పాఠశాలలో విద్యార్థుల హాజరు శాతం పెరగాలి

జగ్గయ్యపేట అర్బన్‌: తరగతులకు గైర్హాజరవుతున్న విద్యార్థులను ఉపాధ్యాయులు దత్తత తీసుకొని వారు పాఠశాలకు హాజరయ్యేలా చూడాలని కృష్ణా జిల్లా విద్యాశాఖ అధికారి ఎల్‌.చంద్రకళ ఆదేశించారు. పట్ట ణంలోని జీవీజే జెడ్పీ బాలుర హైస్కూల్‌ను డీఈఓ చంద్రకళ గురువారం సందర్శించారు. ఈ సందర్భంగా పాఠశాలలో మధ్యాహ్న భోజనం అమలు తీరును పరిశీలించి తగు సూచనలు చేశారు. అనంతరం ఉపాధ్యాయులతో సమావేశమై పాఠశాల స్టార్‌ రేటింగ్‌ గురించి అడిగి, విద్యార్థులు, ఉపాధ్యాయుల హాజరు, సంగ్రహణాత్మక మూల్యాంకనం, పదో తరగతి ఫలితాలపై చర్చించారు. వీటి ప్రకారమే పాఠశాలకు స్టార్‌ రేటింగ్‌ వస్తుందని తెలిపారు. విద్యార్థుల హాజరు శాతం పెరగాలని స్పష్టంచేశారు. పాఠశాలకు గైరుహాజరవుతున్న విద్యార్థులను ఒక్కొక్క ఉపాధ్యాయుడు నలుగురు చొప్పున దత్తత తీసుకుని వారు విధిగా పాఠశాలకు హాజరయ్యేలా చూడాలని సూచించారు. విద్యార్థుల్లో అభ్యసన సామర్థ్యాలు పెరగాలని సూచించారు. వికసిత్‌ భారత్‌, స్వర్ణాంధ్ర లక్ష్యాలు సాధించాలని ఆదేశించారు. ఈ కార్యక్రమంలో నందిగామ డీవైఈఓ జి.గురునాథం, పాఠశాల ప్రధానోపాధ్యాయుడు పి.వి.నాగేశ్వరరావు, పలువురు ఉపాధ్యా యులు పాల్గొన్నారు.