సరికొత్తగా ‘సామజవరగమన’

మాట్లాడుతున్న హీరో శ్రీవిష్ణు

డాబాగార్డెన్స్‌/గాజువాక: సామజవరగమన చిత్ర యూనిట్‌ బుధవారం నగరం, గాజువాకలో సందడి చేసింది. రాష్ట్రవ్యాప్తంగా నిర్వహిస్తున్న ఆహ్వాన యాత్రలో భాగంగా హీరో శ్రీవిష్ణు, హీరోయిన్‌ రెబా మోనికా జాన్‌, దర్శకుడు రామ్‌ అబ్బరాజు తదితరులు ఇక్కడకు వచ్చారు. ఈ సందర్భంగా హీరో శ్రీవిష్ణు మీడియాతో మాట్లాడుతూ ఇది పూర్తి కుటుంబ కథా చిత్రమని, ప్రేక్షకులను అలరించడంతోపాటు యువతకు మంచి సందేశాన్నిస్తుందన్నారు. ఈ సినిమా కాన్సెప్ట్‌ సరికొత్తగా ఉంటుందని, అందరూ థియేటర్లలో చూడాలని కోరారు. అభిరుచి గల ప్రేక్షకులు విశాఖలో ఉన్నారని, విశాఖ వాసిగా ఎంతో సంతోషంగా ఉందన్నారు. చిత్ర మాటల రచయిత భాను కూడా విశాఖ వాసేనని చెప్పారు. దర్శకుడు మాట్లాడుతూ హాస్య మూవీస్‌ బ్యానర్‌పై ఏకే ఎంటర్‌టైన్‌మెంట్‌తో కలిసి నిర్మిస్తున్న ఈ చిత్రాన్ని ఈ నెల 29న విడుదల చేస్తున్నట్లు తెలిపారు. గోపి సుందర్‌ మంచి సంగీతం అందించారన్నారు. హీరోయిన్‌ రెబా మోనికా మాట్లాడుతూ చిత్ర కథలో తన పాత్రకు ప్రాధాన్యం ఉంటుందన్నారు. గాజువాకలో చిత్ర యూనిట్‌కు స్వాగతం పలికిన బీజేపీ గాజువాక కన్వీనర్‌ కరణంరెడ్డి నర్సింగరావు, గణేష్‌ తదితరులు ఈ సందర్భంగా యూనిట్‌ను శాలువాలతో సత్కరించారు. సంగీత దర్శకుడు గోపి సుందర్‌, పృథ్వి తదితరులు పాల్గొన్నారు.