రోగుల సేవకా..కాసుల వేటకా..?

● పట్టణంలో 25కు పైగా ప్రైవేట్‌ ఆస్పత్రులు ఉన్నాయి. ఇందులో కొన్ని వైద్యులు సొంతంగా నడిపిస్తున్నవి. మరికొన్ని నాన్‌ వైద్యులు మేనేజ్‌మెంట్‌గా ఉండి నిర్వహిస్తున్నవి ఉన్నాయి. ● ప్రైవేట్‌ ఆస్పత్రుల సంఖ్య పెరిగిపోతుండడంతో వారి మధ్య పోటీ తీవ్రమైంది. ● మరోవైపు నిర్వహణ భారంగా మారడంతో కొందరు వైద్యులు, నిర్వాహకులు ఆదాయం కోసం అడ్డదారులు తొక్కుతున్నారనే విమర్శలు వినిపిస్తున్నాయి. ● ప్రధానంగా చాలావరకు ఆస్పత్రులు గ్రామీణ ప్రాంతాల్లో పని చేసే ఆర్‌ఎంపీల మీద ఆధారపడి ఉన్నాయి. వారి ద్వారా రోగులను ఆస్పత్రులకు రప్పించుకునేందుకు పెద్ద మొత్తంలో కమీషన్లు ఆశ చూపుతున్నారు. సాధారణంగా ఒక బిల్లు మీద 20 నుంచి 30శాతం వరకు కమీషన్‌ అందిస్తుండగా.. పోటీ నేపథ్యంలో ప్రస్తుతం ఓ వైద్యుడు 60శాతం వరకు ఇస్తున్నట్లు ప్రచారం జరుగుతోంది. ● ఇలా పోటీ పడి కమీషన్లు ఇస్తుండడం కొందరికి ఇబ్బందిగా మారింది. ● ఈ క్రమంలోనే మార్కెట్‌లో ఒకరిపై ఒకరు దుష్ప్రచారం చేయడమే కాకుండా ఆస్పత్రులు, వైద్యులకు సంబంధించిన లోటుపాట్లపై అధికారులకు ఫిర్యాదు చేస్తున్నారనే ఆరోపణలు ఉన్నాయి. ● ఈ కారణాలతో కొంతకాలంగా ప్రైవేట్‌ ఆసుపత్రుల మధ్య అంతర్గతంగా నెలకొన్న విభేదాలు తాజాగా వైద్యుడిపై కేసుతో బహిర్గతమయ్యాయి. ● కొందరు వైద్యులు, ఆస్పత్రుల నిర్వాహకులు ఆదాయార్జన కోసం వైద్య వృత్తికి సంబంధించి నైతిక విలువలకు తిలోదకాలిస్తుండడంపై ఆందోళన వ్యక్తమవుతోంది. ● రోగులను రప్పించుకునేందుకు ఆర్‌ఎంపీలకు పోటాపోటీగా కమీషన్లు ఇస్తున్న నిర్వాహకులు.. ఆ భారాన్ని రోగులపైనే మోపుతున్నారు. ● ఇందుకోసం అవసరం లేని పరీక్షలు, అడ్డగోలు మందులు రాస్తూ అందినకాడికి దోచుకుంటున్నారనే ఆరోపణలు ఉన్నాయి. ● వైద్యశాఖ అధికారులు, ఇండియన్‌ మెడికల్‌ అసోసియేషన్‌ నాయకులు జోక్యం చేసుకుని గాడితప్పిన ప్రైవేట్‌ వైద్యాన్ని చక్కదిద్దాలని ప్రజలు కోరుతున్నారు.

ప్రైవేట్‌ ఆస్పత్రుల మధ్య ఆధిపత్య పోరు మెట్‌పల్లిలో గొడవలకు దిగుతున్న వైనం ఇటీవల ఓ వైద్యుడిపై కేసు నమోదు