సెట్‌లో తిట్టేవాడు.. నావల్ల కాదని వెళ్లిపోయా..: హీరోయిన్‌

దర్శకుడు సాజిద్‌ ఖాన్‌ (Sajid Khan) సెట్‌లో తనను ఇ‍బ్బంది పెట్టాడంటోంది బాలీవుడ్‌ బ్యూటీ ఈషా గుప్తా (Esha Gupta). సాజిద్‌ డైరెక్ట్‌ చేసిన హమ్‌షకల్‌ (2014) మూవీలో ఈషా హీరోయిన్‌గా నటించింది. ఆనాటి చేదు అనుభవాల గురించి తాజాగా ఓ ఇంటర్వ్యూలో మాట్లాడింది. నన్నెవరైనా చులకనగా చూస్తే అస్సలు ఊరుకోను. అలాంటిది సాజిద్‌ నన్ను సెట్‌లోనే తిట్టేవాడు. నేనెందుకు ఊరుకుంటాను? తిరిగి ఇచ్చిపడేసేదాన్ని. కొంతమందికి ఆలోచన తక్కువ.. ఫ్రస్టేషన్‌ ఎక్కువుంటుంది. 

సారీ చెప్పడంతో వెళ్లా..
ఈయన పదేపదే కోప్పడుతుండేవాడు. ఎంతవరకని భరిస్తాం? అప్పటికే సినిమాను కష్టపడి ప్రమోట్‌ చేశాం. అయినా కూడా కనీస గౌరవం ఇవ్వడం లేదు. అందరిపైనా అరుస్తూ తన పరువు తనే తీసుకునేవాడు. ఓరోజు ఆయన వైఖరిపై కోపమొచ్చి నేరుగా కారెక్కి ఇంటికి వెళ్లిపోయాను. ఆ సినిమానే వదిలేయాలనుకున్నాను. కానీ నిర్మాత వాసు భగ్నానీ పిలిచి సారీ చెప్పడంతో వెళ్లాను. దర్శకుడు సాజిద్‌ కూడా క్షమాపణలు చెప్పాడు.. కానీ నా మనసులో మాత్రం ఆయన్ను క్షమించలేకపోయాను అని చెప్పుకొచ్చింది. 

సినీ జర్నీ
హమ్‌షకల్‌ మూవీలో సైఫ్‌ అలీ ఖాన్‌, రితేశ్‌ దేశ్‌ముఖ్‌, రామ్‌ కపూర్‌ హీరోలుగా నటించారు. తమన్నా భాటియా, బిపాషా బసు, ఈషా గుప్తా కథానాయికలుగా యాక్ట్‌ చేశారు. ఈ చిత్రం బాక్సాఫీస్‌ వద్ద మెప్పించలేకపోయింది. ఈషా గుప్తా సినీజర్నీ విషయానికి వస్తే.. 'జన్నత్‌ 2' (2012) చిత్రంతో కెరీర్‌ ప్రారంభించింది. తెలుగులో వీడెవడు మూవీ చేసింది. వినయ విధేయ రామలో 'ఏక్‌ బార్‌ ఏక్‌ బార్‌..' అనే ఐటం సాంగ్‌లో యాక్ట్‌ చేసింది. చివరగా 'వన్‌ డే: జస్టిస్‌ డెలివర్‌డ్‌' మూవీలో డీసీపీ లక్ష్మీగా నటించింది. ప్రస్తుతం ప్రైవేట్‌ సాంగ్స్‌లో కనిపిస్తోంది.

చదవండి: హార్దిక్‌తో డేటింగ్.. ముందే అది ఫిక్స్ అయ్యాం: బాలీవుడ్ నటి