భూపాలపల్లి అర్బన్‌: జిల్లావ్యాప్తంగా మరుగుదొడ్లు లేని పాఠశాలలు ఉండవద్దని.. అన్ని పాఠశాలల్లో మరుగుదొడ్ల నిర్మాణం చేపట్టాలని కలెక్టర్‌ భవేష్‌మిశ్రా అధికారులను ఆదేశించారు. కలెక్టరేట్‌లోని సమావేశ మందిరంలో సోమవారం వివిధ శాఖల అధికారులతో సమావేశం నిర్వహించారు. ఈ సందర్భంగా కలెక్టర్‌ మాట్లాడుతూ జిల్లాలో 13 పాఠశాలల్లో తాగునీటి సౌకర్యాలు లేనట్లు గుర్తించామని, 61 పాఠశాలల్లో మరుగుదొడ్లు నిర్మించాల్సి ఉందన్నారు. రెండు పాఠశాలల్లో మైనర్‌ మరమ్మతులు చేపట్టాల్సి ఉందన్నారు. అమ్మ ఆదర్శ పాఠశాలల్లో ఉపాధి హామీ పథకం ద్వారా నిర్మాణానికి 42 మరుగుదొడ్లు అనుమతులు మంజూరు చేశామని.. నెల రోజుల్లో మొత్తం పూర్తిచేయాలని ఆదేశించారు. మరుగుదొడ్డి లేని పాఠశాలలు ఉండొద్దని.. చాలా ప్రాధాన్యమైన అంశమని నిర్లక్ష్యం వహిస్తే చర్యలు తప్పవని హెచ్చరించారు. ఎన్ని పాఠశాలలో మరుగుదొడ్లు నిర్మించాల్సి ఉందో చెప్పాలని డీఈఓను అడుగగా సమాధానం చెప్పకపోవడంపై ఆగ్రహం వ్యక్తం చేశారు. మరుగుదొడ్లు లేవన్న సమాచారం కూడా లేకపోతే ఎలా అని అసంతృప్తి వ్యక్తంచేశారు. క్షేత్రస్థాయిలో నిరంతర పర్యవేక్షణ జరగాలని ప్రతి రోజు డీఆర్డీఓ సిబ్బంది టీఏలు, ఫీల్డ్‌ అసిస్టెంట్స్‌, పంచాయతీ కార్యదర్శులు పర్యవేక్షణ చేయాలని ఆదేశించారు. మరుగుదొడ్ల నిర్మాణానికి మంగళవారం వరకు డిజైన్లు అందచేయాలని పంచాయతీరాజ్‌ ఈఈని సూచించారు. మరుగుదొడ్లు ఎన్ని నిర్మించాల్సి ఉందో నివేదికలు అందచేయాలని డీఈఓను ఆదేశించారు. ప్రభుత్వ పాఠశాలల్లో మరుగుదొడ్లు లేకపోతే అందుకు బాధ్యులు డీఈఓ అవుతారని తెలిపారు. సమావేశంలో డీఆర్‌డీఓ నరేష్‌, డీఈఓ రాంకుమార్‌, పీఆర్‌ ఈఈ దిలీప్‌ పాల్గొన్నారు. నిర్లక్ష్యం వహిస్తే చర్యలు కలెక్టర్‌ భవేష్‌మిశ్రా డీఈఓపై ఆగ్రహం

భూపాలపల్లి: కేంద్ర, రాష్ట్ర ప్రభుత్వాలు అమలు చేసే పథకాలపై అసిస్టెంట్‌ సెక్షన్‌ అధికారులు సమగ్రమైన అవగాహన పెంపొందించుకోవాలని అదనపు కలెక్టర్‌ వెంకటేశ్వర్లు సూచించారు. ఐదు రోజుల జిల్లా పర్యటనకు వచ్చిన 27 మంది అసిస్టెంట్‌ సెక్షన్‌ అధికారులతో సోమవారం ఐడీఓసీ కార్యాలయంలోని మీటింగ్‌ హాల్‌లో అదనపు కలెక్టర్‌ సమావేశం నిర్వహించారు. ఈ సందర్భంగా ఆయన మాట్లాడుతూ.. చిట్టచివరి ఇంటిని కూడా పరిశీలించి క్షేత్రస్థాయిలో ప్రజల జీవన విధానంపై అవగాహన పెంపొందించుకోవాలని అన్నారు. గ్రామస్థాయి పర్యటన భవిష్యత్‌ ఉద్యోగ జీవితానికి చాలా ఉపయోగపడుతుందని అన్నారు. ఈ అవకాశాన్ని సద్వినియోగం చేసుకొని ప్రజాసేవలో మంచి ఉద్యోగులుగా రాణిస్తూ ప్రజల మన్ననలు పొందాలన్నారు. ఉత్తర రాష్ట్రాలకు తెలంగాణ రాష్ట్రానికి చాలా వ్యత్యాసం ఉంటుందని.. గ్రామీణ ప్రాంతాలు అత్యధికంగా కలిగినటువంటి రాష్ట్రం కాబట్టి ప్రజల జీవన విధానంపై అవగాహన కలిగి ఉండాలని సెక్షన్‌ అధికారులకు సూచించారు. ఈ నెల 20వ తేదీ నుంచి 24వ తేదీ వరకు కేంద్ర ప్రభుత్వ అసిస్టెంట్‌ సెక్షన్‌ అధికారుల బృందం జిల్లాలో పర్యటిస్తుందని, పర్యటనలో భాగంగా గ్రామాల్లో బస చేయాల్సి ఉన్నందున లోటుపాట్లు రాకుండా పర్యవేక్షణ చేయాలని ఎంపీడీఓలను ఆదేశించారు. 27మంది అధికారులు ఐదు రోజుల పాటు గణపురం మండలంలోని చెల్పూరు, రేగొండ మండలంలోని కొడవటంచ, కాటారం మండలంలోని గంగారం, మహదేవపూర్‌ మండలంలోని కాళేశ్వరం, భూపాలపల్లి మండలంలోని గొర్లవీడు గ్రామాల్లో పర్యటిస్తారని తెలిపారు. అదే గ్రామాల్లో అధికారులు బస చేయాల్సి ఉంటుందని, సౌకర్యాలు కల్పనలో ఇబ్బంది రాకుండా చూడాలన్నారు. భౌగోళిక, సామాజిక, ఆర్థిక స్థితిగతులు, ప్రజల జీవన విధానం, పంటలు, ఎస్సీ, ఎస్టీ ఆవాసాలు వారి జీవన ప్రమాణాలు తదితర అంశాలను క్షుణ్ణంగా అధ్యయనం చేయాలని అసిస్టెంట్‌ సెక్షన్‌ అధికారులకు సూచించారు. ఈ సమావేశంలో డాక్టర్‌ మర్రి చెన్నారెడ్డి ఇన్‌స్టిట్యూట్‌ ట్రైనింగ్‌ మేనేజర్‌ కుమారస్వామి, సీపీఓ శామ్యూల్‌, డీఆర్‌డీఓ నరేష్‌, ఎంపీడీఓలు పాల్గొన్నారు. సమస్యలకు సత్వర పరిష్కారం ప్రజావాణి కార్యక్రమానికి వచ్చిన దరఖాస్తులకు అధిక ప్రాధాన్యత ఇచ్చి సత్వర పరిష్కారం చూపాలని అదనపు కలెక్టర్‌ వెంకటేశ్వర్లు అధికారులకు సూచించారు. కలెక్టర్‌ కార్యాలయంలో సోమవారం ప్రజావాణి కార్యక్రమం నిర్వహించారు. జిల్లాలోని వివిధ ప్రాంతాలకు చెందిన ప్రజల సమస్యలకు సంబంధించిన 15 దరఖాస్తులను అదనపు కలెక్టర్‌ స్వీకరించారు. ప్రజల నుంచి అందిన దరఖాస్తులను వెంటనే పరిష్కరించాలని సంబంధిత శాఖల అధికారులను ఆదేశించారు. ఈ కార్యక్రమంలో కలెక్టరేట్‌ కార్యాలయ సిబ్బంది పాల్గొన్నారు. అదనపు కలెక్టర్‌ వెంకటేశ్వర్లు జిల్లాకు 27మంది అసిస్టెంట్‌ సెక్షన్‌ అధికారులు

భూపాలపల్లి అర్బన్‌: సింగరేణిలో కార్మికులు ఎదుర్కొంటున్న సమస్యలను పరిష్కరించాలని తెలంగాణ సింగరేణి ఉద్యోగుల సంఘం నాయకులు సోమవారం సింగరేణి ఇన్‌చార్జ్‌ సీఎండీ బలరాంనాయక్‌ను హైదరాబాద్‌లో కలిసి వినతిపత్రం అందజేశారు. రాష్ట్రంలో బొగ్గు బ్లాక్‌లను ప్రైవేట్‌ కంపెనీలకు ఇవ్వవద్దని.. విద్యుత్‌ సంస్థల నుంచి సింగరేణి సంస్థకు రావాల్సిన బకాయిలు వసూలు చేయాలని.. అసంఘటిత రంగ కార్మికులను పర్మనెంట్‌ చేయాలని కోరారు. ఈ కార్యక్రమంలో తెలంగాణ సింగరేణి ఉద్యోగుల సంఘం రాష్ట్ర అధ్యక్షుడు గట్టయ్య, నాయకులు రమేష్‌, కిరణ్‌, కుమారస్వామి, సత్యం, కనకయ్య పాల్గొన్నారు.

భూపాలపల్లి అర్బన్‌: ప్రజల సమస్యల పరిష్కారానికి పోలీసు అధికారులు, సిబ్బంది చిత్తశుద్ధితో పనిచేసి బాధితులకు అండగా ఉంటూ, ఫిర్యాదులపై వెంటనే చర్యలు తీసుకోవాలని ఎస్పీ కిరణ్‌ ఖరే ఆదేశించారు. జిల్లా పోలీస్‌ కార్యాలయంలో సోమవారం నిర్వహించిన ప్రజాదివస్‌ కార్యక్రమంలో భాగంగా వివిధ మండలాల నుంచి వచ్చిన 13మంది నుంచి ఫిర్యాదులు స్వీకరించారు. ఆయా ఫిర్యాదులను సంబంధిత పోలీసు స్టేషన్ల అధికారులు సత్వరం పరిష్కరించాలని ఆదేశించారు. పోలీసు పరిధిలోని ప్రతీ అంశాన్ని పరిష్కరించడం, బాధితులకు న్యాయం చేయడంలో వేగంగా చర్యలు తీసుకోవాలన్నారు. సివిల్‌ వివాదాలను కోర్టులోనే పరిష్కరించుకోవాలని సూచించారు. చట్ట వ్యతిరేకంగా వ్యవహరిస్తూ శాంతి భద్రతల పరిస్థితులకు భంగం కలిగించేవారి పట్ల కఠినంగా వ్యవహరించాలని పోలీస్‌ అధికారులను ఆదేశించారు.

● వీసీలో టీజీపీఎస్సీ చైర్మన్‌ మహేందర్‌రెడ్డి భూపాలపల్లి: జూన్‌ 9న నిర్వహించే తెలంగాణ రాష్ట్ర పబ్లిక్‌ సర్వీస్‌ కమిషన్‌ గ్రూప్‌ –1 ప్రిలిమినరీ పరీక్ష పకడ్బందీగా నిర్వహించేందుకు కలెక్టర్లు సన్నద్ధం కావాలని టీజీపీఎస్సీ చైర్మన్‌ మహేందర్‌రెడ్డి సూచించారు. శనివారం హైదరాబాద్‌ నుంచి అన్ని జిల్లాల కలెక్టర్లు, ఎస్పీలు, రీజనల్‌ కో ఆర్డినేటర్లతో వీడియో కాన్ఫరెన్స్‌ నిర్వహించారు. ఈ కార్యక్రమానికి భూపాలపల్లి ఐడీఓసీ నుంచి ఎస్పీ కిరణ్‌ ఖరే, అదనపు కలెక్టర్‌ వెంకటేశ్వర్లు పాల్గొన్నారు. పరీక్ష నిర్వహణకు సంబంధించి చైర్మన్‌ మహేందర్‌రెడ్డి పలు సలహాలు, సూచనలు అందించారు. అనంతరం అదనపు కలెక్టర్‌ వెంకటేశ్వర్లు మాట్లాడుతూ.. జిల్లా వ్యాప్తంగా 17 పరీక్షా కేంద్రాలను ఏర్పాటు చేశామని, మొత్తం 4,473 మంది అభ్యర్థులు పరీక్షకు హాజరు కానున్నట్లు తెలిపారు. పరీక్షా కేంద్రాల్లో అభ్యర్థులకు ఎటువంటి ఇబ్బందులు తలెత్తకుండా సౌకర్యాలు కల్పిస్తామన్నారు. ఎస్పీ కిరణ్‌ ఖరే మాట్లాడుతూ.. అభ్యర్థులు మాస్‌ కాపీయింగ్‌కు పాల్పడకుండా పోలీసుశాఖ నుంచి క్షుణ్ణంగా పర్యవేక్షిస్తారన్నారు. స్ట్రాంగ్‌ రూంను ఏర్పాటు చేస్తామని, పోలీసు భద్రత మధ్య ప్రశ్నపత్రాలను తరలిస్తామన్నారు. ఈ వీసీలో రీజినల్‌ కో ఆర్డినేటర్‌ శ్యామ్‌ప్రసాద్‌ పాల్గొన్నారు.