నీటి వనరుల సంరక్షణకు ప్రాధాన్యం

నీటి వనరుల సంరక్షణకు ప్రాధాన్యం గద్వాల: ఎల్‌నినోతో వర్షాభావ పరిస్థితులు నెలకొన్న నేపథ్యంలో రైతులు అందుబాటులో ఉన్న నీటి వనరులను పొదుపుగా వినియోగించుకోవాలని అదనపు కలెక్టర్‌ నర్సింగ్‌రావు సూచించారు. శనివారం గద్వాల మండల పరిషత్‌ కార్యాలయంలో మహిళా సంఘాల ప్రతినిధులకు జలసిరి కార్యక్రమంపై అవగాహన కల్పించారు. ఈ సందర్భంగా ఆయన మాట్లాడుతూ.. గ్రామాల్లో నీటి వనరుల సంరక్షణకు ప్రాధాన్యత ఇవ్వాలన్నారు. ఐదెకరాలలోపు ఉన్న చిన్న, సన్నకారు రైతులతో పంట కుంటలను తవ్వించాలని.. ఆగస్టు 15వ తేదీలోగా వాటి నిర్మాణాలను పూర్తి చేయించాలని ఆయన ఆదేశించారు. కుంటల్లో నిల్వ ఉన్న నీటితో రైతులు అరుతడి పంటలను సాగుచేసుకోవచ్చని తెలిపారు. అంతకుముందు రాష్ట్ర పంచాయతీరాజ్‌ గ్రామీణాభివృద్ధిశాఖ మంత్రి సీతక్క నిర్వహించిన వీడియో కాన్ఫరెన్స్‌లో అదనపు కలెక్టర్‌ పాల్గొన్నారు. ఈ సందర్భంగా జలసిరి, వీబీ–జీ రామ్‌జీ, వనమహోత్సవం తదితర అంశాలపై మంత్రి పలు సూచనలు చేశారు. ఎల్‌నినో ప్రభావాన్ని దృష్టిలో ఉంచుకొని ఉపాధిహామీ పథకం కింద గ్రామీణ ప్రాంతాల్లో 100 శాతం పనులు కల్పించాలని.. 12 కోట్ల పనిదినాల లక్ష్యన్ని సాధించాలని సూచించారు. కార్యక్రమంలో డీపీఓ శ్రీకాంత్‌, పీఆర్‌ ఈఈ ప్రభాకర్‌, జిల్లా పరిషత్‌ అధికారి శ్రీకాంత్‌, ఏపీడీ శ్రీనివాస్‌, ఎంపీడీఓ శైలజ ఉన్నారు.