సాక్షి ప్రతినిధి, గుంటూరు: ఆయన గుంటూరు టీడీపీలో ఓ మండలానికి పార్టీ అధ్యక్షుడు. రాష్ట్ర కమిటీలోనూ ఓ పెద్ద పదవి ఉంది. అన్నిటికీ మించి ప్రత్తిపాడు నియోజకవర్గంలో షాడో ఎమ్మెల్యేగా పేరు గడించాడు. ఆ ‘షాడో’ ఎమ్మెల్యే చేసే ఆగడాలు, పేదలపై చేసే దౌర్జన్యాలు, కప్పం పేరుతో వ్యాపారులపై విసిరే పంజా, చేసే సెటిల్‌మెంట్లకు అడ్డూ అదుపు లేకుండా పోతోంది. అధికార పార్టీ పెద్దల ఆపన్న హస్తం ఉండటం, అతని దందాలు, బలవంతపు వసూళ్లలో కూటమి నాయకులతోపాటు ప్రభుత్వ పెద్దలకు వాటాలు అందుతుండటంతో ఇదేమని అడిగే వారు కరవయ్యారు. ఫలితంగా ఆయన దందా మూడు దౌర్జాన్యాలు.. ఆరు బెదిరింపులుగా సాగిపోతోంది. తాజాగా ఓ మహిళను కాల్‌మనీ పేరుతో వేధించగా.. ఆమె బలవన్మరణానికి పాల్పడటంతో ఆ కాల్‌నాగు పేరు గుంటూరు జిల్లాలో చర్చనీయాంశంగా మారింది. అనుమతి ఉన్నా.. ‘రియల్‌’ కప్పం కట్టాల్సిందే! రాజధాని అమరావతికి చేరువలో ఉండటంతో కూటమి ప్రభుత్వం వచ్చాక గుంటూరుకు ఆనుకుని ఉన్న ప్రత్తిపాడు నియోజకవర్గంలోని గ్రామాల్లో రియల్‌ వ్యాపారులు వెంచర్లు వేశారు. రూ.లక్షలు ఖర్చుచేసి నానా ఇబ్బందులు పడి వ్యాపారులు రియల్‌ ఎస్టేట్‌ వెంచర్లకు అనుమతులు తెచ్చుకున్నా.. వారి కష్టాలు మాత్రం తీరడం లేదు. షాడో ఎమ్మెల్యేగా చలామణి అయ్యే ఆ నేత ‘భగీరథ’ సినిమా తరహా రియల్‌ ఎస్టేట్‌ వ్యాపారులకు ఫోన్లు చేసి ఎకరాకు రూ.2.50 లక్షల చొప్పున ఎన్ని ఎకరాల్లో వెంచర్‌ వేస్తే అంత మొత్తం పంపాలని హుకుం జారీ చేస్తాడు. పంపకుంటే వేధింపులు తప్పవు. ఇదే విషయం గతంలోనూ పెద్దఎత్తున నియోజకవర్గంలో చర్చకు దారితీసింది.వైన్‌ షాపుంటే రూ.5 లక్షలు కట్టాల్సిందే ఈ నేత మద్యం వ్యాపారంలోనూ ఆరితేరిపోయాడు. ఆయనకు గుంటూరు పరిసరాల్లో ఒక బార్‌ అండ్‌ రెస్టారెంట్‌ ఉన్నట్టు తెలిసింది. గుంటూరు రూరల్‌ మండలంలో లిక్కర్‌ సిండికేట్‌లో కీలక భాగస్వామి కూడా. కొద్దినెలల క్రితం ప్రత్తిపాడు నియోజకవర్గంలోని మద్యం షాపుల లైసెన్స్‌దారులు ఒక్కొక్కరూ ప్రతి షాపు నుంచి రూ.5 లక్షలు ఇచ్చేలా మాట్లాడాలని ఆబ్కారీ అధికారులకు ఆర్డర్‌ వేశాడు. అంతే అధికారులు ఆచరణ మొదలుపెట్టడం, లైసెన్సుదారులకు కాల్‌చేసి దుకాణానికి రూ.5 లక్షలు చొప్పున ఆయనకు కప్పం కట్టాలని చెప్పడంతో కొందరు అడ్డం తిరిగారు. ఒక్కసారి సదరు నేతతో మాట్లాడాలని ఏకంగా అధికారులే లైసెన్సుదారులకు చెప్పడం, ఆ తరువాత ఆ వివాదం అటు పారీ్టలో, ఇటు మద్యం లైసెన్సుదారుల అసోసియేషన్‌తో పాటు జిల్లాలో దుమారం రేగడంతో మధ్యే మార్గంగా బేరం కుదుర్చుకున్నారు. బెల్టు దుకాణాల వ్యాపారంలోనూ ఆయనదే హవా. ఆయన చెప్పిన వారికే బెల్టు దుకాణం ఇవ్వడం, వారినుంచి పెద్ద మొత్తంలో డబ్బులు వసూళ్లు చేయడం పరిపాటిగా మారిందన్న విమర్శలు వినిపిస్తున్నాయి. సమస్య చెప్పుకుందామని వెళితే సెటిల్‌మెంటే.. ప్రజలు సమస్యల పరిష్కారం కోసం పొరపాటున ఆయన దగ్గరకు వెళ్లారా.. ఇక అంతేసంగతులు. ఆయన సెటిల్‌మెంట్‌ దెబ్బకు వెళ్లిన వారికి దిమ్మతిరిగిపోవాల్సిందే. ఇటీవల ఓ గ్రామానికి చెందిన వ్యక్తి తన ఆస్తి వివాదం విషయంలో ఎమ్మెల్యే కార్యాలయాన్ని సంప్రదించాడు. అక్కడే ఉన్న ఈ నాయకుడు జోక్యం చేసుకుని ‘మీ సమస్య పరిష్కరిస్తాం. మాకేంటీ..’ అంటూ రాయ‘బేరాలు’ మాట్లాడుకున్నారు. అడిగినంత ఇవ్వలేదంటే అధికారులను ఉసిగొల్పి వారి పని ఎక్కడా కాకుండా మోకాలడ్డి బలవంతంగా సెటిల్‌మెంట్లు చేయడంలో ఆయన దిట్ట.కాల్‌మనీలోనూ.. ఈ నేత కాల్‌మనీ పేరుతో నిత్యం పేదలపై బుసలు కొడుతూనే ఉన్నాడు. పేదల అవసరాన్ని ఆసరాగా తీసుకుని వారికి అప్పులు ఇచ్చి, రుణం తీసుకున్న పాపానికి వారిపై వేధింపులకు పాల్పడుతుంటాడు. అసలుకు వడ్డీ, చక్రవడ్డీ కలిపి నాలుగింతల వసూలు చేస్తుంటాడు. ఇవ్వని వారిపై అధికార ప్రతాపాన్ని చూపటం, బెదిరింపులకు పాల్పడటం, అవసరమైతే నేరుగా దాడు­లకు తన ముఠాను ప్రోత్సహించడం, మహిళలని కూడా చూడకుండా బూతులు తిట్టడం చేస్తుంటారన్న ఆరోపణలు పెద్దఎత్తున వినిపిస్తున్నాయి.భూకబ్జాలోనూ దిట్ట ఈ నాయకుడు భూకబ్జాలకు కూడా పాల్పడుతుంటాడన్న విమర్శలు ఉన్నాయి. గతంలో గుంటూరు మండలం పెదపలకలూరులో 8 సెంట్ల స్థలాన్ని కబ్జా చేసేందుకు యతి్నంచాడు. ఆ భూమిని ఓ దేవదాయ డైరెక్టర్‌ పేరిట రిజిస్టర్‌ చేయించి భూమిని స్వా«దీనం చేసుకునేందుకు ప్రయతి్నంచాడు. తీరా ఆ భూమి జనసేన నాయకులకు చెందినది కావడంతో వారంతా ఎదురుతిరిగారు. స్థలంలోకి రావడానికి వీల్లేదని అవరమైతే కోర్టులో తేల్చుకోవాలని తెగేసి చెప్పారు. దీంతో వారి కబ్జా కుట్రలు పనిచేయలేదు.

గుంటూరు: ‘‘నా చావుకు కారణం టీడీపీ నేతలు కల్లూరి శ్రీనివాసరావు, కర్లపూడి. శ్రీనివాసరావు, రమేష్, పద్మ, పద్మ చెల్లి సీత, ఆమె పెద్దకొడుకు శివకృష్ణ, పొట్ట జాను అనే వ్యక్తి కోడలు జానీ బేగం. వాళ్ల టార్చర్‌ తట్టుకోలేకపోతున్నా. కర్లపూడి శ్రీనివాసరావు తురకపాలెం గ్రామంలో రెండు లక్షలు అప్పుగా ఇప్పించగా అందులో రూ.1.30 లక్షలు తిరిగి చెల్లించేశా. అయినా రోజూ వేధిస్తున్నారు. ఇంటికొచ్చి గొడవ చేస్తున్నారు. తెలిసో తెలీకో వాళ్ల దగ్గర అప్పుచేశా. నేను తింటానికి కాదు. అమ్మా శివమణి (కూతురు).. నాన్నని ఏమీ అనొద్దు, నవీన్‌ (అల్లుడు) నువ్వు జాగ్రత్త నాన్న.. కుటుంబాన్ని జాగ్రత్తగా చూసుకో.. అంటూ ఈపూరి శేషమ్మ అనే వివాహిత పురుగుల మందు తాగుతూ సెల్ఫీ వీడియో తీసుకుని బలవన్మరణానికి యత్నించింది. ఈ హృదయ విదారక ఘటన గుంటూరు జిల్లా వెంగళాయపాలెం మిర్చియార్డులో గత మంగళవారం జరిగింది. ఆమెను హుటాహుటిన కుటుంబ సభ్యులు గుంటూరులోని ప్రైవేటు ఆస్పత్రికి తరలించగా చికిత్స పొందుతూ వారం రోజుల నుంచి మృత్యువుతో పోరాడి మంగళవారం మరణించింది. ఆమె పురుగుల మందు తాగుతూ తీసుకున్న వీడియో ప్రస్తుతం సోషల్‌ మీడియాలో వైరల్‌ అవుతోంది. ఈ వీడియో చూపరులను కంటతడి పెట్టిస్తోంది. ఇచ్చేది రూపాయి వసూలు చేసేది రూ.వేలల్లో వెంగళాయపాలెంలో టీడీపీ నేతల కాల్‌మనీ దాష్టీకాలకు అడ్డూఅదుపూ లేకుండా పోతోంది. తీసుకున్న అప్పుకు వడ్డీలకు వడ్డీలు, చక్రకవడ్డీలు లెక్కగట్టి ముక్కుపిండి మరీ వసూలు చేస్తున్నారు. ఠంచనుగా అడిగినంత డబ్బు ఇవ్వకపోతే ఇంటికొచ్చి వేధిస్తున్నారు. అందరిముందూ పరువు తీస్తున్నారు. ఈ ఆగడాలు భరించలేకే గ్రామానికి చెందిన ఈపూరి శేషమ్మ పురుగుల మందు తాగి బలవన్మరణానికి పాల్పడింది. శేషమ్మ, ముసలయ్య (మద్దిలేటి)ల దంపతులకు కుమార్తె ఉంది. ఆమెకు పెళ్లయింది. వీరు వ్యవసాయ పనులు చేసుకుంటూ మిర్చియార్డు కాలనీలో ఉంటున్నారు. శేషమ్మ పలువురు వద్ద అప్పులు తీసుకుంది. తీసుకున్న అప్పులకు ప్రతి నెలా వడ్డీలు చెల్లిస్తోంది. మిగిలిన డబ్బు కోసం అప్పు ఇచ్చినవారు ఇంటికి వచ్చి వేధిస్తున్నారు. ఈ క్రమంలో శేషమ్మ తన కుమార్తెకు తద్ది తీర్చుకునే కార్యక్రమాన్ని నిర్వహించుకుంది. అదే రోజు గ్రామంలోని పలువురు ఇంటికి వచ్చి తమ వద్ద తీసుకున్న అసలు, వడ్డీ తిరిగి ఇవ్వాలని లేకుంటే కుటుంబాన్ని రోడ్డున పడేస్తామని బెదిరింపులకు పాల్పడ్డారు. అసభ్య పదజాలంతో అవమానించారు. లైంగికంగా కూడా వేధించినట్టు సమాచారం. దీంతో ఆమె తట్టుకోలేక సెల్ఫీ వీడియో విడుదల చేసి ఆత్మహత్య చేసుకుంది.కల్లూరి శ్రీనివాసరావు ఎమ్మెల్యే అనుచరుడు శేషమ్మ సెల్ఫీ వీడియోలో చెప్పిన కల్లూరి శ్రీనివాసరావు టీడీపీ గుంటూరు రూరల్‌ మండల అధ్యక్షుడు. స్థానిక టీడీపీ ఎమ్మెల్యే బూర్ల రామాంజనేయులు అనుచరుడు. దీంతో ఆయన ఆగడాలకు అడ్డే లేకుండా పోతోంది. ఘటనపై నల్లపాడు పోలీసులు కేసు నమోదు చేసి దర్యాప్తు చేస్తున్నారు.

సాక్షి ప్రతినిధి, విజయవాడ: టీడీపీ ప్రభుత్వ హయాంలో బెజవాడలో బొండా ఉమామహేశ్వరరావు ఆయన అనుచరుల ఆగడాలకు అడ్డూ అదుపూ లేకుండా పోయింది. భూకబ్జాలు, దౌర్జన్యాలు, కాల్‌మనీ, సెక్స్‌ రాకెట్‌.. ఆయన చేయని దందా లేదు. ఫలితంగా 2019 ఎన్నికల్లో ప్రజలు గట్టిగానే బుద్ధి చెప్పారు. ఇప్పుడు మళ్లీ ఓటర్లను మభ్యపెట్టి గెలిచేందుకు ప్రయత్నిస్తున్నారు. ఈ నేపథ్యంలో గతంలో ఆయన ఎమ్మెల్యేగా ఉన్న సమయంలో చేసిన అరాచకాలను సెంట్రల్‌ నియోజకవర్గ ప్రజలు గుర్తుచేసుకుంటున్నారు.   ► 2014–19 మధ్య బెజవాడ సెంట్రల్‌ ఎమ్మెల్యేగా ఉన్న బొండా ఉమా ఏకంగా ఓ అవినీతి సామ్రాజ్యాన్నే నిర్మించారు. నియోజకవర్గం మొత్తాన్ని కనుసైగతో శాసించారు. భూకబ్జాలు, దందాలు, దౌర్జన్యాలతో పేట్రేగిపోయారు. అధికార యంత్రాంగం కూడా ఆయన అవినీతి దందాకు వంతపాడింది. నియోజకవర్గ వ్యాప్తంగా రూ.వందల కోట్లు విలువైన భూమిని బొండా కబ్జా చేశారు. సెటిల్‌మెంట్లతోపాటు ప్రభుత్వంలో జరగాల్సిన పనులకు కూడా కప్పం వసూలు చేశారు. ప్రజల నుంచి రూ.వందల కోట్లు కొల్లగొట్టారు.   ► కాల్‌మనీ, సెక్స్‌ రాకెట్‌ వ్యవహారాల్లో బొండాపై అనేక ఆరోపణలు వచ్చాయి. కాల్‌మనీ కింగ్‌గా ఉమా పేరొందారు. ఎందరో బాధితులు బొండా కబంధ హస్తాల్లో చిక్కుకుని విలవిల్లాడారు.   ► సత్యనారాయణపురంలోని భువనేశ్వరి పీఠానికి చెందిన సీతారామ కల్యాణ మండప కబ్జాకు బొండా వర్గీయులు యతి్నంచారు.   ► న్యూ రాజరాజేశ్వరిపేటలోని అజిత్‌సింగ్‌నగర్‌ పోలీస్‌స్టేషన్‌కు ఎదురుగా ఉన్న స్వాతంత్య్ర సమరయోధులకు సంబంధించిన స్థలాన్ని ఆక్రమించేందుకు ప్రయత్నించి బొండా భంగపడ్డారు.   ► రామకృష్ణాపురం బుడమేరులో బొండా ఉమా అనుచరులు, టీడీపీ డివిజన్‌ అధ్యక్షుడు కలిసి వెంచర్‌ వేసి విక్రయించారు. స్థానిక టీడీపీ నేతలు కూడా బుడమేరు లోపలకు ఇళ్లు నిర్మించి విక్రయించారు.   ► ముత్యాలంపాడులో ఇరిగేషన్‌ స్థలాన్ని టీడీపీ నేత కుమారుడి వ్యాయామశాలకు ధారాదత్తం చేశారు.  ► అప్పటి 44వ డివిజన్‌ కార్పొరేటర్‌ రైల్వే, ప్రభుత్వ స్థలాలనూ విక్రయించారు.    ► విజయవాడ అజిత్‌సింగ్‌నగర్‌కు చెందిన రూ.30 కోట్లు భూదందాలో కూడా మాగంటి బాబు కీలక పాత్రధారి. ఈ వ్యవహారాన్ని అక్కడి ప్రజలు ఇప్పటికీ మరచిపోలేదు.   ► కండ్రిక కాలనీలో జర్నలిస్టుల ఇళ్ల పేరిట ఎమ్మెల్యే అతని అనుచరులు కార్పొరేషన్‌కు చెందిన 1,720 గజాల స్థలాన్ని ఆక్రమించి, నిర్మాణాలు చేసేందుకు ప్రయతి్నంచారు. స్థానికుల ఆందోళనతో వెనక్కి తగ్గారు.  ► పాయకాపురం బర్మాకాలనీ ప్రాంతంలో మూడు ఎకరాల వరకూ ఉన్న కాలనీ కామన్‌ సైట్‌ను తన అనుచరులతో ఆక్రమించి, వాటి కి ఇంటి పట్టాలను సృష్టించేందుకు తెగబడ్డారు. స్థానికులు అడ్డం తిరగడంతో తోకముడిచారు.  గీతాంజలి కేసులో బొండా అనుచరుడి అరెస్ట్‌   ఇటీవల తెనాలికి చెందిన వివాహిత గీతాంజలి ఆత్మహత్య కేసులో బొండా అనుచరుడు పసుమర్తి రాంబాబు అరెస్టయ్యాడు. సీఎం వైఎస్‌ జగన్‌మోహన్‌రెడ్డి పాలనను ప్రశంసించిన గీతాంజలి వీడియో సోషల్‌ మీడియాలో వైరల్‌ కావడంతో రాంబాబు ఆమెను అసభ్య పదజాలంతో దూషిస్తూ కామెంట్లు పెట్టాడు. అతడితో పాటు టీడీపీ కార్యకర్తల అనుచిత వ్యాఖ్యలకు మనస్తాపానికి గురైన గీతాంజలి ఆత్మహత్యకు పాల్పడ్డారు.   కొడుకులదీ అదే తీరు బొండా కుమారులు ఇద్దరూ దౌర్జన్యాలు చేయడంలో ఘనులే. బొండా కుమారుడు నిర్వహించిన కారు రేస్‌లో మనోరమ హోటల్‌లో పనిచేసే మేనేజర్‌ కుమారుడు మరణించాడు. అప్పట్లో ఈ విషయం సంచలనం సృష్టించింది. అధికారాన్ని అడ్డం పెట్టుకుని కుక్క అడ్డురావడంతో కారు ప్రమాదం జరిగిందని కేసును తప్పుదారి పట్టించారు.   తెనాలికి చెందిన రౌడీషిటర్‌ సుబ్బుతో బొండాకు సత్సంబంధాలున్నాయి. సుబ్బు హైదరాబాద్‌లో తుపాకీ కొనుగోలు చేస్తూ పట్టుబడి బొండా, మరికొందరి టీడీపీ నేతల పేర్లు బయటపెట్టాడు. ఆ తర్వాత విజయవాడలోని మాచవరంలో పట్టపగలే సుబ్బు దారుణ హత్యకు గురయ్యాడు. ఈ కేసులో అధికార పార్టీ నేతల పేర్లు బయటకు రాకుండా పాత కక్షల నేపథ్యంలో హత్య జరిగినట్లు కేసును తారుమారు చేశారు.   దుర్గాపురంలోని ఓ అపార్ట్‌మెంటులో క్యాన్సర్‌ బాధితురాలు మాదంశెట్టి సాయిశ్రీకి చెందిన ఫ్లాట్‌ను బొండా అనుచరులు కబ్జాకు యత్నించారు. ఆమె తన వైద్యం కోసం ఆ ఫ్లాట్‌ విక్రయానికి యత్నించగా జాలి లేకుండా బొండా అడ్డుకున్నారు. చివరకు వైద్యం అందక సాయిశ్రీ మరణించారు.  బొండా ఉమాకు మాగంటి బాబు అత్యంత సన్నిహితుడు. అప్పట్లో స్వాతంత్య్ర సమరయోధుడి భూమిని తప్పుడు పత్రాలతో రిజి ్రస్టేషన్‌ చేసుకున్న వారిలో బొండా ఉమా భార్య సుజాతతోపాటు మాగంటి బాబు కూడా ఉన్నారు. బొండా ఉమా అక్రమ దందాలన్నింటిలో మాగంటి బాబు కీలకంగా వ్యవహరించారనేది బహిరంగ రహస్యం.   అకృత్యాలెన్నున్నా  కేసులు మూడే.. బొండా ఉమా మూడు కేసుల్లో నిందితుడిగా ఉన్నారు. 2011 మార్చి1న సెక్షన్‌ 9, 9ఏఏ ఆఫ్‌ సెంట్రల్‌ ఎక్సైజ్‌ యాక్ట్‌ ప్రకారం బొండాపై కేసు నమోదైంది. కృష్ణలంక పోలీస్‌ స్టేషన్‌ పరిధిలో ఎఫ్‌ఐఆర్‌ నంబర్‌ 462/2006పై సెక్షన్‌ 143 కేసు ఉంది. విజయవాడ 2వ అదనపు చీఫ్‌ మెట్రోపాలిటన్‌ మేజిస్ట్రేట్‌ కోర్టులో సెక్షన్‌ 143 కింద కేసు ఉన్నట్టు బొండా అఫిడవిట్‌లో పేర్కొన్నారు.

సాక్షి, అమరావతి బ్యూరో: కాల్‌మనీ పాపాల పుట్ట బద్ధలవుతోంది. తవ్వేకొద్దీ అనేక అక్రమాలూ బయటపడుతున్నా యి. అధిక వడ్డీలకు రుణాలు ఇవ్వడమే కాకుండా.. తీసు కున్న అప్పు చెల్లించిన తర్వాత కూడా బాకీ ఉన్నారంటూ వీఎంసీ విశ్రాంత, ఉద్యోగులను వేధింపులకు గురిచేస్తోన్న ఉదంతాలు ఒక్కొక్కటీ  వెలుగులోకి వస్తున్నాయి. ఈ నేపథ్యంలో ఫోర్జరీ సంతకాలు, ప్రామిసరీ నోట్లతో ఇతరుల పేరిట దావాలు వేసి మరీ డబ్బులు వసూలు చేస్తున్న ముఠా సభ్యుల ఆగడాలకు పోలీసులు బ్రేక్‌ వేశారు. బాధితుల నుంచి వివరాలు సేకరించి కాల్‌మనీ ముఠా సభ్యులను అదుపులోకి తీసుకుని విచారిస్తున్నారు. తమ చేతికి మట్టి అంటకుండా కాల్‌మనీ వ్యాపారులు ఇతరుల పేరిట కోర్టులో దావాలు వేసిన వైనంపై పూర్తిస్థాయిలో దర్యాప్తు చేస్తున్నారు. కోర్టులో దాఖలైన ప్రామిసరీ నోట్లను ఎవరు ఇచ్చారు? వారికి బాధితులకు ఉన్న సంబంధం ఏమిటి? అన్న వివరాలపై కూపీ లాగనున్నారు.  విజయవాడ నగర పాలక సంస్థ (వీఎంసీ) ఉద్యోగులను వేధింపులకు గురిచేస్తోన్న కాల్‌మనీ ముఠా సభ్యుల ఆగడాలపై నగర పోలీసు కమిషనర్‌ దృష్టి సారించారు.  రంగంలోకి దిగిన నగర పోలీసులు కాల్‌మనీ ముఠా సభ్యులైన పాపారావు, శీరం వెంకటేశ్వరావు(పెదబాబు)లను అదుపులోకి తీసుకు ని విచారిస్తున్నారు. అదే సమయంలో బాధితుల నుంచి వాగ్మూలం సేకరించారు. తమ సంతకాలు ఫోర్జరీ చేసి.. అప్పు ఉన్నట్లు కోర్టుల్లో దావాలు వేశారని బాధితులు పోలీసుల వద్ద వాపోయినట్లు సమాచారం. దీంతో అప్పు చెల్లించినా మళ్లీ డబ్బులు బాకీ ఉన్నారంటూ కోర్టు నుంచి దావాలు వేసిన వారిని పోలీసుస్టేషన్‌కు పిలిపించి విచారిస్తున్నారు. కాల్‌మనీ వ్యాపారి పాపారావు, కోర్టులో దావా వేసిన వారు చెబుతున్న అంశాల్లో పొంతన లేదని సమాచారం. అమాయకుల నుంచి అధిక మొత్తంలో డబ్బులు రాబట్టే యత్నంలోనే ఈ కుట్రకు కాల్‌మనీ వ్యాపారులు తెరలేపారని పోలీసులు భావిస్తున్నారు. కోర్టు సెలవులు ముగియగానే ప్రామిసరీ నోట్ల వ్యవహారం ఓ కొలిక్కి వస్తుందని ఓ పోలీసు ఉన్నతాధికారి చెబుతున్నారు.   కేసు నుంచి తప్పించుకునేందుకు బేరాలు?  వీఎంసీ విశ్రాంత ఉద్యోగులను వేధింపులకు గురిచేయడమే కాకుండా.. వారి అకౌంట్లను అక్రమంగా సీజ్‌ చేయించిన కాల్‌మనీ వ్యాపారి పాపారావు గత ఏడేళ్లలోనే కోట్లకు పడగలెత్తినట్లు తెలుస్తోంది. ఇదే కాల్‌మనీ వ్యాపార నేరం కింద గతంలో ఇతనిపై పోలీసులు 8 కేసులు నమోదు చేశారు.  అప్పట్లో కొంత కాలం వ్యాపారాలు మానేసినట్లు నటించిన పాపారావు ఆ తర్వాత మళ్లీ పాతబాటే పట్టారు. రాష్ట్ర విభజన నేపథ్యంలో అప్పట్లో రాజధానిపై పలు ఊహాగానాలు వెల్లడైన సమయంలో ఇతను నూజివీడు, అమరావతి పరిధిలో సుమారు 50 ఎకరాల వరకు భూములు కొనుగోలు చేసినట్లు సమాచారం.అలాగే వడ్లమానులో 3.5 ఎకరాలను ల్యాండ్‌పూలింగ్‌లో తీసుకోగా.. అందుకు గాను వారికి 3,500 గజాల స్థలం రాగా.. అందులో 500 గజాల స్థలాన్ని ఇస్తానంటూ ఓ పోలీసు అధికారితో బేరసారాలు అడుతున్నట్లు సన్నిహితులు పేర్కొనడం చర్చనీయాంశమైంది.   డాక్యుమెంట్లపై విచారణ చేస్తున్నాం..  కాల్‌మనీ ముఠా ఆగడాలపై పూర్తిస్థాయిలో దర్యాప్తు చేపట్టాం. ఇప్పటికే బాధితుల నుంచి వివరాలు సేకరించాం. బాధితుల ప్రమేయం లేకుండా వారి సంతకాలను ఫోర్జరీ చేసి కోర్టులో దాఖలు చేసిన డాక్యుమెంట్లపై విచారణ చేస్తున్నాం. అప్పు ఇచ్చిన వారు కాకుండా ఇతరులు ఎలా కోర్టులను ఆశ్రయించారనే దానిపైనా దర్యాప్తు చేస్తున్నాం.   –విక్రాంత్‌ పాటిల్, డీసీపీ–2, విజయవాడ నగరం 

సాక్షి, తాడేపల్లిరూరల్‌ (మంగళగిరి): టీడీపీ నాయకుడు మీడియా ముసుగులో ‘కాల్‌మనీ గురించి విచారణ చేస్తే పీక కోస్తా’ అంటూ ఓ విలేకరిని బెదిరించాడు. దీనిపై బాధిత విలేకరి తాడేపల్లి పోలీస్‌స్టేషన్‌లో బుధవారం ఫిర్యాదు చేశాడు. వివరాలు... ఉండవల్లిలో అనుమతులు లేకుండా వడ్డీ వ్యాపారం చెయ్యడం, నూటికి వారానికి పది నుంచి పదిహేను రూపాయల  వసూలు చేస్తున్నారని సమాచారం రావడంతో ఓ టీవీ చానల్‌ విలేకరి సాయి సందీప్‌ వివరాలు సేకరించేందుకు ప్రయత్నించాడు. దీంతో టీడీపీ ఉండవల్లి అధ్యక్షుడు గాదె శ్రీనివాసరావు చెప్పడానికి వీల్లేని విధంగా ఫోన్‌చేసి బూతులు తిట్టాడు. ‘కాల్‌మనీ వ్యాపారం చేస్తాను.  చేసేవాళ్లకు కూడా అండగా ఉంటాను. అయితే ఏంటి? నువ్వు జోక్యం చేసుకుంటే  అర్ధరూపాయి బ్లేడ్‌తో పీకకోస్తా ’ అంటూ బెదిరించడంతో బాధితుడు సందీప్‌ పోలీసులకు ఫిర్యాదు చేశాడు. మరో కేసులో కాల్‌మనీ వ్యాపారుల అరెస్టు  తాడేపల్లి పట్టణ పరిధిలో, విజయవాడలో కాల్‌మనీ వ్యాపారం నిర్వహిస్తున్న ఇద్దరు మహిళలతో పాటు మరో ఇద్దరిని తాడేపల్లి పోలీసులు బుధవారం అరెస్టు చేశారు. పోలీసుల కథనం మేరకు.. నులకపేటకు చెందిన అర్చకుడు కృష్ణతేజ విజయవాడ ఒన్‌టౌన్‌కు చెందిన అన్నదమ్ములు దుక్కా వేణు, దుక్కా శ్రీను వద్ద రూ.2 లక్షలకు చిట్టీ వేసి ముందుగానే పాడుకున్నాడు. డబ్బులు చెల్లించకపోవడంతో అన్నదమ్ములు ఇద్దరూ రూ.5లక్షలు చెల్లించాలని కృష్ణతేజపై ఒత్తిడి తెచ్చి బలవంతంగా ఖాళీచెక్కులు, ప్రామిసరీ నోటులు తీసుకున్నారు. వారి బాకీ తీర్చేందుకు నులకపేటకు చెందిన ఝాన్సీ దగ్గర కృష్ణతేజ రూ.75 వేలు, విజయవాడ ఒన్‌టౌన్‌కు చెందిన లక్ష్మి వద్ద కూడా అప్పుచేశారు. ఝాన్సీ, లక్ష్మి కూడా కృష్ణతేజ వద్ద ఖాళీ ప్రామిసరీ నోట్లు, ఖాళీ చెక్‌లు తీసుకుని చెరో రూ.5 లక్షలు చెల్లించాలని బెదిరించడంతో పోలీసులను ఆశ్రయించాడు. ఈ కేసుకు సంబంధించి నలుగురు వడ్డీ వ్యాపారుల నుంచి ఆరు ఖాళీ ప్రామిసరీ నోట్లు, మరో నాలుగు ఖాళీ చెక్కులను పోలీసులు స్వాధీనం చేసుకుని, వారిని కోర్టుకు హాజరు పరిచినట్లు తాడేపల్లి పోలీసులు తెలిపారు. (చదవండి: పేద మహిళలను లక్షాధికారులను చేశారు)

 సాక్షి, అమరావతిబ్యూరో/పటమట: విజయవాడ కొత్తపేట జోడు బొమ్మల సెంటర్‌కు చెందిన బవిడిశెట్టి రాము వీఎంసీలో ఓ చిరు ఉద్యోగి. పెదబాబు అనే వడ్డీ వ్యాపారి దగ్గర రూ. 50 వేలు అప్పు తీసుకున్నాడు. సకాలంలో చెల్లించకపోవడంతో పెదబాబు కోర్టు ద్వారా అతని పింఛన్‌ నుంచి నెలనెలా కొంత సొమ్ము జమ చేసుకుంటున్నాడు. అదే సమయంలో రాము వన్‌టౌన్‌కు చెందిన రాంప్లి పాపారావు వద్ద కూడా రూ.2 లక్షలు అప్పు తీసుకుని చెల్లించేశాడు. అయితే అతను పాపారావుకు ఇచ్చిన ప్రామిసరీ నోట్లు వెనక్కు తీసుకోలేదు. ఇప్పుడా ప్రామిసరీ నోట్ల ఆధారంగా పాపారావు కోర్టుకు వెళ్లి రూ.7 లక్షలకు దావా వేశాడు. పాపారావు వేధింపులు భరించలేక బవిడిశెట్టి రాము ఇటీవల మృతి చెందాడు. అయినా అప్పు చెల్లించాలంటూ అతని కుటుంబ సభ్యులను కాల్‌మనీ గ్యాంగ్‌ వేధిస్తోంది. విజయవాడ మున్సిపల్‌ కార్పొరేషన్‌ (వీఎంసీ)లో శానిటరీ విభాగంలో పనిచేస్తున్న సుమారు 450 మంది చిరు ఉద్యోగులు అప్పుల ఊబిలో చిక్కుకుని విలవిల్లాడుతున్నారు. కాల్‌మనీ వ్యాపారులు రాబందుల్లా మారి ఉద్యోగులను పీక్కుతింటున్నారు. అవసరాల నిమిత్తం కాల్‌మనీ వ్యాపారుల వద్ద రూ.వేలల్లో అప్పు తీసుకున్న పాపానికి రూ.లక్షల్లో డబ్బులు చెల్లించినప్పటికీ వారి అప్పు తీరడం లేదు. పైగా రూ.లక్షల్లో అప్పు ఉన్నాడంటూ లీగల్‌ నోటీసులు రావడం.. పింఛన్లు, రిటైర్‌ బెనిఫిట్లు అటాచ్‌మెంట్‌కు గురవతుండటంతో వీఎంసీ ఉద్యోగుల్లో దిక్కుతోచని స్థితి నెలకొంది. మరికొందరు ఉద్యోగులకైతే ముక్కు మొహం తెలియని వారి నుంచి లీగల్‌ నోటీసులు రావడం గమనార్హం. కాల్‌మనీ వ్యాపారులు తెరవెనుక ఉండి ఇతరుల పేరిట లీగల్‌ నోటీసులు పంపుతూ వసూళ్లకు తెగబడుతున్నట్లు తెలుస్తోంది. ఈ తతంగమంతా వీఎంసీ అడ్డాగా జరుగుతోన్న ఉన్నతాధికారులు పట్టించుకోవడం లేదని బాధితులు వాపోతున్నారు. ఇటీవల మరణించిన శానిటరీ ఇన్‌స్పెక్టర్‌ ముక్కంటి కూడా కాల్‌మనీ వ్యాపారుల వేధింపులకు గురైనట్లు సమాచారం. వీఎంసీలో కీలక స్థానంలో పనిచేసి ఉద్యోగ విరమణ పొందిన ఓ ఉద్యోగి కాల్‌మనీ వ్యాపారులు కలిసి ఈ దందాను కొనేళ్లుగా సాగిస్తున్నట్లు సమాచారం. అతనికి చెందిన రూ.20 లక్షలకు పైగా డబ్బును కాల్‌మనీ వ్యాపారులు వడ్డీకి తిప్పుతున్నట్లు వీఎంసీ ఉద్యోగులు చెబుతున్నారు. ఉద్యోగులెవరైనా తీసుకున్న అప్పు చెల్లించకపోతే వారికి బ్యాంకు ద్వారా రుణం ఇప్పించే పనిని సైతం అప్పట్లో ఆ ఉద్యోగి చేసేవాడని.. ఇందుకు అకౌంట్స్‌ విభాగంలోని కొందరు సహకారం ఉన్నట్లు తెలుస్తోంది.   భర్త అప్పును భార్య చెల్లించినా..   బండి చిన్న నూకమ్మ వీఎంసీలో శానిటరీ విభాగంలో పనిచేస్తూ ఈ ఏడాది జూన్‌లో రిటైరైంది. ఈమె భర్త వడ్డాది నాగరాజు ఆర్టీసీలో పనిచేస్తూ 2017లో చనిపోయాడు. ఇతను రాంపల్లి పాపారావు వద్ద రూ.2 లక్షలు అప్పు తీసుకున్నాడు. భర్త చెల్లించాల్సిన అప్పునకు గానూ పాపారావుకు నూకమ్మ ప్రామిసరీ నోటు రాసి ఇచ్చింది. ఆ తర్వాత వడ్డీతో సహా అప్పు చెల్లించేసింది. ఆ సమయంలో పాపారావు నుంచి తాను రాసిచ్చిన ప్రామిసరీ నోటు తీసుకోవడం మరిచింది. ఇప్పుడదే ఆమెకు శాపంగా మారింది. ఇటీవల ఆమెకు కోర్టు నుంచి రెండు లీగల్‌ నోటీసులు వచ్చాయి. అందులో ఒకటి రూ.7 లక్షలు చెల్లించాలంటూ మంగళగిరికి చెందిన పలతోటి మరియరాజు నుంచి కాగా.. మరొకటి గుణదలకు చెందిన జాదు రాజేశ్వరి అనే మహిళ నుంచి రూ.లక్షలు అప్పు చెల్లించాలని ఉంది. దీంతో ఆమెకు రావాల్సిన రిటైర్మెంట్‌  బెనిఫిట్స్, పింఛను నిలిచిపోయింది. కాల్‌మనీ వ్యాపారుల వేధింపుల కారణంగా ఆమె అనారోగ్యంతో మంచం పట్టింది. మందులకు కూడా బ్యాంకు నుంచి డబ్బు తీసుకోలేని దుస్థితిలో ఉంది. 

సాక్షి, అమరావతి: ముఖ్యమంత్రి వైఎస్‌ జగన్‌మోహన్‌రెడ్డి ఆదేశాలతో ఆన్‌లైన్ కాల్ మనీ వ్యవహారాలపై పోలీస్‌శాఖ ప్రత్యేక దృష్టి సారించింది. యాప్‌ల ద్వారా అధిక వడ్డీలకు రుణాలు ఇచ్చిన వారిపై ఉక్కుపాదం మోపాలని జిల్లా ఎస్పీలకు, సీఐడీ, సైబర్ క్రైమ్ విభాగానికి డీజీపీ గౌతమ్ సవాంగ్ ఆదేశాలు జారీ చేశారు. కాల్‌ మనీ వేధింపులకు పాల్పడితే ఉపేక్షించమని డీజీపీ హెచ్చరించారు. ఆన్‌లైన్ కాల్‌మనీ బాధితులకు పోలీస్‌శాఖ అండగా ఉంటుందని పేర్కొన్నారు. చట్టబద్ధత లేని యాప్‌ల ద్వారా రుణాలు స్వీకరించొద్దని సూచించారు. వేధింపులకు పాల్పడే యాప్‌లపై డయల్ 100, 112లకు ఫిర్యాదు చేయాలని డీజీపీ గౌతం సవాంగ్‌ తెలిపారు. 

సాక్షి, అమరావతి: ఆన్‌లైన్‌ కాల్‌ మనీ వ్యవహారాలపై దృష్టి పెట్టాలని ముఖ్యమంత్రి వైఎస్‌ జగన్‌మోహన్‌రెడ్డి ఆదేశించారు. ఆన్‌లైన్ కాల్ మనీ వేధింపులపై కఠిన చర్యలు తీసుకోవాలని తెలిపారు. చట్టవ్యతిరేక కార్యకలాపాలు చేస్తున్న వారిపై కఠిన చర్యలు తీసుకోవాలన్నారు. కాల్‌ మనీ వ్యవహారాలను ఉపేక్షించేది లేదని సీఎం వైఎస్‌ జగన్‌ స్పష్టం చేశారు. (చదవండి: ‘పల్లెల్లోకి వైద్యులు.. సరికొత్త వ్యవస్థ’) ఏపీవ్యాప్తంగా స్పెషల్‌ డ్రైవ్‌లు:డీజీపీ మొబైల్‌ లోన్ యాప్‌లపై ఏపీ వ్యాప్తంగా స్పెషల్ డ్రైవ్‌లు చేపడుతున్నట్లు డీజీపీ గౌతం సవాంగ్‌ తెలిపారు. మైక్రో ఫైనాన్స్‌పై ప్రత్యేక దృష్టి పెడుతున్నామని పేర్కొన్నారు. మొబైల్‌ లోన్ యాప్‌లు మహిళల్నే ఎక్కువగా టార్గెట్ చేస్తున్నాయని వెల్లడించారు. మొబైల్‌ లోన్ యాప్‌లపై కఠిన చర్యలు తీసుకుంటామని డీజీపీ తెలిపారు.(చదవండి: లోన్‌యాప్స్‌ కేసులో ఆసక్తికర విషయాలు)

సాక్షి తాడేపల్లి : కాల్‌మనీ వేధింపులు తట్టుకోలేక బకింగ్‌హామ్‌కెనాల్‌లో దూకి ఆత్మహత్య చేసుకున్న వేములపూడి ప్రేమ్‌ కుమార్‌ (30) మృతదేహం మంగళవారం తెనాలి మండలం కొలకలూరు రైల్వే బ్రిడ్జి వద్ద లభించింది. విజయవాడ పటమటలో నివసించే ప్రేమ్‌ కుమార్‌ గుంటూరు జిల్లా సీతానగరం సమీపంలోని కొండవీటివాగు హెడ్‌స్లూయిస్‌ వద్ద డిసెంబర్‌ 28న బకింగ్‌హామ్‌ కెనాల్‌లో దూకి ఆత్మహత్య చేసుకున్నాడు. అతని ఆచూకీ కోసం గాలిస్తున్న ఎన్డీఆర్‌ఎఫ్‌ సిబ్బంది మంగళవారం కొలకలూరు రైల్వే బ్రిడ్జి సమీపంలోని ముళ్ల పొదల్లో మృతదేహాన్ని గుర్తించి వెలికితీశారు. అనంతరం తాడేపల్లి తహసీల్దార్‌ శ్రీనివాసులురెడ్డికి సమాచారం ఇవ్వడంతో ఆయన విజయవాడలోని ప్రేమ్‌కుమార్‌ భార్య దిశిదాకృష్ణ, బంధువులకు సమాచారం ఇచ్చారు. కేసు నమోదు చేసిన పటమట పోలీసులు సంఘటనా స్థలానికి చేరుకుని మృతదేహాన్ని పోస్టుమార్టం నిమిత్తం విజయవాడ తరలించారు.  వడ్డీ వ్యాపారి బతకనివ్వట్లేదు!  ‘పండూ.. వాడు పోలీసుల్ని కూడా కొనేశాడు. మనకిక న్యాయం జరగదు. బతకాలని ఉన్నా.. బతకనివ్వట్లేదు. అందుకే ఈ నిర్ణయం తీసుకున్నా. నన్ను క్షమించు..’ అంటూ ఓ యువకుడు తన భార్యకు సెల్ఫీ వీడియో పంపించి బకింగ్‌హామ్‌ కెనాల్‌లో దూకిన ఘటన విజయవాడలో కలకలం రేపిన విషయం తెలిసిందే. వివరాల్లోకి వెళితే.. విజయవాడలోని పటమటకు చెందిన ప్రేమ్‌కుమార్, అతని సోదరి జ్యోతి కలిసి ఇద్దరి ఇళ్లను అదే ప్రాంతానికి చెందిన కాసుల వెంకట రంగారావు అనే వడ్డీ వ్యాపారి వద్ద తనఖా పెట్టి 2017వ సంవత్సరంలో రూ.6 లక్షలు అప్పుగా తీసుకున్నారు. మొదట్లో రూ.3 వడ్డీ అని చెప్పిన రంగారావు.. ఆ తర్వాత వడ్డీ రేటును రూ.10కి పెంచాడు.  చదవండి: ప్రాణం తీసిన కాల్‌మనీ వ్యవహారం ప్రేమ్‌ కుమార్, జ్యోతి వడ్డీ మొత్తంతోపాటు అసలు మొత్తంలో రూ.5 లక్షలు చెల్లించేశారు. చివరకు రూ.లక్ష అప్పు ఉండగా.. దానిని కూడా త్వరలో చెల్లిస్తామని, ఈలోపు తమ ఇళ్లకు సంబంధించిన పత్రాలు తిరిగివ్వాలని రంగారావును కోరగా.. ఇంకా రూ.16 లక్షలు బకాయి ఉన్నారని, ఆ మొత్తం చెల్లిస్తేనే పత్రాలిస్తానని బెదిరింపులకు పాల్పడ్డాడు. ఇదే విషయాన్ని ప్రేమ్‌కుమార్‌ ఈ నెల 16న స్పందన కార్యక్రమంలో నగర పోలీసు కమిషనర్‌కు ఫిర్యాదు చేశాడు. స్పందించిన సీపీ ద్వారకా తిరుమలరావు ఆ ఫిర్యాదు పరిష్కరించాలని పటమట పోలీసులకు ఆదేశాలిచ్చారు.  ఫలితం లేకపోవడంతో ప్రేమ్‌కుమార్‌ 23వ తేదీన మరోసారి స్పందనలో సీపీకి ఫిర్యాదు చేశాడు. ఆ తర్వాత వడ్డీ వ్యాపారి ప్రేమ్‌కుమార్‌పై కిరాయి గుండాలతో దాడి చేయించాడు. ఈ విషయాన్ని కూడా స్థానిక పోలీసులకు చెప్పినా పట్టించుకోవట్లేదని ప్రేమ్‌కుమార్‌ కుటుంబ సభ్యులతో చెప్పాడు. ఇక ఎక్కడికి వెళ్లినా తనకు న్యాయం జరగదని ఆవేదన చెందిన అతడు ఈనెల 28న సాయంత్రం తన భార్యకు సెల్ఫీ వీడియో పంపించి బకింగ్‌హామ్‌ కెనాల్‌లో దూకేశాడు.  చదవండి: కాల్‌మనీ.. ఇదో దారుణ కహానీ!

టీడీపీ పెద్దల పేరు చెప్పి కృష్ణాజిల్లాలో ఓ బడా వడ్డీ వ్యాపారి అరాచకం (సాక్షి ప్రత్యేక ప్రతినిధి) ‘‘అసలు ఏమనుకుంటున్నావ్‌ మా గురించి.. మా వెనకాల ఎవరెవరు ఉన్నారో, మా పరపతి ఏంటో తెలుసుగా.. వాళ్లతో ఉన్న ఫొటోలు పంపాను.. చూశావుగా? ఇంతకూ ఆ డబ్బులు ఎవరివో నీకు అర్థమవుతోందా.. పెద్దవాళ్లకు ఒక్కసారి చెబితే మీ కుటుంబమంతా మటాష్‌ అయిపోతుంది.. మీ ఇంట్లోని ఆడవాళ్లు కటకటాల వెనకుంటారు. పిల్లల భవిష్యత్తు నాశనమవుతుంది. అందుకే నోర్మూసుకుని చెప్పింది చేయ్‌.. అడిగింది ఇచ్చేయ్‌’’..   .. ఇది బరితెగించిన ఓ బడా ‘కాల్‌’నాగు బాగోతం. ‘పచ్చ’కావరంతో పెచ్చుమీరిన దౌర్జన్యానికి పరాకాష్ట ఇది. అధికారం అండతో.. పెద్ద మనుషుల ముసుగులో జలగలా పీక్కుతింటున్న అప్పులోడి అరాచకం ఇది. ఇలా.. హద్దులు మీరి కొనసాగుతున్న హెచ్చరికలకు బెంబేలెత్తిపోయిన విజయవాడకు చెందిన ఓ రియల్టర్‌ తమ కుటుంబానికి ప్రాణరక్షణ కల్పించాలని ఇటీవల ‘స్పందన’లో వేడుకున్నారు. ఈ దారుణమైన కాల్‌మనీ కహానీ వివరాలు ఏంటంటే.. కృష్ణాజిల్లా గుడివాడకు చెందిన వడ్డీ వ్యాపారి వర్లేపల్లి సీతారామమోహనరావు నుంచి భవన నిర్మాణం నిమిత్తం విజయవాడకు చెందిన రియల్టరు యార్లగడ్డ రవికిరణ్‌ కుటుంబం రూ.1.25 కోట్లను 2010 ఏప్రిల్‌లో అప్పుగా తీసుకుంది.  చదవండి: ప్రాణం తీసిన కాల్‌మనీ వ్యవహారం ఇందుకుగాను సెక్యూరిటీ కింద కోల్‌కత–చెన్నై జాతీయ రహదారి–16ని ఆనుకుని గుంటూరు జిల్లా తాడేపల్లి మండలం కుంచనపల్లి గ్రామ పరిధిలోని 81/2, 81/5, 81/7 సర్వే నెంబర్లలో ఉన్న ఏడు ఎకరాల స్థిరాస్తిని వడ్డీ వ్యాపారి తన భార్య అయిన లక్ష్మి, అమెరికాలో ఉంటున్న కుమారుడు శశికాంత్‌ వర్లేపల్లి, బంధువుల పేరిట జీపీఏ కమ్‌ సేల్‌ అగ్రిమెంట్‌ను ఏడు డాక్యుమెంట్లుగా చేయించుకున్నారు. దాంతోపాటు ఖాళీ చెక్కులు, ప్రామిసరీ నోట్లు, నాన్‌ జ్యుడీషియల్‌ స్టాంప్‌ పేపర్, లెడ్జర్‌పై సంతకాలు, బ్యాలెన్స్‌ అమౌంట్‌ రిసిప్ట్‌లు కూడా ముందుగానే తీసుకున్నారు. 2012 నుంచి 2014 మధ్య కాలంలో అసలుతోపాటు వందకు రూ.20 చొప్పన వడ్డీ చెల్లించడంతో అగ్రిమెంట్ల క్యాన్సిలేషన్‌ డీడ్స్‌ చేశారని.. కానీ,  రిజిస్ట్రేషన్లు క్యాన్సిల్‌ చేయకుండా రేపు, మాపు అంటూ కాలయాపన చేస్తున్నారని రవికిరణ్‌ ఫిర్యాదులో పేర్కొన్నారు.  2014లో చంద్రబాబు సీఎం అయ్యాక..  ముఖ్యమంత్రిగా చంద్రబాబు 2014లో బాధ్యతలు చేపట్టాక కుంచనపల్లి వద్ద ఎన్‌హెచ్‌–16ను ఆనుకుని ఉన్న ఏడు ఎకరాలను డెవలప్‌మెంట్‌ కింద సినీనటుడు, నాటి తెలుగుదేశం ఎంపీ మురళీమోహన్‌కు చెందిన జయభేరి ప్రాపర్టీస్‌.. భూ యజమాని రవికిరణ్‌కు చెందిన బెస్ట్‌ ఫారŠూచ్యన్‌ సంస్థ మధ్య చర్చలు జరిగాయి. తన వ్యాపార ఒప్పందం కోసం అగ్రిమెంట్ల రిజిస్ట్రేషన్లను క్యాన్సిల్‌ చేయాలని వడ్డీ వ్యాపారిని రవికిరణ్‌ కోరగా.. తాను రూ.1.25 కోట్లు అప్పు ఇచ్చినందునే జయభేరి సంస్థతో ఒప్పంద అవకాశం వచ్చిందని, తనకూ వడ్డీతో పాటు మరింత లాభం చేకూర్చితేనే రిజిస్ట్రేషన్‌ క్యాన్సిల్‌తో పాటు ఖాళీ చెక్కులు, ప్రామిసరీ నోట్లు, నాన్‌ జ్యుడీషియల్‌ స్టాంప్‌ పేపర్లు, బ్యాలెన్స్‌ అమౌంట్‌ రిసిప్ట్‌లు తిరిగి ఇచ్చేస్తానంటూ సీతారామమోహన్‌రావు అడ్డం తిరిగారు.  అదే సమయంలో చంద్రబాబు, లోకేశ్‌లతో తమకున్న అనుబంధాన్ని గుర్తుచేస్తూ భారత్, అమెరికాలో వారి ఆర్థిక లావాదేవీలు చూస్తున్నందున తమనెవరూ ఏమీ చేయలేరని హెచ్చరించారు. అంతటితో ఆగక.. తాము తలచుకుంటే డెవలప్‌మెంట్‌ ఒప్పందం జరగకుండా కూడా అడ్డుకోగలమని హెచ్చరించారని రవికిరణ్‌ తన ఫిర్యాదులో పేర్కొన్నారు. దీంతో చేసేదేంలేక ఒక్క రూపాయి పెట్టుబడి లేకుండానే బెస్ట్‌ ఫారూచ్యన్‌లో మూడు శాతం వాటా ఇచ్చామని.. ఆ తరువాతే జయభేరి ప్రాపర్టీస్‌తో ఒప్పందం కుదిరిందని రవికిరణ్‌ అందులో వివరించారు.   చదవండి: బాబుకే అప్పు ఇచ్చాం.. నన్ను ఏం చేయలేరు మొత్తం వాటా  ఇవ్వాలని ఒత్తిడి  ఒప్పందం ప్రకారం ఏడు ఎకరాలలో 9.30 లక్షల చదరపు అడుగుల నిర్మాణం జరగాలి. అందులో 40 శాతం కింద భూ యజమానికి 3.60 లక్షల చ.అ వస్తుంది. ఇందులో బెస్ట్‌ ఫారŠూచ్యన్‌ కంపెనీ వాటా 1.30 లక్షల చ.అ. ఒక చ.అ ధర రూ.5,500 చొప్పున ఈ కంపెనీకి రూ.71.50 కోట్లు సమకూరుతుంది. తనకు రాసిచ్చిన మూడు శాతం కాకుండా బెస్ట్‌ ఫారŠూచ్యన్‌ వాటా మొత్తం తనకే ఇవ్వాలని సీతారామమోహన్‌రావు గత సర్కారు పెద్దల అండతో బెదిరింపులకు పాల్పడుతున్నారని రవికిరణ్‌ ఆరోపించారు.  అంతేకాదు.. శశికాంత్‌కు చంద్రబాబు, లోకేశ్‌లతో సన్నిహిత సంబంధాలు ఉన్నాయని తెలియజెప్పేందుకు వారిద్దరితో శశికాంత్‌ ఉన్న ఫొటోలను తరచూ పంపేవారని తెలిపారు. అలాగే, భారత్, అమెరికాలో తాము వడ్డీలకు తిప్పుతున్న దాంట్లో ఎక్కువ మొత్తం లోకేశ్‌కు చెందినదేనని చెప్పేవారని రవికిరణ్‌ తన ఫిర్యాదులో పేర్కొనడం గమనార్హం. అప్పటి డీజీపీ ఠాకూర్‌తో పలు దఫాలు ఫోన్‌లో మాట్లాడించారని కూడా తెలిపారు. మరోవైపు.. తనకన్నా ముందు గోదావరి జిల్లాకు చెందిన విద్యా సంస్థల యాజమాని అయిన మాజీ ఎమ్మెల్సీ.. ప్రముఖ దర్శకుడు, విజయవాడకు చెందిన మరో ఇద్దరు రియల్టర్లు, గుడివాడలోని ఇంజనీరింగ్‌ కాలేజీ యజమానితో పాటు పలువురు తనలాగే మోసపోయారన్నారు.    పోలీసు ఉన్నతాధికారుల తీరెలా ఉందంటే..  ఈనెల 16న సీఎం కార్యాలయం వద్ద స్పందనలో రవికిరణ్‌ ఫిర్యాదు చేయగా విజయవాడ సీపీకి రిఫర్‌ చేశారు.  20న పటమట పోలీసుల నుంచి రవికిరణ్‌కు ఫోన్‌ వచ్చింది. ఆరో టౌన్‌ స్టేషన్‌కు బదిలీ అయింది. ఆ తరువాత స్పందన లేదు.  23న తాము ఇచ్చిన ఫిర్యాదుపై పోలీసుల చర్యలేదని డీజీపీ గౌతమ్‌ సవాంగ్‌ దృష్టికి ఫిర్యాదిదారు తీసుకెళ్లారు. పరిశీలించాలని ఏఐజి రాజశేఖర్‌కు సూచనలు వెళ్లాయి. ఫిర్యాదు విచారణకు అర్హమైనదిగా నిర్ధారించారు. 26న గుంటూరు అర్బన్‌ ఎస్పీ రామకృష్ణకు ఫిర్యాదును పంపి విచారించాలని డీజీపీ గౌతం సవాంగ్‌ ఆదేశించారు.  తనపై రవికిరణ్‌ ఫిర్యాదు చేశారని తెలుసుకున్న సీతారామమోహన్‌రావు.. విజయవాడ సీపీ ద్వారకా తిరుమలరావును కలిసి ఫిర్యాదు చేశారు. దీనిపై పరిశీలించాలని టాస్క్‌ఫోర్స్‌ ఏసీపీ వీఎస్‌ఎన్‌ వర్మకు ఆదేశాలు వెళ్లాయి.   కాగా, ఈ ఫిర్యాదు విషయంలో చూసీచూడనట్లు వెళ్లాలని తెలుగుదేశం పార్టీకి చెందిన పెద్దలు కొందరు రంగంలోకి దిగి పోలీసు ఉన్నతాధికారులతో మాట్లాడుతున్నట్లు సమాచారం. ఫిర్యాదులో పార్టీ పెద్దల పేర్లు కూడా ఉన్నందున తాము ఏదోలా సర్దుబాటు చేసుకుంటామని అంటున్నట్లు తెలియవచ్చింది. ఈ విషయమై డీజీపీ గౌతమ్‌ సవాంగ్‌ వద్ద ‘సాక్షి’ ప్రస్తావించగా.. అన్ని కోణాల్లో క్షుణ్ణంగా పరిశీలించాలని ఆదేశించామన్నారు. ఇదే విషయమై విజయవాడ సీపీ ద్వారకా తిరుమలరావును అడగ్గా తనకు ఫిర్యాదు అందిందని, వాస్తవాలను తెలుసుకుంటామన్నారు.  

సాక్షి, తిరుపతి : పాకాలలోని ఓ టీడీపీ నేత కాల్‌మనీ తరహా వేధింపులకు పాల్పడుతున్నాడు. కొన్నేళ్లుగా పాకాల మండల కేంద్రంగా ఈ తంతు సాగుతోంది. ఈ వేధింపులకు తాళలేక బాధితులు న్యాయం కోసం పోలీసులను ఆశ్రయించినా పట్టించుకోకపోవడంతో ఆందోళనకు దిగుతున్నారు.  అసలేం జరిగిందంటే పాకాల కమ్మవీధికి చెందిన గోవర్దన్‌బాబు నాయుడు అలియాస్‌ గోపీనాయుడు కొన్నేళ్లుగా వడ్డీ వ్యాపారం చేస్తున్నాడు. బాధితుల నుంచి బాండు, ఖాళీ చెక్కులు తీసుకుంటున్నాడు. వడ్డీ, తీసుకున్న సొమ్ము తిరిగి చెల్లించినా బాధితులకు అతడు బాండు, చెక్కు తిరిగి ఇవ్వడం లేదు. ఇదేమని అడిగితే వేధింపులకు దిగుతున్నాడు. ఆపై తిరిగి సొమ్ము వసూలు చేయడం తంతుగా పెట్టుకుంటున్నాడు. నలుగురు కలిసి నిలదీస్తే మా నాన్న చంద్రబాబు నాయుడికే అప్పు ఇచ్చాడురా..! నేను టీడీపీ వాడ్ని ఎవ్వరూ ఏమీ చేయలేరు.. అంటూ దౌర్జన్యాలకు పాల్పడుతున్నాడు. డబ్బులిచ్చి పోలీసులను కూడా కొనేస్తానని బెదిరింపులకు పాల్పడుతున్నట్లు బాధితులు వాపోతున్నారు. మహిళలకు సైతం అప్పులు ఇవ్వడం, ఇచ్చిన అప్పు తీర్చినా తన కోరిక తీర్చాలని వేధించడం రివాజుగా మారిందని పలువురు ఆరోపించారు. అరాచకాలు అరికట్టండి అప్పు పేరుతో అమాయకులపై దౌర్జన్యానికి పాల్పడుతూ మోసం చేస్తున్న గోవర్దన్‌బాబు నాయుడి అరాచకాలను అరికట్టాలని పూతపట్టు మండలం, ముత్తురేవుల గ్రామానికి చెందిన లోకేష్‌ డిమాండ్‌ చేశారు. సోమవారం తిరుపతి ప్రెస్‌క్లబ్‌లో ఆయన మాట్లాడారు. తన వ్యాపారం నిమిత్తం గోవర్దన్‌బాబు నాయుడు వద్ద రూ.70 వేలు అప్పుగా తీసుకున్నాని, ఇందుకు తన వద్ద రూ.70 వేలకు బాండు, ఖాళీ చెక్‌ తీసుకున్నాడని తెలిపారు. 2017 నవంబర్‌ 15న రూ.17,200 అతని ఆంధ్రాబ్యాంక్‌ అకౌంట్‌లో డిపాజిట్‌ చేశానన్నారు. మిలిగిన సొమ్ము రూ.2,800 అతని చేతికి ఇచ్చానని తెలిపారు. ప్రతి నెలా రూ.6 వేలు వడ్డీ లెక్కన అతిని చేతికి చెల్లిస్తూ వచ్చానన్నారు. ఆపై అతినికి ఇవ్వాల్సిన రూ.50 వేలు 2018 ఫిబ్రవరి 3న తన ఐసీఐసీ అకౌంట్‌కు వేశానని. ఈ మొత్తం అతను డ్రా చేసుకున్నాడని తెలిపారు. అప్పు తీరిపోవడంతో తనకు బాండు ఇవ్వమని అడిగితే రెండు రోజుల తర్వాత ఇస్తానని చెప్పి దాట వేశాడని తెలిపారు.  దీనిపై 2018 మార్చి 5న తిరుపతి అర్బన్‌ ఎస్పీకి ఫిర్యాదు చేసినట్లు వెల్లడించారు. అతనిపై పోలీసులు ఎఫ్‌ఐఆర్‌ నమోదు చేశారన్నారు. ఈ నేపథ్యంలో తనపై అతడు కక్షగట్టాడని వాపోయాడు.  అతడి వద్ద ఉన్న బాండును 2019 జూలై 7న పాకాల కోర్టులో తనపై కేసు వేశాడని తెలిపారు. ఇలా చాలా మందిపై కేసులు వేసి వారిని ఇబ్బంది పెడుతున్నట్లు ఆరోపించారు. అప్పు తీర్చినా కేసులు వేసి భయభ్రాంతులకు గురిచేయడం అతనికి అలవాటుగా మారిందన్నారు. ఇప్పటికైనా అధికారులు స్పందించి అతనిపై చర్యలు తీసుకోవాలని కోరారు. సమావేశంలో బత్తల వినోద్‌కుమార్, హరిప్రసాద్, గిరియప్ప, త్యాగరాజుల నాయుడు, టి.నజీర్‌బాషా పాల్గొన్నారు. 

సాక్షి, పిడుగురాళ్ల(గుంటూరు) : రోజు వారీ కూలీలు, చిరు ఉద్యోగులు, రోజు వారీ వ్యాపారులు, తోపుడు బండ్ల వారు ఇలా పేద, నిరుపేద కుటుంబాలకు చెందిన వారు ఓ రూపాయి సంపాదించాలని పెట్టుబడి కోసం, లేదంటే వారి కుటుంబాల అవసరాల కోసం వారాల లెక్క వడ్డీకి డబ్బులు తీసుకుని అసలు, వడ్డీ చెల్లించలేక నానా అవస్థలు పడుతున్న వైనం పిడుగురాళ్ల పట్టణంలో జరుగుతుంది. పట్టణంలోని మాచర్ల బస్టాండ్‌ సెంటర్‌ వద్ద ఓ దివ్యాంగురాలు ప్రైవేటు పాఠశాలలో ఆయాగా, వంట మనిషిగా పని చేస్తుంది. కుమార్తెకు ఆరోగ్యం బాగోలేకపోవడంతో వారాల లెక్కన రూ.10 వేలు తీసుకుంది. సగం డబ్బులు చెల్లించింది. మధ్యలో తనకు ఆరోగ్యం బాగోలేక రెండు నెలలు ఆలస్యం కావడంతో వారాల లెక్క వడ్డీకి డబ్బులు ఇచ్చిన వడ్డీ వ్యాపారులు ఇంటిపైకి వచ్చి గతంలో చెల్లించిన డబ్బులు వడ్డీకే సరిపోయాయని, తిరిగి మళ్లీ నోటు రాసి మొదటి నుంచి చెల్లించాలని భయబ్రాంతులకు గురిచేస్తున్నారు. అదే విధంగా పట్టణంలోని ఆదర్శ కాలనీకి చెందిన షేక్‌ ఖాశిం అనే వ్యక్తి సున్నం బట్టీల్లో కూలి పనులు చేస్తుంటాడు. కుటుంబ అవసరాల కోసం రూ.10 వేలు వారాల లెక్క వడ్డీకి తీసుకున్నాడు. ఇతను కూడా సగానికి పైగానే అప్పు చెల్లించాడు. మధ్యలో ఇతనికి అనారోగ్యం కారణంగా ఓ నెల చెల్లించలేకపోవడంతో సదరు వడ్డీ రాయుళ్లు అతని ఇంటిపైకి వెళ్లి అతని పట్ల అసభ్య పదజాలంతో దూషించి అతన్ని భయబ్రాంతులకు గురి చేయడంతో అతను ఎవరికి చెప్పుకోవాలో అర్థం కాక బిక్కుబిక్కు మంటూ ఉన్నాడు. ఇలా పట్టణంలో వందల సంఖ్యలో పేద, నిరుపేద, చిరువ్యాపారులు వడ్డీకి డబ్బులు తీసుకుని అధిక వడ్డీలు చెల్లించలేక నరకయాతన పడుతున్నారు.  వారాల లెక్క ఇలా... పట్టణంలోనే కాకుండా రాజమండ్రి, అనపర్తి, మండపేట ప్రాంతాల నుంచి కొంతమంది వడ్డీ వ్యాపారులు పిడుగురాళ్ల పట్టణంలో వారాల లెక్క వడ్డీ వ్యాపారం నిర్వహిస్తున్నారు. వీరు ఒక్కొక్కరు 1000 మందికి రూ.5 వేల నుంచి రూ.30 వేల వరకు వారాల లెక్క వడ్డీలకు  తిప్పుతున్నారు. వీరు రూ.5 వేలు తీసుకున్న వారికి రూ.4900 ఇస్తారు. కాని వారు 12 వారాల్లో రూ.6 వేలు చెల్లించాలి. రూ.10 వేలు తీసుకున్న వారికి రూ.9800 ఇస్తారు. 12 వారాల్లో రూ.12 వేలు చెల్లించాలి. సుమారు నూటికి రూ.8 వడ్డీ వసూలు చేస్తున్నారు. మధ్యలో ఎవరైనా రెండు, మూడు వారాలు చెల్లించకుంటే అదనంగా మరో రూ.4 వడ్డీ వేసి రూ.12 వడ్డీ వసూలు చేస్తున్నారు. ఖాళీ ప్రామిసరీ నోట్లపై సంతకాలు, వేలిముద్రలు తీసుకుని వీరు వడ్డీ వ్యాపారం నిర్వహిస్తున్నారు.  అన్నీ అనధికారమే... ఈ వడ్డీ వ్యాపారం చేసే వారు అన్నీ అనధికారికంగానే చేస్తున్నారు. ఎటువంటి లైసెన్సులు ఉండవు. ఓ చిన్న పుస్తకాన్ని వారి పేరుతో ప్రింట్‌ చేసి వారాల వివరాలు, వారానికి ఎంత కట్టాలి రాసి ఇస్తారు. అయితే వసూలు చేసే వ్యక్తులు చదువు రాని వారికి రాయకుండానే రాశామని చెప్పి మాయ చేస్తూ వారు పూర్తిగా చెల్లించినప్పటికీ ఇంకా చెల్లించాలంటూ వారి వద్ద నుంచి ముక్కు పిండి వసూలు చేస్తున్నారు.  దీనిపై పేద, మధ్య తరగతి ప్రజలు  ఆందోళన చెందుతున్నారు. కాల్‌మనీ వ్యాపారులపై  సంబంధిత అధికారులు చర్యలు చేపట్టి బడుగు, బలహీన, చిరు వ్యాపారులను కాపాడాల్సిన బాధ్యత ఎంతైనా ఉంది. ఈ విషయమై పిడుగురాళ్ల పట్టణ సీఐ ఎ.సురేంద్రబాబును ‘సాక్షి’ వివరణ కోరగా కాల్‌మనీకి సంబంధించిన ఫిర్యాదులు తన దృష్టికి రాలేదన్నారు. ఎవరైనా ఫిర్యాదు ఇస్తే తప్పకుండా చర్యలు తీసుకుంటామన్నారు. ఖాళీ నోటుపై సంతకాలు పెట్టమంటున్నారు కుటుంబ అవసరాల కోసం వారాల వారి దగ్గర రూ.10 వేలు అప్పు తీసుకుంటే సగానికి పైగానే చెల్లించాను. మధ్యలో ఓ నెల ఆరోగ్యం బాగోలేక చెల్లించలేకపోయాను. దానికే చెల్లించిన నగదు వడ్డీకి సరిపోయిందని, మళ్లీ రూ.10 వేలు చెల్లించాలని, దానికి గాను ఖాళీ నోటుపై సంతకాలు పెట్టమని ఒత్తిడి చేస్తున్నారు.  వై.కుమారి, పిడుగురాళ్ల, కాల్‌మనీ బాధితురాలు 

జిల్లా కేంద్రంలో వడ్డీ వ్యాపారుల ఆగడాలు మితిమీరుతున్నాయి. కొందరు వ్యాపారులు అడ్డగోలు వడ్డీతో ప్రజల నడ్డి విరుస్తున్నారు. అసలుకన్నా వడ్డీ ఎక్కువైనప్పుడు.. కట్టలేని పరిస్థితుల్లో అప్పు తీసుకున్నవారి ఇళ్లను, ప్లాట్లను, ఇతర ఆస్తులను స్వాధీనం చేసుకుంటున్నారు.   – సాక్షి, కామారెడ్డి   సాక్షి, కామారెడ్డి : జిల్లా కేంద్రంలోని అశోక్‌నగర్‌ కాలనీకి చెందిన రాజయ్య (పేరు మార్చాం) అవసరానికి ఓ వడ్డీ వ్యాపారి వద్ద రూ. 2 లక్షలు అప్పు తీసుకున్నాడు. రాజయ్య వ్యాపారం దెబ్బతింది. తీసుకున్న అప్పు చెల్లించలేకపోయాడు. అప్పు తీర్చడానికి మరికొంత కాలం గడువు అడిగాడు. దీనికి సమ్మతించిన సదరు వడ్డీ వ్యాపారి.. 15 నెలలకు వడ్డీ లెక్కగట్టి అసలు, వడ్డీ మొత్తం రూ. 3.50 లక్షలు అయ్యిందని తేల్చాడు. ఇంత మొత్తం బాకీకి ఇంటికి సంబంధించిన కాగితాలు ఇవ్వాలనే షరతు పెట్టాడు. తప్పనిసరి పరిస్థితుల్లో రాజయ్య ఇంటికాగితాలు చేతికిచ్చాడు. మరో ఏడాది గడిచింది. అప్పు వడ్డీలతో రూ. 5 లక్షలు దాటింది. ఇక లాభం లేదని ఇంటిని తన పేరిట రిజిస్ట్రేషన్‌ చేయించాలని ఒత్తిడి తేవడంతో రిజిస్ట్రేషన్‌ చేసి ఇచ్చాడు. వ్యాపారాల్లో నష్టాలే తప్ప లాభాలు రాకపోవడంతో అప్పు తీర్చలేకపోయాడు. సదరు వడ్డీ వ్యాపారి పది నెలల తర్వాత మళ్లీ అసలు, వడ్డీ లెక్కేశాడు. అప్పు రూ. 7 లక్షలు దాటిందని.. వారం రోజుల్లో మొత్తం అప్పు తీర్చకపోతే ఇల్లు ఖాళీ చేయాలని బెదిరించాడు. వారం తర్వాత పదిహేను మందిని తీసుకుని వచ్చాడు. ఎంత బతిమాలినా కనికరించకపోవడంతో రాజయ్య సామాన్లు సర్దుకుని, వేరే ఇంటికి మారాడు. జిల్లా కేంద్రంలో ఇళ్ల నిర్మాణాలు చేపట్టి అమ్ముతూ నాలుగు పైసలు సంపాదించాలన్న ఆశతో ఓ ఆంధ్రా మేస్త్రీ తన దగ్గర ఉన్న డబ్బులను పెట్టుబడిగా పెట్టాడు. అవి సరిపోకపోవడంతో ఓ వడ్డీ వ్యాపారిని ఆశ్రయించాడు. ఎంత కావాలన్నా ఇస్తాను కాని, ప్లాటును తన పేరిటే రిజిస్ట్రేషన్‌ చేసి ఇవ్వాలనే షరతు పెట్టాడు. దానికి సమ్మతించిన మేస్త్రీ.. రెండు ప్లాట్లను రిజస్ట్రేషన్‌ చేసి రూ. 5 లక్షల అప్పు తీసుకున్నాడు. ఇంటి నిర్మాణానికి డబ్బులు సరిపోకపోవడంతో మరో రూ. 5 లక్షల అప్పు అడిగాడు. ప్లాటు తన పేరిటే ఉండడంతో సదరు వ్యాపారి అప్పు ఇచ్చాడు. మేస్త్రీ ఆరు నెల ల్లో ఇంటి నిర్మాణాలను పూర్తి చేశాడు. మరో ఆరు నెలలైనా ఇళ్లను ఎవరూ కొనుగోలు చేయలేదు. తన సొంత డబ్బులుపోను రూ. 10 లక్షలు అప్పు గా తీసుకుని పెట్టిన పెట్టుబడికి సంబంధించి వడ్డీ లెక్కలు చూసుకున్నాడు. వడ్డీ వ్యాపారి డబ్బుల కోసం ఒత్తిళ్లు తేసాగాడు. ఓరోజు కూర్చోబెట్టి ‘‘నువ్వు తీసుకున్న అప్పుకు ఇప్పటికే రూ. 4 లక్షల మిత్తి అయ్యింది. అసలుతో కలిపి రూ.14 లక్షలు కట్టు’’ అని ఒత్తిడి తెచ్చాడు. ఇళ్లు అమ్ముడవకపోవడంతో మేస్త్రీ చేతులెత్తేశాడు. వ్యాపారి రెం డు ఇళ్లకు రూ. 18 లక్షలు లెక్కగట్టి.. తనకు రావాల్సిన రూ. 14 లక్షలు పోనూ మిగిలిన రూ. 4 లక్షలను మేస్త్రీ చేతిలో పెట్టాడు. తాను కష్టపడి దాచుకున్న సొమ్ము కూడా పోవడంతో ఆ మేస్త్రీ కన్నీళ్లు పెట్టుకున్నాడు. కొంత కాలానికి ఆ వ్యాపారి ఒక్కో ఇంటిని రూ. 26 లక్షలకు అమ్ముకున్నాడు. కష్టపడ్డ మేస్త్రీకి మాత్రం కన్నీళ్లు మిగిలాయి. అవసరానికి అప్పు ఇస్తున్నామని చెప్పుకుంటూ కొందరు వడ్డీ వ్యాపారులు అప్పు తీసుకున్నవారి రక్తాన్ని పీల్చేస్తున్నారు. అడ్డగోలు వడ్డీలతో వారి నడ్డి విరుస్తున్నారు. ఇదే సమయంలో తమ దగ్గర తీసుకున్న అప్పును తీర్చలేని వారికి సంబంధించిన ఆస్తులను జబర్దస్తీగా స్వాధీనం చేసుకుంటున్నారు. జిల్లా కేంద్రంలో కొందరు వడ్డీ వ్యాపారుల ఆగడాలు మితిమీరాయి. ఎలాంటి అనుమతులు, లెక్కా పత్రం లేకుండానే రూ. కోట్లల్లో వడ్డీల దందా నిర్వహిస్తున్నారు. అప్పుపై అడ్డగోలు వడ్డీలు వసూలు చేస్తున్నారు. అప్పు ఇచ్చే ముందు ఇంటి కాగితాలో, ప్లాటు కాగితాలనో తనఖా పెట్టుకోవడం, సకాలంలో అప్పు చెల్లించకుంటే ఆస్తులను ఆక్రమించుకోవడం పరిపాటిగా మారింది.   అడ్డగోలు వడ్డీలు...  వడ్డీ వ్యాపారం పేరుతో కొందరు చేస్తున్న దందా సామాన్యులను దివాలా తీయిస్తోంది. ప్రతి మని షికి ఏదో ఒక సందర్భంలో అప్పు చేయాల్సి వ స్తోంది. ప్రధానంగా పిల్లల చదువులకో, ఇళ్ల నిర్మా ణానికో, ప్లాటు కొనుగోలు కోసమో, పిల్లల పెళ్లి ళ్లు, ఫంక్షన్లు, ఏదైనా వ్యాపారంలో పెట్టుబడుల కోసమో.. ఇలా ప్రతిదానికి అప్పు చేయాల్సిందే. ఇలాంటి సందర్భంలో వడ్డీ వ్యాపారులు ‘కొంద రు’ అడ్డగోలు వడ్డీలతో నడ్డివిరుస్తున్నారు. నూటి కి నెలకు రూ. 3 నుంచి రూ. 5 వరకు వడ్డీ వసూ లు చేస్తున్నారు. కొందరైతే మూడు నెలలకోసారి, మరికొందరు ఆరు నెలలకోసారి వడ్డీ లెక్కలు గ డుతున్నారు. కొందరు వడ్డీ వ్యాపారులు ముందుగానే ఆరు నెలల వడ్డీని తీసుకుంటున్నారు. వడ్డీ, అసలు కలిపి మళ్లీ కొత్త లెక్క రాసుకోవడం మూ లంగా అప్పుభారం ఏడాదిన్నర, రెండేళ్లలో రెట్టింపవుతోంది. వాయిదా ప్రకారం డబ్బు చెల్లించకుం టే వడ్డీలపై వడ్డీలు వేసి ఇబ్బంది పెడుతున్నారు. తనఖా తప్పనిసరి కొందరు వడ్డీ వ్యాపారులు అప్పు ఇచ్చేటపుడు ఏదైనా తనఖా పెట్టాలన్న షరతు విధిస్తున్నారు. ప్రధానంగా ఇంటికి సంబంధిం చిన డాక్యుమెంట్లుగాని, ప్లాట్లకు సంబంధించిన డాక్యుమెంట్లు గాని వారి వద్ద తనఖా పెట్టుకున్న తరువాతనే అప్పులు ఇస్తున్నారు. అప్పులు చెల్లించని పక్షంలో వడ్డీ వ్యాపారులు తమ మనుషులను తీసుకెళ్లి ఇంటి ముందర నానా హంగామా చేయడం, అప్పుకట్టకుంటే ఆస్తులను స్వాధీనం చేసుకోవడం పరిపాటిగా మారింది. అప్పులు తీసుకున్నవారు చాలా మంది వడ్డీ వ్యాపారుల చేతిలో నలిగిపోతున్నారు. వడ్డీ వ్యాపారుల ఆగడాలకు కళ్లెం వేయాలని చిరువ్యాపారులు కోరుతున్నారు.

సాక్షి, విజయవాడ : కాల్‌ మనీ ఆగడాలు మరోసారి పెచ్చుమీరాయి. కాల్‌ మనీ వేధింపులు భరించలేక ఓ వివాహిత ఆత్మహత్యాయత్నానికి పాల్పడింది. ఈ సంఘటన మంగళవారం రాత్రి విజయవాడలో చోటుచేసుకుంది. వివరాల్లోకి వెళితే.. విజయవాడకు చెందిన పసుపులేటి పద్మ అనే వివాహిత నాలుగేళ్ల కిందట టీడీపీ నేత అనుచరుడి నుంచి 2లక్షల రుణం తీసుకుంది. కొన్ని నెలల క్రితమే తీసుకున్న బాకీ మొత్తం తీర్చేసింది. అయితే ఇంకా డబ్బులు బాకీ ఉన్నావంటూ అధికార పార్టీకి చెందిన ప్రజాప్రతినిధులు దౌర్జన్యానికి దిగారు. తరుచూ ఆమెను వేధింపులకు గురిచేయటం మొదలుపెట్టారు. వేధింపులు తాళలేకపోయిన ఆమె మంగళవారం రాత్రి పురుగుల మందు తాగి ఆత్మహత్యాయత్నానికి పాల్పడింది. ఆపస్మారక స్థితిలో ఉన్న ఆమెను ప్రభుత్వ ఆస్పత్రికి తరలించారు. బాధితురాలి ఫిర్యాదు మేరకు కేసు నమోదు చేసుకున్న పోలీసులు ధర్యాప్తు చేపట్టారు.

ఏలూరు అమీనాపేటకు చెందిన వెంకట కృష్ణవేణిఒక వడ్డీ వ్యాపారి వద్ద 2014లో కుటుంబ అవసరాల నిమిత్తం రూ.30 వేలు అప్పుగా తీసుకుంది. భర్త చనిపోవటంతో కూలిపని చేసుకుంటూ ఒంటరిగా జీవిస్తోంది. బాకీని నెలనెలా కొంతమొత్తంగా చెల్లిస్తోంది. 2015 నాటికి బాకీ రూ.2 వేలు మిగిలింది. ఇదే సమయంలో కాల్‌మనీ వివాదంతో వడ్డీ వ్యాపారులపై కేసులు నమోదు కావటంతో సొమ్ము తీసుకునేందుకు ఆమె వద్దకు ఎవరూ రాలేదు. అనంతరం బాకీ విషయంలో సదరు వడ్డీ వ్యాపారి ఆమెతో గొడవ పెట్టుకున్నాడు. తాజాగాఆమె తమకు రూ.2 లక్షలు బకాయి ఉందని, వెంటనే చెల్లించేలా చర్యలు తీసుకోవాలంటూ చెక్కుల ఆధారంగా బినామీలతో కోర్టులో కేసు వేశాడు. ఇప్పటికేతీవ్ర ఆర్థిక సమస్యలతో కొట్టుమిట్టాడుతున్న ఆమెనువడ్డీ వ్యాపారి కోర్టు కేసు పేరుతో వేధిస్తూ..బెదిరింపులకు పాల్పడుతున్నాడు. ఏలూరు టౌన్‌ :  జిల్లా వ్యాప్తంగా వడ్డీ వ్యాపారుల ఆగడాలకు అడ్డూఅదుపులేకుండా పోతోంది. ఒక్క ఏలూరు నగరంలోనే ఇలా అధిక వడ్డీలు వసూలు చేసే వ్యాపారులు పదుల సంఖ్యలో ఉన్నారు. వీరు రూ.కోట్లలో వ్యాపారాలు సాగిస్తున్నారు. రోడ్ల మీద చిన్నచిన్న వ్యాపారాలు చేసుకునే వ్యక్తుల నుంచి మధ్య తరగతి వర్గాల వరకూ వేలసంఖ్యలో వ్యక్తులకు అప్పులు ఇస్తూ ఉంటారు. ధర్మ వడ్డీకి అప్పు ఇచ్చే పరిస్థితులు పోయి.. చక్రవడ్డీలు, ఎస్‌టీడీ వడ్డీల పేరుతో జనాలను దోచేస్తున్నారు. రోజంతా కూలీనాలీ చేసుకునే పేద వర్గాలు, చిన్న ఉద్యోగాలు చేసుకునే వ్యక్తులు ఈ కాల్‌మనీ జలగల ఉచ్చులో పడి దోపిడీకి గురవుతున్నారు. ఏలూరు అశోక్‌నగర్‌లోనే ఇద్దరు, ముగ్గురు వడ్డీ వ్యాపారులు చేస్తున్న అరాచక దందాలతో జనాలు బెంబేలెత్తిపోతున్నారు. ‘కాల్‌మనీ’ కేటుగాళ్లు డబ్బు వాసన రుచిమరిగి పేట్రేగిపోతున్నారు. అవసరాల కోసం అప్పు తీసుకుంటున్న పేద, మధ్య తరగతి వర్గాల జీవితాలతో చెలగాటమాడుతున్నారు. మహిళలు, వితంతువులు, వృద్ధులు, పేదలు, ఆదరణలేని వ్యక్తులనే లక్ష్యంగా చేసుకుంటూ అప్పులు ఇస్తున్నారు. తీసుకున్న అప్పునకు ఎస్‌టీడీ వడ్డీ వేసి రెట్టింపు కట్టించుకున్నాక, వారితో గొడవలు పెట్టుకుంటున్నారు. రెండు, మూడేళ్లు ఆగిన అనంతరం అప్పు తీసుకున్న వ్యక్తుల చెక్కులతో కోర్టులో మరోసారి భారీ మొత్తానికి కేసులు వేస్తున్నారు. సెటిల్‌మెంట్‌ చేసుకునే వరకూ వేధింపులకు గురి చేస్తున్నారు. పోనీ పోలీస్‌స్టేషన్లకు వెళదామా అంటే అక్కడ తమ అనుచర వర్గాన్ని పెట్టి మరీ బెదిరింపులకు పాల్పడడం కాల్‌మనీ కేటుగాళ్ల స్టైల్‌. బినామీలతో చెక్కులను కోర్టుల్లో వేయిస్తూ నోటీసులు పంపిస్తారు. నగరంలో ఇదే తరహాలో వేధింపులకు గురవుతున్న బాధితులు తీవ్ర మానసిక వేదనతో నలిగిపోతున్నారు. హత్యానేరాల్లో నిందితులతో బలవంతపు వసూళ్లు ఏలూరు నగరానికి చాలా ఏళ్ల క్రితం ఉపాధి కోసం వచ్చి ఇక్కడే పాతుకుపోయిన కొందరు ప్రైవేటు సైన్యాన్ని ఏర్పాటు చేసుకున్నారు. రూ.వేలల్లో సొమ్ములు ఇస్తూ.. రోజువారీ, వారం, పక్షం రోజులు, నెలరోజులు ఇలా వసూలు చేస్తుంటారు. రూ.వెయ్యి అప్పుగా ఇవ్వాలంటే ముందుగానే రూ.200 మినహాయించుకుని రూ.800 ఇస్తుంటారు. ఈ సొమ్మును వాయిదాల పద్ధతిలో చెప్పిన రోజుకు చెల్లించాలి. ఒక్కరోజు దాటితే  అదనంగా  పెనాల్టీ పడుతుంది. ఇక తీసుకున్న అప్పు వసూళ్ల బాధ్యతను నగరంలోని హత్యా నేరాల్లో నిందితులు, రౌడీషీటర్లకు అప్పగిస్తారు. ఈ వ్యక్తులు రాత్రి వేళల్లో, తెల్లవారుజామున ఇళ్లకు వెళ్లి డబ్బు వసూళ్లకు బెదిరింపులు చేస్తుంటారు. ఒక వేళ సొమ్ములు చెల్లించలేని పక్షంలో మహిళలను లైంగికం  గానూ వేధింపులకు గురిచేస్తూ తమదైన శైలిలో వసూలు చేయటం వీరికి వెన్నతో పెట్టిన విద్య. బాధితులు పోలీస్‌స్టేషన్లకు వెళ్లే అవకాశం లేకుండా స్టేషన్లలో సైతం తమ అనుచరులను ఏర్పాటు చేసుకుని బెదిరింపులకు పాల్పడుతుంటారు. ఏలూరు తంగెళ్లమూడికి చెందిన ఎస్‌కే రియాజుద్దీన్‌ ఓ వడ్డీ వ్యాపారి వద్ద రూ.50 వేలు అప్పుగా తీసుకున్నాడు. నెలనెలా వాయిదాల పద్ధతిలో వడ్డీతో కలిపి సొమ్ము చెల్లించేలా నిర్ణయించారు. తీసుకున్న రుణానికి మూడు రెట్లు రూ.1.50 లక్షలు ఎస్‌టీడీ (వందకు నెలకు రూ.10 నుంచి రూ.20 వరకు వసూలు చేస్తారు) వడ్డీతో వసూలు చేశారు. కానీ అంతటితో వ్యాపారి ఆగిపోలేదు. అదనంగా మరో రూ.50 వేలు చెల్లించాల్సిందేనంటూ వేధింపులకు దిగాడు. తన సొమ్ము ఇప్పించాలంటూ బినామీలతో రియాజుద్దీన్‌ ఇచ్చిన చెక్కులతో కోర్టులో కేసు వేశాడు. కుటుంబ పోషణే కష్టంగా మారిన ఆతను వడ్డీ వ్యాపారి వేధింపులకు తాళలేక 2017లో  ఆత్మహత్యకు పాల్పడి తనువు చాలించాడు. వృద్ధులు, వితంతువులు, ఆదరణలేనివారే టార్గెట్‌ కుటుంబ అవసరాలో.. వ్యక్తిగత సమస్యలతోనో.. వడ్డీలకు అప్పులు     తీసుకున్నారో ఇక అప్పు తీసుకున్న వ్యక్తుల జీవితాలు వారి చేతుల్లోకి వెళ్ళిపోయినట్లే. ఈ వ్యాపారులు ఎవరికి పడితే వారికి అప్పులు ఇవ్వరు. సమాజంలో ఆదరణలేనివారు, పేదవర్గాలు, బంధువర్గం లేనివాళ్ళు, మహిళలు, వృద్ధులు, వితంతువులు ఇలా కొన్ని వర్గాల ప్రజలను మాత్రమే వారు టార్గెట్‌గా చేసుకుంటారు. వ్యాపారుల కనుసన్నల్లో నడిచే వ్యక్తుల విశ్వసనీయ సమాచారం మేరకు భారీగా డబ్బులు అప్పులుగా ఇస్తుంటారు. వేధింపులకు గురిచేసినా ఎవరూ అండలేకుండా చేయటం, పోలీస్‌స్టేషన్లకు వెళ్ళలేని నిస్సహాయులను ఏరికోరి వారికే అప్పులు ఇవ్వటం వారి స్పెషల్‌.    చట్టాన్ని ఉల్లంఘిస్తే కఠిన చర్యలు చట్టాన్ని ఎవరైనా తమ చేతుల్లోకి తీసుకుంటూ వేధింపులకు పాల్పడితే సహించేదిలేదు. బలవంతంగా ఎవరితోనైనా సంతకాలు చేయించి, నిబంధనలు మీరితే చర్యలు తప్పవు. ఎవరైనా వడ్డీ వ్యాపారం పేరుతో వేధింపులకు పాల్పడితే కఠినంగా వ్యవహరిస్తాం. విచారణ చేపట్టి బాధితుల ఫిర్యాదు మేరకు కాల్‌మనీ కేసులు నమోదు చేసేందుకు చర్యలు తీసుకుంటాం. పేదలు, మహిళలు, వితంతువులు, ఇలా ఎవరిపైన అయినా దాడులు, వేధింపులు జరిగినట్లు నిర్ధారణ అయితే తప్పకుండా కేసులు నమోదు చేసి చర్యలు తీసుకుంటాం. ఇలాంటి వారి పట్ల ప్రజలూ జాగ్రత్తలు పాటించాలి. – ఎం.రవిప్రకాష్, ఎస్పీ

సాక్షి ప్రతినిధి, నెల్లూరు: రాష్ట్రంలో రెండేళ్ల క్రితం సంచలనం సృష్టించిన విజయవాడ కాల్‌మనీ బాగోతం ఇప్పుడు నెల్లూరు జిల్లాలో కలకలం రేపుతోంది. వ్యాపారులు, రియల్టర్లను టార్గెట్‌ చేసుకుని రూ.లక్షల్లో అప్పులు ఇచ్చి రూ.కోట్లలో వసూలు చేసే ఓ కాల్‌మనీ వ్యాపారిపై ఇప్పుడు ఫిర్యాదుల పరంపర మొదలైంది. మున్సిపల్‌ శాఖ మంత్రి పి.నారాయణ ముఖ్య అనుచరుడిగా నగరంలో హవా సాగిస్తూ.. అప్పులు తీసుకున్న వారిని వేధించి ఆస్తులు రాయించుకుంటున్నారు. ఎవరైనా ఫిర్యాదు చేస్తే వారిపై కక్ష సాధింపులకు పాల్పడుతున్నారు. అధికార పార్టీ నేత కావడంతో పోలీసులు కూడా ఇతనిపై వచ్చే ఫిర్యాదులను చూసీ చూడనట్టుగా వదిలేస్తున్నారు. తాజాగా రెండు ఫిర్యాదులు వెలుగులోకి రావడం, అందులో ఒక ఫిర్యాదుకు సంబంధించి కేసు నమోదు కావడంతో ఈ కాల్‌మనీ దందా వెలుగులోకి వచ్చింది. ప్రకాశం జిల్లాకు చెందిన కోట గురుబ్రహ్మం నెల్లూరు నగరంలో స్థిరపడ్డాడు. సింహపురి పెయింట్స్‌ పేరిట వ్యాపార రంగంలోకి ప్రవేశించి వడ్డీ వ్యాపారం ద్వారా అనతి కాలంలోనే రూ.కోట్లు గడించాడు. మున్సిపల్‌ శాఖ మంత్రి నారాయణకు సన్నిహితుడు కావడంతో జిల్లాలో ఇష్టానుసారంగా దందా సాగిస్తున్నాడు. రూ.లక్షల్లో అప్పులిచ్చి కోట్లు వసూలు చేస్తూ కాల్‌మనీ వ్యాపారం చేస్తున్నాడు. ఇతనితోపాటు మరో ముగ్గురు అధికార పార్టీ చోటా నేతలు సిండికేటుగా ఏర్పడి పెద్ద మొత్తాలతో లావాదేవీలు నడుపుతున్నారు. ఈ నేపథ్యంలో నగరంలోని గోమతీ ఎడ్యుకేషన్‌ సొసైటీ కరస్పాండెంట్‌ అరుణ.. 2012లో గూడూరుకు చెందిన వడ్డీ వ్యాపారి వాయుగుండ్ల వెంకట నరసింహారావు వద్ద మూడు రూపాయల వడ్డీకి రూ.15 లక్షలు అప్పు తీసుకున్నారు. ష్యూరిటీగా తన భర్త పేరుతో చెక్కులు, ప్రామిసరీ నోట్లను ఇచ్చారు. ఈ క్రమంలో నరసింహారావు ఆ అప్పును మంత్రి అనుచరుడు కోట గురుబ్రహ్మంకు బదలాయించి అప్పును అతనికి చెల్లించాలని సూచించి తిరిగి గురుబ్రహ్మం, అతని కుమారుడు ఈశ్వరచంద్ర విద్యాసాగర్‌ పేరుతో ప్రామిసరి నోట్లు, చెక్కులు తీసుకున్నారు. 2016లో అసలు, వడ్డీ చెల్లించారు. అయితే, ప్రామిసరీ నోట్లు, చెక్కులు కనిపించడంలేదని, కొద్ది రోజుల్లో తిరిగి ఇస్తానని చెప్పి అప్పు రద్దయినట్లు కాగితం రాసిచ్చారు. రెండు నెలల తర్వాత చెక్కులు బౌన్స్‌ చేశారు. దీంతో అరుణ కోర్టులో ప్రైవేటు కంప్‌లైంట్‌ వేయడంతో ఈనెల 16న 4వ నగర పోలీసుస్టేషన్‌లో గురుబ్రహ్మంపై కేసు నమోదైంది. దీంతో అతని నుంచి ఆమెకు వేధింపులు మొదలయ్యాయి. ఈ పరిణామాల క్రమంలో బాధితులు ఒక్కొక్కరు బయటకు వస్తున్నారు. మంత్రి అండతోనే దందా సాధారణ పెయింట్‌ వ్యాపారి అయిన గురుబ్రహ్మం ఒక దశలో మంత్రికే చేబదులుగా అప్పులిచ్చే స్థాయికి ఎదిగాడు. 15 ఏళ్ల క్రితం వరకు మంత్రికి అనేకసార్లు అప్పు ఇచ్చినట్లు సమాచారం. కోట గురుబ్రహ్మంతోపాటు మంత్రికి సన్నిహితంగా ఉండే ఏలూరు శీనయ్య, కృష్ణయ్య, ప్రసాద్‌ సిండికేట్‌గా ఏర్పడి కాల్‌మనీ నిర్వహిస్తుంటారు. కొన్ని సందర్భాలలో వీరితో నిమిత్తం లేకుండా గురుబ్రహ్మం అప్పులు ఇస్తుంటాడు. అలాగే, నగరంలోని ధనలక్ష్మీపురానికి చెందిన బత్తుల విజయభాస్కర్‌రెడ్డి అనే రియల్‌ ఎస్టేట్‌ వ్యాపారి 2010లో 131 అంకణాల స్థలాన్ని డెవలప్‌మెంట్‌ కోసం రిజిస్ట్రేషన్‌ చేయించుకున్నారు. ఈ జాగాలో అపార్టుమెంట్‌ నిర్మాణం కోసం మూడు రూపాయల వడ్డీకి గురుబ్రహ్మం వద్ద రూ.70 లక్షలు అప్పు తీసుకుని డెవలప్‌మెంట్‌ కోసం తీసుకున్న స్థలాన్ని ఆయన తల్లి శేషమ్మ పేరుతో అన్‌ రిజిస్టర్‌ చేశారు. ఈ క్రమంలో అపార్టుమెంట్‌లో రెండు ఫ్లోర్ల నిర్మాణం పూర్తిచేసి 12 మందికి విజయభాస్కర్‌రెడ్డి విక్రయించి ఆ డబ్బును బాకీ కింద జమ చేసుకోమని కోరగా కుదరదని చెప్పి అపార్టుమెంట్‌ను స్వాధీనం చేసుకున్నాడు. ఇదేమని ప్రశ్నిస్తే వడ్డీతో కలిపి రూ.కోటి 76 లక్షలు చెల్లించాలని డిమాండ్‌ చేసి తనకు మంత్రి అండ ఉందని, ఏమీ చేయలేవని బెదిరించి పంపాడు. ఇదే క్రమంలో గూడూరులో, సర్వేపల్లి, నగరంలో అనేకమంది గురుబ్రహ్మం బాధితులు ఉన్నారు. మరోవైపు.. గోమతి నిర్వాహకురాలు అరుణ ఫిర్యాదుతో కేసు నమోదు చేశారు. అలాగే, విజయభాస్కర్‌రెడ్డి కూడా పోలీసులకు ఫిర్యాదు చేశాడు. నగరంలో అనేకమంది వ్యాపారులు, అధికార పార్టీ నేతల సమీప బంధువులు కూడా ఇదే తరహాలో మోసం చేస్తున్నారు. మంత్రి నారాయణ ముఖ్య అనుచరుడు కావడంతో పోలీసులు కూడా కేసు నమోదు చేయడంలేదు. 2013లో ముత్తుకూరు పోలీసుస్టేషన్‌లో ఇతనిపై కేసు నమోదైంది. కేసును విచారిస్తున్నాం కోర్టు ఆదేశాల మేరకు కోట గురుబ్రహ్మంపై కేసు నమోదు చేశాం. పూర్తిస్థాయిలో విచారిస్తున్నాం. నకిలీ డాక్యుమెంట్లు, చెక్కుల ఫోర్జరీ చేసిన అభియోగాలపై విచారణ సాగుతోంది. ఫోరెన్సిక్‌ నివేదిక రాగానే చర్యలు తీసుకుంటాం. గురుబ్రహ్మం తన అనుచరుల ద్వారా బెదిరించినట్లు గోమతి విద్యా సంస్థల కరస్పాండెంట్‌ అరుణ ఫిర్యాదు చేశారు. దీనిపైనా విచారణ సాగుతోంది. – వి.సుధాకర్‌రెడ్డి, నెల్లూరు నాలుగో నగర సీఐ

సాక్షి, చెన్నై: ఆంధ్రప్రదేశ్‌లోనే కాదు తమిళనాడులోనూ ‘కాల్‌మనీ’ భూతం బుసలు కొడుతోంది. ఏపీలో ఇప్పటికే ఈ రక్కసి బారిన పడి ఎంతో మంది మానప్రాణాలు పోగొట్టుకోగా, తాజాగా పొరుగు రాష్ట్రానికి ఇది పాకింది. కాల్‌మనీ వ్యవహారం కోలీవుడ్‌ దర్శక నిర్మాత బి.అశోక్ కుమార్ బలవన్మరణానికి కారణమైంది. నటుడు శశికుమార్‌ సోదరుడైన ఆయన మంగళవారం చెన్నైలో ఆత్మహత్య చేసుకోవటం సినిమా వర్గాలను నివ్వెరపోయేలా చేసింది. ఫైనాన్షియర్లు, కాల్‌మనీ దారుల నుండి గత కొంతకాలంగా బెదిరింపులు వస్తుండటంతో ఆయన బలవన్మరణానికి పాల్పడ్డారు. ఈ విషయాన్ని సూసైడ్ లెటర్‌లో అశోక్ కుమార్ వివరించటం చిత్రసీమను దిగ్భ్రాంతికి గురిచేసింది. దీంతో కోలీవుడ్‌ కాల్‌మనీ దందాకు వ్యతిరేకంగా కదంతొక్కింది. బాధ్యులపై చర్యలు తీసుకోవాలని గట్టిగా డిమాండ్‌ చేసింది. అశోక్ కుమార్‌ను బెదిరించిన వారిపై కేసు నమోదు చేసి పోలీసులు దర్యాప్తు ప్రారంభించారు. ప్రభుత్వం కూడా దీన్ని సీరియస్‌గా తీసుకోవడంతో కందువడ్డీ, కాల్‌మనీ వ్యవహారంలో ప్రమేయమున్న పైనాన్షియర్లపై ఉక్కుపాదం మోపేందుకు అధికారులు సిద్దమవుతున్నారు. గతంలో కాల్‌మనీ వ్యవహారంలో ఓ కుటుంబం తిరునెల్వేలి కలెక్టర్ కార్యాలయం ముందు ఆత్మహత్యకు పాల్పడిన ఘటన దేశవ్యాప్తంగా సంచలనం సృష్టించింది. ఈ విదారక ఉదంతాన్ని మరువక ముందే కాల్‌మనీకి సినీ నిర్మాత అశోక్ కుమార్ బలి కావడం తమిళనాట తీవ్ర కలకలం రేపింది.


 నల్లగొండ : ఆంధ్రప్రదేశ్‌లో సంచలనంగా మారిన కాల్‌మనీ వ్యవహారం తాజాగా నల్లగొండ జిల్లాలో పడగ విప్పింది. నార్కెట్‌పల్లి మండలం, యల్లారెడ్డి గూడెంలో తాజాగా కాల్‌మనీ వ్యవహారం వెలుగులోకి వచ్చింది. అనేకమంది బాధితులు కాల్‌మనీ బారిన పడినట్లు తెలిసింది.
 
 రూ.10వడ్డీతో పేదలనే లక్ష్యంగా చేసుకొని డబ్బులిస్తూ వసూలు చేసే క్రమంలో ఓ వ్యక్తి తీవ్ర అరాచకాలకు పాల్పడుతున్నాడు. పేదలు అని కూడా చూడకుండా వారిని ఇష్టం వచ్చినట్లు కొట్టడమే కాకుండా వారి ఇళ్లలోని మహిళలపై లైంగిక దాడి యత్నాలకు పాల్పడుతున్నాడు. ఆ గ్రామంలోని పెద్దలు కూడా అతడి తీరును సమర్థిస్తుండటం గమనార్హం.


 సీపీకి పెందుర్తి మండలానికి చెందిన ఓ కుటుంబం ఫిర్యాదు
 సాక్షి, విశాఖపట్నం/అల్లిపురం: నిన్న గాక మొన్న పొక్లె్లయిన్‌తో ప్రహరీని కూలగొట్టిన ఘటనలో పెందుర్తి పోలీస్‌ స్టేషన్‌లో ఈయనపై కేసు నమోదైంది. ఇది మరవకముందే కాల్‌మనీ వ్యవహరంలో తీవ్రమైన ఆరోపణలు ఎదుర్కొంటున్నారు. వడ్డీవ్యాపారస్తులతో చేతులు కలిపి సెటిల్‌ మెంట్స్‌కు పాల్పడుతున్నారు. అప్పు తీర్చలేదనే అక్కసుతో పెందుర్తిలోని ఓ మైనార్టీ కుటుంబానికి చెందిన అరకోటికి పైగా విలువైన స్థిరాస్తిని కాజేసేందుకు ఏకంగా బెదిరింపులకు పాల్పడ్డారని ఫిర్యాదు అందింది.
 
 బాధితుల తెలిపిన వివరాల ప్రకారం ..
 పెందుర్తి మండలం రాతిచెరువుకు చెందిన షేక్‌ ఆదంబీ  భర్త షేక్‌ మహ్మద్‌ఆలీతో కలిసి సర్వే నం.237/5బిలోని డోర్‌ నం.4–63/1లో నివసిస్తోంది. పెందుర్తి, విశాఖపట్నం మెయిన్‌రోడ్డులో వ్యాపారం చేసుకుంటున్న వీరు 2015 జూన్‌లో దేశపాత్రునిపాలేనికి చెందిన ఫైనాన్షియర్‌ రమణ నుంచి రూ.8 లక్షలు అప్పుగా తీసుకున్నారు. ఆ మొత్తానికి గతేడాది నవంబర్‌ వరకు వడ్డీతో కలిసి రూ.6 లక్షలు వరకు చెల్లించారు. నోట్ల రద్దు తర్వాత వడ్డీ చెల్లించలేకపోయారు. బాకీ చెల్లించాలని రమణ ఒత్తిడి తీసుకు వచ్చాడు. ఆర్థికభారం కావటంతో వారు ఉంటున్న ఇంటిని అమ్మకానికి  పెట్టి వడ్డీతో కలిసి సింగిల్‌ పేమెంట్‌గా రూ.5లక్షలు ఇచ్చేందుకు అంగీకరించారు.
 ఆ మేరకు మరొకరికి ఇంటిని అమ్మకానికి పెట్టి రూ.18 లక్షలు అడ్వాన్సు తీసుకున్నారు. ఆ మొత్తం నుంచి రూ.5 లక్షలు ఫైనాన్షియర్‌ రమణకు ఇచ్చేందుకు బాధిత కుటుంబ సభ్యులు సిద్ధమయ్యారు. అమ్మకానికి పెట్టిన రాతిచెరువులోని బాధితుల ఇంటిని కబ్జా చేసే ఆలోచనతో ఫైనాన్షియర్‌ రమణ అనకాపల్లి ఎమ్మెల్యే ద్వారా బాధితులపై బెదిరింపులకు పాల్పడ్డారు. అప్పు తీసుకున్నప్పుడు ఖాళీ పేపర్లపై పెట్టిన సంతకాలను ఆసరాగా చేసుకుని సదరు వడ్డీ వ్యాపారి పత్రికల్లో బహిరంగ ప్రకటన ఇచ్చారు. ఆ ఇంటిని తమకు తనఖా పెట్టి సదరు వ్యక్తులు రుణం పొందారని, ఇంటిని ఎవరు కొనుగోలు.. అమ్మకాలు చేయడానికి వీల్లేదని సదరు ప్రకటన సారాంశం.అంతటితో ఆగకుండా సంతకాలు తీసుకున్న కాగితాలపై వంద రూపాయల స్టాంపులు అతికించి బాధితులు ఉంటున్న రాతిచెరువులోని ఇంటిని కబ్జా చేసేందుకు ప్రయత్నించారు.
 బాధితులు ప్రతిఘటించటంతో వడ్డీ వ్యాపారస్తుడు విషయాన్ని ఎమ్మెల్యే పీలా గోవింద్‌ దృష్టికి తీసుకెళ్లారు. అనకాపల్లి ఎమ్మెల్యే పీలా గోవింద్‌సత్యనారాయణ రమ్మంటున్నారని ఫైనాన్సర్‌ రమణతోపాటు మరో పదిమంది  వెళ్లి బాధితులను  గురువారం సాయంత్రం 4గంటల సమయంలో ఎమ్మెల్యే ఇంటికి తీసుకెళ్లారు.అక్కడ సుమారు మూడు గంటల పాటు ఒక గదిలో బాధితురాలు షేక్‌ ఆదంబీ, ఆమె కుమార్తె షేక్‌ అఫ్రోజ్‌ల పట్ల కొంతమంది వ్యక్తులు అసభ్యకరంగా ప్రవర్తించడమే కాకుండా నానా దుర్భాషలాడారు. మీ ఇంటిని మర్యాదగా అప్పగించండి లేకపోతే మీ అంతు చూస్తాం అంటూ ఎమ్మెల్యే పీలా గోవింద్, వడ్డీ వ్యాపారస్తుడు రమణలతో పాటు మరొక డాక్టర్‌ బెదిరించారని బాధితులు ఆరోపిస్తున్నారు.
 మీ ఇంటిని నేనే కబ్జా చేస్తాను ఏం చేస్తారో చూస్తాను అంటూ సాక్షాత్తు ఎమ్మెల్యే పీలా గోవింద్‌ సత్యనారాయణ తమను బెదిరించాడని బాధితులు సీపీకి ఫిర్యాదు చేసిన కాపీలో పేర్కొన్నారు. ఎమ్మెల్యే గోవింద్‌ నుంచి తమకు ప్రాణ హాని ఉందని ఆయన నుంచి తమకు  రక్షణ కల్పించి, న్యాయం చేయాలని నగర పోలీస్‌ కమిషనర్‌ టి.యోగానంద్‌ను కలసి ఫిర్యాదు చేసినట్లు వారు తెలిపారు.  కేసును జోన్‌–2, శాంతిభద్రతల డీసీపీ రవికుమార్‌ మూర్తికి అప్పగించినట్లు సీపీ యోగానంద్‌ తెలిపారు.
 


 వాస్తవ ఘటనల ఆధారంగా కాల్‌మనీ నేపథ్యంలో రూపొందిన సినిమా ‘పోలీస్‌ పవర్‌’. శివ జొన్నలగడ్డ హీరోగా నటిస్తూ, స్వీయ దర్శకత్వంలో నిర్మించిన ఈ చిత్రానికి ఆయనే సంగీత దర్శకుడు. గుద్దేటి బసవప్ప మేరు మరో నిర్మాత. ఈ చిత్రం ఆడియో వేడుకలో వికలాంగులు, చిన్న పిల్లలకు సైకిల్స్‌ పంపిణీ చేశారు. ‘‘ఈ చిత్రాన్ని త్వరలో విడుదల చేస్తాం’’ అని శివ జొన్నలగడ్డ అన్నారు. ఈ చిత్రానికి ఫైట్స్‌: అవినాష్, ఎగ్జిక్యూటివ్‌ నిర్మాత: వసంత.


 – పురంలో కొనసాగుతున్న వడ్డీ వ్యాపారుల దందా
 హిందూపురం అర్బన్‌ : పట్టణంలో వడ్డీ వ్యాపారుల దందా కొనసాగుతోంది. కొంతకాలం క్రితం కాల్‌మనీ వ్యవహారంపై పోలీసులు తీవ్రంగా పరిగణించడంతో అఘ్నాతంలోకి వెళ్లిన వడ్డీ వ్యాపారులు తిరిగి వచ్చి దందా యథావిధిగా కొనసాగిస్తున్నారు. రోజు, వారం, నెలసరి పద్ధతిలో వడ్డీలు చెల్లింపులతో రోజుకు రూ.40 లక్షలకు పైగా వ్యాపారం కొనసాగిస్తున్నారు.
 
 హిందూపురం పట్టణంలో వడ్డీ వ్యాపారులు సుమారు 40 మంది ఉన్నారు. వారు ప్రతిరోజు చిన్న వ్యాపారులు, కిరణాషాపుల వారికి పెద్దమొత్తాల్లో వడ్డీలకు అప్పు ఇచ్చి పెద్ద ఎత్తున వసూళ్లు చేస్తున్నారు. అవసరాలకు వడ్డీలు తీసుకున్న వ్యాపారులు కరువు పరిస్థితుల కారణంగా సరిగా వ్యాపారాలు జరగకపోవడంతో వడ్డీలు, అసలు చెల్లించలేకపోవడంతో వారి రుణాలు చక్రవడ్డీ రీతిలో పెరిగిపోతున్నాయి.
 
 వ్యాపారులే కాకుండా ఆర్టీసీ కార్మికులు, రైల్వే కార్మికులు కూడా కాల్‌మనీ ఉచ్చులో ఇరుక్కుపోయారు. ప్రతి నెలా వారికి వచ్చే వేతనాన్ని బ్యాంకుల్లో డ్రా చేసుకోలేకపోతున్నారు. వడ్డీ వ్యాపారులు వారి ఏటీఎం కార్డులు లాగేసుకుని ఆ నెల వడ్డీ, అసలు పట్టుకుని మిగిలిన మొత్తాన్ని వారికి ఇస్తున్నారు. చాలీచాలని మొత్తంతో ఇల్లు, పిల్లల చదువులు, ఇతర అవసరాలు తీర్చుకోలేక తిరిగి అప్పులు చేస్తూ కాల్‌మనీ చట్రంలో ఇరుక్కుపోయి వేధింపులకు గురవుతున్నారు.
 
 రోజువారి వడ్డీతో మొదలు
 వ్యాపారం రోజువారి వడ్డీతో మొదలవుతోంది. చిరు వ్యాపారులు, తోపుడుబండ్ల వారికి ఉదయం రూ.900 ఇస్తే సాయంత్రానికి రూ.వెయ్యి ఇవ్వాలి. ఇదే రీతిలో రూ.9 వేలు ఇస్తే రూ.10 వేలు ఇవ్వాల్సి ఉంటుంది. ఇలా వడ్డీ వ్యాపారం జోరుగా సాగిపోతోంది. పట్టణంలో ఉన్న వారికి తోడు ఇటీవల గుంటూరు ప్రాంతం నుంచి కొందరు వ్యాపారులు వచ్చి వడ్డీ వ్యాపారానికి దిగారు. టింబర్, ఐరన్‌ వ్యాపారులకు భారీ మొత్తంలో అప్పు ఇచ్చి వడ్డీ రూపంలో వారి లాభాలను పిండేస్తున్నారు.


 – జిల్లాలో మళ్లీ కాల్‌మనీ వేధింపులు
 – గుత్తిలో అప్పున్న ఓ వ్యక్తిని కిడ్నాప్‌ చేసిన ఓ ప్రజాప్రతినిధి కుమారుడు
 – పోలీసుల జోక్యంతో క్షేమంగా ఇంటికి
 – కరువు దెబ్బతో జీవనోపాధికి అప్పులు చేస్తున్న రైతులు, కూలీలు
 – కాల్‌మనీ వేధింపులకు మూల సమస్య...రైతు, డ్వాక్రా రుణాలు మాఫీ కాకపోవడమే
 – బయటపడేందుకు వడ్డీవ్యాపారులను ఆశ్రయిస్తున్న వైనం
 
 సాక్షిప్రతినిధి, అనంతపురం : జిల్లాలో మళ్లీ కాల్‌నాగులు బుసలు కొడుతున్నాయి. భారీ వడ్డీలకు అప్పులిచ్చి, వాటిని వసూలు చేసేందుకు వేధింపులకు దిగుతున్నారు. గతేడాది కృష్ణా జిల్లాలో తెరపైకి వచ్చిన 'కాల్‌మనీ' ఉదంతంతో రాష్ట్రవ్యాప్తంగా పోలీసులు తనిఖీలు చేశారు. ఇందులో భాగంగా జిల్లాలోనూ వడ్డీవ్యాపారుల నుంచి ప్రామిసరీ నోట్లు స్వాధీనం చేసుకున్నారు. ఈ చర్యలతో కొద్దికాలంపాటు మౌనంగా వ్యవహారాలు చక్కబెట్టిన కాల్‌మనీ మాఫియా మళ్లీ విజృంభిస్తోంది. సోమవారం వెలుగులోకి వచ్చిన ఓ ఘటనతో మళ్లీ  వేధింపులు ఉన్నాయనేది స్పష్టమవుతోంది.  అనంతపురం నగర పాలక వర్గంలోని ఓ ప్రజాప్రతినిధి తనయుడు గుత్తిలోని ఓ వ్యక్తికి రూ.25లక్షల అప్పు ఇచ్చాడు. ఈ డబ్బు చెల్లించలేదని సోమవారం సదరు వ్యక్తిని గుత్తిలో కిడ్నాప్‌ చేసి 'అనంత'కు తీసుకువచ్చారు. ఈ వ్యవహారం పోలీసులకు తెలియడంతో జోక్యం చేసుకుని ఆ వ్యక్తిని తిరిగి పంపేశారు.
 
     జిల్లాలో అసలే కరువు పరిస్థితి. పంటల సాగుకు  బ్యాంకుల నుంచి తీసుకున్న అప్పులు కూడా చెల్లించలేని పరిస్థితి. ఈ క్రమంలో పిల్లల చదువులు, జీవనోపాధికి అధికవడ్డీలతో ప్రైవేటు వ్యక్తుల వద్ద అప్పులు తీసుకుంటున్నారు.  సకాలంలో చెల్లించలేక వడ్డీవ్యాపారుల నుంచి వేధింపులు ఎదుర్కొంటున్నారు.  రైతులతో పాటు చిరువ్యాపారులు, ఉద్యోగులు..ఇలా అన్ని వర్గాల ప్రజలకు 'కాల్‌మనీ' కష్టాలు ఉన్నాయి.  
 
 వసూళ్లు ఇలాఽ...
 ఉదాహరణకు మైనుద్దీన్‌ అనే వ్యక్తికి రూ.10వేలు అవసరం వచ్చింది. వడ్డీ వ్యాపారిని ఆశ్రయించాడు.  రూ.10వేలు...పదివారాలకు చెల్లించేలా అప్పు ఇచ్చాడు. పదివారాలకు వెయ్యి రూపాయల వడ్డీ అని చెప్పి ఆ సొమ్మును ముందే పట్టుకున్నాడు. చేతికి రూ.9వేలు ఇచ్చాడు. అలాగే లక్ష్మి అనే మహిళకు రూ.10వేలు అవసరం కావడంతో వడ్డీవ్యాపారితో తీసుకుంది. వందకు రూ.10 చొప్పున పదివేలకు వారానికి రూ.వెయ్యి ఽవడ్డీ చెల్లించాలి. అసలు రెన్నెళ్లకు చెల్లిస్తారా, రెండేళ్లకు చెల్లిస్తారా అనేది వడ్డీవ్యాపారి పట్టించుకోడు. ప్రతివారం రూ.వెయ్యి వడ్డీ ఇస్తే అసలు ఎంతకాలమున్నా అడగడు. ఒకవేళ నాలుగువారాలు చెల్లించలేకపోతే ఈ నాలుగువేలు కూడా అసలులో జమ చేసుకుని వడ్డీసొమ్మును  రూ.1400కు పెంచుతాడు. జిల్లాలో ఇలా పేదల నడ్డి విరిచేలా వడ్డీ వసూలు చేస్తున్నారు.  
 
 'అనంత'లో వసూల్‌ రాయుళ్లు అధికం
     అధిక వడ్డీలు వసూలు చేసే దందాకు  కాల్‌మనీ మాఫియా పెట్టుకున్నపేరు 'ఫైనాన్స్‌'! ఈ దందా నడుపుతున్న వారిలో 'అనంత'లోని ద్వారకానగర్‌కు చెందిన ఓ నాయుడు, చౌదరి ఉన్నారు. రాంనగర్‌లో భారీమీసాలు, ఒంటిపై అరకిలో బంగారంతో దందా నడిపే వ్యక్తి, ఇదే ప్రాంతంలో మరో వ్యక్తి ఉన్నారు.  ధర్మవరంలో 'సినిమా' థియేటర్‌ నడుపుతున్న ఓ వ్యక్తి కాల్‌మనీతోనే ఆర్థికంగా ఎదిగారు. ఇప్పుడు కూడా వడ్డీవ్యాపారాన్ని ధర్మవరంతో పాటు ఇతర ప్రాంతాలకు విస్తరింపజేశారు. ఇదే మండలంలో ఓ వ్యక్తి ఇటీవల ఒకరిని కిడ్నాప్‌ చేసి రూ.11 లక్షల అప్పు ఉన్నట్లు బాండు రాయించుకున్నారు. అలాగే అనంతపురం సర్వజన ఆస్పత్రిలోని ఇద్దరు ఉద్యోగులు కూడా కాల్‌మనీ వ్యవహారం నడుపుతున్నారు.గుంతకల్లు, కదిరి, హిందూపురం, తాడిపత్రితో పాటు చాలా పట్టణాల్లో ఈ తరహా వేధింపులు అధికమవుతున్నాయి. అనంతపురంతో పాటు జిల్లా వ్యాప్తంగా పోలీసుస్టేషన్లకు వచ్చే ప్రతి పది కేసుల్లో కనీసం నాలుగు 'కాల్‌మనీ' వ్యవహారాలే కావడం గమనార్హం. ఈ క్రమంలో పోలీసులు మరోసారి ప్రత్యేకదృష్టి సారించాల్సి ఉంది.
 
  బాధితుల్లో అధికశాతం డ్వాక్రా మహిళలే
             జిల్లా వ్యాప్తంగా 52 వేల డ్వాక్రా సంఘాలలో 5.40 లక్షలమంది సభ్యులు ఉన్నారు. వీరు 2014 ఎన్నికల నాటికి  రూ.990 కోట్ల బకాయిలు ఉన్నారు. వీటన్నిటినీ మాఫీ చేస్తామని ఎన్నికల్లో చంద్రబాబు ప్రకటించారు. దీంతో ఒక్కో సంఘం 4–7 నెలల వరకూ రుణాలు చెల్లించలేదు. సీఎం అయిన తర్వాత చంద్రబాబు మాట తప్పారు. మాఫీ ప్రకటనను అటకెక్కించారు. దీంతో బకాయిలు చెల్లించాలని బ్యాంకర్లు నోటీసులు పంపి ఒత్తిడి పెంచారు.  తప్పని పరిస్థితుల్లో అధికవడ్డీలకు అప్పులు చేసి కాల్‌మనీ ఉచ్చులో చిక్కుకున్నారు. ఈ అప్పులను సకాలంలో చెల్లించకపోవడంతో వడ్డీవ్యాపారులు వేధింపులకు దిగారు. దీంతో తిరిగి మరో వ్యక్తి వద్ద అప్పులు చేయాల్సి వస్తోంది. ఇలా తాత్కాలిక ఉపశమనం కోసం మరోచోట అప్పు చేయడం మినహా ఈ ఊబి నుంచి బయటపడలేకపోతున్నారు. ఇదే పరిస్థితిని చాలామంది రైతులు కూడా ఎదుర్కొంటున్నారు.


 అప్పిచ్చిన వారి వేధింపులు తాళలేక ఓ వ్యక్తి కూకట్‌పల్లి పోలీస్‌స్టేషన్‌లో ఆత్మహత్యాయత్నం చేశాడు. తన వెంట తెచ్చుకున్న పురుగులమందు తాగి బలవన్మరణానికి పాల్పడబోయాడు. రౌడీలతో కలిసి గన్‌తో బెదిరించి ప్రాంసరీ నోట్లు, బ్లాంక్ చెక్కులు తీసుకున్నారని బాధితుడు శ్రీనివాసరావు ఆరోపిస్తూ పురుగుల మందు తాగాడు. దీంతో పోలీసులు హుటాహుటిన ఆసుపత్రికి తరలించారు. ఈ ఘటనపై పోలీసులు కేసు నమోదు చేసి దర్యాప్తు చేస్తున్నారు.
 
  


 కాల్‌మనీ పేరుతో సమాజాన్ని పట్టి పీడిస్తున్న అరాచక శక్తులపై ఓ పోలీస్ సాగించిన పోరాటం నేపథ్యంలో తెరకెక్కిన చిత్రం ‘పోలీస్ పవర్’. స్వీయదర్శకత్వంలో శివ  జొన్నలగడ్డ హీరోగా నటిస్తూ, రూపొందిస్తున్న ఈ చిత్రాన్ని బసవప్ప మేరు నిర్మించారు. నందినీ కపూర్, ధరణి కథానాయికలు. దర్శకుడు శివ మాట్లాడుతూ -‘‘ఈ సినిమాలోని పోరాట సన్నివేశాలు ప్రేక్షకులను ఆకట్టుకుంటాయి. ఏడు ఫైట్స్‌లో మూడు  పోరాట సన్నివేశాలను చిత్రీకరించాం’’ అన్నారు. ఈ చిత్రానికి కెమేరా: బీఎస్. కుమార్, ఫైట్స్: అవినాశ్.


 ► చాపకింద నీరులా వడ్డీ వ్యాపారం
 ► అనుమతి లేకుండానే కొనసాగింపు
 ► గుంటూరులో దంపతుల బలవన్మరణం
  
 రాష్ట్ర వ్యాప్తంగా సంచలనం సృష్టించిన విజయవాడ కాల్‌మనీ వ్యవహారం మర్చిపోకముందే గుంటూరులో మరో విషాదం చోటుచేసుకుంది. కాలకూట విషపు నాగుల కాటుకు దంపతులు బలవన్మరణం చెందడం నగరవాసుల్లో విచారం నింపింది. అధికారం మాటున కొందరు వడ్డీ వ్యాపారులు అరాచకాలకు పాల్పడుతున్నా ప్రభుత్వం కనీసంగా స్పందించకపోవడంపై సర్వత్రా ఆగ్రహావేశాలు వ్యక్తమవుతున్నాయి.- పట్నంబజారు(గుంటూరు)
  
  
 పట్నంబజారు (గుంటూరు): గుంటూరు నగరం కాల్‌మనీ వ్యాపారానికి పెద్ద అడ్డాగా మారింది. మూడు పువ్వులు...ఆరు కాయలుగా ఈ వ్యాపారం యథేచ్ఛగా సాగిపోతోంది. ఏ విధమైన అనుమతులు లేకుండానే కొందరు వడ్డీ వ్యాపారులు జనానికి కోట్లాది రూపాయలు అప్పులిచ్చి అంతకంటే ఎక్కువ మొత్తంలో వసూలు చేసుకుంటున్నారు. విజయవాడలో కాల్‌మనీ వ్యవహారం బయటకు వచ్చిన సమయంలో కొద్దిగా హడావుడి చేసిన పలు శాఖల అధికారులు ఆ తర్వాత మిన్నకుండిపోయారు. కొంతకాలం కిందట బ్రాడీపేటకు చెందిన చిరు వ్యాపారి శ్రీరామమూర్తి వడ్డీ వ్యాపారుల వేధింపులు తట్టుకోలేక ఆత్మహత్యకు పాల్పడ్డారు. ఇదే క్రమంలో బుధవారం కొత్తపేటకు చెందిన గండి నాగభూషణం, యామిని దంపతులు కాల్‌మనీ వ్యాపారుల వేధింపుల కారణంగానే ఆత్మహత్యకు పాల్పడ్డారని బంధువులు ఆరోపిస్తున్నారు.
 
 కొత్తపేటలోని చిన్న ఆంజనేయస్వామి ఆలయం సమీపంలో ఉండే నాగభూషణం (45) ఏలూరుబజారు, రైలుపేటల్లో జీడిపప్పు దుకాణాలు నిర్వహిస్తూ ఉండేవారు. వ్యాపారాభివృద్ధి కోసం అప్పులు చేశారు. వడ్డీలు అధికంగా వసూలుచేస్తున్నా కట్టుకుంటూ వస్తున్నారు. వ్యాపారంలో నష్టాలు రావడం, వడ్డీల కోసం వ్యాపారుల వేధింపులు అధికమవడంతో దంపతులు మంగళవారం అర్ధరాత్రి సమయంలో ఉరివేసుకుని ఆత్మహత్యకు పాల్పడ్డారు. వీరికి ఇద్దరు సంతానం. కుమారుడు ముఖేష్ ఇంటర్మీడియెట్, కుమార్తె మేఘన పదో తరగతి చదువుతున్నారు.
 
 
 పోలీసులకు వడ్డీ వ్యాపారులపై ఫిర్యాదుల వెల్లువ...
 ఇటీవల కాలంలో అర్బన్, రూరల్ జిల్లాల ఉన్నతాధికారులకు  వడ్డీ వ్యాపారుల వేధింపులపై పదుల సంఖ్యలో ఫిర్యాదులు అందాయి. ప్రతి సోమవారం నిర్వహించే పోలీసు గ్రీవెన్స్‌కు 80 శాతం ఫిర్యాదులు కేవలం వడ్డీ వ్యాపారుల బాధితుల నుంచే వస్తున్నాయంటే పరిస్థితి ఏ విధంగా ఉందో అర్థం చేసుకోవచ్చు. గుంటూరు, పరిసర ప్రాంతాల్లో రూ. 100కు రూ. 30 చొప్పున వడ్డీ వసూలు చేసే వ్యాపారులున్నారు. డొంకరోడ్డు, అరండల్‌పేట, బ్రాడీపేట, కొత్తపేట, పట్నంబజారు, లాలాపేట, ఆర్టీసీ బస్టాండ్, పరిసర ప్రాంతాలను కేంద్రాలుగా చేసుకుని అనుమతి లేని వడ్డీ వ్యాపార కార్యాలయాలు నిరాటంకంగా సాగుతున్నాయి.
 
 పోలీసులకు వీరి గురించి పూర్తిగా తెలిసినప్పటికీ పట్టీ పట్టనట్లు వ్యవహరిస్తున్నారనే విమర్శలు వెల్లువెత్తుతున్నాయి. గతంలో వడ్డీ వ్యాపారుల నివాసాలపై దాడులతో హడావుడి చేసిన అధికారులు ప్రస్తుతం మీనమేషాలు లెక్కిస్తున్నారని ఆరోపణలున్నాయి. అధికార పార్టీకి చెందిన వారే ఈ వడ్డీ వ్యాపారుల్లో ఎక్కువ మంది ఉన్నారు.
  
  
 ఆస్తుల తాకట్టు పెడితేనే....
 ప్రజల అవసరమే వడ్డీ వ్యాపారుల ఆయుధం. కేవలం వడ్డీ చెల్లిస్తామంటే అప్పులివ్వరు. స్థలాలు, ఇళ్లు, బంగారు నగలు తాకట్టు పెట్టుకొని మరీ డబ్బులిస్తారు. దీనికి తోడు నెలనెలా భరించలేని వడ్డీ ఉంటుంది. నెలల వ్యవధిలోనే వడ్డీని అసలుతో కలిపేసి చెల్లించాల్సిన మొత్తాన్ని వ్యాపారులు పెంచేస్తారు. అప్పు పెరిగిపోయి కట్టలేక వందలాది మంది తాము తాకట్టు పెట్టిన ఆస్తులను వడ్డీ వ్యాపారులకు రాసిన సంఘటనలు నగరంలో కోకొల్లలుగా ఉన్నాయి.


 అన్నీ మానవీయ కోణంతో ముడిపడిన కేసులే..
 పోలీసులు, న్యాయవాదులు సమన్వయంతో ముందుకెళ్లాలి
 కాల్‌మనీ వర్క్‌షాపులో పలువురు వక్తలు
  
 సాంఘిక దురాచారంగా మారిన కాల్‌మనీ కోరలు పీకాలని  విజయవాడ ఎ-కన్వెన్షన్ సెంటర్‌లో మంగళవారం జరిగిన కాల్‌మనీ వర్క్‌షాప్‌లో పలువురు పేర్కొన్నారు.  సామాజిక చైతన్యం, బ్యాంకర్ల పూర్తి సహకారం ఉన్నప్పుడే ఈ కేసులకు అడ్డుకట్ట పడుతుందన్నారు. పోలీసులు విస్తృత ప్రచారం చేయడంతోపాటు అవగాహన కల్పించడం మంచి పరిణామమన్నారు.


 రామచంద్రపురం(తూర్పుగోదావరి జిల్లా): అధిక వడ్డీలు వేసి, ఇచ్చిన అప్పు వెంటనే తీర్చాలని, లేకుంటే విలువైన స్థలం లాక్కుంటామని బెదిరించడమే కాకుండా, తనను లైంగిక వేధింపులకు గురి చేశారని ఒక మహిళ ఆవేదన వ్యక్తం చేసింది. బాధితురాలు, రామచంద్రపురం పోలీసుల తెలిపిన కథనం ప్రకారం.. తూర్పు గోదావరి జిల్లా రామచంద్రపురం పట్టణానికి చెందిన కృష్ణవేణి భర్త అప్పారావు ఉద్యోగరీత్యా విదేశాల్లో ఉంటున్నారు. ఆర్థిక ఇబ్బందుల రీత్యా 2010లో కుతుకులూరుకు చెందిన నల్లమిల్లి వీర్రెడ్డి నుంచి రూ.2 లక్షల అప్పు తీసుకున్నారు. ఇందుకోసం కత్తిపూడిలో ఉన్న స్థలం అస్వాధీన తనఖా పెట్టాలని షరతు విధించడంతో, దానికి సమ్మతించారు.
 
 ఈ నేపథ్యంలో రామచంద్రపురంలోని ఆమె తండ్రి ఇంటికి వీర్రెడ్డి, సత్తి శ్రీనివాసరెడ్డి, పులగం వీఆర్‌జీ కృష్ణారెడ్డి, సత్యనారాయణరెడ్డి, నల్లమిల్లి జనార్దనరెడ్డి వచ్చి ఆమె, భర్త అప్పారావు, వారి బంధువుల వద్ద కలిపి మొత్తం 10 ఖాళీ చెక్కులు, 10 ఖాళీ ప్రామిసరీ నోట్లు, 10 కాంటస్సా పేపర్లపై సంతకాలు తీసుకున్నారు. స్థలం ఒరిజినల్ డాక్యుమెంట్లు తీసుకుని 2010 జూన్‌లో తుని సబ్‌రిజిస్ట్రార్ కార్యాలయం వద్దకు అస్వాధీన తనఖా చేసుకునేందుకు పిలిపించారు. అయితే అస్వాధీన తనఖా కాకుండా కాగితాలను మార్చి పవర్ ఆఫ్ పట్టాగా రాయించుకున్నారని, దీనిపై అడగ్గా ఎటువంటి సమస్యా ఉండదని వీర్రెడ్డి నమ్మబలికారని కృష్ణవేణి చెప్పింది. నెలనెలా వడ్డీలు కడుతున్నా, రూ.40 లక్షలు వెంటనే కట్టాలని, లేకుంటే స్థలం స్వాధీనం చేసుకుని, వేరేవారికి అమ్ముతామంటూ బెదిరించారని వివరించింది. ఈ క్రమంలో నిందితులు అయిదుగురూ తన తండ్రిని, తనను దుర్భాషలాడి వేధించడం ప్రారంభించారన్నారు.
 
 తాము మోసపోయమని తెలుసుకుని వారి నుంచి బయటపడే ఉద్దేశ్యంతో విశాఖ జిల్లా గాజువాకలో ఉన్న ఇంటిపై అప్పు తీసుకుని రూ.17 లక్షల సెటిల్‌మెంట్‌కు వెళ్లగా రూ.12 లక్షలు తీసుకుని కొన్ని కాగితాలు మాత్రమే ఇచ్చారని, మిగిలినవి ఇవ్వలేదని, భూమి తనఖా రద్దు చేయలేదని కృష్ణవేణి చెప్పింది. మిగిలిన కాగితాలు ఇస్తామని చెప్పి సోమేశ్వరం గ్రామ శివార్లలోని లక్ష్మీగణపతి రైస్‌మిల్లు వద్దకు రమ్మని పిలిచి కూల్‌డ్రింక్‌లో మత్తుమందు కలిపి లైంగిక దాడికి యత్నించటమే కాకుండా దానిని వీడియో తీశారని, యూట్యూబ్, సోషల్ మీడియాలో పెడతామంటూ బెదిరిస్తున్నారని ఆమె వాపోయింది. బలవంతంగా అక్కడి నుంచి బయటపడినా వీడియోలతో భయపెడుతున్నారని విలపించింది.
 
 అప్పటి నుంచీ లైంగిక వేధింపులకు గురి చేయటం మొదలెట్టారని చెప్పింది. ఈ మేరకు గత ఏడాది డిసెంబర్‌లో పోలీసులకు ఫిర్యాదు చేసినా పట్టించుకోలేదని, చివరకు హైకోర్టును ఆశ్రయించానని వివరించింది. కోర్టు ఆదేశాల మేరకు పోలీసులు శనివారం కేసు నమోదు చేశారని తెలిపింది. పోలీసు ఉన్నతాధికారులు తనను కాపాడాలని, నిందితుల వద్ద ఉన్న వీడియోలు స్వాధీనం చేసుకోవాలని, అవి బయట పడితే తనకు చావు తప్ప వేరే శరణ్యం లేదని ఆవేదన వ్యక్తం చేసింది. ఈ వ్యవహారంపై బాధితురాలి ఫిర్యాదు, కోర్టు ఆదేశాల మేరకు కేసు నమోదు చేసినట్లు రామచంద్రపురం ఎస్సై ఎల్. శ్రీను నాయక్ తెలిపారు.


 ► కాల్‌మనీ కేసులో కీలక  నిందితుడు ఆరు నెలలుగా పరారీలోనే
 ► అధికార పార్టీ నేతల సహకారంతో అజ్ఙాతంలో
 ► శ్రీకాంత్ వద్ద అధికార పార్టీ నేతల పెట్టుబడులు
 ► తరచూ నగరానికి వస్తున్న శ్రీకాంత్!
 ► రాజకీయ ఒత్తిళ్లతో పట్టించుకోని పోలీసులు
 ► ఆరు నెలలు గడిచినా పురోగతి లేని కేసు
  
 సాక్షి, విజయవాడ : రాష్ట్రాన్ని కుదిపేసిన కాల్‌మనీ, సెక్స్‌రాకెట్ కేసు ప్రకంపనలు మళ్లీ నగరంలో మొదలయ్యాయి. కేసులో కీలక సూత్రధారి, ఏ-6 నిందితుడుగా ఉన్న వెనిగళ్ల శ్రీకాంత్ మినహా మిగిలిన వారందరూ అరెస్టయ్యారు. కాల్‌మనీ వ్యవహారం వెలుగులోకి వచ్చి ఆరు నెలలు గడిచిపోయినా కీలక నిందితుడుగా ఉన్న వెనిగళ్ల శ్రీకాంత్‌ను అరెస్ట్ చేసే దిశగా పోలీసులు కనీసం దృష్టి సారించకపోవటం గమన్హారం. ఈ క్రమంలో శ్రీకాంత్ పరారీలోనే ఉంటూ పాత వ్యవహారాలను చక్కబెట్టే పనుల్లో బిజీగా మారినట్లు సమాచారం. నాలుగేళ్ల కిత్రం రూ.20 లక్షల పెట్టుబడితో కాల్‌మనీ వ్యాపారం మొదలుపెట్టిన శ్రీకాంత్ కోట్ల రూపాయలకు ఎదగడం వెనుక కాల్‌మనీ దందాలు, దాడులతో పాటు అధికార పార్టీ ప్రజాప్రతినిధుల సహకారం, భారీ పెట్టుబడులు ఉన్నట్లు తెలుస్తోంది.
 
 
  రాష్ట్ర వ్యాప్తంగా కలకలం రేపిన ఘటన...
  గత ఏడాది డిసెంబర్ 10న కాల్‌మనీ ముఠా ఆగడాలు వెలుగులోకి వచ్చాయి. మొగల్రాజపురానికి చెందిన ఓ బాధిత మహిళ నేరుగా నగర పోలీస్ కమిషనర్‌కు ఫిర్యాదు చేయటంతో వీరి గుట్టు బట్టబయలైంది. 11న యలమంచలి రాము కార్యాలయంపై టాస్క్‌ఫోర్స్ అధికారులు దాడులు చేసిన క్రమంలో 25 వరకు సీడీలు (మహిళల్ని లోబర్చుకున్న వీడియోలు), 3 బస్తాల డాక్యుమెంట్లు, ప్రామిసరీ నోట్ల బయటపడ్డాయి. దీంతో 12 మందిపై నిర్భయ చట్టం కింద కేసులు నమోదు చేశారు. దశలవారీగా నిందితుల అరెస్టులు జరిగాయి. ఈ ఘటన రాష్ట్రంలో సంచలనం సృష్టించటమే కాదు..  దేశవ్యాప్తంగా చర్చనీయాంశమైంది.
 
 రాష్ట్ర శాసనసభను కుదిపేసింది. ఆరో నిందితుడుగా ఉన్న వెనిగళ్ల శ్రీకాంత్ తనకు స్నేహితుడు మాత్రమేనని, అతని లావాదేవీలతో సంబంధం లేదని పెనమలూరు ఎమ్మెల్యే బోడే ప్రసాద్ మీడియా సమావేశం పెట్టి మరీ వివరణ ఇచ్చుకోవటంతో పాటు అసెంబ్లీలోనూ దీనిపై వివరణ ఇచ్చుకున్నారు. ఈ పరిణామాల క్రమంలో కమిషనరేట్ పోలీసులు కేసును పూర్తిస్థాయిలో ఛేదించామనే రీతిలో హడావుడి చేశారు. ప్రత్యేక సెల్ ఏర్పాటు చేసి 1181 కాల్‌మనీ ఫిర్యాదులు తీసుకొని వాటిలో 1104 సెటిల్ చేసినట్లు ప్రకటించారు. అయితే ఇప్పటివరకు కీలక కేసులో నిందితుడిని మాత్రం గుర్తించి అరెస్టు చేయకపోవటం అనేక అనుమానాలకు తావిస్తోంది.
 
 
  కాపాడుతున్నది అధికార పార్టీ నేతలే!
 సిండికేట్ టీమ్‌లో సభ్యులందరూ ఒక్కో ప్రజాప్రతినిధి వద్ద పరపతి బాగా పెంచుకొని హవా సాగించారు. శ్రీకాంత్ కొంత దూకుడుగా ఉండి కాల్‌మనీ వ్యవహారాల్లో అనేక మందిపై దాడులు చేసినట్లు ఆరోపణలు ఉన్నాయి. నాలుగేళ్ల కిత్రం రూ.20 లక్షల పెట్టుబడితో కాల్‌మనీ వ్యాపారం మొదలుపెట్టిన శ్రీకాంత్ అంచెలంచెలుగా ఎదిగాడు. దీని వెనుక అధికార పార్టీ నేతల పూర్తి సహకారం ఉందనే ఆరోపణలు ఉన్నాయి. ముఖ్యంగా నగరానికి చెందిన ప్రజాప్రతినిధి, నగర సమీపంలోని నియోజకవర్గానికి చెందిన ఒక అధికార పార్టీ ప్రజాప్రతినిధి పెట్టుబడులు అతని వద్ద పెట్టినట్లు సమాచారం.
 
 వారి నగదు వ్యవహారం సెటిల్ అయ్యే వరకు శ్రీకాంత్‌ను దొరకకుండా కాపాడుతున్నారనే ఆరోపణ ఉంది. కాల్‌మనీ ముఠాకు రావాల్సిన బకాయిలు కూడా వసూలు చేసేందుకే అతన్ని పోలీసులు అరెస్టు చేయకుండా ప్రజాప్రతినిధులు జాగ్రత్తలు తీసుకుంటున్నారని సమాచారం. ఈ క్రమంలో పరారీలో ఉన్న శ్రీకాంత్ తరచూ విజయవాడ నగరానికి వస్తున్నట్లు తెలిసింది. గత వారంలో విజయవాడలో జరిగిన ఒక ఫంక్షన్‌కు కూడా శ్రీకాంత్ హాజరైనట్లు నిఘా వర్గాల కథనం.
  
  వివాదాలివీ...
 శ్రీకాంత్ పరారీ వెనుక అధికార పార్టీ ప్రజాప్రతినిధుల హస్తం ఉన్నట్లు తెలుస్తోంది. కేసులో 12 మంది నిందితులకు గాను శ్రీకాంత్ మినహా మిగిలిన వారంతా అరెస్టయ్యారు. ఘటన జరి గిన రోజు నుంచే శ్రీకాంత్ పరారీలో ఉన్నాడు. పోరంకి గ్రామానికి చెందిన శ్రీకాంత్‌పై పటమట పోలీస్ స్టేషన్‌లో సస్పెక్ట్ షీటు ఉంది. గతంలో పటమట ప్రాంతానికి చెందిన ఒక డాక్టర్‌తో స్నేహంగా ఉంటూ చివరకు అతని తమ్ముడిపైనే దాడి చేశాడు. దీనిపై పంచాయితీ పోలీస్‌స్టేషన్‌కు చేరడంతో ఉయ్యూరుకు చెందిన ఒక అధికార పార్టీ నేత, హైదరాబాద్‌లో హత్యకు గురైన రౌడీషీటర్ ద్వారా వివాదాన్ని సెటిల్ చేయించుకున్నాడు.
 
 దీంతో శ్రీకాంత్ అప్పట్లో ఒక టీడీపీ నేతకు అనుచరునిగా మారిపోయాడు. కాలక్రమంలో సదరు నేత ప్రజాప్రతినిధి కావటంతో శ్రీకాంత్ ఆగడాలు మొదలయ్యాయి. వెంటనే సిండికేట్ టీమ్‌లో కీలక వ్యక్తిగా మారాడు. ఈ క్రమంలోనే తాము బిల్డింగ్ అద్దెకు తీసుకున్న భవన యజమానిపై దాడి చేశాడు.
  
  


 ► కాల్‌మనీ ఉచ్చులో భారీ బిల్డర్ ముఠా నుంచి పెరిగిన ఒత్తిళ్లు
 ► కానూరులో మహిళకు వేధింపులు
 ► రూ.26 లక్షల అసలుకు రూ.67 లక్షలు వసూలు
 ► అంతటితో ఆగకుండా రూ.5 కోట్ల విలువైన స్థలం స్వాధీనం
 ► మళ్లీ నగరంలో దందా షురూ
  
 సాక్షి, విజయవాడ : రాజధాని నగరంలో కాల్‌మనీ ప్రకంపనలు మళ్లీ మొదలయ్యాయి. కాల్‌మనీ ముఠా సభ్యులు నగరంలోని భారీ రియల్టర్‌కు ఆర్థిక అవసరాలకు అప్పు ఉచ్చి ఆస్తుల స్వాధీనానికి యత్నించారు. అంతటితో ఆగక వేధింపులు కొనసాగిస్తున్నారు. మరోవైపు ఒక మహిళను కూడా ఈ ముఠా వేధించింది. అసలుకు రెండు రెట్లు వసూలు చేయటంతో పాటు కోట్ల రూపాయల విలువైన స్థలాన్ని స్వాధీనం చేసుకుంది. ఇంకా డబ్బు కట్టాలని వేధిస్తూ మహిళను మానసిక క్షోభకు గురిచేసింది. పర్యవసానంగా సదరు మహిళ ఆత్మహత్య చేసుకునే స్థితికి వెళ్లింది. చివరకు గత్యంతరం లేని పరిస్థితుల్లో విజయవాడ కమిషనరేట్ పోలీసుల్ని ఆశ్రయించింది. ఈ ఘటనతో మళ్లీ కాల్‌మనీ దందా కార్యకలాపాలు జోరుగా సాగుతున్నట్టు తేటతెల్లమైంది. ఇదిగాక వెలుగులోకి రాని ఘటనలు అనేకం ఉన్నాయి. తాజాగా బీజేపీ నేతలు విలేకర్ల సమావేశం ఏర్పాటు చేసి మరీ ఈ వ్యవహారాన్ని కదిలించారు. దీంతో మళ్లీ అనేక మంది కాల్‌మనీ ముఠా, బడా బాబుల ఆగడాలు వెలుగులోకి వస్తున్నాయి.
 
  మహిళ ఫిర్యాదుతో మరోసారి వెలుగులోకి...
 విజయవాడ నగరంలో కాల్‌మనీ ముఠా ఆగడాలు మళ్లీ ఒక్కొక్కటిగా వెలుగులోకి వస్తున్నాయి. ప్రస్తుతం పరిస్థితులు సద్దుమణగడంతో గతంలో అప్పులు ఇచ్చినవారు తిరిగి వేధింపులు సాగిస్తూ వసూళ్లు ప్రారంభించినట్లు తెలుస్తోంది. శుక్రవారం కానూరుకు చెందిన మహిళ చలసాని నిర్మల కాల్‌మనీ ముఠాపై ఫిర్యాదు చేయటంతో ఈ వ్యవహారం వెలుగులోకొచ్చింది. నిర్మల ఫిర్యాదులో తెలిపిన వివరాల ప్రకారం.. కానూరుకు చెందిన కాల్‌మనీ వ్యాపారి అన్నే శివనాగేశ్వరరావు వద్ద 2009లో అదే గ్రామంలో తనకున్న 2057 గజాల స్థలాన్ని తనఖా పెట్టి పిల్లల చదువు కోసం 26.90 లక్షలు అప్పుగా తీసుకున్నారు.
 
 దశలవారీగా 2014 సంవత్సరం కల్లా అసలు, వడ్డీ కలిపి రూ.67.88 లక్షలు చెల్లించారు. ఈ నేపథ్యంలో తాను తనఖా పెట్టిన స్థలం జీపీఏను రద్దు చేసి తన పేరుతో రిజిస్ట్రేషన్ చేయాల్సిందిగా కోరారు. అప్పటికే కాల్ ముఠా సభ్యుడు అన్నే శివనాగేశ్వరరావు ఆమెకు తెలియకుండా స్థలాన్ని వేరే వ్యక్తికి రిజిస్ట్రేషన్ చేశాడు. ప్రస్తుతం స్థలం బహిరంగ మార్కెట్ విలువ రూ.5 కోట్ల వరకు ఉంటుంది. ఈ విషయంపై గ్రామంలో పెద్ద మనుషుల వద్ద పంచాయితీ పెట్టినా న్యాయం జరగలేదు. దీంతో బాధితురాలైన నిర్మల కమిషనరేట్ పోలీసులను ఆశ్రయించారు. టాస్క్‌ఫోర్స్ పోలీసులు కేసును విచారిస్తున్నారు.
 
 
  కాల్ ఉచ్చులో మరో బడా బిల్డర్
 కాల్‌మనీ ముఠా ఉచ్చులో మరో బడా బిల్డర్ చిక్కుకున్నట్లు సమాచారం. కానూరు ప్రాంతానికి చెందిన ఒక బిల్డర్ అనతికాలంలో రియల్ ఎస్టేట్ రంగంలో బాగా గడించారు. తొలుత వ్యాపారానికి బయట నుంచి అప్పులు తెచ్చి విజయవాడ, విశాఖపట్నం, హైదరాబాద్‌లో పలు బహుళ అంతస్తుల సముదాయాలు పలు నిర్మించారు. ఈ క్రమంలో భారీగా సంపాదించినట్లు సమాచారం. ఒక దశలో ఆయనకు పెట్టుబడులు పెట్టేందుకు అనేకమంది ముందుకొచ్చారు. అదే క్రమంలో వ్యాపారంలో తాత్కాలిక సర్దుబాట్ల కోసం కాల్‌మనీ కేసు నిందితుల నుంచి గతంలో కొంత మొత్తం అప్పుగా తీసుకున్నారు. దీనికి నగరంతో పాటు ఇతర ప్రాంతాల్లో ఉన్న పలు ఆస్తుల్ని తనఖా పెట్టి జీపీఏ రిజిస్ట్రేషన్ చేశారు. ఇప్పుడు బకాయిని అసలు కంటే నాలుగు రెట్లు పెంచి మొత్తం ఆస్తుల్ని రిజిస్ట్రేషన్ చేసుకోవటానికి కాల్‌మనీ ముఠా యత్నిస్తున్నట్లు తెలిసింది.
 
 వేధిస్తున్న ముఠా సభ్యులు గతంలో కాల్‌మనీ కేసులో అరెస్ట్ అయిన వ్యక్తులని సమాచారం. దీనికోసం బౌన్సర్‌లను వినియోగించి బిల్డర్‌పై దౌర్జన్యాలకు పాల్పడుతున్నట్లు తెలిసింది.  మరోవైపు ఈ కేసులో కాల్‌మనీ కేసులో పరారీలో ఉన్న వ్యక్తి కీలక పాత్ర పోషించినట్లు సమాచారం. పరారీలో ఉన్న వెనిగళ్ల శ్రీకాంత్ ద్వారా ఈ అప్పులు తీసుకున్నట్లు తెలిసింది. వెనిగళ్ల శ్రీకాంత్ గతంలో ఎమ్మెల్యే బోడే ప్రసాద్‌తో కలిసి విదేశాలకు వెళ్లాడని విస్తృత ప్రచారం జరిగింది. పోలీసులు మాత్రం ఈ కీలక కేసులోని నిందితుడైన వెనిగళ్ల శ్రీకాంత్ ఆచూకీని మాత్రం ఇంతవరకు కనిపెట్టలేకపోయారు. రాజకీయంగా పరపతి ఉన్న వెనిగళ్ల శ్రీకాంత్ పరారీ వెనుక అధికార పార్టీ నేతల కీలక సహకారం ఉందనేది బహిరంగ రహస్యం.


 ► విజయవాడలో కాల్‌మనీ వ్యాపారి రవికాంత్ ఆగడాలు
 ► మహిళల వద్ద అప్పు తీసుకుని ఎగ్గొడుతున్న వైనం
 ► తిరిగి చెల్లించాలని అడిగితే బెదిరింపులు.. టీడీపీ నేతల అండ
 ► కృష్ణలంకలో మహిళల ఆందోళన
 విజయవాడ: కృష్ణాజిల్లా విజయవాడలో మళ్లీ కాల్ మనీ వ్యవహారం కలకలం సృష్టించింది. ఓ మహిళను లైంగికంగా వేధిస్తున్న కేసులో టీడీపీకి చెందిన కాల్మనీ వ్యాపారి మండవ రవికాంత్‌ను పోలీసులు అరెస్ట్ చేశారు. రవికాంత్ ఆరాచకాలపై మహిళా సంఘాలు శనివారం ఆందోళన చేపట్టాయి. కృష్ణలంకలో రవికాంత్ ఇంటి ఎదుట ఆయనకు వ్యతిరేకంగా కొందరు మహిళలు ఆందోళన ఉధృతం చేస్తున్నారు. పోలీసుల కథనం ప్రకారం.. రవికాంత్‌కు టీడీపీ నేతలతో సన్నిహిత సంబంధాలున్నాయి. దీంతో తన పలుకుబడిని వాడి రెండు రూపాయల వడ్డీ చెల్లిస్తానని మహిళల వద్ద డబ్బులు వసూలు చేసేవాడు. ఇలా దాదాపు కోటి రూపాయల వరకు వసూలు చేసినట్లు తెలుస్తోంది.
 ఆ డబ్బును కాల్మనీలో పెట్టుబడిగా పెట్టి వడ్డీ వ్యాపారం చేస్తున్నాడు. కాల్ మనీ కేసుకు సంబంధించిన కేసులో అరెస్టయ్యాడు. 10 మంది మహిళలను లైంగికంగా వేధిస్తున్నాడని ఆరోపణలున్నట్లు పోలీసులు వెల్లడించారు. రవికాంత్ కు ఇచ్చిన డబ్బు తిరిగివ్వాలని అడిగిన మహిళలను బెదిరించేవాడు. డబ్బు అడిగితే వారి అశ్లీల చిత్రాలను పెన్ డ్రైవ్, డీవీడీలలో సేవ్ చేశానని, వాటిని బయటపెడతానని తరచుగా వేధింపులకు గురిచేసేవాడని మహిళలు తమ బాధను చెప్పుకొన్నారు. రవికాంత్ కు అండగా ఉన్న టీడీపీ ప్రజా ప్రతినిధులపై చర్యలు తీసుకోవాలని డిమాండ్ చేస్తున్నారు.


 ► అడుగడుగునా నేరాలు
 ► మొన్న దేశాన్ని కుదిపేసిన కాల్‌మనీ వ్యవహారం
 ► నిన్న చర్చి ఫాదర్‌పై దందా
 ►  నేడు వివాహితపై వెలుగుచూసిన అకృత్యాలు
  
 విజయవాడ కమిషనరేట్ పరిధిలో బ్లాక్‌మెయిల్ నేరాలు, అకృత్యాలు పెచ్చుమీరుతున్నాయి. కొంతమంది నగ్న చిత్రాలు, వీడియోలతో బెదిరించి లక్షలు, కోట్లలో నగదు వసూళ్లకు పాల్పడుతున్నారు. మరికొందరు.. మహిళలపై అకృత్యాలకు తెగబడుతున్నారు. ఇటీవలే వెలుగుచూసిన చర్చి ఫాదర్ బ్లాక్‌మెయిల్ ఘటన తీవ్ర చర్చనీయాంశమైంది. దేశవ్యాప్తంగా చర్చనీయాంశమైన కాల్‌మనీ వ్యవహారాన్ని మరువకముందే.. సింగ్‌నగర్ పరిధిలోని రామలింగేశ్వనగర్‌లో మరో మహిళపై అకృత్యం ఉదంతం తాజాగా వెలుగులోకొచ్చింది.
  
  
 సాక్షి ప్రతినిధి, విజయవాడ/ సాక్షి, విజయవాడ : రాజధాని నగరంలో నేర ప్రవృత్తి పెరిగిపోతోంది. సంచలనం రేపిన కాల్‌మనీ వ్యవహారం నుంచి పేరెన్నికగన్న చర్చి ఫాదర్ వ్యవహారం వరకు నగరంలో నేరాలు రకారకాల తీరులో బయటపడుతున్నాయి. చర్చి ఫాదర్ ఘటనలో నగ్న చిత్రాలు, వీడియోలు చూపించి బ్లాక్‌మెయిల్ చేసి కోట్ల రూపాయల వసూళ్లకు పాల్పడిన వ్యక్తులను పోలీసులు ఇటీవల అరెస్టు చేసి కోర్టుకు పంపించారు. వారిపై ప్రత్యేక విచారణ కోసం కోర్టు పోలీసు కస్టడీకి ఇచ్చింది. ఈ ఘటనలో అనేక కోణాలు కూడా వెలుగు చూసిన విషయం తెలిసిందే.
 
 వివాహితపై టీడీపీ చోటా నేత లైంగిక దోపిడీ
 తాజాగా సింగ్‌నగర్ పరిధిలోని రామలింగేశ్వనగర్‌లో వెలుగుచూసిన ఘటన నగరంలో పెచ్చుమీరుతున్న నేరప్రవృత్తికి మరో ఉదాహరణ. పోలీసులు తెలిపిన వివరాల ప్రకారం... భర్తతో విభేదాల నేపథ్యంలో ఒక వివాహిత రామలింగేశ్వనగర్‌లో తన తల్లిదండ్రులతో కలిసి నివసిస్తోంది. పక్క ఇంట్లో మండవ రవికాంత్ అనే టీడీపీ చోటా నేత, రియల్టర్ తన రెండో భార్య శ్రీదేవితో కలిసి ఉంటున్నాడు. అతని మొదటి భార్య కృష్ణలంకలో నివసిస్తున్నారు. ఇంటి పక్కన నివసించే వివాహితపై కన్నేసిన రవికాంత్ ఆమెను లోబర్చుకునేందుకు తన రెండో భార్య సహకారం కోరాడు. తోటి స్త్రీ అన్న సంగతి మరచి ఆమె అతనికి సహకరించింది.
 
 వివాహితతో స్నేహం పెంచుకుని, బాత్‌రూమ్‌లో స్నానం చేస్తున్న నగ్న వీడియోలను మొబైల్‌లో చిత్రీకరించింది. వాటి ఆధారంగా బెదిరింపులకు దిగింది. లేని పక్షంలో వీడియో ఇంటర్నెట్‌లో పెట్టి కుటుంబం పరువు తీస్తానని, మీ కుటుంబ సభ్యుల్ని చంపి నాగాయలంకలో పడేస్తానని బెదిరించారు. ఈ నేపథ్యంలో నిందితుడు ఆమెను లొంగదీసుకుని పలుమార్లు లైంగిక దాడికి పాల్పడ్డాడు. అంతటితో ఆగక ఆమెను నగ్నంగా చేసి మెడకు బెల్టు కట్టి మోకాళ్లపై నడిపించి పైశాచిక ఆనందం పొందేవారు.
 
 
 లక్షల్లో నగదు వసూలు...
 మరోపక్క లక్షల్లో నగదు కూడా వసూలు చేశారు. గత ఏడాది ఫిబ్రవరి 25న సదరు వివాహిత వద్ద 38 గ్రాముల ఆభరణాలు తీసుకున్నారు. అంతేగాక తన తండ్రి రిటైరైతే వచ్చిన రూ.6 లక్షల నగదు కూడా వడ్డీ పేరుతో తీసుకున్నారు. బయటికి చెబితే కుటుంబసభ్యులు, పిల్లలపై యాసిడ్ పోసి చంపుతామని బెదిరించి, కులదూషణకు పాల్పడ్డారు. అంతేగాక మరింత బరితెగించి ఆమెను వేరొకరికి అమ్మే ప్రయత్నం చేస్తుండగా తెలుసుకున్న వివాహిత ఇంటినుంచి పారిపోయి కొంతకాలం బంధువుల ఇంట్లో ఉంది. చివరికి వివాహిత తల్లిదండ్రులు ఆమెను వెతికి తెచ్చి అన్ని విషయాలు తెలుసుకుని రవికాంత్‌పై, అతని భార్య శ్రీదేవిపై పోలీసులకు ఫిర్యాదు చేశారు. కేసు నమోదు చేసిన అజిత్‌సింగ్‌నగర్ పోలీసులు విచారణ చేపట్టారు. ఏసీపీ సత్యానందం ఆధ్వర్యంలో నిందితులను మంగళవారం అరెస్టు చేశారు. వారినుంచి వీడియోలు తీసిన మొబైల్, ట్యాబ్‌లను సీజ్ చేసి ఫోరెన్సిక్ ల్యాబ్‌కు పంపారు.
 
 
 పోలీసులకు సవాలే...
 ఒకవైపు నగదు వసూళ్లు, మరోవైపు లైంగిక దాడులకు పాల్పడటం వంటి నేరాలకు పాల్పడే ముఠాలు నగరంలో పెరుగుతుండటం పోలీసులకు సవాలుగా మారింది. ఫాదర్‌ను బ్లాక్‌మెయిల్ చేసిన వారిలో ఇప్పటికే ఐదుగురు అరెస్ట్ కావడంతో ఇంకా ఎవరైనా ఈ ముఠాకు సంబంధించిన వారు నగరంలో ఉన్నారేమోననే కోణంలోనూ పోలీసుల దర్యాప్తు సాగుతోంది. కాల్‌మనీ వ్యవహారంలోనూ వేల సంఖ్యలోనూ ఫిర్యాదులు నమోదైన విషయం తెలిసిందే. మరి ఇలాంటి నేరాలకు చెక్ పెట్టేందుకు నగర పోలీసు అధికారులు ఎలాంటి చర్యలు తీసుకుంటారో వేచిచూడాలి


 ►నాకు అర్జెంట్ పని ఉంది. ఓ రూ.50 వేలు ఇవ్వు. మళ్లీ ఇస్తా!
 ► నువ్వు కాల్‌మనీ వ్యాపారం చేస్తున్నావంట.. ఒక్కసారి నా వద్దకు వచ్చిపో!!
 ►మీరిద్దరూ ఒకరిపై ఒకరు కేసులు పెట్టుకున్నారు. కోర్టుల చుట్టూ ఎక్కడ తిరుగుతారు.. రండి హోటల్‌లో మాట్లాడుకుందాం!!! 
 ► ఇదీ ఓ సీఐ వ్యవహారం
  
  
  సాక్షి ప్రతినిధి, కర్నూలు:  స్టేషన్‌కు వచ్చిన ఫిర్యాదులు తీసుకోకపోవడం.. కేవలం సెటిల్‌మెంట్లతో వ్యవహారాలు చక్కబెట్టడం.. తన కింద పనిచేస్తున్న ఎస్‌ఐతో కలిసి ఇసుక దందాకు తెగబడటం.. ఆ సీఐ బాగోతం ఎంత చెప్పినా తక్కువే. అధిక వడ్డీ వ్యాపారం చేస్తున్న కొద్ది మంది వ్యాపారులను పిలిపించి కాల్‌మనీ పేరుతో బెదిరించి సుమారు రూ.10లక్షల నుంచి రూ.12 లక్షలు వసూలు చేశారు. ఇదే డబ్బుతో కొద్దిరోజుల క్రితం కారు కొన్న సదరు సీఐ ఎంచక్కా షికారు చేస్తున్నారని తెలుస్తోంది. మొత్తం మీద కర్నూలు రెవెన్యూ డివిజన్ పరిధిలో ఉన్న ఆ సీఐ వ్యవహారం కాస్తా ఇప్పుడు డిపార్టుమెంట్‌లో చర్చనీయాంశమయింది. కొద్ది రోజుల క్రితం అవినీతి ఆరోపణలతో ఏకంగా నలుగురు సీఐలపై వేటు పడింది. ఇదే కోవలో ఈయనను కూడా తప్పిస్తారా? లేదో తేలాల్సి ఉంది.
 
 బంగారు గొలుసు మాయం
 కొద్దిరోజుల క్రితం సదరు సీఐ స్టేషన్ పరిధిలో ఒక బంగారు గొలుసు చోరీ అయింది. దీనిపై కేసు కూడా నమోదయింది. ఈ బంగారు గొలుసును దొంగలించిన దొంగను పట్టుకున్నారు కూడా. అయితే.. ఇప్పటి వరకు రికవరీ అయినట్టు ఎక్కడా చూపలేదు. ఎక్కడికెళ్లిందోనని ఆరా తీస్తే.. సీఐ గారి ఇంట్లో ప్రత్యక్షమయిందని తెలిసింది. ఈ వ్యవహారం స్టేషన్‌లో ఉన్న పోలీసులందరికీ తెలిసినా ఎవ్వరూ కిక్కురుమనలేని పరిస్థితి. అంతేకాకుండా ఎప్పుడు ఎవ్వరి మీద విరుచుకుపడతారో తెలియని ఆందోళన పరిస్థితులల్లో కిందిస్థాయి సిబ్బంది కూడా ఇబ్బందిగా కాలం వెళ్లదీస్తున్నారు.
 
 తన కింద పనిచేసే ఒక ఎస్‌ఐతో కలిసి మొన్నటి వరకు ఇసుక దందాను ప్రోత్సహించారు. అయితే, ఇప్పుడు ఉచిత ఇసుక విధానం అమల్లోకి రానుండటంతో.. ఇసుక ట్రాక్టర్లపైన టార్పాలిన్లు కప్పలేదనే సాకుతో వేధింపులకు గురిచేస్తున్నట్టు తెలుస్తోంది.


 పురుగు మందు తాగి చిరువ్యాపారి ఆత్మహత్య
 గుంటూరు (పట్నంబజారు): కాల్‌మనీ కోరలకు మరో జీవితం బలైపోయింది. తీసుకున్న సొమ్ముకు నాలుగింతలు అధికంగా చెల్లించినా, వేధింపులు ఆగకపోవడంతో ఆఖరికి ఆత్మహత్యే శరణ్యమనుకున్నాడు.  పట్టాభిపురం పోలీసులు, మృతుడి కుమారుడు నాగరాజకుమార్ తెలిపిన వివరాల ప్రకారం.. గుంటూరు నగరానికి చెందిన మద్ది శ్రీరామమూర్తి(62)కి చిన్న బడ్డీ కొట్టు జీవనాధారం.అతను ఏడాదిన్నర కిందట శ్యామల అనే మహిళ వద్ద రూ. లక్ష అప్పుగా తీసుకున్నాడు. రోజుకి రూ.వెయ్యి వడ్డీ కడుతున్నాడు.
 
 ఆమెతోపాటు మరో మహిళ నాగలక్ష్మి వద్ద కూడా రూ.1.30లక్షలు తీసుకోగా అధిక వడ్డీలు వేసి ఆయన పాడిన రూ. 2 లక్షల చీటీ డబ్బులు తీసుకుని ఇంకా రూ. 30 వేలు ఇవ్వాలని వే ధింపులకు దిగుతున్నారని బంధువులు తెలిపారు. వేధింపులు అధికమవడంతో శ్రీరామమూర్తి శుక్రవారం సాయంత్రం దుకాణంలోనే పురుగు మందు తాగాడు. స్థానికులు ప్రభుత్వాసుపత్రికి తరలించగా అప్పటికే మృతి చెందినట్లు వైద్యులు ధ్రువీకరించారు. శ్రీరామమూర్తి సూసైడ్ నోట్ శనివారం వెలుగులోకి తీసుకురావడంతో విషయం బయటకు పొక్కింది. పోలీసులు ఎఫ్‌ఐఆర్ నమోదు చేశారు. శ్రీరామమూర్తి మృతి కేసులో అన్ని కోణాల్లో దర్యాప్తు చేస్తున్నట్లు పట్టాభిపురం ఎస్‌హెచ్‌వో శేషగిరిరావు చెప్పారు.


 హైదరాబాద్: ఒక పార్టీ గుర్తుపై గెలిచి మరో పార్టీకి వెళ్లడం అనైతికమని, నేతలు ఏం ఆశించి అధికార పార్టీలోకి వెళ్లారో చెప్పాలని సీపీఎం పొలిట్ బ్యూరో సభ్యుడు బీవీ రాఘవులు డిమాండ్ చేశారు. రాష్ట్రంలో ప్రతిపక్షాలు లేకుండా చేయాలని అధికార పార్టీ భావిస్తోందని ఆయన విమర్శించారు.
 అధికారంలో ఉన్న తరువాత ప్రతిపక్ష ఎమ్మెల్యేలను కొనడం చంద్రబాబుకు తగదని రాఘవులు హితవు పలికారు. ఓటుకు కోట్ల కేసు, కాల్మనీ కేసులు ఎందుకు మూత పడ్డాయో చెప్పాలని ఆయన డిమాండ్ చేశారు. కాల్మనీ కేసులో టీడీపీ నేతలు దొంగల్లా దొరికారు కాబట్టి ప్రభుత్వం స్పందించాలన్నారు. రాష్ట్రంలో కరువు, ఆర్థిక పరిస్థితిపై అసెంబ్లీలో ప్రభుత్వం సమాధానం చెప్పాలన్నారు. రాజధాని పేరుతో ఒకే దగ్గర నిధులు కెటాయించడం సరికాదని రాఘవులు తెలిపారు.
 
  


 హైదరాబాద్‌: వడ్డీ డబ్బులు చెల్లించలేదని చైతన్యపురిలోని ఓ ఇంటిపై కొంతమంది వ్యక్తులు దాడికి దిగారు. వివరాలు..దిల్‌సుఖ్‌నగర్ పరిధిలోని చైతన్యపురికి చెందిన కృష్ణ అనే వ్యక్తి స్థానికంగా ఉన్న కిరణ్ అలియాస్ లడ్డూ నుంచి రూ.4 లక్షలు అప్పు తీసుకున్నాడు. దీనిపై చక్రవడ్డీ, బారువడ్డీ చేసి కిరణ్ సుమారు రూ.17 లక్షల వరకు చెక్కులు తీసుకున్నాడు.
  
 అప్పు తీసుకున్న కృష్ణ ఇళ్లు ఖాళీ చేసి వేరొక చోట ఉంటున్నారు. వడ్డీ కట్టలేదని కిరణ్ తన అనుచరులతో కలిసి శుక్రవారం, కృష్ణ సోదరుడు శ్రీనివాస్‌తో సహా కుటుంబసభ్యులపై దాడికి పాల్పడ్డాడు. ఈ ఘటనలో పార్వతి, బాలముని అనే ఇద్దరు మహిళలకు గాయాలయ్యాయి. బాధితులు చైతన్యపురి పోలీస్‌స్టేషన్‌లో ఫిర్యాదు చేశారు. కేసు నమోదు చేసుకుని దర్యాప్తు చేస్తున్నారు.


 ♦ రైతుల పేరుతో బడా వ్యాపారుల దందా
 ♦ బ్యాంకు అకౌంట్లు.. రూ. కోట్లలో లావాదేవీలు
 ♦ ఐటీ నోటీసులతో లబోదిబోమంటున్న అన్నదాతలు
 తాండూరు: కాల్‌మనీ తరహాలో రంగారెడ్డి జిల్లా తాండూరులో పత్తి స్కాం సర్వత్రా చర్చనీయాంశంగా మారింది. రైతుల పేరుతో కొందరు బడా వ్యాపారులు కోట్ల రూపాయలు ఆర్థిక లావాదేవీలు సాగించడం కలకలం రేపుతున్నది. ఇందుకు సంబంధించి ఆదాయపన్ను (ఐటీ) శాఖ నుంచి నోటీసులు జారీ అవుతుండటంతో రైతులు లబోదిబోమంటున్నారు. రైతులను బురిడీ కొట్టించి సుమారు రూ.12 కోట్ల వరకు ‘పత్తి’ స్కాం కు పాల్పడినట్లు అంచనా.  ఆదాయపన్ను ఎగవే సేందుకు వ్యాపారులు రైతులపేరుతో ఎవరికీ అనుమానం రాకుండా పత్తి కొనుగోలు చేపట్టారు. మార్కెటింగ్ అధికారుల పర్యవేక్షణ లేకపోవడం, రైతుల బలహీనతలు వ్యాపారుల దందాకు వరంగా మారాయి.
  2.87 లక్షల పత్తి కొనుగోళ్లు
 గతేడాది సుమారు రూ.2.87 లక్షల క్వింటాళ్ల పత్తికొనుగోళ్లు జరిగాయి. ఇందులో సుమారు రూ.2.9 లక్షల క్వింటాళ్లు సీసీఐ సేకరించింది. మిగతా ప్రైవేట్ వ్యాపారులు కొనుగోలు చేశారు. క్వింటాలు ధర రూ.4,050 ఉంది.
  దళారులు ఇలా..
 గ్రామాల్లో దళారులు రైతుల నుంచి రూ.3,500-రూ.3,600 ధర చొప్పున పత్తిని కొనుగోలు చేశారు. అక్కడి నుంచి బడా వ్యా పారులకు క్వింటాలుకు సుమారు రూ.100 వరకు గిట్టుబాటు చూసుకొని విక్రయిం చారు. వ్యాపారులుగా కూడా రైతుల నుంచి తక్కువ ధరకు నేరుగా కొనుగోళ్లు చేసి వ్యాపారులు తెలివిగా వ్యవహరించారు.
  మద్దతు ధరకు విక్రయం
 దళారులతోపాటు తాము నేరుగా కొనుగోలు చేసిన పత్తిని రైతుల పేరుతో మద్దతుధరకు విక్రయించారని సమాచారం. ఇందుకుగాను ఎవరికీ అనుమానం రాకుండా రైతుల పేరు తో తాండూరు, బషీరాబాద్ మండలాల్లో బ్యాంకు ఖాతాలు తెరిచారు. బ్యాంకు ఖాతా, చెక్‌బుక్‌లను వ్యాపారులు తమ వద్దనే పెట్టుకున్నారు. అడిగితే పంట పెట్టుబడులకు అప్పులు ఇవ్వరనే భయంతో రైతులు మిన్నకుండి పోయారని తెలుస్తోంది. దీనిని వ్యాపారలు ఆసరాగా చేసుకున్నారు.
  రైతు ఖాతాల  నుంచి లావాదేవీలు?
 ఒక్కొక్క రైతు బ్యాంకు ఖాతా నుంచి రూ.40 లక్షల నుంచి రూ.కోటి వరకు దశలవారీగా ఆర్థిక లావాదేవీలు జరుగుతుండటంతో ఆదాయపన్ను శాఖ తాఖీదులు జారీ చేసింది. దీంతో వ్యాపారుల దందా వెలుగు చూసింది.
  ముందుకురాని రైతన్నలు..
 వ్యాపారులు పరోక్షంగా రైతులకు హెచ్చరి కలు జారీ చేస్తుండడంతో నోటీసుల విషయాన్ని కూడా చెప్పడానికి రైతులు జంకుతున్నారు. మొదటి నుంచి వ్యాపారితో సంబంధాలు ఉన్నాయని, ఇప్పుడు ఏమైనా చెబితే   సమస్య వచ్చినప్పుడు తమ వెంట ఎవరూ రారని రైతులు ఆందోళన చెందుతున్నారు. బషీరాబాద్ మండలంలోని ఐదు గ్రామాల్లో 40 మందికి పైగా రైతులకు ఐటీ నోటీసులు జారీ అయ్యాయి. తీగలాగితే డొంక కదిలి నట్టు ఐటీ నోటీసులతో పత్తి అక్రమ వ్యవహారాలు బయటపడుతున్నాయి. ఉన్నతస్థాయిలో పూర్తిస్థాయి విచారణ జరిపితే వాస్తవాలు వెలుగులోకి వచ్చే అవకాశముంది.
  అక్రమం సాగిందిలా..
 ఉదాహరణకు ఒక రైతు నుంచి వ్యాపారి/దళారీ పత్తిని సేకరించాడు. నాణ్యతాప్రమాణాల సాకుతో క్వింటాలుకు సుమారు రూ.3,600 వరకు కొనుగోలు చేశారు. ఈ పత్తినే రూ.4,050 మద్దతు ధరకు వ్యాపారి రైతు పేరుతో విక్రయించాడు. బ్యాంకు ఖాతా, చెక్‌బుక్‌లు తనవద్దే పెట్టుకున్నందున ఆన్‌లైన్‌లో డబ్బు జమ కాగానే వ్యాపారులు డ్రా చేసుకుంటున్నారు. క్వింటాలుకు సుమారు రూ.450 వరకు వ్యాపారి సొమ్ము చేసుకున్నాడు. మిగులు  రూ.200 వరకు వెన్నుదన్నుగా నిలిచిన అధికారులకు ముట్టచెప్పాడు. ఇటు రైతులను.. అటు ప్రభుత్వాదాయానికి బడా వ్యాపారులు ‘సక్రమంగా’ గండి పెట్టడం గమనార్హం.


 ఇప్పటి వరకు 1,003 ఫిర్యాదులు
 ఇంకా వస్తూనే ఉన్న బాధితులు
 ఫిర్యాదుల ప్రత్యేక సెల్ కొనసాగింపు యోచన
  
 విజయవాడ సిటీ :‘కాల్’ మనీ విషయం విలయంలో ప్రజలు ఇంకా విలవిలలాడుతూనే ఉన్నారు. అవసరమో.. వ్యసనం కోసమో.. కారణమేదైనా ఒక్కసారి కాల్‌మనీ బారిన పడితే జీవితాంతం వెంటాడుతూనే ఉంటుంది. కమిషనరేట్‌కు వస్తున్న బాధితులు చెపుతున్న కథనాలే ఇందుకు నిదర్శనం. ఏళ్ల తరబడి కడుతున్నా.. వడ్డీ జమవుతుందే తప్ప అసలు తీరడం లేదని ఆవేదన చెందుతున్నారు. ఈ అక్రమ వడ్డీ వ్యాపారం కనిపించకుండా చేయాలనే అభిప్రాయంతో ఉన్న కమిషనరేట్ పెద్దలు ప్రత్యేక విభాగాన్ని(కాల్‌మనీ సెల్) కొనసాగించాలనుకుంటున్నారు. ఇదే సమయంలో పోలీసు స్టేషన్లలో కాల్‌మనీ వ్యాపారులకు అనుకూలంగా చోటు చేసుకుంటున్న పరిణామాలపై దృష్టిసారించాలని నిర్ణయించారు.
  
 దశల వారీగా విస్తరణ
  నగరంలో కాల్‌మనీ వ్యాపారం దశలవారీగా విస్తరించింది. రెండున్నర దశాబ్దాల కిందట కొందరు స్నేహితులు, ఒకేచోట పని చేసే కార్మికుల మధ్య కాల్‌మనీ ఇచ్చిపుచ్చుకోవడం ఉండేది. కాలక్రమేణా దీనిపై కన్నేసిన వడ్డీ వ్యాపారులు అవసరమైన వారిని గుర్తించి అప్పులు ఇవ్వడం ప్రారంభించారు. విజయవాడలో రోజుకు రూ.50 కోట్ల మేర వ్యాపారం నిర్వహిస్తున్నారు. దీంతో ఆస్తుల తనఖా, వడ్డీ డబ్బుల కోసం చిట్టీలు కట్టించుకోవడం ప్రారంభమైంది. తనఖా ఆస్తులు రేటు పెరిగి విక్రయించుకుంటే, చిట్టీ సొమ్మును వడ్డీలకు మాత్రమే జమ చేసుకుంటున్నారు. దీంతో అప్పు అప్పుగానే ఉండగా ఆస్తులు మాత్రం హరించుకుపోతున్నాయి.
  
 వస్తూనే ఉన్న బాధితులు
  గత డిసెంబర్‌లో కాల్‌మనీ సెక్స్ రాకెట్ కుంభకోణం వెలుగులోకి వచ్చిన తర్వాత కాల్‌మనీ వ్యాపారంపై తీవ్ర ఆగ్రహాలు వ్యక్తమవడంతో ప్రభుత్వం వ్యాపారులపై దాడులకు ఆదేశించింది. పోలీసులు కూడా దాడులు జరిపి కొందరిని అరెస్టు చేశారు. మరికొందరి నుంచి నోట్లు, చెక్కులు స్వాధీనం చేసుకున్నారు. ఈ క్రమంలోనే పోలీసు కమిషనర్ గౌతమ్ సవాంగ్ బాధితుల కోసం ప్రత్యేక విభాగం ఏర్పాటు చేశారు. ఏసీపీ కె.ప్రకాష్‌బాబు నేతృత్వంలో పలువురు ఇన్‌స్పెక్టర్లు, సిబ్బంది విధులు నిర్వహిస్తున్నారు. ఇరు వర్గాలను పిలిపించడం, విచారించడం, రాజీ చేయడం, కేసుల నమోదుకు సిఫారసు చర్యలను చేపడుతున్నారు. ఇప్పటి వరకు 1,003 ఫిర్యాదులు ప్రత్యేక విభాగానికి వచ్చినట్టు అధికారులు చెపుతున్నారు.
  
 పోలీసుల చేతివాటం
 కాల్‌మనీ వ్యాపారులతో సత్సంబంధాలు కలిగిన కొందరు పోలీసు స్టేషన్ల అధికారులు చేతివాటం ప్రదర్శిస్తున్నారనే ఆరోపణలు వినబడుతున్నాయి. ప్రత్యేక విభాగం నుంచి కేసు నమోదుకు వెళ్లినప్పుడు అధికారుల దృష్టి మరల్చేందుకు అరెస్టులు చేస్తున్నారు. ఆ తర్వాత వ్యాపారులకు బాధితులకు చెందిన చెక్కులు, నోట్లు కాల్‌మనీ వ్యాపారులకు ఇస్తున్నారనే విమర్శలు వినబడుతున్నాయి. పశ్చిమ జోన్ పరిధిలో ఇవి ఎక్కువగా చోటు చేసుకుంటున్నట్టు బాధితుల ఆరోపణ.
  
 దృష్టి పెడతాం
 కొందరు పోలీసు అధికారులు కాల్‌మనీ వ్యాపారుల పక్షం వహిస్తున్నట్లు మా దృష్టికి వచ్చింది. పని ఒత్తిడి, ఇతరత్రా కారణాల వలన పెద్దగా పట్టించుకోలేదు. కొద్ది రోజుల్లోనే ఇప్పటి వరకు జరిగిన పరిణామాలపై ఆరా తీసి తప్పు చేసిన వారిపై కఠినంగా వ్యవహరిస్తాం. ప్రత్యేక ఫిర్యాదుల సెల్‌ను మరికొద్ది రోజులు కొనసాగించాలని నిర్ణయించాం.
  డి.గౌతమ్ సవాంగ్, నగర పోలీసు కమిషనర్


 అప్పుల బాధ తాళలేక వస్త్రవ్యాపారి ఆత్మహత్య
 రూ.6 లక్షలకు రూ.18 లక్షలు వడ్డీ
 కట్టానని సూసైడ్‌నోట్
   
 ఇరగవరం/తణుకు/పెరవలి :  కాల్‌మనీ కాటుకు మరో ప్రాణం బలైంది. అప్పులిచ్చిన వాళ్ల అధిక వడ్డీ వేధింపులు తాళలేక ఓ వస్త్ర వ్యాపారి మంగళవారం పురుగుల మందు తాగి బలవన్మరణానికి పూనుకున్నారు. తన కుటుంబానికి తీవ్ర విషాదం మిగిల్చారు. బాధితుని సూసైడ్‌నోట్, బంధువులు, పోలీసుల కథనం ప్రకారం.. ఇరగవరం మండలం సూరంపూడి గ్రామానికి చెందిన దొడ్డిపట్ల ధనరాజు (31) తణుకులో రెడీమేడ్ వస్త్ర దుకాణం నిర్వహిస్తున్నారు. టైలరింగ్ చేస్తూనే ఆయన వస్త్ర వ్యాపారం చేస్తున్నారు. ఈ నేపథ్యంలో వ్యాపారం నిమిత ్తం తణుకు మండలం పైడిపర్రు గ్రామానికి చెందిన మారిశెట్టి వెంకట్రావు, మారిశెట్టి శేషగిరి వద్ద రూ.3 లక్షలు, ఇరగవరం మండలం ఏలేటిపాడు గ్రామానికి చెందిన మేడపాటి తాతిరెడ్డి వద్ద రూ. 3 లక్షలు అప్పు తీసుకున్నారు. మారిశెట్టి వెంకట్రావు, మారిశెట్టి శేషగిరిలకు వడ్డీ నిమిత్తం ఇప్పటివరకు రూ. 8 లక్షలు, మేడపాటి తాతిరెడ్డికి వడ్డీ నిమిత్తం రూ.10 లక్షలు చెల్లించారు. వ్యాపారం బాగా లేకపోవడంతో చేసిన అప్పులకు వడ్డీలు పెరిగిపోయాయి. కాల్‌మనీ వల్ల అధిక వడ్డీల భారం పడింది.
 
 ఈ నేపథ్యంలోనే అప్పులు ఇచ్చిన వారు తీవ్రంగా ఒత్తిడి చేస్తుండడంతో ధనరాజు మనస్థాపానికి గురయ్యారు.  మంగళవారం ఉదయం ఇంటి వద్ద నుంచి తణుకు వచ్చిన ధనరాజు  పురుగులమందు డబ్బా కొనుక్కుని పెరవలి మండలం తీపర్రు గోదావరి ఒడ్డుకు వెళ్లాడు. అక్కడ పురుగులమందు తాగి అపస్మారకస్థితికి చేరుకున్నాడు. దీనిని గమనించిన స్థానికులు అతని బంధువులకు సమాచారం అందించారు. బంధువులు వచ్చి ధనరాజును మోటారుసైకిల్‌పై తణుకు ప్రైవేటు ఆస్పత్రికి తరలించారు. అక్కడ చికిత్స పొందుతూ ధనరాజు ప్రాణాలు వదిలారు. దీంతో స్వగ్రామం సూరంపూడికి తీసుకెళ్లారు. ధనరాజు పంచాయతీ వార్డు సభ్యునిగా కూడా పనిచేస్తున్నారు.
 
  
  ఎమ్మెల్యే.. ఎస్పీల పేరిట సూసైడ్ నోట్
 ధనరాజు ఆత్మహత్యకు పాల్పడే ముందు రాసిన సూసైడ్ నోట్‌ను పోలీసులు స్వాధీనం చేసుకున్నారు. ఈ నోట్‌లో ఎమ్మెల్యే ఆరిమిల్లి రాధాకృష్ణ, ఎస్పీ భాస్కర్‌భూషణ్‌లకు ధనరాజు తన ఆవేదనను వెలిబుచ్చారు. తన భార్య నగలు అమ్మి అధిక వడ్డీలు కట్టానని, ఇకపై వడ్డీలు, అప్పు కట్టలేని పరిస్థితుల్లో అప్పు ఇచ్చిన వారి ఒత్తిళ్లు తాళలేకే తాను చనిపోతున్నట్టు వివరించారు. తాను చేసిన అప్పులకు తన కుటుంబ సభ్యులకు ఎలాంటి సంబంధమూ లేదని, తాను చనిపోవడానికి కారణమైన వారిని కఠినంగా శిక్షించాలని కోరారు. మృతుడు ధనరాజుకు భార్య చంద్రకళ, కుమారుడు, కుమార్తె ఉన్నారు. అయిదేళ్ల క్రితం వివాహం చేసుకున్న ధనరాజు ప్రస్తుతం  తణుకులో అనూషా డ్రస్ మెటీరియల్స్ పేరుతో వస్త్రదుకాణం నిర్వహిస్తూ ఇక్కడే ఫ్లాట్ అద్దెకు తీసుకుని కుటుంబంతో సహా నివాసం ఉంటున్నారు.  దీనిపై పెరవలి ఎస్‌ఐ పి.నాగరాజు కేసునమోదుచేసి దర్యాప్తు చేపట్టారు.


 
 -వడ్డీవ్యాపారి ఇంటి వద్ద ఒంటిపై కిరోసిన్ పోసుకున్న బాధితులు 
 
 - వడ్డీ వ్యాపారిపై చర్యలు తీసుకోవాలని డిమాండ్
 
 - ఫిర్యాదు చేసినా పోలీసులు స్పందించలేదని మనస్తాపం
 
 - ఒంటిపై కిరోసిన్ పోసుకుని నిప్పంటించుకోబోయిన వైనం
 
  
 
 రేపల్లె(గుంటూరు జిల్లా): తీసుకున్న అప్పుకు ఓ వైపు వడ్డీలపై వడ్డీలు వసూలు చేస్తూ, మరో వైపు తనఖా పెట్టిన ఇంటి పట్టాను తన కూతురి పేరిట రిజిస్ట్రేషన్ చేయించుకున్న వడ్డీ వ్యాపారిపై చర్యలు తీసుకోవాలని పోలీసుస్టేషన్ చుట్టూ తిరిగి విసిగిపోయిన కాల్‌మనీ బాధితులు సోమవారం ఆత్మహత్యాయత్నం చేశారు. ఈ ఘటన గుంటూరు జిల్లా రేపల్లెలో సోమవారం చోటుచేసుకుంది. 
  
 
 బాధితులు తెలిపిన వివరాల ప్రకారం.. పట్టణంలోని ఏకలవ్య కాలనీకి చెందిన దాసరి వెంకట నాగేశ్వరమ్మ నాలుగేళ్ల క్రితం 6వ వార్డుకు చెందిన పొదిలి సత్యనారాయణ వద్ద రూ.1.50 లక్షలు అప్పు తీసుకుంది. నెలకు రూ.7,500 చొప్పున క్రమం తప్పకుండా వడ్డీ చెల్లిస్తోంది. అయినా ఇంకా రూ.4లక్షలు చెల్లించాలంటూ సత్యనారాయణ ఒత్తిడి తెస్తున్నారు. 
 
  
 
 మరో బాధితురాలు సజ్జా రజని అదే వ్యాపారి వద్ద మూడేళ్ల క్రితం రూ.లక్ష తీసుకుని నెలకు రూ.5,000 చొప్పున క్రమం తప్పకుండా చెల్లిస్తోంది. అప్పు తీకుసున్న సమయంలో తనకున్న ఇంటిపట్టాను తాకట్టుపెట్టింది. తీరా చూస్తే తన స్థలాన్ని వడ్డీవ్యాపారి పొదిలి సత్యనారాయణ కుమార్తె పేర రిజిస్ట్రేషన్ చేయించినట్లు ఉంది. అదేమని అడిగితే మీకు దిక్కున్న చోట చెప్పుకోమని బెదిరించాడు. విధిలేక వ్యాపారి ఇంటి ముందు పలుమార్లు బైఠాయించి ఆందోళన చేపట్టారు. 
 
  
 
 ఈ క్రమంలో మూడు రోజుల క్రితం వడ్డీవ్యాపారి కుమారులు బాధిత మహిళలపై దాడి చేయడంతో పోలీసుస్టేషన్లో ఫిర్యాదు చేశారు. కాళ్లరిగేలా స్టేషన్ చుట్టూ తిరుగుతున్నా పోలీసులు చొరవ చూపడం లేదని మనస్తాపం చెందిన బాధితులు సోమవారం ఉదయం వడ్డీవ్యాపారి ఇంటి ముందు ఒంటిపై కిరోసిన్ పోసుకుని నిప్పు అంటించుకునే ప్రయత్నం చేశారు. గమనించిన వ్యాపారి కుటుంబసభ్యులు అడ్డుకొని, పోలీసులకు సమాచారం అందించారు. స్టేషన్‌కు తరలించిన తర్వాత కూడా మరోమారు బాధితులు కిరోసిన్ పోసుకుని ఆత్మహత్యా యత్నం చేయడంతో పోలీసులు కంగుతిన్నారు. సీఐ మల్లికార్జునరావు బాధితులతో చర్చించి న్యాయం చేస్తానని హామీ ఇవ్వడంతో పరిస్థితి సద్దుమణిగింది.
 
  


 రూ.20 లక్షలు అప్పిచ్చి ఎకరం పొలం కాజేశారు
 కలర్ జిరాక్సులతో మోసం
 రియల్టర్ల మాయాజాలం
 ఆందోళనతో అనారోగ్యం పాలైన బాధితుడు
  
 విజయవాడ : విజయవాడ నగరంలో కాల్‌మనీ వ్యాపారుల మోసాలు రకరకాలుగా వెలుగులోకి  వస్తున్నాయి. ఈసారి రియల్టర్ల ముసుగులో ఈ మాయాజాలం చోటుచేసుకుంది. వారి మోసానికి బాధితుడు మానసిక రోగిగా మారి మాట్లాడలేని స్థితికి చేరాడు. బాధితుడి భార్య కథనం మేరకు వివరాలివీ.. భవానీపురం గాంధీబొమ్మ రోడ్డులో షేక్ శ్రీను, రసూల్‌బీ దంపతులు నివసిస్తున్నారు. శ్రీను పాల ఫ్యాక్టరీలో ముఠాకూలీగా పనిచేస్తూ జీవనం సాగిస్తున్నాడు. అనారోగ్యంతో ఉన్న తల్లికి వైద్యం చేయించేందుకు, చిన్నచిన్న అప్పులు తీర్చేందుకు తన పొలాన్ని తాకట్టు పెట్టాలనుకున్నాడు.
  
 భవానీపురం హౌసింగ్‌బోర్డ్ కాలనీలోని సాయి నిర్మాణ్ అపార్ట్‌మెంట్‌లో రియల్ ఎస్టేట్ వ్యాపారం చేస్తున్న ఆచంట రాజశేఖర్, చెల్లుబోయిన ఆంజనేయులును కలుసుకున్నారు. 2015 మే 28న పి.నైనవరంలోని తన ఎకరం పొలం తాలూకు డాక్యుమెంట్లను ఇచ్చాడు. దీంతో రాజశేఖర్ తన దగ్గర పనిచేసే చిట్టినగర్‌కు చెందిన నమ్మి శ్రీనివాసరావు పేరుమీద జీపీ (తనఖా రిజిస్ట్రేషన్) చేయించుకుని రూ.20 లక్షలు అప్పుగా ఇచ్చాడు.
  
 వడ్డీ పెరిగిపోతుందని భావించిన శ్రీను మూడు నెలల అనంతరం (ఆగస్టు) మరోచోట ఉన్న పొలం అమ్మి రాజశేఖర్‌కు అసలు, వడ్డీతో కలిపి బాకీ తీర్చేశాడు. అయితే రాజశేఖర్ అతనికి తనఖా పెట్టిన డాక్యుమెంట్లు ఇవ్వకుండా వాటి కలర్ జిరాక్సులు ఇచ్చి పంపించాడు. అవే ఒరిజినల్ డాక్యుమెంట్లు అనుకుని శ్రీను వాటిని తీసుకుని వెళ్లిపోయాడు.
  
 నెలన్నర తర్వాత గుర్తింపు...
 నెలన్నర తరువాత శ్రీను తన పొలం వద్దకు వెళ్లగా, నీ పొలం అమ్మేశావట గదా.. వాళ్లు ఈ మధ్యే వచ్చి వెళ్లారని చుట్టుపక్కలవాళ్లు అనటంతో కంగుతిన్నాడు. వెంటనే రిజిస్ట్రార్ కార్యాలయానికి వెళ్లి ఈసీ తీయించగా జీపీ చేయించుకున్న తొమ్మిదో రోజునే చిట్టినగర్‌కు చెందిన కొర్రపాటి శ్యాంప్రసాద్ (చెల్లుబోయిన ఆంజనేయులు బినామీ) పేరుతో 60 సెంట్లు రిజిస్టర్ అయి ఉంది.
  
 సెప్టెంబర్ 19న గుంటూరుకు చెందిన కొప్పినేని కోటేశ్వరరావు (రాజశేఖర్ బినామీ) పేరు మీద 40 సెంట్లు రిజిస్టర్ అయి ఉంది. ఇదంతా చూసిన శ్రీను మానసిక ఒత్తిడికి గురై అనారోగ్యం పాలయ్యాడు. దీంతో భార్య ర సూల్‌బీ తన కుటుంబ సభ్యులతో కలిసి డిసెంబర్‌లో భవానీపురం పోలీసులకు ఫిర్యాదు చేశారు. వారినుంచి ఎటువంటి స్పందనా లేకపోవడంతో ఈ ఏడాది జనవరి 12న నగర పోలీస్ కమిషనర్ కార్యాలయానికి వెళ్లి ఫిర్యాదు చేశారు. పోలీసులు దర్యాప్తు చేస్తున్నారు.
  
 ప్లాట్లుగా అమ్ముకునే యత్నాల్లో రియల్టర్లు...
 తమ బినామీల పేరుమీద రిజిస్టర్ చేయించుకున్న రాజశేఖర్, ఆంజనేయులు ఇప్పుడు ఆ పొలాన్ని ప్లాట్లుగా గానీ, ఏక మొత్తంగా గానీ అమ్ముకునేందుకు ప్రయత్నం చేస్తున్నట్లు బాధితులు చెబుతున్నారు. ప్రస్తుతం ఆ పొలం కోటి రూపాయలకుపైనే పలుకుతుందని సమాచారం.
 ఇదెక్కడి న్యాయమని రాజశేఖర్, ఆంజనేయులును ప్రశ్నిస్తే శ్రీను స్నేహితులపై, బంధువులపై కేసులు పెడుతున్నారని శ్రీను బావమరిది హుస్సేన్ తెలిపారు. పోలీసులు సమగ్ర దర్యాప్తు చేసి తమను మోసగించిన వారిపై చర్యలు తీసుకుని తమ పొలం తిరిగి ఇప్పించాలని బాధితులు విజ్ఞప్తి చేస్తున్నారు.


 కర్నూలు: ఏపీలో కాల్ మనీ వ్యాపారుల ఆగడాలు శృతి మించుతున్నాయి. అప్పుతీసుకున్న వారి ప్రాణాలు తీస్తున్నాయి. మరికొందరిపై వడ్డీ వ్యాపారులు దాడులకు దిగుతున్నారు. తాజాగా కర్నూలు జిల్లా నంద్యాలలో శుక్రవారం కాల్ మనీ వ్యాపారులు రెచ్చిపోయారు. నంద్యాల పట్టణం ఎస్‌బీఐ కాలనీకి చెందిన రాజేశ్వర్‌రెడ్డి అనే వ్యక్తి స్థానిక వడ్డీ వ్యాపారి చందు వద్ద రూ.10 వడ్డీకి రూ.4 లక్షలు రుణంగా తీసుకున్నాడు. అందుకు గాను దఫాలుగా డబ్బు చెల్లిస్తూ వస్తున్నాడు. ఇప్పటి వరకు రెండుసార్లు రూ. లక్ష ఇచ్చాడు.
  
 మిగతా డబ్బును శుక్రవారం కల్లా చెల్లించాలంటూ తీవ్రంగా ఒత్తిడి తేవటంతో రాజేశ్వర్‌రెడ్డి నిస్సహాయత వ్యక్తం చేశాడు. తీవ్ర ఆగ్రహం వ్యక్తం చేసిన చందూ అతడిని పిడిగుద్దులు గుద్దాడు. దీంతో కుడి భుజం కిందికి జారిపోయింది. కుటుంబసభ్యులు రాజేశ్వరరెడ్డిని నంద్యాల ప్రభుత్వ ఆస్పత్రికి తరలించారు. ఈ సంఘటనపై తమకు ఎటువంటి ఫిర్యాదు అందలేదని టూటౌన్ పోలీసులు తెలిపారు.


 జడ్చర్ల: సంచలనం సృష్టించిన కాల్‌మనీ కేసు వ్యవహారం గురువారం తెలంగాణలోని మహబూబ్‌నగర్ జిల్లా జడ్చర్లలో కలకలం రేపింది. కాల్‌మనీతో సంబంధం ఉన్న నిందితులు కొన్ని రోజులుగా జడ్చర్ల మండల పరిధిలోని గోప్లాపూర్, తదితర గ్రామాలలో తలదాచుకున్నట్లు సమాచారం ఉండడంతో గురువారం వేకువజామునే గుంటూరు జిల్లా పోలీసులు జడ్చర్లకు చేరుకుని గాలింపు చర్యలు చేపట్టారు. సెల్‌ఫోన్ సిగ్నల్స్ ఆధారంగా రహస్య విచారణ చేపట్టిన పోలీసులు.. నిందితులు తలదాచుకున్న గ్రామాన్ని పసిగట్టినట్లు తెలుస్తోంది.
 నిందితులు గోప్లాపూర్‌కు వచ్చి గుంటూరు ప్రాంతంతో సంబంధం కలిగి ఉన్న ఓ నాయకుడి దగ్గర ఆశ్రయం పొందినట్లు తెలిసింది. పక్కా సమాచారంతో పోలీసులు జడ్చర్లకు చేరుకుని నిందితుల అరెస్ట్‌కు ప్రయత్నించారు. అయితే పోలీసుల రాకను ముందే పసిగట్టిన నిందితులు తమ సెల్‌ఫోన్‌లను స్విచ్ ఆఫ్ చేసి ఇతర ప్రాంతాలకు పారిపోయినట్లుగా సమాచారం. అయితే అప్పటికే ఓ నిందితుడిని పోలీసులు అదుపులోకి తీసుకున్నట్లు తెలిసింది. జడ్చర్ల, మిడ్జిల్ మండలాల వాసులకు గుంటూరు జిల్లాతో సత్సంబంధాలు ఉండడంతో అక్కడి కాల్‌మనీ నిందితులు ఇక్కడ తలదాచుకునేందుకు దోహదపడిందని పోలీసులు భావిస్తున్నారు.


 రేపల్లె: కాల్‌మనీ వేధింపులు మరో ప్రాణాన్ని బలిగొన్నాయి. ఈ ఘటన గుంటూరు జిల్లా రేపల్లెలో గురువారం వేకువజామున చోటుచేసుకుంది. పట్టణానికి చెందిన కదరవల్లి రాంబాబు(58) స్థానికంగా గరికపాటి రవి అనే వ్యాపారి నుంచి 8 ఏళ్ల క్రితం రూ.8 లక్షలు అప్పుగా తీసుకున్నాడు.
  
 ప్రస్తుతం ఆ రుణానికి సంబంధించి వడ్డీయే రూ. 24 లక్షలయింది. మరో వ్యక్తి వేమూరి శ్రీను దగ్గర రూ.1.50 లక్షలు అప్పు తీసుకోగా దానికి వడ్డీ రూ. 2లక్షలకు చేరుకుంది. అప్పుల వారి నుంచి వేధింపులు తీవ్రం కావటంతో ఈనెల 19వ తేదీన తమ స్వగ్రామం బొబ్బర్లంక వెళ్లి పొలంలోనే పురుగు మందు తాగి చనిపోయాడు. మరణ వార్త విని స్వగ్రామానికి చేరుకున్న కుమారుడు తండ్రి చొక్కా జేబులో ఉన్న సూసైడ్ నోట్‌ను గమనించి, ఆమేరకు గురువారం పోలీసులకు ఫిర్యాదు చేశాడు. చౌడాయపాలెం ఇన్‌చార్జి ఎస్సై మహ్మద్ షఫీ దర్యాప్తు చేస్తున్నారు. రాంబాబు ఇద్దరు కుమారులు ఉన్నారు


 విజయవాడ: తెలుగు రాష్ట్రాల్లో సంచలనం సృష్టించిన కాల్ మనీ, సెక్స్ రాకెట్ నిందితులకు బెయిల్ మంజూరు అయ్యింది. నిందితులు ఎలమంచిలి రాము, భవానీ శంకర్, దూడల రాజేష్లకు మంగళవారం విజయవాడ మహిళా సెషన్స్ కోర్టు షరతులతో కూడిన బెయిల్ మంజూరు చేసింది. విజయవాడ కేంద్రంగా అధిక వడ్డీ రేట్లకు డబ్బులు అప్పుగా  ఇవ్వడంతో పాటు అసాంఘిక కార్యకలాపాలకు పాల్పడిన ఘటనలపై నిందితులు అరెస్ట్ అయిన విషయం తెలిసిందే.


 విజయవాడ : నగరంలోని వన్టౌన్లో కాల్మనీ వ్యాపారీ బుద్ధ భాస్కరరావు ఆగడాలు రోజురోజూకు పెరిగిపోతున్నాయి.  విజయవాడలో నివసిస్తున్న వృద్ధ దంపతలుకు అత్యవసరంగా నగదు కావాల్సి వచ్చింది. ఈ నేపథ్యంలో వారు వ్యాపారీ బుద్ధ భాస్కరరావును ఆశ్రయించారు. వృద్ధ దంపతులకు అప్పుగా రూ. 4 లక్షలు ఇచ్చాడు.
 అందుకు ప్రతిగా తుమ్మలపాలెం సెంటర్లోని సదరు దంపతులకు చెందిన భూమికి సంబంధించిన పత్రాలను తన వద్ద పెట్టుకున్నాడు.  ఆ క్రమంలో వృద్ధ దంపతులకు చెందిన స్థలాన్ని బుద్ధ భాస్కరరావు కబ్జా చేశారు. దీంతో వృద్ధ దంపతులు నగర పోలీసులను ఆశ్రయించారు.


 నోట్లు, చెక్కులను తిరిగి ఇచ్చేస్తున్న పోలీసులు
 
 విజయవాడ (చిట్టినగర్) : పోలీసుల నుంచి  కాల్‌మనీ వ్యాపారులకు ‘సంక్రాంతి పండుగ’ కానుక అందినట్లు సమాచారం. ఫైనాన్స్ వ్యాపారుల ఇళ్ల నుంచి పోలీసులు స్వాధీనం చేసుకున్న చెక్కులు, నోట్లను పోలీసులు రెండు రోజులుగా తిరిగి ఇచ్చేస్తున్నట్లు తెలిసింది. గత నెల 16 నుంచి కాల్‌మనీ వ్యాపారులపై పోలీసులు దాడులు చేసిన సంగతి విదితమే. వారం రోజుల పాటు నిర్వహించిన దాడుల్లో విజయవాడలోని చిట్టినగర్, కేఎల్‌రావునగర్, కొత్తపేటలోని పలువురు ఫైనాన్స్ వ్యాపారుల ఇళ్లపై దాడులు చేసిన పోలీసులు వారి నుంచి భారీగా చెక్కులు, నోట్లు స్వాధీనం చేసుకున్నారు.
 
 అయితే కేసులు నమోదు చేసి అరెస్టు చేయడంతోనే వీటికి ముగింపు పలికారు. మరో వైపు పోలీసులపై తీవ్రస్థాయిలో ఒత్తిడి రావడంతో కాల్‌మనీ వ్యవహారం ముగినట్లే అయింది. ఫైనాన్స్ వ్యాపారులు స్టేషన్ అధికారులను కలిసి తమ చెక్కులు , నోట్లు తిరిగి ఇచ్చేయాలని కోరడంతో ఇచ్చేసినట్లు తెలుస్తోంది. శనివారం మధ్యాహ్నం కేఎల్‌రావునగర్‌కు చెందిన ఫైనాన్స్ వ్యాపారి కోటేశ్వరరావుకు చెక్కులు, నోట్లు తిరిగి ఇచ్చేయడంతో సదరు వ్యాపారి స్టేషన్‌కు సమీపంలోని ఓ మాజీ కార్పొరేటర్ ఇంటికి వెళ్లి పరిశీలించుకున్నట్లు సమాచారం.
  
  
  


 కాల్‌మనీ కేసులో మరో మోసం
  ప్రజాప్రతినిధి   బంధువుల నిర్వాకం
  
 విజయవాడ లీగల్ : తనఖా రిజిస్ట్రేషన్ అంటూ తన ఇంటిని కాల్‌మనీ వ్యాపారి అమ్మకం రిజిస్ట్రేషన్ చేయించుకున్నారని ఓ వృద్ధుడు ఆరోపించారు. నగరానికి చెందిన ప్రజాప్రతినిధి బంధువు ఈ మోసానికి పాల్పడ్డాడని పేర్కొన్నారు. తన న్యాయవాది ద్వారా కోర్టును ఆశ్రయిస్తానని తెలిపారు. బాధితుడి కథనం మేరకు.. 83 ఏళ్ల రేలంగి హనుమంతరావు విద్యాధరపురంలోని రావిచెట్టు సెంటర్ రేలంగివారి వీధిలో నివసిస్తున్నారు. కుటుంబ అవసరాల నిమిత్తం నగరానికి చెందిన బుద్దా భాస్కరరావు వద్ద 2015 జూలై 31న రూ.4 లక్షలు అప్పుగా తీసుకున్నారు. ప్రతినెలా వడ్డీ చెల్లిస్తున్నారు. నగదు ఇచ్చిన రోజు హనుమంతరావు నుంచి భాస్కరరావు రూ.100 స్టాంపు పేపరు, సంతకాలు చేసిన తెల్ల కాగితాలు నాలుగు, సంతకం చేసిన ఖాళీ ప్రాంసరీ నోట్లు, నాలుగు ఖాళీ చెక్కులు తీసుకున్నారు. రెండు నెలలు తర్వాత నూటికి ఆరు రూపాయలు చెల్లించాలని భాస్కరరావు పట్టుబట్టారు.
 
 అంతవడ్డీ చెల్లించలేనని హనుమంతరావు పేర్కొనడంతో ఇంటిని తనఖా చేస్తే వడ్డీ తగ్గిస్తానని చెప్పిన భాస్కరరావు రూ.70 లక్షల ఇంటిని తనఖా పెట్టుకున్నాడు. అయితే ఆ ఇంటిని రూ.4 లక్షలకు అమ్మినట్లుగా రిజిస్ట్రేషన్ చేయించుకున్నాడు. ఆ తరువాత రూ.6 వడ్డీ చెల్లించాల్సిందేనని పట్టుబట్టాడు. ఆ మేరకు వడ్డీ చెల్లించి తనఖా రిజిస్ట్రేషన్ రద్దు చేయాలని కోరగా ఇంటిని తనకు అమ్మేశారుగా అంటూ హనుమంతరావును దూషించాడు. బాధితుడి అల్లుడు పలగాని మురళీ కృష్ణ ఇంటి కాగితాల కోసం వెళ్లగా భాస్కరరావు చేతనైంది చేసుకోండి, ఆ ఇంటి కాగితాలు ఓ వ్యక్తి వద్ద ఉన్నాయి అని చెప్పాడు. దీంతో బాధితులు ఆ వ్యక్తి వద్దకు వెళ్లగా తనకు సంబంధంలేదని, భాస్కరరావు వద్దే తేల్చుకోవాలని ఆ వ్యక్తి సూచించాడు.
 
 ఈ వ్యవహారాన్ని పరిష్కరిస్తానని చెప్పిన బుద్దా సత్యనారాయణ ఆ తరువాత ఇంటిని ఇచ్చే ప్రసక్తేలేదని, ఎంతో కొంత నగదు ఇప్పిస్తామని చెప్పాడు. బుద్దా వెంకన్న బంధువు భాస్కరరావు తనను మోసగించాడని పోలీసులకు, నగర పోలీసు కమిషనర్‌కు ఫిర్యాదు చేసినా ఫలితం లేదని హనుమంతరావు దంపతులు వాపోయారు. ముఖ్యమంత్రికి చెప్పుకుందామని వెళ్తే, ఆయన అందుబాటులో లేరని, తమ న్యాయవాది ద్వారా కోర్టులో ప్రయివేటు కేసు దాఖలు చేయనున్నామని పేర్కొన్నారు.
  


 నూతన చిట్ వేడుకల్లో అసభ్యకర నృత్యాలు
 అడ్డుకున్న పోలీసులు ఒత్తిళ్లతో చర్యలకు వెనుకడుగు
  
 నరసరావుపేట టౌన్ : కాల్‌మనీ వ్యవహారంలో రాష్ట్ర వ్యాప్తంగా వడ్డీ వ్యాపారులపై దాడులు నిర్వహిస్తున్న నేపథ్యంలో అధికార పార్టీకి చెందిన ఒక ప్రజాప్రతినిధి, అతని సోదరుడు నూతన చిట్ వేడుకల్లో భాగంగా మందుపార్టీ, అసభ్యకర నృత్యాలు ఏర్పాటు చేయడం చర్చనీయాంశమైంది. ఈ సమాచారం అందుకున్న పోలీసులు కార్యక్రమాన్ని అడ్డుకున్నారు. అధికార పార్టీకి చెందిన నాయకులు కావడంతో చర్యలకు వెనుకడుగు వేశారన్న విమర్శలు సర్వత్రా వినిపిస్తున్నాయి. వివరాల్లోకి వెళితే. పట్టణంలో అధికార పార్టీకి చెందిన కౌన్సిలర్, అతని సోదరుడు నూతన చిట్స్‌ను ప్రారంభించారు. వేడుకల్లో భాగంగా వినుకొండ రోడ్డులోని ఓ ఫంక్షన్‌హాల్‌లో ఆదివారం రాత్రి మందు పార్టీ ఏర్పాటు చేశారు. అంతేకాకుండా మహిళలతో అసభ్యకర డాన్స్‌లు చేయించారు. హాజరైన చీటీపాట సభ్యులు కార్యక్రమాలను ఫోన్‌లో చిత్రీకరించి ఇతరులకు వాట్స్‌ఆప్ ద్వారా పంపారు.
 
 కొందరు ఈ విషయాన్ని పోలీసు అధికారుల దృష్టికి తీసుకురావడంతో వెంటనే స్పందించిన అధికారులు అక్కడకు చేరుకున్నారు. ఈ వేడుకల్లో పట్టణానికి చెందిన పలువురు ప్రముఖులు ఉన్నారు. పోలీసుల రాకను గమనించిన వారు అక్కడ నుంచి మెల్లగా జారుకున్నారు. కార్యక్రమాన్ని నిలిపివేయాలని పోలీసులు సూచించినప్పటికీ కార్యక్రమాన్ని కొనసాగించడంతో నిర్వాహకులపై పోలీసు అధికారులు ఆగ్రహం వ్యక్తం చేశారు. ఈలోగా పై అధికారుల నుంచి ఒత్తిళ్లు రావడంతో నిర్వాహకులను స్టేషన్‌కు రావాలని ఆదేశించి అక్కడ నుంచి వెళ్లిపోయారు. ఈ విషయం ఆ నోటా ఈ నోటా పాకి సోమవారం పట్టణంలో చర్చనీయాంశంగా మారింది. ఈ వ్యవహారంపై డీఎస్పీ కె.నాగేశ్వరరావును వివరణ కోరగా పోలీసుశాఖ అనుమతి లేకుండా డాన్స్‌లు నిర్వహిస్తున్న కారణంగా కార్యక్రమాన్ని నిలిపివేశామన్నారు.
  


 అనంతపురం : కాల్మనీ వ్యవహారంలో బాధితుల ఫిర్యాదు మేరకు కర్నూలు సీసీఎస్ ఎస్ఐ సురేష్పై ఆదివారం కేసు నమోదు అయింది. కర్నూలు జిల్లాలో విధులు నిర్వహిస్తున్న సురేష్ అనంతపురంలో వడ్డీ వ్యాపారం చేస్తున్నారు. నగదు అప్పు తీసుకున్న వారి వద్ద నుంచి అధిక వడ్డీ డిమాండ్ చేస్తున్నట్లు సురేష్పై బాధితులు కర్నూలు జిల్లా పోలీసులకు ఫిర్యాదు చేశారు. దీంతో సురేష్పై పోలీసులు కేసు నమోదు చేశారు.


 అక్కయ్యపాలెం : కాల్‌మనీ వేధింపులపై ఫోర్త్‌టౌన్ పోలీసులకు ఫిర్యాదు అందింది. సీఐ కె.వి.బాలకృష్ణ తెలిపిన వివరాల ప్రకారం... ప్రభుత్వ ఎయిడెడ్ పాఠశాలలో టీచర్‌గా పనిచేస్తున్న ఆర్.వి.రమణి(57) గతంలో దొండపర్తిలో నివశించేవారు. అదే ప్రాంతానికి చెందిన శ్రీలక్ష్మీ ఫైనాన్స్ నిర్వాహకుడు రెడ్డి వద్ద ఐదేళ్ల కిందట రూ.2లక్షలు అప్పుగా తీసుకున్నారు. అలాగే కె.వినయ్ వద్ద రూ.50వేలు, కె.వెంకటలక్ష్మి వద్ద రూ.50వేలు అప్పుగా తీసుకున్నారు.
 
 గత ఏడాది వడ్డీతో సహా అప్పులు చెల్లించానని, అయితే సంతకాలు చేసిన చెక్కులు, ప్రామిసరీ నోట్లు తిరిగి ఇవ్వకుండా ఇంకా డబ్బు చెల్లించాలని వేధిస్తున్నారని రమణి పోలీసులకు ఫిర్యాదు చేశారు. స్కూల్‌కి వెళ్లే దారిలో అడ్డుకొని బెదిరింపులకు పాల్పడుతున్నారని ఆమె ఫిర్యాదులో పేర్కొన్నారు. పోలీసులు కేసు నమోదు చేసి దర్యాప్తు చేస్తున్నారు.


 నవరంగ్ సెంటర్‌లో త్రిమూర్తుల దందా
  
 విజయవాడ సిటీ : పైకి స్టిక్కరింగ్ వ్యాపా రం. చేసేది కాల్‌మనీ వ్యాపారం. వడ్డీ చెల్లించలేని మహిళలకు లైంగిక వేధింపులు ఇక్కడ నిత్యకృత్యం. నవరంగ్ థియేటర్ సమీపంలో త్రిమూర్తులు కాల్‌మనీ దందా వికృత స్వరూపమిది. వీరి బెదిరింపులకు అనేక మంది మహిళలు బెంబేలెత్తుతున్నారు. వీరి పరపతికి వెరసి పైకి చెప్పుకోలేక కుమిలిపోతున్నారు. ఓ మహిళ ధైర్యం చేసి సాక్షి కార్యాలయానికి లేఖ రూపంలో వీరి ఆగడాలను ఏకరువు పెట్టింది. ఆ లేఖలో ఆమె పేర్కొన్న అంశాలను పరిశీలిస్తే వీరంటే ఎంతగా భయపడుతుందో స్పష్టమవుతోం ది. నవరంగ్ సెంటర్ అంటే వాహనాల నంబర్లకు స్టిక్కరింగ్ చేసే షాపుల కోలాహలం ఉంటుంది. ఇక్కడ తమ వాహనానికి స్టిక్కరింగ్ చేయించుకునేందుకు యువకులు ‘క్రేజీ’ చూపుతుంటారు. అలాంటి సెంటర్‌ను కేంద్రంగా చేసుకొని ఇద్దరు సోదరులు, వీరి స్నేహితుడు కలిసి కాల్‌మనీ వ్యాపారం చేస్తున్నారు.
 
 వీరి వద్ద ఎక్కువగా రూ.20వేల నుంచి రూ.50వేల వరకు కాల్‌మనీగా అప్పులు తీసుకునే వారే. ఒక్కసారి వీరి వద్ద కాల్‌మనీకి డబ్బులు తీసుకుంటే ఏళ్ల తరబడి వడ్డీలు కట్టడమే సరిపోతుంది తప్ప అసలు మాత్రం తీరదు. ఒకవేళ అసలు తీసుకొచ్చి ఎవరైనా ఇచ్చినా ముందుగా తీసుకున్న ఖాళీ నోట్లను చూపి కోర్టు కేసుల పేరిట బెదిరింపులకు దిగుతారు. ఆ నెపంతో మహిళలను లొంగదీసుకునే ప్రయత్నాలు చేస్తుంటారు. తిరస్కరిస్తే కోర్టు మెట్లు ఎక్కాల్సిందేనని బాధితురాలి ఆవేదన. వీరి వద్ద రూ.20 వేలు తీసుకున్న పాపానికి రూ.2 లక్షల వరకు వడ్డీగా కట్టినట్టు చెప్పింది. అసలు అలానే ఉందంటూ బెదిరింపులకు పాల్పడుతున్నట్టు పేర్కొంది. అదేమంటే రూ.2 లక్షలు ఇవ్వాలంటూ కోర్టులో కేసు వేస్తామని బెదిరింపులకు పాల్పడుతున్నట్టు ఆమె తెలిపింది. ఇక తాను కట్టలేనంటే తమతో గడపాలంటూ వేధిస్తున్నట్టు ఆమె వెల్లడించింది. ఏళ్ల తరబడి ఇదే సెంటర్‌ను కేంద్రంగా చేసుకొని కాల్‌మనీ దందా చేస్తున్న వీరికి రాజకీయ, పోలీసు సర్కిళ్లతో పరిచయాలు ఉన్నట్టు ఆమె వెల్లడించింది. అనేక మంది మహిళలు వీరి ఆగడాలను కిమ్మనకుండా భరిస్తున్నట్టు తెలిపింది. పోలీసు కమిషనర్ జోక్యం చేసుకుంటే తప్ప వీరి ఆగడాలకు అడ్డుకట్ట పడదని ఆమె ఆవేదన వ్యక్తం చేసింది.
  


 * కాల్‌మనీ కేసులో కోర్టులో లొంగిపోయిన నిందితుడు
 * మరో కేసులో అరెస్టు
 విజయవాడ సిటీ/ఇబ్రహీంపట్నం: కాల్‌మనీ-సెక్స్‌రాకెట్ కేసులో నాలుగో నిందితుడైన విద్యుత్ శాఖ డీఇ ఎం.సత్యానందం గురువారం విజయవాడలో ఒకటో అదనపు చీఫ్ మెట్రోపాలిటన్ మేజిస్ట్రేట్ కోర్టులో లొంగిపోయాడు. మరో కేసులో పోలీసులు ఆయనను అరెస్టు చేశారు. కాల్‌మనీ కేసులో సత్యానందంకు హైకోర్టు మంగళవారం షరతులతో కూడిన ముందస్తు బెయిల్ మంజూరు చేసిన విషయం విదితమే.
 
 హైకోర్టు ఉత్తర్వుల మేరకు ఒకటో అదనపు మేజిస్ట్రేట్ కోర్టులో సత్యానందం లొంగిపోయాడు. రూ.లక్ష పూచీకత్తు సమర్పించడంతోపాటు ప్రతిరోజూ ఉదయం 10 నుంచి సాయంత్రం 5 గంటల మధ్యలో మాచవరం పోలీసుస్టేషన్‌లో హాజరై సంతకం చేయాలని సత్యానందంను హైకోర్టు ఆదేశించింది.
 
 సత్యానందం కోర్టుకు సమర్పించిన పూచీకత్తును ఇన్‌చార్జి న్యాయమూర్తి డి.సత్యప్రభాకరరావు పరిశీలించారు.  కాగా రాష్ట్ర డీజీపీ జేవీ రాముడు వార్షిక నేర సమీక్షను విలేకరుల కు విడుదల చేస్తున్న సమయంలోనే సత్యానందం లొంగుబాటు తెలిసింది. ఈ నేపథ్యంలోనే ఇబ్రహీం పట్నం పోలీసులు మరో కేసులో అతడిని అదుపులోకి తీసుకొని   తరలించారు. ఇది ఇలా   ఉండగా విజయవాడ కోర్టు నుంచి బయటకు వచ్చిన అనంతరం సత్యానందం విలేకరులతో మాట్లాడాడు. కాల్‌మనీ కేసులో తాను నిర్దోషినని చెప్పుకున్నాడు.


 విజయవాడ సిటీ:కాల్ మనీ- సెక్స్ రాకెట్ కేసులో నాలుగో నిందితుడైన విద్యుత్‌శాఖ డీఈ ఎం.సత్యానందం గురువారం ఒకటవ అదనపు చీఫ్ మెట్రోపాలిటన్ మేజిస్ట్రేట్ కోర్టులో లొంగిపోయాడు. రాష్ట్రవ్యాప్తంగా సంచలనం కలిగించిన ఈ కేసులో సత్యానందంకు షరతులతో కూడిన ముందస్తు బెయిల్ మంజూరు చేస్తూ హైకోర్టు మంగళవారం తీర్పుచెప్పిన విషయం విదితమే. హైకోర్టు ఉత్తర్వుల మేరకు ఇక్కడి 1వ అదనపు మేజిస్ట్రేట్ కోర్టులో తన న్యాయవాదులు విష్ణువర్థన్‌రెడ్డి, సీహెచ్ మన్మథరావులతో కలిసి వచ్చి సత్యానందం లొంగిపోయాడు. రూ.లక్ష పూచీకత్తుతోపాటు ప్రతి రోజు ఉదయం 10నుంచి సాయంత్రం 5 గంటల మధ్యలో కేసు నమోదైన మాచవరం పోలీసుస్టేషన్‌లో హాజరు కావాల్సి ఉంటుంది. అక్కడ సంతకాలు చేయాలనేది హైకోర్టు ఆదేశం.
 
 సత్యానందం కోర్టుకు సమర్పించిన పూచీకత్తులను ఇన్‌చార్జి న్యాయమూర్తి డి.సత్యప్రభాకరరావు పరిశీలించారు. రాష్ట్ర డీజీపీ జె.వి.రాముడు, నగర పోలీసు కమిషనర్ గౌతమ్ సవాంగ్, ఇతర పోలీసు అధికారులతో కలిసి వార్షిక నేర సమీక్షను విలేకరుల సమావేశంలో విడుదల చేస్తున్న సమయంలో సత్యానందం లొంగుబాటు విషయం తెలిసింది. కంగుతిన్న పోలీసు ఉన్నతాధికారులు మాచవరం ఇన్‌స్పెక్టర్ కె.ఉమామహేశ్వరరావు సహా ప్రత్యేక పోలీసు బృందాన్ని కోర్టు వద్దకు పంపింది. ఇదే సమయంలో సత్యానందంపై మరికొన్ని కేసులు కూడా ఉన్నాయంటూ డీజీపీ రాముడు చెపుతూ ఆయా కేసులపై కూడా తగు చర్యలు తీసుకుంటామన్నారు. మరో కేసుపై అరెస్టు చేయనున్నారనే సమాచారంతో సత్యానందం న్యాయవాదులతోపాటు కోర్టుకు భారీగా న్యాయవాదులు చేరుకున్నారు. కోర్టు ప్రొసీడింగ్స్ పూర్తి కాగానే న్యాయవాదులతో కలిసి బయటకు వచ్చిన సత్యానందం తన కారెక్కి వెళ్లిపోయాడు. తల్లిదండ్రులను చూసి ఉద్వేగం చెందిన సత్యానందం అస్వస్థతకు లోనై సాయంత్రం ప్రైవేటు ఆసుపత్రిలో చికిత్సకోసం చేరగా పోలీసులు అదుపులోకి తీసుకున్నారు. అనంతరం సీపీ కార్యాలయానికి, ఆపై గుర్తు తెలియని ప్రాంతానికి తరలించారు.


 విజయవాడ : కాల్మనీ కేసుకి సంబంధించి ఓ కేసులో మాత్రమే డీఈ సత్యానందం బెయిల్ పొందాడని ఆంధ్రప్రదేశ్ డీజీపీ జె.వి.రాముడు వెల్లడించారు. అతని మీద మరికొన్ని కేసులు పెండింగ్లో ఉన్నాయని తెలిపారు. కాల్ మనీ సెక్స్ రాకెట్ కేసులో విచారణ కోసం సత్యానందంను అదుపులోకి తీసుకుంటామని రాముడు స్పష్టం చేశారు.
 గురువారం విజయవాడలో ఈ ఏడాది రాష్ట్రంలో జరిగిన నేరాల సంఖ్యపై జేవీ రాముడు మాట్లాడారు. ఈ ఏడాది 100 మంది మావోయిస్టులు లొంగిపోయారని చెప్పారు. మరో 96 మంది మావోయిస్టులను అరెస్ట్ చేశామని పేర్కొన్నారు.  అలాగే ఎర్రచందనం అక్రమ రవాణాలో 2,710 మందిని అరెస్ట్ చేసినట్లు వివరించారు. 2014తో పోలిస్తే ఈ ఏడు నేరాల సంఖ్య 4.23 శాతం తగ్గిందని డీజీపీ రాముడు విశ్లేషించారు.


 గుంటూరు జిల్లాలో ఘటనలు
  
 రాజధానిగా రూపాంతరం చెందిన కృష్ణా, గుంటూరు జిల్లాల్లో గతించిపోతున్న 2015 నేరపరంగా చేదు జ్ఞాపకాలనే మిగిల్చింది. రోడ్డు ప్రమాదాల్లో అనేకమంది మృతిచెందడం, సంవత్సరం మొదట్లోనే విజయవాడలోని భవానీపురంలో విద్యుత్ షాక్‌కు గురై ఐదుగురు మృతిచెందడం, కల్తీ మద్యం తాగి మరో ఐదుగురు ప్రాణాలొదలడం, కాల్‌మనీ ఉచ్చులో చిక్కుకుని ఎంతోమంది అష్టకష్టాలు పడటం, ఏఎన్‌యూలో ర్యాగింగ్ భూతానికి రిషితేశ్వరి బలి, పలుచోట్ల జరిగిన ప్రమాదాల్లో జిల్లావాసులు కన్నుమూయడం కన్నీటి జ్ఞాపకాలే. ఇక చోరీలు ఈ ఏడాది విచ్చలవిడిగా జరిగాయి. మన రాష్ర్ట          దొంగలే కాకుండా ఇతర రాష్ట్రాల నుంచి వచ్చిన ముఠాలు చెలరేగిపోయాయి. చైన్‌స్నాచింగ్‌లు ఊహకందనంత రీతిలో జరిగాయి. గ్రూపు తగాదాలు, ముఠా కక్షలు పెచ్చుమీరాయి. ఇక రాజధాని నేపథ్యంలో ఏర్పడిన భూతగాదాలు   రక్త సంబంధీకుల మధ్య చిచ్చురేపి అన్నదమ్ములను కోర్టుకు లాగాయి. ెుుత్తంమీద  2015 సంవత్సరం కృష్ణా, గుంటూరు జిల్లాలపై   రక్తచరిత్రనే లిఖించింది.
  
 గుంటూరు :  గుంటూరు, కృష్ణాజిల్లాల్లో గత ఏడాదితో పోలిస్తే నేరాల సంఖ్య తక్కువగానే ఉన్నా దేశవ్యాప్తంగా సంచలనం కలిగించిన నేరాలు అనేకం జరిగాయి. హత్యలు, ఆత్మహత్యలు, దాడులు, దోపిడీలు, దొంగతనాలు, కిడ్నాప్‌లు, అత్యాచారాలు, మోసాలు, మహిళలు, విద్యార్థినులపై లైంగిక వేధింపులు, నమ్మక ద్రోహాలు, భూ వివాదాలు, రోడ్డు ప్రమాదాలతో 2015లో రాజధాని రక్తసిక్తంగా మారింది. తుళ్లూరులో భూ కబ్జాలు పెరిగి వివాదాలు చెలరేగాయి. రక్తసంబంధాలు కూడా చూడకుండా దాడులకు దిగారు. గుంటూరు జిల్లాలో రిషితేశ్వరి, జీజీహెచ్‌లో ఎలుకల దాడిలో చిన్నారి మృతి వంటి సంఘటనలు, విజయవాడలో కల్తీ నెయ్యి, కల్తీ మద్యం, కాల్‌మనీ సంఘటనలు రాష్ట్రవ్యాప్తంగా సంచలనం కలిగించాయి.
 
 దొంగల హల్‌చల్
 గత రెండేళ్లతో పోలిస్తే గుంటూరు, కృష్ణా జిల్లాల్లో దొంగల ముఠాలు స్వైర విహారం చేశాయి. చైన్‌స్నాచింగ్, ఇళ్లల్లో జరిగే దొంగతనాలకు లెక్కే లేకుండాపోయింది. ద్విచక్ర వాహనం రోడ్డు పక్కన పెట్టి పక్కకు వెళ్లాలంటే ప్రజలు భయపడిపోతున్నారు. గుంటూరు, విజయవాడ కేంద్రాలుగా ఇరాని, పార్ధివ్, బిహారీ ముఠాలు సంచరిస్తున్నట్లు నిఘా వర్గాలు గుర్తించాయి.
  
 ►చిలకలూరిపేటలో శంకర్ అనే విలేకరిపై మంత్రి అనుచరులు దాడిచేసి హతమార్చిన సంఘటన రాష్ట్రవ్యాప్తంగా                      చర్చనీయాంశమైంది.
 ►గుంటూరు జీజీహెచ్‌లోని శిశు శస్త్రచికిత్స విభాగంలో వైద్యం కోసం చేరిన పదిరోజుల పసికందును ఎలుకలు కొరికి చంపాయి. సూపరింటెండెంట్, ఆర్‌ఎంవో, వైద్య అధికారి, ఇద్దరు స్టాఫ్ నర్సులు, పారిశుధ్య కాంట్రాక్టర్లపై వేటు పడింది.
 ►తుళ్లూరులో చంద్రశేఖర్ అనే రైతుకు చెందిన చెరుకు పంటను గుర్తుతెలియని దుండగులు దగ్ధం చేశారు.
 ►లింగాయపాలెంలో రాజేష్ అనే రైతుకు చెందిన ఏడు ఎకరాల భూమిలో వేసిన అరటి తోటను సీఆర్‌డీఏ అధికారులు              పొక్లెయిన్లతో ధ్వంసం చేశారు.  
 ►మంగళగిరిలో రెండు వర్గాల ఘర్షణలో ఇద్దరు యువకులు           అక్కడిక్కడే మృతిచెందగా, ముగ్గురికి తీవ్రగాయాలైన సంఘటన సంచలనం కలిగించింది.
 ►మాచర్ల నియోజకవర్గంలోని దుర్గి, మాచర్ల, వెల్దుర్తి మండలాల పరిధిలోని 15 గ్రామాల్లో మూడు నెలల వ్యవధిలో నాలుగు సార్లు మావోయిస్టుల పేరుతో వాల్ పోస్టర్లు వెలిసిన సంఘటన ప్రజలను తీవ్ర భయభ్రాంతులకు గురిచేసింది.
 ►ఏసీబీ అధికారులు జిల్లా పంచాయతీ అధికారి వీరయ్యచౌదరి ఇంటిపై దాడులు నిర్వహించి రూ.1.5 కోట్లకుపై అక్రమ               ఆస్తులను గుర్తించి ఆయన్ను అరెస్టు చేసిన సంఘటన               సంచలనం కలిగించింది.
 ► గుంటూరు నగరంలో ఒకేరోజు గంట వ్యవధిలో ఎనిమిది చైన్‌స్నాచింగ్‌లు జరగడం రాష్ట్రవ్యాప్తంగా సంచలనం కలిగించింది.
 ► గుంటూరు-విజయవాడల్లో సిమీ ఉగ్రవాదులు షెల్టర్ ఏర్పాటు చేసుకున్నట్లు సూర్యాపేట ఎన్‌కౌంటర్ ఉదంతంతో బయటకు రావడంతో అంతా హడలిపోయారు.
 ►గుంటూరు జీజీహెచ్‌లో సిబ్బంది అవినీతి వల్ల ఇద్దరు తల్లులు తనకు మగబిడ్డ పుట్టాడంటూ గొడవకు దిగి ఆడశిశువును పట్టించుకోకపోవడంతో మృతిచెందిన దారుణ సంఘటన   సంచలనం కలిగించింది.
 ►బాపట్ల మండలం చుండూరుపల్లిలో సాంబశివరావు అనే              ఎన్‌ఆర్‌ఐ ఇంట్లో చోరీ జరిగింది. సుమారు రూ.3.5 కోట్ల సొత్తు చోరీకి గురికావడం సంచలనం కలిగించింది. దొంగను పట్టుకుని చోరీ సొత్తును పోలీసులు వారం వ్యవధిలోనే రికవరీ చేయడం మరో సంచలనం.
  
 ఏఎన్‌యూలో ఆర్కిటెక్చర్ విద్యార్థిని రిషితేశ్వరి ఆత్మహత్యకు పాల్పడిన సంఘటన సంచలనం కలిగించింది. రిషితేశ్వరి సంఘటన జరిగిన నాలుగు రోజులకే వట్టిచెరుకూరు మండలంలో ఓ కళాశాలలో సునీత అనే విద్యార్థిని ర్యాగింగ్ విషయంలో తనపై చర్యలు తీసుకుంటారేమోననే భయంతో కళాశాల భవనం పై నుంచి కిందకు దూకి  బలవన్మరణానికి పాల్పడింది.  వెల్దుర్తి మండలానికి చెందిన తిరుపతమ్మ అనే విద్యార్థిని తనపై కొంతమంది విద్యార్థులు లైంగిక వేధింపులకు  పాల్పడుతున్నారంటూ సుసైడ్ నోట్ రాసి ఆత్మహత్యకు పాల్పడింది.  గుంటూరు నగరంలోని మహిళా డిగ్రీ కళాశాల వద్ద   వెంకటరమణ అనే విద్యార్థినిపై ఓ ఉన్మాది సుత్తితో దాడిచేసి తలపై కొట్టడంతో తీవ్రగాయాల పాలైంది.
 
  


 హైదరాబాద్ : రాష్ట్రవ్యాప్తంగా రేకెత్తించిన కాల్ మనీ, సెక్స్ రాకెట్ నిందితుడు, విద్యుత్ శాఖ డిఇ సత్యానందంకు ముందస్తు బెయిల్ లభించింది. పోలీసుల దర్యాప్తుకు సహకరించాలని షరతు విధిస్తూ ఆయనకు హైకోర్టు మంగళవారం బెయిల్ ఇచ్చింది. ఈ కేసు వ్యవహారం వెలుగులోకి రాగానే సత్యానందం పరారీలో ఉన్న విషయం తెలిసిందే.
 ఈ నేపథ్యంలో తన అరెస్ట్ తప్పదని గ్రహించిన సత్యానందం ముందస్తు బెయిల్ కోసం నేరుగా హైకోర్టులో పిటిషన్ దాఖలు చేశారు. ఈ వ్యాజ్యాన్ని మంగళవారం న్యాయమూర్తి జస్టిస్ రాజా ఇలంగో విచారించారు. కాల్‌మనీ-సెక్స్ రాకెట్ వ్యవహారంలో పిటిషనర్‌కు ఎటువంటి సంబంధం లేదని, వాస్తవాలను తెలుసుకోకుండా పోలీసులు పిటిషనర్‌ను నిందితునిగా చేరుస్తూ కేసు నమోదు చేశారని సత్యానందం తరఫు న్యాయవాది పి.విష్ణువర్థన్‌రెడ్డి తెలిపారు. ఫిర్యాదు ఇచ్చిన మహిళకు అసలు సత్యానందం ఎవరో కూడా తెలియదని, ఈ విషయం ఫిర్యాదును పరిశీలిస్తే అర్థమవుతోందన్నారు. తరువాత పబ్లిక్ ప్రాసిక్యూటర్ పోసాని వెంకటేశ్వర్లు వాదనలు వినిపిస్తూ, ఇవ్వరాదని కోరారు. కాల్‌మనీ-సెక్స్‌రాకెట్ కేసులో సత్యానందం కీలక నిందితుల్లో ఒకరన్నారు. ఫిర్యాదుదారు మేజిస్ట్రేట్ ముందు ఇచ్చిన వాంగ్మూలంలో సత్యానందం తనను లైంగికంగా వేధించారని చెప్పారని, దీనిని తీవ్రంగా పరిగణించాలని కోరారు. ఇరుపక్షాల వాదనలు విన్న న్యాయమూర్తి జస్టిస్ రాజా ఇలంగో పిటిషనర్ మంజూరు చేస్తూ ఉత్తర్వులు జారీ చేశారు.
  
 మరోవైపు ఈ కేసులో నిందితులపై  చార్జ్‌షీట్‌ నమోదైంది.  ప్రధాన నిందితులు యలమంచిలి రాము, భవానీ ప్రసాద్, సత్యానందం, చెన్నుపాటి శ్రీను, పెండ్యాల శ్రీకాంత్, వెనిగళ్ల శ్రీకాంత్, దూడల రాజేష్‌పై పోలీసులు చార్జిషీట్‌ నమోదు చేశారు. అయితే కేసు నమోదై మూడు వారాలవుతున్నా ఇంకా నిందితుల్ని పోలీసులు పట్టుకోలేదు. అలాగే ఈ కేసులో నిందితులైన పెండ్యాల శ్రీకాంత్,వెనిగళ్ల శ్రీకాంత్‌ల ఆచూకీ ఇంకా దొరకలేదు.


 సంచలనం రేకెత్తించిన కాల్‌మనీ సెక్స్‌ రాకెట్‌ కేసులో నిందితులపై రౌడీషీట్‌ నమోదైంది. ప్రధాన నిందితులు యలమంచిలి రాము, భవానీ ప్రసాద్, సత్యానందం, చెన్నుపాటి శ్రీను, పెండ్యాల శ్రీకాంత్, వెనిగళ్ల శ్రీకాంత్, దూడల రాజేష్‌పై పోలీసులు రౌడీ షీట్‌ నమోదు చేశారు. అయితే కేసు నమోదై మూడు వారాలవుతున్నా ఇంకా నలుగురు నిందితుల్ని పోలీసులు పట్టుకోలేదు. కేసులో నిందితులుగా ఉన్న విద్యుత్ శాఖ డీఏ సత్యానందం ఇంకా పరారీలోనే ఉన్నాడు. ఈ కేసులో నిందితులైన పెండ్యాల శ్రీకాంత్, వెనిగళ్ల శ్రీకాంత్‌ల ఆచూకీ ఇంకా దొరకలేదు. నిందితుల పరారీ వెనుక అధికార పార్టీ నేతల ప్రమేయముందన్న విమర్శలు వెల్లువెత్తుతున్నాయి.
 
 విజయవాడలో కాల్‌మనీ - సెక్స్‌రాకెట్ ముఠాలో పట్టుబడిన ముగ్గురు నిందితుల విచారణలో దిమ్మతిరిగే నిజాలు వెల్లడవుతున్నాయి. ప్రత్యేక అనుమతితో ఈ ముఠాను విచారిస్తున్న పోలీసులు ఇప్పటికే కీలక సమాచారాన్ని సేకరించారు. కాల్‌మనీ ముఠా సభ్యుల సెల్‌ఫోన్ కాల్ డేటాను విశ్లేషిస్తున్నారు. కాల్‌మనీ- సెక్స్ రాకెట్‌లో నిందితుల నుంచి స్వాధీనం చేసుకున్న ఫోన్లలో అధిక శాతం మహిళల నెంబర్లే దర్శనమిస్తున్నాయి. పెద్దసంఖ్యలో మహిళలతో ఈ ముఠా సభ్యులు సంభాషించారన్న ఆధారాలు లభ్యమవుతున్నాయి. అప్పులు ఇవ్వడం, మహిళల అసహాయతను ఆసరాగా తీసుకుని వారిని తమ లైంగిక వాంఛల కోసం దూర ప్రాంతాలకు తీసుకువెళ్లడం వీరు పరిపాటిగా చేసుకున్నట్లు కాల్ డెటా సమాచారం ద్వారా పోలీసులు విశ్లేషిస్తున్నారు. పోలీసులు విచారణలోనూ నిందితులు కొన్ని వాస్తవాలను కూడా వెల్లడించినట్లు సమాచారం.  
 
 కాల్‌మనీ ముఠా నుంచి లభించిన డాక్యుమెంట్ల ద్వారా సుమారు 200 కోట్ల రూపాయల మేరకు కాల్‌మనీ పేరుతో అప్పులు ఇచ్చినట్లు తెలుస్తోంది. అయితే అనధికారికంగా 500 కోట్లకు పైగా కాల్‌మనీ పేరుతో డబ్బును చెలామణి చేస్తున్నట్లు పోలీసులు అనుమానిస్తున్నారు. ప్రస్తుతం పోలీసుల అదుపులో ఉన్న యలమంచిలి రాము, దూడల రాజేష్, భవానీశంకర్‌ల ద్వారా కాల్‌మనీ వ్యవహారంపై మరిన్ని వివరాలను సేకరించేందుకు పోలీసులు ప్రయత్నిస్తున్నారు. కాల్‌మనీకి సంబంధించి ఆర్థిక వనరులు ఎలా వచ్చాయనే దానిపై నిందితుల నుంచి సరైన సమాదానం రాబట్టలేకపోయారు. అలాగే కాల్‌మనీలోని మిగిలిన నిందితుల ఆర్థిక మూలాలపై కూడా విచారణ జరిపిస్తామని నగర పోలీస్ కమిషనర్ గౌతం సవాంగ్ ప్రకటించినా, దానిపై ఇప్పటివరకు చర్యలేవీ మొదలు కాలేదు.
  
 ఇక ఈ కేసులో నాలుగో నిందితుడైన విద్యుత్ శాఖ డిఇ సత్యానందం తృటిలో పోలీసుల నుంచి తప్పించుకోవడం వెనుక కొందరు పెద్దల సహకారం కూడా ఉన్నట్లు పోలీసులు అనుమానిస్తున్నారు. సత్యానందాన్ని అదుపులోకి తీసుకోవాలని నిర్ణయించిన కొద్దిసేపట్లోనే ఆయన విజయవాడ నుంచి పరారైనట్లు పోలీసులు భావిస్తున్నారు. ఇందుకు నగరానికి చెందిన ఓ ప్రభుత్వ కాలేజీ ప్రిన్సిపాల్, మరో ఎన్జీఓ నేత కూడా సహకరించనట్లు సమాచారం. వీరి వాహనాల్లోనే సత్యానందం రాష్ట్రం విడిచిపెట్టి పరారైనట్లు పోలీసులు అనుమానిస్తున్నారు. సత్యానందాన్ని ఈ కేసు నుంచి బయటపడేసేందుకు అమెరికాలోని తెలుగు సంఘాల్లో కీలకమైన ఓ ఎన్‌ఆర్‌ఐ అధికార పార్టీలోని ప్రముఖులపై ఒత్తిడి కూడా తీసుకువచ్చినట్లు సమాచారం. కాల్‌మనీ బాధితుల్లో ఓ యువతికి అమెరికాలో ఉపాధి కల్పిస్తానని మోసగించిన ఘటనలో ఎన్‌ఆర్‌ఐ పాత్ర కూడా ఉన్నట్లు ఆరోపణలు వినిపిస్తున్నాయి. ఈ నేపథ్యంలో ఎన్‌ఆర్‌ఐ పాత్రపై కూడా పోలీసులు దృష్టి పెట్టారు.
 
 ఇక మిగిలిన నిందితుల్లో వెనిగళ్ల శ్రీకాంత్‌కు పెనమలూరు ఎమ్మెల్యే బోడె ప్రసాద్ అత్యంత సన్నిహితుడు. ఎమ్మెల్యే బోడె ప్రసాద్‌తో కలిసి విదేశాలకు వెళ్లిన శ్రీకాంత్ ఈ కేసు బయటపడగానే హఠాత్తుగా మాయమయ్యాడు. విదేశాల్లోనే ఉన్నాడా... దేశంలోని మరో రాష్ట్రంలో తలదాచుకున్నాడా అనే అంశంపై పోలీసులు ఆరా తీస్తున్నారు. పశ్చిమగోదావరి జిల్లాకు చెందిన మరో టీడీపీ నేతకు సన్నిహితుడైన పెండ్యాల శ్రీకాంత్ కూడా వేరే రాష్ట్రంలో ఉన్నట్లు తెలుస్తోంది. న్యాయస్థానం ద్వారా ముందస్తు బెయిల్ తీసుకున్న తరువాతే వీరు రాష్ట్రానికి వస్తారనే ప్రచారం జరుగుతోంది. అయితే నిందితుల కోసం గాలిస్తున్నామని పోలీసులు చెబుతున్నా.. వీరిని రప్పించేందుకు, ఆర్థిక మూలాలను తెలుసుకునేందుకు ప్రయత్నాలు మొదలుకాకపోవడం చర్చనీయాంశంగా మారింది.


 విజయవాడ :  కాల్‌మనీ సెక్స్‌రాకెట్‌పై నిందితులపై చర్యకు మావోయిస్టులు విడుదల చేసిన ప్రకటన పోలీసు వర్గాల్లో కలకలం రేపింది. విజయవాడ కేంద్రంగా మావోయిస్టు పార్టీ ఆంధ్రప్రదేశ్ రాష్ట్ర కమిటీ నుంచి అధికార ప్రతినిధి శ్యామ్ పేరుతో సోమవారం ప్రకటన వెలువడింది. అధికార తెలుగుదేశం పార్టీ నాయకులు, ఎమ్మెల్యేలు, ఎమ్మెల్సీలకు కాల్‌మనీ సెక్స్‌రాకెట్ కేసుతో సంబంధాలు ఉన్నాయని, వాళ్లను రక్షించాలని చూస్తే ప్రజాకోర్టులో శిక్ష తప్పదంటూ మావోయిస్టు పార్టీ పేరుతో హెచ్చరిక వెలువడడం అధికార తెలుగుదేశం వర్గాలను కూడా కలవరపాటుకు గురిచేసింది. మావోయిస్టులకు షెల్టర్ జోన్‌గా విజయవాడ ఉంటున్నదని, అయితే రాజధాని కావడంతో నేరుగా ఇక్కడి నుంచే ప్రకటన వచ్చిందని పోలీసులు భావిస్తున్నారు.
 
 గుంటూరు, ఖమ్మం జిల్లాలను బేస్ చేసుకొని కార్యకలాపాలు సాగిస్తున్న మావోయిస్టులు నేరుగా విజయవాడలో ప్రకటన విడుదల చేయడంతో తెలుగుదేశం పార్టీవారు ఆలోచనలో పడ్డారు. ఇటీవల పలు సందర్భాల్లో రాష్ట్రంలో మావోయిస్టులు లేరన్నారు. అయితే సెక్స్‌రాకెట్‌పై సుదీర్ఘ ప్రకటన విడుదల చేయడంతో పాటు సీఎం చంద్రబాబునాయుడు కేసును తప్పుదోవ పట్టించేందుకు అంగన్‌వాడీ వ్యవహారాన్ని తెరపైకి తెచ్చారని మావోయిస్టుల ప్రకటనలో ఆరోపించారు.
  టీడీపీ నేతల గుండెల్లో రైళ్లు..
  మావోయిస్టుల ప్రకటనతో తెలుగుదేశం నేతల గుండెల్లో రైళ్లు పరుగెడుతున్నాయి. కాల్‌మనీ సెక్స్ రాకెట్ కేసులో పెట్టుబడులు పెట్టిన వారు, దౌర్జన్యాలకు దిగిన వారు, మహిళలపై అనుచితంగా ప్రవర్తించినవారు వణికి పోతున్నారు. నగరంలో ఏమూలనైనా తమకు ఇబ్బందులు తప్పవనే ఆలోచనలో ఉన్నారు. కాల్‌మనీలో పెట్టుబడులు ఉన్న జాబితాలను ఇప్పటికే పోలీసులు తయారు చేసినట్లు సమాచారం. వీరి వివరాలు మావోయిస్టుల చేతుల్లో పడితే పరిస్థితి ఏమిటనేది కూడా తెలుగుదేశం పార్టీలో చర్చ సాగుతోంది. పైగా సోమవారం విడుదల చేసిన ప్రకటన ప్రభుత్వ అధిపతి సీఎం చంద్రబాబునాయుడు, పోలీసులను ఉద్దేశించే ఉంది.
  
 పోలీసులకు సవాల్..
 కాల్‌మనీ సెక్స్‌రాకెట్ కేసు పోలీసులకు సవాల్‌గా మారిన సంగతి తెలిసిందే. తెలుగుదేశం పార్టీలో పలు హోదాల్లో ఉన్నవారు నిందితులుగా ఉండడంతో ఎలాగైనా ఈ కేసు నుంచి బయట పడేందుకు వారు చేయని వ్యవహారాలంటూ లేవు. ఈ విషయాలను పరిశీలించిన మావోయిస్టులు నేరుగా హెచ్చరికలు జారీచేశారు.
  
 జిల్లాలో మావోయిస్టులు..
 గుంటూరు జిల్లా పల్నాడు ప్రాంతంలో కార్యకలాపాలు సాగిస్తున్న మావోయిస్టులు జిల్లాకు కూడా కార్యకలాపాలు విస్తరించారా? అనేది చర్చకు దారి తీసింది. పశ్చిమ కృష్ణాలో సమస్యలు కొట్టొచ్చినట్లు కనిపిస్తున్నాయి. రాజధాని ప్రాంతంలో భూములు కోల్పోతున్న రైతుల సమస్యలపై పోరాడాలన్న ఆలోచనలో ఉన్నట్లు సమాచారం. అదే జరిగితే రాజధాని బాధితుల తరుఫున మావోయిస్టులు కూడా పోరాటం నిర్వహించే అవకాశం ఉంది. ఇటీవల కొందరు హక్కుల సంఘాల వారు ఆ ప్రాంతంలో పర్యటించి ఒక రైతుపై పోలీసుల దుశ్చర్యను ఖండించారు. దీనిపై పోలీసులు మరింత దృష్టిపెట్టి అణచివేసేందుకు ప్రయత్నించారు. దీనిని హక్కుల సంఘాల వారు హైకోర్టులో సవాల్ చేయడంతో పోలీసులు వెనకడుగు వేశారు.
  
  


 రౌడీషీట్లు తెరిచేందుకు పోలీసుల సమాయత్తం
  వివరాలు సేకరిస్తున్న నిఘా విభాగం
  
 విజయవాడ సిటీ : కాల్‌మనీ వ్యాపారుల ఆగడాలకు చెక్ పెట్టేందుకు పోలీసు అధికారులు సిద్ధమవుతున్నారు. కాల్‌మనీ వ్యాపారం పేరిట దందాలు చేసేవారిని ఉక్కుపాదంతో అణచివేసేందుకు రౌడీషీట్ల మంత్రం ప్రయోగిస్తున్నారు. మాజీ రౌడీషీటర్లపై వెంటనే పాత రౌడీషీట్లను పునరుద్ధరించడంతో పాటు దందాలు చేసినట్టు సమాచారం ఉన్న వారిని కొత్తగా జాబితాలో చేర్చనున్నారు. నిఘా వర్గాల ద్వారా ఇప్పటికే పలువురి వివరాలు తెప్పించుకుంటున్నట్టు తెలిసింది. ఈ క్రమంలోనే గన్‌మెన్లను వెంటేసుకొని వడ్డీ వ్యాపారం దందా నిర్వహిస్తున్న మాజీ రౌడీషీటర్ మాదంశెట్టి శివకుమార్‌పై తిరిగి రౌడీషీటు ప్రారంభించారు.
 
 గతంలో పలువురు మహిళలు శివకుమార్ ఆగడాలపై కృష్ణలంక పోలీసులను ఆశ్రయించారు. పోలీసుల్లోని పలుకుబడితో అప్పటికప్పుడు శివకుమార్ బయటపడ్డాడు. కాల్‌మనీ బాధితులకు పోలీసు కమిషనర్ సవాంగ్ భరోసా ఇవ్వడంతో ఓ మహిళ అతని ఆగడాలపై పోలీసులను ఆశ్రయించారు. దీంతో అతనిపై కేసు నమోదు చేసి అరెస్టు చేశారు.


 కృష్ణా: 'కాల్మనీ బాధితులు నేరుగా నన్ను కలవొచ్చు' అని టీడీపీ ఎమ్మెల్యే వల్లభనేని వంశీ మోహన్ తెలిపారు. కాల్మనీ వ్యవహారంలో ఎంతటి వారి పైనైనా చర్యలు తీసుకుంటామన్నారు. గన్నవరం నియోజకవర్గంలో కొందరికి ఇప్పటికే నోటీసులు ఇచ్చామని తెలిపారు. కాల్మనీ వ్యవహారంపై ఏపీ సర్కార్ స్పెషల్ కోర్టు ఏర్పాటు చేయనుందని పునరుద్ఘాటించారు.   
  


 రాష్ట్ర వ్యాప్తంగా.. కలకలం రేపిన కాల్‌మనీ కేసులో.. నిందితులను కఠినంగా శిక్షించాలని కోరుతూ.. కాల్‌మనీ పోరాట వేదిక ఆధ్వర్యంలో రాస్తారోకో నిర్వహించారు. విజయవాడ బందర్ రోడ్డులో సోమవారం కాల్‌మనీ పోరాట వేధిక ఆధ్వర్యంలో బాధిత మహిళలు రోడ్డెక్కారు. మహిళలిన చెరబట్టిన కాల్ కీచకుల్ని కఠినంగా శిక్షించాలని.. సిట్టింగ్ జడ్జి చేత న్యాయ విచారణ చేపట్టాలని కోరుతూ.. రాస్తారోకో నిర్వహించారు.
 
  


 ఆంధ్రప్రదేశ్ రాష్ట్రం మొత్తాన్ని విపరీతంగా కుదిపేస్తున్న కాల్‌మనీ సెక్స్ రాకెట్ వ్యవహారంలో కొత్త కోణాలు వెలుగులోకి వస్తున్నాయి. ముగ్గురు నిందితులను రెండు రోజులుగా టాస్క్‌ఫోర్స్ బృందం విచారిస్తోంది. సెక్స్ రాకెట్ కేసులో ఉన్న నిందితుల కాల్‌డేటాను విశ్లేషించగా విస్తుగొలిపే వాస్తవాలు వెలుగుచూశాయి. వాటిలో పెద్ద సంఖ్యలో మహిళల ఫోన్ నంబర్లను గుర్తించారు. గంటల తరబడి ఆ మహిళలతో నిందితులు సంభాషించినట్లు నిర్ధారించారు.
 
 ఎ-4 నిందితుడు సత్యానందం పరారు కావడానికి సహకరించినవారిపై దృష్టిపెట్టారు. ఓ కాలేజి ప్రిన్సిపాల్, ఏపీ ఎన్జీవో నేతల ప్రమేయంపై కూడా ఆరా తీస్తున్నారు. నిందితుడు సత్యానందానికి మద్దతుగా ఓ ఎన్నారై ప్రముఖుడు జోక్యం చేసుకుంటున్నారు. టీడీపీ నేతలతో ఆ ఎన్నారై మంతనాలు జరుపుతున్నట్లు తెలిసింది. ఈ కేసులో నలుగురు కీలక నిందితులు ఇంకా పరారీలోనే ఉన్నారు. ఇంత జరుగుతున్నా, పోలీసులు మాత్రం కాల్‌మనీ సెక్స్ రాకెట్ నిందితుల ఆస్తుల జోలికి వెళ్లడం లేదు. నిందితుల ఆర్థిక మూలాలపై దర్యాప్తు కూడా ఇంకా మొదలుకాలేదు.
 నిందితులు మహిళలను ఎలా బెదిరించారనే విషయాలు తేల్చడానికి ప్రయత్నిస్తున్నారు. ఇప్పటివరకు అధికారికంగా తేలిన లెక్కల ప్రకారమే.. దాదాపు రూ. 200 కోట్ల మేరకు చలామణి చేయించినట్లు తెలుస్తోంది. కొంతమంది పెద్దలకు చెందిన మరో 500 కోట్లను కూడా అనధికారికంగా తిప్పుతున్నట్లు సమాచారం.


 విజయవాడ : రైల్వే చిరుద్యోగులకు 'కాల్‌ మనీ' వడ్డీకి అప్పులు ఇచ్చి వేధింపులకు పాల్పడుతున్న గుడివాడకు చెందిన కొమ్మిరెడ్డి వెంకట సుబ్బారెడ్డిని విజయవాడ సత్యనారాయణపురం పోలీసులు అరెస్టు చేశారు. అతని నుంచి 1469 ప్రామిసరీ నోట్లు, 911 ఖాళీ చెక్కులు, బ్యాంక్ పాస్ పుస్తకాలు 59, ఏటీఎం కార్డులు 83, ఆరు నాన్ జ్యుడీషియరీ స్టాంపులు స్వాధీనం చేసుకున్నట్టు శనివారం కమిషనరేట్‌లో ఏర్పాటు చేసిన విలేకరుల సమావేశంలో శాంతిభద్రతల విభాగం డీసీపీ ఎల్.కాళిదాస్ చెప్పారు. ఈ నెల 24న కార్పొరేషన్ చిరుద్యోగులను అధిక వడ్డీల పేరిట వేధింపులకు పాల్పడుతున్న రాంపిళ్ల పాపారావును అరెస్టు చేసిన విషయం తెలిసిందే. ప్రభుత్వ శాఖల్లోని చిరుద్యోగులను అధిక వడ్డీల పేరిట వేధింపులకు పాల్పడుతున్నవారిని కమిషనరేట్ పోలీసులు అరెస్టులు చేయడం సంచలనం కలిగిస్తోంది.
 
 డీసీపీ కాళిదాస్ కథనం ప్రకారం.. సుబ్బారెడ్డి మొబైల్ ఫోన్ల వ్యాపారంతో పాటు విజయవాడ, గుడివాడ పట్టణాల్లో వడ్డీ వ్యాపారం చేస్తుంటాడు. గత 20 ఏళ్లుగా ప్రభుత్వ ఉద్యోగులు ముఖ్యంగా రైల్వేలో పని చేసే చిరుద్యోగులకు అధిక వడ్డీలకు అప్పులు ఇస్తున్నాడు. ఇందుకోసం ఖాళీ నోట్లు, చెక్కులు, బ్యాంక్ పుస్తకాలు, ఏటీఎం కార్డులు తీసుకుంటాడు. ఆయా ఉద్యోగులు ఏళ్ల తరబడి వడ్డీలు చెల్లిస్తున్నారు. కనీసం తమకు జీతం ఎంత వస్తుందనే విషయం కూడా వారికి తెలియదు. ఫైనాన్స్ వ్యాపారి తన వడ్డీ పోను ఇచ్చింది తీసుకొని కుటుంబాన్ని గడుపుకోవడమే. ఒకవేళ పూర్తిగా అప్పులు చెల్లించినా వారికి ఇవ్వాల్సిన పత్రాలు, ఇతర ఆధారాలు ఇవ్వడు. గట్టిగా నిలదీస్తే అనుచరులతో కోర్టు కేసులు వేయించి వేధింపులకు పాల్పడుతుంటాడు.
 
 సత్యనారాయణపురం ప్రాంతానికి చెందిన పలువురు చిరుద్యోగులు తాము అప్పు చెల్లించినా వేధింపులకు గురి చేస్తున్నాడని పేర్కొంటూ పోలీసు కమిషనర్ గౌతమ్ సవాంగ్‌కు ఫిర్యాదు చేశారు. పోలీసు కమిషనర్ ఆదేశాలతో రంగంలోకి దిగిన సత్యనారాయణపురం పోలీసు స్టేషన్ ఇన్‌స్పెక్టర్ ఎం.సత్యనారాయణ రంగంలోకి దిగి నిందితుణ్ణి అదుపులోకి తీసుకున్నారు. అతని వద్ద నుంచి నోట్లు, చెక్కులు, పాస్‌పుస్తకాలు, ఏటీఎం కార్డులు స్వాధీనం చేసుకొని అరెస్టు చేశారు. కొత్తపేట పోలీసులు కె.ఎల్.రావునగర్ కుండల మార్కెట్ ప్రాంతానికి చెందిన కానుళ్ల కోటేశ్వరరావు మెడికల్ షాపుపై దాడి చేసి పెద్ద మొత్తంలో ఖాళీ ప్రామిసరీ నోట్లు, చెక్కులు, రోజువారీ పుస్తకాలు స్వాధీనం చేసుకున్నారు.
  


 విశాఖపట్నం : విశాఖపట్నంలో కాల్ మనీ సెక్స్ రాకేట్ తరహా కేసులో నిందితుడు, టీడీపీ నాయకుడు గుడివాడ రామకృష్ణను పోలీసులు అరెస్ట్ చేశారు. అప్పులు తీసుకున్న మహిళలను లైంగిక వేధింపులకు గురి చేస్తున్న గుడివాడ రామకృష్ణపై ఆరోపణలు వెల్లువెత్తాయి. ఈ నేపథ్యంలో తనను వేధింపులకు గురిచేస్తున్నట్లు అరిలోవకు చెందిన ఓ మహిళ ఇటీవల విశాఖపట్టణంలోని పట్టణ నాలుగో పోలీస్ స్టేషన్లో గుడివాడ రామకృష్ణపై ఫిర్యాదు చేసింది.
 అందులోభాగంగా పోలీసులు అతడి కోసం గాలింపు చర్యలు చేపట్టారు. ఆ విషయం గమనించిన రామకృష్ణ విశాఖ నుంచి పరారైయ్యారు.  అతడి కోసం పోలీసుల గాలింపు తీవ్రతరం చేశారు. ఆ క్రమంలో అతడు చెన్నైలో ఉన్నట్లు పోలీసులు గుర్తించారు. దీంతో బుధవారం గుడివాడ రామకృష్ణను అదుపులోకి తీసుకుని అరెస్ట్ చేశారు. గురువారం విశాఖపట్నం నగరానికి తీసుకు వచ్చారు. గుడివాడ రామకృష్ణని జ్యుడిషియల్ రిమాండ్ కి తరలించినట్లు విశాఖపట్నం డీసీపీ త్రివిక్రమ్ వర్మ వెల్లడించారు. అంతకుముందు గుడివాడ రామకృష్ణను త్రివిక్రమ వర్మ మీడియా ముందుకు తీసుకువచ్చారు.  ఈ సందర్భంగా త్రివిక్రమ్ వర్మ మాట్లాడుతూ... రామకృష్ణ వల్ల బాధితులుగా మారిన వారు ఎవరైనా తమ వద్దకు వచ్చి... ఫిర్యాదు ఇవ్వవచ్చని మీడియా ద్వారా విజ్ఞప్తి చేశారు.


 నరసరావుపేట రూరల్ : అసెంబ్లీ సమావేశాల్లో కాల్‌మనీ వ్యవహారాన్ని పక్కదారి పట్టించడానికే కుట్రపూరితంగా ఎమ్మెల్యే రోజాను ఏడాది పాటు సస్పెండ్ చేశారని కాంగ్రెస్ పార్టీ నాయకుడు డాక్టర్ కొండపల్లి వెంకటేశ్వరరావు విమర్శించారు. పీసీసీ క్రమశిక్షణా సంఘం చైర్మన్ కాసు వెంకట కృష్ణారెడ్డి స్వగృహాంలో ఆయన విలేకరులతో మాట్లాడారు. విజయవాడలో వెలుగుచూసిన కాల్‌మనీ వ్యవహారంలో నింధితులందరూ టీడీపీ వాళ్లేనని, వారిపై ఇప్పటి వరకు ఎటువంటి చర్య తీసుకోలేదన్నారు.
 
 శాసనసభలో జరుగుతున్న పరిణామాలు బాధాకరమన్నారు. ఎమ్మెల్యే రోజాను ఏడాది పాటు సస్పెండ్ చేయడం సరికాదన్నారు. స్పీకర్ కోడెల శివప్రసాదరావుపై అవిశ్వాసం పెట్టడం నరసరావుపేటకు మచ్చగా మిగులుతుందన్నారు. ముఖ్యమైన బిల్లులు, ప్రజాసమస్యలపై చర్చ జరగాల్సి ఉండగా వాటి గురించి పట్టించుకోకుండా పరస్పరం ఆరోపణలు చేసుకోవడానికే ప్రాధాన్యత ఇచ్చారన్నారు. పార్టీ నాయకులు పడాల చక్రారెడ్డి, కపలవాయి రమేష్, మంజూర్, దుర్గాబాబు, బాషా పాల్గొన్నారు.
  


 విజయవాడ: రాష్ట్రాన్ని కుదిపేస్తున్న కాల్‌మనీ-సెక్స్ రాకెట్‌లో ఒక ఎన్‌ఆర్‌ఐ పాత్ర కూడా ఉన్నట్లు తెలిసింది. అతడి ద్వారా అమెరికాలో ఉద్యోగాలిప్పిస్తామని ఆశపెట్టి చాలా మంది యువతులను లొంగదీసుకున్నట్లు సమాచారం. ఆ తర్వాత  ఉద్యోగం ఇప్పించక పోగా ఎంతో కొంత డబ్బు ఇచ్చేస్తామని, తమతో సర్దుబాటు చేసుకోవాలని వారి కుటుంబాలపై ఒత్తిడి తెచ్చినట్లు పలువురు బాధితుల ద్వారా తెలిసింది. కాల్‌మనీలో సదరు ఎన్‌ఆర్‌ఐ భారీగా పెట్టుబడి పెట్టినట్లు చెబుతున్నారు. ఈ ముఠా దగ్గర అప్పు తీసుకున్న ఒక మహిళ వడ్డీ కట్టలేకపోవడంతో ఆమెను బలవంతంగా లోబరుచుకొని చాన్నాళ్లపాటు లైంగికంగా వేధించారు. అంతటితో ఆగకుండా ఆమె కుమార్తెపై కూడా కన్నేశారు. తాము చెప్పినట్లు వింటే అమెరికాలో ఉద్యోగం ఇప్పిస్తామని ఆ యువతిని వశపరచుకున్నారు.
  
 ముఠా సభ్యులంతా ఆమెపై లైంగిక దాడి చేయడంతోపాటు వేరే వ్యక్తుల వద్దకు కూడా పంపించినట్లు తెలిసింది. ఈ వ్యవహారంలో విద్యుత్‌ శాఖ డీఈ సత్యానందం కీలకపాత్ర పోషించాడు. ఆ యువతిని అతడే తొలుత లోబరుచుకున్నాడని సమాచారం. అమెరికాలో తెలుగు వ్యవహారాలు చూసే ఓ ప్రముఖ సంస్థ మాజీ అధ్యక్షుడి ద్వారా అతని కంపెనీలో ఉద్యోగం ఇప్పిస్తామని వారు నమ్మబలికారు. గతంలోనూ చాలామందికి అలాగే ఉద్యోగాల ఎరవేసినట్లు సమాచారం. నమ్మినవారిని లైంగికంగా వేధించి, ఎన్‌ఆర్‌ఐ వద్దకు పంపుతారు. అలా పంపిన వారిలో చాలా కొద్ది మందికి ఉద్యోగాలు రాగా మిగిలిన వారిని వ్యభిచారంలోకి దింపారనే అనుమానాలు రేగుతున్నాయి.
  
 ప్రముఖ సంస్థ గెస్ట్‌హౌస్ వినియోగం
 కృష్ణానది కరకట్టపై సీఎం  నివాసం ఉండడానికి గెస్ట్‌హౌస్ ఇచ్చిన సంస్థకే ఏఎన్‌యూ వద్ద మరో గెస్ట్‌హౌస్ ఉంది. అందులో కాల్‌మనీ ముఠా తమ లైంగిక ఆగడాలకు ఉపయోగించుకునేవారని టీడీపీ వర్గాలే చెబుతున్నాయి. వీరిపై ఫిర్యాదు చేసిన తల్లీకూతుళ్లను ఈ గెస్ట్‌హౌస్‌కే చాలాసార్లు తీసుకెళ్లినట్లు చెబుతున్నారు. ఈ గెస్ట్‌హౌస్ యజమానులకు సీఎంతో సంబంధాలు ఉండడంతో పోలీసులు అటువైపు కన్నెత్తి చూసేవారు కాదు. 


  కాకినాడ క్రైం (తూర్పుగోదావరి) : రాష్ట్రాన్ని కుదిపేసిన కాల్‌మనీ వ్యవహారంపై అడిగిన ప్రశ్నలకు ఏలూరు రేంజ్ డీఐజీ పి.హరికుమార్ దాటవేత వైఖరి ప్రదర్శించారు. ‘ఎలా జరగాల్సింది అలాగే జరుగుతుంది.. నెక్ట్స్..’ అంటూ విలేకరులు అడిన ప్రశ్నకు మాట దాటవేశారు.
 
 జిల్లా పోలీసు కార్యాలయానికి వార్షిక తనిఖీ కోసం మంగళవారం కాకినాడ వచ్చిన ఆయన విలేకరులతో మాట్లాడారు. కాల్‌మనీ వ్యవహారంపై అడిగిన ప్రశ్నలన్నింటినీ తోసిపుచ్చారు.
  
  


 * వైఎస్సార్‌సీపీ ఎమ్మెల్యే రోజా ఆవేదన
 * నన్ను రాజకీయంగా భూస్థాపితం చేయాలని చూస్తున్నారు...
 * టీడీపీలో ఉన్నపుడు నా భాష బాగుందా, ఇపుడు బాగా లేదా!
 * ఇరుపక్షాల క్లిప్పింగ్‌లు విడుదల చేస్తే వాస్తవాలు తెలుస్తాయి
 సాక్షి, హైదరాబాద్: రాష్ట్రంలో బాధిత మహిళల తరపున, ప్రజల తరపున శాసనసభలో గట్టిగా పోరాడుతున్నందునే తనను రాజకీయంగా భూస్థాపితం చేయాలని, సర్వనాశనం చేయాలని టీడీపీ ప్రయత్నిస్తోందని వైఎస్సార్‌సీపీ మహిళా విభాగం అధ్యక్షురాలు, ఎమ్మెల్యే ఆర్.కె.రోజా ఆవేదన వ్యక్తం చేశారు.
 
 పార్టీ శాసనసభాపక్షం ఉపనేత ఉప్పులేటి కల్పన, ఎమ్మెల్యేలు వంతెల రాజేశ్వరి, గిడ్డి ఈశ్వరి, విశ్వాసరాయి కళావతితో కలిసి రోజా మంగళవారం సాయంత్రం పార్టీ కేంద్ర కార్యాలయంలో మీడియాతో మాట్లాడారు. తాను అసెంబ్లీలో ప్రజా సమస్యలపై గళమెత్తినపుడల్లా సభా హక్కుల ఉల్లంఘన తీర్మానాన్ని ముందుకు తెస్తున్నారని ఆమె పేర్కొన్నారు. తాను అసెంబ్లీలో లేకపోయినా, అంతకుముందు జరిగిన గొడవలో తానున్నానని, సభా హక్కుల తీర్మానంలో తన పేరును చేర్చారని ఆమె గుర్తు చేశారు.
 
 కాల్‌మనీ సెక్స్ రాకెట్‌పై ముఖ్యమంత్రి చంద్రబాబునాయుడు చేసే ప్రకటనపై తొలి వక్తగా తానే మాట్లాడబోతున్నానని తెలిసి అడ్డుకునేందుకు ముందుగానే తనను సభకు రాకుండా ఏడాది పాటు సస్పెండ్ చేశార న్నారు. సస్పెన్షన్‌పై న్యాయపోరాటం చేస్తానన్నారు. మూడు రోజుల తరువాత టీడీపీ ఎమ్మెల్యే అనితతో కంట తడి పెట్టించి తానేదో దళితులను అవమానం చేసినట్లుగా సృష్టించడం సరికాదని, వాస్తవానికి అసెంబ్లీలో వాళ్లు (టీడీపీ) తనను తిట్టిన తిట్లకు తానెంతగానో బాధపడ్డానన్నారు.
 
 శాసనసభ కార్యక్రమాల్లో రెండు వైపులా (అధికార, ప్రతిపక్షాల వైపు) జరుగుతున్న దృశ్యాలన్నింటినీ బయటకు విడుదల చేస్తే వాస్తవాలేమిటో తెలుస్తాయని ఆమె అన్నారు. అసెంబ్లీ కార్యక్రమాలు జరుగుతున్నవి జరుగుతున్నట్లే చూపించాలని ఆమె డిమాండ్ చేశారు. ‘ప్రజా సమస్యలపై ప్రతిపక్షం చేసే పోరాటాన్ని చూపించరు. ప్రజా సమస్యలపై మేం ప్రదర్శించే ప్లకార్డులు చూపించరు. నినాదాలు చేస్తే వినిపించరు. సమస్యలపై మేం ప్రభుత్వాన్ని నిలదీస్తే చూపించరు’ అని ఆమె వివరించారు.
 
 కానీ వారు (టీడీపీ) ఉచ్చులో ఇరుక్కున్నపుడు మాత్రం తప్పించుకోవడానికి తమకు చెందిన రెండు, మూడు క్లిప్పింగ్‌లు చూపించి మా ప్రవర్తన బాగోలేదంటూ ప్రచారం చేస్తారని రోజా అన్నారు. మహిళలను, ఎస్సీ, ఎస్టీలను అడ్డం పెట్టుకుని రాజకీయం చేసే స్థాయికి చంద్రబాబు దిగజారి పోయారన్నారు.
  
 అసెంబ్లీ కాదది ఎన్టీఆర్ భవన్
 రాష్ట్ర శాసనసభ ఎన్టీఆర్ భవన్ (టీడీపీ కార్యాలయం) మాదిరిగా తయారైందని, ప్రజా సమస్యలు చర్చించే వేదికలాగా అది కనిపించడం లేదన్నారు. తమను కొత్తగా అసెంబ్లీకి వచ్చారంటూ ఎద్దేవా చేస్తున్న టీడీపీ నేతలు ఎలాంటి నీచమైన భాష వాడుతున్నారో ఇప్పటికి జరిగిన నాలుగు సమావేశాలను పరిశీలిస్తే తెలుస్తుందన్నారు. టీడీపీ ఎమ్మెల్యే బొండా ఉమామహేశ్వరరావు ‘మిమ్మల్ని పాతేస్తాను’ అని నిందించారని, సాక్షాత్తూ ముఖ్యమంత్రి చంద్రబాబునాయుడు వేలు చూపిస్తూ ‘మీ అంతు చూస్తాను.
 
 నాతో పెట్టుకున్న వారెవ్వరూ బతికి బట్ట కట్టలేదు...’ అని బెదిరించిన విషయాలను గుర్తు చేశారు. ‘నా భాష బాగోలేదని, నా హావభావాలు బాగో లేవని అంటున్నారే... పదేళ్లు మీ పార్టీ (టీడీపీ)లో పోరాటాలు చేసినపుడు, పనిచేసినపుడు ఇదే భాష, ఇవే హావభావాలున్నాయి. అపుడు బాగున్నవి, ఇపుడెందుకు బాగాలేవు’ అని రోజా ప్రశ్నించారు.
 
 అనిత కంట తడిపెట్టిందంటున్న వారికి కాల్‌మనీ-సెక్స్‌రాకెట్‌లో రుణాలు చెల్లించని మహిళలను బౌన్సర్లు లాక్కెళుతూ ఉంటే.. వారు ఏడుస్తూ ఉంటే ఆ కన్నీళ్లు కనిపించలేదా? నారాయణ విద్యాసంస్థల్లో పద్నాలుగు మంది విద్యార్థులను పోగొట్టుకున్న తల్లిదండ్రుల కన్నీళ్లు కనిపించలేదా? రిషితేశ్వరిని పోగొట్టుకున్న అమ్మానాన్నలు విలపించడం కనిపించలేదా? అని ఆమె సూటిగా ప్రశ్నించారు.
 
 సభా సంప్రదాయాలను వల్లె వేసే టీడీపీ నేతలు ఎన్టీఆర్ వంటి మహానుభావుని కుర్చీని లాక్కుని ఆయనను కనీసం అసెంబ్లీలో మాట్లాడనీయకుండా చేయలేదా? ఆయన అవమాన భారంతో అసెంబ్లీ నుంచి ఏడుస్తూ వెళ్లి మానసిక క్షోభకు గురై చనిపోవడానికి కారకులు వీరు కాదా? అని ఆమె నిలదీశారు. కల్తీ మద్యం తాగి మరణించిన వారి భార్యలు పుస్తెలు తెగిపోయి విలపించడం గానీ, పుష్కరాల్లో చంద్రబాబు పబ్లిసిటీ పిచ్చి కారణంగా మృతి చెందిన 25 మంది కుటుంబాలు విలపించడంగానీ కనిపించడం లేదా అని రోజా ప్రశ్నించారు.
 
 వీరందరి సమస్యలపై గళమెత్తుతున్నానని తనను ఆడ రౌడీ  అనడం సబబేనా? అన్నారు. మహిళల మాన ప్రాణాలతో ఆడుకుంటూ చంద్రబాబు కాలకేయుడిలా వ్యవహరిస్తున్నారన్నారు. చంద్రబాబు భార్య, కోడలికి తాను ఒక విజ్ఞప్తి చేస్తున్నానని, రాష్ట్రంలో మహిళల కన్నీళ్లు ఆ కుటుంబానికి మంచివి కావని, వారి ఉసురు ఆ కుటుంబానికి తగులుతుందని రోజా అన్నారు.


 ప్రగతిశీల మహిళా సంఘం జిల్లా కార్యదర్శి ఏసమ్మ
 
 గుంటూరు వెస్ట్ : కాల్‌మనీ వ్యవహారంలో దోషులకు సిఎం చంద్రబాబు ప్రభుత్వం అండగా ఉంటూ, వారిని కాపాడే ప్రయత్నం చేస్తున్నదని ప్రగతిశీల మహిళా సంఘం జిల్లా కార్యదర్శి శీలం ఏసమ్మ ఆరోపించారు. కాల్‌మనీ వ్యవహారంలో దోషులను శిక్షించాలని డిమాండ్ చేస్తూ గుంటూరు రూరల్ మండలం లాల్‌పురం పంచాయతీ పరిధిలోని లింగాయపాలెం అల్లూరిసీతారామరాజు కాలనీలో మంగళవారం సభ జరిగింది.
 
 సభలో ఏసమ్మ మాట్లాడుతూ ఈ వ్యవహారంపై నిస్పక్షపాతంగా న్యాయవిచారణ చేపట్టి దోషులను కఠినంగా శిక్షించాలని డిమాండ్ చేశారు. కాల్‌మనీ మాఫియాకు పోలీసు వ్యవస్థ అండగా ఉండటం వల్ల దురాగాతాలు ఎక్కువగా జరుగుతున్నాయన్నారు.  కార్యక్రమంలో సంఘం డివిజన్ కార్యదర్శి డి.శివపార్వతి, సిపిఐ(ఎంఎల్) న్యూడెమోక్రసీ జిల్లా కార్యదర్శి ఎన్.బ్రహ్మయ్య, అఖిల భారత రైతుకూలీ సంఘం నాయకులు నక్కా పోతురాజు తదితరులు పాల్గొన్నారు.
  


 హైదరాబాద్: ఆంధ్రప్రదేశ్ అసెంబ్లీ అనేది ఎన్టీఆర్ భవన్‌లా తయారైంది గానీ ప్రజాసమస్యలను చర్చించే వేదికగా కనపడటం లేదని వైఎస్ఆర్ సీపీ ఎమ్మెల్యే రోజా విమర్శించారు. మంగళవారం రోజా మీడియాతో మాట్లాడుతూ.. అసెంబ్లీలో టీడీపీ సభ్యులు 'మీరు కొత్తగా వచ్చారు, సంప్రదాయాలు తెలియవంటూ' తమను విమర్శిస్తూ నాలుగైదు సార్లు గెలిచిన వాళ్లే నీచంగా మాట్లాడుతున్నారని అన్నారు. ప్రతిపక్ష నేతతో సహా అందరి విషయంలో నీచంగా మాట్లాడుతూ, సమస్యను పక్కదారి పట్టిస్తున్నారని ఆరోపించారు. తనను ఆడ రౌడీ అంటూ హావభావాలు, భాష బాగోలేదని టీడీపీ ఎమ్మెల్యేలు అంటున్నారని.. వాళ్ల పార్టీలో పదేళ్లు పనిచేసినప్పుడు బాగున్నాయి, ఇప్పుడు బాగోలేదా అని ప్రశ్నించారు. ఈ రాష్ట్రంలో ఉన్న మహిళలంతా కంటతడి పెడుతున్నారని, ఇది చంద్రబాబు వంశానికి, కుటుంబానికి కూడా మంచిది కాదని అన్నారు. ఆమె ఇంకా ఏం మాట్లాడారంటే..
 
 'గతంలో కూడా రైతు ఆత్మహత్యల మీద వైఎస్ జగన్ మాట్లాడుతుంటే మైకు కట్ చేశారు. రైతు సమస్యల గురించి మాట్లాడేందుకు మైకు ఇవ్వాలని మేమంతా నినాదాలు చేస్తే.. దళిత మహిళ పీతల సుజాతను లేపి ఎలా మాట్లాడించారో అందరికీ తెలుసు. అసెంబ్లీ సెషన్ జరిగేటప్పుడు అవి తప్ప మరే ఇతర క్లిప్పింగులు ఇవ్వకూడదని తెలిసినా, నేనేదో ఆమెను తిట్టినట్లు చూపించారు. వ్యక్తిత్వాన్ని హననం చేయడం సరికాదు. ఆ ముందు ఏం జరిగిందో, నేనేం మాట్లాడానో ప్రజలకు తెలియాలి. బోండా ఉమ అందరినీ పాతేస్తాను, రండిరా రౌడీల్లారా అన్నారు. బుచ్చయ్య చౌదరి సమయం సందర్భం లేకుండా నా గురించి ఏం మాట్లాడారు.. అధికారం, మీడియా తమ చేతిలో ఉన్నాయని తాము అనుకున్నట్లు చేస్తామని ముందుకుపోతున్నారు. ప్రజా సమస్యల మీద మేం చేసే నినాదాలు, ప్లకార్డులు చూపించరు. వాళ్లు ఉచ్చులో ఇరుక్కున్నప్పుడు తప్పించుకోడానికి రెండు మూడు క్లిప్పింగులు చూపించి, మా భాష బాగోలేదంటే చంద్రబాబు ఎంత దిగజారిపోయారో తెలుస్తుంది. మహిళలను, ఎస్సీ ఎస్టీలను అడ్డుపెట్టుకుని కాల్‌మనీ సెక్స్ రాకెట్ నుంచి తప్పించుకోడానికి ఎన్ని ప్రయత్నాలు చేయాలో అన్నీ చేస్తున్నారు' అని రోజా అన్నారు.
 
 'చంద్రబాబును ఏనాడూ ఎస్సీ ఎస్టీలు నమ్మరు. అంబేద్కర్ మీద గౌరవం ఉన్నట్లు ఆయన చేసిన నటన అందరూ చూశారు. అసెంబ్లీ ప్రాంగణంలోని అంబేద్కర్ విగ్రహం మీద దుమ్ము, ధూళి ఉన్నా పట్టించుకోరు. ఇష్యూని డైవర్ట్ చేయడానికి పెద్దాళ్లను ఉపయోగించుకోవాలని చూశారు తప్ప అంబేద్కర్ మీద గౌరవం ఉంటే ఆయన రాసిన రాజ్యాంగానికి విరుద్ధంగా ఎందుకు పనిచేస్తున్నావని ప్రశ్నిస్తున్నా? గిరిజనులు, దళితులను అవమానిస్తూ, వాళ్ల హక్కులను కాలరాసేలా పాలిస్తున్నావు? ఆయన నటన అసెంబ్లీలో చూశాం. నేనేదో అన్నట్లు, వాళ్లు బాధపడినట్లు నటిస్తున్నారు. భార్యలను, పిల్లలను లాక్కుపోతుంటే ఏం చేయలేని నిస్సహాయ స్థితిలో ప్రజలు ఉన్నప్పుడు వాళ్ల కన్నీళ్లు కనిపించలేదా? మీ కుటుంబ సభ్యులను ఇలాగే లాక్కెళ్లిపోతే కడుపుమంటతో సీఎంను నిలదీస్తారా.. వదిలేస్తారా అని ప్రశ్నిస్తున్నాను? రిషితేశ్వరి విషయంలో, వనజాక్షి విషయంలో మీరు వేసిన కమిటీలు ఏం చెప్పాయి? వనజాక్షి తప్పు చేశారని అసెంబ్లీలో చెబుతున్నారే..నిజంగా ఆమె జిల్లా దాటి వచ్చి ఉంటే ఆమెను సస్పెండ్ చేయండి. అధికారిని కొట్టినందుకు చింతమనేనిని నాన్ బెయిలబుల్ కేసులో అరెస్టు చేయండి. నారాయణ కాలేజిలో 18 మంది పిల్లలు చనిపోతే తల్లిదండ్రులు ఎలా రోదిస్తున్నారో చూడరా? కనీసం మీ మంత్రిమండలి నుంచి నారాయణను డిస్మిస్ చేశారా, ఆ కేసులు విచారించారా, ఎవరికైనా శిక్షలు వేశారా?' అని రోజా ప్రశ్నించారు.
 
 'ప్రజాప్రతినిధులు కూడా కంటతడి పెట్టే పరిస్థితి వచ్చింది. అసెంబ్లీ నుంచి ఏం సందేశం ఇచ్చారు? ఎంతో ధైర్యమున్న రోజానే లాగిపారేస్తాం.. మీరెవరైనా మా ఎమ్మెల్యేలు తప్పు చేసినట్లు ఫిర్యాదుచేస్తే మీ కుటుంబాలను సర్వనాశనం చేస్తామన్న సందేశం ఇచ్చారా లేదా? ఎన్టీఆర్ లాంటి మహానుభావుడిని అదే అసెంబ్లీ నుంచి ఏడిపించి పంపించారంటే ఆయన ఎంత మానసిక క్షోభకు గురై మరణించారో అర్థమవుతుంది. ఎన్టీఆర్ మహిళలను ఎంతో గౌరవించారు.. ఆస్తిలో సమాన హక్కు ఇచ్చారు. వాళ్ల కోరిక మేరకు మద్యపాన నిషేధం పెట్టారు.. కానీ మీరు అడుగడుగునా ధన, మాన ప్రాణాలను హరిస్తూ కాలకేయుడిలా ప్రవర్తిస్తున్నారు. ఇప్పుడు కొత్త నాటకానికి తెర ఎత్తారు. మూడు రోజుల క్రితం సస్పెండ్ చేసి ఇప్పుడు మళ్లీ ఏడుపు కార్యక్రమం పెట్టారు. గత అసెంబ్లీ సమావేశాల్లో ఇలాగే రాష్ట్రమంతా బాబును దుమ్మెత్తి పోస్తే పీతల సుజాతతో ఏడుపు కార్యక్రమం పెట్టించారు. మహిళా ఎమ్మెల్యేలకు చీము, నెత్తురు ఉంటే.. అంగన్‌వాడీ మహిళలను బట్టలిప్పి కొడుతుంటే మీరేం చేస్తున్నారని అడుగుతున్నాను. కల్తీ మద్యం తాగి ఎంతమంది మహిళల పుస్తెలు తెగిపోయాయి.. వాళ్లు వితంతువులు అవ్వడానికి కారణమైన మీరు మీ షూటింగ్ పిచ్చితో పుష్కరాల్లో 30 మంది మరణించారు.. అది చూసి మీరు సిగ్గుతో తలదించుకోవాలి తప్ప నేను తలదించుకోనక్కర్లేదు. రిషితేశ్వరిని ర్యాగింగ్ పేరుతో ఎలా చంపారో తెలిసినా.. తమవాళ్లన్న కారణంతో తల్లిదండ్రులకు పరిహారం ఇచ్చేశాం, నోరు మూసుకుని ఉంటారన్నట్లు ప్రవర్తిస్తున్నారు. ఆడవాళ్లు అబలలు, వాళ్లను ఎలాగోలా ఉచ్చులో ఇరికించవచ్చని నీ వెన్నుపోటు రాజకీయాలు నామీద ప్రదర్శిస్తే.. నీ అంతు చూసేవరకు ఊరుకోను' అని రోజా చెప్పారు.
 
 'ఈ రాష్ట్రంలో ఉన్న మహిళలంతా కంటతడి పెడుతున్నారు.. ఇది మీ వంశానికి, కుటుంబానికి కూడా మంచిది కాదు. కనకపు సింహాసనం మీద శునకాలను కూర్చోబెట్టినట్లుందని మా గురించి వ్యాఖ్యానిస్తున్నారు. రావెల కిశోర్‌బాబు అజ్ఞాని, బుద్ధి జ్ఞానం లేవని అంటారు. నాతో పెట్టుకున్నవాళ్లు ఎవరూ బతికి బట్టకట్టలేదని సీఎం అంటారు.. అంటే చంపేస్తారా? గిరిజన మహిళ బాక్సైట్ తవ్వితే గిరిజనులకు నష్టం కలుగుతుందని పోరాడితే ఆమె మీద దేశద్రోహం నేరం మోపుతారు. ఆమెను జీవిత ఖైదు చేయాలట. ఎవరు మీకు వ్యతిరేకంగా మాట్లాడితే వాళ్ల క్యారెక్టర్‌ను చంపేస్తారన్న మాట. ఇంతకుముందు అందరూ అలాగే అనుకుంటే చంద్రబాబు, ఆయన మంత్రులు ఉండేవాళ్లా? పనికిమాలినవాళ్లను జన్మభూమి కమిటీల్లో వేస్తున్నారు. ఇంతవరకు చరిత్రలో ఏ ప్రభుత్వానికి రాని చెడ్డపేరు మొదటి 18 నెలల్లో మూటగట్టుకున్నావు. దేశంలో ఎక్కడా జరగనన్ని అఘాయిత్యాలు, అరాచకాలు ఆంధ్ర రాష్ట్రంలోనే జరుగుతున్నాయి. నువ్వున్న విజయవాడలోనే ఇన్ని జరుగుతుంటే, విజయవాడకు చెడ్డపేరు తేవడానికి నేను ప్రయత్నిస్తున్నానని చెప్పడం సిగ్గుచేటు' అని రోజా అన్నారు.


 ♦ కాల్‌మనీ - సెక్స్‌రాకెట్ నిందితులపై చంద్రబాబు
 ♦ ఆ వ్యవహారాన్ని నిఘా వ్యవస్థ గుర్తించలేకపోయింది
 ♦ ఆధారాల కోసం పత్రికలు, చానళ్లకు నోటీసులు
 ♦ తహసీల్దార్ వనజాక్షి  పరిధి దాటారు...ఆమెపై కూడా చర్య తీసుకోవాలి..
 
  సాక్షి, హైదరాబాద్: కాల్‌మనీ-సెక్స్ రాకెట్‌కు సంబంధించిన కేసులో నిందితులు ఉరి శిక్షకు కూడా అర్హులేనని ముఖ్యమంత్రి చంద్రబాబు  పేర్కొన్నారు. కాల్ మనీపై శాసన మండలిలో చర్చ సందర్భంగా సోమవారం ముఖ్యమంత్రి మాట్లాడుతూ ఈ వ్యవహారంపై ప్రజా ప్రతినిధులుగాని లేదా బాధితులు ఎవ్వరైనా తప్పుడు ఆరోపణలు చేయకుండా వారి వద్దనున్న ఆధారాలు తనకు ఇస్తే అందుకు బాధ్యులైన వారిపై చర్యలు తీసుకుంటామని తెలిపారు. ఈ విషయాన్ని పసిగట్టడంలో నిఘా వ్యవస్థ సైతం విఫలమైందన్నారు. ఈ కేసుకు సంబంధించి మీడియా బాధ్యతారహితంగా వ్యవహరిస్తోందని, తోచిన విధంగా రాస్తూ ప్రజలను గందరగోళం చేస్తోందన్నారు.
 
 సాక్ష్యాధారాలుంటే నిర్భయ కేసు న మోదు చేస్తున్నామని...కొన్ని ఛానెళ్లు మహిళలకు ముసుగులు వేసి ప్రభుత్వం పట్టించుకోవట్లేదంటూ మాట్లాడిస్తున్నాయని, వాటి ఆధారంగా చర్యలు తీసుకోలేమని, స్పష్టమైన ఆధారాలు కావాలన్నారు. అందుకే వార్తలు ప్రచురించి, ప్రసారం చేసిన పత్రికలు, టీవీ ఛానెళ్లకు నోటీసులు ఇచ్చి వాటి ఆధారాలు సేకరించాలని పోలీసులను ఆదేశించినట్లు తెలిపారు. ఇసుక మాఫియాకు సంబంధించి మహిళా తహసీల్దార్‌పై దాడి చేసిన టీడీపీ ఎమ్మెల్యేపై ఏమి చర్యలు తీసుకున్నారని సీపీఐ సభ్యుడు పి.జె. చంద్రశేఖర్ రావు ముఖ్యమంత్రిని ప్రశ్నించగా తహసీల్దార్ తన పరిధి దాటి వెళ్లినందునే అక్కడ సమస్య ఉత్పన్నమైందన్నారు. ఆమె మండల పరిధి కాదు...ఏకంగా ఇతర జిల్లాకు సంబంధించిన వ్యవహారంలో ఆమె తల దూర్చారు... వాస్తవానికైతే ఆమెపై కూడా చర్యలు తీసుకోవాల్సి ఉందన్నారు.
 
  ఇప్పటి వరకు 227 కేసులు
  కాల్ మనీ వ్యవహారంలో రాష్ట్ర వ్యాప్తంగా బాధితులు ఇచ్చిన ఫిర్యాదులు, సొంత సమాచారంతో ఇప్పటి వరకు 227 కేసులు నమోదు చేసి 188 మందిని అరెస్టు చేసినట్లు ఉప ముఖ్యమంత్రి, హోం శాఖ మంత్రి నిమ్మకాయల చిన రాజప్ప తెలిపారు. కాల్‌మనీపై చర్చ సందర్భంగా ఆయన మాట్లాడుతూ  ఈ విషయమై ఇప్పటికే జ్యుడీషియల్ విచారణకు ఆదేశించినట్లు పేర్కొన్నారు.
 
  కరువు రహిత రాష్ట్రమే లక్ష్యం
  ఆంధ్రప్రదేశ్‌ను కరువులేని రాష్ట్రంగా మార్చడమే తెలుగుదేశం ప్రభుత్వ లక్ష్యమని సీఎం  పేర్కొన్నారు. ఇందుకోసం తమ ప్రభుత్వం నదుల అనుసంధానానికి ప్రాధాన్యం ఇస్తోందని ‘నీరు - ప్రగతి’పై  సోమవారం అసెంబ్లీలో చర్చ సందర్భంగా చంద్రబాబు ప్రకటించారు.   2018 నాటికి ఎట్టి పరిస్థితుల్లో పోలవరం ప్రాజెక్టును పూర్తి చేయాలన్నదే తమ సంకల్పమన్నారు.  వచ్చే ఏడాది జూన్ 1వ తేదీ నుంచి ప్రభుత్వ కార్యాలయాలన్నీ నూతన రాజధాని ప్రాంతం నుంచే పని చేస్తాయని ఆర్థిక మంత్రి యనమల రామకృష్ణుడు తెలిపారు. శాసనమండలి ప్రశ్నోత్తరాల సమయంలో కాంగ్రెస్ సభ్యుడు బి.చెంగల్ రాయుడు అడిగిన ప్రశ్నకు మంత్రి సమాధానం ఇస్తూ ఈ విషయమై సచివాలయంలోని అన్ని శాఖలకు, శాఖాధి పతులకు ఈ నెల 1వ తేదీన ప్రధాన పరిపాలన శాఖ ఆదేశాలు జారీ చేసిందన్నారు.


  కాల్‌మనీపై సభలో బీజేపీ నేత విష్ణుకుమార్‌రాజు
 
  సాక్షి, హైదరాబాద్: కాల్‌మనీ వ్యాపారులు ఐఎస్‌ఐ తీవ్రవాదుల కంటే ప్రమాదకారులని బీజేపీ శాసనసభ పక్ష నేత విష్ణుకుమార్‌రాజు ఆవేదన వ్యక్తం చేశారు. జీరో అవర్‌లో సోమవారం ఆయన ఈ అంశాన్ని ప్రస్తావించారు.  అప్పులు ఇచ్చిన వారు.. బాధితుల ఆస్తుల డాక్యుమెంట్లు తీసుకుంటున్నారని, అప్పులు చెల్లించిన తర్వాతా వాటిని తిరిగి ఇవ్వడం లేదని వివరించారు. ఈ సమస్యను అరికట్టడానికి ప్రభుత్వమే ప్రామిసరీ నోట్లు ముద్రించి విక్రయించాలని సూచించారు. కాల్‌మనీ, చిట్‌ఫండ్ కంపెనీల నియంత్రణకూ చట్టం తీసుకురావాలని కోరారు.
 
  మంత్రులు ఫోన్లు తీయడం లేదు... : ఎమ్మెల్యేలు ఫోన్ చేస్తే మంత్రులు సమాధానం ఇవ్వరని, అసలు ఫోన్లు తీయరని విష్ణుకుమార్‌రాజు ఆవేదన వ్యక్తం చేశారు. మంత్రులు క్షేత్రస్థాయికి వచ్చినప్పుడు జనం సమస్యలు పట్టించుకోరని, ఫోటోలు తీయించుకోవడానికే పరిమితమవుతున్నారని విమర్శించారు. ఈ అంశాన్ని ప్రస్తావించినప్పుడు.. టీడీపీ ఎమ్మెల్యేలు బల్లలు చరిచారు. స్పీకర్ స్థానంలో ఉన్న డిప్యూటీ స్పీకర్ మండలి బుద్ధప్రసాద్ గట్టిగా నవ్వేశారు.


 ఐదు గంటల పాటు హైడ్రామా ఇంటి పత్రాలు
 ఇప్పిస్తామనడంతో శాంతించిన వైనం
  
 పెనుమాక (తాడేపల్లి) : కాల్‌మనీ బాధితుడు న్యాయం జరగలేదంటూ పెనుమాకలో సోమవారం సెల్ టవర్ ఎక్కాడు. పోలీసులకు చమటలు పట్టించాడు. బాధితుడు పాతూరి సత్యంబాబు, అతని భార్య జయప్రద కథనం ప్రకారం... సత్యంబాబు తల్లిదండ్రులు గ్రామానికి చెందిన అట్టు అంకమ్మరెడ్డి వద్ద కుటుంబ అవసరాల నిమిత్తం అనేక సంవత్సరాల క్రితం రూ.60 వేలు వడ్డీకి తీసుకున్నారు. తండ్రి చనిపోయే వరకు వడ్డీ కడుతూనే ఉన్నాడు. ఆ తర్వాత సత్యంబాబు దంపతుల వద్ద నూటికి పది రూపాయల చొప్పున వడ్డీ కట్టించుకుంటున్నారు. ఈ క్రమంలో సత్యంబాబు తండ్రి ఇవ్వాల్సిన నోటుతో పాటు సత్యంబాబుతో మరికొన్ని నోట్లు రారుుంచుకున్న అంకమ్మరెడ్డి మొత్తం రూ.4 లక్షలు కట్టాలని, లేకపోతే నీ ఇల్లు రాసివ్వాలని డిమాండ్ చేశారు. లేనిపక్షంలో కోర్టులో కేసు వేస్తానని బెదిరించారు. దీంతో చేసేది లేక రూ.20 లక్షల విలువ చేసే ఇంటిని, ఇంటి స్థలాన్ని అల్లు అంకమ్మరెడ్డి పేరు స్వాధీన అగ్రిమెంట్ సత్యంబాబు రాశారు. ఆ తర్వాత రూ.లక్షా ఇరవై వేలు సత్యంబాబు చెల్లించారు. ఇంకా రూ. 4 లక్షలు ఇవ్వాలని చెప్పి ఇంటి పత్రాలు అతనికి ఇవ్వలేదు. ఈ క్రమంలో ఇంటి పన్ను కూడా తన పేర మార్చుకున్న అంకమ్మరెడ్డి ఇంటి అద్దె ఇవ్వడంలేదని కోర్టు నుంచి నోటీసులు సత్యంబాబుకు పంపించారు.
 
 రూ. వేలల్లో అప్పు తీసుకుంటే రూ.లక్షల్లో కట్టించుకున్నది గాక ఇల్లుకుడా లేకుండా చేశారని మనస్తాపం చెందిన సత్యంబాబు సోమవారం ఆత్మహత్య చేసుకుంటానని సెల్‌టవర్ ఎక్కాడు. సమాచారం తెలుసుకున్న మంగళగిరి రూరల్ సీఐ హరికృష్ణ పలుమార్లు సత్యంబాబుతో ఫోన్‌లో చర్చలు జరిపి చివరకు అంకమ్మరెడ్డి వద్ద నుంచి ఇంటి పత్రాలు తెప్పిస్తామని హామీ ఇవ్వడంతో సత్యంబాబు టవర్ దిగివచ్చాడు. అదే సమయంలో పలువురు స్థానిక మహిళలు అల్లు అంకమ్మరెడ్డి, బాణావత్ నాగేశ్వరరావు నాయక్‌లపై వడ్డీల విషయమై పోలీసులకు ఫిర్యాదు చేశారు. విషయం తెలుసుకున్న అంకమ్మరెడ్డి పరారయ్యూరు. నాగేశ్వరావు నాయక్‌ను మాత్రం ఎస్‌ఐ వీరేంద్రబాబు అరెస్టు చేశారు. తహశీల్దార్ ఎంటి వెంకటేశ్వర్లు పాల్గొన్నారు.
  


 హిందూపూర్ (అనంతపురం జిల్లా) : అనంతపురం జిల్లా ఎస్పీ రాజశేఖర్ బాబును కాల్ మనీ బాధిత దంపతులు సోమవారం ఎస్పీ కార్యాలయంలో కలిశారు. హిందూపూర్‌కు చెందిన శశికుమార్, శ్రీరాములు అనే ఇద్దరు కాల్‌మనీ వడ్డీవ్యాపారులు తమకు రూ.4లక్షలు అప్పు ఇచ్చి రూ.40 లక్షల విలువ చేసే రెండు ఇళ్లను వాళ్ల పేరు మీద బలవంతంగా రిజిస్టర్ చేయించుకున్నారని బాధితులు నాగలక్ష్మి, సాయినాథ్ దంపతులు ఎస్పీ ముందు వాపోయారు. బాధితుల గోడు విన్న ఎస్పీ ఈ విషయంపై విచారణ జరిపి చర్య తీసుకోవాలని పోలీసులను కోరారు.


 గుంటూరు వెస్ట్ : శాసనసభ శీతాకాల సమావేశాలు జరుగుతున్న తీరుతో బాధ కలుగుతుందని ఏపీ అసెంబ్లీ స్పీకర్ కోడెల శివప్రసాదరావు అన్నారు. గత్యంతరం లేని పరిస్థితుల్లోనే సభను వాయిదా వేస్తున్నట్లు చెప్పారు. గుంటూరులో ఆదివారం జరిగిన విలేకరుల సమావేశంలో ఆయన మాట్లాడుతూ ఈ సమావేశాల్లో లిక్కర్ మాఫియా, కరువు పరిస్థితులు, శాంతిభద్రతలు, బాక్సైట్ వ్యవహారం, కాల్‌మనీ తదితర అంశాలపై విస్తృతంగా చర్చించాల్సి ఉండగా వ్యక్తిగత దూషణలతో సభా సమయం వృథా అవుతోందని అన్నారు. సభ నిర్వహణ కత్తిమీద సాము లాంటిదని, నిబంధనలు, సంప్రదాయాలను పాటిస్తూ అజెండా పూర్తిచేయాల్సిన బాధ్యత తనపై ఉందన్నారు.


 ‘కాల్‌మనీ’పై కేంద్ర మంత్రి వెంకయ్య
 సాక్షి, విజయవాడ: కాల్‌మనీపై అసెంబ్లీలో విస్తృత చర్చ జరగాలని, దోషులు ఏ పార్టీలో ఉన్నా కఠినంగా శిక్షించాలని కేంద్ర పట్టణాభివృద్ధిశాఖ మంత్రి ఎం.వెంకయ్యనాయుడు వ్యాఖ్యానించారు. శనివారం బీజేపీ రాష్ట్ర కార్యాలయంలో ఆయన విలేకరులతో మాట్లాడుతూ ఒకరిపై ఒకరు ఆరోపణలు మాని దోషులను గుర్తించేందుకు ప్రయత్నించాలని సూచించారు. దోషులకు రాజ కీయ రంగు పులమడం వల్ల వారు తప్పించుకునే అవకాశముందన్నారు. కేసు మూలాల్లోకి వెళ్లి దోషులను గుర్తించి బాధితులకు న్యాయం చేయాలని చెప్పారు. ‘హెరాల్డ్’ను పక్కదోవ పట్టించేందుకే..
  
 పార్లమెంట్ సజావుగా సాగేందుకు ప్రతిపక్ష కాంగ్రెస్ పార్టీ సహకరించాలని వెంకయ్య విజ్ఞప్తి చేశారు.  జీఎస్‌టీ, రియల్‌ఎస్టేట్, ఇన్‌లాండ్ వాటర్ వేస్ట్ వంటి 16 ముఖ్యమైన బిల్లులు పెండింగ్‌లో ఉన్నాయన్నారు. నేషనల్ హెరాల్డ్ పత్రిక కేసును సోనియా, రాహుల్‌గాంధీ పక్కదోవ పట్టించేందుకు బీజేపీపై నిరాధారమైన ఆరోపణలు చేస్తూ తమ తప్పును కప్పిపుచ్చుకోవాలని చూస్తున్నారని విమర్శించారు. 2012లో హెరాల్డ్ కేసును సుబ్రహ్మణ్యస్వామి కోర్టులో వేశారని, అప్పుడు ఆయన బీజేపీ సభ్యుడు కాదన్నారు.
  
 హిందూత్వం భారతీయ వారసత్వం: వెంకయ్య
 గుంటూరు ఎడ్యుకేషన్: హిందూత్వం అంటే మతం కాదు.. అనాదిగా వస్తున్న భారతీయ వారసత్వమని కేంద్ర మంత్రి వెంకయ్యనాయుడు పేర్కొన్నారు. గుంటూరులో జరుగుతున్న అఖిల భారతీయ విద్యార్థి పరిషత్ (ఏబీవీపీ) 33వ రాష్ట్ర మహాసభల్లో భాగంగా శనివారం ఏబీవీపీ పూర్వ కార్యకర్తల ఆత్మీయ సమ్మేళనం నిర్వహించారు.
 
 ఒకప్పటి ఏబీవీపీ కార్యకర్తలు, ప్రస్తుత కేంద్ర మంత్రులు వెంకయ్యనాయుడు, జగత్ ప్రకాష్ నడ్డా ముఖ్యఅతిథులుగా హాజరయ్యారు. రాష్ట్ర మంత్రి కామినేని, ఏబీవీపీ నాయకులు సునీల్ అంబేకర్, మురళీమనోహర్, తిరుమలరెడ్డి, పలువురు బీజేపీ కార్యకర్తలు పాల్గొన్నారు.


 అందిన కాడికి సొమ్ము చేసుకుంటున్న పోలీసులు
 వడ్డీ వ్యాపారులతో తెర వెనుక ఒప్పందాలు
 టీడీపీ వారైతే కేసు నమోదు చేయడానికే నిరాకరణ
 ఇప్పటికే ఉన్నవారిని తప్పించే ప్రయత్నాలు
  
 విశాఖపట్నం: ‘కాల్‌మనీ’ వ్యవహారం పోలీసు శాఖకు కాసులు పండిస్తోంది. కొందరు ఖాకీలు వడ్డీ వ్యాపారులపై జరుగుతున్న దాడులను సొమ్ము చేసుకుంటున్నారు. ఫైనాన్స్ కార్యాలయాలు, వడ్డీ వ్యాపారుల ఇళ్లల్లో దొరికిన సొత్తును పూర్తిగా బయటపెట్టడం లేదు. అదే విధంగా కొందరు వడ్డీ వ్యాపారులతో తెరచాటు ఒప్పందాలు చేసుకుంటూ వారిని వదిలిపెడుతున్నారు. ఇక అధికార పార్టీకి చెందిన వారిపైన కేసు నమోదు చేయడానికి కూడా నిరాకరిస్తున్నారు. ఇప్పటికే కేసులో ఉంటే వారిని తప్పించేందుకు ప్రయత్నిస్తున్నారు.
  ూ    గాజువాకలో ఓ మాజీ కార్పొరేటర్ బంధువులపై కాల్‌మనీ కేసు నమోదు చేయమని ఓ వ్యక్తి ఫిర్యాదు చేశారు. కానీ రెండు రోజులైనా వారిపై కేసు నమోదు కాలేదు. ఫిర్యాదు చేసిన వారు, ఆరోపణ ఎదుర్కొంటున్న వారు కూడా స్థానిక ఎమ్మెల్యేకు బంధువులు కావడంతో ఫిర్యాదుదారుడితో సెటిల్‌మెంట్ చేసుకుంటున్నారు. ఈ తతంగమంతా పూర్తయ్యే వరకు కేసు నమోదు చేయకూడదని పోలీసులు మిన్నకుండిపోయారు. నిజానికి కాల్‌మనీ వ్యవహరంలో ఏ కేసు వచ్చినా వెంటనే ఫిర్యాదు స్వీకరించి ఎఫ్‌ఐఆర్ నమోదు చేసేస్తున్నారు. కానీ ఈ కేసు విషయంలో మాత్రం అలా చేయకపోవడం చూస్తుంటే అధికార పార్టీ వారికి పోలీసులు ఏ స్థాయిలో ప్రాధాన్యత ఇస్తున్నారో అర్ధమవుతోంది.
 
 గుడివాడ రామకృష్ణ అనే వడ్డీ వ్యాపారిపై ఇప్పటివరకు రెండో, మూడు, నాల్గవ పట్టణ పోలీస్ స్టేషన్లలో ఫిర్యాదులు అందాయి. కేసులు కూడా నమోదయ్యాయి. అతను తన కారుకు టీడీపీ జెండా తగిలించుకుని తిరుగుతుంటే కూడా అతను ఏ పార్టీకీ చెందినవాడు కాడని రికార్డుల్లో చూపిస్తున్నారు. పోలీసుల ఆధీనంలో ఉన్న అతని కారుకు ఉన్న టీడీపీ జెండాను మాయం చేశారు. ఇలా టీడీపీ నేతల బంధువులకు ప్రత్యక్షంగానే పోలీసులు అండగా నిలబడుతున్నారనే విమర్శలు వినిపిస్తున్నాయి.
  
 వ్యాపారులకు ముందుగానే సమాచారం?
 ఇక కాల్‌మనీ వ్యవహారంలో రెండో కోణం చూస్తే మరీ దారుణంగా కనిపిస్తోంది. వడ్డీ వ్యాపారులతో ఎప్పటి నుంచో కొందరు పోలీసులకు సత్సంబంధాలున్నాయి. పలు వివాదాలు, కేసుల్లో వారి మధ్య రాజీలు జరిగిన సందర్భంలో ఏర్పడిన పరిచయాలు ఇప్పుడు ఉపయోగించుకుంటున్నారు. కొందరు వ్యాపారులను అజ్ఞాతంలోకి వెళ్లిపొమ్మని పోలీసులే సలహా ఇస్తున్నారనే అనుమానాలు వ్యక్తమవుతున్నాయి. అంతేకాదు రైడింగ్ వెళ్లేముందే వ్యాపారులకు సమాచారమిచ్చి, సర్దుకోమని సలహా ఇస్తున్నారని తెలుస్తోంది. దానివల్ల రైడింగ్ జరిగిన ప్రాంతంలో ఎలాంటి ఆధారాలు దొరకకుండా వ్యాపారులు జాగ్రత్తపడుతున్నట్లు సమాచారం. ఇలా పోలీసులకు, వడ్డీ వ్యాపారులకు మధ్య ‘మనం మనం తర్వాత చూసుకుందాం’ అనే ఒప్పందాలు జరుగుతున్నట్లు జిల్లావ్యాప్తంగా గుప్పుమంటోంది.
  


 చిత్తూరు జిల్లా నగరి ఎమ్మెల్యే ఆర్కే రోజా 9 రోజులుగా అనారోగ్యంతో ఆస్పత్రిలో ఉన్నారని.. ఇప్పుడు కూడా ఆమె ఆరోగ్య పరిస్థితి బాగోలేదని, అలాంటి మనిషిని అరెస్టు చేస్తారా అని ప్రతిపక్షనేత వైఎస్ జగన్ మోహన్ రెడ్డి అసెంబ్లీలో ప్రశ్నించారు. సభ వాయిదా పడి, తిరిగి సమావేశమైన తర్వాత ఆయన మాట్లడారు. గతంలో ఎన్నడూ ఈ విధంగా జరగలేదని, రోజాపై సస్పెన్షన్ ఎత్తివేయాలని, ఇది తప్పు సంప్రదాయమని స్పష్టం చేశారు. ఆయన ఏమన్నారంటే...
 
 కరణం బలరాం వ్యవహారానికి, రోజా సస్పెన్షన్‌కు సంబంధం ఏంటి?
 
 బలరాం విషయంలో నిబంధనలన్నీ పాటించారు. ఆయన నేరుగా స్పీకర్‌ను దూషించారు
 
 పైగా దాన్ని ప్రివిలేజి కమిటీకి రిఫర్ చేశారు, ఆ సందర్భంగా జరిపిన విచారణకు ఆయన హాజరు కాలేదు
 
 ఆ తర్వాత మాత్రమే ఆయనను సస్పెండ్ చేశారు
 
 ఇప్పుడు కూడా మా ఎమ్మెల్యే ఒక్కరు వస్తుంటే పదిమంది టీడీపీ ఎమ్మెల్యేలు తిట్టారు
 
 రోజా సస్పెన్షన్‌ను ఉపసంహరించకపోతే మేమంతా సస్పెండ్ కావడానికి సిద్ధంగా ఉన్నాం
 
 స్పీకర్ సమక్షంలోనే సభలోనే తిట్టినా పట్టించుకోరా
 
 ఎథిక్స్, ప్రివిలేజ్ కమిటీకి రిఫర్ చేయకుండా ఎలా సస్పెండ్ చేస్తారు
 
 ప్రతి రోజూ సభ జరగకుండా ఉండాలనే యనమల చూస్తున్నారు
 
 ఎజెండాలో లేకపోయినా అంబేద్కర్ అంశాన్ని తెరమీదకు తెచ్చారు
 
 ఇప్పుడు కూడా రోజాను ఏడాది సస్పెండ్ చేసి, ఇక సభను నడవనివ్వకూడదని చేస్తున్నారు
 
 మేం ఎటూ నిరసన వ్యక్తం చేస్తామని ఆయనకు తెలుసు
 
 సెక్స్ రాకెట్ అంశాన్ని అసలు చర్చించనివ్వకుండా ఈ అంశాన్ని లేవనెత్తారు
 
 సభలో ఉన్న ఏకైక ప్రతిపక్షం మాది మాత్రమే
 
 అలాంటిది ప్రతిపక్షానికి వాయిస్ ఇవ్వకుండా, సభ్యులను సస్పెండ్ చేసుకుంటూ పోతే ఇక సభ ఎలా జరుపుతారు?
 
 అయితే రోజా సస్పెన్షన్ విషయంలో తమకు మరో ఆలోచన లేదని యనమల స్పష్టం చేశారు. సభను జరగనివ్వబోమని అనడం సరికాదని, తాను బిల్లులు ప్రవేశపెడతానని చెప్పారు. దాంతో వైఎస్ఆర్‌సీపీ ఎమ్మెల్యేలు తీవ్రస్థాయిలో నిరసన వ్యక్తం చేశారు. పోడియం వద్దకు చేరుకుని నినాదాలు చేశారు. అయితే, వాటిని ఏమాత్రం పట్టించుకోకుండా నిరసనల మధ్యే బిల్లు ప్రవేశపెట్టిన ఆర్థికమంత్రి యనమల రామకృష్ణుడు, ఇతర మంత్రులు పలు బిల్లులను ప్రవేశపెట్టారు. వాటన్నింటినీ మూజువాణీ ఓటుతో ఆమోదిస్తున్నట్లు సభ ప్రకటించింది. అనంతరం సభను స్పీకర్ కోడెల 15 నిమిషాల పాటు వాయిదా వేశారు.


 కాల్‌మనీ బ్రోకర్ల వేధింపులపై పోలీసులకు ఫిర్యాదు చేసిన బాధితుడు శనివారం ఉదయం ఆకస్మికంగా మృతిచెందాడు. రేపల్లె 7వ వార్డుకు చెందిన తాతయ్య కాల్‌మనీ బ్రోకర్ల వద్ద లక్ష రూపాయలు అప్పు తీసుకున్నాడు. ఇప్పటి వరకూ దాదాపు పది లక్షల దాకా వడ్డీ చెల్లించాడు. అయితే ఇంకా వేధింపులు ఆపకపోవడంతో శుక్రవారం సాయంత్రం రేపల్లె సీఐకి ఫిర్యాదు చేశారు. అయితే శనివారం ఉదయం హఠాత్తుగా ఇంట్లోనే మృతిచెందాడు. బాగున్న వ్యక్తి హఠాత్తుగా మృతిచెందడంతో కుటుంభ్యులు దుఃఖసాగరంలో మునిగిపోయారు.
 
 
 
  


 కిటకిటలాడుతున్న బెజవాడ పోలీసు కమిషనరేట్
 ♦ ఫిర్యాదుదారుల్లో ఎవర్ని కదిలించినా.. కన్నీళ్లే
 ♦ ఒక్కసారి ‘లొంగితే’ వడ్డీ మొత్తం మాఫీ చేస్తారట
 ♦ 300 దాటిన ఫిర్యాదులు.. తలలు పట్టుకుంటున్న పోలీసులు
  
  ‘నేను చాలా అందంగా ఉంటానంట.. ఒక్కసారి తన దగ్గరకు వెళ్తే చాలంట.. వడ్డీతోపాటు అప్పుమొత్తం మాఫీ చేస్తాడంట..!’ ఇదో నిస్సహాయ ఆడపడుచు ఆవేదన.
  
  ‘ఆవిడగారు చెప్పిన లాయర్ దగ్గరకెళ్తే అప్పు సంగతి ఆయనే చూసుకుంటాడంట.. ఆపైన నాకు అప్పు భయం అక్కర్లేదంట. తోటి ఆడమనిషి మాట్లాడాల్సిన మాటలేనా ఇవి? అప్పు తీసుకున్నంత మాత్రాన అంత అలుసా..?’ ఇదో బాధితురాలి ఆక్రోశం.
  
  ‘ఈ నెలాఖరులోగా అసలుతోపాటు వడ్డీ కూడా కట్టి తీరాల్సిందే. నువ్వేం చేస్తావో, ఎవరి దగ్గర పడుకుంటావో మాకు తెలియదని బెదిరిస్తున్నారు’ కన్నీళ్ల పర్యంతమైన ఎస్సీ మహిళ ఆందోళన.
  - సాక్షి, విజయవాడ బ్యూరో
 
  .... ఇలా ఫిర్యాదుదారులెవర్ని కదిలించినా కన్నీళ్లే. చెప్పే వేదనలన్నీ కనీవినీ ఎరుగని దారుణాలే. ఒక్కొక్కరిదీ ఒక్కో దయనీయ గాథ. నెలల తరబడి తీరని వ్యథ. నగర పోలీసు కమిషనర్ గౌతమ్ సవాంగ్ ఇచ్చిన భరోసాతో ముందుకొచ్చి వడ్డీ వ్యాపారులు, కాల్‌మనీ దారుణాలపై ఫిర్యాదులు చేస్తున్నారు. శుక్రవారం కమిషనరేట్‌కు 150 మందికిపైగా ఫిర్యాదుదారులు వచ్చారు. మధ్యాహ్నం 3 గంటల వరకూ దాదాపు 300 వరకు ఫిర్యాదుల్ని స్వీకరించిన పోలీసు అధికారులు తిరిగి మరుసటి రోజు రమ్మని మిగతా వారిని పంపారు. వీరిలో మూడో వంతు ఎస్సీ, ఎస్టీలే ఉన్నారు. కాల్‌మనీ బాధితులకంటే, వడ్డీ వ్యాపారుల బాధితులే ఎక్కువ మంది కమిషనర్‌ను కలిశారు. వచ్చిన ఫిర్యాదులను పరిశీలించిన పిమ్మట సెక్షన్ల వారీగా వాటిని విభజించి ఆయా స్టేషన్లలో కేసులు నమోదు చేస్తున్నారు. శుక్రవారం కమిషనరేట్‌కు వచ్చిన పలువురు మహిళలు వడ్డీ వ్యాపారుల బెదిరింపులను వివరించారు.
 
  రాజ్యాంగ నిర్మాత డాక్టర్ బీఆర్ అంబేడ్కర్‌పై చర్చ కోసమంటూ ప్రతిపక్ష వైఎస్సార్‌సీపీ సభ్యుల్ని సస్పెండ్ చేయించిన ముఖ్యమంత్రి చంద్రబాబునాయుడు.. ఈ కాల్‌మనీ-సెక్స్ రాకెట్‌పై చర్చకు మాత్రం అంగీకరించకపోవడం గమనార్హం. ఎవరికోసమైతే అంబేడ్కర్ జీవితాంతం పోరాడారో ఆ అణగారిన వర్గాలవారే ఈ కాల్‌మనీ-సెక్స్ రాకెట్ బాధితుల్లో అధిక సంఖ్యలో ఉన్నారు. అయినప్పటికీ వీరి విషయాన్ని పట్టించుకోకుండా కేవలం అంబేడ్కర్‌పై చర్చ అంటూ చంద్రబాబు.. సెక్స్ రాకెట్‌పై చర్చించకపోవడం సిగ్గుచేటంటూ మహిళాలోకం మండిపడుతోంది.


 రెండు వారాలపాటు రిమాండ్‌కు ఆదేశించిన జడ్జి
 
  విజయవాడ సిటీ: కాల్‌మనీ-సెక్స్ రాకెట్ కేసులో రెండో నిందితుడు భవానీ శంకర్‌ను శుక్రవారం కృష్ణా జిల్లా మాచవరం పోలీసులు అరెస్టు చేశారు. 1వ అదనపు చీఫ్ మెట్రోపాలిటన్ మేజిస్ట్రేట్ కోర్టు ఇన్‌చార్జి జడ్జి డి.సత్యప్రభాకరబాబు ముందు హాజరుపరచగా రెండు వారాలపాటు రిమాండ్‌కు ఆదేశించారు. మాచవరం పోలీసులు నమోదు చేసిన ఈ కేసులో ఇప్పటికే ప్రధాన నిందితుడు యలమంచిలి శ్రీరామమూర్తి అలియాస్ రాము, ఏడో నిందితుడు దూడల రాజేశ్‌ను అరెస్టు చేయగా, ఐదుగురు నిందితులు పరారీలో ఉన్నారు.


 రాయచోటి : వైఎస్సార్ జిల్లా రాయచోటి పట్టణంలో 'కాల్ మనీ' లైంగిక వేధింపులు తట్టుకోలేక ఓ మహిళ ఆత్మహత్యాయత్నం చేసింది. పట్టణంలోని కొత్తపల్లి ప్రాంతానికి చెందిన ఆరీఫున్నీసా శుక్రవారం నిద్రమాత్రలు మింగింది. పరిస్థితి విషమంగా ఉండడంతో ఆమెను చికిత్స కోసం జిల్లా ఆస్పత్రికి తరలించారు. ఆరీఫున్నీసా భర్త హసన్‌వలీ మూడేళ్ల క్రితం రోడ్డు ప్రమాదంలో మృతి చెందాడు.
 
 దాంతో కాల్‌మనీ నిర్వాహకుడు హబీబుల్లా కన్ను ఒంటరిగా ఉంటోన్న ఆరీఫున్నీసాపై పడింది. హసన్‌వలీ రూ.65 వేల రుణానికి హామీగా ఉన్నాడని, ఆ మొత్తం తీర్చాలంటూ ఆరీఫున్నీసాపై ఒత్తిడి తీసుకొచ్చాడు. దీంతో పెద్ద మనుషుల దగ్గర ఒప్పందం కుదుర్చుకుని ఆరీఫున్నీసా రూ.46వేలు చెల్లించేసింది. అయితే ఆ తర్వాత నకిలీ పత్రాలు చూపించి.. తనతో ఉంటే బాకీ చెల్లించక్కర్లేదంటూ హబీబుల్లా వేధించసాగాడు. దీనిపై ఆరీఫున్నీసా జిల్లా ఎస్పీకి ఫిర్యాదు చేసింది. అయినా హబీబుల్లా వేధింపులు ఆగలేదు. దీంతో బాధితురాలు ఆత్మహత్యాయత్నం చేసింది.


 అసెంబ్లీ నుంచి సస్పెండైన వైఎస్ఆర్‌సీపీ ఎమ్మెల్యేలందరూ అసెంబ్లీ వెలుపల గాంధీ విగ్రహం వద్ద నిరసన వ్యక్తం చేశారు. పార్టీ అధ్యక్షుడు వైఎస్ జగన్ మోహన్ రెడ్డి నేతృత్వంలో ప్లకార్డులు, బ్యానర్లు పట్టుకుని నినాదాలు చేశారు.
 
 ఈ సందర్భంగా వైఎస్ జగన్ మీడియాతో మాట్లాడారు. ''నిన్నటి బిజినెస్ ఎజెండా చూడండి.. ఈ జాబితాలో అంబేద్కర్ గారి గురించి ఎక్కడా లేదు. ఆ అంశం మీద చర్చ జరుగుతుందని ఎక్కడైనా ఒక్క చోటైనా ఉందా అని అడుగుతున్నా. తొలిసారి వాయిదా పడినప్పుడు అంబేద్కర్ అంశం లేదు. రెండోసారి సభ వాయిదా పడిన తర్వాత చంద్రబాబు ఎట్టి పరిస్థితుల్లోనూ సెక్స్ రాకెట్‌కు సంబంధించిన చర్చ జరగకూడదని, జరిగితే తాను చేసిన పాపం బయటపడుతుందని భావించారు.
 
 చంద్రబాబుతోను, ఇంటెలిజెన్స్ డీజీతోను నిందితుడు పిచ్చాపాటీ మీటింగ్ పెట్టుకున్నాడు. సీఎం అండదండలు లేకపోతే ఇలా కూర్చోగలడా? ఇక ఓ టీడీపీ ఎమ్మెల్యే శ్రీకాంత్ అనే నిందితునితో విదేశాలకు విహారయాత్రకు వెళ్లారు. తర్వాత ఎమ్మెల్యే తిరిగొస్తాడు గానీ నిందితుడు మాత్రం విదేశాల్లోనే ఆగిపోతాడు. ఆ నిందితుడు ఎక్కడున్నాడని పోలీసులు ఎమ్మెల్యేను ప్రశ్నించరు, కేసులు పెట్టరు. మరో ఎమ్మెల్సీ చంద్రబాబుకు సాష్టాంగ నమస్కారం చేస్తాడు. ఆయన చంద్రబాబుకు అత్యంత సన్నిహితుడు. ఆయన సొంత అన్న.. కాల్‌మనీ కేసులో నిందితుడు. వీళ్లిద్దరూ ఒకే ఇంట్లో ఉంటారు. అయినా ఈ ఎమ్మెల్సీ మీద కేసు పెట్టరు, కస్టడీలోకి తీసుకోరు, ప్రశ్నించరు.
 
 ఇవన్నీ చంద్రబాబు దీవనెలతో జరుగుతున్నాయి. ఆయన కొడుకు ఆశీస్సులు కూడా దీనికి ఉన్నాయి. ఈ చర్చను తప్పుదోవ పట్టించేందుకు రాష్ట్రవ్యాప్తంగా వడ్డీ వ్యాపారులందరి మీద దాడులు చేస్తారు. ఇదేదో మామూలు వడ్డీ వ్యాపారమని తేల్చేయడానికి చూస్తారు. కృష్ణాజిల్లాలో అతి హేయంగా ఆడవాళ్ల మానప్రాణాలతో ఆడుకుని, వారిని అశ్లీలంగా వీడియో టేపులు తీసి, వారిని బ్లాక్ మెయిల్ చేశారు. 200 పైచిలుకు వీడియో సీడీలు దొరికాయి. ఆడవాళ్లకు ఎక్కువ వడ్డీలకు అప్పులిచ్చి, అవి తీర్చలేదని వాళ్ల మాన ప్రాణాలతో ఆడుకుంటున్నారు. వాళ్లను శాశ్వతంగా వేశ్యవృత్తిలోకి దింపే కార్యక్రమం చేస్తున్నారు. ఈ రాకెట్‌లో చంద్రబాబు నుంచి ఆయన ఎమ్మెల్యేలు, ఎమ్మెల్సీలు, మంత్రులు అంతా ఉన్నారు.
 
 ఇంత ముఖ్యమైన అంశం మీద అసెంబ్లీలో చర్చ రాకుండా చేసేందుకు అంబేద్కర్ గారిని కూడా వాడుకున్నారు. చంద్రబాబు గట్టిగా అంబేద్కర్‌ను అడ్డుపెట్టుకున్నారు. పార్లమెంటులో రెండురోజులు చర్చిస్తే చంద్రబాబుకు ఇప్పుడు గుర్తుకొచ్చింది. నవంబర్ 26న పార్లమెంటు చర్చించిందంటే, అది రాజ్యాంగ రచన పూర్తిచేసిన రోజు. అందుకే అప్పుడు పార్లమెంటులో దాని గురించి రెండు రోజులు చర్చించారు. దానికో అర్థం, పరమార్థం ఉన్నాయి. అంబేద్కర్ జయంతి, వర్ధంతి, రాజ్యాంగసభ తొలి సమావేశం, రాజ్యాంగాన్ని పార్లమెంటుకు సమర్పించిన రోజు.. ఈ రోజుల్లో ఎప్పుడూ చంద్రబాబుకు ఆయన గురించి చర్చ జరపాలని గుర్తుకు రాలేదు. ఈవాళ మాత్రం.. డిసెంబర్ 17, 18 తేదీల్లో గుర్తుకొస్తున్నారు. సెక్స్ రాకెట్ కేసులో తాను, తన వాళ్లు నిండా మునగడంతో బయట పడేందుకు ఇప్పుడు గుర్తుకొస్తున్నారు. ఇక్కడ ఉన్న అంబేద్కర్ విగ్రహాన్ని ఒకసారి చూడండి.. ఆ విగ్రహాలను క్లీన్ చేయించాలన్న ఆలోచన కూడా లేదు. దుమ్ము, ధూళితో ఉన్నాయి. దండ ఎండిపోయింది. లోపల అసెంబ్లీలో మాత్రం అంబేద్కర్‌ను రాజకీయాల కోసం ఉపయోగించుకుంటున్నారు. ఇంత రాక్షస పాలన ఎక్కడా ఉండదు. సెక్స్ రాకెట్‌లో ఉన్నవాళ్లు పేదలు కారా, అంబేద్కర్ బిడ్డలు కారా అని అడుగుతున్నా. వాళ్లను కాపాడే కేసును నీరుగార్చడానికి మీరు చేస్తున్నది కరెక్టేనా అని అడుగుతున్నా'' అన్నారు.
 
 రాజకీయాల కోసం రాజ్యాంగ నిర్మాత అంబేద్కర్‌ను కూడా వాడుకోవడం దుర్మార్గమని ఇతర ఎమ్మెల్యేలు అన్నారు. మహిళల జీవితాలతో ఆడుకుంటున్న కాల్‌మనీ సెక్స్ రాకెట్ అంశాన్ని చర్చించాలని అడిగినందుకు తమను మార్షల్స్‌తో బలవంతంగా బయటకు తరలించారని ఎమ్మెల్యేలు మండిపడ్డారు. రాష్ట్ర ప్రభుత్వం శాసనసభలో మందబలంతో ఎంత దుర్మార్గంగా వ్యవహరించిందో ప్రజలంతా చూశారని ఎమ్మెల్యే శ్రీధర్ రెడ్డి అన్నారు. అత్యంత ముఖ్యమైన కాల్‌మనీ సెక్స్ రాకెట్ అంశంపై చర్చించడానికి అధికారపక్షానికి తీరికలేదా అని ప్రశ్నించారు.


 హైదరాబాద్: కాల్ మనీ సెక్స్‌ రాకెట్పై ప్రభుత్వ చర్యలను నిరసిస్తూ అసెంబ్లీ బయటా వెలుపలా వైఎస్ఆర్ కాంగ్రెస్ పార్టీ గట్టిగా ఆందోళన వ్యక్తం చేస్తోంది. ప్రభుత్వ చర్యలు ఏమాత్రం సహించేవి కావంటూ ఆగ్రహం వ్యక్తం చేస్తోంది. శుక్రవారం రెండో రోజు అసెంబ్లీ సమావేశాలు ప్రారంభమైన తర్వాత సెక్స్ రాకెట్ పై వ్యవహారంపై చర్చ జరగాలని వైఎస్ఆర్ కాంగ్రెస్ పార్టీ వాయిదా తీర్మానం ఇవ్వగా దానిని పక్కకు పెడుతూ స్పీకర్ ప్రశ్నోత్తరాలు ప్రారంభించారు. దీంతో, వైఎస్ఆర్ కాంగ్రెస్ పార్టీ నేతలు చర్చ జరగాల్సిందేనని డిమాండ్ చేశారు. ఆ తర్వాత సభను వాయిదా వేసిన స్పీకర్ తిరిగి మరోసారి ప్రారంభించగా వైఎస్ఆర్ సీపీ అదే డిమాండ్ ను పట్టుబట్టింది.
 
 దీంతో మొత్తం ప్రతిపక్షాన్ని స్పీకర్ సస్పెండ్ చేశారు. అంబేద్కర్ జన్మదినోత్సవంపై చర్చ పూర్తయ్యే వరకు వారిపై సస్పెన్షన్ కొనసాగుతుందని చెప్పారు. అయితే, సభలో నుంచి వెళ్లేందుకు వైఎస్ఆర్ సీపీ నేతలు తిరస్కరించడంతో సభలోకి మార్షల్స్ ను పెట్టించి బయటకు పంపించారు. దీంతో కొందరు గాంధీ విగ్రహం వద్ద నిరసనలు ప్రారంభించగా మరికొందరు అసెంబ్లీ గేటువద్ద ప్రభుత్వ వ్యతిరేక ఆందోళన ప్రారంభించారు. వైఎస్ఆర్ కాంగ్రెస్ పార్టీనేత చెవిరెడ్డి భాస్కర్ రెడ్డి గేటు వద్ద కూర్చుని అక్కడి నుంచి కదిలేందుకు నిరాకరించారు.


 ప్రతిపక్షం మొత్తాన్ని అసెంబ్లీ నుంచి సస్పెండ్ చేసి తమ చర్చ తాము జరుపుకోడానికి అధికార పక్షం కుట్ర పన్నింది. ప్రతిపక్ష నేత వైఎస్ జగన్ మోహన్ రెడ్డి సహా మొత్తం వైఎస్ఆర్ కాంగ్రెస్ పార్టీకి చెందిన ఎమ్మెల్యేలు అందరినీ అంబేద్కర్ అంశంపై చర్చ ముగిసేవరకు సస్పెండ్ చేయాలని శాసనసభా వ్యవహారాల శాఖ మంత్రి యనమల రామకృష్ణుడు తీర్మానం ప్రవేశపెట్టారు. కాల్ మనీ అంశంపై చర్చకు విపక్షం పట్టుబట్టడం, అయినా వినిపించుకోకుండా అధికార పక్షం యథా ప్రకారం అంబేద్కర్ అంశంపైనే చర్చను కొనసాగిస్తుండటంతో వైఎస్ఆర్‌సీపీ సభ్యులు పోడియం వద్దకు చేరుకుని నినాదాలు చేశారు.
 
 దాంతో యనమల మొత్తం ప్రతిపక్ష సభ్యులను సస్పెండ్ చేయాలంటూ స్పీకర్‌ను కోరారు. దాన్ని సభ ఆమోదించిందని స్పీకర్ కోడెల శివప్రసాదరావు ప్రకటిస్తూ, అంబేద్కర్ అంశంపై చర్చ ముగిసేవరకు మొత్తం ప్రతిపక్ష సభ్యులందరినీ సస్పెండ్ చేస్తున్నట్లు అందరి పేర్లను చదివి ప్రకటించారు.
 అయినా కొద్దిసేపటి పాటు వైఎస్ఆర్ కాంగ్రెస్ పార్టీ సభ్యులు సభలోనే ఉండి ప్రభుత్వానికి, చంద్రబాబు నాయుడికి వ్యతిరేకంగా నినాదాలు చేశారు. సస్పెండైన సభ్యులందరూ వెంటనే సభను వదిలిపెట్టి వెళ్లిపోవాలని స్పీకర్ పదేపదే చెప్పారు. సభలో అనుచిత ప్రవర్తన మానుకోవాలని తెలిపారు. దీంతో వైఎస్ఆర్‌సీపీ సభ్యులు పెద్ద ఎత్తున నిరసన వ్యక్తం చేశారు. ఆ సమయంలో స్పీకర్ కోడెల తన సీటు నుంచి లేచి వెళ్లిపోగా, ప్యానల్ స్పీకర్ అధ్యక్ష స్థానంలోకి వచ్చారు. ఆయన మార్షల్స్‌ను పిలిచి, విపక్ష సభ్యులను బయటకు పంపాల్సిందిగా సూచించారు. అయితే ప్రతిపక్ష సభ్యులు మాత్రం వెల్‌లోనే బైఠాయించి తమ నిరసనను కొనసాగించారు. ఆ తర్వాత.. మార్షల్స్ రంగప్రవేశం చేసి, వైఎస్ఆర్ సీపీ సభ్యులను బలవంతంగా బయటకు లాక్కెళ్లారు.


 హైదరాబాద్‌: అధికారం ఉంది కదా అని ఇష్టమొచ్చినట్లు ప్రవర్తిస్తే ప్రజలు తగిన బుద్ది చెప్తారని వైఎస్ఆర్ కాంగ్రెస్ పార్టీ నేత చెవిరెడ్డి భాస్కర్ రెడ్డి అన్నారు. నీచమైన రాజకీయాలకోసం మహానుభావుడు అంబేద్కర్ ను వాడుకున్న దౌర్బాగ్య ముఖ్యమంత్రి చంద్రబాబు తప్ప దేశంలో మరొకరు లేరని అన్నారు. అసలు సెక్స్ రాకెట్ ను ప్రోత్సహించినందుకు చంద్రబాబునాయుడికి చికాగో యూనివర్సిటీ గౌరవ డాక్టరేట్ ఇచ్చిందా అని ఆగ్రహం వ్యక్తం చేశారు. ప్రజలు నమ్మి ముఖ్యమంత్రిని చేస్తే మొత్తం రాష్ట్రాన్ని చంద్రబాబు మోసం చేశారని అన్నారు. 'రుణాలు మాఫీ చేయలేదు. మిమ్మల్ని నమ్ముకున్నందుకు మహిళలు అప్పుల పాలయ్యారు.
 
 అందుకే అధిక వడ్డీలకు డబ్బులు తీసుకోవాల్సి వచ్చింది. ఈ పరిస్థితులు ఆసరగా తీసుకొని మహిళలను అసభ్యంగా చిత్రీకరించారు. వారితో బలవంతంగా వ్యభిచారం చేయించే పరిస్ధితి తీసుకొచ్చారు. మహిళలకు ఇలాంటి దుస్తితి కల్పించడానికి ఎలా మనసు వచ్చింది. అందరూ ఆంధ్రప్రదేశ్ వైపు చూసినవ్వుతున్నారు' అని చెవిరెడ్డి ఆవేదన వ్యక్తం చేశారు. ఈ సమయంలో పార్టీలకు అతీతంగా మహిళలకు అండగా ఉందామని, చర్చ జరిపి నేరస్తులను శిక్షిద్దామంటే సీఎం ఎందుకు వద్దంటున్నారని ప్రశ్నించారు. ముఖ్యమంత్రి ప్రకటన తర్వాత అసలు మాట్లాడేందుకు ఏమి ఉంటుందని అన్నారు. కుటుంబంలో పెద్ద నిర్ణయం తీసుకోవాల్సి వస్తే ముందు ఆ విషయం ఇంట్లో వారికి చెప్పి అందరి అభిప్రాయాలు తీసుకున్నాకే నిర్ణయం ప్రకటిస్తారని ఉదహరించారు. అధికారం ఉంది కదా అని ఏమైనా చేయొచ్చనుకుంటే కష్టమని గుర్తుచేశారు.


 ప్రధానమైన అంశం ఉన్నప్పుడు ఎవరైనా, చర్చ జరిగిన తర్వాత ప్రకటన ఇస్తారు గానీ, ప్రకటన తర్వాత చర్చ అనేది తాను ఎక్కడా వినలేదని ప్రతిపక్ష నాయకుడు వైఎస్ జగన్ మోహన్ రెడ్డి మండిపడ్డారు. ఇది కేవలం ఆంధ్రరాష్ట్ర అసెంబ్లీలో మాత్రమే జరుగుతోందని చెప్పారు. ''సీఎం ప్రకటన చేసేసిన తర్వాత ఇక చర్చించడానికి ఏముంది? కామన్ సెన్స్ ఉండాలి. చర్చ జరిగిన తర్వాత ప్రకటన ఉండాలి. అంబేద్కర్ గారిని కూడా రాజకీయ అవసరాలకు వాడుకుంటున్నారని, ఐదురోజులే ఎందుకు పెట్టారు, అది కూడా మధ్యాహ్నం వరకే ఎందుకు? మరో రెండు రోజులు పొడిగించి, ఆ రెండు రోజులు అచ్చంగా అంబేద్కర్ గారి మీదే చర్చిద్దాం. చంద్రబాబు, ఆయన కొడుకు, ఎమ్మెల్యేలు, ఎమ్మెల్సీలు అందరూ ఈ సెక్స్ రాకెట్‌లో ఉన్నారు. డీజీ ఇంటెలిజెన్స్ ఈ మాదిరిగా నిందితులతో కూర్చుంటున్నారు. ఇంత ముఖ్యమైన టాపిక్ మీద చర్చ జరగకుండా చూసుకోడానికి అంబేద్కర్ గారిని వాడుకుంటున్నారు'' అని ఆయన అన్నారు.
 
 ఈ మధ్యలో మంత్రి యనమల రామకృష్ణుడు మాట్లాడుతూ, ఏం అంశంపై అయినా ప్రకటన చేసే హక్కు ప్రభుత్వానికి ఉందని చెప్పారు. చర్చ పెట్టాలని అడిగే హక్కు ప్రతిపక్షానికి లేదని అన్నారు. కావాలని అసెంబ్లీని స్తంభింపజేయాలని అనుకుంటున్నారన్నారు. చర్చే కావాలంటే ప్రభుత్వం ఆమోదించే సమస్య లేదని, ముందు ముఖ్యమంత్రి ప్రకటన చేసిన తర్వాత మాత్రమే చర్చకు అనుమతిస్తామని తెలిపారు. ఇలాగే సభను అడ్డుకుంటే తగిన చర్య తీసుకోవాల్సిందిగా చెబుతానని బెదిరించారు.
 
 రాష్ట్రం మొత్తమ్మీద చాలా పరిణామాలు జరిగాయని, ఏయే అంశాల మీద ప్రభుత్వం చర్యలు తీసుకుందో ముఖ్యమంత్రి ప్రకటన చేసిన తర్వాత చర్చ ఉండాలని మంత్రి అచ్చెన్నాయుడు అన్నారు.
 
 ఈ గందరగోళం నడుమ స్పీకర్ కోడెల శివప్రసాదరావు సభను పది నిమిషాల పాటు వాయిదా వేశారు.


 హైదరాబాద్: సెక్స్ రాకెట్ ఏపీ అసెంబ్లీని కుదిపేస్తోంది. అనుకున్నట్లుగానే సభ ప్రారంభంకాగానే గందరగోళం నెలకొంది. ముఖ్యమైన కాల్ మనీ వ్యవహారంపై చర్చ జరగాలని సభ ప్రారంభంలోనే వైఎస్ఆర్ కాంగ్రెస్ పార్టీ వాయిదా తీర్మానం ఇవ్వగా దానిని పక్కకు పెడుతూ స్పీకర్ ప్రశ్నోత్తరాలు ప్రారంభించారు. దీంతో, వైఎస్ఆర్ కాంగ్రెస్ పార్టీ నేతలు చర్చ జరగాల్సిందేనని డిమాండ్ చేశారు. దీంతో టీడీపీ మంత్రి అచ్చెన్నాయుడు ఒక్కసారిగా లేచి ప్రతిపక్షంపై మండిపడ్డారు.
 
 మీరు ఏ అనైతిక చర్యలకు పాల్పడలేదా, మీకు వాటిల్లో భాగస్వామ్యం లేదా అంటూ వ్యాఖ్యానించారు. ప్రభుత్వ పక్షానా అభ్యర్థిస్తున్నామని, సభా సమయం వృధా కాకుండా ముందు ప్రశ్నోత్తరాలు, ఆ తర్వాత అంబేద్కర్ అంశంపై చర్చ, తర్వాత చంద్రబాబు ప్రకటన ఉంటుందని, ఆ తర్వాతే కాల్ మనీ అంశంపై చర్చ అని అన్నారు. దీంతో వివరణ ఇవ్వాల్సిన సమయంలో ఎదురుదాడులకు దిగడమేమిటని నిలదీస్తూ మరోసారి సభలోని ప్రతిపక్ష సభ్యులు పోడియం దగ్గరకు చేరుకున్నారు. ఈలోగా యనమల రామకృష్ణుడు లేచి ప్రభుత్వం బీఏసీలో నిర్ణయంచిందే చేస్తామని అన్నారు. అచ్చెన్నాయుడు చెప్పినట్లు సభ కొనసాగుతోందని అన్నారు. అసలు ప్రతిపక్ష సభ్యులకు కాల్ మనీపై చర్చించే నైతిక హక్కే లేదని అన్నారు.


 హైదరాబాద్: ఆంధ్రప్రదేశ్ రాష్ట్రంలో సంచలనం సృష్టించిన హేయమైన కాల్ మనీ సెక్స్ రాకెట్ పై శుక్రవారం కూడా అసెంబ్లీ దద్దరిల్లుతోంది. ఎంతో దారుణమైన ఈ అంశంపై చర్చ జరపాల్సిందేనని ప్రధాన ప్రతిపక్షం వైఎస్ఆర్ కాంగ్రెస్ పార్టీ డిమాండ్ చేస్తుండగా ఆ విషయాన్ని అప్రస్తుతం చేసి, అవసరమైతే ఆ పార్టీ ఎమ్మెల్యేలపై సస్పెన్షన్ వేటు వేసి సభను ముందుకు తీసుకెళ్లాలని అధికార పక్షం భావిస్తోంది. ఈ మేరకు గురువారం సాయంత్రమే ముందుగా కసరత్తు కూడా చేసినట్లు తెలుస్తోంది. గతంలో జరిగిన అవినీతి అంశాలపై చర్చను లేవనెత్తినప్పుడు మూకుమ్మడిగా అధికార సభ్యులు ప్రతిపక్ష సభ్యులపై ఎలా దాడులు చేశారో అలాంటి పరిస్థితినే మరోసారి సభలో సృష్టించాలని వారు నిర్ణయానికి వచ్చినట్లు సమాచారం.
 
 వాస్తవానికి కాల్ మనీ సెక్స్ రాకెట్ పై తాను ప్రకటన చేసిన తర్వాతే చర్చ జరపాలని ముఖ్యమంత్రి చంద్రబాబునాయుడు గురువారం ప్రకటించినా అసలు ఆయన ఎలాంటి ప్రకటన చేయనున్నారనేది ఇప్పుడు ఆసక్తి కరంగా మారింది. ఈ రాకెట్ లో దాదాపు అందరూ టీడీపీ నేతలే ఉన్నట్లు స్పష్టంగా తెలుస్తోంది. ఆ పార్టీ, ఎమ్మెల్యేలు, మంత్రులకు ఇందులో భాగస్వామ్యం ఉన్నట్లు కథనాలు కూడా వెలువడ్డాయి. ఇప్పటికే రాష్ట్ర వ్యాప్తంగా సామాన్యుల నుంచి మేధావుల వరకు అంతా ఈ అంశాన్ని చర్చించుకుంటున్నారు.
 
 ఈ సమయంలో చంద్రబాబు నాయుడు చేసే ప్రకటన సంబంధిత మంత్రులు, ఎమ్మెల్యేలపై తప్పకుండా చర్యలు తీసుకుంటామని హామీ ఇచ్చేలా ఉంటుందా.. అసలు వారి ప్రస్తావనే రాకుండా వడ్డీ వ్యాపారుల పేరిట ప్రకటన చేస్తారా? లేక గతంలో మాదిరిగా అసలు విషయాన్ని మాట్లాడకుండా ఓ సుధీర్ఘ ఉపన్యాసం చేసి ప్రతిపక్ష సభ్యులను అసహనానికి గురిచేసి వారిపై వేటు వేయిస్తారా అనేది ఎదురు చూడాల్సిందే.


 * పైనున్న ఆయన ఆత్మ క్షోభిస్తుంది
 * ‘కాల్ మనీ-సెక్స్ రాకెట్’ అంశాన్ని పక్కదోవ పట్టిస్తున్నారు
 * సాక్షాత్తూ చంద్రబాబుతో నిందితుల ఫొటోలున్నాయి
 * నిందితుడితో కలసి ఎమ్మెల్యే విదేశాల్లో విహరించారు
 * ఎమ్మెల్యే వచ్చినా.. నిందితుడు తిరిగి రాలేదు
 * ఆ ఎమ్మెల్యేను కనీసం విచారించనూ లేదు
 * ప్రభుత్వ తీరుపై ధ్వజమెత్తిన ప్రతిపక్ష నేత జగన్
  
 సాక్షి, హైదరాబాద్: ‘కాల్ మనీ-సెక్స్ రాకెట్’ అంశాన్ని పక్కదోవ పట్టించడానికి అధికార పక్షం రాజ్యాంగ నిర్మాత అంబేడ్కర్‌ను కూడా వాడుకుంటోందని ప్రతిపక్ష నేత వైఎస్ జగన్‌మోహన్‌రెడ్డి నిప్పులు చెరిగారు. శాసనసభ సమావేశాల్లో తొలిరోజు గురువారం విపక్ష నేతకు రెండుసార్లు మాట్లాడే అవకాశం ఇచ్చినట్లే ఇచ్చి మైక్ కట్ చేశారు. రెండుసార్లూ జగన్ మూడు వాక్యాలైనా మాట్లాడకముందే స్పీకర్ మైక్‌ను కట్ చేశారు. సభ ప్రారంభంలో విపక్ష నేతకు మైక్ ఇచ్చినప్పుడు.. ‘సాక్షాత్తూ ముఖ్యమంత్రి చంద్రబాబు నాయుడుతో నిందితులు ఉన్న ఫోటోలున్నాయి.
 
 నిఘా విభాగం అధిపతి(ఇంటెలిజెన్స్ చీఫ్)తో నిందితులు ఉన్న ఫోటోలూ ఉన్నాయి. నిందితుడితో కలసి ఎమ్మెల్యే విదేశాల్లో విహరిస్తున్న ఫోటోలూ..’ అంటూ మాట్లాడుతుండగానే అర్ధంతరంగా మైక్ మూగబోయింది. తొలి వాయిదా అనంతరం సభ సమావేశమైనప్పుడు కూడా విపక్ష నేతకు మైక్ ఇచ్చినట్లే ఇచ్చి తొలగించారు. ‘అంబేడ్కర్-రాజ్యాంగం’ అంశం మీద పార్లమెంట్‌లో చర్చ జరిగిందని, ఆ అంశం మీద శాసనసభలోనూ చర్చిద్దామని అధికార పక్షం గట్టిగా కోరింది.
 
 అంబేడ్కర్ మీద చర్చను విపక్షం అడ్డుకుంటోందని అధికారపక్ష సభ్యులు విమర్శించారు. రెండోసారి విపక్ష నేతకు మాట్లాడే అవకాశం ఇచ్చినప్పుడు.. ‘నిజంగా.. పైనున్న అంబేడ్కర్ గారి ఆత్మ క్షోభిస్తుంది. కాల్‌మనీ-సెక్స్ రాకెట్ అంశాన్ని, దానిపై చర్చను పక్కదారి పట్టించడానికి అంబేడ్కర్‌నూ వాడుకుంటున్నారు.
 
 ఈ ఫొటో చూడండి.. (ఫొటో చూపిస్తూ..) ఒక నిందితుడు ఎమ్మెల్యేతో పాటు విదేశాలకు వెళ్లాడు. ఎమ్మెల్యే తిరిగి వచ్చారు. నిందితుడు మాత్రం రాలేదు. కానీ.. ఎమ్మెల్యేను పోలీసులు కనీసం విచారణ కూడా చేయలేదు. ఇంత దారుణంగా పరిస్థితి ఉంది’ అంటూ తన ప్రసంగాన్ని కొనసాగిస్తుండగా, అర్ధంతరంగా మైక్ కట్ చేశారు.


 సాక్షి ప్రతినిధి, ఏలూరు : విజయవాడలో తెలుగుదేశం పార్టీ ఎమ్మెల్యేలు, ఎమ్మెల్సీల కాల్‌మనీ, సెక్స్‌రాకెట్ కుంభకోణాన్ని నిర్వీర్యం చేసే కుట్రకు తెరలేపిన పాలకులు ఇప్పుడు వైఎస్సార్ సీపీ నేతలే లక్ష్యంగా ఆర్థిక దాడులకు, వేధింపులకు తెగబడుతున్నారు. రాష్ట్రవ్యాప్తంగా అన్ని జిల్లాల్లోనూ వడ్డీ వ్యాపారులపై ఉక్కుపాదం మోపే పేరిట పోలీసులు కేవలం వైఎస్సార్ సీపీ శ్రేణులనే టార్గెట్ చేస్తున్నారు. ఏలూరు నగరంలో తెలుగుదేశం పార్టీ కార్పొరేటర్లు, టీడీపీ నేతలు ఎస్టీడీ వడ్డీలతో ప్రజలను పీల్చిపిప్పి చేస్తున్నా వారి జోలికి వెళ్లే సాహసం చేయలేని పోలీసులు వైఎస్సార్ సీపీ నాయకులను మాత్రం వేధింపులకు గురిచేస్తున్నారు. ఇందుకు ఒక్కరోజు వ్యవధిలో చోటుచేసుకున్న ఘటనలే తార్కాణం.
  
  గుండాల ఇంట్లో చేష్టలుడిగి..
  ఏలూరు నగరంలోని చేపల తూము సెంటర్‌కు చెందిన ఫైనాన్స్, రియల్ ఎస్టేట్ వ్యాపారి గుండాల దుర్గారావు(జీడీఆర్) ఇంటికి మంగళవారం రాత్రి తనిఖీలకు వెళ్లిన సీఐ ఎన్.రాజశేఖర్, పోలీసు సిబ్బందికి ఆ కుటుంబ సభ్యులు చుక్కలు చూపించారు. పోలీసులని కూడా చూడకుండా చెలరేగిపోయారు. నానాయాగీ చేసి దుర్భాషలాడారు. దుర్గారావుకుమార్తె వెంటనే ఎమ్మెల్యే బడేటి బుజ్జికి ఫోన్ చేస్తే.. ఆయన అర్ధరాత్రి  2గంటల సమయంలో హుటాహుటిన అక్కడకు చేరుకున్నారు. ‘ఇప్పుడేంటి హడావుడి.. తర్వాత చూద్దాం వెళ్లండి’ అనగానే మారుమాట్లాడకుండా పోలీసులు వెనక్కి వచ్చేశారు.
  
  పిల్లంగోళ్ల ఇంట్లో పోలీస్ షో
  అదే  సీఐ రాజశేఖర్, పోలీసులు గురువారం ఏలూరు కర్రల వంతెన  సమీపంలో ఉంటున్న వైఎస్సార్ సీపీ మహిళా విభాగం ప్రధాన కార్యదర్శి పిల్లంగోళ్ల శ్రీలక్ష్మి ఇంటికి సోదాలకు వెళ్లారు. వాస్తవానికి శ్రీలక్ష్మి తండ్రి రంగారావుకు వడ్డీ వ్యాపారం ఉన్నా ఆమెకు, ఆమె భర్తకు ఈ వ్యాపారంతో ఎటువంటి సంబంధాలు లేవు. అయితే, ఎన్నో చీటింగ్ కేసులు ఎదుర్కొంటున్న కేఆర్ బాబు అనే వ్యక్తి ఫిర్యాదును సాకుగా చూపించి గురువారం శ్రీలక్ష్మి ఇంట్లో పోలీసులు హల్‌చల్ చేశారు. ఇంట్లో ఆమె ఒక్కరే ఉన్న సమయంలో కేవలం ఒక మహిళా కానిస్టేబుల్‌ను వెంట పెట్టుకుని సీఐ, ఎస్సై, 10మంది కానిస్టేబుళ్లు  ఇంట్లో అణువణువూ సోదా చేశారు. బెడ్‌రూమ్‌లు, వంట గదులే కాదు.. చివరకు బాత్‌రూమ్‌లలోనూ తనిఖీలు నిర్వహించారంటే పరిస్థితి అర్థం చేసుకోవచ్చు. ఎటువంటి డాక్యుమెంట్లు, ప్రామిసరీ నోట్లు, చెక్కులు లభ్యం కాకపోవడంతో వెనక్కివెళ్లారు. టీడీపీ ఎమ్మెల్యే అండ ఉన్న గుండాల దుర్గారావుపై ఎన్నో ఆరోపణలు ఉన్నప్పటికీ విచారణ చేపట్టకుండా వాస్తవాలను తొక్కిపెడుతున్న పోలీసులు... తండ్రి వ్యాపారంతో సంబంధం లేని పిల్లంగోళ్ల శ్రీలక్ష్మిని మాత్రం టార్గెట్ చేయడం చూస్తుంటేనే ఖాకీల పనితీరు ఏమిటో అవగతమవుతోంది.
  


 కాల్మనీ బాధితురాలు శ్రీలత వ్యవహారంపై సాక్షి ప్రసారం చేసిన కధనానికి జిల్లా ఎస్పీ గోపీనాథ్ జెట్లీ స్పందించారు. బాధితురాలిని వేధించిన కానిస్టేబుల్ కొండారెడ్డిపై చర్యలు తీసుకుంటామని హామీ ఇచ్చారు. భవిష్యత్ లో ఎలాంటి ఇబ్బందులు లేకుండా చూస్తామని బాధితురాలికి భరోసా ఇచ్చారు. కానిస్టేబుల్ కొండారెడ్డికి ఎలాంటి డబ్బు చెల్లించాల్సిన అవసరం లేదని సూచించారు.
 
  


 నూజివీడు : దేశవ్యాప్తంగా సంచలనం సృష్టించిన  విజయవాడ కాల్‌మనీ వ్యవహారంపై రాష్ట్ర పరువు తీసిన  టీడీపీ నాయకులు అసెంబ్లీలో కూడా నిసిగ్గుగా వ్యవహరించడంపై  విమర్శలు వెల్లువెత్తుతున్నాయి. కాల్‌మనీ కేసులో నిందితులైన తెలుగుదేశం నాయకులను  కఠినంగా శిక్షించకుండా   వ్యవహారాన్ని పక్కదారి పట్టించేందుకు అంబేడ్కర్ పేరును వాడుకోవడం నీచాతినీచమని పేర్కొంటున్నారు. రాష్ట్ర ప్రభుత్వం ఆడుతున్న నాటకాన్ని రాష్ట్ర ప్రజలు  చూస్తూనే ఉన్నారని, ప్రజలే వీరికి తగిన గుణపాఠం చెపుతారని పలువురు హెచ్చరిస్తున్నారు. దీనిని బట్టే కాల్‌మనీ వ్యవహారంలో ప్రభుత్వ పలాయనవాదం అర్ధమవుతోందనే అభిప్రాయం అంతటా వ్యక్తమవుతోంది.  
 కాల్‌మనీ వ్యవహారాన్ని తప్పించుకునేందుకే
 కాల్‌మనీ వ్యవహారం రాష్ట్ర వ్యాప్తంగా  సంచలనంగా మారితే  ప్రభుత్వం  చాలా దారుణంగా   వ్యవహరిస్తోంది.  కాల్‌మనీ చర్చ ను తప్పించుకునేందుకు  ప్రభుత్వం ఇలా వ్యవహరిస్తోంది. కాల్‌మనీ నిందితులను వెంటనే అరెస్టు చేయాలి.
  - జీ రాజు,  సీపీఎం డివిజన్ కార్యదర్శి
  
 ప్రభుత్వానికి చిత్తశుద్ధి లేదు
 రాష్ట్రంలో  కాల్‌మనీ దోపిడీ ఎక్కువైంది. అధికారం ఉండడంతో టీడీపీ కాల్‌మనీ వ్యాపారులు దారుణాలకు ఒడిగడుతున్నారు. ఎమ్మెల్యే, ఎమ్మెల్సీలున్నప్పటికీ వారిని ఇంతవరకు అరెస్టు చేయకపోవడాన్ని బట్టే  ప్రభుత్వానికి దీనిపై చిత్తశుద్ధి లేదనేది అర్ధమవుతోంది.                - గోళ్ల పవన్,
  కాంగ్రెస్ నాయకులు, నూజివీడు   
  
 అసెంబ్లీలో చర్చకు భయమెందుకు?
 ప్రజలను పీడించుకుతింటున్న  కాల్ నాగుల గురించి  అసెంబ్లీలో  చర్చిం చేందుకు  టీడీపీ భయపడుతోంది.  దీనిని బట్టే  కాల్‌మనీలో ఎంత మేరకు టీడీపీ నాయకుల పాత్ర ఉందో  ప్రజలకు అర్ధమవుతోంది. ఇప్పటికైనా వారిని కఠినంగా శిక్షించి ప్రభుత్వం చిత్తశుద్ధిని  నిరూపించుకోవాలి.
  - మూడగాని మధు,  నూజివీడు
  
 బాధితుల పక్షాన నిలబడాలి
 ప్రభుత్వం బాధితుల పక్షాన నిలబడి వారికి న్యాయం చేయాలే గాని నిందితులను రక్షించ              కూడదు.  ఇసుక మాఫియా, మట్టి మాఫియా, తాజాగా కాల్‌మనీ మాఫీయాలు వెలుగు చూశాయి.  రాష్ట్రంలో ఇంకా ఎన్ని మాఫియాలు వెలుగు               చూస్తాయో  అంతుబట్టడం లేదు.   
  -చిటికెల రామారావు, సీఐటీయూ డివిజన్ కార్యదర్శి, నూజివీడు  
  
  


 వైఎస్సార్ సీపీ జిల్లా కన్వీనర్ మర్రి
 
 కారంపూడి : కాల్‌మనీ వ్యవహారంలో చర్యలు తీసుకోవడంలో విఫలమైన ప్రభుత్వం దాన్ని వదిలేసి రాష్ట్రవ్యాప్తంగా ఫైనాన్స్ సంస్థలు నడుపుతున్న వ్యక్తుల ఇళ్లు, కార్యాలయాలపై పోలీసు సోదాలు నిర్వహిస్తోందని వైఎస్సార్‌సీపీ జిల్లా అధ్యక్షుడు మర్రి రాజశేఖర్ ఆరోపించారు. వడ్డీ వ్యాపారులను ఇందులో ఇరికించి అన్ని పార్టీల పాత్ర వుందని చెబుతూ ప్రజల దృష్టిని మరల్చేందుకు ప్రభుత్వం విఫల యత్నాలు చేస్తోందని ఆగ్రహం వ్యక్తం చేశారు.
 
 కారంపూడిలో గురువారం రాష్ట్రస్థాయి ఎండ్ల పందేలను ప్రారంభించిన అనంతరం ఆయన విలేకరుల సమావేశంలో మాట్లాడారు. ప్రభుత్వం దగ్గర కాల్ మనీ నిందితుల పూర్తి సమాచారం వుందన్నారు. కాలయాపన చేస్తే ప్రజలు మర్చిపోతారని హైకోర్టు రిటైర్డ్ జడ్జితో విచారణ చేయిస్తానంటోందని ఆరోపించారు. గుంటూరులో వడ్డీ వ్యాపారంతో సంబంధం లేని వైఎస్సార్‌సీపీ యువజన విబాగం కన్వీనర్ కావటి మనోహర్‌నాయుడు ఇంట్లో సోదాలు నిర్వహించడంతోనే ప్రభుత్వ వైఖరి స్పష్టం అవుతోందన్నారు.        
                                                                                           
 ఇలాగానే ఆదుకునేది.. పత్తి ఎకరాకు ఐదు క్వింటాళ్లు దిగుబడి వచ్చి కుమిలి పోతుంటే కనీస మద్దతు ధర రూ.4,100 సీసీఐ కేంద్రాల్లో కూడా ఇవ్వలేకపోయారని పేర్కొన్నారు. కష్టకాలంలో క్వింటాకు ఆరువేలు మద్దతు ధర ఇచ్చి ఆదుకోవాలనే ఆలోచన లేదన్నారు. పత్తి వ్యాపారి వ్యవసాయ మంత్రి ఐతే పరిస్థితి ఇలాగే వుంటుందని రాజశేఖర్ ఎద్దేవా చేశారు
 
 నిందితులను రక్షించేందుకే.. : జంగా కృష్ణమూర్తి
 గురజాల మాజీ ఎమ్మెల్యే జంగా కృష్ణమూర్తి మాట్లాడుతూ అప్పులు ఇచ్చి పుచ్చు కోవడం అనాదిగా వస్తోందని, అసలు అలా చేయడమే తప్పు అన్నట్లుగా పోలీసు తనిఖీల ద్వారా ప్రభుత్వ వైఖరి ఉందన్నారు. ఇదంతా కాల్‌మనీ నిందితులపై చర్యలు తీసుకోకుండా ఉంటేందుకు ప్రభుత్వం ఆడుతున్న డ్రామాగా పేర్కొన్నారు. యువజన విభాగం జిల్లా కన్వీనర్ కావటి మనోహర్ నాయుడు మాట్లాడుతూ టీడీపీ ఎమ్మెల్యేలు బంధువులను బినామీలుగా రంగంలోకి దించి మట్టి నుంచి బ్రాందీ షాపుల వరకు అందర్ని దోచుకునే యత్నం చేస్తున్నారని ఆరోపించారు. ముఖ్యమంత్రి కూడా తన తనయుడి ద్వారా దోచుకో దాచుకో పద్ధతికి తెరతీసి మిగతా ప్రభుత్వ పెద్దలకు తప్పుడు  మార్గం చూపారని ఆరోపించారు. సమావేశంలో నాయకులు గజ్జెల బ్రహ్మారెడ్డి, నియోజకవర్గ, మండల పార్టీ నాయకులు పాల్గొన్నారు.


  ఆదుకోని సర్కారు.. ఆసరాకోసం బేజారు
   రుణాలివ్వని బ్యాంకులు... ప్రైవేటు వ్యాపారులకు బేడీలు
   జిల్లాలో కలకలం సృష్టించిన కాల్‌మనీ వ్యవహారం
   సామాన్యుడి అవసరాలు తీరడం ప్రశ్నార్థకమే!
  
  రుణమాఫీ వివరాలు
  రుణాలు తీసుకున్న రైతులు: 4.29 లక్షలు
  తీసుకున్న రుణం : రూ. 1462 కోట్లు
  మూడు విడతల్లో మాఫీ పొందిన రైతులు: 2,32,214
  మాఫీఅయిన మొత్తం : రూ. 313.92 కోట్లు
  
  ఖరీఫ్ రుణాలు
  జిల్లాలో రైతులు :  4.50 లక్షలు
  ఖరీఫ్ సీజన్‌లో కొత్త రుణాల లక్ష్యం : రూ. 1008 కోట్లు
  రుణాల రీషెడ్యూల్ పొందిన రైతులు : లక్షా 40 వేలు
  కొత్తగా రుణాలు పొందిన రైతుల సంఖ్య : 600
  రీషెడ్యూలైన రుణం : రూ.629 కోట్లు
  
   గరుగుబిల్లి మండలం గొట్టివలసకు చెందిన లక్ష్మునాయుడు బ్యాంకులో వ్యవసాయ రుణం తీసుకుని తనకున్న రెండెకరాలు సాగు చేసుకున్నాడు. టీడీపీ ప్రకటించిన మాఫీ ఆశతో తీసుకున్న బకాయి చెల్లించలేదు. రుణమాఫీ కాకపోవడంతో బకాయి కాస్తా వడ్డీతో కలిపి రెట్టింపయింది. కొత్తగా రుణంకోసం బ్యాంకు కెళ్తే పాత బకాయి తీర్చమని పట్టుబట్టారు. ఇక చేసేది లేక ప్రైవేటు వ్యాపారివద్ద అప్పు తీసుకుని ఈ ఏడాది వ్యవసాయం చేశాడు.
  
   ఎస్‌కోట మండలం కృష్ణాపురానికి చెందిన అన్నపూర్ణ డ్వాక్రా రుణం తీసుకుని టీకొట్టు నడుపుతోంది. మాఫీ ఆశతో వాటిని చెల్లించకపోవడంతో కొత్తగా పెట్టుబడికి సమస్య ఏర్పడింది. బ్యాంకులు కొత్తగా రుణాలివ్వకపోవడంతో తప్పనిసరి పరిస్థితుల్లో ఊళ్లో ఉన్న వడ్డీవ్యాపారి వద్ద అప్పుతీసుకుని వ్యాపారం పెంచుకుంది.
  
  ఈ రెండు సంఘటనలే కాదు... అడుగడుగునా ప్రైవేటు వ్యాపారుల సహకారం లేనిదే ఎవరి బతుకులూ సజావుగా సాగలేదు. రుణమాఫీ జరిగి ఉంటే... బ్యాంకులు ఆదుకుని ఉంటే... ప్రైవేటు వ్యాపారులను ఆశ్రయించాల్సిన పరిస్థితి వచ్చేది కాదు కదా...!
  
  సాక్షి ప్రతినిధి, విజయనగరం :  కొందరికి పూట గడవడమే కష్టం. మరికొందరికి పూట గడుస్తుందే తప్ప ఇతర అవసరాలు తీరవు. పిల్లల్ని చదివించుకునేందుకు ఇంకొందరికి స్థోమత ఉండదు. పెళ్లిళ్లు చేసినా, రోగాలొచ్చినా సామాన్య, మధ్యతరగతి కుటుంబాలు పడే యాతన అంతా ఇంతా కాదు. ఇక రైతులైతే నిత్యం మదుపుల కోసం ఎన్ని బాధలు పడతారో చెప్పనక్కర్లేదు. ఆదుకోవల్సిన ప్రభుత్వం పట్టించుకోనపుడు... ప్రైవేటుగా అప్పులిచ్చినవారే ఆపద్బాంధవులు. ఇప్పుడు అప్పులిచ్చిన వారిపైనా ప్రభుత్వం కొరడా ఝుళిపిస్తోంది. పేద, సామాన్య, మధ్యతరగతి ప్రజల ఆసరాను తీసేస్తోంది.
  
  విజయవాడ నేపథ్యంలో...
  విజయవాడ కాల్‌మనీ కేసు నేపథ్యంలో వడ్డీ వ్యాపారుల మీద దాడులు చేయడం, ఖాళీ బాండ్లు దొరికాయనే  కారణంతో కేసులు నమోదు చేయడం జిల్లాలో చర్చనీయాంశమైంది. టీడీపీ నాయకులను గట్టున పడేసే యత్నంలో భాగంగానే వ్యూహాత్మకంగా పోలీసులను ఉసిగొల్పారని చిన్న పిల్లాడినడిగినా ఇట్టే చెప్పగలరు. బోడి గుండుకు మోకాలికి ముడిపెట్టిన చందంగా విజయవాడ కాల్‌మనీ వ్యాపారానికి ఇక్కడి వడ్డీ వ్యాపారానికి లింకు పెట్టి వేధిస్తే భవిష్యత్‌లో ఇక సామాన్యులకు అప్పులెలా లభిస్తాయన్నది సర్వత్రా వ్యక్తమవుతున్న ప్రశ్న.
  
  రుణమాఫీ జరిగి ఉంటే...
  ఇప్పటికే ప్రభుత్వం రైతుల్ని, డ్వాక్రా మహిళల్ని రుణమాఫీ పేరుతో మోసగించింది.   ఎన్నికల హామీ ప్రకారం గతంలో తీసుకున్న రైతుల రుణాల్ని మాఫీ చేయలేదు. ఫలితంగా వారికి కొత్తగా బ్యాంకులు రుణాలివ్వలేదు. వారి పరిస్థితి రెంటికి చెడ్డ రేవడిలా తయారైంది. ముఖ్యంగా రైతుల్లో కొందరికి రుణాలు రీషెడ్యూల్ చేసి బ్యాంకులు చేతులు దులుపుకున్నాయి. మాఫీ కాని రైతులంతా అక్కడా ఇక్కడా అప్పులు చేసి సాగు చేశారు. కరువు నేపథ్యంలో పంటలు కూడా పోయాయి. చేసిన అప్పులు కూడా తీర్చలేని పరిస్థితి వారిది. ప్రభుత్వం ఆదుకోలేదు సరికదా కేవలం మూడు మండలాల్ని కరువు ప్రాంతాలుగా గుర్తించి మమ అనిపించేసింది. మిగతా మండలాల రైతుల పరిస్థితి అయోమయంగా తయారైంది. ఇప్పుడు మళ్లీ సాగుకోసం అప్పులు చేయాలంటే బ్యాంకులు నిరాకరిస్తే.. ప్రైవేటు వ్యాపారులు భయపడుతుంటే వారి భవిష్యత్తు ఏమిటన్నది పాలకులే తేల్చాలి.
  


 ► చర్చకు ముందుకు రాని అధికార పక్షం
 ► కాల్ మనీపై తొలిరోజు అట్టుడికిన అసెంబ్లీ
 ►ప్రతిపక్షం వాయిదా తీర్మానాన్ని తిరస్కరించిన స్పీకర్
 ►ఇద్దరు వైఎస్సార్‌సీపీ ఎమ్మెల్యేల సస్పెన్షన్
 ► నినాదాలతో హోరెత్తిన శాసనసభ
  
  సాక్షి, హైదరాబాద్: సంచలనం రేపుతున్న కాల్ మనీ సెక్స్ రాకెట్‌పై శాసనసభలో చర్చకు అధికార తెలుగుదేశం పార్టీ తొలిరోజు వెనుకడుగు వేసింది. ప్రతిపక్ష పార్టీపై ఎదురుదాడి చేయడానికి ఎజెండాలో లేని అంశాన్ని తెరమీదకు తెచ్చి కాల్ మనీ అంశాన్ని వాయిదా వేసింది. కాల్ మనీ వ్యవహారంలో అసలైన దోషులు బయటకు రావాలని, అందుకు ఎంతో కీలకమైన అంశంపై తొలి ప్రాధాన్యత అంశంగా చర్చించాలని ప్రతిపక్ష వైఎస్సార్ కాంగ్రెస్ పార్టీ గురువారం అసెంబ్లీలో వాయిదా తీర్మానం ప్రతిపాదించగా స్పీకర్ తిరస్కరించారు. కాల్ మనీ వ్యవహారంలో మానవ హక్కుల ఉల్లంఘన జరిగిందని, తక్షణం చర్చించాలని డిమాండ్ చేస్తూ ప్రతిపక్ష సభ్యులు పోడియం చుట్టుముట్టి నినాదాలతో నిరసనలు తెలిపారు. దాంతో పలుసార్లు వాయిదాల అనంతరం సభ రేపటికి వాయిదా పడింది.
  
  నిరుపేదలు, మహిళల జీవితాలతో ఆటలాడుకున్న కాల్ మనీ సెక్స్ రాకెట్ పై వెంటనే చర్చించి తక్షణం దోషులను శిక్షించాలని ప్రతిపక్షం పట్టుబట్టగా అధికారపక్ష సభ్యులు సభలో అడుగడుగునా అడ్డుపడ్డారు. విపక్ష సభ్యులు పోడియం వద్ద నిరసన కొనసాగిస్తున్న దశలో సభ ఆర్డర్‌లో లేకపోయినప్పటికీ అధికార పార్టీ సభ్యులు మాట్లాడారు. ఎప్పటిలాగే విపక్ష నేత వైఎస్ జగన్‌మోహన్‌రెడ్డిపై విమర్శలు గుప్పించడంతోనే టీడీపీ నేతలు కాలం గడిపారు.
  
  రోజంతా సభ విపక్ష సభ్యుల నిరసనలతో హోరెత్తగా, అధికార పార్టీ సభ్యులు మాట్లాడుతున్నప్పుడు అది టీవీల్లో ప్రసారం కాకుండా కెమెరాలకు అడ్డంగా ఉన్నారంటూ వైఎస్సార్‌సీపీకి చెందిన ఇద్దరు సభ్యులను రెండు రోజులపాటు సభ నుంచి సస్పెండ్ చేశారు. ఆ పార్టీ సభ్యులు శివప్రసాదరెడ్డి, దాడిశెట్టి రామలింగేశ్వరరావులను సభ నుంచి ఒకరోజు సస్పెండు చేయాలని శాసనసభా వ్యవహారాలశాఖ మంత్రి యనమల రామకృష్ణుడు ప్రతిపాదించగా, స్పీకర్ వారిని రెండు రోజులపాటు సస్పెండ్ చేశారు.
  
 వైఎస్ జగన్ మైక్ కట్
 ఈ గందరగోళ పరిస్థితుల మధ్య విపక్ష నాయకుడు వైఎస్ జగన్‌మోహన్‌రెడ్డిని మాట్లాడాల్సిందిగా స్పీకర్ రెండుసార్లు అవకాశమిచ్చినట్టే ఇచ్చి మైక్ కట్ చేశారు. కాల్ మనీ వ్యవహారంతో సంబంధాలున్నాయని ఆరోపణలు వచ్చిన వారితో ముఖ్యమంత్రి చంద్రబాబునాయుడు కలిసి దిగిన ఫోటోలను ఈ సందర్భంగా జగన్ స్పీకర్‌కు చూపిస్తూ.. అదే విషయాన్ని ప్రస్తావించబోగా వెంటనే స్పీకర్ మైక్ కట్ చేశారు. దాంతో ఆ పార్టీ సభ్యులంతా పోడియం చుట్టుముట్టి నిరసనగా నినాదాలు చేశారు.
  
 మా ప్రకటన తర్వాతే...
 కాల్ మనీ చర్చ జరపాలని వైఎస్ఆర్ సీపీ పట్టుబట్టగా, మధ్యలో స్పందించిన ఆర్థికమంత్రి ఆ విషయంపై శుక్రవారం సభలో ప్రభుత్వం ప్రకటన చేస్తుందని, ఆ ప్రకటన తర్వాతే చర్చ చేపడుతామని చెప్పారు. ఎంతో ముఖ్యమైన అంశమైనందున ముందు దానిపై చర్చ అనంతరం మిగతా ఎజెండా చేపట్టాలని ప్రతిపక్షం పట్టుబట్టింది. ఈ రకమైన గందలగోళ పరిస్థితుల నడుమ స్పీకర్ సభను మరుసటి రోజుకు వాయిదా వేశారు.
  
 తెరపైకి అంబేద్కర్
 తొలిసారి సభ వాయిదా పడిన మళ్లీ సమావేశమైన సందర్భంలో అధికారపార్టీ సభ్యులు అంబేద్కర్‌ను తెర మీదకు తెచ్చారు. అంబేద్కర్ 125వ జయంతి ఉత్సవాల నేపథ్యంలో పార్లమెంట్‌లో అంబేద్కర్-రాజ్యాంగం అనే అంశం మీద చర్చ జరిగిందని, అదే అంశం మీద శాసనసభలో చర్చ జరగాలని కోరింది. దాన్ని ఆసరాగా చేసుకుని అధికార పార్టీ సభ్యులు ప్రతిపక్షంపై విమర్శల దాడి కొనసాగించింది.
  
 అంబేద్కర్‌తో రాజకీయమా...
 సమస్యను పక్కదారి పట్టించడానికి తెలుగుదేశం అంబేద్కర్‌ను వాడుకుంటోందని జగన్ తీవ్రస్థాయిలో ప్రతిస్పందించారు. ఈ రకంగా చేయడం వల్ల అంబేద్కర్ ఆత్మ క్షోభిస్తుందని ఆవేదన వ్యక్తం చేశారు.


 తెనాలి రూరల్(గుంటూరు): గుంటూరు జిల్లా తెనాలి పోలీసులు ఇద్దరు వడ్డీ వ్యాపారులను ఆరెస్ట్ చేశారు. కాల్‌ మనీ, ఇదే తరహా ఆగడాలు జరుగుతున్నాయా అన్న విషయంపై విచారించాలని ఉన్నతాధికారుల నుంచి వచ్చిన ఆదేశాల మేరకు అనుమానితుల ఇళ్లపై పోలీసులు సోదాలు నిర్వహిస్తున్నారు.
 
 ఈ నేపథ్యంలో పట్టణంలో ఇద్దరిని పోలీసులు అదుపులోకి తీసుకున్నారు. స్థానిక బీసీ కాలనీకి చెందిన నక్కా శివయ్య, చండిక కృష్ణను టూ టౌన్ పోలీసులు గురువారం అరెస్ట్ చేశారు.


 హైదరాబాద్ : ఆంధ్రప్రదేశ్ ముఖ్యమంత్రి చంద్రబాబు నాయుడుతో విజయవాడ పోలీస్ కమిషనర్ గౌతమ్ సవాంగ్ గురువారమిక్కడ భేటీ అయ్యారు.  కాల్ మనీ వ్యవహారంపై ఆయన ఈ సందర్భంగా చంద్రబాబుకు నివేదిక సమర్పించారు.
  
 కాగా కాల్ మనీ, సెక్స్ రాకెట్పై విమర్శలు వెల్లువెత్తుతుండడంతో ఈ ఉదంతంపై న్యాయ విచారణ జరిపించాలని రాష్ట్రప్రభుత్వం నిర్ణయించిన విషయం తెలిసిందే. హైకోర్టు రిటైర్డ్ జడ్జితో విచారణ జరిపించనుంది. అలాగే రాష్ట్రంలో ఎక్కడా ఇలాంటి ఘటనలు ఇకపై జరగకుండా నిరోధించేందుకు, ఫైనాన్షియర్ల ఆగడాల్ని అరికట్టేందుకు మనీల్యాండరింగ్ చట్టాన్ని తేవాలని ప్రభుత్వం నిర్ణయించింది.


 హైదరాబాద్ : కాల్ మనీ కేసులో తెలుగు తమ్ముళ్లు అడ్డంగా దొరికిపోయినా అధికారం అడ్డం పెట్టుకుని, ప్రతిపక్షంపై ఎదురుదాడికి టీడీపీ సిద్ధం అవుతోంది.  గురువారమిక్కడ సమావేశమైన టీడీఎల్పీ కాల్ మనీ, సెక్స్ రాకెట్ ఆరోపణలు ఉన్న నేతలకు అండగా ఉండాలని నిర్ణయించుకుంది.  ఆరోపణలు ఎదుర్కొంటున్న బోడె ప్రసాద్, ఎమ్మెల్సీ బుద్దా వెంకన్నకు పలువురు టీడీపీ పెద్దలు ధైర్యం నూరిపోసినట్లు తెలుస్తోంది. రాజకీయాల్లో ఆరోపణలు సహజమేనని, భయపడవద్దంటూ సూచించినట్లు సమాచారం.
 
 ఇక అసెంబ్లీ సమావేశాల్లో బాక్సైట్ తవ్వకాలపై ఎదురుదాడికి దిగాలని టీడీఎల్పీ నిర్ణయించింది. అలాగే సభలో అంబేద్కర్పై చర్చ తర్వాతే ఇతర అంశాలను చేపట్టనుంది. ఇక పార్టీ అధ్యక్షుడు, ముఖ్యమంత్రి చంద్రబాబు నాయుడు టీడీఎల్పీ వివరాలను మీడియాకు లీక్ చేయొద్దని ఈ సందర్భంగా హెచ్చరించారు. మీడియాతో జాగ్రత్తగా మాట్లాడాలని పార్టీ నేతలకు చంద్రబాబు సూచనలు చేశారు.


 రాష్ట్ర వ్యాప్తంగా ప్రకంపనలు సృష్టించిన కాల్ మనీ వ్యవహారం.. బయట పడటంతో.. పలు ప్రాంతాల్లో ఆతరహా ఇబ్బందులు పడుతున్న బాధితులు ఒక్కొక్కరుగా బయటికి వస్తున్నారు.తాజాగా.. తిరుపతిలో ఓ కానిస్టేబుల్ అధిక వడ్డీలకు అప్పులిస్తూ.. మహిళలను వేధిస్తున్న ఘటన వెలుగు చూసింది. వివరాల్లోకి వెళితే.. కొర్లకుంటకు చెందిన ఓ మహిళ తిరుపతిలో కానిస్టేబుల్ గా పనిచేస్తున్న వ్యక్తి వద్ద అప్పు తీసుకుంది. సదరు మహిళ నుంచి తెల్ల కాగితాలపై సంతకాలు తీసుకున్న కానిస్టేబుల్.. అప్పు చెల్లించలేదంటూ వేధింపులు మొదలు పెట్టాడు.
 ఐదు నెలల క్రితం అలిపిరి పీఎస్ లో మూడు రోజుల పాటు అక్రమంగా నిర్భంధించాడు. దీంతో సదరు మహిళ కుటుంబ సభ్యులు భయంతో వైఎస్సార్ కడప జిల్లాకు పారిపోయారు. అయినా.. కానిస్టేబుల్ వెంటాడి.. వేధిస్తున్నాడనీ.. తక్షణమే రూ10లక్షలు చెల్లించాలని.. లేదంటే.. తన బిడ్డలను ముంబై రెడ్ లైట్ ఏరియాలో అమ్మేస్తానంటూ బెదిరింపులకు దిగుతున్నాడనీ బాధితురాలు వాపోయింది.


 ► కెమెరాలకు అడ్డుగా ఉన్నారని సస్పెన్షన్
 ► వెంటనే సభ శుక్రవారానికి వాయిదా
 కెమెరాలకు అడ్డుగా ఉన్నారన్న కారణంతో ఇద్దరు వైఎస్ఆర్‌సీపీ ఎమ్మెల్యేలపై రెండు రోజుల పాటు సస్పెన్షన్ వేటు వేశారు. శివప్రసాదరెడ్డి, దాడిశెట్టి రామలింగేశ్వరరావు (రాజా)లను సస్పెండ్ చేస్తున్నట్లు స్పీకర్ కోడెల శివప్రసాదరావు ప్రకటించారు. ఆ తర్వాత కొద్ది సేపటికే సభను శుక్రవారానికి వాయిదా వేశారు.
 
 అంతకుముందు యనమల రామకృష్ణుడు కలగజేసుకుని, ప్రతిపక్ష నాయకులకు ఉన్నది కమ్యూనికేషన్ సమస్య కాదని, అండర్‌స్టాండింగ్ ప్రాబ్లమ్ అని వ్యాఖ్యానించారు. ముఖ్యమంత్రి చర్చ ప్రారంభించమన్నప్పుడు కూడా ప్రతిపక్ష సభ్యులు చర్చకు అంగీకరించడం లేదన్నారు. సభ్యులను కావాలని రెచ్చగొట్టి వెల్‌లోకి పంపించడం దౌర్భాగ్యస్థితి అని విమర్శించారు. కెమెరాలకు అడ్డు పడుతున్నవాళ్లపై చర్యలు తీసుకోవాలని స్పీకర్‌ను కోరారు.
 
 దాంతో సభ్యులపై చర్య తీసుకోడానికి తీర్మానం ప్రవేశపెట్టాల్సిందిగా శాసనసభా వ్యవహారాల మంత్రి యనమల రామకృష్ణుడికి స్పీకర్ సూచించారు.
 
 శాసనసభలో జరిగే ప్రతి విషయం కెమెరాల ద్వారా ప్రజలకు అందాలని, దానికి సభ్యులు అడ్డుపడుతున్నారని యనమల అన్నారు. కెమెరాలకు, సభకు అడ్డుపడటం సంప్రదాయాలకు వ్యతిరేకమని, కెమెరాలకు అడ్డుపడుతున్న ఇద్దరు ఎమ్మెల్యేలను సస్పెండ్ చేయాల్సిందిగా కోరుతున్నట్లు చెప్పారు. శివప్రసాదరెడ్డి, దాడిశెట్టి రామలింగేశ్వరరావు (రాజా)లను సస్పెండ్ చేయాలని కోరుతున్నానన్నారు. దీంతో స్పీకర్ వారిద్దరినీ రెండు రోజుల పాటు సస్పెండ్ చేసినట్లు ప్రకటించి, వారిద్దరూ సభను వదిలి వెళ్లిపోవాలని సూచించారు.


 హైదరాబాద్ : రాష్ట్రంలో కాల్ మనీ - సెక్స్ రాకెట్ నేరాలు విపరీతంగా పెరిగిపోయాయని ఆంధ్రప్రదేశ్ శాసనసభలో బీజేఎల్పీ నేత విష్ణుకుమార్ రాజు ఆవేదన వ్యక్తం చేశారు. రూ. లక్షకు రూ. 3 లక్షలు వసూలు చేస్తున్నారని ఆరోపించారు. గురువారం ప్రారంభమైన ఆంధ్రప్రదేశ్ శీతాకాల సమావేశాల్లో విష్ణుకుమార్ రాజు మాట్లాడుతూ... కాల్ మనీ సెక్స్ రాకెట్ కంటే ఐఎస్ఐఎస్ ఉగ్రవాదులే నయమని ఆయన పేర్కొన్నారు.
 నిందితులు ఎంతటి వారైనా సరే అరెస్ట్ చేయాలని ప్రభుత్వాన్ని విష్ణుకుమార్ రాజు డిమాండ్ చేశారు. డబ్బులతో వడ్డీ వ్యాపారం చేస్తే మంచిదే కానీ.... మహిళల జీవితాలతో చెలగాటమాడటం మంచిది కాదని ఆయన అభిప్రాయపడ్డారు. వడ్డీలు కట్టలేని మహిళలను వేధించి వ్యభిచారంలోకి దించడం ఎంతవరకు కరెక్ట్ అని విష్ణుకుమార్ రాజు అన్నారు.


 విజయవాడ : 'కాల్మనీ' కీలక సూత్రధారి శ్రీరామమూర్తి ముఠా సాగించిన దాష్టీకం గురువారం మరోకటి వెలుగులోకి వచ్చింది. నగదు అప్పు తీసుకున్న కృష్ణాజిల్లా  కాకులపాడుకు చెందిన ఎలమంచిలి వెంకటేశ్వరరావు కుటుంబాన్ని వేధింపులకు గురి చేశారు. ఆ వేధింపుల కారణంగా 16 నెలల క్రితమే వెంకటేశ్వరరావు భార్య, కుమారుడు ఆత్మహత్య చేసుకున్నారు.
 శ్రీరామమూర్తి ఆగడాలపై గతంలో జిల్లా ఎస్పీకి వెంకటేశ్వరరావు ఫిర్యాదు చేశారు. శ్రీరామమూర్తికి అధికార పార్టీ నేతల అండ ఉన్న కారణంగా సదరు ఫిర్యాదును పట్టించుకోలేదు. తాజాగా 70 ఏళ్ల వెంకటేశ్వరరావుపై బౌన్సర్లు దాడి చేశారు. దీంతో తనకు న్యాయం చేయాలంటూ విజయవాడ నగర పోలీస్ కమిషనర్ను గురువారం బాధితుడు కలసి విజ్ఞప్తి చేశారు.


 రుణాలు వసూలు కాకపోతే రౌడీలను ఆశ్రయిస్తున్న వడ్డీ వ్యాపారులు
 పోలీసు స్టేషన్‌కు వెళ్లనీయకుండా ప్రైవేటు సెటిల్‌మెంట్లు
 అమలాపురంలో వడ్డీ రేట్లు రూ.10 నుంచి రూ.20
  
  
 అమలాపురం  : అమలాపురంలో రౌడీయిజంపై పోలీసులు ఎన్ని కేసులు నమోదు చేస్తున్నా వారి జులుంకు కళ్లెం వేయలేకపోతున్నారు. రౌడీలకు రాజకీయ అండ పుష్కలంగా ఉండటంతో కొన్ని సందర్భా ల్లో పోలీసులు కేసులు నమోదు చేస్తున్నా అవి అరెస్ట్‌ల వరకూ వెళ్లడం లేదు. విజయవాడలో కాల్ మనీ-సెక్స్ రాకెట్ వెలుగు చూసిన నేపథ్యంలో మన జిల్లాలోనూ అప్పులు ఇచ్చిన వారి వేధింపులు, బెదిరింపులు ఎంత వేదనాభరితంగా ఉంటాయో తెలియజెప్పే సంఘటనలు ఉన్నాయి. అమలాపురంలో వడ్డీ వ్యాపారులు రౌడీలను ఆశ్రయించి వసూలు కాని అప్పులపై బెదిరింపు అస్త్రాన్ని ప్రయోగిస్తున్నారు.
  
 రాజకీయ గొడుగు నీడలో..
 అమలాపురంలో 150 మందికి పైగా బడా వడ్డీ వ్యాపారులు ఉన్నారు. వీరిలో 40 మంది పెద్ద వ్యాపారులకు అటు రాజకీయ నేతలు ఇటు రౌడీ షీటర్లతో సత్సంబంధాలు ఉన్నాయి. వీరు ఎవరికి అప్పులు ఇచ్చినా అవి రూ.లక్షల్లోనే ఉంటాయి. వడ్డీ రేట్లు రూ.10 నుంచి రూ.20 వరకూ ఉంటాయి. వడ్డీ నెలనెలా వసూలు అయిపోతున్నంత వరకూ కథ సజావుగానే సాగిపోతుంది. అధిక వడ్డీల భారంతో రుణగ్రస్తుడు కొన్ని నెలల పాటు చెల్లించకపోయినా... ఇక అసలు ఇవ్వలేకపోరుునా వడ్డీ వ్యాపారులు తక్షణమే రౌడీలను ఆశ్రయిస్తారు. అంతే అప్పు తీసుకున్న వారికి ఫోన్లు... బెదిరింపులు మొదలవుతాయి.
  
  అదే స్థాయిలో వేధింపులూ ఉంటాయి. చివరకు బాధితులు పోలీసులను ఆశ్రయిద్దామనుకున్నా వారికి ఆ అవకాశం ఇవ్వరు. ప్రైవేటుగా సెటిల్‌మెంట్ చేస్తారు. అమలాపురంలో రూ.కోట్లు సంపాదించిన ఓ తెలుగుదేశం పార్టీ నాయకుడు రూ.కోట్లల్లోనే అధిక వడ్డీలకు రుణాలు ఇస్తారు. ఓ రుణం వసూలులో ఇబ్బందులు ఎదురుకావటంతో అధికార పార్టీ అండతో రుణగ్రస్తుడిపై పోలీసు కేసులు కూడా పెట్టించాడు.
  
  ఈ వ్యాపారి ఓ మంత్రి నా బంధువంటూ పోలీసుల దగ్గర తన దర్పాన్ని ప్రదర్శిస్తాడు. ఓ ప్రజాప్రతినిధి బంధువునంటూ ఓ రౌడీ ప్రైవేటు సెటిల్‌మెంట్లు తెగ చేస్తున్నాడు. ఓ పోలీసు అధికారి తండ్రి కూడా అధిక వడ్డీలకు రుణాలిస్తు న్నాడు. ఇటీవల ఒక రుణం వసూలు కాకపోతే తీసుకున్న అప్పునకు మించి రుణ గ్రస్తుడి ఆస్తులను రాజకీయ, అధికార అండతో అక్రమంగా జప్తు చేసేస్తున్నారు.
  
  6 గ్యాంగ్‌లు...115 మంది రౌడీలపై కేసులు నమోదు చేసినా...
  అమలాపురంలో గత ఏడాది కాలంలో రౌడీల ఆగడాలపై పట్టణ పోలీసు స్టేషన్‌లో అనేక కేసులు నమోదయ్యాయి. పట్టణంలో తరచూ శాంతి భద్రతలకు విఘాతం కల్గిస్తున్న ఆరు రౌడీ గ్యాంగ్‌లను పోలీసులు గుర్తించి ఆ గ్యాంగ్‌లకు చెందిన మొత్తం 115 మంది రౌడీలపై కేసులు నమోదుచేశారు. ఇందులో కొందరిని పోలీసులు నేరుగా అరెస్ట్ చేయగా... మరికొందరు హైకోర్టు నుంచి బెయిల్ తెచ్చుకున్నారు. ఈ కేసులు కాకుండా ఇటీవలే 30 మందిపై కొత్తగా రౌడీ షీట్లు... 44 మందిపై సస్పెక్ట్ షీట్లు (నేర చరిత్ర షీట్లు) తెరిచారు.
  
  పోలీసులు ఎంతసేపూ రౌడీ గ్యాంగ్‌లు ఒకరిపై ఒకరు స్కెచ్‌లు వేసుకుని హత్యయత్నాలకు... హత్యలకు వేసుకుంటున్న ఎత్తులు పై ఎత్తులపైనే దృష్టి పెడుతున్నారు తప్ప వారు ప్రైవేట్ సెటిల్‌మెంట్లు పేరుతో చేస్తున్న దందాలపై పూర్తి స్థాయిలో చర్యలు చేపట్టం లేదన్న విమర్శలు ఉన్నాయి. రౌడీల వెనుక రాజకీయ నేతల అండదండలు ఉన్నాయన్న కారణంతోనే వారు చేస్తున్న అన్ని రకాల నేరాలపైనా ఒకే రకమైన దృష్టి సారించలేకపోతున్నారని ప్రజలు వ్యాఖ్యానిస్తున్నారు.


 ఆంధ్రప్రదేశ్‌లో సాగుతున్న కాల్‌మనీ సెక్స్ రాకెట్ వ్యవహారంపై వైఎస్ఆర్ కాంగ్రెస్ పార్టీ ఏపీ అసెంబ్లీ శీతాకాల సమావేశాల తొలిరోజు వాయిదా తీర్మానం ఇచ్చింది. రుణాల ముసుగులో మహిళలను లైంగికంగా లోబరుచుకోవడం, అత్యాచారాల రూపంలో జరుగుతున్న మానవ హక్కుల ఉల్లంఘనపై ఈ తీర్మానాన్ని ఇచ్చారు. ఇదే అంశంపై అసెంబ్లీ రూల్స్ 344 కింద కూడా వైఎస్ఆర్‌సీపీ నోటీసులు ఇచ్చింది.
 
 గురువారం నుంచి ఐదు రోజుల పాటు ఏపీ అసెంబ్లీ సమావేశాలు జరగనున్న విషయం తెలిసిందే. ఈ సమావేశాలను మరిన్ని రోజులు పెంచాలని వైఎస్ఆర్‌సీపీ డిమాండ్ చేస్తోంది.


 ‘కాల్‌మనీ’ కేసును తప్పుదోవ పట్టిస్తున్న ప్రభుత్వం : శ్రీకాంత్‌రెడ్డి
  
  సాక్షి, హైదరాబాద్: కాల్‌మనీ-సెక్స్ రాకెట్ వ్యవహారంలో టీడీపీ నేతలను తప్పించడానికి రాష్ట్ర ప్రభుత్వం మొత్తం కేసును తప్పుదోవ పట్టిస్తోందని వైఎస్సార్‌సీపీ ఎమ్మెల్యేల కో-ఆర్డినేటర్ గడికోట శ్రీకాంత్‌రెడ్డి ఆరోపించా రు. ఆయన బుధవారం పార్టీ కేంద్ర కార్యాలయం వద్ద మీడియాతో మాట్లాడారు. ఈ కేసులో విజయవాడకు చెందిన టీడీపీ ఎమ్మెల్యేలు, ఎమ్మెల్సీలు, వారి బంధువుల పాత్ర ఉన్నట్లు వార్తలు వెలుగుచూస్తున్నా వారిని తప్పించేం దుకు ప్రభుత్వం కుట్ర చేస్తోందని విమర్శించారు. విజయవాడలో ఈ సెక్స్ రాకెట్ జరిగితే ఆ కోణాన్ని మార్చి రాష్ట్రవ్యాప్తంగా ఏదో జరుగుతున్నట్లుగా వడ్డీ వ్యాపారులపై దాడులు నిర్వహించడంలో ఆంతర్యం ఇదేనన్నారు. అధికార పార్టీ నాయకులను తప్పించే యత్నంలో భాగంగా ఇవన్నీ చేస్తున్నారని ధ్వజమెత్తారు. సెక్స్ రాకెట్‌ను నీరుగార్చే ప్రయత్నం జరుగుతోందన్నారు. వైఎస్సార్‌సీపీ గట్టిగా గళమెత్తిన తరువాత దీనిని రాష్ట్ర మంత్రివర్గ సమావేశంలో చర్చించారని చెప్పారు.
  
  ‘సిట్’ ఏర్పాటు చేయాలి: ఉప్పులేటి
  కల్తీ మద్యం మృతుల కేసులో ప్రత్యేక దర్యాప్తు బృందాన్ని(సిట్) ఏర్పాటు చేసినట్లుగానే కాల్‌మనీ-సెక్స్ రాకెట్ పై కూడా సిట్‌ను ఏర్పాటు చేయాలని వైఎస్సార్‌సీపీ శాసనసభాపక్షం ఉప నేత ఉప్పులేటి కల్పన డిమాండ్ చేశారు. ఆమె బుధవారం పార్టీ కేంద్ర కార్యాలయం వద్ద విలేకరులతో మాట్లాడారు. ఈ వ్యవహారంలో డబ్బు కంటే మహిళలపై సాగిన లైంగిక వేధింపులే ప్రధానమన్నారు.
 
  మహిళలకు క్షమాపణ చెప్పాలి: రోజా
  టీడీపీ ఎమ్మెల్యేలు, ఎమ్మెల్సీలు కాల్‌మనీ గ్యాంగులుగా ఏర్పడి అమాయక నిరుపేద మహిళలను వ్యభిచార రొంపిలోకి దింపుతున్నారని వైఎస్సార్‌సీపీ మహిళా విభాగం రాష్ట్ర అధ్యక్షురాలు, నగరి ఎమ్మెల్యే ఆర్కే రోజా ధ్వజమెత్తారు. కాల్‌మనీ వ్యవహారాన్ని సామాజిక సమస్యగా చూడాలని, సీఎం చంద్రబాబు మహిళలకు క్షమాపణ చెప్పాలని ఆమె బుధవారం డిమాండ్ చేశారు. రాజధాని ప్రాంతమైన విజయవాడలో ఇలాంటి దారుణాలు, దురాగతాలు జరుగుతుంటే భవిష్యత్తులో ఇక్కడకు వచ్చి జీవించాలనుకునే వారికి ఏం రక్షణ కల్పిస్తారని ప్రశ్నించారు.