నేటి నుంచి నామినేషన్ల జాతర

మొదటి దశ గ్రామ పంచాయతీ ఎన్నికల సమరానికి సర్వం సిద్ధమైంది. ఆదివారం నుంచి ప్రారంభమయ్యే నామినేషన్ల ఘట్టంతో పల్లెల్లో ఎన్నికల సందడి మొదలు కానుంది. మూడు రోజుల నామినేషన్ల ప్రక్రియ అనంతరం అభ్యర్థులెవరో తేలనుంది. సర్పంచ్‌ పీఠం ఎవరిని వరిస్తుంది.. గ్రామాల్లో ఏ వర్గం పైచేయి సాధిస్తుంది.. ప్రజలు ఎవరికి పట్టం కడతారు.. అన్న ఉత్కంఠకు ఈ నెల 26న పోలింగ్‌ – కౌంటింగ్‌తో తెరపడనుంది.

అనంతపురం ఎడ్యుకేషన్‌: తొలి విడత గ్రామపంచాయతీ ఎన్నికల నిర్వహణకు జిల్లా యంత్రాంగం పకడ్బందీ ఏర్పాట్లు చేసింది. కళ్యాణదుర్గం రెవెన్యూ డివిజన్‌ పరిధిలో కళ్యాణదుర్గం, బ్రహ్మసముద్రం, కంబదూరు, శెట్టూరు, కుందుర్పి, రాయదుర్గం, డి.హీరేహాళ్‌, బొమ్మనహాళ్‌, కణేకల్లు, గుమ్మఘట్ట, అనంతపురం రెవెన్యూ డివిజన్‌ పరిధిలో అనంతపురం రూరల్‌, ఆత్మకూరు, రాప్తాడు మండలాల్లో తొలి విడత ఎన్నికలు జరగనున్నాయి. మొత్తంగా ఈ 13 మండలాల్లో పంచాయతీ ఎన్నికల కోలాహలం మొదలుకానుంది. ఈ నెల 15, 16, 17 తేదీల్లో నామినేషన్లు స్వీకరించనున్నారు. 18న పరిశీలన, నామినేషన్ల ఉపసంహరణకు 21 చివరి తేదీగా నిర్ణయించారు. 26న అసలు ఎన్నికల సమరం జరగనుంది. ఆ రోజు ఉదయం 7 నుంచి మధ్యాహ్నం ఒంటి గంట వరకు పోలింగ్‌ నిర్వహిస్తారు. ఓటింగ్‌ ముగిసిన అనంతరం మధ్యాహ్నం 2 గంటల నుంచి ఓట్ల లెక్కింపు ప్రక్రియ ప్రారంభమవుతుంది. ఒకవేళ ఎక్కడైనా రీపోలింగ్‌ అవసరమైతే నవంబర్‌ 27న ఉదయం 7 గంటల నుంచి మధ్యాహ్నం ఒంటి గంట వరకు నిర్వహిస్తారు.

సర్పంచ్‌ పీఠమే లక్ష్యం

గ్రామానికి ప్రథమ పౌరుడిగా గుర్తింపు పొందాలనే ఆశతో పలువురు సర్పంచ్‌ పదవులపై కన్నేశారు. ఇప్పటికే గ్రామాల్లో తమకు ఉన్న బలాబలాలను అంచనా వేసుకుంటూ మద్దతుదారులతో మంతనాలు సాగిస్తున్నారు. సామాజిక సమీకరణలు, రాజకీయ పలుకుబడి, వ్యక్తిగత పరిచయాలు, గతంలో గ్రామానికి చేసిన సేవలను ప్రస్తావిస్తూ ఓటర్లను ఆకట్టుకునే ప్రయత్నాలకు సిద్ధమవుతున్నారు.

పత్రాల కోసం పరుగులు

పోటీలో నిలవాలనుకుంటున్న అభ్యర్థులు నామినేషన్లకు అవసరమైన కుల ధ్రువీకరణ, ఇంటి గుత్త పత్రాల కోసం కార్యాలయాల చుట్టూ తిరుగుతున్నారు. పోలీస్‌ శాఖ నుంచి అవసరమైన నిరభ్యంతర పత్రాలు (ఎన్‌ఓసీ) పొందేందుకు బిజీగా ఉన్నారు. నామినేషన్‌ దాఖలు చేసే సమయంలో ఎలాంటి సాంకేతిక ఇబ్బందులు తలెత్తకుండా ముందస్తు జాగ్రత్తలు తీసుకుంటున్నారు.

నామినేషన్‌ కేంద్రాల వద్ద పటిష్ట భద్రత

ఎన్నికల ప్రక్రియ ప్రశాంతంగా నిర్వహించేందుకు జిల్లా ఎన్నికల అధికారి, కలెక్టర్‌ ఆనంద్‌ ప్రత్యేక చర్యలు చేపట్టారు. నామినేషన్ల స్వీకరణ కేంద్రాల వద్ద అవసరమైన ఏర్పాట్లు పూర్తి చేయాలని అధికారులకు ఆదేశాలు జారీ చేశారు. ఎన్నికల విధుల్లో పాల్గొనే సిబ్బందికి అవసరమైన సూచనలు అందించారు. అదేవిధంగా ఎలాంటి అవాంఛనీయ ఘటనలు చోటుచేసుకోకుండా ఎస్పీ జగదీష్‌ పోలీసు యంత్రాంగాన్ని అప్రమత్తం చేశారు. నామినేషన్‌ కేంద్రాల వద్ద ప్రత్యేక పోలీసు బందోబస్తు ఏర్పాటు చేయడంతో పాటు సమస్యాత్మక ప్రాంతాలపై నిఘా ఉంచుతున్నారు. శాంతిభద్రతలకు విఘాతం కలగకుండా ముందస్తు చర్యలు తీసుకుంటున్నారు.

గ్రామాల్లో రాజకీయ వేడి

ఈ ఎన్నికలు గ్రామాల్లో స్థానిక నాయకుల బలాబలాలకు పరీక్షగా నిలవనున్నాయి. గ్రామంలో తాగునీటి సమస్య, రహదారులు, పారిశుధ్యం, డ్రెయినేజీ, వీధి దీపాలు వంటి మౌలిక సదుపాయాలు ప్రధాన ఎన్నికల అంశాలుగా మారనున్నాయి. గెలిచిన తర్వాత గ్రామాభివృద్ధికి ఎవరు కృషి చేస్తారన్నది ఓటర్ల ముందు కీలక ప్రశ్నగా నిలవనుంది. మరోవైపు సర్పంచ్‌ పదవులతో పాటు వార్డు సభ్యుల స్థానాల్లోనూ పోటీ ఆసక్తికరంగా మారే అవకాశముంది. ఒకే గ్రామంలో పలువురు ఆశావహులు బరిలో దిగేందుకు సిద్ధమవుతుండటంతో చివరి నిమిషంలో రాజకీయ సమీకరణలు ఎలాంటి మలుపులు తిరుగుతాయోనన్న ఉత్కంఠ నెలకొంది.

ఏర్పాట్లు సిద్ధం చేసిన అధికార యంత్రాంగం

17వ తేదీ వరకు నామినేషన్ల స్వీకరణ

26న పోలింగ్‌, అదే రోజు ఫలితాలు