T20 WC 2021 SL Vs NED: 8 వికెట్ల తేడాతో శ్రీలంక ఘన విజయం

8 వికెట్ల తేడాతో శ్రీలంక ఘన విజయం
నెదర్లాండ్స్‌ నిర్ధేశించిన 45 పరుగుల సునాయాస లక్ష్యాన్ని ఛేదించేందుకు బరిలోకి దిగిన శ్రీలంక కేవలం 7.1 ఓవర్లలోనే 2 వికెట్లు కోల్పోయి లక్ష్యాన్ని చేరుకుంది. ఓపెనర్‌ పథుమ్‌ నిస్సంక(0), చరిత్‌ అసలంక(6) తక్కువ స్కోర్‌కే పెవిలియన్‌కు చేరినప్పటికీ.. కుశాల్‌ పెరీరా(24 బంతుల్లో 33; 6 ఫోర్లు), అవిష్క ఫెర్నాండో(2)లు జట్టును విజయతీరాలకు చేర్చారు. నెదర్లాండ్స్‌ బౌలర్లు బ్రాండన్‌ గ్లోవర్‌, పాల​ వాన్‌ మీకెరెన్‌ తలో వికెట్‌ పడగొట్టారు. ఈ గెలుపుతో శ్రీలంక గ్రూప్‌-ఏ టాపర్‌గా నిలిచి సూపర్‌ 12లో బలమైన జట్లున్న గ్రూప్‌-1లో చేరింది. కాగా, క్వాలిఫయర్స్‌లో గ్రూప్‌-ఏ నుంచి శ్రీలంకతో పాటు నమీబియా సూపర్‌ 12కు అర్హత సాధించింది.    

లంక బౌలర్ల విజృంభణ.. 44 పరుగులకే కుప్పకూలిన నెదర్లాండ్స్‌
టాస్‌ గెలిచి తొలుత ఫీల్డింగ్‌ ఎంచుకున్న శ్రీలంక పసికూన నెదర్లాండ్స్‌పై ప్రతాపాన్ని చూపింది. స్పిన్నర్లు వనిందు హసరంగ(3/9), మహీశ్‌ తీక్షణ(2/3), పేసర్లు లహీరు కుమార(3/7), దుశ్మంత చమీరా(1/13) చెలరేగి బౌల్‌ చేయడంతో నెదర్లాండ్స్‌ చిగురుటాకులా వణిపోయింది. కేవలం 10 ఓవర్లు మాత్రమే ఆడి 44 పరగులకే ఆలౌటై, పొట్టి ప్రపంచకప్‌ చరిత్రలో రెండో అత్యల్ప స్కోర్‌ నమోదు చేసింది. నెదర్లాండ్స్‌ ఇన్నింగ్స్‌లో కొలిన్‌ ఆకెర్‌మెన్‌(11) మినహా ఏ ఒక్కరూ రెండంకెల స్కోర్‌ చేయలేకపోయారు. నెదర్లాండ్స్‌ స్కోర్‌లో 6 పరుగులు ఎక్స్‌ట్రాల రూపంలో వచ్చాయి. కాగా, గ్రూప్‌-ఏ నుంచి శ్రీలంక ఇదివరకే సూపర్‌ 12 బెర్త్‌ ఖరారు చేసుకోగా.. నెదర్లాండ్స్‌ ఈ మ్యాచ్‌ జయాపజయాలతో సంబంధం లేకుండానే టోర్నీ నుంచి నిష్క్రమించింది. 

లంక బౌలర్ల విజృంభణ.. 32 పరుగులకే 5 వికెట్లు కోల్పోయిన నెదర్లాండ్స్‌
టాస్‌ ఓడి ప్రత్యర్ధి ఆహ్వానం మేరకు బ్యాటింగ్‌కు దిగిన నెదర్లాండ్స్‌.. లంక బౌలర్ల ధాటికి వణికిపోతుంది. తొలి 5 ఓవర్లలో కేవలం 32 పరుగులు మాత్రమే చేసి సగం వికెట్లు కోల్పోయింది. వనిందు హసరంగ(2/5), మహీశ​ తీక్షణ(2/3) తమ స్పిన్‌ మాయాజాలంతో నెదర్లాండ్స్‌కు కుదురుకునే అవకాశం ఇవ్వడంలేదు. తొలి ఓవర్‌లో మ్యాక్స్‌ ఒడౌడ్‌ 2 పరుగులు చేసి రనౌట్‌ కాగా.. బెన్‌ కూపర్‌(9), మైబుర్గ్‌(5)లను తీక్షణ, ఆకెర్‌మెన్‌(11), బాస్‌ డీ లీడే(0)లను హసరంగ పెవిలియన్‌కు పంపాడు. 

షార్జా: టీ20 ప్రపంచకప్‌-2021 క్వాలిఫయర్స్‌ పోటీల్లో భాగంగా శుక్రవారం రాత్రి 7:30 గంటలకు షెడ్యూలైన గ్రూప్‌-ఏ మ్యాచ్‌లో శ్రీలంక, నెదర్లాండ్స్‌ జట్లు తలపడుతున్నాయి. ఈ మ్యాచ్‌లో టాస్‌ గెలిచిన శ్రీలంక తొలుత ఫీల్డింగ్‌ ఎంచుకుంది.
తుది జట్లు: 
శ్రీలంక: కుశాల్‌ పెరీరా(వికెట్‌ కీపర్‌), పాథుమ్‌ నిషంక, చరిత్‌ అసలంక, అవిష్క ఫెర్నాండో, భనుక రాజపక్స, దసున్‌ షనక(కెప్టెన్‌), చమిక కరుణరత్నే, వనిందు హసరంగ, దుష్మంత చమీర, మహీశ్‌ తీక్షణ, లాహిరు కుమార.

నెదర్లాండ్స్‌: మాక్స్‌ ఆడౌడ్‌, స్టెఫాన్‌ మైబుర్గ్‌, బెన్‌ కూపర్‌, బాస్‌ డీ లీడే, కొలిన్‌ ఆకెన్‌మాన్‌, రియాన్‌ టెన్‌ డొచేట్‌, స్కాట్‌ ఎడ్వర్డ్స్‌(వికెట్‌ కీపర్‌), పీటర్‌ సీలార్‌(కెప్టెన్‌), ఫ్రెడ్‌ క్లాసీన్‌, పాల్‌ వాన్‌ మీకెరెన్‌, బ్రాండన్‌ గ్లోవర్‌.