జలపాతం వద్ద సీన్‌.. జ్ఞాపకశక్తి కోల్పోయిన అమ్రిష్‌ పురి

హీరోయిన్‌ కాజోల్‌కు మతిమరుపు ఉండేది. కుచ్‌కుచ్‌ హోతా హై సినిమా సెట్‌లో పదేపదే అన్నింటినీ మర్చిపోయేది. ఓసారి తనే ఈ విషయాన్ని వెల్లడించింది. అయితే లెజెండరీ నటుడు అమ్రిష్‌ పురి (Amrish Puri) ఒకానొక సందర్భంలో తనెవరన్నది కూడా మర్చిపోయాడని చెప్పింది. ఓ ఇంటర్వ్యూలో కాజోల్‌ మాట్లాడుతూ.. అజయ్‌ దేవ్‌గణ్‌, అమ్రిష్‌ పురి ఓ సినిమాలో కలిసి నటించారు. 

అంతా మర్చిపోయిన అమ్రీష్‌పురి
అందులో అమ్రీష్‌.. జలపాతం కింద నిల్చునే సీన్‌ ఉంది. అందుకోసం ఆయన వాటర్‌ఫాల్‌ కింద నిలబడ్డారు. పైనుంచి ఎంతో వేగంగా వస్తున్న నీళ్లు ఆయన తలను కొట్టుకుంటూ కిందపడేవి. తలకు రక్షణగా ఏదీ పెట్టలేదు. సన్నివేశం అయిపోగానే ఆయన వాటర్‌ఫాల్‌ నుంచి వచ్చేశారు. కానీ అన్నీ మర్చిపోయాడు. అసలేదీ గుర్తులేదు. నేనెవర్ని? నేనిక్కడేం చేస్తున్నాను? అని ప్రశ్నించాడు. సెట్‌లో ఉన్నవాళ్లందరికీ భయంతో చెమటలు పట్టాయి. తనకు జ్ఞాపకశక్తి రావడానికి మూడు గంటలు పట్టింది. 

కరడుగట్టిన విలన్‌గా..
ఇప్పుడు తల్చుకుంటే సరదాగా అనిపిస్తుందేమోకానీ ఆ సమయంలో మాత్రం అందరూ చాలా భయపడ్డారు అని చెప్పుకొచ్చింది. అమ్రీష్‌ పురి, అజయ్‌ దేవ్‌గణ్‌.. టార్జాన్‌: ద వండర్‌ కార్‌, ఫూల్‌ ఔర్‌ కాంటే, హల్‌చల్‌, గెయిర్‌ వంటి చిత్రాల్లో కలిసి నటించారు. హిందీలో వందలాది సినిమాలు చేసిన అమ్రిష్‌ పురి.. ఆదిత్య 369, బాబా, జగదేక వీరుడు అతిలోక సుందరి, మేజర్‌ చంద్రకాంత్‌, నిప్పురవ్వ వంటి పలు చిత్రాల్లో నటించారు. కరడుగట్టిన విలన్‌గా ప్రేక్షకులను తన ఆహార్యంతోనే భయపెట్టేవారు. 2005లో బ్లడ్‌ క్యాన్సర్‌తో కన్నుమూశారు.

చదవండి: కన్నప్పలో ప్రభాస్‌ పెళ్లి టాపిక్‌.. రచ్చ లేపిన ఫ్యాన్స్‌