నదిని శుభ్రం చేసిన ఆ యువకుడికి అనారోగ్యం.. చేతులకు ఇన్ఫెక్షన్ | Bittu Tabahi Says Repeated River Clean Up Efforts Took A Toll On His Healt​​h | Sakshi
Sakshi News home page

నదిని శుభ్రం చేసిన ఆ యువకుడికి అనారోగ్యం.. చేతులకు ఇన్ఫెక్షన్

Nov 16 2026 5:48 PM | Updated on Nov 16 2026 5:48 PM

Bittu Tabahi Says Repeated River Clean Up Efforts Took A Toll On His Healt​​h

నదిలో పేరుకుపోయిన చెత్తను తొలగించేందుకు పదేపదే శుభ్రత కార్యక్రమాలు చేపట్టిన పర్యావరణ కార్యకర్త బిట్టూ తబాహీ అనారోగ్యం బారినపడ్డారు. కలుషిత నీరు, వ్యర్థాలను పదే పదే తాకడంతో ఆయన చేతులకు ఇన్ఫెక్షన్ సోకింది. ఈ విషయాన్ని ఆయన సామాజిక మాధ్యమాల్లో వీడియో ద్వారా వెల్లడించారు. నదిని శుభ్రం చేస్తున్న దృశ్యాలతో పాటు, ఆసుపత్రి లేదా వైద్యశాలగా కనిపిస్తున్న చోట మంచంపై పడుకున్న దృశ్యాలను కూడా ఆ వీడియోలో చూపించారు. ఇన్ఫెక్షన్ కారణంగా దెబ్బతిన్న తన చేతులను కూడా అందులో చూపించారు.

మధ్యప్రదేశ్‌కు చెందిన పర్యావరణ కార్యకర్త సురేంద్ర సింగ్ చౌధరి.. బిట్టూ తబాహీ పేరుతో గుర్తింపు పొందారు. అజ్నార్ నదిలో పేరుకుపోయిన చెత్తను తొలగించేందుకు ఆయన 2026 జనవరిలో శుభ్రత కార్యక్రమాన్ని ప్రారంభించారు. అప్పటి నుంచి నదిలోని ప్లాస్టిక్ సీసాలు, సంచులు, నాచు, ఇతర వ్యర్థాలను తొలగిస్తున్నారు. అయితే ఆయన శ్రమతో శుభ్రం చేసిన ప్రాంతంలోకి ప్రజలు మళ్లీ చెత్త వేస్తుండటంపై తీవ్ర అసహనం వ్యక్తం చేస్తున్నారు.

నదిని శుభ్రం చేసే క్రమంలో ఎదురవుతున్న ఇబ్బందులతో పాటు, తన ఆరోగ్యంపై పడుతున్న ప్రభావాన్ని కూడా బిట్టూ వెల్లడించారు. కలుషిత నీరు, ప్లాస్టిక్ వ్యర్థాలు, ఇతర చెత్తతో పదేపదే సంబంధం ఏర్పడటంతో చేతులు, కాళ్లలో దురద, నొప్పి వస్తున్నట్లు తెలిపారు. సమస్య తీవ్రం కావడంతో ప్రతి రాత్రి నిద్రపోయే ముందు మందులు తీసుకోవాల్సి వస్తోందని పేర్కొన్నారు.

నదిని శుభ్రం చేసేందుకు ఆయన గ్లోవ్స్‌, బూట్లు వంటి వాటిని ఉపయోగించినట్లు సమాచారం. అయితే కొన్ని సందర్భాల్లో చేతులతోనే చెత్తను తొలగించారు. కలుషిత నీరు, కుళ్లిపోతున్న వ్యర్థాలను ఎక్కువసేపు తాకుతూ ఉంటే హానికరమైన బ్యాక్టీరియా, సూక్ష్మజీవులు, చర్మానికి హాని కలిగించే పదార్థాల వల్ల ఇన్ఫెక్షన్లు, ఇతర చర్మ సమస్యలు తలెత్తే ప్రమాదం ఉందని వైద్యపరమైన సమాచారం సూచిస్తోంది.

బిట్టూ తాజా వీడియోపై పలువురు సామాజిక మాధ్యమాల్లో స్పందించారు. ఆయన త్వరగా కోలుకోవాలని ఆకాంక్షించారు. నదిని ఒకరు శుభ్రం చేస్తున్నప్పటికీ ఇతరులు మళ్లీ చెత్త వేస్తుండటంపై విమర్శలు గుప్పించారు. ప్రజల్లో పరిసరాల పరిశుభ్రతపై బాధ్యత పెరగాలని కోరారు. ఓ నెటిజన్ స్పందిస్తూ.. ‘‘జాగ్రత్తగా ఉండండి. త్వరగా కోలుకోవాలని కోరుకుంటున్నాను. ప్రజల్లో కనీస పౌర బాధ్యత పెరిగి, నదులను మళ్లీ మళ్లీ కలుషితం చేయకుండా ఉంటారని నిజంగా ఆశిస్తున్నాను’’ అని పేర్కొన్నారు. మరో వ్యక్తి స్పందిస్తూ.. ‘‘ఆయనకు అవసరమైన రక్షణ దుస్తులు కొనుగోలు చేసేందుకు నిధుల సేకరణ ప్రారంభించాలి’’ అని సూచించారు.

Advertisement

Related News By Category

Related News By Tags

Advertisement
 
Advertisement
Advertisement