అంబానీ ఇంటి కరెంటు బిల్లు ఎంతో తెలుసా..?

వేసవికాలంలో ఎండలు మండిపోతుంటాయి. ఇంట్లో కరెంటు బిల్లులు భారీగానే వస్తుంటాయి. ఉక్కపోత తాలలేక ఏసీలు, ఇతర ఎలక్ట్రానిక్‌ ఉపకరణాల వాడకం పెరుగుతుంది. దాంతో విద్యుత్తు బిల్లులు పెరుగుతాయి. సామాన్యులకైతే ఈ బిల్లులు రూ.వందల్లోనో లేదా మహాఅయితే రూ.వేలల్లోనో ఉంటాయి కదా. ఓ వ్యక్తి ఇంటికి ఏకంగా రూ.70 లక్షల కరెంటు బిల్లు వచ్చింది. అయితే దానికి ప్రపంచంలోనే రెండో అత్యంత ఖరీదైన ఇల్లుగా గుర్తింపు ఉంది. ఇంతకీ ఆ ఇల్లు ఎవరిదో తెలుసా? ప్రపంచ కుబేరుల్లో ఒకరైన ముఖేశ్‌ అంబానీది. ముంబయిలోని తన నివాసం ‘అంటిలియా’ ఇటీవల నెల కరెంట్‌ బిల్లు ఏకంగా రూ.70,69,488గా ఉందని కొన్ని రిపోర్ట్‌లు చెబుతున్నాయి. ఈ నెల బిల్లుతో ఒక కుటుంబం జీవితాంతం ఓ మోస్తారుగా జీవనంగా సాగించవచ్చనే అభిప్రాయాలు కూడా వ్యక్తమవుతున్నాయి. సకాలంలో బిల్లు చెల్లిస్తుండడంతో అంబానీకి రూ.48,354 డిస్కౌంట్‌ కూడా లభించిందని రిపోర్ట్‌లు చెబుతున్నాయి.

ఇదీ చదవండి: గిగ్‌ వర్క్‌ర్ల సంక్షేమానికి సెస్‌

అంటిలియా ప్రత్యేకతలు..

• ముంబైలోని అల్టామౌంట్ రోడ్డులో 27 అంతస్తులతో ఈ అంటిలియాను నిర్మించారు.

• ఈ భవనం సుమారు 4,00,000 చదరపు అడుగుల విస్తీర్ణంలో ఉంది.

• 50 సీట్ల థియేటర్, బహుళ స్విమ్మింగ్ పూల్స్, ఒక స్పా, ఆలయం, మరియు కృత్రిమ మంచుకొండల నుంచి మంచు కురిసేలా అత్యాధునిక సౌకర్యాలు ఉన్నాయి.

• ఇందులో 168 కార్లు నిలిపే గ్యారేజీ ఉంది.

• మూడు హెలిప్యాడ్లు ఉన్నాయి.

• అమెరికన్ ఆర్కిటెక్చర్ సంస్థ పెర్కిన్స్ & విల్ దీన్ని రూపొందించింది.

• 2006-2010 మధ్య నిర్మించిన ఈ భవనానికి ఆ సమయంలోనే సుమారు 2 బిలియన్‌ డాలర్లు(సుమారు రూ.15,000 కోట్లు) వ్యయం అయిందని అంచనా.

• రిక్టర్ స్కేలుపై 8 తీవ్రతతో వచ్చే భూకంపాలను సైతం తట్టుకునేలా ఈ నివాసాన్ని రూపొందించారు.