ఓటీటీలోకి వచ్చేసిన 'ఆర్‌ఆర్‌ఆర్‌' డాక్యుమెంటరీ

ఆర్‌ఆర్‌ఆర్‌.. టాలీవుడ్‌ కీర్తిని ఆస్కార్‌ రేంజ్‌కు ఈ చిత్రం తీసుకెళ్లింది. ఈ సినిమాకు సంబంధించి తెరవెనుక జరిగిన ఆసక్తికర విషయాలను 'ఆర్‌ఆర్‌ఆర్‌ బిహైండ్‌ అండ్‌ బియాండ్' పేరుతో థియేటర్స్‌లో విడుదల చేశారు. ఇప్పుడు ఓటీటీలో కూడా రిలీజ్‌ చేశారు. ఆర్‌ఆర్‌ఆర్‌ చిత్రాన్ని మూడు గంటల పాటు చూసి అందరూ ఎంజాయ్‌ చేశారు. ఇప్పుడు ఆ సినిమా వెనక దాగి ఉన్న మూడేళ్ల కష్టాన్ని చూపించాలని మేకర్స్‌ అనుకున్నారు.

ఎన్టీఆర్‌, రామ్‌చరణ్‌ నటించిన ఈ చిత్రానికి ఎస్‌‌.ఎస్‌.రాజమౌళి  దర్శకత్వం వహించారు. 2022లో విడుదలైన ఈ చిత్రాన్ని భారీ బడ్జెట్‌తో డీవీవీ ఎంటర్‌టైన్‌మెంట్‌ పతాకంపై డీవీవీ దానయ్య నిర్మించారు.  పీరియాడిక్‌ యాక్షన్‌ చిత్రంగా హిట్‌ కొట్టిన ఈ చిత్రంలో అలియాభట్‌, ఓలివియా మోరిస్‌, అజయ్‌ దేవ్‌గణ్‌, శ్రియ, అలీసన్‌ డూడీ, దివంగత నటుడు రే స్టీవెన్‌ సన్‌ తదితరులు కీలకపాత్రలు పోషించారు.  ఈ మూవీ బాక్సాఫీస్‌ వద్ద రూ.1300 కోట్లకు పైగా వసూళ్లు రాబట్టి రికార్డ్‌ క్రియేట్‌ చేసింది.  

'ఆర్ఆర్ఆర్‌- బిహైండ్‌ అండ్‌ బియాండ్‌' పేరుతో డాక్యుమెంటరీని సిద్ధం చేశారు రాజమౌళి. ఈ ప్రాజెక్ట్‌ షూటింగ్‌ మొదలుపెట్టిన సమయం నుంచి 'ఆస్కార్‌' అందుకునే వరకూ జరిగిన ఆసక్తికర సంఘటనలను ప్రేక్షకులకు పరిచయం చేశారు. డిసెంబరు 20వ తేదీ నుంచి ఎంపిక చేసిన మల్టీప్లెక్స్‌ స్క్రీన్‌లలో మాత్రమే దీనిని విడుదల చేశారు. అయితే, ఇప్పుడు నెట్‌ఫ్లిక్స్‌లో విడుదల చేశారు. 

ఆర్‌ఆర్‌ఆర్‌ ఫ్యాన్స్‌ జక్కన్నకు థ్యాంక్స్‌ చెబుతూ ట్వీట్లు చేస్తున్నారు. డిసెంబర్‌ 27 నుంచి నెట్‌ఫ్లిక్స్‌లో స్ట్రీమింగ్‌ అవుతన్న 'ఆర్ఆర్ఆర్‌- బిహైండ్‌ అండ్‌ బియాండ్‌' డాక్యుమెంటరీని మీరూ చూసేయండి. దీని రన్‌టైమ్‌ 1 గంట 38 నిమిషాలు ఉంది. ఇప్పటివరకూ బయటకు రాని ఆసక్తికర విషయాలను ఇందులో పంచుకున్నారు.