TV
అశ్విన్‌బాబు హీరోగా నటించిన చిత్రం ‘శివం భజే’. ఇందులో దిగంగనా సూర్యవన్షీ హీరోయిన్‌. మూలి మహేశ్వర్‌రెడ్డి నిర్మించిన ఈ చిత్రం నేడు (గురువారం) విడుదలవుతోంది. ఈ సందర్భంగా బుధవారం జరిగిన విలేకర్ల సమావేశంలో అశ్విన్‌బాబు మాట్లాడుతూ– ‘‘హిడింబ’ తర్వాత చాలా కథలు విన్నాను. మళ్లీ ఏదో ఒకటి కొత్తగా ప్రయత్నించాలనుకుంటున్న సమయంలో ‘శివం భజే’ కథ విన్నాను. చాలా నచ్చింది.
నా గత చిత్రాలు ‘రాజుగారి గది, హిడింబ’లా ‘శివం భజే’ పాయింట్‌ బాగుంటుంది. ఈ చిత్రంలో పక్కింటి కుర్రాడిలా కనిపిస్తాను. ఎప్పుడేం జరుగుతుందో తెలియదు. అంతా విధి. శివుని ఆజ్ఞ లేనిదే చీమైనా కుట్టదు అంటారు కదా!.. ఆ టైపులో ఇందులోని నా క్యారెక్టర్‌ ఉంటుంది. అప్సర్‌ ‘శివం భజే’ కథను రాసుకున్న తీరు, ఐడియాలజీ నాకు నచ్చింది. ఫ్యామిలీ ఎమోషన్స్‌తో పాటు కథను డివైన్‌ పాయింట్‌కు కనెక్ట్‌ చేసిన విధానం బాగుంటుంది.
నిర్మాత రాజీ పడకుండా ఎక్కువే ఖర్చుపెట్టారు. ఏమన్నా అంటే అంతా శివయ్య చూసుకుంటారు అనేవారు. ఆగస్టు 1న నా బర్త్‌ డే కాబట్టి ఈ సినిమా రిలీజ్‌ను ప్లాన్‌ చేయలేదు. మేం ఓ రిలీజ్‌ డేట్‌ అనుకున్నాం. సరిగ్గా అది నా బర్త్‌ డేకి కుదిరింది... అంతే. ఇక ‘రాజుగారి గది 4’ సినిమా ప్లానింగ్‌ జరుగుతోంది. మరో రెండు సినిమాలు చర్చల దశలో ఉన్నాయి’’ అని చెప్పుకొచ్చారు.
