వ్యక్తిత్వ వికాసాన్ని అలవర్చుకోవాలి

వరంగల్‌ చౌరస్తా: యువత మెరుగైన జీవన విధానాన్ని అలవర్చుకోవాలని కలెక్టర్‌ సత్యశారద అన్నారు. ఆదివారం ఎంజీఎం ఆస్పత్రిలో నషా ముక్త్‌ యువ ఫర్‌ వికసిత్‌ ఫర్‌ భారత్‌ కార్యక్రమంలో భాగంగా హెల్త్‌ స్క్రీనింగ్‌ క్యాంపును కలెక్టర్‌ ప్రారంభించారు. ఈ సందర్భంగా కలెక్టర్‌ మాట్లాడుతూ యువత డ్రగ్స్‌, మత్తు పదార్థాలు, మద్యం, పొగాకు తదితర వ్యసనాలకు దూరంగా ఉండాలన్నారు. యోగా, ధ్యానం, వ్యాయామం వంటి ఆరోగ్యకరమైన పద్ధతులను పాటించడం ద్వారా ఒత్తిడిని తగ్గించుకోవచ్చన్నారు. అనంతరం యువతచే ప్రతిజ్ఞ చేయించారు. ఈ కార్యక్రమంలో జిల్లా వైద్య ఆరోగ్యశాఖ అధికారి బి. రాజారెడ్డి, ఎంజీఎం సూపరింటెండెంట్‌ రామ్‌కుమార్‌ రెడ్డి, డిప్యూటీ డీఎంహెచ్‌ఓ ప్రకాష్‌, ప్రోగ్రాం అధికారి అరుణ్‌ జోషి, జిల్లా యువజన అధికారి బి.సంజీవ్‌, ప్రొఫెసర్‌ వెంకన్న, వైద్యాధికారులు తదితరులు పాల్గొన్నారు.