శోభా రెడ్డి – ప్రసాద్ రెడ్డి దంపతుల నిస్వార్థ సేవా..

సేవను జీవిత పరమార్థంగా, దాతృత్వాన్ని తమ జీవన విధానంగా మలుచుకున్న శోభా రెడ్డి , వారి భర్త ప్రసాద్ రెడ్డి సమాజానికి స్ఫూర్తిదాయకమైన దంపతులు. అవసరంలో ఉన్నవారికి అండగా నిలవాలనే అంకితభావం, మానవతా దృక్పథం, ఉదార దాతృత్వంతో వారు భారతదేశంతో పాటు అమెరికాలోనూ అనేక మంది చిన్నారులు, కుటుంబాలు, వెనుకబడిన వర్గాల జీవితాల్లో చెరగని ముద్ర వేశారు.

ఇటీవలి కాలంలోనూ శోభా రెడ్డి తమ సేవా కార్యక్రమాలను మరింత విస్తరించారు. ఇటీవల కర్ణాటకలోని బళ్లారి జిల్లాలో పాఠశాల విద్యార్థులకు పోషకాహార భోజనాన్ని సకాలంలో చేరవేసేందుకు అవసరమైన ఆహార రవాణా వాహనాల కొనుగోలుకు 25 వేల అమెరికన్ డాలర్ల విరాళాన్ని అందించారు. అంతేకాకుండా, ప్రతిరోజూ సుమారు 15 వేల మంది విద్యార్థులకు పోషకాహార అల్పాహారం, మధ్యాహ్న భోజనం అందించే లక్ష్యంతో అక్షయపాత్ర ఫౌండేషన్ చేపట్టనున్న వంటశాల నిర్మాణానికి తోడ్పాటుగా శోభా రెడ్డి, ప్రసాద్ రెడ్డి దంపతులు 2.5 లక్షల అమెరికన్ డాలర్ల విరాళాన్ని ప్రకటించారు. ప్రస్తుతం ఈ ప్రతిష్ఠాత్మక ప్రాజెక్టు ప్రణాళిక దశలో ఉండగా, నెల్లూరు సమీపంలోని వెంకటాచలం వద్ద ఐదు ఎకరాల భూమి సమీకరణ ప్రక్రియ కొనసాగుతోంది.

చిన్నారుల సంక్షేమంపై వారి నిబద్ధత ఇక్కడితో ఆగిపోలేదు. ప్రథమ్ నైపుణ్యాభివృద్ధి కేంద్రాల్లో విద్యనభ్యసిస్తున్న ఆర్థికంగా వెనుకబడిన బాలబాలికలకు ఉచితంగా పాదరక్షలు అందించే కార్యక్రమాన్ని కూడా వారు ప్రారంభించారు. తొలి దశలో కర్ణాటక, ఆంధ్రప్రదేశ్ రాష్ట్రాల్లోని పది కేంద్రాల్లో ఈ కార్యక్రమాన్ని అమలు చేసి, అనంతరం ఇతర రాష్ట్రాలకు విస్తరించాలనే లక్ష్యంతో ముందుకు సాగుతున్నారు.

ఆరోగ్య సేవల రంగంలోనూ శోభా రెడ్డి, ప్రసాద్ రెడ్డి దంపతులు విశేష సేవలందిస్తున్నారు. చెన్నైలోని శంకర నేత్రాలయ కోసం అత్యాధునిక మొబైల్ ఐ సర్జికల్ యూనిట్ (MESU) ఏర్పాటుకు వారు 5.5 లక్షల అమెరికన్ డాలర్ల విరాళాన్ని అందించారు. ఈ మొబైల్ ఐ సర్జికల్ యూనిట్ ద్వారా సుమారు 500 కిలోమీటర్ల పరిధిలోని గ్రామీణ, మారుమూల ప్రాంతాలకు చేరుకుని నేత్ర వైద్య సేవలు, శస్త్రచికిత్సలను అందించే అవకాశం కలుగుతుంది. అలాగే ఆంధ్రప్రదేశ్, తమిళనాడు రాష్ట్రాల్లో శంకర నేత్రాలయ యూఎస్ఏ ఆధ్వర్యంలో నిర్వహిస్తున్న నేత్ర శిబిరాలకు కూడా వారి సహకారం కొనసాగుతోంది. ఈ సేవా కార్యక్రమంలో భాగంగా ఇప్పటికే ఆంధ్రప్రదేశ్‌లో ఎనిమిది నేత్ర శిబిరాలు విజయవంతంగా నిర్వహించగా, తొమ్మిదవ శిబిరాన్ని సెప్టెంబర్ 27 నుంచి అక్టోబర్ 6 వరకు తమిళనాడులోని శ్రీపెరుంబుదూర్‌లో నిర్వహించేందుకు ఏర్పాట్లు జరుగుతున్నాయి.

శంకర నేత్రాలయ యూఎస్ఏ 1988లో ఆవిర్భవించినప్పటి నుంచి ప్రసాద్ రెడ్డి ఆ సంస్థతో కలిసి తన సేవా ప్రస్థానాన్ని కొనసాగిస్తూ, అభివృద్ధిలో కీలక పాత్ర పోషిస్తున్నారు. ప్రస్తుతం శంకర నేత్రాలయ యూఎస్ఏకు బోర్డు సలహాదారుగా (Board Advisor), బ్రాండ్ అంబాసిడర్‌గా సేవలందిస్తూనే, ట్విస్టెడ్ ఎక్స్ (Twisted X) సంస్థకు అధ్యక్షుడిగా, ప్రధాన కార్యనిర్వాహక అధికారిగా (CEO) బాధ్యతలు నిర్వహిస్తున్నారు. ప్రతి ఏడాది తన సంస్థ లాభాల్లో సుమారు 13 శాతాన్ని డల్లాస్ ప్రాంతంలోని స్వచ్ఛంద సేవా సంస్థలకు విరాళంగా అందిస్తున్నారు. ఈ విరాళాల విలువ ఏటా 20 లక్షల అమెరికన్ డాలర్లకు మించి ఉండటం, సమాజ సేవ పట్ల ఆయనకున్న అచంచల నిబద్ధతకు నిదర్శనంగా నిలుస్తోంది.

ప్రసాద్ రెడ్డి విశిష్ట సేవా ప్రస్థానానికి ఇప్పటికే ఎన్నో గౌరవాలు దక్కాయి. సమాజ సేవలో ఆయన అందించిన విశేష కృషిని గుర్తిస్తూ న్యూజెర్సీ రాష్ట్ర సెనెట్, అసెంబ్లీ సంయుక్త తీర్మానం ద్వారా ఆయనను ఘనంగా సత్కరించాయి. ఈ ప్రత్యేక సత్కారం శంకర నేత్రాలయ న్యూజెర్సీ నిర్వహించిన కార్యక్రమంలో ప్రదానం చేశారు. అలాగే, ఆయన సేవలకు గుర్తింపుగా చెన్నైలోని శంకర నేత్రాలయం ప్రతిష్ఠాత్మకమైన 'శంకర రత్న' పురస్కారాన్ని ప్రదానం చేయనుంది. 

‍ప్రసాద్ రెడ్డి విశిష్ట సేవా ప్రస్థానం వెనుక శోభా రెడ్డి గారి ప్రోత్సాహం, సహకారం, సేవా దృక్పథం కీలక శక్తిగా నిలిచాయి. ప్రతి సేవా కార్యక్రమంలో ఆయనకు అండగా నిలుస్తూ, సమాజానికి మరింత మేలు చేయాలనే సంకల్పాన్ని కార్యరూపంలోకి తీసుకురావడంలో ఆమె పాత్ర అమూల్యమైనది. ఈ దంపతులు తమ జీవితాల ద్వారా నిజమైన విజయం అనేది వ్యక్తిగత సాధనల్లో మాత్రమే కాకుండా, సమాజానికి తిరిగి ఇవ్వడంలోనూ, ఇతరుల జీవితాల్లో వెలుగులు నింపడంలోనూ ఉందని ఆచరణలో నిరూపిస్తున్నారు.

అపారమైన దాతృత్వం, మానవతా దృక్పథం, సమాజ సేవ పట్ల అచంచల నిబద్ధతతో ఎందరికో ఆదర్శంగా నిలిచిన శోభా రెడ్డి, ప్రసాద్ రెడ్డి  దంపతులకు హృదయపూర్వక అభినందనలు. చిన్నారుల సంక్షేమం, విద్య, పోషకాహారం, ఆరోగ్య సేవలు, వెనుకబడిన వర్గాల అభ్యున్నతి కోసం వారు చేస్తున్న సేవలు సమాజానికి చిరస్థాయిగా స్ఫూర్తినిస్తాయి. వారి ఈ మహోన్నత సేవా ప్రస్థానం మరెన్నో సంవత్సరాలు నిరంతరాయంగా కొనసాగాలని, ఆయురారోగ్యాలు, ఆనందం, శక్తి, మరింత సేవా సంకల్పంతో వారు ఇంకా ఎన్నో జీవితాల్లో వెలుగులు నింపాలని మనస్ఫూర్తిగా ఆకాంక్షిస్తున్నాం.

(చదవండి: టీసీఎస్‌ఎస్‌ ఆధ్వర్యంలో ఘనంగా సింగపూర్ బోనాల జాతర)