్‌ ఎండీ ధూత్‌.. చందా భర్త దీపక్‌ కొచర్‌ సంస్థలో పెట్టుబడులు పెట్టారని, ఇలా క్విడ్‌ ప్రో కో లావాదేవీ ద్వారా ఆమె లబ్ధి పొందారని అభియోగాలు ఉన్నాయి. తొలుత చందా కొచర్‌ను ఐసీఐసీఐ బ్యాంక్‌ బోర్డు వెనకేసుకొచ్చినప్పటికీ, అన్ని వైపుల నుంచి ఒత్తిళ్లు పెరగడంతో జస్టిస్‌ బి.ఎన్‌. శ్రీకృష్ణ సారథ్యంలో స్వతంత్ర కమిటీ వేసింది. ఈ కమిటీ చందా కొచర్‌ని దోషిగా తేల్చింది. అయితే అంతకు ముందే చందా కొచర్‌ తన పదవికి రాజీనామా చేసినప్పటికీ.. కమిటీ నివేదిక నేపథ్యంలో ఆమెను విధుల నుంచి తొలగించినట్లుగా పరిగణించడంతో పాటు అప్పటిదాకా ఇచ్చిన ఇంక్రిమెంట్లు, బోనస్‌లు మొదలైనవన్నీ వెనక్కి తీసుకోనున్నట్లు ఐసీఐసీఐ బ్యాంక్‌ యాజమాన్యం ప్రకటించింది. మరోవైపు, చందా కొచర్, దీపక్‌ కొచర్, ధూత్‌లపై సీబీఐ క్రిమినల్‌ కుట్ర, మోసం అభియోగాలతో ఎఫ్‌ఐఆర్‌ నమోదు చేసింది. వీడియోకాన్‌కు ఇచ్చిన రుణాల్లో చాలా భాగం మొండిబాకీలుగా మారగా, ఐసీఐసీఐకి రూ. 1,730 కోట్ల మేర నష్టం వాటిల్లిందని పేర్కొంది. అప్పట్లో రుణాలు మంజూరు చేసిన కమిటీలో సభ్యులైన పలువురు బ్యాంకింగ్‌ దిగ్గజాల పేర్లను కూడా ఎఫ్‌ఐఆర్‌లో సీబీఐ ప్రస్తావించింది.

న్యూఢిల్లీ: వీడియోకాన్‌కు రుణాల వివాదంలో అవినీతి ఆరోపణలు ఎదుర్కొంటున్న ఐసీఐసీఐ మాజీ సీఈవో చందా కొచర్‌పై సీబీఐ తాజాగా లుక్‌ అవుట్‌ నోటీసు జారీ చేసింది. దేశం విడిచి విదేశాలకు వెళ్లిపోకుండా చందా కొచర్‌తో పాటు ఆమె భర్త దీపక్‌ కొచర్, వీడియోకాన్‌ గ్రూప్‌ ఎండీ వేణుగోపాల్‌ ధూత్‌లపై కూడా లుక్‌ అవుట్‌ నోటీసులు జారీ అయ్యాయని సంబంధిత అధికారులు తెలిపారు. ఈ ముగ్గురిపై కేసు నమోదైన వారం వ్యవధిలోనే నోటీసులపై నిర్ణయం తీసుకోవడం జరిగిందని వివరించారు. చందా కొచర్‌ స్టేట్‌మెంట్‌ను రికార్డు చేయడానికి ఇప్పటిదాకా ఆమెకు సమన్లేమీ జారీ చేయలేదని అధికారవర్గాలు తెలిపాయి. అభియోగాలు ఎదుర్కొంటున్న వారు విదేశాలకు పారిపోకుండా నిలువరించేందుకు సీబీఐ లుక్‌ అవుట్‌ నోటీసును ఇమిగ్రేషన్‌ అధికారులకు పంపుతుంది. ఒకవేళ నిందితులు అటువంటి ప్రయత్నమేదైనా చేసిన పక్షంలో ఇమిగ్రేషన్‌ అధికారులు వారిని అదుపులోకి తీసుకుని, విచారణ సంస్థలకు అప్పజెప్పాల్సి ఉంటుంది. వీడియోకాన్‌ గ్రూప్‌నకు ఐసీఐసీఐ బ్యాంక్‌ రూ. 1,875 కోట్ల మేర ఆరు రుణాలు మంజూరు చేయడంలో చందా కొచర్‌ కీలక పాత్ర పోషించారని, ఈ క్రమంలో నిబంధనలు ఉల్లంఘించారని ఆరోపణలు ఉన్నాయి. దీనికి ప్రతిఫలంగా వీడియోకాన్‌ గ్రూప్‌ ఎండీ ధూత్‌.. చందా భర్త దీపక్‌ కొచర్‌ సంస్థలో పెట్టుబడులు పెట్టారని, ఇలా క్విడ్‌ ప్రో కో లావాదేవీ ద్వారా ఆమె లబ్ధి పొందారని అభియోగాలు ఉన్నాయి. తొలుత చందా కొచర్‌ను ఐసీఐసీఐ బ్యాంక్‌ బోర్డు వెనకేసుకొచ్చినప్పటికీ, అన్ని వైపుల నుంచి ఒత్తిళ్లు పెరగడంతో జస్టిస్‌ బి.ఎన్‌. శ్రీకృష్ణ సారథ్యంలో స్వతంత్ర కమిటీ వేసింది. ఈ కమిటీ చందా కొచర్‌ని దోషిగా తేల్చింది. అంతకు ముందే చందా కొచర్‌ రాజీనామా చేసినప్పటికీ కమిటీ నివేదిక నేపథ్యంలో ఆమెను విధుల నుంచి తొలగించినట్లుగా పరిగణించడంతో పాటు అప్పటిదాకా ఇచ్చిన ఇంక్రిమెంట్లు, బోనస్‌లు మొదలైనవన్నీ వెనక్కి తీసుకోనున్నట్లు ఐసీఐసీఐ బ్యాంక్‌ యాజమాన్యం ప్రకటించింది. మరోవైపు, చందా కొచర్, దీపక్‌ కొచర్, ధూత్‌లపై సీబీఐ క్రిమినల్‌ కుట్ర, మోసం అభియోగాలతో ఎఫ్‌ఐఆర్‌ నమోదు చేసింది. వీడియోకాన్‌కు ఇచ్చిన రుణాల్లో చాలా భాగం మొండిబాకీలుగా మారగా, ఐసీఐసీఐకి రూ. 1,730 కోట్ల మేర నష్టం వాటిల్లిందని పేర్కొంది. అప్పట్లో రుణాలు మంజూరు చేసిన కమిటీలో సభ్యులైన పలువురు బ్యాంకింగ్‌ దిగ్గజాల పేర్లను కూడా ఎఫ్‌ఐఆర్‌లో సీబీఐ ప్రస్తావించింది. 

న్యూఢిల్లీ: వీడియోకాన్‌ గ్రూప్‌నకు రుణాల వివాదంపై విచారణ జరిపిన జస్టిస్‌ బి.ఎన్‌.శ్రీకృష్ణ కమిటీ... ఈ వ్యవహారంలో ప్రైవేట్‌ రంగ ఐసీఐసీఐ బ్యాంక్‌ మాజీ సీఈవో చందా కొచర్‌ని దోషిగా తేల్చింది. బ్యాంకు నిబంధనలను ఆమె ఉల్లంఘించారని స్పష్టం చేసింది. ఐసీఐసీఐ బ్యాంక్‌ బుధవారం ఈ విషయాలు వెల్లడించింది. చందా కొచర్‌ ఇప్పటికే రాజీనామా చేసినప్పటికీ... నివేదిక నేపథ్యంలో ఆమెను విధుల నుంచి తొలగించినట్లుగా పరిగణిస్తామని పేర్కొంది. రాజీనామా కాస్తా ఉద్వాసనగా మారడంతో ఆమె పొందిన ఇంక్రిమెంట్లు, బోనస్‌లు, వైద్య చికిత్స పరమైన ప్రయోజనాలు, స్టాక్‌ ఆప్షన్స్‌ మొదలైనవి రద్దవుతాయని తెలిపింది. 2009 ఏప్రిల్‌ నుంచి 2018 మార్చి దాకా చందా కొచర్‌ పొందిన బోనస్‌లన్నీ కూడా వెనక్కి తీసుకుంటామని పేర్కొంది. వివాదం వెలుగు చూశాక చాన్నాళ్ల దాకా చందా కొచర్‌ను వెనకేసుకొచ్చిన బ్యాంక్‌... తాజాగా నివేదిక నేపథ్యంలో స్వరం మార్చడం గమనార్హం. ఈ వివాదంలో చందా కొచర్, ఆమె భర్త దీపక్‌ కొచర్‌ తదితరులపై సీబీఐ ఇప్పటికే ఎఫ్‌ఐఆర్‌ నమోదు చేసింది. ‘ఐసీఐసీఐ బ్యాంక్‌ నైతిక నియమావళి, విధుల నిర్వహణకు సంబంధించిన నిబంధనలను చందా కొచర్‌ ఉల్లంఘించారని విచారణ నివేదికలో వెల్లడైంది’ అని ఐసీఐసీఐ బ్యాంక్‌ తెలిపింది. ఆమె అశ్రద్ధ వల్ల బ్యాంక్‌ విధానాలు నిర్వీర్యమయ్యాయని ఆక్షేపించింది. ఆకాశం నుంచి అధఃపాతాళానికి..  దేశీ రిటైల్‌ బ్యాంకింగ్‌ స్వరూపాన్ని మార్చేసిన అత్యంత శక్తిమంతమైన మహిళగా కొన్నాళ్ల క్రితం దాకా సర్వత్రా ప్రశంసలు అందుకున్న చందా కొచర్‌ .. వీడియోకాన్‌ రుణ వివాదంతో అప్రతిష్ట పాలైన సంగతి తెలిసిందే. 2012లో వీడియోకాన్‌ గ్రూప్‌నకు ఐసీఐసీఐ బ్యాంక్‌ ఇచ్చిన రూ. 3,250 కోట్ల రుణాల విషయంలో అవకతవకలు జరిగాయని, ఈ లావాదేవీల ద్వారా చందా కొచర్‌ భర్త దీపక్‌ కొచర్, ఆమె కుటుంబ సభ్యులు లబ్ధి పొందారంటూ కొన్నాళ్ల క్రితం ప్రజావేగు ఒకరు బైటపెట్టడంతో ఈ కేసుపై అందరి దృష్టి మళ్లింది. బ్యాంకు నుంచి రుణం పొందిన వెంటనే వీడియోకాన్‌ గ్రూప్‌ అధినేత వేణుగోపాల్‌ ధూత్‌ .. దీపక్‌ కొచర్‌కు చెందిన న్యూపవర్‌ రెన్యూవబుల్స్‌ సంస్థలో కొంత మొత్తాన్ని ఇన్వెస్ట్‌ చేసినట్లు ఆరోపణలున్నాయి. వీడియోకాన్‌కు రుణాలు మంజూరు చేసిన కమిటీలో చందా కొచర్‌ కూడా ఉండటం అనుమానాలు రేకెత్తించింది. ఐసీఐసీఐ బ్యాంక్‌ యాజమాన్యం ముందుగా చందా కొచర్‌ను వెనకేసుకొచ్చినప్పటికీ.. వివాదం మరింత ముదరడంతో వెనక్కి తగ్గింది. 2018 జూన్‌ 6న సుప్రీం కోర్టు మాజీ న్యాయమూర్తి జస్టిస్‌ బీఎన్‌ శ్రీకృష్ణ సారథ్యంలో సమగ్ర విచారణ కోసం స్వతంత్ర కమిటీ వేసింది. ఈ కమిటీ ఇచ్చిన నివేదికను బుధవారం జరిగిన బోర్డు సమావేశంలో పరిశీలించిన డైరెక్టర్లు తాజా నిర్ణయం తీసుకున్నారు. ఈ వివాదంపై విచారణ జరుపుతున్న సీబీఐ.. ఇటీవలే చందా కొచర్, దీపక్‌ కొచర్, వీడియోకాన్‌ గ్రూప్‌ ఎండీ వేణుగోపాల్‌ ధూత్‌ తదితరులపై క్రిమినల్‌ కుట్ర, మోసం అభియోగాలతో ఎఫ్‌ఐఆర్‌ నమోదు చేసింది. షాకింగ్‌ నిర్ణయం  తనను విధుల నుంచి తొలగించినట్లుగా పరిగణించాలన్న బ్యాంక్‌ బోర్డు నిర్ణయంపై చందా కొచర్‌ విచారం వ్యక్తం చేశారు. ఇది తనను తీవ్ర నిరాశకు, షాక్‌కు గురిచేసిందన్నారు. బ్యాంకు మంజూరు చేసే రుణాలకు సంబంధించి తీసుకునే నిర్ణయాలేవీ ఏకపక్షంగా ఉండవని ఆమె స్పష్టం చేశారు. ‘అంతిమంగా సత్యమే జయిస్తుందని నమ్ముతున్నాను. కఠిన నిర్ణయాలు తీసుకోవడంలో నేనెప్పుడూ వెనుకాడలేదు, ఒక ప్రొఫెషనల్‌గా ఎప్పుడూ నిబంధనలకు విరుద్ధంగా ప్రవర్తించలేదు‘ అని చందా కొచర్‌ చెప్పారు.  లాభం 3% డౌన్‌  రూ. 1,605 కోట్లు ∙మొండిబాకీలకు పెరిగిన కేటాయింపులు  న్యూఢిల్లీ: మొండిబాకీలకు కేటాయింపులు పెరగడంతో ప్రైవేట్‌ రంగ బ్యాంకింగ్‌ దిగ్గజం ఐసీఐసీఐ బ్యాంక్‌ నికర లాభం అక్టోబర్‌– డిసెంబర్‌ త్రైమాసికంలో 3 శాతం క్షీణించి రూ.1,605 కోట్లకు పరిమితమైంది. అంతక్రితం ఆర్థిక సంవత్సరం ఇదే వ్యవధిలో లాభం రూ.1,650 కోట్లు. క్యూ3లో ఆదాయం రూ. 16,832 కోట్ల నుంచి రూ.20,163 కోట్లకు పెరిగింది. నికర వడ్డీ ఆదాయం 21 శాతం వృద్ధితో రూ. 5,705 కోట్ల నుంచి రూ.6,875 కోట్లకు పెరిగింది. ట్రెజరీ ఆదాయం కూడా రూ. 66 కోట్ల నుంచి ఏకంగా రూ.479 కోట్లకు ఎగియగా, నికర వడ్డీ మార్జిన్‌ 3.40 శాతంగా నమోదైంది. మొండి బాకీలు క్షీణించినప్పటికీ.. వాటికి సంబంధించిన కేటాయింపులు రూ. 3,570 కోట్ల నుంచి రూ. 4,244 కోట్లకు పెరిగాయి.  కన్సాలిడేటెడ్‌ ప్రాతిపదికన చూస్తే లాభం 1.1 శాతం క్షీణించి రూ. 1,874 కోట్లుగా నమోదైంది. అనుబంధ సంస్థల పనితీరు ఆశించిన స్థాయిలో లేకపోవడంతో పాటు అసెట్‌ క్వాలిటీ మెరుగుపడినా.. మొండిబాకీలకు మరింత ప్రొవిజనింగ్‌ చేయాలని బ్యాంక్‌ భావించడమే ఇందుకు కారణం. మొత్తం ప్రొవిజనింగ్‌ 18.89 శాతం పెరిగింది. ప్రొవిజనింగ్‌ కవరేజీ నిష్పత్తిని మెరుగుపర్చుకోవడం, గత మొండిబాకీల ప్రభావాన్ని తగ్గించుకోవడంపై ప్రధానంగా దృష్టి పెట్టినట్లు సంస్థ సీఈవో సందీప్‌ బక్షి తెలిపారు.     2.58 శాతానికి ఎన్‌పీఏలు..  మూడో త్రైమాసికంలో ఐసీఐసీఐ బ్యాంక్‌ స్థూల నిరర్ధక ఆస్తులు (ఎన్‌పీఏ) స్వల్పంగా 7.82% నుంచి 7.75%కి తగ్గాయి. అటు నికర ఎన్‌పీఏలు 4.20 శాతం నుంచి 2.58 శాతానికి దిగివచ్చాయి. విలువపరంగా చూస్తే మాత్రం స్థూల ఎన్‌పీఏలు రూ. 46,038 కోట్ల నుంచి రూ.51,591 కోట్లకు పెరగ్గా, నికర మొండిబాకీలు మాత్రం రూ.23,810 కోట్ల నుంచి రూ. 16,252 కోట్లకు తగ్గాయి. బుధవారం బీఎస్‌ఈలో ఐసీఐసీఐ బ్యాంక్‌ షేరు 5.29 శాతం ఎగిసి రూ. 365.25 వద్ద క్లోజయ్యింది. మార్కెట్లు ముగిశాక ఫలితాలు వెలువడ్డాయి.

సాక్షి, న్యూఢిల్లీ :  ఐసీఐసీఐ-వీడియోకాన్‌ కుంభకోణానికి సంబంధించి బ్యాంకు మాజీ సీఎండీ, ఈ స్కాంలో ప్రధాన నిందితురాలు చందా కొచర్‌కు (56) మరో షాక్‌ తగిలింది. ఈ స్కాంపై విచారణకు నియమించిన జస్టిస్‌ శ్రీకృష్ట (స్వతంత్ర కమిటీ) తన రిపోర్టును సంస్థకు అందించింది. వీడియోకాన్ రుణం కేసులో చందాకొచర్ దోషేనని, బ్యాంకునకు సంబంధించిన అంతర్గత నిబంధనలను ఆమె ఉల్లఘించారని స్వతంత్ర విచారణలో కమిటీ తేల్చింది. ఈ మేరకు ఆమెను దోషిగా నిర్ధారిస్తూ బ్యాంకు బుధవారం ప్రకటన జారీ చేసింది. అలాగే ఈ ఆరోపణలతోనే బ్యాంకు నుంచి ఆమెను తొలగించినట్టు బోర్డు ప్రకటించడం విశేషం. ఆమెకు సంబంధించిన చెల్లింపులను నిలిపివేస్తున్నట్టు తెలిపింది. దీనిపై కఠిన చర్యలు తీసుకుంటామని వెల్లడించింది. అంతేకాదు ఏప్రిల్‌,2009 నుంచి 2018 మార్చివరకు ఆమెకు చెల్లించిన బోనస్‌, ఇంక్రిమెంట్లు, మెడికల్‌ ఇన్సూరెన్స్‌ సహా ఇతర చెల్లింపులను బ్యాంకునకు వెనక్కి చెల్లించాలని పేర్కొంది. రిటైర్డ్ సుప్రీంకోర్టు న్యాయమూర్తి బీఎన్‌ శ్రీకృష్ణ నేతృత్వంలోని కమిటీవీడియోకాన్ రుణ కేసులో క్విడ్-ప్రో-ఆరోపణలపై విచారణ జరిపింది. వీడియోకాన్ సంస్థకు రుణాల కేటాయింపు సందర్భంగా చందాకొచర్‌ బ్యాంకు ప్రవర్తనా నియమావళిని ఉల్లంఘించినట్లు పేర్కొంది. రెండవ అతిపెద్ద ప్రయివేటు బ్యాంకు ఐసీఐసీఐ బ్యాంకులో చోటుచేసుకున్న సుమారు రూ.3250కోట్ల కుంభకోణంలో క్విడ్‌ప్రోకోకు పాల్పడ్డారన్నఆరోపణలతో చందా కొచర్‌తోపాటు, ఆమె భర్త దీపక్‌ కొచర్‌, వీడియోకాన్‌ అధినేత వేణుగోపాల్‌ ధూత్‌లపై సీబీఐ ఇప్పటికే ఎప్‌ఐఆర్‌ నమోధు చేసిన సంగతి తెలిసిందే. 

న్యూఢిల్లీ: వీడియోకాన్‌ గ్రూప్‌నకు మంజూరు చేసిన రుణాల వివాదంలో ప్రైవేట్‌ రంగ దిగ్గజం ఐసీఐసీఐ బ్యాంక్‌ మాజీ సీఈవో చందా కొచర్‌పై సీబీఐ కేసు నమోదు చేసింది. క్రిమినల్‌ కుట్ర, మోసం, అవినీతి ఆరోపణలతో చందా కొచర్‌తో పాటు ఆమె భర్త దీపక్‌ కొచర్, వీడియోకాన్‌ గ్రూప్‌ ఎండీ వేణుగోపాల్‌ ధూత్‌లపై కూడా ఎఫ్‌ఐఆర్‌ నమోదు చేసినట్లు సీబీఐ వర్గాలు తెలిపాయి. కొచర్‌ తన పదవీకాలంలో వీడియోకాన్‌ గ్రూప్‌నకు రూ. 1,875 కోట్ల మేర ఆరు రుణ ప్రతిపాదనలను క్లియర్‌ చేశారని ఎఫ్‌ఐఆర్‌లో అభియోగాలు ఉన్నాయి. ఈ లావాదేవీల కారణంగా బ్యాంక్‌కు రూ. 1,730 కోట్ల మేర నష్టం వాటిల్లినట్లు సీబీఐ వర్గాలు తెలిపాయి. వీడియోకాన్‌ గ్రూప్, దాని అనుబంధ కంపెనీలకు ఇచ్చిన రూ. 1,875 కోట్ల విలువ చేసే ఆరు రుణాలను క్లియర్‌ చేసిన కమిటీలో సభ్యులైన ప్రస్తుత ఐసీఐసీఐ బ్యాంక్‌ సీఈవో సందీప్‌ బక్షితో పాటు ఇతర అధికారులు సంజయ్‌ చటర్జీ, జరీన్‌ దారువాలా, రాజీవ్‌ సబర్వాల్, కేవీ కామత్, హోమీ ఖుస్రోఖాన్‌ల పాత్రపై కూడా దృష్టి సారించనున్నట్లు సీబీఐ వర్గాలు వివరించాయి. ఎఫ్‌ఐఆర్‌ దరిమిలా గురువారం వీడియోకాన్‌ గ్రూప్, దీపక్‌ కొచర్‌కు చెందిన న్యూపవర్‌ రెన్యూవబుల్స్, ధూత్‌ ఒకప్పుడు ప్రమోట్‌ చేసిన సుప్రీమ్‌ ఎనర్జీ సంస్థ ముంబై, ఔరంగాబాద్‌ కార్యాలయాల్లో సీబీఐ అధికారులు సోదాలు నిర్వహించారు.   క్విడ్‌ ప్రో కో వివాదం.. వీడియోకాన్‌ గ్రూప్‌నకు రుణాల మంజూరుకు చందా కొచర్‌ తోడ్పడినందుకు గాను ప్రతిగా ఆమె భర్త దీపక్‌ కొచర్‌కు చెందిన న్యూపవర్‌లో తన సుప్రీం ఎనర్జీ సంస్థ ద్వారా ధూత్‌ రూ.64 కోట్లు ఇన్వెస్ట్‌ చేసినట్లు ఆరోపణలున్నాయి. 2017 డిసెంబర్‌లో సీబీఐ ఈ వివాదంపై ప్రాథమిక విచారణ ప్రారంభించింది. బ్యాంకు నియమ, నిబంధనలకు విరుద్ధంగా ఈ రుణాలు మంజూరైనట్లు ఆరోపణలు ఉన్నాయని సీబీఐ వర్గాలు పేర్కొన్నాయి. ఇలా వీడియోకాన్‌ గ్రూప్‌నకు ఇచ్చిన రుణాల్లో అధిక భాగం లోన్‌లు మొండిబాకీలుగా మారడంతో బ్యాంక్‌కు దాదాపు రూ. 1,730 కోట్ల మేర నష్టం వాటిల్లినట్లు సీబీఐ వర్గాలు వివరించాయి. ఎఫ్‌ఐఆర్‌లో చందా, దీపక్, ధూత్‌లతో పాటు న్యూపవర్‌ రెన్యూవబుల్స్, సుప్రీం ఎనర్జీ, వీడియోకాన్‌ ఇంటర్నేషనల్‌ ఎలక్ట్రానిక్స్, వీడియోకాన్‌ ఇండస్ట్రీస్‌పై అభియోగాలు ఉన్నాయి.   షేర్లు 3 శాతం దాకా డౌన్‌.. కొచర్, ధూత్‌లపై సీబీఐ ఎఫ్‌ఐఆర్‌ నమోదు చేయడంతో గురువారం ఐసీఐసీఐ బ్యాంక్, వీడియోకాన్‌ ఇండస్ట్రీస్‌ షేర్లు ఒకదశలో సుమారు మూడు శాతం దాకా పడ్డాయి. బీఎస్‌ఈలో వీడియోకాన్‌ ఇండస్ట్రీస్‌ షేరు 2.73% క్షీణించి రూ.2.85 వద్ద, ఐసీఐసీఐ  షేరు 0.72% పడి రూ.365 వద్ద క్లోజయ్యాయి. ఇంత జాప్యం ఎందుకు.. ఐసీఐసీఐ కేసులో రిజర్వ్‌ బ్యాంక్‌ వ్యవహరించిన తీరును ప్రభుత్వ రంగ(పీఎస్‌బీ) బ్యాంకర్లు ఆక్షేపించారు. చందా కొచర్‌పై చర్యలకు జాప్యం జరగడాన్ని తప్పుపట్టారు. ప్రభుత్వ, ప్రైవేట్‌ బ్యాంకుల విషయంలో ఆర్‌బీఐ వేర్వేరుగా వ్యవహరిస్తోందన్నారు. ప్రభుత్వ  బ్యాంకులను నియంత్రించేందుకు తగినన్ని అధికారాల్లేవన్న ఆర్‌బీఐ.. మరి ప్రైవేట్‌ బ్యాంకులపై పూర్తి అధికారాలున్నా చర్యలు ఎందుకు తీసుకోలేదని ప్రశ్నించారు. విధానపరమైన చిన్న చిన్న లోపాలకు కూడా పీఎస్‌బీల్లో టాప్‌ అధికారులపై తక్షణం చర్యలు తీసుకుంటున్న ఆర్‌బీఐ..  స్పష్టమైన ఆధారాలున్నా కొచర్‌ విషయంలో మాత్రం ఆ పని చేయలేదని బ్యాంకర్లు వ్యాఖ్యానించారు. ప్రక్రియాపరమైన వైఫల్యాల కారణంగా పంజాబ్‌ నేషనల్‌ బ్యాంక్‌ ఎండీ, ఇద్దరు ఈడీలపై సత్వరం వేటేసిన ఆర్‌బీఐ.. కొచర్‌ విషయంలో మీనమేషాలు లెక్కపెట్టుకుం టూ కూర్చుందని ఆలిండియా బ్యాంక్‌ ఆఫీసర్స్‌ సమాఖ్య ఏఐబీవోసీ ప్రతినిధి వ్యాఖ్యానించారు.    విచారణ క్రమం ఇదీ.... ► ఈ వివాదంలో వేణుగోపాల్‌ ధూత్‌తో పాటు వీడియోకాన్‌ గ్రూప్‌ సంస్థలు, ఐసీఐసీఐ మాజీ సీఈవో చందా కొచర్, ఆమె భర్త దీపక్‌ కొచర్, ఆయనకు చెందిన న్యూపవర్‌ రెన్యూవబుల్స్‌ కేంద్ర బిందువులు.   ► మొత్తం రూ. 3,250 కోట్ల రుణాల వివాదంపై 2017 డిసెంబర్‌లో సీబీఐ ప్రాథమిక విచారణ చేపట్టింది. ఈ క్రమంలో వీడియోకాన్‌ ఇండస్ట్రీస్‌ (వీఐఎల్‌), వీడియోకాన్‌ ఇంటర్నేషనల్‌ ఎలక్ట్రానిక్స్‌తో (వీఐఈఎల్‌) పాటు ఆ గ్రూప్‌లోని మరో నాలుగు కంపెనీలకు 2009 జూన్‌ – 2011 అక్టోబర్‌ మధ్యకాలంలో రూ. 1,875 కోట్ల మేర ఇచ్చిన ఆరు రుణాల్లో అవకతవకలు చోటు చేసుకున్నాయని సీబీఐ తేల్చింది.   ► వీడియోకాన్‌ ఇంటర్నేషనల్‌ ఎలక్ట్రానిక్స్‌కి 2009 ఆగస్టు 26న రూ. 300 కోట్ల రుణం, వీడియోకాన్‌ ఇండస్ట్రీస్‌కు 2011 అక్టోబర్‌ 31న రూ. 750 కోట్లు మంజూరు చేసిన కమిటీలో చందా కొచర్‌ కూడా ఉన్నారని తేలినట్లు సీబీఐ వర్గాలు తెలిపాయి.   ► 2009 ఆగస్టులో బ్యాంక్‌ కమిటీ ఆమోదం పొందిన రూ. 300 కోట్ల రుణం అదే ఏడాది సెప్టెంబర్‌ 7న వీడియోకాన్‌ ఇంటర్నేషనల్‌ ఎలక్ట్రానిక్స్‌కు మంజూరైంది. తన సొంత సంస్థ సుప్రీం ఎనర్జీ ద్వారా ధూత్‌ ఆ మర్నాడే .. న్యూపవర్‌ రెన్యూవబుల్స్‌కి దొడ్డిదారిన రూ. 64 కోట్లు బదలాయించారని అభియోగాలున్నాయి. ‘తొలి విద్యుత్‌ ప్లాంట్‌      కొనుగోలు కోసం దీపక్‌ కొచర్‌ సంస్థ న్యూపవర్‌కి లభించిన అత్యధిక మొత్తం పెట్టుబడి ఇది. వీడియోకాన్‌ గ్రూప్‌నకు రుణాలు మంజూరు చేసిందుకు ఈ రూపంలో చందా కొచర్‌ లబ్ధి పొందినట్లయింది‘ అని సీబీఐ వర్గాలు తెలిపాయి.   ► వీఐఎల్, వీఐఈఎల్‌తో పాటు మిలీనియం అప్లయెన్సెస్, స్కై అప్లయెన్సెస్, టెక్నో ఎలక్ట్రానిక్స్, అప్లికాంప్‌ ఇండియాకు కూడా ఐసీఐసీఐ బ్యాంక్‌ రుణాలిచ్చింది. వీఐఎల్‌ నుంచి పొందిన అన్‌సెక్యూర్డ్‌ లోన్‌లను తీర్చేసేందుకు ఈ నాలుగు సంస్థలు.. ఆ రుణాలను ఉపయోగించుకున్నాయని ఎఫ్‌ఐఆర్‌లో సీబీఐ పేర్కొంది. ఈ రుణాలు మొండిబాకీలుగా మారడంతో ఐసీఐసీఐ బ్యాంక్‌కు భారీ నష్టం వాటిల్లగా రుణాలు పొందిన నిందితులు మాత్రం ప్రయోజనాలు పొందారని తెలిపింది. ఈ నేపథ్యంలో రుణాలు మంజూరు చేసిన కమిటీలోని సీనియర్‌ అధికారుల పాత్రపై కూడా విచారణ జరపాల్సి ఉంటుందని సీబీఐ పేర్కొంది.

న్యూఢిల్లీ: వీడియోకాన్‌ గ్రూపునకు రుణం జారీ వెనుక ప్రయోజనం పొందారన్న ఆరోపణలతో విచారణ ఎదుర్కొంటూ, ఐసీఐసీఐ బ్యాంకు ఎండీ, సీఈవో పదవుల నుంచి తప్పుకున్న చందాకొచర్‌ విషయంలో అనూహ్య పరిణామం చోటు చేసుకుంది. ఆమెపై వచ్చిన బంధుప్రీతి ఆరోపణల్లో ఏ మాత్రం సత్యం లేదంటూ 2016 డిసెం బర్‌లో క్లీన్‌చిట్‌ ఇచ్చిన న్యాయ సేవల సంస్థ సిరిల్‌ అమర్‌చంద్‌ మంగళ్‌దాస్, తన నివేదికను ఉపసంహరించుకున్నట్టు ఐసీఐసీఐ బ్యాంకు స్టాక్‌ ఎక్సేంజ్‌లకు తెలియజేసింది. ఈ విచారణ నివేదికను ఆధారంగా చేసుకునే ఈ ఏడాది మార్చిలో చందాకొచర్‌పై వచ్చిన ఆరోపణల్లో వాస్తవం లేదని తాము క్లీన్‌చిట్‌ ఇచ్చామని... అమర్‌చంద్‌ మంగళ్‌దాస్‌ తన నివేదికను వెనక్కి తీసుకున్న నేపథ్యంలో అదిక చెల్లుబాటు కాదని బ్యాంకు స్పష్టం చేసింది. ప్రజావేగుల నుంచి వచ్చిన తాజా ఆరోపణలు, బ్యాంకుకు లభించిన అదనపు సమాచారం ఆధారంగా సుప్రీంకోర్టు విశ్రాంత న్యాయమూర్తి బీఎన్‌ శ్రీకృష్ణ ఆధ్వర్యంలో విచారణ కమిటీని నియమించిన విషయం తెలిసిందే. ఈ పరిణామాలను సిరిల్‌ అమర్‌చంద్‌ మంగళ్‌దాస్‌ సంస్థకు తెలియజేయడంతో, గత తమ నివేదిక ఇక ఎంత మాత్రం చెల్లుబాటు కాదని అభిప్రాయం వ్యక్తం చేసినట్టు ఐసీఐసీఐ బ్యాంకు పేర్కొంది. 

న్యూఢిల్లీ: వీడియోకాన్‌ గ్రూప్‌నకు లంచం తీసుకుని రుణం మంజూరు చేశారన్న వివాదం ఐసీఐసీఐ బ్యాంక్‌ సీఈవో చందా కొచర్‌ పదవికి ఎసరు పెట్టింది. క్విడ్‌ప్రోకో ఆరోపణలపై విచారణ నేపథ్యంలో బ్యాంక్‌ ఎండీ, సీఈవో పదవులకు కొచర్‌ రాజీనామా చేశారు. 2019 మార్చి 31 దాకా ఆమె పదవీ కాలం ఉన్నప్పటికీ ముందుగానే వైదొలిగినట్లయింది. వీటితో పాటు ఐసీఐసీఐ సెక్యూరిటీస్‌ సహా ఇతర అనుబంధ సంస్థల నుంచి కూడా ఆమె తప్పుకున్నారు. తాజా పరిణామాలతో కొత్త ఎండీ, సీఈవోగా ప్రస్తుత చీఫ్‌ ఆపరేటింగ్‌ ఆఫీసర్‌ (సీవోవో) సందీప్‌ బక్షి నియమితులయ్యారు. 2023 అక్టోబర్‌ 3 దాకా అయిదేళ్ల పాటు ఆయన ఈ హోదాల్లో కొనసాగుతారని ఐసీఐసీఐ బ్యాంక్‌ ఒక ప్రకటనలో తెలిపింది. చందా కొచర్‌పై  బోర్డు మే నెలలో ఆదేశించిన విచారణ యథాప్రకారం కొనసాగుతుందని, దర్యాప్తు ఫలితాలు బట్టి బ్యాంకు నుంచి ఆమెకు అందాల్సిన ప్రయోజనాలు అందటమనేది ఆధారపడి ఉంటుందని పేర్కొంది. రుణ వివాదంపై సుప్రీం కోర్టు మాజీ జస్టిస్‌ బీఎన్‌ శ్రీకృష్ణ సారథ్యంలో బ్యాంకు బోర్డు విచారణ కమిటీ ఏర్పాటు చేసినప్పట్నుంచి చందా కొచర్‌ సెలవులో ఉన్నారు. మరోవైపు, స్వతంత్ర డైరెక్టర్‌ ఎండీ మాల్యా కూడా ఆరోగ్య కారణాల రీత్యా రాజీనామా చేసినట్లు బ్యాంక్‌ వెల్లడించింది. గురువారం బీఎస్‌ఈలో ఐసీఐసీఐ బ్యాంకు షేరు సుమారు 4 శాతం పెరిగి దాదాపు రూ. 316 వద్ద ముగిసింది రుణం తెచ్చిన తంటా..  వీడియోకాన్‌ గ్రూప్‌నకు ఐసీఐసీఐ బ్యాంక్‌ రూ.3,250 కోట్ల రుణాలివ్వడం వెనుక చందా కొచర్, ఆమె కుటుంబ సభ్యుల ప్రమేయం ఉందని, ఈ డీల్‌కు ప్రతిఫలంగా వారు భారీ లంచం తీసుకున్నారనే (క్విడ్‌ప్రోకో) ఆరోపణలున్నాయి. ఐసీఐసీఐ బ్యాంక్‌  నుంచి రుణం పొందినందుకు ప్రతిగా.. చందా కొచర్‌ భర్త దీపక్‌ కొచర్‌కు చెందిన న్యూపవర్‌ రెన్యూవబుల్స్‌ సంస్థలో వీడియోకాన్‌ గ్రూప్‌ అధినేత వేణుగోపాల్‌ ధూత్‌ పెట్టుబడులు పెట్టారనేది ప్రధాన అభియోగం. అంతే కాకుండా ఎస్సార్‌ గ్రూప్‌ సహ వ్యవస్థాపకుడు రవి రూయా అల్లుడు నిషాంత్‌ కనోడియాకు చెందిన మారిషస్‌ సంస్థ ఫస్ట్‌ల్యాండ్‌ హోల్డింగ్స్‌ నుంచీ న్యూపవర్‌లోకి పెట్టుబడులు వచ్చాయి. సరిగ్గా 2010లో ఎస్సార్‌ స్టీల్‌కు ఐసీఐసీఐ బ్యాంక్‌ సారథ్యంలోని కన్సార్షియం 530 మిలియన్‌ డాలర్ల రుణం ఇచ్చిన నెలలోనే.. న్యూపవర్‌లోకి ఫస్ట్‌ల్యాండ్‌ నుంచి పెట్టుబడులు రావడం అనుమానాలకు తావిచ్చింది. ఈ రుణాన్ని బ్యాంకు ఆ తర్వాత మొండిబాకీగా వర్గీకరించింది. బక్షి.. మూడు దశాబ్దాల బ్యాంకింగ్‌ అనుభవం..  ఐసీఐసీఐ బ్యాంక్‌ కొత్త సీఈవోగా నియమితులైన సందీప్‌ బక్షి(58)కి బ్యాంకింగ్‌ రంగంలో సుమారు మూడు దశాబ్దాల పైగా అనుభవం ఉంది. గతంలో ఐసీఐసీఐ ప్రుడెన్షియల్‌ లైఫ్‌ ఇన్సూరెన్స్‌ ఎండీ, సీఈవోగా వ్యవహరించారు. ఆరోపణలతో కొచర్‌ జూన్‌ నుంచి నిరవధిక సెలవుపై వెళ్లిన నేపథ్యంలో బ్యాంకు తొలుత ఆయన్ను అయిదేళ్ల పాటు హోల్‌టైమ్‌ డైరెక్టర్, సీవోవోగా నియమించింది. 1986 డిసెంబర్‌ 1న బక్షి ఐసీఐసీఐ గ్రూప్‌లోని ప్రాజెక్ట్‌ ఫైనాన్సింగ్‌ విభాగంలో చేరారు. ఆ తర్వాత అంచెలంచెలుగా ఎదిగి 2002 ఏప్రిల్‌లో ఐసీఐసీఐ లాంబార్డ్‌ జనరల్‌ ఇన్సూరెన్స్‌ కంపెనీ ఎండీ, సీఈవోగా నియమితులయ్యారు. 2009 నుంచి 2010 దాకా ఐసీఐసీఐ బ్యాంక్‌ డిప్యుటీ ఎండీగా కూడా వ్యవహరించారు. 2010 ఆగస్టు 1న ఐసీఐసీఐ ప్రుడెన్షియల్‌ లైఫ్‌ ఇన్సూరెన్స్‌ ఎండీ, సీఈవోగా నియమితులయ్యారు. పద్మభూషణ్‌ నుంచి  పతనం దాకా... పురుషాధిపత్యం ఉండే ఆర్థిక రంగంలో శక్తిమంతమైన మహిళగా ఎదిగిన చందా కొచర్‌... అంతలోనే అవమానకర రీతిలో ఐసీఐసీఐ బ్యాంక్‌ చీఫ్‌ హోదా నుంచి నిష్క్ర మించాల్సి రావడం గమనార్హం. ప్రతిష్టాత్మక పద్మశ్రీ, పద్మభూషణ్‌ పురస్కారాలు అందుకున్న కొచర్‌ ప్రస్తుతం అవినీతి ఆరోపణలపై విచారణలను ఎదుర్కొంటున్నారు. 1984లో ఐసీఐసీఐ లిమిటెడ్‌లో మేనేజ్‌మెంట్‌ ట్రైనీగా చేరాక... చురుకైన పనితీరుతో గ్రూప్‌లో అంచెలంచెలుగా ఎదిగారు. ఇన్‌ఫ్రా రంగానికి రుణాలిచ్చే సంస్థ స్థాయి నుంచి 1990లలో ఐసీఐసీఐ కమర్షియల్‌ బ్యాంకుగా పరిణామం చెందడంలో ఆమె కీలక పాత్ర పోషించారు. గ్రూప్‌ చైర్మన్‌ కేవీ కామత్‌ నిష్క్రమణ అనంతరం.. 2009లో ఐసీఐసీఐ బ్యాంక్‌ ఎండీ, సీఈవో పదవిని దక్కించుకున్నారు. ఇది శిఖా శర్మ (యాక్సిస్‌ బ్యాంక్‌ చీఫ్‌) వంటి ఇతరత్రా సీనియర్ల నిష్క్రమణకు దారి తీసింది. చందా కొచర్‌ తన సారథ్యంలో బ్యాంక్‌ను పటిష్ట స్థానానికి చేర్చారు. ఐసీఐసీఐ బ్యాంక్, చందా కొచర్‌ పర్యాయపదాలుగా మారేంతగా ఆమె ప్రభావం చూపారు. వీడియోకాన్‌కు రుణాలపై ఆరోపణలు వచ్చిన తొలినాళ్లలో బ్యాంకు బోర్డు ఆమెకు పూర్తి మద్దతుగా నిల్చినా .. ఆ తర్వాత విచారణకు ఆదేశించాల్సి వచ్చింది. పనితీరుపరంగా చూస్తే.. ఆమె సీఈవో పగ్గాలు చేపట్టినప్పుడు ఐసీఐసీఐ బ్యాంక్‌.. దేశీ బ్యాంకింగ్‌ వ్యవస్థలో రెండో స్థానంలోనూ, ప్రైవేట్‌ రంగంలో అగ్రస్థానంలో ఉండేది. కానీ కొచర్‌ వైదొలిగే నాటికి బ్యాంకింగ్‌ వ్యవస్థలో ఐసీఐసీఐ మూడో స్థానానికి పడిపోయింది.   

వడోదర : ఐసీఐసీఐ బ్యాంక్‌ వార్షిక సాధారణ సమావేశంలో వాటాదారులు ఆగ్రహం పెల్లుబుక్కింది. ఐసీఐసీఐ-వీడియోకాన్‌ స్కాంలో ఆరోపణలు ఎదుర్కొంటున్న మాజీ సీఈవో చందా కొచర్‌ను ఏజీఎం తీసుకు రావాలని వాటాదారులు డిమాండ్‌ చేశారు. చందా కొచర్‌, ఆమె కుటుంబ సభ్యులు వీడియోకాన్‌కు రుణాలు జారీ చేసే విషయంలో ‘క్విడ్‌ ప్రో క్వో’ కు పాల్పడ్డారని వస్తున్న ఆరోపణలపై, కొచర్‌ తమకు సమాధానం చెప్పాలని అన్నారు. బోర్డు పారదర్శకంగా వ్యవహరించలేదని వాటాదారులు మండిపడ్డారు. కొచర్‌, ప్రస్తుతం వీడియోకాన్‌ రుణ వివాద విచారణ పూర్తయ్యేంత వరకు సెలవులో ఉన్నారు. ఈ క్రమంలో ఆమె నేడు(బుధవారం) జరిగిన 24వ వార్షిక సాధారణ సమావేశానికి హాజరు కాలేదు.  ఐసీఐసీఐ నూతన చైర్మన్‌ చతుర్వేది ఆధ్వర్యంలో మొట్టమొదటిసారి ఈ సమావేశం జరిగింది. కానీ ఈ సమావేశంలో వాటాదారులు ఆగ్రహం పెల్లుబికింది. తమ ప్రశ్నలకు ఎలాంటి సమాధానం దొరకడం లేదని వాటాదారుల మండిపడ్డారు. బ్యాంక్‌లో అవినీతిని ఎట్టి పరిస్థితుల్లో అనుమతించేది లేదంటూ వాటాదారులు హెచ్చరించారు. తమ ముందుకు వచ్చి చందా కొచర్‌ సమాధానం చెప్పాల్సిందేనన్నారు. కొచర్‌ జాబ్‌ను బోర్డు నిర్వహించలేదన్నారు. అయితే ఐసీఐసీఐ బ్యాంక్‌ తన ఏజీఎంను ఆగస్టు 10నే చేపట్టాల్సి ఉంది. కానీ బ్యాంక్‌ సీఈవోపై వచ్చిన ఆరోపణ నేపథ్యంలో, స్వతంత్ర విచారణకు ఆదేశించేందుకు ఈ సమావేశాన్ని నెల పాటు వాయిదా వేసింది. త్వరలోనే కొచర్‌కు, ఆమె భర్త దీపక్‌ కొచర్‌కు సెబీ సమన్లు జారీ చేయనున్నట్లు తాజా రిపోర్టులు వెల్లడిస్తున్నాయి. కొంతమంది బ్యాంక్‌ టాప్‌ అధికారులు కూడా, కొచర్‌ భర్తతో భాగస్వామ్యమై లబ్ది పొందినట్టు తెలిసింది. వారిని వ్యక్తిగత విచారణకు హాజరు కావాలని ఆదేశించే అవకాశం కనిపిస్తోంది.   

సాక్షి, ముంబై: ఐసీఐసీఐ బ్యాంకు చెందిన బ్రోకింగ్‌ సంస్థ  ఐసీఐసీఐ సెక్యూరిటీస్‌ కంపెనీ డైరెక్టర్‌గా  ఐసీఐసీఐ  బ్యాంకు మాజీ సీఈవో, ఎండీ  చందా కొచర్  నియామకం దాదాపు ఖరారైంది.  ఐసీఐసీఐ సెక్యూరిటీస్‌ డైరెక్టర్‌గా చందా కొచర్‌కు అనుకూలంగా ఐసీఐసీఐ బ్యాంక్‌ ఓటు వేసింది. ఆగష్టు 30, గురువారం  జరిగిన వార్షిక సాధారణ సమావేశంలోఈ మేరకు బోర్డు ఆమోద ముద్ర వేసింది.   వీడియోకాన్‌ గ్రూప్‌కు ఇచ్చిన రుణాల విషయంలో అవకతవకలు జరిగాయన్న ఆరోపణలు రావడంతో చందా కొచర్‌ను  సెలవుపై పంపారు. ఆమెపై ఐసీఐసీఐ బ్యాంక్‌ స్వతంత్రంగా దర్యాప్తు జరుపుతుండగా, 2018 జూలై 19 నుంచి ఆమె సెలవులో ఉన్నారు. ఈ నేపథ్యంలో ఐసీఐసీఐ సెక్యూరిటీస్‌ డైరెక్టర్‌గా చందా కొచర్‌కు అనుకూలంగా ఓటు వేయడంపై విమర్శలు  చెలరేగాయి.  ఐసీఐసీఐ  వీడియోకాన్‌ రుణాల కుంభకోణంలో  ప్రధాన ఆరోపణల నేపథ్యంలో సెలవులో ఉన్న ఆమెకు కంటితుడుపు చర్యగా ఈ డైరెక్టర్‌ పదవిని కట్టబెడుతున్నారని ప్రాక్సీ అడ్వైజరీ సంస్థ, ఇన్‌గవర్న్‌ విమర్శించిందికాగా ఐసీఐసీఐ సెక్యూరిటీస్ కంపెనీలో  ఐసీఐసీఐ బ్యాంక్‌కు 80 శాతం వాటా ఉంది.

న్యూఢిల్లీ: ఐసీఐసీఐ బ్యాంక్‌ ఎండీ, సీఈఓ చందా కొచర్‌పై జరుగుతున్న విచారణ మరింత లోతుకు వెళ్లే అవకాశం ఉందని, ఇది అదనపు వ్యయ భారాలకూ దారితీయవచ్చని ఆ బ్యాంక్‌ అభిప్రాయపడుతోంది. బ్యాంకు ప్రతిష్టకు ఈ ఉదంతం విఘాతం కలిగించే అంశమని కూడా భావిస్తోంది. అమెరికా సెక్యూరిటీస్‌ అండ్‌ ఎక్సే్ఛంజ్‌ కమిషన్‌ (ఎస్‌ఈసీ)కు జూలై 31న సమర్పించిన ఒక ఫైలింగ్‌లో బ్యాంక్‌ ఈ అభిప్రాయాలను వ్యక్తం చేసింది. కొచర్‌పై వచ్చిన వివిధ ఆరోపణలపై విచారణకు సుప్రీంకోర్టు మాజీ న్యాయమూర్తి బీఎన్‌ శ్రీకృష్ణ నేతృత్వంలో ఒక దర్యాపు సంస్థను బ్యాంక్‌ ఆడిట్‌ కమిటీ జూన్‌లో ఏర్పాటు చేసినట్లూ బ్యాంక్‌ వివరణ ఇచ్చింది.  వ్యాపార నిర్వహణపై ప్రతికూల ప్రభావం  తన భర్త దీపక్‌ కొచర్‌ నియంత్రణలోని సంస్థలు, వీడియోకాన్‌ గ్రూప్‌ మధ్య లావాదేవీలకు సంబంధించి ఐసీఐసీఐ బ్యాంక్‌ రుణాలు, అవి మొండిబకాయిలుగా మారడం, వ్యక్తిగత లబ్ది తత్సంబంధ అంశాలకు సంబంధించి చందాకొచర్‌ ఆశ్రిత పక్షపాతం, క్విడ్‌ ప్రో కో ఆరోపణలను ఎదుర్కొంటున్న సంగతి తెలిసిందే. ‘‘నియంత్రణ సంస్థల విచారణలను బ్యాంక్‌ ఎదుర్కొంటోంది.  విచారణ మరింత లోతుకూ వెళ్లవచ్చు. ఇది బ్యాంకుపై అదనపు వ్యయభారాలను మోపుతుంది. వ్యాపార నిర్వహణపై ప్రతికూల ప్రభావం పడుతుంది. బ్యాంక్‌ ప్రతిష్టను దిగజార్చే ప్రమాదం ఉంది’’ అని ఎస్‌ఈసీకి సమర్పించిన ఫైలింగ్‌లో తెలిపింది. ఆరోపణలు, వాటిపై విచారణల నేపథ్యంలో కొచర్‌ 2018 జూన్‌ 19 నుంచీ సెలవుపై వెళ్లిన సంగతి తెలిసిందే. తాత్కాలిక చీఫ్‌ ఆపరేటింగ్‌ ఆఫీసర్‌ (సీఓఓ)గా సందీప్‌ బక్షీని బ్యాంక్‌ నియమించింది.  కాగా, బ్యాంక్‌ అత్యుత్తమ పాలనా నిర్వహణకు అధిక ప్రాధాన్యత ఇస్తామని  ఐసీఐసీఐ కొత్త నాన్‌ ఎగ్జిక్యూటివ్‌ చైర్మన్‌  గిరీష్‌ చంద్ర చతుర్వేది పేర్కొన్నారు. 

అవకతవకల్లో, అసమర్ధతలో, అనేక రకాల ఇతర జాడ్యాల్లో మన దేశంలోని ప్రైవేటు బ్యాంకులు ప్రభుత్వ రంగ బ్యాంకులకు ఏమాత్రం తీసిపోవని ఏణ్ణర్ధంనుంచి రుజువవుతుండగా ఇన్నాళ్లూ తమ బ్యాంకు సీఈఓ, ఎండీ చందా కొచర్‌ను వెనకేసుకొస్తున్న ఐసీఐసీఐ బ్యాంకు ఎట్టకేలకు ఆమెను ఆ బాధ్యతల నుంచి తప్పించి సందీప్‌ బక్షికి పగ్గాలు అప్పగించింది. అన్నిటినీ ప్రైవే టీకరిస్తూ పోతే తప్ప ఈ దేశం బాగుపడదని తెగ వాదించే ఆర్థిక రంగ నిపుణులు అందుకు ఐసీఐసీఐ పనితనాన్ని తరచు ఉదహరిస్తూ పరవశించేవారు. కానీ ఇప్పుడు బయటపడిందంతా అందుకు విరుద్ధం. అవినీతి, ఆశ్రిత పక్షపాతం, అసమర్థత వగైరాలు వెల్లడైనప్పుడు ప్రభుత్వ రంగ బ్యాంకుల చీఫ్‌లపై కనీసం వెనువెంటనే చర్యలు తీసుకోవడం ఆనవాయితీ. కానీ ఐసీఐసీఐ బ్యాంకు ఆ పని చేయలేదు. వీడియోకాన్‌ గ్రూపునకు రుణం మంజూరులో అవకతవకలు చోటు చేసుకున్నాయని రెండేళ్లక్రితం ఒక మదుపుదారు ఫిర్యాదు చేసినప్పుడు ఆ సంస్థ మిన్నకుండి పోయింది. మొన్న మార్చిలో ఆ ఆరోపణలే వెల్లువెత్తడం మొదలయ్యాక ఆమెను సమర్థిస్తూ ప్రక టన విడుదల చేసింది. వాటిల్లో నిజానిజాలేమిటన్న సంగతలా ఉంచి తన వంతుగా వెను వెంటనే అంతర్గత విచారణ లేదా బయటివారితో విచారణ జరిపించి, నిజానిజాలు వెల్లడించి ‘అంతా సవ్యంగానే ఉన్నద’ని బ్యాంకు చెప్పగలిగితే, కొచర్‌ నిజాయితీ వెల్లడికావడంతోపాటు సంస్థ ప్రతిష్ట ఇంతకింతా పెరిగేది. కానీ కొచర్‌పై తమ సంస్థకు పూర్తి విశ్వాసం, నమ్మకం ఉన్నాయని అది ప్రక టించి ఊరుకుంది. వచ్చిన ఆరోపణలన్నీ దురుద్దేశపూర్వకమైన, నిరాధారమైన వదంతులు మాత్రమేనని చెప్పింది. సంస్థలో 34 ఏళ్లక్రితం మేనేజ్‌మెంట్‌ ట్రైనీగా చేరి, తన ప్రతిభాపాటవా లతో ఎదిగి, బ్యాంకు రూపకల్పనలో పాలుపంచుకుని, దాన్ని ఉన్నత స్థాయికి చేర్చడంలో కొచర్‌ కృషి అసాధారణమైనది. ఆ విషయంలో ఆమెపై బ్యాంకుకు విశ్వాసం, నమ్మకం ఉండటం తప్పేం కాదు. అలా ఉండబట్టే ఆమెకు బ్యాంకు సారథ్య బాధ్య తలు కూడా అప్పగించారనడంలో ఎవరికీ సందేహం లేదు. కానీ వచ్చిన ఆరోపణలపై ఆడిటింగ్‌ జరిపించి బ్యాంకు మదుపుదార్లలోనూ, ఖాతాదార్లలోనూ ఉన్న సందేహాలను తొలగించడానికి అవి అడ్డు రావలసిన అవసరం లేదు.  2012లో వీడియోకాన్‌ గ్రూపునకు రూ. 3,250 కోట్ల రుణం మంజూరు చేయడంలో అవక తవకలు చోటు చేసుకున్నాయన్నది ప్రధాన ఆరోపణ. వీడియోకాన్‌ గ్రూపు అధినేత వేణుగోపాల్‌ ధూత్‌కూ, చందా కొచర్‌ భర్త దీపక్‌ కొచర్‌కూ మధ్య వ్యాపార లావాదేవీలున్నాయని వాటి పర్యవ సానంగానే రుణం లభించిందని ఈ ఆరోపణ చేసినవారు తెలిపారు. రుణం మంజూరయ్యాక దీపక్‌ కొచర్‌కూ, మరో బంధువుకూ లబ్ధి చేకూరిందని సాక్ష్యాధారాలతో చూపారు. తీసుకున్న రుణాన్ని వీడియోకాన్‌ సక్రమంగా చెల్లించి ఉంటే ఈ వ్యవహారం బయటికొచ్చేది కాదు. వచ్చినా దాన్నెవరూ పెద్దగా పట్టించుకునేవారు కాదు. కానీ అప్పుగా తీసుకున్న రూ. 3,250 కోట్లలో రూ. 2,810 కోట్లను అది ఎగేసింది. దాంతో ఆ మొత్తాన్ని గత ఏడాది నిరర్థక ఆస్తిగా ప్రకటించాల్సి వచ్చింది. ఈ విషయంలో ఐసీఐసీఐ వివరణ సమర్ధనీయంగా లేదు. వీడియోకాన్‌కు రుణాలిచ్చిన కన్సార్షి యంలో తమది లీడ్‌ బ్యాంక్‌ కాదని, ఆ సంస్థకు కన్సార్షియం నుంచి వెళ్లిన మొత్తం రుణంలో తాము ఇచ్చింది 10 శాతం కన్నా తక్కువేనని బ్యాంకు చెప్పింది. అలాగే రుణమివ్వాలన్న నిర్ణయం బ్యాంకు క్రెడిట్‌ కమిటీదేనని, కమిటీలో ఆమె ఒక సభ్యురాలే తప్ప దానికి చైర్‌పర్సన్‌ కారని కూడా వివరించింది. ఇవన్నీ నిజమే కావొచ్చు. కానీ క్రెడిట్‌ కమిటీ వీడియోకాన్‌ గ్రూపునకు రుణం మంజూరు చేసిన సందర్భంలో తన భర్తకు వీడియోకాన్‌ గ్రూపు అధినేతతో వ్యాపార సంబంధా లున్నాయని చందా కొచర్‌ వెల్లడించారా లేదా అన్నది తేల్చాలి. అలాగే రుణం మంజూరయ్యాక ధూత్‌ నుంచి ఆమె కుటుంబీలకు లబ్ధి చేకూరిందో లేదో ఆరా తీయాలి. రుణం మంజూరైన సమ యంలో ధూత్‌తో తమ కుటుంబీకుల వ్యాపార వ్యవహారాలను చెప్పకపోయి ఉంటే చందా కొచర్‌ అనౌచిత్యానికీ పాల్పడినట్టే లెక్క.  అధిక ఈక్విటీ గల ప్రధాన ప్రమోటర్‌ నేతృత్వంలో నడిచే హెచ్‌డీఎఫ్‌సీ, కొటక్‌ మహీంద్ర వంటి బ్యాంకులకూ, ఐసీఐసీఐకీ మధ్య వ్యత్యాసం ఉంది. ఐసీఐసీఐ పూర్తిగా వృత్తి నిపుణులుండే బోర్డు కార్యనిర్వహణలో నడుస్తోంది. సంస్థ అధిపతిగా ప్రధాన ప్రమోటర్‌ మార్కెట్‌ స్థితిగతులను అంచనా వేసుకుని, లాభనష్టాలను బేరీజు వేసుకుని ఎలాంటి నిర్ణయానికైనా రాగలుగుతారు. కానీ వృత్తి నిపుణులతో కూడిన బోర్డులు పనితీరు వేరేగా ఉంటుంది. అక్కడ బోర్డులోని నిపుణులంతా ఏ అంశం విషయంలోనైనా అన్ని కోణాల్లోనూ చర్చించుకుని ఒక నిర్ణయానికొస్తారు. ఏ ఒక్కరో బోర్డు నిర్ణయాన్ని ప్రభావితం చేసే అవకాశం తక్కువ. కానీ ఐసీఐసీఐలో జరిగిందంతా అందుకు విరుద్ధమని జరిగిన వ్యవహారాన్ని గమనిస్తే అర్ధమవుతుంది. అలా చూస్తే ఇందులో కొచర్‌కు మాత్రమే కాదు... బోర్డు సమష్టి బాధ్యత కూడా ఉంది. ఐసీఐసీఐ వ్యవహారంపై ఫిబ్రవరిలో సీబీఐ ప్రాథమిక దర్యాప్తు ప్రారంభించగా, ఆ తర్వాత ఎన్‌ఫోర్స్‌మెంట్‌ డైరెక్టరేట్, సెబి కూడా రంగంలోకి దిగాయి. బ్యాంకు తనకు తానుగా సుప్రీం కోర్టు న్యాయమూర్తిగా పనిచేసి రిటైరైన జస్టిస్‌ శ్రీకృష్ణ ఆధ్వర్యంలో విచారణ కమిటీని నియమించింది. కొచర్‌ను వెనకేసుకురావడానికి బదులు ఈ పని ముందే చేసి ఉంటే ఐసీఐసీఐ ప్రతిష్ట ఇనుమడించేది. అయితే విచారకరమైన విషయమేమంటే కొచర్‌ను సెలవుపై వెళ్లాలని బోర్డు కోరలేదు. ఆమె తనంత తానుగా వెళ్లారు. ఇప్పుడు జస్టిస్‌ శ్రీకృష్ణ విచారణ పూర్తయ్యేవరకూ సెలవు కొనసాగించాలని నిర్ణయించుకున్నారు. తీవ్ర ఆరోపణలొచ్చిన ప్పుడైనా నిర్ణయాత్మకంగా, దృఢంగా వ్యవహరించలేకపోతే తప్పుడు సంకేతాలు వెళ్తాయని బోర్డుకు తెలియపోవడం ఆశ్చర్యకరం. ఈ విషయంలో తన విధానాలు సవరించుకోవాలి.

న్యూఢిల్లీ: వీడియోకాన్‌ గ్రూపునకు రుణాల మంజూరు వెనుక ఆర్థిక ప్రయోజనాలు ముట్టాయన్న ఆరోపణలు ఎదుర్కొంటున్న ఐసీఐసీఐ బ్యాంకు సీఈవో, ఎండీ చందా కొచర్‌... ఈ అంశంపై బ్యాంకు స్వతంత్రంగా చేపట్టిన విచారణ పూర్తయ్యే వరకు సెలవుపైనే కొనసాగాలని నిర్ణయించుకున్నారు. ఈ విషయాన్ని ఐసీఐసీఐ బ్యాంకు బోర్డు ప్రకటించింది. ఈ పరిణామాల నేపథ్యంలో ప్రస్తుతం ఐసీఐసీఐ ప్రుడెన్షియల్‌ లైఫ్‌ ఇన్సూరెన్స్‌ ఎండీ, సీఈవోగా పనిచేస్తున్న సందీప్‌ భక్షి ఐసీఐసీఐ బ్యాంకు చీఫ్‌ ఆపరేటింగ్‌ ఆఫీసర్‌ (సీవోవో)గా రంగ ప్రవేశం చేయనున్నారు. ఆయన్ను సీవోవోగా ఎంపిక చేస్తూ సోమవారం సమావేశమైన ఐసీఐసీఐ బ్యాంకు డైరెక్టర్ల బోర్డు నిర్ణయం తీసుకుంది. ఈ నెల 19నే (మంగళవారం) సీవోవోగా సందీప్‌ భక్షి బాధ్యతలు చేపడతారని బ్యాంకు తెలిపింది. ఈ నియామకం వివిధ అనుమతులకు లోబడి ఉంటుందని స్పష్టం చేసింది. ‘‘ఐసీఐసీఐ బ్యాంకు అన్ని వ్యాపారాలను భక్షి పర్యవేక్షించనున్నారు. అలాగే, బ్యాంకు కార్పొరేట్‌ కార్యకలాపాలను కూడా ఆయనే చూస్తారు. ఐసీఐసీఐ బ్యాంకు బోర్డు ఎగ్జిక్యూటివ్‌ డైరెక్టర్లు అందరూ, ఎగ్జిక్యూటివ్‌ మేనేజ్‌మెంట్‌ సైతం ఆయనకే రిపోర్ట్‌ చేయాల్సి ఉంటుంది’’ అని ఐసీఐసీఐ బ్యాంకు తెలిపింది. బ్యాంకు ఎండీ, సీఈవో అయిన చందా కొచర్‌కు భక్షి రిపోర్ట్‌ చేయాల్సి ఉంటుందని, అయితే, కొచర్‌ సెలవు కాలంలో భక్షి బ్యాంకు బోర్డుకు రిపోర్ట్‌ చేస్తారని తెలియజేసింది. ఇక భక్షి స్థానంలో ఐసీఐసీఐ ప్రుడెన్షియల్‌ లైఫ్‌ ఇన్సూరెన్స్‌ ఎండీ, సీఈవోగా ఎన్‌ఎస్‌ కన్నన్‌ నియామకానికి బ్యాంకు బోర్డు సిఫారసు చేసింది. వీడియోకాన్‌ గ్రూపునకు రుణం మంజూరులో చందాకొచర్‌ కుటుంబానికి ఆర్థిక ప్రయోజనాలు ముట్టాయంటూ ఆరోపణలు రావడంతో ఐసీఐసీఐ బ్యాంకు గత నెలలోనే దీనిపై స్వతంత్ర విచారణ నిర్వహించనున్నట్టు ప్రకటించడం తెలిసిందే.

సాక్షి, ముంబై: వీడియోకాన్‌ రుణ వివాదంలో చిక్కుకున్న ఐసీఐసీఐ బ్యాంకు సీఎండీ చందా కొచర్‌కు బోర్డు షాక్‌ ఇవ్వనుందా?  బ్యాంకులో ఆమె భవితవ‍్యం నేడు తేలనుందా? ఈ కుంభకోణంపై విచారణ నేపథ్యంలో  సీఈవో పదవినుంచి ఉద్వాసన పలకనున్నారా?  నేడు జరగనున్న ఐసీఐసీఐ బ్యాంకు బోర్డు సమావేశంలో ఈ కీలక ప్రశ్నలకు  సమాధానం దొరకనుంది. బ్యాంకు మేనేజ్‌మెంట్‌ పునర్వవస్థీకరణపై బోర్డు డైరెక్టర్లు చర్చించనున్నారని విశ్వసనీయ వర్గాల సమాచారం. బ్యాంకుకు చెందిన  లైఫ్ ఇన్సూరెన్స్ వెంచర్ ప్రుడెన్షియల్‌ లైఫ్‌కు సీఈఓ సందీప్ బక్షిని  ఐసీఐసీఐ బ్యాంకు  తాత్కాలిక  సీఈవోగా  ఎంపిక చేయనున్నట్టు  తెలుస్తోంది.  ఆరోపణలపై విచారణ పూర్తయ్యేంత వరకు నిరవధిక సెలవులో వెళ్లమని బోర్డు కోరనుందని భావిస్తున్నారు. అలాగే బీఎన్‌ కృష్ణ విచారణ ప్రతిపాదనకు ఆమోదం, తదుపరి కార్యాచరణపై  సమగ్రంగా ఈ సమావేశం చర్చించనుంది. ఈ వార్తలపై  బ్యాంకు బోర్డు అధికారికంగా స‍్పందించాల్సి ఉంది. 1986లో సందీప్‌ బక్షి ఐసీఐసీఐ బ్యాంకులో చేరారు.  2010 నుంచి ఆగస్టు నుంచి ప్రుడెన్షియల్‌ లైఫ్‌కు సీఈఓగా పనిచేస్తున్నారు. అంతకుముందు 2009-10 మధ్య కాలంలో బ్యాంకుకు చెందిన రిటైల్‌  సంస్థకు డిప్యూటీ ఎండీగా బాధ్యతలు నిర్వహించారు. కాగా బ్యాంకు సీఈవో, మేనేజింగ్ డైరెక్టర్ చందా కొచర్‌పై వచ్చిన ఆర్థిక అభియోగాలకు సంబంధించి సుప్రీంకోర్టు మాజీ న్యాయమూర్తి జస్టిస్ బిఎన్ శ్రీకృష్ణ ఆధ్వర్యంలోని స్వత్రంత  కమిటీ విచారణకు ఆమోదం తెలిపారు.  కొచర్‌ భర‍్త దీపక్‌ కంపెనీకి ఆర్థిక ప్రయోజనాలు కల్పించే విధంగా చందా కొచర్ వ్యవహరించారనే అభియోగాలొచ్చిన విషయం విదితమే.

సాక్షి, ముంబయి : ఐసీఐసీఐ బ్యాంక్‌ చీఫ్‌ చందా కొచర్‌పై వచ్చిన ఆరోపణలపై జస్టిస్‌ బీఎన్‌ శ్రీకృష్ణ నేతృత్వంలోని కమిటీ విచారణ చేపడుతోంది. రుణాల మంజూరులో నిబంధనలను ఉల్లంఘిస్తూ, క్విడ్‌ ప్రోకోకు పాల్పడ్డారని చందా కొచర్‌పై ఆరోపణలు వెల్లువెత్తిన విషయం తెలిసిందే. విచారణ ప్రక్రియ ప్రారంభమైందని సున్నితమైన, వివాదాస్పద అంశం కావడంతో తుది నివేదికకు కొంత సమయం పడుతుందని విశ్వసనీయ వర్గాలు పేర్కొన్నాయి. చందా కొచర్‌పై తాజా ఫిర్యాదుల నేపథ్యంలో మే 30న ఐసీఐసీఐ బ్యాంకు బోర్డు విచారణ కమిటీని ఏర్పాటు చేసింది. తుది విచారణ నివేదిక ఎప్పుడు సమర్పించాలనే దానిపై బోర్డు నిర్థిష్ట గడువును వెల్లడించలేదు. ఫోరెన్సిక్‌, ఈమెయిళ్ల పరిశీలన, రికార్డులు, సంబంధిత వ్యక్తుల స్టేట్‌మెంట్ల ఆధారంగా స్వతంత్ర విచారణ సాగుతుందని ఐసీఐసీఐ బ్యాంక్‌ బోర్డు స్పష్టం చేసింది. దర్యాప్తు ప్రక్రియలో భాగంగా సంబంధిత అంశాలన్నింటిపైనా విచారణ చేపట్టి తుది నివేదికను సమర్పిస్తారని స్టాక్‌ ఎక్స్ఛేంజ్‌లకు దాఖలు చేసిన ఫైలింగ్‌లో బ్యాంక్‌ పేర్కొంది. వీడియోకాన్‌ గ్రూప్‌నకు రుణాల మంజూరులో ఒప్పందానికి విరుద్ధంగా వ్యవహరించారని ఐసీఐసీఐ బ్యాంక్‌కు, చందా కొచర్‌కు సెబీ నోటీసులు జారీ చేసిన క్రమంలో స్వతంత్ర విచారణకు బ్యాంక్‌ ఆదేశించింది. వీడియోకాన్‌ గ్రూప్‌నకు, చందా కొచర్‌ భర్త దీపక్‌ కొచర్‌కు చెందిన న్యూపవర్‌ రెన్యూవబుల్స్‌ మధ్య జరిగిన లావాదేవీలపై సెబీ సందేహం వ్యక్తం చేసింది. దీపక్‌ కొచర్‌కు ఆర్థిక సంబంధాలు కలిగిన వీడియోకాన్‌ గ్రూప్‌నకు ఐసీఐసీఐ బ్యాంక్‌ రుణాల జారీలో క్విడ్‌ ప్రోకో జరిగిందని ఆరోపణలు వెల్లువెత్తిన సంగతి తెలిసిందే.

ముంబై : వీడియోకాన్‌కు ఐసీఐసీఐ బ్యాంకు ఇచ్చిన రుణ కేసులో ఆ బ్యాంకు ఎండీ, సీఈవో చందా కొచర్‌కు ఉచ్చు బిగిస్తోంది. ఈ రుణ వ్యవహారంలో ఆరోపణలు తీవ్రతరమవుతుండటంతో బ్యాంకు బోర్డు దిగొచ్చి స్వతంత్ర దర్యాప్తునకు ఆదేశించడం, కొచర్‌కు, బ్యాంకుకు వ్యతిరేకంగా సెబీ నోటీసులు జారీచేయడం మరింత చర్చనీయాంశమైంది. చందా కొచర్‌ తప్పు చేయలేదంటూ ఓ వైపు నుంచి బ్యాంకు బోర్డు చెబుతూ వస్తుంది. ఒకవేళ ఈ విచారణలో చందా కొచర్‌ కనుక తప్పు చేసినట్టు వెల్లడైతే, ఆమె భారీ మొత్తంలో పెనాల్టీ ఎదుర్కోవాల్సి వస్తుందని తాజా రిపోర్టులు పేర్కొంటున్నాయి. ప్రస్తుతం సెబీ జారీచేసిన నోటీసు ప్రకారం ఐసీఐసీఐ బ్యాంకు టాప్‌ ఎగ్జిక్యూటివ్‌ను ఆ పదవి నుంచి దిగిపోవాలని ఆదేశించే హక్కు లేదని, కానీ భారీ మొత్తంలో పెనాల్టీ విధించే అవకాశముందని మింట్‌ రిపోర్టు చేసింది. ఈ జరిమానా గరిష్టంగా రూ.25 కోట్లు లేదా లబ్ది పొందిన మొత్తంలో మూడింతలు ఉంటుందని తెలిపింది. కానీ చందా కొచర్‌ కేసులో ఎంత జరిమానా విధించాలి అనే విషయంపై సెబీ న్యాయనిర్ణేత అధికారి ఆదేశాలపై ఆధారపడి ఉంటుందని రిపోర్టు పేర్కొంది. వీడియోకాన్‌కు రుణాలు జారీచేసిన లావాదేవీల వివరాలను వెల్లడించే విషయంలో లిస్టింగ్‌ నిబంధనల ఉల్లంఘన జరిగినట్లు సెబీ తన నోటీసుల్లో పేర్కొంది. నేడు అమెరికా మార్కెట్‌ రెగ్యులేటరీ ఎస్‌ఈసీ కూడా ఈ కేసుపై దృష్టిసారించినట్టు తెలిపింది. ఐసీఐసీఐ బ్యాంకు అమెరికాలో కూడా లిస్ట్‌ అయి ఉండటమే దీనికి కారణం. ఈ కేసులో మరిన్ని వివరాల కోసం సెబీని ఎస్‌ఈసీ ఆశ్రయించింది. ప్రస్తుతం చందాకొచర్‌ సీబీఐ, ఇన్‌కమ్‌ ట్యాక్స్‌ నుంచి కూడా విచారణనను ఎదుర్కొంటున్నారు. వీడియోకాన్ గ్రూపునకు 2012లో అక్రమంగా రూ.3,250 కోట్ల రుణ మంజూరు వ్యవహారంలో క్విడ్ ప్రోకో ఏమైనా జరిగిందా అనేది ఆరా తీస్తోంది. ఈ ప్రాథమిక విచారణలో భాగంగా సీబీఐ ఇప్పటికే పలువురు ఐసీఐసీఐ బ్యాంకు అధికారులను ప్రశ్నించడంతో పాటు ఆ రుణ లావాదేవీకి సంబంధించిన  పత్రాలను స్వాధీనం చేసుకుంది. రుణాన్ని పొందిన వీడియోకాన్ గ్రూపు అందుకు ప్రతిఫలంగా దీపక్ కొచ్చర్ ఆధీనంలోని నూపవర్ రెన్యువబుల్స్ అనే పవన విద్యుత్ సంస్థలో పెట్టుబడులు పెట్టిందనీ, వీడియోకాన్ గ్రూపునకు రుణాలను మంజూరు చేసిన కమిటీలో  చందా కొచ్చర్ ఉన్నారంటూ ఆరోపణలు వెల్లువెత్తాయి. మరోవైపు  క్విడ్ ప్రోకో జరగలేదంటూ ఈ ఆరోపణలను  వీడియోకాన్  చైర్మన్‌ ధూత్‌ తోసిపుచ్చిన సంగతి విదితమే..

సాక్షి, న్యూడిల్లీ : ఐసీఐసీఐ బ్యాంక్‌ రుణాల జారీలో చోటుచేసుకున్న అక్రమాలకు సంబంధించి సీఈవో చందా కొచర్‌పై తాజా ఆరోపణల నేపథ్యంలో ఈ అంశంపై మోదీ సర్కార్‌ మౌనం దాల్చడాన్ని కాంగ్రెస్‌ ప్రశ్నించింది. ఐసీఐసీఐ బ్యాంక్‌ వ్యవహారంలో ప్రభుత్వం ఎందుకు జోక్యం చేసుకోవడం లేదని, విచారణకు ఎందుకు ఆదేశించడం లేదని నిలదీసింది. ఆరోపణలను నిగ్గుతేల్చేందుకు బ్యాంక్‌ ఖాతాలపై పర్యవేక్షణ, ఖాతాదారులు, డిపాజిటర్లు, షేర్‌హోల్డర్ల ప్రయోజనాల పరిరక్షణకు చర్యలు చేపట్టాల్సిన మోదీ సర్కార్‌ తన పెట్టుబడిదారీ స్నేహితులను కాపాడటంలో మునిగితేలుతోందని కాంగ్రెస్‌ ప్రతినిధి పవన్‌ ఖేరా ఆరోపించారు. ఐసీఐసీఐ బ్యాంక్‌ రుణాల వ్యవహారంలో అక్రమాలపై హెచ్చరిస్తూ ఈ ఏడాది మార్చిలోనే ప్రధాన మంత్రికి లేఖలు, వార్తలు వెల్లువెత్తిన క్రమంలో ప్రభుత్వం ఎందుకు విచారణకు ఆదేశించలేదని ప్రశ్నించారు. ఐసీఐసీఐ బ్యాంక్‌ అక్రమాలపై మోదీ సర్కార్‌ మౌనం దాల్చడాన్ని తీవ్రంగా తప్పుపట్టారు. బ్యాంకులపై నిఘా కొరవడటంతో రూ 61,036 కోట్ల సొమ్ము రుణాల పేరుతో లూటీ చేశారని ఆందోళన వ్యక్తం చేశారు. బ్యాంకింగ్‌ వ్యవస్థపై సాధారణ ప్రజలకు విశ్వాసం సన్నగిల్లిందన్నారు.

న్యూఢిల్లీ: దేశంలో రెండో అతిపెద్ద ప్రయివేటు బ్యాంక్‌ ఐసీఐసీఐ చీఫ్‌ ఎగ్జిక్యూటివ్‌(సీఈఓ) చందా కొచర్‌ను స్వతంత్ర దర్యాప్తు పూర్తయ్యేవరకు సెలవు మీద వెళ్లాల్సిందిగా బ్యాంక్‌ బోర్డు ఆదేశించినట్టు వార్తలొచ్చాయి. అయితే ఈ కథనాలను బ్యాంక్‌ బోర్డు తోసిపుచ్చింది. ‘ఇండిపెండెంట్‌ బోర్డు విచారణ పూర్తయ్యేంతవరకు కొచర్‌ను సెలవు మీద వెళ్లాల్సిందిగా మేం కోరినట్లు రూమర్లు వినిపిస్తున్నాయి. ఇవి పూర్తిగా అవాస్తవం. ఆమె వార్షిక సెలవులో ఉన్నారు. ముందుగా ప్లాన్‌ చేసుకున్న ప్రకారమే కొచర్‌ సెలవు తీసుకున్నారు. అంతేకానీ ఇందులో ఎలాంటి బలవంతం లేదు’ అని బ్యాంక్‌ బోర్డు పేర్కొంది. చందా కొచర్‌ వారసులను ఎంపిక చేసేందుకు ఎలాంటి సెర్చ్‌ కమిటీని ఏర్పాటు చేయలేదని కూడా స్పష్టం చేసింది. కాగా వీడియోకాన్‌ గ్రూప్‌నకు రుణ మంజూరీ విషయంలో చందా కొచర్‌ క్విడ్‌ ప్రో కో ఆరోపణలు ఎదుర్కొంటున్న విషయం తెలిసిందే. ఈ నేపథ్యంలో కొచర్‌పై వచ్చిన ఆరోపణలపై స్వతంత్ర దర్యాప్తు జరపాలని బ్యాంకు బోర్డు ఇటీవలే ఒక నిర్ణయం తీసుకుంది.

వీడియోకాన్‌ కుంభకోణంలో తమ సీఈవో చందాకొచర్‌కు షాక్‌ ఇచ్చినట్టు వచ్చిన కథనాలను ఐసీఐసీఐ బ్యాంక్ ఖండించింది. వీడియోకాన్‌ కుంభకోణంలో స్వతంత్ర దర్యాప్తు పూర్తయ్యేవరకు చందా కొచర్‌ను సెలవు మీద వెళ్లాల్సిందిగా ఐసీఐసీఐ బోర్డు ఆదేశించినట్టు కథనాలు వచ్చాయి. అయితే, ఈ కథనాలను తోసిపుచ్చిన ఐసీఐసీఐ.. చందా కొచర్‌ ప్రస్తుతం వార్షిక సెలవులో ఉన్నారని, ముందుగా ప్లాన్‌ చేసుకున్న ప్రకారమే ఆమె సెలవు తీసుకున్నారని వెల్లడించింది. వీడియోకాన్‌ సంస్థకు రుణాల విషయంలో చందా కొచర్‌పై క్విడ్‌ ప్రో కో ఆరోపణలు వచ్చిన సంగతి తెలిసిందే. వీడియోకాన్‌కు రుణాలు అందించినందుకు ప్రతిగా.. ఆమె భర్త సంస్థలోకి వీడియోకాన్‌ నుంచి పెద్ద ఎత్తున నిధులు తరలినట్టు ఇటీవల ఆరోపణలు వచ్చాయి. చందా కొచర్‌ భర్త దీపక్‌ కొచర్‌కు చెందిన కంపెనీలో వీడియోకాన్ గ్రూప్‌ అధిపతి వేణుగోపాల్‌ ధూత్ 325 కోట్ల రూపాయల పెట్టుబడి పెట్టినట్టు ఇటీవల వెలుగుచూసింది. అంతకుముందు ఆమె నేతృత్వంలోని ఐసీఐసీఐ కన్సార్షియం వీడియోకాన్‌కు రూ. 3,250 కోట్ల రుణం మంజూరు చేసింది. ఈ రుణం నిరర్థక ఆస్తి (ఎన్‌పీఏ)గా గుర్తించడంతో ఈ వ్యవహారంలో క్విడ్‌ ప్రో కో జరిగిందన్న ఆరోపణలు వెలుగులోకి వచ్చాయి. అయితే, ఈ స్కాం విషయంలో కొచర్‌ ఎలాంటి తప్పు చేయలేదని, ఆమెపై పూర్తి నమ్మకం ఉందని గతంలో ఐసీఐసీఐ బాసటగా నిలిచింది. అయితే, ఈ నెల 29న జరిగిన ఐసీఐసీఐ బోర్డ్‌ ఆఫ్‌ డైరెక్టర్ల సమావేశంలో కొచర్‌ను సెలవు మీద పంపాలని నిర్ణయం తీసుకున్నట్టు కథనాలు వచ్చాయి. అంతేకాకుండా ఆమె స్థానంలో కొత్త సీఈవోను ఎంపిక చేసేందుకు సెర్చ్‌ కమిటీని ఏర్పాటు చేయాలని కూడా నిర్ణయించినట్టు ఆ కథనాలు పేర్కొన్నాయి. ఈ కథనాలు అన్ని తప్పేనని, తాము అలాంటి నిర్ణయాలు తీసుకోలేదని ఐసీఐసీఐ బ్యాంకు అధికార ప్రతినిధి వెల్లడించారు.

సాక్షి, ముంబై :  వీడియోకాన్‌-ఐసీఐసీ  స్కాంలో ఎట్టకేలకు ఐసీఐసీఐ బ్యాంకు దిగి వచ్చింది. ఈ కుంభకోణంపై స్వతంత్ర దర్యాప్తు చేపట్టనున్నట్లు బుధవారం వెల్లడించింది. ఈ మేరకు రెగ్యులేటరీ ఫైలింగ్‌ సందర్భంగా ఐసీఐసీఐ పేర్కొంది. రుణాల వ్యవహారంలో ఐసీఐసీఐ బ్యాంక్‌ సీఎండీ చందా కొచర్‌పై ఆరోపణలను మొదట్లో కొట్టిపారేసిన బ్యాంకు,  తాజాగా వాటిపై విచారణ చేపట్టేందుకు అంగీకరించింది.  ఇందుకోసం ఏకసభ్య  కమిటీని నియమించింది. బ్యాంక్ నియమావళిని ఎలా ఉల్లంఘనలు, ఆమె తీసుకున్న నిర్ణయాలుబ్యాంకుపై ఎలాంటి  ప్రభావం చూపిందన్న కోణంలో విచారణ సాగుతుందని బ్యాంక్ ఓ ప్రకటనలో పేర్కొన్నది.  బ్యాంక్ నియమావళిని ఉల్లంఘించిన కేసులో చందా కొచర్‌ను ఐసీఐసీఐ బ్యాంక్ విచారించనున్నది. దీని కోసం బ్యాంక్ బోర్డు.. ప్రత్యేక ప్యానల్‌ను ఏర్పాటు చేసింది. వీడియోకాన్‌ సంస్థకు రూ. 3,800 కోట్ల రుణ వ్యవహారంలో చందాకొచ్చర్‌ సాయం చేసినట్లు అప్పట్లో ఆరోపణలు వచ్చాయి. 2012లో వీడియోకాన్‌కు ఐసీఐసీఐ బ్యాంక్‌ ఈ రుణం ఇచ్చింది. వీడియోకాన్‌ గ్రూప్‌కు చెందిన వేణుగోపాల్‌ ధూత్‌, చందాకొచర్‌ భర్త దీపక్‌ కొచర్‌, మరో ఇద్దరు బంధవులు కలిసి 2008లో ఒక కంపెనీ ఏర్పాటు చేశారు. వీడియోకాన్‌కిచ్చిన వేలకోట్ల రుణం 2017నాటికి మొండి బకాయిగా మారింది. నిబంధనలకు విరుద్ధంగా క్విడ్‌ ప్రోకో ప్రాతిపదికన వీడియోకాన్‌ గ్రూప్‌కు కొచర్‌ రుణాలిచ్చేందుకు తోడ్పాటు అందించారని, ఫలితంగా ఆమె కుటుంబీకులు లబ్ధి పొందారని ఆరోపణలు వెల్లువెత్తాయి. అయితే ఇందులో చందాకొచర్‌ ప్రమేయం ఏమీ లేదని అప్పట్లో ఐసీఐసీఐ బోర్డు తీవ్రంగా ఖండించింది.  ఆ ఆరోపణలన్నీ అవాస్తవమని, చందాకొచ్చర్‌పై తమకు పూర్తి విశ్వాసం ఉందని  గట్టిగా వాదించడం, ఈ విషయంలో ఐసీఐసీఐ బోర్డులో కూడా విభేదాలొచ్చిన సంగతి తెలిసిందే. మరోవైపు ఈ వ్యవహారంలో దర్యాప్తు చేపట్టిన సీబీఐ.. చందాకొచర్ భర్త దీపక్‌, వీడియోకాన్‌ ప్రమోటర్‌ వేణుగోపాల్‌ ధూత్‌లను అనుమానితులుగా చేర్చింది.

ముంబై: వీడియోకాన్‌ గ్రూప్‌నకు మంజూరు చేసిన రుణాలకు సంబంధించి ఆరోపణలు రావడంతో ఐసీఐసీఐ బ్యాంక్‌ ఎండీ, సీఈవో చందా కొచర్‌కు మార్కెట్ల నియంత్రణ సంస్థ సెబీ నోటీసు జారీ చేసింది. ఈ లావాదేవీల వివరాలను వెల్లడించే విషయంలో లిస్టింగ్‌ నిబంధనల ఉల్లంఘన జరిగినట్లు ఇందులో పేర్కొంది. చందా కొచర్‌ భర్త దీపక్‌ కొచర్‌ సంస్థకు లబ్ధి చేకూర్చేలా ఈ లావాదేవీలు జరిగాయన్న ఆరోపణల నేపథ్యంలో నోటీసులు ఇవ్వడం ప్రాధాన్యం సంతరించుకుంది. సెబీ నోటీసులకు తగు వివరణ ఇవ్వనున్నట్లు స్టాక్‌ ఎక్సే్చంజీలకు ఐసీఐసీఐ బ్యాంకు తెలిపింది. ఈ రుణం విషయంలో ఎలాంటి అవకతవకలు జరగలేదని స్పష్టం చేసింది. ఐసీఐసీఐ బ్యాంకు నుంచి రూ. 3,250 కోట్ల మేర రుణం పొందిన వీడియోకాన్‌ గ్రూప్‌ చైర్మన్‌ వేణుగోపాల్‌ ధూత్‌... దీపక్‌ కొచర్‌కి చెందిన న్యూపవర్‌ రెన్యువబుల్స్‌లో రూ. 64 కోట్లు ఇన్వెస్ట్‌ చేశారు. బ్యాంకు ఎండీ, సీఈవో చందా కొచర్‌ కుటుంబానికి ప్రయోజనం చేకూర్చేలా ఈ లావాదేవీలు క్విడ్‌ ప్రో కో ప్రాతిపదికన జరిగాయని ఆరోపణలు ఉన్నాయి. ప్రస్తుతం దీనిపై సీబీఐ ప్రాథమిక విచారణ జరుపుతోంది.  

ముంబై: దేశీ బ్యాంకింగ్‌ రంగంలో బ్లాక్‌చెయిన్‌ టెక్నాలజీని మరింతగా వినియోగంలోకి తెచ్చే దిశగా ప్రమాణాల రూపకల్పనపై దృష్టి పెట్టినట్లు ఐసీఐసీఐ బ్యాంక్‌ సీఈవో చందా కొచర్‌ తెలిపారు. ఇందుకోసం ఇతర బ్యాంకులు, భాగస్వామ్య సంస్థలతో కలిసి పనిచేస్తున్నట్లు ఆమె వివరించారు. ట్రేడ్‌ ఫైనాన్స్‌కి సంబంధించి కొనుగోలుదారులు, విక్రేతలు, లాజిస్టిక్స్‌ సంస్థలు, బీమా సంస్థలు మొదలైనవన్నీ కూడా భాగస్వాములుగా ఉండే బ్లాక్‌చెయిన్‌ ఆధారిత వ్యవస్థను రూపొందిస్తున్నట్లు చందా కొచర్‌ ఒక ప్రకటనలో పేర్కొన్నారు. డిజిటల్‌ రూపంలో సత్వర ఆర్థిక లావాదేవీలకు తోడ్పడే తమ బ్లాక్‌చెయిన్‌ ప్లాట్‌ఫాంను ఇప్పటికే 250 కార్పొరేట్స్‌ ఉపయోగిస్తున్నట్లు తెలిపారు.  

ముంబై: వీడియోకాన్‌ గ్రూపునకు ఐసీఐసీఐ బ్యాంకు రూ.3,250 కోట్లు రుణమిచ్చిన వ్యవహారం మరింత ముదురుతోంది. చివరికి కొచర్‌ పదవికి ఎసరు పెట్టే స్థాయికెళుతోంది. ఈ వ్యవహారంలో ఐసీఐసీఐ బ్యాంకు సీఈవో చందాకొచర్‌కు పరోక్ష లబ్ధి చేకూరిందంటూ ఆరోపణలు రాగా తొలుత ఆమెకు బ్యాంకు బాసటగా నిలిచింది. కొచర్‌ పట్ల పూర్తి విశ్వాసాన్ని ప్రకటించింది. బ్యాంక్‌ వెబ్‌సైట్‌ తెరిచిన ప్రతి ఒక్కరికీ... బోర్డు బాసటగా నిలుస్తోందన్న విషయం స్పష్టంగా కనిపించింది. అయితే, ఈ అంశంపై సీబీఐ ప్రాథమిక దర్యాప్తు చేస్తుండడం వంటి పరిణామాలతో కొచర్‌ విషయంలో బోర్డు రెండుగా చీలినట్టు విశ్వసనీయంగా తెలిసింది. కొచర్‌ తన పదవి నుంచి తక్షణం తçప్పుకుంటే బావుంటుందని కొందరు డైరెక్టర్లు కోరుతున్నట్టు ఈ వ్యవహారంతో సంబంధం ఉన్న వర్గాలు వెల్లడించాయి. కొచర్‌ పదవిలో కొనసాగటాన్ని స్వతంత్ర డైరెక్టర్లు వ్యతిరేకిస్తున్నారు. దీంతో తదుపరి కార్యాచరణ తేల్చేందుకు బోర్డు ఈ వారంలోనే సమావేశం కానుంది. వాస్తవానికి కొచర్‌ ప్రస్తుత పదవీకాలం వచ్చే ఏడాది మార్చి 31 వరకు ఉంది. అయితే, కొచర్‌ను పదవి నుంచి తప్పుకోవాలని కొందరు బోర్డు సభ్యులు కోరుతున్నట్టు వచ్చిన వార్తలు అసత్యమని బ్యాంకు అధికార ప్రతినిధి స్పష్టం చేశారు. ఐసీఐసీఐ బ్యాంకు బోర్డులో 12 మంది సభ్యులున్నారు. వీరిలో ఆరుగురు స్వతంత్ర డైరెక్టర్లు. ఇందులో బ్యాంకు చైర్మన్‌ ఎంకే శర్మ, ఎల్‌ఐసీ హెడ్‌ కూడా ఉన్నారు. ఒకరు ప్రభుత్వ నామినీ కాగా, ఐదుగురు బ్యాంకు తరఫున ఎగ్జిక్యూటివ్‌ డైరెక్టర్లు. కొచర్‌పై ఆర్‌బీఐ తేలుస్తుంది: ఆర్థిక శాఖ ఐసీఐసీఐ బ్యాంకు చీఫ్‌ చందా కొచర్‌పై వచ్చిన ఆరోపణలను ఆర్‌బీఐ పరిశీలిస్తోందని, ఇందులో తమ పాత్ర ఏదీ లేదని కేంద్ర ఆర్థిక శాఖ తెలిపింది. కొచర్‌ ఐసీఐసీఐ బ్యాంకు సీఈవో, ఎండీగా కొనసాగాలా, లేదా అన్నది ఆర్‌బీఐ తేలుస్తుందని పేర్కొంది. ఆర్‌బీఐ లేదా ఐసీఐసీఐ బ్యాంకు బోర్డుకు దీనిపై నిర్ణయం తీసుకునే అధికారం ఉందని వివరించింది. 3 కోట్ల ఐసీఐసీఐ షేర్లను కొన్న మెరిల్‌ లించ్‌ డీల్‌ విలువ రూ.823 కోట్లు న్యూఢిల్లీ: ఐసీఐసీఐ బ్యాంక్‌పై ప్రతికూల వార్తలు హల్‌చల్‌ చేస్తున్నప్పటికీ, ఈ షేర్లను విదేశీ సంస్థలు జోరుగా కొనుగోలు చేస్తున్నాయి. మెరిల్‌ లించ్‌ మార్కెట్స్‌ సింగపూర్‌ పీటీఈ సంస్థ సోమవారం 2.94 కోట్ల ఐసీఐసీఐ బ్యాంక్‌ షేర్లను ఓపెన్‌ మార్కెట్‌ లావాదేవీల ద్వారా కొనుగోలు చేసింది. ఈ కొనుగోలు విలువ రూ.823.40 కోట్లుగా ఉంటుందని అంచనా. ఒక్కో షేర్‌ సగటు కొనుగోలు ధర రూ.280. బెయిల్లీ గిఫోర్డ్‌ ఎమర్జింగ్‌ మార్కెట్స్‌ ఫండ్‌ ఈ షేర్లను విక్రయించింది. సోమవారం ఐసీఐసీఐ  షేర్‌ బీఎస్‌ఈలో స్వల్ప నష్టంతో రూ.280.45 వద్ద ముగిసింది.  

సాక్షి, ముంబయి : రూ వేల కోట్ల ప్రజా ధనాన్ని దుర్వినియోగం చేయడం ద్వారా ఐసీఐసీఐ బ్యాంక్‌ చీఫ్‌ చందా కొచర్‌, ఆమె భర్త దీపక్‌ కొచర్‌ ప్రజలను మోసగించారని బీజేపీ ఆగ్నేయ ఢిల్లీ ఎంపీ ఉదిత్‌ రాజ్‌ ఆరోపించారు. చందా కొచర్‌ దంపతులపై ఎఫ్‌ఐఆర్‌ నమోదు చేసి కస్టడీలోకి తీసుకుని విచారణ చేపట్టాలని సీబీఐ డైరెక్టర్‌ అలోక్‌ కుమార్‌కు ఆయన లేఖ రాశారు. దీపక్‌ కొచర్‌ కు వ్యాపార అనుబంధం ఉన్న వీడియోకాన్‌ గ్రూప్‌కు రుణాల జారీలో అవినీతి, ప్రలోభాల పర్వం ఆరోపణలపై సీబీఐ ప్రస్తుతం ప్రాధమిక దర్యాప్తు చేపట్టిన సంగతి తెలిసిందే. కొచర్‌ కుటుంబానికి కేసులో కీలక సంబంధాలున్నాయనే కోణంలో చందా కొచర్‌ మరిది రాజీవ్‌ కొచర్‌ ను సీబీఐ రెండు రోజుల పాటు ప్రశ్నించింది. రాజీవ్‌కు సంబంధించిన కంపెనీకి డీల్‌ దక్కేలా ఆమె వ్యవహరించారనే ఆరోపణలున్నాయి. వేణుగోపాల్‌ ధూత్‌ నేతృత్వంలోని వీడియోకాన్‌ గ్రూప్‌కు రుణాల మంజూరులో అవినీతి జరిగిందని ఐసీఐసీఐ షేర్‌ హోల్డర్‌ అరవింద్‌ గుప్తా ఫిర్యాదుతో వెలుగుచూసిన ఈ కేసుపై సీబీఐ ప్రాధమిక దర్యాప్తు చేపట్టింది. అరవింద్‌ గుప్తా ఫిర్యాదును పరిశీలించిన మీదట చందా కొచర్‌ తన భర్త దీపక్‌, వీడియోకాన్‌ గ్రూప్‌తో నేరపూరిత కుట్రకు పాల్పడి వేల కోట్ల ప్రజాధనాన్ని రుణాల పేరుతో దారి మళ్లించారని స్పష్టంగా అవగతమవుతోందని బీజేపీ ఎంపీ ఉదిత్‌ రాజ్‌ ఆరోపించారు. 

న్యూఢిల్లీ : చీఫ్‌ ఎగ్జిక్యూటివ్‌ ఆఫీసర్‌ చందా కొచర్‌ భవితవ్యంపై ఐసీఐసీఐ బ్యాంకు బోర్డు రెండుగా చీలింది. వీడియోకాన్‌ గ్రూప్‌కు ఇచ్చిన రుణ వ్యవహారంలో దర్యాప్తు సంస్థలు తమ విచారణను వేగవంతం చేయడంతో, చందా కొచర్‌కు పదవి గండం తెచ్చిపెట్టింది. చందా కొచర్‌ రాజీనామా చేయాల్సిందిగా కొంతమంది బోర్డు సభ్యులు కోరుతున్నారు. మరికొంత మంది సభ్యులు ఈ ప్రతిపాదనను వ్యతిరేకిస్తూ.. చందా కొచర్‌కు అండంగా నిలుస్తున్నారు. ఇలా బ్యాంకు బోర్డు సభ్యులు రెండుగా చీలినట్టు సంబంధిత వర్గాలు చెప్పాయి.  కొంతమంది వెలుపల ఉన్న డైరెక్టర్లు చందా కొచర్‌ ఐసీఐసీఐ సీఈఓగా కొనసాగడంపై వ్యతిరేకత వ్యక్తం చేస్తున్నట్టు సంబంధిత వర్గాలు చెప్పాయి. ఈ విషయంపై ఐసీఐసీఐ బోర్డు సభ్యులు ఈ వారంలోనే సమావేశం కాబోతున్నట్టు కూడా పేర్కొన్నాయి. ఐసీఐసీఐ బ్యాంకు సీఈవోగా కొచర్‌ పదవి కాలం 2019 మార్చి 31 వరకు ఉంది. ప్రస్తుతం ఐసీఐసీఐ బోర్డులో మొత్తం 12 మంది సభ్యులున్నారు. చైర్మన్‌ ఎంకే శర్మ ఆధ్వర్యంలో ఈ బోర్డు నడుస్తోంది. 12 మంది సభ్యులో ఆరుగురు స్వతంత్ర డైరెక్టర్లు, ఒకరు ప్రభుత్వ నామినీ, ఐదుగురు ఐసీఐసీఐ ఎగ్జిక్యూటివ్‌ డైరెక్టర్లున్నారు.  క్విడ్‌ ప్రో కో ప్రతిపాదికన వీడియోకాన్‌ గ్రూప్‌కు చందా కొచర్‌ రుణం మంజూరు చేశారని ఆరోపణలు వెల్లువెత్తడంపై బోర్డు సమాధానం కూడా ఇచ్చింది. రుణాల జారీలో ఎలాంటి క్విడ్‌ ప్రో కో లేదని, సీఈఓ కొచర్‌పై తమకు పూర్తి విశ్వాసం, నమ్మకం ఉందని బోర్డు స్పష్టం చేసింది. అయితే ప్రస్తుతం ఆమెపై ఆ విశ్వాసం సన్నగిల్లినట్టు తెలుస్తోంది. ఈ వ్యవహారంలో చందా కొచ్చర్‌ కుటుంబీకులు ఉన్నట్లు ఆధారాలు వెలుగుచూడటంతో ఆమె చిక్కుల్లో పడ్డారు. దీంతో సీఈవోగా చందా కొచర్‌ కొనసాగడంపై బోర్డు సభ్యులు నుంచి వ్యతిరేకత వ్యక్తమవుతోంది. ఈ విషయంపై ఇప్పటికే కొచర్‌ భర్త దీపక్‌ కొచర్‌పై, వీడియోకాన్‌ చైర్మన్‌ వేణుగోపాల్‌ ధూత్‌పై సీబీఐ ప్రిలిమినరీ ఎంక్వైరీ కూడా ప్రారంభించింది.  అయితే ప్రస్తుతం వస్తున్న వార్తలు పూర్తిగా అవాస్తవమంటూ ఐసీఐసీఐ అధికార ప్రతినిధి ఖండించారు. కొచర్‌ రాజీనామా చేయాలని బోర్డు సభ్యులు కోరుతున్నారా? అనే ప్రశ్నకు సమాధానంగా అధికార ప్రతినిధి ఈ మేరకు స్పందించారు. కొచర్‌ రాజీనామా వార్తలతో, ఈ బ్యాంకు షేర్లు నష్టాల్లో నడుస్తున్నాయి. ఒకవేళ సీఈవోగా చందా కొచర్‌ రాజీనామా చేస్తే, షేర్లు మరింత కిందకి దిగజారనున్నాయని విశ్లేషకులు చెప్పారు. 

న్యూఢిల్లీ: వీడియోకాన్‌ గ్రూపునకు 2012లో ఐసీఐసీఐ బ్యాంకు జారీ చేసిన రూ.3,250 కోట్ల రుణానికి సంబంధించిన కేసులో బ్యాంకు సీఈవో చందా కొచర్‌ భర్త సోదరుడు రాజీవ్‌ కొచర్‌ను సీబీఐ శుక్రవారం విచారించింది. వీడియోకాన్‌ గ్రూపునకు రుణ పునరుద్ధరణకు సంబంధించి రాజీవ్‌ కొచర్‌ను సీబీఐ అధికారులు తొమ్మిది గంటల పాటు పలు కోణాల్లో ప్రశ్నించారు. రాజీవ్‌ కొచర్‌కు చెందిన అవిస్టా అడ్వైజరీ సర్వీసెస్‌ పేరుతో వీడియోకాన్‌ గ్రూపునకు అందించిన రుణ సలహా సేవలపై వివరాలు రాబట్టే ప్రయత్నం చేశారు. విదేశానికి వెళ్లే ప్రయత్నంలో ఉన్న రాజీవ్‌ కొచర్‌ను సీబీఐ గురువారం అరెస్ట్‌ చేసిన విషయం తెలిసిందే. అనంతరం ఆయన్ను అధికారులు విచారించారు. ఈ విచారణ శుక్రవారం కూడా కొనసాగింది. వీడియోకాన్‌కు రుణం మంజూరు చేయడం ద్వారా బ్యాంకు సీఈవో చందాకొచర్‌కు పరోక్షంగా రూ.60 కోట్లకు పైగా లబ్ధి కలిగిందన్న ఆరోపణలు వచ్చిన విషయం విదితమే. ఈ ఆరోపణల్లో నిజాలను నిగ్గు తేల్చేందుకు సీబీఐ ప్రాథమిక విచారణ చేపట్టింది. విచారణలో ఆరోపణలకు సంబంధించి ప్రాథమిక ఆధారాలున్నాయని తేలితే అప్పుడు నిందితులపై కేసులు నమోదు చేసి పూర్తి స్థాయి దర్యాప్తు చేపడుతుంది. రుణం మంజూరు తర్వాత వీడియోకాన్‌ గ్రూపు చైర్మన్‌ వేణుగోపాల్‌ ధూత్, చందాకొచర్‌ భర్త దీపక్‌ కొచర్‌ ఏర్పాటు చేసిన న్యూపవర్‌ రెన్యువబుల్స్‌కు నిధులు అందించినట్టు ఆరోపణలు వచ్చాయి. అయితే, చందాకొచర్‌పై వచ్చిన ఆరోపణలను ఐసీఐసీఐ బ్యాంకు యాజమాన్యం ఇప్పటికే ఖండించిన విషయం విదితమే.   చందాకొచర్, ఆమె భర్త,ధూత్‌లపై లుకవుట్‌ నోటీసులు? వీడియోకాన్‌–ఐసీఐసీఐ బ్యాంకు కేసు కొత్త మలుపు తీసుకుంది. వీడియోకాన్‌ గ్రూపునకు ఐసీఐసీఐ బ్యాంకు రుణం జారీ వెనుక అవినీతి జరిగిందన్న ఆరోపణలపై ప్రాథమిక దర్యాప్తు చేపట్టిన సీబీఐ, బ్యాంకు సీఈవో చందాకొచర్, ఆమె భర్త దీపక్‌కొచర్, వీడియోకాన్‌ గ్రూపు చైర్మన్‌ వేణుగోపాల్‌ ధూత్‌లపై లుకవుట్‌ నోటీసులు జారీ చేసినట్టు తెలుస్తోంది. దేశం విడిచి వెళ్లిపోకుండా వారిని నిరోధించేందుకు గాను దేశవ్యాప్తంగా అన్ని విమానాశ్రయాలకు లుకవుట్‌ నోటీసులు జారీ చేసినట్టు సమాచారం. దీనిపై సీబీఐ నుంచి అధికారికంగా ప్రకటన విడుదల కాలేదు.   

ముంబై : దేశీయ టాప్‌ ప్రైవేట్‌ బ్యాంకు అధినేతలకు బ్యాంకింగ్‌ రెగ్యులేటరీ ఆర్‌బీఐ షాకిచ్చింది. ఐసీఐసీఐ బ్యాంకు సీఈవో చందా కొచర్‌కు, యాక్సిస్‌ బ్యాంకు సీఈవో శిఖా శర్మకు, హెచ్‌డీఎఫ్‌సీ బ్యాంకు సీఈవో ఆదిత్య పురిలకు ఏడాది చివరన ఇచ్చే బోనస్‌లను ఆలస్యం చేస్తోంది. బ్యాంకుల్లో చోటు చేసుకుంటున్న కుంభకోణాల నేపథ్యంలో బోనస్‌లపై ఆర్‌బీఐ వేటు వేస్తున్నట్టు తెలుస్తోంది. ఈ బ్యాంకుల సీఈవోలు 2017 మార్చి 31 ఆర్థిక సంవత్సరానికి సంబంధించి ఇంకా బోనస్‌లను అందుకోలేదు. ఈ బోనస్‌లు 2018 మార్చి 31 కంటే ముందే అందుకోవాల్సి ఉంది. కానీ ప్రతిపాదిత చెల్లింపులపై ఆర్‌బీఐ ఇప్పటివరకు ఎలాంటి సంకేతాలు ఇవ్వడం లేదు. బోనస్‌లు ఇవ్వకుండా ఆర్‌బీఐ ఎందుకు ఆలస్యం చేస్తుందనే విషయంపై స్పందించడానికి సంబంధిత వర్గాలు నిరాకరించాయి.  చందాకొచర్‌కు రూ.2.2 కోట్ల బోనస్‌ ఇవ్వాలని ఐసీఐసీఐ బోర్డు ఆమోదించింది. శిఖా శర్మ రూ.1.35 కోట్ల బోనస్‌ అందుకోవాల్సి ఉంది. ఆదిత్య పురి కూడా రూ.2.9 కోట్ల బోనస్‌ను పొందాల్సి ఉందని ఎక్స్చేంజ్‌ ఫైలింగ్స్‌లో తెలిసింది. అయితే ఈ విషయంపై స్పందించడానికి యాక్సిస్‌ బ్యాంకు నిరాకరించింది. హెచ్‌డీఎఫ్‌సీ బ్యాంకు, ఐసీఐసీఐ బ్యాంకుల అధికార ప్రతినిధులు కూడా ఫోన్‌ కాల్స్‌, ఈ-మెయిల్స్‌పై స్పందించలేదు. ఆర్‌బీఐ సైతం బోనస్‌లపై స్పందించడం లేదు.  వీడియోకాన్‌కు ఇచ్చిన రుణాల విషయంలో చందాకొచర్‌ తీవ్ర ఆరోపణలు ఎదుర్కొంటున్నారు. క్విడ్‌ ప్రో కో ప్రాతిపదికన వీడియోకాన్‌కు రూ.3250 కోట్ల రుణాలు జారీచేశారని, చందాకొచర్‌ భర్త దీపక్‌ కొచర్‌తో బిజినెస్‌ వ్యవహారాల్లో భాగంగానే వీడియోకాన్‌ గ్రూప్‌కు రుణాలిచ్చారనే ఆరోపణలు తీవ్రంగా వెల్లువెత్తుతున్నాయి. కాగ, ఈ వ్యవహారంలో ఇప్పటికే సీబీఐ తన దర్యాప్తును ముమ్మరం చేసింది. మరోవైపు  తొలి నుంచి శిఖాశర్మపై మొండిబాకీల విషయంలో ఆరోపణలు వెల్లువెత్తుతున్న నేపథ్యంలో ఇటీవలే ఆమె పదవీ కాలం పొడిగింపుపై ఆర్‌బీఐ విముఖత వ్యక్తం చేసినట్టు తెలిసింది. తాజాగా ఏడాది చివర బోనస్‌లను కూడా ఆలస్యం చేస్తోంది. గత కొన్నేళ్లుగా దేశీయ ప్రైవేట్‌ బ్యాంకులు కఠినతరమైన పరిస్థితులను ఎదుర్కొంటున్నాయి. మొండిబకాయిలు పెరగడం, కార్పొరేట్‌ గవర్నెన్స్‌ లోపించడం బ్యాంకులను బాధిస్తోంది. ముందు నుంచి చూసుకుంటే 2018 మార్చి 31 కంటే ముందే ఈ బోనస్‌లను ఆర్‌బీఐ ఆమోదించాల్సి ఉందని ముంబైకి చెందిన బ్యాంకింగ్‌ విశ్లేషకుడు అసుతోష్‌ కుమార్‌ మిశ్రా తెలిపారు. కానీ ఇప్పటి వరకు ఈ ఆలస్యాన్ని తాము ఎన్నడూ చూడలేదన్నారు.

సాక్షి, ముంబై: ఐసీఐసీఐ-వీడియోకాన్ గ్రూపు‌ రుణ వివాదంలో సీబీఐ చురుకుగా కదులుతోంది. తాజాగా ఐసీఐసీఐ బ్యాంకు సీఎండీ చందాకొచర్‌ భర్త, దీపక్‌ కొచర్‌ సోదరుడు రాజీవ్‌  కొచర్‌ను సీబీఐ అదుపులోకి తీసుకున్నారు. ముంబై  విమానాశ్రయంనుంచి సింగపూర్‌ వెళుతుండగా అతనిని సీబీఐ అధికారులు అదుపులోకి తీసుకుని ప్రశ్నిస్తున్నారు.  కాగా ఈ కేసులో చందాకొచర్‌ కుటుంబానికి  చెందిన సన్నిహితుడిని సీబీఐ ప్రశ్నించడం ఇదే మొదటిసారి.  ఈ నేపథ్యంలో మరింత విచారణ చేపట్టే క్రమంలో రాజీవ్‌ను అదుపులోకి తీసుకుంది. అతణ్నించి మరిన్ని వివరాలు రాబట్టేందుకు  ప్రయత్నిస్తోంది.  ఇప్పటికే ఈ కేసులో చందాకొచర్‌ భర్త దీపక్‌ కొచర్‌, వీడియోకాన్‌ ఎండీ వేణుగోపాల్‌ధూత్‌పై ప్రాథమిక దర్యాప్తు చేపట్టిన సీబీఐ,అనేక పత్రాలను స్వాధీనం చేసుకుంది.  అయితే ఇంతవర​కూ  దీపక్‌ను ప్రశ్నించలేదు. కానీ, దీపక్‌ కొచర్‌కుచెందిన న్యూపవర్‌రెన్యువబుల్స్‌ కంపెనీకి ఐటీ శాఖ నోటీసులు జారీ చేసింది. కాగా 2012లో వీడియోకాన్ గ్రూపునకు రూ.3,250 కోట్ల విలువైన రుణాల మంజూరు సందర్భంగా బ్యాంకు సీఈవో చందా కొచర్‌పై ఆరోపణలు వెలుగులోకి వచ్చాయి. అయితే  ఐసీఐసీఐ బ్యాంకు  బోర్డు ఈ ఆరోపణలను ఖండించింది. అలాగే ఈ  కేసులో స్వతంత్ర దర్యాప్తును వ్యతిరేకించింది. కాగా ఈ రుణ వివాదంలోకి తాజాగా దీపక్‌ సోదరుడు, చందా కొచర్‌ మరిది.. రాజీవ్‌ కొచర్‌కి చెందిన అవిస్టా సంస్థ కూడా చేరింది. ఐసీఐసీఐ బ్యాంక్‌ నుంచి రుణాలు పొందిన పలు కంపెనీలకు అవిస్టా రుణ పునర్‌వ్యవస్థీకరణ సేవలు అందించిందనీ,  అవిస్టా సేవలు పొందిన  వాటిల్లో  జైప్రకాశ్‌ అసోసియేట్స్, జైప్రకాశ్‌ పవర్‌లతో పాటు వీడియోకాన్, జీటీఎల్‌ ఇన్‌ఫ్రాస్ట్రక్చర్, సుజ్లాన్‌ తదితర కంపెనీలు ఉన్నట్టు ఆరోపణలు వచ్చాయి. అయితే వీటిని రాజీవ్‌ కొచర్‌ ఖండించిన సంగతి తెలిసిందే. భారతీయ బ్యాంకులతో  ఎలాంటి సిండికేషన్‌ ఉండకూడదనే ఒక నియమాన్ని తాము పెట్టుకున్నామన్నారు.  ఈక్రమంలో చందా కొచర్‌ సీఈవోగా ఉన్న ఐసీఐసీఐ బ్యాంకుతో తమకు ఎలాంటి సంబంధాలు లేవని స్పష్టం చేశారు. ఇండోనేషియా, దుబాయ్‌లోని కార్యాలయాల ద్వారా ప్రపంచవ్యాప్తంగా  వ్యాపారం నిర్వహిస్తున్నామని ఆయన తెలిపారు. ఇదేదో కావాలని చేస్తున్న దుష్ప్రచారంగా  రాజీవ్‌ కొచర్‌  కొట్టిపారేశారు. 

న్యూఢిల్లీ: వీడియోకాన్‌ గ్రూప్‌నకు రుణాలిచ్చిన వివాదానికి సంబంధించి ఐసీఐసీఐ బ్యాంక్‌ సీఈవో చందా కొచర్‌ చుట్టూ ఉచ్చు మరింతగా బిగుసుకుంటోంది. ఈ లావాదేవీల్లో లబ్ధి పొందినట్లు ఆరోపణలు ఎదుర్కొంటున్న ఆమె భర్త దీపక్‌ కొచర్‌కు తాజాగా ఆదాయ పన్ను శాఖ నోటీసులు జారీ చేసింది. ఐటీ చట్టం సెక్షన్‌ 131 కింద జారీ చేసిన నోటీసుల ప్రకారం .. ఆయన వ్యక్తిగత ఆర్థిక వివరాలు, గడిచిన కొన్నేళ్ల ఇన్‌కమ్‌ట్యాక్స్‌ రిటర్న్‌లతో (ఐటీఆర్‌) పాటు న్యూపవర్‌ రెన్యువబుల్స్‌ సంస్థతో వ్యాపార లావాదేవీల వివరాలను కూడా సమర్పించాలని ఆదేశించింది. న్యూపవర్‌తో పాటు ఆ కంపెనీతో సంబంధమున్న వారి ఆర్థిక పరిస్థితులపై కూడా ఐటీ శాఖ దర్యాప్తు మొదలుపెట్టినట్లు అధికార వర్గాలు తెలిపాయి. ఇందులో భాగంగా కంపెనీతో సంబంధమున్న మరికొందరికి కూడా నోటీసులు పంపినట్లు, వారి దగ్గర్నుంచి వచ్చే వివరణను బట్టి తదుపరి చర్యలు తీసుకోనున్నట్లు వివరించాయి. మరోవైపు, దీపక్‌ కొచర్‌ను త్వరలో ప్రశ్నించనున్నట్లు ఈ వివాదంపై దర్యాప్తు చేస్తున్న సీబీఐ వర్గాలు తెలిపాయి. ఇందుకు సంబంధించిన ప్రిలిమినరీ ఎంక్వైరీలో దీపక్‌ కొచర్, వీడియోకాన్‌ గ్రూప్‌ ప్రమోటర్‌ వేణుగోపాల్‌ ధూత్‌లతో పాటు మరికొందరి పేర్లు కూడా ఉన్నట్లు వివరించాయి. వీడియోకాన్‌ గ్రూప్‌నకు 2012లో రూ. 3,250 కోట్ల మేర రుణాలు ఇచ్చిన విషయంలో చందా కొచర్‌ క్విడ్‌ ప్రో కో ఆరోపణలు ఎదుర్కొంటున్న సంగతి తెలిసిందే. ఐసీఐసీఐ బ్యాంక్‌ నుంచి రుణం లభించినందుకు ప్రతిఫలంగా చందా కొచర్‌ భర్త దీపక్‌ సంస్థలో ధూత్‌ రూ. 64 కోట్లు ఇన్వెస్ట్‌ చేశారని ఆరోపణలు ఉన్నాయి.   వివాదంలోకి దీపక్‌ సోదరుడు రాజీవ్‌ సంస్థ కూడా.. రుణ వివాదంలోకి తాజాగా దీపక్‌ సోదరుడు, చందా కొచర్‌ మరిది.. రాజీవ్‌ కొచర్‌కి చెందిన అవిస్టా సంస్థ కూడా చేరింది. ఐసీఐసీఐ బ్యాంక్‌ నుంచి రుణాలు పొందిన పలు కంపెనీలకు అవిస్టా రుణ పునర్‌వ్యవస్థీకరణ సేవలు అందించినట్లు తెలుస్తోంది. అవిస్టా సేవలు పొందిన సంస్థల్లో జైప్రకాశ్‌ అసోసియేట్స్, జైప్రకాశ్‌ పవర్‌లతో పాటు వీడియోకాన్, జీటీఎల్‌ ఇన్‌ఫ్రాస్ట్రక్చర్, సుజ్లాన్‌ మొదలైనవి ఉన్నట్లుగా సమాచారం. అయితే తమ బ్యాంక్‌ ఎన్నడూ కూడా అవిస్టా అడ్వైజరీ గ్రూప్‌ సర్వీసులు వినియోగించుకోలేదని, ఎలాంటి ఫీజు చెల్లించలేదని ఐసీఐసీఐ బ్యాంక్‌ స్పష్టం చేసింది. అటు జేపీ గ్రూప్‌ మాత్రం రుణ పునర్‌వ్యవస్థీకరణ కోసం అవిస్టాను నియమించుకోవడం వాస్తవమేనని, మార్కెట్‌ రేటును బట్టి ఫీజును చెల్లించామని ధ్రువీకరించింది. అయితే, అవిస్టా సేవలు ఫారిన్‌ కరెన్సీ కన్వర్టబుల్‌ బాండ్స్‌ (ఎఫ్‌సీసీబీ) పునర్‌వ్యవస్థీకరణకు మాత్రమే పరిమితమని, దాని ద్వారా ఐసీఐసీఐ బ్యాంక్‌తో ఎటువంటి లావాదేవీలు నిర్వహించలేదని స్పష్టం చేసింది. జేపీ గ్రూప్‌లో ప్రధాన సంస్థ అయిన జైప్రకాశ్‌ అసోసియేట్స్‌.. దాదాపు 110 మిలియన్‌ డాలర్ల విలువ చేసే ఎఫ్‌సీసీబీలను, మరో సంస్థ జైప్రకాశ్‌ పవర్‌ 225 మిలియన్‌ డాలర్ల రుణాల పునర్‌వ్యవస్థీకరణకు అవిస్టా సర్వీసులు ఉపయోగించుకున్నాయి.     న్యూపవర్‌ వెనుక ఉన్నదెవరో తెలియాలి: అరవింద్‌ గుప్తా క్విడ్‌ ప్రో కో వివాదాన్ని బైటికి తెచ్చిన వేగు అరవింద్‌ గుప్తా న్యూపవర్‌పై ఆరోపణాస్త్రాలు కొనసాగిస్తున్నారు. కంపెనీలో మెజారిటీ షేర్‌హోల్డరుగా ఉన్న మారిషస్‌ సంస్థ డీహెచ్‌ రెన్యువబుల్స్‌ హోల్డింగ్‌ అసలు యజమాని వివరాలను బైటపెట్టాలని డిమాండ్‌ చేశారు. 2008లో కంపెనీని ఏర్పాటు చేసినప్పుడు ఇందులో దీపక్‌ కొచర్‌కు, ధూత్‌ కుటుంబానికి చెరి యాభై శాతం వాటాలు ఉండేవని ఆయన పేర్కొన్నారు. ఆ తర్వాత క్రమంగా దీపక్‌ ట్రస్టీగా ఉన్న పినాకిల్‌ ఎనర్జీ, సుప్రీం ఎనర్జీ, డీహెచ్‌ రెన్యువబుల్స్‌ మొదలైనవి ఇందులో వాటాదారులుగా మారాయి. ‘న్యూపవర్‌ ఏర్పాటైనప్పుడు అది.. భారతీయ సంస్థ. అయితే, క్రమంగా ఇందులో 54.99 శాతం వాటాలతో మారిషస్‌కి చెందిన డీహెచ్‌ రెన్యువబుల్స్‌ మెజారిటీ వాటాదారుగా ఆవిర్భవించింది. ఒకప్పుడు ధూత్‌ కుటుంబానికి చెందిన సుప్రీమ్‌ ఎనర్జీ సంస్థ.. ఇప్పుడు పినాకిల్‌ ఎనర్జీ, కొచర్‌ల చేతికి చేరింది. పినాకిల్, డీహెచ్‌ రెన్యువబుల్స్‌ సంస్థ అసలు యజమాని గురించి ఎవరికీ, ఎప్పటికీ అంతుపట్టని విధంగా అనేక లావాదేవీల ద్వారా ఇదంతా జరిగింది‘ అని గుప్తా వ్యాఖ్యానించారు.   ఫిక్కీ సదస్సు నుంచి తప్పుకున్న చందా కొచర్‌ న్యూఢిల్లీ: ఫిక్కీ లేడీస్‌ ఆర్గనైజేషన్‌ (ఎఫ్‌ఎల్‌వో) ఈ నెల 5న నిర్వహిస్తున్న 34వ వార్షిక సదస్సు నుంచి ఐసీఐసీఐ బ్యాంక్‌ సీఈవో చందా కొచర్‌ తప్పుకున్నారు. వీడియోకాన్‌ గ్రూప్‌నకు క్విడ్‌ ప్రో కో ప్రాతిపదికన రుణాలిచ్చారంటూ ఆమె ఆరోపణలు ఎదుర్కొంటున్న నేపథ్యంలో ఇది ప్రాధాన్యం సంతరించుకుంది. ఎఫ్‌ఎల్‌వో వార్షిక సదస్సులో ఆమె గౌరవ అతిథిగా పాల్గొనాల్సి ఉంది. అలాగే, రాష్ట్రపతి రామ్‌ నాథ్‌ కోవింద్‌ చేతుల మీదుగా చందా కొచర్‌కు సన్మానం కూడా ఉంటుందని ఎఫ్‌ఎల్‌వో గతంలో పంపిన ఆహ్వాన పత్రికల్లో పేర్కొంది. అయితే, తాజాగా మంగళవారం పంపిన ఆహ్వానపత్రికల్లో చందా కొచర్‌ పేరు లేకపోవడం చర్చనీయాంశమైంది. ఈ కార్యక్రమం నుంచి చందా కొచర్‌ తప్పుకున్నారని, ఆమె హాజరయ్యే అవకాశం లేదని ఎఫ్‌ఎల్‌వో ఈడీ రష్మి సరిత తెలిపారు. కొచర్‌ తప్పుకోవడానికి కారణాలు తెలియరాలేదని  వివరించారు. ఐసీఐసీఐ బ్యాంక్‌ నుంచి వీడియోకాన్‌ గ్రూప్‌ రూ. 3,250 కోట్ల మేర రుణాలు తీసుకున్న లావాదేవీల్లో.. కొచర్‌ భర్త దీపక్‌ కొచర్‌ లబ్ధి పొందినట్లు ఆరోపణలు రావడం తెలిసిందే. వీటిపై సీబీఐ దర్యాప్తు చేస్తోంది.

సాక్షి, న్యూఢిల్లీ:  ఏప్రిల్ 3: వీడియోకాన్ గ్రూప్ రుణవివాదంలో ఇరుక్కున్న, ఐసీఐసీఐ బ్యాంక్ సీఎండీ చందా కొచర్‌కు మరో పరాభవం ఎదురైంది.  ఫెడరేషన్ ఆఫ్ ఇండియన్ ఛాంబర్స్ ఆఫ్ కామర్స్ అండ్ ఇండస్ట్రీ  (ఫిక్కి) లేడీస్ ఆర్గనైజేషన్ వార్షిక ఉత్సవాలనుంచి ఆమెను తొలగించారు.   ఈవారంలో  నిర్వహించనున్న ఓ ప్రత్యేక  కార్యక్రమంలో దేశాధ్యక్షుడు రామనాథ్‌ కోవింద్‌ చేతులు మీదుగా చందా కొచర్‌ సన్మానాన్ని అందుకోవాల్సి ఉంది. అయితే గత నెలలో ఆమె పేరును ప్రముఖంగా ప్రస్తావించిన నిర్వాహకులు తాజా జాబితాలో చందా కొచర్‌  పేరును తొలగించడం గమనార్హం​. నిర్వాహకులు అందించిన సమాచారం ప్రకారం ఈ నెల 5వ తేదీన జరిగే ఈవెంట్‌కు చందా కొచర్‌  గౌరవ అతిధిగా హాజరుకావాల్సి ఉంది.  బ్యాంకింగ్‌, ఫైనాన్స్‌ రంగంలో  అందించిన  సేవలకుగాను చందాకొచ్చర్‌ను ఎఫ్‌ఎల్‌వో ఐకాన్‌ ఆవార్డుతో సత్కరించాలని భావించింది. కానీ ఈ కార‍్యక్రమంనుంచి   ఆమెను తప్పించామని ఎఫ్‌ఎల్‌వో ఎగ్జిక్యూటివ్ డైరెక్టర్ రష్మి సతిటా  తెలిపారు. అయితే ఎందుకు  తొలగించిందీ కచ్చితంగా చెప్పలేదు. 2018 ఏప్రిల్ 5న ఎఫ్‌ఎల్‌వో  34వ వార్షిక సమావేశంలో అధ్యక్షుడు కోవింద్‌ ముఖ్య అతిథిగా పాల్గొని ప్రసంగిస్తారని, ఈ కార్యక్రమంలో  చందాకొచర్‌  గౌరవ అతిథిగా ఉంటారనీ మార్చి 31న జారీ చేసిన ఒక ప్రకటనలో తెలిపింది. ఈ సందర్భంగా  వివిధ రంగాల్లో విశిష్ట సేవలందించిన 10మంది భారతీయ మహిళా ప్రముఖులను ఎఫ్‌ఎల్‌వో ఐకాన్‌ అవార్డులతో సత్కరించనున్నామని చెప్పింది.  ఆరోగ్యం, సంక్షేమం రంగంలో ఎయిమ్స్‌ చీఫ్‌, ఆర్గాన్ రిట్రీవల్ అండ్ బ్యాంకింగ్ ఆర్గనైజేషన్ కు చెందిన ఆరతి విజ్‌, వినోద రంగంలో నటి, రచయిత ట్వింకిల్‌ ఖన్నా, మీడియా ఎంట్రప్రెన్యూర్షిప్‌లో బాలాజీ టెలీఫిలింస్‌  క్రియేటివ్ డైరక్టర్ ఎక్తాకపూర్‌,  డిజిటల్‌ వ్యాపారంలో నైకా ఫౌండర్‌ ఫల్గుణి నాయక్‌,  సాహిత్యంలో నమితా గోఖలే తదితరుల పేర్లను ఈ జాబితాలో పేర్కొంది.

ముంబై, న్యూఢిల్లీ : కార్పొరేట్లు, బ్యాంకర్లు కుమ్మక్కై బ్యాంకింగ్‌ వ్యవస్థను భ్రష్టుపట్టిస్తున్నారన్న ఆరోపణలకు బలమిస్తూ.. మరో కుంభకోణం!! ఈ సారి బయటపడింది ప్రయివేటు దిగ్గజం ఐసీఐసీఐలో. దేశంలోనే రెండో అతి పెద్ద ప్రైవేట్‌ బ్యాంక్‌ అయిన ఐసీఐసీఐ బ్యాంక్‌ సీఈవో చందా కొచర్‌.. క్విడ్‌ ప్రో కో విమర్శలకు కేంద్ర బిందువయ్యారు. వీడియోకాన్‌ గ్రూప్‌నకు రుణాలిచ్చినందుకు కొచర్‌ కుటుంబం లబ్ధి పొందిందనే ఆరోపణల వెనకున్న ఆధారాలు చూస్తుంటే... ప్రైవేట్‌ బ్యాంకుల్లోనూ కార్పొరేట్‌ గవర్నెన్స్‌ సందేహాస్పదమయిందని అనిపించకమానదు. ఒక పరిశోధనాత్మక కథనం ప్రకారం డిసెంబర్‌ 2008లో ఐసీఐసీఐ బ్యాంక్‌ సీఈవో, ఎండీ చందా కొచర్‌ భర్త దీపక్‌ కొచర్‌తో పాటు ఆమె మరో ఇద్దరు బంధువులతో కలసి వీడియోకాన్‌ గ్రూప్‌ ప్రమోటరు వేణుగోపాల్‌ ధూత్‌.. న్యూపవర్‌ గ్రూప్‌ను ఏర్పాటు చేశారు. ఆ తర్వాత తన సొంత కంపెనీ నుంచి ఈ కొత్త సంస్థకు రూ.64 కోట్ల రుణమిచ్చిన ధూత్‌... ఆపై కేవలం రూ.9 లక్షలకు న్యూపవర్‌లోని తన వాటాలు, యాజమాన్య అధికారాలన్నీ దీపక్‌ కొచర్‌కి బదలాయించేశారు. అయితే, వీడియోకాన్‌ గ్రూప్‌నకు ఐసీఐసీఐ బ్యాంకు నుంచి రూ. 3,250 కోట్ల మేర రుణం మంజూరైన ఆరు నెలల్లోనే ‘న్యూపవర్‌’ కంపెనీ చేతులు మారటం చర్చనీయమైంది. ఇందులో లబ్ధిదారు చందా కొచర్‌ భర్త దీపక్‌ కొచర్, ఇతర కుటుంబీకులు కావడంతో ఆమె పాత్రపై సందేహాలు తలెత్తుతున్నాయి. మరోవైపు, వీడియోకాన్‌ తీసుకున్న రుణ మొత్తంలో ఇప్పటికీ 86 శాతం భాగం (సుమారు రూ.2,810 కోట్లు) కట్టనే లేదు. 2017లో వీడియోకాన్‌ ఖాతాను మొండిపద్దుగా వర్గీకరించారు. తాజా ఆరోపణల నేపథ్యంలో ఈ వ్యవహారంపై దర్యాప్తు ఏజెన్సీలు కూడా దృష్టి పెట్టినట్లు తెలుస్తోంది. న్యూపవర్‌ ఆర్థిక పరిస్థితి ఇదీ.. 2008 డిసెంబర్‌లో ఏర్పాటైన న్యూపవర్‌.. గత ఆరు ఆర్థిక సంవత్సరాలుగా నష్టాలు ప్రకటిస్తూనే ఉంది. 2012–17 మధ్య కంపెనీ నష్టాలు రూ.78 కోట్ల మేర పేరుకుపోయాయి. 2017లో రూ.14.3 కోట్ల నష్టం ప్రకటించింది. 2016 మార్చి 31 నాటి దాకా సుప్రీమ్‌ ఎనర్జీ, పినాకిల్‌ ఎనర్జీలతో పాటు కొచర్‌కి న్యూపవర్‌లో 96.23 శాతం వాటాలు ఉన్నాయి. అయితే, 2017 మార్చి నాటికి సుప్రీమ్, పినాకిల్‌తో కలిపి ప్రత్యక్షంగా, పరోక్షంగా దీపక్‌ కొచర్‌ వాటాలు 43.4 శాతంగా ఉన్నాయి. మిగతా వాటాలు మారిషస్‌కి చెందిన డీహెచ్‌ రెన్యూవబుల్స్‌ చేతిలో ఉన్నాయి. ఐసీఐసీఐ బ్యాంక్‌ ఏమంటుందంటే.. తాజా వ్యవహారంపై ఐసీఐసీఐ స్పందిస్తూ... ‘‘2012లో ఎస్‌బీఐ సారథ్యంలో 20 బ్యాంకులు, ఆర్థిక సంస్థలు కన్సార్షియంగా ఏర్పడి చమురు, గ్యాస్‌ ఉత్పత్తి కార్యకలాపాల కోసం వీడియోకాన్‌కు సుమారు రూ.40,000 కోట్లు రుణాలిచ్చాయి. ఇందులో మా వాటా కేవలం రూ.3,250 కోట్లే. మిగిలిన బకాయి రూ.2,810 కోట్లు.. వడ్డీతో కలసి వీడియోకాన్‌ చెల్లించాల్సింది రూ.2,849 కోట్లు. 2017లో గ్రూప్‌ ఖాతాను మొండి పద్దుగా వర్గీకరించాం’’ అని వివరణిచ్చింది. దీనిపై ఐసీఐసీఐ చైర్మన్‌ ఎం.కె. శర్మ మాట్లాడుతూ... కన్సార్షియంలో ఎస్‌బీఐ, ఐడీబీఐ బ్యాంకులు రుణాలు మంజూరు చేశాకే 2012లో ఐసీఐసీఐ బ్యాంక్‌ క్రెడిట్‌ కమిటీ తన వంతు రుణం మంజూరు చేసిందని చెప్పారు. సదరు కమిటీకి అప్పట్లో చందా కొచర్‌ చైర్‌పర్సన్‌గా లేరని స్పష్టం చేశారు. బ్యాంకులో ఏ స్థాయి ఉద్యోగైనా సరే రుణ నిర్ణయాలను ప్రభావితం చేయలేరని పేర్కొన్నారు. 2009లోనే వదిలేశా: ధూత్‌ ‘‘నేను 2009లోనే న్యూపవర్‌ రెన్యువబుల్స్, సుప్రీమ్‌ ఎనర్జీ సంస్థల నుంచి వైదొలిగాను. న్యూపవర్‌లో 24,996 షేర్లను, సుప్రీమ్‌ ఎనర్జీలో 9,990 షేర్లను అమ్మేసి పూర్తి హక్కులను వదులుకున్నాను. చమురు, టెలికం వ్యాపారాలతో బిజీ అయిపోవడంతో.. ఆ రోజు నుంచి రెండు కంపెనీలతో సంబంధాలు వదులుకున్నాను’’ అని ధూత్‌ వివరించారు. కానీ ఆర్‌ఓసీలో దాఖలు చేసిన ఫైలింగ్స్‌ ప్రకారం చూస్తే 2010 అక్టోబర్‌ దాకా సుప్రీం ఎనర్జీకి ఆయన యజమానిగా కొనసాగినట్లు, 2010 నవంబర్‌లో మాత్రమే తన షేర్లను అనుచరుడు పుంగ్లియాకు బదలాయించినట్లుగా తెలుస్తోంది. న్యూపవర్‌ వివరణ ఇదీ.. ఈ లావాదేవీల్లో పరస్పరం ప్రయోజనాలు పొందారనడానికేమీ లేదని న్యూపవర్‌ వివరణనిచ్చింది. అసలు పినాకిల్‌ ఎనర్జీ ట్రస్టుకు గానీ, సుప్రీమ్‌ ఎనర్జీకి గానీ ఐసీఐసీఐ బ్యాంకుతో ఎలాంటి వ్యాపార సంబంధాలూ లేవని స్పష్టం చేసింది.   లావాదేవీలు జరిగాయిలా.. ♦ 2008 డిసెంబర్‌లో దీపక్‌ కొచర్, వేణుగోపాల్‌ ధూత్‌లు కలసి న్యూపవర్‌ రెన్యూవబుల్స్‌ (ఎన్‌ఆర్‌పీఎల్‌) ఏర్పాటు చేశారు. ఇందులో ధూత్, ఆయన కుటుంబ సభ్యులు, ఇతర సంబంధీకులకు 50 శాతం వాటాలుండేవి. అలాగే దీపక్‌ కొచర్‌కి, ఆయన తండ్రికి చెందిన పసిఫిక్‌ క్యాపిటల్‌ సంస్థకు, చందా కొచర్‌ సోదరుడి భార్యకు మిగతా 50 శాతం వాటాలుండేవి. ♦ 2009 జనవరిలో న్యూపవర్‌ డైరెక్టర్‌ పదవికి ధూత్‌ రాజీనామా చేశారు. రూ. 2.5 లక్షల మొత్తానికి కంపెనీలో తనకున్న 24,999 షేర్లను దీపక్‌ కొచర్‌కి బదలాయించారు. ♦ 2010 మార్చిలో సుప్రీమ్‌ ఎనర్జీ అనే సంస్థ నుంచి న్యూపవర్‌కి రూ.64 కోట్ల రుణం (ఫుల్లీ కన్వర్టబుల్‌ డిబెంచర్‌ రూపంలో) లభించింది. ఈ సుప్రీమ్‌ ఎనర్జీలో ధూత్‌కి 99.9 శాతం వాటాలు ఉన్నాయి. ♦ ధూత్‌ నుంచి కొచర్‌కి.. ఆ తర్వాత కొచర్‌ కుటుంబీకులకు చెందిన పసిఫిక్‌ క్యాపిటల్‌ నుంచి షేర్లు సుప్రీమ్‌ ఎనర్జీకి ఒక ఒక పద్ధతి ప్రకారం న్యూపవర్‌ షేర్ల బదలాయింపు జరిగింది. ఫలితంగా 2010 మార్చి ఆఖరుకు న్యూపవర్‌లో సుప్రీమ్‌ ఎనర్జీ 94.99 శాతం వాటాదారుగా అవతరించింది. మిగతా వాటాలు కొచర్‌ పేరిటే ఉండిపోయాయి. ♦  2010 నవంబర్‌లో ధూత్‌ సుప్రీమ్‌ ఎనర్జీలో తనకున్న మొత్తం వాటాలను.. తన అనుచరుడు మహేష్‌ చంద్ర పుంగ్లియాకు బదలాయించారు. ♦  ఈ పుంగ్లియా.. 2012 సెప్టెంబర్‌ 29 నుంచి 2013 ఏప్రిల్‌ 29 మధ్య తన వాటాలను పినాకిల్‌ ఎనర్జీ అనే ట్రస్టుకు బదలాయించారు. దీనికి మేనేజింగ్‌ ట్రస్టీగా దీపక్‌ కొచర్‌ ఉన్నారు. ఈ షేర్ల విలువ రూ.9 లక్షలుగా చూపించారు. అంటే న్యూపవర్‌కి రూ. 64 కోట్ల రుణాలిచ్చిన ధూత్‌ సంస్థ సుప్రీమ్‌ ఎనర్జీ .. మూడేళ్ల వ్యవధిలో దీపక్‌ కొచర్‌కి చెందిన పినాకిల్‌ ఎనర్జీ అనే కంపెనీలో కలిసిపోయింది. ఐసీఐసీఐ బ్యాంకుకు రూ.59 కోట్ల జరిమానా బాండ్ల విక్రయ నిబంధనలు ఉల్లంఘించినందుకే... ముంబై: ప్రైవేటు రంగ ఐసీఐసీఐ బ్యాంకుపై ఆర్‌బీఐ రూ.58.9 కోట్ల జరిమానా విధించింది. హెచ్‌టీఎం (హెల్డ్‌ టు మెచ్యూరిటీ) సెక్యూరిటీలను నేరుగా విక్రయించే విషయంలో మార్గదర్శకాలను ఐసీఐసీఐ బ్యాంకు ఉల్లంఘించినట్టు ఆర్‌బీఐ పేర్కొంది. అయితే, ఆర్‌బీఐ మార్గదర్శకాలు ఎప్పటి నుంచి అమలయ్యేవనే విషయాన్ని పొరపాటుగా అర్థం చేసుకోవడం వల్లే ఈ ఉల్లంఘన చోటు చేసుకున్నట్లు ఐసీఐసీఐ బ్యాంకు వివరణ ఇచ్చింది. నియంత్రణపరమైన మార్గదర్శకాలను పాటించేందుకు ఎంతో ప్రాధాన్యమిస్తామని బ్యాంకు తెలిపింది. బ్యాంకింగ్‌ రెగ్యులేషన్స్‌ యాక్ట్‌ 1949 ప్రకారం తనకు లభించిన అధికారాల మేరకు, తాను జారీ చేసిన మార్గదర్శకాలను ఐసీఐసీఐ బ్యాంకు పాటించకపోవడంతో జరిమానా విధించినట్టు ఆర్‌బీఐ స్పష్టం చేసింది. ఆర్‌బీఐ మార్గదర్శకాల ప్రకారం బ్యాంకులు పెట్టుబడులను హెల్డ్‌ ఫర్‌ ట్రేడింగ్‌ (హెచ్‌ఎఫ్‌టీ), అవైలబుల్‌ ఫర్‌ సేల్‌ (ఏఎఫ్‌ఎస్‌), హెల్డ్‌ ఫర్‌ మెచ్యూరిటీ (హెచ్‌టీఎం) అని మూడు వర్గీకరణలు చేయాల్సి ఉంటుంది. హెచ్‌టీఎం కేటగిరీలో సెక్యూరిటీలు కాల వ్యవధి తీరే వరకు వాటికి కొనసాగించాలి. ఒకవేళ ఈ విభాగం నుంచి సెక్యూరిటీలను విక్రయించినట్టయితే, అది ఈ విభాగంలో అవసరమైన పెట్టుబడుల్లో 5 శాతానికి మించితే ఆర్‌బీఐకి తెలియజేయాలి. కానీ, ఐసీఐసీఐ బ్యాంకు తెలియజేయలేదు.

న్యూఢిల్లీ : పీఎన్‌బీ కుంభకోణం అనంతరం బ్యాంకింగ్‌ కుంభకోణాలు ఒక్కొక్కటి వెలుగులోకి వస్తున్నాయి. తాజాగా ప్రైవేట్‌ దిగ్గజం ఐసీఐసీఐ బ్యాంకు కుంభకోణం బయటపడింది. వీడియోకాన్‌ సంస్థకు రూ.3,250 కోట్ల రుణం దక్కేలా ఈ బ్యాంకు సీఈవో, ఎండీ చందా కొచ్చర్‌ సాయం చేశారని ఆరోపణలు వెల్లువెత్తుతున్నాయి. 2012లో ఐసీఐసీఐ బ్యాంకు వీడియోకాన్‌కు ఈ రుణం ఇచ్చినట్టు తెలిసింది.  వీడియోకాన్‌ గ్రూప్‌కు చెందిన వేణుగోపాల్ ధూత్‌లో పాటు చందాకొచ్చర్‌ భర్త దీపక్‌ కొచ్చర్‌, చందాకొచ్చర్‌కు చెందిన ఇద్దరు కుటుంబ సభ్యులు 2008లో ఓ కంపెనీ ఏర్పాటు చేశారు. అయితే ఐసీఐసీఐ బ్యాంకు నుంచి వీడియోకాన్‌ గ్రూప్‌కు రూ.3250 కోట్ల రుణం అందిన వెంటనే ఆ కంపెనీలో ఉన్న వేణుగోపాల్‌ తన వాటాను దీపక్‌ కొచ్చర్‌కు ట్రాన్సఫర్‌ చేశారు. ఐసీఐసీఐ బ్యాంకు జారీచేసిన ఆ రుణంలో దాదాపు 86 శాతం అంటే రూ.2810 కోట్లు ఈ గ్రూప్‌ చెల్లించలేకపోయింది. దీంతో 2017లో ఆ రుణమంతటిన్నీ స్థూల నిరర్థక ఆస్తిగా ప్రకటించారు. ఒక్క ఐసీఐసీఐ బ్యాంకు మాత్రమే కాక, మొత్తం బ్యాంకులన్నీ కలిపి వీడియోకాన్‌ సంస్థకు మొత్తం రూ.36వేల కోట్ల రుణమిచ్చినట్టు తెలిసింది. నిబంధనలు పాటించకుండా క్విడ్‌ ప్రోకో ప్రాతిపదికన వీడియోకాన్‌ గ్రూప్‌కు కొచ్చర్‌ రుణమిచ్చారని, దీంతో ఆమె కుటుంబీకులు లబ్ది పొందారని ప్రస్తుతం ఆరోపణలు వెల్లువెత్తుతున్నాయి. అయితే ఈ ఆరోపణలపై ఐసీఐసీఐ బ్యాంకు బోర్డు వివరణ ఇచ్చింది.   2012 ఏప్రిల్‌లో వీడియోకాన్‌ గ్రూప్‌నకు రుణాలిచ్చిన కన్సార్షియంలో తమది లీడ్ బ్యాంక్ కూడా కాదని పేర్కొంది. కన్సార్షియంలో భాగంగానే సుమారు రూ.3,250 కోట్లు ఇవ్వడం జరిగిందని, ఇది కన్సార్షియం ఇచ్చిన మొత్తం రుణంలో 10 శాతం కన్నా తక్కువేనని ఐసీఐసీఐ బ్యాంక్ తెలిపింది. రుణ నిబంధనలను చందాకొచ్చర్‌ ఉల్లంఘించలేదని పేర్కొంది. వీడియోకాన్‌కు రుణమివ్వాలనే నిర్ణయం చందాకొచ్చర్‌ ఒక్కరిదే కాదని, బ్యాంకు క్రెడిట్‌ కమిటీ దీనిపై నిర్ణయం తీసుకుందని తెలిపింది. ఆమె కమిటీ చైర్‌పర్సన్‌ కూడా కాదని ప్రకటించింది. ఆరోపణల్లో పేర్కొంటున్నట్లుగా వీడియోకాన్ గ్రూప్‌నకు రుణాలిచ్చినందుకు చందా కొచ్చ‌ర్ ఎటువంటి లబ్ధి పొందలేదని.. ఈ వ్యవహారంలో క్విడ్‌ ప్రోకో గానీ ఆశ్రిత పక్షపాతం గానీ స్వార్ధ ప్రయోజనాలు గానీ లేవని స్పష్టం చేసింది.

న్యూఢిల్లీ: రుణాల మంజూరు విషయంలో వీడియోకాన్‌ గ్రూప్‌నకు లబ్ధి చేకూర్చేలా వ్యవహరించారని ఆరోపణలు ఎదుర్కొంటున్న ఐసీఐసీఐ బ్యాంక్‌ సీఈవో చందా కొచర్‌కు బ్యాంకు బోర్డు బాసటగా నిల్చింది. ఇవన్నీ దురుద్దేశపూర్వకమైన, నిరాధారమైన వదంతులేనని స్పష్టం చేసింది. కొచర్‌పై తమకు పూర్తి విశ్వాసం, నమ్మకం ఉందని పేర్కొంది. రుణాలను ఆమోదించే విషయంలో తమ బ్యాంకు అంతర్గత వ్యవస్థ పటిష్టంగా ఉందని బోర్డు పేర్కొంది. క్విడ్‌ ప్రో కో ప్రాతిపదికన వీడియోకాన్‌ గ్రూప్‌నకు రుణాలివ్వడం ద్వారా కొచర్, ఆమె కుటుంబీకులు లబ్ధి పొందారంటూ ఒక వెబ్‌సైట్‌లో వార్తలొచ్చిన నేపథ్యంలో ఐసీఐసీఐ బ్యాంకు బోర్డు ఈ మేరకు వివరణనిచ్చింది. ఆరోపణల్లో పేర్కొంటున్నట్లుగా వీడియోకాన్‌ గ్రూప్‌నకు రుణాలిచ్చినందుకు చందా కొచర్‌ ఎటువంటి లబ్ధి పొందలేదని.. ఈ వ్యవహారంలో క్విడ్‌ ప్రో కో గానీ ఆశ్రిత పక్షపాతం గానీ స్వార్థ ప్రయోజనాలు గానీ లేవని స్పష్టం చేసింది. బ్యాంకు, టాప్‌ మేనేజ్‌మెంటును అప్రతిష్ట పాలు చేసేందుకే కొన్ని స్వార్థ శక్తులు వదంతులను వ్యాపింపచేస్తున్నాయని బోర్డు తెలిపింది. 2012 ఏప్రిల్‌లో వీడియోకాన్‌ గ్రూప్‌నకు రుణాలిచ్చిన కన్సార్షియంలో తమది లీడ్‌ బ్యాంక్‌ కూడా కాదని పేర్కొంది. కన్సార్షియంలో భాగంగానే సుమారు రూ.3,250 కోట్లు ఇవ్వడం జరిగిందని, ఇది కన్సార్షియం ఇచ్చిన మొత్తం రుణంలో 10 శాతం కన్నా తక్కువేనని ఐసీఐసీఐ బ్యాంక్‌ తెలిపింది.

‘‘సుదీర్ఘ కాలంగా ఆర్థికరంగం అంటే కేవలం పురుషులకే పరిమితమైన రంగంగా ఉంటూ  వచ్చింది.  అది బ్యాంకింగ్ రంగమైనా, బీమా, పెట్టుబడులు, ఆర్థిక ప్రణాళికలు ఇలా ఏ రంగమైనా  అది మహిళలకు సంబంధించింది కాదనే భావన. దాదాపు మహిళలందరూ ఈ భావనతోనే ఈ రంగాలవైపు (ఆసక్తి వున్నా) వెనకడుగు వేస్తూ వచ్చారు. కానీ ఆ తరువాత  ఈ పరిస్థితిలో మార్పు రావడం మొదలైంది.  వివిధ  రంగాలతోపాటు  ఆర్థిక రంగంలో కూడా  మహిళలు తమ సామర్థ్యాన్ని నిరూపించుకోవడం మొదలు పెట్టారు. ‘‘విత్తం అంటే  కేవలం పురుషుల సొత్తే’’ కాదంటూ తమ సత్తా చాటడం  మొదలు పెట్టారు.  వారిలో  ప్రముఖమైన మహిళల్ని ఇపుడు చూద్దాం’’. చందా కొచ్చర్ జోధ్ పూర్‌లో  జన్మించిన చందా కొచ్చర్ భారతదేశ రెండవ అతిపెద్ద బ్యాంక్  ఐసీఐసీఐ బ్యాంక్ మేనేజింగ్ డైరెక్టర్ , సీఈవోగా తన బాధ్యతలు విజయవంతంగా నిర్వహిస్తున్నారు.     1984 లో ట్రైనీగా ప్రారంభమైన ఆమె ప్రయాణం బ్యాంకు అత్యున్నత అధికారిగా క్లిష్ట పరిస్థితుల్లో కూడా విజయబావుటా ఎగరేస్తూ  అప్రతిహతంగా కొనసాగుతోంది. ముఖ్యంగా ప్రపంచవ్యాప్తంగా ఆర్థిక వ్యవస్థ మాంద్యంతో దెబ్బతిన్న సమయంలో ఆమె బ్యాంకును విజయపథంలో నడిపించారు. ఆమె నాయకత్వంలోనే ఐసీఐసీఐ భారతదేశంలో అతిపెద్ద ప్రైవేటు బ్యాంకులలో ఒకటిగా  నిలవడం  గమనించాల్సిన విషయం.  దేశంలోని అత్యంత శక్తివంతమైన మహిళల జాబితాలో ఆమె నిలవడంలో ఎలాంటి ఆశ్చర్యంలేదు.  ఆర్థిక రంగంలో ఆమె చేసిన విశేష  సేవలకు గాను 2010లో ఆమెకు పద్మభూషణ్ దక్కంది. అలా మేనేజ్మెంట్ ట్రైనీ నుంచి  ఎండీదాకా సాగిన చందా కొచ్చర్  ప్రస్థానం  బ్యాంకింగ్ రంగంలో ప్రవేశించాలనుకునే  అనేకమంది యువతులకు ప్రేరణ. ఉషా అనంతసుబ్రమణియన్ 30 సంవత్సరాలకు పైగా  సుదీర్ఘ అనుభవం ఉషా అనంత సుబ్రమణియన్ సొంతం. స్టాటస్టిక్స్ లో దిట్ట. ప్రస్తుతం, అలహాబాద్ బ్యాంక్ సీఎండీగా ఉన్న ఉషా బ్యాంక్ ఆఫ్ బరోడా, పంజాబ్ నేషనల్ బ్యాంక్, భారతీయ మహిళా బ్యాంక్ లాంటి బ్యాంకులకు సారధ్యం వహించారు.అనంత సుబ్రమణియన్ లైఫ్ ఇన్సూరెన్స్ కార్పోరేషన్ (ఎల్ఐసీ)తో యాక్ట్యుయేరియల్ డిపార్ట్మెంట్లో స్పెషలిస్ట్ గా తన కెరియర్ ను ప్రారంభించారు.   స్టాటస్టిక్స్‌లో ఆమెకున్న పట్టుతో తన  సామర్ధ్యాలకు మరింత పదును పెట్టుకున్నారు.  ఈ   నేపథ్యంలోనే ఆస్తులు క్షీణిస్తూ....దయనీయ పరిస్థితుల్లో, రిజర్వ్ బ్యాంక్ ఆఫ్ ఇండియా (ఆర్బిఐ) పరిశీలనలో ఉన్న ప్రభుత్వ రంగ  బ్యాంకు పంజాబ్ నేషనల్ బ్యాంక్  సారధ్య బాధ్యతలు ఆమెకు అప్పగించారు.  తన  అనుభవం,  ప్రతిభతో బ్యాంకును కష్టాలనుంచి గట్టెక్కిండచడంతోపాటు.. లాభాల బాట పట్టించిన ఘనతను సాధించారామె. ముఖ్యంగా మొట్టమొదటి  భారతీయ మహిళా బ్యాంకు స్థాపనలో ఆమె కృషి ప్రధానంగా చెప్పుకోదగ్గది. (భారతీయ మహిళా బ్యాంకు ఇపుడు ఎస్‌బీఐలో విలీనమైంది). శిఖా శర్మ భారతదేశంలో మూడవ అతి పెద్ద ప్రైవేట్ బ్యాంకు యాక్సిస్ బ్యాంక్ మేనేజింగ్ డైరెక్టర్, సీఈవో శిఖా శర్మ.  1980 లో ఐసిఐసిఐ బ్యాంక్‌లో తన కెరీర్ను ప్రారంభించారు. ఆ సమయంలో ఐసీఐసీఐ సెక్యూరిటీస్,  ఇన్వెస్ట్మెంట్ బ్యాంకింగ్  అండ్ రిటైల్ ఫైనాన్స్ ఏర్పాటులో ముఖ్య పాత్ర పోషించారు. ఆర్ధిక రంగంలో మూడు దశాబ్దాల విశేష అనుభవంతో యాక్సిస్ బ్యాంకు  సారధ్య బాధ్యతలను విజయవంతంగా నిర్వహిస్తున్నారు.అలాగే  ఇన్వెస్ట్మెంట్ బ్యాంకింగ్ అండ్ పేమెంట్స్ విభాగంలో తనదైన ముద్రతో యాక్సిస్ బ్యాంకును అగ్రభాగంలో నిలిపే లక్ష్యంతో సాగుతున్నారు. అరుంధతి భట్టాచార్య దేశీయ అతిపెద్ద ప్రభుత్వ రంగబ్యాంకు  స్టేట్ బ్యాంక్ ఆఫ్ ఇండియా మాజీ చైర్మన్ అరుంధతి భట్టాచార్య గురించి ప్రత్యేక పరిచయం అవసరం లేదు.  208 సంవత్సరాల ఎస్బీఐచరిత్రలో, ఈ ఘనతను సాధించిన మొదటి మహిళగా భట్టాచార్య గుర్తింపు పొందారు.  ఫోర్బ్స్ 'మోస్ట్ పవర్‌ఫుల్ వుమెన్’ 2016 లో 25వ స్థానంలో  నిలిచారు. బ్యాంకు మహిళా ఉద్యోగులకు  రెండేళ్ల సెబాటికల్ లీవ్ విధానాన్ని  ఆమె పరిచయం చేశారు.  దీన్నిమహిళలు ప్రసూతి సెలవు లేదా పెద్దల సంరక్షణల బాధ్యతల సందర్భంగా వినియోగించుకోవచ్చు.అలాగే సర్వైకల్ క్యాన్సర్ టీకాను మహిళా ఉద్యోగులందరు ఉచితంగా  పొందే  సౌకర్యాన్ని కల్పించారు. చిత్ర రామకృష్ణ నేషనల్ స్టాక్ ఎక్స్ఛేంజ్ (ఎన్ఎస్ఈ)  స్థాపనలో  కీలక పాత్ర పోషించిన వారిలో  చిత్రా రామకృష్ణ ప్రముఖులు. అంతేకాదు బొంబాయి స్టాక్ ఎక్స్ఛేంజ్ (బిఎస్ఇ) కు బలమైన   పోటీదారుగా ఎన్ఎస్ఈని నిలపడంలో ఆమె కృషి చాలా ఉంది. మార్కేట్‌ రెగ్యులేటరీ సెబీకి కూడా ఆమె తన సేవలనందించారు. చార్టర్డ్  అకౌంటెంట్‌గా  కెరియర్ ను  ప్రారంభించిన చిత్ర ఐడీబీఐ బ్యాంకులో ప్రాజెక్ట్ ఫైనాన్స్  విభాగంలో  పనిచేశారు. 1992లో ఎన్‌ఎస్‌ఈ ఏర్పడినప్పటినుంచి వివిధ హోదాల్లో పనిచేసిన ఆమె 2013లో (20 ఏళ్ల తరువాత)   సీఈవో, ఎండీగా నియమితులయ్యారు. అదే సంవత్సరం ఫోర్బ్స్ ఇండియన్ విమెన్ లీడర్  పురస్కారం గెలుచుకున్నారు. డిసెంబరు 2, 2016 న ఆమె పదవికి రాజీనామా  చేశారు. ఉషా సంగ్వాన్ దేశీయ అతిపెద్ద ప్రభుత్వ రంగ బీమా  సంస్థ లైఫ్  ఇన్సూరెన్స్ కార్పోరేషన్ ఆఫ్ ఇండియా (ఎల్ఐసీ) కి మొట్టమొదటి మహిళా ఎండీ ఉషా సంగ్వాన్‌. సాధారణంగా ఎల్‌ఐసీకి  టెక్నికల్‌గా నలుగురు ఎండీలు సారధ్యం వహిస్తారు. అయితే నలుగురు ఎండీలు కంపెనీని వీడిన  అనంతరం ఎండీ పదవిన చేపట్టిన ఉషా  సంస్థను ఆరునెలలపాటు  ఒంటి  చేత్తో  నడిపించడం విశేషం. ఈ కాలంలో ఎల్‌ఐసి మార్కెట్ వాటా 70 శాతంనుంచి  71శాతానికి పెరిగింది. క్లెయియ్‌ పరిష్కార నిష్పత్తి 99.6 శాతం వద్ద ఉంది.   వాణి  కోలా బెంగళూరు ఆధారిత కోలారి క్యాపిటల్‌ వ్యవస్థాపకురాలు, ఎండీ  వాణి కోలా.  కోలారి క్యాపిటల్‌ను నెలకొల్పినప్పటినుంచీ విజయపథంలో నడిపించారు. తద్వారా దేశంలో వెంచర్ పెట్టుబడి సంస్థలలో ఒకటిగా నిలిపారు.  22 ఏళ్లపాటు సిలికాన్‌ వ్యాలీలో, 10సంవత్సరాలు వెంచర్‌ క్యాపిటలిస్టుగా   సేవలనందించారు.  సిలికాన్‌ వ్యాలీలో సర్టస్‌ సంస్థకు  వ్యవస్థాపకురాలిగా, సీఈవోగా ఉన్నారు. అంతకుముందు ఇ- ప్రొక్యూర్‌ మెంట్‌ కంపెనీ రైట్‌ వర్క్స్‌కు  సీఈవోగా  పనిచేశారు.2005 లో భారతదేశానికి తిరిగి వచ్చిన  ఆరు  నెలలకాలంలోనే  210 మిలియన్ల డాలర్ల పెట్టుబడులు  పెట్టారు.   ముఖ్యంగా ఫ్లిప్‌కార్ట్‌, స్నాప్‌డీల్‌   సహా దాదాపు 60 స్టార్టప్‌ కంపెనీల్లో 650 మిలియన్ డాలర్ల విలువైన వాటాలను సాధించిన ఘనత ఆమె సొంతం. 1964లో హైదరాబాద్‌లో జన్మించిన వాణి కోలా ఉస్మానియా యూనివర్శిటీలో, అరిజోనా  యూనివర్శిటీలో విద్యనభ్యసించారు. ఇంద్రనూయి 1955లో తమిళనాడులోని మద్రాసులో జన్మించిన ఇంద్రనూయి ప్రపంచంలోనే రెండో అతిపెద్ద ఆహార, పానీయాల కంపెనీ పెప్సీకోకు సీయీవోగా ఎదిగారు. ఫోర్బ్స్‌ వారు ప్రకటించిన ప్రపంచ శక్తివంతమైన మహిళల్లో 13వ స్థానంలో నిలిచారు. 2001లో ఆమె పెప్సీకో కంపెనీలో చేరినప్పుడు సంస్థ నికర లాభం 2.7బిలియన్‌ డాలర్లు ఉండగా ప్రస్తుతం అది 6.5బిలియన్‌ డాలర్లకు చేరుకోవడంలో ఆమె చేసిన కృషి అమోఘం. ఆమె కృషికి తగ్గ ఫలితంగా ఆమె ప్రస్తుతం సంవత్సరానికి 18.6మిలియన్‌ డాలర్ల వేతనాన్ని అందుకుంటున్నారు. కావేరి కళానిధి మారన్‌ సన్‌ టీవీ మానేజింగ్‌ డైరెక్టర్‌గా సంవత్సరానికి 18మిలియన్‌ డాలర్ల వేతనాన్ని పొందుతున్నారు. ఇన్ఫోసిస్‌ సీయీవో వేతనం కంటే కూడా ఇది అధికం. 2010 నుంచి 2015 వరకూ స్పైస్‌జెట్‌ చైర్మన్‌గా పనిచేశారు. కిరణ్‌ మజుందార్‌ షా బెంగెళూరులో బయోకాన్‌ బయోటెక్నాలజీ సంస్థను స్థాపించారు. ప్రస్తుతం సంస్థ మానేజింగ్‌  డైరెక్టర్‌ గా ఉన్నారు. సంవత్సరానికి రూ.16కోట్ల వేతనం పొందుతూ దేశంలో అత్యంత ధనవంతురాలుగా గుర్తింపు పొందుతున్న మహిళ. భౌతికశాస్త్రం, రసాయన శాస్త్రాలలో ఆమె చేసిన రచనలకు గాను 2014లో ఒత్మేర్‌ గోల్డమెడల్‌ పొందారు. ఐఐఎమ్‌ బెంగుళూరుకు చైరపర్సన్‌గా వ్యవహరిస్తున్నారు. ఉర్వి పిరమాల్‌ సంవత్సరానికి రూ.10కోట్ల వేతనం పొందుతూ  నాల్గో స్థానంలో నిలిచారు ఉర్వి పిరమాల్‌, అశోక్‌ పిరమాల్‌ సంస్థ అధినేత్రి. తన 32వ ఏట భర్తను కోల్పొయారు. తదనంతరం కుటుంబ వ్యాపార బాధ్యతలను స్వీకరించారు. కుటుంబ వ్యాపారం విడిపోయిన తర్వాత ఉర్వి పిరమాల్‌కు తన వాటాగా ఒక టెక్సటైల్‌ మిల్, రెండు ఇంజనీరింగ్‌ సంస్థలు లభించాయి.  పూర్తిగా నష్టాల్లో కూరుకుపోయిన సంస్థలను ఆమె  తిరిగి లాభాల  బాట పట్టించారు. ప్రస్తుతం ఈ సంస్థల సంవత్సర  ఆదాయం రూ.1600కోట్లు. ఆర్తీ సుబ్రమణియన్‌ ‘‘ఉత్తమమైనది తప్ప మరేమి వద్దు’’ ఇదే ఆర్తీ సుబ్రమణియన్‌ పాటించే సూత్రం. అదే ఆమెను టీసీఎస్‌ లాంటి టాప్‌ కంపెనీకి ఎక్సిక్యూటీవ్‌ డైరెక్టరుగా ఎదిగేలా చేసింది. ఆమె ఈడీగా బాధ్యతలు తీసుకున్న తర్వాత  సాధించిన అతి గొప్ప విజయం పాస్‌పోర్టు సేవా ప్రాజెక్టు. పాస్‌పోర్టు జారీ ప్రక్రియను పూర్తిగా మార్చి డిజిటైజేషన్‌ చేశారు. టీసీఎస్‌ చరిత్రలోనే బోర్డు ఆఫ్‌ డైరెక్టర్స్‌లో సభ్యురాలైన తొలి మహిళ. ఆమె తోటి ఉద్యోగులు ఆమెను ప్రేమగా ‘మిస్‌.ఫిక్సిట్‌’ అని పిలుచుకుంటారు. వనిత నారయానణ్‌ టెక్‌ దిగ్గజం ఐబీఎమ్‌ గురించి మనలో చాలా మందికి తెలుసు. బీటెక్‌ చదివిన ప్రతి విద్యార్ధి ఐబీఎమ్‌లో ఉద్యోగం గురించి కలలు కంటుంటారు. వనితా నారయానణ్‌ కూడా అలానే అనుకుంది, అనుకోవడమే కాకుండా అందులో ఉద్యోగం కూడా సంపాదించారు. 1985లో ఐబీఎమ్‌లో సాధరణ ఉద్యోగిగా తన ప్రస్థానాన్ని ప్రారంభించి అంచెలంచెలుగా ఎదిగి 2013లో ఐబీఎమ్‌ ఇండియాకు మానేజింగ్‌ డైరెక్టర్‌గా, ఇండియా/సౌత్‌ ఆసియాకు రిజనల్‌ మేనేజర్‌గా నియమితులయ్యారు. 25 సంవత్సరాల నుంచి వివిధ దేశాల్లో పర్యటిస్తూ, వేర్వేరు రకాల వ్యక్తులతో పనిచేస్తున్నారు. 2013-14లో నేషనల్‌ కౌన్సిల్‌ ఆఫ్‌ కాన్ఫేడరేషన్‌ ఆఫ్‌ ఇండియన్‌ ఇండస్ట్రీలో సభ్యురాలిగా పనిచేశారు. నీలమ్‌ ధావన్‌ ​హెచ్‌పీ కంప్యూటర్లు, ప్రింటర్లకు ఉన్న డిమాండ్‌ అందరికీ తెలిసిందే. అంత గొప్ప పేరు ఉన్న కంపెనీకి ఇండియాలో మానేజింగ్‌ డైరెక్టరుగా నియమితులయ్యారు నీలం ధావన్‌. కేవలం కంప్యూటర్లు, ప్రిటింగ్‌ పరికరాలకే పరిమితమైన కంపేని సేవలను బీపీవో, సాఫ్ట్‌వేర్‌, పరిశోధన - సేవలకు కూడా విస్తరించి ప్రస్తుతం హెచ్‌పీ కంపెనీని దేశంలో ఒక ప్రముఖ సాఫ్ట్‌వేర్‌ కంపెనీగా నిలబెట్టారు. హెచ్‌పీలో చేరడానికంటే ముంది నీలం 2005నుంచి 2008వరకూ మైక్రోసాఫ్ట్‌ ఇండియాకు మానేజింగ్‌ డైరెక్టర్‌గా పనిచేశారు. హెచ్‌సీఎల్‌, ఐబీఎమ్‌ కంపెనీల్లో పలు కీలక బాధ్యతలు నిర్వహించారు. అరుణ జయంతి 2011 సెప్టెంబరులో కాప్‌జెమిని సీయీవోగా బాధ్యతలు స్వీకరించిన అరుణ జయంతిది ఈ రంగలో రెండు దశాబ్దల అనుభవం. సీయీవోగా చేయడానికి కంటే ముంది అరుణ కాప్‌ జెమినిలో ఔవుట్‌ సోర్సింగ్‌ విభాగానికి నాయకత్వం వహించారు. ఆ సమయంలో ఆమె ప్రపంచవ్యాప్తంగా  కంపెనీ ఔవుట్‌సోర్సింగ్‌ సేవల విలువలను గణనీయంగా పెంచారు. సీయీవోగా బాధ్యతలు చేపట్టిన అనతికాలంలోనే భారతీయ వ్యాపార రంగంలో తన ఉనికిని చాటుకున్నారు. 2013లో ఇండియా టుడే వారు ప్రకటించిన ఇండియన్‌ వుమేన్‌ ఇన్‌ ద కార్పొరేట్‌ వరల్డ్‌లో స్థానం సంపాదించుకున్నారు‌. క్రితిగా రెడ్డి సామాజిక మాధ్యమం ఫేస్‌బుక్‌ గురించి తెలియని వారు ఉండరు. ప్రపంచవ్యాప్తంగా తన శాఖలను విస్తరించింది ఈ కంపెనీ. ఇంతపెద్ద కంపెనీలో భారతదేశం నుంచి ఉద్యోగంలో చేరిన తొలి మహిళ క్రితిగా రెడ్డి. 2010లో ఉద్యోగంలో చేరిన క్రితిగా రెడ్డి ప్రస్తుతం కంపెనీ భారతదేశంలో తన సేవలను విస్తరించేందుకుగాను హైదరాబాదులో ప్రారంభించిన శాఖ బాధ్యతలను నిర్వహిస్తున్నారు. ఫార్చున్‌ పత్రిక ప్రకటించే టాప్‌ 50 మోస్ట్‌ పవర్‌ఫుల్‌ వుమెన్‌ ఇన్‌ ఇండియాలో స్థానం సంపాదించుకున్నారు. పిల్లలు, మహిళల్లో నాయకత్వ లక్షణాలను పెంచేందుకు కృషి చేస్తున్నారు. కుముద్‌ శ్రీనివాసన్‌ 1987లో ఇంటెల్‌ కంపెనీలో చేరిన కుముద్‌ శ్రీనివాసన్‌ బిజినేస్‌, ఇనఫర్‌మేషన్‌ సిస్టమ్స్‌లో వేర్వేరు బాధ్యతలు నిర్వహించి ప్రస్తుతం భారత్‌లో ఇంటెల్‌కు జనరల్‌ మేనేజర్‌గా బాధ్యతలు నిర్వహిస్తున్నారు. బెంగుళూరులోని ఐఐఐటీ గవర్నింగ్‌ బాడీలో సభ్యురాలిగా పనిచేశారు. తన్యా దుబాష్‌ గోద్రెజ్‌ ఉత్పత్తులకు ప్రజల్లో ఎంతటి ఆదరణ ఉందో తెలిసిన విషయమే. సబ్బుల దగ్గర నుంచి లాకర్ల వరకూ ఎనో ఉత్పత్తులను తయారుచేస్తుంది ఈ ​కంపెనీ. కానీ ఒకానొక సందర్భంలో కంపెనీలో మందగమన పరిస్థితులు నెలకొన్నాయి. ఈ విషయాన్ని ముందు గుర్తించి నష్టం వాటిల్లకుండా చూసి కంపెనీని  తిరిగి పుంజుకునేలా చేసిన ఘనత తన్యా దుబాష్‌ది. తన్యా దుబాష్‌, ఆది గోద్రెజ్‌ పెద్ద కుమార్తే. తన్యా దుబాష్‌ భారతీయ మహిళ బ్యాంకు బోర్డు మెంబరు. సునితా రెడ్డి వైద్యరంగంలో అపోలో ఆసుపత్రులది విశిష్ట స్థానం. 2014లో సునితా రెడ్డి బాధ్యతలను చేపట్టిన తర్వాత ఆరోగ్యసేవలను విస్తరస్తూ పోతు ఉన్నారు. ప్రస్తుతం అపోలో ఆరోగ్య సేవలను గ్రామాలకూ కూడా విస్తరించారు. ఆమె హర్వర్డ్‌ బిజినేస్‌ స్కూల్‌ ఇండియా అడ్వైసరీ బోర్డులో సభ్యురాలుగా ఉన్నారు. శాంతి ఏకాంబరం ప్రస్తుతం ప్రైవేటు బ్యాంకింగ్‌ రంగంలో ఎంతటి పోటి ఉందో అందరికి తెలిసిన విషయమే. ఇంత తీవ్ర పోటిని తట్టుకుని నిలబడాలంటే ఎంతో ముందు చూపు ఉన్న నాయకత్వం అవసరం. ఇలాంటి నాయకత్వ లక్షణాలు ఉన్న వ్యక్తే శాంతి ఏకాంబరం, ప్రముఖ కోటాక్‌ మహింద్ర బ్యాంక్‌ ప్రెసిడెంట్‌. 2014లో ఆమె బాధ్యతలు తీసుకున్న వెంటనే డిజిటల్‌ ఉత్పత్తుల అవసరాలను గుర్తించి అందుకు తగ్గట్టుగానే వేర్వేరు భాషల్లో బ్యాంక్‌ సర్వీసులను అందిచడం, అల్ఫా సేవింగ్స్‌ అకౌంట్స్‌, సామాజిక మాధ్యమాల ద్వారా కూడా డబ్బులను పంపిచడం వంటి నూతన విధానాలను ప్రవేశపెట్టారు. ఆమె చేసిన మార్పుల వల్ల 2015లో రూ.21,113గా ఉన్న ఖాతాదారుల ద్రవ్య నిల్వలు 2016 మార్చి నాటికి రూ.32,987 కోట్లకు చేరుకున్నాయి. చౌహన్‌ సాలుజా పార్లే-జీ అనగానే మనకు టక్కున గుర్తుకు వచ్చేది  బిస్కెట్లు. అంతా ప్రజాదరణ పొందిన ఈ కంపెనీ ఒకానొక సమయంలో అంతర్జాతీయ ఆహార ఉత్పత్తుల కంపెనీల నుంచి తీవ్ర పోటిని ఎదుర్కొవాల్సి వచ్చింది. అలాంటి క్లిష్ట పరిస్థితుల్లో కంపెనీ పగ్గాలు చేపట్టింది చౌహాన్‌ సాలుజా, కంపెనీ వ్యవస్థాపకుడు  ప్రకాశ్‌ సాలుజా పెద్ద కుమార్తే. ఆమె బాధ్యతలు చేపట్టిన తర్వాత సాధించిన అతిపెద్ద విజయం కంపెనీ తయారి సంస్థను ఉత్తారాఖండ్‌లో నెలకొల్పడం. రోశిని నాడార్‌ హెచ్‌సీఎల్‌ అంటే ఐటీ సేవలు అందించే సంస్థగానే గుర్తింపు ఉంది. కానీ రోశిని నాడార్‌ కంపెనీ  సీయీవోగా బాధ్యతలు స్వీకరించిన తర్వాత కంపెనీ రూపురేఖలు పూర్తిగా మారిపోయాయి. 2014లో రోశిని బాధ్యతలు తీసుకున్న తర్వాత ఐటీ సేవలకే పరిమతమయిన కంపెనీ ఆరోగ్యరంగంలో అడుగు పెట్టింది, నైపుణ్య శిక్షణ కోసం హెచ్‌సీఎల్‌ టాలెంట్‌ కేర్‌ను ప్రారంభించారు. ప్రస్తుతం ఇవి విజయవంతంగా పనిచేస్తున్నాయి. రేఖ మీనన్‌ అక్సెంచర్‌ కంపెనీకి 2000 సంవత్సరంలో భారతదేశంలో కేవలం 300మంది ఉద్యోగులు మాత్రమే ఉన్నారు. మరి ప్రస్తుతం...? 1,40,000మంది అవును అక్షరాల లక్షానలబై వేల మంది ఉద్యోగులు ఉన్నారు. కంపెనీ సాధించిన ఈ అభివృద్ధి వెనక రేఖా మీనన్‌ క్రమశిక్షణ, కృషి, అంకితభావం ఉన్నాయి.  ప్రియా నాయర్‌ 1995లో హిందూస్థాన్‌ యూనీలివర్‌ కంపెనీలో మానేజ్‌మెంట్‌ ట్రైనీగా తన కెరీర్‌ను ప్రారంభించి ప్రస్తుతం కంపెనీలో ముఖ్య విభాగమైన హోమ్‌ కేర్‌ డివిజన్‌కు ఎగ్సిక్యూటీవ్‌ డైరెక్టరుగా ఎదిగారు. మార్కెట్‌లో వస్తున్న పోటి కంపెనీ ఉత్పత్తులకు ధీటుగా ఎప్పటికప్పుడు నూతన ఉత్పత్తులను మార్కెట్లో ప్రవేశపెడ్తూ కంపెనీని విస్తరిస్తూ పోతు ఉన్నారు. ఏక్తా కపూర్‌ సగటు భారతీయ ప్రేక్షకులను ముఖ్యంగా ఆడవారిని టీవీల ముందు కట్టిపడేసి, ధారవాహికలకు భారీ హంగులు అద్దిన బుల్లితెర రాణి ఏక్తా కపూర్‌. బాలాజీ టెలిఫిల్మ్‌ అనే సంస్థను స్థాపించి ఎన్నో విజయవంతమైన ధారవాహికలను నిర్మిస్తూన్నారు ఏక్తా కపూర్‌. అంతేకాదు సిని నిర్మాణ రంగంలోనూ ప్రవేశించి తన​ ప్రతిభను చాటుకుంటున్నారు. నీతా అంబాని మధ్యతరగతి కుటుంబంలో పుట్టి, అంబానీల ఇంట అడుగుపెట్టారు నీతా అంబాని. రిలయన్స్‌ సంస్థల అభివృద్ధిలో ఆమె పాత్రను మరవలేము.ఇంత పేరుప్రఖ్యాతులు వచ్చినా ఆమె  తన మూలాలను మరిచిపోలేదు. అందుకే కంపెనీ లాభాల్లోంచి కొంత వాటాను తిరిగి సమాజాభివృద్ధికే కేటాయించే ఉద్ధేశంతో  కార్పొరేట్ సామాజిక బాధ్యత కార్యక్రమాన్ని ప్రారంభించారు. రాబోయే సవాళ్లను ముందే గుర్తించడం, అందుకు తగ్గ పరిష్కారాలను కనుక్కొవడం ఆమె ప్రత్యేకత. వీరు తమ అసమాన ప్రతిభా పాటవాలతో  అటు తాము నేతృత్వం వహిస్తున్న కంపెనీలను విజయపథం వైపు నడిపించడం మాత్రమే కాదు  ఫైనాన్షియల్‌  సెక్టార్‌లో గణనీయమైన కృషి చేశారు.  కొన్ని పనులను,  బాధ్యతలను మహిళలు నిర్వహించలేరు అనేది కేవలం అపోహ మాత్రమేనని నిరూపించారు.   అవకాశాలు కల్పిస్తే..బాధ్యతలు అప్పగిస్తే  ఏ రంగమైనా  రాణించి తీరతామని చాటి పెట్టారు. తద్వారా యావత్‌  మహిళాలోకానికి ప్రేరణగా నిలిచారు. ధరణి సూర్యకుమారి

సాక్షి, హైదరాబాద్‌: ప్రపంచ పారిశ్రామికవేత్తల సదస్సు (జీఈఎస్‌)లో భాగంగా బుధవారం మహిళా పారిశ్రామికవేత్తల నైపుణ్యాభివృద్ధి అంశంపై ప్లీనర్‌ జరిగింది. ఈ చర్చ కార్యక్రమానికి మంత్రి కేటీఆర్‌ సమన్వయకర్తగా వ్యవహరించగా.. ముఖ్య అతిథి ఇవాంకా ట్రంప్‌తోపాటు బ్రిటన్‌ మాజీ ప్రధాని టోనీ బ్లెయిర్‌ సతీమణి చెర్రీ బ్లెయిర్‌, ఐసీఐసీఐ బ్యాంక్‌ ఎండీ చందా కొచ్చార్‌, డెల్‌ సీఈవో క్వింటోస్‌ తదితరులు పాల్గొన్నారు. హైదరాబాద్‌లోని హెచ్‌ఐసీసీలో జరుగుతున్న  ఈ ప్లీనరీలో ఇవాంక మాట్లాడుతూ.. మహిళలు విభిన్న రంగాల్లో అద్భుతంగా రాణిస్తున్నారని అన్నారు. మహిళలు ఉద్యోగాలు చేస్తూ.. కుటుంబసభ్యులకు ఆర్థికంగా అండగా ఉంటున్నారని గుర్తుచేశారు. సాంకేతిక రంగంలో అనేక అవకాశాలు ఉన్నాయని, ఈ అవకాశాలను మహిళలు అందిపుచ్చుకోవాలని సూచించారు. కొత్త ఆవిష్కరణలన్నీ ప్రైవేటు రంగంలోనే వస్తున్నాయని, ఏ రంగంలోనైనా సేవలు బాగుంటేనే ఆదరణ లభిస్తుందని అన్నారు. వ్యాపారాల్లో మహిళల భాగస్వామ్యం ఎంతో అవసరమని గుర్తుచేశారు. నైపుణ్యాభివృద్ధికి శిక్షణ ఇవ్వడం ఎంతో ముఖ్యమని అన్నారు. అమెరికన్‌ వర్సిటీల్లో మహిళలకు సాంకేతిక విద్యను అందించడంపై ఎక్కువ శ్రద్ధా పెట్టామని తెలిపారు. మహిళలకు ప్రధానంగా నమ్మకం, సామర్థ్యం, మూలధనం ఉండాలని చెప్పారు. మహిళలు తమతో ఏ విషయంలో తీసిపోరని పురుషులు గుర్తించాలన్నారు.  మహిళలను ప్రోత్సహించేందుకు తెలంగాణ ప్రభుత్వం అనేక చర్యలు చేపడుతోందని మంత్రి కేటీఆర్‌ ఈ సందర్భంగా పేర్కొన్నారు. సిస్కో, మైక్రోసాఫ్ట్‌తో కలిసి మహిళాభివృద్ధికి తోడ్పడుతున్నామని తెలిపారు. భారత దేశంలో మహిళల భాగస్వామ్యం చాలా పెరిగిందని చందా కొచ్చర్‌ అన్నారు. భారతదేశం నుంచి మంచి క్రీడాకారిణులు అన్ని విభాగాల్లో ఉన్నారని తెలిపారు. నేడు భారత దేశ రక్షణమంత్రిగా మహిళ ఉన్న విషయాన్ని గుర్తుచేశారు. దేశంలోని బ్యాకింగ్‌ రంగంలో 40శాతం మంది మహిళలు పనిచేస్తున్నారని చెప్పారు. ఆత్మస్థైర్యం నింపినప్పుడే మహిళలు రాణించగలరని చెప్పారు. తన పిల్లలే తనకు స్ఫూర్తి అని చెప్పారు. మహిళల సాధికారిత కోసం తమ ఫౌండేషన్‌ ప్రధానంగా కృషి చేస్తున్నదని చెర్రీ బ్లెయిర్‌ తెలిపారు.

సాక్షి, హైదరాబాద్‌: అంతర్జాతీయ పారిశ్రామికవేత్తల సదస్సు(జీఈఎస్‌)లో జరిగే వివిధ చర్చల్లో ప్రసంగించనున్న 57 మంది పారిశ్రామికవేత్తల పేర్లు ఖరారయ్యాయి. వీరికి సంబంధించిన వివరాలను సదస్సు నిర్వాహకులు విడుదల చేశారు. సదస్సులో మొత్తం 53 చర్చాగోష్ఠులు జరగనున్నాయి. అయితే అందులో మాట్లాడే వారి తుది జాబితాలు ఇంకా ఖరారు కాలేదని రాష్ట్ర పరిశ్రమల శాఖ వర్గాలు తెలిపాయి. ఇప్పటివరకు ఖరారైన పేర్లలో 57 మందికి సంబంధించిన నేపథ్యాలను నిర్వాహకులు వెల్లడించారు. వీరిలో ఐసీఐసీఐ బ్యాంక్‌ ఎండీ, చైర్మన్‌ చందా కొచ్చర్, బ్రిటన్‌ మాజీ ప్రధాని టోనీ బ్లెయిర్‌ భార్య చెర్రీ బ్లెయిర్‌తోపాటు దేశ, విదేశాలకు చెందిన ప్రముఖ వ్యాపారవేత్తలు, ఇతర రంగాల ప్రముఖులు ఉన్నారు. అందులో కొందరి గురించి.. చెర్రీ బ్లెయిర్‌ – బ్రిటన్‌ మాజీ ప్రధాని సతీమణి ఈమె ప్రముఖ న్యాయవాది కూడా. పరిశ్రమలను నెలకొల్పడంలో మహిళలకు సహాయం చేసేందుకు 2008లో చెర్రీ బ్లెయిర్‌ ఫౌండేషన్‌ను స్థాపించారు. మహిళలు ఆర్థికంగా ఎదిగితేనే సమాజంలో తమ గొంతను వినిపించగలుగుతారన్న ఆశయంతో ఈ ఫౌండేషన్‌ను ఏర్పాటు చేశారు. మహిళలు, బాలలు, మానవ హక్కుల కోసం కృషి చేస్తున్నారు. చందా కొచ్చర్‌ – ఐసీఐసీఐ బ్యాంక్‌ సీఎండీ దేశంలో అతిపెద్ద ప్రైవేటు రంగ బ్యాంకు ఐసీఐసీఐకు ఈమె 2009 నుంచి సీఎండీగా పని చేస్తున్నారు. 1984లో ఐసీఐసీఐలో ఉద్యోగ ప్రస్థానాన్ని ప్రారంభించిన ఆమె... 2001లో బ్యాంక్‌ పాలక మండలిలో స్థానం సంపాదించారు. 2011లో పద్మభూషన్‌ పురస్కారాన్ని అందుకున్నారు. 153 బిలియన్‌ అమెరికన్‌ డాలర్ల ఆస్తులున్న ఐసీఐసీఐ బ్యాంకుకు లాభాల బాట పట్టిస్తూ ఖ్యాతి గడించారు.      అను ఆచార్య – సీఈవో, మ్యాప్‌ మై జీనోమ్‌ ఇండియా లిమిటెడ్‌ జన్యు చికిత్స ద్వారా వైద్య సేవలందించేందుకు అను ఆచార్య 2013లో ‘మ్యాప్‌ మై జీనోమ్‌’సంస్థను ఏర్పాటు చేశారు. ఈ సంస్థ ఎన్నో పురస్కారాలను గెలుచుకుంది. రెడ్‌ హెర్రింగ్‌ టాప్‌ 100 ఏసియా అండ్‌ గ్లోబల్‌ 2016, ఈఎన్‌–ఏబుల్‌ ఇండియా స్టార్టప్‌ అవార్డ్‌–2016, వాల్‌ స్ట్రీట్‌ జర్నల్‌ స్టార్టప్‌ షోకేస్‌–2016 ఫైనలిస్ట్‌ పురస్కారాలను సొంతం చేసుకుంది. భావిష్‌ అగర్వాల్‌ – ఓలా, సీఈఓ, సహ వ్యవస్థాపకుడు ఐఐటీ ముంబైలో చదివిన భావిష్‌ సహ విద్యార్థి అంకిత్‌ భాటీతో కలిసి ఓలా క్యాబ్స్‌ కంపెనీని 2013 డిసెంబర్‌లో నెలకొల్పారు. అంతకు ముందు రెండేళ్ల పాటు మైక్రోసాఫ్ట్‌ రీసెర్చ్‌లో పనిచేశారు. ఓలా షేర్, ఓలా షటిల్‌ సేవలతో రవాణా రంగంలోకి దూసుకువచ్చారు. ఎకనామిక్స్‌ టైమ్స్‌ నుంచి ఎంటర్‌ప్రెన్యూయర్‌ ఆఫ్‌ ది ఇయర్‌–2017 పురస్కారం అందుకున్నారు.   సంజీవ్‌ భిక్చందాని – ‘నౌకరీ’ వ్యవస్థాపకుడు ఐఐఎం అహ్మదాబాద్‌ నుంచి 1989లో ఎంబీఏ పూర్తి చేసిన సంజీవ్‌ భిక్చందాని ఎన్నో రకాల ఉద్యోగాలు, వ్యాపారాలు చేసిన తర్వాత 2003లో ‘నౌకరి డాట్‌ కాం’వెబ్‌సైట్‌ను స్థాపించారు. ఇది ఉద్యోగ సమాచారం అందించే ప్రధాన వెబ్‌సైట్‌గా పేరుగాంచింది. స్టాక్‌ ఎక్సే్ఛంజీలో రిజిస్టరైన ఈ కంపెనీకి మార్కెట్లో 2 మిలియన్‌ అమెరికన్‌ డాలర్ల పెట్టుబడులున్నాయి. దీప్‌ కాల్ర – ‘మేక్‌ మై ట్రిప్‌’ వ్యవస్థాపకుడు ఈయన ఆన్‌లైన్‌ ట్రావెల్‌ కంపెనీ ‘మేక్‌ మై ట్రిప్‌ డాట్‌ కాం’ను 2000లో స్థాపించి కంపెనీకి సీఈఓగా వ్యవహరిస్తున్నారు. ఐఐఎం అహ్మదాబాద్‌ నుంచి ఎంబీఏ చేశారు.  అంతకు ముందు పలు కంపెనీల్లో పనిచేశారు. ఐఏఎంఏఐ, ఇంటర్నెట్‌ మ్యాన్‌ ఆఫ్‌ ది ఇయర్‌ (2010), కేపీఎంజీ నుంచి డిజిటల్‌ ఇన్‌ఫ్లూయన్సర్‌ ఇన్‌ ఇండియా((2012)తో సహా పలు పురస్కారాలను అందుకున్నారు. సచిన్‌ భన్సల్‌ – ఫ్లిప్‌కార్ట్, సహ వ్యవస్థాపకులు, ఎగ్జిక్యూటివ్‌ చైర్మన్‌ దేశ ఈ–కామర్స్‌ రంగంలో 60 శాతం వాటా కలిగిన ఫ్లిప్‌కార్ట్‌ కంపెనీ వ్యవస్థాపకుల్లో ఒకరు. కంపెనీని స్థాపించిన 2007 నుంచి 2015 వరకు సీఈవోగా, 2016 నుంచి ఎగ్జిక్యూటివ్‌ చైర్మన్‌గా వ్యవహరిస్తున్నారు. 2016లో ఎన్డీటీవీ ఇండియన్‌ ఆఫ్‌ ది ఇయర్‌ పురస్కారాన్ని అందుకున్నారు.  


 న్యూఢిల్లీ: ప్రైవేట్‌ రంగ బ్యాంకింగ్‌ దిగ్గజం చందా కొచర్‌ గత ఆర్థిక సంవత్సరంలో మొత్తం రూ. 7.85 కోట్ల వేతనం అందుకున్నారు. అంతక్రితం ఆర్థిక సంవత్సరంతో పోలిస్తే ఇది 64 శాతం అధి కం. బ్యాంక్‌ వార్షిక నివేదిక ప్రకారం.. ఆమె బేసిక్‌ శాలరీ 15 శాతం పెరిగి రూ. 2.67 కోట్లకు చేరింది. అంటే రోజువారీగా చూస్తే కొచర్‌ రోజుకు.. రూ. 2.18 లక్షల వేతనం అందుకున్నట్లవుతుంది. 2016–17లో ఆమె రూ. 2.2 కోట్ల బోనస్‌ అందుకున్నారు.
 వసతి, గ్యాస్, ఎలక్ట్రిసిటీ, నీరు, గ్రూప్‌ ఇన్సూరెన్స్, క్లబ్‌ ఫీజు, నివాసం వద్ద వినియోగించేందుకు ఫోన్, కారు, రీయింబర్స్‌మెంట్, లీవ్‌ ట్రావెల్‌ కన్సెషన్‌ (ఎల్‌టీఏ), ప్రావిడెంట్‌ ఫండ్‌ మొదలైన వాటితో పాటు రిటైర్మెంట్‌ ప్రయోజనాలన్నీ కలిపి రెమ్యూనరేషన్‌లో లెక్కేస్తారు. నెలవారీ కొచ్చర్‌ బేసిక్‌ శాలరీ రూ. 13,50,000– రూ. 26,00,000 శ్రేణిలో ఉంటుందని ఐసీఐసీఐ బ్యాంక్‌ వార్షిక నివేదిక పేర్కొం ది. ప్రధాన సవాళ్లెదుర్కొంటూ.. వృద్ధి అవకాశాలను అందిపుచ్చుకోవడమే  ఐసీఐసీఐ బ్యాంక్‌ ప్రధాన లక్ష్యమని నివేదికలో కొచర్‌ తెలిపారు. బ్యాంకు పరిమాణం, భారీ స్థాయిలో నిధులు, వివిధ ఆర్థిక సేవలు అందిస్తుండటం తదితర అంశాలు ఇందుకు తోడ్పడగలవని ఆశిస్తున్నట్లు ఆమె పేర్కొన్నారు.


 ప్రైవేట్ రంగ దిగ్గజ బ్యాంకుగా పేరున్న ఐసీఐసీఐ బ్యాంకు, పెద్ద నోట్ల రద్దు అనంతరం భారీగా డిపాజిట్లను ఆర్జించినట్టు ఆ బ్యాంకు చీఫ్ ఎగ్జిక్యూటివ్ చందా కొచ్చర్ తెలిపారు. శుక్రవారం వరకు రూ.32వేల కోట్ల డిపాజిట్లు బ్యాంకులో నమోదయ్యాయని ఆమె వెల్లడించారు. నోట్ల మార్పిడికి బ్యాంకులు, ఏటీఎంల వద్ద నెలకొన్న భారీ రద్దీ, క్యూలైన్లపై స్పందించిన కొచ్చర్, ప్రజలు వారు  ఎదుర్కొంటున్న సమస్యలపై చాలా కోపంగా ఉన్నారని ఆమె వ్యాఖ్యానించారు. కొత్త రూ.500 నోట్లను ఏటీఎంల ద్వారా ఎక్కువగా అందుబాటులోకి తీసుకొస్తే, కస్టమర్లు ఎదుర్కొంటున్న ఒత్తిడిని తగ్గించుకుని, పరిస్థితిని మెరుగుపరుచుకోవచ్చని కొచ్చర్ అభిప్రాయం వ్యక్తంచేశారు.
  
  ప్రభుత్వం తీసుకున్న ఈ నిర్ణయంతో చెల్లింపులన్నీ డిజిటల్ మార్గంలోకి పయనిస్తున్నాయని తెలిపారు. వర్తకుల నుంచి తమకు చాలా రిక్వెస్ట్లు వస్తున్నాయని, సేల్ టెర్నినల్స్ను ఏర్పాటుచేయాలని వారు అభ్యర్థిస్తున్నట్టు పేర్కొన్నారు. దీర్ఘకాలంగా వాడకుండా మూలన పడిఉన్న ఏటీఎం కార్డుల వాడకం కూడా పెరిగిందని చెప్పారు. బ్లాక్మనీపై ఉక్కుపాదం మోపుతూ, అవినీతిని నిర్మూలించడానికి నవంబర్ 8న ప్రధాని నరేంద్రమోదీ రూ.500, రూ.1000 నోట్లను రద్దు చేస్తూ నిర్ణయం ప్రకటించిన సంగతి తెలిసిందే. అప్పటినుంచి ఇప్పటివరకు బ్యాంకులకు రూ.5 ట్రిలియన్ వరకు డిపాజిట్లు నమోదయ్యాయి. బ్యాంకింగ్ డిపాజిట్ల వెల్లువ అటు ఉంచితే, ఎక్కువగా నగదు లావాదేవీలపైనే ఆధారపడిన మన దేశంలో పెద్ద నోట్ల రద్దుతో, బ్యాంకు నోట్లు ఎక్స్చేంజ్కు ప్రజలు తీవ్ర ఇబ్బందులు పడాల్సిన పరిస్థితి ఏర్పడింది. 


 పెద్ద నోట్ల నిషేధంపై ఐసీఐసీఐ బ్యాంక్ చీఫ్ చందా కొచర్
 ముంబై: నల్లధనం నిరోధానికి కేంద్రం తీసుకుంటున్న చర్యలు బ్యాంకుల్లో డిపాజిట్ వృద్ధిరేటు పెరుగుదలకు దోహద పడుతుందని ఐసీఐసీఐ బ్యాంక్ ఎండీ, సీఈఓ చందా కొచర్ గురువారం పేర్కొన్నారు. ఆమె ఒక వార్తా సంస్థకు ఇంటర్వ్యూ ఇచ్చారు. రూ.500, రూ.1,000 నోట్ల రద్దు నేపథ్యంలో కస్టమర్లు ఎటువంటి ఇబ్బందులూ ఎదుర్కొనకుండా చూడ్డంపై అధికంగా దృష్టి సారిస్తున్నట్లు ఆమె తెలిపారు. తగిన రీతిలో రూ. 100 నోట్లను బ్రాంచీలకు భారీగా తరలించినట్లు వెల్లడించారు.
 క్యాష్ అరుుపోవడం అనేది తమ బ్యాంకు బ్రాంచీల్లో ఎక్కడా చోటుచేసుకోలేదని వివరించారు.  గురువారం సాయంత్రమే తమ బ్యాంక్ ఏటీఎంలు కస్టమర్లకు సేవలు అందించడం ప్రారంభించాయనీ వివరించారు.  ఇక   తాజా పరిణామాల నేపథ్యంలో డిపాజిట్ల వృద్ధిని గమనిస్తున్నట్లు తెలిపారు. ‘అరుుతే డిపాజిట్లు ఏ స్థారుులో వచ్చాయన్నది చెప్పడం సరికాదుకానీ, పలు బ్రాంచీల్లో 70 శాతం అధికంగా డిపాజిట్లు వచ్చాయన్నది సమాచారం. సాధారణ పరిస్థితులతో పోల్చితే ఇది రెట్టింపు’ అని వివరించారు. నల్లధనం నిరోధంలో ప్రధాని మోదీ తగిన నిర్ణయం తీసుకున్నారని ప్రశంసించారు.


 ఐసీఐసీఐ బ్యాంక్ సీఈఓ, ఎండీ  చందా కొచర్
 • బ్యాంకింగ్‌కు రోబోటిక్ ప్రాసెస్ ఆటోమేషన్
 • మార్చి నాటికి 20 శాతం లావాదేవీలు లక్ష్యం
 సాక్షి, బిజినెస్ బ్యూరో : ప్రైవేటు బ్యాంకింగ్ దిగ్గజం- ఐసీఐసీఐ బ్యాంక్ ఆటోమేషన్ విప్లవానికి నాంది పలికింది. 2017 మార్చి నాటికి బ్యాంకింగ్ లావాదేవీల్లో 20 శాతం ఆటోమేషన్ ద్వారా జరగాలన్నది బ్యాంక్ లక్ష్యం. ఇందులో భాగంగానే ‘సాఫ్ట్‌వేర్ రోబోటిక్స్’ లేదా ‘రోబోటిక్ ప్రాసెస్ ఆటోమేషన్’ను గురువారం ముంబైలో బ్యాంకు ఎండీ, సీఈఓ చందా కొచర్ ప్రారంభించారు. ఈ సందర్భంగా దీనికి సంబంధించిన వివరాలను ‘సాక్షి’ బిజినెస్ ప్రతినిధితో ప్రత్యేకంగా పంచుకున్నారు. అవి...
 • ఈ సాఫ్ట్‌వేర్ రోబోటిక్స్ ఎలా పనిచేస్తుంది?
 ఒక ఉద్యోగి చేసే పనిని ఒక సాఫ్ట్‌వేర్ చేస్తుంది. విభిన్న పనులు చేయగల సత్తా వీటికుంది. ఫ్యాక్టరీల్లోనైతే రోబోటిక్స్‌తో వస్తువును ఒకచోటి నుంచి మరొకచోటకు తీసుకెళ్లొచ్చు. సాఫ్ట్‌వేర్ రోబోట్స్ అలాకాదు. కంప్యూటర్‌లో నిక్షిప్తమై ఏకకాలంలో అనేక అప్లికేషన్స్‌ను నడిపిస్తాయి. మనుషులకన్నా 10 రెట్లు వేగంగా ప్రాసెస్ చేస్తాయి. ఈ సాఫ్ట్‌వేర్ రోబోటిక్స్‌ను బ్యాంకింగ్ లావాదేవీలకు వాడుతున్న తొలి దేశీ బ్యాంకు మాదే. అంతర్జాతీయంగా కొన్ని బ్యాంకులు వాడుతున్నాయి.
 • ఈ ప్రోగ్రామ్ ఏర్పాటు లక్ష్యమేంటి?
 చాలా ఉన్నాయి. ఒకటి కస్టమర్లకు వీటితో వేగంగా సేవలు అందుతాయి. రెండవది.. దీనివల్ల మా ఉద్యోగులు విలువ ఆధారిత సేవలను అందించగలుగుతారు. పని ఒత్తిడి తగ్గుతుంది. బ్యాంక్ పరంగా చూస్తే... ఏటా మా రిటైల్ బ్యాంకింగ్ వృద్ధి రేటు 25 శాతంగా ఉంది. ఇది పెరుగుతుంది.
 • రిటైల్ బ్యాంకింగ్ ఆటోమేషన్ వల్ల 2015-2025 మధ్య 30 శాతం బ్యాంక్ ఉద్యోగాలు పోతాయంటున్నారు. నిజమేనా?
 గడచిన పదేళ్లుగా బ్యాంకింగ్‌లో ఐటీ వినియోగం పెరుగుతూనే వచ్చింది. అయినా 6-7 లక్షల కొత్త ఉద్యోగాలొచ్చాయి. ఎన్‌బీఎఫ్‌సీలను కూడా లెక్కిస్తే ఈ సంఖ్య 30 లక్షల వరకూ ఉంటుంది. అంటే టెక్నాలజీతో పాటు ఉపాధి కూడా పెరిగింది. ఇక బ్యాంకింగ్ అనుబంధ పరిశ్రమల వల్ల కోట్ల కుటుంబాలు లబ్ధి పొందాయి. అంటే... టెక్నాలజీతో పాటు ఉపాధీ పెరుగుతుంది. కాకపోతే కొత్త నైపుణ్యాలు అలవర్చుకోవాలి.
 • ఆటోమేషన్‌తో ఏ లావాదేవీలు జరుగుతాయి?
 రిటైల్ బ్యాంకింగ్, అగ్రి బిజినెస్, ట్రేడ్ అండ్ ఫారెక్స్, ట్రెజరీ, హ్యూమన్ రిసోర్సెర్స్ విభాగాల్లో తొలుత ఈ సేవలకు ప్రారంభించాం. 2017 మార్చి నాటికి బ్యాంకింగ్ లావాదేవీల్లో 20 శాతం ఆటోమేషన్ ద్వారా జరగాలన్నది లక్ష్యం.
 • సేవింగ్స్ ఖాతా, రుణాలు, కార్డ్ వినియోగదారులకూ దీంతో లాభం ఉంటుందా?
 పలు విభాగాల్లో  సేవల ప్రాసెసింగ్ సమయం గణనీయంగా 60 శాతం మేర తగ్గిపోతుంది. ఏటీఎం, 15జీ/హెచ్ ఫామ్‌ల ప్రాసెసింగ్‌లకు వీటిని వినియోగిస్తున్నాం. ఇంటర్‌నెట్ బ్యాంకింగ్ అలర్ట్స్‌కు మొబైల్ నంబర్ అప్‌డేషన్, రుణ రీపేమెంట్లకు ఈసీఎస్ ప్రెజెంటేషన్, ఆధార్ వివరాలు, దిగుమతి-ఎగుమతిదారు కోడ్ ధ్రువీకరణ ప్రక్రియ, డెబిట్ కార్డ్ పునఃజారీ వంటి కార్యకలాపాలకు తాజా టెక్నాలజీని వినియోగిస్తున్నాం.


 ప్రపంచంలోనే అత్యంత శక్తివంతమైన మహిళల్లో మనవాళ్లు నలుగురు నిలిచారు. ప్రపంచంలో 100మంది అత్యంత శక్తివంతమైన మహిళల జాబితా 2016 ఎడిషన్ ను ఫోర్బ్స్ ప్రకటించింది. ఈ జాబితాలో స్టేట్ బ్యాంకు ఆఫ్ ఇండియా చైర్మన్ అరుంధతీ భట్టాచార్య(25వ ర్యాంకు), ఐసీఐసీఐ బ్యాంకు సీఈవో, ఎండీ చందా కొచ్చర్(40వ ర్యాంకు), బయోకాన్ చైర్మన్, ఎండీ కిరణ్ మజుందర్ షా(77వ ర్యాంకు), హెచ్ టీ మీడియా లిమిటెడ్ ఎడిటోరియల్ డైరెక్టర్, చైర్ పర్సన్ శోభనా భారతీయ(93వ ర్యాంకు)లు చోటు దక్కించుకున్నారు. 
 ఫోర్బ్స్ ప్రకటించిన ఈ జాబితాలో జర్మన్ చాన్స్ లర్ ఏంజెలా మెర్కెల్ అగ్రస్థానంలో నిలిచారు. వరుసగా ఆరోసారి ఆమె ఈ స్థానాన్ని కైవసం చేసుకున్నారు. మెర్కెల్ తర్వాత స్థానం అమెరికా అధ్యక్ష అభ్యర్థురాలు హిల్లరీ క్లింటన్ ను వరించింది. అమెరికా ఫెడరల్ రిజర్వు చైర్ జానెట్ ఎల్లెన్ ఈ లిస్ట్ లో మూడో స్థానంలో నిలిచారు. 
 బిలీనియర్లు, బిజినెస్, ఫైనాన్స్, మీడియా, పాలిటిక్స్, ఫిలాంథ్రఫిక్ట్స్, ఎన్ జీవోస్, టెక్నాలజీ వాటికి ప్రాతినిధ్యం వహిస్తున్న వారినుంచి ప్రపంచంలోనే 100 మంది అత్యంత శక్తివంతుల జాబితాను ఫోర్బ్స్ ప్రకటించింది. ఈ కేటగిరీల్లో సంపద, మీడియా ఉనికి, ప్రతిభపాటవాలు వంటి అంశాలను ఆధారంగా చేసుకుని ఫోర్బ్స్ ఈ జాబితాను రూపొందించింది.


 ముంబయి: ప్రపంచ మహిళా దినోత్సవం సందర్భంగా ఐసీఐసీఐ బ్యాంకు మహిళల కోసం బంపర్ ఆఫర్ ప్రకటించింది. ఇకనుంచి ఇంటి దగ్గర ఉండి పనిచేసేందుకు వీలుగా అవకాశం తెచ్చిపెట్టింది. 'ఐ వర్క్@హోమ్' పేరిట ప్రత్యేక పోర్టల్ను తీసుకొచ్చి తమ సంస్థకు చెందిన ఉద్యోగినులు ల్యాప్ టాప్ ద్వారా బ్యాంకు లావాదేవీలు చూసేందుకు వీలు కల్పించింది. ఈ విధానం ముఖ్యంగా ఏజెన్సీ ప్రాంతాల్లో పనిచేసే మహిళలకు అమితంగా ఉపయోగపడనుంది.
 
 తమ బ్యాంకులో పనిచేసే మహిళలకు పెద్దగా ఇబ్బందులు కలగకూడదని ఐసీఐసీఐ ఈ నిర్ణయం తీసుకుంది. ఈ నేపథ్యంలో బ్యాంకు సీఈవో, ఎండీ చందా కొచ్చర్ మాట్లాడుతూ తాము నిర్వహించిన సర్వేలో మహిళలు మెటర్నటీ కారణంగా విధులకు దూరం కావాల్సి వస్తుందని, ఇంకొందరైతే రాజీనామాలు చేస్తున్నారని గుర్తించామని చెప్పారు.
 
 'ఇకపై మహిళలు ఇబ్బందుల కారణంగా విధులకు దూరం అయ్యే సమస్య లేకుండా ఓ బలమైన వ్యవస్థను ప్రారంభించాలని నిర్ణయించాం. వర్క్ ఎట్ హోమ్ విధానం తెచ్చాం. ఇప్పటికే 50 మంది మహిళలు ఇలా పనిచేస్తున్నారు. మరో 125 మంది ఇలా పనిచేసేందుకు ముందుకొచ్చారు. ఇంటి దగ్గర ఉండి పనిచేసే వారి సంఖ్య త్వరలోనే 500కు చేరుకునే అవకాశం ఉంది. ఇప్పటికే రాజీనామాలు చేసినవారు కూడా.. ఈ కొత్త విధానం చూసి వాటిని ఉపసంహరించుకునేందుకు ఆలోచిస్తారు' అని ఆమె చెప్పారు. ఐసీఐసీఐ బ్యాంకులో 30 శాతం మంది అంటే 73 వేల మంది మహిళలు పని చేస్తున్నారు.


  క్యూ1లో రూ. 2,976 కోట్లు; 12 శాతం పెరుగుదల
 ♦ మొత్తం ఆదాయం రూ. 15,802 కోట్లు; 8 శాతం వృద్ధి
 ♦ 14 శాతం పెరిగిన నికర వడ్డీ ఆదాయం; రూ.5,115 కోట్లు
  
  ముంబై : ప్రైవేటు రంగ బ్యాంకింగ్ దిగ్గజం ఐసీఐసీఐ బ్యాంక్ ఆకర్షణీయమైన ఫలితాలను ప్రకటించింది. ఈ ఏడాది జూన్‌తో ముగిసిన తొలి త్రైమాసికం(2015-16, క్యూ1)లో స్టాండెలోన్ ప్రాతిపదికన(బ్యాంకింగ్ కార్యకలాపాలు మాత్రమే) రూ.2,976 కోట్ల నికర లాభాన్ని ఆర్జించింది. అంతక్రితం ఏడాది ఇదే కాలంలో రూ.2,655 కోట్లతో పోలిస్తే లాభం 12 శాతం ఎగసింది. మొండిబకాయిల పెరుగుదల కొనసాగినప్పటికీ.. ఇక ఈ సమస్య క్రమంగా సద్దుమణుగుతుందంటూ బ్యాంక్ సంకేతాలివ్వడం ఇన్వెస్టర్లలో జోష్ నింపింది. ఫలితాలు కూడా మార్కెట్ వర్గాల అంచనాలను మించడంతో షేరు ధర 6 శాతానికి పైగా దూసుకెళ్లింది. కాగా, క్యూ1లో బ్యాంక్ మొత్తం ఆదాయం రూ.14,617 కోట్ల నుంచి రూ.15,802 కోట్లకు పెరిగింది. 8% వృద్ధి నమోదైంది. ఇక కన్సాలిడేటెడ్ ప్రాతిపదికన (అనుబంధ సంస్థలన్నింటితో కలిపి) బ్యాంక్ నికర లాభం జూన్ క్వార్టర్‌లో 14 శాతం ఎగసి రూ.3,232 కోట్లకు దూసుకెళ్లింది.
 
  మొండిబకాయిలు పెరిగాయ్...
  జూన్ క్వార్టర్ నాటికి మొత్తం రుణాల్లో బ్యాంక్ స్థూల మొండిబకాయిల వాటా (ఎన్‌పీఏ) 3.68 శాతానికి చేరింది. క్రితం ఏడాది ఇదే కాలానికివి 3.05 శాతంగా ఉన్నాయి. విలువ పరంగా రూ.10,843 కోట్ల నుంచి రూ.15,138 కోట్లకు చేరాయి. అయితే, మార్చితో ముగిసిన క్వార్టర్‌లో 3.78 శాతంతో పోలిస్తే స్థూల ఎన్‌పీఏలు కాస్త తగ్గడం గమనార్హం. నికర ఎన్‌పీఏల విషయానికొస్తే.. గతేడాది క్యూ1లో 0.99 శాతం నుంచి ఈ క్యూ1లో 1.58 శాతానికి ఎగబాకాయి. మొండిబకాయిల ప్రొవిజన్స్ (కేటాయింపులు) రూ.726 కోట్ల నుంచి రూ.956 కోట్లకు పెరిగాయి.
 
  ఇతర ముఖ్యాంశాలివీ...
 ►క్యూ1లో బ్యాంక్ నికర వడ్డీ ఆదాయం(ఎన్‌ఐఐ) 14 శాతం ఎగబాకింది. రూ.4,492 కోట్ల నుంచి రూ.5,115 కోట్లకు చేరింది.
 ►వడ్డీయేతర ఆదాయం 5% వృద్ధితో రూ.2,850 కోట్ల నుంచి రూ.2,990 కోట్లకు పెరిగింది.
 ►నికర వడ్డీ మార్జిన్(ఎన్‌ఐఎం) కూడా 3.4 శాతం నుంచి 3.54 శాతానికి పుంజుకుంది.
 ►సేవింగ్స్ అకౌంట్ డిపాజిట్లు 14 శాతం వృద్ధి చెందాయి. రిటైల్ రుణాల్లో 25 శాతం పెరుగుదలను బ్యాంక్ నమోదు చేసింది. కార్పొరేట్ రుణాలు 9 % పెరిగాయి.
 ►అనుబంధ సంస్థలైన ఐసీఐసీఐ ప్రుడెన్షియల్ లైఫ్ నికర లాభం రూ.382 కోట్ల నుంచి రూ.397 కోట్లకు పెరిగింది. ఐసీఐసీఐ లాంబార్డ్ లాభం 61 శాతం ఎగబాకింది. రూ.72 కోట్ల నుంచి రూ.116 కోట్లకు దూసుకెళ్లింది.
 ►మెరుగైన ఫలితాల నేపథ్యంలో బ్యాంక్ షేరు ధర శుక్రవారం పరుగులుతీసింది. బీఎస్‌ఈలో ఒకానొకదశలో 6 శాతంపైగా ఎగబాకి రూ.309 స్థాయిని తాకింది. అయితే చివరకు 4 శాతం లాభంతో రూ.303 వద్ద స్థిరపడింది.
  
  మొండిబకాయిల సమస్య ఇక క్రమంగా తగ్గుముఖం పట్టే అవకాశాలున్నాయి. అయితే, ఆర్థిక వ్యవస్థ పుంజుకోవడంపైనే ఎన్‌పీఏల తగ్గుదల ఆధారపడి ఉంటుంది. రికవరీలపై మరింతగా దృష్టిపెడుతున్నాం. ప్రధానంగా విద్యుత్ వంటి సమస్యాత్మక రంగాల్లో ఆస్తుల విక్రయం ద్వారా రుణ భారాన్ని తగ్గించుకోవాల్సిందిగా ఆయా కంపెనీల ప్రమోటర్లకు సూచిస్తున్నాం. ప్రస్తుత మార్జిన్ల స్థాయిని కొనసాగించగలమన్న నమ్మకం ఉంది.ఈ ఆర్థిక సంవత్సరంలో 18-20% రుణ వృద్ధి లక్ష్యానికి కట్టుబడి ఉన్నాం.
  - చందా కొచర్, ఐసీఐసీఐ బ్యాంక్ ఎండీ, సీఈఓ


  గ్రీస్ సంక్షోభం తమ బ్యాంకుపై ఎటువంటి ప్రభావం చూపబోదని ఐసీఐసీఐ బ్యాంక్ మేనేజింగ్ డెరైక్టర్ చీఫ్ ఎగ్జిక్యూటివ్ చందా కొచర్ అన్నారు. 21వ ఏజీఎం సందర్భంగా ఆమె విలేకరులతో మాట్లాడుతూ, యూరప్‌లో తమకు వ్యాపార కార్యకలాపాలు ఏవీ లేవని అన్నారు. అక్కడి కంపెనీలకు తమ బ్యాంక్ ఎటువంటి రుణాలూ అందజేయలేదని వెల్లడించారు.
  


 క్యూ3లో రూ. 3,265 కోట్లు; 14 % అప్
 ⇒ 3.4 శాతానికి ఎగబాకిన మొండి బకాయిలు...
 ⇒ భారీగా క్షీణించిన షేరు ధర...
 ముంబై: ప్రైవేటు రంగ బ్యాకింగ్ అగ్రగామి ఐసీఐసీఐ బ్యాంక్ లాభాలతోపాటు మొండిబకాయిలు కూడా భారీగా పెరిగాయి. ఈ ఏడాది డిసెంబర్‌తో ముగిసిన మూడు నెలల కాలానికి(2014-15, క్యూ3) బ్యాంక్ కన్సాలిడేటెడ్ ప్రాతిపదికన రూ.3,265 కోట్ల నికర లాభాన్ని ఆర్జించింది. అంతక్రితం ఏడాది ఇదే కాలంలో నమోదైన రూ.2,872 కోట్లతో పోలిస్తే లాభం 13.7 శాతం వృద్ధి చెందింది.
 
 ప్రధానంగా బీమా, బ్రోకింగ్, మ్యూచువల్ ఫండ్ తదితర అనుంబంధ సంస్థల మెరుగైన పనితీరుతో లాభాలు పుంజుకున్నాయి. ఇక మొత్తం ఆదాయం కూడా క్యూ3లో రూ.20,543 కోట్ల నుంచి రూ.23,054 కోట్లకు వృద్ధి చెందింది. 12.2 శాతం పెరిగింది.
  
 స్టాండెలోన్‌గానూ 14 శాతం అప్...
 ఒక్క బ్యాంకింగ్ కార్యకలాపాలకు సంబంధించి(సాండెలోన్) ఐసీఐసీఐ నికర లాభం క్యూ3లో 14.1 శాతం వృద్ధితో రూ.2,889 కోట్లకు ఎగబాకింది. క్రితం ఏడాది ఇదే కాలంలో లాభం రూ.2,532 కోట్లు. మొత్తం ఆదాయం రూ.14,226 కోట్ల నుంచి రూ.15,526 కోట్లకు పెరిగింది. 8.8 శాతం వృద్ధి నమోదైంది.
  
 మొండిబకాయిల సెగ...
 ఈ డిసెంబర్ క్వార్టర్‌లో ఐసీఐసీఐ బ్యాంక్‌ను మొండిబకాయిలు(ఎన్‌పీఏ) వెంటాడాయి. మొత్తం రుణాల్లో స్థూల ఎన్‌పీఏలు 3.4 శాతానికి ఎగబాకాయి. అంతక్రితం ఏడాది ఇదే క్వార్టర్‌లో ఈ పరిమాణం 3.05 శాతమే. మరోపక్క, నికర ఎన్‌పీఏలు కూడా 1.76 శాతం నుంచి 1.9 శాతానికి పెరిగాయి. ఇక మొండిబకాయిలు, కంటింజెన్సీల కోసం ప్రొవిజనింగ్ కేటాయింపులు రూ.695 కోట్ల నుంచి రూ.980 కోట్లకు ఎగిశాయి. కాగా, ఈ క్యూ3లో కొత్తగా రూ.2,279 కోట్ల విలువైన రుణాలు మొండిబకాయిలుగా మారినట్లు బ్యాంక్ వెల్లడించింది. ఇందులో రూ.776 కోట్లు గతంలో పునర్‌వ్యవస్థీకరించిన రుణాలేనని కూడా తెలిపింది. కాగా, అక్టోబర్-డిసెంబర్ వ్యవధిలో రూ.1,755 కోట్ల రుణాలను బ్యాంక్ పునర్‌వ్యవస్థీకరిచింది. అంతక్రితం ఏడాది ఇదే కాలంలో ఈ పరిమాణం రూ.2,300 కోట్లుగా ఉంది.
  
 ఫలితాల్లో ఇతర ముఖ్యాంశాలివీ...
 ⇒ క్యూ3లో బ్యాంక్ నికర వడ్డీ ఆదాయం(ఎన్‌ఐఐ) 13 శాతం పెరిగి రూ.4,812 కోట్లకు ఎగబాకింది. నికర వడ్డీ మార్జిన్(ఎన్‌ఐఎం) కూడా స్వల్ప పెరుగుదలతో 3.46 శాతంగా నమోదైంది.
 ⇒ రిటైల్ రుణాల్లో 26 శాతం వృద్ధి దీనికి దోహదం చేసింది.
 ⇒ సబ్సిడరీల నుంచి అధిక డివిడెండ్‌ల కారణంగా ఇతర ఆదాయం 50 శాతం వృద్ధితో రూ.357 కోట్ల నుంచి రూ.538 కోట్లకు పెరిగింది. ఫీజుల రూపంలో ఆదాయం 6 శాతం పెరిగి రూ.443 కోట్లకు చేరింది.
 ⇒ సబ్సిడరీల్లో ఐసీఐసీఐ ప్రుడెన్షియల్ లైఫ్ లాభం డిసెంబర్ త్రైమాసికంలో రూ.428 కోట్ల నుంచి రూ.462 కోట్లకు పెరిగింది. ఐసీఐసీఐ లాంబార్డ్ జనరల్ ఇన్సూరెన్స్ నికర లాభం రూ.76 కోట్ల నుంచి రూ.176 కోట్లకు వృద్ధి చెందింది.
 ⇒  ఐసీఐసీఐ ప్రుడెన్షియల్ అసెట్ మేనేజ్‌మెంట్(మ్యూచువల్ ఫండ్) సంస్థ లాభం 43 శాతం పెరగగా.. ఐసీఐసీఐ సెక్యూరిటీస్ లాభం రెట్టింపై రూ.76 కోట్లకు చేరింది.
 ⇒ క్యూ3లో కార్పొరేట్ రంగానికి రుణాల్లో 4 శాతం వృద్ధి నమోదైంది. మొత్తం రుణాల్లో ఈ రంగానికి రుణాల వాటా 29 శాతానికి తగ్గింది. రిటైల్ రుణాల వాటా 41 శాతానికి ఎగబాకింది. కాగా, వర్కింగ్ క్యాపిటల్ అవసరాల నేపథ్యంలో కార్పొరేట్ల నుంచి రుణ డిమాండ్ క్రమంగా పుంజుకుంటోంది.
  
 ఆర్థిక వ్యవస్థలో చాన్నాళ్లుగా కొనసాగుతూవస్తున్న మందగమన పరిస్థితులవల్లే మొండి బకాయిలు పెరిగేందుకు దారితీస్తోంది. ఫలితంగా పునర్‌వ్యవస్థీకరించిన రుణాలు కూడా మళ్లీ ఎన్‌పీఏలుగా మారుతున్నాయి. ఇదేవిధమైన దోరణి మరో 2-3 త్రైమాసికాలపాటు కొనసాగవచ్చు. ఆర్థిక వ్యవస్థ మళ్లీ గాడిలోపడితే.. కంపెనీల పనితీరు మెరుగుపడటమేకాకుండా.. మొండి బకాయిల సమస్యకు కూడా అడ్డుకట్టపడుతుంది.  
 
 బీమా రంగంలో విదేశీ ప్రత్యక్ష పెట్టుబడుల(ఎఫ్‌డీఐ) పరిమితిని 49 శాతానికి పెంచుతూ ప్రభుత్వం ఆర్డినెన్స్ తీసుకురావడం పరిశ్రమకు పోత్సాహకరమైన చర్య. మా బీమా సబ్సిడరీలో పెట్టుబడులకు సంబంధించి ఐపీఓ సహా ఇతరత్రా అన్ని అవకాశాలనూ పరిశీలిస్తున్నాం. వడ్డీరేట్లు దిగొస్తాయని రుణగ్రహీతలు భావిస్తున్నారు. అయితే, మా బ్యాంక్ వడ్డీరేట్ల తగ్గింపు ఎప్పుడనేది వెల్లడించలేను. అసెట్స్ లయబిలిటీ కమిటీ దీనిపై నిర్ణయం తీసుకుంటుంది.
  - చందా కొచర్, ఐసీఐసీఐ బ్యాంక్ ఎండీ, సీఈఓ
  
 షేరు ధర క్రాష్...
 మొండి బకాయిల పెరుగుదల ఆందోళనల నేపథ్యంలో ఐసీఐసీఐ బ్యాంక్ షేరు ధర భారీగా క్షీణించింది. శుక్రవారం  బీఎస్‌ఈలో ఒకానొకదశలో 6.5 శాతం మేర దిగజారి రూ.355కు పడిపోయింది. చివరకు 4.95 శాతం నష్టంతో రూ.361 వద్ద స్థిరపడింది. ఈ ఒక్క రోజులోనే బ్యాంక్ మార్కెట్ విలువ (క్యాపిటలైజేషన్)రూ.10,839 కోట్లు ఆవిరై.. రూ.2,09,208 కోట్లకు తగ్గిపోయింది.


 న్యూఢిల్లీ: ఆర్థిక సంస్కరణలను మరింత ముందుకు తీసుకువెళ్లడానికి ఎన్‌డీఏ ప్రభుత్వం కట్టుబడి ఉందని ఆర్థిక మంత్రి అరుణ్‌జైట్లీ భారత పారిశ్రామిక రంగానికి హామీ ఇచ్చారు. సబ్సిడీల వ్యవస్థను మరింత హేతుబద్దీకరిస్తామని కూడా ఆయన పేర్కొన్నారు.  ఈ విషయంపై తాను ఇప్పటికే వ్యయ నిర్వహణా కమిషన్‌తో పలు దఫాలు చర్చలు జరిపినట్లు తెలిపారు. 
 
 కమిషన్ కూడా దీనిని తీవ్రంగా పరిశీలిస్తోందని, వ్యవస్థ పటిష్టతకు వ్యూహాలు రూపొందిస్తోందని అన్నారు. త్వరలో ఈ దిశలో నిర్ణయాలు తీసుకోవడం జరుగుతుందన్నారు. ఈ నిర్ణయాలను తగిన విధంగా కేంద్రం అమలు చేస్తుందని కూడా స్పష్టం చేశారు. డీజిల్ ధరలపై నియంత్రణల ఎత్తివేత, ఎల్‌పీజీ సబ్సిడీని నేరుగా వినియోగదారుకు అందించడం వంటి అంశాన్ని ఈ సందర్భంగా మంత్రి ప్రస్తావించారు.
 
 దేశంలో స్టాక్ మార్కెట్ల పరిస్థితి మెరుగుపడుతోందనడానికి తగిన సంకేతాలు ఉన్నాయని అన్నారు. పెట్టుబడుల ఉపసంహరణల ప్రక్రియ విజయవంతం అవుతుందని విశ్వసిస్తున్నట్లు తెలిపారు. పన్ను వసూళ్లు లక్ష్యాల మేరకు ఉంటాయన్నారు. ఇక్కడ జరిగిన ఒక ఆర్థిక సదస్సులో అరుణ్‌జైట్లీ శనివారం మాట్లాడారు. భారతీ ఎంటర్‌ప్రైజెస్ చైర్మన్ భారతీ మిట్టల్, ఇన్ఫోసిస్ వ్యవస్థాపకులు నారాయణ మూర్తి, ఐసీఐసీఐ బ్యాంక్ సీఈఓ చందా కొచర్ కూడా ఈ కార్యక్రమంలో పాల్గొన్నారు. జైట్లీ మాట్లాడిన కొన్ని ముఖ్యాంశాలు...
 
 బీమా, జీఎస్‌టీ బిల్లుల ఆమోదంపై విశ్వాసం
 ప్రస్తుత పార్లమెంటు శీతాకాల సమావేశాల్లోనే బీమా, వస్తువులు- సేవల పన్ను బిల్లు(జీఎస్‌టీ) ఆమోదానికి కేంద్రం ప్రయత్నిస్తుంది. రాజ్యసభలో తగినంత మెజారిటీ లేనందువల్ల అవసరమైతే ఉభయసభల సమావేశం ద్వారా బిల్లుల ఆమోదానికి రాజ్యాంగబద్దంగా ఉన్న అవకాశాన్నీ వినియోగించుకుంటాం. భూ సేకరణ చట్టంపై నెలకొన్న సవాళ్లను కూడా రానున్న వారాల్లో అధిగమించగమని భావిస్తున్నాం.
 
 ముఖ్యమంత్రుల సమావేశంపై...
 64 సంవత్సరాల క్రితం నుంచీ కొనసాగుతున్న ప్రణాళికా సంఘం స్థానంలో కొత్త వ్యవస్థ ఏర్పాటుపై ఆదివారం జరిగే ముఖ్యమంత్రుల సమావేశం చర్చిస్తుంది. రాష్ట్రాలకు మరింత సాధికారత కల్పించాలన్నది ఇందుకు సంబంధించి కేంద్రం ప్రధాన సంకల్పం. రేపటి (ఆదివారం) సమావేశం అనంతరం తీసుకునే నిర్ణయం ఏదైనా.. అది ఆర్థికంగా రాష్ట్రాల పరిస్థితిని మరింత మెరుగుపరుస్తుందని విశ్వసిస్తున్నాను.
 
 తయారీ రంగంపై దృష్టి అవసరం: కొచర్
 తయారీ రంగం పురోభివృద్ధికి ప్రభుత్వం మరింత దృష్టి సారించాలని ఐసీఐసీఐ ఎండీ, సీఈఓ చందా కొచర్ సదస్సులో వ్యాఖ్యానించారు. ద్రవ్యోల్బణాన్ని దీర్ఘకాలంలో కట్టడి చేయడానికి సరఫరాల సమస్యలను అధిగమించడం కీలకమని విశ్లేషించారు.


 ముంబై: స్వచ్ఛ భారత్ అభియాన్‌లో ఐసీఐసీఐ బ్యాంక్ ఎండీ, సీఈఓ చందా కొచర్ పాల్గొన్నారు. మంగళవారం ముంబైలోని ఐసీఐసీఐ బ్యాక్‌బే రిక్లమేషన్ బ్రాంచ్ సమీపంలో ఆమె, ఇతర ఉద్యోగులతో కలిసి ఈ కార్యక్రమంలో పాల్గొన్నారు. ఈ కార్యక్రమంలో పాల్గొన్నందుకు సంతోషంగా ఉందని చందా కొచర్ వ్యాఖ్యానించారు.
 
 స్వచ్ఛ భారత్ కార్యక్రమంలో భాగంగా ఐసీఐసీఐ బ్రాంచ్‌ల సమీపంలోని ప్రాంతాలను శుభ్రపరుస్తామని, ఈ కార్యక్రమం ఏడాది పొడవునా నిర్వహిస్తామని వివరించారు. పటిష్టమైన, పరిశుభ్రమైన భారత దేశాన్ని సాధించడానికి అందరూ కలసికట్టుగా పనిచేయాల్సి ఉందని చెప్పారు. స్వచ్ఛ భారత్ కార్యక్రమానికి ఐసీఐసీఐ తోడ్పాటు ఉంటుందని హామీ ఇచ్చారు.
  


 క్యూ2లో రూ.2,709 కోట్లు
 అధిక వడ్డీయేతర ఆదాయం ఆసరా
 26 శాతం పెరిగిన నికర వడ్డీ ఆదాయం;రూ.2,738 కోట్లు
 పెరిగిన మొండిబకాయిలు...
  
 ముంబై: ప్రైవేటు రంగ బ్యాంకింగ్ దిగ్గజం ఐసీఐసీఐ బ్యాంక్ ఈ ఏడాది రెండో త్రైమాసికం(2014-15, క్యూ2)లో రూ.2,738 కోట్ల స్టాండెలోన్ నికర లాభాన్ని ప్రకటించింది. క్రితం ఏడాది ఇదే కాలంలో నమోదైన రూ.2,352 కోట్లతో పోలిస్తే లాభం 15 శాతం ఎగబాకింది. ప్రధానంగా వడ్డీయేతర ఆదాయం భారీగా 26 శాతం దూసుకెళ్లి రూ.2,738 కోట్లను తాకడం లాభాల జోరుకు దోహదం చేసింది.
 
 క్యూ2లో రిటైల్ ఫీజుల రాబడి 20 శాతం దూసుకెళ్లగా... ట్రెజరీ లాభం రూ.137 కోట్లు జమైనట్లు బ్యాంకు వెల్లడించింది. బ్యాంకు మొత్తం ఆదాయం కూడా 15 శాతం వృద్ధితో రూ.14,889 కోట్లకు పెరిగింది. గతేడాది క్యూ2లో ఈ మొత్తం రూ.12,980 కోట్లుగా ఉంది. నికర వడ్డీ ఆదాయం(ఎన్‌ఐఐ) రూపంలో బ్యాంకు రూ.4,657 కోట్లను ఆర్జించింది. గతేడాది ఇదే కాలంతో పోలిస్తే 15 శాతం వృద్ధి చెందింది.
 
 కన్సాలిడేటేడ్‌గా చూస్తే: బీమా, స్టాక్ బ్రోకింగ్ ఇతరత్రా అనుబంధ సంస్థలన్నింటితో కలిపి కన్సాలిడేటెడ్ ప్రాతిపదికన చూస్తే ఐసీఐసీఐ నికర లాభం రూ.3,065 కోట్లుగా నమోదైంది. గతేడాది క్యూ2లో నమోదైన రూ.2,698 కోట్లతో పోలిస్తే 14 శాతం పెరిగింది. ఐసీఐసీఐ ప్రుడెన్షియల్ లైఫ్ క్యూ2లో రూ.399 కోట్ల లాభాన్ని ప్రకటించింది. ఐసీఐసీఐ లాంబార్డ్  లాభం రూ. 158 కోట్లుగా నమోదైంది.
 
 ఐసీఐసీఐ వెంచర్స్ వివాదం...
 అనుంబంధ సంస్థ ఐసీఐసీఐ వెంచర్స్‌పై నెలకొన్న వివాదంపై వ్యాఖ్యానించేందుకు ఐసీఐసీఐ బ్యాంకు సీఈఓ, ఎండీ చందా కొచర్ నిరాకరించారు. తమకు అధిక రాబడులను అందిస్తామని చెప్పి... తీవ్ర నష్టాలు తెచ్చిపెట్టిందంటూ ఈ ప్రైవేటు ఈక్విటీపై సుమారు 80 మంది ప్రవాస భారతీయ(ఎన్‌ఆర్‌ఐ) ఇన్వెస్టర్లు మారిషస్ సుప్రీం కోర్టులో 103 మిలియన్ డాలర్ల నష్టపరిహార దావా వేశారు. ఐసీఐసీఐ వెంచర్స్ తమను మోసం చేసిందని. పెట్టుబడులను దుర్వినియోగం చేసిందని వీరు ఆరోపిస్తున్నారు. దర్యాప్తు చేయాలని  మార్కెట్ నియంత్రణ సంస్థ సెబీని కూడా కోరారు.
 
 నికర మొండిబకాయిలు రూ.3,997 కోట్లు...
 బ్యాంకు నికర మొండిబాకాయిలు(ఎన్‌పీఏ) మొత్తం రుణాల్లో 0.96 శాతానికి పెరిగాయి. గతేడాది ఇదే కాలంలో 0.73 శాతంగా ఉన్నాయి. సెప్టెంబర్ చివరికి నికర ఎన్‌పీఏలు రూ.3,997 కోట్లు. గతేడాది ఇదే కాలంలో రూ.3,474 కోట్లు, ఈ ఏడాది జూన్ చివరికి రూ.2,707 కోట్లుగా నికర ఏన్‌పీఏలు(0.87 శాతం) నమోదయ్యాయి. ఇక క్యూ2లో రూ.900 కోట్ల విలువైన మొండిబకాయిలను పునర్‌వ్యవస్థీకరించినట్లు బ్యాంకు వెల్లడించింది. ఎన్‌పీఏలు పెరగడంతో ప్రొవిజనింగ్ మొత్తం కూడా రూ.625 కోట్ల నుంచి రూ.850 కోట్లకు పెరిగినట్లు ఐసీఐసీఐ వెల్లడించింది.
 
 ఇతర ముఖ్యాంశాలివీ...
 బ్యాంకు నికర వడ్డీ మార్జిన్(ఎన్‌ఐఎం) క్యూ2లో 3.31 శాతం నుంచి 3.42 శాతానికి పెరిగింది.
 సెప్టెంబర్ చివరికి బ్యాంకు మొత్తం రుణాలు రూ.3,61,757 కోట్లకు చేరాయి. డిపాజిట్లు రూ,3,52,055 కోట్లను తాకాయి.
 క్యూ2లో కొత్తగా 52 బ్రాంచ్‌లను 292 ఏటీఎంలను బ్యాంకు ఏర్పాటు చేసింది.
 బ్యాంకు షేరు ధర గురువారం బీఎస్‌ఈలో 0.5 శాతం లాభపడి రూ.1,612 వద్ద స్థిరపడింది.


  హైదరాబాద్, బిజినెస్ బ్యూరో: సత్య నాదెళ్ల.. ప్రపంచ ప్రఖ్యాతిగాంచిన ఐటీ రంగ దిగ్గజం మైక్రోసాఫ్ట్ కార్పొరేషన్‌కు సీఈవో. అంతటి ప్రాముఖ్యమున్న సంస్థకు కీలక బాధ్యతలు చేపట్టిన తర్వాత తొలిసారిగా ఆయన భారత్‌లో అడుగుపెట్టి సుడిగాలిలా దేశాన్ని చుట్టేశారు. భారతీయుల ఆలోచనల్ని మరోసారి మైక్రోసాఫ్ట్‌వైపు తీసుకెళ్లారు.
 
  మైక్రోసాఫ్ట్ సీఈవోగా అత్యున్నత పదవి చేపట్టిన తెలుగు వాడిగా రికార్డు నమోదు చేసిన నాదెళ్ల హైదరాబాద్ పర్యటన మాత్రం ఆసాంతం గోప్యంగా సాగడం విశేషం. ఇటు తెలంగాణ ముఖ్యమంత్రితో భేటీ అయినా, అటు మైక్రోసాఫ్ట్ ఉద్యోగుల్ని మైమరిపించినా, మరోవైపు స్నేహితుల్ని పలకరించినా మీడియా కంటికి మాత్రం చిక్కలేదు. ఢిల్లీ వేదికగా వేలాదిమంది విద్యార్థులతో ముచ్చటించి తన అనుభవాలను పంచుకున్నారు. నిత్య విద్యార్థులుగా ఉండాలంటూ ఉద్బోధించారు. చరిత్రలో ఎన్నడూ లేనటువం టి అవకాశాలు మీ ముందు ఉన్నాయంటూ దిశానిర్దేశం చేశారు. ముంబైలో మరో కార్యక్రమంలో తన ప్రసంగంతో ఆది గోద్రెజ్, చందా కొచ్చర్ వంటి 150 మందికిపైగా పరిశ్రమ పెద్దలను ఆకట్టుకున్నారు.
  
  ఊహించని అతిథి..
  సెప్టెంబర్ 30న న్యూఢిల్లీలో నాస్కామ్ రెండు సదస్సులతోపాటు మైక్రోసాఫ్ట్ కార్యక్రమంలో పాల్గొనేందుకే సత్య నాదెళ్ల భారత్ వచ్చారు. రెండు రోజుల ముందుగానే హైదరాబాద్‌లో అడుగు పెట్టారు. సత్య  తల్లిదండ్రులు ఇక్కడే ఉంటున్నారు. హైదరాబాద్ వచ్చిన నాదెళ్ల, తెలంగాణ ముఖ్యమంత్రి కేసీఆర్‌ను ప్రత్యేకంగా కలిశారు. అరగంట పాటు చర్చలు సాగాయి.  ఇదంతా రహస్యంగా జరిగి పోయింది. నాదెళ్ల విన్నపం మేరకే ఈ గోప్యత అని అధికారులు చెబుతున్నారు. నాదెళ్ల పర్యటన గురించి అధికారులకుగానీ, అటు సీఎంకుగానీ సమాచారం లేదు. ఊహించని అతిథి అయ్యారు.
 
  ఆంధ్రప్రదేశ్ సీఎంతో..
  సత్య నాదెళ్ల కేసీఆర్‌ను కలవడంతో ఆంధ్రప్రదేశ్ సీఎంతోనూ సమావేశమవుతారని అందరూ అనుకున్నారు. ఐటీ కంపెనీల సీఈవోల సమావేశం కోసం చంద్రబాబు విశాఖపట్నంలో ఉన్నారు. దీంతో ఇరువురి భేటీ సాధ్యపడలేదు. చంద్రబాబుతో సత్య ఫోన్‌లో మాట్లాడినట్టు తెలిసింది. మైక్రోసాఫ్ట్ కార్యాలయం వైజాగ్‌లో ఏర్పాటు చేయాల్సిందిగా బాబు కోరినట్టు సమాచారం.
 
  ఉద్యోగుల్లో ఉత్సాహం..
  హైదరాబాద్‌లోని మైక్రోసాఫ్ట్ ఇండియా డెవలప్‌మెంట్ సెంటర్ (ఎంఐడీసీ)లో సెప్టెంబర్ 29న సీఈవో హోదాలో తొలిసారిగా నాదెళ్ల అడుగుపెట్టారు. క్లౌడ్ టెక్నాలజీపై ఫోకస్ చేయాల్సిందిగా ఈ సందర్భంగా ఉద్యోగులకు ఉద్బోధించారు. ప్రభుత్వాలతో కలసి పనిచేయబోతున్నామని, అందుకు సిద్ధంగా ఉండాలంటూ పిలుపునిచ్చారు. ప్రతిభ, వనరులు, పట్టుదల మైక్రోసాఫ్ట్ ఉద్యోగుల వద్ద సమృద్ధిగా ఉన్నాయని, ఇది నిరూపితమైందంటూ ఇష్టాగోష్టిలో భుజం తట్టారు. సరదాగా నవ్వుతూ, లక్ష్యాలను గుర్తు చేస్తూ ఉత్సాహం నింపారు. ఇక్కడి సెంటర్‌ను, కంపెనీ కార్యకలాపాల విస్తరణను చేపడుతున్నామని తెలిపారు.
 
  భారత ప్రాజెక్టులపై..: 2019 నాటికి 2.5 లక్షల గ్రామాలకు బ్రాడ్‌బ్యాండ్ సౌకర్యం, 2.5 లక్షల పాఠశాలలు, యూనివర్సిటీల్లో వైఫై, నగరాలు, పర్యాటక ప్రాంతాల్లో వైఫై హాట్‌స్పాట్స్, పబ్లిక్ ఇంటర్నెట్ యాక్సెస్ పాయింట్లు 4 లక్షలు, ఐటీ రంగంలో ఉద్యోగాలకై గ్రామీణులకు శిక్షణ వంటివి డిజిటల్ ఇండియా ప్రాజెక్టులో భాగంగా కేంద్రం చేపడుతోంది. ప్రస్తుత పథకాలకు రూ.1 లక్ష కోట్లు, కొత్త పథకాలకు రూ.13 వేల కోట్లు వ్యయం చేస్తోంది.
 
 ఇంత పెద్ద ఎత్తున చేపడుతున్న ప్రాజెక్టులో పాలుపంచుకునేందుకు ఐటీ కంపెనీలు పోటీ పడుతున్నాయి. ఈ నేపథ్యంలో మైక్రోసాఫ్ట్ సీఈవో భారత పర్యటన ఆసక్తి కలగిస్తోంది. భారత్‌తో కలసి పనిచేసేందుకు మైక్రోసాఫ్ట్ సిద్ధంగా ఉందని ఇప్పటికే ఆయన ప్రకటించారు కూడా.
 
  రాష్ట్ర ప్రభుత్వాలకూ..
  తెలంగాణ ప్రభుత్వం గ్రామ స్థాయికి ఐటీని విస్తృతం చేసే పనిలో నిమగ్నమైంది. హైదరాబాద్‌ను వైఫై నగరంగా తీర్చిదిద్దుతోంది. ఇక స్మార్ట్‌సిటీస్ ప్రాజెక్టు అమలులో టెక్నాలజీ పాత్ర అత్యంత కీలకం. అయితే మైక్రోసాఫ్ట్‌తో కలసి తెలంగాణ ప్రభుత్వం పనిచేసే అవకాశాలు మెరుగ్గా ఉన్నాయి. రాష్ట్ర ప్రభుత్వం తీసుకొంటున్న చొరవ గురించి నాదెళ్ల ఆసక్తిగా తెలుసుకున్నారు.
 
 మైక్రోసాఫ్ట్ సాంకేతిక సహకారం అందిస్తుందని సీఎంకు హామీ ఇచ్చారు. ప్రభుత్వం సైతం కంపెనీ విస్తరణకు వెన్నంటి ఉంటుందని స్పష్టం చేసింది. ఇక ఇంటర్నెట్ పరిజ్ఞానాన్ని ప్రతి ఇంటికి తీసుకెళ్లాలన్న లక్ష్యంతో ‘డిజిటల్ ఆంధ్రప్రదేశ్’ ప్రాజెక్టును ఏపీ ప్రభుత్వం చేపడుతోంది. ఇందులో భాగంగానే గూగుల్, విప్రో తదితర సంస్థలతో చేతులు కలిపింది. వీటి సరసన మైక్రోసాఫ్ట్ సైతం చేరనుంది.


 న్యూయార్క్: ఆసియా-పసిఫిక్ ప్రాంతంలో అత్యంత శక్తివంతమైన 25 మంది మహిళల్లో(వ్యాపార రంగం) ఈ ఏడాది ఎనిమిది మంది భారతీయులకు చోటుదక్కింది. అంతర్జాతీయ బిజినెస్ మేగజీన్ ఫార్చ్యూన్ ఈ జాబితాను రూపొం దించింది. టాప్-10లో ఐసీఐసీఐ బ్యాంక్ సీఈఓ, ఎండీ చందా కొచర్ రెండో స్థానంలో నిలిచారు. దేశీ బ్యాంకింగ్ అగ్రగామి ఎస్‌బీఐ చైర్‌పర్సన్ అరుంధతీ భట్టాచార్య(4వ స్థానం), హిందుస్థాన్ పెట్రోలియం కార్పొరేషన్(హెచ్‌పీసీఎల్) సీఎండీ నిషి వాసుదేవ(5వ స్థానం) తొలిసారి జాబితాలో చోటుదక్కించుకున్నారు.
 
  వాసుదేవ ఒక భారతీయ ఆయిల్ కంపెనీకి తొలి మహిళా సారథి కావడం గమనార్హం. యాక్సిస్ బ్యాంక్ చీఫ్ శిఖా శర్మ 10 ర్యాంక్‌లో నిలిచారు. ఆస్ట్రేలియా బ్యాంకింగ్ దిగ్గజం వెస్ట్‌ప్యాక్ సీఈఓ గెయిల్ కెల్లీ నంబర్ వన్ స్థానాన్ని చేజిక్కించుకున్నారు.
 
  ఇక టాప్-25లో భారత్ నుంచి బయోకాన్ సీఈఓ కిరణ్ మజుందార్ షా(19వ ర్యాంక్), నేషనల్ స్టాక్ ఎక్స్ఛేంజ్(ఎన్‌ఎస్‌ఈ) సీఈఓ చిత్రా రామకృష్ణ(22), హెచ్‌ఎస్‌బీసీ ఇండియా హెడ్ నైనా లాల్ కిద్వాయ్(23), టఫే సీఈఓ మల్లికా శ్రీనివాసన్(25) ఉన్నారు. మహిళా వ్యాపారవేత్తలు అత్యంత కఠినమైన, భారీ సంస్థల్లో ఉన్నతమైన స్థానాలను అందుకుంటున్నారని.. ప్రపంచానికి మార్గనిర్ధేశం చేయడంలో తమ శక్తిసామర్థ్యాలను చాటిచెబుతున్నారని ఫార్చ్యూన్ పేర్కొంది.


 న్యూఢిల్లీ: ఆర్థిక వ్యవస్థలో మహిళల భాగస్వామ్యం మరింత పెరగాల్సిన ఆవశ్యకతను ఐసీఐసీఐ బ్యాంక్ చీఫ్ ఎగ్జిక్యూటివ్ ఆఫీసర్, మేనేజింగ్ డెరైక్టర్ చందాకొచ్చర్ ఉద్ఘాటించారు. తద్వారా స్థూల దేశీయోత్పత్తి (జీడీపీ) మరింత పెరుగుతుందన్న అభిప్రాయాన్ని వెలిబుచ్చారు. ప్రస్తుతం ఆర్థిక వ్యవస్థలో 30 శాతం నుంచి 35 శాతం వరకూ ఉన్న మహిళా భాగస్వామ్యాన్ని దాదాపు 50 శాతానికి పెంచగలిగినా... అది దేశ వృద్ధి మరింత శాతం పెరగడానికి దోహదపడుతుందని అన్నారు.
 
  ప్రస్తుత ఆర్థిక సంవత్సరం (2014-15) 5.5 శాతం జీడీపీ వృద్ధి రేటు లక్ష్యాన్ని సాధించడం సాధ్యమేనని కూడా వివరించారు. యంగ్ ఫిక్కీ లేడీస్ ఆర్గనైజేషన్(వైఎఫ్‌ఎల్‌ఓ) గురువారం నిర్వహించిన ‘ఉన్నత శిఖరాలపై మహిళ’ అనే ఒక చర్చా కార్యక్రమంలో ఆమె మాట్లాడారు. బోర్డ్ సమావేశాల్లో పాల్గొనే మహిళలు- తనపై తనకు పూర్తి విశ్వాసంతో బాధ్యతలు నిర్వహించాలని అన్నారు. ఇందుకు విజ్ఞానాన్ని కూడా పెంపొందించుకుని సమస్యల పరిష్కారానికి కృషి చేయాలని సూచించారు.  ‘‘బాధ్యతలు నిర్వహించే చోట మహిళలు, పురుషులు అన్న తేడాలు ఉండకూడదు. అయితే మహిళా భద్రతా, రక్షణ వంటి విషయాల్లో మాత్రం తగిన పటిష్ట చర్యలు అవసరం’’ అని అన్నారు.
 
  మహిళల భాగస్వామ్యం పెంపొందడం కేవలం వారికే ప్రయోజనం చేకూర్చదని, మొత్తం ప్రపంచం సామాజిక, ఆర్థిక వృద్ధికి ఇది దోహదపడుతుందని విశ్లేషించారు. భారత్ మొత్తం జనాభాలో సగం మంది మహిళలున్న విషయాన్ని ప్రస్తావిస్తూ, ఆర్థిక వ్యవస్థలో వీరి భాగస్వామ్యం పెంపొందించడం ద్వారా పలు రంగాల్లో మంచి ఫలితాలు సాధించవచన్నారు.  ఐసీఐసీఐని రిటైల్ రంగంలో ఒక దిగ్గజంగా నిలబెట్టడంలో కొచ్చర్ కృషి కొనియాడదగినదని వైఎఫ్‌ఎల్‌ఓ చైర్‌పర్సన్ అవర్ణా జైన్ ఈ సందర్భంగా అన్నారు.
 
  వృద్ధి సంకేతాలు బాగు..: కాగా  దేశాభివృద్ధి రికవరీ బాటన పయనిస్తోందనడానికి పలు సంకేతాలు కనిపిస్తున్నాయని కొచ్చర్ అన్నారు. బొగ్గు రంగంలో పురోగతి కనిపిస్తోందన్నారు. కార్ల అమ్మకాలు  మెరుగుపడుతున్న అంశాన్ని సైతం ప్రస్తావించారు. ఈ నేపథ్యంలో 5.5% వృద్ధిరేటు సాధన సాధ్యమేనని అ న్నారు. ఆర్‌బీఐ పాలసీ రేటు కోత ప్రస్తుత ఆర్థిక సంవత్సరం చివర్లో ఉండవచ్చని ఆమె అంచనావేశారు.


 ముంబై: వ్యాపార పరిమాణం, పనితీరులో కూడా దేశంలోనే అతిపెద్ద బ్యాంక్‌గా ఎదగనున్నామని ఐసీఐసీఐ బ్యాంక్ సీఈఓ, ఎండీ చందా కొచర్ విశ్వాసం వ్యక్తం చేశారు. లాభదాయక విధానంలో బ్యాంకును అగ్రస్థానానికి చేర్చాలనేది తమ లక్ష్యమని ఆమె చెప్పారు. పీటీఐ వార్తాసంస్థకు ఇచ్చిన ఇంటర్వ్యూలో ఈ వ్యాఖ్యలు చేశారు. ప్రస్తుతం ఐసీఐసీఐ దేశంలోనే అతిపెద్ద ప్రైవేటు రంగ బ్యాంకుగా కొనసాగుతోంది. మొత్తం దేశీ బ్యాంకింగ్ పరిశ్రమ విషయానికొస్తే.. ప్రభుత్వ రంగ ఎస్‌బీఐ టాప్ స్థానంలో ఉంది.
 
  తర్వాత స్థానంలో ఐసీఐసీఐ నిలుస్తోంది. 2009లో ఐసీఐసీఐ పగ్గాలు చేపట్టిన కొచర్.. ప్రఖ్యాత ‘4సీ’ వ్యూహాన్ని అమలుచేస్తూ బ్యాంకును ప్రగతిపథంలో నడిపిస్తున్నారు. ఈ వ్యూహం బాగానే విజయవతంమైందని.. పరిశ్రమ వృద్ధి రేటు కంటే ముందుండేందుకు ఇది తగిన పునాది వేసిందని కూడా కొచర్ పేర్కొన్నారు. అయితే, లాభాలను ఏమాత్రం త్యాగం చేయకుండానే, అదేవిధంగా అధిక రిస్క్‌లు ఉండే వ్యాపార విధానంలో కాకుండా వృద్ధిని పరుగులు పెట్టించేందుకు కృషిచేస్తున్నట్లు ఆమె పేర్కొన్నారు.
 
  కరెంట్, సేవింగ్స్ ఖాతా(కాసా) డిపాజిట్లలో వృద్ధి, వ్యయ నియంత్రణ, మొండిబకాయిల మెరుగుదల, సరైన మూలధన నిర్వహణ.. ఈ నాలుగు అంశాల సమర్థవినియోగమే 4సీ వ్యూహంగా పేరొందింది. దేశీ బ్యాంకింగ్ పరిశ్రమ కంటే 2-3 శాతం అధిక వృద్ధి రేటును సాధించడంపై దృష్టిపెట్టినట్లు కొచర్ చెప్పారు. ఏదో నామమాత్రంగా అగ్రస్థానానికి చేరాలన్నది తన ధ్యేయం కాదని... నిలకడైన లాభాల వృద్ధితో క్రమంగా దేశంలో నంబర్ వన్ ర్యాంక్‌ను అందుకోవడానికి ప్రయత్నిస్తామని ఐసీఐసీఐ చీఫ్ వ్యాఖ్యానించారు. కేవలం బ్యాంకు పరిమాణం ప్రకారం కాకుండా మెరుగైన పనితీరు ఆధారంగా టాప్‌లోకి వెళ్లాలనేదే తమ లక్ష్యమన్నారు. అయితే, కచ్చితంగా ఈ స్థానాన్ని అందుకుంటామన్న నమ్మకం ఉందని ఆమె చెప్పారు.


 ఐసీఐసీఐ సీఈఓ, ఎండీ చందా కొచర్
 
 ముంబై: దేశీ బ్యాంకింగ్ పరిశ్రమ మొండి బకాయిల(ఎన్‌పీఏ) గడ్డు పరిస్థితుల నుంచి దాదాపు గట్టెక్కినట్లేనని ఐసీఐసీఐ బ్యాంక్ సీఈఓ, ఎండీ చందా కొచర్ అభిప్రాయపడ్డారు. ఇటీవలికాలంలో బ్యాం కుల ఎన్‌పీఏలు ఎగబాకడం తీవ్ర ఆందోళనకలిగిస్తున్న నేపథ్యంలో ఆమె వ్యాఖ్యలు ప్రాధాన్యం సంతరించుకున్నాయి. పీటీఐ వార్తాసంస్థకు ఇచ్చిన ఇంటర్వ్యూలో ఆమె ఈ వ్యాఖ్యలు చేశారు.
 
 ప్రస్తుత 2014-15 ఆర్థిక సంవత్సరంలో కూడా మొండిబకాయిలు, రుణాల పునర్‌వ్యవస్థీకరణలు కొంత పెరిగే అవకాశం ఉందని.. అయితే, క్రితం ఏడాది స్థాయిలో ఉండకపోవచ్చని కొచర్ పేర్కొన్నారు. కార్పొరేట్ రంగంలో ప్రాజెక్టులకు ఇక వేగంగా అనుమతులు లభిస్తాయని భావిస్తున్నామని.. నగదు ప్రవాహంలో ఏవైనా ఒత్తిడి ఉంటే తొలగించాల్సిన అవసరం ఉంద న్నారు.
  
 దేశీ బ్యాంకింగ్ వ్యవస్థకు తక్షణ సమస్య ఎన్‌పీఏల పెరుగుదలేనంటూ తాజాగా ఆర్‌బీఐ గవర్నర్ రఘురామ్ రాజన్  ఆందోళన వ్యక్తం చేయడం తెలిసిందే. కాగా, తమ బీమా యూనిట్లకు(ఐసీఐసీఐ ప్రుడెన్షియల్ లైఫ్, ఐసీఐసీఐ లాంబార్డ్ జనరల్ ఇన్సూరెన్స్)  సరైన విలువ లభిస్తుందన్న విశ్వాసంవస్తే స్టాక్ మార్కెట్లో లిస్టింగ్ చేసే అంశాన్ని పరిశీలిస్తామని కొచర్ పేర్కొన్నారు. తక్షణం తమ అనుబంద సంస్థల లిస్టింగ్ యోచనేదీ లేదని తేల్చిచెప్పారు.


 ముంబై: సరైన పరిమాణం, తగిన ధరకు ఏదైనా బ్యాంకు దొరికితే కొనుగోలు చేయడానికి సిద్ధమేనని ఐసీఐసీఐ బ్యాంక్ సీఈఓ, ఎండీ చందా కొచర్ పేర్కొన్నారు. తమ బ్యాంకు విధానాలకు తగ్గట్టుగా ఉండే బ్యాంకును టేకోవర్ చేసేవిషయంలో ఇంకా వేట మొదలుపెట్టాల్సి ఉందన్నారు. ఇప్పటివరకైతే తమకు అలాంటి బ్యాంక్ తారసపడలేదని చెప్పారు. అయితే, కొనుగోలుకు ఎప్పుడూ రెడీగానే ఉంటామని ఆమె పేర్కొన్నారు. ‘గత 2013-14 ఆర్థిక సంవత్సరంలో ఐసీఐసీఐ 650 కొత్త బ్రాంచ్‌లను ఏర్పాటు చేసింది. వీటి వ్యాపార పరిమాణాన్ని పరిగణనలోకి  తీసుకుంటే దాదాపు ఒక కొత్త బ్యాంక్‌కు సమానంగా ఉంటుంది.
 
  అయితే, కొనుగోలు చేయబోయే బ్యాంక్‌కు మాత్రం తగిన సైజు కచ్చితంగా ఉండాల్సిందే’ అని ఆమె వివరించారు. గతంలో తాము టేకోవర్ చేసిన బ్యాంకులకు 300-400 బ్రాంచ్‌లు ఉన్నాయని.. అప్పటి పరిస్థితులకు అది సరిగ్గా సరిపోయిందన్నారు. బ్యాంక్ ఆఫ్ మదుర, సాంగ్లి బ్యాంక్, బ్యాంక్ ఆఫ్ రాజస్థాన్‌లను ఐసీఐసీఐ చేజిక్కించుకున్న సంగతి తెలిసిందే.
 
  ప్రస్తుతం దేశంలో ప్రైవేటు రంగ బ్యాంకుల్లో అగ్రగామిగా ఉన్న ఐసీఐసీఐకి దేశవ్యాప్తంగా 3,750కి పైగా బ్రాంచ్‌లు ఉన్నాయి. మార్చితో ముగిసిన గత ఆర్థిక సంవత్సరంలో బ్యాంక్ మొత్తం ఆదాయం రూ.54,606 కోట్లు కాగా, నికర లాభం రూ.9,810 కోట్లుగా నమోదైంది. 1984లో అప్పటి ఐసీఐసీఐ లిమిటెడ్‌లో కెరీర్‌ను ప్రారంభించిన కొచర్ 2009లో ఐసీఐసీఐ బ్యాంక్ సీఈఓ, ఎండీగా నియమితులయ్యారు.


 వడోదర: విదేశాల్లో విస్తరణ కోసం  ఐసీఐసీఐ బ్యాంక్ ప్రయత్నాలు చేస్తోంది. ఆస్ట్రేలియా, దక్షిణాఫ్రికా, మారిషస్‌ల్లో బ్యాంక్ శాఖలను ఏర్పాటు చేయనున్నామని బ్యాంక్ ఎండీ, సీఈఓ చందా కొచ్చర్ చెప్పారు. అంతేకాకుండా చైనాలో ఉన్న రిప్రజంటేటివ్ ఆఫీస్‌ను పూర్తి స్థాయి బ్యాంక్ శాఖగా ఏర్పాటు  చేయనున్నామని పేర్కొన్నారు. వీటన్నింటికి తగిన ఆమోదాలు ఆర్‌బీఐ నుంచి పొందామని వివరించారు. బ్యాంక్ 20వ వార్షిక సాధారణ సమావేశంలో ఆమె మాట్లాడారు. భారత ప్రైవేట్ బ్యాంకులతో పోల్చితే విదేశీ నెట్‌వర్క్‌లో ఐసీఐసీఐ బ్యాంక్ అతి పెద్ద బ్యాంక్ అని పేర్కొన్నారు.
  
 మూడు అనుబంధ బ్యాంకులతో, ఎనిమిది రిప్రజంటేటివ్ ఆఫీస్‌లతో విదేశాల్లో కార్యకలాపాలు నిర్వహిస్తున్నామని వివరించారు. గత ఆర్థిక సంవత్సరంలో కొత్తగా 653 బ్యాంక్ శాఖలను, 834 ఏటీఎంలను ఏర్పాటు చేశామని, దీంతో మొత్తం శాఖల సంఖ్య 3,753కు, ఏటీఎంలు 11,315కు పెరిగాయని చందా కొచ్చర్ తెలిపారు. వృద్ధి సాధనపై దృష్టి సారించే సుస్థిరమైన ప్రభుత్వం ఏర్పడటం భారత్‌కు ప్రయోజనం కలిగిస్తుందని పేర్కొన్నారు. గత ఆర్థిక సంవత్సరంలో దేశీ యంగా ఆర్థిక పరిస్థితులు అస్తవ్యస్తంగా ఉన్నప్పటికీ, మంచి పనితీరు సాధించామని తెలిపారు. ఈ ఏడాది మరింత మెరుగైన ఫలితాలను నమోదుచేయగలమన్న విశ్వాసాన్ని కొచర్ వ్యక్తం చేశారు.


  న్యూఢిల్లీ: ఎన్నికల్లో ఎన్డీయేకి స్పష్టమైన ఆధిక్యం రావడాన్ని కార్పొరేట్లు స్వాగతించారు. బీజేపీ ప్రధాని అభ్యర్థి నరేంద్ర మోడీ.. ఆర్థిక వృద్ధికి ఊతమిచ్చేలా విధానపరంగా సాహసోపేతమైన, నిర్ణయాత్మకమైన సంస్కరణలు చేపట్టగలరని ధీమా వ్యక్తం చేశారు.  ఇన్వెస్టర్లలో విశ్వాసాన్ని పునరుద్ధరించేందుకు, అధిక పెట్టుబడులను ఆకర్షించేందుకు, తయారీ రంగంలో ఉపాధి అవకాశాలు పెంచేందుకు ప్రభుత్వం తగు చర్యలు తీసుకునేలా ఈ స్పష్టమైన మెజార్టీ తోడ్పాటు అందించగలదని పరిశ్రమల సమాఖ్య ఫిక్కీ ప్రెసిడెంట్ సిద్ధార్థ్ బిర్లా పేర్కొన్నారు. మరోవైపు, స్థిరమైన ప్రభుత్వం ఏర్పడి, సాహసోపేతమైన నిర్ణయాలు తీసుకునేందుకు మెజార్టీ ఉపయోగపడగలదని అసోచాం ప్రెసిడెంట్ రాణా కపూర్ తెలిపారు. రాబోయే 18-24 నెలల్లో ఎకానమీ నిలకడైన 10% వృద్ధి సాధించడానికి ఆస్కారం ఏర్పడినట్లయిందని ఆయన చెప్పారు. అటు వెల్‌స్పన్ రెన్యూవబుల్స్ ఎనర్జీ వైస్ చైర్మన్ వినీత్ మిట్టల్ .. ఇది ప్రజా విజయం అని వ్యాఖ్యానించారు.
 
 
  రియల్టీకి ఊతం..: కేంద్రంలో స్థిరమైన ప్రభుత్వం ఏర్పడటం వల్ల ప్రాపర్టీ మార్కెట్లు మళ్లీ కళకళ్లాడగలవని రియల్టీ సంస్థలు ఆశాభావం వ్యక్తం చేశాయి. నివాస గృహాలు, ఆఫీస్ ప్రాజెక్టులకు డిమాండ్ పెరగగలదని అభిప్రాయపడ్డాయి. స్థూల దేశీయోత్పత్తి వృద్ధి గానీ పెరిగిన పక్షంలో ముందుగా లాభపడేది రియల్ ఎస్టేట్ రంగమేనని సీబీ్రఆ దక్షిణాసియా సీఎండీ అన్షుమన్ మ్యాగజైన్ చెప్పారు. గుజరాత్‌లో సుపరిపాలన అందించిన మోడీపై తమకు భారీ అంచనాలు ఉన్నాయని, రియల్టీ మార్కెట్లో సెంటిమెంటు గణనీయంగా మెరుగుపడగలదని రియల్టర్ల సమాఖ్య క్రెడాయ్ చైర్మన్ లలిత్ జైన్ చెప్పారు.
 
  విధాన చర్యలు కావాలి: ఇన్‌ఫ్రా సంస్థలు
  మౌలికం తదితర ప్రధాన రంగాల్లో పెట్టుబడులు ఆకర్షించే విధంగా ఎన్డీయే ప్రభుత్వం విధానపరమైన చర్యలు తీసుకోవడంపై దృష్టి పెట్టాలని ఇన్‌ఫ్రా పరిశ్రమ కోరింది. చైనా స్థాయిలో ఎదగాలంటే కొత్త ఆర్థిక మంత్రిగా ఎవరు వచ్చినా సరే.. దేశం వేగవంతమైన వృద్ధి సాధించేలా చర్యలు తీసుకోవాల్సి ఉంటుందని కేపీఎంజీ ఇండియా డిప్యుటీ చీఫ్ ఎగ్జిక్యూటివ్ దినేష్ కనబార్ తెలిపారు. రహదారులు, విద్యుత్ మొదలైన రంగాల్లో పెట్టుబడులను ఆకర్షించేందుకు ప్రభుత్వం గట్టి చర్యలు తీసుకోవాలని చెప్పారు.
 
  
  పన్ను చట్టాలపై అస్పష్టతను తొలగించడం, జీఎస్‌టీని అమల్లోకి తేవడం, ద్రవ్యోల్బణ కట్టడికి చర్యలు తీసుకోవడం మొదలైనవి కొత్త ప్రభుత్వ తక్షణ ప్రాధాన్యతలు కావాలి.     - చందా కొచ్చర్, ఎండీ, ఐసీఐసీఐ బ్యాంక్
 
  నూతన ప్రభుత్వం ఆర్థిక వృద్ధిని వేగవంతం చేయాలి. ద్రవ్యోల్బణం .. ద్రవ్య లోటు కట్టడి, ఉపాధి అవకాశాలు పెంచడంతో పాటు ఇన్వెస్టర్ల విశ్వాసాన్ని మెరుగుపర్చే చర్యలు తీసుకోవడం ముఖ్యం.  - కుమార మంగళం బిర్లా, చైర్మన్, ఆదిత్య బిర్లా గ్రూప్
 
  మరింత మంది ప్రముఖుల  అభిప్రాయాలు ఇవీ..
  కొత్త ప్రభుత్వం.. వైద్య, ఆరోగ్య రంగంపై వ్యయాలను గణనీయంగా పెంచాలి. అందరికీ వైద్యం అందించే దిశగా తగిన ప్రణాళికను రూపొందించాలి. అలాగే, ప్రత్యక్ష పన్నుల కోడ్, జీఎస్‌టీని అర్జెంటుగా అమల్లోకి తేవాల్సిన అవసరం ఉంది.     - ప్రతాప్ రెడ్డి, చైర్మన్, అపోలో హాస్పిటల్స్
  
  స్పష్టమైన ఆధిక్యం లభించడంతో దేశ ప్రజలకు, పరిశ్రమకు మేలు చేసే ఆర్థిక విధానాలను కొత్త ప్రభుత్వం అమలు చేయడానికి ఆస్కారం లభించింది. అధిక వృద్ధి సాధించేందుకు ఇది అనువైన వాతావరణాన్ని కల్పించగలదు.       - జీవీకే రెడ్డి, సీఎండీ, జీవీకే పవర్
  
  గుజరాత్‌లో మంచి పాలన అందించిన అనుభవం మోడీకి ఉంది. ఆయన నాయకత్వంపై ప్రజలు నమ్మకం ఉంచారు. ఈ ఎన్నికల ఫలితాలు.. రాజకీయ స్థిరత్వానికి, అధిక వృద్ధికి, పెట్టుబడులకు అనువైన వాతావరణాన్ని కల్పించడానికి దోహదపడగలవు.  - శ్రీచంద్ హిందుజా, చైర్మన్, హిందుజా గ్రూప్
  
  సోషల్ మీడియా పాత్ర కీలకం
  ధనం, అసంబద్ధమైన హామీలు వంటి వాటికి లొంగకుండా అభివృద్ధి కోసం ఓటు వేసిన వారందరికీ అభినందనలు. ఈ ఎన్నికల్లో యువత సోషల్ మీడియా ద్వారా రాజకీయాల్లో కీలక పాత్ర పోషించింది. ఈ సందర్భంగా ఎన్నికల్లో గెలిచిన మోడీ, చంద్రబాబు, చంద్ర శేఖర్‌లకు అభినందనలు తెలపడమే కాకుండా అభివృద్ధి పరంగా ఆయా ప్రాంతాలను మరింత ముందుకు తీసుకెళ్తారన్న నమ్మకం ఉంది. - డాక్టర్. బీవీఆర్ మోహన్ రెడ్డి, ఎగ్జిక్యూటివ్ చైర్మన్, సైయంట్


  ముంబైలో జరిగిన కార్యక్రమంలో  స్వయం సహాయక గ్రూప్ మహిళలకు రుణ మంజూరీకి సంబంధించిన చెక్కును అందిస్తున్న ఐసీఐసీఐ బ్యాంక్ సీఈఓ చందా కొచర్ అంతర్జాతీయ మహిళా దినోత్సవాన్ని పురస్కరించుకుని శనివారం జరిగిన కార్యక్రమాల్లో భారత ప్రభుత్వ, ప్రైవేటు దిగ్గజ బ్యాంకింగ్‌ల చీఫ్‌లు పాల్గొన్నారు. మహిళల అభ్యున్నతే లక్ష్యంగా బ్యాంకులు వారికి తగిన ప్రోత్సాహ సహకారాలను అందిస్తాయని వారు ఈ సందర్భంగా పేర్కొన్నారు. కోల్‌కతాలో జరిగిన ఒక కార్యక్రమంలో పర్వతారోహకురాలు చందా గయన్‌ను సన్మానిస్తున్న  ప్రభుత్వ బ్యాంకింగ్ దిగ్గజం ఎస్‌బీఐ చీఫ్ అరుంధతీ భట్టాచార్య (ఎడమ చిత్రం).
  
  అమ్మకానికి ఎన్‌పీఏలు...: పెరిగిపోతున్న మొండి  బకాయిల  (ఎన్‌పీఏ) సమస్యను తగ్గించుకునే దిశలో భాగంగా తొలిసారిగా కొన్ని ఎన్‌పీఏలను అసెట్ రీకన్‌స్ట్రక్షన్ సంస్థలకు (ఏఆర్‌సీ) విక్రయించాలని యోచిస్తున్నట్లు ఈ సందర్భంగా భట్టాచార్య తెలిపారు. ఈ త్రైమాసికంలోనే దీన్ని చేపట్టేందుకు కొన్ని ప్రతిపాదనలు పరిశీలిస్తున్నట్లు పేర్కొన్నారు.


  గాంధీనగర్: భారత్‌ను ఆర్థిక సేవల కేంద్రంగా రూపొందించాలని  ఐసీఐసీఐ బ్యాంక్ ఎండీ, సీఈవో చందా కొచర్ బుధవారం చెప్పారు. దీని కోసం మరింత వృద్ధి సాధిం చాల్సిన అవసరముందని పేర్కొన్నారు.  అంతేకాకుండా ద్రవ్యలోటు, కరంట్ అకౌంట్ లోటుల్లో స్థిరత్వాన్ని సాధించాలని, ద్రవ్యోల్బణాన్ని నియంత్రణలో ఉంచాలని ఆమె సూచించారు.
 
  ఆర్థిక సేవలు మరింత వృద్ధి చెందడానికి భారత్‌లో అపారమైన అవకాశాలున్నాయని చెప్పారు. ఇక్కడి గుజరాత్ ఇంటర్నేషనల్ ఫైనాన్షియల్ టెక్(గిఫ్ట్) సిటీలో ‘ఆర్థిక సేవలు-ఆర్థిక వృద్ధికి కీలక చోదక శకి’్త అన్న అంశంపై నిర్వహించిన సెమినార్‌లో ఆమె మాట్లాడారు. దేశంలో సమర్థవంతమైన, పటిష్టమైన శ్రమించే వాతావరణాన్ని సృష్టించాల్సి ఉందని గుజరాత్ ముఖ్యమంత్రి నరేంద్ర మోడీ ప్రేక్షకుడిగా పాల్గొన్న ఈ సెమినార్‌లో  ఆమె ఉద్ఘాటించారు.


 ముంబై: దేశ ఆర్థిక వ్యవస్థ గాడిలోపడుతున్న సంకేతాలు స్పష్టంగా కనబడుతున్నాయని ఆర్థిక మంత్రి పి. చిదంబరం పేర్కొన్నారు. ఈ ఏడాది(2013-14) ద్వితీయార్ధంలో స్థూల దేశీయోత్పత్తి(జీడీపీ) వృద్ధి రేటు పుంజుకోనుందని.. పూర్తి సంవత్సరానికి 5-5.5 శాతం వృద్ధి నమోదవ్వొచ్చని ఆయన విశ్వాసం వ్యక్తం చేశారు. శుక్రవారం ఇక్కడ బ్యాంకాన్-2013 సదస్సును ప్రారంభించిన అనంతరం ఆయన ప్రసంగించారు. ఇండియన్ బ్యాంక్స్ అసోసియేషన్(ఐబీఏ), బ్యాంక్ ఆఫ్ ఇండియాలు సంయుక్తంగా ఈ సదస్సును నిర్వహిస్తున్నాయి.
  
  రుణ ఎగవేతలపై..: కావాలనే రుణాలను ఎగ్గొట్టేవారిని ఉపేక్షించొద్దని, కఠిన చర్యలు తీసుకోవాలని బ్యాంకర్లకు చిదంబరం మరోమారు స్పష్టం చేశారు. అయితే, ఆర్థిక మందగమనం ప్రభావంతో బకాయిపడుతున్న కార్పొరేట్లకు మాత్రం కాస్త చేదోడుగా నిలవాల్సిన అవసరం ఉందని ఆయన సూచించారు.
 
  దర్యాప్తు సంస్థలపై విసుర్లు...: కాగా, బ్యాంకులు తీసుకొనే  వాణిజ్యపరమైన నిర్ణయాలన్నింటినీ దురుద్దేశపూరితమైనవిగా లేదంటే కుట్రపూరితమైనవిగా చూడకూడదని దర్యాప్తు సంస్థలకు చిదంబరం హితవుపలికారు. వాటి పరిధిమేరకు వ్యవహరించాలని సూచించారు. ‘ప్రతి నిర్ణయాన్నీ ఇలాగే ప్రశ్నిస్తే వ్యాపారాలు నడవవు. ఎవరూ నిర్ణయాలు తీసుకోవడానికే ముందుకురారు. కొన్ని నిర్ణయాలు భవిష్యత్తులో తప్పయ్యే అవకాశాలు కూడా ఉన్నాయి. అలాగని అవన్నీ నేరపూరితమైనవిగా పరిగణించలేం. దర్యాప్తు సంస్థలు ఇలాంటి ప్రమాదరకరమైన ధోరణిలో వెళ్లకూడదు’ అని చిదంబరం పేర్కొన్నారు. వాస్తవ పరిస్థితులకు అనుగుణంగా బ్యాంకర్లు తీసుకునే ఎలాంటి నిర్ణయాలకైనా ప్రభుత్వం మద్దతుగా నిలుస్తుందని ఈ సందర్భంగా హామీనిచ్చారు.
  
  ద్రవ్యలోటు, క్యాడ్‌ను కట్టడిచేస్తాం...
  ‘ద్రవ్యలోటును జీడీపీలో 4.8 శాతానికి, కరెంట్ అకౌంట్ లోటును 56 బిలియన్ డాలర్ల కంటే తక్కువకు(3% లోపే) కట్టడి చేస్తాం. ద్రవ్యోల్బణం ఆందోళనలు కొనసాగుతున్నప్టటికీ ఈ లక్ష్యాలను సాకారం చేయగలమన్న నమ్మకం ఉంది’ అని చిదంబరం పేర్కొన్నారు. గతేడాది జీడీపీ వృద్ధి రేటు పదేళ్ల కనిష్టానికి(5 శాతం) పడిపోగా... ఈ ఏడాది తొలి త్రైమాసికం(ఏప్రిల్-జూన్, క్యూ1)లో 4.4%కి దిగజారడం  తెలిసిందే. గతేడాది క్యాడ్ చరిత్రాత్మక గరిష్టానికి(4.8 శాతం-88.2 బిలియన్ డాలర్లు), ఈ క్యూ1లో 4.9 శాతానికి ఎగబాకింది. కాగా, అక్టోబర్‌లో ఎగుమతులు 13.4 శాతం వృద్ధి చెందగా.. సెప్టెంబర్‌లో కీలకమైన 8 మౌలిక రంగ పరిశ్రమల ఉత్పాదకత వృద్ధి అత్యంత మెరుగ్గా 8 శాతానికి(11 నెలల గరిష్టం) ఎగసింది. ఇక సెప్టెంబర్‌లో పారిశ్రామికోత్పత్తి(ఐఐపీ) వృద్ధి సైతం మెరుగ్గానే 2%కి పెరిగింది(ఆగస్టులో 0.43%). నిత్యావసరాల ధరలు ఎగబాకడం ఆందోళనమైన అంశమేనని విత్తమంత్రి వ్యాఖ్యానించారు. అక్టోబర్‌లో టోకు ధరల ద్రవ్యోల్బణం 7 శాతానికి(8 నెలల గరిష్టం) ఎగబాకగా.. రిటైల్ ద్రవ్యోల్బణం ఏడు నెలల గరిష్టస్థాయిలో  10.09%కి పెరిగిపోయింది.
  
  5వేల కోట్ల సమీకరణ: ఎస్‌బీఐ చీఫ్ అరుంధతి
  బ్యాంకింగ్ దిగ్గజం- స్టేట్ బ్యాంక్ ఆఫ్ ఇండియా బాండ్ల (రుణ) మార్గంలో ప్రస్తుత ఆర్థిక సంవత్సరం ముగిసేనాటికి రూ.5,000 కోట్ల వరకూ సమీకరించనుంది. కచ్చితంగా ఎంత సమీకరించాలన్న అంశంపై ఇంకా నిర్ణయానికి రాకున్నప్పటికీ, ఈ మొత్తం దాదాపు రూ.5,000 కోట్ల రేంజ్‌లో ఉంటుందని చైర్‌పర్సన్ అరుంధతీ భట్టాచార్య శుక్రవారం వెల్లడించారు. ఇక్కడ జరిగిన బ్యాంకాన్-2013  వార్షిక సదస్సుకు హాజరైన ఆమె ఈ సందర్భంగా విలేకరులతో మాట్లాడారు. రిటైల్ రంగంలో రుణ వృద్ధిపై తమ బ్యాంక్ అత్యధిక దృష్టి సారిస్తుందని పేర్కొన్నారు. ఆర్థిక రంగంలో ఇబ్బందులు ఉన్నప్పటికీ, 2013-14లో ఎస్‌బీఐ 16 నుంచి 18 శాతం శ్రేణిలో రుణ వృద్ధిని సాధిస్తుందన్న విశ్వాసాన్ని ఆమె వ్యక్తం చేశారు.
  
  నిరాశావాదానికి మందు అవసరం: ఆర్‌బీఐ గవర్నర్ రాజన్
  నిరాశావాదంపై రిజర్వ్ బ్యాంక్ (ఆర్‌బీఐ) గవర్నర్ రఘురామ్ రాజన్ ఆందోళన వెలిబుచ్చారు. దేశంలో విధాన నిర్ణయాల్లో ఆలస్యానికి, వృద్ధి అవకాశాలను అందిపుచ్చుకోలేకపోవడానికి నిస్పృహతత్వమే కారణమని విశ్లేషించారు. ఇక్కడ జరుగుతున్న బ్యాంకాన్ సదస్సును ఉద్దేశించి రాజన్ మాట్లాడారు.  ఏ నిర్ణయం తీసుకున్నా.. దాని ఫలితంపై ముందే అనుమాన ధోరణి పనికిరాదని అన్నారు. దీనికి తగిన పరిష్కారం అవసరమని చెప్పారు. తీసుకున్న నిర్ణయం ఉపయుక్తమైనదిగా, పక్షపాతరహితం, సమర్థవంతనీయంగా ఉండాలన్నారు. ఆర్థిక వ్యవస్థ పటిష్టతకు ఆర్‌బీఐ రానున్న కొద్ది త్రైమాసికాల్లో ఐదంచెల వ్యూహాన్ని అవలంబించనున్నట్లు వెల్లడించారు. పరపతి విధి విధానాల స్పష్టత-పటిష్టత, బ్యాంకింగ్ వ్యవస్థ పటిష్టత,  ఫైనాన్షియల్ మార్కెట్ల విస్తృతి. అవసరం ఉన్న వారికందరికీ రుణ సదుపాయాల కల్పన, ఆర్థిక, కార్పొరేట్ సంస్థల సవాళ్లను అధిగమించగలిగిన స్థాయిలో వ్యవస్థ మెరుగుదలగా వీటిని పేర్కొన్నారు.
  
  ఆ రెండే రూపాయి దిశను నిర్దేశిస్తాయ్: కొచర్
  అమెరికా సహాయక ప్యాకేజీల ఉపసంహరణ అంశం, అలాగే చమురు మార్కెటింగ్ కంపెనీ (ఓఎంసీ) డాలర్ల డిమాండ్ భవిష్యత్తులో రూపాయి గమనాన్ని కొంతవరకూ నిర్దేశిస్తాయని ఐసీఐసీఐ బ్యాంక్ ఎండీ, సీఈవో చందా కొచర్ శుక్రవారం పేర్కొన్నారు. ఆయా అంశాలతోపాటు భారత్ వృద్ధి అవకాశాలు, గ్లోబల్ ఇన్వెస్టర్లలో విశ్వాసం పెంపు వంటి అంశాలు సైతం రూపాయి కదలికలకు కారణమవుతాయని అన్నారు. ఇక్కడ బ్యాంకాన్ సదస్సుకు హాజరైన ఆమె ఈ సందర్భంగా విలేకరులతో మాట్లాడారు.  డిపాజిట్ రేట్ల మార్పునకు సంబంధించి పరిస్థితిని ఐసీఐసీఐ బ్యాంక్ గమనిస్తోందని అన్నారు. దీనిపై ఇప్పటివరకూ ఎలాంటి నిర్ణయం తీసుకోలేదని మాత్రం ఆమె వెల్లడించారు.


 సాక్షి ముంబై: ఐసీఐసీఐ బ్యాంకు ఎండీ చందా కొచ్చర్ పేరుతో బోగస్ ఈ-మెయిల్ ఐడీ తయారు చేసి వినియోగదారులను దోచుకునేందుకు ప్రయత్నించిన నైజీరియా రాకెట్‌ను పోలీసులు ఛేదించారు. ఈ కేసులో నైజీరియన్‌తోపాటు ఇద్దరిని అరెస్టు చేశారు. మరో ఇద్దరి కోసం గాలిస్తున్నారు. జీమెయిల్, లైవ్ డాట్ కామ్, 163 డాట్ కామ్ తదితర మెయిల్ సర్వీసులను ఉపయోగించి ‘కొచ్చర్’ పేరిట సదరు ఈ ముఠా ఎనిమిది ఈ-మెయిల్ ఐడీలను తయారు చేసింది.
  
 బ్యాంక్ దగ్గరున్న రూ.50 కోట్ల రహస్య నిధిని దక్కించుకునేందుకు తమను సంప్రదించాలని దొంగ మెయిళ్లను పంపింది. ఈ విషయం గమనించిన ఐసీఐసీఐ అధికారులు సైబర్‌సెల్‌కు ఫిర్యాదు చేశారు. రంగంలోకి దిగిన నిపుణులు ఏ డేటాకార్డు నుంచి మెయిల్ పంపారో తెలుసుకున్నారు. అది బెంగళూరు ఏటీఎస్ డేటాకార్డు డీలర్ రతీష్ కరగప్పదని తేలింది. రతీష్‌తోపాటు అతని దగ్గర పనిచేసే వ్యక్తిని, కార్డు ను కొనుగోలు చేసిన నైజీరియన్‌ను అరెస్టు చేశారు. అయితే ఈ ముఠా మెయిళ్లను నమ్మి ఎవరైనా మోసపోయారా అనేకోణంలోనూ దర్యాప్తు జరుపుతున్నా మని సైబర్‌సెల్ అధికారి నందకిషోర్ తెలిపారు.


 న్యూఢిల్లీ: భారత వ్యాపార రంగంలో శక్తిమంతమైన మహిళల జాబితాలో ఐసీఐసీఐ బ్యాంక్ ఎండీ, సీఈవో చందా కొచర్ వరుసగా మూడోసారి అగ్రస్థానం దక్కించుకున్నారు. యాక్సిస్ బ్యాంక్ ఎండీ శిఖా శర్మ, క్యాప్‌జెమిని ఇండియా సీఈవో అరుణ జయంతి త ర్వాత స్థానాల్లో నిల్చారు. 2013 సంవత్సరానికి సంబంధించి ఫార్చూన్ మ్యాగజైన్ రూపొందించిన ఈ జాబితాలో అపోలో హాస్పిటల్ ఎంటర్‌ప్రైజెస్ ఎండీ ప్రీతా రెడ్డి నాలుగో స్థానంలోను, ట్రాక్టర్స్ అండ్ ఫార్మ్ ఎక్విప్‌మెంట్ (టాఫే) సీఈవో మల్లికా శ్రీనివాసన్ అయిదో స్థానంలోనూ ఉన్నారు. వ్యాపార రంగంలో రాణిస్తున్న 50 మంది మహిళలతో ఫార్చూన్ ఈ జాబితాను రూపొందించింది. ఇందులో ఈసారి కొత్తగా ఆరుగురికి చోటు దక్కింది. వీరిలో హెరిటేజ్ ఫుడ్స్ వైస్ చైర్మన్, ఎండీ నారా భువనేశ్వరి కూడా ఉన్నారు.  బహుళ జాతి ఇంధన సంస్థ మొదలుకుని ప్రపంచంలోనే అతి పెద్ద కాఫీ చెయిన్ దాకా పలు దిగ్గజాల భారత కార్యకలాపాల నిర్వహణలో మహిళలు మరింత ప్రముఖంగా కనిపిస్తున్నారని ఫార్చూన్ మ్యాగజైన్ వ్యాఖ్యానించింది.
  
  ఈ జాబితాలోని టాప్ టెన్‌లో హెచ్‌టీ మీడియా చైర్‌పర్సన్ శోభన భర్తియా, బయోకాన్ సీఎండీ కిరణ్ మజుందార్ షా, ఏజెడ్‌బీ పార్ట్‌నర్స్ సహవ్యవస్థాపకురాలు జియా మోడీ, బ్రిటానియా ఎండీ వినీత బాలి, హెచ్‌ఎస్‌బీసీ ఇండియా కంట్రీ హెడ్ నైనా లాల్ కిద్వాయ్ ఉన్నారు.
  
  ఫార్చూన్ టాప్-10
  చందా కొచర్ (ఐసీఐసీఐ బ్యాంక్)
  శిఖా శర్మ (యాక్సిస్ బ్యాంక్)
  అరుణ జయంతి (క్యాప్ జెమిని)
  ప్రీతా రెడ్డి (అపోలో హాస్పిటల్స్)
  మల్లికా శ్రీనివాసన్ (టాఫే)
  
  శోభనా భర్తియా (హెచ్‌టీ మీడియా)
  కిరణ్ మజుందార్ షా (బయోకాన్)
  జియా మోడీ (ఏజడ్‌బీ)
  వినీతా బాలి (బ్రిటానియా)
  నైనాలాల్ కిద్వాయ్ (హెచ్‌ఎస్‌బీసీ)


 ముంబై: దేశీ ప్రైవేటురంగ బ్యాంకింగ్ దిగ్గజం.. ఐసీఐసీఐ బ్యాంక్ అంచనాలను మించిన ఆర్థిక ఫలితాలను ప్రకటించింది. ఈ ఏడాది సెప్టెంబర్‌తో ముగిసిన రెండో త్రైమాసికం(2013-14, క్యూ2)లో బ్యాంక్  స్టాండెలోన్ నికర లాభం రూ.2,352 కోట్లకు ఎగబాకింది. క్రితం ఏడాది ఇదే కాలంలో రూ.1,956 కోట్ల లాభంతో పోలిస్తే 20.2 శాతం వృద్ధి నమోదైంది. ప్రధానంగా నికర వడ్డీ ఆదాయం(ఎన్‌ఐఐ), ఫీజుల ఆదాయాలు, తక్కువ నిర్వహణ వ్యయాలు... లాభాల జోరుకు దోహదం చేశాయి. బ్యాంక్ మొత్తం ఆదాయం రూ.12,069 కోట్ల నుంచి రూ.12,980 కోట్లకు పెరిగింది. దాదాపు 7 శాతం వృద్ధి సాధించింది. క్యూ2లో బ్యాంక్ ఎన్‌ఐఐ 20 శాతం ఎగసి రూ.4,044 కోట్లకు దూసుకెళ్లింది. గతేడాది ఇదే కాలంలో ఈ మొత్తం రూ.3,371 కోట్లు మాత్రమే. బ్రోకరేజి సంస్థల విశ్లేషకులు సగటున రూ.2,167 కోట్ల నికర లాభం, రూ.3,955 కోట్ల నికర వడ్డీ ఆదాయాన్ని అంచనా వేశారు.
  
  పెరిగిన మార్జిన్లు...
  ఇక నికర వడ్డీ మార్జిన్(ఎన్‌ఐఎం) కూడా క్యూ2లో 3.31 శాతానికి పెరిగింది. బ్యాంక్ చరిత్రలో ఇది రెండో అత్యధిక స్థాయి మార్జిన్ కావడం గమనార్హం. క్రితం ఏడాది ఇదే త్రైమాసికంలో ఎన్‌ఐఎం 3 శాతం మాత్రమే. మరోపక్క, ప్రస్తుత ఆర్థిక సంవత్సరం మొత్తానికి ఎన్‌ఐఎం లక్ష్యాన్ని 0.10 శాతం పెంచి 3.31 శాతంగా నిర్దేశించుకుంటున్నట్లు బ్యాంక్ పేర్కొంది. ఫీజుల రూపంలో ఆదాయం సెప్టెంబర్ క్వార్టర్‌లో 17 శాతం ఎగసి రూ.1,996 కోట్లకు వృద్ధి చెందింది.
  
  ఎన్‌పీఏలు ఇలా...
  క్యూ2లో స్థూల మొండిబకాయిల నిష్పత్తి(ఎన్‌పీఏ) కాస్త తగ్గుముఖంపట్టి 3.08 శాతానికి పరిమితమైంది. క్రితం ఏడాది ఇదే కాలంలో ఇది 3.54 శాతంగా ఉంది. స్థూలంగా రూ.1,100 కోట్ల విలువైన స్థూల మొండిబకాయిలు క్యూ2లో జతకాగా, పునర్‌వ్యవస్థీకరించిన రుణాల మొత్తం రూ.1,076 కోట్లుగా నమోదైంది. మొండిబకాయిలపై ప్రొవిజనింగ్ మొత్తం గత క్యూ2లో రూ.508 కోట్ల నుంచి ఈ క్యూ2లో 625 కోట్లకు పెరిగింది. కాగా, నికర ఎన్‌పీఏలు 0.78 శాతం నుంచి 0.85 శాతానికి చేరాయి. ఈ ఏడాది జూన్ క్వార్టర్‌లో ఈ పరిమాణం 0.82 శాతం.
  
  ఇతర ముఖ్యాంశాలివీ...
 
  మొత్తం రుణాలు 16 శాతం వృద్ధి చెంది సెప్టెంబర్ చివరినాటికి రూ.3,17,786 కోట్లుగా నమోదయ్యాయి. బ్యాంక్ డిపాజిట్ల వృద్ధి క్యూ2లో 10 శాతంగా నమోదైంది.
 
  బీమా, బ్రోకింగ్ ఇతరత్రా అనుబంధ సంస్థలన్నింటినీ కలుపుకుంటే బ్యాంక్ కన్సాలిడేటెడ్ నికర లాభం క్యూ2లో 13 శాతం వృద్ధితో రూ.2,698 కోట్లకు పెరిగింది. మొత్తం ఆదాయం కూడా రూ.18,609 కోట్ల నుంచి రూ.19,016 కోట్లకు వృద్ధి చెందింది.
 
  ప్రస్తుత ఆర్థిక సంవత్సరం తొలి ఆరు నెలల కాలంలో బ్యాంక్ స్టాండెలోన్ నికర లాభం రూ.4,626 కోట్లు. క్రితం ఏడాది ఇదే కాలంలో రూ.3,771 కోట్లతో పోలిస్తే 22.64 శాతం ఎగబాకింది. మొత్తం ఆదాయం రూ. 23,495 కోట్ల నుంచి రూ.25,885 కోట్లకు పెరిగింది. తొలి ఆరు నెలల్లో కన్సాలిడేటెడ్ నికర లాభం రూ.4,467 కోట్ల నుంచి రూ.5,445కు(22 శాతం) ఎగసింది.
 
  శుక్రవారం ఐసీఐసీఐ బ్యాంక్ షేరు ధర బీఎస్‌ఈలో క్రితం ముగింపు స్థాయిలోనే రూ.1,021.65 వద్ద ఫ్లాట్‌గా స్థిరపడింది. ఎన్‌ఎస్‌ఈలో 0.14 శాతం స్వల్ప లాభంతో రూ.1,022.35 వద్ద ముగిసింది.
 
  
  సెప్టెంబర్ క్వార్టర్‌లో మెరుగైన పనితీరుకు ప్రధానంగా అధిక వడ్డీ ఆదాయం, ఫీజుల ఆదాయమే దోహదం చేసింది. కార్పొరేట్ రుణాలకు కాస్త దూరంగా ఉండటం, ఇదే సమయంలో రిటైల్ రుణాలపై మరింత ఎక్కువగా దృష్టిసారించాలన్న వ్యూహంతో బ్యాంక్ ముందుకెళ్తోంది. క్యూ2లో కార్పొరేట్ రుణాల వృద్ధి 11 శాతం కాగా, రిటైల్ రుణ వృద్ధి 20 శాతంగా నమోదవడమే దీనికి నిదర్శనం. ఇకపై కూడా ఇదే తీరును కొనసాగించడంపై దృష్టిపెడతాం.
  - చందా కొచర్, ఐసీఐసీఐ బ్యాంక్ సీఈఓ, ఎండీ


 న్యూయార్క్: ఫార్చ్యూన్ మ్యాగజైన్ రూపొందించిన అంతర్జాతీయ అగ్రశ్రేణి 50 మహిళా వ్యాపార వేత్తల జాబితాలో నలుగురు భారత మహిళలకు స్థానం దక్కింది. ప్రపంచవ్యాప్తంగా అత్యంత శక్తివంతమైన వ్యాపార మహిళల జాబితాలో ఐసీఐసీఐ బ్యాంక్ సీఈవో చందా కొచర్ నాలుగో స్థానంలో నిలిచారు. ఇంకా ఈ జాబితాలో  నేషనల్ స్టాక్ ఎక్స్ఛేంజ్ చీఫ్ చిత్రా రామకృష్ణ(17 వ స్థానం),  యాక్సిస్ బ్యాంక్ శిఖా శర్మ(32వ స్థానం), హెచ్‌ఎస్‌బీసీ నైనా లాల్ కిద్వాయ్(42వ స్థానం)లో ఉన్నారు.
  
   గత ఏడాది జాబితాలో ఐదో స్థానంలో ఉన్న కొచర్ ఈ ఏడాది జాబితాలో ఒక స్థానం మెరుగై నాలుగో స్థానానికి ఎగబాకారు. ఎన్‌ఎస్‌ఈ చీఫ్ చిత్రా రామకృష్ణన్ తొలిసారిగా ఈ జాబితాలో చోటు సాధించారు. ఈ జాబితాలో తొలి స్థానాన్ని బ్రెజిల్‌కు చెందిన ఇంధన దిగ్గజం పెట్రోబాస్ సీఈవో మరియా దాస్ గ్రేకాస్ ఫోస్టర్ సాధించారు. ఆ తర్వాతి స్థానాల్లో టర్కీకి చెందిన సుబాన్సి హోల్డింగ్స్ గులేర్ సుబాన్సి, ఆస్ట్రేలియా బ్యాంక్ దిగ్గజం, వెస్ట్‌ప్యాక్ సీఈవో గెయిల్ కెల్లీ ఉన్నారు. 
  
  ఇక అమెరికాకు ప్రత్యేకంగా రూపొందించిన ఈ ఏడాది టాప్ 50 శక్తివంతమైన వ్యాపార మహిళల జాబితాలో పెప్సికో ఇంద్రా నూయి తన రెండో  స్థానాన్ని ఈ ఏడాది కూడా నిలుపుకున్నారు. మొదటి స్థానంలో ఐబీఎం గిన్ని రొమెట్టీ, మూడో స్థానంలో డ్యుపాంట్ ఎల్లెన్ కుల్‌మన్‌లు ఉన్నారు. కంపెనీ పరిమాణం, అంతర్జాతీయంగా ఆ కంపెనీ నిర్వహిస్తున్న వ్యాపారం ప్రాముఖ్యత, ఆ వ్యక్తి వ్యాపార కెరీర్, సామాజిక, సాంస్కృతిక ప్రభావాలు తదితర అంశాల ఆధారంగా ఆ జాబితాను రూపొందించామని ఫార్చ్యూన్ మ్యాగజైన్ పేర్కొంది. 
  
  చందా కొచర్        ఐసీఐసీఐ    4వ ర్యాంక్
  చిత్రా రామకృష్ణన్ ఎన్‌ఎస్‌ఈ 17
  శిఖా శర్మ       యాక్సిస్ బ్యాంక్ 32
  నైనాలాల్ కిద్వాయ్ హెచ్‌ఎస్‌బీసీ 42
  


 న్యూయార్క్: ప్రపంచ వాణిజ్య రంగంలో అత్యంత శక్తిమంతుల జాబితాలో నలుగురు భారతీయ మహిళలు చోటు దక్కించుకున్నారు. ఐసీఐసీఐ బ్యాంక్ సీఈవో చందా కొచ్చర్ తన స్థానాన్ని మెరుగుపరుచుకున్నారు. ఫార్చ్యూన్ మేగజీన్ తాజాగా ప్రకటించిన బిజినెస్ వుమెన్ లీడర్స్ టాప్-50 జాబితాలో ఆమె నాలుగో ర్యాంక్లో నిలిచారు. గతేడాది పోలిస్తే కొచ్చర్ ఒక స్థానం మెరుగు పరుచుకున్నారు.
 
 నేషనల్ స్టాక్ ఎక్స్ఛేంజ్ చీఫ్ చిత్రా రామకృష్ణ 17వ స్థానం దక్కించుకున్నారు. ఈ జాబితాలో చిత్రకు తొలిసారిగా స్థానం దక్కింది. ఏక్సిక్ బ్యాంక్కు చెందిన శిఖా శర్మ 32, హెచ్ఎస్బీసీకి ప్రాతినిధ్యం వహిస్తున్న నైనా లాల్ కిద్వాయ్ 42 స్థానాల్లో నిలిచారు. బ్రెజిల్ ఇంధన కంపెనీ పెట్రోబ్రాస్ సీఈవో మారియా దాస్ గ్రాకస్ ఫోస్టర్ అగ్రస్థానం దక్కించుకున్నారు. అమెరికా తరపున రూపొందించిన ఇదే జాబితాలో భారత నేపథ్యం కలిగిన పెప్సికో  ఇండియా చీఫ్ ఇంద్రా నూయి రెండో స్థానంలో ఉన్నారు.


  జైపూర్: యువతలో నైపుణ్యతను పెంపొందించడానికి ప్రైవేటు రంగ బ్యాంకింగ్ దిగ్గజం ఐసీఐసీఐ శుక్రవారం ఇక్కడ ఒక అకాడమీని ప్రారంభించింది. కార్పొరేట్ సామాజిక బాధ్యతల్లో (సీఎస్‌ఆర్) భాగంగా  ఈ అకాడమీకి రూపకల్పన చేసింది. సమాజంలో ఆర్థికంగా బలహీన వర్గాల యువతకు వృత్తి విద్యా  శిక్షణా అవకాశాలను కల్పించడం లక్ష్యంగా ఈ అకాడమీ పనిచేస్తుంది. బ్యాంక్ మేనేజింగ్ డెరైక్టర్, చీఫ్ ఎగ్జిక్యూటివ్  చందా కొచర్ ఈ అకాడమీని ప్రారంభించారు.
  
  ఈ సందర్భంగా ఆమె మాట్లాడుతూ, భారత్ సమ్మిళిత వృద్ధిలో భాగంగా దేశ వ్యాప్తంగా తొమ్మిది శిక్షణా కేంద్రాలను ఏర్పాటు చేస్తున్నట్లు పేర్కొన్నారు. ఏర్పాటు చేసిన తొలియేడాదే 5 వేల మందికి శిక్షణా కార్యక్రమాలు నిర్వహించాలన్నది లక్ష్యమని తెలిపారు. 2016 నాటికి దేశ వ్యాప్తంగా 15,000 మందికి శిక్షణా అవకాశాలు కల్పించాలన్నది ధ్యేయమని వెల్లడించారు. ఐసీఐసీఐ ఫౌండేషన్ ద్వారా హైదరాబాద్, చెన్నై, కోయంబత్తూర్ వంటి పట్టణాల్లో ఈ శిక్షణా అభివృద్ధి కేంద్రాలను ఏర్పాటు చేయనున్నట్లు వెల్లడించారు. బ్యాంకుకు తగిన నగదు లభ్యత (లిక్విడిటీ) ప్రస్తుతం ఉన్నట్లు ఈ సందర్భంగా వెల్లడించారు.