లారీ.. బైకు ఢీ

లారీ.. బైకు ఢీ

– వ్యక్తికి తీవ్ర గాయాలు

సిద్దవటం : మండలంలోని భాకరాపేట గ్రామ సమీపంలోని మలినేనిపట్నం కాలనీ వద్ద బుధవారం రాత్రి లారీ, బైకు ఢీకొన్న ప్రమాదంలో గంగాధరంపల్లి రెడ్డిపవన్‌ అనే వ్యక్తికి తీవ్ర గాయాలయ్యాయి. స్థానికుల కథనం మేరకు వివరాలిలా ఉన్నాయి.. ఏపీఎస్పీ 11వ బెటాలియన్‌లో కుక్‌గా పనిచేస్తున్న గంగాధరంపల్లె హరి కుమారుడు రెడ్డిపవన్‌ తన బైకులో బుధవారం రాత్రి కడప నుంచి నివాసమున్న సిద్దవటం మండలం మాధవరం–1 గ్రామానికి బయలుదేరాడు. సిద్దవటం మండలం భాకరాపేట గ్రామ సమీపంలోని మలినేనిపట్నం కాలనీ వద్దకు రాగానే ముందు వెళ్తున్న వాహనాన్ని ఓవర్‌ టేక్‌ చేసి తిరుపతి వైపు నుంచి ఎదురుగా వస్తున్న లారీని ఢీకొనడంతో బైకు లారీ కిందికిపోయి నుజ్జు అయింది. రెడ్డిపవన్‌ తలకు, కుడికాలుకు తీవ్ర గాయాలయ్యాయి. వైద్యం కోసం 108 వాహనంలో కడప రిమ్స్‌ ఆసుపత్రికి తరలించారు. సమాచారం తెలుసుకున్న సిద్దవటం ఎస్‌ఐ మహమ్మద్‌రఫీ ఘటనా స్థలానికి చేరుకుని ప్రమాదం జరిగిన తీరును పరిశీలించి విచారిస్తున్నారు.

ట్రాక్టర్‌ బోల్తాపడి ఇద్దరు కూలీలకు తీవ్ర గాయాలు

మదనపల్లె రూరల్‌ : విద్యుత్‌ ట్రాన్స్‌ఫార్మర్‌లు, ఇనుపసామగ్రిని తరలిస్తున్న ట్రాక్టర్‌ బోల్తా పడి జార్ఖండ్‌కు చెందిన ఇద్దరు కూలీలు తీవ్రంగా గాయపడిన ఘటన బుధవారం మదనపల్లె మండలంలో జరిగింది. ట్రాన్స్‌కో కార్యాలయంలో విద్యుత్‌ పనుల కాంట్రాక్ట్‌ చేస్తున్న వ్యక్తి వద్ద జార్ఖండ్‌కు చెందిన అర్జున్‌ ముండ్రే(23), సూలే(24) కూలీలుగా పనిచేస్తున్నారు. ఈ క్రమంలో విద్యుత్‌ సామగ్రి, పోల్స్‌, ట్రాన్స్‌ఫార్మర్‌లు మండలంలోని బొమ్మనచెరువు గ్రామం టేకులపాలెంలో ఏర్పాటు చేయాల్సి ఉండగా ట్రాక్టర్‌లో వేసుకుని వెళుతున్నారు. మార్గమధ్యంలో టేకులపాలెం రోడ్డులో ట్రాక్టర్‌ అదుపుతప్పి బోల్తా పడింది. ప్రమాదంలో కూలీలుగా పనిచేస్తున్న జార్ఖండ్‌ యువకులు ఇద్దరు తీవ్రంగా గాయపడ్డారు. గమనించిన స్థానికులు బాధితులను మదనపల్లె ప్రభుత్వ జిల్లా ఆస్పత్రికి తరలించారు. వారి పరిస్థితి విషమంగా ఉండటంతో మెరుగైన వైద్యం కోసం తిరుపతికి రెఫర్‌ చేశారు.

ప్రైవేట్‌ మెడికల్‌ స్టోర్‌లో ప్రభుత్వ ఆసుపత్రి మందులు

మదనపల్లె రూరల్‌ : ప్రభుత్వ జిల్లా ఆసుపత్రిలోని మందులు ప్రైవేట్‌ మెడికల్‌ స్టోర్‌లో ప్రత్యక్షమయ్యాయి. బుధవారం రాత్రి జిల్లా ఆసుపత్రి అత్యవసర విభాగంలో పనిచేస్తున్న డాక్టర్‌ సయ్యద్‌ హదీద్‌ ఈ విషయాన్ని గుర్తించి, రెడ్‌ హ్యాండెడ్‌గా మీడియాను తీసుకెళ్లి చూపించారు. ప్రభుత్వ ఆసుపత్రిలో అతిసార వ్యాధిగ్రస్తులకు అందించే మెట్రోజెల్‌ ఐవి ఫ్యూజన్‌ సైలెన్‌ మందు ఆసుపత్రికి ఎదురుగా ఉన్న ఓ ప్రైవేట్‌ మెడికల్‌ స్టోర్‌లో ఉన్నట్లు రోగి ద్వారా తెలుసుకున్నారు. వెంటనే అందుబాటులో ఉన్న విలేకరులను వెంట తీసుకొని ప్రైవేట్‌ మెడికల్‌ స్టోర్‌కు వెళ్లారు. ప్రైవేటు ఆసుపత్రిలో విక్రయిస్తున్న పారాసెటమాల్‌ ఐవి ఫ్యూజన్‌ సైలెన్‌ మందు డబ్బాలో, జిల్లా ఆస్పత్రిలో వినియోగిస్తున్న మెట్రోజల్‌ ఐవి సైలెన్‌ మందు బాటిల్‌ను ప్రత్యక్షంగా చూపించారు. ఈ విషయంపై ప్రైవేట్‌ మెడికల్‌ స్టోర్‌ సిబ్బందిని విలేకరులు ప్రశ్నించగా, ప్రభుత్వ ఆసుపత్రికి వచ్చిన రోగులు మందు వెనక్కి తీసుకొచ్చి ఇస్తే తాము చూసుకోకుండా ఉంచుకున్నామని తెలిపారు. ప్రభుత్వ ఆసుపత్రిలోని మందులు ఈ విధంగా ప్రైవేట్‌ మైకల్‌ స్టోర్‌లో ఎలా ప్రత్యక్షమవుతున్నాయో అధికారులే సమాధానం చెప్పాల్సి ఉంది.