మనీలా: డ్రగ్స్‌ తరలించారన్న ఆరోపణలపై అరెస్టయి గత 15 సంవత్సరాలుగా జైళ్లో మగ్గిపోతున్న అమాయక ఫిలిప్పీన్స్‌ మహిళకు ఎట్టకేలకు ఇండోనేసియా జైలు నుంచి తాత్కాలిక విముక్తి లభించింది. ఇండోనేసియా, ఫిలిప్పీన్స్‌ దేశాలు కుదుర్చుకున్న ఒప్పందం ప్రకారం ఇకపై ఆమె జీవితకాల జైలు శిక్షను ఇండోనేసియాకు బదులు సొంతదేశం ఫిలిప్పీన్స్‌లోని మహిళల కారాగా రంలో అనుభవించనుంది. ఇండోనేసియా విధించిన శిక్ష ప్రకారం 2015 ఏడాదిలోనే ఫిలిప్పీన్స్‌ పోలీసుల తుపాకీ గుళ్లకు బలికావాల్సిన మేరీ జేన్‌ వెలోసో అనూహ్యంగా ఆ దారుణ శిక్ష అమలు నుంచి తప్పించుకున్నారు. మాదకద్రవ్యాల అక్రమ రవాణా కేసులో తనకు క్షమాభిక్ష పెట్టాలని త్వరలో దేశాధ్యక్షుడిని వేడుకుంటానని 39 ఏళ్ల మేరీ చెప్పారు. బుధవారం ఉదయం ఆమె ఇండోనేసియా నుంచి బయల్దేరి స్వదేశం ఫిలిప్పీన్స్‌లోని మనీలా అంతర్జాతీయ విమానాశ్రయానికి చేరుకున్నారు. తమ తల్లి రాకతో ఇద్దరు కుమారులు, మేరీ తల్లిదండ్రుల ఆనందానికి అవధుల్లేకుండా పోయింది. ఎనిమిది మందిపై బుల్లెట్ల వర్షం2010లో బతుకుదెరువు కోసం పనిమనిషిగా ఇండోనేసియాలో అడుగుపెట్టిన ఆమెను ఎయిర్‌పోర్ట్‌లోనే పోలీసులు అరెస్ట్‌చేశారు. వెంట తెచ్చిన సూట్‌కేసులో 2.6 కేజీల నిషేధిత హెరాయిన్‌ మాదకద్రవ్యం ఉండటంతో ఆమెపై కఠిన డ్రగ్స్‌ ట్రాఫికింగ్‌ చట్టాలు మోపి మరణశిక్ష విధించారు. ఆ సూట్‌కేసుతో తనకేం సంబంధం లేదని, ఇండోనేసియాలో ఇంటి పనిమనిషిగా పని కుదిర్చిన ఏజెంట్‌ మారియా క్రిస్టినా సెర్గీ ఆ సూట్‌కేసు ఇచ్చాడని, అందులో ఏముందో తనకు నిజంగా తెలీ దని ఆమె ఎంత మొత్తుకున్నా పోలీసులు వినలేదు. ఐదే ళ్ల తర్వాత షూట్‌ చేసి చంపేయాలని తీర్పు వెలువడింది. అక్రమంగా డ్రగ్స్‌ తెచ్చారంటూ మేరీసహా ఆస్ట్రే లియా, బ్రెజిల్, ఫ్రాన్స్, ఘనా, నైజీరియాలకు చెందిన మొత్తం తొమ్మిది మందిని 2015 ఏడాదిలో ఒక ద్వీపకారాగారానికి తీసుకెళ్లారు. మేరీ తప్ప మిగతా ఎనిమిది మందిపై ఫైరింగ్‌ స్క్వాడ్‌ పోలీసులు తుపాకీ గుళ్ల వర్షం కురిపించి చంపేశారు. ఈమెను కూడా చంపేసేవారే. కానీ ఈమెను ఇండోనేసియాకు పంపిన ఏజెంట్‌ సెర్గీ కేవలం రెండ్రోజుల ముందు ఫిలిప్పీన్స్‌లో అరెస్టవడం, తానే ఆమెకు ఆ సూట్‌కేసు ఇచ్చి పంపాన ని ఒప్పుకోవడంతో ఈమె శిక్ష అమలు ఆఖరి నిమిషంలో ఆగిపోయింది. అయితే ఎవరు తెచ్చినా డ్రగ్స్‌ తమ భూభాగానికి తేవడం మాత్రం నేరమే కాబట్టి ఈమెను నిర్దోషిగా వదిలేది లేదని ఇండోనేసియా కరాఖండీగా చెప్పింది. దీంతో మేరీ విడుదలకు ఫిలిప్పీన్స్‌లో పెద్ద ఉద్యమమే మొదలైంది. చివరకు ఫిలిప్పీన్స్‌ ప్రభుత్వం చొరవ తీసుకుని ఖైదీల బదిలీ ఒప్పందం చేసుకుంది. మేరీ మిగతా శిక్షాకాలం సొంత దేశంలో అనుభవించేలా డీల్‌ కుదిరింది. ఈ ఒప్పందం మేరకు ఆమెను ఇండోనేసియా బుధవారం వదిలేసింది.

నారాయణపేట: హత్య కేసులో 11 ఏళ్లుగా జైలుశిక్ష అనుభవిస్తున్న వ్యక్తి నిర్దోషిగా తేలింది. ఈ మేరకు మంగళవారం సుప్రీంకోర్టు ఇచ్చిన తీర్పుతో బుధవారం ఆ వ్యక్తికి జైలు నుంచి విముక్తి లభించింది. వివరాల్లోకి వెళ్తే.. నారాయణపేట జిల్లా ఊట్కూర్‌ మండలం తిప్రాస్‌పల్లికి చెందిన భీమరాయుడు 2013 జనవరి 11న కుట్ర పూరితంగా సమీపంలోని రాయచూర్‌కు నాగేశ్‌ అనే వ్యక్తిని రప్పించి తన సోదరుడు, బావమరిదితో కలిసి హతమర్చినట్లు అభియోగం మోపారు. ఈ కేసులో మరో ఐదుగురు నిందితులు సహకరించినట్లు పోలీసులు ఎఫ్‌ఐఆర్‌లో పేర్కొన్నారు. అయితే మహబూబ్‌నగర్‌ ట్రయల్‌ కోర్డులో ఏ–4 నుంచి ఏ–8 వరకు ఉన్న నిందితులను వదిలి.. ఏ–1, ఏ–2, ఏ–3లకు ఐపీసీ సెక్షన్‌ 302 కింద యావజ్జీవ శిక్ష, ఐపీసీ సెక్షన్‌ 364, 384, 201 కింద వివిధ శిక్షలను ఖరారు చేస్తూ 2016 అక్టోబర్‌ 13న తీర్పు ఇచ్చింది. దీంతో భీమరాయుడు హైకోర్టును ఆశ్రయించారు. అయితే ఏ–2, ఏ–3లను నిర్దోషులుగా విడుదల చేసి.. 2019 మార్చి 20న ఏ–1గా ఉన్న భీమరాయుడికి యావజ్జీవ శిక్ష విధిస్తూ హైకోర్టు తీర్పు ఇచ్చింది. దీంతో భీమరాయుడు సుప్రీంకోర్టును ఆశ్రయించారు. అయితే కేసు పూర్వాపరాలు, దర్యాప్తు జరిగిన తీరు, సాక్ష్యాధారాలను పరిశీలించిన అత్యున్నత న్యాయస్థానం.. ఈ కేసులో పోలీసులు సేకరించిన ఆధారాలు సరిగ్గా లేవని, అతడిని నిర్దోషిగా విడుదల చేయాలని మంగళవారం తీర్పునిచ్చింది. సుప్రీం తీర్పు మేరకు భీమరాయుడిని బుధవారం సాయంత్రం మహబూబ్‌నగర్‌ జిల్లా జైలు నుంచి విడుదల చేశారు. అతడు ఇది వరకు జిల్లా జైలు ఆధ్వర్యంలో నిర్వహించే పెట్రోల్‌ బంకులో పనిచేశారు. ఆయనకు పారితోషికంగా నెలకు రూ.9 వేల నుంచి రూ.12 వేల వరకు వేతనం పొందేవారు. 11 ఏళ్ల తర్వాత తమ కుమారుడు ఇంటికి వస్తున్నందున తమకు సంతోషంగా ఉందని తండ్రి బాల్‌రాం పేర్కొన్నారు.

న్యూయార్క్: హత్య కేసులో అమెరికాలో కేరళవాసికి న్యాయస్థానం జీవిత ఖైదు విధించింది. మారణాయుధంతో దాడి చేసిన కేసులో గరిష్టంగా ఐదు సంవత్సరాల శిక్షను ఖరారు చేసింది. దోషి తన భార్యను 17 సార్లు అతి దారుణంగా పొడిచాడు. అనంతరం ఆమెపై నుంచి కారును పోనిచ్చాడు. కేసు తీవ్రతను పరిశీలించిన న్యాయమూర్తి.. దోషికి కఠిన యావజ్జీవ శిక్షను విధించారు.  ఫిలిప్ మ్యాథ్యు, మేరిన్ జోయ్‌(26) కేరళకు చెందినవారు. వివాహం చేసుకుని అమెరికాలో స్థిరపడ్డారు. ఆస్పత్రిలో నర్స్‌గా పనిచేస్తోంది  జోయ్‌. అయితే.. మనస్పర్థల కారణంగా మ్యాథ్యు విడాకులు తీసుకోవాలనుకున్నాడు. ఈ క్రమంలోనే విధులు ముగించుకుని ఆస్పత్రి నుంచి బయటకు వస్తున్న జోయ్‌ని మ్యాథ్యు అడ్డగించి కత్తితో 17 సార్లు పొడిచి హత్య చేశాడు. అంతటితో ఆగకుండా ఆమె పైనుంచి కారును పోనిచ్చాడు. జోయ్‌ సన్నిహితులు ఆమెను ఆస్పత్రికి తరలించినా ప్రయోజనం లేకపోయింది.  ఆ సమయంలో తనకో పాప ఉంది అని తెలిపిన జోయ్.. నిందితుని వివరాలను తెలిపింది. దీని ఆధారంగా నిందితున్ని అరెస్టు చేసిన పోలీసులు.. కేసును నమోదు చేశారు. దాదాపు మూడేళ్ల విచారణ తర్వాత న్యాయస్థానం దోషికి యావజ్జీవ శిక్ష విధించింది. తీర్పుపై బాధితురాలి తల్లి హర్షం వ్యక్తం చేసింది. ఎట్టకేలకు దోషికి శిక్ష పడినందుకు ఆనందం వ్యక్తం చేసింది.   ఇదీ చదవండి: మాజీ డ్రైవరే హంతకుడు

సాక్షి, హైదరాబాద్‌: ఓ కేసులో యావజ్జీవశిక్ష పడి 27 ఏళ్లుగా జైలుశిక్ష అనుభవిస్తున్న ఇద్దరు ఖైదీలు క్షమాభిక్ష కోసం పెట్టుకున్న అర్జీపై నిర్ణయం తీసుకోవాలని రాష్ట్ర ప్రభుత్వాన్ని హైకోర్టు ఆదేశించింది. నాలుగు వారాల గడువు ఇస్తున్నామని, ఈలోగా నిర్ణయం తెలియజేయాలని స్పష్టం చేసింది. ఒకే కేసులో ఖైదీలుగా ఉన్న ముగ్గురికి క్షమాబిక్ష ప్రసాదించి.. తమను పట్టించుకోవడంలేదని అషారఫ్‌ అలీ, ఆరిఫ్‌ఖాన్‌ హైకోర్టులో పిటిషన్లు దాఖలు చేశారు. వీటిపై జస్టిస్‌ సీవీ భాస్కర్‌రెడ్డి ధర్మాసనం విచారణ చేపట్టింది. 1997లో నమోదైన ఓ కేసులో కిందికోర్టు ఈ ఇద్దరితోపాటు మరో ముగ్గురికి యావజ్జీవ జైలుశిక్ష విధించిందని పిటిషనర్ల తరఫు న్యాయవాది పేర్కొన్నారు. హైకోర్టులో అప్పీలు చేసుకున్నా కొట్టివేసిందని చెప్పారు. ఈ ఐదుగురిలో ముగ్గురికి క్షమాభిక్ష ప్రసాదిస్తూ ఆగస్టు 19న ప్రభుత్వం ఉత్తర్వులు జారీ చేసిందన్నారు. వాదనలు విన్న ధర్మాసనం.. ఒకే కేసులో శిక్ష అనుభవిస్తున్న ఐదుగురిలో ముగ్గురిని విడుదల చేసి, ఇద్దరి వినతిపత్రాన్ని పట్టించుకోకపోవడం సరికాదని వ్యాఖ్యానించింది. అనంతరం విచారణను నవంబర్‌ 21వ తేదీకి వాయిదా వేసింది.  

బనశంకరి: బాలికపై అత్యాచారం, హత్య కేసులో యువకుడికి నగర ఎఫ్‌టీసీ 1వ కోర్టు యావజ్జీవ శిక్ష విధిస్తూ గురువారం తీర్పు వెలువరించింది. సోమసంద్రపాళ్య నివాసి సీ.రాజు (25) అనే యువకుడు ఓ బాలిక (15)ను పరిచయం చేసుకుని అత్యాచారానికి పాల్పడ్డాడు. ఈ కేసులో రాజుకు యావజ్జీవ శిక్షతో పాటు లక్ష రూపాయలు జరిమానా విధిస్తూ న్యాయమూర్తి కేఎన్‌.రూపా తీర్పు ఇచ్చారు. డెవలిరీ బాయ్‌గా ఉన్న రాజు వాట్సాప్‌, ఇన్‌స్ట్రాగామ్‌లో బాలిక పరిచయమైంది. కరోనా లాక్‌డౌన్‌ సమయంలో బాలిక ఇంట్లో ఎవరూలేని సమయంలో వెళ్లి రహస్యంగా కలుసుకునేవాడు. ఇలా పలుమార్లు స్కూల్‌ అయిపోగానే బాలికను రాజు ఇంటికి తీసుకెళ్లి శారీరకంగా కలుసుకునేవాడు. ఈ విషయం బాలిక తల్లిదండ్రులకు తెలపడంతో ఇద్దరిని హెచ్చరించారు. అప్పటి నుంచి రాజుతో బాలిక దూరంగా ఉంటోంది. బాలికపై కోపం పెంచుకున్న రాజు 2021 ఏప్రిల్‌ 3న బాలికను వెంబడించి తన ఇంటికి రాకపోతే అంతుచూస్తానని బెదిరించాడు. చివరికి బాలిక రాజు ఇంటికి వచ్చింది. వెంటనే అల్యూమినియం వైర్‌తో గొంతు బిగించి ఊపిరాడకుండా నోటిలో బట్టలు కుక్కి హత్య చేశాడు. అనంతరం తానూ ఫ్యాన్‌కు ఉరి వేసుకుని ఆత్మహత్య చేసుకోవాలని చూశాడు. మళ్లీ అక్కడే కూర్చొని ఈ విషయాన్ని స్నేహితులకు తెలిపాడు. అనంతరం రైలు పట్టాలపై ఆత్మహత్యకు యత్నించాడు. గాయపడిన రాజును ఆసుపత్రికి తరలించి చికిత్స అందించారు. ఈ ఘటనపై కేసు నమోదు చేసుకున్న బండేపాళ్య పోలీసులు హత్య కేసు నమోదు చేసి రాజును అరెస్ట్‌ చేసి ఎఫ్‌టీసీలో చార్జిషీట్‌ వేశారు. వాదప్రతివాదనలు ఆలకించిన కోర్టు న్యాయమూర్తి కేఎన్‌.రూపా గురువారం రాజుకు యావజ్జీవ శిక్షతో పాటు లక్ష రూపాయలు జరిమానా విధిస్తూ తీర్పునిచ్చారు.

సాక్షి, మిర్యాలగూడ, కోదాడ: నిజాం నవాబు భారత ప్రభుత్వానికి లొంగిపోయిన తర్వాత  ఉమ్మడి నల్లగొండ జిల్లాలోని అక్కినెపల్లి, షా అబ్దుల్లాపురం గ్రామాల్లో జరిగిన దొరల, రజాకార్ల హత్య కేసులో నంద్యాల శ్రీనివాస్‌రెడ్డి (నకిరేకల్‌ మాజీ ఎమ్మెల్యే), దోమల జనార్ధన్‌ రెడ్డి, గార్లపాటి రఘుపతిరెడ్డి, దూదిపాల చినసత్తిరెడ్డి, మేర హనుమంతు, మాగి వెంకులు, దాసరి నారాయణరెడ్డి, వడ్ల మల్లయ్య, ఎర్రబోతు రాంరెడ్డి, మిర్యాల లింగయ్య, కల్లూరి ఎల్లయ్య, గులాం దస్తగిరికి ప్రత్యేక ట్రిబ్యునల్‌ 1949 ఆగస్టు 13, 14న  మరణశిక్ష వేసింది. ఉరిశిక్ష పడిన వెంకులు (14), ఎర్రబోతు రాంరెడ్డి(15), నంద్యాల శ్రీనివాసరెడ్డి (20) తోపాటు నల్లా నర్శింహులు (22) నల్లగొండ జైల్లో ఉండగా టైమ్‌ పత్రికకు చెందిన ఓ మహిళా జర్నలిస్టు వారిని కలిసి మైనర్‌ అయిన ఎర్రబోతు రామిరెడ్డి ఫొటోతో వ్యాసం రాసింది. అది పెను సంచలనంగా మారింది. లండన్‌ న్యాయవాది డీఎన్‌ ప్రిట్, బొంబాయ్‌ నుంచి డేనియల్‌ లతీఫ్, గణేష్‌ షాన్‌బాగ్‌ వంటి న్యాయవాదులు  స్థానిక న్యాయవాది మనోహర్‌లాల్‌ సక్సేనాతో కలిసి మరణశిక్ష ఆపేందుకు ప్రయత్నించారు. అంతర్జాతీయంగా ఉరిశిక్ష లకు వ్యతిరేకంగా నిరసనలు వెల్లువెత్తాయి. జెకొస్లోవేకియాలో 10 వేల మందితో భారీ నిర్వహించారు. దీంతో అప్పటి రాష్ట్రపతి బాబు రాజేంద్రప్రసాద్‌ క్షమాభిక్షతో మరణశిక్ష కాస్తా యావజ్జీవ శిక్షగా మారింది. 1956లో కొందరు, దీంతో 1958లో మరికొందరు విడుదలయ్యారు.   నిజాంపై గర్జించిన కృష్ణా జిల్లా  సాక్షి, అమరావతి:  తెలంగాణ సాయుధ పోరాటాన్ని ఉధృతం చేయడంలో, రజాకార్లను ఎదుర్కోవడంలో కృష్ణా జిల్లాకు ఘనమైన చరిత్ర ఉంది. 1944లో మొదలైన తెలంగాణ సాయుధ పోరాటం దొడ్డి కొమరయ్యను రజాకార్లు కాల్చేయడంతో తీవ్రరూపం దాల్చింది. నల్లగొండ జిల్లాలో మొదలైన ఉద్యమం క్రమంగా విస్తరించింది. కృష్ణా జిల్లా నుంచి అనేక మంది నేతలు ఈ సాయుధ పోరుకు ఊతమిచ్చారు. చండ్ర రాజేశ్వరరావు, పుచ్చలపల్లి సుందరయ్య విజయవాడ నుంచే ఉద్యమానికి దిశానిర్దేశం చేశారు. సోవియట్‌ యూనియన్‌ తరహాలో విజయవాడలో ‘కమ్యూన్‌’ఏర్పాటు చేశారు. వడిసెలు, రాళ్లు, కత్తులు వంటి ఆయుధాల ప్రయోగం, తుపాకీ పేల్చడంలో శిక్షణ ఇచ్చారు. పగలంతా కలిసికట్టుగా శ్రమ చేసి సంపాదించిన సొమ్ముతో ఒకే చోట వండుకుని భోజనాలు చేసేవారు. రాత్రి సమయాల్లో యుద్ధ విద్యల్లో శిక్షణ పొందేవారు. ఇక్కడ శిక్షణ పొంది వెళ్లి నల్గొండ జిల్లాలో దళాలు ఏర్పాటు చేశారు. దళాల నేతృత్వంలోనే సాయుధ దాడులు జరిగాయి. ఈ పోరాటాల్లో జిల్లాకు చెందిన 13 మంది ప్రాణత్యాగాలు చేశారు.   ‘దారి’ చూపిన ‘మెతుకుసీమ’ సాక్షిప్రతినిధి, సంగారెడ్డి: భారత ప్రభుత్వం హైదరాబాద్‌ రాజ్యంపై పోలీసు చర్య చేపట్టాలని నిర్ణయించిన రోజులవి. అప్పటి కేంద్ర­హోంమంత్రి సర్దార్‌ వల్లభ్‌భాయ్‌ పటేల్‌ చొరవతో ఇండియన్‌ యూనియన్‌ సైన్యం హైదరాబాద్‌ రాజ్యాన్ని చుట్టుముట్టింది. ఉత్త­రాన ఉన్న ఔరంగాబాద్‌ వైపు నుంచి సైనికచర్య మొదలైంది. ఉమ్మ­డి మెదక్‌ జిల్లా మీదుగానే హైదరాబాద్‌ రాజ్యంలోకి ప్రవేశించింది. అదెలా జరిగిందంటే.. నిజాం ప్రైవేట్‌ సైన్యం అయిన రజాకార్లు లాతూర్‌(మహారాష్ట్ర) నుంచి జహీరాబాద్‌ (సంగారెడ్డి జిల్లా)కు రైలులో బయలుదేరేందుకు సిద్ధమవుతుండగా ఒక్కసారిగా భారత సైన్యం బాంబుల మోత మోగించింది. దీంతో రజాకార్లు రైలు దిగి పరుగెత్తారు. ట్రక్కుల్లో పారిపోయారు. కొన్నిట్రక్కులు అదుపుతప్పి రోడ్డు పక్కన గుంతల్లో కూరుకుపోయాయి. అప్పటికే దౌల్తాబాద్, హుమ్నాబాద్, జాల్న ప్రాంతాలు భారతసైన్యం వశమయ్యాయి.  1948 సెప్టెంబర్‌ 16 భారత సైన్యం జహీరాబాద్‌ వైపు రోడ్డుమార్గంలో వస్తుండగా రజాకార్లు ఎక్కెల్లి (ప్రస్తుతం కర్ణాటకలో ఉంది) వంతెనను కూల్చేశారు. అయితే భారత సైన్యం తాత్కాలిక వంతెన నిర్మించుకుని ముందుకు సాగడంతో నిజాంసేన చెల్లాచెదురైంది. ఇలా జహీరాబాద్‌ను భారత సేనలు వశపరుచుకున్నాయి. 1948 సెప్టెంబర్‌ 17 భారతసైన్యం జహీరాబాద్‌ నుంచి హైదరాబాద్‌ వైపు వస్తుండగా పటాన్‌చెరు ప్రాం­తంలో రజాకార్లు రోడ్డు­కు ఇరువైపులా పేలుడు పదార్థాలు ఉంచారు. అప్రమత్తమైన భారతసైన్యం రూట్‌ మార్చి బొల్లారం మీదుగా ముందుకు సాగాయి. 1948 సెప్టెంబర్‌ 18 (సాయంత్రం 4 గంటలు): భారత సైన్యం బొల్లారం చేరింది. నిజాం సైన్యాధ్యక్షుడైన ఎల్‌.ఎద్రూస్‌ తన ఆయుధాలను వీడి భారత సైన్యం మేజర్‌ జనరల్‌ జేఎన్‌ చౌదరి ఎదుట లొంగిపోయారు. దీంతో ప్రజలు జయజయ ధ్వానాలతో భారత సైనికులకు స్వాగతం పలికారు. స్వేచ్ఛా స్వాతంత్య్రాలు పొందామని ఆనందోత్సవాలు చేసుకున్నారు. 

కొంతమంది ప్రేమ పేరుతోనే లేక స్నేహితులు కారణంగానో తెలిసో/ తెలియకో దారుణంగా మోసపోతుంటారు. దీంతో వారు ఆ మోసాన్ని జీర్ణించు కోలేకపోవడమే గాక మరోకర్ని నమ్మాలన్న భయపడుతుంటారు. ఇలాంటి పరిస్థితి నుంచి సాధ్యమైనంత తొందరగా బయటకొచ్చేందుకు యత్నించాలి గానీ తనను తాను గాయపర్చుకోవడమే లేక పక్కవారికి హాని తలపెట్టడమో చేయకూడదు. ఇక్కడొక మహిళ అలాంటి దారుణానికి ఒడిగట్టి కటకటాలపాలైంది. వివరాల్లోకెళ్తే....తైవాన్‌లోని 51 ఏళ్ల హువాంగ్ కే కే అనే మహిళ తన ప్రియుడు మోసం చేశాడన్న కోపంతో కాహ్‌సియుంగ్‌లో ఉన్న బహుళ అంతస్తుల భవనానికి నిప్పంటించింది. దీంతో సుమారు 46 మృతి చెందగా, దాదాపు 41 మంది గాయపడ్డారు. దీంతో పోలీసులు ఆమెపై హత్య నేరం కింద కేసులు నమోదు చేసి అరెస్టు చేశారు. అయితే కోర్టులో ఆమె ఉద్దేశపూర్వకంగానే ఈ ఘటనకు పాల్పడిందని, పైగా ఆమెలో పశ్చాత్తాపం కూడా లేదంటూ ఉరితీయాలని డిమాండ్‌ చేశారు న్యాయవాదులు. అయితే కోర్టు విచారణలో ఆమెను దోషిగా నిర్థారించింది గానీ భవనంలోని నివాసితులకు నష్టం కలిగించే ఉద్దేశ్యం ఆమెకు లేదని పేర్కొంది. అంతేకాదు ఆమె ఉద్దేశ్యపూర్వకంగా ఈ ఘటనకు పాల్పడలేదని కూడా స్పష్టం చేసింది. ప్రియుడు మోసం చేయడంతో జీర్ణించుకోలేక ఆవేశంతో సదరు వ్యక్తిని ఇబ్బందులకు గురిచేసేందుకు ఈ ఘటనకు పాల్పడినట్లు పేర్కొంది. పైగా దీన్ని ఉద్రేకపూరితమైన చర్యగా భావించి కోర్టు ఆమెకు జీవిత ఖైదు జీవించింది. ఐతే ఆమె తన నేరాన్ని కోర్టులో ఒప్పుకుంది, కానీ ఈ ఘటనకు ప్పాలడే ముందు ఏ జరిగిందనేది అస్పష్టంగా ఉంది. అదీగాక ఈ తీర్పుతో అసంతృప్తి చెందిన న్యాయవాదులు పై కోర్టుకి అప్పీలుకి వెళ్తామని తేల్చి చెప్పారు. (చదవండి: నైట్‌క్లబ్‌లో ఘోర అగ్ని ప్రమాదం.. పలువురి దుర్మరణం​)

లండన్‌: ఫన్‌ కోసం సరదాగా ఆడే ట్రూత్‌ ఆర్‌ డేర్‌ గేమ్‌ ఓ యువకుడిని జైలు పాలు చేసింది. గేమ్‌లో భాగంగా సదరు యువకుడు తన నానమ్మను చంపేశాడు. ఈ సంఘటన రెండేళ్ల క్రితం జరగ్గా.. తాజగా కోర్టు నిందితుడికి జీవిత ఖైదు విధించింది. ఆ వివరాలు.. లాంక్షైర్ కాన్‌స్టాబులరీ ప్రకారం, యూకేకి చెందిన టియర్నాన్ డార్న్టన్ అనే యువకుడికి రిస్కీ పనులు చేయడం అంటే చాలా ఇష్టం. థ్రిల్‌ కోసం ప్రాణాలు పణంగా పెట్టడానికే కాదు.. తీయడానికి కూడా రెడీనే. ఈ క్రమంలో 2018, మే 28న ఇలాంటి థ్రిల్లింగ్‌ పనికే పూనుకున్నాడు. స్నేహితులతో కలిసి ట్రూత్‌ ఆర్‌ డేర్‌ ఆడుతున్నాడు.  (చదవండి: దుస్తులకు లింగ భేదం ఏంటీ..! స్కూల్‌కి స్కర్టులతోనే వస్తాం!!) ఈ క్రమంలో తన వంతు వచ్చినప్పుడు డేర్‌ సెలక్ట్‌ చేసుకున్నాడు డార్న్టన్. దానిలో భాగంగా తన నానమ్మ మేరీ గ్రెగోర్‌ ఇంటికి నిప్పు పెట్టాడు. ఈ సంఘటనలో మేరీ మరణించింది. న్యూమోనియా, ఊపిరిడకపోవడం వల్ల చనిపోయినట్లు వైద్యులు ధృవీకరించారు. పోలీసులు, లాంక్షైర్ కాన్‌స్టాబులరీ ఉ‍మ్మడి పరిశోధనలో సిగరెట్‌ని ఆర్పకుండా పడేయడం వల్ల ఈ అగ్నిప్రమాదం సంభవించినట్లు గుర్తించారు. ప్రమాదవశాత్తు మరణించినట్లు నివేదికలో పేర్కొన్నారు.  మరి ఇప్పుడెలా బయటపడింది అంటే డార్న్టనే స్వయంగా ఈ విషయాన్ని ఒప్పుకున్నాడు. కొన్ని రోజుల క్రితం డార్న్టన్ ఓ కౌన్సిలర్‌ని కలిశాడు. మాటలో మధ్యలో గతంలో తాను తన నానమ్మ ఇంటికే నిప్పు పెట్టానని.. ఈ ప్రమాదంలో ఆమె మరణించిందని తెలిపాడు. ఈ విషయాన్ని కౌన్సిలర్‌ పోలీసులుకు తెలపడంతో వారు కేసును రీఒపెన్‌ చేశారు.  (చదవండి: ఇదేం ట్రెండ్‌రా నాయనా... డస్ట్‌బిన్‌ కవరే డ్రెస్సు.!) కేసు విచారణలో డార్న్టన్ సంచలన విషయాలు తెలిపాడు. ట్రూత్‌ ఆర్‌ డేర్‌ గేమ్‌లో భాగంగా తానే తన నానమ్మ ఇంటికి నిప్పు పెట్టినట్లు వెల్లడించాడు. దీని తర్వాత మరో సారి కూడా ఇలాంటి పని చేసినట్లు తెలిపాడు. ఈ క్రమంలో 2021, మార్చిలో డార్న్టన్‌ మీద హత్య కేసు నమోదు చేశారు పోలీసులు. కోర్టు డార్న్టన్‌కు జీవిత ఖైదు విధించింది. ఈ కేసులో పెరోల్‌ లభించాలంటే.. డార్న్టన్ కనీసం 15 సంవత్సరాలు జైలు జీవితం గడపాలి. ఆ తర్వాతే అతడికి పెరోల్‌ లభించనుంది.  చదవండి: 17 ఏళ్ల వైవాహిక బంధానికి ముగింపు.. గ్రాండ్‌గా విడాకుల పార్టీ

సాక్షి, హైదరాబాద్‌: తన కుమార్తె వయసున్న బాలికపై లైంగిక దాడికి యత్నించిన ఘటనలో కామాంధుడు ఎడ్ల రమేశ్‌ (45) బతికున్నంత కాలం జైలు జీవితం గడపాలని చిన్నారులపై లైంగిక దాడుల నియంత్రణ (పోక్సో) కేసుల విచారణ ప్రత్యేక కోర్టు మంగళవారం తీర్పునిచ్చింది. అలాగే రూ.20 వేలు జరిమానా చెల్లించాలని న్యాయమూర్తి బి.సురేశ్‌ తీర్పులో పేర్కొన్నారు. మూడేళ్ల క్రితం లైంగిక దాడి జరిగిన సమయంలో బాలిక వయస్సు 11 సంవత్సరాల 6 నెలలని, ఈ నేపథ్యంలో బాధితుల పరిహార పథకం కింద రూ.7 లక్షలు పరిహారం ప్రభుత్వం చెల్లించేలా తగిన చర్యలు తీసుకోవాలని జిల్లా న్యాయసేవా సాధికార సంస్థను ఆదేశించింది. ఇందులో 80 శాతం మొత్తాన్ని జాతీయ బ్యాంకులో బాలిక పేరుతో ఫిక్స్‌డ్‌ డిపాజిట్‌ చేయాలని, ఈ డబ్బును బాలిక మేజర్‌ అయిన తర్వాత తీసుకోవచ్చని పేర్కొంది. మిగిలిన 20 శాతం డబ్బును బాలికకు ఇవ్వవచ్చని స్పష్టం చేశారు.

వాషింగ్టన్‌/కాలిఫోర్నియా: కాలిఫోర్నియాలో ఉరిశిక్ష కోసం ఎదురుచూస్తున్న.. "డేటింగ్ గేమ్ కిల్లర్" గా ప్రసిద్ది చెందిన ఓ హంతకుడు శనివారం మరణించినట్లు జైలు అధికారులు తెలిపారు. రోడ్నీ జేమ్స్ అల్కల (77) కాలిఫోర్నియాలోని శాన్ జోక్విన్ వ్యాలీలోని ఆసుపత్రిలో సహజ కారణాలతో మరణించినట్లు జైలు అధికారులు వెల్లడించారు. 1977-1979 మధ్య కాలంలో కాలీఫోర్నియాలో దాదాపు ఐదుగురిని హత్య చేసిన నేరాలకు గాను అల్కలాకు 2010లో కోర్టు ఉరి శిక్ష విధించింది. అల్కల హత్య చేసిన ఐదుగురిలో 12 ఏళ్ల చిన్నారి కూడా ఉండటం అప్పట్లో సంచలనం సృష్టించింది. ఇక అల్కల అమెరికా వ్యాప్తంగా దాదాపు 130 మందిని హత్య చేసినట్లు అధికారులు భావిస్తున్నారు. 2013లో న్యూయార్క్‌లో మరో ఇద్దరిని నరహత్య చేసినందుకు గాను అల్కలాకు అదనంగా మరో 25 ఏళ్ల పాటు జైలు శిక్ష విధించారు. 1977 మృతుల్లో వ్యోమింగ్‌ ప్రాంతంలో లభించిన ఓ 28 ఏళ్ల మహిళ మృతదేహానికి సంబంధించిన కేసులో డీఎన్‌ఏ ఆధారంగా అల్కలా ప్రమేయం వెలుగు చూడటంతో అతడికి 2016లో మరోసారి శిక్ష విధించారు. ఆరు నెలల గర్భవతి హత్య కేసులో అల్కలపై ఇంకా విచారణ కొనసాగుతుందని జడ్జి వెల్లడించారు.  ఉరి శిక్ష విధించినప్పటికి అల్కల మెడికల్‌ సంరక్షణ నిమిత్తం జైలులో కాక అతడి నివాసంలోనే ఎక్కువ కాలం ఉన్నాడు. గావిన్ న్యూసోమ్ గవర్నర్‌గా ఉన్నప్పుడు ఉరిశిక్షపై తాత్కాలిక నిషేధం విధించారు. అధికారులు.. అల్కల తాను హత్య చేసిన మహిళల చెవిపోగులను ట్రోఫీలుగా తీసుకునేవాడని తెలిపారు. గతంలో అల్కల ధరించిన బంగారు చెవి రింగులు తన కుమార్తె రాబిన్‌ సామ్సోకు చెందినవని ఈ కేసులో వాంగ్మూలం ఇచ్చిన మహిళ చెప్పడంతో ఈ విషయం వెలుగులోకి వచ్చింది. కానీ అల్కలా మాత్రం చెవిపోగులు తనవేనని.. వాటిని 1978 లో తాను ధరించినట్లు ‘ది డేటింగ్ గేమ్‌’ టీవీ షోలో కనిపించిన ఒక క్లిప్‌ని చూపించాడు. సామ్సో చనిపోవడానికి దాదాపు ఒక సంవత్సరం ముందే తాను ఈ బంగారు చెవి పోగులను ధరించానని అల్కలా కోర్టుకు తెలిపాడు. తనపై వచ్చిన ఆరోపణలను ఖండించాడు.  దర్యాప్తుదారులు ఒక బాధితురాలి డీఎన్‌ఏ.. అల్కలా దగ్గర ఉన్న గులాబీ రంగు చెవి పోగులో గుర్తించడమే కాక.. సామ్సో శరీరంలో అల్కలా డీఎన్‌ఏ గుర్తించారు. ఈ కేసులో అతడికి రెండు సార్లు మరణశిక్ష విధించారు. కాని రెండు నేరారోపణలు తారుమారు చేయబడ్డాయి. రెండు దశాబ్దాల తరువాత, కొత్త డీఎన్‌ఏ, ఇతర ఫోరెన్సిక్ ఆధారాల ఆధారంగా, నలుగురు మహిళల హత్యలకు సంబంధించి అల్కలాపై అభియోగాలు మోపారు. తీర్పు తరువాత, అధికారులు అల్కాలా ఆధీనంలో ఉన్న యువతులు, బాలికల కి చెందిన100 కి పైగా ఫోటోలను విడుదల చేశారు.   

సాక్షి, జగిత్యాల : చెల్లిని హత్యచేసిన అన్నకు జీవితఖైదు, కేసులో నిందితురాలైన వదినకు ఏడాది జైలు శిక్ష, జరిమానా విధిస్తూ జగిత్యాల సెకండ్‌ అడిషనల్‌ డిస్ట్రిక్ట్‌ సెషన్‌ జడ్జి సుదర్శన్‌ సోమవారం తీర్పునిచ్చారు. వివరాలు ఇలా.. రాయికల్‌ మండలం చెర్లకొండాపూర్‌కి చెందిన పల్లికొండ గంగుకు నలుగురు కుమార్తెలు, ఒక కుమారుడు. భర్త చిన్ననర్సయ్య చనిపోయిన అనంతరం ఇద్దరు కూతుళ్లకు, కుమారుడికి పెళ్లి చేసింది. మరో ఇద్దరు కుమార్తెలు పెళ్లికి ఉండటంతో ఆమెకున్న ఐదెకరాల భూమిలో మూడెకరాలు విక్రయించి మూడో కుమార్తె సునీతకు వివాహం చేసింది. అనంతరం చిన్న కుమార్తె రోజా వివాహానికి మిగతా కొంత డబ్బు నిల్వ ఉంచగా కుమారుడు అశోక్‌ ఆస్తుల పంపకం విషయంలో గొడవపడ్డారు. 2015 మే 16న ఉదయం 8.30 గంటలకు రోజా కిరాణం షాపులో ఉండగా అశోక్‌ అక్కడికి వెళ్లి రోకలిబండతో ఆమె తలపై కొట్టడంతో తీవ్రంగా గాయపడింది. కొన ఊపిరితో ఉండగా గంగు జగిత్యాల ప్రభుత్వ ఆస్పత్రికి తీసుకొచ్చింది. అయితే అప్పటికే ఆమె మృతి చెందింది. మృతురాలి తల్లి ఫిర్యాదు మేరకు రాయికల్‌ పోలీస్‌స్టేషన్‌లో కేసు నమోదు అయ్యింది. కేసులో అడిషనల్‌ పీపీ శ్రీవాణి, ఇన్వెస్టిగేషన్‌ ఆఫీసర్లుగా సరిలాల్, విజయ్‌రాజ్, సురేందర్, రాజశేఖర్‌రాజు, సీఎంఎస్‌ ఎస్సై రాజునాయక్, కోర్టు కానిస్టేబుల్‌ నవీన్, సీఎంఎస్‌ కానిస్టేబుల్‌ కిరణ్‌ నిందితులకు శిక్ష పడేందుకు కోర్టులో సాక్ష్యులను ప్రవేశపెట్టారు. సోమవారం పల్లికొండ అశోక్‌కు జీవిత ఖైదుతోపాటు రూ.5వేలు జరిమానా, ఆయన భార్య భూలక్ష్మికి ఏడాది జైలు, రూ.1,500 జరిమానా విధిస్తూ న్యాయమూర్తి తీర్పునిచ్చారు. కాగా కేసులో దోషులకు శిక్షపడేలా పని చేసిన పోలీస్‌ అధికారులను ఎస్పీ సింధూశర్మ అభినందించారు.

లండన్‌: తనతో విడిపోయిన భార్యను హత్య చేసిన కేసులో ఒక వ్యక్తికి యూకే కోర్టు యావజ్జీవ కారాగార శిక్ష విధించింది. 23 ఏళ్ల జిగుకుమార్ సోర్తి అనే భారత సంతతి వ్యక్తి తన భార్య భవిని ప్రవీన్‌ను కత్తితో పొడిచి దారుణంగా హత్య చేశాడు. అనంతరం వీధిలో కనిపించిన ఒక పోలీసు అధికారితో తన భార్యను హత్య చేసినట్లు తెలిపాడు. అతడిని అరెస్ట్ చేసిన పోలీసులు కోర్టు ముందు హాజరుపరచగా పెరోల్‌ ఇవ్వడానికి కంటే ముందు 28 సంవత్సరాల జైలు శిక్ష విధించింది.  ‘ఇది భయంకరమైన, క్రూరమైన, కనికరంలేని హత్య. కేవలం 21 సంవత్సరాల వయస్సులో ఉన్న ఒక అందమైన, ప్రతిభావంతులైన యువతి ప్రాణాలను దారుణంగా తీశారు’ అని జస్టిస్ తిమోతి స్పెన్సర్ బుధవారం లీసెస్టర్ క్రౌన్ కోర్టులో విచారణలో భాగంగా జిగుకుమార్ సోర్తితో అన్నారు. లీసెస్టర్‌ నగరంలో నివసించిన భవిని ప్రవీన్‌ కొంత కాలంగా భర్తకు దూరంగా ఉంటోంది. ఈ ఏడాది మార్చి 2వ తేదీ 12:30 నిమిషాల సమయంలో ఆమె దగ్గరకు వెళ్లిన జిగుకుమార్‌ కొద్ది సేపు ఆమెతో గొడవపడ్డాడు. అనంతరం ఆమెను కత్తితో పొడిచి, ఆ కత్తిని అక్కడే వదిలేసి బయటకు వచ్చాడు. పోలీసులకు స్వయంగా ఆ విషయాన్ని వెల్లడించాడు. అక్కడికి చేరుకున్న పోలీసులు భవినిని హాస్పటల్‌లో చేర్పించగా అప్పటికే మరణించినట్లు డాక్టర్లు తెలిపారు. పోస్ట్‌మార్టంలో ఆమెను అనేక సార్లు పొడవడంతో గాయాలయ్యి మరణించినట్లు వెల్లడయ్యింది.  చదవండి: తీన్మార్‌ మల్లన్న హద్దులు దాటాడు..  

వాషింగ్టన్‌: ముప్పై ఏళ్లుగా వరుస హత్యలు, అత్యాచారాలకు పాల్పడుతూ ప్రజలను భయభ్రాంతులకు గురి చేసిన ‘గోల్డెన్‌ స్టేట్‌ కిల్లర్‌’గా పిలవబడే అమెరికా మాజీ పోలీసు అధికారి జోసెఫ్‌ జేమ్స్‌ డీ ఏంజెలో సోమవారం తన నేరాలను కోర్టు ముందు అంగీకరించాడు. 13హత్యలు, పదుల సంఖ్యలో అత్యాచారాలు, కిడ్నాప్‌లు, దొంగతనాలకు పాల్పడుతూ మూడు దశాబ్దాలుగా కాలిఫోర్నియాను భయభ్రాంతులకు గురి చేసిన జోసెఫ్‌కు సోమవారం కోర్టు శిక్ష విదించింది. విచారణలో అతడు పాల్పడిన భయంకరమైన నేరాలకు సంబంధించిన వివరాలను కోర్టు వెల్లడించింది. జోసెఫ్‌ దాదాపు 30 ఏళ్లుగా నేరాలు చేస్తూ తప్పించుకుని తిరుగుతు సమాజాన్ని భయభ్రాంతులకు గురి చేశాడని పోలీసులు తెలిపారు. 74 ఏళ్ల జోసెఫ్‌ కోర్టు విచారణ సమయంలో తన నేరాలకు సంబంధించి ‘అవును’.. ‘ఒప్పుకుంటున్నాను’.. ‘తప్పే వంటి’ సమాధానాలు చెప్పాడు. ఈ క్రమంలో ప్రాసిక్యూటర్ అమీ హాలిడే గతంలో జోసెఫ్‌కు విధించిన మరణశిక్షను రద్దు చేస్తూ.. పెరోల్‌కు అనుమతి లేకుండా 11 జీవిత ఖైదుల శిక్షను విధిస్తున్నట్లు తీర్పు వెల్లడించారు.  ‘గోల్డెన్‌ స్టేట్‌ కిల్లర్‌’గా పిలవబడే జోసెఫ్‌ను మూడు దశాబ్దాల తర్వాత 2018లో అరెస్ట్‌ చేశారు. నేరం జరిగిన ప్రదేశంలో దొరికిన డీఎన్‌ఏను జోసెఫ్‌ డీఎన్‌ఏతో పోల్చారు. రెండు మ్యాచ్‌ కావడంతో పోలీసులు అతడిని అరెస్ట్‌ చేసి.. మూడు దశాబ్దాలుగా సాగిన నేరాల పరంపరకు ముగింపు పలికారు. మొదట ఇతడికి 1978లో నూతన జంట బ్రియాన్‌, కేటీ మాగ్గియోర్‌ హత్య కేసులో మాత్రమే కోర్టు శిక్ష విధించింది. ఆ తర్వాత 2018 నాటి కేసు విచారణలో విస్తుపోయే వాస్తవాలు వెలుగు చూశాయి. ఈ క్రమంలో గత మూడు దశాబ్దాల నుంచి జోసెఫ్‌ దాదాపు 13 హత్యలు, 50 అత్యాచారాలు, పదుల కొద్ది దొంగతనాలకు పాల్పడ్డట్లు వెల్లడయ్యింది. న్యాయమూర్తి జోసెఫ్‌ నేరాల చిట్టాను చదువుతూ దిగ్భ్రాంతికి గురయ్యాడు. ఒక అత్యాచారం కేసులో జోసెఫ్‌ బాధితురాలి కొడుకు చెవి కోస్తానని బెదిరించి ఆమెపై అత్యాచారానికి పాల్పడ్డాడని కోర్టు వెల్లడించింది. భారీ వస్తువుతో బాధితుల తలలు పగలకొట్టి హత్యలు చేసేవాడని తెలిపింది. ఇతడి నేరాలు మొదట 1975 సెంట్రల్ కాలిఫోర్నియాలోని శాక్రమెంటో ప్రాంతంలో ప్రారంభమయ్యి.. తర్వాత రాష్ట్రమంతా వ్యాపించాయి. 1986లో ఓ 18 ఏళ్ల యువతిపై అత్యాచారం చేసి హత్య చేశాడు. ఇదే ఇతడి ఆఖరి హత్య. ఈ క్రమంలో ‘ఈస్ట్ ఏరియా రేపిస్ట్’, ‘డైమండ్-నాట్ కిల్లర్’, ‘ఒరిజినల్ నైట్ స్టాకర్’ వంటి అనేక పేర్లతో జనాల గుండెల్లో భయాందోళనలు రేకెత్తించేవాడు. 1979లో ఓ షాపులో దొంగతానికి పాల్పడుతూ పోలీసులకు చిక్కాడు. దాంతో అతడిని ఉద్యోగం నుంచి తొలగించారు. ఆ తర్వాత జోసెఫ్‌ 20 ఏళ్ళకు పైగా సాక్రమెంటో ప్రాంతంలో నివసించాడు. అక్కడ ట్రక్‌ మెకానిక్‌గా పని చేస్తూ.. 2017లో పదవి విరమణ చేశాడు.  కోర్టు జోసెఫ్‌కు శిక్ష విధిస్తూ.. ‘హత్యగావింపబడిన వారి కుటుంబ సభ్యులు తమ ప్రియమైన వారికి న్యాయం జరగడం కోసం దశాబ్దాలుగా ఎదురు చూస్తున్నారు. లైంగిక వేధింపుల బాధితులు న్యాయం కోసం ఇంతకాలం ఎదురు చూడటం విషాదకరం’ అంటూ బాధపడ్డారు.

న్యూఢిల్లీ : మానవ మృగాల్లో కూడా అనిర్వచనీయ కరడుగట్టిన మృగాలు ఉంటాయని అమెరికాకు చెందిన హెన్రీ మిచెల్లీ పియెట్‌ నిరూపించాడు. 63 ఏళ్ల ఆ కామ పిశాచి తన సవతి కూతురిని 11 ఏళ్ల వయస్సులో కిడ్నాప్‌ చేసి అక్రమంగా పెళ్లి చేసుకున్నాడు. ఆమెను మెక్సికోకు తీసుకెళ్లి అక్కడ ఆమెపై ప్రతిరోజు భౌతికంగానే కాకుండా లైంగిక దాడి చేసి ఏకంగా తొమ్మిది మంది పిల్లలను కన్నాడు. తాను మాత్రం బీరు సీసాలతో, హోటల్‌ భోజనంతో కులాసాగానే బతుకుతూ భార్యా, పిల్లలను అర్ధాకలికి వదిలేసి భూలోక నరకం చూపించాడు. (బాయ్‌ఫ్రెండ్‌ను సూట్‌కేసులో పెట్టి తాళం..) 1997 నుంచి 19 ఏళ్ల పాటు తన సవతి తండ్రి పియెట్‌ నిర్బంధంలో ప్రత్యక్ష నరకాన్ని అనుభవించిన రొసాలిన్‌ మ్యాక్‌గిన్నిస్, స్థానికుల సహాయంతో 2016 జూన్‌లో ఎనిమిది మంది పిల్లలతో తప్పించుకొని అమెరికాలోని ఓక్లహామ చేరుకున్నారు. పెద్ద కుమారుడు అంతకుముందే ఆ చెర నుంచి తప్పించుకొని ఎక్కడికో పారిపోయారు. రొసాలిన్‌ తన భర్తగానీ భర్త పియెట్‌పై కేసు పెట్టగా, ఆయన్ని ఓక్లహామ పోలీసులు 2017లో అరెస్ట్‌ చేశారు. ఈ కేసును విచారించిన ఓక్లహామ ఫెడరల్‌ కోర్టు పియెట్‌కు యావజ్జీవ కారాగార శిక్ష విధిస్తూ గత బుధవారం తీర్పు చెప్పింది. ఈ తీర్పు రొసాలిన్‌కు జరిగిన నష్టాన్ని పూడ్చ లేదని, ఆమె పట్ల సానుభూతి చూపడం తప్ప తాము చేయగలిగింది ఏమీ లేదని అమెరికా అటార్నీ బ్రియాన్‌ జే. కుస్టర్‌ వ్యాఖ్యానించారు. రొసాలిన్‌కు ప్రస్తుతం 34 ఏళ్లు. ఆమె ‘పీపుల్‌ టీవీ’కి ఇచ్చిన తాజా ఇంటర్వ్యూ ప్రకారం ఆమె తొమ్మిదవ ఏట, ఆమె తల్లి, పియెట్‌తో డేటింగ్‌  చేస్తూ కలిసి ఉన్నారు. అప్పుడే పియట్, రొసాలిన్‌ను లైంగికంగా వేధించడం ప్రారంభించాడు. పియట్‌ భౌతికంగా కొడుతుండడంతో రొసాలిన్‌ తల్లి కూడా ఆయనతో విడిపోయింది. అప్పటికే తనకు ముగ్గురు పిల్లలున్న పియెట్‌ ఓ రోజు వారితో కలిసి రొసాలిన్‌ చదువుతున్న స్కూల్‌కు వ్యాన్‌లో వెళ్లి ఆమెను కిడ్నాప్‌ చేసి తీసుకెళ్లాడు. అప్పటికి 11 ఏళ్లున్న రొసాలిన్‌ను పియెట్‌ తన పిల్లలకు తల్లిగా పరిచయం చేసి, వారి సాయంతో ఆమెను అక్రమంగా పెళ్లి చేసుకున్నాడు. మెక్సికో వెళ్లిన తర్వాత పియెట్‌ ఓ షెడ్డులో రొసాలిన్‌తో వేరు కాపురం పెట్టాడు. బయటకు వెళ్లేటప్పుడు పియెట్‌ షెడ్డుకు తాళం పెట్టి వెళ్లేవాడు. రొసాలిన్‌కు 15వ ఏట మొదటి సంతానం కలిగింది. అప్పటి వరకు పారిపోయేందుకు పలు సార్లు ప్రయత్నించి విఫలమైన రొసాలిన్‌ ఆ తర్వాత తెలియని మానసిక స్థితిలో నిస్తేజంగా ఉండిపోయి తొమ్మిది మంది పిల్లలకు తల్లయింది. పిల్లలు కూడా సరిగ్గా తిండిలేక ఇబ్బంది పడుతుండడంతో వారిని తీసుకొని ఎక్కడికన్నా పారిపోవాలనుకుంది. చేతిలో చిల్లి గవ్వా లేకపోవడం, ఇరుగు, పొరుగు వారితో కనీసం ముఖ పరిచయం కూడా లేకపోవడంతో పారిపోయేందుకు అంతగా సాహసం చేయలేక పోయింది. 2016లో కొద్దిగా పరిచయమైన పొరుగింటి మహిళ సహకారంతో రొసాలిన్, మెక్సికోలోని అమెరికా అంబసీని సందర్శించి అమెరికాలోని ఓక్లహామ చేరుకున్నారు. ‘నేను ఎలా బతికానో, ఎందుకు బతికానో తెలియదు. నా 19 ఏళ్ల జీవితం జీవచ్ఛవంలా, అగమ్య గోచరంగా, ఒకరకమైన అపస్మారక స్థితిలో సాగింది’ అంటూ ఆమె ఇంటర్వ్యూలో కన్నీళ్లు పెట్టుకుంది. పియెట్‌ పైసాచిక ఉదంతం ఆస్ట్రియా రేపిస్ట్‌ జోసఫ్‌ ఫ్రిజిల్‌ ఉదంతాన్ని గుర్తు చేస్తోంది. ఆ రాక్షసుడు సొంత కూతురిని నేల మాలిగలో 24 ఏళ్ల పాటు నిర్బంధించి ఏడుగురు సంతానాన్ని కన్నాడు. (చదవండి: చచ్చిపోతా.. చిన్నోడి కోసం 4 లక్షల డాలర్లు!)

మంగళూరు : 20 మంది యువతులను దారుణంగా రేప్‌ చేసి ఆపై హత్య చేసిన సీరియల్‌ కిల్లర్‌' సైనైడ్‌' మోహన్‌కు జీవిత ఖైదు శిక్ష విధిస్తున్నట్లు మంగళూరు సెషన్స్‌ కోర్టు మంగళవారం పేర్కొంది. కాగా 2006లో కేరళలోని కస్రాగోడ్‌ జిల్లాకు చెందిన 23 ఏళ్ల యువతిని రేప్‌ చేసి హతమార్చినందుకుగానూ మోహన్‌కు జీవిత ఖైదుతో  పాటు రూ. 25వేల జరిమానా విధిస్తున్నట్లు సెషన్స్‌ కోర్టు జడ్జి సయీదున్నిసా తన తీర్పులో వెల్లడించారు. వివరాలు.. సైనైడ్‌ మోహన్‌.. ఒంటరిగా ఉన్న అమ్మాయిలను ట్రాప్‌ చేసి ప్రేమిస్తున్నాను.. పెళ్లి చేసుకుంటానంటూ మాయ మాటలు చెప్పి మొదట రూంకు తీసుకెళతాడు. ఆ తర్వాత సైనైడ్‌ పూసిన పదార్థాలను వారికి అందించి రేప్‌ చేస్తాడు. తర్వాత వారు చనిపోయారని నిర్దారించుకొని మెల్లగా అక్కడినుంచి జారుకుంటాడు. ఇలా ఇప్పటివరకు 20మంది యువతులను ట్రాప్‌ చేసి హతమార్చాడు.  కాగా ఇదే విధంగా 2006 జనవరి 3న మంగళూరులోని క్యాంప్‌కో యూనిట్‌కు పని నిమ్మిత్తం వచ్చిన 23ఏళ్ల  కేరళ యువతితో మోహన్‌ పరిచయం పెంచుకున్నాడు. పెళ్లి చేసుకుంటానని మాయ మాటలు చెప్పి మైసూరులోని లాడ్జికి తీసుకెళ్లి రాత్రంతా అక్కడే గడిపారు. తెల్లవారుజామున బస్టాండ్‌కు చేరుకొని యువతి ఒంటిపై ఉన్న నగలన్ని తీసుకొని గర్భనిరోధక మాత్ర అని నమ్మించి సైనైడ్‌ పూసిన పదార్థాన్ని అందించాడు. పదార్థాన్ని మింగిన ఆమె చనిపోయిందని నిర్థారించుకొని అక్కడే వదిలిపెట్టి వెళ్లాడు. కాగా 2009లో బంట్వాల్‌లో పోలీసులకు పట్టుబడిన మోహన్‌ 20 మంది యువతుల్ని తానే చంపినట్లు ఒప్పుకోవడంతో పోలీసులు అరెస్టు చేసి రిమాండ్‌కు తరలించారు. అప్పటి నుంచి ఈ కేసు దర్యాప్తు కొనసాగుతుంది.

అధికార మదంతో, తలపొగరుతో ఇష్టానుసారం చెలరేగే రాజకీయ నాయకుల వెన్నులో వణుకు పుట్టేలా ఉన్నావ్‌ అత్యాచార ఉదంతంలో బహిష్కృత బీజేపీ ఎమ్మెల్యే కులదీప్‌ సెంగార్‌కు ఢిల్లీ కోర్టు యావజ్జీవశిక్ష విధించింది. ఆయన తన శేష జీవితం మొత్తం జైల్లోనే గడపాలని, బాధితురాలికి రూ. 25 లక్షల జరిమానా చెల్లించాలని, మరో పది లక్షల రూపాయలు ఆమె తల్లికి ఇవ్వాలని శుక్రవారం తీర్పునిచ్చింది. ఉత్తరప్రదేశ్‌లోని ఉన్నావ్‌లో రెండేళ్లక్రితం జరిగిన ఈ అత్యాచార ఘటన దేశ వ్యాప్తంగా అలజడి రేపింది. చివరకు ఐక్యరాజ్యసమితి సైతం ఈ ఉదంతంపై ఆందోళన వ్యక్తం చేసి, నేరగాళ్లపై కఠిన చర్యలు తీసుకోవాలని కేంద్ర ప్రభుత్వానికి విజ్ఞప్తి చేసింది. ఉన్నావ్‌ బాధితురాలు పడిన వెతలు అన్నీ ఇన్నీ కాదు. ఆమెను అపహరించి పదిరోజులపాటు అత్యాచారం చేయడం మాత్రమే కాదు... అదేమని ప్రశ్నించిన పాపానికి ఆ ఇంటిల్లిపాదినీ సెంగార్, ఆయన అనుచరగణం భయభ్రాంతులకు గురిచేశారు. వారికి పనులు దొరక్కుండా చేశారు. ఆ కుటుంబంతో మాట్లాడా లంటే భయపడేలా ఊరు మొత్తాన్ని శాసించారు. అతగాడిపై కేసు పెట్టాలంటూ బాధితురాలు పోలీస్‌ స్టేషన్‌ చుట్టూ తిరుగుతుండగా ఎప్పటికప్పుడు ఆమె కుటుంబసభ్యులను బెదిరించడం, దౌర్జన్యం చేయడం వారికి నిత్యకృత్యంగా మారింది. తనను అపహరించారని, సామూహిక అత్యాచారానికి ఒడిగట్టారని బాధితురాలు ఫిర్యాదు చేస్తే పోలీసులు మాత్రం అపహరించడం(ఐపీసీ సెక్షన్‌ 363), బలవంతంగా పెళ్లాడేందుకు ప్రయత్నించడం(ఐపీసీ 366) వంటి ఆరోపణలు మాత్రమే ఎఫ్‌ఐఆర్‌లో రాశారు. సెంగార్‌ సోదరుడు బాధితురాలి తండ్రిని తీవ్రంగా కొట్టి గాయపరిచినప్పుడు పోలీసులు ఆయన్ను ఆసుపత్రికి తరలించకుండా పోలీస్‌ లాకప్‌లో ఉంచారు. ఆలస్యంగా వైద్య చికిత్స అంద డంతో ఆయన రెండురోజులు నరకం అనుభవించి కన్నుమూశాడు. ఇక తానూ, తన కుటుంబం ఏకాకులమని, ఎవరి ఆసరా తమకు లభించే అవకాశం లేదని నిర్ధారణయ్యాక బాధితురాలు ముఖ్య మంత్రి యోగి ఆదిత్యనాథ్‌ నివాసగృహం సమీపంలో కిరోసిన్‌ పోసుకుని ఆత్మహత్య చేసుకోవడానికి ప్రయత్నించింది. సెంగార్‌ సోదరుడు, మరికొందరు ఆమె తండ్రిపై దౌర్జన్యం చేయడం, నెత్తురు ముద్దలా మారిన ఆ వృద్ధుణ్ణి స్టేషన్‌లో కూర్చోబెట్టి పోలీసులు తాపీగా ప్రశ్నించడం వంటి దృశ్యాలు సామాజిక మాధ్యమాలకెక్కి అల్లరై జనం ఛీ కొట్టాకగానీ ఎమ్మెల్యే సోదరుణ్ణి అరెస్టు చేయలేదు. అటు తర్వాత ఈ కేసును రాష్ట్ర ప్రభుత్వం సీబీఐకి అప్పజెప్పింది. ఆ తర్వాతే కులదీప్‌ సెంగార్‌ను అరెస్టు చేశారు. ఈలోగా బాధితురాలి బాబాయ్‌పై తప్పుడు కేసులుపెట్టి జైలుకు పంపారు. ఉన్నావ్‌ ఉదంతం మన దేశంలో రాజ్యాంగమూ, చట్టమూ ఉన్నాయా అన్న సందేహాన్ని కలిగించింది. ఉన్నావ్‌ బాధితురాలు ఆ ఉదంతం జరిగేనాటికి మైనర్‌. 2012లో వచ్చిన పోక్సో చట్టం కఠినమైనది. మొన్న జూలైలో సవరణలు చేసి దాన్ని మరింత కఠినంగా మార్చి నేరగాళ్లకు ఉరిశిక్ష పడే నిబంధన తీసుకొచ్చారు. కానీ 2017లో ఆ చట్టం బాధితురాలికి ఏమాత్రం ఉపయోగపడలేదు. ఆ చట్టం ఉన్నా అది తమకు తెలియనట్టు, అసలు లేనట్టు పోలీసులు ప్రవర్తించారు. మన దగ్గరున్న సమస్య అదే. నేరగాళ్లు సాధారణ వ్యక్తులైతే ఒకలా, రాజకీయ పలుకుబడి గలవారైతే మరోలా వ్యవహరిస్తుండటం రివాజుగా మారింది. ఉన్నావ్‌లో అది పరాకాష్టకు చేరింది. మొన్న జూలైలో న్యాయస్థానంలో జరిగే విచారణలో పాల్గొనడానికి బాధితురాలి కుటుంబం కారులో వెళ్తుండగా ఒక ట్రక్కు దాన్ని ఢీకొట్టింది. ఇందులో ఆమె పిన్ని, మేనత్త మరణించారు. బాధితురాలు, న్యాయవాది గాయపడ్డారు. ఈ ఉదంతం తర్వాత బాధితురాలు నేరుగా అప్పటి సుప్రీంకోర్టు ప్రధాన న్యాయ మూర్తి రంజన్‌ గొగోయ్‌కి లేఖ రాశాక ఆయన జోక్యం చేసుకుని ఇందుకు సంబంధించిన కేసుల న్నిటినీ లక్నో న్యాయస్థానం నుంచి ఢిల్లీకి మార్చారు. రోజువారీ విచారించాలని, 45 రోజుల్లో పూర్తి చేయాలని నిర్దేశించారు. అటు తర్వాతే బీజేపీ సెంగార్‌ను పార్టీ నుంచి బహిష్కరించింది.  నేరారోపణలొచ్చిన వ్యక్తి అధికార పక్ష నాయకుడైతే అధికార యంత్రాంగాన్ని కదిలించడం ఎంత కష్టమో, ఎంత ప్రాణాంతకమో ఉన్నావ్‌ బాధితురాలు, ఆమె కుటుంబం పడిన కష్టాలు గమనిస్తే బోధపడుతుంది. సెంగార్‌ ఆ రాష్ట్రంలోని ప్రధాన పార్టీలన్నిటిలోనూ పనిచేశాడు. ఎక్కడున్నా ఆయనపై ఆరోపణలు తరచు వస్తూనే ఉన్నాయి. బీజేపీలో చేరకముందు ఆయన బీఎస్పీ, సమాజ్‌ వాదీ పార్టీల్లో పనిచేశాడు.  కానీ ఆయన ఓట్లు సాధించిపెట్టే బలమైన నాయకుడు గనుక ఏ పార్టీ అధికారంలో ఉన్నా ఆయన అరాచకాలపై ఎవరూ నోరెత్తలేదు. దేశంలో, మరీ ముఖ్యంగా ఉత్తరా దిలో ఇలాంటివారే నాయకులుగా చలామణి అవుతున్నారు. ఉన్నావ్‌ బాధితురాలు రెండేళ్లపాటు ఒంటరి పోరు చేయాల్సి రావడం ఇందువల్లే. నేరం జరిగినప్పుడు వెంటవెంటనే వ్యవస్థలు కదలకపోయినా, ఆ నేరానికి తగిన శిక్ష పడకపోయినా సమాజంలో మరింతమంది నేరగాళ్లు పుట్టుకొస్తారు. ఏం చేసినా తమకేమీ కాదన్న ధైర్యంతో బరితెగిస్తారు. కనుక చట్టాలు కఠినంగా ఉండటం మాత్రమే సరిపోదు. అవి సత్వరం రంగంలోకి దిగాలి. అప్పుడే అందరిలోనూ చట్టాలంటే భయం ఏర్పడుతుంది. నిర్భయ ఉదంతం జరిగాక నియమించిన జస్టిస్‌ జేఎస్‌ వర్మ కమిటీ ఒక విలువైన మాట చెప్పింది. సమాజంలో నేరాలు అధికంగా అణగారిన వర్గాలు, మహిళలు, పిల్లలపైనే జరుగుతాయని, అందువల్ల వారి రక్షణకు ఉద్దేశించిన విభాగాలు ఎలా పనిచేస్తున్నాయో ఎప్పటి కప్పుడు తనిఖీలు నిర్వహిస్తుండాలని ఆ కమిటీ తెలిపింది. ఏ అధికారి అయినా, కింది స్థాయి సిబ్బంది అయినా అలసత్వం ప్రదర్శిస్తున్నట్టు తేలితే తక్షణం కఠిన చర్యలు తీసుకోవాలని సూచిం చింది. ఉన్నావ్‌ ఉదంతం దేశంలోని అన్ని ప్రభుత్వాలకూ గుణపాఠం కావాలి. చట్టాలు సమర్థ వంతంగా పనిచేసేలా, వ్యవస్థలు సత్వరం కదిలేలా తీర్చిదిద్దాలి. అప్పుడు మాత్రమే చట్టాలంటే భయభక్తులు ఏర్పడతాయి.

సాక్షి, న్యూఢిల్లీ : ఇదో చిత్రమైన కేసు. చచ్చి, బతికిన ఓ ఖైదీ దాఖలు చేసిన పిటిషన్‌తో యావత్‌ దేశం దృష్టికి వచ్చిన కేసు. తనకు విధించిన యావజ్జీవ శిక్ష తన చావుతోనే ముగిసిందని, తనను తక్షణమే విడుదల చేయాలంటూ ఖైదీ వాదించిన కేసు. ఈ వాదనతోటి కోర్టు అంగీకరిస్తుందా, లేదా? అంటూ తీర్పు కోసం దేశ ప్రజలు ఉత్కంఠతో ఎదురు చూసిన కేసు.....చివరకు ఏమైందీ?  అమెరికా, అయోవా రాష్ట్రంలోని పెనిటెన్చరీ జైలులో హత్యానేరం కింద యావజ్జీవ కారాగారా శిక్ష అనుభవిస్తున్న బెంజామిన్‌ శ్రైబర్‌ ఓ రోజు హఠాత్తుగా అపస్మారక స్థితిలోకి వెళ్లారు. జైలు అధికారులు వెంటనే అతన్ని ఆస్పత్రికి తరలించారు. అతన్ని పరీక్షించిన ఆస్పత్రి అధికారులు పెదవి విరిచారు. ‘లాభం లేదు, చనిపోయాడు’ అన్నారు. అంతలోనే ఖైదీ గుండె కొట్టుకోవడం గమనించారు. వైద్య చికిత్సల కోసం అతడిని ఆపరేషన్‌ థియేటర్‌లోకి తరలించారు. తనకు ‘పునర్జీవ చికిత్స’లు చేయరాదంటూ అంతకు కొన్నేళ్ల ముందే బెంజామిన్‌ ఓ పత్రం మీద సంతకం చేసి ఉన్నారు. బతికే అవకాశం లేదనుకున్న రోగులకు నరాల్లోకి కొన్ని రకాల రసాయనాలను పంపించడాన్ని ‘పునర్జీవ చికిత్స’లుగా వ్యవహరిస్తారు.  బెంజామిన్‌ అపస్మారక స్థితిలోనే ఉండడంతో టెక్సాస్‌లో ఉన్న అతని సోదరుడిని పిలిపించి రోగి పరిస్థితిని వివరించారు. కిడ్నీ నిండా రాళ్లు పేరుకు పోయాయని, పునర్జీవ చికిత్స ద్వారా ఆయన్ని స్ప్రహలోకి వస్తే ఆపరేషన్‌ చేయవచ్చని చెప్పారు. ‘బెంజామిన్‌కు ఏమైనా బాధ కలుగుతుంటే అందుకు మందులివ్వండి.  లేదంటే అలాగే వదిలేయండి’ అని చెప్పడాన్ని అనుమతిగా తీసుకున్న వైద్యులు అన్ని చికిత్సలు చేసి బెంజామిన్‌ను బతికించారు. ఆస్పత్రి నుంచి డిశ్చార్జి చేయగానే బెంజామిన్‌ జైలు అధికారులు తిరిగి జైలుకు తీసుకెళ్లారు. 1997లో ఓ దారుణ హత్య కేసులో బెంజామిన్‌కు ఒక్క రోజు పెరోల్‌ కూడా దొరకని యావజ్జీవ కారగార శిక్ష పడింది. 2015, మార్చి నెలలో అపస్మారక స్థితిలోకి వెళ్లి ఆస్పత్రి పాలయ్యారు. తిరిగి జైలుకొచ్చాక తాను చావుదాకా వెళ్లి తిరిగి వచ్చినట్లు బెంజామిన్‌కు తెల్సింది. 2018, ఏప్రిల్‌ నెలలో జిల్లా కోర్టులో బెంజామిన్‌ ఓ చిత్రమైన పిటిషన్‌ను దాఖలు చేశారు. తనకు విధించిందీ యావజ్జీవ కారాగార శిక్ష కనుక, తన చావుతో అది ముగుస్తుందని, తాను ఆస్పత్రిలో చనిపోయినప్పుడే అది ముగిసిపోయిందని, అనవసరంగా నాలుగేళ్లు అదనంగా తనను జైలులో ఉంచారంటూ కేసు వాదించారు. అందుకు సంబంధించి ఆస్పత్రి రికార్డుల కాపీలను కూడా సమర్పించారు. వాదోపవాదాలు విన్న తర్వాత కేసులో జీవం లేదని, అస్సలు పరిశీలనార్హం కూడా కాదంటూ జిల్లా జడ్జీ తీర్పు చెప్పారు. దాంతో తీర్పును సవాల్‌ చేస్తూ బెంజామిన్‌ న్యాయవాది అయోవాలోని అప్పీళ్ల కోర్టులో పిటిషన్‌ దాఖలు చేశారు. దీనిపై మొన్న బుధవారం నాడు అప్పీళ్ల కోర్టు తీర్పు చెప్పింది.  ‘యావజ్జీవ కారాగార శిక్ష అంటే డాక్టరిచ్చే డెత్‌ సర్టిఫికెట్‌తో ముగిసేది కాదు. బతికున్నంత కాలం జైలులో ఉంచడమే యావజ్జీవ కారాగార శిక్ష. పైగా నీవు బతికి లేకుంటే కోర్టుకు ఎలా వచ్చావు?’అంటూ జడ్జీ అమంద పాటర్‌ఫీల్డ్‌ కేసును కొట్టివేశారు. ‘పునరుజ్జీవ చికిత్స’ వద్దంటూ తన క్లైంట్‌ సంతకం చేశాక ఎలా చేస్తారని, అందుకు నష్ట పరిహారం చెల్లించాలంటూ దాఖలు చేసిన అనుబంధ పిటిషన్‌ గురించి బెంజామిన్‌ న్యాయవాది ప్రశ్నించగా, జిల్లా కోర్టు ఆ అంశాన్ని ప్రస్తావించలేదు కనుక, తాము పరిగణలోకి తీసుకోలేదని జడ్జీ స్పష్టం చేశారు. 

లండన్‌: తన భార్యతో వివాహేతర సంబంధం ఉందని అనుమానించిన ఓ పాకిస్తానీ, హైదరాబాద్‌కు చెందిన వ్యక్తిని కత్తితో పొడిచి చంపాడు. ఈ కేసులో పాకిస్తాన్, యూకే పౌరసత్వం కలిగిన పెర్విజ్‌ (27)కు లండన్‌లోని క్రౌన్‌ కోర్టు యావజ్జీవ కారాగార శిక్ష విధించింది. పెరోల్‌ దరఖాస్తు చేసుకోవడానికి ముందు కనీసం 22 సంవత్సరాల శిక్ష అనుభవించాలని కోర్టు స్పష్టం చేసింది. పదునైన ఆయుధాన్ని కలిగి ఉన్నందుకు మరో 18 నెలల శిక్ష కూడా విధించింది. యావజ్జీవ శిక్షతో పాటే దీన్ని కూడా అనుభవించాలని పేర్కొంది. ‘మీ భార్య, కుటుంబ సభ్యులు, మరణించిన మొహమ్మద్‌లు నువ్వు తప్పుగా అర్థం చేసుకుంటున్నావని ఎంత చెప్పినా వినలేదు’ అని తీర్పు సందర్భంగా కోర్టు వ్యాఖ్యానించింది. ఈ ఏడాది మేలో ప్రజలు చూస్తుండగానే పెర్విజ్‌ హైదరాబాద్‌కు చెందిన తన సహోద్యోగి నదీమ్‌ ఉద్దీన్‌ హమీద్‌ మొహమ్మద్‌ (24)ను లండన్‌కు సమీపంలో పొడిని చంపాడు. మొహమ్మద్‌ చనిపోయే నాటికి అతడి భార్య అఫ్సా ఎనిమిది నెలల గర్భంతో ఉంది. ఎంతో మంచి భవిష్యత్తు ఉన్న మొహమ్మద్‌ను కిరాతకంగా చంపాడని మృతుడి కుటుంబం ఆవేదన వ్యక్తం చేసింది. ఆయన మరణం కుటుంబానికి తీరని లోటని పేర్కొంది.   

సాక్షి, గుంటూరు: ఓ పరువు హత్య కేసులో తల్లిదండ్రులకు జీవిత ఖైదు, రూ.2వేల జరిమానా విధిస్తూ రెండో అదనపు జిల్లా కోర్టు ఇన్‌చార్జి న్యాయమూర్తి ఎల్‌.శ్రీధర్‌ బుధవారం తీర్పు వెలువరించారు. వివరాల్లోకి వెళితే..గుంటూరు నగరంలోని రాజేంద్రనగర్‌ 2వలైనులో పెదనందిపాడు మండలం గోగులమూడి గ్రామానికి చెందిన పచ్చల హరిబాబు, సామ్రాజ్యం దంపతులు నివాసం ఉంటున్నారు. వీరికి దీప్తి(26), శృతి అనే కుమార్తెలున్నారు.  దీప్తి హైదరాబాదులోని హెచ్‌సీఎల్‌లో సాఫ్ట్‌వేర్‌ ఇంజనీరుగా ఉద్యోగం చేస్తుండేది.  అదే కంపెనీలో పశ్చిమ గోదావరి జిల్లా రాజఒమ్మంగి గ్రామానికి చెందిన అనంతపల్లి కిరణ్‌కుమార్‌ ఉద్యోగం చేసేవాడు. ఈ క్రమంలో దీప్తి(26), కిరణ్‌కుమార్‌ ప్రేమించుకున్నారు. 2014 మార్చి నెల 21వ తేదీ దీప్తి, కిరణ్‌ హైదరాబాదులోని ఆర్య సమాజంలో  వివాహం చేసుకున్నారు. ఈ విషయాన్ని తెలుసుకున్న దీప్తి తల్లిదండ్రులు 22వ తేదీ హైదరాబాద్‌కు వెళ్లి  గుంటూరులో సత్యనారాయణ వ్రతాన్ని నిర్వహిస్తామని నమ్మ బలికి, దీప్తిని ఇంటికి తీసుకెళ్లి మంచానికి కట్టేసి చున్నీ మెడకు బిగించి హత్య చేశారు. నేరం రుజువు కావడంతో  హరిబాబు, సామ్రాజ్యం దంపతులకు ఇన్‌చార్జి న్యాయమూర్తి ఎల్‌.శ్రీధర్‌ జీవిత ఖైదు విధిస్తూ తీర్పు చెప్పారు.   

సాక్షి, చెన్నై :  రాష్ట్రంలో వేర్వేరు చోట్ల జరిగిన హత్య, హత్యాయత్నం కేసుల్లో అరెస్టయిన ఇద్దరికి యావజ్జీవ శిక్ష విధిస్తూ బుధవారం కోర్టు ఉత్తర్వులు జారీ చేసింది. వివరాలు.. తిరుప్పూర్‌ జిల్లా తారాపురం పెరియకాళియమ్మన్‌ ఆలయ వీధికి చెందిన గురునాథన్‌ (29). ఇతను తిరుప్పూర్‌లోని ఓ బనియన్‌ సంస్థలో పనిచేస్తున్నాడు. తిరుప్పూర్‌కు చెందిన ప్లస్‌-1 (16 ఏళ్ల) విద్యార్థిని ప్రేమ పేరిట వేధించాడు. ఇందుకు విద్యార్థిని తల్లిదండ్రులు వ్యతిరేకించారు. అలాగే వేరొకరితో వివాహం చెయ్యడానికి ఏర్పాట్లు చేశారు. దీంతో కోపోద్రిక్తుడైన గురునాథన్‌ 2015, సెప్టెంబర్, 14న సాయంత్రం పాఠశాల ముగిశాక.. విద్యార్థినిపై బీర్‌ బాటిల్‌తో దాడిచేశాడు. తీవ్రగాయాలైన విద్యార్థినిని స్థానికులు చికిత్స నిమిత్తం తిరుప్పూర్‌ ప్రభుత్వ ఆస్పత్రికి తరలించారు. పోలీసులు కేసు నమోదు చేసి గురునాథన్‌ని అరెస్టు చేశారు. ఈ కేసు విచారణ తిరుప్పూర్‌ జిల్లా మహిళ కోర్టులో నడుస్తోంది. బుధవారం ఈ కేసుని విచారించిన న్యాయమూర్తి జయంతి గురునాథన్‌కి యావజ్జీవ శిక్ష, రూ.10 వేల జరిమానా విధిస్తూ ఉత్తర్వులు జారీ చేశారు. అల్లుడి హత్యకేసులో మేనమామకు.. నాగై సమీపం వేలాంగన్ని నిరత్తణ మంగలం మేల వీధికి చెందిన జిమ్మిగార్డన్‌ భార్య ఉషా. వీరి కుమారులు రాబర్ట్‌ (12), రాబిన్‌. ఉషా తమ్ముడు అంథోని (25). ఇతను చిన్నప్పటి నుంచే తన అక్క ఇంట్లోనే ఉంటున్నాడు. 2012లో ఉషా సారాయి విక్రయ కేసులో అరెస్టయి తిరువారూర్‌ జైల్లో ఉంది. ఈ స్థితిలో ఇంట్లో ఉన్న రూ.10 వేల నగదు కనిపించలేదని జిమ్మి గార్డన్‌ వెతికాడు. అప్పుడు రాబర్ట్, ఆ నగదుని ఆంథోని మామ తీశాడు అని తెలిపాడు. ఈ క్రమంలో అంథోని ఆ రోజు రాత్రి రాబర్ట్‌ని గొంతు నులిమి హత్యచేశాడు. అనంతరం పోలీసులు కేసు నమోదు చేసి అంథోనిని అరెస్టు చేశారు. ఈ కేసు విచారణ నాగై జిల్లా కోర్టులో నడుస్తోంది. బుధవారం ఈ కేసు విచారణ చేసిన న్యాయమూర్తి పద్మనాభన్‌ అంథోనికి యావజ్జీవ శిక్ష విధిస్తూ ఉత్తర్వులు జారీ చేశారు.

సాక్షి, ముంబై:  దాదాపు 20 ఏళ్ల నాటి కేసులో ముంబై  స్పెషల్‌ కోర్టుసంచలన తీర్పును వెలువరించింది. బ్యాంక్ ఆఫ్ ఇండియా బ్యాంక్‌  మాజీ అధికారితోపాటు మరో ఆరుగురికి జీవిత ఖైదు విధించింది. అంతేకాదు ఈ కేసులో న్యాయవాదికి  మూడేళ్ల జైలు శిక్షను విధించిందని గురువారం విడుదల చేసిన ఒక  అధికారిక ప్రకటన తెలిపింది.  2000 బీఓఐలో చోటు చేసుకున్న 2.91కోట్ల కుంభకోణానికి సంబంధించి కోర్టు ఈ తీర్పును వెలువరించింది.  సీబీఐ అందించిన సమాచారం ప్రకారం, 2000లో స్విఫ్ట్ సేవల కింద బ్రాంచ్ అధికారులతో కుమ్మక్కై, నకిలీ పత్రాలతో ఆహుజా అతని భాగస్వాములు కలిసి  2.50 కోట్ల రూపాయల మేర లోన్‌ తీసుకున్నారు. రుణాలు తిరిగి చెల్లించకపోవడంతో 2004 ప్రారంభంలో ఎన్‌పీఏగా ప్రకటించబడింది. దీంతో బ్యాంకు నష్టం మొత్తం రూ. 2.91 కోట్లకు చేరింది. 2004లో కేసు నమోదు చేసిన సీబీఐ విచారణ అనంతరం  నవంబరు 2005లో  చార్జిషీట్ దాఖలు చేసింది. బ్యాంకుకు చెందిన అప్పటి అసిస్టెంట్ జనరల్ మేనేజర్ భగవాన్జీ డి.జోషి,  బ్యాంకులో రుణం తీసుకున్న 5గురు వ్యాపారవేత్తలు - మనోహర్‌లాల్ ఆహుజా, అతని కుమారుడు అమిత్ ఆహుజా, మహేష్ బోరా, సందేష్ రామచంద్ర నాగే, జి.కె.శర్మ, శాంతిలాల్ చౌహాన్ తోపాటు న్యాయవాది యూనస్‌పై వివిధ సెక్షన్ల కింద కేసు ఫైల్‌ చేసింది.  దీనిపై ముంబైలోని ప్రత్యేక  సీబీఐ కోర్టులో విచారణ అనంతరం ఈ తీర్పునిచ్చింది.  ఈ తీర్పు చాలా అరుదైనది. ఒక మైలురాయిలాంటిదని అధికారులు  భావిస్తున్నారు.   అంతేకాదు ఆహుజా తండ్రీకొడుకులిద్దరికి చెరి రూ. 50 లక్షలు, బొహ్రా రూ. 3లక్షలు, నాగే రూ. 60వేల, చౌహాన్ రూ .50వేలు జోషి రూ. లక్ష, న్యాయవాదికి  రూ .3 వేల జరిమానా విధించడం గమనార్హం. కాగా ఈ కేసులో ప్రధాన నిందితుడైన శర్మ ఆగస్టు ,2008 లో చనిపోయారు. 

న్యూఢిల్లీ/గువాహటి: అస్సాంలో 1994లో జరిగిన సంచలన నకిలీ ఎన్‌కౌంటర్‌ కేసులో ఓ ఆర్మీ మేజర్‌ జనరల్, ఇద్దరు కల్నల్‌లు సహా ఏడుగురికి జీవిత ఖైదు పడింది. డిబ్రూగఢ్‌ జిల్లాలోని దిన్జన్‌లో సైనిక కోర్టు విచారణ అనంతరం ఈ తీర్పు వెలువరించింది. మేజర్‌ జనరల్‌ ఏకే లాల్, కల్నల్‌లు థామస్‌ మాథ్యూ, ఆర్‌ఎస్‌ సిబిరెన్‌లతోపాటు జూనియర్‌ కమిషన్డ్, నాన్‌ కమిషన్డ్‌ అధికారులుగా ఉన్న దిలీప్‌ సింగ్, జగ్‌దేవ్‌ సింగ్, అల్బీందర్‌ సింగ్, శివేందర్‌సింగ్‌లను ఆర్మీ కోర్టు ఈ కేసులో దోషులుగా తేల్చింది. 1994 ఫిబ్రవరి 23న ఆల్‌ అస్సాం స్టూడెంట్స్‌ యూనియన్‌ (ఏఏఎస్‌యు) కార్యకర్తలు ప్రవీణ్‌ సోనోవాల్, ప్రదీప్‌ దత్తా, దేవాజిత్‌ విశ్వాస్, అఖిల్‌ సోనోవాల్, భాబెన్‌ మోరన్‌లను దోషులు అపహరించి, నకిలీ ఎన్‌కౌంటర్‌ చేసి చంపారు. డంగారి ఫేక్‌ ఎన్‌కౌంటర్‌గా ఈ కేసు పేరుమోసింది. ఈ ఎన్‌కౌంటర్‌కు వ్యతిరేకంగా నాటి ఏఏఎస్‌యు అధ్యక్షుడు, ప్రస్తుత బీజేపీ నేత జగదీశ్‌ భుయాన్‌ ఒక్కరే హైకోర్టులో పోరాడారు. ఈ కేసులో సీబీఐ విచారణ జరపాలని కోర్టు ఆదేశించింది. కొద్ది రోజులు సీబీఐ దర్యాప్తు జరిగిన అనంతరం ఈ కేసును తాము మిలిటరీ చట్టం కింద విచారిస్తామంటూ కోర్టు అనుమతిని ఆర్మీ పొందింది. ఇప్పుడు ఏడుగురికి జీవితఖైదు విధించడంపై భుయాన్‌ స్పందిస్తూ ‘24 ఏళ్లలో ఒక్కసారి కూడా భారత ప్రజాస్వామ్యం, న్యాయవ్యవస్థ, సైన్యంపై నేను నమ్మకం కోల్పోలేదు. ఆర్మీ తన సొంత సిబ్బందికే గుణపాఠం నేర్పే శిక్ష వేసింది’ అని అన్నారు. ఆర్మీ చీఫ్‌ బిపిన్‌ రావత్‌ మాట్లాడుతూ తప్పుచేసే సైనికులపై తాము కఠిన చర్యలు తీసుకుంటామని చెప్పారు. ఈ తీర్పును కోల్‌కతాలోని తూర్పు ఆర్మీ కమాండ్, ఢిల్లీలోని ఆర్మీ ప్రధాన కార్యాలయం ఆమోదించాల్సి ఉంది. ఇందుకు మూడు నెలల సమయం పట్టొచ్చు. దోషులు సుప్రీంకోర్టులో అప్పీల్‌ చేసుకోవచ్చు. దోషుల్లో ఒకరైన ఏకే లాల్‌ తనతో అసభ్యంగా ప్రవర్తించారని సహోద్యోగిని 2007లో ఫిర్యాదు చేయడంతో ఆర్మీ విచారణ అనంతరం 2010లోనే ఆయనను ఉద్యోగం నుంచి తొలగించారు.

అహ్మదాబాద్‌: గుజరాత్‌ అల్లర్లకు కారణమైన గోద్రా రైలు దహనం కేసులో సిట్‌ ప్రత్యేక న్యాయస్థానం సోమవారం మరో ఇద్దరికి జీవిత ఖైదు విధించింది. ఈ కేసులో నిందితులుగా ఉన్న మరో ముగ్గురిని నిర్దోషులుగా ప్రకటించింది. 2002 ఫిబ్రవరి 27న గోద్రా రైల్వే స్టేషన్‌ సమీపంలో అల్లరిమూకలు సబర్మతి ఎక్స్‌ప్రెస్‌కు నిప్పుపెట్టిన సంగతి తెలిసిందే. ఈ ప్రమాదంలో రెండు బోగీలు పూర్తిగా దగ్దమవ్వగా.. అందులో ప్రయాణిస్తున్న 59 మంది కరసేవకులు సజీవ దహనం అయ్యారు. దీంతో గుజరాత్‌ వ్యాప్తంగా ఒక్కసారిగా మత ఘర్షణలు చెలరేగాయి. రాష్ట్ర వ్యాప్తంగా జరిగిన దాడుల్లో దాదాపు వెయ్యి మంది మరణించారు. ఈ కేసులో సుదీర్ఘ కాలం విచారణ చేపట్టిన సిట్‌ ప్రత్యేక న్యాయస్థానం 2011 మార్చి 1న ఈ కేసులో 31 మందిని దోషులుగా తేల్చింది. వారిలో 11 మందికి మరణశిక్ష, 20 మందికి జీవిత ఖైదు విధిస్తూ తీర్పు వెలువరించింది. దీంతో వారు ప్రత్యేక న్యాయస్థానం తీర్పును గుజరాత్‌ హైకోర్టులో సవాలు చేశారు. దీనిపై విచారణ జరిపిన గుజరాత్‌ హైకోర్టు 2017 అక్టోబర్‌లో మరణశిక్ష ఖరారైన 11 మంది శిక్షను జీవిత ఖైదుగా మారుస్తూ తీర్పు వెలువరించింది. మిగతా 20 మందికి ప్రత్యేక న్యాయస్థానం విధించిన జీవిత ఖైదును హైకోర్టు సమర్ధించింది. కాగా ఈ కేసులో నిందితులుగా ఉన్న ఫరూఖ్‌ బానా, ఇమ్రాన్‌ షేరు, హుస్సేన్‌ సులేమాన్‌, ఫరూఖ్‌ ధాంతియా, కసమ్‌ బమేదీలను పోలీసులు 2015-16 మధ్య కాలంలో అరెస్ట్‌ చేశారు. వీరిలో ఫరూఖ్‌ బానా, ఇమ్రాన్‌ షేరులకు కోర్టు జీవిత ఖైదు విధించగా, మరో ముగ్గురిని నిర్దోషులుగా ప్రకటించింది. ఈ కేసులో మరో 8 మంది నిందితులు ఇంకా పరారీలోనే ఉన్నారు.

ముజఫర్‌నగర్‌: పదేళ్ల బాలికపై అత్యాచారం చేసిన కేసులో ఓ నిందితుడికి ఉత్తర్‌ప్రదేశ్‌లోని ముజఫర్‌నగర్‌ కోర్టు జీవిత ఖైదు విధించింది. అలాగే రూ.25 వేల జరిమానా కూడా విధించింది. 2014 సంవత్సరం జూలై 8న కిరణ్‌పాల్‌ అనే వ్యక్తి ముజఫర్‌నగర్‌ జిల్లా పంచెండకాలా గ్రామానికి చెందిన 10 ఏళ్ల బాలికను ఇంట్లో నుంచి ఎత్తుకు వచ్చాడు. అనంతరం స్కూల్‌ వద్ద అత్యాచారం చేసి పారిపోయాడు. స్కూల్‌ వద్ద అపస్మారక స్థితిలో ఉన్న బాలికను స్థానికులు ఆసుపత్రికి తరలించి పోలీసులకు సమాచారం అందించారు. ఈ ఘటనపై విచారణ చేపట్టిన పోలీసులు తర్వాత నిందితుడు కిరణ్‌పాల్‌ను అరెస్ట్‌ చేశారు. నిందితునిపై భారత శిక్షా స్మృతిలోని వివిధ సెక్షన్లతో పాటు పోక్సో చట్టం కింద కేసులు నమోదు చేశారు. విచారణలో నేరం రుజువు కావడంతో శుక్రవారం తుదితీర్పు వెలువడింది. 

కన్సాస్‌, అమెరికా : హైదరాబాద్‌ టెకీ శ్రీనివాస్‌ కూచిభొట్ల(33) హంతకుడికి అమెరికా కోర్టు జీవిత ఖైదు విధించింది. స్నేహితుడితో కలసి బార్‌లో ఉన్న శ్రీనివాస్‌పై అమెరికా నేవీ మాజీ సైనికుడు ఆడమ్‌ ప్యురిన్‌టన్‌(52) ‘నా దేశం నుంచి వెళ్లిపోండి’అంటూ కాల్పులకు తెగబడిన విషయం తెల్సిందే. ఈ ఘటనలో తీవ్రంగా గాయపడిన కూచిభొట్ల చికిత్సపొందుతూ ఆసుపత్రిలో ప్రాణాలు వదిలారు. శ్రీనివాస్‌తో పాటు బార్‌లో ఉన్న అలోక్‌ మాదసాని గాయాలతో బయటపడ్డారు. వీరిపై దాడిని అడ్డుకునేందుకు వచ్చిన ఇయాన్‌ గ్రిలట్‌ అనే వ్యక్తికి కూడా బుల్లెట్‌ గాయాలయ్యాయి. శ్రీనివాస్‌ హత్యపై అంతర్జాతీయ స్థాయిలో ఆగ్రహావేశాలు వ్యక్తం అయ్యాయి. ఈ ఏడాది జనవరిలో కూచిభొట్ల భార్య సునయనను అమెరికా అధ్యక్షుడు డొనాల్డ్‌ ట్రంప్‌ తొలి స్టేట్‌ ఆఫ్‌ యూనియన్‌ ప్రసంగానికి ఆహ్వానించారు. ఈ వేదికపై నుంచి ట్రంప్‌ కూచిభొట్లపై జరిగిన దాడిని ఖండించారు. ప్యూరింగ్‌టన్‌ శిక్షపై మాట్లాడిన న్యాయవాదులు 50 ఏళ్ల తర్వాత అతనికి పెరోల్‌పై బయటకు వచ్చే అవకాశం ఉంటుందని చెప్పారు. ఆడమ్‌కు జీవిత ఖైదు విధించడాన్ని శ్రీనివాస్‌ భార్య సునయన ఆహ్వానించదగ్గ విషయంగా పేర్కొన్నారు. విదేశీయులపై దాడులకు పాల్పడేవారికి కఠిన శిక్షలు విధించాలని అన్నారు.

జోధ్‌పూర్‌ : 16 ఏళ్ల బాలికపై అత్యాచారానికి పాల్పడిన కేసులో స్వయం ప్రకటిత బాబా ఆసారాం బాపును దోషిగా  తేల్చుతూ జోధ్‌పూర్‌ ట్రయిల్‌ కోర్టు జీవిత ఖైదు విధించిన విషయం తెలిసిందే. ఈ కేసు విచారణ సందర్భంగా సాక్షి, ఆసారాం అనుచరుడు రాహుల్‌ సచార్‌ పలు సంచలనాత్మక విషయాలు కోర్టుకు వెల్లడించాడు. ఆసారాం ఎంతో అమ్మాయిలపై అత్యాచారానికి పాల్పడటం తాను స్వయంగా చూశానని తెలిపాడు. మీరిలా ఎందుకు చేస్తున్నారంటూ ఆసారాంకు లేఖలు రాయగా.. అమ్మాయిలను లోబరచుకోవడం, వారిపై అత్యాచారం చేయడం వల్ల బ్రహ్మయోగులకు పాపం అంటుకోదంటూ ఆసారాం తన నోరు మూయించే ప్రయత్నం చేశాడని పేర్కొన్నాడు. ఆ సిగ్నల్‌ వారి ముగ్గురికీ తెలుసు.. ముగ్గురు అమ్మాయిలతో కలిసి ఆసారాం ఆశ్రమమంతా తిరిగేవాడని.. తనకు నచ్చిన అమ్మాయి కనపడగానే.. ఆ అమ్మాయిపై టార్చ్‌లైట్‌ వేయడం ద్వారా వారికి సిగ్నల్‌ ఇచ్చేవాడని రాహుల్‌ పేర్కొన్నాడు. వెంటనే ఆ ముగ్గురు అమ్మాయిలు ఆసారాంకు నచ్చిన అమ్మాయిని ఎలాగోలా మభ్యపెట్టి కుటియా(ఆశ్రమంలోని గది)కి తీసుకు వచ్చేవారని తెలిపాడు. అదే విధంగా ఒకరోజు సాయంత్రం వీరి కదలికల్ని గమనించిన తాను గోడపైకి ఎక్కి చూడగా ఆసారాం నిజ స్వరూపం తెలుసుకున్నానని రాహుల్‌ వాపోయాడు. తను చూసింది నిజం కాదని భావించానని.. అందుకే స్వామీజీ దగ్గరికి వెళ్లి.. మీలాంటి వారికి ఇలాంటి కోరికలు ఉండవు కదా అని అడిగానన్నాడు. తన ప్రశ్నలతో విసుగెత్తిన ఆసారాం చివరకు తనను బయటికి గెంటేశాడని రాహుల్‌ సచార్‌ పేర్కొన్నాడు. ఆసారాంకు డ్రగ్స్‌ తీసుకునే అలవాటు కూడా ఉందని రాహుల్‌ కోర్టుకు తెలిపాడు. అంతేకాదు ఈ కేసులో సాక్షులపైన ఆసారాం బాపూ ప్రైవేట్‌ సైన్యం బెదిరింపులు, దాడులకు దిగిందని ఆవేదన వ్యక్తం చేశాడు.

న్యూఢిల్లీ: 17 ఏళ్ల కిందట భార్యను హతమార్చిన ప్రముఖ టీవీ యాంకర్‌ సుహైబ్‌ ఇల్యాసికి ఢిల్లీ కోర్టు యావజ్జీవ కారాగార శిక్ష విధించింది. ఒకప్పుడు పాపులర్‌ అయిన 'ఇండియాస్‌ మోస్ట్‌ వాంటెడ్‌' టీవీ క్రైమ్‌ షోకు సుహైబ్‌ హోస్ట్‌గా వ్యవహరించాడు. సుహైబ్‌ భార్య అంజు ఇల్యాసి 2000 సంవత్సరం జనవరి 11న కత్తిపోట్లతో ఆస్పత్రిలో చేరి ప్రాణాలు విడిచింది. మొదట ఆమెది ఆత్మహత్యగా భావించారు. కానీ అంజు తల్లి, సోదరి ఆమెది ఆత్మహత్య కాదని, భర్త ఆమెను ఆత్మహత్య చేసుకునేలా ప్రేరేపించాడని డివిజనల్‌ మేజిస్ట్రేట్‌ ముందు వాంగ్మూలం ఇచ్చారు. కట్నం కోసం అంజును నిత్యం సుహైబ్‌ వేధించేవాడని తెలిపారు. ఈ ఆరోపణలను సుహైబ్‌ తిరస్కరించారు. అతనిపై విచారణకు మొదట ట్రయల్‌ కోర్టు నిరాకరించగా.. అనంతరం ఢిల్లీ హైకోర్టు ఆదేశాలు ఇవ్వడంతో విచారణ మలుపు తిరిగింది. భార్య అంజు చనిపోయిన సమయంలో 'మోస్ట్‌ వాంటెడ్‌ షో' హోస్ట్‌గా, నిర్మాతగా సుహైబ్‌ టాప్‌ పొజిషన్‌లో ఉన్నాడు.


 విజయనగరం: భార్యను హత మార్చాడన్న కేసులో అభియోగం రుజువు కావడంతో ఎస్‌.కోట మండలం మూలబొడ్డవర గ్రామానికి చెందిన సుకురు భీమరాజుకు యావజ్జీవ కారాగార శిక్ష విధిస్తూ మూడవ అదనపు జిల్లా న్యాయమూర్తి బి.శ్రీనివాసరావు బుధవారం తీర్పు చెప్పారు.
 
 ప్రాసిక్యూషన్‌ కథనం ప్రకారం... భీమరాజు దొరపాలెం గ్రామానికి చెందిన అచ్చయ్యమ్మను పదహారేళ్ల కిందట వివాహం చేసుకున్నాడు. వారికి తులసీ అనే కుమార్తె ఉంది. సుమారు ఆరేళ్ల పాటు వారి వైవాహిక జీవితం సజావుగా సాగింది. అప్పటి నుంచి వ్యసనాలకు బానిసైన భీమరాజు తరచూ భార్యతో తగాదా పడేవాడు.
  
 పుట్టింటి నుంచి డబ్బులు తెమ్మని భార్యను వేధించ సాగాడు. ఆమె అందుకు అంగీకరించకపోవడంతో ఆమెను అడ్డు తొలగించుకోవాలని నిర్ణయించుకున్నాడు. 2016 ఆగస్టు 26న ఇంటి సమీపంలో రోడ్డు మీద తన భార్యను కత్తితో పొడిచి హతమార్చాడు. ఈ మేరకు మృతురాలి సమీప బంధువు ఇచ్చిన ఫిర్యాదు మేరకు ఎస్‌.కోట పోలీసులు కేసు నమోదు చేశారు. అదే రోజు రాత్రి భీమరాజు ఎస్‌.కోట పోలీస్‌స్టేషన్‌లో లొంగిపోయాడు. ప్రాసిక్యూషన్‌ సరైన సాక్ష్యాధారాలతో కేసు రుజువు చేసినందున న్యాయమూర్తి పై విధంగా తీర్పు చెప్పారు. ప్రాసిక్యూషన్‌ తరఫున ఏపీపీ పి.అప్పలనాయుడు వాదించారు.
  


 రంగారెడ్డి: డబ్బు కోసం భార్యను హత్య చేసిన భర్తకు జిల్లా 2వ అదనపు డిస్ట్రిక్ట్ అండ్ సెషన్స్ కోర్టు జీవిత ఖైదు విధించింది. నిందితుడికి జీవిత ఖైదుతో పాటు రూ.6వేల జరిమానా విధిస్తూ న్యాయమూర్తి గాంధీ గురువారం తీర్పునిచ్చారు. పబ్లిక్ ప్రాసిక్యూటర్ రజని కథనం ప్రకారం.. కాప్రా యాదవబస్తీలో నివాసముండే జీనత్ యాస్మిన్, ఖాదర్‌ వలీ దంపతులకు ఇద్దరు పిల్లలున్నారు. ఖాదర్‌ వలీ మద్యానికి బానిసై భార్యను డబ్బులు తెమ్మంటూ శారీరకంగా, మానసికంగా వేధిస్తున్నాడు. 
  
 ఈ క్రమంలోనే 2014 మే 22వ తేదీన రూ.10 వేలు ఇవ్వమని భార్య జీనత్ యాస్మిన్‌ను అడుగగా ఆమె తిరస్కరించింది. దీంతో కోపం తెచ్చుకున్న ఖాదర్‌ వలీ ఇంట్లో ఉన్న కిరోసిన్ తీసుకుని భార్యపై పోసి నిప్పంటించాడు. తీవ్రంగా గాయపడిన జీనత్ యాస్మిన్ ఆసుపత్రిలో చికిత్స పొందుతూ మృతి చెందింది.
  
 యాస్మిన్ మరణ వాంగ్మూలం మేరకు కుషాయిగూడ పోలీసులు నిందితునిపై కేసు నమోదు చేసి రిమాండ్‌కు తరలించి కోర్టులో అభియోగ పత్రం నమోదు చేశారు. కేసు సాక్ష్యాధారాలను పరిశీలించిన 2వ అదనపు డిస్ట్రిక్ట్ అండ్ సెషన్స్ జడ్జీ గాంధీ ఖాదర్ వలీకు జీవిత ఖైదు విధిస్తూ తీర్పు చెప్పారు.


 ముంబై: సుదీర్ఘ విచారణ తర్వాత ఔరంగాబాద్ ఆయుధాల అక్రమ రవాణా కేసులో ఉగ్రవాది  సయ్యద్ జుబేదిన్ అన్సారీ అలియాస్ అబూ జుందాల్ కు జీవితఖైదు పడింది. గత వారమే జుందాల్, అతని గ్యాంగ్ ను దోషులుగా నిర్ధారించిన మహారాష్ట్ర కంట్రోల్ ఆఫ్ ఆర్గనైజ్డ్ క్రైమ్ యాక్ట్ (మోకా) కోర్టు మంగళవారం శిక్షలు ఖరారుచేసింది. అబూ జిందాల్ కాకుండా మరో ఆరుగురు దోషులకు జీవితఖైదు విధిస్తున్నట్లు న్యాయమూర్తి ప్రకటించారు. కాగా, జుందాల్ పై 26/11 ముంబై దాడుల కేసు విచారణలో ఉంది. ఔరంగాబాద్ ఆయుధాల అక్రమరవాణా కేసులో మొత్తం 12 మంది దోషులుగా తేలారు. వారిలో అబూ జిందాల్ సహా మరో ఏడుగురికి జీవిత ఖైదు పడింది. ఇద్దరికి 14 ఏళ్లు, ముగ్గురికి 8 ఏళ్లు జైలు శిక్షలు పడ్డాయి.  
 
 మోదీ హత్యకు కుట్ర
 2002 గుజరాత్ అల్లర్ల తర్వాత నాటి ముఖ్యమంత్రి నరేంద్ర మోదీని, విశ్వహిందూ పరిషత్ కీలక నేత ప్రవీణ్ తొగాడియానూ హత్య చేసేందుకు అబూ జుందాల్ అండ్ గ్యాంగ్ కుట్రపన్నారని పోలీసులు సాక్ష్యాధారాలతో నిరూపించడంతో శిక్షలు పడ్డాయి. మహారాష్ట్రలోని బీడ్ జిల్లాకు చెందిన జుందాల్.. మాలేగావ్ కేంద్రంగా మోదీపై కుట్రలు పన్నాడు. ప్లానింగ్ లో భాగంగా 2006, మే 8న.. 30 కేజీల ఆర్డీఎక్స్, 10 ఏకే 47 తుపాకులు, 3,200 బులెట్లతో కారులో బయలుదేరిన జుందాల్ బృందాన్ని పోలీసులు అడ్డుకున్నారు. ఆయుధాలు పట్టుబడినప్పటికీ అబూ జుందాల్ మాత్రం తప్పించుకున్నాడు.
 
 ముంబై దాడుల్లో హస్తం
 బంగ్లాదేశ్ కు పారిపోయిన అబూ అక్కణ్నుంచి సౌదీకి, సౌదీ నుంచి పాకస్థాన్ కు వెళ్లాడు. 2008 నవంబర్ 26న లష్కరే తాయిబా ఉగ్రవాదులు బై మారణహోం సృష్టించిన సమయంలో అబూ పాకిస్థాన్ లోనే ఉన్నాడు. ముంబై దాడుల సూత్రధారి, లష్కరే చీఫ్ హఫీజ్ సయీద్ కు అబూ అన్నిరకాలుగా సాయపడ్డాడని దర్యాప్తు బృందాలు నిర్ధారించాయి. 2012లో అనూహ్యంగా సౌదీ అరేబియాలో పోలీసులకు పట్టుబడ్డ అబూ జిందాల్ ను నేరస్తుల అప్పగింత ఒప్పందంలో భాగంగా భారత్ కు తీసుకొచ్చారు.


 గుజరాత్‌లో వింత సంఘటన జరిగింది. ముగ్గురి హత్య కేసులో పోలీసులు 18 మగ సింహాలను అరెస్టుచేసి, తమ కస్టడీలోకి తీసుకున్నారు. ఈ 18 మంది 'నిందితుల' కాలి ముద్రలను తీసుకుని, వాటి ముఖాలను కూడా పరీక్షించి.. అప్పుడు నిజంగానే ఈ సింహాలు ఆ హత్యలు చేశాయో లేదో నిర్ధారించుకుంటారు. ఒకవేళ అవే నిందితులని తెలిస్తే.. వాటికి 'జీవితఖైదు' కూడా విధించే అవకాశం ఉందట. అంటే, దోషిగా తేలిన మగ సింహాన్ని శాశ్వతంగా జూకు పంపేస్తారన్నమాట. మిగిలిన ఏషియాటిక్ సింహాలను అడవుల్లోకి వదిలేస్తారు.
 
 అసలైన దోషి ఏ సింహమో కూడా తమకు తెలిసిందని, అయితే మిగిలిన సింహాల విషయం కూడా తెలిసిన తర్వాతే దాన్ని జూకు తరలిస్తామని అటవీశాఖ అధికారి ఒకరు తెలిపారు. అధికారులు ప్రస్తుతం ఆ సింహాలన్నింటి ప్రవర్తనను కూడా పరిశీలిస్తున్నారని, సాధారణంగా మ్యాన్ ఈటర్లుగా మారినవి మనుషులను చూస్తే వెంటనే రెచ్చిపోతాయని వన్యప్రాణి నిపుణురాలు రుచి దవె తెలిపారు. అటవీ ప్రాంతం బాగా తగ్గిపోవడంతో ఇటీవలి కాలంలో సింహాలు, పులులు, చిరుతపులులు జనావాసాలలోకి వస్తున్నాయి. దాంతో మనుషుల మీద దాడులు కూడా పెరిగిపోతున్నాయి.


 ప్రపంచ వ్యాప్తంగా సంచలనం సృష్టించిన పిల్లలపై లైంగిక దాడి కేసులో దోషిగా తేలిన వ్యక్తికి కోర్టు దాదాపు 25 ఏళ్ల  శిక్ష విధించింది. లైంగిక దాడులకు పాల్పడడమే కాకుండా అఘాయిత్యాలను  ఆ వ్యక్తి చిత్రీకరించేవాడు. అక్కడితో ఆగకుండా చిన్న పిల్లలపై ఎలా లైంగిక దాడి చేయాలో చెబుతూ వాటిని ఆన్లైన్లో అమ్మకానికి కూడా పెట్టాడు. అంతే కాదు ఇప్పుడిప్పుడే అభివృద్ది చెందుతున్న దేశాల్లో పేదరికంలో ఉన్న పిల్లలను ఈ లైంగిక కూపంలోకి దించడం చాలా సులువు అంటూ ఆ వీడియోల్లో సూచనలు కూడా చేసేవాడు. దీంతో యూకేలోని అశ్ఫోర్డ్లోని కెన్ట్ ప్రాంతానికి చెందిన రిచర్డ్ హకిల్(30)దాదాపు తొమ్మిదేళ్లపాటూ మలేసియాలోని కౌలలాంపూర్లో చిన్న పిల్లలపై చేసిన అకృత్యాలు ఒక్కొక్కటిగా బయటకు వచ్చాయి.
 
 వివరాలు.. క్రిస్టియన్ మతాభిమానినని, ఇంగ్లీష్ టీచర్గా తనను తాను పరిచయం చేసుకొని స్థానికులను నమ్మించేవాడు. పేదరికంలో మగ్గుతూ ఆర్థిక పరిస్థితి బాగాలేని దాదాపు 200 మంది చిన్నారుల పై లైంగిక దాడికి పాల్పడ్డాట్టు అతనిపై ఆరోపణలు ఉన్నాయి. చిన్నారుల సంరక్షణ కేంద్రాలు, అనాథ శరణాలయాలను లక్ష్యంగా చేసుకొని ఈ తతంగాన్ని కొనసాగించాడు. 23 మంది చిన్నారులపై 71 సార్లు లైంగిక దాడులకు పాల్పడ్డ కేసులో కోర్టు ముందు హకిల్ తన నేరాలను ఒప్పుకున్నాడు. 2006 నుంచి 2014 వరకు 6 నెలలు నుంచి 12 ఏళ్ల మధ్య వయసున్న చిన్నారులపై జరిపిన లైంగిక దాడుల నేరాలను హకిల్ అంగీకరించాడు.
 
 ఆస్ట్రేలియాలోని ఉన్నతాధికారుల సమాచారంతో హకిల్ను అరెస్ట్ చేయడానికి నేషనల్ క్రైం ఏజెన్సీ బృందం వెళ్లింది. ఆ సమయంలో అతను కుటుంబసభ్యులతో ఉన్నాడు. బెయిల్ పై విడుదలైన అతను ముందుగా నేరాలను తన తల్లి ముందు అంగీకరించాడు. విషయం తెలిసిన తల్లిదండ్రులు వెంటనే పోలీసులను కలిసి జరిగినదంతా వివరించి చెప్పారు. తమ కుమారున్ని అరెస్ట్ చేయడానికి కావల్సిన సాక్షాలను కూడా ఇస్తామని తెలిపారు.అయితే బ్రిటన్ లో మాత్రం కనీసం ఒక్క నేరం కూడా నమోదుకాలేదు. మధ్యతరగతి క్రిస్టియన్ కుటుంబంలో హకిల్ జన్మించాడు.ఎక్కువ సమయం కంప్యూటర్ ముందే గడిపే వాడని అతని కుటుంబసభ్యులు తెలిపారు.
  


 సంగారెడ్డి మున్సిపాలిటీ (మెదక్) : ప్రభుత్వ ఉద్యోగం కోసం తల్లిదండ్రులతో పాటు మేనల్లుడిని సైతం పొట్టనబెట్టుకున్న నిందితుడికి యావజ్జీవ కారగార శిక్షతోపాటు వెయ్యి రూపాయల జరిమానా విధిస్తూ మెదక్ జిల్లా జడ్జి ఎంవీ రమణ నాయుడు తీర్పు చెప్పారు. మెదక్ జిల్లా బీహెచ్‌ఈఎల్ పరిశ్రమలో సుధాకర్ రెడ్డి ఉద్యోగం చేస్తూ టౌన్ షిప్‌లో జీవనం సాగిస్తున్నాడు. ఆయన కుమారుడు ప్రవీణ్‌రెడ్డి చిల్లరిగా తిరుగుతూ అప్రయోజకునిగా మారాడు. ప్రభుత్వ ఉద్యోగం ఉంటే జీవితం సాఫీగా సాగుతుందని స్నేహితులు సలహా ఇచ్చారు. దీంతో ప్రవీణ్ ప్రభుత్వ ఉద్యోగం సంపాదించేందుకు రకరకాల ప్లాన్‌లు వేశాడు. ఏవీ పారకపోవటంతో చివరికి తండ్రిని చంపేసి ఆయన ఉద్యోగంలో చేరిపోవాలని కుట్రపన్నాడు.
 
 ఇందుకోసం 2013 అగస్టు 28న తల్లిదండ్రులు, మేనల్లుడు మణికంఠరెడ్డి ఇంట్లోని ఓ గదిలో నిద్రిస్తుండగా వారిపై పెట్రోల్ పోసి నిప్పంటించాడు. బయటకు రాకుండా తలుపులకు గడియ వేశాడు. చనిపోయారని భావించిన తరువాత అక్కడి నుంచి పారిపోయాడు. ఈ విషయాలన్నీ పోలీసు విచారణలో తేలాయి. నేరం రుజువు కావడంతో న్యాయమూర్తి నిందితుడికి యావజ్జీవ కారాగార శిక్ష తోపాటు రూ.వెయ్యి జరిమానా విధిస్తూ శుక్రవారం తీర్పు వెలువరించారు.


  - ఒడిషాలో గిరిజనుడికి జీవితఖైదు
 
  బరిపాడ (ఒడిషా): అరవై ఏళ్ల తన బాబాయిని ముక్కలు ముక్కలుగా నరికేసి.. అతి కిరాతకంగా చంపిన ఓ వ్యక్తికి ఒడిషా కోర్టు జీవితఖైదు విధించింది. వితంతువైన తన కోడలితో బాబాయి అక్రమ సంబంధం కలిగి ఉన్నాడన్న కారణంతో నిందితుడు ఈ దారుణానికి ఒడిగట్టాడు. ఈ కేసులో 35 ఏళ్ల నాగకిషోర్ నాయక్ కు మయూర్‌బంజ్ జిల్లా సెషన్స్ కోర్టు యావజ్జీవ శిక్ష విధించింది. మయూర్‌బంజ్ జిల్లా హాలాపూర్ గ్రామంలో నివసించే నాగకిషోర్ బాబాయి అయిన కునూ నాయక్(60)ను ఏప్రిల్ 27, 2011న గొడ్డలితో ముక్కలుముక్కలుగా నరికి చంపాడు.
 
 ఆ తర్వాత అతని చేతిని తీసుకొని వెళ్లి స్థానిక పోలీస్ స్టేషన్‌లో లొంగిపోయాడు. వితంతువైన తన కోడలితో కునూ నాయక్ వివాహేతర సంబంధం ఏర్పర్చుకున్నాడని, అందుకే తాను అతడిని చంపేశానని కిషోర్ నాయక్ కోర్టులో నేరాన్ని ఒప్పుకొన్నాడు. ఈ కేసులో మొత్తం 20మంది సాక్షులను విచారించిన కోర్టు నాగకిషోర్‌ను దోషిగా ప్రకటిస్తూ జీవిత ఖైదు, పదివేల రూపాయల జరిమానా విధించింది.
 
 
  


 హైదరాబాద్: తెలంగాణలో జీవిత ఖైదీల విడుదలకు మార్గదర్శకాలు జారీ అయ్యాయి. జనవరి 26న కటాఫ్ తేదిగా నిర్ణయించారు. ఈ తేదిని దృష్టిలోపెట్టుకొని సత్ప్రవర్తన కలిగిన ఖైదీలను విడిచిపెట్టనున్నారు.
 
 ఐదేళ్లు శిక్షను అనుభవించిన మహిళా ఖైదీలకు కూడా ఇది వర్తిస్తుంది. ఏడేళ్ల శిక్ష పూర్తి చేసుకున్న ఇతర ఖైదీలకు కూడా దీనిద్వారా ఉపశమనం కలగనుంది. ఖైదీల విడుదల జాబితా తయారీ కోసం ఆరుగురు అధికారులతో కమిటీ ఏర్పాటుచేశారు.


 మార్కాపురం (ప్రకాశం) : మద్యం మత్తులో భార్యను గొంతు నులిమి హత్య చేసిన భర్తకు యావజ్జీవ ఖైదు విధిస్తూ న్యాయస్థానం తీర్పునిచ్చింది. ప్రకాశం జిల్లా పుల్లల చెరువు మండలం ముమ్మడివరం గ్రామానికి చెందిన ఇజ్రాయిల్, సువార్త(24) దంపతులు కూలి పనులు చేసుకుంటూ జీవనం సాగిస్తుండేవారు.
 
 ఈ క్రమంలో మద్యానికి బానిసైన ఇజ్రాయిల్ 2011 నవంబర్ 16న పూటుగా తాగి ఇంటికి వచ్చి భార్యతో గొడవపడి విపరీతంగా కొట్టాడు. అతని నుంచి విడిపించుకోవడానికి ఆమె ప్రయత్నించడంతో..  గొంతు నులిమి చంపేశాడు. కేసు నమోదు చేసుకున్న పోలీసులు నిందితుడిని న్యాయస్థానంలో హాజరుపరచగా పూర్తి విచారణ అనంతరం నేరం నిరూపించబడటంతో సోమవారం జిల్లా ఆరో అదనపు న్యాయమూర్తి జీవిత ఖైదు శిక్ష విధిస్తూ తీర్పునిచ్చింది.


 హర్యానా: అత్యాచారం, హత్యకేసులో ఏడుగురికి రోహ్‌టక్‌ కోర్టు సోమవారం ఉరిశిక్ష విధించింది. ఈ కేసులో దోషులకు 1.75 లక్షల రూపాయల చొప్పున కోర్టు జరిమానా విధించింది. అయితే గత ఫిబ్రవరి 4న 28 ఏళ్ల మానసిక వికలాంగురాలిపై ఎనిమిది మంది యువకులు సామూహిక అత్యాచారానికి పాల్పడిన సంగతి తెలిసిందే. ఈ కేసును విచారించిన కోర్టు.. దోషులుగా తేలడంతో వారికి మరణశిక్ష విధిస్తూ తీర్పు చెప్పింది. కాగా, ఎనిమిది మంది దోషుల్లో ఒకరు అరెస్ట్‌ అనంతరం తప్పించుకుని ఆత్మహత్యకు పాల్పడినట్టు పోలీసులు పేర్కొన్నారు.


 చెన్నై: భార్యను హత్య చేసిన కేసులో ఆరోపణలు ఎదుర్కొంటున్న భర్తకు ఎరోడ్ జిల్లా కోర్టు జీవిత ఖైదు విధించింది. వివరాలిలా ఉన్నాయి.. రంగానాథన్(50) ఓ పండ్ల వ్యాపారి. అయితే, భార్యపై అనుమానం పెంచుకున్న రంగనాథన్ తరచుగా ఆమెతో గొడవ పడుతుండేవాడు. ఈ క్రమంలో గతేడాది జూన్ 25న భార్యతో గొడవకు దిగిన భర్త, నైలాన్ తాడును ఆమె మెడకు బిగించి ఊపిరాడకుండా చేసి హత్యచేశాడు.
 తన తల్లిని, తండ్రే హత్య చేశాడని కూతురు ఇచ్చిన ఫిర్యాదు ఆధారంగా కేసు నమోదు చేసుకున్న పోలీసులు దర్యాప్తు చేశారు.మంగళవారం నాడు ఎరోడ్ జిల్లా కోర్టు మేజిస్ట్రేట్ ఎన్ తిరునవుక్కరసు ఎదుట హాజరు పరిచారు. కేసును విచారించిన మేజిస్ట్రేట్.. భార్యను హత్య చేసిన రంగనాథన్కు జీవిత ఖైదు విధిస్తూ తీర్పును వెలువరించారు.


 బుక్కరాయసముద్రం (అనంతపురం) : రాష్ట్రంలోని వివిధ జైళ్లలో జీవిత ఖైదు శిక్షను అనుభవిస్తున్న ఖైదీలకు సంబందించిన క్షమాబిక్ష తమ చేతుల్లో లేదని ప్రస్తుతం క్షమాబిక్ష వ్యవహారం సుప్రీం కోర్టులో నడుస్తోందని రాష్ట్ర జైళ్లశాఖ డీజి క్రిష్ణంరాజు పేర్కొన్నారు. గురువారం మండల పరిదిలోని ఓపెన్ ఎయిర్ జైలును పరిశీలించారు. ఆయన తోపాటు రాష్ట్ర జైళ్ల శాఖ ఐజీ సునీల్‌కుమార్, డిఐజీ జయవర్ధన్ వున్నారు. ఈ సందర్బంగా డీజీ క్రిష్ణంరాజు మీడియాతో మాట్లాడుతూ జీవిత ఖైదీలుగా ఉన్న వారికి సంబందించిన క్షమాబిక్ష తమ చేతుల్లోగానీ, రాష్ట్ర ప్రభుత్వం చేతుల్లోగానీ లేదన్నారు. ఈ వ్యవహారం రాజీవ్‌గాంధీ హత్య కేసుతో ముడిపడి సుప్రీం కోర్టులో నడుస్తోందన్నారు. క్షమాబిక్ష ఇవ్వద్దని సుప్రీంకోర్డు స్టే ఇచ్చిందన్నారు. దీంతో ఈ వ్యవహారం పెండింగ్‌లో పడిందన్నారు. రాష్ట్రం విడిపోయాక తెలంగాణా, ఆంద్ర జైళ్లు,అధికారులు వేరు వేరుగా విడిపోయాయన్నారు. ఇప్పటికే ఉద్యోగులు కూడా ఎక్కడివారక్కడే పని చేస్తున్నారన్నారు.
 
 అదే విదంగా రెడ్డిపల్లి ఓపన్ ఎయిర్‌జైలు వద్ద రెండు పెట్రోలు బంక్‌లు మంజూరయ్యాయన్నారు. వీటిపై ఇప్పటికే ఐఓసి వారితో ఒప్పందం పూర్తయ్యాయన్నారు. వీటిని నిర్మాణానికి జైలుకు సంబందించిన భూమి, స్థలం కూడా ఎంపిక చేయడం జరిగిందన్నారు. ఈ స్థలానికి జిల్లా కలెక్టర్ అనుమతి ఇవ్వాల్సి వుందన్నారు. సెంట్రల్ యూనివర్శిటికి జైలుకు సంబందించిన 502 ఎకరాల భూమిని ఇవ్వడం జరిగిందన్నారు. వీటిలో 18 ఎకరాలులో నర్సరీ పెంచుతున్నామన్నారు. వీటికి మినహాయింపు ఇవ్వాల్సి వుంటుందన్నారు. త్వరలో పెట్రోలు బంక్‌లు ఏర్పాటు చేసి అందులో జీవిత ఖైదీలే విధులు నిర్వహిస్తారన్నారు. ఇది వరకు రాజమండ్రి, కడప, విశాఖపట్నం జైళ్లలో పెట్రోలు బంక్‌లు నడుస్తున్నాయన్నారు. అనంతపురం ఓపన్ ఎయిర్ జైలు నందు కూడా ఏర్పాటు చేయనున్నట్లు ఆయన తెలిపారు.


 వరంగల్: పెళ్లి చేసుకుంటానని నమ్మించి లోబరుచుకుని, పెళ్లికి నిరాకరించిన యువకుడికి వరంగల్ మొదటి అదనపు జిల్లా జడ్జి యావజ్జీవ కారాగార శిక్ష విధించారు. పోలీసుల కథనం ప్రకారం...సంగెం మండలం నార్లవాయికి చెందిన బాలిక మొండ్రాయి గ్రామంలోని పాఠశాలలో పదో తరగతి చదువుతోంది. అదే గ్రామానికి చెందిన రాజమౌళి ప్రేమిస్తున్నానంటూ ఆమె వెంట పడేవాడు. పెళ్లి చేసుకుంటానని నమ్మించి, శారీరకంగా లొంగదీసుకున్నాడు. ఆపై మరొకరిని వివాహం చేసుకోవటానికి ప్రయత్నాలు ప్రారంభించాడు. బాధిత బాలిక తల్లిదండ్రులు కులపెద్దల సమక్షంలో పంచాయితీ నిర్వహించగా రాజమౌళి పెళ్లికి నిరాకరించాడు.
 దీంతో బాధితురాలు 2014 మేలో పోలీసులను ఆశ్రయించింది. కేసు నమోదు చేసిన పోలీసులు రాజమౌళిని అరెస్టు చేసి, కోర్టులో హాజరుపర్చారు. పదహారు మంది సాక్ష్యుల వాంగ్మూలాలను విచారించిన కోర్టు నేరం రుజువు కావటంతో ఐపీసీ సెక్షన్ 376(2) కింద యావజ్జీవ కారాగార శిక్ష, అత్యాచారాల నిరోధక చట్టం ఐపీసీ సెక్షన్ 417 కింద మరో మూడేళ్ల జైలు, రూ.25,000 జరిమానా విధిస్తూ తీర్పునిచ్చారు. పై శిక్షలన్నీ ఏకకాలంలో అమలు చేయాలని తీర్పులో పేర్కొన్నారు.
  


 చిలకలగూడ: కుటుంబ కలహాల నేపధ్యంలో యువకుడిని కిడ్నాప్ చేసి, దారుణంగా కొట్టిచంపి, పెట్రోలు పోసి అనవాల్లు తెలియకుండా మృతదేహాన్ని దహనం చేసి మూసీ నదిలో పడేసిన కేసులో ఇద్దరు ముద్ధాయిలకు జీవితఖైదు విధిస్తూ సికింద్రాబాద్ 6వ అడిషనల్ మెట్రోపాలిటన్ సెషన్స్ జడ్జీ సీఎస్‌ఎస్‌వీ దుర్గాప్రసాద్ సోమవారం తీర్పునిచ్చారు. వివరాలు.. బోయిగూడకు చెందిన పాలవ్యాపారులైన బీ.మల్లేష్, ఎన్. సత్యనారాయణలు సన్నిహితులు. వీరి కుమారులు దయానంద్, శ్రీనివాస్‌లు స్నేహితులు. కాగా, 2011 జనవరి 12వతేది రాత్రి 8 గంటల సమయంలో దయానంద్‌ను బలవంతంగా కారులో ఎక్కించుకున్నారు. ప్రతాపసింగారం గౌరెల్లి గ్రామ పొరమేరల్లోకి తీసుకెల్లి, కాళ్లుచేతులు కట్టి కర్రలతో దారుణంగా కొట్టి దయానంద్‌ను హతమార్చారు. కారులో మృతదేహన్ని మూసీనది వద్దకు తీసుకువెల్లి పెట్రోలు పోసి నిప్పంటించారు. చేతి వేలికి ఉన్న సిల్వర్‌రింగ్ ఆధారంగా మృతదేహం దయానంద్‌దేనని పోలీసులు గుర్తించారు.
 జీవితఖైదు, రూ. 2వేల జరిమానా
 దయానంద్ హత్యకేసు సుమారు నాలుగున్నరేళ్లు వాదోపవాదాలు జరిగిన తర్వాత సోమవారం తీర్పు వెలువడింది. హత్యకేసులో ప్రధాన ముద్ధాయిలైన సోదరులు బొల్లబోయిన కృష్ణ (28), బొల్లబోయిన శ్రీశైలం (24)లకు జీవితఖైదు, రూ. 2వేల జరిమానా విధిస్తూ న్యాయస్థానం తీర్పు చెప్పింది. సరైన సాక్ష్యాధారాలు లేనందున బొల్లబోయిన మల్లేష్ (60), అశోక్ (21,సాయికుమార్ (22), భాను (22)లకు ఎటువంటి శిక్ష విధించలేదు. ముద్దాయిలను చర్లపల్లి జైలుకు తరలించారు.


 చిత్తూరు జిల్లా: తండ్రిని చంపిన తనయుడికి న్యాయస్థానం గురువారం జీవితఖైదు విధించింది. వివరాలు.. చిత్తూరు జిల్లా కుప్పంకు చెందిన రమేష్ 2013లో తండ్రిని ఆస్తి పంచాలని కోరాడు. అందుకు తండ్రి శ్రీరాములు(65) నిరాకరించడంతో అగ్రహించిన రమేష్ తండ్రిపై దాడిచేసి తలనరికి చంపాడు. అనంతరం కుప్పం పోలీస్ స్టేషన్‌లో లొంగిపోయాడు. ఈ కేసును విచారించిన చిత్తూరు జిల్లా జడ్జీ విజయ్‌కుమార్ అతనికి జీవితఖైదు విధిస్తూ గురువారం తీర్పు వెలువరించారు.
 (కుప్పం)


 డిల్లీ: పంజాబ్ మాజీ ముఖ్యమంత్రి బియాంత్ సింగ్ హత్యకేసులో దోషి జగతార్ సింగ్ ను ఇంటెలిజెన్స్ అధికారులు థాయిలాండ్ నుంచి దేశానికి తీసుకొచ్చినట్లు విశ్వసనీయ వర్గాల సమాచారం. ఈ హత్య కేసులో జగతార్ సింగ్ కు గతంలో యావజ్జీవ కారాగార శిక్ష విధించింది.
 ఈ హత్యకేసులో ప్రధాన నిందితుడైన జగ్తార్ సింగ్ హవారాకు సీబీఐ ప్రత్యేక కోర్టు 2007లో మరణ శిక్ష విధించింది. అనంతరం పంజాబ్, హర్యానా హైకోర్టు తీర్పును జీవిత ఖైదుగా మార్చింది. అయితే కేసులో మరో నిందితుడు రోజానాకు మాత్రం మరణదండన కొనసాగించాలని తీర్పునిచ్చింది.


 తాను పని చేస్తున్న ఇంట్లో యజమాని కూతురిని చంపినందుకు దుబాయ్లో ఓ భారతీయ మహిళకు జీవితఖైదు విధించారు. సెలవు ఇవ్వలేదన్న కోపంతో 11 నెలల బాలికను చంపినందుకు ఈ శిక్ష పడింది. ఆర్.టి. అనే ఇంటిపేరున్న నిందితురాలు.. తన యజమాని ఇంట్లో లేని సమయంలో ఆ చిన్నారి బాలిక మెడకు స్కార్ఫ్ బిగించి, పీకనొక్కి చంపేసింది. ముందుగా వేసుకున్న పథకం ప్రకారమే ఆమె ఈ హత్య చేసినట్లు కోర్టులో రుజువైంది.
 
 తొలుత ఆమె తాను ఆ పాపను హత్య చేయలేదని, కేవలం మంచం మీద పడుకోబెట్టానని కోర్టులో చెప్పింది. ఆమెను తన సొంత కూతురిలా ప్రేమించానంది. తనకూ ఇద్దరు పిల్లలున్నారని, అందువల్ల ఇలాంటి దారుణానికి పాల్పడే అవకాశమే లేదని తెరలిపింది. అయితే, ఆమె తన యజమాని బయటకు వెళ్లే వరకు ఆగడం.. స్కార్ఫ్ కొనుక్కుని తీసుకొచ్చి పాప మెడచుట్టూ చుట్టి, ఆమె నోట్లోంచి ఎలాంటి అరుపులు రాకుండా నోరు నొక్కడం అన్నీ రుజువయ్యాయి. తర్వాత ఏమీ ఎరగనట్లు ఇంట్లో పని చేసుకుంటూ ఉండిపోయింది. తర్వాత బాలిక తల్లికి అనుమానం రావడంతో తన సోదరికి ఫోన్ చేసి.. ఇంటికి వెళ్లాల్సిందిగా చెప్పింది. తీరా ఆమె వచ్చి చూస్తే పాప కదలట్లేదు. వెంటనే ఆస్పత్రికి తరలించినా, రెండు గంటల క్రితమే మరణించినట్లు చెప్పారు.


 హైదరాబాద్: కరీంనగర్ జిల్లా గోదావరిఖని సెషన్ కోర్టు సంచలన తీర్పు వెలువరించింది. హత్య కేసులో ఇద్దరికి ఉరిశిక్ష విధించింది.
 
 2010 మార్చి 27న నలుగురు హత్యకు గురయ్యారు. ఈ కేసును విచారించిన న్యాయస్థానం ఇద్దరు నిందితులను దోషులుగా నిర్దారిస్తూ శిక్షను ఖరారు చేసింది. శుక్రవారం మధ్యాహ్నం తుది తీర్పును వెలువరించింది.


 న్యూఢిల్లీ : మరణ శిక్షలు పడినవారికి సుప్రీంకోర్టు ఇచ్చిన తాజాతీర్పు ఊరట కలిగించింది. మరణ దండనకు గురైన 15 మంది శిక్షలను జీవిత ఖైదుగా మారుస్తూ సుప్రీంకోర్టు మంగళవారం తీర్పునిచ్చింది. ఒక వ్యక్తి క్షమాభిక్ష పిటిషన్‌పై విపరీత జాప్యం వల్ల.. ఆ వ్యక్తికి విధించిన మరణ శిక్షను జీవిత ఖైదుగా మార్చడానికి అర్హమైనదిగా పరిగణించాలని ఉన్నత న్యాయస్థనం స్పష్టం చేసింది.
 
 క్షమాభిక్ష పిటిషన్లపై విచారణ సందర్భంగా సుప్రీంకోర్టు ధర్మాసనం సంచలనాత్మక వ్యాఖ్యలు చేసింది.  జీవిత ఖైదులుగా మారిన వారిలో మాజీ ప్రధాని రాజీవ్‌గాంధీ హత్య కేసులో మరణశిక్షలకు గురైన నలుగురు ఖైదీలు ఉన్నారు. గంధం చెక్కల స్మగ్లర్‌ వీరప్పన్‌ అనుచరులు నలుగురు ఉన్నారు. మానసిక వైకల్యంతో లేదా ఇతర దీర్ఘకాలిక వ్యాధులతో ఉండేవారికి మరణ శిక్ష విధించరాదని, వారికి జీవిత ఖైదును మాత్రమే విధించాలని స్పష్టం చేసింది.
 
 గవర్నర్‌గానీ, రాష్ట్రపతిగానీ క్షమాభిక్ష పిటిషన్‌ను తిరస్కరించిన 14రోజుల్లోనే జాప్యం లేకుండా ఆ ఖైదీకి మరణ శిక్ష అమలు చేయాలని వివరించింది. క్షమాభిక్ష పిటిషన్‌ తిరస్కరణ గురైన అంశాన్ని వారి బంధువులకు కూడా తప్పనిసరిగా తెలుపాలని న్యాయమూర్తులు కోరారు. జైల్లో శిక్ష అనుభవిస్తున్నవారికి న్యాయ సహాయాన్ని అందించడం రాజ్యాంగం కల్పించిన హక్కుగా భావించాలని సుప్రీంకోర్టు స్పష్టం చేసింది.


 వైద్యం చేయాల్సిన డాక్టర్ పశువులా మారి రోగిపైనే.. అది కూడా ఐసీయూలో అత్యాచారం చేసిన కేసులో బాంబే హైకోర్టు శనివారం జీవిత ఖైదు విధించింది. జస్టిస్ పి.వి.హరిదాస్, జస్టిస్ పి.ఎన్.దేశ్ముఖ్తో కూడిన ధర్మాసనం శిక్షణను ఖరారు చేసింది. గత జనవరిలో ధానెలో విశాల్ వన్నె (29) అనే వైద్యుడు ఓ ప్రైవేటు ఆస్ప్రత్రిలో ఐసీయూలో ఓ రోగిపై దారుణ అత్యాచారానికి పాల్పడ్డాడు. జనరల్ వార్డులో ఉన్న మహిళా రోగిని నైట్ డ్యూటీ మెడికల్ ఆఫీసర్ విశాల్ ఐసీయూకు తరలించి అఘాయిత్యానికి పాల్పడ్డాడు.
 
 ఈ కేసులో విశాల్ నేరం చేసినట్టు రుజువు కావడంతో దిగువ కోర్టు విశాల్కు జీవితఖైదు శిక్ష విధించింది. ఈ తీర్పును సవాల్ చేస్తూ విశాల్ హైకోర్టును ఆశ్రయించాడు. నిందితుడు నేరం చేశాడన్న ప్రాసిక్యూటర్ ఉషా కేజ్రివాల్ వాదనలతో ఏకీభవించిన న్యాయస్థానం అప్పీలు తిరస్కరించింది.