ఖమ్మం సహకారనగర్‌ : ఖమ్మం పార్లమెంట్‌ నియోజకవర్గానికి సంబంధించి ఈవీఎంలను స్ట్రాంగ్‌ రూమ్‌లకు తరలించే ప్రక్రియ పూర్తయిందని రిటర్నింగ్‌ అధికారి, కలెక్టర్‌ వి.పి. గౌతమ్‌ తెలిపారు. మంగళవారం ఆయన ఖమ్మం రూరల్‌ మండలం పొన్నెకల్‌లోని శ్రీ చైతన్య ఇంజనీరింగ్‌ కళాశాలలో ఏర్పాటు చేసిన కౌంటింగ్‌ కేంద్రాన్ని పార్లమెంట్‌ ఎన్నికల సాధారణ పరిశీలకులు డాక్టర్‌ సంజయ్‌ జి కోల్టే తో కలిసి పరిశీలించారు. ఈ సందర్భంగా మాట్లాడుతూ.. ఖమ్మం, పాలేరు, వైరా, మధిర, సత్తుపల్లి, కొత్తగూడెం, అశ్వారావుపేట అసెంబ్లీ నియోజకవర్గాలకు సంబంధించిన ఈవీఎంలను స్ట్రాంగ్‌ రూమ్‌ల్లో భద్రపరిచామని చెప్పారు. ఈవీఎంలకు మూడంచెల భద్రత కల్పించామని, సీఆర్పీఎఫ్‌, ఆర్మ్‌డ్‌, స్థానిక పోలీసులు నిరంతరం కాపలా ఉంటారని తెలిపారు. స్ట్రాంగ్‌ రూమ్‌కు అన్ని వైపులా సీసీ కెమెరాలు, టెరరస్‌ పై నైట్‌ విజన్‌ కెమెరాలు ఏర్పాటు చేశామని, సీసీ కెమెరాల పుటేజ్‌లు చూడడానికి టెలివిజన్‌లు ఏర్పాటు చేశామని వెల్లడించారు. అభ్యర్థులు, అభ్యర్థుల ఏజెంట్లు వచ్చి టెలివిజన్‌లో సీసీ కెమెరాలు పరిశీలించవచ్చని, పాస్‌లు ఉన్న వారు స్ట్రాంగ్‌ రూంల వద్దకు వెళ్లి పర్యవేక్షణ చేసుకోవచ్చని తెలిపారు. కార్యక్రమంలో పోలీస్‌ కమిషనర్‌ సునీల్‌ దత్‌, ఏఆర్‌ఓలు ఆదర్శ్‌ సురభి, బి.సత్యప్రసాద్‌, వేణుగోపాల్‌, ఎం.రాజేశ్వరి, గణేష్‌, రాజేందర్‌, మధు తదితరులు పాల్గొన్నారు. పోలింగ్‌ పత్రాల పరిశీలన పార్లమెంట్‌ ఎన్నికల పోలింగ్‌కు సంబంధించిన పత్రాలను పక్కాగా పరిశీలించామని ఖమ్మం పార్లమెంట్‌ రిటర్నింగ్‌ అధికారి, కలెక్టర్‌ గౌతమ్‌ తెలిపారు. మంగళవారం ఆయన ఖమ్మం రూరల్‌ మండలం పొన్నెకల్‌లోని శ్రీ చైతన్య ఇంజనీరింగ్‌ కళాశాలలో ఏర్పాటు చేసిన కౌంటింగ్‌ కేంద్రాన్ని, అభ్యర్థులు, ఎన్నికల ఏజెంట్లతో కూడిన పత్రాలను పరిశీలించారు. ఈ సందర్భంగా మాట్లాడుతూ.. పార్లమెంట్‌ పరిధిలో ప్రశాంతంగా పోలింగ్‌ ముగిసిందని, ప్రజలు స్వేచ్ఛగా ఓటు హక్కు వినియోగించుకున్నారని తెలిపారు. పటిష్ట బందోబస్తు నడుమ ఈవీఎంలను రిసెప్షన్‌ సెంటర్‌కు, అక్కడి నుంచి స్ట్రాంగ్‌ రూమ్‌లకు తరలించామన్నారు. ఈవీఎంలకు భారీ బందోబస్తు ఖమ్మంరూరల్‌: లోక్‌సభ ఎన్నికల ప్రక్రియ ముగియడంతో ఈవీఎంలను అధికారులు మండలంలోని పొన్నెకల్‌లోని శ్రీ చైతన్య ఇంజనీరింగ్‌ కళాశాలకు తరలించారు. జూన్‌ 4న కౌంటింగ్‌ జరగనుండడంతో అప్పటి వరకు ఈవీఎంలకు భారీ బందోబస్తు కల్పించారు. కేంద్ర బలగాలతో పాటు స్థానిక పోలీసులు కూడా నిరంతరం కాపలా కాస్తున్నారు. సీసీ కెమెరాల నడుమ భద్రత కల్పిస్తూ స్ట్రాంగ్‌ రూంల వైపు చీమ కూడా దూరనంతగా నిఘా ఏర్పాటు చేశారు. కౌంటింగ్‌ జరిగే వరకు ఉన్నతాధికారులు నిత్యం స్ట్రాంగ్‌రూంలను పర్యవేక్షించనున్నారు. రిటర్నింగ్‌ అధికారి గౌతమ్‌

ఖమ్మంమయూరిసెంటర్‌/తిరుమలాయపాలెం/కూసుమంచి : జిల్లా వ్యాప్తంగా మంగళవారం వాతావరణం చల్లబడింది. పలు ప్రాంతాల్లో వర్షం కురిసింది. మధిర, సత్తుపల్లి, కారేపల్లి, ఖమ్మం అర్బన్‌, ఖమ్మం రూరల్‌, తిరుమలాయపాలెం, వైరా, కామేపల్లి, రఘునాథపాలెం, ఏన్కూరు, కూసుమంచి, ఎర్రుపాలెం మండలాల్లో వర్షం పడింది. కొన్ని చోట్ల గాలి దుమారంతో ప్రజలు ఇబ్బందులు పడ్డారు. తిరుమలాయపాలెం మండలం గోపాయిగూడెం స్టేజి వద్ద భారీ వృక్షం రోడ్డుపై పడింది. దీంతో ట్రాఫిక్‌కు అంతరాయం వాటిల్లింది. పాతర్లపాడు, గోల్‌తండా, జింకలగూడెం గ్రామాల్లోనూ తీవ్ర నష్టం వాటిల్లింది. ఇళ్ల పైకప్పు రేకులు లేచిపోయాయి. విద్యుత్‌ స్తంభాలు కూలిపోయాయి. ఈ మూడు గ్రామాల్లోనే సుమారు 50 స్తంభాలు పడిపోయాయని ట్రాన్స్‌కో ఏఈ రవికుమార్‌ తెలిపారు. విద్యుత్‌ సరఫరా పునరుద్ధరణకు సిబ్బంది కృషి చేస్తున్నట్లు చెప్పారు. గోల్‌తండా మీదుగా జల్లేపల్లి, హైదర్‌సాయిపేట వెళ్లే వాహనదారులు ఇబ్బంది పడాల్సి వచ్చింది. ఇంటికప్పులు లేచిపోయి నష్టపోయిన తమను ప్రభుత్వం ఆదుకోవాలని బాధితులు కోరుతున్నారు. కూసుమంచి మండలంలోని పలు గ్రామాల్లో డ్రెయిన్లు పొంగిపొర్లగా, దుక్కుల్లోకి వర్షపు నీరు చేరింది. అత్యధికంగా సత్తుపల్లిలో.. సత్తుపల్లిలో 3.9 సెం.మీ.వర్షపాతం నమోదైంది. మధిర ఏఆర్‌ఎస్‌ కేంద్రంలో 2 సెం.మీ., పెనుబల్లి గౌరారంలో 1.3, మధిర మండలం సిరిపురంలో 1.3 సెంటీమీటర్ల వర్షపాతం నమోదైంది. ఈ వర్షాలు మరో మూడు రోజులు ఉంటాయని వాతావరణ శాఖ పేర్కొంది. సత్తుపల్లిలో 3.9 సెం.మీ.వర్షపాతం నమోదు

12,41,135● ఖమ్మం, కొత్తగూడెంలో తక్కువగా పోలింగ్‌ ● పాలేరులో అత్యధికంగా 83.77 శాతం నమోదుమందిసాక్షిప్రతినిధి, ఖమ్మం : ఖమ్మం పార్లమెంట్‌ ఎన్నికల్లో 16,31,039 మంది ఓటర్లకు గాను 12,41,135 మంది ఓటుహక్కు వినియోగించుకున్నారు. అంటే 76.09 శాతం పోలింగ్‌ నమోదైంది. 7,87,160 మంది పురుషులకు.. 6,05,969 మంది, 8,43,749 మంది మహిళలకు 6,35,099 మంది ఓటు వేశారు. సంఖ్యాపరంగా మహిళలే ఎక్కువ మంది ఓటు వేసినా.. శాతంలో లెక్కిస్తే పురుషులు 76.98 శాతం, మహిళలు 75.27 శాతం మంది మాత్రమే ఉండడం గమనార్హం. పాలేరులో అత్యధికంగా.. ఈ ఎన్నికల్లో పాలేరు నియోజకవర్గంలో అత్యధికంగా పోలింగ్‌ నమోదైంది. ఇక్కడ 2,40,806 మంది ఓటర్లకు గాను 2,01,721 మంది ఓటు వేశారు. అంటే 83.77 శాతం మంది ఓటు హక్కు వినియోగించుకున్నారు. గత పార్లమెంట్‌ ఎన్నికల్లోనూ పాలేరు నియోజకవర్గంలో ఎక్కువ శాతం ఓట్లు పోలయ్యాయి. అలాగే ఖమ్మంలో 62.97 శాతం, కొత్తగూడెంలో 69.47 శాతం మాత్రమే ఓటింగ్‌ నమోదైంది.నియోజకవర్గాల వారీగా పోలింగ్‌ వివరాలు.. నియోజకవర్గం మొత్తం ఓటర్లు పోలైన ఓట్లు శాతం ఖమ్మం 3,24,073 2,04,078 62.97 పాలేరు 2,40,806 2,01,721 83.77 మధిర 2,22,160 1,81,815 81.84 వైరా 1,93,389 1,56,762 81.06 సత్తుపల్లి 2,43,943 1,95,979 80.34 కొత్తగూడెం 2,47,494 1,71,928 69.47 అశ్వారావుపేట 1,59,174 1,28,852 80.95మొత్తం 16,31,039 12,41,135 76.09

ఖమ్మంలీగల్‌ : వచ్చే నెల 8న జాతీయ లోక్‌ అదాలత్‌ నిర్వహిస్తున్నామని, కార్యక్రమాన్ని విజయవంతం చేసేలా తక్షణమే చర్యలు ప్రారంభించాలని జిల్లా ప్రధాన న్యాయమూర్తి జి.రాజగోపాల్‌ అన్నారు. లోక్‌ అదాలత్‌ విజయవంతానికి తీసుకోవాల్సిన చర్యలపై మంగళవారం ఆయన ఇతర న్యాయమూర్తులతో సమావేశం నిర్వహించారు. ఈ సందర్భంగా మాట్లాడుతూ.. రాజీ పడదగిన క్రిమినల్‌ కేసులను గుర్తించి కక్షిదారులకు నోటీసులు పంపాలని మెజిస్ట్రేట్‌లను ఆదేశించారు. చెల్లని చెక్కుల కేసులు, భార్యాభర్తల మధ్య తగాదాలు వంటి కేసులు పరిష్కారం అవుతాయని, వాటిపై ప్రత్యేక శ్రద్ధ కనబరచాలని తెలిపారు. కక్షిదారులకు లోక్‌ అదాలత్‌ ప్రయోజనాలను వివరించి వారిని రాజీ దిశగా ప్రోత్సహించాలని సూచించారు. సివిల్‌ కేసుల్లో ముఖ్యంగా రుణ వసూలు కేసులలో సులభ వాయిదాల రూపంలో కూడా అప్పు చెల్లించేలా రాజీ పడవచ్చని, ఈ కేసులో లోక్‌ అదాలత్‌ ఇచ్చే అవార్డును చట్ట ప్రకారం అమలు చేయవచ్చని పేర్కొన్నారు. సమావేశంలో మొదటి అదనపు జిల్లా న్యాయమూర్తి కె.ఉమాదేవి, రెండో అదనపు జిల్లా న్యాయమూర్తి వి.అపర్ణ, ప్రిన్సిపల్‌ సీనియర్‌ సివిల్‌ న్యాయమూర్తి కె.వి. చంద్రశేఖర్‌రావు, అదనపు సీనియర్‌ సివిల్‌ న్యాయమూర్తి ఎం.కల్పన, రెండో అదనపు మెజిస్ట్రేట్‌ వై.బిందుప్రియ, మూడో అదనపు మెజిస్ట్రేట్‌ వి.మాధవి తదితరులు పాల్గొన్నారు.నేటి నుంచి దోస్త్‌ వెబ్‌ ఆప్షన్‌లుఖమ్మం సహకారనగర్‌ : డిగ్రీ ప్రథమ సంవత్సర ప్రవేశాలకు సంబంధించి వెబ్‌ ఆప్షనన్ల ప్రక్రియ బుధవారం ప్రారంభమవుతుందని ఎస్‌ఆర్‌అండ్‌బీజీఎన్‌ఆర్‌ డిగ్రీ కళాశాల ప్రిన్సిపాల్‌ మహ్మద్‌ జాకిరుల్లా తెలిపారు. కళాశాలలో మంగళవారం వెబ్‌ ఆప్షన్ల ప్రచార పోస్టర్లు ఆవిష్కరించారు. ఈ సందర్భంగా మాట్లాడుతూ.. ఇప్పటికే రిజిస్ట్రేషన్‌ చేసుకున్న విద్యార్థులు నేటి నుంచి వెబ్‌ ఆప్షన్‌లు పెట్టుకోవచ్చని చెప్పారు. ఈనెల 25 వరకు రిజిస్ట్రేషన్‌ ప్రక్రియ కొనసాగుతుందని, 27వ తేదీ వరకు వెబ్‌ ఆప్షన్లకు అవకాశం ఉంటుందని తెలిపారు. మొదటి విడత సీట్లు కేటాయింపు జూన్‌ 3న వెలువడుతుందన్నారు. కార్యక్రమంలో వైస్‌ ప్రిన్సిపాల్స్‌ బి.వి.రెడ్డి, టి.జీవన్‌, ఐక్యూఏసీ కో ఆర్డినేటర్‌ సత్యవతి, దోస్త్‌ కో ఆర్డినేటర్‌ ఎం.సుబ్రమణ్యం, పరీక్షల కంట్రోలర్‌ ఎన్‌.గోపి, వేలాద్రి, బి.వెంకన్న, ఎం.వి.రమణ, రాంప్రసాద్‌ తదితరులు పాల్గొన్నారు. ఇంటర్‌లో ప్రవేశాలకు దరఖాస్తుల ఆహ్వానం భద్రాచలంటౌన్‌: తెలంగాణ గిరిజన సంక్షేమ శాఖ ఆధ్వర్యంలో ఉమ్మడి ఖమ్మం జిల్లాలో కొనసాగుతున్న ఎనిమిది ఏకలవ్య మోడల్‌ సంక్షేమ విద్యాలయాలలో ప్రవేశాలకు దరఖాస్తులు ఆహ్వానిస్తున్నట్లు భద్రాచలం ఐటీడీఏ పీఓ ప్రతీక్‌ జైన్‌ మంగళవారం ఓ ప్రకటనలో తెలిపారు. సీబీఎస్‌ఈ సిలబస్‌ బోధనలో ఇంటర్‌ మొదటి సంవత్సరానికి ఎంపీసీ, బైపీసీ, సీఈసీ, హెచ్‌ఈసీ గ్రూపులలో ప్రవేశం పొందవచ్చని పేర్కొన్నారు. 2023 – 24 విద్యా సంవత్సరంలో ఎస్సెస్సీ ఉత్తీర్ణులైన గిరిజన విద్యార్థులు ఈనెల 18వ తేదీ లోగా దరఖాస్తు చేసుకోవాలని సూచించారు. ఉమ్మడి జిల్లాలో బాలికలకు గండుగులపల్లి, పాల్వంచ, గుండాల, బాలురకు టేకులపల్లి, దుమ్ముగూడెం, చర్ల, ములకలపల్లి, సింగరేణి కళాశాలల్లో వివిధ గ్రూపుల్లో సీట్లు ఉన్నాయని వివరించారు. ఆసక్తి ఉన్నవారు ఎంచుకున్న ఈఎంఆర్‌ఎస్‌ విద్యాలయాలలో దరఖాస్తులు అందజేయాలని, పదో తరగతిలో సీజీపీఏ, సీబీఎస్‌ఈ మార్కుల ఆధారంగా ప్రవేశాలు కల్పిస్తామని వెల్లడించారు. ఇందుకు గాను ఈనెల 22న చర్ల విద్యాలయంలో కౌన్సిలింగ్‌ ఉంటుందని పీఓ తెలిపారు. 18 వరకు గడువు ములకలపల్లి: ఏకలవ్య మోడల్‌ రెసిడెన్షియల్‌ స్కూల్‌ (ఈఎంఆర్‌ఎస్‌)లో ఇంటర్‌లో ప్రవేశానికి ఈ నెల 18 వరకు గడువు పొడిగించినట్లు విద్యాలయాల ప్రాంతీయ సమన్వయ అధికారి టీవీ.రాజు, ములకలపల్లి ఏకలవ్య ప్రిన్సిపాల్‌ రాజేశ్‌ మంగళవారం ఒక ప్రకటనలో తెలిపారు. ఇంటర్మీడియట్‌ ప్రథమ సంవత్సరంలో అడ్మిషన్‌ పొందేందుకు 2023–24లో పదో తరగతి ఉత్తీర్ణులైన గిరిజన విద్యార్థులు అర్హులని పేర్కొన్నారు.

ఖమ్మంసహకారనగర్‌: సంగారెడ్డి జిల్లా నారాయణఖేడ్‌ నియోజకవర్గంలో సజావుగా ఎన్నికల విధులు నిర్వహించిన ఉపాధ్యాయులపై లాఠీచార్జీ చేయించిన అధికారులపై చర్యలు తీసుకోవాలని టీపీటీఎఫ్‌ బాధ్యులు వై.అశోక్‌కుమార్‌, పి.నాగిరెడ్డి ప్రధాన ఎన్నికల అధికారిని కోరారు. రాష్ట్రంలో ఒకేవిధంగా రెమ్యునరేషన్‌ ఇవ్వాలని డిమాండ్‌ చేసిన ఉపాధ్యాయులపై పోలీసులు అసహనంగా లాఠీచార్జ్‌ చేశారన్నారు. ఉపాధ్యాయులు అంకితభావంతో పని చేస్తారని చెప్పిన అధికారులే ఎన్నికలు ముగిసిన తర్వాత సరైన రెమ్యునరేషన్‌ ఇవ్వకుండా పోలీసులతో బలప్రయోగం చేయించడం అత్యంత బాధాకరమన్నారు. ఐదు రోజుల రెమ్యునరేషన్‌ ఇవ్వకుండా ఈ ఘటనకు బాధ్యులైన ఆర్డీఓ తదితర అధికారులపై చర్యలు తీసుకోవాలని కోరారు. కేసు నమోదు చింతకాని: మండలంలోని రామకృష్ణాపురం గ్రామానికి చెందిన దేవరపల్లి మోహన్‌రెడ్డి, కురుగుంట్ల రవీందర్‌రెడ్డి, పిన్నెల్లి శ్రీనివాసరావుపై స్థానిక పోలీస్‌ స్టేషన్‌లో మంగళవారం కేసు నమోదైంది. పోలీసుల కథనం ప్రకారం.. గ్రామానికి చెందిన తూము కోటేశ్వరరావు స్కూల్‌ వద్ద ఉండగా ఆ ముగ్గురు వ్యక్తులు అతడితో గొడవ పడి కొట్టి చంపుతామని బెదిరించారు. కోటేశ్వరరావు ఇచ్చిన ఫిర్యాదు మేరకు ఎస్‌ ఐ నాగుల్‌మీరా ముగ్గురిపై కేసు నమోదు చేసి దర్యాప్తు జరుపుతున్నట్లు తెలిపారు. మహిళ మెడలో గొలుసు చోరీఇల్లెందురూరల్‌: మండలంలోని సుభాష్‌నగర్‌లో మహిళ మెడలో నుంచి బంగారు గొలుసును గుర్తుతెలియని వ్యక్తి చోరీ చేసిన ఘటన మంగళవారం చోటుచేసుకుంది. బాధితురాలు నరేట్ల ప్రమీల కథనం ప్రకారం.. మండలంలోని సుభాష్‌నగర్‌ గ్రామపంచాయతీ గిరిజన గురుకుల కళాశాల వీధికి చెందిన ప్రమీల ఉదయం ఏడు గంటల సమయంలో ఆరుబయిట వాకింగ్‌ చేస్తోంది. అదే సమయంలో ముఖానికి తెల్లటి రుమాలు కట్టుకున్న వ్యక్తి బైక్‌పై వేగంగా వచ్చి ఆమె మెడలోని 2.50 తులాల బంగారు గొలుసును లాక్కొని వెళ్లిపోయాడు. ఈ ఘటనతో షాక్‌కు గురైన మహిళ తేరుకునేలోపు చోరీకి పాల్పడిన వ్యక్తి పరారయ్యాడు. బాధితురాలి ఫిర్యాదు మేరకు పోలీసులు కేసు నమోదు చేసుకొని దర్యాప్తు చేస్తున్నారు.