ఎన్నికల ఏర్పాట్లు ముమ్మరం

సాక్షి, గుంటూరు :వచ్చే నెల తొలి వారంలో ఎన్నికల షెడ్యూల్ వెలువడనుందని రాష్ట్ర ఎన్నికల ప్రధానాధికారి భన్వర్‌లాల్ ప్రకటనతో జిల్లా అధికార యంత్రాంగం ఏర్పాట్లు ముమ్మరం చేసింది. జిల్లా ఎన్నికల అధికారి అయిన కలెక్టరు క్షేత్ర స్థాయిలో సర్వం సిద్ధం చేసేందుకు రిటర్నింగ్, అసిస్టెంట్ రిటర్నింగ్ అధికారులకు ఇప్పటికే దిశా నిర్దేశం చేశారు. ఇప్పటికే ఎన్నికల బదిలీలు  దాదాపు పూర్తయ్యాయి. ఆయా నియోజకవర్గాలకు రిటర్నింగ్ అధికారులుగా వ్యవహరించిన డిప్యూటీ కలెక్టర్లు శనివారంతో తమ బాధ్యతల నుంచి రిలీవ్ అయ్యారు. ఇతర జిల్లాల నుంచి వచ్చిన డిప్యూటీ కలెక్టర్లు విధుల్లో చేరారు. ఈ దఫా ఎన్నికల్లో పూర్తి స్థాయి నిఘా, అభ్యర్థుల ఎన్నికల ప్రవర్తన నియమావళిపై ఐదు విభాగాలుగా బృందాలు పనిచేయనున్నాయి. ప్రతిసారి ఎన్నికల్లో ముఖ్య విధుల్లో పాలు పంచుకునే అధికారి వివరాలు మాత్రమే సేకరించే వారు. ఈ సారి ఎన్నికల విధుల్లో పాల్గొనే హోం గార్డుల నుంచి ఫొటో, వీడియోగ్రాఫర్లు, డ్రైవర్లు, క్లాస్-4 ఉద్యోగుల వివరాలన్నింటినీ సేకరించాలని ఉత్తర్వులు జారీ అయ్యాయి. ఇందుకు ఆయా శాఖల బాధ్యులకు తమ శాఖల్లోని ఉద్యోగుల వివరాలన్ని అందించాలని కోరనున్నారు.