పర్యాటకంలో జిల్లాకు రెండు అవార్డులు

కడప సిటీ : వైఎస్సార్‌ కడప జిల్లాకు రెండు ప్రతిష్టాత్మక రాష్ట్రస్థాయి పర్యాటక అవార్డులు దక్కాయి. ఆదివారం రాజమహేంద్రవరంలోని మంజీరా కన్వెన్షన్‌ హాలులో జరిగిన ప్రపంచ పర్యాటక దినోత్సవ వేడుకల్లో రాష్ట్ర పర్యాటక శాఖ, ఏపీటీడీసీ ఈ పురస్కారాలను అందజేశాయి. గండికోటలో చేపట్టిన సమగ్ర పర్యాటక అభివృద్ధికి, చారిత్రక వారసత్వ పరిరక్షణకు కలెక్టర్‌, జిల్లా పర్యాటక మండలి చైర్‌పర్సన్‌ శ్రీధర్‌ చెరుకూరి ఈ పురస్కారాన్ని అందుకున్నారు. పర్యాటకులకు, ప్రయాణికులకు అత్యాధునిక మౌలిక వసతులు కల్పించినందుకు పులివెందుల డాక్టర్‌ వైఎస్‌ఆర్‌ బస్‌ టెర్మినల్‌ ఉత్తమ పర్యాటక అనుకూల బస్‌ స్టాండ్‌ అవార్డు దక్కించుకుంది. పులివెందుల ఆర్టీసీ డిపో మేనేజర్‌ ఏ. ప్రేమ్‌ కుమార్‌, సిబ్బంది దీనిని స్వీకరించారు.