ఎట్టకేలకు గెలిచిన సౌతాఫ్రికా.. 17వ ప్రయత్నంలో విజయం | Sakshi
Sakshi News home page

ఎట్టకేలకు గెలిచిన సౌతాఫ్రికా.. 17వ ప్రయత్నంలో విజయం

Published Wed, Feb 7 2024 5:18 PM

South Africa Women Team Registered Their First ODI Win Against Australia In 17th Attempt - Sakshi

మహిళల క్రికెట్‌లో తమపై ఆస్ట్రేలియా ఆథిపత్యానికి సౌతాఫ్రికా చెక్‌ పెట్టింది. వన్డేల్లో వరుసగా 16 మ్యాచ్‌ల్లో విజయం ఎరుగని ప్రొటీస్‌ జట్టు.. ఎట్టకేలకు 17వ ప్రయత్నంలో (ఇరు జట్ల మధ్య జరిగిన చివరి 16 వన్డేల్లో ఓ మ్యాచ్‌ టై కాగా మిగతా మ్యాచ్‌లన్నీ ఆస్ట్రేలియానే గెలిచింది) విజయం సాధించగలిగింది. 

మూడు మ్యాచ్‌ల సిరీస్‌లో భాగంగా సిడ్నీ వేదికగా ఇవాళ (ఫిబ్రవరి 7) జరిగిన రెండో వన్డేలో సౌతాఫ్రికా 80 పరుగుల తేడాతో గెలుపొందింది. 45 ఓవర్లకు కుదించిన ఈ మ్యాచ​్‌లో తొలుత బ్యాటింగ్‌ చేసిన సౌతాఫ్రికా 6 వికెట్ల నష్టానికి 229 పరుగులు చేసింది. మారిజెన్‌ కప్‌ (75) అర్ధసెంచరీతో రాణించగా.. అన్నెక్‌ బోష్‌ (44), క్లో టైరాన్‌ (37 నాటౌట్‌) ఓ మోస్తరు స్కోర్లు చేశారు. ఆసీస్‌ బౌలర్లలో మెగాన్‌ షట్‌, ఆష్లే గార్డ్‌నర్‌ తలో రెండు వికెట్లు సాధించగా.. సదర్‌ల్యాండ్‌, కిమ్‌ గార్త్‌ చెరో వి​కెట్‌ పడగొట్టారు.

అనంతరం 230 పరుగుల లక్ష్యాన్ని ఛేదించేందుకు బరిలోకి దిగిన ఆసీస్‌.. సఫారీ బౌలర్లు మూకుమ్మడిగా చెలరేగడంతో 29.3 ఓవరల్లో 149 పరుగులకే చాపచుట్టేసింది. మారిజెన్‌ కెప్‌ 3, అయాండా హ్లుబీ, ఎలిజ్‌ మారి మార్క్స్‌, డి క్లెర్క్‌ తలో 2 వికెట్లు, క్లో టైరాన్‌ ఓ వికెట్‌ పడగొట్టారు. ఆసీస్‌ ఇన్నింగ్స్‌లో పదో నంబర్‌ ప్లేయర్‌ కిమ్‌ గార్త్‌ (42 నాటౌట్‌) టాప్‌ స్కోరర్‌గా నిలిచింది. గార్త్‌.. గార్డ్‌నర్‌ (35) సాయంతో ఈ ఇన్నింగ్స్‌ ఆడకపోయుంటే ఆసీస్‌ మరింత దారుణంగా ఓడేది. మూడు మ్యాచ్‌ల ఈ సిరీస్‌లో తొలి మ్యాచ్‌ ఆసీస్‌ గెలువగా.. రెండో దాంట్లో సౌతాఫ్రికా విజయం సాధించింది. నిర్ణయాత్మక మూడో వన్డే ఫిబ్రవరి 10న సిడ్నీలోనే జరుగనుంది. 

Advertisement
 
Advertisement