విజయవాడ, సాక్షి: వైఎస్‌ జగన్‌మోహన్‌రెడ్డిపై హత్యాయత్నం కేసులో ఏ1 నిందితుడు వేముల సతీష్‌, మంత్రి నారా లోకేష్‌ను కలిశాడు. శనివారం ఉదయం లోకేష్‌ నిర్వహించే ప్రజాదర్బాకు వెళ్లి.. ఆయనతో ఫొటో దిగాడు. వైఎస్‌ జగన్‌ హత్యాయత్నం కేసులో ప్రధాన నిందితుడిగా ఉన్న సతీష్‌కు టీడీపీతో లింకులు ఉన్నాయంటూ వైఎస్సార్‌సీపీ ఎప్పటి నుంచో ఆరోపిస్తోంది. అయితే ఎన్నికల్లో కూటమి ప్రభుత్వం గెలిచాక.. సతీష్‌ లోకేష్‌ను కలిసేందుకు యత్నించాడు. అయితే ఎందుకనో అది కుదరలేదు. తాజాగా ఓ టీడీపీ నేత సహకారంతోనే ఈ అపాయింట్‌మెంట్‌ దక్కినట్లు తెలుస్తోంది. ఎన్నికల ప్రచారంలో భాగంగా.. ఏప్రిల్‌ 13వ తేదీ రాత్రి విజయవాడ అజిత్‌సింగ్‌నగర్‌లో మేమంతా సిద్ధం బస్సు యాత్ర కొనసాగుతుండగా నాటి సీఎం జగన్‌పై దాడి జరిగింది. అయితే ప్రజలకు అభివాదం చేస్తూ పక్కకు తిరగడంతో అదృష్టతవశాత్తూ ఆయన కంటికి పైన భాగంలో మాత్రమే గాయమైంది. ఈ కేసులో ఏప్రిల్‌ 18వ తేదీన వేముల సతీష్‌ను అరెస్ట్‌ చేసిన పోలీసులు.. నెల్లూరు జైలుకు తరలించారు. అయితే ఇందులో పొలిటికల్‌ కాన్‌స్పిరసీ (రాజకీయ కుట్ర) ఉందని పోలీసులు సంచలన ప్రకటన చేశారు. అంతేకాదు జగన్‌ను హత్య చేయాలనే కుట్రతోనే వేముల సతీష్‌ పదునైన రాయితో దాడి చేసినట్లు రిమాండ్‌ రిపోర్ట్‌లో పేర్కొన్నారు. ఆ తర్వాత మే 28వ తేదీన విజయవాడ కోర్టు కండిషనల్‌ బెయిల్‌ ఇవ్వడంతో సతీష్‌ బయటకు వచ్చాడు. ఆ తర్వాత అతనికి పలువురు టీడీపీ నేతలు మద్దతుగా నిలవడం విశేషం.

సాక్షి,అమరావతి: చంద్రబాబుకు ఏ దురుద్దేశమూ లేకపోతే ఇటీవల అమరావతి పరిసర ప్రాంతాల్లో పర్యటిస్తూ సీఎం జగన్‌ను రాళ్లతో కొట్టండి అని ఎందుకు అన్నారో సమాధానం చెప్పాలని వైఎస్సార్‌సీపీ యూకే సోషల్‌ మీడియా సభ్యులు భూమిరెడ్డి కార్తీక్‌ టీడీపీని డిమాండ్‌ చేశారు. బాబు అన్న కొద్ది గంటల్లోనే సీఎం జగన్‌పై హత్యాయత్నం జరిగిందని గుర్తు చేశారు. దీనిని వైఎస్సార్‌సీపీ యూకే విభాగం తీవ్రంగా ఖండిస్తుందని పేర్కొన్నారు. ఆదివారం యూకేలో సీఎం జగన్‌పై  హత్యాయత్నం ఘటనను ఖండిస్తూ నిరసన చేపట్టారు. కార్తీక్‌ మాట్లాడుతూ.. విజయవాడలో సీఎం జగన్‌ చేపట్టిన బస్సుయాత్రకు ప్రజలు పెద్ద ఎత్తున మద్దతు పలికారని, దాన్ని చంద్రబాబు ఓర్చుకోలేక పోయారని అన్నారు. యాత్ర ఇలాగే సాగితే టీడీపీకి రాజకీయ భవిష్యత్తు ఉండదని భావించే సీఎం జగన్‌పై ఘాతుకానికి తెగబడ్డారని విమర్శించారు. రానున్న ఎన్నికల్లో సీఎం జగన్‌ కచి్చతంగా గెలుస్తారని ధీమా వ్యక్తం చేశారు. పాలెం క్రాంతి కుమార్‌ రెడ్డి, మలిరెడ్డి కిషోర్, వడ్డూరి అప్పాజీ, వీర పులిపాకల, వజ్రాల రాజశేఖర్, భీమిరెడ్డి ప్రతాప్, మాదిరెడ్డి శ్రీకాంత్, వెంకట్‌ రమణ మామిడిశెట్టి, వంశీ కృష్ణా రెడ్డి కూకటి, గుండం సాయి తేజ తదితరులు పాల్గొన్నారు.

సాక్షి, కాకినాడ: 2018 అక్టోబర్‌లో విశాఖ ఎయిర్ పోర్టులో అప్పటి ప్రతిపక్ష నేత వైఎస్‌ జగన్‌పై  హత్యాయత్నం జరిగితే.. కోడి కత్తి కేసు అని చంద్రబాబు, ఎల్లో మీడియా ఎగతాళి చేశాయని మండిపడ్డారు వైఎస్సార్‌సీపీ జిల్లా అధ్యక్షులు, మాజీ మంత్రి కురసాల కన్నబాబు. చంద్రబాబు ఎప్పుడైనా కోడి కత్తి చూశారా? అని ప్రశ్నించారు. ఎంత పదునుగా ఉంటుందో ఓసారి టచ్ చేసి చూడండి అని హెచ్చరించారు. ఈ మధ్య కోడి కత్తి తగిలి ఇద్దరు చనిపోయారని మీ ఈనాడు పత్రికే రాసింది చూసుకోండి అని చంద్రబాబుకు ఆయన హితవు పలికారు. 'వైఎస్‌ జగన్‌పై హత్యాయత్నం జరిగిందని ఛార్జిషీటు పేర్కొంది. దీనిపై లోతైన అధ్యయనం చేయాల్సి ఉంది. ఈనాడు కథనంలో దీనిపై తీర్పు కూడా ఇచ్చేశారు. తీర్పులు ఇవ్వడానికి మీరెవరూ? మీకు ఏం హక్కుఉంది.  నిందితుని వాంగూల్మంతో తీర్పులు ఇచ్చేస్తున్నారు. చంద్రబాబు నోటికి వచ్చినట్లు మాట్లాడితే ఈనాడు అచ్చేస్తుంది. ఎన్ఐఎ ఈ కేసును లోతుగా దర్యాప్తు చేయమని కోరితే మీకు ఇబ్బంది ఏంటి? మీరెందుకు భుజాలు తడుముకుంటున్నారు. ఈ సంఘటనను చులకనగా తీసిపడేస్తే చంద్రబాబును కాపాడొచ్చు అని మీ దుర్బుద్ధి కాదా? చంద్రబాబు ప్రభుత్వం అధికారంలో ఉన్నప్పుడు ఆయనకు బాధ్యత లేదా? నిందితుడి కత్తి భుజానికి కాకుండా మెడకు తగిలి ఉంటే పరిస్ధితి ఏంటి?' అని కురసాల కన్నబాబు ఆగ్రహం వ్యక్తం చేశారు. చదవండి: ‘చంద్రబాబు, లోకేశ్‌ను తరిమికొడతాం’

సాక్షి, అమరావతి: గత ఏడాది విశాఖ విమానాశ్రయంలో వైఎస్‌ జగన్‌మోహన్‌రెడ్డిపై జరిగిన హత్యాయత్నం కేసులో హైకోర్టు సంచలన తీర్పునిచ్చింది. ఈ కేసులో నిందితుడు జనుపల్లి శ్రీనివాసరావు బెయిల్‌ రద్దు చేస్తూ శుక్రవారం తీర్పు వెల్లడించింది. నిందితుడు శ్రీనివాస్‌ బెయిల్‌ రద్దు చేయాలంటూ ఎన్‌ఐఏ వేసిన పిటిషన్‌పై ఇవాళ హైకోర్టులో ఇరువర్గాల న్యాయవాదులు తమ వాదనలు వినిపించారు. ఎన్‌ఐఏ వాదనతో ఏకీభవించిన న్యాయస్థానం శ్రీనివాస్‌ బెయిల్‌ రద్దు చేసింది. అయితే నిందితుడు బెయిల్‌పై అప్పీలు చేసుకునే అవకాశాన్ని న్యాయస్థానం కల్పించింది. శ్రీనివాస్‌కు ఈ ఏడాది మే 22న బెయిల్‌ మంజూరు కాగా, 25న జైలు నుంచి విడుదల అయ్యాడు. దీంతో కోర్టు మంజూరు చేసిన బెయిల్‌ను రద్దు చేయాలని జాతీయ దర్యాప్తు సంస్థ (ఎన్‌ఐఏ) ప్రత్యేక పబ్లిక్‌ ప్రాసిక్యూటర్‌ ....హైకోర్టులో అభ్యర్థించారు. ఈ కేసులో దర్యాప్తు ఇంకా పూర్తి కాలేదన్న విషయాన్ని కింది కోర్టు పరిగణనలోకి తీసుకోలేదని, అసలు బెయిల్‌ మంజూరుకు కారణాలు కూడా తెలపలేదన్నారు. జగన్‌పై జరిగిన హత్యాయత్నం ఘటన పౌర విమానయాన భద్రత చట్టం ప్రకారం చట్ట వ్యతిరేక కార్యకలాపాల నిర్వచన పరిధిలోకి వస్తుందని, ఈ చట్టంలోని సెక్షన్‌ 6ఏ ప్రకారం బెయిల్‌ మంజూరుకు కారణాలు చెప్పడం తప్పనిసరని కోర్టుకు విన్నవించారు. 2018 అక్టోబర్ 25న వైఎస్‌ జగన్‌పై శ్రీనివాసరావు కత్తితో దాడి చేసిన సంగతి తెలిసిందే. ప్రజా సంకల్ప యాత్రలో పాల్గొని... హైదరాబాద్‌కు తిరిగి వస్తున్న సమయంలో విశాఖ ఎయిర్‌పోర్టు లాంజ్‌లో ఆయనపై దాడి జరిగింది. 

సాక్షి, విజయవాడ : గత ఏడాది ముఖ్యమంత్రి వైఎస్‌ జగన్‌మోహన్‌రెడ్డిపై  విశాఖపట్నం విమానాశ్రయంలో హత్యాయత్నానికి పాల్పడిన జె.శ్రీనివాసరావు బెయిల్‌ను ఎన్‌ఐఏ కోర్టు పొడగించింది. జూలై 12 వరకు బెయిల్‌ను పొడగిస్తూ ఏఐఏ కోర్టు తీర్పు వెల్లడించింది. బుధవారం విజయవాడలోని ఎన్ఐఏ కోర్టులో శ్రీనివాసరావును పోలీసులు ప్రవేశపెట్టారు.ఈ సందర్భంగా శ్రీనివాసరావు బెయిల్ పిటిషన్ ను రద్దు చేయాలంటూ అధికారులు కోర్టును కోరారు.  విచారణ చేపట్టిన ధర్మాసనం శ్రీనివాస్‌రావు బెయిల్‌ను వచ్చే నెల 12 వరకు పొడగించింది. 2018 అక్టోబర్ 25న వైఎస్‌ జగన్‌పై శ్రీనివాసరావు కత్తితో దాడి చేసిన సంగతి తెలిసిందే. ప్రజా సంకల్ప యాత్రలో పాల్గొని... హైదరాబాద్‌కు తిరిగి వస్తున్న సమయంలో ఎయిర్ పోర్ట్ లాంజ్ లో ఆయనపై దాడి జరిగింది. 

సాక్షి, అమరావతి: గత ఏడాది వైఎస్‌ జగన్‌పై విశాఖపట్నం విమానాశ్రయంలో హత్యాయత్నానికి పాల్పడిన జె.శ్రీనివాసరావుకు ఎన్‌ఐఏ కోర్టు మంజూరు చేసిన బెయిల్‌ను రద్దు చేయాలని జాతీయ దర్యాప్తు సంస్థ (ఎన్‌ఐఏ) ప్రత్యేక పబ్లిక్‌ ప్రాసిక్యూటర్‌ జి.సిద్ధిరాములు బుధవారం హైకోర్టును అభ్యర్థించారు. ఈ కేసుకు సంబంధించిన కీలక అంశాలను పరిగణనలోకి తీసుకోకుండానే శ్రీనివాసరావుకు ఎన్‌ఐఏ కోర్టు బెయిల్‌ మంజూరు చేసిందని తెలిపారు. ఈ కేసులో దర్యాప్తు ఇంకా పూర్తి కాలేదన్న విషయాన్ని కింది కోర్టు పరిగణనలోకి తీసుకోలేదని వివరించారు. అసలు బెయిల్‌ మంజూరుకు కారణాలు కూడా తెలియచేయలేదన్నారు. జగన్‌పై జరిగిన హత్యాయత్నం ఘటన పౌర విమానయాన భద్రత చట్టం ప్రకారం చట్ట వ్యతిరేక కార్యకలాపాల నిర్వచన పరిధిలోకి వస్తుందని, ఈ చట్టంలోని సెక్షన్‌ 6ఏ ప్రకారం బెయిల్‌ మంజూరుకు కారణాలు చెప్పడం తప్పనిసరని ఆయన వివరించారు. ఆ తరువాత శ్రీనివాసరావు తరఫు న్యాయవాది మట్టా జయకర్‌ వాదనలు వినిపించారు.

సాక్షి, అమరావతి: ఆంధ్రప్రదేశ్‌ ముఖ్యమంత్రి వైఎస్‌ జగన్‌మోహన్‌రెడ్డిపై విశాఖ ఎయిర్‌పోర్టులో హత్యాయత్నానికి పాల్పడిన నిందితుడు జనుపల్లి శ్రీనివాసరావు బెయిల్‌ రద్దు చేయాలని కోరుతూ.. ఏపీ హైకోర్టులో జాతీయ దర్యాప్తు సంస్థ (ఎన్‌ఐఏ) పిటిషన్‌ దాఖలు చేసింది. కేసు దర్యాప్తును ప్రభావితం చేసే అవకాశం ఉందని, కావున అతని బెయిల్‌ను రద్దు చేయాల్సిందిగా ఎన్‌ఐఏ పేర్కొన్నట్లు తెలుస్తోంది. దీనిపై హైకోర్టు త్వరలోనే విచారణ జరిపే అవకాశం ఉంది. కాగా వైఎస్‌ జగన్‌పై హత్యాయత్నం కేసులో శ్రీనివాసరావు ప్రధాన నిందితుడిగా ఉన్న విషయం తెలిసిందే. ఆయన మే 25న రాజమండ్రి సెంట్రల్ జైలు నుంచి విడుదలయ్యాడు. బెయిల్‌ పత్రాలు అందడంతో జైలు అధికారులు శ్రీనివాసరావుని విడుదల చేశారు. 

సాక్షి, తూర్పు గోదావరి జిల్లా(రాజమండ్రి) : వైఎస్సార్‌ కాంగ్రెస్‌ పార్టీ అధినేత వైఎస్‌ జగన్‌మోహన్‌రెడ్డిపై విశాఖ ఎయిర్‌పోర్టులో హత్యాయత్నానికి పాల్పడిన నిందితుడు జనుపల్లి శ్రీనివాసరావు రాజమండ్రి సెంట్రల్ జైలు నుంచి శనివారం విడుదలయ్యాడు. బెయిల్‌ పత్రాలు అందడంతో జైలు అధికారులు శ్రీనివాసరావుని విడుదల చేశారు.  అనంతరం శ్రీనివాసరావు మాట్లాడుతూ..  'ఆ రోజు సంఘటన అనుకోకుండా జరిగింది. నేను నార్కో అనాలసిస్ టెస్ట్ కూడా సిద్ధం. వైఎస్‌ జగన్‌పై కావాలని దాడి చేయలేదు. రైతులు, మహిళలు, ఇతర సమస్యల గురించి వైఎస్‌ జగన్‌తో మాట్లాడాలనుకున్నాను' అంటూ శ్రీనివాస్ నీతి కబుర్లు చెప్పాడు. తానొక చెఫ్‌నని అందుకే ఆరోజు తన వద్ద మూడు కత్తులు, ఫోర్క్ ఉన్నాయని తెలిపాడు.

సాక్షి, విజయవాడ: వైఎస్సార్‌ కాంగ్రెస్‌ పార్టీ అధినేత వైఎస్‌ జగన్‌మోహన్‌రెడ్డిపై జరిగిన హత్యాయత్నం కేసు నిందితుడు శ్రీనివాస్‌ను పోలీసులు ఎన్‌ఐఏ కోర్డులో హాజరుపరిచారు. విచారణలో భాగంగా రిమాండ్‌లో ఉన్న శ్రీనివాస్‌ జ్యూడిషీయల్‌ రిమాండ్‌ ఇవాల్టితో ముగియనున్న విషయం తెలిసిందే. తనకు ఆరోగ్యం సరిగా లేదని, చికిత్సం కోసం బెయిల్‌ మంజూరు చేయాలని శ్రీనివాస్‌ పిటిషన్‌ దాఖలు చేశారు. ఆయన పిటిషన్‌పై కోర్టులో వాదనలు కొనసాగుతున్నాయి. లేఖ ద్వారా న్యాయమూర్తికి బెయిల్‌ పిటిషన్‌పై గతంలోనే విన్నవించిన విషయం తెలిసిందే. ఆయన పిటిషన్‌పై కోర్టు నేడు తుది నిర్ణయం తీసుకోనుంది.

జైలు నుంచి ఆస్పత్రికి.. ఆస్పత్రి నుంచి జైలుకు.. అంతా గోప్యమే ఎన్నో అనుమానాలకు దారితీస్తున్న అధికారుల తీరు సాధారణ వార్డులో చికిత్స అని చెప్పి ప్రత్యేక సౌకర్యాలున్న ఐసీయూకు తరలింపు మామూలు జ్వరానికి ఇంత హడావుడి ఎందుకు? ఆస్పత్రి అంతా కెమేరాలున్నా.. ఒక్క ఐసీయూలో మాత్రం లేవు ముందస్తు ప్రణాళికలో భాగంగా టీడీపీ పెద్దలు కలిసినట్లు సమాచారం జైలులో అయితే రికార్డుల్లో నమోదవుతుందని ఆస్పత్రి ఎంపిక? కేసును తప్పుదారి పట్టించే వ్యూహాలు పన్నుతున్నట్లు అనుమానాలు   రాజమహేంద్రవరం క్రైం/ముమ్మిడివరం: వైఎస్సార్‌సీపీ అధ్యక్షుడు, ప్రతిపక్ష నేత వైఎస్‌ జగన్‌పై హత్యాయత్నం కేసులో తూర్పుగోదావరి జిల్లా రాజమహేంద్రవరం సెంట్రల్‌ జైలులో రిమాండ్‌ ముద్దాయిగా శిక్ష అనుభవిస్తున్న జనుపల్లి శ్రీనివాసరావును జైలు నుంచి ఆస్పత్రికి తరలించడంపై పలు అనుమానాలు వ్యక్తమవుతున్నాయి. వైద్యులు మాత్రం వైరల్‌ ఫీవర్‌ అని చెబుతున్నారు. అయితే అంత హడావుడిగా ప్రభుత్వ ఆస్పత్రికి తరలించి రెండు రోజులపాటు అక్కడే ఉంచి పలువురు అపరిచిత వ్యక్తులతో మాట్లాడించడం వెనుక కుట్ర దాగుందని ఆరోపణలు వెల్లువెత్తుతున్నాయి. మీడియాకు విషయం తెలియడంతో బుధవారం రాజమహేంద్రవరం త్రీటౌన్‌ సీఐ శేఖర్‌బాబు ఆధ్వర్యంలో ఎస్కార్ట్‌ పోలీసులు పెద్ద ఎత్తున ప్రభుత్వ ఆస్పత్రికి చేరుకొని బందోబస్తు మధ్య సెంట్రల్‌ జైల్‌కు తరలించారు. ఈ నెల 22వ తేదీ సోమవారం శ్రీనివాసరావును ప్రభుత్వ అస్పత్రికి తీసుకువచ్చినట్లు ఆస్పత్రి సూపరింటెండెంట్‌ టి.రమేష్‌ కిశోర్, ఆర్‌ఎంఓ డాక్టర్‌ పద్మశ్రీ, అతనికి చికిత్స అందించిన డాక్టర్లు నాయక్, చంద్రశేఖర్‌లు పేర్కొన్నారు. అతనికి డెంగీ, మలేరియా, టైఫాయిడ్, హెచ్‌ఐవీ వంటి పరీక్షలు నిర్వహించినట్లు తెలిపారు. మలేరియా వ్యాధితో బాధపడుతున్నట్లు గుర్తించి చికిత్స అందించినట్లు డాక్టర్‌ నాయక్‌ పేర్కొన్నారు. శ్రీనివాసరావుకు హార్ట్‌ ఎటాక్‌ లక్షణాలున్నాయని, ఇతర వ్యాధులు ఉన్నట్లు మీడియాలో వస్తున్నవన్నీ వదంతులేనని, అతను ప్రస్తుతం పూర్తి ఆరోగ్యంగా ఉన్నాడని వైద్యులు స్పష్టం చేశారు. గోప్యత పాటించిన జైలు అధికారులు... శ్రీనివాసరావును ఆస్పత్రికి తరలించిడంతో అటు జైలు అధికారులు, ఇటు ఆస్పత్రి వర్గాలు మొదటి నుంచి మీడియాను తప్పుదోవ పట్టించే ప్రయత్నం చేశారు. ఆస్పత్రిలో శ్రీనివాసరావు ఎక్కడ ఉన్నాడో కూడా తెలియనీయకుండా గుట్టుగా ఉంచారు. సాధారణ ఖైదీల వార్డులో చికిత్స అందిస్తున్నట్లు మొదట సమాచారం ఇచ్చారు. అయితే సకల సౌకర్యాలు, ఏసీ ఉన్న ఐసీయూ వార్డులో ఉంచారు. ఆస్పత్రిలో అన్ని ప్రాంతాల్లో సీసీ కెమేరాలు ఉన్నప్పటికీ శ్రీనివాసరావును ఉంచిన ఐసీయూలో మాత్రం కెమేరాలు లేకపోవడం గమనార్హం. సాధారణ జ్వరానికి ఐసీయూలో ఎందుకు ఉంచారనే ప్రశ్నకు ఎవరూ సరైన సమాధానం ఇవ్వడం లేదు. మీడియా కంట పడకుండా తరలించేందుకు ఏర్పాట్లు చేశారు. అప్పటికే మీడియా చేరుకోవడంతో శ్రీనివాసరావు ముఖానికి టవల్‌ చుట్టి పోలీస్‌ ఎస్కార్ట్‌ కారు ఎక్కించి జైలుకు తరలించారు. ముందస్తు జాగ్రత్తతో మంతనాలు.. రాష్ట్రంలో వైఎస్సార్‌సీపీ ప్రభుత్వం ఏర్పాటు చేసే అవకాశం ఉండడంతో శ్రీనివాసరావును టీడీపీ పెద్దలు, పలువురు అపరిచిత వ్యక్తులు ఆస్పత్రిలో కలిసినట్లు తెలుస్తోంది. సెంట్రల్‌ జైలులో ములాఖత్‌ కోసం ఎవరు కలసినా ఆధార్‌ కార్డు, రేషన్‌ కార్డు, వారి పూర్తి వివరాలు ఇవ్వాల్సి ఉంటుంది. ఈ వివరాలు మొత్తం జైలు రికార్డుల్లో నమోదవుతాయి. అలా నమోదు కాకుండా ముందస్తు జాగ్రత్తలతో మంతనాలు చేసేందుకు ప్రభుత్వ ఆస్పత్రిని వేదికగా చేసుకున్నారనే అనుమానాలు వ్యక్తమవుతున్నాయి. కేసుకు సంబంధించిన వివరాలు బయటపెట్టకుండా ఏవిధంగా వ్యవహరించాలనే అంశాలపై శ్రీనివాసరావుతో చర్చించి ఉంటారనే ఆరోపణలు వెల్లువెత్తుతున్నాయి. సాక్ష్యాలు తారుమారు చేసి కేసును తప్పుదారి పట్టించేందుకు వ్యూహం పన్నుతున్నట్టు, ఇందుకు కొంతమంది జైలు, ఆస్పత్రి వర్గాలు సహకరించినట్టుగా భావిస్తున్నారు. కాగా, శ్రీనివాసరావును ఆస్పత్రికి తీసుకెళ్లడంతో తూర్పు గోదావరి జిల్లా ముమ్మిడివరం మండలం ఠాణేల్లంకలో తల్లిదండ్రులు తాతారావు, సావిత్రి, సోదరుడు సుబ్బరాజు ఆందోళనకు గురయ్యారు. సుబ్బరాజు ఆస్పత్రికి వెళ్లి సోదరుడిని పరామర్శించాడు.

సాక్షి, తూర్పు గోదావరి :  వైఎస్సార్‌సీపీ అధ్యక్షుడు వైఎస్‌ జగన్‌మోహన్‌ రెడ్డిపై హత్యాయత్నం కేసులో నిందితుడు జనుపల్లి శ్రీనివాస్‌రావు తీవ్ర అనారోగ్యం పాలయ్యాడు. అతన్ని రాజమండ్రి ప్రభుత్వాస్పత్రిలో చేర్పించారు. శ్రీనివాస్‌ ఆరోగ్యానికి సంబంధించి మరిన్ని వివరాలు తెలియాల్సి ఉంది. కాగా, గతేడాది అక్టోబర్‌ 25న విశాఖ ఎయిర్‌పోర్ట్‌లో వైఎస్‌ జగన్‌పై.. టీడీపీ నేతకు చెందిన ఫ్యూజన్‌ ఫుడ్స్‌ రెస్టారెంట్‌లో పనిచేసే శ్రీనివాసరావు పదునైన కత్తితో హత్యాయత్నానికి పాల్పడిన సంగతి తెలిసిందే. ఈ ఘటన జరిగిన కొద్దిసేపటికే సీఎం చంద్రబాబుతో పాటు డీజీపీ, మంత్రులు, టీడీపీ నేతలు తెరపైకి వచ్చి నిందితుడు శ్రీనివాసరావు వైఎస్‌ జగన్‌ అభిమానే అంటూ తప్పుడు ప్రచారం చేశారు. హత్యాయత్నాన్ని చాలా తేలిగ్గా తీసిపారేశారు. ఈ కేసును తొలుత రాష్ట్ర ప్రభుత్వం సిట్‌కు అప్పగించింది. అయితే, ప్రభుత్వ పెద్దల ఆదేశాల మేరకు ఈ కేసును శ్రీనివాసరావు ఒక్కడికే పరిమితం చేసి, సూత్రధారులు, కుట్రదారులను తప్పించారు. చివరకు హైకోర్టు ఆదేశాల మేరకు ఈ కేసు విచారణను ఎన్‌ఐఏకు అప్పగించారు. అయితే, ఈ కేసులో ఇంకా ప్రాథమిక దర్యాప్తు కూడా పూర్తి కాకుండానే చంద్రబాబు సహా పలువురు టీడీపీ నేతలు ఈ కేసును మొదటి నుంచీ తప్పుదోవ పట్టించేలా ఇష్టారీతిన వ్యాఖ్యలు చేస్తున్నారని  జాతీయ దర్యాప్తు సంస్థ (ఎన్‌ఐఏ) అధికారి మహ్మద్‌ సాజిద్‌ఖాన్‌ ఇటీవల ఆగ్రహం వ్యక్తం చేశారు. (చదవండి : మా విచారణ పూర్తికాలేదు)

సాక్షి ప్రతినిధి, విశాఖపట్నం: ప్రతిపక్ష నేత, వైఎస్సార్‌సీపీ అధినేత వైఎస్‌ జగన్‌పై విశాఖ ఎయిర్‌పోర్ట్‌లో జరిగిన హత్యాయత్నం కేసులో ఇంకా తమ విచారణ పూర్తి కాలేదని జాతీయ దర్యాప్తు సంస్థ (ఎన్‌ఐఏ) అధికారి మహ్మద్‌ సాజిద్‌ఖాన్‌ వెల్లడించారు. ఇంకా ప్రాథమిక దర్యాప్తు కూడా పూర్తి కాలేదని తెలిపారు. సీఎం చంద్రబాబు సహా పలువురు టీడీపీ నేతలు ఈ కేసును మొదటి నుంచీ తప్పుదోవ పట్టించేలా ఇష్టారీతిన వ్యాఖ్యలు చేస్తున్న సంగతి తెలిసిందే. ఈ కేసులో కుట్ర కోణమేదీ లేదని ఏకంగా ఎన్‌ఐఏ తేల్చేసినట్లు ప్రచారం చేస్తున్నారు. దీన్ని ఎన్‌ఐఏ అధికారులు తీవ్రంగా తప్పుపడుతున్నారు. గతేడాది అక్టోబర్‌ 25న విశాఖ ఎయిర్‌పోర్ట్‌లో వైఎస్‌ జగన్‌పై.. టీడీపీ నేతకు చెందిన ఫ్యూజన్‌ ఫుడ్స్‌ రెస్టారెంట్‌లో పనిచేసే శ్రీనివాసరావు పదునైన కత్తితో హత్యాయత్నానికి పాల్పడ్డాడు. ఈ ఘటన జరిగిన కొద్దిసేపటికే సీఎం చంద్రబాబుతో పాటు డీజీపీ, మంత్రులు, టీడీపీ నేతలు తెరపైకి వచ్చి నిందితుడు శ్రీనివాసరావు వైఎస్‌ జగన్‌ అభిమానే అంటూ తప్పుడు ప్రచారం చేశారు. హత్యాయత్నాన్ని చాలా తేలిగ్గా తీసిపారేశారు. సిట్‌ కూడా ప్రభుత్వ పెద్దల ఆదేశాల మేరకు ఈ కేసును శ్రీనివాసరావు ఒక్కడికే పరిమితం చేసి, సూత్రధారులు, కుట్రదారులను తప్పించారు.   ఎన్‌ఐఏకు మొదట్నుంచీ సహాయనిరాకరణే..  చివరకు హైకోర్టు ఆదేశాల మేరకు ఈ కేసు విచారణ చేపట్టిన ఎన్‌ఐఏకు.. రాష్ట్ర ప్రభుత్వ ఆదేశాల మేరకు విశాఖ పోలీసులు సహాయ నిరాకరణ చేశారు. కేసు వివరాలు సైతం ఎన్‌ఐఏ అధికారులకు వెల్లడించలేదు. సీఎం చంద్రబాబు స్వయంగా ఎన్‌ఐఏ విచారణను వ్యతిరేకిస్తూ కేంద్రానికి లేఖ రాశారు. ఓ దశలో సుప్రీంకోర్టుకు సైతం వెళ్లాలని యోచించారు. ప్రభుత్వ పెద్దల ఆదేశాల మేరకు విశాఖ పోలీసులు ఓ దశలో ఏకంగా కోర్టుకు కూడా ఈ కేసు సీడీ ఫైల్‌ ఇచ్చేందుకు నిరాకరించారు.  ఎన్‌ఐఏ ప్రధాన దర్యాప్తు అధికారి (సీఐవో) మహ్మద్‌ సాజిద్‌ఖాన్‌తో సహా అధికారుల బృందాన్ని విశాఖ పోలీసులు తీవ్ర ఇబ్బందులకు గురి చేశారు. చివరకు న్యాయస్థానం జోక్యం చేసుకోవడంతో చార్జిషీట్‌ ఫైల్‌ తీసుకుని ఎన్‌ఐఏ విచారణ చేపట్టింది. ఆ ఫైల్‌లోని వివరాలు ఆధారంగా దర్యాప్తు మొదలుపెట్టారు.  పదేపదే తప్పుడు ప్రకటనలు..  సీఎం చంద్రబాబు సిట్‌ మాదిరే ఈ కేసులో ఏమీ లేదంటూ ఎన్‌ఐఏ తేల్చేసిందని ఇష్టారీతిన పదేపదే తప్పుడు ప్రకటనలు చేస్తున్నారు. ఎన్నికల ప్రచారంలో భాగంగా ఆయన బహిరంగసభల్లో కోడికత్తి కేసుపై ఎన్‌ఐఏ వాళ్లు ఏం పీకారు.. మేం చెప్పిందే వాళ్లూ చెప్పారంటూ అసత్య ప్రకటనలు చేస్తున్నారు. దీనిపై ఎన్‌ఐఏ తీవ్ర అభ్యంతరం వ్యక్తం చేసింది. మేమింకా ప్రాథమిక దర్యాప్తు కూడా పూర్తి చేయలేదని సీఐవో సాజిద్‌ ఖాన్‌ వెల్లడించారు. విచారణ కొనసాగుతున్న దశలో.. వివరాలేమీ చెప్పలేమన్నారు.  

సాక్షి, అమరావతి : వైఎస్సార్‌ కాంగ్రెస్‌ పార్టీ అధినేత, ప్రతిపక్ష నేత వైఎస్‌ జగన్‌మోహన్‌రెడ్డిపై విశాఖపట్నం విమానాశ్రయంలో జరిగిన హత్యాయత్నానికి సంబంధించిన కేసు విచారణను ఇకపై ఇన్‌ కెమెరా ద్వారా చేపట్టాలని విజయవాడలోని జాతీయ దర్యాప్తు సంస్థ (ఎన్‌ఐఏ) ప్రత్యేక కోర్టు నిర్ణయించింది. ఈ కేసుకు సంబంధించిన ఇరుపక్షాల న్యాయవాదులు తప్ప, మరెవ్వరూ కూడా ఈ కేసు విచారణ సమయంలో కోర్టులో ఉండరాదని స్పష్టంచేసింది. అలాగే, ఇకపై ఈ కేసుకు సంబంధించి కోర్టులో జరిగే విచారణపై ఎలాంటి వార్తలు రాయడంగానీ, ప్రసారం చేయడంగానీ చేయరాదని పత్రికలు, ఎలక్ట్రానిక్‌ మీడియాను ఆదేశించింది. తదుపరి ఉత్తర్వులు ఇచ్చేవరకు ఈ ఆదేశాలు అమల్లో ఉంటాయని స్పష్టంచేసింది. ఈ మేరకు ఎన్‌ఐఏ ప్రత్యేక కోర్టు న్యాయమూర్తి బీవీఎల్‌ఎన్‌ చక్రవర్తి శుక్రవారం ఉత్తర్వులు జారీచేశారు. జగన్‌పై జరిగిన హత్యాయత్నం కేసులో ఎన్‌ఐఏ దర్యాప్తు చేస్తున్న విషయం తెలిసిందే. ఇటీవల ఈ కేసులో ఎన్‌ఐఏ చార్జిషీట్‌ కూడా దాఖలు చేసింది. చార్జిషీట్‌కు ప్రత్యేక కోర్టు నెంబర్‌ కేటాయించక ముందే ఈ చార్జిషీట్‌ బహిర్గతమైంది. ఈ నేపథ్యంలో గత విచారణ సమయంలోనే న్యాయమూర్తి ఇన్‌ కెమెరా ప్రొసీడింగ్స్‌ నిర్వహణకు ఆదేశాలిస్తానని సూచనప్రాయంగా చెప్పారు. ఈ కేసు శుక్రవారం మరోసారి విచారణకు వచ్చింది. నిందితుడు శ్రీనివాసరావు కస్టడీ ముగియడంతో అతన్ని పోలీసులు ప్రత్యేక కోర్టులో హాజరుపరిచారు. విచారణ ప్రారంభం కాగానే, న్యాయమూర్తి ఎన్‌ఐఏ చట్టంలోని సెక్షన్‌ 17(3) ప్రకారం ఈ కేసును ఇకపై ఇన్‌ కెమెరా (కేసుకు సంబంధించిన వారి సమక్షంలోనే విచారణ జరపడం) ద్వారా విచారణ చేపడతామంటూ ఉత్తర్వులు జారీచేయడం ప్రారంభించారు. కేసు విచారణ వేగవంతం అయ్యేందుకు, అలాగే నిష్పాక్షికంగా విచారణ జరిగేందుకు ఈ విచారణ తోడ్పతుందని న్యాయమూర్తి ఆ ఉత్తర్వుల్లో పేర్కొన్నారు. అలాగే, సాక్షులు, నిందితుడు, పీపీలు, న్యాయవాదుల భద్రతను దృష్టిలో పెట్టుకుని కూడా ఈ ఉత్తర్వులు జారీచేస్తున్నట్లు తెలిపారు. ఈ సందర్భంగా శ్రీనివాసరావు తరఫు న్యాయవాది మట్టా జయకర్‌ చార్జిషీట్‌లోని అంశాలు పత్రికల్లో వచ్చాయంటూ, వాటి కాపీలను న్యాయమూర్తికి ఇచ్చారు. ఈ ఉత్తర్వులు జారీచేసిన తరువాత కోర్టు హాలులో ఉన్న ఇతర కక్షిదారులు, న్యాయ విలేకరులు, ఇతర రిపోర్టర్లు, న్యాయవాదులను బయటకు పంపేశారు.  

సాక్షి, విజయవాడ : ప్రతిపక్షనేత, వైఎస్సార్‌ కాంగ్రెస్‌ పార్టీ అధ్యక్షుడు వైఎస్‌ జగన్‌మోహన్‌ రెడ్డిపై విశాఖ ఎయిర్‌పోర్టులో జరిగిన హత్యాయత్నం కేసులో నిందితుడు శ్రీనివాసరావుకు ఎన్‌ఐఏ కోర్టు రిమాండ్‌ పొడిగించింది. శ్రీనివాస్‌ తరఫున న్యాయవాది సలీం బెయిల్‌ పిటీషన్‌ దాఖలు చేయగా.. శుక్రవారం వాదనలు విన్న ఎన్‌ఐఏ కోర్టు.. బెయిల్‌ పిటిషన్‌ను ఈ నెల 26కు వాయిదా వేసింది. నిందితుడి రిమాండ్‌ను మార్చి 8 వరకు పొడిగించింది.

అధికారమే పరమావధిగా లెక్కలేనన్ని కుట్రలు చేస్తున్నారు. తిరుగులేని శక్తిగా ఎదుగుతున్న వైఎస్సార్‌సీపీని ఎదుర్కొనలేక కుయుక్తులకు తెగబడుతున్నారు. ఆ పార్టీ అధినేతపై హత్యాయత్నం నుంచి తాజాగా జిల్లాలోని వివిధ నేతలకు వస్తున్న బెదిరింపులు ఈ విషయాన్ని చెప్పకనే చెబుతున్నాయి. ఓ వైపు తమకు వ్యతిరేకులైనవారి ఓట్లను తొలగించేందుకు దొంగసర్వేలు చేపట్టడం... వాటిని అడ్డుకున్నవారిని అడ్డగోలుగా అరెస్టు చేయడం... చివరకు జిల్లా నాయకుల్లో భయోత్పాతాన్ని సృష్టించేందుకు జరుగుతున్న ప్రయత్నం... ఇవన్నీ పాలకపక్షం అనుసరిస్తున్న దుస్సంప్రదాయానికి ప్రతీకలుగా నిలుస్తున్నాయి. సాక్షిప్రతినిధి, విజయనగరం: ప్రజా క్షేత్రంలో తిరుగులేని శక్తిగా అవతరిస్తున్న వైఎస్సార్‌సీపీని అణగదొక్కడానికి అధికార తెలుగుదేశం పార్టీ అడుగడుగునా కుట్రలకు పాల్పడుతోంది. విజయనగరం జిల్లాలో ఆ పార్టీ అధినేత వైఎస్‌ జగన్‌మోహన్‌రెడ్డి ప్రజా సంకల్పయాత్రకు వచ్చిన అపూర్వ ప్రజాదరణను చూసినప్పటి నుంచీ ఈ దుశ్చర్యలు మొదలయ్యాయి. ప్రతిపక్ష పార్టీని దెబ్బకొట్టాలని... అవసరమైతే ముఖ్యులనుహతమార్చాలని పన్నాగాలు రచించింది. గతేడాది సెప్టెంబర్‌ 24న వైఎస్‌ జగన్‌మోహన్‌రెడ్డి ప్రజా సంకల్పయాత్ర విజయనగరం జిల్లా శృంగవరపుకోట నియోజకవర్గం, కొత్తవలస మండలం, చింతలపాలెంలో అడుగుపెట్టింది. పాదయాత్ర జిల్లాలో అడుగుపెట్టిన తొలిరోజే 3000 కిలోమీటర్ల మైలురాయిని చేరుకుని జగన్‌ చరిత్ర సృష్టించారు. అక్కడ జరిగిన బహిరంగకు వచ్చిన జనం చూసి అధికార పార్టీ కన్నుకుట్టింది. అక్కడి నుంచి ప్రతి నియోజకవర్గంలోనూ అదే ప్రభంజనం కొనసాగింది. ఆ జన ఉప్పెనను చూసిన అధికారపక్షం జగన్‌ను ఎలాగైనా ఆపాలని అప్పటికే చేసిన నిర్ణయాన్ని ఇక ఆలస్యం చేయకుండా అమలుచేసేలా పథకం రచించింది. సాలూరు నియోజకవర్గం, మక్కువ మండలం, పాయకపాడు నుంచి గతేడాది అక్టోబర్‌ 25న హైదరాబాద్‌ వెళ్లేందుకు విశాఖ విమానాశ్రయానికి వెళ్లిన జగన్‌పై వీఐపీ లాంజ్‌లో శ్రీనివాసరావు అనే యువకుడు హత్యాయత్నానికి పాల్పడ్డాడు. త్రుటిలో ప్రాణాపాయం తప్పింది. యావత్‌ తెలుగు రాష్ట్రాలే కాకుండా దేశం మొత్తం ఉలిక్కిపడింది. కానీ గంటలోనే రాష్ట్ర ప్రభుత్వం, డీజీపీ ఈ విషయంపై చాలా తేలిగ్గా మాట్లాడారు. కోడికత్తికే ఇంత రాద్ధాంతమేంటని చులకనచేశారు. ఇప్పుడు వైఎస్సార్‌సీపీ ఓట్ల తొలగింపే లక్ష్యం జిల్లాలో టీడీపీ మరోకుట్రకు తెరదీసింది. ప్రైవేటు సంస్థలను నియమించుకుని గ్రామాల్లో సర్వే మొదలుపెట్టింది. ప్రతిపక్షానికి అనుకూలంగా ఎవరైనా తమ ప్రశ్నలకు బదులిస్తే వారిని భయపెట్టడం ఈ సర్వే బృందాల ప్రధాన విధి. టీడీపీకి ఓటెయ్యకపోతే సంక్షేమ పథకాలు ఆగిపోతాయని ప్రచారం చేయించింది. అయినా లొంగని వారిని గుర్తించి వారి ఓట్లు జాబితాల్లో లేకుండా చేయాలని కుట్ర పన్నింది. జిల్లా వ్యాప్తంగా 700 మంది సర్వే బృందాలను రంగంలోకి దించి ఈ ప్రక్రియను పోలీసుల అండతో జరిపిస్తోంది. దీనిపై ఎన్నికల కమిషన్‌కు, రాష్ట్ర డీజీపీకి వైఎస్సార్‌ సీపీ నేతలు ఫిర్యాదు చేశారు. సర్వేల పేరుతో ఓట్లు తొలగించే ప్రక్రియ  చేపడుతున్న వారిని అడ్డుకున్నందుకు జిల్లా పార్టీ రాజకీయ వ్యవహారాల సమన్వయకర్త మజ్జి శ్రీనివాసరావు అక్రమ అరెస్ట్, (చిత్రంలో) తాజాగా బెదిరింపులను ఎదుర్కొన్న ఇందుకూరి రఘురాజు. పార్టీ నేతల అక్రమ అరెస్టులు ఓటర్ల జాబితాల్లో పేర్ల గల్లంతే లక్ష్యంగా సాగుతున్న సర్వేపై అనుమానం వచ్చి వైఎస్సార్‌సీపీ నేతలు సర్వే బృందాలను అడ్డుకున్నారు. అదే వారు చేసిన నేరంగా పరిగణించి జిల్లా పార్టీ రాజకీయ వ్యవహారాల సమన్వయకర్త మజ్జి శ్రీనివాసరావును ఎలాంటి లిఖితపూర్వక ఫిర్యాదు ఆయనపై లేకపోయినా అరెస్ట్‌ చేయించింది. అతనితో పాటు మరికొంత మంది పార్టీ నాయకులను గత నెల 25న అక్రమంగా అరెస్ట్‌ చేసి భయానక వాతావరణాన్ని జిల్లాలో సృష్టించింది. అరెస్ట్‌ చేసిన తర్వాత మజ్జి శ్రీనివాసరావును శృంగవరపుకోట నియోజకవర్గం జామి పోలీస్‌ స్టేషన్‌కు తరలించారు. అక్రమ అరెస్టుల ద్వారా ప్రతిపక్షం స్ధైర్యాన్ని దెబ్బతీయాలని ప్రభుత్వం చూసింది. పోలీసులు టీడీపీ చేతిలో కీలుబొమ్మల్లా మారడం విమర్శలకు దారితీసింది. చంపేస్తామంటున్నా అదే నిర్లక్ష్యం ఇప్పుడు శృంగవరపుకోట నియోజకవర్గం వైఎస్సార్‌సీపీ రాష్ట్ర కార్యదర్శి ఇందుకూరి రఘురాజుపై హత్యకు కుట్ర జరుగుతున్నా... దానిని కూడా తేలిగ్గా తీసుకుని, నిందితులను రక్షిస్తున్నారు. నెల రోజులుగా రఘురాజుకు కొందరు వ్యక్తులు ఫోన్‌ చేసి చంపేస్తామని బెదిరిస్తుంటే ఆయన ఎస్‌కోట పోలీసులకు ఫిర్యాదుచేశారు. ఫోన్‌ నంబర్ల ఆధారంగా నాలుగు రోజుల క్రితం ఇద్దరు వ్యక్తులను అదుపులోకి తీసుకున్న పోలీసులు వారి గురించి ఎలాంటి వివరాలు బయటకు పొక్కకుండా జాగ్రత్తపడ్డారు. చివరికి ఆకతాయిల పనిగా తేల్చేసి, కేసును నీరుగార్చేశారు. హత్య చేయడానికి తమకు రూ.3 కోట్లు ఇస్తామన్నారని ఫోన్లో బెదిరించిన వారిని అంత తేలికగా ఎలా వదిలేశారని అడిగితే పోలీసుల నుంచి సరైన సమాధానం రావడం లేదు. రేపేదైనా జరగరానిది జరిగితే దానికి ఈ ప్రభుత్వం, పోలీసులు బాధ్యత వహిస్తారా అని ప్రతిపక్షం అడుగుతున్నా వారిలో చలనం లేదు.

సాక్షి, విజయవాడ : వైఎస్సార్‌సీపీ అధ్యక్షులు వైఎస్‌ జగన్ మోహన్‌ రెడ్డిపై హత్యాయత్నం కేసులో నిందితుడు శ్రీనివాస్‌కు సంబంధించి సోమవారం అతని తరఫు లాయర్లు బెయిల్ పిటిషన్ దాఖలు చేయనున్నారు. అతని తరఫు న్యాయవాదులు సలీం, మట్టాజయకర్‌లు గురువారం రాజమండ్రి సెంట్రల్ జైల్లో శ్రీనివాస్‌ను కలిశారు. ప్రాణానికి ప్రమాదముందని లాయర్లు చెప్పినా, ఏమైనా పర్లేదు బెయిల్ మాత్రం కావాలని శ్రీనివాస్ పట్టుబట్టాడు. తనను బయటకి తీసుకురావాలని శ్రీనివాస్ లాయర్లని కోరాడు. ధానేలంకలో శ్రీనివాస్ తల్లిదండ్రులతో అతడి తరఫు లాయర్లు మాట్లాడారు. రేపటితో శ్రీనివాస్ రిమాండ్ గడువు ముగియనుంది. ఎన్‌ఐఏ కోర్టులో శ్రీనివాస్‌ను పోలీసులు హాజరుపరచనున్నారు.

సాక్షి, హైదరాబాద్‌: ప్రతిపక్ష నేత వైఎస్‌ జగన్‌మోహన్‌రెడ్డి హత్యాయత్నం కేసులో నిజంగా టీడీపీ నేతల చేతులకు రక్తం అంటక పోతే ఎన్‌ఐఏ విచారణకు ఆటంకాలెందుకు సృష్టిస్తున్నారని వైఎస్సార్‌ కాంగ్రెస్‌ పార్టీ విజయవాడ పార్లమెంటు పార్టీ కోఆర్డినేటర్, మాజీ ఐపీఎస్‌ అధికారి మహ్మద్‌ ఇక్బాల్‌ సూటిగా ప్రశ్నించారు. ఎన్‌ఐఏ విచారణతో డొంకంతా కదులుతోందని ఆయన అన్నారు. హైదరాబాద్‌లోని పార్టీ కేంద్ర కార్యాలయంలో శనివారం జరిగిన విలేకరుల సమావేశంలో ఆయన మాట్లాడారు. జగన్‌పై హత్యాయత్నం జరిగితే... ‘తమ్ముళ్లూ... అది కోడికత్తి అని ముఖ్యమంత్రి చంద్రబాబునాయుడు ఎగతాళి చేసి మాట్లాడారని, అది కోడి కత్తో... నారా కత్తో త్వరలో తేలుతుందని ఇక్బాల్‌ హెచ్చరిక చేశారు. ఎన్‌ఐఏ విచారణకు సహకరించకుండా అడ్డుకోవడం టీడీపీ దిగజారుడుతనానికి నిదర్శనమన్నారు. చంద్రబాబు, డీజీపీ ఇద్దరూ కేసును తప్పు దోవ పట్టించేయత్నం చేశారని ఇక్బాల్‌ ఆగ్రహం వ్యక్తం చేశారు. డీజీపీ ప్రకటనతో గరుడ ఫ్లెక్సీ, మడతలు లేని లేఖను సృష్టించారు కాబట్టే రాష్ట్ర పోలీసులు దర్యాప్తు చేస్తే నిజాలు నిగ్గు తేలవని హైకోర్టును ఆశ్రయించామని, ఇది కేంద్రం పరిధిలో ఉందని పౌర, విమానయాన చట్టం ప్రకారం విమానాశ్రయంలో జరిగిన హత్యాయత్నం ఎన్‌ఐఏకి అప్పగించాలని తెలిసినా చంద్రబాబు ఎన్నో అడ్డంకులు సృష్టించారన్నారు. చివరికి హైకోర్టు ఆదేశాలతో ఎన్‌ఐఏకి కేసును అప్పగించక తప్పలేదన్నారు. జగన్‌పై జరిగిన హత్యాయత్నం వెనుక కుట్ర కోణం ఉందని, నిందితుడు శ్రీనివాసరావును ఎవరెవరు ప్రోత్సహించారో తేలాల్సి ఉందని ఎన్‌ఐఏ స్పష్టం చేసిందన్నారు. చంద్రబాబు తాను స్వయంగా అబద్ధాలు చెప్పడమే కాక, డీజీపీతోనూ చెప్పించారని, అప్పట్లో వికటాట్టహాసం చేసిన చంద్రబాబు ఇపుడు తలకాయ ఎక్కడ పెట్టుకుంటారని ఇక్బాల్‌ ప్రశ్నించారు. చంద్రబాబు, లోకేష్‌కు అత్యంత సన్నిహితుడైన ఫ్యూజన్‌ రెస్టారెంట్‌ యజమాని హర్షవర్థన్‌ చౌదరి నేర చరిత్ర కలిగిన శ్రీనివాసరావును ఎలా పనిలో పెట్టుకున్నాడనే దానిపై కూడా ఎన్‌ఐఏ విచారణ చేపడుతుందని ఇక్బాల్‌ తెలిపారు. ఇన్ని అబద్ధాలు చెబుతున్న చంద్రబాబు ఇంకా ప్రజలను మభ్యపెట్టి, నయవంచన చేసినట్లు మాట్లాడుతున్నాడంటే ఎక్కడ ఆ కత్తి నారా కత్తిగా మారి తన మెడ మీద వేలాడుతుందోనని భయపడుతున్నాడన్నారు. ఈ కేసులో డొంక కదులుతోందని తెలిసే చంద్రబాబు తన దావోస్‌ పర్యటనను రద్దు చేసుకుని లోకేష్‌ను పంపించారని అన్నారు. దర్యాప్తు కొనసాగాలని ఎన్‌ఐఏ చెబుతుంటే... దర్యాప్తు ముగిసిందని చెప్పడం ఏమిటని మండిపడ్డారు.  సీఎంగా వైఎస్‌ ఎలా వ్యవహరించారో గుర్తు చేసుకో చంద్రబాబూ!  దివంగత ముఖ్యమంత్రి వైఎస్‌ రాజశేఖరరెడ్డి ముఖ్యమంత్రిగా ఉన్నపుడు ఎలా వ్యవహరించారో చంద్రబాబు గుర్తు చేసుకోవాలని ఇక్బాల్‌ సూచించారు. పరిటాల రవి హత్య కేసును సీబీఐకి అప్పగించాలని ప్రతిపక్ష నేతగా చంద్రబాబు డిమాండ్‌ చేస్తే వైఎస్‌ వెంటనే ఆదేశించారన్నారు. ప్రతిపక్షనేతపై హత్యాయత్నం జరిగినపుడు కనీస బాధ్యత లేకుండా ముఖ్యమంత్రి వ్యవహరించడం సిగ్గు చేటన్నారు. చంద్రబాబు ప్రజలకు తన మొహం చూపించే అర్హతే లేదని, ఆయన నల్లగుడ్డ కప్పుకుని ప్రజల ముందుకు రావాలని ఆయన అన్నారు. డ్వాక్రా మహిళలను ఇప్పటికే చంద్రబాబు మోసం చేశారని, పసుపు–కుంకుమ పేరుతో పోస్ట్‌ డేటెడ్‌ చెక్కులు ఇచ్చినందుకు తల ఎక్కడ పెట్టుకుంటారని ఆయన ప్రశ్నించారు.  

సాక్షి, హైదరాబాద్‌: వైఎస్సార్‌ కాంగ్రెస్‌ పార్టీ అధ్యక్షుడు, ఏపీ ప్రతిపక్ష నేత వైఎస్‌ జగన్‌మోహన్‌ రెడ్డిపై జరిగిన హత్యాయత్నాన్ని టీడీపీ నేతలు కోడి కత్తి అంటూ ఎగతాళి చేశారని, దర్యాప్తు జరిగితే కోడి కత్తో.. నారా కత్తో తేలుతుందని వైఎస్సార్‌ సీపీ నేత ఇక్బాల్‌ వ్యాఖ్యానించారు. శనివారం ఆయన మీడియాతో మాట్లాడుతూ.. ఎన్‌ఐఏ దర్యాప్తును అడ్డుకోవటం టీడీపీ దిగజారుడుతనానికి నిదర్శనమన్నారు. వైఎస్‌ జగన్‌పై హత్యాయత్నం కేసులో ఏపీ ప్రభుత్వం నిస్సిగ్గుగా వ్యవహరిస్తోందన్నారు. ఆంధ్రప్రదేశ్‌ ముఖ్యమంత్రి చంద్రబాబునాయుడు ఆడే అబద్ధాలు చూసి ప్రజలు విస్తుపోతున్నారని పేర్కొన్నారు. సీఎం చంద్రబాబు, ఏపీ డీజీపీ కేసును తప్పుదోవపట్టించే ప్రయత్నం చేశారన్నారు. ప్రజలకు మొహం చూపించడానికి చంద్రబాబుకు అర్హత లేదని విమర్శించారు. చంద్రబాబు నల్ల చొక్కా వేసుకోవటం కాదు.. మొహానికి నల్లరంగు పూసుకోవాలంటూ మండిపడ్డారు. ప్రత్యేక హోదాను నిర్వీర్యం చేసింది చంద్రబాబేనన్నారు. వైఎస్సార్‌ సీపీ పోరాటం వల్లే హోదా సజీవంగా ఉందని తెలిపారు.  

సాక్షి, అమరావతి: ప్రతిపక్ష నేత, వైఎస్సార్‌సీపీ అధ్యక్షుడు వైఎస్‌ జగన్‌ను చంపాలన్న ఉద్దేశంతోనే ఆయనపై శ్రీనివాసరావు అలియాస్‌ చంటి కత్తితో దాడికి పాల్పడ్డారని జాతీయ దర్యాప్తు సంస్థ(ఎన్‌ఐఏ) తేల్చింది. జగన్‌ను అంతమొందించాలనే మెడపై పొడిచేందుకు శ్రీనివాసరావు ప్రయత్నించాడని, ఈ ప్రక్రియలో జగన్‌కు తన ఎడమ చేయి పై భాగంలో గాయమైందని స్పష్టం చేసింది. విశాఖపట్నం విమానాశ్రయంలోని వీఐపీ లాంజ్‌లోకి వెళ్లేందుకు సాధారణ ప్రజానీకానికి అనుమతి ఉండదని, అందువల్ల నిందితుడు సెల్ఫీ పేరుతో లోనికి ప్రవేశించాడని తెలిపింది. జగన్‌పై దాడి చేసేందుకు శ్రీనివాసరావు సరైన సమయం కోసం ఎదురు చూశాడని వివరించింది. ముందస్తు పథకంలో భాగంగానే 2018 జనవరిలో కోడి పందేల సందర్భంగా తన ఊరికి సమీపంలో కత్తిని సంపాదించాడని పేర్కొంది. ఈ విషయాలన్నింటినీ జనవరి 12 నుంచి 18 వరకు తాము చేపట్టిన విచారణలో శ్రీనివాసరావు స్వయంగా వెల్లడించాడని ప్రత్యేక కోర్టుకు ఎన్‌ఐఏ తెలిపింది. శ్రీనివాసరావు చర్యలు పౌర విమానయాన చట్టంలోని సెక్షన్‌ 3ఏ(1)(ఏ) కింద చట్ట వ్యతిరేక కార్యకలాపాల పరిధిలోకి వస్తాయంది. అంతేకాక జగన్‌పై హత్యాయత్నానికి పాల్పడం ద్వారా ఐపీసీ సెక్షన్‌ 307 కింద కూడా నేరానికి పాల్పడ్డారంది. ఈ నేరాలను విచారణ నిమిత్తం స్వీకరించాలని కోర్టును కోరింది. పౌర విమానయాన చట్టం కింద శ్రీనివాసరావును ప్రాసిక్యూట్‌ చేసేందుకు అనుమతి కోరుతూ కేంద్రానికి దరఖాస్తు చేశామని తెలిపింది. అనుమతి రాగానే ఆ విషయాన్ని కోర్టుకు నివేదిస్తామంది. జగన్‌ను చంపాలన్న కుట్ర ఎవరిది? ఎవరి ప్రేరణతో శ్రీనివాసరావు ఈ దుశ్చర్యకు పాల్పడ్డారు? తదితర అంశాలపై సీఆర్‌పీసీ సెక్షన్‌ 173(8) కింద దర్యాప్తును కొనసాగిస్తామని కోర్టుకు నివేదించింది. ఇలా అన్ని అంశాలను క్రోడీకరిస్తూ జనవరి 23న ఎన్‌ఐఏ ప్రత్యేక కోర్టులో ఈ కేసు ప్రధాన దర్యాప్తు అధికారి మహ్మద్‌ సాజిద్‌ ఖాన్‌ చార్జిషీట్‌ దాఖలు చేశారు. సాక్షుల వివరాలు, సేకరించిన డాక్యుమెంట్లను జత చేశారు. ఈ చార్జిషీట్‌కు ప్రత్యేక కోర్టు ప్రొవిజినల్‌ క్రిమినల్‌ నెంబర్‌(పీఆర్‌సీ) కేటాయించాల్సి ఉంది. అనుబంధాలను మినహాయిస్తే, ఈ చార్జిషీట్‌ 9 పేజీలుంది. జగన్‌ రాకపోకలపై కన్ను... శ్రీనివాసరావు విమానాశ్రయంలో తిరిగేందుకు ఫ్యూజన్‌ ఫుడ్స్‌ యాజమాన్యం ఎయిర్‌పోర్ట్‌ అధికారులకు దరఖాస్తు చేసింది. ఎంట్రీ పాస్‌ను అధికారులు ఎప్పటికప్పుడు పొడిగిస్తూ వచ్చారు. ఈ పాస్‌ కోసం దరఖాస్తు చేసినప్పుడు శ్రీనివాసరావు అనేక కీలక విషయాలను దాచి పెట్టాడు. తనపై కేసు విషయాన్నీ మరుగునపెట్టాడు. దీని గురించి అధికారులూ విచారణ చేయలేదు. మరోవైపు ఉత్తరాంధ్రలో జగన్‌ చేసిన పాదయాత్రను శ్రీనివాసరావు చాలా జాగ్రత్తగా గమనిస్తూ వచ్చాడు. అలాగే విశాఖ విమానాశ్రయం నుంచి ఆయన రాకపోకలను కూడా పరిశీలించాడు. ప్రతివారం హైదరాబాద్‌ వెళ్లేందుకు జగన్‌ విశాఖ విమానాశ్రయానికి వచ్చేవారు. ఈ సమయంలోనే జగన్‌పై దాడి చేయాలని శ్రీనివాసరావు ప్రణాళికలు రచించారు. కోడి పందేలకు ఉపయోగించే కత్తిని ఇందుకోసం ఉపయోగించాలని నిర్ణయించుకున్నాడు. తన ఈ ప్రణాళికను అమలు చేసేందుకు వైఎస్సార్‌ సీపీ వారితో మాట్లాడి జగన్‌తో తనకు సెల్ఫీ తీసుకునే అవకాశం ఇప్పించేలా చేయాలని ఫ్యూజన్‌ ఫుడ్స్‌లో క్యాషియర్‌గా పనిచేస్తున్న యువతిని అడిగాడు. అక్టోబర్‌ 25న జగన్‌ విశాఖ విమానాశ్రయం వస్తున్నారని, ఆ రోజున సెల్ఫీ తీసుకోవచ్చునని ఆ యువతి శ్రీనివాసరావుకు చెప్పింది. ఆరోజున విమానాశ్రయం చేరుకున్న జగన్‌ నేరుగా వీఐపీ లాంజ్‌లోకి వెళ్లారు. ఆయన వెంట పీఏతో పాటు పార్టీ నేతలు కూడా ఉన్నారు. కొద్దిసేపటి తరువాత ఫ్యూజన్‌ ఫుడ్స్‌ సిబ్బంది జగన్, ఇతర నేతలకు కాఫీ, టీ అందించారు. అవకాశం రాగానే దాడి చేశాడు... శ్రీనివాసరావు ఫ్యూజన్‌ ఫుడ్స్‌ యూనిఫాం ధరించి, వీఐపీ లాంజ్‌లోకి అడుగుపెట్టే సమయంలో కత్తిని గుర్తించకుండా ఉండేందుకు చేతిలో వాటర్‌ బాటిల్‌ పట్టుకుని వెళ్లాడు. జగన్‌కు ఎడమ వైపు నిల్చున్నాడు. సమయం రాగానే చంపేందుకు ఆయన మెడపై కత్తితో దాడికి ప్రయత్నించారు. ఈ ప్రక్రియలో జగన్‌ ఎడమ చేయికి గాయమైంది. ఆ వెంటనే ప్రొటోకాల్‌ అధికారులు, స్థానిక పోలీసులు, సీఐఎస్‌ఎఫ్‌ అధికారులు లాంజ్‌లోకి వచ్చి శ్రీనివాసరావును పట్టుకుని విమానాశ్రయంలోని ఇంటర్నేషనల్‌ సెక్యూరిటీ హోల్డ్‌ ఏరియా(ఎస్‌హెచ్‌ఏ) వైపు తీసుకెళ్లారు. ఈ విషయాలన్నింటినీ శ్రీనివాసరావు మా ఇంటరాగేషన్‌లో వెల్లడించారు. 3.5 సెంటీమీటర్ల లోతుగా గాయం... దాడి తరువాత జగన్‌ విమానాశ్రయంలో ఉన్న అపోలో హెల్త్‌ డెస్క్‌ డాక్టర్‌ వద్ద చికిత్స తీసుకుని హైదరాబాద్‌ వెళ్లిపోయారు. అక్కడికి చేరుకోగానే జగన్‌ నేరుగా సిటీ న్యూరో సెంటర్‌కు వెళ్లారు. అక్కడ వైద్యులు ఆయనకు చికిత్సను అందించారు. 3.5 సెంటీమీటర్ల లోతుగా గాయమైనట్లు వైద్యులు గుర్తించారు. ఆ మేర చికిత్స అందించి, 26వ తేదీ మధ్యాహ్నం డిశ్చార్జ్‌ చేశారు. శ్రీనివాసరావు తన చర్యల ద్వారా పౌర విమానయాన చట్టం కింద నిర్ధేశించిన నేరాలకు పాల్పడ్డారని చార్జీషీట్‌లో ఎన్‌ఐఏ పేర్కొంది జగన్‌పై హత్యాయత్నం కేసు 8కి వాయిదా విజయవాడ లీగల్‌: జగన్‌పై హత్యాయత్నం కేసు విచారణను ఎన్‌ఐఏ ప్రత్యేక న్యాయస్థానం పూర్తి అదనపు ఇన్‌చార్జి జడ్జి అచ్యుత పార్థసారథి ఈ నెల 8కి వాయిదా వేశారు. నిందితుడు శ్రీనివాసరావు తరఫు న్యాయవాదులు దాఖలు చేసిన మెమోలపై కౌంటర్‌ అండ్‌ వాదనల నిమిత్తం న్యాయమూర్తి వాయిదా వేశారు.

సాక్షి, అమరావతి: ప్రతిపక్ష నేత, వైఎస్సార్‌ కాంగెస్‌ పార్టీ అధ్యక్షుడు వై.ఎస్‌.జగన్‌మోహన్‌రెడ్డిపై గత ఏడాది అక్టోబర్‌ 25న విశాఖ విమానాశ్రయంలో జరిగిన హత్యాయత్నం ఉద్దేశ పూర్వకంగా జరిగిందేనని జాతీయ దర్యాప్తు సంస్థ (ఎన్‌ఐఏ) తేల్చి చెప్పింది. ఆ దాడి గురి తప్పకపోయుంటే మరణం సంభవించి ఉండేదని, అందుకే జగన్‌పై జరిగిన దాడిని రాష్ట్ర పోలీసులు హత్యాయత్నంగా పరిగణిస్తూ, ఆ మేరకు ఐపీసీ సెక్షన్‌ 307 కింద కేసు నమోదు చేశారని వివరించింది. విమానాశ్రయంలో చట్ట విరుద్ధంగా, ఉద్దేశ పూర్వకంగా ఏదైనా ఉపకరణాన్ని, ఆయుధాన్ని ఉపయోగించి హింసకు పాల్పడటం ద్వారా ఎవరైనా తీవ్రంగా గాయపడినా, మరణించినా అది పౌర విమానయాన చట్టం ప్రకారం చట్ట వ్యతిరేక కార్యకలాపాల నిర్వచన పరిధిలోకి వస్తుంది. జగన్‌పై జరిగిన దాడి ఘటనకు సంబంధించి రాష్ట్ర ప్రభుత్వం, కేంద్ర పారిశ్రామిక భద్రత దళం (సీఐఎస్‌ఎఫ్‌), ఇంటెలిజెన్స్‌ బ్యూరో (ఐబీ), ఎన్‌ఐఏలు ఇచ్చిన సమాచారాన్ని క్షుణ్ణంగా పరిశీలించి, విశ్లేషించిన తర్వాతే ఇది పౌర విమానయాన చట్టం కింద చట్ట వ్యతిరేక కార్యకలాపాల పరిధిలోకి వస్తుందని కేంద్ర ప్రభుత్వం ప్రాథమిక అభిప్రాయానికి వచ్చిందని ఎన్‌ఐఏ వివరించింది. ఇందుకు అనుగుణంగానే ఈ ఘటనపై దర్యాప్తును తమకు అప్పగిస్తూ కేంద్రం ఉత్తర్వులు జారీ చేసిందని పేర్కొంది. రాష్ట్ర ప్రభుత్వం కౌంటర్‌ దాఖలుకు గడువు జగన్‌పై జరిగిన హత్యాయత్నం ఘటనపై దర్యాప్తును ఎన్‌ఐఏకు అప్పగిస్తూ కేంద్ర హోం శాఖ జారీ చేసిన ఉత్తర్వును సవాలు చేస్తూ రాష్ట్ర హోం శాఖ ముఖ్య కార్యదర్శి ఏఆర్‌ అనురాధ హైకోర్టులో పిటిషన్‌ దాఖలు చేసిన విషయం తెలిసిందే. ఈ వ్యాజ్యంపై ఇటీవల విచారణ జరిపిన న్యాయమూర్తి జస్టిస్‌ గుడిసేవ శ్యాంప్రసాద్‌ పూర్తి వివరాలతో కౌంటర్‌ దాఖలు చేయాలని కేంద్ర ప్రభుత్వం, ఎన్‌ఐఏలను ఆదేశించారు. తాజాగా ఈ వ్యాజ్యం బుధవారం విచారణకు రాగా, అటు ఎన్‌ఐఏ, ఇటు కేంద్ర ప్రభుత్వం తరఫున ఎన్‌ఐఏ డిప్యూటీ ఇన్‌స్పెక్టర్‌ జనరల్‌ ఎస్‌.ప్రవీణ్‌కుమార్‌ దాఖలు చేసిన కౌంటర్‌ను అసిస్టెంట్‌ సొలిసిటర్‌ జనరల్‌ (ఏఎస్‌జీ) బొప్పుడి కృష్ణమోహన్‌ న్యాయమూర్తి ముందు ఉంచారు. ఈ కౌంటర్‌కు తిరుగు సమాధానం ఇస్తూ అఫిడవిట్‌ దాఖలు చేసేందుకు ప్రభుత్వ ప్రత్యేక న్యాయవాది (ఎస్‌జీపీ) డి.రమేశ్‌ గడువు కోరారు. ఇందుకు న్యాయమూర్తి అంగీకరిస్తూ విచారణను ఫిబ్రవరి 12కి వాయిదా వేస్తూ ఉత్తర్వులు జారీ చేశారు. ఇదే సమయంలో ఎమ్మెల్యే ఆళ్ల రామకృష్ణారెడ్డి తరఫు న్యాయవాది పొన్నవోలు సుధాకర్‌రెడ్డి స్పందిస్తూ, ఈ వ్యాజ్యంలో తమనూ ప్రతివాదిగా చేర్చుకోవాలని కోరుతూ పిటిషన్‌ దాఖలు చేశామని, దానిని అనుమతించాలని కోర్టును కోరారు. దీనిపై ఎస్‌జీపీ రమేశ్‌ అభ్యంతరం వ్యక్తం చేస్తూ కౌంటర్‌ దాఖలు చేస్తామని చెప్పగా, న్యాయమూర్తి అంగీకరించారు.  క్షేత్ర స్థాయి దర్యాప్తు ఆధారంగా చార్జిషీట్‌   ‘ఈ విషయంలో కేంద్రం చాలా జాగ్రత్తగా నిర్ణయం తీసుకుంది. ఎన్‌ఐఏ చట్టంలోని సెక్షన్‌ 6(5) కింద ఉన్న అధికారాన్ని ఉపయోగించి ఈ ఉత్తర్వులు జారీ చేసింది. ఈ ఉత్తర్వులు రాజ్యాంగ విరుద్ధం, చట్ట విరుద్ధం ఎంత మాత్రం కాదు. ఎన్‌ఐఏ చట్టంలోని సెక్షన్‌ 6 (6) ప్రకారం ఈ కేసు దర్యాప్తునకు సంబంధించిన రికార్డులు, డాక్యుమెంట్లన్నింటినీ రాష్ట్ర ప్రభుత్వం లేదా రాష్ట్ర పోలీసులు ఎన్‌ఐఏకు అందజేయాలి. అయితే ఈ కేసులో మేం పలుమార్లు అభ్యర్థించినా, ఎన్‌ఐఏ ఆదేశించినా కూడా రాష్ట్ర పోలీసులు ఇప్పటి వరకు రికార్డులు, డాక్యుమెంట్లను తమకు సమర్పించలేదంది. దీంతో క్షేత్ర స్థాయి దర్యాప్తు ఆధారంగా దర్యాప్తు అధికారి ఈ నెల 23న ఎన్‌ఐఏ ప్రత్యేక కోర్టులో చార్జిషీట్‌ దాఖలు చేశారు. వీటన్నింటినీ పరిగణనలోకి తీసుకుని రాష్ట్ర ప్రభుత్వం దాఖలు చేసిన పిటిషన్‌ను కొట్టేయండి’ అని ఎన్‌ఐఏ హైకోర్టును అభ్యర్థించింది.

సాక్షి, అమరావతి : ప్రతిపక్షనేత, వైఎస్సార్‌ కాంగ్రెస్ పార్టీ అధ్యక్షుడు వైఎస్‌ జగన్‌మోహన్ రెడ్డిపై విశాఖ ఎయిర్‌పోర్టులో జరిగిన హత్యాయత్నం ఘటన కేసును అడ్డుకునేందుకు ఏపీ ప్రభుత్వం ప్రయత్నాలు కొనసాగిస్తూనే ఉంది. ఈ కేసును జాతీయ దర్యాప్తు సంస్థ ఎన్‌ఐఏకు అప్పగిస్తూ కేంద్ర ఇచ్చిన నోటిఫికేషన్‌ చెల్లదంటూ ఏపీ ప్రభుత్వం హైకోర్ట్‌లో రిట్‌ పిటిషన్‌ వేసిన విషయం తెలిసిందే. వెంటనే ఎన్‌ఐఏ విచారణపై స్టే విధించాలని ప్రభుత్వం ఈ పిటిషన్‌లో పేర్కొంది. అయితే ఈ పిటిషన్‌పై బుధవారం హైకోర్టులో విచారణ జరగ్గా.. తక్షణమే విచారణను నిలిపివేయాలని ఏపీ ప్రభుత్వం వాదించింది. గత హైకోర్టు ఆదేశాల మేరకు ఈ పిటిషన్‌పై ఎన్‌ఐఏ అధికారులు కౌంటర్‌ దాఖలు చేయగా.. తమ వాదనను వినిపించేందుకు ఏపీ ప్రభుత్వం మరింత గడువు కోరింది. దీంతో ఈ కేసు విచారణను కోర్టు ఫిబ్రవరి 12కు వాయిదా వేసింది. హైకోర్టులో ఎన్ఐఏ చార్జ్‌షీట్‌ దాఖలు చేసే సమయం దగ్గరపడుతుండటంతో టీడీపీ ప్రభుత్వం ఈ కేసును నిలువరించేందుకు శతవిధాల ప్రయత్నిస్తోంది. ఈ కేసుకు సంబంధించిన వివరాలు ఎన్ఐఏకు ఇవ్వాలని సిట్‌ అధికారులను హైకోర్టు ఆదేశించినప్పటికీ వారిలో ఎలాంటి చలనం లేదు. హైకోర్టు తుదితీర్పు వచ్చేంతవరకు ఎన్‌ఐఏకు సహకరించేది లేదని రాష్ట్ర ప్రభుత్వం ఖరాఖండిగా ప్రకటించేసింది.

శాంతిభద్రతల పరిరక్షణలో కీలక భూమిక పోషించే పోలీసులు తమ భుజాలపై అధికార పార్టీ సొంత అజెండా మోయాల్సి వస్తోంది. ప్రభుత్వ సేవల్లో మునిగితేలిన ఫలితంగా విధి నిర్వహణలో తీవ్రవైఫల్యాలు వెంటాడుతున్నాయి. రాష్ట్రంలో శాంతి లేదు.. భద్రత కానరాదు అంటూ ప్రజలు ఆవేదన చెందే పరిస్థితి దాపురించింది. శాంతిభద్రతలు అడుగంటడంతో ఆంధ్రప్రదేశ్‌ అభద్రత.. ఆందోళన.. ఆవేదనకు చిరునామాగా మారిపోయింది. సర్కారు ఘోర వైఫల్యాలతో పోలీసుల ప్రతిష్ట మసకబారుతోంది. గత నాలుగేళ్లలో రాష్ట్రంలో హత్యలు, అత్యాచారాలు, వేధింపులు, ఇతర నేరాలు పెరిగిపోయాయి. మహిళలపై లైంగిక వేధింపులు, వరకట్న వేధింపులు రెట్టింపయ్యాయి. మైనర్‌ బాలికలపైన అత్యాచారాలు పెచ్చరిల్లాయి. టీడీపీ నాలుగున్నరేళ్ల పాలనలో ప్రతిపక్ష పార్టీకి చెందిన నాయకులు, కార్యకర్తలను మట్టుపెట్టడం, వారిపై రాజకీయ కక్ష సాధింపులకు పాల్పడటం పరిపాటిగా మారింది. కర్నూలు జిల్లా పత్తికొండ నియోజకవర్గ వైఎస్సార్‌సీపీ సమన్వయకర్తగా ఉన్న నారాయణరెడ్డిని 2017 మేలో పెళ్లికి వెళ్లి వస్తుండగా ప్రత్యర్థులు దారుణంగా హత్య చేయడం దీనికి పరాకాష్ట.   సాక్షి, అమరావతి: ప్రతిపక్ష నేత, వైఎస్సార్‌ కాంగ్రెస్‌ పార్టీ అధినేత వైఎస్‌ జగన్‌మోహన్‌రెడ్డిపై జరిగిన హత్యాయత్నం కేసును నీరుగార్చారన్న అపఖ్యాతిని పోలీసులు మూటగట్టుకున్నారు. విశాఖ విమానాశ్రయంలో గతేడాది అక్టోబర్‌ 25న కత్తితో హత్యాయత్నం చేసిన ఘటనలో పోలీసులు, ప్రభుత్వం స్పందించిన తీరు ప్రజల్లో తీవ్ర విమర్శలకు దారితీసింది. ఘటన జరిగిన గంటకే డీజీపీ ఠాకూర్‌ స్పందించిన తీరు కేసు దర్యాప్తును ప్రభావితం చేసేలా ఉందని న్యాయ నిపుణులు సైతం తీవ్రంగా తప్పుపట్టడం గమనార్హం. సీఎం చంద్రబాబు మీడియా సమావేశంలో చేసిన వెకిలి వ్యాఖ్యలు సైతం కేసు దర్యాప్తుపై ప్రభావితం చూపాయి. ఈ కేసులో సిట్‌ కుట్ర కోణం వైపు దృష్టి పెట్టకుండా నిందితుడు శ్రీనివాసరావు చుట్టూనే దర్యాప్తును పరిమితం చేసింది. కేంద్ర దర్యాప్తు సంస్థకు కేసును అప్పగించాలని వైఎస్సార్‌సీపీ నేతలు కోర్టును ఆశ్రయించడంతో జాతీయ దర్యాప్తు సంస్థ (ఎన్‌ఐఏ) ఈ కేసును విచారిస్తోంది. అయితే రాష్ట్ర ప్రభుత్వం, పోలీసులు ఎన్‌ఐఏకు సహకరించడం లేదు.  విమానాశ్రయంలోనూ నిర్బంధం  రాష్ట్రానికి ప్రత్యేక హోదా కావాలంటూ 2017, జనవరి 26న విశాఖలో తలపెట్టిన కొవ్వొతుల నిరసనకు సంఘీభావంగా వెళ్లిన ప్రతిపక్ష నేత వైఎస్‌ జగన్‌ని విమానాశ్రయం రన్‌వేపైనే అడ్డుకున్న పోలీసుల తీరును ప్రజలు తప్పుబట్టారు. అమరావతిలో 2017 ఫిబ్రవరి 11న నిర్వహించిన జాతీయ మహిళా పార్లమెంట్‌కు హాజరయ్యేందుకు వచ్చిన వైఎస్సార్‌సీపీ ఎమ్మెల్యే ఆర్కే రోజాను గన్నవరం విమానాశ్రయంలో దౌర్జన్యంగా అదుపులోకి తీసుకుని పోలీస్‌ వాహనంలో రకరకాల ప్రాంతాల్లో తిప్పి హైదరాబాద్‌లో వదిలిపెట్టడం వివాదాస్పదమైంది. కాపు రిజర్వేషన్ల కోసం ఉద్యమించిన మాజీ మంత్రి ముద్రగడను ఇంటి నుంచి బయటకు రాకుండా అడుగడుగునా పోలీసులు అడ్డుకున్నారు. వైఎస్సార్‌సీపీ నేత భూమన కరుణాకర్‌రెడ్డితోపాటు ఏపీ కాంగ్రెస్‌ అధ్యక్షుడు ఎన్‌.రఘువీరారెడ్డి, సీపీఎం, సీపీఐ రాష్ట్ర కార్యదర్శులు పి.మధు, కె.రామకృష్ణలను పలుమార్లు అరెస్టులు చేసిన తీరు విమర్శలకు తావిచ్చింది.  రాష్ట్రమంతా టెర్రర్‌..  రాజధాని అమరావతిలో తమ అడుగులకు మడుగులొత్తకపోతే బెదిరింపులు, అక్రమ కేసులతో ప్రభుత్వం టెర్రర్‌ పుట్టిస్తోంది. భూసమీకరణకు భూములు ఇవ్వని రైతులపై ప్రభుత్వ కక్ష సాధింపు చర్యలు జాతీయ మానవ హక్కుల సంఘాన్ని సైతం విస్మయానికి గురిచేశాయి. తమ మాట వినని రైతుల అరటి తోటలు, ఇతర పంట పొలాలు తగలబెట్టించిన టీడీపీ నేతలు భయాందోళనలు సృష్టించారు. తమ సమస్యలను పరిష్కరించాలని న్యాయపోరాటాలు చేసిన వివిధ వర్గాల ప్రజలను, ఉద్యోగులను ప్రభుత్వం పోలీసులతో అణచివేసింది. సర్కారు ఆదేశాలతో పోలీసులు సమస్యలపై నినదించిన ప్రజల గొంతు నొక్కేశారు. శాంతియుత నిరసనలు తెలిపినవారిపై లాఠీలు విరుచుకుపడ్డాయి. డిమాండ్ల సాధన కోసం రోడ్డెక్కిన పాపానికి అక్రమ కేసులు బనాయించారు. సీఆర్‌పీసీ 144, 151లతోపాటు పోలీస్‌ యాక్ట్‌ 30లను విచ్చలవిడిగా ప్రయోగించి అప్రకటిత ఎమర్జెన్సీని అమలు చేశారు. మూడేళ్లుగా పశ్చిమగోదావరి జిల్లా తుందుర్రు పోలీసుల హడావుడితో ఉలిక్కిపడుతోంది. కాలుష్య కారక ఆక్వా ఫుడ్‌పార్కు వద్దని ప్రజలు నిర్వహిస్తున్న ఉద్యమాన్ని అణచివేస్తున్న పోలీసులు కేసులతో భయపెడుతున్నారు. వంశధార ప్రాజెక్టు నిర్వాసితులకు 11 ఏళ్లనాటి ప్యాకేజీనే ఇస్తామంటూ పోలీసులను ప్రయోగించి భయాందోళనలు సృష్టిస్తోంది. పోలవరం ప్రాజెక్టు, పురుషోత్తపట్నం ఎత్తిపోతల కోసం భూములు త్యాగం చేసిన నిర్వాసితులకు సరైన పరిహారం ఇవ్వని ప్రభుత్వం పోలీసులను ప్రయోగించి పరిహాసం చేస్తోంది.   ఎన్‌కౌంటర్ల కలకలం..  రాష్ట్రంలో జరిగిన ఎన్‌కౌంటర్లు పోలీసులపై కౌంటర్లు వేసేలా మారాయి. చిత్తూరు జిల్లా శేషాచలం అడవుల్లో టాస్క్‌ఫోర్స్‌ పోలీసులు 2015, ఏప్రిల్‌లో 20 మంది ఎర్రచందనం స్మగ్లర్లను కాల్చి చంపారు. వారిని పోలీసులే పట్టుకుని హత్య చేశారంటూ పౌరహక్కుల నేతలు ఆరోపణలు చేశారు. 2018, జూలై 25న పోలీసులు, ఎర్రచందనం స్మగ్లర్ల నడుమ మరోమారు కాల్పుల్లో ఒక స్మగ్లర్‌ మృతి చెందాడు. ఆంధ్రా–ఒడిశా బోర్డర్‌ (ఏవోబీ)లో మల్కన్‌గిరి లో 2016, అక్టోబర్‌ 24 నుంచి నాలుగు రోజులపాటు పోలీసులు జరిపిన ఎన్‌కౌంటర్‌లో 30 మంది మావోయిస్టులు మృత్యువాత పడ్డారు. వారిలో 11 మందికి పైగా గిరిజనులు ఉండటం విమర్శలకు తావిచ్చింది. తాజాగా గతేడాది సెప్టెంబర్‌ 23న విశాఖ మన్యంలో ఫిరాయింపు ఎమ్మెల్యే కిడారి సర్వేశ్వరరావు, మాజీ ఎమ్మెల్యే సివేరి సోమలను మావోయిస్టులు హత్య చేయడంతో భద్రతా వైఫల్యం, నిఘా నీరుగారిన తీరుపై విమర్శలు వెల్లువెత్తాయి. ఈ కేసును కేంద్ర దర్యాప్తు బృందం చేపట్టింది.   కత్తులు దూస్తున్న రౌడీయిజం  రాష్ట్రంలో రౌడీయిజం కత్తులు దూస్తోంది. రాష్ట్రంలో రౌడీ, కేడీ, డెకాయిట్, సస్పెక్ట్‌ (హిస్టరీ) షీట్లు ఏకంగా 28,381 మందిపై ఉండటం కలవరపాటుకు గురిచేస్తోంది. కృష్ణా, గుంటూరు జిల్లాల్లోనే అత్యధిక హిస్టరీ షీట్లు ఉండటం ఆందోళన కలిగిస్తోంది. కృష్ణా జిల్లాలో 4,236 మందిపైన, గుంటూరు జిల్లాలో 3,984 మందిపైన హిస్టరీ షీట్లు ఉన్నాయి. దశాబ్ద క్రితం సద్దుమణిగిన రౌడీయిజం మళ్లీ కోరలు చాస్తోంది. వ్యాపారుల నుంచి బలవంతపు వసూళ్లు, భూసెటిల్‌మెంట్లు, రాజకీయ ప్రత్యర్థుల హత్యలే లక్ష్యంగా వెర్రితలలు వేస్తోంది. పోలీసులు అటువైపు కన్నెత్తి చూడట్లేదు. కొన్ని సంఘటనలను పరిశీలిస్తే.. గుంటూరులో మాజీ రౌడీషీటర్‌ బసవల వాసు (38) దారుణ హత్యకు గురైన తీరు సంచలనం సృష్టించింది. పోలీస్‌స్టేషన్‌కు దగ్గరలోనే రెస్టారెంట్‌లో భోజనం చేసి బయటకు వచ్చిన వాసును స్కార్పియోలో వచ్చిన ప్రత్యర్థులు రెప్పపాటులోనే విచక్షణారహితంగా నరికేశారు. విజయవాడ సింగ్‌నగర్‌లో ఒక బార్‌ వద్ద రౌడీషీటర్‌ కట్లా వేణుగోపాలరావు అలియాస్‌ కల్నాయక్‌ కత్తులతో దాడి చేసి గంధసిరి వెంకటేశ్వరరావును హతమార్చాడు. రౌడీషీటర్‌ కల్నాయక్‌పై 20 ఏళ్లలో 16 కేసులు ఉండటంతో పోలీసులు నగర బహిష్కరణ విధించినప్పటికీ అతను నిర్భయంగా వచ్చి హత్య చేయడం గమనార్హం. కర్నూలు జిల్లా నంద్యాలలోని నడిరోడ్డుపై పట్టపగలే రౌడీషీటర్‌ రాఘవేంద్రను మరో రౌడీషీటర్‌ గుమ్మపాలెం బద్రి  హత్య చేశాడు. విశాఖ మద్దిలపాలెంలోని సింగర్‌ బార్‌ వద్ద రౌడీషీటర్‌ మళ్ళ వెంకటరమణను తోటి రౌడీషీటర్‌ హతమార్చాడు.  మహిళలను అగౌరపరచడంలో టాప్‌  రాష్ట్రంలో మహిళలను కించపరచడం, వేధించడం, ఎస్సీ, ఎస్టీ అట్రాసిటీ కేసులు, కిడ్నాప్‌ కేసులు ఆందోళనకు గురిచేస్తున్నాయి. జాతీయ నేర నమోదు సంస్థ నివేదిక ప్రకారం.. మహిళలపై రాష్ట్రంలో 2016లో 16,362 నేరాలు జరగ్గా 2015లో 15,967 నేరాలు జరిగాయి. మహిళలపై నేరాల్లో ఏపీ దేశంలోనే 8వ స్థానంలో ఉండటం గమనార్హం. మహిళల అక్రమ రవాణాలోనూ రాష్ట్రం ఏడో స్థానంలో ఉంది. ఎస్సీలపై జరిగిన నేరాల్లో ఐదు, ఎస్టీలపై నేరాల్లో నాలుగు, ఆర్థిక నేరాల్లో పది, సైబర్‌ నేరాల్లో ఆరో స్థానంలో ఉంది. మొత్తం నేరాలన్నింటిలో కలిపి ఏపీ 13వ స్థానంలో ఉంది.    రైల్వే నేరాల్లో ఆరో స్థానంలో ఆంధ్రప్రదేశ్‌  రైల్వే నేరాల్లో దేశంలో ఏపీ ఆరో స్థానంలో నిలిచింది. ఇటీవల జాతీయ నేర నమోదు విభాగం(ఎన్‌సీఆర్‌బీ) నివేదిక వెల్లడించిన నేరాల చిట్టా చూస్తే విస్తుపోవాల్సిందే. 2016లో జరిగిన రైల్వే నేరాలను గమనిస్తే.. ఏపీలో రైళ్లలో హత్యలు, దొంగతనాలు, దోపిడీలు, స్మగ్లింగ్‌ హడలెత్తిస్తున్నాయి. రాష్ట్ర ప్రభుత్వ పర్యవేక్షణలోని గవర్నమెంట్‌ రైల్వే పోలీస్‌ (జీఆర్‌పీ) పరిధిలో 2014లో 1,786 కేసులు, 2015లో 1,809 కేసులు, 2016లో 1,893 కేసులు నమోదయ్యాయి. ఏపీలోని రైళ్లలో గంజాయి, బంగారం, సుంకం చెల్లించని విలువైన సామాగ్రి స్మగ్లింగ్‌ జరుగుతున్న తీరు పోలీసులకు సవాలుగా మారింది.   బెట్టింగ్‌లకు బ్రేక్‌ పడలేదు..  రాష్ట్రంలో పెద్దఎత్తున సాగుతున్న బెట్టింగ్‌ మాఫియాకు బ్రేక్‌ పడటంలేదు. క్రికెట్‌ బెట్టింగ్‌ మాఫియాకు అధికార పార్టీ అండదండలు ఉండటంతో పోలీసులు కన్నెత్తి చూడటంలేదు. బెట్టింగ్‌లు వేలాది కుటుంబాలను చిన్నాభిన్నం చేస్తున్నాయి. చంద్రబాబు గత పాలనలో హైదరాబాద్‌లో మొదలైన క్రికెట్‌ బెట్టింగ్‌లు క్రమంగా రాష్ట్రమంతా విస్తరించాయి. పల్లెల నుంచి పట్టణాల వరకు బెట్టింగ్‌ల కోసం ప్రత్యేకంగా బుకీలున్నారు. చిన్నపాటి పాన్‌షాపుల నుంచి ఫైవ్‌స్టార్‌ హోటళ్ల వరకు బుకీలకు నిలయాలుగా మారిపోయాయి. రాజకీయ, ఆర్థిక పలుకుబడి కలిగిన పలువురి అతిథిగృహాలు క్రికెట్‌ సీజన్‌లో బుకీలకు విందు, మందు, పొందుతో ఆతిథ్యమిచ్చే షెల్టర్‌జోన్‌లుగా మారిపోతున్నాయి. చివరకు ముంబైలోని అండర్‌వరల్డ్‌ డాన్‌ల వరకు అండదండలు ఉండటంతో బెదిరింపులు, కిడ్నాప్‌లకు బెట్టింగ్‌లు దారితీస్తున్నాయి. పేకాట శిబిరాలకు కూడా టీడీపీ నేతలే నిర్వాహకులుగా ఉండటం ఆందోళన కలిగిస్తోంది.  రెచ్చిపోతున్న ‘పచ్చ’ నేతలు - విశాఖపట్నం, గన్నవరం విమానాశ్రయాల్లో టీడీపీ ఎంపీ జేసీ దివాకర్‌రెడ్డి అక్కడి సిబ్బందిపై వీరంగం సృష్టించిన తీరు విమర్శలకు తావిచ్చింది. ఆయన తమ్ముడు, ఎమ్మెల్యే జేసీ ప్రభాకర్‌రెడ్డి గతంలో తమ దివాకర్‌ ట్రావెల్స్‌ బస్సును ఆపారన్న ఉక్రోశంతో హైదరాబాద్‌ ట్రాన్స్‌పోర్టు కార్యాలయానికి వెళ్లి అక్కడ అధికారిని కొట్టడం పెనుదుమారం సృష్టించింది. తాజాగా అనంతపురం జిల్లాలోని ప్రబోధానంద ఆశ్రమంపై జేసీ అనుచరుల దాడి ఉద్రిక్తతకు దారితీసింది.   - నిజాయితీగా విధులు నిర్వర్తించిన మహిళా తహసీల్దార్‌ వనజాక్షిపై టీడీపీ ఎమ్మెల్యే చింతమనేని ప్రభాకర్‌ తన అనుచరులతో దాడిచేసినప్పటికీ ఆమెకు న్యాయం చేయడంలో ప్రభుత్వం పచ్చపాతం చూపింది. సీఎం చంద్రబాబు పట్టించుకోకపోవడంతో మరింత రెచ్చిపోతున్న చింతమనేని అధికారులు, పోలీసులు, కార్మికులు, విలేకరులు, రాజకీయ నాయకులపై దాడులపర్వాన్ని కొనసాగిస్తున్నారు.  - విజయవాడ ఎంపీ కేశినేని శ్రీనివాస్‌(నాని), ఎమ్మెల్యే బొండా ఉమామహేశ్వరరావు, ఎమ్మెల్సీ బుద్దా వెంకన్నలు సీనియర్‌ ఐపీఎస్‌ అధికారి బాలసుబ్రమణ్యం విధులకు ఆటంకం కలిగించి దుర్భాషలాడటంతోపాటు ఆయన గన్‌మెన్‌పై దౌర్జన్యం చేసినా ఎలాంటి కేసులు, క్రమశిక్షణా చర్యలూ లేవు.  - పశ్చిమగోదావరి జిల్లా ఇరగవరం ఎస్‌ఐ శ్రీనివాస్, రైటర్‌ను నిర్బంధించి దుర్భాషలాడిన టీడీపీ తణుకు ఎమ్మెల్యే ఆరిమిల్లి రాధాకృష్ణ, మరో ఎనిమిది మందిపై తçప్పనిసరి పరిస్థితిలో కేసు నమోదు చేసినా చట్టపరమైన చర్యలు లేవు.    - నెల్లూరులో సీఐని తాట తీస్తానంటూ మంత్రి సోమిరెడ్డి చంద్రమోహన్‌రెడ్డి దుర్బాషలాడినా ఎలాంటి చర్యలూ లేవు.   - పశ్చిమగోదావరి జిల్లా తుందుర్రులో టీడీపీ ఎమ్మెల్యే బండారు మాధవనాయుడు జనచైతన్య యాత్ర సమయంలో ఫుడ్‌పార్కు విషయంలో నిరసన తెలిపిన మహిళలపై టీడీపీ కార్యకర్తలు దాడి చేసి తీవ్రంగా కొట్టారు.   - స్పీకర్‌ కోడెల శివప్రసాద్‌ తనయుడు శివరాం తన అనుచరులతో నడికుడి–శ్రీకాళహస్తి రైల్వే కాంట్రాక్టర్‌ పర్సంటేజీ(మామూళ్లు) ఇవ్వలేదనే కారణంతో దాడి చేసి వర్క్‌షాపు షెడ్డును కూల్చేసి, సామాగ్రిని ధ్వంసం చేసి ఎదురుకేసులు పెట్టిన ఘటన విమర్శలకు తావిచ్చింది.  - అనంతపురం జిల్లా కూడేరు మండలం జల్లిపల్లిలో సుధమ్మ అనే మహిళపై టీడీపీ గ్రామ సర్పంచ్‌ నాగరాజు, జన్మభూమి గ్రామ కమిటీ సభ్యుడు చంద్ర మూకుమ్మడిగా దాడి చేసి దారుణంగా కొట్టిన ఘటన రాష్ట్రంలో సంచలనం రేపింది.  ఎర్రచందనం స్మగ్లింగ్‌.. గంజాయి సాగు  అటు శేషాచలం అడవుల్లో ఎర్రచందనం స్మగ్లింగ్, ఇటు ఏవోబీలో గంజాయి సాగు పోలీసులకు సవాలుగా మారాయి. ఎర్ర చందనం స్మగ్లింగ్‌ నిరోధానికి ప్రత్యేక టాస్క్‌ఫోర్సు ఏర్పాటు చేసినప్పటికీ అడ్డుకోవడంలో పోలీసులు విఫలమవుతున్నారు. మరోవైపు విశాఖ, తూర్పుగోదావరి జిల్లాల్లోని ఏజెన్సీ ప్రాంతాల్లో వేలాది ఎకరాల్లో సాగవుతున్న గంజాయిని అరికట్టడంలోనూ ఇదే కథ. గంజాయి తోటలను ధ్వంసం చేస్తామంటూ మూడేళ్లుగా కార్యాచరణ ప్రకటిస్తున్న పోలీసులు మిగిలిన శాఖలను సమన్వయం చేసుకోవడంలో ఫలితం సాధించలేకపోతున్నారు. ఏజెన్సీ ప్రాంతాల నుంచి అమరావతికి, హైదరాబాద్‌కు, తమిళనాడు, ఒడిశా, పశ్చిమబెంగాల్‌ లకు గంజాయి స్మగ్లింగ్‌ అవుతున్నా చెక్‌పోస్టుల్లోని సిబ్బంది, ప్రత్యేక బృందాలు గంజాయి స్మగ్లింగ్‌ను చూసీచూడనట్టు వదిలేస్తున్నారనే విమర్శలున్నాయి.  ఖాకీ వనంలో కీచకులు..  త్యాగాలకు మారుపేరైన ఖాకీవనంలో కొందరు కలుపుమొక్కలుగా మారి చేస్తున్న అసాంఘిక కార్యకలాపాలు మొత్తం వ్యవస్థకే చెడ్డపేరు తెస్తున్నాయి. కొందరు పోలీసులే దందాలు, మాఫియాలను నడపడంతోపాటు హత్యలు చేయించడం, వివాహేతర సంబంధాలు పెట్టుకోవడంతో పోలీస్‌ శాఖ పరువుపోయింది. విశాఖ డీఎస్పీ రవిబాబు గతంలో చేయించిన ఒక హత్యను కప్పిపుచ్చుకునేందుకు మరో హత్య చేయించి దొరికిపోవడం పోలీస్‌ శాఖను జనంలో పలుచన చేసింది. భార్యాభర్తల వివాదం పరిష్కారంలో కృష్ణా జిల్లా కూచిపూడి ఎస్‌ఐగా పనిచేసిన గుడివాడ అనిల్‌ అతి వల్ల మొవ్వ మండలం కోసూరు శివారు తురకపాలెం గ్రామానికి చెందిన వీరంకి శ్రీహరి అనే యువకుడు ఆత్మహత్య చేసుకున్నాడు. సాయం కోసం పోలీసుస్టేషన్‌కు వచ్చిన వివాహిత ఫోన్‌ నెంబర్‌ను తీసుకున్న నూజివీడుకు చెందిన ఎస్‌ఐ వెంకటకుమార్‌ తన కోరిక తీర్చకుంటే వివాహిత భర్తను కేసులో ఇరికిస్తానంటూ నీచంగా ప్రవర్తించిన వైనం ప్రతి ఒక్కరినీ విస్మయపరిచింది. కృష్ణా జిల్లా హనుమాన్‌ జంక్షన్‌ ఎస్‌ఐ విజయకుమార్‌ నూజివీడుకు చెందిన ఒక బ్యూటీపార్లర్‌ నిర్వాహకురాలితో వివాహేతర సంబంధం నెరపడంతో ఆ ఫొటోలు, వీడియోను ఆమె భర్త సామాజిక మాధ్యమాల్లో పోస్టు చేయడంతో ఆ ఎస్‌ఐ సస్పెండ్‌ అయ్యాడు. మచిలీపట్నం సహోద్యోగి లైంగిక వేధింపులకు పాల్పడుతున్నాడంటూ ఫిర్యాదు చేసిన పోస్టల్‌  ఉద్యోగిని నుంచి రూ.25 వేలు లంచం తీసుకున్న ఎస్‌ఐ అశ్వక్‌పై క్రమశిక్షణ వేటు పడింది. తిరుపతిలో కుటుంబ వివాదాలపై ఫిర్యాదు చేసిన వివాహితతో ఫోన్‌లో తరచూ మాట్లాడుతూ తన రూమ్‌కు రావాలని కోరిన సీఐపై ఆమె అధికారులకు ఫిర్యాదు చేయడంతో సస్పెండ్‌ చేశారు. చిత్తూరు జిల్లాకు చెందిన మహిళతో వివాహేతర సంబంధం, క్రమశిక్షణారాహిత్యం కారణంగా ఏపీఎస్‌పీ బెటాలియన్‌ (మంగళగిరి) అసిస్టెంట్‌ కమాండెంట్‌ పీఎన్‌డీ ప్రసాద్‌ సస్పెండ్‌ అయ్యాడు. విజయవాడ బస్టాండులో అమ్మాయిలపై అసభ్యంగా ప్రవర్తించిన ఇద్దరు ఏపీఎస్‌పీ కానిస్టేబుళ్లపై సస్పెన్షన్‌ వేటు పడింది. 

సాక్షి, అమరావతి: ప్రతిపక్ష నేత, వైఎస్సార్‌సీపీ అధ్యక్షుడు వైఎస్‌ జగన్‌పై విశాఖపట్నం విమానాశ్రయంలో జరిగిన హత్యాయత్నం ఘటన కేసులో నిందితుడు శ్రీనివాసరావును జాతీయ దర్యాప్తు సంస్థ (ఎన్‌ఐఏ) అధికారులు శుక్రవారం ఎన్‌ఐఏ కోర్టులో హాజరుపరిచారు. నిందితుడు తరఫున న్యాయవాదులు దాఖలు చేసిన రెండు మెమోలను విచారించిన కోర్టు.. శ్రీనివాస్‌కు ఫిబ్రవరి 8 వరకు జుడీషియల్‌ రిమాండ్‌ విధించింది. నిందితుడిని రాజమండ్రి సెంట్రల్‌ జైల్‌కు తరలించాలని అధికారులను ఆదేశించింది. సెంట్రల్‌ జైల్లో శ్రీనివాస్‌కు ప్రత్యేక బ్యారక్‌తో పాటు పెన్ను, పుస్తకం, న్యూస్‌ పేపర్‌ అందించాలని అతని తరఫు న్యాయవాదులు కోరగా.. అందుకు ఎన్‌ఐఏ కోర్టు అంగీకరించింది.

సాక్షి, అమరావతి: ప్రతిపక్ష నేత, వైఎస్సార్‌సీపీ అధ్యక్షుడు వైఎస్‌ జగన్‌పై విశాఖపట్నం విమానాశ్రయంలో జరిగిన హత్యాయత్నం ఘటనకు సంబంధించి జాతీయ దర్యాప్తు సంస్థ (ఎన్‌ఐఏ) అధికారులు బుధవారం ఎన్‌ఐఏ కోర్టులో తుది చార్జిషీట్‌ దాఖలు చేశారు. దీంతోపాటు పలు డాక్యుమెంట్లను సైతం సమర్పించారు. తదుపరి దర్యాప్తును కొనసాగించి ఆధారాలను సమర్పిస్తామని ఎన్‌ఐఏ ప్రత్యేక పబ్లిక్‌ ప్రాసిక్యూటర్‌ కోర్టుకు నివేదించారు. కాగా, వైఎస్‌ జగన్‌పై హత్యాయత్నానికి పాల్పడిన శ్రీనివాసరావు తరఫున న్యాయవాదులు దాఖలు చేసిన రెండు మెమోలపై తదుపరి విచారణ ఈ నెల 25కి వాయిదా పడింది. శ్రీనివాసరావు రాసిన 22 పేజీల లేఖను ఎన్‌ఐఏ స్వాధీనం చేసుకుందని, ఆ లేఖను తమకు అప్పగించేలా ఆదేశాలు ఇవ్వాలంటూ అతడి తరఫున న్యాయవాది మెమో దాఖలు చేశారు. అలాగే శ్రీనివాసరావును విచారణ నిమిత్తం కస్టడీలోకి తీసుకునే విషయంలో ఎన్‌ఐఏ అధికారులు తమకు సరైన సమాచారం ఇవ్వలేదని కోర్టు దృష్టికి తెచ్చారు. తమ ప్రమేయం లేకుండా జరిగిన విచారణకు సంబంధించిన అంశాలను పరిగణనలోకి తీసుకోరాదంటూ మరో మెమో దాఖలు చేశారు.  జైలు అధికారులు తీసుకున్నారని నిందితుడే చెప్పాడు ఈ సందర్భంగా నిందితుడు శ్రీనివాసరావు తరఫున న్యాయవాది మట్టా జయకర్‌ వాదనలు వినిపిస్తూ నిందితుడు రాసిన 22 పేజీల లేఖను అతని ఇష్టానికి విరుద్ధంగా ఎన్‌ఐఏ అధికారులు తీసుకున్నారని చెప్పారు. న్యాయమూర్తి స్పందిస్తూ నిందితుడిని కోర్టు ముందు ప్రవేశపెట్టినప్పుడు.. తాను స్వయంగా అడిగినప్పుడు పుస్తకం రాశానని, దాన్ని జైలు అధికారులు తీసుకున్నారని శ్రీనివాసరావు స్పష్టంగా చెప్పాడని గుర్తు చేశారు. జయకర్‌ వాదనలను కొనసాగిస్తూ.. శ్రీనివాసరావును కస్టడీలోకి తీసుకునే రోజున జైలు లోపల, బయట ఉన్న సీసీ టీవీ ఫుటేజీలను సమర్పించేలా ఆదేశాలు ఇవ్వాలని కోరారు. ఈ సమయంలో ఎన్‌ఐఏ తరఫున ప్రత్యేక పబ్లిక్‌ ప్రాసిక్యూటర్‌ జోక్యం చేసుకుంటూ నిందితుడు రాసిన లేఖను దర్యాప్తులో భాగంగా జైలు అధికారుల నుంచి తీసుకున్నామని చెప్పారు. నిబంధనల ప్రకారమే నడుచుకున్నామని పిటిషనర్లు నిరాధార ఆరోపణలు చేస్తున్నారని వివరించారు. ఈ కేసులో తాము చార్జిషీట్‌ దాఖలు చేస్తున్నామని, ఆ లేఖను చార్జిషీట్‌తోపాటు కోర్టు ముందుంచుతున్నామన్నారు. తాము లేవనెత్తిన అభ్యంతరాలను చదవకుండానే నిందితుడి తరఫున న్యాయవాది ఇష్టమొచ్చినట్లు ఆరోపణలు చేయడం సరికాదన్నారు. న్యాయవాదుల సమక్షంలో శ్రీనివాసరావును విచారించాలని ప్రత్యేక కోర్టు ఆదేశించిందని తెలిపారు. నిందితుడి తరఫున న్యాయవాది సలీం ఫోన్‌ నెంబర్‌ తెలుసుకుని, నిందితుడిని ఎక్కడకు తీసుకెళుతున్నాం? ఎక్కడ విచారిస్తాం? ఎన్ని గంటలకు విచారిస్తాం? తదితర వివరాలను ఎప్పటికప్పుడు తెలియచేశామన్నారు. సలీంకు చేసిన ఫోన్‌ కాల్స్‌కు సంబంధించిన స్క్రీన్‌షాట్‌లను సైతం కోర్టు ముందుంచారు.   ఎవరిని పడితే వారిని అనుమతించడం సాధ్యం కాదు విచారణ సమయంలో శ్రీనివాసరావును ఎన్‌ఐఏ అధికారులు బాగా చూసుకున్నారని ప్రత్యేక పబ్లిక్‌ ప్రాసిక్యూటర్‌ కోర్టుకు తెలిపారు. విచారణ సమయంలో ఎవరిని పడితే వారిని అనుమతించడం సాధ్యం కాదని, శ్రీనివాసరావు తరఫున న్యాయవాదులమని చెప్పి వచ్చి, అతడికి ఏదైనా హాని తలపెడితే బాధ్యత ఎవరు వహిస్తారని ప్రశ్నించారు. ఈ కేసులో మీడియా ట్రయిల్‌ జరుగుతోందని, విచారణకు సంబంధించిన వివరాలను సలీం మీడియాకు తెలియచేశారని కోర్టుకు నివేదించారు. అందువల్ల ఈ కేసును బహిరంగంగా కాకుండా ఇన్‌ కెమెరా ప్రొసీడింగ్స్‌ ద్వారా విచారించాలని కోరారు. నిరాధార ఆరోపణలతో నిందితుడి తరఫున దాఖలు చేసిన మెమోలను కొట్టేయాలని కోరారు. వాదనలు విన్న న్యాయమూర్తి ఈ రెండు మెమోలపై ఉత్తర్వులను ఈ నెల 25న వెలువరిస్తానని స్పష్టం చేశారు. ఇదే సమయంలో ఈ కేసులో అటు రాష్ట్ర పోలీసుల సిట్, ఇటు ఎన్‌ఐఏ అధికారులు నిష్పాక్షికంగా దర్యాప్తు జరపడంలేదని, ఈ కేసులో వారు ఏ పత్రాల మీద ఆధారపడుతున్నారో వాటిని తమకు అందచేసేలా ఆదేశాలు ఇవ్వాలంటూ శ్రీనివాసరావు తరఫున మరో మెమో దాఖలైంది. ఈ మెమోపై స్పందించాలని ఎన్‌ఐఏ ప్రత్యేక పీపీని న్యాయమూర్తి ఆదేశించారు. 

సాక్షి, విశాఖపట్నం: ఏపీ సీఎం చంద్రబాబు నాయుడుకు హత్య రాజకీయాలు అలవాటేనని వైఎస్సార్‌ సీపీ సీనియర్‌ నాయకులు బొత్స సత్యనారాయణ ఆరోపించారు. వైఎస్సార్‌ సీపీ అధినేత వైఎస్‌ జగన్‌మోహన్‌రెడ్డిపై జరిగిన హత్యాయత్నం ఘటనలో చంద్రబాబుపై అనుమానాలు బలపడుతున్నాయని ఆయన అన్నారు. బుధవారం ఆయన మీడియాతో మాట్లాడుతూ.. వైఎస్‌ జగన్‌పై జరిగిన హత్యాయత్నంపై థర్డ్‌ పార్టీతో విచారణ జరిపించాలని తాము కోరితే.. చంద్రబాబు సిట్‌ వేసి కేసును నీరుగార్చే యత్నం చేశారని మండిపడ్డారు. ఎన్‌ఐఏ విచారణకు సిట్‌ సహకరించడం లేదని తెలిపారు. ఈ కేసులో కుట్రకోణంపై విచారణ జరపాలని ఎన్‌ఐఏ చార్జీషీట్‌ దాఖలు చేస్తే.. కేసు హైకోర్టు పరిధిలో ఉందని చెప్పి సిట్‌ అధికారులు వివరాలు ఇచ్చేందుకు నిరాకరించారని చెప్పారు. ఎన్‌ఐఏ విచారణను చంద్రబాబు పదేపదే అడ్డుకుంటున్నారని పేర్కొన్నారు. వైఎస్‌ జగన్‌పై జరిగిన హత్యాయత్నంతో టీడీపీ నేతలకు సంబంధం లేకుంటే.. ఎన్‌ఐఏ విచారణను అడుగడుగునా ఎందుకు అడ్డుకుంటున్నారో సమాధానం చెప్పాలని అన్నారు. ప్రతిపక్ష నాయకుడిపై హత్యాయత్నం జరిగితే దాన్ని తప్పుదోవ పట్టిస్తారా అని ప్రశ్నించారు. నీచపు ఆలోచనలతోనే చంద్రబాబు సర్కార్‌ ముందుకెళ్తుందని విమర్శించారు. ఇప్పటికైనా ఎన్‌ఐఏ విచారణకు ప్రభుత్వం సహకరించాలని కోరారు. చంద్రబాబు తీరును ప్రజలు గమనిస్తున్నారని.. వచ్చే ఎన్నికల్లో ఆయనకు తగిన బుద్ధి చెబుతారని హెచ్చరించారు.  

సాక్షి, హైదరాబాద్‌: వైఎస్సార్‌ కాంగ్రెస్‌ పార్టీ అధినేత వైఎస్‌ జగన్‌మోహన్‌రెడ్డిపై విశాఖపట్నం ఎయిర్‌పోర్ట్‌లో జరిగిన హత్యాయత్నం కుట్ర ప్రకారమే జరిగిందని ఆ పార్టీ అధికార ప్రతినిధి వాసిరెడ్డి పద్మ ఆరోపించారు. ఈ కేసును నీరుగార్చడానికే రాష్ట్ర ప్రభుత్వం సిట్‌ను ఏర్పాటు చేసిందని విమర్శించారు. హైదరాబాద్‌లోని వైఎస్సార్‌ సీపీ కేంద్ర కార్యాలయంలో బుధవారం ఆమె మీడియాతో మాట్లాడుతూ.. వైఎస్‌ జగన్‌పై జరిగిన హత్యాయత్నం కేసులో ఎన్‌ఐఏ దర్యాప్తు ముందుకు సాగకుండా అడ్డుపడుతుంది చంద్రబాబు కాదా అని ప్రశ్నించారు. ఎన్‌ఐఏ విచారణలో చంద్రబాబు, ఆయన కుమారుడు లోకేశ్‌ పాత్ర బయటకు వస్తుందనే భయం కనిపిస్తోందని ఆరోపించారు. అందుకే సిట్‌ దర్యాప్తు మాత్రమే ఫైనల్‌ కావాలనే భావనలో చంద్రబాబు ఉన్నట్టు తెలుస్తోందన్నారు ఎన్‌ఐఏ విచారణను ఆపేందుకు చంద్రబాబు ప్రధాని నరేంద్ర మోదీకి కూడా లేఖ రాశారని తెలిపారు. ఈ కేసులో ఆధారాలను ఎన్‌ఐఏకు ఇవ్వకుండా ఉండేందుకు చంద్రబాబు విశ్వప్రయత్నాలు చేస్తున్నారని మండిపడ్డారు. వైఎస్‌ జగన్‌ను రాజకీయంగా ఎదుర్కొలేకే ఇలాంటి కుట్రలు చేస్తున్నారని వ్యాఖ్యానించారు. పదేపదే ఎన్‌ఐఏ విచారణకు చంద్రబాబు అడ్డుపడటం చూస్తుంటే ఈ కేసులో ఆయన పాత్ర ఉందనేది స్పష్టమవుతుందని పేర్కొన్నారు. చంద్రబాబు తీరును అంతా గమనిస్తున్నారని.. ఆయనకు వ్యతిరేకంగా తీర్పు ఇవ్వడానికి ప్రజలు సిద్దంగా ఉన్నారని హెచ్చరించారు.  చంద్రబాబుకు ఇతర పార్టీల నేతలు టైం ఇవ్వని పరిస్థితి.. ఇంకా ఆమె మాట్లాడుతూ.. చంద్రబాబు రాష్ట్రంలో సమస్యలను వదిలి ఢిల్లీ చుట్టూ తిరుగుతున్నారని.. కానీ ఆయనతో మీటింగ్‌ అంటే ఇతర పార్టీల నేతలు టైం ఇవ్వని పరిస్థితి నెలకొందని ఎద్దేవా చేశారు. రాష్ట్ర ప్రయోజనాల కోసం కాకుండా.. స్వప్రయోజనాల కోసమే ఆయన ఢిల్లీ వెళ్తున్నారని విమర్శించారు. చంద్రబాబు ఈవీఎంలు వద్దని అంటున్నారని.. అయితే 2014లో ఆయన ఈవీఎంలను ట్యాంపరింగ్‌ చేసే గెలిచారా అంటూ ప్రశ్నించారు. చంద్రబాబును కలసి వచ్చిన తర్వాత టీజీ వెంకటేశ్‌ జనసేనతో పొత్తు అంటూ మాట్లాడతారని.. కానీ ఆ కొద్ది సేపటికే టీజీపై చంద్రబాబు అసహనం అని లీకులు ఇస్తారని వ్యాఖ్యానించారు. టీడీపీ, బీజేపీ, కాంగ్రెస్‌, జనసేన అంతా ఒక్కటేనని విమర్శించారు. వచ్చే ఎన్నికల్లో ఓటమికి చంద్రబాబు సాకులు వెతుక్కునే పనిలో పడినట్టుగా కనిపిస్తున్నారని ఆరోపించారు. చంద్రబాబు డ్రామాలన్నీ ప్రజలు గమనిస్తున్నారని తెలిపారు.

సాక్షి, విజయవాడ: వైఎస్సార్‌ కాంగ్రెస్‌ పార్టీ అధ్యక్షుడు, ఆంధ్రప్రదేశ్‌ ప్రతిపక్ష నాయకుడు వైఎస్‌ జగన్‌మోహన్‌ రెడ్డిపై హత్యాయత్నం కేసులో జాతీయ దర్యాప్తు సంస్థ(ఎన్‌ఐఏ) బుధవారం చార్జిషీట్‌ దాఖలు చేసింది. ఎన్‌ఐఏ కోర్టు న్యాయమూర్తికి చార్జిషీట్‌ను సమర్పించింది. నిందితుడు శ్రీనివాసరావు జైలులో రాసుకున్న 22 పేజీల పుస్తకాన్ని చార్జిషీట్‌తో పాటు జత చేసింది. చార్జిషీట్‌ కాపీని ఎవరికీ అందకుండా చూడాలని, గోప్యంగా ఉంచాలని కోర్టు సిబ్బందిని ఈ సందర్భంగా న్యాయమూర్తి ఆదేశించారు. ఈ కేసులో విచారణ ఎదుర్కొంటున్న జునుమిల్లి శ్రీనివాసరావును ఏ1 నిందితుడిగా పేర్కొన్నట్టు సమాచారం. కుట్రకోణంపై విచారణ కొనసాగిస్తామని కోర్టుకు ఎన్‌ఐఏ అధికారులు తెలిపారు. చార్జిషీట్‌లో ఏముందో ఈ నెల 25న తెలిసే అవకాశముంది. ఈ కేసులో పలు పిటిషన్లు పెండింగ్‌లో ఉండగా అత్యవసరంగా చార్జిషీట్ దాఖలు చేయాల్సిన అవసరం ఏమొచ్చిందని నిందితుడి తరఫున న్యాయవాది మట్టా జయకర్‌ ప్రశ్నించారు.

సాక్షి, విజయవాడ: ఏపీ ప్రతిపక్షనేత, వైఎస్సార్‌ కాంగ్రెస్ పార్టీ అధ్యక్షుడు వైఎస్‌ జగన్‌మోహన్ రెడ్డిపై విశాఖ ఎయిర్‌పోర్టులో జరిగిన హత్యాయత్నం ఘటన కేసును అడ్డుకునేందుకు ఏపీ ప్రభుత్వం ప్రయత్నాలు కొనసాగిస్తూనే ఉంది. హైకోర్టులో జాతీయ దర్యాప్తు సంస్థ(ఎన్ఐఏ) చార్జ్‌షీట్‌ దాఖలు చేసే సమయం దగ్గరపడుతుండటంతో టీడీపీ ప్రభుత్వం ఈ కేసును నిలువరించేందుకు  కుట్రలకు పాల్పడుతూనే  ఉంది. ఈ కేసుకు సంబంధించిన వివరాలు ఎన్ఐఏకు ఇవ్వాలని సిట్‌ అధికారులను హైకోర్టు ఆదేశించినప్పటికీ వారిలో ఎలాంటి చలనం లేదు. హైకోర్టు తుదితీర్పు వచ్చేంతవరకు ఎన్‌ఐఏకు సహకరించేది లేదని రాష్ట్ర ప్రభుత్వం ఖరాఖండిగా ప్రకటించేసింది.  తాజాగా హత్యాయత్నం కేసు విచారణను ఆపాలంటూ ఎన్ఐఏ కోర్టులో రాష్ట్ర ప్రభుత్వం పిటిషన్‌ దాఖలు చేసింది. హత్యాయత్నానికి సంబంధించిన కేసు హైకోర్టు పరిధిలో ఉన్నందున ఎన్‌ఐఏ విచారణ ఆపాలని పిటిషన్‌లో పేర్కొంది. వైఎస్‌ జగన్‌పై జరిగిన హత్యాయత్నం కేసును కావాలనే రాష్ట్ర ప్రభుత్వం జాప్యం చేస్తోందని న్యాయవాది వెంకటేశ్‌ శర్మ ఆరోపించారు. ఎన్ఐఏ చార్జ్‌షీట్‌ దాఖలు చేస్తే.. అసలు కుట్ర దారులు బయటికొస్తారనే భయంతోనే కేసును అడ్డుకునేందుకు సర్వశక్తులు ఒడ్డుతున్నారని విమర్శించారు.  ప్రభుత్వ కుట్రలను న్యాయపరంగా ఎదుర్కొంటామని వెంకటేశ్‌ శర్మ స్పష్టం చేశారు. 

సాక్షి, తూర్పు గోదావరి : ఏపీ ముఖ్యమంత్రి చంద్రబాబు నాయుడుపై బీజేపీ ఎమ్మెల్సీ సోము వీర్రాజు విమర్శల వర్షం కురిపించారు. వైఎస్‌ జగన్‌పై కోడి కత్తితో దాడి జరిగినపుడు సింపుల్‌గా మాట్లాడిన చంద్రబాబు నేడు ఎన్‌ఐఏ విచారణ వద్దంటూ ఎందుకు గగ్గోలు పెడుతున్నారని ప్రశ్నించారు.  దొరికిపోతాననే భయంతోనే బాబు న్యాయస్థానాన్ని ఆశ్రయిస్తున్నారని ఆరోపించారు. ఏపీ బీజేపీ అధ్యక్షుడు కన్నా లక్ష్మీనారాయణతో కలిసి ఆయన మంగళవారం మీడియాతో మాట్లాడారు. ఆంధ్రప్రదేశ్‌ అభివృద్థికి కేంద్రంలోని బీజేపీ పాటుపడుతోందని అన్నారు. సర్వశిక్ష అభియాన్‌ కింద కస్తూర్బా పాఠశాలకు కేంద్రం 600 కోట్లు మంజూరు చేసిందని తెలిపారు. మోరంపూడిలో ఫ్లైఓవర్‌ నిర్మాణానికి, హార్టికల్చర్ సబ్ సెంటర్లకు నిధులను కూడా కేంద్రమే ఇచ్చిందన్నారు. అగ్రవర్ణాల పేదలకు కేంద్రం 10 శాతం రిజర్వేషన్లు కేటాయిస్తే.. దానిలో నుంచి కాపులకు ఏపీలో 5 శాతం రిజర్వేషన్లు ఎలా ఇవ్వగలదని ప్రశ్నించారు. ప్రజలను రెచ్చగొట్టి అధికారంలోకి వచ్చిన చంద్రబాబు రాజకీయ వ్యవస్థలో ఉన్న సాధ్యాసాధ్యాల గురించి ఆలోచించాలని హితవు పలికారు. చంద్రబాబు పరిపక్వత లేని నిర్ణయంతో సమాజంలోని రెండు వర్గాల మధ్య దూరం పెంచుతున్నారని ఆగ్రహం వ్యక్తం చేశారు. కాపులకు, అగ్రవర్ణాలకు చిచ్చు..! అధికారం కోసమే అగ్ర అగ్రవర్ణాల రిజర్వేషన్లలో 5 ఐదు శాతం కాపులకు ఇస్తామని చంద్రబాబు చెబుతున్నారని కన్నా లక్ష్మీనారాయణ విమర్శించారు. బాబు అగ్రవర్ణాలు, కాపుల మధ్య చిచ్చు పెట్టాలని చూస్తున్నారని మండిపడ్డారు. ‘గతంలో మాల మాదిగల మధ్య, మొన్నటికి మొన్న బీసీలు, కాపుల మధ్య గొడవ పెట్టారు. బాబు మోసాన్ని కాపులు గమనించాలి’ అని వ్యాఖ్యానించారు. రాష్ట్రంలో రాష్ట్రపతి పాలన పెట్టాలని తాను ఎవరికి లేఖ రాయలేదని అన్నారు. ఇక్కడ ఉన్న శాంతి భద్రతలపై మాత్రమే హోం మంత్రికి లేఖ రాశానని చెప్పుకొచ్చారు. కేంద్ర ప్రభుత్వ సహాయ సహకారాలపై స్వయంగా మంత్రి అయ్యన్న పాత్రుడే చెప్పారు. రాష్ట్ర అభివృద్ధికి కేంద్రం చేసిన సహాయంపై మంత్రి మాటలకన్నా ఇంకేం ఆధారం కావాలని చురకలంటించారు.

సాక్షి, హైదరాబాద్‌: ప్రతిపక్ష నేత వైఎస్‌ జగన్‌మోహన్‌రెడ్డిపై విమానాశ్రయంలో జరిగిన హత్యాయత్నం ఘటనకు సంబంధించిన దర్యాప్తును అడ్డుకోవడానికే రాష్ట్ర ప్రభుత్వం పిటిషన్‌ దాఖలు చేసిందని కేంద్ర ప్రభుత్వం తరఫు న్యాయవాది, అసిస్టెంట్‌ సొలిసిటర్‌ జనరల్‌(ఏఎస్‌జీ) బొప్పుడి కృష్ణమోహన్‌ హైకోర్టుకు నివేదించారు. అందుకే న్యాయస్థానం ఆదేశించినా కూడా ఎన్‌ఐఏకు రికార్డులివ్వకుండా ఏపీ ప్రభుత్వం తాత్సారం చేస్తోందన్నారు. పైగా తమను రికార్డులివ్వాలని కోరుతున్నారని.. ఇది చాలా విచిత్రంగా ఉందన్నారు. ఎన్‌ఐఏ దర్యాప్తు ప్రారంభించగానే ఆ కేసుకు సంబంధించిన రికార్డులివ్వాలని చట్టంలో స్పష్టంగా ఉన్నా.. ఏపీ ప్రభుత్వం పట్టించుకోలేదని న్యాయస్థానం దృష్టికి తెచ్చారు. కాగా, రికార్డులన్నింటినీ జాతీయ దర్యాప్తు సంస్థ (ఎన్‌ఐఏ)కు అప్పగించే విషయంలో తమ ప్రయోజనాలను పరిరక్షించాలని హైకోర్టును రాష్ట్ర ప్రభుత్వం సోమవారం అభ్యర్థించింది. దీనికి హైకోర్టు సానుకూలంగా స్పందించలేదు. అయితే ఎన్‌ఐఏ దర్యాప్తునకు ఆదేశిస్తూ జారీ చేసిన ఉత్తర్వులకు సంబంధించిన రికార్డులను తమ ముందు ఉంచాలని కేంద్ర హోంశాఖను ఆదేశించింది. తదుపరి విచారణను ఈ నెల 30కి వాయిదా వేసింది. ఈ మేరకు న్యాయమూర్తి జస్టిస్‌ గుడిసేవ శ్యాంప్రసాద్‌ సోమవారం ఉత్తర్వులు జారీ చేశారు. జగన్‌పై జరిగిన హత్యాయత్నం ఘటనపై దర్యాప్తును ఎన్‌ఐఏకు అప్పగిస్తూ కేంద్ర హోంశాఖ జారీ చేసిన ఉత్తర్వులను సవాలు చేస్తూ రాష్ట్ర హోంశాఖ ముఖ్య కార్యదర్శి ఏఆర్‌ అనురాధ హైకోర్టులో పిటిషన్‌ దాఖలు చేసిన విషయం తెలిసిందే. ఈ వ్యాజ్యంపై సోమవారం న్యాయమూర్తి జస్టిస్‌ శ్యాంప్రసాద్‌ విచారణ జరిపారు. ఈ సందర్భంగా వాదనలు వాడిగా వేడిగా సాగాయి. ప్రభుత్వం తరఫున అడ్వొకేట్‌ జనరల్‌ (ఏజీ) దమ్మాలపాటి శ్రీనివాస్‌ వాదనలు వినిపిస్తూ, ఎన్‌ఐఏను దర్యాప్తు చేయాలన్న కేంద్ర హోంశాఖ ఆదేశాలను సవాలు చేశామని, అంతేకాక రికార్డులను ఎన్‌ఐఏకి ఇవ్వాలని ప్రత్యేక కోర్టు ఆదేశాలు జారీ చేసిందని, ఈ నేపథ్యంలో అత్యవసరంగా జోక్యం చేసుకోవాల్సిన అవసరం ఉందన్నారు. ఈ సమయంలో కేంద్ర ప్రభుత్వం తరఫున అసిస్టెంట్‌ సొలిసిటర్‌ జనరల్‌ (ఏఎస్‌జీ) బొప్పుడి కృష్ణమోహన్‌ వాదనలు వినిపిస్తూ, ఎన్‌ఐఏ దర్యాప్తు కొనసాగుతోందని, చట్ట ప్రకారం ఎన్‌ఐఏ దర్యాప్తునకు సహకరించాల్సిన బాధ్యత రాష్ట్ర పోలీసులపై ఉందని వివరించారు. ఎన్‌ఐఏకు దర్యాప్తు అప్పగించాలన్నది కేంద్రం స్వీయ నిర్ణయం కాదని, హైకోర్టు ఆదేశాల మేరకు తీసుకున్న నిర్ణయమన్నారు.  వాడీ వేడిగా వాదనలు.. ఏజీ స్పందిస్తూ, తాము దర్యాప్తును నిలుపుదల చేయాలని కోరడం లేదని, తమ ప్రయోజనాలను పరిరక్షించాలని మాత్రమే తాము కోరుతున్నామని చెప్పారు. ఎన్‌ఐఏ దర్యాప్తునకు ఎందుకు ఆదేశిస్తున్నారో కారణాలు చెప్పలేదని, కేవలం ఘటన తీవ్రత దృష్ట్యా అని మాత్రమే కేంద్ర హోంశాఖ ఆ ఉత్తర్వుల్లో పేర్కొందని వివరించారు. కేంద్రం జారీ చేసిన ఉత్తర్వులకు సంబంధించిన రికార్డులను సమర్పించేలా ఆదేశాలివ్వాలని కోరారు. కృష్ణమోహన్‌ వాదనలు వినిపిస్తూ.. కోర్టు ఆదేశించినా ఎన్‌ఐఏకు రికార్డులు ఇవ్వకుండా, తమను రికార్డులివ్వాలని కోరడం విచిత్రంగా ఉందన్నారు. దర్యాప్తును అడ్డుకోవడానికే ప్రభుత్వం ఈ పిటిషన్‌ దాఖలు చేసిందని తెలిపారు. ఈ సమయంలో ఎమ్మెల్యే ఆళ్ల రామకృష్ణారెడ్డి తరఫు న్యాయవాది పొన్నవోలు సుధాకర్‌రెడ్డి జోక్యం చేసుకుంటూ, తాము కేవియట్‌ దాఖలు చేశామని కోర్టు దృష్టికి తీసుకొచ్చారు. అయినా ప్రభుత్వం తమకు నోటీసు ఇవ్వకుండానే పిటిషన్‌ దాఖలు చేసిందన్నారు. ఏజీ స్పందిస్తూ,  తమ పిటిషన్‌తో వారికి ఏం సంబంధం లేదని, ఈ వ్యవహారంలో ఆళ్ల థర్డ్‌ పార్టీ అని చెప్పారు. దీనికి సుధాకర్‌రెడ్డి స్పందిస్తూ, జగన్‌పై జరిగిన హత్యాయత్నంపై ఎన్‌ఐఏ దర్యాప్తునకు ఆదేశించాలని కోరుతూ ఎమ్మెల్యే పిల్‌ దాఖలు చేసినపుడు తమకు సంబంధం లేకుండా ఎలా పోతుందని ప్రశ్నించారు. ఇది రాష్ట్ర ప్రభుత్వం, కేంద్రం మధ్య వివాదమని, అధికరణ 131 ప్రకారం కేవలం సుప్రీంకోర్టులో మాత్రమే పిటిషన్‌ దాఖలు చేయాలన్నారు. అయినా రాష్ట్ర ప్రభుత్వం కోర్టును తప్పుదోవ పట్టిస్తోందన్నారు. అనంతరం న్యాయమూర్తి, కేవియట్‌ కేసుల విచారణ జాబితాలో లేదని, అందువల్ల దాన్ని జాబితాలోకి వచ్చేలా చూసుకోవాలని సుధాకర్‌రెడ్డికి సూచించారు.  

సాక్షి, విజయవాడ: ఏపీ ప్రతిపక్షనేత, వైఎస్సార్‌ కాంగ్రెస్‌ పార్టీ అధ్యక్షుడు వైఎస్‌ జగన్‌మోహన్‌ రెడ్డిపై విశాఖ విమానాశ్రయంలో జరిగిన హత్యాయత్నం ఘటన కేసులో మరోసారి రాష్ట్ర ప్రభుత్వానికి చుక్కెదురైంది. ఈ కేసును జాతీయ దర్యాప్తు సంస్థ(ఎన్‌ఐఏ) నుంచి తప్పించాలని ఏపీ ప్రభుత్వం హైకోర్టులో స్టే పిటిషన్‌ దాఖలు చేసిన విషయం తెలిసిందే. దీనిపై సోమవారం విచారణ చేపట్టిన హైకోర్టు ధర్మాసనం స్టేను నిరాకరిస్తూ కేసును కొట్టివేసింది. ఈ నెల 30లోగా కౌంటర్‌ దాఖలు చేయాలని కేంద్ర ప్రభుత్వాన్ని ఆదేశించింది. ఇప్పటివరకు చేసిన దర్యాప్తు వివరాలను కోర్టు ముందు పెట్టాలని ఎన్‌ఐఏకు ఆదేశాలు జారీ చేసింది. 

సాక్షి ప్రతినిధి, విశాఖపట్నం : ప్రతిపక్షనేత, వైఎస్సార్‌ కాంగ్రెస్‌ పార్టీ అధ్యక్షుడు వైఎస్‌ జగన్‌మోహన్‌రెడ్డిపై హత్యాయత్నం కేసులో కీలకంగా భావిస్తున్న ఎయిర్‌పోర్ట్‌లోని ఫ్యూజన్‌ఫుడ్స్‌ రెస్టారెంట్‌ యజమాని, టీడీపీ నేత హర్షవర్ధన్‌ చౌదరిని జాతీయ దర్యాప్తు సంస్థ (ఎన్‌ఐఏ) అధికారులు విచారించారు. గత ఏడాది అక్టోబర్‌ 25న విశాఖ విమానాశ్రయంలో వైఎస్‌ జగన్‌మోహన్‌రెడ్డిపై కత్తి దూసి హత్యాయత్నానికి పాల్పడిన శ్రీనివాసరావు ఫ్యూజన్‌ఫుడ్స్‌లో పనిచేసిన సంగతి తెలిసిందే. ఆ రెస్టారెంట్‌ కేంద్రంగానే కుట్ర జరిగిందనేది అందరూ అనుమానించినా.. రాష్ట్ర ప్రభుత్వం నియమించిన ప్రత్యేక దర్యాప్తు బృందం (సిట్‌) అధికారులు హర్షవర్ధన్‌ జోలికే వెళ్లలేదు. సీఎం చంద్రబాబు కుటుంబానికి సన్నిహితుడైన హర్షవర్ధన్‌తో కనీసం మాట్లాడేందుకు సాహసించలేదు. అయితే ఎన్‌ఐఏ నోటీసులు అందుకున్న తర్వాత హర్షవర్ధన్‌ పత్తాలేకుండా పోయారు. ఇదే విషయమై సాక్షిలో వార్త వచ్చిన దరిమిలా.. తనకు యాక్సిడెంట్‌ అయి ఇంట్లోనే కదల్లేని స్థితిలో ఉన్నానని ఎన్‌ఐఎ అధికారులకు హర్షవర్ధన్‌ సమాచారమిచ్చారు. దీంతో ఎన్‌ఐఏ అధికారులే రెండు రోజుల కిందట గాజువాకలోని అతని ఇంటికి వెళ్లి విచారణ చేపట్టారు. ఆయన చెప్పిన వివరాలను మొత్తం రికార్డు చేశారు. శ్రీనివాసరావు ఎలా పరిచయం, ఎన్‌వోసీ లేకుండా ఎలా ఉద్యోగంలోకి తీసుకున్నారు. అతను రెస్టారెంట్‌లోనే కత్తులు దాచినా ఎందుకు గమనించలేదని ప్రశ్నించినట్టు తెలుస్తోంది. 

అది 2018 అక్టోబర్‌ 25. నయవంచక పాలనపై సమరభేరి మోగిస్తూ... ప్రజాసమస్యలను క్షేత్రస్థాయిలో తెలుసుకునేందుకు వైఎస్సార్‌సీపీ అధినేత జగన్‌మోహన్‌రెడ్డి చేపట్టిన ప్రజాసంకల్ప యాత్ర అశేష జనవాహిని నడుమ విజయనగరం జిల్లా సాలూరు నియోజకవర్గం మక్కువలో సాగుతోంది. ఆ రోజు మొదటిపూట యాత్ర పూర్తి చేసుకుని హైదరాబాద్‌లో కోర్టుకు హాజరయ్యేందుకు విశాఖ ఎయిర్‌పోర్టుకు అధినేత చేరుకున్నారు. ఇంతలో ఓ దుండగుడు ఆయన్ను హతమార్చేందుకు కత్తితో దాడిచేశాడు. అనుకోని సంఘటనతో ఆయన చుట్టూ ఉన్నవారు ఒక్కసారిగా నిశ్చేష్టులయ్యారు. దానికి సంబంధించిన కేసు  నీరుగార్చేందుకు రాష్ట్ర ప్రభుత్వం ఓ వైపు ప్రయత్నిస్తుంటే... ఎన్‌ఐఏ మాత్రం కేసు మూలాల దర్యాప్తులో తలమునకలై ఉంది. సాక్షిప్రతినిధి, విజయనగరం: రాష్ట్ర ప్రజల గుండెల్లో గూడుకట్టుకున్న నాయకుడు, వైఎస్సార్‌సీపీ అధినేత వై.ఎస్‌.జగన్‌మోహన్‌రెడ్డి. ఆయన్ను ఎలాగైనా అడ్డుతొలగించుకోవాలన్నదే ప్రత్యర్థుల వ్యూహం. అందుకు వేదికయ్యింది విశాఖ ఎయిర్‌పోర్టు. రెస్టారెంట్‌లో పనిచేసే ఓ యువకుడిని అందుకు పావుగా వాడుకున్నారు. వాడిచేత హతమార్చాలని యత్నించారు. కానీ ఆ కుట్ర ఫలించలేదు. ప్రజల ఆశీస్సులు, భగవంతుని కృపవల్ల అంత పెద్ద గండం నుంచి జగన్‌ బయటపడగలిగారు. అంతటి నాయకుడిపై జరిగిన హత్యాయత్నం కేసు విషయంలో రాష్ట్ర ప్రభుత్వం వ్యవహరిస్తున్న తీరుపై సర్వత్రా సందేహాలు నెలకొన్నాయి. ఈ నేపథ్యంలో జాతీయ దర్యాప్తు సంస్థ(ఎన్‌ఐఏ) రంగంలోకి దిగింది. చకచకా కేసు విచారణ సాగిస్తోంది. దానిలో భాగంగా ప్రత్యక్ష సాక్షులను శనివారం విశాఖ పిలిపించి విచారించింది. వారిలో జిల్లాకు చెందిన సాలూరు ఎమ్మెల్యే పీడిక రాజన్నదొర, పార్టీ జిల్లా రాజకీయ వ్యవహారాల సమన్వయకర్త మజ్జి శ్రీనివాసరావు కూడా ఉన్నారు. వీరిద్దరూ ఎన్‌ఐఏకు తమ వాంగ్మూలాన్ని ఇచ్చారు. అసలేం జరిగిందంటే... రాష్ట్రంలో సాగుతున్న నయవంచక పాలనపై సమరభేరి మోగిస్తూ... ప్రజలు పడుతున్న ఇబ్బందులను క్షేత్రస్థాయిలో  తెలుసుకునేందుకు విపక్ష నేత వై.ఎస్‌.జగన్‌మోహన్‌రెడ్డి చేస్తున్న ప్రజా సంకల్పయాత్ర 294వ రోజైన గతేడాది అక్టోబర్‌ 25న సాలూరు నియోజకవర్గంలోని మక్కువ మండలంలో కొనసాగింది. చప్పబుచ్చమ్మపేట క్రాస్‌ వద్ద ఏర్పాటు చేసిన శిబిరం నుంచి పాదయాత్ర ప్రారంభించిన జగన్‌ పాయకపాడు మీదుగా మక్కువ మండల కేంద్రం శివారు వద్ద ఏర్పాటు చేసిన శిబిరానికి చేరుకుని  ముగించారు. అక్కడి నుంచి హైదరాబాద్‌ వెళ్లేందుకు విశాఖ విమానాశ్రయానికి చేరుకున్నారు. ఆయన వెంట సాలూరు ఎమ్మెల్యే రాజన్నదొర, పార్టీ జిల్లా రాజకీయవ్యవహారాల సమన్వయకర్త మజ్జి శ్రీనివాసరావు కూడా ఉన్నారు. జగన్‌తో సెల్ఫీ దిగే నెపంతో దగ్గరకు వచ్చిన శ్రీనివాసరావు అనే దుండగుడు కోడి పందాలకు వాడే పదునైనకత్తితో జగన్‌పై హత్యాయత్నానికి పాల్పడ్డాడు. ఈ దుర్ఘటనలో జగన్‌ భుజానికి తీవ్ర గాయమైంది. ఈ సమయంలో అక్కడే ఉన్న మజ్జి శ్రీనివాసరావు, మరికొందరు పార్టీ నేతలు కలిసి నిందితుడ్ని పట్టుకుని పోలీసులకు అప్పగించారు. నిందితుడు ఉపయోగించిన ఆయుధాన్ని మాత్రం స్థానిక పోలీసులకు ఇవ్వలేదు. ఎయిర్‌పోర్టు భద్రతా విభాగం అధికారులకు అందజేశారు. రాష్ట్ర ప్రభుత్వ తీరుపై మొదటినుంచీ అనుమానాలు ప్రతిపక్షనేతపై హత్యాయత్నం ఘటనపై రాష్ట్ర ప్ర భుత్వం, డీజీపీ స్పందించిన తీరుపై సర్వత్రా అనుమానాలు వ్యక్తమయ్యాయి. ఇక్కడి పోలీసుల దర్యాప్తుపై నమ్మకం కోల్పోయిన వీరు రాష్ట్ర ప్రభుత్వం నియమించిన ‘సిట్‌’ అధికారులకు మజ్జి శ్రీను, రాజన్నదొర ఎలాంటి వాంగ్మూలం ఇవ్వలేదు. అనంతర పరిణామాల్లో కేసు నేషనల్‌ ఇన్వెస్టిగేషన్‌ ఏజెన్సీ(ఎన్‌ఐఏ) చేతికి వెళ్లింది. కేంద్ర ప్రభుత్వ ఆధీనంలోని సంస్థ దర్యాప్తు చేస్తుండటంతో మరలా పార్టీ ఆదేశాలను అనుసరించి వీరు ఎన్‌ఐఎకు సహరించేందుకు సిద్ధపడ్డారు. మరోవైపు ఎన్‌ఐఏ కూడా విచారణకు హాజరుకావాల్సిందిగా వీరికి నోటీసులు జారీచేయడంతో విశాఖ వెళ్లి అక్కడి ఎన్‌ఐఏ అధికారుల బృందానికి పూర్తిగా వాంగ్మూలం ఇచ్చారు. ఎన్‌ఐఏ ఎప్పుడు పిలిచినా విచారణకు రావడానికి తాము సిద్ధమని, తమ నాయకుడిపై జరిగిన హత్యాయత్నం వెనుక ఎంతటి పెద్దవాళ్లున్నా వారికి చట్టప్రకారం శిక్షపడేలా ఎన్‌ఐఏ చేస్తుందనే నమ్మకం తమకుందని తెలిపారు. సామాన్యుల పరిస్థితేంటి ఎవరిపై హత్యాయత్నం జరిగినా రాష్ట్ర ప్రభుత్వం సీరియస్‌గా తీసుకోవాలి. కానీ ఓ పార్టీకి అధినేత, ప్రధాన ప్రతిపక్ష నేతపై హత్యాయత్నం జరిగితే ప్రభుత్వమే ఈ కేసును నీరుగార్చే ప్రయత్నం ఎందుకు చేయాలనుకుంటోందో ప్రజలు అర్ధం చేసుకోవాలి. చట్టప్రకారం కేంద్ర ప్రభుత్వం నిర్ణయం తీసుకుని ఎన్‌ఐఏను నియమించింది. అత్యంత ప్రజాదరణ కలిగిన నాయకుడి కేసు దర్యాప్తును అడ్డుకోవడానికి న్యాయ స్థానంలో రాష్ట్ర ప్రభుత్వం పిటిషన్‌ వేయడం, ఎన్‌ఐఏకు సహకరించకపోవడం చూస్తుంటే అనుమానాలు మరింత బలపడుతున్నాయి. ఎన్‌ఐఏ ద్వారా న్యాయం జరుగుతుందని భావిస్తున్నాం. – పీడిక రాజన్నదొర, ఎమ్మెల్యే, సాలూరు. కుట్రదారులంతా బయటికొస్తారు ఆ రోజు ఎయిర్‌పోర్టులో జరిగిన ప్రతి విషయాన్నీ ఎన్‌ఐఏ అధికారుల దృష్టికి తీసుకువెళ్లాం. వారు మా వాంగ్మూలాన్ని నమోదు చేసుకున్నారు. ఎన్‌ఐఏ విచారణను అడ్డుకోమని, విచారణే వద్దని రాష్ట్ర ప్రభుత్వం కోర్టులో వేస్తే న్యాయస్థానం వారికి అనుకూలంగా స్పందించకుండా వాయిదా వేయడాన్ని స్వాగతిస్తున్నాం. జగన్‌మోహన్‌రెడ్డిపై జరిగిన హత్యాయత్నం కేసును నీరుగార్చాలని రాష్ట్ర ప్రభుత్వం ప్రయత్నిస్తోంది. ఘటన వెనుక ఉన్న రాష్ట్ర పెద్దలు, కుట్ర దారులంతా ఎన్‌ఐఏ విచారణ ద్వారా బయటకు రావడం తథ్యం. – మజ్జి శ్రీనివాసరావు, జిల్లా పార్టీ రాజకీయ వ్యవహారాల సమన్వయకర్త, విజయనగరం

సాక్షి, హైదరాబాద్‌: ప్రతిపక్ష నేత, వైఎస్సార్‌ కాంగ్రెస్‌ పార్టీ అధ్యక్షుడు వైఎస్‌ జగన్‌మోహన్‌రెడ్డిపై విశాఖపట్నం విమానాశ్రయంలో జరిగిన హత్యాయత్నం దర్యాప్తు బాధ్యతలను జాతీయ దర్యాప్తు సంస్థ (ఎన్‌ఐఏ)కు అప్పగిస్తూ కేంద్ర హోంశాఖ జారీ చేసిన ఉత్తర్వును సవాలు చేస్తూ రాష్ట్ర ప్రభుత్వం హైకోర్టును ఆశ్రయించింది. కేంద్ర ప్రభుత్వ ఉత్తర్వు, తదనుగుణంగా ఎన్‌ఐఏ నమోదు చేసిన ఎఫ్‌ఐఆర్‌ను చట్ట విరుద్ధంగా ప్రకటించి, వాటిని రద్దు చేయాలని కోరుతూ రాష్ట్ర హోం శాఖ ముఖ్య కార్యదర్శి ఏఆర్‌ అనురాధ హైకోర్టులో పిటిషన్‌ దాఖలు చేశారు. ఇందులో కేంద్ర హోంశాఖ కార్యదర్శి, ఎన్‌ఐఏ డైరెక్టర్‌ జనరల్, ఎన్‌ఐఏ డిప్యూటీ ఇన్‌స్పెక్టర్‌ జనరల్‌ను ప్రతివాదులుగా పేర్కొన్నారు. ప్రస్తుతం హైకోర్టుకు సంక్రాంతి సెలవులు ఉన్న నేపథ్యంలో ఈ వ్యాజ్యంపై హౌస్‌మోషన్‌ (న్యాయమూర్తి ఇంటి వద్ద)రూపంలో విచారణ జరపాలని అభ్యర్థించారు. అయితే హౌస్‌మోషన్‌గా విచారించేందుకు హైకోర్టు నిరాకరించింది. అత్యవసరంగా విచారించాల్సినది ఈ వ్యాజ్యంలో ఏమీ లేదని తేల్చి చెప్పింది. సంక్రాంతి సెలవుల అనంతరం సోమవారం నుంచి హైకోర్టు పునః ప్రారంభమవుతున్న నేపథ్యంలో ఈ వ్యాజ్యంపై ఆ రోజు న్యాయమూర్తి ముందు ప్రస్తావించే అవకాశం ఉంది.  హత్యాయత్నం చిన్న విషయం... జగన్‌పై జరిగిన హత్యాయత్నం ఘటనను రాష్ట్ర ప్రభుత్వం తన పిటిషన్‌లో చాలా చిన్న విషయంగా అభివర్ణించింది. ఇంత చిన్న విషయంపై కేంద్ర ఎన్‌ఐఏ దర్యాప్తునకు ఆదేశించడంపై అభ్యంతరం వ్యక్తం చేసింది. శాంతి, భద్రతల వ్యవహారం పూర్తిగా రాష్ట్ర ప్రభుత్వ పరిధిలోనిదని, ఇందులో జోక్యం చేసుకునే అధికారం కేంద్రానికి లేదని తన 13 పేజీల పిటిషన్‌లో పేర్కొంది. ఎన్‌ఐఏ దర్యాప్తునకు కేంద్రం ఆదేశించినపుడు అందుకు కారణాలను తెలియచేయాలంది. అయితే ఈ కేసు విషయంలో  తన ఉత్తర్వులో ఎటువంటి కారణాలను పేర్కొనలేదని తెలిపింది. జగన్‌పై జరిగిన దాడిని చాలా చిన్న విషయంగా తాము భావిస్తున్నామని తెలిపింది. దీనికీ పౌర విమానయాన భద్రతకూ ఎటువంటి సంబంధం లేదని వివరించింది. కేంద్ర హోంశాఖ ఉత్తర్వు, ఎన్‌ఐఏ ఎఫ్‌ఐఆర్‌ చట్ట విరుద్ధమని, ఏకపక్షంగా తీసుకున్న నిర్ణయమని ఆరోపించింది. ప్రత్యేక దర్యాప్తు బృందం (సిట్‌) దర్యాప్తునకు సంబంధించిన రికార్డులను, ఇతర మెటీరియల్‌ను స్వాధీనం చేయాలని ఎన్‌ఐఏ అధికారులు ఒత్తిడి చేస్తున్నారని, అందువల్ల ఈ వ్యాజ్యాన్ని దాఖలు చేస్తున్నామని తెలిపింది. ఈ కేసులో ఉన్న అత్యవసరం దృష్ట్యా దీనిపై అత్యవసర విచారణ జరపాల్సిన అవసరం ఉందంది. కేంద్ర ప్రభుత్వ ఉత్తర్వు, ఎన్‌ఐఏ ఎఫ్‌ఐఆర్‌కు సంబంధించిన తదుపరి చర్యలన్నింటినీ నిలిపేస్తూ మధ్యంతర ఉత్తర్వులు జారీ చేయాలని అభ్యర్థించింది.  

ముమ్మిడివరం/సాక్షి ప్రతినిధి, విశాఖపట్నం: విశాఖ ఎయిర్‌పోర్టులో వైఎస్సార్‌సీపీ అధినేత, ప్రతిపక్ష నేత వైఎస్‌ జగన్‌మోహన్‌రెడ్డిపై హత్యాయత్నానికి పాల్పడిన జనుపల్లి శ్రీనివాసరావు స్వగ్రామమైన తూర్పుగోదావరి జిల్లా ముమ్మిడివరం మండలం ఠాణేల్లంకలో రెండో రోజు శనివారం కూడా ఎన్‌ఐఏ అధికారులు విచారణ నిర్వహించారు. గతేడాది అక్టోబర్‌ 25న విశాఖ ఎయిర్‌పోర్టులో వైఎస్‌ జగన్‌పై హత్యాయత్నం జరిగిన విషయం తెలిసిందే. ఈ కేసును విచారిస్తున్న ఎన్‌ఐఏ బృందం.. సీఐ మహబూబ్‌బాషా ఆధ్వర్యంలో మరో ముగ్గురు అధికారులు శుక్రవారం శ్రీనివాసరావు కుటుంబ సభ్యులను విచారించారు. రెండో రోజు శనివారం ఠాణేల్లంకలో వీఆర్వో భాస్కరరావు సమక్షంలో శ్రీనివాసరావుకు ఉత్తరం రాసిన సోదరి విజయదుర్గను, జగన్‌తో కలిసి ఉన్న ఫ్లెక్సీ వేయించిన శ్రీనివాసరావు స్నేహితుడు, విజయదుర్గ రాసిన ఉత్తరాల జిరాక్స్‌ కాపీలు తీసిన జిరాక్స్‌ సెంటర్‌ నిర్వాహకుడు జె.శివసుబ్రహ్మణ్యంను విచారించారు. శ్రీనివాసరావు ప్రవర్తనపై గ్రామంలో పలువురు యువకులను విచారించారు. నిందితుడి తండ్రి తాతారావు, తల్లి సావిత్రి, సోదరుడు సుబ్బరాజులకు సంబంధించి ఆస్తి వివరాలు, బ్యాంకు అకౌంట్లు, ఇతర ఆర్థిక లావాదేవీలపై విచారణ చేశారు. నిందితుడిపై గతంలో ముమ్మిడివరం పోలీస్‌స్టేషన్‌లో నమోదైన కేసు వివరాలు, ఎయిర్‌పోర్ట్‌లో ఉద్యోగంలో చేరే సమయంలో ఎన్‌ఓసీ కోసం శ్రీనివాసరావు పోలీస్‌స్టేషన్‌కు దరఖాస్తు చేసుకున్నాడా.. లేదా.. తదితర వివరాలను లిఖిత పూర్వకంగా ఇవ్వాలని పోలీసులను కోరినట్లు తెలిసింది.  మీరైనా నిజాయితీతో విచారించి దోషులను పట్టుకోండి  ‘మీపై నమ్మకంతో వచ్చాం.. ఏం జరిగిందో మొత్తం చెబుతాం.. నిజాయితీతో విచారణ చేపట్టి దోషులను పట్టుకోండి. కుట్రదారులను, సూత్రధారులను బయటపెట్టండి’ అంటూ ఎన్‌ఐఏ అధికారులను వైఎస్సార్‌సీపీ నేతలు కోరారు. శనివారం మధ్యాహ్నం ఎన్‌ఐఏ బృందం ఎదుట వారు విచారణకు హాజరయ్యారు. విశాఖ విమానాశ్రయంలో జగన్‌పై హత్యాయత్నం జరిగిన సమయంలో వీవీఐపీ లాంజ్‌లో ఉన్న నేతలందరినీ సాక్షులుగా పేర్కొంటూ ఎన్‌ఐఏ నోటీసులిచ్చింది. విచారణకు ముందు మళ్ల విజయప్రసాద్‌ నివాసంలో భేటీ అయిన వైఎస్సార్‌సీపీ నేతలు  ఎన్‌ఐఏ తాత్కాలిక కార్యాలయంలో సరైన వసతులు లేనందున వైఎస్సార్‌సీపీ నగర అధ్యక్షుడు మళ్ల విజయప్రసాద్‌ నివాసంలో విచారణకు హాజరుకావాలని అధికారులు సమాచారమిచ్చారు. ఈ మేరకు పార్టీ నేతలు విచారణకు హాజరయ్యారు. ముగ్గురు అధికారుల బృందం ఒక్కొక్కరితో కనీసం పావుగంట సేపు విడివిడిగా మాట్లాడి వివరాలు సేకరించింది. ఎమ్మెల్యే పీడిక రాజన్న దొర, మాజీ ఎమ్మెల్యేలు మళ్ల విజయప్రసాద్, తైనాల విజయకుమార్, ద్వారంపూడి చంద్రశేఖరరెడ్డి, కరణం ధర్మశ్రీ, నేతలు మజ్జి శ్రీనివాసరావు, తిప్పల నాగిరెడ్డి, కేకే రాజు, ఎ.సుధాకర్, జియ్యాని శ్రీధర్, కొండా రాజీవ్‌గాంధీ విచారణకు హాజరయ్యారు. ‘ఆ రోజు ఏం జరిగిందో వివరించాం.. ఎన్‌ఐఏ అధికారులైనా నిజాలు నిగ్గు తేలుస్తారని భావిస్తున్నాం’ అని నేతలు మీడియాతో చెప్పారు.  

సాక్షి, విజయవాడ : ఏపీ ప్రతిపక్షనేత, వైఎస్సార్‌ కాంగ్రెస్‌ పార్టీ అధ్యక్షుడు వైఎస్‌ జగన్‌మోహన్‌ రెడ్డిపై విశాఖ విమానాశ్రయంలో జరిగిన హత్యాయత్నం ఘటన కేసులో రాష్ట్ర ప్రభుత్వానికి చుక్కెదురైంది. ఈ కేసును జాతీయ దర్యాప్తు సంస్థ(ఎన్‌ఐఏ) నుంచి తప్పించాలని ఏపీ ప్రభుత్వం హైకోర్టులో హౌస్‌మోషన్‌ పిటిషన్‌ దాఖలు చేసింది. శనివారం విచారణ చేపట్టిన ధర్మాసనం.. ఈ పిటిషన్‌ను తిరస్కరించింది. అత్యవసరంగా విచారించాల్సిన అవసరం ఈ పిటిషన్‌కు లేదని స్పష్టం చేసింది. ఈ తీర్పుతో ఎన్‌ఐఏ విచారణను అడ్డుకోవాలని భావించిన చంద్రబాబు ప్రభుత్వ ప్రయత్నానికి బ్రేక్‌ పడింది.  దొడ్డి దారిన ఆర్డర్‌ తెచ్చే ప్రయత్నం : జగన్‌ తరఫు న్యాయవాది ఏపీ ప్రభుత్వం హౌస్‌మోషన్‌ పిటిషన్‌ దాఖలు చేసి దొడ్డి దారిన ఆర్డర్‌ తెచ్చే ప్రయత్నం చేసిందని జగన్‌ తరఫు న్యాయవాది సుజాత శర్మ అన్నారు. ఈ పిటిషన్‌ను అత్యవసరంగా విచారించాల్సిన అవసరం లేదని కోర్టు స్పష్టం చేసిందని ఆమె మీడియాకు వివరించారు. హత్యయత్నం జరిగిన చోటు కేంద్రం పరిధిలో ఉందని చంద్రబాబు మాట్లాడారని, ఇప్పుడేమో కుట్ర ఎక్కడ భయటపడుతుందోనని, ఎన్‌ఐఏ విచారణను అడ్డుకునే ప్రయత్నం చేస్తున్నారని తెలిపారు. ఈ కేసులో నిజాన్ని బయటకు రాకుండా ప్రభుత్వం ప్రయత్నిస్తోందన్నారు. ఈ కేసు విషయంలో సోమవారం తమ వాదనలు బలంగా వినిపిస్తామని చెప్పారు.

విజయవాడ లీగల్‌/సాక్షి ప్రతినిధి, విశాఖపట్నం/రాజమహేంద్రవరం క్రైం: వైఎస్సార్‌సీపీ అధ్యక్షుడు, ప్రతిపక్ష నేత వైఎస్‌ జగన్‌పై హత్యాయత్నం కేసుకు సంబంధించి పూర్తి రికార్డులు, మెటీరియల్‌ ఆబ్జెక్టులను ఎన్‌ఐఏకు అప్పగించాలని రాష్ట్ర పోలీసులను న్యాయస్థానం శుక్రవారం ఆదేశించింది. ఈ కేసుకు సంబంధించిన రికార్డులు, మెటీరియల్‌ ఆబ్జెక్టులను తమకు ఇవ్వకుండా ఏపీ పోలీసులు సహాయనిరాకరణ చేస్తున్నారని ఎన్‌ఐఏ అధికారులు న్యాయస్థానంలో గురువారం ప్రత్యేక మెమో దాఖలు చేసిన విషయం తెలిసిందే. రికార్డులు ఇవ్వకపోవడంతో నిబంధనల మేరకు 90 రోజుల్లో చార్జిషీట్‌ దాఖలు చేయలేకపోతున్నామని, దాంతో నిందితుడికి బెయిల్‌ వచ్చే అవకాశం ఉందని ఎన్‌ఐఏ అధికారులు న్యాయస్థానం దృష్టికి తీసుకొచ్చారు. ఈ మెమోపై విచారించిన విజయవాడలోని ఎన్‌ఐఏ న్యాయస్థానం శుక్రవారం ఆదేశాలు జారీ చేసింది. వైఎస్‌ జగన్‌పై హత్యాయత్నానికి సంబంధించి రాష్ట్ర పోలీసులు ఇప్పటిదాకా చేసిన దర్యాప్తు వివరాలతో కూడిన నివేదిక, ఆ కేసుకు సంబంధించిన రికార్డులు, మెటీరియల్‌ ఆబ్జెక్టులను ఎన్‌ఐఏ అధికారులకు అందజేయాలని విశాఖపట్నం పోలీసు అధికారులను ఆదేశించింది. దీంతో వైఎస్‌ జగన్‌పై హత్యాయత్నం కేసులో ఎన్‌ఐఏ తమ దర్యాప్తును మరింత వేగవంతం చేసేందుకు మార్గం సుగమమైంది.  నిందితుడు శ్రీనివాసరావును విజయవాడ కోర్టుకు తీసుకొస్తున్న ఎన్‌ఐఏ అధికారులు   25 వరకు నిందితుడి రిమాండ్‌ పొడిగింపు  వైఎస్‌ జగన్‌మోహన్‌రెడ్డిపై హత్యాయత్నం కేసులో నిందితుడు జనుపల్లి శ్రీనివాసరావుకు ఈ నెల 25 వరకు రిమాండ్‌ను పొడిగిస్తూ విజయవాడలోని ఎన్‌ఐఏ ప్రత్యేక న్యాయస్థానం శుక్రవారం ఉత్తర్వులు జారీ చేసింది. నిందితుడు వారం రోజుల ఎన్‌ఐఏ కస్టడీ శుక్రవారంతో ముగిసింది. దాంతో ఎన్‌ఐఏ అధికారులు అతడిని విజయవాడలోని ప్రత్యేక కోర్టలో శుక్రవారం హాజరుపరిచారు. నిందితుడి వైద్య పరీక్షల రిపోర్టులను కూడా దాఖలు చేశారు. ఎన్‌ఐఏ అధికారులు థర్డ్‌ డిగ్రీ ప్రయోగించారా... ఏమైనా ఇబ్బందులు పెట్టారా అని నిందితుడు శ్రీనివాసరావును న్యాయమూర్తి ప్రశ్నించారు. తనను ఏ విధంగానూ ఇబ్బంది పెట్టలేదని శ్రీనివాసరావు బదులిచ్చాడు. నిందితునికి ప్రాణహాని ఉందని, విజయవాడ జిల్లా జైలు సురక్షితం కాదని అతడి తరఫు  న్యాయవాది సలీం న్యాయమూర్తి దృష్టికి తీసుకొచ్చారు. దీనిపై న్యాయమూర్తి నిందితుడిని జైలులో పరిస్థితుల గురించి అడగ్గా, తనకు విజయవాడ జైలు అయినా రాజమండ్రి జైలు అయిన ఇబ్బంది లేదని తెలిపాడు. దాంతో అతడిని రాజమండ్రి సెంట్రల్‌ జైలుకు తరలించాలని  న్యాయమూర్తి ఉత్తర్వులు జారీ చేశారు. అనంతరం శ్రీనివాసరావును ఎన్‌ఐఏ అధికారులు రాజమండ్రి సెంట్రల్‌ జైలుకు తరలించారు. తాను తప్ప మరే న్యాయవాది శ్రీనివాసరావును కలవకూడదంటూ అతడి తరఫు న్యాయవాది సలీం కోర్టులో మెమో దాఖలు చేశారు. తాను లేని సమయంలో శ్రీనివాసరావును ఎన్‌ఐఏ అధికారులు 30 గంటలపాటు  విచారించారని, ఆ వివరాలను కోర్టువారు పరిగణనలోకి తీసుకోరాదని కోరారు. దీనిపై పబ్లిక్‌ ప్రాసిక్యూటర్లు స్పందిస్తూ.. శ్రీనివాసరావును విచారించడానికి వారంరోజుల కస్టడీకి అప్పగిస్తూ న్యాయస్థానం జారీ చేసిన ఉత్తర్వులను అతనికి అందజేయగా విచారణకు తనకు ఎటువంటి అభ్యంతరం లేదని నిందితుడు లిఖితపూర్వకంగా పేర్కొన్నాడని తెలిపారు. శ్రీనివాసరావును కస్టడీకి తీసుకున్న అనంతరం ఫోన్‌ ద్వారా అతడి తరఫు న్యాయవాది సలీంకు సమాచారం ఇచ్చామని న్యాయస్థానానికి తెలిపారు.    22 పేజీల లేఖపై 23న వాదనలు  నిందితుడు శ్రీనివాసరావు విశాఖపట్నం జైలులో రాసిన 22 పేజీల లేఖను జైలు సూపరింటెండెంట్‌ తీసుకున్నారని అతడి తరఫు న్యాయవాది సలీం న్యాయస్థానం దృష్టికి తీసుకొచ్చారు. ఆ లేఖను తనకు ఇప్పించాలని కోరుతూ మెమో దాఖలు చేశారు. దీనిపై ఎన్‌ఐఏ తరఫున ప్రత్యేక పబ్లిక్‌ పబ్లిక్‌ ప్రాసిక్యూటర్లు వాదనలు వినిపించారు. ఆ 22 పేజీల లేఖను కేసు దర్యాప్తు చేస్తున్న ఎన్‌ఐఏ ప్రధాన అధికారికి అప్పగించాలని కోరారు. ఆ తరువాతే ఆ లేఖ కాపీని నిందితుడి తరఫు న్యాయవాదికి ఇవ్వాలని న్యాయస్థానానికి విన్నవించారు. దీనిపై ప్రత్యేక మెమో దాఖలు చేయాలని ఎన్‌ఐఏ తరఫున వాదిస్తున్న పబ్లిక్‌ ప్రాసిక్యూటర్లను న్యాయమూర్తి ఆదేశించారు. ఈ కేసు విచారణను ఈ నెల 23వ తేదీకి వాయిదా వేశారు.  కొనసాగుతున్న ఎన్‌ఐఏ విచారణ  ప్రతిపక్ష నేత వైఎస్‌ జగన్‌పై హత్యాయత్నం కేసుపై దర్యాప్తు కొనసాగుతోంది. విశాఖపట్నంలోనే మకాం వేసిన ఎన్‌ఐఏ అధికారులు గురు, శుక్రవారాల్లో ఘటనాస్థలం విశాఖ ఎయిర్‌పోర్ట్‌లోని వీవీఐపీ లాంజ్, పక్కనే ఉన్న ఫ్యూజన్‌ ఫుడ్స్‌ రెస్టారెంట్‌ ప్రాంతాలను నిశితంగా పరిశీలించారు. కైలాసగిరి పోలీస్‌ హెడ్‌ క్వార్టర్స్‌ ప్రాంగణంలో ఏర్పాటు చేసిన ఎన్‌ఐఏ తాత్కాలిక కార్యాలయంలో కొద్దిరోజులుగా సాక్షులను విచారిస్తున్న సంగతి తెలిసిందే. ఈ క్రమంలోనే వైఎస్సార్‌సీపీకి చెందిన మాజీ కార్పొరేటర్‌ జియ్యాని శ్రీధర్‌ను శుక్రవారం రెండున్నర గంటలపాటు విచారించారు. మూడు రోజుల క్రితం శ్రీధర్‌ను పిలిపించి వైఎస్‌ జగన్‌పై హత్యాయత్న ఘటన సమయంలో ఏం జరిగిందో వివరాలు నమోదు చేసుకున్న ఎన్‌ఐఎ అధికారులు శుక్రవారం మరోసారి విచారణ చేపట్టారు. ఆ రోజు ఏం జరిగింది? హత్యాయత్నం సమయంలో ఇంకా ఎవరెవరు ఉన్నారు? అనే వివరాలను అడిగి తెలుసుకున్నారు. కాగా, విచారణకు హాజరు కావాల్సిందిగా ఎన్‌ఐఏ నుంచి నోటీసులు అందుకున్న మిగిలిన వైఎస్సార్‌సీపీ నేతలు శనివారం హాజరుకానున్నట్టు సమాచారం.  ఆరోగ్యం కుదుటపడ్డాక విచారణకు సహకరిస్తా: హర్షవర్దన్‌ చౌదరి  జగన్‌పై హత్యాయత్నం కేసులో కీలకంగా భావిస్తున్న తెలుగుదేశం పార్టీ నేత, ఎయిర్‌పోర్ట్‌లోని ఫ్యూజన్‌ ఫుడ్స్‌ రెస్టారెంట్‌ యజమాని హర్షవర్దన్‌ చౌదరి ఇప్పటివరకు పత్తాలేకుండా పోయిన సంగతి తెలిసిందే. ఎన్‌ఐఏ విచారణకు హర్షవర్దన్‌ గైర్హాజరుపై శుక్రవారం ‘సాక్షి’లో ప్రచురితమైన కథనం కలకలం రేపింది. ఈ నేపథ్యంలో హర్షవర్దన్‌ శుక్రవారం ఎన్‌ఐఏ అధికారులకు అందుబాటులోకి వచ్చాడు. తనకు యాక్సిడెంట్‌ అయి కదల్లేని పరిస్థితుల్లో ఇంట్లోనే ఉన్నానని, ఆరోగ్యం కుదుటపడిన తర్వాత విచారణకు వచ్చి సహకరిస్తానని సమాచారం పంపాడు. ఎన్‌ఐఎ అధికారులు శుక్రవారం గాజువాకలోని హర్షవర్దన్‌ ఇంటికి వెళ్లి వీలైనంత త్వరగా విచారణకు హాజరు కావాల్సిందిగా ఆదేశించినట్టు సమాచారం.   జైలులో శ్రీనివాసరావుకు ప్రత్యేక సెల్‌  వైఎస్‌ జగన్‌పై హత్యాయత్నం కేసులో నిందితుడు శ్రీనివాసరావును విజయవాడ నుంచి రోడ్డు మార్గం ద్వారా శుక్రవారం రాత్రి రాజమహేంద్రవరం సెంట్రల్‌ జైలుకు పటిష్టమైన బందోబస్తు మధ్య తరలించారు. నిందితుడికి ప్రాణహాని ఉన్న దృష్ట్యా రాజమహేంద్రవరం సెంట్రల్‌ జైలులో ఇతర ఖైదీలతో కలపకుండా ప్రత్యేకమైన సెల్‌(గది)లో అతడిని ఉంచుతున్నట్లు జైలు సూపరింటెండెంట్‌ సాయిరామ్‌ ప్రకాశ్‌ తెలిపారు. అతడిని సాధారణ ఖైదీల మాదిరిగానే పరిగణిస్తామని, అయితే ప్రాణహాని ఉందని నిందితుడు కోర్టుకు తెలియజేసిన నేపథ్యంలో కోర్టు ఆదేశాల మేరకు అతడిని ప్రత్యేక సెల్‌లో ఉంచి, నిరంతరం పర్యవేక్షించేందుకు ఒక గార్డును ఏర్పాటు చేస్తున్నామని తెలిపారు. 

విజయవాడ: వైఎస్సార్‌ కాంగ్రెస్‌ పార్టీ అధ్యక్షుడు, ఆంధ్రప్రదేశ్‌ ప్రతిపక్ష నాయకుడు వైఎస్‌ జగన్‌మోహన్‌ రెడ్డిపై జరిగిన హత్యాయత్నం కేసులో సిట్‌ సహాయ నిరాకరణపై ఎన్‌ఐఎ కోర్టు ఆగ్రహం వ్యక్తం చేసింది. తమకు సిట్‌ సహకరించడం లేదని ఎన్‌ఐఎ దాఖలు చేసిన పిటిషన్‌పై విచారణ చేపట్టిన కోర్టు.. సిట్‌ వద్ద ఉన్న వివరాలు, ఆధారాలను ఎన్‌ఐఎకు అప్పగించాలని స్పష్టం చేసింది. ఈ మేరకు సిట్‌ ఏసీసీ నాగేశ్వరరావుకు న్యాయస్థానం ఆదేశాలు జారీ చేసింది. అదే సమయంలో నిందితుడు జనుపల్లి శ్రీనివాసరావుకు ఈ నెల 25 వరకు జ్యుడిషియల్‌ రిమాండ్‌ విధించింది. ఈ క్రమంలోనే ఎన్‌ఐఏ దాఖలు చేసిన మెమోపై వాదనలు ఈనెల 23న వింటామని పేర్కొంది. వారం రోజుల ఎన్‌ఐఏ కస్టడీ ముగియడంతో శ్రీనివాసరావుకు అంతకుముందు అధికారులు విజయవాడ ప్రభుత్వాసుపత్రిలో వైద్య పరీక్షలు చేయించారు. తర్వాత అతడిని కోర్టులో హాజరుపరిచారు. శ్రీనివాసరావుకు విజయవాడలో భద్రత లేదని అతడి తరపు న్యాయవాది సలీమ్‌ కోర్టు దృష్టికి తీసుకొచ్చారు. దీనిపై ప్రభుత్వ న్యాయవాదిని వివరణ కోరగా రక్షణ కల్పించలేమని ఒప్పుకున్నారు. దీంతో నిందితుడిని రాజమండ్రి సెంట్రల్‌ జైలుకు తరలించాలని న్యాయస్థానం ఆదేశించింది. దాంతో శ్రీనివాసరావును రాజమండ్రి జైలుకు తరలించారు.

సాక్షి, విజయవాడ: వైఎస్సార్‌ కాంగ్రెస్‌ పార్టీ అధ్యక్షుడు, ఆంధ్రప్రదేశ్‌ ప్రతిపక్ష నాయకుడు వైఎస్‌ జగన్‌మోహన్‌ రెడ్డిపై హత్యాయత్నం చేసిన జనుపల్లి శ్రీనివాసరావుకు ఎన్‌ఐఏ కోర్టు ఈ నెల 25 వరకు జ్యుడిషియల్‌ రిమాండ్‌ విధించింది. దర్యాప్తుకు రాష్ట్ర పోలీసులు, సిట్‌ అధికారులు సహకరించడం లేదని ఎన్‌ఐఏ దాఖలు చేసిన మెమోపై వాదనలు ఈనెల 23న వింటామని పేర్కొంది. కౌంటర్‌ దాఖలు చేయాలని ఎన్‌ఐఏ, సిట్‌ అధికారులను ఆదేశించింది. (ఎన్‌ఐఏకు సిట్‌ సహాయ నిరాకరణ) వారం రోజుల ఎన్‌ఐఏ కస్టడీ ముగియడంతో శ్రీనివాసరావుకు అంతకుముందు అధికారులు విజయవాడ ప్రభుత్వాసుపత్రిలో వైద్య పరీక్షలు చేయించారు. తర్వాత అతడిని కోర్టులో హాజరుపరిచారు. ఎన్‌ఐఏ అధికారులు ఏమైనా ఇబ్బంది పెట్టారా అని న్యాయమూర్తి అడగ్గా.. ఏం లేదని శ్రీనివాసరావు సమాధానమిచ్చాడు. మీడియాతో మాట్లాడేందుకు అవకాశం ఇవ్వాలన్న నిందితుడి విజ్ఞప్తిని తిరస్కరించారు. శ్రీనివాసరావుకు విజయవాడలో భద్రత లేదని అతడి తరపు న్యాయవాది సలీమ్‌ కోర్టు దృష్టికి తీసుకొచ్చారు. దీనిపై ప్రభుత్వ న్యాయవాదిని వివరణ కోరగా రక్షణ కల్పించలేమని ఒప్పుకున్నారు. దీంతో నిందితుడిని రాజమండ్రి సెంట్రల్‌ జైలుకు తరలించాలని న్యాయస్థానం ఆదేశించింది. కోర్టు ఆదేశాలతో పటిష్ట భద్రత నడుమ నిందితుడిని రాజమండ్రికి తీసుకెళుతున్నారు. (ఎన్‌ఐఏ విచారణకు హర్షవర్ధన్‌ గైర్హాజరు)

సాక్షి, అమరావతి బ్యూరో, విజయవాడ లీగల్‌: ప్రతిపక్ష నేత వైఎస్‌ జగన్‌మోహన్‌రెడ్డిపై విశాఖ ఎయిర్‌పోర్టులో హత్యాయత్నం కేసు విచారణకు సంబంధించి రాష్ట్ర పోలీసులు, సిట్‌ అధికారులు తమకు ఏమాత్రం సహకరించడం లేదని జాతీయ దర్యాప్తు సంస్థ (ఎన్‌ఐఏ) న్యాయస్థానం దృష్టికి తెచ్చింది. ఈ మేరకు ఎన్‌ఐఏ తరఫున ప్రత్యేక పబ్లిక్‌ ప్రాసిక్యూటర్‌ గురువారం విజయవాడ ఎన్‌ఐఏ న్యాయస్థానంలో మెమో దాఖలు చేశారు. వాదనలను విన్న అనంతరం దీనిపై విచారణను న్యాయస్థానం రేపటికి వాయిదా వేసింది. వైఎస్‌ జగన్‌పై గత ఏడాది అక్టోబరు 25న జరిగిన హత్యాయత్నం తీవ్ర సంచలనం సృష్టించింది. ఘటన జరిగిన గంటల వ్యవధిలోనే సీఎం చంద్రబాబు, డీజీపీ ఠాకూర్‌లు స్పందిస్తూ కేసును తప్పుదారి పట్టించేలా వ్యాఖ్యలు చేసిన నేపథ్యంలో ఈ కేసు విచారణను స్వతంత్ర దర్యాప్తు సంస్థలతో నిర్వహించేలా ఆదేశించాలని కోరుతూ వైఎస్సార్‌సీపీ న్యాయస్థానాన్ని ఆశ్రయించడం తెలిసిందే. అనంతరం ఈ కేసుపై విచారణను ఎన్‌ఐఏకు అప్పగిస్తూ ఉత్తర్వులిచ్చినట్లు కేంద్ర హోం శాఖ న్యాయస్థానానికి నివేదించింది. ఈ నేపథ్యంలో ఇప్పటివరకు చేపట్టిన విచారణకు సంబంధించిన రికార్డులు, మెటీరియల్, వస్తువులను ఎన్‌ఐఏకు అప్పగించాలని విశాఖ పోలీసులను కోర్టు ఆదేశించింది. అయితే విశాఖ పోలీసులు కేసుకు సంబంధించిన రికార్డులను ఇంతవరకు తమకు అప్పగించకుండా సహాయ నిరాకరణ చేయడంపై ఎన్‌ఐఏ న్యాయస్థానాన్ని ఆశ్రయించింది. విశాఖ పోలీసులు కోర్టు ఆదేశాలను ఉల్లంఘిస్తూ తమకు కేసు రికార్డులు, మెటీరియల్, ఆబ్జెక్ట్స్‌అందించడం లేదని పేర్కొంది. 23లోగా చార్జిషీట్‌ దాఖలు చేయకుంటే నిందితుడికి బెయిల్‌! విశాఖ పోలీసు అధికారులు నిందితుడు శ్రీనివాసరావుకు సహకరిస్తున్నారని, తమ విచారణకు మాత్రం సహకరించడం లేదని ఎన్‌ఐఏ స్పష్టం చేసింది. ఈ కేసులో 90 రోజుల్లోగా అంటే ఈ నెల 23లోగా తాము చార్జ్‌షీట్‌ దాఖలు చేయాల్సి ఉందని, లేదంటే నిందితుడు శ్రీనివాసరావు బెయిల్‌పై బయటకు వచ్చే అవకాశం ఉందని ఎన్‌ఐఏ న్యాయస్థానానికి నివేదించింది. ఈ కేసులో తాము ఎఫ్‌ఐఆర్‌ దాఖలు చేసి చాలా రోజులైనా రాష్ట్ర పోలీసు అధికారులు విచారణకు ఏ మాత్రం సహకరించడం లేదని తెలిపింది. రికార్డులు లేకుండా చార్జ్‌షీట్‌ దాఖలు చేయలేమని కోర్టు దృష్టికి తెచ్చింది. కేసుకు సంబంధించిన రికార్డులు, మెటీరియల్, ఆబ్జెక్ట్‌లను తమకు అప్పగించేలా విశాఖ పోలీసులను ఆదేశించాలని ఎన్‌ఐఏ తరఫున ప్రత్యేక పబ్లిక్‌ ప్రాసిక్యూటర్‌ న్యాయస్థానాన్ని కోరారు. వాదనలు విన్న న్యాయమూర్తి ఈ కేసు విచారణను శుక్రవారానికి వాయిదా వేశారు. మరోవైపు వైఎస్‌ జగన్‌పై హత్యాయత్నం కేసులో నిందితుడు జనుపల్లి శ్రీనివాసరావు కస్టడీ శుక్రవారంతో ముగియనున్న నేపథ్యంలో నేడు కోర్టులో హాజరు పరిచే అవకాశం ఉన్నట్లు తెలిసింది. తదుపరి విచారణ నిమిత్తం నిందితుడిని మరో వారం రోజులు పాటు తమ కస్టడీకి అప్పగించాలని ఎన్‌ఐఏ కోరే అవకాశం ఉంది.  కుట్ర కోణం వెలుగులోకి వస్తోందనే... ప్రతిపక్ష నేత వైఎస్‌ జగన్‌పై హత్యాయత్నం కేసులో రాష్ట్ర ప్రభుత్వ పెద్దలే సూత్రధారులని స్పష్టమవుతోంది. ఈ హత్యాయత్నం కేసులో కుట్ర కోణం వెలుగులోకి వస్తే తమ బండారం బట్టబయలవుతుందని బెంబేలెత్తుతూ రాష్ట్ర పోలీసుల ద్వారా కేసు విచారణను తప్పుదారి పట్టిస్తున్నారు. కోర్టు ఆదేశాలతో ఎన్‌ఐఏ ఈ కేసు విచారణను చేపట్టడంతో సహాయ నిరాకరణ అస్త్రాన్ని ప్రయోగిస్తున్నారు. న్యాయస్థానం ఆదేశాలను  బేఖాతరు చేస్తూ రాజ్యాంగ సూత్రాలను కాలరాస్తూ రాష్ట్ర ప్రభుత్వం బరితెగించడం విస్మయపరుస్తోంది.  సీబీఐకి రాష్ట్ర ప్రభుత్వం అడ్డుకట్ట  వైఎస్‌ జగన్‌పై హత్యాయత్నం కేసు విచారణను కేంద్ర ప్రభుత్వ సంస్థలు చేపడితే తమ కుట్ర బట్టబయలవుతుందని ప్రభుత్వ పెద్దలు ఆందోళన చెందారు. ఈ నేపథ్యంలోనే సీబీఐ విచారణకు అనుమతిస్తూ గతంలో ఇచ్చిన అనుమతిని రాష్ట్ర ప్రభుత్వం హఠాత్తుగా ఉపసంహరించుకుంది. ఈమేరకు 2018 నవంబరు 8న ప్రత్యేక జీవో జారీ చేసింది. జగన్‌పై హత్యాయత్నం కేసు విచారణను సీబీఐ చేపట్టకుండా అడ్డుకునేందుకే హడావుడిగా ఈ జీవో ఇచ్చినట్లు స్పష్టమవుతోంది.  ‘ఎన్‌ఐఏ’పై సహాయ నిరాకరణ అస్త్రం న్యాయస్థానం ఆదేశాలతో జగన్‌పై హత్యాయత్నం కేసును విచారిస్తున్న ఎన్‌ఐఏను సైతం సీఎం చంద్రబాబు తీవ్రంగా వ్యతిరేకించడం న్యాయ నిపుణులను విస్మయపరిచింది. ఎన్‌ఐఏ విచారణను వ్యతిరేకిస్తూ చంద్రబాబు ప్రధాని మోదీకి లేఖ రాయడంపై జాతీయ స్థాయిలో తీవ్ర విమర్శలు వెల్లువెత్తాయి. ఈ హత్యాయత్నం సూత్రధారులను రాష్ట్ర ప్రభుత్వం రక్షించేందుకు యత్నిస్తోందన్నది దీనిద్వారా మరింతగా ప్రస్పుటమైంది. రాష్ట్ర పోలీసుల సహాయ నిరాకరణపై ఎన్‌ఐఏ తాజాగా న్యాయస్థానంలో మెమో దాఖలు చేయడం గమనార్హం.  రికార్డులను తారుమారు చేసే అవకాశం? న్యాయస్థానం ఆదేశించిన తరువాత నిబంధనల ప్రకారం జగన్‌పై హత్యాయత్నం కేసుకు సంబంధించిన అన్ని రికార్డులను  రాష్ట్ర పోలీసులు ఎన్‌ఐఏకు అప్పగించాలి. కానీ విశాఖపట్నం పోలీసులు ఇంతవరకు ఆ పని చేయకపోవడం విస్మయపరుస్తోంది. రాష్ట్ర ప్రభుత్వ పెద్దల ఒత్తిడితోనే ఇలా వ్యవహరిస్తున్నారనే విమర్శలు వ్యక్తమవుతున్నాయి. ఈ రికార్డులను తారుమారు చేసే అవకాశం ఉందనే ఆందోళన వ్యక్తమవుతోంది. బెయిల్‌పై తరలించి మట్టుబెట్టే కుట్ర? వైఎస్‌ జగన్‌పై హత్యాయత్నం ఘటన జరిగిన వెంటనే కేసు విచారణ చేపట్టిన విశాఖపట్నం పోలీసులు ఉద్దేశపూర్వకంగానే రెండు నెలలు దాటినప్పటికీ చార్జ్‌షీట్‌ దాఖలు చేయలేదు. మరోవైపు ఈనెల 9న విచారణ చేపట్టిన ఎన్‌ఐఏకు రికార్డులు అందించకుండా సహాయ నిరాకరణ చేస్తున్నారు. దీంతో ఎన్‌ఐఏ చార్జిషీట్‌ దాఖలు చేయడంలో జాప్యం జరుగుతోంది. ఈ నెల 23 వరకు ఇలాగే వ్యవహరించి నిందితుడు శ్రీనివాసరావుకు బెయిల్‌ వచ్చేలా చూడాలన్నది ప్రభుత్వ పెద్దల వ్యూహంగా ఉంది. బెయిల్‌పై శ్రీనివాసరావు బయటకు వస్తే తరువాత ఎలాంటి పరిణామాలు సంభవిస్తాయో అంతు చిక్కకుండా ఉంది. తన ప్రాణాలకు ముప్పు ఉందని ఇప్పటికే నిందితుడు తీవ్ర ఆందోళన వ్యక్తం చేయడం తెలిసిందే. భద్రత లేని బాహ్య ప్రపంచంలోకి శ్రీనివాసరావును తరలించి మట్టుబెట్టేందుకు కుట్ర పన్నారా? అనే సందేహాలు వ్యక్తమవుతున్నాయి. ఎన్‌ఐఏ దర్యాప్తుపై హైకోర్టుకు సర్కారు! సాక్షి, అమరావతి: ప్రతిపక్ష నేత వైఎస్‌ జగన్‌మోహన్‌రెడ్డిపై జరిగిన హత్యాయత్నం ఘటనపై జాతీయ దర్యాప్తు సంస్థ (ఎన్‌ఐఏ) విచారణకు ఆదేశిస్తూ కేంద్ర ప్రభుత్వం జారీ చేసిన ఉత్తర్వులను న్యాయస్థానంలో సవాల్‌ చేయాలని రాష్ట్ర ప్రభుత్వం నిర్ణయించింది. ఎన్‌ఐఏ దర్యాప్తుపై హైకోర్టులో పిటిషన్‌ దాఖలు చేసేందుకు అంతా సిద్ధం చేసింది. ప్రస్తుతం హైకోర్టుకు సంక్రాంతి సెలవులు కావడంతో శుక్రవారం లేదా శనివారం హౌస్‌మోషన్‌ (న్యాయమూర్తి ఇంటి వద్ద విచారణ జరపడం) రూపంలో పిటిషన్‌ దాఖలు చేయనున్నట్లు సమాచారం. హౌస్‌మోషన్‌ రూపంలో అత్యవసరంగా విచారణ జరిపేందుకు హైకోర్టు నిరాకరిస్తే సోమవారం కోర్టు పునఃప్రారంభమయ్యాక ఈ వ్యవహారంపై వాదనలు వినాలని అభ్యర్థించనుంది. హౌస్‌మోషన్‌ రూపంలో ఈ వ్యాజ్యంపై విచారణ జరిపే అవకాశాలు చాలా తక్కువగా ఉన్నాయి. ప్రస్తుతం హైదరాబాద్‌లో ఉన్న ఏపీ హైకోర్టు న్యాయమూర్తులంతా శనివారం లేదా ఆదివారం అమరావతి చేరుకునే వీలుంది. ఎన్‌ఐఏ తన దర్యాప్తును ఎప్పుడో ప్రారంభించినందున హౌస్‌మోషన్‌ రూపంలో విచారణ జరిపే అవకాశాలు తక్కువగా ఉన్నాయని భావిస్తున్నారు.  సీఎంతో డీజీపీ ఠాకూర్‌ భేటీ ఎన్‌ఐఏ దర్యాప్తుపై సీఎం చంద్రబాబు గురువారం డీజీపీ ఠాకూర్‌తో ప్రత్యేకంగా సమావేశమై సుదీర్ఘంగా చర్చించారు. ఎన్‌ఐఏ విచారణను వ్యతిరేకిస్తూ కేంద్రానికి లేఖ రాసినా ప్రయోజనం లేకపోవడంతో కోర్టును ఆశ్రయించి దర్యాప్తును అడ్డుకునే విషయం ఈ సందర్భంగా చర్చకు వచ్చినట్లు తెలిసింది.  

సాక్షి ప్రతినిధి, విశాఖపట్నం: ప్రతిపక్షనేత వైఎస్‌ జగన్‌పై హత్యాయత్నం కేసులో కీలకంగా భావిస్తున్న టీడీపీ నాయకుడు, విశాఖ ఎయిర్‌పోర్టులోని ఫ్యూజన్‌ఫుడ్స్‌ రెస్టారెంట్‌ యజమాని హర్షవర్ధన్‌ చౌదరి ఎన్‌ఐఏ విచారణకు గైర్హాజరయ్యారు. కేసు విచారణలో భాగంగా విశాఖలోని కైలాసగిరి పోలీస్‌ హెడ్‌క్వార్టర్స్‌ ప్రాంగణంలో తాత్కాలిక కార్యాలయం ఏర్పాటు చేసుకున్న ఎన్‌ఐఏ అధికారులు 3 రోజులుగా సాక్షులను విచారిస్తున్నారు. హత్యాయత్నం జరిగిన గతేడాది అక్టోబర్‌ 25న ఘటనాస్థలంలో ఉన్న వైఎస్సార్‌సీపీ నేతలు, కార్యకర్తలను కూడా సాక్షులుగా పేర్కొంటూ నోటీసులు పంపగా.. వైఎస్సార్‌సీపీ కార్యాలయంలో పనిచేసే కృష్ణకాంత్, మాజీ కార్పొరేటర్‌ జియ్యాని శ్రీధర్‌ 2 రోజులక్రితం హాజరయ్యారు. నోటీసులందుకున్న మిగతా వైఎస్సార్‌సీపీ నేతలు సైతం 2 రోజుల్లో విచారణకు హాజరవుతామని సమాచారమిచ్చారు. అయితే ఈ కేసులో కీలకంగా భావిస్తున్న టీడీపీ నేత, ఎయిర్‌పోర్ట్‌లోని ఫ్యూజన్‌ ఫుడ్స్‌ రెస్టారెంట్‌ యజమాని హర్షవర్ధన్‌ చౌదరి మాత్రం పత్తా లేకుండా పోయారు. ఈ నెల 15 తర్వాత విచారణకు హాజరుకావాలంటూ ఎన్‌ఐఏ అధికారులు ఆయన ఇంటికి నోటీసులు పంపినట్టు సమాచారం. గురువారం ఆయన  హాజరుకావొచ్చని భావించారు. నిజానికి ఫ్యూజన్‌ ఫుడ్స్‌ రెస్టారెంట్‌ కేంద్రంగానే కుట్ర జరిగిందని, హర్షవర్ధన్‌ చౌదరికి తెలియకుండా శ్రీనివాసరావు.. వైఎస్‌ జగన్‌పై హత్యాయత్నం చేసేంతటి ఘాతుకానికి తెగబడడన్న వాదనలు బలంగా వినిపించినా.. పోలీసులు, సిట్‌ అధికారులు హర్షవర్ధన్‌ జోలికే పోలేదు. ఈ నేపథ్యంలో ఎన్‌ఐఏవిచారణకు హర్షవర్ధన్‌ చౌదరి హాజరైతే కీలక సమాచారం రాబట్టవచ్చన్న వాదనలు వినిపించాయి. దీంతో గురువారమే హర్షవర్ధన్‌ విచారణకు హాజరు కావొచ్చన్న ప్రచారంతో పెద్దఎత్తున మీడియా ఎన్‌ఐఏ తాత్కాలిక కార్యాలయం వద్ద గుమిగూడింది. అయితే హర్షవర్ధన్‌ సహా రెస్టారెంట్‌లో పనిచేసే సిబ్బంది ఎవ్వరూ హాజరుకాలేదు. పైగా హర్షవర్ధన్‌ ఫోన్‌ స్విచ్చాఫ్‌ రావడంతోపాటు కొద్దిరోజులుగా పత్తా లేకుండా పోయారన్న వాదనలు వినిపిస్తున్నాయి. ఇటీవల మంత్రి యనమల నగరానికి వచ్చినప్పుడు హల్‌చల్‌ చేశాడని, ఆ తర్వాత నుంచి కానరావట్లేదని టీడీపీ నేతలే చెప్పుకొస్తుండడం గమనార్హం. ప్రభుత్వ పెద్దల అండతోనే హర్షవర్ధన్‌ పత్తా లేకుండా పోయారన్న వాదన వినిపిస్తోంది. దీనిపై ఎన్‌ఐఏ వర్గాలు మాట్లాడుతూ.. ఒకటి, రెండు రోజులు చూసి అప్పటికీ హర్షవర్ధన్‌ విచారణకు రాకుంటే ఏం చేయాలో నిర్ణయిస్తామని చెప్పాయి. 

సాక్షి, అమరావతి : ఏపీ ప్రతిపక్ష నేత, వైఎస్సార్‌సీపీ అధ్యక్షుడు వైఎస్‌ జగన్‌ మోహన్‌రెడ్డిపై జరిగిన హత్యాయత్నానికి సంబంధించిన కేసును ఎన్‌ఐఏకు అప్పగించడంపై ఏపీ ప్రభుత్వం అడుగడునా అడ్డుతగులుతోన్న విషయం తెలిసిందే. దీనిలో భాగంగా ఏపీ సీఎం చంద్రబాబు డీజీపీ ఠాకూర్‌ భేటీ అయ్యారు.  విశాఖ ఎయిర్‌పోర్ట్‌లో వైఎస్‌ జగన్‌పై జరిగిన హత్య కేసును ఎన్‌ఐఏకు అప్పగించడం, హైకోర్టులో వేసిన పిటిషన్‌ చర్చించినట్టు తెలుస్తోంది. వైఎస్‌ జగన్‌ కేసును ఎన్‌ఐఏకు అప్పగించడాన్ని వ్యతిరేకిస్తూ ఏపీ ప్రభుత్వం రేపు హైకోర్టులో పిటిషన్‌ వేయాలని ఆలోచనలో ఉన్నట్లు సమాచారం. ఈ కేసుకు సంబంధించిన విచారణకు ఏపీ సిట్‌ అధికారులు సహకరించకపోవడంపై ఆగ్రహించిన ఎన్‌ఐఏ అధికారులు విజయవాడ కోర్టులో పిటిషన్‌ వేసిన సంగతి తెలిసిందే.  

సాక్షి, విజయవాడ : ఏపీ ప్రతిపక్ష నేత, వైఎస్సార్‌సీపీ అధ్యక్షుడు వైఎస్‌ జగన్‌మోహన్‌ రెడ్డిపై విశాఖ ఎయిర్‌పోర్ట్‌లో జరిగిన హత్యాయత్నం కేసు విచారణను ఎన్‌ఐఏకు అప్పగించేందుకు ఏపీ ప్రభుత్వం అడ్డుతగులుతోంది. ఈ కేసుకు సంబంధించి ఎఫ్‌ఐఆర్‌  దాఖలు చేసి విచారణ చేపట్టినా కేసు రికార్డులు అందజేసేందుకు సిట్‌ నిరాకరిస్తోంది. ఎన్‌ఐఏకు అప్పగించిన ఈ కేసుకు సంబంధించిన ఆధారాలను అప్పగించేందుకు ఏపీ సిట్‌ అధికారులు నిరాకరిస్తున్నారు. ఈమేరకు ఎన్‌ఐఏ అధికారులు విజయవాడ కోర్టులో పిటిషన్‌ దాఖలు చేశారు. సిట్‌ తీరుపై మండిపడ్డ ఎన్‌ఐఏ అధికారులు పిటిషన్‌ దాఖలు చేయడంతో.. కోర్టులో వాదనలు కొనసాగుతున్నాయి.  

సాక్షి ప్రతినిధి, విశాఖపట్నం: వైఎస్సార్‌ కాంగ్రెస్‌ పార్టీ అధ్యక్షుడు, ప్రతిపక్ష నేత వైఎస్‌ జగన్‌మోహన్‌రెడ్డిపై హత్యాయత్నం ఘటన కేసు విచారణలో జాతీయ దర్యాప్తు సంస్థ(ఎన్‌ఐఏ) అధికారులు దూకుడు పెంచారు. ముందుగా నిందితుడు శ్రీనివాసరావును కోర్టు అనుమతితో అదుపులోకి తీసుకుని, విశాఖపట్నం విమానాశ్రయంలోని ఘటనా స్థలానికి తీసుకువచ్చి విచారణ చేపట్టిన అధికారులు ఇప్పుడు ఆ కేసులోని సాక్షుల విచారణను ముమ్మరం చేశారు. విశాఖ నగరం కైలాసగిరి పోలీస్‌ హెడ్‌క్వార్టర్స్‌ ప్రాంగణంలో నాలుగు రోజులుగా ఎన్‌ఐఏ అధికారులు మకాం వేశారు. అక్కడే తాత్కాలిక కార్యాలయం ఏర్పాటు చేసుకున్నారు. సంక్రాంతి సెలవులు కూడా లేకుండా నిర్విరామంగా దర్యాప్తు కొనసాగిస్తున్నారు.  బయటి నుంచి కాఫీ తేవొద్దన్నారు  వైఎస్‌ జగన్‌పై హత్యాయత్నం జరిగినప్పుడు ఘటనా స్థలంలో ఉన్న వైఎస్సార్‌సీపీ నేతలు, కార్యకర్తలను కూడా సాక్షులుగా పేర్కొంటూ విచారణ చేస్తున్నట్టు తెలుస్తోంది. ఈ మేరకు పార్టీ కార్యాలయంలో పనిచేసే కృష్ణకాంత్‌ను మంగళవారం మధ్యాహ్నం ఎన్‌ఐఏ అధికారులు పిలిపించి రెండుగంటలకు పైగా విచారించారు. అదేవిధంగా వైఎస్సార్‌సీపీకి చెందిన మాజీ కార్పొరేటర్‌ జియ్యాని శ్రీధర్‌ను మంగళవారం సాయంత్రం పిలిపించి విచారించారు. ‘‘ఉత్తరాంధ్రలో ప్రజా సంకల్పయాత్ర నేపథ్యంలో ఎయిర్‌పోర్ట్‌కు వైఎస్‌ జగన్‌మోహన్‌రెడ్డి విచ్చేసినప్పుడు మా ఇంటి నుంచి నేనే కాఫీ తీసుకువెళ్లేవాడిని. హత్యాయత్న ఘటనకు సరిగ్గా వారం ముందే బయటి నుంచి కాఫీ వద్దంటూ ఫ్యూజన్‌ ఫుడ్స్‌ రెస్టారెంట్‌ యజమాని హర్షవర్దన్‌ చౌదరితో చెట్టాపట్టాలు వేసుకుతిరిగే ఎయిర్‌పోర్ట్‌ చీఫ్‌ సెక్యూరిటీ ఆఫీసర్‌ వేణుగోపాల్‌ అడ్డుకున్నారు. మా ఇంటి నుంచి తెచ్చిన కాఫీని సర్వ్‌ చేసిన ఇద్దరు ఎయిర్‌ ఇండియా సిబ్బందిని వారంపాటు సస్పెండ్‌ చేశారు. ఫ్యూజన్‌ ఫుడ్స్‌ నుంచే తేవాలని షరతు విధించారు. సరిగ్గా ఆ వారమే ప్రతిపక్ష నేతపై శ్రీనివాసరావు కత్తితో దాడి చేశాడు’’ అని శ్రీధర్‌ ఎన్‌ఐఏ అధికారులకు వివరించారు. ‘‘కేసు దర్యాప్తు చేసిన ‘సిట్‌’ అధికారులు, విశాఖ పోలీస్‌ ఉన్నతాధికారులు మాకు ఏమాత్రం సహకరించలేదు. ఆ కేసు గురించి ఒక్క ముక్క కూడా చెప్పలేదు. అందుకే మీరైనా ఏం జరిగిందో చెప్పండి’’ అని ఎన్‌ఐఎ అధికారులు విచారణకు హాజరైన సాక్షులతో అన్నట్టు సమాచారం.  ఆ లేఖపైనా విచారణ నిందితుడు శ్రీనివాసరావు వద్ద లభ్యమైనట్టు పోలీసులు చెబుతున్న 11 పేజీల లేఖపై కూడా ఎన్‌ఐఏ అధికారులు విచారణ సాగిస్తున్నారు. ఈ క్రమంలోనే లేఖలో 2 పేజీలు రాసినట్టు చెబుతున్న ఫ్యూజన్‌ఫుడ్స్‌ రెస్టారెంట్‌లో శ్రీనివాసరావు సహోద్యోగి రేవతీ ప్రసాద్‌ను అధికారులు బుధవారం పిలిపించి సుదీర్ఘంగా విచారించారు. ఆ లేఖ ఎవరు రాశారు? నిజంగా నువ్వే రాశావా?  వైఎస్‌ జగన్‌పై హత్యాయత్నం జరిగిన సమయంలో లేఖ శ్రీనివాసరావు వద్దనే ఉందా? లేదా? ఆ తర్వాత పుట్టించారా? ఇలా పలు కోణాల్లో రేవతీ ప్రసాద్‌ను ప్రశ్నించినట్లు సమాచారం.  హర్షవర్దన్‌ చౌదరికి నోటీసులు జగన్‌పై హత్యాయత్నం కేసులో కీలకంగా భావిస్తున్న టీడీపీ నాయకుడు. ఫ్యూజన్‌ ఫుడ్స్‌ రెస్టారెంట్‌ యజమాని టి.హర్షవర్దన్‌ చౌదరి సహా రెస్టారెంట్‌లో పనిచేస్తున్న ఉద్యోగులు, ఇతర సాక్షులు మొత్తం 15మందిని గురు, శుక్రవారాల్లో విచారణకు హాజరు కావాల్సిందిగా ఎన్‌ఐఏ అధికారులు నోటీసులు జారీ చేసినట్టు తెలుస్తోంది. హర్షవర్దన్‌ చౌదరిని ప్రశ్నిస్తే కీలక సమాచారం లభ్యమవుతుందని ఎన్‌ఐఏ అధికారులు భావిస్తున్నట్లు సమాచారం.

సాక్షి, తిరుపతి: రాష్ట్రంలోకి జాతీయ దర్యాప్తు సంస్థ(ఎన్‌ఐఏ) రావటానికి వీల్లేదని ముఖ్యమంత్రి చంద్రబాబు నాయుడు అన్నారు. ప్రతిపక్ష నేత వైఎస్‌ జగన్‌పై జరిగిన హత్యాయత్నం కేసుపై దర్యాప్తును ఎన్‌ఐఏ చేపట్టడాన్ని ఆయన తప్పుబట్టారు. రాష్ట్రం హక్కులను కేంద్రం లాక్కొంటోందని ఆగ్రహం వ్యక్తం చేశారు. సంక్రాంతి పండుగ సందర్భంగా సీఎం చంద్రబాబు సోమవారం తన స్వగ్రామం చిత్తూరు జిల్లా నారావారిపల్లెకు చేరుకున్నారు. రెండు రోజులపాటు గ్రామంలోనే ఉండి కుటుంబ సభ్యులతో కలిసి సంక్రాంతి సంబరాలు జరుపుకున్నారు. అమరావతికి తిరుగు ప్రయాణం అయ్యే సమయంలో మంగళవారం సాయంత్రం విలేకరుల సమావేశంలో మాట్లాడారు. సొంత గ్రామంలో పండుగ జరుపుకునే సంప్రదాయాన్ని తన భార్య భువనేశ్వరి 20 ఏళ్ల క్రితమే ప్రారంభించిందని చెప్పుకొచ్చారు. సంక్రాంతిని అడ్డం పెట్టుకుని జూదాలు ఆడడం మంచిది కాదన్నారు.  ధనిక రాష్ట్రమైన తెలంగాణలో కూడా చెయ్యని అభివృద్ధి, సంక్షేమ కార్యక్రమాలు ఆంధ్రప్రదేశ్‌లో చేపట్టామన్నారు. ప్రస్తుతం ఏపీలో వందశాతం అభివృద్ధి చేశామని, సమస్యలన్నీ పరిష్కరించామని తెలిపారు. ఇక ఉన్నవన్నీ వ్యక్తిగత సమస్యలేనని చెప్పారు. వైఎస్‌ జగన్‌పై జరిగిన హత్యాయత్నం ఘటనపై ఎన్‌ఐఏ చేపడుతున్న విచారణపై విలేకరులు అడిగిన ప్రశ్నకు చంద్రబాబు తీవ్రంగా స్పందించారు. రాష్ట్రంలోకి ఎన్‌ఐఏ రాకూడదన్నారు. రాష్ట్రానికి ఉన్న హక్కులను కేంద్రం లాక్కుంటోందని ఆరోపించారు. హక్కుల కోసం పోరాడుతామన్నారు.  షర్మిల తెలంగాణలో ఎందుకు ఫిర్యాదు చేశారో?  వైఎస్‌ షర్మిలకు ఏమైందని తెలంగాణలో ఫిర్యాదు చేశారని చంద్రబాబు ప్రశ్నించారు. ఏపీ పోలీసులపై నమ్మకం లేదనడం సమంజసం కాదన్నారు. షర్మిల తెలంగాణలో ఎందుకు ఫిర్యాదు చేశారో తనకు అర్థం కావడం లేదన్నారు. ఎవరూ వేలెత్తి చూపని క్యారెక్టర్‌ తనదని పేర్కొన్నారు. మీరు ఎప్పుడూ పొత్తులు లేకుండా ఎన్నికల్లో పోటీ చెయ్యలేదు కదా? ఈసారి ఎవరితో పొత్తుపెట్టుకోనున్నారు? అని ఓ విలేకరి ప్రశ్నించగా... టీడీపీ ఒంటరిగా కూడా పోటీచేసిందని, ఒకసారి వెనక్కి వెళ్లి చూడమన్నారు. ‘రాష్ట్రాన్ని కాంగ్రెస్‌ విభజించిందని బీజేపీతో పొత్తు పెట్టుకున్నాం. ఇప్పుడు బీజేపీ విభజన హామీలను అమలు చేయలేదు. అందుకే కాంగ్రెస్‌తో కలిశాం’ అని చంద్రబాబు స్పష్టం చేశారు. కేంద్రం రూ.75 వేల కోట్లు ఇచ్చి ఉంటే ఇప్పుడు ఇబ్బందులే ఉండేవి కావన్నారు. కేసీఆర్‌తో కలిసి ప్రత్యేకహోదా తీసుకొస్తామని వైఎస్‌ జగన్‌ చెబుతున్నారని, మరి ప్రధాని నరేంద్రమోదీని ఎందుకు అడగలేదని ప్రశ్నించారు.

సాక్షి, హైదరాబాద్‌: వైఎస్సార్‌ కాంగ్రెస్‌ పార్టీ అధ్యక్షుడు, ఏపీ ప్రతిపక్ష నేత వైఎస్‌ జగన్‌మోహన్‌రెడ్డిపై హత్యాయత్నం కేసులో నిందితుడు జనుపల్లి శ్రీనివాసరావును జాతీయ దర్యాప్తు సంస్థ(ఎన్‌ఐఏ) ఐదోరోజు విచారించింది. నిందితుడి విచారణ న్యాయవాదుల సమక్షంలో కొనసాగుతున్న సంగతి తెలిసిందే. ఐదోరోజు విచారణలో భాగంగా నిందితుడు జనుపల్లి శ్రీనివాసరావును న్యాయవాది సలీం సమక్షంలో విశాఖపట్నంలోని కైలాసగిరి పోలీస్‌ హెడ్‌ క్వార్టర్స్‌లో విచారించారు. (కొనసాగుతున్న శ్రీనివాస్‌ విచారణ) శ్రీనివాస్‌ 20 మంది యువతులతో మాట్లాడిన కాల్‌ డేటా వివరాలపై ఎన్‌ఐఏ అధికారులు ప్రశ్నించారని న్యాయవాది సలీం తెలిపారు. ‘ఎయిర్‌పోర్టులోకి కత్తి ఎలా వచ్చింది. ఎవరు తెచ్చారు’ అనే అంశాలపై శ్రీనివాస్‌కు ప్రశ్నించారని పేర్కొన్నారు. శ్రీనివాస్‌ కాల్‌ డేటాను అధికారులు పరిశీలించారని చెప్పారు. మిగిలిన రెండు రోజులు శ్రీనివాస్‌ను ఎక్కడ విచారస్తారనేది ఎన్‌ఐఏ ఇంకా చెప్పలేదని సలీం బుధవారం మీడియాకు చెప్పారు.  కాగా, వైఎస్‌ జగన్‌పై హత్యాయత్నం జరిగిన రోజు ఎయిర్ పోర్ట్ లాంజ్ వద్ద ఉన్న ఇద్దరి వ్యక్తుల నుంచి ఎన్‌ఐఏ అధికారులు వివరాలు సేకరించినట్టు సమాచారం.

సాక్షి, హైదరాబాద్‌: వైఎస్సార్‌ కాంగ్రెస్‌ పార్టీ అధ్యక్షుడు, ఏపీ ప్రతిపక్ష నేత వైఎస్‌ జగన్‌మోహన్‌రెడ్డిపై హత్యాయత్నం కేసులో నిందితుడు జనుపల్లి శ్రీనివాసరావును జాతీయ దర్యాప్తు సంస్థ(ఎన్‌ఐఏ) తమ కార్యాలయంలో నాలుగో రోజు విచారిస్తోంది. న్యాయవాదుల సమక్షంలో నిందితుడిని ప్రశ్నిస్తున్నారు. శ్రీనివాసరావుతో పాటు పలువురిని ఎన్‌ఐఏ అధికారులు విచారిస్తున్నారు. ఆధారాలు ముందుంచి నిందితుడిని ప్రశ్నిస్తున్నారు. శ్రీనివాసరావు చెప్పే విషయాలను రికార్డ్‌ చేస్తున్నారు. ఎన్‌ఐఏ డీఐజీ ప్రవీణ్‌ కుమార్‌ నేతృత్వంలో విచారణ కొనసాగుతోంది. మరో మూడు రోజుల పాటు నిందితుడు ఎన్‌ఐఏ కస్టడీలో ఉండనున్నాడు. ఎన్‌ఐఏ అధికారులతో కూడిన మరో బృందం విశాఖపట్నంలో విచారణ జరుపుతోంది. శ్రీనివాసరావు ఆరోగ్య పరిస్థితి బాగుందని అతడి తరపు న్యాయవాది సలీం తెలిపారు. విచారణ కోసం శ్రీనివాస్‌ను మరోసారి విశాఖపట్నం తీసుకెళ్లే అవకాశం లేదని, మిగతా మూడు రోజులు హైదరాబాద్‌లోనే విచారణ కొనసాగుతుందని వెల్లడించారు. (వైఎస్‌ జగన్‌పై హత్యాయత్నం వెనుక ఎవరున్నారు?)

సాక్షి, అమరావతి/సాక్షి,హైదరాబాద్‌: వైఎస్సార్‌ కాంగ్రెస్‌ పార్టీ అధ్యక్షుడు, ఏపీ ప్రతిపక్ష నేత వైఎస్‌ జగన్‌మోహన్‌రెడ్డిపై హత్యాయత్నం కేసులో నిందితుడు శ్రీనివాసరావును జాతీయ దర్యాప్తు సంస్థ(ఎన్‌ఐఏ) విచారించింది. విశాఖ విమానాశ్రయంలో గతేడాది అక్టోబర్‌ 25న హత్యాయత్నం చేసిన శ్రీనివాసరావును కస్టడీకి తీసుకున్న ఎన్‌ఐఏ మూడో రోజు పలు కీలక అంశాలపై ప్రశ్నించినట్టు సమాచారం. తొలుత హైదరాబాద్‌లోని మాదాపూర్‌లో వైద్య పరీక్షలు నిర్వహించాక విచారణ కొనసాగించారు. మాదాపూర్‌లోని ఎన్‌ఐఏ కార్యాలయంలో శ్రీనివాస్‌రావును అతని న్యాయవాది సమక్షంలోనే ఎన్‌ఐఏ అధికారులు ప్రశ్నించారు. జగన్‌పై హత్యాయత్నం ఎందుకు చేశావు.. వెనుక ఎవరున్నారనే దానిపై విచారించారు. శ్రీనివాసరావు కాల్‌ డేటాను పరిశీలించి, వాటికి సంబంధించిన వివరాలు సేకరించేందుకు పలు ప్రశ్నలు సంధించినట్టు సమాచారం. ఒక్క సంవత్సరంలో వందలాది సిమ్‌ కార్డులు, పదుల సంఖ్యలో సెల్‌ఫోన్లు మార్చడం వెనకున్న ఆంతర్యమేంటని ప్రశ్నించినట్టు తెలిసింది.  టీడీపీ నేతతో శ్రీనివాసరావు ఫోన్‌ కాల్స్‌పై దృష్టి: జగన్‌పై హత్యాయత్నం చేయడానికి ముందుగా జరిగిన బ్యాంకు లావాదేవీలపై ఆరా తీసినట్టు తెలిసింది. ఎయిర్‌ పోర్టులో ఫ్యూజన్‌ఫుడ్స్‌ యజమాని వద్ద పనికి కుదిర్చిందెవరు? సంబంధిత టీడీపీ నేతతో శ్రీనివాస్‌రావుకు జరిగినట్టు భావిస్తున్న ఫోన్‌ కాల్స్‌ సంభాషణలపైనా దర్యాప్తు అధికారులు దృష్టి సారించినట్టు తెలుస్తోంది. ఎయిర్‌పోర్టు లోపలికి వెళ్లేందుకు ఇచ్చే అనుమతి పాస్‌ తాత్కాలికమైనా క్రిమినల్‌ కేసులున్న వ్యక్తికి ఎలా ఇచ్చారు? తాత్కాలిక పాస్‌ ఇప్పించిందెవరన్న అంశాలపై లోతుగా దర్యాప్తు చేస్తున్నట్టు తెలుస్తోంది. ఆ పాస్‌కు సిఫారసు లేఖతో పాటు పోలీస్‌ క్లియరెన్స్‌ సర్టిఫికెట్‌ ఇచ్చిన అధికారులు ఎవరన్నది ఎన్‌ఐఏ అధికారులు ఆరా తీసినట్టు సమాచారం. హత్యాయత్నం చేయడానికి ఎవరైనా పురిగొల్పారా? అనే కోణంపై దృష్టి సారించినట్టు తెలిసింది. విచారణలో భాగంగా నిందితుడు చెప్పిన వివరాలను రికార్డు చేశారు. శ్రీనివాసరావు కస్టడీలో నాల్గో రోజైన మంగళవారం మరోసారి విశాఖ ఎయిర్‌పోర్టుకు తీసుకెళ్లేందుకు ఎన్‌ఐఏ అధికారులు ఏర్పాట్లు చేస్తున్నారు. విశాఖ విమానాశ్రయంలో మరోసారి సీన్‌ రీకన్‌స్ట్రక్షన్‌ కోసం శ్రీనివాసరావును తీసుకెళ్లనున్నట్టు తెలుస్తోంది. నేర స్థలంలో మరికొన్ని అదనపు వివరాలు సేకరించే విషయంపై ఎన్‌ఐఏ అధికారులు దృష్టిసారించారు. ఎన్‌ఐఏ డీఐజీ ప్రవీణ్‌ కుమార్‌ నేతృత్వంలో విచారణ కొనసాగింది.

సాక్షి, హైదరాబాద్‌: వైఎస్సార్‌ కాంగ్రెస్‌ పార్టీ అధ్యక్షుడు, ఆంధ్రప్రదేశ్‌ ప్రతిపక్ష నేత వైఎస్‌ జగన్‌మోహన్‌రెడ్డిపై హత్యాయత్నానికి పాల్పడ్డ జనుపల్లి శ్రీనివాసరావును జాతీయ దర్యాప్తు సంస్థ(ఎన్‌ఐఏ) అధికారులు సోమవారం హైదరాబాద్‌లో విచారించారు. న్యాయవాదుల సమక్షంలో అతడిని ప్రశ్నించారు. ఎన్‌ఐఏ డీఐజీ ప్రవీణ్‌ కుమార్‌ నేతృత్వంలో విచారణ కొనసాగింది. నిందితుడి స్టేట్‌మెంట్‌ను అధికారులు రికార్డు చేశారు. వైఎస్‌ జగన్‌పై దాడి ఎందుకు చేశావు, దాడి వెనుక ఎవరున్నారనే దానిపై లోతుగా విచారించారు. శ్రీనివాసరావు కాల్‌ డేటాను పరిశీలించి, దీనిపై ప్రశ్నలు సంధించినట్టు సమాచారం. నేటితో నిందితుడి మూడో రోజు కస్టడీ ముగిసింది. క్రైం సీన్‌ రీకన్‌స్ట్రక్షన్‌లో భాగంగా రేపు మరోసారి విశాఖపట్నం విమానాశ్రయానికి తీసుకెళ్లి విచారించే అవకాశముందని తెలుస్తోంది. నిందితుడిని వారం రోజులపాటు ఎన్‌ఐఏ కస్టడీకి అప్పగిస్తూ ఎన్‌ఐఏ కోర్టు న్యాయమూర్తి శుక్రవారం ఉత్తర్వులు జారీ చేయడంతో శనివారం ఉదయం అతడిని ఎన్‌ఐఏ అధికారులు అదుపులోకి తీసుకున్నారు. ఆదివారం విశాఖపట్నంలో అతడిని విచారించారు. (శ్రీనివాసరావుపై ఎన్‌ఐఏ ప్రశ్నల వర్షం)

ఒంగోలు సిటీ: ప్రతిపక్ష నేత వైఎస్‌ జగన్‌మోహన్‌రెడ్డిపై హత్యాయత్నం కేసును ఎన్‌ఐఏ విచారిస్తున్న నేపథ్యంలో చంద్రబాబుకు ఉలుకెందుకని వైఎస్సార్‌సీపీకి చెందిన మాజీ ఎంపీ వై.వి.సుబ్బారెడ్డి ప్రశ్నించారు. దీనిపై ప్రధానికి సీఎం లేఖ రాయడాన్ని ఆయన తప్పుపట్టారు. ఆదివారం ఒంగోలులోని తన నివాసంలో ఆయన విలేకరులతో మాట్లాడారు. ఎన్‌ఐఏ దర్యాప్తుతో ప్రభుత్వ పెద్దల కుట్రలు బయటకొస్తాయన్న ఆందోళనలో ఉన్నారన్నారు. ప్రత్యేక హోదాపై లేఖ రాయడానికి నాలుగేళ్ల ఎనిమిది నెలలపాటు స్పందించని చంద్రబాబు.. ప్రతిపక్ష నేత జగన్‌పై హత్యాయత్నం కేసును ఎన్‌ఐఏకి అప్పగించిన గంటల వ్యవధిలోనే స్పందించి ప్రధానికి లేఖ రాయడం భయం పట్టుకున్నందువల్లేనని వైవీ అన్నారు. ఈ కుట్ర వెనుక సీఎం, డీజీపీ స్థాయి వారితోపాటు మంత్రులు, కొందరు ఎమ్మెల్యేల పాత్ర ఉందన్నారు. ఎన్‌ఐఏ విచారణను ఎలా ఆపాలి, ఎలా అడ్డుకోవాలని చంద్రబాబు ఎత్తులు వేస్తున్నారని మండిపడ్డారు. ప్రతిపక్ష నేతపై హత్యాయత్నం జరిగితే చిన్న సంఘటనగా చంద్రబాబు, డీజీపీ పేర్కొనడం వెనుక ఆంతర్యాలున్నాయని, నిష్పక్షపాతంగా విచారణ జరిపిస్తేనే ఈ కుట్రలోని వ్యక్తులు, పాత్రధారుల వివరాలు వెల్లడవుతాయని పేర్కొన్నారు. న్యాయంకోసం హైకోర్టును ఆశ్రయించామన్నారు. చంద్రబాబుకు హైకోర్టుపై గౌరవ, మర్యాదలు లేవన్నారు. హైకోర్టు ఎన్‌ఐఏ విచారణకు కేసును ఇవ్వమంటే చంద్రబాబు అవసరం లేదని కోర్టు ఆదేశాల్నే ధిక్కరించే పరిస్థితిలో ఉన్నారని తెలిపారు. ఎన్‌ఐఏ ఈ కేసులోని పెద్దలను కుట్రదారుల నిగ్గు తేలుస్తుందని, అప్పుడు తెలుస్తుంది ఇది కోడికత్తా.. చంద్రన్న కత్తా అనేదని ఆయన అన్నారు. రాష్ట్రంలో దోపిడీ, రాక్షస పాలన సాగుతోందన్నారు. వ్యవస్థల్ని చంద్రబాబు తన స్వార్థ ప్రయోజనాలకు వాడుకున్నారని, రాష్ట్రాన్ని అన్నివిధాలుగా భ్రష్టు పట్టించారని విమర్శించారు. ప్రజలు రానున్న ఎన్నికల్లో చంద్రబాబు పాలనకు చరమగీతం పాడేందుకు సిద్ధంగా ఉన్నారన్నారు. 

సాక్షి, న్యూఢిల్లీ: ప్రతిపక్ష నేత వైఎస్‌ జగన్‌మోహన్‌రెడ్డిపై జరిగిన హత్యాయత్నం కుట్రలో సీఎం చంద్రబాబు పాత్ర ఉంది కాబట్టే.. ఎన్‌ఐఏ విచారణతో నిజాలు బయటపడతాయని ఆయనకు చెమటలు పడుతున్నాయని రాష్ట్ర బీజేపీ నేతలు ధ్వజమెత్తారు. ఘటన విశాఖ విమానాశ్రయంలో జరిగింది కాబట్టి.. అది కేంద్రం పరిధిలోదని చెప్పి కేసు విచారణతో తమకు సంబంధం లేదన్న చంద్రబాబు.. ఇప్పుడు కేసును ఎన్‌ఐఏ విచారిస్తుంటే ఎందుకు అంతలా ఉలికిపడుతున్నారని ప్రశ్నించారు. బీజేపీ రాష్ట్ర కో ఇన్‌చార్జ్‌ సునిల్‌ దియోధర్, రాష్ట్ర అధ్యక్షుడు కన్నా లక్ష్మీనారాయణ, ఎంపీ జీవీఎల్‌ నరసింహారావు ఆదివారం ఢిల్లీలోని పార్టీ కేంద్ర కార్యాలయంలో మీడియాతో మాట్లాడారు. జగన్‌పై దాడి కేసును కేంద్రం ఎన్‌ఐఏకు అప్పగించడంపై అభ్యంతరం వ్యక్తం చేస్తూ ప్రధానికి లేఖ రాసిన చంద్రబాబు వ్యవహారశైలిపై వారు అనుమానాలు వ్యక్తం చేశారు. ఎమ్మెల్యే కిడారి సర్వేశ్వరరావు, మాజీ ఎమ్మెల్యే సోమల హత్య కేసును ఎన్‌ఐఏకు అప్పగించినప్పుడు ఎన్‌ఐఏపై విశ్వాసం వ్యక్తం చేసిన బాబు.. జగన్‌ కేసు విచారణకొచ్చే సరికి రాష్ట్ర సంబంధాల్లో కేంద్రం జోక్యం ఎందుకు? అని అంటున్నారని ధ్వజమెత్తారు. మానసిక వ్యాధితో బాధపడుతున్న బాబు : కన్నా ఒకే విషయంపై రోజుకోరకంగా మాట్లాడుతున్న చంద్రబాబు పరిస్థితి చూస్తే ఆయన మానసిక వ్యాధితో బాధపడుతున్నట్టు అర్థమవుతోంది. జగన్‌పై దాడి కేసుతో తమకు సంబంధం లేదని ఘటన జరిగిన రోజు మీడియా ముందు చంద్రబాబు చెప్పారు. ఇప్పుడు ఆ కేసు విచారణను ఎన్‌ఐఏకు అప్పగిస్తే అభ్యంతరం వ్యక్తం చేస్తున్నారు. ఇలాంటి మానసిక వ్యాధితో బాధపడుతున్న చంద్రబాబు సీఎంగా ఉండడం ప్రమాదకరం. ఈ విషయాన్ని ప్రజలు అర్థం చేసుకోవాలి. రాష్ట్రంలో 600 హామీలు ఇచ్చి అన్ని వర్గాలను మోసం చేశారు. బీజేపీకి చంద్రబాబే బ్రాండ్‌ అంబాసిడర్‌: సునిల్‌ దియోధర్‌ ‘కేంద్రం ఏపీకి ఏం చేయలేదంటూనే ఇప్పటి వరకు చేసిన మేలుపై పరోక్షంగా ప్రచారం కల్పిస్తున్న చంద్రబాబే ఏపీ బీజేపీకి బ్రాండ్‌ అంబాసిడర్‌. కేంద్రం ఇచ్చిన నిధులను జన్మభూమి కమిటీలోని దొంగలు దోచుకుంటూ.. గజదొంగైన చంద్రబాబుకు దోచిపెడుతున్నారు. అమిత్‌షా ఈ నెల 18 కడప, ఫిబ్రవరి ఒకటిన వైజాగ్‌లలో పర్యటించి పార్టీశ్రేణులతో సమావేశమవుతారు.  అప్పుడు మంచివి.. ఇప్పుడు చెడ్డవా?  : జీవీఎల్‌ తన ప్రత్యర్థులపై ఎన్‌ఐఏ, సీబీఐలు కేసులు నమోదు చేస్తే దర్యాప్తు సంస్థలన్నీ బాగా పనిచేసినట్టు.. తన మనుషులపై కేసులు పెడితే మాత్రం బాబు సహించరు. ఏకంగా సీబీఐనే రాష్ట్రంలో నిషేధించారంటే చంద్రబాబు ఏ స్థాయిలో తప్పులు చేస్తున్నారో అర్థం చేసుకోవచ్చు.

సాక్షి, అమరావతి/విశాఖపట్నం /హైదరాబాద్‌:  వైఎస్సార్‌ కాంగ్రెస్‌ పార్టీ అధ్యక్షుడు, ప్రతిపక్ష నేత వైఎస్‌ జగన్‌మోహన్‌రెడ్డిపై హత్యాయత్నానికి పాల్పడ్డ జనుపల్లి శ్రీనివాసరావును జాతీయ దర్యాప్తు సంస్థ(ఎన్‌ఐఏ) అధికారులు ఆదివారం విశాఖపట్నంలో విచారించారు. అనంతరం విమానంలో హైదరాబాద్‌లోని తమ కార్యాలయానికి తరలించారు. విజయవాడ కోర్టు అనుమతితో శనివారం ఎన్‌ఐఏ సిబ్బంది శ్రీనివాసరావును తమ కస్టడీలోకి తీసుకున్న సంగతి తెలిసిందే. విజయవాడ జైలు నుంచి అదేరోజు అర్ధరాత్రి దాటాక విశాఖపట్నం బక్కన్నపాలెంలోని ఏపీఎస్‌పీ బెటాలియన్‌కు తీసుకొచ్చారు. ఆదివారం మధ్యాహ్నం ఒంటి గంట నుంచి రెండు గంటల వరకు శ్రీనివాసరావును అతడి న్యాయవాది అబ్దుల్‌ సలీం సమక్షంలో విచారించారు. తర్వాత తెల్లచొక్కా, నల్ల ప్యాంటు ధరించిన నిందితుడిని అక్కడి నుంచి 3.45 గంటల సమయంలో ర్యాపిడ్‌ ఇంటర్వెన్షన్‌ వాహనంలో విశాఖపట్నం విమానాశ్రయానికి తీసుకొచ్చారు. అక్కడ అతడికి ముసుగు వేసి ఎయిర్‌పోర్టులోకి తీసుకెళ్లారు. లోపలకు వెళ్లాక ముసుగు తొలగించారు. క్రైం సీన్‌ రీకన్‌స్ట్రక్షన్‌లో భాగంగా జగన్‌మోహన్‌రెడ్డిపై హత్యాయత్నం జరిగిన వీఐపీ లాంజ్‌లోకి శ్రీనివాసరావును వెంటబెట్టుకుని వెళ్లారు. అక్కడ అతడిని పలు అంశాలపై ప్రశ్నించారు. ఘటన జరిగిన తీరుతెన్నులను ఆరా తీశారు. ఎయిర్‌పోర్టు వీఐపీ లాంజ్‌లోని నేరస్థలం, కత్తిని భద్రపరిచిన ప్రదేశాన్ని పరిశీలించారు. అనంతరం శ్రీనివాసరావు పనిచేసిన తెలుగుదేశం పార్టీ నేత హర్షవర్దన్‌ ప్రసాద్‌ చౌదరికి చెందిన ఎయిర్‌పోర్టులోని ఫ్యూజన్‌ఫుడ్స్‌ రెస్టారెంట్‌కు తీసుకెళ్లారు. దాదాపు 20 నిమిషాలపాటు అక్కడ ఉన్నారు. రెస్టారెంట్‌లో నిందితుడు విధులు నిర్వహించిన ప్రాంతాన్ని పరిశీలించారు. అక్కడ ఏయే పనులు చేసేవాడివని ప్రశ్నించారు.  వారిద్దరూ అక్కడ లేరు  నిందితుడు శ్రీనివాసరావును విశాఖపట్నం ఎయిర్‌పోర్టులో విచారణకు తీసుకొచ్చిన సమయంలో ఫ్యూజన్‌ ఫుడ్స్‌ రెస్టారెంట్‌ యజమాని, టీడీపీ నేత హర్షవర్దన్‌ ప్రసాద్‌ చౌదరి అక్కడ లేరు. అలాగే ఆరోపణలు ఎదుర్కొంటున్న ఎయిర్‌పోర్టు చీఫ్‌ సెక్యూరిటీ ఆఫీసర్‌ వేణుగోపాల్‌ కూడా లేరు. నిందితుడిని ఎయిర్‌పోర్టుకు తీసుకొచ్చే సమయంలోనూ విశాఖపట్నం పోలీసు అధికారులెవరూ వెంట రాలేదు.   హైదరాబాద్‌కు తరలింపు  విశాఖపట్నం ఎయిర్‌పోర్టులో శ్రీనివాసరావును దాదాపు రెండు గంటల పాటు ఎన్‌ఐఏ అధికారులు ప్రశ్నించారు. సాయంత్రం 6 గంటలకు విశాఖ నుంచి హైదరాబాద్‌ మీదుగా దుబాయ్‌ వెళ్లే ఎయిర్‌ ఇండియా విమానంలో నిందితుడిని వెంటబెట్టుకుని హైదరాబాద్‌కు పయనమయ్యారు. శ్రీనివాసరావు వెంట ఎన్‌ఐఏ అధికారులు సాజిద్‌ మహ్మద్, ప్రసాద్, మరో అధికారి ఉన్నారు. శంషాబాద్‌ ఎయిర్‌పోర్టు నుంచి భారీ బందోబస్తు మధ్య శ్రీనివాసరావును మాదాపూర్‌లోని ఎన్‌ఐఏ ప్రాంతీయ కార్యాలయానికి తరలించారు. వారంరోజుల పాటు నిందితుడిని కస్టడీకి తీసుకున్న ఎన్‌ఐఏ అధికారులు జగన్‌మోహన్‌రెడ్డిపై హత్యాయత్నం వెనుకున్న కారణాలు, సూత్రధారుల పాత్రను వెలుగులోకి తీసుకొచ్చేందుకు మాదాపూర్‌ కార్యాలయంలోనే విచారణ జరుపనున్నట్టు తెలిసింది. ముందుగా అనుకున్నట్టు విజయవాడ లేదా విశాఖపట్నంలోనే నిందితుడిని విచారించాలని భావించారు. అయితే, అక్కడి పరిస్థితులు అనుకూలించకపోవడంతో తమ కార్యాలయంలోనే విచారించడం మంచిదని నిర్ణయానికొచ్చినట్లు సమాచారం. అందులో భాగంగా మాదాపూర్‌లోని కార్యాలయంలోనే మిగిలిన విచారణ కొనసాగించాలని యోచిస్తున్నారు.   నన్ను హైదరాబాద్‌కు రమ్మన్నారు  శ్రీనివాసరావును హైదరాబాద్‌ మాదాపూర్‌లోని ఎన్‌ఐఏ కార్యాలయంలో విచారిస్తామని, విచారణ సమయంలో అక్కడికి రావాలని అధికారులు తనకు చెప్పారని నిందితుడు శ్రీనివాసరావు తరపు న్యాయవాది అబ్దుల్‌ సలీం పేర్కొన్నారు. తాను సోమవారం ఉదయం హైదరాబాద్‌ పయనమవుతున్నానని తెలిపారు. ఆదివారం విశాఖ ఏపీఎస్‌పీ బెటాలియన్‌లో ఎన్‌ఐఏ అధికారులు తన సమక్షంలో శ్రీనివాసరావును విచారించారని, ప్రతిపక్ష నేత జగన్‌ను హత్యచేయాలని ఎందుకు ప్రయత్నించావు, దీని వెనక ఎవరున్నారని ప్రశ్నించారని అబ్దుల్‌ సలీం చెప్పారు. 

సాక్షి, విశాఖపట్నం : ఏపీ ప్రతిపక్ష నేత వైఎస్‌ జగన్‌పై జరిగిన హత్యాయత్నం ఘటన కేసును జాతీయ దర్యాప్తు సంస్థ(ఎన్ఐఏ) అధికారులు రీ కనస్ట్రక్షన్‌ చేస్తున్నారు. విచారణలో భాగంగా నిందితుడు శ్రీనివాస్‌రావును ఆదివారం విశాఖపట్నంకు తీసుకొచ్చిన ఎన్ఐఏ అధికారులు అనంతరం హైదరాబాద్‌కు తీసుకొచ్చారు. విశాఖ విమానాశ్రయంలో నిందితుడు పనిచేసిన టీడీపీ నేత హర్షవర్థన్‌ చౌదరికి చెందిన ఫ్యూజన్‌ ఫుడ్స్‌ రెస్టారెంట్‌తో పాటు వీవీఐపీ లాంజ్‌ను పరిశీలించారు. నిందితుడ్ని తీసుకెళ్లి మరీ ఘటన జరిగిన తీరుతెన్నులను తెలుసుకున్నారు. కోడిపందాల కత్తిని భద్రపర్చిన ప్రదేశంపై కూడా ఆరా తీశారు. అంతకుముందు విశాఖలోని సీఆర్పీఎఫ్ ట్రైనింగ్ సెంటర్‌లో నిందితుడు న్యాయవాది సలీం సమక్షంలో విచారణ జరపాలని అధికారులు భావించారు. కానీ తమ విచారణకు ఈ ప్రదేశం అనువైంది కాదని భావించి మరో చోటుకు తరలించేందుకు ఉన్నతాధికారుల అనుమతిని కోరారు. దీనికి సమ్మతి లభించడంతో నిందితుడు శ్రీనివాస్‌ రావును హైదరాబాద్‌లోని ఎన్ఐఏ ప్రాంతీయ కార్యాలయానికి తీసుకొచ్చారు.

సాక్షి, విశాఖపట్నం : వైఎస్సార్‌ కాంగ్రెస్‌ పార్టీ అధినేత, ప్రతిపక్ష నేత వైఎస్‌ జగన్‌ మోహన్‌రెడ్డిపై విశాఖ విమానాశ్రయంలో హత్యాయత్నానికి పాల్పడిన నిందితుడు శ్రీనివాసరావును జాతీయ దర్యాప్తు సంస్థ (ఎన్‌ఐఏ) అధికారులు రహస్యప్రాంతానికి తరలించే యోచనలో ఉన్నట్లు తెలుస్తోంది. హైకోర్టు ఆదేశాలతో వైఎస్‌ జగన్‌పై దాడి కేసు దర్యాప్తును చేపట్టిన ఎన్‌ఐఏ.. నిందితుడిని కస్టడీలోకి తీసుకుని విచారణను ముమ్మరం చేసిన విషయం తెలిసిందే.  ఈ నేపథ్యంలో ఆదివారం నిందితుడి తరపు లాయర్‌ అబ్దుల్‌ సలీమ్‌ను విశాఖబక్కన్నపాలెం సీఆర్పీఎఫ్‌ ట్రైనింగ్‌ సెంటర్‌కు రావాలని సూచించారు. అయితే ఇక్కడ అధికారులు ఎలాంటి విచారణ జరపలేదని న్యాయవాది సలీమ్‌ మీడియాకు తెలిపారు. శ్రీనివాసరావును విచారించేందుకు బక్కన్నపాలెంలోని సీఆర్పీఎఫ్ ట్రైనింగ్ సెంటర్ సరైన ప్రాంతం కాదని అధికారులు భావిస్తున్నట్లు చెప్పారు. అందువల్ల నిందితుడిని విచారణ కోసం మరో ప్రాంతానికి తరలించడానికి ఉన్నతాధికారుల అనుమతిని కోరారని పేర్కొన్నారు. అనుమతులు లభించిన వెంటనే శ్రీనివాసరావును హైదరాబాద్ లేదా మరో ప్రాంతానికి తరలిస్తారని స్పష్టం చేశారు. శ్రీనివాస్‌ రావును హైదరాబాద్‌కు తరలించిన అధికారులు అనంతరం ఢిల్లీ లేక ముంబైకు తరలించే అవకాశం ఉన్నట్లు తెలుస్తోంది.

సాక్షి, న్యూఢిల్లీ : వైఎస్సార్‌ కాంగ్రెస్‌ పార్టీ అధ్యక్షుడు, ఏపీ ప్రతిపక్ష నేత వైఎస్‌ జగన్‌మోహన్‌ రెడ్డిపై హత్యాయత్నం కేసులో ఎన్‌ఐఏ చర్యలు చేపడితే మీకెందుకు భయం అంటూ ఆంధ్రప్రదేశ్‌ ముఖ్యమంత్రి చంద్రబాబు నాయుడిని బీజేపీ జాతీయ అధికార ప్రతినిధి జీవీఎల్‌ నరసింహరావు ప్రశ్నించారు. వైఎస్‌ జగన్‌పై జరిగిన హత్యాయత్నాన్ని చంద్రబాబు డ్రామాగా చిత్రీకరించారంటూ మండిపడ్డారు. ఆదివారం ఆయన మీడియాతో మాట్లాడుతూ.. చంద్రబాబు రోజుకో మాట మాట్లాడుతున్నారని, అనేక సందర్భాల్లో ఆయన మాట మార్చారని అన్నారు. ఏపీలో ఉన్నది అధ్వాన్న ప్రభుత్వం అని ఎద్దేవా చేశారు. కాంగ్రెస్‌తో కుమ్మక్కైన వారు వేలకోట్ల రుణాలు లబ్ధిపొంది విదేశాలకు పారిపోయారని ఆరోపించారు. ఏపీలో ప్రజాస్వామ్య వ్యతిరేక ప్రభుత్వం కొనసాగుతోందని విమర్శించారు. అవినీతి, అసూయతో ప్రభుత్వాన్ని కొనసాగిస్తున్నారని చెప్పారు.

సాక్షి, అమరావతి బ్యూరో/లబ్బీపేట (విజయవాడ తూర్పు)/సాక్షి, విశాఖపట్నం : వైఎస్సార్‌ కాంగ్రెస్‌ పార్టీ అధినేత, ప్రతిపక్ష నేత వైఎస్‌ జగన్‌ మోహన్‌రెడ్డిపై విశాఖ విమానాశ్రయంలో హత్యాయత్నానికి పాల్పడిన నిందితుడు జె. శ్రీనివాసరావును జాతీయ దర్యాప్తు సంస్థ (ఎన్‌ఐఏ) అధికారులు శనివారం తమ అదుపులోకి తీసుకున్నారు. వైఎస్‌ జగన్‌పై దాడి కేసు దర్యాప్తును హైకోర్టు ఆదేశాలతో చేపట్టిన ఎన్‌ఐఏ.. నిందితుడిని విచారించేందుకు అనుమతించాలని కోరుతూ శుక్రవారం విజయవాడ ఎన్‌ఐఏ ప్రత్యేక కోర్టులో దాఖలు చేసిన పిటిషన్‌ను అనుమతిస్తూ న్యాయమూర్తి ఉత్తర్వులు జారీచేశారు. ఈ నేపథ్యంలో శనివారం ఉదయం విజయవాడ జిల్లా జైలులో ఉన్న శ్రీనివాసరావును ఎన్‌ఐఏ అధికారులు తమ అదుపులోకి తీసుకున్నారు. అక్కడి నుంచి ప్రభుత్వాసుపత్రికి తరలించి అతడికి వైద్య పరీక్షలు నిర్వహించారు. ఆసుపత్రి సూపరింటెండెంట్‌ డాక్టర్‌ పి.నాంచారయ్య పర్యవేక్షణలో వైద్య పరీక్షలు నిర్వహించారు. ఆ నివేదికను అధికారులకు డాక్టర్ల బృందం అందజేసింది. కాగా, అవసరమైతే నార్కో ఎనాలసిస్‌ పరీక్షలకైనా తాను సిద్ధమేనని నిందితుడు చెప్పినట్లు అతని తరఫు న్యాయవాది సలీం జైలు వద్ద మీడియాకు తెలిపారు. న్యాయవాది సమక్షంలో విచారణ చేపట్టాలని న్యాయమూర్తి ఉత్తర్వులు ఇచ్చారన్నారు.  విశాఖకు నిందితుడి తరలింపు? నిందితుడు శ్రీనివాసరావును ప్రత్యేక వాహనంలో హైదరాబాద్‌కు తరలించారు. ఎన్‌ఐఏ అధికారులు ఇందుకు సంబంధించిన సమాచారాన్ని గోప్యంగా ఉంచుతున్నారు. మరోవైపు.. విశాఖ ఎయిర్‌పోర్టులో హత్యాయత్నం జరిగిన ప్రదేశాన్ని పరిశీలించేందుకు శనివారం రాత్రి నిందితుడ్ని విశాఖకు తీసుకొస్తున్నట్లు అక్కడి పోలీసు ఉన్నతాధికారి ‘సాక్షి’కి చెప్పారు. కానీ, రాత్రి వరకు అతనిని తీసుకురాలేదు. దీంతో శనివారం అర్థరాత్రి తర్వాత లేదా ఆదివారం ఉదయానికి తీసుకొస్తారని సమాచారం. విమానాశ్రయంలో టీడీపీ నేత హర్షవర్థన్‌ చౌదరికి చెందిన ఫ్యూజన్‌ ఫుడ్స్‌ రెస్టారెంట్‌తో పాటు వీవీఐపీ లాంజ్‌లోకి నిందితుడ్ని తీసుకెళ్లి, ఘటన జరిగిన తీరుతెన్నులను ఎన్‌ఐఏ అధికారులు పరిశీలిస్తారని తెలుస్తోంది. 

సాక్షి, అమరావతి: విమానాశ్రయంలో భద్రతా వ్యవహారాల బాధ్యత కేంద్ర ప్రభుత్వానిదేనని, అక్కడ జరిగే ఘటనలపై విచారణ జరిపే బాధ్యత మాత్రం తమదని ముఖ్యమంత్రి చంద్రబాబు నాయుడు చెప్పారు. విమానాశ్రయంలో కేంద్రం విఫలమైనా దానిపై దర్యాప్తు చేయాల్సింది రాష్ట్ర ప్రభుత్వమేనని అన్నారు. చంద్రబాబు శనివారం ఉండవల్లిలోని గ్రీవెన్స్‌ హాలులో మీడియా సమావేశంలో మాట్లాడారు. ప్రతిపక్ష నేత వైఎస్‌ జగన్‌మోహన్‌రెడ్డిపై హత్యాయత్నం కేసును జాతీయ దర్యాప్తు సంస్థ(ఎన్‌ఐఏ)కు అప్పగించడంపై అభ్యంతరం వ్యక్తం చేశారు. రాష్ట్రం అధికారాన్ని కేంద్రం ఎలా తీసుకుంటుందని ప్రశ్నించారు. హత్యాయత్నం జరిగిన ఎయిర్‌పోర్టు తమ పరిధిలో లేదని, కేంద్రం పరిధిలో ఉందని చెప్పి ఇప్పుడు కేంద్రం ఆధీనంలోని ఎన్‌ఐఏ విచారణను ఎలా తప్పుపడతారని ప్రశ్నించగా... ఎయిర్‌పోర్టులో భద్రత మాత్రమే కేంద్రం చూసుకోవాలని, అక్కడ శాంతిభద్రతలు విఫలమైతే వాటిపై తాము దర్యాప్తు చేస్తామన్నారు. రాష్ట్ర సార్వభౌమాధికారాన్ని కేంద్రం హరిస్తోందని ఆరోపించారు. తమ పరిధిలోని అంశాలపై కేంద్రం ఎలా జోక్యం చేసుకుంటుందని అన్నారు. రాష్ట్రాల వ్యవహారాల్లో ఎన్‌ఐఏ జోక్యం చేసుకుంటోందని గతంలో మోదీ విమర్శించారని, ఇప్పుడు ఆయనే ఏపీలోకి ఎన్‌ఐఏను పంపుతున్నారని మండిపడ్డారు. అందుకే సీబీఐకి సాధారణ సమ్మతిని వెనక్కి తీసుకున్నామని, అవినీతి ఆరోపణలు ప్రధానమంత్రిపైనా ఉన్నాయన్నారు. రాష్ట్ర వ్యవహారాల్లో జోక్యం చేసుకోవడానికి ఎన్‌ఐఏ ఎవరని నిలదీశారు. దీనిపై కోర్టుకెళతామని, జాతీయ స్థాయిలో చర్చకు పెడతామని వెల్లడించారు.  కాంగ్రెస్‌ హయాంలో 50 మందిని చంపారు  రాష్ట్ర అభివృద్ధికి ప్రతిపక్షం సహకరించలేదని చంద్రబాబు విమర్శించారు. కాంగ్రెస్‌ పార్టీ హయాంలో పరిటాల రవి సహా 50 మందిని హత్య చేశారని ఆరోపించారు. రూ.6 లక్షల కోట్ల అవినీతి జరిగిందని తమను విమర్శిస్తున్నారని, రాష్ట్ర బడ్జెట్‌ కూడా అంతలేదని చెప్పారు. తమ అవినీతిపై విచారణ జరిపి, జైల్లో పెడతామంటున్నారని పేర్కొన్నారు. ఏపీకి ప్రత్యేక హోదా ఎప్పుడిస్తారో జగన్, కేసీఆర్, మోదీ కలిసి చెప్పాలని డిమాండ్‌ చేశారు. వైఎస్సార్‌సీపీ ఇచ్చిన హామీ చూసి భయపడి పెన్షన్‌ పెంచామంటున్నారని చెప్పారు. వైఎస్సార్‌సీపీ చెప్పేవి నవ రత్నాలు కాదని, నవగ్రహాలని ఆరోపించారు.  మాది చిన్నపార్టీ  ఈబీసీ రిజర్వేషన్లు చేసే ముందు కేంద్రం ఎవరినీ సంప్రదించలేదని, ఏ రాష్ట్రంతోనూ మాట్లాడలేదని, ప్రజలను సిద్ధం చేయకుండా ఉన్నట్టుండి ఇలాంటివి ఎలా చేస్తారని చంద్రబాబు నిలదీశారు. కాపు రిజర్వేషన్ల గురించి తమ ప్రతిపాదనలను ఒప్పకోలేదని, తెలంగాణలో ముస్లిం రిజర్వేషన్ల గురిచి ఒప్పుకోలేదని కానీ ఈబీసీలకు ఇచ్చారని విమర్శించారు. తనకు ప్రధానమంత్రి పదవి వద్దని చెబుతున్నానని, గతంలో తీసుకోమన్నా తీసుకోలేదని, తమది చిన్న పార్టీ అని చంద్రబాబు వ్యాఖ్యానించారు. పింఛన్‌తో వృద్ధులకు గౌరవం  రెండు చేతులూ లేని దివ్యాంగులకు నెలకు రూ.10 వేల పింఛన్‌ ఇస్తామని సీఎం చెప్పారు. ఇళ్లు, ఫించన్లు, రేషన్‌ వందశాతం ఇవ్వగలిగామన్నారు. రూ.1,000 పింఛన్‌తో వృద్ధులను గౌరవిస్తున్నారని, ఇప్పుడు రూ.2000 పింఛన్‌తో వారిని చూసుకోవడానికి పోటీ పడతారని అన్నారు. ఏపీలో లోటు బడ్జెట్‌ ఉన్నా కేసీఆర్‌ కంటే ఎక్కువ సంక్షేమ కార్యక్రమాలు అమలు చేశామని తేల్చిచెప్పారు. «ఒకేరోజు రెండు పెద్ద సంస్థలు రూ.లక్ష కోట్ల పెట్టుబడులు పెట్టడానికి ముందుకొచ్చాయని తెలిపారు. జిల్లా ప్రణాళికలను 21 నుంచి విడుదల చేస్తామని, త్వరలో రాష్ట్రస్థాయి ప్రణాళికను వెల్లడిస్తామన్నారు.  ఎన్‌ఐఏ విచారణను ఉపసంహరించండి  ప్రధానమంత్రి మోదీకి సీఎం చంద్రబాబు లేఖ  ప్రతిపక్ష నేత వైఎస్‌ జగన్‌మోహన్‌రెడ్డిపై జరిగిన హత్యాయత్నం కేసును ఎన్‌ఐఏకు అప్పగిస్తూ కేంద్ర హోంశాఖ జారీ చేసిన ఉత్తర్వును వెనక్కి తీసుకునేలా ఆదేశాలు జారీ చేయాలని సీఎం చంద్రబాబు ప్రధానమంత్రి నరేంద్ర మోదీని కోరారు. ఈ మేరకు ఆయన శనివారం ప్రధానమంత్రికి ఐదు పేజీల లేఖ రాశారు. రాష్ట్ర ప్రభుత్వాన్ని సంప్రదించకుండా, రాష్ట్ర ప్రభుత్వం లేవనెత్తిన అభ్యంతరాలను పరిగణనలోకి తీసుకోకుండా ఈ కేసును ఎన్‌ఐఏ విచారణకు అప్పగించారని తప్పుపట్టారు.  

సాక్షి, అమరావతి బ్యూరో: ప్రతిపక్ష నేత వైఎస్‌ జగన్‌మోహన్‌రెడ్డిపై విశాఖ ఎయిర్‌పోర్టులో హత్యాయత్నం ఘటనపై జాతీయ దర్యాప్తు సంస్థ (ఎన్‌ఐఏ) విచారణను వ్యతిరేకిస్తూ ఈ కేసు సంగతి తామే చూసుకుంటామని కేంద్ర ప్రభుత్వాన్ని దబాయించేలా టీడీపీ సర్కారు లేఖ రాయడంపై రాజకీయ పరిశీలకులు, న్యాయ నిపుణుల్లో విస్మయం వ్యక్తమవుతోంది. ఈ దారుణ హత్యా యత్నం వెనుక రాష్ట్ర ప్రభుత్వ పెద్దల ప్రమేయం ఉందనే అనుమానాలకు తాజా పరిణామాలు బలం చేకూరుస్తున్నాయని పేర్కొంటున్నారు. ఎయిర్‌పో ర్టులో భద్రత బాధ్యత కేంద్రానిది, విచారణ మాత్రం తాము చూసుకుంటామంటూ సీఎం వింత వ్యాఖ్యలు చేయడంపై అంతా విస్తుపోతున్నారు. ఈ కేసులో ఇప్పటికే ఎన్‌ఐఏ దర్యాప్తు ప్రారంభమై చురుగ్గా సాగుతుండటంతో తమ బండారం బయటపడుతుందనే భయంతోనే రాష్ట్ర ప్రభుత్వ పెద్దలు ఇలా వ్యవహరిస్తున్నట్లు చర్చ జరుగుతోంది. ఈ కేసు దర్యాప్తు అంశం కేంద్ర పరిధిలోకి రాదని, ఇది చాలా చిన్న కేసు అని బుకాయించేలా ప్రధానికి శనివారం రాసిన లేఖలో చంద్రబాబు  పేర్కొన్నారు. దీన్ని కేంద్ర, రాష్ట్ర సంబంధాలుగా చిత్రీకరిస్తూ రాష్ట్రం అధికారాలపై దురాక్రమణగా సీఎం అభివర్ణించడాన్ని తప్పుబడుతున్నారు. విమానాశ్రయాల్లో స్మగ్లింగ్, నకిలీ కరెన్సీ, విదేశీ చొరబాట్లపైనే ఎన్‌ఐఏ విచారణ జరపాలని చట్టంలో ఉందటూ సీఎం చంద్రబాబు వక్రీకరిస్తూ అవాస్తవాలు చెప్పడం గమనార్హం. చిన్న కేసులు, ఆర్థికపరమైన కేసులు మినహా హత్యాయత్నాలు, హత్యలు, లాంటి తీవ్రమైన కేసుల విచారణను ఎన్‌ఐఏ చేపట్టకూడదని చెప్పడం చంద్రబాబుకే సాధ్యమని పరిశీలకులు ఎద్దేవా చేస్తున్నారు.  కేసును నీరుగార్చేలా సీఎం, డీజీపీ వ్యాఖ్యలు ప్రతిపక్ష నేత వైఎస్‌ జగన్‌పై విశాఖ ఎయిర్‌పోర్టులో పక్కా ప్రణాళిక ప్రకారమే హత్యాయత్నం జరిగిందని కేసుపై తొలుత దర్యాప్తు జరిపిన సిట్‌ అధికారులు సైతం హైకోర్టుకు సమర్పించిన రిమాండ్‌ నివేదికలో పేర్కొన్నారు. అయితే ఎయిర్‌పోర్టులో ఘటన జరిగిన గంటల వ్యవధిలోనే డీజీపీ, మంత్రులు, టీడీపీ నేతలు స్పందిస్తూ దీన్ని అభిమాని చేసిన దాడిగా చిత్రీకరిస్తూ వాస్తవాలను కప్పిపుచ్చేందుకు ప్రయత్నించారు. ఈ నేపథ్యంలో కుట్ర కోణాన్ని వెలికితీసేందుకు కేంద్ర సంస్థతో స్వతంత్ర దర్యాప్తునకు ఆదేశించాలని కోరుతూ వైఎస్సార్‌ సీపీ న్యాయ పోరాటం చేసింది. సాక్షాత్తూ ముఖ్యమంత్రి చంద్రబాబు, డీజీపీ ఠాకూర్‌ కేసు విచారణను ప్రభావితం చేసేలా వ్యాఖ్యలు చేయడాన్ని నివేదించింది. ఈ నేపథ్యంలో రాష్ట్ర పోలీసులు ఈ కేసును నిష్పక్షపాతంగా విచారించలేరని తెలిపింది. కేంద్ర పౌర విమానయాన భద్రతా చట్టం, ఎన్‌ఐఏ చట్టాలను ఉటంకిస్తూ ఈ కేసు దర్యాప్తును కేంద్ర ప్రభుత్వ సంస్థలకు అప్పగించాలని కోరింది. దీనిపై న్యాయస్థానం స్పందిస్తూ కేంద్ర హోంశాఖ స్పందనను కోరింది. విమానాశ్రయంలో జరిగిన ఈ హత్యాయత్నం కేసును చట్ట ప్రకారం ఎన్‌ఐఏకు అప్పగిస్తున్నట్లు కేంద్ర హోం శాఖ న్యాయస్థానానికి తెలియచేయడం, రంగంలోకి దిగిన దర్యాప్తు సంస్థ చురుగ్గా విచారిస్తుండటంతో కుట్రదారులు ఆందోళన చెందుతున్నట్లు న్యాయ నిపుణులు పేర్కొంటున్నారు. ఎన్‌ఐఏ దర్యాప్తు చేయాల్సిందేనంటున్న చట్టం నిజానికి విమానాశ్రయంలో హత్యాయత్నాలు, హత్యలు, దాడుల కేసు దర్యాప్తును రాష్ట్ర పోలీసులు చేపట్టకూడదని ఎన్‌ఐఏ చట్టం సెక్షన్‌ 6 స్పష్టం చేస్తోంది. ఇక విమానాశ్రయంలో ఏదైనా ఆయుధం, వస్తువుతో హత్యలు, హత్యాయత్నాలకు పాల్పడితే ఎన్‌ఐఏ విచారణ పరిధిలోకి వస్తాయని పౌర విమానయాన భద్రతా చట్టంలో ఉంది. అయితే కేంద్ర ప్రభుత్వ చర్యలు భారత సమాఖ్య వ్యవస్థ విధానానికి విరుద్ధమని చంద్రబాబు అవాస్తవాలు చెప్పడం సీఎం స్థాయిని దిగజార్చిందని నిపుణులు స్పష్టం చేస్తున్నారు. రాష్ట్ర ప్రభుత్వ పరిధిలోని అంశాలపై కేంద్ర ప్రభుత్వం ఎలా దర్యాప్తు చేపడుతుందని చంద్రబాబు తన లేఖలోప్రధానిని ప్రశ్నించారు. విమానాశ్రయం అన్నది కేంద్ర ప్రభుత్వ పరిధిలోని సంస్థ. అక్కడ జరిగిన హత్యాయత్నం కేసు విచారణ కేంద్ర ప్రభుత్వ పరిధిలోకే వస్తుందన్న  విషయాన్ని చంద్రబాబు ఎందుకు గుర్తించలేదని నిపుణులు ప్రశ్నిస్తున్నారు. మాలేగావ్‌ అల్లర్ల కేసులో ఓ పబ్లిక్‌ ప్రాసిక్యూటర్‌పై ఎన్‌ఐఏ ఉన్నతాధికారి ఒకరు ఒత్తిడి తెచ్చారంటూ ఓ ప్రతికలో వచ్చిన వార్తను చంద్రబాబు ప్రస్తావిస్తూ ఎన్‌ఐఏ నిబద్ధతను ప్రశ్నించారు. మరి ప్రతిపక్ష నేత వైఎస్‌ జగన్‌పై హత్యాయత్నం సానుభూతికోసమేనంటూ స్వయంగా సీఎం చంద్రబాబుతోపాటు డీజీపీ బహిరంగ వ్యాఖ్యలు చేసిన తరువాత రాష్ట్ర పోలీసులు నిష్పక్షపాతంగా దర్యాప్తు ఎలా నిర్వహిస్తారని నిపుణులు నిలదీస్తున్నారు. ప్రతిపక్ష నేత వైఎస్‌ జగన్‌పై హత్యాయత్నం కేసు ఎన్‌ఐఏ విచారణ పరిధిలోకే వస్తుందని కేంద్ర పౌర విమానయాన భద్రతా చట్టం–1982, ఎన్‌ఐఏ చట్టాలు స్పష్టంగా పేర్కొంటున్నాయి. విమానాశ్రయాల్లో భద్రత, రక్షణకు విఘాతం కలిగించే నేరాలపై దర్యాప్తు బాధ్యత పూర్తిగా ఎన్‌ఐఏదేనని పౌర విమానయాన భద్రతా చట్టంలోని సెక్షన్‌ 3(ఎ), 5(ఎ)లు స్పష్టం చేస్తున్నాయి. విమానాశ్రయాల్లో భద్రతకు భంగం కలిగించే చర్యలు, హత్యాయత్నాలు, దాడులు తదితర కేసులను ఎన్‌ఐఏ విచారించాలని వివరంగా  పేర్కొన్నారు. ఏదైనా విమానాశ్రయంలో ఎవరైనా చట్ట విరుద్ధంగా, ఉద్దేశపూర్వకంగా ఏదైనా ఆయుధాన్నిగానీ వస్తువునుగానీ ఉపయోగించిన కేసులను ఎన్‌ఐఏ విచారించాలి. హింసాత్మక చర్యలకు పాల్పడి ఎవరినైనా గాయపరిచినా, హత్యలకు పాల్పడినా ఆ కేసులు ఎన్‌ఐఏ దర్యాప్తు పరిధిలోకే వస్తాయి.  కుట్ర కోణాన్ని వెలికి తీసే సెక్షన్లను చేర్చకుండా... ప్రతిపక్ష నేత జగన్‌పై హత్యాయత్నం కేసును ఎన్‌ఐఏ దర్యాప్తు చేయాలని తెలిసినా రాష్ట్ర ప్రభుత్వం తన కనుసన్నల్లో మెలిగే వారికి దీన్ని అప్పగించి వ్యూహాత్మకంగా విచారణను నీరుగార్చేందుకు యత్నించింది. 2018 అక్టోబరు 25వతేదీ మధ్యాహ్నం 12.45 గంటల సమయంలో నిందితుడు శ్రీనివాసరావు హత్యాయత్నానికి ఒడిగట్టాడు. అయితే ప్రాథమిక విచారణ కూడా పూర్తికాకముందే అదే రోజు మధ్యాహ్నం 1.30 గంటలకే డీజీపీ ఠాకూర్‌ విలేకరుల సమావేశం నిర్వహించి ‘సానుభూతి కోసమే నిందితుడు శ్రీనివాసరావు జగన్‌పై హత్యాయత్నానికి పాల్పడ్డాడు’ అని ప్రకటించేశారు. మధ్యాహ్నం 2.30 గంటలకు మంత్రులు అదే మాట చెప్పుకొచ్చారు. సాయంత్రం 7 గంటలకు ముఖ్యమంత్రి చంద్రబాబు స్పందిస్తూ ‘సానుభూతి కోసమే ఈ హత్యాయత్నం చేయించారు’ అని బాధ్యతారాహిత్యంగా కేసు దర్యాప్తును ప్రభావితం చేసేలా ప్రకటన చేశారు. విమానాశ్రయంలోని తన రెస్టారెంట్‌లో నిందితుడికి ఏడాదికిపైగా ఆశ్రయం ఇచ్చిన టీడీపీ నేత హర్షవర్థన్‌ చౌదరిని సిట్‌ అధికారులు సరిగా విచారించ లేదు. నిందితుడు శ్రీనివాసరావుకు  ఏరోడ్రోమ్‌ ఎంట్రీ పర్మిట్‌(ఏఈపీ) జారీకి అవసరమైన నో అబ్జక్షన్‌ సర్టిఫికెట్‌ (ఎన్‌వోసీ)కు సంబంధించి కూడా విశాఖ పోలీస్‌ కమిషనర్‌ తప్పుడు ప్రకటనలు చేశారు. ఈ హత్యాయత్నం వెనుక ఉన్న కుట్ర కోణాన్ని ఛేదించేందుకు అవసరమైన ‘సెక్షన్‌ 120–బి’ చేర్చనేలేదు. హత్యాయత్నం కేసులో అసలు సూత్రధారుల పాత్ర బట్టబయలు కాకుండా కేవలం శ్రీనివాసరావుకే పరిమితం చేసేలా ప్రభుత్వ ముఖ్యనేత ఆదేశాలతో పోలీసులు కథ నడపడం తెలిసిందే. 

సాక్షి, అమరావతి: ప్రతిపక్షనేత వైఎస్‌ జగన్‌మోహన్‌ రెడ్డిపై జరిగిన హత్యాయత్నం కేసులో ఎన్‌ఐఏ విచారణ ప్రారంభించడం.. టీడీపీ నేతల్లో వణుకు పుట్టిస్తోంది. ఈ కేసు విచారణను జాతీయ దర్యాప్తు సంస్థ (ఎన్‌ఐఏ)కు అప్పగిస్తూ విజయవాడలోని ఎన్ఐఏ కోర్టు శుక్రవారం ఆదేశించిన విషయం తెలిసిందే. దీనిపై ఏపీ సీఎం చంద్రబాబు నాయుడు తీవ్ర అసహనం వ్యక్తం చేస్తూ తాజాగా ప్రధాని మోదీకి లేఖ రాశారు. జగన్‌పై హత్యాయత్నం కేసు విచారణను ఎన్‌ఐఏకు అప్పగించడం సరైనది కాదనీ, దీనిపై ప్రభుత్వానికి పలు అభ్యంతరాలు ఉన్నాయని ఐదు పేజీల లేఖలో చం‍ద్రబాబు పేర్కొన్నారు. రాష్ట్ర ప్రభుత్వాన్ని సంప్రదించకుండా ఎన్‌ఐఏకు ఎలా అప్పగిస్తారని కేం‍ద్రాన్ని చంద్రబాబు ప్రశ్నించారు. దాడి ఘటన విచారణను ఎన్‌ఐఏకు అప్పగిస్తూ తీసుకున్న నిర్ణయాన్ని రీకాల్‌ చేయాలని లేఖలో ప్రధాని మోదీని కోరారు. చంద్రబాబు లేఖపై సర్వత్రా విమర్శలు వస్తున్నాయి. చంద్రబాబు తీరుతో దాడి ఘటనలో నిజంగానే టీడీపీ పాత్ర ఉన్నదా అనే అనుమానం వ్యక్తమవుతోంది. జగన్‌పై హత్యాయత్నంలో టీడీపీ హస్తం ఉందని మొదటినుంచి ప్రతిపక్ష వైస్సార్‌సీపీ ఆరోపిస్తున్న విషయం తెలిసిందే. ఎన్‌ఐఏ విచారణలో అసలు వాస్తవాలు బయటకు వస్తాయనే భయంతోనే చంద్రబాబు విచారణకు సహరించడంలేదని వైఎస్సార్‌సీపీ నేతలు అనుమానం వ్యక్తం చేస్తున్నారు. జగన్‌పై దాడిలో టీడీపీ పాత్ర లేకపోతే ఎన్‌ఐఏ విచారణకు ఆ పార్టీ సహకరించాలి, కానీ అందుకు భిన్నంగా టీడీపీ ప్రభుత్వం వ్యవహరిస్తుండటం పరిశీలకుల్ని విస్మయ పరుస్తోంది. ఎన్‌ఐఏ దర్యాప్తు మొదలైన నాటినుంచి టీడీపీ సర్కారు, ఏపీ పోలీసులు వ్యవహరిస్తున్న తీరు.. పలు ప్రశ్నలకు తావిస్తోంది. ఈ నేపథ్యంలో ఎన్‌ఐఏ దర్యాప్తు అనగానే చంద్రబాబు సర్కారు ఎందుకు వణికిపోతోందని, ఈ కేసులో టీడీపీ పాత్ర ఏమాత్రం లేనిపక్షంలో ఎందుకు చంద్రబాబు ప్రభుత్వం ఎన్‌ఐఏ దర్యాప్తుకు సహకరించడం లేదని వైఎస్సార్‌సీపీ నేతలు ప్రశ్నించారు. చంద్రబాబు తప్పేమీ లేనప్పడు ఎన్‌ఐఏ విచారణకు ఎందుకు అడ్డుపడుతున్నారని నిలదీస్తున్నారు.  

సాక్షి, అమరావతి: ఏపీ ప్రతిపక్షనేత వైఎస్‌ జగన్‌మోహన్‌ రెడ్డిపై జరిగిన హత్యాయత్నం కేసు విచారణను అడ్డుకోవడానికి ఏపీ సీఎం చంద్రబాబు ప్రయత్నాలు మొదలుపెట్టారు. వైఎస్‌ జగన్‌పై జరిగిన హత్యాయత్నం కేసును ఎన్‌ఐఏకు అప్పగించిన విషయం తెలిసిందే. ఈ నిర్ణయాన్ని వ్యతిరేకిస్తూ శనివారం ప్రధాని నరేంద్ర మోదీకి చంద్రబాబు లేఖ రాశారు. జగన్‌పై దాడి కేసును జాతీయ దర్యాప్తు సంస్థకు అప్పగించడంపై చంద్రబాబు అసంతృప్తి వ్యక్తం చేశారు. జగన్‌పై జరిగిన హత్యాయత్నం కేసును ఎన్‌ఐఏ విచారణ చేపట్టడంపై ఏపీ ప్రభుత్వానికి అభ్యంతరాలు ఉన్నాయని లేఖలో పేర్కొన్నారు. దాడి కేసును ఎన్‌ఐఏకు అప్పగించడం సరికాదనీ, ఎన్‌ఐఏ విచారణను రీకాల్‌ చెయ్యాలని మోదీని కోరారు. కేసు విచారణను అడ్డుకునేందుకు పలు అభ్యంతరాలను చూపుతూ ఐదుపేజీల లేఖను మోదీకి రాశారు. నిందితుడు శ్రీనివాసరావుని వారం రోజులపాటు ఎన్‌ఐఏ కస్టడీకి అప్పగిస్తూ ఎన్‌ఐఏ కోర్టు న్యాయమూర్తి శుక్రవారం ఉత్తర్వులు జారీ చేసిన సంగతి తెలిసిందే. కాగా చంద్రబాబు లేఖపై ప్రతిపక్ష వైఎస్సార్‌సీపీ విమర్శల వర్షం కురిపిస్తోంది. దాడితో చంద్రబాబుకు ఎలాంటి సంబంధం లేకపోతే ఎన్‌ఐఏ విచారణకు ఎందుకు బయపడుతున్నారని ఆపార్టీ నేతలు ప్రశ్నిస్తున్నారు.

సాక్షి, విజయవాడ: వైఎస్సార్‌ కాంగ్రెస్‌ పార్టీ అధ్యక్షుడు, ప్రతిపక్ష నేత వైఎస్‌ జగన్‌మోహన్‌రెడ్డిపై హత్యాయత్నానికి పాల్పడిన నిందితుడు జనుపల్లి శ్రీనివాసరావును జాతీయ దర్యాప్తు సంస్థ (ఎన్‌ఐఏ) అధికారులు శనివారం అదుపులోకి తీసుకున్నారు. ప్రత్యేక భద్రత నడుమ ప్రభుత్వ ఆసుపత్రికి తీసుకెళ్లి అతడికి వైద్య పరీక్షలు నిర్వహించారు. (ఎన్‌ఐఏ కస్టడీకి శ్రీనివాసరావు) శ్రీనివాసరావును విచారణ నిమిత్తం రోడ్డు మార్గం గుండా హైదరాబాద్‌ ఎన్‌ఐఏ కార్యాలయానికి తరలించనున్నారు. అక్కడే వారం రోజుల పాటు నిందితుడిని అధికారులు విచారించనున్నారు. నిందితుడిని వారం రోజులపాటు ఎన్‌ఐఏ కస్టడీకి అప్పగిస్తూ ఎన్‌ఐఏ కోర్టు న్యాయమూర్తి శుక్రవారం ఉత్తర్వులు జారీ చేసిన సంగతి తెలిసిందే. నిందితుడికి మూడురోజులకోసారి వైద్యపరీక్షలు చేయించాలని, అతని న్యాయవాది సమక్షంలోనే విచారించాలని న్యాయమూర్తి స్పష్టం చేశారు.

యాధృచ్ఛికమే కావొచ్చు గానీ.. సరిగ్గా ప్రతిపక్ష నేత వైఎస్‌ జగన్‌మోహన్‌రెడ్డిపై జరిగిన హత్యాయత్నం కేసు దర్యాప్తును ఎన్‌ఐఏ చేపట్టిన ఉత్తరక్షణమే అలా సెలవులో వెళ్లిపోయిన ఆయన.. కేసు విచారణలో భాగంగా నిందితుడు నిందితుడు జనుపల్లి శ్రీనివాసరావును విజయవాడ ఎన్‌ఐఏ కోర్టుకు.. అక్కడి నుంచి జైలుకు తరలించగానే.. లడ్హా ఇలా సెలవు ముగించుకుని వచ్చేశారు.వైఎస్‌ జగన్‌పై హత్యాయత్నం కేసులో కుట్ర కోణాన్ని దాచేసి విచారణ మొత్తం ప్రభుత్వ పెద్దల ఆదేశాల మేరకు జరిగిందన్న వాదనలకు బలం చేకూర్చేలా.. లడ్హా వ్యవహారశైలి ఉండటం వివాదాస్పదమవుతోంది.కేసు ఎన్‌ఐఏ పరిధిలోకి వెళ్లిన తర్వాత సీపీ లడ్హా ప్రెస్‌మీట్‌ పెట్టి ఆ కేసులో శ్రీనివాసరావు తప్ప నిందితులెవ్వరూ లేరని చెప్పడం, కుట్ర కోణమే లేదని స్పష్టం చేయడం, ఆ వెంటనే సెలవులోకి వెళ్ళడం ద్వారా ఎన్నో అనుమానాలకు తావిచ్చారు. సాక్షి ప్రతినిధి, విశాఖపట్నం: ప్రతిపక్ష నేత, వైఎస్సార్‌ కాంగ్రెస్‌ పార్టీ అధ్యక్షుడు వైఎస్‌ జగన్‌మోహన్‌రెడ్డిపై హత్యాయత్నం కేసు దర్యాప్తులో మొదటి నుంచి విశాఖ పోలీసుల వ్యవహారశైలి అనుమానాస్పదంగానే ఉంది. విశాఖ విమానాశ్రయంలో గతేడాది అక్టోబర్‌ 25వ తేదీన దుండగుడు శ్రీనివాసరావు ప్రతిపక్ష నేతపై కత్తిదూసి హత్యాయత్నం చేసిన క్షణం మొదలు.. కేసు జాతీయ దర్యాప్తు సంస్థ(ఎన్‌ఐఏ)కు బదలీ అయిన నేపథ్యం వరకు ఏ కోణంలో చూసినా పోలీసుల తీరు ఆరోపణలకు తావిచ్చే విధంగానే ఉంది. హత్యాయత్నం ఘటన దరిమిలా ప్రత్యేక దర్యాప్తు బృందం(సిట్‌) చేపట్టిన విచారణ క్రమం పరిశీలించిన ఎవ్వరికైనా.. ఆ  కేసు నిర్వీర్యమైపోతుందని అర్ధమైపోతుంది. సరిగ్గా అదే రీతిలో సీపీ లడ్హా.. కేసులో ఎవ్వరి పాత్ర లేదని,  శ్రీనివాసరావు ఒక్కడే ప్రచారం కోసం హత్యాయత్నానికి పాల్పడ్డాడని మొదటి నుంచి చెప్పుకొస్తూ వచ్చారు. ఆ క్రమంలోనే హైడ్రామా సృష్టించి విచారణ తంతు సాగించారు. నెల రోజుల తర్వాత సిట్‌ ఆఫీసును కూడా క్లోజ్‌ చేసేశారు. అంతా పక్కాగా కేసును నిర్వీర్యం చేసి క్లోజ్‌ చేసేశామని పోలీసు పెద్దలు, సర్కారు పెద్దలు భావిస్తున్న తరుణంలో హైకోర్టు విచారణతో కేసు  కేంద్ర హోంశాఖ పరిధిలోకి వెళ్లింది. దీంతో విశాఖ పోలీసులకు, సర్కారు పెద్దలకు ఊహించని షాక్‌ తగిలింది. హైకోర్టు నిర్ణయంతో వెంటనే కేంద్ర హోంశాఖ కేసును ఎన్‌ఐఏకు అప్పగించడంతో ఆ సంస్థ జనవరి ఒకటో తేదీన కేసు నమోదు చేసింది. విషయం తెలుసుకున్న వెంటనే సీపీ లడ్హా హడావుడిగా ప్రెస్‌మీట్‌ పెట్టి కేసులో శ్రీనివాసరావు మినహా మరెవ్వరి పాత్ర లేదని తేల్చేశారు. మరుసటి రోజు ఎన్‌ఐఏ అధికారులు విశాఖ వచ్చి దర్యాప్తుకు రంగం సిద్ధం చేయగానే.. లడ్హా వ్యక్తిగత పనుల పేరిట సెలవుపై వెళ్ళిపోయారు. నాలుగు రోజులని చెప్పి.. వారం రోజులు నాలుగురోజుల పాటు వ్యక్తిగత పనులపై రాజస్థాన్‌ వెళ్ళారని పోలీసు వర్గాలు చెప్పుకొచ్చాయి. సరిగ్గా ఎన్‌ఐఏ రంగంలోకి దిగగానే ఆయన నాలుగురోజులంటూ వెళ్లి ఏకంగా వారంరోజుల పాటు.. కాదు కాదు.. కేసు విచారణ పర్వం విజయవాడకు బదిలీ అయ్యే వరకు.. శ్రీనివాసరావును విజయవాడ కోర్టుకు తరలించే వరకు.. సెలవు కొనసాగించడం చర్చనీయాంశమవుతోంది. నిజంగానే ఆయన సెలవు యాధృచ్ఛికమే అనుకున్నా...  జాతీయస్థాయిలో కలకలం రేపిన ఓ ప్రధాన ప్రతిపక్ష నేతపై హత్యాయత్నం కేసు విచారణ జాతీయ దర్యాప్తు సంస్థ చేపట్టిన సందర్భంలో లడ్హా వ్యవహారశైలి వివాదాస్పదమైంది. సరిగ్గా గురువారం అర్ధరాత్రి నిందితుడు శ్రీనివాసరావును విజయవాడకు తరలించగానే.. శుక్రవారం నుంచి లడ్హా అందుబాటులో ఉన్నారని కమిషనరేట్‌ వర్గాలు చెప్పడం గమనార్హం.

సాక్షి, అమరావతిబ్యూరో/విజయవాడ లీగల్‌/ ఆరిలోవ (విశాఖతూర్పు):  ప్రతిపక్ష నేత వైఎస్‌ జగన్‌మోహన్‌రెడ్డిపై హత్యాయత్నానికి పాల్పడిన నిందితుడు జనుపల్లి శ్రీనివాసరావును వారం రోజులపాటు ఎన్‌ఐఏ కస్టడీకి అప్పగిస్తూ ఎన్‌ఐఏ కోర్టు న్యాయమూర్తి శుక్రవారం ఉత్తర్వులు జారీ చేశారు. దీంతో శనివారం నిందితుడిని అదుపులోకి తీసుకోనున్న ఎన్‌ఐఏ అధికారులు విచారణ నిమిత్తం హైదరాబాద్‌ ఎన్‌ఐఏ కార్యాలయానికి తరలించనున్నట్లు సమాచారం. హైకోర్టు ఆదేశాల మేరకు జగన్‌పై హత్యాయత్నం కేసును జాతీయ దర్యాప్తు సంస్థ (ఎన్‌ఐఏ) విచారణ జరుపుతున్న సంగతి తెలిసిందే. అందులో భాగంగా ఎన్‌ఐఏ అధికారులు నిందితుడు శ్రీనివాసరావును తమకు అప్పగించమని కోరుతూ పిటిషన్‌ దాఖలు చేశారు. ఆ తర్వాత  నిందితుడిని విశాఖ జైలు నుంచి భారీ బందోబస్తు నడుమ విజయవాడ తీసుకువచ్చి శుక్రవారం పూర్తి అదనపు ఇన్‌చార్జి నగర మెట్రోపాలిటన్‌ సెషన్స్‌ జడ్జి అచ్యుత పార్థసారథి ఎదుట హాజరుపరచగా ఈ నెల 25 వరకు రిమాండ్‌ విధిస్తూ ఉత్తర్వులు జారీ చేశారు. రిమాండ్‌ అనంతరం నిందితుడిని జిల్లా జైలుకు తరలించారు. విచారణ నిమిత్తం నిందితుడిని వారం రోజుల పాటు తమ కస్టడీకి అప్పగించమని కోరుతూ ఎన్‌ఐఏ చీఫ్‌ ఇన్వెస్టిగేషన్‌ అధికారి ప్రత్యేక పబ్లిక్‌ ప్రాసిక్యూటర్‌ ద్వారా కోర్టులో పిటిషన్‌ దాఖలు చేశారు. నిందితుడి తరఫున న్యాయవాదులు హాజరు కాకపోవడంతో అధికారులు నిందితుడికి కస్టడీ పిటిషన్‌ కాపీ ప్రతులను అందజేశారు. తనను విచారించడానికి ఎటువంటి అభ్యంతరం లేదని, లాయర్‌ సమక్షంలో విచారించమని నిందితుడు న్యాయమూర్తిని  కోరాడు. దీంతో శ్రీనివాసరావును వారం రోజుల పాటు ఎన్‌ఐఏ కస్టడీకి అనుమతిస్తూ న్యాయమూర్తి ఉత్తర్వులు జారీచేశారు. నిందితుడికి మూడురోజులకోసారి వైద్యపరీక్షలు చేయించాలని, అతని న్యాయవాది సమక్షంలోనే విచారించాలని న్యాయమూర్తి స్పష్టం చేశారు. శనివారం  ఉదయం 10 గంటలకు జిల్లా జైలు నుంచి నిందితుడిని అదుపులోకి తీసుకున్న తరువాత ప్రభుత్వ ఆసుపత్రికి తరలించి వైద్య పరీక్షల అనంతరం నేరుగా హైదరాబాద్‌లోని ఎన్‌ఐఏ కార్యాలయానికి తరలిస్తున్నట్లు తెలిసింది. అక్కడే వారం రోజులపాటు ఉంచి విచారణ చేపడతారని సమాచారం

సాక్షి, విజయవాడ: ఏపీ ప్రతిపక్ష నేత, వైఎస్సార్‌ కాంగ్రెస్‌ పార్టీ అధ్యక్షుడు వైఎస్‌ జగన్‌మోహన్‌రెడ్డిపై జరిగిన హత్యాయత్నం కేసులో నిందితుడు శ్రీనివాసరావుని వారం రోజులు ఎన్‌ఐఏ కస్టడీకి అప్పగించాలని రాష్ట్రపోలీస్‌శాఖను విజయవాడ ఎన్‌ఐఏ ప్రత్యేక కోర్టు ఆదేశించింది. నిందితుడికి వైద్య పరీక్షలు చేయించిన తర్వాతే ఎన్‌ఐఏకు అప్పగించాలని, ప్రతి మూడు రోజులకు ఒకసారి వైద్యపరీక్షలు నిర్వహించాలని ఆదేశాల్లో పేర్కొంది. శ్రీనివాస్‌ కోరితే న్యాయవాది సమక్షంలోనే విచారణ చేపట్టాలని, విచారణలో భాగంగా నిందితుడిపై థర్డ్‌డిగ్రీ ప్రయోగించరాదని స్పష్టం చేసింది. విశాఖ విమానాశ్రయంలో చోటు చేసుకున్న ఈ ఘటనకు సంబంధించిన కేసును ఇటీవల కేంద్ర హోం శాఖ జాతీయ దర్యాప్తు  సంస్థ (ఎన్‌ఐఏ) కి అప్పగించిన సంగతి తెలిసిందే. వెంటనే రంగంలోకి దిగిన ఎన్‌ఐఏ అధికారులు విచారణ మొదలుపెట్టారు. నిందితుడు శ్రీనివాసరావు బెయిల్‌ పిటిషన్‌పై వాదనలు జరిగిన సమయంలో విశాఖ పోలీసులు ఎన్‌ఐఏ అధికారులకు రికార్డులు ఇవ్వడానికి నిరాకరించారు. దీంతో ఎన్‌ఐఏ అధికారులు నిందితుడు శ్రీనివాస్‌రావును తమకు అప్పగించాలని విజయవాడ ఎన్‌ఐఏ కోర్టులో పిటిషన్‌ దాఖలు చేశారు.

విశాఖ లీగల్‌/అల్లిపురం (విశాఖ దక్షిణం):  ప్రతిపక్ష నేత వై.ఎస్‌.జగన్‌మోహన్‌రెడ్డిపై హత్యాయత్నానికి పాల్పడిన జనుపల్లి శ్రీనివాసరావు బెయిల్‌ పిటిషన్‌ను విశాఖ మెట్రోపాలిటన్‌ మేజిస్ట్రేట్‌ కోర్టు డిస్మిస్‌ చేసింది. ఈ నెల 9న శ్రీనివాసరావు బెయిల్‌ పిటిషన్‌ విశాఖపట్నం మెట్రోపాలిటన్‌ మేజిస్ట్రేట్‌ కోర్టులో విచారణకు వచ్చింది. ఈ కేసు ఈ నెల 4న ఎన్‌ఐఏకు బదిలీ అయినందున ఎన్‌ఐఏ పీపీకి నోటీసు ఇవ్వాలని ఈ సందర్భంగా న్యాయవాది అబ్దుల్‌ సలీమ్‌ ను న్యాయమూర్తి ఆదేశించారు. ఈ మేరకు గురువారం సలీమ్, ఎన్‌ఐఏ పీపీ సిద్దరాములుకు నోటీస్‌ అందజేసి, దానిని కోర్టువారికి అందజేశారు. ఈ మేరకు మేజిస్ట్రేట్‌ ఎన్‌ఐఏ పీపీ ని వివరణ కోరగా.. ఆయన కేసుకు రికార్డుల నిమిత్తం 3వ మెట్రోపాలిటన్‌ మేజిస్ట్రేట్‌ కోర్టులో మెమో దాఖలు చేసినట్లు తెలిపారు. ఇంకా రికార్డులు ఏపీ పోలీసుల నుండి తమకు చేరలేదని విన్నవించారు. దీంతో న్యాయమూర్తి కేసు ఎన్‌ఐఏకి బదిలీ చేసినందున కోర్టు పరిధిలోకి రాదని తెలియజేశారు. న్యాయవాది సలీమ్‌ బెయిల్‌ పిటిషన్‌ను ఉపసంహరించుకున్నారు. దీంతో న్యాయమూర్తి బెయిల్‌ పిటిషన్‌ను డిస్మిస్‌ చేశారు. కాగా ఎన్‌ఐఏ అధికారులు ఈ నెల 7న కేసు రికార్డులు తమకు అప్పగించాలని కోర్టులో మెమో దాఖలు చేశారు. జనవరి 1న (ఆర్‌సీ నంబరు 01/2019/ఎన్‌ఐఏ/హైదరాబాద్‌) ఎఫ్‌ఐఆర్‌ నమోదైనందన రికార్డులు అప్పగించాలని కోరారు. ఈ మేరకు న్యాయమూర్తి గురువారం సాయంత్రం కేసు రికార్డులను ఎన్‌ఐఏ అప్పగించే నిమిత్తం విజయవాడకు తరలించారు.   ఎన్‌ఐఏకు నిందితుడి అప్పగింత  నిందితుడు శ్రీనివాస్‌ రిమాండ్‌ శుక్రవారం వరకు ఉండటంతో గురువారం సాయంత్రం నిందితుడిని ఎన్‌ఐఏకు అప్పగిస్తూ వారెంట్‌ జారీ చేశారు. ఉత్తర్వులు అందినట్లు జైలు అధికారులు వెల్లడించారు. గురువారం అర్ధరాత్రి దాటాక శ్రీనివాస్‌ను ఎన్‌ఐఏ అధికారులు విజయవాడ తరలించారు. అతడిని ఇవాళ కోర్టులో హాజరుపరచనున్నారు.

సాక్షి, విజయవాడ : ఆంధ్రప్రదేశ్‌ ప్రతిపక్షనేత వైఎస్‌ జగన్‌ మోహన్‌ రెడ్డి మీద హత్యాయత్నం కేసును విశాఖపట్నం నుంచి విజయవాడకు బదిలీ చేయాలంటూ మెట్రోపాలిటన్‌ కోర్టు తీర్పునిచ్చింది. జగన్‌పై హత్యాయత్నం కేసులో ప్రభుత్వం తమకు సహకరించడం లేదని.. ఈ కేసును విజయవాడకు బదిలీ చేయాలంటూ జాతీయ దర్యాప్తు సంస్థ (ఎన్‌ఐఏ) కోర్టులో పిటిషన్‌ దాఖలు చేసింది. కేసు పూర్వాపరాలు పరిశీలించిన న్యాయమూర్తి.. ఈ కేసును విశాఖపట్నం నుంచి విజయవాడకు బదిలీ చేయాలని ఆదేశాలు జారీ చేశారు. అంతేకాక కేసుకు సంబంధించిన అన్ని రికార్డులను ఎన్‌ఐఏకు అప్పగించాలంటూ కోర్టు ప్రభుత్వాన్ని ఆదేశించింది.

సాక్షి, విజయవాడ : ఆంధ్రప్రదేశ్‌ ప్రతిపక్ష నేత వైఎస్‌ జగన్‌ మోహన్‌ రెడ్డిపై జరిగిన హత్యాయత్నం కేసులో విశాఖపట్నం ఏసీపీ నాగేశ్వరరావు బుధవారం జాతీయ ఎస్సీ కమిషన్‌ ఎదుట హాజరయ్యారు. ఈ కేసుకు సంబంధించి కమిషన్‌ గతంలోనే ఆంధ్రప్రదేశ్‌ డీజీపీని తమ ఎదుట హాజరు కావాలంటూ నోటీసులు జారీ చేసింది. అయితే డీజీపీ బదులు సిట్‌ అధికారి నాగేశ్వరరావు కమిషన్‌ ముందు హాజరయ్యారు. ఈ సందర్భంగా నాగేశ్వరరావు ఈ కేసును ఇప్పటికే ఎన్‌ఐఏకు బదిలీ చేశామని  కమిషన్‌కు తెలిపారు. అంతేకాక ఈ కేసులో నిందుతుడైన శ్రీనివాసరావు ప్రస్తుతం విశాఖ జైల్లో ఉన్నాడని చెప్పారు. ఈ నెల 11 శ్రీనివాస రావును మరోసారి కోర్టు ముందు హాజరుపర్చుతామని నాగేశ్వర రావు..  కమిషన్‌కు వెల్లడించారు. ఈ సందర్భంగా కమిషన్‌ ఈ కేసుతో సంబంధమున్న మిగతా పోలీసు ఉన్నతాధికారులు ఎందుకు హాజరు కాలేదని ప్రశ్నించింది. అంతేకాక ఈ విషయమై విశాఖ కమిషనర్‌కు నోటీసులు కూడా జారీ చేసింది. అనంతరం ఈ కేసులో నిందుతుడైన శ్రీనివాస్‌కు, అతని కుటుంబ సభ్యులకు భద్రత కల్పించాలంటూ జాతీయ ఎస్సీ కమిషన్‌.. రాష్ట్ర పోలీసులను ఆదేశించింది.

సాక్షి ప్రతినిధి విశాఖపట్నం/ విశాఖ లీగల్‌: తెలుగు రాష్ట్రాలతోపాటు జాతీయస్థాయిలో కలకలం  సృష్టించిన రాష్ట్ర ప్రతిపక్షనేత, వైఎస్సార్‌సీపీ అధ్యక్షుడు వైఎస్‌ జగన్‌మోహన్‌రెడ్డిపై హత్యాయత్నం కేసు మంగళవారం కీలక  మలుపు తిరిగింది. ఇటీవల ఆ కేసుని కేంద్ర హోం శాఖ జాతీయ దర్యాప్తు  సంస్థ (ఎన్‌ఐఏ) కి అప్పగించిన సంగతి తెలిసిందే. వెంటనే రంగంలోకి దిగిన ఎన్‌ఐఏ అధికారులు విశాఖ చేరుకుని విచారణ మొదలుపెట్టారు. సోమవారం నిందితుడు శ్రీనివాసరావు బెయిల్‌ పిటిషన్‌పై వాదనలు జరిగిన సమయంలో విశాఖ పోలీసులు ఎన్‌ఐఏ అధికారులకు రికార్డులు ఇవ్వడానికి నిరాకరించారు. ఈ సందర్భంగా న్యాయమూర్తి ఆగ్రహం వ్యక్తం చేశారు. దీంతో మంగళవారం ఎన్‌ఐఏ అధికారులు విజయవాడలోని మెట్రోపాలిటన్‌ సెషన్స్‌ జడ్జి కోర్టులో పిటిషన్‌ దాఖలు చేశారు. సీఆర్‌పీసీ సెక్షన్‌ 41 (డి) ప్రకారం నిందితుడిని తమకు అప్పగించాలని, స్థానిక పోలీసులు ఇప్పటివరకూ చేపట్టిన  విచారణకు సంబంధించిన అన్ని ఫైళ్లు తమకు అప్పగించాలని న్యాయస్థానాన్ని కోరారు.  ప్రస్తుతం ఈ పిటిషన్‌ న్యాయస్థానంలో విచారణలో ఉంది. విశాఖ పోలీసులు, ప్రత్యేక దర్యాప్తు బృందం(సిట్‌) అధికారులు సహకరించకపోవడంతో ఇప్పటికే ఎన్‌ఐఏ అధికారులు విజయవాడలోని ఎన్‌ఐఏ ప్రత్యేక కోర్టులో ఒక పిటిషన్‌ వేశారు.  ఇకపై కేసు విచారణ విజయవాడలోనే  విశాఖపట్నంలోని 7వ మెట్రోపాలిటన్‌ మేజిస్ట్రేట్‌ కోర్టులో ఉన్న కేసు విజయవాడకు బదిలీ అయింది. ఈ మేరకు విజయవాడ లోని ఎన్‌ఐఏ ప్రత్యేక న్యాయస్థానం, మెట్రోపాలిటన్‌ సెషన్స్‌ జడ్జి విశాఖ కోర్టుకు ఆదే శాలు జారీ చేశారు. ఆ ఆదేశాలు విశాఖలోని కోర్టుకు మంగళవారం అందా యి. కేసు విచారణ విజయవాడలో జరుగనుంది.  

సాక్షి, విశాఖపట్నం : వైఎస్సార్‌సీపీ అధ్యక్షుడు, ప్రతిపక్షనేత వైఎస్‌ జగన్‌మోహన్‌ రెడ్డిపై జరిగిన హత్యాయత్నం కేసులో ఏపీ పోలీసులు సహకరించకపోవడంతో జాతీయదర్యాప్తు సంస్థ (ఎన్‌ఐఏ) మంగళవారం కోర్టును ఆశ్రయించింది. ఈ హత్యాయత్నం కేసుకు సంబంధించిన డాక్యుమెంట్లు ఇప్పించాలని ఎన్‌ఐఏ కోర్టులో మెమో దాఖలు చేసింది. అలాగే ఈ కేసును విజయవాడ కోర్టుకు బదలాయించాలని కోరింది. నిందితుడు శ్రీనివాసరావును కూడా కస్టడీ కోరే అవకాశం ఉన్నట్లు తెలుస్తోంది. విశాఖ విమానాశ్రయంలో గతేడాది అక్టోబర్‌ 25న ప్రతిపక్ష నేతపై జరిగిన హత్యాయత్నం ఘటనమీద దర్యాప్తును హైకోర్టు ఆదేశాల మేరకు జాతీయ దర్యాప్తు సంస్థ(ఎన్‌ఐఎ)కు అప్పగిస్తూ కేంద్ర హోంశాఖ నిర్ణయం తీసుకున్న సంగతి తెలిసిందే. ఈ నేపథ్యంలో రంగంలోకి దిగిన ఎన్‌ఐఎ జనవరి 1న ఎఫ్‌ఐఆర్‌ను నమోదు చేసి దర్యాప్తు కూడా మొదలుపెట్టింది. విచారణలో భాగంగా ఏపీ పోలీసులు సహకరించకపోవడంతో ఎన్‌ఐఏ అధికారులు కోర్టును ఆశ్రయించారు.  

సాక్షి, న్యూఢిల్లీ: ఆంధ్రప్రదేశ్‌ ప్రతిపక్ష నేత వైఎస్‌ జగన్‌పై జరిగిన హత్యాయత్నంలో నీ ప్రమేయం లేకపోతే అంత భయమెందుకని సీఎం చంద్రబాబును వైఎస్సార్‌సీపీ ఎంపీ విజయసాయిరెడ్డి ప్రశ్నించారు. ఎన్‌ఐఏ విచారణకు సహకరించవద్దని పోలీసులకు ఎందుకు ఆదేశాలిచ్చావో చెప్పాలని చంద్రబాబును నిలదీశారు. ఎన్‌ఐఏ విచారణతో వాస్తవాలు బయటకొస్తాయన్న భయంతోనే ఈ విధంగా ప్రవర్తిస్తున్నాడని దుయ్యబట్టారు. ఏపీకి ప్రత్యేక హోదా ఇవ్వాలని డిమాండ్‌ చేస్తూ వైఎస్సార్‌సీపీ రాజ్యసభ సభ్యులు వి.విజయసాయిరెడ్డి, వేమిరెడ్డి ప్రభాకర్‌రెడ్డి సోమవారం పార్లమెంటు ఆవరణలోని గాంధీ విగ్రహం వద్ద నిరసన చేపట్టారు. ఏపీకి ప్రత్యేక హోదా ఇవ్వాలంటూ ప్లకార్డులు ప్రదర్శించారు. ఈ సందర్భంగా విజయసాయిరెడ్డి మీడియాతో మాట్లాడుతూ.. ఎన్‌ఐఏను అడ్డుకుంటున్న చంద్రబాబుకు ప్రజాస్వామ్యంపై కనీస గౌరవం లేదని, రాజ్యాంగాన్ని అపహాస్యం చేస్తున్నారని విమర్శించారు. పోలవరం ప్రాజెక్టును పూర్తిగా నాసిరకం పనులతో అవినీతిమయం చేసి ఏ ఒక్క నిర్వాసితుడికీ 2013 భూసేకరణ చట్ట ప్రకారం పరిహారం ఇవ్వనందుకు గిన్నిస్‌బుక్‌లో ఎక్కించారా? అని ఎద్దేవా చేశారు. ఎంపీ వేమిరెడ్డి ప్రభాకర్‌రెడ్డి మాట్లాడుతూ వైఎస్సార్‌సీపీతోనే ఏపీకి ప్రత్యేక హోదా సాధ్యమవుతుందన్నారు. వచ్చే ఎన్నికల్లో 25 ఎంపీ స్థానాలు కైవసం చేసుకొని వైఎస్‌ జగన్‌ రాష్ట్రానికి ప్రత్యేక హోదా సాధిస్తారన్నారు.   ఢిల్లీలో నేడు ‘అవినీతి చక్రవర్తి’ విడుదల.. గత నాలుగున్నరేళ్లుగా సీఎం చంద్రబాబు రాష్ట్రంలో చేసిన అవినీతి, అక్రమాలపై ఆధారాలతో వైఎస్సార్‌సీపీ రూపొందించిన ‘అవినీతి చక్రవర్తి’ పుస్తకాన్ని ఆ పార్టీ నేతలు మంగళవారం ఢిల్లీలో ఆవిష్కరించనున్నారు. కార్యక్రమంలో ఆ పార్టీ రాజ్యసభ సభ్యులు విజయసాయిరెడ్డి, వేమిరెడ్డి ప్రభాకర్‌రెడ్డితో పాటు ప్రత్యేక హోదా కోసం ఎంపీ పదవులకు రాజీనామా చేసిన మేకపాటి రాజమోహన్‌రెడ్డి, వైవీ సుబ్బారెడ్డి, వరప్రసాదరావు, పెద్దిరెడ్డి మిథున్‌రెడ్డి, అవినాష్‌రెడ్డి పాల్గొంటారు. పునరావాసం కల్పించింది 1,317 కుటుంబాలకే! పోలవరం ప్రాజెక్ట్‌ వల్ల నిర్వాసితులైన 56,495 ఎస్టీ కుటుంబాల్లో ఇప్పటి వరకు కేవలం 1,317 కుటుంబాలనే పునరావాస కాలనీలకు తరలించినట్టు ఆంధ్రప్రదేశ్‌ ప్రభుత్వం తెలిపిందని కేంద్ర జల వనరుల శాఖ సహాయ మంత్రి అర్జున్‌ రామ్‌ మేఘ్‌వాల్‌ సోమవారం రాజ్యసభలో వెల్లడించారు. పోలవరం ప్రాజెక్ట్‌ కారణంగా నిర్వాసితులైన ఎస్టీ కుటుంబాలకు పునరావాసం కల్పించే విషయంలో తీవ్ర నిర్లక్ష్యం జరుగుతున్నట్లు జాతీయ ఎస్టీ కమిషన్‌ రాష్ట్రపతికి సమర్పించిన నివేదికలో పేర్కొన్న విషయం వాస్తవమేనా అని వైఎస్సార్‌సీపీ ఎంపీ విజయసాయి రెడ్డి అడిగిన ప్రశ్నకు కేంద్ర మంత్రి లిఖితపూర్వకంగా సమాధానమిచ్చారు. పోలవరం ప్రాజెక్ట్‌ వల్ల నిర్వాసితులైన గిరిజనులు అన్న అంశంపై జాతీయ ఎస్టీ కమిషన్‌ ఒక ప్రత్యేక నివేదిక రూపొందించిన విషయం వాస్తవమేనని మంత్రి అంగీకరించారు. నిర్వాసితులైన గిరిజన కుటుంబాల సామాజిక, ఆర్థిక అభ్యున్నతి కోసం చేపట్టవలసిన కొన్ని ముఖ్యమైన చర్యలను ఎస్టీ కమిషన్‌ రాష్ట్ర ప్రభుత్వానికి సిఫార్సు చేసిందన్నారు. కోస్టల్‌ రెగ్యులేటరీ జోన్‌ (సీఆర్‌జెడ్‌) నిబంధనల సడలింపు అంశాన్ని సమీక్షించి, పరిశీలించేందుకు కేంద్ర ప్రభుత్వం ఒక కమిటీని నెలకొల్పిందని పర్యావరణ శాఖ సహాయ మంత్రి డాక్టర్‌ మహేష్‌ శర్మ ఎంపీ విజయసాయి రెడ్డి అడిగిన మరో ప్రశ్నకు బదులిచ్చారు. సీఆర్‌జెడ్‌ కారణంగా కోస్తా ప్రాంతాల్లో తలెత్తుతున్న సమస్యలు, ఆంధ్రప్రదేశ్‌తోపాటు తీర ప్రాంతం కలిగిన ఇతర రాష్ట్రాలు, కేంద్ర పాలిత ప్రాంతాల్లో టూరిజం అభివృద్ధికి ఎదురవుతున్న సవాళ్లను ఈ కమిటీ పరిశీలిస్తుందని చెప్పారు.   గొలగమూడి జంక్షన్‌ వద్ద ఫ్‌లైఓవర్‌   జాతీయ రహదారి ఎన్‌హెచ్‌–16లో కోల్‌కత్తా–చెన్నై రహదారులు కలిసే నెల్లూరు జిల్లాలో గొలగమూడి జంక్షన్‌ వద్ద ఫ్‌లైఓవర్‌ నిర్మాణానికి ఎన్‌హెచ్‌ఏఐ ప్రతిపాదనలు స్వీకరించిందని, అలాగే నెల్లూరు బైపాస్‌ ఎన్‌హెచ్‌–16వద్ద సర్వీస్‌ రోడ్డు నిర్మాణానికి కూడా ప్రతిపాదనలు ఉన్నట్టు కేంద్ర మంత్రి గడ్కరీ వెల్లడించారు. వైఎస్సార్‌సీపీ ఎంపీ వేమిరెడ్డి ప్రభాకర్‌ రెడ్డి అడిగిన ప్రశ్నకు కేంద్ర మంత్రి సోమవారం రాజ్యసభలో లిఖితపూర్వకంగా సమాధానమిచ్చారు. అలాగే కడప–మైదుకూరు–కర్నూలు ఎన్‌హెచ్‌–18 పనులు ఈ ఏప్రిల్‌లోపు పూర్తవుతాయని మరో ప్రశ్నకు సమాధానంగా మంత్రి చెప్పారు.

సాక్షి ప్రతినిధి, విశాఖపట్నం: ప్రతిపక్ష నేత, వైఎస్సార్‌ కాంగ్రెస్‌ పార్టీ అధ్యక్షుడు వైఎస్‌ జగన్‌మోహన్‌రెడ్డిపై హత్యాయత్నం కుట్ర కేసు దర్యాప్తు మొదలు పెట్టిన జాతీయ దర్యాప్తు సంస్థ (ఎన్‌ఐఎ)కు విశాఖ పోలీసుల నుంచి సహాయ నిరాకరణ కొనసాగుతోంది. విశాఖ విమానాశ్రయంలో గత ఏడాది అక్టోబర్‌ 25న వైఎస్‌ జగన్‌పై జరిగిన హత్యాయత్నం ఘటనపై సమగ్ర విచారణను జాతీయ దర్యాప్తు సంస్థ (ఎన్‌ఐఎ)కు అప్పగిస్తూ హైకోర్టు ఆదేశాల మేరకు కేంద్రహోం శాఖ నిర్ణయం తీసుకున్న సంగతి తెలిసిందే. ఈ మేరకు జనవరి 1న ఎఫ్‌ఐఆర్‌ నమోదు చేసి రంగంలోకి దిగిన ఎన్‌ఐఎ ప్రధాన దర్యాప్తు అధికారి (సీఐఓ) మహ్మద్‌ సాజిద్‌ఖాన్‌ సహా ఐదుగురు అధికారులకు విశాఖ పోలీసులు చుక్కలు చూపిస్తున్నారు. పాకిస్తాన్‌ ఉగ్రవాద కేసులను సైతం ధైర్యంగా, చాకచాక్యంగా ఎదుర్కొన్న ఎన్‌ఐఎ అధికారులకు ఇలా ఓ రాష్ట్ర పోలీసు యంత్రాంగం నుంచి సహాయనిరాకరణ ఎదురుకావడం ఇదే తొలిసారిగా చెబుతున్నారు. కేసు విచారణ ఫైళ్లు అప్పగించడం సంగతి పక్కన పెడితే కనీసం కేసు వివరాలను కూడా చెప్పేందుకు విశాఖ పోలీసు అధికారులు నిరాకరించడాన్ని ఎన్‌ఐఎ అధికారులు  జీర్ణించుకోలేకపోతున్నారు. కేంద్ర హోం మంత్రిత్వశాఖ ఆదేశాలతో ఎన్‌ఐఎ అధికారులు విశాఖ చేరుకున్న రోజు నుంచే నగర పోలీస్‌ కమిషనర్‌ మహేష్‌ చంద్ర లడ్హా సెలవుపై వెళ్లిపోయారు. దీంతో ఎన్‌ఐఎ బృందం జగన్‌పై హత్యాయత్నం ఘటనపై విచారణకు రెండు నెలల కిందట రాష్ట్ర ప్రభుత్వం నియమించిన ప్రత్యేక దర్యాప్తు బృందం(సిట్‌) అధికారులను, కేసు నమోదు చేసిన ఎయిర్‌పోర్ట్‌ పోలీసులను సంప్రదించింది. తొలి రెండురోజులు సమాచారం ఇవ్వలేమని, ఆ మేరకు ప్రభుత్వ ఆదేశాలున్నాయని ఎన్‌ఐఎ వర్గాలతో చెప్పిన సిట్‌ అధికారులు సోమవారం కనీసం వారిని కలిసేందుకు కూడా ఇష్టపడలేదని తెలుస్తోంది. కేసును ఎన్‌ఐఎకు అప్పగించడంపై రాష్ట్ర ప్రభుత్వం అభ్యంతరం వ్యక్తం చేస్తూ కేంద్రప్రభుత్వానికి లేఖ రాయాలని, అవసరమైతే కోర్టులో పిటిషన్‌ వేయాలని నిర్ణయించిన సంగతి తెలిసిందే. ఈ మేరకు ప్రభుత్వ పెద్దల నుంచి వచ్చిన స్పష్టమైన ఆదేశాలతో విశాఖ పోలీసులు, సిట్‌ అధికారులు ఎన్‌ఐఎ వర్గాలను ఏమాత్రం లెక్క చేయడం లేదు. కాగా ఎన్‌ఐఎ అధికారులకు విశాఖ పోలీసుల్లో ఎవరైనా సహకరిస్తున్నారా రాష్ట్ర  ప్రభుత్వ పెద్దలు నిఘా వేశారు. ఉత్తరాంధ్రకు చెందిన ఓ సీనియర్‌ మంత్రి, టీడీపీలో కీలక నాయకుడు ఆదివారం పొద్దుపోయాక ఈ కేసు గురించి వాస్తవాలు తెలిసిన ఓ పోలీసు అధికారికి ఫోన్‌ చేసి బెదిరింపు ధోరణిలో మాట్లాడినట్టు తెలుస్తోంది. ఎన్‌ఐఎ అధికారులకు ఏ మాత్రం సహకరించినా బాగుండదు.. అని  హుకుం జారీ చేసినట్లు పోలీసువర్గాల్లోనే చర్చ జరుగుతోంది. ఇక సోమవారం విశాఖ వచ్చిన హోం మంత్రి, ఉపముఖ్యమంత్రి నిమ్మకాయల చినరాజప్ప కూడా కేసును ఎన్‌ఐఎకి అప్పగించడాన్ని తీవ్రంగా తప్పుపడుతూ వ్యాఖ్యలు చేశారు.  కుట్ర లేకుంటే అంత ఆందోళన ఎందుకో  వైఎస్‌ జగన్‌పై హత్యాయత్న ఘటన వెనుక భారీ కుట్ర, విచారణలో పెద్దల ప్రభావం లేకుంటే ఎన్‌ఐఎ రంగంలోకి దిగగానే రాష్ట్ర ప్రభుత్వానికి, టీడీపీ పెద్దలకు ఇంత ఉలికిపాటు ఎందుకన్న వాదనలు ప్రతిపక్షాలు, ప్రజల నుంచే కాదు స్వయంగా ఎన్‌ఐఎ వర్గాల నుంచే వినిపిస్తున్నాయి. ఈ మేరకే ఎన్‌ఐఎ వర్గాలు యోచిస్తూ కేసు దర్యాప్తు ఎటు నుంచి మొదలుపెట్టాలనే యోచిస్తున్నాయి. పోలీసులు సహకరించడం లేదు.. ఎన్‌ఐఎ వర్గాలు వాస్తవానికి విచారణ దశలో ఉన్నప్పుడు కేసు వివరాల గురించి మేం ఎవ్వరితోనూ మాట్లాడకూడదు. విశాఖలోనే మకాం వేసిన మాకు రాష్ట్ర ప్రభుత్వం, పోలీసుల నుంచి సహకారం అందని మాట నిజమే. ఎన్‌ఐఎకి అప్పగించడాన్ని వ్యతిరేకిస్తూ వాళ్లేదో ఛాలెంజ్‌ చేయాలని చూస్తున్నారు.. ఈ విషయాలను మేం కేంద్ర హోంమంత్రిత్వశాఖ దృష్టికి తీసుకువెళ్లి కేసు దర్యాప్తును ముందుకు ఎలా తీసుకువెళ్లాలో చూస్తాం.. అని ఎన్‌ఐఎకి చెందిన ఓ అధికారి సోమవారం సాక్షి ప్రతినిధి వద్ద వ్యాఖ్యానించారు. కోర్టుకూ అదే సమాధానం.. న్యాయమూర్తి ఆగ్రహం విశాఖ లీగల్‌: రాష్ట్ర ప్రతిపక్షనేత వైఎస్‌ జగన్‌మోహన్‌రెడ్డిపై హత్యాయత్నం కేసులో నిందితుడు జె.శ్రీనివాసరావు దాఖలు చేసిన బెయిల్‌ పిటిషన్‌ సోమవారం విచారణకు వచ్చింది. నగరంలోని మెట్రోపాలిటన్‌ సెషన్స్‌ కోర్టులో నిందితుడి తరఫు న్యాయవాది సలీమ్‌ వాదనలు వినిపించారు. ఈ సందర్భంగా కేసుకు సంబంధించిన సీడీ ఫైల్‌ ఇవ్వాలని ఏపీపీ పోలీసులను కోరగా.. పైఅధికారుల అనుమతిలేనిదే ఇవ్వలేమని స్పష్టం చేశారు. దీనితో ఏపీపీ అదే విషయాన్ని న్యాయమూర్తికి తెలిపారు. దీనితో న్యాయమూర్తి పార్థసారధి పోలీసుల తీరుపై ఆగ్రహం వ్యక్తంచేశారు. హైకోర్టు ఆదేశాలను సైతం పట్టించుకోలేదని పేర్కొంటూ బెయిల్‌ పిటిషన్‌ విచారణకు సంబంధించిన నోటీస్‌ను ఎన్‌ఐఏకు జారీ చేశారు. ఎన్‌ఐఏకు నోటీస్‌ ఇచ్చి విచారణ కొనసాగించాలని ఆదేశిస్తూ కేసును ఈనెల 19కి వాయిదా వేశారు.  

సాక్షి, విజయవాడ : ఏపీ ప్రతిపక్ష నేత వైఎస్‌ జగన్‌ మోహన్‌ రెడ్డిపై హత్యాయత్నం కేసులో హైకోర్టు ఆదేశాలతో జాతీయ దర్యాప్తు సంస్థ(ఎన్‌ఐఏ) అధికారులు విచారణ ప్రారంభించారు. ఈ మేరకు ఎన్‌ఐఏ డీఐజీ ప్రవీణ్‌ బృందం సోమవారం వైజాగ్‌ చేరుకున్నారు. స్థానిక పోలీసులను కలిసి ఘటనకు సంబంధించిన వివరాలను తీసుకున్నారు. అనంతరం ఎన్‌ఐఏ బృందం ఎయిర్‌ పోర్టులోని సీన్‌ ఆఫ్‌ అఫెన్స్‌ను పరిశీలించనున్నరు. ఈ నేపథ్యంలో హత్యాయత్నం కేసులో నిందుతుడు శ్రీనివాస్‌ రావును విచారణ చేయనున్నట్లు తెలిపారు.

సాక్షి, విజయవాడ : ఏపీ ప్రతిపక్ష నేత వైఎస్‌ జగన్మోహన్‌ రెడ్డిపైన జరిగిన హత్యాయత్నం కేసు నిరూపించడానికి అవసరమైతే న్యాయ పోరటానికి దిగుతామంటున్నారు వైఎస్సార్‌సీపీ ఎమ్మెల్యే ఆళ్ల రామకృష్ణా రెడ్డి. సోమవారమిక్కడ మీడియాతో మాట్లాడుతూ.. తమ పార్టీ అధ్యక్షుడి మీద జరిగిన హత్యాయత్నం కేసులో చంద్రబాబు ఒత్తిళ్లకు తలొగ్గి పోలీసులు విచారణకు సహకరించకపోతే వారిపైన కోర్టులో రిట్‌ పిటిషన్‌ దాఖలు చేస్తామని హెచ్చరించారు. పోలీసులు విచారణకు సహకరించాలని ఎన్‌ఐఏ చట్టంలో సెక్షన్‌ 9 స్పష్టంగా చెబుతోందని గుర్తు చేశారు. సీబీఐని రాష్ట్రంలోకి రాకుండా అడ్డుకున్న చంద్రబాబు.. ఇప్పుడు ఎన్‌ఐఏను కూడా అడ్డుకునేందుకు ప్రయత్నిస్తున్నారని ఆరోపించారు. ఎన్‌ఐఏ విచారణను అడ్డుకునేందుకు రాష్ట్ర ప్రభుత్వం సుప్రీం కోర్టుకు వెళ్తే దానిపైన పోరాడాల్సిన బాధ్యత కూడా ఎన్‌ఐఏదేనని తెలిపారు. ఎన్‌ఐఏ విచారణకు సహకరించని అధికారులపై ఐపీసీ 166 సెక్షన్‌ ప్రకారం కోర్టులో రిట్‌ దాఖలు చేస్తామన్నారు.  

సాక్షి, అమరావతి బ్యూరో/సాక్షి, అమరావతి: ‘‘ఎవరో ఒక అభిమాని సానుభూతికోసం జగన్‌పై కత్తితో దాడి చేస్తే.. దానికి, నాకు సంబంధం ఉందంటూ మాపై బురద చల్లే కార్యక్రమానికి శ్రీకారం చుట్టారు. బీజేపీ, వైఎస్సార్‌సీపీ ఒక్కటే. కాబట్టే జగన్‌పై దాడి కేసును కేంద్ర దర్యాప్తు సంస్థ(ఎన్‌ఐఏ)కు ఇచ్చారు. రాష్ట్రంలో శాంతిభద్రతలను పరిరక్షించే బాధ్యత రాష్ట్ర ప్రభుత్వానిది. ఆ హక్కులను నేరుగా కేంద్రం హరిస్తోంది. లేనిదాన్ని సృష్టించడానికి.. లేనిపోని అపోహలు తేవడానికి అధికార దుర్వినియోగానికి పాల్పడుతోంది..’’ అని సీఎం చంద్రబాబు నాయుడు ఆరోపించారు. కృష్ణా జిల్లా పెనమలూరు నియోజకవర్గం కంకిపాడు మండలం పునాదిపాడులో ఆదివారం నిర్వహించిన ‘జన్మభూమి–మాఊరు’ గ్రామసభలో సీఎం మాట్లాడుతూ.. రాష్ట్రాభివృద్ధికి కేంద్రం సహకరించకుండా మోసం చేసిందని మండిపడ్డారు. చెప్పింది వినకపోతే అణగదొక్కాలని చూస్తున్నారని, హక్కులకోసం పోరాటానికి దిగితే టీడీపీ ఎంపీలు, ఎమ్మెల్యేలు, పారిశ్రామికవేత్తలపై ఐటీ దాడులు చేయించిందని ఆరోపించారు. రాజకీయంకోసం కేరళలాంటి మంచి రాష్ట్రాన్ని బీజేపీ అతలాకుతలం చేసిందన్నారు. యూపీలో అఖిలేష్, మాయావతిలు వచ్చే ఎన్నికలకోసం సీట్లు సర్దుబాటు చేసుకుంటే వెంటనే అఖిలేష్‌పై ఉన్న పాత కేసుల మీద సీబీఐ దర్యాప్తుకు ఆదేశించారని ధ్వజమెత్తారు. రాష్ట్రాన్ని భ్రష్టుపట్టించేందుకు మనపై కేంద్రం ఎదురుదాడి చేస్తోందన్నారు. ప్రధాని నరేంద్రమోదీ అన్ని రంగాల్లో విఫలమయ్యారని విమర్శించారు. దేశాన్ని భ్రష్టు పట్టించినట్లుగానే రాష్ట్రాన్ని భ్రష్టు పట్టించాలని ప్రధాని మోదీ, అమిత్‌షా ప్రయత్నిస్తున్నారని ఆరోపించారు. అభివృద్ధిలో గుజరాత్‌ను మించిపోతామనే భయం మోదీలో ఉందన్నారు. ఏపీకి ఏమీ ఇవ్వకపోగా చేస్తున్న అభివృద్ధికి అడ్డంకులు సృష్టిస్తున్నారని మండిపడ్డారు. రాష్ట్రాభివృద్ధి కోసం పెట్టుబడులను ఆహ్వానించేందుకు దావోస్‌ వెళ్తుంటే వీల్లేదంటూ ఆంక్షలు పెట్టడం దారుణమని, రాష్ట్రంపై కేంద్ర పెత్తనాన్ని సహించేది లేదన్నారు. త్వరలో స్మార్ట్‌ఫోన్‌ పథకానికి రాష్ట్రంలో శ్రీకారం చుట్టబోతున్నామని చెప్పారు. కాగా, జన్మభూమి కార్యక్రమం జరుగుతున్న తీరుపై జిల్లా కలెక్టర్లు, నోడల్‌ అధికారులు, ప్రజాప్రతినిధులతో సీఎం ఆదివారం టెలీకాన్ఫరెన్స్‌ నిర్వహించారు. ఈ సందర్భంగా మాట్లాడుతూ.. ప్రపంచానికే నమూనాగా రాష్ట్రాన్ని మారుస్తున్నామని చెప్పారు. కేంద్రంలో బీజేపీ నేతలు పనిచేయరని, పని చేయమంటే కేసులతో బెదిరిస్తున్నారని మండిపడ్డారు. 

సాక్షి, అమరావతి: వైఎస్సార్‌సీపీ అధ్యక్షుడు, ప్రతిపక్ష నేత వైఎస్‌ జగన్‌పై విశాఖ ఎయిర్‌పోర్టులో జరిగిన హత్యాయత్నం కేసులో దర్యాప్తు చేపట్టేందుకు జాతీయ దర్యాప్తు సంస్థ(ఎన్‌ఐఏ) రంగంలోకి దిగడంతో ముఖ్యమంత్రి చంద్రబాబు ఉలిక్కిపడుతున్నారు. ప్రతిపక్ష నేతను భౌతికంగా అంతం చేసేందుకు సాగించిన కుట్ర బయట పడుతుందనే భయం చంద్రబాబు ప్రభుత్వాన్ని వెంటాడుతోందన్న విషయం తాజా పరిణామాలను బట్టి స్పష్టమవుతోంది. ఎన్‌ఐఏకు ఏపీ పోలీసుల సహాయ నిరాకరణతోపాటు దర్యాప్తును అడ్డుకునేందుకు రాష్ట్ర సర్కారు 2 రోజులుగా మల్లగుల్లాలు పడుతున్న తీరు చూసి రాష్ట్ర ప్రజలు విస్తుపోతున్నారు. గతేడాది అక్టోబర్‌ 25న జగన్‌పై కత్తితో హత్యాయత్నం చేయడాన్ని ఖండించకుండా సీఎం చేసిన వ్యాఖ్యలు, డీజీపీ ఠాకూర్‌ చేసిన ప్రకటన ఈ కేసు దర్యాప్తును తప్పుదోవ పట్టించేలా ఉన్నాయని వైఎస్సార్‌సీపీ శ్రేణులు పేర్కొన్న సంగతి తెలిసిందే. ఈ కేసులో అప్పటి నుంచి చోటుచేసుకున్న పరిణామాలను నిశితంగా గమనిస్తే కుట్రకోణాన్ని మరుగున పరిచేందుకు ప్రభుత్వ యంత్రాంగం సర్వశక్తులూ ఒడ్డిందని తేటతెల్లమవుతోంది. జగన్‌పై జరిగిన హత్యాయత్నం కేసులో అసలు కుట్రను ఛేదించేలా ఏపీ పోలీసులు ఒక్క ప్రయత్నమూ చేయకపోవడం గమనార్హం. ప్రభుత్వం హడావుడిగా ఏర్పాటు చేసిన ప్రత్యేక దర్యాప్తు బృందం(సిట్‌) సైతం నిందితుడు శ్రీనివాసరావు చుట్టూనే దర్యాప్తును తిప్పి, కేవలం అతడిపైనే కేసును పరిమితం చేసి, అసలు కుట్రదారులను తప్పించేందుకు ముందస్తు స్క్రిప్ట్‌ ప్రకారమే నడుచుకుందనే ఆరోపణలున్నాయి. ప్రతిపక్ష నేతపై హత్యాయత్నం కేసును నీరుగార్చేందుకు తిలాపాపం తలా పిడికెడు అన్నట్టుగానే ప్రభుత్వ యంత్రాంగంలో పై నుంచి కింది వరకూ ప్రతి ఒక్కరూ శక్తివంచన లేకుండా కృషి చేశారన్నది బహిరంగ రహస్యమే.  ఎన్‌ఐఏపై ఎందుకీ ద్విముఖ వైఖరి?  ఎన్‌ఐఏపై చంద్రబాబు సర్కారు అవలంభిస్తున్న ద్విముఖ వైఖరిని సాక్షాత్తూ సీనియర్‌ పోలీసు అధికారులే తప్పుబడుతున్నారు. కీలక కేసుల్లో ఎన్‌ఐఏ జోక్యం చేసుకోవడం సర్వసాధారణం. కానీ, ఈ విషయంలో చంద్రబాబు ఎందుకు ఇలా రెండు నాల్కల ధోరణి అవలంభిస్తున్నారని పలువురు ప్రశ్నిస్తున్నారు. విశాఖ జిల్లా కేంద్రంగా జరిగిన 2 ప్రధాన ఘటనల్లో ఎన్‌ఐఏ చేపట్టిన దర్యాప్తుపై చంద్రబాబు పరస్పరం భిన్నంగా వ్యవహరించడం విమర్శలకు తావిస్తోంది. విశాఖ జిల్లా అరకు అసెంబ్లీ నియోకవర్గానికి చెందిన ఫిరాయింపు ఎమ్మెల్యే కిడారి సర్వేశ్వరరావు, టీడీపీ మాజీ ఎమ్మెల్యే సివేరి సోమలను మావోయిస్టులు హత్య చేసిన సంగతి తెల్సిందే. ఈ కేసును విశాఖ జిల్లా డుంబ్రిగూడ పోలీసులు నమోదు చేసి, దర్యాప్తు చేపట్టారు. ఎమ్మెల్యేను మావోయిస్టులు హత్య చేసిన ఈ కేసు దర్యాప్తును డిసెంబర్‌లో ఎన్‌ఐఏ తన చేతుల్లోకి తీసుకుంది. వాస్తవానికి మావోయిస్టులు ప్రజాకోర్టు నిర్వహించి, స్థానికుల ఎదుటే కిడారి, సోమలను కాల్చి చంపారు. వారిని తామే హత్య చేసినట్లు మావోయిస్టులూ ప్రకటించారు.  అయినా ఆ కేసును ఎన్‌ఐఏ తీసుకుంది. అలాంటప్పుడు ప్రతిపక్ష నేతను మట్టుబెట్టాలనే లక్ష్యంతో జరిగిన కుట్ర కేసులో ఎన్‌ఐఏ దర్యాప్తు చేపడితే చంద్రబాబు సర్కారు ఎందుకు కలవరపడుతోందని పలువురు ప్రశ్నిస్తున్నారు. జగన్‌పై హత్యాయత్నం కేసులో నిందితుడిని పట్టుకోవడం తప్ప ఇంకేమీ జరగలేదు. సీఎం, డీజీపీ చేసిన వ్యాఖ్యలు ఈ కేసు దర్యాప్తును ప్రభావితం చేసేలా ఉన్నాయని, కుట్ర కోణం వదిలి నిందితుడికే కేసును పరిమితం చేయడం సరికాదని, థర్డ్‌పార్టీతో దర్యాప్తు చేయించాలని వైఎస్సార్‌సీపీ న్యాయస్థానాన్ని ఆశ్రయించింది. కిడారి హత్య కేసును ఎన్‌ఐఏ చేపడితే తప్పుబట్టని చంద్రబాబు ప్రతిపక్ష నేతపై జరిగిన హత్యాయత్నం కేసును జాతీయ దర్యాప్తు సంస్థ దర్యాప్తు చేపడితే గగ్గోలు పెడుతుండడం గమనార్హం.   కోర్టును ఆశ్రయించాలని నిర్ణయం  ప్రతిపక్ష నేతపై హత్యాయత్నం కేసును ఎన్‌ఐఏ చేపట్టిందని తెలియగానే అధికార పక్షంలో కలవరపాటు మొదలైంది. ఎన్‌ఐఏ దర్యాప్తునకు అడ్డుపడేలా ఎలా వ్యవహరించాలనే దానిపై చంద్రబాబు 2 రోజులుగా మల్లగుల్లాలు పడుతున్నారు. డీజీపీతోపాటు పోలీసు ఉన్నతాధికారులు, అడ్వకేట్‌ జనరల్, ఆంతరంగికులతో సీఎం ఆదివారం నిర్వహించిన సమావేశంలోనూ ఎన్‌ఐఏ దర్యాప్తును సవాలు చేస్తూ కోర్టును ఆశ్రయించాలని నిర్ణయించినట్లు సమాచారం. దీంతోపాటు ఎన్‌ఐఏ అధికారులు ఏం అడిగిన ఏపీ పోలీసులు నోరు మెదపవద్దని, సహాయ నిరాకరణ చేయాలని లోపాయికారీగా ఆదేశాలు ఇచ్చినట్టు తెలిసింది.   ఆధారాలు దొరక్కుండా పన్నాగాలు  జగన్‌పై హత్యాయత్నం జరిగిన రోజున చంద్రబాబు మాట్లాడుతూ.. విశాఖ విమానాశ్రయం భద్రత కేంద్రం పరిధిలోనిదని, ప్రతిపక్ష నేతపై హత్యాయత్నంతో తమకు సంబంధం లేదన్నారు. మరి కేంద్రం పరిధిలోని విమానాశ్రయంలో జరిగిన హత్యాయత్నం ఘటన దర్యాప్తును ఎన్‌ఐఏకు అప్పగిస్తే రాష్ట్రప్రభుత్వం ఎందుకు బెంబేలెత్తిపోతోందో అర్థం కావడం లేదని పలువురు పేర్కొంటున్నారు. ఈ కేసులో ఎన్‌ఐఏకు సహకరించవద్దంటూ మౌఖిక ఆదేశాలు అందినట్టు ఓ పోలీసు అధికారి చెప్పారు. ఈ నేపథ్యంలోనే ఈ నెల 1న ఎన్‌ఐఏ కేసు నమోదు చేస్తే హడావుడిగా 2న విశాఖ సిటీ పోలీస్‌ కమిషనర్‌ లడ్హా మీడియా సమావేశం నిర్వహించి పాతపాటే పాడటం వెనుక పెద్దల డైరెక్షన్‌ ఉందంటున్నారు. ఎన్‌ఐఏ దర్యాప్తునకు సహకరించకపోవడంతోపాటు ఆధారాలు దొరక్కుండా గట్టి ప్రయత్నాలు చేస్తున్నారనే విమర్శలున్నాయి. 

సాక్షి, అనంతపురం: వైఎస్సార్‌ కాంగ్రెస్‌ పార్టీ అధినేత, ఏపీ ప్రతిపక్షనేత వైఎస్‌ జగన్‌మోహన్‌రెడ్డిపై విశాఖ ఎయిర్‌పోర్ట్‌లో జరిగిన హత్యాయత్నం వెనుక సీఎం చంద్రబాబు నాయుడు హస్తం ఉందని మాజీ ఎంపీ అనంత వెంకట్రామిరెడ్డి ఆరోపించారు. వైఎస్‌ జగన్‌ ప్రజాసంకల్పయాత్రకు మద్దతుగా సంఘీభావ యాత్ర చేపట్టిన ఆయన ఆదివారం ఆయన మీడియాతో మాట్లాడుతూ.. వైఎస్‌ జగన్‌పై జరిగిన హత్యాయత్నం కేసును ఎన్‌ఐఏకు అప్పగిస్తే చంద్రబాబు ఎందుకు భయపడుతున్నారని ప్రశ్నించారు. ఈ కేసు నుంచి తప్పించుకోవడానికే చంద్రబాబు ఎన్‌ఐఏ విచారణకు సహకరించలేదని విమర్శించారు. హైకోర్టు ఆదేశాల మేరకు చంద్రబాబు ఎన్‌ఐఏ విచారణకు సహకరించాలని డిమాండ్‌ చేశారు. వైఎస్‌ జగన్‌ చేపట్టిన ప్రజాసంకల్పయాత్ర ఓ చారిత్రాత్మక ఘట్టమని ఆయన వ్యాఖ్యానించారు. దేశంలో ఏ నాయకుడు ఇంత సుదీర్ఘ పాదయాత్ర చేపట్టలేదని తెలిపారు. వైఎస్‌ జగన్‌తోనే ఆంధ్రప్రదేశ్‌ అభివృద్ధి సాధ్యమని అన్నారు.

సాక్షి, విశాఖపట్నం: ప్రతిపక్షనేత వైఎస్‌ జగన్‌మోహన్‌రెడ్డిపై విశాఖ ఎయిర్‌పోర్టులో హత్యాయత్నానికి పాల్పడిన నిందితుడు జనుపల్లి శ్రీనివాసరావుతో మరో డ్రామాకు రంగం సిద్ధమైంది. ప్రస్తుతం విశాఖ కేంద్ర కారాగారంలో రిమాండ్‌ ఖైదీగా ఉన్న నిందితుడు శ్రీనివాసరావు ‘మార్పు కోసం’ పేరుతో ఓ పుస్తకాన్ని రాసేందుకు సిద్ధమైనట్లు సమాచారం. ప్రతిపక్ష నేతను అంతమొందించేందుకు పథకం వేసిన పెద్దలే తాజా నాటకానికీ సూత్రధారులనే ప్రచారం జరుగుతోంది. శ్రీనివాసరావు రాసినట్లుగా చెబుతున్న 11 పేజీల లేఖలో పేర్కొన్న అంశాలనే ఓ పుస్తకంగా ముద్రించి నిందితుడికి ప్రచారం కల్పించాలని భావిస్తున్నట్లు తెలిసింది.   మరోవైపు తాను చెప్పదలుచుకున్న అంశాలను శ్రీనివాసరావు 22 పేజీల నోట్‌బుక్‌లో రాసినట్టు అతడి తరపు  న్యాయవాది ఎ.సలీం ‘సాక్షి’కి తెలిపారు. దీన్ని విడుదల చేసేందుకు అనుమతి ఇవ్వాలని హోంశాఖ మంత్రి, జైళ్ల శాఖ డీఐజీ, డీజీలకు లేఖ రాస్తానని చెప్పారు. పుస్తకం పేరుతో శ్రీనివాసరావు కాగితాలపై రాసిన విషయాన్ని జైళ్ల శాఖ ఉన్నతాధికారులు, ప్రభుత్వానికి తెలియజేస్తానని విశాఖ కేంద్ర కారాగారం సూపరింటెండెంట్‌ రాహుల్‌ తెలిపారు. ప్రభుత్వ అనుమతి లేనిదే ఖైదీలు రాసిన పుస్తకం విడుదలకు వీలు కాదని స్పష్టం చేశారు.

సాక్షి ప్రతినిధి, విశాఖపట్నం: ప్రతిపక్ష నేత, వైఎస్సార్‌ కాంగ్రెస్‌ పార్టీ అధ్యక్షుడు వైఎస్‌ జగన్‌మోహన్‌రెడ్డిపై హత్యాయత్నం కేసును కుట్రపూరితంగా నిర్వీర్యం చేసిన విశాఖ పోలీసులు... ఇప్పుడు కేసు విచారణ చేపట్టిన జాతీయ దర్యాప్తు సంస్థ(ఎన్‌ఐఎ)కు సహాయ నిరాకరణ చేస్తున్నట్టు తెలుస్తోంది. విశాఖ విమానాశ్రయంలో గతేడాది అక్టోబర్‌ 25న ప్రతిపక్ష నేతపై జరిగిన హత్యాయత్నం ఘటనమీద దర్యాప్తును హైకోర్టు ఆదేశాల మేరకు జాతీయ దర్యాప్తు సంస్థ(ఎన్‌ఐఎ)కు అప్పగిస్తూ కేంద్ర హోంశాఖ  నిర్ణయం తీసుకున్న సంగతి తెలిసిందే. ఈ నేపథ్యంలో రంగంలోకి దిగిన ఎన్‌ఐఎ జనవరి 1న ఎఫ్‌ఐఆర్‌ను నమోదు చేసి దర్యాప్తు కూడా మొదలుపెట్టింది. ఆ క్రమంలో ఎన్‌ఐఎ ప్రధాన దర్యాప్తు అధికారి(సీఐఓ) మహ్మద్‌ సాజిద్‌ఖాన్‌తోసహా ఐదుగురు అధికారులు శనివారం విశాఖకు చేరుకుని రంగంలోకి దిగారు. ఎన్‌ఐఎ అధికారులు ఇలా అడుగుపెట్టగానే విశాఖ పోలీస్‌ కమిషనర్‌ మహేష్‌చంద్ర లడ్హా అర్ధంతరంగా సెలవులోకి వెళ్లడం గమనార్హం. వ్యక్తిగత పనుల పేరిట ఆయన శనివారం నుంచి నాలుగురోజులపాటు లీవులోకి వెళ్లడంతో సీనియర్‌ ఐపీఎస్‌ అధికారి రవిశంకర్‌ అయ్యన్నార్‌కు తాత్కాలిక సీపీ పర్యవేక్షణ బాధ్యతలను ప్రభుత్వం అప్పగించింది. ప్రతిష్టాత్మక కేంద్ర దర్యాప్తు సంస్థ రంగంలోకి దిగగానే లడ్హా ఉద్దేశపూర్వకంగా సెలవు పేరిట సహాయ నిరాకరణ చేస్తున్నారన్న వాదనలు స్వయంగా పోలీసువర్గాల నుంచే వినిపిస్తున్నాయి. రాష్ట్రప్రభుత్వం సూచనల మేరకే లడ్హా సెలవుపై వెళ్లారని ఆ వర్గాలంటున్నాయి. మొదటినుంచీ లడ్హా తీరు వివాదాస్పదమే వైఎస్‌ జగన్‌పై హత్యాయత్నం ఘటన జరిగినప్పటి నుంచి విశాఖ సీపీ లడ్హా తీరు వివాదాస్పదంగానే ఉంది. ఘటన జరిగిన రోజైన గతేడాది అక్టోబర్‌ 25న ఆయన ఎవరికీ అందుబాటులోకి రాలేదు. అమరావతిలో ఉన్నతాధికారులతో సమావేశానికి వెళ్లినందువల్ల ఆరోజు కాస్త ఇబ్బందైందని చెప్పుకున్న లడ్హా ఆ తర్వాత విచారణ తంతును దగ్గరుండి నడిపించారు. కేసు విచారణకు ప్రత్యేకంగా ఏసీపీ నాగేశ్వరరావు ఆధ్వర్యంలో ప్రత్యేక దర్యాప్తు బృందం(సిట్‌)ను నియమించినప్పటికీ మొత్తం కథ లడ్హానే నడిపారు. జగన్‌పై హత్యాయత్నానికి పాల్పడ్డ శ్రీనివాసరావు ఒక్కడికే విచారణను పరిమితం చేసి... అతడి పోలీస్‌ కస్టడీ ముగియగానే సిట్‌ విచారణనూ బంద్‌ చేసేశారు. చివరికి సిట్‌ కార్యాలయానికి తాళం కూడా వేసేశారు. అయితే కేసు జనవరి 1న ఎన్‌ఐఎకి బదిలీ అయిన విషయం తెలుసుకుని హడావుడిగా సీపీ లడ్హా జనవరి 2న ప్రెస్‌మీట్‌ పెట్టి జగన్‌పై జరిగింది హత్యాయత్నమే కాదని, ప్రచారం కోసం శ్రీనివాసరావు గాయం చేశాడని ప్రకటించారు. ఈ ప్రకటనతో లడ్హా తీరుపై తీవ్ర విమర్శలు వెల్లువెత్తగా ఇప్పుడు ఎన్‌ఐఎ రంగంలోకి దిగగానే నాలుగురోజులపాటు సెలవు పేరిట సెల్‌ స్విచాఫ్‌ చేసి ఎవరికీ అందుబాటులోకి రాకుండా వెళ్లిపోవడం వివాదాస్పదమవుతోంది. మమ్మల్ని ఇబ్బంది పెట్టొద్దంటూ.. ఇదిలా ఉండగా, రంగంలోకి దిగిన ఎన్‌ఐఎ అధికారులు శనివారం ముందుగా ఎయిర్‌పోర్ట్‌ పోలీస్‌స్టేషన్‌ను పరిశీలించి అక్కడి పోలీసు అధికారులతో మాట్లాడారు. పోలీసులు విచారణ చేపట్టిన క్రమాన్ని అడిగి తెలుసుకునేందుకు యత్నించారు. తర్వాత సిట్‌ అధికారులతోనూ సమావేశమయ్యారు. అయితే సదరు అధికారులెవ్వరూ ఎన్‌ఐఎ అధికారులకు ఏమాత్రం సహకరించలేదని తెలుస్తోంది. కనీసం సమాచారం కూడా అందించలేదంటున్నారు. అంతా పోలీస్‌ కమిషనర్‌ లడ్హా దగ్గరుండి చూశారు.. ఏదైనా ఉంటే మీరు ఆయనతో మాట్లాడండని ఎయిర్‌పోర్ట్‌ స్టేషన్‌ పోలీసులు, సిట్‌ వర్గాలు ఎన్‌ఐఎ అధికారులకు స్పష్టం చేసినట్టు సమాచారం. ‘‘దయచేసి మమ్మల్ని ఇబ్బంది పెట్టకండి.. మీ దర్యాప్తు మీరు చేసుకోండి... మీకు సహకరించాలని హైకోర్టు ఉత్తర్వుల్లో ఎక్కడా లేదు.. అలాగని రాష్ట్రప్రభుత్వం కూడా ఇప్పటివరకు మాకేమీ ఆదేశాలివ్వలేదు.. ప్రభుత్వాన్ని కాదని సమాచారమిచ్చినా.. సహకరించినా మాకు ఇబ్బంది.. మమ్మల్ని అర్థం చేసుకోండి’’ అంటూ పోలీసులు ఓ దశలో ఎన్‌ఐఎ అధికారుల్ని వేడుకున్నట్టు తెలుస్తోంది. అలా ఏమీ లేదు.. వాళ్ళడిగిన సమాచారం ఇస్తున్నాం ‘‘ఎన్‌ఐఎ అధికారులకు మేం సహకరించట్లేదనే వాదనల్లో నిజం లేదు. ఎన్‌ఐఎ సీఐఓ మహ్మద్‌ సాజిద్‌ఖాన్‌ నన్ను కలిశారు. కావాల్సిన సమాచారం అడిగారు. నా పరిధిలో నేను చెప్పాల్సింది చెప్పాను..’’ అని కేసు విచారణపై రాష్ట్రప్రభుత్వం నియమించిన సిట్‌ అధికారి ఏసీపీ నాగేశ్వరరావు సాక్షి ప్రతినిధితో అన్నారు. కాగా ఇప్పటివరకు ఎన్‌ఐఎ బృందం ఎయిర్‌పోర్ట్‌కు వచ్చిన దాఖలాల్లేవని విశాఖ ఎయిర్‌పోర్ట్‌ డైరెక్టర్‌ ప్రకాష్‌రెడ్డి చెప్పారు.      – సిట్‌ అధికారి ఏసీపీ నాగేశ్వరరావు దర్యాప్తు మొదలుపెట్టాం.. అప్పుడే ఏమీ చెప్పలేం ‘‘దర్యాప్తు ఇవాళే మొదలుపెట్టాం... విచారణ ప్రాథమిక దశలో ఉంది.. అప్పుడే ఏమీ చెప్పలేం...’’ అని ఎన్‌ఐఎ ప్రధాన దర్యాప్తు అధికారి(సీఐఓ) మహ్మద్‌ సాజిద్‌ఖాన్‌ శనివారం రాత్రి సాక్షి ప్రతినిధితో అన్నారు. రాష్ట్ర పోలీసులు సహకరిస్తున్నారా? అనే ప్రశ్నకు.. నో కామెంట్‌ అని ఆయన సమాధానమిచ్చారు. – ఎన్‌ఐఎ సీఐఓ మహ్మద్‌ సాజిద్‌ఖాన్‌

సాక్షి, హైదరాబాద్‌: ఏపీ ప్రతిపక్షనేత, వైఎస్సార్‌ కాంగ్రెస్‌ పార్టీ అధ్యక్షులు వైఎస్‌ జగన్‌మోహన్‌ రెడ్డిపై హత్యాయత్నం జరిగితే.. ఆ దాడిని టీడీపీ ప్రభుత్తం చిన్నగా చేసి చూపించే ప్రయత్నం చేసిందని బీజేపీ జాతీయ అధికార ప్రతినిధి జీవిఎల్‌ నరసింహారావు ఆగ్రహం వ్యక్తం చేశారు.  ఏపీ సీఎం చంద్రబాబు నాయుడు ప్రతిపక్షనేతపై కక్ష సాధింపు వైఖరికి ఇది నిదర్శనమన్నారు. శనివారం నిర్వహించిన మీడియా సమావేశంలో పలు అంశాలపై ఆయన చర్చించారు. జాతీయ దర్యాప్తు సంస్థ ఎన్ఐఏ దర్యాప్తుకు టీడీపీ నేతలు ఎందుకు భయపడుతున్నారో అర్థం కావటంలేదన్నారు. వాస్తవాలు బయటకు వస్తే జాతకాలు తారుమారవుతాయని చంద్రబాబు భయపడుతున్నారని ఎద్దేవ చేశారు. ఎన్‌ఐఏ చట్టం ప్రకారం కేసులు తమంతట తాము తీసుకునే అధికారం ఉందని  తెలిపారు. టీడీపీ డ్రామా పూర్తిగా బయట పడుతుందని అందుకే రాష్ట్రాల సంబంధాలు అంటే అర్థం పర్థం లేకుండా మాట్లాడుతున్నారని జీవీఎల్‌ వ్యాఖ్యానించారు.  తెలంగాణలో ఓటమి అనంతరం ఏపీ సీఎం చంద్రబాబు నాయుడులో అసహనం పెరిగిందని ఎద్దేవ చేశారు. ఏపీలో కూడా టీడీపీకి రెండు సీట్లే రావడం ఖాయమని జీవిఎల్‌ జోస్యం చెప్పారు. మహిళా బీజేపీ నాయకురాలు పట్ల చంద్రబాబు వ్యవహరించిన తీరు దారుణంగా ఉందని మండిపడ్డారు. ఓటమి భయంతోనే చంద్రబాబు ఇలా వ్యవహరిస్తున్నారన్నారు.  శబరిమలలో భక్తుల మనోభావాలను దెబ్బతీసేలా కేరళ ప్రభుత్వం వ్యవహరిస్తోందని జీవిఎల్‌ నరసింహారావు మండిపడ్దారు. శాంతియుతంగా నిరసన తెలుపుతున్న భక్తులపై దాడులు చేయడం దుర్మార్గమన్నారు. రాజకీయ ప్రయోజనాల కోసమే సీపీఎం ప్రభుత్వం భక్తులపై దాడులకు పాల్పడుతుందని ఆరోపించారు.  కేరళ సీఎం పినరయి విజయన్‌ దుర్మార్గంగా వ్యవహరిస్తున్నారని ధ్వజమెత్తారు. ఓటు బ్యాంకు రాజకీయాల కోసం భక్తులను భయపెడుతున్నారని ఆవేదన వ్యక్తం చేశారు. శబరిమల తీర్పుపై వేసిన రివ్యూ పిటిషన్‌ విచారణకు రాబోతోందని పేర్కొన్నారు. 

సాక్షి, హైద్రాబాద్ : ఏపీ సీఎం చంద్రబాబు నాయుడు రాజ్యాంగాన్ని తుంగలో తొక్కడానికి నాలుగేళ్లలో ఎన్నిచేయాలో అన్ని చేశారని వైఎస్సార్‌ కాంగ్రెస్‌ పార్టీ ఎమ్మెల్యే ఆర్కే రోజా అన్నారు. హైకోర్టు ఇచ్చిన ఆర్డర్‌ను కూడా గౌరవించను అంటున్నారంటే చంద్రబాబును ఏమనాలని ప్రశ్నించారు. దొంగల్ని, ఆర్థిక నేరగాళ్లను కాపాడే అడ్డాగా ఆంధ్రప్రదేశ్‌ను చంద్రబాబు మార్చేశారని నిప్పులు చెరిగారు. 100 శాతం వైఎస్‌ జగన్‌పై హత్యాయత్నం చంద్రబాబే చేయించారనడానికి, ఆయన మాటలే నిదర్శనమన్నారు. ఇదంతా ఆపరేషన్ గరుడ అని సినిమాలు లేని శివాజీ అనే నటుడితో చెప్పించారని ఆరోపించారు. ఈ కేసులో ఇప్పటి వరకు అతన్ని ఎందుకు విచారించలేదని మండిపడ్డారు.  వైఎస్సార్‌సీపీ కేంద్ర కార్యాలయంలో రోజా మాట్లాడుతూ... 'చంద్రబాబు హిట్లర్‌లా, నియంతలా వ్యవహరిస్తున్నారు. చంద్రబాబును ఎవరూ ప్రశ్నించకూడదు. మహిళను కాకినాడలో పట్టుకుని ఫినిష్ చేస్తానని గూండాలా బెదిరించారు. అసెంబ్లీలో కూడా చాలాసార్లు ప్రతిపక్షాన్ని లేకుండా చేస్తానని బెదిరించారు. కేంద్ర పరిధిలో ఉన్న ఎయిర్ పోర్టులో వైఎస్సార్‌సీపీ అధ్యక్షులు వైఎస్‌ జగన్ మోహన్‌ రెడ్డిని హత్య చేస్తే నేరం కేంద్రంపైకి పోతుందని చంద్రబాబు ప్లాన్ చేశారు. ఎన్‌ఐఏ విచారణకి నిందితుడు శ్రీనివాస్‌కు లేని బాధ చంద్రబాబు, లోకేష్‌కు ఎందుకు? మీకు బాధ లేనపుడు ఆ కేసును ఎన్ఐఏకి అప్పగించాలి. రెస్టారెంట్‌ ఓనర్ హర్షవర్దన్ చౌదరి చంద్రబాబు బినామి. ఆ రెస్టారెంట్‌ను ప్రారంభించింది చంద్రబాబే. దాడికి ఉపయోగించిన కత్తి ఎంతో కాలంగా అక్కడ ఉంచారు. ఎన్ఐఏకి కేసు అప్పగించాలని ఆ అధికారులు కోరితే రాష్ట్ర పోలీసులు సహకరించడం లేదంట. హత్యాయత్నం వెనక ఉన్న వారు హర్షవర్దన్ చౌదరిగాని, శివాజి చౌదరిగాని అందర్ని బయటకు లాగాలి. వైఎస్‌ జగన్, బీజేపీతో కలసి కుట్ర చేస్తున్నారంటారు. బీజేపితో కలసి ఎన్నికలకు వెళ్లింది ఎవరు? ప్రభుత్వంలో కలసి పనిచేసింది మీరు కాదా? చంద్రబాబు ఎప్పటికి మా మిత్రుడే అని రాజ్‌నాథ్‌ సింగ్ లోక్ సభలో చెప్పారు. బీజేపీతో లాలూచి పడింది చంద్రబాబే. మోదీకి ఊడిగం చేస్తోంది చంద్రబాబే. ఏపీలో వేల కోట్ల రూపాయల అవినీతి జరుగుతున్నా ఒక్క కేసు కూడా నమోదు కాలేదు. బీజేపీపై బురద జల్లి బయటకు వెళ్లడం మళ్లీ అధికారం కోసం బీజేపీతో పొత్తు పెట్టుకుంది మీరు కాదా? మహారాష్ట్ర బీజేపి మంత్రి భార్యను టీటీడీ బోర్డు మెంబర్ చేసింది మీరు కాదా? రేపు ఏమైనా కేసులు వస్తే ఆయనతో పనిచేయించుకోవడానికేనా? కేంద్రంపై యుధ్దం అని చెప్పి నీతి అయోగ్ మీటింగ్‌కు వెళ్లి వంగి వంగి దండాలు పెట్టింది చంద్రబాబు కాదా? ఎన్టీఆర్ బయోపిక్‌కు క్లాప్ కొట్టింది వెంకయ్యనాయుడు కాదా? కర్ణాటక ఎన్నికలయ్యాక నన్ను అరెస్ట్ చేయబోతున్నారని, మీరు నన్ను రక్షించుకోవాలని ప్రజలను కోరలేదా? ఈరోజు వరకు మిమ్మల్ని అరెస్ట్ చేయలేదు అంటే అర్థం ఏంటి? లాలూచి కాదా? శంకరర్రావు, ఎర్రన్నాయుడుతో కుమ్మక్కై కేసులు పెట్టించినా ధైర్యంగా వైఎస్‌ జగన్ ఎదుర్కొంటున్నారు. కిడారి సర్వేశ్వరరావును హత్య చేస్తే ఎన్ఐఏకి అప్పగించింది మీరు కాదా? అది సమాఖ్య స్పూర్తికి విరుద్దం కాదా?  ఎమ్మెల్యేను రక్షించుకోలేని చేతకాని దద్దమ్మ చంద్రబాబు. కిడారి సర్వేశ్వరరావు కేసును బదిలి చేసినట్టే వైఎస్‌ జగన్ పై హత్యాయత్నం కేసు ఎందుకు ఎన్ఐఏకి ఇవ్వడం లేదు. శాంతిభద్రతలు రాష్ట్ర పరిధిలోనివి అంటున్నారు. మరి మీ చుట్టు ఉన్న జెడ్ కేటగిరి భద్రత కేంద్రం కల్పించిందే కదా. వారిని నీ చుట్టు ఎందుకు ఉంచుకుంటున్నావు. వారిని పంపించేయి. తిరిగి అధికారంలోకి రాను అని భావించి చంద్రబాబు ఎయిర్ పోర్ట్‌లో భౌతికంగా వైఎస్‌ జగన్‌ను లేకుండా చేయడానికి ప్లాన్ చేసినా, భగవంతుడి దయ వల్ల ఆయన బయటపడ్డార'ని అన్నారు.

సాక్షి, విశాఖపట్నం: జాతీయ దర్యాప్తు సంస్థ (ఎన్‌ఐఏ) విచారణకు విశాఖపట్నం పోలీసులు సహకరించడం లేదు. ప్రభుత్వం నుంచి అనుమతి వస్తే తప్ప ఏపీ ప్రతిపక్ష నేత వైఎస్‌ జగన్‌పై జరిగిన హత్యాయత్నం కేసు వివరాలు ఇవ్వలేమని ఎన్‌ఐఏకు విశాఖ అధికారులు తేల్చి చెప్పినట్టు సమాచారం. విశాఖపట్నం విమానాశ్రయంలో గత ఏడాది అక్టోబర్‌ 25న వైఎస్‌ జగన్‌పై జరిగిన హత్యాయత్నం ఘటనపై దర్యాప్తును ఎన్‌ఐఏకు అప్పగిస్తూ కేంద్ర హోంశాఖ నిర్ణయం తీసుకున్న విషయం తెలిసిందే. (వైఎస్‌ జగన్‌పై హత్యాయత్నం కేసు.. ఎన్‌ఐఏకు అప్పగింత) ఈ ఆదేశాల మేరకు రంగంలోకి దిగిన ఎన్‌ఐఏ హత్యాయత్నం ఘటనకు సంబంధించి ఈనెల 1వతేదీన ఎఫ్‌ఐఆర్‌ను కూడా నమోదు చేసింది. కేంద్రం తరఫున అసిస్టెంట్‌ సొలిసిటర్‌ జనరల్‌ (ఏఎస్‌జీ) కె.లక్ష్మణ్‌ శుక్రవారం ఈ వివరాలను ఆంధ్రప్రదేశ్‌ హైకోర్టుకు సమర్పించారు. కేంద్రం జారీ చేసిన ఉత్తర్వుల ఆధారంగా ఎన్‌ఐఏ ఇప్పటికే ఎఫ్‌ఐఆర్‌ నమోదు చేసిన నేపథ్యంలో జగన్‌పై హత్యాయత్నం ఘటనపై ప్రత్యేక దర్యాప్తు బృందం (సిట్‌) తన దర్యాప్తును నిలిపివేయాల్సి ఉంటుంది. ఈ కేసులో ఇప్పటివరకు సేకరించిన ఆధారాలతో కేసు డాక్యుమెంట్లను, రికార్డులన్నింటినీ చట్ట నిబంధనల మేరకు ఎన్‌ఐఏకు అప్పగించాల్సి ఉంటుంది. వైఎస్‌ జగన్‌పై హత్యాయత్నం ఘటనపై దర్యాప్తును పక్కదారి పట్టించేలా అటు ముఖ్యమంత్రి, ఇటు డీజీపీ ఇద్దరూ వ్యాఖ్యలు చేసిన నేపథ్యంలో ఈ కేసు విచారణ బాధ్యతలను రాష్ట్ర ప్రభుత్వ నియంత్రణలో లేని స్వతంత్ర సంస్థకు అప్పగించేలా ఆదేశించాలంటూ వైస్సార్‌సీపీ ముందు నుంచి డిమాండ్‌ చేస్తుంది. ఇందుకు తగ్గట్టుగానే ఎన్‌ఐఏ దర్యాప్తుకు ఏపీ పోలీసులు సహకరించకపోవడం పలు అనుమానాలకు తావిస్తోంది.

ఔను.. మహేష్‌‘చంద్రం’లది డ్రామాయేనని తేలిపోయింది.పోలీసుల హైడ్రామా, పనితీరుపై ముప్పిరిగొన్న అనుమానాలు, అంచనాలను తాజా పరిణామాలు అక్షరాలా నిజమని రుజువు చేశాయి. వైఎస్సార్‌సీపీ అధ్యక్షుడు, ప్రతిపక్ష నేత వైఎస్‌ జగన్‌మోహన్‌రెడ్డిపై హత్యాయత్నం ఘటన కేసు విచారణలోనే కాదు.. ఆ కేసును నిరుగార్చి.. క్లోజ్‌ చేసేయాలన్న తొందరలోనూ పోలీసులు కుట్రకు తెరలేపిన విషయం హైకోర్టు ఆదేశాలతో బట్టబయలైంది. కేసును నేషనల్‌ ఇన్వెస్టిగేషన్‌ ఏజెన్సీ(ఎన్‌ఐఏ)కి అప్పజెబుతూ హైకోర్టు కేంద్ర హోం శాఖకు ఆదేశాలు ఇచ్చిన విషయాన్ని ముందే పసిగట్టిన సర్కారు అప్పటికప్పుడు విశాఖ పోలీసులతో హడావుడిగా ప్రెస్‌మీట్‌ పెట్టించింది.రాష్ట్ర పోలీసుల విచారణపై నమ్మకం లేని వైఎస్సార్‌సీపీ నేతలు హైకోర్టును ఆశ్రయించిన నేపథ్యంలో కేసునుఎన్‌ఐఏకు అప్పజెప్పాలని ఉన్నత న్యాయస్థానం డిసెంబర్‌ 31నే కేంద్ర హోమ్‌ శాఖను ఆదేశించింది.కేంద్ర హోమ్‌శాఖ ఆదేశాలతో జనవరి ఒకటో తేదీన కేసు తీసుకున్నహైదరాబాద్‌లోని ఎన్‌ఐఏ విభాగం ఎఫ్‌ఐఆర్‌ కూడా నమోదు చేసింది. అంటే ఆ రోజు నుంచే కేసు ఎన్‌ఐఏ చేతుల్లోకి వెళ్ళిపోయింది.ఈ ఉప్పందుకున్న సర్కారు ఆదేశాలతో విశాఖ పోలీస్‌ కమిషనర్‌ మహేష్‌చంద్ర లడ్హా ఆ మరుసటి రోజు.. అంటేజనవరి 2న హడావుడిగా మీడియా సమావేశం పెట్టి ప్రతిపక్ష నేతపై హత్యాయత్నాన్ని చిన్నపాటి ఘటనగా తేల్చేశారు. విచారణ దాదాపు క్లోజ్‌ అయిందని, శ్రీనివాసరావు ఒక్కడే.. ఏదో ప్రచారం కోసం చేశాడనిచాలా తేలిగ్గా తీసిపారేశారు,వైఎస్‌ జగన్‌పై జరిగిన హత్యాయత్నం కేసు విచారణ సందర్భంగా కేసును ఎన్‌ఐఏకు అప్పజెప్పిన విషయం హైకోర్టు స్పష్టం చేయడంతో విశాఖ పోలీసుల కుటిలత్వం, సర్కారు కుట్ర బట్టబయలయ్యాయి. సాక్షి ప్రతినిధి, విశాఖపట్నం: ప్రతిపక్ష నేత వైఎస్‌ జగన్‌మోహన్‌రెడ్డిపై హత్యాయత్నం ఘటన కేసు విచారణలో మొదటి నుంచి హైడ్రామాలకు తెరలేపిన విశాఖ పోలీసులు చివరికి కేసు జాతీయ దర్యాప్తు సంస్థ(ఎన్‌ఐఏ) పరిధిలోకి వెళ్ళిందని తెలిసిన తర్వాత కూడా అర్ధంతరంగా ప్రెస్‌మీట్‌ పెట్టి మరో కుట్రకు తెరలేపారు. వైఎస్‌ జగన్‌పై విశాఖపట్నం ఎయిర్‌పోర్ట్‌లో అక్టోబర్‌ 25న జరిగిన హత్యాయత్నంపై విచారణ తొలి రోజు  నుంచీ పోలీసుల తీరు  అడుగడుగడునా అనుమానాలకే తావిచ్చింది. జగన్‌పై కత్తితో దాడి చేసిన ఎయిర్‌పోర్ట్‌లోని ఫ్యూజన్‌ ఫుడ్స్‌ రెస్టారెంట్‌ ఉద్యోగి శ్రీనివాసరావుకే  విచారణను పరిమితం చేసిన పోలీసులు ఇంతవరకు అసలు కుట్రధారులు, సూత్రధారుల జోలికే పోలేదు. పలు కేసులున్నా.. తూర్పుగోదావరి జిల్లా ముమ్మిడివరం మండలం థానేలంక గ్రామానికి చెందిన శ్రీనివాసరావుపై అక్కడి పోలీస్‌స్టేషన్‌లోనే ఎన్నో కేసులున్నాయి. నేర చరిత ఉన్న వారిని రక్షణశాఖ అధీనంలోని విశాఖ ఎయిర్‌పోర్ట్‌లో పొరపాటున కూడా ఉద్యోగంలోకి తీసుకోరు. పోలీస్‌స్టేషన్‌ నుంచి ఎన్‌వోసీ(నో అబ్జెక్షన్‌ సర్టిఫికెట్‌) ఇస్తేనే ఎయిర్‌పోర్ట్‌ ప్రాంగణంలో ఉద్యోగం చేసేందుకు అర్హులు.  అయితే నేరచరిత ఉన్న శ్రీనివాసరావు ఎయిర్‌పోర్ట్‌లోకి  ఎలా ప్రవేశించగలిగాడు..  అతనికి ఎన్‌వోసీ ఇప్పించిందెవరు.. అన్న ప్రశ్నలకు ఇంతవరకు పోలీస్‌ కమిషనర్‌ కూడా స్పష్టమైన సమాధానం ఇవ్వలేదు. ఈ ప్రశ్నలకు సమాధానాలేవీ? ∙శ్రీనివాసరావు పనిచేస్తున్న ఫ్యూజన్‌ ఫుడ్స్‌ రెస్టారెంట్‌ యజమాని తొట్టెంపూడి హర్షవర్ధన్‌ ప్రసాద్‌ చౌదరి మొదటి నుంచి కరడుగట్టిన తెలుగుదేశం పార్టీ నాయకుడు. అప్పట్లో ఎన్‌టిఆర్‌ మొదలు ఇప్పటి సీఎం చంద్రబాబునాయుడు, లోకేష్‌లు వైజాగ్‌ ఎప్పుడొచ్చినా వెన్నంటే ఉండి హల్‌చల్‌ చేస్తుంటారు. ఇక దగ్గుబాటి పురంధేశ్వరి సిఫార్సుతో 2010లో వైజాగ్‌ ఎయిర్‌పోర్ట్‌లో రెస్టారెంట్‌ లీజుకు తీసుకున్న హర్షవర్ధన్‌..  మొదటి నుంచి టీడీపీ నేతలు సిఫార్సు చేసిన వ్యక్తులనే రెస్టారెంట్‌లో ఉద్యోగంలోకి తీసుకున్నాడు. అలాంటిది శ్రీనివాసరావును ఎవరు సిఫార్సు చేశారు.. ఎవరు చెబితే ఉద్యోగంలోకి తీసుకున్నాడు.. ? అనే దిశగా పోలీసులు విచారణే చేయలేదు. బయటి నుంచి గుండుసూది కూడా తీసుకెళ్లలేని ఎయిర్‌పోర్ట్‌లోకి శ్రీనివాసరావు కత్తులు ఎలా తీసుకురాగలిగాడు. జగన్‌పై హత్యాయత్నానికి పాల్పడ్డ రోజే కత్తులకు రెస్టారెంట్‌లోనే స్టెరిలైజ్‌ చేశాడని స్వయంగా సీపీనే ప్రకటించారు. అంత జరుగుతుంటే హర్షవర్ధన్‌ ఎందుకు అడ్డుకోలేదనే దానిపై సీపీ నుంచి సమాధానమే లేదు. ∙శ్రీనివాసరావుది మొదటి నుంచి రెస్టారెంట్‌లో సాయంత్రం నుంచి రాత్రి వరకు ఉండే బీ షిఫ్ట్‌ డ్యూటీ. జగన్‌పై దాడి చేసిన రోజు మాత్రం ఉదయమే విధుల్లోకి వచ్చినా రెస్టారెంట్‌లోనే ఉన్న హర్షవర్ధన్‌ ఎందుకు ప్రశ్నించలేదు. శ్రీనివాసరావు ఉద్యోగం అసిస్టెంట్‌ కుక్‌ అయితే  సర్వీస్‌ అసిస్టెంట్‌ చేసే పని అతను చేస్తుంటే ఎందుకు అడ్డుకోలేదు..? పోనీ జగన్‌తో సెల్పీ కోసం అని శ్రీనివాసరావు చెప్పాడనుకున్నా అతని వద్ద కెమెరా ఫోన్‌ లేదని రెస్టారెంట్‌లో ఉన్న వారందరికీ తెలుసు. అప్పుడైనా కెమెరా ఫోన్‌ లేకుండా సెల్ఫీ ఏమిటని అడగాలి. కనీసం అప్పటి వరకు అక్కడే ఉన్న హర్షవర్ధనైనా ప్రశ్నించాలి.. కానీ అలా ఎవరూ అడగలేదు. ఈ చిన్న విషయాలు కూడా హర్షవర్ధన్‌ పట్టించుకునేంతటి పరిస్థితి లేదు అని చెబితే నమ్మశక్యం కాదు.. ఎందుకంటే ఆ రెస్టారెంట్‌లో పనిచేసే ఉద్యోగులు పదిమంది లోపే. రోజులో ఎక్కువసేపు హర్షవర్ధన్, ఆయన భార్య ఆ రెస్టారెంట్‌లోనే ఉంటుంటారు. కాబట్టి  ఉద్యోగుల తీరును దగ్గరి నుంచి చూస్తుంటారు. అలాంటిది శ్రీనివాసరావును మేము కనిపెట్టలేకపోయామంటే.. అది నిజమే కాదు. ∙వైఎస్‌ జగన్‌ గత ఆగస్టు నెల నుంచి వారానికి దాదాపు రెండుసార్లు చొప్పున ఎయిర్‌పోర్ట్‌కు వస్తున్నారు. తొమ్మిది నెలలుగా అక్కడే పనిచేస్తున్న శ్రీనివాసరావు ఏరోజూ ఎందుకు జగన్‌ను  కలవలేదు.? జగన్‌ను జనంలో కలవాలంటే కాస్త కష్టమైన పనేమో గానీ.. వాస్తవానికి ఎయిర్‌పోర్ట్‌ లోపల జగన్‌ను ఒకింత సాధ్యమయ్యే పనే, మరి వీరాభిమాని అని చెబుతున్న అతను జగన్‌ను అక్టోబర్‌ 25వ తేదీన కత్తి దూసే వరకు ఎందుకు కలవలేదు.? సీఎస్‌వో తీరూ అనుమానాస్పదమే గత రెండున్నర నెలలుగా జగన్‌ ఎయిర్‌పోర్ట్‌కు ఎప్పుడొచ్చినా వైఎస్సార్‌ కాంగ్రెస్‌ పార్టీ స్థానిక వార్డు అధ్యక్షుడు శ్రీధర్‌ ఇంటి నుంచి కాఫీ వచ్చేది. హైదరాబాద్‌ నుంచి వచ్చేటప్పుడు ఆయన విమానం దిగి నేరుగా బయటకు వచ్చి పాదయాత్ర జరిగే ప్రాంతానికి వెళ్ళిపోతారు. ఇక్కడి నుంచి హైదరాబాద్‌కు వెళ్ళేటప్పుడు మాత్రమే కాస్త సమయముంటే వీవీఐపీ లాంజ్‌కు వెళ్ళి పార్టీ నేతలతో భేటీ అవుతారు. అయితే ఘటన జరగడానికి వారం ముందే జగన్‌కు బయటి నుంచి కాఫీ తీసుకురావడం కుదరదని ఎయిర్‌పోర్ట్‌ చీఫ్‌ సెక్యూరిటీ ఆఫీసర్‌(సీఎస్‌వో) వేణుగోపాల్‌ అడ్డుకున్నారు. కాఫీ ఫ్లాస్క్‌ కూడా స్వాధీనం చేసుకుని సీరియస్‌ అయ్యారు. పక్కనే ఉన్న రెస్టారెంట్‌ నుంచే తీసుకోవాలని పార్టీ నేతలను ఆదేశించాడు. ఇలా అన్న రెండో వారమే ఆ రెస్టారెంట్‌ నుంచే శ్రీనివాసరావు వచ్చి కత్తి దూశాడు. రెస్టారెంట్‌ కేంద్రంగానే కుట్ర జరిగిందన్న అనుమానాలు ఇక్కడే బలపడుతున్నాయి. శేషప్రశ్నలతోనేకేసు చుట్టబెట్టేశారు పక్కా వ్యూహం ప్రకారం రాష్ట్ర శాంతి భద్రతల పరిధిలోకి వచ్చే ప్రాంతంలో కాకుండా సునిశిత సమస్యగా మారే కేంద్ర బలగాల పరిధిలోని ఎయిర్‌పోర్ట్‌లో ప్రధాన ప్రతిపక్ష నేతపై దాడికి తెగబడటం మామూలు విషయం కాదు. ఒక్క వేటుతో గొంతులోకి కత్తి దించి ప్రాణాలు హరించడమే లక్ష్యంగా ఘాతుకానికి తెగించిన శ్రీనివాసరావుకు ఇదంతా చేయమని నూరిపోసిందెవరు..?  అతన్ని అందుకు ప్రేరేపించి  ఏం జరిగినా మేం చూసుకుంటాం.. అని అండగా నిలిచిందెవరు.. పక్కా పథకం ప్రకారం పదినెలలుగా విశాఖ ఎయిర్‌పోర్టులోనే మకాం వేయించి ఉసిగొల్పిందెవరు.. అనే కీలక విషయాలను విశాఖ పోలీసులు కనీసంగా రాబట్టలేకపోయారు. ఇలా ఎన్నో ప్రశ్నలకు కనీసం సమాధానం చెప్పలేని పోలీసులు జనవరి 2న కేసు విచారణ క్లోజ్‌ అయిందని, శ్రీనివాసరావు ఒక్కడే ఏదో ప్రచారం కోసం చిన్నపాటి దాడి చేశాడని చెప్పడం వెనుక అసలు కుట్ర.. శుక్రవారం హైకోర్టు ఆదేశాలతో స్పష్టమైంది.

సాక్షి ప్రతినిధి, కాకినాడ : విశాఖపట్నం ఎయిర్‌పోర్టులో వైఎస్సార్‌ కాంగ్రెస్‌ పార్టీ అధినేత వైఎస్‌ జగన్‌మోహన్‌ రెడ్డిపై జరిగిన హత్యాయత్నం కేసు నేషనల్‌ ఇన్వెస్టిగేషన్‌ ఏజెన్సీ (ఎన్‌ఐఏ)కి అప్పగించడంతో కుట్రకోణం బయటపడుతుందన్న చర్చ జిల్లాలో ప్రారంభమైంది. ఇన్నాళ్లూ వాస్తవాలు తొక్కి పెట్టి కుట్రదారులు బయటపడకుండా జరిగిన విచారణ గుట్టు రట్టు అవుతుందనే అభిప్రాయం వ్యక్తమవుతోంది. హైకోర్టు ఆదేశాలు రావడమే తరువాయి టీడీపీ నేతల్లో గుబులుతోపాటు ఆందోళన ప్రారంభమయింది. జిల్లా పర్యటనలో ఉన్న ముఖ్యమంత్రి చంద్రబాబు నాయుడికి కేసు ఎన్‌ఐఏకు అప్పగించిన విషయం తెలిసిందేమో మొహంలో ఆందోళన కనిపించింది. కాకినాడలో శుక్రవారం జరిగిన జన్మభూమి సభలో ఆయన టెన్షన్‌తోనే గడిపారు.  గతమంతా ఇలా... వైఎస్‌ జగన్‌మోహన్‌ రెడ్డిపై జరిగిన హత్యాయత్నం తర్వాత నిందితుడు జనుపల్లి శ్రీనివాసరావు స్వగ్రామమైన ఠాణేలంకలో సిట్‌ విచారణ అంతా ‘పెద్దల’ సూచనమేరకే తూతూ మంత్రంగా చేసింది. తమకు ఏం కావాలో వాటిని మాత్రమే తీసుకుని, మిగతా కుట్ర కోణాన్ని విస్మరించిందన్న విమర్శలున్నాయి. ఎంతసేపూ నిందితుడు శ్రీనివాసరావును వైఎస్సార్‌సీపీ అభిమానిగా చిత్రీకరించేందుకు యత్నించారే తప్ప వారి వెనుక అసలు వ్యక్తులెవరనేది తేల్చడానికి ప్రయత్నించలేదు. అనుమానాలెన్నో... ♦ హత్యాయత్నం జరిగిన రోజున తన స్వగృహం వద్ద నిందితుడు శ్రీనివాసరావు సోదరుడు సుబ్బరాజు తొలుత మీడియాతో మాట్లాడుతూ తాము టీడీపీలో ఉన్నట్టు  వెల్లడించారు. ఆ తర్వాత వచ్చిన ఒత్తిళ్ల కారణంతో మాట మార్చాడు. వైఎస్సార్‌ సీపీ అభిమానిగా చెప్పడం మొదలు పెట్టాడు. దీనివెనకున్న వ్యూహమేంటి?   ♦ వైఎస్‌ జగన్‌మోహన్‌ రెడ్డిపై కత్తితో హత్యాయత్నం చేసిన వ్యక్తి జనుపల్లి శ్రీనివాసరావు అని తెలియగానే టీడీపీ నేతలు నడింపల్లి శ్రీనివాసరాజు, మట్టపర్తి వెంకటేశ్వరావు, ఇసుకపట్ల వెంకటేశ్వరావు తదితరులు ఆయన ఇంటి వద్దకు వచ్చి కుటుంబ సభ్యులతో మాట్లాడారు. వీరంతా కలిసి మాట్లాడాక  వైఎస్‌ జగన్‌ అభిమానులమంటూ మీడియా ముందుకొచ్చి  చెప్పడం ప్రారంభించారు. వీరి వ్యవహారం దావానంలా వ్యాపించడంతో నిందితుడి ఇంటివైపు ఆ తర్వాత రావడం మానేశారు. దీంట్లో లోగుట్టు ఏంటి? ♦ నిందితుడు శ్రీనివాసరావు ఏర్పాటు చేశారని ప్రభుత్వ పెద్దలు చెప్పుకొచ్చిన ఫ్లెక్సీ తొలిరోజు ఎక్కడా కనిపించలేదు. ఆ ఫ్లెక్సీ ఎప్పుడో పోయిందని, ఎక్కడుందో తెలియదని శ్రీనివాసరావు సోదరుడు తొలి రోజు చెప్పుకొచ్చాడు. ఆ మరసటి రోజున ఫ్లెక్సీ ఏర్పాటు చేసిన ప్రాంతంలో ఓ ఇంటి ముందు ఉన్న ఇసుక దిబ్బపై ఉందని చెప్పి బయటికి తీశారు. ఆ ఫ్లెక్సీపై గతంలో ప్రకటించిన దానికి భిన్నంగా రోజా ఫ్లవర్‌ బొమ్మ ఉంది.   ♦ ముమ్మిడివరం మండల పరిషత్‌ అధ్యక్షుడు పితాని సత్యనారాయణ రావుతో  శ్రీనివాసరావుకు సన్నిహిత సంబంధాలున్నాయి.  శ్రీనివాసరావు తండ్రి తాతారావు కుటుంబీకులకు చెందిన భూములను సత్యనారాయణ కౌలు చేస్తున్నాడన్న వాదనలున్నాయి. ఆ దిశగా ఆరా తీయలేదన్న వాదనలున్నాయి. ♦ ముమ్మిడివరం నియోజకవర్గంలో జరిగే కోడి పందాల్లో కత్తులు కడుతుంటాడు. ఓ టీడీపీ నేత తరుచూ తీసుకెళ్తుండేవాడు. ఆయనతో ఉన్న సత్సంబంధాలు ఎక్కడికి తీసుకెళ్లాయి. ముఖ్యంగా ఎమ్మెల్యే సోదరుడు ఈయన్ని అన్ని విధాలుగా వినియోగించుకుంటాడన్న ఆరోపణలున్నాయి. ఆ దిశగా విచారణ జరగలేదు.    ♦ నిందితుడు శ్రీనివాసరావు కుటుంబీకులు పందెం కోళ్లు పెంచుతారు. వాటిని పందాల కోసం విక్రయిస్తుంటారు. ఈ నేపథ్యంలో పెద్దవాళ్లతో పరిచయాలు ఏర్పడ్డాయి. అవి ఏ రకమైన పరిచయాలు. ఎక్కడి వరకు తీసుకెళ్లాయన్నదానిపై కనీసం ఆరాతీయలేదు. ♦ శ్రీనివాసరావుపై 2017లో కేసు నమోదైంది. ప్రస్తుతం ట్రయల్‌లో ఉంది. నేర చరిత్ర ఉన్న శ్రీనివాసరావుకు నో అబ్జక్షన్‌ సర్టిఫికేట్‌ ఎవరిచ్చారు. ప్రస్తుత ఎస్సై ప్రభాకర్‌ తన హయాంలో ఇవ్వలేదని చెప్పగా, పూర్వపు ఎస్సై అప్పలనాయుడు ఎన్‌ఓసీ ఇచ్చారా...? లేదా? అనేది  తనకు గుర్తు లేదని చెబుతున్నారు. అసలు స్వగ్రామం ఉన్న ఏరియాకు చెందిన పోలీసు స్టేషన్‌ ఎన్‌ఓసీ లేకుండా ఎయిర్‌పోర్టులో ఎలా పెట్టారు? దీని వెనకున్నదెవరు? అనే దానిలో లోతుగా పరిశీలన చేయలేదు. ♦ సాధారణంగా హోటల్‌లో పెట్టుకునే చెఫ్‌కే నాలుగు రకాలుగా ఆరాతీసి పెట్టుకుంటారు. అలాంటిది ముక్కు మొఖం తెలియని శ్రీనివాసరావును ఎయిర్‌ పోర్టులోని రెస్టారెంట్‌ను నడుపుతున్న టీడీపీ నేత హర్షవర్ధన్‌ చౌదరి ఎలా పెట్టుకున్నారు.ఆయన వద్దకు తీసుకెళ్లిందెవరు? మధ్యలో ఉన్న వ్యక్తులెవరు? ♦ నిందితుడు తన స్వగ్రామానికొచ్చినప్పుడు స్నేహితులకు, కుటుంబీకులకు భారీ పార్టీ ఇచ్చారని చెప్పుకుంటున్నారు. లైఫ్‌ సెటిలైపోయిందని...కోటి రూపాయలతో భూమి కొంటానని...నాలుగు ఎకరాలు చూడండని తన స్నేహితులకు చెప్పాడని పెద్ద ఎత్తున ప్రచారం జరుగుతోంది. ఆ దిశగా శోధన జరుగుతున్నదా? ♦ వైఎస్‌ జగన్‌ను హతమార్చేందుకు వినియోగించిన కోడి పందేలకు ఉపయోగించే కత్తిని ఎక్కడ నుంచి తెచ్చాడు? కొనుగోలు చేసిందెక్కడ ? అనే దానిపై స్థానికంగా విచారణ జరగలేదు.   ఈ దిశగా విచారణ జరగకపోగా కాల్‌డేటాలో ఉన్న నెంబర్ల ఆధారంగా సంబంధిత వ్యక్తులు పిలిచి, కాసేపు విచారించి వదిలేశారు. అసలు ఎయిర్‌పోర్టు రెస్టారెంట్‌లో చేర్పించేందుకు ఇక్కడి నుంచి ఎవరు తీసుకెళ్లారన్న దానిపై కూడా కనీసం నిగ్గు తేల్చలేదు. అనుమానితుల ఇళ్లల్లో తనిఖీలు చేయడం గాని, వారి కదలికలపై నిఘా పెట్టడం గాని జరగ లేదు. ఇవన్నీ గాలికొదిలేసి శ్రీనివాసరావు వైఎస్సార్‌సీపీ అభిమాని అని, అందుకు తగ్గ ఆధారాలు ఇవని చెప్పేందుకు సిట్‌ అధికారులు దాదాపు విచారణ జరిపారు కానీ, కుట్ర కోణంలో ఆరా తీయలేదు. ♦ శ్రీనివాసరావు నేరం వెనక ఉన్న సూత్రధారులపై కనీసం విచారణ చేయలేదు. దీంతో సిట్‌ విచారణపై అనేక అనుమానాలు నెలకొన్నాయి. రాష్ట్ర ప్రభుత్వ పరిధిలో ఉంటే సిట్‌ అధికారులు విచారణ జరిపితే వాస్తవాలు బయటికి రావన్న అభిప్రాయం వ్యక్తమైంది. ఈ నేపథ్యంలో హత్యాయత్నం కేసును ఎన్‌ఐఎకి కేంద్రం అప్పగించడంతో కుట్ర గుట్టు రట్టవుతుందన్న నమ్మకం కలిగిస్తోంది. దీంతో  టీడీపీ నేతల్లో మేకపోతు గాంభీర్యం కనిపిస్తోంది. 

సాక్షి, హైదరాబాద్‌: ప్రతిపక్ష నేత వైఎస్‌ జగన్‌మోహన్‌రెడ్డిపై విశాఖ విమానాశ్రయంలో జరిగిన హత్యాయత్నం కేసును జాతీయ పరిశోధన సంస్థ (ఎన్‌ఐఏ)కు అప్పగించడం శుభపరిణామమని, దీంతో వాస్తవాలు బయటకొస్తాయని ఆశిస్తున్నామని మాజీ ఎంపీ, వైఎస్సార్‌సీపీ నేత పెద్దిరెడ్డి మిథున్‌రెడ్డి అన్నారు. ఇది కోడి కత్తి డ్రామా కాదని, నారా వారి కత్తి డ్రామా అనే విషయం విచారణలో బయటపడుతుందని భావిస్తున్నామని చెప్పారు. ఆయన శుక్రవారం హైదరాబాద్‌లోని పార్టీ కేంద్ర కార్యాలయంలో మీడియాతో మాట్లాడారు. జగన్‌ను చంపించడానికి కుట్ర పన్నిందెవరో బయటకు రాకుండా కేసును నీరుగార్చేందుకు చంద్రబాబు విశ్వప్రయత్నాలు చేశారని విమర్శించారు. ‘‘విపక్ష నేతపై హత్యాయత్నం జరిగిన అరగంటలోపే ఈ కేసు ఏవిధంగా దర్యాప్తు జరపాలో డీజీపీ డిక్టేట్‌ చేశారు. డీజీపీ ఆదేశాలకు విరుద్ధంగా ఆయన కింద పనిచేసేవారు ఎలా దర్యాప్తు చేస్తారు? ఈ హత్యాయత్నం వెనుక ఎవరూ లేరని, శ్రీనివాస్‌ అనే వ్యక్తి మాత్రమే ఉన్నారని కోర్టుకు పోలీసులు తెలిపారు. ఇలా చేస్తారని మేం ఊహించే థర్డ్‌పార్టీ విచారణకు డిమాండ్‌ చేస్తూ హైకోర్టును ఆశ్రయించాం. ఈ నేపథ్యంలో ఈ కేసును కేంద్రం ఎన్‌ఐఏకి అప్పగించింది’’ అని చెప్పారు. సీబీఐ, ఆదాయపన్ను శాఖలు ఏపీలో విచారణ జరపడానికి వీల్లేదని అడ్డుకుంటూ చంద్రబాబు ఇప్పటికే జీవోలిచ్చారని, రేపు ఎన్‌ఐఏను కూడా ఆయన సామ్రాజ్యం(రాష్ట్రం)లో విచారణ జరపడానికి వీల్లేదంటూ అడ్డుకునే ప్రయత్నం చేస్తారేమోనని సందేహం వెలిబుచ్చారు. చిల్లర రాజకీయాలకు నిదర్శనం.. మదనపల్లిలో ఎమ్మెల్యే దేశాయ్‌ తిప్పారెడ్డి పంపిణీ చేస్తున్న గడియారాలపై చంద్రబాబు చిల్లర రాజకీయాలు చేస్తున్నారని మిథున్‌ మండిపడ్డారు. తిప్పారెడ్డి తన సొంత డబ్బుతో గత ఆగస్టు నుంచి తన నియోజకవర్గంలోని ప్రజలకు గడియారాలు పంపిణీ చేస్తున్నారని, అందులో ఒకదాంట్లో తమ పార్టీ బొమ్మ వెనకాల టీఆర్‌ఎస్‌ బొమ్మ ఉందని, ఇది తయారీదారు వద్ద జరిగిన చిన్న పొరపాటని, అయితే ప్రభుత్వ కార్యాలయంలో ప్రెస్‌మీట్‌ పెట్టి దీన్ని వీడియో ప్లేచేసి చూపించడం, టీఆర్‌ఎస్‌తో లింకుపెట్టడం చంద్రబాబు చిల్లర రాజకీయాలకు, నీచపు రాజకీయాలకు నిదర్శనమని దుయ్యబట్టారు. ‘‘తిప్పారెడ్డి గుజరాత్‌లో గడియారాల తయారీకి ఆర్డరిచ్చారు. అక్కడ 150 గడియారాల వెనుక పొరపాటున టీఆర్‌ఎస్‌ గుర్తుపేపర్‌ పెట్టామని తయారీదారు తెలియజేశారు. దీన్నెలా రాజకీయం చేస్తారు? పరిటాల శ్రీరామ్‌ వివాహమప్పుడు టీడీపీ నేతలు తెలంగాణ సీఎం ఫ్లెక్సీలు, స్వాగతద్వారాలు ఏర్పాటు చేయడం చంద్రబాబుకు కనిపించలేదా? రాజధాని శంకుస్థాపనకు మీరు (చంద్రబాబు) స్వయంగా కేసీఆర్‌ను ఆహ్వానించలేదా? మీరు కేసీఆర్‌ యాగానికి వెళ్లలేదా? మరిలాంటప్పుడు తయారీదారు ఒక గడియారంలో చిన్న పొరపాటు చేస్తే రాజకీయం చేయడం నీచం కాదా?’’ అని విమర్శించారు. ‘‘ఆంధ్రాలో లూటీ చేసిన డబ్బుతో రేవంత్‌రెడ్డిని బలిపశువును చేయలేదా? హరికృష్ణ చనిపోయిన సందర్భంగా టీఆర్‌ఎస్‌తో పొత్తుకోసం కేటీఆర్‌తో ప్రయత్నించడం నిజంకాదా? మీతో పొత్తుకు ఒప్పుకుంటే టీఆర్‌ఎస్‌ మంచిది.. లేదంటే చెడ్డదా? ఇదేనా బాబు మార్కు నీతి’’ అని నిలదీశారు. 

అక్టోబరు 25, 2018..  మ.12.45 గం.–12.48 గం. : విశాఖపట్నం విమానాశ్రయంలో ప్రతిపక్ష నేత వైఎస్‌ జగన్‌పై నిందితుడు జునుపల్లి శ్రీనివాసరావు హత్యాయత్నానికి పాల్పడ్డాడు.    మ.1.30గం. : డీజీపీ ఆర్పీ ఠాకూర్‌ విజయవాడలో మీడియాతో మాట్లాడారు. నిందితుడు పేరు, ఊరు వెల్లడించి అతను వైఎస్సార్‌సీపీ సానుభూతిపరుడు, జగన్‌ అభిమాని అని ప్రకటించారు. ప్రచారం కోసమే హత్యాయత్నం చేశాడని వెల్లడించారు.     మ.2గం. : వైఎస్‌జగన్‌ బొమ్మతో ఉన్న ఫ్లెక్సీని ముగ్గురు మంత్రులు మొబైల్‌లో చూపించారు.   (సా.4 గంటలు దాటిన తర్వాత సీఐఎస్‌ఎఫ్‌ అసిస్టెంట్‌ కమాండర్‌ పోలీసులకు ఫిర్యాదు చేశారు. 4.30 గంటలకు ఎఫ్‌ఐఆర్‌ నమోదైంది. సీఆర్‌పీసీ–156 ప్రకారం.. ఎఫ్‌ఐఆర్‌ రిజిస్టర్‌ అయిన తర్వాత విచారణకు అవకాశం ఉంటుంది. సా.4.30 వరకు నిందితుడిని తమ కస్టడీకి ఇవ్వలేదని సీఎం చంద్రబాబు స్వయంగా ప్రకటించారు. స్వయంగా సీఎంయే నిందితుడిని 4.30 తర్వాత కస్టడీలోకి తీసుకున్నామని చెబితే... అంతకు 3 గంటల ముందే డీజీపీ, మంత్రులు అన్ని వివరాలు ఎలా చెప్పగలిగారు?)     మ.3.30గం. : తూర్పుగోదావరి జిల్లా ఠాణేలంకలోని నిందితుడు శ్రీనివాసరావు నివాసానికి చేరుకున్న స్థానిక టీడీపీ నేతలు. శ్రీనివాసరావు వైఎస్సార్‌సీపీ అభిమాని అని ప్రకటన. మారుమూల ఉన్న ఆ ఇంటికి అంత తక్కువ సమయంలో ఎలా చేరుకోగలిగారు?     రాత్రి 7గం. : సీఎం చంద్రబాబు తన నివాసంలో మీడియాతో మాట్లాడారు. సానుభూతి కోసమే వైఎస్‌ జగన్‌పై హత్యాయత్నం నాటకం ఆడారని ప్రకటించారు.    1.ఏడాదిన్నర క్రితమే హత్యకు కుట్ర..  ప్రతిపక్ష నేత వైఎస్‌ జగన్‌ను హతమార్చడానికి చేసిన కుట్రకు బీజం.. హత్యాయత్నం జరగడానికి ఏడాదిన్నర ముందే ప్రారంభమైంది. జగన్‌ గొంతులో కత్తిదింపి అంతమొందించడానికి నిందితుడు జనుపల్లి శ్రీనివాసరావును ఏడాదిన్నర క్రితమే ఎంపిక చేసుకుని ఆ కుటుంబానికి ‘అన్నీ’ సమకూర్చారన్నది స్పష్టంగా తెలుస్తోంది. ఆ కుటుంబం తూర్పు గోదావరి జిల్లా ముమ్మిడివరం మండలంలోని తమ స్వగ్రామం ఠానేలంకలో చకచకా ఇంటిని నిర్మిస్తుండటం ఆ విషయాన్ని చెప్పకనే చెబుతోంది. ఆ ఇంటి నిర్మాణానికి అధికార పార్టీ నుంచి అన్ని రకాలుగా సహాయ సహకారాలు అందించడం.. ఠానేలంకలోని నిందితుడి కుటుంబం నిర్మిస్తున్న ఇంటిని చూస్తే స్పష్టంగా కనిపిస్తుంది.  సాధారణంగా రోజువారీ కూలీ మీద జీవనం సాగిస్తున్న కుటుంబం ఉన్నట్లుండి ఇంటి నిర్మాణానికి రూ.20 లక్షలు వ్యయం చేయడానికి సిద్ధపడటం అనుమానాలను రేకెత్తిస్తోంది. నిందితుడి కుటుంబం ఠానేలంక గ్రామంలో రూ.20 లక్షల వ్యయంతో ఇంటి నిర్మాణం చేపట్టి 60 శాతానికి పైగా పూర్తిచేసింది. ఇప్పటివరకు రూ.12 లక్షలు ఖర్చు చేశామని నిందితుడి తల్లి సావిత్రమ్మ చెప్పారు. ప్రభుత్వం నుంచి గృహ నిర్మాణ పథకం కింద అందింది రూ.2 లక్షల లోపే. మిగతా రూ.10 లక్షలు వారి చేతి నుంచే పెట్టారు.  ప్రశ్న : విపక్ష నేతను హత్య చేయడానికి రూపొందించిన ప్రణాళికలో నిందితుడు శ్రీనివాసరావును ‘ఇన్‌స్ట్రుమెంట్‌’గా వాడటానికి అప్పుడే ఎంపిక చేసుకున్నారని ‘ఇంటిగుట్టు’ చెప్పకనే చెబుతోంది. నిందితుడి కుటుంబానికి ఉన్నట్లుండి అంత సొమ్ము ఎలా వచ్చిందనే దిశగా ‘సిట్‌’ దర్యాప్తు ఎందుకు చేయలేదు?  2.నిందితుడి కుటుంబం పక్కా టీడీపీ..  పీఎంఏవై–ఎన్టీఆర్‌ గ్రామీణ గృహ నిర్మాణ పథకం కింద ఠానేలంకలో 143 ఇళ్ల నిర్మాణానికి అనుమతిస్తే.. అవన్నీ టీడీపీ కార్యకర్తలకు, ఆ పార్టీ సానుభూతిపరులకే దక్కాయి. ఈ పథకంలో ఇళ్ల కోసం దరఖాస్తు చేసుకున్న వైఎస్సార్‌సీపీ సానుభూతిపరులకు వాటిని మంజూరు చేయకపోవడం గమనార్హం. ప్రతిపక్షానికి చెందిన 16 మందికి అన్ని అర్హతలున్నాయని అధికార యంత్రాంగం నిర్ధారించిన తర్వాత కూడా ఇళ్లు మంజూరు చేయలేదు. ‘నిందితుడి కుటుంబం వైఎస్సార్‌సీపీ అయితే ఇల్లు వచ్చేదా? ఇంటి నిర్మాణంలోనూ నిబంధనలను ఉల్లంఘించినా.. వైఎస్సార్‌సీపీకి చెందిన కుటుంబమే అయితే టీడీపీ వాళ్లు చూస్తూ ఊరుకునే వారేనా?’.. అని నిందితుడు శ్రీనివాసరావు బాబాయి, టీడీపీ నాయకుడు, గ్రామ ఉప సర్పంచ్‌గా పనిచేసిన జనుపల్లి నాగేశ్వరరావు ప్రశ్నించడమే ఇందుకు నిదర్శనం. మరోవైపు.. తమకు అన్ని అర్హతలున్నా ఇళ్లు మంజూరు చేయలేదని, నిర్మాణ సామగ్రి సమకూర్చుకున్న తర్వాత మంజూరు జాబితాలో తమ పేర్లు లేకుండా తొలగించారని వైఎస్సార్‌సీపీ సానుభూతిపరులు వెల్లడించారు. శ్రీనివాసరావు కుటుంబం టీడీపీనే అంటూ ఇటు నిందితుడి బాబాయి నాగేశ్వరరావు చెప్పడం, తమకు అన్ని అర్హతలున్నా కేవలం వైఎస్సార్‌సీపీ సానుభూతిపరులనే ఏకైక కారణంతోనే ఇళ్లు ఇవ్వలేదని మిగతా వారంతా చెప్పడం ద్వారా శ్రీనివాసరావు కుటుంబానిది ఏ పార్టీ అనే విషయం స్పష్టమవుతోంది. నిందితుడి స్నేహితులు, ఇరుగుపొరుగు వారూ.. శ్రీనివాసరావు కుటుంబం టీడీపీనే అని చెప్పారు.  వైఎస్సార్‌సీపీ అయితే రెండు ఇళ్లు ఇస్తారా?  మా రోడ్డులో ఇళ్లు కట్టుకునే వాళ్లకు లోన్‌ ఇవ్వలేదు. పిల్లర్లలోనే ఇళ్లు ఆగిపోయాయి. ఇలాంటి (శ్రీనివాసరావు కుటుంబానికి) వాళ్లకు రెండు లోన్లు ఇచ్చారు.     ఒకసారి ఆ పార్టీ, మరోసారి ఈ పార్టీ అంటూ సుబ్బరాజు (శ్రీనివాసరావు సోదరుడు) అంటున్నారు. టీవీల్లో చూస్తుంటే ఆశ్చర్యం వేస్తోంది. సుబ్బరాజు వాళ్లకు 2 లోన్లు ఎలా ఇచ్చారో తెలుసుకోండి. అందరూ బేస్‌మట్టం వేసుకుని లోన్లు కోసం ఎదురుచూస్తున్నారు. వీరందరికీ వైఎస్సార్‌సీపీ అని ఇవ్వలేదు. మరి సుబ్బరాజు వాళ్లకు 2 లోన్లు ఎలా ఇచ్చారు? కనుక్కోండి. కాగిత బాబూజీ వైఎస్సార్‌సీపీ అని లోన్‌ ఇవ్వలేదు. సొంత డబ్బులతో ఇల్లు కట్టుకుంటున్నాడు. మరి సుబ్బరాజుకు రెండు ఎలా ఇచ్చారు? ముందేమో టీడీపీ, తర్వాత ఎవరికి పడితే వారికి వేస్తాం. ఇప్పుడు వైఎస్సార్‌సీపీ అంటున్నారు. ప్రజలకు అంతా అర్థం అవుతోంది.  వాళ్లలో పశ్చాత్తాపంలేదు. మేం హడలిపోతున్నాం. వాళ్లేమో డేర్‌గా మాట్లాడుతున్నారు. మాకేమీ అర్థం కావడంలేదు.    – జనుపల్లి నాగేశ్వరరావు (శ్రీనివాసరావు బాబాయి, ఠానేలంకకు ఉప సర్పంచ్‌గా పనిచేశారు. టీడీపీ నాయకుడు)  ఏకగ్రీవంగా ఎన్నికైనా వైఎస్సార్‌సీపీ అని ఇల్లు ఇవ్వలేదు  లోన్‌ పెట్టుకుంటే పార్టీవల్ల ఇవ్వడంలేదు. మా లోను కాగితాలు పక్కనబెట్టేశారు. ఏకగ్రీవంగా నన్ను ఠానేల్లంక పంచాయితీలో 8వ వార్డు మెంబర్‌గా ఎన్నుకున్నారు. మూడుసార్లు పంచాయితీకి వెళ్లి అప్లై చేశాను. పంచాయితీలో కనీసం కాగితాలు కూడా లేకుండా చేశారు. ఇల్లు సరిపోక నానా ఇబ్బందులు పడుతున్నాం. మా వార్డులో అంతా కలిసి ఏకగ్రీవంగా ఎన్నుకున్నా నాకు మాత్రం ఇంటి లోను ఇవ్వడం లేదు. నా మరిది రాంబాబు వైఎస్సార్‌ కాంగ్రెస్‌ పార్టీ గ్రామ కన్వీనర్‌గా ఉన్నారని నాకు ఇల్లు ఇవ్వబోమంటున్నారు. అదేమని అడిగితే మీ పార్టీ వాళ్లకు ఇళ్లు ఇవ్వబోమని చెబుతున్నారు.  – నక్కా అమృతవల్లి, బలుసుల్లంక, ముమ్మిడివరం  ప్రశ్న : ఠానేలంకలో ఉన్న వైఎస్సార్‌సీపీ కార్యకర్తలు, సానుభూతిపరుల్లో ఒక్కరికి కూడా ఇల్లు మంజూరు చేయలేదు. ఇల్లు మంజూరైన నిందితుడు శ్రీనివాసరావు మాత్రం వైఎస్సార్‌సీపీ అని టీడీపీ ప్రచారం చేస్తోంది. దీనివెనక ఉన్న అంతరార్థం ఏమిటి?  3.తర్వాత అంకం ‘ఫ్లెక్సీ నాటకం’..  ఇంటి నిర్మాణానికి అన్ని రకాలుగా సహకారం అందించిన తర్వాత నిందితుడు, కుట్ర సూత్రధారుల మధ్య పరస్పరం నమ్మకం ఏర్పడి ఉండవచ్చు. తర్వాత అంకంలో.. నిందితుడిని జగన్‌ అభిమానిగా చిత్రీకరించడానికి చేసిన ప్రయత్నంలో ‘ఫ్లెక్సీ నాటకం’  మొదలుపెట్టారు. కుట్రను అమలుచేయడానికి ఎంపిక చేసుకున్న జనుపల్లి శ్రీనివాసరావును జగన్‌ అభిమానిగా చిత్రీకరించడానికి వీలుగా 2018 జనవరి 1న నూతన సంవత్సర శుభాకాంక్షలు చెబుతూ ఫ్లెక్సీని.. సూత్రధారుల సూచనలకు అనుగుణంగా ఠానేలంకలో ఏర్పాటుచేశారు. హత్యాయత్నం జరిగిన గంట వ్యవధిలోనే.. ఎక్కడో మారుమూల గ్రామంలో దాదాపు 10 నెలల క్రితం ఏర్పాటుచేసిన ఫ్లెక్సీ సమాచారాన్ని పోలీసులు వెల్లడించడం వెనక.. ‘సూత్రధారుల ప్రణాళిక’ ఉందనేది స్పష్టం.  ప్రశ్న : జగన్‌ మీద హత్యాయత్నం జరిగిన గంట వ్యవధిలోనే నిందితుడు జగన్‌ అభిమాని అని, నూతన సంవత్సర శుభాకాంక్షలు చెబుతూ (2018 జనవరి 1న) ఫ్లెక్సీ కూడా వేయించారని పోలీసులు ప్రకటించారు. ఈ మేరకు ఫ్లెక్సీ పీడీఎఫ్‌ కాపీని పోలీసులు విడుదల చేశారు. హత్యాయత్నం జరిగిన గంట వ్యవధిలోనే.. 10 నెలల క్రితం వేయించిన ఫ్లెక్సీ గురించి పోలీసులకు ఎవరు చెప్పారు?   పోలీసులకు సమాచారం ఇచ్చిన వ్యక్తి వివరాలు ఎందుకు బయటపెట్టడం లేదు?  దొంగలను పట్టించిన ‘రోజాపూలు’  హత్యాయత్నం జరిగిన గంట వ్యవధిలోనే పోలీసులు విడుదల చేసిన ఫ్లెక్సీలో రోజాపూలు లేవు. ‘రోజాపూలు లేకుండా ఫ్లెక్సీ పీడీఎఫ్‌ను జనుపల్లి శ్రీనివాసరావు ఆమోదం కోసం లేపాక్షి ప్రింటర్స్‌లో పనిచేస్తున్న చైతన్య స్నేహితుడు 2017 డిసెంబర్‌ 30న చైతన్య (శ్రీనివాసరావుకు బంధువు)కు మెయిల్‌ పంపించాడు. అయితే, శ్రీనివాసరావు నేరుగా పి.గన్నవరంలోని లేపాక్షి ప్రింటర్స్‌కు వచ్చి మెయిల్‌లో పంపించిన ఫ్లెక్సీ నమూనాకు కొద్దిపాటి మార్పులు చేశాడు. రోజాపూలు ఉండాలని ఫ్లెక్సీలో పెట్టించాడు. రోజాపూలు పెట్టిన తర్వాత ఫ్లెక్సీ నా ప్రింటర్స్‌లోనే ప్రింట్‌ చేసి పట్టుకెళ్లాడు’ అని చెప్పారు. –ఫ్లెక్సీని ప్రింట్‌ చేసిన లేపాక్షి ప్రింటర్స్‌ యజమాని అయ్యప్ప ఫ్లెక్సీ చిరిగిపోతే రోజాపూలు అంటించారు  లేపాక్షి ప్రింటర్స్‌ యజమాని అయ్యప్ప చెబుతున్న దానికి, నిందితుడు శ్రీనివాసరావు సోదరుడు సుబ్బరాజు చెబుతున్న విషయానికి పొంతనలేదు. ‘ఫ్లెక్సీ కట్టిన తర్వాత అది చిరిగిపోయింది. ఫ్లెక్సీ చిరిగిపోయిందని శ్రీనివాసరావు బాధపడి.. చినిగిన చోట రోజాపూలు బొమ్మతో ప్యాచ్‌ అతికించాడు. అందువల్ల పోలీసులు విడుదల చేసిన ఫ్లెక్సీ పీడీఎఫ్‌ కాపీలో రోజాపూలు లేవు. పోలీసులకు లభించిన ఫ్లెక్సీలో రోజాపూలున్నాయి’.  – సుబ్బరాజు (శ్రీనివాసరావు అన్న)  అయ్యప్ప మాటలపైనా అనుమానాలు..  నిందితుడు శ్రీనివాసరావు స్వయంగా తమ ఆఫీసుకు వచ్చి రోజాపూలు పెట్టించుకుని ఫ్లెక్సీ ప్రింట్‌ తీసుకెళ్లాడని లేపాక్షీ ప్రింటర్స్‌ యజమాని అయ్యప్ప చెప్పారు. మరి రోజాపూలతో ఉన్న ఫ్లెక్సీ పీడీఎఫ్‌ కాపీ చూపించమని అడిగినప్పుడు.. ఓఎస్‌ (ఆపరేటింగ్‌ సిస్టం) పోయిందని, అందువల్ల 2017 డిసెంబరు ఫైళ్లు పోయాయని చెప్పారు. నిజానికి.. అయ్యప్ప చెబుతున్న మాటల్లో వాస్తవంలేదు. ‘ఓఎస్‌ పోతే.. మొత్తం ఫైళ్లు పోతాయి. ఒక నెల, ఒక వారం ఫైళ్లు మాత్రమే పోయే అవకాశం లేదు’ అని ఐటీ నిపుణులు చెబుతున్నారు. సరిగ్గా డిసెంబర్‌ ఫైళ్లు మాత్రమే పోయాయని చెప్పడం అనుమానాలకు దారితీస్తోంది.  ‘ఎస్‌ఆర్‌టి ప్రింటర్స్‌’ కథ ఏమిటి?  పోలీసులు బయటపెట్టిన ఫ్లెక్సీ.. ఎస్‌ఆర్‌టీ ప్రింటర్స్‌లో ప్రింట్‌ చేయించినట్లు ఫ్లెక్సీ కింద ముద్రించారు. ఎస్‌ఆర్‌టీ ప్రింటర్స్‌ అనేది ఎక్కడా లేదు. ఆ ప్రింటర్స్‌ పేరిట ఫ్లెక్సీలో ఇచ్చిన ఫోన్‌ నంబర్‌ లేపాక్షి ప్రింటర్స్‌ యజమాని అయ్యప్పది. ఇదే విషయాన్ని అయ్యప్పను అడిగితే.. ‘నా దగ్గర పనిచేసే కుర్రాడు తెచ్చుకునే ఆర్డర్స్‌ (వ్యాపారం)కు ఎస్‌ఆర్‌టీ ప్రింటర్స్‌ అని వేస్తామ’ని సమాధానం ఇచ్చారు. మరి ఫోన్‌ నంబర్‌ ఆ కుర్రాడిది కాకుండా.. యజమాని నంబర్‌ ఎందుకు పెట్టారనే ప్రశ్నకు సమాధానంలేదు.  ప్రశ్న : ఫ్లెక్సీ ప్రింట్‌ చేసిన లేపాక్షి ప్రింటర్స్‌ యజమాని.. ఫ్లెక్సీలో రోజాపూలున్నాయని చెప్పారు. నిందితుడు సోదరుడు అందుకు భిన్నంగా.. ఫ్లెక్సీలో రోజాపూలు లేవు.. ఫ్లెక్సీ చినిగిపోతే ప్యాచ్‌లాగా రోజాపూలు బొమ్మ అతికించారని చెప్పారు. పోలీసులు విడుదల చేసిన ఫ్లెక్సీ పీడీఎఫ్‌లో రోజాపూల బొమ్మ లేదు. పోలీసులు కనుక్కున్నామని చెబుతున్న ఫ్లెక్సీలో మాత్రం రోజాపూల బొమ్మ ఉంది. నిందితుడు కట్టిన ఫ్లెక్సీ ఒకే ఒకటి. ఈ పొంతనలేని సమాధానాలే చెబుతున్నాయి కదా ఇందులో ఏదో మతలబు దాగి ఉందని? ఈ దిశగా ఎందుకు విచారణ చేయలేదు?  4.కుట్ర అమల్లో తదుపరి ఘటం.. విమానాశ్రయ ప్రవేశం  కుట్ర అమలుకు విమానాశ్రయాన్ని ఎన్నుకోవడం వెనకా సూత్రధారులు పెద్ద కసరత్తే చేశారు. ప్రజల్లో జగన్‌ మీద పాశవిక దాడి చేయడం సాధ్యం కాదనే ఉద్దేశంతో.. పెద్దగా జనంలేని ప్రాంతాన్ని కుట్రదారులు ఎంపిక చేసుకున్నారు. అది కూడా కేంద్ర ప్రభుత్వ ఆధీనంలో ఉన్న ప్రాంతమైతే.. హత్య తర్వాత పరిణామాల్లో తమ చేతులకు మట్టి అంటకుండా బయటపడొచ్చనే ఆలోచన కుట్రదారులకు ఉందని స్పష్టమవుతోంది. విమానాశ్రయంలోకి నిందితుడిని తీసుకెళ్లడానికి ఫ్యూజన్‌ ఫుడ్స్‌ రెస్టారెంట్‌ యజమాని, టీడీపీ నాయకుడు, ముఖ్యమంత్రి చంద్రబాబు కుటుంబానికి సన్నిహితుడు హర్షవర్ధన్‌ ప్రసాద్‌ చౌదరి మార్గం సుగమం చేశారు. నిందితుడు శ్రీనివాసరావు మీద ముమ్మిడివరం పోలీస్‌స్టేషన్‌లో కేసులు నమోదైన విషయాన్ని పోలీసులు పట్టించుకోకుండా.. నిందితుడికి ఎన్‌వోసీ (నో అబ్జెక్షన్‌ సర్టిఫికెట్‌) జారీ వెనక టీడీపీ నేతల ఒత్తిడి ఉందని అనుకోవచ్చు. దరఖాస్తుదారుడికి నేర చరిత్రలేదని నిర్ధారించడానికి మొట్టమొదట చేసే పని.. సొంత ఊరు పోలీస్‌స్టేషన్‌లో వాకబు చేయడం. సంబంధిత జిల్లా ఎస్పీకి లేఖ రాసి దరఖాస్తుదారుడి నేర చరిత్ర తెలుసుకుంటారు. దాడి చేయడం, చంపుతానని బెదిరించిన ఘటనలో ముమ్మిడివరంలో శ్రీనివాసరావు మీద కేసు నమోదైంది. నేర చరిత్రను దాచి, నిందితుడికి ఎన్‌వోసీ తెప్పించి నిందితుడిని విమానాశ్రయ ప్రవేశం చేయించడంలో సూత్రధారులు విజయవంతమయ్యారు.  ముమ్మిడివరం పీఎస్‌లో కేసు  2017 మార్చి 2న ముమ్మిడివరం పోలీసుస్టేషన్‌లో నిందితుడు శ్రీనివాసరావుపై కేసు నమోదైంది. ఓ వివాహ వేడుకలో తనపై దాడిచేసి కొట్టి, చంపుతానని శ్రీనివాసరావు బెదిరించడంతో కాగిత వెంకటేష్‌ అనే వ్యక్తి కేసు పెట్టారు. క్రైమ్‌ నెంబర్‌ 48/2017, సెక్షన్‌ 323, 506 కింద పోలీసులు కేసు నమోదు చేశారు. కేసులో  ఎ–4గా శ్రీనివాసరావు పేరు ఉంది. 41ఎ సీఆర్‌పీసీ కింద శ్రీనివాసరావుకు పోలీసులు నోటీసు జారీచేసి విచారించారు. కోర్టులో చార్జిషీటు కూడా పోలీసులు దాఖలు చేశారు. ప్రస్తుతం కోర్టులో కేసు విచారణ జరుగుతోంది.  ముమ్మిడివరం పీఎస్‌లో 2017 ఏప్రిల్‌ నుంచి ఎస్‌ఐగా పనిచేస్తున్నాను. నేను  శ్రీనివాసరావుకు ఎన్‌ఓసీ ఇవ్వలేదు. అంతకుముందు ఏం జరిగిందో తెలీదు   – ముమ్మడివరం ఎస్‌ఐ పి. ప్రభాకర్‌ ప్రశ్న : రక్షణ శాఖ ఆధీనంలోని విమానాశ్రయం(విశాఖ విమానాశ్రయం పౌర విమానయాన శాఖ పరిధిలోది కాదు) లోకి ప్రవేశానికి వీలుగా ఎన్‌వోసీ జారీచేయడంలో నిందితుడి  నేర చరిత్రను పోలీసులు దాచి పెట్టడం వెనక ఉన్న సూత్రధారులు ఎవరు? పోలీసులు ఈ దిశగా ఎందుకు విచారణ చేయడంలేదు? సూత్రధారుల బండారం బయటపడుతుందనే ఎన్‌వోసీ జారీలో నిబంధనలను పాటించలేదనే విషయాన్ని ‘సిట్‌’ పట్టించుకోవడంలేదా?  5.నిందితుడిపై హర్షవర్ధన్‌ చౌదరికి ఎంత ప్రేమ శ్రీనివాసరావు మొదటి నుంచి వైఎస్సార్‌ కాంగ్రెస్‌ పార్టీ వీరాభిమాని అని పోలీసులు పదే పదే చెప్పుకొచ్చారు. హర్షవర్ధన్‌కి ఉన్న పార్టీ (టీడీపీ) నేపథ్యం చూస్తే.. పొరపాటున కూడా తన సంస్థల్లో తన పార్టీకి వ్యతిరేకంగా ఉన్న వారికి ఉద్యోగం ఇచ్చిన పాపాన పోలేదు. మరి శ్రీనివాసరావుకు ఎలా ఇచ్చారు?  రెస్టారెంట్‌లో పనిచేస్తున్న అందరికంటే శ్రీనివాసరావుకే ఎక్కువ వేతనం ఇచ్చి ప్రత్యేక వసతి సౌకర్యం కల్పించడానికి కారణమేంటి?..  ఈ ప్రశ్నలకు సమాధానం తెలిస్తే కుట్ర కోణం సులభంగానే అర్థమవుతుంది. తమ కుట్రను అమలుచేయడానికి ఎంపిక చేసుకున్న శ్రీనివాసరావుకు సకల సౌకర్యాలు కల్పించడంతో పాటు మిగతా సిబ్బంది కంటే ఫ్యూజన్‌ రెస్టారెంట్‌ యజమాని నిందితుడ్ని ‘ప్రత్యేకంగా’ చూశారు.  ప్రశ్న : అంత ప్రత్యేకంగా చూడటానికి కారణాలను ‘సిట్‌’ ఎందుకు అన్వేషించలేదు? అలా అన్వేషిస్తే సూత్రధారులెవరో తేలిపోతుందని పలువురు పోలీసు అధికారులు, విమానశ్రయం ఉన్నతాధికారులు ‘సాక్షి’ బృందానికి చెప్పారు. 6.మట్టుబెట్టేందుకే మాటేశారు..  అత్యంత కట్టుదిట్టమైన భద్రత ఉండే విమానాశ్రయంలో అనధికారికంగా ఓ వ్యక్తి ఒక్కరోజైనా ఉండగలడా?.. ఏమాత్రం సాధ్యం కాదు. కానీ, ప్రతిపక్ష నేత వైఎస్‌ జగన్‌పై హత్యాయత్నం చేసిన నిందితుడు శ్రీనివాసరావు ఏకంగా ఏడాదిపాటు ఉన్నాడు. ఇదే విషయాన్ని ఢిల్లీలోని బ్యూరో ఆఫ్‌ సివిల్‌ ఏవియేషన్‌ సెక్యూరిటీ (బీసీఏఎస్‌) డైరెక్టర్‌ జనరల్‌ కుమార్‌ రాజేష్‌ చంద్ర నివేదిక బహిర్గతం చేసింది. విమానాశ్రయంలో ప్రవేశానికి ఏరోడ్రోమ్‌ ఎంట్రీ పర్మిట్‌ (ఏఈపీ) తప్పనిసరి. మరి శ్రీనివాసరావుకు ఏఈపీ ఎవరిచ్చారు.. ఎలా ఇచ్చారో తెలియజేయాలని వైఎస్సార్‌సీపీ రాజ్యసభ సభ్యుడు వి.విజయసాయిరెడ్డి బీసీఏఎస్‌ను కోరారు. దీనిపై బీసీఏఎస్‌ డీజీ ఇచ్చిన సమాధానంతో అసలు కుట్ర కోణం  బట్టబయలైంది. అసలు శ్రీనివాసరావుగానీ అతని తరఫున రెస్టారెంట్‌ యజమాని హర్షవర్థన్‌గానీ ఏఈపీ కోసం దరఖాస్తు చేయనేలేదని ఆయన వెల్లడించారు. కాబట్టి తాము ఏఈపీ జారీ చేయలేదని చెప్పారు. కాగా, నిందితుడు శ్రీనివాసరావు విమానాశ్రయం డి–జోన్‌లో పనిచేసేందుకు 2018 అక్టోబరు 1 నుంచి 30 వరకు విశాఖపట్నం ఎయిర్‌పోర్ట్‌ డైరెక్టర్‌ తాత్కాలిక ఏఈపీ జారీచేశారని కూడా ఆయన తెలిపారు. ఇక్కడే అసలు మతలబు ఉంది. వాస్తవం ఏమిటంటే, నిందితుడు శ్రీనివాసరావు దాదాపు ఏడాదిగా విశాఖ విమానాశ్రయంలోని ఫ్యూజన్‌ రెస్టారెంట్‌లో పనిచేస్తున్నారు. సిట్‌ అధికారులే న్యాయస్థానానికి సమర్పించిన రిమాండ్‌ నివేదికలో ఈ విషయాన్ని స్పష్టంగా పేర్కొనడం గమనార్హం. కేవలం 2018, అక్టోబరు నెలకు మాత్రమే అనుమతి ఉన్న అతను ఏడాదిగా విమానాశ్రయంలో ఎలా కొనసాగారు? అనుమతిలేని వ్యక్తి విమానాశ్రయంలో ఏడాదిగా దర్జాగా తిరుగుతుంటే విమానాశ్రయ భద్రతా విభాగం అధికారులు ఎందుకు పట్టించుకోలేదు?  విమానాశ్రయంలోని రెస్టారెంట్‌ యజమాని, టీడీపీ నేత హర్షవర్ధన్‌ చౌదరికి విమానాశ్రయ ప్రధాన భద్రతా అధికారి వేణుగోపాలరావుతో సన్నిహిత సంబంధాలు ఉండటంతోనే సాధ్యమైందని సందేహాలు బలపడుతున్నాయి.   7.తాత్కాలిక ఏఈపీ కట్టుకథేనా!?  శ్రీనివాసరావుకు 2018 అక్టోబరు 1 నుంచి 30వరకు ఇచ్చామని చెబుతున్న తాత్కాలిక ఏఈపీ కూడా సందేహాస్పదమే. ఏఈపీ జారీకి కేంద్ర విమానయాన సంస్థ మార్గదర్శకాలను నిర్దేశించింది. ప్రైవేటు వ్యక్తులకు ఒక రోజు నుంచి 3 రోజులకు ఒక కేటగిరీ, 4 రోజుల నుంచి 90 రోజులకు మరో కేటగిరీ కింద ఏఈపీలు కేటాయిస్తారు. నెల రోజులకు తాత్కాలిక ఏఈపీ అన్నది ఏఏఐ మార్గదర్శకాల్లో లేదు. మరి నిందితుడికి అక్టోబరు నెల రోజులకు తాత్కాలిక ఏఈపీ ఎలా జారీచేశారు? అంటే.. వైఎస్‌ జగన్‌పై హత్యాయత్నం చేసిన తరువాత కేసును తప్పుదారి పట్టించేందుకే అప్పటికప్పుడు తాత్కాలిక ఏఈపీ అన్నది సృష్టించారని తేటతెల్లమవుతోంది. అనామకుడైన శ్రీనివాసరావుకు అంతటి పరపతి ఉండదు కదా. మరి దీని వెనుక ఉన్న ప్రభుత్వ పెద్దలు ఎవరు?    మొదటి నుంచి శ్రీనివాసరావుది రెస్టారెంట్‌లో సాయంత్రం నుంచి రాత్రి వరకు ఉండే బీ షిఫ్ట్‌ డ్యూటీ. జగన్‌గారిపై దాడి చేసిన రోజు మాత్రం ఉదయమే విధుల్లోకి వచ్చినా.. రెస్టారెంట్‌లోనే ఉన్న హర్షవర్ధన్‌ చౌదరి నిందితుడు శ్రీనివాస్‌ను ఎందుకు ప్రశ్నించలేదు?  శ్రీనివాసరావు ఉద్యోగం అసిస్టెంట్‌ కుక్‌ అయితే సర్వీస్‌ అసిస్టెంట్‌ చేసే పని అతను చేస్తుంటే ఎందుకు అడ్డుకోలేదు? వీఐపీ లాంజ్‌లోకి సర్వీస్‌ అసిస్టెంట్‌గా వెళ్లడానికి ఎవరు అనుమతించారు?  జగన్‌తో సెల్ఫీ కోసం అని శ్రీనివాసరావు చెప్పాడనుకున్నా.. అతని వద్ద కెమెరా ఫోన్‌ లేదని రెస్టారెంట్‌లో ఉన్న వారందరికీ తెలుసు. అప్పుడైనా కెమెరా ఫోన్‌ లేకుండా సెల్ఫీ ఏమిటని అడగాలి? కనీసం అప్పటివరకు అక్కడే ఉన్న హర్షవర్ధన్‌ చౌదరిని అయినా ప్రశ్నించాలి. కానీ, సిట్‌ ప్రశ్నించలేదు? ఎందుకు?  గత రెండున్నర నెలలుగా జగన్‌గారు ఎయిర్‌పోర్ట్‌కు ఎప్పుడొచ్చినా వైఎస్సార్‌సీపీ స్థానిక వార్డు అధ్యక్షుడు శ్రీధర్‌ ఇంటి నుంచి కాఫీ వచ్చేది. హైదరాబాద్‌ నుంచి వచ్చేటప్పుడు ఆయన నేరుగా విమానం దిగి బయటకు వచ్చి పాదయాత్ర జరిగే ప్రాంతానికి వెళ్లిపోతారు. హైదరాబాద్‌కు వెళ్లేటప్పుడు కాస్త సమయముంటే వీవీఐపీ లాంజ్‌కు వెళ్లి పార్టీ నేతలతో భేటీ అవుతారు. అయితే, ఘటన జరిగే వారం ముందే జగన్‌గారికి బయటి నుంచి కాఫీ తీసుకురావడం కుదరదని ఎయిర్‌పోర్ట్‌ చీఫ్‌ సెక్యూరిటీ ఆఫీసర్‌ (సీఎస్‌వో) వేణుగోపాల్‌ అడ్డుకున్నారు. కాఫీ ఫ్లాస్క్‌ స్వాధీనం చేసుకుని సీరియస్‌ అయ్యారు. పక్కనే ఉన్న రెస్టారెంట్‌ నుంచే తీసుకోవాలని పార్టీ నేతలను ఆదేశించారు. ఇలా అన్న రెండో వారమే ఆ రెస్టారెంట్‌ నుంచి శ్రీనివాసరావు వచ్చి కత్తి దూశాడు. రెస్టారెంట్‌ కేంద్రంగానే కుట్ర జరిగిందని తెలుస్తున్నా ఈ దిశగా కనీస విచారణ ఎందుకు జరగలేదు?  అక్టోబరు 25న వైఎస్‌ జగన్‌పై హత్యాయత్నం జరిగే సమయానికి సరిగ్గా పది నిమిషాల ముందే హర్షవర్ధన్‌ ఎయిర్‌పోర్ట్‌ నుంచి బయటకు వెళ్లడం, ఘటన తర్వాత.. ‘శ్రీనివాసరావు చాలా మంచోడండీ.. అమాయకుడండీ, ఏదో అభిమానంతో పిచ్చి పనిచేసుంటాడు’.. అని హర్షవర్ధన్‌ చౌదరి వకాల్తా పుచ్చుకోవడం వెనక ఉద్దేశం ఏమిటి? హర్షవర్ధన్‌ను సిట్‌ కనీసం ప్రశ్నించడానికి కూడా ఎందుకు సాహసించలేకపోయింది?  సీఎస్‌వో వేణుగోపాల్‌ మొదటి నుంచి టీడీపీ తొత్తుగా ఉంటూ వైఎస్సార్‌సీపీ నేతలపై వ్యతిరేకత ప్రదర్శిస్తుంటాడనేది ఎయిర్‌పోర్ట్‌లో అందరికీ తెలుసు. గతంలో ఓసారి ఎంపీ విజయసాయిరెడ్డి పట్ల కూడా ఒకింత దురుసుగా ప్రవర్తించిన దాఖలాలున్నాయి. టీడీపీ నేతలతో అంటకాగే వేణుగోపాల్‌.. హర్షవర్ధన్‌ ప్రసాద్‌ చౌదరికి కుట్రకోణంలో సహకరించాడన్న వాదనలకు బలం చేకూరుస్తోంది. మరి ఈ ఇద్దరిని నిందితులుగా సిట్‌ ఎందుకు చేర్చలేదు? అలా చేస్తే కుట్ర మొత్తం బట్టబయలవుతుందని ప్రభుత్వ పెద్దలకు భయమా?  హర్షవర్ధన్‌ చౌదరినిగానీ, సీఎస్‌వో వేణుగోపాల్‌నుగానీ ఇంతవరకు ప్రశ్నించలేదు. అనుమానపు వేళ్లన్నీ వారిద్దరినీ చూపిస్తుంటే పోలీసులు వారిని ఎందుకు పిలిచి విచారించలేదు?  జగన్‌పై హత్యాయత్నం జరిగిన వీఐపీ లాంజ్‌లో సీసీ కెమెరాలు లేవని అధికారులు చెబుతున్నారు. కానీ, ఫ్యూజన్‌ ఫుడ్స్‌ మొత్తం సీసీ టీవీ నిఘాలోనే ఉంది. నిందితుడు ఉపయోగించిన కత్తిని వాటర్‌ బాటిల్, నాప్కిన్‌ చాటుగా తెచ్చాడని చెబుతున్నారు. మరి రెస్టారెంట్‌లోనే భద్రపరిచిన కత్తిని అక్కడే నాప్కిన్‌లో పెట్టి తీసుకువచ్చినప్పుడు సీసీ ఫుటేజీ ఉంటుంది. కానీ, పోలీసులు ఎందుకు ఫ్యూజన్‌ రెస్టారెంట్‌ జోలికి వెళ్లలేదు?  8.ఎన్‌వోసీ పోలీసుల సృష్టేనా?  విమానాశ్రయంలో పనిచేసే వ్యక్తులకు ఎలాంటి నేరచరిత్ర లేదని నిర్ధారిస్తూ ఇచ్చిన ఎన్‌వోసీ తప్పనిసరిగా ఉండాలి. దాని ఆధారంగానే విమానాశ్రయంలో ప్రవేశానికి ఏఈపీ జారీచేస్తారు. నిందితుడు శ్రీనివాసరావు ప్రతిపక్ష నేత జగన్‌పై హత్యాయత్నం చేసిన వెంటనే అందరి మదిలో మెదిలిన ప్రశ్న. ‘అతనికి ఎన్‌వోసీ ఎవరిచ్చారు? ఎలా ఇచ్చారు’? అని. అందులోనూ శ్రీనివాసరావుపై అతని స్వస్థలంలో ఓ క్రిమినల్‌  కేసు నమోదై ఉంది. మరి అతనికి ఎన్‌వోసీ ఎలా ఇచ్చారన్నది కీలకంగా మారింది. హత్యయత్నం కేసులో కుట్ర కోణాన్ని కప్పిపుచ్చేందుకు ప్రభుత్వ పెద్దలు పోలీసుల ద్వారా కట్టుకథకు తెరతీశారు. మొదట శ్రీనివాసరావుకు తూర్పుగోదావరి జిల్లా పోలీసులే ఎన్‌వోసీ ఇచ్చారని విశాఖ పోలీసులు చెప్పారు. తాము ఎన్‌వోసీ ఇవ్వలేదని ముమ్మడివరం ప్రస్తుత ఎస్సై, గతంలో పనిచేసిన ఎస్సై కూడా తెలిపారు. దాంతో విశాఖ పోలీసులు మరో కథ వినిపించారు. శ్రీనివాసరావు విశాఖలో నివసిస్తున్నందున ఆ పరిధిలోని విమానాశ్రయ పోలీస్‌స్టేషన్‌ నుంచి ఎన్‌వోసీ తీసుకున్నాడని విశాఖ పోలీస్‌ కమిషనర్‌ మహేష్‌చంద్ర లడ్హా చెప్పారు. కాగా, ఢిల్లీలోని బ్యూరో ఆఫ్‌ సివిల్‌ ఏవియేషన్‌ సెక్యూరిటీ డీజీ కుమార్‌ రాజేష్‌ చంద్ర వెల్లడించిన సమాచారంతో అసలు వాస్తవం బట్టబయలైంది. ఎంపీ విజయసాయిరెడ్డికి ఇచ్చిన లిఖితపూర్వక వివరణలో.. అసలు శ్రీనివాసరావు పేరిట తమకు ఎన్‌వోసీ రాలేదని ఆయన వెల్లడించడం గమనార్హం. విమానాశ్రయంలో ప్రవేశానికి అవసరమైన ఏరోడ్రోమ్‌ ఎంట్రీ పర్మిట్‌ కోసం శ్రీనివాసరావుగానీ, రెస్టారెంట్‌ యజమాని హర్షవర్ధన్‌ చౌదరిగానీ దరఖాస్తు చేయనేలేదని తెలిపారు. ఏఈపీ కోసం దరఖాస్తు చేయనప్పుడు ఎన్‌వోసీ సమర్పించాల్సిన అవసరమే ఉత్పన్నం కాదని కుండబద్దలు కొ ట్టారు. అంటే శ్రీనివాసరావు పేరిట (బీసీఏఎస్‌)కి ఎలాంటి ఎన్‌వోసీ సమర్పించలేదని స్పష్టమవుతోంది.   మరి శ్రీనివాసరావు పేరిట విశాఖ పోలీసులు ఎన్‌వోసీ ఇచ్చారని పోలీస్‌ కమిషనర్‌ చెప్పడం వెనుక లోగుట్టు ఏమిటి?  ఈ హత్యాయత్నం వెనుక ఎవరి పాత్రను కప్పిపుచ్చేందుకు పోలీసులు ఈ కట్టుకథ వినిపించారు? ఈ ప్రశ్నలకు పోలీసులు సమాధానం చెప్పకపోవడం వైఎస్‌ జగన్‌పై  హత్యాయత్నం వెనుక ప్రభుత్వ పెద్దల పాత్రను చెప్పకనే చెబుతోంది. 9.సీసీ కెమెరాలు ఆఫ్‌.. కుట్ర ఆన్‌..   ప్రతిపక్ష నేత వైఎస్‌ జగన్‌ పాదయాత్ర ఉత్తరాంధ్రలోకి ప్రవేశించగానే సూత్రదారులు, పాత్రధారులు తమ కుట్ర కార్యాచరణను వేగవంతం చేశారు. ఆయన హత్యకు కార్యస్థలిగా ఎంపిక చేసుకున్న విశాఖ విమానాశ్రయంలో సీసీ కెమెరాలు పనిచేయకుండా ఆపేశారు. వైఎస్‌ జగన్‌పై హత్యాయత్నం కేసు హైకోర్టులో విచారణ సందర్భంగా విమానాశ్రయంలో మూణ్ణెళ్లుగా సీసీ కెమెరాల ఫుటేజీలేదని సిట్‌ పోలీసులే చెప్పారు. అంటే ఆగస్టు నుంచి సీసీ కెమెరాలు పనిచేయడంలేదని స్పష్టమైంది. వైఎస్‌ జగన్‌ పాదయాత్ర 2018, ఆగస్టు 14న విశాఖ జిల్లాలో ప్రవేశించింది. అప్పటి నుంచి ఉత్తరాంధ్రలో పాదయాత్ర సందర్భంగా ఆయన ప్రతివారం విశాఖ విమానాశ్రయం నుంచే హైదరాబాద్‌కు రాకపోకలు సాగించాలి. దాంతో ఆయన్ని విమానాశ్రయంలో అంతమొందించాలన్న కుట్రకు ముందస్తు వ్యూహంలో భాగంగానే సీసీ కెమెరాలు ఆఫ్‌ చేశారు. సీసీ కెమెరాలు పనిచేసి ఉంటే జగన్‌పై హత్యాయత్నం కుట్ర ఆధారసహితంగా బట్టబయలయ్యేదని ఓ పోలీసు ఉన్నతాధికారి చెప్పారు. హత్యాయత్నం చేసిన అక్టోబరు 25న నిందితుడు శ్రీనివాసరావు విమానాశ్రయంలో ప్రవేశం, అతనికి సహకరించిన మరికొందరి చర్యలు, వీఐపీ లాంజ్‌ వద్ద నిందితుడి ప్రవర్తన.. అదను చూసి కత్తిదూయడం, ఆ వెంటనే అతనికి సహకరించిన వారి స్పందన మొదలైన దృశ్యాలన్నీ కూడా సీసీ కెమెరాల్లో రికార్డయ్యేవి. ఈ కుట్రకు సహకరించిన వారేవరో తెలిసేది. వారిని విచారిస్తే ప్రభుత్వ పెద్దల బండారం బహిర్గతమయ్యేది. ఇది ఊహించే ప్రభుత్వ పెద్దలు సీసీ కెమెరాలు పనిచేయకుండా చేశారని పోలీసు ఉన్నతాధికారి చెప్పడం ప్రాధాన్యం సంతరించుకుంది.   ప్రశ్న : పక్కా పన్నాగంతో సీసీ కెమెరాలు ఆఫ్‌ చేయడం ఎవరికి సాధ్యం?  సీసీ కెమెరాలు 3 నెలలుగా పనిచేయకున్నా భద్రతా అధికారులు ఎందుకు పట్టించుకోలేదు? దీని వెనుకున్న పెద్దలెవరు? సహకరించిన అధికారులెవరు?  రెస్టారెంట్‌ యజమాని, టీడీపీ నేత హర్షవర్ధన్‌తో విమానాశ్రయ భద్రతా అధికారి వేణుగోపాల్‌కు ఉన్న సాన్నిహిత్యం ప్రభావమెంత?  10.హత్యాయత్నం గురితప్పింది.. ‘సిట్‌’ విచారణ దారి తప్పింది  కుట్ర పన్ని ఏడాదిన్నరగా ఎదురుచూస్తున్న రోజు రానే వచ్చింది. ఎప్పటి లాగే ఆ గురువారం (అక్టోబరు 25న) కూడా విశాఖ విమానాశ్రయానికి వచ్చిన జగన్‌.. వీఐపీ లాంజ్‌లో ఉన్నప్పుడు శ్రీనివాసరావు వచ్చి పదునైన కత్తిని జగన్‌ గొంతులోకి దించే లక్ష్యంతో పాశవిక దాడికి పాల్పడ్డారు. కత్తి గొంతులో దిగి ఉంటే.. ప్రాణం దక్కడం అనుమానమే. అదృష్టవశాత్తూ..జగన్‌ పక్కకు వంగడంతో గొంతులో దిగాల్సిన కత్తి గురితప్పి భుజంలో దిగింది. దీంతో జగన్‌ ప్రాణాపాయం నుంచి తప్పించుకున్నారు. కత్తిపోటు గురితప్పడంతో.. కుట్ర సూత్రధారుల బండారం బయటకు రాకుండా ‘సిట్‌’ దర్యాప్తును ప్రభుత్వ పెద్దలు దారి తప్పించారు. ఈ విచారణ దారి తప్పడంతో ఎన్నో అనుమానాలు ప్రజల్లో నెలకొన్నాయి.  పోలీసు ఉన్నతాధికారులు, విమానాశ్రయ అధికారులకూ ఎన్నో సందేహాలు ఏర్పడ్డాయి. వారికి ఉన్న అనుమానాలను ‘సాక్షి’ బృందంతో పంచుకున్నారు. వారి అనుమానాలు ఇవీ..  డీజీపీ, మంత్రులు, సీఎం మాటలకు అర్థాలే వేరులే..  ప్రతిపక్ష నేత వైఎస్‌ జగన్‌మోహన్‌రెడ్డి మీద విశాఖపట్నం విమానాశ్రయంలో అక్టోబరు 25 గురువారం మధ్యాహ్నం 12.45–12.48 మధ్య హత్యాయత్నం జరిగింది. ప్రతిపక్ష నేతను హతమార్చడానికి పాశవిక దాడి జరిగితే తక్షణ విచారణ చేపట్టి నిగ్గుతేల్చాల్సిన ప్రభుత్వం అందుకు భిన్నంగా వ్యవహరించింది. హత్యాయత్నం జరిగిన తర్వాత నిందితుడిని సీఐఎస్‌ఎఫ్‌ తన కస్టడీలోకి తీసుకుంది.  ప్రశ్న–1: వైఎస్‌ జగన్‌ మీద హత్యాయత్నం జరిగిన 40 నిమిషాల్లోనే (అప్పటికి నిందితుడు సీఐఎస్‌ఎఫ్‌ కస్టడీలో ఉన్నాడు. సీఎస్‌ఐఎఫ్‌ అధికారులు పోలీసులకు ఫిర్యాదు చేయలేదు. ఎఫ్‌ఐఆర్‌ నమోదు కాలేదు. నిందితుడిని విచారించలేదు) మధ్యాహ్నం 1.30కు డీజీపీ మీడియాతో మాట్లాడారు. నిందితుడు వైఎస్సార్‌సీపీ సానుభూతిపరుడు, జగన్‌ అభిమాని అని చెబుతూ అతని పేరు, ఊరు ప్రకటించారు. ప్రచారం కోసమే హత్యాయత్నం చేశాడని వెల్లడించారు. పోలీసుల కస్టడీలోకి రాకముందే నిందితుడి వివరాలు ఎలా వెల్లడించగలిగారు? విచారణ మొదలుపెట్టకముందే హత్యాయత్నం వెనక ఉద్దేశాన్ని ఎలా చెప్పారు? డీజీపీ ప్రెస్‌మీట్‌లో చెప్పిన విషయాలకు ఆధారమేమిటి?  ప్రశ్న–2: డజీపీ మీడియా సమావేశం ముగిసిన వెంటనే.. మ.2 గంటలకు ముగ్గురు మంత్రులు లైవ్‌లోకి వచ్చారు. నిందితుడి వివరాలతో పాటు జగన్‌ బొమ్మతో ఉన్న ఫ్లెక్సీని మొబైల్‌లో చూపించారు. హత్యాయత్నానికి 10 నెలల ముందు ఎక్కడో మారుమూల గ్రామంలో వేసినట్లుగా చెబుతున్న ఫ్లెక్సీ మంత్రులకు ఎలా వచ్చింది? నిందితుడిని పోలీస్‌ కస్టడీలోకి తీసుకోకముందే.. విచారణ ప్రారంభం కాకముందే నిందితుడి పేరు తప్ప మరే వివరాలు వెల్లడించకముందే నిందితుడి గ్రామం, ఫ్లెక్సీ, ఏ పార్టీ అనే విషయాలు మంత్రులు ఎలా చెప్పగలిగారు? నిందితుడు వెల్లడించకముందే ప్రభుత్వంలోని పెద్దలకు తెలిసిపోవడం ఎలా సాధ్యం?  మంత్రులు అచ్చెన్నాయుడు, ఆదినారాయణరెడ్డి, నక్కా ఆనందబాబు తదితరులు మీడియా ముందుకు వచ్చారు. హత్యాయత్నం జరిగిన ప్రాంతం కాని, హత్యాయత్నానికి ఒడిగట్టిన నిందితుడు శ్రీనివాసరావు స్వగ్రామంగాని ఆ మంత్రులకు చెందిన జిల్లాల్లో లేవు. వారి శాఖలకూ సంబంధంలేదు. పార్టీ అధిష్టానం ఆదేశిస్తే మీడియా ముందుకు వచ్చి మాట్లాడారా? వారికి సమాచారం ఎవరు చెప్పారు?  ప్రశ్న–3: సా.4 గంటలు దాటిన తర్వాత సీఐఎస్‌ఎఫ్‌ అసిస్టెంట్‌ కమాండర్‌ పోలీసులకు ఫిర్యాదు చేశారు. 4.30 గంటలకు ఎఫ్‌ఐఆర్‌ నమోదైంది. సీఆర్‌పీసీ–156 ప్రకారం.. ఎఫ్‌ఐఆర్‌ రిజిస్టర్‌ అయిన తర్వాత విచారణకు అవకాశం ఉంటుంది. సా.4.30 గంటల వరకు నిందితుడిని తమ కస్టడీకి ఇవ్వలేదని సీఎం చంద్రబాబునాయుడు స్వయంగా ప్రకటించారు. నిందితుడిని 4.30 తర్వాత కస్టడీలోకి తీసుకున్నామని ఆయనే చెబితే... అంతకు 3 గంటల ముందే డీజీపీ, మంత్రులు అన్ని వివరాలు ఎలా చెప్పగలిగారు?  ప్రశ్న–4: సీఐఎస్‌ఎఫ్‌ అసిస్టెంట్‌ కమాండెంట్‌ చేసిన ఫిర్యాదులో నిందితుడిది ఏ ఊరనే విషయంలేదు. వారి కస్టడీలో ఉన్న నిందితుడి వివరాలు సీఐఎస్‌ఎఫ్‌కు తెలియలేదు. మరి ప్రభుత్వ పెద్దలకు ఎలా తెలిశాయి?  హత్యాయత్నంపై టీడీపీ నేతలకు ముందే సమాచారం?  వైఎస్‌ జగన్‌పై జనుపల్లి శ్రీనివాసరావు హత్యాయత్నానికి పాల్పడిన వెంటనే ఠానేలంకలోని నిందితుడి ఇంటి ముంగిట స్థానిక టీడీపీ నేతలు వచ్చి వాలిపోయారు. హత్యాయత్నం జరిగిన (అక్టోబరు 25వ తేదీ, గురువారం) వెంటనే టీవీల్లో చూసి అదే గ్రామానికి చెందిన జనుపల్లి ఇంటిపేరు ఉన్న వారిలో చాలామంది.. ఈ శ్రీనివాస్‌ ఎవరు అని బంధువులకు ఫోన్లుచేసి ఆరా తీస్తుండగానే తమకు ముందుగానే తెలిసినట్లుగా టీడీపీ నేతలు నిందితుడు ఇంటి వద్ద వాలడం.. నిందితుడికి అధికార పార్టీ పెద్దలతో ఉన్న సంబంధాలను స్పష్టంచేస్తోందని గ్రామస్తులు పేర్కొన్నారు. ప్రతిపక్ష నేతపై హత్యాయత్నం జరిగిన వెంటనే నిందితుడు శ్రీనివాసరావు ఇంటి వద్దకు చేరిన టీడీపీ నాయకులు (ఫైల్‌)   మీడియా కంటే ముందుగానే అక్కడకు చేరుకున్న టీడీపీ నేతలు.. శ్రీనివాసరావు  జగన్‌ అభిమాని అంటూ వారే మీడియా ముందుకు వచ్చి చెప్పారు. స్థానికులు ఎవరైనా మాట్లాడాలని మీడియా ప్రతినిధులు కోరగానే.. స్థానిక ఎమ్మెల్యే అనుచరుడు, కేశవస్వామి దేవస్థానం చైర్మన్‌ నడింపల్లి శ్రీనివాసరాజు, ఠానేలంక గ్రామ టీడీపీ అధ్యక్షుడు కొప్పిశెట్టి వెంకటేశ్వరావు, జన్మభూమి కమిటీ సభ్యుడు ఇసుకపట్ల వెంకటేశ్వరరావు, టీడీపీ నాయకుడు ఇసుకపట్ల ఈశ్వర్‌కుమార్‌లు ముందుకు వచ్చారు. వీరితో పాటు టీడీపీ నేత ఇసుకపట్ల వెంకటేశ్వరావుతో పాటు పలువురు కార్యకర్తలు  మీడియా ముందు నిలబడి వారే ఇరుగుపొరుగు వ్యక్తుల్లా మాట్లాడారు. టీడీపీ నేతలు మీడియాతో మాట్లాడుతూ.. శ్రీనివాసరావు జగన్‌ అభిమాని అంటూ పదేపదే చెప్పడం కనిపించింది. శ్రీనివాసరావు కుటుంబీకుల కంటే టీడీపీ నేతలే మీడియా  ముందుండటం కొసమెరుపు. వారన్నట్టుగానే శ్రీనివాసరావు వైఎస్సార్‌సీపీ మనిషి అయితే టీడీపీ నేతలు భుజాలు తడుముకొంటున్నట్లుగా అక్కడకు ఎందుకు వచ్చారు?  జగన్‌ మీద హత్యాయత్నానికి తెగబడింది వైఎస్సార్‌సీపీ అభిమాని అని టీడీపీ ప్రచారం చేస్తోంది. మరి నిందితుడి ఇంటికి అంత వేగంగా టీడీపీ నేతలు వచ్చి వాలడం ఎందుకు? వారికేం సంబంధం ఉందని వచ్చారు?  ప్రచారం కోసమే వైఎస్సార్‌సీపీ అభిమాని జగన్‌ మీద దాడిచేశారని డీజీపీ ప్రకటించారు. దాన్ని నిజమని భావిస్తే.. టీడీపీ నేతలు నిందితుడి ఇంటికి వెళ్లరు. వెళ్లాల్సిన అవసరమూలేదు. కానీ, అందుకు భిన్నంగా టీడీపీ నేతలు అక్కడకు వెళ్లడం, నిందితుడి కుటుంబం వైఎస్సార్‌సీపీ అని పదేపదే మీడియాకు చెప్పడానికి ప్రయత్నించడం వెనక ఉద్దేశాలను వెలికి తీయడానికి సిట్‌ బృందం ఎందుకు ప్రయత్నించలేదు?  నిందితుడు ఇంటికి వెళ్లమని వారికి ఎవరి నుంచి ఆదేశాలు అందాయి? టీడీపీ పెద్దల్లో ఎవరు వారికి సూచించారు? ఈ అంశాన్ని నిగ్గు తేల్చడానికి వారి కాల్‌డేటా పరిశీలిస్తే ఇట్టే తేలిపోతుంది. కానీ, సిట్‌ ఈ దిశగా కనీస ప్రయత్నం కూడా చేయలేదు?  వాళ్ల కుటుంబం టీడీపీ అని అంటుంటారు  జగన్‌ పార్టీ వాళ్లకు ఇంటి లోన్లు మంజూరు చేయలేదు. మా బంధువుకు ఇవ్వలేదు. ‘జనుపల్లి’ వాళ్లలో టీడీపీ వాళ్లు ఉన్నారు. వాళ్లకు లోన్లు వచ్చాయి. వాళ్ల కుటుంబం కూడా టీడీపీ అని అంటుంటారు. వాళ్ల చిన్నాన్న నాగేశ్వరరావు టీడీపీయే. మా అబ్బాయి వెంకటేష్‌ కారు డ్రైవర్‌గా పనిచేస్తున్నాడు. ఏడాదిన్నర క్రితం పెళ్లిలో మా అబ్బాయి వెంకటేష్‌ను శ్రీనివాస్, అతని స్నేహితులు కలిసి కొట్టారు. అంతకు పదిహేను రోజుల క్రితం మా అబ్బాయి పడిపోతే చెయ్యి విరిగిపోయింది. రాజేష్‌ అన్న కుర్రాడు వచ్చి మీ అబ్బాయిని కొట్టిపడేశామని చెప్పాడు. పెద్దల్లో పెట్టినా కూడా ఎవరూ స్పందించకపోవడంతో పోలీస్‌స్టేషన్‌లో కేసు పెట్టాం. గోపాలం, జనుపల్లి నాగేశ్వరరావు అనేవాళ్లు వచ్చి కేసు రాజీ చేసుకోవాలని కోరారు. కానీ, కేసు వెనక్కి తీసుకోలేదు. వాళ్ల చిన్నాన్న గ్రామ పంచాయితీ వైస్‌ ప్రెసిడెంట్‌. టీడీపీ నేత. వాళ్ల కుటుంబం కూడా టీడీపీ అని అంటుంటారు.   – కాగిత వెంకటేష్‌ తల్లి సీతారత్నం, శ్రీనివాసరావుపై గతంలో ఫిర్యాదు చేసిన వ్యక్తి  కేస్‌ క్లోజ్‌ అంటున్నారు  కేసులు కొట్టేశారని చెప్పుకుంటున్నారు. ప్లీడర్లు వస్తున్నారు. బెయిల్‌ ఇప్పిస్తామని వీళ్లని అడుగుతున్నారట.   విమానాశ్రయంలో ఉద్యోగం కోసం ఎలా వెళ్లాడో మాకు తేలీదు.  ఎయిర్‌పోర్టులో ఉద్యోగం చేస్తున్నాడని టీవీలో చూసిన తర్వాతే మాకు తెలిసింది.   సర్వశిక్షాభియాన్‌లో ఔట్‌ సోర్సింగ్‌ టీచర్‌ పోస్టు కోసం కాకినాడ వెళ్తే.. నా రెజ్యూమ్‌లో ఇంటి పేరు జనుపల్లి అని చూసి ఆ అబ్బాయి (శ్రీనివాస్‌) మీకు ఏమవుతాడు అని అడుగుతున్నారు. మీకు ఉద్యోగాలు రావు అంటున్నారు.  –టీడీపీ ఉపసర్పంచ్‌ నాగేశ్వరరావు (నిందితుడు బాబాయి) కుమార్తె నాగమణి వాడివల్ల మూడు జీవితాలు నాశనమవుతున్నాయి   ఆ దుర్మార్గుడు మమ్మల్ని ఇరికించాడు. మా కూతురు వాళ్ల ఇంటిలో సెల్‌ఫోన్‌ చార్జింగ్‌ పెడితే దానితో ఎవరికో చేశాడు. పోలీసులు నా కూతురుకు ఫోన్‌చేసి రావాలన్నారు. ఆ ఫోన్‌లోని సిమ్‌ పోలీసులు తీసుకున్నారు. వాడు ఫోన్‌ వాడటంవల్ల మూడు జీవితాలు నాశనమవుతున్నాయని బాధపడుతున్నాం. ఎంతో జాగ్రత్తగా ఉండేవాళ్లం. కానీ, వీడివల్ల అంతా ఏడుస్తున్నాం. నా కొడుకైనా.. ప్రాణం తీసేసినా తప్పులేదు. సామాన్యమైన పని చేయలేదు.   – శ్రీనివాస్‌ పిన్ని (పక్క ఇల్లు)  నిందితుడు స్నేహితుడు ఉన్నట్లుండి ధనవంతుడయ్యారు  నిందితుడు శ్రీనివాసరావు నాలుగో అన్నకు తోడల్లుడు, తనకు స్నేహితుడు అయిన ఈశ్వరరావు గత ఏడాది కాలంలో లక్షాధికారి అయ్యాడు. ట్రాక్టర్, టాటా ఏస్, ఇండికా కారు, పల్సర్‌ బైక్‌ కొనుగోలు చేయడంతో పాటు శానపల్లిలంక (ఈశ్వరరావు సొంత గ్రామం)లో హైస్కూల్‌ ప్రహరీ గోడ కాంట్రాక్టును స్థానిక ఎమ్మెల్యే సిఫార్సులో సొంతం చేసుకున్నాడు. ఈ కాంట్రాక్టు విలువ రూ.14 లక్షలు. ఊర్లో బెల్ట్‌షాప్‌ నడుపుతూ పొట్టపోసుకునే వ్యక్తి హఠాత్తుగా అన్ని వాహనాలు కొనగడం, పి.గన్నవరం ఎమ్మెల్యే పులిపర్తి నారాయణమూర్తి సిఫార్సుతో రూ.14 లక్షల విలువైన కాంట్రాక్టు పొందడం సాధారణ విషయం కాదు. నిందితుడికి టీడీపీ నేతలతో ఉన్న సంబంధాలే అందుకు కారణం అని గ్రామస్తుల అనుమానం. శ్రీనివాసరావు బినామీగా ఈశ్వరరావు వ్యవహరించాడని అంటున్నారు.   శ్రీనివాస్‌ అన్న సుబ్బరాజుది టీడీపీ అంటారు  ‘జనుపల్లి శ్రీనివాస్‌ అన్నయ్య సుబ్బరాజుది టీడీపీ అంటారు. నాతో పాటు మరో ముగ్గురు స్నేహితులు ప్రభాకర్, చిట్టి, వెంకట దుర్గాప్రసాద్‌లను సిట్‌ అధికారులు ముమ్మిడివరం పిలిచి విచారించారు. స్నేహితులమని మమ్మల్ని పిలిచారు. శ్రీనివాస్‌ ఎటువంటి వాడు, అతని మనస్తత్వం ఎటువంటిది. ఎలా ఉండేవాడని అడిగారు. ఊళ్లో ఎక్కువగా ఉండేవాడు కాదు. రెండు నెలల క్రితం కనిపించాడు. ఒరేయ్‌ అంటే ఒరేయ్‌ అనుకునే వాళ్లం. రావడం, వెళ్లిపోవడం తప్ప ఎక్కువ రోజులు ఇక్కడ ఉండేవాడు కాదు.       – మెల్లం రాజు, సిట్‌ విచారణ ఎదుర్కొన్న శ్రీనివాసరావు స్నేహితుడు  పిల్లల్ని వీధిలో పెట్టాడు.. అభిమానైతే పొడిచేస్తాడా?  ఇంట్లో పిల్లలందరినీ వీధిలో పెట్టాడు. అభిమానైతే కత్తితో పొడిచేస్తాడా? ఏదో జరిగింది? వెనకెవరో ఉండి ఉంటారు. ఫ్లెక్సీలు ఎవరు బాగా వేస్తారని మా అబ్బాయి గిడ్డి చైతన్యను అడిగినప్పుడు పి.గన్నవరంలో తనకు తెలిసిన ఫ్లెక్సీలు తయారుచేసే షాపు ఒకటి ఉందని.. దాని అడ్రసు ఇచ్చాడు. పి.గన్నవరంలోని ఫ్లెక్సీల షాపు అతనికి మా అబ్బాయి ఫోన్‌చేసి శ్రీనివాసరావు వస్తాడు.. ఫ్లెక్సీ వేసిపెట్టు అని మాత్రమే చెప్పాడు. శ్రీనివాసరావుకు, మా అబ్బాయికి అంత స్నేహం లేదు. ఫ్లెక్సీ షాపు గురించి వివరాలు అడగడం.. అది శ్రీనివాసరావుకు చెప్పడం.. ఫ్లెక్సీ షాపు వాడు ‘ఫ్రూఫ్‌ ఫ్లెక్సీ’ని మా అబ్బాయి సెల్‌కు పంపించడంతో మా వాడు పోలీసుల విచారణ ఎదుర్కోవలసి వచ్చింది.      – సిట్‌ విచారణ ఎదుర్కొన్న గిడ్డి చైతన్య తల్లి  శ్రీనివాస్‌ ఫోన్‌లో నెంబర్లున్న యువకులను విచారించారు  జగన్‌గారిపై హత్యాయత్నం చేసిన జనుపల్లి శ్రీనివాసరావు ఇంటి పేరుతో ఉన్న తామంతా బంధువులేమే. అయితే, శ్రీనివాసరావు ఫోన్‌లో ఫీడ్‌ అయిన నెంబర్ల ఆధారంగా వాడి వయస్సుతో సమానంగా ఉన్న తమ ఊరు ముఖ్యంగా పెదపేట యువకులను సిట్‌ పోలీసులు విచారించారు.   – జనుపల్లి సతీష్, సిట్‌ విచారణ ఎదుర్కొన్న శ్రీనివాస్‌ స్నేహితుడు

సాక్షి, అమరావతి: విశాఖపట్నం విమానా శ్రయంలో గత ఏడాది అక్టోబర్‌ 25న ఏపీ ప్రతిపక్ష నేత వైఎస్‌ జగన్‌పై జరిగిన హత్యాయత్నం ఘటనపై దర్యాప్తును జాతీయ దర్యాప్తు సంస్థ (ఎన్‌ఐఏ)కు అప్పగిస్తూ కేంద్ర హోంశాఖ నిర్ణయం తీసుకుంది. ఈ ఆదేశాల మేరకు రంగంలోకి దిగిన ఎన్‌ఐఏ హత్యాయత్నం ఘటనకు సంబంధించి ఈనెల 1వతేదీన ఎఫ్‌ఐఆర్‌ను కూడా నమోదు చేసింది. కేంద్రం తరఫున అసిస్టెంట్‌ సొలిసిటర్‌ జనరల్‌ (ఏఎస్‌జీ) కె.లక్ష్మణ్‌ శుక్రవారం  ఈ వివరాలను ఆంధ్రప్రదేశ్‌ హైకోర్టుకు సమర్పించారు. వీటిని పరిశీలించిన హైకోర్టు.. పిటిషనర్లు కోరిన విధంగా కేంద్రం ఎన్‌ఐఏ దర్యాప్తునకు ఆదేశించిన నేపథ్యంలో ఈ వ్యాజ్యాలపై ఇక విచారించేందుకు ఏమీ లేదని స్పష్టం చేసింది. కేంద్రం సమర్పించిన వివరాలను పరిగణనలోకి తీసుకుంటూ ఈ వ్యాజ్యాలను మూసివేస్తున్నట్లు తెలిపింది. ఈ మేరకు న్యాయమూర్తులు జస్టిస్‌ ఎస్‌.వి.భట్, జస్టిస్‌ కొంగర విజయలక్ష్మీలతో కూడిన ధర్మాసనం ఉత్తర్వులు జారీ చేసింది. కేంద్రం జారీ చేసిన ఉత్తర్వుల ఆధారంగా ఎన్‌ఐఏ ఇప్పటికే ఎఫ్‌ఐఆర్‌ నమోదు చేసిన నేపథ్యంలో జగన్‌పై హత్యాయత్నం ఘటనపై ప్రత్యేక దర్యాప్తు బృందం (సిట్‌) తన దర్యాప్తును నిలిపివేయాల్సి ఉంటుంది. ఈ కేసులో ఇప్పటివరకు సేకరించిన ఆధారాలతో కేసు డాక్యుమెంట్లను, రికార్డులన్నింటినీ చట్ట నిబంధనల మేరకు ఎన్‌ఐఏకు అప్పగించాల్సి ఉంటుంది.  వైఎస్‌ జగన్‌ తదితరుల అభ్యర్థనలివీ... తనపై జరిగిన హత్యాయత్నం ఘటన చట్ట వ్యతిరేక కార్యకలాపాల నియంత్రణ నిర్వచన పరిధిలోకే వస్తుందని, పౌర విమానయాన భద్రతా చట్ట నిబంధ నల ప్రకారం ఇలాంటి ఘటనలపై దర్యాప్తు చేసే అధికార పరిధి ఎన్‌ఐఏకు ఉందని, అందువల్ల సమగ్ర దర్యాప్తు జరిపేలా కేంద్ర హోంశాఖను ఆదేశించాలని కోరుతూ వైఎస్‌ జగన్‌ హైకోర్టును ఆశ్రయించడం తెలిసిందే. మంగళగిరి ఎమ్మెల్యే ఆళ్ల రామకృష్ణారెడ్డి సైతం ఇదే అభ్యర్థనతో ప్రజా ప్రయోజన వ్యాజ్యం (పిల్‌) దాఖలు చేశారు. జగన్‌పై జరిగిన హత్యాయత్నం ఘటనపై దర్యాప్తును పక్కదారి పట్టించేలా అటు ముఖ్యమంత్రి, ఇటు డీజీపీ ఇద్దరూ వ్యాఖ్యలు చేసిన నేపథ్యంలో ఈ కేసు విచారణ బాధ్యతలను రాష్ట్ర ప్రభుత్వ నియంత్రణలో లేని స్వతంత్ర సంస్థకు అప్పగించేలా ఆదేశించాలంటూ వైఎస్సార్‌ సీపీ తరఫున పార్టీ రాజకీయ వ్యవహారాల కమిటీ సభ్యుడు వైవీ సుబ్బారెడ్డి కూడా పిటిషన్‌ దాఖలు చేశారు.  ఉమ్మడి హైకోర్టు ఆదేశమిదీ... ఈ వ్యాజ్యాలన్నింటిపై ఉమ్మడి హైకోర్టులో విచారణ జరిగింది. ఈ సందర్భంగా పౌర విమానయాన భద్రతా చట్టం, ఎన్‌ఐఏ చట్ట నిబంధనలను పరిశీలించిన ఉమ్మడి హైకోర్టు ధర్మాసనం.. వైఎస్‌ జగన్‌పై హత్యాయత్నం ఘటనఎన్‌ఐఏ చట్టంలో పేర్కొన్న నేరాల కిందకు వస్తుందో రాదో వెల్లడించాలని డిసెంబర్‌ 14న కేంద్ర హోంశాఖను ఆదేశించింది. ఎన్‌ఐఏ దర్యాప్తునకు ఆదేశించే విషయంలో కేంద్ర ప్రభుత్వమేనని ధర్మాసనం స్పష్టం చేసింది. ఎన్‌ఐఏ దర్యాప్తునకు ఆదేశించే విషయంలో నిర్ణయం తీసుకుంటే ఆ వివరాలను తమ ముందుంచాలంటూ తదుపరి విచారణను జనవరి 4కి వాయిదా వేయడం తెలిసిందే.  విభజనతో ఏపీకి బదిలీ అయిన వ్యాజ్యాలు.. ఈలోపు ఉమ్మడి హైకోర్టు విభజన జరగడంతో ఈ వ్యాజ్యాలన్నీ ఆంధ్రప్రదేశ్‌ హైకోర్టుకు బదిలీ అయ్యాయి. శుక్రవారం వీటిపై జస్టిస్‌ ఎస్‌.వి.భట్‌ నేతృత్వంలోని ధర్మాసనం విచారణ జరిపింది. ఈ సందర్భంగా ఏఎస్‌జీ లక్ష్మణ్‌ వాదనలు వినిపిస్తూ వైఎస్‌ జగన్‌పై విశాఖ విమానాశ్రయంలో హత్యాయత్నం ఘటనపై దర్యాప్తు జరపాలని ఎన్‌ఐఏను ఆదేశిస్తూ కేంద్ర హోంశాఖ డిసెంబర్‌ 31న ఉత్తర్వులు జారీ చేసిందని తెలిపారు. వీటి ఆధారంగా ఎన్‌ఐఏ జనవరి 1వతేదీన ఎఫ్‌ఐఆర్‌ కూడా నమోదు చేసిందని చెప్పారు. కేంద్ర హోంశాఖ ఉత్తర్వులు, ఎన్‌ఐఏ నమోదు చేసిన ఎఫ్‌ఐఆర్‌ను ఆయన ధర్మాసనం ముందుంచారు.  కేంద్రం అధికార పరిధి దాటి ఉత్తర్వులిచ్చింది... ఈ సమయంలో రాష్ట్ర అడ్వకేట్‌ జనరల్‌ (ఏజీ) దమ్మాలపాటి శ్రీనివాస్‌ స్పందిస్తూ.. కేంద్ర ప్రభుత్వం తన అధికార పరిధిని దాటి ఈ ఉత్తర్వులు జారీ చేసిందన్నారు. ఈ ఉత్తర్వును సవాలు చేసే విషయంలో రాష్ట్ర ప్రభుత్వం నిర్ణయం తీసుకోవాల్సి ఉందన్నారు. దీనిపై ధర్మాసనం జోక్యం చేసుకుంటూ... ‘కేంద్ర ప్రభుత్వం ఇచ్చిన ఈ ఉత్తర్వులను సవాలు చేసే విషయంలో ఉన్న హక్కులను ఉపయోగించుకోవాలా లేదా అన్నది రాష్ట్ర ప్రభుత్వ ఇష్టం. ఈ వ్యాజ్యాలన్నింటిలో ప్రధాన అభ్యర్థన దర్యాప్తును ఎన్‌ఐఏకి అప్పగించాలనే. ఇప్పుడు కేంద్రం ఈ కేసును ఎన్‌ఐఏకి అప్పగించింది. కేంద్రం ఉత్తర్వుల మేరకు ఎన్‌ఐఏ ఎఫ్‌ఐఆర్‌ను కూడా నమోదు చేసింది. కాబట్టి ఈ వ్యాజ్యాల్లో ఇకపై విచారించేందుకు ఏమీ ఉండదు. అందువల్ల వాటిని మూసేస్తున్నాం’ అని స్పష్టం చేసింది.  సెక్షన్‌ 6లో స్పష్టంగా ఉంది..  ఈ సమయంలో వైఎస్‌ జగన్‌ తరఫు న్యాయవాది నవీన్‌కుమార్‌ స్పందిస్తూ.. ఈ వ్యవహారంలో ఇకపై దర్యాప్తు చేయకుండా స్థానిక పోలీసులను నియంత్రిస్తూ, ఎన్‌ఐఏకి దర్యాప్తును అప్పగించేలా ఆదేశించాలని ధర్మాసనాన్ని అభ్యర్థించారు. దీనికి ధర్మాసనం బదులిస్తూ.. ఎన్‌ఐఏ చట్టం సెక్షన్‌ 6ని ఒకసారి చదవాలని నవీన్‌కు సూచించింది. ఈ సెక్షన్‌ ప్రకారం రాష్ట్ర ప్రభుత్వం లేదా రాష్ట్ర ప్రభుత్వానికి చెందిన ఏ పోలీసు అధికారి కూడా దర్యాప్తు విషయంలో ముందుకెళ్లడానికి వీల్లేదని, వెంటనే కేసుకు సంబంధించిన డాక్యుమెంట్లు, రికార్డులను ఎన్‌ఐఏకు అప్పగించాల్సి ఉంటుందని ధర్మాసనం స్పష్టం చేసింది. నిబంధనలు ఇంత స్పష్టంగా ఉన్నప్పుడు ఈ విషయంలో తమ నుంచి తదుపరి ఆదేశాలు అవసరం లేదని పేర్కొంది.  ఉత్తర్వుల్లో అన్ని విషయాలను ప్రస్తావించిన ధర్మాసనం... ఆ వెంటనే హైకోర్టు ధర్మాసనం ఉత్తర్వులను వెలువరిస్తూ కేంద్రం ఇచ్చిన ఆదేశాలు, అందుకు అనుగుణంగా ఎన్‌ఐఏ నమోదు చేసిన ఎఫ్‌ఐఆర్‌ గురించి ప్రస్తావించింది. కేంద్రం ఆ ఉత్తర్వులను రాష్ట్ర ప్రభుత్వానికి పంపిన విషయాన్ని కూడా ప్రస్తావించింది. అంతేకాకుండా అడ్వకేట్‌ జనరల్‌ చెప్పిన విషయాలు, జగన్‌ తరపు న్యాయవాది నవీన్‌ ప్రస్తావించిన అంశాలను కూడా అందులో పొందుపరిచింది. పిటిషనర్ల అభ్యర్థన మేరకు కేంద్రం నిర్ణయం తీసుకున్న నేపథ్యంలో ఈ వ్యాజ్యాల్లో తదుపరి విచారణ అవసరం లేదని, అందువల్ల వాటిని మూసివేస్తున్నట్లు ఆ ఉత్తర్వుల్లో పేర్కొంది.  శిక్షార్హమైన నేరమే  సాక్షి, న్యూఢిల్లీ: ఏపీ ప్రతిపక్ష నేత వైఎస్‌ జగన్‌మోహన్‌రెడ్డిపై విశాఖ విమానాశ్రయంలో జరిగిన హత్యాయత్నం కేసు విచారణను జాతీయ దర్యాప్తు సంస్థ (ఎన్‌ఐఏ)కి అప్పగిస్తూ కేంద్ర హోంశాఖ పరిధిలోని కౌంటర్‌ టెర్రరిజం అండ్‌ కౌంటర్‌ రాడికలైజేషన్‌ డివిజన్‌ (సీటీసీఆర్‌) డిసెంబరు 31న ఉత్తర్వులు జారీ చేసింది. ‘వైఎస్‌ జగన్‌మోహన్‌రెడ్డిపై హత్యాయత్నం ఘటనకు సంబంధించి విశాఖ ఎయిర్‌పోర్టు పోలీస్‌ స్టేషన్‌లో గత ఏడాది అక్టోబర్‌ 25వ తేదీన ఐపీసీ 307 సెక్షన్‌ కింద నమోదైన ఎఫ్‌ఐఆర్‌పై కేంద్ర ప్రభుత్వానికి సమాచారం అందింది. ఈ ఘటన పౌర విమానయాన చట్టం 1982 సెక్షన్‌ 3 ఏ (1)(ఏ) ప్రకారం శిక్షార్హమైన నేరం. జాతీయ దర్యాప్తు సంస్థ చట్టం 2008 షెడ్యూల్‌ ప్రకారం కూడా నేరమే. ఘటన తీవ్రత దృష్ట్యా దీనిపై ఎన్‌ఐఏ దర్యాప్తు జరపాల్సిన అవసరం ఉంది. ఎన్‌ఐఏ చట్టం 2008 సెక్షన్‌–6 (సెక్షన్‌–8తోపాటు చదివినప్పుడు)లోని ఉప సెక్షన్‌ (5) ద్వారా సంక్రమించిన అధికారాలతో ఈ కేసును దర్యాప్తు చేయాల్సిందిగా ఎన్‌ఐఏను ఆదేశిస్తున్నాం’అని కేంద్ర హోంశాఖ తరపున ధర్మేందర్‌కుమార్‌ పేరుతో జారీ చేసిన ఉత్తర్వుల్లో పేర్కొన్నారు.  ‘సెక్షన్‌ 3 ఏ (1)(ఏ) ఏం చెబుతోంది?  సెక్షన్‌ 3 ఏ: ఎయిర్‌పోర్టు వద్ద నేరానికి పాల్పడటం.  (1): ఎవరైనా, ఏ ఎయిర్‌ పోర్టు వద్ద అయినా చట్ట వ్యతిరేకంగా, ఉద్దేశపూర్వకంగా, ఏదైనా సాధనాన్ని, ఆయుధాన్ని, పదార్థాన్ని వినియోగించడం.  (ఏ): హింసాత్మక చర్యకు పాల్పడడం ద్వారా తీవ్రంగా బాధించడం లేదా వ్యక్తి మృతి చెందేందుకు కారణం కావడం.  

సాక్షి, హైదరాబాద్‌: వైఎస్సార్‌ కాంగ్రెస్‌ పార్టీ అధ్యక్షులు వైఎస్‌ జగన్‌మోహన్‌ రెడ్డిపై వక్రమార్గంలో గెలవాలని ఏపీ సీఎం చంద్రబాబు నాయుడు కుట్రలు చేస్తున్నారని ఆ పార్టీ సీనియర్‌ నేత ఉమ్మారెడ్డి వెంకటేశ్వర్లు ధ్వజమెత్తారు. విశాఖపట్నం విమానాశ్రయంలో వైఎస్‌ జగన్‌పై జరిగిన దాడిని వక్రీకరించే ప్రయత్నం చేశారని ఆరోపించారు. అయితే ఈ హత్యాయత్నం కేసును కేంద్రం జాతీయ దర్యాప్తు సంస్థ ఎన్‌ఐఏకు అప్పగించడాన్ని స్వాగతిస్తున్నామన్నారు. శుక్రవారం వైఎస్సార్‌సీపీ కేంద్రకార్యాలయంలో జరిగిన మీడియా సమావేశంలో ఆయన మాట్లాడుతూ వైఎస్‌ జగన్‌పై జరిగిన హత్యాయత్నం కుట్రలో ఎవరున్నారో తేలాలన్నారు. హైకోర్టు ఇచ్చిన తీర్పు ప్రభుత్వానికి చెంపపెట్టు వంటిదని, ఇప్పటికైన ప్రభుత్వానికి కనివిప్పు కావాలన్నారు. వాస్తవాలు బయటకి వస్తే అసలు కుట్ర దారులు ఎవరో తెలస్తుందన్నారు.   ప్రతిపక్షనేతపై దాడిని ప్రజాస్వామ్యంపై జరిగిన దాడిగానే ప్రజలు భావించారన్నారు. దాడి జరిగిన గంటలోపే డీజీపీ ఆర్పీ ఠాకూర్‌ ఎలాంటి విచారణ చేయకుండా కేసు పక్కదారి పట్టించే ప్రయత్నం చేయడం దారుణమన్నారు.  ప్రతిపక్షనేతపై జరిగిన దాడిని ఎవరు చేశారో పోలీసులు విచారణ చేసి చెప్పాలని కానీ డీజీపీకి కనీస అవగాహన లేదని ఎద్దేవ చేశారు. బాధ్యత గల ముఖ్యమంత్రి, డీజీపీలు వైఎస్‌ జగన్‌ను కనీసం పరామర్శించకపోవడం సిగ్గుచేటన్నారు. అలిపిరిలో చంద్రబాబుపై దాడి జరిగితే అప్పటి ప్రతిపక్షనేత, దివంగత నేత వైఎస్సార్‌.. గాంధీ విగ్రహం దగ్గర విచారణ చేయాలని డిమాండ్‌ చేశారు.. అది మానవత్వమంటే అని అన్నారు. కానీ ప్రస్తుత సీఎం తీరు చూస్తుంటే.. బాధ్యులను రక్షించాలని చూస్తున్నారని ఆవేదన వ్యక్తం చేశారు. నిందితుడు శ్రీనివాసరావుపై 307 సెక్షన్‌ వేసి వదిలేయాలని చూస్తున్నారని ఆగ్రహం వ్యక్తం చేశారు.

సాక్షి, హైదరాబాద్‌ : ఏపీ హైకోర్టు ఇచ్చిన తీర్పును, వైఎస్సార్‌ కాంగ్రెస్‌ పార్టీ అధ్యక్షులు వైఎస్‌ జగన్‌మోహన్‌ రెడ్డిపై విశాఖపట్నం విమానాశ్రయంలో జరిగిన హత్యాయత్నం కేసును జాతీయ దర్యాప్తు సంస్థ ఎన్‌ఐఏ స్వీకరించడాన్ని స్వాగతిస్తున్నామని వైఎస్సార్‌సీపీ ఎమ్మెల్యే ఆళ్ల రామకృష్ణా రెడ్డి అన్నారు. వైఎస్‌ జగన్‌పై జరిగిన హత్యాయత్నాన్ని సీఎం చంద్రబాబు ఎగతాళి చేశారని, ఏపీ డీజీపీకి కనీస పరిజ్ఞానం లేదని మండిపడ్డారు. చంద్రబాబు ఒత్తిడి చేసి ఈ కేసును తప్పుదారి పట్టించాలని చూశారన్నారు. సీఎం, డీజీపీ కలిసి కేసును నీరుకార్చే ప్రయత్నం చేశారని ఆర్కే తెలిపారు. 12.30 గంటలకు హత్యాయత్నం జరిగితే సాయంత్రం వరకు కేసు నమోదు చేయలేదన్నారు. డీజీపీ చేసిన తప్పులు ఎన్‌ఐఏ ముందు ఉంచుతామని ఆర్కే చెప్పారు. విచారణ చేయకముందే, కథను అల్లి డీజీపీ చెప్పడం వెనక చంద్రబాబు ఉన్నారని ధ్వజమెత్తారు. హత్యాయత్నం వెనక ఉన్నవాళ్లను ఎన్‌ఐఏ ముందు నిలబెడతామని తెలిపారు. నిందితులకు శిక్షలు పడితీరుతాయని, ఎన్‌ఐఏ సుమోటోగా తీసుకోవడాన్ని స్వాగతిస్తున్నామన్నారు.

సాక్షి, అమరావతి : వైఎస్సార్‌ కాంగ్రెస్‌ పార్టీ అధ్యక్షులు, ఆంధ్రప్రదేశ్‌ ప్రతిపక్ష నేత వైఎస్‌ జగన్‌మోహన్‌ రెడ్డిపై విశాఖపట్నం విమానాశ్రయంలో జరిగిన హత్యాయత్నం కేసును ఏపీ హైకోర్టు ఎన్‌ఐఏకి అప్పగిస్తూ ఉత్తర్వులు జారీ చేసింది.  వైఎస్‌ జగన్‌పై జరిగిన హత్యాయత్నం కేసుపై శుక్రవారం ఏపీ హైకోర్టు విచారణ జరిపింది.  ఎన్‌ఐఏ యాక్ట్‌ ప్రకారం కేసును ఎన్‌ఐఏకి బదిలీ చేయాలని వైఎస్‌ జగన్‌ తరపు న్యాయవాది గత విచారణలో కోర్టును కోరారు. కేసు దర్యాప్తు ఆలస్యమైతే సాక్ష్యాధారాలు తారుమారు అయ్యే అవకాశం ఉందని పిటిషనర్‌ తరుపు న్యాయవాది కోర్టు దృష్టికి తీసుకువచ్చారు. ఈ కేసును ఎన్‌ఐఏకి అప్పగించడంపై కేంద్ర, రాష్ట్రాలను హైకోర్టు గతంలోనే అడిగి తెలుసుకుంది. ఈ కేసును ఎన్‌ఐఏకి అప్పగించడంపై కేంద్రం నిర్ణయం తీసుకోకపోతే, తామే తీసుకుంటామని హైకోర్టు తేల్చిచెప్పడంతో కేంద్రం దిగొచ్చి ఎన్‌ఐఏ విచారణకు అంగీకరించింది.  విశాఖపట్నం ఎయిర్‌పోర్ట్‌లోని వీవీఐపీ లాంజ్‌లో అక్టోబర్‌ 25న వైఎస్‌ జగన్‌మోహన్‌రెడ్డిపై పక్కనే ఉన్న ఫ్యూజన్‌ఫుడ్స్‌ రెస్టారెంట్‌లో పనిచేస్తున్న శ్రీనివాసరావు కత్తితో దాడి చేసి హత్యాయత్నానికి పాల్పడిన సంగతి తెలిసిందే. రక్షణశాఖకు చెందిన తూర్పు నావికాదళం పర్యవేక్షణలో ఉన్న ఎయిర్‌పోర్ట్‌లో జరిగిన ఈ దారుణ ఘటన వెనుక భారీ కుట్ర దాగి ఉందనేది ఒక్క రాష్ట్ర ప్రభుత్వం మినహా కేంద్రం మొదలు అన్ని రాజకీయ పక్షాలూ అనుమానిస్తూ వచ్చాయి. ఎయిర్‌పోర్ట్‌ భద్రతను పర్యవేక్షిస్తున్న కేంద్ర పారిశ్రామిక భద్రతాదళం (సీఐఎస్‌ఎఫ్‌) ఉన్నతాధికారులు కూడా ప్రాథమిక విచారణలో ఇదే నిర్ధారణకు వచ్చారు. అయితే ఘటన జరిగిన మరుక్షణం నుంచే కేసును నిర్వీర్యం చేసేందుకు, పక్కదారి పట్టించేందుకే రాష్ట్ర ప్రభుత్వం ఆరాటపడుతూ వచ్చింది. ఆ క్రమంలోనే సీఎం చంద్రబాబు మొదలు, డీజీపీ ఠాకూర్, మంత్రులు, టీడీపీ నేతలు నోటికొచ్చినట్టు మాట్లాడారు. వైఎస్‌ జగన్‌పై సానుభూతి కోసమే శ్రీనివాసరావు దాడి చేశాడని ఏకపక్షంగా ప్రకటనలు చేశారు. ఏదో చిన్నపాటి ఘటనగా చిత్రీకరించేందుకు యత్నించారు. అందుకే కేంద్ర దర్యాప్తు సంస్థలతో నిష్పక్షపాతంగా విచారణ నిర్వహించాలని వైఎస్సార్‌సీపీ న్యాయస్థానాన్ని కోరింది. డిసెంబర్‌ 31న ఈకేసును ఎన్‌ఐఏకి బదిలీ చేసినట్టు ఏపీ హైకోర్టుకు కేంద్రం తెలిపింది. హోం శాఖ ఆదేశాలతో హైదరాబాద్‌ ఎన్‌ఐఏ విభాగం ఎఫ్‌ఐఆర్‌ నమోదు చేసింది. ప్రధాన విచారణ అధికారిగా మహ్మద్‌ సాజిద్‌ ఖాన్‌ను నియమించారు.

ఇటీవల ప్రతిరోజూ విలేకరుల సమావేశాలతో హడావుడిచేస్తున్న విశాఖ నగర పోలీస్‌ కమిషనర్‌ మహేష్‌ చంద్ర లడ్డాబుధవారం మధ్యాహ్నం ఒంటిగంటకు  ప్రెస్‌తోమాట్లాడతారంటే.. ఏదో రొటీన్‌ క్రైమ్‌ స్టోరీ చెబుతారేమోననిజర్నలిస్టులు ఒకింత నిర్లిప్తతే ప్రదర్శించారు.సహజంగా సీపీ ప్రెస్‌మీట్‌ అంటే ముందుగా విషయంబ్రీఫ్‌ చేయడం పోలీస్‌ కమిషనర్‌ కార్యాలయ సిబ్బందికి పరిపాటి.కానీ బుధవారం అటువంటి సమాచారం ఏదీ రాలేదు.లీకులూ ఇవ్వలేదు.సరిగ్గా ఒంటిగంటకు క్రైం స్టోరీ తరహాలోనే మొదలైనసీపీ బ్రీఫింగ్‌లో.. వైఎస్‌ జగన్‌పై దాడి ప్రస్తావన రాగానే అందరూ అలర్ట్‌ అయ్యారుప్రధాన ప్రతిపక్ష నేత, వైఎస్సార్‌ కాంగ్రెస్‌ పార్టీ అధినేతవైఎస్‌ జగన్‌మోహన్‌రెడ్డిపై గత అక్టోబర్‌ 25న ఎయిర్‌పోర్ట్‌లోజరిగిన హత్యాయత్నం కేసు విచారణ వివరాలతో ఏకంగాగంటంపావు సేపు.. ఎక్కడా తొట్రుపాటు లేకుండా... పక్కా స్క్రిప్ట్‌తోనడిచిన సీపీ ప్రసంగపాఠంలో మొత్తంగా తేలిందేమిటంటే..అది కుట్రే కాదట..!కేవలం సంచలనం, ప్రచారం కోసమే శ్రీనివాసరావు ఒక్కడేచేశాడట!!... ఇంకెవ్వరికీ సంబంధం లేదట!!!..  అని సీపీ ముక్తాయించారు. ఇంటర్మీడియట్‌ కూడా చదవని,  గతంలో నేర చరిత ఉన్న శ్రీనివాసరావు ఏకంగా వైఎస్‌ జగన్‌పై హత్యాయత్నమే లక్ష్యంగా.. నావికాదళం పర్యవేక్షణలో ఉన్న ఎయిర్‌పోర్ట్‌లోకి ఎలా వచ్చాడు..  ఎయిర్‌పోర్ట్‌నే ఎందుకు ఎంచుకున్నాడు..ఎవరి అండదండ, ప్రోద్బలం లేకుండా ఏకంగా జనాకర్షణ కలిగిన నేత జగన్‌పై హత్యాయత్నానికి ఎలా కత్తి దూశాడు.. అనే సామాన్యజనం నుంచి ఉత్పన్నమైన  ప్రశ్నలకు కూడా సీపీ సమాధానంచెప్పకుండా తాను చెప్పాల్సింది మాత్రం చెప్పిముగించేసిన తీరు అందరికీ విస్తు గొల్పింది.మరో వారం రోజుల్లో వైఎస్‌ జగన్‌మోహన్‌రెడ్డిప్రజాసంకల్పయాత్ర చారిత్రాత్మక ఘట్టంగా ముగుస్తున్ననేపథ్యంలో హఠాత్తుగా సీపీ ఈ కేసును నిర్వీర్యం చేసే విధంగాప్రకటించడం చర్చనీయాంశంగా మారింది.ఎంతో ట్రాక్‌ రికార్డ్‌ ఉన్న సీనియర్‌ ఐపీఎస్‌ అధికారి లడ్డా... బాధ్యతాయుతంగా చేపట్టాల్సిన  కేసు విచారణ తీరు, కేసు పురోగతిని హడావుడిగా వెల్లడించిన క్రమం ఇప్పుడు విమర్శలపాలవుతోంది. సాక్షి ప్రతినిధి, విశాఖపట్నం: జననేత, ప్రధాన ప్రతిపక్షనేత వైఎస్‌ జగన్‌మోహన్‌రెడ్డిపై విశాఖ ఎయిర్‌పోర్ట్‌లో జరిగిన హత్యాయత్నం కేసు విచారణ తీరుపై మొదటి రోజు నుంచి అనుమానాలు వెల్లువెత్తినా..  నగర పోలీస్‌ కమిషనర్‌ మహేష్‌ చంద్ర లడ్డా ట్రాక్‌ రికార్డ్‌  ఎరిగిన వాళ్ళు మాత్రం ఎంతో కొంత నిబద్ధత పాటిస్తారని, వాస్తవాలు వెలుగులోకి రావొచ్చని భావించారు. అయితే అందరి అంచనాలనే తారుమారు చేస్తూ కేసును నిర్వీర్యం చేసేశారన్న వాదనలే ఇప్పుడు బహిరంగంగా వినిపిస్తున్నాయి. తెలుగు రాష్ట్రాలతో పాటు జాతీయస్థాయిలో కలకలం రేపిన జగన్‌పై హత్యాయత్నం కేసు విచారణపై  ప్రభుత్వ పెద్దల ప్రభావం ఉందన్న వాదనలకు ఊతమిచ్చేలానే సీపీ సహా పోలీసు ఉన్నతాధికారుల విచారణ,  ప్రత్యేక దర్యాప్తు బృందం(సిట్‌) దర్యాప్తు కొనసా...గుతూ వచ్చింది. జగన్‌ను  హత్యచేయాలనే పన్నాగంతోనే దుండగుడు శ్రీనివాసరావు కత్తితో దాడికి తెగబడ్డాడని కోర్టుకిచ్చిన రిమాండ్‌ రిపోర్ట్‌లో స్పష్టంగా పేర్కొన్న పోలీసులు ఆ రిపోర్ట్‌లోనే హత్యాపథకం వెనుక కుట్రదారులెవరు, అసలు సూత్రధారులెవరు అనే కీలక విషయాలను కనీసంగా కూడా ప్రస్తావించలేదు. ఘటన జరిగిన మూడో రోజు రిమాండ్‌ రిపోర్ట్‌ రూపొందించడంతోనే  విచారణ తంతును బట్టబయలు చేసిన పోలీసు అధికారులు ఈ రెండు నెలల కాలంలో దర్యాప్తు డ్రామాను రక్తి కట్టించారు. అంతా ఒక్కడే చేశాడా... పదోతరగతి వరకు మాత్రమే చదువుకున్న యువకుడు పక్కా వ్యూహం ప్రకారం రాష్ట్ర శాంతి భద్రతల పరిధిలోకి వచ్చే ప్రాంతంలో కాకుండా సునిశిత సమస్యగా మారే కేంద్ర బలగాల పరిధిలోని ఎయిర్‌పోర్ట్‌లో ప్రధాన ప్రతిపక్ష నేతపై దాడికి  తెగబడటం మామూలు విషయం కాదు. ఒక్క వేటుతో గొంతులోకి కత్తి దించి ప్రాణాలు హరించడమే లక్ష్యంగా ఘాతుకానికి తెగించిన శ్రీనివాసరావుకు ఇదంతా చేయమని నూరిపోసిందెవరు..? అతన్ని ఆ విధంగా ప్రేరేపించి  ఏం జరిగినా మేం చూసుకుంటాం... అని అండగా నిలిచిందెవరు.. పక్కా పథకం ప్రకారం పదినెలలుగా విశాఖ ఎయిర్‌పోర్టులోనే మకాం వేయించి ఉసిగొల్పిందెవరు.. అనే కీలక విషయాలవైపే పోలీసులు, సిట్‌ అధికారులు దృష్టి సారించలేదు. ఇక పోలీసు విచారణలో సైతం నిందితుడు లెక్కలేకుండా ఉన్నాడని, నేను చెప్పాల్సిందిందంతా లేఖలో రాసేశాను.. ఇంకేమీ లేదంటూ  కనీసం భయం లేకుండా నిర్లక్ష్యంగా మాట్లాడుతున్నాడని, విచారణకు సహకరించడం లేదని అప్పట్లో పోలీసు ఉన్నతాధికారులే బాహాటంగా అంగీకరించారు. అందుకు ఊతమిచ్చే విధంగానే సీపీ లడ్డా బుధవారం మాట్లాడారు. జగన్‌పై హత్యాయత్నానికి పాల్పడిన నిందితుడు  శ్రీనివాసరావు పక్కా పథకంతోనే అన్ని ఏర్పాట్లు చేసుకున్నాడని, ఎటువంటి బెరుకు, భయం లేకుండా  ముందుగానే కొందరికి ఫోన్లు చేసి చెప్పుకున్నాడని సీపీ విలేకరుల సమావేశంలో వెల్లడించారు. ఇదంతా చూస్తుంటేనే  శ్రీనివాసరావు వెనుక బడాబాబుల పాత్ర ఉందనేది ఎవరికైనా అర్ధమవుతుంది. కానీ సీపీ ఆ కేసులో ఇంకెవ్వరి పాత్ర లేదంటూ  శ్రీనివాసరావు ఒక్కరికే పరిమితం చేస్తూ... దాదాపు కేసు క్లోజ్‌ అని అర్ధం వచ్చేటట్టు మాట్లాడటమే విస్తుగొలుపుతోంది.

విశాఖపట్నం , పెదవాల్తేరు(విశాఖ తూర్పు): రాష్ట్ర ప్రతిపక్ష నేత, వైఎస్సార్‌ కాంగ్రెస్‌ పార్టీ అధ్యక్షుడు వైఎస్‌ జగన్‌మోహన్‌రెడ్డిపై హత్యాయత్నానికి కుట్ర పన్నింది ముమ్మాటికీ ముఖ్యమంత్రి చంద్రబాబునాయుడేనని వైఎస్సార్‌ సీపీ నగర అధ్యక్షుడు మళ్ల విజయప్రసాద్‌ ఆరోపించారు. ఎయిర్‌పోర్టులో సంఘటన జరిగినపుడు తాను పక్కనే ఉన్న ప్రత్యక్ష సాక్షినని పేర్కొన్నారు. సిట్‌ నివేదికను నగర సీపీ మహేష్‌ చంద్ర లడ్డా వెల్లడించిన నేపథ్యంలో సాక్షి మీడియాతో బుధవారం విజయప్రసాద్‌ మాట్లాడారు. ముందుగా వేసుకున్న ప్రణాళిక ప్రకారమే జగన్‌మోహన్‌రెడ్డిపై హత్యాయత్నం జరిగిందని స్పష్టం చేశారు. ఇది చాలా ప్రమాదకరమైన అటాక్‌ అన్నారు. దేవుడు, ప్రజల ఆశీస్సులతోనే జగన్‌మోహన్‌రెడ్డి తప్పించుకున్నారని తెలిపారు. పోలీసులు మొదటి నుంచి ఈ కేసు నీరుగారుస్తున్నారని ఆరోపించారు. ముఖ్యమంత్రి స్థాయి వ్యక్తి కూడా కత్తితో చేసిన దాడిని అవహేళన చేయడం హాస్యాస్పదం అన్నారు. ఈ దాడి కేసులో కూడా నిందను వైఎస్సార్‌ సీపీపైకి నెట్టేయాలని టీడీపీ నాయకులు ప్రయత్నించడం అన్యాయమన్నారు. విశాఖ భూ కుంభకోణంపై సిట్‌ నివేదిక ఇచ్చినా సరే టీడీపీకి అనుకూలంగా మార్చేసుకుందన్నారు. పుష్కరాల ఘటన దర్యాప్తు కూడా నిర్యీర్యం చేశారన్నారు. చైతన్యవంతులైన ప్రజలే త్వరలో తమ సత్తా చాటుతారన్నారు. వైఎస్సార్‌ కాంగ్రెస్‌ పార్టీ నగర మహిళా విభాగం అధ్యక్షురాలు గరికిన గౌరి మాట్లాడుతూ ఎయిర్‌పోర్టులో దాడి జరిగిన తరువాత పోలీస్‌లు మాట్లాడుతూ నిందితుడు వైఎస్సార్‌ కాంగ్రెస్‌ అభిమాని అని ప్రకటించడం శోచనీయమన్నారు. ఈ ఘటనపై థర్డ్‌ పార్టీతో విచారణ చేయాలని డిమాండ్‌ చేసినా ప్రభుత్వం ఎందుకు పట్టించుకోలేదన్నారు. జగన్‌ సీఎం అవ్వకుండా అడ్డుకోవాలన్న కుట్రతోనే ఎయిర్‌పోర్టులో దాడి చేయించారని ఆమె ఆరోపించారు. విశాఖ పార్లమెంటరీ జిల్లా బీసీ విభాగం అధ్యక్షుడు కంట్రేడ్డి రామన్నపాత్రుడు మాట్లాడుతూ దాడి ఘటనకు సూత్రధారులెవరో బయటపెట్టాలని డిమాండ్‌ చేశారు.

సాక్షి, అమరావతి బ్యూరో: ప్రతిపక్ష నేత వైఎస్‌ జగన్‌పై  హత్యాయత్నం కేసులో నిందితుడు శ్రీనివాసరావుకు విశాఖ సెంట్రల్‌ జైల్లో వీఐపీ మర్యాదలు అందుతున్నాయి. చిత్రావతి హై అలర్ట్‌ బ్లాక్‌లో రిమాండ్‌ ఖైదీగా ఒంటరిగా ఉంచిన శ్రీనివాసరావుకు సదుపాయాలను సెంట్రల్‌ జైలు డిప్యూటీ సూపరింటెండెంట్‌ స్వయంగా పర్యవేక్షిస్తున్నారు. నిందితుడు ఉంటున్న గదిని శుభ్రం చేయడం, వ్యక్తిగత పనులు, భోజనం గదికి తెచ్చేందుకు  ప్రత్యేకంగా ఇతర రాష్ట్రాలకు చెందిన ముగ్గురు ఖైదీలను ఏర్పాటు చేశారు. బిహార్‌కు చెందిన భాయ్, జలీల్, ఒడిశాకు చెందిన మిధుల్‌ అనే ఖైదీలను శ్రీనివాసరావుకు సేవలు చేసేందుకు నియమించారు.  ఇతర రిమాండ్‌ ఖైదీలు కలవకుండా కట్టడి..  జైల్లో శ్రీనివాస్‌ ఉంటున్న గది వద్దకు నలుగురు కాపలా పోలీసులు, సేవలు అందిస్తున్న ముగ్గురు ఖైదీలు, జైలు ఉన్నతాధికారులు మినహా ఇతరులు ఎవరూ వెళ్లకుండా ప్రత్యేక జాగ్రత్తలు తీసుకుంటున్నారు. నిందితుడికి జైల్లో జరుగుతున్న రాచ మర్యాదలు ప్రతిపక్ష నేతపై హత్యాయత్నాన్ని ఓ ప్రణాళిక ప్రకారం ప్రభుత్వ పెద్దలే చేయించారనే వాదనకు బలం చేకూరుస్తున్నాయి. (అల్లిన కథే.. మళ్లీ) శ్రీనివాస్‌కి సేవలు చేస్తే రోజూ నాన్‌వెజ్‌  వైఎస్‌ జగన్‌పై హత్యాయత్నం కేసులో నిందితుడు శ్రీనివాసరావును రిమాండ్‌ ఖైదీగా సెంట్రల్‌ జైలుకి తరలించినప్పుడు అతడికి అవసరమైన సేవలు చేస్తే రోజూ శ్రీనివాసరావుకు అందించే మాంసాహారాన్నే ఇస్తామని జైలు అధికారులు ఖైదీలకు ఆఫర్‌ ఇచ్చారు. ఆసక్తి చూపిన వారిలో ఆంధ్రప్రదేశ్‌కు చెందిన ఖైదీలను కాకుండా ఇతర రాష్ట్రాలకు చెందిన వారిని ఎంపిక చేశారు. 

సాక్షి ప్రతినిధి, విశాఖపట్నం/ సాక్షి, అమరావతి బ్యూరో:  ఊహించిందే జరిగింది. తెలుగు రాష్ట్రాలతో పాటు జాతీయస్థాయిలో సంచలనం సృష్టించిన ప్రతిపక్ష నేత, వైఎస్సార్‌ కాంగ్రెస్‌ పార్టీ అధ్యక్షుడు వైఎస్‌ జగన్‌మోహన్‌రెడ్డిపై హత్యాయత్నం ఘటన వెనుక ఎటువంటి కుట్ర కోణం లేదని విశాఖ పోలీసులు తేల్చేశారు. టీడీపీ నేత హర్షవర్ధన్‌ చౌదరి సహా ఇంకెవరి ప్రమేయమూ లేదని చెప్పేశారు. నిందితుడు శ్రీనివాసరావు కేవలం సంచలనం కోసం, పబ్లిసిటీ కోసం తాను రాసిన, రాయించిన లేఖను వైఎస్‌ జగన్‌ చదవాలనే ఉద్దేశంతో కోడి కత్తితో ఆయనపై చిన్న పాటి దాడి చేశాడని.. ప్రభుత్వ పెద్దల సూచనల మేరకు మొదటి రోజు నుంచీ చెబుతున్న కథనే మూడు నెలల విచారణ తర్వాత కూడా అక్షరం పొల్లుపోకుండా వల్లె వేశారు. చివరకు కేసును శ్రీనివాసరావు ఒక్కడికే పరిమితం చేసిన వైనం వివాదాస్పదమవుతోంది.  విశాఖపట్నం ఎయిర్‌పోర్ట్‌లోని వీవీఐపీ లాంజ్‌లో అక్టోబర్‌ 25న వైఎస్‌ జగన్‌మోహన్‌రెడ్డిపై పక్కనే ఉన్న ఫ్యూజన్‌ఫుడ్స్‌ రెస్టారెంట్‌లో పనిచేస్తున్న శ్రీనివాసరావు కత్తితో దాడి చేసి హత్యాయత్నానికి పాల్పడిన సంగతి తెలిసిందే. రక్షణశాఖకు చెందిన తూర్పు నావికాదళం పర్యవేక్షణలో ఉన్న ఎయిర్‌పోర్ట్‌లో జరిగిన ఈ దారుణ ఘటన వెనుక భారీ కుట్ర దాగి ఉందనేది ఒక్క రాష్ట్ర ప్రభుత్వం మినహా కేంద్రం మొదలు అన్ని రాజకీయ పక్షాలూ అనుమానిస్తూ వచ్చాయి. ఎయిర్‌పోర్ట్‌ భద్రతను పర్యవేక్షిస్తున్న కేంద్ర పారిశ్రామిక భద్రతాదళం (సీఐఎస్‌ఎఫ్‌) ఉన్నతాధికారులు కూడా ప్రాథమిక విచారణలో ఇదే నిర్ధారణకు వచ్చారు. అయితే ఘటన జరిగిన మరుక్షణం నుంచే కేసును నిర్వీర్యం చేసేందుకు, పక్కదారి పట్టించేందుకే రాష్ట్ర ప్రభుత్వం ఆరాటపడుతూ వచ్చింది. ఆ క్రమంలోనే సీఎం చంద్రబాబు మొదలు, డీజీపీ ఠాకూర్, మంత్రులు, టీడీపీ నేతలు నోటికొచ్చినట్టు మాట్లాడారు. వైఎస్‌ జగన్‌పై సానుభూతి కోసమే శ్రీనివాసరావు దాడి చేశాడని ఏకపక్షంగా ప్రకటనలు చేశారు. ఏదో చిన్నపాటి ఘటనగా చిత్రీకరించేందుకు యత్నించారు. అయితే..నిందితుడు శ్రీనివాసరావు పనిచేస్తున్న ఫ్యూజన్‌ఫుడ్స్‌ రెస్టారెంట్‌ యజమాని టి.హర్షవర్ధన్‌ ప్రసాద్‌ చౌదరి సీఎం చంద్రబాబుకు, మంత్రి లోకేష్‌కు అత్యంత సన్నిహితుడు కావడం, పక్కా ప్రణాళిక ప్రకారం నేరచరిత్ర ఉన్న శ్రీనివాసరావుకు తప్పుడు ఎన్‌వోసీ ఇప్పించి రెస్టారెంట్‌లో ఉద్యోగంలో పెట్టడం, ఆగస్టు నుంచి దాదాపు ప్రతివారంలో రెండుసార్లు విశాఖ ఎయిర్‌పోర్ట్‌కు వస్తున్న వైఎస్‌ జగన్‌కు పార్టీ కార్యకర్త ఇంటి నుంచి వస్తున్న కాఫీని అడ్డుకుని ఆ రెస్టారెంట్‌ నుంచే తీసుకోవాలని నిబంధన పెట్టడం, అక్టోబర్‌ 25 గురువారం మధ్యాహ్నం ఆ రెస్టారెంట్‌ నుంచి కాఫీ తీసుకురావడం, అదే రోజు శ్రీనివాసరావు జగన్‌పై కత్తి దూయడం, ఘటన జరిగిన వెంటనే సీఎం చంద్రబాబు, డీజీపీ అసలు అది దాడే కాదని ప్రచారం చేయడం.. సదరు దుండగుడు వైఎస్సార్‌ పార్టీ అభిమాని అని ప్రచారం పుట్టించడం, ఇందుకు అనుగుణంగా ఓ లేఖ సృష్టించడం... ఇవన్నీ దీని వెనుక ఉన్న కుట్రను దాచలేకపోయాయి. కుట్రపూరితంగానే ఇదంతా జరిగినట్టు స్పష్టమవుతున్నా విశాఖ పోలీసులు మాత్రం ప్రభుత్వ పెద్దల ఆదేశాల మేరకు విచారణ డ్రామాను రక్తికట్టించారు. జగన్‌పై హత్యాయత్నం వెనుక కుట్ర కోణం లేదని తేల్చేశారు.  శ్రీనివాసరావుతో చెప్పించిన స్క్రిప్టే..  రెండు నెలల క్రితం పోలీస్‌ కస్టడీలో ఉన్న శ్రీనివాసరావుతో ఏదైతే చెప్పించారో అవే విషయాలను విశాఖ సీపీ మహేశ్‌ చంద్ర లడ్హా బుధవారం విలేకరుల సమావేశంలో మరోసారి వల్లెవేయడం గమనార్హం. ఆరు రోజుల పోలీసు విచారణలో శ్రీనివాసరావుతో ‘నేను జగన్‌ అభిమానినే..’అని పదే పదే చెప్పించేందుకు పోలీసులు నానా తంటాలు పడ్డారు. అవే మాటలు నేరుగా శ్రీనివాసరావుతోనే మీడియాకు చెప్పించేందుకు అతనికి వైద్యసేవల పేరిట ప్రభుత్వాసుపత్రికి తీసుకువచ్చారు. ఇప్పుడు సీపీ కూడా అవే మాటలు వల్లెవేయడంతో అసలు ఈ కేసు విచారణ ఏపాటిగా జరిగిందో ఇట్టే అర్థమవుతోంది.  కత్తులకు పదును పెడుతుంటే హర్షవర్ధన్‌ ఎందుకు అడ్డుకోలేదు  వైఎస్‌ జగన్‌పై హత్యాయత్నం చేసిన అక్టోబర్‌ 25న ఉదయమే శ్రీనివాసరావు ఎయిర్‌పోర్ట్‌లోని ఫ్యూజన్‌ ఫుడ్స్‌ రెస్టారెంట్‌కు చేరుకున్నాడని, ఉదయం 9 గంటల సమయంలో కత్తులను రెస్టారెంట్‌లోనే వేడినీళ్ళలో స్టెరిలైజ్‌ చేశాడని సీపీ చెప్పుకొచ్చారు. ఆ సమయంలో రెస్టారెంట్‌ యజమాని, టీడీపీ నేత హర్షవర్ధన్‌ ప్రసాద్‌ చౌదరి అక్కడే ఉన్నారు. తాను ఆ రోజు తెల్లవారుజాము నుంచి జగన్‌పై హత్యాయత్నం జరిగే పదినిమిషాల ముందువరకు అక్కడే ఉన్నానని చౌదరి ఇప్పటికి ఎన్నోసార్లు మీడియాకు చెప్పారు. ఈ లెక్కన తన రెస్టారెంట్‌లో పనిచేసే యువకుడు కత్తులకు పదును పెడుతుంటే ఎందుకు అడ్డుకోలేదు? కనీసం ఎందుకోసం అని ఎందుకు అడగలేదన్న దానిపై సీపీ నుంచి సమాధానమే లేదు. రెస్టారెంట్‌ మొత్తం సీసీ టీవీ ఫుటేజ్‌ పరిధిలోనే ఉంటుంది. అతను ఎక్కడ స్టెరిలైజ్‌ చేసినా కనపడుతుంది. మరి అంతమంది కళ్ళుగప్పి అతను కత్తులను ఎలా దాచాడు?, అదే రోజు ధైర్యంగా ఎలా పదును పెట్టాడన్న ప్రశ్నలకు కూడా పోలీసుల వద్ద సమాధానం లేదు.  రిమాండ్‌ రిపోర్ట్‌కు భిన్నంగా సీపీ ప్రకటనలు  ప్రతిపక్ష నేత వైఎస్‌ జగన్‌మోహన్‌రెడ్డిపై జరిగింది ముమ్మాటికీ హత్యాయత్నమేనని, ఆ కత్తి గొంతులో దిగి ఉంటే ప్రాణాలు పోయేవని కోర్టుకు సమర్పించిన రిమాండ్‌ రిపోర్ట్‌లో ఎయిర్‌పోర్ట్‌ పోలీస్‌స్టేషన్‌ పోలీసులు పేర్కొన్న సంగతి తెలిసిందే. వాస్తవానికి కుట్ర కోణం దాచి రిమాండ్‌ రిపోర్ట్‌ రాసినప్పటికీ ప్రభుత్వ పెద్దల నుంచి వారికి తీవ్రస్థాయిలో అక్షింతలు పడినట్టు అప్పట్లోనే ప్రచారం జరిగింది. ప్రభుత్వాన్ని ఇరుకున పెట్టేవిధంగా రిమాండ్‌ రిపోర్ట్‌ రూపొందించారంటూ ప్రభుత్వ పెద్దలు ఆగ్రహం వ్యక్తం చేశారన్న వాదనలు వినిపించాయి. అయితే ఇప్పుడు రిమాండ్‌ రిపోర్ట్‌కు భిన్నంగా సీపీ మహేష్‌ చంద్ర లడ్హా ప్రకటనలు చేయడం గమనార్హం. సీపీ తాజా ప్రకటనలు చూస్తుంటే చార్ట్‌షీట్‌లో... అసలు హత్యాయత్నమే జరగలేదంటూ కేసు నిర్వీర్యం చేసే విధంగా పొందుపరచడం ఖాయంగా కనిపిస్తోందన్న వ్యాఖ్యలు వినిపిస్తున్నాయి.  ఇలాగేనా హర్షవర్ధన్‌ను విచారించేది?  కేసులో కీలకంగా అందరూ అనుమానిస్తున్న టీడీపీనేత, ఎయిర్‌పోర్ట్‌లోని రెస్టారెంట్‌ యజమాని హర్షవర్ధన్‌ చౌదరిని పలుమార్లు విచారించామని సీపీ చెప్పుకొచ్చారు. కానీ పోలీస్‌స్టేషన్‌ వద్దనే పడిగాపులు కాసి విచారణ క్రమం తెలుసుకునేందుకు ప్రయత్నించిన ప్రతి ఒక్కరికీ హర్షవర్ధన్‌ విచారణ ఏ విధంగా జరిగిందో క్షుణ్ణంగా తెలుసు. కేవలం కేసు విచారణ పేరిట కాలయాపన చేసేందుకు రెస్టారెంట్‌లో పనిచేసే సిబ్బందిని, నిందితుడు శ్రీనివాసరావు స్నేహితులను విచారించిన సందర్భాల్లో... వారిని తిరిగి ఇళ్ళకు తీసుకువెళ్లేందుకు మాత్రమే హర్షవర్ధన్‌ పోలీస్‌స్టేషన్‌కు వచ్చేవాడు. ఆ సందర్భాల్లో కూడా పోలీస్‌స్టేషన్లలో దర్జాగా తిరుగుతుండటం, పోలీసులంటే లెక్కలేనట్టుగా ప్రవర్తించడం ప్రతిఒక్కరూ గమనించారు. తన వాహనాన్ని పోలీస్‌స్టేషన్‌ ప్రాంగణంలోనే నో పార్కింగ్‌ బోర్డ్‌ ఎదురుగా సీపీ మహేష్‌ చంద్ర లడ్హా వాహనం ఎదురుగా పార్క్‌ చేసే వాడంటేనే అతనికున్న అండదండలు ఎలాంటివో అర్ధం చేసుకోవచ్చు.   ఫ్లెక్సీపై సీపీ హాస్యాస్పద వ్యాఖ్యలు  చివరికి శ్రీనివాసరావు ఆ ఊళ్ళో ఏర్పాటు చేసిన ఫ్లెక్సీ విషయంలోనూ సీపీ చేసిన వ్యాఖ్యలు హాస్యాస్పదంగా ఉన్నాయి. ఫ్లెక్సీపై గరుడ పక్షి ఫొటో ఉండటం చర్చనీయాంశంగా మారిన సంగతి తెలిసిందే. గతేడాది అక్టోబర్‌ 25న జగన్‌పై హత్యాయత్నం ఘటనతో ఆర్నెల్ల క్రితం హాస్యనటుడు శివాజీ చెప్పిన గరుడ పురాణంలో మాదిరిగానే ప్రతిపక్షనేతపై హత్యాయత్నం జరిగిందన్న వాదనలు, అనుమానాలు ఒక్కసారిగా బయలుదేరాయి. కాగా శ్రీనివాసరావు వేయించిన ఫ్లెక్సీలో గరుడ పక్షి ఉండటంతో ఇదంతా పక్కా ప్రణాళిక ప్రకారమే జరిగిందన్న ప్రచారం జరిగింది. ఆ మేరకు వైఎస్సార్‌సీపీ నేతలు అనుమానం వ్యక్తం చేసి ఈ దిశగా విచారణ చేపట్టాలని డిమాండ్‌ చేశారు. అవేమీ పట్టించుకోని సీపీ లడ్హా ఫ్లెక్సీలోని గరుడ పక్షి బొమ్మపై చేసిన వ్యాఖ్యలు వివాదాస్పదమవుతున్నాయి. శ్రీనివాసరావుకు గరుడ పక్షి అంటే ఇష్టమని, అందుకే దానిపై ఆ బొమ్మ వేయించుకున్నాడని చెబుతూ తేలిగ్గా తీసిపారేయడం చూస్తుంటే.. రాష్ట్ర ప్రతిపక్ష నేతపై జరిగిన హత్యాయత్నం కేసు విచారణ ఏ విధంగా కొనసాగిందో ఇట్టే అర్ధం చేసుకోవచ్చు.  సిట్‌ ఆఫీసుకు తాళం వేసేస్తే ఇంకేం విచారణ  హత్యాయత్నం వెనుక ఎటువంటి కుట్ర కోణం లేదంటూ విచారణ మొదలుపెట్టకుండానే తేల్చేసిన సీపీ మహేష్‌ చంద్ర దర్యాప్తు ఇంకా కొనసాగిస్తామని చెప్పారు. నిజమైన విచారణను హత్యాయత్నం జరిగిన రోజే గాలికొదిలేసిన పోలీసులు కొన్నాళ్ళు సిట్‌ కార్యాలయం తెరిచి పబ్లిసిటీ స్టంట్‌ నడిపారు. దానికి కూడా ఇటీవల తాళం కూడా వేసేశారు. విచారణ ముగిసిందని, తాము ఎవరి పనుల్లో వారు ఉన్నామని సిట్‌ అధికారి ఒకరు ఈమధ్య చెప్పారు. వాస్తవం ఇలావుంటే సీపీ మాత్రం కేసు విచారణ కొనసాగుతుందని చెప్పడం గమనార్హం.  కోర్టు ధిక్కారం..!   నిందితుడు శ్రీనివాసరావు పథకం ప్రకారమే హత్యాయత్నానికి పాల్పడ్డాడని సీపీ లడ్హా చెప్పారు. ఈ కేసు వెనుక ఇంకెవరూ లేరన్నట్లుగా చెప్పుకొచ్చారు. వాస్తవానికి ఈ కేసును రాష్ట్ర పోలీసులు నిష్పక్షపాతంగా విచారించడం లేదని వైఎస్సార్‌ కాంగ్రెస్‌ పార్టీతో పాటు ప్రజలూ భావిస్తున్నారు. అందుకే కేంద్ర దర్యాప్తు సంస్థలతో విచారణ నిర్వహించాలని పార్టీ న్యాయస్థానాన్ని కోరింది. ఆ మేరకు కోర్టులో విచారణ కొనసాగుతోంది. ఈ దశలో పోలీస్‌ కమిషనర్‌ ఏకపక్షంగా మీడియాకు ప్రకటనలు చేయడం కోర్టు ధిక్కారమే అవుతుందని, అయినా అదేమీ పట్టించుకోకుండా సీపీ లడ్హా ఆ విధంగా ప్రకటనలు చేస్తున్నారంటే వారిపై ప్రభుత్వ పెద్దల ఒత్తిడే కారణమనే అభిప్రాయం వ్యక్తం అవుతోంది.  పెద్దల వ్యాఖ్యలను సమర్థించేలా మరోసారి..  శ్రీనివాసరావు తాను ఉపయోగించిన కత్తిని హత్యాయత్నానికి ముందు రెండుసార్లు వేడి నీటిలో మరిగించాడని సీపీ చెప్పడంపై విస్మయం వ్యక్తమవుతోంది. కత్తితో పొడిచినా ఏమీ కాకుండా శ్రీనివాసరావు జాగ్రత్త తీసుకున్నాడన్న అర్థం స్ఫురించేలా సీపీ వ్యూహాత్మకంగా మాట్లాడారు. ఆ విధంగా మాట్లాడటం ద్వారా సానుభూతి కోసమే శ్రీనివాసరావు ఈ హత్యాయత్నానికి పాల్పడ్డాడంటూ ముఖ్యమంత్రి చంద్రబాబు, డీజీపీ ఠాకూర్‌ చేసిన వ్యాఖ్యలనే సీపీ మరోసారి సమర్థించారనే అభిప్రాయం వ్యక్తమవుతోంది.   గతంలోనూ ఇదే తీరు   వైఎస్‌ జగన్‌పై హత్యాయత్నం కేసులో విశాఖపట్నం సీపీ గతంలోనూ వివాదాస్పదంగా వ్యవహరించారు. హర్షవర్థన్‌కు చెందిన రెస్టారెంట్‌లో పనిచేసేందుకు నిందితుడు శ్రీనివాసరావుకు నో అబ్జెక్షన్‌ సర్టిఫికెట్‌ (ఎన్‌వోసీ) ఉందని చెప్పారు. కానీ అతని స్వస్థలం తూర్పుగోదావరి జిల్లాకు చెందిన పోలీసులు తాము ఎన్‌వోసీ ఇవ్వలేదని తెలిపారు. సీపీ వెంటనే స్పందిస్తూ విశాఖ ఎయిర్‌పోర్ట్‌ పీఎస్‌ నుంచి శ్రీనివాసరావు ఎన్‌వోసీ పొందాడని ప్రకటించారు. ఢిల్లీలోని బ్యూరో ఆఫ్‌ సివిల్‌ ఏవియేషన్‌ సెక్యూరిటీ (బీసీఏఎస్‌) డీజీ కుమార్‌ రాజేష్‌ చంద్ర అసలు విషయాన్ని వెల్లడించడంతో ప్రభుత్వ కుట్ర బట్టబయలైంది. విమానాశ్రయంలో పనిచేసేందుకు అవసరమైన ఏరోడ్రోమ్‌ ఎంట్రీ పర్మిట్‌ (ఏఈపీ) కోసం శ్రీనివాసరావుగానీ అతని తరఫున రెస్టారెంట్‌ యజమాని గానీ దరఖాస్తు చేయనేలేదని స్పష్టం చేశారు. ఏఈపీ కోసం దరఖాస్తు చేయనప్పుడు ఎన్‌వోసీ అవసరమే తలెత్తదని, శ్రీనివాసరావు పేరిట ఎన్‌వోసీ లేనే లేదని స్పష్టం చేశారు.   స్క్రిప్ట్‌ను ముందే వెల్లడించిన సాక్షి వాస్తవానికి సిట్‌ స్క్రిప్ట్‌ను రెండు నెలల ముందే సాక్షి బట్టబయలు చేసింది. హత్యాయత్నం జరిగిన రోజు నుంచి పోలీసుల విచారణ తంతును పరిశీలించిన సాక్షి ముందే నివేదిక సారాంశాన్ని గ్రహించింది. గత నవంబర్‌ మూడవ తేదీన ‘‘బాస్‌ల నివేదిక సిద్ధం.. ఇదే స్క్రిప్ట్‌ ’’శీర్షికన గత నవంబర్‌ 1న ప్రచురించింది. ఇప్పుడు అందు లోని అంశాలనే సీపీ లడ్హా చెప్పుకురావడం గమనార్హం.   

సాక్షి, విశాఖపట్నం: ప్రతిపక్ష నేత, వైఎస్సార్‌సీపీ అధ్యక్షుడు వైఎస్‌ జగన్‌పై విశాఖ ఎయిర్‌పోర్టులో దాడి వెనుక టీడీపీ నేత హర్షవర్థన్‌ చౌదరి సహా ఇంకెవరి ప్రమేయం గానీ, కుట్ర గానీ లేదని విశాఖ నగర పోలీస్‌ కమిషనర్‌ మహేష్‌ చంద్ర లడ్హా చెప్పారు. శ్రీనివాసరావు పది నెలల ముందు 2017 డిసెంబర్‌లోనే దాడికి పథకాన్ని రచించాడని తెలిపారు. పబ్లిసిటీ, సానుభూతి కోసమే ప్రతిపక్ష నేతపై దాడికి పాల్పడ్డాడని, తాను జగన్‌ అభిమానినని చెప్పాడని పేర్కొన్నారు. హైకోర్టు అనుమతించాక ఈ కేసుపై చార్జిషీట్‌ దాఖలు చేస్తామన్నారు. జగన్‌పై హత్యాయత్నం కేసులో పురోగతిని కమిషనర్‌ బుధవారం విలేకరులకు వివరించారు. సీపీ ఏమన్నారో ఆయన మాటల్లోనే..  పక్షులంటే ఇష్టమని ఫ్లెక్సీపై ముద్రించాడు   ‘తూర్పు గోదావరి జిల్లా థానేలంకకు చెందిన జనుపల్లి శ్రీనివాసరావు మూలపాలెం ఎన్‌పీఎం కాలేజీలో ఇంటర్మీడియట్‌ మధ్యలో ఆపేశాడు. 2009–16 మధ్య గోవా, కర్ణాటక, కువైట్, హైదరాబాద్‌లో వెల్డర్, వంట పని చేశాడు. 2017లో రాజమండ్రి బాలాజీ బేకరీలో కేక్‌ మాస్టర్‌గా కొన్నాళ్లు, అమలాపురంలో కుక్‌గా కొన్నాళ్లు చేశాడు. అదే ఏడాది డిసెంబర్‌ 27న తూర్పు గోదావరి జిల్లా ముమ్మిడివరంలోని అఖిల్‌ స్టూడియోలో ఫోటో దిగాడు. 30న పి.గన్నవరం లేపాక్షి ఫ్లెక్సీలో వైఎస్‌ జగన్‌తో తన ఫోటో ఉండేలా ఫ్లెక్సీ ప్రింటింగ్‌కు ఆర్డరిచ్చాడు. పక్షులంటే తనకు ఇష్టమని గరుడ పక్షిని కూడా ముద్రించాడు. ఆపరేషన్‌ గరుడ కాదు. 31 రాత్రి థానేలంకలో ఈ ఫ్లెక్సీ ఏర్పాటు చేశాడు. 2018 జనవరిలో రాజుపాలెంలో కోడిపందాలు చూడటానికి వెళ్లి అక్కడ రెండు కత్తులు కొనుగోలు చేశాడు. అదే నెల 28న విశాఖ ఎయిర్‌పోర్టులో ఉన్న ఫ్యూజన్‌ ఫుడ్స్‌ రెస్టారెంట్‌లో కుక్‌గా చేరాడు. అప్పట్నుంచి తన స్వగ్రామానికి వెళ్లి వస్తున్నాడు. అక్టోబర్‌ మొదటి వారంలో తన ఇంటికెళ్లినప్పుడు తన సమీప బంధువు విజయదుర్గతో తొమ్మిది పేజీలు, తన గదిలో ఉంటున్న రేవతీపతితో ఒక పేజీ లేఖ రాయించాడు. 17న తిరిగి విశాఖ వచ్చి తానుంటున్న గదిలో కత్తిని స్టెరిలైజ్‌ (వేడినీటిలో మరిగించడం) చేశాడు. ఈ కత్తి ఎందుకుని సహోద్యోగులు శిరీష, ప్రసాద్‌లు అడగ్గా రెస్టారెంట్‌లో కూరగాయలను అందమైన ఆకృతిలో మలచడానికని చెప్పాడు.  అక్టోబర్‌ 18నే దాడికి ప్లాన్‌   తొలుత అక్టోబర్‌ 18న జగన్‌పై విశాఖ విమానాశ్రయంలో దాడికి ప్లాన్‌ వేశాడు. కానీ దసరా సందర్భంగా ఒకరోజు ముందు అంటే 17నే జగన్‌ హైదరాబాద్‌ పయనమవడంతో ఆ ప్రయత్నం ఫలించలేదు. తర్వాత 25 మధ్యాహ్నం జగన్‌ విశాఖ విమానాశ్రయానికి వస్తున్నారని విశాఖ వైఎస్సార్‌సీపీ కార్యాలయంలో ఆఫీస్‌ అసిస్టెంట్‌గా పనిచేస్తున్న కృష్ణకాంత్‌ అనే వ్యక్తి నుంచి రెస్టారెంట్‌లో పనిచేస్తున్న హేమలత ద్వారా తెలుసుకున్నాడు. 25 ఉదయం 4.55కి కోడిపందాల కత్తిని పర్స్‌లో పెట్టుకుని తన ఇంటి నుంచి ఎయిర్‌పోర్టుకు బయల్దేరాడు. 9 గంటల సమయంలో కత్తిని మరోసారి స్టెరిలైజ్‌ చేశాడు. జగన్‌ మధ్యాహ్నం 12.21–25 గంటల మధ్య ఎయిర్‌పోర్టుకు చేరుకుని వీఐపీ లాంజ్‌కు వెళ్లారు. శ్రీనివాస్‌ బ్యాగులో రాసి ఉంచిన లేఖతో పాటు రెండు మంచినీళ్ల బాటిళ్లు వెంట తీసుకుని జగన్‌ దగ్గరకు ఫోటో దిగే నెపంతో వెళ్లాడు. కత్తితో జగన్‌ భుజంపై పొడిచాడు. అక్కడే ఉన్న మాజీ ఎమ్మెల్యేలు కరణం ధర్మశ్రీ, ద్వారంపూడి చంద్రశేఖరరెడ్డిలు అతని వద్ద నుంచి కత్తిని లాక్కున్నారు.   దాడికి పాల్పడిన వెంటనే పోలీసు, సీఐఎస్‌ఎఫ్‌ అధికారులు నిందితుడిని అదుపులోకి తీసుకున్నారు. ప్రతిపక్ష నేతకు ఎయిర్‌పోర్టులో ఉన్న వైద్యురాలితో ప్రాథమిక చికిత్స అందించారు. విమానం బయలుదేరే సమయం కావడంతో జగన్‌ హైదరాబాద్‌ వెళ్లిపోయారు. కత్తి దాడితో జగన్‌ భుజంపై ఒక సెంటీమీటరు వెడల్పు, 3.5 సెంటీమీటర్ల లోతులో గాయమైంది. అంతకుముందు తాను జగన్‌పై దాడి చేసి సంచలనం సృష్టించబోతున్నానని, టీవీల్లో కనిపిస్తానని తనకు పరిచయం ఉన్న ప్రకాశం జిల్లా కనిగిరి ప్రాంతానికి చెందిన షేక్‌ అమ్మాజీతో అక్టోబర్‌ 14, 15 తేదీల్లో శ్రీనివాస్‌ ఫోన్‌లో చెప్పాడు. 17న మరోసారి ఆమెకు అదే విషయాన్ని చెప్పడంతో తాము వెటకారమని నవ్వుకున్నట్టు అమ్మాజీ చెప్పింది. శ్రీనివాస్‌ వద్ద 11 పేజీల లేఖ ఉంది. అందులో తొలి తొమ్మిది పేజీలు సమీప బంధువు విజయదుర్గ, పదో పేజీ రూమ్‌మేట్‌ రేవతీపతి, 11వ పేజీ శ్రీనివాస్‌ రాశాడు. ఈ పేజీల దస్తూరీ వీరిదేనని ఎఫ్‌ఎస్‌ఎల్‌ తేల్చింది. ఎయిర్‌పోర్టులో ఉద్యోగంలో చేరడానికి అవసరమైన ఎన్‌ఓసీని 2018 జనవరి 28, ఏప్రిల్‌ 6న విశాఖ పరిధిలో పోలీసులు ఇచ్చారు. ఫ్యూజన్‌ఫుడ్స్‌కు అన్ని అనుమతులూ ఉన్నాయి. శ్రీనివాసరావు డిపార్చర్‌ ఏరియాలో తిరగడానికి అనుమతి ఉంది.   కుట్రకోణం లేదు..పబ్లిసిటీ కోసమే..   ఈ కేసులో 92 మంది సాక్షులను విచారించాం. వారి నుంచి వివరాలు సేకరించాం. నిందితుడి తన ఫోన్‌ నుంచి 1,110 కాల్స్‌ చేసినట్టు గుర్తించాం. కుట్రకోణంలో కూడా దర్యాప్తు చేశాం. ఇందులో అలాంటిదేమీ లేదు. ఫ్యూజన్‌ ఫుడ్స్‌ రెస్టారెంట్‌ హర్షవర్థన్‌ చౌదరిని కూడా విచారించాం. శ్రీనివాస్‌ పబ్లిసిటీ కోసమే జగన్‌పై కత్తితో దాడి చేశాడు. దాడి సమయంలో ఎయిర్‌పోర్టులో వైఎస్సార్‌సీపీకి చెందిన మాజీ ఎమ్మెల్యేలు కరణం ధర్మశ్రీ, ద్వారంపూడి చంద్రశేఖరరెడ్డి, నాయకులు రామన్నదొర, కొండా రాజీవ్‌గాంధీ, ఎస్‌.సుధాకర్‌ ఉన్నారు.  బ్యాగులో ఉన్నందున లేఖ నలగలేదు   శ్రీనివాసరావు తమ ప్రాంతంలో నాలుగెకరాల భూమి కొనుగోలుకు ప్రయత్నించిన విషయం మాకు తెలియదు. నిందితుని వద్ద ఉన్న లేఖ బ్యాగులో ఉంచడం వల్ల నలగలేదు.  శ్రీనివాసరావు, ఆయన కుటుంబ అకౌంట్లను పరిశీలించి అతని సోదరికి రమాదేవి అనే సహోద్యోగిని అకౌంట్‌ ద్వారా రూ.40 వేలు, 22 వేల చొప్పున బదలాయించినట్టు గుర్తించాం. ఘటన జరిగిన గంటలోనే ఫ్లెక్సీ బయట పడడం వెనక ఎలాంటి ముందస్తు వ్యూహం లేదు. ఈ కేసు పూర్తయ్యే వరకు సిట్‌ విచారణ కొనసాతుంది..’ అని సీపీ చెప్పారు. విలేకరుల సమావేశంలో సిట్‌ ఇన్‌చార్జి బీవీఎస్‌ నాగేశ్వరరావు, ఏసీపీ అర్జున్‌ తదితరులు పాల్గొన్నారు.  

విజయవాడ సిటీ: ప్రతిపక్షనేత వైఎస్‌ జగన్‌మోహన్‌రెడ్డిపై హత్యాయత్నం కేసులో అసలు కుట్రదారులను తప్పించే ప్రయత్నం తీవ్రంగా జరుగుతోందని వైఎస్సార్‌ సీపీ లీగల్‌ సెల్‌ అధ్యక్షుడు పొన్నవోలు సుధాకర్‌రెడ్డి ఆరోపించారు. ఈ కేసును కేవలం నిందితుడు జనపల్లి శ్రీనివాస్‌కే పరిమితం చేయాలనే కుట్ర జరుగుతోందన్నారు. ఎన్‌ఐఏ పరిధిలోని కేసును రాష్ట్ర పరిధిలో విచారణ చేపట్టి నీరుగారుస్తున్నారని అనుమానం వ్యక్తం చేశారు. గతంలో డీజీపీ చేసిన వ్యాఖ్యలు తప్పుడువనే విషయం బుధవారం విశాఖపట్నం సీపీ లడ్డా ప్రెస్‌మీట్‌తో వెల్లడైందన్నారు. విజయవాడలోని వైఎస్సార్‌ సీపీ రాష్ట్ర కార్యాలయంలో ఆయన బుధవారం విలేకరులతో మాట్లాడారు. వైఎస్‌ జగన్‌పై హత్యాయత్నం కేసులో నిందితుడు శ్రీనివాస్‌ ఒక్కడినే  కర్త, కర్మ, క్రియ అని చెప్పే విధంగా విశాఖపట్నం పోలీసు కమిషనర్‌ లడ్డా ప్రయత్నించారన్నారు.  కేసు రిజిస్టర్‌ చేసే సమయంలో ఐపీసీ సెక్షన్‌ 120 బి లేకుండా ఈ కేసులో కేవలం సెక్షన్‌ 307 మాత్రమే ఎందుకు నమోదు చేశారని నిలదీశారు. వైఎస్‌ జగన్‌పై హత్యాయత్నం జరిగిన వెంటనే మధ్యాహ్నం 2 గంటలకు డీజీపీ ప్రెస్‌మీట్‌ పెట్టి..‘జగన్‌ అభిమానే దాడి చేశాడని’ వ్యాఖ్యలు చేశారని గుర్తు చేశారు. అది తప్పని మాత్రమే ఈ రోజు లడ్డా చెప్పారన్నారు.  ఎన్‌ఐఏతో ఎందుకు విచారణ చేయించరు?  ఎయిర్‌పోర్టులో ఏ నేరం జరిగినా నేషనల్‌ ఇన్వెస్టిగేషన్‌ ఏజెన్సీ (ఎన్‌ఐఏ) చట్టం పరిధిలోకి వస్తుందన్నారు. ఎన్‌ఐఏ పరిధిలోకి వచ్చే కేసు ఎందుకు రాష్ట్ర పరిధిలో పెట్టుకున్నారని నిలదీశారు. కేంద్ర పరిధిలో ఉన్న స్థలంలో జరిగిన ఘటనపై సెక్షన్‌ 61 ఎన్‌ఏఐ యాక్ట్‌ 2008 ప్రకారం, అలాగే సివిల్‌ ఏవియేషన్‌ యాక్ట్‌ 1982 సెక్షన్‌ 3ఏ కింద  కేసు నమోదు చేసి దానిని ఎన్‌ఐఏకి బదిలీ చేయాలన్నారు. పాడేరు ఎమ్మెల్యే కిడారి, మాజీ ఎమ్మెల్యే సోముపై మావోయిస్టులు దాడి చేసి హత్య చేస్తే వెంటనే నేషనల్‌ ఇన్వెస్టిగేషన్‌ ఏజెన్సీ (ఎన్‌ఐఏ)కి బదిలీ చేసిన రాష్ట్ర ప్రభుత్వం.. వైఎస్‌ జగన్‌ కేసును ఎందుకు అప్పగించడం లేదని నిలదీశారు. పై రెండు చట్టాలు డీజీపీకి తెలియవా? లేక కావాలనే తొక్కిపట్టారా? అని ప్రశ్నించారు. విచారణను చంద్రబాబు ప్రభావితం చేశారని, ఈ కేసును ఆలస్యం చేస్తే ఇందులో సాక్ష్యాలు ఆవిరవుతాయని హైకోర్టులో ఫిర్యాదు చేశామన్నారు.  ‘జగన్‌పై ఉన్న కేసుల నుంచి తప్పించుకునేందుకే ప్రధానిని ఆశ్రయించారని, మోదీ తలచుకుంటే జగన్‌ జైలుకే అని’ కుప్పంలో బుధవారం జరిగిన జన్మభూమి గ్రామ సభలో ముఖ్యమంత్రి చంద్రబాబు చేసిన వ్యాఖ్యలు దుర్మార్గమని చెప్పారు. చంద్రబాబు మీద 27 కేసులు ఇవాల్టికీ స్టే రూపంలో ఉన్నాయంటే...ఆ కేసులు ముందుకు వెళ్లకుండా ఆయన కోర్టును మేనేజ్‌ చేశారా? అని ప్రశ్నించారు.  న్యాయ వ్యవస్థ అంటే బాబుకు అంత చులకన భావమా అని ఆగ్రహం వ్యక్తంచేశారు. ఆయన వ్యాఖ్యలను కోర్టు ధిక్కారం కింద పరిగణించాలన్నారు. వైఎస్‌ జగన్‌పై ఉన్న కేసులు గాలి బుడగ లాంటివని, ఎవరి కుట్రతో కేసులు పెట్టారో అందరికీ తెలిసిందేనని సుధాకర్‌రెడ్డి అన్నారు.  

సాక్షి, విశాఖపట్నం: ఆంధ్రప్రదేశ్‌ ప్రతిపక్ష నాయకుడు, వైఎస్సార్‌ కాంగ్రెస్‌ పార్టీ అధ్యక్షుడు వైఎస్‌ జగన్‌మోహన్‌ రెడ్డిపై పక్కా పథకం ప్రకారమే హత్యాయత్నం జరిగిందని విశాఖపట్నం పోలీసు కమిషనర్‌ మహేష్‌ చంద్ర లడ్డా తెలిపారు. బుధవారం ఆయన మీడియాతో మాట్లాడుతూ.. వైఎస్‌ జగన్‌పై దాడికి నిందితుడు శ్రీనివాస్‌ రెండుసార్లు కుట్ర పన్నాడని వెల్లడించారు. ‘నిందితుడు 2017 డిసెంబర్ నుండే వైఎస్‌ జగన్ హత్యపై కార్యాచరణ ప్రారంభించాడు. అక్టోబర్‌ 18నే దాడికి పథక రచన చేశాడు. అక్టోబర్‌ 17నే వైఎస్‌ జగన్‌ విశాఖ నుంచి వెళ్లిపోవడంతో అతడి పథకం ఫలించలేదు. శ్రీనివాస్‌ గతంలో వెల్డర్‌, కేక్‌ మాస్టర్‌, కుక్‌గా పనిచేశాడు. జనవరి 2018 కర్ణాటకలో తనతో పనిచేసిన వెంకటపతి అనే వ్యక్తి ద్వారా ఫ్యూజన్ ఫుడ్స్ లో చేరాడు. 164 సీఆర్ పీసీ కింద ఇప్పటి వరకు 92 మంది సాక్షులను విచారించి, స్టేట్‌మెంట్‌లు రికార్డ్ చేసాం. దాడికి ఉపయోగించిన కోడిపందేల కత్తికి నిందితుడు రెండుసార్లు పదును పెట్టాడు. (అది హత్యాయత్నమే) ముందుగానే ఓ లేఖను విజయదుర్గతో రాయించాడు. ఈ లేఖను ఆమె జిరాక్స్‌ కూడా తీయించింది. హేమలత, షేక్‌ అమ్మాజీ అనే మహిళలకు శ్రీనివాస్‌ ముందురోజు ఫోన్‌ చేసి రేపు నా పేరు టీవీలో చూస్తారంటూ చెప్పాడు. అక్టోబర్‌ 25న ఉదయం 4.55 గంటలకు ఎయిర్‌పోర్టుకు బయలు దేరాడు. ఎయిర్‌పోర్టు క్యాంటీన్‌లో ఉదయం 9 గంటలకు కత్తికి మరోసారి పదును పెట్టాడు. దాడికి పక్కా పథకం ప్రకారం సిద్ధమయ్యాడు. వీఐపీ లాంజ్‌లో వేచివున్న వైఎస్‌ జగన్‌ వద్దకు హేమలతను తీసుకెళ్లాడు. కరణం ధర్మశ్రీతో జగన్‌ మాట్లాడుతుండగా శ్రీనివాస్‌ దాడికి తెగబడ్డాడు. రాష్ట్రంలో ఎక్కడ ఘటన జరిగిన రాష్ట్ర పోలీసులే కేసు నమోదు చేసి దర్యాప్తు చేస్తారు. కేంద్ర దర్యాప్తు సంస్థలకు అప్పగించాలంటే రాష్ట్ర ప్రభుత్వం అప్పగించాలి లేదా కేంద్రం కోరాలి. స్థానిక పోలీసులకు అధికారం లేదు. నిందితుడి దగ్గర దొరికిన లేఖలో ముగ్గురి చేతి రాతలు ఉన్నట్లు ఎఫ్ఎస్ఎల్ రిపోర్ట్ ఇచ్చింది. కేసులో ఇప్పటివరకు శ్రీనివాస్‌ మాత్రమే నిందితుడు. దాదాపుగా విచారణ పూర్తి అయింది. ఛార్జి షీట్ దాఖలుకు హైకోర్ట్ అనుమతి రావాల్సి ఉంద’ని లడ్డా వివరించారు. అనుమానాలెన్నో..? పోలీసు కమిషనర్‌ హడావుడిగా విలేకరుల సమావేశం పెట్టి కేసు వివరాలు వెల్లడించడంపై వైఎస్సార్‌ సీపీ నాయకులు అనుమానాలు వ్యక్తం చేస్తున్నారు. అంతకుముందు చెప్పిందే మళ్లీ చెప్పారని, కొత్తగా ఏం చెప్పలేదని పేర్కొన్నారు. సూత్రధారులను తప్పించేందుకే రాష్ట్ర పోలీసులు దర్యాప్తు చేస్తున్నారని ఆరోపించారు. కేంద్ర దర్యాప్తు సంస్థలతో విచారణ చేయిస్తేనే వాస్తవాలు వెలుగులోకి వస్తాయని వ్యాఖ్యానించారు. కేసు విచారణను కేంద్ర దర్యాప్తు సంస్థలకు అప్పగించేందుకు చంద్రబాబు సర్కారు ఎందుకు భయపడుతోందని ప్రశ్నిస్తున్నారు.

రాష్ట్ర రాజకీయాల్లో దిగజారిన విలువలకు సాక్షీభూతం.. 2018. ప్రజాస్వామ్యం అపహాస్యం పాలైంది ఈ ఏడాదే. చంద్రబాబు ఏలుబడిలో రాజ్యాంగం ఖూనీ అయింది. అధికార బలంతోవ్యవస్థలను నిర్వీర్యం చేశారు. రాష్ట్ర ప్రయోజనాలను పట్టపగలే తాకట్టు పెట్టారు. అధికార తెలుగుదేశం పార్టీ క్షుద్ర రాజకీయాలకు 2018 సంవత్సరమే సాక్ష్యం. తిరగబడేజనాన్ని.. ఎగిసిపడే జగన్‌ ప్రభంజనాన్ని చూసి చంద్రబాబు హడలిపోయిందీ ఈ ఏడాదే. గతి తప్పిన రాజకీయ రహదారిలో చంద్రబాబు నైతిక విలువలూ కోల్పోయిందీ ఈ సంవత్సరమే.   అసెంబ్లీ వేదికగా ప్రతిపక్షంపై దూషణలు  ఈ ఏడాదంతా ప్రతిపక్షం లేకుండానే శాసనసభ జరిగింది. ప్రభుత్వ అప్రజాస్వామిక చర్యలను నిరసిస్తూ ప్రతిపక్ష వైఎస్సార్‌సీపీ సభ్యులు శాసనసభకు హాజరు కాలేదు. దీంతో అధికార పక్షం రెచ్చిపోయింది. సభలో లేని ప్రతిపక్షాన్ని, ప్రతిపక్ష నాయకుడిని నోటికొచ్చినట్టు దూషించడమే అధికార పార్టీ విధానంగా మారింది. ఈ ఏడాది శాసనసభలో ప్రజా సమస్యలపై నిర్మాణాత్మక చర్చ జరిగిన దాఖలాలే లేకపోవడం గమనార్హం. ప్రజలకు ఉపయోగకరమైన ఏ ఒక్క నిర్ణయమూ తీసుకోలేదు. అధికార పార్టీ సొంత డబ్బాకు అసెంబ్లీ వేదికవ్వడం 2018లో కనిపించిన మరో దృశ్యం.  కుట్రల బాబు... కుయుక్తుల కాలం  వెకిలి పోకడలకు, మకిలి రాజకీయాలకు 2018 వేదికైంది. ముఖ్యమంత్రి చంద్రబాబు నాయుడు ఏడాది పొడవునా తీసుకున్న యూటర్న్‌లు అన్నీ ఇన్నీ కావు. రాష్ట్ర అభివృద్ధికి సంజీవని లాంటి ప్రత్యేక హోదాకు ఉప్పు పాతరేశారు. ప్యాకేజీ గొప్పదని తేల్చేశారు. ప్రధాని నరేంద్ర మోదీ గ్రాఫ్‌ తగ్గిందనే భావనతో చంద్రబాబు రూటు మార్చారు. నాలుగేళ్లపాటు కేంద్రంతో సాగిస్తున్న కాపురాన్ని తెగదెంపులు చేసుకున్నారు. నిన్న మొన్నటి దాకా మోదీని ఆకాశానికెత్తిన చంద్రబాబు అంతలోనే మాటల దాడి పెంచారు. ప్రత్యేక హోదా సాధనే ఊపిరిగా ప్రతిపక్ష వైఎస్సార్‌ కాంగ్రెస్‌ పార్టీ సాగిస్తున్న పోరాటం 2018లో తారస్థాయికి చేరింది. హోదా ఇవ్వని కేంద్ర ప్రభుత్వాన్ని పార్లమెంట్‌లో వైఎస్సార్‌సీపీ నిలదీసింది. అవిశ్వాసం అస్త్రాన్ని సంధించింది. పార్టీ ఎంపీలు పదవులను తృణప్రాయంగా వదిలేశారు. హోదా కోసం పదవులు వదులుకున్న వైఎస్సార్‌సీపీకి ప్రజాదరణ పెరుగుతుండడంతో సీఎం చంద్రబాబు మాట మార్చేశారు. ధర్మపోరాట దీక్షలంటూ కొత్త డ్రామాలకు తెరతీశారు.   దిగజారుడు రాజకీయం చంద్రబాబు దిగజారుడు రాజకీయం ఈ ఏడాది పరాకాష్టకు చేరింది. మోదీ జోడీ విడిచిపెట్టిన బాబును అవినీతి భూతం కలవరపెట్టింది. రాష్ట్రంలో విచ్చలవిడిగా ప్రజాధనాన్ని దోచుకున్న బాబుకు వెన్నులో చలిపుట్టింది. ఎక్కడో ఐటీ, ఈడీ దాడులు జరిగితే తన గుట్టు బయటకొస్తుందని బెంబేలెత్తిపోయారు. ఐటీ దాదులను రాష్ట్రంపై కేంద్రం దాడిగా చిత్రీకరించేందుకు ప్రయత్నించి భంగపడ్డారు. చంద్రబాబు రాజకీయ నైతిక విలువలకూ తిలోదకాలివ్వడం ఈ ఏడాది మరో వైపరీత్యంగా చెప్పాలి. దశాబ్దాలుగా సైద్ధాంతిక విభేదాలున్న కాంగ్రెస్‌ పార్టీతో అపవిత్ర పొత్తు పెట్టుకున్నారు. కాంగ్రెస్‌ అధ్యక్షుడు రాహుల్‌గాంధీతో పొరుగు రాష్ట్రం తెలంగాణలో చెట్టాపట్టాలేసుకుని తిరిగారు. ఈ అనైతిక పొత్తును తెలంగాణ ప్రజలు అసహ్యించుకున్నారు. అసెంబ్లీ ఎన్నికల్లో చంద్రబాబుకు గట్టిగా గుణపాఠం చెప్పారు.  మతి తప్పిన మాటలు  2018లో సీఎం చంద్రబాబు చేసిన పలు వ్యాఖ్యలు కలకలం రేపాయి. అసలు ఆయనకు ఏమైందనే అనుమానం రాజకీయ వర్గాలనూ వెంటాడింది. చంద్రబాబుకు మతిస్థిమితం తప్పిందా అనే సందేహాలు వ్యక్తమయ్యాయి. దీనికి కారణాలు లేకపోలేదు. అదిగో అమరావతి... ఇదిగో అసెంబ్లీ... అదిగదిగో సచివాలయం... అంటూ ప్రజలకు గ్రాఫిక్స్‌ చూపిస్తూ కాలం గడిపేశారు. తాజాగా తెలంగాణ ఎన్నికల సభలో విచిత్రంగా మాట్లాడారు. హైదరాబాద్‌ను తానే నిర్మించానని, తెలంగాణలోని అన్నీ తానే తీసుకొచ్చానని చెప్పడం ఈ ఏడాది జోక్‌గా జనం ఇప్పటికీ చెప్పుకుంటారు. తాను ప్రచారం చేసిన తెలంగాణలో ప్రజాకూటమికి పుట్టగతుల్లేకుండా పోయినా... కొన్ని రాష్ట్రాల్లో కాంగ్రెస్‌ నెగ్గడం తన దయే అంటూ బాబు నోటివెంట రావడం 2018లో ప్రజలను విస్మయపరిచింది. విశాఖపట్నం విమానాశ్రయంలో ప్రతిపక్ష నేత వైఎస్‌ జగన్‌మోహన్‌రెడ్డిపై హత్యాయత్నం జరిగితే చంద్రబాబు విషపు నవ్వులు నవ్వడం యావత్‌ రాష్ట్ర ప్రజలను ఆశ్చర్యపరిచింది. రక్తసిక్తమైన విపక్ష నేతపై ఇసుమంతైనా సానుభూతి చూపని చంద్రబాబు కర్కశత్వానికి 2018 సంవత్సరమే కన్నీరు పెట్టిందేమోనని పలువురు వ్యాఖ్యానించారు. 

సాక్షి, హైదరాబాద్‌: వైఎస్సార్‌ కాంగ్రెస్‌ పార్టీ అధ్యక్షుడు, ప్రతిపక్ష నేత వైఎస్‌ జగన్‌మోహన్‌రెడ్డిపై విశాఖపట్నం విమానాశ్రయంలో జరిగిన హత్యాయత్నం ఘటనపై దర్యాప్తు చేపట్టే విషయంలో ఓ అభిప్రాయానికి రావాలని కేంద్ర, రాష్ట్ర ప్రభుత్వాలను హైకోర్టు ఆదేశించింది. వివిధ పరిస్థితుల్లో కేంద్రం లేదా రాష్ట్ర ప్రభుత్వం ఏ విధంగా వ్యవహరించాలన్న విధివిధానాలు ఎన్‌ఐఏ చట్టంలోని సెక్షన్‌ 6లో స్పష్టంగా ఉన్నాయని, దీనిప్రకారం ఓ అభిప్రాయానికి వచ్చి, అవసరమైన చర్యలు తీసుకోవాలని పేర్కొంది. ఏ నిర్ణయం తీసుకున్నారో తమకు తెలియచేయాలని సూచించింది. తదుపరి విచారణను జనవరి 4వ తేదీకి వాయిదా వేసింది. ఇదే సమయంలో ఈ కేసులో చార్జిషీట్‌ దాఖలు చేయవద్దని ప్రత్యేక దర్యాప్తు బృందం(సిట్‌)ను ఆదేశిస్తూ గతంలో తామిచ్చిన మధ్యంతర ఉత్తర్వులను ధర్మాసనం పొడిగించింది. ఈ మేరకు ప్రధాన న్యాయమూర్తి(సీజే) జస్టిస్‌ తొట్టతిల్‌ బి.రాధాకృష్ణన్, న్యాయమూర్తి జస్టిస్‌ ఎస్‌.వి.భట్‌లతో కూడిన హైకోర్టు ధర్మాసనం శుక్రవారం ఉత్తర్వులు జారీ చేసింది.  తనపై విశాఖపట్నం విమానాశ్రయంలో జరిగిన హత్యాయత్నం ఘటన పౌర విమానయాన భద్రతా చట్టం ప్రకారం చట్ట వ్యతిరేక కార్యకలాపాల నిర్వచనం పరిధిలోకి వస్తుందని.. ఈ నిర్వచనం పరిధిలోకి వచ్చే ఘటనలపై దర్యాప్తు చేయాల్సింది జాతీయ దర్యాప్తు సంస్థ అని, ఆ మేరకు కేంద్ర హోంశాఖకు తగిన ఆదేశాలు జారీ చేయాలని కోరుతూ వైఎస్‌ జగన్‌మోహన్‌రెడ్డి హైకోర్టులో పిటిషన్‌ దాఖలు చేసిన విషయం తెలిసిందే. జగన్‌పై జరిగిన హత్యాయత్నం ఘటనపై స్వతంత్ర సంస్థ దర్యాప్తుతో దర్యాప్తునకు ఆదేశించాలని కోరుతూ వైఎస్సార్‌సీపీ ఆ పార్టీ రాజకీయ వ్యవహారాల కమిటీ సభ్యులు వైవి సుబ్బారెడ్డి పిటిషన్‌ దాఖలు చేశారు. ఇదే ఘటనపై ఎన్‌ఐఏ దర్యాప్తునకు ఆదేశించాలని కోరుతూ మంగళగిరి ఎమ్మెల్యే ఆళ్ల రామకృష్ణారెడ్డి ప్రజా ప్రయోజన వ్యాజ్యం(పిల్‌)దాఖలు చేశారు. ఈ వ్యాజ్యాలను శుక్రవారం సీజే నేతృత్వంలోని ధర్మాసనం విచారించింది.   గత విచారణ సమయంలో ధర్మాసనం ఆదేశాల మేరకు ఎన్‌ఐఏ దర్యాప్తుపై కేంద్రం నిర్ణయాన్ని అసిస్టెంట్‌ సొలిసిటర్‌ జనరల్‌ (ఏఎస్‌జీ) కె.లక్ష్మణ్‌ సీల్డ్‌ కవర్‌లో కోర్టు ముందుంచారు. ధర్మాసనం దాన్ని తిరిగి సీల్డ్‌ కవర్‌లో ఉంచి, సీల్‌ చేసింది. ఆ నివేదికలో ఏముందో బహిర్గతం చేయలేదు. ఆ వెంటనే ఉత్తర్వులు జారీ చేస్తూ, కేంద్ర హోంశాఖ రహస్య ఈ నివేదికను తిరిగి ఆ శాఖకే ఇచ్చేస్తున్నట్లు తెలిపింది.    శ్రీనివాసరావుకు మరో 14 రోజుల రిమాండ్‌ సాక్షి, విశాఖపట్నం: ఏపీ ప్రతిపక్షనేత, వైఎస్సార్‌ సీపీ అధినేత వై.ఎస్‌.జగన్‌మోహన్‌రెడ్డిపై జరిగిన హత్యాయత్నం కేసులో ప్రధాన నిందితుడు జనుపల్లి శ్రీనివాసరావు జ్యుడీషియల్‌ రిమాండ్‌ను మరో 14 రోజుల పాటు పొడిగిస్తూ విశాఖ మూడో మెట్రోపాలిటన్‌ మేజిస్ట్రేట్‌ ఆదేశాలు జారీ చేశారు. విశాఖ ఎయిర్‌పోర్టు వీఐపీ లాంజ్‌లో అక్టోబర్‌ 25న జరిగిన హత్యాయత్నం కేసులో అరెస్టయిన శ్రీనివాసరావు రిమాండ్‌ గడువు శుక్రవారంతో ముగిసింది. గడచిన మూడు దఫాలుగా కస్టడీ ముగిసిన ప్రతిసారి సెంట్రల్‌ జైలు నుంచి నిందితుడ్ని ప్రత్యేక బందోబస్తుతో జిల్లా కోర్టుకు తీసుకురావడం.. మేజిస్ట్రేట్‌ ముందు హాజరు పర్చగానే  పది నిముషాల్లో రిమాండ్‌ పొడిగింపు ఆదేశాలు రాగానే తిరిగి మళ్లీ బందోబస్తు మధ్య సెంట్రల్‌ జైలుకు తరలించే వారు. మూడేళ్ల క్రితం ప్రయోగాత్మకంగా అమలు చేసిన వీడియో కాన్ఫరెన్స్‌ ద్వారా రిమాండ్‌ నిందితుల హాజరు విధానానికి మళ్లీ శుక్రవారం నుంచి శ్రీకారం చుట్టారు. రిమాండ్‌ ముగిసిన జనుపల్లి శ్రీనివాసరావును సెంట్రల్‌ జైలులోని వీడియో కాన్ఫరెన్స్‌ హాలు నుంచే నేరుగా మధ్యాహ్నం 2 గంటల సమయంలో మూడో మెట్రోపాలిటన్‌ మేజిస్ట్రేట్‌ ఎదుట హాజరు పరిచారు. ఆ వెంటనే మేజిస్ట్రేట్‌ నిందితుడి రిమాండ్‌ గడువును మరో 14 రోజులు పొడిగిస్తూ ఉత్తర్వులు జారీ చేశారు. మరో వైపు నిందితుడి తరఫు లాయర్‌ సలీం జిల్లా కోర్టులో బెయిల్‌ పిటిషన్‌ దాఖలు చేశారు. ఈ పిటిషన్‌ ఈ నెల 27న విచారణకు రానుందని ఆయన మీడియాకు తెలిపారు. కాగా ఎప్పటిలాగే ఈసారి కూడా నిందితుడ్ని కోర్టుకు తీసుకొస్తారన్న ఆలోచనతో మీడియా ప్రతినిధులు పెద్ద సంఖ్యలో జిల్లా కోర్టుకు చేరుకుని ఉదయం నుంచి మధ్యాహ్నం వరకు వేచి చూశారు.

సాక్షి, హైదరాబాద్‌ : వైఎస్సార్‌ కాంగ్రెస్‌ పార్టీ అధ్యక్షులు, ఆంధ్రప్రదేశ్‌ ప్రతిపక్ష నేత వైఎస్‌ జగన్‌మోహన్‌ రెడ్డిపై విశాఖపట్నం విమానాశ్రయంలో జరిగిన హత్యాయత్నం కేసుపై ఈ శుక్రవారం హైకోర్టు విచారణ జరిపింది. ఎన్‌ఐఏ యాక్ట్‌ ప్రకారం కేసును ఎన్‌ఐఏకి బదిలీ చేయాలని వైఎస్‌ జగన్‌ తరపు న్యాయవాది కోర్టును కోరారు. కేసు దర్యాప్తు ఆలస్యమైతే సాక్ష్యాధారాలు తారుమారు అయ్యే అవకాశం ఉందని పిటిషనర్‌ తరుపు న్యాయవాది కోర్టు దృష్టికి తీసుకువచ్చారు. పిటిషనర్‌ వాదనలతో ఏకీభవించిన హైకోర్టు కేసును ఎన్‌ఐఏకి బదిలీ చేయటంపై తమ నిర్ణయాలను చెప్పాలని కేంద్ర, రాష్ట్ర ప్రభుత్వాలను ఆదేశించింది. హైకోర్టు తదుపరి విచారణను జనవరి 4వ తేదీకి వాయిదా వేసింది. (ఎన్‌ఐఏ చట్ట పరిధిలోకి వస్తుందా? రాదా?)

సాక్షి, గుంటూరు : చంద్రబాబు ప్రభుత్వం పోలీసులను అడ్డుపెట్టుకుని విచారణ పేరుతో తనను వేధిస్తోందని వైఎస్సార్‌ కాంగ్రెస్‌ పార్టీ నేత, మాజీ ఎమ్మెల్యే జోగి రమేష్‌ ఆవేదన వ్యక్తం చేశారు. వైఎస్సార్‌ సీపీ నాయకులపై టీడీపీ ప్రభుత్వ వేధింపుల పర్వంలో భాగంగా.. విచారణ నిమిత్తం జోగి రమేష్‌ మరోసారి నల్లపాడు పోలీస్‌స్టేషన్‌కు రావాలంటూ అరండల్‌పేట పోలీసులు ఆదేశాలిచ్చిన సంగతి తెలిసిందే. ఈ క్రమంలో శనివారం ఆయన పోలీసుల ఎదుట హాజరయ్యారు. విచారణ అనంతరం విలేకరులతో మాట్లాడుతూ... వేధింపులకు భయపడకుండా న్యాయపోరాటం చేస్తానని జోగి రమేష్ అన్నారు. నిన్నటి వరకు ఈ కేసులో సాక్షిగా ఉన్న తనకు సీఆర్‌పీసీ 91 కింద నోటీసులు ఇచ్చిన పోలీసులు ప్రస్తుతం ముద్దాయినంటూ సీఆర్‌పీసీ 41ఏ కింద నోటీసులివ్వడం ఏమిటని ప్రశ్నించారు. ప్రభుత్వం ఎలా చెబితే పోలీసులు అలా నడుచుకుంటున్నారంటూ ఆరోపించారు. ప్రతిపక్ష నేత వైఎస్‌ జగన్‌మోహన్‌ రెడ్డిపై హత్యాయత్నం జరిగితే నిందితులను పట్టుకోలేని ప్రభుత్వం తన లాంటి అమాయకులను మాత్రం వేధిస్తోందని ఆవేదన వ్యక్తం చేశారు. ‘ఈ నెల 21న మరోసారి అరండల్‌పేట స్టేషన్‌కు రావాలని చెప్పారు. ఎన్నిసార్లు పిలిచినా వస్తా. మాకు చట్టాలు, న్యాయస్థానాల పట్ల గౌరవం ఉంది. కానీ ప్రభుత్వం మాత్రం చట్టాలను తుంగలో తొక్కుతోంది’ అని జోగి రమేష్‌ వ్యాఖ్యానించారు. విచారణ ఎందుకంటే.. ఏపీ ప్రతిపక్షనేత వైఎస్‌ జగన్‌ మోహన్‌ రెడ్డి హత్య కేసులో నిందితుడు శ్రీనివాసరావు టీడీపీ కార్యకర్త అంటూ సోషల్‌ మీడియాలో టీడీపీ సభ్యత్వ నమోదు కార్డు వైరల్‌ అయిన సంగతి తెలిసిందే. సోషల్‌ మీడియాలో వైరల్‌ అవుతోన్న సభ్యత్వ కార్డు విషయమై వైఎస్సార్‌సీపీ జోగి రమేష్‌ ప్రెస్‌మీట్‌ పెట్టడమే ఆయన తప్పయింది. ఈ విషయాన్ని పట్టుకుని పోలీసుల ద్వారా టీడీపీ నేతలు వేధింపులకు గురిచేస్తున్నారు. టీడీపీ నేత వర్ల రామయ్య ఫిర్యాదుతో జోగి రమేష్‌పై కేసు నమోదు చేసి విచారణ పేరుతో పలుమార్లు తమ చుట్టూ తిప్పుకుంటూ వేధిస్తున్నారు.

సాక్షి, గుంటూరు: వైఎస్సార్‌సీపీ నాయకులపై టీడీపీ ప్రభుత్వ వేధింపుల పర్వం కొనసాగుతోంది. మాజీ ఎమ్మెల్యే, వైఎస్సార్‌సీపీ నేత జోగి రమేష్‌ను మరోసారి విచారణ నిమిత్తం నల్లపాడు పోలీస్‌స్టేషన్‌కు రావాలంటూ అరండల్‌పేట పోలీసులు ఆదేశాలిచ్చారు. వైఎస్‌ జగన్‌ మోహన్‌ రెడ్డి హత్య కేసులో నిందితుడు శ్రీనివాసరావు టీడీపీ కార్యకర్త అంటూ సోషల్‌ మీడియాలో టీడీపీ సభ్యత్వ నమోదు కార్డు వైరల్‌ అయిన సంగతి తెల్సిందే. సోషల్‌ మీడియాలో వైరల్‌ అవుతోన్న సభ్యత్వ కార్డు విషయమై వైఎస్సార్‌సీపీ జోగి రమేష్‌ ప్రెస్‌మీట్‌ పెట్టడమే ఆయన తప్పయింది. ఈ విషయాన్ని పట్టుకుని పోలీసుల ద్వారా టీడీపీ నేతలు వేధింపులకు గురిచేస్తున్నారు. టీడీపీ నేత వర్ల రామయ్య ఫిర్యాదుతో జోగి రమేష్‌పై కేసు నమోదు చేసి విచారణ పేరుతో పలుమార్లు తమ చుట్టూ తిప్పుకుంటూ వేధించసాగారు. ఇప్పటికే జోగిరమేష్‌ను పలుమార్లు పోలీసులు విచారించారు. తాజాగా మరోసారి విచారణకు రమ్మని ఆదేశాలు జారీ చేశారు. పదే పదే విచారణ పేరుతో కక్ష గట్టి జోగి రమేష్‌ను ప్రభుత్వం వేధిస్తోందని వైఎస్సార్‌సీపీ నాయకులు ఆగ్రహం వ్యక్తం చేస్తున్నారు.

సాక్షి, హైదరాబాద్‌: ఆంధ్రప్రదేశ్‌ ప్రతిపక్ష నేత వైఎస్‌ జగన్‌మోహన్‌రెడ్డిపై విశాఖ విమానాశ్రయంలో జరిగిన హత్యాయత్న ఘటన విషయంలో కేంద్ర ప్రభుత్వం తీరును హైకోర్టు తప్పుపట్టింది. జగన్‌పై జరిగిన హత్యాయత్నం ఘటన జాతీయ దర్యాప్తు సంస్థ (ఎన్‌ఐఏ) చట్టంలో పేర్కొన్న నేరాల కిందకు వస్తుందో రాదో తేల్చకుండా ఆ బాధ్యతను తమపైకి నెట్టేయడంపై తీవ్ర అసంతృప్తి వ్యక్తం చేసింది. గత విచారణ సమయంలో తాము ఇచ్చిన ఆదేశాల మేరకు జగన్‌పై జరిగిన హత్యాయత్న ఘటన ఎన్‌ఐఏ చట్ట పరిధిలోకి వస్తుందో రాదో స్పష్టంగా తెలియచేస్తూ సీల్డ్‌ కవర్‌లో నివేదిక ఇవ్వాలని కేంద్రాన్ని ఆదేశించింది. తదుపరి విచారణను వచ్చే వారానికి వాయిదా వేసింది. ఈ మేరకు ప్రధాన న్యాయమూర్తి (సీజే) జస్టిస్‌ తొట్టతిల్‌ బి.రాధాకృష్ణన్, న్యాయమూర్తి జస్టిస్‌ ఎస్‌.వి.భట్‌లతో కూడిన ధర్మాసనం శుక్రవారం ఉత్తర్వులు జారీ చేసింది. తనపై విశాఖ విమానాశ్రయంలో జరిగిన హత్యాయత్నం ఘటన పౌర విమానయాన భద్రత చట్టం ప్రకారం చట్ట వ్యతిరేక కార్యకలాపాల నిర్వచన పరిధిలోకి వస్తుందని, ఇలాంటి ఘటనలపై దర్యాప్తు చేయాల్సింది జాతీయ దర్యాప్తు సంస్థ అని, ఆ మేర కేంద్ర హోంశాఖకు తగిన ఆదేశాలు జారీ చేయాలని కోరుతూ వైఎస్‌ జగన్‌ హైకోర్టులో పిటిషన్‌ దాఖలు చేసిన విషయం తెలిసిందే. జగన్‌పై హత్యాయత్నం ఘటనపై స్వతంత్ర సంస్థ దర్యాప్తునకు ఆదేశించాలని కోరుతూ వైఎస్సార్‌ సీపీ తరఫున వైవీ సుబ్బారెడ్డి పిటిషన్‌ దాఖలు చేశారు. ఇదే ఘటనపై ఎన్‌ఐఏ దర్యాప్తునకు ఆదేశించాలని కోరుతూ మంగళగిరి ఎమ్మెల్యే ఆళ్ల రామకృష్ణారెడ్డి పిల్‌ దాఖలు చేశారు. ఈ వ్యాజ్యాలను శుక్రవారం సీజే నేతృత్వంలోని ధర్మాసనం విచారించింది. ఈ సందర్భంగా కేంద్రం తరఫున అసిస్టెంట్‌ సొలిసిటర్‌ జనరల్‌ (ఏఎస్‌జీ) కె.లక్ష్మణ్‌ సీల్డ్‌ కవర్‌లో ఓ నివేదికను ధర్మాసనం ముందుంచారు. ఈ నివేదికను పరిశీలించిన ధర్మాసనం, ఇందులో తాము కోరిన వివరాలు లేవంటూ అసహనం వ్యక్తం చేసింది. ఈ సందర్భంగా ధర్మాసనం వ్యాఖ్యానిస్తూ.. ‘జగన్‌పై హత్యాయత్నం ఘటన ఎన్‌ఐఏ చట్టంలో పేర్కొన్న నేరాల కిందకు వస్తుందా?రాదా? తేల్చేందుకు మూడు మార్గాలున్నాయి. ఘటనపై రాష్ట్ర ప్రభుత్వం నుంచి నివేదిక తెప్పించుకోవడం ఒకటి. ఇతర మార్గాల ద్వారా అందిన సమాచారం రెండోది. కేంద్ర ప్రభుత్వమే సుమోటోగా సమాచారం తెప్పించుకోవడం మూడోది. ఈ మూడు మార్గాల్లో ఏదో ఒక దాని ద్వారా సమాచారం అందినప్పుడు నిర్ణయం తీసుకోవాల్సింది కేంద్రమే’ అని స్పష్టం చేసింది. కేంద్రం నిర్ణయం తీసుకోకుండా దానిని ఇతరులపైకి నెట్టడం సరికాదంది. ఈ సందర్భంగా లక్ష్మణ్‌ స్పందిస్తూ, కేంద్ర హోంశాఖ అధికారులతో మాట్లాడి నిర్ణయం చెబుతానని తెలిపారు. దీనికి ధర్మాసనం స్పందిస్తూ, ఏం చేయాలో చెప్పేందుకు తామేమీ సలహాదారులం కాదంది. ఎన్‌ఐఏ చట్ట ప్రకారం ఈ మొత్తం వ్యవహారంపై నిర్ణయం తీసుకుని దానిని సీల్డ్‌ కవర్‌లో తమ ముందుంచాలంది.  

సాక్షి, హైదరాబాద్‌:  వైఎస్సార్‌ కాంగ్రెస్‌ పార్టీ అధ్యక్షులు, ఆంధ్రప్రదేశ్‌ ప్రతిపక్ష నాయకుడు వైఎస్‌ జగన్‌పై హత్యాయత్నం కేసు విచారణను హైకోర్టు వచ్చే శుక్రవారానికి వాయిదా వేసింది. కేంద్ర ప్రభుత్వం సీల్డ్‌కవర్‌లో పంపించిన నివేదికపై హైకోర్టు తీవ్ర ఆగ్రహం వ్యక్తం చేసింది. సీల్డ్‌ కవర్‌ నివేదిక సరిగ్గా లేదని అసంతృప్తి వ్యక్తం చేసింది. మరో మారు నివేదిక పంపించాలని కేంద్ర ప్రభుత్వానికి హైకోర్టు ఆదేశాలు జారీ చేసింది. కేసు తదుపరి విచారణను వచ్చే శుక్రవారానికి(ఈ నెల 21 తేదీకి)  వాయిదా వేస్తూ హైకోర్టు నిర్ణయం తీసుకుంది.  విశాఖపట్నం విమానాశ్రయంలో జరిగిన హత్యాయత్నం ఘటనపై జాతీయ దర్యాప్తు సంస్థ(ఎన్‌ఐఏ) చేత దర్యాప్తు చేయించే విషయంపై పరిశీలన జరుగుతోందని కేంద్ర ప్రభుత్వం బుధవారం హైకోర్టుకు నివేదించిన సంగతి తెల్సిందే.ఈ ఘటన ఎన్‌ఐఏ చట్టంలో నిర్ధేశించిన నేరాల పరిధిలోకి వస్తుందో రాదో పరిశీలన చేసి, ఆ తరువాత దర్యాప్తుపై నిర్ణయం తీసుకుంటామని, అందుకు కొంత సమయం పడుతుందని కూడా వివరించింది. ఈ వివరాలను పరిగణనలోకి తీసుకున్న హైకోర్టు.. ఎన్‌ఐఏ దర్యాప్తుపై ఏ నిర్ణయం తీసుకున్నా బహిర్గతం చేయకుండా సీల్డ్‌ కవర్‌లో తమ ముందుంచాలని కేంద్రాన్ని ఆదేశించింది. అయినా శుక్రవారం కేంద్ర ప్రభుత్వం సీల్డ్‌ కవర్‌లో పంపిన నివేదికపై అసంతృప్తి వ్యక్తం చేస్తూ మళ్లీ పూర్తి స్థాయి నివేదిక పంపాలని ఆదేశించింది. ఈ కేసులో వైఎస్‌ జగన్‌ తరపున వాదనలు వినిపిస్తోన్న న్యాయవాది పొన్నవోలు సుధాకర్‌ రెడ్డి మీడియాతో మాట్లాడుతూ.. కేంద్ర ప్రభుత్వం పంపిన సీల్డ్‌ కవర్‌ నివేదిక విషయంలో హైకోర్టు అసంతృప్తి వ్యక్తం చేసిందని తెలిపారు. ఈ నెల 21లోగా మళ్లీ నివేదిక ఇవ్వాలని కేంద్రానికి హైకోర్టు ఆదేశించదని వెల్లడించారు. శుక్రవారం లోగా కేసును ఎన్‌ఐఏకు మీరు బదిలీ చేస్తారా? లేక మమ్మల్నే బదిలీ చేయమంటారా అని కూడా కేంద్రాన్ని హైకోర్టు ప్రశ్నించిందని చెప్పారు.

హైదరాబాద్‌: వైఎస్సార్‌సీపీ అధ్యక్షులు వైఎస్‌ జగన్‌మోహన్‌ రెడ్డిపై జరిగిన హత్యాయత్నం కేసు శుక్రవారం హైకోర్టు విచారించనుంది. ఏపీ ప్రభుత్వం ఇప్పటి వరకు ఈ కేసు ఎందుకు కేంద్రానికి ఎందుకు బదిలీ చెయ్యలేదని గత విచారణలో హైకోర్టు ప్రశ్నించిన సంగతి తెల్సిందే. జాతీయ దర్యాప్తు సంస్థ(ఎన్‌ఐఏ)కే కేసును ఇవ్వాలా లేదా అన్న దానిపై నిర్ణయం తీసుకోవాలని గత విచారణలో కేంద్రానికి హైకోర్టు ఆదేశాలు కూడా జారీ చేసింది. మీరు(కేంద్రం) నిర్ణయం తీసుకోలేకపోతే మేమే ఆదేశిస్తామని హైకోర్టు వ్యాక్యానించింది. కేసు విచారణ కీలక దశకు చేరుకోవడంతో కేంద్ర ప్రభుత్వ నిర్ణయం కీలకం కానుంది. ఎన్‌ఐఏకు కేసు బదిలీపై శుక్రవారం హైకోర్టు కీలక నిర్ణయం తీసుకునే అవకాశముంది. విశాఖపట్నం విమానాశ్రయంలో జరిగిన హత్యాయత్నం ఘటనపై ఎన్‌ఐఏ చేత దర్యాప్తు చేయించే విషయంపై పరిశీలన జరుగుతోందని కేంద్ర ప్రభుత్వం  హైకోర్టుకు ఇదివరకే నివేదించింది. ఈ ఘటన ఎన్‌ఐఏ చట్టంలో నిర్ధేశించిన నేరాల పరిధిలోకి వస్తుందో రాదో పరిశీలన చేసి, ఆ తరువాత దర్యాప్తుపై నిర్ణయం తీసుకుంటామని, అందుకు కొంత సమయం పడుతుందని వివరించింది కూడా. ఈ వివరాలను పరిగణనలోకి తీసుకున్న హైకోర్టు.. ఎన్‌ఐఏ దర్యాప్తుపై ఏ నిర్ణయం తీసుకున్నా బహిర్గతం చేయకుండా సీల్డ్‌ కవర్‌లో తమ ముందుంచాలని కేంద్రాన్ని ఆదేశించింది. ఈ లోపు రాష్ట్ర పోలీసులు దర్యాప్తును కొనసాగించవచ్చునని ఇదివరకే తెలిపింది.

సాక్షి, హైదరాబాద్‌: ప్రతిపక్ష నేత, వైఎస్సార్‌ కాంగ్రెస్‌ పార్టీ అధ్యక్షుడు వైఎస్‌ జగన్‌పై విశాఖపట్నం విమానాశ్రయంలో జరిగిన హత్యాయత్నం ఘటనపై జాతీయ దర్యాప్తు సంస్థ(ఎన్‌ఐఏ) చేత దర్యాప్తు చేయించే విషయంపై పరిశీలన జరుగుతోందని కేంద్ర ప్రభుత్వం బుధవారం హైకోర్టుకు నివేదించింది. ఈ ఘటన ఎన్‌ఐఏ చట్టంలో నిర్ధేశించిన నేరాల పరిధిలోకి వస్తుందో రాదో పరిశీలన చేసి, ఆ తరువాత దర్యాప్తుపై నిర్ణయం తీసుకుంటామని, అందుకు కొంత సమయం పడుతుందని వివరించింది. ఈ వివరాలను పరిగణనలోకి తీసుకున్న హైకోర్టు.. ఎన్‌ఐఏ దర్యాప్తుపై ఏ నిర్ణయం తీసుకున్నా బహిర్గతం చేయకుండా సీల్డ్‌ కవర్‌లో తమ ముందుంచాలని కేంద్రాన్ని ఆదేశించింది. ఈ లోపు రాష్ట్ర పోలీసులు దర్యాప్తును కొనసాగించవచ్చునని తెలిపింది. తదుపరి విచారణను ఈ నెల 14కి వాయిదా వేసింది. ఈ మేరకు ప్రధాన న్యాయమూర్తి (సీజే) జస్టిస్‌ తొట్టతిల్‌ బి.రాధాకృష్ణన్, న్యాయమూర్తి జస్టిస్‌ ఎస్‌.వి.భట్‌తో కూడిన ధర్మాసనం బుధవారం ఉత్తర్వులిచ్చింది. తనపై జరిగిన హత్యాయత్నం ఘటన పౌర విమానయాన భద్రత చట్టం ప్రకారం చట్ట వ్యతిరేక కార్యకలాపాల నిర్వచన పరిధిలోకి వస్తుందని, అందువల్ల దర్యాప్తు చేయాల్సింది జాతీయ దర్యాప్తు సంస్థని, ఆ మేర కేంద్ర హోం శాఖకు ఆదేశాలు జారీ చేయాలని కోరుతూ వైఎస్‌ జగన్‌ హైకోర్టులో పిటిషన్‌ దాఖలు చేసిన విషయం తెలిసిందే. ఇదే ఘటనపై వైఎస్సార్‌సీపీ తరఫున మాజీ ఎంపీ వైవీ సుబ్బారెడ్డి, ఎమ్మెల్యే ఆళ్ల రామకృష్ణారెడ్డి వ్యాజ్యాలు దాఖలు చేశారు. వీటిపై బుధవారం సీజే నేతృత్వంలోని ధర్మాసనం విచారణ జరిపింది. ఈ సందర్భంగా పార్టీ తరఫున సీనియర్‌ న్యాయవాది దేశాయ్‌ ప్రకాశ్‌రెడ్డి వాదనలు వినిపిస్తూ.. జగన్‌పై జరిగిన హత్యాయత్నం ఎన్‌ఐఏ చట్టంలోని నిర్ధేశించిన నేరాల పరిధిలోకి వస్తుందని తెలిపారు. ఈ ఘటనకు సంబంధించిన వివరాలను పోలీసులు రాష్ట్ర ప్రభుత్వానికి పంపాలని, ఆ తరువాత రాష్ట్ర ప్రభుత్వం ఓ నివేదికను కేంద్రానికి పంపడం తప్పనిసరన్నారు. ఈ నివేదికను ఆధారంగా కేంద్రం ఎన్‌ఐఏ దర్యాప్తుపై నిర్ణయం తీసుకుంటుందని వివరించారు. కేంద్రం ఎన్‌ఐఏ దర్యాప్తునకు ఆదేశిస్తే రాష్ట్ర పోలీసులు దర్యాప్తును కొనసాగించడానికి వీల్లేదని, అయితే రాష్ట్ర ప్రభుత్వం ఇప్పటి వరకు కేంద్రానికి నివేదిక పంపలేదన్నారు. రాష్ట్ర ప్రభుత్వం తరఫున అడ్వొకేట్‌ జనరల్‌ (ఏజీ) దమ్మాలపాటి శ్రీనివాస్‌ వాదనలు వినిపిస్తూ, జగన్‌పై జరిగిన ఘటన పౌర విమానయాన భద్రత చట్టంలోని సెక్షన్‌ 3 పరిధిలోకి రాదన్నారు. ఆ చట్టం ప్రకారం పౌర విమానయాన భద్రతకు విఘాతం కలిగినప్పుడే ఎన్‌ఐఏ రంగంలోకి వస్తుందని, ఓ వ్యక్తిపై దాడి జరిగినప్పుడు ఎన్‌ఐఏ దర్యాప్తు అవసరముండదన్నారు. కేంద్రానికి రాష్ట్ర ప్రభుత్వం నివేదిక పంపడం తప్పనిసరి కాదన్నారు. కేంద్రం సుమోటోగా నిర్ణయం తీసుకోవచ్చన్నారు. కేంద్రం తరఫున అసిస్టెంట్‌ సొలిసిటర్‌ జనరల్‌ (ఏఎస్‌జీ) కె.లక్ష్మణ్‌ స్పందిస్తూ.. ఎన్‌ఐఏ చట్టం ప్రకారం కేంద్రానికి రాష్ట్ర ప్రభుత్వం నివేదిక పంపడం తప్పనిసరన్నారు. ఇప్పటి వరకు రాష్ట్రం నుంచి కేంద్ర హోం శాఖకు నివేదిక రాలేదన్నారు. ధర్మాసనం స్పందిస్తూ.. జగన్‌పై హత్యాయత్నానికి సంబంధించి సీఐఎస్‌ఎఫ్‌ కేంద్రానికి నివేదిక పంపి ఉంటుందని, దాని ఆధారంగా కేంద్రం నిర్ణయం తీసుకోవచ్చునని తెలిపింది.

సాక్షి, హైదరాబాద్‌ : ప్రతిపక్ష నేత వైఎస్‌ జగన్‌మోహన్‌రెడ్డిపై విశాఖపట్నం విమానాశ్రయంలో జరిగిన హత్యాయత్నం కేసును హైకోర్టు బుధవారం మరోసారి విచారించింది. వైఎస్‌ జగన్‌పై హత్యాయత్నం ఘటనలో కేంద్రానికి హైకోర్టు కీలక ఆదేశాలు జారీ చేసింది. ఈ నెల 14లోపు ఎన్‌ఐఏకి కేసును బదిలీ చేయాలా? వద్దా ? అనే దానిపై నిర్ణయం తీసుకోవాలని, ఎన్‌ఐఏ కేసు దర్యాప్తు చేసి ఉంటే నివేదికను సీల్డ్‌ కవర్‌లో ఇవ్వాలని కేంద్రాన్ని హైకోర్టు ఆదేశించింది. ఇప్పటికే కేంద్రానికి రిపోర్టు ఇచ్చామని సీఐఎస్‌ఎఫ్‌ పేర్కొంది. ఏపీ ప్రభుత్వం తరపున కేసు దర్యాప్తు పై కోర్టులో ఏపీ అడ్వొకేట్‌ జనరల్‌ వాదనలు వినిపించారు. ఈ కేసు సెక్షన్(3) కిందకు రాదని ఏజీ తెలిపారు. ఏజీ వాదనతో హైకోర్టు ఏకీభవించలేదు. ఏపీ ప్రభుత్వ తీరుపై హైకోర్టు ఆగ్రహం వ్యక్తం చేసింది. తదుపరి విచారణను ఈ నెల 14కు వాయిదా వేసింది.  ఇటీవల విశాఖ విమానాశ్రయంలో తనపై జరిగిన హత్యాయత్నం ఘటనపై దర్యాప్తును పక్కదారి పట్టించేలా ముఖ్యమంత్రి చంద్రబాబు, డీజీపీ మాట్లాడిన నేపథ్యంలో, ఈ కేసు దర్యాప్తును స్వతంత్ర సంస్థకు అప్పగించేలా ఆదేశాలు ఇవ్వాలంటూ వైఎస్‌ జగన్‌ హైకోర్టులో పిటిషన్‌ దాఖలు చేసిన విషయం తెలిసిందే. ఇదే సమయంలో ఆయన ఓ అదనపు అఫిడవిట్‌ను కూడా దాఖలు చేశారు. తనపై జరిగిన హత్యాయత్నం ఘటన చట్ట వ్యతిరేక కార్యకలాపాల నియంత్రణ నిర్వచన పరిధిలోకి వస్తుందని, పౌర విమానయాన భద్రత చట్ట నిబంధనల ప్రకారం ఇటువంటి ఘటనలపై దర్యాప్తు చేసే అధికారం ఎన్‌ఐఏకు ఉందని, అందువల్ల సమగ్ర దర్యాప్తు జరిపేలా కేంద్ర హోంశాఖను ఆదేశించాలని కోరారు. ఇదే అంశంపై మంగళగిరి ఎమ్మెల్యే ఆళ్ల రామకృష్ణారెడ్డి కూడా పిల్‌ దాఖలు చేసిన విషయం తెలిసిందే.  

సాక్షి, హైదరాబాద్‌: ప్రతిపక్ష నేత వైఎస్‌ జగన్‌మోహన్‌రెడ్డిపై విశాఖపట్నం విమానాశ్రయంలో జరిగిన హత్యాయత్నం ఘటన పౌర విమానయాన భద్రత చట్టం పరిధిలోకి వస్తున్నప్పుడు, ఆ ఘటన సమాచారాన్ని జాతీయ దర్యాప్తు సంస్థ (ఎన్‌ఐఏ) చట్ట నిబంధనల ప్రకారం కేంద్ర ప్రభుత్వానికి తప్పనిసరి గా పంపాల్సి ఉన్నా, ఎందుకు పంపలేదని హైకోర్టు ఆంధ్రప్రదేశ్‌ ప్రభుత్వాన్ని ప్రశ్నించింది. ఇది చాలా తీవ్రమైన అంశమని, దీనికి సమాధానం చెప్పి తీరాల ని ప్రభుత్వానికి సోమవారం స్పష్టం చేసింది. జాతీయ భద్రత చట్టం కింద ఏం చర్యలు తీసుకున్నారో తెలపాలంది. విమానాశ్రయంలో చట్ట వ్యతిరేక ఘటనలు జరిగినప్పుడు ఈ చట్టం కింద ఏం చర్యలు తీసుకోవచ్చో తెలియచేయాలని కేంద్ర ప్రభుత్వాన్ని కూడా ఆదేశించింది. తదుపరి విచారణను డిసెంబర్‌ 5కి వాయిదా వేసింది. ఈ మేరకు ప్రధాన న్యాయమూర్తి (సీజే) జస్టిస్‌ తొట్టతిల్‌ బి.రాధాకృష్ణన్, న్యాయమూర్తి జస్టిస్‌ ఎస్‌.వి.భట్‌లతో కూడిన ధర్మాసనం ఉత్తర్వులు జారీ చేసింది. ఇటీవల విశాఖ విమానాశ్రయంలో తనపై జరిగిన హత్యాయత్నం ఘటనపై దర్యాప్తును పక్కదారి పట్టించేలా ముఖ్యమంత్రి చంద్రబాబు, డీజీపీ మాట్లాడిన నేపథ్యంలో, ఈ కేసు దర్యాప్తును స్వతంత్ర సంస్థకు అప్పగించేలా ఆదేశాలు ఇవ్వాలంటూ వైఎస్‌ జగన్‌ హైకోర్టులో పిటిషన్‌ దాఖలు చేసిన విషయం తెలిసిందే. ఇదే సమ యంలో ఆయన ఓ అదనపు అఫిడవిట్‌ను కూడా దాఖలు చేశారు. తనపై జరిగిన హత్యాయత్నం ఘట న చట్ట వ్యతిరేక కార్యకలాపాల నియంత్రణ నిర్వచన పరిధిలోకి వస్తుందని, పౌర విమానయాన భద్రత చట్ట నిబంధనల ప్రకారం ఇటువంటి ఘటనలపై ద ర్యాప్తు చేసే అధికారం ఎన్‌ఐఏకు ఉందని, అందువల్ల సమగ్ర దర్యాప్తు జరిపేలా కేంద్ర హోంశాఖను ఆదేశించాలని కోరారు. ఇదే అంశంపై మంగళగిరి ఎమ్మెల్యే ఆళ్ల రామకృష్ణారెడ్డి కూడా పిల్‌ దాఖలు చేసి న విషయం తెలిసిందే. ఈ వ్యాజ్యాలపై సోమవారం సీజే నేతృత్వంలోని ధర్మాసనం విచారణ జరిపింది.   ఎన్‌ఐఏ దర్యాప్తు జరపొచ్చు...  ఈ సందర్భంగా వైఎస్‌ జగన్‌ తరఫు సీనియర్‌ న్యాయవాది సి.వి.మోహన్‌రెడ్డి వాదనలు వినిపిస్తూ, ‘పౌర విమానయాన భద్రతకు నష్టం కలిగే చట్ట విరుద్ధ కార్యకలాపాలను నిరోధించేందుకు 1982లో చట్టం తీసుకొచ్చారు. ఈ చట్టంలోని సెక్షన్‌ 3, 3ఏ ప్రకారం విమానాశ్రయంలో ఏదైనా ఆయుధాన్ని ఉపయోగించినా, ఎవరైనా వ్యక్తిని గాయపరిచినా, హతమార్చినా, విమానాన్ని నాశనం చేసినా, విమానాల రాకపోకలకు ఆటంకం కలిగించినా, విమానాశ్రయం భద్రతకు ప్రమాదంగా పరిణమించినా, బెదిరింపులకు పాల్పడినా అందుకు బాధ్యుడైన వ్యక్తిపై కేంద్ర ప్రభుత్వం చర్యలు తీసుకోవచ్చు. అంతేకాక సెక్షన్‌ 5ఎ ప్రకారం కేంద్ర దర్యాప్తు సంస్థ లేదా కేంద్ర ప్రభుత్వం నియమించిన అధికారి దర్యాప్తు చేయవచ్చు. అలాగే పౌర విమానయాన ఘటనలపై దర్యాప్తు జరిపే పరిధి ఎన్‌ఐఏకు ఉంది. విమానాశ్రయంలో చట్ట విరుద్ధ కార్యకలాపాలు జరిగినప్పుడు ఎన్‌ఐఏ చట్టం ప్రకారం అందుకు సంబంధించిన సమాచారాన్ని స్థానిక పోలీసులు వెంటనే రాష్ట్ర ప్రభుత్వానికి పంపాలి. రాష్ట్ర ప్రభుత్వం ఆ సమాచారాన్ని నివేదిక రూపంలో కేంద్ర ప్రభుత్వానికి పంపుతుంది. ఆ నివేదిక ఆధారంగా ఎన్‌ఐఏ దర్యాప్తుపై కేంద్రం నిర్ణయం తీసుకుంటుంది. అయితే జగన్‌పై జరిగిన హత్యాయత్నం ఘటనకు సంబంధించిన వివరాలను రాష్ట్ర ప్రభుత్వం ఇప్పటి వరకు కేంద్ర ప్రభుత్వానికి పంపనే లేదు. రాష్ట్ర ప్రభుత్వం ఉద్దేశపూర్వకంగానే ఇలా చేసింది. ఈ కేసును పక్కదోవ పట్టించాలనే ఉద్దేశంతోనే ఇలా చేస్తోంది. పౌర విమానయాన భద్రత చట్టం కింద కేంద్రం రంగంలోకి దిగితే రాష్ట్ర పోలీసులకు దర్యాప్తు చేసే అధికారం ఉండదు. చట్ట ప్రకారం చేయాల్సిన పనులను దర్యాప్తు అధికారులు చేయడంలేదు’అని మోహన్‌రెడ్డి కోర్టుకు నివేదించారు.  రాష్ట్ర పోలీసులు దర్యాప్తు చేయరాదు...  ఆ తరువాత ఆళ్ల రామకృష్ణారెడ్డి తరఫు న్యాయవాది పొన్నవోలు సుధాకర్‌రెడ్డి వాదనలు వినిపిస్తూ, జగన్‌పై హత్యాయత్నం ఘటనపై రాష్ట్ర పోలీసులు దర్యాప్తు జరపడం చట్ట విరుద్ధమని, ఈ దర్యాప్తునకు చట్ట ప్రకారం ఎటువంటి విలువా లేదన్నారు. ఉభయ రాష్ట్రాలకు ఎన్‌ఐఏ కోర్టు హైదరాబాద్‌లో ఉందని ధర్మాసనం దృష్టికి తీసుకొచ్చారు. రాష్ట్ర పోలీసుల దర్యాప్తును వెంటనే నిలిపేస్తూ ఆదేశాలు ఇవ్వాలని ఆయన కోర్టును కోరారు. అంతేకాక ప్రస్తుతం రాష్ట్ర పోలీసులు నమోదు చేసిన ఎఫ్‌ఐఆర్‌ను సవరించాలని, లేని పక్షంలో ఆ ఎఫ్‌ఐఆర్‌కు ఎటువంటి విలువ ఉండదన్నారు. ఈ సమయంలో విమానాశ్రయాల్లో భద్రతా లోపాలపై పిల్‌ దాఖలు చేసిన బోరుగడ్డ అనిల్‌కుమార్‌ తరఫు న్యాయవాది కృష్ణమూర్తి జోక్యం చేసుకోవడంతో అతనిపై ధర్మాసనం తీవ్ర అసహనం వ్యక్తం చేసింది. సమాచారం ఎందుకివ్వలేదు..  ధర్మాసనం స్పందిస్తూ ‘మేం మీ (పోలీసులు) దర్యాప్తును అడ్డుకోం. అయితే కేంద్రానికి ఇప్పటి వరకూ మీరు ఎందుకు సమాచారం ఇవ్వలేదన్నదే ఇక్కడ ప్రధాన ప్రశ్న. మాకు ఈ ప్రశ్నకు సమాధానం చెప్పాల్సిందే. ఇది చాలా తీవ్రమైన అంశం. అందువల్ల మాకు ఈ అంశంపై పూర్తి స్పష్టతనివ్వాల్సిన బాధ్యత ప్రభుత్వంపై ఉంది.’అని స్పష్టం చేసింది. నిబంధనలు తెలియదని చెప్పడానికి వీల్లేదని పేర్కొంది. అలాగే ఎన్‌ఐఏ చట్టం కింద సమాచారం అందుకున్న తరువాత ఏం చర్యలు తీసుకోవచ్చో చెప్పాలని కేంద్ర ప్రభుత్వాన్ని కూడా ధర్మాసనం ఆదేశించింది.

సాక్షి, హైదరాబాద్‌: ఆంధ్రప్రదేశ్‌ ప్రతిపక్ష నాయకుడు, వైఎస్సార్‌ సీపీ అధ్యక్షుడు వైఎస్ జగన్‌మోహన్‌ రెడ్డిపై హత్యాయత్నం కేసులో సోమవారం హైకోర్టులో ఏపీ ప్రభుత్వానికి చుక్కెదురైంది. ఎయిర్‌పోర్టులో దాడి జరిగితే రాష్ట్ర పోలీసులు ఎందుకు విచారణ చేపట్టారని ఉన్నత న్యాయస్థానం ప్రశ్నించింది. కేసు విచారణను జాతీయ దర్యాప్తు సంస్థ(ఎన్‌ఐఏ)కు ఎందుకు అప్పగించలేదని నిలదీసింది. ఈ కేసును ఎన్‌ఐఏకు ఎందుకు బదిలీ చేయలేదో చెప్పాలని, పూర్తి వివరాలతో కౌంటర్ అఫిడవిట్‌ ధాఖలు చేయాలని ఏపీ ప్రభుత్వాన్ని ఆదేశించింది. తదుపరి విచారణను బుధవారానికి వాయిదా వేసింది. వైఎస్ జగన్‌పై హత్యాయత్నం కేసును ఏపీ పోలీసుల పరిధి నుంచి ఎన్ఐఏకు బదిలీ చేసేలా ఆదేశించాలని కోరుతూ మంగళగిరి ఎమ్మెల్యే ఆళ్ల రామకృష్ణారెడ్డి దాఖలు చేసిన పిల్‌పై హైకోర్టు ఈరోజు వాదనలు ఆలకించింది. ఆయన తరపున న్యాయవాది పొన్నవోలు సుధాకర్‌ రెడ్డి వాదనలు వినిపించారు. సెక్షన్ 307 కింద కేసు నమోదు చేసి కావాలనే ఏపీ ప్రభుత్వం విచారణను తమ పరిధిలో సాగిస్తుందని కోర్టుకు తెలిపారు. ఎన్‌ఐఏ యాక్ట్ సెక్షన్ 6 ప్రకారం ఎయిర్ పోర్ట్ లేదా, ఎయిర్ క్రాఫ్ట్ లో అఫెన్స్ జరిగితే విచారణ ఎన్‌ఐఏ పరిధిలోకి వస్తుందన్నారు. అన్ లా ఫుల్ అగనెస్ట్ సేఫ్టీ ఆఫ్ సివిల్ ఎవియేషన్ యాక్ట్ ప్రకారం సెక్షన్ 3(ఏ)కింద కేసు నమోదు చేయాలని, తమ వాదనలతో ఏకీభవించిన న్యాయస్థానం ఏపీ ప్రభుత్వాకి గట్టిగా అక్షింతలు వేసిందని ‘సాక్షి’తో పొన్నవోలు సుధాకర్‌ రెడ్డి చెప్పారు. ఈ కేసులో ఏపీ ప్రభుత్వం రెండు చట్టాలను తొక్కిపెట్టినట్టు సాక్ష్యాధారాలతో కోర్టు ముందుంచామని వెల్లడించారు. విచారణను తమ పరిధిలోనే ఉంచు​కుని నాటకాలు ఆడుతోందని, దీనికి కచ్చితంగా జవాబు చెప్పాల్సివుంటుందన్నారు. కేసు దర్యాప్తు కచ్చితంగా ఎన్‌ఐఏ పరిధిలోకి వెళుతుందన్న విశ్వాసాన్ని ఆయన వ్యక్తం చేశారు.

నెల్లూరు(సెంట్రల్‌): విశాఖపట్నం ఎయిర్‌పోర్టులో వైఎస్సార్‌ కాంగ్రెస్‌ పార్టీ అధ్యక్షుడు వైఎస్‌ జగన్‌మోహన్‌రెడ్డిపై జరిగిన హత్యాయత్నంపై వెంటనే సీబీఐ విచారణ చేయించి దోషులను కఠినంగా శిక్షించాలని సౌదీ అరేబియాలోని వైఎస్సార్‌ సీపీ యూత్‌ నాయకులు డిమాండ్‌ చేశారు. సౌదీఅరేబియాలోని రియాద్‌ సిటీలోని ముఝుమియా ప్రాంతంలో ఆంధ్రప్రదేశ్‌కు చెందిన వైఎస్సార్‌సీపీ సౌదీ అరేబియా యూత్‌ ఆధ్వర్యంలో కళ్లకు గంతలు కట్టుకుని నిరసన వ్యక్తం చేశారు. ఈ సందర్భంగా పార్టీ  సౌదీఅరేబియా యూత్‌ లీడర్‌ షేక్‌ అర్హద్‌ ఆయుబ్‌ బాషా మాట్లాడుతూ ప్రభుత్వం కావాలనే హత్యాయత్నాన్ని నీరు కారుస్తోందన్నారు. చంద్రబాబు అధికారాన్ని అడ్డం పెట్టుకుని నీచ రాజకీయాలు చేస్తున్నారని ఆరోపించారు. 

సాక్షి, హైదరాబాద్‌ : విశాఖపట్నం విమానాశ్రయంలో ప్రతిపక్ష నేత, వైఎస్సార్‌ కాంగ్రెస్‌ పార్టీ అధ్యక్షుడు వైఎస్‌ జగన్‌మోహన్‌రెడ్డిపై జరిగిన హత్యాయత్నం కేసు విషయంలో ఆంధ్రప్రదేశ్‌ పోలీసులు చట్ట ప్రకారం నడుచుకోలేదని ఆయన తరఫున సీనియర్‌ న్యాయవాది సీవీ మోహన్‌రెడ్డి గురువారం హైకోర్టుకు నివేదించారు. పౌర విమానయాన చట్టం ప్రకారం.. విశాఖ విమానాశ్రయంలో జరిగిన హత్యాయత్నం ఘటన చట్ట వ్యతిరేక కార్యకలాపాల నియంత్రణ నిర్వచన పరిధిలోకి వస్తుందని తెలిపారు. దీని ప్రకారం జగన్‌పై జరిగిన ఘటనకు సంబంధించిన సమాచారాన్ని, నివేదికను ఏపీ పోలీసులు కేంద్ర ప్రభుత్వానికి తప్పనిసరిగా పంపాల్సి ఉండగా, ఇప్పటివరకు ఆ పని చేయలేదని ఆయన వివరించారు. పౌర విమానయాన భద్రతా చట్ట నిబంధనల ప్రకారం ఇటువంటి ఘటనలపై దర్యాప్తు చేసే అధికారం జాతీయ దర్యాప్తు సంస్థ (ఎన్‌ఐఏ)కు ఉందన్నారు. రాష్ట్ర పోలీసులు పంపే నివేదిక ఆధారంగా ఎన్‌ఐఏ దర్యాప్తునకు అప్పగించే విషయంపై కేంద్రం నిర్ణయం తీసుకుంటుందని వివరించారు. అయితే, రాష్ట్ర పోలీసులు చట్ట ప్రకారం కేంద్రానికి ఎటువంటి నివేదిక పంపలేదని ఆయన కోర్టు దృష్టికి తీసుకొచ్చారు. దీంతో స్పందించిన హైకోర్టు.. కేసులో చాలా తీవ్రత ఉందని, అందువల్ల పూర్తిస్థాయి వాదనలు వింటామని స్పష్టంచేస్తూ ఈ వ్యాజ్యంపై విచారణను డిసెంబరు 3కి వాయిదా వేసింది. ఈ మేరకు ప్రధాన న్యాయమూర్తి (సీజే) జస్టిస్‌ తొట్టతిల్‌ బి.రాధాకృష్ణన్, న్యాయమూర్తి జస్టిస్‌ ఎస్‌వి భట్‌లతో కూడిన ధర్మాసనం ఉత్తర్వులు జారీచేసింది.   కాగా, తన మీద జరిగిన హత్యాయత్న ఘటనపై రాష్ట్ర ప్రభుత్వ, పోలీసుల నియంత్రణలో లేని స్వతంత్ర సంస్థతో దర్యాప్తు చేయించేలా ఆదేశాలివ్వాలంటూ జగన్‌ హైకోర్టులో పిటిషన్‌ దాఖలు చేసిన విషయం తెలిసిందే. ఇదే సమయంలో ఆయన పౌర విమానయాన చట్ట నిబంధనల గురించి వివరిస్తూ ఇటీవల ఓ అనుబంధ పిటిషన్‌ కూడా దాఖలు చేశారు. అలాగే, ఇదే వ్యవహారంలో వైఎస్సార్‌ కాంగ్రెస్‌ పార్టీ తరఫున వైవీ సుబ్బారెడ్డి, జగన్‌పై హత్యాయత్నం ఘటనను ఎన్‌ఐఏతో దర్యాప్తు చేయించాలని కోరుతూ మంగళగిరి ఎమ్మెల్యే ఆళ్ల రామకృష్ణారెడ్డి కూడా పిటిషన్లు దాఖలు చేశారు. విమానాశ్రయాల్లో భద్రతా లోపాలపై బోరుగడ్డ అనిల్‌కుమార్, మరొకరు ప్రజా ప్రయోజన వ్యాజ్యం (పిల్‌) దాఖలు చేశారు. ఈ వ్యాజ్యాలన్నింటిపై గురువారం సీజే నేతృత్వంలోని ధర్మాసనం విచారణ జరిపింది. ఈ సందర్భంగా ధర్మాసనం కౌంటర్ల దాఖలు గురించి ఆరా తీయగా, కౌంటర్లు సిద్ధమయ్యాయని సీఐఎస్‌ఎఫ్‌ తరఫు న్యాయవాది లక్ష్మణ్‌ కోర్టుకు నివేదించారు. తదుపరి విచారణ నాటికి వాటిని కోర్టు ముందుంచుతానని ఆయన తెలిపారు. ఇందుకు ధర్మాసనం అంగీకరిస్తూ, ఈ కేసులో చాలా తీవ్రత ఉందని మరోసారి గుర్తుచేసింది. తదుపరి విచారణను సోమవారానికి వాయిదా వేసింది.   

సాక్షి, హైదరాబాద్‌ : ఆంధ్రప్రదేశ్‌ ప్రతిపక్ష నాయకుడు, వైఎస్సార్‌ సీపీ అధ్యక్షుడు వైఎస్ జగన్‌మోహన్‌ రెడ్డిపై హత్యాయత్నం కేసు విచారణ సోమవారానికి వాయిదా పడింది. వైఎస్‌ జగన్‌పై హత్యాయత్నంపై దాఖలు అయిన అన్ని పిటిషన్లను సోమవారం విచారిస్తామని ధర్మానం ప్రకటించింది. ఏపీ ప్రభుత్వం ఆజమాయిషీ లేని థర్డ్ పార్టీ చేత దర్యాప్తు జరిపించాలని పిటిషన్‌లో వైఎస్‌ జగన్‌ కోరిన విషయం తెలిసిందే. కాగా, ఈ కేసులో ఆంధ్రప్రదేశ్‌ ప్రభుత్వం అఫిడవిట్‌ దాఖలు చేయకపోవడంపై హైకోర్టు ఆగ్రహం వ్యక్తం చేసింది. అఫిడవిట్‌ ఎందుకు దాఖలు చేయలేదని ప్రశ్నించింది. సోమవారం కల్లా అఫిడవిట్‌ దాఖలు చేయాలని ఏపీ, కేంద్ర ప్రభుత్వాలను ఆదేశించింది. మరోవైపు వైఎస్‌ జగన్ పై హత్యాయత్నం కేసులో హైకోర్టులో మంగళగిరి ఎమ్మెల్యే ఆర్కే ప్రజా ప్రయోజన వ్యాజ్యం దాఖలు చేశారు. ఏపీ పోలీస్ పరిధి నుండి కేసును సీఐఎస్ఎఫ్‌కు బదిలీ చేసి, జాతీయ దర్యాప్తు సంస్థ చేత విచారణ జరిపించాలని కోరారు. కేంద్ర హోంమంత్రిత్వ కార్యదర్శి, పౌర విమానయాన కార్యదర్శి, ఎయిర్‌పోర్ట్‌ అథారిటీ ఆఫ్‌ ఇండియా, ఎన్‌ఐఏ డైరెక్టర్‌ జనరల్‌, ఏపీ ప్రభుత్వ ప్రధాన కార్యదర్శి, ఏపీ హోంశాఖ ప్రిన్సిపల్‌ సెక్రటరీ, ఆంధ్రప్రదేశ్‌ డీజీపీ, విశాఖ తూర్పు డివిజన్‌ పోలీసు అసిస్టెంట్‌ కమిషనర్‌, వైజాగ్‌ పోలీసు కమిషనర్‌, విశాఖ ఎయిర్‌పోర్టు పోలీస్‌స్టేషన్‌ హౌస్‌ ఆఫీసర్‌లను ప్రతివాదులుగా చేర్చారు. ఈ పిల్‌పై విచారణను కూడా హైకోర్టు సోమవారానికి వాయిదా వేసింది.

అల్లిపురం(విశాఖ దక్షిణం): ప్రతిపక్ష నేత వైఎస్‌ జగన్‌మోహన్‌రెడ్డిపై హత్యాయత్నం కేసులో.. కోర్టుకు సమర్పించిన రక్తపు మరకలతో ఉన్న ఆయన చొక్కాను అప్పుడే ఫోరెన్సిక్‌ లేబొరేటరీకి పంపవద్దని, వైఎస్సార్‌సీపీ అధినేత దాఖలు చేసిన రిట్‌ హైకోర్టులో పెండింగ్‌లో ఉన్నందున.. అది తేలేవరకు వేచి ఉండాలని జగన్‌ తరఫు న్యాయవాది విశాఖ కోర్టును కోరారు. సంఘటన సమయంలో ప్రతిపక్ష నేత ధరించిన షర్టును సీల్డు కవర్లో ఈ నెల 23న ఆయన తరఫు న్యాయవాదులు 7వ అదనపు మెట్రోపాలిటన్‌ మేజిస్ట్రేట్‌ కోర్టులో అందజేసిన విషయం తెలిసిందే. ఈ షర్టును పరీక్షల నిమిత్తం ఫోరెన్సిక్‌ సైన్స్‌ లేబొరేటరీకి పంపించాలని కోర్టును కోరుతూ సిట్‌ పోలీసులు గత సోమవారం మెమో దాఖలు చేశారు. దీనికి జగన్‌మోహన్‌రెడ్డి న్యాయవాది నీలాపు కాళీదాసురెడ్డి బుధవారం కౌంటర్‌ మెమో దాఖలు చేశారు. వైఎస్‌ జగన్‌మోహన్‌రెడ్డి హైకోర్టులో రిట్‌ పిటిషన్‌ దాఖలు చేసిన విషయాన్ని కోర్టువారికి గుర్తుచేశారు. రిట్‌ పిటిషన్‌ ఈ నెల 27న విచారణకు రావాల్సి ఉండగా డిసెంబర్‌ 3వ తేదీకి వాయిదా పడిందని విన్నవించారు. హత్యాయత్నం కేంద్ర బలగాల అధీనంలో ఉన్న చోట జరిగినందున సివిల్‌ ఏవియేషన్‌ యాక్ట్‌ 1982కు విరుద్ధంగా స్థానిక పోలీసుల విచారణ జరిగే అవకాశముందని, అందువల్ల కేసు విచారణను కేంద్ర విచారణ సంస్థకు అప్పగించాలని కోరుతూ హైకోర్టులో రిట్‌ పిటిషన్‌ దాఖలు చేసి ఉన్నందున.. దానిపై ఉన్నత న్యాయస్థానం తీర్పు వెలువరించేవరకు షర్టును రాష్ట్ర ప్రభుత్వ హయాంలో నిర్వహించే ఫోరెన్సిక్‌ లేబొరేటరీకి అప్పగించవద్దని, హైకోర్టు తీర్పు వెల్లడించే వరకు పెండింగ్‌లో ఉంచాలని కోరారు. ఆయన వాదనను విన్న న్యాయమూర్తి ఏపీపీకి నోటీసు ఇమ్మని కోరగా.. నోటీసు ఇచ్చారు. దీంతో డిసెంబర్‌ 3న ఇరు పార్టీలు వాదనలు వినిపించాలని న్యాయమూర్తి పేర్కొంటూ కేసు విచారణను వాయిదా వేశారు.

ఆరిలోవ (విశాఖ తూర్పు): వైఎస్సార్‌ సీపీ అధినేత వైఎస్‌ జగన్‌మోహన్‌రెడ్డిపై హత్యాయత్నానికి పాల్పడిన నిందితుడు జనుపల్లి శ్రీనివాస్‌రావును  కట్టుదిట్టమైన భద్రత మధ్య కోర్టుకు తరలించారు.  శుక్రవారం విశాఖ కేంద్ర కారాగారం నుంచి ఎయిర్‌పోర్టు పోలీస్‌ స్టేషన్‌కు చెందిన పోలీసులు బందోబస్తుగా వచ్చి జైలు నుంచి శ్రీనివాసరావును కోర్టుకు తీసుకెళ్లారు.  కోర్టు వద్ద ప్రత్యేక పోలీసులతో భద్రత ఏర్పాటు చేశారు. కోర్టులో న్యాయమూర్తి మరో 14 రోజులు రిమాండ్‌ పొడిగించడంతో తిరిగి జైలుకు తరలించారు. హత్యాయత్నానికి పాల్ప డిన అనంతరం శ్రీనివాసరావుకు న్యాయమూర్తి 14 రోజుల రిమాండ్‌ విధించడంతో గత నెల 26న రాత్రి ఎయిర్‌పోర్టు పోలీసులు జైలుకు తరలించారు. అప్పట్లో విధించిన రిమాండ్‌లో 6 రోజులపాటు సిట్‌ కస్టడీలో ఉండగా మిగిలిన 9 రోజులు జైలులో గడిపాడు. అనంతరం ఈ నెల 9 నుంచి 23 వరకు 14 రోజులు పాటు రిమాండ్‌లో గడిపాడు. ఇంతవరకు శ్రీనివాసరావు 23 రోజులు జైలులో రిమాండ్‌లో గడిపాడు.  కోర్టులపై నమ్మకం ఉంది విశాఖ లీగల్‌: వైఎస్సార్‌ సీపీ అధినేత వైఎస్‌ జగన్‌మోహన్‌రెడ్డిపై ఎయిర్‌పోర్టు వీఐపీ లాంజ్‌లో జరిగిన హత్యాయత్నంపై ప్రభుత్వ పెద్దలు, పోలీస్‌ ఉన్నతాధికారులు స్పందించిన తీరు వల్లే సిట్‌ విచారణపై నమ్మకం లేదని చెప్పామని ఆ పార్టీ నగర అధ్యక్షుడు మళ్ల విజయప్రసాద్‌ అన్నారు. జగన్‌ తరపున న్యాయవాదితో కలిసి శుక్రవారం కోర్టుకు వచ్చిన ఆయన మీడియాతో మాట్లాడుతూ కోర్టులపై తమపార్టీ అధినేతకు, తమకు అచంచలమైన గౌరవం, విశ్వాసం ఉన్నాయన్నారు. అందువల్లే కోర్టు ఆదేశాల మేరకే షర్ట్‌ను కోర్టులో సమర్పించామని, అయితే హైకోర్టులో విచారణ ఉన్నందున 27వ తేదీ వరకు షర్ట్‌ ఇవ్వొద్దని జగన్‌ తరపున న్యాయవాది కోరగా.. పరిశీలిస్తామని మేజిస్ట్రేట్‌ చెప్పారన్నారు. ఈ కేసులో దాగి ఉన్న కుట్ర కోణం సిట్‌ విచారణలో బయటపడే అవకాశాలు లేవని మళ్ల విజయప్రసాద్‌ అన్నారు.

విశాఖ లీగల్‌/ విశాఖ క్రైం: ప్రతిపక్ష నేత, వైఎస్సార్‌ సీపీ అధ్యక్షుడు వైఎస్‌ జగన్‌మోహన్‌రెడ్డిపై హత్యాయత్నం కేసులో నిందితుడు జనుపల్లి శ్రీనివాసరావుకు జ్యూడీషియల్‌ రిమాండ్‌ను మరో 14 రోజులపాటు పొడిగిస్తూ విశాఖ మూడో మెట్రోపాలిటిన్‌ మేజిస్ట్రేట్‌ ఆదేశాలు జారీచేశారు. విశాఖ ఎయిర్‌పోర్టులో ప్రతిపక్ష నేతపై గత నెల 25న జరిగిన హత్యాయత్నం కేసులో అరెస్టయిన శ్రీనివాసరావు రిమాండ్‌ గడువు శుక్రవారంతో ముగిసింది. దీంతో అతడిని శుక్రవారం మూడో మెట్రోపాలిటన్‌ మెజిస్ట్రేట్‌ కోర్టు ముందు హాజరుపరచగా, డిసెంబర్‌ 7 వరకు రిమాండ్‌ను పొడిగిస్తూ మెజిస్ట్రేట్‌ ఆదేశాలు జారీ చేశారు. అనంతరం నిందితుడిని తిరిగి సెంట్రల్‌ జైలుకు తరలించారు.  విచారణ పూర్తయ్యే వరకు చొక్కాను అప్పగించొద్దు హత్యాయత్నం జరిగిన సమయంలో వైఎస్‌ జగన్‌ ధరించిన చొక్కాను కోర్టు ఆదేశాల మేరకు జగన్‌ తరఫు న్యాయవాది షీల్డ్‌ కవర్‌లో కోర్టుకు సమర్పించారు. చొక్కాకు సంబంధించిన వివరాలతో మెమో కూడా ఫైల్‌ చేశారు. అనంతరం అసిస్టెంట్‌ పబ్లిక్‌ ప్రాసిక్యూటర్‌ నోటీసు ఇవ్వాలని జడ్జి ఆదేశించగా.. ఏపీపీ అందుబాటులో లేకపోవడంతో సిట్‌ అధికారి బీవీఎస్‌ నాగేశ్వరరావుకు కోర్టు సమక్షంలోనే నోటీసులందజేశారు. మరోవైపు హత్యాయత్న ఘటనపై థర్డ్‌ పార్టీతో విచారణ జరిపించాలని కోరుతూ వైఎస్‌ జగన్‌ దాఖలు చేసిన పిటిషన్‌ హైకోర్టులో ఈ నెల 27న విచారణకు రానున్నందున అప్పటివరకు ఆ షర్ట్‌ను విచారణ అధికారికి గానీ, సిట్‌ పోలీసులకు గానీ అప్పగించొద్దని జగన్‌ తరఫు న్యాయవాది మెజిస్ట్రేట్‌ను కోరారు. అప్పటి వరకు కోర్టు కస్టడీలోనే ఉంచాలని అభ్యర్థించారు. దీనిపై స్పందించిన మేజిస్ట్రేట్‌ రూల్‌ పొజిషన్‌ పరిశీలించి ఆర్డర్‌ పాస్‌ చేస్తామన్నారు. కోర్టులపై తమకు ప్రగాఢ విశ్వాసం ఉందని వైఎస్సార్‌సీపీ విశాఖ నగర అధ్యక్షుడు మళ్ల విజయప్రసాద్‌ చెప్పారు. 

సాక్షి, హైదరాబాద్‌: విశాఖపట్నం విమానాశ్రయంలో తనపై జరిగిన హత్యాయత్నం ఘటన పౌర విమానయాన భద్రతా చట్టం పరిధిలోకి వస్తుందని, అందువల్ల ఈ ఘటనపై సమగ్ర దర్యాప్తు జరిపేలా కేంద్ర హోంశాఖను ఆదేశించాలని వైఎస్సార్‌ కాంగ్రెస్‌ పార్టీ అధ్యక్షుడు, ప్రతిపక్ష నేత వైఎస్‌ జగన్‌మోహన్‌రెడ్డి హైకోర్టుకు విజ్ఞప్తి చేశారు. తనపై జరిగిన హత్యాయత్నం ఘటన చట్ట వ్యతిరేక కార్యకలాపాల నియంత్రణ నిర్వచనం పరిధిలోకి వస్తుందని, పౌర విమానయాన భద్రతా చట్ట నిబంధనల ప్రకారం ఇలాంటి ఘటనలపై దర్యాప్తు చేసే అధికార పరిధి జాతీయ భద్రతా విభాగానికి(ఎన్‌ఐఏ) ఉందని పేర్కొన్నారు. ఈ హత్యాయత్నం ఘటన తాలూకు పూర్తి సమాచారాన్ని, నివేదికను రాష్ట్ర పోలీసులు కేంద్ర హోంశాఖకు పంపాల్సి ఉన్నా, ఇప్పటివరకూ పంపలేదని న్యాయస్థానానికి నివేదించారు. అందువల్ల సంబంధిత నివేదికను, సమాచారాన్ని వెంటనే కేంద్రానికి పంపేలా రాష్ట్ర హోంశాఖ ముఖ్య కార్యదర్శి, డీజీపీ, ఎయిర్‌పోర్ట్‌ విమానాశ్రయ ఎస్‌హెచ్‌ఓలను ఆదేశించాలని హైకోర్టును అభ్యర్థించారు.  న్యాయస్థానానికి అదనపు సమాచారం  విశాఖ విమానాశ్రయంలో అక్టోబర్‌ 25న తనపై జరిగిన హత్యాయత్నంపై దర్యాప్తును పక్కదారి పట్టించేలా ముఖ్యమంత్రి, డీజీపీ మాట్లాడిన నేపథ్యంలో ఈ కేసు దర్యాప్తు బాధ్యతలను రాష్ట్ర ప్రభుత్వ నియంత్రణలో స్వతంత్ర సంస్థకు అప్పగించేలా ఆదేశాలు ఇవ్వాలంటూ వైఎస్‌ జగన్‌మోహన్‌రెడ్డి హైకోర్టులో పిటిషన్‌ దాఖలు చేసిన విషయం తెలిసిందే. ఈ వ్యాజ్యంపై విచారణ జరిపిన హైకోర్టు, ఈ మొత్తం ఘటనకు సంబంధించి పూర్తి వివరాలతో కౌంటర్లు దాఖలు చేయాలంటూ రాష్ట్ర ప్రభుత్వాన్ని, కేంద్ర ప్రభుత్వాన్ని ఆదేశిస్తూ విచారణను ఈ నెల 27కి వాయిదా వేసింది. తాను దాఖలు చేసిన వ్యాజ్యానికి అనుబంధంగా జగన్‌మోహన్‌రెడ్డి శుక్రవారం కోర్టులో అదనపు అఫిడవిట్‌ను దాఖలు చేశారు. ఇందులో మరింత అదనపు సమాచారాన్ని, కీలక చట్ట నిబంధనలు ఏం చెబుతున్నాయన్న అంశాలను పొందుపరిచారు.  కేంద్ర దర్యాప్తు సంస్థ దర్యాప్తు చేయొచ్చు  ‘‘పౌర విమానయాన భద్రతకు వ్యతిరేకంగా జరిగే చట్ట విరుద్ధ కార్యకలాపాలను నిరోధించేందుకు 1982లో చట్టం వచ్చింది. ఈ చట్టంలోని సెక్షన్‌ 3, 3ఎ ప్రకారం.. ఏ విమానాశ్రయంలోనైనా ఉద్దేశపూర్వకంగా, చట్ట విరుద్దంగా ఏదైనా ఆయుధాన్ని, పరికరాన్ని ఉపయోగించినా, హింస ద్వారా ఎవరైనా వ్యక్తిని గాయపరిచినా, హతమార్చినా, ఏదైనా విమానాన్ని నాశనం చేసినా, తీవ్రంగా నష్టపరిచినా, విమానాల రాకపోకలకు ఆటంకం కలిగించినా, విమానాశ్రయం భద్రతకు ప్రమాదంగా పరిణమించినా, బెదిరింపులకు పాల్పడినా అందుకు బాధ్యుడైన వ్యక్తికి జీవిత ఖైదు విధించవచ్చు. ఈ నేరాలపై సెక్షన్‌ 5ఎ ప్రకారం కేంద్ర దర్యాప్తు సంస్థ లేదా కేంద్ర ప్రభుత్వం నియమించిన అధికారి దర్యాప్తు చేయవచ్చు. సీఆర్‌పీసీ కింద ఓ పోలీసు అధికారికి ఉండే అధికారాలన్నీ ఈ సెక్షన్‌ కింద నియమితులయ్యే అధికారులకు ఉంటాయి. కేంద్రం నియమించే అధికారికి రాష్ట్ర పోలీసులు సహకరించాల్సి ఉంటుంది’’ అని అనుబంధ పిటిషన్‌లో జగన్‌ పేర్కొన్నారు.  ఎన్‌ఐఏకు దర్యాప్తు జరిపే పరిధి ఉంది  ‘2008లో ఎన్‌ఐఏ చట్టం వచ్చింది. ఈ చట్టం కింద పౌర విమానయాన భద్రతకు వ్యతిరేకంగా జరిగే చట్ట విరుద్ధ కార్యకలాపాలపై దర్యాప్తు జరిపే పరిధి ఎన్‌ఐఏకు ఉంది. విమానాశ్రయంలో చట్ట విరుద్ధ కార్యకలాలు జరిగినప్పుడు అందుకు సంబంధించిన సమాచారాన్ని స్థానిక పోలీసులు వెంటనే రాష్ట్ర ప్రభుత్వానికి పంపాలి. ఆ తరువాత ఆ సమాచారాన్ని నివేదిక రూపంలో రాష్ట్ర ప్రభుత్వం కేంద్ర ప్రభుత్వానికి పంపుతుంది. ఘటన తీవ్రతను బట్టి కేంద్ర ప్రభుత్వం దర్యాప్తు బాధ్యతలను ఎన్‌ఐఏకు అప్పగించాలా? లేదా? అన్న దానిపై స్వతంత్రంగా నిర్ణయం తీసుకుంటుంది. నాపై విశాఖ విమానాశ్రయంలో జరిగిన హత్యాయత్నం ఘటనకు సంబంధించిన వివరాలను రాష్ట్ర ప్రభుత్వం ఇప్పటికీ కేంద్ర ప్రభుత్వానికి పంపనే లేదు. విమానాశ్రయాల్లో ఘటనలు జరిగినప్పుడు ఏం చేయాలో చట్టం నిబంధనలు స్పష్టంగా చెబుతున్నాయి’’ అని వైఎస్‌ జగన్‌ వివరించారు. రాష్ట్ర ప్రభుత్వం, డీజీపీ విఫలమయ్యారు  ‘‘రాష్ట్ర హోంశాఖ, డీజీపీ తదితరులు వారి చట్టపరమైన బాధ్యతలను నిర్వర్తించడంలో విఫలమయ్యారు. అంతేకాక చట్ట నిబంధనల ప్రకారం ఎయిర్‌పోర్ట్‌ పోలీస్‌స్టేషన్‌ ఎస్‌హెచ్‌ఓ నుంచి హోంశాఖ ముఖ్య కార్యదర్శి ఇప్పటి వరకు ఎటువంటి నివేదిక తెప్పించుకోలేదు. ఈ అదనపు సమాచారాన్ని పరిగణనలోకి తీసుకుని నాపై విశాఖ విమానాశ్రయంలో జరిగిన హత్యాయత్నం ఘటన తాలూకు సమాచారాన్ని, నివేదికను కేంద్ర హోంశాఖకు పంపేలా రాష్ట్ర హోంశాఖ ముఖ్య కార్యదర్శిని ఆదేశించండి. దాని ప్రకారం హత్యాయత్నంపై సమగ్ర దర్యాప్తు జరిపేలా కేంద్ర హోంశాఖను ఆదేశించండి’’ అని హైకోర్టును జగన్‌ అభ్యర్థించారు.  విచారణను వాయిదా వేయండి: ఏజీ  ప్రతిపక్ష నేత జగన్‌మోహన్‌రెడ్డి దాఖలు చేసిన ప్రధాన పిటిషన్‌ నవంబర్‌ 27న విచారణకు రానున్న నేపథ్యంలో ఆ వ్యాజ్యం గురించి రాష్ట్ర అడ్వొకేట్‌ జనరల్‌(ఏజీ) దమ్మాలపాటి శ్రీనివాస్‌ శుక్రవారం ప్రధాన న్యాయమూర్తి(సీజే) నేతృత్వంలోని హైకోర్టు ధర్మాసనం ముందు ప్రస్తావించారు. 27వ తేదీన తనకు సుప్రీంకోర్టులో పోలవరం కేసుల విచారణ ఉందని, అందువల్ల జగన్‌ పిటిషన్‌ విచారణను ఆపై వచ్చే వారానికి వాయిదా వేయాలని కోరారు. దీనిపై జగన్‌ తరఫు సీనియర్‌ న్యాయవాది సి.వి.మోహన్‌రెడ్డి అభ్యంతరం తెలిపారు. దీంతో ధర్మాసనం విచారణను వాయిదా వేసే అంశాన్ని 27న పరిశీలిస్తామని స్పష్టం చేసింది.  దర్యాప్తుపై తదుపరి చర్యలన్నీ నిలిపేయండి  హైకోర్టులో ఎమ్మెల్యే ఆళ్ల రామకృష్ణారెడ్డి ‘పిల్‌’  విశాఖ ఎయిర్‌పోర్టులో వైఎస్‌ జగన్‌పై జరిగిన హత్యాయత్నం ఘటనకు సంబంధించిన సమాచారాన్ని, నివేదికను కేంద్ర ప్రభుత్వానికి పంపించేలా రాష్ట్ర సర్కారును ఆదేశించాలని మంగళగిరి ఎమ్మెల్యే ఆళ్ల రామకృష్ణారెడ్డి కోరారు. ఈ మేరకు ఆయన హైకోర్టులో ప్రజా ప్రయోజన వ్యాజ్యం(పిల్‌) దాఖలు చేశారు. హత్యాయత్నంపై దర్యాప్తును ఎన్‌ఐఏకు అప్పగించేలా కేంద్రాన్ని ఆదేశించాలని విన్నవించారు. అలాగే డీజీపీ, సిట్‌ ఇన్‌చార్జి, విశాఖ పోలీస్‌ కమిషనర్, ఎయిర్‌పోర్ట్‌ పోలీస్‌స్టేషన్‌ ఎస్‌హెచ్‌ఓలను ప్రాసిక్యూట్‌ చేసేలా కేంద్రాన్ని ఆదేశించాలన్నారు. జగన్‌పై హత్యాయత్నంపై రాష్ట్ర పోలీసులు చేస్తున్న దర్యాప్తుపై తదుపరి చర్యలన్నింటినీ నిలిపేస్తూ మధ్యంతర ఉత్తర్వులు జారీ చేయాలని విజ్ఞప్తి చేశారు. 

సాక్షి, విశాఖపట్నం: ప్రతిపక్ష నేత, వైఎస్సార్‌సీపీ అధినేత వైఎస్‌ జగన్‌మోహన్‌రెడ్డిపై జరిగిన హత్యాయత్నం కేసులో నిందితుడు జనుపల్లి శ్రీనివాసరావు రిమాండ్‌ గడువు శుక్రవారంతో ముగియనుంది. విశాఖ సెంట్రల్‌ జైలులో ఉన్న నిందితుడ్ని ఎయిర్‌పోర్టు పోలీసులు శుక్రవారం విశాఖ మూడో మెట్రోపాలిటన్‌ మేజిస్ట్రేట్‌ కోర్టుకు తీసుకురానున్నారు. నిందితుడి తరఫు న్యాయవాది సలీం వేసిన బెయిల్‌ పిటీషన్‌ను కోర్టు కొట్టేసిన నేపథ్యంలో శ్రీనివాసరావుకు మరో 14 రోజుల పాటు రిమాండ్‌ పొడిగించే అవకాశాలున్నాయి.  

సాక్షి, హైదరాబాద్‌: విశాఖపట్నం విమానాశ్రయంలో తన మీద జరిగిన హత్యాయత్నంపై స్వతంత్ర సంస్థ దర్యాప్తు కోరుతూ హైకోర్టులో తాను దాఖలు చేసిన పిటిషన్‌ పరిష్కారమయ్యేంత వరకు తన వాంగ్మూలం నమోదును వాయిదా వేయాలని ప్రత్యేక దర్యాప్తు బృందం(సిట్‌) ఇన్‌చార్జిని వైఎస్సార్‌ కాంగ్రెస్‌ పార్టీ అధినేత, ఏపీ ప్రతిపక్ష నేత వైఎస్‌ జగన్‌ మోహన్‌రెడ్డి కోరారు. తాను దాఖలు చేసిన పిటిషన్‌ హై కోర్టులో పెండింగ్‌లో ఉన్న విషయాన్ని ఆయనీ సందర్భంగా సిట్‌ ఇన్‌చార్జికి గుర్తు చేశారు. జగన్‌ మీద జరిగిన హత్యాయత్నం ఘటనపై ప్రత్యేక దర్యాప్తు బృందం(సిట్‌) దర్యాప్తు చేస్తున్న విషయం తెలిసిందే. దర్యాప్తులో భాగంగా వాంగ్మూలం నమోదు నిమిత్తం తమ ముందు హాజరు కావాలని, లేనిపక్షంలో స్థలం, సమయం, తేదీ చెబితే తామే వాంగ్మూలం నమోదుకు వస్తామంటూ సిట్‌ ఇన్‌చార్జి బి.వి.ఎస్‌.నాగేశ్వరరావు గత నెల 27న సీఆర్‌పీసీ సెక్షన్‌ 160 కింద జగన్‌కు నోటీసు ఇచ్చారు. ఈ నోటీసుకు జగన్‌ సమాధానమిచ్చారు. ‘‘నాపై 25.10.2018న విశాఖపట్నం విమానాశ్రయంలో హత్యాయత్నం జరిగింది. నేర న్యాయ ప్రక్రియను రాష్ట్ర ప్రభుత్వం దుర్వినియోగం చేస్తున్న నేపథ్యంలో ఈ ఘటనపై రాష్ట్ర హోంశాఖ, డీజీపీ నియంత్రణలో లేని స్వతంత్ర సంస్థ చేత దర్యాప్తు చేయించాలని కోరుతూ నేను హైకోర్టులో పిటిషన్‌ దాఖలు చేశాను. ఈ పిటిషన్‌ను విచారించిన హైకోర్టు ప్రతివాదులకు నోటీసులు జారీ చేసింది. కౌంటర్లు దాఖలు చేయాలని ఆదేశించింది. తదుపరి విచారణను 27.11.2018కి వాయిదా వేసింది. నేను దాఖలు చేసిన పిటిషన్‌ హైకోర్టులో అపరిష్కృతంగా ఉన్న నేపథ్యంలో.. దానిని పరిగ ణనలోకి తీసు కుంటూ నా పిటిషన్‌ పరిష్కారమయ్యేంత వరకు నా వాంగ్మూలం నమోదును వాయిదా వేయండి’’ అని జగన్‌ తానిచ్చిన సమాధానంలో పేర్కొన్నారు. ఈ సమాధానాన్ని వైఎస్సార్‌ కాంగ్రెస్‌ పార్టీ విశాఖ నగర అధ్యక్షుడు మళ్ల విజయప్రసాద్‌ ద్వారా బుధవారం సాయంత్రం సిట్‌ ఇన్‌చార్జికి అందజేశారు.