రేపు పాలిటెక్నిక్‌ స్పాట్‌ అడ్మిషన్లు

మొగల్రాజపురం(విజయవాడతూర్పు): నగరం లోని ప్రభుత్వ పాలిటెక్నిక్‌ కళాశాలలో చేరేందుకు సోమవారం స్పాట్‌ అడ్మిషన్లు నిర్వహిస్తున్నామని ప్రిన్సిపాల్‌ ఎం.విజయసారథి శనివారం ఓ ప్రకటనలో తెలిపారు. తొలి రెండు విడతల కౌన్సెలింగ్‌లలో మిగిలిన సీట్లను ఈ స్పాట్‌ అడ్మిషన్లలో భర్తీ చేస్తామని పేర్కొన్నారు. పదో తరగతి ఉత్తీర్ణులై, పాలిసెట్‌–2026 పరీక్ష రాసిన, రాయని వారు పాల్గొనవచ్చని సూచించారు.

మచిలీపట్నం అర్బన్‌: క్రీడా ప్రాధికార సంస్థ నిర్వహిస్తున్న అమరావతి చాంపియన్‌షిప్‌లో రాష్ట్ర స్థాయి పోటీలకు జిల్లా స్థాయి అథ్లెటిక్స్‌ ఎంపిక పోటీలు శనివారం మచిలీపట్నం పోలీస్‌ పరేడ్‌ గ్రౌండ్‌లో జరిగాయని జిల్లా క్రీడాభివృద్ధి అధికారి ఝాన్సీలక్ష్మి ఒక ప్రకటనలో తెలిపారు. జిల్లాలోని ఏడు నియోజకవర్గాల నుంచి 224 మంది బాలబాలికలు ఉత్సాహంగా ఎంపిక పోటీల్లో పాల్గొన్నారు. అండర్‌–17, అండర్‌–23 బాలురు, బాలికల విభాగాల్లో 100 మీటర్లు, 400 మీటర్లు, 800 మీటర్లు, ఐదు కిలోమీటర్ల పరుగు, లాంగ్‌జంప్‌, హైజంప్‌, జావెలిన్‌త్రో, షాట్‌పుట్‌ తదితర విభాగాల్లో పోటీలు నిర్వహించారు. పోటీల్లో ప్రతిభ కనబరిచిన 10 మంది క్రీడాకారులను అండర్‌–17, 12 మంది క్రీడాకారులను అండర్‌–23 విభాగాల్లో రాష్ట్ర స్థాయి పోటీలకు ఎంపిక చేసినట్లు ఝాన్సీలక్ష్మి తెలిపారు.