శతక్కొట్టిన మిల్లర్, డు ప్లెసిస్‌

దక్షిణాఫ్రికా చేతిలో శ్రీలంక చిత్తు

డర్బన్‌: డు ప్లెసిస్, మిల్లర్‌ సెంచరీలతో కదంతొక్కడంతో దక్షిణాఫ్రికా 121 పరుగుల తేడాతో శ్రీలంకపై ఘనవిజయం సాధించింది. బుధవారం రాత్రి జరిగిన రెండో వన్డేలో మొదట బ్యాటింగ్‌ చేపట్టిన దక్షిణాఫ్రికా 50 ఓవర్లలో 6 వికెట్లకు 307 పరుగులు చేసింది. మిల్లర్‌ (98 బంతుల్లో 117 నాటౌట్‌; 3 ఫోర్లు, 6 సిక్సర్లు), డు ప్లెసిస్‌ (120 బంతుల్లో 105; 7 ఫోర్లు, 1 సిక్స్‌) చెలరేగారు. ఇద్దరు ఐదో వికెట్‌కు 117 పరుగులు జోడించారు. అనంతరం మిల్లర్‌... మోరిస్‌ (26)తో కలిసి ఆరో వికెట్‌కు 65 పరుగులు జతచేశాడు.

లక్మాల్‌కు 2 వికెట్లు దక్కాయి. తర్వాత శ్రీలంక 37.5 ఓవర్లలో 186 పరుగులకే ఆలౌటైంది. లంక బ్యాట్స్‌మెన్‌ ఏ దశలోనూ లక్ష్యం దిశగా పయనించలేకపోయారు. చండిమాల్‌ 36 పరుగులతో టాప్‌స్కోరర్‌గా నిలిచాడు. దక్షిణాఫ్రికా బౌలర్లలో పార్నెల్, ఇమ్రాన్‌ తాహిర్, డుమిని తలా 2 వికెట్లు తీశారు. ఐదు వన్డేల సిరీస్‌లో దక్షిణాఫ్రికా 2–0తో ఆధిక్యంలో ఉంది. మూడో వన్డే శనివారం జొహన్నెస్‌బర్గ్‌లో జరగనుంది. సెంచరీతో చెలరేగిన మిల్లర్‌ గాయం కారణంగా తదుపరి మూడు వన్డేలకు దూరమయ్యాడు.