గదిలో విగతజీవిగా పాకిస్తాన్‌ నటి.. వారం రోజులుగా కుళ్లిపోతూ..

పాకిస్తాన్‌ నటి ఆయేషా ఖాన్‌ (76) అనుమానాస్పద స్థితిలో మృతి చెందింది. పాకిస్తాన్‌.. కరాచీలోని తన ఫ్లాట్‌లో విగతజీవిగా కనిపించింది. కొద్దిరోజులుగా ఆమె ఫ్లాట్‌లో నుంచి దుర్వాసన వస్తుండటంతో ఇరుగుపొరుగువారు పోలీసులకు సమాచారమిచ్చారు. దీంతో అక్కడికి చేరుకున్న పోలీసులు ఇంట్లోకి వెళ్లి చూడగా కుళ్లిపోయిన స్థితిలో నటి మృతదేహాన్ని గుర్తించారు. వారం రోజుల క్రితమే ఆమె మరణించినట్లుగా అనుమానిస్తున్నారు. మృతదేహాన్ని శవ పరీక్ష కోసం జిన్నా హాస్పిటల్‌కు తరలించారు.

కొన్నేళ్లుగా ఒంటరి జీవితం
కొన్నేళ్లుగా ఒంటరిగానే నివసిస్తున్న ఆయేషా ఖాన్‌ (Pakistani Actress Ayesha Khan) ఎలా మరణించింది? చివరి రోజుల్లో తను ఎలాంటి పరిస్థితిలో ఉంది? అన్న కోణంలో పోలీసులు విచారణ చేపడుతున్నారు. చుట్టుపక్కలవారిని, బంధువులను సైతం విచారిస్తున్నారు. ఆయేషా 1948, నవంబర్‌ 22న జన్మించింది. పాకిస్తాన్‌ బుల్లితెరపై తనకంటూ ప్రత్యేక గుర్తింపు తెచ్చుకుంది. ఇప్పటికీ అక్కడి ప్రజలు ఆమెను ఎంతగానో ఆరాధిస్తారు. ఈమె సోదరి ఖలీదా రియాసత్‌ కూడా బుల్లితెరపై చాలా పాపులర్‌.

చదవండి: అతడు చెప్పేదంతా అబద్ధం.. తీసుకెళ్లి పిచ్చి ఆస్పత్రిలో వేయండి: నటి