హోమ్‌లోన్‌పై గుడ్‌న్యూస్‌.. త్వరలో కొత్త రుణాలు

HDFC Bank Home Loans : దేశంలో అతిపెద్ద ప్రైవేటు రంగ బ్యాంక్‌ అయిన హెచ్‌డీఎఫ్‌సీ బ్యాంక్ హోమ్‌ లోన్‌పై గుడ్‌న్యూస్‌ చెప్పింది. కస్టమర్లకు త్వరలో రెండు కొత్త లోన్లను అందుబాటులోకి తీసుకురాబోతోంది. ఇందులో ‘హోమ్ సేవర్ ప్రొడక్ట్‌’ పేరిట ఓ లోన్‌ను ఏప్రిల్‌లో, హోమ్ రిఫర్బిష్‌మెంట్ లోన్‌లను రాబోయే నెలల్లో ప్రారంభించాలని యోచిస్తోందని బ్యాంక్ సీనియర్ అధికారి మీడియాకు తెలిపారు.

హోమ్ సేవర్ ప్రొడక్ట్‌ అనేది ఓవర్‌డ్రాఫ్ట్ సౌకర్యం లాంటిది. ఎస్‌బీఐ అందిస్తున్న  మ్యాక్స్‌గెయిన్ హోమ్ లోన్ స్కీమ్‌కి పోటీగా దీన్ని భావించవచ్చు. ఇక హోమ్‌ రీఫర్బిష్‌మెంట్‌ లోన్‌ విషయానికి వస్తే హెచ్‌డీఎఫ్‌సీ బ్యాంక్‌తో విలీనానికి ముందు హెచ్‌డీఎఫ్‌సీ లిమిటెడ్‌ ఈ లోన్‌ను అందించేది. ఇప్పుడు ఈ లోన్‌ను త్వరలో పునఃప్రారంభిస్తున్నారు.

ఈ రెండు లోన్లు ఇప్పటికే ఉన్న కస్టమర్లతోపాటు కొత్త కస్టమర్లకు అందించనున్నట్లు హెచ్‌డీఎఫ్‌సీ బ్యాంక్‌ మార్టగేజ్‌ బ్యాంకింగ్, హోమ్ లోన్, ల్యాప్ కంట్రీ హెడ్  అరవింద్ కపిల్ మీడియా ప్రతినిధులతో చెప్పారు. అయితే బ్యాంకు గృహ రుణాలపై వసూలు చేసే రేటు కంటే హోమ్ రిఫర్బిష్‌మెంట్ లోన్ 100 బేసిస్ పాయింట్లు ఎక్కువగా ఉండే అవకాశం ఉందని ఆయన చెప్పారు.

హెచ్‌డీఎఫ్‌సీ బ్యాంక్ ప్రస్తుతం ఎక్స్‌టర్నల్‌ బెంచ్‌మార్క్ లెండింగ్ రేటుతో లింక్‌ అయిన గృహ రుణాలపై 8.55 నుంచి 9.10 శాతం వడ్డీ వసూలు చేస్తోంది. కాగా ఇప్పటివరకూ ఉన్న హెచ్‌డీఎఫ్‌సీ సర్వీస్‌ సెంటర్లను దశలవారీగా బ్యాంక్‌ బ్రాంచ్‌లుగా మార్చబోతున్నట్లు హెచ్‌డీఎఫ్‌సీ బ్యాంక్‌ పేర్కొంది.