చంద్రగిరిలో.. గతి తప్పుతున్న లాఠీ!

కానిస్టేబుల్‌ నుంచి ఎస్‌హెచ్‌ఓల వరకు అదే దూకుడు లాఠీలతో చావబాది స్వామి భక్తిని చాటుకుంటున్న సిబ్బంది కోర్టులు మందలించినా..ఎఫ్‌ఐఆర్‌లు నమోదు చేసినా మారని తీరు ప్రత్యక్ష ఆందోళనలకు సిద్ధమవుతున్న వైఎస్‌ఆర్‌సీపీ శ్రేణులు

తిరుచానూరు పోలీస్‌ స్టేషన్‌ పరిధిలో మూడు మాసాల క్రితం అమ్మవారి వాహన బేరర్లు, స్థానికులకు ట్రాఫిక్‌లో చిన్నపాటి తగాదా జరిగింది. దానికి రాజకీయ రంగు పులిమిన పోలీసులు ప్రతిపక్ష వైఎస్‌ఆర్‌సీపీకి సానుభూతి పరులపై అక్రమ కేసులు బనాయించి చితకబాదారు. ఈ విషయాన్ని సీరియస్‌గా తీసుకున్న జడ్జి ఆ సీఐని మందిలిస్తూ వైద్య పరీక్షలకు పంపించారు. అంతేకాకుండా పోలీసులు కొట్టినట్టు నిందితుల వాంగ్మూలం కింద రికార్డు కూడా చేశారు.

పాకాల మండలం ఇరంగారిపల్లి పంచాయతీ ముద్దలపల్లిలో దళితులపై టీడీపీ నాయకులు భౌతిక దాడులకు దిగారు. అక్కడి సీఐ అడ్డుకోకపోగా బూటు కాలితో తన్నుతూ దాడులు చేశారని బాధితులు జిల్లా ఎస్పీకి ఫిర్యాదు చేశారు. టీడీపీ నాయకులు, వారికి అండగాా నిలిచిన సీఐపై ఎస్సీ, ఎస్టీ అట్రాసిటీ కేసు నమోదు చేయాలని బాధితుడు శ్రీనాథ్‌ పేర్కొన్నారు.

పాకాల మండలం పెద్దగోర్పాడు గ్రామానికి చెందిన 77 ఏళ్ల వృద్ధురాలు చిట్టెమ్మ ఇంటి గేట్లు విరిచిన సీఐ చిన్నగోవిందుపై ఎఫ్‌ఐఆర్‌ నమోదు చేయాలని జడ్జి ఆదేశాలు ఇచ్చారు. అదే పోలీస్‌ స్టేషన్‌లో పనిచేస్తున్న హెడ్‌ కానిస్టేబుల్‌ పాతపాళెం దశరాజన్‌ జూలై 1వ తేదీన క్రైం నంబర్‌ 104/2026 కింద ఎఫ్‌ఐఆర్‌ నమోదు చేశారు. అయినప్పటికీ సదరు సీఐ అదే పోలీస్‌ స్టేషన్‌లో విధులు నిర్వహిస్తుండడం గమనార్హం.

ఇటీవల రిటైర్డ్‌ జడ్జి గుర్రప్పనాయుడు, మాజీ ఎమ్మెల్యే చెవిరెడ్డి కుటుంబీకులను ఎమ్మెల్యే పులివర్తి నాని నీచ మాటలతో దుర్భాషలాడిన ఘటనపై పోలీసులు చర్యలు తీసుకోలేదని ఎస్పీకి ఫిర్యాదు చేయడానికి వెళ్లగా అదనపు ఎస్పీ రవిమనోహరాచారి అడ్డుకోవడం, ఫిర్యాదు చేయడానికి వెళ్లిన వారిపైనే కేసులు పెట్టారు.

తాజాగా రామచంద్రాపురం మండలం రాయలచెరువుకు చెందిన సుబ్రమణ్యం మద్యం మత్తులో న్యూసెన్స్‌ చేస్తున్నట్టు ఫిర్యాదు వెళ్లడంతో పోలీసులు అతన్ని లాఠీలతో చావబాదారు. దెబ్బలు తట్టుకోలేక అతను ఆత్మహత్య చేసుకున్నాడు. ఈ కేసులో ప్రధాన నిందితులైన పోలీసులను తప్పించేందుకు టీడీపీ మండల అధ్యక్షుడు తిరుమలరెడ్డి, హెడ్‌కానిస్టేబుల్‌ రాజశేఖర్‌ రాజీయత్నాలు చేశారు. పోలీసు శాఖలోని ఓ ఉన్నతాధికారి కేసు తారుమారుకు సహకరించినట్టు సమాచారం.