సాధిక్‌కు ఆ కెమికల్‌ ఎక్కడి నుంచి వచ్చింది?

సాధి­క్‌

సాక్షి ప్రతినిధి, కాకినాడ: పంచాయతీ రాజ్‌ ఏఈ నూకరాజు కుమార్తె సౌజన్య భర్త జగదీశ్వరరెడ్డి హత్యలో పోలీసులు కీలక ఆధారాలు సేకరిస్తు­న్నారు. సాధిక్‌ ప్రొటీన్‌ పౌడర్‌లో కెమికల్స్‌ కలిపి తన తండ్రికి ఇచ్చాడంటూ జగదీశ్వరరెడ్డి కుమారుడు రియాన్ష్ కార్తికేయ చెప్పడంతో దాని­పై పోలీసులు విచారణ చేపట్టారు. ఆ కెమికల్‌ కేరళ నుంచి హైదరాబాద్‌కు వచ్చిందని, అది సాధి­క్‌కు చేరేలా హైదరాబాద్‌లోని ఓ బంగారు దుకా­ణం యజమాని సహకరించినట్లు ప్రాథమి­కంగా గుర్తించారు. దీనిని నిగ్గు తేల్చేందుకు పోలీ­సు బృందం హైదరాబాద్‌ వెళ్లింది.నూకరాజు కుటుంబం నుంచి ఆస్తులు లాక్కునేందుకు సాధి­క్‌ ప్రయత్నించాడనే ఆరోపణలపైనా విచారణ జరు­పుతున్నారు.

నూకరాజు కుటుంబం, జగదీ­శ్వరరెడ్డి ఆస్తులకు సంబంధించి రెండేళ్లలో ఏవైనా లావాదేవీలు జరిగాయా.. అవి ఎవరి పేరు మీద బదిలీ అయ్యాయో తెలుసుకొనేందుకు స్టాంప్స్‌ అండ్‌ రిజిస్ట్రేషన్స్‌ శాఖ అధికా­రులకు పోలీసులు లేఖ రాశారు. సౌజన్య బ్యాంక్‌ ఖాతాలు, పాస్‌ పుస్తకాలను సాధిక్‌ లాక్కున్నా­డనే అంశంపైనా విచారణ సాగుతోంది. సాధిక్‌ తి­మ్మాపు­రం పంచాయతీలో నూకరాజు పేరిట ఉన్న స్థలాన్ని విక్రయించేందుకు సైతం ప్రయ­త్నించాడని ఓ వ్యక్తి వాంగ్మూలంలో చెప్పినట్లు సమాచారం.

రిమాండ్‌ రిపోర్టులో కీలక అంశాలు?
సాధిక్‌ ఖాన్‌ను కోర్టులో హాజరుపరిచిన సందర్భంగా పోలీసులు సమర్పించిన రిమాండ్‌ రి­పో­ర్టులో పలు కీలక అంశాలు పొందుపరిచినట్లు తెలిసింది. సాధిక్‌ మొదటి నుంచీ ఆస్తి కొట్టేయా­లనే ఆలోచనతో ఉండేవాడని పేర్కొన్నట్లు సమాచారం. జగ­దీ­శ్వర్‌రెడ్డి అడ్డు తొలగించుకుని, సౌజన్యను పెళ్లి చేసుకుని, ఆమె డబ్బు, బంగారం, ఆస్తి తీసు­కో­వాలని అతను పథకం వేసినట్లు రిమాండ్‌ రిపోర్టులో తెలిపినట్లు సమాచారం. 

జగదీశ్వర్‌­రెడ్డి ఇంటికి వెళ్లిన సాధిక్‌ అతడితో గొడవ పడి, తీవ్రంగా గాయపరిచాడని, అడ్డు వచ్చిన సౌజన్యపై దాడి చేసినట్లు పేర్కొన్నారు. జగదీశ్వరరెడ్డిని అనేక మార్లు కొట్టినట్లు సాక్షులు వాంగ్మూలం ఇచ్చారని తెలిసింది. జగదీశ్వరరెడ్డి హైదరాబాద్‌లో చికిత్స పొందుతున్న సమయంలో సాధిక్‌ హైదరాబా­ద్‌లోనే ఉండి సౌజన్యతో ఫోనులో మాట్లాడేవా­డని కాల్‌ డేటా ద్వారా తేలినట్లు సమాచారం.

బయటకొచ్చిన మరో లేఖ..!
నూకరాజు, ఆయన కుమార్తె సౌజన్య రాసిన లేఖలతో పాటు మూడో సూసైడ్‌ నోట్‌ సైతం ఉన్నట్లు సమాచారం. ఆ నోట్‌ నూకరాజు భార్య మీనాదిగా ప్రచారం జరుగుతోంది. పోలీసులు సూసైడ్‌ నోట్లను ఫోరెన్సిక్, హ్యాండ్‌ రైటింగ్‌ పరీక్షకు పంపినట్లు సమాచారం. ఈ కేసులో మరింత లోతైన విచారణ కోసం నిందితుడు షేక్‌ సాధిక్‌ ఖాన్‌ను వారం రోజుల పాటు తమ కస్టడీకి అనుమతించాలంటూ సర్పవరం పోలీసులు కాకినాడ మొబైల్‌ జ్యుడిషియల్‌ ఫస్ట్‌క్లాస్‌ మేజిస్ట్రేట్‌ కోర్టులో పిటిషన్‌ దాఖలు చేశారు.