Anil Chandra punetha

సాక్షి, అమరావతి: ‘స్థానిక సంస్థల ఎన్నికల ప్రక్రియ అంతా కలెక్టర్లు, ఎస్పీల ద్వారానే నడిపించాలి. ఎలాంటి ఫిర్యాదులొచ్చినా, వాటిపై సంబంధిత జిల్లాల కలెక్టర్లు, ఎస్పీలు ఇచ్చే నివేదికల ఆధారంగానే ఏ చర్య అయినా తీసుకోగలను. ఈ వ్యవస్థలో నా పరిధి ఇంతే’ అని రాష్ట్ర ఎన్నికల కమిషనర్‌ (ఎస్‌ఈసీ) అనిల్‌ చంద్ర పునేఠ వ్యాఖ్యానించారు. ఆదివారం జరిగిన మున్సిపల్‌ ఎన్నికల పోలింగ్‌ సరళిని వివరించేందుకు ఏర్పాటు చేసిన విలేకరుల సమావేశంలో ఆయన ఈ వ్యాఖ్యలు చేశారు. మున్సిపల్, ఎంపీటీసీ, జెడ్పీటీసీ ఎన్నికల్లో అధికార టీడీపీ నాయకులు, వారి గూండాలు పలుచోట్ల పోలీసు అధికారుల సహకారంతో వైఎస్సార్‌సీపీ నేతలను నామినేషన్లు వేయకుండా అడ్డుకోవడం మొదలు.. పోలింగ్‌ సమయంలో వైఎస్సార్‌సీపీ ఏజెంట్లను బూత్‌ల నుంచి బయటకు నెట్టేయడంపై వైఎస్సార్‌సీపీ అధినేత, మాజీ ముఖ్యమంత్రి వైఎస్‌ జగన్‌మోహన్‌ రెడ్డి స్వయంగా ఆర్వో ఆఫీసు ఎదుట ధర్నా చేసిన సంగతి తెలిసిందే. ఈ ఘటనలపై ఎస్‌ఈసీ పునేఠను మీడియా ప్రతినిధులు ప్రశ్నించారు. ‘ఈ ఎన్నికల్లో పోలీసులు, అధికారులు పక్షపాతంతో ఉన్నారని రాజకీయ పార్టీలు మీకు ఫిర్యాదు చేస్తున్నారు. రాష్ట్ర ఎన్నికల కమిషన్‌ స్వతంత్ర సంస్థ. అందుకే ఫిర్యాదులు ఇస్తున్నామంటున్నారు. అయితే, మీరు కలెక్టర్లు, ఎస్పీల నివేదికలను ఫాలో అవుతామంటున్నారు. మరి బాధితులకు న్యాయం ఎలా’ అని విలేకరులు అడగ్గా.. ఏ మనిషి రిపోర్టుపై ఆధారపడాలో మీరే చెప్పండి అని ఎస్‌ఈసీ ఎదురు ప్రశ్నించారు. ‘ఈ వ్యవస్థలో ఎస్‌ఈసీగా నేను కలెక్టర్లు, ఎస్పీల ద్వారానే ఎన్నికలు నిర్వహించాలి. ఎక్కడైనా వేరే జిల్లా అధికారిని నియమించినా అతను కూడా పక్షపాతంతో ఉన్నారని అంటారు. మొత్తం వ్యవస్థ ఇలా ఉంది. లేకపోతే, ఏమైనా అవకాశం ఉంటే చెప్పండి. అసెంబ్లీ, లోక్‌సభ ఎన్నికలు జరిపే కేంద్ర ఎన్నికల సంఘం బయట రాష్ట్రాల పరిశీలకులను తీసుకొస్తారు. ఆ వ్యవస్థ ఇక్కడ లేదు. మేం ఉన్న వ్యవస్థలోనే పనిచేయాలి’ అని పునేఠ వ్యాఖ్యానించారు.అనంత, పల్నాడు జిల్లాల ఎస్పీలే కొన్ని ఫిర్యాదులున్నాయన్నారు..మున్సిపల్‌ పోలింగ్‌ ముగియడానికి 45 నిమిషాల ముందు పలు జిల్లాల కలెక్టర్లు, ఎస్పీలు, పోలీసు కమిషనర్లతో మాట్లాడినట్టు పునేఠ తెలిపారు. మొదటి నుంచి స్థానిక సంస్థల ఎన్నికల్లో హింసాత్మక ఘటనలు జరిగిన, ఎక్కువగా ఫిర్యాదులొచ్చిన నంద్యాల, కడప, పల్నాడు, మార్కాపురం, ప్రకాశం, నెల్లూరు, తిరుపతి, చిత్తూరు, అనంతపురం, కర్నూలు, అన్నమయ్య, శ్రీ సత్యసాయి జిల్లాల ఎస్పీలతో మాట్లాడి, ఏమైనా హింసాత్మక ఘటనలు, ఫిర్యాదులు ఉన్నాయేమోనని ఆరా తీశానన్నారు. ఎక్కడైనా రీ పోలింగ్‌ కావాలా అని అడిగినట్టు వివరించారు. కేవలం పల్నాడు, అనంతపురం రెండు జిల్లాల్లోనే కొన్ని ఫిర్యాదులున్నట్టు వారు తెలిపారన్నారు.పోలింగ్‌ ముగిసిన తర్వాత అక్కడి పోలింగ్‌ అధికారులు అందజేసే పీవో రిపోర్టును పరిశీలించిన తర్వాత తగిన ఆధారాలు, కారణాలు ఉంటే రీపోలింగ్‌ అడుగుతామని ఆ రెండు జిల్లాల అధికారులు చెప్పారన్నారు. వారు రీపోలింగ్‌ కావాలని నివేదికలిస్తే ఆదివారం రాత్రి లోగానే ఆదేశాలిస్తామని చెప్పారు. విజయవాడ 55వ వార్డులో పొలింగ్‌ రెండున్నర గంటల ఆలస్యంగా మొదలైందని కలెక్టరు నివేదిక ఇవ్వడంతో అక్కడ పోలింగ్‌ సమయాన్ని పొడిగించినట్లు తెలిపారు. మొత్తంగా అన్ని జిల్లాల్లో పోలింగ్‌ ప్రశాంతంగానే జరిగిందని చెప్పారు.పులివెందులపై సమాచారం రాగానే కలెక్టర్‌తో మాట్లాడా..పులివెందులలో 70 చోట్ల వైఎస్సార్‌సీపీ ఏజెంట్లను బూత్‌లలోకి రానీయలేదని తనకు ఉదయం సమాచారం వచ్చిందని, ఆ వెంటనే జిల్లా కలెక్టర్‌ను సమాచారం అడిగానని విలేకరుల ప్రశ్నకు సమాధానంగా చెప్పారు. ఆ జాబితా ఇస్తే దానిపై ఎస్పీలతో మాట్లాడతానని కలెక్టరు చెప్పారన్నారు. పులివెందుల విషయంలో తాను జోక్యం చేసుకొని వెంటనే కలెక్టర్, ఎస్పీతో మాట్లాడానన్నారు. ఐజీతోనూ మాట్లాడినట్టు చెప్పారు. మీ జోక్యం తర్వాత సమస్య పరిష్కారమైందా అని అడగ్గా.. ‘తర్వాత అక్కడ ఏమి జరిగిందో మీకూ తెలుసు. ఏమైనా ఆధారం ఉంటే రిపోర్టు పంపమని అధికారులను అడిగా. నివేదిక మేరకు చర్యలు తీసుకుంటా’ అని బదులిచ్చారు. ఎస్పీ నివేదిక ఇస్తే వెంటనే రీ పోలింగ్‌కు ఆదేశాలిస్తానన్నారు. జమ్మలమడుగులో ఉదయం 9–11 గంటల మధ్య భారీ పోలింగ్‌పై కడప కలెక్టరుతో మాట్లాడినట్టు చెప్పారు. అనంతపురం నుంచి కూడా ఇలాంటి ఫిర్యాదు ఉందని కలెక్టరు చెప్పారన్నారు. ఆధారాలు ఉంటే పంపుతామన్నారని, అవి వచ్చాక చర్యలు తీసుకుంటానని చెప్పారు.

సాక్షి, అమరావతి: రాజకీయ పార్టీల అభ్యర్థులు పోలింగ్‌ కేంద్రాల్లో నియమించే పోలింగ్‌ ఏజెంట్ల అర్హతలు, నేపథ్యం తనిఖీ చేయడానికి ఎన్నికల ప్రక్రియలో ఎటువంటి నిబంధనలు లేవని రాష్ట్ర ఎన్నికల కమిషనర్‌ (ఎస్‌ఈసీ) అనిల్‌చంద్ర పునేఠ తెలిపారు. పరిశీలన పేరుతో పోలింగ్‌ ఏజెంట్లను ప్రిసైడింగ్‌ అధికారులు, పోలీసులు అడ్డుకోరాదని స్పష్టం చేశారు. మున్సిపల్‌ ఎన్నికలతో పాటు ఎంపీటీసీ, జెడ్పీటీసీ ఎన్నికల్లో పోలింగ్‌ ఏజెంట్ల నియామకంపై మరింత స్పష్టత ఇస్తూ శనివారం ఆయన ఆ­దేశాలు జారీచేశారు. అభ్య­ర్థులు పోలింగ్‌ కేంద్రాల్లో నియమించుకునే ఏజెంట్లను మార్చుకునే వెసులుబాటు ఉందని తెలిపారు. పోలింగ్‌ ఏజెంట్‌ను మార్చినప్పుడు, అందుకు సంబంధించిన నియామక, తొలగింపు ఫారాన్ని అభ్యర్థులు సంబంధిత ప్రిసైడింగ్‌ అధికారికి ఇవ్వాలని పేర్కొన్నారు. ఆ ఆదేశాల్లో మరికొన్ని అంశాలు..» పోలింగ్‌ ఏజెంట్‌గా నియమితులయ్యే వ్యక్తి అదే వార్డు లేదా ప్రాదేశిక నియోజకవర్గం పరిధిలోని అదే పోలింగ్‌ స్టేషన్‌కు లేదా పొరుగున ఉన్న పోలింగ్‌ స్టేషన్‌కు చెందిన ఓటరై ఉండాలి.» ఏజెంట్‌ వద్ద ఓటరు గుర్తింపు కార్డు లేదా రాష్ట్ర ఎన్నికల సంఘం ఆమోదించిన ఇతర గుర్తింపుపత్రం ఉండాలి. పోలింగ్‌ స్టేషన్‌లో, ప్రిసైడింగ్‌ అధికారి జారీచేసిన గుర్తింపు కార్డును కనిపించేలా ఉంచుకోవాలి. » ఒక అభ్యర్థి ఒక పోలింగ్‌ స్టేషన్‌లో ఒక పోలింగ్‌ ఏజెంట్‌ను, మరో ప్రత్యామ్నాయ ఏజెంట్‌ను మాత్రమే నియమించుకోవచ్చు. అయితే ఏ సమయంలోనైనా పోలింగ్‌ స్టేషన్‌ లోపల ఒక పోలింగ్‌ ఏజెంట్‌కు మాత్రమే అనుమతి ఉంటుంది. » మంత్రులు, ఎంపీలు, ఎమ్మెల్యేలు, ఎమ్మెల్సీలు, ప్రభుత్వ భద్రతతో ఉన్న వ్యక్తులను పోలింగ్‌ ఏజెంట్లుగా నియమించకూడదు. » పోలింగ్‌ ఏజెంట్లు ఓటింగ్‌ ప్రక్రియను గమనించేలా, ఓటర్లను గుర్తించేలా కూర్చోవాలి. అయితే ఓటింగ్‌ రహస్యానికి ఎటువంటి భంగం కలగకుండా చూసుకోవాలి. » పోలింగ్‌ ఏజెంట్లకు కూర్చునే స్థలాలను రాజ­కీయ పార్టీల ప్రాధాన్యత మేరకు కేటాయించాలి. తొలుత గుర్తింపు పొందిన జాతీయ పార్టీలు, ఆ తర్వాత గుర్తింపు పొందిన రాష్ట్ర పార్టీలు, తర్వాత ప్రత్యేక గుర్తులు కలిగిన నమోదిత రాజకీయ పార్టీలు, ప్రత్యేక గుర్తులు లేని నమోదిత రాజకీయ పార్టీలు, స్వతంత్ర అభ్యర్థుల ఏజెంట్లకు వరుస క్రమంలో సీట్లు కేటాయించాలి. రాజకీయ పార్టీల ప్రాతిపదికన కాకుండా నిర్వహించే గ్రామ పంచాయతీ ఎన్నికలకు ఈ నిబంధన వర్తించదు.» పోలింగ్‌ ఏజెంట్లు పోలింగ్‌ జరుగుతున్న సమయంలో ఎట్టి పరిస్థితుల్లోను తాము గుర్తించిన ఓటర్ల జాబితా ప్రతిని పోలింగ్‌ కేంద్రం బయటకు తీసుకెళ్లకూడదు. వారు పోలింగ్‌ కేంద్రం నుంచి బయటకు వెళ్లాలంటే, తమ వద్ద ఉన్న ఓటర్ల జాబితాలను ప్రిసైడింగ్‌ అధికారికి అప్పగించి, అనుమతితోనే వెళ్లాలి.శాంతిభద్రతలు, ప్రశాంత పోలింగ్‌కు ఏర్పాట్లు పూర్తిఓటర్లు స్వేచ్ఛగా తమ ఓటుహక్కును వినియోగించుకునేందుకు ముందుకు రావాలని ఎస్‌ఈసీ అనిల్‌చంద్ర పునేఠ పిలుపునిచ్చారు. ఆదివారం జరిగే మున్సిపల్‌ ఎన్నికలకు, నవంబర్‌ ఐదోతేదీ జరిగే మండల, జిల్లా పరిషత్‌ ఎన్నికలకు అన్ని ఏర్పాట్లు చేశామని చెప్పారు. శాంతిభద్రతల పరిరక్షణకు, ప్రశాంత ఎన్నికల నిర్వహణకు ఏర్పాట్లు చేసినట్టు పోలీసులు నివేదించారని తెలిపారు. పొలింగ్‌ రోజున ఎలాంటి ఘటనలు జరగకుండా అదనపు బలగాలు ఏర్పాటు చేస్తున్నామని, ఆయా అంశాలను డీజీపీ పర్యవేక్షిస్తున్నారని చెప్పారు.

సాక్షి, అమరావతి: స్థానిక సంస్థల ఎన్నికల్లో అధికార పార్టీ అక్రమాలు, దౌర్జన్యాలకు అడ్డుకట్ట వేసి, ప్రజాస్వామ్యాన్ని పరిరక్షించడంలో రాష్ట్ర ఎన్నికల కమిషన్‌ విఫలమైందని వైఎస్సార్‌సీపీ నేతలు మండిపడ్డారు. అయినా, ప్రజాస్వామ్య పరిరక్షణకు వైఎస్సార్‌సీపీ పోరాటం ఆగదని స్పష్టం చేశారు. ప్రజాస్వామ్య విలువలు, ఎన్నికల నిబంధనలు ఉల్లంఘనకు గురవుతున్నాయని పేర్కొంటూ వైఎస్సార్‌సీపీ నేతలు ఎమ్మెల్సీ లేళ్ల అప్పిరెడ్డి, మాజీ ఎమ్మెల్యే టీజేఆర్‌ సుధాకర్‌బాబు, పార్టీ లీగల్‌ సెల్‌ రాష్ట్ర అధ్యక్షుడు మలసాని మనోహర్‌రెడ్డి, ఎస్సీ సెల్‌ వర్కింగ్‌ ప్రెసిడెంట్‌ యోనా రాజు తదితరులు రాష్ట్ర ఎన్నికల కమిషనర్‌ అనిల్‌చంద్ర పునేఠకు సోమవారం ఫిర్యాదు చేశారు. ఎన్నికల ప్రక్రియలో అభ్యర్థుల హక్కులకు భంగం కలుగుతున్న తీరును ఎస్‌ఈసీ దృష్టికి తీసుకెళ్లారు. అధికార పార్టీ అండతో ఎన్నికల అక్రమాలు, నామినేషన్ల తిరస్కరణలు, అభ్యర్థులకు బెదిరింపులు, పోలీసుల దౌర్జన్యాలను వివరించారు. రాజకీయ పార్టీలతోనే కాకుండా, నిర్వీర్యమవుతున్న వ్యవస్థలు, బాధ్యతలను విస్మరిస్తున్న రాష్ట్ర ఎన్నికల కమిషన్‌తోనూ పోరాడాల్సిన పరిస్థితి ఏర్పడిందని చెప్పారు. ఎస్‌ఈసీ తన బాధ్యతలను సమర్థంగా నిర్వర్తించకపోయినా ప్రజాస్వామ్య పరిరక్షణ కోసం, అభ్యర్థుల హక్కులు, ప్రజల ఓటు హక్కు, రాజ్యాంగ విలువలను కాపాడేందుకు రాజకీయంగా, న్యాయపరంగా పోరాటాన్ని కొనసాగిస్తామని తేల్చిచెప్పారు. సుప్రీం కోర్టు ఆదేశాలనూ అధికారులు పట్టించుకోవడంలేదు అనంతరం ఎస్‌ఈసీ కార్యాలయం వద్ద నేతలు మీడియాతో మాట్లాడుతూ.. స్థానిక సంస్థల ఎన్నికల్లో అధికార పార్టీ నామినేషన్ల దశ నుంచే అక్రమాలకు పాల్పడుతోందని ఎమ్మెల్సీ లేళ్ల అప్పిరెడ్డి చెప్పారు. చంద్రగిరిలో తమ పార్టీకి చెందిన 142 నామినేషన్లు తిరస్కరణకు గురయ్యాయన్నారు. కందుకూరుతో పాటు అనేక ప్రాంతాల్లోనూ ఇదే పరిస్థితి ఉందన్నారు. అవసరం లేని ధ్రువపత్రాలను సాకుగా చూపి నామినేషన్లు తిరస్కరిస్తున్నారని మండిపడ్డారు. అప్పీళ్లలోనూ అభ్యర్థుల వాదనలు వినడం లేదని, సుప్రీంకోర్టు, హైకోర్టు ఆదేశాలను సైతం పట్టించుకోవడంలేదని చెప్పారు. పోలీసు, రెవెన్యూ అధికారుల్లో కొందరు అధికార పార్టీకి అనుకూలంగా వ్యవహరిస్తూ అభ్యర్థులను బెదిరించడం, అక్రమంగా అరెస్టులు చేయడం, నామినేషన్‌ పత్రాలను చించేయడం వంటి చర్యలకు పాల్పడుతున్నారన్నారు. నకిరికల్లు జెడ్పీటీసీ అభ్యర్థి కందుల హనుమాయమ్మ భర్త లక్ష్మారెడ్డిని పోలీసులు తీసుకెళ్లి ఎక్కడ ఉంచారో కూడా చెప్పడంలేదని తెలిపారు. ఇలా అనేకానేక అక్రమాలకు పాల్పడుతున్నారని తెలిపారు. ఎన్నికల కమిషన్‌ నిబంధనలను అధికారులు అమలు చేయడం లేదు అని చెప్పారు. వైఎస్సార్‌సీపీ పేరుతో సంబంధం లేని వ్యక్తులు నామినేషన్లు వేయడం, రాజకీయ పార్టీల గుర్తులు లేకుండా బ్యాలెట్‌ పత్రాలు రూపొందించాలనే సర్క్యులర్‌ వంటి అంశాలపై సమాధానం చెప్పాల్సి ఉందన్నారు. ఎస్‌ఈసీ న్యాయం చేయకపోతే సుప్రీంకోర్టును ఆశ్రయిస్తామని చెప్పారు. మాజీ ఎమ్మెల్యే టీజేఆర్‌ సుధాకర్‌బాబు మాట్లాడుతూ.. ఈ నెల 13 నుంచి పలుమార్లు రాష్ట్ర ఎన్నికల కమిషన్‌ను కలిసి వినతిపత్రాలు ఇచ్చి, ఎన్నికల్లో జరుగుతున్న అక్రమాలపై అభ్యంతరాలను తెలియజేస్తున్నామని, అయినా ఎటువంటి చర్యలు లేవని తెలిపారు. చివరకు వార్డు మెంబర్‌ ఎన్నికలను కూడా చంద్రబాబు ప్రభుత్వం రాజకీయ కక్ష సాధింపులకు వాడుకుంటూ జాతీయ స్థాయిలో ఆంధ్రప్రదేశ్‌ పరువును దెబ్బతీస్తోందన్నారు. ఒక వ్యక్తి, ఒక కుటుంబం ప్రయోజనాల కోసం ప్రజాస్వామ్య వ్యవస్థలను పక్కదారి పట్టించడం సమంజసం కాదని చెప్పారు.

సాక్షి, అమరావతి: ఎన్నికల్లో ఇచ్చిన సూపర్‌ సిక్స్‌ హామీలు నెరవేర్చకపోవడం, ఇసుక నుంచి మైకా వరకు దోపిడీ, అయినవాళ్లకు కారు చౌకగా భూములు రాయితీలు ఇవ్వడం, రాష్ట్రంలో పరిపాలన పూర్తిగా గాడితప్పడం.. ప్రభుత్వంపై అసంతృప్తి పెల్లుబుకడంతో స్థానిక ఎన్నికల్లో ఓటమి తప్పదని భావించిన చంద్రబాబు నాయుడు.. ఎలాగైనా గెలిచేందుకు భారతంలో శకునివలే కుట్రలు కుతంత్రాలకు తెరతీశాడు. ఇందుకోసం రాష్ట్ర ఎన్నికల కమిషనర్‌ అనిల్‌ చంద్ర పునేఠను తోలుబొమ్మలాగా, డీజీపీ హరీష్‌కుమార్‌ గుప్తాను కీలుబొమ్మలాగా, కిందిస్థాయి అధికారులను పాచికలుగా మార్చుకొని పచ్చకుట్రకు తెరలేపారు. మున్సిపల్‌ ఎన్నికల్లో కనీసం నామినేషన్లు వేయడానికి అనుమతివ్వకపోగా.. అధికారుల కళ్లముందే వైఎస్సార్‌సీపీ అభ్యర్థులపై దాడులు చేస్తూ, వేసిన నామినేషన్లను లాక్కొని చింపేస్తుంటే ఎసీఈసీ నుంచి డీజీపీ వరకు కళ్లప్పగిస్తూ కూర్చున్నారు. దీనిపై వైఎస్సార్‌సీపీ ఎస్‌ఈసీకి అనేకమార్లు ఫిర్యాదు చేసినా దున్నపోతుపై వర్షం మాదిరి ఎటువంటి స్పందన లేకపోవడంతో ప్రజాస్వామ్య పరిరక్షణ కోసం చివరకు వైఎస్సార్‌సీపీ సుప్రీంకోర్టు వరకు వెళ్లాల్సి వచ్చింది. మున్సిపల్‌ నామినేషన్లపై చంద్రబాబు సర్కారు చేసిన దాష్టీకాలను వీడియోలతో సహా చూపించడంతో రాష్ట్రంలో శాంతిభద్రతలు అనేవి ఉన్నాయా అని సుప్రీంకోర్టు తీవ్రంగా వ్యాఖ్యానించడమే కాకుండా ఈ ఫిర్యాదులపై చర్యలు తీసుకొని ఈ నెల 27లోగా నివేదిక ఇవ్వాలంటూ ఆదేశాలు జారీ చేయడంతో బాబు డైరెక్షన్‌లో రాష్ట్ర ఎన్నికల కమిషన్‌ (ఎస్‌ఈసీ), డీజీపీ తమ నట విశ్వరూపాన్ని ప్రపంచానికి చూపించారు. సుప్రీం తీర్పు వచ్చిన తర్వాత కూడా ఎంపీటీసీ, జెడ్‌పీటీసీ నామినేషన్ల విషయంలో చివరి వరకు కళ్లు మూసుకున్న ఎస్‌ఈసీ, డీజీపీ సుప్రీం కోర్టుకు గంతలు కట్టడానికి నామినేషన్లు రెండుగంటల్లో ముగియనున్న తరుణంలో కమల్‌హాసన్‌ను మించి ఎస్‌ఈసీ, అమితాబ్‌బచ్చన్‌ మించి డీజీపీ తమ నటనా కౌశలాన్ని అద్భుతంగా ప్రదర్శించారు. ఇలా ఎస్‌ఈసీ, డీజీపీ నుంచి ఆదేశాలు రాగానే కింద ఆర్‌వోలు, ఇతర అధికారులు క్యారెక్టర్‌ ఆర్టిస్టుల్లాగా తమ తమ పాత్రల్లో ఒదిగిపోయారు. టేక్‌.. యాక్షన్‌.. షాట్‌ పరిషత్‌ ఎన్నికల్లో చివరకు వరకు వైఎస్సార్‌సీపీ వారిని నామినేషన్లు వేయకుండా అడ్డుకుంటూ కోర్టులను తప్పుదోవ పట్టించడానికి శకుని చంద్రబాబు డైరెక్షన్‌లో కొత్త కుట్రలకు తెరతీశారు. నామినేషన్లు భారీగా నమోదైనట్లు కోర్టులకు చూపించడం కోసం ఏకంగా తెలుగుదేశం కార్యకర్తలకు వైఎస్సార్‌సీపీ కండువాలు వేసి నామినేషన్లు వేసినట్లు దొంగ రికార్డులు నమోదు చేయించారు. అలాగే నామినేషన్ల ప్రక్రియ శుక్రవారం మూడుగంటలతో ముగిసిన తర్వాత 3.15 నిమిషాలకు ఎవరైతే నామినేషన్లు వేయలేకపోయామంటూ ఆందోళన చేస్తున్నారో వారికి అయిదుగంటల వరకు గడువు ఇస్తున్నట్లు ఎస్‌ఈసీ ప్రకటించారు. అంతేకాకుండా ఆయా అభ్యర్థులకు పోలీసులే ఫోన్‌ చేసి వారికి రక్షణ కల్పిస్తూ నామినేషన్లు వేయించాలంటూ ఉత్తర్వులు జారీ చేయడం ఆ వెంటనే పోలీసులు రంగంలోకి దిగి వారికి రక్షణ కల్పిస్తున్నట్లు , నామినేషన్లు వేయడానికి వారిని బతిమాలుతున్నట్లు వీడియోలు తీసుకుంటూ రసవత్తర సన్నివేశాలను పండించారు. నటనా కౌశలంలో పోటాపోటీ నామినేషన్ల ప్రక్రియ ముగిశాక ఎస్‌ఈసీ నటనా కౌశలంలో అత్యున్నత స్థాయికి చేరింది. మాజీ మంత్రి విడదల రజినీని మూడు రోజుల పాటు గృహనిర్బంధం చేయడమే కాకుండా ఆమె ఇంటివద్దనే చిలకలూరిపేట ఎస్‌ఐ దాష్టీకంగా ప్రవరిస్తూ తోసివేసిన వీడియో జాతీయస్థాయిలో పెద్దఎత్తున వైరల్‌ అయ్యింది. ఈ ఘటనను అన్ని రాజకీయపార్టీలు ముక్తకంఠంతో ఖండించడంతో ఎస్‌ఈసీ కంటితుడుపు చర్యలు తీసుకుంది. ఘటన జరిగిన 24 గంటల తర్వాత ఆ ఎస్‌ఐను సస్పెండ్‌ చేస్తూ ఎన్నికల విధుల నుంచి తప్పించినట్లు ప్రకటించింది. అలాగే అన్నమయ్య జిల్లా ములకల చెరువు ఎన్నికల విధుల్లో నిర్లక్ష్యం, పక్షపాతంగా వ్యవహరించిన సీఐ దస్తగిరి, ఎస్సై రామకృష్ణపై క్రమశిక్షణా చర్యలు తీసుకోవాలంటూ శనివారం సాయంత్రం ఆదేశాలు జారీ చేసింది. ఈ ఇద్దరు అధికారులను విధుల నుంచి రిలీవ్‌ చేసి నవంబర్‌ 5లోగా క్రమశిక్షణ చర్యలపై పూర్తి నివేదిక ఇవ్వాల్సిందిగా ఆదేశించింది. ఇలా పార్టీ గుర్తులపై జరిగే మున్సిపల్, పరిషత్‌ ఎన్నికల నామినేషన్ల ప్రక్రియ ముగిసే వరకు మొద్దు నిద్ర నటించిన ఎస్‌ఈసీ అంతా అయిపోయిన తర్వాత ఇప్పుడు చర్యలు తీసుకోవడం వల్ల ఏమి ఉపయోగం ఉంటుందని రాజకీయ విశ్లేషకులు వ్యాఖ్యానిస్తున్నారు. ఇది కేవలం 27న సుప్రీంకోర్టుకు కళ్లకు గంతలు కట్టేందుకే ఈ కంటితుడుపు చర్యలు అని వ్యాఖ్యానిస్తున్నారు.

సాక్షి, అమరావతి: ‘స్థానిక’ ఎన్నికల్లో రాష్ట్రంలో శాంతిభద్రతల పరిస్థితులపై సుప్రీంకోర్టు తీవ్రంగా ఆక్షేపించిన తర్వాత కూడ రాష్ట్ర ఎన్నికల కమిషనర్‌ అనిల్‌ చంద్ర పునేఠ తీరు మారలేదు. ‘రాజ్యాంగ బాధ్యతల నిర్వహణలో ఎన్నికల కమిషన్‌ విఫలమైతే మా జోక్యం తప్పదు..’ అని సుప్రీంకోర్టు స్పష్టం చేసిన తర్వాత కూడా ఆయన స్థానిక ఎన్నికల నామినేషన్ల సమయంలో చోటు చేసుకుంటున్న అక్రమాల అడ్డుకట్టకు కనీస చర్యలు చేపట్ట లేదు. పోలింగ్‌ కేంద్రాల లోపల, వెలుపల పోలీసుల ఎదుటే నామినేషన్లు వేయడానికి వచ్చిన అభ్యర్థులపై అధికార పార్టీ మోహరించిన అల్లరి మూకలు, గంజాయి బ్యాచ్‌లు యథేచ్ఛగా దాడులు చేస్తూ వారి చేతుల్లో నామినేషన్‌ పత్రాలను ఎత్తుకెళ్తున్నారు. అక్కడే చించిపోస్తున్నారు. మహిళా అభ్యర్థులపై అల్లరి మూకలు దాడులకు తెగబడి వారిని తాకరాని చోట్ల తాకుతూ అసభ్యంగా ప్రవర్తిస్తూ వారి చేతుల్లో నామినేషన్లు లాక్కెళ్లినా అధికారులు, పోలీసులు ఏమీ పట్టనట్టే వ్యవహరించారు. అధికారులకు చేరిన నామినేషన్ల పత్రాలను సైతం అక్రమంగా గూండాలు లాక్కెళ్లినా, వారి కళ్లముందే చించేస్తున్నా పట్టించుకునే వారే కరువయ్యారు. రోజూ వందలాది ఘటనలు సోషల్‌ మీడియాలో కళ్లకు కడుతున్నా విశేష అధికారాలున్న రాష్ట్ర ఎన్నికల కమిషనర్‌ అనిల్‌ చంద్ర పునేఠ ఏం జరగనట్టు మిన్నకుండి పోవడంతో రోజు రోజుకు హింసాత్మక ఘటనలు పెరిగిపోతున్నాయి. మున్సిపల్‌ ఎన్నికల నామినేషన్లలో కొన్ని చోట్లే దౌర్జన్యాలు, దాడులు కొనసాగితే.. ఎంపీటీసీ జెడ్పీటీసీ ఎన్నికల నామినేషన్లలో అమాంతం ఆ సంఖ్య భారీగా పెరిగిపోయింది. చంద్రబాబుకు లబ్ధి చేకూర్చడం కోసం ఎస్‌ఈసీ తన స్థాయిని పాతాళానికి దిగజార్చుకుంటే.. డీజీపీ మరో అడుగు ముందుకు వేసి, బాబుకు ప్రైవేట్‌ సెక్యూరిటీ గార్డులా వ్యవహరిస్తున్నారనే విమర్శలు వ్యక్తమవుతున్నాయి. ఎక్కడికక్కడ నామినేషన్లను అడ్డుకుంటుంటే పోలీసుల నుంచి కనీస స్పందన లేకపోవడమే ఇందుకు నిదర్శనం. కళ్లెదుటే కిరాయి మూకలు స్వైర విహారం చేస్తున్నా చోద్యం చూశారు. పైగా టీడీపీ గూండాలు లేని చోట పోలీసులే ఆ అవతారం ఎత్తి దౌర్జన్యం చేశారు. వైఎస్సార్‌సీపీ అంటే చాలు లాఠీలతో చితకబాదుతూ తరిమేయడం ఊరూరా కనిపించింది. ఆయా ప్రాంతాల్లో జరిగిన దాష్టీకాలకు సంబంధించి వీడియో సాక్ష్యాలతో ఆయా జిల్లాల ఎస్పీలకు, ఎస్‌ఈసీకి ఫిర్యాదు చేసినా ఏ చర్యా లేదు. పైగా ఫిర్యాదులు బుట్ట దాఖలు చేసి.. తమకు ఫిర్యాదులే రాలేదని బొంకడం వారు దిగజారిన స్థాయిని తేటతెల్లం చేస్తోంది. ఎస్‌ఈసీ, డీజీపీ పోస్టుల్లో కసబ్, బిన్‌లాడెన్‌లు ఉన్నా బాబును ఇంతగా వెనకేసుకురారేమో! సుప్రీంకోర్టు చెప్పాక కూడా నిస్సిగ్గుగా బాబు దాష్టీకానికి మద్దతు పలకడం దేశ చరిత్రలో ఇలాంటి అధికారులను ఇప్పుడే చూస్తున్నాం. ఫలితంగా ఎస్పీలు, డీఎస్పీలు, సీఐలు, ఎస్‌ఐలు ‘పచ్చ’పాతం చూపుతూ అధికార పార్టీ కోసం శక్తి వంచన లేకుండా పని చేస్తున్నారు.నమ్మించి నమ్మక ద్రోహంనామినేషన్‌ వేయడానికి టీడీపీ నేతలు అడ్డంకులు సృష్టిస్తున్నారని, ప్రజాస్వామ్యాన్ని ఖూనీ చేస్తున్నారని వైఎస్సార్‌సీపీ నేతలు ఎస్పీలకు ఫిర్యాదు చేస్తే.. తాము భద్రత కల్పించి, నామినేషన్‌ వేయిస్తామని నమ్మకంగా చెబుతున్నారు. ఆపై కాలయాపన చేసి.. గడువు ముగిసే సమయంలో రమ్మని చెబుతున్నారు. తీరా అక్కడికి వెళ్లగానే ఒక్కసారిగా టీడీపీ మూక దాడికి పాల్పడుతుంది. ఇలా జరిగిందేమిటని ప్రశ్నిస్తే వారి నుంచి సమాధానం కరువు. విశేషాధికారాలు కలిగి ఉన్నా.. ఉత్సవ విగ్రహమేరాజ్యాంగంలోని 243కే అధికరణం కింద ఏర్పాటయ్యే రాష్ట్ర ఎన్నికల కమిషన్‌కు భారత ఎన్నికల సంఘానికి లోకసభ, అసెంబ్లీ ఎన్నికలకు దఖలు పడే అన్ని రకాల అధికారాలు ఉంటాయని రాజ్యాంగంలోనే పేర్కొన్నారని అధికారులు చెబుతున్నారు. వివిధ రకాల ఎన్నికల నిర్వహణకు రాజ్యాంగంలో భారత ఎన్నికల సంఘం, రాష్ట్ర ఎన్నికల కమిషన్‌కు ఒకే తరహా అధికారాలను కట్టబెట్టిందని నిపుణులు పేర్కొంటున్నారు. ఆంధ్రప్రదేశ్‌ పంచాయతీరాజ్‌ చట్టంలోని 201 నిబంధన ‘రాష్ట్ర ఎన్నికల కమిషనర్‌కు కల్పించిన అధికారాల్లో ‘అన్ని స్థానిక సంస్థల ఎన్నికలు రాష్ట్ర ఎన్నికల కమిషన్‌ అధీక్షణ, నియంత్రణ కిందే జరగాలి. ఎన్నికలను సమర్థవంతంగా జరిపించేందుకు జిల్లా కలెక్టర్లకు లేదా ప్రభుత్వ, స్థానిక సంస్థల అధికారులెవరికైనా, ఉద్యోగులెవ్వరికైనా ఆ చట్టం కింద రాష్ట్ర ఎన్నికల కమిషనర్‌ తాను అవసరమనుకున్న ఏ ఆదేశాలైనా ఇచ్చే అధికారం కలిగి ఉంటారు’ అని పేర్కొంది. మున్సిపల్‌ ఎన్నికల రూల్‌ బుక్‌లోని 46వ పేజీ రూల్‌ నెంబరు 10(బీ)లో పంచాయతీరాజ్‌ చట్టంలో పేర్కొన్న నిబంధనను ఉదహరించారు. ప్రత్యేకంగా ఫలానా అని లేకుండా అపరిమిత విశేషాధికారాలు ఉన్నా­యి. అయినా ఎస్‌ఈసీ అనిల్‌ చంద్ర పునేఠ మాత్రం రాష్ట్రంలో వారం రోజులుగా పలుచోట్ల హింసాత్మక ఘటనలు చోటుచేసుకుంటున్నా ఏ చర్యలు తీసుకునేందుకు ముందుకు రాలేదు. ఆయా హింసాత్మక ఘటనలపై వివిధ రాజకీయ పార్టీలు భారీగా ఫిర్యాదులు చేసినా పట్టించుకోలేదు. రాష్ట్ర ఎన్నికల కమిషనర్‌ తనకు ఉండే విశేషాధికారాలను ఉపయోగించి ఒక్కరిపై చర్య తీసుకున్నా స్థానిక సంస్థల ఎన్నికల్లో ఇలాంటి దుస్థితి ఉండేది కాదని అధికార వర్గాల్లో చర్చ సాగుతోంది. ప్రభుత్వ పెద్దలకు కావాలి్సనట్టే ఎన్నికలు పునేఠ రాష్ట్ర ఎన్నికల కమిషనర్‌గా ఈ ఏడాది ఏప్రిల్‌లో బాధ్యతలు చేపట్టారు. అయితే అప్పటికే మున్సి­పల్, పంచాయతీ పాలక మండళ్ల పదవీ కాలం ముగిసినా, తిరిగి ఎన్నికల నిర్వహణకు ఏడు నెలలుగా కనీస ప్రయత్నాలు చేయలేదు. ముఖ్య­మంత్రి చంద్రబాబు త్వరలో స్థానిక సంస్థల ఎన్నికలు నిర్వహించనున్నట్టు ప్రకటించగానే రాష్ట్ర ఎన్ని­కల కమి­షన్‌ ఎన్నికల ప్రక్రియను వేగవంతం చేసింది. ఎన్నికలను స్వేచ్ఛాయుత, నిష్పక్షపాతంగా నిర్వహించేందుకు ఎన్నికల షెడ్యూల్‌కు ముందే.. ఎన్నికల ప్రక్రియలో ప్రత్యక్ష సంబంధం ఉండే పోలీసు, ఇతర అధికారులు రెండేళ్లకు మించి ఒకే చోట పని చేస్తుండటం.. లేదా సొంత ప్రాంతాల్లో ఉద్యోగ విధుల్లో ఉండడం వంటి వాటిపై సమీక్షించి.. అలాంటి వారిని తక్షణమే బదిలీ చేయాలి. అయితే ఇలాంటి చర్యలు ఏకోశానా పునేఠా తీసుకోలేదు. ఫలితంగా గ్రేటర్‌ రాయలసీమ జిల్లాల్లో హింస చోటుచేసుకుంది. కర్నూలు రేంజి ఐజీ కోయ ప్రవీణ్‌ అయితే టీడీపీ నేతలను మించి ఆ పార్టీ కోసం పని చేస్తున్నారని ఆయన చర్యలు స్పష్టం చేస్తున్నాయి.పునేఠ ఇలా.. నిమ్మగడ్డ అలా..ఆరేళ్ల క్రితం మన రాష్ట్రంలో అప్పటి రాష్ట్ర ఎన్నికల కమిషనర్‌ నిమ్మగడ్డ రమేష్‌ కుమార్‌ ఎన్నికల సమయంలో తనకు ‘ఆకాశమే హద్దు అన్నట్టు..’ ప్రభుత్వం కన్నా అపరిమిత విశేషాధికారాలు ఉన్నాయని చెబుతూ వ్యవహరించారు. అప్పటి ఎన్నికలకు ముందు ఘర్షణలు జరిగే అవకాశం ఉందని పలు జిల్లాల్లో కలెక్టర్లు, ఎస్పీలను బదిలీ చేస్తూ ఆదేశాలిచ్చారు. ఇద్దరు రాష్ట్ర స్థాయి ఐఏఎస్‌ అధికారాలపై చర్యలకు సిఫార్సు చేస్తూ సెన్‌సూ్యర్‌ ఆదేశాలిచ్చారు. క్షేత్ర స్థాయిలో పలువురు డీఎస్పీ, సీఐ వంటి అధికారుల బదిలీలకు తానే ఎస్పీలకు ఆదేశాలు జారీ చేసిన ఉదంతాలు ఉన్నాయి.అయితే ప్రస్తుత ఎస్‌ఈసీ అందుకు పూర్తి భిన్నంగా వ్యవహరిస్తున్నారు. దేశ ఎన్నికల చరిత్రలోనే ఎప్పుడూ, ఎక్కడా లేని విధంగా ఏకంగా సుప్రీంకోర్టే రాష్ట్రంలో ఎన్నికల సందర్భంగా అభ్యర్ధులు స్వేచ్చగా నామినేషన్లు వేసుకోలేని పరిస్థితులపై తీవ్రంగా ఆక్షేపించింది. అయినా ఎస్‌ఈసీ çతగిన చర్యలు తీసుకోక పోవడం.. ఫలితంగా ఎంపీటీసీ, జెడ్పీటీసీ నామినేషన్లలోనూ అధికార పార్టీ గూండాలు యథేచ్ఛగా పేట్రేగిపోతున్నారు.రాష్ట్రం రావణకాష్టంగా మారినా అందుకే స్పందన నిల్‌రాష్ట్ర ప్రతిష్టనే దెబ్బతీసే ఘటనలు పునరావృతం కాకుండా స్వేచ్ఛాయుతంగా ఎన్నికలు జరపాల్సిన రాష్ట్ర ఎన్నికల కమిషనర్‌ అవేమీ పట్టవన్నట్టు తనను ఆ పదవిలో నియమించిన చంద్రబాబు చెప్పినట్టే నడుచుకుంటున్నారని ఉద్యోగ వర్గాల్లో విస్తృత చర్చ సాగుతోంది. ఎన్నికలను ప్రభావితం చేసే విధుల్లో ఉంటూ.. ఆ విధుల నుంచి ఒకసారి తప్పిస్తే ఆ అధికారి తర్వాత ఏ ఎన్నికల విధుల్లో ఉండకూడదన్నది కేంద్ర ఎన్ని­కల సంఘం నిబంధన. ఎందుకంటే ఆ అధికారి పర్యవేక్షణలో ఎన్నికలు ప్రశాంతంగా జరిగే అవకాశం ఉండదని ఈ నిబంధన అమలులో ఉంది.ఈ క్రమంలో 2019 సార్వత్రిక ఎన్నికల సమయంలో రాష్ట్ర ప్రభుత్వ ప్రధాన కార్యదర్శిగా ఉండి.. అప్పటి చంద్రబాబు ప్రభుత్వ సూచనతో కేంద్ర ఎన్నికల సంఘం ఆదేశాలు పాటించక పోవడంతో అప్పట్లో కేంద్ర ఎన్నికల కమిషన్‌ పునేఠను ఆ విధుల నుంచి తప్పించింది. ఈ దృష్ట్యా ఆ తర్వాత ఆయన ఏ ఎన్నికల విధుల్లో పాల్గొనకూడదు. అయినా.. చంద్రబాబు 2024లో తిరిగి ముఖ్యమంత్రి కాగానే పునేఠను రాష్ట్ర ఎన్నికల కమిషనర్‌గా నియమించారు. ఈ దృష్ట్యా రాష్ట్రం రావణ కాష్టంగా మారినా చంద్రబాబు కోసం పునేఠా పట్టించుకోవడం లేదని స్పష్టమవుతోంది.రాష్ట్రంలో ఇదీ ఎన్నికల దారుణ సిత్రంస్టెప్‌ 1: వైఎస్సార్‌సీపీ ముఖ్య నేతలందరికీ నోటీసులు.. నామినేషన్ల వేళ గృహ నిర్బంధాలు.స్టెప్‌ 2: టీడీపీ నేతలందరూ ఎక్కడికైనా వెళ్లేలా పూర్తి స్వేచ్ఛ.. నామినేషన్ల కేంద్రం వద్ద టీడీపీ గూండాల మోహరింపు.స్టెప్‌ 3: వైఎస్సార్‌సీపీ నేతలు నామినేషన్‌ వేయడానికి వెళితే కిలోమీటర్‌ దూరంలోనే పోలీసుల అడ్డగింత.. వెనక్కు వెళ్లాలని తరిమేయడం.స్టెప్‌ 4: వారిని తప్పించుకుని వెళితే కేంద్రంలోకి ఇద్దరు మాత్రమే వెళ్లాలని పోలీసుల హుకుం.స్టెప్‌ 5: వీరందరినీ దాటుకుని ఆర్వో వద్దకు వెళ్లి నామినేషన్‌ పత్రాలు అందజేస్తుండగా టీడీపీ రౌడీ మూకలు, గంజాయి బ్యాచ్‌ ఒక్క ఉదుటున దాడి చేసి పత్రాలు లాక్కోవడం.. చించేయడం.స్టెప్‌ 6: ఈ దారుణాన్ని జిల్లా కలెక్టర్, ఎస్పీ, డీఎస్పీల దృష్టికి తీసుకెళ్తే ఎలాంటి స్పందనా ఉండక పోవడం. గట్టిగా నిలదీస్తే నామినేషన్‌ మళ్లీ వేయండంటూ ఉచిత సలహా ఇవ్వడం.స్టెప్‌ 7: ఈ అడ్డంకులన్నీ దాటుకుని నామినేషన్‌ దాఖలు చేస్తే.. తీరా చెల్లుబాటు కాలేదని తిరస్కరణ.. లేదా ఉపసంహరించుకోవాలని పచ్చ మూక బెదిరింపులు

సాక్షి, అమరావతి: అభ్యర్థులు నామినేషన్‌ దాఖలు చేసే సమయంలో తప్పనిసరిగా ‘నో అబ్జెక్షన్, నో డ్యూస్‌ సర్టిఫికెట్లు’ సమర్పించాలనే నిబంధన ఎన్నికల నియమావళిలో లేదని తాజాగా రాష్ట్ర ఎన్నికల సంఘం స్పష్టం చేసింది. ఈ సర్టిఫికెట్లు లేవన్న కారణంగా నామినేషన్లు తిరస్కరించరాదని స్పష్టంచేసింది. నామినేషన్‌ పత్రాలతో పాటు ‘కేసులకు సంబంధిత పోలీస్‌స్టేషన్‌ నుంచి నో అబ్జెక్షన్‌ సర్టిఫికెట్‌’, అలాగే ఏదైనా ప్రభుత్వ శాఖ నుంచి ‘బకాయిల్లేవని తెలిపే నో డ్యూస్‌ సర్టిఫికెట్‌’ సమర్పించలేదనే కారణంతో నామినేషన్‌ను తిరస్కరించకూడదని స్పష్టంచేసింది. ఈ మేరకు అన్ని జిల్లాల కలెక్టర్లు, మున్సిపల్‌ కమిషనర్లు, జెడ్పీ సీఈవోలు, డీపీవోలతో పాటు ఆయా ఎన్నికలాధికారులకు రాష్ట్ర ఎన్నికల కమిషనర్‌ అనిల్‌ చంద్రపునేఠ ఆదేశాలు జారీ చేశారు. ఎన్నికల నియమావళికి విరుద్ధంగా అదనపు నిబంధనలు విధించకుండా, అర్హులైన అభ్యర్థులు నిబంధనల ప్రకారం నామినేషన్లు దాఖలుకు అవసరమైన చర్యలు తీసుకోవాలని సూచించారు. కాగా, మున్సిపల్‌ ఎన్నికల నామినేషన్ల సందర్భంగా ఈ సర్టిఫికెట్ల కోసం అభ్యర్థులు తీవ్ర ఇబ్బందులు పడాల్సి వచ్చింది. కీలక ప్రక్రియ ముగిసిన తర్వాత ఇప్పుడు తాపీగా ఎన్నికల కమిషనర్‌ నుంచి ఈ ప్రకటన ఏమిటంటూ సర్వత్రా విమర్శలు వినిపిస్తున్నాయి. ఆలస్యంగా జారీ చేసిన ఈ ఆదేశాల పట్ల పలు అనుమానాలు వ్యక్తమవుతున్నాయి. మున్సిపల్‌ ఎన్నికలకు దాఖలైన మొత్తం నామినేషన్లలో వివిధ రకాల కారణాలతో దాదాపు 1,665 నామినేషన్ల తిరస్కరణకు గురికావడం గమనార్హం.

సాక్షి, అమరావతి: మున్సిపల్‌ ఎన్నికల తరహాలోనే జెడ్పీటీసీ, ఎంపీటీసీ ఎన్నికల ప్రక్రియకు టీడీపీ నేతలు ఆటంకాలు కల్పించి వైఎస్సార్‌సీపీ అభ్యర్థులను నామినేషన్లు దాఖలు చేయకుండా అడ్డుకోవడంపై రాష్ట్ర ఎన్నికల కమిషనర్‌ అనిల్‌ చంద్రను పునేఠకు వైఎస్సార్‌సీపీ నేతలు బుధవారం ఫిర్యాదు చేశారు. ఎన్నికలు స్వేచ్ఛగా, నిష్పక్షపాతంగా జరిగేలా చర్యలు తీసుకోవాలని, శాంతి భద్రతలను కాపాడుతూ అభ్యర్థులకు రక్షణ కల్పించాలని వైఎస్సార్‌సీపీ నేతలు కోరారు. మున్సిపల్‌ ఎన్నికల్లో కనీసం నామినేషన్లు దాఖలు చేయనివ్వని పరిస్థితులపై స్వయంగా సుప్రీంకోర్టు జోక్యం చేసుకున్న తర్వాత కూడా పలుచోట్ల పోలీసులే అధికార పార్టీ గూండాలకు అండగా నిలవడం.. నామినేషన్లు వేయడానికి వెళుతున్న మహిళలను అడ్డుకోవడం.. అనంతపురం, చిత్తూరు, తిరుపతి, కర్నూలు, పల్నాడు జిల్లాల్లో అభ్యర్థులపై దాడుల ఘటనలను ఎస్‌ఈసీ దృష్టికి తెచ్చారు. అనంతరం పార్టీ ప్రధాన కార్యదర్శి ఎమ్మెల్సీ లేళ్ల అప్పిరెడ్డి, ఎమ్మెల్సీ కల్పలతారెడ్డి, మాజీ ఎమ్మెల్యే టీజేఆర్‌ సుధాకర్‌బాబు మీడియాతో మాట్లాడారు. సుప్రీం ఆదేశాలు పాటించకుంటే మరోసారి న్యాయపోరాటం సుప్రీంకోర్టు ఆదేశాలను రాష్ట్ర ఎన్నికల కమిషన్‌ నిష్పక్షపాతంగా అమలు చేయాలని.. మున్సిపల్‌ ఎన్నికల నామినేషన్లలో అక్రమాలకు పాల్పడిన పోలీ­సు, రెవెన్యూ అధికారులను ఎన్నికల విధుల నుంచి తప్పించాలని నేతలు డిమాండ్‌ చేశారు. ‘సుప్రీంకోర్టు తీర్పును తమకు అనుకూలంగా వక్రీకరించి ప్రచారం చేస్తున్న అధికార పార్టీ తీరును ఎన్నికల సంఘం గమనించాలి. జెడ్పీటీసీ, ఎంపీటీసీ నామినేషన్ల విషయంలో ఎన్నికల సంఘం న్యాయం చేయకుంటే మరోసారి సుప్రీంకోర్టు తలు­పులు తడతాం. చట్టాన్ని పక్కనపెట్టి అధికార పార్టీకి అనుకూలంగా వ్యవహరించే పోలీసు, రెవెన్యూ అధి­కారులపై న్యాయపోరాటం చేస్తాం. మేం అధికారంలోకి వచ్చిన తర్వాత ఈ ఘటనలపై విచారణ జరిపించి బాధ్యులను చట్టం ముందు నిలబెడతాం’ అని పేర్కొన్నారు. మున్సిపల్‌ ఎన్నికల నామినేషన్ల సమయంలో రాష్ట్ర ప్రభుత్వ యంత్రాంగం వ్యవహరించిన తీరుతో సుప్రీంకోర్టు జోక్యం చేసుకోవాల్సి వచ్చిందని.. ఇందుకు నైతిక బాధ్యత వహిస్తూ సీఎం చంద్రబాబు తన పదవికి రాజీనామా చేయాలని డిమాండ్‌ చేశారు. డీజీపీ, హోంమంత్రి నైతిక బాధ్యత వహించాలన్నారు. రాష్ట్ర ఎన్నికల కమిషన్‌ ఇప్పటికైనా ప్రజాస్వామ్యయుతంగా ఎన్నికల నిర్వహణకు చర్యలు చేపట్టాలని డిమాండ్‌ చేశారు. శాంతి భద్రతలను కాపాడటంలో విఫలమైన పోలీసు అధికారులను ఎన్నికల విధుల నుంచి తప్పించాలని పేర్కొన్నారు. ఎన్నికల కమిషనర్‌ను కలిసిన వారిలో వైఎస్సార్‌ సీపీ లీగల్‌ సెల్‌ రాష్ట్ర అధ్యక్షుడు ఎం.మనోహర్‌రెడ్డి, పార్టీ ఎంప్లాయీస్‌ అండ్‌ పెన్షనర్స్‌ విభాగం రాష్ట్ర అధ్యక్షుడు నలమారు చంద్రశేఖర్‌రెడ్డి, పార్టీ అధికార ప్రతినిధి యనమల నాగార్జునయాదవ్‌ తదితరులున్నారు.

సాక్షి, అమరావతి: నామినేషన్లు వేసేందుకు వెళ్లుతు­న్న తమ పార్టీ అభ్యర్థులపై అధికారపక్షం గూండా­­లు దాడులకు పాల్పడుతూ అడ్డుకుంటున్న తీరు­పై రాష్ట్ర ఎన్నికల కమిషనర్‌ (ఎస్‌ఈసీ)కి ఎన్నిసార్లు ఫిర్యాదులు చేసినా ఫలితం లేకుండా పోయిందని వైఎస్సార్‌సీపీ మండిపడింది. తొలిరోజు ఘటనపై ఫిర్యాదు చేశామని, ఎస్‌ఈసీ ఎటువంటి చర్యలు తీసుకోకపోవడంతో అధికార పార్టీ మూకలు రెండో రోజూ విధ్వంసాలకు పాల్పడ్డారని తూర్పారపట్టింది. వీటిని వివరి­స్తూ ఎస్‌ఈసీకి శనివారం మరో­మారు వినతిపత్రమిచ్చింది. వైఎస్సార్‌సీపీ ఎమ్మె­ల్సీ­లు లేళ్ల అప్పిరెడ్డి, రు­హుల్లా, మాజీ ఎమ్మెల్యే టీజేఆర్‌ సుధాకర్‌ బా­బు, పార్టీ లీగల్‌ సెల్‌ అధ్యక్షుడు మలసాని మనోహ­ర్‌ రెడ్డి ఆధ్వర్యంలో పార్టీ నేతల బృందం శనివారం మరోసారి రాష్ట్ర ఎన్నికల కమిషనర్‌ అనిల్‌చంద్ర పునేఠను కలిసి వినతిపత్రాలిచ్చారు. అనంతరం అప్పిరెడ్డి, సుధాకర్‌బాబు విలేకరులతో మాట్లాడుతూ.. తిరుపతిలో వైఎస్సార్‌సీపీ అభ్యర్థి నామినేషన్‌ ప్రతిపాదనల్ని తీసుకెళ్తున్న ఎంపీ గురుమూర్తిని పోలీసులు అడ్డుకోవడం, పేపర్లు చూపించమని అ­డ­గటం, అక్కడే ఉన్న టీడీపీ గూండాలు వీళ్ల చేతు­ల్లో నామినేషన్లు లాక్కెళ్లడం చూస్తుంటే అసలు రా­ష్ట్రంలో ప్రజాస్వామ్యం ఉందా అన్న అనుమానం కలుగుతోందన్నారు. నామినేషన్ల గడువు మరో రో­జు పొడిగించాలని కోరారు. నామినేషన్లు వేయడానికి వచ్చిన వారే దాడులు చేసినట్టు డీఐజీ కోయ ప్రవీణ్‌ ఓ పార్టీకి కొమ్ముకాసేలా ఎలా మాట్లాడతా­రని ప్రశ్నించారు. జరిగిన çఘటనలకు బాధ్యత ఆయనదేనని, తక్షణమే ఆయన్ని ఎన్నికల విధుల నుంచి తప్పించాలని డిమాండ్‌ చేశారు.

సాక్షి, అమరావతి: స్థానిక సంస్థల ఎన్నికలను స్వేచ్ఛగా, నిష్పక్షపాతంగా, పారదర్శకంగా నిర్వ­హిం­చేందుకు జిల్లా, క్షేత్రస్థాయిలో ఎన్నికల ప్రవర్తన నియమావళిని (కోడ్‌ను) పటిష్టంగా అమలు చేయాలని రాష్ట్ర ఎన్నికల కమిషనర్‌ (ఎస్‌ఈసీ) అనిల్‌చంద్ర పునేఠ సూచించారు. ఆయన 28 జిల్లాలకు ఎన్నికల పరిశీలకులుగా ఐఏఎస్‌ అధికారులను నియమించారు. అనంతరం ఆయన వారితో రాష్ట్ర ఎన్నికల కమిషన్‌ కార్యాలయంలో సమావేశం అయ్యారు. ఈ సందర్భంగా ఆయన మాట్లాడుతూ సార్వత్రిక ఎన్నికల నిర్వహణలో అనుసరించే విధానాలను స్థానిక సంస్థల ఎన్నికల్లోను పాటించాలని చెప్పారు. రాజకీయ ప్రతినిధులు కోడ్‌ ఉల్లంఘించకుండా నిరంతరం పర్యవేక్షించాలని, నిబంధనల అమలుకు తగిన చర్యలు తీసుకోవాలని సూచించారు. పోల్‌ మేనేజ్‌మెంట్‌ యాప్‌ ఎన్నికల నిర్వహణను మరింత సులభతరం చేసేందుకు పోల్‌ మేనేజ్‌మెంట్‌ యాప్‌ను రూపొందించినట్లు చెప్పారు. ఈ యాప్‌లో పోలింగ్‌ కేంద్రాలు, ఎన్నికల నిర్వహణ విధానాలు తదితర సమాచారాన్ని అందుబాటులో ఉంచినట్లు తెలిపారు. ఎన్నికల నిర్వహణలో సాంకేతిక పరిజ్ఞానాన్ని సమర్థంగా వినియోగించుకోవాలని సూచించారు. శాంతిభద్రతల పరిరక్షణకు జిల్లా పోలీసు యంత్రాంగంతో సమన్వయం చేసుకుంటూ పటిష్టమైన భద్రతా ఏర్పాట్లు చేయాలని ఆదేశించారు. అభ్యర్థుల నుంచి ఓటుహక్కును వినియోగించుకునే సామాన్య పౌరుల వరకు అందరికీ భద్రత కల్పించేలా చర్యలు తీసుకోవాలని ఆయన సూచించారు. జిల్లాల వారీగా ఎన్నికల పరిశీలకుల నియామకం పల్నాడు జిల్లాకు కె.కన్నబాబు, కృష్ణా జిల్లాకు ఎంఎం నాయక్, మార్కాపురం జిల్లాకు సీహెచ్‌.శ్రీధర్, పశ్చిమ గోదావరి జిల్లాకు ఎంవీ శేషగిరిబాబు, బాపట్ల జిల్లాకు కేవీఎన్‌ చక్రధర్‌బాబు, ప్రకాశం జిల్లాకు హెచ్‌.రాణి, ఏలూరు జిల్లాకు మనాజిర్‌ జిలానీ సమూన్‌డెనీ, ఎన్టీఆర్‌ జిల్లాకు ఎస్‌.నాగలక్ష్మి, వైఎస్సార్‌ కడప జిల్లాకు పి.రంజిత్‌బాషా, చిత్తూరు జిల్లాకు శివశంకర్‌ లోతేటి, అంబేడ్కర్‌ కోనసీమ జిల్లాకు పి.ప్రశాంతి, గుంటూరు జిల్లాకు సగిలి షణ్మోహన్, తూర్పు గోదావరి జిల్లాకు ఎం.గౌతమి, శ్రీసత్యసాయి జిల్లాకు పి.అరుణ్‌బాబు, అనంతపురం జిల్లాకు కె.శ్రీనివాసులు, కాకినాడ జిల్లాకు బి.లావణ్యవేణి, నెల్లూరు జిల్లాకు ఎస్‌.భార్గవి, నంద్యాల జిల్లాకు జె.వెంకటమురళి, పోలవరం జిల్లాకు చేతన్‌ టీఎస్, అల్లూరి సీతారామరాజు జిల్లాకు రోణంకి కూర్మనాథ్, అనకాపల్లి జిల్లాకు గోపాలకృష్ణ రోణంకి, అన్నమయ్య జిల్లాకు ప్రవీణ్‌ ఆదిత్య సీవీ, విజయనగరం జిల్లాకు ఎన్‌.తేజ్‌భరత్, కర్నూలు జిల్లాకు బి.శ్రీనివాసరావు, పార్వతీపురం మన్యం జిల్లాకు ఎస్‌.చిన్నరాముడు, శ్రీకాకుళం జిల్లాకు మల్లవరపు సూర్యతేజ, తిరుపతి జిల్లాకు మామిడిపల్లి వరప్రసాద్, విశాఖపట్నం జిల్లాకు గీతాంజలిశర్మ, రిజర్వ్‌ పరిశీలకులుగా జి.వీరపాండియన్, శోబిక ఎస్‌ఎస్‌ నియమితులయ్యారు.

సాక్షి, అమరావతి: మున్సిపల్‌ ఎన్నికల నామినేషన్ల ప్రక్రియ శుక్రవారం ఉదయం 11 గంటలకు ప్రారంభం కానుంది. విజయనగరం సహా రాష్ట్రవ్యాప్తంగా 13 నగర కార్పొరేషన్లు, 77 మున్సిపాలిటీలు, 10 నగర పంచాయతీలు కలిపి మొత్తం 100చోట్ల మున్సిపల్‌ ఎన్నికలు నిర్వహించేందుకు రాష్ట్ర ఎన్నికల కమిషనర్‌ అనిల్‌చంద్ర పునేఠ బుధవారమే షెడ్యూల్‌తో పాటు ఎన్నికల నోటిఫికేషన్‌ కూడా జారీచేసిన విషయం తెలిసిందే. ఆ మేరకు 13 మేయర్‌ పదవులతో పాటు 922 కార్పొరేటర్‌ పదవులకు.. 77 మున్సిపాలిటీలు, 10 నగర పంచాయతీల్లో మొత్తం 87 చైర్మన్‌ పదవులు, 3,020 వార్డు కౌన్సిలర్‌ పదవులకు స్థానిక ఎన్నికల రిటర్నింగ్‌ అధికారులు శుక్రవారం ఉదయం వేర్వేరుగా ఎన్నికల నోటిఫికేషన్లు విడుదల చేయనున్నారు. అనంతరం 11 గంటల నుంచి నామినేషన్ల స్వీకరణ ప్రారంభమవుతుందని రాష్ట్ర ఎన్నికల కమిషన్‌ అధికారులు తెలిపారు. 18వ తేదీ సా.3 గంటల వరకు నామినేషన్ల స్వీకరణ ప్రక్రియ కొనసాగుతుంది. విజయనగరం కార్పొరేషన్‌ పోలింగ్‌ తేదీ మార్పు?ఉత్తరాంధ్ర వాసుల ఆరాధ్య దైవమైన పైడితల్లమ్మ సిరిమానోత్సవం ఈనెల 27న జరగనున్నందున విజయనగరం మున్సిపల్‌ కార్పొరేషన్‌ పోలింగ్‌ తేదీని ఈనెల 28 నుంచి 29కి మార్చాలని కోరుతూ జిల్లా కలెక్టర్‌ రామసుందర్‌రెడ్డి రాష్ట్ర ఎన్నికల కమిషన్‌కు లేఖ రాశారు. ఉత్సవం రోజున పోలీసులు, ఇతర అధికార యంత్రాంగం ఉత్సవ విధుల్లో ఉండడంవల్ల ఎన్నికల విధులపై ప్రభావం పడుతుందని ఆయన పేర్కొన్నారు. దీనిపై రాష్ట్ర ఎన్నికల కమిషన్‌ ఒకట్రెండు రోజుల్లోనే సానుకూల నిర్ణయం తీసుకునే అవకాశముందని కమిషన్‌ కార్యాలయ అధికారులు వెల్లడించారు.

సాక్షి, అమరావతి: మున్సిపల్, మండల.. జిల్లా పరిషత్, గ్రామ పంచాయతీ ఎన్నికల షెడ్యూల్‌ బుధవారం విడుదలైంది. రాష్ట్ర ఎన్నికల కమిషనర్‌ అనిల్‌ చంద్ర పునేఠ షెడ్యూల్‌ విడుదల చేశారు. రాష్ట వ్యాప్తంగా 13 నగర కార్పొరేషన్లు, 77 మున్సిపాలిటీలు, 10 నగర పంచాయతీలలో ఈ నెల 28వ తేదీన పోలింగ్‌ నిర్వహించనున్నట్టు ప్రకటించారు. కోర్టు కేసుల కారణంగా ఎన్నికల ముందస్తు కార్యక్రమాలు పూర్తి కాని మరో నాలుగు కార్పొరేషన్లు, 15 మున్సిపాలిటీలు, నాలుగు నగర పంచాయతీల్లో డిసెంబర్‌ ఆఖరులో ఎన్నికలు నిర్వహించనున్నట్టు వెల్లడించారు. రాష్ట్ర వ్యాప్తంగా అన్ని జిల్లాల్లో జెడ్పీటీసీ, ఎంపీటీసీలకు నవంబర్‌ 3న పోలింగ్‌ నిర్వహించనున్నట్టు తెలిపారు. గ్రామ పంచాయతీ ఎన్నికల పోలింగ్‌ను మూడు విడతల్లో.. నవంబర్‌ 26, 29, డిసెంబర్‌ 3వ తేదీల్లో నిర్వహించనున్నట్టు పేర్కొన్నారు. మూడు కేటగిరీల స్థానిక సంస్థల ఎన్నికల షెడ్యూల్‌ ప్రకటనతో పాటే బుధవారమే మున్సిపల్‌ ఎన్నికల నోటిఫికేషన్‌ విడుదల చేశారు. ఆయా నగర కార్పొరేషన్లు, మున్సిపాలిటీల్లో ఈ నెల 18వ తేదీ మద్యాహ్నం 3 గంటల వరకు వరకు నామినేషన్ల స్వీకరణ చేపడతారు. 28న పోలింగ్‌.. 30న ఓట్ల లెక్కింపు ఉంటుంది. ఎంపీటీసీ, జెడ్పీటీసీ ఎన్నికల నోటిఫికేషన్‌ను ఈ నెల 19వ తేదీన విడుదల చేయనున్నారు. మూడు దశల గ్రామ పంచాయతీ ఎన్నికలకు నవంబర్‌ 13, 16, 19వ తేదీల్లో వేర్వేరుగా నోటిఫికేషన్లు విడుదల చేస్తారు. కాగా, నేటి నుంచి ఎన్నికల కోడ్‌ అమలులోకి వస్తుందని ఎస్‌ఈసీ తెలిపింది.మున్సిపల్‌ ఎన్నికల తేదీలు నామినేషన్లు స్వీకరణ : 16–10–2026 ఉదయం 11:00 గంటల నుంచినామినేషన్లు దాఖలకు చివరి తేదీ : 18–10–2026 మధ్యాహ్నం 3:00 గంటల వరకు నామినేషన్ల పరిశీలన : 19–10–2026ఉపసంహరణకు చివరి తేదీ : 21–10–2026 మధ్యాహ్నం 3 గంటల వరకుపోటీ చేసే అభ్యర్థుల తుది జాబితా ప్రచురణ : 21–10–2026 మధ్యాహ్నం 3:00 గంటల తర్వాతపోలింగ్‌ తేదీ: 28–10–2026 ఉదయం 7:00 నుంచి సాయంత్రం 5:00 గంటల వరకుఅవసరమైన చోట రీ పోలింగ్‌ : 29–10–2026 ఉదయం 7:00 నుంచి సాయంత్రం 5:00 గంటల వరకుఓట్ల లెక్కింపు : 30–10–2026 ఉదయం 8:00 గంటల నుంచి..డిప్యూటీ మేయర్‌ లేదా డిప్యూటీ చైర్మన్‌ ఎన్నిక తేదీ : 05–11–2026 ఎంపీటీసీ, జెడ్పీటీసీ ఎన్నికల తేదీలుఎంపీటీసీ, జెడ్పీటీసీ ఎన్నికల నోటిఫికేషన్‌ : 19–10–2026నామినేషన్ల స్వీకరణ మొదలు : 21–10–2026నామినేషన్లు దాఖలకు చివరి తేదీ : 23–10–2026 నామినేషన్ల పరిశీలన : 24–10–2026ఆపీళ్లు, పరిశీలన, తుది నిర్ణయం : ఈ నెల 25, 26 తేదీల్లో ఉప సంహరణకు చివరి తేదీ : 27–10–2026పోటీ చేసే అభ్యర్థుల తుది జాబితా ప్రచురణ : 27–10–2026పోలింగ్‌ తేదీ : 03–11–2026అవసరమైన చోట రీ పోలింగ్‌ : 04–11–2026ఓట్ల లెక్కింపు : 05–11–2026జెడ్పీ చైర్మన్‌ లేదా ఎంపీపీల పరోక్ష ఎన్నిక : 11–11–2026ఎన్నికలు జరిగే మున్సిపాలిటీలు, నగర కార్పొరేషన్లువిశాఖపట్నం రీజియన్‌ : పలాస–కాశీబుగ్గ, బొబ్బిలి, యలమంచిలి, పాలకొండ, నెల్లిమర్ల, ఇచ్ఛాపురం, విజయనగరం మున్సిపల్‌ కార్పొరేషన్,పార్వతీపురం, గ్రేటర్‌ విశాఖపట్నం మున్సిపల్‌ కార్పొరేషన్‌ (జీవీఎంసీ), సాలూరు, నర్సీపట్నం.రాజమండ్రి రీజియన్‌ : తుని, అమలాపురం, నిడదవోలు, మండపేట, నర్సాపూర్, జగ్గారెడ్డిగూడెం, కొవ్వూరు, సామర్లకోట, పెద్దాపురం, నందిగామ, నూజివీడు, ఉయ్యూరు, ముమ్మిడివరం, ఏలేశ్వరం, తిరువూరు, గొల్లప్రోలు, కొండపల్లి, ఆకివీడు, విజయవాడ, రామచంద్రపురం, ఏలూరు, పిఠాపురం, పెడన, మచిలీపట్నం, జగ్గయ్యపేట.గుంటూరు రీజియన్‌ : తెనాలి, రేపల్లె,అద్దంకి, చీమకుర్తి,కనిగిరి,గిద్దలూరు, వెంకటగిరి,ఆత్మకూరు, సూళ్లురుపేట, నాయుడుపేట,దర్శి, బుచ్చిరెడ్డిపాలెం, పిడుగురాళ్ల, గురజాల,దాచేపల్లి, మాచర్ల, గుంటూరు, నెల్లూరు, వినుకొండ, సత్తెనపల్లి, చిలకలూరిపేట, మార్కాపురం, ఒంగోలు, చీరాల.అనంతపురం రీజియన్‌ : హిందూపూర్, గూడూర్‌ (కర్నూలు), గుంతకల్లు, ఆదోని, ఎమ్మిగనూరు, పుంగనూరు, డోన్, నందికొట్కూరు, ఆత్మకూరు (నంద్యాల జిల్లా), ఆళ్లగడ్డ, గుత్తి, కల్యాణదుర్గం, మైదుకూరు, రాజంపేట, కుప్పం, బేతంచర్ల, పెనుకొండ, మదనపల్లె, మడకశిర, చిత్తూరు, అనంతపూర్, కర్నూలు, ప్రొద్దుటూరు, రాయచోటి, రాయదుర్గం, పుట్టపర్తి, బద్వేల్, నగిరి, పుత్తూరు, కడప, ధర్మవరం, తాడిపత్రి, నంద్యాల, ఎర్రగుంట్ల, కదిరి, జమ్మలమడుగు, పలమనేరు, తిరుపతి, పులివెందుల, కమలాపురం.

సాక్షి, అమరావతి: స్థానిక సంస్థల ఎన్నికలను స్వేచ్ఛాయుతంగా, పూర్తి పారదర్శకంగా నిర్వహించేందుకు చర్యలు చేపడుతున్నట్టు రాష్ట్ర ఎన్నికల కమిషనర్‌ (ఎస్‌ఈసీ) అనిల్‌చంద్ర పునేఠ చెప్పారు. ఇందుకు అన్ని రాజకీయ పార్టీలు, అభ్యర్థులు సహకరించాలని విజ్ఞప్తి చేశారు. ఎన్నికల షెడ్యూల్‌ విడుదల సందర్భంగా బుధవారం విజయవాడలో ఏర్పాటుచేసిన విలేకరుల సమావేశంలో ఆయన మాట్లాడారు. షెడ్యూల్‌ ప్రకటించిన నేపథ్యంలో రాష్ట్రంలో తక్షణమే ఎన్నికల కోడ్‌ అమలులోకి వచ్చినట్టు ప్రకటించారు.కోడ్‌ సమయంలో ప్రభుత్వం ఓటర్లను ప్రభావితం చేసేలా ఎలాంటి పథకాలను, అభివృద్ది కార్యక్రమాలను అమలు చేయకూడదని చెప్పారు. బ్యానర్ల ఏర్పాటు, విగ్రహాల విషయంలో పలు నియంత్రణలు అమలులోకి తెస్తున్నట్లు తెలిపారు. కోడ్‌ కాలంలో ఉద్యోగుల పదోన్నతులు, బదిలీ ఉండవని పేర్కొన్నారు. ఎన్నికల కోడ్‌ నిబంధనలను పట్టిషంగా అమలు చేసేందుకు రాష్ట్ర ప్రభుత్వ ప్రధాన కార్యదర్శికి లేఖ రాసినట్టు వెల్లడించారు. ఆన్‌లైన్‌ నామినేషన్లకు ఇప్పుడు సమయం లేదు నామినేషన్‌ వేసే అభ్యర్థులకు తగిన భద్రత కల్పించాలని జిల్లా పోలీసు అధికారులకు స్పష్టమైన ఆదేశాలిచ్చినట్లు చెప్పారు. అభ్యర్థులు ఆన్‌లైన్‌లో నామినేషన్‌ వేసేందుకు ఏర్పాట్లకు సమయం లేకపోవడంతో వచ్చే ఎన్నికల్లో ఆయా ఏర్పాట్లు చేయాలంటూ ప్రభుత్వానికి సిఫార్సు చేసినట్టు తెలిపారు. అర్హత ఉన్న ప్రతి ఒక్కరు పోటీచేయడంలో ఏ ఇబ్బందులు తలెత్తకుండా అవసరమయ్యే కులధ్రువీకరణ పత్రాలను దరఖాస్తు చేసిన 24 గంటల్లో జారీచేయాలని జిల్లా యంత్రాంగాలను ఆదేశించినట్లు చెప్పారు. నోడ్యూస్‌ పత్రాలను కూడా 24 గంటలలోపే ఇవ్వాలని ఆదేశించామన్నారు. వీలైనంత మేర వాటిని అందజేస్తారన్నారు. పోలింగ్‌ జరిగే ప్రతి చోట సీసీటీవీల ఏర్పాటు ఖర్చుతో కూడిన ప్రక్రియ అని పేర్కొన్నారు. పోలీసుశాఖ సమస్యాత్మక, అతి సమస్యాత్మక ప్రాంతాలుగా గుర్తించినచోట సీసీటీవీలు ఏర్పాటు చేస్తామని చెప్పారు. రాజకీయ పార్టీ వినతుల మేరకు ఆ సీసీటీవీల పుటేజీ 60 రోజులు రిజర్వు చేయాలని నిర్ణయించామన్నారు. ప్రతి జిల్లాలో రాష్ట్ర ఎన్నికల కమిషన్‌ నియమించే అబ్జర్వర్ల ద్వారా మద్యం నియంత్రణకు చర్యలు చేపడతామని చెప్పారు. ఎన్నికల కోడ్‌ పటిష్టంగా అమలయ్యేలా అబ్జర్వర్లు చర్యలు చేపడతారని తెలిపారు. ఎన్నికల సంఘం కొత్త ఓటర్ల జాబితాలు ఇస్తే వాటితోనే ఎన్నికలు కేంద్ర ఎన్నికల సంఘం ఈ ఏడాది ఫిబ్రవరిలో రాష్ట్ర ఎన్నికల కమిషన్‌కు అందజేసిన ఓటర్ల జాబితాల ఆధారంగా ఎన్నికలకు ముందస్తు కార్యక్రమాలను పూర్తి చేసినట్లు చెప్పారు. ఎన్నికల నిర్వహణ నేపథ్యంలో అక్టోబర్‌ నాటికి ఉన్న తాజా ఓటర్ల జాబితాలు కావాలని రాష్ట్ర ఎన్నికల ప్రధానాధికారికి లేఖ రాయనున్నట్లు తెలిపారు. కేంద్ర ఎన్నికల సంఘం ఆ జాబితాలను ఇస్తే కొత్త జాబితాలతోనే పోలింగ్‌ నిర్వహిస్తామని చెప్పారు. పోలింగ్‌ సమయానికి కొత్త జాబితాలు తమకు అందని పక్షంలో ఇప్పటికే తమవద్ద ఉన్న పాత ఓటర్ల జాబితాల మేరకు పోలింగ్‌ నిర్వహిస్తామని ఆయన తెలిపారు. రాష్ట్ర ఎన్నికల కమిషన్‌ కార్యదర్శి మల్లిఖార్జున మాట్లాడుతూ ఎన్నికలకు సంబంధించి ఫిర్యాదులు, వినతుల కోసం రాష్ట్ర ఎన్నికల కమిషన్‌ కార్యాలయంలో కంట్రోల్‌రూమ్‌ ఏర్పాటు చేసినట్లు చెప్పారు. వినతుల పరిష్కారానికి తగిన ఏర్పాట్లు చేసినట్లు తెలిపారు. మున్సిపల్‌శాఖ డైరెక్టర్‌ సంపత్‌కుమార్‌ మాట్లాడుతూ పోలింగ్‌ నిర్వహణకు 4,027 మంది ఎన్నికల అధికారులు, వెయ్యిమంది ఎన్నికల స్క్వాడ్, 72 వేలమందిని ఎన్నికల సిబ్బందిని నియమించనున్నట్లు చెప్పారు. పోలింగ్‌ రోజు మున్సిపల్‌ సిబ్బంది పోలింగ్‌ స్టేషన్‌లో కూర్చోకూడదన్న నిబంధన ఉందని తెలిపారు. పోటీచేసే ఎస్సీ, ఎస్టీ, బీసీ అభ్యర్థులకు నామినేషన్‌ డిపాజిట్‌లో 50 శాతం రాయితీ ఉంటుందని ఆయన చెప్పారు.

సాక్షి, అమరావతి: స్థానిక సంస్థల ఎన్నికల్లో అభ్యర్ధులు ఆన్‌లైన్‌లో నామినేషన్లు దాఖలు చేసుకునే వెసులుబాటు కల్పించాలంటూ రాజకీయ పార్టీల నుంచి అందిన సూచనను పరిశీలిస్తామని రాష్ట్ర ఎన్నికల కమిషనర్‌ అనిల్‌ చంద్రపునేఠ తెలిపారు. స్థానిక సంస్థల ఎన్నికల నిర్వహణపై మంగళవారం ఆయన రాజకీయ పార్టీలతో సమావేశం నిర్వహించి సూచనలు స్వీకరించారు. టీడీపీ, వైఎస్సార్‌సీపీ, జనసేన, బీజేపీ, సీపీఎం, సీపీఐ, కాంగ్రెస్‌ సహా మొత్తం 19 రాజకీయ పార్టీల ప్రతినిధులు హాజరయ్యారు. అనంతరం రాష్ట్ర ఎన్నికల కమిషన్‌ కార్యదర్శి మల్లిఖార్జునతో కలసి ఎస్‌ఈసీ పునేఠ విలేకరులతో మాట్లాడారు. పోటీ చేసే ఆశావహులకు కులధ్రువీకరణ, నో డ్యూస్‌ పత్రాలు జారీలో జాప్యం జరుగుతోందని, ఎన్నికల్లో పారదర్శకత కోసం సీసీ టీవీ కవరేజీ పెద్ద ఎత్తున చేపట్టాలని, ఓటర్లను ప్రభావితం చేసే మద్యాన్ని నియంత్రించాలని, అభ్యర్థులకు పటిష్ట భద్రత కల్పించాలని రాజకీయ పార్టీల ప్రతినిధులు సూచనలు చేసినట్లు పేర్కొన్నారు. పోటీ చేసే అభ్యర్థులందరికీ కుల ధ్రువీకరణ, నో డ్యూస్‌ సర్టిఫికెట్లు చాలా కీలకమని, ఆయా సర్టిఫికెట్లు తక్షణమే జారీ చేయాలని జిల్లా యంత్రాంగానికి సూచించినట్లు రాష్ట్ర ఎన్నికల కమిషన్‌ తెలిపారు.ఆయా పార్టీల నుంచి వచ్చిన ఇతర సూచనలను రాష్ట్ర ఎన్నికల కమిషన్‌ పరిశీలిస్తుందని చెప్పారు. సాధ్యమైనవి, సాధ్యమైనంత మేర అమలు చేస్తామన్నారు. కలెక్టరేట్‌ లేదా ఆర్డీవో కార్యాలయాల్లోనూ నామినేషన్లు స్వీకరించాలన్న వినతిపై ఆయన స్పందిస్తూ.. ఎన్నికలకు సంబంధించి కొన్ని సంప్రదాయాలు ఉన్నాయని, వాటిని వెంటనే మార్పు చేయడం కుదరదన్నారు. ఎక్కడైనా ఎన్నికల రిటర్నింగ్‌ అధికారులు లేదా కలెక్టర్లనుంచి ప్రతిపాదన వస్తే పాటిస్తామన్నారు. పారా మిలటరీ బలగాల పర్యవేక్షణలో ఎన్నికలు నిర్వహించాలన్న విజ్ఞప్తులను పోలీస్‌శాఖకు పంపామని, పరిశీలించి తగిన నిర్ణయం తీసుకుంటారని తెలిపారు. రిజర్వేషన్ల గెజిట్‌ నోటిఫికేషన్, ఎన్నికల సంసిద్ధత తెలియజేస్తూ సంబంధిత శాఖలు ధ్రువీకరణ పత్రాలు రాష్ట్ర ఎన్నికల కమిషన్‌కు అందజేయగానే ఎన్నికల నోటిఫికేషన్‌ జారీకి చర్యలు చేపడతామని తెలిపారు. పండుగ రోజు ఎలాంటి ఎన్నికల కార్యక్రమాలు లేకుండా ఏర్పాట్లు చేస్తామన్నారు. ఎన్నికల నిబంధనలు మేరకు ఓటర్ల జాబితాలపై నిర్ణయాలు ఉంటాయన్నారు. సరిగ్గా నోటిఫికేషన్‌కు ముందు మీటింగ్‌లా?: సీపీఎం తక్కువ వ్యవధి ఉండే స్థానిక సంస్థల ఎన్నికలను దసరా సమయంలో చేపట్టడం సరికాదని చెప్పాం. తర్వాత ఎన్నికల షెడ్యూల్‌ విడుదల చేయాలని కోరాం. సరిగ్గా నోటిఫికేషన్‌ జారీకి ముందు రాజకీయ పార్టీలతో మీటింగ్‌లు కాకుండా ముందే ఇలాంటి సమావేశం నిర్వహిస్తే బాగుండేదని చెప్పాం. నోటిఫికేషన్‌ జారీకి అంతా సిద్దం చేశాక పార్టీలతో మీటింగ్‌లు సరికాదు. నామినేషన్లు అన్‌లైన్‌లో కూడా సమర్పించేలా అవకాశమివ్వాలని కోరాం. కుల ధృవీకరణ పత్రాల కోసం దరఖాస్తు చేసుకునే వారికి 24 గంటల్లో అందించాలి. – వై వెంకటేశ్వరరావు (సీపీఎం)వ్యయ పరిమితులపై అభ్యంతరం: జనసేన కూటమిలో భాగస్వామి పార్టీగా ఎన్నికలు స్వేచ్ఛగా జరిగేందుకు సహకరిస్తాం. అభ్యర్థి ఎన్నికల వ్యయ వ్యత్యాసాల గురించి రాష్ట్ర ఎన్నికల కమిషన్‌కు జనసేన తరఫున పిర్యాదు చేశాం. విశాఖలో మేయర్‌ వ్యయ పరిమితి రూ. 40 లక్షలుగా నిర్ణయించి కార్పొరేటర్‌ వ్యయం రూ. 20 లక్షలుగా నిర్దేశించడం సరికాదు. లౌడ్‌ స్పీకర్ల తీవ్రతను నియంత్రించాలని కోరాం. –శివశంకర్‌ (జనసేన)పులివెందుల జడ్పీటీసీ ఎన్నికలు ఓ ట్రైలర్‌: సీపీఐ కూటమి సర్కారు అధికారంలోకి వచ్చాక జరిగిన పులివెందుల జడ్పీటీసీ, విద్యా కమిటీ ఎన్నికల మాదిరిగా స్థానిక ఎన్నికలు జరగకూడదని రాష్ట్ర ఎన్నిక కమిషనర్‌ను కోరాం. అధికార పార్టీ అక్రమాలకు అవి ఒక ట్రైలర్‌గా మేం భావిస్తున్నాం. పులివెందుల జడ్పీటీసీ ఎన్నికల్లో ప్రతిపక్షాలను ప్రచారమే చేయకుండా చేశారు. విద్యా కమిటీ ఎన్నికల్లో అధికార పార్టీ సానుభూతి పరులు గెలవని చోట రద్దు చేశారు. పోలీసులే నామినేషన్లు ఉపసంహరించుకోవాలని బెదిరిస్తున్న పరిస్థితులు చూస్తున్నాం. స్థానిక సంస్థల ఎన్నికలకు సంబంధించి ముందుగా రాజకీయ పార్టీలతో సమావేశం నిర్వహించకుండా షెడ్యూల్‌ వెలువడే వేళ హడావుడిగా ముగించడం సరికాదు. గ్రామాల్లో కూడా సెప్టెంబరు వరకు ఓటు అర్హత ఉన్నవారికి అవకాశమివ్వాలని కోరాం. – జగదీష్, శంకర్‌ (సీపీఐ)అన్ని ఎన్నికలకు ఒకేసారి షెడ్యూల్‌ వద్దు: బీజేపీ పండుగ నేపథ్యంలో మున్సిపల్, మండల జిల్లా పరిషత్, గ్రామ పంచాయతీల ఎన్నికలకు ఒకేసారి షెడ్యూల్‌ కాకుండా వేర్వేరుగా ప్రకటించాలి. ఉమ్మడి జిల్లాల ప్రాతిపదికన అభ్యర్థులకు కొత్త జిల్లాల్లో పోటీ చేసే అవకాశమివ్వాలి. పండుగ నేపథ్యంలో లౌడ్‌ స్పీకర్లకు అనుమతులు తదితర అంశాల్లో రాజకీయ పార్టీలకు వెసులుబాటు కల్పించాలి. అభ్యర్ధులకు కుల ధ్రువీకరణ, నో డ్యూస్‌ సర్టిఫికెట్లు నిర్ణీత సమయంలో నేరుగా జారీ చేసేలా చర్యలు చేపట్టాలి. ఓటర్‌ స్లిప్‌లు ప్రభుత్వమే జారీ చేయాలి. – రమేష్‌ నాయుడు, శ్రీనివాసరాజు(బీజేపీ) పారా మిలటరీ బలగాలతో నిర్వహించాలి: కాంగ్రెస్‌ మొక్కుబడిగా రాష్ట్ర ఎన్నికల కమిషన్‌ మీటింగ్‌ పెట్టింది. స్థానిక ఎన్నికల కోసం ప్రభుత్వం ప్రకటించిన మున్సిపల్‌ రిజర్వేషన్లలో ఎస్సీ, ఎస్టీలకు అన్యాయం జరిగింది. కొన్ని జిల్లాల్లో ఆయా వర్గాలకు ఒక్క రిజర్వేషనూ రాలేదు. ప్రకాశం జిల్లాలో బీసీ, ఎస్సీలకు రిజర్వేషన్లు రాలేదు. పారదర్శక ఎన్నికల కోసం ఆన్‌లైన్‌లో నామినేషన్లు దాఖలుకు వీలు కల్పించాలి. స్థానిక పోలీసులతో ఎన్నికల నిర్వహణ వల్ల న్యాయం జరిగే అవకాశం ఉండదు. పారామిలటరీ బలగాలతో ఎన్నికలు జరపాలి. –మస్తాన్‌వలి (కాంగ్రెస్‌)

సాక్షి, అమరావతి: శాంతిభద్రతల సమస్యలతో పాటు ఎన్నికల ఏర్పాట్లలో సమస్యలు తలెత్తకుండా ఉండేందుకు అన్ని మున్సిపాలిటీలు, నగర కార్పొరేషన్లకు ఒకేరోజు పోలింగ్‌ కాకుండా రెండు దశల్లో నిర్వహించాలని జిల్లా కలెక్టర్లు, ఎస్పీలు రాష్ట్ర ఎన్నికల కమిషనర్‌కు సూచించారు. అదే మాదిరిగా ఎంపీటీసీ, జెడ్పీటీసీ ఎన్నికలను కూడా రెండు దశల్లో నిర్వహించాలని కోరారు. స్థానిక సంస్థల ఎన్నికలకు జరుగుతున్న ఏర్పాట్లతో పాటు క్షేత్రస్థాయి పరిస్థితులపై రాష్ట్ర ఎన్నికల కమిషనర్‌ అనిల్‌చంద్ర పునేఠ గురువారం అన్ని జిల్లాల కలెక్టర్లు, ఎస్పీలు, పోలీసు కమిషనర్లతో పాటు జెడ్పీ సీఈఓలు, డీపీఓలు, నగర మున్సిపల్‌ కమిషనర్లతో గురువారం వీడియో కాన్ఫరెన్స్‌ నిర్వహించారు. పంచాయతీరాజ్‌ గ్రామీణాభివృద్ధి శాఖ కమిషనర్‌ కృష్ణతేజ, మున్సిపల్‌ శాఖ డైరెక్టర్‌ సంపత్‌కుమార్‌ కూడా పాల్గొన్నారు. ఎన్నికల నిర్వహణకు అన్ని జిల్లాల్లో ఏర్పాట్లు పూర్తయినట్లు చెప్పిన కలెక్టర్లు, ఎస్పీలు.. ఒక్క దశలోనే ఎన్ని కలు నిర్వహిస్తే వచ్చే ఇబ్బందులను వివరించారు. రెండు దశల్లో 100 మున్సిపాలిటీలు, కార్పొరేషన్ల ఎన్నికలు జరపండిరాష్ట్రంలో 17 కార్పొరేషన్లు, 106 మున్సిపాలిటీలు ఉండగా.. ప్రస్తుతం 13 కార్పొరేషన్లతో పాటు 87 మున్సిపాలిటీల్లోనే కొత్తగా వార్డుల విభజన జరిగి ఓటర్ల జాబితాలు, పోలీసు కేంద్రాల గుర్తింపు వంటి ఏర్పాట్లు పూర్తయ్యాయి. మిగిలిన 23 చోట్ల కోర్టు కేసుల కారణంగా ఆ ప్రక్రియ వాయిదా పడ్డాయి. అయితే, వాటిలోని 20 చోట్ల కోర్టు ఇబ్బందులు తొలగడంతో వాటిల్లో కూడా ఈనెల 17 కల్లా వార్డుల విభజన ప్రక్రియ పూర్తిచేసేందుకు అధికారులు కసరత్తు మొదలుపెట్టారు. కానీ, రాష్ట్ర ఎన్నికల కమిషన్‌ ఇప్పటికే ఎన్నికల ఏర్పాట్లు పూర్తయిన వంద మున్సిపాలిటీలు, కార్పొరేషన్లలో ఒకే దశలో ఎన్నికలు నిర్వహించి, మిగిలిన 20 చోట్ల రెండు నెలల తర్వాత మరో విడతలో ఎన్నికలు నిర్వహించాలని నిర్ణయించింది. అయితే, 100 మున్సిపాలిటీలు, కార్పొరేషన్లలో ఎన్నికల నిర్వహణ రెండు దశల్లో జరపాలని కొందరు కలెక్టర్లు గురువారం నాటి సమావేశంలో కోరారు. ఎందుకంటే.. ఇతర అన్ని జిల్లాల కన్నా వైఎస్సార్‌ కడప జిల్లాలో అత్యధికంగా కార్పొరేషన్, మున్సిపాలిటీలన్నీ కలిపి మొత్తం తొమ్మిది వరకు ఉండడంతో ఒకేరోజు ఎన్నికతో శాంతిభద్రతల సమస్యతో పాటు ఏర్పాట్లలో ఇబ్బందులు పడాల్సి ఉంటుందని వారు ఎన్నికల కమిషనర్‌కు ఉదహరించారు. అలాగే, ఎంపీటీసీ, జెడ్పీటీసీ ఎన్నికల్లోనూ శాంతిభద్రతల ఇబ్బందులు తలెత్తకుండా ప్రతీ జిల్లాలో రెండో దశల్లో ఎన్నికలు జరపాలని ఐదు జిల్లాల ఎస్పీలు కోరారు. మూడు దశల్లో పంచాయతీ ఎన్నికలు మరోవైపు.. గ్రామ పంచాయతీల ఎన్నికలను మూడు దశల్లో నిర్వహించాలని రాష్ట్ర ఎన్నికల కమిషన్‌ నిర్ణయించింది. దీంతో.. గతంలో ఒక రెవిన్యూ డివిజన్‌ పరిధిలోని గ్రామ పంచాయతీలన్నింటికీ ఒకరోజు నిర్వహించేలా కాకుండా.. మండలం మొత్తానికి ఒకరోజు ఎన్నికలు జరిగేలా ఏర్పాట్లు చేస్తున్నారు. జిల్లాలో అన్ని మండలాలను మూడుగా వర్గీకరించి కలెక్టర్లు ప్రతిపాదనలు పంపాలని రాష్ట్ర ఎన్నికల కమిషనర్‌ కోరారు. ఇక మున్సిపల్‌ ఎన్నికలకు నోటిఫికేషన్‌ ఇచ్చిన తర్వాత 15వ రోజు పోలింగ్‌ పూర్తిచేసి, డిప్యూటీ మేయర్, వైస్‌ చైర్మన్‌ ఎన్నికలను 25వ రోజుకల్లా పూర్తికి ఏర్పాట్లు చేసుకోవాలని ఎస్‌ఈసీ సూచించారు. అలాగే, మండల పరిషత్‌ అధ్యక్ష, జిల్లా పరిషత్‌ చైర్మన్‌ ఎన్నికలను నోటిఫికేషన్‌ జారీచేసిన 26 రోజుల్లోపు.. సర్పంచి ఎన్నికలను నోటిఫికేషన్‌ తర్వాత 15 రోజుల్లో పూర్తిచేయనున్నట్లు ఎస్‌ఈసీ ఆయా జిల్లాల జెడ్పీ సీఈఓ, డీపీఓలకు తెలిపారు.

అమరావతి: ఆంధ్రప్రదేశ్‌ రాష్ట్ర ప్రధాన కార్యదర్శిగా పనిచేసిన అనిల్‌ చంద్ర పునేతా రేపు పదవీ విరమణ చేయనున్నారు. ఆయన ప్రస్తుతం ఏపీ మినరల్‌ డెవలప్‌మెంట్‌ కార్పొరేషన్‌ చైర్మన్‌గా వ్యవహరిస్తున్నారు. అనిల్‌ చంద్ర పునేతా 1984 బ్యాచ్‌కు చెందిన ఐఏఎస్‌ అధికారి. ఇటీవల జరిగిన సార్వత్రిక ఎన్నికల సమయంలో టీడీపీకి అనుకూలంగా వ్యవహరిస్తున్నారని తేలడంతో  ఆంధ్రప్రదేశ్‌ ఎన్నికల ప్రధానాధికారి గోపాల కృష్ణ ద్వివేదీ, అప్పుడు ఏపీ సీఎస్‌గా పని చేస్తున్న అనిల్‌ చంద్ర పునేతాను సీఎస్‌గా తప్పించిన సంగతి తెల్సిందే. అనంతరం ఆయన స్థానంలో ఎల్‌వీ సుబ్రహ్మణ్యాన్ని ఏపీ సీఎస్‌గా నియమించిన విషయం విదితమే.

తనకు అనుకూలంగా పనిచేస్తేనే సమర్థులైన అధికారులుగా చిత్రీకరించడం.. లేకపోతే అసమర్థులుగా, అవినీతిపరులుగా ముద్ర వెయ్యడం ఏపీ సీఎం చంద్రబాబుకు పరిపాటి అయిపోయింది. తానా అంటే తందానా అన్నవిధంగా ఆయన చెప్పే ఈ అసత్యాలను విస్తృతంగా ప్రచారం చేయటం తన అనుకూల మాధ్యమాలకు అలవాటు అయిపోయింది. తన తప్పిదాలకు, వైఫల్యాలకు అధికారులను బాధ్యులుగా చేస్తూ ముఖ్యమంత్రి ప్రవర్తించడం, అదే నిజంగా ప్రజలను నమ్మించడానికి యత్నించడం ఆయనకూ, అనుకూల మాధ్యమాలకు చాలాకాలం నుంచి వెన్నతో పెట్టిన విద్య. గత వారంలో ప్రభుత్వ ప్రధాన కార్యదర్శి విషయంలో బాబు  చేసిన వ్యాఖ్యలు, ప్రధాన ఎన్నికల అధికారి విషయంలో అనుసరించిన వైఖరి గత 30 ఏళ్లుగా కష్టపడి జాతీయంగా, అంతర్జాతీయంగా సంపాదించిన సీఎం వ్యక్తిగత స్థాయిని తుడిచిపెట్టేశాయి. నేను సర్వీసులో చేరిన కొత్తలో శిక్షణ పొందుతూ ఉన్నప్పుడు ఎమ్మార్‌ పాయ్‌ అని సీనియర్‌ ఐఏఎస్‌ ఆఫీసర్‌ ఉండేవారు. ఆయనకు అన్ని అర్హతలు ఉన్న ఆ రోజుల్లో నాటి సీఎం చెన్నారెడ్డి వారిని విస్మరించి వారి కన్నా  సర్వీసులో జూనియర్ని చీఫ్‌ సెక్రటరీగా చేశారు. అపారమైన పరిపాలన అనుభవం నిజాయతీ, మంచితనం కలిగిన వ్యక్తి. పరిపాలన శిక్షణ సంస్థకు డైరెక్టర్‌గా  పనిచేస్తూ మాకందరికీ శిక్షణా కార్యక్రమాలు నిర్వహిస్తూ ఉండేవారు. తన అనుభవాలను మాతో పంచుకుంటూ ఉండేవారు. వారు సర్వీస్‌లో చేరిన కొత్తలో రాజకీయ నాయకులతో సంబంధాలు ఏ విధంగా ఉండేవి అనేది వివరిస్తూ, బెజవాడ గోపాలరెడ్డి లాంటి సీఎంలు తమవంటి కలెక్టర్లతో ఎంత మర్యాద పూర్వకంగా ప్రవర్తించేవారో చెప్తూ ఉండేవారు.  మేము సర్వీసులో చేరేనాటికి ఈ  ప్రమాణాలు చాలా తగ్గినప్పటికీ అధికారులకు, ప్రభుత్వ సర్వీసులకు చాలా విలువ ఉండేది. నేను విజయవాడ సబ్‌ కలెక్టర్‌గా పని చేసే రోజుల్లో చనుమోలు వెంకటరావు రాష్ట్ర ప్రభుత్వంలో మంత్రిగా ఉండేవారు. అధికారులకు గౌరవం ఇవ్వటంలో, రాజకీయ సత్ప్రవర్తనలో ఆయనకు ఆయనే సాటి. ఆ కాలంలో ఎవరికో ఒకరికి  సిమెంటు కేటాయించాలని సిఫార్సు చేశారు. అయితే ఆ వ్యక్తి అంతకుముందు నాతో ఎట్లా ప్రవర్తించిందీ వివరించి నిర్మొహమాటంగా ఇచ్చేది లేదని చెప్పాను. ఆ వ్యక్తికి ఏ స్థాయిలో అక్షింతలు పడ్డాయి అంటే రెండవ రోజు నా దగ్గరకు వచ్చి క్షమాపణ వేడుకున్నాడు. ఆనాటికే దిగజారుడుగా మాట్లాడే చాలా మంది  మంత్రివర్యులు ఉన్నా, చనుమోలు వెంకటరావు లాంటి మర్యాదస్తులేన  రాజకీయ నాయకులు చాలా మందే ఉండేవారు. కాలక్రమేణా ఇది తగ్గుతూ వచ్చి ఈనాడు అధికారులు అంటే చులకన భావం రాజకీయ నాయకులలో జాస్తి అయింది. దీనికి కారణాలు అనేకం ఉన్నాయి. అందులో ఒక ప్రధాన కారణం అధికారులలో అవినీతి పెరగటం. అవినీతిపరుడైన అధికారిని ఏ విధంగా తమ లాభం కోసం ఉపయోగించుకోవాలని రాజకీయ నాయకులు చూస్తారే కానీ అతనిని గౌరవంగా చూసే అవకాశం తక్కువ. అవినీతిపరుడైన అధికారికి రాజకీయ నాయకుడికి వ్యవస్థలో ఆత్మీయమైన అవినాభావ సంబంధంఉంటుంది. అవినీతిపరులైన అధికారుల సంఖ్య పెరగటంతో నీతిపరులైన అధికారుల అవసరం వ్యవస్థకు లేకుండా పోయింది. పరిపాలనా యంత్రాంగంలో నిలబడాలంటే అటువంటి అధికారులు కూడా కొంత సర్దుకొని పోవలసిన అవసరం ఏర్పడింది. చట్టాలు గుడ్డిగా ఉండటంతో అవినీతిపరులైన అధికారులు చాకచక్యంగా తప్పించుకొని తిరుగుతున్నారు. విలువలకు ప్రాధాన్యమిస్తూ తప్పని పరిస్థితుల్లో ఫైళ్ల పైన కేవలం రూల్స్‌ పాటించకుండా నిర్ణయాలు తీసుకున్న అధికారులు దోషులుగా నిలబడుతున్నారు.. బలైపోతున్నారు.  ఇక అధికారులు చులకన కావడానికి మరొకప్రధాన కారణం.. విలువ లేని వ్యక్తులు రాజకీయాలలో ఉన్నత స్థానాల్లోకి రావటం. అడ్డదారిలో డబ్బులు చేసుకొని డబ్బుతోనే అన్నీ సాధించవచ్చు అనుకునే ఈ చౌకబారు రాజకీయ నాయకులకు ఉచ్చ నీచాలు తెలియటం లేదు. నడమంత్రపు సిరి లాగా నడమంత్రపు అధికారం చేతిలోకి రాగానే కొందరు రాజకీయ నాయకులకు కళ్ళు నెత్తికి ఎక్కటం సహజం. ఈ మధ్య ఒక మంత్రివర్యులు ఒక విశ్రాంత అధికారిని ఉద్దేశించి ఉద్యోగంలో ఉన్నప్పుడు గాడిదలు కాచారా అనటం ఇందుకు నిదర్శనం. ఈ రెండు ప్రధాన కారణాల దృష్ట్యా ఈనాడు అధికారులు రాజకీయ నాయకుల దృష్టిలో చులకన అయిపోతున్నారు.  మూడవ కారణం.. భారత రాజ్యాంగంలో అధికార వ్యవస్థను రాజకీయ ప్రమేయం లేని తటస్థ వ్యవస్థగా పొందుపరిచారనే ప్రధాన అంశాన్ని మర్చిపోయి కొందరు అధికారులు ఒక పార్టీకో, పార్టీ నాయకులకో కొమ్ముకాయడం. దీనివలన అధికార వ్యవస్థ నిలువుగా చీలి రాజ్యాంగంలో పొందుపరచిన తటస్థ వ్యవస్థకు బదులు అమెరికా సంయుక్త రాష్ట్రాల్లో ఉన్న  టఞౌజీlటటyట్ట్ఛఝ లాగా రూపాంతరం చెందే అవకాశం ఉంది. రాజకీయ నాయకత్వం మార్పు జరగ్గానే అధికార వ్యవస్థ పూర్తిగా మారిపోయి కొత్తవారు పదవిలోకి రావటం దీనికి నిదర్శనం. అటువంటి సమయంలో తటస్థ అధికార విధానానికి అర్థం లేకుండా పోతుంది. మన దేశంలో కూడా రాజ్యాంగాన్ని మార్చుకొని  టఞౌజీlటటyట్ట్ఛఝను ప్రవేశ పెట్టుకోవచ్చు. అప్పుడు ఈ నాటకాలకు అవసరం లేకుండా గెలుపొందిన పార్టీకి అనుకూలంగా వారి సలహాదారులు వస్తారు. సలహా ఇస్తారు. వారితోపాటే నిష్క్రమిస్తారు. ఇది సాధారణంగా రాజకీయ నాయకులు, అధికారుల సంబంధ బాంధవ్యాల్లో వచ్చిన కాలక్రమేణా మార్పు. ఈ సాధారణ అంశాలకు సంబంధం లేకుండా గత వారంలో అధికారులను చులకన చేసి ఏపీ సీఎం రెండు సందర్భాలలో మాట్లాడారు, ప్రవర్తించారు. ఎన్నికల నిర్వహణ తేదీ కన్నా ఒక రోజు ముందు ముఖ్యమంత్రి ప్రధాన ఎన్నికల అధికారి కార్యాలయానికి వెళ్లి నిరసన తెలపాలని నిర్ణయించుకున్నారు. ఇది చాలా అసాధారణమైన విషయం. ఇటువంటి విషయాలకు సీఎంలు సాధారణంగా ఒక సీనియర్‌ నాయకుడిని పంపించడం పరిపాటి. అంతేకాకుండా ఆయన కార్యాలయం ముందు ధర్నాకు దిగారు. ఒక సాధారణమైన నాయకుడు కాదు. జాతీయంగా, అంతర్జాతీయంగా కీర్తిని గడించిన నాయకుడు. మమతా బెనర్జీలాంటి నాయకులు కేంద్ర మంత్రిగా ఉన్నప్పుడే ధర్నా చేయడం ముఖ్యమంత్రిగా ధర్నాకు దిగటం ఎవరూ పెద్దగా పట్టించుకోరు.  కానీ చంద్రబాబులాంటి లబ్ధప్రతిష్టులు ఈ రకంగా చేయటం వారి స్థాయికి తగదు. ఇంతేకాక ప్రధాన ఎన్నికల అధికారిని దోషిగా చూపెడుతూ ‘మీ కార్యాలయమే మూసుకోవచ్చు కదా’ అన్న ధోరణిలో మాట్లాడారు. ప్రధాన ఎన్నికల అధికారి సీఎం హోదాను గౌరవించి చాలా సభ్యతతో, పద్ధతిగా ప్రతిస్పందించారు. సీఎం హోదాను, గౌరవాన్ని కాపాడారు. గట్టిగా సమాధానం చెప్పి సహేతుకంగా వాదనలు వినిపించి ఉంటే ముఖ్యమంత్రి గారి హోదాకు భంగం కలిగి ఉండేది. దురదృష్టం ఏమిటంటే ఆయన నమ్రతను, సభ్యతను బలహీనతగా చిత్రీకరిస్తూ ఏదో తప్పు చేశాడు కాబట్టి సీఎంకి సమాధానం చెప్పలేదు అంటూ తెలుగుదేశం పార్టీ దుష్ప్రచారాన్ని కొనసాగించి ఎన్నికలలో లబ్ధి పొందడానికి ప్రయత్నం చేయడం. ఇక ఎన్నికలు అయిన రెండవ రోజు సీఎం ఏకంగా ప్రధాన కార్యదర్శినే లక్ష్యంగా చేసుకుని తన విమర్శలు సంధించారు. ఎన్నికల సంఘం పనితీరు ప్రశ్నిస్తూ ఈవీఎంల విషయం ప్రస్తావన చేస్తూ ప్రధానకార్యదర్శి అంశం కూడా లేవనెత్తారు. తాను నియమించిన ప్రధాన కార్యదర్శి అనిల్‌ చంద్ర పునేత్‌ని తొలగించి మరొకరిని ముఖ్య కార్యదర్శిగా ఎన్నికల సంఘం ఎట్లా నియమిస్తుంది అని ప్రశ్నించారు. కొత్తగా నియమితులైన ప్రధాన కార్యదర్శి ప్రతిపక్ష నేత జగన్‌తో పాటు సహ నిందితుడు అనీ, అటువంటివారిని ప్రధాన కార్యదర్శి ఎట్లా చేస్తారని వ్యాఖ్యానించారు. ప్రధానంగా చంద్రబాబు మర్చిపోయిన విషయం ప్రధాన కార్యదర్శి మార్పుకు ఎవరైనా కారణం అయితే అది తానుమాత్రమే. ఎన్నికల షెడ్యూలు విడుదల తరువాత అధికార యంత్రాంగం అంతా ఎన్నికల సంఘం అధీనంలోకి వస్తుందని తెలిసి కూడా ఎన్నికల సంఘం ఉత్తర్వులను ప్రధాన కార్యదర్శి బేఖాతర్‌ చేసే విధంగా సీఎం నిర్దేశించారు. వారి  ఆంతరంగిక అధికార వర్గం ఈ విషయంలో సరైన విధి విధానాలను సీఎంకు వివరించ కుండా ఆయన అభిప్రాయానికే వత్తాసు పలికారు. ఇటువంటి ఒత్తిడిని తట్టుకొని ప్రధాన కార్యదర్శి సరైన నిర్ణయం తీసుకుని ఉంటే పరిస్థితి మరో రకంగా ఉండేది.  అందువల్లనే ప్రధాన కార్యదర్శి మార్పు జరిగింది.  ఎన్నికల సంఘం తన అధికారాలను ఉపయోగించుకుని అన్ని విధాల అర్హుడైన వ్యక్తిని ప్రధాన కార్యదర్శిగా నియమిస్తే ఎటువంటి ఆధారాలు లేకుండా సీఎం అర్థరహిత ఆరోపణలు చేస్తున్నారు. కేసులన్నీ హైకోర్టు కొట్టివేసిన తర్వాత సీనియారిటీ ప్రకారం అర్హతల ప్రకారం ప్రధాన కార్యదర్శి పదవి స్వీకరించడానికి ఎల్‌వీ సుబ్రహ్మణ్యం అన్ని విధాల అర్హులుగా ఉన్నప్పుడు ముఖ్యమంత్రి అర్థరహిత అనవసర అభాండాలు వేయడం ఆయన స్థాయికి తగని పని. మనకు అనుకూలంగా పనిచేస్తేనే నిష్పాక్షిక సమర్థులైన అధికారులుగా చిత్రీకరించడం లేకపోతే అసమర్థులుగా అవినీతిపరులుగా ముద్ర వెయ్యడం సీఎంచంద్రబాబుకి పరిపాటి అయిపోయింది. తానా అంటే తందానా అన్న విధంగా ఆయన చెప్పే ఈ అసత్యాలను విస్తృతంగా ప్రచారం చేయటం ఆయన అనుకూల మాధ్యమాలకు పరిపాటి అయిపోయింది. తన తప్పిదాలకు, వైఫల్యాలకు అధికారులను బాధ్యులుగా చేస్తూ ముఖ్యమంత్రి ప్రవర్తించడం, అదే నిజంగా ప్రజలను నమ్మించడానికి యత్నిచడం ఆయనకు, ఆయన అనుకూల మాధ్యమాలకు చాలాకాలం నుంచి వెన్నతో పెట్టిన విద్య. గత వారంలో ప్రధాన కార్యదర్శి విషయంలో ముఖ్యమంత్రి  చేసిన వ్యాఖ్యలు, ప్రధాన ఎన్నికల అధికారి విషయంలో అనుసరించిన వైఖరి గత 30 ఏళ్లుగా చాలా కష్టపడి జాతీయంగా, అంతర్జాతీయంగా సంపాదించిన వారి వ్యక్తిగత స్థాయిని ఒక్క పెట్టుతో తుడిచి వేశాయి. దీనికి కారణం ఆయన నిజమైన వ్యవహారశైలి.. తను కష్టపడి ప్రపంచానికి ప్రదర్శించిన కృత్రిమ వ్యవహార శైలి కన్నా పూర్తిగా భిన్నంగా ఉండటమా? లేక ఎన్నికలలో పరాజయ సంకేతాలు రావటంతో ఏర్పడిన నిరాశ నిçస్పృహలా? వేచి చూడాలి. వ్యాసకర్త : ఐవైఆర్‌ కృష్ణారావు, ఏపీ ప్రభుత్వ మాజీ ప్రధాన కార్యదర్శి ఈ మెయిల్‌ : iyrk45@ gmail. com

సాక్షి, అమరావతి: బ్రాహ్మణులపై కక్ష కట్టిన సీఎం చంద్రబాబు తన ప్రభుత్వ ప్రధాన కార్యదర్శిగా అనిల్‌ చంద్ర పునేఠను తాను చెప్పినట్టే వినాలని ఒత్తిడి తెచ్చి ఆయనను బలిపశువును చేశారని, ఆయన స్థానంలో ఎన్నికల సంఘం మరో బ్రాహ్మణ ఐఏఎస్‌ అధికారి ఎల్వీ సుబ్రమణ్యంను సీఎస్‌గా నియమిస్తే ఆయననూ అవమానించేలా మాట్లాడారంటూ అఖిల భారత బ్రాహ్మణ ఫెడరేషన్‌ ఉపాధ్యక్షుడు ద్రోణంరాజు రవికుమార్‌ మండిపడ్డారు. వైఎస్‌ జగన్‌మోహన్‌రెడ్డి కేసుల్లో ఎల్వీ సుబ్రమణ్యం నిందితుడు కాదంటూ 2018 జనవరిలోనే ఉమ్మడి ఏపీ హైకోర్టు కొట్టివేసిందన్నారు. చంద్రబాబు వ్యాఖ్యలు కోర్టు ధిక్కారం కింద వస్తాయన్నారు. సీఎస్ డీజీపీ కార్యాలయానికి ప్రభుత్వ ప్రధాన కార్యదర్శి వెళ్లడమనేది ఎన్నికల ప్రక్రియలో ఒక భాగమని తెలిపారు. ఎల్వీ సుబ్రమణ్యంను సీఎస్‌గా ఎంపిక చేయడంపై చంద్రబాబు చేసిన వ్యాఖ్యలపై ఐఏఎస్‌ అధికారుల సంఘంతో పాటు వివిధ ఉద్యోగుల సంఘాలు స్పందించాల్సిన అవసరం ఉందన్నారు. గతంలో చంద్రబాబు, ఆయన పార్టీ నేతలు అడ్వకేట్‌ జనరల్‌ వేణుగోపాల్‌ విషయంలోనూ, రవాణా శాఖ కమిషనర్‌ బాలసుబ్రమణ్యం విషయంలోనూ వ్యవహరించిన తీరే బ్రాహ్మణులు ఇప్పటికీ మరిచిపోలేకుండా ఉన్నారన్నారు. (చదవండి: సీఎస్‌పై చంద్రబాబు అనుచిత వ్యాఖ్యలు)

సాక్షి, అమరావతి : ఆంధ్రప్రదేశ్‌ ప్రభుత్వ ప్రధాన కార్యదర్శిగా  లంకా వెంకట సుబ్రహ్మణ్యం (ఎల్వీ సుబ్రహ్మణ్యం) శనివారం బాధ్యతలు చేపట్టారు. సచివాలయం ఒకటో బ్లాక్‌లోని సీఎస్‌ కార్యాలయంలో వేదపండితుల ఆశీర్వచనాల మధ్య ఆయన బాధ్యతలు స్వీకరించారు. అనిల్‌చంద్ర పునేఠను తప్పించి ఎల్వీ సుబ్రహ్మణ్యంను కొత్త సీఎస్‌గా నియమించాలని కేంద్ర ఎన్నికల కమిషన్‌ ఇచ్చిన ఆదేశాల మేరకు రాష్ట్ర ప్రభుత్వం ఉత్తర్వులు జారీచేసిన విషయం విదితమే. ఈ నేపథ్యంలో ఉగాది పర్వదినం సందర్భంగా ఉ.10.30 గంటలకు వేదపండితుల ఆశీర్వచనాల మధ్య ఎల్వీ సుబ్రహ్మణ్యం ఛాంబర్‌లోకి ప్రవేశించి బాధ్యతలు స్వీకరించారు. బాధ్యతలు చేపట్టిన వెంటనే రాష్ట్రంలో  సార్వత్రిక ఎన్నికలకు సన్నద్ధతపై కొత్త సీఎస్‌ అధికారులతో సమీక్షించారు. 1983 బ్యాచ్‌కు చెందిన ఆయన గతంలో వైద్య ఆరోగ్య, ఆర్థిక శాఖ ముఖ్య కార్యదర్శి, టీటీడీ ఈవో తదితర కీలక బాధ్యతలు నిర్వహించారు. చదవండి....(ఏపీ సీఎస్‌ పునేఠపై సీఈసీ వేటు)

సాక్షి, అమరావతి : ఆంధ్రప్రదేశ్‌ ప్రభుత్వ ప్రధాన కార్యదర్శిగా నియమితులైన ఎల్వీ సుబ్రహ్మణ్యం శనివారం బాధ్యతలు స్వీకరించారు. అమరావతిలోని ఏపీ సచివాలయంలో ఆయన బాధ్యతలు చేపట్టారు. ఈ సందర్భంగా ఆయన మాట్లాడుతూ.. ఇది కీలకమైన సమయం అన్నారు. ఎన్నికల కమిషన్‌ సూచనలకు అనుగుణంగా పాలన ఉంటుందని స్పష్టం చేశారు. 36 ఏళ్ల సర్వీస్‌లో ఇదో కొనసాగింపు మాత్రమేనని.. ఎలాంటి ఒత్తిడికి గురి కావడం లేదని పేర్కొన్నారు. ఇదిలా ఉండగా ఆంధ్రప్రదేశ్‌ ప్రభుత్వ ప్రధాన కార్యదర్శిగా ఉన్న అనిల్‌ చంద్ర పునేఠాను కేంద్ర ఎన్నికల సంఘం బదిలీ చేసిన సంగతి తెలిసిందే. ఆయన స్థానంలో ఎన్నికల సంఘం ఎల్వీ సుబ్రహ్మణ్యాన్ని నియమించింది.

సాక్షి, అమరావతి: ఏపీ ప్రభుత్వ ప్రధాన కార్యదర్శి అనిల్‌ చంద్ర పునేఠపై కేంద్ర ఎన్నికల కమిషన్‌ కన్నెర్ర చేసింది. తాము తొలగించిన ఏపీ ఇంటెలిజెన్స్‌ డీజీ వెంకటేశ్వరరావును తిరిగి అదే పోస్టులో నియమిస్తూ ఉత్తర్వులు జారీ చేయడాన్ని తీవ్రంగా పరిగణించింది. ఎన్నికల కోడ్‌ అమల్లో ఉండగా సీఎం ఒత్తిళ్ళకు లొంగిపోయి వ్యవహరించడాన్ని తప్పుబట్టింది. వెంకటేశ్వరరావును వెనకేసుకొస్తూ, ఈసీ చర్యను సవాల్‌ చేస్తూ ప్రభుత్వం హైకోర్టుకెళ్లడాన్ని సీరియస్‌గా తీసుకుంది. సీఎస్‌గా పునేఠను తప్పించింది. అంతేకాదు ఎన్నికల విధులకు ఆయన్ను దూరంగా ఉంచాలంటూ ఆదేశించింది. 1983 బ్యాచ్‌కు చెందిన సీనియర్‌ ఐఏఎస్‌ అధికారి ఎల్‌వీ సుబ్రహ్మణ్యంను కొత్త సీఎస్‌గా నియమిస్తూ శుక్రవారం ఉత్తర్వులు జారీ చేసింది. ఎన్నికల కమిషన్‌ ఆదేశాల మేరకు..  క్రీడలు, యువజన సర్వీసుల శాఖ ప్రత్యేక ప్రధాన కార్యదర్శిగా పనిచేస్తున్న ఎల్వీ సుబ్రహ్మణ్యంను ఏపీ ప్రభుత్వ ప్రధాన కార్యదర్శిగా నియమిస్తూ సాధారణ పరిపాలన శాఖ కార్యదర్శి నాగులపల్లి శ్రీకాంత్‌ శుక్రవారం రాత్రి ఉత్తర్వులు జారీ చేశారు. పునేఠకు తదుపరి పోస్టింగ్‌పై తర్వాత ఉత్తర్వులు జారీ చేస్తామని జీవోలో పేర్కొన్నారు. ఎల్వీ సుబ్రహ్మణ్యం గతంలో వైద్య ఆరోగ్య, ఆర్థిక శాఖ ముఖ్య కార్యదర్శి, టీటీడీ ఈవో తదితర కీలక బాధ్యతలు నిర్వహించారు. ఒత్తిళ్లకు లొంగినందుకే.. ఇంటెలిజెన్స్‌ డీజీ.. ఏబీ వెంకటేశ్వరరావును బదిలీ చేస్తూ సీఈసీ జారీ చేసిన ఉత్తర్వులకు అనుగుణంగా జారీ చేసిన జీవోను, ఏపీ ముఖ్యమంత్రి చంద్రబాబు ఒత్తిళ్లకు లొంగిపోయి రద్దు చేయడం.. పునేఠ మెడకు చుట్టుకుందనే అభిప్రాయం వ్యక్తమవుతోంది. తెలుగుదేశం ఏజెంటుగా వ్యవహరిస్తున్నారనే ఆరోపణల నేపథ్యంలో కేంద్ర ఎన్నికల సంఘం ఆయన్ను ఆ బాధ్యతల నుంచి తప్పించిన సంగతి తెలిసిందే. ఈ మేరకు ఏపీ ప్రభుత్వం జీవో జారీ చేసింది. తర్వాత వెంకటేశ్వరరావును తిరిగి అదే పదవిలో నియమిస్తూ పునేఠ మరో జీవో జారీ చేశారు. అంతేకాదు ఎన్నికల సంఘం ఉత్తర్వులను ప్రభుత్వం హైకోర్టులో సవాల్‌ చేసింది. ఈ పరిణామాలన్నిటినీ కమిషన్‌ సీరియస్‌గా తీసుకుంది. ఏపీ ప్రభుత్వం ఒక అధికారిని వెనుకేసుకు రావడానికి గల కారణాలపై ఆరా తీసినట్లు తెలిసింది. ఏబీ వెంకటేశ్వరరావు పూర్తిగా తమకు అనుకూలంగా వ్యవహరిస్తున్న నేపథ్యంలో, ఆయన్ను ఆ పదవి నుంచి ఎట్టి పరిస్థితుల్లోనూ తప్పించకుండా కొనసాగించుకోవాలని భావించిన ఏపీ ముఖ్యమంత్రి.. ఆ మేరకు ఒత్తిడి తెచ్చి సీఎస్‌తో జీవోలు జారీ చేయించారని నిర్ధారణకు వచ్చిన తర్వాతే ఈసీ ఈ చర్య తీసుకున్నట్లు తెలుస్తోంది. తమ ఉత్తర్వులను బేఖాతరు చేస్తూ జీవో ఇచ్చిన నేపథ్యంలో పునేఠను పిలిపించిన కేంద్ర ఎన్నికల కమిషన్‌ వివరణ కోరింది. ఏబీని బదిలీ చేస్తే ప్రభుత్వానికి వచ్చిన నష్టమేమిటి? ఆయనకు అనుకూలంగా ప్రభుత్వం కోర్టుకు వెళ్లడం వెనుక మతలబు ఏమిటి? తదితర అంశాలపై ఇంటెలిజెన్స్‌ నుంచి నివేదికలు తెప్పించుకోవడంతో పాటు పునేఠను కూడా వాకబు చేసింది. సీఎం ఒత్తిడికి లొంగిపోయి తమ ఉత్తర్వులను ఉల్లంఘించిన వారిని సీఎస్‌ స్థానంలో ఉంచితే కమిషన్‌ చులకనవుతుందని, ఎన్నికలు నిష్పక్షపాతంగా జరిగే అవకాశం ఉండదని నిర్ధారణకు వచ్చిన తర్వాతే పునేఠపై చర్య తీసుకున్నట్లు తెలుస్తోంది. ఏకపక్ష నిర్ణయంపై ఆగ్రహం ఇంటెలిజెన్స్‌ డీజీకి ఎన్నికల విధులతో సంబంధం ఉండదని, ఆయన సీఈసీ పరిధిలోకి రారంటూ డీజీపీ పంపిన ఫైల్‌ మేరకు సీఎస్‌ పునేఠ ఉత్తర్వులు జారీ చేయడాన్ని ఎన్నికల కమిషన్‌ తీవ్రంగా పరిగణించింది. ‘ఎవరు ఎన్నికల పరిధిలోకి వస్తారో? ఎవరు ఎన్నికల నిర్వహణ విధుల పరిధిలోకి రారో మాకు తెలియదా? తెలియకుండానే ఉత్తర్వులు జారీ చేయడానికి మాకేమైనా చట్టం తెలియదా? మీరు చెబితే మేం తెలుసుకోవాలా? గతంలో ఉమ్మడి ఆంధ్రప్రదేశ్‌లో అప్పటి డీజీపీ ఎస్‌ఎస్‌పీ యాదవ్‌ను తప్పించి ఏకే మహంతిని డీజీపీగా నియమించిన విషయం పునేఠకు తెలియదా? తెలిసీ కమిషన్‌ నిర్ణయాన్ని ఉల్లంఘించడాన్ని ఎలా అర్థం చేసుకోవాలి? సీఎస్‌ పదవి అంటే సీఎం అడుగులకు మడుగులొత్తుతూ పక్షపాతంగా వ్యవహరించడమా?..’ అన్నరీతిలో కమిషన్‌ వర్గాలు ఆగ్రహం వ్యక్తం చేసినట్లు తెలిసింది. సీఎం రాజకీయ స్వార్థానికి పునేఠ బలి ఏపీ ముఖ్యమంత్రి చంద్రబాబునాయుడి రాజకీయ స్వార్థానికి పునేఠ బలయ్యారని ఐఏఎస్‌ అధికారులు అంటున్నారు. ‘కేంద్ర ఎన్నికల కమిషన్‌ నుంచి ఆదేశాలు వచ్చిన వెంటనే ఇంటెలిజెన్స్‌ డీజీ వెంకటేశ్వరరావు, శ్రీకాకుళం, కడప ఎస్పీలు వెంకటరత్నం, రాహుల్‌దేవ్‌ శర్మలను బదిలీ చేస్తూ పునేఠ జీవో నంబరు 716 జారీ చేశారు. తర్వాత సీఎం ఒత్తిళ్లతో ఇంటెలిజెన్స్‌ డీజీ ఎన్నికల కమిషన్‌ పరిధిలోకి రారంటూ జీవో నంబరు 721 జారీ చేశారు. ఆ వెంటనే డీజీ వెంకటేశ్వరరావు బదిలీ ఉత్తర్వులను రద్దుచేస్తూ.. డీజీ ఇంటెలిజెన్స్‌గానే కొనసాగుతారంటూ జీవో 720 జారీ చేశారు. సీఎం ఒత్తిడి చేసినప్పుడు నిక్కచ్చిగా వ్యవహరించకుండా లొంగిపోయి తప్పుచేయడంవల్లే పునేఠ పదవి పోయింది. నిష్పక్షపాతంగా, నిక్కచ్చిగా వ్యవహరించకపోతే ఎవరికైనా ఇలాంటి పరిస్థితులు రావచ్చు...’ అని పలువురు సీనియర్‌ ఐఏఎస్‌ అధికారులు వ్యాఖ్యానించారు. ఈసీకి ఏపీ డీజీపీ వివరణ వెంకటేశ్వరరావు బదిలీ రద్దు వ్యవహారంలో డీజీపీ ఆర్పీ ఠాకూర్‌ వ్యవహరించిన తీరు కూడా చర్చనీయాంశమయ్యింది. ఈ నేపథ్యంలోనే.. మొదట పునేఠాను పిలిచి వివరణ కోరిన ఈసీ తర్వాత డీజీపీని పిలిచింది. ఆసక్తికరమైన విషయం ఏమిటంటే డీజీపీ ఢిల్లీలో ఈసీని కలిసే ముందే ఆయన్ను ఏసీబీ డీజీ విధుల నుంచి తప్పిస్తూ పునేఠా ఉత్తర్వులు ఇవ్వడం గమనార్హం. కాగా గురువారం ఢిల్లీ వెళ్లిన డీజీపీ కేంద్ర ఎన్నికల సంఘం ముంగిట వివరణ ఇచ్చారు. అయితే ఈసీ ఫుల్‌ బెంచ్‌ లేదని, ఎన్నికల కమిషనర్లలో ఇద్దరు లేకపోవడంతో శుక్రవారం రావాలని డీజీపీకి ఈసీ ఆదేశించింది. దీంతో గురువారం రాత్రి ఢిల్లీలోనే ఉండిపోయిన ఆయన శుక్రవారం మరోమారు కేంద్ర ఎన్నికల సంఘాన్ని కలిశారు. సీఈసీ కమిషనర్లు అశోక్‌ లావాస్, సుశీల్‌ చంద్రలను కలిసి వివరణ ఇచ్చారు.  డీజీపీగాను, ఏసీబీ డీజీగాను రెండు విధులు నిర్వహించిన మీరు ఏబీ వెంకటేశ్వరరావుకు అనుకూలంగా జీవో ఇవ్వడం కోసం సీఎస్‌పై ఒత్తిడి తెచ్చి ఎందుకు నోట్‌ఫైల్‌ ఇవ్వాల్సి వచ్చిందని వారు డీజీపీని ప్రశ్నించినట్టు సమాచారం. ఏబీ వెంకటేశ్వరరావును తప్పించినప్పటికీ ఆయన అనధికారికంగా బాధ్యతలు నిర్వర్తిస్తున్నారనే ఫిర్యాదులపై కూడా డీజీపీని ఈసీ వివరణ కోరినట్టు తెలిసింది. 

సాక్షి, అమరావతి: ఆంధ్రప్రదేశ్‌ చీఫ్‌ సెక్రటరీ అనిల్‌ చంద్రా పునేఠాను ఎన్నికల సంఘం బదిలీ చేసింది. పునేఠాను ఎన్నికల విధుల నుంచి తప్పిస్తూ శుక్రవారం ఈసీ నిర్ణయం తీసుకుంది. ఆయన స్థానంలో నూతన సీఎస్‌గా ఎల్‌వీ సుబ్రహ్మణ్యంను నియమిస్తూ ఉత్తర్వులు జారీచేసింది. ఎన్నికల ప్రక్రియ ముగిసేవరకు ఎల్‌వీ సుబ్రహ్మణ్యం సీఎస్‌గా కొనసాగనున్నారు. ఎన్నికల సంఘం ఆదేశాలను బేఖాతరు చేస్తూ ఏబీ వెంకటేశ్వరరావు బదిలీని పునేఠా అడ్డుకున్న సంగతి తెలిసిందే. వెంకటేశ్వరరావు బదిలీ వ్యవహారంలో పునేఠా విరుద్ద జీవోలు జారీచేశారు. చంద్రబాబు ఒత్తిడికి తలొగ్గినట్టు పునేఠాపై ఆరోపణలు ఉన్నాయి. కాగా,1983 బ్యాచ్‌కు చెందిన ఎల్‌వీ సుబ్రహ్మణ్యం ఏపీలో అందరికంటే సీనియర్‌ అధికారి.  ఎల్‌వీ సుబ్రహ్మణ్యం   

సాక్షి, న్యూఢిల్లీ: రాష్ట్ర డైరెక్టర్‌ జనరల్‌ ఆఫ్‌ ఇంటెలిజెన్స్‌ ఏబీ వెంకటేశ్వరరావును తప్పించాలని, ఆయనకు ఎలాంటి ఎన్నికల విధులు అప్పగించరాదని తాము జారీచేసిన ఉత్తర్వులను ఉల్లంఘించి ఆయనను తిరిగి అదే పదవిలో నియమిస్తూ  ప్రభుత్వ ప్రధాన కార్యదర్శి (సీఎస్‌) అనిల్‌చంద్ర పునేత జీవో జారీ చేయడంపై కేంద్ర ఎన్నికల కమిషన్‌ (ఈసీ) ఆగ్రహం వ్యక్తం చేసింది. కమిషన్‌ ఆదేశాల మేరకు వెంకటేశ్వరరావును తప్పిస్తూ రాష్ట్ర ప్రభుత్వం జారీ చేసిన జీవో 716ను ఎందుకు రద్దు చేయాల్సి వచ్చింది? తిరిగి ఆయననే డీజీ ఇంటెలిజెన్స్‌గా నియమిస్తూ జీవో 720 ఎందుకు జారీ చేశారు? ఎన్నికల కమిషన్‌ ఆదేశాలను తు.చ. తప్పకుండా పాటించాల్సిన రాష్ట్ర ప్రభుత్వమే ఉల్లంఘించడాన్ని ఎలా పరిగణించాలి? అని ఈసీ ప్రశ్నించింది. ఈ మేరకు ప్రభుత్వ ప్రధాన కార్యదర్శి (సీఎస్‌) అనిల్‌చంద్ర పునేతను ఈసీ వివరణ కోరింది. దీంతో అనిల్‌చంద్ర పునేత సోమవారం ఢిల్లీలో ఈసీని కలిసి వివరణ ఇచ్చారు. ‘కమిషన్‌ ఆదేశాలు వచ్చిన తక్షణమే ఇంటెలిజెన్స్‌ డీజీ వెంకటేశ్వరరావు, శ్రీకాకుళం, వైఎస్సార్‌ కడప జిల్లాల ఎస్పీలు వెంకటరత్నం, రాహూల్‌ దేవ్‌ శర్మను బదిలీ చేస్తూ జీవో నంబరు 716  జారీ చేశాం. తర్వాత ఇంటెలిజెన్స్‌ డీజీ ఎన్నికల కమిషన్‌ పరిధిలోకి రారంటూ డైరెక్టర్‌ జనరల్‌ ఆఫ్‌ పోలీస్‌ (డీజీపీ) పంపిన నోట్‌ ఫైల్‌ మేరకే జీవో 721 జారీ చేశాం. దీని ప్రకారమే ఇంటెలిజెన్స్‌ డీజీ వెంకటేశ్వరరావు బదిలీని రద్దు చేసి మిగిలిన ఇద్దరు ఎస్పీల బదిలీలను యథాతథంగా కొనసాగిస్తున్నట్లు జీవో నంబరు 720 జారీ చేశాం ’ అని సీఎస్‌ అనిల్‌చంద్ర పునేత వివరణ ఇచ్చినట్లు తెలిసింది. డీజీపీ నోట్‌ ఫైల్‌ పంపితే ఆ విషయం మా (ఈసీ) దృష్టికి తీసుకొచ్చి అనుమతి తీసుకోకుండా బదిలీ ఉత్తర్వులను ఎలా రద్దు చేస్తారు? డీజీపీగానీ, మరొకరుగానీ ఏది చెబితే అది చేసేస్తారా? ఎన్నికల కమిషన్‌ నిర్ణయాన్ని రాష్ట్ర ప్రభుత్వం కోర్టులో ఎలా సవాల్‌ చేస్తుంది? అని ఈసీ నిలదీసినట్లు తెలిసింది. ఎన్నికల కమిషన్‌ అనుమతి తీసుకోకుండా జీవో ఇవ్వడం తొందరపాటు చర్యేనని, ఇకమీదట ఇలా జరగనీయబోమంటూ సీఎస్‌ సంజాయిషీ ఇచ్చినట్లు సమాచారం. ఎన్నికల కమిషన్‌ ఆదేశాల మేరకు వెంకటేశ్వరరావును బదిలీచేసిన ప్రభుత్వం 24 గంటలు గడవకముందే ఆయనను తిరిగి అదే స్థానంలో నియమించడం, కమిషన్‌ నిర్ణయాన్ని సాక్షాత్తూ రాష్ట్ర ప్రభుత్వమే హైకోర్టులో సవాల్‌ చేయడం ఈసీకి ఆగ్రహం తెప్పించింది. ఎన్నికల కమిషన్‌ ఆదేశాల్లో జోక్యం చేసుకునేందుకు హైకోర్టు నిరాకరించడమే కాకుండా ఈసీ ఉత్తర్వులను యథాతథంగా అమలు చేయాలని కోర్టు ఆదేశించిన నేపథ్యంలో ప్రభుత్వం మళ్లీ వెంకటేశ్వరరావును ఇంటెలిజెన్స్‌ డీజీ పోస్టు నుంచి తప్పించి పోలీస్‌ హెడ్‌క్వార్టర్స్‌కు అటాచ్‌ చేస్తూ జీవో ఇచ్చింది. ఈ నేపథ్యంలో రాష్ట్ర ప్రభుత్వం తీరును తప్పుబడుతూ వివరణ అడగడంతోపాటు ఇందుకు దారితీసిన పరిణామాలు, రాష్ట్రంలో జరుగుతున్న పరిస్థితులను కమిషన్‌ అధికారులు వాకబు చేసినట్లు సమాచారం.  

సాక్షి, అమరావతి : రాష్ట్ర పారిశ్రామిక పెట్టుబడుల ప్రోత్సాహక మండలి(ఎస్‌ఐపీబీ) సమావేశాలను ముఖ్యమంత్రి చంద్రబాబు, ఆయన తనయుడు, ఐటీ శాఖ మంత్రి నారా లోకేశ్‌ కలిసి నిర్వహిస్తుండడం మంత్రుల్లో, అధికార యంత్రాంగంలో చర్చనీయాంశంగా మారింది. ఎన్నికల ముందు గత నెల 9వ తేదీన, ఈ నెల 6వ తేదీన ఎస్‌ఐపీబీ సమావేశాలు నిర్వహించారు. పలు ఐటీ కంపెనీలకు నిబంధనలకు విరుద్ధంగా భారీ రాయితీలు ఇచ్చేశారు. ఎస్‌ఐపీబీకి కన్వీనర్‌గా ఉన్న రాష్ట్ర ప్రభుత్వ ప్రధాన కార్యదర్శి(సీఎస్‌) ఈ రెండు సమావేశాలకు హాజరు కాకపోవడం గమనార్హం. ఎస్‌ఐపీబీ సమావేశాలంటే పెదబాబు, చినబాబుల ఇష్టారాజ్యంగా మారిందని అధికార వర్గాలు వ్యాఖ్యానిస్తున్నాయి.  అందుబాటులో ఉండి కూడా.. ప్రభుత్వ ప్రధాన కార్యదర్శి, ఆర్థిక శాఖ కార్యదర్శి లేకుండా ఎస్‌ఐపీబీ సమావేశాలు నిర్వహించిన దాఖలాలు గత ప్రభుత్వాల హయాంలో ఎప్పుడూ లేవని అధికారులు గుర్తుచేస్తున్నారు. వచ్చే పదేళ్లపాటు పలు ఐటీ కంపెనీలకు రాయితీలు ఇస్తూ ఎస్‌ఐపీబీ సమావేశాల్లో నిర్ణయాలు తీసుకున్నారని అంటున్నారు. ఎస్‌ఐపీబీకి ముఖ్యమంత్రి అధ్యక్షత వహిస్తారు. సభ్యులుగా ఆర్థిక, రెవెన్యూ, ఐటీ, మున్సిపల్, వ్యవసాయ, కార్మిక, ఉపాధి, శిక్షణ, పరిశ్రమలు, ఇంధన శాఖ మంత్రులు, ఆయా శాఖల కార్యదర్శులు ఉంటారు. సభ్య కన్వీనర్‌గా ప్రభుత్వ ప్రధాన కార్యదర్శి(సీఎస్‌) ఉంటారని రాష్ట్ర ప్రభుత్వం 2017 ఏప్రిల్‌ 20న జీవో నం.51 జారీ చేసింది. అయితే, ఫిబ్రవరి 9న నిర్వహించిన ఎస్‌ఐపీబీ సమావేశంలో ముఖ్యమంత్రి చంద్రబాబు, ఐటీ శాఖ మంత్రి, సీఎం కార్యాలయ ముఖ్యకార్యదర్శి సాయి ప్రసాద్, ఐటీ శాఖ ముఖ్యకార్యదర్శి విజయానంద్, పరిశ్రమల శాఖ కార్యదర్శి ఆరోఖ్యరాజ్, ఏపీఐఐసీ వైస్‌ చైర్మన్‌ అండ్‌ మేనేజింగ్‌ డైరెక్టర్‌ అహ్మద్‌బాబు మాత్రమే పాల్గొన్నారు. మిగతా మంత్రులు, ప్రభుత్వ ప్రధాన కార్యదర్శి, సంబంధిత శాఖల కార్యదర్శులు పాల్గొనలేదు. అలాగే ఈ నెల 6న నిర్వహించిన ఎస్‌ఐపీబీ సమావేశానికి ప్రభుత్వ ప్రధాన కార్యదర్శి, ఆర్థిక శాఖ కార్యదర్శి అందుబాటులో ఉండి కూడా హాజరు కాలేదు. మిగతా సభ్యులైన మంత్రులు కూడా హాజరు కాలేదు. ఈ సమావేశంలో ఐటీ శాఖ ముఖ్యకార్యదర్శి విజయానంద్, సీఎం కార్యాలయ కార్యదర్శి గిరిజాశంకర్, ఈడీబీ సీఈవో జాస్తి కృష్ణకిషోర్‌ మాత్రమే పాల్గొన్నారు.  సమావేశం కంటే ముందే నిర్ణయాలు  ఎన్నికల ముందు హడావిడిగా ఎస్‌ఐపీబీ సమావేశాలు నిర్వహిస్తూ నిబంధనలకు విరుద్ధంగా నిర్ణయాలు తీసుకుంటున్నందువల్లే ప్రభుత్వ ప్రధాన కార్యదర్శితోపాటు ఆర్థిక శాఖ కార్యదర్శి హాజరుకాలేదని ఉన్నతస్థాయి వర్గాలు చెబుతున్నాయి. సీఎం చంద్రబాబు, ఆయన కుమారుడు లోకేశ్‌ ఎవరికి, ఏ కంపెనీలకు ఏ ధరకు భూములు ఇవ్వాలి, ఎన్ని రాయితీలు ఇవ్వాలనే విషయాన్ని ముందుగానే నిర్ణయించేస్తున్నారని, తరువాత ఎస్‌ఐపీబీ సమావేశం ఏర్పాటుచేసి అందులో ఆమోదింపజేస్తున్నారని, అలాంటి సమావేశాలకు వెళ్లడం కంటే దూరంగా ఉండటమే మేలని మంత్రులు భావిస్తున్నట్లు సమాచారం. అందుకే వారు హాజరుకావడం లేదని తెలుస్తోంది.   

సాక్షి, అమరావతి: విభజన తర్వాత రాష్ట్రంలో చాలా సమస్యలు ఉన్నందున ప్రస్తుతం ప్రభుత్వ ప్రధాన కార్యదర్శి(సీఎస్‌) పదవిని సమర్థంగా నిర్వహించడం సవాలు వంటిదని అనిల్‌ చంద్ర పునేఠ పేర్కొన్నారు. దినేష్‌ కుమార్‌ నుంచి నూతన ప్రభుత్వ ప్రధాన కార్యదర్శిగా ఆయన ఆదివారం మధ్యాహ్నం 3.45 గంటలకు బాధ్యతలు స్వీకరించారు. ఈ సందర్భంగా పునేఠ మీడియాతో మాట్లాడారు. ‘ఇప్పటికి 34 ఏళ్ల ఉద్యోగ జీవితం పూర్తయి 35వ ఏట సర్వీసులో అడుగుపెట్టాను. 2015 నుంచి ఇప్పటి వరకూ రాష్ట్ర భూపరిపాలన ప్రధాన కమిషనర్‌గా పనిచేశాను. నా సేవలను గుర్తించి అత్యంత బాధ్యతాయుతమైన సీఎస్‌ పదవి ఇవ్వడం సంతోషంగా ఉంది. నాపై మరింత గురుతర బాధ్యత పెరిగింది. ఆంధ్రప్రదేశ్‌ ప్రజలు ఆదాయాన్ని, సంతోష సూచికను పెంచాలి. ప్రజలకు అన్ని రకాల సౌకర్యాలు కల్పించేందుకు కృషి చేస్తా. ప్రభుత్వ పథకాల ఫలితాలపై అధికార యంత్రాంగం దృష్టి పెట్టాలి. ప్రతిదానిని సమీక్షించి లక్ష్యాలు నిర్దేశించుకుంటాం. టీమ్‌వర్క్‌తో రాష్ట్ర పగతికి పాటుపడతాం’ అని పునేఠ వివరించారు. అన్ని విభాగాల మధ్య సమన్వయంతో ఉత్తమ ఫలితాలు సాధించి తద్వారా రాష్ట్ర ప్రగతికి కృషి చేస్తామన్నారు.   తొలిపోస్టింగ్‌లోనే అత్యంత ఆనందం ‘నా ఉద్యోగ జీవితంలో సంతోషం కలిగించిన, ఆనందం మిగిల్చిన పనులు అనేకం ఉన్నాయి. చెప్పాలంటే అన్నీ సంతోషం కలిగించాయి’ అని ఓ విలేకరి అడిగిన ప్రశ్నకు పునేఠ జవాబిచ్చారు. అన్నింటికంటే ఎక్కువ ఆనందం, సంతృప్తి కలిగించింది ఏమిటని ప్రశ్నించగా.. ‘వైఎస్సార్‌ జిల్లా రాజంపేటలో సబ్‌ కలెక్టరుగా నేను ఉద్యోగ జీవితం ఆరంభించాను. ఆ తర్వాత పలు జిల్లాల్లో కలెక్టరుగాను, వివిధ శాఖల్లో కార్యదర్శి, ముఖ్యకార్యదర్శి, ప్రత్యేక ప్రధాన కార్యదర్శిగాను పనిచేశాను. రాజంపేటలో సబ్‌ కలెక్టరుగా ఉన్నప్పుడు నాకు వచ్చిన వినతుల్లో ఒక్కటి కూడా పెండింగ్‌లో పెట్టకుండా అందరికీ సాధ్యమైన మేలు చేయడం నాకు అత్యంత మరపురాని ఆనందం మిగిల్చింది. ఇంటి స్థలాల కోసం అర్జీలిచ్చిన ప్రతి ఒక్కరికీ ఐదు సెంట్ల స్థలానికి పట్టాలిచ్చాను. వ్యవసాయ భూమి కోసం దరఖాస్తు చేసిన వారికి 3 నుంచి ఐదు ఎకరాల చొప్పున భూమి పట్టాలు ఇచ్చాను’ అని పునేఠ  గుర్తు చేసుకున్నారు.  కాగా, సీఎస్‌గా బాధ్యతలు స్వీకరించే సమయంలో అనిల్‌ చంద్ర పునేఠ ఆదిదంపతులైన పార్వతీ పరమేశ్వరుల పటాన్ని పట్టుకుని చాంబర్‌లోకి ప్రవేశించారు. అనంతరం దినేష్‌ కుమార్‌ నుంచి బాధ్యతలు స్వీకరించారు. ఈ సందర్భంగా పునేఠను దినేష్‌ కుమార్‌ ఆలింగనం చేసుకుని అభినందించారు. 

సాక్షి, అమరావతి: ఆంధ్రప్రదేశ్‌ ప్రభుత్వ నూతన ప్రధాన కార్యదర్శిగా అనిల్‌ చంద్ర పునేత నియామకం వివాదాస్పదంగా మారింది. సీనియరిటీని పక్కకుపెట్టి ఏపీ సీఎం చంద్రబాబు తీసుకున్న నిర్ణయంపై రాష్ట్రంలోని పలువురు ఐఏఎస్‌లు అసంతృప్తి వ్యక్తం చేస్తున్నారు.  ప్రస్తుతం ఉన్న ఐఏఎస్‌లలో 1983 బ్యాచ్‌కు చెందిన ఎల్వీ సుబ్రమణ్యం అందరికంటే సీనియర్‌ అయినప్పటికీ చంద్రబాబు ఆయనకు సీఎస్‌గా అవకాశం ఇవ్వలేదు. ఆయనను కాదని.. 1984 బ్యాచ్‌కు చెందిన అనిల్‌ చంద్రను సీఎస్‌గా నియమించడంపై సర్వత్రా విమర్శలు వెల్లువెత్తున్నాయి. గతంలో కూడా చంద్రబాబు ఎల్వీ సుబ్రమణ్యంకు అవకాశం ఇవ్వలేదు. ఈ విధంగా సీనియర్‌ అధికారులను అవమానించడంపై ఏపీలోని ఐఏఎస్‌ అధికారుల్లో తీవ్ర అసంతృప్తి నెలకొంది. కాగా, ఆదివారం ఏపీ నూతన సీఎస్‌గా అనిల్‌ చంద్ర పునేత బాధ్యతలు చేపట్టిన సంగతి తెలిసిందే. మాజీ సీఎస్‌ దినేష్‌కుమార్‌ చేతులు మీదుగా ఆయన బాధ్యతలను స్వీకరించారు. అనిల్‌ చంద్ర 2019 మే 31వరకు ఆ పదవిలో కొనసాగనున్నారు.

సాక్షి, అమరావతి : ఆంధ్రపదేశ్‌ ప్రభుత్వ నూతన ప్రధాన కార్యదర్శి(సీఎస్‌)గా అనిల్‌ చంద్ర పునేత బాధ్యతలు స్వీకరించారు. ఆదివారం మాజీ సీఎస్‌ దినేష్‌కుమార్‌ చేతులు మీదుగా ఆయన బాధ్యతలను చేపట్టారు. ఈ సందర్భంగా పలువురు ఉన్నతాధికారులు సీఎస్‌ను కలిసి అభినందనలను తెలిపారు. తిరుమల, శ్రీశైలం, దుర్గ గుడి వేదపండితులు పునేతను ఆశ్వీరదించారు. ప్రజల సంతోషం, ఆర్థిక స్థితిగతుల పెంపుదల కోసం కృషి చేస్తాననని పునేత చెప్పారు. టీం వర్క్‌తో ముందుకు వెళ్తు ప్రజల అభివృద్ధి కోసం పనిచేస్తానన్నారు. 2019 మే 31వరకు అనిల్‌ చంద్ర పునేత సీఎస్‌గా కొనసాగనున్నారు.


 నెల్లూరు(పొగతోట):
 స్మార్ట్‌ పల్స్‌ సర్వే త్వరగా పూర్తి చేసేలా చర్యలు చేపట్టాలని సీసీఎల్‌ఏ అనిల్‌చంద్రపునేఠ జిల్లా అధికారులను ఆదేశించారు. మంగళవారం విజయవాడ నుంచి జిల్లా అధికారులతో నిర్వహించిన వీడియో కాన్ఫరెన్స్‌లో సీసీఎల్‌ఏ మాట్లాడారు. వంద శాతం సర్వే పూర్తి చేసి వివరాలు అప్‌లోడ్‌ చేయాలన్నారు. ఆక్రమణలకు గురైన ప్రభుత్వ భూములను గుర్తించి వాటిని స్వాధీనం చేసుకోవాలని తెలిపారు. ఈ కాన్ఫరెన్స్‌లో జాయింట్‌ కలెక్టర్‌ మహమ్మద్‌ఇంతియాజ్, డీఆర్‌ఓ మార్కండేయులు, ఆత్మకూరు ఆర్‌డీఓ ఎంవీ రమణ పాల్గొన్నారు.
  
  


 నెల్లూరు(పొగతోట): స్మార్ట్‌ పల్స్‌ సర్వేను నిర్దేశించిన సమయంలో పూర్తి చేసేలా చర్యలు చేపట్టాలని సీసీఎల్‌ఏ అనిల్‌చంద్రపునేట జిల్లా అధికారులను ఆదేశించారు. శుక్రవారం విజయవాడ నుంచి జిల్లా అ«ధికారులతో నిర్వహించిన వీడియో కాన్ఫరెన్స్‌లో ఆయన మాట్లాడారు. పేర్లు నమోదు చేసుకోని ప్రజలకు అవగాహన కలిగేలా ప్రచారం నిర్వహించాలన్నారు. ఇప్పటి వరకు 72 శాతం మాత్రమే సర్వే పూర్తి అయిందన్నారు. గ్రామాల్లో లేని వారి పేర్లు నమోదు చేసుకుని, వారి కోసం ప్రత్యేక దృష్టి సారించాలన్నారు. ప్రత్యేక ప్రాంతాల్లో ఎన్యూమరేటర్లను అందుబాటులో ఉంచి పేర్లు నమోదు చేయాలని తెలిపారు. ఈ కాన్ఫరెన్స్‌లో జాయింట్‌ కలెక్టర్‌ ఏ మహమ్మద్‌ఇంతియాజ్, డీఆర్‌ఓ మార్కండేయులు, ఆత్మకూరు ఆర్‌డీఓ ఎంవీ రమణ పాల్గొన్నారు.
  
  


 విజయవాడ : విజయవాడ నగరంలో మూడు ప్రభుత్వ కార్యాలయాలు బుధవారం ప్రారంభమైయ్యాయి. ఆంధ్రప్రదేశ్ హౌసింగ్ కార్పొరేషన్ కార్యాలయాన్ని గృహనిర్మాణ శాఖ మంత్రి కె. మృణాళిని ప్రారంభించారు. అలాగే ఇబ్రహీంపట్నంలో ఆర్ అండ్ బీ కార్యాలయాన్ని రవాణాశాఖ మంత్రి శిద్ధా రాఘవరావు ప్రారంభించారు. అలాగే భూపరిపాలన కార్యాలయాన్ని ఆ శాఖ ప్రధాన కమిషనర్ అనిల్ చంద్ర పునీత ప్రారంభించారు.


 హైదరాబాద్: ఇద్దరు ఐఏఎస్ అధికారులకు రాష్ట్ర ప్రభుత్వం అదనపు బాధ్యతలు అప్పగించింది. ఈ మేరకు ప్రభుత్వ ప్రధాన కార్యదర్శి ఐవైఆర్ కృష్ణారావు శుక్రవారం ఉత్తర్వులు జారీ చేశారు. రాష్ట్ర భూపరిపాలన ప్రధాన కమిషనర్ అనిల్‌చంద్ర పునేఠాకు కమిషనర్ అప్పీల్స్‌గా పూర్తి స్థాయి అదనపు బాధ్యతలు అప్పగించారు. స్టాంపులు, రిజిస్ట్రేషన్ల శాఖ డెరైక్టర్ వెంకట్రామిరెడ్డికి సర్వే అండ్ సెటిల్‌మెంట్, ల్యాండ్ రికార్డ్స్ డెరైక్టరుగా పూర్తి స్థాయి అదనపు బాధ్యతలిచ్చారు.


 విజయనగరం వ్యవసాయం, న్యూస్‌లైన్:  రాష్ట్ర వ్యవసాయశాఖ ముఖ్యకార్యదర్శి అనిల్ చంద్ర పునేఠా శుక్రవారం కలెక్టరేట్ మినీ కాన్ఫరెన్స్ హాల్లో ఆ శాఖాధికారులతో గుట్టుగా సమీక్ష సమావేశాన్ని నిర్వహించారు. లోపాలు బయటపడతాయనో మరే కారణమో తెలియదు గానీ సమావేశానికి మీడియాను అనుమతించలేదు. లోపలికి వెళ్లిన ఒకరిద్దరు మీడియా ప్రతినిధులను సైతం బయటకు పంపించేశారు. సుమారు రెండుగంటల పాటు పునేఠా వ్యవసాయాధికారులతో సమీక్ష నిర్వహించారు.  
  డొల్లతనం బయటపడుతుందనే...
  వ్యవసాయాధికారుల డొల్లతనం బయటపడుతుందనే మీడియాను లోపలికి అనుమతించలేదనే ఆరోపణులు వినిపిస్తున్నాయి. పాత్రికేయులు సమావేశంలో ఉంటే లోపాలను ఎత్తిచూపుతారని, బండారం బయటపడుతుందనే భావనతో లోపలికి అనుమతించలేదని విమర్శలు వ్యక్తమవుతున్నాయి. జిల్లాలో ప్రకృతి వైపరీత్యాల వల్ల నష్టపోయిన రైతులకు పరిహారం అందించడంలో తీవ్ర జాప్యం జరుగుతోంది. అదే విధంగా పంట నష్టం అంచనా వేయడంలోనూ అధికారులు అలసత్వం వహిస్తున్నారు. రాజకీయ సిఫారసులకు అధిక ప్రాధాన్యం ఇస్తున్నారనే ఆరోపణలు ఉన్నాయి.  పొలంబడి, వర్మీకంపోస్టు యూనిట్ వంటి పథకాలు తీరు ఆధ్వానంగా ఉంది. దీనికి తోడు వీటన్నింటి గురించి అధికారులను ప్రశ్నిస్తే పత్రికలు, మీడియాలో వస్తుం దని ఆందోళనతో ఈ సమీక్షను మీడియా ప్రతి నిధులకు ప్రవేశం నిరాకరించినట్టు తెలిసింది.
  అధికారులపై ఆగ్రహం
  పథకాల నిర్వహణ, ఇతర విషయాల్లో నిర్లక్ష్యం వహించిన అధికారులపై పునేఠా తీవ్ర ఆగ్రహం వ్యక్తం చేశారు. ఆత్మ పథకం ద్వారా గత ఏడాది ఏయే కార్యక్రమలు నిర్వహించారని ఆత్మ పీడీ రాజబాబుని  ముఖ్యకార్యదర్శి పునేఠా ప్రశ్నించారని, దీనికి సరైనా ఆయన సమధానం చెప్పలేనట్టు తెలిసింది. అదేవిధంగా రైతు శిక్షణ కేంద్రం ద్వారా గత ఏడాది ఎంత మందికి శిక్షణ ఇచ్చారని , ఏయే అంశాలపై శిక్షణ ఇచ్చారని డీడీ ఆశాదేవిని ప్రశ్నించగా ఆమె కూడా సరైన సమాధానం చెప్పలేకపోయినట్టు తెలిసింది. దీంతో వీరిద్దరిపై పునేఠా ఆగ్రహం వ్యక్తం చేసినట్టు సమాచారం.  నిర్లక్ష్యంగా పనిచేస్తే సహించేదిలేదని, వృత్తి పట్ల అంకితభావంతో పనిచేయాలని, మొక్కుబడిగా పనిచేయాలనుకుంటే ఊరుకునేది లేదని హెచ్చరించినట్టు తెలిసింది. మొక్కుబడి పర్యటనలను మాని రైతులకు దీర్ఘకాలికంగా ఉపయోగపడే పనులు చేపట్టాలని సూచించారు. క్షేత్ర స్థాయిలో పర్యటించి, వ్యవసాయశాఖ అనగానే రైతులకు అండగా ఉంటుందనే భావనను తీసుకురావాలని చెప్పారు.