సూపర్మార్కెట్లో పేలుడు: నలుగురు మృతి

సూపర్ మార్కెట్లో శక్తిమంతమైన బాంబు పేలుడు సంభవించి నలుగురు మరణించిన సంఘటన పశ్చిమ కోలంబియాలో చోటు చేసుకుంది. పనామా సరిహద్దుల్లోని చోకొ ప్రావెన్స్ రాజధాని క్విబ్డో పట్టణంలో ఆ ఘటన చోటు చేసుకుంది. సూపర్ మార్కెట్లోని ముగ్గురు ఉద్యోగులతోపాటు ఆ షాపు యజమాని కుమార్తె కూడా మరణించిన వారిలో ఉన్నారు. ఆ ఘటనలో మరో 10 మంది తీవ్రంగా గాయపడ్డారు. క్షతగాత్రులు పట్టణంలోని వివిధ ఆసుపత్రులలో చికిత్స పొందుతున్నారని, వారిలో కొందరి పరిస్థితి విషమంగా ఉందని పోలీసు ఉన్నతాధికారులు వెల్లడించారు.

 

సూపర్ మార్కెట్ లోని ఉంచిన ప్యాకేజీ బాంబు కారణంగానే ఆ బాంబు పేలుడు సంభవించిందని పోలీసులు భావిస్తున్నారు. రెవెల్యూషనరీ ఆర్మీడ్ ఫోర్సెస్ ఆఫ్ కొలంబియా ( ఎఫ్ఏఆర్సీ) లేదా లాస్ యూర్బెనొస్ తీవ్రవాద సంస్థ ఆ దుశ్చర్యకు పాల్పడి ఉంటాయని పోలీసు ఉన్నతాధికారులు అనుమానిస్తున్నారు. అయితే ఆ దుశ్చర్యకు పాల్పడింది తామే అంటూ ఇంత వరకు ఏ తీవ్రవాద సంస్థ ప్రకటించ లేదన్నారు. ఆ ఘటన మంగళవారం రాత్రి చోటు చేసుకుంది.