TV
కాంగ్రెస్‌తోనే గ్రామాల అభివృద్ధి
● సీఎం రేవంత్‌రెడ్డికి మద్దతుగా నిలవాలి
● గజ్జల రవీంద్రనర్సింహారెడ్డి
దుద్యాల్‌: కాంగ్రెస్‌ చేస్తున్న అభివృద్ధిని చూసి, ప్రజలు ప్రభుత్వం వెంట నడుస్తున్నారని ఆ పార్టీ జిల్లా నాయకుడు గజ్జల నర్సింహారెడ్డి అన్నారు. మండలంలోని హకీంపేట్‌ సర్పంచ్‌ అభ్యర్థిగా తన భార్య రవీంద్రతో శనివారం నామినేషన్‌ వేయించారు. మద్దతుదారులు, గ్రామస్తులతో కలిసి ర్యాలీగా నామినేషన్‌ సెంటర్‌కు వెళ్లారు. అనంతరం ఆయన మాట్లాడుతూ.. సీఎం రేవంత్‌రెడ్డి ప్రభుత్వం ఏర్పాటైన రెండేళ్ల కాలంలోనే గ్రామానికి రూ.6 కోట్ల నిధులు ఇచ్చారన్నారు. హకీంపేట్‌లో వందల కోట్లతో పారిశ్రామిక వాడ, ఎడ్యుకేషన్‌ హబ్‌ను ఏర్పాటు చేస్తున్న ముఖ్యమంత్రి ఈప్రాంత సమగ్రాభివృద్ధికి కృషిచేస్తున్నారన్నారు. తన సొంత డబ్బులతో గ్రామంలో ఆలయం నిర్మిస్తున్నానని స్పష్టంచేశారు. గ్రామాభివృద్ధికి అవసరమైనన్ని నిధులు తీసుకువస్తానని ధీమా వ్యక్తంచేశారు. అన్ని గ్రామాల ప్రజలు కాంగ్రెస్‌ పార్టీ మద్దతుదారులను గెలిపించాలని కోరారు. హకీంపేట్‌ పంచాయతీ త్వరలోనే రాష్ట్రానికి రోల్‌ మోడల్‌గా రూపుదిద్దుకుంటుందని వెల్లడించారు. పారిశ్రామిక వాడకు భూములు ఇచ్చిన రైతులకు అన్ని సౌకర్యాలు అందుబాటులోకి తేవాలనే ఉద్దేశంతో విద్యాలయాలు, రోడ్లు, కంపెనీలు ఏర్పాటు చేస్తున్నారన్నారు. త్వరలోనే హకీంపేట్‌ రెవెన్యూ డివిజన్‌గా ఏర్పడుతుందని తెలిపారు. కొడంగల్‌ నియోజకవర్గంలోని ఓటర్లందరూ రేవంత్‌రెడ్డికి అండగా నిలవాలని పిలుపునిచ్చారు. ఈ కార్యక్రమంలో గ్రామ నాయకులు సంజీవరెడ్డి, శ్రీనివాస్‌రెడ్డి, నరెందర్‌రెడ్డి, బిచ్చిరెడ్డి, శ్రీకాంత్‌రెడ్డి, శ్రీనివాస్‌, సాయిలు, అశోక్‌, వెంకటేశ్‌, అంజనేయులు తదితరులు పాల్గొన్నారు.
కాంగ్రెస్‌తోనే గ్రామాల అభివృద్ధి
