బాబు దీక్ష: 'ఢిల్లీ’కి దూరంగా జిల్లా నేతలు

సాక్షి ప్రతినిధి, సంగారెడ్డి: ఇప్పటికే కొన ఊపిరితో కొట్టుమిట్టాడుతున్న తెలుగుదేశం నేతలకు పార్టీ అధినేత చంద్రబాబు ‘ఢిల్లీ దీక్ష’ మింగుడు పడటంలేదు. జిల్లాలో ఉనికి కోల్పోయిన పార్టీని ప్రస్తుత పరిణామాలు మరింత ఇరకాటంలో నెట్టాయి. పంచాయతీ ఎన్నికల్లో నామమాత్ర ఫలితాలతో సరిపెట్టుకున్న పార్టీ వచ్చే సాధారణ ఎన్నికలపై దింపుడు కళ్లం ఆశతో వుంది. అయితే చంద్రబాబు చేపట్టిన దీక్షతో చివరి ఆశలు కూడా ఆవిరైనట్లేనని తెలుగుదేశం పార్టీ జిల్లా నేతలు మండిపడుతున్నారు. దీంతో నాలుగు రోజులుగా ఏపీ భవన్ వేదికగా పార్టీ అధ్యక్షుడు దీక్ష చేస్తున్నా ఢిల్లీ గుమ్మం తొక్కేందుకు నేతలు వెనుకంజ వేస్తున్నారు. జిల్లా నుంచి పార్టీ ముఖ్య నేతలు ఏ ఒక్కరు కూడా ఇప్పటివరకు ఢిల్లీ గడప తొక్కకపోవడమే నిదర్శనమని పార్టీ వర్గాలు చెప్తున్నాయి.