నూతిలో వ్యక్తి మృతదేహం

వేపాడ: వేపాడ రెడ్డివారి కళ్లాల వద్ద గల నూతిలో ఓ వ్యక్తి మృతదేహం కలకలం రేపింది. శనివారం చోటుచేసుకున్న ఈ సంఘటనకు సంబంధించి పోలీసులు అందించిన వివరాలు ఇలా ఉన్నాయి. వల్లంపూడి గ్రామానికి చెందిన మోర్చా విజయ్‌ (32) కొంతకాలంగా తాగుడుకు బానిసై డబ్బుల కోసం కుటుంబ సభ్యులను ఇబ్బంది పెడుతూ ఉన్నాడు. ఈ క్రమంలో రెండు రోజుల కిందట ఆత్మహత్య చేసుకుంటానని చెబుతూ ఇంటి నుంచి వెళ్లిపోయాడు. ఇంతలో రెడ్డివారి కళ్లాల వద్ద గల నూతిలో ఓ వ్యక్తి మృతదేహం తేలి ఉండడాన్ని స్థానికులు గుర్తించగా.. కుటుంబ సభ్యులు వచ్చి విజయ్‌గా గుర్తించారు. మృతుడి బంధువు కొమ్మనాపల్లి జ్యోతి ఇచ్చిన ఫిర్యాదు మేరకు ఎస్సై ఎస్‌.సుదర్శన్‌ కేసు నమోదు దర్యాప్తు చేస్తున్నారు. పోస్టుమార్టం నిమిత్తం మృతదేహాన్ని ఎస్‌.కోట ప్రభుత్వాస్పత్రికి తరలించారు.