గోల్కొండ కోటలో అది సొరంగం కాదు.. బయటపడింది ఏంటంటే?

హైదరాబాద్: పురావస్తు శాఖ, హైదరాబాద్ సర్కిల్ పరిధిలో జాతీయ ప్రాధాన్యం కలిగిన రక్షిత కట్టడం గోల్కొండ కోట. దక్కన్ పీఠభూమిలోని అతిపెద్ద, ప్రముఖ కోటల్లో ఇది ఒకటి. సుమారు 120 మీటర్ల ఎత్తుకు పెరిగిన కొండపై నిర్మించిన ఈ కోటలో భారీ రాతి ప్రాకారాల మధ్య మధ్యయుగ ఇస్లామిక్ నివాస ప్రాంతం ఉంది. 

ఈ సముదాయంలో రక్షణ నిర్మాణాలు, ప్రవేశ ద్వారాలు, బురుజులు, మసీదులు, ఉద్యానవనాలు, నివాస ప్రాంతాలు, రాజభవన నిర్మాణాలు ఉన్నాయి. మూడు వరుసల రక్షణ ప్రాకారాలు, 87 బురుజులతో గోల్కొండ కోట మధ్యయుగ సైనిక నిర్మాణ శైలి, పట్టణ నివాస వ్యవస్థకు అద్భుతమైన ఉదాహరణగా నిలుస్తోంది.

సొరంగం కనిపించిందా? 
సామాజిక మాధ్యమాల్లో ప్రచారం జరిగిన వార్త ప్రకారం, కోట వెనుక గోల్కొండ ఆర్టిలరీ సెంటర్ చేపడుతున్న పనుల సమయంలో ఒక సొరంగం కనిపించినట్లు సమాచారం వెలువడింది. ఈ ప్రాంతం గోల్కొండ కోటకు చెందిన నిషేధిత ప్రాంతంలోకి వస్తుంది. ఈ నిషేధిత ప్రాంతం కోట ప్రాకార గోడకు 100 మీటర్లకు మించి విస్తరించి ఉంటుంది.

ఈ విషయం పురావస్తు శాఖ హైదరాబాద్ సర్కిల్ దృష్టికి వచ్చిన వెంటనే వాస్తవాలను పరిశీలించేందుకు ఒక పురావస్తు శాస్త్రవేత్త, ఇంజనీర్, సర్వేయర్, గోల్కొండ కోట స్థల బాధ్యుడితో కూడిన బృందాన్ని అక్కడికి పంపించారు.

ప్రాథమిక పరిశీలనలో ఆ నిర్మాణం సొరంగం కాదని తేలింది. అది సుమారు 1.2 మీటర్ల పొడవు, 1.8 మీటర్ల వెడల్పు, 2.2 మీటర్ల లోతుతో ఉన్న దీర్ఘచతురస్రాకార గది అని గుర్తించారు. దీన్ని గ్రానైట్ రాతితో నిర్మించారు. లోపలి భాగంలో గరుకు రాళ్లతో గోడలాంటి నిర్మాణం ఉంది. ఈ ప్రాంతంలో ఎరుపు రంగులో ఉన్న కొన్ని కుండ పెంకులను కూడా బృందం గుర్తించింది. ఇవి మధ్యయుగ కాలానికి చెందినవిగా కనిపిస్తున్నాయి.

 ఈ నిర్మాణం సొరంగం కాదు 
ప్రాథమిక పరిశీలనలో ఈ నిర్మాణం సొరంగం కాదని, చిన్న గది అని స్పష్టమైంది. అయితే, దాని కచ్చితమైన ఉద్దేశం, వినియోగం ఏమిటనేది వివరమైన పరిశీలన లేకుండా గుర్తించడం సాధ్యం కాలేదు.

ఈ విషయాన్ని పురావస్తు శాఖ హైదరాబాద్ సర్కిల్, పురావస్తు శాఖ డైరెక్టర్ జనరల్‌కు నివేదించనుంది. అనుమతి లభించిన తరువాత ఈ గది ఉద్దేశం, వినియోగాన్ని నిర్ధారించేందుకు, చుట్టుపక్కల ప్రాంతంలో ఇలాంటి గదులు ఉన్నాయా లేదా తెలుసుకునేందుకు వివరణాత్మక పరిశీలన చేపట్టనున్నారు.

గోల్కొండ కోటలోని బాలా హిస్సార్ ప్రాంతం ఒక చిన్న కొండపై ఉంది. గోల్కొండ కోట నివాస ప్రాంతంగా పనిచేసిన సమయంలో ప్రజల అవసరాల కోసం నిర్మించిన మరికొన్ని చిన్న నిర్మాణాలను కూడా కోట ప్రాకార గోడ చుట్టుముట్టి ఉంది.

ఈ కొత్త నిర్మాణంపై తదుపరి పరిశీలన ద్వారా స్పష్టమైన సమాచారం లభించే వరకు భూమిని చదును చేసే పనులను కొనసాగించవద్దని పురావస్తు శాఖ హైదరాబాద్ సర్కిల్, గోల్కొండ ఆర్టిలరీ సెంటర్‌కు తెలిపింది.

ఇదీ చదవండి: ‘సింగం’ తుకారాం రాజకీయాల్లోకి వస్తారా? కుండబద్దలుకొట్టిన అధికారి