ప్రపంచకప్‌ చరిత్రలో ఎవరికీ సాధ్యంకాని ఓ అత్యంత అరుదైన ప్రపంచ రికార్డు టీమిండియా స్టార్‌ క్రికెటర్‌ విరాట్‌ కోహ్లి పేరిట ఉంది. 2019 వరల్డ్‌కప్‌లో టీమిండియా కెప్టెన్‌గా కోహ్లి వరుసగా ఐదు హాఫ్‌ సెంచరీలు చేశాడు. అప్పటివరకు ప్రపంచకప్‌ టోర్నీల్లో ఏ కెప్టెన్‌ ఈ ఘనతను సాధించలేదు. నాటి వరల్డ్‌కప్‌లో సౌతాఫ్రికాతో జరిగిన తొలి మ్యాచ్‌లో 18 పరుగులు మాత్రమే చేసి ఔటైన కోహ్లి ఆతర్వాత జరిగిన ఐదు మ్యాచ్‌ల్లో హాఫ్‌ సెంచరీలు చేసి ఇరగదీశాడు. ఆస్ట్రేలియాపై 82, పాకిస్తాన్‌పై 77, వెస్టిండీస్‌పై 72, ఆఫ్ఘనిస్తాన్‌పై 77, ఇంగ్లండ్‌పై 66 పరుగులు చేసిన కోహ్లి  ఈ వరల్డ్‌కప్‌లో సెంచరీ మాత్రం చేయలేకపోయాడు. వరల్డ్‌కప్‌ టోర్నీల్లో కెప్టెన్‌ హోదాలో వరుస హాఫ్‌ సెంచరీ రికార్డు గతంలో ఆస్ట్రేలియా ఆరోన్‌ ఫించ్‌, సౌతాఫ్రికా గేమ్‌ స్మిత్‌ పేరిట ఉండింది. వీరిద్దరు వరల్డ్‌కప్‌ టోర్నీల్లో కెప్టెన్లుగా వరుసగా నాలుగు హాఫ్‌ సెంచరీలు చేశారు. ఇదిలా ఉంటే, 2023 ప్రపంచకప్‌ భారత్‌ వేదికగా అక్టోబర్‌ 5 నుంచి ప్రారంభం కానుంది. అహ్మదాబాద్‌లోని నరేంద్ర మోదీ స్టేడియంలో డిఫెండింగ్‌ ఛాంపియన్స్‌ ఇంగ్లండ్‌- గత ఎడిషన్‌ రన్నరప్‌ న్యూజిలాండ్‌ మధ్య మ్యాచ్‌తో వరల్డ్‌కప్‌ స్టార్ట్‌ అవుతుంది. వరల్డ్‌కప్‌ కోసం ఇప్పటికే అన్ని జట్లు భారత్‌కు చేరుకున్నాయి. ప్రస్తుతం అన్ని జట్లు వార్మప్‌ మ్యాచ్‌లతో బిజీగా ఉన్నాయి. అక్టోబర్‌ 8న జరిగే మ్యాచ్‌తో ఈ వరల్డ్‌కప్‌లో భారత్‌, ఆస్ట్రేలియా జర్నీ స్టార్ట్‌ అవుతుంది. భారత్-ఆస్ట్రేలియా మ్యాచ్‌కు చెన్నై వేదిక కానుంది. ఈనెల 14న టీమిండియా పాకిస్తాన్‌తో తలపడుతుంది. అహ్మదాబాద్‌ వేదికగా ఈ మ్యాచ్‌ జరుగనుంది. 

వన్డే వరల్డ్‌కప్‌ 2023 కోసం భారత సెలెక్టర్లు ఇవాళ (సెప్టెంబర్‌ 5) టీమిండియాను ప్రకటించారు. 15 మంది సభ్యుల ఈ జట్టుకు రోహిత్‌ శర్మ నాయకత్వం వహించనున్నాడు. యువకులు, అనుభవజ్ఞులతో ఈ జట్టు సమతూకంగా ఉంది. తిలక్‌ వర్మ, సంజూ శాంసన్‌, యుజ్వేంద్ర చహల్‌లకు అందరూ ఊహించినట్టుగానే మొండిచెయ్యి ఎదురైంది.  ఇక్కడ ఓ ఆసక్తికర విషయం ఏంటంటే.. గత వరల్డ్‌కప్‌లో ఆడిన సగం మంది సభ్యులు (ఏడుగురు) ప్రస్తుతం ప్రకటించిన జట్టులో లేరు. అలాగే టీమిండియాకు కెప్టెన్‌ కూడా మారాడు. 2019 ప్రపంచకప్‌లో టీమిండియాకు విరాట్‌ కోహ్లి సారథ్యం వహించగా.. అక్టోబర్‌ 5 నుంచి ప్రారంభంకాబోయే 2023 వరల్డ్‌కప్‌లో రోహిత్‌ శర్మ టీమిండియాను ముందుండి నడిపించనున్నాడు. గత వరల్డ్‌కప్‌ ఆడిన ఎంఎస్‌ ధోని పూర్తిగా ఆట నుంచి తప్పుకోగా.. శిఖర్‌ ధవన్‌, విజయ్‌ శంకర్‌, కేదార్‌ జాదవ్‌, దినేశ్‌ కార్తీక్‌, యుజ్వేంద్ర చహల్‌, భువనేశ్వర్‌ కుమార్‌లు జట్టులో చోటు దక్కించుకోలేకపోయారు. వీరి స్థానల్లో ఇషాన్‌ కిషన్‌, శుభ్‌మన్‌ గిల్‌, శార్దూల్‌ ఠాకూర్‌, శ్రేయస్‌ అయ్యర్‌, సూర్యకుమార్‌ యాదవ్‌, అక్షర్‌ పటేల్‌, మహ్మద్‌ సిరాజ్‌ జట్టులోకి వచ్చారు. ఈ ఏడుగురికి ఇది తొలి వరల్డ్‌కప్‌ కావడం విశేషం.  వరల్డ్‌కప్‌ కోసం ప్రకటించిన భారత జట్టు: రోహిత్‌ శర్మ(కెప్టెన్‌), శుభ్‌మన్‌ గిల్‌, విరాట్‌ కోహ్లి, శ్రేయస్‌ అయ్యర్‌, కేఎల్‌ రాహుల్‌, సూర్యకుమార్‌ యాదవ్‌,  ఇషాన్‌ కిషన్‌, హార్దిక్‌ పాండ్యా(వైస్‌ కెప్టెన్‌), రవీంద్ర జడేజా, అక్షర్‌ పటేల్‌, జస్‌ప్రీత్‌ బుమ్రా, మహ్మద్‌ షమీ, మహ్మద్‌ సిరాజ్‌, కుల్దీప్‌ యాదవ్‌, శార్థూల్‌ ఠాకూర్‌.

లండన్‌: ఇంగ్లండ్‌ బ్యాట్స్‌మన్‌ జోస్‌ బట్లర్‌ కరోనా బాధితుల సహాయార్థం ముందుకొచ్చారు. 2019 ప్రపంచ కప్‌ ఫైనల్‌ మ్యాచ్‌లో తాను ధరించిన టీషర్ట్‌ను వేలం వేసి.. ఆ మొత్తాన్నికరోనా బాధితులకు చికిత్స అందిస్తున్న లండన్‌లోని రెండు ఆస్పత్రులకు అందిస్తానని చెప్పారు. ఈమేరకు ట్విటర్‌లో ఆయన ఓ వీడియో పోస్టు చేశారు. ‘ప్రపంచకప్‌ ఫైనల్‌ మ్యాచ్‌లో నేను ధరించిన టీషర్ట్‌ను వేలం వేద్దామనుకుంటున్నా. వచ్చిన సొమ్మును లండన్‌లోని రాయల్‌ బ్రాంప్టన్‌, హారెఫైడ్‌ ఆస్పత్రులకు అందిస్తాను. కోవిడ్‌-19 బాధితులకు సేవలందిస్తున్న ఈ రెండు ఆస్పత్రులు తగినంత వైద్య పరికరాలు లేక ఇబ్బందులు పడుతున్నాయి. అందరికీ విజ్ఞప్తి చేస్తున్నా.. ఇంటి వద్దే ఉండండి. వైరస్‌ వ్యాప్తిని కట్టడి చేయండి.’అని బట్లర్‌ ట్విటర్‌లో పేర్కొన్నాడు. (చదవండి: కరోనా విలయం : ఈమె త్యాగం మహోన్నతం) ఇక మెరీల్‌బోన్‌ క్రికెట్‌ క్లబ్‌ (ఎంసీసీ) కూడా ఆస్పత్రుల వైద్య సిబ్బందికి సాయం చేసేందుకు ముందుకొచ్చింది. లార్డ్స్‌ మైదానంలో వారి వాహనాలు పార్కింగ్‌ చేసుకునే అవకాశం కల్పించింది. కాగా, యూకేలో ఇప్పటివరకు 25వేల కరోనా పాజిటివ్‌ కేసులు నమోదు కాగా.. 1500 మంది మృతి చెందారు. ఇదిలాఉండగా.. 2019 జులై 14న లార్డ్స్‌ మైదానంలో న్యూజిలాండ్‌తో ఫైనల్‌ మ్యాచ్‌లో ఇంగ్లండ్‌ విజయం సాధించిన సంగతి తెలిసిందే. ఉత్కంఠ భరితంగా జరిగిన ఈ మ్యాచ్‌లో తొలుత ఇరు జట్ల స్కోర్లు సమం కావడంతో.. సూపర్‌ ఓవర్‌ ద్వారా విజేతను నిర్ణయించారు. ఇంగ్లండ్‌కు ఇదే తొలి వన్డే వరల్డ్‌ కప్‌ ట్రోఫీ కావడం విశేషం. (చదవండి: పెంపుడు పిల్లికి కరోనా పాజిటివ్‌)

లండన్‌: ప్రపంచ కప్‌ విజేతగా నిలిచే అవకాశాన్ని త్రుటిలో చేజార్చుకున్న న్యూజిలాండ్‌ క్రికెట్‌ జట్టు మొత్తం తీవ్ర నిరాశకు గురైంది. ఫైనల్‌ మరుసటి రోజు దీనిపై కెప్టెన్‌ కేన్‌ విలియమ్సన్‌ భారంగా స్పందించాడు. ‘నిరాశ మమ్మల్ని ఉప్పెనలా ముంచెత్తింది. ఉదయం లేచి చూస్తే పీడకల కన్నట్లుగా అనిపించింది. మా ఆటగాళ్లంతా నిజంగా చాలా బాధపడుతున్నారు. మ్యాచ్‌లో ఈ తరహాలో ఓడటం ఏదోలా ఉంది’ అని విలియమ్సన్‌ తన బాధను వ్యక్తీకరించాడు. ఆదివారం మ్యాచ్‌ ముగిసిన తర్వాత మీడియా సమావేశంలో మాట్లాడిన కివీస్‌ కెప్టెన్‌... బౌండరీల లెక్క నిబంధనపై ఆచితూచి స్పందించాడు. ‘బౌండరీలను బట్టి విజేతను నిర్ణయించడం సరైందా అంటే నేను ఎప్పటికీ సమాధానం ఇవ్వలేను. నిజానికి ఇలాంటి ప్రశ్న మీరు అడుగుతారని గానీ నేను జవాబు ఇవ్వాల్సి వస్తుందని గానీ అసలెప్పుడూ ఊహించలేదు. ఇంకా ఓటమి బాధలోనే ఉన్నాం. ఇరు జట్లు ఇంత కష్టపడిన తర్వాత బౌండరీ లెక్క ప్రకారం ఫలితం రావడం జీర్ణించుకోలేకపోతున్నాం. ఇది సిగ్గుచేటు’ అని అతను వ్యాఖ్యానించాడు. అయితే ఇంత జరిగినా అతను ఈ నిబంధనను విమర్శించడానికి ఇష్టపడకుండా క్రీడాస్ఫూర్తిని ప్రదర్శించాడు. ‘నిబంధనలు మొదటి నుంచి ఉన్నాయనేది వాస్తవం. కానీ ఇలాంటి నిబంధనతో మ్యాచ్‌ ఫలితం తేల్చాల్సి వస్తుందని బహుశా ఎవరూ ఊహించకపోవచ్చు. స్టోక్స్‌ బ్యాట్‌కు తగిలి ఓవర్‌త్రో వెళ్లడం కూడా అలాంటిదే. ఒక అద్భుతమైన మ్యాచ్‌ జరిగింది. అందరూ దానిని బాగా ఆస్వాదించారు’ అని విలియమ్సన్‌ చెప్పడం విశేషం. ఫైనల్‌ ఫలితం తర్వాత భావోద్వేగాలు ఎలా ఉన్నాయనే ప్రశ్నకు స్పందిస్తూ విలియమ్సన్‌... ‘ఇలాంటి స్థితిలో నవ్వడమో లేదా ఏడవడమో అనే ఒకే ఒక అనుభూతి ఉంటుంది. అయితే కొంత నిరాశ ఉన్నా నాకు కోపం మాత్రం లేదు’ అని విలియమ్సన్‌ స్పష్టం చేశాడు.  

లండన్‌: బెన్‌ స్టోక్స్‌ అంటే అందరికీ రెండే రెండు విషయాలు గుర్తుకొస్తాయి. 2016 టి20 ప్రపంచకప్‌ ఫైనల్‌ చివరి ఓవర్లో వరుసగా నాలుగు సిక్సర్లు ఇచ్చి మ్యాచ్‌ను చేజార్చిన వైనం... ఆ తర్వాత నైట్‌ క్లబ్‌ వద్ద ఒక వ్యక్తిని చితక్కొట్టిన ఘటన... కానీ ఇప్పుడు అతను ఒకేసారి ఈ రెండింటినీ మరచిపోయే ఘనతను సాధించాడు. ‘వీధిలో రౌడీలా గొడవకు దిగిన వ్యక్తిగా నేను గుర్తుండిపోదల్చుకోలేదు. మైదానంలో ఏదైనా సాధించిన వాడిగా ఉండాలనుకుంటున్నా. ప్రపంచ కప్‌ గెలిస్తే నా బయోడేటాలో అదే ముందుంటుంది’ అని మెగా టోర్నీకి ముందు చెప్పిన స్టోక్స్‌ చివరకు దానిని నిజం చేసి చూపించాడు. ఇంగ్లండ్‌కు ప్రపంచకప్‌ అందించడంలో కీలక పాత్ర పోషించి ఒకరకంగా అతను పాపపరిహారం చేసుకున్నాడు. టోర్నీలో ఐదు అర్ధ సెంచరీలు చేసిన స్టోక్స్‌... ఫైనల్లో ఆడిన ఇన్నింగ్స్‌ అపూర్వం. క్లిష్టపరిస్థితుల్లో అజేయంగా 84 పరుగులు చేసిన స్టోక్స్‌ చరిత్రలో నిలిచిపోయాడు. ‘నాకు మాటలు రావడం లేదు. ఇక్కడికి చేరేందుకు గత నాలుగేళ్లుగా పడ్డ శ్రమ, ఇప్పుడు ప్రపంచ చాంపియన్లుగా నిలవడం అద్భుతంగా అనిపిస్తోంది’ అని ఫైనల్‌ అనంతరం స్టోక్స్‌ వ్యాఖ్యానించాడు. న్యూజిలాండ్‌లోని క్రైస్ట్‌చర్చ్‌లో పుట్టి 12 ఏళ్ల వయసులో ఇంగ్లండ్‌కు వలస వెళ్లిన స్టోక్స్‌... ఇప్పుడు ఫైనల్లో కివీస్‌పైనే చెలరేగడం విశేషం. ‘న్యూజిలాండ్‌తో మ్యాచ్‌ అంటే ఎప్పుడైనా ప్రత్యేకమే. అది గొప్ప జట్టు మాత్రమే కాదు. అందులో చాలా మంది మంచివాళ్లున్నారు. నా ఓవర్‌త్రో సిక్సర్‌ తర్వాత విలియమ్సన్‌కు నేను క్షమాపణ చెప్పా’ అని మ్యాచ్‌ అనంతరం స్టోక్స్‌ వ్యాఖ్యానించాడు. కష్టకాలంలో జట్టు సహచరులు తనకు, తన కుటుంబానికి అండగా నిలవడం వల్లే మళ్లీ కోలుకొని ఇక్కడి వరకు రాగలిగాలని 28 ఏళ్ల స్టోక్స్‌ భావోద్వేగంతో చెప్పాడు. ఇప్పుడెవరికీ అతని నాలుగు సిక్సర్లు గానీ బ్రిస్టల్‌లో గొడవ కానీ గుర్తుకు రావు. ఇంగ్లండ్‌ చరిత్రలో గొప్ప ఆల్‌రౌండర్‌గా నిలిచిపోయిన ఇయాన్‌ బోథమ్‌ సహా మరెందరికో సాధ్యం కాని రీతిలో విశ్వ విజయంలో భాగమైన స్టోక్స్‌ ఇప్పుడు వారందరికీ సూపర్‌ హీరో మాత్రమే.  

లండన్‌: ప్రపంచ కప్‌ను గెలుచుకున్నామన్న ఆనందం నుంచి తాము ఇంకా బయటకు రాలేకపోతున్నట్లు ఇంగ్లండ్‌ కెప్టెన్‌ ఇయాన్‌ మోర్గాన్‌ చెప్పాడు. నాలుగేళ్ల శ్రమకు దక్కిన ఫలితమిదని మ్యాచ్‌ తర్వాత అతను వ్యాఖ్యానించాడు. ‘మేం గెలుపు గీత దాటడం ఇంకా నమ్మశక్యంగా అనిపించడం లేదు. నాతో పాటు జట్టు సభ్యులందరూ ఒక ప్రణాళిక ప్రకారం అంకితభావంతో కష్టపడ్డాం. ఈ గెలుపు ప్రయాణం అద్భుతంగా సాగింది. టోర్నీ ఆరంభం నుంచి కూడా మాపై అంచనాలు ఉన్నాయి. వాటిని నిజం చేయడం సంతోషంగా ఉంది’ అని మోర్గాన్‌ అన్నాడు. బౌండరీల ఆధారంగా విజేతను నిర్ణయించిన నిబంధనపై మోర్గాన్‌ జాగ్రత్తగా స్పందించాడు. ‘ఇప్పుడు అమలు చేసిన పద్ధతి కాకుండా ఇంకా వేరే ఏదైనా ప్రత్యామ్నాయం ఉంటే చెప్పండి. అప్పుడు ఈ రెండింటినీ పోల్చి ఏది మెరుగైందో నిర్ణయించవచ్చు. టోర్నీ నిబంధనలు చాలా కాలం క్రితమే రూపొందించారు. వాటిపై మన నియంత్రణ ఉండదు’ అని ఇంగ్లండ్‌ కెప్టెన్‌ స్పష్టీకరించాడు. జట్టు విజయంలో కీలక పాత్ర పోషించిన బెన్‌ స్టోక్స్‌పై మోర్గాన్‌ ప్రశంసలు కురిపించాడు. ‘స్టోక్స్‌ గురించి ఒక్క మాటలో చెప్పాలంటే అతను మానవాతీతుడిలా ఆడి జట్టు గెలుపు భారాన్ని సమర్థంగా మోశాడు. బట్లర్‌ ఔటైన తర్వాత చివరి వరుస బ్యాట్స్‌మెన్‌తో అతను ఇన్నింగ్స్‌ నడిపించడం అసాధారణం’ అని మోర్గాన్‌ చెప్పాడు.   ‘అల్లా కూడా మాతోనే’... మోర్గాన్‌ స్వదేశం ఐర్లాండ్‌ కాగా... అన్ని కలిసి రావడంపై అక్కడ ‘ఐరిష్‌ లక్‌’ పేరుతో బాగా ప్రాచుర్యంలో సామెత ఉంది. ‘ఐరిష్‌ లక్‌’ వెంట నడిచిందా అంటూ అడిగిన ప్రశ్నపై మోర్గాన్‌ ఆసక్తికర సమాధానం ఇచ్చాడు. ‘నా సహచరుడు ఆదిల్‌ రషీద్‌తో మాట్లాడినప్పుడు అల్లా ఈ రోజు మనతో ఉన్నాడని చెప్పాడు. కాబట్టి నేను కూడా అల్లా మా జట్టుకు అండగా నిలిచాడని నమ్ముతున్నా. సరిగ్గా చెప్పాలంటే మా జట్టులో వేర్వేరు సంప్రదాయాలు, నేపథ్యాలకు చెందిన ఆటగాళ్లు ఉన్నారు. భిన్నత్వంలో ఏకత్వం కనిపిస్తుంది. కానీ ఆటకు వచ్చేసరికి అంతా కలిసికట్టుగా ఆడి విజయం సాధించాం’ అని అతను విశ్లేషించాడు. భారత్‌లో జరిగే 2023 ప్రపంచకప్‌ గురించి ఏమాత్రం ఆలోచించడం లేదని, ప్రస్తుతం విశ్వ విజేతగా ఆనందాన్ని ఆస్వాదించడంపైనే దృష్టి పెట్టినట్లు మోర్గాన్‌ చెప్పాడు.    6 కాదు 5 పరుగులు ఇవ్వాల్సింది! ఓవర్‌త్రోపై మాజీ అంపైర్‌ టఫెల్‌ అభిప్రాయం లండన్‌: ఓవర్‌ త్రో ద్వారా ఇంగ్లండ్‌కు ఆరు పరుగులు రావడం ప్రపంచకప్‌ ఫైనల్‌ డ్రామాలో కీలక ఘట్టం. 50వ ఓవర్లో విజయం కోసం ఇంగ్లండ్‌ 3 బంతుల్లో 9 పరుగులు చేయాల్సి ఉండగా నాలుగో బంతికి ఆరు పరుగులు లభించడంతో సమీకరణం 2 బంతుల్లో 3 పరుగులుగా మారిపోయింది. బౌల్ట్‌ వేసిన ఫుల్‌టాస్‌ను డీప్‌ మిడ్‌వికెట్‌ వైపు కొట్టిన స్టోక్స్‌ సింగిల్‌ను పూర్తి చేసి రెండో పరుగు కోసం పరుగెత్తాడు. ఫీల్డర్‌ గప్టిల్‌ విసిరిన త్రో నేరుగా స్టోక్స్‌ పరుగెడుతున్న వైపే దూసుకొచ్చినా... అతని బ్యాట్‌కే తగిలి బౌండరీని దాటింది. స్టోక్స్, రషీద్‌ చేసిన 2 పరుగులతో కలిపి ధర్మసేన దానిని ‘6’గా ప్రకటించాడు. స్టోక్స్‌ ఉద్దేశపూర్వకంగా అడ్డు రాలేదు కాబట్టి తప్పు లేదు కానీ ఆరు పరుగులు ఇవ్వడాన్ని ప్రఖ్యాత మాజీ అంపైర్‌ సైమన్‌ టఫెల్‌ తప్పు పట్టారు. ‘నిబంధన 19.8 ప్రకారం ఫీల్డర్‌ త్రో సంధించిన సమయంలో ఇద్దరు బ్యాట్స్‌మెన్‌ పిచ్‌పై ఒకరిని మరొకరు దాటితేనే రెండో పరుగును లెక్కించాలి. వీడియో రీప్లేలో చూస్తే ఫీల్డర్‌ బంతిని విసిరినప్పుడు వీరిద్దరు ఒకరిని మరొకరు దాటలేదు. కాబట్టి బౌండరీతో పాటు సింగిల్‌నే అనుమతించాల్సింది. అప్పుడు ఒక పరుగు తగ్గడంతో పాటు రషీద్‌ స్ట్రయికింగ్‌ తీసుకోవాల్సి వచ్చేది’ అని టఫెల్‌ వివరించారు. అయితే తాను అంపైర్‌ను విమర్శించడం లేదని, అదంతా ఆ సమయంలో మైదానంలో ఉండే ఉద్వేగాలు, వేడిలో అలాంటిది జరిగిపోయిందని అన్నారు. ‘స్టోక్స్‌ పరుగు పూర్తి చేసే స్థితిలో ఉన్నాడని అంపైర్‌ భావించి ఉండవచ్చు. ఈ నిర్ణయం ప్రభావం మ్యాచ్‌పై కొంత మేరకు ఉన్నా, తుది ఫలితానికి ఇది మాత్రం కారణం కాదు’ అని టఫెల్‌ అభిప్రాయపడ్డారు.    ‘బౌండరీ’పై విమర్శల బాదుడు! ప్రపంచ కప్‌ ఫైనల్‌ ఫలితాన్ని బౌండరీల లెక్కతో తేల్చడంపై అన్ని వైపుల నుంచి విమర్శలు వచ్చాయి. దీనిని అత్యంత చెత్త నిబంధనగా పేర్కొంటూ మాజీ క్రికెటర్లు ఐసీసీపై విరుచుకుపడ్డారు. దీనికంటే ఇరు జట్లను సంయుక్త విజేతలుగా ప్రకటించాల్సిందని కొందరు అభిప్రాయ పడగా, ఇలాంటి నిబంధనలు మార్చేయాలని మరికొందరు సూచించారు. ఫైనల్‌ మ్యాచ్‌లో బౌండరీ పరంగా చూస్తే 26–17 తేడాతో న్యూజిలాండ్‌పై ఇంగ్లండ్‌ నెగ్గింది. ‘క్రికెట్‌లో కొన్ని నిబంధనలపై తీవ్రంగా చర్చ జరగాల్సిన అవసరం ఉంది’      –రోహిత్‌ శర్మ ‘అద్భుతంగా సాగిన మ్యాచ్‌లో ఫలితాన్ని బౌండరీల తేడాతో నిర్ణయించడం ఏమిటో అర్థం కాలేదు. అతి చెత్త నిబంధన ఇది. ‘టై’గా ప్రకటిస్తే బాగుండేది’     –గౌతం గంభీర్‌ ‘బౌండరీ నిబంధనకు నేను కూడా మద్దతివ్వను. కానీ రూల్స్‌ అంటే రూల్సే. ఎట్టకేలకు కప్‌ గెలిచిన ఇంగ్లండ్‌కు అభినందనలు’ –యువరాజ్‌ సింగ్‌ ‘అసలు ఎంత బాగా పని చేస్తున్నారో...అసలు ఐసీసీ అనేదే పెద్ద జోక్‌’      –స్కాట్‌ స్టయిరిస్‌ ‘ఐసీసీ నిబంధన వల్ల ఇంగ్లండ్‌ కప్‌ గెలవడం అసలే మాత్రం ఊహించలేనిది. ఇద్దరినీ సంయుక్త విజేతలుగా ప్రకటిస్తే బాగుండేది’ –బిషన్‌ సింగ్‌ బేడి   ‘డక్‌వర్త్‌ లూయిస్‌ నిబంధన పరుగులు, వికెట్లపై ఆధారపడి ఉంది. కానీ ఫైనల్‌ ఫలితం మాత్రం బౌండరీల లెక్క ప్రకారం తీసుకుంటారా’      –డీన్‌ జోన్స్‌ ‘నా దృష్టిలో ఇలా విజేతను నిర్ణయించడం దుర్మార్గమైన పద్ధతి. ఇది మారాల్సిందే’ –బ్రెట్‌ లీ ‘చాలా బాధగా ఉంది. మేం మోసపోయినట్లనిపిస్తోంది. పిచ్చి నిబంధన. ఇది కూడా టాస్‌ వేసి విజేతను నిర్ణయించడంలాంటిదే’ –డియాన్‌ నాష్‌   ‘క్రూరత్వం’      –స్టీఫెన్‌ ఫ్లెమింగ్‌

సాక్షి క్రీడావిభాగం: ప్రపంచకప్‌ ఫైనల్లో పాత రూల్స్‌ అమల్లో ఉంటే ఇంగ్లండ్‌–న్యూజిలాండ్‌లు సంయుక్త విజేతలుగా నిలిచేవి. కానీ ఈ మ్యాచ్‌లో కివీస్‌ ఓడిపోయిందంటే సగటు క్రికెట్‌ అభిమాని కూడా దానిని తమ పరాజయంగా భావిస్తున్నాడు. స్టోక్స్‌ బ్యాట్‌ను తాకి పోయిన 6 పరుగుల ఓవర్‌త్రో దురదృష్టమో, గప్టిల్‌ గ్రహచారం బాగా లేని రోజు కావడమో కానీ విలియమ్సన్‌ సేన విలపించాల్సి వచ్చింది. ఇంత అద్భుతమైన ఆట తర్వాత కూడా బౌండరీ లెక్కల త్రాసుతో ఇంగ్లండ్‌ పైచేయి కావడం బలవంతంగా కివీ రెక్కలు విరిచేసినట్లయింది. వరుసగా రెండోసారి కూడా న్యూజిలాండ్‌ను ఫైనల్‌ మ్యాచ్‌లో ఓటమి వెంటాడింది. అయితే ఆ జట్టు గొప్పతనాన్ని ఈ మ్యాచ్‌ ఫలితం తగ్గించలేదు. ప్రత్యర్థులపై మాటల దాడి చేయకుండా, దూషణలకు పాల్పడకుండా కూడా ప్రపంచ కప్‌లో గొప్ప విజయాలు సాధించవచ్చని ఆ జట్టు నిరూపించింది. కివీస్‌ క్రికెట్‌ అనగానే అందరికీ గుర్తొచ్చేది మైదానంలో వారి ప్రవర్తన. తమదైన ఆటను ఆడుకుంటూ గెలుపోటములతో నిమిత్తం లేకుండా క్రీడా స్ఫూర్తిని ప్రదర్శించడంలో వారికి వారే సాటి. ఫెయిర్‌ ప్లే అవార్డు అంటూ ఎప్పుడిచ్చినా ఈ మర్యాద రామన్నల బృందానికే దక్కడం పరమ రొటీన్‌. ఆటగాళ్లపై క్రమశిక్షణా చర్యలు తీసుకునేందుకు 2016లో ఐసీసీ డీమెరిట్‌ పాయింట్‌ సిస్టంను మొదలు పెట్టింది. అప్పటినుంచి ఇప్పటి వరకు అందరికంటే అతి తక్కువగా ఒకే ఒకసారి శిక్షకు గురైన జట్టు న్యూజిలాండ్‌. వారి ఆట ఎలా ఉంటుందో చెప్పేందుకు ఇది చాలు. ఏ టోర్నీలో బరిలోకి దిగినా వారిని ‘అండర్‌డాగ్‌’గానే చూడడం అందరికీ అలవాటైపోయింది. డాగ్‌ ఏదైనా అసలైన రోజు కరవడం ముఖ్యం అని స్వయంగా విలియమ్సన్‌ చెప్పినట్లు రెండు అసలు మ్యాచ్‌లలో కివీస్‌ సత్తా చాటింది. సెమీస్‌లోనే భారత్‌ ముందు అసలు కివీస్‌ను ఎవరూ పెద్దగా లెక్క చేయలేదు. కానీ అద్భుత వ్యూహంతో ఆ జట్టు అనూహ్య విజయాన్ని అందుకుంది. స్వల్ప స్కోరుకే పరిమితమైనా... పట్టుదలతో ఆడి టీమిండియాను నిలవరించగలిగింది. ఫైనల్లో కూడా నాలుగు ఇంగ్లండ్‌ వికెట్లు తీసిన తర్వాత విజయానికి బాటలు వేసుకున్న ఆ జట్టు అదే ఒత్తిడిని కొనసాగించలేకపోయింది.    కెప్టెన్‌గా తొలి ప్రపంచ కప్‌లో బ్యాట్స్‌మన్‌గానూ తనదైన ముద్ర వేసిన విలియమ్సన్‌కు దురదృష్టవశాత్తూ ఇతర ఆటగాళ్ల నుంచి ఎక్కువ మద్దతు లభించలేదు. అదే చివరి పోరులో తక్కువ స్కోరుకే పరిమితమయ్యేందుకు కారణమైంది. విలియమ్సన్‌ 82.57 సగటుతో ఏకంగా 578 పరుగులు చేయగా... రెండో స్థానంలో నిలిచిన టేలర్‌ మూడు అర్ధ సెంచరీలతో 350 పరుగులకే పరిమితమయ్యాడు. గత వరల్డ్‌కప్‌లో డబుల్‌ సెంచరీ సహా హీరోగా నిలిచిన గప్టిల్‌ ఘోర వైఫల్యం జట్టును దెబ్బ తీసింది. 10 ఇన్నింగ్స్‌లలో కలిపి అతను 186 పరుగులు మాత్రమే చేయగలిగాడు. కివీస్‌ ఇక్కడి వరకు రాగలిగిందంటే పేస్‌ బౌలింగ్‌ త్రయమే కారణం. ఫెర్గూసన్‌ (21), బౌల్ట్‌ (17), హెన్రీ (14) కలిపి 52 వికెట్లు పడగొట్టారు. ఈ ముగ్గురిలో ఒక్కరు కూడా ఓవర్‌కు ఐదుకు మించి పరుగులు ఇవ్వలేదంటే ఎంత నియంత్రణతో బౌలింగ్‌ చేశారో అర్థమవుతుంది. 232 పరుగులు చేసిన నీషమ్‌ కూడా 15 వికెట్లతో అండగా నిలిచాడు. అయితే చివరకు బ్యాటింగ్‌ వైఫల్యమే కివీస్‌కు గొప్ప అవకాశాన్ని దూరం చేసింది. అఫ్గానిస్తాన్‌ మినహా టోర్నీలో 300 దాటని ఏకైక జట్టు న్యూజిలాండే. ఫలితంగా కివీస్‌ బృందం టైటిల్‌ కాకుండా మరోసారి హృదయాలు గెలుచుకోవడంతోనే సరిపెట్టుకోవాల్సి వచ్చింది.

సాక్షి క్రీడా విభాగం: గత నాలుగేళ్లలో ఇంగ్లండ్‌ అద్భుతమైన వన్డే క్రికెట్‌ ఆడింది. ఎన్నో రికార్డులు ఆ జట్టు పాదాక్రాంతమయ్యాయి. ఏ దశలోనూ భయం, బెరుకు లేకుండా ప్రత్యర్థులపై నిర్దాక్షిణ్యంగా విరుచుకుపడుతూ ఆ జట్టు ప్రదర్శించిన జోరు ప్రపంచకప్‌ గెలుపుపై ఆశలు రేపింది. ఇంగ్లండ్‌ జట్టు టాప్‌–20 వన్డే అత్యధిక స్కోర్ల జాబితాలో (అన్ని 350 పరుగులకు మించి) రెండు మినహా మిగిలిన 18 స్కోర్లు 2015 వరల్డ్‌ కప్‌ వైఫల్యం తర్వాతే వచ్చాయంటే ఆ జట్టు సాధించిన పురోగతి ఏమిటో అర్థమవుతుంది. ఇందులో 481 పరుగుల ప్రపంచ రికార్డు స్కోరు కూడా ఉంది. ఇదంతా అంత సులువుగా జరగలేదు. కెప్టెన్‌ మోర్గాన్, కోచ్‌ ట్రెవర్‌ బేలిస్‌ కలిసి మూలాల నుంచి పరిస్థితి మార్చేందుకు సంకల్పించారు. ముందుగా సాంప్రదాయ ముద్ర నుంచి జట్టును బయట పడేసే ప్రయత్నం చేశారు. టెస్టుల్లో దిగ్గజాలే అయినా వన్డే క్రికెట్‌కు పనికి రారంటూ అండర్సన్, స్టువర్ట్‌ బ్రాడ్, బెల్‌లాంటి వారిని బయటకు పంపించడంతో జట్టు ప్రక్షాళన మొదలైంది. వారి స్థానాల్లో ఆల్‌రౌండర్లతో జట్టును నింపేశారు. అవసరమైతే పదో నంబర్‌ ఆటగాడు కూడా బ్యాటింగ్‌ చేయాల్సి ఉంటుందనే ఆలోచన నిజంగానే చాలా బాగా పని చేసింది. వరుస విజయాలు వచ్చి చేరడంతో గత ఏడాది మేలో తొలిసారి ఇంగ్లండ్‌ వన్డేల్లో నంబర్‌వన్‌గా నిలిచింది. ఇక అక్కడి నుంచి తదుపరి లక్ష్యం ప్రపంచ కప్‌ విజయమే. ఆ దారిలో దూసుకుపోయిన మోర్గాన్‌ సేన తమ దేశంలో సంబరాలు పంచింది.   ఇంగ్లండ్‌ ఆటగాళ్లకు, అభిమానులకు, బోర్డుకు, ప్రసారకర్తలకు, ప్రకటనదారులకు అందరికీ తెలుసు ఈసారి సాధ్యం కాకపోతే ఇంకెప్పటికీ ఇంగ్లండ్‌ వన్డే ప్రపంచ కప్‌ గెలవలేదని. పేరుకే క్రికెట్‌ ఇంగ్లండ్‌లో పుట్టినా, వన్డే వరల్డ్‌ కప్‌ అక్కడే తొలి అడుగు వేసినా... ఒక్కసారి కూడా టైటిల్‌ గెలవలేని జట్టుగా అవమాన భారాన్ని ఆ జట్టు ఇంత కాలంగా మోస్తూనే వచ్చింది. ఇంగ్లండ్‌ ప్రదర్శనపై ఎన్నో విమర్శలు, మరెన్నో జోక్‌లు ప్రచారంలో ఉన్న సంగతీ వారికి తెలియనిది కాదు. గత వరల్డ్‌కప్‌లో ఘోర వైఫల్యం తర్వాతనైతే అసలు ఇంగ్లండ్‌ టీమ్‌ను ఎవరూ లెక్కలోకి తీసుకోని పరిస్థితి. కానీ కొత్త ఇంగ్లండ్‌ జట్టు చరిత్రను తిరగరాసింది. అసమాన ఆటతీరుతో సత్తా చాటి ఇన్నేళ్ల ప్రశ్నలకు ఒకేసారి సమాధానం ఇచ్చింది. పాత గాయాలు అంత తొందరగా మానేవి కావు. 1992లో పాకిస్తాన్‌ బౌలర్‌ వసీమ్‌ అక్రమ్‌ వేసిన రెండు అద్భుత బంతులతో ప్రపంచ కప్‌ కల చెల్లాచెదురైన తర్వాత మళ్లీ కోలుకునేందుకు ఇంగ్లండ్‌కు 27 ఏళ్లు పట్టింది. న్యూజిలాండ్‌ కంటే కూడా ఇంగ్లండ్‌కు ఈ విజయం ఎంతో అవసరం. ఒక్కసారి కూడా విశ్వ విజేతగా నిలవలేదన్న పేరును తొలగించుకునేందుకు స్వదేశంలో ఇంతకంటే మంచి అవకాశం వారికి రాదు. దానిని ఒడిసిపట్టుకొని మోర్గాన్‌ సేన తమ దేశం మొత్తాన్ని ఆనందంలో ముంచెత్తింది.   దాదాపు ఏడాది కాలంగా ఇంగ్లండ్‌ అభిమానులు ‘ఇట్స్‌ కమింగ్‌ హోమ్‌’ అంటూ గొంతు చించుకుంటూ హోరెత్తిస్తుండగా మోర్గాన్‌ సేన కోటి ఆశలతో మైదానంలో తమ ఆట మొదలుపెట్టింది.  తొలి మ్యాచ్‌లో 100 పరుగులకు పైగా తేడాతో గెలవగానే ఇంగ్లిష్‌ సేన సంబరపడిపోయింది. కానీ పాకిస్తాన్‌తో మ్యాచ్‌ జట్టును నేలకు దించింది. ఆ తర్వాత ఆస్ట్రేలియా కూడా చితక్కొట్టగా,  శ్రీలంక చేతిలో ఓటమి పాత ఇంగ్లండ్‌ను గుర్తుకు తెచ్చింది. నిజంగా  ఇంగ్లండ్‌ సెమీస్‌ చేరకపోయి ఉంటే ఆ క్షణాన ఎన్ని గుండెలు బద్దలయ్యేవో... కానీ భారత్‌పై గెలుపు మళ్లీ ఆశలు నిలబెట్టింది. ఈ విజయం ఇచ్చిన ఆత్మవిశ్వాసమే కివీస్‌నూ ఓడించి దర్జాగా సెమీస్‌ చేరేలా చేసింది. ఇక ఆస్ట్రేలియాను ఓడించి ఫైనల్‌ చేరడం జట్టు ఆనందాన్ని రెట్టింపు చేసింది. లీగ్‌లో తమ చేతిలో చిత్తయిన కివీస్‌పై ఫైనల్‌ అనగానే సహజంగానే అందరిలో అంచనాలు పెరిగిపోయాయి. భారత్‌నే ఓడించిన న్యూజిలాండ్‌ను తక్కువగా అంచనా వేస్తే మూల్యం చెల్లించాల్సి ఉంటుందని ఇంగ్లండ్‌కు తెలుసు. రసవత్తర ఫైనల్‌ దానిని నిజం చేసింది. చివరకు అశేష  అభిమానుల జయజయధ్వానాలతో సగర్వంగా ట్రోఫీని ఎత్తుకుంది.   ఇంగ్లండ్‌ విజయంలో అందరికీ సమష్టి పాత్ర ఉంది. ఓపెనర్లుగా బెయిర్‌స్టో (532 పరుగులు), జేసన్‌ రాయ్‌ (443 పరుగులు) అద్భుత ఆరంభాలు అందిస్తే, జో రూట్‌ (556 పరుగులు), స్టోక్స్‌ (465 పరుగులు), బట్లర్‌ (312 పరుగులు) మధ్యలో దానిని కొనసాగించారు. మోర్గాన్‌ (371 పరుగులు) బ్యాట్స్‌మన్‌గా కంటే కెప్టెన్‌గా తనదైన ముద్ర చూపించగలిగాడు. ఫైనల్లో స్టోక్స్, బట్లర్‌ ఆడిన ఆట గురించి ఎంత చెప్పినా తక్కువే. లోతైన బ్యాటింగ్‌ వనరులు ఉండటం కూడా జట్టుకు కలిసొచ్చింది. ఇక బౌలింగ్‌లో ఆర్చర్‌ (20 వికెట్లు) అత్యధిక వికెట్లతో చెలరేగితే వుడ్‌ (18 వికెట్లు), వోక్స్‌ (16 వికెట్లు) ప్రత్యర్థులను కట్టిపడేశారు. ప్లంకెట్‌ 11 వికెట్లే తీసినా అవి కీలక సమయంలో జట్టుకు అవసరమైనప్పుడు వచ్చాయి. అందరిలోకి స్టోక్స్‌ గురించి ప్రత్యేకంగా చెప్పాలి. 2016 టి20 ఫైనల్‌ చివరి ఓవర్లో వరుసగా నాలుగు సిక్సర్లు ఇచ్చి కప్‌ కోల్పోవడానికి కారణమైన అతనికి ఇది పాపపరిహారంగా చెప్పుకోవచ్చు. ఫైనల్లో చివరి వరకు నిలబడి అతను జట్టును గెలిపించాడు. అయితే ఐదు అర్ధసెంచరీలు ఇంగ్లండ్‌ విజయ యాత్రలో కీలక పాత్ర పోషించాయి.     1975, జూన్‌ 7: ప్రతిష్టాత్మక లార్డ్స్‌ మైదానంలో జరిగిన ప్రపంచ కప్‌ తొలి మ్యాచ్‌లో ఇంగ్లండ్‌ బరిలోకి దిగింది. క్రికెట్‌ను కనుగొన్న దేశం వరల్డ్‌ కప్‌ గెలవాలనే కలతో, ఆశలు అడుగుపెట్టిన రోజది. 2019, జూలై 14: లార్డ్స్‌ మైదానంలో ఇంగ్లండ్‌ విశ్వ విజేతగా నిలిచి సగర్వంగా ట్రోఫీని సొంతం చేసుకున్న రోజు... నాటి కల నెరవేరేందుకు ఇంగ్లండ్‌కు ఏకంగా 44 ఏళ్లు పట్టింది.

ఒకప్పుడు సగం ప్రపంచాన్ని ఏలినా... ఇన్నాళ్లూ ప్రపంచ కప్‌ మాత్రం వారికి కలే... మూడుసార్లు కడపటి మెట్టుపై బోల్తా... ఆపై దరిదాపులకూ రాలేని దీన స్థితి... నాలుగోసారి మాత్రం ఆ కల నెరవేరింది... ఓ దశలో కల్లగా మారేలా ఉన్నా కాలం కలిసొచ్చింది... ఒత్తిడిని పక్కకు నెడుతూ, ఉత్కంఠను తట్టుకుని... విశ్వ విజేత కిరీటం వారిని వరించింది.  ఔను...! ఇంగ్లండ్‌ సాధించింది... ఎట్టకేలకు వన్డే చాంపియన్‌ అయింది... వీడని నీడలాంటి వారి ఆశయం నెరవేరింది... ఎన్నాళ్లో వేచిన విజయం పలకరించింది... చాలావరకు సాదాసీదాగా సాగిన ఫైనల్‌... ఆఖర్లో అదిరిపోయే హై డ్రామా సృష్టించింది... మైదానంలో అభిమానులను మునివేళ్లపై నిలిపింది... టీవీల ముందు ప్రేక్షకులను కన్నార్పకుండా చేసింది... ప్రపంచ కప్‌ తుది సమరం ‘టై’ అవడమే అరుదంటే... వన్డే క్రికెట్‌ చరిత్రలోనే తొలిసారి సూపర్‌ ఓవర్‌ ఆడిస్తే... అందులోనూ ఇరు జట్ల స్కోర్లు సమమైతే... ఇంతకంటే మజా మజా ఏదైనా ఏముంటుంది? ఏదేమైనా క్రికెట్‌ పుట్టిల్లు పండుగ చేసుకుంది... వారి ‘ప్రపంచ కల’ సొంతగడ్డపైనే నెరవేరింది... నాలుగేళ్ల వారి శ్రమకు ఫలితం దక్కింది... రాబోయే నాలుగేళ్లు వారే రారాజని తీర్పొచ్చింది... లండన్‌ : ఇంగ్లండ్‌ కల నెరవేరింది. 44 ఏళ్ల వారి సుదీర్ఘ నిరీక్షణకు తెరపడింది. ఆ దేశ జట్టు ఎట్టకేలకు వన్డే క్రికెట్‌ ప్రపంచ చాంపియన్‌గా అవతరించింది. క్రికెట్‌ చరిత్రలోనే అత్యంత ఉత్కంఠతో సాగినదిగా పేర్కొనదగిన వరల్డ్‌ కప్‌ ఫైనల్లో వన్‌ ఓవర్‌ ఎలిమినేటర్‌ పద్ధతిలో ఇంగ్లండ్‌ విజేతగా ఆవిర్భవించింది. ఇక్కడి ప్రఖ్యాత లార్డ్స్‌ మైదానంలో ఆదివారం జరిగిన మ్యాచ్‌లో టాస్‌ గెలిచి బ్యాటింగ్‌ ఎంచుకున్న న్యూజిలాండ్‌ నిర్ణీత ఓవర్లలో 8 వికెట్ల నష్టానికి 241 పరుగులు చేసింది. అర్ధ సెంచరీ సాధించిన ఓపెనర్‌ హెన్రీ నికోల్స్‌ (77 బంతుల్లో 55; 4 ఫోర్లు) టాప్‌ స్కోరర్‌. వికెట్‌ కీపర్‌ టామ్‌ లాథమ్‌ (56 బంతుల్లో 47; 2 ఫోర్లు, సిక్స్‌) రాణించాడు. కివీస్‌ ఇన్నింగ్స్‌లో కెప్టెన్‌ విలియమ్సన్‌ (53 బంతుల్లో 30; 2 ఫోర్లు) స్కోరుకు సమానంగా అదనపు పరుగులు రావడం గమనార్హం. వోక్స్‌ (3/37), ప్లంకెట్‌ (3/42)లకు చెరో మూడు వికెట్లు దక్కాయి. చివర్లో హై డ్రామా నడుమ ఇంగ్లండ్‌ సరిగ్గా 50 ఓవర్లలో 241 పరుగులకు ఆలౌటైంది. సూపర్‌ ఓవర్లోనూ స్కోర్లు (15) సమం కాగా... ఇరు జట్ల ఇన్నింగ్స్‌లో నమోదైన బౌండరీల ఆధారంగా ఇంగ్లండ్‌ను జగజ్జేతగా ప్రకటించారు. ప్రత్యర్థి బౌలర్లు నీషమ్‌ (3/43), ఫెర్గూసన్‌ (3/50) వరుసగా వికెట్లు పడగొట్టడం, గ్రాండ్‌హోమ్‌ (1/25) పొదుపుగా బంతులే యడంతో ఛేదనలో ఇంగ్లండ్‌ కష్టాలు ఎదుర్కొంది. ‘మ్యాన్‌ ఆఫ్‌ ద మ్యాచ్‌’, ఆల్‌ రౌండర్‌ బెన్‌ స్టోక్స్‌ (98 బంతుల్లో 84 నాటౌట్‌; 5 ఫోర్లు, 2 సిక్స్‌లు) అద్భుత పోరాటం, బట్లర్‌ (60 బంతుల్లో 59; 6 ఫోర్లు) చక్కటి ఇన్నింగ్స్‌తో తేరుకుంది.     నికోల్స్‌ నిలిచాడు... లాథమ్‌ ఆడాడు కివీస్‌ ఓపెనింగ్‌ జంట నికోల్స్, గప్టిల్‌ (18 బంతుల్లో 19, 2 ఫోర్లు, సిక్స్‌) ఫైనల్లో కాసేపు నిలిచింది. ఆర్చర్‌ ఓవర్లో సిక్స్, ఫోర్‌తో దూకుడు చూపిన గప్టిల్‌ను వోక్స్‌ వికెట్ల ముందు దొరకబుచ్చుకున్నాడు. విలియమ్సన్‌ జాగ్రత్తగా ఆడాడు. ఎదుర్కొన్న 12వ బంతికి గానీ పరుగు తీయలేకపోయాడు. పవర్‌ ప్లే అనంతరం ఇద్దరూ వేగం పెంచడంతో కదలిక వచ్చింది. స్వల్ప వ్యవధిలో వీరిని ఔట్‌ చేసి కివీస్‌కు ప్లంకెట్‌ షాకిచ్చాడు. అతడి గుడ్‌ లెంగ్త్‌ బంతి విలియమ్సన్‌ బ్యాట్‌ను తాకుతూ కీపర్‌ బట్లర్‌ చేతిలో పడింది. అంపైర్‌ ధర్మసేన ఔటివ్వకున్నా మోర్గాన్‌ రివ్యూ కోరి ప్రత్యర్థి కెప్టెన్‌ను సాగనంపాడు. అంపైర్‌ ఎరాస్మస్‌ తప్పుడు నిర్ణయానికి రాస్‌ టేలర్‌ (15) బలయ్యాడు. ఆల్‌రౌండర్‌ నీషమ్‌ (25 బంతుల్లో 19; 3 ఫోర్లు) మిడాన్‌లో రూట్‌కు క్యాచ్‌ ఇచ్చాడు. గ్రాండ్‌హోమ్‌ (16) అండగా లాథమ్‌ బండి లాగించాడు. వోక్స్‌ ఈ ఇద్దరినీ ఔట్‌ చేసి దెబ్బకొట్టాడు. హెన్రీ (4), సాన్‌ట్నర్‌ (5 నాటౌట్‌) చివర్లో భారీ షాట్లు ఆడలేకపోయారు. ఇంగ్లండ్‌ కష్టంగానైనా అందుకుంది... ఇంగ్లండ్‌ ఛేదన సులువుగా సాగలేదు. బౌల్ట్‌ వేసిన ఇన్నింగ్స్‌ మొదటి బంతే ఓపెనర్‌ జేసన్‌ రాయ్‌ (20 బంతుల్లో 17; 3 ఫోర్లు) ప్యాడ్లను తాకింది. అంపైర్‌ ఎరాస్మస్‌ ఔటివ్వకపోవడంతో కివీస్‌ సమీక్ష కోరింది. బంతి లెగ్‌ స్టంప్‌ మీదుగా వెళ్తున్నట్లు తేలడంతో ఎరాస్మస్‌ నిర్ణయానికి కట్టుబడ్డాడు. హెన్రీ... రాయ్‌ను ఊగిసలాటలో పడేసి వికెట్‌ దక్కించుకున్నాడు. రూట్‌ (30 బంతుల్లో 7) స్వేచ్ఛగా ఆడలేకపోయాడు. గ్రాండ్‌హోమ్‌పై ప్రతాపం చూపబోయి వికెట్‌ ఇచ్చేశాడు. బెయిర్‌ స్టో (55 బంతుల్లో 36; 7 ఫోర్లు) వికెట్లను ఫెర్గూసన్‌ గిరాటేశాడు. ఆ వెంటనే మోర్గాన్‌ (9) పేలవ షాట్‌కు ఔటయ్యాడు.  అప్పటికి 23.1 ఓవర్లలో జట్టు స్కోరు 86/4. స్టోక్స్‌–బట్లర్‌  ఐదో వికెట్‌కు 130 బంతుల్లో 110 పరుగులు జోడించి మలుపు తిప్పారు. 53 బంతుల్లో బట్లర్, స్టోక్స్‌ 81 బంతుల్లో అర్ధసెంచరీలు అందుకున్నారు. సమీకరణం 32 బంతుల్లో 46 పరుగులుగా మారి విజయావకాశాలు మెరుగైన స్థితిలో ఫెర్గూసన్‌ ఓవర్లో బట్లర్‌ షాట్‌కు యత్నించి ఔటవడం ఉత్కంఠ పెంచింది. స్టోక్స్‌ పోరాడుతున్నా... వోక్స్‌ (2)ను పెవిలియన్‌ చేర్చి కివీస్‌ మళ్లీ మ్యాచ్‌లోకి వచ్చింది. 49వ ఓవర్లో ప్లంకెట్‌ (10), ఆర్చర్‌ (0)లను నాలుగు బంతుల వ్యవధిలో ఔట్‌ చేసి నీషమ్‌ ఒత్తిడిని ఆతిథ్య జట్టు మీదకు నెట్టాడు. చివరి ఓవర్లో 15 పరుగులు అవసరం కాగా... బౌల్ట్‌ తొలి రెండు బంతులకు స్టోక్స్‌ పరుగులు చేయలేకపోయాడు. మూడో బంతిని సిక్స్‌ కొట్టాడు. నాలుగో బంతిని డీప్‌ మిడ్‌ వికెట్‌లోకి పంపి రెండో పరుగుకు యత్నిస్తుండగా గప్టిల్‌ త్రో స్టోక్స్‌కు తగిలి 6 పరుగులు వచ్చాయి. లక్ష్యం రెండు బంతుల్లో 3 పరుగులుగా మారింది. రషీద్‌ (0), వుడ్‌ (0) రనౌట్లయినా పరుగు వచ్చి మ్యాచ్‌ టై అయింది. చివరి ఐదు ఓవర్లు హైడ్రామా... ఫైనల్లో చివరి ఐదు ఓవర్ల హైడ్రామా ఇరు జట్ల పోరాటాన్ని పతాక స్థాయికి తీసుకెళ్లింది. అప్పటికి ఇంగ్లండ్‌ 30 బంతుల్లో 46 పరుగులు చేయాలి. బట్లర్‌  రెండు బంతుల ముందే ఔటయ్యాడు. వోక్స్‌ (46.1), ప్లంకెట్‌ (48.3), ఆర్చర్‌ (48.6) ఔటవ డంతో కప్‌ న్యూజిలాండ్‌దే అనిపించింది. కానీ, అటు పరుగులూ రావడంతో ఉత్కంఠ పెరిగింది. చివరి ఓవర్లో స్టోక్స్‌ సిక్స్, ఓవర్‌ త్రో రూపంలో 2 ప్లస్‌ 4 పరుగులు రావడంతో తలకిందులైంది. బౌల్ట్‌ క్యాచ్‌... సిక్స్‌... మ్యాచ్‌లో ప్రత్యేకంగా చెప్పుకోవాల్సిన టర్నింగ్‌ పాయింట్‌ నీషమ్‌ ఓవర్లో స్టోక్స్‌ కొట్టిన సిక్స్‌ షాట్‌. 9 బంతుల్లో 22 పరుగులు కావాల్సిన స్థితిలో జరిగిందీ ఘటన. స్టోక్స్‌ మిడ్‌ వికెట్‌లోకి భారీ షాట్‌ ఆడగా... బౌండరీ లైన్‌ వద్ద బౌల్ట్‌ చేసిన తప్పిదం దెబ్బకొట్టింది. లైన్‌కు కొన్ని అంగుళాల ముందే బంతిని అందుకున్న బౌల్ట్‌... అలాఅలా వెనక్కువెళ్తూ బౌండరీ రోప్‌ను తొక్కేశాడు. ఎదురుగా ఫీల్డర్‌ గప్టిల్‌ ఉన్నా అతడికి విసిరే ప్రయత్నం చేయలేకపోయాడు. పోనీ, బంతిని లోపలకు విసిరేసినా ఆరు పరుగులు బదులుగా రెండో, మూడో వచ్చేవి. అవేవీ కాకపోగా ఏకంగా సిక్స్‌ నమోదైంది. బోనస్‌గా స్టోక్స్‌కు లైఫ్‌ వచ్చింది. ప్రధాన పేసర్‌ అయిన బౌల్ట్‌ బౌలింగ్‌లోనూ (10 ఓవర్లలో 67 పరుగులు; సూపర్‌ ఓవర్లో 15 పరుగులు) ఆకట్టుకోలేకపోవడం కివీస్‌కు వేదన మిగిల్చింది. స్కోరు వివరాలు న్యూజిలాండ్‌ ఇన్నింగ్స్‌: గప్టిల్‌ (ఎల్బీడబ్ల్యూ) వోక్స్‌ 19; నికోల్స్‌ (బి) ప్లంకెట్‌ 55; విలియమ్సన్‌ (సి) బట్లర్‌ (బి) ప్లంకెట్‌ 30; టేలర్‌ (ఎల్బీడబ్ల్యూ) వుడ్‌ 15; లాథమ్‌ (సి) సబ్‌ (విన్స్‌) (బి) వోక్స్‌ 47; నీషమ్‌ (సి) రూట్‌ (బి) ప్లంకెట్‌ 19; గ్రాండ్‌హోమ్‌ (సి) సబ్‌ (విన్స్‌) (బి) వోక్స్‌ 16; సాన్‌ట్నర్‌ (నాటౌట్‌) 5; హెన్రీ (బి) ఆర్చర్‌ 4; బౌల్ట్‌ (నాటౌట్‌) 1; ఎక్స్‌ట్రాలు 30; మొత్తం (50 ఓవర్లలో 8 వికెట్లకు) 241 వికెట్ల పతనం: 1–29, 2–103, 3–118, 4–141, 5–173, 6–219, 7–232, 8–240. బౌలింగ్‌: వోక్స్‌ 9–0–37–3; ఆర్చర్‌ 10–0–42–1; ప్లంకెట్‌ 10–0–42–3; వుడ్‌ 10–1–49–1; రషీద్‌ 8–0–39–0; స్టోక్స్‌ 3–0–20–0. ఇంగ్లండ్‌ ఇన్నింగ్స్‌: జేసన్‌ రాయ్‌ (సి) లాథమ్‌ (బి) హెన్రీ 17; బెయిర్‌స్టో (బి) ఫెర్గూసన్‌ 36; రూట్‌ (సి) లాథమ్‌ (బి) గ్రాండ్‌హోమ్‌ 7; మోర్గాన్‌ (సి) ఫెర్గూసన్‌ (బి) నీషమ్‌ 9, స్టోక్స్‌ (నాటౌట్‌) 84; బట్లర్‌ (సి) సబ్‌ (సౌతీ) (బి) ఫెర్గూసన్‌ 59; వోక్స్‌ (సి) లాథమ్‌ (బి) ఫెర్గూసన్‌ 2; ప్లంకెట్‌ (సి) బౌల్ట్‌ (బి) నీషమ్‌ 10; ఆర్చర్‌ (బి) నీషమ్‌ 0; రషీద్‌ (రనౌట్‌) 0; మార్క్‌ వుడ్‌ (రనౌట్‌) 0; ఎక్స్‌ట్రాలు 17; మొత్తం (50 ఓవర్లలో ఆలౌట్‌) 241. వికెట్ల పతనం: 1–28, 2–59, 3–71, 4–86, 5–196, 6–203, 7–220, 8–227, 9–240, 10–241. బౌలింగ్‌: బౌల్ట్‌ 10–0–67–0, హెన్రీ 10–2–40–1, గ్రాండ్‌హోమ్‌ 10–2–25–1, ఫెర్గూసన్‌ 10–0–50–3, నీషమ్‌ 7–0–43–3, సాన్‌ట్నర్‌ 3–0–11–0.   సూపర్‌ ఓవర్‌ సాగిందిలా... నోట్‌: సూపర్‌ ఓవర్లోనూ స్కోర్లు ‘టై’ కావడంతో మ్యాచ్‌ మొత్తంలో ఎక్కువ బౌండరీలు కొట్టిన ఇంగ్లండ్‌ విజేతగా నిలిచింది. ఇంగ్లండ్‌ 26 బౌండరీలు కొట్టగా... న్యూజిలాండ్‌ 17 బౌండరీలు సాధించింది.    స్టోక్స్‌... మాస్టర్‌ స్ట్రోక్‌... ప్రపంచ కప్‌ నెగ్గడం జట్టుగా ఇంగ్లండ్‌కు ఎంత సంబరమో, అంతకుమించి బెన్‌ స్టోక్స్‌కు వ్యక్తిగతంగా ఆనందదాయకం. ఎందుకంటే అతడి చేతుల మీదుగానే ఇంగ్లండ్‌కు ఒక కప్‌ (2017 టి20 ప్రపంచ కప్‌) చేజారింది. భారత్‌ వేదికగా జరిగిన నాటి కప్‌ ఫైనల్లో స్టోక్స్‌ వేసిన చివరి ఓవర్లో కార్లొస్‌ బ్రాత్‌వైట్‌ వరుసగా నాలుగు సిక్స్‌లు బాది వెస్టిండీస్‌కు కప్‌ను సాధించి పెట్టాడు. అప్పుడు స్టోక్స్‌ పిచ్‌ పైనే కుప్పకూలి రోదించాడు. ఆదివారం నాటి ఫైనల్లో ఆ చేదు అనుభవాన్ని అతడు తన చేతులతోనే చెరిపేసుకున్నాడు. ఇంగ్లండ్‌ ఓటమికి దగ్గరగా ఉన్నప్పుడు క్రీజులోకి వచ్చిన స్టోక్స్‌ తన స్ఫూర్తిదాయక ఇన్నింగ్స్‌తో ఒడ్డునపడేశాడు. సహచరులు వెనుదిరుగుతున్నా పట్టు వదలకుండా ఆఖరి వరకు క్రీజులో నిలిచాడు. సూపర్‌ ఓవర్లోనూ బ్యాటింగ్‌కు వచ్చి బాధ్యతను సంపూర్తిగా నెరవేర్చాడు. టోర్నీలో స్టోక్స్‌ ఆస్ట్రేలియాపై (89), శ్రీలంకపై (82 నాటౌట్‌) ఆడిన ఇన్నింగ్స్‌లు ఓటముల కారణంగా వెలుగులోకి రాలేకపోయాయి. ఫైనల్లో మాత్రం అతడి శ్రమకు అత్యద్భుత రీతిలో ఫలితం దక్కింది. గప్టిల్‌ హీరో... విలన్‌... న్యూజిలాండ్‌ను టోర్నీలో దెబ్బకొట్టింది ఓపెనింగ్‌ వైఫల్యమే. సీనియర్‌ మార్టిన్‌ గప్టిల్‌ ఏమాత్రం రాణించలేక విమర్శల పాలయ్యాడు. అయితే, సెమీఫైనల్లో టీమిండియా వెటరన్‌ ధోనిని అద్భుత త్రో ద్వారా రనౌట్‌ చేసి వాటికి కొంతవరకు సమాధానమిచ్చాడు. ఫైనల్లో మళ్లీ విమర్శల పాలయ్యే ప్రదర్శన చేశాడు. బ్యాటింగ్‌లో విఫలమైన అతడు... 50వ ఓవర్‌ నాలుగో బంతిని ఓవర్‌ త్రో చేసి ప్రత్యర్థికి నాలుగు పరుగులు సునాయాసంగా ఇచ్చాడు. ఇందులో గప్టిల్‌ పాత్ర పరోక్షమే అని, కివీస్‌ దురదృష్టమని అనుకుని సరిపెట్టుకున్నా... సూపర్‌ ఓవర్‌ చివరి బంతికి ప్రపంచ కప్‌ సాధించి పెట్టే రెండు పరుగులు చేయలేకపోయాడు. దీనిని తలుచుకునే ఏమో మ్యాచ్‌ అనంతరం గప్టిల్‌ కన్నీటి పర్యంతమయ్యాడు.   (ఫొటో గ్యాలరీ కోసం ఇక్కడ క్లిక్ చేయండి) గప్టిల్‌ను ఓదార్చుతున్న నీషమ్‌

ప్రారంభంలో చప్పగా సాగుతోందన్నారు వారాలు గడుస్తున్నా ఊపు లేదన్నారు మ్యాచ్‌లు తరుగుతున్నా మజా ఏదన్నారు మధ్యలోకి వచ్చేసరికి కాక మొదలైంది రంజైన మ్యాచ్‌లతో ఆట రక్తి కట్టింది ఇప్పుడిక ప్రపంచ కప్‌ ఆఖరి అంకం 46వ రోజున 48వ మ్యాచ్‌తో ముగింపు వన్డే కిరీటం ఎవరిదో తేలిపోయే సందర్భం రానున్న నాలుగేళ్లకు రారాజు పట్టాభిషేకం దూకుడైన ఇంగ్లండ్‌... నిబ్బరంగా న్యూజిలాండ్‌ జగజ్జేత హోదా పుట్టింటికి దక్కుతుందా? రెక్కలు కట్టుకుని కివీస్‌ గూటిలో వాలుతుందా?  క్రికెట్‌ మక్కా లార్డ్స్‌లో... అందమైన బాల్కనీ నుంచి... సగర్వంగా కప్‌ను చూపే కెప్టెన్‌ ఎవరో? మరికొద్ది గంటల్లో ఉత్కంఠకు తెర తర్వాత తెరపైకి ‘సరికొత్త విజేత’ అభిమానులూ... ఆస్వాదించండి!   లండన్‌: వన్డే క్రికెట్‌లో 23 ఏళ్ల తర్వాత సరికొత్త చాంపియన్‌ ఆవిర్భావానికి 12వ ప్రపంచ కప్‌ వేదిక కాబోతోంది. తొలిసారి జగజ్జేతగా నిలిచేందుకు లండన్‌లోని ప్రఖ్యాత లార్డ్స్‌ మైదానంలో ఆదివారం ఇంగ్లండ్, న్యూజిలాండ్‌ తుది సమరంలో తలపడనున్నాయి. మ్యాచ్‌లో ఎవరు గెలిచినా అది వారి దేశ చరిత్రలో సువర్ణాధ్యాయంగా మిగిలిపోనుంది. ఇరు జట్ల బలాబలాల ప్రకారం చూస్తే ఈ ఫైనల్‌ను బ్యాటింగ్, పేస్‌ బౌలింగ్‌ మధ్య పోటీగా పేర్కొనవచ్చు. దూకుడైన ఆటతో పైచేయి సాధించడం ఇంగ్లండ్‌ వ్యూహం కాగా... నెమ్మదిగా పట్టు బిగించే స్వభావం న్యూజిలాండ్‌ది. మరి అంతిమ పోరులో ఎవరి ప్రణాళికలు విజయవంతం అవుతాయో చూడాలి? మార్పుల్లేకుండానే! అత్యంత కీలక మ్యాచ్‌ కాబట్టి రెండు జట్లు తాము సెమీఫైనల్లో ఆడిన తుది పదకొండు మందితోనే ఫైనల్లో దిగే వీలుంది. పైకి కనిపించకున్నా అటు ఇటు ఒకరిద్దరు ఆటగాళ్లే కీలకం. జేసన్‌ రాయ్, రూట్‌ను త్వరగా ఔట్‌ చేస్తే ఆతిథ్య జట్టు పరోక్షంగానైనా ఆత్మరక్షణలో పడటం ఖాయం. ఈ నేపథ్యంలో విధ్వంసక జాస్‌ బట్లర్‌ నుంచి భారీ ఇన్నింగ్స్‌ నమోదవాల్సి ఉంటుంది. అనంతరం కెప్టెన్‌ మోర్గాన్, ఆల్‌రౌండర్‌ స్టోక్స్‌ బాధ్యతలు తీసుకుంటారు. ఇక విలియమ్సన్, రాస్‌ టేలర్‌ తేలిపోతే న్యూజిలాండ్‌ పని ఖతం. అసలే ఆ జట్టు ఓపెనర్లు గప్టిల్, నికోల్స్‌ పేలవ ఫామ్‌తో సతమతం అవుతోంది. లాథమ్, గ్రాండ్‌హోమ్, నీషమ్‌ అదనపు పరుగులు జోడించగలరు తప్ప పరిస్థితిని అమాంతం మార్చలేరు. మొత్తమ్మీద చూస్తే బ్యాటింగ్, బౌలింగ్‌లో సమతూకంతో ఉన్నందున ఇంగ్లండ్‌కు ఫేవరెట్‌ మార్కులు ఎక్కువగా పడతాయి. బ్యాటింగ్‌లో బలహీనంగా ఉన్నా టోర్నీలో కీలక మ్యాచ్‌ల్లో ఒత్తిడిని తట్టుకుని గెలిచినందున కివీస్‌ను తేలిగ్గా తీసుకోలేం. చరిత్ర బాటలో ఈ ఇద్దరు ఐర్లాండ్‌ జాతీయుడైన మోర్గాన్‌ ఇంగ్లండ్‌ తరఫున ఆడటమే అనూహ్యం అనుకుంటే, కెప్టెన్‌గానూ ఎదిగి, ఇప్పుడు ప్రపంచ కప్‌ సాధించే వరకు తీసుకొచ్చాడు. గాటింగ్, గూచ్‌ వంటి మహామహులకు సాధ్యం కాని ఈ చిరకాల స్వప్నాన్ని గనుక నెరవేరిస్తే మోర్గాన్‌ పేరు చరిత్రలో చిరస్థాయిగా నిలిచిపోతుంది. అటు విలియమ్సన్‌కూ అంతే స్థాయిలో ఖ్యాతి దక్కుతుంది. మార్టిన్‌ క్రో, బ్రెండన్‌ మెకల్లమ్‌ వంటి తమ దేశ దిగ్గజాలకు త్రుటిలో చేజారిన కప్‌ను సాధిస్తే... ఇప్పటికే ప్రపంచ శ్రేణి బ్యాట్స్‌మన్‌గా పేరున్న అతడు వ్యక్తిగతంగా మరో మెట్టెక్కుతాడు. నాలుగోసారి... రెండోసారి.... ఇంగ్లండ్‌ ప్రపంచకప్‌ ఫైనల్‌ ఆడటం ఇది నాలుగోసారి. 1979, 87, 92లలో ఆ జట్టు తుది సమరానికి అర్హత సాధించింది. న్యూజిలాండ్‌ 2015 కప్‌ రన్నరప్‌. చిత్రమేమంటే ఇంగ్లండ్‌ ఆటగాళ్లందరికీ ఇదే తొలి ఫైనల్‌. కివీస్‌ తరఫున గత ఫైనల్‌ మ్యాచ్‌ ఆడిన గప్టిల్, విలియమ్సన్, టేలర్, బౌల్ట్, హెన్రీ ఈసారీ బరిలో దిగనున్నారు. అటో గోడ.. ఇటో గోడ ఇరు జట్లలో అంత తొందరగా బద్దలు కొట్టలేనంతటి రెండు బ్యాటింగ్‌ గోడలున్నాయి. అవే విలియమ్సన్‌ , రూట్‌ (549 పరుగులు). పోటాపోటీగా రాణించిన ఈ ఇద్దరూ సమవయస్కులే. ఒకే తరహా బ్యాటింగ్‌ శైలి వారే. తమ జట్ల విజయాల్లో కీలకంగా మారినవారే. ఎలాంటి సందర్భంలోనైనా ఇన్నింగ్స్‌లు నిర్మించగలవారే. ఫైనల్లో ఎవరు తమ పాత్ర సమర్థంగా పోషిస్తారో చూద్దాం. వీరి సమరం ఆసక్తికరం రాయ్, బెయిర్‌స్టో x బౌల్ట్, హెన్రీ  జేసన్‌ రాయ్‌ (426 పరుగులు), బెయిర్‌స్టో (496 పరుగులు)... టోర్నీలో అత్యంత విజయవంతమైన ఓపెనింగ్‌ జంట. గాయంతో రాయ్‌ దూరమైతే ఓ దశలో సంక్లిష్ట పరిస్థితులు ఎదుర్కొన్నది జట్టు. అప్పుడు బెయిర్‌స్టో ఒంటరివాడైనట్లు కనిపించాడు. భారత్‌తో మ్యాచ్‌లో రాయ్‌ పునరాగమనంతో ఈ జోడీ మళ్లీ తడాఖా చూపుతోంది. ఫైనల్లో వీరికి న్యూజిలాండ్‌ పేసర్లు బౌల్ట్‌ (17 వికెట్లు), హెన్రీ (13 వికెట్లు) అడ్డుకట్ట వేస్తే ఇంగ్లండ్‌కు ముకుతాడు పడినట్లే. కచ్చితమైన లెంగ్త్‌లో బౌలింగ్‌ చేసే ఈ జోడీకి మరో పేసర్‌ లాకీ ఫెర్గూసన్‌ (18 వికెట్లు) తోడైతే ఆతిథ్య జట్టుకు కష్టాలు తప్పవు. విలియమ్సన్, టేలర్‌ X ఆర్చర్, వోక్స్‌ న్యూజిలాండ్‌ ఫైనల్‌కు చేరిందంటే అది కెప్టెన్‌ విలియమ్సన్‌ (548 పరుగులు) విశేష రాణింపు, రాస్‌ టేలర్‌ (335 పరుగులు) నిలకడతోనే. భారత్‌తో జరిగిన సెమీస్‌లో వీరి అర్ధ సెంచరీలే ఈ విషయాన్ని చాటుతాయి. ఈ ఇద్దరికీ ఇంగ్లండ్‌ పేసర్లు ఆర్చర్‌ (19 వికెట్లు), వోక్స్‌ (13 వికెట్లు) నుంచి సవాల్‌ ఎదురవడం ఖాయం. మూడో పేసర్‌ మార్క్‌ వుడ్‌ (17 వికెట్లు) కూడా తక్కువేం కాదు. కేన్‌–టేలర్‌ జోడీ... వీరిని కాచుకొని క్రీజులో నిలదొక్కుకుంటే న్యూజిలాండ్‌ ఇన్నింగ్స్‌ సాఫీగా సాగే అవకాశం ఉంటుంది. స్పిన్నర్లూ ఉన్నారోయ్‌... బ్యాటింగ్‌కు అనుకూలమైనా, పేసర్లు పండుగ చేసుకుంటున్నా ఈ కప్‌లో స్పిన్నర్లూ అంతోఇంతో ప్రభావం చూపారు. అలాంటివారిలో ఆదిల్‌ రషీద్‌ (ఇంగ్లండ్, 11 వికెట్లు), సాన్‌ట్నర్‌ (న్యూజిలాండ్, 6 వికెట్లు) ముఖ్యులు. స్పిన్‌ను సమర్థంగా ఆడే భారత్‌ను సెమీస్‌లో సాన్‌ట్నర్‌ కట్టి పడేశాడు. రషీద్‌... ఆస్ట్రేలియాపై నిర్ణయాత్మక ప్రదర్శన కనబర్చాడు. ఇక ఫైనల్స్‌లో అవసరమైన సందర్భంలో వీరు ఎలాంటి పాత్ర పోషిస్తారో? తుది జట్లు (అంచనా) ఇంగ్లండ్‌: జేసన్‌ రాయ్, బెయిర్‌స్టో, రూట్, మోర్గాన్‌ (కెప్టెన్‌), స్టోక్స్, బట్లర్, వోక్స్, ప్లంకెట్, ఆర్చర్, రషీద్, మార్క్‌ వుడ్‌. న్యూజిలాండ్‌: గప్టిల్, నికోల్స్, విలియమ్సన్‌ (కెప్టెన్‌), రాస్‌ టేలర్, నీషమ్, లాథమ్, గ్రాండ్‌హోమ్, సాన్‌ట్నర్, హెన్రీ, బౌల్ట్, ఫెర్గూసన్‌. పిచ్, వాతావరణం శనివారం వరకు పిచ్‌పై సన్నటి పొరలా పచ్చిక ఉంది. వేడి ప్రభావంతో ఆదివారం మ్యాచ్‌ సమయానికి అది ఎండిపోవచ్చు. తద్వారా సహజ స్వభావంతో బ్యాటింగ్‌కు అనుకూలంగా మారుతుంది. పిచ్‌ను పరిశీలించిన మోర్గాన్‌ మ్యాచ్‌ మొదలయ్యే వేళకు ఓ అంచనాకు రావొచ్చని అన్నాడు. మ్యాచ్‌కు వర్షం ముప్పు లేదు. ఫైనల్‌కూ రిజర్వ్‌ డే ఉంది. ఆదివారం వర్షం వల్ల అంతరాయం కలిగి ఫలితం రాకపోతే సోమవారం కొనసాగిస్తారు. ఒకవేళ ఫైనల్‌ ‘టై’ అయితే ‘సూపర్‌ ఓవర్‌’ ద్వారా విజేతను నిర్ణయిస్తారు. మ్యాచ్‌ రద్దయితే మాత్రం రెండు జట్లను సంయుక్త విజేతలుగా ప్రకటిస్తారు.   ముఖాముఖిలో పోటాపోటీ... ఇప్పటివరకు ఇరు జట్ల మధ్య 90 మ్యాచ్‌లు జరిగాయి. న్యూజిలాండ్‌ 43 మ్యాచ్‌లు, ఇంగ్లండ్‌ 41 గెలిచాయి. రెండు ‘టై’ కాగా, నాలుగింట్లో ఫలితం తేలలేదు. ప్రపంచకప్‌లో 9 సార్లు ఎదురుపడగా ఐదుసార్లు కివీస్, నాలుగుసార్లు ఇంగ్లండ్‌ నెగ్గాయి.

లండన్‌: విఖ్యాత లార్డ్స్‌ మైదానంలో ఆదివారం జరుగనున్న ప్రపంచ కప్‌ ఫైనల్‌కు కుమార ధర్మసేన (శ్రీలంక), మారిస్‌ ఎరాస్మస్‌ (దక్షిణాఫ్రికా) ఫీల్డ్‌ అంపైర్లుగా వ్యవహరించనున్నారు. రాడ్‌ టకర్‌ (ఆస్ట్రేలియా) థర్డ్‌ అంపైర్‌ కాగా, అలీమ్‌ దార్‌ (పాకిస్తాన్‌) నాలుగో అంపైర్‌గా బాధ్యతలు నిర్వర్తిస్తారని అంతర్జాతీయ క్రికెట్‌ కౌన్సిల్‌ (ఐసీసీ) శుక్రవారం ఓ ప్రకటనలో తెలిపింది. ఇదే బృందం గురువారం నాటి ఆస్ట్రేలియా–ఇంగ్లండ్‌ మధ్య జరిగిన రెండో సెమీఫైనల్‌కూ పనిచేసింది. అయితే, ధర్మసేన ఈ మ్యాచ్‌లో ఇంగ్లండ్‌ ఓపెనర్‌ జేసన్‌ రాయ్‌ను ఔట్‌గా ప్రకటించిన తీరు వివాదాస్పదమైంది.     యూకేలో ఫైనల్‌ ఉచిత ప్రసారం సొంతగడ్డపై టైటిల్‌కు అడుగు దూరంలో నిలిచిన నేపథ్యంలో యునైటెడ్‌ కింగ్‌డమ్‌ (యూకే)లో ఆదివారం జరుగబోయే ప్రపంచ కప్‌ ఫైనల్‌ను ఉచిత ప్రత్యక్ష ప్రసారం చేసేందుకు నిర్ణయించారు. యూకేలో 2005 నుంచి అంతర్జాతీయ క్రికెట్‌ మ్యాచ్‌ల ప్రసార హక్కులు స్కై స్పోర్ట్స్‌ చేతిలోనే ఉన్నాయి. ప్రస్తుత కప్‌కు సంబంధించి యూకేలో ప్రసార హక్కులను చానెల్‌ 4 దక్కించుకుంది. స్కై స్పోర్ట్స్‌తో వ్యవహారం కుదరకపోవడంతో ఆ సంస్థ ఒప్పందం చేసుకోలేదు. అయితే, ఇంగ్లండ్‌ ఫైనల్‌ చేరిన నేపథ్యంలో చానెల్‌ 4 మెత్తబడి మెట్టుదిగింది.

ముంబై: ప్రపంచకప్‌లో భారత జట్టు ప్రదర్శనను సమీక్షించాలని క్రికెట్‌ పరిపాలకుల కమిటీ (సీఓఏ) నిర్ణయించింది. దీనికి సంబంధించి త్వరలోనే జట్టు కెప్టెన్‌ విరాట్‌ కోహ్లి, కోచ్‌ రవిశాస్త్రిలతో సీఓఏ సమావేశమవుతుంది. మెగా టోర్నీ గ్రూప్‌ దశలో అగ్రస్థానంలో నిలిచిన టీమిండియా అనూహ్యంగా సెమీఫైనల్లో న్యూజిలాండ్‌ చేతిలో ఓడి నిష్క్రమించింది. ఇంగ్లండ్‌ నుంచి కోహ్లి, శాస్త్రి తిరిగి రాగానే సీఓఏ సభ్యులు వినోద్‌ రాయ్, డయానా ఎడుల్జీ, రవి తోడ్గే వారితో చర్చిస్తారు. దీంతో పాటు సెలక్షన్‌ కమిటీ చైర్మన్‌ ఎమ్మెస్కే ప్రసాద్‌తో కూడా ప్రత్యేకంగా భేటీ ఉంటుంది. ముఖ్యంగా అంబటి రాయుడు విషయంలో సెలక్టర్లు, టీమ్‌ మేనేజ్‌మెంట్‌ వ్యవహరించిన తీరును సీఓఏ ప్రశ్నించే అవకాశం ఉంది. రాయుడు మిడిలార్డర్‌లో సరైనవాడని కాదని భావిస్తే ప్రపంచ కప్‌ ముందు జరిగిన ఆఖరి సిరీస్‌ (ఆస్ట్రేలియాతో) వరకు కూడా అతడిని ఎందుకు ఆడించారనే విషయాన్ని కమిటీ ప్రశ్నించవచ్చు. అదే విధంగా దినేశ్‌ కార్తీక్‌ వైఫల్యం, సెమీస్‌లో ధోని ఏడో స్థానంలో ఆడిన విషయాలు కూడా  భేటీలో చర్చకు వచ్చే అవకాశం ఉంది. దీంతో పాటు 2020 టి20 ప్రపంచకప్‌ కోసం భారత జట్టును సిద్ధం చేసే విషయంలో సెలక్షన్‌ కమిటీ సూచనలను సీఓఏ కోరనుంది.    రేపు భారత జట్టు రాక... ప్రపంచకప్‌ ప్రస్థానాన్ని ముగించిన భారత క్రికెట్‌ జట్టు ఆదివారం స్వదేశం చేరుకోనుంది. విడిగా కాకుండా జట్టు ఆటగాళ్లందరూ కలిసి ఒకేసారి ముంబైకి ప్రయాణిస్తారు. ‘టోర్నీ ముగిశాక కొందరు ఆటగాళ్లు ఇంగ్లండ్‌లోనే ఉండి విరామం కోరుకుంటారని వినిపించింది. అయితే అది వాస్తవం కాదు. జట్టు సభ్యులంతా ఆదివారం లండన్‌లో ఒక్కచోటికి చేరుకుంటారు. అక్కడి నుంచి నేరుగా ముంబై విమానమెక్కుతారు. సెమీస్‌ ఓటమి తర్వాత క్రికెటర్లంతా చాలా బాధలో ఉన్నారు’ అని బీసీసీఐ ఉన్నతాధికారి ఒకరు వెల్లడించారు. టోర్నీ నుంచి నిష్క్రమించిన తర్వాత ఇప్పుడు అందరి దృష్టి ధోని రిటైర్మెంట్‌పైనే ఉంది. దీనిపై అతను మాత్రం ఇప్పటి వరకు పెదవి విప్పలేదు. ముంబై నుంచి స్వస్థలం రాంచీ చేరుకున్న తర్వాతే ధోని ఏదైనా ప్రకటన చేసే అవకాశం ఉంది.    ‘4’లో స్పెషలిస్ట్‌ బ్యాట్స్‌మెన్‌ లేకే ఓడాం హెడ్‌ కోచ్‌ రవిశాస్త్రి విశ్లేషణ ఎప్పటి నుంచో వెంటాడిన ‘నాలుగో’ సమస్యను సమస్యగానే ఉంచడం వల్ల ప్రపంచకప్‌ ఆశలు ఆవిరయ్యాయని భారత ప్రధాన కోచ్‌ రవిశాస్త్రి ఎట్టకేలకు అంగీకరించారు. మిడిలార్డర్‌లో స్పెషలిస్ట్‌ బ్యాట్స్‌మెన్‌ లేకే సెమీఫైనల్లో కంగుతిన్నామని రవిశాస్త్రి అన్నారు. టీమిండియా పరాజయాన్ని విశ్లేషించిన ఆయన ఈ లోటుపై తప్పకుండా సమీక్షించి సరైన నిర్ణయం తీసుకోవాల్సిందేనని సూచించారు.  ‘మిడిలార్డర్‌కు కీలకమైన నాలుగో స్థానాన్ని మొదట్లో రాహుల్‌తో లాగించాం. టోర్నీ మధ్యలో ఓపెనర్‌ ధావన్‌ గాయంతో నిష్క్రమించడంతో అతన్ని ఓపెనర్‌గా దింపాల్సి వచ్చింది. విజయ్‌ శంకర్‌ను ఆ నాలుగో స్థానంలో ఆడించినా... అతనూ గాయపడటంతో ఇక చేయాల్సిందేమీ లేకపోయింది’ అని రవిశాస్త్రి వివరించారు. మయాంక్‌ అగర్వాల్‌ను పిలిపించినా అప్పటికే సమయం మించిపోయిందన్నారు. ధోనిని బ్యాటింగ్‌ ఆర్డర్‌లో ముందుకు పంపలేదన్న గావస్కర్‌ విమర్శలపై మాట్లాడుతూ ఎంతో అనుభవజ్ఞుడు, గొప్ప ఫినిషర్‌ అయిన ధోనిని ముందే పంపితే... అతను ఔటయితే ఇక గెలిచే పరిస్థితే ఉండదన్న విశ్లేషణతోనే మాజీ కెప్టెన్‌ను ఏడోస్థానంలో దింపామని... ఇది పూర్తిగా జట్టు నిర్ణయమని రవిశాస్త్రి చెప్పుకొచ్చారు. ‘ఆఖరిదాకా వికెట్‌ కాపాడుకున్న ధోని కూడా గెలిపించగలననే ధీమాతోనే ఉన్నాడు. అతను రనౌట్‌ కానంత వరకు అతని కళ్లలో ఈ ఆత్మవిశ్వాసమే కనబడింది. దురదృష్టవశాత్తూ రనౌట్‌ కావడంతో ఓటమి తప్పలేదు’ అని కోచ్‌ తెలిపారు.  

44 ఏళ్ల వన్డే ప్రపంచ కప్‌ చరిత్రలో ఐదు జట్లే (వెస్టిండీస్, భారత్, ఆస్ట్రేలియా, పాకిస్తాన్, శ్రీలంక) ఇప్పటివరకు చాంపియన్లుగా నిలిచాయి. పెద్ద టోర్నీల్లో తేలిపోయే దురదృష్ట దక్షిణాఫ్రికాను మినహాయిస్తే మిగతా వాటిలో కచ్చితంగా జగజ్జేతగా నిలిచే సత్తా ఉన్నవి ఇంగ్లండ్, న్యూజిలాండ్‌. అయితే, వీటి పోరాటం ఇన్నాళ్లూ సెమీఫైనల్లోనో, ఫైనల్లోనో ముగిసింది. ఇక ఆ నిరీక్షణకు తెరపడే సమయం వచ్చింది. కొత్త చాంపియన్‌ ఆవిర్భావానికి వేదిక సిద్ధమవుతోంది. సరికొత్త చరిత్ర నమోదుకు కాలం వేచి చూస్తోంది. మరి ఈ జట్ల గత ఫైనల్‌ ప్రస్థానం ఎలా ఉందంటే?   సాక్షి క్రీడా విభాగం ఇంగ్లండ్‌ మూడుసార్లు 1979, 1987, 1992లో న్యూజిలాండ్‌ 2015లో ప్రపంచ కప్‌ చివరి మెట్టు వరకు వచ్చాయి. ఇంగ్లిష్‌ జట్టు... వరుసగా వెస్టిండీస్, ఆస్ట్రేలియా, పాకిస్తాన్‌ చేతిలో పరాజయం పాలై విశ్వ విజేతగా నిలిచే అవకాశం చేజార్చుకుంది. కివీస్‌ను గత కప్‌ ఫైనల్లో ఆస్ట్రేలియా దెబ్బకొట్టింది. ఈ రెండు జట్లు ఫైనల్లో తలపడనుండటం ఇదే మొదటిసారి కావడం ఓ విశేషమైతే... 12వ ప్రపంచ కప్‌ ద్వారా 23 ఏళ్ల తర్వాత కొత్త చాంపియన్‌ను ప్రేక్షకులు చూడబోతుండటం మరో విశేషం. చివరి సారిగా 1996లో (శ్రీలంక) ఓ కొత్త జట్టు జగజ్జేత అయింది. ఇంగ్లండ్‌ ఆ మూడుసార్లు ఇలా... క్రికెట్‌ పుట్టిల్లయిన ఇంగ్లండ్‌ ఇంతవరకు వన్డేల్లో విశ్వవిజేత కాలేకపోవడం ఆశ్చర్యమే. మంచి ఫామ్, గొప్ప ఆటగాళ్లు ఉన్నప్పటికీ కొన్ని తప్పిదాల కారణంగా ఆ జట్టు మిగతా దేశాలతో పోటీలో వెనుకబడిపోయింది. వీటిలో సంప్రదాయ టెస్టు తరహా ఆటను విడనాడకపోవడం మొదటిది. కాలానికి తగ్గట్లు మారకపోవడం రెండోది. ఇప్పుడు వాటిని ఛేదించి అమీతుమీకి సిద్ధమైంది. గతంలోని మూడు విఫలయత్నాలను గమనిస్తే... వివ్‌ విధ్వంసంలో కొట్టుకుపోయింది... వరుసగా రెండోసారి ఆతిథ్యమిచ్చిన 1979 కప్‌లో ఇంగ్లండ్‌ గ్రూప్‌ మ్యాచ్‌లన్నిటిలో అజేయంగా నిలిచింది. కెప్టెన్‌ మైక్‌ బ్రియర్లీ, బాయ్‌కాట్‌ వంటి ఓపెనర్లతో, కుర్రాళ్లు గూచ్, బోథమ్, డేవిడ్‌ గోవర్‌లతో టైటిల్‌ ఫేవరెట్‌గా కనిపించింది. సెమీస్‌లో గట్టి పోటీని తట్టుకుని 9 పరుగుల తేడాతో న్యూజిలాండ్‌ను ఓడించి ఫైనల్‌ చేరింది. తుది సమరంలో మాత్రం భీకర వెస్టిండీస్‌కు తలొంచింది. టాస్‌ గెలిచి బౌలింగ్‌ ఎంచుకోవడం ఓ తప్పిదం కాగా... విధ్వంసక వివ్‌ రిచర్డ్స్‌ (157 బంతుల్లో 138 నాటౌట్‌; 11 ఫోర్లు, 3 సిక్స్‌లు) అజేయ శతకంతో ఆతిథ్య జట్టును చితక్కొట్టాడు. కొలిస్‌ కింగ్‌ (66 బంతుల్లో 86; 10 ఫోర్లు, 3 సిక్స్‌లు) అతడికి అండగా నిలవడంతో కరీబియన్లు నిర్ణీత 60 ఓవర్లలో 9 వికెట్ల నష్టానికి 286 పరుగులు చేశారు. ఛేదనలో బ్రియర్లీ (64), బాయ్‌కాట్‌ (57) అర్ధ సెంచరీలతో మంచి పునాది వేసినా జోయల్‌ గార్నర్‌ (5/38) ధాటికి గూచ్‌ (32) మినహా మిగతావారు విఫలమయ్యారు. వీరు కాక రాండల్‌ (15) మాత్రమే రెండంకెల స్కోరు చేయడంతో ఇంగ్లండ్‌ 51 ఓవర్లలో 194 పరుగులకే ఆలౌటైంది. 92 పరుగుల తేడాతో ఓడి కప్‌ను చేజార్చుకుంది. గాటింగ్‌ షాట్‌తో గూబ గుయ్‌... భారత్‌ ఆతిథ్యమిచ్చిన 1987 కప్‌లో గ్రూప్‌ దశలో రెండుసార్లు (ఫార్మాట్‌ ప్రకారం) పాకిస్తాన్‌ చేతిలో ఓడిన ఇంగ్లండ్‌... శ్రీలంక, వెస్టిండీస్‌లపై అజేయ విజయాలతో సెమీస్‌ చేరింది. సెమీస్‌లో నాటి డిఫెండింగ్‌ చాంపియన్‌ భారత్‌పై 35 పరుగులతో నెగ్గింది. ఫైనల్లో టాస్‌ గెలిచి బ్యాటింగ్‌కు దిగిన ఆసీస్‌ను 50 ఓవర్లలో 253/5 కు కట్టడి చేసింది. గూచ్‌ (35), అథె (58)కు తోడు కెప్టెన్‌ గాటింగ్‌ (41), అలెన్‌ లాంబ్‌ (45) రాణించడంతో లక్ష్యం దిశగా సాగింది. అయితే, 135/2తో ఉన్న దశలో గాటింగ్‌ అత్యుత్సాహ రివర్స్‌ స్వీప్‌ సీన్‌ను రివర్స్‌ చేసింది. స్కోరు 177 వద్ద అథెను ఔట్‌ చేసిన ఆసీస్‌ బౌలర్లు పట్టుబిగించి ఇంగ్లండ్‌ను 50 ఓవర్లలో 246/8కే పరిమితం చేశారు. కప్‌నకు అతి దగ్గరగా వచ్చిన ఇంగ్లండ్‌ ఏడు పరుగుల తేడాతో కోల్పోయింది. పాక్‌ ప్రతాపాన్ని తట్టుకోలేక... ఆ వెంటనే జరిగిన 1992 కప్‌లో రౌండ్‌ రాబిన్‌ ఫార్మాట్‌లో ఇంగ్లండ్‌ అదరగొట్టింది. పాయింట్ల పట్టికలో రెండో స్థానంలో నిలిచింది. వర్షం రూపంలో అదృష్టం కలిసివచ్చి సెమీస్‌లో దక్షిణాఫ్రికాను 19 పరుగుల తేడాతో ఓడించి ఫైనల్‌కు వెళ్లింది. అటువైపు ప్రత్యర్థి పాకిస్తాన్‌ కావడంతో ఇంగ్లండ్‌దే కప్‌ అని అంతా అనుకున్నారు. కానీ, పాక్‌ పట్టువిడవకుండా ఆడి ఇంగ్లండ్‌ కలను చెదరగొట్టింది. టాస్‌ గెలిచి బ్యాటింగ్‌కు దిగిన పాక్‌ కెప్టెన్‌ ఇమ్రాన్‌ ఖాన్‌ (72), జావెద్‌ మియాందాద్‌ (58) అర్ధసెంచరీలు, ఇంజమామ్‌ (42) అక్రమ్‌ (32) మెరుపులతో నిర్ణీత 50 ఓవర్లలో 6 వికెట్ల నష్టానికి 249 పరుగులు చేసింది. ఛేదనలో అక్రమ్‌ (3/49), ముస్తాక్‌ అహ్మద్‌ (3/41), అకిబ్‌ జావెద్‌ (2/27) ప్రతాపానికి నీల్‌ ఫెయిర్‌ బ్రదర్‌ (62) తప్ప మిగతా ఇంగ్లండ్‌ ఆటగాళ్లు చేతులెత్తేశారు. దీంతో 49.2 ఓవర్లలో 227 పరుగులకే ఆలౌటై కప్‌నకు 22 పరుగుల దూరంలో ఆగిపోయింది.   కివీస్‌కు ఆసీస్‌ కిక్‌... ప్రపంచ కప్‌లలో న్యూజిలాండ్‌ది స్థిరమైన ప్రదర్శన. టోర్నీ ఎక్కడ జరిగినా కనీసం సెమీస్‌ చేరే స్థాయి ఉన్న జట్టుగా బరిలో దిగుతుంది. మొత్తం 12 కప్‌లలో 8 సార్లు సెమీస్‌కు రావడమే దీనికి నిదర్శనం. వాస్తవానికి మార్టిన్‌ క్రో బ్యాటింగ్‌ మెరుపులతో సహ ఆతిథ్యమిచ్చిన 1992 కప్‌లోనే కివీస్‌ హాట్‌ ఫేవరెట్‌గా కనిపించింది. కానీ, సెమీస్‌లో పాకిస్తాన్‌ విజృంభణకు తలొంచింది. మళ్లీ 2015లో సహ ఆతిథ్యంలో కెప్టెన్‌ మెకల్లమ్‌ విధ్వంసక ఇన్నింగ్స్‌లతో మెగా టోర్నీలో విజేతగా నిలిచేలా కనిపించింది. అయితే ఫైనల్లో ఆస్ట్రేలియాను నిలువరించలేకపోయింది. టాస్‌ గెలిచి బ్యాటింగ్‌ ఎంచుకున్నా... భీకర ఫామ్‌లో ఉన్న మెకల్లమ్‌ (0) డకౌట్‌ కావడంతో మానసికంగా బలహీన పడిపోయింది. ఇలియట్‌ (83), రాస్‌ టేలర్‌ (40) మాత్రమే రాణించడంతో 45 ఓవర్లలో 183కే ఆలౌటైంది. స్వల్ప స్కోరును ఆస్ట్రేలియా 33.1 ఓవర్లలో 3 వికెట్లే కోల్పోయి ఛేదించింది.

9969 రోజులు... ఇంగ్లండ్‌ క్రికెట్‌ జట్టు ఆఖరిసారిగా ప్రపంచ కప్‌ ఫైనల్‌ ఆడి ఇన్నిరోజులైంది! అప్పటి నుంచి ఆ దేశపు అభిమానులు ఎదురు చూపులు చూస్తూనే ఉన్నారు. 1992 వరల్డ్‌ కప్‌ తర్వాత ఆరు టోర్నీలలో ఒక్కసారి కూడా సెమీస్‌ చేరలేకపోయిన ఇంగ్లండ్‌ ఇప్పుడు సొంతగడ్డపై ఎట్టకేలకు తుదిపోరుకు అర్హత సాధించింది. గతంలో మూడు ఫైనల్‌ పోరాటాల్లోనూ ఓడిన ఆ జట్టు నాలుగో సారి ఫైనల్లోకి అడుగుపెట్టి 44 ఏళ్ల తమ టైటిల్‌ కలను నెరవేర్చుకునేందుకు అడుగు దూరంలో నిలిచింది. 2015 ప్రపంచకప్‌లో లీగ్‌ దశలోనే నిష్క్రమించి పాతాళానికి పడిపోయిన ఇంగ్లండ్‌ కొత్తగా ఎగసి ఇప్పుడు డిఫెండింగ్‌ చాంపియన్, చిరకాల ప్రత్యర్థి ఆస్ట్రేలియానే చిత్తు చేసి ఫైనల్లోకి అడుగు పెట్టడం మరో విశేషం. బర్మింగ్‌హామ్‌: సెమీస్‌లో డిఫెండింగ్‌ చాంపియన్‌ ఆస్ట్రేలియా ఖేల్‌ ఖతమైంది. ఈ ప్రపంచకప్‌లో కొత్త చాంపియన్‌ ఖాయమైంది. గురువారం జరిగిన రెండో సెమీఫైనల్లో ఇంగ్లండ్‌ 8 వికెట్ల తేడాతో ఆస్ట్రేలియాపై జయకేతనం ఎగురవేసింది. ముందుగా బ్యాటింగ్‌కు దిగిన ఆస్ట్రేలియా 49 ఓవర్లలో 223 పరుగుల వద్ద ఆలౌటైంది. స్మిత్‌ (119 బంతుల్లో 85; 6 ఫోర్లు) ఒంటరి పోరాటం చేశాడు. ‘మ్యాన్‌ ఆఫ్‌ ద మ్యాచ్‌’ క్రిస్‌ వోక్స్‌ ప్రత్యర్థిని దెబ్బతీశాడు. లక్ష్యఛేదనకు దిగిన ఇంగ్లండ్‌ 32.1 ఓవర్లలో 2 వికెట్లు కోల్పోయి 226 పరుగులు చేసింది. ఓపెనర్‌ జేసన్‌ రా య్‌ (65 బంతుల్లో 85; 9 ఫోర్లు, 5 సిక్స్‌లు) మెరిపించాడు. మోర్గాన్‌ (39 బంతుల్లో 45 నాటౌట్‌), రూట్‌ (46 బంతుల్లో 49 నాటౌట్‌; 8 ఫోర్లు) రాణించారు. ఫించ్‌ 0... 14కే ముగ్గురు ఔట్‌ టాస్‌ నెగ్గిన ఆస్ట్రేలియా బ్యాటింగ్‌ ఎంచుకోగా, వార్నర్‌తో కలిసి ఓపెనింగ్‌ చేసిన కెప్టెన్‌ ఫించ్‌ (0) డకౌటయ్యాడు. ఇన్నింగ్స్‌ రెండో ఓవర్‌ తొలి బంతికే  ఆర్చర్‌ అతన్ని ఔట్‌ చేశాడు. మరుసటి ఓవర్లోనే వార్నర్‌ (9)ను పెవిలియన్‌ చేర్చిన వోక్స్,  హ్యాండ్స్‌కోంబ్‌ (4)ను బౌల్డ్‌ చేశాడు. 6.1 ఓవర్లలో ఆసీస్‌ స్కోరు 14/3. పట్టుమని పది ఓవర్ల ‘పవర్‌ప్లే’  పూర్తికాకముందే టాపార్డర్‌ వికెట్లను కోల్పోయిన కంగారూ జట్టు పీకల్లోతు కష్టాల్లో పడింది. ఆఖరి దాకా స్మిత్‌ ఒక్కడే... రెండో ఓవర్‌ రెండో బంతికే స్మిత్‌ ఆట మొదలైంది. అక్కడి నుంచి 47.1 ఓవర్‌ దాకా స్మిత్‌ జట్టును ఒడ్డున పడేసేందుకు చేసిన పోరాటం అద్వితీయం. హ్యాండ్స్‌కోంబ్‌ నిష్క్రమించాక వచ్చిన అలెక్స్‌ క్యారీ (70 బంతుల్లో 46; 4 ఫోర్లు)తో కలిసి ముందుగా వికెట్ల పతనాన్ని అడ్డుకున్నాడు. తర్వాత జాగ్రత్త పడుతూ... ఓపిగ్గా ఆడుతూ పరుగుల బాటపట్టాడు. ఇద్దరి జోడీ కుదురుకోవడంతో నెమ్మదిగానైనా జట్టు కోలుకుంది. 72 బంతుల్లో స్మిత్‌ అర్ధసెంచరీ పూర్తి చేసుకున్నాడు. నాలుగో వికెట్‌కు 103 పరుగులు జతయ్యాక జట్టు స్కోరు 117 పరుగుల వద్ద క్యారీని,  స్టొయినిస్‌ (0)ను రషీదే ఔట్‌ చేశాడు.  మళ్లీ కుదుపునకు గురైన స్మిత్‌ తన అసాధారణ పోరాటంతో జట్టును నిలబెట్టే ప్రయత్నం చేశాడు. ముందుగా మ్యాక్స్‌వెల్‌ (23 బంతుల్లో 22;  2 ఫోర్లు, 1 సిక్స్‌)తో కలిసి జట్టు స్కోరును 150 పరుగులు దాటించిన స్మిత్‌... టెయిలెండర్లతో కలిసి 200 పరుగుల దాకా తీసుకెళ్లాడు. కమిన్స్‌ (6) విఫలమైనా స్టార్క్‌ (36 బంతుల్లో 29; 1 ఫోర్, 1 సిక్స్‌) మెరుగ్గా ఆడటంతో జట్టు ఆ మాత్రమైనా చేయగలిగింది.    రాయ్‌ జోరు ఇంగ్లండ్‌ విజయలక్ష్యం 224. ఇదేమంత స్కోరే కాదు. కానీ కివీస్‌ చేతిలో జోరుమీదున్న భారత్‌ చిత్తవడం, ముందుగా బ్యాటింగ్‌ చేసిన ఆస్ట్రేలియా వికెట్ల విలాపంతో ఇంగ్లండ్‌ జాగ్రత్తపడింది. రాయ్, బెయిర్‌ స్టో (43 బంతుల్లో 34; 5 ఫోర్లు) మొదట్లో ఆచితూచి ఆడారు. పిచ్‌ను ఆకళింపు చేసుకున్నాక రాయ్‌ రఫ్ఫాడించడం మొదలుపెట్టాడు. స్టార్క్‌ వేసిన నాలుగో ఓవర్లో 2 బౌండరీలు కొట్టాడు. అతని మరుసటి ఓవర్లో భారీ సిక్సర్‌తో ఊపుతెచ్చాడు. పవర్‌ప్లే తర్వాత రాయ్‌ తన బ్యాటింగ్‌ పవర్‌ పెంచాడు. 11వ ఓవర్లో స్పిన్నర్‌ లయన్‌ను రంగంలో దించగా... రాయ్‌ సిక్సర్‌తో అతనికి స్వాగతం పలికాడు. మరో బౌండరీ కూడా కొట్టడంతో అతని ఓవర్లో 13 పరుగులు వచ్చాయి. స్టార్క్‌ వేసిన 15 ఓవర్లో రెండు ఫోర్లు కొట్టిన రాయ్‌ 50 బంతుల్లో ఫిఫ్టీ పూర్తి చేసుకున్నాడు. వికెట్‌ కోసం స్మిత్‌ బౌలింగ్‌తో ఆసీస్‌ ప్రయోగం చేసింది. అతను 16వ ఓవర్‌ వేయగా... రాయ్‌ ‘హ్యాట్రిక్‌’ సిక్సర్లతో విరుచుకుపడ్డాడు. ఈ ఓవర్లో 21 పరుగులు రాగా జట్టు స్కోరు 100 పరుగులు దాటేసింది. ఓపెనింగ్‌ జోడీ దుర్భేద్యంగా మారడంతో స్టార్క్‌ బౌలింగ్‌ను అదేపనిగా కొనసాగించాడు. ఈ ప్రయత్నంలో ఆసీస్‌ కెప్టెన్‌ ఫించ్‌ సఫలమయ్యాడు. 18వ ఓవర్లో బెయిర్‌స్టోను స్టార్క్‌ ఔట్‌ చేయడంతో 124 పరుగుల తొలి వికెట్‌ భాగస్వామ్యానికి తెరపడింది. కాసేపటికే కమిన్స్‌ బౌలింగ్‌లో అంపైర్‌ తప్పుడు నిర్ణయంతో రాయ్‌ ఔటయ్యాడు. అతని నిష్క్రమణతో కెప్టెన్‌ మోర్గాన్‌... రూట్‌కు జతయ్యాడు. జట్టు విజయానికి కేవలం 77 పరుగులే కావాలి. ఎలాంటి ఒత్తిడి లేని ఈ దశలో వీళ్లిద్దరు మరో వికెట్‌ పడకుండా... చక్కగా తమ పని పూర్తిచేశారు. ఇది  ఔటా! అ‘ధర్మసేన’ నిర్ణయంపై జేసన్‌ రాయ్‌ భగ్గుమన్నాడు. 20వ ఓవర్‌ నాలుగో బంతిని కమిన్స్‌ లెగ్‌సైడ్‌లో వేశాడు. పుల్‌షాట్‌కు ప్రయత్నించినా... బంతి బ్యాట్‌కు చిక్కకుండానే కీపర్‌ చేతుల్లో పడింది. కానీ కంగారూ ఆటగాళ్లంతా పెద్దగా అప్పీల్‌ చేసేసరికి ధర్మసేన (శ్రీలంక) తీరిగ్గా ఔటిచ్చాడు. బ్యాట్‌కు తగలనంత దూరం వెళ్లినా... ఔటేంటని రాయ్‌ తీవ్రంగా వాదించాడు. పిచ్‌పై నుంచి కదల్లేదు. మరో అంపైర్‌ ఎరాస్మస్‌ (దక్షిణాఫ్రికా) సర్దిచెప్పడంతో ఆగ్రహంగా పెవిలియన్‌కు వెళ్లిన రాయ్‌ తన గ్లవ్స్‌ను విసిరికొట్టడం కనిపించింది. రాయ్‌పై ఐసీసీ చర్య తీసుకుంది. మ్యాచ్‌ ఫీజులో 30 శాతం జరిమానాతో పాటు 2 డీ మెరిట్‌ పాయింట్లు శిక్షగా విధించింది. అయితే ఎలాంటి నిషేధానికి గురికాకపోవడం ఇంగ్లండ్‌కు పెద్ద ఊరట. స్కోరు వివరాలు ఆస్ట్రేలియా ఇన్నింగ్స్‌: వార్నర్‌ (సి) బెయిర్‌స్టో (బి) వోక్స్‌ 9; ఫించ్‌ ఎల్బీడబ్ల్యూ (బి) ఆర్చర్‌ 0; స్మిత్‌ రనౌట్‌ 85; హ్యాండ్స్‌కోంబ్‌ (బి) వోక్స్‌ 4; క్యారీ (సి) సబ్‌–విన్స్‌ (బి) రషీద్‌ 46; స్టొయినిస్‌ ఎల్బీడబ్ల్యూ (బి) రషీద్‌ 0; మ్యాక్స్‌వెల్‌ (సి) మోర్గాన్‌ (బి) ఆర్చర్‌ 22; కమిన్స్‌ (సి) రూట్‌ (బి) రషీద్‌ 6; స్టార్క్‌ (సి) బట్లర్‌ (బి) వోక్స్‌ 29; బెహ్రెన్‌డార్ఫ్‌ (బి) వుడ్‌ 1; లయన్‌ నాటౌట్‌ 5; ఎక్స్‌ట్రాలు 16; మొత్తం (49 ఓవర్లలో ఆలౌట్‌) 223.  వికెట్ల పతనం: 1–4, 2–10, 3–14, 4–117, 5–118, 6–157, 7–166, 8–217, 9–217, 10–223.  బౌలింగ్‌: వోక్స్‌ 8–0–20–3, ఆర్చర్‌ 10–0–32–2, స్టోక్స్‌ 4–0–22–0, వుడ్‌ 9–0–45–1, ప్లంకెట్‌ 8–0–44–0, రషీద్‌ 10–0–54–3.   ఇంగ్లండ్‌ ఇన్నింగ్స్‌: జేసన్‌ రాయ్‌ (సి) క్యారీ (బి) కమిన్స్‌ 85; బెయిర్‌ స్టో ఎల్బీడబ్ల్యూ (బి) స్టార్క్‌ 34; జో రూట్‌ నాటౌట్‌ 49; మోర్గాన్‌ నాటౌట్‌ 45; ఎక్స్‌ట్రాలు 13; మొత్తం (32.1 ఓవర్లలో 2 వికెట్లకు) 226. వికెట్ల పతనం: 1–124, 2–147. బౌలింగ్‌: బెహ్రెన్‌డార్ఫ్‌ 8.1–2–38–0, స్టార్క్‌ 9–0–70–1, కమిన్స్‌ 7–0–34–1, లయన్‌ 5–0–49–0, స్మిత్‌ 1–0–21–0, స్టొయినిస్‌ 2–0–13–0.   ఆర్చర్‌ బౌన్సర్‌ ధాటికి విలవిల్లాడిన క్యారీ... బ్యాండేజ్‌తో బ్యాటింగ్‌ కొనసాగించి కీలక ఇన్నింగ్స్‌ ఆడాడు.

కలలు కల్లలవడం అంటే ఇదేనేమో! ఆశలు అడియాసలు కావడమంటే ఇలాగేనేమో! దూసుకుపోతున్న రేసు గుర్రాన్ని దురదృష్టం వెంటాడితే ఈ తీరునే ఉంటుందేమో! అంచనాలను చేరుతున్నా... శిఖరం అంచుల్లోంచి జారిపడిపోయిన దృష్టాంతాలకు ఇదే నిదర్శనమేమో! తేలికైన ప్రత్యర్థిగా భావిస్తే అసలుకే మోసం తెచ్చింది. మనకు తిరుగులేదనుకుంటే తలొంచాల్సి వచ్చింది. స్వింగుతో కంగుతినిపించి స్పిన్‌తో చుక్కలు చూపింది. వెరసి... ప్రపంచ కప్‌ ఊహలను చెల్లాచెదురుచేస్తూ టీమిండియాకు న్యూజిలాండ్‌ అతిపెద్ద ఝలక్‌ ఇచ్చింది. ఇంతటి బాధాకర ఓటమిలోనూ ఆల్‌రౌండర్‌ రవీంద్ర జడేజా త్రీడీ ఆట (77 పరుగులు, ఒక వికెట్, ఒక రనౌట్, రెండు క్యాచ్‌లు) ఓదార్పునిచ్చింది. వెటరన్‌ ధోని పోరాటంతో పరువు దక్కింది. మనకు మిగిలిందిక... ప్రపంచ కప్‌ను పెద్దగా ఆసక్తి లేని సాధారణ ప్రేక్షకుడిగా వీక్షించడమే! మాంచెస్టర్‌: కోట్లాది అభిమానులను హతాశులను చేస్తూ... టీమిండియా ప్రపంచ కప్‌ పోరాటం సెమీఫైనల్‌తోనే ముగిసింది. లీగ్‌ దశ నుంచి అద్భుతంగా సాగుతున్న కోహ్లి సేన ప్రస్థానానికి నాకౌట్‌లో న్యూజిలాండ్‌ అడ్డుకట్ట వేసింది. రెండు జట్ల మధ్య బుధవారం ఇక్కడ కొనసాగిన తొలి సెమీస్‌లో కివీస్‌ 18 పరుగుల తేడాతో భారత్‌ను ఓడించి వరుసగా రెండోసారి ఫైనల్‌ చేరింది. అంతకుముందు ప్రత్యర్థి నిర్ణీత 50 ఓవర్లలో 8 వికెట్ల నష్టానికి 239 పరుగులు చేసింది. భువనేశ్వర్‌ (3/43)కు మూడు వికెట్లు దక్కాయి. 240 పరుగుల లక్ష్యంతో బరిలోకి దిగిన కోహ్లి బృందం 49.3 ఓవర్లలో 221 పరుగులకు ఆలౌటైంది. అద్భుత పోరాటం సాగించిన ఆల్‌రౌండర్‌ రవీంద్ర జడేజా (59 బంతుల్లో 77; 4 ఫోర్లు, 4 సిక్స్‌లు) టాప్‌ స్కోరర్‌. అతడికి అండగా నిలిచిన వెటరన్‌ మహేంద్ర సింగ్‌ ధోని (72 బంతుల్లో 50; ఫోర్, సిక్స్‌) అర్ధసెంచరీ సాధించాడు. కుర్రాళ్లు రిషభ్‌ పంత్‌ (56 బంతుల్లో 32; 4 ఫోర్లు), హార్దిక్‌ పాండ్యా (62 బంతుల్లో 32; 2 ఫోర్లు) ఫర్వాలేదనిపించారు. ఫామ్‌లో ఉన్న భారత ఓపెనర్లను త్వరగా పెవిలియన్‌ చేర్చి ఆదిలోనే కివీస్‌కు పట్టు చిక్కేలా చూసిన పేసర్‌ మ్యాట్‌ హెన్రీ (3/37)ని ‘మ్యాన్‌ ఆఫ్‌ ద మ్యాచ్‌’ వరించింది. బౌల్ట్‌ (2/42), సాన్‌ట్నర్‌ (2/34)లు రెండేసి వికెట్లు పడగొట్టారు. ఆతిథ్య ఇంగ్లండ్‌–ఆస్ట్రేలియా మధ్య గురువారం జరిగే రెండో సెమీఫైనల్‌ మ్యాచ్‌ విజేతతో ఆదివారం విఖ్యాత లార్డ్స్‌ మైదానంలో న్యూజిలాండ్‌ తలపడుతుంది. రోహిత్, రాహుల్, కార్తీక్, పంత్, హార్దిక్‌ అప్పుడే ఆశలు ఆవిరి... టోర్నీలో కళ్లు చెదిరే ఆటతో ఐదు సెంచరీలు చేసిన ‘హిట్‌మ్యాన్‌’ రోహిత్‌ శర్మ (1), గత మ్యాచ్‌లో శతకం బాదిన మరో ఓపెనర్‌ కేఎల్‌ రాహుల్‌ (1)తో పాటు మంచి ఫామ్‌లో ఉన్న కెప్టెన్‌ విరాట్‌ కోహ్లి (1)లను... ఇన్నింగ్స్‌ ఇలా మొదలైందో లేదో అలా ఔట్‌ చేసి భారత్‌ను తేరుకోలేనంత దెబ్బకొట్టింది కివీస్‌. దీంతో ఇటీవల ఎన్నడూ లేనివిధంగా భారత్‌ 5/3 గణాంకాలతో నిలిచింది. ఈ దశలో ప్రత్యర్థి పేసర్లను పంత్, దినేశ్‌ కార్తీక్‌ (25 బంతుల్లో 6) కాసేపు కాచుకున్నారు. దూకుడైన పంత్‌ వికెట్‌ పారేసుకునే ప్రమాదం ఉండటంతో కార్తీక్‌ ఎక్కువగా స్ట్రయికింగ్‌ తీసుకున్నాడు. కానీ, హెన్రీ బౌలింగ్‌లో బంతిని కొంత ఆలస్యంగా ఆడిన కార్తీక్‌... నీషమ్‌ అందుకున్న మెరుపు క్యాచ్‌కు వెనుదిరిగాడు. ధోని, జడేజా సరిగ్గా పవర్‌ ప్లే చివరి బంతికి కార్తీక్‌ పెవిలియన్‌ చేరగా స్కోరు 24/4. ఈ కప్‌లో అతి తక్కువ పవర్‌ ప్లే స్కోరు ఇదే కావడం గమనార్హం. హిట్టింగ్‌కు మారు పేరైన పంత్, పాండ్యా సహనం చూపుతూ ఐదో వికెట్‌కు 77 బంతుల్లో 47 పరుగులు జోడించి కాస్త ఒడ్డున పడేశారు. విజృంభించి బౌండరీలు కొట్టని స్థితిలో వీలు చూసుకుని సింగిల్స్‌ తీశారు. అయితే, స్పిన్నర్‌ సాన్‌ట్నర్‌పై భారీ షాట్లతో ప్రతాపం చూపబోయి ఇద్దరూ ఔటయ్యారు. ఈ దశలో ధోని, జడేజా సమయోచితంగా ఆడుతూ ముందుకు నడిపించారు. కానీ, 11 బంతుల వ్యవధిలో వీరిద్దరితో పాటు భువనేశ్వర్‌ (0), చహల్‌ (5)లను పెవిలియన్‌ చేర్చిన కివీస్‌ మ్యాచ్‌ను వశం చేసుకుంది.   టాపార్డర్‌ 1..1..1.. బ్యాటింగ్‌లో టాపార్డర్‌ భారత్‌కు పెట్టని బలం. దీనికితగ్గట్లే టోర్నీలో రోహిత్‌ (648), రాహుల్‌ (361), కోహ్లి (443) పరుగులు చేశారు. కానీ, సెమీస్‌లో ఈ ముగ్గురూ కలిపి చేసింది మూడే పరుగులు. వారు సింగిల్‌ డిజిట్‌కే వెనుదిరగడం మ్యాచ్‌ ఫలితాన్నే మార్చేసింది. ఆ పరుగులే కీలకంగా మారి! మంగళవారం నాటి స్కోరు 46.1 ఓవర్లలో 211/5 నుంచి బుధవారం ఆట ప్రారంభించిన న్యూజిలాండ్‌ మిగతా 23 బంతుల్లో 28 పరుగులు జోడించి 239/8 వద్ద ఇన్నింగ్స్‌ ముగించింది. క్రీజులో ఉన్న బ్యాట్స్‌మన్‌ రాస్‌ టేలర్‌ (90 బంతుల్లో 74; 3 ఫోర్లు, సిక్స్‌)ను బుమ్రా వేసిన 48వ ఓవర్‌ చివరి బంతికి చురుకైన త్రో ద్వారా రనౌట్‌ చేసిన జడేజా; ఆ వెంటనే భువనేశ్వర్‌ బౌలింగ్‌లో టామ్‌ లాథమ్‌ (10)ను చక్కటి క్యాచ్‌తో పెవిలియన్‌ చేర్చాడు. ఇదే ఓవర్‌ ఆఖరి బంతికి హెన్రీ (1) సైతం వెనుదిరిగాడు. బౌల్ట్‌ (3), సాన్‌ట్నర్‌ (9) చివరి ఓవర్‌ ఎదుర్కొని ఏడు పరుగులు జత చేశారు. ఈ మొత్తం 28 పరుగుల్లో కొన్నింటిని నిరోధించగలిగినా... మ్యాచ్‌ ఫలితం మరోలా ఉండేదేమో? స్కోరు వివరాలు   న్యూజిలాండ్‌ ఇన్నింగ్స్‌: గప్టిల్‌ (సి) కోహ్లి (బి) బుమ్రా 1; నికోల్స్‌ (బి) రవీంద్ర జడేజా 28; విలియమ్సన్‌ (సి) రవీంద్ర జడేజా (బి) చహల్‌ 67; రాస్‌ టేలర్‌ (రనౌట్‌) 74; నీషమ్‌ (సి) దినేశ్‌ కార్తీక్‌ (బి) హార్దిక్‌ పాండ్యా 12; గ్రాండ్‌హోమ్‌ (సి) ధోని (బి) భువనేశ్వర్‌ 16; లాథమ్‌ (సి) రవీంద్ర జడేజా (బి) భువనేశ్వర్‌ 10; సాన్‌ట్నర్‌ (నాటౌట్‌) 9; హెన్రీ (సి) కోహ్లి (బి) భువనేశ్వర్‌ 1; బౌల్ట్‌ (నాటౌట్‌) 3; ఎక్స్‌ట్రాలు 18; మొత్తం (50ఓవర్లలో 8 వికెట్లకు) 239.   వికెట్ల పతనం: 1–1, 2–69, 3–134, 4–162, 5–200, 6–225, 7–225, 8–232. బౌలింగ్‌: భువనేశ్వర్‌ 10–1–43–3; బుమ్రా 10–1–39–1; హార్దిక్‌ పాండ్యా 10–0–55–1, రవీంద్ర జడేజా 10–0–34–1, చహల్‌ 10–0–63–1. భారత్‌ ఇన్నింగ్స్‌: లోకేశ్‌ రాహుల్‌ (సి) లాథమ్‌ (బి) హెన్రీ 1; రోహిత్‌ శర్మ (సి) లాథమ్‌ (బి) హెన్రీ 1; విరాట్‌ కోహ్లి (ఎల్బీడబ్ల్యూ) (బి) బౌల్ట్‌ 1; రిషభ్‌ పంత్‌ (సి) గ్రాండ్‌హోమ్‌ (బి) సాన్‌ట్నర్‌ 32; దినేశ్‌ కార్తీక్‌ (సి) నీషమ్‌ (బి) హెన్రీ 6; హార్దిక్‌ పాండ్యా (సి) విలియమ్సన్‌ (బి) సాన్‌ట్నర్‌ 32; ధోని (రనౌట్‌) 50; రవీంద్ర జడేజా (సి) విలియమ్సన్‌ (బి) బౌల్ట్‌ 77; భువనేశ్వర్‌ (బి) ఫెర్గూసన్‌ 0; చహల్‌ (సి) లాథమ్‌ (బి) నీషమ్‌ 5; బుమ్రా (నాటౌట్‌) 0; ఎక్స్‌ట్రాలు 16; మొత్తం (49.3 ఓవర్లలో ఆలౌట్‌) 221 వికెట్ల పతనం: 1–4, 2–5, 3–5, 4–24, 5–71, 6–92, 7–208, 8–216, 9–217, 10–221. బౌలింగ్‌: బౌల్ట్‌ 10–2–42–2, హెన్రీ 10–1–37–3, ఫెర్గూసన్‌ 10–0–43–1, గ్రాండ్‌హోమ్‌ 2–0– 13–0, నీషమ్‌ 7.3–0–49–1, సాన్‌ట్నర్‌ 10–2–34–2. సాహో జడేజా... భళా ధోని 30.3 ఓవర్లకు స్కోరు 92/6. సాధించాల్సిన రన్‌రేట్‌ 8కి దగ్గరగా ఉంది. ఇలా చాలా ముందే ఓటమి ఖరారైన టీమిండియా చివరకు లక్ష్యానికి అంత దగ్గరగా వచ్చిందంటే అది జడేజా, ధోని ఘనతే. పాండ్యా ఔటయ్యేసరికి మన జట్టు గెలిచే అవకాశాలు 10 శాతమే. ఇలాంటి దశలో పొరపాటునైనా వికెట్‌ ఇవ్వకూడదన్నట్లు ధోని జాగ్రత్త పడ్డాడు. జడేజా మాత్రం వస్తూనే ధైర్యం చేసి నీషమ్‌ బౌలింగ్‌లో లాంగాన్‌లో సిక్స్‌ కొట్టి తాడోపేడో తేల్చుకోవాలన్నట్లు కనిపించాడు. ఇద్దరూ తమదైన సమన్వయంతో పరుగులు తీస్తూ స్కోరు బోర్డులో కదలిక తెచ్చారు. టర్నింగ్‌ పాయింట్‌ : ధోని రనౌట్‌ హెన్రీ, ఫెర్గూసన్‌ ఓవర్లలో ఫోర్లు కొట్టిన జడ్డూ... సాన్‌ట్నర్‌ స్పిన్‌ వలయాన్ని ఛేదిస్తూ లాంగాన్, మిడ్‌ వికెట్‌ మీదుగా సిక్స్‌లతో ప్రతాపం చూపాడు. 39 బంతుల్లోనే అర్ధశతకం అందుకున్నాడు. అప్పటికి ధోని ఇంకా 28 పరుగుల వద్దే ఉండటం గమనార్హం. బౌలర్‌ ఎవరైనా లెక్క చేయనంతటి జోష్‌లో అతడు ఫెర్గూసన్‌ ఓవర్లో సిక్స్, బౌల్ట్‌ బౌలింగ్‌లో ఫోర్‌ దంచాడు. జడేజా–ధోని 97 బంతుల్లోనే 100 పరుగులు జోడించారు. ఇందులో జడేజావే 69 పరుగులు ఉండటం విశేషం. ఇదే క్రమంలో జట్టు స్కోరును 200 సైతం దాటించారు. గెలుపునకు 14 బంతుల్లో 32 పరుగులు అవసరమైన స్థితిలో బౌల్ట్‌ వేగం తగ్గించి వేసిన బంతికి జడేజా బోల్తా పడ్డాడు. అతడు కొట్టిన బంతి గాల్లో చాలా ఎత్తులో లేవగా లాంగాఫ్‌లో పొంచి ఉన్న విలియమ్సన్‌ ఒడిసి పట్టాడు. కొంత క్లిష్టమే అయినా అవకాశాలు ఉన్న ఈ పరిస్థితిలో ఫెర్గూసన్‌ వేసిన 49వ ఓవర్‌ తొలి బంతినే బ్యాక్‌వర్డ్‌ పాయింట్‌లోకి సిక్స్‌కు పంపి ధోని ఆశలు రేపాడు. మరుసటి బంతికి పరుగులు తీయని మహి... మూడో బంతికి రెండో పరుగు తీసే యత్నంలో స్క్వేర్‌ లెగ్‌ నుంచి గప్టిల్‌ విసిరిన డైరెక్ట్‌ రాకెట్‌ త్రోకు రనౌటయ్యాడు. ఈ ఓవర్‌ చివరి బంతికి భువీ బౌల్డ్‌ అవడంతో ఏ మూలనో ఉన్న ఆశలు ఆవిరయ్యాయి. వరుణుడా...? దెబ్బకొట్టావ్‌! ‘న్యూజిలాండ్‌తో కలిసి వరుణుడు సెమీఫైనల్లో టీమిండియాను ఓడించాడు’... ఫలితాన్ని విశ్లేషిస్తే ఇది సరైనదేమోననే అనిపిస్తుంది. పిచ్‌ ఎలా ఉన్నా మంగళవారం మ్యాచ్‌ పూర్తిగా సాగి ఉంటే కివీస్‌ విధించే 230 లేదా 240 పరుగుల మోస్తరు లక్ష్యాన్ని ఛేదించి విజయం సాధించేలా కనిపించిన భారత్‌కు... వాన కారణంగా వాయిదా పడటం ప్రతికూలమైంది. బుధవారం చల్లటి వాతావరణంలో ప్రత్యర్థి పేసర్లు చెలరేగిపోయారు. బౌల్ట్‌ వంటి ఎడమ చేతివాటం పేసర్‌కు బంతి స్వింగ్‌ అయ్యే వీలుచిక్కడం; హెన్రీ కచ్చితమైన డెలివరీలకు రోహిత్, రాహుల్‌ తడబడటం దెబ్బకొట్టింది. ఈ జట్టు చేతిలో ఓడటమేంటబ్బా? కివీస్‌పై కచ్చితంగా గెలుస్తామనే అంచనాల మధ్య భారత్‌ ఓటమి అభిమానులను తీవ్రంగా బాధించేదే. కప్‌లో రెండు జట్లు భిన్న నేపథ్యాల నుంచి సెమీస్‌ చేరడమే దీనికి కారణం. ఇంగ్లండ్‌పై ఓటమి తప్ప అప్రతిహత విజయాలతో భారత్‌ పాయింట్ల పట్టికలో అగ్రస్థానంలో నిలిచి సెమీస్‌కు సిద్ధమవగా; న్యూజిలాండ్‌ లీగ్‌ చివర్లో తేలిపోయింది. అంతా కోహ్లి సేనకు ఇంగ్లండ్‌ ఎదురవుతుందని అనుకుంటే కివీస్‌ అనూహ్యంగా తారసపడి అంతే ఆశ్చర్యకరమైన షాకిచ్చింది. విలియమ్సన్, టేలర్‌ తప్ప ఎవరూ ఫామ్‌లో లేని ఆ జట్టుపై ‘ఎలాగైనా మనమే గెలుస్తాం’ అని ఊహల్లో ఉన్న భారత వీరాభిమానులను ఈ పరాజయం కొన్ని రోజులు వెంటాడటం ఖాయం. మ్యాన్‌ ఆఫ్‌ ద మ్యాచ్‌ హెన్రీ (3/37) కూర్పు ఒప్పు... తప్పు మంగళవారం సెమీస్‌కు మైదానంలో దిగిన భారత తుది జట్టులో పేసర్‌ షమీ లేకపోవడంతో అంతా అవాక్కయ్యారు. టోర్నీలో నాలుగు మ్యాచ్‌ల్లో 14 వికెట్లు తీసిన అతడిని శ్రీలంకతో మ్యాచ్‌కు పక్కన పెట్టడమే అనూహ్యం. న్యూజిలాండ్‌తో మ్యాచ్‌లోనూ ఆడించకపోవడం ఏం వ్యూహమో అర్థం కాలేదు. అటువైపు కివీస్‌ స్పిన్నర్‌ సాన్‌ట్నర్‌నే నమ్ముకుని, ముగ్గురు ఫ్రంట్‌లైన్‌ పేసర్లను తీసుకుంది. భారత్‌ మాత్రం కుల్దీప్‌ బదులు చహల్‌ను తుది పదకొండులో చేర్చింది. అతడు విఫలమవ్వగా సహచర స్పిన్నర్‌ జడేజా చకచకా బంతులేస్తూ ప్రత్యర్థిని కట్టడి చేస్తుంటే చహల్‌ పరుగులిస్తూ పోయాడు. పాత కాలపు ఇద్దరు స్పెషలిస్ట్‌ స్పిన్నర్ల ఆలోచనకు భారత్‌ స్వస్తి పలికి మూడో పేసర్‌గా షమీని ఆడిస్తే కివీస్‌కు పుంజుకొనే అవకాశమే రాకపోయేది. కివీస్‌ అప్పుడు... ఇప్పుడు... వరుణుడి చలవతో వరుసగా రెండోసారి ప్రపంచ కప్‌ ఫైనల్‌ చేరింది న్యూజిలాండ్‌. సహ ఆతిథ్యమిచ్చిన 2015 కప్‌లోనూ ఆ జట్టు వర్షం ప్రభావిత మ్యాచ్‌ ద్వారానే తుది సమరానికి అర్హత పొందింది. నాడు మొదట బ్యాటింగ్‌కు దిగిన దక్షిణాఫ్రికా డివిలియర్స్‌ (45 బంతుల్లో 65 నాటౌట్‌) భీకర హిట్టింగ్‌తో 43 ఓవర్లలో 281/5తో భారీ స్కోరు దిశగా వెళ్తుండగా వర్షం అడ్డుకుంది. తర్వాత లక్ష్యాన్ని 43 ఓవర్లలో 299 పరుగులుగా నిర్దేశించారు. గ్రాంట్‌ ఇలియట్‌ (84 నాటౌట్‌) మెరుపు ఇన్నింగ్స్‌తో మరో బంతి మాత్రమే ఉండగా కివీస్‌ లక్ష్యాన్ని చేరుకుంది.   రిటైర్మెంట్‌పై ధోని నాకేమీ చెప్పలేదు టోర్నీ ఆసాంతం అద్భుతంగా ఆడి ఒక్క 45 నిమిషాల చెత్త ఆటతో జట్టు బోల్తా పడటం చాలా నిరాశ పరిచింది. టోర్నీలో జోరుమీదున్న మేం ఇలాంటి అనూహ్య ఫలితంతో నిష్క్రమించడాన్ని జీర్ణించుకోలేకపోతున్నాం. కివీస్‌ బౌలర్లు అద్భుతంగా బౌలింగ్‌ చేశారు. జడేజా అసాధారణ ఆటతీరు కనబరిచాడు. తన క్రికెట్‌ నైపుణ్యాన్ని చాటాడు. ధోనితో విలువైన భాగస్వామ్యం జోడించాడు. ధోని ఇన్నింగ్స్‌ను నిలబెట్టేందుకే నింపాదిగా ఆడాడు. మరోవైపు జడేజా యథేచ్చగా ఆడేందుకు స్ట్రయికింగ్‌తో సాయపడ్డాడు. ఒకవేళ ఆఖర్లో ధోని రనౌట్‌ కాకపోతే ఫలితం మరోలా ఉండేది. అయితే అతను తన రిటైర్మెంట్‌పై మాకేమీ చెప్పలేదు. – భారత కెప్టెన్‌ కోహ్లి   నేడు రెండో సెమీఫైనల్‌ ఇంగ్లండ్‌ X ఆస్ట్రేలియా వేదిక : బర్మింగ్‌హామ్‌ మధ్యాహ్నం 3 గంటల నుంచి స్టార్‌ స్పోర్ట్స్‌ –1లో ప్రత్యక్షప్రసారం

ప్రతిష్టాత్మక ప్రపంచ కప్‌ సెమీఫైనల్‌ మ్యాచ్‌కు వరుణ దేవుడు అడ్డు పడ్డాడు. భారత్, న్యూజిలాండ్‌ మధ్య పోరులో ఒక ఇన్నింగ్సూ పూర్తిగా ముగియకుండానే వర్షం కారణంగా ఆటకు అంతరాయం కలిగింది. అయితే వరల్డ్‌ కప్‌ నాకౌట్‌ నిబంధనల ప్రకారం ‘రిజర్వ్‌ డే’ అయిన నేడు  మ్యాచ్‌ కొనసాగుతుంది. 46.1 ఓవర్ల వద్ద కివీస్‌ ఇన్నింగ్స్‌ నిలిచిపోగా... ఇప్పుడు అక్కడి నుంచే బుధవారం ఆట జరుగుతుంది. భారత బౌలర్లు చెలరేగడంతో స్వల్ప స్కోరు మాత్రమే చేయగలిగిన కివీస్‌ మిగిలిన 3.5 ఓవర్లలో మరికొన్ని పరుగులు జోడించే అవకాశం ఉంది. రెండో రోజు వాన దెబ్బ లేకుండా సెమీస్‌ సజావుగా సాగితే భారీ బ్యాటింగ్‌ లైనప్‌ కలిగిన టీమిండియాకు లక్ష్యాన్ని ఛేదించడంలో ఇబ్బంది ఉండకపోవచ్చు. ఒకవేళ నేడు కూడా మ్యాచ్‌ మధ్యలో వర్షం కారణంగా ఆటకు అంతరాయం కలిగితే డక్‌వర్త్‌ లూయిస్‌ పద్ధతి ప్రకారం భారత లక్ష్యాన్ని సవరిస్తారు. భారత ఇన్నింగ్స్‌లో కనీసం 20 ఓవర్లు కూడా సాధ్యంకాకపోతే మ్యాచ్‌ రద్దయినట్లు ప్రకటిస్తారు. ఈ నేపథ్యంలో నిబంధనల ప్రకారం లీగ్‌ దశలో టాప్‌ ర్యాంక్‌లో నిలిచిన భారత జట్టు ఫైనల్‌కు చేరుకుంటుంది.    మాంచెస్టర్‌: ప్రపంచ కప్‌ తొలి సెమీస్‌ మ్యాచ్‌ రెండో రోజుకు చేరింది. సుదీర్ఘ సమయం పాటు కురిసిన వర్షం కారణంగా మంగళవారం ఆట అర్ధాంతరంగా నిలిచిపోయింది. టాస్‌ గెలిచి బ్యాటింగ్‌ ఎంచుకున్న న్యూజిలాండ్‌ మ్యాచ్‌ ఆగిపోయే సమయానికి 46.1 ఓవర్లలో 5 వికెట్ల నష్టానికి 211 పరుగులు చేసింది. రాస్‌ టేలర్‌ (85 బంతుల్లో 67 బ్యాటింగ్‌; 3 ఫోర్లు, 1 సిక్స్‌), విలియమ్సన్‌ (95 బంతుల్లో 67; 6 ఫోర్లు) అర్ధ సెంచరీలు సాధించారు. ఐదుగురు భారత బౌలర్లు తలా ఒక వికెట్‌ తీశారు. ప్రస్తుతం టేలర్‌తో పాటు లాథమ్‌ (3 బ్యాటింగ్‌) క్రీజ్‌లో ఉన్నాడు.   ఎదురుచూపులు... కివీస్‌ ఇన్నింగ్స్‌లో భువనేశ్వర్‌ వేసిన 47వ ఓవర్‌ తొలి బంతికి టేలర్‌ రెండు పరుగులు తీశాడు. ఈ దశలో వర్షం వచ్చింది. కొన్ని చినుకుల వరకు అంపైర్లు ఆగినా... చహల్‌ మైదానంలో జారడం, వాన పెరిగితే పిచ్‌ పాడయ్యే ప్రమాదం ఉండటంతో వెంటనే ఆటను నిలిపివేశారు. భారత కాలమానం ప్రకారం సా. 6.30 గంటలకు ఆట ఆగిపోయింది. ఆ తర్వాతి నుంచి వర్షం పెరగడం, మధ్యలో కొంత తెరిపినిచ్చినా పూర్తిగా తగ్గకపోవడంతో గంటలు గడిచిపోయాయి. దాదాపు రెండున్నర గంటల తర్వాత వాన ఆగడంతో అంపైర్లు పరిస్థితిని సమీక్షించేందుకు సిద్ధమయ్యారు. అయితే ఆ వెంటనే మళ్లీ వర్షం వచ్చింది. కివీస్‌ ఇన్నింగ్స్‌ను అంతటితో ఆపివేసి భారత్‌ కనీసం 20 ఓవర్లు ఆడే అవకాశం ఇవ్వాలన్నా రాత్రి గం.11.05కు ఆట ఆరంభం కావాల్సింది. కానీ అలాంటి పరిస్థితి కనిపించలేదు. చివరకు రాత్రి గం.10.52కు మంగళవారం ఆటను యథాతథ స్థితిలో నిలిపివేస్తున్నట్లు ప్రకటించారు.   బౌలర్లు భళా... న్యూజిలాండ్‌ను ప్రపంచ కప్‌ ఆసాంతం వేధించిన ఓపెనింగ్‌ సమస్య సెమీస్‌లోనూ కొనసాగింది. భువీ, బుమ్రా వేసిన తొలి రెండు ఓవర్లు మెయిడిన్లుగా ముగియగా, తీవ్రంగా ఇబ్బంది పడుతూ ఆడిన గప్టిల్‌ (1)ను చక్కటి బంతితో బుమ్రా పెవిలియన్‌ పంపించాడు. స్లిప్‌లో కోహ్లి అద్భుత రీతిలో ఈ క్యాచ్‌ను అందుకున్నాడు. ఎనిమిదో ఓవర్‌ చివరి బంతికి గానీ తొలి ఫోర్‌ కొట్టలేకపోయిన కివీస్‌... తొలి 10 ఓవర్లలో 27 పరుగులే చేయగలిగింది. ఈ దశలో నికోల్స్‌ (51 బంతుల్లో 28; 2 ఫోర్లు), విలియమ్సన్‌ కలిసి జట్టును ఆదుకునే ప్రయత్నం చేశారు. రెండో వికెట్‌కు వీరిద్దరు 68 పరుగులు జత చేశారు. అయితే భారత బౌలర్లు కట్టుదిట్టంగా బంతులు వేయడంతో కివీస్‌ స్కోరు బాగా నెమ్మదిగా సాగింది. ఈ జోడి కుదురుకుంటున్న దశలో జడేజా టర్నింగ్‌ బంతితో నికోల్స్‌ స్టంప్స్‌ను పడగొట్టాడు. దాంతో ఇన్నింగ్స్‌ను చక్కదిద్దే బాధ్యత కెప్టెన్‌తో పాటు మరో సీనియర్‌ టేలర్‌పై పడింది. అయితే ఈ జంట కూడా బౌలింగ్‌ను సమర్థంగా ఎదుర్కోలేక మరీ నెమ్మదిగా ఆడింది. ఒక దశలో 80 బంతుల పాటు న్యూజిలాండ్‌ ఫోర్‌ కూడా కొట్టలేకపోయింది!  ఎట్టకేలకు చహల్‌ ఓవర్లో రెండు ఫోర్లు సాధించిన కివీస్‌ తడబాటును అధిగమించే ప్రయత్నం చేసింది. ఈ క్రమంలో విలియమ్సన్‌ 79 బంతుల్లో అర్ధ సెంచరీ పూర్తి చేసుకున్నాడు. 65 పరుగుల మూడో వికెట్‌ భాగస్వామ్యానికి విలియమ్సన్, టేలర్‌ ఏకంగా 102 బంతులు తీసుకున్నారు. చివరకు చహల్‌ బౌలింగ్‌లో చెత్త షాట్‌కు విలియమ్సన్‌ ఔటయ్యాడు. వెంటనే నీషమ్‌ (12), గ్రాండ్‌హోమ్‌ (16) పెవిలియన్‌ చేరారు. మరో వైపు చహల్‌ బౌలింగ్‌లో సిక్సర్‌తో టేలర్‌ 73 బంతుల్లో హాఫ్‌ సెంచరీ మార్క్‌ను చేరుకున్నాడు. చివర్లో భారత బౌలర్లు కట్టు తప్పడంతోపాటు నాసిరకమైన ఫీల్డింగ్‌తో 5 ఓవర్లలో కివీస్‌ 47 పరుగులు చేయగలిగింది. వారి ఇన్నింగ్స్‌లో 153 డాట్‌ బాల్స్‌ ఉండటం ఆ జట్టు బ్యాటింగ్‌ వైఫల్యానికి నిదర్శనం. మ్యాచ్‌ రద్దయితే... మనమే ఫైనల్‌కు వాతావరణ శాఖ అంచనా ప్రకారం మాంచెస్టర్‌లో బుధవారం కూడా పరిస్థితి అంత మెరుగ్గా ఏమీ లేదు. ఒక వేళ మ్యాచ్‌ సమయంలో మళ్లీ వర్షం పడితే కివీస్‌ ఇన్నింగ్స్‌ను అక్కడితోనే ముగించి డక్‌వర్త్‌ లూయిస్‌ ప్రకారం భారత్‌కు లక్ష్యాన్ని నిర్దేశించే అవకాశం ఉంది. కనీసం 20 ఓవర్ల ఆట సాధ్యమైనా డక్‌వర్త్‌ లూయిస్‌ వర్తిస్తుంది. అదీ జరగకుండా పూర్తిగా రద్దయితే మాత్రం లీగ్‌ దశలో టాప్‌ ర్యాంలో నిలిచిన భారత్‌ ఫైనల్‌కు చేరుతుంది. నిజానికి మంగళవారం మళ్లీ వర్షం రావడమే భారత్‌కు మంచిదైంది. మ్యాచ్‌ను 20 ఓవర్లకు కుదిస్తే టీమిండియా విజయానికి 148 పరుగులు చేయాల్సిన స్థితిలో ఉంది. టి20 స్టార్లు టీమ్‌లో ఉన్నా...వర్షం ఆగిన తర్వాత పిచ్‌లో వచ్చే మార్పు, మబ్బు పట్టిన వాతావరణంలో కివీస్‌ బౌలర్లు స్వింగ్‌తో చెలరేగిపోయే ప్రమాదం ఉండేది. అదే జరిగితే భారత్‌కు ఛేదన కష్టంగా మారిపోయేదేమో! తొలి బంతికే రివ్యూ పోయింది! భువనేశ్వర్‌ వేసిన మ్యాచ్‌ తొలి బంతి గప్టిల్‌ ప్యాడ్లను తాకడంతో భారత ఆటగాళ్లు ఎల్బీడబ్ల్యూ కోసం గట్టిగా అప్పీల్‌ చేశారు. అయితే అంపైర్‌ కెటిల్‌బరో తిరస్కరించడంతో కోహ్లి రివ్యూ కోరాడు. రీప్లేలో బంతి లెగ్‌స్టంప్‌కు దూరంగా వెళుతున్నట్లు తేలింది. దాంతో గప్టిల్‌ బతికిపోగా... మొదటి బంతికే రివ్యూ కోల్పోయిన భారత్‌ తీవ్రంగా నిరాశ చెందింది. స్కోరు వివరాలు   న్యూజిలాండ్‌ ఇన్నింగ్స్‌: గప్టిల్‌ (సి) కోహ్లి (బి) బుమ్రా 1; నికోల్స్‌ (బి) రవీంద్ర జడేజా 28; విలియమ్సన్‌ (సి) జడేజా (బి) చహల్‌ 67; టేలర్‌ (బ్యాటింగ్‌) 67; నీషమ్‌ (సి) కార్తీక్‌ (బి) పాండ్యా 12; గ్రాండ్‌హోమ్‌ (సి) ధోని (బి) భువనేశ్వర్‌ 16; లాథమ్‌ (బ్యాటింగ్‌) 3; ఎక్స్‌ట్రాలు 17; మొత్తం (46.1 ఓవర్లలో 5 వికెట్లకు) 211.   వికెట్ల పతనం: 1–1, 2–69, 3–134, 4–162, 5–200. బౌలింగ్‌: భువనేశ్వర్‌ 8.1–1–30–1; బుమ్రా 8–1–25–1; పాండ్యా 10–0–55–1, రవీంద్ర జడేజా 10–0–34–1, చహల్‌ 10–0–63–1.  87 ఏళ్ల భారత అభిమాని చారులత ఉత్సాహం

సాక్షి, సిటీబ్యూరో: ప్రపంచకప్‌లోకి భారత జట్టు సెమీ ఫైనల్స్‌కు ప్రవేశించడంతో క్రికెట్‌ అభిమానుల్లోనే కాదు.. బెట్టింగ్‌రాయుళ్లల్లోనూ జోష్‌ పెంచింది. ఈ క్రేజ్‌కు క్యాష్‌ చేసుకోవడానికి బుకీలు కొత్త ‘అవతారాల్లో’ రంగంలోకి దిగినట్లు పోలీసులు గుర్తించారు. వీరికి చెక్‌ చెప్పడానికి నిఘా ముమ్మరం చేశారు. గతంలో బెట్టింగ్‌ కేసుల్లో అరెస్టయిన వారి వివరాలు, కదలికలనూ పోలీసులు ఆరా తీస్తున్నారు. నగరానికి చెందిన అనేక మంది బుకీలు ఇటీవల తమ పంథా మార్చినట్లు పోలీసులు గుర్తించారు. ఒకప్పుడు వీరంతా నగరంలోనే ఉండి నేరుగా పందేలు కాసేవాళ్లతో (పంటర్లు) సంబంధాలు ఏర్పాటు చేసుకునే వాళ్లు. ఇలా చేయడంతో పోలీసులు దాడి చేసినప్పుడు పట్టుబడే అవకాశాలు ఎక్కువగా ఉండేవి. దీంతో కొందరు కీలక బుకీలు ఇటీవల కాలంలో తమ పంథా మార్చారు. ముంబై, గోవా తదితర ప్రాంతాల్లో వాళ్లు మకాం వేశారు. ప్రత్యేకంగా రూపొందించిన యాప్స్‌తో పాటు వాట్సాప్, టెలిగ్రామ్‌ తదితర సోషల్‌ మీడియా గ్రూపుల ద్వారా బెట్టింగ్స్‌ను పర్యవేక్షిస్తున్నారు. వీరివద్ద పందేలు కాసే పంటర్లు సుపరిచితులే. దీంతో ఫోన్ల ద్వారా పందేలను అంగీకరిస్తున్నారు. ఓడిన వారి నుంచి డబ్బు వసూలు చేయడం, గెలిచిన వారికి అప్పగించడానికి ప్రత్యేకంగా ఏజెంట్లను ఏర్పాటు చేసుకుంటున్నారు. వీరు మాత్రమే నగరంలో ఉంటూ ప్రధాన బుకీలకు సహకరిస్తుంటారు. పోలీసులకు వీళ్లు చిక్కుతున్నా అనేక సందర్భాల్లో సూత్రధారులు పట్టుబడట్లేదు. క్రికెట్‌ మ్యాచ్‌ నేపథ్యంలో ముందస్తు పందాల కంటే ఇటీవల కాలంలో లైవ్‌ బెట్టింగ్‌లు పెరిగాయని పోలీసులు చెబుతున్నారు. మ్యాచ్‌లో ఫలానా జట్టు గెలుస్తుందని, ఇన్ని పరుగులు చేస్తుందని, ఓడిపోయే జట్టు ఇన్ని పరుగులకే కట్టడి అవుతుందని.. ఈ పంథాలో జరిగేవి ముందస్తు పందేల కిందికి వస్తాయని పోలీసులు చెబుతున్నారు. మ్యాచ్‌ ప్రారంభమైన తర్వాత రేషియో ఆధారంగా బంతి బంతికీ జరిగే పందేలను లైవ్‌ బెట్టింగ్‌లుగా పరిగణిస్తుంటారు. యాప్స్‌ ఆధారంగా బెట్టింగ్‌ దందా నిర్వహించే బుకీలు ఈ తరహాకే ఎక్కువ ప్రాధాన్యమస్తారని చెబుతున్నారు. ఈ పరిణామాలను దృష్టిలో పెట్టుకున్న నగర టాస్క్‌ఫోర్స్‌ పోలీసులు నిఘా ముమ్మరం చేశారు. నగరంలో బెట్టింగ్‌ నిర్వహణకు, ఏజెంట్ల కదలికలను ఆస్కారం ఉన్న ప్రాంతాల్లో ప్రత్యేక సిబ్బందిని మోహరించారు. గతంలో బెట్టింగ్‌ కేసుల్లో అరెస్టయిన వ్యక్తులు ప్రస్తుతం ఎక్కడ ఉన్నారు? ఏం చేస్తున్నారు? ఎవరితో సంబంధాలు కలిగి ఉన్నారు? అనే అంశాలపై ఆరా తీస్తున్నారు. 

సిటీలో క్రికెట్‌ ఫీవర్‌ పీక్‌స్థాయికి చేరింది. నేడు ఇండియా–న్యూజిలాండ్‌ జట్ల సెమీఫైనల్‌ మ్యాచ్‌ నేపథ్యంలో అంతటా ఉత్కంఠ నెలకొంది. ఫెక్సీలు..బ్యానర్లు..ప్రత్యేక స్క్రీన్లతో అభిమానులు హడావుడి చేస్తున్నారు.  న్యూజిలాండ్‌పై విజయం సాధించి ఇండియా ఫైనల్‌కు చేరుతుందని,ఫైనల్‌లోనూ గెలుపొంది వరల్డ్‌ కప్‌ సాధించడం ఖాయమని క్రికెట్‌ లవర్స్‌తోపాటు పలువురు ప్రముఖులు ధీమాగా ఉన్నారు. సాక్షి, సిటీబ్యూరో/చార్మినార్‌/హిమాయత్‌నగర్‌ :నగరానికి వరల్డ్‌కప్‌ ఫీవర్‌ పట్టుకుంది..  క్రికెట్‌ అభిమానులు మంచి జోష్‌లో ఉన్నారు. నేడు మాంచెస్టర్‌లో జరిగే భారత్, న్యూజిలాండ్‌ జట్ల మధ్య సెమీఫైనల్‌ మ్యాచ్‌ కోసం ఉత్కంఠభరితంగా ఎదురుచూస్తున్నారు. అభిమానుల క్రికెట్‌ క్రేజ్‌కు మరింత జోష్‌నిస్తూ నగరంలోని బడా రెస్టారెంట్లు, హోటళ్లు, పబ్బులు, క్లబ్బులు, కాఫీ షాపులు ప్రత్యేక ఆఫర్‌లతో ఓ వైపు విందు.. మరోవైపు క్రికెట్‌ వినోదాన్ని పంచేందుకు అన్ని ఏర్పాట్లు చేశాయి. జయహో భారత్‌ అనే ప్రత్యేక స్క్రీన్‌లతో మ్యాచ్‌ ప్రత్యక్ష ప్రసారాలను అభిమానులు చూసేలా జాగ్రత్తలు తీసుకుంటున్నారు. నోరూరించే రుచులతో విభిన్నమైన వంటకాలను ప్రత్యేక ఆఫర్‌లతో నగరవాసులకు అందించేందుకు అన్ని ఏర్పాట్లు చేశారు. కుటుంబ సభ్యులతో కలిసి వచ్చేవారికి ప్రత్యేక వంటకాల మెనూను అందుబాటులో ఉంచామని వివిధ రెస్టారెంట్‌ నిర్వాహకులు చెబుతున్నారు. ‘రోజువారీ వంటకాలకు కొంచెం డిఫరెంట్‌గా అదనంగా రెండు రకాల బిర్యానీ రుచులు అందించేందుకుసిద్ధమవుతున్నాం’ అని గచ్చిబౌలిలోని ఉలవచారు రెస్టారెంట్‌ ఎండీ వినయ్‌ తెలిపారు. ‘స్పెషల్‌ డీజేతో పాటు పెద్ద స్క్రీన్‌ ఏర్పాటు చేశాం.  డ్రింక్స్‌ మీద కూడా ప్రత్యేక ఆఫర్లు ఇస్తున్నాం. మ్యాచ్‌ ముగిసినా మరో గంట పాటు పార్టీకొనసాగుతుంది’ అని చెప్పారు అవుట్‌ స్వింగర్‌ పబ్‌కు చెందిన అమేయ్‌. ఇదే తరహాలో పలు హోటల్స్‌ సైతం ప్రత్యేక ఆఫర్లతో సిటీ యూత్‌ని ఆకట్టుకుంటున్నాయి.  పాతబస్తీలో భారీ ఫ్లెక్సీలు..   కమాన్‌ ఇండియా.. విన్‌ ఫైనల్‌.. టేక్‌ వరల్డ్‌ కప్‌ అంటూ పాతబస్తీలో ఫ్లెక్సీలు వెలిశాయి. మదీనా సర్కిల్‌లోని మహ్మద్‌ క్యాప్‌ మార్ట్‌ మేనేజింగ్‌ డైరెక్టర్‌ మహ్మద్‌ ఇలియాస్‌ బుకారీ ఆధ్వర్యంలో నయాపూల్‌ బ్రిడ్జిపై ప్రపంచ కప్‌ క్రికెట్‌ టోర్నమెంట్‌లో భారత్‌దే విజయమంటూ ఫ్లెక్సీ ఏర్పాటు చేసి క్రికెట్‌పై తన అభిమానాన్ని చాటుకుంటున్నారు. సెమీఫైనల్లో భారత్‌ నెగ్గి ఫైనల్‌ చేరుకుంటే ఈ నెల 14న పాతబస్తీ నుంచి గుర్రం బగ్గీతో ప్రదర్శన నిర్వహించేందుకు సన్నాహాలు చేస్తున్నారు. ఎనిమిది గుర్రాలతో ప్రత్యేక బగ్గీని తయారు చేయించి భారత క్రికెట్‌ ఆటగాళ్ల బొమ్మలను ఏర్పాటు చేసి బాజాభజంత్రీలతో పాతబస్తీలోని మదీనా నుంచి మొజంజాహీ మార్కెట్, అబిడ్స్, ట్యాంక్‌బండ్, నెక్లెస్‌ రోడ్డు మీదుగా సికింద్రాబాద్‌ పరేడ్‌ గ్రౌండ్‌ వరకు నిర్వహించేలా ఏర్పాట్లు చేస్తున్నారు.   సెమీస్‌.. కప్పు.. రెండూ గెలవబోతున్నాం ‘లా ఆఫ్‌ యావరేజెస్‌’ ప్రకారం చూస్తే ఈసారి భారత్‌ జట్టు సెమీ ఫైనల్స్‌తో పాటు ఫైనల్స్‌లోనూ గెలిచి ప్రపంచ కప్పు సొంతం చేసుకోబోతోంది. ఇప్పటికి జరిగిన మొత్తం తొమ్మిది మ్యాచ్‌ల్లో వరుసగా గెలిస్తే ఆ ధీమాతో ఉదాసీనత కారణంగా ఓడిపోయే ప్రమాదం ఉండేది. లా ఆఫ్‌ యావరేజెస్‌ ప్రకారం తొమ్మిదింటిలో ఏదో ఒక మ్యాచ్‌లో ఓడిపోవాల్సిందే. ఇప్పటికే భారత్‌ జట్టు ఇంగ్లండ్‌పై ఓడిపోయింది. దీంతో ఆ థియరీ ప్రకారం ఇక కప్పు గెలుచుకునే అవకాశాలు పెరిగాయి. ఇప్పటి వరకు క్రికెట్‌ కెరీర్‌లో టీ– 20 సహా అనేక మ్యాచ్‌లు ఆడిన నా అనుభవం సైతం ఈ విషయాన్నే స్పష్టం చేస్తోంది. వాటిలో వరుసగా మ్యాచ్‌లు గెలిస్తే సెమీస్‌ లేదా ఫైనల్స్‌లో కప్పును కోల్పోయేవాళ్లం. అలా కాకుండా ఏదో ఒక మ్యాచ్‌లో ఓడి సెమీస్‌ వరకు వెళ్తే కప్పును సొంతం చేసుకునేవాళ్లం. ఇలా లా ఆఫ్‌ యావరేజెస్‌ థియరీ అనేకసార్లు నిజమైంది. ఇప్పుడు భారత జట్టు విషయంలోనూ నిజమవుతుందనే భావిస్తున్నా.– సీవీ ఆనంద్, సీఐఎస్‌ఎఫ్‌ ఐజీ/క్రికెటర్‌ అభిమానులను ఉత్సాహపర్చాలని..   మా కుటుంబానికి క్రికెట్‌ అంటే ఎంతో ఇష్టం. భారత ఆటగాళ్లంటే అభిమానం. భారత్‌ విజయం సాధించినప్పుడల్లా కుటుంబ సభ్యులందరం పండగ చేసుకుంటాం. మా నాన్నగారు దివంగత మహ్మద్‌ యాకుబ్‌ బుకారీ సైతం క్రికెట్‌ అభిమానే. ఆయన కాలం నుంచే మేము వినూత్న ప్రదర్శనలు నిర్వహిస్తూ వస్తున్నాం.    – మహ్మద్‌ ఇలియాస్‌ బుకారీ,మహ్మద్‌ క్యాప్‌ మార్ట్‌ ఎండీ వరల్డ్‌ కప్‌ మనదే.. భారత జట్టు ఆటతీరు ఎంతో బాగుంది. మునుపెన్నడూ లేని విధంగా చక్కటి ప్రతిభను కనబరుస్తున్నారు. అంచనాలనుతలకిందులు చేస్తూ క్రీడాభిమానుల మన్ననలు  అందుకుంటున్నారు మనవాళ్లు. సెమీఫైనల్‌లో అత్యుత్తమ ప్రతిభను కనబరచి ఫైనల్‌కు చేరుకుంటారనే నమ్మకం బలంగా ఉంది. ఫైనల్‌లోనూ ప్రత్యర్థిని ఓడించి వరల్డ్‌ కప్‌ను కచ్చితంగా సాధిస్తుందని విశ్వసిస్తున్నా. – అజారుద్దీన్, మాజీ కెప్టెన్‌

‘భారత్‌ సెమీఫైనల్‌ ప్రత్యర్థి న్యూజిలాండ్‌’ శనివారం అర్ధరాత్రి దాటాక ఆస్ట్రేలియా, దక్షిణాఫ్రికా మ్యాచ్‌ ఫలితం వచ్చాక సగటు టీమిండియా అభిమానిని ఒకింత సంతోషపర్చిన మాట ఇది! కివీస్‌తో పోరు అనగానే ఇక గెలుపు ఖాయం అన్నట్లుగా అన్ని వైపుల నుంచి ఫ్యాన్స్‌ నిశ్చింతంగా కనిపిస్తున్నారు. ఫైనల్‌ ప్రత్యర్థి గురించి మాత్రమే చర్చిస్తున్నారు. మరి నిజంగా ప్రపంచ కప్‌ సెమీఫైనల్‌ మాత్రం అంత ఏకపక్షంగా సాగుతుందా? అద్భుత విజయాలతో ఊపు మీదున్న భారత జట్టు నాకౌట్‌ ఒత్తిడిని అధిగమించి అలవోకగా న్యూజిలాండ్‌కు చెక్‌ పెడుతుందా? ఎనిమిది మ్యాచ్‌లలో ఒకే ఒక ఓటమి మినహా ఏడు సాధికారిక విజయాలతో సెమీస్‌ చేరిన జట్టు మనదైతే... పాక్‌తో సమానంగా ఐదు విజయాలే సాధించినా, వరుసగా గత మూడు మ్యాచ్‌లలో ఓడిన తర్వాత కూడా రన్‌రేట్‌ రూపంలో అదృష్టం కలిసొచ్చి ముందంజ వేసిన టీమ్‌ న్యూజిలాండ్‌. బలబలాల పరంగా ప్రత్యర్థి కంటే ఎంతో మెరుగ్గా కనిపిస్తున్న కోహ్లి సేనకే విజయావకాశాలు కనిపిస్తున్నాయి. అయితే ఐసీసీ టోర్నీలో అనూహ్య ప్రదర్శన కనబర్చడం అలవాటుగా మార్చుకున్న కివీస్‌ అంత సులువుగా లొంగుతుందా? ఫుట్‌బాల్‌ సంగతేమో కానీ ఇప్పుడు మాత్రం మాంచెస్టర్‌ మొత్తం నీలి రంగు పులుముకుంది. విండీస్‌తో మ్యాచ్‌ తర్వాత కోహ్లి చేసిన వ్యాఖ్య ఇది. అంతకుముందు ఇదే మైదానంలో పాకిస్తాన్‌తో పోరులో కూడా ‘మెన్‌ ఇన్‌ బ్లూ’ అభిమాన సంద్రం తరలి వచ్చింది. ఒక రకంగా సొంతగడ్డలా కనిపిస్తోన్న ఓల్డ్‌ ట్రఫోర్డ్‌లో కోహ్లి సేన ముందు ‘బ్లాక్‌ క్యాప్స్‌’ నిలవగలదా? మూడోసారి జగజ్జేతగా నిలిచేందుకు రెండడుగుల దూరంలో ఉన్న భారత్‌కు లార్డ్స్‌ ప్రయాణంకంటే ముందు కివీస్‌ సవాల్‌ ఎదురుగా నిలిచింది. ఈ నేపథ్యంలో ఇక అందరి కళ్లూ భారత్‌–న్యూజిలాండ్‌ తొలి సెమీస్‌పైనే ఉన్నాయి.    మాంచెస్టర్‌: ప్రపంచ కప్‌ లీగ్‌ దశలో భారత్, న్యూజిలాండ్‌ మధ్య జరగాల్సిన మ్యాచ్‌ వర్షం కారణంగా రద్దు కావడంతో ‘ఫేస్‌ టు ఫేస్‌’లో ఆధిపత్యం ఎవరిదో తేలలేదు. ప్రాక్టీస్‌ మ్యాచ్‌లో మనపై కివీస్‌ చెలరేగినా అది అసలు సమరం మాత్రం కానే కాదు. ఇప్పు డు ఇరు జట్లు నేరుగా నాకౌట్‌ మ్యాచ్‌లోనే తలపడుతున్నాయి. నేడు ఇక్కడి ఓల్డ్‌ ట్రఫోర్డ్‌ మైదానంలో జరిగే తొలి సెమీఫైనల్‌ మ్యాచ్‌లో న్యూజిలాండ్‌ను భారత్‌ ఎదుర్కోనుంది. 2015లోనూ భారత్‌ సెమీస్‌ చేరి ఆసీస్‌ చేతిలో ఓడగా... కివీస్‌ తుదిపోరుకు అర్హత సాధించి అక్కడ కుదేలైంది. ఇటీవలే కోహ్లి, బుమ్రా లేకుండానే కివీస్‌ను వారి సొంతగడ్డపైనే వన్డే సిరీస్‌లో 4–1తో చిత్తు చేసిన భారత్‌కు ప్రత్యర్థి బలహీనతలపై పక్కా అవగాహన ఉందనడంలో సందేహం లేదు.   మార్పులు ఉంటాయా... వరుస విజయాలతో జోరు మీదున్న జట్టు నాకౌట్‌ మ్యాచ్‌కు వెళుతుంటే సహజంగానే మార్పులకు ఆస్కారం ఉండదు. భారత జట్టు కూడా దాదాపు అదే తరహాలో ఆలోచిస్తోంది. అనితర సాధ్యమైన రీతిలో ఐదు సెంచరీలతో రోహిత్‌ శర్మ చెలరేగి ఆడుతుండగా, కోహ్లి ఈసారి సహాయక పాత్రలో సమర్థంగా రాణించాడు. ఓపెనర్‌గా రాహుల్‌ సఫలం కావడం కూడా భారత్‌లో ఆందోళన తగ్గించింది. అయితే సెమీఫైనల్‌ ఆరంభ ఓవర్లలో వీరంతా బౌల్ట్‌ను సమర్థంగా ఎదుర్కోవడం ముఖ్యం. బౌల్ట్‌కు అవకాశమిస్తే అతను మొత్తం బ్యాటింగ్‌ను కుప్పకూల్చగలడు. నాలుగో స్థానంలో పంత్‌ సామర్థ్యంపై కొంత అపనమ్మకం కనిపిస్తున్నా, అతని స్థానానికి ఢోకా లేదు. పాండ్యా దూకుడును కొనసాగించాల్సి ఉండగా... ధోని ఈసారి ఒక గొప్ప ఇన్నింగ్స్‌ ఆడకపోతాడా అని అంతా ఆశగా ఎదురు చూస్తున్నారు. లంకతో మ్యాచ్‌లో ధోనికి బ్యాటింగ్‌ చేయాల్సిన అవసరం రాలేదు. ఓవరాల్‌గా తన బ్యాటింగ్‌పై అత్తెసరు మార్కులే వేయించుకున్న మాజీ కెప్టెన్‌ కూడా చెలరేగితే టీమిండియాకు తిరుగుండదు. ఇద్దరు రెగ్యులర్‌ పేసర్లతోనే ఆడితే గత మ్యాచ్‌లాగే రవీంద్ర జడేజా కొనసాగే అవకాశం ఉంది. అయితే పిచ్‌ను బట్టి అవసరమైతే ప్రత్యామ్నాయ స్పిన్నర్‌గా పనికొస్తాడు కాబట్టి దినేశ్‌ కార్తీక్‌ స్థానంలో కేదార్‌ జాదవ్‌ తిరిగి రావచ్చు. అయితే లంకతో మ్యాచ్‌లో పాండ్యా కూడా పూర్తి పది ఓవర్ల కోటా వేశాడు కాబట్టి ఈ మార్పు సందేహమే.   విలియమ్సన్‌ మినహా... టోర్నీ ఆరంభంలో చెలరేగిన న్యూజిలాండ్‌ ఆ తర్వాత తడబడింది. తమ చివరి మూడు మ్యాచ్‌లలో పరాజయాలే అందుకు నిదర్శనం. సరిగ్గా చెప్పాలంటే ఒక్క కెప్టెన్‌ విలియమ్సన్‌ మినహా మిగతా వారంతా అంతంత మాత్రంగానే ఆడుతున్నారు. సీనియర్‌ రాస్‌ టేలర్‌ కూడా వరుసగా విఫలమవుతుండటంతో ఆ జట్టు బ్యాటింగ్‌ బలహీనంగా కనిపిస్తోంది. గప్టిల్‌ ఘోరంగా ఆడుతుండగా... రెండో ఓపెనర్‌గా మార్చి మార్చి మున్రో, నికోల్స్‌లను ఆడించినా ఇద్దరూ చేతులెత్తేశారు. మిడిలార్డర్‌లో కీపర్‌ లాథమ్‌ పర్వాలేదనిపిస్తున్నాడు. ఆల్‌రౌండర్లుగా నీషమ్, గ్రాండ్‌హోమ్‌ తమ విలువను చూపిస్తే కివీస్‌ పరిస్థితి మెరుగ్గా ఉంటుంది. సౌతీ స్థానంలో ఫాస్ట్‌ బౌలర్‌ ఫెర్గూసన్‌ రావడం ఖాయమైంది. మూడో పేసర్‌ హెన్రీ స్థానంలో లెగ్‌ స్పిన్నర్‌ సోధికి అవకాశం ఇవ్వాలని కూడా కివీస్‌ మేనేజ్‌మెంట్‌ ఆలోచిస్తోంది. గత రెండు మ్యాచ్‌లలో సాన్‌ట్నర్‌ను తప్పించి రెండో స్పిన్నర్‌ లేని కొరత ఆ జట్టులో బాగా కనిపించింది. పోరాటపటిమలో ఎక్కడా తగ్గని న్యూజిలాండ్‌ జట్టు వరుసగా రెండోసారి ఫైనల్‌కు చేరాలని పట్టుదలగా ఉంది.   సెమీఫైనల్‌ రోజున మాంచెస్టర్‌లో కొంత వర్షసూచన ఉన్నా, అది మ్యాచ్‌కు అంతరాయం కలిగించకపోవచ్చు. ఒకవేళ మంగళవారం మ్యాచ్‌ జరగకపోతే రిజర్వ్‌ డే బుధవారం దానిని నిర్వహిస్తారు. రిజర్వ్‌ డే రోజు కూడా మ్యాచ్‌ సాధ్యం కాకపోతే గ్రూప్‌ దశలో ఎక్కువ పాయింట్లు సాధించిన జట్టు (భారత్‌) ఫైనల్లోకి ప్రవేశిస్తుంది. మ్యాచ్‌ రోజున ఒక జట్టు ఇన్నింగ్స్‌ పూర్తయి రెండో జట్టు ఇన్నింగ్స్‌ ప్రారంభమై మధ్యలో ఆగిపోతే (డక్‌వర్త్‌ లూయిస్‌ పద్ధతిలోనూ విజేత తేలకపోతే)... ఎక్కడ ఆట ఆగిపోయిందో అక్కడి నుంచే మ్యాచ్‌ను  రిజర్వ్‌ డే రోజున కొనసాగిస్తారు. ఒకవేళ సెమీఫైనల్‌ మ్యాచ్‌ ‘టై’గా ముగిస్తే విజేతను నిర్ణయించేందుకు టి20 తరహాలో ‘సూపర్‌ ఓవర్‌’ నిర్వహిస్తారు. ఒకవేళ వర్షం కారణంగా మ్యాచ్‌ రోజు సూపర్‌ ఓవర్‌ సాధ్యపడకపోతే రిజర్వ్‌ డే రోజున సూపర్‌ ఓవర్‌ వేయిస్తారు. ఒకవేళ వర్షం కారణంగా రిజర్వ్‌ డే రోజున కూడా సూపర్‌ ఓవర్‌ వీలుకాకపోతే లీగ్‌ దశలో ఎక్కువ పాయింట్లు సాధించిన జట్టు (భారత్‌) ఫైనల్‌కు చేరుతుంది. పిచ్, వాతావరణం ఓల్డ్‌ ట్రఫోర్డ్‌ మైదానం బ్యాటింగ్‌కు అనుకూలం. భారీ స్కోర్లకు అవకాశం ఉంది. భారత్‌ ఇప్పటికే ఇక్కడ పాక్, విండీస్‌లపై గెలవగా... కివీస్‌ చేతిలో విండీస్‌ త్రుటిలో ఓడింది ఇక్కడే. మోర్గాన్‌ 17 సిక్సర్లు ఇదే స్టేడియంలో బాదాడు. అయితే ఈ మ్యాచ్‌కు కొత్తగా వేసిన పిచ్‌ను వాడుతున్నారు. టాస్‌ గెలిచిన జట్టు ముందుగా బ్యాటింగ్‌ చేయడం ఖాయం. ఈ ప్రపంచకప్‌లో ఈ మైదానంలో జరిగిన 5 లీగ్‌ మ్యాచ్‌లలో తొలుత బ్యాటింగ్‌ చేసిన జట్టే గెలిచింది. ప్రపంచ కప్‌ రెండో దశకు వచ్చేసరికి పిచ్‌లు జీవం కోల్పోయి రెండో ఇన్నింగ్స్‌లో బ్యాటింగ్‌ చేయడం కష్టంగా మారిపోయింది. గత 20 మ్యాచ్‌లలో రెండోసారి బ్యాటింగ్‌ చేసిన టీమ్‌ 4 మ్యాచ్‌లే గెలవగలిగింది. తుది జట్లు (అంచనా)   భారత్‌: కోహ్లి (కెప్టెన్‌), రోహిత్, రాహుల్, పంత్, ధోని, పాండ్యా, కార్తీక్‌/జాదవ్, జడేజా, భువనేశ్వర్, కుల్దీప్, బుమ్రా.   న్యూజిలాండ్‌: విలియమ్సన్‌ (కెప్టెన్‌), గప్టిల్, మున్రో, టేలర్, లాథమ్, నీషమ్, గ్రాండ్‌హోమ్, సాన్‌ట్నర్, ఫెర్గూసన్, బౌల్ట్, హెన్సీ/సోధి.    బౌల్ట్‌ X రోహిత్‌   రోహిత్‌ శర్మ ప్రపంచకప్‌లో ఇప్పటికే 647 పరుగులు సాధించాడు. సచిన్‌ చేసిన ఆల్‌టైమ్‌ వరల్ట్‌ కప్‌ రికార్డు (673)ని దాటేందుకు కేవలం 27 పరుగుల దూరంలో ఉన్న అతను సెమీస్‌లోనూ చెలరేగితే భారత్‌కు తిరుగుండదు. కాబట్టి అతడిని ఆపేందుకు కివీస్‌ తమ ‘ట్రంప్‌ కార్డ్‌’ ట్రెంట్‌ బౌల్ట్‌ను ప్రయోగిస్తుందనడంలో సందేహం లేదు. బౌల్ట్‌ బౌలింగ్‌లో రోహిత్‌ రికార్డు గొప్పగా లేదు. ముఖ్యంగా లెఫ్టార్మ్‌ పేసర్లు వేసే ఇన్‌స్వింగర్లను ఎదుర్కోవడంలో అతని బలహీనత చాలా సార్లు బయటపడింది. వార్మప్‌ మ్యాచ్‌లో కూడా బౌల్ట్‌ సరిగ్గా ఇలాంటి బంతితోనే రోహిత్‌ను ఎల్బీగా ఔట్‌ చేశాడు. ఈసారి రోహిత్‌ అతడిని ఎంత బాగా ఎదుర్కొంటాడో చూడాలి. వన్డేల్లో బౌల్ట్‌ బౌలింగ్‌లో 136 బంతులు ఎదుర్కొన్న రోహిత్‌ 64.7 స్ట్రయిక్‌ రేట్‌తో 88 పరుగులు మాత్రమే చేయగలిగాడు. నాలుగుసార్లు అతని బౌలింగ్‌లో ఔటయ్యాడు.   3-3 ప్రపంచకప్‌లో ఆరుసార్లు సెమీఫైనల్‌ చేరిన భారత్‌ 3సార్లు ఓడి (1987, 1996, 2015) మూడుసార్లు ఫైనల్‌ చేరింది. ఇందులో 2003 ఫైనల్లో ఆస్ట్రేలియా చేతిలో ఓడగా.. 1983, 2011లలో విజేతగా నిలిచింది.  1-6 ప్రపంచ కప్‌లో ఏడుసార్లు సెమీస్‌ చేరిన న్యూజిలాండ్‌ 2015లో ఫైనల్‌ చేరడం మినహా మిగతా ఆరు సార్లు (1975, 1979, 1992, 1999, 2007, 2011) సెమీస్‌లోనే ఓడింది. అత్యధికంగా ఆరు సార్లు సెమీస్‌లో ఓడిన రికార్డు కివీస్‌ పేరిటే ఉంది. 4-3 ప్రపంచకప్‌లో భారత్, న్యూజిలాండ్‌ జట్లు ఏడుసార్లు తలపడ్డాయి. నాలుగు మ్యాచ్‌ల్లో న్యూజిలాండ్‌ గెలిచింది. మూడు మ్యాచ్‌ల్లో భారత్‌కు విజయం దక్కింది. ఈ రెండు జట్లు 2003 తర్వాత మళ్లీ ఓ ప్రపంచకప్‌ మ్యాచ్‌లో అమీతుమీ తేల్చుకోనుండటం విశేషం. 2003 ప్రపంచకప్‌ మ్యాచ్‌లో న్యూజిలాండ్‌పై భారత్‌ ఏడు వికెట్లతో గెలిచింది.   

ప్రపంచకప్‌లో లీగ్‌ దశకు తెర పడింది. అత్యుత్తమ ప్రదర్శన చేసిన నాలుగు జట్లు భారత్, ఆస్ట్రేలియా, ఇంగ్లండ్, న్యూజిలాండ్‌ సెమీఫైనల్‌ పోరుకు అర్హత సాధించాయి. వరుసగా 38 రోజుల్లో మొత్తం 45 లీగ్‌ మ్యాచ్‌లు జరిగాయి. రౌండ్‌ రాబిన్‌ లీగ్‌ ఫార్మాట్‌లో అన్ని జట్లకు సెమీఫైనల్‌ చేరే అవకాశాలు సమానంగా లభించాయి. కానీ సెమీఫైనల్లో మాత్రం అలాంటి చాన్స్‌ ఉండదు. విశ్వవిజేతను నిర్ణయించే ఫైనల్‌ పోరుకు అర్హత పొందేందుకు ఈ నాలుగు జట్లకు సెమీఫైనల్స్‌ రూపంలో ఒక్కో అవకాశమే లభించనుంది. ఈ నాకౌట్‌ మ్యాచ్‌ల్లో ఓడితే ఇంటిదారి పడతారు కాబట్టి నాలుగు జట్లూ ఈ కీలక మ్యాచ్‌ల్లో పైచేయి సాధించేందుకు పక్కా వ్యూహాలతో సమాయత్తం అవుతున్నాయి. – సాక్షి క్రీడావిభాగం టైటిల్‌ ఫేవరెట్స్‌లో ఒకరిగా బరిలోకి దిగిన భారత్‌ ప్రస్థానం సెమీఫైనల్‌ వరకు రాజసంగా సాగింది. ఆతిథ్య ఇంగ్లండ్‌ చేతిలో పరాజయం... వర్షం కారణంగా న్యూజిలాండ్‌తో మ్యాచ్‌ రద్దు కావడం మినహా... మిగతా ఏడు మ్యాచ్‌ల్లో భారత్‌ అదరగొట్టింది. శిఖర్‌ ధావన్, విజయ్‌ శంకర్‌ గాయాలతో మధ్యలోనే వైదొలిగినా వారి నిష్క్రమణ ప్రభావం టీమిండియా ప్రదర్శనపై అంతగా పడలేదు. రోహిత్‌ శర్మ ఐదు సెంచరీలతో భీకరమైన ఫామ్‌లో ఉండటం పెద్ద ఊరట. మరో ఓపెనర్‌ లోకేశ్‌ రాహుల్‌ శతకంతో ఫామ్‌లోకి రావడం... కెప్టెన్‌ కోహ్లి నిలకడ... వెరసి భారత టాపార్డర్‌ పటిష్టంగా కనిపిస్తోంది. అయితే ఇప్పటి వరకు భారత మిడిలార్డర్‌కు సరైన పరీక్ష ఎదురుకాలేదు. ఈ నేపథ్యంలో న్యూజిలాండ్‌తో సెమీఫైనల్లో టాపార్డర్‌ ప్రదర్శన కీలకం కానుంది. భారత్‌ భారీ స్కోరు చేయాలన్నా... లక్ష్య ఛేదన సాఫీగా సాగాలన్నా రోహిత్, రాహుల్, కోహ్లిలో ఒకరు మరోసారి భారీ ఇన్నింగ్స్‌ ఆడాల్సిందే. ఒకవేళ వీరు విఫలమైతే మిడిలార్డర్‌లో రిషభ్‌ పంత్, దినేశ్‌ కార్తీక్, హార్దిక్‌ పాండ్యా, ధోని బాధ్యతాయుతంగా ఆడాలి. బౌలింగ్‌ విషయానికొస్తే జస్‌ప్రీత్‌ బుమ్రా, మొహమ్మద్‌ షమీ అద్భుతమైన ఫామ్‌లో ఉన్నారు. బుమ్రా 17 వికెట్లు, షమీ 14 వికెట్లు తీశారు. లెగ్‌ స్పిన్నర్‌ యజువేంద్ర చహల్‌ 11 వికెట్లు పడగొట్టాడు. హార్దిక్‌ పాండ్యా, భువనేశ్వర్, కుల్దీప్‌ యాదవ్‌ కూడా తమవంతుగా రాణిస్తున్నారు.   ఒకరిద్దరిపైనే భారం... అందని ద్రాక్షగా ఉన్న ప్రపంచకప్‌ను ఈసారైనా సాధించాలనే లక్ష్యంతో ఉన్న న్యూజిలాండ్‌కు ఈ మెగా ఈవెంట్‌ చరిత్రలో కీలక మ్యాచ్‌ల్లో చేతులెత్తేసే అలవాటు ఉంది. 1975, 1979, 1992, 1999, 2007, 2011 ప్రపంచకప్‌లలో సెమీఫైనల్లో నిష్క్రమించిన కివీస్‌... 2015 ప్రపంచకప్‌లో ఫైనల్‌ చేరి తుదిమెట్టుపై చతికిలపడింది. ఈ ప్రపంచకప్‌లోనూ న్యూజిలాండ్‌ ఆరంభంలో అదరగొట్టింది. వరుసగా ఆరు మ్యాచ్‌ల్లో ఆ జట్టుకు పరాజయం ఎదురుకాలేదు. అయితే పాకిస్తాన్, ఆస్ట్రేలియా, ఇంగ్లండ్‌లతో జరిగిన చివరి మూడు మ్యాచ్‌ల్లో కివీస్‌ జట్టుకు ఓటమి ఎదురైంది. ఈ టోర్నీలో న్యూజిలాండ్‌ బ్యాటింగ్, బౌలింగ విభాగాల్లో ఎక్కువగా ఒకరిద్దరి ప్రదర్శనపైనే ఆధారపడుతోంది. బ్యాటింగ్‌లో విలియమ్సన్, రాస్‌ టేలర్‌... బౌలింగ్‌లో ఫెర్గూసన్, ట్రెంట్‌ బౌల్ట్‌ నిలకడగా ఆడుతున్నారు. విలియమ్సన్, టేలర్‌ తక్కువ స్కోర్లకే ఔటైతే మాత్రం న్యూజిలాండ్‌కు మరోసారి నిరాశ తప్పదేమో.   ముఖాముఖి భారత్, న్యూజిలాండ్‌ జట్ల మధ్య మొత్తం 106 మ్యాచ్‌లు జరిగాయి. 55 మ్యాచ్‌ల్లో భారత్, 45 మ్యాచ్‌ల్లో న్యూజిలాండ్‌ గెలిచాయి. ఒక మ్యాచ్‌ ‘టై’కాగా... ఐదు మ్యాచ్‌లు రద్దయ్యాయి. ప్రపంచకప్‌లో ఏడు సార్లు ఈ రెండు జట్లు తలపడ్డాయి. మూడుసార్లు భారత్‌ను విజయం వరించగా, నాలుగుసార్లు న్యూజిలాండ్‌ గెలుపు రుచి చూసింది. ఈ రెండు జట్లు చివరిసారి 2003 ప్రపంచకప్‌లో తలపడటం గమనార్హం. వారిద్దరి సారథ్యంలోనే మళ్లీ... విరాట్‌ కోహ్లి నేతృత్వంలో భారత జట్టు 2008లో అండర్‌–19 ప్రపంచ కప్‌ టైటిల్‌ను సాధించింది. మలేసియాలో జరిగిన నాటి టోర్నీలో సెమీఫైనల్లో న్యూజిలాండ్‌పై మూడు వికెట్ల తేడాతో భారత్‌ గెలిచి ఫైనల్లోకి ప్రవేశించింది. నాటి సెమీఫైనల్లో న్యూజిలాండ్‌ జట్టుకు ప్రస్తుత సీనియర్‌ జట్టు కెప్టెన్‌ కేన్‌ విలియమ్సన్‌ కెప్టెన్‌గా వ్యవహరించాడు. 11 ఏళ్ల తర్వాత మళ్లీ ఈ రెండు జట్ల మధ్య ప్రపంచకప్‌ సెమీఫైనల్‌ పోరు జరగనుండగా... యాదృచ్ఛికంగా కోహ్లి, విలియమ్సన్‌ ఈసారి సీనియర్‌ జట్లకు సారథులుగా ఉన్నారు. నాటి జూనియర్‌ న్యూజిలాండ్‌ జట్టులో సభ్యులుగా ఉన్న ట్రెంట్‌ బౌల్ట్, టిమ్‌ సౌతీ... భారత జూనియర్‌ జట్టులో సభ్యుడైన రవీంద్ర జడేజా ప్రస్తుతం సీనియర్‌ జట్టులోనూ ఉన్నారు.   అడ్డంకి దాటాలంటే... 1992 తర్వాత మళ్లీ ప్రపంచకప్‌లో సెమీఫైనల్‌ చేరిన ఇంగ్లండ్‌పై ఈసారి భారీగా అంచనాలు ఉన్నాయి. భారీ హిట్టర్లు ఉండటం.. అందరూ ఫామ్‌లోకి రావడం... బౌలింగ్‌ పదును పెరగడం... వెరసి ఇంగ్లండ్‌ను ఈసారి టైటిల్‌ ఫేవరెట్‌గా చేశాయి. లీగ్‌ దశలో ఆసీస్‌ చేతిలో ఓడిన ఇంగ్లండ్‌... చావోరేవోలాంటి సెమీఫైనల్లో ఆస్ట్రేలియాను దెబ్బ కొట్టాలని పట్టుదలగా ఉంది. పోరాటపటిమకు మారుపేరైన ఆసీస్‌ను ఓడించాలంటే ఇంగ్లండ్‌ తమ అత్యుత్తమ ప్రదర్శన చేయాలి. ఇంగ్లండ్‌ నుంచి ఐదుగురు బ్యాట్స్‌మెన్‌లో జో రూట్, బెయిర్‌స్టో రెండేసి సెంచరీలు చేయగా... జేసన్‌ రాయ్, మోర్గాన్, బట్లర్‌ ఒక్కోసెంచరీ సాధించారు. బౌలింగ్‌లో జోఫ్రా ఆర్చర్‌ (17 వికెట్లు), మార్క్‌ వుడ్‌ (16 వికెట్లు), క్రిస్‌ వోక్స్‌ (10 వికెట్లు) హడలెత్తిస్తున్నారు. అయితే లీగ్‌ దశ ప్రదర్శన ఇప్పుడు చరిత్రే. నాకౌట్‌ మ్యాచ్‌లో ఒత్తిడిని అధిగమించి ఓపెనర్లు శుభారంభం అందించాలి. మిడిలార్డర్‌ కుదురుగా ఆడాలి. ఆ తర్వాత బౌలర్లు మిగతా బాధ్యతను నిర్వర్తించాలి. కీలక మ్యాచ్‌లో కలిసికట్టుగా ఆడితేనే గట్టెక్కుతామన్న సంగతి ఇంగ్లండ్‌కూ తెలుసు కాబట్టి రెండో సెమీఫైనల్‌ రసవత్తరంగా సాగడం ఖాయం.   ముఖాముఖి   ఆస్ట్రేలియా, ఇంగ్లండ్‌ జట్లు ఓవరాల్‌గా 148 మ్యాచ్‌ల్లో తలపడ్డాయి. 82 మ్యాచ్‌ల్లో ఆస్ట్రేలియా గెలవగా... 61 మ్యాచ్‌ల్లో ఇంగ్లండ్‌కు విజయం దక్కింది. రెండు మ్యాచ్‌లు ‘టై’గా ముగిశాయి. మూడు మ్యాచ్‌లు రద్దయ్యాయి. ప్రపంచకప్‌లో ఈ రెండు జట్లు ఎనిమిదిసార్లు పోటీపడ్డాయి. ఆరు సార్లు ఆస్ట్రేలియా నెగ్గగా... రెండుసార్లు ఇంగ్లండ్‌ గెలిచింది. 1992 ఈవెంట్‌ తర్వాత ఆస్ట్రేలియాపై ఇంగ్లండ్‌కు ప్రపంచకప్‌ మ్యాచ్‌లో విజయం దక్కలేదు.   కంగారూ పడొద్దంటే... ప్రపంచ కప్‌ సెమీస్‌ ముంగిట డిఫెండింగ్‌ చాంపియన్‌ ఆస్ట్రేలియాను ఆటగాళ్ల గాయాలు కలవరపెడుతున్నాయి. ఇప్పటికే షాన్‌ మార్‌‡్ష మోచేతి గాయంతో ప్రపంచ కప్‌కు దూరం కాగా, తాజాగా ఉస్మాన్‌ ఖాజా తొడ కండరాల గాయంతో ప్రపంచ కప్‌ నుంచి వైదొలిగాడు. ఖాజా స్థానంలో వికెట్‌ కీపర్‌ బ్యాట్స్‌మెన్‌ మాథ్యూ వేడ్‌ను ఎంపిక చేశారు. మరోవైపు ఆల్‌ రౌండర్‌ స్టొయినిస్‌ పక్కటెముకల గాయంతో బాధపడుతున్నాడు. అయితే అతను సెమీఫైనల్లో ఆడేది లేనిది మరో రెండు రోజుల్లో తేలనుంది. స్టొయినిస్‌కు బ్యాకప్‌గా మిచెల్‌ మార్‌‡్షను ఎంపిక చేశారు. లీగ్‌ దశ ఆరంభంలో భారత్‌ చేతిలో ఓడిన ఆస్ట్రేలియా ఆ తర్వాత వరుసగా ఐదు మ్యాచ్‌ల్లో గెలిచి... చివరి లీగ్‌ మ్యాచ్‌లో దక్షిణాఫ్రికా చేతిలో పోరాడి ఓడింది. ఆస్ట్రేలియా విజయమంత్రాల్లో సమష్టి ప్రదర్శన ప్రధానం. ఏ ఒక్కరిపైనో ఆ జట్టు అతిగా ఆధారపడటం లేదు. వార్నర్, ఫించ్, స్టీవ్‌ స్మిత్, అలెక్స్‌ క్యారీ జోరు మీదుండగా... మ్యాక్స్‌వెల్‌ నుంచి భారీ ఇన్నింగ్స్‌ బాకీ ఉంది. ఇక బౌలింగ్‌లో మిషెల్‌ స్టార్క్‌ 26 వికెట్లతో టోర్నీ టాపర్‌గా కొనసాగుతున్నాడు. కమిన్స్‌ 13 వికెట్లు, బెహ్రెన్‌డార్ఫ్‌ తొమ్మిది వికెట్లు తీశారు. లీగ్‌ దశలో ఇంగ్లండ్‌పై నెగ్గిన ఆస్ట్రేలియా నాకౌట్‌ మ్యాచ్‌లో మాత్రం విజయం సాధించాలంటే విశేషంగా రాణించాల్సి ఉంటుంది.   తొలి సెమీఫైనల్‌ జూలై 9 భారత్‌ X న్యూజిలాండ్‌ వేదిక: మాంచెస్టర్‌ మధ్యాహ్నం 3 గంటల నుంచి స్టార్‌ స్పోర్ట్స్‌–1లో ప్రత్యక్ష ప్రసారం రెండో సెమీఫైనల్‌   జూలై 11   ఆస్ట్రేలియా X ఇంగ్లండ్‌ వేదిక: బర్మింగ్‌హామ్‌ మధ్యాహ్నం 3 గంటల నుంచి స్టార్‌ స్పోర్ట్స్‌–1లో ప్రత్యక్ష ప్రసారం 2008లో కోహ్లి, విలియమ్సన్‌

మాంచెస్టర్‌: ప్రపంచ కప్‌ ఆసాంతం నిరాశజనక ప్రదర్శన కనబర్చిన దక్షిణాఫ్రికా తమ ఆఖరి మ్యాచ్‌లో డిఫెండింగ్‌ చాంపియన్‌ ఆస్ట్రేలియాను ఓడించింది. శనివారం ఇక్కడ జరిగిన ప్రపంచ కప్‌ చివరి లీగ్‌ మ్యాచ్‌లో దక్షిణాఫ్రికా 10 పరుగుల తేడాతో ఆస్ట్రేలియాపై గెలిచింది. ప్రపంచకప్‌ మ్యాచ్‌లో ఆస్ట్రేలియాపై దక్షిణాఫ్రికా గెలవడం 1992 తర్వాత ఇదే తొలిసారి. 326 పరుగుల విజయలక్ష్యంతో బరిలోకి దిగిన ఆస్ట్రేలియా 49.5 ఓవర్లలో 315 పరుగులకు ఆలౌటై  ఓడిపోయింది. ఓపెనర్‌ డేవిడ్‌ వార్నర్‌ (117 బంతుల్లో 122; 15 ఫోర్లు, 2 సిక్స్‌లు) అద్భుత సెంచరీ చేసినా... అలెక్స్‌ క్యారీ (69 బంతుల్లో 85; 11 ఫోర్లు, సిక్స్‌) మెరిసినా ఫలితం లేకపోయింది. ఫించ్‌ (3), స్మిత్‌ (7), స్టొయినిస్‌ (22), మ్యాక్స్‌వెల్‌ (12) తక్కువ స్కోరుకే వెనుదిరిగారు. దక్షిణాఫ్రికా బౌలర్లలో రబడ (3/56), ప్రిటోరియస్‌ (2/27), ఫెలుక్వాయో (2/22) రాణించారు. 4 వికెట్లకు 119 పరుగులతో కష్టాల్లో పడిన ఆసీస్‌ను వార్నర్‌ ఆదుకున్నాడు. అలెక్స్‌ క్యారీతో కలిసి ఐదో వికెట్‌కు 108 పరుగులు జోడించాడు. దక్షిణాఫ్రికా శిబిరంలో ఆందోళన పెంచాడు. అయితే 40వ ఓవర్లో ప్రిటోరియస్‌ బౌలింగ్‌లో మోరిస్‌ కళ్లు చెదిరే క్యాచ్‌ పట్టడంతో వార్నర్‌ ఔటయ్యాడు. దాంతో ఆసీస్‌ జట్టు విజయంపై ఆశలు  వదులుకుంది. అంతకుముందు టాస్‌ గెలిచి బ్యాటింగ్‌ ఎంచుకున్న దక్షిణాఫ్రికా నిర్ణీత 50 ఓవర్లలో 6 వికెట్ల నష్టానికి 325 పరుగులు చేసింది. కెప్టెన్‌ డు ప్లెసిస్‌ (94 బంతుల్లో 100; 7 ఫోర్లు, 2 సిక్స్‌లు) చక్కటి సెంచరీ సాధించాడు. డుసెన్‌ (97 బంతుల్లో 95; 4 ఫోర్లు, 4 సిక్స్‌ల) త్రుటిలో సెంచరీ అవకాశం చేజార్చుకున్నాడు. ఓపెనర్‌ డికాక్‌ (51 బంతుల్లో 52; 7 ఫోర్లు) అర్ధ సెంచరీ చేశాడు. ఆసీస్‌ బౌలర్లలో స్టార్క్‌ (2/59), లయన్‌ (2/53) రెండేసి వికెట్లు తీశారు.  లీగ్‌ దశ మ్యాచ్‌లు ముగిశాక భారత్‌ 15 పాయింట్లతో టాప్‌ ర్యాంక్‌లో నిలువగా... 14 పాయింట్లతో ఆస్ట్రేలియా రెండో స్థానంలో నిలిచింది. 12 పాయింట్లతో ఇంగ్లండ్‌ మూడో స్థానంలో, 11 పాయింట్లతో న్యూజిలాండ్‌ నాలుగో స్థానంలో నిలిచాయి. ఈనెల 9న మాంచెస్టర్‌లో జరిగే తొలి సెమీఫైనల్లో న్యూజిలాండ్‌తో భారత్‌; బర్మింగ్‌హామ్‌లో 11న జరిగే రెండో సెమీఫైనల్లో ఇంగ్లండ్‌తో ఆస్ట్రేలియా తలపడతాయి.

వేర్వేరు ప్రత్యర్థులు... వేర్వేరు మైదానాలు, పిచ్‌లు... ప్రపంచ కప్‌ మెగా టోర్నీ ఒత్తిడి... వేటినీ రోహిత్‌ గురునాథ్‌ శర్మ లెక్క చేయడు... పక్షి కన్నుకు గురి పెట్టిన అర్జునుడిలా అతని దృష్టి అంతా పరుగుల వరద పారించడంపైనే... అందుకే రికార్డులు అతని ముందు మోకరిల్లుతాయి. గణాంకాలు గజ్జె కట్టుకొని అతని ముందు ఆడతాయి. తన అత్యద్భుత వన్డే కెరీర్‌లో ఎన్నో కీర్తికిరీటాలను పదిలపర్చుకున్న ‘హిట్‌మ్యాన్‌’ ఇప్పుడు మరో శిఖరాన్ని అధిరోహించాడు. పన్నెండు ప్రపంచ కప్‌ల చరిత్రలో మరెవరికీ సాధ్యం కాని రీతిలో ఒకే టోర్నీలో ఐదు సెంచరీలతో అతను ఎవరికీ అందనంత ఎత్తులో నిలిచాడు. అనితర సాధ్యమైన రీతిలో మూడు వన్డే డబుల్‌ సెంచరీలు సాధించిన రోహిత్‌ ఇప్పుడు మరో రీతిలో చరిత్రను తిరగరాశాడు. రోహిత్‌ రికార్డుకు తోడు రాహుల్‌ కూడా సెంచరీతో అండగా నిలవడంతో లీగ్‌ దశను భారత్‌ భారీ విజయంతో ముగించింది. ఏమాత్రం పోటీనివ్వలేని రీతిలో శ్రీలంక తక్కువ స్కోరుకే పరిమితం కాగా... టీమిండియా తమకు అలవాటైన రీతిలో లక్ష్యాన్ని సునాయాసంగా ఛేదించింది.     లీడ్స్‌: ప్రపంచ కప్‌లో భారత్‌ తమ ఆధిపత్యాన్ని మళ్లీ ప్రదర్శిస్తూ మరో సాధికారక విజయాన్ని సాధించింది. శనివారం ఇక్కడి హెడింగ్లీ మైదానంలో జరిగిన మ్యాచ్‌లో భారత్‌ 7 వికెట్ల తేడాతో శ్రీలంకను చిత్తు చేసింది. టాస్‌ గెలిచి బ్యాటింగ్‌ ఎంచుకున్న శ్రీలంక 50 ఓవర్లలో 7 వికెట్ల నష్టానికి 264 పరుగులు చేసింది. ఏంజెలో మాథ్యూస్‌ (128 బంతుల్లో 113; 10 ఫోర్లు, 2 సిక్సర్లు) సెంచరీతో కదం తొక్కగా, తిరిమన్నె (68 బంతుల్లో 53; 4 ఫోర్లు) రాణించాడు. బుమ్రా 37 పరుగులకే 3 వికెట్లు తీయడం విశేషం. అనంతరం భారత్‌ 43.3 ఓవర్లలో 3 వికెట్లకు 265 పరుగులు చేసి విజయాన్నందుకుంది. ‘మ్యాన్‌ ఆఫ్‌ ద మ్యాచ్‌’ రోహిత్‌ (94 బంతుల్లో 103; 14 ఫోర్లు, 2 సిక్సర్లు), లోకేశ్‌ రాహుల్‌ (118 బంతుల్లో 111; 11 ఫోర్లు, 1 సిక్స్‌) సెంచరీలు బాది జట్టును సునాయాసంగా గెలిపించారు. వీరిద్దరు తొలి వికెట్‌కు 189 పరుగులు జోడించడం విశేషం. వరుసగా మూడో శతకం బాదిన రోహిత్‌కు వన్డేల్లో ఇది 27వ సెంచరీ.   కీలక భాగస్వామ్యం... భారత బౌలర్ల దెబ్బకు శ్రీలంక ఆరంభంలో వెంటవెంటనే వికెట్లు కోల్పోయింది. 12 ఓవర్లు పూర్తి కాక ముందే జట్టు స్కోరు 55/4 వద్ద నిలిచింది. తన తొలి రెండు ఓవర్లలో ఒక్క పరుగు ఇవ్వని బుమ్రా... కరుణరత్నే (10)ను ఔట్‌ చేసి తొలి దెబ్బ కొట్టాడు. మరో రెండు ఓవర్లకు కుశాల్‌ పెరీరా (18) కూడా బుమ్రా బౌలింగ్‌లోనే వెనుదిరిగాడు. టోర్నీలో తొలి మ్యాచ్‌ ఆడుతున్న రవీంద్ర జడేజా తన మొదటి ఓవర్లోనే కుశాల్‌ మెండిస్‌ (3) పని పట్టగా... పాండ్యా వేసిన తర్వాతి ఓవర్లో అవిష్క ఫెర్నాండో (20) కూడా ఔటయ్యాడు. ఈ స్థితిలో మాథ్యూస్, తిరిమన్నె భాగస్వామ్యం లంకను ఆదుకుంది. ప్రపంచకప్‌లో ఇంగ్లండ్‌పై 82 పరుగుల ఇన్నింగ్స్‌ మినహా ఇతర అన్ని మ్యాచ్‌లలో విఫలమైన మాథ్యూస్‌ కీలక సమయంలో తన అనుభవాన్ని ప్రదర్శించాడు. ప్రపంచ కప్‌లో తొలి అర్ధ సెంచరీతో తిరిమన్నె అతనికి అండగా నిలిచాడు. నిలదొక్కుకునేందుకు కొంత సమయం తీసుకున్న అనంతరం ఈ జంట కొన్ని చక్కటి షాట్లు ఆడింది. 61 పరుగుల వద్ద మాథ్యూస్‌ ఇచ్చిన సునాయాస క్యాచ్‌ను భువనేశ్వర్‌ వదిలేశాడు. ఎట్టకేలకు తిరిమన్నెను కుల్దీప్‌ ఔట్‌ చేయడంతో 124 పరుగుల ఐదో వికెట్‌ భాగస్వామ్యం ముగిసింది. ఆ తర్వాత 115 బంతుల్లో మాథ్యూస్‌ సెంచరీ పూర్తయింది. అతని కెరీర్‌లో ఇది మూడో సెంచరీ కాగా మూడూ భారత్‌పైనే వచ్చాయి.   రాహుల్‌ హిట్‌... కెరీర్‌ తొలి వన్డేలోనే సెంచరీ సాధించిన రాహుల్‌ మూడేళ్ల తర్వాత తన 22వ వన్డేలో మరో శతకం సాధించగలిగాడు! గత మ్యాచ్‌లో బంగ్లాదేశ్‌పై 77 పరుగులు చేసి ఫామ్‌లోకి వచ్చిన అతను దానిని ఇక్కడా కొనసాగించాడు. ఈ క్రమంలో లంక బౌలింగ్‌ను సమర్థంగా ఎదుర్కొని కొన్ని చూడచక్కటి షాట్లు ఆడాడు. ఆరంభంలో ఐదు బంతుల వ్యవధిలోనే మూడు ఫోర్లు కొట్టి దూకుడు ప్రదర్శించిన రాహుల్, ఆ తర్వాత రోహిత్‌కు అండగా నిలిచాడు. డి సిల్వా వేసిన ఒక ఓవర్లో అతను చెలరేగిపోయాడు. ఈ ఓవర్లో 2 ఫోర్లు, 1 సిక్స్‌ కొట్టిన అతను 67 బంతుల్లో అర్ధ సెంచరీ మార్క్‌ను అందుకున్నాడు. రోహిత్‌ వెనుదిరిగిన కొద్ది సేపటి తర్వాత మలింగ బౌలింగ్‌లో సింగిల్‌ తీయడంతో 109 బంతుల్లో రాహుల్‌ తొలి ప్రపంచ కప్‌ సెంచరీ పూర్తయింది. జట్టు విజయానికి 21 పరుగుల దూరంలో రాహుల్‌ ఔట్‌ కాగా... విరాట్‌ కోహ్లి (41 బంతుల్లో 34 నాటౌట్‌; 3 ఫోర్లు) అజేయంగా నిలిచి టీమ్‌ను గెలుపు తీరం చేర్చాడు.   స్కోరు వివరాలు   శ్రీలంక ఇన్నింగ్స్‌: కరుణరత్నే (సి) ధోని (బి) బుమ్రా 10; కుశాల్‌ పెరీరా (సి) ధోని (బి) బుమ్రా 18; అవిష్క ఫెర్నాండో (సి) ధోని (బి) పాండ్యా 20; కుశాల్‌ మెండిస్‌ (స్టంప్డ్‌) ధోని (బి) జడేజా 3; మాథ్యూస్‌ (సి) రోహిత్‌ (బి) బుమ్రా 113; తిరిమన్నె (సి) జడేజా (బి) కుల్దీప్‌ 53; ధనంజయ డి సిల్వా (నాటౌట్‌) 29; తిసారా పెరీరా (సి) పాండ్యా (బి) భువనేశ్వర్‌ 2; ఉదాన (నాటౌట్‌) 1; ఎక్స్‌ట్రాలు 15; మొత్తం (50 ఓవర్లలో 7 వికెట్లకు) 264.   వికెట్ల పతనం: 1–17, 2–40, 3–53, 4–55, 5–179, 6–253, 7–260. బౌలింగ్‌: భువనేశ్వర్‌ 10–0–73–1, బుమ్రా 10–2–37–3, హార్దిక్‌ పాండ్యా 10–0–50–1, జడేజా 10–0–40–1, కుల్దీప్‌ 10–0–58–1. భారత్‌ ఇన్నింగ్స్‌: రాహుల్‌ (సి) కుశాల్‌ పెరీరా (బి) మలింగ 111; రోహిత్‌ (సి) మాథ్యూస్‌ (బి) రజిత 103; కోహ్లి (నాటౌట్‌) 34; పంత్‌ (ఎల్బీ) (బి) ఉదాన 4; పాండ్యా (నాటౌట్‌) 7; ఎక్స్‌ట్రాలు 6; మొత్తం (43.3 ఓవర్లలో 3 వికెట్లకు) 265.   వికెట్ల పతనం: 1–189, 2–244, 3–253.   బౌలింగ్‌: మలింగ 10–1–82–1, రజిత 8–0–47–1, ఉదాన 9.3–0–50–1, తిసారా పెరీరా 10–0–34–0, ధనంజయ డి సిల్వా 6–0–51–0. 1: ఒకే ప్రపంచకప్‌లో ఐదు సెంచరీలు కొట్టిన తొలి క్రికెటర్‌గా రోహిత్‌ శర్మ ఘనత వహించాడు. 1: ప్రపంచకప్‌ చరిత్రలో అత్యధిక సెంచరీలు కొట్టిన క్రికెటర్ల జాబితాలో అగ్రస్థానంలో ఉన్న సచిన్‌ టెండూల్కర్‌ (44 ఇన్నింగ్స్‌లో 6 సెంచరీలు) సరసన రోహిత్‌ (16 ఇన్నింగ్స్‌లో 6 సెంచరీలు) చేరాడు. ఐదేసి సెంచరీలతో రికీపాంటింగ్‌ (ఆస్ట్రేలియా), కుమార సంగక్కర (శ్రీలంక) రెండో స్థానంలో ఉన్నారు. 2: విరాట్‌ కోహ్లి తర్వాత వన్డేల్లో వరుసగా మూడు మ్యాచ్‌ల్లో సెంచరీలు కొట్టిన రెండో భారతీయ క్రికెటర్‌గా రోహిత్‌ నిలిచాడు. ఓవరాల్‌గా 11వ ప్లేయర్‌గా గుర్తింపు పొందాడు. సంగక్కర 2015 ప్రపంచకప్‌లో వరుసగా నాలుగు మ్యాచ్‌ల్లో సెంచరీలు కొట్టాడు.   2: అంతర్జాతీయ క్రికెట్‌లో (టెస్టు, వన్డే ఫార్మాట్‌) ఓ సిరీస్‌లో లేదా ఓ టోర్నమెంట్‌లో ఐదు సెంచరీలు కొట్టిన రెండో క్రికెటర్‌ రోహిత్‌. 1955లో ఆస్ట్రేలియాతో జరిగిన ఐదు టెస్టుల సిరీస్‌లో విండీస్‌ బ్యాట్స్‌మన్‌ క్లయిడ్‌ వాల్కట్‌ ఐదు సెంచరీలు కొట్టాడు. 3: ప్రపంచకప్‌ మ్యాచ్‌లో ఓ జట్టు తరఫున ఇద్దరు ఓపెనర్లు సెంచరీలు చేయడం ఇది మూడోసారి. 2011 ప్రపంచకప్‌లో శ్రీలంక తరఫున దిల్షాన్, ఉపుల్‌ తరంగ (జింబాబ్వే, ఇంగ్లండ్‌లపై) రెండుసార్లు ఈ ఘనత సాధించారు.   3: వన్డేల్లో ఎంజెలో మాథ్యూస్‌ చేసిన మూడు సెంచరీలు భారత్‌పైనే వచ్చాయి. అయితే మాథ్యూస్‌ సెంచరీ చేసిన మూడుసార్లూ శ్రీలంక ఓడిపోవడం గమనార్హం.   27: మరో 27 పరుగులు చేస్తే ఒకే ప్రపంచకప్‌లో అత్యధిక పరుగుల చేసిన బ్యాట్స్‌మన్‌గా రోహిత్‌ ఘనత వహిస్తాడు. ఈ జాబితాలో సచిన్‌ (673 పరుగులు–2003లో), హేడెన్‌ (659 పరుగులు–2007లో) తొలి రెండు స్థానాల్లో ఉన్నారు. ప్రస్తుత ప్రపంచకప్‌లో రోహిత్‌ 647 పరుగులతో టాప్‌ ర్యాంక్‌లో ఉన్నాడు. రోహిత్‌ స్పెషల్‌... మంచినీళ్లప్రాయంగా సెంచరీలు బాదుతున్న రోహిత్‌ నుంచి మరో సునాయాస శతకం జాలువారింది. శ్రీలంక బౌలర్లను అసలు ఏమాత్రం లెక్క చేయకుండా నెట్స్‌లో ప్రాక్టీస్‌ చేస్తున్నంత సునాయాసంగా రోహిత్‌ బ్యాటింగ్‌ సాగింది. రజిత వేసిన రెండో ఓవర్లో కొట్టిన ఫోర్‌తో మొదలైన పరుగుల ప్రవాహం సెంచరీ వరకు సాగింది. మలింగ ఓవర్లో రెండు వరుస ఫోర్ల అనంతరం రజిత తర్వాతి ఓవర్లోనూ రెండు ఫోర్లు కొట్టి రోహిత్‌ దూసుకుపోయాడు. సిల్వా వేసిన బంతిని భారీ సిక్సర్‌గా మలచి 48 బంతుల్లో అర్ధ సెంచరీ పూర్తి చేసుకున్న రోహిత్‌ అదే ఓవర్లో మరో భారీ సిక్సర్‌ బాదాడు. ఉదాన ఓవర్లో రెండు బౌండరీలతో 90ల్లోకి చేరుకున్న రోహిత్‌... రజిత బౌలింగ్‌లో పుల్‌ షాట్‌తో ఫోర్‌ కొట్టి అరుదైన శతకాలు పూర్తి చేసుకున్నాడు. ఒకే ప్రపంచకప్‌లో ఐదో సెంచరీతో కొత్త ఘనతను అందుకున్నాడు. మొత్తం ఇన్నింగ్స్‌ అనాయాసంగా, శ్రమ లేకుండా సాగడం చూస్తే రోహిత్‌ ఆత్మవిశ్వాసం ఏ స్థాయిలో ఉందో అర్థం చేసుకోవచ్చు. తాజా ప్రదర్శనతో రోహిత్‌ ఈ ప్రపంచ కప్‌లో 647 పరుగులతో అగ్రస్థానానికి చేరుకున్నాడు. లీగ్‌ దశలో ఎనిమిది మ్యాచ్‌లు ఆడితే అందులో ఐదు సెంచరీలు, ఒక అర్ధసెంచరీ ఉండటం విశేషం.   ఈ ప్రపంచకప్‌లో రోహిత్‌ స్కోర్లు రాహుల్‌, మాథ్యూస్‌ రోహిత్‌ భార్య రితిక

లండన్‌: ప్రపంచ కప్‌లో పాకిస్తాన్, బంగ్లాదేశ్‌ల ఆట ముగిసింది. శుక్రవారం జరిగిన నామమాత్రమైన చివరి మ్యాచ్‌లో పాక్‌ 94 పరుగులతో బంగ్లాదేశ్‌ను ఓడించింది. తొలుత పాకిస్తాన్‌ నిర్ణీత ఓవర్లలో 9 వికెట్ల నష్టానికి 315 పరుగులు చేసింది. ఓపెనర్‌ ఇమాముల్‌ హక్‌ (100 బంతుల్లో 100; 7 ఫోర్లు) సెంచరీ సాధించాడు. బాబర్‌ ఆజమ్‌ (98 బంతుల్లో 96; 11 ఫోర్లు) త్రుటిలో శతకం చేజార్చుకున్నాడు. పేసర్‌ ముస్తఫిజుర్‌ (5/75) టోర్నీలో రెండోసారి ఐదు వికెట్లు పడగొట్టాడు. అద్భుత ఫామ్‌ కొనసాగిస్తూ ఆల్‌రౌండర్‌ షకీబ్‌ అల్‌ హసన్‌ (77 బంతుల్లో 64; 6 ఫోర్లు) అర్ధ సెంచరీ సాధించినా ఇతరుల నుంచి సహకారం కరవవడంతో ఛేదనలో బంగ్లా 44.1 ఓవర్లలో 221 పరుగులకే ఆలౌటైంది. ఈ కప్‌లో ఉత్తమ బౌలింగ్‌ గణాంకాలను నమోదు చేస్తూ ‘మ్యాన్‌ ఆఫ్‌ ద మ్యాచ్‌’, షాహీన్‌ అఫ్రిది (6/35) ప్రత్యర్థి వెన్నువిరిచాడు. మొత్తం 9 లీగ్‌ మ్యాచ్‌లు పూర్తి చేసుకున్న పాకిస్తాన్‌ 11 పాయింట్లతో న్యూజిలాండ్‌తో కలిసి సంయుక్తంగా నాలుగో స్థానంలో నిలిచింది. అయితే మెరుగైన రన్‌రేట్‌ కారణంగా కివీస్‌కు సెమీఫైనల్‌ బెర్త్‌ ఖాయమైంది. 

లీడ్స్‌: శ్రీలంక జట్టుపై భారత్‌ గత రికార్డు, తాజా ప్రపంచ కప్‌ ఫామ్‌లాంటివి చూసుకుంటే నిస్సందేహంగా మన జట్టుకే విజయావకాశాలు ఉన్నాయి. అయితే అనూహ్యంగా ఇంగ్లండ్, వెస్టిండీస్‌లను ఓడించిన లంకను తక్కువగా అంచనా వేస్తే మొదటికే మోసం రావచ్చు. రెండేళ్ల క్రితం ఇంగ్లండ్‌లోనే జరిగిన చాంపియన్స్‌ ట్రోఫీలో లంక 322 లక్ష్యాన్ని అందుకొని తమను ఓడించిన విషయం టీమిండియా సభ్యులకు గుర్తుండే ఉంటుంది. భారత జట్టు బ్యాటింగ్‌ విషయానికి వస్తే పదే పదే మిడిలార్డర్‌లోనే సమస్య ఎదురవుతోంది. కీలకమైన సెమీఫైనల్‌ మ్యాచ్‌కు ముందు దీనిని జట్టు పరిష్కరించుకోవాల్సి ఉంది. బంగ్లాదేశ్‌తో మ్యాచ్‌లో పాండ్యా, దినేశ్‌ కార్తీక్‌ విఫలం కాగా, ధోని కూడా చచ్చీ చెడి పరుగులు సాధించాడు. మాజీ కెప్టెన్‌ ఈ ప్రపంచకప్‌లో స్పిన్నర్ల బౌలింగ్‌లో 81 బంతులు ఎదుర్కొని 47 పరుగులు మాత్రమే చేయడం అతని బలహీనతను చూపించింది. నాలుగో స్థానంలో రెండు చెప్పుకోదగ్గ స్కోర్లు సాధించిన పంత్‌ తన చోటును ఖాయం చేసుకున్నాడు. ఆడింది ఒకే మ్యాచ్‌ కాబట్టి కార్తీక్‌కు మరో అవకాశం దక్కవచ్చు. మయాంక్‌ జట్టుతో చేరినా... ఓపెనర్‌గా రాహుల్‌ స్థానానికి వచ్చిన ప్రమాదమేమీ లేదు. కాబట్టి మయాంక్‌ తన అవకాశం కోసం వేచి చూడాల్సిందే. ఏకంగా నాలుగు సెంచరీలు చేసి 544 పరుగులతో అందనంత ఎత్తులో ఉన్న రోహిత్‌ శర్మ జట్టు ప్రధాన బలం కాగా 5 అర్ధ సెంచరీలతో 408 పరుగులు చేసిన కోహ్లి కూడా భారత్‌ బ్యాటింగ్‌కు వెన్నెముక. పిచ్‌ కొంత వరకు స్పిన్‌కు అనుకూలించే అవకాశం కనిపిస్తోంది కాబట్టి ముగ్గురు పేసర్లలో ఒకరిని పక్కన పెట్టి కుల్దీప్‌కు మళ్లీ అవకాశం కల్పించవచ్చు. వికెట్ల వేటలో పోటీ పడుతున్న షమీ, బుమ్రాలే ఆడే అవకాశం ఉంది. అయితే జట్టులో ఇప్పటి వరకు ఒక్క మ్యాచ్‌ కూడా ఆడే అవకాశం రాని రవీంద్ర జడేజాను కూడా బరిలోకి దించాలని మేనేజ్‌మెంట్‌ ఆలోచిస్తోంది. సెమీస్‌ రేసు నుంచి నిష్క్రమించిన శ్రీలంక గత మ్యాచ్‌లో విండీస్‌ను ఓడించి ఆత్మవిశ్వాసాన్ని పెంచుకుంది. ఆ మ్యాచ్‌లో సెంచరీ సాధించిన యువ అవిష్క ఫెర్నాండో అదే జోరు సాగించాలని జట్టు ఆశిస్తోంది. లంక ఓపెనర్లలో కరుణరత్నే ఒక మ్యాచ్‌ మినహా బాగానే ఆడగా, కుశాల్‌ పెరీరా కూడా మూడు అర్ధ సెంచరీలతో మెరుగైన ప్రదర్శన చేశాడు. వీరిద్దరు శుభారంభం అందిస్తే ఆ తర్వాత ఫెర్నాండో, కుశాల్‌ మెండిస్‌ ఇన్నింగ్స్‌ను నడిపించగలరు. సీనియర్‌ మాథ్యూస్‌ తన స్థాయికి తగినట్లు మరో మంచి ఇన్నింగ్స్‌ ఆడితే లంకకు ప్రయోజనం. గత మ్యాచ్‌కు దూరమైన ఆల్‌రౌండర్‌ తిసారా పెరీరా తిరిగి జట్టులోకి వచ్చే అవకాశం ఉంది. బౌలింగ్‌లో ఆ జట్టు మరోసారి మలింగనే నమ్ముకుంది. ఉదాన, రజిత భారత్‌పై ఏమాత్రం ప్రభావం చూపిస్తారనేది సందేహమే. స్పి న్నర్లు ధనంజయ డి సిల్వా, వాండర్సేలకు టీమిండియాను నిలువరిం చడం అంత సులువు కాదు.   ముఖాముఖి భారత్, శ్రీలంక జట్ల మధ్య ఇప్పటివరకు 158 మ్యాచ్‌లు జరిగాయి. 90 మ్యాచ్‌ల్లో భారత్‌... 56 మ్యాచ్‌ల్లో శ్రీలంక గెలిచాయి. ఒక మ్యాచ్‌ ‘టై’ అయింది. 11 మ్యాచ్‌లు రద్దయ్యాయి. ప్రపంచకప్‌లో ఈ రెండు జట్ల మధ్య 8 మ్యాచ్‌లు జరిగాయి. 3 మ్యాచ్‌ల్లో భారత్‌... 4 మ్యాచ్‌ల్లో శ్రీలంక నెగ్గాయి. మరో మ్యాచ్‌ రద్దయింది.   తుది జట్లు (అంచనా) భారత్‌: కోహ్లి (కెప్టెన్‌), రోహిత్, రాహుల్, పంత్, ధోని, పాండ్యా, కార్తీక్, షమీ/భువనేశ్వర్, కుల్దీప్, చహల్, బుమ్రా. శ్రీలంక: కరుణరత్నే, కుశాల్‌ పెరీరా, అవిష్క, కుశాల్‌ మెండిస్, మాథ్యూస్, తిసార పెరీరా, ధనంజయ, ఉదాన, మలింగ, రజిత, వాండర్సే. పిచ్, వాతావరణం సాధారణ బ్యాటింగ్‌ పిచ్‌. భారీ స్కోర్లకు అవకాశం ఉంది. కొంత వరకు స్పిన్‌కు అనుకూలించవచ్చు. మ్యాచ్‌కు వర్ష సూచన లేదు.   1: మరో వికెట్‌ తీస్తే వన్డేల్లో జస్‌ప్రీత్‌ బుమ్రా 100 వికెట్లు పూర్తి చేసుకుంటాడు 5: రోహిత్‌ మరో సెంచరీ చేస్తే ఒకే వరల్డ్‌ కప్‌లో ఐదు శతకాలు బాదిన తొలి ఆటగాడవుతాడు. రోహిత్‌ రెండు డబుల్‌ సెంచరీలు లంకపైనే సాధించాడు.  మధ్యాహ్నం 3 గంటల నుంచి స్టార్‌ స్పోర్ట్స్‌–1లో ప్రత్యక్ష ప్రసారం   మాంచెస్టర్‌: ప్రపంచకప్‌కు ముందు ఆసీస్, దక్షిణాఫ్రికా  మ్యాచ్‌ గురించి ఆలోచిస్తే సమ ఉజ్జీల సమరమయ్యేది. రెండు అగ్రశ్రేణి జట్ల మధ్య మ్యాచ్‌ గురించి ఎన్నో అంచనాలుండేవి. గణాంకాల పరంగా చూసినా ఇరు జట్ల మధ్య జరిగిన 99 వన్డేల్లో ఆసీస్‌ 48 గెలిస్తే, దక్షిణాఫ్రికా 47 గెలిచింది. హోరాహోరీగా సాగిన 3 మ్యాచ్‌లు ‘టై’గా ముగిశాయి. కానీ ఇప్పుడు పరిస్థితి వేరు. ఆసీస్‌ ఏడు విజయాలతో దూసుకుపోతే సఫారీలు అతికష్టమ్మీద 2 మ్యాచ్‌లే గెలిచి సెమీస్‌ అవకాశాలు కోల్పోయారు. ఇంగ్లండ్‌లో జరిగింది కాబట్టి 1999 ప్రపంచకప్‌లో జరిగిన ‘అత్యద్భుత టై మ్యాచ్‌’ గుర్తుకు రావచ్చు కానీ ఇప్పుడు దానితో పోలికే లేదు. ప్రస్తుతం ఆసీస్‌ లక్ష్యం ఈ మ్యాచ్‌లోనూ గెలిచి నంబర్‌వన్‌గా నిలవడం. అదే జరిగితే ఇంగ్లండ్‌కంటే బలహీన ప్రత్యర్థి అయిన న్యూజిలాండ్‌తో సెమీస్‌లో ఇదే మాంచెస్టర్‌ మైదానంలో తలపడవచ్చు. మరోవైపు దక్షిణాఫ్రికా ఒక బలమైన జట్టును ఓడించి కొంతైనా సంతృప్తితో ప్రపంచకప్‌ను ముగించాలని భావిస్తోంది. ఈ మ్యాచ్‌తో వన్డేల నుంచి రిటైర్‌ అవుతున్న ఇమ్రాన్‌ తాహిర్, డుమినిలకు విజయంతో వీడ్కోలు పలకాలని కూడా సహచరులు ఆశిస్తున్నారు.   భారత్‌తో మ్యాచ్‌ మినహా ఆస్ట్రేలియాకు టోర్నీలో ఎక్కడా సమస్య ఎదురు కాలేదు. ఇంగ్లండ్‌ రావడానికి ముందు ఎవరూ ఫేవరెట్‌గా పరిగణించని డిఫెండింగ్‌ చాంపియన్‌ ఒక్కసారిగా పుంజుకొని చెలరేగిపోయింది. ఓపెనర్లు వార్నర్‌ (516 పరుగులు), ఫించ్‌ (504) ఒకరితో మరొకరు పోటీ పడి జట్టుకు శుభారంభాలు అందిస్తున్నారు. ఒక్క మ్యాక్స్‌వెల్‌ మాత్రమే అంచనాలను అందుకోలేకపోయాడు. 1992 ప్రపంచకప్‌ నుంచి ఏదో కారణంగా అనూహ్యంగా కీలక సమయాల్లో నిష్క్రమించి అయ్యో అనిపించిన దక్షిణాఫ్రికా ఈసారి మాత్రం చెత్త ఆటతో సానుభూతికి కూడా అవకాశం లేని రీతిలో ‘ఆత్మహత్య’ చేసుకుంది. సెమీస్‌ చేరిన మూడు జట్ల చేతిలోనూ చిత్తయి అఫ్గానిస్తాన్, శ్రీలంకలపై మాత్రం సఫారీలు గెలవగలిగారు. టోర్నీ మొత్తంలో ఆ జట్టు నుంచి ఒక్కరూ సెంచరీ చేయకపోగా, మొత్తం 9 అర్ధ సెంచరీలు మాత్రమే నమోదవడం జట్టు బ్యాటింగ్‌ వైఫల్యాన్ని చూపిస్తోంది.    సాయంత్రం 6 గంటల నుంచి స్టార్‌ స్పోర్ట్స్‌–3లో ప్రత్యక్ష ప్రసారం ప్రపంచ కప్‌లో లీగ్‌ దశ ఆఖరి ఘట్టానికి చేరింది. పట్టికలో తొలి రెండు స్థానాల్లో నిలిచే జట్లేవో చివరి రోజే తేలనుంది. డిఫెండింగ్‌ చాంపియన్‌తో పాటు ఫేవరెట్‌ జట్టు బరిలోకి దిగుతుండగా... సెమీస్‌ చేరడంలో విఫలమైన మరో రెండు జట్లు ప్రత్యర్థులుగా అటువైపు నిలిచాయి. లీడ్స్‌లో జరిగే మ్యాచ్‌లో ‘ప్రియమైన శత్రువు’ శ్రీలంకను చిత్తు చేసి అగ్రస్థానం కోసం తమ వంతు ప్రయత్నం పూర్తి చేసేందుకు భారత్‌ సిద్ధమవుతుండగా... మాంచెస్టర్‌లో   బలహీన దక్షిణాఫ్రికాపై ఘన విజయం సాధించి నంబర్‌వన్‌గా నిలవాలని ఫించ్‌ సేన కోరుకుంటోంది. మూడు గంటల వ్యవధిలో టాప్‌ ఎవరిదో, సెమీస్‌లో ఎవరి ప్రత్యర్థి ఎవరో తేలిపోతుంది. ఈ నేపథ్యంలో వారాంతంలో రెండు ఆసక్తికర మ్యాచ్‌లకు రంగం సిద్ధమైంది.

ప్రపంచ కప్‌ క్వాలిఫయింగ్‌ టోర్నీలో  అఫ్గానిస్తాన్‌ చేతిలో తమకెదురైన పరాజయానికి వెస్టిండీస్‌ బదులు తీర్చుకుంది. బ్యాట్స్‌మెన్‌ సమష్టిగా రాణించడంతో తొలుత భారీ స్కోరు చేసిన కరీబియన్లు... బౌలింగ్‌లో కీలక సమయంలో వికెట్లు తీసి గెలుపొందారు. మ్యాచ్‌లో ఓడినా అఫ్గాన్‌ పోరాటంతో ఆకట్టుకుంది. యువ ఇక్రమ్‌ చక్కటి బ్యాటింగ్‌తో అలరించాడు. లీడ్స్‌: ఈ కప్‌ కంటే ముందు క్వాలిఫయింగ్‌ ఈవెంట్‌ ఫైనల్లో విండీస్‌పై గెలిచిన అఫ్గానిస్తాన్‌ ‘హీరో’గా  మెగా ఈవెంట్‌కు అర్హత సాధించింది. ఇప్పుడదే ప్రత్యర్థిపై గెలవడం ద్వారా వెస్టిండీస్‌... అఫ్గాన్‌ను ‘జీరో’గా మార్చింది. ఒక్క సంచలన విజయమూ లేకుండానే, ఆడినవన్నీ ఓడి అఫ్గాన్‌ ప్రపంచకప్‌ నుంచి నిష్క్రమించింది. గురువారం జరిగిన పోరులో వెస్టిండీస్‌ 23 పరుగుల తేడాతో ఆ జట్టుపె విజయం సాధించింది. మొదట విండీస్‌ 50 ఓవర్లలో 6 వికెట్ల నష్టానికి 311 పరుగులు చేసింది. ‘మ్యాన్‌ ఆఫ్‌ ద మ్యాచ్‌’ షై హోప్‌ (92 బంతుల్లో 77; 6 ఫోర్లు, 2 సిక్స్‌లు) రాణించగా, నికోలస్‌ పూరన్‌ (43 బంతుల్లో 58; 6 ఫోర్లు, 1 సిక్స్‌) రాణించాడు. దౌలత్‌ జద్రాన్‌ 2 వికెట్లు తీశాడు. తర్వాత లక్ష్యఛేదనకు దిగిన అఫ్గానిస్తాన్‌ 50 ఓవర్లలో 288 పరుగుల వద్ద ఆలౌటైంది. ఇక్రమ్‌ అలిఖిల్‌ (93 బంతుల్లో 86; 8 ఫోర్లు), రహ్మత్‌ షా (78 బంతుల్లో 62; 10 ఫోర్లు) రాణించాడు. బ్రాత్‌వైట్‌ 4 వికెట్లు తీశాడు. సమష్టిగా రాణించిన బ్యాట్స్‌మెన్‌ టాస్‌ గెలిచి బ్యాటింగ్‌కు దిగిన విండీస్‌ జట్టులో ఓపెనర్‌ గేల్‌ (7) ఒక్కడే విఫలమయ్యాడు. మిగతావారంతా రాణించడంతో పాటు మూడు విలువైన భాగస్వామ్యాలు నమోదు చేయడంతో స్కోరు దూసుకెళ్లింది. లూయిస్‌ (78 బంతుల్లో 58; 6 ఫోర్లు, 2 సిక్స్‌లు), హోప్‌ కలిసి రెండో వికెట్‌కు 88 పరుగులు జోడించారు. తర్వాత హెట్‌మైర్‌తో కలిసి హోప్‌ మూడో వికెట్‌కు 65 పరుగులు జత చేశారు. పూరన్, హోల్డర్‌ (34 బంతుల్లో 45; 1 ఫోర్, 4 సిక్స్‌లు) ధాటిగా ఆడి ఐదో వికెట్‌కు 105 పరుగులు జోడించడంతో స్కోరు 300 పరుగులు దాటింది. సయద్, నబీ, రషీద్‌ఖాన్‌ తలా ఒక వికెట్‌ తీశారు. పోరాడిన ఇక్రమ్‌ లక్ష్యాన్ని ఛేదించే క్రమంలో కెప్టెన్‌ నైబ్‌ (5) వికెట్‌ పారేసుకున్న అఫ్గాన్‌ను రహ్మత్‌ షా, ఇక్రమ్‌ జోడీ నిలబెట్టింది. ఇద్దరు కలిసి రెండో వికెట్‌కు 133 పరుగులు జోడించడం ప్రత్యర్థి శిబిరాన్ని ఆత్మరక్షణలో పడేసింది. ఇద్దరు విండీస్‌ బౌలర్లను అద్భుతంగా ఎదుర్కొన్నారు. తర్వాత ఇక్రమ్‌కు జతయిన నజీబుల్లా కూడా మెరుగ్గా ఆడటంతో విండీస్‌కు కష్టాలు తప్పలేదు. అయితే గేల్‌ వేసిన ఇన్నింగ్స్‌ 36వ ఓవర్‌ మ్యాచ్‌ను మార్చేసింది. ఇక్రమ్‌ వికెట్ల ముందు దొరికిపోగా, నజీబుల్లా (31) రనౌటయ్యాడు. కాసేపటికే నబీ (2) కూడా ఔట్‌ కావడంతో అఫ్గాన్‌ పరాజయం ఖాయమైనా... అస్గర్‌ (32 బంతుల్లో 40; 4 ఫోర్లు, 1 సిక్స్‌), సయద్‌ (17 బంతుల్లో 25; 2 ఫోర్లు, 2 సిక్స్‌లు) మెరిపించడంతో ఆఖరి బంతిదాకా అఫ్గాన్‌ ఆడింది. స్కోరు వివరాలు వెస్టిండీస్‌ ఇన్నింగ్స్‌: గేల్‌ (సి) ఇక్రమ్‌ (బి) దౌలత్‌ 7; లూయిస్‌ (సి) నబీ (బి) రషీద్‌ఖాన్‌ 58; షైహోప్‌ (సి)రషీద్‌ఖాన్‌ (బి) నబీ 77; హెట్‌మైర్‌ (సి) సబ్‌– నూర్‌ అలీ (బి) దౌలత్‌ 39; పూరన్‌ రనౌట్‌ 58; హోల్డర్‌ (సి) దౌలత్‌ (బి) సయద్‌ 45; బ్రాత్‌వైట్‌ నాటౌట్‌ 14; అలెన్‌ నాటౌట్‌ 0; ఎక్స్‌ట్రాలు 13; మొత్తం (50 ఓవర్లలో 6 వికెట్లకు) 311. వికెట్ల పతనం: 1–21, 2–109, 3–174, 4–192, 5–297, 6–297. బౌలింగ్‌: ముజీబ్‌ 10–0–52–0, దౌలత్‌ 9–1–73–2, సయద్‌ 8–0–56–1, నైబ్‌ 3–0–18–0, నబీ 10–0–56–1, రషీద్‌ఖాన్‌ 10–0–52–1. అఫ్గానిస్తాన్‌ ఇన్నింగ్స్‌: నైబ్‌ (సి) లూయిస్‌ (బి) రోచ్‌ 5; రహ్మత్‌ షా (సి) గేల్‌ (బి) బ్రాత్‌వైట్‌ 62; ఇక్రమ్‌ ఎల్బీడబ్ల్యూ (బి) గేల్‌ 86; నజీబుల్లా రనౌట్‌ 31; అస్గర్‌ (సి) హోల్డర్‌ (బి) బ్రాత్‌వైట్‌ 40; నబీ (సి) అలెన్‌ (బి) రోచ్‌ 2; సమీవుల్లా (సి) హెట్‌మైర్‌ (బి) రోచ్‌ 6; రషీద్‌ ఖాన్‌ (సి) హోల్డర్‌ (బి) బ్రాత్‌వైట్‌ 9; దౌలత్‌ (సి) కాట్రెల్‌ (బి) బ్రాత్‌వైట్‌ 1; సయద్‌ (సి) అలెన్‌ (బి) థామస్‌ 25; ముజీబ్‌ నాటౌట్‌ 7; ఎక్స్‌ట్రాలు 14; మొత్తం (50 ఓవర్లలో ఆలౌట్‌) 288. వికెట్ల పతనం: 1–5, 2–138, 3–189, 4–194, 5–201, 6–227, 7–244, 8–255, 9–260, 10–288. బౌలింగ్‌: కాట్రెల్‌ 7–0–43–0, రోచ్‌ 10–2–37–3, థామస్‌ 7–0–43–1, హోల్డర్‌ 8–0–46–0, అలెన్‌ 3–0–26–0, బ్రాత్‌వైట్‌ 9–0–63–4, గేల్‌ 6–0–28–1.  

బర్మింగ్‌హామ్‌: ఇంగ్లండ్‌తో మ్యాచ్‌లో ప్రపంచకప్‌లో అరంగేట్రం చేసిన టీమిండియా యువ సంచలనం రిషభ్‌ పంత్‌పై ఫీల్డింగ్‌ కోచ్‌ శ్రీధర్‌ కీలక వ్యాఖ్యలు చేశాడు. ఔట్‌ఫీల్డ్‌లో పంత్‌ మరింత వేగంగా కదలాల్సి ఉందని అభిప్రాయపడ్డాడు. బంగ్లాదేశ్‌తో మ్యాచ్‌లో అతని ఫీల్డింగ్‌ లోపాలు బయటపడ్డాయని అన్నాడు. ఔట్‌పీల్డ్‌లో అతనికున్న వేగం సరిపోదని మరింత రాటుదేలాలని అన్నాడు. బంగ్లాతో మ్యాచ్‌ అనంతరం జరిగిన ప్రెస్‌ కాన్ఫరెన్స్‌లో ఆయన ఈ వ్యాఖ్యలు చేశాడు. ‘ఫీల్డింగ్‌లో పంత్‌ మరింత శ్రమించాల్సి ఉంది. ముఖ్యంగా ఔట్‌ఫీల్డ్‌లో వేగంగా కదలడం.. మరీ ముఖ్యంగా బంతిని త్రో చేయడంలో ప్రత్యేక శ్రద్ధ కనబర్చాలి. పంత్‌ను తగిన పొజిషన్‌లో ఫీల్డింగ్‌ చేయించాలని కెప్టెన్‌ కోహ్లి, ఎంస్ ధోని ఆసక్తితో ఉన్నారు. ఇంగ్లండ్‌తో మ్యాచ్‌లో అతను 5 పరుగుల వరకు సేవ్‌ చేశాడు. ఒక క్యాచ్‌ కూడా అందుకున్నాడు. అయితే, టీమ్‌ అంచనాలకు తగ్గట్టుగా అతను ఫీల్డింగ్‌లో మెళకువలు నేర్చుకోవాలి.‌’అన్నాడు.  (చదవండి : ‘పంత్‌ను అందుకే అలా పిలుస్తా’) ఇక బంగ్లాతో మ్యాచ్‌లో ప్రపంచకప్‌లో అరంగేట్రం చేసిన దినేష్‌ కార్తీక్‌ ఔట్‌ఫీల్డ్‌లో పంత్‌ కంటే బెటర్‌గా ఫీల్డింగ్‌ చేయగలడని అన్నాడు. ఎవరికి వారు తమ స్థానాల్లో మెరుగ్గా ఫీల్డింగ్‌ చేస్తే.. ఆయా చోట్ల వారినే కంటిన్యూ చేయడం జట్టుకు మేలు చేస్తుందని అన్నాడు. క్రికెట్‌ మైదానాలన్నీ ఒకే రీతిలో ఉండవనీ, టెక్నిక్‌తో ఫీల్డింగ్‌ చేసినప్పుడే అంచనాలు అందుకోగలమని చెప్పాడు. ఇక మంగళవారం బంగ్లాతో జరిగిన మ్యాచ్‌లో 28 పరుగులతో విజయం సాధించిన టీమిండియా సెమీస్‌ బెర్త్‌ ఖాయం చేసుకున్న సంగతి తెలిసిందే. (చదవండి : దినేశ్‌ కార్తీక్‌ ఎన్నాళ్లకెన్నాళ్లకు..)

చెస్టర్‌ లీ స్ట్రీట్‌:  ప్రపంచ కప్‌ ఆతిథ్య జట్టు, ఫేవరెట్‌గా బరిలోకి దిగిన ఇంగ్లండ్‌ సెమీ ఫైనల్‌కు అర్హత సాధించేందుకు తమ చివరి మ్యాచ్‌ వరకు శ్రమించాల్సిన పరిస్థితి! ఎలాంటి సమీకరణాలతో సంబంధం లేకుండా నేరుగా సెమీస్‌ చోటు దక్కించుకునే ప్రయత్నంలో మోర్గాన్‌ సేన నేడు (బుధవారం) జరిగే మ్యాచ్‌లో న్యూజిలాండ్‌తో తలపడనుంది. భారత్‌పై విజయంతో కోలుకున్న ఇంగ్లండ్‌... ఈ మ్యాచ్‌లోనూ గెలిస్తే 12 పాయింట్లతో సెమీస్‌ చేరుకుంటుంది. ఒక వేళ ఓడితే మాత్రం పరిస్థితి ఇబ్బందికరంగా మారుతుంది. మరో వైపు గత మ్యాచ్‌లో ఆసీస్‌ చేతిలో ఓడిన న్యూజిలాండ్‌ కూడా విజయం సాధించి దర్జాగా ముందంజ వేయాలని కోరుకుంటోంది. ఇంగ్లండ్‌ బ్యాటింగ్‌ ఒక్కసారిగా ఫామ్‌లోకి రాగా... కివీస్‌ ప్రధానంగా విలియమ్సన్, టేలర్‌లపైనే ఆధార పడుతోంది. 2015 ప్రపంచకప్‌లో ఇరు జట్ల మధ్య మ్యాచ్‌లో ఇంగ్లండ్‌ 123 పరుగులకే కుప్పకూలగా కివీస్‌ 12.2 ఓవర్లలోనే లక్ష్యాన్ని ఛేదించింది. దానికి సొంతగడ్డపై ప్రతీకారం తీర్చు కోవాలని కూడా ఇంగ్లండ్‌ భావిస్తోంది.  

ఈ ప్రపంచకప్‌లో రోహిత్‌ జోరు, భారత్‌ స్కోర్లను చూస్తుంటే ఇక టీమిండియాకు తిరుగులేదనే అనిపిస్తుంది. తాజాగా బంగ్లా పనిపట్టింది. చక్కగా సెమీఫైనల్‌ చేరింది. ఈ టోర్నీలో మేటి జట్లకు దీటుగా రాణిస్తున్న బంగ్లాదేశ్‌ ఆట లీగ్‌ దశలోనే ముగిసింది. ఇక కోహ్లి సేన లక్ష్యం అగ్రస్థానంలో నిలవడమే! ఆఖరి మ్యాచ్‌లో లంకను ఓడిస్తే సెమీస్‌ పరీక్షను ఆత్మవిశ్వాసంతో ఎదుర్కోవచ్చని భావిస్తోంది.   బర్మింగ్‌హామ్‌: ఒక్క పరాజయం ఎదురైందో లేదో వెంటనే టీమిండియా పుంజుకుంది. బంగ్లాదేశ్‌పై అదరగొట్టింది. మంగళవారం జరిగిన మ్యాచ్‌లో 28 పరుగుల తేడాతో విజయం సాధించింది. సగర్వంగా భారత్‌ సెమీఫైనల్లోకి అడుగుపెట్టింది.  ముందుగా బ్యాటింగ్‌కు దిగిన భారత్‌ నిర్ణీత 50 ఓవర్లలో 9 వికెట్ల నష్టానికి 314 పరుగులు చేసింది. ఈ మెగా ఈవెంట్‌లో ‘హిట్‌మ్యాన్‌’ రోహిత్‌ (92 బంతుల్లో 104; 7 ఫోర్లు, 5 సిక్స్‌లు) మళ్లీ సెంచరీతో చెలరేగాడు. కేఎల్‌ రాహుల్‌ (92 బంతుల్లో 77; 6 ఫోర్లు, 1 సిక్స్‌) రాణించాడు. ముస్తఫిజుర్‌ రహ్మాన్‌కు 5 వికెట్లు దక్కాయి. తర్వాత కష్టసాధ్యమైన లక్ష్యాన్ని ఛేదించేందుకు బరిలోకి దిగిన బంగ్లాదేశ్‌ 48 ఓవర్లలో 286 పరుగులకు ఆలౌటైంది. షకీబ్‌ (74 బంతుల్లో 66; 6 ఫోర్లు), సైఫుద్దీన్‌ (38 బంతుల్లో 51 నాటౌట్‌; 9 ఫోర్లు) రాణించారు. భారత బౌలర్లలో బుమ్రా 4 వికెట్లు తీశాడు. రోహిత్‌కు ‘మ్యాన్‌ ఆఫ్‌ ద మ్యాచ్‌’ అవార్డు దక్కింది. ఇరు జట్లు రెండేసి మార్పులతో బరిలోకి దిగాయి. టీమిండియా తరఫున కుల్దీప్, కేదార్‌ స్థానాల్లో భువనేశ్వర్, దినేశ్‌ కార్తీక్‌ బరిలోకి దిగారు. రుబెల్‌ హొస్సేన్, షబ్బీర్‌ రహ్మాన్‌ బంగ్లా తుదిజట్టులోకి వచ్చారు. సూపర్‌ హిట్‌ జోడి... ధావన్‌ గాయపడగానే భారత్‌కు పెద్ద దెబ్బనుకున్నాం. కానీ ఆ లోటు మాత్రం లేనేలేదు. రాహుల్, రోహిత్‌లిద్దరు కీలకమైన మ్యాచ్‌ల్లో శుభారంభాలిస్తున్నారు. ఈ మ్యాచ్‌లోనూ అదే చేశారు. టాస్‌ నెగ్గగానే కోహ్లి బ్యాటింగ్‌కే ఓటేశాడు. ఆ వెంటే రాహుల్, రోహిత్‌ల జోడి బలమైన భాగస్వామ్యానికి ధాటిగా పునాదులు వేశారు. ఎడ్జ్‌బాస్టన్‌ మైదానంలో ఫోర్లు, సిక్సర్లు అవలీలగా బాదుతుంటే స్కోరు జోరందుకుంది. తొలి 10 ఓవర్లలో వికెట్‌ కోల్పోకుండా 69 పరుగులు చేసిన భారత ఓపెనర్లు భారీ భాగస్వామ్యాన్ని నెలకొలిపే పనిలో అర్ధసెంచరీలు పూర్తి చేసుకున్నారు. రోహిత్‌ 45 బంతుల్లో, రాహుల్‌ 57 బంతుల్లో ఫిఫ్టీలు చేశారు. చేతిలో ఉన్న బౌలింగ్‌ వనరులన్నీ ఉపయోగించినా... 20 ఓవర్లు పూర్తయినా... ఒక్క వికెట్‌ కూడా పడగొట్టలేకపోయిన బంగ్లా బౌలర్లు మరింత నీరసించారు. రోహిత్‌ శతకం బంగ్లా బౌలర్లకు కొరకరాని కొయ్యగా మారిన రోహిత్‌... వీలుచిక్కితే సిక్స్, కుదిరితే బౌండరీలుగా బాదుతుంటే స్కోరు అమాంతం పెరుగుతూ పోయింది. 23.1 ఓవర్లోనే భారత్‌ స్కోరు 150కి చేరింది. రోహిత్‌ 90 బంతుల్లోనే సెంచరీ సాధించాడు. ఈ టోర్నీలో అతనికిది నాలుగో సెంచరీ కావడం విశేషం. పైగా 29వ ఓవర్లోనే సెంచరీ కొట్టడంతో అభిమానులు డబుల్‌ సెంచరీకి అవకాశముందనుకున్నారు. అందుకేనేమో 30వ ఓవర్లో అతను ఔట్‌ కాగానే భారత ప్రేక్షకులు తీవ్రంగా నిరాశచెందారు. సౌమ్య సర్కార్‌ బౌలింగ్‌లో రోహిత్‌ వెనుదిరగడంతో 180 పరుగుల భారీ భాగస్వామ్యానికి తెరపడింది. స్వల్పవ్యవధిలో రాహుల్‌ను రూబెల్‌ పెవిలియన్‌ చేర్చాడు. ముస్తఫిజుర్‌ దెబ్బ... భారత్‌ జోరు, స్కోరు చూస్తే 350 పైచిలుకు గ్యారంటీ అనే అనుకున్నారంతా కానీ ముస్తఫిజుర్‌ బౌలింగ్‌ నైపుణ్యం భారత బ్యాట్స్‌మెన్‌ను కట్టడి చేసింది. ఓపెనర్లు ఔటయ్యాక కెప్టెన్‌ కోహ్లి, రిషభ్‌ పంత్‌ స్కోరు పెంచే బాధ్యతను తీసుకున్నారు. ఈ దశలో ఇన్నింగ్స్‌ 39వ ఓవర్‌ వేసిన ముస్తఫిజుర్‌... కోహ్లి (26), హార్దిక్‌ పాండ్యా (0)లను ఔట్‌ చేయడంతో స్కోరు వేగం మందగించింది. ధాటిగా ఆడుతున్న పంత్‌ (41 బంతుల్లో 48; 6 ఫోర్లు, 1 సిక్స్‌)ను షకీబ్‌ పెవిలియన్‌ చేర్చగా, మిగతా బ్యాట్స్‌మెన్‌ దినేశ్‌ కార్తీక్‌ (8), భువనేశ్వర్‌ (2), షమీ (1) తేలిపోయారు. ధోని (33 బంతుల్లో 35; 4 ఫోర్లు) ఆఖరి ఓవర్‌దాకా ఉన్నా మళ్లీ విమర్శలపాలయ్యే ఆటే ఆడాడు. ఆఖరి 10 ఓవర్లలో కేవలం 63 పరుగులే చేసిన భారత్‌ 5 వికెట్లను కోల్పోయింది.   షకీబ్‌ మరో అర్ధసెంచరీ... భారీ లక్ష్యాన్ని ఛేదించేందుకు బరిలోకి దిగిన బంగ్లాదేశ్‌కు పదో ఓవర్‌ నుంచి కష్టాలు మొదలయ్యాయి. ఓపెనర్లు తమీమ్‌ ఇక్బాల్, సౌమ్య సర్కార్‌ల జోరు లేకపోయినా... క్రీజులో పాతుకుపోతున్న దశలో షమీ తొలిదెబ్బ తీశాడు. తమీమ్‌ (22)ను క్లీన్‌బౌల్డ్‌ చేశాడు. దీంతో సర్కార్‌కు సూపర్‌ ఫామ్‌లో ఉన్న షకీబ్‌ అల్‌ హసన్‌ జతయ్యాడు. 12వ ఓవర్లో జట్టు 50 పరుగులను అధిగమించింది. 16వ ఓవర్‌ వేసిన హార్దిక్‌... సర్కార్‌ (38 బంతుల్లో 33; 4 ఫోర్లు)ను ఔట్‌ చేయడంతో 74 పరుగుల వద్ద రెండో వికెట్‌ కూలింది. అనంతరం షకీబ్, ముష్ఫికర్‌ జట్టు స్కోరును వందకు చేర్చారు. ముష్ఫికర్‌ మూడో వికెట్‌కు 47 పరుగులు జతయ్యాయో లేదో ముష్ఫికర్‌ (23 బంతుల్లో 24, 3 ఫోర్లు)ను చహల్‌ ఔట్‌ చేశాడు. ఇలా భారత బౌలర్లు  ప్రత్యర్థి జట్టు బలమైన భాగస్వామ్యాలు నమోదు చేయకుండా తలా ఒక చెయ్యివేశారు. 30వ ఓవర్లో పాండ్యా బౌలింగ్‌లో లిటన్‌ దాస్‌ (24 బంతుల్లో 22; 1 సిక్స్‌) ఔట్‌ కావడంతో బంగ్లా ఆశలు ఆవిరయ్యాయి. 58 బంతుల్లో అర్ధసెంచరీ పూర్తి చేసుకున్న షకీబ్‌ ఆ తర్వాత ఎక్కువ సేపు క్రీజులో నిలువలేకపోయాడు. మొసద్దిక్, షకీబ్‌ వరుస ఓవర్లలో నిష్క్రమించడంతో 179 పరుగులకే 6 వికెట్లు కోల్పోయింది. టెయిలెండర్లు షబ్బీర్‌ (36 బంతు ల్లో 36; 5 ఫోర్లు), సైఫుద్దీన్‌ కాసేపు పోరాడినప్పటికీ లక్ష్యానికి అవేమాత్రం సరిపోలేదు. ఒకే ఓవర్లో రూబెల్‌ (9), ముస్తఫిజుర్‌ (0)లను బౌల్డ్‌ చేసిన బుమ్రా బంగ్లా ఇన్నింగ్స్‌ను ముగించాడు. ఔటెందుకివ్వరు భారత కెప్టెన్‌ కోహ్లి ఫీల్డు అంపైర్లతో వాదనకు దిగాడు. సౌమ్య సర్కార్‌ ఎల్బీడబ్ల్యూ అప్పీల్‌ను ఔటెందుకు ఇవ్వరని తీవ్ర అసహనం వ్యక్తం చేశాడు. షమీ వేసిన ఇన్నింగ్స్‌ 12 ఓవర్లో బంతి సర్కార్‌ ప్యాడ్లను తాకింది. వెంటనే భారత ఆటగాళ్లంతా గట్టిగా అప్పీల్‌ చేసినా ఫీల్డ్‌ అంపైర్‌ ఎరాస్మస్‌ తిరస్కరించాడు. దీనిపై ఆలస్యంగా... అసహనంతో డీఆర్‌ఎస్‌కు వెళ్లాడు. పలుమార్లు రీప్లే చూశాక నాటౌట్‌ అని ప్రకటించారు. అయితే గత మ్యాచ్‌లో రోహిత్‌కు ఇలాంటి పరిస్థితి ఎదురైనపుడు ఔటిచ్చారు కదాని కాస్త గట్టిగానే వాదించాడు. 9 పరుగుల వద్ద బతికిపోయి... రోహిత్‌ పరుగుల ఖాతా సిక్సర్‌తో మొదలైంది. అలా మొదలైన ఇన్నింగ్స్‌ 9 పరుగుల వద్దే ముగియాల్సింది. దురదృష్టం తమీమ్‌ చేతుల్లోంచి జారితే... అదృష్టం రోహిత్‌ బ్యాట్‌ను తాకింది. తమీమ్‌ క్యాచ్‌ మిస్‌ చేయడం. తదనంతరం అతను మూడంకెల స్కోరు దాకా చెలరేగడం జరిగిపోయాయి. తొలిఓవర్లోనే స్క్వేర్‌ లెగ్‌లో సిక్స్‌ కొట్టాడు రోహిత్‌. ఐదో ఓవర్‌ను ముస్తఫిజుర్‌ వేసే సమయానికి  మరో మూడే పరుగులు జతచేశాడు. నాలుగో బంతిని డీప్‌ స్కేర్‌ లెగ్‌లో గాల్లోకి లేపాడు. తమీమ్‌ సునాయాస క్యాచ్‌ను నేలపాలు చేయడంతో బతికిపోయిన హిట్‌మ్యాన్‌ శతక్కొట్టాడు. ఈ టోర్నీలో దక్షిణాఫ్రికా, ఇంగ్లండ్‌లపై సాధించిన సెంచరీలు కూడా క్యాచ్‌ మిస్‌అయ్యాకే సాధించాడు. 87 ఏళ్ల అభిమానం! భారత్, బంగ్లా మధ్య మ్యాచ్‌లో ఒక వృద్ధ మహిళా అభిమాని ఉత్సాహం అందరినీ ఆకర్షించింది. 87 ఏళ్ల ఆమె పేరు చారులత పటేల్‌. భారత్‌ బ్యాటింగ్‌ చేస్తున్న సమయంలో చిన్నపిల్లలకు ఏమాత్రం తగ్గకుండా బూర ఊదుతూ ఆమె చూపించిన జోష్‌కు అటు ఆటగాళ్లు, ఇటు కామెంటేటర్లు ఫిదా అయ్యారు. 1983లో కపిల్‌ డెవిల్స్‌ లార్డ్స్‌లో ప్రపంచ కప్‌ గెలిచినప్పుడు అక్కడే ఉన్నానని చెప్పిన ‘ఫ్యాన్‌ ఆఫ్‌ ద డే’...మ్యాచ్‌ తర్వాత తన వద్దకు అభిమానంతో వచ్చిన కోహ్లి, రోహిత్‌లపై ఆప్యాయత కురిపిస్తూ భారత్‌ మళ్లీ టైటిల్‌ గెలుస్తుందని నమ్మకం వ్యక్తం చేసింది. స్కోరు వివరాలు భారత్‌ ఇన్నింగ్స్‌: రాహుల్‌ (సి) ముష్ఫికర్‌ (బి) రూబెల్‌ 77; రోహిత్‌ (సి) లిటన్‌ దాస్‌ (బి) సర్కార్‌ 104; కోహ్లి (సి) రూబెల్‌ (బి) ముస్తఫిజుర్‌ 26; రిషభ్‌ (సి) మొసద్దిక్‌ (బి) షకీబ్‌ 48; హార్దిక్‌ (సి) సర్కార్‌ (బి) ముస్తఫిజుర్‌ 0; ధోని (సి) షకీబ్‌ (బి) ముస్తఫిజుర్‌ 35; దినేశ్‌ కార్తీక్‌ (సి) మొసద్దిక్‌ (బి) ముస్తఫిజుర్‌ 8; భువనేశ్వర్‌ రనౌట్‌ 2; షమీ (బి) ముస్తఫిజుర్‌ 1; బుమ్రా నాటౌట్‌ 0; ఎక్స్‌ట్రాలు 13; మొత్తం (50ఓవర్లలో 9 వికెట్లకు) 314. వికెట్ల పతనం: 1–180, 2–195, 3–237, 4–237, 5–277, 6–298, 7–311, 8–314, 9–314. బౌలింగ్‌: మొర్తజా 5–0–36–0, సైఫుద్దీన్‌ 7–0–59–0, ముస్తఫిజుర్‌ 10–1–59–5, షకీబ్‌ 10–0–41–1, మొసద్దిక్‌ 4–0–32–0, రూబెల్‌ 8–0–48–1, సౌమ్య సర్కార్‌ 6–0–33–1. బంగ్లాదేశ్‌ ఇన్నింగ్స్‌: తమీమ్‌ (బి) షమీ 22; సర్కార్‌ (సి) కోహ్లి (బి) హార్దిక్‌ 33; షకీబ్‌ (సి) దినేశ్‌ కార్తీక్‌ (బి) హార్దిక్‌ 66; ముష్ఫికర్‌ (సి) షమీ (బి) చహల్‌ 24; లిటన్‌ దాస్‌ (సి) దినేశ్‌ కార్తీక్‌ (బి) హార్దిక్‌ 22; మొసద్దిక్‌ (బి) బుమ్రా 3; షబ్బీర్‌ (బి) బుమ్రా 36; సైఫుద్దీన్‌ నాటౌట్‌ 51; మొర్తజా (సి) ధోని (బి) భువనేశ్వర్‌ 8; రూబెల్‌ (బి) బుమ్రా 9; ముస్తఫిజుర్‌ (బి) బుమ్రా 0; ఎక్స్‌ట్రాలు 12; మొత్తం ( 48 ఓవర్లలో ఆలౌట్‌) 286. వికెట్ల పతనం: 1–39, 2–74, 3–121, 4–162, 5–173, 6–179, 7–245, 8–257, 9–286, 10–286. బౌలింగ్‌: భువనేశ్వర్‌ 9–0–51–1, బుమ్రా 10–1–55–4, షమీ 9–0–68–1, చహల్‌ 10–0–50–1, హార్దిక్‌ 10–0–60–3.   2: సచిన్‌ (రెండు సార్లు) తర్వాత ఒకే ప్రపంచకప్‌లో 500కు పైగా పరుగులు చేసిన రెండో భారత ఆటగాడు రోహిత్‌ శర్మ. సచిన్‌ 1996 (523 పరుగులు), 2003 (673 పరుగులు)లలో ఈ ఘనత సాధించాడు.   2: కుమార సంగక్కర (2015లో) తర్వాత ఒకే ప్రపంచ కప్‌లో 4 సెంచరీలు చేసిన రెండో ఆటగాడు రోహిత్‌ శర్మ. గత ప్రపంచకప్‌లో బంగ్లాపై చేసిన సెంచరీతో కలిపి రోహిత్‌ చేసిన మొత్తం శతకాల సంఖ్య 5. సచిన్‌ మాత్రమే 6 సెంచరీలు సాధించాడు.  26: రోహిత్‌ వన్డే సెంచరీల సంఖ్య. ఓవరాల్‌ జాబితాలో సచిన్‌ (49), కోహ్లి (41), పాంటింగ్‌ (30), జయసూర్య (28), ఆమ్లా (27) తర్వాత అతను ఆరో స్థానంలో ఉన్నాడు.   230: వన్డేల్లో రోహిత్‌ సిక్సర్ల సంఖ్య. ధోని (228)ని అధిగమించగా... అఫ్రిది (351), గేల్‌ (326), జయసూర్య (270) మాత్రమే ముందున్నారు.   1: ఒకే ప్రపంచకప్‌లో 500కు పైగా పరుగులు చేసి కనీసం 10 వికెట్లు పడగొట్టిన తొలి ఆటగాడు షకీబ్‌ అల్‌ హసన్‌

బర్మింగ్‌హామ్‌: ప్రపంచ కప్‌ కీలక దశలో మరో భారత ఆటగాడు టోర్నీకి దూరమయ్యాడు. ఎడమ కాలు బొటన వేలి గాయం కారణంగా ఆల్‌రౌండర్‌ విజయ్‌ శంకర్‌ వరల్డ్‌ కప్‌ నుంచి తప్పుకున్నాడు. అతని స్థానంలో టెస్టు ఓపెనర్‌ మయాంక్‌ అగర్వాల్‌ను సెలక్షన్‌ కమిటీ ఎంపిక చేసింది. శిఖర్‌ ధావన్‌ తర్వాత గాయం కారణంగా మెగా టోర్నీ నుంచి తప్పుకున్న రెండో ఆటగాడు విజయ్‌ శంకర్‌. జూన్‌ 19న నెట్‌ ప్రాక్టీస్‌లో బుమ్రా వేసిన యార్కర్‌తో విజయ్‌ కాలి బొటనవేలికి గాయమైంది. అయితే ఆ తర్వాత పెద్దగా ఇబ్బంది అనిపించకపోవడంతో భారత్‌ ఆడిన తర్వాత రెండు మ్యాచ్‌లలో (అఫ్గానిస్తాన్, వెస్టిండీస్‌లతో) అతను బరిలోకి దిగాడు. ఆ తర్వాత అదే గాయం తిరగబెట్టింది. ఫలితంగా ఇంగ్లండ్‌తో మ్యాచ్‌కు దూరమయ్యాడు. ‘సీటీ స్కాన్‌ అనంతరం విజయ్‌ శంకర్‌ బొటన వేలికి ఫ్రాక్చర్‌ అయినట్లుగా తేలింది. దీని నుంచి కోలుకునేందుకు కనీసం మూడు వారాల సమయం పడుతుంది. దాంతో అతను వరల్డ్‌ కప్‌ నుంచి తప్పుకుంటున్నాడు’ అని బీసీసీఐ ప్రకటించింది.   ఆది నుంచి విమర్శలే..: 2019 జనవరిలోనే వన్డేల్లో అరంగేట్రం చేసిన విజయ్‌ శంకర్‌ ఆస్ట్రేలియా, న్యూజిలాండ్‌ పర్యటనల్లో అద్భుతంగా ఆడకపోయినా... సెలక్టర్లను ఆకట్టుకునేందుకు రెండు ఇన్నింగ్స్‌లు (45, 46) సరిపోయాయి. మిడిలార్డర్‌ బ్యాట్స్‌మన్‌గా అంబటి రాయుడును కాదని 9 వన్డేల అనుభవం ఉన్న అతడిని సెలక్టర్లు ప్రపంచ కప్‌కు ఎంపిక చేశారు. పైగా ‘మంచి బ్యాట్స్‌మన్, చక్కటి బౌలర్‌ కావడంతో పాటు అద్భుతమైన ఫీల్డర్‌ కాబట్టి మూడు రకాలుగా ఉపయోగపడతాడు’ అని చైర్మన్‌ ఎమ్మెస్కే ప్రసాద్‌ ప్రశంసాపూర్వక మాటలు కూడా చెప్పాడు. అయితే ఈ ప్రపంచ కప్‌లో అతని ప్రభావం అంతగా ఏమీ కనిపించలేదు. ఆడిన 3 మ్యాచ్‌లలో 15 నాటౌట్, 29, 14 పరుగులు చేసిన అతను ఒకే మ్యాచ్‌లో బౌలింగ్‌ చేసి 2 వికెట్లు తీశాడు. పాక్‌తో మ్యాచ్‌లో తాను వేసిన తొలి బంతికే వికెట్‌ తీయడం మాత్రం అందరికీ గుర్తుండిపోయే క్షణం. విండీస్‌తో మ్యాచ్‌ తర్వాత విజయ్‌ శంకర్‌ పనికి రాడని, అతడిని తప్పించాలని అభిమానులు, విశ్లేషకుల నుంచి చాలా విమర్శలు వచ్చాయి. ఇప్పుడు గాయంతో అతను మొత్తం టోర్నీకే దూరమయ్యాడు.  

చెస్టర్‌ లీ స్ట్రీట్‌: రేసులో లేని మ్యాచ్‌లో శ్రీలంక పరుగుల డోసు పెంచింది. ఈ ప్రపంచకప్‌లో తొలిసారి 300 మార్కు దాటింది. చివరకు 23 పరుగుల తేడాతో వెస్టిండీస్‌పై గెలిచింది. ముందుగా శ్రీలంక 50 ఓవర్లలో 6 వికెట్ల నష్టానికి 338 పరుగుల భారీస్కోరు చేసింది. అవిష్క ఫెర్నాండో (103 బంతుల్లో 104; 9 ఫోర్లు, 2 సిక్స్‌లు) సెంచరీ సాధించగా, కుశాల్‌ పెరీరా (51 బంతుల్లో 64; 8 ఫోర్లు) అర్ధసెంచరీ సాధించాడు. హోల్డర్‌ 2 వికెట్లు తీశాడు. అనంతరం వెస్టిండీస్‌ 50 ఓవర్లలో 9 వికెట్లకు 315 పరుగులు చేసి పోరాడి ఓడింది. నికోలస్‌ పూరన్‌ (103 బంతుల్లో 118; 11 ఫోర్లు, 4 సిక్స్‌లు) శతక్కొట్టగా, అలెన్‌ (32 బంతుల్లో 51; 7 ఫోర్లు, 1 సిక్స్‌) రాణించాడు. మలింగకు 3 వికెట్లు దక్కాయి. ఫెర్నాండోకు ‘మ్యాన్‌ ఆఫ్‌ ద మ్యాచ్‌’ అవార్డు దక్కింది. భారీ లక్ష్యంతో బరిలోకి దిగిన విండీస్‌ ఇన్నింగ్స్‌ తడబడుతూ సాగింది. ఓపెనర్‌ అంబ్రిస్‌ (5), షైహోప్‌ (5) మలింగ పేస్‌కు తలవంచారు. గేల్‌ (48 బం తుల్లో 35; 1 ఫోర్, 2 సిక్సర్లు) కూడా త్వరగానే ఔటయ్యాడు. హెట్‌మైర్‌ (38 బంతుల్లో 29; 2 ఫోర్లు) ఎక్కువగా కష్టపడలేదు. దీంతో 84 పరుగులకే కీలకమైన 4 వికెట్లను కోల్పోయింది.  ఈ దశలో నికోలస్‌ పూరన్‌ దాటిగా ఆడటం మొదలుపెట్టాడు. అతనికి కెప్టెన్‌ హోల్డర్‌ (26; 4 ఫోర్లు) కాసేపు తోడయ్యాడు. ఐదో వికెట్‌కు 61 పరు గులు జోడించాక హోల్డర్‌ ఔట్‌కాగా...అనంతరం బ్రాత్‌వైట్‌ (8) రనౌటయ్యాడు. అలెన్‌ వచ్చాక పూరన్‌ మరింత రెచ్చిపోయాడు. గెలుపు మలుపు తీసుకుంటున్న దశలో ధాటిగా ఆడుతున్న అలెన్‌ రనౌటయ్యాడు. తర్వాత 92 బంతుల్లో సెంచరీ చేసుకున్న పూరన్‌ ఎనిమిదో వికెట్‌గా నిష్క్రమించడంతో ఓటమి ఖాయమైంది. సంక్షిప్త స్కోర్లు శ్రీలంక ఇన్నింగ్స్‌: 338/6 (50 ఓవర్లలో) (అవిష్క ఫెర్నాండో 104, కుశాల్‌ పెరీరా 64, తిరిమన్నె 45 నాటౌట్‌; హోల్డర్‌ 2/59) వెస్టిండీస్‌ ఇన్నింగ్స్‌: 315/9 (50 ఓవర్లలో) ( పూరన్‌ 118, అలెన్‌ 51, మలింగ 3/55).

సాక్షి క్రీడా విభాగం: మరోసారి ప్రపంచ కప్‌ అవకాశం మన అంబటి తిరుపతి (ఏటీ) రాయుడు చేజారింది. జట్టులో నాలుగో స్థానానికి ఎంపికైన విజయ్‌ శంకర్‌ గాయం నుంచి తప్పుకున్నా... అదే స్థానానికి చివరి వరకు పోటీ పడిన రాయుడుకు మాత్రం మరోసారి మొండిచేయి ఎదురైంది. ప్రపంచ కప్‌ స్టాండ్‌ బై ఆటగాళ్లలో అతని పేరు ఉన్నా, అసలు సమయానికి మాత్రం ఆ చాన్స్‌ మయాంక్‌ ఎగరేసుకుపోయాడు. పునరాగమనం తర్వాత నిలకడైన ప్రదర్శనతో ‘4’కు సరైనవాడు అని కోహ్లితో ప్రశంసలు పొందినా...న్యూజిలాండ్‌ గడ్డపై భారత టాప్‌ స్కోరర్‌గా నిలిచినా దురదృష్టవశాత్తూ రాయుడును సెలక్టర్లు గుర్తించలేదు. ఇప్పుడు జట్టు ఉన్న పరిస్థితుల్లో మిడిలార్డర్‌లో సమర్థంగా ఆడగల సత్తా రాయుడుకి ఉందనడంలో సందేహం లేదు. ఓపిగ్గా ఇన్నింగ్స్‌ను నడిపించడంతో పాటు అవసరమైన సమయంలో ధాటిగా ఆడగల నైపుణ్యం అతని సొంతం. సెలక్టర్ల ఎంపిక ప్రక్రియే కాస్త ఆశ్చర్యకరంగా అనిపించింది. ఓపెనర్‌ ధావన్‌ గాయపడితే ఒక మిడిలార్డర్‌ బ్యాట్స్‌మన్‌ పంత్‌ను ఎంపిక చేశారు. ఇప్పుడు మిడిలార్డర్‌ బ్యాట్స్‌మన్‌ తప్పుకుంటే ఇప్పటి వరకు ఒక్క వన్డే కూడా ఆడని ఓపెనర్‌ను ఎంచుకున్నారు. తనను కాదని శంకర్‌ను ఎంపిక చేస్తూ ‘త్రీ డైమెన్షనల్‌ ఆటగాడు’ అంటూ ఎమ్మెస్కే ప్రసాద్‌ వ్యాఖ్యానించడం... పరోక్షంగా దానిపై సెటైర్‌ విసురుతూ ‘వరల్డ్‌ కప్‌ చూసేందుకు 3డి అద్దాలు కొన్నాను’ అంటూ రాయుడు ట్వీట్‌ చేయడం వివాదం రేపింది. ఏదో స్థానం కోల్పోయిన బాధలో అన్నాడు పాపం కాబట్టి చర్య తీసుకోవడం లేదు అని బీసీసీఐ పెద్దలు కొందరు అప్పట్లో వ్యాఖ్యానించినా... ఆ విషయాన్ని వారంతా తేలిగ్గా వదిలి పెట్టలేదని అర్థమవుతోంది. తమనే ప్రశ్నించిన రాయుడుకు మళ్లీ అవకాశం ఇవ్వరాదనే సంకేతం తాజా ఎంపికలో కనిపించిందనడంలో సందేహం లేదు.   ఇదీ మయాంక్‌ రికార్డు... భారత్‌ తరఫున ఆస్ట్రేలియాతో 2 టెస్టులు ఆడి ఆకట్టుకున్న కర్ణాటక బ్యాట్స్‌మన్‌ మయాంక్‌ పరిమిత ఓవర్ల మ్యాచ్‌లలో ఇంకా అరంగేట్రమే చేయలేదు. దేశవాళీ వన్డేల్లో (లిస్ట్‌ ఎ) 75 మ్యాచ్‌లలో 48.71 సగటుతో 3,605 పరుగులతో అతనికి చెప్పుకోదగ్గ రికార్డు ఉంది. అతని స్ట్రయిక్‌ రేట్‌ కూడా 100.72 కావడం విశేషం. ముఖ్యంగా గత రెండేళ్లలో అతను 61.60 సగటుతో వన్డేల్లో పరుగులు చేశాడు. ఐపీఎల్‌లో కూడా ఆకట్టుకున్న మయాంక్‌ అగర్వాల్‌... గత ఏడాది భారత ‘ఎ’ తరఫున ఇంగ్లండ్‌ గడ్డపై 4 వన్డేల్లో 71.75 సగటు, 105.90 స్ట్రయిక్‌ రేట్‌తో 287 పరుగులు సాధించడం అతని ఎంపికకు కారణమైంది. ప్రపంచ కప్‌కు ఎంపిక చేసేందుకు బీసీసీఐకి రాసిన లేఖలో ‘సరైన టాపార్డర్‌ బ్యాట్స్‌మన్‌’ కావాలని టీమ్‌ మేనేజ్‌మెంట్‌ కోరడాన్ని బట్టి చూస్తే అతడిని ఓపెనింగ్‌ స్థానానికే ఎంపిక చేశారని అర్థమవుతోంది. 

ప్రపంచ కప్‌లో ఆరు మ్యాచ్‌లలో పరాజయం లేకుండా సాగిన భారత్‌ను ఇంగ్లండ్‌ చేతిలో ఓటమి ఒక్కసారిగా కలవరపెట్టింది. ఆ మ్యాచ్‌ చేజార్చుకోవడం వల్ల ఉన్నపళంగా జరిగిన నష్టమేమీ లేదు కానీ జట్టులో ఉన్న లోపాలు మాత్రం బయటపడ్డాయి. సునాయాసంగా సెమీఫైనల్‌ చేరే స్థితిలో కనిపించిన టీమిండియాకు ఇప్పుడు ముందుకెళ్లాలంటే మరో విజయం కావాలి. అయితే ప్రత్యర్థి ప్రమాదకరమైన బంగ్లాదేశ్‌ రూపంలో ఎదురుగా నిలిచింది. గతంలో బంగ్లాదేశ్‌ సాధించిన సంచలనాలు, ఈ టోర్నీలో ఆ జట్టు ప్రదర్శనపరంగా చూస్తే భారత్‌కు ఇదేమీ సులువైన మ్యాచ్‌ కాబోదు. మన మిడిలార్డర్‌ సమస్యను ప్రత్యర్థి లక్ష్యంగా మార్చుకుంటే హోరాహోరీ పోరు ఖాయం. గత మ్యాచ్‌ ఓటమిని పక్కన పెట్టి అదే వేదికపై సరైన వ్యూహంతో తమ స్థాయికి తగ్గట్లుగా ఆడితే మాత్రం కోహ్లి సేనకు ఎదురుండదు.    బర్మింగ్‌హామ్‌: వరల్డ్‌ కప్‌లో ఒక రోజు విరామంతో భారత్‌ మరో ప్రధాన పోరుకు సన్నద్ధమైంది. ఎడ్జ్‌బాస్టన్‌ మైదానంలో నేడు జరిగే తమ ఎనిమిదో లీగ్‌ మ్యాచ్‌లో బంగ్లాదేశ్‌తో టీమిండియా ఆడుతుంది. బలాబలాల పరంగా చూస్తే ఇప్పటికీ భారత్‌దే పైచేయిగా కనిపిస్తున్నా... దక్షిణాఫ్రికా, వెస్టిండీస్‌లను ఓడించడంతో పాటు తాము పరాజయంపాలైన మ్యాచ్‌లలో కూడా ఎంతో మెరుగైన ప్రదర్శన చేసిన బంగ్లాను తక్కువగా అంచనా వేయలేం. ముఖ్యంగా వరల్డ్‌ కప్‌లో చెలరేగిపోతున్న షకీబ్‌ను ఆపడం భారత్‌కు ఎంతో కీలకం.   భువీకి చాన్స్‌... ఇంగ్లండ్‌తో జరిగిన మ్యాచ్‌లో మరోసారి రోహిత్, కోహ్లిల బ్యాటింగే భారత్‌ను ఆదుకుంది. ఈ నేపథ్యంలో వీరిద్దరు విఫలమైతే పరిస్థితి ప్రమాదకరంగా మారవచ్చు. బంగ్లా కూడా ఈ రెండు వికెట్లే లక్ష్యంగా ఒత్తిడి పెంచుతుందనడంలో సందేహం లేదు. మయాంక్‌ అగర్వాల్‌ ఈ మ్యాచ్‌కు జట్టుతో చేరే అవకాశం లేదు కాబట్టి రాహుల్‌ ఓపెనర్‌గానే కొనసాగుతాడు. నాలుగో స్థానంలో పంత్‌ మరోసారి తన అదృష్టాన్ని పరీక్షించుకోనుండగా, చెలరేగేందుకు పాండ్యా సిద్ధంగా ఉన్నాడు. అయితే భారత్‌కు ధోని బ్యాటింగే పెద్ద ఆందోళనగా మారింది. ఇంగ్లండ్‌తో చివర్లో భారీ షాట్లు ఆడలేకపోగా, గత రెండేళ్లుగా స్పిన్‌ను ఎదుర్కోవడంలో ధోని రికార్డు పేలవంగా ఉంది. ఈ ప్రపంచకప్‌లోనైతే అతను స్పిన్నర్ల బౌలింగ్‌లో 87 బంతులు ఎదుర్కొని ఒకే ఒక ఫోర్‌తో 41 పరుగులే చేశాడు! బంగ్లా త్రయం షకీబ్, మెహదీ, మొసద్దిక్‌లను అతను ఎలా ఆడతాడన్నది కీలకం. భారత్‌ ఈ మ్యాచ్‌లో రెండు మార్పులతో బరిలోకి దిగే అవకాశం కనిపిస్తోంది. గత మ్యాచ్‌లో భారీగా పరుగులు ఇచ్చిన లెగ్‌ స్పిన్నర్‌ చహల్‌ స్థానంలో భువనేశ్వర్‌ను ఆడించవచ్చు. ముగ్గురు రెగ్యులర్‌ పేసర్లతో పాటు భువీ బ్యాటింగ్‌ అదనపు బలం కానుంది. కేదార్‌ జాదవ్‌ స్థానంలో ఆల్‌రౌండర్‌ రవీంద్ర జడేజాకు కూడా చోటు దక్కవచ్చు. జాదవ్‌ కంటే దూకుడుగా ఆడగలగడంతో పాటు కట్టుదిట్టమైన బౌలింగ్, మెరుపు ఫీల్డింగ్‌ అతనికి తొలి అవకాశం కల్పించవచ్చు. బుమ్రా, షమీ పదునైన బౌలింగ్‌పై కూడా టీమిండియా నమ్మకం పెట్టుకుంది. మిడిల్, లోయర్‌ బలహీనతను అధిగమించగలిగితే మిగతా పనిని మన బౌలర్లు పూర్తి చేయగలరు.   అదే జట్టుతో... ప్రపంచ కప్‌లో బంగ్లాదేశ్‌ ఆటతీరు ఒక్కసారిగా ఆశ్చర్యపరిచేలా సాగుతోంది. షకీబ్‌ ఆల్‌రౌండ్‌ ప్రదర్శనతో చెలరేగిపోతుండగా... సీనియర్లు ముష్ఫికర్, తమీమ్‌ తమ స్థాయిని ప్రదర్శించారు. ఆ జట్టు ఇప్పటి వరకు మూడు విజయాలే సాధించినా... ఇతర మ్యాచ్‌లలో కూడా గట్టి పోటీనిచ్చింది. అదృష్టం కలిసిరాక ఓటమి పాలైనా, తమదైన రోజున ఎలాంటి ప్రత్యర్థినైనా ఓడించగలదు. గత మూడు ఐసీసీ టోర్నీలలో కూడా భారత్‌ను ఓడించేందుకు ఆ జట్టు చివరి వరకు ప్రయత్నించింది కానీ గెలుపు మాత్రం దక్కలేదు. ఈసారి అవకాశం చేజార్చుకోకూడదని టీమ్‌ పట్టుదలగా కనిపిస్తోంది. లిటన్‌ దాస్, సౌమ్య సర్కార్‌ కూడా చక్కటి బ్యాటింగ్‌ ప్రదర్శన కనబరుస్తున్నారు. ఆల్‌రౌండర్‌ మహ్ముదుల్లా గాయం నుంచి కోలుకోవడంతో జట్టు ఊపిరి పీల్చుకుంది. మరో 53 పరుగులు చేస్తే మహ్ముదుల్లా వన్డేల్లో 4 వేల పరుగులు పూర్తి చేసుకుంటాడు. బౌలింగ్‌లో భారత్‌ను దెబ్బ తీయగల సత్తా ముస్తఫిజుర్‌కు ఉంది. టోర్నీలో నిలకడగా రాణిస్తున్న మరో పేసర్‌ సైఫుద్దీన్‌ను భారత్‌ ఎప్పుడూ ఎదుర్కోలేదు కాబట్టి అది బంగ్లాకు కొంత అనుకూలాంశం. కెప్టెన్‌ కాబట్టి మొర్తజా జట్టులో కొనసాగుతున్నాడు తప్ప అతని బౌలింగ్‌లో ఏమాత్రం పస లేదు. ఆరు మ్యాచ్‌లలో మొర్తజా తీసింది ఒకే ఒక వికెట్‌! ఈ మ్యాచ్‌లోనైనా అతను తన అనుభవంతో రాణిస్తే బంగ్లాకు అంతకు మించి ఆనందం ఉండదు. తుది జట్లు (అంచనా) భారత్‌: కోహ్లి (కెప్టెన్‌), రోహిత్, రాహుల్, పంత్, ధోని, పాండ్యా, జాదవ్‌/జడేజా, భువనేశ్వర్, షమీ, కుల్దీప్, బుమ్రా.   బంగ్లాదేశ్‌: మొర్తజా (కెప్టెన్‌), తమీమ్, సర్కార్, షకీబ్, ముష్ఫికర్, లిటన్‌ దాస్, మçహ్ముదుల్లా, మొసద్దిక్, మెహదీ, సైఫుద్దీన్, ముస్తఫిజుర్‌. ముఖాముఖి వన్డేల్లో భారత్, బంగ్లాదేశ్‌ జట్లు 35 మ్యాచ్‌ల్లో తలపడ్డాయి. 29 మ్యాచ్‌ల్లో భారత్‌... 5 మ్యాచ్‌ల్లో బంగ్లాదేశ్‌ గెలిచాయి. మరో మ్యాచ్‌ రద్దయింది. ప్రపంచకప్‌లో ఈ రెండు జట్ల మధ్య మూడుసార్లు పోరు జరిగింది. రెండుసార్లు భారత్, ఒకసారి బంగ్లాదేశ్‌ విజయం సాధించాయి. పిచ్, వాతావరణం   ఆదివారం భారత్, ఇంగ్లండ్‌ ఆడిన పిచ్‌పైనే ఈ మ్యాచ్‌ జరగనుండటం విశేషం. పూర్తిగా బ్యాటింగ్‌కు అనుకూలమైన పిచ్‌. భారీ స్కోరుకు అవకాశం ఉంది కాబట్టి టాస్‌ గెలిచిన జట్టు బ్యాటింగ్‌ ఎంచుకోవచ్చు. ఒకవైపు 59 మీటర్లే ఉన్న బౌండరీ లక్ష్యంగా ఇంగ్లండ్‌ పరుగులు సాధించిందని విమర్శించిన కోహ్లి... ఇప్పుడు అదే అనుభవంతో తమకు అనుకూలంగా మార్చుకునే ప్రయత్నం చేయవచ్చు. ఈ మ్యాచ్‌కు వర్ష ప్రమాదం లేదు.   5: మరో 5 వికెట్లు తీస్తే బుమ్రా వన్డేల్లో 100 వికెట్లు పూర్తి చేసుకుంటాడు.   8: మరో 8 వికెట్లు తీస్తే కుల్దీప్‌ వన్డేల్లో 100 వికెట్లు పూర్తి చేసుకుంటాడు.  

లండన్‌: ఇప్పటికే సెమీఫైనల్‌ బెర్త్‌ను ఖాయం చేసుకున్న డిఫెండింగ్‌ చాంపియన్‌ ఆస్ట్రేలియా ప్రపంచకప్‌లో తమ జోరు కొనసాగిస్తోంది. న్యూజిలాండ్‌తో శనివారం జరిగిన డేనైట్‌ మ్యాచ్‌లో ఆసీస్‌ 86 పరుగుల తేడాతో గెలిచి ఈ టోర్నీలో ఏడో విజయాన్ని నమోదు చేసుకుంది. 244 పరుగుల లక్ష్యంతో బరిలోకి దిగిన న్యూజిలాండ్‌ను ఆసీస్‌ పేసర్‌ మిషెల్‌ స్టార్క్‌ (5/26) హడలెత్తించాడు. స్టార్క్‌ ధాటికి న్యూజిలాండ్‌ 43.4 ఓవర్లలో 157 పరుగులకే కుప్పకూలి ఓటమి చవిచూసింది. ఆసీస్‌ మిగతా బౌలర్లలో బెహ్రాన్‌డార్ఫ్‌కు రెండు వికెట్లు దక్కగా... కమిన్స్, లయన్, స్టీవ్‌ స్మిత్‌ ఒక్కో వికెట్‌ తీశారు. తమ చివరి రౌండ్‌ మ్యాచ్‌ల్లో జూలై 6న దక్షిణాఫ్రికాతో ఆస్ట్రేలియా; జూలై 3న ఇంగ్లండ్‌తో న్యూజిలాండ్‌ తలపడతాయి.

భారత్‌కు ఝలక్‌ ఇస్తూ... ప్రపంచ కప్‌లో ఇంగ్లండ్‌ ఊపిరి పీల్చుకుంది. నాకౌట్‌ బెర్త్‌ ఉత్కంఠను సగం తగ్గించుకుంది. ఫ్లాట్‌ పిచ్‌ ఎదురైతే, అందునా ముందు బ్యాటింగ్‌కు దిగితే తామెంత భీకరంగా ఆడతామో చూపుతూ చెలరేగిన ఆతిథ్య జట్టు... మెగా టోర్నీలో కోహ్లి సేనకు తొలి ఓటమి రుచి చూపింది. అంతమాత్రాన భారత్‌ తేలిగ్గా ఏమీ లొంగలేదు. తొలుత వెనుకబడ్డా బౌలింగ్‌లో, బ్యాటింగ్‌లో పుంజుకుని ప్రత్యర్థికి సవాల్‌ విసిరింది. చివర్లో పైచేయి సాధించలేక విజయానికి దూరమైంది. బర్మింగ్‌హామ్‌: ప్రపంచ కప్‌లో భారత్‌ అప్రతిహత విజయాలకు ఇంగ్లండ్‌ గండి కొట్టింది. సెమీఫైనల్స్‌ చేరాలంటే గెలుపు తప్పనిసరైన స్థితిలో ఆదివారం ఇక్కడ జరిగిన మ్యాచ్‌లో ఆతిథ్య జట్టు 31 పరుగుల తేడాతో నెగ్గింది. టాస్‌ గెలిచి బ్యాటింగ్‌కు దిగిన ఇంగ్లండ్‌ ఓపెనర్, ‘మ్యాన్‌ ఆఫ్‌ ద మ్యాచ్‌’ జానీ బెయిర్‌స్టో (109 బంతుల్లో 111; 10 ఫోర్లు, 6 సిక్స్‌లు) సెంచరీ బాదడంతో నిర్ణీత ఓవర్లలో 7 వికెట్ల నష్టానికి 337 పరుగులు చేసింది. మరో ఓపెనర్‌ జేసన్‌ రాయ్‌ (57 బంతుల్లో 66; 7 ఫోర్లు, 2 సిక్స్‌లు); ఆల్‌ రౌండర్‌ బెన్‌ స్టోక్స్‌ (54 బంతుల్లో 79; 6 ఫోర్లు, 3 సిక్స్‌లు) అర్ధసెంచరీలు సాధించారు. మొహమ్మద్‌ షమీ (5/69) మరోసారి చక్కటి బౌలింగ్‌తో వికెట్లు పడగొట్టగా, జస్‌ప్రీత్‌ బుమ్రా (1/44) పొదుపుగా బంతులేశాడు. ఓపెనర్‌ రోహిత్‌ శర్మ (109 బంతుల్లో 102; 15 ఫోర్లు) శతకంతో అదరగొట్టినా, కెప్టెన్‌ విరాట్‌ కోహ్లి (76 బంతుల్లో 66; 7 ఫోర్లు) రాణించినా, హార్దిక్‌ పాండ్యా (33 బంతుల్లో 45; 4 ఫోర్లు) మెరిసినా... టీమిండియా భారీ లక్ష్యాన్ని ఛేదించలేకపోయింది. వెటరన్‌ ధోని (31 బంతుల్లో 42 నాటౌట్‌; 4 ఫోర్లు, సిక్స్‌), కేదార్‌ జాదవ్‌ (13 బంతుల్లో 12 నాటౌట్‌)లు చివరి 31 బంతుల్లో 39 పరుగులే చేసి తీవ్రంగా నిరాశపర్చారు. దీంతో టీమిండియా నిర్ణీత ఓవర్లలో 5 వికెట్ల నష్టానికి 306 పరుగులే చేయగలిగింది. ప్లంకెట్‌ (3/55); వోక్స్‌ (2/58) వికెట్లు తీయగా, ఆర్చర్‌ (0/45) కీలక సమయంలో పరుగులు అడ్డుకున్నాడు. టోర్నీలో భారత్‌కిది తొలి ఓటమి. మంగళవారం ఇదే వేదికపై బంగ్లాదేశ్‌తో తలపడుతుంది. ఇతడు వచ్చాడు... అతడు దంచాడు ఇంగ్లండ్‌ ఇన్నింగ్స్‌లో 160 పరుగులు జోడించిన ఓపెనర్ల ఆటే హైలైట్‌. ముందు రాయ్, తర్వాత బెయిర్‌స్టో దూకుడు చూపి అద్భుత ఆరంభం ఇచ్చారు. టోర్నీలో అంచనాకు తగ్గట్లు ఆడని బెయిర్‌స్టో ఈ ఇన్నింగ్స్‌తో సత్తా చాటగా, గత మూడు మ్యాచ్‌లకు దూరమైన రాయ్‌ పునరాగమనంలో జట్టు బ్యాటింగ్‌ ఆర్డర్‌లో తన ప్రభావమెంతో చాటాడు. షమీ వేసిన మొదటి ఓవర్లోనే అతడు రెండు ఫోర్లు బాదాడు. చహల్‌ను ఆరో ఓవర్లోనే దింపడం ఈ ద్వయం పని తేలిక చేసింది. బెదురు లేని రాయ్‌ ఆటతో స్ఫూర్తి పొందిన బెయిర్‌స్టో జోరు పెంచి 56 బంతుల్లో అర్ధ సెంచరీని చేరుకున్నాడు. 41 బంతుల్లో అర్ధసెంచరీ పూర్తి చేసుకున్న రాయ్‌ను కుల్దీప్‌ ఔట్‌ చేశాడు. స్పిన్నర్లను లక్ష్యంగా చేసుకుని సిక్స్‌లు బాదిన బెయిర్‌స్టో 90 బంతుల్లో సెంచరీ సాధించాడు. అతడితో పాటు కెప్టెన్‌ మోర్గాన్‌ (1)ను వరుస ఓవర్లలో ఔట్‌ చేసి ప్రత్యర్థికి షమీ కళ్లెం వేశాడు. రూట్‌ (54 బంతుల్లో 44; 2 ఫోర్లు) వేగంగా ఆడలేకపోవడం, స్టోక్స్‌ కుదురుకోవాలని చూడటంతో ఇంగ్లండ్‌ రన్‌ రేట్‌ 6కు పడిపోయింది. అయితే, చహల్‌ వేసిన 40వ ఓవర్లో ఫోర్, సిక్స్‌తో స్టోక్స్‌ మళ్లీ పైకి లేపాడు. 38 బంతుల్లో అతడి అర్ధసెంచరీ పూర్తయింది. రూట్, బట్లర్‌ (8 బంతుల్లో 20; ఫోర్, 2 సిక్స్‌లు), వోక్స్‌ (7)లను షమీ పెవిలియన్‌ బాట పట్టించినా, దూకుడు తగ్గించని స్టోక్స్‌ భారీ షాట్లతో జటుకు తగిన స్కోరు అందించాడు. తట్టుకుని నిలిచారు... వోక్స్‌ తొలి ఓవర్‌ను మెయిడిన్‌ ఆడిన రాహుల్‌ (0) అతడి తర్వాతి ఓవర్లో మూడు బంతులను ఎదుర్కొని ఖాతా తెరవకుండానే నిష్క్రమించాడు. ఈ దశలో వోక్స్, ఆర్చర్‌ అన్ని అస్త్రాలతో రోహిత్‌–కోహ్లిలను పరీక్షించారు. ఆర్చర్‌ బౌలింగ్‌లో 4 పరుగుల వద్ద రోహిత్‌ క్యాచ్‌ను రెండో స్లిప్‌లో రూట్‌ చేజార్చడం మనకు కలిసొచ్చింది. ఈ జోడీ సాహసాలకు పోకుండా ఆడటంతో భారత్‌ టోర్నీలోనే అత్యంత తక్కువ పవర్‌ ప్లే స్కోరు (28/1) నమోదు చేసింది. వుడ్, ప్లంకెట్‌ దిగాక బౌండరీలు బాదుతూ వీరు గేర్‌ మార్చారు. 59 బంతుల్లో కోహ్లి, 65 బంతుల్లో రోహిత్‌ అర్ధశతకం మార్కును చేరుకున్నారు. స్టోక్స్‌ ఓవర్లో హ్యాట్రిక్‌ ఫోర్లతో రోహిత్‌ టాప్‌ గేర్‌లోకి వచ్చాడు. ప్లంకెట్‌ బౌలింగ్‌లో కోహ్లి ఔటవడంతో 138 పరుగుల రెండో వికెట్‌ భాగస్వామ్యానికి తెరపడింది. పంత్‌ (29 బంతుల్లో 32; 4 ఫోర్లు) తోడుగా కప్‌లో రోహిత్‌ మూడో శతకం (106 బంతుల్లో) పూర్తి చేసుకున్నాడు. 14 ఓవర్లలో 140 పరుగులు అవసరమైన దశలో ఇక చెలరేగిపోతాడని భావిస్తుండగా అతడిని... వోక్స్‌ స్లో బంతితో బోల్తా కొట్టించాడు. సమీకరణం 12 ఓవర్లలో 128గా ఉండగా వోక్స్‌ ఓవర్లో హార్దిక్‌ హ్యాట్రిక్‌ ఫోర్లు సహా 16 పరుగులు రాబట్టి ఆశలు రేపాడు. ఆ వెంటనే ప్లంకెట్‌ బౌలింగ్‌లో పంత్‌ కొట్టిన షాట్‌ను స్వే్కర్‌లెగ్‌ వద్ద వోక్స్‌ ముందుకు దూకుతూ అందుకుని మలుపు తిప్పా డు. రన్‌రేట్‌ పెరుగుతూ పోతుండగా భారీ షాట్‌కు యత్నించి హార్దిక్‌ ఔట య్యాడు. ధోని, జాదవ్‌ బ్యాటింగ్‌æ తీరుతో ఓటమి ఖరారైంది. టాస్‌ చేజారింది... కూర్పు దెబ్బకొట్టింది మ్యాచ్‌లో టీమిండియాకు టాస్‌ రూపంలో అదృష్టం కలిసిరాలేదు. ఫ్లాట్‌ పిచ్‌పై టాస్‌ నెగ్గిన మోర్గాన్‌ ఏమాత్రం ఆలోచించకుండా బ్యాటింగ్‌ ఎంచుకున్నాడు. భారత్‌ కూర్పులోనూ పొరపాటు చేసింది. ఇంగ్లండ్‌ పిచ్‌కు తగ్గట్లుగా స్పిన్‌ ఆల్‌రౌండర్‌ మొయిన్‌ అలీని పక్కనపెట్టి పేసర్‌ ప్లంకెట్‌ను తీసుకుని వ్యూహాత్మకంగా వ్యవహరించింది. తద్వారా ఐదుగురు స్పెషలిస్ట్‌ (నలుగురు పేసర్లు వోక్స్, వుడ్, ప్లంకెట్, ఆర్చర్‌ +స్పిన్నర్‌ రషీద్‌) బౌలర్లతో బరిలో దిగినట్లైంది. భారత్‌ మాత్రం స్పిన్నర్‌ను తగ్గించుకుని పేసర్‌ భువనేశ్వర్‌ను ఆడించే ఆలోచన చేయలేదు. పైగా తుది జట్టులో ఉంటాడని ముందు రోజే స్పష్టమైన పేస్‌ ఆల్‌ రౌండర్‌ విజయ్‌ శంకర్‌ను అనూహ్యంగా తప్పించి వికెట్‌ కీపర్‌ బ్యాట్స్‌మన్‌ రిషభ్‌ పంత్‌కు చోటిచ్చింది. మ్యాచ్‌లో మన ప్రధాన పేసర్లు బుమ్రా, షమీ తమ పూర్తి కోటాలో 113 పరుగులిచ్చి 6 వికెట్లు తీస్తే స్పిన్‌ ద్వయం చహల్‌ (0/88), కుల్దీప్‌ (1/72) ఏకంగా 160 పరుగులు సమర్పించుకుని ఒక వికెటే పడగొట్టగలిగారు. వీరిని అలవోకగా ఎదుర్కొన్న ఆతిథ్య జట్టు బ్యాట్స్‌మెన్‌ పరుగుల పండుగ చేసుకున్నారు. అంతగా ఫామ్‌లో లేని బెయిర్‌స్టో ఇదే అదనుగా సిక్స్‌లతో చెలరేగిపోయాడు. దీన్నిచూసి కోహ్లి... పార్ట్‌టైమ్‌ స్పిన్నర్‌ జాదవ్‌కు బంతి ఇవ్వనేలేదు. ఈ నేపథ్యంలో శంకర్‌ ఉండి ఉంటే అతడి మీడియం పేస్‌ కొంతైనా ఉపయోగపడేది. పేస్‌ ఆల్‌రౌండర్‌ హార్దిక్‌ పాండ్యా గణాంకాలు (0/60) పరిశీలించినా మూడో పేసర్‌గా భువీని ఆడించి ఉండాల్సిందని స్పష్టమవుతుంది. 1: వన్డేల్లో 25 సెంచరీలు చేసిన రోహిత్‌ ఒక్క సిక్స్‌ కొట్టకుండా శతకం చేయడం ఇదే ప్రథమం. 2:  ఒకే ప్రపంచకప్‌లో మూడు సెంచరీలు చేసిన రెండో భారత క్రికెటర్‌ రోహిత్‌. గంగూలీ (2003లో) కూడా మూడు సెంచరీలు చేశాడు. 6: ప్రపంచకప్‌లోని ఓ మ్యాచ్‌లో ఐదు వికెట్లు తీసిన ఆరో భారత బౌలర్‌ షమీ. గతంలో కపిల్‌ (1983), రాబిన్‌ సింగ్‌ (1999), వెంకటేశ్‌ ప్రసాద్‌ (1999), ఆశిష్‌ నెహ్రా (2003), యువరాజ్‌ సింగ్‌ (2011) ఈ ఘనత సాధించారు.   2: ప్రపంచకప్‌ చరిత్రలో అత్యధిక సెంచరీలు చేసిన భారత బ్యాట్స్‌మెన్‌ జాబితాలో గంగూలీ సరసన రోహిత్‌ (4 చొప్పున) నిలిచాడు. సచిన్‌ (6) ముందున్నాడు. 1: ఒకే ప్రపంచకప్‌లో వరుసగా ఐదు ఇన్నింగ్స్‌లో అర్ధ సెంచరీలు చేసిన తొలి కెప్టెన్‌ కోహ్లి. 1:  భారత్‌ తరఫున ప్రపంచ కప్‌ మ్యాచ్‌లో అత్యధిక పరుగులు సమర్పించుకున్న బౌలర్‌గా చహల్‌ నిలిచాడు. శ్రీనాథ్‌ (87; 2003లో ఆస్ట్రేలియాపై)ను చహల్‌ వెనక్కి నెట్టాడు. స్కోరు వివరాలు ఇంగ్లండ్‌ ఇన్నింగ్స్‌: జేసన్‌ రాయ్‌ (సి) సబ్‌ (జడేజా) (బి) కుల్దీప్‌ 66; బెయిర్‌స్టో (సి) పంత్‌ (బి) షమీ 111; రూట్‌ (సి) పాండ్యా (బి) షమీ 44; మోర్గాన్‌ (సి) జాదవ్‌ (బి) షమీ 1; స్టోక్స్‌ (సి) సబ్‌ (జడేజా) (బి) బుమ్రా 79; బట్లర్‌ (సి అండ్‌ బి) షమీ 20; వోక్స్‌ (సి) రోహిత్‌ (బి) షమీ 7; ప్లంకెట్‌ (నాటౌట్‌) 1; ఆర్చర్‌ (నాటౌట్‌) 0; ఎక్స్‌ట్రాలు 8; మొత్తం (50 ఓవర్లలో 7 వికెట్లకు) 337. వికెట్ల పతనం: 1–160, 2–205, 3–207, 4–277, 5–310, 6–319, 7–336. బౌలింగ్‌: షమీ 10–1–69–5, బుమ్రా 10–1–44–1, చహల్‌ 10–0–88–0, హార్దిక్‌ 10–0–60–0, కుల్దీప్‌ 10–0–72–1. భారత్‌ ఇన్నింగ్స్‌: రాహుల్‌ (సి అండ్‌ బి) వోక్స్‌ 0; రోహిత్‌ శర్మ (సి) బట్లర్‌ (బి) వోక్స్‌ 102; కోహ్లి (సి) సబ్‌ (విన్స్‌) (బి) ప్లంకెట్‌ 66; పంత్‌ (సి) వోక్స్‌ (బి) ప్లంకెట్‌ 32; హార్దిక్‌ పాండ్యా (సి) సబ్‌ (విన్స్‌) (బి) ప్లంకెట్‌ 45; ధోని (నాటౌట్‌) 42; కేదార్‌ జాదవ్‌ (నాటౌట్‌) 12; ఎక్స్‌ట్రాలు 7; మొత్తం (50 ఓవర్లలో 5 వికెట్లకు) 306. వికెట్ల పతనం: 1–8, 2–146, 3–198, 4–226, 5–267. బౌలింగ్‌: వోక్స్‌ 10–3–58–2, ఆర్చర్‌ 10–0– 45–0, ప్లంకెట్‌ 10–0–55–3, మార్క్‌ వుడ్‌ 10–0–73–0, రషీద్‌ 6–0–40–0, స్టోక్స్‌ 4–0–34–0.    

లీడ్స్‌ : అఫ్గాన్‌, పాక్‌ అభిమానుల చేష్టలతో క్రికెట్‌ ప్రపంచం నివ్వెరపోయింది. ఆటను ఆస్వాదిస్తూ తమవాళ్లకు మద్దతుగా నిలవాల్సిందిపోయి.. వీధిరౌడిల్లా కొట్టుకోవడంతో ఆయా దేశాలకు తలవంపులు తెచ్చారని క్రికెట్‌ ప్రేమికులు మండిపడుతున్నారు. స్థానిక మైదానంలో శనివారం అఫ్గాన్‌, పాక్‌ల మధ్య మ్యాచ్‌ జరిగిన సంగతి తెలిసిందే. అఫ్గాన్‌ నిర్దేశించిన 227 పరుగుల లక్ష్యాన్ని పాక్‌ 49.4 ఓవర్లలో ఏడు వికెట్లు కోల్పోయి ఛేదించింది. అయితే, మ్యాచ్‌కు ముందు ఇరుదేశాల అభిమానుల మధ్య నెలకొన్న ఘర్షణపూరిత వాతావరణం అనంతరం కూడా కొనసాగింది.    మ్యాచ్‌ జరగుతున్న క్రమంలో రెండు దేశాల అభిమానులు ఒకరిపై ఒకరు పిడిగుద్దుల వర్షం కురిపించారు. ఈ నేపథ్యంలో స్టేడియం బయట కూడా ఘర్షణ చెలరేగింది. అక్కడా అభిమానులు పరస్పర దాడులకు దిగారు. స్టేడియం వెలుపల ఉన్న ఆస్తులను ధ్వంసం చేశారు. రంగంలోకి దిగిన పోలీసులు గొడవకు కారణమైన వారిని బయటికి పంపించి వేశారు. వరల్డ్‌కప్‌ మిగతా మ్యాచ్‌లు చూడకుండా ఐసీసీ వారిపై నిషేదం విధించింది. ఇలాంటి చర్యలను ఎంతమాత్రం సహించబోమని స్పష్టం చేసింది. పాకిస్తాన్‌కు చెందిన ఓ వృద్ధ అభిమానిపై అఫ్గాన్‌ మద్దతుదారు నోరుజారడంతో ఈ గొడవ జరినట్టు తెలుస్తోంది. ఇక ఈ వివాదానికి సంబంధించిన వీడియో సోషల్‌ మీడియాలో వైరల్‌ అయింది. 

లీడ్స్‌: ప్రపంచకప్‌లో భాగంగా పాకిస్తాన్‌తో శనివారం జరిగిన మ్యాచ్‌లో అఫ్గాన్‌ చేజేతులో ఓడింది. స్పిన్నర్లు అద్భుత బౌలింగ్‌తో పాక్‌ బ్యాట్స్‌మెన్‌ను కట్టడి చేస్తున్న తరుణంలో అఫ్గాన్‌ కెప్టెన్‌ గుల్బదిన్‌ చెత్త నిర్ణయం తీసుకున్నాడు. అప్పటికీ 228 పరుగుల లక్ష్య ఛేదనలో తడబడిన పాక్‌ ఒక దశలో 45 ఓవర్లలో 6 వికెట్లకు 182 పరుగులు చేసింది. 5 ఓవర్లలో 46 పరుగులు అంటే 9కి పైగా రన్‌రేట్‌తో కష్టసాధ్యమైన పరిస్థితి! ప్రధాన స్పిన్నర్లు రషీద్, ముజీబ్‌లకు కలిపి 3 ఓవర్లు, అంతకుముందు ఓవర్లో 2 పరుగులే ఇచ్చిన లెగ్‌స్పిన్నర్‌ షిన్వారికి మరో 2 ఓవర్లు మిగిలే ఉన్నాయి.  కానీ, అప్పటికే అందరికంటే ఎక్కువ పరుగులు ఇచ్చిన నైబ్‌ అత్యుత్సాహంతో బౌలింగ్‌కు సిద్ధమయ్యాడు. బౌలింగ్‌ (46వ ఓవర్‌) చేసి విజయాన్ని బంగారు పళ్లెంలో పెట్టి ప్రత్యర్థికి అందించాడు. ఈ ఓవర్లో చెలరేగిన ఇమాద్‌ వసీం మూడు ఫోర్లు సహా ఏకంగా 18 పరుగులు రాబట్టి పాక్‌ పని సులువు చేశాడు. ఒక్కసారిగా 18 బంతుల్లో 28 పరుగులకు సమీకరణం మారిపోగా, 16 బంతుల్లోనే పాక్‌ పని పూర్తి చేసింది. ఈ విజయంతో పాక్‌ పాయింట్ల పట్టికలో నాలుగో స్థానానికి చేరగా.. ఇంగ్లండ్‌ ఐదో స్థానానికి పడిపోయింది. (అయ్యో అఫ్గాన్‌!) ఇదిలాఉండగా.. గుల్బదిన్‌ అత్యుత్సాహంపై స్వదేశీ అభిమానులతోపాటు ఇంగ్లండ్‌ మాజీ ఆటగాళ్లు, అభిమానులు సైతం మండిపడుతున్నారు. ప్రపంచకప్‌లో అఫ్గాన్‌ తొలి విజయం సాధించే అవకాశానికి గండికొట్టడంతో పాటు ఇంగ్లండ్‌ సెమీస్‌ అవకాశాలనూ సంక్లిష్టం చేశారని ఇంగ్లీష్‌ జుట్టు మాజీ కెప్టెన్‌ మైఖేల్‌వాన్‌ అసహనం వ్యక్తం చేశాడు. ఓటమితో సెమీస్‌రేసులో వెనకబడిపోతుందనుకున్న పాక్‌కు అనూహ్య విజయాన్నందించాడని ఆగ్రహం వ్యక్తం చేశాడు. ఇక పాక్‌ విజయంతో సెమీస్‌ చేరాలంటే ఇంగ్లండ్‌ భారత్‌, న్యూజిలాండ్‌తో తప్పక గెలవాల్సిన పరిస్థితి నెలకొంది. ఒకవేళ అఫ్గాన్‌ చేతిలో పాక్‌ పరాజయం పాలైతే ఇంగ్లండ్‌ సెమీస్‌ అవకాశాలు మరింత సరళమయ్యేవి. శనివారం ఇక్కడి హెడింగ్లీ మైదానంలో జరిగిన లీగ్‌ మ్యాచ్‌లో పాకిస్తాన్‌ 3 వికెట్ల తేడాతో అఫ్గాన్‌పై గెలుపొందింది. ఫలితంగా తమ సెమీస్‌ అవకాశాలను సజీవంగా ఉంచుకుంది. టాస్‌ గెలిచి ముందుగా బ్యాటింగ్‌కు దిగిన అఫ్గాన్‌ 50 ఓవర్లలో 9 వికెట్ల నష్టానికి 227 పరుగులు చేసింది. అస్గర్‌ అఫ్గాన్‌ (35 బంతుల్లో 42; 3 ఫోర్లు, 2 సిక్సర్లు), నజీబుల్లా జద్రాన్‌ (54 బంతుల్లో 42; 6 ఫోర్లు) టాప్‌ స్కోరర్లుగా నిలిచారు.షాహిన్‌ అఫ్రిది 4 వికెట్లతో ప్రత్యర్థిని దెబ్బ తీశాడు. అనంతరం పాకిస్తాన్‌ 49.4 ఓవర్లలో 7 వికెట్లకు 230 పరుగులు సాధించింది. ‘మ్యాన్‌ ఆఫ్‌ ద మ్యాచ్‌’ ఇమాద్‌ వసీం (54 బంతుల్లో 49 నాటౌట్‌; 5 ఫోర్లు) అద్భుత బ్యాటింగ్‌తో చివరి వరకు నిలిచి జట్టును గెలిపించగా... బాబర్‌ ఆజమ్‌ (51 బంతుల్లో 45; 5 ఫోర్లు), ఇమామ్‌ ఉల్‌ హఖ్‌ (36) రాణించారు.  

ప్రపంచ కప్‌ హాట్‌ ఫేవరెట్‌ ఎవరంటే...? ఠక్కుమని ఇంగ్లండ్‌ అని చెప్పేవారు. ఇదే సమయంలో టీమిండియా సత్తాపై సందేహాలు లేకున్నా ఎలా ఆడుతుందోనన్న అనుమానాలు ఉండేవి. మరిప్పుడు...? ఆతిథ్య దేశం అత్యంత సంక్లిష్ట సందర్భంలో ఉంటే... కోహ్లి సేన జైత్రయాత్రతో సాగిపోతోంది. సెమీ ఫైనల్‌ గడపముంగిట రెండు జట్లూ భిన్నమైన సమీకరణాలతో నిలిచాయి. మరి... నేటి సమరంలో భారత్‌ ఫటాఫట్‌ ఆటతో ముందుకెళ్తుందా? ఇంగ్లండ్‌ తాడోపేడో తేల్చుకుంటుందా? బర్మింగ్‌హామ్‌: ప్రపంచ కప్‌లో ఎదురైన ప్రతి జట్టునూ ఓడిస్తూ అప్రతిహతంగా సాగిపోతున్న టీమిండియాకు తమ శక్తియుక్తులను పరీక్షించుకునే మ్యాచ్‌. జోరుమీదున్న మన జట్టు ఆదివారం ఇక్కడి ఎడ్జ్‌బాస్టన్‌ మైదానంలో ఆతిథ్య ఇంగ్లండ్‌ను ఢీకొననుంది. వరుస విజయాలతో కోహ్లి సేన నిండైన ఆత్మవిశ్వాసంతో బరిలో దిగనుండగా... ఏమాత్రం తేడా వచ్చినా నాకౌట్‌ రేసు నుంచి ఔటయ్యే పరిస్థితి ప్రత్యర్థిది. ప్రధాన పేసర్‌ ఆర్చర్‌ పక్కటెముకల నొప్పితో ఇబ్బంది పడుతున్నా ఆడించేంత క్లిష్టమైన మలుపులో ఉంది ఇంగ్లండ్‌. దీన్నిబట్టే ఆ జట్టు ఎంత ఒత్తిడిలో ఉందో అర్థం చేసుకోవచ్చు. మరి... మరో విజయంతో టీమిండియా సెమీస్‌ బెర్తును ఖాయం చేసుకుంటుందా? అత్యవసరమైన గెలుపుతో ఇంగ్లండ్‌ ఆశలు నిలుపుకొంటుందా? చూడాలి.   నాలుగులో అతడిపైనే నమ్మకం! మిగతా జట్టంతా యథావిధిగా ఉన్నా... టీమిండియా బ్యాటింగ్‌ ఆర్డర్‌లో నాలుగో స్థానంపై చర్చకు అంతే ఉండటం లేదు. ఆల్‌రౌండర్‌ విజయ్‌ శంకర్‌ సామర్థ్యంపై సందేహాలే దీనికి కారణం. బ్యాటింగ్‌లో ధాటిగా పరుగులు రాబట్టలేని అతడికి గత రెండు మ్యాచ్‌ల్లో బౌలింగ్‌ అవకాశమూ ఇవ్వలేదు. జట్టులో శంకర్‌ అవసరమా? అనే వాదన వస్తోంది. కానీ, శుక్రవారం కోహ్లి మాటలను బట్టి చూస్తే శంకర్‌కు మరో చాన్స్‌ దక్కేలా కనిపిస్తోంది. అంటే భారత్‌ మార్పుల్లేని జట్టుతోనే బరిలో దిగనుంది. పెద్ద జట్టుతో మ్యాచ్‌ కాబట్టి ధావన్‌ లేని లోటు కనిపించకుండా ఓపెనింగ్‌లో రాహుల్‌ భారీ ఇన్నింగ్స్‌ ఆడాల్సి ఉంది. హార్దిక్, ధోని, జాదవ్‌ తలో చేయి వేస్తే ప్రత్యర్థికి భారీ లక్ష్యాన్ని నిర్దేశించవచ్చు. పేసర్లకు సరైన సవాల్‌ భారత పేసర్లు బుమ్రా, షమీలకు ఈ మ్యాచ్‌ సరైన సవాల్‌గానే చెప్పాలి. తొలుత భువీ, తర్వాత షమీ తోడుగా బుమ్రా దక్షిణాఫ్రికా, ఆస్ట్రేలియా, పాకిస్తాన్, వెస్టిండీస్‌లను కట్టడి చేసినప్పటికీ ఇంగ్లండ్‌ వాటికి భిన్నం. సొంతగడ్డ అనుకూలతకు తోడు రాయ్, బట్లర్, మోర్గాన్‌ వంటి హార్డ్‌ హిట్టర్లున్న ఆతిథ్య జట్టును ఆపగలిగితే బుమ్రా–షమీ ద్వయానికి ఇక తిరుగుండదనే చెప్పొచ్చు. షమీ బంతులను చూస్తుంటే బుమ్రా మించిన ప్రమాదకారిలా ఉన్నాడు. అయితే, ఏమాత్రం తేడా వచ్చినా ఇంగ్లండ్‌ బ్యాట్స్‌మెన్‌ చెలరేగిపోతారు. కాబట్టి ఎంత ఊపులో ఉన్నా గాడి తప్పకుండా బౌలింగ్‌ చేయడం ముఖ్యం. మరి ఈ సవాలును భారత పేస్‌ ద్వయం ఎలా ఛేదిస్తుందో చూడాలి. కోహ్లి శతకానికి చకోర పక్షిలా... రోహిత్, రూట్, వార్నర్, ఫించ్, విలియమ్సన్‌... ఇలా అగ్రశ్రేణి బ్యాట్స్‌మెన్‌ అంతా రెండేసి సెంచరీలు బాదేశారు. బంగ్లాదేశ్‌ ఆల్‌రౌండర్‌ షకీబ్‌ సైతం రెండుసార్లు 100 మార్కును దాటాడు. వీరందరి కంటే ఓ మెట్టుపైనే ఉండే విరాట్‌ కోహ్లినే ఇంకా శతకాన్ని అందుకోలేదు. టోర్నీలో 19 సెంచరీలు నమోదైనా భారత కెప్టెన్‌ బ్యాట్‌ నుంచి మాత్రం మూడంకెల ఇన్నింగ్స్‌ జాలు వారలేదు. వరుసగా నాలుగు అర్ధ సెంచరీలతో అద్భుత ఫామ్‌లో ఉన్న కోహ్లి... ఇంగ్లండ్‌తో మ్యాచ్‌లో ఆ ముచ్చట తీర్చుకుంటే చూసి తరించాలన్నది అభిమానుల కోరిక.   రెచ్చిపో... రోహిత్‌ దక్షిణాఫ్రికా, పాకిస్తాన్‌పై అద్భుత శతకాలతో అదరగొట్టిన ఓపెనర్‌ రోహిత్‌... అఫ్గాన్‌పై ఖాతా తెరవలేదు. మంచి టచ్‌లో ఉండగా విండీస్‌పై దురదృష్టవశాత్తు అంపైర్‌ నిర్ణయానికి బలయ్యాడు. ఇప్పుడు అతడు మళ్లీ చెలరేగాల్సిన సమయం వచ్చింది. ఆర్చర్, వుడ్, వోక్స్‌లను రోహిత్‌ భారీ షాట్లతో దంచేస్తే అవతలి ఎండ్‌లో రాహుల్‌ సమయోచితంగా ఆడే వీలుంటుంది. తద్వారా కోహ్లిపైనా భారం తగ్గుతుంది. ఈ త్రయం అటుఇటుగా 40 ఓవర్ల వరకు క్రీజులో ఉంటే... ఆస్ట్రేలియాపై తరహాలోనే హార్దిక్‌ను ముందు పంపి స్కోరును అమాంతం పెంచుకోవచ్చు. ఇంగ్లండ్‌ ఎలానో? వరుసగా రెండు పరాజయాలు... అందులోనూ శ్రీలంక చేతిలోనూ ఓటమితో ఇంగ్లండ్‌ ఒక్కసారిగా ఆత్మరక్షణలో పడిపోయింది. కండరాల గాయంతో ఓపెనర్‌ జేసన్‌ రాయ్‌ దూరమవడంతో జట్టు సాధారణంగా మారిపోయింది. రూట్‌ నిలకడ చూపుతున్నా మోర్గాన్, బట్లర్‌ కీలక సమయంలో విఫలమవడం దెబ్బకొట్టింది. మరో ఓపెనర్‌ బెయిర్‌ స్టో భారీ స్కోర్లు చేయలేకపోతున్నాడు. రాయ్‌ పునరాగమనంతో ఆతిథ్య జట్టుకు ఊపిరి వచ్చినట్లైంది. ప్రస్తుతానికి వారికి ఆల్‌ రౌండర్‌ బెన్‌ స్టోక్స్‌ ఫామ్‌ ఒక్కటే ఊరట. ఇలాంటి పరిస్థితుల్లో టీమిండియా పేస్‌ ద్వయం, మణికట్టు స్పిన్నర్లు చహల్, కుల్దీప్‌లను ఎలా కాచుకుంటారన్నది ఆసక్తికరం. పేసర్లు ఆర్చర్, వుడ్‌ భారత టాపార్డర్‌ను త్వరగా ఔట్‌ చేస్తేనే జట్టుకు ప్రయోజనం. వీరుగనుక కోహ్లి బృందాన్ని నిలువరించలేకపోతే స్టోక్స్‌ సహా స్పిన్నర్లు రషీద్, మొయిన్‌ అలీ చేసేందుకు ఏమీ ఉండదు. 1992 నుంచి మనకు ఓటమే లేదు ప్రపంచ కప్‌లో చివరిసారిగా ఇంగ్లండ్‌ చేతిలో భారత్‌ 1992లో ఓడింది. 1996, 2007, 2015 కప్‌లలో రెండు జట్లు ఎదురుపడలేదు. 1999లో ఇంగ్లండ్‌ను సొంతగడ్డపైనే టీమిండియా ఓడించింది. దక్షిణాఫ్రికా ఆతిథ్యమిచ్చిన 2003లో మనదే పైచేయి. అయితే, 2011లో భారత్‌ వేదికగా జరిగిన కప్‌లో 338 పరుగుల భారీ లక్ష్యాన్ని ఇంగ్లండ్‌ సమం చేసి ఔరా అనిపించింది. కొట్టినోడే బాల్‌ తీసుకు రావాలి! భారత జట్టు ప్రాక్టీస్‌లో ధోని ‘గల్లీ క్రికెట్‌ రూల్‌’ను పాటించాడు. ఎడ్జ్‌బాస్టన్‌ మైదానంలో సాధన చేస్తున్న సమయంలో అతను కొట్టిన షాట్‌కు బంతి వెళ్లి దగ్గరలో ఉన్న పొదల్లో పడింది. మాజీ కెప్టెన్‌ చెట్లలోకి వెళ్లి వెతికి మరీ బంతిని బయటకు తీసుకు రావడం విశేషం!    తుది జట్లు (అంచనా) భారత్‌: రోహిత్, రాహుల్, కోహ్లి (కెప్టెన్‌), విజయ్, ధోని, జాదవ్, పాండ్యా, చహల్, కుల్దీప్, షమీ, బుమ్రా. ఇంగ్లండ్‌: రాయ్, బెయిర్‌స్టో, రూట్, మోర్గాన్‌ (కెప్టెన్‌), బట్లర్, స్టోక్స్, అలీ, రషీద్, ఆర్చర్, వోక్స్, వుడ్‌. ముఖాముఖి రికార్డు ఇరు జట్ల మధ్య ఇప్పటివరకు 99 మ్యాచ్‌లు జరగ్గా భారత్‌ 53 మ్యాచ్‌ల్లో నెగ్గింది. 41 మ్యాచ్‌ల్లో ఇంగ్లండ్‌ విజయం సాధించింది. రెండు టై కాగా,  మూడింట్లో ఫలితం తేలలేదు. ప్రపంచ కప్‌లో భాగంగా ఏడు మ్యాచ్‌ల్లో తలపడగా చెరో మూడింట్లో నెగ్గాయి. ఒకటి ‘టై’గా ముగిసింది. పిచ్, వాతావరణం మ్యాచ్‌కు వేదికైన ఎడ్జ్‌బాస్టన్‌ మైదానం పిచ్‌ టోర్నీలోనే బ్యాటింగ్‌కు అత్యంత అనుకూలమైనదిగా చెబుతున్నారు. ఇరు జట్ల సామర్థ్యాన్ని బట్టి చేస్తే భారీ స్కోర్లు ఖాయం. మ్యాచ్‌కు వర్షం ముప్పు లేదు.   ఎన్‌సీఏకు ద్రవిడ్‌ నేతృత్వం భారత క్రికెట్‌ దిగ్గజం, మాజీ కెప్టెన్‌ రాహుల్‌ ద్రవిడ్‌ మరో గురుతర బాధ్యతను తన భుజాలపై వేసుకున్నాడు. ప్రతిష్టాత్మక జాతీయ క్రికెట్‌ అకాడమీ (ఎన్‌సీఏ) అతను ‘హెడ్‌’గా వ్యవహరిస్తాడు. జూలై 1నుంచి ద్రవిడ్‌ తన కొత్త పాత్రలోకి ప్రవేశిస్తాడు. తన విధుల్లో భాగంగా అతను ఇక్కడ యువ క్రికెటర్లకు మార్గనిర్దేశనం చేస్తాడు. జూనియర్‌ క్రికెట్‌ మ్యాచ్‌ను రూపొందించడంతో పాటు మహిళా క్రికెటర్లను తీర్చిదిద్దడం కూడా అతని విధుల్లో భాగంగా ఉంటాయి. ద్రవిడ్‌ ఇప్పటికే భారత ‘ఎ’, అండర్‌–19 టీమ్‌లకు కోచ్‌గా పని చేస్తున్నాడు.

లండన్‌: ఇప్పటికే సెమీస్‌ బెర్తును ఖరారు చేసుకున్న కంగారూ జట్టు.. మరో విజయాన్నందుకుంది. శనివారం బౌలర్ల ఆధిపత్యం సాగిన మ్యాచ్‌లో ఆ జట్టు.. 86 పరుగుల తేడాతో న్యూజిలాండ్‌ను ఓడించింది. 244 పరుగుల లక్ష్యంతో బరిలోకి దిగిన కివీస్‌ 43.4 ఓవర్లలో 157 పరుగులకే కుప్పకూలింది. 40 పరుగులు చేసిన కెప్టెన్‌ విలియమ్సనే ఆ జట్టులో టాప్‌స్కోరర్‌.  మిచెల్‌ స్టార్క్‌ (5/26) నిప్పులు చెరిగే బంతులతో కివీస్‌ పతనాన్ని శాసించాడు. అతనికి తోడు బెరెన్‌డార్ఫ్‌ (2/31) కూడా చక్కటి ప్రదర్శన చేశాడు. అంతకుముందు బౌల్ట్‌ (4/51), ఫెర్గూసన్‌ (2/49), నీషమ్‌ (2/28)ల ధాటికి ఆసీస్‌ ఒక దశలో 92 పరుగులకే 5 వికెట్లు కోల్పోయి కష్టాల్లో పడినా.. ఖవాజా (88; 129 బంతుల్లో 5×4), కేరీ (71; 72 బంతుల్లో 11×4)ల అద్భుత పోరాటంతో పుంజుకుని 50 ఓవర్లలో 9 వికెట్ల నష్టానికి 243 పరుగులు చేసింది. ట్రెంట్‌ బౌల్ట్‌ హ్యాట్రిక్‌ పేసర్‌ ట్రెంట్‌ బౌల్ట్‌ (4/51) హ్యాట్రిక్‌కు తోడు నీషమ్‌ (2/28), ఫెర్గూసన్‌ (2/49) రాణించడంతో శనివారం ఇక్కడ జరిగిన మ్యాచ్‌లో ఆస్ట్రేలియాను న్యూజిలాండ్‌ కట్టడి చేసింది.ఇన్నింగ్స్‌ ఆఖరి ఓవర్లో బౌల్ట్‌ విజృంభించి ఖాజా, స్టార్క్‌ (0), బెహ్రెన్‌డార్ఫ్‌ (0)లను వరుస బంతుల్లో ఔట్‌ చేసి హ్యాట్రిక్‌ సాధించాడు. దీంతో ఆసీస్‌ నిర్ణీత ఓవర్లలో 9 వికెట్ల నష్టానికి 243 పరుగులు చేసింది. ఈ ప్రపంచ కప్‌లో భారత పేసర్‌ మొహమ్మద్‌ షమీ తర్వాత హ్యాట్రిక్‌ సాధించిన రెండో బౌలర్‌ బౌల్ట్‌.  హ్యాట్రిక్‌ సాధించిన క్రమం... ఇన్నింగ్స్‌ 50వ ఓవర్‌ మూడో బంతి – ఖాజా (బి) బౌల్ట్‌ నాలుగో బంతి – స్టార్క్‌ (బి) బౌల్ట్‌ ఐదో బంతి – బెహ్రన్‌డార్ఫ్‌ (ఎల్బీడబ్ల్యూ) బౌల్ట్‌ వన్డే కెరీర్‌లో రెండో హ్యాట్రిక్‌ సాధించిన బౌల్ట్‌... ప్రపంచ కప్‌లో ఈ ఘనత నమోదు చేసిన తొలి న్యూజిలాండ్‌ బౌలర్‌గా రికార్డులకెక్కాడు.  

గెలుపు అంచుల దాకా రావడం వేరు... మ్యాచ్‌ గెలవడం వేరు... అఫ్గానిస్తాన్‌ జట్టుకు ఇప్పుడు ఈ రెండింటి మధ్య తేడా అర్థమై ఉంటుంది. ఈ కప్‌లో భారత్‌ను గడగడలాడించిన ఆ టీమ్‌ శనివారం పాకిస్తాన్‌ను దాదాపు ఓడించే స్థితిలో నిలిచింది. కానీ మరోసారి ఆ జట్టు అరుదైన అవకాశాన్ని చేజార్చుకుంది...పేలవ ఫీల్డింగ్‌కు తోడు కెప్టెన్‌ గుల్‌బదిన్‌ నైబ్‌ చెత్త నాయకత్వం అఫ్గన్‌కు వరుసగా ఎనిమిదో పరాజయాన్ని మిగిల్చాయి. మరో వైపు ఈ మ్యాచ్‌లో ఓడితే సెమీస్‌ అవకాశాలు దాదాపుగా కోల్పోయే పరిస్థితిలో నిలిచిన పాక్‌ ఎట్టకేలకు గట్టెక్కింది. బౌలింగ్‌లో షాహిన్‌ అఫ్రిది సత్తా చాటి ప్రత్యర్థిని కట్టడి చేయగా... తీవ్ర ఒత్తిడిలో ఇమాద్‌ వసీమ్‌ అద్భుత బ్యాటింగ్‌తో జట్టును గెలిపించాడు.   లీడ్స్‌: 228 పరుగుల లక్ష్య ఛేదనలో తడబడిన పాక్‌ ఒక దశలో 45 ఓవర్లలో 6 వికెట్లకు 182 పరుగులు చేసింది. 5 ఓవర్లలో 46 పరుగులు అంటే 9కి పైగా రన్‌రేట్‌తో కష్టసాధ్యమైన పరిస్థితి! కానీ అఫ్గానిస్తాన్‌ కెప్టెన్‌ గుల్బదిన్‌ విజయాన్ని బంగారు పళ్లెంలో పెట్టి ప్రత్యర్థికి అందించాడు. ప్రధాన స్పిన్నర్లు రషీద్, ముజీబ్‌లకు కలిపి 3 ఓవర్లు, అంతకుముందు ఓవర్లో 2 పరుగులే ఇచ్చిన లెగ్‌స్పిన్నర్‌ షిన్వారికి మరో 2 ఓవర్లు మిగిలి ఉన్నాయి. పాక్‌ బ్యాట్స్‌మెన్‌ స్పిన్‌లో తీవ్రంగా ఇబ్బంది పడుతున్న దశలో వీరి బౌలింగ్‌ అఫ్గాన్‌కు అరుదైన విజయాన్ని అందించేదే. కానీ అప్పటికే అందరికంటే ఎక్కువ పరుగులు ఇచ్చిన నైబ్‌ అత్యుత్సాహంతో బౌలింగ్‌కు సిద్ధమయ్యాడు. ఈ ఓవర్లో చెలరేగిన ఇమాద్‌ మూడు ఫోర్లు సహా ఏకంగా 18 పరుగులు రాబట్టి పాక్‌ పని సులువు చేశాడు. ఒక్కసారిగా 18 బంతుల్లో 28 పరుగులకు సమీకరణం మారిపోగా, 16 బంతుల్లోనే పాక్‌ పని పూర్తి చేసింది.   శనివారం ఇక్కడి హెడింగ్లీ మైదానంలో జరిగిన లీగ్‌ మ్యాచ్‌లో పాకిస్తాన్‌ 3 వికెట్ల తేడాతో అఫ్గాన్‌పై గెలుపొందింది. ఫలితంగా తమ సెమీస్‌ అవకాశాలను సజీవంగా ఉంచుకుంది. టాస్‌ గెలిచి ముందుగా బ్యాటింగ్‌కు దిగిన అఫ్గాన్‌ 50 ఓవర్లలో 9 వికెట్ల నష్టానికి 227 పరుగులు చేసింది. అస్గర్‌ అఫ్గాన్‌ (35 బంతుల్లో 42; 3 ఫోర్లు, 2 సిక్సర్లు), నజీబుల్లా జద్రాన్‌ (54 బంతుల్లో 42; 6 ఫోర్లు) టాప్‌ స్కోరర్లుగా నిలిచారు. షాహిన్‌ అఫ్రిది 4 వికెట్లతో ప్రత్యర్థిని దెబ్బ తీశాడు. అనంతరం పాకిస్తాన్‌ 49.4 ఓవర్లలో 7 వికెట్లకు 230 పరుగులు సాధించింది. ‘మ్యాన్‌ ఆఫ్‌ ద మ్యాచ్‌’ ఇమాద్‌ వసీం (54 బంతుల్లో 49 నాటౌట్‌; 5 ఫోర్లు) అద్భుత బ్యాటింగ్‌తో చివరి వరకు నిలిచి జట్టును గెలిపించగా... బాబర్‌ ఆజమ్‌ (51 బంతుల్లో 45; 5 ఫోర్లు), ఇమామ్‌ ఉల్‌ హఖ్‌ (36) రాణించారు.    స్కోరు వివరాలు అఫ్గానిస్తాన్‌ ఇన్నింగ్స్‌ : రహ్మత్‌ షా (సి) బాబర్‌ (బి) ఇమాద్‌ 35; గుల్బదిన్‌ (సి) సర్ఫరాజ్‌ (బి) షాహిన్‌ 15; హష్మతుల్లా (సి) ఇమాద్‌ (బి) షాహిన్‌ 0; ఇక్రామ్‌ (సి) హఫీజ్‌ (బి) ఇమాద్‌ 24; అస్గర్‌ (బి) షాదాబ్‌ 42; నబీ (సి) ఆమిర్‌ (బి) రియాజ్‌ 16; నజీబుల్లా (బి) షాహిన్‌ 42; షిన్వారి (నాటౌట్‌) 19; రషీద్‌ (సి) ఫఖర్‌  (బి) షాహిన్‌ 8; హమీద్‌ (బి) వహాబ్‌  1; ముజీబ్‌ (నాటౌట్‌) 7; ఎక్స్‌ట్రాలు 18; మొత్తం (50 ఓవర్లలో 9 వికెట్లకు) 227.   వికెట్ల పతనం: 1–27, 2–27, 3–57, 4–121, 5–125, 6–167, 7–202, 8–210, 9–219.   బౌలింగ్‌: ఇమాద్‌ 10–0–48–2, ఆమిర్‌ 10–1–41–0, షాహిన్‌ 10–0–47–4, హఫీజ్‌ 2–0–10–0, వహాబ్‌ 8–0–29–2, షాదాబ్‌ 10–0–44–1. పాకిస్తాన్‌ ఇన్నింగ్స్‌: ఫఖర్‌ ఎల్బీడబ్ల్యూ (బి) ముజీబ్‌ 0; ఇమామ్‌ (స్టంప్డ్‌) ఇక్రామ్‌ (బి) నబీ 36; బాబర్‌ ఆజమ్‌ (బి) నబీ 45; హఫీజ్‌ (సి) హష్మతుల్లా (బి) ముజీబ్‌ 19;  హారిస్‌ సొహైల్‌ ఎల్బీడబ్ల్యూ (బి) రషీద్‌ 27; సర్ఫరాజ్‌ రనౌట్‌ 18; ఇమాద్‌ (నాటౌట్‌) 49; షాదాబ్‌ రనౌట్‌ 11; వహాబ్‌ నాటౌట్‌ 15; ఎక్స్‌ట్రాలు 10; మొత్తం (49.4 ఓవర్లలో 7 వికెట్లకు)230. వికెట్ల పతనం: 1–0, 2–72, 3–81, 4–121, 5–142, 6–156, 7–206. బౌలింగ్‌: ముజీబ్‌ 10–1–34–2, హమీద్‌ 2–0–13–0, నైబ్‌ 9.4–0–73–0, నబీ 10–0–23–2, రషీద్‌ 10–0–50–1, షిన్వారీ 8–0–32–0.

చెస్టర్‌ లీ స్ట్రీట్‌: టోర్నీ హాట్‌ ఫేవరెట్‌ ఇంగ్లండ్‌ను ఓడించిన ఊపులో, మిగిలిన మూడు మ్యాచ్‌లూ నెగ్గితే సెమీఫైనల్స్‌ చేరే అవకాశం ఉన్న స్థితిలో శ్రీలంక శుక్రవారం దక్షిణాఫ్రికాను ఎదుర్కొననుంది. ప్రత్యర్థి పరాజయాల పరంపరలో ఉన్నందున... లంకకు ఇది ఆశావహ పరిస్థితి. గత మ్యాచ్‌లో ఆల్‌ రౌండర్‌ ఏంజెలో మాథ్యూస్‌ రాణించడం, వెటరన్‌ పేసర్‌ లసిత్‌ మలింగ బుల్లెట్‌ బంతులతో సత్తా చాటడంతో జట్టు ఆత్మ విశ్వాసంతో కనిపిస్తోంది. ఓపెనర్లు కెప్టెన్‌ కరుణరత్నె, కుశాల్‌ పెరీరా మంచి ఇన్నింగ్స్‌లు ఆడితే లంక విజయంపై ఆశలు పెట్టుకోవచ్చు. ధనంజయ డిసిల్వా స్పిన్‌ను ఆడటం సఫారీలకు పరీక్షే. టోర్నీలో ఒక్కటంటే ఒక్కటే (అఫ్గానిస్తాన్‌) గెలుపుతో ఉన్న దక్షిణాఫ్రికాకు ఈ మ్యాచ్‌ పరువుతో ముడిపడినది. బ్యాటింగ్, బౌలింగ్‌లో పేలవ ప్రదర్శన కనబరుస్తున్న ఆ జట్టు చివరి మ్యాచ్‌ను పటిష్టమైన ఆస్ట్రేలియా (జూలై 6న)తో ఆడాల్సి ఉంది. లంక చేతిలో ఓడితే, ఇక ఆసీస్‌ను నిలువరించడం అసాధ్యం. అదే జరిగితే తమ చరిత్రలోనే అత్యంత దారుణ పరాభవం మిగులుతుంది. కాబట్టి, శుక్రవారం మ్యాచ్‌ సఫారీలకు కీలకం. వెటరన్లు ఆమ్లా, మిల్లర్‌ ఏమాత్రం ప్రభావం చూపలేకపోతున్న నేపథ్యంలో ఓపెనర్‌ డికాక్, కెప్టెన్‌ డుప్లెసిస్‌ పరుగులు సాధిస్తే ప్రత్యర్థికి పోటీ ఇవ్వగలుగుతుంది. ఎన్నో ఆశలు పెట్టుకున్న పేసర్‌ రబడ కనీసం ఇప్పుడైనా సత్తా చాటుతాడేమో చూడాలి. ముఖాముఖి రికార్డు ఇరు జట్ల మధ్య ఇప్పటివరకు 76 మ్యాచ్‌లు జరగ్గా... లంక 31 మ్యాచ్‌ల్లో నెగ్గింది. దక్షిణాఫ్రికా 43 మ్యాచ్‌ల్లో విజయం సాధించింది. ఒకటి టై కాగా, మరోదాంట్లో ఫలితం తేలలేదు. ప్రపంచ కప్‌లో ఐదు సార్లు ఎదురుపడగా మూడుసార్లు దక్షిణాఫ్రికా, ఒకసారి లంక గెలిచాయి. మరో మ్యాచ్‌ (2003 కప్‌లో) ‘టై’గా ముగిసింది.

వరల్డ్‌కప్‌ వేటలో ఎదురు లేకుండా సాగుతున్న భారత బృందం మరో జట్టుపై తమ ప్రతాపం ప్రదర్శించింది. బ్యాటింగ్‌లో సాధారణ స్కోరుకే పరిమితమైనా, అద్భుతమైన బౌలింగ్‌ ప్రదర్శనతో చెలరేగి ఐదో గెలుపును తమ ఖాతాలో వేసుకుంది. తిరుగులేని ఆటతో టోర్నీలో ఓటమెరుగని జట్టుగా తమ స్థాయిని చూపిస్తూ దాదాపుగా సెమీఫైనల్‌ స్థానాన్ని ఖాయం చేసుకుంది. బ్యాటింగ్‌లో కోహ్లి కీలక ఇన్నింగ్స్‌తో పాటు చివర్లో ధోని మెరుపులు భారత్‌ను ఆదుకోగా, బౌలింగ్‌లో షమీ, బుమ్రాల సూపర్‌ ప్రదర్శన ఘన విజయాన్ని అందించాయి. టీమిండియాకు ఎంతో కొంత పోటీనివ్వగలదని భావించిన వెస్టిండీస్‌ కూనల స్థాయి బ్యాటింగ్‌ ప్రదర్శనతో పరాజయాన్ని ఆహ్వానించింది. మెరుగైన బౌలింగ్‌తో కోహ్లి సేనను నిరోధించగలిగిన ఆ జట్టు లక్ష్యాన్ని ఛేదించడంలో మాత్రం పేలవ ప్రదర్శన కనబర్చింది. ఫలితంగా ప్రపంచ కప్‌లో సెమీస్‌ రేసు నుంచి అధికారికంగా నిష్క్రమించిన మూడో జట్టుగా నిలిచింది. ఇక అజేయ భారత్‌ తదుపరి లక్ష్యం ఆదివారం ఆతిథ్య ఇంగ్లండ్‌ను ఓడించడమే!   మాంచెస్టర్‌: విశ్వ వేదికలో భారత్‌ మళ్లీ తమ సత్తా చాటింది. ఆరో లీగ్‌ మ్యాచ్‌లో ఐదో విజయం సాధించి మరింత పైకి దూసుకుపోయింది. గురువారం ఇక్కడి ఓల్డ్‌ ట్రఫోర్డ్‌ మైదానంలో జరిగిన మ్యాచ్‌లో భారత్‌ 125 పరుగుల తేడాతో వెస్టిండీస్‌పై ఘన విజయం సాధించింది. టాస్‌ గెలిచి ముందుగా బ్యాటింగ్‌ ఎంచుకున్న భారత్‌ 50 ఓవర్లలో 7 వికెట్ల నష్టానికి 268 పరుగులు చేసింది. విరాట్‌ కోహ్లి (82 బంతుల్లో 72; 8 ఫోర్లు), ఎమ్మెస్‌ ధోని (61 బంతుల్లో 56 నాటౌట్‌; 3 ఫోర్లు, 2 సిక్సర్లు) అర్ధ సెంచరీలు చేయగా... కేఎల్‌ రాహుల్‌ (64 బంతుల్లో 48; 6 ఫోర్లు), హార్దిక్‌ పాండ్యా (38 బంతుల్లో 46; 5 ఫోర్లు) రాణించారు. అనంతరం వెస్టిండీస్‌ 34.2 ఓవర్లలో 143 పరుగులకే ఆలౌటైంది. సునీల్‌ ఆంబ్రిస్‌ (31)దే అత్యధిక స్కోరు. పేసర్లు షమీ (4/16), బుమ్రా (2/9), స్పిన్నర్‌ యజువేంద్ర చహల్‌ (2/39) ప్రత్యర్థిని దెబ్బతీశారు.   రాణించిన రాహుల్, పాండ్యా విండీస్‌ పేసర్లు కాట్రెల్, రోచ్‌ పదునుగా బౌలింగ్‌ చేయడంతో ఆరంభంలో భారత ఓపెనర్లు రోహిత్‌ (18), రాహుల్‌ జాగ్రత్తగా ఆడారు. ఐదో ఓవర్‌ మూడో బంతికి గానీ తొలి బౌండరీ రాలేదు. రోచ్‌ వేసిన ఆరో ఓవర్లో రోహిత్‌ భారీ సిక్స్, రాహుల్‌ ఫోర్‌ కొట్టగా, అదే ఓవర్‌ చివరి బంతికి రోహిత్‌ వెనుదిరిగాడు. రాహుల్‌ అర్ధసెంచరీకి చేరువలో రోచ్‌ వేసిన బంతికి క్లీన్‌బౌల్డయ్యాడు. కోహ్లి, రాహుల్‌ రెండో వికెట్‌కు 69 పరుగులు జోడించారు. నాలుగో స్థానంలో మరో అవకాశం అందుకున్న విజయ్‌ శంకర్‌ (14) ఈసారి కూడా దానిని వాడుకోలేకపోయాడు. హోల్డర్‌ బౌలింగ్‌లోనే మూడు ఫోర్లు కొట్టిన అతను... రోచ్‌ బౌలింగ్‌లో కీపర్‌కు క్యాచ్‌ ఇచ్చాడు. శంకర్‌ ఔటైన తీరు కోహ్లికి కూడా అసహనం తెప్పించింది. అతను తన చేతికి ఉన్న గ్లవ్స్‌ను విసిరి కొట్టాడు. రోచ్‌ తర్వాతి ఓవర్లో జాదవ్‌ (7) కీపర్‌కు క్యాచ్‌ ఇచ్చి పెవిలియన్‌ చేరాడు. అంపైర్‌ తిరస్కరించడంతో రివ్యూ చేసిన విండీస్‌ ఫలితం సాధించింది. కోహ్లి ఔటయ్యాక పాండ్యా క్రీజ్‌లో ఉన్నంత సేపు దూకుడు కనబరుస్తూ బౌండరీలు బాదాడు. ఆరో వికెట్‌కు ధోని, పాండ్యా 70 పరుగులు జత చేశారు.   విరాట్‌ ఎప్పటిలాగే... పిచ్, పరిస్థితులు ఎలా ఉన్నా పరుగులు చేయకుండా కోహ్లిని ఎవరూ ఆపలేరు. గురువారం ఇదే జరిగింది. తనదైన శైలి బ్యాటింగ్‌ ప్రదర్శనతో కీలక అర్ధ సెంచరీ సాధించాడు. రాహుల్‌తో కలిసి ఇన్నింగ్స్‌ను నడిపిస్తున్న సమయంలో కోహ్లికి అదృష్టం కూడా కలిసొచ్చింది. థామస్‌ బౌలింగ్‌లో రాహుల్‌ పాయింట్‌ దిశగా కొట్టగా కోహ్లి సింగిల్‌ కోసం చాలా ముందుకు దూసుకొచ్చాడు. అయితే రాహుల్‌ వెనక్కి పంపించాడు. ఫీల్డర్‌ బంతిని అందుకోకపోవడంతో కెప్టెన్‌ బతికిపోయాడు. హోల్డర్‌ బౌలింగ్‌లో మిడాన్‌ దిశగా సింగిల్‌ తీయడంతో (37 పరుగుల వద్ద) అంతర్జాతీయ క్రికెట్‌లో 20 వేల పరుగులు పూర్తి చేసుకున్నాడు. ఆ వెంటనే 55 బంతుల్లో అర్ధ సెంచరీని చేరుకున్నాడు. ఆ తర్వాత రెండు ఫోర్లు కొట్టిన కోహ్లి చెత్త షాట్‌కు వెనుదిరిగాడు. హోల్డర్‌ బౌలింగ్‌లో ముందుకొచ్చి మిడ్‌వికెట్‌లో సునాయాస క్యాచ్‌ ఇచ్చాడు.   హోల్డర్‌... సూపర్‌... కోహ్లికి మెయిడిన్‌ ఓవర్‌ వేయడం అంటే మాటలు కాదు. కానీ విండీస్‌ కెప్టెన్‌ హోల్డర్‌ వేసిన 15వ ఓవర్లో కోహ్లి ఒక్క పరుగు కూడా తీయలేకపోయాడు. రాహుల్‌ ఎదుర్కొన్న అంతకు ముందు హోల్డర్‌ ఓవర్‌ కూడా మెయిడిన్‌గానే ముగిసింది. యార్కర్, బౌన్సర్‌ కూడా లేకుండా కేవలం కచ్చితత్వంతో బౌలింగ్‌ చేసిన హోల్డర్‌ ఏకంగా 46 డాట్‌ బంతులు సంధించడం మరో విశేషం.   ధోని విఫలమయ్యాడా!   61 బంతుల్లో 56 నాటౌట్‌... ఇందులో 3 ఫోర్లు, 2 సిక్సర్లు ఉన్నాయి. ఎలా చూసినా ఇది మంచి స్కోరే. అయినా సరే ధోని ఆటతీరుపై మళ్లీ విమర్శలు వినిపించాయి. చివరి ఓవర్‌ మెరుపులను మినహాయిస్తే వన్డే క్రికెట్‌కు ఎంతో అవసరమైన ‘స్ట్రయిక్‌ రొటేటింగ్‌’ విషయంలో ధోని బాగా ఇబ్బంది పడటమే అందుకు కారణం. తాను ఎదుర్కొన్న నాలుగో బంతికి ఫోర్‌ కొట్టిన ధోని ఆ తర్వాత సింగిల్స్‌ తీయడానికి శ్రమించాడు. 8 పరుగుల వద్ద కీపర్‌ హోప్‌ అతి సునాయాస స్టంపింగ్‌ను వదిలేయడం ధోనికి కలిసొచ్చింది. తొలి 40 బంతుల్లో అతను 20 పరుగులే చేయగలిగాడు. 37 వద్ద కూడా థామస్‌ రిటర్న్‌ క్యాచ్‌ వదిలేశాడు. అప్పటి వరకు 55 బంతుల్లో 40 పరుగుల వద్ద ఉన్న ఎమ్మెస్‌... థామస్‌ వేసిన ఆఖరి ఓవర్లో మాత్రం చెలరేగాడు. 2 భారీ సిక్సర్లు, ఒక ఫోర్‌ బాది 16 పరుగులు రాబట్టాడు. తొలి 5 ఓవర్లలో 34 పరుగులిచ్చిన అలెన్‌... తర్వాతి 5 ఓవర్లలో 18 పరుగులే ఇచ్చాడు. ఇందులో ధోనినే 19 బంతులు ఎదుర్కొన్నాడు. ఇదే విషయాన్ని సెహ్వాగ్‌ విమర్శించాడు! టపటపా... వెస్టిండీస్‌ బ్యాటింగ్‌ బలగాన్ని బట్టి చూస్తే 269 పరుగుల లక్ష్యాన్ని అందుకోవడం పెద్ద కష్టమేమీ కాదు. కానీ టీమిండియా అద్భుత బౌలింగ్‌ వారికి ఆ అవకాశం ఇవ్వలేదు. తొలి ఓవర్‌నుంచే  కట్టిపడేసిన మన బౌలర్లు ప్రత్యర్థి కోలుకునే అవకాశం ఇవ్వకుండా వికెట్లు పడగొట్టారు. షమీ బౌలింగ్‌లో తీవ్రంగా ఇబ్బంది పడిన గేల్‌ (6) చివరకు అసహనంతో భారీ షాట్‌కు ప్రయత్నించి వెనుదిరగడంతో విండీస్‌ పతనం మొదలైంది. ఆ వెంటనే షమీ అద్భుత బంతి హోప్‌ (5) వికెట్లను గిరాటేసింది. ఈ దశలో ఆంబ్రిస్, పూరన్‌ (28; 2 ఫోర్లు) మూడో వికెట్‌కు 55 పరుగులు జోడించి పరిస్థితిని చక్కదిద్దే ప్రయత్నం చేశారు. అయితే ఆంబ్రిస్‌ను పాండ్యా వికెట్ల ముందు దొరకబుచ్చుకున్న తర్వాత విండీస్‌ పతనం వేగంగా సాగింది. 36 పరుగుల వ్యవధిలో ఆ జట్టు నలుగురు ప్రధాన బ్యాట్స్‌మెన్‌ వికెట్లు కోల్పోయింది. హెట్‌మైర్‌ (18), హోల్డర్‌ (6), బ్రాత్‌వైట్‌ (1) విఫలం కావడంతో ఆ జట్టు పరాజయం దిశగా సాగింది. మరో 15.4 ఓవర్లు మిగిలి ఉండగానే విండీస్‌ ఆలౌటైంది. రోహిత్‌ ఔటా, కాదా! ఓపెనర్‌ రోహిత్‌ శర్మ విషయంలో థర్డ్‌ అంపైర్‌ ఇచ్చిన నిర్ణయం కూడా సందేహాస్పదంగా కనిపించింది. రోచ్‌ బౌలింగ్‌లో రోహిత్‌ ఆడిన బంతి కీపర్‌ చేతుల్లో పడింది. విండీస్‌ అప్పీల్‌ చేయగా అంపైర్‌ తిరస్కరించాడు. దీనిపై విండీస్‌ రివ్యూ కోరింది. రీప్లేలో స్నికోలో కనిపించిన స్పైక్‌ను బట్టి థర్డ్‌ అంపైర్‌ మైకేల్‌ గాఫ్‌ ఔట్‌గా ప్రకటించాడు. అయితే బంతి బ్యాట్‌కంటే ప్యాడ్‌కు తగిలినప్పుడు స్నికో స్పందించినట్లుగా, బంతికి బ్యాట్‌కు మధ్య కొంత ఖాళీ ఉన్నట్లు కూడా అనిపించింది. దీనిపై పూర్తి స్పష్టత లేకపోయినా అంపైర్‌ మాత్రం తన నిర్ణయాన్ని భారత్‌కు ప్రతికూలంగా వెల్లడించారు. దాంతో రోహిత్‌ నిరాశగా వెనుదిరిగాడు.   స్కోరు వివరాలు భారత్‌ ఇన్నింగ్స్‌: రాహుల్‌ (బి) హోల్డర్‌ 48; రోహిత్‌ (సి) హోప్‌ (బి) రోచ్‌ 18; కోహ్లి (సి) (సబ్‌) డారెన్‌ బ్రేవో (బి) హోల్డర్‌ 72; విజయ్‌ శంకర్‌ (సి) హోప్‌ (బి) రోచ్‌ 14; జాదవ్‌ (సి) హోప్‌ (బి) రోచ్‌ 7; ధోని (నాటౌట్‌) 56; పాండ్యా (సి) అలెన్‌ (బి) కాట్రెల్‌ 46; షమీ (సి) హోప్‌ (బి) కాట్రెల్‌ 0; కుల్దీప్‌ (నాటౌట్‌) 0; ఎక్స్‌ట్రాలు 7; మొత్తం 50 ఓవర్లలో 7 వికెట్లకు) 268. వికెట్ల పతనం: 1–29, 2–98, 3–126, 4–140, 5–180, 6–250, 7–252.   బౌలింగ్‌:కాట్రెల్‌ 10–0–50–2, రోచ్‌ 10–0–36–3, థామస్‌ 7–0–63–0, అలెన్‌ 10–0–52–0, హోల్డర్‌ 10–2–33–2, బ్రాత్‌వైట్‌ 3–0–33–0.   వెస్టిండీస్‌ ఇన్నింగ్స్‌: గేల్‌ (సి) జాదవ్‌ (బి) షమీ 6; ఆంబ్రిస్‌ (ఎల్బీ) (బి) పాండ్యా 31; హోప్‌ (బి) షమీ 5; పూరన్‌ (సి) షమీ (బి) కుల్దీప్‌ 28; హెట్‌మైర్‌ (సి) రాహుల్‌ (బి) షమీ 18; హోల్డర్‌ (సి) జాదవ్‌ (బి) చహల్‌ 6; బ్రాత్‌వైట్‌ (సి) ధోని (బి) బుమ్రా 1; అలెన్‌ (ఎల్బీ) (బి) బుమ్రా 0; రోచ్‌ (నాటౌట్‌) 14; కాట్రెల్‌ (ఎల్బీ) (బి) చహల్‌ 10; థామస్‌ (సి) రోహిత్‌ (బి) షమీ 6; ఎక్స్‌ట్రాలు 18, మొత్తం (34.2 ఓవర్లలో ఆలౌట్‌) 143.   వికెట్ల పతనం: 1–10, 2–16, 3–71, 4–80, 5–98, 6–107, 7–107, 8–112, 9–124, 10–143.    బౌలింగ్‌: షమీ 6.2–0–16–4, బుమ్రా 6–1–9–2, పాండ్యా 5–0–28–1, కుల్దీప్‌ 9–1–35–1, జాదవ్‌ 1–0–4–0, చహల్‌ 7–0–39–2.     అంతర్జాతీయ క్రికెట్‌లో (మూడు ఫార్మాట్‌లలో కలిపి) వేగవంతంగా 20 వేల పరుగులు పూర్తి చేసిన క్రికెటర్‌గా కోహ్లి రికార్డు నెలకొల్పాడు. కోహ్లి ఈ మైలురాయిని 417 ఇన్నింగ్స్‌లో చేరుకున్నాడు. సచిన్, లారా (453 ఇన్నింగ్స్‌ చొప్పున) పేరిట ఉన్న రికార్డును కోహ్లి బద్దలు కొట్టాడు.    గేల్‌

ప్రపంచ కప్‌లో ఓటమి లేకుండా అజేయంగా సాగుతున్న భారత జట్టు ద్వితీయార్ధ పోరుకు సన్నద్ధమైంది. టోర్నీ ఆరంభం నుంచి 28 రోజుల వ్యవధిలో ఐదు మ్యాచ్‌లే పూర్తి చేసుకున్న టీమిండియా... రాబోయే పది రోజుల్లో నాలుగు మ్యాచ్‌ల్లో బరిలోకి దిగబోతోంది. ఈ క్రమంలో వెస్టిండీస్‌ తొలి ప్రత్యర్థిగా భారత్‌ ముందు నిలిచింది. బలాబలాలు, ఫామ్‌ దృష్ట్యా విండీస్‌కంటే టీమిండియా ఎంతో మెరుగ్గా కనిపిస్తుండగా... తమదైన రోజున చెలరేగితే ఆ జట్టు నుంచి కూడా గట్టి పోటీ తప్పకపోవచ్చు. మిగిలిన మూడు మ్యాచ్‌లు గెలిస్తే తప్ప వరల్డ్‌కప్‌లో ముందుకెళ్లడంపై ఆశలు పెట్టుకోలేని స్థితిలో విండీస్‌ ఉండగా... ఈ మ్యాచ్‌లో గెలిస్తే కోహ్లి సేన సెమీస్‌కు దాదాపుగా చేరువవుతుంది. మాంచెస్టర్‌: మెగా టోర్నీలో దక్షిణాఫ్రికా, పాకిస్తాన్, ఆస్ట్రేలియాలపై సాధించిన సాధికారిక విజయాలు భారత్‌ ఆధిపత్యాన్ని చూపాయి. అయితే అఫ్గానిస్తాన్‌తో జరిగిన మ్యాచ్‌ ఒక్కసారిగా జట్టులో కొత్త లోపాలను చూపించింది. వాటిని సరిదిద్దుకొని ముందుకెళ్లే క్రమంలో మరో కీలక మ్యాచ్‌కు రంగం సిద్ధమైంది. ఇక్కడి ఓల్డ్‌ట్రఫోర్డ్‌ మైదానంలో నేడు జరిగే తమ ఆరో లీగ్‌ మ్యాచ్‌లో వెస్టిండీస్‌తో టీమిండియా తలపడుతుంది. టోర్నీలో ఇప్పటి వరకు ఒకే మ్యాచ్‌ గెలిచిన విండీస్‌ ఈ సారైనా మెరుగైన ప్రదర్శన ఇవ్వాలని భావిస్తోంది.   ధోని ఎలా ఆడతాడో! సాధారణంగా వ్యక్తిగతంగా ఆటగాళ్లను విమర్శించడాన్ని ఇష్టపడని క్రికెట్‌ దిగ్గజం సచిన్‌ టెండూల్కర్‌ కూడా అఫ్గాన్‌తో మ్యాచ్‌లో ధోని బ్యాటింగ్‌ను తప్పుపట్టాడు. వాస్తవంగా కూడా గత మ్యాచ్‌లో మాజీ కెప్టెన్‌ మిడిలార్డర్‌లో ఆడిన తీరు జట్టును ఆందోళన కలిగించేదే. ఈ నేపథ్యంలో అందరి దృష్టి ధోని బ్యాటింగ్‌పైనే ఉంటుందనడంలో సందేహం లేదు. ఇది మినహా టీమిండియా జట్టు కూర్పు విషయంలో పెద్దగా ఆలోచించాల్సిన అవసరం కనిపించడం లేదు. రోహిత్, రాహుల్, కోహ్లిలతో టాపార్డర్‌ పటిష్టంగా ఉండగా... విజయ్‌ శంకర్‌ మరోసారి నాలుగో స్థానంలో తన అదృష్టాన్ని పరీక్షించుకోనున్నాడు. అఫ్గాన్‌పై అర్ధ సెంచరీ సాధించిన కేదార్‌ జాదవ్‌ కూడా కీలక పాత్ర పోషించాల్సి ఉంది. నలుగురు రెగ్యులర్‌ బౌలర్లతో గత పోరులో భారత బ్యాటింగ్‌ కొంత బలహీనంగా కనిపించింది. ఈ నేపథ్యంలో ఇద్దరు స్పిన్నర్లలో జడేజాను ఆడించే అవకాశం కూడా కనిపిస్తోంది. భువనేశ్వర్‌ గాయం కారణంగా జట్టులోకి వచ్చిన షమీ హ్యాట్రిక్‌ ప్రదర్శనతో తన చోటు ఖాయం చేసుకున్నాడు. గాయం నుంచి కోలుకొని భువీ ఈ మ్యాచ్‌ కోసం సుదీర్ఘంగా ప్రాక్టీస్‌ చేసినా... ఇప్పటికిప్పుడు షమీని తప్పించకపోవచ్చు. బుమ్రా మరోసారి పదునైన ఆరంభం ఇస్తే విండీస్‌ను దెబ్బ తీయడం భారత్‌కు కష్టం కాదు.   బ్రాత్‌వైట్‌ మళ్లీ చెలరేగితే... కివీస్‌తో మ్యాచ్‌లో విండీస్‌ దురదృష్టవశాత్తూ మంచి విజయావకాశాన్ని చేజార్చుకుంది. అయితే విండీస్‌ బ్యాటింగ్‌ లోతు ఎలాంటిదో ఈ మ్యాచ్‌ చూపిం చింది. వరుసగా విధ్వంసక ఆటగాళ్లు ఉన్న ఆ జట్టు సమష్టిగా చెలరేగితే ఆపడం ఎవరి తరం కాదు. మధ్యలో కొన్ని మ్యాచ్‌లు విఫలమైనా... గేల్‌ దూకుడు గురించి భారత్‌కు కొత్తగా చెప్పాల్సిన పని లేదు. హోప్, హెట్‌మైర్‌ తమపై ఉన్న అంచనాలకు తగినట్లుగా రాణించాల్సి ఉంది. హెట్‌మైర్‌కు స్పిన్‌ను సమర్థంగా ఎదుర్కోగల నైపుణ్యం ఉంది. గత మ్యాచ్‌ హీరో బ్రాత్‌వైట్‌ తన జోరు కొనసాగిస్తే టీమిండియాకు కష్టాలు తప్పవు. ఈ ప్రపంచకప్‌లో వెస్టిండీస్‌ పదునైన పేస్‌ బౌలింగ్‌ కూడా చెప్పుకోదగ్గ అంశం. ముఖ్యంగా కాట్రెల్‌ ప్రతీ జట్టుపై చెలరేగిపోయాడు. ఆరంభంలో అతని లెఫ్టార్మ్‌ పేస్‌ను ఎదుర్కోవడం భారత ఓపెనర్లకు అంత సులువు కాదు. ఈ విషయంలో రోహిత్‌ తరచుగా విఫలమయ్యాడు. తుది జట్లు (అంచనా) భారత్‌: కోహ్లి (కెప్టెన్‌), రోహిత్, రాహుల్, విజయ్‌ శంకర్, ధోని, జాదవ్, పాండ్యా, కుల్దీప్, చహల్‌/ జడేజా, షమీ, బుమ్రా.   వెస్టిండీస్‌: హోల్డర్‌ (కెప్టెన్‌), గేల్, లూయిస్, హోప్, పూరన్, హెట్‌మైర్, బ్రాత్‌వైట్, నర్స్, రోచ్, కాట్రెల్, థామస్‌.   పిచ్, వాతావరణం ఓల్డ్‌ ట్రఫోర్డ్‌ మైదానం బ్యాటింగ్‌కు అనుకూలం. భారీ స్కోర్లకు అవకాశం ఉంది. భారత్‌ ఇదే వేదికపై ఇప్పటికే పాక్‌తో ఆడగా... విండీస్‌ కూడా న్యూజిలాండ్‌ను ఇక్కడే ఎదుర్కొంది. మ్యాచ్‌కు వర్షం ముప్పు లేదు.   ముఖాముఖి రికార్డు భారత్, వెస్టిండీస్‌ జట్లు ఇప్పటివరకు 126 వన్డేల్లో తలపడ్డాయి. 59 మ్యాచ్‌ల్లో భారత్‌... 62 మ్యాచ్‌ల్లో వెస్టిండీస్‌ విజయం సాధించాయి. రెండు మ్యాచ్‌లు ‘టై’గా ముగిశాయి. మూడు మ్యాచ్‌లు రద్దయ్యాయి. ప్రపంచకప్‌లో ఈ రెండు జట్లు ఎనిమిది మ్యాచ్‌ల్లో తలపడ్డాయి. ఐదు మ్యాచ్‌ల్లో భారత్, మూడు మ్యాచ్‌ల్లో విండీస్‌ గెలిచాయి. ప్రపంచకప్‌లో చివరిసారి 1992లో భారత్‌పై విండీస్‌ గెలిచింది. 1996, 2011, 2015 ప్రపంచకప్‌ మ్యాచ్‌ల్లో భారత్‌ను విజయం వరించింది. ఎమ్మెస్కే కీపింగ్‌ చేయగా... విండీస్‌తో మ్యాచ్‌కు ముందు రోజు భారత ఆటగాళ్ల ప్రాక్టీస్‌ జోరుగా సాగింది. ముఖ్యంగా గాయం నుంచి కోలుకున్న పేసర్‌ భువనేశ్వర్‌ కుమార్‌ నిర్విరామంగా బౌలింగ్‌ చేస్తూ ఫిట్‌గా కనిపించాడు. అతను ‘సింగిల్‌ వికెట్‌’ బౌలింగ్‌ చేస్తున్న సమయంలో భారత మాజీ కీపర్, సెలక్షన్‌ కమిటీ చైర్మన్‌ ఎమ్మెస్కే ప్రసాద్‌ కీపర్‌గా వ్యవహరించడం విశేషం. ఆ తర్వాత కూడా భారత ఆటగాళ్లతో ప్రసాద్‌ ఫీల్డింగ్‌ ప్రాక్టీస్‌ చేయించడం విశేషం. రిజర్వ్‌ కీపర్‌ పంత్‌ కూడా చాలా సేపు ఫీల్డింగ్‌ చేశాడు. మరో వైపు ఎమ్మెస్‌ ధోని స్పిన్నర్ల బౌలింగ్‌లో ప్రాక్టీస్‌ చేశాడు. ముఖ్యంగా అతను స్వీప్‌ షాట్లు ఆడటంపైనే ఎక్కువగా దృష్టి పెట్టాడు. గత మ్యాచ్‌లో అఫ్గాన్‌ స్పిన్‌ను ఎదుర్కోవడంలోనే ధోని బాగా ఇబ్బంది పడిన విషయం గమనార్హం. కోహ్లి అన్ని ఫార్మాట్‌లలో వరల్డ్‌ నంబర్‌వన్‌ బ్యాట్స్‌మన్‌. ధోని స్ట్రయిక్‌రేట్‌ను కోహ్లితో పోల్చడం సరైంది కాదు. కాబట్టి ధోని ఆటను మరెవరితోనూ పోల్చవద్దు. మేం ఆ మ్యాచ్‌లో స్వల్ప లక్ష్యాన్ని కూడా కాపాడుకున్నాం. ధోని పరిస్థితులను బట్టి ఆడతాడు. కాబట్టి అతని బ్యాటింగ్‌ గురించి ఆందోళన అనవసరం. ధోని ఒక్కడితోనే కాదు కోచ్‌లు, సహాయక సిబ్బంది ఇతర బ్యాట్స్‌మెన్‌ అందరితో కూడా వారి ఆటపై చర్చిస్తూనే ఉంటాం. – భరత్‌ అరుణ్, భారత బౌలింగ్‌ కోచ్‌   50: హార్దిక్‌ పాండ్యాకు ఇది 50వ మ్యాచ్‌. మరో 2 వికెట్లు తీస్తే అతని 50 వికెట్లు పూర్తవుతాయి. 59: గేల్‌ మరో 59 పరుగులు చేస్తే విండీస్‌ తరఫున వన్డేల్లో అత్యధిక పరుగులు చేసిన ఆటగాడిగా లారాను అధిగమిస్తాడు.    

సౌతాంప్టన్‌: శక్తి మేర ఆడితే తాము భారత్‌ను ఓడించగలమని అంటున్నాడు బంగ్లాదేశ్‌ స్టార్‌ ఆల్‌రౌండర్‌ షకీబుల్‌ హసన్‌. ప్రస్తుతం సూపర్‌ ఫామ్‌లో ఉన్న షకీబ్‌... ప్రపంచ కప్‌లో 1000 పరుగులు చేసిన తొలి బంగ్లా బ్యాట్స్‌మన్‌గా రికార్డులకెక్కాడు. అఫ్గాన్‌పై గెలుపు అనంతరం ఏడు మ్యాచ్‌ల్లో ఏడు పాయింట్లతో ఉందీ జట్టు. సెమీఫైనల్స్‌ చేరాలంటే భారత్‌ (జూలై 2), పాకిస్తాన్‌పై (జూలై 5) విజయం సాధించాల్సి ఉంటుంది. ఈ నేపథ్యంలో షకీబ్‌ మాట్లాడుతూ... ‘భారత్‌ అగ్ర జట్టు. టైటిల్‌కు గట్టి పోటీదారుగా ఉన్న అలాంటి జట్టును ఓడించడం కష్టమే. కానీ, అత్యుత్తమ స్థాయి ఆటతో మా శక్తి మేర ప్రయత్నిస్తాం’ అని పేర్కొన్నాడు. ఫలితాన్ని మార్చగల ప్రపంచ స్థాయి ఆటగాళ్లున్న టీమిండియాతో మ్యాచ్‌లో అనుభవం ప్రధాన పాత్ర పోషిస్తుందని షకీబ్‌ అన్నాడు. కప్‌లో తన ఫామ్‌ (476 పరుగులు, 10 వికెట్లు)పై అతడు పూర్తి సంతృప్తి వ్యక్తం చేశాడు. వ్యక్తిగత రాణింపుతో అవసరమైన సమయంలో జట్టుకు ఉపయోగపడుతుండటం పట్ల సంతోషం వ్యక్తం చేశాడు.

బర్మింగ్‌హామ్‌: ప్రపంచ కప్‌లో అజేయంగా దూసుకెళ్తూ సెమీఫైనల్స్‌ మెట్టెక్కేందుకు ఒక్క గెలుపు దూరంలో ఉంది న్యూజిలాండ్‌. మరోవైపు నాకౌట్‌ చేరాలంటే ఆడబోయే మూడు మ్యాచ్‌ల్లోనూ నెగ్గాల్సిన పరిస్థితి పాకిస్తాన్‌ది. ఈ నేపథ్యంలో రెండు జట్లూ బుధవారం తలపడనున్నాయి. టోర్నీలో క్లిష్టమైన సందర్భాల్లో పట్టు వదలకుండా పోరాడుతున్న కివీస్‌ ఆటతీరు అందరినీ ఆకట్టుకుంటోంది. పాక్‌ మాత్రం ఆపసోపాలు పడుతోంది. అయితే, ఎడంచేతి వాటం బ్యాట్స్‌మన్‌ హారిస్‌ సొహైల్‌ అద్భుత ఇన్నింగ్స్‌తో గత మ్యాచ్‌లో దక్షిణాఫ్రికాపై సాధించిన విజయం జట్టులో ఆత్మవిశ్వాసం నింపింది. తాడోపేడో తేల్చుకోవాల్సిన ఈ సమయంలో పాక్‌ తెగించి ఆడేందుకు ప్రయత్నించనుంది. ప్రధాన పేసర్‌ ఆమిర్‌ సూపర్‌ ఫామ్‌లో ఉన్నాడు. రెండో పేసర్‌ వహాబ్‌ రియాజ్‌ మెరిస్తే ప్రత్యర్థికి కష్టాలు తప్పవు. ఓపెనర్లు ఇమాముల్, ఫఖర్‌ జమాన్, వన్‌డౌన్‌ బ్యాట్స్‌మన్‌ బాబర్‌ ఆజమ్‌కు తోడుగా కెప్టెన్‌ సర్ఫరాజ్‌ పరుగులు చేస్తే బ్యాటింగ్‌ మరింత బలోపేతం అవుతుంది. న్యూజిలాండ్‌కు అంతా బాగున్నా, ఓపెనర్లు గప్టిల్, మున్రో ఫామ్‌ కలవర పరుస్తోంది. కెప్టెన్‌ విలియమ్సన్‌ చెలరేగి ఆడుతుండటం, మిడిలార్డర్‌ బ్యాట్స్‌మన్‌ టేలర్‌ నిలకడ కారణంగా లాథమ్‌ సహా మిగతావారి వైఫల్యం ప్రభా వం చూపడం లేదు. ఆల్‌ రౌండర్లు నీషమ్, గ్రాండ్‌హోమ్‌ జట్టుకు కావాల్సిన విధంగా రాణిస్తున్నారు. పేసర్లు బౌల్ట్, ఫెర్గూసన్‌ పదునైన బంతులను పాక్‌ బ్యాట్స్‌మెన్‌ ఎలా కాచుకుంటారో చూడాలి. ముఖాముఖి రికార్డు ఇరు జట్ల మధ్య ఇప్పటి వరకు 106 మ్యాచ్‌లు జరగ్గా 54 మ్యాచ్‌ల్లో పాకిస్తాన్‌ నెగ్గింది. కివీస్‌ 48 మ్యాచ్‌ల్లో విజయం సాధించింది. ఒకటి టై కాగా, మూడింట్లో ఫలితం తేలలేదు. ప్రపంచ కప్‌లోనూ న్యూజి లాండ్‌పై పాకిస్తాన్‌దే పైచేయిగా ఉంది. మెగా ఈవెంట్‌లలో మొత్తం 8 మ్యాచ్‌లాడగా... ఆరింట్లో పాక్, రెండింట్లో కివీస్‌ గెలుపొందాయి.  

వరల్డ్‌ నంబర్‌వన్‌ జట్టు హోదాలో, సొంతగడ్డపై ప్రపంచకప్‌ ఫేవరెట్‌గా భారీ అంచనాలతో బరిలోకి దిగిన ఇంగ్లండ్‌ బ్యాటింగ్‌ కోటకు బీటలు పడుతున్నాయి. గత మ్యాచ్‌లో అనూహ్యంగా శ్రీలంక చేతిలో ఓడిన మోర్గాన్‌ సేన ఇప్పుడు చిరకాల ప్రత్యర్థి ఆసీస్‌ చేతిలోనూ చావుదెబ్బ తింది. సాధారణ లక్ష్యాన్ని ఛేదించలేక, కనీసం పూర్తి ఓవర్లు ఆడలేక ఆ జట్టు చతికిల పడింది. ఒకరితో పోటీ పడి మరో బ్యాట్స్‌మన్‌ విఫలం కావడంతో టోర్నీలో మూడో ఓటమిని తమ ఖాతాలో వేసుకుంది. ఫలితంగా సెమీస్‌ అవకాశాలు మరింత సంక్లిష్టం చేసుకుంది. అటు ఆస్ట్రేలియా మాత్రం అదరగొట్టే ఆటతో జైత్రయాత్రను కొనసాగిస్తోంది. మ్యాచ్‌ మ్యాచ్‌కూ రాటుదేలుతున్న కంగారూ సేన వరుసగా నాలుగో విజయాన్ని అందుకొని ప్రపంచకప్‌లో సెమీఫైనల్లోకి అడుగు పెట్టిన తొలి జట్టుగా నిలిచింది. బ్యాటింగ్‌లో ఫించ్, వార్నర్‌ జట్టును ముందుండి నడిపిస్తే బౌలింగ్‌లో బెహ్రన్‌డార్ఫ్‌ ఐదు వికెట్లకు తోడు స్టార్క్‌ అద్భుత బంతులు ఆసీస్‌ను గెలిపించాయి. 1992 తర్వాత ఇంగ్లండ్‌ చేతిలో ఓడని తమ రికార్డును ఈసారి కూడా ఆస్ట్రేలియా నిలబెట్టుకోవడం విశేషం.    లండన్‌: ప్రపంచకప్‌లో తొలి సెమీస్‌ స్థానం ఖాయమైంది. డిఫెండింగ్‌ చాంపియన్‌ ఆస్ట్రేలియా టోర్నీలో ఆరో విజయంతో సెమీఫైనల్లోకి దూసుకెళ్లింది. మంగళవారం లార్డ్స్‌ మైదానంలో జరిగిన మ్యాచ్‌లో ఆసీస్‌ 64 పరుగుల తేడాతో ఇంగ్లండ్‌ను చిత్తు చేసింది. టాస్‌ ఓడి ముందుగా బ్యాటింగ్‌కు దిగిన ఆస్ట్రేలియా 50 ఓవర్లలో 7 వికెట్ల నష్టానికి 285 పరుగులు చేసింది. ‘మ్యాన్‌ ఆఫ్‌ ద మ్యాచ్‌’ కెప్టెన్‌ ఫించ్‌ (116 బంతుల్లో 100; 11 ఫోర్లు, 2 సిక్సర్లు) సెంచరీతో చెలరేగాడు. వార్నర్‌ (61 బంతుల్లో 53; 6 ఫోర్లు) మరోసారి కీలక ఇన్నింగ్స్‌ ఆడాడు. ఇంగ్లండ్‌ 44.4 ఓవర్లలో 221 పరుగులకే ఆలౌటైంది. స్టోక్స్‌ (115 బంతుల్లో 89; 8 ఫోర్లు, 2 సిక్సర్లు) మినహా అంతా విఫలమయ్యారు. బెహ్రన్‌డార్ఫ్‌ (5/44), మిషెల్‌ స్టార్క్‌ (4/43) ప్రత్యర్థిని కుప్పకూల్చారు.    రాణించిన వార్నర్‌... ఆస్ట్రేలియాకు ఫించ్, వార్నర్‌ మరోసారి అదిరే ఆరంభం అందించారు. పిచ్‌ బౌలింగ్‌కు కొంత అనుకూలంగా కనిపించినా... ఇంగ్లండ్‌ పేసర్లు ఆ అవకాశాన్ని ఉపయోగించు కోలేకపోవడంతో కంగారూల ఇన్నింగ్స్‌ సాఫీగా సాగిపోయింది. 15 పరుగుల వ్యక్తిగత స్కోరు వద్ద ఫించ్‌ ఇచ్చిన కష్టసాధ్యమైన క్యాచ్‌ను విన్స్‌ వదిలేయడం, 18 వద్ద ఇంగ్లండ్‌ ఎల్బీ అప్పీల్‌ను అంపైర్‌ తిరస్కరించడం ఆసీస్‌కు కలిసొచ్చింది. అంపైర్‌ నిర్ణయాన్ని ఇంగ్లండ్‌ రివ్యూ చేసినా లాభం లేకపోయింది. తొలి పవర్‌ప్లేలో ఆసీస్‌ 44 పరుగులు చేయగా... ఓపెనర్లు ఇద్దరూ ఒకరితో మరొకరు పోటీ పడి చకచకా పరుగులు సాధించారు. ఈ క్రమంలో ఫించ్‌ 61 బంతుల్లో, వార్నర్‌ 52 బంతుల్లో అర్ధ సెంచరీలు పూర్తి చేసుకున్నారు. 17.5 ఓవర్లలో భాగస్వామ్యం వంద పరుగులకు చేరింది. చివరకు వార్నర్‌ను ఔట్‌ చేసి స్పిన్నర్‌ అలీ ఈ జోడీని విడదీశాడు. మరోవైపు ఫించ్‌ దూకుడు తగ్గించలేదు. 9 పరుగుల వద్ద బట్లర్‌ స్టంపింగ్‌ వదిలేయడంతో బతికిపోయిన ఖాజా (23) కెప్టెన్‌కు అండగా నిలిచాడు. వీరిద్దరు 50 పరుగులు జత చేసిన తర్వాత ఖాజా వెనుదిరిగాడు. ఆ తర్వాత ఆస్ట్రేలియా ఇన్నింగ్స్‌ ఆశించినంత వేగంగా సాగకపోవడంతో స్కోరు 300 పరుగులకు కూడా చేరలేదు. 115 బంతుల్లో ఈ ప్రపంచకప్‌లో రెండో సెంచరీ పూర్తి చేసుకున్న వెంటనే ఫించ్‌ వెనుదిరగ్గా... స్టీవ్‌ స్మిత్‌ (34 బంతుల్లో 38; 5 ఫోర్లు) ఫర్వాలేదనిపించాడు. చివర్లో క్యారీ (27 బంతుల్లో 38 నాటౌట్‌; 5 ఫోర్లు) వేగంగా ఆడటంతో ఆసీస్‌ చెప్పుకోదగ్గ స్కోరు నమోదు చేయగలిగింది.   స్టోక్స్‌ మినహా... 26 పరుగులకు 3 వికెట్లు... లక్ష్య ఛేదనలో ఇంగ్లండ్‌కు లభించిన ఆరంభం ఇది!  ఇన్నింగ్స్‌ రెండో బంతికే విన్స్‌ (0)ను బెహ్రన్‌డార్ఫ్‌ క్లీన్‌బౌల్డ్‌ చేయగా, స్టార్క్‌ అద్భుత బంతికి రూట్‌ (8) వికెట్ల ముందు దొరికిపోయాడు. పుల్‌ షాట్‌ ఆడబోయి మోర్గాన్‌ (4) వెనుదిరిగాడు. ఈ దశలో బెయిర్‌స్టో (27) జట్టును ఆదుకునే ప్రయత్నం చేసినా చెత్త షాట్‌తో నిష్క్రమించాడు. స్టోక్స్, బట్లర్‌ (25) ఐదో వికెట్‌కు 71 పరుగులు జోడించారు. రెండు సార్లు ఔటయ్యే ప్రమాదం తప్పించున్న బట్లర్‌ ఇన్నింగ్స్‌... డీప్‌ స్క్వేర్‌ లెగ్‌లో ఖాజా అద్భుత క్యాచ్‌తో ముగిసింది. స్టోక్స్‌ మాత్రం కండరాల నొప్పితో బాధపడుతూనే చికిత్స తీసుకుంటూ తన పోరాటం కొనసాగించాడు. ఈ క్రమంలో కొన్ని చక్కటి షాట్లు ఆడిన అతను 75 బంతుల్లో హాఫ్‌ సెంచరీ పూర్తి చేసుకున్నాడు. క్రిస్‌ వోక్స్‌ (26) నుంచి అతనికి కొంత సహకారం లభించింది. మ్యాక్స్‌వెల్‌ ఓవర్లో రెండు భారీ సిక్సర్లు, కమిన్స్‌ ఓవర్లో రెండు ఫోర్లు కొట్టి జోరు పెంచే ప్రయత్నం చేసిన స్టోక్స్‌ను బౌల్డ్‌ చేసి స్టార్క్‌ ఆసీస్‌ అడ్డుగోడను తప్పించాడు. అతను వేసిన ఈ యార్కర్‌ మ్యాచ్‌కే హైలైట్‌గా నిలిచింది. ఆ తర్వాత ఇంగ్లండ్‌ పతనం కావడానికి ఎంతో సేపు పట్టలేదు.   స్కోరు వివరాలు   ఆస్ట్రేలియా ఇన్నింగ్స్‌: ఫించ్‌ (సి) వోక్స్‌ (బి) ఆర్చర్‌ 100; వార్నర్‌ (సి) రూట్‌ (బి) అలీ 53; ఖాజా (బి) స్టోక్స్‌ 23; స్మిత్‌ (సి) ఆర్చర్‌ (బి) వోక్స్‌ 38; మ్యాక్స్‌వెల్‌ (సి) బట్లర్‌ (బి) వుడ్‌ 12; స్టొయినిస్‌ (రనౌట్‌) 8; క్యారీ (నాటౌట్‌) 38; కమిన్స్‌ (సి) బట్లర్‌ (బి) వోక్స్‌ 1; స్టార్క్‌ (నాటౌట్‌) 4; ఎక్స్‌ట్రాలు 8; మొత్తం (50 ఓవర్లలో 7 వికెట్లకు) 285.   వికెట్ల పతనం: 1–123, 2–173, 3–185, 4–213, 5–228, 6–250, 7–259. బౌలింగ్‌: వోక్స్‌ 10–0–46–2, ఆర్చర్‌ 9–0–56–1, వుడ్‌ 9–0–59–1, స్టోక్స్‌ 6–0– 29–1, అలీ 6–0–42–1, రషీద్‌ 10–0–49–0.   ఇంగ్లండ్‌ ఇన్నింగ్స్‌: బెయిర్‌స్టో (సి) కమిన్స్‌ (బి) బెహ్రన్‌డార్ఫ్‌ 27; విన్స్‌ (బి) బెహ్రన్‌డార్ఫ్‌ 0; రూట్‌ (ఎల్బీ) (బి) స్టార్క్‌ 8; మోర్గాన్‌ (సి) కమిన్స్‌ (బి) స్టార్క్‌ 4; స్టోక్స్‌ (బి) స్టార్క్‌ 89; బట్లర్‌ (సి) ఖాజా (బి) స్టొయినిస్‌ 25; వోక్స్‌ (సి) ఫించ్‌ (బి) బెహ్రన్‌డార్ఫ్‌ 26; అలీ (సి) క్యారీ (బి) బెహ్రన్‌డార్ఫ్‌ 6; రషీద్‌ (సి) స్టొయినిస్‌ (బి) స్టార్క్‌ 25; ఆర్చర్‌ (సి) వార్నర్‌ (బి) బెహ్రన్‌డార్ఫ్‌ 1; వుడ్‌ (నాటౌట్‌) 1; ఎక్స్‌ట్రాలు 9; మొత్తం (44.4 ఓవర్లలో ఆలౌట్‌) 221.   వికెట్ల పతనం: 1–0, 2–15, 3–26, 4–53, 5–124, 6–177, 7–189, 8–202, 9–211, 10–221. బౌలింగ్‌: బెహ్రన్‌డార్ఫ్‌ 10–0–44–5, స్టార్క్‌ 8.4–1–43–4, కమిన్స్‌ 8–1–41–0, లయన్‌ 9–0–43–0, స్టొయినిస్‌ 7–0–29–1, మ్యాక్స్‌వెల్‌ 2–0–15–0. బెహ్రన్‌డార్ఫ్‌ 7: ప్రపంచకప్‌లో ఒకే జట్టుపై రెండు సెంచరీలు చేసిన ఏడో బ్యాట్స్‌మన్‌గా ఆరోన్‌ ఫించ్‌ గుర్తింపు పొందాడు. డివిలియర్స్‌ అత్యధికంగా వెస్టిండీస్‌పై మూడు సెంచరీలు నమోదు చేశాడు. సచిన్‌ టెండూల్కర్‌ (కెన్యాపై), బ్రియాన్‌ లారా (దక్షిణాఫ్రికాపై), గంగూలీ (కెన్యాపై), స్కాట్‌ స్టయిరిస్‌ (శ్రీలంకపై), రికీ పాంటింగ్‌ (భారత్‌పై) రెండేసి సెంచరీలు సాధించారు.  

లార్డ్స్‌: క్రికెట్‌ మక్కాగా పిలవబడే లార్డ్స్‌ మైదానం సమఉజ్జీల సమరానికి వేదిక కానుంది. ప్రపంచ కప్‌లో భాగంగా నేడు డిఫెండింగ్‌ చాంపియన్‌ ఆస్ట్రేలియాతో ఆతిథ్య ఇంగ్లండ్‌ జట్టు తలపడనుంది. ఇంగ్లండ్‌పై గెలిచి సెమీస్‌ బెర్త్‌ను సొంతం చేసుకోవాలని ఆసీస్‌.. శ్రీలంక చేతిలో ఎదురైన అనూహ్య పరాజయాన్ని మర్చిపోయి మళ్లీ విజయాల బాట పట్టాలని ఇంగ్లండ్‌ భావిస్తున్నాయి. 1992 తర్వాత ప్రపంచ కప్‌ వేదికపై ఆస్ట్రేలియాను ఇంగ్లండ్‌ ఇప్పటి వరకు ఓడించలేదు. గత రికార్డులతో సంబంధం లేకుండా ఈ మ్యాచ్‌లో పూర్తి విశ్వాసంతో బరిలోకి దిగి విజయం సాధించాలనే లక్ష్యంతో మోర్గాన్‌ బృందం ఉంది. ఏదేమైనా రెండు జట్లలో భారీ హిట్టర్లు ఉండటంతో నేటి మ్యాచ్‌ ప్రేక్షకులను కనువిందు చేయడం ఖాయం. ఓపెనర్ల బెంగ.. ఇంగ్లండ్‌ స్టార్‌ ఓపెనర్‌ జేసన్‌ రాయ్‌ తొడ కండరాల గాయంతో దూరమైనప్పటి నుంచి ఇంగ్లండ్‌కు ఓపెనింగ్‌ బెంగ మొదలైంది. రాయ్‌ స్థానంలో వచ్చిన విన్స్‌ గత రెండు మ్యాచ్‌లలోనూ చెప్పుకోదగ్గ ప్రదర్శన ఇవ్వలేదు. అయితే సోమవారం చేసిన స్కానింగ్‌లో రాయ్‌ గాయం తగ్గిందని నిర్ధారణ అయింది. అదే విధంగా రాయ్‌ సోమవారం నెట్స్‌లో సాధన కూడా చేశాడు. ఆసీస్‌పై 47.43 సగటుతో 759 పరుగులు చేసిన ఈ ఓపెనర్‌కు మంచి రికార్డుంది. నేటి మ్యాచ్‌లో రాయ్‌ బరిలోకి దిగితే ఇంగ్లండ్‌ ఓపెనింగ్‌ కష్టాలు తీరినట్టే.   గెలుపు తప్పనిసరి... శ్రీలంక చేతిలో ఓడిపోవడంతో టైటిల్‌ ఫేవరెట్‌గా బరిలో దిగిన ఇంగ్లండ్‌ సెమీఫైనల్‌ చేరే సమీకరణాలు ఒక్కసారిగా మారిపోయాయి. శ్రీలంకపై బెన్‌ స్టోక్స్‌ ఒంటరి పోరాటం చేసినా ఇతర సభ్యుల నుంచి సహకారం లభించకపోవడంతో జట్టుకు విజయాన్ని అందించలేకపోయాడు. ప్రస్తుతం 8 పాయింట్లతో నాలుగో స్థానంలో ఉన్న ఇంగ్లండ్‌ సెమీస్‌ చేరాలంటే మిగిలిన మూడు మ్యాచ్‌లలో కనీసం రెండింటిని గెలవాల్సిన పరిస్థితి. ఒక మ్యాచ్‌ గెలిచినా వెళ్తుంది కానీ అప్పుడు శ్రీలంక, బంగ్లాదేశ్‌ల ఫలితాలపై ఆధారపడాల్సిన పరిస్థితి ఈ ప్రపంచ నంబర్‌వన్‌  జట్టుకు ఏర్పడుతుంది. అయితే ఇంగ్లండ్‌ తమ తదుపరి మ్యాచ్‌లను పటిష్టమైన ఆస్ట్రేలియా, భారత్, న్యూజిలాండ్‌లతో ఆడాలి. ఇటువంటి పరిస్థితిల్లో నేడు జరిగే ఆస్ట్రేలియా చేతిలో ఓడితే ఇంగ్లండ్‌ పరిస్థితి క్లిష్టంగా మారుతుంది. అదే విధంగా స్లో వికెట్‌లపై తడబడుతుండటం మోర్గాన్‌ సేనకు ప్రతికూలాంశం.   ఆత్మవిశ్వాసంతో కంగారులు... మరోవైపు టోర్నీలో కేవలం భారత్‌ చేతిలో మాత్రమే ఓడిన ఆస్ట్రేలియా పూర్తి ఆత్మవిశ్వాసంతో ఉంది. ఓటమి అనంతరం హ్యాట్రిక్‌ విజయాలను నమోదు చేసిన కంగారులు పాయింట్ల పట్టికలో రెండో స్థానంలో ఉన్నారు. వార్నర్, ఫించ్‌లు సూపర్‌ ఫామ్‌లో ఉండడం, స్మిత్, ఖాజాలు నిలకడగా రాణిస్తుండడం ఆ జట్టుకు కలిసొచ్చే అంశం. చివర్లో ఫినిష్‌ చేయడానికి మ్యాక్స్‌వెల్, స్టొయినిస్, క్యారీలు ఉండనే ఉన్నారు. బంగ్లాదేశ్‌ మ్యాచ్‌లో 381 పరుగులు చేసినా కేవలం 48 పరుగులతో గెలవడంతో బౌలింగ్‌పై దృష్టి పెట్టాల్సిన పరిస్థితి ఆసీస్‌కు ఏర్పడింది. మిచెల్‌ స్టార్క్‌ (15 వికెట్లు), కమిన్స్, కూల్టర్‌ నైల్‌ రాణిస్తున్నా లెగ్‌ స్పిన్నర్‌ జంపా మాత్రం భారీగా పరుగులిస్తుండటం ఆసీస్‌ను ఇబ్బంది పెట్టే అంశం. అతని స్థానంలో నాథన్‌ లయన్‌కి చాన్స్‌ దొరికే అవకాశం ఉంది. పిచ్, వాతావరణం బ్యాటింగ్, బౌలింగ్‌కు అనుకూలించే ఈ పిచ్‌పై గత మ్యాచ్‌లో మొదట బ్యాటింగ్‌ చేసిన పాకిస్తాన్‌ 308 పరుగులు చేయగా, దక్షిణాఫ్రికా 259 పరుగులు చేసింది. స్పిన్నర్లు కీలక పాత్ర పోషించే అవకాశం ఉంది. లార్డ్స్‌లో మంగళవారం వేడి వాతావరణం ఉంటుందని వాతావరణ శాఖ తెలిపింది. చిరుజల్లులు కురిసినా మ్యాచ్‌కు వర్షం ఆటంకం కాకపోవచ్చు.   ముఖాముఖి రికార్డు ఇంగ్లండ్, ఆస్ట్రేలియా జట్ల మధ్య ఇప్పటివరకు 147 వన్డేలు జరిగాయి. ఇంగ్లండ్‌ 81 మ్యాచ్‌ల్లో ఓడిపోయి, 61 మ్యాచ్‌ల్లో గెలిచింది. రెండు మ్యాచ్‌లు ‘టై’కాగా... మూడు మ్యాచ్‌ల్లో ఫలితం తేలలేదు. ప్రపంచకప్‌లో ఈ రెండు జట్లు ఏడుసార్లు తలపడ్డాయి. రెండుసార్లు ఇంగ్లండ్, ఐదుసార్లు ఆస్ట్రేలియా గెలిచాయి.   ఇంగ్లండ్‌ నెట్స్‌లో అర్జున్‌ టెండూల్కర్‌ ఆస్ట్రేలియాతో కీలక మ్యాచ్‌కు సన్నద్ధమవుతున్న ఇంగ్లండ్‌కు భారత క్రికెట్‌ దిగ్గజం సచిన్‌ టెండూల్కర్‌ తనయుడు అర్జున్‌ టెండూల్కర్‌ తనవంతు సహాయం చేశాడు. సోమవారం జరిగిన నెట్‌ ప్రాక్టీస్‌ సెషన్స్‌లో అర్జున్‌ ఇంగ్లండ్‌ బ్యాట్స్‌మెన్‌కు బౌలింగ్‌ చేశాడు. ఎడంచేతి ఫాస్ట్‌ బౌలర్‌ అయిన అర్జున్‌ ఇంగ్లండ్‌ స్పిన్‌ సలహాదారుడు సక్లాయిన్‌ ముస్తాక్‌ పర్యవేక్షణలో బౌలింగ్‌ చేశాడు. ఇంగ్లండ్‌ జట్టుకు నెట్స్‌లో బౌలింగ్‌ చేయడం అర్జున్‌కు కొత్తేం కాదు. ఇది వరకు 2015 యాషెస్‌ సందర్భంగా కూడా అర్జున్‌ ఇంగ్లండ్‌కు నెట్స్‌లో బౌలింగ్‌ చేశాడు. ఇటీవల మెరిల్‌బోన్‌ క్రికెట్‌ క్లబ్‌ (ఎంసీసీ)తరపున బరిలో దిగిన 19 ఏళ్ల అర్జున్‌.. సర్రే సెకండ్‌ ఎలెవన్‌తో జరిగిన మ్యాచ్‌లో తన బౌలింగ్‌తో అదరగొట్టాడు. 11 ఓవర్లు వేసి 2 వికెట్లు తీసుకున్నాడు.    జట్లు (అంచనా) ఇంగ్లండ్‌: మోర్గాన్‌     (కెప్టెన్‌), బెయిర్‌స్టో, విన్స్‌/జేసన్‌ రాయ్, జో రూట్, బెన్‌ స్టోక్స్, బట్లర్, మొయిన్‌ అలీ, క్రిస్‌ వోక్స్, ఆదిల్‌ రషీద్, ఆర్చర్, ప్లంకెట్‌/వుడ్‌. ఆస్ట్రేలియా: ఫించ్‌        (కెప్టెన్‌), వార్నర్, ఖాజా, స్మిత్, మ్యాక్స్‌వెల్, స్టొయినిస్, అలెక్స్‌ క్యారీ, కూల్టర్‌ నైల్, కమిన్స్, స్టార్క్, జంపా/నాథన్‌ లయన్‌.  

భళారే బంగ్లా! షకీబ్‌ ఆల్‌రౌండ్‌ షోతో ఈ ప్రపంచకప్‌లో బంగ్లాదేశ్‌ మాజీ చాంపియన్లను మించిపోయింది. సఫారీ కంటే ఎన్నో రెట్లు ముందుంది. ఆడుతున్న పది జట్లలో సగం జట్లను కిందికి దించేసింది. టోర్నీ ఆరంభం నుంచి సెమీస్‌ రేసులో ఉన్న న్యూజిలాండ్, ఆస్ట్రేలియా, భారత్, ఇంగ్లండ్‌ తర్వాతి స్థానం ఇప్పుడు బంగ్లాదేశ్‌దే కావడం విశేషం. పాయింట్ల పట్టికలో బంగ్లా తర్వాతే మాజీ చాంపియన్లు శ్రీలంక, పాక్, వెస్టిండీస్‌లు కొనసాగుతున్నాయి.    సౌతాంప్టన్‌: మెగా ఈవెంట్‌లో షకీబ్‌ అల్‌ హసన్‌ మళ్లీ చెలరేగాడు. బ్యాట్‌తో, బంతితో అఫ్గానిస్తాన్‌ పని పట్టాడు. దీంతో బంగ్లాదేశ్‌ 62 పరుగుల తేడాతో అఫ్గానిస్తాన్‌పై విజయం సాధించింది. టోర్నీలో మూడో విజయంతో మొర్తజా బృందం టాప్‌–5లోకి వచ్చి సెమీస్‌ రేసులో నిలిచింది. మొదట బ్యాటింగ్‌కు దిగిన బంగ్లాదేశ్‌ నిర్ణీత 50 ఓవర్లలో 7 వికెట్ల నష్టానికి 262 పరుగులు చేసింది. ముష్ఫికర్‌ రహీమ్‌ (87 బంతుల్లో 83; 4 ఫోర్లు, 1 సిక్స్‌), షకీబ్‌ అల్‌ హసన్‌ (69 బంతుల్లో 51; 1 ఫోర్‌) రాణించారు. అఫ్గాన్‌ బౌలర్లలో ముజీబుర్‌ రహ్మాన్‌ 3, గుల్బదిన్‌ నైబ్‌ 2 వికెట్లు తీశారు. అనంతరం లక్ష్యఛేదనకు దిగిన అఫ్గానిస్తాన్‌ 47 ఓవర్లలో 200 పరుగుల వద్ద ఆలౌటైంది. సమీవుల్లా షిన్వారి (51 బంతుల్లో 49 నాటౌట్‌; 3 ఫోర్లు, 1 సిక్స్‌), గుల్బదిన్‌ నైబ్‌ (75 బంతుల్లో 47; 3 ఫోర్లు) అఫ్గాన్‌ పరువు నిలిపారు. అర్ధ సెంచరీతోపాటు స్పిన్‌తో తిప్పేసిన షకీబ్‌ (5/29)కు ‘మ్యాన్‌ ఆఫ్‌ ద మ్యాచ్‌’ అవార్డు దక్కింది.   షకీబ్‌ మరో ఫిఫ్టీ... టాస్‌ నెగ్గిన అఫ్గానిస్తాన్‌ బౌలింగ్‌ ఎంచుకుంది. దీంతో ముందుగా బ్యాటింగ్‌ చేపట్టిన బంగ్లాకు ఓపెనర్లు లిటన్‌ దాస్‌ (16), తమీమ్‌ ఇక్బాల్‌ (53 బంతుల్లో 36; 4 ఫోర్లు) శుభారంభం ఇవ్వలేకపోయారు. జట్టు స్కోరు 23 పరుగుల వద్ద దాస్‌ ఔట్‌ కావడంతో తమీమ్‌కు సూపర్‌ ఫామ్‌లో ఉన్న షకీబ్‌ జతయ్యాడు. ఇద్దరు నిలదొక్కుకోవడంతో పరుగుల వేగం క్రమంగా పెరిగింది. ఈ దశలో తమీమ్‌ను నబీ క్లీన్‌  బౌల్డ్‌ చేశాడు. దీంతో రెండో వికెట్‌కు 59 పరుగుల భాగస్వామ్యం ముగిసింది. తమీమ్‌ నిష్క్రమణతో క్రీజులోకి వచ్చిన ముష్ఫికర్‌ రహీమ్, షకీబ్‌తో కలిసి బాధ్యతాయుతమైన ఇన్నింగ్స్‌ ఆడాడు. 21వ ఓవర్లో జట్టు స్కోరు వందకు చేరింది. ఇద్దరు సమన్వయంతో ఆడటంతో అఫ్గాన్‌ బౌలర్లకు కష్టాలు తప్పలేదు. అద్భుతమైన ఫామ్‌లో ఉన్న షకీబ్‌ 66 బంతుల్లో ఫిఫ్టీ పూర్తి చేసుకున్నాడు. ఈ టోర్నీలో అతనికి ఇది మూడో అర్ధసెంచరీ.   మెరిసిన ముష్ఫికర్‌... అర్ధసెంచరీ కాగానే బంగ్లా జట్టు స్కోరు 143 పరుగుల వద్ద షకీబ్‌... ముజీబ్‌ బౌలింగ్‌లో వికెట్ల ముందు దొరికిపోయాడు. షకీబ్, ముష్ఫికర్‌ మూడో వికెట్‌కు 61 పరుగులు జతచేశారు. తర్వాత సౌమ్య సర్కార్‌ (3) ఎక్కువసేపు క్రీజులో నిలువలేదు. దీంతో మహ్ముదుల్లా (38 బంతుల్లో 27; 2 ఫోర్లు) అండతో ముష్ఫికర్‌ 56 బంతుల్లో అర్ధశతకం సాధించాడు. బౌండరీలు బాదకపోయిన పరుగులను మాత్రం వేగంగా జత చేశాడు. 41వ ఓవర్లో బంగ్లా 200 పరుగులు చేసింది. మహ్ముదుల్లాను నైబ్‌ ఔట్‌ చేయడంతో ముష్ఫికర్‌కు మొసద్దిక్‌ హొస్సేన్‌ జతయ్యాడు. ఇద్దరు స్కోరు వేగం పెంచేందుకు శ్రమించారు. పోరాడే లక్ష్యాన్ని అందించి ఆఖరి ఓవర్లలో నిష్క్రమించారు. షకీబ్‌ మళ్లీ బంతితో... తన బ్యాటింగ్‌తో రెండు విలువైన భాగస్వామ్యాలు జోడించిన షకీబ్‌ అల్‌ హసన్‌ బంతితోనూ చెలరేగాడు.  స్పిన్‌ బౌలింగ్‌తో అఫ్గాన్‌ ఆరంభానికి తూట్లు పొడి చాడు. లక్ష్యాన్ని ఛేదించేందుకు బరిలోకి దిగిన అఫ్గానిస్తాన్‌ పది ఓవర్లదాకా వికెట్‌ చేజార్చుకోకుండా 48 పరుగులు చేసింది. ఓపెనర్లు గుల్బదిన్‌ నైబ్, రహ్మత్‌ షా క్రీజులో పాతుకుపోతున్న దశలో షకీబ్‌ దెబ్బతీశాడు. తొలి ఓవర్లోనే (ఇన్నింగ్స్‌ 11వ) రహ్మత్‌ షా (35 బంతుల్లో 24; 3 ఫోర్లు) వికెట్‌ను పడగొట్టాడు. తర్వాత వచ్చిన హష్మతుల్లా షాహిది (11) మొసద్దిక్‌ బౌలింగ్‌లో స్టంపౌటయ్యాడు. అస్గర్‌ (38 బంతుల్లో 20; 1 ఫోర్‌) అండతో కెప్టెన్‌ నైబ్‌ జట్టు స్కోరును వంద పరుగులు దాటించాడు. అర్ధసెంచరీ దిశగా సాగుతున్న నైబ్‌నూ, హార్డ్‌ హిట్టర్‌ నబీ (0)ని ఒకే ఓవర్లో షకీబ్‌ పెవిలియన్‌ చేర్చడంతో అఫ్గాన్‌ కష్టాల్లో పడింది. కాసేపటి తర్వాత అస్గర్‌ను షకీబే ఔట్‌ చేయడంతో 117 పరుగుల వద్ద ఐదో వికెట్‌ను కోల్పోయింది. స్వల్ప వ్యవధిలోనే ఇక్రమ్‌ రనౌట్‌ కావడంతో అఫ్గాన్‌ లక్ష్యానికి దూరమైంది. మిడిలార్డర్‌ బ్యాట్స్‌మన్‌ సమీవుల్లా ఆఖరిదాకా పోరాడాడు. అతనికి నజీబుల్లా జద్రాన్‌ (23) కాసేపు అండగా నిలిచినా షకీబ్‌ స్పిన్‌కు తలవంచాడు. సమీవుల్లా అజేయంగా నిలిచినా టెయిలెండర్లు రషీద్‌ ఖాన్‌ (2), దౌలత్‌ జద్రాన్‌ (0), ముజీబ్‌ (0)లను ఔట్‌ చేయడంతో అఫ్గాన్‌ 200 పరుగులకే ఆలౌటైంది.   స్కోరు వివరాలు బంగ్లాదేశ్‌ ఇన్నింగ్స్‌: లిటన్‌ దాస్‌ (సి) హష్మతుల్లా (బి) ముజీబ్‌ 16; తమీమ్‌ (బి) నబీ 36; షకీబ్‌ (ఎల్బీడబ్ల్యూ) (బి) ముజీబ్‌ 51; ముష్ఫికర్‌ (సి) నబీ (బి) దౌలత్‌ 83; సౌమ్య సర్కార్‌ (ఎల్బీడబ్ల్యూ) (బి) ముజీబ్‌ 3; మహ్ముదుల్లా (సి) నబీ (బి) గుల్బదిన్‌ 27; మొసద్దిక్‌ (బి) గుల్బదిన్‌ 35; సైఫుద్దీన్‌ (నాటౌట్‌) 2; ఎక్స్‌ట్రాలు 9; మొత్తం (50 ఓవర్లలో 7 వికెట్లకు) 262. వికెట్ల పతనం: 1–23, 2–82, 3–143, 4–151, 5–207, 6–251, 7–262. బౌలింగ్‌: ముజీబ్‌ 10–0–39–3, దౌలత్‌ 9–0–64–1, నబీ 10–0–44–1, గుల్బదిన్‌ 10–1–56–2, రషీద్‌ ఖాన్‌ 10–0–52–0, రహ్మత్‌ షా 1–0–7–0. అఫ్గానిస్తాన్‌ ఇన్నింగ్స్‌: గుల్బదిన్‌ నైబ్‌ (సి) లిటన్‌ దాస్‌ (బి) షకీబ్‌ 47; రహ్మత్‌ షా (సి) తమీమ్‌ (బి) షకీబ్‌ 24; హష్మతుల్లా (స్టంప్డ్‌) ముష్ఫికర్‌ (బి) మొసద్దిక్‌ 11; అస్గర్‌ అఫ్గాన్‌ (సి) సబ్‌ (షబ్బీర్‌ రహమాన్‌) (బి) షకీబ్‌ 20; నబీ (బి) షకీబ్‌ 0; సమీవుల్లా (నాటౌట్‌) 49; ఇక్రమ్‌ (రనౌట్‌) 11; నజీబుల్లా జద్రాన్‌ (స్టంప్డ్‌) ముష్ఫికర్‌ (బి) షకీబ్‌ 23; రషీద్‌ ఖాన్‌ (సి) మొర్తజా (బి) ముస్తఫిజుర్‌ 2; దౌలత్‌ జద్రాన్‌ (సి) ముష్ఫికర్‌ (బి) ముస్తఫిజుర్‌ 0; ముజీబ్‌ (బి) సైఫుద్దీన్‌ 0; ఎక్స్‌ట్రాలు 13; మొత్తం (47 ఓవర్లలో ఆలౌట్‌) 200. వికెట్ల పతనం: 1–49, 2–79, 3–104, 4–104, 5–117, 6–132, 7–188, 8–191, 9–195, 10–200.  బౌలింగ్‌: మష్రఫె మొర్తజా 7–0–37–0, ముస్తఫిజుర్‌ 8–1–32–2, సైఫుద్దీన్‌ 8–0–33–1, షకీబ్‌ 10–1–29–5, మెహదీ హసన్‌ మిరాజ్‌ 8–0–37–0, మొసద్దిక్‌ 6–0–25–1.    2: ప్రపంచకప్‌ మ్యాచ్‌లో అర్ధ సెంచరీ చేయడంతోపాటు ఐదు వికెట్లు తీసిన రెండో స్పిన్నర్‌గా షకీబ్‌ అల్‌ హసన్‌ గుర్తింపు పొందాడు. 2011 ప్రపంచకప్‌లో ఐర్లాండ్‌తో జరిగిన మ్యాచ్‌లో భారత ఆల్‌రౌండర్‌ యువరాజ్‌ సింగ్‌ (5/31; 50 నాటౌట్‌) ఈ ఘనత సాధించాడు.   1: ఈ ప్రపంచకప్‌లో షకీబ్‌ ఆరు మ్యాచ్‌లు ఆడి 476 పరుగులు చేసి, 10 వికెట్లు తీశాడు. ఒకే ప్రపంచకప్‌లో 400 కంటే ఎక్కువ పరుగులు చేయడంతోపాటు పది వికెట్లు కూడా తీసిన తొలి ప్లేయర్‌గా షకీబ్‌ గుర్తింపు పొందాడు.  

విండీస్‌ లక్ష్యం 292. స్కోరు 142/4గా ఉన్న దశలో కార్లోస్‌ బ్రాత్‌వైట్‌ క్రీజులోకి వచ్చాడు. ఇంకో మూడు ఓవర్లయ్యాక చూస్తే 164/7. ఇక జట్టు ఓటమికి మూడే అడుగుల దూరం. విజయానికి మాత్రం 128 పరుగుల సుదూర ప్రయాణం ఈ దశలో బ్రాత్‌వైట్‌ అద్భుత ఇన్నింగ్స్‌కు తెరలేపాడు. 9 బౌండరీలు, 5 భారీ సిక్సర్లతో ‘మ్యాచ్‌ సీన్‌’ మార్చేశాడు. టెయిలెండర్ల అండతో మెరుపు సెంచరీ సాధించాడు. ఇక 7 బంతుల్లో ఆరే పరుగులు కావాలి. ఆఖరి వికెట్‌ కావడం... అందునా అవతలి వైపు బ్యాట్స్‌మన్‌ లేకపోవడంతో సిక్స్‌తో ఆట ముగించేందుకు ప్రయత్నించాడు. అయితే అతడిని దురదృష్టం వెంటాడింది. లాంగాన్‌ బౌండరీ వద్ద బౌల్ట్‌ అద్భుత రీతిలో క్యాచ్‌ అందుకున్నాడు. కివీస్‌ ఊపిరిపీల్చుకోగా బ్రాత్‌వైట్‌ కుప్పకూలాడు. ప్రత్యర్థి ఆటగాళ్ల సాంత్వనతో తేరుకున్నాడు.    మాంచెస్టర్‌: ప్రపంచకప్‌లో శనివారం జరిగిన రెండు మ్యాచ్‌లు రసవత్తరంగా ముగిశాయి. భారత్‌ పసికూన అఫ్గాన్‌పై గెలిచేందుకు ఆఖరిదాకా పోరాడితే... కివీస్‌ను ఓడించేందుకు విండీస్‌ శక్తిమేర శ్రమించింది. కానీ వెస్టిండీస్‌ 5 పరుగుల దూరంలో ఆలౌటైంది. బ్రాత్‌వైట్‌ (82 బంతుల్లో 101; 9 ఫోర్లు, 5 సిక్సర్లు) వరల్డ్‌కప్‌లో చరిత్రకెక్కే సెంచరీ సాధించాడు. మ్యాచ్‌లో న్యూజిలాండ్‌ జట్టు గెలిచింది. పోరాటంతో బ్రాత్‌వైట్‌ కూడా గెలిచాడు. ఉత్కంఠభరిత మలుపులతో సాగిన ఈ మ్యాచ్‌లో మొదట కివీస్‌ 50 ఓవర్లలో 8 వికెట్లకు 291 పరుగులు చేసింది. అనంతరం లక్ష్యఛేదనకు దిగిన వెస్టిండీస్‌ను ఓపెనర్‌ గేల్‌ (84 బంతుల్లో 87; 8 ఫోర్లు, 6 సిక్స్‌లు), మిడిలార్డర్‌ బ్యాట్స్‌మన్‌ హెట్‌మైర్‌ (45 బంతుల్లో 54; 8 ఫోర్లు, 1 సిక్స్‌) నడిపించారు. కానీ కీలకమైన సమయంలో ఫెర్గుసన్‌ (3/59), బౌల్ట్‌ (4/30) విండీస్‌ ఇన్నింగ్స్‌ను దెబ్బమీద దెబ్బతీశారు. 164 పరుగులకే 7 వికెట్లను కోల్పోయిన కరీబియన్‌ జట్టు పరాజయానికి దగ్గరైంది. ఈ దశలో బ్రాత్‌వైట్, కీమర్‌ రోచ్‌ (31 బంతుల్లో 14; 1 సిక్స్‌)తో కలిసి ఎనిమిదో వికెట్‌కు 47 పరుగులు, కాట్రెల్‌కు జతగా తొమ్మిదో వికెట్‌కు 34 పరుగులు జోడించాడు. ఆఖరికి ఖాతా తెరవని థామస్‌ (0 నాటౌట్‌)ను కూడా కాచుకొని పదో వికెట్‌కు 41 పరుగులు జోడించాడు. 18 బంతుల్లో 33 పరుగులు అవసరమైన దశలో 48వ ఓవర్‌ వేసిన హెన్రీ బౌలింగ్‌లో బ్రాత్‌వైట్‌ జూలు విదిల్చాడు. 2, 6, 6, 6, 4, 1తో 25 పరుగులు పిండుకున్నాడు. ఇక 12 బంతుల్లో 8 పరుగులే కావాలి. నీషమ్‌ ఓవర్లో సింగిల్స్‌ తీయకుండా డాట్‌బాల్‌ ఆడిన బ్రాత్‌వైట్‌ నాలుగో బంతికి 2 పరుగులు తీసి 80 బంతుల్లో సెంచరీ పూర్తి చేసుకున్నాడు. ఆఖరి బంతిని సిక్సర్‌గా మలిచేందుకు యత్నించి బౌల్ట్‌ క్యాచ్‌ పట్టడంతో ఔటయ్యాడు. గెలుపుతీరం దాకా తీసుకొచ్చి ఔటైన బ్రాత్‌వైట్‌ పిచ్‌పైనే కూలబడ్డాడు. కివీస్‌ ఆటగాళ్లు టేలర్, విలియమ్సన్‌ సçహా ప్రత్యర్థులంతా ఓదార్చారు. బరువెక్కిన హృదయంతో బ్రాత్‌వైట్‌ మైదానం వీడాడు.  

సౌతాంప్టన్‌: శక్తి సామర్థ్యాలకు పూర్తి పరీక్షగా నిలిచే మ్యాచ్‌లు జట్టుకు అవసరమైనవేనని టీమిండియా కెప్టెన్‌ విరాట్‌ కోహ్లి అన్నాడు. ఓటమి ముప్పు తప్పించుకుంటూ ప్రపంచ కప్‌లో అఫ్గానిస్తాన్‌పై సాధించిన ఉత్కంఠభరిత గెలుపును ప్రస్తావిస్తూ అతడీ వ్యాఖ్యలు చేశాడు. ‘మేం వేసుకున్న ప్రణాళికలేవీ సాగని, ప్రతిభనంతా ప్రదర్శిస్తూ పుంజుకోవాల్సిన ఇలాంటి మ్యాచ్‌లు మా దృష్టిలో అతి ముఖ్యమైనవి. జట్టులో ప్రతి ఒక్కరూ తమ వంతు కోసం వేచి చూస్తున్నారు. బంతిని స్వింగ్‌ చేస్తూ షమీ అద్భుతంగా బౌలింగ్‌ చేశాడు. పిచ్‌ స్వభావం కారణంగా షాట్లు ఆడటం కష్టమైంది’ అని మ్యాచ్‌ అనంతరం కోహ్లి చెప్పుకొచ్చాడు. తొలుతే వికెట్లు పడగొట్టినా, బుమ్రాను సమయానుకూలంగా వాడుకుని ప్రత్యర్థికి హెచ్చరిక సందేశం పంపాలని ముందే అనుకున్నట్లు కోహ్లి తెలిపాడు. కెప్టెన్‌ నమ్మకమే నాకు ప్రేరణ: బుమ్రా బౌలింగ్‌కు దిగిన ప్రతిసారీ కెప్టెన్‌ తన మీద ఉంచే నమ్మకమే తనకు ప్రేరణ అని టీమిండియా పేసర్‌ జస్‌ప్రీత్‌ బుమ్రా అన్నాడు. అది తనకు ఎనలేని ఆత్మవిశ్వాసం ఇస్తుందని పేర్కొన్నాడు. అఫ్గాన్‌తో మ్యాచ్‌ లో తన చివరి రెండు ఓవర్లలో బుమ్రా ఏకంగా 7 యార్కర్లు వేయడం విశేషం. దీనిపై మాట్లాడుతూ ‘నెమ్మదిస్తున్న పిచ్‌కు తగిన విధంగా వికెట్లకు నేరుగా బౌలింగ్‌ చేస్తూ, యార్కర్లు సంధించా. వికెట్లు తీయకున్నా పరుగులు నిరోధిస్తూ ప్రత్యర్థి సాధించాల్సిన రన్‌రేట్‌ పెరిగేలా చేసి అవకాశాలు సృష్టించుకోవడం మా గేమ్‌ ప్లాన్‌’ అని అతడు వివరించాడు. ధోని సలహా ఇచ్చాడు: షమీ 49వ ఓవర్లో బుమ్రా తక్కువ పరుగులివ్వడం తన పని తేలిక చేసిందని పేసర్‌ షమీ వ్యాఖ్యానించాడు. అయినప్పటికీ దానిని ఓ సవాలుగా భావించానన్నాడు. చివరి ఓవర్లో, అందులోనూ ప్రపంచ కప్‌లో సాధించినందున హ్యాట్రిక్‌ను చాలా ప్రత్యేకమైనదిగా అతడు అభివర్ణించాడు. ‘ప్రపంచ కప్‌లో హ్యాట్రిక్‌లు చాలా అరుదు. ఇది మంచి అవకాశం. యార్కర్‌ వేసేందుకే ప్రయత్నించు అని ధోని సలహా ఇచ్చాడు. దానిని మైండ్‌లో పెట్టుకునే బౌలింగ్‌ చేశా’ అని షమీ తెలిపాడు. వికెట్‌ ఇవ్వకుండా మ్యాచ్‌లో అఫ్గాన్‌ ఆల్‌రౌండర్‌ నబీ చిరాకు పెట్టినా, ఆ ప్రభావం బౌలింగ్‌పై పడనీయలేదని, అతడిని ఔట్‌ చేస్తే తమ గెలుపు ఖాయమని తెలుసని అన్నాడు. ‘షార్ట్‌ బంతులు, బౌన్సర్లను ఎదుర్కొనడంలో అఫ్గాన్ల బలహీనతను గుర్తించి అందుకు తగ్గట్లు బౌలింగ్‌ చేశాం. ఫుల్‌ లెంగ్త్‌ బంతులు వేయకుండా జాగ్రత్తపడ్డాం’ అని షమీ అన్నాడు. కోహ్లికి జరిమానా సౌతాంప్టన్‌: అఫ్గాన్‌తో మ్యాచ్‌లో అతిగా అప్పీల్‌ చేసినందుకు భారత కెప్టెన్‌ విరాట్‌ కోహ్లి మ్యాచ్‌ ఫీజులో 25 శాతం కోతతో పాటు ఒక డి మెరిట్‌ పాయింట్‌ను ఎదుర్కొన్నాడు. 29వ ఓవర్‌ బుమ్రా బౌలింగ్‌లో రహ్మత్‌ షా ఎల్బీడబ్ల్యూకు అప్పీల్‌ చేయగా అంపైర్‌ అలీమ్‌ దార్‌ తిరస్కరించాడు. దీంతో కోహ్లి... అతడి వద్దకు వెళ్లి వాదనకు దిగాడు. దీనికి ఐసీసీ ప్రవర్తనా నియమావళిలోని 2.1 నిబంధన ప్రకారం లెవల్‌ 1 ఉల్లంఘన కింద భారత కెప్టెన్‌పై చర్యలు తీసుకున్నారు. ప్రస్తుతం కోహ్లి ఖాతాలో రెండు డి మెరిట్‌ పాయింట్లున్నాయి.   

ఇంగ్లండ్‌ గడ్డపై దక్షిణాఫ్రికా ప్రపంచకప్‌ ప్రస్థానం లీగ్‌ దశలోనే ముగిసింది. ఇప్పటి వరకు ఒకటే విజయంతో సరిపెట్టుకున్న సఫారీ ఐదు మ్యాచ్‌ల్లో ఓడింది. దీంతో సెమీస్‌ అవకాశాల్ని పూర్తిగా కోల్పోయింది. మరోవైపు పాకిస్తాన్‌ జట్టు ఎట్టకేలకు రెండో విజయాన్ని సాధించింది. ముందుగా బ్యాట్స్‌మెన్, తర్వాత బౌలర్లు సమష్టిగా కదం తొక్కడంతో దక్షిణాఫ్రికాను తేలిగ్గానే కంగుతినిపించింది. లండన్‌: పాకిస్తాన్‌ జట్టు సమష్టి శ్రమతో దక్షిణాఫ్రికాను బోల్తా కొట్టించింది. ఆదివారం జరిగిన పోరులో పాకిస్తాన్‌ 49 పరుగుల తేడాతో జయభేరి మోగించింది. ముందుగా బ్యాటింగ్‌కు దిగిన పాకిస్తాన్‌ నిర్ణీత 50 ఓవర్లలో 7 వికెట్లకు 308 పరుగులు చేసింది. ‘మ్యాన్‌ ఆఫ్‌ ద మ్యాచ్‌’ హరిస్‌ సొహైల్‌ (59 బంతుల్లో 89; 9 ఫోర్లు, 3 సిక్స్‌లు), బాబర్‌ ఆజమ్‌ (80 బంతుల్లో 69; 7 ఫోర్లు) రాణించారు.  తర్వాత లక్ష్యఛేదనకు దిగిన దక్షిణాఫ్రికా 50 ఓవర్లలో 9 వికెట్లకు 259 పరుగులు చేసి ఓడింది. డుప్లెసిస్‌ (79 బంతుల్లో 63; 5 ఫోర్లు), డికాక్‌ (60 బంతుల్లో 47; 3 ఫోర్లు, 2 సిక్స్‌లు) రాణించారు.   ఓపెనర్ల శుభారంభం పాక్‌కు ఓపెనర్లు ఇమామ్‌ ఉల్‌ హక్‌ (58 బంతుల్లో 44; 6 ఫోర్లు), ఫఖర్‌ జమాన్‌ (50 బంతుల్లో 44; 6 ఫోర్లు, 1 సిక్స్‌) శుభారంభం అందించారు. కుదురుగా ఆడుతున్న ఓపెనర్లను ఇమ్రాన్‌ తాహిర్‌ ఔట్‌ చేశాడు. తర్వాత బాబర్‌ ఆజమ్, హఫీజ్‌ (20)లు కూడా బాధ్యతగా ఆడటంతో సఫారీ బౌలర్లకు కష్టాలు తప్పలేదు. హఫీజ్‌ వెనుదిరిగాక వచ్చిన హరిస్‌ సొహైల్‌ కీలక ఇన్నింగ్స్‌ ఆడాడు. క్రీజ్‌లో పాతుకుపోయిన ఆజమ్‌తో కలిసి నాలుగో వికెట్‌కు 81 పరుగులు జోడించాడు. బాబర్‌ 61 బంతుల్లో అర్ధసెంచరీ పూర్తిచేసుకున్నాడు. జట్టు స్కోరు 224 పరుగుల వద్ద బాబర్‌ నిష్క్రమించగా, సొహైల్‌... ఇమాద్‌ వసీమ్‌ (23; 3 ఫోర్లు) కలిసి ఐదో వికెట్‌కు 71 పరుగులు జోడించారు. ధాటిగా ఆడిన సొహైల్‌ 38 బంతుల్లో అర్ధశతకం సాధించాడు. డుప్లెసిస్‌ మినహా... ఆరంభంలోనే ఆమ్లా (2) ఔట్‌ కాగా... డికాక్, కెప్టెన్‌ డుప్లెసిస్‌ క్రీజులో ఉన్నంతసేపు దక్షిణాఫ్రికా గెలుపు మీద ఆశలు పెట్టుకుంది. వీళ్లిద్దరు పాక్‌ బౌలర్లను చక్కగా ఎదుర్కొన్నారు. రెండో వికెట్‌కు 87 పరు గులు జోడించారు.  డికాక్‌తో పాటు స్వల్ప వ్యవధిలో మార్క్‌రమ్‌ (7)ను స్పిన్నర్‌ షాదాబ్‌ ఔట్‌ చేశాడు. అర్ధసెంచరీ పూర్తిచేసుకున్న డుప్లెసిస్‌ను ఆమిర్‌ పెవిలియన్‌ చేర్చాడు. 136 పరుగులకే 4 కీలక వికెట్లను కోల్పోయిన దక్షిణాఫ్రికా లక్ష్యానికి దూరమైంది. స్కోరు వివరాలు పాకిస్తాన్‌ ఇన్నింగ్స్‌: ఇమామ్‌ (సి అండ్‌ బి) తాహిర్‌ 44; ఫఖర్‌ (సి) ఆమ్లా (బి) తాహిర్‌ 44; బాబర్‌ (సి) ఇన్‌గిడి (బి) ఫెలుక్‌వాయో 69; హఫీజ్‌ ఎల్బీడబ్ల్యూ (బి) మార్క్‌రమ్‌ 20; సొహైల్‌ (సి) డికాక్‌ (బి) ఇన్‌గిడి 89; ఇమాద్‌ (సి) సబ్‌–డుమిని (బి) ఇన్‌గిడి 23; రియాజ్‌ (బి) ఇన్‌గిడి 4; సర్ఫరాజ్‌ నాటౌట్‌ 2; షాదాబ్‌ నాటౌట్‌ 1; ఎక్స్‌ట్రాలు 12; మొత్తం (50 ఓవర్లలో 7 వికెట్లకు) 308. వికెట్ల పతనం: 1–81, 2–98, 3–143, 4–224, 5–295, 6–304, 7–307. బౌలింగ్‌: రబడ 10–0–65–0, ఇన్‌గిడి 9–0–64–3, మోరిస్‌ 9–0–61–0, ఫెలుక్‌వాయో 8–0–49–1, తాహిర్‌ 10–0–41–2, మార్క్‌రమ్‌ 4–0–22–1. దక్షిణాఫ్రికా ఇన్నింగ్స్‌: ఆమ్లా ఎల్బీడబ్లూ (బి) ఆమిర్‌ 2; డికాక్‌ (సి) ఇమామ్‌ (బి) షాదాబ్‌ 47; డుప్లెసిస్‌ (సి) సర్ఫరాజ్‌ (బి ఆమిర్‌ 63; మార్క్‌రమ్‌ (బి) షాదాబ్‌ 7; డసెన్‌ (సి) హఫీజ్‌ (బి) షాదాబ్‌ 36; మిల్లర్‌ (బి) షాహిన్‌ 31;  ఫెలుక్‌వాయో నాటౌట్‌ 46; మోరిస్‌ (బి) రియాజ్‌ 16, రబడ (బి) రియాజ్‌ 3; ఇన్‌గిడి (బి) రియాజ్‌ 1; తాహిర్‌ నాటౌట్‌ 1; ఎక్స్‌ట్రాలు 6; మొత్తం (50 ఓవర్లలో 9 వికెట్లకు) 259. వికెట్ల పతనం: 1–4, 2–91, 3–103, 4–136, 5–189, 6–192, 7–222, 8–239, 9–246. బౌలింగ్‌: హఫీజ్‌ 2–0–11–0, ఆమిర్‌ 10–1–49–2, షాహిన్‌ 8–0–54–1, వసీమ్‌ 10–0–48–0, రియాజ్‌ 10–0–46–3, షాదాబ్‌ 10–1–50–3.

మాంచెస్టర్‌: చివరి ఓవర్‌ వరకు ఉత్కంఠగా సాగిన మ్యాచ్‌లో న్యూజిలాండ్‌ వెస్టిండీస్‌పై 5 పరుగుల తేడాతో విజయం సాధించింది. పాయింట్ల పట్టికలో మరోసారి అగ్రస్థానానికి చేరింది. టాస్‌ గెలిచి వెస్టిండీస్‌ ఫీల్డింగ్‌ ఎంచుకోవడంతో తొలుత బ్యాటింగ్‌ చేపట్టిన కివీస్‌ జట్టుకు ఆదిలోనే ఎదురుదెబ్బ తలిలింది. ఇన్నింగ్స్‌ తొలిబంతికే గప్టిల్‌ (0)ను ఔట్‌ చేసిన కాట్రెల్‌ ఐదో బంతికి మున్రో (0)ను బౌల్డ్‌ చేశాడు. రెండో బంతికే క్రీజులోకి వచ్చిన విలియమ్సన్‌... టేలర్‌తో కలిసి ఇన్నింగ్స్‌ను నడిపించాడు. విలియమ్సన్‌ (154 బంతుల్లో 148; 14 ఫోర్లు, 1 సిక్స్‌) వీరోచిత శతకానికి తోడు... టేలర్‌ (95 బంతుల్లో 69; 7 ఫోర్లు) రాణించడంతో న్యూజిలాండ్‌ నిర్ణీత 50 ఓవర్లలో 8 వికెట్ల నష్టానికి 291 పరుగులు చేసింది. విండీస్‌ బౌలర్‌ కాట్రెల్‌కు 4 వికెట్లు దక్కాయి.  అనూహ్యంగా మ్యాచ్‌ అటూ ఇటూ..! 292 పరుగుల భారీ లక్ష్యంతో బరిలోకి దిగిన వెస్టిండీస్‌ కుప్పకూలింది. 49 ఓవర్లలో 285 పరుగులకు ఆలౌట్‌ అయింది. ఓపెనర్‌ క్రిస్‌గేల్‌ (87), సెకండ్‌ డౌన్‌ బ్యాట్స్‌మన్‌ హెట్‌మైర్‌ (54) రాణించారు. మూడో వికెట్‌కు 122 పరుగులు జోడించారు. ఓ దశలో 27 ఓవర్లలో 7 వికెట్ల నష్టానికి 164 పరుగులు చేసిన వెస్టిండీస్‌ను మిడిలార్డర్‌ బ్యాట్స్‌మన్‌ కార్లోస్‌ బ్రాత్‌వైట్‌ 101 (82 బంతులు, 9 ఫోర్లు, 5 సిక్స్‌లు) గెలుపు అంచుల దాకా తీసుకెళ్లాడు. చివరి వికెట్‌కు 7 బంతుల్లో 6 పరుగులు మాత్రమే చేయాలి. అయితే, 49వ ఓవర్‌ చివరి బంతిని భారీ సిక్సర్‌గా మలిచి జట్టుకు అనూహ్య విజయాన్నందించాలనుకున్న అతని ఆశ నెరవేరలేదు. నీషమ్‌ బౌలింగ్‌లో బౌల్ట్‌కు క్యాచ్‌ ఇచ్చి అతను భారంగా పెలివిలియన్‌ చేరాడు. దీంతో విండీస్‌ కథ ముగిసింది. ఓటమి ఖాయమనుకున్న దశ నుంచి గెలుపు దిశగా వెస్టిండీస్‌ పయనించడం.. చివర్లో ఓటమి పాలవడం స్టేడియంలో ఉన్న ప్రతిఒక్కరినీ బాధింపజేసింది. ముఖ్యంగా బ్రాత్‌వైట్‌ పోరాట పటిమకు అందరూ ముగ్ధులయ్యారు.

ప్రపంచ కప్‌లో అజేయంగా దూసుకెళ్తున్న భారత్‌కు మరో గెలుపును తేలికగా తన ఖాతాలో జమ చేసుకునే అవకాశం. సంచలనాలు సృష్టిస్తుందనుకుంటే... కొంతైనా ప్రతిఘటించ లేకపోతున్న అఫ్గానిస్తాన్‌ను కుమ్మేసి పాయింట్లతో పాటు నెట్‌ రన్‌రేట్‌ను మెరుగుపర్చుకునే మార్గం. ఇప్పటిదాకా పేస్‌ బలమున్న ప్రత్యర్థులపై నెగ్గుతూ వచ్చిన కోహ్లి సేన... ఇప్పుడు స్పిన్‌ ప్రధాన అస్త్రమైన జట్టును ఎదుర్కోనుంది. ఇందులోనూ పైచేయి సాధిస్తే ఓ విధంగా పరిపూర్ణ సన్నాహంతో సెమీస్‌ రేసులో ముందుకెళ్లే వీలుంటుంది.   సౌతాంప్టన్‌: వరుసగా గట్టి ప్రత్యర్థుల పని పట్టి గెలుపు ఊపులో ఉన్న టీమిండియాకు... ఆ ఒత్తిడి నుంచి కాస్త ఊపిరి పీల్చుకునే అవకాశం. అఫ్గానిస్తాన్‌ రూపంలో బలహీన జట్టుతో శనివారం జరుగనున్న మ్యాచ్‌ ఇందుకు వీలు కల్పిస్తోంది. ఎక్కడా తగ్గకుండా ఊహించినట్లే ఆడుతూ వస్తున్న కోహ్లి సేనకు... ఈ క్రమంలో పనిలో పనిగా ఒకరిద్దరు ఆటగాళ్లకు తగిన ప్రాక్టీస్‌ కల్పించేదిగానూ మారనుంది. మరోవైపు అనుకున్నట్లు రాణించలేకపోతున్న అఫ్గానిస్తాన్‌ పోరాటంతో పరువు నిలబెట్టుకోవాలని చూస్తోంది. జోరు మీదున్న భారత్‌ను అడ్డుకోవడం వారికి ఎంతవరకు సాధ్యమో చూడాలి. ఆ ఒక్క మార్పుతోనే! భువనేశ్వర్‌ స్థానంలో మొహమ్మద్‌ షమీని తీసుకోవడం ఒక్కటే భారత్‌ తుది జట్టులో చేయనున్న మార్పుగా కనిపిస్తోంది. ఫిట్‌నెస్‌ జాగ్రత్తల దృష్ట్యా ఆల్‌ రౌండర్‌ విజయ్‌ శంకర్‌ను ఆడించడం ఇబ్బందికరంగా భావిస్తే దినేశ్‌ కార్తీక్, రిషభ్‌ పంత్‌లలో ఒకరికి స్థానం దక్కొ చ్చు. మిడిలార్డర్‌లో కేదార్‌ జాదవ్‌కు ఇంతవరకు బ్యాటింగ్‌ ప్రాక్టీస్‌ దక్కలేదు. మూడు మ్యాచ్‌ల్లో అతడు కేవలం 8 బంతులే ఎదుర్కొన్నాడు. మున్ముందు అవసరాలరీత్యా జాదవ్‌ను బ్యాటింగ్‌ ఆర్డర్‌లో ప్రమోట్‌ చేసే వీలుంది. ఓపెనర్‌ రోహిత్‌ రెండు సెంచరీలతో ఫామ్‌ను చాటగా, కెప్టెన్‌ కోహ్లి నుంచి శతకం కోసం అభిమానులు ఎదురుచూస్తున్నారు. ఇకపై టోర్నీ అంతా పూర్తిస్థాయి ఓపెనర్‌గా బాధ్యత మోయాల్సిన నేపథ్యంలో అందుకు తగినట్లుగా సిద్ధమయ్యేందుకు కేఎల్‌ రాహుల్‌కు ఈ మ్యాచ్‌ సరైన వేదిక. బుమ్రా, షమీల పేస్‌ను ఎదుర్కొనడమే సవాలంటే... స్పిన్‌ ద్వయం చహల్, కుల్దీప్‌లను కాచుకోవడం అఫ్గాన్‌ బ్యాట్స్‌మెన్‌కు శక్తికి మించిన పనే. పాక్‌తో మ్యాచ్‌లో భువనేశ్వర్‌ వంటి బౌలర్‌ అర్ధంతరంగా వైదొలగినా, మన బౌలింగ్‌ వనరుల లోతును చాటుతూ హార్దిక్, విజయ్‌ కర్తవ్యాన్ని నెరవేర్చారు. భారీ స్కోరు సాధించి తద్వారా రన్‌రేట్‌ను మెరుగుపర్చుకునే వ్యూహంతో టాస్‌ గెలిచిన జట్టు మొదట బ్యాటింగ్‌కే మొగ్గుచూపే వీలుంది. కూన నిలుస్తుందా? ‘పరుగులు కాదు... 50 ఓవర్లు నిలిచి ఆడాలని బ్యాట్స్‌మెన్‌ను కోరుతున్నా.’ ...ఇది అఫ్గాన్‌ కెప్టె న్‌ గుల్బదిన్‌ నైబ్‌ మాట. హష్మతుల్లా షాహిది అర్ధ సెంచరీ కారణంగా ఇంగ్లండ్‌తో జరిగిన గత మ్యాచ్‌లో ఈ కోరిక నెరవేరింది. కానీ, మోర్గాన్‌ విధ్వంసంతో వారి ఆత్మవిశ్వాసంపై పెద్ద దెబ్బే పడింది. ముఖ్యంగా ఆ చేదు జ్ఞాపకాల నుంచి మిస్టరీ స్పిన్నర్‌ రషీద్‌ ఖాన్‌ తేరుకోకుంటే జట్టు ప్రదర్శన మరింత పడిపోవడం ఖాయం. ఇప్పటివరకు అతడిపై పైచేయి సాధించిన వారంతా లెఫ్ట్‌ హ్యాండర్లే. భారత జట్టులో ఎడంచేతి వాటం బ్యాట్స్‌మన్‌ లేకపోవడం రషీద్‌కు కొంత ఊరట. అయితే, అనవసర మార్పులు టీంపై ప్రభావం చూపినట్లు తెలుస్తోంది. ఫామ్‌లో ఉన్న రహ్మత్‌ షాకు తోడు నూర్‌ అలీ, కెప్టెన్‌ నైబ్‌ పరుగులు చేస్తేనే పోటీ ఇవ్వగలుగుతుంది. ముఖాముఖి రికార్డు రెండు జట్ల మధ్య ఇప్పటి వరకు రెండు వన్డేలే జరిగాయి. అవి కూడా 2014, 2018 ఆసియా కప్‌లలో భాగంగానే కావడం గమనార్హం. వీటిలో భారత్‌ ఒక మ్యాచ్‌ నెగగ్గా... మరోటి ‘టై’ అయింది. పిచ్, వాతావరణం బ్యాటింగ్‌కు అనుకూలమైనప్పటికీ కొంత భిన్నమైన పిచ్‌. మైదానం చిన్నది. ఆట పూర్తిగా సాగిన గత ఐదు వన్డేల్లో మొదట బ్యాటింగ్‌ చేసిన జట్టు సగటు స్కోరు 286 మాత్రమే. మే నెలలో ఇంగ్లండ్‌–పాకిస్తాన్‌ మధ్య జరిగిన వన్డేలో మాత్రం ఏకంగా 734 పరుగులు నమోదయ్యాయి. ప్రస్తుత కప్‌లో వెస్టిండీస్‌తో మ్యాచ్‌లో 213 పరుగుల లక్ష్యాన్ని ఇంగ్లండ్‌ 33.1 ఓవర్లలోనే ఛేదించింది. భారత్‌... దక్షిణాఫ్రికాపై తొలి మ్యాచ్‌ను ఇక్కడే ఆడింది. 228 పరుగుల లక్ష్యాన్ని మన జట్టు 47.3 ఓవర్లలో అందుకుంది. మ్యాచ్‌కు వర్ష సూచన లేదు.   తుది జట్లు (అంచనా) భారత్‌: రాహుల్, రోహిత్, కోహ్లి (కెప్టెన్‌), విజయ్‌ శంకర్‌/దినేశ్‌ కార్తీక్‌/ రిషభ్‌ పంత్, ధోని, జాదవ్, హార్దిక్, కుల్దీప్, చహల్, షమీ, బుమ్రా. అఫ్గానిస్తాన్‌: నూర్‌ అలీ, గుల్బదిన్‌ నైబ్‌ (కెప్టెన్‌), రహ్మత్‌ షా, హష్మతుల్లా, అస్గర్, నబీ, రషీద్‌ ఖాన్, ఇక్రమ్, ఆఫ్తాబ్‌ ఆలమ్, దౌలత్, ముజీబ్‌. ప్రపంచకప్‌లో నేడు వెస్టిండీస్‌ X న్యూజిలాండ్‌ సాయంత్రం 6 గంటల నుంచి స్టార్‌ స్పోర్ట్స్‌–3లో ప్రత్యక్ష ప్రసారం నబీ, రషీద్‌, షమీ, బుమ్రా

శ్రీలంక సీనియర్‌ ఆటగాళ్లు మాథ్యూస్, మలింగ. ఒకరు బ్యాట్‌తో, మరొకరు బంతితో హాట్‌ ఫేవరెట్‌ ఇంగ్లండ్‌కు దిమ్మతిరిగే షాకిచ్చారు. ఈ టోర్నీలో డకౌట్లతో తీవ్ర విమర్శలెదుర్కొన్న మాథ్యూస్‌ అజేయ పోరాటంతో జట్టుకు గౌరవప్రద స్కోరు అందించాడు. తర్వాత మలింగ తన అనుభవాన్నంత రంగరించి ఇంగ్లిష్‌ బ్యాట్స్‌మెన్‌ను దెబ్బకొట్టాడు. దీంతో లంక ప్రపంచకప్‌లో రెండో విజయాన్ని నమోదు చేసింది.   లీడ్స్‌: ‘ఈ ప్రపంచకప్‌లో మేమూ ఆడుతున్నాం... మావైపూ కన్నెత్తి చూడండి’ అనే రీతిలో విజయం సాధించింది శ్రీలంక. శుక్రవారం జరిగిన పోరులో ఆతిథ్య ఇంగ్లండ్‌కు అనూహ్య షాకిస్తూ 20 పరుగుల తేడాతో గెలిచింది. ముందుగా శ్రీలంక 50 ఓవర్లలో 9 వికెట్ల నష్టానికి 232 పరుగులు చేసింది. మాథ్యూస్‌ (115 బంతుల్లో 85 నాటౌట్‌; 5 ఫోర్లు, 1 సిక్స్‌) చక్కని పోరాటం చేశాడు. ఇంగ్లండ్‌ బౌలర్లలో ఆర్చర్, మార్క్‌ వుడ్‌ చెరో 3 వికెట్లు తీశారు. అనంతరం లక్ష్యఛేదనకు దిగిన ఇంగ్లండ్‌ 47 ఓవర్లలో 212 పరుగుల వద్ద ఆలౌటైంది. స్టోక్స్‌ (89 బంతుల్లో 82 నాటౌట్‌; 7 ఫోర్లు, 4 సిక్స్‌లు) అజేయంగా నిలిచాడు. రూట్‌ (89 బంతుల్లో 57; 3 ఫోర్లు) రాణించాడు. ‘మ్యాన్‌ ఆఫ్‌ ద మ్యాచ్‌’ మలింగ (4/43) ఇంగ్లండ్‌ను వణికించాడు. స్పిన్నర్‌ ధనంజయ 3 వికెట్లు తీశాడు. ఆదుకున్న మాథ్యూస్‌... టాస్‌ గెలిచి బ్యాటింగ్‌కు దిగిన శ్రీలంక ఆదిలోనే ఓపెనర్లు కరుణరత్నే (1), కుశాల్‌ పెరీరా (2) వికెట్లను కోల్పోయింది. అప్పుడు జట్టు స్కోరు 2/3. ఈ దశలో అవిష్క ఫెర్నాండో (39 బంతుల్లో 49; 6 ఫోర్లు, 2 సిక్స్‌లు), కుశాల్‌ మెండిస్‌ (68 బంతుల్లో 46; 2 ఫోర్లు) ఆదుకున్నారు. ఫెర్నాండో ఔటయ్యాక వచ్చిన మాథ్యూస్‌ అద్భుతమైన పోరాటం చేశాడు. నాలుగో వికెట్‌కు కుశాల్‌ మెండిస్‌తో కలిసి 71 పరుగులు జోడించిన మాథ్యూస్‌... ధనంజయ (29)తో కలిసి ఆరో వికెట్‌కు 57 పరుగులు జతచేశాడు. జీవన్‌ (0) డకౌట్‌ కాగా, టెయిలెండర్లతో కలిసి జట్టుకు పోరాడే స్కోరును అందించాడు.   మలింగ కూల్చేశాడు... ఇటీవల 300 పైచిలుకు స్కోర్లను అవలీలగా సాధిస్తున్న ఇంగ్లండ్‌కు 233 పరుగుల లక్ష్యం ఏమంత కష్టమే కాదు. కానీ పిచ్‌ పరిస్థితులతో పాటు మలింగ వీరంగం ముందు ఇంగ్లండ్‌ బ్యాట్స్‌మెన్‌ తోకముడిచారు. అతని తొలి ఓవర్లోనే బెయిర్‌స్టో (0) డకౌటయ్యాడు. కాసేపటికి విన్స్‌ (18 బంతుల్లో 14; 2 ఫోర్లు) ఆటా ముగించాడు. ఈ దశలో రూట్, కెప్టెన్‌ మోర్గాన్‌ (35 బంతుల్లో 21; 2 ఫోర్లు) ఇన్నింగ్స్‌ను నిలబెట్టేందుకు కష్టపడ్డారు. కానీ మలింగ ఆ అవకాశం ఇవ్వలేదు. జట్టు స్కోరు 73 పరుగుల వద్ద మోర్గాన్‌ను ఉదాన ఔట్‌చేస్తే... అర్ధసెంచరీ పూర్తి చేసిన రూట్, కీలకమైన బట్లర్‌ (9 బంతుల్లో 10; ఫోర్‌) వికెట్లను మలింగ పడేశాడు. 144 పరుగులకే 5 వికెట్లను కోల్పోయిన ఇంగ్లండ్‌ కష్టాల్లో పడింది. ధనంజయ డిసిల్వా (3/32) లోయర్‌ ఆర్డర్‌ పనిపట్టడంతో ఇంగ్లండ్‌ కోలుకోలేకపోయింది. 186 స్కోరు వద్ద తొమ్మిదో వికెట్‌ కోల్పోవడంతో స్టోక్స్‌ వరుసగా భారీ షాట్లతో విరుచుకుపడ్డాడు. కానీ వుడ్‌ (0)ను నువాన్‌ ప్రదీప్‌ ఔట్‌ చేయడంతో ఇంగ్లండ్‌పై లంక విజయఢంకా మోగించింది. స్కోరు వివరాలు శ్రీలంక ఇన్నింగ్స్‌: కరుణరత్నే (సి) బట్లర్‌ (బి) ఆర్చర్‌ 1; కుశాల్‌ పెరీరా (సి) అలీ (బి) వోక్స్‌ 2; ఫెర్నాండో (సి) రషీద్‌ (బి) వుడ్‌ 49; కుశాల్‌ మెండిస్‌ (సి) మోర్గాన్‌ (బి) రషీద్‌ 46; మాథ్యూస్‌ (నాటౌట్‌) 85; జీవన్‌ మెండిస్‌ (సి అండ్‌ బి) రషీద్‌ 0; ధనంజయ డిసిల్వా (సి) రూట్‌ (బి) ఆర్చర్‌ 29; తిసారా పెరీరా (సి) రషీద్‌ (బి) ఆర్చర్‌ 2; ఉదాన (సి) రూట్‌ (బి) వుడ్‌ 6; మలింగ (బి) వుడ్‌ 1; ప్రదీప్‌ (నాటౌట్‌) 1; ఎక్స్‌ట్రాలు 10; మొత్తం (50 ఓవర్లలో 9 వికెట్లకు) 232.  వికెట్ల పతనం: 1–3, 2–3, 3–62, 4–133, 5–133, 6–190, 7–200, 8–209, 9–220. బౌలింగ్‌: వోక్స్‌ 5–0–22–1, ఆర్చర్‌ 10–2–52–3, వుడ్‌ 8–0–40–3, స్టోక్స్‌ 5–0–16–0, మొయిన్‌ అలీ 10–0–40–0, రషీద్‌ 10–0–45–2, రూట్‌ 2–0–13–0. ఇంగ్లండ్‌ ఇన్నింగ్స్‌: విన్స్‌ (సి) కుశాల్‌ మెండిస్‌ (బి) మలింగ 14; బెయిర్‌స్టో (ఎల్బీడబ్ల్యూ) (బి) మలింగ 0; రూట్‌ (సి) కుశాల్‌ పెరీరా (బి) మలింగ 57; మోర్గాన్‌ (సి అండ్‌ బి) ఉదాన 21; స్టోక్స్‌ (నాటౌట్‌) 82; బట్లర్‌ (ఎల్బీడబ్ల్యూ) (బి) మలింగ 10; మొయిన్‌ అలీ (సి) ఉదాన (బి) ధనంజయ డిసిల్వా 16; వోక్స్‌ (సి) కుశాల్‌ పెరీరా (బి) ధనంజయ డిసిల్వా 2; రషీద్‌ (సి) కుశాల్‌ పెరీరా (బి) ధనంజయ 1; ఆర్చర్‌ (సి) తిసారా పెరీరా (బి) ఉదాన 3; వుడ్‌ (సి) కుశాల్‌ పెరీరా (బి) ప్రదీప్‌ 0; ఎక్స్‌ట్రాలు 6; మొత్తం (47 ఓవర్లలో ఆలౌట్‌) 212. వికెట్ల పతనం: 1–1, 2–26, 3–73, 4–127, 5–144, 6–170, 7–176, 8–178, 9–186, 10–212. బౌలింగ్‌: మలింగ 10–1–43–4, ప్రదీప్‌ 10–1–38–1, ధనంజయ డిసిల్వా 8–0–32–3, తిసారా పెరీరా 8–0–34–0, ఉదాన 8–0–41–2, జీవన్‌ 3–0–23–0.  మాథ్యూస్‌

లీడ్స్‌: సెమీస్‌ రేసులో నిలవాలంటే ఆడబోయే నాలుగు మ్యాచ్‌లూ గెలవాల్సిన పరిస్థితుల్లో మాజీ చాంపియన్‌ శ్రీలంక శుక్రవారం టోర్నీ ఫేవరెట్‌ ఇంగ్లండ్‌ను ఎదుర్కోనుంది. ప్రస్తుతం ఐదు మ్యాచ్‌ల ద్వారా నాలుగు పాయింట్లతో (ఒక గెలుపు, రెండు రద్దు, రెండు ఓటములు) ఉన్న లంకకు... జోరుమీదున్న ఆతిథ్య జట్టును నిలువరించడం శక్తికి మించిన పనే కానుంది. కరుణరత్నె బృందం మిడిలార్డర్‌ బ్యాట్స్‌మెన్‌ ఘోర వైఫల్యాలతో పరాజయ బాటలో ఉండగా, అందుకు పూర్తి భిన్నంగా మోర్గాన్‌ సేన భీకర హిట్టింగ్‌తో దుమ్ము రేపుతోంది. కండరాల గాయంతో ఓపెనర్‌ జేసన్‌ రాయ్‌ దూరమైనా, బెయిర్‌స్టో సరైన సమయంలో జోరందుకుని ఇంగ్లండ్‌కు బెంగ లేకుండా చేశాడు. రూట్‌ నిలకడకు తోడు తానెంత విధ్వంసకరంగా ఆడగలడో గత మ్యాచ్‌లో కెప్టెన్‌ మోర్గాన్‌ చాటాడు. వీరికి ప్రత్యర్థి పేసర్లు లసిత్‌ మలింగ, నువాన్‌ ప్రదీప్‌ ఏ మేరకు కళ్లెం వేయగలరో చూడాలి. ఓపెనర్లు కెప్టెన్‌ కరుణ రత్నె, కుశాల్‌ పెరీరా మినహా మిగతా వారు పరుగులు చేయలేకపోతుండటం లంక ఓటములకు ప్రధానం కారణం. ఆస్ట్రేలియాతో జరిగిన మ్యాచ్‌లో 205/3 నుంచి 247కు ఆలౌటైన తీరే దీనికి నిదర్శనం. కుశాల్‌ మెండిస్, మాథ్యూస్, తిసారా పెరీరా పూర్తిగా విఫలమవుతున్నారు. ఈ త్రయం రాణిస్తే జట్టు ఇంగ్లండ్‌పై పోరాడగలదు. ఫామ్‌లో ఉన్న పేసర్లు ఆర్చర్, వుడ్‌లను తట్టుకుని వీరు క్రీజులో నిలవడం అనుమానమే.   ముఖాముఖి రికార్డు ప్రస్తుత బలాబలాలు ఎలా ఉన్నా మొత్తం వన్డే గెలుపోటముల గణాంకాల్లో ఇంగ్లండ్‌కు శ్రీలంక దీటుగా నిలుస్తోంది. ఇరు జట్లు ఇప్పటివరకు 74 మ్యాచ్‌ల్లో తలపడగా లంక 35 మ్యాచ్‌ల్లో గెలిచింది. ఇంగ్లండ్‌ 36 మ్యాచ్‌ల్లో విజయం సాధించింది. ఒక మ్యాచ్‌ ‘టై’ కాగా, రెండింట్లో ఫలితం తేలలేదు. ప్రపంచ కప్‌లో 10 మ్యాచ్‌లకుగాను నాలుగింట్లో లంక, ఆరు మ్యాచ్‌ల్లో ఇంగ్లండ్‌ గెలిచాయి.

సౌతాంప్టన్‌: ఇప్పటికే బొటన వేలి గాయంతో ఓపెనర్‌ శిఖర్‌ ధావన్‌ పూర్తిగా దూరమై, ఫిట్‌నెస్‌ సమస్యలతో పేసర్‌ భువనేశ్వర్‌ ఇబ్బంది పడుతున్న వేళ... టీమిండియాను కొంత కలవరపరిచే సంఘటన చోటుచేసుకుంది. బుధవారం ప్రాక్టీస్‌ సందర్భంగా పేసర్‌ జస్‌ప్రీత్‌ బుమ్రా వేసిన యార్కర్‌ను ఎదుర్కొనే క్రమంలో ఆల్‌రౌండర్‌ విజయ్‌ శంకర్‌ ఎడమ కాలి పాదానికి బంతి బలంగా తగిలింది. దీంతో అతడు నొప్పితో విలవిల్లాడాడు. అనంతరం పరిస్థితిని పర్యవేక్షించిన జట్టు మేనేజ్‌మెంట్‌ సాయంత్రానికి శంకర్‌ కోలుకున్నాడని, ఆందోళన అవసరం లేదని ప్రకటించింది. మరోవైపు గురువారం ప్రాక్టీస్‌లో దినేశ్‌ కార్తీక్‌ చాలాసేపు బ్యాటింగ్‌ సాధన చేశాడు. ఈ తీరు చూస్తుంటే శనివారం అఫ్గానిస్తాన్‌తో మ్యాచ్‌లో అతడు తుది జట్టులో ఉండే అవకాశం కనిపిస్తోంది. శంకర్‌ మాత్రం బ్యాట్‌ పట్టలేదు. కాసేపు జాగింగ్‌ చేశాడు. ఇతర ఆటగాళ్ల ప్రాక్టీస్‌ను గమనిస్తూ ఉండిపోయాడు. గాయం ప్రభావం లేనట్లు సాధారణంగానే నడిచాడు. చివర్లో కొద్దిసేపు బౌలింగ్‌కు దిగినా షార్ట్‌ రనప్‌తో సరిపెట్టాడు. ప్రస్తుత సమీకరణాల్లో జట్టు కూర్పులో కీలకంగా మారిన శంకర్‌కు టోర్నీ ప్రారంభానికి ముందు సైతం నెట్స్‌లో బంతి మోచేతికి బలంగా తాకింది. దీంతో అతడిని న్యూజిలాండ్‌పై సన్నాహక మ్యాచ్‌ ఆడించలేదు. ధావన్‌ దూరమై, రాహుల్‌ ఓపెనింగ్‌కు వెళ్లిన నేపథ్యంలో పాకిస్తాన్‌తో మ్యాచ్‌లో చోటుదక్కిన శంకర్‌ రెండు కీలక వికెట్లు తీశాడు. శుక్రవారం టీమిండియా ప్రాక్టీస్‌ నుంచి విరామం తీసుకోనుంది. శనివారం అఫ్గానిస్తాన్‌తో మ్యాచ్‌ ఆడనుంది. భువీ పరిస్థితేమిటో! ప్రపంచకప్‌లో జట్టు రెండో ప్రధాన పేసర్‌గా నమ్మకం ఉంచిన భువనేశ్వర్‌ మరో 8 రోజుల తర్వాతే మైదానంలో దిగే పరిస్థితి కనిపిస్తోంది. తొడ కండరాలు పట్టేయడంతో పాక్‌తో మ్యాచ్‌ నుంచి మధ్యలో తప్పుకొన్న భువీ ఇంగ్లండ్‌తో మ్యాచ్‌ (జూన్‌ 30) సమయానికి కానీ కోలుకోడని తెలుస్తోంది. ఇప్పటికైతే అతడు ఫిట్‌నెస్‌ సాధిస్తాడనే బీసీసీఐ భావిస్తోంది. భువీ... బుధవారం జాగింగ్‌కే పరిమతమయ్యాడు. నెట్స్‌లో బౌలింగ్‌ చేయలేదు. బ్యాట్స్‌మెన్‌ను గాయపర్చాలని బౌలర్లెవరూ కోరుకోరు. మా ప్రాక్టీస్‌ మేం చేసుకోవాలి కదా?. నావరకైతే బ్యాట్స్‌మెన్‌కు బంతులేయడమే మంచి సాధన. ఆ దిశగానే ప్రయత్నిస్తుంటా. కొన్నిసార్లు ఇలా జరుగుతుంటుంది. ఇదంతా ఆటలో ఒక భాగమే. నేనేం విజయ్‌ను లక్ష్యంగా చేసుకోలేదు (నవ్వుతూ). అతడు క్షేమంగానే ఉన్నాడు. ధావన్‌ జట్టుకు ముఖ్యమైన ఆటగాడు. తను దూరమవడం దురదృష్టకరం. దీనిని మర్చిపోయి ముందుకెళ్లాలి.      –జస్‌ప్రీత్‌ బుమ్రా, భారత పేసర్‌

భారత్‌ చేతిలో పరాజయం తర్వాత ప్రపంచ కప్‌లో ఆస్ట్రేలియా ఒక్కసారిగా చెలరేగుతోంది. గత రెండు మ్యాచ్‌లలో పాకిస్తాన్, శ్రీలంకలను ఓడించి జోరు పెంచిన కంగారూలు ఇప్పుడు ‘హ్యాట్రిక్‌’ విజయాన్ని అందుకున్నారు. తనదైన శైలిలో చెలరేగిన డేవిడ్‌ వార్నర్‌ మరో భారీ సెంచరీతో కదం తొక్కగా... ఉస్మాన్‌ ఖాజా, ఫించ్‌ అండగా నిలిచి భారీ స్కోరుకు కారణమయ్యారు. చిన్నదైన ట్రెంట్‌బ్రిడ్జ్‌ మైదానంలో బంగ్లా పేలవ బౌలింగ్‌ను చితక్కొట్టిన ఆసీస్‌ పరుగుల వరద పారించింది. కొండంత లక్ష్యం ముందుండగా బంగ్లా పోరాడేందుకు సిద్ధమైంది. సీనియర్లు ముష్ఫికర్, మహ్ముదుల్లా, తమీమ్, షకీబ్‌ తమ స్థాయిలో గట్టిగా ప్రయత్నించినా... వన్డేల్లో తమ అత్యధిక స్కోరు చేసినా విజయానికి చేరువలో రాలేకపోయింది. గత మ్యాచ్‌లో స్ఫూర్తిదాయక ఆటతో విండీస్‌పై భారీ లక్ష్యాన్ని ఛేదించి సత్తా చాటిన బంగ్లా... ఆసీస్‌ పదునైన బౌలింగ్‌లో మాత్రం చివరి వరకు అదే ధాటిని కనబర్చలేక ఓటమిపాలైంది. నాటింగ్‌హామ్‌: డిఫెండింగ్‌ చాంపియన్‌ ఆస్ట్రేలియా వరల్డ్‌ కప్‌లో ఐదో విజయంతో మళ్లీ అగ్రస్థానానికి చేరుకుంది. గురువారం ఇక్కడ జరిగిన లీగ్‌ మ్యాచ్‌లో ఆసీస్‌ 48 పరుగుల తేడాతో బంగ్లాదేశ్‌పై ఘన విజయం సాధించింది. టాస్‌ గెలిచి బ్యాటింగ్‌ ఎంచుకున్న ఆస్ట్రేలియా 50 ఓవర్లలో 5 వికెట్ల నష్టానికి 381 పరుగులు చేసింది. ‘మ్యాన్‌ ఆఫ్‌ ద మ్యాచ్‌’ డేవిడ్‌ వార్నర్‌ (147 బంతుల్లో 166; 14 ఫోర్లు, 5 సిక్సర్లు) కెరీర్‌లో 16వ సెంచరీ సాధించాడు. ఉస్మాన్‌ ఖాజా (72 బంతుల్లో 89; 10 ఫోర్లు), ఆరోన్‌ ఫించ్‌ (51 బంతుల్లో 53; 5 ఫోర్లు, 2 సిక్సర్లు) కీలక పాత్ర పోషించారు. తొలి వికెట్‌కు ఫించ్‌తో 121 పరుగులు జోడించిన వార్నర్, రెండో వికెట్‌కు ఖాజాతో 192 పరుగులు జత చేశాడు. అనంతరం బంగ్లాదేశ్‌ 50 ఓవర్లలో 8 వికెట్లకు 333 పరుగులు చేసింది. ముష్ఫికర్‌ రహీమ్‌ (97 బంతుల్లో 102 నాటౌట్‌; 9 ఫోర్లు, 1 సిక్స్‌) కెరీర్‌లో ఏడో సెంచరీ సాధించగా... మహ్ముదుల్లా (50 బంతుల్లో 69; 5 ఫోర్లు, 3 సిక్సర్లు), తమీమ్‌ ఇక్బాల్‌ (74 బంతుల్లో 62; 6 ఫోర్లు), షకీబ్‌ అల్‌ హసన్‌ (41 బంతుల్లో 41; 4 ఫోర్లు) రాణించారు.   రెండు శతక భాగస్వామ్యాలు... ఆస్ట్రేలియాకు ఓపెనర్లు వార్నర్, ఫించ్‌ మరోసారి అద్భుతమైన ఆరంభాన్ని అందించారు. గత మ్యాచ్‌లో ఫించ్‌ భారీ సెంచరీతో చెలరేగిపోతే ఈసారి ఆ బాధ్యతను వార్నర్‌ తీసుకున్నాడు. వీరిద్దరి చక్కటి షాట్లతో ఇన్నింగ్స్‌కు బలమైన పునాది వేశారు. 10 పరుగుల వ్యక్తిగత స్కోరు వద్ద వార్నర్‌ ఇచ్చిన క్యాచ్‌ను షబ్బీర్‌ వదిలేయడం ఆసీస్‌కు కలిసొచ్చింది. పది ఓవర్లు ముగిసేసరికి ఆసీస్‌ స్కోరు 53 పరుగులకు చేరింది. ఇదే జోరులో ముందుగా వార్నర్‌ 55 బంతుల్లో, ఆ తర్వాత ఫించ్‌ 47 బంతుల్లో అర్ధ సెంచరీలు పూర్తి చేసుకున్నారు. ఎట్టకేలకు ఫించ్‌ను తన తొలి ఓవర్లోనే ఔట్‌ చేసి పార్ట్‌టైమర్‌ సౌమ్య సర్కార్‌ ఓపెనింగ్‌ జోడీని విడదీశాడు. వన్‌డౌన్‌లో వచ్చిన ఖాజా వార్నర్‌కు చక్కటి సహకారం అందించాడు. షకీబ్‌ బౌలింగ్‌లో సింగిల్‌తో ఈ ప్రపంచ కప్‌లో వార్నర్‌ రెండో సెంచరీ (110 బంతుల్లో) పూర్తయింది. అనంతరం సైతం వార్నర్, ఖాజా దూకుడు తగ్గకుండా ఆడారు. ఫలితంగా ప్రపంచకప్‌ చరిత్రలో ఆసీస్‌ తొలిసారి మొదటి రెండు వికెట్లకు సెంచరీ భాగస్వామ్యాలు నమోదు చేసింది. సరిగ్గా 50 బంతుల్లో హాఫ్‌ సెంచరీ పూర్తి చేసుకున్న ఖాజా.. ముస్తఫిజుర్‌ వేసిన ఇన్నింగ్స్‌ 42వ ఓవర్లో పండగ చేసుకున్నాడు. ఈ ఓవర్లో 4 ఫోర్లు కొట్టిన మొత్తం 19 పరుగులు రాబట్టడం విశేషం. వార్నర్‌ ధాటిని కొనసాగిస్తూ 150 పరుగుల మైలురాయి (139 బంతుల్లో) అధిగమించాడు. చివరకు సర్కార్‌ బౌలింగ్‌లోనే థర్డ్‌మ్యాన్‌కు క్యాచ్‌ ఇవ్వడంతో అతడి అద్భుత ఇన్నింగ్స్‌ ముగిసింది. నంబర్‌ 4లో దిగిన మ్యాక్స్‌వెల్‌ (10 బంతుల్లో 32; 2 ఫోర్లు, 3 సిక్సర్లు) క్రీజ్‌లో ఉన్నంత సేపు అదరగొట్టాడు. రూబెల్‌ ఓవర్లో వరుస బంతుల్లో 6, 4, 6 బాదాడు. ఖాజా మరో ఫోర్‌ కొట్టడంతో ఈ ఓవర్లో 25 పరుగులు వచ్చాయి. రెండు పరుగుల వ్యవధిలో ఆసీస్‌ 3 వికెట్లు కోల్పోయింది. ఖాజాతో సమన్వయ లోపంతో మ్యాక్సీ రనౌట్‌ కాగా... ఖాజా, స్మిత్‌ (1)  వెంటవెంటనే వెనుదిరిగారు. 49 ఓవర్ల తర్వాత వర్షంతో ఆట ఆగిపోయినా... కొద్ది సేపటికి అంపైర్లు మళ్లీ కొనసాగించారు. చివరి ఓవర్లో స్టొయినిస్‌ (17 నాటౌట్‌) రెండు ఫోర్లు కొట్టడంతో మరో 13 పరుగులు జతచేరాయి. చివరి పది ఓవర్లలో ఆస్ట్రేలియా ఏకంగా 131 పరుగులు సాధించడం విశేషం.   రాణించిన షకీబ్‌... భారీ లక్ష్యాన్ని ఛేదించే క్రమంలో బంగ్లాకు పేలవ ఆరంభం లభించింది. లేని సింగిల్‌ తీసే ప్రయత్నంలో సౌమ్య సర్కార్‌ (10) రనౌట్‌ కావడంతో జట్టు తొలి వికెట్‌ కోల్పోయింది. ఇద్దరు సీనియర్లు తమీమ్, షకీబ్‌ కలిసి ఆదుకునే ప్రయత్నం చేశారు. సూపర్‌ ఫామ్‌లో ఉన్న షకీబ్‌ అదే జోరును కొనసాగించగా, తమీమ్‌ సొగసైన షాట్లు ఆడారు. ఫలితంగా పవర్‌ప్లే ఆసీస్‌లాగే బంగ్లా సరిగ్గా 53 పరుగులు చేసింది. వీరిద్దరు రెండో వికెట్‌కు 79 పరుగులు జోడించాక స్టొయినిస్‌ బౌలింగ్‌లో షకీబ్‌ వెనుదిరిగాడు. 65 బంతుల్లో అర్ధ సెంచరీ పూర్తి చేసుకున్న తమీమ్‌ను అద్భుత బంతితో స్టార్క్‌ బౌల్డ్‌ చేయడంతో బంగ్లా కష్టాల్లో పడింది. లిటన్‌ దాస్‌ (20) ఎక్కువసేపు నిలవలేకపోయాడు. ఈ దశలో ముష్ఫికర్, మహ్ముదుల్లా జోడి బంగ్లా బృందంలో విజయంపై ఆశలు రేపింది. వీరిద్దరు ఒకరితో పోటీ పడి మరొకరు దూకుడుగా ఆడారు. 54 బంతుల్లో ముష్ఫికర్‌ అర్ధసెంచరీ పూర్తి చేసుకోగా, జంపా ఓవర్లో రెండు భారీ సిక్సర్లు బాదిన మహ్ముదుల్లా 41 బంతుల్లోనే ఆ మైలురాయిని అందుకున్నాడు. 80 బంతుల్లోనే ఈ భాగస్వామ్యం 100 పరుగులు దాటడం విశేషం. సాధించాల్సిన రన్‌రేట్‌ బాగా పెరిగిపోయిన పరిస్థితుల్లో... 28 బంతుల్లో 80 పరుగులు చేయాల్సి ఉండగా మహ్ముదుల్లా, షబ్బీర్‌ (0)లను వరుస బంతుల్లో కూల్టర్‌ నైల్‌ ఔట్‌ చేయడంతో బంగ్లా పరాజయం ఖాయమైంది. స్కోరు వివరాలు   ఆస్ట్రేలియా ఇన్నింగ్స్‌: వార్నర్‌ (సి) రూబెల్‌ (బి) సర్కార్‌ 166; ఫించ్‌ (సి) రూబెల్‌ (బి) సర్కార్‌ 53; ఖాజా (సి) ముష్ఫికర్‌ (బి) సర్కార్‌ 89; మ్యాక్స్‌వెల్‌ (రనౌట్‌) 32; స్టొయినిస్‌ (నాటౌట్‌) 17; స్మిత్‌ (ఎల్బీ) (బి) ముస్తఫిజుర్‌ 1; క్యారీ (నాటౌట్‌) 11; ఎక్స్‌ట్రాలు 12; మొత్తం (50 ఓవర్లలో 5 వికెట్ల నష్టానికి ) 381.   వికెట్ల పతనం: 1–121, 2–313, 3–352, 4–353, 5–354.  బౌలింగ్‌: మొర్తజా 8–0–56–0, ముస్తఫిజుర్‌ 9–0–69–1, షకీబ్‌ 6–0–50–0, రూబెల్‌ 9–0–83–0, మెహదీ హసన్‌ 10–0–59–0, సర్కార్‌ 8–0–58–3.   బంగ్లాదేశ్‌ ఇన్నింగ్స్‌: తమీమ్‌ (బి) స్టార్క్‌ 62; సర్కార్‌ (రనౌట్‌) 10; షకీబ్‌ (సి) వార్నర్‌ (బి) స్టొయినిస్‌ 41; ముష్ఫికర్‌ (నాటౌట్‌) 102; లిటన్‌ దాస్‌ (ఎల్బీ) (బి) జంపా 20; మహ్ముదుల్లా (సి) కమిన్స్‌ (బి) కూల్టర్‌నైల్‌ 69; షబ్బీర్‌ రహమాన్‌ (బి) కూల్టర్‌నైల్‌ 0; మెహదీ హసన్‌ (సి) వార్నర్‌ (బి) స్టార్క్‌ 6; మొర్తజా (సి) మ్యాక్స్‌వెల్‌ (బి) స్టొయినిస్‌ 6; ఎక్స్‌ట్రాలు 17, మొత్తం (50 ఓవర్లలో 8 వికెట్లకు) 333.   వికెట్ల పతనం: 1–23, 2–102, 3–144, 4–175, 5–302, 6–302, 7–323, 8–333.   బౌలింగ్‌: స్టార్క్‌ 10–0–55–2, కమిన్స్‌ 10–1–65–0, మ్యాక్స్‌వెల్‌ 3–0–25–0, కూల్టర్‌నైల్‌ 10–0–58–2, స్టొయినిస్‌ 8–0–54–2, జంపా 9–0–68–1.   2: ప్రపంచకప్‌లో ఆసీస్‌ తరఫున వార్నర్‌ రెండో అత్యధిక వ్యక్తిగత స్కోరు (166) సాధించాడు. అగ్రస్థానంలో కూడా అతనే (178, అఫ్గానిస్తాన్‌పై 2015లో) ఉన్నాడు.   6: వార్నర్‌ కెరీర్‌లో 150కుపైగా స్కోరు చేయ డం ఇది ఆరోసారి. ఈ జాబితాలో రోహిత్‌  (7) మాత్రమే అతనికంటే ముందున్నాడు.   3: ఆసీస్‌ తరఫున అత్యధిక సెంచరీలు చేసిన ఆటగాళ్లలో గిల్‌క్రిస్ట్‌తో సమంగా వార్నర్‌ (16) నిలిచాడు. రికీ పాంటింగ్‌ (29), మార్క్‌వా (18) మాత్రమే ముందున్నారు. 3: ఆస్ట్రేలియాకు వన్డేల్లో ఇది మూడో అత్యుత్తమ స్కోరు. గతంలో ఆ జట్టు 434/4, 417/6 స్కోర్లు సాధించింది. వార్నర్‌ సెంచరీ సంబరం

నాటింగ్‌హామ్‌: ప్రపంచకప్‌లో సెమీస్‌ రేసులో దూసుకెళ్తున్న ఆస్ట్రేలియా నేడు జరిగే లీగ్‌ మ్యాచ్‌లో బంగ్లాదేశ్‌తో తలపడనుంది. సాధారణంగా అయితే ఐదుసార్లు ప్రపంచ చాంపియన్‌గా నిలిచిన ఆసీస్‌కు బంగ్లాదేశ్‌ ఏమంత క్లిష్ట ప్రత్యర్థి కానేకాదు. కానీ ఈ మెగా టోర్నీలో ఒకే ఒక్కడి జోరు ముందు ‘కంగారూ’ పడాల్సిందే. ఆ ఒక్కడు షకీబ్‌ అల్‌ హసన్‌. ఈ బంగ్లా ఆల్‌రౌండర్‌ బ్యాట్‌తో భీకరమైన ఫామ్‌లో ఉన్నాడు. బంతితో ప్రత్యర్థుల గుండెల్లో వణుకు పుట్టిస్తున్నాడు. ఆడిన నాలుగు ఇన్నింగ్స్‌లో వరుసగా 75, 64, 121, 124 స్కోర్లు చేశాడు. శ్రీలంకతో మ్యాచ్‌ వర్షార్పణమైంది. బౌలింగ్‌లో ఐదు వికె ట్లు తీశాడు. గత మ్యాచ్‌లో మాజీ చాంపియన్‌ వెస్టిండీస్‌ 300 పైచిలుకు లక్ష్యాన్ని నిర్దేశించినా షకీబ్‌ వీరోచిత పోరాటంతో బంగ్లాదేశ్‌ అలవోకగా ఛేదించింది. ఇలాంటి ఆటగాడు ఎదురైతే ఎంతటి మేటి ప్రత్యర్థికైనా కష్టాలు తప్పవు. ఇప్పుడు ఆస్ట్రేలియా వ్యూహమంతా షకీబ్‌ను కట్టడి చేయడంపైనే ఉంది. ఎందుకంటే రెండేళ్ల క్రితం షకీబ్‌ ఆల్‌రౌండ్‌ షోతోనే బంగ్లాదేశ్‌ టెస్టుల్లో కంగారూపై చారిత్రక విజయం సాధించింది. ఆసీస్‌పై కూడా చక్కని రికార్డు ఉన్న షకీబ్‌ ఆ జట్టు పాలిట సింహస్వప్నం కాగలడని ఆస్ట్రేలియా భయపడుతోంది. మరోవైపు ఆడిన ఐదు మ్యాచ్‌ల్లో ఒక్క భారత్‌ చేతిలో తప్ప అన్ని మ్యాచ్‌ల్లోనూ గెలిచిన ఆస్ట్రేలియా సమతూకంతో ఉంది. ఓపెనర్లు ఫించ్, వార్నర్‌లతో పాటు మిడిలార్డర్‌లో స్మిత్, ఖాజా, క్యారీలతో బ్యాటింగ్‌ ఆర్డర్‌ పటిష్టంగా ఉంది. ఆల్‌రౌండర్‌ స్టొయినిస్‌ కూడా ఫిట్‌నెస్‌ సాధించడంతో మార్‌‡్ష బెంచ్‌కు పరిమితం కావొచ్చు. ఇక బంగ్లా జట్టు విషయానికొస్తే గత మ్యాచ్‌లో బరిలోకి దిగి షకీబ్‌తో అజేయ పోరాటం చేసిన లిటన్‌ దాస్‌ను కొనసాగించడం ఖాయం. సౌమ్య సర్కార్, తమీమ్‌లు కూడా స్థిరంగా ఆడుతుండటం జట్టుకు కలిసివస్తుంది. ఇరుజట్ల ప్రదర్శనను పరిశీలిస్తే ఈ మ్యాచ్‌ ఏకపక్షంగా మాత్రం జరుగదని అర్థమవుతుంది. బంగ్లాకు కలిసొస్తే ఆసీస్‌కు షాకిచ్చినా ఆశ్చర్యపోనక్కర్లేదు. జట్లు (అంచనా) బంగ్లాదేశ్‌: మొర్తజా (కెప్టెన్‌), తమీమ్‌ ఇక్బాల్, సౌమ్య సర్కార్, షకీబ్, ముష్ఫికర్, లిటన్‌ దాస్, మహ్ముదుల్లా, మొసద్దిక్, సైఫుద్దీన్, ముస్తఫిజుర్, మిరాజ్‌. ఆస్ట్రేలియా: ఫించ్‌ (కెప్టెన్‌), వార్నర్, ఖాజా, స్మిత్, మ్యాక్స్‌వెల్, మార్‌‡్ష/స్టొయినిస్, క్యారీ, కమిన్స్, స్టార్క్, బెహ్రెన్‌డార్ఫ్, రిచర్డ్‌సన్‌. 18: ఆస్ట్రేలియా, బంగ్లాదేశ్‌ జట్ల మధ్య ఇప్పటివరకు 20 మ్యాచ్‌లు జరిగాయి. ఆస్ట్రేలియా 18 మ్యాచ్‌ల్లో గెలిచింది. బంగ్లాదేశ్‌ ఒక మ్యాచ్‌లో నెగ్గింది. మరో మ్యాచ్‌ రద్దయింది. ఇక ప్రపంచకప్‌లో బంగ్లాదేశ్‌తో జరిగిన రెండు మ్యాచ్‌ల్లోనూ ఆసీస్‌నే విజయం వరించింది.     

సౌతాంప్టన్‌: ఊహించినంతా అయింది. వరుస విజయాలతో ప్రపంచ కప్‌లో జోరు మీదున్న టీమిండియాకు ఎదురుదెబ్బ తగిలింది. గాయంతో బాధపడుతున్న ఓపెనర్‌ శిఖర్‌ ధావన్‌... టోర్నీ మొత్తానికే దూరమయ్యాడు. బుధవారం ఈ విషయాన్ని అధికారికంగా ప్రకటించారు. ఆస్ట్రేలియాతో ఈ నెల 9న జరిగిన మ్యాచ్‌లో పేసర్‌ కమిన్స్‌ వేసిన బంతి బలంగా తాకడంతో ధావన్‌ ఎడమ బొటన వేలిలో చీలిక వచ్చింది. నొప్పితో బాధపడుతూనే ఆడిన అతడు మ్యాచ్‌లో సెంచరీతో జట్టు విజయంలో కీలక పాత్ర పోషించాడు. మున్ముందు జట్టు అవసరాలరీత్యా ధావన్‌ కోలుకునే వరకు చూడాలని మేనేజ్‌మెంట్‌ భావించింది. అందుకని ఓపెనర్‌ మూడు మ్యాచ్‌ల వరకు అందుబాటులో ఉండడని ప్రకటిం చింది. అయితే, తాజా పరిస్థితి ప్రకారం జూలై రెండో వారం వరకు కూడా ధావన్‌ పూర్తి ఫిట్‌నెస్‌ సాధించే అవకాశం లేదని బీసీసీఐ స్పష్టం చేసింది. దీంతో అతడి స్థానాన్ని యువ వికెట్‌ కీపర్‌ బ్యాట్స్‌మన్‌ రిష భ్‌ పంత్‌తో భర్తీ చేయనున్నట్లు తెలిపింది. ఇప్పటికే స్టాండ్‌బైగా ఎంపిక చేసిన పంత్‌... పాకిస్తాన్‌తో ఆదివారం జరిగిన మ్యాచ్‌కు ముందే జట్టుతో చేరాడు. రోహిత్, కోహ్లిపై భారం ఫామ్‌లో ఉండీ ప్రతిష్టాత్మక టోర్నీకి అనూహ్యంగా దూరం కావడం వ్యక్తిగతంగా ధావన్‌ను తీవ్రంగా నిరాశకు గురిచేసే అంశమైతే, కీలకమైన అతడి సేవలు కోల్పోవడం కోహ్లి సేనను కలవరపాటుకు గురిచేసేదే. జట్టులో ఏకైక ఎడంచేతి వాటం బ్యాట్స్‌మన్‌ అయిన ధావన్‌కు ఐసీసీ టోర్నీల్లో అద్భుత రికార్డుంది. మొత్తం ఆరు సెంచరీలు (చాంపియన్స్‌ ట్రోఫీలో 3, ప్రపంచ కప్‌లలో 3) బాదాడు. అన్నింటికి మించి ధావన్‌–రోహిత్‌ శర్మ ప్రపంచ అత్యుత్తమ ఓపెనింగ్‌ జోడీ. వీరిద్దరు ఎన్నో చక్కటి ఆరంభాలు ఇచ్చారు. ఒకరు విఫలమైనా మరొకరు రాణిస్తూ... వన్‌డౌన్‌లో వచ్చే కెప్టెన్‌ కోహ్లికి అండగా నిలుస్తున్నారు. కొన్నేళ్లుగా భారత విజయ యాత్రలో ఈ త్రయానిదే ప్రధాన వాటా. ఇప్పుడు ధావన్‌ దూరమవడం కచ్చితంగా ప్రభావం చూపేదే. ఈ నేపథ్యంలో రోహిత్, కోహ్లిపై మరింత భారం పడుతుంది. రెండో ఓపెనర్‌గా రాహుల్‌ ముందు పెద్ద బాధ్యతే ఉంది.    జట్టు కూర్పుపై ప్రభావం ధావన్‌ బదులుగా ఎంపిక చేసిన పంత్‌కు తుది జట్టులో చోటు మాత్రంఅనుమానమే. అతడిని తీసుకుంటే నాలుగో స్థానంలో బ్యాటింగ్‌కు పంపాలి. హార్డ్‌ హిట్టర్‌ అయిన పంత్‌... మిడిలార్డర్‌కు తగిన రీతిలో స్ట్రయిక్‌ రొటేట్‌ చేయలేడు. రాహుల్‌పై భరోసా లేకుంటే ఓపెనర్‌గా పంత్‌ను పరీక్షించవచ్చు. అలాగైతే అది పెద్ద ప్రయోగమే అవుతుంది. ఎలాగూ స్కోరు పెంచే ఉద్దేశంలో నంబర్‌–4గా పాండ్యాను పంపుతున్నందున పంత్‌ అవసరం ఎంత అనేది చూడాలి. మరోవైపు పేసర్‌ భువనేశ్వర్‌ కండరాల నొప్పితో బాధపడుతున్న వేళ, బౌలింగ్‌ ప్రత్యామ్నాయంగానూ పనికొచ్చే ఆల్‌రౌండర్‌ విజయ్‌ శంకర్‌ వైపే జట్టు మొగ్గు చూపే వీలుంది. రాబోయే రెండు మ్యాచ్‌లు బలహీన అఫ్గానిస్తాన్, విండీస్‌పైనే కాబట్టి వాటిపై జట్టు కూర్పును పరీక్షించుకుంటే తర్వాత తప్పొప్పులను సరిచేసుకునే వీలుంటుంది. 2019 ప్రపంచ కప్‌లో ఇకపై భాగం కాలేకపోతున్నాననే ప్రకటన చేయడానికి భావోద్వేగానికి గురయ్యా. దురదృష్టవశాత్తు గాయం సమయానికి నయం కావడం లేదు. కానీ, మన జట్టు విజయ పరంపర ముందుకు సాగాలి. జట్టు సభ్యులు, క్రికెట్‌ ప్రేమికులు, భారత దేశం నుంచి దక్కిన ప్రేమ, మద్దతుకు నేను ధన్యుడిని. జై హింద్‌!     – ట్విట్టర్‌లో శిఖర్‌ ధావన్‌ పంత్‌కు జాక్‌పాట్‌! సరిగ్గా రెండు నెలల క్రితం రిషభ్‌ పంత్‌ను ప్రపంచ కప్‌ జట్టుకు ఎంపిక చేయకపోవడాన్ని దిగ్గజాలు సహా అందరూ తప్పుబట్టారు. స్వయంగా పంత్‌ తీవ్ర నిరాశ చెందాడు. ఇప్పుడు మాత్రం అదృష్టం అతడిని మరో రూపంలో వరించింది. అన్నింట్లోనూ చోటు దక్కకున్నా పరిస్థితులు కలిసొస్తే కనీసం ఒకటి, రెండు మ్యాచ్‌ల్లోనైనా పంత్‌ తుది జట్టులో ఉండే వీలుంది. తద్వారా ప్రపంచ కప్‌ జట్టు సభ్యుడిగా చిరస్థాయిగా పేరు నిలిచే అవకాశం లభించింది.

ప్రపంచ కప్‌లో అత్యంత ఉత్కంఠభరిత పోరుకు అద్భుత ముగింపు లభించింది. భారీ స్కోర్లు లేకపోయినా, పరుగుల వరద పారకపోయినా హోరాహోరీ సమరం ప్రేక్షకులను కట్టిపడేసింది. చివరకు ఈ సమయంలో సఫారీలపై కివీస్‌దే పైచేయి అయింది. కెప్టెన్‌ కేన్‌ విలియమ్సన్‌ స్ఫూర్తిదాయక ప్రదర్శనతో ముందుండి నడిపించగా న్యూజిలాండ్‌ చిరస్మరణీయ విజయం సాధించింది. 2011, 2015 ప్రపంచకప్‌ నాకౌట్‌ మ్యాచ్‌లలో కివీస్‌ చేతిలో ఓడి టోర్నీ నుంచి నిష్క్రమించిన దక్షిణాఫ్రికా ఇప్పుడు కూడా అదే జట్టు చేతిలో ఓడి టోర్నీలో తమ సెమీస్‌ అవకాశాలను పూర్తిగా కోల్పోయింది. 242 పరుగుల లక్ష్యాన్ని అందుకునే క్రమంలో ఒక దశలో కివీస్‌ తడబడ్డా... విలియమ్సన్, గ్రాండ్‌హోమ్‌ ఆరో వికెట్‌కు 91 పరుగులు జోడించి విజయానికి చేరువగా తెచ్చారు. చివరి 18 బంతుల్లో 17 పరుగులు కావాల్సిన స్థితిలో 11 బంతుల్లో 5 పరుగులే వచ్చాయి. ఈ దశలో విలియమ్సన్‌ తన క్లాస్, మాస్‌ కలగలిసిన బ్యాటింగ్‌తో జట్టును గెలిపించాడు. చివరి ఓవర్‌ రెండో బంతికి భారీ సిక్సర్‌తో స్కోరు సమం చేసి సెంచరీ అందుకున్న కెప్టెన్‌ తర్వాతి బంతికి మ్యాచ్‌ను ముగించాడు.    బర్మింగ్‌హామ్‌: ప్రపంచకప్‌లో న్యూజిలాండ్‌ అజేయ యాత్ర కొనసాగింది. బుధవారం ఇక్కడి ఎడ్జ్‌బాస్టన్‌ మైదానంలో ఆసక్తికరంగా సాగిన మ్యాచ్‌లో కివీస్‌ 4 వికెట్ల తేడాతో దక్షిణాఫ్రికాను ఓడించింది. వర్షం కారణంగా ఆట ఆలస్యం కావడంతో ఒక ఓవర్‌ను తగ్గించారు. టాస్‌ ఓడి ముందుగా బ్యాటింగ్‌కు దిగిన దక్షిణాఫ్రికా 49 ఓవర్లలో 6 వికెట్ల నష్టానికి 241 పరుగులు చేసింది. డసెన్‌ (64 బంతుల్లో 67 నాటౌట్‌; 2 ఫోర్లు, 3 సిక్సర్లు), ఆమ్లా (55; 4 ఫోర్లు) అర్ధ సెంచరీలు చేశారు. అనంతరం న్యూజిలాండ్‌ 48.3 ఓవర్లలో 6 వికెట్లకు 245 పరుగులు చేసింది. ‘మ్యాన్‌ ఆఫ్‌ ద మ్యాచ్‌’ విలియమ్సన్‌ (138 బంతుల్లో 106 నాటౌట్‌; 9 ఫోర్లు, 1 సిక్స్‌) శతకంతో చెలరేగగా, గ్రాండ్‌హోమ్‌ (47 బంతుల్లో 60; 5 ఫోర్లు, 2 సిక్సర్లు) కీలక ఇన్నింగ్స్‌ ఆడాడు.   మూడు అర్ధ సెంచరీ భాగస్వామ్యాలు... టోర్నీలో వరుసగా విఫలమవుతున్న దక్షిణాఫ్రికా బ్యాటింగ్‌ ఆర్డర్‌ మరోసారి దూకుడు కనబర్చడంలో విఫలమైంది. బౌల్ట్‌ తన తొలి ఓవర్లోనే డి కాక్‌ (5)ను బౌల్డ్‌ చేసి సఫారీలను దెబ్బ తీశాడు. ఈ దశలో ఆమ్లా, డు ప్లెసిస్‌ (23) కలిసి పరిస్థితిని చక్కదిద్దేందుకు ప్రయత్నించారు. అయితే పిచ్‌ బౌలింగ్‌కు అనుకూలిస్తుండటంతో వికెట్‌ కోల్పోకుండా జాగ్రత్తగా ఆడే ప్రయత్నంలో పరుగులు నెమ్మదించాయి. ఫెర్గూసన్‌ అద్భుత యార్కర్‌కు డు ప్లెసిస్‌ క్లీన్‌బౌల్డయ్యాడు. ఆ తర్వాత కూడా ఆమ్లా, మార్క్‌రమ్‌ (38; 4 ఫోర్లు) నెమ్మదిగా ఆడటంతో పరుగులు రావడమే గగనంగా మారింది. 75 బంతుల్లో ఆమ్లా అర్ధ సెంచరీ పూర్తయింది. ఈ భాగస్వామ్యం 52 పరుగులకు చేరిన తర్వాత ఆమ్లా కూడా బౌల్డ్‌గానే వెనుదిరిగాడు. మార్క్‌రమ్‌ కొద్ది సేపటికే పెవిలియన్‌ చేరాడు. ఈ స్థితిలో డసెన్, మిల్లర్‌ (36; 2 ఫోర్లు, 1 సిక్స్‌) ఆదుకున్నారు. ఒక దశలో వరుసగా ఎనిమిది ఓవర్ల పాటు ఒక్క బౌండరీ కూడా రాకపోయినా, ఆ తర్వాత మంచి షాట్లతో వీరిద్దరు లెక్క సరిచేశారు. ఫెర్గూసన్‌ ఓవర్లో వరుసగా రెండు ఫోర్లు కొట్టిన మిల్లర్, అదే ఓవర్లో ఔటయ్యాడు. డసెన్, మిల్లర్‌ ఐదో వికెట్‌కు 72 పరుగులు జత చేశారు. ఇన్నింగ్స్‌ చివరి రెండు బంతుల్లో డసెన్‌ వరుసగా 6, 4 కొట్టడంతో స్కోరు 240 పరుగులు దాటింది.   గ్రాండ్‌హోమ్‌ జోరు... ఛేదనలో న్యూజిలాండ్‌ బాగా ఇబ్బంది పడింది. రబడ రెండో ఓవర్లో రిటర్న్‌ క్యాచ్‌ ఇచ్చి మున్రో (9) వెనుదిరగడంతో కివీస్‌ తొలి వికెట్‌ కోల్పోయింది. రెండో వికెట్‌కు విలియమ్సన్, గప్టిల్‌ (59 బంతుల్లో 35; 5 ఫోర్లు) కలిసి 60 పరుగులు జోడించడంతో ఇన్నింగ్స్‌ కుదుటపడింది. భారీ షాట్‌ ఆడబోయి పట్టుతప్పిన గప్టిల్‌ తన కాలితోనే వికెట్లను తన్ని పెవిలియన్‌ చేరాడు! 8 పరుగుల వ్యవధిలో టేలర్‌ (1), లాథమ్‌ (1) ఔట్‌ కావడంతో కివీస్‌ కష్టాల్లో పడింది. విలియమ్సన్‌కు నీషమ్‌ (23) అండగా నిలిచాడు. ఐదో వికెట్‌కు 57 పరుగులు జత చేశారు. అయితే విలియమ్సన్‌కు తోడు గ్రాండ్‌హోమ్‌ దూకుడైన బ్యాటింగ్‌ కివీస్‌ను గెలిపించాయి. దక్షిణాఫ్రికా పేలవ ఫీల్డింగ్‌ కూడా కలిసొచ్చింది. 3  క్యాచ్‌లు వదిలేసిన మిల్లర్‌... విలియమ్సన్‌ను రనౌట్‌ చేసే బంగారు అవకాశాన్ని  చేజార్చాడు. స్కోరు వివరాలు దక్షిణాఫ్రికా ఇన్నింగ్స్‌: డి కాక్‌ (బి) బౌల్ట్‌ 5; ఆమ్లా (బి) సాన్‌ట్నర్‌ 55; డు ప్లెసిస్‌ (బి) ఫెర్గూసన్‌ 23; మార్క్‌రమ్‌ (సి) మున్రో (బి) గ్రాండ్‌హోమ్‌ 38; వాన్‌ డర్‌ డసెన్‌ (నాటౌట్‌) 67; మిల్లర్‌ (సి) బౌల్ట్‌ (బి) ఫెర్గూసన్‌ 36; ఫెలుక్‌వాయో (సి) విలియమ్సన్‌ (బి) ఫెర్గూసన్‌ 0; మోరిస్‌ (నాటౌట్‌) 6, ఎక్స్‌ట్రాలు 11, మొత్తం (49 ఓవర్లలో 6 వికెట్లకు) 241.   వికెట్ల పతనం: 1–9, 2–59, 3–111, 4–136, 5–208, 6–218.  బౌలింగ్‌: హెన్రీ 10–2–34–0, బౌల్ట్‌ 10–0–63–1, ఫెర్గూసన్‌ 10–0–59–3, గ్రాండ్‌హోమ్‌ 10–0–33–1, సాన్‌ట్నర్‌ 9–0–45–1. న్యూజిలాండ్‌ ఇన్నింగ్స్‌: గప్టిల్‌ (హిట్‌వికెట్‌) (బి) ఫెలుక్‌వాయో 35; మున్రో (సి అండ్‌ బి) రబడ 9; విలియమ్సన్‌ (నాటౌట్‌) 106; టేలర్‌ (సి) డి కాక్‌ (బి) మోరిస్‌ 1; లాథమ్‌ (సి) డి కాక్‌ (బి) మోరిస్‌ 1; నీషమ్‌ (సి) ఆమ్లా (బి) మోరిస్‌ 23; గ్రాండ్‌హోమ్‌ (సి) డు ప్లెసిస్‌ (బి) ఇన్‌గిడి 60; సాన్‌ట్నర్‌ (నాటౌట్‌) 2; ఎక్స్‌ట్రాలు 8; మొత్తం (48.3 ఓవర్లలో 6 వికెట్లకు) 245.   వికెట్ల పతనం: 1–12, 2–72, 3–74, 4–80, 5–137, 6–228.  బౌలింగ్‌: రబడ 10–0–42–1, ఇన్‌గిడి 10–1–47–1, మోరిస్‌ 10–0–49–3, ఫెలుక్‌వాయో 8.3–0–73–1, తాహిర్‌ 10–0–33–0. విలియమ్సన్‌

న్యూఢిల్లీ: భారత్‌ చేతిలో పరాభవం తర్వాత పాక్‌ ఆటగాళ్లపై తీవ్రస్థాయిలో అటు అభిమానులు, ఇటు పాకిస్తాన్‌ మాజీ క్రికెటర్లు విరుచుకుపడుతున్నారు. ఈ విమర్శల తాకిడి షోయబ్‌ మాలిక్‌ భార్య, భారత టెన్నిస్‌ స్టార్‌ సానియా మీర్జాను తాకాయి. నైట్‌ క్లబ్‌లో షోయబ్‌ సహా పలువురు క్రికెటర్లతో ఆమె డైనింగ్‌ టేబుల్‌ పంచుకున్న ఫొటోపై పాకిస్తాన్‌ నటి వీణా మాలిక్‌ వ్యంగ్యాస్త్రాలు సంధించింది. ‘మీ అబ్బాయిని కూడా తీసుకెళ్లావా? జాగ్రత్త... జంక్‌ ఫుడ్‌ ఆటగాళ్లకు మంచిదికాదన్న సంగతి ప్లేయర్‌వైన నీకు తెలియదా’ అని సానియాను దెప్పిపొడుస్తూ వీణా మాలిక్‌ ట్వీట్‌ చేసింది. దీనికి టెన్నిస్‌ స్టార్‌ స్పందించింది. ‘వీణా... నేను నా కుమారుణ్ని అక్కడికి తీసుకెళ్లలేదు. వాడినెలా చూసుకోవాలో నీకంటే, అందరికంటే నాకే బాగా తెలుసు. ఇకపోతే నేనేమీ పాక్‌ జట్టు డైటీషియన్‌ను (పోషకాహార నిపుణులు) కాదు. ప్రిన్సిపాల్‌నో, టీచర్‌నో అంతకంటే కాదు. నీ స్థానంలో నేను ఉండి ఉంటే మ్యాగజిన్‌ కవర్‌పై ప్రచురితమైన నీ అశ్లీల చిత్రాలు నీ పిల్లలకు ఎంత ప్రమాదకరమో అనే విషయం గురించి ఆలోచించేదాన్ని’ అని ట్వీట్‌ చేసింది. ఈ వ్యవహారంపై సానియా భర్త షోయబ్‌ నిర్వేదం చెందాడు. ఆటగాళ్ల కుటుంబ సభ్యుల్ని కూడా విమర్శించడం తగదని హితవు పలికాడు. ‘మేం మ్యాచ్‌ ముందురోజు క్లబ్‌కు వెళ్లలేదు. రెండ్రోజుల ముందు వెళ్లిన ఫొటో అది. దాన్ని పట్టుకొని నిందించడమేంటి. 20 ఏళ్లుగా పాక్‌ క్రికెట్‌కు సేవలందించిన నన్ను ఇలా అవమానిస్తే ఎలా’ అని అసంతృప్తి వ్యక్తం చేశాడు. 

సాక్షి క్రీడా విభాగం: గత కొన్నేళ్లలో వన్డేల్లో భారీగా పరుగులు సాధించిన, రికార్డులు నమోదు చేసిన కోహ్లి, రోహిత్, గేల్, డివిలియర్స్‌ తదితర ఆటగాళ్లతో కూడిన జాబితాను చూస్తే ఇయాన్‌ మోర్గాన్‌ పేరు కనిపించదు. అతను ఓపెనర్‌ కాకపోవడమే అందుకు ప్రధాన కారణం. మోర్గాన్‌ తన కెరీర్‌లో ఎక్కువ భాగం ఐదో స్థానంలోనే బ్యాటింగ్‌కు దిగాడు. ఇంగ్లండ్‌ కూడా తమ జట్టుకు ఫినిషర్‌గానే అతడిని చూసింది. అయితే మొదటి నుంచీ అతని బ్యాటింగ్‌ శైలి దూకుడుగానే ఉంటుంది. రెండు దేశాల తరఫున అంతర్జాతీయ క్రికెట్‌ ఆడిన అరుదైన ఆటగాళ్లలో మోర్గాన్‌ కూడా ఒకడు. ఐర్లాండ్‌లో పుట్టిన అతను తన మాతృదేశం తరఫునే అరంగ్రేటం చేశాడు. స్కాట్లాండ్‌తో జరిగిన తొలి మ్యాచ్‌లో ‘మ్యాన్‌ ఆఫ్‌ ద మ్యాచ్‌’ అయిన మోర్గాన్‌... 99 పరుగుల వద్ద రనౌట్‌ అయి ఆ మ్యాచ్‌ను ఎప్పటికీ మరచిపోలేని విధంగా మార్చుకున్నాడు! దాదాపు మూడేళ్ల పాటు ఐర్లాండ్‌కు ఆడిన (23 వన్డేలు) అనంతరం అతడిని ఇంగ్లండ్‌ సాదరంగా ఆహ్వానించింది. అనంతరం 2010 టి20 ప్రపంచ కప్‌ను గెలుచున్న ఇంగ్లండ్‌ జట్టులో మోర్గాన్‌ కీలక పాత్ర పోషించాడు. మధ్యలో టెస్టు క్రికెటర్‌గా నిలదొక్కుకునే ప్రయత్నం చేసినా, అది తన వల్ల కాదని గుర్తించి రెండేళ్లకే గుడ్‌బై చెప్పేశాడు. ఐపీఎల్‌ అనుభవంతో అతని బ్యాటింగ్‌లో మరింత ధాటి పెరిగింది. ఆ తర్వాత బ్యాట్స్‌మన్‌గా మోర్గాన్‌ స్థానానికి తిరుగు లేకుండా పోయింది. మోర్గాన్‌ కెరీర్‌లో మేలి మలుపు 2014 క్రిస్మస్‌ సమయంలో వచ్చింది. వన్డేల్లో ఇంగ్లండ్‌ పేలవ ప్రదర్శన చూసీ చూసీ విసుగెత్తిన బోర్డు ఉన్నపళంగా కుక్‌ను తప్పించేసి మోర్గాన్‌ను కెప్టెన్‌గా ప్రకటించింది. రెండు నెలల తర్వాత జరిగిన ప్రపంచకప్‌లోనూ ఇంగ్లండ్‌ పేలవ ప్రదర్శన కొనసాగింది. బంగ్లా చేతిలో ఓటమితో క్వార్టర్‌ ఫైనల్‌ అవకాశం పోయింది. ఇంకా నాయకుడిగా కుదురుకోని మోర్గాన్‌ కూడా విఫలమయ్యాడు. అయితే ఆ తర్వాత జట్టు ప్రక్షాళన కార్యక్రమం సాగింది. వన్డేల నుంచి సీనియర్లు అండర్సన్, బ్రాడ్, బెల్‌లను తప్పించడంలో మోర్గాన్‌దే కీలక పాత్ర. ఆ తర్వాత విధ్వంసక బ్యాట్స్‌మెన్‌తో జట్టును నింపి స్వయంగా చెలరేగి ఆడుతూ సహచరులలో స్ఫూర్తిని నింపాడు. అంతే...ఇంగ్లండ్‌ కొత్త ప్రస్థానం మొదలైంది. వన్డేల్లో ప్రపంచ రికార్డు స్కోరు నమోదు చేసిన జట్టు మళ్లీ అదే రికార్డును బద్దలు కొట్టింది. 2015 ప్రపంచ కప్‌ తర్వాత ఈ వరల్డ్‌ కప్‌కు ముందు ఏకంగా 18 సార్లు 350కు పైగా స్కోర్లు నమోదు చేస్తే నాలుగు సార్లు 400 పరుగులు దాటింది. వన్డేల్లో నంబర్‌వన్‌గా అవతరించిన ఇంగ్లండ్‌... మోర్గాన్‌ నాయకత్వంలో ఆడిన 13 వన్డే సిరీస్‌లలో 12 గెలుచుకుంది. ఇప్పుడు సొంతగడ్డపై ఇంగ్లండ్‌ను ఫేవరెట్‌గా చూస్తున్నారంటే అదంతా గత నాలుగేళ్లలో మోర్గాన్‌ నాయకత్వంలో వచ్చిన మార్పే కారణం. ఒక ప్రపంచకప్‌లో ఇంగ్లండ్‌ అత్యధికంగా 22 సిక్సర్లు (2007లో) కొడితే ఇవాళ ఒక్క మ్యాచ్‌లోనే జట్టు 25 సిక్సర్లు బాదింది. తన బ్యాటింగ్‌తో పాటు ఇదే జోరును జట్టు కొనసాగిస్తే వరల్డ్‌ కప్‌ విజేతగా ఈ ‘ఐరిష్‌ మ్యాన్‌’ చరిత్రలో నిలిచిపోవడం ఖాయం. 2003 ప్రపంచకప్‌లో భారత్, ఇంగ్లండ్‌ మ్యాచ్‌ను దక్షిణాఫ్రికాలో ఉండి ప్రేక్షకుడిగా చూశాను. కాడిక్‌ బౌలింగ్‌లో పక్కకు జరుగుతూ మిడ్‌వికెట్‌ మీదుగా టెండూల్కర్‌ కొట్టిన భారీ సిక్సర్‌ దాదాపు మైదానం బయటకు వెళ్లింది. నా జీవితంలో అలాంటి భారీ సిక్సర్‌ ఎప్పుడూ చూడలేదు. మ్యాచ్‌ గురించి నాకు ఆ సిక్సర్‌ తప్ప ఏమీ గుర్తు లేదు. అప్పటినుంచి సిక్సర్ల మోజు పెరిగిపోయిందంతే. –ఒక ఇంటర్వ్యూలో మోర్గాన్‌     

ఇంగ్లండ్‌ అభిమానులు ప్రపంచ కప్‌లో ఎప్పుడెప్పుడా అని ఎదురు చూసిన ఇన్నింగ్స్‌ రానే వచ్చింది. సింగిల్‌ తీసినంత ఈజీగా సిక్సర్లు కొట్టిన కెప్టెన్‌ ఇయాన్‌ మోర్గాన్‌ ఒక్కసారిగా కప్‌కు ఊపు తెచ్చేశాడు. అతని దెబ్బకు అఫ్గాన్‌ ఆటగాళ్లు అసలైన పసికూనల్లా కనిపించారు. ఒకటి, రెండు, మూడు... ఇలా బ్యాట్‌కు తగిలిన వెంటనే అలా బంతి గాల్లో తేలిపోతూ స్టాండ్స్‌లోకి పడుతుంటే వారంతా ప్రేక్షకుల్లా నివ్వెరపోయి చూస్తుండటం మినహా ఏమీ చేయలేకపోయారు. ఎలా బంతి వేసినా అది చివరకు సిక్సర్‌గా మారాల్సిందే అన్నంత కసిగా మోర్గాన్‌ బాదడంతో మాంచెస్టర్‌ మైదానంలో పరుగుల పండగ సాగింది. చివరకు మోర్గాన్‌ లెక్క భారీ సెంచరీ సహా 17 సిక్సర్ల ప్రపంచ రికార్డు వద్ద ఆగింది... ఒక్క సిక్సర్లతోనే వంద పరుగులు సాధించిన తొలి ఆటగాడిగా నిలిచిన తమ కెప్టెన్‌కు తోడుగా బెయిర్‌స్టో, రూట్‌ కూడా రాణించడంతో ప్రపంచకప్‌లో ఇంగ్లండ్‌ అత్యధిక స్కోరు నమోదు చేసింది. ఊహించినట్లుగానే అఫ్గానిస్తాన్‌ లక్ష్యానికి అందనంత దూరంలో నిలిచిపోయి మరో పరాజయాన్ని తమ ఖాతాలో వేసుకుంది.     మాంచెస్టర్‌: రికార్డుల మోత మోగిన మ్యాచ్‌లో ఫేవరెట్‌ ఇంగ్లండ్‌ మరో అద్భుత విజయాన్ని నమోదు చేసింది. మంగళవారం ఇక్కడి ఓల్డ్‌ ట్రఫోర్డ్‌ మైదానంలో జరిగిన పోరులో ఇంగ్లండ్‌ 150 పరుగుల తేడాతో అఫ్గనిస్తాన్‌పై ఘన విజయం సాధించింది. టాస్‌ గెలిచి ముందుగా బ్యాటింగ్‌ ఎంచుకున్న ఇంగ్లండ్‌ 50 ఓవర్లలో 6 వికెట్ల నష్టానికి 397 పరుగులు చేసింది. ‘మ్యాన్‌ ఆఫ్‌ ద మ్యాచ్‌’ ఇయాన్‌ మోర్గాన్‌ (71 బంతుల్లో 148; 4 ఫోర్లు, 17 సిక్సర్లు) భారీ శతకం నమోదు చేయగా... బెయిర్‌స్టో (99 బంతుల్లో 90; 8 ఫోర్లు, 3 సిక్సర్లు), జో రూట్‌ (82 బంతుల్లో 88; 5 ఫోర్లు, 1 సిక్స్‌) ఆ అవకాశం చేజార్చుకున్నారు. అనంతరం అఫ్గానిస్తాన్‌ 50 ఓవర్లలో 8 వికెట్ల నష్టానికి 247 పరుగులు చేసింది. హష్మతుల్లా షాహిది (100 బంతుల్లో 76; 5 ఫోర్లు, 2 సిక్సర్లు) టాప్‌స్కోరర్‌గా నిలిచాడు. ఆడిన ఐదు మ్యాచ్‌ల్లో ఐదు పరాజయాలతో సెమీస్‌ రేసు నుంచి తప్పుకున్న తొలి జట్టుగా అఫ్గానిస్తాన్‌ ఖాయమైంది.   రెండు సెంచరీలు చేజారె... ఇంగ్లండ్‌కు బెయిర్‌స్టో మరోసారి శుభారంభం అందించాడు. రాయ్‌ గాయపడటంతో జట్టులోకి వచ్చిన విన్స్‌ (26) పెద్దగా రాణించకపోయినా... 120 పరుగుల బెయిర్‌స్టో, రూట్‌ రెండో వికెట్‌ భాగస్వామ్యం ఇంగ్లండ్‌ భారీ స్కోరుకు బాటలు వేసింది. వీరిద్దరు చక్కటి సమన్వయంతో బ్యాటింగ్‌ చేస్తూ అఫ్గాన్‌ బౌలర్లు అందరిపై ఆధిపత్యం ప్రదర్శించారు. ఈ క్రమంలో 61 బంతుల్లో బెయిర్‌స్టో, 54 బంతుల్లో జో రూట్‌ హాఫ్‌ సెంచరీలు పూర్తి చేసుకున్నారు. పార్ట్‌నర్‌షిప్‌ 100 పరుగులు దాటిన తర్వాత సెంచరీకి చేరువైన దశలో నైబ్‌కు రిటర్న్‌ క్యాచ్‌ ఇచ్చి బెయిర్‌స్టో నిష్క్రమించాడు. అనంతరం మోర్గాన్‌ మెరుపుల ముందు చాలా సేపు రూట్‌ ప్రేక్షక పాత్ర పోషించాల్సి వచ్చింది. 189 పరుగుల మోర్గాన్, రూట్‌ మూడో వికెట్‌ భాగస్వామ్యంలో మోర్గాన్‌ కొట్టినవి 142 పరుగులు కాగా, రూట్‌ 43 పరుగులు చేశాడు. చివరకు నైబ్‌ బౌలింగ్‌లోనే భారీ షాట్‌ ఆడబోయి లాంగాన్‌లో క్యాచ్‌ ఇవ్వడంతో ఈ టోర్నీలో రూట్‌ మూడో సెంచరీ అవకాశాన్ని కోల్పోయాడు. వీరిద్దరు ఔటైన తర్వాత చివర్లో మొయిన్‌ అలీ (9 బంతుల్లో 31 నాటౌట్‌; 1 ఫోర్, 4 సిక్సర్లు) కూడా చెలరేగడంతో ఇంగ్లండ్‌ 400 పరుగులకు చేరువగా వచ్చింది. ఆఖరి 2 ఓవర్లలో అలీ రెండేసి సిక్సర్లు బాదాడు. చివరి పది ఓవర్లలో ఇంగ్లండ్‌ 142 పరుగులు సాధించింది.   హష్మతుల్లా మినహా... దాదాపు అసాధ్యమైన లక్ష్య ఛేదనలో అఫ్గాన్‌ ఏ దశలోనూ గట్టిగా నిలబడలేకపోయింది. రెండో ఓవర్లోనే నూర్‌ అలీ (0) ఔట్‌ కావడంతో సరైన ఆరంభమే లభించలేదు. కెప్టెన్‌ గుల్బదిన్‌ నైబ్‌ (28 బంతుల్లో 37; 4 ఫోర్లు, 1 సిక్స్‌) ధాటిగా ఆడే ప్రయత్నం చేయగా, రహ్మత్‌ షా (74 బంతుల్లో 46; 3 ఫోర్లు, 1 సిక్స్‌) రాణించాడు. ఆ తర్వాత హష్మతుల్లా, అస్గర్‌ (48 బంతుల్లో 44; 3 ఫోర్లు, 2 సిక్స్‌లు) నాలుగో వికెట్‌కు 90 బంతుల్లోనే 94 పరుగులు జోడించి కొద్దిగా ప్రతిఘటించే ప్రయత్నం చేసినా పెద్దగా ప్రయోజనం లేకపోయింది. నబీ (9) కూడా విఫలం కావడంతో విజయంపై అఫ్గాన్‌ ఆశలు కోల్పోయింది. ‘కొడితే కొట్టాలిరా సిక్స్‌ కొట్టాలి’ ప్రపంచకప్‌ ప్రారంభానికి ముందు ఇచ్చిన ఒక ఇంటర్వ్యూలో మోర్గాన్‌ను నీకిష్టమైన షాట్‌ ఏదని అడిగితే... ‘సిక్సర్‌ కొట్టగలిగే ఏ షాట్‌ అయినా నాకిష్టమే’ అని చెప్పాడు! ప్రస్తుతం ప్రపంచ క్రికెట్‌లో అత్యధిక సిక్సర్లు కొట్టిన ఆటగాళ్ల జాబితాలో ఆరో స్థానంలో (211 సిక్సర్లు) ఉన్న మోర్గాన్‌ విషయంలో ఆ వ్యాఖ్య అతిశయోక్తిగా అనిపించదు. అతని సిక్సర్ల సునామీ అఫ్గాన్‌ మ్యాచ్‌లో మరోసారి కనిపించింది. డీప్‌ మిడ్‌వికెట్, లాంగాన్, లాంగాఫ్, డీప్‌ స్క్వేర్‌లెగ్, మిడాఫ్‌... ఇలా ఏ వైపు అంటే ఆ వైపు, ఎలా అనుకుంటే అలా మోర్గాన్‌ సిక్సర్లతో విరుచుకు పడ్డాడు. అతని దెబ్బకు పాపం అఫ్గాన్‌ బౌలర్లంతా బెంబేలెత్తిపోయారు. పరిమిత ఓవర్ల క్రికెట్‌లో ప్రస్తుతం అత్యుత్తమ లెగ్‌స్పిన్నర్‌గా ప్రశంసలందుకుంటున్న రషీద్‌ ఖాన్‌ అయితే బంతి ఎలా వేయాలో తెలీక పూర్తిగా చేతులెత్తేశాడు. 30వ ఓవర్‌ చివరి బంతికి మోర్గాన్‌ క్రీజ్‌లోకి వచ్చే సమయానికి రూట్‌ 45 పరుగుల వద్ద ఆడుతున్నాడు. సరిగ్గా 40 ఓవర్లు ముగిసే సరికి రూట్‌ స్కోరు 66 కాగా, మోర్గాన్‌ 67 వద్ద నిలవడం విశేషం! నైబ్‌ ఓవర్లో వరుసగా రెండు సిక్సర్లతో మోర్గాన్‌ జోరు మొదలైంది. ఆ తర్వాత రషీద్‌ ఓవర్లో 2 సిక్సర్లు, మరో ఫోర్‌తో ఇంగ్లండ్‌ కెప్టెన్‌ చెలరేగాడు. అదే ఓవర్లో 28 పరుగుల వద్ద మోర్గాన్‌ బంతిని గాల్లోకి లేపగా బౌండరీ వద్ద సునాయాసంగా అందుకోవాల్సిన క్యాచ్‌ను దౌలత్‌ పొరపాటుగా అంచనా వేయడంతో అఫ్గాన్‌ సువర్ణావకాశం కోల్పోయింది. నబీ బౌలింగ్‌లో సిక్స్‌తోనే 36 బంతుల్లో మోర్గాన్‌ అర్ధ సెంచరీ పూర్తయింది. ఆ తర్వాత మరింత చెలరేగిపోయిన ఇయాన్‌ తర్వాతి 21 బంతుల్లోనే సెంచరీ మార్క్‌ను చేరుకున్నాడు. ఈ క్రమంలో రషీద్‌ ఖాన్‌ మళ్లీ బాధితుడయ్యాడు. అతను వేసిన 43వ ఓవర్లో మోర్గాన్‌ మూడు సిక్సర్లు బాది ప్రపంచకప్‌లో నాలుగో వేగవంతమైన శతకం (57 బంతుల్లో) నమోదు చేశాడు. రషీద్‌ తర్వాతి ఓవర్లో కూడా రీప్లే చూపిస్తూ మళ్లీ 3 భారీ సిక్సర్లతో విరుచుకుపడిన మోర్గాన్‌... నైబ్‌ ఓవర్లో కూడా మళ్లీ మూడు సిక్సర్లు కొట్టి ప్రపంచ రికార్డు సృష్టించాడు. సిక్సర్లతోనే సెంచరీ సాధించిన మోర్గాన్‌ ఇన్నింగ్‌లో అలా ఉండీ లేనట్లు నాలుగు ఫోర్లు మాత్రం ఉన్నాయి. 17వ సిక్సర్‌ కొట్టగానే మరో భారీ షాట్‌కు ప్రయత్నించి లాంగాఫ్‌లో షాకు క్యాచ్‌ ఇవ్వడంతో అద్భుత ఇన్నింగ్స్‌ ముగిసింది. నాలుగు రోజుల క్రితం వెన్నునొప్పితో బాధపడుతూ మీడియా సమావేశంలో నిలబడి మాట్లాడిన మోర్గాన్‌ ఒక దశలో ఈ మ్యాచ్‌ ఆడటం కూడా సందేహంగానే మారింది. కానీ అతను ఆడటమే కాదు అదరగొట్టాడు.    9 ఓవర్లలో 110 పరుగులు... ప్రపంచవ్యాప్తంగా టి20 క్రికెట్‌లో స్టార్‌ బౌలర్‌గా గుర్తింపు తెచ్చుకొని అఫ్గాన్‌ జట్టు ఆశలు మోస్తున్న లెగ్‌స్పిన్నర్‌ రషీద్‌ ఖాన్‌కు ఈ మ్యాచ్‌లో భారీ దెబ్బ పడింది. మోర్గాన్‌ దెబ్బకు ఎవరూ ఆశించని చెత్త రికార్డులు అతని ఖాతాలో చేరాయి. ఒక ప్రపంచకప్‌ మ్యాచ్‌లో అత్యధిక పరుగులు (110) ఇచ్చిన బౌలర్‌గా వహాబ్‌ రియాజ్‌ (110)తో సమంగా నిలిచిన రషీద్, వన్డేల్లో 100కు పైగా పరుగులు ఇచ్చిన తొలి స్పిన్నర్‌. ఓవరాల్‌గా వన్డేల్లో మిక్‌ లూయీస్‌ (113) తర్వాత ఇది రెండో చెత్త ప్రదర్శన. కాగా... ఎకానమీ (9 ఓవర్లలోనే 110 పరుగులు ఇవ్వడం; ఓవర్‌కు 12.22 పరుగులు) పరంగా చూస్తే దీనికే అగ్రస్థానం దక్కుతుంది. రషీద్‌ బౌలింగ్‌లో మోర్గాన్‌ ఒక్కడే 7 సిక్సర్లు బాదగా... మొత్తంగా 11 సిక్స్‌లతో అత్యధిక సిక్సర్లు ఇచ్చిన బౌలర్‌గా ఎవరూ కోరుకోని గుర్తింపు పొందాడు.   స్కోరు వివరాలు ఇంగ్లండ్‌ ఇన్నింగ్స్‌: విన్స్‌ (సి) ముజీబ్‌ (బి) దౌలత్‌ 26; బెయిర్‌స్టో (సి అండ్‌ బి) నైబ్‌ 90; రూట్‌ (సి) రహ్మత్‌ షా (బి) నైబ్‌ 88; మోర్గాన్‌ (సి) రహ్మత్‌షా (బి) నైబ్‌ 148; బట్లర్‌ (సి) నబీ (బి) దౌలత్‌ 2; స్టోక్స్‌ (బి) దౌలత్‌ 2; మొయిన్‌ అలీ (నాటౌట్‌) 31; వోక్స్‌ (నాటౌట్‌) 1; ఎక్స్‌ట్రాలు 9; మొత్తం (50 ఓవర్లలో 6 వికెట్లకు) 397. వికెట్ల పతనం: 1–44, 2–164, 3–353, 4–359, 5–362, 6–378.  బౌలింగ్‌: ముజీబ్‌ 10–0–44–0, దౌలత్‌ 10–0–85–3, నబీ 9–0–70–0, గుల్బదిన్‌ నైబ్‌ 10–0–68–3, రహ్మత్‌ షా 2–0–19–0, రషీద్‌ ఖాన్‌ 9–0–110–0. అఫ్గానిస్తాన్‌ ఇన్నింగ్స్‌: నూర్‌ అలీ (బి) ఆర్చర్‌ 0; నైబ్‌ (సి) బట్లర్‌ (బి) వుడ్‌ 37; రహ్మత్‌ షా (సి) బెయిర్‌స్టో (బి) ఆదిల్‌ రషీద్‌ 46; హష్మతుల్లా (బి) ఆర్చర్‌ 76; అస్గర్‌ (సి) రూట్‌ (బి) ఆదిల్‌ రషీద్‌ 44; నబీ (సి) స్టోక్స్‌ (బి) ఆదిల్‌ రషీద్‌ 9; నజీబుల్లా (బి) వుడ్‌ 15; రషీద్‌ ఖాన్‌ (సి) బెయిర్‌స్టో (బి) ఆర్చర్‌ 8; ఇక్రమ్‌ (నాటౌట్‌) 3; దౌలత్‌ (నాటౌట్‌) 0; ఎక్స్‌ట్రాలు 9; మొత్తం (50 ఓవర్లలో 8 వికెట్లకు) 247. వికెట్ల పతనం: 1–4, 2–52, 3–104, 4–198, 5–210, 6–234, 7–234, 8–247. బౌలింగ్‌: వోక్స్‌ 9–0–41–0, ఆర్చర్‌ 10–1–52–3, మొయిన్‌ అలీ 7–0–35–0, వుడ్‌ 10–1–40–2, స్టోక్స్‌ 4–0–12–0, ఆదిల్‌ రషీద్‌ 10–0–66–3.    1: వన్డే ఇన్నింగ్స్‌లో అత్యధిక సిక్సర్లు (17) కొట్టిన ఆటగాడు మోర్గాన్‌. గతంలో రోహిత్, డివిలియర్స్, గేల్‌ 16 చొప్పున సిక్సర్లు బాదారు.   1: ఒక ఇన్నింగ్స్‌లో అత్యధిక సిక్సర్లు నమోదు చేసిన జట్టు (25)గా ఇంగ్లండ్‌ నిలిచింది.   1: ప్రపంచ కప్‌లో ఇంగ్లండ్‌ తమ అత్యధిక స్కోరు (397) నమోదు చేసింది.   ప్రపంచకప్‌లో నేడు దక్షిణాఫ్రికా X న్యూజిలాండ్‌ వేదిక: బర్మింగ్‌హామ్‌ మధ్యాహ్నం 3 గంటల నుంచి స్టార్‌ స్పోర్ట్స్‌–1లో ప్రత్యక్ష ప్రసారం

న్యూఢిల్లీ : టీమిండియా మాజీ క్రికెటర్‌, బీజేపీ ఎంపీ గౌతం గంభీర్‌పై నెటిజన్లు విరుచుకుపడుతున్నారు. మీరు కేవలం మాటల మనిషని  నిరూపించుకున్నారు.. దేశం కంటే డబ్బు ముఖ్యం అయ్యిందా అంటూ మండిపడుతున్నారు. గంభీర్‌ను ఇంతలా ట్రోల్‌ చేయడానికి ఓ కారణం ఉంది. పుల్వామా ఉగ్రదాడి జరిగినప్పుడు గంభీర్‌ తీవ్ర ఆవేదన వ్యక్తం చేశారు. ఉగ్రదాడిపై ఘాటుగా స్పందించిన గంభీర్‌ పాక్‌తో ఎలాంటి సంబంధాలు పెట్టుకోవద్దని, ప్రపంచకప్‌లో కూడా ఆ జట్టుతో జరిగే మ్యాచ్‌ను బహిష్కరించాలన్నారు. మహా అయితే భారత్‌ రెండు పాయింట్లు కోల్పోతుందని, ఆట కన్నా దేశ ప్రజల సెంటిమెంట్‌ ముఖ్యమని అభిప్రాయపడిన సంగతి తెలిసిందే. అప్పట్లో ఈ విషయంపై తీవ్ర చర్చ కూడా జరిగింది. మాజీ ఆటగాళ్లు, అభిమానులు భిన్నాభిప్రాయాలు వ్యక్తం చేశారు. బీసీసీఐ కూడా పాక్‌తో మ్యాచ్‌ విషయంలో కేంద్రప్రభుత్వ ఆదేశాల మేరకే నడుచుకుంటామని స్పష్టం చేసింది. ఈ నేపథ్యంలో ఆదివారం జరిగిన భారత్‌-పాక్‌ మ్యాచ్ సందర్భంగా గంభీర్‌ చేసిన ట్వీట్‌ నెటిజన్ల దృష్టిని ఆకర్షించింది. అంతేకాక ఈ మాజీ క్రికెటర్‌ స్టార్‌ స్పోర్ట్స్‌ చానెల్‌లో దర్శనమివ్వడం.. మ్యాచ్‌ విశ్లేషకుడిగా అవతారం ఎత్తడం పట్ల నెటిజన్లు ఆగ్రహం వ్యక్తం చేస్తున్నారు. ‘అసలు పాకిస్తాన్‌తో మ్యాచే వద్దన్న నువ్వు.. ఇప్పుడు డబ్బు కోసం భారత్‌-పాక్‌ మ్యాచ్‌కు విశ్లేషకుడిగా వ్యవహరిస్తావా.. నీ కపటత్వం జనాలకు తెలిసిపోయింది’ అంటూ ట్రోల్‌ చేయడమే కాక గంభీర్‌ గతంలో చేసిన వ్యాఖ్యలకు సంబంధించిన వీడియోలను ట్విటర్‌లో షేర్‌ చేయడం ప్రారంభించారు. తను వ్యతిరేకించిన మ్యాచ్‌తోనే గంభీర్‌ డబ్బు సంపాదించుకుంటున్నాడంటూ నెటిజన్లు ఆగ్రహం వ్యక్తం చేస్తున్నారు.   Political Gambhir vs Cricketer Gambhir #IndiaVsPakistan pic.twitter.com/19pqECs1SD — Dhruv Rathee (@dhruv_rathee) June 16, 2019

మాంచెస్టర్‌: సొంతగడ్డపై ప్రపంచకప్‌ సాధించాలనే స్వప్నాన్ని సాకారం చేసుకోవాలనే పట్టుదలతో ఉన్న ఆతిథ్య ఇంగ్లండ్‌ జట్టు నాలుగో విజయమే లక్ష్యంగా మరో పోరుకు సిద్ధమైంది. ఈ టోర్నీలో ఆడిన నాలుగు మ్యాచ్‌ల్లోనూ ఓడిపోయిన అఫ్గానిస్తాన్‌తో నేడు ఇంగ్లండ్‌ తలపడనుంది. అయితే గాయాల బెడద ఇంగ్లండ్‌ను కలవర పెడుతుంది. ఇప్పటికే డాషింగ్‌ ఒపెనర్‌ జేసన్‌ రాయ్‌ తొడ కండరాల గాయంతో రెండు మ్యాచ్‌లకు దూరం కాగా... వెన్ను నొప్పితో బాధపడుతున్న ఇంగ్లండ్‌ కెప్టెన్‌ ఇయాన్‌ మోర్గాన్‌ నేటి మ్యాచ్‌లో ఆడేది అనుమానమే. ఒకవేళ మోర్గాన్‌ బరిలోకి దిగకపోతే నేటి మ్యాచ్‌లో వైస్‌ కెప్టెన్‌ జోస్‌ బట్లర్‌ తాత్కాలిక కెప్టెన్‌గా వ్యవహరిస్తాడు.   సూపర్‌ ఫామ్‌లో రూట్‌ ఈ టోర్నీలో ఇంగ్లండ్‌ అన్ని విభాగాల్లో అదరగొడుతోంది. టాపార్డర్‌ బ్యాట్స్‌మెన్‌ అద్భుతమైన ఫామ్‌లో ఉన్నారు. ముఖ్యంగా రూట్‌ రెండు సెంచరీలు సాధించి జోరు మీదున్నాడు. వెస్టిండీస్‌తో జరిగిన మ్యాచ్‌లో జట్టుకు అవసరమైన సమయంలో హోల్డర్, హెట్‌మైర్‌ వికెట్లను తీసిన రూట్‌ ప్రత్యర్థి జట్టు భారీ స్కోర్‌ చేయకుండా కళ్లెం వేశాడు. రూట్‌కు తోడుగా బట్లర్, బెయిర్‌స్టో, స్టోక్స్‌ చెలరేగితే ఇంగ్లండ్‌ మరోసారి 300 మైలురాయిని దాటడం లాంఛనమే. బౌలింగ్‌లో వోక్స్, జోఫ్రా ఆర్చర్, వుడ్, ఆదిల్‌ రషీద్‌లతో పటిష్టంగా ఉంది. ఖాతా తెరవని అఫ్గాన్‌... ఆడిన నాలుగు మ్యాచ్‌ల్లోనూ ఓడిన అఫ్గానిస్తాన్‌ అత్యద్భుత ప్రదర్శన చేస్తే తప్ప ఇంగ్లండ్‌ను నిలువరించడం కష్టం. బ్యాటింగ్‌తోపాటు బౌలింగ్‌ విభాగంలోనూ వారు అంచనాలను అందుకోలేకపోతున్నారు. నజీబుల్లా, హష్మతుల్లా ఒక్కో అర్ధ సెంచరీ చేయడం మినహా మిగతా బ్యాట్స్‌మెన్‌ నుంచి పెద్ద స్కోర్లు రాలేదు. బౌలింగ్‌ విషయానికొస్తే నబీ శ్రీలంక మ్యాచ్‌లో 4 వికెట్లతో అదరగొట్టాక అలాంటి ప్రదర్శనను పునరావృతం చేయలేదు. రషీద్‌ ఖాన్, కెప్టెన్‌ గుల్బదిన్, హమీద్‌ హసన్‌ అంతగా ప్రభావం చూపడం లేదు. 

మాంచెస్టర్‌: ప్రపంచకప్‌లో అజేయంగా సాగుతున్న భారత క్రికెట్‌ జట్టు కాస్త సేదతీరాలని నిర్ణయించుకుంది. ఆటగాళ్లకు రెండు రోజుల పాటు విరామం ఇవ్వాలని టీమ్‌ మేనేజ్‌మెంట్‌ నిర్ణయించింది. ఈ రెండు రోజుల్లో క్రికెటర్లకు ప్రాక్టీస్‌ నుంచి మినహాయింపు లభిస్తుంది. ఆదివారం పాక్‌పై అద్భుత విజయం తర్వాత టీమిండియాలో జోష్‌ వెల్లువెత్తుతుండగా... ఆటగాళ్లంతా విరామంలో సరదాగా గడిపేందుకు సిద్ధమయ్యారు. భారత్‌ తమ తర్వాతి మ్యాచ్‌లో ఈ నెల 22న అఫ్గానిస్తాన్‌తో తలపడుతుంది. మరోవైపు పాకిస్తాన్‌పై ఘనవిజయం సాధించిన భారత జట్టుకు ఇంగ్లండ్‌లోని విఖ్యాత ఫుట్‌బాల్‌ క్లబ్‌ మాంచెస్టర్‌ యునైటెడ్‌ (ఎంయూ) శుభాకాంక్షలు తెలిపింది. మ్యాచ్‌కు ముందు పలువురు భారత ఆటగాళ్లు మాంచెస్టర్‌లోని ఎంయూ స్టేడియాన్ని సందర్శించారు.     

మాంచెస్టర్‌: భారత ఆటగాడిగా తాను చేసే ప్రతీ సెంచరీ ప్రత్యేకమైనదేనని, ఏది అత్యుత్తమమని అడిగితే చెప్పలేనని ఓపెనర్‌ రోహిత్‌ శర్మ వ్యాఖ్యానించాడు. ఆదివారం మ్యాచ్‌లో పాక్‌ పేసర్లు ఎక్కువగా షార్ట్‌ పిచ్‌ బంతులు వేశారని, అదే తన బలం కాబట్టి చెలరేగిపోయానని అతను విశ్లే షించాడు. ఇంగ్లండ్‌ మైదానాల్లో ఒకసారి నిలదొక్కుకుంటే బ్యాట్స్‌మెన్‌ను నిరోధించడం చాలా కష్టమని... అందుకే తనను ఆపడంలో ప్రత్యర్థి విఫలమైందని రోహిత్‌ అన్నాడు. మ్యాచ్‌ తర్వాత మీడియా సమావేశంలో ఒక ఆసక్తికర ప్రశ్న ఎదురైంది. ప్రస్తుతం కష్టాల్లో ఉన్న పాక్‌కు మీరు ఎలాంటి సలహా ఇస్తారు అని ప్రశ్నించగా...‘నేను పాకిస్తాన్‌ జట్టుకు కోచ్‌గా మారినప్పుడు దీనికి సమాధానం చెబుతా’ అని గడుసుగా జవాబిచ్చాడు.   అది అసలైన టెస్టు బంతి... మ్యాచ్‌లో బాబర్‌ను బౌల్డ్‌ చేసిన బంతి పట్ల తాను గర్వపడుతున్నట్లు భారత స్పిన్నర్‌ కుల్దీప్‌ యాదవ్‌ చెప్పాడు. ‘బాబర్‌ను దుబాయ్‌లో కూడా ఒకసారి ఔట్‌ చేశాను. అది స్ఫూర్తిగా తీసుకున్నా. మ్యాచ్‌లో అప్పటికే నేను బంతిని బాగా టర్న్‌ చేస్తున్నాను. అది నా ప్రధాన బలం. ఆ బంతి కూడా చాలా బాగా పడింది. దీనిని చూసి నేనే కాదు ప్రతీ స్పిన్నర్‌ గర్వపడతాడు. ఒక్క మాటలో చెప్పాలంటే టెస్టుల్లోనూ ఇలాంటి బంతి మనకు కనిపిస్తుంది’ అని కుల్దీప్‌ విశ్లేషించాడు. మరోవైపు తామిద్దరి బౌలింగ్‌ ఎండ్‌లు మార్చమని చహల్‌ చెప్పిన తర్వాతే కుల్దీప్‌ ఆ వికెట్‌ పడగొట్టాడని...చహల్‌ వ్యూహం కోహ్లితో చర్చించి అమలు చేశామని రోహిత్‌ వెల్లడించాడు.     

మాంచెస్టర్‌: పాకిస్తాన్‌ కెప్టెన్‌ సర్ఫరాజ్‌ అహ్మద్‌ ఆవలింతలపై మీమ్‌లు... అతని శరీరంపై జోకులు... సర్ఫరాజ్‌ కీపర్‌ మాత్రమే కాదు, ‘స్లీప్‌’ ఫీల్డర్‌ అంటూ అతని ఆవలింతలపై వ్యంగ్యాస్త్రాలు... జట్టు సభ్యుల ఫిట్‌నెస్‌పై పరిహాసాలు... దేశ ప్రధాని మాటనూ పట్టించుకోలేదని విసుర్లు, మ్యాచ్‌కు ముందు రోజు బయటకు షికార్లు చేయడంపై ఆగ్రహావేశాలు... ప్రపంచకప్‌ మ్యాచ్‌లో భారత్‌ చేతిలో చిత్తుగా ఓడిన తర్వాత పాకిస్తాన్‌పై విమర్శలతో సోషల్‌ మీడియా హోరెత్తిపోయింది. చిరకాల ప్రత్యర్థి చేతిలో మళ్లీ ఓడటంతో ఆ దేశ అభిమానులు తమ కోపాన్ని ఆపుకోలేకపోయారు. సహజంగానే తీవ్ర పదజాలంతో విరుచుకుపడ్డారు. ముఖ్యంగా మైదానంలో మ్యాచ్‌ చూసిన అనంతరం ఒక వీరాభిమాని తన ఆవేదనను ప్రదర్శిస్తున్న వీడియో వైరల్‌గా మారింది. ‘ఎన్నో సమస్యలు ఉన్న పాకిస్తాన్‌లో మాకు క్రికెట్‌ కొంత సాంత్వననిస్తుంది. ఎంతో డబ్బు పెట్టి, ఇబ్బందులు పడి ఎన్నో ఆశలతో ఇక్కడికొస్తే ఇలాంటి ఆట ఆడతారా? ఆటగాళ్లకు కనీస ఫిట్‌నెస్‌ కూడా లేదు. మ్యాచ్‌కు ముందు రోజు  రాత్రి వారు పిజ్జాలు, బర్గర్లు, ఐస్‌క్రీమ్‌లు తిన్నారని విన్నాను. ఎవరైనా ఆటగాళ్లు ఇలాంటి తిండి తింటారా? వీరు క్రికెట్‌లో కాదు కుస్తీలో పోటీ పడాల్సింది. సర్ఫరాజ్‌ అయితే నిద్ర మాత్రలు వేసుకున్నట్లు కనిపించాడు.అతను మమ్మల్ని మోసం చేశాడు’ అని సదరు అభిమాని ఏడ్చేశాడు. పాక్‌ క్రికెటర్లు బేకరీ, ఐస్‌క్రీమ్‌ షాప్‌కు వెళ్లిన ఫోటోలు, షోయబ్‌ మాలిక్‌ తన భార్య సానియా మీర్జా, ఇద్దరు సహచరులతో కలిసి ‘హుక్కా కేఫ్‌’లో ఉన్న ఫోటోలు కూడా బయటకు రావడంతో అభిమానుల ఆగ్రహం మరింత పెరిగింది. అయితే పాకిస్తాన్‌ క్రికెట్‌ బోర్డు (పీసీబీ) దీనిని ఖండించింది. ప్రచారంలో ఉన్న వీడియోలు, ఫోటోలు మ్యాచ్‌కు రెండు రోజుల ముందు (శుక్రవారం) నాటివని... మ్యాచ్‌కు ముందు రాత్రి జట్టు సభ్యులంతా నిర్ణీత సమయానికి గదుల్లో ఉన్నారని, నిబంధనలు ఉల్లంఘించలేదని స్పష్టం చేసింది.   ఇమ్రాన్‌ సూచనను పట్టించుకోలేదని... పాకిస్తాన్‌ టాస్‌ గెలిస్తే బ్యాటింగ్‌ తీసుకోవాలని దేశానికి ప్రపంచ కప్‌ అందించిన దిగ్గజం, ప్రస్తుతం ప్రధాని అయిన ఇమ్రాన్‌ ఖాన్‌ మ్యాచ్‌కు ముందు సూచించాడు. ఛేదనలో పాక్‌ బలహీనం కాబట్టి మాజీలు కూడా ఇదే అభిప్రాయం వ్యక్తం చేశారు. అయితే సర్ఫరాజ్‌ మాత్రం ఫీల్డింగ్‌ను ఎంచుకున్నాడు. దీనిపై విమర్శలకు తోడు ‘ఇమ్రాన్‌ ఇంగ్లీష్‌లో రాశాడు కాబట్టి సర్ఫరాజ్‌కు అర్థం కాలేదు’ అంటూ అభిమానులు దెప్పిపొడిచారు. మరోవైపు జట్టులో ఆటగాళ్ల మధ్య విభేదాలే ఓటమికి కారణమయ్యాయని కూడా పాక్‌ మీడియా కథనాలు ప్రచురించింది.   90ల్లో పాకిస్తాన్‌ జట్టు చాలా బలంగా ఉండి భారత్‌పై ఆధిపత్యం ప్రదర్శించేది. ఇప్పుడు పరిస్థితి మారిపోయి భారత్‌ మెరుగ్గా తయారైంది. ఇలాంటి మ్యాచ్‌లలో మేం ఒత్తిడిని అధిగమించలేకపోతున్నాం. మా జట్టు అన్ని రంగాల్లో విఫలమైంది. రెండు రోజులుగా పిచ్‌ కప్పి ఉంచారు. తేమ ఉండటంతో టాస్‌ గెలిచి ఫీల్డింగ్‌ తీసుకున్నా. అయితే మా ప్రణాళిక ప్రకారం బౌలింగ్‌ చేయడంలో విఫలమయ్యాం. మా శారీరక భాష బాగా లేదంటే ఒప్పుకోను. ఆటగాళ్లంతా బాగానే ప్రయత్నించారు. మా ఫీల్డింగ్‌ బాగా లేక రోహిత్‌ రెండు సార్లు రనౌట్‌ కాకుండా తప్పించుకున్నాడు. అతను ఔటైతే పరిస్థితి భిన్నంగా ఉండేది. మా ఆటగాళ్ల మధ్య ఎలాంటి విభేదాలు లేవు. డ్రెస్సింగ్‌ రూమ్‌లో అంతా బాగుంది.       –సర్ఫరాజ్‌ అహ్మద్, పాక్‌ కెప్టెన్‌   రెస్టారెంట్‌లో షోయబ్‌ మాలిక్, సానియా, వహాబ్‌ రియాజ్‌ తదితరులు

ఐర్లాండ్‌లో ఇటీవల జరిగిన ముక్కోణపు సిరీస్‌లో బంగ్లాదేశ్‌ మూడుసార్లు విండీస్‌ను ఓడించింది. అప్పుడు గేల్, రసెల్‌ లేరు కాబట్టే గెలిచారని అన్నారు. మరిప్పుడు  ఆ విధ్వంసకారులున్న జట్టును... 300 పైచిలుకు లక్ష్యాన్ని 41.3 ఓవర్లలోనే ఛేదించి మరీ బంగ్లా సంచలన విజయం సాధించింది. అందుకేనేమో ఈ టోర్నీలో బంగ్లా కెప్టెన్‌ మొర్తజా దక్షిణాఫ్రికాను ఓడించినపుడే చెప్పాడు ‘ఇక మేం గెలిస్తే సంచలనం కానేకాదు’ అని ఇప్పుడీ ఫలితం చూస్తుంటే నిజమేననిపిస్తోంది..!   టాంటన్‌: ప్రపంచకప్‌లోనూ వెస్టిండీస్‌పై బంగ్లా పంజా విసిరింది. ఎదురైంది పటిష్టమైన ప్రత్యర్థే అయినా... ఎదురుగా ఉన్నది భారీ స్కోరే అయినా... బంగ్లాదేశ్‌ చకచకా ఛేదించింది. అది కూడా 8.3 ఓవర్లు మిగిల్చి మరీ విండీస్‌ భరతం పట్టింది. ఈ మెగా ఈవెంట్‌లోనే అసాధారణ ఫామ్‌లో ఉన్న షకీబ్‌ అల్‌ హసన్‌ (99 బంతుల్లో 124 నాటౌట్‌; 16 ఫోర్లు) అజేయ సెంచరీతో జట్టును గెలిపించేదాకా పోరాడాడు. అనూహ్యంగా తుది జట్టులోకి వచ్చిన లిటన్‌ దాస్‌ (69 బంతుల్లో 94 నాటౌట్‌; 8 ఫోర్లు, 4 సిక్స్‌లు) ఈ గెలుపులో వాటా దక్కించుకున్నాడు. దీంతో విండీస్‌పై బంగ్లా 7 వికెట్ల తేడాతో జయకేతనం ఎగురవేసింది. మొదట వెస్టిండీస్‌ 50 ఓవర్లలో 8 వికెట్ల నష్టానికి 321 పరుగుల భారీస్కోరు చేసింది. షై హోప్‌ (121 బంతుల్లో 96; 4 ఫోర్లు, 1 సిక్స్‌), లూయిస్‌ (67 బంతుల్లో 70; 6 ఫోర్లు, 2 సిక్స్‌లు), హెట్‌మైర్‌ (26 బంతుల్లో 50; 4 ఫోర్లు, 3 సిక్స్‌లు) మెరిశారు. బంగ్లా బౌలర్లలో సైఫుద్దీన్, ముస్తఫిజుర్‌ రహ్మాన్‌ చెరో 3 వికెట్లు తీశారు. తర్వాత భారీ లక్ష్యాన్ని బంగ్లాదేశ్‌ 41.3 ఓవర్లలోనే 3 వికెట్లే కోల్పోయి ఛేదించింది. అజేయ సెంచరీతోపాటు రెండు వికెట్లు కూడా తీసిన షకీబ్‌కు ‘మ్యాన్‌ ఆఫ్‌ ద మ్యాచ్‌’ అవార్డు దక్కింది.   హోప్‌ సెంచరీ మిస్‌... టాస్‌ నెగ్గిన బంగ్లా బౌలింగ్‌ ఎంచుకుంది. ఓపెనింగ్‌ భాగస్వామ్యం గేల్‌ (13 బంతుల్లో 0)తో విఫలమైనా... మరో ఓపెనర్‌ లూయిస్, షై హోప్‌ ఇన్నింగ్స్‌ను పటిష్టపరిచే భాగస్వా మ్యాన్ని నెలకొల్పారు. 24 ఓవర్లపాటు బంగ్లా బౌలర్లకు కొరకరాని కొయ్యలయ్యారు. ఈ క్రమంలో లూయిస్‌ 58 బంతుల్లో... తర్వాత హోప్‌ 75 బంతుల్లో అర్ధసెంచరీలు పూర్తి చేసుకున్నారు. రెండో వికెట్‌కు 116 పరుగులు జోడించాక లూయిస్‌ను షకీబ్‌ ఔట్‌ చేశాడు. దీంతో హోప్‌కు  పూరన్‌ (30 బంతుల్లో 25; 2 ఫోర్లు, సిక్స్‌) జతయ్యాడు. క్రీజులో పాతుకుపోతున్న దశలో పూరన్‌ను షకీబే పెవిలియన్‌ చేర్చాడు. రసెల్‌ (0) డకౌటైనా... హెట్‌మైర్‌ విధ్వంసం సృష్టించాడు. 25 బంతుల్లోనే ఫిఫ్టీ చేశాడు. కెప్టెన్‌ హోల్డర్‌ (15 బంతుల్లో 33; 4 ఫోర్లు, 2 సిక్స్‌లు) ధాటిగా ఆడాడు. ముస్తఫిజుర్‌ బౌలింగ్‌లో లిటన్‌ దాస్‌ క్యాచ్‌ పట్టడంతో హోప్‌ నాలుగు పరుగుల తేడాతో సెంచరీని చేజార్చుకున్నాడు.   ధనాధన్‌ ఛేదన... వెస్టిండీస్‌ బౌలింగ్‌ పరంగా చూస్తే 322 పరుగుల లక్ష్యం కష్టతరమైందే! కానీ ప్రత్యర్థిపై ఇటీవలి రికార్డు, షకీబ్‌ అల్‌ హసన్‌ వరల్డ్‌కప్‌ ఫామ్‌ అద్భుతంగా ఉండటంతో సీన్‌ మారిపోయింది. దీనికి తగ్గట్లుగానే ఓపెనర్లు సౌమ్య సర్కార్‌ (23 బంతుల్లో 29; 2 ఫోర్లు, 2 సిక్స్‌లు), తమీమ్‌ ఇక్బాల్‌ (53 బంతుల్లో 48; 6 ఫోర్లు) బీజం వేశారు. తొలి వికెట్‌కు చకచకా 52 పరుగులు జోడించారు. సర్కార్‌ ఆట ముగిశాక వచ్చిన షకీబ్‌ తన జోరు కొనసాగించాడు. రన్‌రేట్‌ పడిపోకుండా తమీమ్, షకీబ్‌ జోడీ జాగ్రత్త పడింది. దీంతో 13.5 ఓవర్లలోనే జట్టు స్కోరు 100 పరుగులు చేరింది. రెండో వికెట్‌కు 69 పరుగులు జోడించాక తమీమ్‌ రనౌటయ్యాడు. ముష్ఫికర్‌ (1) విఫలమయ్యాడు. అప్పటికి 19 ఓవర్లలో బంగ్లాదేశ్‌ జట్టు స్కోరు 133/3.  బంగ్లాదేశ్‌కు గెలిచేందుకు 189 పరుగులు కావాలి. మిథున్‌ స్థానంలో తుది జట్టులోకి వచ్చిన లిటన్‌ దాస్‌... షకీబ్‌కు జతయ్యాడు. ఇద్దరు టాంటన్‌లో ఠారెత్తించారు. చూస్తుండగానే 30 ఓవర్లకంటే ముందే జట్టు స్కోరు 200 (29 ఓవర్లలో) పరుగులు దాటింది. షకీబ్‌ 83 బంతుల్లో శతకం సాధించాడు. ఈ టోర్నీలో అతనికిది రెండో సెంచరీ. లిటన్‌ దాస్‌ 43 బం తుల్లో ఫిఫ్టీ పూర్తిచేసుకున్నాడు. గాబ్రియెల్‌ వేసిన 38వ ఓవర్లో లిటన్‌ హ్యాట్రిక్‌ సిక్స్‌లు కొట్టాడు. షకీబ్‌ బౌండరీ బాదడంతో ఈ ఓవర్లోనే 24 పరుగులొచ్చాయి. ఈ ఓవర్‌కు ముందు 79 బంతుల్లో 52 పరుగులుగా వున్న లక్ష్యం కాస్తా 72 బం తుల్లో 28 పరుగులుగా మారిపోయింది. అబేధ్యమైన నాలుగో వికెట్‌కు 189 పరుగులు జోడించి షకీబ్, లిటన్‌ బంగ్లాకు సంచలన విజయాన్ని అందించారు.    స్కోరు వివరాలు వెస్టిండీస్‌ ఇన్నింగ్స్‌: గేల్‌ (సి) రహీమ్‌ (బి) సైఫుద్దీన్‌ 0; లూయిస్‌ (సి) సబ్‌–షబ్బీర్‌ (బి) షకీబ్‌ 70; హోప్‌ (సి) లిటన్‌ (బి) ముస్తఫిజుర్‌ 96; పూరన్‌ (సి) సర్కార్‌ (బి) షకీబ్‌ 25; హెట్‌మైర్‌  (సి) తమీమ్‌ (బి) ముస్తఫిజుర్‌ 50; రసెల్‌ (సి) రహీమ్‌ (బి) ముస్తఫిజుర్‌ 0; హోల్డర్‌ (సి) మహ్ముదుల్లా (బి) సైఫుద్దీన్‌ 33; బ్రావో (బి) సైఫుద్దీన్‌ 19; థామస్‌ (నాటౌట్‌) 6; ఎక్స్‌ట్రాలు 22; మొత్తం (50 ఓవర్లలో 8 వికెట్లకు) 321. వికెట్ల పతనం: 1–6, 2–122, 3–159, 4–242, 5–243, 6–282, 7–297, 8–321. బౌలింగ్‌: మొర్తజా 8–1–37–0, సైఫుద్దీన్‌ 10–1–72–3, ముస్తఫిజుర్‌ 9–0–59–3, మెహిదీ హసన్‌ 9–0–57–0, మొసద్దిక్‌ 6–0–36–0, షకీబ్‌ 8–0–54–2. బంగ్లాదేశ్‌ ఇన్నింగ్స్‌: తమీమ్‌ (రనౌట్‌) 48; సౌమ్య సర్కార్‌ (సి) గేల్‌ (బి) రసెల్‌ 29; షకీబ్‌ (నాటౌట్‌) 124; ముష్ఫికర్‌ (సి) హోప్‌ (బి) థామస్‌ 1; లిటన్‌ దాస్‌ (నాటౌట్‌) 94; ఎక్స్‌ట్రాలు 26; మొత్తం (41.3 ఓవర్లలో 3 వికెట్లకు) 322.  వికెట్ల పతనం: 1–52, 2–121, 3–133. బౌలింగ్‌: కాట్రెల్‌ 10–0–65–0, హోల్డర్‌ 9–0–62–0, రసెల్‌ 6–0–42–1, గాబ్రియెల్‌ 8.3–0–78–0, థామస్‌ 6–0–52–1, గేల్‌ 2–0–22–0. 4 వన్డేల్లో 6 వేల పరుగులు చేసి 250 వికెట్లు తీసిన నాలుగో ఆటగాడు షకీబ్‌. ఈ జాబితాలో ఆఫ్రిది, కలిస్, జయసూర్య ఉండగా...అందరికంటే తక్కువ మ్యాచ్‌లలో (202) షకీబ్‌ ఈ ఘనత సాధించాడు.  

మాంచెస్టర్: దాయాదులు భారత్‌-పాకిస్తాన్‌ క్రికెట్‌ మ్యాచ్‌ అంటే ఆ క్రేజ్‌ వేరుగా ఉంటుంది. అందులోనూ వరల్డ్‌ కప్‌లో దాయాదులు తలపడుతున్నారంటే ఇంకా చెప్పాల్సిన పనిలేదు. ఇరుదేశాలు క్రికెట్‌ ఫీవర్‌తో ఊగిపోతాయి. ఆదివారం మాంచెస్టర్‌లో జరిగిన మ్యాచ్‌లోనూ ఈ ఫీవర్‌ పెద్దస్థాయిలో కనిపించింది. ఏ ఇంట్లో చూసినా క్రికెట్‌ గోలే, ఎవర్ని కదిలించినా మ్యాచ్‌ ముచ్చట్లే.. ఇక ఓ అభిమాని ఏకంగా గుర్రంపై మైదానానికి వచ్చి.. అందరినీ ఆశ్చర్యపరిచాడు. తెల్లని గుర్రంపై స్వారీ చేస్తూ, చేతిలో పాకిస్తాన్‌ జెండాతో స్టేడియానికి ఓ అభిమాని మైదానానికి విచ్చేశాడు. అతని వెనకే పాకిస్తాన్‌ జట్టు అభిమానులతో కూడిన బస్‌ కూడా వచ్చింది.  ఇక పాక్‌ అభిమాని గుర్రంపై స్టేడియానికి విచ్చేసిన వీడియో.. ట్విట్టర్‌ను నవ్వులతో ముంచెత్తింది. 'ఇంతకీ ఆ గుర్రానికి కూడా టికెట్‌ తీసుకున్నాడా', 'అయినా ఆ గుర్రాన్ని ఎక్కడ పార్క్‌ చేశారు' అంటూ నెటిజన్లు సెటైర్స్‌ వేస్తున్నారు. కొసమెరుపు ఏంటంటే ఆట ప్రారంభం కాకముందు పాక్‌కు మద్దతుగా గుర్రంపై క్రేజీగా ఓ అభిమాని ఎంట్రీ ఇచ్చాడు. ఇదే మ్యాచ్‌లో ఇండియా విజృంభించడంతో ఆట మధ్యలోనే ఇంకో అభిమాని కన్నీటి పర్యంతమవుతూ అదే జట్టును తిట్టిపోశాడు.

మాంచెస్టర్‌ : ప్రపంచకప్‌లో భారత్‌ తన ఆధిపత్యాన్ని కొనసాగిస్తూ పాక్‌ను ఏడోసారి చిత్తు చేసింది. ప్రపంచవ్యాప్తంగా ఉత్కంఠతను రేపిన పోరులో భారత్‌ 89 పరుగుల (డక్‌వర్త్‌–లూయిస్‌ ప్రకారం) తేడాతో పాకిస్తాన్‌పై ఘన విజయం సాధించింది. ఆదివారం జరిగిన మ్యాచ్‌లో రోహిత్‌ శర్మ శతకం, కోహ్లి, రాహుల్‌ అర్థశతకం.. బౌలర్లు కుల్దీప్‌ యాదవ్‌, హార్దిక్‌ పాండ్యా, విజయ్‌ శంకర్‌లు భారత్‌కు విజయాన్ని అందించడంలో కీలక పాత్ర పోషించారు. ఈ గెలుపుతో ఓ వైపు భారత అభిమానులు పండగ చేసుకుంటుండగా.. పాక్‌ అభిమానులు మాత్రం తమ జట్టు పేలవ ప్రదర్శనను విమర్శిస్తూ.. సోషల్‌ మీడియా వేదికగా మండిపడుతున్నారు. ఈ నేపథ్యంలో ఓ పాక్‌ అభిమాని రియాక్షన్‌ ట్విటర్‌లో తెగ ట్రెండ్‌ అవుతోంది. సదరు అభిమాని ఓ విలేకరితో మాట్లాడుతూ.. ‘భారత్‌ విజృంభించడం చూశాక వర్షం వచ్చి మ్యాచ్‌ ఆగిపోవాలని కోరుకున్నాం. కానీ వరుణ దేవుడు కూడా మాపై దయ చూపలేదు.  మా టీం తిండి తినడం మీద చూపే శ్రద్ధలో పావు వంతు అయినా ఫిట్‌నెస్‌, క్రమశిక్షణ మీద చూపిస్తే బాగుండేది. పిజ్జాలు బర్గర్లు తింటారు తప్ప మైదానంలో పోరాడలేరు. రేపు మ్యాచ్‌ ఉందంటే.. మా వాళ్లు తమ ఫిట్‌నెస్‌ గురించి ఏ మాత్రం ఆలోచించకుండా.. జంక్‌ ఫుడ్‌ తిని కడుపు నింపుకోవడంలో బిజీగా ఉంటారు’ అంటూ కన్నీటి పర్యంతమయ్యాడు. పక్కనే ఉన్న మరో వ్యక్తి అతని భుజం తడుతూ.. ఓదర్చగా మరో వ్యక్తి తమ జాతీయ జెండాతో ఆ అభిమాని కన్నీళ్లు తుడిచాడు. ప్రస్తుతం ఈ వీడియో ట్విటర్‌ తెగ ట్రెండ్‌ అవుతోంది.   Feelings😭 #ICCWorldCup2019 #INDvPAK #PAKvsIND pic.twitter.com/1RPykLVqSJ — viraldesii (@Syedakhann01) June 16, 2019

ప్రపంచకప్‌లో పాకిస్తాన్‌పై భారత జెండా మళ్లీ సగర్వంగా ఎగిరింది. 27 ఏళ్లుగా సాగుతున్న సినిమానే టీమిండియా ఆటగాళ్లు దాయాదికి మళ్లీ చూపించారు. ఆటగాళ్లు మారినా, మైదానాలు మారినా విశ్వ వేదికపై మనల్ని ఓడించే సత్తా ఆ జట్టుకు లేదని మరోసారి నిరూపించారు. మ్యాచ్‌కు ముందు ఎన్ని అంచనాలు ఉన్నా, ‘మ్యాచ్‌ ఆఫ్‌ ద టోర్నీ’ అంటూ ఇరు దేశాల్లో హడావిడి చేసినా అసలు పోరుకు వచ్చే సరికి భారత్‌ బలం ముందు పాక్‌ ఏమాత్రం నిలబడలేదని ఈ మ్యాచ్‌ కూడా నిరూపించింది. రెండేళ్ల క్రితం చాంపియన్స్‌ ట్రోఫీ ఫైనల్‌ విజయాన్ని చూసి మురిసిపోతూ అదే ప్రదర్శనను పునరావృతం చేయాలని ఆశించిన పాకిస్తాన్‌కు గర్వభంగమైంది. సమష్టితత్వంతో చెలరేగిన కోహ్లి సేన వరల్డ్‌ కప్‌ ముఖాముఖీ పోరులో తమ ఆధిపత్యాన్ని 7–0కు పెంచుకొని ప్రత్యర్థికి అందనంత ఎత్తులో నిలిచింది. వన్డే కెరీర్‌లో ఎన్ని శతకాలు బాదినా ప్రపంచకప్‌లో పాకిస్తాన్‌పై సెంచరీ అంటే ఆ కిక్కే వేరు... రోహిత్‌ శర్మ అదే జోష్‌తో ఆడటంతో భారత్‌ భారీ స్కోరుకు బాటలు పడ్డాయి. సహాయక పాత్రలో కెప్టెన్‌ కోహ్లి, ఓపెనర్‌గా వచ్చిన రాహుల్‌ కూడా ఒదిగిపోవడంతో ధావన్‌ లేని లోటు తెలియకుండా భారత్‌ దూసుకుపోయింది. పెద్ద లక్ష్యాలను ఛేదించడంలో పేలవ రికార్డు ఉన్న పాకిస్తాన్‌కు ఇది శక్తికి మించిన పనే అయింది. బుమ్రా, భువీ ఒక్క వికెట్‌ తీయకపోయినా... ఎవరినైనా ఓడించగల బౌలింగ్‌ మనకుందని చూపిస్తూ కుల్దీప్, హార్దిక్‌ పాండ్యా చెలరేగిపోయారు. అనూహ్య అవకాశాన్ని అద్భుతంగా వాడుకున్న విజయ్‌ శంకర్‌ కూడా వీరికి జత కలవడంతో ప్రత్యర్థి కుప్పకూలిపోయింది. మొత్తంగా భయపెట్టిన వర్షం సరైన సమయానికి పక్కకు తప్పుకోవడంతో భారత్‌ రికార్డు చెక్కు చెదరలేదు.    మాంచెస్టర్‌: ప్రపంచకప్‌ టోర్నీ ప్రతిష్టాత్మక పోరులో భారత్‌ మరోసారి పైచేయి సాధించింది. ఆదివారం ఇక్కడి ఓల్డ్‌ ట్రఫోర్డ్‌ మైదానంలో జరిగిన పోరులో భారత్‌ 89 పరుగుల (డక్‌వర్త్‌–లూయిస్‌ ప్రకారం) తేడాతో పాకిస్తాన్‌పై ఘన విజయం సాధించింది. టాస్‌ ఓడి ముందుగా బ్యాటింగ్‌కు దిగిన భారత్‌ 50 ఓవర్లలో 5 వికెట్ల నష్టానికి 336 పరుగులు చేసింది. ‘మ్యాన్‌ ఆఫ్‌ ద మ్యాచ్‌’ రోహిత్‌ శర్మ (113 బంతుల్లో 140; 14 ఫోర్లు, 3 సిక్సర్లు) సెంచరీకి తోడు కోహ్లి (65 బంతుల్లో 77; 7 ఫోర్లు), కేఎల్‌ రాహుల్‌ (78 బంతుల్లో 57; 3 ఫోర్లు, 2 సిక్సర్లు) రాణించారు. అనంతరం పాక్‌ 35 ఓవర్లు ముగిసేసరికి 6 వికెట్ల నష్టానికి 166 పరుగులు చేసింది. ఈ దశలో వర్షం కారణంగా మ్యాచ్‌ నిలిచిపోయింది. దాంతో డక్‌వర్త్‌–లూయిస్‌ ప్రకారం పాక్‌ లక్ష్యాన్ని 40 ఓవర్లలో 302 పరుగులుగా నిర్దేశించారు. పాక్‌ తర్వాతి 5 ఓవర్లలో మరో 46 పరుగులు జోడించి చివరకు 212 పరుగుల వద్ద ఆట ముగించింది. ఫఖర్‌ జమాన్‌ (75 బంతుల్లో 62; 7 ఫోర్లు, 1 సిక్స్‌) టాప్‌ స్కోరర్‌గా నిలిచాడు. భారత్‌ తమ తదుపరి మ్యాచ్‌లో ఈనెల 22న అఫ్గానిస్తాన్‌తో ఆడుతుంది.    టపటపా... భారీ లక్ష్యాన్ని ఛేదించే క్రమంలో ఏ దశలోనూ పాకిస్తాన్‌ గెలుపు దిశగా సాగలేదు. పేలవమైన ఆరంభం, మధ్య ఓవర్లలో స్పిన్‌ను సమర్థంగా ఎదుర్కోలేకపోవడం, ఒక్క బ్యాట్స్‌మన్‌ కూడా దూకుడుగా ఆడలేకపోవడంతో పాక్‌ సహజంగానే ఓటమిని ఆహ్వానించింది. తొలి పది ఓవర్లలో ఆ జట్టు 38 పరుగులే చేయగలిగింది. బాబర్‌ ఆజమ్‌ ఔటయ్యే సమయానికి చేయాల్సిన రన్‌రేట్‌ 8.46 పరుగులకు చేరిపోయింది. కొద్దిసేపటికే హార్దిక్‌ వరుస బంతుల్లో హఫీజ్‌ (9), షోయబ్‌ మాలిక్‌ (0)లను ఔట్‌ చేయడంతో ఆ జట్టుకు ఉన్న దారులు మూసుకుపో యాయి. ఆ తర్వాత మిగతా ఆటంతా లాంఛనమే అయింది. చివర్లో ఇమాద్‌ వసీమ్‌ (39 బంతుల్లో 46 నాటౌట్‌; 6 ఫోర్లు) కొద్దిగా ప్రతిఘటించాడు.   భువీకి గాయం... విజయ్‌కు వికెట్‌... ‘3ఈ’ ప్లేయర్‌గా వరల్డ్‌ కప్‌ జట్టులోకి వచ్చిన విజయ్‌ శంకర్‌పై సగటు అభిమానికి మాత్రం పెద్దగా అంచనాలు లేవు. ధావన్‌ గాయంతో తుది జట్టులో అవకాశం దక్కించుకున్న అతను ఒత్తిడిలో ధాటిగా ఆడలేక బ్యాటింగ్‌లో పెద్దగా ఆకట్టుకోలేకపోయాడు. అయితే ప్రపంచకప్‌లో తొలి మ్యాచ్‌ ఆడుతున్న అతను, తొలి బంతికే వికెట్‌ తీసి వహ్వా అనిపించాడు. ప్రధాన పేసర్‌ భువనేశ్వర్‌ తన మూడో ఓవర్లో నాలుగు బంతులు వేసిన తర్వాత కండరాలు పట్టేయడంతో మైదానం నుంచి వెళ్లిపోయాడు. ఆ ఓవర్‌ను పూర్తి చేసేందుకు వచ్చిన శంకర్‌ తొలి బంతికే ఇమాముల్‌ హఖ్‌ (7)ను వికెట్ల ముందు దొరకబుచ్చుకున్నాడు. అతను ఈ రకంగా వికెట్‌ తీయడం కెప్టెన్‌ కోహ్లితో సహా అందరినీ ఆశ్చర్యపరచింది. వారంతా అతడిని అభినందనలతో ముంచెత్తారు. గాయంతో భువీ రెండు మ్యాచ్‌లకు దూరమయ్యాడు. అద్భుతం ఆ బంతి పాక్‌ ఆశలన్నీ ఆ జట్టు టాప్‌ బ్యాట్స్‌మన్‌ బాబర్‌ ఆజమ్‌ (57 బంతుల్లో 48; 3 ఫోర్లు, 1 సిక్స్‌) పైనే ఉన్న దశలో కుల్దీప్‌ వేసిన బంతి ఒక్కసారిగా పాక్‌ పతనానికి శ్రీకారం చుట్టింది. ఆఫ్‌స్టంప్‌ మీదుగా పడిన బంతి అనూహ్యంగా టర్న్‌ తీసుకొని లోపలికి దూసుకొచ్చింది. బయటి వైపు ఆడేందుకు ప్రయత్నించిన బాబర్‌ పూర్తిగా అంచనా తప్పా డు. దాంతో బ్యాట్, ప్యాడ్‌ మధ్యనుంచి దూసుకుపోయిన బంతి బెయి ల్స్‌ను ఎగరగొట్టింది. బాబర్‌ షాక్‌లో ఉండిపోగా... టీమిండియా సంబరాలు చేసుకుంది. అతని తర్వాతి ఓవర్లోనే ఫఖర్‌ కూడా ఔట్‌ కావడంతో పాక్‌ పరిస్థితి మరింత దిగజారింది. స్కోరు వివరాలు   భారత్‌ ఇన్నింగ్స్‌: రాహుల్‌ (సి) బాబర్‌ (బి) రియాజ్‌ 57; రోహిత్‌ (సి) రియాజ్‌ (బి) హసన్‌ 140; కోహ్లి (సి) సర్ఫరాజ్‌ (బి) ఆమిర్‌ 77; పాండ్యా (సి) బాబర్‌ (బి) ఆమిర్‌ 26; ధోని (సి) సర్ఫరాజ్‌ (బి) ఆమిర్‌ 1; విజయ్‌ శంకర్‌ (నాటౌట్‌) 15; జాదవ్‌ (నాటౌట్‌) 9; ఎక్స్‌ట్రాలు 11; మొత్తం (50 ఓవర్లలో 5 వికెట్లకు) 336. వికెట్ల పతనం: 1–136, 2–234, 3–285, 4–298, 5–314. బౌలింగ్‌: ఆమిర్‌ 10–1–47–3, హసన్‌ అలీ 9–0–84–1, వహాబ్‌ రియాజ్‌ 10–0–71–1, ఇమాద్‌ 10–0–49–0, షాదాబ్‌ 9–0–61–0, మాలిక్‌ 1–0–11–0, హఫీజ్‌ 1–0–11–0. పాకిస్తాన్‌ ఇన్నింగ్స్‌: ఇమామ్‌ ఉల్‌ హఖ్‌ (ఎల్బీ) (బి) విజయ్‌ శంకర్‌ 7; ఫఖర్‌ జమాన్‌ (సి) చహల్‌ (బి) కుల్దీప్‌ 62; బాబర్‌ ఆజమ్‌ (బి) కుల్దీప్‌ 48; హఫీజ్‌ (సి) శంకర్‌ (బి) పాండ్యా 9; సర్ఫరాజ్‌ (బి) విజయ్‌ శంకర్‌ 12; షోయబ్‌ మాలిక్‌ (బి) పాండ్యా 0; ఇమాద్‌ (నాటౌట్‌) 46; షాదాబ్‌ (నాటౌట్‌) 20; ఎక్స్‌ట్రాలు 8; మొత్తం (40 ఓవర్లలో 6 వికెట్లకు) 212. వికెట్ల పతనం: 1–13, 2–117, 3–126, 4–129, 5–129, 6–165.   బౌలింగ్‌: భువనేశ్వర్‌ 2.4–0–8–0, బుమ్రా 8–0–52–0, విజయ్‌ శంకర్‌ 5.2–0–22–2, హార్దిక్‌ పాండ్యా 8–0–44–2, కుల్దీప్‌ 9–1–32–2, చహల్‌ 7–0–53–0.   రాణించిన రాహుల్‌ రాహుల్‌ ఆరంభంలో కొంత తడబడ్డా చివరకు అర్ధ సెంచరీతో భారీ స్కోరులో కీలక పాత్ర పోషించాడు. అతనికి ఆమిర్‌ వేసిన ఇన్నింగ్స్‌ తొలి ఓవర్‌ ‘మెయిడిన్‌’గా ముగిసింది. ఎదుర్కొన్న 11వ బంతికి తొలి ఫోర్‌ కొట్టిన రాహుల్‌... అనంతరం కొన్ని చక్కటి షాట్లు ఆడాడు.  సిక్సర్‌తో 69 బంతుల్లో అతని అర్ధ సెంచరీ పూర్తయింది. మరోసారి బ్యాటింగ్‌ ఆర్డర్‌లో ప్రమోట్‌ అయిన హార్దిక్‌ పాండ్యా (19 బంతుల్లో 26; 2 ఫోర్లు, 1 సిక్స్‌) ఉన్నంత సేపు దూకుడుగా ఆడాడు. హసన్‌ ఓవర్లో అతను కొట్టిన ఫోర్, సిక్స్‌ హైలైట్‌గా నిలిచాయి. ధోని (1) మాత్రం ఎక్కువ సేపు నిలవలేకపోయా డు. ఈ రెండు వికెట్లు ఆమిర్‌కే దక్కాయి.   విరాట్‌ జోరు కోహ్లి నిలదొక్కుకునేందుకు కొంత సమయం తీసుకున్నాడు. సింగిల్స్‌ పైనే దృష్టి పెట్టి రోహిత్‌కు సహకరిస్తూ వచ్చాడు. అతను ఎదుర్కొన్న తొలి 39 బంతుల్లో ఒకే ఒక ఫోర్‌ ఉంది. రోహిత్‌ ఔటైన తర్వాతే విరాట్‌ దూకుడు పెంచి చకచకా బౌండరీలు బాదాడు. ఆమిర్‌ బౌలింగ్‌లో రెండు పరుగులు తీయడంతో 51 బంతుల్లో కెప్టెన్‌ హాఫ్‌ సెంచరీ మార్క్‌ను చేరుకున్నాడు. వ్యక్తిగత స్కోరు 57 వద్ద కోహ్లి వన్డేల్లో 11 వేల పరుగులు పూర్తి చేసుకోవడం విశేషం. వర్షం ఆగిన తర్వాత మరో బౌండరీ కొట్టిన అతని ఇన్నింగ్స్‌ ఆమిర్‌ బౌలింగ్‌లో ముగిసింది. ఆ 20 బంతుల్లో... ఊహించినంత ఎక్కువసేపు కాకపోయినా కొన్ని నిమిషాలు వర్షం మ్యాచ్‌కు కొంత అంతరాయం కలిగించింది. భారత ఇన్నింగ్స్‌లో 46.4 ఓవర్లు ముగిసిన తర్వాత వర్షం వల్ల ఆట ఆగిపోయింది. దాదాపు 40 నిమిషాల తర్వాత మళ్లీ ఆట మొదలైంది. వర్షానికి ముందే పాక్‌ ప్రతిఘటనతో భారత ఇన్నింగ్స్‌లో వేగం తగ్గింది. మిగిలిన 20 బంతుల్లో కోహ్లి ఔట్‌ కాగా... విజయ్‌ శంకర్‌ (15 నాటౌట్‌), కేదార్‌ జాదవ్‌ (9 నాటౌట్‌) ఆశించినంత వేగంగా ఆడలేకపోయారు. దాంతో మొత్తం 31 పరుగులు వచ్చాయి. చివరి పది ఓవర్లలో భారత్‌ 88 పరుగులు చేసింది.   కోహ్లిని ఔట్‌ చేసిన కోహ్లి కోహ్లిని ఔట్‌ చేయడం పాక్‌ బౌలర్ల వల్ల కాకపోయినా కోహ్లి వల్లనే అవుతుంది... తాజా ఘటన దీనికి ఉదాహరణ. ఆమిర్‌ వేసిన బౌన్సర్‌ను కోహ్లి పుల్‌ చేయబోగా అది కీపర్‌ చేతుల్లో పడింది. అంతే...కోహ్లి వెంటనే తలవంచుకొని పెవిలియన్‌ వైపు బయల్దేరాడు. అప్పటికి అంపైర్‌ ఔట్‌గా కూడా ప్రకటించలేదు. రీప్లే చూస్తే కోహ్లి బ్యాట్‌కు బంతి తగల్లే దని తేలింది. అతని బ్యాట్‌ హ్యాండిల్‌ చివర కొంత లూజ్‌గా ఉండటం వల్ల వచ్చిన శబ్దంతో అతను ఔటైనట్లుగా భావించినట్లు అంచనా. నిజానికి భారత్‌కు ఒక రివ్యూ మిగిలే ఉంది. దానిని  విరాట్‌ వాడే ప్రయత్నం చేయకుండా తనంతట తాను వెళ్లిపోవడం విశేషం. రోహిత్‌ సూపర్‌ టోర్నీ తొలి మ్యాచ్‌లో దక్షిణాఫ్రికాపై సెంచరీ సాధించిన రోహిత్‌ మళ్లీ పాక్‌పై సత్తా చాటి శతకంతో చెలరేగాడు. పాక్‌పై అతనికి ఇది వరుసగా రెండో సెంచరీ కావడం విశేషం. ఆరంభంలో అతను హసన్‌ అలీ బౌలింగ్‌లో చెలరేగిపోయాడు. హసన్‌ తొలి రెండు ఓవర్లలో ఒక్కో ఫోర్‌ కొట్టిన రోహిత్, తర్వాతి ఓవర్లో మరో ఫోర్, సిక్స్‌ బాదాడు. స్పిన్నర్‌ షాదాబ్‌ తొలి ఓవర్లో వరుస బంతుల్లో 6, 4 కొట్టిన రోహిత్‌ 34 బంతుల్లోనే హాఫ్‌ సెంచరీ పూర్తి చేసుకున్నాడు. ఆ తర్వాతా అతని జోరు కొనసాగింది. హసన్‌ తర్వాతి స్పెల్‌లో కూడా మళ్లీ ఫోర్, సిక్స్‌ కొట్టిన భారత ఓపెనర్‌ 90ల్లోకి అడుగు పెట్టాడు. షాదాబ్‌ బౌలింగ్‌లో సింగిల్‌తో రోహిత్‌ సెంచరీ (85 బంతుల్లో) పూర్తయింది. ఆ తర్వాత వహాబ్‌ బౌలింగ్‌లో ఒంటికాలిపై బ్యాక్‌వర్డ్‌ స్క్వేర్‌లెగ్‌ దిశగా కొట్టిన ఫోర్‌ ఇన్నింగ్స్‌కే హైలైట్‌గా నిలిచింది. 38 ఓవర్లు ముగిసే సరికే రోహిత్‌ స్కోరు 136. అతని జోరు చూస్తే మరో డబుల్‌ సెంచరీ ఖాయమనిపించింది. అయితే హసన్‌ బౌలింగ్‌లో స్కూప్‌ ఆడేందుకు ప్రయత్నించి షార్ట్‌ ఫైన్‌లెగ్‌లో క్యాచ్‌ ఇవ్వడంతో అద్భుత ఇన్నింగ్స్‌ ముగిసింది. 140 పరుగులు చేసినా... తాను ఔటైన తీరు పట్ల రోహిత్‌ తనపై తానే తీవ్ర అసంతృప్తిని ప్రదర్శిస్తూ పెవిలియన్‌ చేరాడు.   1 ప్రపంచ కప్‌లో పాక్‌పై ఏ జట్టుకైనా ఇదే అత్యధిక స్కోరు (336/5). ఇదే టోర్నీలో ఇంగ్లండ్‌ (334/9) నమోదు చేసిన రికార్డును భారత్‌ సవరించింది. 2 అత్యధిక వన్డేలు ఆడిన భారత క్రికెటర్ల జాబితాలో ద్రవిడ్‌ (340)ను దాటి ధోని (341) రెండో స్థానానికి చేరాడు. సచిన్‌ (463) టాపర్‌గా ఉన్నాడు. 3 ప్రపంచకప్‌ అరంగేట్రం మ్యాచ్‌లో తొలి బంతికే వికెట్‌ తీసిన మూడో బౌలర్‌ విజయ్‌ శంకర్‌. గతంలో హార్వే (ఆస్ట్రేలియా; పాక్‌పై 2003లో), మలాచీ జోన్స్‌ (బెర్ముడా; భారత్‌పై 2007లో) ఈ ఘనత సాధించారు.    9 వన్డేల్లో 11 వేల పరుగులు పూర్తి చేసుకున్న తొమ్మిదో క్రికెటర్‌ కోహ్లి. సచిన్, గంగూలీ తర్వాత భారత్‌ నుంచి ఈ ఘనత సాధించిన మూడో బ్యాట్స్‌మన్‌.

కార్డిఫ్‌: ఎట్టకేలకు ప్రపంచ కప్‌లో దక్షిణాఫ్రికా గెలుపు బోణీ కొట్టింది. శనివారం అఫ్గానిస్తాన్‌తో ఇక్కడ జరిగిన మ్యాచ్‌లో సఫారీ జట్టు 9 వికెట్లతో జయభేరి మోగించింది. టాస్‌ ఓడి బ్యాటింగ్‌కు దిగిన అఫ్గాన్‌ జట్టు 20 ఓవర్లకు 69/2 స్కోరుతో ఉండగా వర్షం గంటపాటు అంతరాయం కలిగింది. అంతకుముందూ 25 నిమిషాలు ఆటకు ఆటంకం ఏర్పడింది. దీంతో డక్‌వర్త్‌ లూయీస్‌ నిబంధనల ప్రకారం మ్యాచ్‌ను 48 ఓవర్లకు కుదించారు. అయితే, ‘మ్యాన్‌ ఆఫ్‌ ద మ్యాచ్‌’ ఇమ్రాన్‌ తాహిర్‌ (4/29), క్రిస్‌ మోరిస్‌ (3/13) ధాటికి అఫ్గాన్లు 34.1 ఓవర్లలో 125 పరుగులకే ఆలౌటయ్యారు. రషీద్‌ ఖాన్‌ (25 బంతుల్లో 35; 6 ఫోర్లు) టాప్‌ స్కోరర్‌. ఓపెనర్లు హజ్రతుల్లా జజాయ్‌ (22; 3 ఫోర్లు), నూర్‌ అలీ జద్రాన్‌ (32; 4 ఫోర్లు) మినహా మిగతా బ్యాట్స్‌మెన్‌ సింగిల్‌ డిజిట్‌కే పరిమితమయ్యారు. అనంతరం దక్షిణాఫ్రికా లక్ష్యాన్ని 48 ఓవర్లలో 127గా సవరించారు. సఫారీలు 28.4 ఓవర్లలో వికెట్‌ మాత్రమే కోల్పోయి 131 పరుగులు చేసి విజయానందాన్ని పొందారు. ఓపెనర్లు క్వింటన్‌ డికాక్‌ (72 బంతుల్లో 68; 8 ఫోర్లు), హషీమ్‌ ఆమ్లా (83 బంతుల్లో 41 నాటౌట్‌; 4 ఫోర్లు) శతక భాగస్వామ్యం అందించారు. డికాక్‌ ఔటయ్యాక వన్‌డౌన్‌లో వచ్చిన ఫెలూక్వాయో (17 బంతుల్లో 17 నాటౌట్‌; 2 ఫోర్లు, సిక్స్‌) సిక్స్‌తో లాంఛనం ముగించాడు.

బ్యాటింగ్, బౌలింగ్‌లో కొంత తడబడినా చివరకు శ్రీలంకపై ఆస్ట్రేలియాదే పైచేయి అయింది. తొలుత కెప్టెన్‌ ఫించ్‌ భారీ సెంచరీతో అదరగొట్టడంతో శ్రీలంకకు సవాల్‌ విసిరిన కంగారూలు... అనంతరం ప్రత్యర్థి పోరాటాన్ని తట్టుకుని గెలుపును అందుకున్నారు. ఓ దశలో సింహళీ జట్టు సంచలనం సృష్టిస్తుందేమో అనిపించినా ఆసీస్‌ ముందు వారి ఆటలు సాగలేదు.    లండన్‌: డిఫెండింగ్‌ చాంపియన్‌ ఆస్ట్రేలియాకు ప్రపంచ కప్‌లో మరో విజయం దక్కింది. శనివారం ఇక్కడి ఓవల్‌ మైదానంలో జరిగిన మ్యాచ్‌ లో ఆ జట్టు 87 పరుగుల తేడాతో శ్రీలంకను తేలిగ్గా ఓడించింది. కెప్టెన్‌ ఆరోన్‌ ఫించ్‌ (132 బంతుల్లో 153; 15 ఫోర్లు, 5 సిక్స్‌లు) భారీ సెంచరీకి తోడు, స్టీవ్‌ స్మిత్‌ (59 బంతుల్లో 73; 7 ఫోర్లు, సిక్స్‌) అర్ధ సెంచరీ సాధించాడు. టాస్‌ ఓడి బ్యాటింగ్‌కు దిగిన ఆసీస్‌ నిర్ణీత ఓవర్లలో ఏడు వికెట్ల నష్టానికి 334 పరుగులు చేసింది. చివర్లో మ్యాక్స్‌వెల్‌ (25 బంతుల్లో 46 నాటౌట్‌; 5 ఫోర్లు, సిక్స్‌) మెరిశాడు. ఉదాన (2/57) కీలక వికెట్లు తీయడంతో పాటు రెండు చురుౖకైన రనౌట్లు చేశా డు. ఛేదనలో ఓపెనర్లు కెప్టెన్‌ కరుణరత్నే (108 బంతుల్లో 97; 9 ఫోర్లు), కుశాల్‌ పెరీరా (36 బంతుల్లో 52; 5 ఫోర్లు, సిక్స్‌) ఇచ్చిన అద్భుత ప్రారంభాన్ని సద్వినియోగం చేసుకోలేకపోయిన లంక 45.5 ఓవర్లలో 247 పరుగులకే ఆలౌటైంది. పేసర్లు స్టార్క్‌ (4/55), రిచర్డ్‌సన్‌ (3/47) కీలక సమయంలో విజృంభించి ప్రత్యర్థిని నిలువరించారు. ఫించ్‌కు ‘మ్యాన్‌ ఆఫ్‌ ద మ్యాచ్‌’ దక్కింది. వరుసగా రెండో మ్యాచ్‌లోనూ ఆసీస్‌ స్పెషలిస్ట్‌ స్పిన్నర్‌ లేకుండా బరిలో దిగడం గమనార్హం. వారిద్దరికి తోడు.. చివర్లో అతడు కెప్టెన్‌ హోదాకు తగ్గట్లు ఆసీస్‌ ఇన్నింగ్స్‌కు ఫించ్‌ మూలస్తంభంలా నిలిచాడు. అతడితో కలిసి తొలి వికెట్‌కు 80 పరుగులు జోడించినా ఇబ్బందిగా కనిపించిన మరో ఓపెనర్‌ వార్నర్‌ (48 బంతుల్లో 26; 2 ఫోర్లు)ను ధనంజయ బౌల్డ్‌ చేశాడు. 53 బంతుల్లో ఫించ్‌ అర్ధశతకం అందుకున్నాడు. ఉస్మాన్‌ ఖాజా (10)నూ ధనంజయే ఔట్‌ చేశాడు. అప్పటికి స్కోరు 23 ఓవర్లలో సరిగ్గా 100. రన్‌రేట్‌ 5 లోపే. ఈ దశలో ఫించ్‌కు స్మిత్‌ తోడవడంతో పరిస్థితిలో మార్పు వచ్చింది. ధనంజయ బౌలింగ్‌లో ఫోర్, రెండు సిక్స్‌లు బాది ఫించ్‌ ఊపు తెచ్చాడు. సిరివర్దన ఓవర్లో లాంగాఫ్‌లోకి లాఫ్టెడ్‌ షాట్‌తో సిక్స్‌ కొట్టి సెంచరీ (97 బంతుల్లో) పూర్తి చేసుకున్నాడు. స్మిత్‌ అర్ధ సెంచరీ (46 బంతుల్లో) మార్క్‌ను చేరుకోవడం, ఫించ్‌ దూకుడు మీద ఉండటంతో ఆసీస్‌ 350 పైనే చేసేలా కనిపించింది. తిసారా పెరీరా, నువాన్‌ ప్రదీప్, మలింగ వేసిన వరుస ఓవర్లలో వీరు ఏకంగా 45 పరుగులు పిండుకున్నారు. 128 బంతుల్లోనే 150 పరుగులు పూర్తి చేసుకున్న ఫించ్‌ ఇదే జోష్‌లో ఉదాన బౌలింగ్‌లో భారీ షాట్‌కు యత్నించి ఔటయ్యాడు. మరుసటి ఓవర్లోనే మలింగ పదునైన యార్కర్‌తో స్మిత్‌ వికెట్లను గిరాటేశాడు. ప్రదీప్‌ బౌలింగ్‌లో (45వ ఓవర్‌) మ్యాక్స్‌వెల్‌ నాలుగు ఫోర్లు, సిక్స్‌ బాది జట్టు స్కోరును 300 దాటించాడు. ఆ ఐదు ఓవర్లు... మొదటి 25 ఓవర్లలో 110 పరుగులే చేసిన ఆసీస్‌ తర్వాతి 20 ఓవర్లలో 192 పరుగులతో చెలరేగింది. అయితే, ఆ జట్టు ఇన్నింగ్స్‌లో చివరి ఐదు ఓవర్లను ప్రత్యేకంగా చెప్పుకోవాలి. భీకరంగా ఆడుతున్న మ్యాక్స్‌వెల్‌ను కట్టడి చేయడంతో పాటు, షాన్‌ మార్‌‡్ష, అలెక్స్‌ క్యారీలను అడ్డుకుని లంక ఒక్కసారిగా పుంజుకుంది. ఈ క్రమంలో 46, 47 ఓవర్లలో మలింగ, ఉదాన నాలుగేసి పరుగులే ఇచ్చారు. 48వ ఓవర్లో మలింగ 7 పరుగులతో సరిపెట్టాడు. 49వ ఓవర్లో ఉదాన సైతం 7 పరుగులే ఇచ్చి... డైరెక్ట్‌ హిట్‌లతో క్యారీ (4), కమిన్స్‌ (0)లను రనౌట్‌ చేశాడు. తిసారా వేసిన ఆఖరి ఓవర్లో 10 పరుగులే వచ్చాయి. మొత్తమ్మీద చివరి ఐదు ఓవర్లలో కంగారూలు మూడు వికెట్లు కోల్పోయి 32 పరుగులే చేయగలిగారు. లంక కలకలం రేపినా... తమ స్థాయి ఆటకు భారీ అనదగ్గ లక్ష్యంతో బరిలో దిగిన శ్రీలంక అనూహ్యంగా విజృంభించింది. కరుణరత్నే, కుశాల్‌ తొలి ఓవర్‌ నుంచే బౌండరీలు బాదుతూ సులువుగా పరుగులు సాధించారు. ఒకటికి రెండుసార్లు బంతి ఓపెనర్ల బ్యాట్‌ లోపలి అంచుకు తగిలినా వాటికీ ఫోర్లు రావడంతో రన్‌రేట్‌ జోరుగా సాగింది. 43 బంతుల్లో కరుణరత్నే, 33 బంతుల్లో కుశాల్‌ అర్ధ సెంచరీలు నమోదు చేసుకున్నారు. 13వ ఓవర్లోనే జట్టు స్కోరు 100 దాటింది. అయితే, కుశాల్‌ను బౌల్డ్‌ చేసి స్టార్క్‌ ఈ భాగస్వామ్యాన్ని విడదీశాడు. తిరిమన్నె (16) పేలవ ఫామ్‌ కొనసాగిస్తూ వెనుదిరిగాడు. సెంచరీ ముంగిట కరుణరత్నే ఔటయ్యాడు. మాథ్యూస్‌ (9), మెండిస్‌ (30) పరిస్థితులకు తగ్గట్లు ఆడలేకపోయారు. ఒకే ఓవర్లో సిరివర్ధన (3), తిసారా పెరీరా (7)లను పెవిలియన్‌ చేర్చి లంక ను స్టార్క్‌ దెబ్బకొట్టాడు. ఉదాన (8), మలింగ (1) వికెట్లు రిచర్డ్‌సన్‌కు దక్కాయి. స్కోరు వివరాలు ఆస్ట్రేలియా ఇన్నింగ్స్‌: వార్నర్‌ (బి) ధనంజయ 26; ఫించ్‌ (సి)       కరుణరత్నే (బి) ఉదాన 153; ఖాజా (సి) ఉదాన (బి) ధనంజయ 10; స్మిత్‌ (బి) మలింగ 73; మ్యాక్స్‌వెల్‌ (నాటౌట్‌) 46; షాన్‌ మార్‌‡్ష (సి) సిరివర్ధన (బి) ఉదాన 3; క్యారీ (రనౌట్‌) 4; కమిన్స్‌ (రనౌట్‌) 0; స్టార్క్‌ (నాటౌట్‌) 5; ఎక్స్‌ట్రాలు 14; మొత్తం (50 ఓవర్లలో 7          వికెట్లకు) 334. వికెట్ల పతనం: 1–80, 2–100, 3–273, 4–278, 5–310, 6–317, 7–320.   బౌలింగ్‌: మలింగ 10–1–61–1, ప్రదీప్‌ 10–0–88–0, ఉదాన 10–0–57–2, తిసారా పెరీరా 10–0–67–0, డి సిల్వా 8–0–40–2, సిరివర్ధన 2–0–17–0. శ్రీలంక ఇన్నింగ్స్‌: కరుణరత్నే (సి) మ్యాక్స్‌వెల్‌ (బి) రిచర్డ్‌సన్‌ 97; కుశాల్‌ పెరీరా (బి) స్టార్క్‌ 52; తిరిమన్నె (సి) క్యారీ (బి) బెహ్రెన్‌డార్ఫ్‌ 16; మెండిస్‌ (సి) క్యారీ (బి) స్టార్క్‌ 30; మాథ్యూస్‌ (సి) క్యారీ (బి) కమిన్స్‌ 9; సిరివర్ధన (బి) స్టార్క్‌ 3; తిసారా పెరీరా (సి) వార్నర్‌ (బి) స్టార్క్‌ 7; ధనంజయ నాటౌట్‌ 16; ఉదాన (సి) ఫించ్‌ (బి) రిచర్డ్‌సన్‌ 8; మలింగ (సి) ఖాజా (బి) రిచర్డ్‌సన్‌ 1; ప్రదీప్‌ (సి) క్యారీ (బి) కమిన్స్‌ 0; ఎక్స్‌ట్రాలు 8; మొత్తం (45.5 ఓవర్లలో ఆలౌట్‌) 247. వికెట్ల పతనం: 1–115, 2–153, 3–186, 4–205, 5–209, 6–217, 7–222, 8–236, 9–237, 10–247. బౌలింగ్‌: స్టార్క్‌ 10–0–55–4; కమిన్స్‌ 7.5–0–38–2; బెహ్రెన్‌డార్ఫ్‌ 9–0–59–1; రిచర్డ్‌సన్‌ 9–1–47–3; మ్యాక్స్‌వెల్‌ 10–0–46–0. లంక నిరసన ప్రపంచ కప్‌లో బస, ప్రాక్టీస్‌ ఏర్పాట్లు, మ్యాచ్‌ వేదికల విషయంలో తమ పట్ల వివక్ష చూపుతున్నందుకు నిరసన తెలుపుతూ... శ్రీలంక జట్టు ఆస్ట్రేలియాతో మ్యాచ్‌ అనంతరం మీడియా సమావేశాన్ని బహిష్కరించింది. ఐసీసీ నిబంధనల ప్రకారం జట్టు తరఫున ఎవరైనా ఒకరు ఈ సమావేశానికి తప్పనిసరిగా హాజరవాలి. దీనిని ఉల్లంఘించినందుకు లంక జట్టుపై చర్యలు తీసుకునే వీలుంది.  

సరిగ్గా నాలుగు నెలల క్రితం జమ్మూ కశ్మీర్‌లోని పుల్వామాలో పాకిస్తాన్‌ ఉగ్రవాదులు జరిపిన దాడిలో నలభై మంది భారత సీఆర్‌పీఎఫ్‌ జవాన్లు మరణించారు. ఆ దాడి తర్వాత మన దేశంలో వెల్లువెత్తిన ఆగ్రహావేశాల ప్రభావం క్రికెట్‌పై కూడా పడింది. ఏమైనా సరే పాకిస్తాన్‌తో క్రికెట్‌ మ్యాచ్‌ మాత్రం ఆడవద్దంటూ వీరాభిమానుల నుంచి మాజీ ఆటగాళ్ల వరకు వ్యాఖ్యలు చేశారు. రెండు పాయింట్లు పోయినా వరల్డ్‌ కప్‌ మ్యాచ్‌ను బహిష్కరించాల్సిందేనని ప్రముఖులెందరో బహిరంగంగా పిలుపునిచ్చారు. ఇప్పుడు సమయం గిర్రున తిరిగింది... అసలు జరుగుతుందో లేదో అని సందేహమున్న మ్యాచ్‌కు సర్వం సన్నద్ధమైంది. ఇప్పుడు ఎవరి ఆలోచనల్లోనూ పుల్వామాలు, బాలాకోట్‌లు లేవు... ఉన్నదల్లా క్రికెట్‌ ఒక్కటే. ప్రపంచకప్‌ను ప్రత్యక్షంగా చూసేందుకు టికెట్ల కొనుగోలు కోసం ఐసీసీ బ్యాలెట్‌ ఓపెన్‌ చేస్తే ఫైనల్‌ మ్యాచ్‌కు 2.7 లక్షల దరఖాస్తులు వచ్చాయి. అదే భారత్, పాక్‌ మ్యాచ్‌కు ఏకంగా 4 లక్షల మంది దరఖాస్తు చేసుకున్నారు. ఇది ప్రపంచవ్యాప్తంగా ఈ మ్యాచ్‌కు ఉన్న క్రేజ్‌కు నిదర్శనం. ఇరు జట్ల కెప్టెన్లు దీనిని ఒక క్రికెట్‌ మ్యాచ్‌గానే చూడండి, ఆటను ఆస్వాదించండి అని గంభీరంగా ఎన్ని మాటలైనా చెప్పవచ్చు. కానీ వారితో పాటు అభిమానులకూ తెలుసు ఇది అన్ని మ్యాచ్‌లలాంటిది కాదని. రెండు దేశాలు మ్యాచ్‌ ఫలితాన్ని ఎంత ప్రతిష్టాత్మకంగా తీసుకుంటాయోనని! 41 ఏళ్లలో 131 సార్లు తలపడినా... భారత్, పాక్‌ మ్యాచ్‌ ఏదో రూపంలోనో, మరే కారణంతోనో ఆసక్తి రేపుతూనే ఉంది. ఇప్పుడు విశ్వ వేదికపై దాయాదుల మధ్య ఏడోసారి జరిగే సమరానికి అందరిలో అంతే ఆసక్తి, అదే ఉత్సాహం!   మాంచెస్టర్‌: రెండేళ్ల క్రితం చాంపియన్స్‌ ట్రోఫీ ఫైనల్‌ మ్యాచ్‌... అప్పటి భారత్‌ టీమ్‌ బలాన్ని చూస్తే పాకిస్తాన్‌ చేతిలో ఓడిపోవడం అనూహ్యం. సరిగ్గా చెప్పాలంటే బలహీనంగా కనిపించిన పాక్‌ను తప్పుగా అంచనా వేసి కోహ్లి సేన బోల్తా కొట్టింది. ఇప్పుడు అదే ఇంగ్లండ్‌లో మరో ఐసీసీ ఈవెంట్‌లో ఇరు జట్లు తలపడబోతున్నాయి. ఈ మధ్య కాలంలో మరో రెండు వన్డేలలో పాక్‌ను భారత్‌ చిత్తు చేసినా... వరల్డ్‌ కప్‌ మ్యాచ్‌ అంటే ఉండే జోష్‌ వేరు. ఈ నేపథ్యంలో ఇరు జట్లు ఇక్కడి ఓల్డ్‌ ట్రఫోర్డ్‌ మైదానంలో నేడు లీగ్‌ మ్యాచ్‌లో తలపడబోతున్నాయి. మూడు మ్యాచ్‌లలో ఓటమి లేకుండా విరాట్‌ బృందం ఆత్మవిశ్వాసంతో కనిపిస్తుండగా, ఈ సారైనా భారత్‌పై తమ చెత్త ప్రపంచకప్‌ రికార్డు సరిచేయాలని పాక్‌ ఆశిస్తోంది. అయితే ఇరు జట్లకు ప్రత్యర్థిగా వర్షం మరోవైపు నుంచి వేచి చూస్తుండటమే పెద్ద సమస్య.   విజయ్‌ శంకర్‌కు చాన్స్‌! ధావన్‌కు గాయమయ్యాక న్యూజిలాండ్‌తో మ్యాచ్‌లో జట్టు కొత్త కూర్పును పరీక్షించాలని భారత్‌ భావించింది. అయితే వర్షం కారణంగా అది సాధ్యం కాలేదు. కాబట్టి ఈ మ్యాచ్‌ దానికి అవకాశం కల్పించవచ్చు. ఓపెనర్‌గా రోహిత్‌కు తోడుగా రాహుల్‌ బరిలోకి దిగుతాడు. నాలుగో స్థానంలో విజయ్‌ శంకర్‌ను ఆడించాలని టీమ్‌ మేనేజ్‌మెంట్‌ దాదాపుగా నిర్ణయించుకుంది. వాతావరణం అనుకూలంగా ఉంటే అతని స్లో మీడియం పేస్‌ ఉపయుక్తంగా ఉంటుందని జట్టు భావిస్తోంది. ఇది మినహా మిగతా జట్టులో ఎలాంటి మార్పులు ఉండకపోవచ్చు. అయితే పిచ్‌ను బట్టి అదనపు పేసర్‌ గురించి ఆలోచిస్తామని కోహ్లి చెప్పాడు. అదే జరిగితే కుల్దీప్‌ స్థానంలో షమీ ఆడే అవకాశం ఉంది. వర్షంతో మ్యాచ్‌ కుదించాల్సి వస్తే అప్పుడు తమ జట్టు కూర్పును కూడా మార్చుకుంటామని కూడా కెప్టెన్‌ అన్నాడు. చాంపియన్స్‌ ట్రోఫీ ఫైనల్లో రోహిత్, కోహ్లి వైఫల్యమే భారత్‌ను దెబ్బ తీసింది. ఈసారి వీరిద్దరు గట్టిగా నిలబడితే టీమిండియాకు ఎలాంటి సమస్య ఉండదు. శుభారంభం లభిస్తే ఆ తర్వాత ధోని, పాండ్యా, జాదవ్‌ దానిని కొనసాగించగలరు. ఒక్కసారిగా ఫామ్‌ను అంది పుచ్చుకున్న ఆమిర్‌ను మన టాపార్డర్‌ సమర్థంగా ఎదుర్కోవడం ముఖ్యం. బుమ్రా, భువనేశ్వర్‌ తమ స్థాయిలో చెలరేగితే భారత్‌కు ఆరంభంలోనే మ్యాచ్‌పై పట్టు చిక్కుతుంది.   మాలిక్‌ను ఆడిస్తారా! భారత్‌తో వన్డేల్లో అద్భుతమైన రికార్డు ఉన్న పాక్‌ ఆటగాళ్లలో షోయబ్‌ మాలిక్‌ ఒకడు. అయితే అదంతా గతం. భారత్‌పై గత తొమ్మిదేళ్లలో అతను ఒకే ఒక అర్ధ సెంచరీ చేశాడు. ప్రపంచకప్‌లో కూడా ఫామ్‌ ఘోరంగా ఉంది. అయితే అతని అనుభవం దృష్ట్యా మరో అవకాశం ఇవ్వాలని టీమ్‌ భావిస్తోంది. ఆసిఫ్‌ అలీ స్థానంలో ఆల్‌రౌండర్‌ ఇమాద్‌ వసీమ్‌కు చోటు ఇవ్వడం మినహా గత మ్యాచ్‌ ఆడిన జట్టునే పాక్‌ బరిలోకి దించనుంది. పాక్‌కు కూడా టాప్‌–3నే బలం. ఈ ముగ్గురి వన్డే సగటు 50కి పైగానే ఉండటం విశేషం. చాంపియన్స్‌ ట్రోఫీ ఫైనల్లో కూడా ఫఖర్‌ జమాన్‌ సెంచరీనే భారత్‌ను ఓడించింది.ఇమామ్‌ ఉల్‌ హఖ్, బాబర్‌ ఆజమ్‌ కూడా మంచి ఫామ్‌లో ఉన్నారు. అనుభవజ్ఞుడైన హఫీజ్‌ కూడా కీలకం అవుతాడు. కొత్త పేసర్‌ షాహిన్‌ ఆఫ్రిది బౌలింగ్‌లో భారత్‌ ఎప్పుడూ ఆడలేదు. ఇది తమకు అనుకూలిస్తుందని పాక్‌ ఆశిస్తోంది. ఆమిర్‌ను జట్టు ప్రధానంగా నమ్ముకుంది. తన శైలి బౌలింగ్‌కు ఇక్కడి పరిస్థితులు సరిగ్గా అనుకూలించే అవకాశం ఉండటంతో ఆమిర్‌ ప్రమాదరకంగా మారగలడు. మొత్తంగా తొలి మ్యాచ్‌లో విండీస్‌ చేతిలో చిత్తు కావడం మినహా పాక్‌ జట్టు బలంగానే కనిపిస్తోంది. ఫేవరెట్‌ ఇంగ్లండ్‌ను కూడా ఓడించగలిగిన సర్ఫరాజ్‌ బృందాన్ని తక్కువగా అంచనా వేస్తే కష్టం.   మీరు హీరోలుగా మారే అవకాశం వచ్చింది. మీది 2019 బ్యాచ్‌. మిమ్మల్ని ఎలా గుర్తుంచుకోవాలని భావిస్తున్నారు. ఈ మ్యాచ్‌ ఒక అద్భుతమైన అవకాశాన్ని ఇస్తోంది. ఇందులో ఒక్కో క్షణం మీ కెరీర్‌లను నిర్వచిస్తుంది. ఏదైనా ప్రత్యేకంగా చేస్తే ఎప్పటికీ గుర్తుండిపోతారు. –పాక్‌ జట్టు సభ్యులనుద్దేశించి కోచ్‌ మికీ ఆర్థర్‌ చెప్పిన మాటలు     పిచ్, వాతావరణం సాధారణ బ్యాటింగ్‌ పిచ్‌. కనీస మాత్రం పచ్చిక కూడా లేదు. భారీ స్కోర్లు నమోదయ్యే అవకాశం ఉంది. అయితే ఒక్కసారిగా మారిపోయే వాతావరణం జట్టు వ్యూహాలను మార్చవచ్చు. వర్ష ప్రమాదం ఎలాగూ ఉంది. కాబట్టి టాస్‌ గెలిచిన జట్టు ఫీల్డింగ్‌ ఎంచుకోవచ్చు. 1999 ప్రపంచకప్‌లో ఇరు జట్ల మధ్య ఇక్కడే మ్యాచ్‌ జరిగింది.   తుది జట్లు (అంచనా) భారత్‌: కోహ్లి (కెప్టెన్‌), రోహిత్, రాహుల్, విజయ్‌ శంకర్, ధోని, జాదవ్, పాండ్యా, భువనేశ్వర్, కుల్దీప్, చహల్, బుమ్రా. పాకిస్తాన్‌: సర్ఫరాజ్‌ (కెప్టెన్‌), ఇమామ్, ఫఖర్, బాబర్‌ ఆజమ్, హఫీజ్, మాలిక్, సొహైల్‌/ఇమాద్, షాదాబ్, రియాజ్, ఆమిర్, షాహిన్‌ ఆఫ్రిది.   చహల్, రోహిత్, బుమ్రా

న్యూఢిల్లీ : భారత్‌-పాకిస్తాన్‌ మధ్య క్రికెట్‌ మ్యాచ్‌ అంటే యావత్‌ ప్రపంచం ఆసక్తిగా ఎదురుచూస్తుంది. ఇక దాయాదుల పోరు నేపథ్యంలో అటు అభిమానులు, ఇటు ఆటగాళ్లు ‘సమరమే ’ అంటూ రంగంలోకి దిగుతారు. సోషల్‌ మీడియాలో పెద్ద యుద్ధమే నడుస్తుంది. ఇండియన్‌ హీరో, వింగ్‌ కమాండర్‌ అభినందన్‌ వర్ధమాన్‌ను అవమానిస్తూ పాకిస్తాన్‌కు చెందిన జాజ్‌టీవీ ఓ యాడ్‌ రూపొందించిన సంగతి తెలిసిందే. దీనిపై భారత అభిమానులు తీవ్ర ఆగ్రహం వ్యక్తం చేశారు. ఈ నేపథ్యంలో ‘వీ సెవెన్‌ పిక్చర్స్‌’ యూట్యూబ్‌ ఛానెల్‌ పాకిస్తాన్‌ యాడ్‌కు కౌంటర్‌గా ఓ వీడియో రూపొందించి శభాష్‌ అనిపించుకుంది. (వైరల్‌ : కప్పు లాక్కెళ్లిపోయిన పాకిస్తాన్‌..!) వీడియో ప్రకారం.. ఓ సెలూన్‌ షాప్‌లో షేవింగ్‌ చేసుకుని టీమిండియా ఆటగాడొకరు టీవీలో యువరాజ్‌సింగ్‌ ఆటను ఆస్వాదిస్తుంటాడు. కొందరు ఆటగాళ్లని మర్చిపోలేం అంటాడు. అంతలోనే పాక్‌ ఆటగాడొకరు లోనికి వస్తాడు. అతనివైపు చూసి మరికొందరినీ మర్చిపోవాలి అనుకుంటాం అంటాడు. ఇండియన్‌ ఆటగాడికి ఫాదర్స్‌డే శుభాకాంక్షలు చెప్పిన పాక్‌ ఆటగాడు.. చేతి రుమాలుని గిఫ్ట్‌గా ఇస్తాడు. ఓడిపోయిన తర్వాత ముఖం దాచుకోవడానికి ఈ కర్చీఫ్‌ ఉపయోగపడుతుంది డాడీ అంటూ ఎగతాళిగా మాట్లాడతాడు. అనంతరం  హెయిర్‌ స్టైలిస్ట్‌ని షేవ్‌ చేయమంటాడు. పాక్‌ ఆటగాడి వెకిలి చేష్టలతో అప్పటికే ఆగ్రహంతో ఉన్న ఇండియన్‌ క్రికెటర్‌, హెయిర్‌ స్టైలిస్ట్‌ వైపు చూసి ఓ సైగ చేస్తాడు. (చదవండి : ట్రెండింగ్‌లో అభినందన్‌ ‘గన్‌స్లింగర్‌’..!) దాంతో పాక్‌ ఆటగాడి కళ్లపై దోసకాయ ముక్కల్ని పెట్టి.. షేవింగ్‌ కానిచ్చేస్తాడు. ఆఫ్రిదిలా ఉన్నానా..? అంటూ పాక్‌ ఆటగాడు ఆనందంతో అడుగుతాడు. అద్దంలో ముఖం చూసుకుని బిత్తరపోతాడు. తను చెప్పిన విధంగా కాకుండా.. అభినందన్‌ గన్‌స్లింగర్‌ మీసంతో షేవ్‌ చేశావేంటని ప్రశ్నిస్తాడు. అది మా నేషనల్‌ హీరో అభినందన్‌ స్టైల్‌ అంటాడు హెయిర్‌ స్టైలిస్ట్‌. ఇప్పుడు బయటికి వెళ్లడం ఎలా అని పరేషాన్‌ అవుతున్న పాక్‌ ఆటగాడికి కర్చీఫ్‌ ఇచ్చి ఇప్పుడు మఖం దాచుకోపో అంటాడు టీమిండియా ఆటగాడు. బిడ్డకు ఏం కావాలో తండ్రికి తెలుసు.. మీకు ప్రపంచకప్‌ అవసరం లేదు, అభినందన్‌ టీకప్పు చాలు అని అర్థం అయింది అంటాడు టీమిండియా ఆటగాడు. ఇక ప్రపంచకప్‌లో భాగంగా భారత్‌ పాక్‌ వన్డే మ్యాచ్‌ ఆదివారం మాంచెస్టర్‌లో జరుగనున్న సంగతి తెలిసిందే.

కార్డిఫ్‌: ఈ ప్రపంచకప్‌లో ఇప్పటివరకు అసలు గెలవలేకపోయిన జట్లు దక్షిణాఫ్రికా, అఫ్గానిస్తాన్‌. ఎట్టకేలకు ఈ రెండు జట్ల మధ్య పోరు జరుగనుండటంతో ఖాతా తెరిచే అవకాశం వచ్చినట్లయింది. శనివారం వానే లేకపోతే... అట్టడుగు స్థానాల్లో ఉన్న ఈ జట్లలో ఏదో ఒక జట్టు గెలుపుబాట పడుతుంది. ఈ మెగా ఈవెంట్‌ సఫారీకి కంటిమీద కునుకు లేకుండా చేస్తోంది. ఎప్పుడైనా క్వార్టర్సో, సెమీస్‌లోనో దురదృష్టంతో దూరమయ్యే దక్షిణాఫ్రికా ఈసారి ఆరంభం నుంచే కష్టాలు ఎదుర్కొంటుంది. వరుసగా ఇంగ్లండ్, బంగ్లాదేశ్, భారత్‌ చేతిలో ఓడిన సఫారీ జట్టు విండీస్‌తో వర్షం వల్ల ఆడలేకపోయింది. ఆడాల్సిన 9 మ్యాచ్‌ల్లో నాలుగు మ్యాచ్‌లు పూర్తయినా గెలవని ఈ జట్టు సెమీస్‌ అవకాశాల్ని దాదాపు కోల్పోయింది. మరోవైపు క్రికెట్‌ కూన అఫ్గానిస్తాన్‌ కూడా వరుసగా ఆడిన మూడు మ్యాచ్‌ల్లో ఓడింది. ఆసీస్, లంక, కివీస్‌లను ఎదుర్కోలేకపోయింది. అయితే దక్షిణాఫ్రికాలాంటి పటిష్ట జట్టును ఓడిస్తుందన్న నమ్మకం లేకపోయినా... రోజు కలిసొస్తే, సఫారీకి దురదృష్టం వెంటాడితే మాత్రం అఫ్గాన్‌ గెలిచే అవకాశాల్ని కొట్టిపారేయలేం. పైగా నిలకడలేని బ్యాటింగ్‌ లైనప్‌ సఫారీని నిండా ముంచుతోంది. ఆమ్లా వరుసగా విఫలమవుతున్నాడు. కెప్టెన్‌ డు ప్లెసిస్, ఓపెనర్, కీపర్‌ డికాక్‌ బాధ్యతను తీసుకుంటే పరుగుల వరద పారించొచ్చు. బౌలింగ్‌లో రబడపైనే జట్టు ఆధారపడింది. మరోవైపు కెప్టెన్‌ గుల్బదిన్‌ నైబ్, హజ్రతుల్లా, ఆల్‌రౌండర్‌ నబీ బ్యాటింగ్‌లో రాణిస్తే దక్షిణాఫ్రికాను ఎదుర్కోవచ్చు. రషీద్‌ ఖాన్, ముజీబ్‌ బౌలింగ్‌లో సత్తాచాటితే... ప్రత్యర్థి ఫామ్‌ దృష్ట్యా అనూహ్య ఫలితాన్ని ఆశించవచ్చు.

లండన్‌: రెండు మ్యాచ్‌లు వర్షార్పణంతో డీలా పడిన శ్రీలంక శనివారం డిఫెండింగ్‌ చాంపియన్‌ ఆస్ట్రేలియాను ఎదుర్కొనేందుకు సిద్ధమైంది. ఈ ప్రపంచకప్‌లో లంక జూన్‌ 4 తర్వాత బరిలోకే దిగలేదు. బంగ్లాదేశ్, పాకిస్తాన్‌లతో జరగాల్సిన మ్యాచ్‌లు కనీసం టాస్‌ అయిన పడకుండానే రద్దయ్యాయి. నాలుగు మ్యాచ్‌ల్లో ఒకటి మాత్రమే గెలిచిన ఈ జట్టు 4 పాయింట్లతో ప్రస్తుతం పాయింట్ల పట్టికలో ఐదో స్థానంలో ఉంది. జట్టు పరిస్థితి అధోగతిలో ఉంది. నిలకడే లేని బ్యాటింగ్‌ జట్టు మేనేజ్‌మెంట్‌ను కలవరపెడుతోంది. కివీస్‌తో చేతులేత్తేసిన బ్యాట్స్‌మెన్‌... అఫ్గాన్‌ ధాటికీ ఆపసోపాలు పడ్డారు. ఏదో బౌలర్ల పుణ్యమాని ఆ మ్యాచ్‌ గెలిచింది. బ్యాటింగ్‌లో కెప్టెన్‌ కరుణరత్నే, కుశాల్‌ పెరీరా మాత్రమే ఫామ్‌లో ఉన్నారు. ఆడిన రెండు మ్యాచ్‌ల్లోనూ మిగతావారంతా మూకుమ్మడిగా విఫలమయ్యారు. ఆల్‌రౌండర్‌ మ్యాథ్యూస్‌ రెండు సార్లు డకౌటయ్యాడు. బౌలింగ్‌లో మలింగ, నువాన్‌ ప్రదీప్‌లు ఆకట్టుకునే ప్రదర్శన ఇచ్చారు. మరోవైపు ఆస్ట్రేలియా ప్రపంచకప్‌లో దూసుకెళుతోంది. ఒక్క భారత్‌ చేతిలో ఓడిన కంగారూ సేన మూడింట గెలిచి పట్టికలో రెండో స్థానంలో ఉంది. బ్యాటింగ్, బౌలింగ్, ఫీల్డింగ్‌ ఇలా ఏ రకంగా చూసినా కూడా ఇపుడున్న లంక కంటే టోర్నీ ఫేవరెట్‌ ఆస్ట్రేలియా ఎన్నో రెట్లు ముందంజలో ఉంది. వార్నర్, స్మిత్, ఫించ్, ఖాజా, క్యారీ అందరూ టచ్‌లోకి వచ్చేశారు. జట్టుకు అవసరమైనపుడు కూల్టర్‌ నైల్‌ ఆల్‌రౌండ్‌ ప్రదర్శనతో ఆదుకుం టున్నాడు. బౌలింగ్‌లో స్టార్క్, కమిన్స్‌ ప్రత్యర్థుల వెన్నువిరుస్తున్నారు. పటిష్టమైన ఫించ్‌ సేనను ఎదుర్కోవాలంటే శ్రీలంక సర్వశక్తులు ఒడ్డాల్సిందే. ముఖాముఖి... ఇప్పటివరకు ఆస్ట్రేలియా, శ్రీలంక జట్ల మధ్య 96 మ్యాచ్‌లు జరిగాయి. 60 మ్యాచ్‌ల్లో ఆస్ట్రేలియా గెలుపొందగా... శ్రీలంకకు ఖాతాలో 32 విజయాలు చేరాయి. నాలుగు మ్యాచ్‌లు రద్దయ్యాయి. ప్రపంచకప్‌ చరిత్రలో ఈ రెండు జట్లు తొమ్మిదిసార్లు తలపడ్డాయి. ఏడు సార్లు ఆస్ట్రేలియాను విజయం వరించగా... ఒకసారి మాత్రమే శ్రీలంక (1996 ఫైనల్లో) గెలిచింది. మరో మ్యాచ్‌ రద్దయింది.   అవేం పిచ్‌లు... ఇదేం వివక్ష! ‘టోర్నీ ఆడేందుకు వచ్చిన పది దేశాలను సమానంగా చూడాలి. కానీ ఏ విషయంలోనూ మమ్మల్ని అలా చూడట్లేదు. పిచ్, నెట్స్, బస, బస్సు ఇలా అన్నింటా సవతి తల్లి ప్రేమే చూపిస్తున్నారు. మేం ఇప్పటి వరకు ఆడిన మ్యాచ్‌ల్లో అన్ని బౌన్సీ వికెట్లే! బ్యాటింగ్‌కు అవకాశమున్న పిచ్‌లే ఇవ్వలేదు. ప్రాక్టీస్‌లోనూ వివక్షే. బస ఏర్పాట్లూ అరకొరే! అందరికీ మూణ్నాలుగు నెట్స్‌ ఇస్తే... మాకు రెండింటితో సరిపెట్టారు. అందరికి సౌకర్యవంతమైన డబుల్‌ డెక్కర్‌ బస్సులిస్తే మాకేమో తక్కువ సీట్లున్న బస్సుతో లాగిస్తున్నారు. స్విమ్మింగ్‌ పూల్‌ లేని హోటల్లో బస ఏర్పాటు చేశారు. పేసర్లు సేదతీరేందుకు కొలను అవసరం లేదా’ అని శ్రీలంక జట్టు మేనేజర్‌ అశాంత డి మెల్‌ ఐసీసీకి ఫిర్యాదు చేశారు. జట్లు (అంచనా) శ్రీలంక: కరుణరత్నే (కెప్టెన్‌), కుశాల్‌ పెరీరా, తిరిమన్నె, కుశాల్‌ మెండిస్, మాథ్యూస్, డిసిల్వా, తిసారా పెరీరా, ఉదాన, లక్మల్, ప్రదీప్, మలింగ.  ఆస్ట్రేలియా: ఫించ్‌ (కెప్టెన్‌), వార్నర్, ఖాజా, స్మిత్, మ్యాక్స్‌వెల్, మార్ష్, క్యారీ, కూల్టర్‌ నైల్, కమిన్స్, స్టార్క్, జంపా.  

హార్డ్‌ హిట్టర్లు... మెరుపు పేసర్లతో నిండిన ఇంగ్లండ్‌ జట్టులో హంగు ఆర్భాటాలు లేకుండా, తన పని తాను చేసుకుంటూ పోతూ, సాత్వికంగా కనిపించే ఆటగాడు జో రూట్‌. ఓ దశలో ఆ జట్టు దూకుడైన ఆటతో రూట్‌ అవసరం ఇక లేదనిపించింది. కానీ, అతడో వెలకట్టలేని ఆభరణం. అందుకే... ఎందరు విధ్వంసక బ్యాట్స్‌మెన్‌ పోటీకి వచ్చినా రూట్‌ను మాత్రం ఇంగ్లండ్‌ పక్కన పెట్టలేదు. ఈ నమ్మకానికి తగ్గట్లే... వన్డేలకు సరిగ్గా సరిపోయే సొగసైన ఆటతో వెస్టిండీస్‌తో మ్యాచ్‌లో తన విలువను మరోసారి చాటాడతడు. పార్ట్‌టైమ్‌ స్పిన్‌తో ప్రత్యర్థిని కీలక సమయంలో కోలుకోలేని దెబ్బకొట్టి... జట్టు అవసరాల రీత్యా ఓపెనింగ్‌కు దిగి అజేయ సెంచరీతో గెలిపించాడు. ‘మ్యాన్‌ ఆఫ్‌ ద మ్యాచ్‌’గా నిలిచాడు.   సౌతాంప్టన్‌: జో రూట్‌ (94 బంతుల్లో 100 నాటౌట్‌; 11 ఫోర్లు; 2/27; 2 క్యాచ్‌లు) ఆల్‌రౌండ్‌ ప్రదర్శన మినహా... భారీ స్కోర్లు, మెరుపు ఇన్నింగ్స్‌ ఏమీ లేకుండా ఇంగ్లండ్‌– వెస్టిండీస్‌ మ్యాచ్‌ సాదాసీదాగా సాగిపోయింది. రెండు జట్ల మధ్య శుక్రవారం ఇక్కడ జరిగిన మ్యాచ్‌లో ఇంగ్లండ్‌ 8 వికెట్లతో సునాయాస విజయం సాధించింది. టాస్‌ ఓడి బ్యాటింగ్‌కు దిగిన కరీబియన్‌ జట్టు బ్యాట్స్‌మెన్‌ పేలవ షాట్లతో వికెట్లు పారేసుకోవడంతో 44.4 ఓవర్లలో 212 పరుగులకే ఆలౌటైంది. నికోలస్‌ పూరన్‌ (78 బంతుల్లో 63; 3 ఫోర్లు, సిక్స్‌) టాప్‌ స్కోరర్‌. ఓపెనర్‌ క్రిస్‌ గేల్‌ (41 బంతుల్లో 36; 5 ఫోర్లు, సిక్స్‌), హెట్‌మైర్‌ (48 బంతుల్లో 39; 4 ఫోర్లు) ఫర్వాలేదనిపించారు. ఆతిథ్య జట్టు పేసర్లు మార్క్‌ వుడ్‌ (3/18), జోఫ్రా ఆర్చర్‌ (3/30) కట్టుదిట్టంగా బంతులేయగా, రూట్‌ కీలక సమయంలో రెండు వికెట్లు తీశాడు. అనంతరం అతడు బెయిర్‌స్టో (46 బంతుల్లో 45; 7 ఫోర్లు)తో కలిసి ఛేదనలో శుభారంభం అందించాడు. దీంతో జట్టు ఏ దశలోనూ ఇబ్బంది పడకుండా 33.1 ఓవర్లలో రెండు వికెట్లు కోల్పోయి లక్ష్యాన్ని అందుకుంది. సమష్టి వైఫల్యంతో... మ్యాచ్‌లో వెస్టిండీస్‌ పరాజయానికి ఇంగ్లండ్‌ బౌలింగ్‌ ప్రతిభ కంటే బ్యాట్స్‌మెన్‌ చెత్త షాట్లే కారణం. కాస్త నిలదొక్కుకుంటే పరుగులు చేసే వీలున్నా... అడ్డదిడ్డంగా బాది వారు ఔటయ్యారు. అధ్వాన ఫామ్‌ కొనసాగిస్తూ ఓపెనర్‌ ఎవిన్‌ లూయిస్‌ (2) మూడో ఓవర్లోనే బౌల్డయ్యాడు. గేల్‌ దూకుడుగా ఆడే ప్రయత్నం చేసినా... షై హోప్‌ (11) పూర్తిగా తడబడ్డాడు. వీరిద్దరూ రెండు బంతుల వ్యవధిలో వెనుదిరగడంతో జట్టు బాధ్యతంతా హెట్‌మైర్, పూరన్‌పై పడింది. ఈ కుర్రాళ్లు సమన్వయంతో బ్యాటింగ్‌ చేస్తూ ఇన్నింగ్స్‌ను నిలబెట్టే ప్రయత్నం చేశారు. రన్‌రేట్‌ను పెంచుకుంటూ పోతూ వీరు నాలుగో వికెట్‌కు 89 పరుగులు జోడించి పరిస్థితి చక్కదిద్దుతుండగా రూట్‌ దెబ్బకొట్టాడు. వరుస ఓవర్లలో హెట్‌మైర్, కెప్టెన్‌ హోల్డర్‌ (9)లను రిటర్న్‌ క్యాచ్‌లతో పెవిలియన్‌ చేర్చాడు. రసెల్‌ (16 బంతుల్లో 21; ఫోర్, 2 సిక్స్‌లు) దూకుడుకు వుడ్‌ తెరదించాడు. ఆర్చర్‌ పదునైన పేస్‌తో పూరన్‌ను ఔట్‌ చేశాక విండీస్‌ ఇన్నింగ్స్‌ ముగిసేందుకు ఎంతోసేపు పట్టలేదు. ఆతిథ్య జట్టు అలవోకగా... అడపాదడపా షార్ట్‌ పిచ్‌ బంతులు వేయడం మినహా విండీస్‌ పేసర్లు ప్రభావవంతంగా లేకపోవడంతో ఛేదన ఇంగ్లండ్‌కు నల్లేరుపై నడకే అయింది. బౌండరీలు బాదుతూ బెయిర్‌స్టో, రూట్‌ ఓవర్‌కు 6 పైగా పరుగులు చేస్తూ పోయారు. తొలి వికెట్‌కు 95 పరుగులు జోడించాక బెయిర్‌ స్టో ఔటయ్యాడు. రూట్‌తో రెండో వికెట్‌కు 104 పరుగులు జోడించిన క్రిస్‌ వోక్స్‌ (54 బంతుల్లో 40; 4 ఫోర్లు) లక్ష్యానికి చేరువలో  వెనుదిరిగాడు. ఈ క్రమంలో రూట్‌ 50 బంతుల్లో అర్ధ సెంచరీ, 93 బంతుల్లో సెంచరీ పూర్తి చేసుకున్నాడు. కెరీర్‌లో అతడికి 16వ వన్డే సెంచరీ కాగా, ఈ ప్రపంచ కప్‌లో రెండోది. స్టోక్స్‌ (6 బంతుల్లో 10 నాటౌట్‌; 2 ఫోర్లు) విజయ లాంఛనం పూర్తి చేశాడు. స్కోరు వివరాలు వెస్టిండీస్‌ ఇన్నింగ్స్‌: గేల్‌ (సి) బెయిర్‌స్టో (బి) ప్లంకెట్‌ 36; లూయిస్‌ (బి) వోక్స్‌ 2; హోప్‌ (ఎల్బీడబ్ల్యూ) (బి) వుడ్‌ 11; పూరన్‌ (సి) బట్లర్‌ (బి) ఆర్చర్‌ 63; హెట్‌మైర్‌ (సి అండ్‌ బి) రూట్‌ 39; హోల్డర్‌ (సి అండ్‌ బి) రూట్‌ 9; రసెల్‌ (సి) వోక్స్‌ (బి) వుడ్‌ 21; బ్రాత్‌వైట్‌ (సి) బట్లర్‌ (బి) ఆర్చర్‌ 14; కాట్రెల్‌ (ఎల్బీడబ్ల్యూ) (బి) ఆర్చర్‌ 0; థామస్‌ (నాటౌట్‌) 0; గాబ్రియెల్‌ (బి) వుడ్‌ 0; ఎక్స్‌ట్రాలు 17; మొత్తం (44.4 ఓవర్లలో ఆలౌట్‌) 212. వికెట్ల పతనం: 1–4, 2–54, 3–55, 4–144, 5–156, 6–188, 7–202, 8–202, 9–211, 10–212. బౌలింగ్‌: వోక్స్‌ 5–2–16–1; ఆర్చర్‌ 9–1–30–3; ప్లంకెట్‌ 5–0–30–1; వుడ్‌ 6.4–0–18–3; స్టోక్స్‌ 4–0–25–0; రషీద్‌ 10–0–61–0; రూట్‌ 5–0–27–2. ఇంగ్లండ్‌ ఇన్నింగ్స్‌: బెయిర్‌స్టో (సి) బ్రాత్‌వైట్‌ (బి) గాబ్రియెల్‌ 45; జో రూట్‌ (నాటౌట్‌) 100; వోక్స్‌ (సి) సబ్‌ (అలెన్‌) (బి) గాబ్రియెల్‌ 40; స్టోక్స్‌ (నాటౌట్‌) 10, ఎక్స్‌ట్రాలు 18; మొత్తం (33.1 ఓవర్లలో 2 వికెట్లకు) 213. వికెట్ల పతనం: 1–95, 2–199. బౌలింగ్‌: కాట్రెల్‌ 3–0–17–0, థామస్‌ 6–0–43–0, గాబ్రియెల్‌ 7–0–49–2, రసెల్‌ 2–0–14–0, హోల్డర్‌ 5.1–0–31–0, బ్రాత్‌వైట్‌ 5–0–35–0, గేల్‌ 5–0–22–0.   ఇంగ్లండ్‌కు గాయాల బెడద హాట్‌ ఫేవరెట్‌ ఇంగ్లండ్‌కు ప్రపంచ కప్‌లో గాయాల బెడద తీవ్రమవుతోంది. కీలక బ్యాట్స్‌మన్‌ జోస్‌ బట్లర్‌ కండరాల గాయం నుంచి కోలుకున్నాడని ఊరట చెందుతుండగానే, స్టార్‌ ఓపెనర్‌ జేసన్‌ రాయ్, కెప్టెన్‌ ఇయాన్‌ మోర్గాన్‌లు వెస్టిండీస్‌తో మ్యాచ్‌లో ఫిట్‌నెస్‌ సమస్యలతో ఇబ్బంది పడ్డారు. విండీస్‌ ఇన్నింగ్స్‌ 8వ ఓవర్‌లో ఫీల్డింగ్‌ చేస్తూ తొడ కండరాలు పట్టేయడంతో మైదానాన్ని వీడిన రాయ్‌ తిరిగి రాలేదు. నిబంధనల ప్రకారం అతడు మైదానం బయట ఎంత సమయమైతే ఉన్నాడో అంత సమయం, లేదంటే ఇంగ్లండ్‌ ఇన్నింగ్స్‌లో ఐదు వికెట్లు పడిన తర్వాత బ్యాటింగ్‌కు రావాల్సి ఉంటుంది. దీంతో రాయ్‌ ఇన్నింగ్స్‌ను ప్రారంభించే వీల్లేకపోయింది. ఇక మోర్గాన్‌... విండీస్‌ ఇన్నింగ్స్‌ 40వ ఓవర్లో వెన్నునొప్పితో తప్పుకొన్నాడు. ఈ నేపథ్యంలో బెయిర్‌స్టోతో కలిసి రూట్‌ ఓపెనింగ్‌కు దిగగా, వోక్స్‌ను వన్‌డౌన్‌లో పంపాల్సి వచ్చింది. మరోవైపు పేసర్‌ మార్క్‌ వుడ్‌ మోకాలి నొప్పితో ఇబ్బంది పడుతున్నాడు. అతడు శుక్రవారం ఫిట్‌నెస్‌ టెస్ట్‌ ఎదుర్కొని మరీ మ్యాచ్‌ ఆడటం గమనార్హం. ఆర్చర్‌  

వెస్టిండీస్‌ చివరిసారిగా ప్రపంచ కప్‌ గెలిచింది 1979లో...! అది కూడా ఫైనల్లో ఇంగ్లండ్‌పై విజయంతో! ఆ తర్వాత రెండు జట్లు గత 40 ఏళ్లలో కప్‌లో మరో ఐదుసార్లు ఎదురుపడ్డాయి. కానీ, వెస్టిండీస్‌కు ఇంగ్లండ్‌పై నెగ్గడం గగనమైంది. ప్రస్తుతం మరోసారి అమీతుమీకి సిద్ధమయ్యాయి. మరి... పైచేయి టోర్నీ హాట్‌ ఫేవరెట్, మోర్గాన్‌ నేతృత్వంలోని ఆతిథ్య జట్టుదా? హోల్డర్‌ సారథ్యంలోని కరీబియన్లదా? నేడే చూడాలి...!   సౌతాంప్టన్‌: ప్రపంచ కప్‌లో ఓ ఆసక్తికర సమరం. ధనాధన్‌ ఆటకు పేరుగాంచిన ఇంగ్లండ్‌–వెస్టిండీస్‌లు సౌతాంప్టన్‌లోని రోజ్‌బౌల్‌ మైదానం వేదికగా శుక్రవారం తలపడనున్నాయి. ఆతిథ్య జట్టు భీకర ఫామ్‌తో అదరగొడుతున్నా, సమష్టిగా ఆడితే ఎలాంటి ప్రత్యర్థినైనా ఓడించే సత్తా ఉన్నవారు కరీబియన్లు. కప్‌లో ఇరు జట్లకు ఇది నాలుగో మ్యాచ్‌. రెండు విజయాలు, ఒక ఓటమితో ఇంగ్లండ్‌ నాలుగు పాయింట్లతో ఉండగా, ఒక విజయం, ఒక ఓటమి, ఒక మ్యాచ్‌ రద్దుతో విండీస్‌ ఖాతాలో మూడు పాయింట్లున్నాయి. ఇటీవలి కాలంలో వన్డేల్లో ఇంగ్లండ్‌కు దీటుగా నిలిచినది వెస్టిండీసే కావడం గమనార్హం. వీటి మధ్య ఫిబ్రవరిలో జరిగిన ఐదు మ్యాచ్‌ల సిరీస్‌ 2–2తో సమమవడమే దీనికి నిదర్శనం. మరోవైపు విండీస్‌ దీవుల్లోని ఓ భాగమైన బార్బడోస్‌లో జన్మించి ఇంగ్లండ్‌కు ఆడుతున్న పేసర్‌ జోఫ్రా ఆర్చర్‌ను యూనివర్సల్‌ బాస్‌ క్రిస్‌ గేల్‌ ఎలా ఎదుర్కొం టాడన్నది ఈ మ్యాచ్‌లో ఆసక్తికర అంశం కానుంది. కీలక బ్యాట్స్‌మన్‌ జాస్‌ బట్లర్‌ ఫిట్‌నెస్‌ సాధించడం ఇంగ్లండ్‌కు ఊరటనిస్తోంది. ఆల్‌రౌండర్‌ ఆండ్రీ రసెల్‌ మోకాలి గాయం విండీస్‌ను కలవరపరుస్తోంది. దక్షిణాఫ్రికాతో మ్యాచ్‌లో అతడు లేకుండానే జట్టు బరిలో దిగింది. రసెల్‌ కోలుకుంటే తప్పక ఆడించాలని జట్టు భావిస్తోంది. జోరులో మోర్గాన్‌ సేన టోర్నీ తొలి మ్యాచ్‌లో సఫారీలను తేలిగ్గానే ఓడించిన ఇంగ్లండ్‌కు రెండో మ్యాచ్‌లో పాకిస్తాన్‌ షాకిచ్చింది. ఈ ప్రభావం నుంచి వెంటనే కోలుకున్న ఆ జట్టు బంగ్లాదేశ్‌పై భారీ విజయం సాధించింది. పేస్, అదనపు బౌన్స్‌తో ప్రత్యర్థి పేసర్లు కాట్రెల్, థామస్, హోల్డర్‌ మంచి లయలో బౌలింగ్‌ చేస్తుండటంతో నేటి మ్యాచ్‌ వారికి సవాలే కానుంది. ఓపెనర్‌ జేసన్‌ రాయ్, జో రూట్, బట్లర్‌ ఫామ్‌లో ఉండటంతో మిగతావారు పెద్దగా పరుగులు చేయకున్నా సాగిపోతోంది. మరో ఓపెనర్‌ బెయిర్‌ స్టో, కెప్టెన్‌ మోర్గాన్‌ తమ స్థాయి ఇన్నింగ్స్‌ బాకీ ఉన్నారు. బౌలింగ్‌లో ఆర్చర్‌ ఏమాత్రం అవకాశం లేనంతగా బంతులేస్తున్నాడు. రషీద్‌ స్పిన్‌ మధ్య ఓవర్లలో కీలకం. మొదట బ్యాటింగ్‌ దక్కితే ఇంగ్లండ్‌ను అందుకోవడం ఎవరి తరం కాదు. విండీస్‌కు బ్యాటింగే బెంగ బౌలింగ్‌ ఎంత బలంగా ఉందో... విండీస్‌ బ్యాటింగ్‌ అంత అనిశ్చితితో సాగుతోంది. ఆస్ట్రేలియాతో మ్యాచ్‌ బ్యాట్స్‌మెన్‌ వైఫల్యం కారణంగానే చేజారింది. దక్షిణాఫ్రికాతో మ్యాచ్‌ రద్దు జట్టు అవకాశాలకు కొంత గండి కొట్టింది. ఈ నేపథ్యంలో ఇంగ్లండ్‌పై గెలుపు కీలకం కానుంది. విధ్వంసక క్రిస్‌ గేల్‌ ఇంకా పూర్తిస్థాయిలో విజృంభించలేదు. ఓపెనర్‌ ఎవిన్‌ లూయిస్‌ ఫామ్‌లో లేడు. భారీ స్కోర్లు చేయాలన్నా, ఛేదించాలన్నా వీరితో పాటు కుర్రాళ్లు పూరన్, హెట్‌మైర్‌ రాణించాల్సి ఉంటుంది. సౌతాంప్టన్‌లో శుక్రవారం వర్షం కురిసే అవకాశం ఉంది. దీని ప్రభావం మ్యాచ్‌పై పడొచ్చు.   ముఖాముఖి రికార్డు ఇరు జట్లు ఇప్పటివరకు 101 మ్యాచ్‌ల్లో ఎదురుపడ్డాయి. ఇంగ్లండ్‌ 51 మ్యాచ్‌ల్లో గెలుపొందగా... వెస్టిండీస్‌ 44 గెలిచింది. ఆరుమ్యాచ్‌లు రద్దయ్యాయి. ప్రపంచ కప్‌లో మాత్రం ఇంగ్లండ్‌దే పూర్తిగా పైచేయి. విండీస్‌తో ఆరుసార్లు తలపడగా... ఐదుసార్లు ఇంగ్లండే నెగ్గింది. ఒక్కదాంట్లోనే కరీబియన్లు (1979 ప్రపంచ కప్‌ ఫైనల్‌) విజయం సాధించగలిగారు. 

నాటింగ్‌హామ్‌: ప్రపంచ కప్‌ను నీడలా వెంటాడుతున్న వరుణుడు భారత్‌కూ అడ్డుతగిలాడు. దీంతో గురువారం ఇక్కడ న్యూజిలాండ్‌తో టీమిండియా ఆడాల్సిన మ్యాచ్‌ రద్దయింది. ఇరు జట్లకు చెరో పాయింట్‌ కేటాయించారు. తొలుత తడిగా ఉన్న ఔట్‌ ఫీల్డ్, శీతల వాతావరణ ప్రభావంతో టాస్‌ ఆలస్యమైంది. అరగంట తర్వాత సిద్ధమవబోతుండగా వాన ప్రారంభమైంది. సాధారణ పరిస్థితుల్లో అయితే ఇదేమంత అడ్డంకి కాకపోయేది. కానీ, మంగళ, బుధవారాల్లో నాటింగ్‌హామ్‌లో కురిసిన భారీ వర్షాలకు ట్రెంట్‌బ్రిడ్జ్‌ మైదానం ఔట్‌ ఫీల్డ్‌ చిత్తడిగా మారింది. దీనికి గురువారం వాన తోడవడం, ఎండ ఏమాత్రం లేకపోవడంతో మ్యాచ్‌ ఆడే వీల్లేకపోయింది. ‘వచ్చారు... చూశారు... వెళ్లారు’ తరహాలో అప్పటికీ  ఇంగ్లండ్‌ కాలమానం ప్రకారం 11.30కు, 12.30కు అంపైర్లు మైదానాన్ని పరిశీలించారు. మధ్యాహ్నం 3 గంటల సమయంలో చివరి సారిగా పరిస్థితిని సమీక్షించి మ్యాచ్‌ను రద్దు చేస్తున్నట్లు ప్రకటించారు. నాలుగు మ్యాచ్‌ల ద్వారా (మూడు విజయాలు, ఒక రద్దు) ఏడు పాయింట్లు సాధించిన న్యూజిలాండ్‌ ప్రస్తుతం పాయింట్ల పట్టికలో ‘టాప్‌’లో ఉండగా, మూడు మ్యాచ్‌లాడిన భారత్‌ రెండు విజయాలు, ఒక మ్యాచ్‌ రద్దుతో ఐదు పాయింట్లతో మూడో స్థానానికి చేరింది. గత మూడు ప్రపంచ కప్‌లలో భారత్, కివీస్‌ జట్ల మధ్య మ్యాచ్‌ జరగలేదు. చివరిసారి 2003 కప్‌లో సెంచూరియన్‌ వేదికగా టీమిండియా నెగ్గింది. కప్‌లో ఇరు జట్ల మధ్య మొత్తం ఏడు మ్యాచ్‌లు జరగ్గా భారత్‌ మూడు, కివీస్‌ నాలుగు గెలిచాయి. ఆదివారం చిరకాల ప్రత్యర్థి పాకిస్తాన్‌తో మ్యాచ్‌ నేపథ్యంలో... గురువారం మ్యాచ్‌ సాగి ఉంటే టీమిండియాకే ఎక్కువ ప్రయోజనకరంగా ఉండేది. కీలక ఓపెనర్‌ శిఖర్‌ ధావన్‌ దూరమైన నేపథ్యంలో కూర్పును పరీక్షించుకునే అవకాశమూ చిక్కేది. పాక్‌తో మ్యాచ్‌కు సైతం ముప్పు! వారం వ్యవధిలో టోర్నీలో వర్షం కారణంగా రద్దయిన నాలుగో మ్యాచ్‌ ఇది. వీటిలో మూడింట  టాస్‌ అయినా పడకపోగా, మరోదాంట్లో గంటకు మించి ఆట సాగలేదు. వాతావరణం చూస్తుంటే శుక్రవారం నాటి వెస్టిండీస్, ఇంగ్లండ్‌ మ్యాచ్‌ సహా ఇదే బాటలో మరిన్ని మ్యాచ్‌లు ప్రభావితం కావడం ఖాయంగా కనిపిస్తోంది. ఇప్పటివరకు ఆస్ట్రేలియా, అఫ్గానిస్తాన్, ఇంగ్లండ్‌ జట్లు ఆడిన మ్యాచ్‌లకు మాత్రమే వర్షం ఎదురవ్వలేదు. అన్నింటికీ మించి టోర్నీకే పెద్ద ఆకర్షణ అయిన భారత్‌–పాకిస్తాన్‌ మ్యాచ్‌కూ వరుణుడి గండం తప్పేలా లేదు. మాంచెస్టర్‌లో ఆదివారం ఈ మ్యాచ్‌ జరగాలి. నాటింగ్‌హామ్‌కు వందపైగా కిలోమీటర్ల దూరంలో ఉన్నప్పటికీ అక్కడ సైతం వాతావరణం ఇదే తీరుగా ఉంది. అభిమానుల ఆవేదన... ప్రతిష్టాత్మక ప్రపంచ కప్‌లో వర్షం అభిమానులకు మరో రూపంలో ఆవేదన మిగులుస్తోంది. ఐసీసీ నిబంధనల ప్రకారం మ్యాచ్‌ ప్రారంభం కాకుంటే ప్రేక్షకులకు టిక్కెట్‌ డబ్బు వెనక్కిస్తారు. అయితే, ఎక్కువశాతం మంది బ్లాక్‌లో టిక్కెట్లు కొంటున్నారు. దీంతో మ్యాచ్‌ రద్దయినా వీరికి డబ్బు తిరిగి రావడం లేదు. ‘కివీస్‌తో మ్యాచ్‌కు రూ.70 వేలు పెట్టి బ్లాక్‌లో టిక్కెట్‌ కొన్నా. ఇదంతా పోయినట్లే. పాక్‌తో మ్యాచ్‌కైతే రూ.1.80 లక్షలు చెబుతున్నారు. నేను దీనిని భరించే స్థితిలో లేను’ అని సింగపూర్‌ నుంచి వచ్చిన ఓ సాఫ్ట్‌వేర్‌ ఇంజినీర్‌ వాపోయాడు. మరోవైపు ‘మేం నాలుగు రోజులైంది సూర్యుడిని చూసి...! భారత్‌తో మ్యాచ్‌ రద్దు మాకేం ఆశ్చర్యం కలిగించలేదు. విశ్రాంతి దొరుకుతున్నందున ఒకందుకు ఇది మంచిదే అనుకోవాలి’ అని న్యూజిలాండ్‌ కెప్టెన్‌ విలియమ్సన్‌ అన్నాడు.   చెరో పాయింట్‌ సంతోషమే ‘కివీస్‌తో మ్యాచ్‌ రద్దు సరైన నిర్ణయమే. విజయాలు సాధించి ఉన్నాం కాబట్టి చెరో పాయింట్‌ దక్కడం ఏమంత ఇబ్బందికరమేం కాదు. పాక్‌తో ఆదివారం మ్యాచ్‌ గురించి ఆలోచిస్తున్నాం. మా ప్రణాళికలు మాకున్నాయి. మైదానంలో వాటిని అమలు చేయాలి. ధావన్‌ చేతికి కొన్ని వారాల పాటు ప్లాస్టర్‌ తప్పనిసరి. లీగ్‌ మ్యాచ్‌ల చివరి దశలో లేదా సెమీస్‌కు అతడు అందుబాటులోకి వస్తాడు. అతడు తిరిగి ఆడాలని కోరుకుంటున్నా’ అని కోహ్లి పేర్కొన్నాడు.

లండన్‌ : వికెట్‌ తీసిన వెంటనే ‘సెల్యూట్‌’ చేసి వెస్టిండీస్‌ ఫాస్ట్‌బౌలర్‌ షెల్డన్ కాట్రెల్ తాజా వరల్డ్‌కప్‌లో ఓ నయా ట్రెండ్‌ సృష్టించాడు. పాకిస్తాన్‌తో జరిగిన తొలి మ్యాచ్‌లో వికెట్‌ తీసిన వెంటనే అంపైర్‌కు, డ్రెస్సింగ్‌ రూమ్‌వైపు సెల్యూట్‌ చేసి అందరినీ ఆశ్చర్యానికి గురిచేశాడు. వృత్తిరీత్యా సోల్జర్‌ అయిన కాట్రెల్‌ జమైకా డిఫెన్స్‌ ఫోర్స్‌కు గౌరవ సూచకంగా వికెట్‌ తీసిన వెంటనే మార్చ్‌ఫాస్ట్‌ చేసి సెల్యూట్‌ చేస్తానని వెల్లడించాడు. అయితే, షెల్డన్‌ సెల్యూట్‌పై ఇంగ్లండ్‌ కోచ్‌ ట్రెవర్‌ బేలిస్‌ మాత్రం అసహనం వ్యక్తం చేశాడు. తనకు నచ్చని ఒకేఒకే విషయం షెల్డన్‌ సెల్యూట్‌ అంటూ పేర్కొన్నాడు. (వికెట్‌ పడగానే సెల్యూట్‌.. కారణం ఇదే) ‘ఆటగాళ్లేం నాలుగు పదుల వయసు వారు కాదు. ఇది కుర్రాళ్ల ఆట. సంబరాలు చేసుకునే విధానం ఒక్కో జట్టుకు ఒక్కోలా ఉంటుంది. ఆటగాళ్ల మధ్య సెలబ్రేషన్స్‌లో తేడాలుంటాయి. గెలుపు సంబరాలు అటు సహచరులకు, ఇటు అభిమానులకు ఉత్తేజాన్నిస్తాయి. అయితే, ఒకరి సెలబ్రేషన్స్‌.. మరొకరికి నచ్చాలనే నియమమేమీ లేదు. షెల్డన్‌ సెల్యూట్‌ విషయంలో నాకూ అలానే అనిపించింది’ అని చెప్పుకొచ్చాడు. ఇక ఈ శుక్రవారం ఇంగ్లండ్‌, వెస్టిండీస్‌ మధ్య మ్యాచ్‌ జరుగనుంది.  (చదవండి : ఈ క్యాచ్‌ చూస్తే.. ‘సెల్యూట్‌’ చేయాల్సిందే)

లండన్‌: ప్రపంచ కప్‌లో ఇప్పటికే మూడు మ్యాచ్‌లు వర్షం కారణంగా రద్దయ్యాయి. మరికొన్ని మ్యాచ్‌ లకు కూడా వర్షం ముప్పు పొంచి ఉందని వాతావరణ శాఖ చెబుతోంది. ఈ నేపథ్యంలో ఐసీసీ టోర్నీ నిర్వహణ తీరుపై తీవ్ర విమర్శలు వస్తున్నాయి. ప్రతిష్టాత్మక ఈవెంట్‌లో అన్ని మ్యాచ్‌లకు ‘రిజర్వ్‌ డే’ ఉంటే బాగుండేదని చాలా మంది అభిప్రాయపడ్డారు. అయితే అంతర్జాతీయ క్రికెట్‌ మండలి (ఐసీసీ) దీనిపై పూర్తి స్థాయి వివరణ ఇచ్చింది. 45 లీగ్‌ మ్యాచ్‌లకు రిజర్వ్‌ డే ఉంచడం సాధ్యం కాదని... అది తీవ్ర శ్రమతో కూడుకున్న వ్యవహారమని స్పష్టం చేసింది. సెమీఫైనల్, ఫైనల్‌ మ్యాచ్‌లకు మాత్రం రిజర్వ్‌ డే ఉన్నట్లు వెల్లడించింది. ‘ప్రపంచకప్‌లో ప్రతీ మ్యాచ్‌కు రిజర్వ్‌ డే పెట్టడం సాధ్యం కాదు. రిజర్వ్‌ డే రోజున కూడా వర్షం పడదని ఎవరూ హామీ ఇవ్వలేరు’ అని ఐసీసీ వివరణ ఇచ్చింది.

నాటింగ్‌హామ్‌: గాయం కారణంగా రాబోయే ప్రపంచకప్‌ మ్యాచ్‌లకు దూరమైన శిఖర్‌ ధావన్‌ తన ప్రతిస్పందనను కవితా రూపంలో వెల్లడించాడు. గాయం తనను దెబ్బ తీయలేదనే ఉద్దేశం అతని మాటల్లో కనిపించింది. ప్రఖ్యాత ఉర్దూ రచయిత రాహత్‌ ఇందోరీ రాసిన పంక్తిని అతను ట్విట్టర్‌ ద్వారా పంచుకున్నాడు. ‘కభీ మహక్‌ కీ తరహ్‌ హమ్‌ గులోన్‌సే ఉడ్తే హై.. కభీ ధుయే కీ తరహ్‌ పర్బతోన్‌సే ఉడ్తే హై..యే కైంచియా హమే ఉడ్నే సే ఖాఖ్‌ రోకేంగీ.. కే హమ్‌ పరోన్‌సే నహీ హౌస్‌లోసే ఉడ్తే హై’ (పూలల్లో ఉండే సువాసనలా ఒకసారి, పర్వతాల మీదుగా వెళ్లే పొగ మంచులా మరోసారి ఎగురుకుంటూ వెళ్లిపోతాను. నేను ఎగరకుండా ఈ కత్తెరలు ఏం ఆపగలవు. నేను ఎగిరేది రెక్కలతో కాదు, సంకల్పంతో) అని ధావన్‌ తన భావాన్ని పంచుకున్నాడు. తన కవితతో ధావన్‌ స్ఫూర్తి పొందే ప్రయత్నం చేయగా... స్వయంగా రాహత్‌ ఇందోరి వెంటనే మరో కవితతో స్పందించడం విశేషం. ‘సెలయేటికి తన అస్తిత్వంపై చాలా గర్వం ఉంది. దాహంతో ఉన్న నాతో పెట్టుకుంటే తన సంగతేమౌతుందో తెలియదా’ (బహుత్‌ గురూర్‌ హై దరియాకో అప్నే హోనేపర్‌. జో మేరీ ప్యాస్‌ సే ఉల్‌ఝేతో ధజ్జియా ఉడ్‌జాయే, జిందాబాద్‌) అంటూ మరింతగా ప్రోత్సహించే ప్రయత్నం చేశారు.

నాటింగ్‌హామ్‌: ఓపెనర్‌ శిఖర్‌ ధావన్‌ అనూహ్యంగా గాయపడటంతో భారత టీమ్‌ మేనేజ్‌మెంట్‌ ప్రత్యామ్నాయంపై దృష్టి పెట్టింది. అవసరమైతే మరో ఆటగాడు అందుబాటులో ఉంటే మంచిదని భావిస్తూ అందుకోసం యువ ఆటగాడు రిషభ్‌ పంత్‌ను ఎంపిక చేసింది. ప్రపంచ కప్‌ జట్టును ఎంపిక చేసిన సమయంలో ప్రకటించిన రిజర్వ్‌ ఆటగాళ్లలో పంత్‌ కూడా ఒకడు. రిషభ్‌ గురువారం సాయంత్రం ఇంగ్లండ్‌ చేరుకుంటాడు. అయితే గాయం నుంచి కోలుకునే వరకు ధావన్‌ను జట్టుతోనే కొనసాగించాలని భారత్‌ నిర్ణయించుకున్న నేపథ్యంలో ఐసీసీ నిబంధనల ప్రకారం పంత్‌ టీమిండియాతో చేరే అవకాశం లేదు. అతను జట్టుతో ఉండకుండా మాంచెస్టర్‌లో ఉంటాడని, ప్రస్తుతానికి పంత్‌ ‘స్టాండ్‌ బై’ మాత్రమేనని, ధావన్‌ స్థానంలో ఎంపిక చేయలేదని బీసీసీఐ ప్రకటించింది. గత ఏడాది కాలంగా అద్భుత ఫామ్‌లో ఉన్న పంత్‌ను ప్రపంచకప్‌కు ఎంపిక చేయకపోవడంపై అప్పట్లో తీవ్ర చర్చ జరిగింది. అయితే కుర్ర పంత్‌కంటే అనుభవజ్ఞుడైన దినేశ్‌ కార్తీక్‌కే ప్రాధాన్యమిచ్చామని చీఫ్‌ సెలక్టర్‌ ఎమ్మెస్కే ప్రసాద్‌ వివరణ ఇచ్చారు.   మరో రెండు మ్యాచ్‌లకు... ప్రస్తుతం ధావన్‌ గాయాన్ని వైద్యులు పర్యవేక్షిస్తున్నారు. అతని గాయంపై పూర్తిగా స్పష్టత వచ్చేందుకు మరో 10–12 రోజులు పడుతుందని బ్యాటింగ్‌ కోచ్‌ సంజయ్‌ బంగర్‌ వెల్లడించారు. ముందుగా అనుకున్నట్లు కివీస్, పాక్‌ మ్యాచ్‌లకే కాకుండా 22, 27 తేదీల్లో అఫ్గానిస్తాన్, వెస్టిండీస్‌లతో జరిగే మ్యాచ్‌లు కూడా ధావన్‌ ఆడే అవకాశం కనిపించడం లేదు. అయితే 30లోగా అతను పూర్తిగా కోలుకోవచ్చని వైద్యులు టీమ్‌ మేనేజ్‌మెంట్‌కు చెప్పినట్లు సమాచారం. వరల్డ్‌ కప్‌లో అతి పెద్ద మ్యాచ్‌గా భావిస్తున్న భారత్, ఇంగ్లండ్‌ మధ్య పోరు ఈ నెల 30న బర్మింగ్‌హామ్‌లో జరుగనుంది. ఈ మ్యాచ్‌లో శిఖర్‌ బరిలోకి దిగితే చాలని భారత్‌ కోరుకుంటోంది.   

టాంటన్‌: ఈ ప్రపంచ కప్‌లో మరో సంచలన విజయం సాధించే అవకాశాన్ని పాకిస్తాన్‌ కాలదన్నుకుంది. తొలుత బౌలింగ్‌లో పుంజుకుని ప్రత్యర్థిని కట్టడి చేసిన ఆ జట్టు... బ్యాటింగ్‌లో మంచి స్థితిలో ఉండీ గెలుపును చేజార్చుకుంది. దీంతో ఆస్ట్రేలియాతో బుధవారం ఇక్కడ జరిగిన మ్యాచ్‌లో 41 పరుగుల తేడాతో ఓటమి పాలైంది. ‘మ్యాన్‌ ఆఫ్‌ ద మ్యాచ్‌’ ఓపెనర్‌ డేవిడ్‌ వార్నర్‌ (111 బంతుల్లో 107; 11 ఫోర్లు, సిక్స్‌) శతకం బాదడంతో పాటు కెప్టెన్‌ అరోన్‌ ఫించ్‌ (84 బంతుల్లో 82; 6 ఫోర్లు, 4 సిక్స్‌లు) అర్ధ సెంచరీ సాధించడంతో... టాస్‌ ఓడి బ్యాటింగ్‌కు దిగిన ఆస్ట్రేలియా 49 ఓవర్లలో 307 పరుగులకు ఆలౌటైంది. పేసర్‌ ఆమిర్‌ (5/30) ప్రత్యర్థికి కళ్లెం వేశాడు. ఛేదనలో పాక్‌ 45.4 ఓవర్లలో 266 పరుగులకు ఆలౌటైంది. ఓపెనర్‌ ఇమాముల్‌ హక్‌ (75 బంతుల్లో 53; 7 ఫోర్లు), హఫీజ్‌ (46; 3 ఫోర్లు, సిక్స్‌) రాణించినా మిడిలార్డర్‌ వైఫల్యం దెబ్బకొట్టింది. టెయిలెండర్లు హసన్‌ అలీ (15 బంతుల్లో 32; 3 ఫోర్లు, 3 సిక్స్‌లు), వహాబ్‌ రియాజ్‌ (39 బంతుల్లో 45; 2 ఫోర్లు, 3 సిక్స్‌లు) మెరుపులకు కెప్టెన్‌ సర్ఫరాజ్‌ (48 బంతుల్లో 40; ఫోర్‌) అండగా నిలిచి పోరాడినా... పేసర్‌ స్టార్క్‌ (2/43) ఒకే ఓవర్లో రియాజ్, ఆమిర్‌ (0)లను ఔట్‌ చేసి ఆసీస్‌ విజయాన్ని ఖాయం చేశాడు. కమిన్స్‌ (3/33) పొదుపుగా బంతులేశాడు. ఆరంభం అదిరినా... చివర్లో చతికిల 146/0. రన్‌రేట్‌ 6.63. 22 ఓవర్లకు ఆసీస్‌ స్కోరిది. కానీ, 23వ ఓవర్‌ తొలి బంతికి ఫించ్‌ను ఔట్‌ చేసి ఆమిర్‌ మలుపు తిప్పాడు. వార్నర్‌ సహజ శైలిలో ఆడుతూ పోతుంటే... మరో ఎండ్‌లో స్మిత్‌ (10), మ్యాక్స్‌వెల్‌ (20), షాన్‌ మార్‌‡్ష (23), ఖాజా (18) వెంటవెంటనే ఔటయ్యారు. 102 బంతుల్లో కెరీర్‌లో 15వ వన్డే సెంచరీ పూర్తి చేసుకున్న వార్నర్‌ ఎక్కువసేపు నిలువలేదు. కీపర్‌ అలెక్స్‌ క్యారీ (20)తో పాటు స్టార్క్‌ (3)ను చక్కటి బంతులతో డగౌట్‌ చేర్చిన ఆమిర్‌ 49వ ఓవర్లోనే ఆసీస్‌ ఇన్నింగ్స్‌ను ముగించాడు. కంగారూలు తమ పది వికెట్లను 28 ఓవర్ల వ్యవధిలో 161 పరుగులకే కోల్పోయారు. ఛేదించేలా కనిపించి... చేజేతులా ఫఖర్‌ జమాన్‌ (0)ను ఖాతా తెరవకుండానే ఔట్‌ చేసి ఛేదనలో పాక్‌కు కమిన్స్‌ షాకిచ్చాడు. ఇమాముల్, ఆజమ్‌ (28 బంతుల్లో 30; 7 ఫోర్లు) చకచకా బౌండరీలు బాదుతూ ఆశలు రేపారు. ఈ స్థితిలో బాబర్‌ అనవసర షాట్‌కు పోయి వికెట్‌ పారేసుకున్నాడు. ఇమాముల్, హఫీజ్‌ మూడో వికెట్‌కు 86 బంతుల్లో 80 పరుగులు జోడించడంతో పాక్‌ లక్ష్యం దిశగా సాగుతున్నట్లే కనిపించింది. కమిన్స్‌ ఓవర్లో లెగ్‌ సైడ్‌ వెళ్తున్న బంతిని వేటాడి ఇమాముల్, పార్ట్‌టైమర్‌ ఫించ్‌ బంతిని భారీ షాట్‌ ఆడబోయి హఫీజ్‌ వరుస ఓవర్లలో వెనుదిరగడం దెబ్బకొట్టింది. షోయబ్‌ మాలిక్‌ (0), ఆసిఫ్‌ అలీ (5) పేలవంగా నిష్క్రమించారు. 160/6తో పరాజయం అంచుల్లో ఉన్న జట్టును సర్ఫరాజ్, హసన్‌ అలీ, రియాజ్‌ మొండిగా నడిపించినా లాభం లేకపోయింది.    స్కోరు వివరాలు ఆస్ట్రేలియా ఇన్నింగ్స్‌: ఫించ్‌ (సి) హఫీజ్‌ (బి) ఆమిర్‌ 82; వార్నర్‌ (సి) ఇమాముల్‌ (బి) షాహీన్‌  107; స్మిత్‌ (సి) ఆసిఫ్‌ అలీ (బి) హఫీజ్‌ 10; మ్యాక్స్‌వెల్‌ (బి) షాహీన్‌ 20; షాన్‌ మార్‌‡్ష (సి) షోయబ్‌ మాలిక్‌ (బి) ఆమిర్‌ 23; ఖాజా (సి) వహాబ్‌ రియాజ్‌ (బి) ఆమిర్‌ 18; క్యారీ (ఎల్బీడబ్ల్యూ) (బి) ఆమిర్‌ 20; కూల్టర్‌నైల్‌ (సి) సర్ఫరాజ్‌ (బి) రియాజ్‌ 2; కమిన్స్‌ (సి) సర్ఫరాజ్‌ (బి) హసన్‌ అలీ 2; స్టార్క్‌ (సి) షోయబ్‌ మాలిక్‌ (బి) ఆమిర్‌ 3; రిచర్డ్‌సన్‌ (నాటౌట్‌) 1; ఎక్స్‌ట్రాలు 19; మొత్తం (49 ఓవర్లలో ఆలౌట్‌) 307. వికెట్ల పతనం: 1–146, 2–189, 3–223, 4–242, 5–277, 6–288, 7–299, 8–302, 9–304, 10–307. బౌలింగ్‌: ఆమిర్‌ 10–2–30–5; షాహీన్‌ ఆఫ్రిది 10–0–70–2; హసన్‌ అలీ 10–0–67–1; వహాబ్‌ రియాజ్‌ 8–0–44–1; హఫీజ్‌ 7–0–60–1; షోయబ్‌ మాలిక్‌ 4–0–26–0. పాకిస్తాన్‌ ఇన్నింగ్స్‌: ఇమాముల్‌ హక్‌ (సి) క్యారీ (బి) కమిన్స్‌ 53; ఫఖర్‌ జమాన్‌ (సి) రిచర్డ్‌సన్‌ (బి) కమిన్స్‌ 0; బాబర్‌ ఆజమ్‌ (సి) రిచర్డ్‌సన్‌ (బి) కూల్టర్‌నైల్‌ 30; హఫీజ్‌ (సి) స్టార్క్‌ (బి) ఫించ్‌ 46; సర్ఫరాజ్‌ (రనౌట్‌) 40; షోయబ్‌ మాలిక్‌ (సి) క్యారీ (బి) కమిన్స్‌ 0; ఆసిఫ్‌ అలీ (సి) క్యారీ (బి) రిచర్డ్‌సన్‌ 5; హసన్‌ అలీ (సి) ఖాజా (బి) రిచర్డ్‌సన్‌ 32; వహాబ్‌ రియాజ్‌ (సి) క్యారీ (బి) స్టార్క్‌ 45; ఆమిర్‌ (సి) స్టార్క్‌ 0; షాహీన్‌ ఆఫ్రిది (నాటౌట్‌) 1; ఎక్స్‌ట్రాలు 14; మొత్తం (45.4 ఓవర్లలో ఆలౌట్‌) 266. వికెట్ల పతనం: 1–2, 2–56, 3–136, 4–146, 5–147, 6–160, 7–200, 8–264, 9–265, 10–266. బౌలింగ్‌: కమిన్స్‌ 10–0–33–3, స్టార్క్‌ 9–1–43–2, రిచర్డ్‌సన్‌ 8.4–0–62–2, కూల్టర్‌నైల్‌ 9–0–53–1, మ్యాక్స్‌వెల్‌ 7–0–58–0, ఫించ్‌ 2–0–13–1.     

ప్రపంచ కప్‌లో తొలి రెండు మ్యాచ్‌లలో అగ్రశ్రేణి టీమ్‌లను ఓడించిన భారత్‌ ఇప్పుడు మరో ప్రధాన జట్టును ఓడించడంపై గురి పెట్టింది. టోర్నీలో మూడు విజయాలతో పాయింట్ల పట్టికలో అగ్రస్థానంలో ఉన్న న్యూజిలాండ్‌ను టీమిండియా ఎదుర్కోనుంది. బలాబలాలపరంగా చూస్తే ఇటీవలే కివీస్‌ను వారి సొంతగడ్డపై వన్డే సిరీస్‌లో చిత్తుగా ఓడించిన కోహ్లి సేనదే పైచేయిగా కనిపిస్తున్నా... ఐసీసీ టోర్నీల్లో న్యూజిలాండ్‌ ఎప్పుడైనా ప్రమాదకర జట్టే. అయితే అన్నింటికి మించి ఓపెనర్‌ శిఖర్‌ ధావన్‌ లేని జట్టు తప్పనిసరి పరిస్థితుల్లో కొత్త వ్యూహంతో బరిలోకి దిగాల్సి వస్తోంది. ఇన్నేళ్లుగా జట్టు విజయాల్లో కీలకంగా నిలిచిన ధావన్‌ లేకుండా బలపరీక్షకు సిద్ధమైన కోహ్లి సేన అదే తరహా జోరు ప్రదర్శించగలదా? కూర్పులో మార్పు వల్ల జట్టు లయ దెబ్బతింటుందా? చూడాలి! నాటింగ్‌హామ్‌: ఇంగ్లండ్‌ గడ్డపై అడుగు పెట్టిన తర్వాత సన్నాహాల్లో భాగంగా ప్రాక్టీస్‌ మ్యాచ్‌లో న్యూజిలాండ్‌ చేతిలో భారత్‌ చిత్తుగా ఓడింది. ఇరవై రోజుల క్రితం ఆ మ్యాచ్‌ ఫలితం మనపై ఎలాంటి ప్రభావం చూపలేదు. ఆ తర్వాత అసలు పోరులో మన టీమ్‌ సత్తా చూపింది. ఇక ఇప్పుడు అసలు సమరంలో గెలిస్తే భారత్‌కు టోర్నీ లో తిరుగుండదు. మరోవైపు రెండు మ్యాచ్‌లలో బలహీన శ్రీలంక, అఫ్గానిస్తాన్‌లపై నెగ్గిన కివీస్‌... అతి కష్టమ్మీద బంగ్లాను ఓడించింది. ఈ నేపథ్యంలో భారత్‌లాంటి టీమ్‌తో ఆ జట్టుకు పెను సవాల్‌ ఎదురవుతోంది.   నాలుగో స్థానంలో ఎవరు?   ముందుగా దక్షిణాఫ్రికాపై, ఆ తర్వాత ఆస్ట్రేలియాపై కూడా భారత్‌ సంపూర్ణ ఆధిపత్యం ప్రదర్శించింది. అన్ని విభాగాల్లో ఆటగాళ్లు ఒకరితో మరొకరు పోటీ పడి చక్కటి ప్రదర్శన కనబర్చారు. రోహిత్, ధావన్‌లు సెంచరీలు చేయగా, కోహ్లి గత మ్యాచ్‌లో తన స్థాయికి తగినట్లుగా ఆడాడు. హార్దిక్‌ పాండ్యా మెరుపు బ్యాటింగ్‌ అదనపు బలం కాగా, ధోని కూడా చక్కటి స్ట్రోక్స్‌ ఆడుతున్నాడు. కేదార్‌ జాదవ్‌కు ఇంకా బ్యాటింగ్‌ అవకాశం సరిగా రాలేదు. బౌలింగ్‌లో కూడా నలుగురు రెగ్యులర్‌ బౌలర్లు తమ పాత్రను సమర్థంగా పోషించగా... పాండ్యా, జాదవ్‌ కలిసి ఐదో బౌలర్‌ కోటాను ఇబ్బంది లేకుండా పూర్తి చేయగలిగారు. మొత్తంగా జట్టులో లోపాలేవీ కనిపించడం లేదు. అయితే ఇప్పుడు అందరి దృష్టి ధావన్‌కు బదులుగా వచ్చే ఆటగాడిపైనే ఉంది. లోకేశ్‌ రాహుల్‌ ఓపెనింగ్‌ చేయడం ఖాయమైపోయింది. ఓపెనర్‌ పాత్ర అతనికి కొత్త కాదు. నిజానికి ప్రపంచకప్‌కు ఎంపిక చేసినప్పుడు కూడా సెలక్టర్లు మూడో ఓపెనర్‌గానే చూశారు. కెరీర్‌లో అతని ఏకైక సెంచరీ ఓపెనర్‌గానే సాధించాడు. ఇప్పుడు కీలకమైన ప్రపంచ కప్‌ మ్యాచ్‌లో అతను రోహిత్‌తో కలిసి ఎలాంటి ఆరంభం ఇస్తాడనేది చూడాలి. మరోవైపు రాహుల్‌కు బదులుగా మిడిలార్డర్‌లో ఎవరికి అవకాశం దక్కుతుందో చెప్పలేని పరిస్థితి. బుధవారం నెట్స్‌లో విజయ్‌ శంకర్‌ ఎక్కువసేపు బ్యాటింగ్‌ ప్రాక్టీస్‌ చేస్తూ కనిపించాడు. కానీ దినేశ్‌ కార్తీక్‌ అవకాశాలను కూడా కొట్టి పారేయలేం. వార్మప్‌ మ్యాచ్‌ తరహా వాతావరణమే ఎదురయ్యే అవకాశం ఉండటంతో బౌల్ట్‌ను భారత బ్యాట్స్‌మెన్‌ సమర్థంగా ఎదుర్కోవడం ముఖ్యం.   మిడిలార్డర్‌ కీలకం... న్యూజిలాండ్‌ కూడా మూడు విజయాలతో అమితోత్సాహంతో ఉంది. అయితే ఆ జట్టుకు కూడా సొంత సమస్యలు ఉన్నాయి. కివీస్‌కు ఓపెనింగ్‌ ప్రధాన సమస్యగా మారింది. గత కొన్నేళ్లలో ఏ జోడి కూడా భారీ భాగస్వామ్యాలు నమోదు చేయలేదు. గప్టిల్‌ గత రెండు మ్యాచ్‌లలోనూ విఫలమయ్యాడు. భారత్‌తో సిరీస్‌లో విఫలమైన మున్రోను పక్కన పెట్టి నికోల్స్‌ను మరో ఓపెనర్‌గా పంపే అవకాశం ఉంది. టీమ్‌ బరువు బాధ్యతలన్నీ ఇప్పుడు విలియమ్సన్, రాస్‌ టేలర్‌లపైనే ఆధారపడి ఉన్నాయి. మరోసారి వీరిద్దరు రాణిస్తే కివీస్‌కు గెలుపు అవకాశాలు ఉంటాయి. లాథమ్, నీషమ్‌ కూడా రాణించడం అవసరం. బౌలింగ్‌లో ప్రధాన బలం ట్రెంట్‌ బౌల్ట్‌. అతను చెలరేగితే భారత్‌కు కష్టాలు తప్పవు. 145 కిలోమీటర్లకు తగ్గకుండా బౌలింగ్‌ చేస్తున్న ఫెర్గూసన్‌ కూడా ప్రత్యర్థికి ఇబ్బందులు సృష్టించగలడు.   తుది జట్లు (అంచనా) భారత్‌: కోహ్లి (కెప్టెన్‌), రోహిత్‌ శర్మ, రాహుల్, దినేశ్‌ కార్తీక్‌/విజయ్‌ శంకర్, పాండ్యా, ధోని, జాదవ్, భువనేశ్వర్, కుల్దీప్, చహల్, బుమ్రా.  న్యూజిలాండ్‌: విలియమ్సన్‌ (కెప్టెన్‌), గప్టిల్, నికోల్స్, టేలర్, లాథమ్, నీషమ్, సాన్‌ట్నర్, గ్రాండ్‌హోమ్, సౌతీ, ఫెర్గూసన్, బౌల్ట్‌. పిచ్, వాతావరణం గత కొన్నేళ్లుగా పరుగుల వరద పారిన మైదానం. ఈ వరల్డ్‌ కప్‌లో కూడా రెండు మ్యాచ్‌లలో భారీ స్కోర్లు నమోదయ్యాయి. బౌండరీలు చిన్నవి కాబట్టి బ్యాట్స్‌మెన్‌ చెలరేగిపోవచ్చు. అయితే మేఘావృత వాతావరణం కారణంగా స్వింగ్‌ బౌలర్లకూ మంచి అవకాశ ముంది. దాంతో బ్యాట్‌కు, బంతికి మధ్య సమాన పోరు జరిగేందుకు ఆస్కారముంది. గురువారం నాటింగ్‌హామ్‌లో వర్ష సూచన ఉంది. ఆటకు అంతరాయం కలగవచ్చు. 57:  కోహ్లి మరో 57 పరుగులు చేస్తే అందరికంటే వేగంగా (222 ఇన్నింగ్స్‌లలో) వన్డేల్లో 11 వేల పరుగులు పూర్తి చేసుకుంటాడు. సచిన్‌ 276 ఇన్నింగ్స్‌లలో ఈ మైలురాయి దాటాడు.

అంతర్జాతీయ క్రికెట్‌ కౌన్సిల్‌పై కామెంటేటర్‌, విండీస్‌ మాజీ ఫాస్ట్‌బౌలర్‌ మైఖేల్‌ హోల్డింగ్స్‌ ఫైర్‌ అయ్యాడు. కొన్నిసార్లు అంపైర్లు చేసే పొరపాట్లను చూసీచూడనట్లు వదిలేయాలని, వాటిని ఫోకస్‌ చేస్తూ కామెంటరీ చేయొద్దని ఐసీసీ సూచించడాన్ని తప్పుబట్టాడు. విషయమేంటంటే.. ప్రపంచకప్‌లో భాగంగా గత గురువారం వెస్టిండీస్‌, ఆస్ట్రేలియా మధ్య మ్యాచ్‌ జరిగింది. దానికి హోల్డింగ్స్‌ వ్యాఖ్యాతగా వ్యవహరించాడు. ఈ మ్యాచ్‌లో క్రిస్‌ గేల్‌ అంపైర్‌ క్రిస్‌ గఫానీ (న్యూజిలాండ్‌) తప్పుడు నిర్ణయానికి బలయ్యాడు. స్టార్క్‌ వేసిన మూడో ఓవర్లో అంపైర్‌ నోబాల్‌ గుర్తించపోవడంతో అతను ఔట్‌ కావాల్సి వచ్చింది. దీంతో కామెంటరీ బాక్స్‌లో ఉన్న హోల్డర్స్‌ విమర్శలు గుప్పించాడు. అంపైర్‌ తప్పిదాన్ని వేలెత్తి చూపాడు. (ఇదేం అంపైరింగ్‌ గురూ?) అయితే, అంపైర్ల తప్పిదాలపై ఐసీసీ చర్యలు తీసుకోకపోగా.. వాటిని పెద్దది చేసి మాట్లాడొద్దని హోల్డర్స్‌కు ఓ సూచన చేసింది. ‘అసలు ఐసీసీలో నియమాలు, నిబంధనలు ఉన్నాయా. డ్యూటీ సరిగా నిర్వర్తించని వారిని వెనక్కేసుకొస్తారా. ఇదే ఫిఫా వరల్డ్‌కప్‌ అయ్యుంటే.. తప్పుడు అంపైరింగ్‌ చేసినవారు ఈపాటికి ఇంటికి వెళ్లి ఉండేవారు. ఇంకెప్పుడు ప్రపంకప్‌ టోర్నీల్లో వారికి అవకాశం ఇచ్చేవారు కాదు. క్రికెట్‌ను మరో స్థాయికి తీసుకెళ్లాల్సిందిపోయి.. ఇలా చేస్తారా. మీరిచ్చే సూచనలు పాటించాల్సి వస్తే.. కామెంటరీ మానేసి ఇంటికి వెళ్లడమే మేలు అనుకుంటాను’అని ఐసీసీకి హోల్డింగ్స్‌ ఘాటైన రిప్లై ఇచ్చాడు. ఇక ఈ వివాదం సద్దుమణిగిందని అటు హోల్డింగ్స్‌‌, ఇటు ఐసీసీ చెప్పడం గమనార్హం.

న్యూఢిల్లీ : అసలే అది పాకిస్తాన్‌.. ఆపై ఓ మ్యాచ్‌ గెలిచింది.. వర్షం కారణంగా ఆట రద్దవడంతో మరో పాయింట్‌ కూడా ఖాతాలో పడింది. ఇంకేముంది కప్పుపై కన్నేసింది. వింగ్‌ కమాండర్‌ అభినందన్‌ వర్ధమాన్‌ చేతిలో నుంచి టీకప్పు లాక్కెళ్లిపోయింది. అవును ఇది నిజం. దానికి సంబంధించిన విశేషాలు..! ప్రపంచకప్‌లో భాగంగా భారత్‌ పాకిస్తాన్‌ మధ్య వచ్చే ఆదివారం (జూన్‌ 16) మ్యాచ్‌ జరుగనుంది. అయితే, పాక్‌ చేతిలో టీమిండియా ఓటమి ఖాయమన్న తీరులో జాజ్‌ టీవీ ఓ యాడ్‌ రూపొందించి విమర్శలపాలైంది. వింగ్‌ కమాండర్‌ అభినందన్‌ వర్ధమాన్‌ దాదాపు 60 గంటల పాటు పాకిస్తాన్‌ ఆర్మీ కస్టడీలో ఉన్న సంగతి తెలిసిందే. గన్‌స్లింగర్‌ మీసంతో ఉండే అభినందన్‌ ఆహార్యం అందరికీ సుపరిచితమే. ఇక 33 సెకండ్ల నిడివి గల యాడ్‌లోని అంశాలు.. ‘అభినందన్‌ వేషధారణతో, టీమిండియా జెర్సీతో ఓ వ్యక్తి విచారణ గదిలో ఉంటాడు. మీ జట్టు టాస్‌ గెలిస్తే ఏం చేస్తుంది..ఐయామ్‌ సారీ నేనది చెప్పకూడదు అని ఆ వ్యక్తి బదులిస్తాడు. పైనల్‌ టీమ్‌లో ఎవరెవరు ఉంటారు అని మళ్లీ ప్రశ్నిస్తారు. ఐయామ్‌ సారీ నేనది చెప్పకూడదు అని ఆ వ్యక్తి అంటాడు. చివరలో టీ ఎలా ఉంది అనే ప్రశ్నకు.. చాలా బాగుంది అంటాడు. ఇక నువ్‌ వెళ్లొచ్చు అనగానే.. అక్కడ నుంచి ముందుకు కదులుతాడు. అంతలోనే...  కప్పు ఎక్కడికి తీసుకెళ్తున్నావ్‌.. అని చేతిలో నుంచి లాక్కుంటారు’. ఇదిలాఉండగా.. జాజ్‌ టీవీ అత్యుత్సాహంపై నెటిజన్లు మండిపడుతున్నారు. ఎన్ని టీ కప్పులు కావాలో తీస్కోండి అని చురకలంటిస్తున్నారు. వచ్చే ప్రపంకప్‌నకు సంబంధించి కూడా మరిన్ని కప్పులు కావాలంటే తీస్కోండని ఎద్దేవా చేస్తున్నారు. ఈ వీడియో వైరల్‌ అయింది. (చదవండి : వాళ్లతోనే కలిసి ఉంటా; అభినందన్‌ అంకిత భావం) Jazz TV advt on #CWC19 takes the Indo-Pak air duel to new level. It uses the air duel over Nowshera and Wing Co Abhinandan Varthaman's issue as a prop. @IAF_MCC @thetribunechd @SpokespersonMoD @DefenceMinIndia pic.twitter.com/30v4H6MOpU — Ajay Banerjee (@ajaynewsman) June 11, 2019

సౌతాంప్టన్‌: ఈ ప్రపంచకప్‌లో మరో మ్యాచ్‌ వర్షార్పణమైంది. దక్షిణాఫ్రికాను నిండా ముంచేసింది. ఇంకా విజయాల బోణీ కొట్టని సఫారీ జట్టుకు ఇది కీలకమైన పోరు. కానీ ఈ మ్యాచ్‌ రద్దవడంతో డు ప్లెసిస్‌ సేన సెమీస్‌ ఆశలు దాదాపుగా ఆవిరయ్యాయి. మొత్తానికి దక్షిణాఫ్రికాను ఈ మెగా ఈవెంట్‌లో ప్రత్యర్థులే కాదు వర్షం కూడా దెబ్బకొట్టింది. వానతో ఆలస్యంగా మొదలైన ఈ మ్యాచ్‌ ఎంతోసేపు సాగలేదు. వర్షంతో ఆట నిలిచే సమయానికి దక్షిణాఫ్రికా 7.3 ఓవర్లలో 2 వికెట్ల నష్టానికి 29 పరుగులు చేసింది. టాస్‌ నెగ్గిన వెస్టిండీస్‌ మొదట ఫీల్డింగ్‌ ఎంచుకుంది. డికాక్‌ (17 నాటౌట్‌; 1 ఫోర్‌)తో కలిసి సఫారీ ఇన్నింగ్స్‌ను ఆరంభించిన ఆమ్లా (6) విఫలమయ్యాడు. కాట్రెల్‌ వేసిన ఇన్నింగ్స్‌ మూడో ఓవర్లో గేల్‌కు క్యాచ్‌ ఇచ్చి నిష్క్రమించాడు. వన్‌డౌన్‌లో బ్యాటింగ్‌కు దిగిన మార్క్‌రమ్‌ (5)ను కూడా కాట్రెలే ఔట్‌ చేశాడు.  కెప్టెన్‌ డుప్లెసిస్‌ (0 నాటౌట్‌) క్రీజులోకి వచ్చిన కాసేపటికే వర్షం కూడా వచ్చింది. మైదానాన్ని ముంచెత్తింది. దీంతో ఆటకు చాలా సేపు అంతరాయం ఏర్పడింది. చివరకు పిచ్, ఔట్‌ఫీల్డ్‌ మ్యాచ్‌ నిర్వహణకు ఏమాత్రం అనుకూలంగా లేకపోవడంతో ఫీల్డు అంపైర్లు పాల్‌ విల్సన్, రొడ్‌ టక్కర్‌లు మ్యాచ్‌ను రద్దు చేస్తున్నట్లు ప్రకటించారు. దీంతో ఇరు జట్లు ఒక్కో పాయింట్‌తో సరిపెట్టుకున్నాయి. చిత్రంగా మూడు మ్యాచ్‌లాడినా పాయింట్లు గెలవలేకపోయిన దక్షిణాఫ్రికా ఖాతాలో ఎట్టకేలకు రద్దయిన మ్యాచ్‌తో ఓ పాయింట్‌ చేరింది. ప్రపంచకప్‌లో నేడు శ్రీలంక vs బంగ్లాదేశ్‌ మధ్యాహ్నం గం.3 నుంచి స్టార్‌ స్పోర్ట్స్‌–1లో ప్రత్యక్ష ప్రసారం

న్యూఢిల్లీ : భారతీయుల విశ్వాసాలు కొన్ని వింతగా.. విడ్డూరంగా ఉంటాయి. మరికొన్ని మూఢంగా ఉంటాయి. ఇక ఆటలో టీమిండియా విజయం సాధించాలని, తమ అభిమాన ఆటగాళ్లు సెంచరీలు బాదాలని కొందరు గుళ్లు, గోపురాలూ తిరుగుతారు. అభిషేకాలు, అర్చనలు చేస్తారు. మరికొందరు వీరాభిమానులు గుళ్లే నిర్మిస్తారు. తాజాగా టీమిండియా కెప్టెన్‌ విరాట్‌ కోహ్లి సారథ్యంలో మన జట్టు ప్రపంచకప్‌ సాధించాలని ఢిల్లీలో అతను విద్యనభ్యసించిన విశాల్‌ భారతి పబ్లిక్‌ స్కూల్‌ అలాంటి పనే చేసింది. ‘కోహ్లి క్రికెట్‌ పాఠాలు నేర్చిన మట్టి’ని లండన్‌ పంపించింది. టీమిండియా కెప్టెన్‌ను ఆశీర్వదించేందుకు ఉత్తమ్‌నగర్‌లోని అతని పూర్వ పాఠశాల మట్టిని పంపిందంటూ స్టార్‌ స్పోర్ట్స్‌ ట్వీట్‌ చేసింది. మీరు కూడా కోహ్లిని ఆశీర్వదించండని కోరింది. (అసలు సిసలు సమరం) దీనిని నెటిజన్లు తమదైన శైలిలో ట్రోల్‌ చేస్తున్నారు. ఎవరు బాబు ఈ అద్భుతమైన ఐడీయా ఇచ్చిందని అంటున్నారు. మరీ ఇంత ఓవరాక్షన్‌ అవసరమా అని చురకలంటిస్తున్నారు. మట్టి పంపుతున్నారు సరే.. మరి ఆ స్కూల్‌ పరిసరాల్లో ఉన్న గాలి కూడా పంపండని ఎద్దేవా చేస్తున్నారు. ‘మట్టితో పాటు గోమూత్రాన్ని కూడా పంపండి. దాంతో స్నానం చేస్తే కోహ్లికి అతీతమైన శక్తులు వస్తాయి. అప్పుడు ఎలాంటి ప్రాక్టీస్‌ లేకుండానే అతను పరుగుల వరద పారిస్తాడు’ అని వ్యంగ్యాస్త్రాలు సంధిస్తున్నారు. ఇక గత బుధవారం దక్షిణాఫ్రికాతో జరిగిన తొలిమ్యాచ్‌లో భారత జట్టు ఆరు వికెట్లతో ఘన విజయం సాధించిన సంగతి తెలిసిందే. ఓవల్‌లో టీమిండియా ఆస్ట్రేలియా మ్యాచ్‌ ఆదివారం జరుగనుంది. మధ్యాహ్నం 3 గంటల నుంచి ఆట ప్రారంభం అవనుంది. The soil from @imVkohli's school, where he learnt to play cricket, is going to London to bless him. Reply with your blessings and wishes and share this post with five other Virat fans as #KingKohli hunts for the #CricketKaCrown.#BlessingsFromHomeGround pic.twitter.com/6fVpbmYfyQ — Star Sports (@StarSportsIndia) June 7, 2019

టాంటన్‌: ప్రపంచకప్‌లో న్యూజిలాండ్‌ వరుసగా మూడో విజయం సాధించి ‘హ్యాట్రిక్‌’ నమోదు చేసింది. అఫ్గానిస్తాన్‌తో శనివారం జరిగిన డేనైట్‌ మ్యాచ్‌లో న్యూజిలాండ్‌ 7 వికెట్ల తేడాతో గెలిచింది. అఫ్గానిస్తాన్‌ నిర్దేశించిన 173 పరుగుల లక్ష్యాన్ని న్యూజిలాండ్‌ 32.1 ఓవర్లలో 3 వికెట్లు కోల్పోయి అధిగమించింది. కెప్టెన్‌ విలియమ్సన్‌ (99 బంతుల్లో 79 నాటౌట్‌; 9 ఫోర్లు), రాస్‌ టేలర్‌ (52 బంతుల్లో 48; 6 ఫోర్లు, సిక్స్‌) రాణించారు. అంతకుముందు న్యూజిలాండ్‌ పేస్‌కు అఫ్గానిస్తాన్‌ తలవంచింది. నీషమ్‌ (5/31), ఫెర్గుసన్‌ (4/37) నిప్పులు చెరగడంతో ముందుగా బ్యాటింగ్‌ చేసిన అఫ్గాన్‌ 41.1 ఓవర్లలో 172 పరుగులకు ఆలౌటైంది. తొలుత ఓపెనర్లు హజ్రతుల్లా (34; 5 ఫోర్లు, 1 సిక్స్‌), నూర్‌ అలీ (31; 5 ఫోర్లు) తొలి వికెట్‌కు 66 పరుగులు జోడించి మంచి ఆరంభాన్నిచ్చారు. కానీ అదే స్కోరు వద్ద ఓపెనర్లతో పాటు రహ్మత్‌ షా (0) ఔటయ్యారు. తర్వాత 4 పరుగుల వ్యవధిలో కెప్టెన్‌ గుల్బదిన్‌ నైబ్‌ (4) కూడా చేతులెత్తేయడంతో 70 పరుగులకే 4 కీలక వికెట్లను కోల్పోయి కష్టాల్లో పడింది. ఈ దశలో హష్మ తుల్లా (59; 9 ఫోర్లు) ఒంటరి పోరాటం చేశాడు. సహచరులు నబీ (9), నజీబుల్లా (4), ఇక్రమ్‌ (2), రషీద్‌ (0) ఇలా సింగిల్‌ డిజిట్‌కే పరిమితమైన బ్యాట్స్‌మెన్‌తో కలిసి అర్ధసెంచరీ చేశాడు.  

ఈసారి ప్రపంచ కప్‌ గెలిచే జట్లేవంటే? వచ్చే సమాధానం ‘ఇంగ్లండ్, భారత్, ఆస్ట్రేలియా’. కప్‌లో ఇప్పటి వరకు 13 మ్యాచ్‌లు జరగ్గా... టోర్నీని రక్తి కట్టించే ఆటతీరుకు పేరుగాంచిన ఈ మూడు ఫేవరెట్‌ జట్లు ఇంకా పరస్పరం తలపడాల్సి ఉంది. అభిమానులంతా ఎప్పుడెప్పుడా అని ఎదురుచూస్తున్న ఈ రసవత్తర అంకానికి ఆదివారంతో తెరలేవనుంది. లండన్‌లోని ఓవల్‌ మైదానం వేదికగా భారత్‌–ఆస్ట్రేలియా నేడు అమీతుమీ తేల్చుకోనున్నాయి. అఫ్గానిస్తాన్‌ను అలవోకగా ఓడించి, విండీస్‌కు ఎదురొడ్డి గెలిచిన కంగారూలు... దక్షిణాఫ్రికాపై విజయంతో ఆత్మవిశ్వాసంతో ఉన్న టీమిండియాలలో ఎవరు పైచేయి సాధిస్తారో వేచి చూడాలి. లండన్‌: పన్నెండో ప్రపంచ కప్‌లో ఫేవరెట్‌ జట్ల మధ్య ‘తొలి’ పోరుకు భారత్, ఆస్ట్రేలియా సిద్ధమయ్యాయి. అన్ని రంగాల్లో పటిష్టంగా ఉన్న ఈ రెండింటి మధ్య పోరు ఆసక్తికరంగా సాగడం ఖాయంగా కనిపిస్తోంది. ఈ మ్యాచ్‌లో గెలిచిన జట్టు టోర్నీలో మరింత ఆత్మవిశ్వాసంతో ముందుకెళ్తుంది. కీలకమైన సమరం కావడంతో ఇరు జట్లు గత మ్యాచ్‌లో ఆడిన తుది 11 మందితోనే బరిలో దిగనున్నట్లు తెలుస్తోంది. పరుగులకు లోటుండని ఓవల్‌ పిచ్‌పై చెలరేగేది రోహిత్, కోహ్లినా...? స్మిత్, వార్నరా...? చూడాలి. అతడూ జోరందుకుంటే... కప్‌ ప్రారంభానికి ముందు భారత్‌కు ఓపెనర్ల ఫామ్‌పై ఆందోళన నెలకొంది. దక్షిణాఫ్రికాపై ఏకంగా సెంచరీ బాది రోహిత్‌ శర్మ టచ్‌లోకి వచ్చాడు. మిగిలింది శిఖర్‌ ధావన్‌. ఐసీసీ ఈవెంట్లలో మెరుగ్గా రాణించే అతడు జోరందుకోవాల్సిన సమయం వచ్చింది. కెప్టెన్‌ కోహ్లి తన స్థాయి ఇన్నింగ్స్‌ ఆడితే ప్రత్యర్థి తేలిపోవడం ఖాయం. తర్వాతి బాధ్యత కేఎల్‌ రాహుల్, ధోని, కేదార్‌ జాదవ్‌లది. ఆఖర్లో చెలరేగేందుకు హార్దిక్‌ పాండ్యా ఉండనే ఉన్నాడు. రెండో పేసర్‌గా భువనేశ్వర్, షమీ మధ్య మ్యూజికల్‌ చైర్‌ నడుస్తోంది. ఆసీస్‌కు కళ్లెం వేయడంలో బుమ్రా–షమీ ద్వయమే మేలనే భావన ఉంది. కానీ, జట్టు భువీ వైపే మొగ్గుతోంది. తొలి మ్యాచ్‌లో అతడు రెండో స్పెల్‌లో అవసరమైన సమయంలో వికెట్లు తీశాడు. ఓవల్‌ పిచ్‌పై జాదవ్‌ స్పిన్‌తో పెద్దగా ప్రయోజనం ఉండదనుకుంటే విజయ్‌ శంకర్‌కు అవకాశం రావొచ్చు. సఫారీలపై నాలుగు వికెట్లు తీసిన యజువేంద్ర చహల్‌... తనకు మెరుగైన రికార్డు లేని కంగారూలను ఎలా కట్టడి చేస్తాడో చూడాలి. కుల్దీప్‌ యాదవ్‌ను ఎదుర్కొనడంలో ఆస్ట్రేలియా గతంలో తడబడింది. అతడిని ఆయుధంగా చేసుకుని ప్రత్యర్థి బ్యాటింగ్‌ ఆర్డర్‌ను దెబ్బకొట్టే ఆలోచన చేయాలి. ఆసీస్‌... ఆత్మవిశ్వాసంతో సరిగ్గా ప్రతిష్టాత్మక కప్‌ ముందు గాడిలో పడ్డ ఆస్ట్రేలియాకు తమ శక్తిసామర్థ్యాలను మరింత పరీక్షించుకునే అవకాశం భారత్‌తో మ్యాచ్‌ ద్వారా లభించనుంది. ప్రధాన బ్యాట్స్‌మెన్‌ వార్నర్, స్మిత్‌ అర్ధసెంచరీలతో ఫామ్‌ చాటుకోగా... కెప్టెన్‌ ఆరోన్‌ ఫించ్, ఖాజా ఇంకా గాడిలో పడలేదు. మ్యాక్స్‌వెల్‌ కూడా రాణించాల్సి ఉంది. గత మ్యాచ్‌లో వికెట్‌ కీపర్‌ క్యారీ, కూల్టర్‌ నైల్‌ జట్టు బ్యాటింగ్‌ లోతేమిటో చాటారు. స్టొయినిస్‌ ఆల్‌ రౌండ్‌ పాటవం, పేసర్లు స్టార్క్, కమిన్స్‌ ఫామ్‌ ఆసీస్‌కు పెద్ద బలం. లెగ్‌ స్పిన్నర్‌ ఆడమ్‌ జంపాకు తోడుగా నాథన్‌ లయన్‌ను దింపాలనుకుంటే కూల్టర్‌ నైల్‌ను తప్పించాలి. గత మ్యాచ్‌ గెలుపులో కీలకంగా నిలిచిన అతడిని పక్కన పెడతారా? అన్నది ప్రశ్న. పేసర్లు రాణిస్తే భారత్‌ను నియంత్రించడం కష్టం కాదని కంగారూలు లెక్కలేస్తున్నారు.   షార్ట్‌ బంతులతో పడగొట్టాలి షార్ట్‌ బంతులను ఆడటంలో ఆసీస్‌ బ్యాట్స్‌మెన్‌ ఇబ్బంది పడుతున్నారు. వార్నర్, ఫించ్, ఖాజాలు కరీబియన్‌ పేసర్ల ధాటికి నిలవలేకపోయారు. ఓ బంతి ఖాజా హెల్మెట్‌ను బలంగా  తాకింది. ఈ బలహీనతను ఆసీస్‌ సహాయ కోచ్‌ పాంటింగ్‌ అంగీకరించాడు కూడా. టీమిండియా పేసర్లు దీనిని సొమ్ము చేసుకుంటే మ్యాచ్‌పై పట్టు సాధించవచ్చు. తేల్చేది బుమ్రానే! ఈ మ్యాచ్‌లో బుమ్రానే భారత్‌ తురుపుముక్క. బ్యాట్స్‌మెన్‌ ఏమాత్రం ఆడలేని విధంగా అతడు సంధిస్తున్న బంతులే దీనికి కారణం. బుమ్రా మొదట్లోనే చెలరేగి ఆసీస్‌ టాపార్డర్‌ పని పడితే చహల్, కుల్దీప్‌ స్థిరంగా వికెట్లు తీయగలరు. మొదట బౌలింగ్‌కు దిగితే గాలులు వీస్తున్న పరిస్థితుల్లో స్వింగ్‌తో భువనేశ్వర్‌ ప్రభావం చూపగలడు.   మన మీదే పుంజుకుని... రెండేళ్లలో 33 వన్డేలు ఆడితే ఎనిమిదింట్లోనే గెలుపు...! మూడు నెలల క్రితం ఆస్ట్రేలియా పరిస్థితిది. కానీ, మార్చిలో భారత్‌తో వన్డే సిరీస్‌ ద్వారా ఆ జట్టు తీరే మారిపోయింది. పరుగుల లేమితో కొట్టుమిట్టాడుతున్న కెప్టెన్‌ ఫించ్‌ సెంచరీల మీద సెంచరీలతో పూర్తి ఫామ్‌లోకి వచ్చాడు. ఖాజా ఏకంగా ప్రపంచ కప్‌ బెర్తే కొట్టేశాడు. టీమిండియాపై 0–2తో వెనుకబడి మరీ 3–2తో సిరీస్‌ నెగ్గిన ఊపులో పాకిస్తాన్‌ను వైట్‌వాష్‌ చేసింది ఆసీస్‌. వార్నర్, స్మిత్‌ చేరికతో ఇప్పుడు దుర్బేధ్యంగా మారింది. అటు పేస్‌ బౌలింగ్‌లో కమిన్స్‌ అత్యంత నిలకడగా రాణిస్తున్నాడు. స్టార్క్‌ విండీస్‌పై 5 వికెట్లతో సత్తా చాటాడు. ఈ మ్యాచ్‌ను చూసినవారికి... ఎలాంటి పరిస్థితుల్లోనూ విజయంపై ఆశలు వదులుకోని, ఎంతటి ఒత్తిడిలోనూ ప్రత్యర్థికి అవకాశం ఇవ్వని ఒకప్పటి అచ్చమైన ప్రొఫెషనలిస్ట్‌ ఆస్ట్రేలియా గుర్తొచ్చి ఉంటే ఆశ్చర్యం లేదు. ఈ నేపథ్యంలో కంగారూలను ఓడించాలంటే భారత్‌ పూర్తి శక్తి మేర ఆడాల్సి ఉంటుంది. ముఖాముఖి రికార్డు రెండు జట్ల మధ్య ఇప్పటివరకు 136 వన్డేలు జరగ్గా భారత్‌ 49 గెలిచింది. ఆస్ట్రేలియా 77 మ్యాచ్‌ల్లో విజయం సాధించింది. పదింట్లో ఫలితం తేలలేదు. ప్రపంచ కప్‌లో పదకొండు మ్యాచ్‌లకు గాను భారత్‌ మూడింట్లో, ఆసీస్‌ ఎనిమిది మ్యాచ్‌ల్లో నెగ్గాయి. పిచ్, వాతావరణం మ్యాచ్‌కు ఫ్లాట్‌ పిచ్‌ ఎదురుకానుంది. గత నాలుగేళ్లుగా ఇంగ్లండ్‌లో భారీ స్కోర్లకు ఓవల్‌ మైదానం వేదికగా నిలుస్తోంది. ఈసారీ దీనినే ఊహించవచ్చు. గాలులు వీస్తున్నప్పటికీ మొత్తమ్మీద వాతావరణం పొడిగా ఉండనుంది. వర్షానికి అవకాశం లేదు. తుది జట్లు భారత్‌: రోహిత్‌ శర్మ, శిఖర్‌ ధావన్, విరాట్‌ కోహ్లి (కెప్టెన్‌), రాహుల్, ధోని, కేదార్‌ జాదవ్, హార్దిక్, భువనేశ్వర్, చహల్, కుల్దీప్, బుమ్రా.   ఆస్ట్రేలియా: ఫించ్‌ (కెప్టెన్‌), వార్నర్, ఉస్మాన్‌ ఖాజా, స్మిత్, మ్యాక్స్‌వెల్, స్టొయినిస్, క్యారీ, కూల్టర్‌ నైల్, కమిన్స్, స్టార్క్, ఆడమ్‌ జంపా.     

కార్డిఫ్‌: పాకిస్తాన్‌తో ఎదురైన షాక్‌ నుంచి ఇంగ్లండ్‌ వెంటనే తేరుకుంది. శనివారం జరిగిన ప్రపంచకప్‌ మ్యాచ్‌లో బంగ్లాదేశ్‌ భరతం పట్టింది. 106 పరుగుల తేడాతో ఘన  విజయం సాధించింది. విధ్వంసక ఓపెనర్‌ జేసన్‌ రాయ్‌ (121 బంతుల్లో 153; 14 ఫోర్లు, 5 సిక్స్‌లు) బంగ్లా బౌలింగ్‌ను చీల్చి చెండాడటంతో మొదట ఇంగ్లండ్‌ 50 ఓవర్లలో 6 వికెట్లకు 386 పరుగులు చేసింది. బట్లర్‌ (44 బంతుల్లో 64; 2 ఫోర్లు, 4 సిక్స్‌లు), బెయిర్‌స్టో (50 బంతుల్లో 51; 6 ఫోర్లు) రాణించారు. కష్టసాధ్యమైన లక్ష్యాన్ని ఛేదించేందుకు బరిలోకి దిగిన బంగ్లాదేశ్‌ 48.5 ఓవర్లలో 280 పరుగులకు ఆలౌటైంది. ఆల్‌రౌండర్‌ షకీబ్‌ అల్‌ హసన్‌ (119 బంతుల్లో 121; 12 ఫోర్లు, 1 సిక్స్‌) సెంచరీతో పోరాడినా ఫలితం లేకపోయింది. ఇంగ్లండ్‌ బౌలర్లలో ఆర్చర్, స్టోక్స్‌ చెరో 3 వికెట్లు తీశారు. జేసన్‌ రాయ్‌కి ‘మ్యాన్‌ ఆఫ్‌ ద మ్యాచ్‌’ దక్కింది.   రాయ్‌ వీర విహారం... టాస్‌ ఓడి ముందుగా బ్యాటింగ్‌కు దిగిన ఇంగ్లండ్‌ తొలి ఓవర్లో ఒక పరుగు మాత్రమే చేసింది. తర్వాత నుంచి జేసన్‌ రాయ్, బెయిర్‌స్టో దూకుడుతో స్కోరుబోర్డు పరుగుపెట్టింది. ముఖ్యంగా రాయ్‌ నిలదొక్కుకున్నాక షాట్లపై కన్నేశాడు. లాంగాన్, డీప్‌ మిడ్‌ వికెట్, లాంగాఫ్, కవర్స్, ఎక్స్‌ట్రా కవర్స్‌ ఇలా మైదానంలో ఏ ప్రాంతాన్ని వదలకుండా కళ్లు చెదిరే షాట్లతో విరుచుకుపడ్డాడు. ఈ క్రమంలో 38 బంతుల్లో అర్ధసెంచరీ చేసిన జేసన్, బెయిర్‌స్టోతో కలిసి తొలి వికెట్‌కు 128 పరుగులు జోడించి ఘనమైన ఆరంభాన్నిచ్చాడు. బెయిర్‌స్టో ఫిఫ్టీ కాగానే ఔటయ్యాడు. రూట్‌ (21) పెద్దగా పరుగులు చేయలేదు. బట్లర్‌ రాకతో మళ్లీ పరుగుల ప్రవాహం జోరందుకుంది. రాయ్‌ 92 బంతుల్లో సెంచరీ మార్కును చేరుకోగా, జట్టు 30.4ఓవర్లలోనే 200 స్కోరు చేసింది. సెంచరీ తర్వాత జేసన్‌ సిక్సర్లతో విరుచుకుపడటంతో అతడి డబుల్‌ సెంచరీ ఖాయమనిపించింది. అయితే మెహదీహసన్‌ మిరాజ్‌ బౌలింగ్‌ వరుసగా 6, 6, 6 కొట్టిన రాయ్‌ మరో భారీషాట్‌ కొట్టే ప్రయత్నంలో నిష్క్ర మించాడు. కెప్టెన్‌ మోర్గాన్‌ 35 పరుగులు చేయగా, స్టోక్స్‌ (6) విఫలమయ్యాడు. చివర్లో ప్లంకెట్‌ (9 బంతుల్లో 27 నాటౌట్‌; 4 ఫోర్లు, 1 సిక్స్‌), వోక్స్‌ (18 నాటౌట్‌) 17 బంతుల్లో 45 పరుగులు జోడించారు.   షకీబ్‌ పోరాటం... అసాధ్యమైన లక్ష్యంతో బరిలోకి దిగిన బంగ్లా ఆరంభంలోనే ఓపెనర్‌ సౌమ్య సర్కార్‌ (2) వికెట్‌ను కోల్పోయింది. ఈ  దశలో వన్‌డౌన్‌లో బ్యాటింగ్‌కు వచ్చిన షకీబ్‌ అల్‌ హసన్‌ చక్కని పోరాటం చేశాడు. ముందుగా ఓపెనర్‌ తమీమ్‌ ఇక్బాల్‌ (19)తో కలిసి రెండో వికెట్‌కు 55 పరుగులు జోడించాడు. తర్వాత ముష్ఫీకర్‌ రహీమ్‌ (50 బంతుల్లో 44; 2 ఫోర్లు)తో కలిసి ఇన్నింగ్స్‌ను నడిపించిన షకీబ్‌ 53 బంతుల్లో అర్ధసెంచరీ పూర్తిచేసుకున్నాడు. షకీబ్, రహీమ్‌ జోడీ మూడో వికెట్‌కు 106 పరుగులను జతచేసింది. మొహమ్మద్‌ మిథున్‌ (0) డకౌట్‌ కాగా... మహ్మూదుల్లా (28) అండతో షకీబ్‌ 95 బంతుల్లో సెంచరీ సాధించాడు. ఇతని పోరాటానికి స్టోక్స్‌ బౌలింగ్‌లో చుక్కెదురైంది. తర్వాత వచ్చిన వారిలో మొసద్దిక్‌ 26, మెహదీహసన్‌ మిరాజ్‌ 12 పరుగులు చేశారు.   స్కోరు వివరాలు ఇంగ్లండ్‌ ఇన్నింగ్స్‌: రాయ్‌ (సి) మొర్తజా (బి) మిరాజ్‌ 153; బెయిర్‌స్టో (సి) మిరాజ్‌ (బి) మొర్తజా 51; రూట్‌ (బి) సైఫుద్దీన్‌ 21; బట్లర్‌ (సి) సర్కార్‌ (బి) సైఫుద్దీన్‌ 64; మోర్గాన్‌ (సి) సర్కార్‌ (బి) మిరాజ్‌ 35; స్టోక్స్‌ (సి) మొర్తజా (బి) ముస్తఫిజుర్‌ 6; వోక్స్‌ (నాటౌట్‌) 18; ప్లంకెట్‌ (నాటౌట్‌) 27; ఎక్స్‌ట్రాలు 11; మొత్తం (50 ఓవర్లలో 6 వికెట్లకు) 386. వికెట్ల పతనం: 1–128, 2–205, 3–235, 4–330, 5–340, 6–341.  బౌలింగ్‌: షకీబ్‌ 10–0–71–0, మొర్తజా 10–0–68–1, సైఫుద్దీన్‌ 9–0–78–2, ముస్తఫిజుర్‌ 9–0–75–1, మిరాజ్‌ 10–0–67–2, మొసద్దిక్‌ 2–0–24–0. బంగ్లాదేశ్‌ ఇన్నింగ్స్‌: తమీమ్‌  (సి) మోర్గాన్‌ (బి) వుడ్‌ 19, సౌమ్య సర్కార్‌ (బి) ఆర్చర్‌ 2; షకీబ్‌ (బి) స్టోక్స్‌ 121; రహీమ్‌ (సి) రాయ్‌ (బి) ప్లంకెట్‌ 44; మిథున్‌ (సి) బెయిర్‌స్టో (బి) రషీద్‌ 0; మహ్మూదుల్లా  (సి) బెయిర్‌స్టో (బి) వుడ్‌ 28, మొసద్దిక్‌ (సి) ఆర్చర్‌ (బి) స్టోక్స్‌ 26; సైఫుద్దీన్‌ (బి) స్టోక్స్‌ 5; మిరాజ్‌ (సి) బెయిర్‌స్టో (బి) ఆర్చర్‌ 12; మొర్తజా (నాటౌట్‌) 4; ముస్తఫిజుర్‌ (సి) బెయిర్‌స్టో (బి) ఆర్చర్‌ 0; ఎక్స్‌ట్రాలు 19; మొత్తం (48.5 ఓవర్లలో ఆలౌట్‌) 280. వికెట్ల పతనం: 1–8, 2–63, 3–169, 4–170, 5–219, 6–254, 7–261, 8–264, 9–280, 10–280. బౌలింగ్‌: వోక్స్‌ 8–0–67–0, ఆర్చర్‌ 8.5–2– 29–3, ప్లంకెట్‌ 8–0–36–1, వుడ్‌ 8–0–52–2, రషీద్‌ 10–0–64–1, స్టోక్స్‌ 6–1–23–3. 1 వన్డేల్లో వరుసగా ఏడు మ్యాచ్‌ల్లో 300పైగా పరుగులు చేసిన తొలి జట్టుగా ఇంగ్లండ్‌ రికార్డు సృష్టించింది. ఆస్ట్రేలియా (వరుసగా ఆరు మ్యాచ్‌ల్లో) పేరిట ఉన్న రికార్డును ఇంగ్లండ్‌ సవరించింది.   386 ప్రపంచకప్‌ చరిత్రలో ఇంగ్లండ్‌ జట్టుకిదే అత్యధిక స్కోరు. 2011 కప్‌లో బెంగళూరులో భారత్‌పై ఇంగ్లండ్‌ నమోదు చేసిన 338/8 స్కోరు తెరమరుగైంది.

న్యూఢిల్లీ : టీమిండియా మాజీ కెప్టెన్‌, సీనియర్‌ క్రికెటర్‌ మహేంద్రసింగ్‌ ధోనిపై పాకిస్తాన్‌ మాజీ క్రికెటర్‌ షోయబ్‌ అక్తర్‌ ప్రశంసల వర్షం కురిపించారు. మైదానంలో సహచర ఆటగాళ్లకు నిర్దేశం చేస్తూ.. జట్టు విజయానికి ప్రణాళికలు రచించే ధోని మైదానంలో ఉండటం టీమిండియాకు కొండంత బలం అని చెప్పుకొచ్చాడు. మైదానంలో ధోని చతురత కంప్యూటర్‌ కంటే వేగంగా ఉంటుందని కితాబిచ్చాడు. ఏ వికెట్‌ ఎలా మారుతుందోననే విషయంలో ధోని కంప్యూటర్‌కన్నా వేగంగా స్పందిస్తాడని అన్నాడు. తన యూట్యూబ్‌ చానెల్‌లో పాక్‌ స్పీడ్‌స్టర్‌ ఈ వ్యాఖ్యలు చేశాడు. ఇక టీమిండియా బ్యాటింగ్‌ లైనప్‌లో నాలుగో ఆటగాడిగా పేర్కొంటున్న కేఎల్‌ రాహుల్‌ను కూడా షోయబ్‌ మెచ్చుకున్నాడు. ‘ఒక క్రికెటర్‌గా కేఎల్‌ రాహుల్‌ అంటే ఇష్టం. అతను కోహ్లి అడుగు జాడల్లో నడుస్తున్నాడనిపిస్తోంది. భవిష్యత్‌లో అతనో గొప్ప బ్యాట్స్‌మన్‌ అవుతాడు. గతంలో ఓసారి కలిసినప్పుడు..  మైదానంలో వెలుపల ఇతర వ్యాపకాల పై దృష్టి పెట్టకుండా.. ఆటపైనే ఫోకస్‌ పెట్టాలని సూచించాను. రాహుల్‌కు మంచి భవిష్యత్‌ ఉంది’అన్నాడు. ఇక ఐసీసీ వరల్డ్‌కప్‌-2019లో భాగంగా దక్షిణాఫ్రికాతో బుధవారం జరిగిన తొలిమ్యాచ్‌లో టీమిండియా విజయం సాధించింది. టాస్‌ గెలిచి బ్యాటింగ్‌కు దిగిన సఫారీలు... మణికట్టు స్పిన్నర్‌ యజువేంద్ర చహల్‌ (4/51) మాయాజాలం, పేసర్‌ జస్‌ప్రీత్‌ బుమ్రా (2/35) పకడ్బందీ బౌలింగ్‌తో నిర్ణీత ఓవర్లలో 9 వికెట్ల నష్టానికి 227 పరుగులు చేసింది. 228 పరుగుల లక్ష్యాన్ని 47.3 ఓవర్లలో ఛేదించిన భారత జట్టు ఘనంగా శుభారంభం చేసింది. హిట్‌ మ్యాన్‌’ రోహిత్‌ శర్మ (144 బంతుల్లో 122 నాటౌట్‌; 13 ఫోర్లు, 2 సిక్స్‌లు) అజేయ సెంచరీకి తోడు ఎంస్‌ ధోని 34, కేఎల్‌ రాహుల్‌ 26 పరుగులు చేసి జట్టు విజయంలో తమవంతు పాత్ర పోషించారు. చహల్‌ బౌలింగ్‌లో ధోని ఫెలుక్వాయోను స్టంపౌట్‌ చేశాడు.

సౌతాంప్టన్‌ : అంచనాలకు తగ్గకుండా ఆడిన టీమిండియా  ప్రపంచకప్‌లో శుభారంభం చేసింది. బ్యాటింగ్, బౌలింగ్‌లో అద్భుత ఆటతో  తమ తొలి మ్యాచ్‌లో సునాయాస విజయం సాధించింది. ‘హిట్‌ మ్యాన్‌’ రోహిత్‌ శర్మ (144 బంతుల్లో 122 నాటౌట్‌; 13 ఫోర్లు, 2 సిక్స్‌లు) అజేయ సెంచరీకి తోడు.. మణికట్టు స్పిన్నర్‌ యజువేంద్ర చహల్‌ (4/51) మాయాజాలం, పేసర్‌ జస్‌ప్రీత్‌ బుమ్రా (2/35) పకడ్బందీ బౌలింగ్‌తో భారత్‌ ఖాతాలో తొలి విజయం నమోదైంది. బుధవారం జరిగిన ఇండియా-సౌతాప్రికా మ్యాచ్‌లో తొలుత బ్యాటింగ్‌ చేసిన సఫారీ జట్టు నిర్ణీత ఓవర్లలో 9 వికెట్ల నష్టానికి 227 పరుగులు చేయగా.. 47.3 ఓవర్లలో నాలుగు వికెట్లు కోల్పోయిన భారత జట్టు లక్ష్యాన్ని ఛేదించింది. ఇక ఈ మ్యాచ్‌లో చహల్‌ 51 పరుగులిచ్చి నాలుగు కీలక వికెట్లు తీశాడు. ఫలితంగా వరల్డ్‌కప్‌ అరంగేట్ర మ్యాచ్‌లో ఉత్తమ ప్రదర్శన కనబర్చిన రెండో భారత బౌలర్‌గా చరిత్ర సృష్టించాడు. 2015-ప్రపంచకప్‌లో పాకిస్తాన్‌తో జరిగిన అరంగేట్ర మ్యాచ్‌లో మహ్మద్‌ షమీ ఉత్తమ గణాంకాలు నమోదు చేశాడు. 35 పరుగులే ఇచ్చిన నాలుగు వికెట్లు నేల కూల్చాడు. డసెన్‌, డుప్లెసిస్‌, డేవిడ్‌ మిల్లర్‌, ఫెలుక్వాయో వికెట్లు పడగొట్టిన చహల్‌ భారీ భాగస్వామ్యాలు నమోదు కాకుండా అడ్డుకున్నాడు. 54 పరుగులు జోడించి ప్రమాదకరంగా పరిణమించిన డసెన్‌, డుప్లెసిస్ జోడిని చహల్‌ 20వ ఓవర్లో విడగొట్టాడు. తొలిబంతికి డసెన్‌ను చివరి బంతికి డుప్లెసిస్‌ను పెవిలియన్‌ చేర్చాడు. ఇక 46 పరుగులు భాగస్వామ్యంతో నెలకొల్పిన మిల్లర్‌, ఫెలుక్వాయోను ఔట్‌ చేసి సఫారీ జట్టుని కోలుకోలేని దెబ్బతీశాడు.

న్యూఢిల్లీ : టీమిండియా మాజీ కెప్టెన్‌, సీనియర్‌ క్రికెటర్‌ మహేంద్రసింగ్‌ ధోనికి భారత ఆర్మీ అంటే ఎనలేని గౌరవం. క్రికెట్‌ అభిమానుల మాదిరిగానే ఇండియన్‌ ఆర్మీకీ అతనంటే ప్రత్యేకమైన అభిమానం. 2011లో ధోనికి లెఫ్టినెంట్‌ కల్నల్‌ హోదా ఇచ్చి ఇండియన్‌ ఆర్మీ గౌరవించిన సంగతి తెలిసిందే. భారత పారామిలటరీ దళంలో పనిచేయడమంటే తనకెంతో ఇష్టమని ధోని పలు సందర్భాల్లో వెల్లడించాడు కూడా. ఇక ఐసీసీ క్రికెట్‌ వరల్డ్‌కప్‌-2019ని ఘనంగా ఆరంభించిన కోహ్లిసేన దక్షిణాఫ్రికాతో బుధవారం జరిగిన మ్యాచ్‌లో జయకేతనం ఎగురవేసింది. 227 పరుగుల లక్ష్యాన్ని నాలుగు వికెట్లు కోల్పోయి 47.3 ఓవర్లలో ఛేదించింది. ఈ మ్యాచ్‌లో మిస్టర్‌కూల్‌ ఎంస్‌ ధోని ఇండియన్‌ పారామిలటరీ రెజిమెంట్‌తో తయారు చేసిన గ్లోవ్స్‌ ధరించి కీపింగ్‌ చేయడం విశేషం.  (సూపరోహిట్‌...) ధోని గ్లోవ్స్‌పై ఉన్న ‘బలిదాన్‌’(త్యాగం) చిహ్నం దక్షిణాఫ్రికా బ్యాట్స్‌మన్‌ ఫెలుక్వాయోను (34) స్టంపౌట్‌ చేసిన  సమయంలో బయటపడింది. అమర జవాన్లకు నివాళిగా ధోని చేసిన పనిపై సోషల్‌ మీడియాలో ప్రశంసల వర్షం కురుస్తోంది. ‘అందుకే మీరంటే మాకు అత్యంత అభిమానం, గౌరవం.. మీకిదే మా సెల్యూట్‌’ అంటూ అభిమానులు పేర్కొంటున్నారు. ఇక లక్ష్య ఛేదనలో 34 పరుగులు సాధించిన ధోని టీమిండియా విజయంలో తనవంతు పాత్ర పోషించాడు. అతని సారథ్యంలో టీమిండియా 2011 క్రికెట్‌ వరల్డ్‌కప్‌ గెలుచుకున్న సంగతి విదితమే. ఈ ఏడాది ప్రారంభంలో.. ఆస్ట్రేలియాతో జరిగిన మ్యాచ్‌లోనూ టీమిండియా ఆటగాళ్లు ఆర్మీ క్యాప్‌లు ధరించి పుల్వామా అమరులకు నివాళర్పించారు. ప్రపంచకప్‌లో భాగంగా టీమిండియా రెండో మ్యాచ్‌ జూన్‌ 9న ఆస్ట్రేలియాతో జరగనుంది.

లండన్‌ : భారత క్రికెట్ మాజీ సారథి, మహేంద్ర సింగ్ ధోనీ గారాల పట్టీ జీవాకి ఉన్న ఫాలోయింగ్ గురించి ప్రత్యేకంగా చెప్పాల్సిన పనిలేదు. క్యూట్‌ ఎక్స్‌ప్రెషన్‌తో ముద్దు ముద్దు మాటలతో కోట్ల మందిని తన అభిమానులుగా మార్చేసుకుంది జీవా. తల్లి సాక్షి ధోని సాయంతో ఆమె సొంత ఇన్‌స్టాగ్రామ్‌ అకౌంట్‌ను కూడా హ్యాండిల్‌ చేస్తోంది. ధోని మైదానంలో ఉన్నప్పుడు తప్పక మ్యాచ్‌ను వీక్షించే ఈ లిటిల్‌ స్టార్‌ తాజా ప్రపంచకప్‌ నేపథ్యంలోనూ తల్లితో కలిసి ఇంగ్లండ్‌ పయనమైంది. ఎయిర్‌పోర్టులో దిగిన ఓ ఫొటోను ‘ట్రావెల్‌ టైమ్స్‌’ అని పోస్టు చేసింది.  (కమాన్‌ పప్పా.. జీవాధోని హల్‌చల్‌) ఇక బుధవారం దక్షిణాఫ్రికాతో జరిగిన మ్యాచ్‌లో టీమిండియా 6 వికెట్ల తేడాతో ఘన విజయం సాధించిన సంగతి తెలిసిందే. సఫారీ జట్టు నిర్దేశించిన 227 పరుగుల లక్ష్యాన్ని కోహ్లి సేన 47.3 ఓవర్లలో నాలుగు వికెట్లు కోల్పోయి ఛేదించింది. ఈ మ్యాచ్‌లో ధోని 34 పరుగులు జోడించి జట్టు విజయంలో తనదైన పాత్ర పోషించాడు. ఇక ధోని బ్యాటింగ్‌ చేస్తున్న సమయంలో జీవా ఇచ్చిన క్యూట్‌ ఎక్స్‌ప్రెషన్స్‌పై నెటిజన్లు ముచ్చడపడ్డారు. ‘లిటిల్‌ స్టార్‌ డాడీ ఆటను ఎంజాయ్‌ చేస్తూ చీర్‌లీడర్‌గా మారారు’ అని సరదాగా వ్యాఖ్యానిస్తున్నారు. కాగా, జీవా ఇన్‌స్టాగ్రామ్‌ అకౌంట్‌కు 98 వేల మంది ఫాలోవర్లు ఉన్నారు. (పంత్‌కు పాఠాలు నేర్పిస్తున్న జీవా)

క్రికెట్‌ వరల్డ్‌కప్‌ సాధించాలన్న దక్షిణాఫ్రికా కల నేటికి కలగానే మిగిలిపోయింది. నిర్ణయాక మ్యాచుల్లో చేతులెత్తేయడం ఆ జట్టుకు అలవాటు. అయితే, 1999 వరల్డ్‌కప్‌లో టైటిల్‌ ఫేవరెట్లలో ఒకటిగా బరిలో నిలిచిన ఆ జట్టును ఓ మిస్‌ఫీల్డ్‌ కొంపముంచింది. చెత్త ఫీల్డింగ్‌తో హర్షలే గిబ్స్‌ తన జట్టుకు తీరని వ్యథ మిగిల్చాడు. ఆస్ట్రేలియా బ్యాట్స్‌మన్‌ స్టీవ్‌వా ఇచ్చిన సులభమైన క్యాచ్‌ను జారవిడిచి అటు మ్యాచ్‌ను, ఇటు ప్రపంచప్‌ గెలుచుకునే సువర్ణ అవకాశాన్ని దూరం చేశాడు. ఒకవేళ ‘అత్యంత చెత్త క్యాచ్‌ మిస్‌’ అవార్డు ఏదైనా ఉంటే అది.. గిబ్స్‌కే ఇవ్వాల్సి ఉంటుందని నాటి చేదు జ్ఞాపకాల్ని గుర్తు చేసుకుంటున్నారు దక్షిణాఫ్రికా మాజీ ఆటగాళ్లు. మ్యాచ్‌ పోయింది.. కప్పు పోయింది.. 1999 ప్రపంచకప్‌లో టైటిల్‌ ఫేవరెట్లలో ఒకటిగా బరిలోకి దిగిన దక్షిణాఫ్రికా అంచనాలకు తగినట్లే ఆడింది. సూపర్‌ సిక్స్‌ చేరింది. తొలుత బ్యాటింగ్‌ చేసిన ఆ జట్టు 50 ఓవర్లలో 7 వికెట్లకు 271 పరుగులు చేసింది. ఇక దక్షిణాఫ్రికా పేస్‌ దళం అలెన్‌ డోనాల్డ్‌, షాన్‌ పొలాక్‌, స్టీవ్‌ ఎల్వర్థి, లాన్స్‌ క్లుజెనర్ ఆసీస్‌కు చెమటలు పట్టించారు. 12 ఓవర్లలో 48 పరుగులు చేసిన ఆ జట్టు 3 వికెట్లు కోల్పోయి ఆత్మరక్షణలో పడింది. క్రీజులో పాంటింగ్‌, స్టీవ్‌ వా ఆచితూచి ఆడుతున్నారు. ఒక్కో పరుగు జోడిస్తూ తమ జట్టుని విజయం వైపు తీసుకెళ్తున్నారు.  ధాటిగా ఆడుతున్న స్టీవ్‌వా ప్రమాదకరంగా మారాడు. ఆసీస్‌ స్కోరు 30 ఓవర్లలో మూడు వికెట్లకు 149. ఈ జోడీని విడగొడితే దక్షిణాఫ్రికా గెలుపునకు దగ్గరైనట్లే. అయితే, మరుసటి ఓవర్లోనే ఆ జట్టుకు భారీ షాక్‌. 31 ఓవర్‌ చివరి బంతికి స్టీవ్‌వా ఇచ్చిన సులభమైన క్యాచ్‌ను హర్షలే గిబ్స్‌ జారవిడిచాడు. క్యాచ్‌ పట్టిన ఆనందంలో బంతిని పైకి ఎగరేద్దామనుకున్నాడు. పూర్తిగా ఒడిసిపట్టక మునుపే బంతిని గాల్లోకి ఎగరేసేందుకు యత్నించాడు. ఆ క్రమంలో బంతి చేజారింది. క్యాచ్‌ మిస్‌. మ్యాచ్‌ గోవిందా..! దొరికిన అవకాశాన్ని వినియోగించుకున్న స్టీవ్‌వా మిగతా బ్యాట్స్‌మెన్‌తో కలసి తమ జట్టును విజయ తీరాలకు చేర్చాడు. రెండు బంతులు మిగిలుండగానే 5వికెట్లు కోల్పోయి ఆసీస్‌ లక్ష్యాన్ని ఛేదించింది. ఇక సెమీఫైనల్స్‌లో ఆసీస్‌తో మరోసారి తలపడిన దక్షిణాఫ్రికా మళ్లీ పరాజయం పాలైంది. సూపర్‌సిక్స్‌లో ఎదురైన ఓటమి నుంచి తేరుకోకముందే ఆసీస్‌ మరోసారి దెబ్బకొట్టింది. టైగా ముగుస్తుందనుకున్న మ్యాచ్‌లో ఆస్ట్రేలియా చివరి బంతికి విజయం సాధించింది. ఫైనల్‌ చేరి పాకిస్తాన్‌ను సునాయాసంగా ఓడించి రెండోసారి ప్రపంచకప్పును ఎగరేసుకుపోయింది. సూపర్‌సిక్స్‌లో గెలవకపోయుంటే ఆసీస్‌ ఇంటిదారిపట్టేది. మిగతా జట్లతో పోల్చుకుంటే ఎంతో బలంగా ఉన్న సౌతాఫ్రికా కప్పును ముద్దాడేది. ఇక దక్షిణాఫ్రికా ఇప్పటివరకు ఒక్క ఐసీసీ టోర్నీ కూడా గెలవకపోవడం గమనార్హం.

సాక్షి ప్రతినిధి, చెన్నై: ఈ ఏడాది జరగనున్న క్రికెట్‌ ప్రపంచ కప్‌ పోటీల్లో భారత జట్టు ఘన విజయాన్ని నమోదు చేసుకుంటుందని ఢిల్లీ క్యాపిటల్స్‌ జట్టు సలహాదారు, భారత జట్టు మాజీ కెప్టెన్‌ సౌరవ్‌గంగూలి విశ్వాసం వెలిబుచ్చారు. అడ్వాన్డ్స్‌ హెయిర్‌ స్టూడియో పదో వార్షికోత్సవం సందర్భంగా సంస్థ బ్రాండ్‌ అంబాసిడర్‌ సౌరవ్‌గంగూలి మంగళవారం చెన్నైలో సందడి చేశారు. మీడియా సమావేశంలో ఆయన మాట్లాడుతూ, కెప్టెన్‌ వీరాట్‌ కోహ్లీ నాయకత్వంలో భారత జట్టులో యువక్రీడాకారుల ఉత్సాహం వెల్లివిరుస్తోంది. ఈ ఉత్సాహమే విజయానికి దారితీస్తుందని అన్నారు. ఒక్క కోహ్లీ మాత్రమే కాదు ఎంఎస్‌ ధోని సహా అందరూ ప్రతిభావంతమైన క్రీడాకారులేనని చెప్పారు. తమ హయాంతో పోల్చుకుంటే క్రికెట్‌ క్రీడారంగంలో ఒత్తిళ్లు పెరిగాయి, గట్టి పోటీ నెలకొని ఉందని అన్నారు. ప్రపంచ కప్‌లో భాగస్వామ్యులైన పాకిస్థాన్‌  అన్నిదేశాల జట్టు మెరుగైన క్రీడను ప్రదర్శిస్తున్నాయని చెప్పారు. ఏ జట్టు దేనికదే తీసిపోదు అనే విధంగా భారత్‌కు గట్టి పోటీ ఇస్తాయని చెప్పారు. మీడియా సమావేశంలో గంగూలి, మోహిత్‌శర్మ, సంకేత్‌షా అయితే ఆయా జట్టులను దీటుగా ఎదుర్కొనే సామర్థ్యం భారత్‌ జట్టుకు ఉందని చెప్పారు. కాగా, అడ్వాన్డ్స్‌ హెయిర్‌ స్టూడియోతోపాటూ బ్రాండ్‌ అంబాసిడర్‌గా తన ప్రయాణం పదేళ్లుగా సాగిపోతోందని చెప్పారు. అంతర్జాతీయస్థాయిలో పేరొందిన ఈ సంస్థ సీఈఓ సంకేత్‌షా దేశదేశాలు తిరుగుతూనే తనకు అవసరమైనపుడు ఐదు నిమిషాల్లో స్పందిస్తారని మెచ్చుకున్నారు. భారత్‌లో తనకెందరు అభిమానులు ఉన్నారో ఈ సంస్థకు అదే స్థాయిలో దేశ విదేశాల్లో అభిమానులు, ఖాతాదారులున్నారని చెప్పారు. ప్రపంచకప్‌ గెలవడంపై గట్టి నమ్మకంతో ఉన్నామని చెన్నై సూపర్‌ కింగ్స్‌ బౌలర్‌ మోహిత్‌ శర్మ తెలిపారు. సంకేత్‌ షా మాట్లాడుతూ, సౌరవ్‌గంగూలీ బ్రాండ్‌ అంబాసిడర్‌గా ఉండడం వల్ల తమ సంస్థకు మరింత ఖ్యాతి దక్కిందని అన్నారు. 1970లో అమెరికాలో ప్రారంభమైన తమ సంస్థ ఈ 45 ఏళ్ల కాలంలో 2.4 బిలియన్‌ డాలర్ల కంపెనీగా ఎదిగి ప్రపంచ వ్యాప్తంగా కోట్లాది మంది ఖాతాదారులను సొంతం చేసుకుందని చెప్పారు. అంతేగాక ఒక మిలియన్‌ ప్రజలు తమ స్టూడియోపై ఆధారపడి లబ్ధి పొందినట్లు తెలిపారు. ప్రపంచ వ్యాప్తంగా పదివేల మంది సెలబ్రిటీలకు తమ స్టూడియో సేవలు అందిస్తున్నదని వివరించారు. 

కరాచీ : ఓవైపు పుల్వామా ఉగ్రదాడి.. మరోవైపు పాక్‌పై సర్జికల్‌ స్ట్రైక్స్‌-2తో భారత్‌ ప్రతీకార దాడితో ఇరు దేశాల మధ్య యుద్ధ వాతావరణం నెలకొంది. దీంతో వన్డే ప్రపంచకప్‌లో భాగంగా భారత్‌-పాక్‌ మధ్య జరుగనున్న మ్యాచ్‌ల పట్ల సందగ్దం నెలకొంది. టెర్రరిజాన్ని పెంచిపోషిస్తున్న దేశాలను వరల్డ్‌కప్‌ నుంచి బహిష్కరించాలని బీసీసీఐ ఇప్పటికే ఐసీసీకి లేఖ రాసింది. ఇక అభిమానులు, మాజీ క్రికెటర్లు మాత్రం జూన్‌ 16న పాక్‌తో జరిగే మ్యాచ్‌ని బాయ్‌కాట్‌ చేయాలని కోరుతున్నారు. కాగా, దుబాయ్‌లో శుక్రవారం లేదా శనివారం జరుగనున్న ఐసీసీ ఎగ్జిక్యూటివ్‌ బోర్డ్‌ త్రైమాసిక సమావేశంలో భారత్‌-పాక్‌ పంచాయతీ చర్చకు రానుంది. ఈ సమావేశంలో భారత్‌ అభ్యంతరాలపై పాక్‌ గట్టి కౌంటర్‌ ఇవ్వనుందని సమాచారం. భారత్‌ కోరుకున్నట్టే లీగ్‌ దశలో టీమిండియాతో మ్యాచ్‌లు ఆడమని, కానీ నాకౌట్‌ దశలో ఇరు జట్లు ఎదురుపడితే అప్పుడేం చేస్తారనే ప్రశ్నను పాక్‌ క్రికెట్‌ బోర్డు ఈ సమావేశంలో లేవనెత్తనుందని  పీసీబీలోని  ఓ అధికారి తెలిపారు. దక్షిణాఫ్రికా క్రికెటర్‌పై జాతి విద్వేష వ్యాఖ్యలు చేశాడంటూ పాక్‌ కెప్టెన్‌ సర్పరాజ్‌ఖాన్‌పై నాలుగు మ్యాచ్‌ల నిషేదం విధించిన ఐసీసీ.. తమతో ఆడమని అంటున్న భారత్‌ పట్ల ఎందుకు స్పందించదో ప్రశ్నించనున్నట్టు వెల్లడించారు.