నైపుణ్యం పెరగాలి

సాక్షి ప్రతినిధి, బెంగళూరు : భారతీయ సినిమాలో దక్షిణ భారత దేశం వాటా 70 శాతానికి పైగానే ఉన్నందున ఈ రంగంలో నిపుణులను తయారు చేయాల్సిన అవసరం ఉందని ప్రముఖ నటుడు కమలహాసన్ అన్నారు. ఇక్కడి ఓ హోటల్‌లో మంగళవారం ప్రారంభమైన రెండు రోజుల ‘మాధ్యమ, వినోద వాణిజ్య సమ్మేళనంలో’ ఆయన ప్రసంగించారు. నైపుణ్యంతో పాటు డిజిటలైజేషన్‌లో ప్రత్యేక శిక్షణను ఇవ్వడం ద్వారా నిపుణులను తయారు చేయాల్సిన ఆగత్యం ఉందన్నారు. డిజిటలైజేషన్, తదితర విభాగాల్లో ఇప్పటికే సాధించిన ప్రగతిని ప్రశంసిస్తూనే, మరింత పురోగతి సాధించాల్సి ఉందని చెప్పారు. ఇప్పటికే ఉత్తమ నాణ్యతా ప్రమాణాలతో కూడిన కార్యక్రమాలను ఏర్పాటు చేస్తున్నప్పటికీ, అవింకా ఎక్కువ కావాల్సి ఉందన్నారు.