క్యాష్‌ విత్‌డ్రా, శ్మశాన వాటికల జీఎస్టీపై మంత్రి నిర్మలా సీతారామన్‌ క్లారిటీ

పిల్లల స్టేషనరీ నుంచి పాలు,పెరుగు ప్యాకెట్లపై కేంద్రం జీఎస్టీ విధించింది. జులై 18 నుంచి వాటిపై జీఎస్టీ వసూలు చేస్తుంది. ఈ వసూళ్లపై సామాన్యులు కేంద్రంపై ఆగ్రహం వ్యక‍్తం చేస్తున్నారు. ఈ  తరుణంలో జరుగుతున్న రాజ్యసభ సమావేశాల్లో విధించిన జీఎస్టీ, ద్రవ్యోల్బణంపై ఆర్ధిక శాఖ మంత్రి నిర్మలా సీతారామన్‌ ప్రసంగించారు. ఆమె ఏం చెప్పారంటే..      

►బ్యాంకుల నుంచి నగదు ఉపసంహరణపై జీఎస్టీ లేదు. 

►ప్రింటర్ నుండి బ్యాంక్ కొనుగోలు చేసిన చెక్ బుక్‌పై మాత్రమే జీఎస్టీ వసూలు చేస్తున్నాం.   

► ప్యాక్ చేసిన, లేబుల్ వేసిన ఆహార పదార్థాలపై 5 శాతం జీఎస్టీ విధించాలన్న ప్రతిపాదనపై ప్రసంగిస్తూ.. ప్రతి రాష్ట్రంలో ప్యాకేజీ ఫుడ్‌పై ట్యాక్స్‌ ఉంటోందన్న విషయాన్ని ప్రస్తావించారామె.  

►హాస్పిటల్ బెడ్‌లు, ఐసీయూ (ఇంటెన్సివ్ కేర్ యూనిట్)పై జీఎస్టీ లేదని, రోజుకు రూ. 5000 అద్దె ఉన్న గదులపై మాత్రమే పన్ను విధిస్తున్నట్లు చెప్పారు. 

►పేదలు తీనే ఏ ఆహార పదార్ధాలపై జీఎస్టీ విధించలేదన్నారు.  5 శాతం జీఎస్టీ  విధింపు అనేది ముందుగా ప్యాక్ చేసిన , లేబుల్ వేసిన వస్తువులపై మాత్రమేనని అన్నారు. 

►ప్రతి రాష్ట్రం తృణధాన్యాలు, పప్పులు, పెరుగు, లస్సీ, మజ్జిగతో పాటు ఇతర ఆహార పదార్థాలపై పన్ను విధిస్తున్నాయని, ఆహార పదార్థాలపై జీఎస్టీ  విధించడాన్ని నిర్మలా సీతారామన్‌ సమర్థించుకున్నారు.

►శ్మశాన వాటికలపై జీఎస్టీ లేదని, కొత్త శ్మశాన వాటిక నిర్మాణాలపై మాత్రమే పన్ను విధింపు ఉంటుందని ఆమె తెలిపారు.

►రాజ్యసభలో ద్రవ్యోల్బణంపై జరిగిన చర్చకు మంత్రి సమాధానమిస్తూ, ఇతర దేశాలలో ద్రవ్యోల్బణాన్ని ప్రస్తావిస్తూ ఆర్బీఐ, ప్రభుత్వం చేసిన ప్రయత్నం వల్ల మనం ఇప్పుడు 7 శాతం ద్రవ్యోల్బణం రేటు వద్ద ఉన్నామని అన్నారు. ద్రవ్యోల్బణం లేదని మేము చెప్పడం లేదని, అదే సమయంలో ధరల పెరుగుదలను ఎవరూ తిరస్కరించడం లేదని చెప్పారు.