సూపర్‌ సబలెంకా | Top seed Sabalenka wins WTA Brisbane Open 500 tournament | Sakshi
Sakshi News home page

సూపర్‌ సబలెంకా

Jan 6 2025 4:28 AM | Updated on Jan 6 2025 4:28 AM

Top seed Sabalenka wins WTA Brisbane Open 500 tournament

టైటిల్‌తో సీజన్‌ను ప్రారంభించిన బెలారస్‌ టెన్నిస్‌ స్టార్‌ 

బ్రిస్బేన్‌: గత ఏడాదిని ప్రపంచ నంబర్‌వన్‌ ర్యాంక్‌తో ముగించిన బెలారస్‌ టెన్నిస్‌ స్టార్‌ సబలెంకా కొత్త ఏడాదిని టైటిల్‌తో ప్రారంభించింది. ఆదివారం ముగిసిన మహిళల టెన్నిస్‌ సంఘం (డబ్ల్యూటీఏ) బ్రిస్బేన్‌ ఓపెన్‌–500 టోర్నీలో టాప్‌ సీడ్‌ సబలెంకా విజేతగా నిలిచింది. హోరాహోరీగా సాగిన సింగిల్స్‌ ఫైనల్లో సబలెంకా 4–6, 6–3, 6 2తో ప్రపంచ 107వ ర్యాంకర్, క్వాలిఫయర్‌ పొలీనా కుదెర్‌మెతోవా (రష్యా)పై గెలిచింది. 

విజేతగా నిలిచిన సబలెంకాకు 1,92,475 డాలర్ల (రూ. 1 కోటీ 65 లక్షలు)ప్రైజ్‌మనీతోపాటు 500 ర్యాంకింగ్‌ పాయింట్లు లభించాయి. కుదెర్‌మెతోవాతో జరిగిన తుది పోరులో సబలెంకా తొలి సెట్‌ను కోల్పోయినా... నెమ్మదిగా తేరుకొని ఆ తర్వాత వరుసగా రెండు సెట్‌లను సొంతం చేసుకుంది. 1 గంట 47 నిమిషాలపాటు జరిగిన ఈ మ్యాచ్‌లో సబలెంకా ఐదు ఏస్‌లు సంధించింది. 

తన సర్వీస్‌ను మూడుసార్లు కోల్పోయి... ప్రత్యర్థి సర్వీస్‌ను ఆరుసార్లు బ్రేక్‌ చేసింది. కుదెర్‌మెతోవా ఆరు ఏస్‌లు సంధించినా... తొమ్మిది డబుల్‌ ఫాల్ట్‌లు చేసి మూల్యం చెల్లించుకుంది. టోర్నీ మొత్తంలో కేవలం ఒక సెట్‌ను కోల్పోయిన సబలెంకా తాజా విజయంతో కెరీర్‌లో 18వ సింగిల్స్‌ టైటిల్‌ను దక్కించుకుంది. సీజన్‌ తొలి గ్రాండ్‌స్లామ్‌ టోర్నమెంట్‌ ఆ్రస్టేలియన్‌ ఓపెన్‌లో సబలెంకా డిఫెండింగ్‌ చాంపియన్‌గా బరిలోకి దిగనుంది. 

Advertisement

Related News By Category

Related News By Tags

Advertisement
 
Advertisement

పోల్

Advertisement