ఖరగ్పూర్: దేశంలోనే తొలి ఇండియన్ ఇన్స్టిట్యూట్ ఆఫ్ టెక్నాలజీ (ఐఐటీ) అయిన ఖరగ్పూర్ ఐఐటీ స్థాపించి 75 ఏళ్లు పూర్తయిన సందర్భంగా ప్రధానమంత్రి నరేంద్ర మోదీ శనివారం ప్రత్యేక స్మారక నాణేన్ని ఆవిష్కరించారు. సంస్థ ప్లాటినం జూబ్లీ వేడుకల్లో భాగంగా ఈ కార్యక్రమం నిర్వహించారు.
1951లో ఏర్పాటైన ఐఐటీ ఖరగ్పూర్ దేశంలో సాంకేతిక విద్య, పరిశోధన, ఆవిష్కరణల అభివృద్ధిలో కీలక పాత్ర పోషిస్తోంది. ఈ సందర్భంగా 'వికసిత్ భారత్ కోసం 75 గొంతుకలు' కార్యక్రమంలో భాగంగా 75 మంది విద్యార్థులతో మోదీ ముచ్చటించారు. సంస్థ అభివృద్ధి చేసిన వైద్య సాంకేతిక ఆవిష్కరణలు, మారుమూల ప్రాంతాలకు వైద్య సేవలు అందించే పరిష్కారాలను పరిశీలించారు.


