ఇప్పటికీ అతడి టెక్నిక్‌ సరిగ్గా లేదు: భారత మాజీ క్రికెటర్‌ ఫైర్‌

న్యూజిలాండ్‌తో స్వదేశంలో టీ20 సిరీస్‌ తర్వాత భారత ఓపెనింగ్‌ జోడీ మారిపోయింది. వరుస వైఫల్యాల కారణంగా సంజూ శాంసన్‌ టీ20 ప్రపంచకప్‌-2026 టోర్నీలో ఓపెనర్‌గా స్థానం కోల్పోయాడు. కివీస్‌తో సిరీస్‌లో వన్‌డౌన్‌లో వచ్చి అదరగొట్టిన ఇషాన్‌ కిషన్‌ (Ishan Kishan).. అభిషేక్‌ శర్మకు జోడీగా సంజూ స్థానాన్ని భర్తీ చేశాడు.

రెండో అవకాశం
అయితే, నమీబియాతో మ్యాచ్‌కు అభిషేక్‌ శర్మ (Abhishek Sharma) అనారోగ్యం కారణంగా దూరం కాగా.. సంజూకు ఇషాన్‌తో కలిసి ఇన్నింగ్స్‌ ఆరంభించే అవకాశం దక్కింది. ఈ మ్యాచ్‌లో అతడు 8 బంతుల్లో 22 పరుగులు చేశాడు. ఆ తర్వాత మళ్లీ బెంచ్‌కే పరిమితమైన సంజూ (Sanju Samson).. సూపర్‌-8లో భాగంగా జింబాబ్వేతో మ్యాచ్‌లో ఓపెనర్‌గా బరిలోకి దిగాడు.

ఘనంగా ఆరంభించి
చెన్నైలోని చెపాక్‌ స్టేడియం వేదికగా జింబాబ్వేతో మ్యాచ్‌లో సంజూ 15 బంతులు ఎదుర్కొని ఒక ఫోర్‌, రెండు సిక్స్‌లు బాది 24 పరుగులు చేశాడు. అయితే, బ్లెసింగ్స్‌ ముజర్‌బానీ బౌలింగ్‌లో షార్ట్‌ బంతిని తప్పుగా అంచనా వేసి గాల్లోకి లేపగా.. ర్యాన్‌ బర్ల్‌ క్యాచ్‌ అందుకున్నాడు. దీంతో సంజూ ఇన్నింగ్స్‌ ముగిసిపోయింది.

ఈ నేపథ్యంలో మరోసారి సంజూ ఆట తీరుపై విమర్శలు వచ్చాయి. రాకరాక వచ్చిన అవకాశాన్ని సద్వినియోగం చేసుకోలేకపోయాడంటూ అభిమానులు సైతం విమర్శించారు. భారత మాజీ క్రికెటర్‌ సుబ్రమణ్యం బద్రీనాథ్‌ కూడా ఇదే మాట అంటున్నాడు. సంజూ టెక్నిక్‌ తప్పుగా ఉందని.. ఇప్పటికైనా పొరపాటు సరిచేసుకోవాలని సూచించాడు.

మరోసారి తన టెక్నిక్‌ తప్పని నిరూపించాడు
‘‘చెపాక్‌లో సంజూను ఆడించడం వల్ల చెన్నై ప్రేక్షకులు సంతోషించారు. అందుకు తగ్గట్లుగానే అతడు మంచి ఆరంభమే అందుకున్నాడు. కానీ మరోసారి తన టెక్నిక్‌ తప్పని నిరూపించాడు.

లెగ్‌ సైడ్‌ దిశగా వచ్చిన బంతిని ఆడేందుకు పక్కకు జరిగి మూల్యం చెల్లించాడు. మూడు స్టంప్స్‌ను ప్రత్యర్థి బౌలర్‌కు చూపి ఈజీ టార్గెట్‌ అయ్యాడు. క్రికెట్‌లో ఓనమాలు దిద్దినపుడే ప్రతి ఆటగాడు ఈ విషయాన్ని అర్థం చేసుకుంటాడు. మూడు స్టంప్స్‌ బౌలర్‌కు కనిపించేలా ఎప్పుడూ ఓ బ్యాటర్‌ ఎప్పుడూ తప్పు చేయకూడదు.

కోచ్‌ల మాట వింటాడో లేదో!
అలా చేయడం ప్రాథమిక తప్పిదం. అసలు అతడు కోచ్‌ల మాట వింటాడో లేదో నాకు తెలియదు. నిజానికి టీమిండియాలో ప్రతి ఒక్కరికి వ్యక్తిగత కోచ్‌ ఉన్నాడు. కాబట్టి అతడు ఎవరి మాట విని ఇలా చేస్తున్నాడో అర్థం కావడం లేదు. టెక్నికే తప్పుగా ఉంటే.. ఆటలో ఇంకేం ముందుకు వెళ్లగలవు?.. ఈ టోర్నీలో అతడు టెక్నిక్‌ సరి చేసుకోవడం కష్టమే అనిపిస్తోంది’’ అంటూ ఘాటుగా సంజూను విమర్శించాడు బద్రీనాథ్‌.

కాగా కేరళ వికెట్‌ కీపర్‌ బ్యాటర్‌ సంజూ గత ఏడాది కాలంగా భారత టీ20 ఓపెనర్‌గా రాణించాడు. అయితే, ఇటీవలి కాలంలో అతడు ఫామ్‌ కోల్పోయాడు. కివీస్‌తో సిరీస్‌లో సంజూ చేసిన పరుగులు 10, 6, 0, 24, 6. గత కొంతకాలంగా అతడు షార్ట్‌ బంతుల్ని తప్పుగా అంచనా వేసి అవుట్‌ కావడం గమనార్హం. ఈ నేపథ్యంలోనే బద్రీనాథ్‌ సంజూ టెక్నిక్‌ సరిగ్గా లేదంటూ చివాట్టు పెట్టాడు.

చదవండి: అతడు ఎక్కడ బౌలింగ్‌ చేశాడో చూశారా?: భారత మాజీ కెప్టెన్‌ ఫైర్‌

𝐃𝐈𝐒𝐏𝐀𝐓𝐂𝐇𝐄𝐃 🚀

Sanju Samson starts the innings on a positive note! 💪

ICC Men’s #T20WorldCup 👉 SUPER 8, #INDvZIM | LIVE NOW ➡️ https://t.co/vIdZg7mGmy pic.twitter.com/TtmJRlvcR0

— Star Sports (@StarSportsIndia) February 26, 2026