ఆంధ్రజ్యోతి దినపత్రిక ప్రతులు దహనం

విషపు రాతలపై వైఎస్సార్‌ సీపీ శ్రేణుల ఆగ్రహం ● ఈ సందర్భంగా ఎమ్మార్పీఎస్‌ వ్యవస్థాపక అధ్యక్షుడు పరిశపోగు శ్రీనివాసరావు మాట్లాడుతూ పథకాలు అమలు చేతకాక గత ప్రభుత్వంపై నిందలు వేయడం నీతిమాలిన పని అని ధ్వజమెత్తారు. దీనికి పచ్చ మీడియా వంత పాడుతూ చంద్రబాబు తానా అంటే అవి తందానా అని తాళం వేస్తున్నాయని విమర్శించారు. ఆంధ్రజ్యోతి దినపత్రిక అందరి కన్నా ముందు వరుసలో నిలబడి నిస్సిగ్గుగా పత్రికా విలువలకు తిలోదకాలు ఇచ్చేసిందని దుయ్యబట్టారు. చంద్రబాబు ‘చెప్పేది కొండంత – చేసేది గోరంత‘ అయితే ఆంధ్రజ్యోతి మాత్రం దానికి పూర్తి రివర్సుగా కథనాలు వండి వడ్డిస్తోందని విమర్శించారు. తెలుగు దినపత్రికలా కాక తెలుగుదేశం కరపత్రికలా మారిపోయిన ఆంధ్రజ్యోతిని ప్రజలంతా బహిష్కరించాలని పిలుపునిచ్చారు. ● వైఎస్సార్‌ సీపీ విద్యార్థి విభాగం జిల్లా అధ్యక్షుడు సీహెచ్‌ వినోద్‌ మాట్లాడుతూ అన్ని పథకాలు క్రమంగా ఎత్తేయాలని టీడీపీ కూటమి ప్రభుత్వం కుట్ర చేస్తోందన్నారు. అందుకే ఆర్భాట ప్రచారాలతో ప్రజలను ఏమారుస్తోందని విమర్శించారు. పార్టీ మహిళా విభాగం నగర అధ్యక్షురాలు కేసరి సుబ్బులు మాట్లాడుతూ, తన అనుకూల మీడియాలో కథనాలు రాయిస్తోన్న చంద్రబాబు వైఖరిని తీవ్రంగా ఖండించారు. వైఎస్సార్‌ సీపీ యువజన విభాగం నగర ఉపాధ్యక్షుడు యర్రెడ్ల వెంకటేష్‌రెడ్డి మాట్లాడుతూ పిచ్చిపిచ్చి రాతలు రాస్తే.. చూస్తూ ఊరుకోబోమని హెచ్చరించారు. ఈ కార్యక్రమంలో మహిళా విభాగం నేతలు గనిక జాన్సీ, తోటకూర స్వర్ణలత, రజియా బేగం, వెంకాయమ్మ, తులసి, విజయ, విద్యార్థి విభాగం నేతలు అరుణ్‌, అభి, రోషన్‌, వీరాస్వామి, తేజ, వెంకటేశ్వరరెడ్డి, రోహన్‌, హరీష్‌ తదితరులు పాల్గొన్నారు.