ఉసేన్ బోల్ట్ రికార్డును బీట్ చేసిన రోబో!

రోబోలు అనగానే మనకు ముందుగా గుర్తొచ్చేది ఫ్యాక్టరీల్లో పనులు చేసే యంత్రాలు మాత్రమే. కానీ.. టెక్నాలజీ పెరుగుతున్న కొద్దీ రోబోలు కూడా మనుషుల్లా నడవడం, పరుగెత్తడం, క్రీడల్లో పాల్గొనడం నేర్చుకుంటున్నాయి. ఇప్పుడు చైనాలో తయారైన ఓ హ్యూమనాయిడ్ రోబో ఏకంగా ప్రపంచంలోనే అత్యంత వేగవంతమైన స్ప్రింటర్‌గా పేరున్న ఉసేన్ బోల్ట్ రికార్డును మించిన వేగంతో పరుగెత్తి అందరినీ ఆశ్చర్యపరిచింది.

100 మీటర్లు.. కేవలం 9.32 సెకన్లలో!
చైనాకు చెందిన స్మార్ట్‌ఫోన్ తయారీ సంస్థ హానర్ అభివృద్ధి చేసిన ఈ హ్యూమనాయిడ్ రోబో పేరు 'లైట్నింగ్' (Lightning). బీజింగ్‌లో శనివారం ప్రారంభమైన రెండో వరల్డ్ హ్యూమనాయిడ్ రోబోట్ గేమ్స్‌కు ముందు నిర్వహించిన సన్నాహక కార్యక్రమంలో లైట్నింగ్ 100 మీటర్ల పరుగులో ఈ సంచలన ప్రదర్శన చేసింది.

రోబో కేవలం 9.32 సెకన్లలో 100 మీటర్ల పరుగును పూర్తి చేసింది. ఈ క్రమంలో గరిష్ఠంగా సెకనుకు 14.5 మీటర్ల వేగాన్ని అందుకుంది.
బోల్ట్ రికార్డు కంటే కూడా వేగం అన్నమాట.

జమైకా స్ప్రింటర్ ఉసేన్ బోల్ట్ 2009లో బెర్లిన్‌లో జరిగిన వరల్డ్ అథ్లెటిక్స్ ఛాంపియన్‌షిప్‌లో 100 మీటర్ల పరుగును 9.58 సెకన్లలో పూర్తి చేశాడు. ఇప్పటివరకు పురుషుల 100 మీటర్ల పరుగులో ఇదే ప్రపంచ రికార్డుగా ఉంది. అయితే లైట్నింగ్ 9.32 సెకన్లలో రేసును పూర్తి చేయడంతో.. బోల్ట్ రికార్డు కంటే 0.26 సెకన్లు వేగంగా పరుగెత్తినట్లయింది.

అయితే ఇక్కడ గుర్తుంచుకోవాల్సిన విషయం ఏమిటంటే.. ఇది హ్యూమన్ అథ్లెటిక్స్‌లో జరిగిన ప్రపంచ రికార్డు కాదు. రోబో సాధించిన వేగాన్ని బోల్ట్ ప్రపంచ రికార్డుతో పోల్చినది మాత్రమే.

హాఫ్ మారథాన్‌లోనూ సత్తా
'లైట్నింగ్'కు పరుగులో ఇది మొదటి రికార్డ్ మాత్రమే కాదు. ఎందుకంటే.. ఈ ఏడాది ఏప్రిల్‌లో జరిగిన బీజింగ్ హాఫ్ మారథాన్‌లో కూడా ఈ రోబో పాల్గొంది. అక్కడ 21 కిలోమీటర్ల దూరాన్ని 50 నిమిషాల 26 సెకన్లలో పూర్తి చేసింది. హ్యూమన్ అథ్లెట్ల అత్యుత్తమ ప్రపంచ రికార్డు స్థాయి వేగంతో పోల్చినా ఇది చాలా వేగమైన ప్రదర్శన కావడం విశేషం.

🔴 Çinli teknoloji şirketi Honor'un robotu “Lightning”, Pekin'deki Dünya İnsansı Robot Oyunları öncesi testte 100 metreyi 9,32 saniyede koşarak Usain Bolt'un 9,58 saniyelik rekorunu geride bıraktı. pic.twitter.com/lO0cDz4ZCm

— Piyasa Türkiye ✰ (@PiyasaTturkiye) August 22, 2026

హాఫ్ మారథాన్ సమయంలో రోబో ఎత్తు 169 సెంటీమీటర్లు ఉండగా, దాని కాళ్ల పొడవు 95 సెంటీమీటర్లు. అయితే ఆ తర్వాత పరిశోధకులు రోబో పరుగును మరింత మెరుగుపరిచేందుకు దాని కాళ్లను 10 సెంటీమీటర్లు పొడిగించారు. ఇప్పుడు లైట్నింగ్ కాళ్ల పొడవు 1.05 మీటర్లకు చేరింది. దీని వల్ల రన్నింగ్‌లో మరింత వేగం, స్థిరత్వం సాధించేందుకు ప్రయత్నిస్తున్నారు.

రోబోలపై చైనా ఫోకస్
చైనా ప్రస్తుతం హ్యూమనాయిడ్ రోబోట్లను భవిష్యత్తులో కీలకమైన టెక్నాలజీ రంగంగా చూస్తోంది. ఏఐ, రోబోటిక్స్, హార్డ్‌వేర్ రంగాల్లో జరుగుతున్న అభివృద్ధిని ఉపయోగించుకుని ఈ రోబోలను వివిధ రంగాల్లోకి తీసుకురావాలని ప్రయత్నిస్తోంది. ముఖ్యంగా తయారీ పరిశ్రమ, లాజిస్టిక్స్, వినియోగదారుల సేవలు వంటి రంగాల్లో హ్యూమనాయిడ్ రోబోల వినియోగం పెంచే దిశగా చైనా అడుగులు వేస్తోంది.

రోబోటిక్స్‌లో కొత్త దశకు సంకేతమా?
ఒకప్పుడు రోబోలు మనుషులు చేసే పనులను అనుకరించడం కూడా కష్టంగా ఉండేది. కానీ ఇప్పుడు అవే రోబోలు మనుషుల్లా నడవడం, పరుగెత్తడం మాత్రమే కాకుండా క్రీడా పోటీల్లో పాల్గొనే స్థాయికి చేరుకున్నాయి. లైట్నింగ్ 100 మీటర్లను 9.32 సెకన్లలో పూర్తి చేయడం రోబోటిక్స్ రంగంలో గొప్ప మైలురాయి. భవిష్యత్తులో ఏఐ, హ్యూమనాయిడ్ రోబోటిక్స్ మరింత అభివృద్ధి చెందితే.. మనుషులు, రోబోల సామర్థ్యాల మధ్య తేడా ఇంకా ఎంత తగ్గుతుందో చూడాలి.